Главные молитвы для женщин

Молитва-благословение на вступление в брак

Святым Петру и Февронии Муромским

Тропарь, глас 8

Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею премудрою Феврониею, в мире Богу угодивше, и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.

Кондак, глас 8

Мира сего княжение и славу временну помышляя, сего ради благочестно в мире пожил еси, Петре, купно и с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете. И ныне Христу молитеся сохранити град же и люди, иже вас славящих.

Молитва

О велиции угодницы Божии и предивнии чудотворцы, благовернии княже Петре и княгине Февроние, града Мурома предстателие и хранителие, и о всех нас усерднии ко Господу молитвенницы! К вам прибегаем и вам с упованием крепким молимся: вознесите о нас, грешных, святыя молитвы ваша ко Господу Богу, и испросите у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимо,

в добрых делех преуспеяние, мира умирение, земли плодоносие, воздуха благорастворение, телесем здравие и душам спасение. Исходатайствуйте у Царя Небеснаго Церкви Святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите Отечество ваше и вся грады Российския от всякаго зла; и вся правоверныя люди, к вам приходящия и святым мощем вашим поклоняющиеся, осените благодатным действом богоприятных молитв ваших, и вся прошения их во благо исполните. Ей, чудотворцы святии! Не презрите молитв наших, со умилением вам днесь возносимых, но будите о нас приснии предстателие ко Господу, и сподобите нас помощию вашею спасение вечное улучити и Царствие Небесное унаследовати: да славословим неизреченное человеколюбие Отца и Сына и Святаго Духа, в Троице покланяемаго Бога, во веки веков. Аминь.

Молитва о покровительстве вступающим в брак

Святым бессребреникам Косме и Дамиану

К вам, святии бессребреницы и чудотворцы Космо и Дамиане, яко к скорым помощником и теплым молитвенником о спасении нашем, мы недостойнии, преклонше колена, прибегаем и припадающе усердно вопием: не презрите моления нас грешных, немощных, во многая беззакония впадших, и по вся дни и часы согрешающих. Умолите Господа, да прибавит нам, недостойным рабом Своим, великия и богатыя Своя милости, избавите нас от всякия скорби и болезни, вы бо прияли есте от Господа и Спаса нашего Иисуса Христа неоскудную благодать исцелений, ради твердыя веры безмезднаго врачевания

и мученическия кончины вашея. Паки, припадающе, прилежно молим: испросите нам от Господа вся благополезная, яже в животе нашем временном, наипаче же ко спасению вечному належащая, да сподобимся молитвами вашими улучити кончину христианскую, безболезненну, непостыдну, мирну, и да избавимся от козней диавольских и вечныя муки, безконечнаго же и блаженнаго Царствия Небеснаго наследницы будем. Ей, угодницы Божии, не престайте молящеся за ны, с верою к вам притекающия, аще бо по множеству грехов наших и несмы достойни милосердия вашего, обаче вы вернии подражателие человеколюбия Божия суще, сотворите молитвами вашими, да принесем плоды достойны покаяния и в вечный покой достигнем, хваляще и благословяще дивнаго во святых Своих Господа и Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне и присно и во веки веков. Аминь.

О счастии в браке

Молитва Архангелу Варахиилу – покровителю благочестивых семейств

О великий архистратиже Божий Архангеле Варахииле! Предстоя Престолу Божию и оттоли принося благословения Божия в домы верных раб Божиих, испроси у Господа Бога милосердия и благословения на домы наша, да благословит Господь Бог нас и умножит изобилие плодов земных, и подаст нам здравие и спасение, во всем благое поспешение, и на врагов победу и одоление, и сохранит нас на многая лета, всегда, ныне и присно и во веки веков. Аминь.

Молитва апостолу Симону Зилоту

Святый славный и всехвальный апостоле Христов Симоне, сподобивыйся прияти в дом твой в Кане Галилейстей Господа нашего Иисуса Христа и Его Пречистую Матерь, Владычицу нашу Богородицу, и очевидцем быти преславнаго чудесе Христова, на браце твоем явленного, претворения воды в вино! Молим тя с верою и любовию: умоли Христа Господа претворить души наша из грехолюбивых в боголюбивыя; сохрани и соблюди нас молитвами твоими от искушений диавольских и падений греховных и испроси нам свыше помощь во время уныния и беспомощия нашего, да не преткнемся о камень соблазна, но неуклонно шествуем спасительным путем заповедей Христовых, дондеже достигнем обителей райских, идеже ты ныне водворяешися и веселишися. Ей, апостоле Спасов! Не посрами нас, крепце на тя уповающих, но буди нам помощник и покровитель во всем житии нашем и помози нам благочестно и богоугодно житие сие временное скончати, благую и мирную христианскую кончину получити и добраго ответа сподобитися на Страшнем Суде Христове, да избежавше мытарств воздушных и власти лютаго миродержца, унаследуем Царство Небесное и прославим великолепое Имя Отца и Сына и Святаго Духа во веки веков. Аминь.

Молитва святому апостолу и евангелисту Иоанну Богослову

О великий и всехвальный апостоле и евангелисте Иоанне Богослове, наперсниче Христов, теплый наш заступниче и скорый в скорбех помощниче! Умоли Господа Бога даровати нам оставление всех прегрешений наших, елико согрешихом от юности нашея, во всем житии нашем, делом, словом, помышлением и всеми нашими чувствы. Во исходе же душ наших помози нам, грешным, избавитися воздушных мытарств и вечнаго мучения, да твоим милостивным предстательством прославляем Отца и Сына и Святаго Духа, ныне и присно и во веки веков. Аминь.

Молитва Архангелу Рафаилу

О святый Архангеле Рафаиле! Всеусердно молим тя, буди нам путеводитель в жизни нашей, сохрани от всех видимых и невидимых враг, исцели душевныя и телесныя болезни наша, управи жизнь нашу к покаянию во гресех и ко творению добрых дел. О святый великий Рафаиле Архангеле! Услыши нас, грешных рабов Божиих ( имена ), молящихся тебе, и сподоби в здешней и в будущей жизни благодарити и славити общаго Создателя нашего в безконечныя веки веков. Аминь.

Об устранении семейных неурядиц

Молитва ко Господу о мире в семье

Милосердный и милостивый Боже, возлюбленный Отче! Ты по милостивой воле Твоей и Твоему Божественному промыслу поставил нас в состояние святого брака, чтобы мы по установлению Твоему жили в нем. Мы утешаемся благословением Твоим, изреченным в слове Твоем, которое говорит: обретший жену обрел благо и получил благословение от Господа. Господи Боже! Соделай, чтоб мы жили друг с другом в Божественном страхе Твоем. Соделай также, чтоб жили мы в мире и согласии, чтоб в брачном состоянии нашем любили целомудрие и честность и не поступали противу их, чтобы в доме нашем обитало спокойствие, и мы сохранили честное имя. Даруй нам благодать воспитать детей наших в страхе и научении к Божественной славе Твоей, чтобы Ты из уст их возмог устроить Себе хвалу. Даруй им послушное сердце, да благо им будет и долголетны будут на земле. Даруй нам также хлеб насущный и благослови питание наше. Огради дом и наследие наше, чтобы злой враг и его орудие не могли нанести им вреда. И когда Ты, Господи Боже, восхощешь наслать на нас страдания и скорбь, то даруй нам терпение, чтобы мы послушно покорялись отеческому наказанию Твоему, и поступи милостиво с нами. Если же мы падем, то не отринь нас, поддержи и снова возстави нас. Облегчи нам скорби наши и утешь нас, и не оставь нас в нуждах наших. Даруй нам, чтобы мы не предпочитали временного вечному, потому что мы ничего не принесли с собою в мир, ничего и не вынесем из него. Не попусти нам прилепляться к сребролюбию, этому корню всех злополучий, но да стараемся успевать в вере и любви и достигать вечной жизни, к которой мы призваны. Бог Отец да благословит и сохранит нас. Бог Сын да просветит нас светом Своим и да помилует нас. Бог Дух Святый да обратит к нам лице Свое и да даст нам мир. Святая Троица да охраняет вход и исход наш отныне и во веки. Аминь.

Молитва ко Пресвятой Богородице о семье

Владычице Преблагословенная, возьми под Свой покров семью мою. Всели в сердца супруга моего и чад наших мир, любовь и непрекословие всему доброму; не допусти никого из семьи моей до разлуки и тяжкаго расставания, до неизцельных болезней и немощей, до преждевременныя и внезапныя смерти без покаяния. А дом наш и всех нас, живущих в нем, сохрани от огненнаго запаления, воровскаго нападения, всякаго злаго обстояния, разнаго страхования и диавольскаго наваждения. Да и мы купно и раздельно, явно и сокровенно будем прославлять имя Твое Святое всегда, ныне и присно, и во веки веков. Аминь. Пресвятая Богородице, спаси нас!

Молитва мученикам и исповедникам Гурию, Самону и Авиву

О преславнии мученицы Гурие, Самоне и Авиве! К вам, яко скорым помощникам и теплым молитвенникам, мы, немощнии и недостойнии, прибегаем, усердно моляще: не презрите ны, во многая беззакония впадшия и по вся дни и часы согрешающия; наставите на путь правый заблудшия, исцелите страждущия и скорбящия; соблюдите ны в непрочнем и целомудреннем житии; и якоже древле, тако и ныне покровители супружеств пребудите, в любве и единомыслии сия утверждающе и от всех злых и бедственных обстояний избавляюще. Защитите, о многомощныя исповедницы, вся православныя христианы от напастей, злых человек и козней демонских; оградите я от нечаянныя смерти, умоляюще Всеблагаго Господа, да великия и богатыя милости нам, смиренным рабом Своим, пробавит. Несмы бо достойни нечистыми устами призывати великолепое имя Создателя нашего, аще не вы, святии мученицы, за ны ходатаи будете;

сего ради к вам прибегаем и предстательства вашего пред Господем о нас просим. Такожде избавите нас от глада, потопа, огня, меча, нашествия иноплеменных, междоусобныя брани, смертоносныя язвы и всякаго душепагубнаго обстояния. Ей, страстотерпцы Христовы, устройте нам молитвами вашими вся благая и полезная, да благочестно житие временное прешедше и кончину непостыдну стяжавше, удостоимся теплым заступлением вашим со всеми святыми одесную Правосуднаго Бога Судии стати, и Того непрестанно славити со Отцем и Святым Духом во веки. Аминь.

Молитвы супругов о даровании детей

Молитва первая

Услыши, Боже Милосердый и Всемогущий, моления наша, буди милостив нам и ниспосли нам благодать Твою. Яко Давый закон умножения рода человеческаго, буди и нам милостивным Покровителем, да помощию Твоею исполнится и на нас Тобою установленное. Ты властию Твоею из несущаго вся сотворил еси и положил еси начало всему, в мире сущему – сотворил еси и человека по образу Своему и тайною высокою освятил еси союз супружества в предуказание тайны единения Христа с Церковию Своею.

Призри, Милосерде, на рабов Твоих сих, союзом брака соединенных и о помощи Тя умоляющих, да будет на них милость Твоя, да будут яко лозы плодовиты и да увидят сыны сынов своих даже до третияго и четвертаго рода, и, старости достигше, войдут в Царство Небесное, милостию Господа нашего Иисуса Христа, Ему же подобает всякая слава, честь и поклонение со Святым Духом во веки. Аминь.

Молитва вторая, преподобному Роману Чудотворцу

О преподобне отче Романе, услыши ны, призывающия тя! В малей келии затворився, тамо пребыл еси до кончины твояй, скудно питаяся, огня не имый, нося же власяницу и тяжкия вериги. Сего ради благодати Божественныя сподобився, многих человек недуги уврачевал еси и многих жен молитвою своею от безплодия разрешил еси. И ныне, внемли с благоговением и усердием припадающим и молящимся тебе женам неплодным. Умоли Господа

Бога, да всемощною силою Своею разрешит безплодие их и чад им дарует, Благ бо и Человеколюбец Бог наш есть, свыше призираяй на ны и исполняй прошения наша. Аминь.

Молитва третья

Услыши нас, Милосердный и Всемогущий Боже, да молением нашим ниспослана будет благодать Твоя. Будь милостив, Господи, к молитве нашей, воспомяни закон Твой об умножении рода человеческого и буди милостивым Покровителем, да Твоею помощью сохранится Тобою же установленное. Ты властною силою Твоею из ничего все сотворил и положил начало всего в мире существующего – сотворил и человека по образу Своему и высокою тайною освятил союз супружества и предуказание тайны единения Христа с Церковью. Призри, Милосердный, на рабов Твоих сих ( имена ), союзом супружеским соединенных и умоляющих о Твоей помощи, да будет на них милость Твоя, да будут плодовиты

и да увидят они сыны сынов своих даже до третьего и четвертого рода и до желаемой старости доживут и войдут в Царство Небесное через Господа нашего Иисуса Христа, Которому всякая слава, честь и поклонение подобает со Святым Духом во веки. Аминь.

Молитвы о рождении здоровых детей

Молитва супруги, имеющей плод чрева

Боже Великий, Животе и жизни Подателю и Хранителю! Благодарю Тя, яко милостию Твоею и мене, смиренную рабу Твою, причастной соделал еси благодати чадородия, се бо имам плод чрева. Обаче веси, Господи, яко боюся, да не како грех моих ради лютее постражду раждающи, и того ради к милосердию Твоему прибегаю.

Не молю Тя, да избавиши мя участи всего рода нашего женскаго, ему же определил еси в болезнех раждати чада, общий бо закон есть нам, согрешающим. О сем же молю Тя: егда приидет час мой, даждь ми ослабу и разрешение нетрудное, избави мя от болезней непосильных. Исполни, Господи, желание сердца моего, вкупе же и желание супруга моего, егоже дал ми еси. Даждь нам радость рождения новаго человека в мир Твой. Да явится младенец цел, здрав и крепок, и да ктому не помним скорби за радость, благодатию и щедротами Единороднаго Сына Твоего, Иже нас ради воплотися от пречистых кровей Марии Девы, в ложеснах носим бысть и плотию рождение восприят, Емуже слава подобает со Святым Духом во веки. Аминь.

Молитвенное воздыхание жены во время беременности

О Преславная Матерь Божия, помилуй меня, рабу Твою ( имя ), прииди ко мне на

помощь во время моих болезней и опасностей, с которыми рождают чад все бедные дщери Евы. Вспомни, о Благословенная в женах, с какою радостию и любовию Ты шла поспешно в горнюю страну посетить сродницу Твою Елисавету во время ея беременности и какое чудесное действие произвело благодатное посещение Твое и в матери, и в младенце. И по неисчерпаемому благосердию Твоему даруй и мне, униженнейшей рабе Твоей, разрешиться от бремени благополучно; даруй мне сию благодать, чтобы дитя, покоящееся теперь под моим сердцем, пришедши в чувство, с радостным взыгранием, подобно святому младенцу Иоанну, поклонялось Божественному Господу Спасителю, Который из любви к нам, грешным, не возгнушался и Сам стать младенцем. Неизглаголанная радость, которою преисполнилось девственное Твое сердце при воззрении на новорожденного Твоего Сына и Господа, да усладит скорбь, предстоящую мне среди болезней рождения. Жизнь мира, мой Спаситель, рожденный Тобою, да спасет меня

от смерти, пресекающей жизнь многих матерей в час разрешения, и да причтет плод чрева моего к числу избранных Божиих. Услышь, Пресвятая Царице Небесная, смиренную мольбу мою и призри на меня, бедную грешницу, оком Твоея благодати; не постыди моего упования на Твое великое милосердие и осени меня. Помощница христиан, Исцелительница болезней, да сподоблюсь и я испытать на себе, что Ты – Матерь милосердия, и да прославлю всегда Твою благодать, не отвергшую никогда молитвы бедных и избавляющую всех, призывающих Тебя во время скорби и болезни. Аминь.

Молитва святым праведным богоотцем Иоакиму и Анне

Тропарь, глас 1

Иже в законней благодати праведни бывше, Младенца Богоданнаго породиша нам, Иоаким и Анна. Темже днесь светло торжествует, весело празднующи, Божественная Церковь честную вашу память, славящи Бога, воздвигшаго рог спасения нам в дому Давидове.

Кондак, глас 2

Радуется ныне Анна, неплодства разрешившися соуз, и питает Пречистую, созывающи вся воспети, Даровавшаго от чрева ея человеком Едину Матерь и неискусомужную.

Молитвы пред иконою Пресвятыя Богородицы, именуемою «Целительница»

Тропарь, глас 4

Яко Пресветлая Звездо, просия Божественными чудесы святый Твой образ, Целительнице, подаждь убо и нам, Богородице Марие, исцеление недугов душевных и телесных, спасение и велию милость.

Ин тропарь, глас 1

Любовию, Чистая Дево, Твою святую икону почитающим, и Божию Тя истинную Матерь прославляющим, и верно покланяющим Ти ся Целительница явися, всякое зло и болезни от сих удаляющая, яко Всемогущая.

Кондак, глас 6

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Молитвы ко Пресвятой Богородице пред иконою ея «Млекопитательница»

Тропарь, глас 3

Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без отца бывша, плотию родила еси и Младенца млеком питала еси. Темже не престай молити избавитися от бед душам нашим.

Кондак, глас 5

Душ наших чувствия очистивше, узрим на иконе таинство преславное, Творца Вселенныя и Господа вышних сил, во объятиих держима и от сосцу Твоею, яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

Молитвы ко господу о чадех

Молитва первая

Отче Святый, Предвечный Боже, от Него же исходит всяк дар и всяко благо, Тебе прилежно молюся о чадех, яже дарова ми благость Твоя. Ты дал еси им бытие, оживотворил еси их душею безсмертною, оградил еси святым Крещением, во еже жити им согласно воле Твоей и Царствие Небесное наследити. Сохрани их во благодати Твоей до кончины жития их и освящая истиною Твоею, да святится в них имя Твое. Содействуй ми благодатию Твоею, да возращу их во славу имене Твоего и ближним на пользу. Господи! Подаждь ми терпение, силу и вся к сему потребная. Просвещай их светом Премудрости Твоея, да возлюбят Тя всею душею и всем помышлением своим. Насади в сердцах их страх Твой и от всякаго беззакония отвращение, да будут непорочны в путех своих. Господи! Украси души их целомудрием, долготерпением и всякою праведностию, да будет мерзостна пред ними всяка клевета, ложь и лесть. Окропи их росою благодати Твоея, да преуспевают в добродетели и святости, да возрастают в любве у Тебе и благочестивых человек. Ангели Хранителие их выну да пребудут с ними, да соблюдут юность их от помышлений суетных, от прелестей и соблазнов мира сего и от всяких наветов лукаваго. Аще же иногда и согрешат пред Тобою, не отврати лица Твоего от них, но буди милостив к ним, возбуди сокрушение в сердцах их и по множеству щедрот Твоих очисти согрешения их. Не лиши их и земных Твоих благ, но посли им вся потребная в жизни сей ко обретению блаженныя вечности. Сохрани их от всякия болезни, гнева, напасти, беды и скорби и осени милостию Твоею во вся дни живота их. Боже Благий! Еще молю Ти ся: даждь ми веселие и радость о чадех моих и сподоби мя на Страшнем судищи Твоем с непостыдным дерзновением рещи: се аз и чада моя, яже ми дал еси, Господи; да купно с ними прославляю неизреченную Твою благость и вечную любовь и превозношу пресвятое имя Твое, Отца и Сына и Святаго Духа, ныне и присно и во веки веков. Аминь.

Молитва вторая

Милосердый Господи, Иисусе Христе, Тебе вручаем…