Пастка на рыцара

Валерый ГАПЕЕЎ

Пастка на рыцара

Калі ўсё пачалося?

Задаць такое пытанне проста, а паспрабуй адказаць... Можа яшчэ ў першым класе. Але не, у першым, відаць, не... Гэта ў другім-трэцім з’явіліся ў класе свае лідэры, свае забіякі, свае прыгажуні і, вядома, свае непрыгожыя. Так адказаць?.. А завуч ходзіць па кабінету нейкі нечакана стомлены, паніклы і таму такі просты, бы сусед-вясковец з-за нейкай няўдачы. І яшчэ больш няёмка ад таго, што ніяк не адшукаць адказу на ягонае пытанне. Калі ўсё пачалося? Ну, навошта Вам, Мікалай Васільевіч, аб гэтым дапытвацца? Няўжо гэта так важна? Важна, кажаце…

Грышка-філосаф нарэшце прыдумаў:

— Я мяркую, з той вясны. Тады, калі кіналекторый быў, і мы глядзелі стужку пра Айвенга. Гэта было штуршком.

І на самай справе — тады.

Выбеглі ўзрушаныя з цеснага клуба, і Лёшка зараз жа асядлаў Косцю.

— Гэй, рыцары! Доблесны рыцар Без імя і каня выклікае вас на спаборніцтва! — ён ваяўніча размахваў рукамі і падскокваў на шырокім Косцікавым карку.

Косця — галоўны асілак дзесятага — цярпеў і толькі ўсміхаўся. Лешка побач з ім — дзіценак кірпаты, вастраносы, але сябры яны, Косця і Лёшка, можа яшчэ з першага класа, а то і раней.

Дзяўчатам цікава і весела, акружылі хлопцаў колам. І раней так на перапынках дурэлі, таму супраціўнікаў Лешка не доўга чакаў. Яшчэ знайшліся "коні" і "вершнікі", пачалася таўкатня — хто каго скіне з "каня". Лёшка закамандаваў, каб адзін на адзін выходзілі — турнір атрымаўся. “Рыцарскія баі” ішлі хвілін дзесяць, пакуль Генадзь, у каторы раз зірнуўшы на гадзіннік, не сказаў:

— Усё! Хопіць! Перамагла дружба. Праз восем хвілін — алгебра.

Генадзь — аўтарытэт. Ён не той сухар-выдатнік, у якога ў галаве нічога, акрамя ўрокаў. Нездарма Генадзя ў Савет школы абралі. Касцюм на ім заўжды бы толькі з-пад праса, сам заўсёды акуратна падстрыжаны. Ён, зразумела, ні коннікам, ні рыцарам і быць не збіраўся ў гэтай гульні, ды і не прапаноўвалі.

Затое Генадзь як ніхто ўмее ўладжваць спрэчкі з настаўнікамі. Да яго слоў і дырэктар прыслухоўваецца, з завучам Генадзь амаль на “ты”. І дзесяты (адзіны ў школе), які лічыў сябе вельмі дружным, вельмі свабодным, вельмі разумным класам, быў не раз яму ўдзячны. Ды і калі ў Савеце школы свой хлопец — таксама акалічнасць не лішняя.

Алгебра — гэта сур’ёзна. Яе вядзе сам Шаноўны — Зіновій Пятровіч. Шаноўны ён таму, што заўсёды прыйдзе, пакладзе журнал на стол, абвядзе клас позіркам, такім вострым, можа б прасціну разрэзаў, і:

— Ну-у, шаноўныя, хто хоча двойку?

З ім лепей не чапацца, а то ад “калоў” не адкараскаешся.

"Коні" скінулі сваіх рыцараў, і ўсе з гоманам рушылі да недалёкай школы. Лёшка і тут знайшоўся:

— Наперад! На штурм гэтага логава! Вызвалім бедную Алгебру з палону рыцара Шаноўнага! Ура!

Выбухнулі, як угарэлыя, крыкам і лямантам, пабеглі напрасткі, бо час падганяў.

І раптам:

— Эх вы, рыцары! — праспявала са здзекам Ала, першая прыгажуня ў класе і, бадай, у школе. — Ганьба вам!

— А што? — Сталі разгублена, бо яна не жартавала.

— А вунь! — Ала крутнулася назад.

Ну і што? Кульгае далека ззаду Курыца. Ну, не курыца, вядома, а Насця, дачка лясніка. Яшчэ малой аднойчы звалілася з бацькавага Букета (прыгожы конь!), вось і кульгае з тае пары, бо адна нага ў яе карацейшая за другую.

— Можа ты прапануеш яе на руках несці, прыгажуню-паненку? — пакпіў Генадзь, і хлопцы дружна зарагаталі.

Што праўда, то праўда — Насця непрыгожая. Твар смуглявы, рабацінкамі абсыпаны густа-густа. А нос на самай справе, як у курыцы дзюба — востры, злёгку ўніз загнуты. І не такая яна як усе, дзікаватая нейкая. Яно і зразумела: леснічоўка, дзе яна з бацькам жыве, далекавата ад вёскі. Вось і прывыкла адна быць. І маўклівая яна — слова лішняга не выцягнеш. Гэта ўжо бацькава натура — той за дзень можа і слова не вымавіць. Увогуле, Насцю Кульгавую не асабліва заўважалі. Яна быццам і з усімі і ў той жа час.

На Алу быццам найшло нешта, нават нагой прытопнула:

— Сорам! Сорам вам і ганьба! Пакінулі дзяўчыну адну!

Тут не вытрымаў Додзіеў, другагоднік, якога часцей проста Додзікам клікалі:

— Вось ідзі да яе і паднясі! —з’едліва прапанаваў ён, цыркнуў слінай.

Злаваць Додзіку на Насцю было з чаго: гэта яна, Насця выкрыла яго і ягонага сябра, Толіка, калі яны мінулай вясной збіралі бярозавы сок і спляжылі шэсць добрых бяроз, высокіх, стройных. Бацька Насці тады акт склаў, давялося штраф плаціць бацькам.

— І панесла б! — адазвалася Ала. — Каб толькі ў мяне твая сіла была.

Крутнулася і пакрочыла да школы. Пайшлі і астатнія, моўчкі, бо дурэць нешта расхацелася. Генадзь яшчэ азірнуўся на кульгаючую Насцю, быццам хацеў пачакаць яе, але потым пайшоў шпарка.

Потым было лета — апошнія іх вучнёўскія канікулы. Вольныя дзянькі праляцелі хутка, пачаліся заняткі. Прайшоў верасень, набліжаўся канец першай чвэрці іх апошняга школьнага года. Вось тады якраз і з’явіўся таямнічы рыцарскі ордэн.

Спачатку была аб’ява. Вялікі аркуш, здалёк кідаліся ў вочы словы: “Увага! Увага! Увага!”

Чаго-чаго, а ўвагі гэтаму аркушу хапіла. Ён быў прышпілены на месцы “Вучнёўскага пражэктара”, насценнай школьнай газеты, якая ўжо стала свяціць пажоўклай паперай. Аб’ява з’явілася перад вялікім перапынкам. Калі натоўп каля незвычайнага аркуша вырас настолькі, што заднія не маглі чытаць, а пярэднія ніяк не адыходзілі, уражаныя прачытаным, нехта выгукнуў:

— Чытайце ўголас!

Пачаў адзін, закрычалі: “Грамчэй!”, тут і Генадзь падышоў — як жа гэта, на яго “пражэктары” (ён быў рэдактарам сценгазеты) і нешта там вісіць!

— "Так далей нельга! — звонка пачалі счытваць з аб’явы. — Гэтулькі хлусні, гэтулькі зла, гэтулькі несправядлівасці! І не гэта бяда, а тое, што не было дагэтуль сілы, якая б хоць калі выступіла супраць усяго гэтага. Цяпер такая моц ёсць! Гэта мы — рыцарскі ордэн “Зніч”. Слабыя і зняважаныя! Калі вы не можаце самастойна пастаяць за сваю годнасць — паклічце нас! Подлыя двурушнікі! Ваш час скончыўся! Рыцарскі ордэн на слова адкажа словам, на ўдар — ударам, на кроў — крывёю. Помніце ўсе — мы не жартуем!"

— Фію-ю, — прысвіснулі ў натоўпе, і ўсе ўторпіліся на Генадзя.

Той падышоў, пачаў сам моўчкі чытаць напісаны праз трафарэт тэкст, быццам хацеў яшчэ нешта там знайсці. На аркушы нічога больш не было, толькі крыж у кутку і словы паўкругам над ім: “Сумленне. Адвага. Годнасць”. Відаць, герб.

— Што, Генік, новую забаўку прыдумаў? — выскаліўся Додзік.

— Гэта хто напісаў? — Генадзь на Додзіка ўвагі не звярнуў, аглядзеў прыцішаны натоўп. — Што, няма тут аўтараў? Ну, выдатна! — ён упэўнена зняў аркуш паперы з лінялай школьнай газеты і знік праз момант у былым піянерскім пакоі — там цяпер быў кабінет пазакласнай работы.

Школа зашумела, як вулей. Усе разгубіліся, бо лічылі, што ордэн гэты — чарговая ініцыятыва актыву школы і Генадзя, вядома. Хоць і не вельмі пасавалі тут словы пра бойкі і кроў.

Не вельмі каб, але ўзрушыўся і адзінаццаты. Трохі паспрачаліся — чыя гэта справа, потым — сапраўды ёсць такі ордэн ці гэта толькі так, дзеля смеху. І калі спрэчкі ўжо заціхлі, Косця, запіваючы з’едзены коржык ліманадам, раптам выдаў:

— Не ведаю, хто там, у гэтым ордэне, а я лічу — добрыя хлопцы! Шкада, што адрасу не пакінулі.

— О! У рыцары захацеў?

— І захацеў! — працягнуў Косця, распрамляючы і так шырокія плечы. — Дайце мне латы і меч!

— Ой, трымаце мяне, людцы! Рыцар! Манах Тук! — залямантаваў Лёшка, і клас выбухнуў рогатам.

Гарэзлівая суседка Косці, Галінка, падляцела, абшчаперыла за шыю.

— О, мой рыцар! Ратуй мяне! Абарані! Мяне хочуць сілком выдаць замуж за Прафесара!

І зноў рогат, бо Прафесар — Мішка, вунь сядзіць, усчырванелы, разгублены. Галя — яго даўняя сімпатыя, гэта ўсе ведаюць. Але Мішка гэтакі ўжо няўклюда, што толькі і ўмее паглядваць крадком ды чырванець так, што і рабацінак не відаць. Вучыцца добра, фізіку і інфарматыку ведае лепей за настаўніка, той сам так гаворыць. Вось і мянушка — Прафесар.

— Ат, кіньце вы, — адмахнуўся Косця. — Усё роўна яны малайцы.

— Пісклявы ты хлопец, Косця, — з напускным жалем заўважыў Генадзь, які ў гэты момант зайшоў у клас.

— Гэта чаму? — шчыра здзівіўся той, насцярожыўся.

— Таму. Вусы прабіваюцца, а табе ў дзяцінства пагуляць захацелася.

Косця разгубіўся, і тут на абарону сябра стаў Лёшка:

— Ты, Генадзь! Лепей быць дарослым і калі-некалі гуляць у дзяцінства, чым быць дзіцем і корчыць з сябе вельмі дарослага! — выкрыкнуў ён у твар Генадзя.

Генадзь пабялеў ад пачутага, спытаў патрабавальна, ледзь стрымліваючыся:

— Ты што, мяне маеш на ўвазе?

— Што маю, тое і на ўвазе!

Клас заціх. Не з-за таго, што спужаліся спрэчкі, былі падобныя і раней, і юшка чырвоная з насоў капала, але з Генадзем ніхто, мабыць, з класа пятага не спрачаўся вось так, як зараз.

І тут прагучаў ціхі памяркоўны голас:

— А што дрэннага ці смешнага ў рыцарстве?

Азірнуліся ўсе на яго, як на стрэл. Бо гаварыла Курыца — Насця кульгавая. Гэта было нечакана, але для Генадзя — адзінае выйсце, бо як адказаць Лёшку, ён не ведаў. І таму ўся злосць вылілася на дзяўчыну:

— Па-першае, я з табой не размаўляю. Па-другое...

— А ты паразмаўляй і са мной, — спакойна, не адводзячы позірка ўбок, перабіла Генадзя Насця. — Дык што дрэннага ў тым, што нехта захацеў стаць на абарону слабых, стаць рыцарам?

— Ён прыедзе некалі да яе — рыцар на белым, як снег, кані, падхопіць з зямлі і лёгка пасадзіць прад сабой, падніме забрала ў сваім шлеме, наблізіць да яе свой твар...— загучаў тэатральна летуценны голас Галінкі.

Відавочна, яна ўсё хацела перавесці ў жарт, але Додзік не даў ёй закончыць, выгукнуў са зларадствам:

— І ўпрэцца ў курыны нос!

Насця сядзела спіной да ўсіх, і настаўнік літаратуры, Мікалай Антонавіч, адчыніўшы дзверы, убачыў на яе твары, як і заўсёды, легкую, трохі вінаватую ўсмешку. Здавалася, што рогату за спіной яна не чула.

Пра рыцараў пагаварылі дні два ды і забыліся.

А праз тыдзень, пасля кароткіх дажджлівых канікул загула ўсхвалявана і вёска, і школа.

Навіну прынеслі зарэчанскія хлапчукі з пятага класа. А Додзік прынес і важкі доказ пагалосак — след ад бізуна на твары.

Было так.

Як і заўсёды, Додзік выйшаў са школы са сваімі целаахоўнікамі, як ён сам іх называў. Хлапчукі павінны былі чакаць Додзіка цэлы ўрок, каб ісці разам два кіламетры ў зарэчанскі паселак. За тое, што ён вадзіў малечу ў цёмныя восеньскія і зімовыя ранкі праз бярозавы гай, тыя павінны былі яму аддзячваць. Па-першае, кожны тыдзень збіраць грошы на пачку цыгарэт, бо сваіх грошай Додзік не меў — бацька не даваў. Па-другое, насіць яго не дужа поўную сумку. Ну, а трэцяе хлапчукі самі наклікалі сабе на галаву, калі зрабілі каляску, каб усім адразу можна было з’ехаць з пакатай дарогі праз гай. Додзіку даспадобы прышлася гэтая скрыня на колах, і зараз хлапчукі кожны дзень, як толькі заходзілі ў гай, цягнулі яго ў калясцы па дарозе ўгару, потым (як Додзік дазваляў) садзіліся самі і несліся ўніз.

У той дзень настрой у Додзіка быў дрэнны — адхапіў першую “двойку” ў чвэрці, і хлапчукоў ён падганяў зламанай галінай. З гары з’язджаў адзін, хлапчукі беглі ўслед.

Унізе, дзе дарога рабіла паварот, стаяў коннік. Скуль ён узяўся — невядома. Самы сапраўдны рыцар. Блішчалі латы, быў пакрыты пунсовым конь, аздоблена кружкамі з бляхі вуздэчка. Рыцар быў высокі і шырокі ў плячах, твар і галаву закрываў прыгожы, хоць і падобны нечым на вядро, шлем, а палову постаці — вялікі шчыт. На шчыце быў намаляваны чырвоны крыж. З-пад шчыта далёка ўперад тырчала вялікае кап’ё з вострым наканечнікам. А калі рыцар нетаропка ўзняў другую руку, хлапчукі ўбачылі ў ёй бізун.

Додзік вытрашчыў вочы, пачаў таропка і нязграбна вылазіць з глыбокай скрыні, якая яшчэ не спынілася. Скрыня завалілася на бок разам з Додзікам. Коннік крануўся да яго.

Додзік і разагнуцца не паспеў, як першы ляск бізуна па спіне апек скуру праз куртку. Потым яшчэ і яшчэ. І ўсе гэта моўчкі, толькі гучна соп конь.

Додзік крутнуўся, каб схапіцца за вуздэчку, але наляцеў проста тварам на хлёсткі бізун. Кінуўся з лямантам уцякаць. Коннік лёгка даганяў яго, біў па спіне, плячах, трапляла і па галаве. Додзік з енкам упаў. І тады пачуўся голас.

Што сказаў рыцар, хлапчукі не расчулі, сам Додзік толькі злосна мацюкаўся, калі яго аб гэтым пасля пыталі.

Закончылася тым, што Додзік прывалок каляску на гару, клікнуў прыціхлых у чэзлым малінніку хлапчукоў і вез іх не толькі праз гай, але і да першых хат паселка.

Назаўтра Додзік маўчаў, толькі выціснуў праз зубы:

— Я даведаюся, што там за рыцары. І тады...

Што будзе тады — здагадваліся ўсе. Хоць Додзіка не шкадаваў ніхто — у класе добра ведалі аб яго здзеках над малымі.

Прайшоў тыдзень, размовы змоўклі, а адзінаццаты і зусім забыўся пра рыцарскі ордэн. Захварэла класная, Лідзія Пятроўна. Адвезлі ў мястэчка. Казалі — будуць рабіць аперацыю.

Доўга вырашалі, калі ісці адведаць настаўніцу, спрачаліся — усім разам, ці толькі дэлегацыяй, збіралі грошы. Так прайшоў тыдзень, і калі ўжо намерыліся было, прайшла чутка, што Лідзія Пятроўна праз два дні выпісваецца. Але і праз тыдзень яна не з’явілася ні ў школе, ні ў вёсцы. Дамовіліся наведаць класную ў нядзелю.

І пайшлі б, каб не Ала. І трэба ёй было прынесці на ўрокі свой асабісты дзённік! І яшчэ нечага выцягнуць яго са сваёй сумкі на кантрольнай па геаметрыі.

Што яна там пісала — хто ведае, але відаць, надта шчырае, асабістае, бо калі Шаноўны з-пад сшытка з задачкамі выцягнуў блакітны, з наклеенымі ружамі дзённік, Ала ўзвілася з маленнем:

— Аддайце! Аддайце, Зіновій Пятровіч!

Той нічога не адказаў, пайшоў сабе ў вугал да акна, далей ад адчайных позіркаў дзяўчыны. Кароткі шэпат прашалясцеў і змоўк, калі Шаноўны адкрыў сшытак і стаў перагортваць старонкі, а недзе і чытаць, раз-пораз расцягваючы вусны ў тоненькай усмешцы. Клас маўчаў, паглядвалі на разгубленую, чырвоную дзяўчыну, а Ала была гатова вось-вось заплакаць уголас.

— Гэта подла! — у напружанай цішыні прагучаў голас, і ўсе уздрыгнулі.

Словы гэтыя ва ўсіх былі на вуснах, бухалі патрабавальна ў скронях, але сказаць іх услых не адважваўся ніхто. І вось...

Шаноўны аж адхіснуўся. З нейкім страхам у вачах пазіраў на клас і не сустракаў ніводнага сустрэчнага позірка.

— Хто гэта сказаў? Хто сказаў? — паўтарыў настаўнік пытанне. — Клас, устаць!

Узнімаліся павольна, насцярожана, крадком пераглядваліся вучні з кучай адчуванняў. І страх, і захапленне, і цікавасць, і... радасць — Шаноўны не ведае! Не ведае, хто сказаў! А хто? Хто?

На кантрольную Шаноўны нібыта забыўся. Усе стаялі, а ён абходзіў, пытліва свідраваў твары.

— Ты?! Глядзі мне ў вочы! Не? А хто? Хто сказаў?

Вучні з задніх радоў пазіралі ў сярэдзіну класа — ім здавалася, што словы прагучалі адтуль. А сярэдзіна крадком зіркала наперад — той, хто сказаў: “Гэта подла” сядзеў недзе там.

Допыт скончыўся нічым.

Дзённіка Шаноўны больш не чытаў, але і не вярнуў. На Алу, якая нясмела была падышла да яго пасля званка, ён не звярнуў увагі, быццам не бачыў яе, і таропка, спяшаючыся некуды, выйшаў з класа.

Ледзь толькі ён выйшаў за дзверы, як падхапіўся са свайго месца за першай партай ля акна ўскаламачаны Лёшка:

— Вы чулі, га?! Не, вы толькі ўявіце, хто гэта сказаў!

Вочы яго блішчалі, кірпаты нос пакрыўся кропелькамі поту ад узбуджэння.

— Нехта з вас! — безапеляцыйна абвінавачваючы сказаў Генадзь, выйшаў да настаўніцкага стала. — З вашага кута, ад акна быў голас!

— Ага! Дудкі! Ты памыліўся! — задаволена выкрыкнуў Лёшка ў прадчуванні таго, якую ён зараз сенсацыйную навіну паведаміць класу. — А ну, Косця, скажы, хто нашага паважанага Шаноўнага падлюгай аблаяў!

Яго сябра павольна, расцягваючы момант, пачаў узнімацца з месца, але не паспеў ён і рота раскрыць, як спакойны голас паведаміў:

— Гэта я сказала.

Голас належаў Насці Кульгавай. Цяпер гэта заўважылі ўсе. І сказала яна гэтыя словы без аніякага ценю ўзрушэння, быццам размова ішла аб нечым другасным, мізэрным, нявартым усеагульнае ўвагі. У класе ад няспадзяванасці ўсталявалася мёртвая цішыня.

— Ты?!! — Генадзь узарваў гэтыю цішыню пытаннем-стрэлам.

Усчырванелы ўмомант ад напружання і нечаканасці, ён павольна сунуўся ўзбоч стала настаўніка да дзяўчыны.

— Ты? — пагрозліва паўтарыў пытанне, працягнуў руку з прыкметна трымцячымі пальцамі. — Ты разумеееш сваёй курынай галавой, што ты нарабіла?!

— Яна разумее! Не чапай яе, — падняўся са свайго месца Грышка-філісаф. — Яна сказала тое, пра што думаў кожны з нас.

— Хто цябе цягнуў за язык? — нібыта не чуў яго Генадзь, схапіў, сціснуў руку дзяўчыны вышэй локця. — Зараз жа пойдзеш са мной прасіць прабачэння! Я паклічу Зіновія Пятровіча ў калідор, а ты будзеш прасіць у яго прабачэння!

— Нікуды яна не пойдзе! — сказаў Юрась, стараста класа, які неўпрыкмет падышоў да парты Насці.

Юрася не за так абралі старастам — яго паважалі за памяркоўнасць, нетаропкасць і незвычайную для яго ўзросту сталасць, абдуманасць кожнага слова.

— Адпусці яе! — упэўнена загадаў Юрась Генадзю. — Сіняк у дзяўчыны на руцэ застанецца, так ціснеш.

— Яшчэ адзін абаронца! — усклікнуў абурана Генадзь. — З гэтага філосафа што пытаць, а ты павінен зразумець сваімі мужыцкімі мазгамі, што на самой справе адбылося!

— Нічога не адбылося. Шаноўны толькі пачуў, як аднеслася да яго дзеянняў адна з вучаніц класа. І ўсё. Няхай ведае. — Юрась перахапіў руку Генадзя, і той расціснуў пальцы на руцэ дзяўчыны.

Насця ўвесь гэты час сядзела моўчкі, гледзячы ўважліва на пустую старонку разгорнутага сшытка. Яна міжвольна пацерла месца на руцэ, якое сціскалі пальцы Генадзя, і прамовіла ціха, але цвёрда:

— Я не пайду прасіць прабачэння.

— І за цябе ўвесь клас такое можа чакаць на экзаменах! — выгукнуў са злосцю Генадзь. — Табе напляваць на атэстат, цябе ферма калгасная з каровамі чакаюць, а людзі аб інстытутах думаюць! — Генадзь на гэтых словах кіўнуў галавой у бок класа, ці то просячы падтрымку, ці то паказваючы ўсім, што ён выступае ад іх імя.

— А ты ідзі, скажы Шаноўнаму, што ты не вінаваты, каб ён цябе не "зарэзаў", — параіў Генадзю з’едліва Лёшка, якому стала ніякавата ад таго, які працяг выклікала яго паведамленне.

Ён хацеў усяго толькі здзівіць, бо надта ж гэта было незвычайна: Насця Кульгавая ў якасці абвінаваўцы настаўніка. Лёшка не чакаў, што Генадзь так накінецца на дзяўчыну, што будзе не захапленне, а абурэнне. Бо і самому Лёшку карцела вымавіць тады тыя словы.

— Забудзе завуч пра ўсё на экзаменах! — упэўнена махнуў ён рукой. — Ды і сам ён ведае, што непрыгожа зрабіў. А хто сапраўды вінаваты, дык гэта наша прыгажунька, Алачка! Нашто дзённік прынесла?

Лёшка павярнуўся ў бок пачырванелай, бы бурак, Алы. Дзяўчына і сама адчула сваю віну, цяпер толькі апусціла вочы.

— І што ты туды такое пішаш, што аж Шаноўны чырванеў, чытаючы? — дапытваўся, выскаляючыся, Лёшка.

У класе з палёгкай засмяяліся, знікла напружанне. А Ала пачырванела яшчэ болей, хоць, здавалася, далей не было куды.

— Усё, хопіць. І закончым на гэтым, — пляснуў па стале важкай далоняй Юрась. — А ты, Насця, напярод прытрымлівай свой язык. Адкуль настаўнік ведаў, што ў тым сшытку нейкія сардэчныя сакрэты? Можа, ён і не стаў бы чытаць. Тут таксама думаць трэба..

— А дзённік? — нагадаў нечакана Грышка.

— Што — дзённік?

— Як што? Ён застанецца ў настаўніка? — спытаў Грышка з ноткай кплівасці. — Давайце рашаць справы да канца. Насця адзіны чалавек, які не проста выказаў свае думкі. Яе словы патрабавалі вярнуць дзённік. Дык што, акрамя слабай дзяўчыны, няма каму абараніць дзявочыя сакрэты ад нахабных вачэй? Няма сярод нас рыцараў...

— А пры чым тут рыцары?— узрушыўся Лёшка

—Ды не пры чым, — адказаў Грышка. Але ж… Падумай сам…

—Што тут думаць? Дзённік вяртаць трэба.

— Вось і вярні. — Грышка паклаў руку на плячо Лёшкі. — Паспрабуй, вярні. Ды паспяшайся, бо мне здаецца, не толькі ты паспрабуеш…

Лёшка з Косцем вярталіся са школы, як і заўсёды, разам.

— Лёшка, ты мне сябар? — нечакана спытаў Косця.

— Што ты пытаешся? — здзівіся Лёшка.

— Ды… Ведаеш, я нікому не казаў… Мне Ала падабаецца.

— Ух ты! — Лёшка спыніўся, уражаны. — І даўно?

— Ды не… Мяне дзяўчаты неяк не цікавілі раней. А тут во з гэтага года… Думаю пра яе…

— Так, — працягнуў Лёшка ў задуменні. — Значыць, калі нехта верне Але дзённік, гэты нехта павінен быць толькі ты!

— Ну… Я таму табе і кажу. Добра б было. — уздыхнуў Косця. — А то я ніяк не асмелюся да яе падысці. А так бы дзённік аддаў… Ды і шкада мне яе…

— Тут і другое ўпускаць нельга, — загарэўся Лёшка. — Табе не зашкодзіць ведаць, ці не занятае сэрцайка нашай Алы.

— Ты што — чужы дзённік чытаць? — абурыўся Косця. — Што я — той Шаноўны?

— А ты не гарачыся. Шаноўны чытаў дзённік дзеля простай цікавасці, а мы хочам атрымаць неабходную інфармацыю…

— Не-е-е! — упарта працягнуў Косця. — Яна ў мяне возьме ды спытае ці чытаў. А я што адкажу? І не хачу я. Можа, там такія дзявочыя сакрэты, што самому потым сорамна будзе, як прачытаю.

— Добра, добра, не будзем мы загадваць. Дзённіка ў нас яшчэ няма, — супакоіў Лёшка сябра. — Трэба нейкі план распрацаваць.

— Во, прыдумай, — папрасіў Косця. — Ты ж галавасты. У мяне дык нічога не атрымліваецца, я спрабаваў. Можа, Шаноўнага прыціснуць дзе вечарам, га?

— Гэта не план, а дурасць. Я прыдумаю сапраўдную аперацыю. Кодавая назва — "Ружа".

— Чаму ружа? — здзівіўся Косця.

— Так, падабаецца… Ды і ружы былі на дзённіку. Урэшце, гэта не галоўнае...

Назаўтра раніцай па дарозе ў школу Лёшка расказваў свой план вяртання дзённіка.

Ім трэба было атрымаць ключ ад настаўніцкай. Але проста скрадаць яго з пакоя тэхнічак было нельга — скарыстаць ключ адразу мо б і не ўдалося, а яго маглі хапіцца. Таму трэба зрабіць дублікат. А напачатку атрымаць адбітак. Для гэтага Лёшка ў малодшай сястры пазычаў кавалак пластыліну.

— Робім адбітак, заліваем яго гіпсам, — тлумачыў Лёшка. — Атрымліваем гіпсавы ключ. Далей бяром загатоўку ключа, ставім у ціскі. Паўгадзіны напільнікам пашкрабаў — ключ гатовы.

На ўрок біялогіі, які быў другім, не пайшлі абое. Схаваліся ў гардэробе між радоў вешалак. Пачакалі хвілін дзесяць, пакуль школьны калідор не апусцеў. Потым Косця рушыў да фантанчыка у канцы калідора, з якога вучні пілі ваду. Каб ваду не разлівалі, рэгулятар фантанчыка меў абмежавальнік — тоўсты цвік. Крутнуць рэгулятар так, каб сагнуць цвік, у Косці сілаў хапіла. Струмень вады ударыў ці не пад столь і стаў падаць на падлогу.

Косця кінуўся ў гардэроб.

Пакойчык тэхнічак знаходзіўся ў другім канцы калідора. Трэба было пачакаць, пакуль тэхнічка, цётка Нюра, не пачуе плёск вады.

Прайшло хвіліны тры. Ужо і лужына добрая сабралася, а тэхнічка не ішла.

— Другі варыянт, — прашаптаў Лёшка.

Косця зноў пайшоў да фантанчыка, павярнуў спакойна рэгулятар і потым накіраваўся да пакоя тэхнічак.

— Цётка Нюра, там хтось вады наналіваў, — сказаў ён да тэхнічкі.

— А, Божа, толькі ж выцерла! — завохкала тая. — Многа?

— Ага, лужына, цэлая. — з жалем да тэхнічкі прагаварыў Косця, а сам крадком зірнуў на фанерны шчыток з убітымі ў яго цвічкамі, на якіх віселі ключы. На цвічку, пад якім было напісана "Настаўніцкая", ключ вісеў.

— Давайце, я дапамагу! — Косця забраў з рук тэхнічкі вядро.

Калі праходзілі каля гардэроба, Косця вымавіў умоўныя словы:

— Можа, кран сапсаваўся. Такое бывае…

Гэта азначала, што ў пакоі тэхнічак нікога няма, а ключ вісіць на месцы.

Косця дапамог цётцы Нюры сабраць з падлогі ваду, знаходзячыся увесць час між тэхнічкай і другім канцом калідора, каб нельга было выпадкова заўважыць каля пакойчыка тэхнічак Лёшку. Потым ён пайшоў нібыта на ўрок.

У туалеце яго ўжо чакаў Лёшка.

— Глядзі! Выдатны адбітак! — аж свяціўся ад захаплення сябар. — Адна хвіліна — і ўсе справы. Сёння пасля ўрокаў робім ключ у майстэрні. Я дагаваруся з Сямёнам Паўлавічам, у яго і загатоўкі ёсць.

— А заўтра вечарам забіраем дзённік! — узрушана выгукнуў Косця.

Хлопцы ледзь дачакаліся званка — так доўга цяпер цягнуўся час, калі ў іх з’явілася сапраўдная справа!

Ішоў трэці ўрок, Мікалай Антонавіч расказваў пра Талстога, калі запахла дымам. Зашморгалі насамі, а потым хтосьці выгукнуў:

— Дым!

Утаропіліся на дзверы. А там праз шчыліну запаўзаў у клас белы, ванючы туман. Усхапіўся настаўнік, рыўком расчыніў дзверы, і цэльны клуб дыму, бы жывая істота, уваліўся ў пакой.

Загрукалі дзверы па ўсёй школе, пачуліся крыкі, піск, кашаль. У мітусні, хваляванні праз удушліва затуманены калідор высыпалі на вуліцу вучні. Хто паспеў схапіць паліто, а хто і не. Старэйшыя хлопцы выносілі вопратку, бегалі, шукалі па школе — дзе гарыць? Верхаводзіў завуч, Мікалай Васільевіч.

Знайшлі. На замкненай леснічай пляцоўцы чорнага ходу курэла старая ватоўка. Адсюль цягнуў добры скразнячок, і не дзіва, што ўся школа была задымлена, як пры сапраўдным пажары.

Праз гадзіну праветрылі класы, усе вярнуліся на свае месцы, узрушаныя неспадзяваным здарэннем.

Калі заняткі на гадзіну пазней скончыліся, і настаўніца выйшла, падняўся раптам Грышка-філосаф.

— Гэй! Усе слухайце сюды. Вы кажаце, хлопцы там курылі, вось і ўсе справы? Вось глядзіце! — Ён узняў угару руку з кавалкам нечага жаўтлявага.

— І што? Што гэта?

— Воск!

— Які там воск? Гавары толкам!

— Зараз будзе толк. — Грышка выйшаў да настаўніцкага стала, звычна паправіў акуляры. — Гэты воск я знайшоў там, дзе гарэла ватоўка. І мяркую, што раней гэта была свечка. А цяпер, Ала, пакапайся старанна ў сваім партфелі.

— Навошта? — Ала разгублена, як і ўсе астатнія, глядзела на яго.

— Калі я не дурань, дык твой дзённік будзе ляжаць на сваім месцы. Паглядзі ўважліва.

Ала паціснула плячыма, паслухмяна шчоўкнула зашчэпкай і праз момант з нейкім недаверам, асцярожна, быццам крапівіну, трымала ў руках знаёмы зараз усім блакітны сшытак з ружамі.

— А ну, дай сюды, — папрасіў-загадаў Грышка, і Ала моўчкі працягнула яму злашчасны дзённік.

Грышка ўзяў яго за вокладкі, патрос над сталом. Выпала паштоўка. Грышка патрымаў яе крышку ў руках, усміхнуўся, загадкава паглядзеў на клас.

— Вось так, шаноўныя, глядзіце! — Ён падняў руку высока ўгару, і на адваротным баку паштоўкі ўсе ўбачылі старанна намаляваны крыж у паўкружжы слоў: “Сумленне. Адвага. Годнасць”. — Зразумела зараз ўсе? Ставяць свечку каля ватоўкі, сумленна ідуць на ўрок, потым — дым, тлум, крык, потым — у настаўніцкую, потым — у клас, і дзённік на месцы. Я памыліўся раней — сярод нас нехта ёсць з рыцарскага ордэна! Чаго маўчыце, рыцары?

Хтосьці прысвіснуў. Усхапіўся Генадзь:

— Выдатна! Далей няма куды! Вы ведаеце, чым гэта пахне? Ведаеце? Думаеце, Шаноўны не здагадаецца, што падпал ватоўкі і выкраданне дзенніка — адно цэлае? Вы ведаеце, што можа быць?

— А чаму ты на нас крычыш?

— Таму, што Грышка і на самай справе не дурань! У гэтым ордэне сядзяць ідыёты з нашага класа. І нам патрэбна іх знайсці!

— Ой, дзяўчынкі! — азвалася гарэза-Галінка. — Ой, як цудоўна! Гэтыя рыцары — сярод нас! Як рамантычна! Хлопчыкі, хто яны, га? Цікава так...

— Табе цікава, а нам усім лазня будзе — задыхнешся ў пары!

І раптоўна ўсе змоўклі, углядаючыся ў твар адзін аднаму. — Хто? Хто? Хто? Маўчанне парушыў Грышка, які ўсё яшчэ стаяў каля стала настаўніка:

— Ты, Генадзь, больш аб сабе клапоцішся. За аўтарытэт свой трасешся — як жа, такое нетрадыцыйнае пачынанне і без цябе. Па школе чутак больш пра ордэн, чым пра актыў школьны і яго справы. І я не дзеля таго...

— Лухта гэта ўсё! — перабіў Генадзь. — А рассакрэціць ордэн гэты вельмі проста. Зараз толькі ўспомніць трэба — дзе хто быў і што рабіў. І ўсё высветліцца!

Пачуліся галасы адабрэння. Усе ўзбуджана заварушыліся, нервова перакідваліся словамі. Прадчуванне блізкай разгадкі таямніцы захапіла, узрушыла, прымусіла забыцца, што пара дадому. Генадзь выцягнуў чысты сшытак:

— Так, панове, будзем запісваць. Пачнем. Ну, ты, Додзіеў, дзе, з кім быў? Каго бачыў, калі мітусня ішла?

— Стойце! — Грышка прымусіў зноў звярнуць на сябе ўвагу. — Перш чым ставіць пастку на звера, трэба памеркаваць — што рабіць з яго скурай. Ну, вылічым, гэта не цяжка. А што далей?

— А далей я ім морды біць буду! — Додзік раз’юшана ўскочыў. — Пішы, Генік: Толік вось, я, Венька і Косця кішку пажарную разгортвалі. Ніхто не адыходзіў.

— Выдатна. Далей, Ахрэмчык, ты?

Прасядзелі хвілін сорак. І — анічога.

— А чаму мы так рашылі, што ордэн толькі ў нас? А можа, адзін з ордэна ў нашым класе, другі — у дзесятым, трэці — яшчэ дзе? — прагучала слушная думка. — Ды і потым, мог і хто не з нашага класа ведаць пра дзённік.

— Можа, і так, — стомлена згадзіўся Генадзь. — Аднак адказваць будзем мы.

— Ат, дробязь! Лухта! Ніхто нічога не дакажа, а ты, Ала, скажаш, што дзённік у вочы не бачыла! — загаварыў Юрась. — І хопіць, пайшлі дахаты. Ну ёсць рыцары, ну і няхай будуць. Каму хочацца — хай хоць чортам робіцца. І чаго ўсхадзіліся?

— Добра, але, — нечакана узняўся Косця, — я вось што хачу сказаць. Нехта гуляе ў рыцараў, а я буду гуляць у паляванне на рыцараў.

— А як шукаць будзеш? Пастку пастаў!

— І пастаўлю! Усе паставім і зловім!

—А што яны табе асабіста такое зрабілі, Косця, што ты іх лавіць сабраўся? — спытаў, прыпыніўшыся каля парога, Юрась.

— Ну... — Косця разгубіўся, і на дапамогу яму прыйшоў яго сябар Лёшка:

— Калі гэтыя рыцары сярод нас — няхай ім будзе горай. Але няправільна так — цішком нешта рабіць. Узнік у цябе план, то падкажы іншым. Мы таксама з Косцем думалі, як адбітак ключа ад настаўніцкай зрабіць, як момант быбраць... Нячэсна гэта! Нехта з нас рашыў стаць самым смелым, самым справядлівым. Дык чаго тады хавацца? Нам таксама крыўдна, увесь наш план к чорту, як быццам мы не хацелі той дзённік вярнуць, як быццам астатнім усім было абыякава... Я такое не дарую! Паляванне пачынаецца! — Лёшка пляснуў на парту бясформенны кавалак пластыліну, на якім быў непатрэбны цяпер адбітак ключа.

Лёшку падтрымалі крыкамі, і толькі Грышка, які дагэтуль стаяў каля стала, задуменна крануў акуляры.

— Вось што, шаноўныя! Не думаў я, што мая інфармацыя выкліча такія падзеі. Шкадую. А ты, Лёшка, і ўсе астатнія хоць словам абмовіліся аб тым, што трэба неяк дапамагчы Але, вярнуць дзённік, прыдумаць нейкі план? Табе не здаецца, што гэты агульны план як раз і ёсць гульня, а па-сапраўднаму ўсё робіцца без вялікай рэкламы... Гульня гульнёй, але ў паляванне не гуляюць. І потым, задайце сабе пытанне — навошта?

— І сапраўды, хлопчыкі, — падала нясмела голас Ала, бо адчувала нейкую сваю віну ў гэтых падзеях. — Гэтыя рыцары... няхай, можа, будуць таямніцай? Я кветкі разлюбіла, калі батанічка пра песцікі з тычынкамі расказала... Так жа цікавей.

— Заўтра будзе цікава, калі Шаноўны не знойдзе твайго дзённіка.

— І ўсё роўна! — голасна сказала Ала з міжвольным хваляваннем. — Дзякую вам, невядомыя рыцары!

На гэтым і разышліся.

Праз два дні нарэшце сабраліся ісці ў мястэчка, наведаць у бальніцы класную. Але вярнуліся засмучаныя — напярэдадні Лідзію Пятроўну адправілі ў Мінск на складаную аперацыю.

Дзіўна, але справа з пажарам так і закончылася нічым. І пра дзённік Шаноўны нібы забыўся. Пра таямнічы ордэн спрэчак больш не заводзілі, не чуваць стала пра яго. І толькі пад Новы год зноў пайшлі гаворкі.

Рыцар сустрэў зарэчанскіх хлапчукоў у бярозавым гаі, калі тыя ішлі ў школу на святочны ранішнік. Ён стаяў нерухома прама на дарозе, толькі конь зрэдку пераступаў капытамі. Сярод застыўшых у шэрані бяроз, у марозным ранішнім тумане ён быў падобны на здань, і хлапчукі сумеліся. Але цікавасць узяла верх, і яны пайшлі, хаваючыся адзін за аднаго і цягнучы за сабой санкі.

Падышлі дастаткова блізка, каб разгледзець добра латы і шлем, і тады вершнік крануў вуздэчку. Конь паслухмяна рушыў з дарогі ў гай, схаваўся за дрэвамі. А на дарозе застаўся ляжаць вялізны мех. На прышпіленым да яго кавалку паперы было напісана: “Першаму, другому, трэцяму класу ад рыцарскага ордэна “Зніч”. Расціце рыцарамі!”

У мяшку былі арэхі. Звычайная лясная ляшчына. Паўнютка духмяных, бліскучых, карычнева-цеплых шарыкаў. Хлапчукі ледзьве узвалілі мех на санкі і пацягнулі ў школу. Незвычайны пачастунак прыйшоўся як раз — цукерак у школу завезлі зусім няшмат, і традыцыйны падарунак дзецям складалі тры звяўшыя яблыкі і колькі цукерак. І вось — цэльны мяшок такіх выдатных арэхаў!

— ...Ну, гэта ўжо свінства! — кіпеў Лёшка ад адчаю і злосці. —Жнівень усе прагайсалі, можна ж было разам гэтых арэхаў дзятве два, тры мяхі б назбіраць! Была б памяць пра нас, глядзіш, і традыцыя б у школе ад нас пайшла — дарыць выпускному класу навагоднія падарункі малым…

— Ды не псіхуй ты, — супакойваў яго Косця. — Знойдзем, ён на нашы пытанні адкажа...

— Можа, і нам што дастанецца? А раптам падарунак кожнаму? — гадалі назаўтра дзяўчаты на школьным балю.

— Адзін ужо атрымаў на арэхі, яшчэ хто хоча?

Але старэйшыя віншавання ад рыцарскага ордэна не дачакаліся.

Затое пасля зімовых канікул усіх чакаў сюрпрыз. На тым жа самым месцы, дзе вісеў некалі аркуш з аб’явай аб стварэнні ордэна “Зніч”, з’явілася новая аб’ява.

Яшчэ адзін рыцарскі ордэн!

Ужо не тайны — пяцера хлапчукоў з зарэчанскага паселка абвясцілі сябе рыцарамі і запрашалі ўсіх да сябе. Тут жа быў і “Кодэкс рыцарскай чэсці”: “Не хлусіць ніколі! Не баяцца ніколі!” Пунктаў было не вельмі і шмат, але рыцары не забылі дзяўчынак: “Не крыўдзіць і не даваць крыўдзіць дзяўчынак, нават непрыгожых”.

Не смяяўся з гэтага аркуша адзін Генадзь. Ён адчуваў нейкую пагрозу ў гэтай аб’яве, але зрываць яе не стаў.

Праз тыдзень у новым ордэне было каля дзесятка хлапчукоў, і не толькі малеча! З’явіўся свой ордэн у шостых класах, потым яны аб’ядналіся, і колькасць рыцараў стала больш дваццаці. Рыцары майстравалі сабе латы, збіраліся ўвесну правесці сапраўдны турнір. У аднаго з іх дзядзька быў некалі даволі ўмелым фехтавальшчыкам, і зараз у спартыўнай зале пасля ўрокаў рыцары вучыліся змагацца па ўсіх правілах сапраўднага бою. Дырэктар дазволіў карыстацца не толькі спартыўнай залай, шумна было і ў школьнай майстэрні. Рыцарам зайздросцілі — ім было цікава, але абы каго яны да сабе не прымалі.

Генадзь рабіў выгляд, што нічога істотнага не адбываецца, але завуч аднойчы спыніў яго ў калідоры:

— Здаецца, уся школа хутка стане рыцарскім ордэнам. І хто тады будзе ў ёй кіраваць? Савет школы ці рыцары? Як думаеш?

Генадзь не адказаў нічога, толькі пачырванеў.

Праз тыдзень, калі ў ордэне з’явіліся два хлопцы з восьмага класа, ён ніяк не мог заснуць. Ці то надвор’е было такое — выў вецер, сек крупяным снегам у шыбы, ці то іншае што... Снег і падказаў. “Стыхія” — варухнулася незнарок, і Генадзь аж прысеў на ложку. Вось яно, выйсце! Самы надзейны крок! І як яму раней не прыйшло такое ў галаву? Падпарадкаваць стыхію!

Назаўтра ён сабраў школьны актыў — дзесяць хлопцаў і дзяўчат са старэйшых класаў — і прапанаваў узяць над ордэнам шэфства. З ім ляніва паспрачаліся: навошта ўлазіць у дзіцячую гульню, але Генадзь нечакана для ўсіх пачаў настойваць. Згадзіліся.

На чарговыя заняткі рыцараў па фехтаванні ён прынёс паперу і фарбы. Яго ідэя мець ордэну сваю газету вельмі спадабалася рыцарам, і ўмомант выбралі рэдкалегію. Ну, а калі Генадзь паабяцаў значкі, усе прыйшлі ў захапленне. Мець свой значок! Уга! Вось дык маеш!

Генадзь з’ездзіў у горад — там, на механічным заводзе працаваў яго брат. І праз тыдзень хлапчукі разглядвалі з бляскам у вачах маленькіх зіхцячых коннікаў, высечаных з белай бляхі.

Стыхія была падпарадкавана. Генадзь пераканаў рыцараў, што для таго, каб быць сапраўднай арганізацыяй, трэба выконваць некаторыя фармальнасці. Быў абраны рыцарскі камітэт, зацверджаны школьным актывам (каб па-даросламу было, растлумачыў Генадзь), з’явіўся план, спісы членаў ордэна.

Генадзь быў задаволены — задуманае ўдалося надзіва лёгка.

Між тым ордэн у школе пачалі паважаць. Колькасць рыцараў яшчэ вырасла, хлапчукоў з бліскучым коннікам на грудзях можна было бачыць і ў гардэробе, і ў буфеце. Яны сачылі за чаргой. Старэйшыя хлопцы спачатку пасмейваліся, але калі аднойчы Толік, сябра Додзіка, нахабна палез праз галовы, каб узяць бутэльку ліманаду, цэлы дзесятак хлапчукоў ушчаперыўся ў яго і выцягнуў з буфета. Толік раззлаваўся, пачаў раздаваць кухталі, ды яго не спалохаліся. Сапраўдную бойку распачынаць Толік пабаяўся. На дапамогу аднаму дзесятку хлапчукоў аднекуль узялося яшчэ столькі ж. Болей з імі ніхто не звязваўся. Было зразумела — ордэн стаў сілай, і моц яго у незвычайнай дружнасці хлапчукоў.

Неяк надвячоркам, калі заняткі ўжо скончыліся, у школу прывезлі вугаль, які дырэктар столькі часу дзе толькі не выпрошваў. Трэба было тэрмінова вугаль разгружаць — а каму, калі школа пустая? Колькі хвілін сам дырэктар з аднаногім школьным качагарам, дзядзькам Рыгорам скідвалі з машыны паліва, а потым дырэктар заўважыў свет у школьнай майстэрні. Ён рушыў туды.

Трое рыцараў-пяцікласнікаў малявалі эскізы латаў, рабілі выкрайкі з паперы.

На словы дырэктара аб тым, што трэба тэрмінова разгружаць машыну з вугалем, хлапчукі адрэагавалі нечакана: двое адразу рушылі да машыны, а трэці куляй выляцеў са школы і знік. Не паспелі дырэктар з двумя памочнікамі скінуць па некалькі шуфляў вугалю, як на машыну з прамежкамі ў хвіліну-дзве сталі залазіць па адным, па два хлопцы. Хвілін праз пятнаццаць іх было больш дзесятка. Куча вугалю меншала ўвачавідкі, рыцары працавалі дружна, з імпэтам, не зважаючы на чорны пыл. І ў самога дырэктара, і ў старога Рыгора забралі з рук шуфлі — не хапіла прыладаў на ўсіх.

Разгрузілі — і зніклі, не чакаючы ніякіх падзяк...

Генадзь тым часам развіў кіпучую дзейнасць, і неяк незаўважна ён стаў, па сутнасці, кіраўніком ордэна. Па яго ініцыятыве ордэн рос як на дражджах — прымаліся новыя хлопцы. Але частыя пасяджэнні, на якіх размяркоўвалі розныя абавязкі, абмяркоўвалі планы, хлапчукам пачалі наскучваць, ды гэтага Генадзь быццам не заўважаў.

У сярэдзіне лютага Генадзя паклікаў завуч, Мікалай Васільевіч.

Размаўлялі ў пустой настаўніцкай.

— Ты, Генадзь, сваю дасціпнасць дастаткова яскрава паказаў на паседжаннях Савета школы, ды і школьны актыў вядзе работу ў правільным накірунку, — пачаў Зіновій Пятровіч. — Што ты наконт гэтага рыцарства думаеш?

— Ды... Неблагая як быццам гульня. Галоўнае — яна пад кантролем, — падкрэслена адказаў Генадзь.

— Пад кантролем... А ведаеш, што кантроль — гэта недастаткова, каб весці сапраўдны выхаваўчы працэс?

— Вядома... — паціснуў плячыма Генадзь. — Трэба і кіраваць. Дарэчы, у мяне сярод рыцараў дастатковы аўтарытэт.

— Але ж ты не рыцар?

— Ну, не, гэта ж гульня...

— Гэта не гульня! — жорстка перабіў завуч. — Помні — любое аб’яднанне стаіць на нейкай аснове. Ідэалагічнай аснове. Якая аснова ў рыцараў?

— Ну... Якая там у іх аснова — прыдумалі самі сабе кодэкс, па ім і жывуць. Звычайны набор з кніжкі “Што такое добра і што такое дрэнна”...

— Ой, памыляешся, памыляешся, — са скрухай загаварыў завуч. — Трэба глядзець у сутнасць. І ў сутнасць з’явы, а не ў сутнасць нейкага кодэксу. А сутнасць у тым, што рыцары, іх ордэн — самастойныя. Разумееш — са-ма-стой-ны-я! Вось сёння ў школе ёсць вучнёўскі актыў школы. Ён самастойны? — хутка спытаў Шаноўны.

— А чаму не? — запытаў у сваю чаргу Генадзь, не разумеючы, куды вядзе гаворку завуч.

— А таму не, што працуе ў школе, пад неназойлівым кіраўніцтвам педагагічнага савета, і ў савета ж просячы падтрымкі і дазволу на розныя свае мерапрыемствы. Справы актыву непарушна звязаны са школай, з выхаваўчым працэсам. А рыцары хоць і ў школе, але іх планы і дзеянні ад школы мала залежаць. Ты разумееш?

— Разумею, — кіўнуў Генадзь.

— Тады ідзем далей. Я — не супраць рыцарства, малайцы хлопцы. Але хоць ты імі нібыта і кіруеш, але кіраванне тваё фіктыўнае. Бо ў цябе самога ніякай ідэйнай базы кіравання няма. А гэта азначае, што ў любы момант рыцарства можа пайсці зусім у не той бок. З’явіцца ў ім лідэр з ідэйнай базай — пойдуць за ім. І самае страшнае, што ідэйная база можа быць самой рознай. Як рознымі былі і рыцары: быў Айвенга, але былі і крыжакі, што няслі смерць. Дзе ўпэўненасць, што заўтра гонар рыцараў не перарасце ў самалюбаванне, і рыцары не стануць лічыць сябе не проста лепшымі, а вышэйшымі за іншых?

— А... што тады робіць? — разгубіўся Генадзь.

— Што рабіць? Не дапусціць гэтага. Дарэчы, з’яўленне рыцарства чаму адбылося, як думаеш?

— Бо няма камсамола.

— Але ж ёсць БСМ, БПСМ... Чаму ў школе не створаны пярвічкі гэтых арганізацый? І сам ты, дарэчы...

— Ды... Быў я ў іншых школах. Нейкая несур’ёзнасць у арганізацыях гэтых. Слоў многа, а спраў — няма.

— Правільна, больш гаварыльні, пустэчы. А месца не можа доўга пуставаць. Таму і з’явіліся рыцары. Бо маладзёжнае аб’яднанне — патрэбнасць маладых. Вось яны і аб’ядналіся. Ты ўпусціў момант, ці нехта яго ўпусціў — не ў гэтым справа.

— А ў чым тады?

— Ты яшчэ не зразумеў? — Мікалай Васільевіч пільна глянуў у вочы Генадзю, і той адвёў позірк у бок. — Чаму вучаць рыцары? У іх кодэксе ёсць пункт аб радзіме? Аб ветэранах вайны? Кім яны хочуць стаць? Касмапалітычнымі абаронцамі слабых, ці патрыётамі сваёй радзімы?

— Мне здаецца, ды і самі ж Вы казалі, што там добрыя хлопцы.

— І патрыёты з іх самі сабой атрымаюцца, так?

— Думаю, так, — нясмела адказаў Генадзь.

— Не, само сабой нічога не атрымліваецца. Нічога і ніколі. Запомні гэта.

— А што Вы прапануеце мне рабіць?

— Напачатку думаць. Многа думаць. І не спяшацца, не сячы з пляча. Праз тыдзень сустрэнемся. — Завуч хутка ўзняўся з крэсла.

Падхапіўся і Генадзь.

Каля дзвярэй завуч прытрымаў за локаць хлопца:

— Заўтра на першым перапынку пакліч да мяне вашу прыгажуню, Алу...

— Але ж дзённіка... — Генадзь спуджана змоўк, са страхам глядзеў у прыжмураныя вочы завуча.

— Я ведаю, што дзённіка ў Зіновія Пятровіча ўжо няма. Укралі ў час фіктыўнага пажару. Рыцары гэтыя і ўкралі. Але Алу я не таму клічу. Пагавару крыху з ёй наконт таго, што можна насіць у школу, што не. Дарэчы, як ты лічыш, Зіновій Пятровіч паступіў правільна?

Ён яшчэ больш сажмурыў вочы, і Генадзь не ведаў, што там — з’едлівасць ці шчырая, нават вінаватая ўсмешка. Ён нічога лепшага не прыдумаў, як толькі сказаць:

— Я не ведаю. А адкуль Вы пра ўсё ведаеце?..

— Думаць трэба, Генадзь. Многа-многа думаць. Аналізаваць. І толькі потым дзейнічаць. Зразумела?

— Зразумела, — выдыхнуў Генадзь.

Як ні ўпарціўся рыцарскі камітэт, колькасць членаў ордэна ўзрасла яшчэ на некалькі адзінак. Генадзь настаяў, аргументаваўшы тым, што сіла — ў колькасці. Майстраванне латаў і шлемаў было адкладзена, як і заняткі ў спартыўнай зале — ордэн па плану рыхтаваўся даць вялікі канцэрт у гонар жанчын — набліжалася восьмае сакавіка.

Гэта дало адваротны вынік — некалькі хлапчукоў з старэйшых класаў выйшлі з ордэна. Ды і астатнія не вельмі радаваліся плану Генадзя — хлапчукі саромеліся сваіх тэатральных здольнасцей. Тады Генадзь увёў у лік рыцараў некалькі школьных артыстаў, а лік рыцараў яшчэ больш паменшыўся. Яшчэ сямера хлапчукоў знялі свае зіхцячыя значкі — “Нецікава”. Але ядро трымалася.

Хоць і прыкра было Генадзю тое рабіць, ды ён адазваў убок Додзіка. Размова атрымалася не доўгай — Додзік усё зразумеў з паўслова. Ён узяў у Генадзя некалькі значкоў — зіхцячых коннікаў — і паабяцаў арганізаваць справу належным чынам.

І ўжо на наступны дзень завуч зноў унюхаў дым каля пляцоўкі, дзе некалі курэла ватоўка. Ён рыўком распахнуў дзверы (зараз яны не зачыняліся) і замёр ад неспадзяванасці. Некалькі хлопцаў курылі цыгарэты. Яны кінуліся таропка па лесвіцы ўніз, нікога Шаноўны схапіць не змог.

Але бліскучых коннікаў на лацканах пінжакоў ён заўважыў. Размова яго з Генадзем была кароткай. Завуч толькі сумна ўсміхнуўся:

— Я акцэнтаваў тваю увагу на ідэалогіі. Яе няма, але пакрысе яе месца займае нешта вычварнае. Ты гэта разумееш? Калі ў рыцарскім ордэне школьнікі пачалі курыць — куды прывядзе ордэн?

Генадзь прыйшоў на пасяджэнне ордэна і абвясціў ультыматым: альбо будуць выдадзены курыльшчыкі, альбо ордэн будзе забаронены.

Для Генадзя было поўнай нечаканасцю, калі рыцары запрасілі яго... выйсці за дзверы. Ён раз’юшыўся, але падпарадкаваўся, бо рыцары нагадалі яму, што ён не з’яўляецца членам ордэна.

Праз гадзіну на дошцы аб’яў вісеў квіток. У ім паведамлялася, што рыцарскі ордэн заканчвае свае існаванне.

Генадзь ішоў да завуча прыкметна ўзрушаны: у школе зноў стала ўсё на сваё звыклае месца.

Паведамленне аб спыненні існавання ордэна завуч выслухаў моўчкі, доўга глядзеў на размаляванае марозам аконнае шкло. Нечакана павярнуўся да Генадзя, які стаяў, перамінаючыся з нагі на нагу і спытаў:

— А табе самому не хацелася стаць рыцарам?

— Ды не... Не думаў пра гэта,— разгубіўся Генадзь.

— Шкада... Шкада, што не думаў. — Мікалай Васільевіч прысеў, запрасіў жэстам сесці Генадзя. — Ну, што ж, няма ордэна, то і няма праблем. Так?

— Так.

— Так, усё так. Ты ж ведаеш, як рыцары збіраліся, каб дапамагчы вугаль разгрузіць? Вось як паўторыцца сітуацыя, ты за лічаныя хвіліны, як старшыня школьнага актыву, зможаш так усё арганізаваць?

— Не ведаю...

Непрыемны халадок, нейкая незразумелая прыкрасць пачалі запаўняць Генадзя. Ён пачаў разумець, што зрабіў нешта не тое, атрымалася зусім не так, як патрэбна было завучу.

— Я казаў табе, Генадзь, — прадоўжыў завуч, — што ты не кіруеш ордэнам. Нельга кіраваць воўчай зграяй, не стаўшы ваўком, нельга было кіраваць рыцарскім ордэнам, не будучы рыцарам. А другое... Некалі быў камсамол. І не стала яго. А не стала яшчэ і па той прычыне, што бралі ў гэтую арганізацыю ўсіх, угаворвалі, каб толькі “рост радоў” забяспечыць. І то ўжо не камсамол быў. У камсамоле павінны былі быць лепшыя, а былі ўсе, хто пажадае. Зрэшты, сутнасць не ў назве. Сутнасць у ідэі, якая яднае. А ў цябе ідэя так і не з’явілася.

— А Вы самі... нічога не падказалі... — нясмела запярэчыў Генадзь.

— У мяне ўзрост не той, каб нешта раіць і прапаноўваць маладым. Па-другое, рыцары б не прынялі ніякага камандавання зверху, старэйшых. Але сваёй віны я з сябе не здымаю.

Генадзь быў канчаткова збіты з панталыку.

— Я думаў, так лепей...

— Вядома, лепей, калі турбот меней. І ўсё ж — шкада. Вельмі шкада. Я спадзяваўся, што ты зможаш...

— Але ж то была дзіцячая гульня!

— Ад таго, у якія гульні мы гуляем у дзяцінстве, залежыць тое, кім мы мы станем у будучым... Ты можаш ісці. — Завуч скончыў размову.

Генадзь выйшаў з пустой школы са злой рашучасцю. Ён пакляўся самому сабе, што знойдзе таго першага рыцара, з-за якога заварылася такая горкая для яго, Генадзя, каша, і з-за якой ён беззваротна згубіў свой аўтарытэт у завуча.

У наступны дзень зарэчанскія хлапчукі, не спяшаючыся дамоў са школы, каталіся на санках з гары і зноў сустрэліся з коннікам. На гэты раз яны доўга аб нечым размаўлялі. Але аб гэтай размове хлапчукі нікому не расказвалі.

Набліжалася жаночае свята. У адзінаццатым не віншаваліся ні хлопцы, ні дзяўчаты. Недзе да сёмага класа была такая традыцыя, але потым хлопцы неяк забыліся павіншаваць у адказ дзяўчат, і на гэтым усе скончылася.

Нечакана адпусцілі маразы. Па-веснавому заззяла сонца, і з пакояў было відаць, як пачарнела за зіму шкло шыбінаў.

Сёмага сакавіка школа зноў загаманіла аб таямнічым рыцарскім ордэне “Зніч”.

Збіраліся вучні, заходзілі ў класы, а там на стале настаўніка стаялі ў шклянках кветкі — жывыя дрыготкія цюльпаны. Па пяць кветачак. Вялізны букет сустракаў усіх у настаўніцкай. Побач з кветкамі ляжалі віншавальныя паштоўкі. Пад словамі віншавання замест подпісу быў намаляваны крыж і тры літары "Р.О.З."

А ў адзінаццатым на месцы кожнай дзяўчыны пунсовелі на сталах па тры дзівосныя ў такую пару кветкі.

Дзяўчаты былі настолькі расчулены, што не адразу пачалі дзякаваць хлопцам.

Першым урокам была літаратура. Зайшоў Мікалай Антонавіч, павітаўся, павіншаваў дзяўчат. Усміхнуўся, агледзеўшы святочны клас — паўсюль чырванеюць кветкі.

— Ну, я віншую і хлопцаў! Значыць, не згінуў ордэн “Зніч”! Вось дзе ён, як я разумею, стаў на ногі.

— Чаму? — пачулася пытанне.

— Як чаму? Таму, што толькі ў вашым класе кожнай дзяўчыне прыйшлося па тры кветкі. У астатніх — букет на ўсіх. Малайцы, чэрці, нават, нас, настаўнікаў, абмішурылі. Мы да жывых кветак не дадумаліся. Можа, мяне прымяце, га? — спытаў ён ці то жартам, ці ўсур’ёз і, не пачуўшы адказу, прадоўжыў: — Ну, рыцары, вам сягоння і адказ трымаць.

На перапынку хлопцы сабраліся разам не згаварваючыся. Загаварыў першым Генадзь:

— Я сёння першы зайшоў у класны пакой. Дык вось, пад словамі віншавання на дошцы быў надпіс — “РОЗ”. Гэта нам усім ёмкая аплявуха, — заключыў ён.

— Чаму? Можа, добры ўрок? — заўважыў Грышка. — І подпіс ты выцер ад сораму?

— Ты надакучыў са сваёй філасофіяй! — агрызнуўся Генадзь.

Зашыкалі і астатнія.

— Вось што. Зараз ужо справа нашага гонару знайсці гэты ордэн. Так што лепей прызнайцеся цяпер, калі гэта хто з нас.

— І гэтым зменшыце сваё пакаранне, — дадаў пагрозліва Косця. — Мяне гэта закранула. Калі так рабіць, то можна было б і з астатнімі дамовіцца. Хіба тут усе скнары?

— Чакайце, чакайце, — Юрась, чалавек практычны, падняў руку ўгару. — А адкуль кветкі?

Разгублена замаўчалі. І на самай справе — адкуль?

— З гораду, больш ніадкуль.

— На базары адна кветка колькі каштуе! А тут больш сотні. Хто ў нас гэткі багаты?

— І зноў чакайце, — прадоўжыў Юрась сваю думку. — Няхай і так. Гэта першая версія. Праверым. Аўтобус адзін раз на дзень ходзіць. Незаўважна больш сотні кветак не правязеш. Мая цётка ўчора на рынак ездзіла, спытаю.

— Чаму ўчора? А як раней?

— Кветкі вельмі свежыя. Цяпер другое: кветкі выраслі тут, у нас.

— Дзе?

— Ды хоць у хаце! Ім абы цяпло і святло. І, гледзячы на кветкі, я так і мяркую. Трошкі яны хілаватыя.

— Значыцца, гэта вы?! — павярнуўся раптоўна да братоў блізнят, Валодзькі і Андрэя, Косця. — Вы ж у нас у гуртку батанічкі, бы бабулькі ў зямельцы корпаецеся. Гэта вы!

— Ты што, звар’яцеў?

— Не слухаць іх! Яны!

— Стой усе! — скамандаваў Генадзь. — З іх вачэй не спускаць, пасля заняткаў пойдзем да іх дадому. Цяпліцу не схаваеш.

— З батанічкай пагаварыць! Каму яна гэтулькі клубняў давала?

— Паспеем, — выскачыў аднекуль успацелы, вёрткі Лёшка. — Я размаўляў з дзядзькам Рыгорам. Ён сёння вартаваў, зараз качагарыць унізе.

— І што?

— Нічога! — зазлаваў нечакана Лёшка. — Рыцар быў зранку, на кані. А з ім — чацвёра пешых, таксама твараў не відаць. У дзверы пагрукалі, дзядзька выйшаў, яму кап’ё ў грудзі. Казаў, аж ліхаманка хапіла. Ён і адчыніў школу. Коннік ля дзвярэй стаяў. Дзесяць хвілін — і ўсе справы.

— Ух ты, вось дык маеш! — загулі ў захапленні.

— Ідыятызм гэта! Дзяцінства! Цьфу! — плюнуў Генадзь пад ногі.

На вялікім перапынку хлопцы былі ў качагарцы. Частавалі старога Рыгора ліманадам, распытвалі аб ранішнім здарэнні. Нічога новага не пачулі. Але, як заключыў пасля Грышка, Рыгор казаў не ўсе, калі зусім не тое. Не надта падобна, каб стары салдат Вялікай Айчыннай спалохаўся нейкага рыцара, нават і з кап’ём.

Батанічка на пытанні хлопцаў нічога адказваць не стала, а пачала іх сароміць. Выскачылі ад яе, як ашпараныя. І злосныя. Лёшка паабяцаў распрацаваць добры план, але каб толькі яго лішні раз не турбавалі.

Пасля заняткаў праводзілі вобыск у доме Андрэя і Валодзькі. Перапалохалі страшэнна іх маці. Аблазілі хлеў, злазілі на гарышча, у склепе пабылі — слядоў аніякіх. Абвінавачванне знялі з неахвотай. Але прабачэння нават у маці не папрасілі. Забыліся.

На сваю мянушку — "Філосаф" — Грышка на аднакласнікаў не крыўдаваў. Хоць іншы раз казаў, што ён не філосаф, а аналітык. Збіраць факты, аналізаваць, рабіць вывады стала для яго не проста любімым заняткам, а звычкай. Са знакамітым дэдуктыўным метадам Шэрлака Холмса Грышка пазнаёміўся яшчэ ў дзесяць год — ён вельмі любіў чытаць.

З’яўленне ў школе рыцара нарадзіла ў Грышкі не толькі захапленне, але і сверб, якога ён даўно не адчуваў: сверб даследчыка-аналітыка. Таямніца рыцара не магла заставацца таямніцай для Грышкі. Гэта не космас, гэта было народжана нечай фантазіяй тут, у школе, аўтарам гэтай ідэі быў такі ж хлопец, як і Грышка. Таму тайну можна было раскрыць аналізуючы і робячы вывады. Ніхто лепей за Грышку гэтага рабіць не мог. Значыць, не раскрыць тайну Грышка не меў права.

Дома ён узяў вялікі аркуш паперы, расчарціў яго. Атрымалася нешта накшталт вялікай сеткі. Цяпер сетку трэба запоўніць. Спачатку запісаў прозвішчы ўсіх вучняў свайго класа, выключыў толькі сябе і Додзіева. Падумаў, выкрасліў яшчэ і Генадзя. Прозвішчы Лёшкі і Косці пакінуў — для чысціні расследвання.

План ягоны быў не складаным: трэба ўсе вядомыя даныя суаднесці з суб’ектамі — вучнямі класа. Напрыклад — конь. Хто з суб’ектаў можа ездзіць верхам? Хто мае магчымасць недзе ўзяць таго каня? Хто мог змайстраваць латы і шлем? Хто мог сярод зімы вырасціць кветкі? І яшчэ мноства іншых пытанняў.

Грышка выбраў тры варыянты адказу: "Так", "Не", "Магчыма". Калі адказ "Так", перакрыжаванне суб’екта і даных замалёўваецца зяленым колерам, "Не" — чырвоным, "Магчыма" — жоўтым.

Ён працаваў над сваёй сеткай гадзіны тры. Маці ўжо паспела двойчы нагадаць, каб клаўся спаць, калі, нарэшце, апошні чатырохвугольнік быў замаляваны.

Стомленымі вачыма Грышка глянуў на сваю мазаіку і зразумеў, што прааналізаваць вынікі будзе далёка не проста. Ён чакаў, што будзе многа чырвонага колеру, але такіх квадратаў было толькі чатыры… Дваццаць шэсць прозвішчаў, дзевятнаццаць стаўбцоў даных. Грышка нават уключыў сюды і пытанне: "Хто ведае, што такое "Зніч"?".

Як тут было брацца за аналіз, што рабіць з жоўтымі квадратамі — ці дадуць разам два такога колеру адзін зялёны?

Але здавацца Грышка не збіраўся. Калі цяжка чалавеку супаставіць мноства даных, трэба гэту справу даручыць машыне…

Назаўтра Грышка разгарнуў перад Міхасём-прафесарам свой размаляваны ў розныя квадраты аркуш.

— Так, Міхась, вось даныя, вось суб’екты. Для цябе ж камп’ютэр як бог. Складзі праграму, няхай вылічыць твой бог: хто з суб’ектаў з найбольшай верагоднасцю можа адпавядаць усім даным.

Адно толькі ўпамінанне аб нейкай практычнай праграме для камп’ютэра запаліла ў вачах Міхася азартны агеньчык.

— Ну, ну, — ён пацягнуў на сябе аркуш. — Цікава… Алгарытм будзе не дужа складаным… Ого! Ты рыцара вылічыць сабраўся?

— Але.

— Для камп’ютэра задачка гэтая на чвэрць секунды. Вось толькі даных малавата.

— Дзевятнаццаць пунктаў мала?

— Мала. І яшчэ трэба раздрабніць колеры. Не проста "Магчыма", а "Магчыма, так", "Магчыма, не" і гэтак далей. Ты яшчэ збірай даныя, я сёння складу праграму. Якраз інфарматыка будзе, закіну праграму ў камп’ютэр… — Міхась знайшоў свае інацэялы на аркушы, усміхнуўся: — Мяне можаш выкрасліць.

— Не, калі за справу возьмецца камп’ютэр, то я і сваё ўпішу, — запярэчыў Грышка. — Дзеля праверкі.

— Добра. Калі Сяргей Антонавіч дадому адразу не пойдзе, я спытаю ў яго дазволу, то сёння пасля заняткаў і ўвядзем даныя.

— Згода.

На перапынках Грышка распытваў зарэчанскіх хлапчукоў, тых самых, якіх рыцар бараніў некалі ад Додзіка. Але ні аб рыцары, ні аб тым, якога колеру ў яго конь, ці ёсць нешта адметнае, хлапчукі расказвалі вельмі неахвотна, хоць Грышку ў школе паважалі. Не вельмі дапамог Грышку і Додзіеў. А качагар, дзядзька Рыгор, нечакана раззлаваўся:

— Што вы ўсё вынюхваеце? Ты б лепш злодзея спаймаў, які вугаль цягае. Бач, усхадзіліся! Даўся вам рыцар. От табе рыцар што дрэннага зрабіў? Чаго ты на яго ўз’еўся?

— Ды нічога дурнога я не задумваю. Проста цікава мне і ўсё. — Грышка разгубіўся, адступіў назад — ён аніяк не чакаў такой бурнай рэакцыі качагара на сваё пытанне: "Якой масці быў конь?".

— Цікава яму! Табе цікавасць, а чалавеку — справа! Ідзі прэч адсюль!

Грышку гналі як блазнюка. Ён адчуў такое прыніжэнне, якога не паспытваў ужо даўно. Было сорамна. І яшчэ свідравалі душу гэтыя словы качагара: "…чалавеку — справа". Яго аднакласніка, гэтага рыцара, стары салдат называў чалавекам, а яго, Грышку, гнаў, бы неразумнага падлетка.

"Ну, чаго ён так усхадзіўся?" — думаў Грышка, выходзячы з качагаркі. І вырашыў, што стары Рыгор даўно ведае гэтага рыцара. І не проста ведае, а сябруюць яны. А гэта важкія даныя… Што ж, з усяго бывае толк…

У кабінеце інфарматыкі яны засталіся удвух, Грышка і Міхась — настаўнік пайшоў у настаўніцкую, папярэдзіўшы, каб нікога больш не пускалі ў кабінет. Грышка прадыктаваў апошнія даныя, сядзеў, маўчаў.

— Ну, што, ціснуць? — Міхась трымаў палец на клавішы.

— Ты, Міхась, не крыўдуй, але… — Грышка зняў акуляры, стаў церці шкельцы — яўны прызнак яго хвалявання. — Я пакуль даныя дыктаваў, амаль здагадаўся, хто такі гэты рыцар. Я не хачу, каб нехта, акрамя мяне, бачыў вынік работы праграмы. Ты зразумей, я не таму…

— Ды калі ласка! — проста адказаў Міхась. — Мяне ваш рыцар хвалюе як пазалеташні снег. А вось праграму было цікава складаць. — ён устаў з месца і адышоў да камп’ютэра настаўніка.

Грышка націснуў клавішу.

Адказ на маніторы ўспыхнуў амаль зразу ж.

Грышка хвіліну глядзеў на манітор, потым выключыў праграму.

— Міхась, ты сцяры, калі ласка, праграму, каб не ўлез хто, — папрасіў ён.

— Што, атрымалася? — захваляваўся Міхась.

— Атрымалася. Маю інтуіцыю пацвердзіў твой камп’ютэр. Верагоднасць 80 працэнтаў. У самага бліжэйшага суб’екта верагоднасць 35 працэнтаў.

— Дык цудоўна! — узрадваўся Міхась. — Спрацавала праграма! А ты сам чаго засмучоны? Сумняваешся?

— Ніколькі, — адказаў Грышка. — Я не сумняваюся, хоць і нечаканы ў нечым атрымаўся для мяне адказ. Усё так і ёсць.

— Дык чаму не рады? Не хочаш расказваць?

— Я не дзеля таго рыцара шукаў, каб усім расказаць. Для сябе, як і ты вось праграму складаў.

— Дык жа ўсё знайшоў… — не разумеў Міхась.

— Я зразумеў адну простую рэч, — задуменна сказаў Грышка. — Раней чытаў той выраз з Бібліі, не мог дацяміць. А цяпер разумею, што значаць словы: "Той, хто множыць веды, множыць скруху". Мне сорамна. Проста сорамна.

Грышка выйшаў з кабінета, не падзякаваўшы Міхасю за дапамогу.

Міхась сцёр праграму, не зазіраючы ў яе. Яго і на самой справе ніколечкі не хвалявала таямніца рыцара.

Мінуў месяц, другі. Рыцарскі ордэн: “Зніч” тады-сяды абвяшчаў аб сабе.

Саўкоў з восьмага “Б” зняважыў аднойчы на школьным вечары адпачынку дзяўчыну. І ўвесь наступны тыдзень то яму солі ў шклянку з чаем хтось сыпне, то цукру ў боршч. “РОЗ” у лістоўцы паведаміў, што заморыць яго голадам, калі не папросіць прабачэння. Саўкоў фанабэрыўся, але калі пачаў прыліпаць да зэдліка і хадзіць з плямамі мелу на спіне — здаўся. Прыціхлі задзіры — двое ўжо атрымалі “цемную”. І малых не надта асмельваліся цяпер крыўдзіць. Ордэн і на самай справе на кулак адказваў кулаком. Але галоўнай яго сілай была яго цяперашняя таямнічасць. Хто ў ім — ніхто не ведаў.

Ды ўсе дагэтуль здавалася драбязой, аж пакуль зноў не выбухнула ў адзінаццатым.

Алена Радзько, дачка старшыні калгаса, марыла аб інстытуце. Але з матэматыкай... Вышэй “трох” у яе за чвэрць ніколі не было. І то — ледзь-ледзь. Пасля чарговай кантрольнай Шаноўны раздаў правераныя лісткі з адзнакамі. Радзько пакруцілася і спытала:

— А дзе мая, Зіновій Пятровіч?

Той неяк скрывіўся і нехаця адказаў:

— Я, відаць, яе згубіў. Але добра памятаю, што табе я паставіў “чацвёрку”.

Алена шмыгнула задаволена носам, і насупраць яе прозвішча з’явілася ўжо другая “чацвёрка”. Першая была за вусны адказ з месца.

У класе зразумела заўсміхаліся.

А назаўтра кантрольная Радзько знайшлася. На тым самым месцы, дзе заўсёды прышпільваліся аб’явы і паведамленні ордэна. Нічога зроблена ў ёй не было, хіба што ўмовы задач перапісаны, ды сяк-так намаляваны трохвугольнікі. І стаяў знізу вялікі запытальнік чырвонага колеру. А квіток ордэна паведамляў, што за гэтую кантрольную Радзько атрымала “чатыры”.

З настаўніцкай чуліся прыглушаныя галасы...

— Я казаў! Я казаў, што гэта — ідыятызм! Рамантыкі! У справядлівасць пагуляць захацелі! Каго вы ганіце? І што з вашай ганьбы? — крычаў раз’юшана Генадзь.

Большасць была за Генадзя, добрая частка ставілася да ўсяго з абыякавай цікавасцю, але былі і супраць. Супраць быў і Грышка-філосаф.

— Мы — дзеці. Хоць і лічым сябе дарослымі. Адзін чалавек ведае жыццё лепей за нас. І ён імкнецца даць нам адзін урок за другім. Зрабіць за нас тое, што мы павінны рабіць самі. Не ведаю як вам, а мне зараз сорамна! — ён нават акуляры зняў і цёр, цёр чыстыя шкельцы насоўкай.

— Пачакай, пачакай, — ажывіўся нечакана Додзік. — Ты кажаш — адзін?

— Адзін, — цвёрда запэўніў Грышка. — Малеча не ў лік.

— Чаму так?

— Бо я ведаю, хто гэта. Раней здагадваўся, а цяпер — ведаю.

Усе, як па камандзе, утаропіліся на яго. Усталявалася цішыня, было чуваць, як Грышка паціху перагортвае старонкі.

— Хто гэта, Грышачка? — спытала нарэшце Галінка.

Як прарвала астатніх:

— Хто, гавары!

— Хутчэй!

— Не цягні!

— А ці не ён сам?!

— Не, гэта не я, — адказаў Грышка, адзеў акуляры. — І як калісьці шкадаваў Косця, так зараз шкадую і я. Зараз я ведаю гэтага невядомага, і ад гэтага ведання мне толькі сорамна. Але вам яго імя я называць не буду.

— Чаму? — ледзь не за грудкі схапіў яго Генадзь. — Чаму?

— Бо не хачу. І я лічу, што не маю права выдаваць чужыя сакрэты. Гэта ўсё.

— А-а, вось як?! Ну тады, калі ён смелы такі, гэты рыцар, няхай прызнаецца сам! Ты ж усё роўна яго таямніцу ведаеш, які сэнс далей хавацца? Ці ў яго смеласці толькі на старых вартаўнікоў хапае? Ну, хто з вас рыцар адзінокі? — Генадзь пакусваў вусны, узбуджана аглядзеў клас.

Зноў падняўся Грышка.

— Я прашу рыцара ордэна “Зніч” верыць мне. Я нікому без яго дазволу не раскрыю яго сакрэт. Даю слова гонару!

— Ты ідзеш насуперак класу! Усе хочуць ведаць яго імя!

— Хто хоча?

— Я, напрыклад! — усхапіўся Лёшка.

— Паспрабуй адказаць пераканаўча — навошта?

— Каб... Каб паглядзець яму ў вочы!

— Глядзі, усе прад табой, а ён тут.

— Слоў колькі хачу сказаць!

— Кажы, ён жа не глухі.

— А я яшчэ не расквітаўся за сваю абразу! — злосна выгукнуў Додзік.

— Не думаю, што рыцар не зможа пачаставаць цябе бізуном яшчэ раз, калі ты зноў будзеш крыўдзіць малых. Усе, хопіць! — Грышка сеў.

Генадзь адкрыў было рот, каб яшчэ нешта казаць, але ў клас ужо ўваходзіла настаўніца — пачынаўся апошні ўрок.

Хвілін за пяць да канца ўрока ў клас асцярожна пастукалі. Астранамічка выгукнула: “Заходзьце!”

Адчыніліся дзверы, ніякавата ўсміхаючыся, зайшла Лідзія Пятроўна. Усхапіліся з месца, вітаючы класнага кіраўніка.

— З выздараўленнем вас! — прывітала яе і астранамічка. — Ну, у мяне ўжо ўсё, пагаварыце. — І выйшла.

Клас замёр.

— Ой, якія ж сталі! Як змяніліся! Кастусь, ці то гэта ты яшчэ большы стаў, ці гэта Аляксей зменшыўся?

Стрымана засмяяліся.

— Выраслі, выраслі, — паківала задуменна галавой Лідзія Пятроўна. — Ну пра вас і пра справы школьныя я ўсё ведаю, дзякую вам. Зайшла да вас на хвілінку, бо машына чакае, каб павітацца і... развітацца. Пуцёўка ў мяне, еду адпачываць, на жаль, нават правесці вас не змагу. І кажу вам зараз — дзякуй за ўсё! За тое, што не забыліся на мяне за гэты час, што не далі засумаваць, што кожны тыдзень пісалі ў Мінск...

Яна ўсміхнулася нейкім сваім успамінам, прадоўжыла:

— Ведаеце, калі я ў мястэчку ляжала, прыносяць мне адну перадачу, другую, то мне вядома — ад вас, бо ліст жа ў клуначку, а нянечкі аж млеюць ад цікавасці — хто ды хто? Ну, малайцы, гэткае прыдумаць! Калі ля бальніцы сапраўдны рыцар першы раз уранку з’явіўся, дзяжурную сястрычку ледзь не адкалыхваць прыйшлося. А потым прывыклі, кожны ранак выглядвалі і ўсе распытвалі — дзе ж я сабе такога рыцара знайшла? Дзякую вам, мой адзінаццаты, мой рыцарскі ордэн “Зніч”!

Яна гаварыла, а галовы апускаліся ніжэй і ніжэй, разгубленыя, аглушаныя пачутым. Ніхто не мог падняць вачэй. Быццам не лагодныя, поўныя ўдзячнасці і светлага захаплення словы, а цяжкія папрокі зрываліся з вуснаў настаўніцы і падалі гарачым каменнем на галовы і плечы.

— Ну чаго засаромеліся? Такога не трэба саромецца. А чыя гэта была задумка, га? — спытала Лідзія Пятроўна, гарэзліва бліснулі вочы. — Хто тут быў галоўны? Ці не ты, Лёшка?

— Мы не ведаем, — адазваўся ціха і нечакана стараста Юрась. — Мы павінны вам сказаць, Лідзія Пятроўна...

— А куды вы едзеце адпачываць, Лідзія Пятроўна? — перабіў яго раптоўна Грышка.

— Ой, Грыгорый, і назву выгаварыць цяжка. Нейкі санаторый у гарах, мора побач.

— Прыемнага вам адпачынку! Прыязджайце здаровай!

— Дзякую. Усім вам яшчэ раз дзякую! — яна ўсміхнулася шырока, паволі абвяла вучняў светлым позіркам, нетаропка выйшла.

У поўнай цішыні падняўся Грышка, закінуў на плячо сумку, рушыў да дзвярэй. Адчыніў, азірнуўся на Юрася.

— Ты, Юрка, хлопец разумны, нешта, відаць, да цябе дайшло. Але... Маўчанне — гэта не хлусня. А праўда іншы раз і забівае. Не абавязкова фізічна.

І выйшаў.

Зазвінеў званок, пранізліва, як сігнал на нейкі штурм.

— Хопіць! — выгукнуў Генадзь, падскочыў да настаўніцкага стала. — Гэты чортаў рыцар на восьмага сакавіка хлопцам даў аплявуху! А зараз ён плюе ў твар усяму класу!

— Морду яму набіць за такое!

— Знайсці! Неадкладна знайсці!

— Ціха! Што вы як цёткі на рынку? — Юрась ўстаў з месца. — Вось што, — ён запнуўся, рашуча прадоўжыў: — Рыцар нам у твар не пляваў. Ён наш твар выратаваў. Мы лічылі сябе такімі разумнымі і дружнымі, што не змаглі дамовіцца, каб калі наведаць настаўніцу, не напісалі ёй ні аднаго ліста, не павіншавалі са святамі. Не ведаю, як у вас, а ў мяне было жаданне праваліцца скрозь зямлю. Я не ведаю, хто гэты рыцар, але я кажу яму “дзякуй” ужо за тое, што падтрымліваў цёплыя пачуцці сталай жанчыны — нашай класнай.

Ён сеў, стаў запіхваць падручнік у сумку.

— А табе не здаецца, што гэты рыцар лічыць нас інфантыльнымі? Што ён лічыць сябе лепшым за ўсіх? Дабрэйшым за ўсіх?

— Не, не здаецца. Ён і на самай справе лепей за нас.

— Ён топча нас у гразь! — выгукнуў у запале Лёшка. — Ён добры — мы дрэнныя, ён смелы — мы баязліўцы! Хопіць, у мяне ёсць план! Не прызнаецца — і няхай. Але потым хай не шкадуе!

— Го, паляванне на рыцара!

— Злавіць яго!

Зноў падняўся Юрась, агледзеў клас.

— Я паўтару — я ўдзячны рыцару і лавіць яго з вамі я не буду. І нікому не раю.

Ён пайшоў да дзвярэй.

— Хто яшчэ можа прымаць абразу з удзячнасцю — ідзіце за ім! — тэатральна выкінуў яму ўслед руку Генадзь.

Юрась азірнуўся, пачакаў. Моўчкі ўстала і пайшла да яго Насця Кульгавая.

Вучні стралялі адзін у аднаго вачыма — хто яшчэ? Нечакана для ўсіх рушыла да выхаду Ала.

— І ты, Брут? — выгукнуў хтось амаль трагічна.

— І я, — кіўнула Ала. — Выбачайце, але гэты невядомы — сапраўдны рыцар. Няхай сабе ён і даў нам такі ўрок.

— А за навуку не судзяць! — падхапіўся, нібы баючыся спазніцца, Валодзька, пацягнуў за руку брата. — Пайшлі, Андрэй, можа, Генадзь прывядзе клас шукаць латы і каня, хоць маці папярэдзім. — Даўняя крыўда прагучала ў яго словах, і абодва браты далучыліся да Юрася, Насці і Алы.

— Раз-два-тры-чатыры-пяць, выйшаў рыцар пагуляць, — палічыў насмешліва Генадзь, але было відаць, што ён напружана ловіць кожны рух у класе. — Ну, усе летуценнікі?

Ніхто не варушыўся.

— Дык ідзіце! Слаўныя зброяносцы дурного рыцара з адзінаццатага класа!

Пяцёра выйшлі.

— Цяпер — за справу! — Генадзь пляснуў рукой па сталу. — Давай, Аляксей, твой план!

— А як рыцар сярод нас? Тыя ж на рыцараў не падобны?..

— Чакайце, — узняўся Додзік. — Застаюцца: Генадзь, Лёшка, Косця, і Толік вось, — тыцнуў ён на свайго сябра побач. — Хопіць, Лёшка?

— Пакуль хопіць.

— Выдатна! — Генадзь прадоўжыў камандаванне. — Значыць, усе астатнія няхай не крыўдзяцца. На заключную частку мы іх запросім. Так?

— Так, запросім, — пацвердзіў Лёшка.

З гулам клас апусцеў, засталіся толькі пералічаныя Додзікам.

— А нас не падслухоўваюць?

Праверылі, ніхто каля дзвярэй не стаяў.

Ад лёшкавага плана прыйшлі ў захапленне. Тое-сёе ўдакладнілі, вырашылі ў гэты ж дзень праверыць усё на месцы, рушылі ў гай. Паўгадзіны лазілі па кустах, на якіх ўжо з’явіліся кволыя лісткі, варушылі сапрэлую лістоту і траву на доле.

Додзік яшчэ раней паслаў Толіка ў краму, і той якраз вярнуўся з дзвюма бутэлькамі віна.

— За ўдалае паляванне на рыцара!

Генадзь пакруціў трохі носам, але не адмовіўся. Хаця, калі б яму хто ў пачатку года сказаў, што ён будзе піць віно разам з Додзікам і Толікам, ён бы толькі пасмяяўся. А вось жа і давялося, і адмаўляцца магчымасці не было — не зразумелі б астатнія, пакрыўдзіліся. Разам справу рабіць, разам і піць…

У якасці прынады выбралі Галінку — у яе бабуля якраз у Зарэччы, і Косцю з Галінкай будзе лёгка дамовіцца — яны, лічы, выраслі разам, іх хаты стаяць па суседству.

Назаўтра гарэза-Галінка спуджана шчабятала на перапынках. Расказвала, як яе, калі несла малако да бабулі праз гай, перастрэў нейкі валацуга. І як чуць вырвалася, і які ён страшэнны. Дзяўчаты губляліся ў здагадках.

Падказаў Додзік:

— У Зарэччы шабашнікі кароўнік ладзяць. “Зэкі” былыя. Мабыць, з іх хто.

— Ой, мне ж у нядзелю да бабулі зноў малако несці! Як жа я праз гай прайду? Ён жа зноў стрэне, крычаў жа ўслед...

— А ты рыцара папрасі, каб цябе правёў... — з’едліва прапанаваў Додзік.

— Ат, рыцар толькі цішком нешта зрабіць можа, — адмахнулася Галінка.

Да апошняга званка заставаўся тыдзень.

Лёшка на перапынку аж ускочыў на стол, каб паведаміць сваю навіну.

— Прашу ўвагі! Ў гэтую нядзелю я запрашаю ўсіх адзначыць дзень майго нараджэння. Чакаю ўсіх у пяць гадзін. Форма адзення — паходная, бо ўсё мерапрыемства пройдзе на беражку возера. Усё. Хто не жадае ці не можа — прашу папярэдзіць адразу.

Назаўтра, у нядзелю, большая частка класа сабралася каля дома Лёшкі. Ён быў зусім не радасна ўзбуджаны, востраносы яго твар ззяў рашучасцю, аж рабацінкі пахаваліся.

— Так, сябры мае! Мы абяцалі вам усім удзел у паляванні на нашага невядомага рыцара. Пастка сёння захлопнецца, план ужо пачаў дзейнічаць. Гэта будзе цудоўны спектакль. У нас гадзіна, каб падрыхтавацца.

— Чакайце, чакайце! — Грышка нервова зняў акуляры. — Не рабіце гэтага. Я вам скажу яго імя.

— Позна, філосаф! — ступіў да яго Генадзь. — Цябе прасілі аб гэтым раней. А сёння мы абыдземся без цябе.

— У вас нічога не атрымаецца.

— Ты перашкодзіш?

— Я!

— Ну, не. Мы прадугледзелі і гэта. Ты ў нас на час палявання пасядзіш у лазні. Пад арыштам!

— Што вы прыдумалі? Вы права на гэта не маеце! — ступіў наперад з паўкола аднакласнікаў стараста Юрась.

— І ты пасядзіш! Вядзіце іх!

Дужы Додзік, Толік і яшчэ некалькі хлопцаў акружылі Юрася з Грышкам. Яны разгублена азіраліся вакол. Моўчкі, уражаныя застылі астатнія аднакласнікі — ніхто не чакаў, што справа прыме такі сур’ёзны характар.

— Прыйшоў час даведацца, хто ўвесь год таптаў нас у бруд, хто ўзяў на сябе абавязак вучыць нас жыць, хто палічыў сябе самым лепшым і самым разумным, — амаль урачыста загаварыў Генадзь. — Успомніце тыя хвіліны, калі класная стала нам дзякаваць. Вам не хацелася праваліцца скрозь зямлю? То скажыце “дзякуй” рыцару за тыя хвіліны. Асабіста я вельмі хачу гэта зрабіць. І ніхто нам не перашкодзіць. Уперад, у лес! А гэтыя двое няхай пакуль папарацца ў лазні. Вядзіце іх!

Праз паўгадзіны ўсе былі на месцы. Лёшка энергічна стаў расстаўляць хлопцаў каля вяровак, якія яны з Додзікам, Толікам і Косцем прывязвалі тут днём.

— Як толькі дам каманду — нацягвайце і завязвайце на ўзроўні грудзей. Астатнія — вунь там яміна, хавайцеся ў ёй. Усім сядзець ціха, не высоўвацца! Што б ні здарылася на дарозе — пакуль не крыкну, не вылазіць.

Яшчэ праз дзесяць хвілін у лесе каля дарогі стала ціха, бязлюдна, быццам нікога і не было.

Лёшка ляжаў пад ялінкай разам з Косцем. Адсюль быў відаць кавалак дарогі з мастком, шэры клін ельніку. Хілілася сонца да захаду, несла халадком з нізіны, ад мастка.

Паказаўся на дарозе Додзік — у старой ватоўцы, у глыбока насунутай на вочы шапцы. Падышоў да мастка, прысеў каля бярозы. Запаліў цыгарэту...

Вакол было ціха. Лёшка круціў галавой па баках, углядваўся ў гушчар. Але момант з’яўлення рыцара ён праглядзеў. Вось не было нікога каля старой яліны, як раптам быццам з-пад зямлі вырасла постаць конніка. Промні сонца, што стала хіліцца да захаду, блішчалі на латах і шлеме, не варушыўся, застыў пад рыцарам конь...

“Конь! Вось ад чаго трэба было танцаваць! От жа, дурань, як я адразу не звярнуў на гэта ўвагу”, — стрэліла ў галаву Лёшкі здагадка. — "Грышка менавіта так вылічыў гэтага рыцара...”

А рыцар стаяў нерухома. У душы Лёшка пачаў адчуваць лёгкі неспакой. Не, ён быў упэўнены, што сёння рыцару ад іх не схавацца, ды... не было адчування радасці ад будучай перамогі. Знік азарт паляўнічага, непрыемна казытала душу думка аб тым, што ён, Лёшка, будзе галоўным разбуральнікам гэтай дзівоснай казкі. На самой справе, можа, няхай і далей застаецца таямніцай гэты рыцар, няхай праз гады абрасце новымі легендамі, няхай яшчэ доўга будуць расказваць у школе, у навакольных вёсках аб гэтым незвычайным здарэнні. Ён, Лёшка, вось толькі падумае як след і так даведаецца ўсё, што пажадае.

Лёшка глядзеў на рыцара. На самаробныя, з бляхі, латы, на шлем з апушчаным забралам, на доўгае кап’ё... Яму раптам захацелася падысці да гэтага хлопца, павітацца, а потым папрасіць... прымерыць рыцарскае ўбранне на сабе. Сесці на варанога, у чырвонай папоне каня, гэйкнуць, ускінуць кап’ё, і конь панясе яго шырокім галопам праз лес, насустрач нябачным ворагам...

— Пусці! Не чапай! Ой, дапамажыце! — пачулася ад дарогі. Там ужо Додзік цягнуў за руку ў бок гушчару Галінку.

Коратка рыцар тузануў за аброць каня. Конь заіржаў, рэха падхапіла гэтае іржанне, панесла далёка па лесе. Застыў на дарозе Додзік, аскаліўся, убачыўшы, як высока ўзняўся на дыбкі конь, імкліва скокнуў, і віхрам паляцеў на дарогу. Ва ўзнятай руцэ вершніка Додзік убачыў бізун, прыгнуўся, таўхануў долу Галінку і закрычаў роспачна і патрабавальна:

— Вяроўкі, вяроўкі нацягвайце хутчэй! Уцячэ!

Лес узарваўся мноствам крыкаў, свістам, улюлюканнем. Рыцар спыніўся, крутнуўся на месцы конь. А між дрэвамі вужакамі ўзвіваліся вяроўкі... Да конніка беглі з усіх бакоў адзінаццацікласнікі. Додзік улавіў момант, падскочыў, схапіў за аброць каня.

— Ага! Папаўся!

Узвіўся на дыбкі конь. Додзік узляцеў услед за аброццю, грузна сарваўся ўніз. Тонка свіснула ў паветры, і востры боль пра¬цяў Додзіка — бізун рыцара знайшоў яго спіну.

...Доўгімі скачкамі конь прабягаў ад адной нацягнутай вяроўкі да другой, імкліва паварочваўся, рыцар азіраўся, тузаў аброць, і зноў яны несліся да процілеглала кута пасткі. Вершніку кідаліся наперарэз, але блізка падысці баяліся пасля таго, як яшчэ дваіх рыцар пачаставаў бізуном.

Рыцар кінуў кап’ё — з ім цяжка было рабіць хуткія, імклівыя павароты. Кап’ё падхапіў Додзік, дзіка, раз’юшана залямантаваў:

— Акружай яго, ганіце на мяне, на мяне ганіце!

Хапалі з зямлі доўгае сучча, невядома, з чыіх першых рук паляцела ў рыцара кінутая ламаччына. Потым кідалі ўсе, імкнуліся пацэліць у галаву, шпурлялі сучча, карэнні, проста камякі зямлі. З гіканнем, лямантам, свістам насіліся па паляне за коннікам. Злаўчыўся Додзік, шырока размахнуўся і ўдарыў кап’ём па задніх конскіх нагах. Конь зрабіў вялікі скачок, яшчэ адзін, і вяроўка сцебанула яго па пярэдніх нагах, напялася, стрэліла. Конь упаў, пераляцеў цераз галаву. Памкнуўся быў адразу ўскочыць на ногі, але не здолеў, упаў на бок, заіржаў гучна, жалобна...

Рыцар вылецеў з сядла, падаючы, моцна выцяўся спіной аб бярозавы камель і цяпер ляжаў нерухома.

І ў момант вакол сціхла. Падыходзілі да рыцара моўчкі, расціскаліся сціснутыя кулакі, адкідваліся прэч палкі. Толькі Додзік нёс доўгае кап’ё.

Рыцар заварушыўся, сеў, абапёршыся спіной аб бярозу. Яны стаялі паўколам каля яго, у некалькіх метрах, і ніхто не адважваўся зрабіць крок бліжэй. Рыцар скінуў пальчаткі, узняў павольна рукі і сцягнуў з галавы пагнуты ў некалькіх месцах шлем.

Рассыпаліся па бліскучых наплечніках русыя дзявочыя валасы.

— Насця... Кульгавая... — здзіўлены прыглушаны шэпт прашалясцеў уздыхам ветру па паўколу адзінаццікласнікаў.

Дзяўчына аніяк не адрэагавала, нібы не чула і не бачыла нічога вакол. Яна сядзела, адкінуўшы далёка назад галаву, промні заходзячага сонца зіхацелі ў кропельках слёз, што каціліся і каціліся з яе вачэй. Яна плакала бязгучна, сцяўшы пабялелыя вусны.

У лесе было ціха-ціха, толькі нейкая адзінокая птушка раптам падала самотнае, горкае “піць-піць”...

...Выпускнога балю ў адзінаццатым класе не было.