Исцели свою жизнь молитвами

«О Пресвятыя Госпоже, Владычице Богородице! Со страхом, верою и любовию пред честною (и чудотворною) иконою Твоею припадающе, молим Тя: не отврати лица Твоего от прибегающих к Тебе. Умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, церковь Свою Святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево, Ты еси всесильная христиан помощница и заступница. Избави же всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от напрасныя смерти.

Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия и милости Твоея, являемыя над нами зде на земли, сподобимся Небеснаго Царствия, и тамо со всеми святыми прославим Пречестное и Великолепое имя Отца и Сына и Святаго Духа во веки веков».

«О Владычице Преблагословенная, защитнице рода христианского, Прибежище и спасение притекающих к Тебе!

Вем, воистину вем, яко зело согреших и прогневах, Премилостивыя Госпоже, рожденнаго плотию от Тебе Сына Божия. Но имам многие образы прежде меня прогневавших Его милосердие: мытари, блудницы и прочия грешники, имже дадеся прощение грехов их, покаяния ради и исповедания. Тыя убо образы помилованных очесем грешныя души моея представляя и на толикое Божие милосердие, оныя приимшее, взирая, дерзнух и аз грешный прибегнути с покаянием ко Твоему благосердию.

О, Всемилостивая Владычице! Подажь ми руку помощи и испросиши у Сына Твоего и Бога, матерними и святейшими Твоими молитвами, тяжким моим грехом прощение. Верую и исповедую, яко Той, Егоже родила еси, Сын Твой есть воистину Христос, Сын Бога Живаго, Судия живых и мертвых, воздаяй комуждо по делом Его. Верую же паки и исповедую Тебе быти истинную Богородицу, милосердия источник, утешение плачущих, взыскание погибших, сильную и непрестающую к Богу ходатаицу, зело любящую род христианский и Споручницу покаяния. Воистину бо несть нам иныя помощи и покрова, разве Тебе, Госпоже Премилостивая, и никто-же, уповая на Тя, постыдеся когда, и Тобою умоляя Бога, никтоже оставлен бысть. Того ради и аз Твою неисчетную благость молю: отверзи двери милосердия Твоего мне, заблудшему и падшему в тимение глубины, не возгнушайся мене сквернаго, не презри грешнаго моления моего, не остави мене окаяннаго, яко в погибель злобный враг похитити мя ищет, но умоли и мне Ражденнаго от Тебе милосерднаго Сына Твоего и Бога, да простит великия моя грехи и избавит мя от пагубы моея, яко да и аз, со всеми получившими прощение, воспою и прославлю безмерное милосердие Божие и Твое непостыдное о мне заступление в жизни сей и нескончаемом веце».

«Радуйся, Благодатная Богородице Дево, во объятиях своих Предвечнаго Младенца и Бога носившая, проси Его дати миру умирение и душам нашим спасение. Сын бо Тебе, Богомати, вещает яко вся прошения Твоя во благое исполнит. Сего ради и мы, припадающее молимся и надеющиися на Тя, да не погибнем, имя Твое именуем, Ты бо еси, Владычице, Взыскание погибших».

«О Пресвятая Владычице Богородице, преблагословенная Мати Христа Бога, Спасителя нашего, всех скорбящих радосте, больных посещение, немощных покрове и заступнице, вдовиц и сирых покровительнице, матерей печальных всенадежная утешительнице, младенцев немощных крепосте, и всем безпомощным всегда готовая помоще и верное прибежище!

Тебе, о Всемилостивая, дадеся от Всевышнего благодать во еже всех заступати и избавляти от скорби и болезни претерпела еси, взираючи на вольное страдание Сына Твоего возлюбленнаго и Того на кресте распинаема зрящи, егда оружие Симеоном предреченное сердце Твое пройде. Тем же убо, о Мати чадолюбивая, вонми гласу моления нашего, утеши нас в скорби сущих, яко верная радости ходатаица. Предстоящи престолу Пресвятыя Троицы, одесную Сына Твоего, Христа Бога нашего, можещи, аще восхощеши, вся нам позная испросити. Сего ради с верою сердечною и любовию от души припадаем к Тебе яко Царице и Владычице, и псаломски вопити Тебе дерзаем: слыши, дщи, и виждь, и приклони ухо Твое, услыши моление наше, и избави нас от предстоящих бед и скорбей. Ты бо прошения всех верных, яко скорбящих радость, исполняеши, и душам их мир и утешение подаеши. Се зриши беду нашу и скорбь: яви нам милость Твою, посли утешение уязвленному печалию сердцу нашему, покажи и удиви на нас грешных богатство милосердия Твоего, подаждь нам слезы покаяния ко очищению грехов наших и утолению гнева Божия, да с чистым сердцем, совестию благою и надеждою несумненною прибегаем ко Твоему ходатайству и заступлению.

Прими, всемилостивая наша Владычице Богородице, усердное моление наше Тебе приносимое, и не отрини нас недостойных от Твоего благосердия, но подаждь нам избавление от скорби и болезни, защити нас от всякого навета вражия и клеветы человеческия, буди нам помощница неотступная во все дни жизни нашея, яко да под Твоим Матерним покровом всегда пребудем цели и сохранении Твоим заступлением и молитвами к Сыну Твоему и Богу Спасителю нашему, Ему же подобает всякая слава, честь и поклонение, со Безначальным Его Отцем и Святым Духом, ныне и присно и во веки веков».

«О, всемилостивая Госпоже Дево, Владычице, Богородице! Услыши нас, молящихся Тебе, и яви милость Твою на людях Твоих: моли Сына Твоего избавитися нам от всякого зла, и сохрани град наш и всяку страну верных и люди, благочеcтно прибегающия и призывающия имя Твое святое, от всякия напасти, губительства, глада, труса, потопа, огня, меча, нашествия иноплеменников и междуусобныя брани, от всякия болезни, и всякия обстояния, да ни ранами, ни прещением, ни мором, ни всяким праведным гневом Божиим им умалятся рабы Твоя; но соблюдай и спасай милостию Своею, Госпоже, за им молящихся, и полезное благорастворение воздуха ко времени приношения нам даруй; облегчи, возстави и помилуй, премилостивыя Владычице, Богородице, препетая, во всякой беде и нужде сущая; помяни рабы Твоя и не презри слез и воздыханий наших, и обнови нас благодатию Своея милости, да со благодарением утешаемся, обретиши Тя Помощницу. Умилосердися, Госпоже Пречистая, на немощныя люди Твоя, надежда наша: разсеянныя собери, заблудшия на путь правый настави, отпадшия от благочестия отеческия веры паки возврати, старость поддержи, юные накажи, младенцы воспитай, прослави славящия Тя, изряднее же Церковь Сына Твоего соблюди и сохрани в долготу дней. Ты, бо еси, Госпоже, слава небесных и упование земных. Ты наша надежда и заступница всех притекающих к Тебе и Твоея святыя помощи просящих. Ты молебница наша теплая к Сыну Твоему и Богу нашему; Твоя Матерная молитва много может на умоление Владыки, и Твоим предстательством к престолу благодати пресвятых и животворящих Его тайн приступати дерзнем, еще и недостойни. Тем же святый образ Твой и Твоею рукой держимаго Вседержителя, видяща на иконе, радуемся грешни, со умилением припадающее и любовию сей целуем, чающее, Госпоже, Твоими святыми молитвами дойти небесныя, бесконечныя жизни и непостыдно стати в день судный одесную Сына Твоего и Бога нашего, славящее Его купно со безначальным Отцем, Пресвятым благим и животворящим Духом во веки веков».

«Помяни нас во Твоих молитвах, Госпоже Дево Богородице, до не погибнем за умножение грехов наших, покрый нас от всякого зла и лютых напастей; на Тя бо уповаем и, Твоего Покрова праздник чествующее, Тя величаем».

«Покрый нас честным Твоим покровом и избави нас от всякаго зла, молящи Сына Твоего Христа Бога нашего спасти души наша... Владычице, с честными и славными пророки, с верховными апостолы и со священномученики и со архиереи за ны грешныя Богу помолися, Твоего Покрова праздник в российстей земле прославльшия».

«О Пресвятая и Преблагословенная Мати сладчайшаго Господа нашего Иисуса Христа, припадаем и поклоняемся Тебе пред святою и пречестною иконою Твоею, ею же дивная и преславная чудеса содеваеши, от огненнаго запаления и молниеноснаго грома жилища наши спасаеши, недужныя исцеляеши, и всяко благое прошение наше во благо исполняеши.

Смиренно молим Тя, всесильная рода нашего Заступнице: сподоби ны немощныя и грешныя Твоего Матерняго заступления и благопечения. Спаси и сохрани, Владычице, под кровом милости Твоея церковь святую, град сей (или весь сию, или обитель сию), всю страну нашу православную, и вся ны припадающия к Тебе с верою и любовию, и со умиленными слезами Твоего заступления просящия. Ей, Госпоже всемилостивая, умилосердися на нас обуреваемых грехи многими и не имущих дерзновения ко Христу Господу просити Его о помиловании и прощении: Тебе убо предлагаем к Нему на умоление, Матерь Его сущую: простри к Нему, о Всеблагая, богоприемнеи руце Твои, и предстательствуй за нас пред Его благостию, просящи нам прощения прегрешений наших, благочестнаго мирнаго жития, благия христианския кончины и добраго ответа на Страшнем Суде Его.

В час же грознаго посещения Божия, аще огнем возгорятся домове наши, аще ли молниеносным громом устрашаеми будем, яви нам милостивное Твое заступление и державное вспоможение: да, спасаеми всесильными Твоими ко Господу молитвами, временнаго наказания Божия зде избегнем, вечное же блаженство райское тамо унаследуем, и со всеми святыми воспоем пречестное и великолепное имя покланяемыя Троицы, Отца и Сына и Святаго Духа, и Твое велие к нам милосердие, и во веки веков».

«К Тебе, о Богомати, молитвенно притекаем ми грешнии, чудеса Твоя во святей лавре Почаевстей явленная поминающее и о своих сокрушающееся прегрешениих. Вемы, Владычице, вемы, яко не подабаше нам грешным чесого просити, токмо о еже праведному Судии беззакония наша оставити нам. Вся бо, нами в житии претерпенная, скорби же и нужды и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистыя, притекоша, и во умилении сердец к Тебе взывают сице: грехов и беззаконий наших, Благая, не помяни, но паче всечестныя руце Твоя воздвигши, к Сыну Твоему и Богу предстани, да люте содеянная нами отпустит нам, да за премногия неисполненныя обещания наша, лица Своего от рабов Своих не отвратит, да благодати Своея, спасению нашему пособствующая, от душ наших не отымет.

Ей, Владычице, буди спасению нашему ходатаица, и малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслами умы наша, веру нашу укрепи, надежду утверди, любве сладчайший дар сподоби нас приятии. Сими убо, Пречистая, дарованьми, а не болезньми и скорбьми живот наш ко спасению да возводится, но от уныния и отчаяния души наша ограждающи, избави нас маломощных от находящих на ны бед и нужд, и клеветы человеческия, и болезней нестерпимых, даруй мир и благоустроение жительству христианскому предстательством Твоим, Владычице, утверди православную веру во стране нашей и во всем мире.

Церковь Апостольскую и Соборную умалению не предаждь, уставы святых отец на веки непоколебимы сохрани, и всех к Тебе притекающих от рова погибельнаго спаси. Еще же и ересию прельщенных братий наших или веру спасительную во греховных страстех погубивших, паки ко истинной вере и покаянию приведи, да вкупе с нами Твоему чудотворному образу покланяющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети, сподоби нас благодатную радость прежде кончины нашея восприятии, якоже древни насельники почаевстии Твоим явлением победители и просветители агарян показала еси, да вси мы, благодарным сердцем вкупе со Ангелы и пророки и апостолы и со всеми святыми Твое милосердие прославляющее, воздадим славу, честь и поклонение в Троице певаемому Богу, Отцу и Сыну и Святому Духу, во веки веков».

«О Пресвятая Дево, Мати Господа Вышняго, скоропослушная заступнице всех, к Тебе с верою прибегающих!

Призри с высоты небеснаго величия Твоего на мя непотребнаго, ко святей иконе Твоей припадающа, услыши смиренную молитву мене грешнаго и принеси ю к Сыну Твоему: умоли Его, да озарит мрачную душу мою светом Божественныя благодати Своея и очистит ум мой от помыслов суетных, да умирит страждущее мое сердце и исцелит раны его, да вразумит мя на добрая дела и укрепит работати Ему со страхом, да простит вся содеянная мною злая, да избавит от вечныя муки и не лишит Небеснаго Своего Царствия.

О Преблагословенная Богородице! Ты благоизволила еси нарещися во образе твоем Скоропослушница, повелевающи всем притекати к Тебе с верою: не презри убо мне скорбнаго и не попусти погибнути мне в бездне грехов моих. На Тя по Бозе все мое упование и надежда спасения, и Твоему покрову и предстательству вручаю себя во веки веков».

«О мира заступнице, Матерь Всепетая! Со страхом, верою и любовию припадающее пред иконою Твоею Державною, усердно молим Тя: не отврати лица Твоего от прибегающих в Тебе, умоли, милосердная Матерь Света, Сына Твоего и Бога нашего, Сладчайшего Господа Иисуса Христа, да сохранит в мире страну нашу в благоденствии и избавит нас от междоусобныя брани, да укрепит святую Церковь нашу православную, и непозыблему соблюдет ю от неверия, раскола и ересей.

Не имамы бо иныя помощи, разве Тебе, Пречистая Дево, Ты еси всесильная христиан заступница пред Богом, праведный гнев Его умягчающая. Избави всех с верою Тебе молящихся от падений греховных. От навете злых человек, от глада, скорбей и болезней, даруй нам дух сокрушения, смирение сердца, чистоту помышлений, исправление греховныя жизни и оставление согрешений наших: да вси благодарственнее воспевающее величия Твоя, сподобимся Небеснаго Царствия, и тамо со всеми святыми прославим пречестное и великолепное имя в Троице славимаго Бога, Отца и Сына и Святаго Духа. Аминь».

«К кому возопием, Владычице? К кому прибегнем в горести нашей, аще не к Тебе, Царице Небесная? Кто плач наш и воздыхание примет, аще не Ты, Пренепорочная, надеждо христиан и прибежище нам грешным? Кто паче Тебе в милости? Приклони ухо Твое к нам, Владычице, Мати Бога нашего, и не презри требующих Твоей помощи: услыши стенание наше, подкрепи нас грешных, вразуми и научи, Царице Небесная, и не отступи от нас раб Твоих, Владычице, за роптание наше, но Буди нам мати и заступница, и вручи нас милостивому покрову Сына Твоего. Устрой о нас, како угодно будет святей Твоей воли, и приведи нас грешных к тихой и безмятежной жизни, да плачемся о гресех наших, да возрадуемся же с Тобою всегда, ныне и присно и во веки веков».

«Благодарим Тя, о Преблагая и Пречистая, Преблагословенная Дево Владычице, Мати Христа Бога нашего, о всех благодеяниих Твоих, яже показала еси роду человеческому, наипаче же нам, христоименитым людем российским, о нихже ниже самый ангельский язык к похвалению доволен будет.

Благодарим Тя, якоже и ныне удивила еси неизреченную Твою милость на нас, недостойных рабех Твоих, преестественным самопришествием пречистыя Твоея иконы, еюже всю просветила еси российскую страну. Тем-же и мы грешнии, со страхом и радостию покланяющеся, вопием Ти: о Пресвятая Дево, Царице и Богородице, спаси и помилуй святейший правительствующий синод, архиереи же и вся люди, и подаждь им победы на вся враги их, и сохрани царствущия грады и вся грады и страны христианския, и сей святый храм, и от всякаго навета вражия избави, и всем вся на пользу даруй, ныне пришедшим с верою и молящимся рабом Твоим и покланяющимся пресвятому образу Твоему, яко благословенна еси с рождшимся от Тебе Сыном и Богом, ныне и присно и во веки веков».

«О, Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому (и чудотворному) образу Твоему. Се бо грехми погружа-емии и скорбьми обуреваемии, взирающее на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину и на страшнем Суде Сына Твоего явися нам милосердная предстательница, да всегда поем, величаем и славим Тя, яко благую заступницу рода христианскаго, со всеми угодившими Богу, во веки».

«Приими, о всеблагословенная и всемощная Госпоже Владычице, Богородице Дево, сия молитвы, со слезами Тебе ныне приносимые от нас, недостойных раб Твоих, ко твоему цельбоносному образу пение возсылающих со умилением, яко Тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши; еще же, Госпоже Владычице Богородице, и от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему.

О всепетая Мати, Пресвятая Богородице! Не престай моляся о нас, недостойных рабех Твоих, славящих Тя и почитающих Тя и поклоняющихся со умилением пречистому образу Твоему, и надежду имущих невозвратну, и веру несумненну к Тебе, Приснодеве преславней и непорочней, ныне и присно и во веки веков. Аминь».

«О Пресвятая Дево, всеблагого Сына Мати всеблагая, града и святаго храма сего покрове, всех сущих во гресех и скорбех, бедах же и болезнех верная Предстательнице и Заступнице!

Прими молебное пение сие от нас недостойных раб Твоих Тебе возносимое; и якоже древле грешника, на всяк день многажды пред честною иконою Твоею молившагося, не презрела еси, но нечаянную радость тому даровала еси, и усердным к Сыну Твоему ходатайством Сего ко прощению грешника преклонила еси, тако и ныне не презри моления нас, недостойных раб Твоих, но умоли Сына Твоего и Бога нашего, да и всем нам, с верою и умилением пред цельбоносным образом Твоим покланяющимся, по коегождо потребе нечаянную радость дарует; да вси на небеси и на земли ведят Тя, яко твердую и непостыдную Предстательницу рода христианского и сие ведущее славят Тя и Тобою Сына Твоего, со безначальным Его Отцем и единосущным Его Духом, ныне и присно и во веки веков. Аминь».

«Богородице Дево, Пренепорочная Мати Христа Бога нашего, Заступнице всего рода христианскаго! Чудотворней иконе Твоей благоговейнее предстоящее, молим Тя: услыши нас, молящихся Тебе; прими благодарения наши недостойная о всех неизреченных Твоих к нам благодеяниях, в месте сем и во многих весех и градех земли Российския явленных и являемых. Ты бо еси больных исцеление, скорбящих утешение, заблудших исправление и вразумление. Буди всем нам покров и утешение, пристанище от всяких зол, бед и обстояний, от глада, труса, потопа, огня, меча, нашествия иноплеменников, смертоносныя язвы и от злых человек озлобления. Вознеси молитвы наша, яко кадило благовонное, ко престолу Всевышняго, дарующаго нам здравие, долгоденствие и в трудех благочестивых поспешение, да Твоим окормлением управляеми и покровом Твоим осеняеми, прославим Отца, Сына и Святаго Духа и Твое матернее о нас заступление, всегда, ныне и присно и во веки веков. Аминь».

«К кому воззову, Владычице, к кому прибегну в печали моей? К кому принесу слезы и воздыхания моя, аще не к Тебе, Царице Небеси и земли? Кто исторгнет мя от тины грехов и беззаконий, аще не Ты, о Мати Живота, Заступнице и Прибежище рода человеческаго? Услыши стенание мое, утеши мя и помилуй в горести моей, защити в бедах и напастях, избави от озлоблений и скорбей, и всяких недугов и болезней, от враг видимых и невидимых, умири вражду стужающих мне, да избавлен буду от клеветы и злобы человеческия; такожде от своея ми плоти гнусных обычаев свободи мя. Укрый мя под сению милости Твоея, да обрящу покой и радость и от грехов очищение. Твоему матернему заступлению себя вручаю; буди мне Мати и надежда, покров, и помощь, и заступление, радость и утешение и скорая во всем помощница.

О чудная Владычице! Всяк притекаяй к Тебе без Твоея всесильныя помощи не отходит; сего ради и аз недостойный к Тебе прибегаю, да избавлен буду от внезапныя и лютыя смерти, скрежета зубовнаго и вечнаго мучения. Небесное же Царствие получити сподоблюся и Тебе во умилении сердца реку: радуйся, Мати Божия, Предстательнице и Заступнице наша усердная, во веки веков. Аминь».

«Умягчи наша злая сердца, Богородице, и напасти ненавидящих нас угаси, и всякую тесноту души нашей разреши. На Твой святый образ взирающи, Твоим страданием и милосердием о нас умиляемся и раны Твои лобызаем, стрел же наших, Тя терзающих, ужасаемся. Не даждь нам, Мати благосердная, в жестокосердии нашем и от жестокосердия ближних погибнути. Ты бое си воистину злых сердец умягчение».

«О всеблагая досточудная Богородице Пантанасса, Всецарице! Несмь достоин да внидеши под кров мой! Но яко милостиваго Бога любоблагоутробная Мати, рцы слово, да исцелится душа моя и укрепится немоществующее тело мое. Имаши бо державу непобедимую и не изнеможет у Тебе всяк глагол, о Всецарице! Ты за мя упроси, Ты за мя умоли. Да прославлю преславное имя Твое, всегда, ныне и в безконечныя веки. Аминь».

«О Пресвятая Госпоже Владычице Богородице, велие чудо святому Иоанну Дамаскину явившая, яко веру истинную – надежду несумненную показавшему! Услыши нас грешных, пред чудотворною иконою Твоею усердно молящихся и просящих Твоея помощи: не отрини моления сего многих ради прегрешений наших, но, яко Мати милосердия и щедрот, избави нас от болезней, скорбей и печалей, прости содеянныя нами грехи, исполни радости и веселия всех, чтущих святую икону Твою, да радостно воспоем и любовию прославим имя Твое, яко Ты ест от всех родов избранная и благословенная во веки веков. Аминь».

«Надежда всех концев земли, Пречистая Дево, Госпоже Богородице, утешение мое! Не гнушайся мене грешнаго, на Твою бо милость уповаю: угаси ми пламень греховный и покаянием ороси изсохшее мое сердце, очисти ум мой от грешных помыслов, прими мольбу, от души и сердца со воздыханием приносимую Тебе. Буди о мне Ходатаица к Сыну Твоему и Богу и укроти гнев Его Материными Твоими молитвами: душевныя и телесныя язвы исцели, Госпоже Владычице, утоли болезни души и тела, утиши бурю злых нападений вражеских, отыми бремя грехов моих. И не остави мене до конца погибнути, и печалию сокрушенное сердце мое утеши, да славлю Тя до последнего издыхания моего. Аминь».