Текст Требника на церковнославянском языке

Последование мертвенное мирских тел

Скончавшуся кому от православных, абие призывают сродницы его священника, иже пришед в дом, в немже мощи усопшаго лежат, и возложив епитрахиль, и вложив фимиам в кадильницу, кадит тело мертваго, и предстоящих, и начинает обычно:

Литиа.

Диакон: Благослови́, влады́ко.

Священник: Благослове́н Бог наш всегда́, ны́не и при́сно, и во ве́ки веко́в.

Лик: Ами́нь.

И начинают сопредстоящии: Святы́й Бо́же: Пресвята́я Тро́ице: О́тче наш: Священник: Я́ко Твое́ есть Ца́рство: Чтец: Ами́нь.

И абие поют тропари сия. Глас 4:

Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.

В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́ [или рабы́ Твоея́], я́ко еди́н еси́ Человеколю́бец.

Слава: Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ [или рабы́ Твоея́] упоко́й.

И ныне: Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].

Диакон глаголет:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Диакон: Прему́дрость.

Лик: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

И абие бывает от священника сицевый отпуст:

Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х Свои́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих святы́х всели́т, и с пра́ведными причте́т, и нас поми́лует, я́ко Благ и Человеколю́бец.

Или иный:

Живы́ми и ме́ртвыми облада́яй, воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, преподо́бных и богоно́сных оте́ц на́ших и всех святы́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих пра́ведных учини́т, в не́дрех Авраа́ма упоко́ит и с пра́ведными причте́т, и нас поми́лует, я́ко Благ и Человеколю́бец.

И аще убо готова суть вся, яже ко исходу, творит паки священник начало:

Благослове́н Бог наш всегда́, ны́не и при́сно, и во ве́ки веко́в.

И начинаем пети: Святы́й Бо́же: со страхом, и всяким умилением.

И вземше мощи усопшаго, отходим в храм, предыдущим священником со свещами, диакону с кадильницею.

Егда же приидут в храм, мощи убо полагаются в паперти, [или в храме, якоже зде в велицей России обыче.]

И начинают псалом 90:

Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твое́й ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́; Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́; на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя Мое́. Воззове́т ко Мне, и услы́шу его́, с ним есмь в ско́рби, изму́ его́ и просла́влю его́, долгото́ю дней испо́лню его́ и явлю́ ему́ спасе́ние Мое́.

Непорочны.

И посем вышшим гласом поют:

Благослове́н еси́, Го́споди, / научи́ мя оправда́нием Твои́м.

Непоро́чнии в пу́ть: / Аллилу́иа.

И поется первая статия непорочных, во глас 6: в концы же коегождо стиха поем: Аллилу́иа.

1. Блаже́ни непоро́чнии в путь, / ходя́щии в зако́не Госпо́дни. / Аллилу́иа.

2. Блаже́ни испыта́ющии свидения Его́, / всем се́рдцем взы́щут Его́. / Аллилу́иа.

И прочее псалма:

3. Не де́лающии бо беззако́ния / в путе́х Его́ ходи́ша.

4. Ты запове́дал еси́ за́поведи Твоя́ / сохрани́ти зело́.

5. Дабы́ испра́вилися путие́ мои́, / сохрани́ти оправда́ния Твоя́.

6. Тогда́ не постыжу́ся, / внегда́ призре́ти ми на вся за́поведи Твоя́.

7. Испове́мся Тебе́ в пра́вости се́рдца, / внегда́ научи́ти ми ся судьба́м пра́вды Твоея́.

8. Оправда́ния Твоя́ сохраню́, / не оста́ви мене́ до зела́.

9. В чесо́м испра́вит юне́йший путь свой? / Внегда́ сохрани́ти словеса́ Твоя́.

10. Всем се́рдцем мои́м взыска́х Тебе́, / не отри́ни мене́ от за́поведей Твои́х.

11. В се́рдце моем скрых словеса Твоя́, / я́ко да не согрешу Тебе́.

12. Благослове́н еси́, Го́споди, / научи́ мя оправда́нием Твои́м.

13. Устна́ма мои́ма возвести́х / вся судьбы́ уст Твои́х.

14. На пути́ свиде́ний Твои́х наслади́хся, / я́ко о вся́ком бога́тстве.

15. В за́поведех Твои́х поглумлю́ся, / и уразуме́ю пути́ Твоя́.

16. Во оправда́ниих Твои́х поучуся, / не забуду словес Твои́х.

17. Возда́ждь рабу́ Твоему́, живи́ мя, / и сохраню́ словеса́ Твоя́.

18. Откры́й о́чи мои́, / и уразуме́ю чудеса́ от зако́на Твоего́.

19. Пришле́ц аз семь на земли́, / не скрый от мене́ за́поведи Твоя́.

20. Возлюби́, душа́ моя́, / возжела́ти судьбы́ Твоя́ на вся́кое вре́мя.

21. Запрети́л еси́ го́рдым, / про́кляти уклоня́ющиися от за́поведей Твои́х.

22. Отыми́ от мене́ поно́с и уничиже́ние, / я́ко свиде́ний Твои́х взыска́х.

23. И́бо седо́ша кня́зи, и на мя клевета́ху: / раб же Твой глумля́шеся во оправда́ниих Твои́х.

24. И́бо свиде́ния Твоя́ поуче́ние мое́ есть, / и сове́ти мои́ оправда́ния Твоя́.

25. Прильпе́ земли́ душа́ моя́, / живи́ мя по словеси́ Твоему́.

26. Пути́ моя́ возвести́х, и услы́шал мя еси́, / научи́ мя оправда́нием Твои́м.

27. Путь оправда́ний Твои́х вразуми́ ми, / и поглумлю́ся в чудесе́х Твои́х.

28. Воздрема́ душа́ моя́ от уны́ния, / утверди́ мя в словесе́х Твои́х.

29. Путь непра́вды отста́ви от мене́, / и зако́ном Твои́м поми́луй мя.

30. Путь и́стины изво́лих, / и судьбы́ Твоя́ не забы́х.

31. Прилепи́хся свиде́нием Твои́м, Го́споди, / не посрами́ мене́.

32. Путь за́поведей Твои́х теко́х, / егда́ разшири́л еси́ се́рдце мое́.

33. Законоположи́ мне, Го́споди, путь оправда́ний Твои́х, / и взыщу́ и́ вы́ну.

34. Вразуми́ мя, и испыта́ю зако́н Твой, / и сохраню́ и́ всем се́рдцем мои́м.

35. Наста́ви мя на стезю́ за́поведей Твои́х, / я́ко ту́ю восхоте́х.

36. Приклони́ се́рдце мое́ во свиде́ния Твоя́, / а не в лихои́мство.

37. Отврати́ о́чи мои́, е́же не ви́дети суеты́, / в пути́ Твое́м живи́ мя.

38. Поста́ви рабу́ Твоему́ / сло́во Твое́ в страх Твой.

39. Отыми́ поноше́ние мое́, е́же непщева́х, / я́ко судьбы́ Твоя́ бла́ги.

40. Се возжела́х за́поведи Твоя́, / в пра́вде Твое́й живи́ мя.

41. И да прии́дет на мя ми́лость твоя́, Го́споди, / спасе́ние Твое́ по словеси́ Твоему́.

42. И отвеща́ю поноша́ющим ми сло́во, / я́ко упова́х на словеса́ Твоя́.

43. И не отыми́ от уст мои́х словесе́ и́стинна до зела́, / я́ко на судьбы́ Твоя́ упова́х.

44. И сохраню́ зако́н Твой вы́ну / в век, и в век ве́ка.

45. И хожда́х в широте́, / я́ко за́поведи Твоя́ взыска́х.

46. И глаго́лах о свиде́ниих Твои́х / пред цари́, и не стыдя́хся.

47. И поуча́хся в за́поведех Твои́х, / я́же возлюби́х зело́.

48. И воздвиго́х ру́це мои́ / к за́поведем Твои́м, я́же возлюби́х.

48. И глумля́хся / во оправда́ниих Твои́х.

49. Помяни́ словеса́ Твоя́ рабу́ Твоему́, / и́хже упова́ние дал ми еси́.

50. То мя уте́ши во смире́нии мое́м, / я́ко сло́во Твое́ живи́ мя.

51. Го́рдии законопреступова́ху до зела́, / от зако́на же Твоего́ не уклони́хся.

52. Помяну́х судьбы́ Твоя́ от ве́ка, Го́споди, / и уте́шихся.

53. Печа́ль прия́т мя от гре́шник, / оставля́ющих зако́н Твой.

54. Пе́та бя́ху мне оправда́ния Твоя́ / на ме́сте прише́льствия моего́.

55. Помяну́х в нощи́ и́мя Твое́, Го́споди, / и сохрани́х зако́н Твой.

56. Сей бысть мне, / я́ко оправда́ний Твои́х взыска́х.

57. Часть моя́ еси́, Го́споди, / рех сохрани́ти зако́н Твой.

58. Помоли́хся Лицу́ Твоему́ всем се́рдцем мои́м, / поми́луй мя по словеси́ Твоему́.

59. Помы́слих пути́ Твоя́, / и возврати́х но́зе мои́ во свиде́ния Твоя́.

60. Угото́вихся и не смути́хся, / сохрани́ти за́поведи Твоя́.

61. У́жа гре́шник обяза́шеся мне, / и зако́на Твоего́ не забы́х.

62. Полу́нощи воста́х испове́датися Тебе́ / о судьба́х пра́вды Твоея́.

63. Прича́стник аз есмь всем боя́щимся Тебе́, / и храня́щим за́поведи Твоя́.

64. Ми́лости Твоея́, Го́споди, испо́лнь земля́, / оправда́нием Твои́м научи́ мя.

65. Бла́гость сотвори́л еси́ с рабо́м Твои́м, Го́споди, / по словеси́ Твоему́.

66. Бла́гости и наказа́нию, и ра́зуму научи́ мя, / я́ко за́поведем Твои́м ве́ровах.

67. Пре́жде да́же не смири́ти ми ся, аз прегреши́х, / сего́ ра́ди сло́во Твое́ сохрани́х.

68. Благ еси́ Ты, Го́споди, / и бла́гостию Твое́ю научи́ мя оправда́нием Твои́м.

69. Умно́жися на мя непра́вда го́рдых, / аз же всем се́рдцем мои́м испыта́ю за́поведи Твоя́.

70. Усыри́ся я́ко млеко́ се́рдце их, / аз же зако́ну Твоему́ поучи́хся.

71. Бла́го мне, я́ко смири́л мя еси́, / я́ко да научу́ся оправда́нием Твои́м.

72. Благ мне зако́н уст Твои́х, / па́че ты́сящ зла́та и сребра́.

Сла́ва: Аллилу́иа.

И ны́не: Аллилу́иа.

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

И посем начинаем вторую статию на глас 5: на коемждо же конце стиха глаголем:

Поми́луй раба́ Твоего́ [или рабу́ Твою́].

Лик начинает: За́поведи Твоя́: / Поми́луй раба́ Твоего́ [или рабу́ Твою́].

Паки тойже лик:

73. Ру́це Твои́ сотвори́сте мя, и созда́сте мя; / вразуми́ мя, и научу́ся за́поведем Твои́м. / Поми́луй раба́ Твоего́ [или рабу́ Твою́].

74. Боя́щиися Тебе́ у́зрят мя и возвеселя́тся, / я́ко на словеса́ Твоя́ упова́х. / Поми́луй раба́ Твоего́ [или рабу́ Твою́].

И прочее псалма:

75. Разуме́х, Го́споди, я́ко пра́вда судьбы́ Твоя́, / и вои́стинну смири́л мя еси́.

76. Бу́ди же ми́лость Твоя́, да уте́шит мя, / по словеси́ Твоему́ рабу́ Твоему́.

77. Да прии́дут мне щедро́ты Твоя́, и жив бу́ду, / я́ко зако́н Твой поуче́ние мое́ есть.

78. Да постыдя́тся го́рдии, / я́ко непра́ведно беззако́нноваша на мя, / аз же поглумлю́ся в за́поведех Твои́х.

79. Да обратя́т мя боя́щиися Тебе́, / и ве́дящии свиде́ния Твоя́.

80. Бу́ди се́рдце мое́ непоро́чно во оправда́ниих Твои́х, / я́ко да не постыжу́ся.

81. Исчеза́ет во спасе́ние Твое́ душа́ моя́, / на словеса́ Твоя́ упова́х.

82. Исчезо́ша о́чи мои́ в сло́во Твое́, глаго́люще: / когда́ уте́шиши мя?

83. Зане́ бых я́ко мех на сла́не, / оправда́ний Твои́х не забы́х.

84. Коли́ко есть дней раба́ Твоего́? / Когда́ сотвори́ши ми от гоня́щих мя суд?

85. Пове́даша мне законопресту́пницы глумле́ния, / но не я́ко закон Твой, Го́споди.

86. Вся за́поведи Твоя́ и́стина, / непра́ведно погна́ша мя, помози́ ми.

87. Вма́ле не сконча́ша мене́ на земли́: / аз же не оста́вих за́поведей Твои́х.

88. По ми́лости Твое́й живи́ мя, / и сохраню́ свиде́ния уст Твои́х.

89. Во век Го́споди, сло́во Твое́ / пребыва́ет на небеси́.

90. В род и род и́стина Твоя́, / основа́л еси́ зе́млю, и пребыва́ет.

91. Учине́нием Твои́м пребыва́ет день, / я́ко вся́ческая рабо́тна Тебе́.

92. Я́ко а́ще бы не зако́н Твой поуче́ние мое́ был, / тогда́ у́бо поги́бл бых во смире́нии мое́м.

93. Во век не забу́ду оправда́ний Твои́х, / я́ко в них оживи́л мя еси́.

94. Твой есмь аз, спаси́ мя, / я́ко оправда́ний Твои́х взыска́х.

95. Мене́ жда́ша гре́шницы погуби́ти мя, / свиде́ния Твоя́ разуме́х.

96. Вся́кия кончи́ны ви́дех коне́ц, / широка́ за́поведь Твоя́ зело́.

97. Коль возлюби́х зако́н Твой Го́споди, / весь день поуче́ние мое́ есть.

98. Па́че враг мои́х умудри́л мя еси́ за́поведию Твое́ю, / я́ко в век моя́ есть.

99. Па́че всех уча́щих мя разуме́х, / я́ко свиде́ния Твоя́ поуче́ние мое́ есть.

100. Па́че ста́рец разуме́х, / я́ко за́поведи Твоя́ взыска́х.

10́1 От вся́каго пути́ лука́ва возбрани́х нога́м мои́м, / я́ко да сохраню́ словеса́ Твоя́.

102. От суде́б Твои́х не уклони́хся, / я́ко Ты законоположи́л ми еси́.

103. Коль сладка́ горта́ни моему́ словеса́ Твоя́, / па́че ме́да усто́м мои́м.

104. От за́поведей Твои́х разуме́х, / сего́ ра́ди возненави́дех всяк путь непра́вды.

105. Свети́льник нога́ма мои́ма зако́н Твой, / и свет стезя́м мои́м.

106. Кля́хся, и поста́вих / сохрани́ти судьбы́ пра́вды Твоея́.

107. Смири́хся до зела́ Го́споди, / живи́ мя по словеси́ Твоему́.

108. Во́льная уст мои́х благоволи́ же, Го́споди, / и судьба́м Твои́м научи́ мя.

109. Душа́ моя́ в руку́ Твое́ю вы́ну, / и зако́на Твоего́ не забы́х.

110. Положи́ша гре́шницы сеть мне, / и от за́поведей Твои́х не заблуди́х.

111. Насле́довах свиде́ния Твоя́ во век, / я́ко ра́дование се́рдца моего́ суть.

112. Приклони́х се́рдце мое́, / сотвори́ти оправда́ния Твоя́ в век за воздая́ние.

113. Законопресту́пныя возненави́дех, / зако́н же Твой возлюби́х.

114. Помо́щник мой, и Засту́пник мой еси́ Ты, / на словеса́ Твоя́ упова́х.

115. Уклони́теся от мене́, лука́внующии, / и испыта́ю за́поведи Бо́га моего́.

116. Заступи́ мя по словеси́ Твоему́ и жив бу́ду, / и не посрами́ мене́ от ча́яния моего́.

117. Помози́ ми, и спасу́ся, / и поучу́ся во оправда́ниих Твои́х вы́ну.

118. Уничижи́л еси́ вся отступа́ющия от оправда́ний Твои́х, / я́ко непра́ведно помышле́ние их.

119. Преступа́ющия непщева́х вся гре́шныя земли́: / сего́ ра́ди возлюби́х свиде́ния Твоя́.

120. Пригвозди́ стра́ху Твоему́ пло́ти моя́, / от суде́б бо Твои́х убоя́хся.

121. Сотвори́х суд и пра́вду, / не преда́ждь мене́ оби́дящим мя.

122. Восприими́ раба́ Твоего́ во бла́го, / да не оклевета́ют мене́ го́рдии.

123. О́чи мои́ исчезо́сте во спасе́ние Твое́, / и в сло́во пра́вды Твоея́.

124. Сотвори́ с рабо́м Твои́м по ми́лости Твое́й / и оправда́нием Твои́м научи́ мя.

125. Раб Твой есмь аз, вразуми́ мя, / и уве́м свиде́ния Твоя́.

126. Вре́мя сотвори́ти Го́сподеви, / разори́ша зако́н Твой.

127. Сего́ ра́ди возлюби́х за́поведи Твоя́ / па́че зла́та и топа́зия.

128. Сего́ ра́ди ко всем за́поведем Твои́м направля́хся, / всяк путь непра́вды возненави́дех.

129. Ди́вна свиде́ния Твоя́, / сего́ ра́ди испыта́ я́ душа́ моя́.

130. Я́вление слове́с Твои́х / просвеща́ет, и вразумля́ет младе́нцы.

131. Уста́ моя́ отверзо́х, и привлеко́х дух, / я́ко за́поведей Твои́х жела́х.

Сла́ва: Поми́луй раба́ Твоего́ [или рабу́ Твою́].

И ны́не: Поми́луй раба́ Твоего́ [или рабу́ Твою́].

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

И паки начинаем третию статию на глас третий:

И́мя Твое́: / Аллилу́иа.

Паки тойже лик поет:

132. При́зри на мя, и поми́луй мя, / по суду́ лю́бящих и́мя Твое́. / Аллилу́иа.

133. Стопы́ моя́ напра́ви по словеси́ Твоему́, / и да не облада́ет мно́ю вся́кое беззако́ние. / Аллилу́иа.

И прочее:

134. Изба́ви мя от клеветы́ челове́ческия, / и сохраню́ за́поведи Твоя́.

135. Лице́ Твое́ просвети́ на раба́ Твоего́, / и научи́ мя оправда́нием Твои́м.

136. Исхо́дища водна́я изведо́сте о́чи мои́, / поне́же не сохрани́х зако́на Твоего́.

137. Пра́веден еси́, Го́споди, / и пра́ви суди́ Твои́.

138. Запове́дал еси́ пра́вду, свиде́ния Твоя́, / и и́стину зело́.

139. Иста́яла мя есть ре́вность Твоя́, / я́ко забы́ша словеса́ Твоя́ врази́ мои́.

140. Разжже́но сло́во Твое́ зело́, / и раб Твой возлюби́ е́.

141. Юне́йший аз есмь и уничиже́н, / оправда́ний Твои́х не забы́х.

142. Пра́вда Твоя́ пра́вда во век, / и зако́н Твой и́стина.

143. Ско́рби и ну́жди обрето́ша мя, / за́поведи Твоя́ поуче́ние мое́.

144. Пра́вда свиде́ния Твоя́ в век: / вразуми́ мя, и жив бу́ду.

145. Воззва́х всем се́рдцем мои́м, услы́ши мя, Го́споди, / оправда́ния Твоя́ взыщу́.

146. Воззва́х Ти, спаси́ мя, / и сохраню́ свиде́ния Твоя́.

147. Предвари́х в безго́дии, и воззва́х, / на словеса́ Твоя́ упова́х.

148. Предвари́сте о́чи мои́ ко у́тру, / поучи́тися словесе́м Твои́м.

149. Глас мой услы́ши, Го́споди, по ми́лости Твое́й, / по судьбе́ Твое́й живи́ мя.

150. Прибли́жишася гоня́щии мя беззако́нием, / от зако́на же Твоего́ удали́шася.

151. Близ еси́ Ты, Го́споди, / и вси путие́ Твои́ и́стина.

152. Испе́рва позна́х от свиде́ний Твои́х, / я́ко во век основа́л я́ еси́.

153. Виждь смире́ние мое́, и изми́ мя, / я́ко зако́на Твоего́ не забы́х.

154. Суди́ суд мой, и изба́ви мя, / словесе́ ра́ди Твоего́ живи́ мя.

155. Дале́че от гре́шник спасе́ние, / я́ко оправда́ний Твои́х не взыска́ша.

156. Щедро́ты Твоя́ мно́ги, Го́споди, / по судьбе́ Твое́й живи́ мя.

157. Мно́зи изгоня́щии мя и стужа́ющии ми, / от свиде́ний Твои́х не уклони́хся.

158. Ви́дех неразумева́ющия и иста́ях, / я́ко слове́с Твои́х не сохрани́ша.

159. Виждь, я́ко за́поведи Твоя́ возлюби́х, Го́споди, / по ми́лости Твое́й живи́ мя.

160. Нача́ло слове́с Твои́х и́стина, / и во век вся судьбы́ пра́вды Твоея́.

161. Кня́зи погна́ша мя ту́не, / и от слове́с Твои́х убоя́ся се́рдце мое́.

162. Возра́дуюся аз о словесе́х Твои́х, / я́ко обрета́яй коры́сть мно́гу.

163. Непра́вду возненави́дех и омерзи́х, / зако́н же Твой возлюби́х.

164. Седмери́цею днем хвали́х Тя, / о судьба́х пра́вды Твоея́.

165. Мир мног лю́бящим зако́н Твой, / и несть им собла́зна.

166. Ча́ях спасе́ния Твоего́ Го́споди, / и за́поведи Твоя́ возлюби́х.

167. Сохрани́ душа́ моя́ свиде́ния Твоя́, / и возлюби́ я́ зело́.

168. Сохрани́х за́поведи Твоя́ и свиде́ния Твоя́, / я́ко вси путие́ мои́ пред Тобо́ю, Го́споди.

169. Да прибли́жится моле́ние мое́ пред Тя, Го́споди, / по словеси́ Твоему́ вразуми́ мя.

170. Да вни́дет проше́ние мое́ пред Тя, Го́споди, / по словеси́ Твоему́ изба́ви мя.

171. Отры́гнут устне́ мои́ пе́ние, / егда́ научи́ши мя оправда́нием Твои́м.

172. Провеща́ет язы́к мой словеса́ Твоя́, / я́ко вся за́поведи Твоя́ пра́вда.

173. Да бу́дет рука́ Твоя́ е́же спасти́ мя, / я́ко за́поведи Твоя́ изво́лих.

174. Возжела́х спасе́ние Твое́, Го́споди, / и зако́н Твой поуче́ние мое́ есть.

175. Жива́ бу́дет душа́ моя́, и восхва́лит Тя, / и судьбы́ Твоя́ помо́гут мне.

176. Заблуди́х я́ко овча́ поги́бшее, / взыщи́ раба́ Твоего́, я́ко за́поведей Твои́х не забы́х.

И по конце абие:

Благослове́н еси́, Го́споди, / научи́ мя оправда́нием Твои́м.

Святы́х лик обре́те исто́чник жи́зни и дверь ра́йскую, / да обря́щу и аз путь покая́нием: / поги́бшее овча́ аз есмь, / воззови́ мя, Спа́се, и спаси́ мя.

Благослове́н еси́, Го́споди, / научи́ мя оправда́нием Твои́м.

А́гнца Бо́жия пропове́давше, / и закла́ни бы́вше я́коже а́гнцы, / и к жи́зни нестаре́емей, святи́и, / и присносу́щней преста́вльшеся. / Того́ приле́жно, му́ченицы, моли́те, / долго́в разреше́ние нам дарова́ти.

Благослове́н еси́, Го́споди, / научи́ мя оправда́нием Твои́м.

В путь у́зкий хо́ждшии приско́рбный, / вси в житии́ крест я́ко яре́м взе́мшии, / и Мне после́довавшии ве́рою, / прииди́те, наслади́теся, / и́хже угото́вах вам по́честей, / и венцо́в небе́сных.

Благослове́н еси́, Го́споди, / научи́ мя оправда́нием Твои́м.

О́браз есмь неизрече́нныя Твоея́ сла́вы, / а́ще и я́звы ношу́ прегреше́ний: / уще́дри Твое́ созда́ние, Влады́ко, / и очи́сти Твои́м благоутро́бием, / и возжеле́нное оте́чество пода́ждь ми, / рая́ па́ки жи́теля мя сотворя́я.

Благослове́н еси́, Го́споди, / научи́ мя оправда́нием Твои́м.

Дре́вле у́бо от не су́щих созда́вый мя, / и о́бразом Твои́м Боже́ственным почты́й, / преступле́нием же за́поведи / па́ки мя возврати́вый в зе́млю, от нея́же взят бых, / на е́же по подо́бию возведи́ / дре́внею добро́тою возобрази́тися.

Благослове́н еси́, Го́споди, / научи́ мя оправда́нием Твои́м.

Упоко́й, Бо́же, рабы́ Твоя́, / и учини́ я́ в раи́, / иде́же ли́цы святы́х, Го́споди, / и пра́ведницы сия́ют я́ко свети́ла, / усо́пшия рабы́ Твоя́ упоко́й, / презира́я их вся согреше́ния.

Сла́ва: Трисия́тельное еди́наго Божества́, благоче́стно пое́м вопию́ще: / Свят еси́, О́тче Безнача́льный, / Собезнача́льный Сы́не, и Боже́ственный Ду́ше: / просвети́ нас ве́рою Тебе́ служа́щих, / и ве́чнаго огня́ исхити́.

И ны́не: Ра́дуйся, Чи́стая, Бо́га пло́тию ро́ждшая во спасе́ние всех, / Е́юже род челове́ческий обре́те спасе́ние: / Тобо́ю да обря́щем рай, / Богоро́дице Чи́стая благослове́нная.

Аллилу́ия, аллилу́ия, аллилу́ия, сла́ва Тебе́ Бо́же. Трижды.

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

И по возгласе поем настоящия тропари, глас 5:

Поко́й, Спа́се наш, / с пра́ведными раба́ Твоего́ [или рабу́ Твою́], / и сего́ [или сию́] всели́ во дворы́ Твоя́, / я́коже есть пи́сано: / презира́я я́ко благ прегреше́ния его́ [или ея́] / во́льная и нево́льная, / и вся я́же в ве́дении и не в ве́дении, Человеколю́бче.

Сла́ва, конец: И вся я́же в ве́дении и не в ве́дении, Человеколю́бче.

И ны́не, Богородичен: От Де́вы возсия́вый мiру, Христе́ Бо́же, / и сы́ны све́та То́ю показа́вый, / поми́луй нас.

Таже, псалом 50.

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

И канон, егоже краестрочие:

Шесту́ю припева́ю отше́дшему песнь.

Феофаново. Глас 6.

Песнь 1.

Ирмос: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.

Стих: Ди́вен Бог во святы́х Свои́х, Бог Изра́илев.

В небе́сных черто́зех вы́ну до́блии му́ченицы мо́лят Тя, Христе́, / его́же [или ю́же] от земли́ преста́вил еси́ ве́рнаго [или ве́рную], / ве́чных благ получи́ти сподо́би.

Стих: Поко́й, Го́споди, ду́шу усо́пшаго раба́ Твоего́ [или усо́пшия рабы́ Твоея́].

Украси́вый вся́ческая, живо́тное смеше́нное, / посреде́ мя, челове́ка, смире́ния вку́пе и вели́чества, созда́л еси́, / те́мже раба́ Твоего́ [или рабы́ Твоея́] ду́шу, Спа́се, упоко́й.

Слава: Рая́ жи́теля и земледе́лателя в нача́ле мя учини́л еси́, / престу́пльша же Твою́ за́поведь изгна́л еси́, / те́мже раба́ Твоего́ [или рабы́ Твоея́] ду́шу, Спа́се, упоко́й.

И ныне, Богородичен: И́же от ребра́ Созда́вый Е́ву, пре́жде на́шу прама́терь, / из пречи́стаго Твоего́ чре́ва в плоть одева́ется, / е́юже сме́рти кре́пость, Чи́стая, разруши́.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Зако́нно пострада́ша Твои́ му́ченицы, Жизнода́вче, / и венце́м побе́ды украси́вшеся, / приле́жно преста́вльшемуся ве́рному [или преста́вльшейся ве́рней] ве́чное избавле́ние подаю́т.

Наказа́в пе́рвее мно́гими чудесы́ и зна́меньми мене́, заблу́дшаго, / напосле́док самого́ Себе́ истощи́л еси́, я́ко сострада́тель, / и поиска́в обре́л и спасл еси́.

Слава: От теку́щих непостоя́тельныя тли, к Тебе́ преше́дшаго [или преше́дшую], / в селе́ниих ве́чных жи́ти ра́достно сподо́би, Бла́же, / оправда́в ве́рою же и благода́тию.

И ныне, Богородичен: Несть непоро́чна, я́коже Ты, Пречи́стая Богома́ти, / еди́на бо от ве́ка Бо́га и́стиннаго зачала́ еси́ во чре́ве, / сме́рти разруши́вшаго си́лу.

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Седален, глас 6:

Вои́стинну суета́ вся́ческая, / житие́ же сень и со́ние, / и́бо всу́е мяте́тся всяк земноро́дный, / я́коже рече́ Писа́ние: / егда́ мiр приобря́щем, / тогда́ во гроб всели́мся, / иде́же вку́пе ца́рие и ни́щии. / Те́мже, Христе́ Бо́же, / преста́вльшагося раба́ Твоего́ [или преста́вльшуюся рабу́ Твою́] упоко́й, / я́ко Человеколю́бец.

Слава, и ныне, Богородичен: Всесвята́я Богоро́дице, / во вре́мя живота́ мое́го не оста́ви мене́, / челове́ческому предста́тельству не вве́ри мя, / но Сама́ заступи́ и поми́луй мя.

Песнь 4.

Ирмос: Христо́с моя́ си́ла, / Бог и Госпо́дь, честна́я Це́рковь / боголе́пно пое́т, взыва́ющи / от смы́сла чи́ста, о Го́споде пра́зднующи.

Прему́дрости бо́льшее явля́я позна́ние, / и е́же о даре́х многосоверше́нныя, Влады́ко, благосты́ни, / му́ченическия ли́ки а́нгелом сочета́л еси́.

Неизрече́нныя сла́вы Твоея́ / получи́ти сподо́би к Тебе́ преста́вльшагося [или преста́вльшуюся], / иде́же, Христе́, веселя́щихся есть жили́ще, / и глас чи́стаго ра́дования.

Слава: Пою́ща [или пою́щу] приими́ в Боже́ственную держа́ву Твою́, / его́же [или ю́же] от земли́ прия́л еси́, ча́до све́та сего́ [или сию́] соде́ловая, / грехо́вную мглу очища́я, Многоми́лостиве.

И ныне, Богородичен: Прия́телище пречи́стое, храм всенепоро́чный, ковче́г всесвяты́й, / де́вственное ме́сто свяще́ния, / Тебе́, добро́ту Иа́ковлю, Влады́ка избра́л есть.

Песнь 5.

Ирмос: Бо́жиим / све́том Твои́м, Бла́же, / у́тренюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Я́ко всепло́дие свяще́нное, / и я́ко нача́ток челове́ческаго естества́, му́ченицы, / просла́вленному прине́сшеся Бо́гови, / нам спасе́ние при́сно хода́тайствуют.

Небе́снаго пребыва́ния, раздая́ния дарова́ний сподо́би, Го́споди, / пре́жде усо́пшаго ве́рнаго раба́ Твоего́ [или усо́пшую ве́рную рабу́ Твою́], / подая́ прегреше́ний избавле́ние.

Слава: И́же еди́н естество́м Животво́рец, / и́же бла́гости вои́стинну неизсле́димая пучи́на, / сконча́вшагося [или сконча́вшуюся] Ца́рствия Твоего́ сподо́би, Ще́дре, / еди́не Безсме́ртне.

И ныне, Богородичен: Кре́пость и пе́ние, из Тебе́, Влады́чице, мiру Рожде́йся, / и спасе́ние быв поги́бшим, и́же от а́довых врат избавля́яй, / ве́рою Тебе́ блажа́щия.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

На Кресте́ пригвожда́емь, / му́ченическия ли́ки к Себе́ собра́л еси́, / подража́ющия страсть Твою́, Бла́же. / Те́мже мо́лимся Ти: к Тебе́ преста́вльшагося [или преста́вльшуюся] ны́не упоко́й.

Неизрече́нною сла́вою Твое́ю, / егда́ прии́деши стра́шно суди́ти мiру всему́ на о́блацех, / благоволи́ све́тло сре́сти Тебе́, Изба́вителю, / его́же [или ю́же] от земли́ прия́л еси́ ве́рнаго раба́ Твоего́ [или ве́рную рабу́ Твою́].

Слава: Исто́чник жи́зни Сый, / му́жеством Боже́ственным, Влады́ко, окова́нныя изводя́й, / раба́ Твоего́ [или рабу́ Твою́] к Тебе́ ве́рно отше́дшаго [или отше́дшую] / в сла́дости ра́йстей всели́.

И ныне, Богородичен: В зе́млю возврати́хомся, престу́пльше Бо́жию за́поведь Боже́ственную, / Тобо́ю же Де́во, на не́бо от земли́ вознесо́хомся, / тлю сме́ртную оттря́сше.

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Кондак, глас 8:

Со святы́ми упоко́й, / Христе́, ду́шу раба́ Твоего́ [или рабы́ Твоея́], / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши: / а́може вси челове́цы по́йдем, / надгро́бное рыда́ние творя́ще песнь: / аллилу́ия.

И паки: Со святы́ми упоко́й, Христе́:

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие, / мучи́теля увеща́ вопи́ти: / благослове́н еси́, Бо́же оте́ц на́ших.

Изба́вльшиися Твое́ю кро́вию му́ченицы пе́рваго преступле́ния, / окропи́вшеся же свое́ю кро́вию, прообразу́ют я́ве Твое́ заколе́ние, / благослове́н еси́, Бо́же оте́ц на́ших.

Свирепе́ющую смерть умертви́л еси́, Сло́ве живонача́льнейший, / в ве́ре же усо́пшаго [или усо́пшую] приими́ ны́не воспева́ющаго и глаго́лющаго [или воспева́ющую и глаго́лющую], Христе́: / благослове́н еси́, Бо́же оте́ц на́ших.

Слава: Воодуши́вый мя, челове́ка, вдохнове́нием Боже́ственным Богонача́льнейший Влады́ко, / преста́вленнаго [или преста́вленную] Ца́рствия Твоего́ сподо́би, пе́ти Тебе́, Спа́се: / благослове́н еси́, Бо́же оте́ц на́ших.

И ныне, Богородичен: Превы́шши вся́кия тва́ри, Пренепоро́чная, была́ еси́, заче́нши Бо́га, / сокруши́вшаго сме́ртная врата́ и вереи́ сте́ршаго: / те́мже Тя, Чи́стая, песносло́вим ве́рнии, я́ко Богома́терь.

Песнь 8.

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Кре́пко по́двиги показа́вше, / побе́ды венце́м украси́стеся му́ченицы Христо́вы страстоте́рпцы, зову́ще: / Тя превозно́сим, Христе́, во ве́ки.

Свяще́нне житие́ оста́вльшия ве́рныя, / и к Тебе́, Влады́це, преше́дшия, / приими́ кро́тце упокоева́я, я́ко благоутро́бен, / Тя превознося́щия во вся ве́ки.

Слава: Ны́не в земли́ кро́тких / вся водворя́тися пре́жде усо́пшия, Спа́се, благоизво́ли, / ве́рою я́же в Тя оправда́в и благода́тию, / Тя превознося́щия во вся ве́ки.

И ныне, Богородичен: Вси Тя блажи́м, Всеблаже́нная, / ро́ждшую Сло́ва вои́стинну су́щаго Блаже́ннаго, / плоть нас ра́ди бы́вшаго; / Его́же превозно́сим во вся ве́ки.

Песнь 9.

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с небе́сными во́и Тя ублажа́ем.

Наде́жда му́чеников ли́ки укрепи́, и к Твое́й любви́ распале́нне впери́ / бу́дущих сим предвообрази́вши непоколеби́мый вои́стинну поко́й; / ему́же преста́вльшагося, Бла́же, ве́рнаго [или преста́вльшуюся, Бла́же, ве́рную] сподо́би получи́ти.

Све́тлаго и Боже́ственнаго получи́ти сия́ния Твоего́, Христе́, / ве́рою преста́вльшагося [или преста́вльшуюся] благоволи́ в не́дрех Авраа́мовых упокое́ние, / я́ко Еди́н ми́лостив сему́ [или сей] да́руяй, и ве́чнаго сподобля́яй блаже́нства.

Слава: Сый естество́м благ и благоутро́бен, / и воли́тель ми́лости и благоутро́бия бе́здна; его́же [или ю́же] от ме́ста сего́ озлобле́ния / и се́ни сме́ртныя, Спа́се, преста́вил еси́, / иде́же сия́ет Твой свет, сего́ [или сию́] учини́.

И ныне, Богородичен: Сень святу́ю, Чи́стая, разуме́ем, / и ковче́г, и скрижа́ль Тя зако́на и благода́ти; / Тобо́ю бо оставле́ние дарова́ся, / оправда́нным кро́вию Воплоще́ннаго из Твоего́ Чре́ва, Всенепоро́чная.

Таже ектения:

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Начинаем самогласны Иоанна монаха.

Глас 1: Ка́я жите́йская сла́дость / пребыва́ет печа́ли неприча́стна? / Ка́я ли сла́ва стои́т на земли́ непрело́жна? / Вся се́ни немощне́йша, вся со́ний преле́стнейша: / еди́нем мгнове́нием, и вся сия́ смерть прие́млет. / Но во све́те, Христе́, лица́ Твоего́ / и в наслажде́нии Твоея́ красоты́, / его́же [или ю́же] избра́л еси́, упоко́й, я́ко Человеколю́бец.

Глас 2: Увы мне, яковы́й по́двиг и́мать душа́ разлуча́ющися от телесе́́ / Увы́, тогда́ коли́ко слези́т и несть поми́луяй ю́́ / Ко А́нгелом о́чи возводя́щи, безде́льно мо́лится: / к челове́ком ру́це простира́ющи, не и́мать помога́ющаго. / Те́мже, возлю́бленнии мои́ бра́тие, / помы́сливше на́шу кра́ткую жизнь, / преста́вленному [или преста́вленней] упокое́ния от Христа́ про́сим, / и душа́м на́шим ве́лию ми́лость.

Глас 3: Вся суета́ челове́ческая, / ели́ка не пребыва́ют по сме́рти; / не пребыва́ет бога́тство, ни сше́ствует сла́ва; / прише́дшей бо сме́рти, сия́ вся потреби́шася. / Те́мже Христу́ безсме́ртному возопии́м: / преста́вленнаго [или преста́вленную] от нас упоко́й, / иде́же всех есть веселя́щихся жили́ще.

Глас 4: Где есть мiрско́е пристра́стие? / Где есть привре́менных мечта́ние? / Где есть зла́то и сребро́? / Где есть рабо́в мно́жество и молва́? / Вся персть, вся пе́пел, вся сень. / Но прииди́те возопии́м безсме́ртному Царю́: / Го́споди, ве́чных Твои́х благ сподо́би преста́вльшагося [или преста́вльшуюся] от нас, / упокоя́я его́ [или ю́] в нестаре́ющемся блаже́нстве Твое́м.

Глас 5: Помяну́х проро́ка вопию́ща: / аз есмь земля́ и пе́пел, / и па́ки разсмотри́х во гробе́х, / и ви́дех ко́сти обнаже́ны, и рех: / у́бо кто есть царь, или́ во́ин, / или́ бога́т, или́ убо́г, / или́ пра́ведник, или́ гре́шник? / Но упоко́й, Го́споди, / с пра́ведными раба́ Твоего́ [или рабу́ Твою́].

Глас 6: Нача́ток мне и соста́в зижди́тельное Твое́ бысть повеле́ние: / восхоте́в бо от неви́димаго же и ви́димаго жи́ва мя соста́вити естества́. / От земли́ те́ло мое́ созда́л еси́, / дал же ми еси́ ду́шу / Боже́ственным Твои́м и животворя́щим вдохнове́нием. / Те́мже, Христе́, раба́ Твоего́ [или рабу́ Твою́] во стране́ живу́щих, / и в селе́ниих пра́ведных упоко́й.

Глас 7: По о́бразу Твоему́ и по подо́бию созда́вый в нача́ле челове́ка, / в раи́ поста́вил еси́ владе́ти Твои́ми тва́рьми; / за́вистию же диа́волею прельсти́вся, сне́ди причасти́ся, / за́поведей Твои́х престу́пник быв. / Те́мже па́ки в зе́млю, от нея́же взят бысть, / осуди́л еси́ возврати́тися, Го́споди, / и испроси́ти упокое́ние.

Глас 8: Пла́чу и рыда́ю, / егда́ помышля́ю смерть, / и ви́жду во гробе́х лежа́щую / по о́бразу Бо́жию созда́нную на́шу красоту́, / безобра́зну, безсла́вну, / не иму́щую ви́да. / О, чудесе́́ / Что сие́ е́же о нас бысть та́инство? / Ка́ко преда́хомся тле́нию? / Ка́ко сопряго́хомся сме́рти? / Вои́стинну Бо́га повеле́нием, / я́коже пи́сано есть, / подаю́щаго преста́вльшемуся [или преста́вльшейся] упокое́ние.

Блаженна, глас 6.

Во Ца́рствии Твое́м помяни́ нас, Го́споди, / егда́ прии́деши, во Ца́рствии Твое́м.

Блаже́ни ни́щии ду́хом, / я́ко тех есть Ца́рство Небе́сное.

Блаже́ни пла́чущии, / я́ко ти́и уте́шатся.

Блаже́ни кро́тции, / я́ко ти́и насле́дят зе́млю.

Блаже́ни а́лчущии и жа́ждущии пра́вды, / я́ко ти́и насы́тятся.

Блаже́ни ми́лостивии, / я́ко ти́и поми́ловани бу́дут.

Разбо́йника рая́, Христе́, жи́теля, / на Кресте́ Тебе́ возопи́вша, помяни́ мя, / предсоде́ял еси́ покая́нием его́, / и мене́ сподо́би недосто́йнаго.

Блаже́ни чи́стии се́рдцем, / я́ко ти́и Бо́га у́зрят.

Живото́м госпо́дствуяй и сме́ртию, / во дво́рех святы́х упоко́й, / его́же [или ю́же] прия́л еси́ от привре́менных; / и помяни́ мя, егда́ прии́деши во Ца́рствии Твое́м.

Блаже́ни миротво́рцы, / я́ко ти́и сы́нове Бо́жии нареку́тся.

Душа́ми влады́чествуяй и телеса́ми, / Его́же в руце́ дыха́ние на́ше, / оскорбля́емых утеше́ние, / упоко́й во стране́ пра́ведных, / его́же [или ю́же] преста́вил еси́ раба́ Твоего́ [или рабу́ Твою́].

Блаже́ни изгна́ни пра́вды ра́ди, / я́ко тех есть Ца́рство Небе́сное.

Христо́с Тя упоко́ит во стране́ живу́щих, / и врата́ ра́йская да отве́рзет ти, / и Ца́рствия пока́жет жи́теля, / и оставле́ние тебе́ даст, / о ни́хже согреши́л еси́ [или согреши́ла еси́] в житии́, христолю́бче [или христолю́бице].

Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.

Изы́дем и у́зрим во гробе́х, / я́ко на́ги ко́сти челове́к, / черве́й снедь и смрад, / и позна́ем что́ бога́тство, добро́та, кре́пость, благоле́пие.

Ра́дуйтеся и весели́теся, / я́ко мзда ва́ша мно́га на Небесе́х.

Услы́шим, что зове́т Вседержи́тель: / увы́ и́щущим зре́ти стра́шный день Госпо́день́ / Сей бо есть тьма: / огне́м бо искуша́ются вся́ческая.

Слава: Безнача́льным и рожде́нием же и происхожде́нием, / Отцу́ покланя́юся роди́вшему, / Сы́на сла́влю рожде́ннаго, / пою́ сопросия́вшаго Отцу́ же и Сы́ну, Ду́ха Свята́го.

И ныне, Богородичен: Ка́ко от сосцу́ Твое́ю млеко́ то́чиши Де́во? / Ка́ко пита́еши Пита́теля тва́ри? / Я́коже весть, источи́вый во́ду от ка́мене, / жи́лы водны́я жа́ждущим лю́дем, я́коже писа́ся.

Посем диакон глаголет: Во́нмем.

Священник: Мир всем.

И чтец: И ду́хови твоему́.

И паки диакон: Прему́дрость.

Лик же поет прокимен, глас 6:

Блаже́н путь, во́ньже и́деши днесь, душе́, / я́ко угото́вася тебе́ ме́сто упокое́ния. Стих: К Тебе́, Го́споди, воззову́, Бо́же мой, да не премолчи́ши от мене́.

Диакон: Прему́дрость.

Чтец: К Солу́няном посла́ния свята́го Апо́стола Па́вла чте́ние.

Диакон: Во́нмем.

Апостол к Солуняном, зачало 270.

Бра́тие, не хощу́ вас неве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршия во Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се, и та́ко всегда́ с Го́сподем бу́дем.

Священник: Мир ти.

Чтец: И ду́хови твоему́.

Аллилуия, глас 6:

Стих: Блаже́н, его́же избра́л и прия́л еси́, Го́споди.

Диакон: Прему́дрость, про́сти, услы́шим свята́го Ева́нгелия.

Иерей: Мир всем.

Людие: И ду́хови твоему́.

Диакон: От Иоа́нна свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Диакон: Во́нмем.

Евангелие от Иоанна, зачало 16.

Рече́ Госпо́дь ко прише́дшим к Нему́ иуде́ем: ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя, и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́. И о́бласть даст Ему́ и суд твори́ти, я́ко Сын Челове́чь есть, не диви́теся сему́. Я́ко гряде́т час, во́ньже вси су́щии во гробе́х услы́шат глас Сы́на Бо́жия, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.

Священник: Мир ти, благовеству́ющему.

Лик: Сла́ва Тебе́, Го́споди, сла́ва Тебе́.

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

И по исполнении сего глаголет первый от священников, или архиерей прилучився, молитву велегласно, пришед близ умершаго:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Такожде и настоящии священницы вси.

Ведомо же буди, яко глаголемому коемуждо прошению от диакона, во елико глаголется прошение от него, глаголет вышереченную молитву кийждо священник, по чину своему тайно близ умершаго, и возглашает: Я́ко Ты еси́ воскресе́ние:

Ныне же от перваго священника, или архиереа глаголется велегласно молитва: Бо́же духо́в: якоже выше речеся.

По возгласе же бывает целование.

И поем настоящия стихиры, глас 2.

Подобны: Егда́ от дре́ва:

Прииди́те, после́днее целова́ние / дади́м, бра́тие, уме́ршему [или уме́ршей], / благодаря́ще Бо́га: / сей [или сия́] бо оскуде́ от сро́дства своего́, / и ко гро́бу тщи́тся не ктому́ пеки́йся [или пеку́щися] / о су́етных, и о многостра́стной пло́ти. / Где ны́не сро́дницы же и дру́зи? / Се разлуча́емся. / Его́же [или ю́же] упоко́ити, Го́споду помо́лимся.

Ко́е разлуче́ние, о бра́тие? Кий пла́чь? / Ко́е рыда́ние в настоя́щем часе́? / Прииди́те у́бо, целу́йте бы́вшаго [или бы́вшую] вма́ле с на́ми; / предае́тся ко гро́бу, / ка́менем покрыва́ется, / во тьму вселя́ется, / с ме́ртвыми погреба́ется, / и всех сро́дников и друго́в ны́не разлуча́ется. / Его́же [или ю́же] упоко́ити, Го́споду помо́лимся.

Ны́не жите́йское лука́вое разруша́ется торжество́ суеты́: / дух бо оскуде́ от селе́ния, бре́ние очерни́ся, / сосу́д раздра́ся, безгла́сен, нечу́вствен, ме́ртвен, недви́жимь. / Его́же [или ю́же] посыла́юще гро́бу, Го́споду помо́лимся, / да́ти сему́ [или сей] во ве́ки упокое́ние.

Яко́в живо́т наш есть? Цвет и дым, и роса́ у́тренняя вои́стинну. / Прииди́те у́бо, у́зрим на гробе́х я́сно, где добро́та теле́сная? / Где ю́ность? Где суть очеса́ и зрак плотски́й? / Вся увядо́ша я́ко трава́, вся потреби́шася, / прииди́те ко Христу́ припаде́м со слеза́ми.

Ве́лий плачь и рыда́ние, ве́лие воздыха́ние и ну́жда, / разлуче́ние души́, ад и поги́бель, / привре́менный живо́т, сень непостоя́нная, / сон преле́стный, безвременномечта́нен труд жития́ земна́го. / Дале́че отбежи́м мiрска́го вся́каго греха́, да небе́сная насле́дим.

Ви́дяще предлежа́ща ме́ртва, / о́браз восприи́мем вси коне́чнаго часа́: / сей бо отхо́дит я́ко дым от земли́, / я́ко цвет отцвете́, / я́ко трава́ посече́ся, / вре́тищем повива́емь, / земле́ю покрыва́емь. / Его́же неви́дима оста́вивше, Христу́ помо́лимся, / да́ти сему́ [или сей] во ве́ки упокое́ние.

Прииди́те, вну́цы Ада́мовы, уви́дим на земли́ пове́рженнаго, / по о́бразу на́шему все благоле́пие отлага́юща, / разруше́на во гро́бе гно́ем, червьми́, тьмо́ю иждива́ема, земле́ю покрыва́ема. / Его́же неви́дима оста́вльше, Христу́ помо́лимся, / да́ти во ве́ки сему́ [или сей] упокое́ние.

Егда́ душа́ от те́ла и́мать ну́ждею восхи́титися стра́шными А́нгелы, / всех забыва́ет сро́дников и зна́емых, / и пече́тся о бу́дущих суди́лищей стоя́нии, я́же суеты́ и многотру́дныя пло́ти разреше́нии; / тогда́ Судию́ моля́ще, вси помо́лимся, / да прости́т Госпо́дь, я́же соде́ла.

Прииди́те, бра́тие, во гро́бе у́зрим пе́пел и пе́рсть, из нея́же созда́хомся. / Ка́мо ны́не и́дем? Что же бы́хом? / Кий убо́г или́ бога́т? Или́ кий влады́ка? / Кий же свобо́дь? И не вси ли пе́пел? / Добро́та лица́ согни́ и ю́ности весь цвет увяди́ смерть.

Вои́стинну суета́ и тле́ние, / вся жите́йская ви́ды и безсла́вная; / вси бо исчеза́ем, вси у́мрем, / ца́рие же и кня́зи, / судии́ и наси́льницы, / бога́тии и убо́зии, / и все естество́ челове́ческое; / ны́не бо, и́же иногда́ в житии́, во гро́бы вверга́ются, / и́хже да упоко́ит Госпо́дь, помо́лимся.

Вси́ теле́снии ны́не орга́ны пра́здни зря́тся, / и́же пре́жде ма́ло дви́жими бя́ху, / вси́ недействи́тельны, ме́ртви, нечу́вственни: / о́чи бо заидо́ша, связа́стеся но́зе, / ру́це безмо́лвствуете и слух с ни́ми, / язы́к молча́нием заключи́ся, гро́бу предае́тся. / Вои́стинну суета́ вся челове́ческая.

Спаса́й наде́ющияся на тя, / Ма́ти незаходи́маго со́лнца, Богороди́тельнице, / умоли́ моли́твами Твои́ми преблага́го Бо́га / упоко́ити, мо́лимся, ны́не преста́вльшагося [или ны́не преста́вльшуюся], / иде́же упокоева́ются пра́ведных ду́си, / Боже́ственных благ насле́дника покажи́, / во дво́рех пра́ведных, / в па́мять, Всенепоро́чная, ве́чную.

Слава, глас 6: Зря́ще мя безгла́сна / и бездыха́нна предлежа́ща [или безгла́сну и бездыха́нну предлежа́щу] / воспла́чите о мне бра́тие и дру́зи, / сро́дницы и зна́емии: / вчера́шний бо день бесе́довах с ва́ми / и внеза́пу на́йде на мя стра́шный час сме́ртный. / Но прииди́те вси лю́бящии мя / и целу́йте мя после́дним целова́нием. / Не ктому́ бо с ва́ми похожду́, / или́ собесе́дую про́чее, / к Судии́ бо отхожду́, / иде́же несть лицеприя́тия: / раб бо и влады́ка вку́пе предстоя́т, / царь и во́ин, бога́тый и убо́гий / в ра́внем досто́инстве; / ки́йждо бо от свои́х дел / или́ просла́вится, или́ постыди́тся. / Но прошу́ всех и молю́, / непреста́нно о мне моли́теся Христу́ Бо́гу, / да не низведе́н бу́ду [или да не низведе́на бу́ду] по грехо́м мои́м, / на ме́сто муче́ния, / но да вчини́т мя, иде́же свет живо́тный.

И ныне, Богородичен, глас тойже: Моли́твами ро́ждшия Тя, Христе́, / и Предте́чи Твоего́, / Апо́столов, проро́ков, иера́рхов, / преподо́бных, и пра́ведных, и всех святы́х, / усо́пшаго раба́ Твоего́ [или усо́пшую рабу́ Твою́] упоко́й.

Таже, Трисвятое. Пресвята́я Тро́ице: О́тче наш: Священник: Я́ко Твое́ есть Ца́рство: Лик: Ами́нь.

И абие поют тропари сия. Глас 4:

Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.

В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́ [или рабы́ Твоея́], я́ко еди́н еси́ Человеколю́бец.

Слава: Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ [или рабы́ Твоея́] упоко́й.

И ныне: Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].

Диакон глаголет:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о упокое́нии души́ усо́пшаго раба́ Бо́жия [или усо́пшия рабы́ Бо́жия], имярек, и о е́же прости́тися ему́ [или ей] вся́кому прегреше́нию, во́льному же и нево́льному.

Лик: Го́споди, поми́луй, трижды.

Я́ко да Госпо́дь Бог учини́т ду́шу его́ [или ея́], иде́же пра́веднии упокоя́ются.

Лик: Го́споди, поми́луй, трижды.

Ми́лости Бо́жия, Ца́рства Небе́снаго и оставле́ния грехо́в его́ [или ея́], у Христа́, безсме́ртнаго Царя́ и Бо́га на́шего, про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник глаголет молитву сию:

Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ [или усо́пшия рабы́ Твоея́] имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им [или е́ю] сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ [или усо́пшия рабы́ Твоея́] имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Диакон: Прему́дрость.

[Священник: Пресвята́я Богоро́дице, спаси́ нас.]

Лик: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

И отпуст:

Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, преподо́бных и богоно́сных оте́ц на́ших и всех святы́х, ду́шу от нас преста́вльшагося раба́ Своего́ [или преста́вльшияся рабы́ Своея́] имярек, в селе́ниих пра́ведных учини́т, в не́дрех Авраа́ма упоко́ит и с пра́ведными сопричте́т, и нас поми́лует, я́ко Благ и Человеколю́бец.

Лик: Ами́нь.

Архиерей же или начальствуяй иерей сам глаголет трижды сие:

Ве́чная твоя́ па́мять, достоблаже́нне и приснопа́мятне бра́те наш. (Трижды).

Или диакон возглашает: Во блаже́нном успе́нии ве́чный поко́й пода́ждь, Го́споди, усо́пшему рабу́ Твоему́ [или усо́пшей рабе́ Твое́й] имярек, и сотвори́ ему́ [или ей] ве́чную па́мять.

Таже певцы поют трижды: Ве́чная па́мять.

Абие же архиерей, аще приключится тамо быти, или иерей чтет молитву прощальную велегласно:

Госпо́дь Иису́с Христо́с Бог наш, и́же Боже́ственная за́поведи свя́тым Свои́м ученико́м и Апо́столом да́вый, во е́же вяза́ти и реши́ти па́дших грехи́, и от о́ных па́ки мы прие́мше вины́ то́йже твори́ти; да прости́т тебе́, ча́до духо́вное, а́ще что соде́лал [или соде́лала] еси́ в ны́нешнем ве́це во́льное или́ нево́льное, ны́не и при́сно, и во ве́ки веко́в, ами́нь.

И тако вземше мощи отходим ко гробу последующим всем людем, предыдущим же священником, и поющим:

Святы́й Бо́же: Пресвята́я Тро́ице: О́тче на́ш: и прочая.

И полагаются мощи во гроб; архиерей же, или священник, взем персть лопатою, крестовидно мещет верху мощей, глаголя:

Госпо́дня земля́ и исполне́ние ея́, вселе́нная и вси живу́щии на ней.

И посем наливает верху елей от кандила, или сыплют пепел от кадильницы, и тако покрывают яко обычно гроб, приглаголемым тропарем: Со ду́хи пра́ведных: и прочим всем. Зри выше.

И отпуст.

Молитва разрешительная от иерея над преставльшимся чадом чтомая.

Госпо́дь наш Иису́с Христо́с, Боже́ственною Свое́ю благода́тию, да́ром же и вла́стию, да́нною святы́м Его́ ученико́м и Апо́столом, во е́же вяза́ти и реши́ти грехи́ челове́ков (рек им: приими́те Ду́ха Свята́го, и́хже отпустите́ грехи́, отпу́стятся им; и́хже удержите́, удержа́тся; и ели́ка а́ще свя́жете и разрешите́ на земли́, бу́дут свя́зана и разреше́на и на Небеси́); от о́нех же и на ны друг другоприима́тельно прише́дшею, да сотвори́т чрез мене́, смире́ннаго, проще́но и сие́ по ду́ху ча́до (имярек) от всех, ели́ка я́ко челове́к согреши́ Бо́гу сло́вом или́ де́лом, или́ мы́слию, и все́ми свои́ми чу́вствы, во́лею или́ нево́лею, ве́дением или́ неве́дением; а́ще же под кля́твою или́ отлуче́нием архиере́йским или иере́йским бысть, или а́ще кля́тву отца́ своего́ или́ ма́тере своея́ наведе́ на ся, или́ своему́ прокля́тию подпаде́, или́ кля́тву преступи́, или́ ины́ми не́киими грехи́ я́ко челове́к связа́ся, но о всех сих се́рдцем сокруше́нным пока́яся, и от тех всех вины́ и ю́зы да разреши́т его́ [или ю́]; ели́ка же за не́мощь естества́ забве́нию предаде́, и та вся да прости́т ему́ [или ей], человеколю́бия ра́ди Своего́, моли́твами Пресвяты́я и Преблагослове́нныя Влады́чицы на́шея Богоро́дицы и Присноде́вы Мари́и, святы́х сла́вных и всехва́льных Апо́стол, и всех святы́х, ами́нь.