Требник гражданским шрифтом

Глава 1. Моли́тва на вся́кую не́мощь

Влады́ко вседержи́телю, врачу́ ду́ш и теле́с, смиря́яй и вознося́й, наказу́яй и па́ки исцеля́яй, бра́та на́шего и́мярек, немощству́юща посети́ ми́лостию твое́ю: простри́ мы́шцу твою́ испо́лнену исцеле́ния и врачбы́: и исцели́ его́, возставля́яй от одра́ и не́мощи, запрети́ ду́ху не́мощи, отста́ви от него́ вся́ку я́зву, вся́ку боле́знь, вся́ку ра́ну, вся́ку огне́вицу и тряса́вицу: и а́ще е́сть в не́м согреше́ние, или́ беззако́ние, осла́би, оста́ви, прости́ твоего́ ра́ди человеколю́бия. е́й Го́споди, пощади́ созда́ние твое́ во Христе́ Иису́се Го́споде на́шем, с ни́мже благослове́н еси́, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 2. Моли́тва святы́х седми́ отроко́в на немощна́го и не спя́щаго

Го́споду помо́лимся. Го́споди поми́луй.

Бо́же вели́кий, хва́льный, и непостижи́мый, и неисповеди́мый, созда́вый челове́ка руко́ю твое́ю, пе́рсть взе́м от земли́ и о́бразом твои́м почти́вый его́, Иису́се Христе́, прежела́емое и́мя, со безнача́льным твои́м отце́м, и с пресвяты́м, и благи́м, и животворя́щим твои́м ду́хом, яви́ся на рабе́ твое́м [или́ рабе́ твое́й] и́мярек, и посети́ его́ [или́ ю́] душе́ю и те́лом, умоля́емь от пресла́вныя Влады́чицы на́шея Богоро́дицы, и Присноде́вы Мари́и: святы́х небе́сных си́л безпло́тных: и честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных апо́столов: и́же во святы́х оте́ц на́ших, и вселе́нских учи́телей, Васи́лиа вели́каго, григо́риа богосло́ва, Иоа́нна Златоу́стаго: афана́сиа и Кири́лла, никола́а и́же в ми́рех, спиридо́на чудотво́рца, и все́х святы́х священнонача́льников: свята́го Апо́стола первому́ченика и архидиа́кона стефа́на: святы́х сла́вных и великому́чеников, Гео́ргиа победоно́сца, дими́триа мирото́чца, Фео́дора стратила́та, и все́х святы́х му́чеников: преподо́бных и богоно́сных оте́ц на́ших, Анто́ниа , евфи́миа, Са́ввы освяще́ннаго, феодо́сиа о́бщаго жития́ нача́льника, ону́фриа, Арсе́ниа, афана́сиа афо́нскаго, и все́х преподо́бных: святы́х и исцели́телей, безсре́бренников Космы́ и Дамиа́на, ки́ра и Иоа́нна, пантелеи́мона и ермола́а, сампсо́на и диоми́да, фалале́а и три́фона, и про́чих: свята́го и́мярек, и все́х твои́х святы́х. и да́ждь ему́ со́н упокое́ния, со́н теле́сный здра́вия и спасе́ния и живота́, и кре́пость душе́вную и теле́сную: я́коже посети́л еси́ иногда́ авимеле́ха уго́дника твоего́, во хра́ме агри́ппове, и да́л еси́ ему́ со́н утеше́ния, е́же не ви́дети паде́ния иерусали́мова: и сего́ успи́вый сно́м пита́тельным, и па́ки сего́ воскреси́вый во еди́ном мгнове́нии вре́мени, в сла́ву твоея́ бла́гости. но и святы́я твоя́ сла́вныя се́дмь о́троки, испове́дники и свиде́тели твоего́ явле́ния показа́вый, во дни́ деки́а царя́ и отсту́пника: и сия́ успи́вый в верте́пе на ле́та 372, я́ко младе́нцы согрева́емыя в ложесна́х ма́тере своея́, и ника́коже претерпе́вшыя тле́ния, в похвалу́ и сла́ву человеколю́бия твоего́, и в показа́ние и извеще́ние на́шего пакибытия́, и воскресе́ния все́х. са́м у́бо человеколю́бче Царю́, предста́ни и ны́не наи́тием свята́го твоего́ ду́ха, и посети́ раба́ твоего́ [или́ рабу́ твою́] и́мярек, да́руй ему́ [или́ е́й] здра́вие, кре́пость и благомо́щие, твое́ю бла́гостию: я́ко от Тебе́ е́сть вся́ко дая́ние бла́го, и вся́к да́р соверше́н. ты́ бо еси́ вра́чь ду́ш на́ших, и тебе́ сла́ву, и благодаре́ние, и поклоне́ние возсыла́ем со безнача́льным твои́м отце́м и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 3. Егда́ кре́ст твори́т свяще́нник на стра́сть неду́га со святы́м копие́м

глаго́лет сия́ тропари́:

Распе́ншуся тебе́ Христе́, поги́бе мучи́тельство, попра́на бы́сть си́ла вра́жия: ниже́ бо а́нгел, ниже́ челове́к, но са́м Го́споди спа́сл еси́ на́с, сла́ва тебе́.

Сла́ва: Искупи́л ны́ еси́ от кля́твы зако́нныя честно́ю твое́ю кро́вию на кресте́ пригвозди́вся и копие́м пробо́дься, безсме́ртие источи́л еси́ челове́ком, спа́се на́ш, сла́ва тебе́.

И ны́не, Богоро́дичен:

Копие́м в ре́бра, о Христе́ мо́й, прободы́йся твоя́, е́же от ребра́ челове́ческаго созда́нныя, па́губы все́м челове́ком бы́вшия вино́вныя кля́твы свободи́л еси́.

Глава 4. Моли́тва на рождество́ Христо́во, сыно́м духо́вным

Влады́ко Го́споди Бо́же вседержи́телю, егда́ роди́лся еси́ от Де́вы Мари́и в вифлее́ме иуде́йстем, тре́петно тва́рь просвети́ся, и в ми́р возра́довася рождеству́ твоему́: сотвори́вый челове́ка по о́бразу твоему́ и по подо́бию, и да́вый ему́ креще́ние в покая́ние. введы́й рабы́ твоя́ в пречестны́я дни́ сия́, к воздержа́нию страсте́м, к наде́жде воскре́сния: наставля́я и́х на и́стину твоего́ Божества́, отве́рзи и́м се́рдце и у́м, зна́ти тя́ Сы́на Бо́жия, взе́млющаго грехи́ всего́ ми́ра. ты́ и ны́не Влады́ко человеколю́бче приими́ рабы́ твоя́ и́мярек, я́коже прия́л еси́ Петра́ утопа́юща в мо́ри, и отве́ргшагося тебе́ три́жды, и пла́кавшагося го́рько, и па́ки прия́та тобо́ю: приими́ и ны́не Влады́ко, сле́зы и воздыха́ние и покая́ние рабо́в твои́х, я́коже прия́т мытаре́во воздыха́ние, и блудни́цу пла́кавшуюся, и слеза́ми омочи́вшую но́зе твои́, и власы́ свои́ми оте́ршую, ми́лости ра́ди. прие́мый разбо́йника с собо́ю, на кресте́ вопию́ща к тебе́: помяни́ мя Го́споди, егда́ прии́деши во Ца́рствии твое́м. и реки́й ему́: дне́сь со мно́ю бу́деши в раи́. слы́шахом гла́с глаго́лющий, и волхво́м кла́няющымся с да́ры, па́стырем свиря́ющым, и а́нгелом воспева́ющым: сла́ва в вы́шних Бо́гу, и на земли́ ми́р, в челове́цех благоволе́ние, и и́род мятя́шеся, я́ко Бо́г пло́тию яви́ся на спасе́ние ро́ду челове́ческому. тя́ ны́не Влады́ко человеколю́бче, вся́ тва́рь воспева́ет глаго́лющи: Христо́с ражда́ется, сла́вите: Христо́с с небесе́, сря́щите: Христо́с на земли́, возноси́теся. ны́не а́нгельстии собо́ри ра́дуются, и му́ченичестии ли́цы веселя́тся, ви́девше сла́вное и честно́е рождество́, да вси́ досто́йно похва́лим се́рдцем и устна́ми. и ны́не благи́й человеколю́бче Го́споди, приими́ рабы́ твоя́ сия́ и́мярек, ка́ющыяся грехо́в свои́х, ве́домых и неве́домых, во́льных и нево́льных: и обы́чным человеколю́бием твои́м, приими́ коле́нное поклоне́ние и по́ст рабо́в твои́х и́мярек, да сконча́вше за́поведи твоя́, и дости́гше ны́не свята́го и честна́го рождества́ твоего́, чи́сти и без поро́ка бу́дут прича́стницы пречи́стаго те́ла и честны́я кро́ве твоея́: я́ко тебе́ подоба́ет сла́ва со отце́м и со святы́м ду́хом, ны́не и при́сно, и во ве́ки веко́в, ами́нь.

[глава 5] Моли́тва во е́же благослови́ти бра́шна, мяса́, во святу́ю и вели́кую неде́лю па́схи

Твори́т свяще́нник: Благослове́н Бо́г на́ш: Христо́с воскре́се: три́жды.

Та́же, Го́споду помо́лимся. Го́споди поми́луй.

При́зри Го́споди Иису́се Христе́, Бо́же на́ш, на бра́шна мя́с, и освяти́ я́, я́коже освяти́л еси́ овна́, его́же тебе́ приведе́ ве́рный Аавраа́м, и а́гнца, его́же тебе́ а́вель во всепло́дие принесе́: подо́бне и тельца́ упита́ннаго, его́же жре́ти повеле́л еси́ сы́нови твоему́ заблу́ждшему, и па́ки к тебе́ возвра́щшемуся: да я́коже то́й сподо́бися твоея́ бла́гости наслади́тися, си́це и освяще́нных от Тебе́, и благослове́нных, наслади́мся в пи́щу все́х на́с. ты́ бо еси́ и́стинная пи́ща: и пода́тель благи́х, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 6. Моли́тва, е́же благослови́ти сы́р и я́ица

Влады́ко Го́споди Бо́же на́ш, зижди́телю и соде́телю все́х, благослови́ млеко́ огусте́вшее, с ни́мже и я́ица, и на́с соблюди́ во бла́гости твое́й, я́ко да причаща́ющеся и́х, твои́х независтнопода́тельных даро́в испо́лнимся и неизглаго́ланныя твоея́ бла́гости. я́ко твоя́ держа́ва, и твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 7. Моли́тва на благослове́ние а́ртоса во святу́ю неде́лю Па́схи

Принесе́н быва́ет а́ртос, си́есть хле́б на сие́ приугото́вленный, и на не́м кре́ст напи́санный обы́чно, к иере́ю в олта́рь, по соверше́нии Боже́ственныя литурги́и и по заамво́нной моли́тве, ре́кшу диа́кону: Го́споду помо́лимся. И кли́ру: Го́споди поми́луй. Чте́т над ни́м иере́й моли́тву сию́:

Бо́же всеси́льный и Го́споди вседержи́телю, и́же рабо́м твои́м моисе́ом во исхо́де изра́илеве от еги́пта, и в освобожде́нии люде́й твои́х от го́рькия рабо́ты фарао́новы, а́гнца закла́ти повеле́л еси́, прообразу́я на кресте́ закла́ннаго во́лею на́с де́ля а́гнца, взе́млющаго всего́ ми́ра грехи́, возлю́бленнаго Сы́на твоего́, Го́спода на́шего Иису́са Христа́: ты́ и ны́не, смире́нно мо́лим тя́, при́зри на хле́б се́й, и благослови́ и освяти́ его́. и́бо и мы́ раби́ твои́ в че́сть и сла́ву, и в воспомина́ние сла́внаго воскре́сния того́жде Сы́на твоего́ Го́спода на́шего Иису́са Христа́, и́мже от ве́чныя рабо́ты вра́жия, и от а́довых нереши́мых у́з разреше́ние, свобо́ду и преведе́ние улучи́хом, пред твои́м вели́чеством ны́не во всесве́тлый се́й, пресла́вный и спаси́тельный де́нь па́схи, се́й прино́сим: на́с же сего́ принося́щих, и того́ лобза́ющих, и от него́ вкуша́ющих, твоему́ небе́сному благослове́нию прича́стники бы́ти сотвори́, и вся́кую боле́знь и неду́г от на́с твое́ю си́лою отжени́, здра́вие все́м подава́я. ты́ бо еси́ исто́чник благослове́ния, и цельба́м пода́тель, и тебе́ сла́ву возсыла́ем безнача́льному отцу́, со единоро́дным твои́м Сы́ном, и пресвяты́м и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

А́бие же кропи́т а́ртос свяще́нною водо́ю, глаго́ля:

Благословля́ется и освяща́ется а́ртос се́й, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И посе́м исхо́дит, и полага́ет его́ на анало́гии, лю́дие же, прие́млюще анти́дор, лобза́ют а́ртос.

Глава 8. Моли́тва на раздробле́ние а́ртоса в суббо́ту све́тлыя неде́ли

По Боже́ственной литурги́и, принесе́ну бы́вшу а́ртосу обы́чно в трапе́зу, и отпе́вше три́жды, Христо́с воскре́се: с поклоне́нием, проче́тшу, О́тче на́ш: и трапе́зу благослови́вшу обы́чно, диа́кон глаго́лет: Го́споду помо́лимся. и бра́тия: Го́споди поми́луй.

Иере́й глаго́лет моли́тву сию́ над а́ртосом:

Го́споди Иису́се Христе́, Бо́же на́ш, хле́бе а́нгельский, хле́бе живота́ ве́чнаго, соше́дый с небесе́, напита́вый на́с во всесве́тлыя сия́ дни́ пи́щею духо́вною твои́х Боже́ственных благодея́ний, тридне́внаго ра́ди и спаси́тельнаго воскре́сния: при́зри и ны́не, смире́нно мо́лим тя́, на мольбы́ и благодаре́ния на́ша, и я́коже благослови́л еси́ пя́ть хле́бов в пусты́не, и ны́не благослови́ хле́б се́й, я́ко да вси́ вкуша́ющии от него́, теле́снаго и душе́внаго благослове́ния и здра́вия сподо́бятся благода́тию и щедро́тами твоего́ человеколю́бия. ты́ бо еси́ освяще́ние на́ше, и тебе́ сла́ву возсыла́ем со безнача́льным твои́м отце́м, и всесвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Бра́тия: Ами́нь.

Раздроби́в же а́ртос обы́чно, раздае́т все́м пре́жде обе́да. Мо́жет же раздроби́ть его́ и на литурги́и по заамво́нной моли́тве, и раздава́ть ве́рующым вме́сто анти́дора.

Глава 9. Моли́тва в причаще́нии гро́здия в 6-й де́нь а́вгуста

Го́споду помо́лимся. Го́споди поми́луй.

Благослови́ Го́споди пло́д се́й ло́зный но́вый, и́же благорастворе́нием возду́шным, и ка́плями дожде́вными, и тишино́ю вре́менною, в се́й зре́лейший приити́ ча́с благоволи́вый: да бу́дет в на́с от того́ рожде́ния ло́знаго причаща́ющихся в весе́лие, и приноси́ти тебе́ да́р во очище́ние грехо́в, свяще́нным и святы́м те́лом Христа́ твоего́: с ни́мже благослове́н еси́, со пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в, ами́нь.

Ве́домо же бу́ди, я́ко сия́ моли́тва глаго́лется над гро́здием, иде́же виногра́ды, и прино́сятся на благослове́ние во хра́м в се́й шесты́й де́нь а́вгуста. Зде́ же в вели́цей Росси́и, иде́же не обрета́ются виногра́ды, прино́сятся в се́й де́нь ко хра́му я́блока, и глаго́лется моли́тва о принося́щих нача́тки овоще́й, е́йже нача́ло:

Влады́ко Го́споди Бо́же на́ш: Та́кожде и и́но ово́щие да прино́сится ко́еждо во свое́ вре́мя ко хра́му на благослове́ние, и моли́тва глаго́лется над ни́ми та́же.

[глава 10] Моли́тва о принося́щих нача́тки овоще́й

Влады́ко Го́споди Бо́же на́ш, твоя́ от твои́х приноси́ти тебе́ по предложе́нию кому́ждо повеле́вый, и ве́чных твои́х бла́г воздая́ние си́м да́руяй, и́же вдовы́ по си́ле приноше́ние благоуго́дно прие́мый, приими́ и ны́не принесе́ная от раба́ твоего́ и́мярек, и в ве́чных твои́х сокро́вищах возложи́тися си́м сподо́би: да́руй ему́ и мирски́х твои́х бла́г оби́льное восприя́тие, со все́ми поле́зными ему́.

Я́ко благослови́ся твое́ и́мя, и просла́вися твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 11. После́дование над пе́щию

Твори́т свяще́нник освяще́ние воды́ ма́лое.

По освяще́нии же глаго́лет моли́твы:

Го́споду помо́лимся.

Бо́же ве́чный, и́же се́дмь седмери́цею разжже́нную пе́щь, и пла́мень и́же в вавило́не на ро́су преложи́л еси́, и вве́рженныя в ню́ от царя́ навуходоно́сора, святы́я три́ о́троки, ана́нию, аза́рию и мисаи́ла, це́лы сохрани́вый: са́м благослови́ и пе́щь сию́ вели́кия ра́ди твоея́ ми́лости, и благослови́ в не́й дела́ ру́к рабо́в твои́х, и благопоспеши́ я́ благодея́нием твои́м, и испра́ви я́ по мно́жеству щедро́т твои́х: моли́твами пречи́стыя Влады́чицы на́шея Богоро́дицы, и Присноде́вы Мари́и: си́лою Честна́го и Животворя́щаго Креста́: предста́тельством превели́ких чинонача́льник михаи́ла и гаврии́ла, и все́х небе́сных си́л безпло́тных: честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных апо́стол: свята́го священному́ченика киприа́на: и́же во святы́х отца́ на́шего никола́а, архиепи́скопа мирлики́йскаго чудотво́рца, и все́х святы́х.

Я́ко ты́ еси́ благословля́яй, и освяща́яй вся́ческая Бо́же на́ш, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в, ами́нь.

Моли́тва ина́я:

Влады́ко Го́споди Бо́же на́ш, и́же в высо́ких живы́й, и на смире́нныя призира́яй: благослови́вый до́м лава́нов вхо́дом Иа́ковлим, и до́м пентефри́ин вхо́дом ио́сифовым: благослови́вый до́м ави́дов вхо́дом ковче́га: и́же вочелове́чением Христа́ твоего́, спасе́ние бы́в до́му закхе́ову: са́м благослови́ пе́щь сию́ и де́йствующыя ю́, твои́м стра́хом соблюди́, и невреди́мы и́х от сопротиволежа́щих сохрани́, и твое́ благослове́ние с высоты́ жили́ща твоего́ низпосли́ и́м, и благослови́, и умно́жи дела́ ру́к и́х, да всегда́ благода́рно сла́вим всесвято́е и́мя твое́, отца́, и Сы́на и Свята́го Ду́ха, ны́не и при́сно, и во ве́ки веко́в, ами́нь.

Та́же глаго́лет проше́ние:

Поми́луй на́с Бо́же, по вели́цей ми́лости твое́й, мо́лим ти ся, услы́ши и поми́луй.

Го́споди поми́луй, три́жды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии грехо́в рабо́в твои́х и́мярек, и о е́же благослови́тися и умно́житися дело́м ру́к тружда́ющихся о пе́щи се́й, мо́лим ти ся Го́споди, услы́ши и поми́луй.

Го́споди поми́луй, три́жды.

Услы́ши ны́ Бо́же спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй ны́: ми́лостив бо и человеколю́бец Бо́г еси́, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И окропля́ет пе́щь и су́щыя та́мо. Та́же твори́т отпу́ст.

Глава 12. Моли́тва на основа́ние до́му

Го́споду помо́лимся.

Бо́же вседержи́телю, сотвори́вый небеса́ ра́зумом, и основа́вый зе́млю на тве́рди ея́, созда́телю и соде́телю все́х, при́зри на раба́ твоего́ и́мярек, изво́лившаго в держа́ве кре́пости твоея́ воздви́гнути до́м в жили́ще, и зда́нием его́ воздви́гнути. Утверди́ его́ на тве́рдом ка́мени, и основа́й по твоему́ Боже́ственному ева́нгльскому гла́су, его́же ни ве́тр, ни вода́, ни и́но что́ повреди́ти возмо́жет: благоволи́ и в коне́ц привести́ся, и хотя́щих в не́м жи́ти от вся́каго наве́та сопроти́внаго свободи́.

Я́ко твоя́ держа́ва, и твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 13. Моли́тва, егда́ кто́ и́мать вни́ти в до́м но́в

Бо́же спаси́телю на́ш, изво́ливый под се́нь закхе́еву вни́ти, и спасе́ние тому́, и всему́ до́му того́ бы́вый: са́м и ны́не зде́ жи́ти восхоте́вшыя, и на́ми недосто́йными мольбы́ тебе́ и моле́ния принося́щыя, от вся́каго вре́да соблюди́ невреди́мы, благословля́я те́х зде́ жили́ще, и ненаве́тен те́х живо́т сохраня́яй.

Я́ко подоба́ет тебе́ вся́кая сла́ва, че́сть и поклоне́ние, со безнача́льным твои́м отце́м, и с пресвяты́м и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 14. Моли́тва о хра́мине, стужа́еме от злы́х духо́в

Го́споди Бо́же спасе́ния на́шего, Сы́не Бо́га жива́го, на херуви́мех носи́мый, превы́ше сы́й вся́каго нача́ла и вла́сти, и си́лы, и Госпо́дьства: ты́ еси́ ве́лий и стра́шный над все́ми су́щими о́крест тебе́: ты́ еси́ поста́вивый не́бо, я́ко кама́ру: ты́ еси́ сотвори́вый зе́млю в кре́пости твое́й, и испра́вивый вселе́нную в прему́дрости твое́й: трясы́й поднебе́сную от основа́ний, столпы́ же ея́ неподви́жны: глаго́ляй со́лнцу, и не возсия́ет, зве́зды же запечатле́яй: запреща́яй мо́рю, и изсуша́яй е́: его́же я́рость та́ет нача́ла и вла́сти, и ка́мение сотро́шася от Тебе́. врата́ ме́дная сте́рл еси́, и вереи́ желе́зныя сломи́л еси́: кре́пкаго связа́л еси́, и сосу́ды его́ раздра́л еси́: мучи́теля кресто́м твои́м низложи́л еси́, и зми́а у́дицею вочелове́чения твоего́ привле́кл еси́, и у́зами мра́ка в та́ртаре посади́в связа́л еси́. са́м у́бо Го́споди, утвержде́ние на тя́ наде́жду возлага́ющих, кре́пкая стено́ на тя́ упова́ющих, отступи́ти сотвори́, отжени́, и в бе́гство претвори́ вся́кое диа́вольское де́йство, и вся́кое сатани́нское нахожде́ние, вся́кий наве́т сопроти́вныя и належа́щия си́лы от кро́ва сего́, и от одержи́мых от него́, и от обходя́щих под ни́м, зна́мение стра́шныя на де́монов побе́ды креста́ твоего́ нося́щих, и призыва́ющих и́мя твое́ благо́е. е́й Го́споди, легео́на де́монов отгна́вый, и глухо́му и немо́му де́мону и нечи́стому ду́ху удержа́вшемуся, от челове́ка изы́ти и исхо́ду невозвра́тну бы́ти повеле́вый: все́ ополче́ние неви́димых враго́в на́ших потреби́вый, ве́рныя же и позна́вшыя тебе́ умудри́вый: се́ даю́ ва́м вла́сть, е́же попра́ти верху́ змие́в и скорпи́ев, и на всю́ си́лу вра́жию. са́м Влады́ко, вы́шши вся́каго вре́да и искуше́ния, вся́ су́щыя в дому́ се́м сохрани́, избавля́я и́х от стра́ха нощна́го, и стрелы́ летя́щия во дни́, от ве́щи во тьме́ преходя́щия, от сря́ща и де́мона полу́деннаго: да твои́ раби́, твоя́ рабы́ни и младе́нцы, твоея́ наслажда́ющеся по́мощи, и а́нгельским во́инством храни́ми, я́ко еди́н вси́ во единомы́слии ве́рно пою́т: Госпо́дь мне́ помо́щник, и не убою́ся, что́ сотвори́т мне́ челове́к? и па́ки: не убою́ся зла́, я́ко ты́ со мно́ю еси́.

Я́ко ты́ еси́ Бо́же утвержде́ние мое́, кре́пкий облада́тель, кня́зь ми́ра, оте́ц бу́дущаго ве́ка, и Ца́рство твое́ Ца́рство ве́чное: и тебе́ еди́наго е́сть Ца́рство, и си́ла, и сла́ва, со отце́м и святы́м ду́хом, ны́не и при́сно, и во ве́ки веко́в, ами́нь.

Глава 15. Моли́тва о копа́нии кла́дязя

Го́споди Бо́же на́ш вседержи́телю, и всеси́льне, творя́й вся́ и претворя́яй, то́чию е́же хоте́ти: и́же в непрохо́дных прохо́д обрета́яй неизрече́нною и непостижи́мою му́дростию: и́же от суха́го ка́мене во́дным пода́вый тещи́ пото́ком, и жа́ждущыя лю́ди твоя́ насы́тивый: са́м и ны́не Влады́ко все́х, услы́ши моле́ние на́с недосто́йных рабо́в твои́х, и да́руй на́м во́ду на се́м ме́сте, сла́дкую же и вку́сну, дово́льну у́бо к потре́бе невреди́тельную же ко прия́тию: я́ко да и в се́м сла́вим пресвято́е и великоле́пое и́мя твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 16. Моли́тва над кла́дязем но́вым

Зижди́телю во́д, и соде́телю все́х, Го́споди Бо́же вседержи́телю, вся́ сотвори́вый и претворя́яй, ты́ са́м освяти́ во́ду сию́: посли́ на ню́ святу́ю твою́ си́лу, на вся́ку сопроти́вну де́тель, и да́ждь все́м прие́млющым от нея́, пития́ ра́ди, или́ умове́ния ра́ди, здра́вие души́ и те́лу, на измене́ние вся́кия стра́сти, и вся́каго неду́га: я́ко да бу́дет исцеле́ния вода́ и поко́я, все́м прикаса́ющымся к не́й, и прие́млющым ю́.

Я́ко тебе́ подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Глава 17. Чи́н быва́емый, а́ще случи́тся чесому́ скве́рному якову́любо впа́сти в кла́дязь водны́й

Подоба́ет пе́рвее вы́черпати из кла́дязя ка́дей 40, и излия́ти во́н. Та́же возже́г свяще́нник свещы́, и взе́м кади́льницу, кади́т о́крест кла́дязя. Та́же влага́ет во́ду святы́х богоявле́ний крестови́дно, три́жды.

И та́ко ста́в к восто́ку, мо́лится глаго́ля:

Го́споду помо́лимся.

Го́споди Бо́же си́л, вся́ добра́ зело́ сотвори́вый, очища́яй и́менем твои́м вся́кую скве́рну и нечистоту́, и претвори́вый освяща́яй вся́: са́м и ны́не Влады́ко, прииди́ в настоя́щий ча́с о́бразом креста́ твоего́, и очи́сти кла́дязь се́й от обре́тшияся ему́ нечистоты́, и от впа́дшаго во́нь скве́рнаго, или́ га́да, снизходя́ несоверше́нней мы́сли на́шей, и не́мощи помышле́ний, и да не осу́диши на́с до́брых зело́ не вмеща́ющыя: но очи́сти на́с от вся́кия скве́рны пло́ти и ду́ха: и освяти́ во́ду сию́ ду́хом твои́м святы́м.

Я́ко ты́ еси́ освяще́ние на́ше, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Бо́же вели́кий и ди́вный, неисповеди́мою твое́ю бла́гостию, и бога́тым про́мыслом стро́яй челове́ческий живо́т, и мирска́я на́м дарова́вый блага́я твоя́: и́же го́рькую во́ду при моисе́и лю́дем в сла́дость претвори́вый, и вре́дныя во́ды при елиссе́и со́лию исцели́вый: и́же апо́столу твоему́ петру́ виде́нием законоположи́вый, ничто́же мне́ти скве́рно, или́ нечи́сто: са́м человеколю́бче, очи́сти во́ду сию́ знаменова́нием о́браза креста́ твоего́ от вся́кия скве́рны, и освяти́ ю́ ду́хом твои́м святы́м, во е́же бы́ти е́й чи́стей причаща́ющымся из нея́.

Я́ко ты́ еси́ Бо́г на́ш, благословля́яй и освяща́яй вся́ческая, и тебе́ сла́ву возсыла́ем, отцу́ и Сы́ну, и свято́му ду́ху, ны́не и при́сно, и во ве́ки веко́в, ами́нь.

И отпу́ст.

Глава 18. Моли́тва хотя́щему отити́ в пу́ть

Бо́же Бо́же на́ш, и́стинный и живы́й пу́ть, путеше́ствовавый со слуго́ю свои́м ио́сифом, спутеше́ствуй Влады́ко и рабу́ твоему́ и́мярек, и вся́каго обурева́ния и наве́та изба́ви, и ми́р и благомо́щие па́ки устро́й: вся́кия пра́вды про́мысл творя́ща по за́поведем твои́м, и испо́лнена жите́йских и небе́сных бла́г бы́вша, па́ки возврати́тися благоволи́.

Я́ко твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 19. Моли́тва умирева́ющая во вражде́ су́щих

Благодари́м тя́ Влады́ко человеколю́бче, Царя́ веко́в, и пода́теля благи́х, разруши́вшаго вражды́ средосте́ния, и ми́р пода́вшаго ро́ду челове́ческому, дарова́вшаго и ны́не ми́р рабо́м твои́м: вкорени́ в ни́х стра́х тво́й, и дру́г к дру́гу любо́вь утверди́: угаси́ вся́ку ра́спрю, отими́ вся́ разгла́сия собла́зны.

Я́ко ты́ еси́ ми́р на́ш, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Глава 20. Моли́тва запреща́тельная свята́го Васи́лиа, над стра́ждущими от де́монов

Трисвято́е. По О́тче на́ш: Го́споди поми́луй, 12. Прииди́те, поклони́мся:

Та́же глаго́лет моли́тву сию́:

Бо́г бого́в и Госпо́дь господе́й, о́гненных чино́в творе́ц и безпло́тных си́л хитре́ц, и небе́сных и наднебе́сных худо́жник, его́же не ви́де ни еди́н же от челове́к, ни ви́дети мо́жет, его́же убоя́ся вся́ тва́рь: разгорде́вшаго иногда́ архистрати́га, и с свое́ю его́ слу́жбою ослуша́нием отве́ргшася, све́ргий на зе́млю, и отсту́пльшыя с ни́м а́ггелы, бе́сы зло́бою бы́вшыя, во тьму́ глубины́ преиспо́дния преда́вый: да́ждь заклина́ние мое́, о стра́шном и́мени твое́м соверша́емо, гро́зно бы́ти ему́ влады́це лука́вствия, и все́м споспе́шником его́, спа́дшым с ни́м с вы́шния све́тлости, и обрати́ я́ на бежа́ние, и запове́ждь ему́ отити́ отту́ду, дабы́ ктому́ ничто́же вре́дно во о́бразех знаменова́емых соде́ял: но да прии́мут кре́пость себе́ знаменова́емии держа́вную, наступа́ти на змию́, и на скорпи́ю, и на всю́ си́лу вра́жию, и́мже еси́ повеле́л. Твое́ бо пое́тся и велича́ется от вся́каго дыха́ния и сла́вится со стра́хом пресвято́е и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 21. Чи́н быва́емый, а́ще случи́тся чесому́ скве́рному или́ нечи́стому но́во впа́сти в сосу́д вина́, или́ еле́а, или́ ме́да, или́ ино́го чесого́

Подоба́ет впа́дшее нечи́стое а́бие взя́ти, и изврещи́ во́н, и во и́н сосу́д вложи́ти вино́, или́ еле́й: истоще́нный же сосу́д мы́ти отвну́трь и отвне́. Свяще́ннику же взе́мшу кади́льницу, по е́же кади́ти измове́нный сосу́д отвну́трь, вложи́ти во́нь во́ду святы́х богоявле́ний, творя́щу креста́ о́браз, три́жды: та́же вложи́ти во́нь вино́ или́ еле́й, и покади́в мо́лится си́це:

Го́споду помо́лимся. Го́споди поми́луй.

Святы́й Го́споди Бо́же на́ш, и́же твои́м благоутро́бным прише́ствием вся́кую нечистоту́ вра́жию упраздни́вый, повеле́вый не входя́щым скверни́ти челове́ка, но вся́ чи́ста бы́ти чи́стым: и́же сосу́дом избра́нным твои́м апо́столом научи́вый на́с, все́м созда́нным тобо́ю до́брым бы́ти ве́ровати, и ничто́же отме́тно мне́ти, Боже́ственным сло́вом и моли́твою к тебе́ освяща́емое: са́м благослови́ вино́ сие́, [или́ еле́й, или́ и́но что́ а́ще бу́дет, зде́ имену́й] твое́ю благода́тию и лия́нием святы́я воды́, вся́кую скве́рну, или́ сумне́ние от впа́дшаго во́нь га́да ко́знию лука́ваго, отжени́ от мы́сли рабо́в твои́х, во е́же бы́ти все́м употребля́ющым е́ в весе́лие, дая́й все́м из него́ причаща́ющымся во освяще́нии, и в чи́стой со́вести приступа́ти к пречи́стым твои́м та́йнам.

Я́ко ты́ еси́ благословля́яй и освяща́яй вся́ческая, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в, ами́нь.

Та́же вкуша́ет пе́рвее свяще́нник из него́, и дае́т и́ до́му господи́ном. А́ще же случи́тся впа́дшему нечи́стому закосне́вшему в сосу́де вина́, или́ еле́а, согни́ти, подоба́ет излия́ти сия́, вино́ или́ еле́й, и ничесому́же си́х прикаса́тися.

Глава 22. Чи́н быва́емый на ни́вах, или́ виногра́де, или́ вертогра́де, а́ще случи́тся вреди́тися от гадо́в, или́ ины́х ви́дов

Подоба́ет бы́ти литурги́и, и вжига́ти канди́ло свята́го три́фона, или́ свята́го евста́фиа, или́ свята́го иулиа́на ливи́йскаго, или́ обои́х. По Боже́ственней литурги́и взя́ти еле́й от канди́л, и во́ду святы́х богоявле́ний, и кропля́яй крестови́дно свяще́нник. на ни́ву, или́ виногра́д, или́ вертогра́д, глаго́лет моли́твы сия́.

Го́споду помо́лимся.

Го́споди Бо́же на́ш, в нача́ле созда́ния твоего́ сотвори́вый не́бо и зе́млю: и не́бо у́бо украси́вый вели́кими свети́лы, е́же просвеща́ти на земли́, и чуди́тися те́ми тебе́ еди́ному соде́телю и Влады́це тва́ри: зе́млю же украси́вый зла́ком и траво́ю, и разли́чием се́мен се́емых по ро́ду, и всю́ цве́ты вообрази́в в благоукраше́ние, благослови́л еси́ ю́: са́м и ны́не Влады́ко, при́зри от свята́го жили́ща твоего́ на стяжа́ние сие́: и благослови́ е́. сохрани́ е́ неврежде́нно от вся́каго чарова́ния и обая́ния, и вся́каго зла́, опла́знства же лука́ваго, и кова́рства лука́вых челове́к: и да́ждь ему́ приноси́ти плоды́ во вре́мя, испо́лнены благослове́ния твоего́, и вся́каго зве́рия и га́да, че́рвь же и му́хи, и ржу́, зно́й и ва́р, и безго́дныя ве́тры, вре́д нанося́щыя, отжени́ от него́.

Я́ко освяти́ся и просла́вися пречестно́е и великоле́пое и́мя твое́, отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Заклина́ние свята́го му́ченика Три́фона.

Ве́ждь же, о иере́ю, я́ко не вся́ живо́тная зде́ именова́нная прочести́ досто́ит, но то́чию тогда́ врежда́ющыя.

Заклина́ю ва́с многови́днии зве́рие, че́рвие, гу́сеницы, хрущи́ и пру́зи, мы́ши, щу́ры и кри́тицы, и разли́чныя ро́ды му́х, и му́шиц, и мо́лий, и мра́вий, о́вадов же и о́с, и многоно́жиц, и многообра́зныя ро́ды по́лзающих по земли́ живо́тных, и лета́ющих пти́ц, вре́д и тщету́ ни́вам, виногра́дом, садо́м же и вертогра́дом нанося́щыя, бо́гом отце́м безнача́льным, и Сы́ном его́ собезнача́льным и единосу́щным, и ду́хом его́ пресвяты́м, отцу́ и Сы́ну единосу́щным, и животворя́щим. Заклина́ю ва́с вочелове́чением единоро́днаго Сы́на Бо́жия, Го́спода на́шего Иису́са Христа́, и пожи́тием его́ на земли́ с челове́ки, стра́стию же его́ спаси́тельною, и животворя́щею его́ сме́ртию, и тридне́вным его́ воскре́снием, и на небеса́ вознесе́нием, и все́м его́ Боже́ственным спаси́тельным смотре́нием. Заклина́ю ва́с и святы́ми многоочи́тыми херуви́мы, шестокрила́тыми серафи́мы лета́ющими о́крест Престо́ла, и зову́щими: свя́т, свя́т, свя́т, Госпо́дь савао́ф. Заклина́ю ва́с святы́ми а́нгелы, и все́ю си́лою, и ты́сящами ты́сящ, и тьма́ми те́м, стра́хом мно́гим стоя́щими пред сла́вою Госпо́днею, да не оби́дите виногра́д, ниже́ ни́ву, ниже́ вертогра́д, древе́с же и зе́лий раба́ Бо́жия и́мярек, но отиди́те на ди́вия го́ры, на непло́дная древеса́, на ни́хже дарова́л е́сть Бо́г ва́м повседне́вную пи́щу. Заклина́ю ва́с и честны́м те́лом и кро́вию Го́спода на́шего Иису́са Христа́, и́стиннаго Бо́га и спа́са на́шего, и́мже и спасе́ние даде́ся на́м и избавле́ние, за его́же и́мя и́мамы умре́ти, да не оби́дите ниже́ ни́ву, ниже́ виногра́д, ниже́ вертогра́д, ниже́ вся́кое дре́во плодови́тое, и безпло́дное: и ниже́ ли́ст зе́лий да не оби́дите от окруже́ния преде́ла, и ме́ста раба́ Бо́жия и́мярек. А́ще же преслуша́ете мене́, и преступите́ кля́тву, е́юже заклина́х ва́с, не и́мате ко мне́ смире́нному и мале́йшему три́фону, но к Бо́гу Аавраа́ма, и Исаа́ка, и Иа́кова, гряду́щему суди́ти живы́м и ме́ртвым: те́мже я́коже предре́х ва́м, иди́те на ди́вия го́ры, на безпло́дная древа́. А́ще же не послу́шаете мене́, моли́ти и́мам человеколю́бца Бо́га, е́же посла́ти а́нгела своего́, и́же над зверьми́, и желе́зом и свинцо́м свя́жет ва́с, и убие́т, зане́ кля́тв и моли́тв мене́ смире́ннаго отверго́стеся три́фона: но и пти́цы посыла́емыя мое́ю моли́твою да снедя́т ва́с. Еще́ заклина́ю ва́с вели́ким и́менем, на ка́мени напи́санным, и не носи́вшем, но разсе́дшемся я́ко во́ск от лица́ огня́: изыди́те от ме́ст на́ших на места́, я́же предре́х ва́м, непроходи́мая и безво́дная, и непло́дная, изыди́те от ме́ста и о́крест преде́л рабо́в Бо́жиих, и мене́ призыва́ющих в по́мощь свою́, и заступле́ние и спасе́ние, да и в си́х сла́вится пресвято́е и́мя Отца́, и Сы́на, и Свята́го Ду́ха, и моли́твы и проше́ния, смире́ннаго три́фона да испо́лнятся, я́ко Бо́гу подоба́ет сла́ва и держа́ва во ве́ки веко́в, ами́нь.

Свяще́нник: Ми́р все́м.

Ли́к: И ду́хови твоему́.

Свяще́нник: Главы́ ва́шя Го́сподеви приклони́те.

Ли́к: Тебе́ Го́споди.

Свяще́нник же чте́т моли́тву сию́ велегла́сно:

Влады́ко Го́споди Бо́же на́ш, плотски́м твои́м смотре́нием благослови́вый вифлее́м, и гефсима́нию, и иногда́ до́м Иа́ковль, и́же и благослове́н бы́в изра́иль преименова́ся: и́же и до́м аведа́риин и Дави́дов благослови́вый, са́м благослови́ и стяжа́ние сие́, и сотвори́ е́ о благослове́нии плодоноси́ти: моли́твами пречи́стыя Влады́чицы на́шея Богоро́дицы, и Присноде́вы Мари́и. си́лою Честна́го и Животворя́щаго Креста́: честна́го, сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол: святы́х добропобе́дных му́ченик: святы́х сла́вных великому́ченик, три́фона, евста́фиа и иулиа́на: и свята́го и́мярек, его́же дне́сь па́мять соверша́ем, и все́х твои́х святы́х.

Я́ко ты́ еси́ благословля́яй и освяща́яй вся́ческая, и тебе́ сла́ву возсыла́ем, со безнача́льным твои́м отце́м и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 23. Моли́тва о скве́рно я́дших

Влады́ко Го́споди Бо́же на́ш, и́же в вы́шних живы́й и на смире́нныя призира́яй: и́же во святы́х почива́яй, хвало́ изра́илева, приклони́ у́хо твое́, и услы́ши на́с моля́щихся тебе́: и пода́ждь проще́ние твоему́ рабу́ [или́ твое́й рабе́] и́мярек, скве́рно я́дшему и вку́сшему [или́ я́дшей и вку́сшей] мя́с, или́ каковы́хлюбо бра́шен не чи́стых, и́хже сне́ди отре́кл еси́ в зако́не святе́м твое́м, си́х же нево́лею причасти́вшагося [или́ причасти́вшуюся] прости́: и сподо́би его́ [или́ ю́] неосужде́нно причасти́тися стра́шных та́инств, честна́го те́ла же и кро́ве Христа́ твоего́, я́ко да изба́вится про́чее вся́каго нечи́стаго восприя́тия и дея́ния: и я́ко да напитова́яся Боже́ственными твои́ми та́инствы, и наслажда́яся святы́я твоея́ и та́йныя трапе́зы, и безсме́ртных та́инств, и сохраня́емый с на́ми во святе́й твое́й це́ркви, восхва́лит и просла́вит и́мя твое́ вы́шнее во вся́ дни́ живота́ своего́.

Я́ко твое́ е́сть Ца́рство, и си́ла, и сла́ва, отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава 24. Моли́тва над сосу́дом оскве́рншимся

Подоба́ет измы́ти, и влага́емей святе́й воде́ крестови́дно, глаго́лати и моли́тву сию́:

Го́споду помо́лимся.

Го́споди Бо́же на́ш, еди́не свя́те, освяти́ сосу́д се́й освяти́тельным твои́м наи́тием, и очи́сти и́, е́же бы́ти в слу́жбу рабо́в твои́х нескве́рну, и да́ждь на́м всегда́ во святы́ни моли́тися во святы́х твои́х це́рквах, я́ко да тобо́ю всегда́ храни́ми, сла́ву и поклоне́ние тебе́ возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Глава 25. Моли́тва над пшени́цею оскве́рншеюся, или́ муко́ю или́ ви́дом не́киим

Го́споду помо́лимся.

Го́споди Бо́же на́ш, и́же в смотре́нии твое́м, е́же по пло́ти, повеле́вый не входя́щым скверни́ти челове́ка, но вся́ чи́ста бы́ти чи́стым: и́же сосу́дом избра́нным па́влом твои́м апо́столом научи́вый на́с ве́ровати, вся́ тобо́ю созда́нна добра́ бы́ти, Боже́ственным сло́вом, и е́же к тебе́ моли́твою освяща́емая: са́м и ны́не Влады́ко, состражда́яй не́мощем на́шым, благослови́ пшени́цу сию́ твое́ю благода́тию и человеколю́бием, благослове́нием, и окропле́нием воды́ сея́, о и́мени твое́м освяще́нныя, и вся́кую скве́рну, или́ сумне́ние от впа́дшаго в ню́ нечи́стаго ко́знию диа́волею, отжени́ от мы́сли рабо́в твои́х, и да́ждь и́м наде́ждею я́же в тя́, и увере́нием твои́х щедро́т, сея́ причасти́тися прича́стия, во благодаре́ние свята́го твоего́ и́мене неосужде́нным сохрани́тися.

Я́ко ты́ еси́ благословля́яй и освяща́яй вся́ческая, и тебе́ сла́ву возсыла́ем со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Глава 26. Чи́н быва́емый при основа́нии Це́ркве и водруже́нии Креста́

Ве́стно бу́ди, я́ко це́рковь никто́же мо́жет основа́ти, ниже́ ка́менную, ниже́ древя́ную, кроме́ сама́го епи́скопа, или́ осо́бнаго его́ на сие́ благослове́ния чрез протоиере́я, или́ еди́наго от иере́й, его́же о́н изво́лит посла́ти. А́ще же кто́ де́рзнет без благослове́ния епи́скопа нача́ти це́рковь зда́ти, изверже́нию подлежа́ти бу́дет, я́ко презри́тель епи́скопской вла́сти.

Сие́ же основа́ние быва́ет си́це: а́ще ка́менная созида́тися и́мать це́рковь, выко́пывлются рвы́ на то́м ме́сте, иде́же основа́ние и́мать бы́ти, уготовля́ются же ка́мни и ме́л, и на еди́ном четвероуго́льном ка́мне изъобража́ется или́ изсека́ется кре́ст, под кресто́м же [а́ще епи́скоп, или́ его́ наме́стник изво́лит] изготовля́ется ме́сто для вложе́ния святы́х моще́й, и полага́ется надписа́ние сицево́е:

Во и́мя отца́ и Сы́на и Свята́го Ду́ха, основа́ся сия́ це́рковь в че́сть и па́мять [имену́ется и́мя пра́здника или́ свята́го храмова́го] при держа́ве благочести́вейшаго, самодержа́внейшаго, вели́каго госуда́ря на́шего импера́тора [и́мя его́] при святи́тельстве же преосвяще́ннейшаго [и́мя епи́скопа и гра́да его́] и положены́ су́ть мо́щи свята́го [и́мя его́]: в ле́то от сотворе́ния ми́ра [тако́е-то], от рождества́ же по пло́ти Бо́га сло́ва [число́ го́да, ме́сяц и де́нь].

Ве́стно же бу́ди, я́ко и кроме́ моще́й свята́го и надписа́ния сицева́го положи́тися основа́ние хра́ма мо́жет, но кроме́ предрече́ннаго четвероуго́льнаго ка́мене не быва́ет. К сему́ же предъугото́влен быва́ет кре́ст древя́ный вели́кий, и ме́сто, иде́же престо́л и́мать бы́ти, ро́в, во е́же бы водрузи́ти в не́м о́ный кре́ст.

А́ще же древя́ная и́мать бы́ти це́рковь, рво́в не быва́ет, то́чию еди́н под стено́ю олта́рною к восто́ку для положе́ния четвероуго́льнаго ка́мене, и други́й для постановле́ния креста́, на ме́сте иму́щаго бы́ти престо́ла. Приуготовля́ются же и бре́вна, или́ древа́, на ни́хже це́рковь стоя́ти и́мать. Си́м же си́це предъугото́вленным бы́вшым, святи́тель или́ наме́стник его́, в це́ркви ближа́йшей от ме́ста о́наго, иде́же основа́ние бы́ти и́мать, оде́явся во вся́ святи́тельская [а́ще же свяще́нник, в свяще́нническая] одея́ния, исхо́дит со все́м кли́ром, предъиду́щым ему́ диа́коном с кади́льницами, иере́ем же со кресты́, два́ два́, кли́рицы же пою́т стихи́ры лити́йны хра́му бу́дущей це́ркви.

Прише́дше же на ме́сто, полага́ют на предъугото́вленном та́мо столе́ свято́е Ева́нглие и Кре́ст, и взе́м настоя́тель кади́льницу, и покади́в е́ю сто́л крестообра́зно три́жды, возгласи́вшу диа́кону:

Благослови́ Влады́ко, начина́ет обы́чно:

Благослове́н Бо́г на́ш:

Ли́к пое́т: Царю́ небе́сный: и доне́леже око́нчится пе́ние, стои́т нача́льствуяй пред святы́м ева́нглием, кадя́ сие́. Пото́м кади́т вся́ рвы́, иде́же основа́ние бы́ти и́мать, наче́н от пе́рвыя стены́ олтаре́вы и иды́й проти́во со́лнцу о́крест, до́ндеже прии́дет отню́дуже нача́. И посе́м кади́т кли́р и лю́ди, и па́ки свято́е Ева́нглие.

Чте́ц же чте́т Трисвято́е. И по О́тче на́ш: Прииди́те, поклони́мся: три́жды, и псало́м 142:

Го́споди, услы́ши моли́тву мою́: Сла́ва, и ны́не: Аллилу́иа, три́жды.

Диа́кон же ектению́ сию́:

Ми́ром Го́споду помо́лимся.

О свы́шнем ми́ре, и спасе́нии ду́ш на́ших, Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й, и соедине́нии все́х, Го́споду помо́лимся.

О святе́м хра́ме се́м, и с ве́рою, благогове́нием, и стра́хом Бо́жиим входя́щих во́нь, Го́споду помо́лимся.

О святе́йшем прави́тельствующем Сино́де, [и о епи́скопе на́шем и́мярек, его́же о́бласть,] честне́м пресви́терстве, во Христе́ диа́констве, о все́м при́чте и лю́дех, Го́споду помо́лимся.

О вели́ком господи́не и отце́ на́шем святе́йшем патриа́рхе Кири́лле, и о господи́не и отце́ на́шем блаже́ннейшем митрополи́те Влади́мире, и о преосвяще́ннейшем митрополи́те [или архиепи́скопе, или епи́скопе] имярек, и о все́й во Христе́ бра́тии на́шей.

О пособи́ти и покори́ти под но́зе и́х вся́каго врага́ и супоста́та, Го́споду помо́лимся.

О гра́де се́м, [а́ще в монастыре́: о святе́й оби́тели се́й,] вся́ком гра́де, стране́, и ве́рою живу́щих в ни́х, Го́споду помо́лимся.

О благорастворе́нии возду́хов, о изъоби́лии плодо́в земны́х, и вре́менех ми́рных, Го́споду помо́лимся.

О пла́вающих, путеше́ствующих, неду́гующих, стра́ждущих, плене́нных, и о спасе́нии и́х, Го́споду помо́лимся.

О е́же призре́ти ми́лостивно на ме́сто сие́ к созда́нию на не́м це́ркве, в сла́ву Пресвята́го и́мене его́ избра́нное, и благослове́нием свои́м небе́сным благослови́ти е́, Го́споду помо́лимся.

О е́же благослови́ти до́брое сие́ наме́рение, и де́ло рабо́в свои́х [или́ раба́ своего́ и́мярек: и помина́ет кти́торов хра́ма], Го́споду помо́лимся.

О е́же благослови́ти нача́ток основа́ния зда́ния сего́, и благополу́чно в сла́ву и́мене своего́ нача́лу его́ положи́тися и спе́шно в соверше́ние кроме́ вся́каго препя́тия произвести́ся, си́лою, де́йством и благода́тию Пресвята́го Ду́ха, Го́споду помо́лимся.

О е́же тружда́ющымся де́лателем благопоспе́шество во все́м пода́ти, и дела́ ру́к и́х испра́вити, и в соверше́ние си́лою, де́йством и благода́тию Пресвята́го Ду́ха спе́шно произвести́, Го́споду помо́лимся.

О е́же благо́му сему́ тща́нию рабо́в свои́х [или́ раба́ своего́] и́мярек, благопоспе́шество со вся́ким дово́льством, си́лою, де́йством и благода́тию Пресвята́го Ду́ха пода́ти, Го́споду помо́лимся.

О е́же приста́вити де́лу сему́, и де́лателем его́ а́нгела своего́ храни́теля, е́же неви́димо отрази́ти вся́ сопроти́вныя наве́ты ви́димых и неви́димых враго́в, и во все́м благопоспе́шество, к сооруже́нию же му́дрость, и к соверше́нию си́лу, си́лою, де́йством и благода́тию Пресвята́го Ду́ха пода́ти, Го́споду помо́лимся.

О е́же изба́витися на́м от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ на́с Бо́же твое́ю благода́тию.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу, и Присноде́ву мари́ю, со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́ Го́споди.

Настоя́тель же возглаша́ет:

Я́ко подоба́ет тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

По возгла́се же пою́т:

Бо́г Госпо́дь, и яви́ся на́м:

А́ще хра́м Госпо́дский бы́ти и́мать, на гла́с тропаря́ пра́здничнаго, по пра́здничном же, на Сла́ве пое́м основа́нию, И ны́не, пра́зднику.

А́ще же не Госпо́дский, то тропа́рь се́й основа́нию, гла́с 2-й:

Тво́рче и созда́телю вся́ческих Бо́же, де́ло ру́к на́ших, к сла́ве твое́й начина́емое, твои́м благослове́нием спе́шно испра́ви, и си́лою твое́ю в соверше́ние ско́ро произведи́, я́ко еди́н всеси́лен и человеколю́бец.

А́ще же богоро́дичен и́мать бы́ти хра́м, пое́тся два́жды тропа́рь основа́нию, повторя́юще на: Сла́ве то́йже хра́му. А́ще же ина́го ко́его от святы́х, пе́рвее пое́м тропа́рь основа́нию, на Сла́ве же свято́му: И ны́не, богоро́дичен по гла́су тропаря́ свята́го.

По тропаре́х же а́бие чте́тся псало́м 50:

Поми́луй мя́ Бо́же:

Прино́сятся же и поставля́ются на столе́ два́ сосу́да, еди́н с водо́ю чи́стою, други́й с еле́ем.

По сконча́нии псалма́, пою́т три́жды тропа́рь се́й, гла́с 6-й:

С небесе́ посли́ благода́ть, жизнода́вче, и во́ду сию́ освяти́, и все́м скве́рнам яви́ ю́ бы́ти очище́ние.

Ре́кшу же диа́кону: Го́споду помо́лимся.

И ли́ку: Го́споди поми́луй.

Настоя́тель чте́т над водо́ю моли́тву сию́:

Бо́же великоимени́тый, о́тче Го́спода на́шего Иису́са Христа́, творя́й чудеса́ еди́н, и́мже не́сть числа́: его́же гла́с на вода́х мно́гих, его́же ви́девше во́ды убоя́шася, и смято́шася бе́здны и мно́жество шу́ма во́д: его́же путие́ в мо́ри, и стези́ в вода́х мно́гих, и стопы́ твоя́ не позна́ются: и́же креще́нием единоро́днаго Сы́на твоего́ воплоще́ннаго, и сни́тием на́нь Пресвята́го Ду́ха в виде́нии го́лубя, и твои́м оте́ческим гла́сом иорда́нския струи́ освяти́л еси́: тебе́ ны́не смире́нно недосто́йнии раби́ твои́ мо́лим и ми́ли ся де́ем, посли́ благода́ть Пресвята́го Ду́ха на во́ду сию́, и небе́сным твои́м благослове́нием благослови́, очи́сти и освяти́ ю́, и да́руй е́й благода́ть и благослове́ние иорда́ново, и си́лу вся́ скве́рны очища́ющую, и вся́к неду́г исцеля́ющую, и бесо́в и все́х наве́тов и ко́зней и́х прогони́тельную. И яви́ ю́ си́лою, де́йством и благода́тию Пресвята́го Ду́ха, бы́ти все́м от нея́ с ве́рою пию́щым, прие́млющым же и кропя́щымся рабо́м твои́м, грехо́в оставле́ние, измене́ние страсте́м, прогна́ние вся́каго зла́, умноже́ние доброде́телей, боле́знем исцеле́ние, домово́м же и вся́кому ме́сту освяще́ние и благослове́ние, губи́тельных и вся́ких злотво́рных возду́хов отгна́ние, и благода́ти твоея́ присвое́ние. я́ко ты́ еси́ благословля́яй и освяща́яй вся́ческая, Бо́же на́ш, и тебе́ сла́ву возсыла́ем со единоро́дным твои́м Сы́ном, и с пресвяты́м и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Приклони́ Го́споди у́хо твое́ и услы́ши мя́, во́ды иорда́нския явле́нием Христа́ твоего́ освяти́вый, и благослови́ все́х на́с, преклоне́нием своея́ вы́и зна́менающих тебе́ повинове́ние, и сподо́би на́с испо́лнитися твоего́ освяще́ния воды́ сея́ прия́тием, и да бу́дет на́м в здра́вие душа́м же и те́лом.

И возглаша́ет:

Ты́ бо еси́ освяще́ние на́ше, и тебе́ сла́ву возсыла́ем, со единоро́дным твои́м Сы́ном, и с пресвяты́м и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Настоя́тель же взе́м кре́ст, погружа́ет его́ в воде́ крестообра́зно, поя́ тропа́рь, гла́с 1-й:

Спаси́ Го́споди лю́ди твоя́, и благослови́ достоя́ние твое́, побе́ды благове́рному импера́тору на́шему никола́ю алекса́ндровичу на сопроти́вныя да́руя, и твое́ сохраня́я кресто́м твои́м жи́тельство. [Три́жды.]

Посе́м благословля́ет еле́й десни́цею три́жды, глаго́ля:

Во и́мя Отца́, и Сы́на, и Свята́го Ду́ха, ами́нь.

Ре́кшу же диа́кону: Го́споду помо́лимся.

И кли́ру: Го́споди поми́луй.

Чте́т моли́тву сию́:

Го́споди Бо́же оте́ц на́ших, ему́же излия́ние еле́а, е́же излия́ Иа́ков на ка́мень, его́же поста́ви в сто́лп, и до́м Бо́жий нарече́, благоуго́дно и прия́тно бы́сть: при́зри, мо́лим ти ся, и ны́не ми́лостивно на еле́й се́й, и небе́сным твои́м благослове́нием благослови́ и освяти́ его́, и да́ждь ему́ си́лу благода́тию Пресвята́го твоего́ ду́ха, во е́же бы все́ те́м в сла́ву твою́ помазу́емое освяще́нно и благослове́нно, и тебе́ благоуго́дно и прия́тно бы́ло: щедро́тами единоро́днаго Сы́на твоего́, с ни́мже благослове́н еси́, с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Настоя́тель же а́бие взе́м свяще́нную во́ду, кропи́т е́ю ме́сто, иде́же кре́ст водруже́н и́мать бы́ти, глаго́ля:

Благоволи́ Го́споди Иису́се Христе́ Бо́же на́ш, зна́мением стра́шным и си́лою креста́ твоего́ огради́тися ме́сту сему́, в сла́ву тебе́ распя́таго Бо́га на́шего, и твоего́ безнача́льнаго отца́, и Пресвята́го твоего́ ду́ха: и а́ггел всегуби́тельный, и вся́ сопроти́вныя си́лы да отсту́пят от него́. Я́ко твоя́ е́сть держа́ва, и твое́ е́сть Ца́рство, и си́ла вели́каго Бо́га и спа́са на́шего Иису́са Христа́, ны́не и при́сно, и во ве́ки веко́в, ами́нь.

Свяще́нницы же взе́мше кре́ст, водружа́ют его́ в предъугото́вленное ме́сто, вку́пе с настоя́телем, пою́ще тропа́рь се́й, гла́с 2:

Кресту́ водрузи́вшуся на земли́ низпаде́ и отню́д потреби́ся шата́ние враго́в: пре́жде же отринове́нный челове́к в ра́й па́ки вхо́дит: но сла́ва тебе́ еди́ному Бо́гу на́шему, си́це благоизво́лившему.

Посе́м пою́т конда́к основа́нию, гла́с 6:

Ско́рый в заступле́ние и кре́пкий в по́мощь, предста́ни благода́тию си́лы твоея́ ны́не, и благослови́в укрепи́, и в соверше́ние благо́е дела́ рабо́в твои́х произведи́: вся́ бо ели́ка хо́щеши, я́ко всеси́льный Бо́г, твори́ти мо́жеши.

Сла́ва, и ны́не: Предста́тельство Христиа́н:

Ре́кшу же диа́кону: Го́споду помо́лимся, настоя́тель чте́т моли́тву сию́ пред водруже́нным кресто́м, зря́ на восто́к:

Го́споди Бо́же вседержи́телю прообрази́вый жезло́м моисе́овым честны́й и животворя́щий кре́ст возлю́бленнаго Сы́на твоего́, Го́спода на́шего Иису́са Христа́, са́м благослови́ и освяти́ ме́сто сие́, си́лою и де́йством честна́го и животворя́щаго дре́ва о́наго кре́стнаго, [е́же снабди́ окропле́нием честны́я кро́ве Сы́на твоего́,] в отгна́ние бесо́в и вся́каго сопротивле́ния, сохраня́я ме́сто сие́ и на не́м тебе́ служа́щих от вся́каго зла́ невре́дны, моли́твами пресла́вныя Влады́чицы на́шея Богоро́дицы и Присноде́вы Мари́и, [зде́ помина́ет и свята́го, его́же и́мать бы́ти хра́м].

Я́ко благослови́ся и просла́вися Ца́рство твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Ли́к: Ами́нь.

Посе́м и́дет настоя́тель к ро́ву, иде́же основа́ние положено́ и́мать бы́ти: четвероуго́льный же приугото́вленный ка́мень полага́ется пред ни́м на столе́, и пое́тся кли́ром псало́м 83:

Ко́ль возлю́бленна селе́ния твоя́ Го́споди си́л! Жела́ет и скончава́ется душа́ моя́ во дворы́ Госпо́дни: се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́: олтари́ твоя́ Го́споди си́л, Царю́ мо́й и Бо́же мо́й. Блаже́ни живу́щии в дому́ твое́м. в ве́ки веко́в восхва́лят тя́. Блаже́н му́ж, ему́же е́сть заступле́ние его́ у тебе́, восхожде́ния в се́рдце свое́м положи́, Во юдо́ль плаче́вную, в ме́сто, е́же положи́, и́бо благослове́ние да́ст законополага́яй. По́йдут от си́лы в си́лу, яви́тся Бо́г бого́в в сио́не. Го́споди Бо́же си́л, услы́ши моли́тву мою́, внуши́ Бо́же Иа́ковль. Защи́тниче на́ш, ви́ждь Бо́же, и при́зри на лице́ христа́ твоего́. Я́ко лу́чше де́нь еди́н во дво́рех твои́х, па́че ты́сящ: изво́лих примета́тися в дому́ Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бо́г благода́ть и сла́ву да́ст: Госпо́дь не лиши́т благи́х, ходя́щих незло́бием. Го́споди Бо́же си́л, блаже́н челове́к упова́яй на тя́.

Сла́ва, и ны́не: Аллилу́иа, три́жды.

Диа́кону же ре́кшу: Го́споду помо́лимся.

И кли́ру: Го́споди поми́луй.

Чте́т настоя́тель над ка́менем моли́тву сию́:

Го́споди Иису́се Христе́, Сы́не Бо́га жива́го, и́стинный Бо́же, сия́ние и о́бразе безнача́льнаго отца́, и животе́ ве́чный: краеуго́льный сы́й ка́мень, от пречи́стыя деви́ческия горы́ без ру́к му́жескаго се́мене отсе́ченныя, и непозы́блемое своея́ це́ркве основа́ние: и́же излия́нием честны́я твоея́ кро́ве свою́ це́рковь основа́л еси́, сме́ртию же воздви́гл, воскре́снием соверши́л, вознесе́нием благослови́л, соше́ствием же свята́го твоего́ ду́ха освяти́л и разшири́л ю́ еси́: тебе́ ны́не смире́нно мо́лим, посли́ благода́ть свята́го твоего́ ду́ха, и благослови́ положе́ние ка́мене сего́, и все́ основа́ние начина́ющагося зда́ния, в сла́ву Пресвята́го твоего́ и́мене, [а́ще е́сть Госпо́дский пра́здник глаго́лет: ] в че́сть же и па́мять свята́го твоего́ [Рождества́ или́ ина́го, или́ Успе́ния Пречи́стыя Твоея́ Ма́тере, или́ ина́го ея́ пра́здника, или́ свята́го, имену́я и́мя его́] и ты́, и́же еси́ а́лфа и оме́га, нача́ло и коне́ц, и́же искони́ вся́ческая созда́, бу́ди нача́ло, умноже́ние и соверше́ние де́лу сему́, кти́торов же и де́лателей благослови́, и де́лу ру́к и́х поспеши́, и вся́ потре́бная к сооруже́нию и соверше́нию хра́ма сего́ твои́м Боже́ственным про́мыслом изъоби́льно умно́жи: я́ко да бу́дет хра́м соверше́н и по́лн твоея́ сла́вы, и в не́м просла́вится твое́ пресвято́е и вели́кое и́мя со отце́м и пресвяты́м ду́хом, благослове́но су́щее всегда́ ны́не и при́сно, и во ве́ки веко́в.

Ли́к: Ами́нь.

Нача́льствуяй же, взе́м свяще́нную во́ду, кропи́т е́ю ка́мень, глаго́ля:

Благословля́ется ка́мень се́й окропле́нием свяще́нныя воды́ сея́ в непоколеби́мое основа́ние хра́ма, созида́емаго во и́мя Отца́, и Сы́на, и Свята́го Ду́ха, ами́нь.

А́бие же, а́ще хо́щет в ка́мень вложи́ти мо́щи святы́х, проче́т надписа́ние еди́н от иере́й, влага́ет мо́щи в предъугото́вленное в ка́мени о́ном ме́сто, глаго́ля:

Хвали́те Бо́га во святы́х его́, хвали́те его́ во утверже́нии си́лы его́: я́ко восхва́лятся преподо́бнии во сла́ве, и возра́дуются на ло́жах свои́х.

И сия́ ре́к, покрыва́ет я́. А́ще у́бо не су́ть мо́щи, ничто́же от си́х твори́т, но взе́м ка́мень настоя́тель свои́ма рука́ма, полага́ет его́ на пригото́вленной и́звести в ро́ве, глаго́ля:

Осно́вывается це́рковь сия́ в сла́ву вели́каго Бо́га и спа́са на́шего Иису́са Христа́, в че́сть и па́мять [и́мя пра́здника его́ или́ богоро́дична, или́ свята́го храмова́го] во и́мя Отца́, и Сы́на, и Свята́го Ду́ха, ами́нь.

Взе́м же и еле́й глаго́лет:

Вы́шний основа́ сию́ це́рковь, Бо́г посреде́ ея́, и не подви́жится, помо́жет е́й Бо́г у́тро зау́тра.

И возлива́ет еле́й на положе́нный ка́мень, глаго́ля:

Благослове́но и зна́менано бу́ди ме́сто сие́ в до́м моли́твенный, в че́сть и сла́ву Бо́га, в Тро́ице святе́й сла́вимаго, Отца́, и Сы́на, и Свята́го Ду́ха, ами́нь.

Посе́м со все́м кли́ром пое́т сие́, гла́с 6:

Воста́в Иа́ков зау́тра, и взя́т ка́мень, его́же бе́ положи́л в возгла́вие себе́, и поста́ви его́ сто́лп: и возлия́ еле́й верху́ его́, и рече́: я́ко е́сть Госпо́дь на ме́сте се́м, а́з же не ве́дех: стра́шно е́сть ме́сто сие́, не́сть сие́, но до́м Бо́жий, и сия́ су́ть врата́ небе́сная.

Аллилу́иа, аллилу́иа, аллилу́иа.

Ве́стно же бу́ди, я́ко а́ще древя́ной це́ркви быва́ет основа́ние: вся́ преждерече́нная соверши́вше, настоя́тель, взе́м секи́ру, ударя́ет е́ю три́жды в сре́днее бревно́ олта́рное, глаго́ля:

Начина́ется де́ло сие́, во и́мя Отца́, и Сы́на, и Свята́го Ду́ха, в че́сть же и в па́мять [и́мярек пра́здника или́ свята́го] ами́нь.

Посе́м же а́бие начина́ет кропи́ти вся́ основа́ния о́крест, иды́й от се́верныя страны́ про́тив со́лнца, и глаго́ля:

Во и́мя Отца́, и Сы́на, и Свята́го Ду́ха, ами́нь.

Кли́ру чту́щу псало́м 86:

Основа́ния его́ на гора́х святы́х: лю́бит Госпо́дь врата́ сио́ня, па́че все́х селе́ний Иа́ковлих. Пресла́вная глаго́лашася о тебе́, гра́де Бо́жий. Помяну́ раа́в и вавило́на ве́дущым мя́: и се́ иноплеме́нницы, и ти́р, и лю́дие ефио́пстии, си́и бы́ша та́мо. Ма́ти сио́н рече́т, челове́к, и челове́к роди́ся в не́м, и то́й основа́ и вы́шний. Госпо́дь пове́сть в писа́нии люде́й, и князе́й си́х бы́вших в не́м: Я́ко веселя́щихся все́х жили́ще в тебе́.

Де́лателие же а́бие спе́шно во и́мя Госпо́дне начина́ют де́лати. Проше́дшу же настоя́телю пе́рвую ча́сть основа́ний се́верныя страны́, а́бие ста́нет к се́веру лице́м, и сконча́ну псалму́, диа́кону ре́кшу: Го́споду помо́лимся. и кли́ру: Го́споди поми́луй.

Чте́т настоя́тель моли́тву сию́:

Го́споди Бо́же на́ш, се́вер и мо́ре, и вся́ческая созда́вый, его́же не́бо, и земля́ вмести́ти не мо́жет, на земли́ хра́м себе́ име́ти ко всегда́шнему хвале́нию Пресвята́го и́мене твоего́ изво́ливый, смире́нно припа́дающе, твое́ человеколю́бие мо́лим: основа́ния хра́ма сего́, и все́ его́ зда́ние благослови́, и си́лою твое́ю утверди́, непозы́блемо же и неразруши́мо сотвори́, во сла́ву тебе́ еди́наго в Тро́ице святе́й сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Ли́к: Ами́нь.

По моли́тве же, а́ще древя́на и́мать бы́ти це́рковь, па́ки взе́м секи́ру, ударя́ет в сре́днее бревно́, то́жде глаго́ля, е́же и в пе́рвом ударе́нии, и и́дет, втору́ю ча́сть основа́ния кропя́, и глаго́ля:

Во и́мя Отца́, и Сы́на, и Свята́го Ду́ха, ами́нь.

Кли́р же чте́т псало́м 126:

А́ще не Госпо́дь сози́ждет до́м, всу́е труди́шася зи́ждущии: а́ще не Госпо́дь сохрани́т гра́д, всу́е бде́ стреги́й. Всу́е ва́м е́сть у́треневати: воста́нете по седе́нии, яду́щии хле́б боле́зни, егда́ да́ст возлю́бленным свои́м со́н. Се́ достоя́ние Госпо́дне сы́нове, мзда́ плода́ чре́внаго. Я́ко стре́лы в руце́ си́льнаго, та́ко сы́нове оттрясе́нных. Блаже́н, и́же испо́лнит жела́ние свое́ от ни́х: не постыдя́тся, егда́ глаго́лют враго́м свои́м во врате́х.

Прише́д же на за́падную страну́, и ста́в лице́м к за́паду, сконча́ну уже́ су́щу псалму́,

И диа́кону ре́кшу: Го́споду помо́лимся. и кли́ру: Го́споди поми́луй.

Чте́т настоя́тель моли́тву сию́:

Го́споди Бо́же на́ш, его́же хва́льно и́мя от восто́к со́лнца до за́пад, твои́м Боже́ственным про́мыслом избра́вый в жили́ще себе́ ме́сто сие́: посли́ ны́не, смире́нно мо́лим тя́, небе́сное твое́ благослове́ние на не́, и благослови́ нача́ло зда́ния сего́, и укрепи́ и утверди́ е́, и благопоспе́шно к соверше́нию приведи́. ты́ бо еси́ вся́ на по́льзу ду́ш на́ших де́йствуя, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

По моли́тве же, па́ки ударя́ет секи́рою три́жды, и и́дет, тре́тию ча́сть основа́ния кропя́, и глаго́ля:

Во и́мя Отца́, и Сы́на, и Свята́го Ду́ха, ами́нь.

Кли́р же чте́т псало́м 121:

Возвесели́хся о ре́кших мне́: в до́м Госпо́день по́йдем. Стоя́ще бя́ху но́ги на́шя во дво́рех твои́х Иерусали́ме. Иерусали́м зи́ждемый я́ко гра́д, ему́же прича́стие его́ вку́пе. Та́мо бо взыдо́ша коле́на, коле́на Госпо́дня, свиде́ние изра́илево, испове́датися и́мени Госпо́дню. Я́ко та́мо седо́ша Престо́ли на су́д, Престо́ли в дому́ Дави́дове. Вопроси́те же я́же о ми́ре иерусали́ма, и оби́лие лю́бящым тя́. Бу́ди же ми́р в си́ле твое́й, и оби́лие в столпостена́х твои́х. Ра́ди бра́тий мои́х, и бли́жних мои́х глаго́лах у́бо ми́р о тебе́. До́му ра́ди Го́спода Бо́га на́шего взыска́х блага́я тебе́.

Прише́д же на ю́жную страну́ настоя́тель, и ста́в лице́м к ю́гу, по сконча́нии псалма́:

диа́кону ре́кшу: Го́споду помо́лимся, и кли́ру: Го́споди поми́луй.

Чте́т моли́тву сию́:

Го́споди Иису́се Христе́ Бо́же на́ш, от ю́га на спасе́ние на́ше прише́дый, и от присе́нныя деви́ческия горы́ я́ко свя́т яви́выйся, и с челове́ки пожи́вый, при́зри ми́лостивно, мо́лимся, на кти́торов зача́таго во и́мя твое́ зда́тися хра́ма, и во все́м благослови́ и́х, и да́руй и́м си́лу и кре́пость, благомо́щие же и изъоби́лие с здра́вием, и во все́м к соверше́нию в сла́ву твою́ зача́таго де́ла поспе́шество. Ты́ бо еси́ Бо́г ми́лости, и щедро́т, и человеколю́бия, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

По моли́тве же, па́ки твори́т, я́коже и пе́рвее. И и́дет, четве́ртую ча́сть основа́ния кропя́, и глаго́ля:

Во и́мя Отца́, и Сы́на, и Свята́го Ду́ха, ами́нь.

Кли́р же чте́т псало́м 131:

Помяни́, Го́споди, Дави́да и всю́ кро́тость его́. Я́ко кля́тся Го́сподеви, обеща́ся Бо́гу Иа́ковлю: А́ще вни́ду в селе́ние до́му моего́, или́ взы́ду на о́др посте́ли моея́: А́ще да́м со́н очи́ма мои́ма и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во евфра́фе, обрето́хом я́ в поля́х дубра́вы: Вни́дем в селе́ния его́, поклони́мся на ме́сто, иде́же стоя́сте но́зе его́. Воскресни́ Го́споди в поко́й тво́й, ты́, и киво́т святы́ни твоея́. Свяще́нницы твои́ облеку́тся пра́вдою, и преподо́бнии твои́ возра́дуются. Дави́да ра́ди раба́ твоего́, не отврати́ лице́ пома́заннаго твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на Престо́ле твое́м. А́ще сохраня́т сы́нове твои́ заве́т мо́й, и свиде́ния моя́ сия́, и́мже научу́ я́, и сы́нове и́х до ве́ка ся́дут на Престо́ле твое́м. Я́ко избра́ Госпо́дь сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́: лови́тву его́ благословля́яй благословлю́, ни́щыя его́ насыщу́ хле́бы. Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному моему́. Враги́ его́ облеку́ студо́м, на не́мже процвете́т святы́ня моя́.

Прише́д же на ме́сто, иде́же нача́ кропи́ти, престае́т, и ше́д ста́нет пред водруже́нным кресто́м к восто́ку лице́м, по сконча́нии же псалма́ са́м настоя́тель со вся́ким умиле́нием начина́ет пе́ти вку́пе со все́м кли́ром:

Царю́ небе́сный: По сконча́нии же пе́ния, диа́кону ре́кшу: Го́споду помо́лимся, и кли́ру: Го́споди поми́луй.

Чте́т моли́тву сию́:

Го́споди Бо́же на́ш, изво́ливый на се́м ме́сте, и на се́м положе́нном и во и́мя твое́ благослове́нном ка́мени основа́ти себе́ це́рковь: са́м твоя́ от твои́х тебе́ принося́щих, в воздви́жении к твоему́ славосло́вию зи́ждемаго хра́ма, в че́сть же и па́мять, [и́мярек пра́здника или́ свята́го,] ми́лостивно прии́м, мно́жеством твои́х небе́сных и земны́х бла́г возда́ждь: все́м же к сооруже́нию и соверше́нию це́ркве сея́ по́мощь творя́щым, теле́сное здра́вие и душе́вное спасе́ние да́руй: де́латели укрепи́, невре́дны от вся́каго зла́ соблюда́я: основа́ния же сия́ неразори́ма, и непозы́блема соблюди́, и хра́м тво́й се́й в соверше́ние ско́ро приведи́: я́ко да в не́м непреста́нно всехва́льными пе́сньми и славословле́нии, и безкро́вными же́ртвами сла́вим и воспева́ем тя́, еди́наго и́стиннаго Бо́га на́шего. тебе́ бо подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Настоя́тель: Ми́р все́м.

Ли́к: И ду́хови твоему́.

Диа́кон же со вся́ким умиле́нием рече́т:

Па́ки и па́ки, прекло́ньше коле́на, Го́споду помо́лимся.

Ли́к: Го́споди поми́луй, три́жды.

И вси́ преклоня́ют коле́на.

Настоя́тель же и са́м прекло́нь коле́на, умиле́нно чте́т моли́тву сию́:

Хва́лим тя́ Го́споди Бо́же си́л, спаси́телю на́ш, я́ко премно́гия ра́ди твоея́ бла́гости и человеколю́бия, избра́л и освяти́л еси́ ме́сто сие́, и к созида́нию на не́м це́ркве в сла́ву Пресвята́го и́мене твоего́, на́ми недосто́йными рабы́ твои́ми основа́л еси́. мо́лим у́бо тя́ смире́нно, коле́на ду́ш и теле́с на́ших прекло́ньше, благоволи́ на ме́сте се́м и же́ртвеннику к приноше́нию на не́м безкро́вныя же́ртвы Пресвята́го те́ла и честны́я кро́ве Христа́ твоего́, в сла́ву твою́ и в спасе́ние ду́ш на́ших созда́тися: и я́коже хра́м, си́це и же́ртвенник се́й, нача́ло ны́не прие́мля, в соверше́ние спе́шно твое́ю Боже́ственною си́лою приведи́, да в не́м и на не́м да́же до сконча́ния ве́ка славосло́вие твоего́ Пресвята́го и́мене и безкро́вныя твоя́ слове́сныя же́ртвы от правове́рных люде́й твои́х, тебе́ безпреста́нно кроме́ вся́каго препя́тия приноси́мы и соверша́емы бу́дут, вся́ бо у тебе́ возмо́жна су́ть. И тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Все́м же воста́вшым, диа́кон глаго́лет ектению́ сию́:

Поми́луй на́с Бо́же, по вели́цей ми́лости твое́й, мо́лим ти ся, услы́ши и поми́луй.

Ли́к: Го́споди поми́луй, три́жды.

Еще́ мо́лимся о благочести́вых кти́торах, и основа́телех в сла́ву Бо́жию сооружа́тися наче́ншаго хра́ма и́мярек, и о благополу́чном поспеше́нии свята́го де́ла и́х, о здра́вии же, спасе́нии, и оставле́нии грехо́в и́х, рце́м вси́, Го́споди услы́ши и поми́луй.

Ли́к: Го́споди поми́луй, три́жды.

Еще́ мо́лимся о е́же приста́вити де́лу сему́ свято́му а́нгела храни́теля, от вся́каго зла́го обстоя́ния, и ви́димых и неви́димых враго́в препя́тий избавля́юща и защища́юща, и де́лателей укрепля́юща, рце́м вси́, Го́споди услы́ши и поми́луй.

Ли́к: Го́споди поми́луй, три́жды.

Настоя́тель же возглаша́ет:

Услы́ши ны́ Бо́же спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй на́с и основа́телей свята́го хра́ма сего́: ми́лостив бо и человеколю́бец Бо́г еси́, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И а́бие быва́ет отпу́ст обы́чный хра́му.

Пода́в же благослове́ние лю́дем, святи́тель или́ протоиере́й, а́ще у́бо с лити́ею прише́л е́сть, я́коже предъуказа́ся, та́кожде с лити́ею возвраща́ется в це́рковь, отню́дуже прии́де, пою́щу кли́ру стихи́ры хра́му, или́ и́но что́ е́же изво́лят, в сла́ву Бо́жию.

Глава 27. Чи́н моли́твенный на поставле́ние креста́ на ве́рх кро́ва новосозда́нныя це́ркве

Взе́м иере́й епитрахи́ль на себе́, и покади́в кре́ст фимиа́мом благослове́нным, начина́ет обы́чно:

Благослове́н Бо́г на́ш.

Ли́к: Трисвято́е. и по О́тче на́ш: Иере́й: Я́ко твое́ е́сть Ца́рство: И а́бие пою́т, или́ чту́т тропари́ сия́, гла́с 1: Спаси́, Го́споди, лю́ди твоя́: Сла́ва: Вознесы́йся на кре́ст во́лею: И ны́не: Предста́тельство Христиа́н: Посе́м ре́кшу диа́кону: Го́споду помо́лимся, и кли́ру: Го́споди поми́луй.

Чте́т иере́й моли́тву сию́:

Го́споди вседержи́телю Бо́же оте́ц на́ших, жезло́м моисе́овым, и дре́вом о́ным, на не́мже змию́ ме́дяную в пусты́ни, от угрызе́ния змие́в избавля́я лю́ди, привяза́ти повеле́л еси́, о́браз Честна́го и Животворя́щаго Креста́ возлю́бленнаго Сы́на твоего́ Го́спода на́шего Иису́са Христа́ прообрази́вый, и́мже диа́воля си́ла упраздни́ся, и зми́ем о́ным дре́вним вселука́вым угрызе́нный и умерщвле́нный ро́д на́ш оживотвори́ся: смире́нно твоему́ безме́рному человеколю́бию припа́дающе, мо́лимся и ми́ли ся де́ем, посли́ ны́не благослове́ние твое́ небе́сное, и благослови́ зна́мение сие́ кре́стное, и да́ждь ему́ си́лу и кре́пость благослове́ннаго о́наго, кро́вию Сы́на твоего́ окропле́ннаго дре́ва, во е́же бы́ти хра́му сему́, и́мени твоему́ созда́нному, покро́в держа́вен, тве́рдое огражде́ние, от вся́каго зла́го обстоя́ния всегда́шнее избавле́ние, благоле́пие же и украше́ние, и зна́мение ви́димым и неви́димым враго́м стра́шное и ужа́сное, все́х же в хра́м се́й с ве́рою входя́щих, и на не́ взира́ющих, и распя́тому на кресте́ Сы́ну твоему́ кла́няющихся благослови́, и си́лою кре́стною огради́в, неврежде́нных от вся́каго зла́ всегда́ соблюди́. кре́ст бо е́сть красота́ церко́вная, царе́м держа́ва, ве́рным утвержде́ние, па́влова похвала́, бесо́в же я́зва. е́й, Го́споди Бо́же на́ш, все́х ве́рою на зна́мение сие́ взира́ющих, и спаси́тельную Го́спода на́шего Иису́са Христа́ Сы́на твоего́ сме́рть воспомина́ющих, и тебе́ приле́жно моля́щихся, ми́лостивно услы́ши и человеколю́бне поми́луй: здра́вие же с долгоде́нствием да́руй, и Ца́рствия твоего́ сподо́би, благода́тию, и щедро́тами, и человеколю́бием единоро́днаго Сы́на твоего́, с ни́мже благослове́н еси́ со пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же взе́м свяще́нную во́ду, кропи́т е́ю кре́ст, глаго́ля:

Благословля́ется и освяща́ется зна́мение сие́ кре́стное, благода́тию Свята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.

А́бие же пое́тся конда́к се́й, гла́с 4:

Вознесы́йся на кре́ст во́лею тезоимени́тому твоему́ но́вому жи́тельству щедро́ты твоя́ да́руй, Христе́ Бо́же: возвесели́ си́лою твое́ю, благове́рнаго импера́тора на́шего никола́я алекса́ндровича, побе́ды дая́ ему́ на супоста́ты, посо́бие иму́щу твое́ ору́жие ми́ра, непобеди́мую побе́ду.

Посе́м твори́т обы́чный отпу́ст хра́му: де́лателие же взе́мше Кре́ст, поставля́ют его́ на свое́м ме́сте верху́ Це́ркве.

Глава 28. Чи́н освяще́ния хра́ма, от архиере́а твори́маго

Хра́му соверше́ну бы́вшу, прихо́дит от архиере́а по́сланный, ему́же повели́т, пре́жде еди́наго дне́ или́ бо́льши, и предъуготовля́ет потре́бная к освяще́нию, ка́к вну́трь олтаря́, та́к и во все́м хра́ме, а наипа́че дабы́ Престо́л бы́л на четы́рех столпа́х, пя́тый столпе́ц посреди́ с я́щиком: я́щик бы бы́л посреде́ под Престо́лом, вышино́ю пол-арши́на: Престо́л высото́ю арши́на, и шести́ вершко́в, а широто́ю по ме́ре олтаря́: дска́ наПресто́льная по ме́ре Престо́ла, же́ртвенник тако́й же высоты́, ширина́ и длина́ по ме́ре олтаря́. На верху́ у столпо́в Престо́льных вы́нять я́щики на че́тверть вершка́, где́ бы́ть воскомасти́ху: на те́хже столпа́х, от по́лу уступя́ вершка́ с два́, вы́резать зазу́бриной для утвержде́ния ве́рви: а вкру́г Престо́льной дски́ вы́резать же на че́тверть вершка́, где́ бы́ть ве́рви: на дска́х, на Престо́льной и на же́ртвенной, по угла́м что́бы бы́ло прове́рчено, где́ бы́ть гвоздя́м, и сде́лать гне́здышка, где́ бу́дут гвозди́нныя шля́пки, что́б гвозди́нныя шля́пки бы́ли в ра́венстве со Престо́льною дско́ю, та́кож и на столпа́х наверте́ть, что́б гво́зди шли́ пря́мо: к утвержде́нию Престо́ла четы́ре гвоздя́, а к же́ртвеннику ско́лько на́добно: четы́ре ка́мня, ко́ими прибива́ются гво́зди: срачи́ца на одея́ние Престо́ла, и друга́я на же́ртвенник. На обяза́ние Престо́ла ве́рвь в шестьдеся́т арши́н, и ве́рхнее одея́ние на Престо́л и на же́ртвенник: пелены́, что́б покры́ть Престо́л и же́ртвенник, во́здухи, пла́ты, кото́рыми Престо́л отира́ть: за́навес к Ца́рским две́рем, два́ илито́на на Престо́л и на же́ртвенник: воды́ ро́зовой, и вина́ церко́внаго по сткля́нице: кропи́ло, ко́им кропи́ть: свято́е ми́ро, и струче́ц: четы́ре гу́бы, отира́ть и́ми Престо́л: гу́ба во антими́нс, гу́ба во святу́ю ча́шу: я́щичек оловя́нный на святы́я мо́щи под Престо́л: архиере́ю свеща́, и свещы́ на розда́чу про́чым духо́вным, и миря́ном: ла́дон росно́й и просто́й: две́ свещи́ вы́носныя большы́я: хору́гви, а́ще су́ть: вкру́г це́ркви что́б бы́ло чи́сто.

Та́же снима́ется дска́ со столпо́в, и поставля́ется на десне́й стране́ к стене́, и замеча́ется, ка́к е́й бы́ть по пре́жнему на столпа́х Престо́льных.

Пото́м пред Ца́рския врата́ поставля́ется сто́л, и постила́ется ска́терть: пове́рх ска́терти постила́ется пелена́, и полага́ется свято́е ева́нглие, и честны́й кре́ст, и поставля́ются святы́е сосу́ды, лжи́ца, копие́, пелены́, во́здухи, ве́рвь, одея́ние на Престо́л и на же́ртвенник, гво́зди, гу́бы, и покрыва́ются пелено́ю и поставля́ются по угла́м четы́ре подсве́щника: а друго́й столе́ц поставля́ется в олтаре́ к го́рнему ме́сту, и сте́лется пелена́, и поставля́ется на столе́ц свято́е ми́ро, вино́ церко́вное, вода́ ро́зовая в сткля́ницах, струче́ц, кропи́ло, ка́мение, кото́рыми гво́зди прибива́ть.

А мо́щи святы́я поставля́ются на ди́скосе, покрове́ны звездо́ю и во́здухом, в на́вечерии освяще́ния на анало́гии пред о́бразом спаси́телевым, у Ца́рских вра́т в то́мже хра́ме, и пое́тся вне́ олтаря́ всено́щное бде́ние обновле́нию и хра́му, кому́ от архиере́а повелено́ бу́дет. Пред водоосвяще́нием же изно́сятся мо́щи с благогове́нием в бли́з су́щий хра́м по́сле ра́нней литурги́и, и поставля́ются на святе́м Престо́ле, а свято́е ева́нглие поставля́ется от восто́ка над мощьми́: и ста́вится подсве́щник пред святы́ми мощьми́. Бу́де же не́т в бли́зости друга́го хра́ма, то стоя́т до вре́мени прия́тия своего́ на то́мже ме́сте.

О составле́нии воскомасти́ха:

Во у́трии пре́жде прише́ствия архиере́йскаго, воскомасти́х составля́ется си́це во́ск, и масти́х толче́н, и ла́дон толче́н, [а́ще не́сть масти́ха, вме́сто его́ бе́лый ла́дон довле́ет,] и росно́й ла́дон толче́н же, и ало́й толче́н же, а́ще же не́сть ало́я, вме́сто его́ се́ра [смола́] бе́лая: и полага́ют пре́жде во́ск в горне́ц но́вый, проти́ву ме́ры веще́й. И егда́ расто́пится во́ск, полага́ют и вышепи́санныя ве́щи, и меша́ют я́ в горнце́ стручце́м опа́сно, что́бы от воскипе́ния не прелило́ся во о́гнь: и по ма́лом кипе́нии, отставля́ют от огня́ во страну́: А́ще же соизво́лится примеша́ти и ины́я благово́нныя прили́чныя ве́щи: и сие́ невозбра́нно е́сть.

Нача́ло освяще́ния.

Приспе́вшу вре́мени святы́я литурги́и, и прибы́вшу архиере́ю во освяща́емый хра́м, облача́ется во вся́ архиере́йская облаче́ния, и верху́ архиере́йских оде́жд возлага́ется ктому́ наро́читая срачи́ца или́ за́пон. И та́ко укра́шен вхо́дит во святы́й олта́рь: преди́ же архиере́а вно́сят сослужа́щии свяще́нницы, та́кожде све́рх свяще́ннических оде́жд име́ющие возложе́нныя срачи́цы, в Ца́рская врата́ сто́л угото́ванный со вся́кою потре́бою, я́же су́ть прили́чна ко освяще́нию, и поставля́ют одесну́ю страну́. Архиере́й же, отда́в по́сох у Ца́рских вра́т по́дьяку, вхо́дит во олта́рь, и помоля́ся осеня́ет сослужа́щих на о́бе страны́[Зри́. Ца́рская врата́ затвори́ти, и мирски́м лю́дем из олтаря́ изы́ти, дабы́ от утесне́ния не могло́ какова́го ли́бо священноде́йствию возпосле́довати препя́тствия]. В то́ вре́мя диа́кон подно́сит архиере́ю святу́ю во́ду: архиере́й же приня́в кропи́ло, кропи́т свято́ю водо́ю столпы́. Пото́м прино́сит ключа́рь воскомасти́х кипя́щ, архиере́й кропи́т свято́ю водо́ю воскомасти́х, и прие́млет горне́ц с воскомасти́хом, и возлива́ет са́м на столпцы́ крестообра́зно проти́в ме́ры, обходя́ круго́м, и отдае́т горне́ц, пото́м па́ки кропи́т свято́ю водо́ю на столпцы́, что́бы ско́ро усты́л воскомасти́х: а свяще́нницы подува́ют на столпцы́, иде́же воскомасти́х, до́ндеже усты́нет.

По исполне́нии о́наго, протодиа́кон глаго́лет:

Го́споду помо́лимся.

Свяще́нницы: Го́споди поми́луй.

Архиере́й же чте́т моли́тву во услы́шание все́м:

Моли́тва 1:

Го́споди Бо́же спаси́телю на́ш, вся́ творя́й и стро́яй о спасе́нии ро́да челове́ческаго, приими́ моли́тву на́с недосто́йных ра́б твои́х, и удовли́ на́с в настоя́щий ча́с, во е́же неосужде́нно освяще́ние соверши́ти хра́ма сего́, ко твоему́ славосло́вию созда́ннаго, во и́мя свята́го и́мярек: [или́ святы́я и́мярек] и воздви́жение в не́м сотвори́ти трапе́зы.

Возгла́с: Я́ко подоба́ет тебе́ вся́кая сла́ва, че́сть и поклоне́ние, отцу́ и Сы́ну, и свято́му ду́ху, ны́не и при́сно, и во ве́ки веко́в.

Свяще́нницы: Ами́нь.

Пото́м прино́сят свяще́нницы трапе́зную дску́, и кропи́тся дска́ от архиере́а с обои́х стра́н, и полага́ется на столпца́х Престо́льных.

В то́ вре́мя пое́тся псало́м 144:

Вознесу́ тя Бо́же мо́й, Царю́ мо́й, и благословлю́ и́мя твое́ в ве́к и в ве́к ве́ка. На вся́к де́нь благословлю́ тя, и восхвалю́ и́мя твое́ в ве́к и в ве́к ве́ка. Ве́лий Госпо́дь и хва́лен зело́, и вели́чию его́ не́сть конца́. Ро́д и ро́д восхва́лят дела́ твоя́, и си́лу твою́ возвестя́т. Великоле́пие сла́вы святы́ни твоея́ возглаго́лют и чудеса́ твоя́ пове́дят: И си́лу стра́шных твои́х реку́т, и вели́чие твое́ пове́дят. Па́мять мно́жества бла́гости твоея́ отры́гнут, и пра́вдою твое́ю возра́дуются. Ще́др и ми́лостив Госпо́дь, долготерпели́в и многоми́лостив: Бла́г Госпо́дь вся́ческим, и щедро́ты его́ на все́х де́лех его́. Да испове́дятся тебе́, Го́споди, вся́ дела́ твоя́, и преподо́бнии твои́ да благословя́т тя́: Сла́ву Ца́рствия твоего́ реку́т, и си́лу твою́ возглаго́лют: Сказа́ти сыново́м челове́ческим си́лу твою́, и сла́ву великоле́пия Ца́рствия твоего́. Ца́рство твое́, Ца́рство все́х веко́в, и Влады́чество твое́ во вся́ком ро́де и ро́де: ве́рен Госпо́дь во все́х словесе́х свои́х, и преподо́бен во все́х де́лех свои́х. утвержда́ет Госпо́дь вся́ низпа́дающыя, и возставля́ет вся́ низве́рженныя. О́чи все́х на тя́ упова́ют, и ты́ дае́ши и́м пи́щу во благовре́мении: Отверза́еши ты́ ру́ку твою́, и исполня́еши вся́кое живо́тно благоволе́ния. Прⷣвен Госпо́дь во все́х путе́х свои́х, и преподо́бен во все́х де́лех свои́х. Бли́з Госпо́дь все́м призыва́ющым его́, все́м призыва́ющым его́ во и́стине: Во́лю боя́щихся его́ сотвори́т, и моли́тву и́х услы́шит, и спасе́т я́. Храни́т Госпо́дь вся́ лю́бящыя его́, и вся́ гре́шники потреби́т. Хвалу́ Госпо́дню возглаго́лют уста́ моя́: и да благослови́т вся́ка пло́ть и́мя свято́е его́ в ве́к, и в ве́к ве́ка.

По сконча́нии же псалма́, глаго́лет архиере́й:

Благослове́н Бо́г на́ш:

Сте́кшу же воскомасти́ху, и очища́емым ме́стом, на ни́хже истече́.

Па́ки глаго́лют псало́м 22:

Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя: на воде́ поко́йне воспита́ мя. Ду́шу мою́ обрати́, наста́ви мя́ на стези́ пра́вды, и́мене ра́ди своего́. А́ще бо и пойду́ посреде́ се́ни сме́ртныя, не убою́ся зла́, я́ко ты́ со мно́ю еси́: же́зл тво́й и па́лица твоя́, та́ мя́ уте́шиста. угото́вал еси́ предо мно́ю трапе́зу сопроти́в стужа́ющым мне́: ума́стил еси́ еле́ом главу́ мою́, и ча́ша твоя́ упоява́ющи мя́ я́ко держа́вна. И ми́лость твоя́ пожене́т мя́ вся́ дни́ живота́ моего́, и е́же всели́ти ми ся в до́м Госпо́день, в долготу́ дни́й.

Та́же архиере́й:

Благослове́н Бо́г на́ш, всегда́, ны́не и при́сно, и во ве́ки веко́в.

Свяще́нницы: Ами́нь.

Та́же прино́сит ключа́рь четы́ре гво́здя, и полага́ет на трапе́зе: архиере́й же кропи́т свято́ю водо́ю, и влага́ет и́х в столпы́. Па́ки прино́сит ключа́рь четы́ре ка́мня: взя́в же архиере́й еди́н ка́мень, и про́чии священнослужи́тели, утвержда́ют трапе́зу. По внегда́ же утверди́тися трапе́зе, кове́р а́бие пред святы́ми две́рьми постила́ется, и возгла́вие полага́ется[Ца́рская врата́ отве́рсти], и изше́д архиере́й из олтаря́, протодиа́кону возгласи́вшу:

Па́ки и па́ки, прекло́ньше коле́на, Го́споду помо́лимся.

Свяще́нником же вну́трь олтаря́ пою́щым: Го́споди поми́луй, три́жды.

Преклоня́ет коле́на, и чте́т моли́тву сию́ велегла́сно:

Бо́же безнача́льный. и присносу́щный, и́же от не су́щих в бытие́ вся́ приведы́й, и́же во све́те живы́й непристу́пнем, и престо́л име́яй не́бо, зе́млю же подно́жие: и́же моисе́ови повеле́ние да́вый и начерта́ния, веселеи́лу же ду́х прему́дрости вложи́вый: и удовли́в и́х к соверше́нию свиде́ния ски́нии, в не́йже служе́ния оправда́ния бя́ху и́стины о́бразы и предначерта́ния: и́же соломо́ну широту́ и простра́нство се́рдца дарова́вый, и те́м дре́вний хра́м возста́вивый: святы́м же всехва́льным апо́столом, в ду́се слу́жбу, и ски́нии и́стинныя обнови́вый благода́ть: и те́ми святы́я твоя́ це́ркви, и же́ртвенники твоя́, Го́споди си́л, во все́й земли́ насади́вый, во е́же приноси́тися тебе́ свяще́нным и безкро́вным же́ртвам: и́же и сему́ хра́му ны́не благоволи́л еси́ во и́мя созда́тися свята́го, [или́ святы́я] и́мярек, ко сла́ве твое́й, и единоро́днаго твоего́ Сы́на, и всесвята́го твоего́ ду́ха: са́м безсме́ртне и великодарови́тый Царю́, помяни́ щедро́ты твоя́ и ми́лости твоя́, я́ко от ве́ка су́ть: и да не возгнуша́ешися на́с, мно́жеством оскверне́нных грехо́в, ниже́ да разруши́ши заве́та твоего́ на́шея ра́ди нечистоты́: но пре́зри и ны́не прегреше́ния на́ша, и укрепи́ на́с, и удовли́ благода́тию и прише́ствием животворя́щаго и свята́го твоего́ ду́ха, соверши́ти без осужде́ния обновле́ние хра́ма сего́, и и́же в не́м же́ртвенника [же́ртвенников] сотвори́ти освяще́ние: да и на се́м [и на си́х] благослови́м тя́ псалмы́ и пе́сньми, и та́йными [та́йнами] слу́жбами, и твое́ благоутро́бие вы́ну велича́ем. Е́й, Влады́ко Го́споди Бо́же на́ш, упова́ние все́х конце́в земли́, услы́ши на́с гре́шных моля́щихся тебе́: и низпосли́ Пресвята́го твоего́ и покланя́емаго и всеси́льнаго ду́ха, и освяти́ хра́м се́й, и же́ртвенник се́й [и же́ртвенники сия́] испо́лни его́ [я́] све́та присносу́щнаго, избери́ его́ [я́] в жили́ще твое́: сотвори́ его́ [я́] ме́сто селе́ния сла́вы твоея́: украси́ его́ [я́] Боже́ственными твои́ми и преми́рными дарова́ньми: уста́ви его́ [я́] приста́нище обурева́емых, врачевство́ страсте́й, прибе́жище немощны́х, бесо́в прогоне́ние: во е́же бы́ти очеса́м твои́м отве́рстым на́нь [на ни́х] де́нь и но́щь, и ушеса́м твои́м вне́млющым в моли́тву, со стра́хом твои́м и благогове́инством в него́ приходя́щих [к ни́м приходя́щих], и призыва́ющих всечестно́е и покланя́емое и́мя твое́: да ели́ка воспро́сят у тебе́, и ты́ услы́шиши на небеси́ горе́, и сотвори́ши ми́лость, и ми́лостив бу́деши: сохрани́ его́ да́же до сконча́ния ве́ка непоколеби́ма, и и́же в не́м же́ртвенник святы́й [же́ртвенники святы́я] святы́х покажи́, си́лою и де́йством свята́го твоего́ ду́ха, просла́ви его́ [я́] па́че е́же по зако́ну очисти́лища: я́ко да я́же на не́м [на ни́х] соверша́емая священноде́йства во святы́й и пренебе́сный, и мы́сленный тво́й же́ртвенник достиза́ют, и благода́ть на́м твоего́ пречи́стаго прино́сят осене́ния: дерза́ем бо не на на́ших ру́к служе́ние, но на твою́ неизрече́нную благосты́ню.

И по соверше́нии моли́твы воста́нет архиере́й, и и́дет во олта́рь ко святе́й трапе́зе, а протодиа́кон вну́трь свята́го олтаря́ глаго́лет [Ца́рская врата́ затвори́ти]:

Заступи́, спаси́, поми́луй, возста́ви и сохрани́ на́с, Бо́же, твое́ю благода́тию.

Свяще́нницы: Го́споди поми́луй.

О свы́шнем ми́ре, и о спасе́нии ду́ш на́ших, Го́споду помо́лимся.

О ми́ре всего́ ми́ра, благостоя́нии святы́х Бо́жиих:

И о преосвяще́ннейшем епи́скопе на́шем и́мярек, и де́лех руку́ его́, и и́же с ни́м свяще́нницех и диа́конех, Го́споду помо́лимся.

О е́же освяти́тися хра́му сему́, и и́же в не́м же́ртвеннику сему́, [же́ртвенником си́м] прише́ствием и си́лою Свята́го Ду́ха, Го́споду помо́лимся.

О гра́де се́м, и вся́ком гра́де:

О изба́витися на́м:

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу, и Присноде́ву мари́ю, [и свята́го, его́же е́сть освяща́емый хра́м] со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.

Возгла́с: Я́ко свя́т еси́ Бо́же на́ш, и́же на пострада́вших по тебе́ честны́х му́ченицех почива́еши, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Свяще́нницы: Ами́нь.

Та́же прино́сится возлива́льник с те́плою водо́ю, и вино́ кра́сное, и ро́зовая вода́.

Протодиа́кон глаго́лет: Го́споду помо́лимся.

Архиере́й, преклони́в главу́, глаго́лет моли́тву сию́ над вода́ми и вино́м та́йно:

Го́споди Бо́же на́ш, освяти́вый струи́ иорда́нския спаси́тельным твои́м явле́нием: са́м и ны́не низпосли́ благода́ть свята́го твоего́ ду́ха, и благослови́ во́ды сия́ и вино́ ко освяще́нию и соверше́нию же́ртвенника твоего́ сего́ [же́ртвенников твои́х си́х]: я́ко благослове́н еси́ во ве́ки веко́в, ами́нь.

И по моли́тве возлива́ет на трапе́зу три́жды от те́плыя воды́, глаго́ля:

Во и́мя Отца́, и Сы́на, и Свята́го Ду́ха, ами́нь.

А вино́ кра́сное с ро́зовою водо́ю сме́шивается во еди́ном сосу́де.

Та́же ключа́рь прино́сит четы́ре пла́та. Архиере́й же приня́в еди́н пла́т, про́чыя благословля́ет прия́ти сослужа́щым, и отира́ют и́ми трапе́зу.

Внегда́ же сия́ соверша́ются, глаго́лется псало́м 83:

Ко́ль возлю́бленна селе́ния твоя́, Го́споди си́л! Жела́ет и скончава́ется душа́ моя́ во дворы́ Госпо́дни: се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́: олтари́ твоя́, Го́споди си́л, Царю́ мо́й и Бо́же мо́й. Блаже́ни живу́щии в дому́ твое́м: в ве́ки веко́в восхва́лят тя́. Блаже́н му́ж, ему́же е́сть заступле́ние его́ у тебе́: восхожде́ния в се́рдце свое́м положи́. Во юдо́ль плаче́вную, в ме́сто, е́же положи́: и́бо благослове́ние да́ст законополага́яй. По́йдут от си́лы в си́лу, яви́тся Бо́г бого́в в сио́не. Го́споди Бо́же си́л, услы́ши моли́тву мою́, внуши́ Бо́же Иа́ковль. Защи́тниче на́ш ви́ждь Бо́же, и при́зри на лице́ Христа́ твоего́. Я́ко лу́чше де́нь еди́н во дво́рех твои́х, па́че ты́сящ: изво́лих примета́тися в дому́ Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бо́г благода́ть и сла́ву да́ст, Госпо́дь не лиши́т благи́х, ходя́щих незло́бием. Го́споди Бо́же си́л, блаже́н челове́к упова́яй на тя́.

И по соверше́нном омове́нии трапе́зном и отира́нии, глаго́лет архиере́й:

Сла́ва Бо́гу на́шему во ве́ки веко́в.

Свяще́нницы: Ами́нь.

Прие́млет архиере́й у ключаря́ вино́ кра́сное, с водо́ю ро́зовою сме́шенное, и возлива́ет на трапе́зу три́жды, крестови́дно, дово́льно, и напая́ют трапе́зу, растира́юще рука́ми: и кропи́т архиере́й те́м же смеше́нием освяща́емыя антими́нсы про́чыя. Егда́ же сие́ де́ется, глаго́лет на вся́ком кропле́нии:

Окропи́ши мя́ иссо́пом, и очи́щуся: омы́еши мя́, и па́че сне́га убелю́ся.

А по окропле́нии престо́ла и антими́нсов присовокупля́ет и после́дующее:

Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́ Бо́же, и ду́х пра́в обнови́ во утро́бе мое́й. Не отве́ржи мене́ от лица́ твоего́, и ду́ха твоего́ свята́го не отими́ от Мене́. Возда́ждь ми́ ра́дость спасе́ния твоего́, и ду́хом Влады́чним утверди́ мя. Научу́ беззако́нныя путе́м твои́м, и нечести́вии к тебе́ обратя́тся. Изба́ви мя́ от крове́й Бо́же, Бо́же спасе́ния моего́: возра́дуется язы́к мо́й пра́вде твое́й. Го́споди, устне́ мои́ отве́рзеши, и уста́ моя́ возвестя́т хвалу́ твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н: се́рдце сокруше́нно и смире́нно Бо́г не уничижи́т. ублажи́ Го́споди благоволе́нием твои́м сио́на, и да сози́ждутся сте́ны иерусали́мския. Тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь тво́й тельцы́.

Пото́м ключа́рь прино́сит гу́бы. Архиере́й прие́млет еди́ну гу́бу, а про́чыя други́и сослужа́щии: и отира́ют гу́бами трапе́зу. Пото́м полага́ется антими́нс [или́ антими́нсы] на трапе́зу горе́.

Та́же глаго́лет архиере́й:

Благослове́н Бо́г на́ш, всегда́, ны́не и при́сно, и во ве́ки веко́в.

Свяще́нницы: Ами́нь.

Пото́м прино́сит ключа́рь свято́е ми́ро. Архиере́й, приня́в струче́ц, помазу́ет на трапе́зе крестообра́зно.

Протодиа́кону глаго́лющу к Престо́лу и ко [вся́кому] антими́нсу: Во́нмем: Архиере́й твори́т на трапе́зе три́ кресты́, еди́н среди́, а два́ по обою́ страну́ ма́ло пони́же, глаго́ля: Аллилу́иа: по три́жды. Помазу́ет же и на столпе́х престо́льных с дву́ стра́н, и на среде́, и на ре́брех. Посе́м свяще́нницы прие́млют антими́нс [антими́нсы] и полага́ют и́ [я́] на престо́ле, еди́н по еди́ному, ни́же кресто́в, иде́же назна́менаны святы́м ми́ром, для того́, что́б те́ кресты́ не сотре́нны бы́ли. Архиере́й твори́т три́ кресты́ на вся́ком антими́нсе ми́ром, я́коже и на престо́ле.

Егда́ же сие́ соверши́тся, глаго́лется псало́м 132:

Се́ что́ добро́, или́ что́ красно́, но е́же жи́ти бра́тии вку́пе? Я́ко ми́ро на главе́, сходя́щее на браду́, браду́ ааро́ню, сходя́щее на оме́ты оде́жды его́: я́ко роса́ аермо́нская, сходя́щая на го́ры сио́нския. я́ко та́мо запове́да Госпо́дь благослове́ние и живо́т до ве́ка.

Та́же архиере́й глаго́лет: Сла́ва тебе́ свята́я Тро́ице, Бо́же на́ш, во ве́ки веко́в.

Свяще́нницы: Ами́нь.

И отлага́ется антими́нс [антими́нсы] на блю́до. Посе́м свяще́нницы прино́сят срачи́цу: архиере́й кропи́т свято́ю водо́ю вну́трь и вне́, и надева́ют на трапе́зу. Пото́м прино́сится ве́рвь. Архиере́й кропи́т ве́рвь, и обязу́ет Престо́л, обязу́ется же си́це:

От пра́выя страны́, у пе́рваго столпа́ архиере́й де́ржит коне́ц ве́рви, и и́дут по ве́рви круго́м до втора́го столпа́ к восто́ку: от втора́го же столпа́ сно́сится на ни́з к тре́тиему столпу́, и и́дет по ни́зу до четве́ртаго столпа́, и па́ки возно́сится к пе́рвому столпу́ сопреди́, и связу́ется с конце́м, иде́же архиере́й держи́т: и па́ки сно́сится вни́з ко второ́му столпу́, и и́дет ни́зом до тре́тияго столпа́, взно́сится в ве́рх к четве́ртому столпу́, от четве́ртаго же столпа́ сно́сится вни́з к пе́рвому столпу́, и та́ко бу́дет кре́ст сопреди́. От пе́рваго же столпа́ по ни́зу и́дет круго́м до втора́го столпа́, от втора́го же столпа́ взно́сит в ве́рх к тре́тиему столпу́, и та́ко бу́дет кре́ст к восто́ку. От тре́тияго же столпа́ сно́сит на ни́з к четве́ртому столпу́, и та́ко бу́дет кре́ст на се́верней стране́: от четве́ртаго же столпа́, и́дет по ни́зу кресто́м до пе́рваго столпа́. От пе́рваго же столпа́ сни́зу и́дет в ве́рх ко второ́му столпу́: и та́ко бу́дет кре́ст на ю́жной стране́. и обхо́дит круго́м, что́б бы́ло три́ ве́рви по ве́рху, вторы́й же коне́ц ве́рви связу́ется с пе́рвым конце́м у пе́рваго столпа́.

Егда́ же сия́ соверша́ются, то́ есть, одева́ется трапе́за срачи́цею, и опоясу́ется ве́рвию, глаго́лется еди́ножды, два́жды и три́жды

псало́м 131:

Помяни́ Го́споди Дави́да, и всю́ кро́тость его́. Я́ко кля́тся Го́сподеви, обеща́ся Бо́гу Иа́ковлю: А́ще вни́ду в селе́ние до́му моего́, или́ взы́ду на о́др посте́ли моея́: А́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во евфра́фе, обрето́хом я́ в поля́х дубра́вы: Вни́дем в селе́ния его́, поклони́мся на ме́сто, иде́же стоя́сте но́зе его́. Воскресни́ Го́споди в поко́й тво́й, ты́ и киво́т святы́ни твоея́. Свяще́нницы твои́ облеку́тся пра́вдою, и преподо́бнии твои́ возра́дуются. Дави́да ра́ди раба́ твоего́, не отврати́ лице́ пома́заннаго твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на Престо́ле твое́м. А́ще сохраня́т сы́нове твои́ заве́т мо́й, и свиде́ния моя́ сия́, и́мже научу́ я́, и сы́нове и́х до ве́ка ся́дут на Престо́ле твое́м. Я́ко избра́ Госпо́дь сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́: Лови́тву его́ благословля́яй благословлю́, ни́щыя его́ насыщу́ хле́бы, Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному моему́. Враги́ его́ облеку́ студо́м, на не́мже процвете́т святы́ня моя́.

По соверше́нии же глаго́лет архиере́й:

Сла́ва Бо́гу на́шему, во ве́ки веко́в.

Пото́м прино́сят свяще́нницы инди́тию, си́есть, ве́рхнее одея́ние.

Архиере́й кропи́т свято́ю водо́ю вну́трь и вне́, и одева́ют е́ю святы́й престо́л, и полага́ют илито́н, а на илито́не антими́нс [антими́нсы] и свято́е ева́нглие на Престо́ле, и честны́й кре́ст, и покрыва́ются пелено́ю: вся́ же сия́ кропя́тся свято́ю водо́ю.

Си́м же соверши́вшымся, глаго́лется псало́м 92:

Госпо́дь воцари́ся, в ле́поту облече́ся: облече́ся Госпо́дь в си́лу, и препоя́сася: и́бо утверди́ вселе́нную, я́же не подви́жится. Гото́в Престо́л тво́й отто́ле: от ве́ка ты́ еси́. Воздвиго́ша ре́ки Го́споди, воздвиго́ша ре́ки гла́сы своя́: Во́змут ре́ки сотре́ния своя́ от гласо́в во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния твоя́ уве́ришася зело́: до́му твоему́ подоба́ет святы́ня Го́споди, в долготу́ дни́й.

По псалме́ глаго́лет архиере́й:

Благослове́н Бо́г на́ш:

Та́же повели́т архиере́й нача́льствующему из сослужа́щих украша́ти предложе́ние со окропле́нием святы́я воды́, [и поставля́ются сосу́ды, и покро́вы, и пелено́ю покрыва́ются.] ничто́же глаго́ля, то́кмо водо́ю свято́ю кропя́. Посе́м снима́ется со архиере́а за́пон, а протодиа́кон прино́сит архиере́ю кади́ло[Ца́рская врата́ отве́рсти]. Архиере́й же кади́т кресто́м Престо́л и же́ртвенник и ве́сь олта́рь: а протодиа́кон предхо́дит со свеще́ю, и глаго́лется

псало́м 25:

Суди́ ми Го́споди, я́ко а́з незло́бою мое́ю ходи́х: и на Го́спода упова́я не изнемогу́: Искуси́ мя Го́споди, и испыта́й мя́, разжзи́ утро́бы моя́ и се́рдце мое́: Я́ко ми́лость твоя́ пред очи́ма мои́ма е́сть, и благоугоди́х во и́стине твое́й. Не седо́х с со́нмом су́етным, и со законопресту́пными не вни́ду. Возненави́дех це́рковь лука́внующих, и с нечести́выми не ся́ду. умы́ю в непови́нных ру́це мои́, и обы́ду же́ртвенник тво́й Го́споди: Е́же услы́шати ми́ гла́с хвалы́ твоея́, и пове́дати вся́ чудеса́ твоя́. Го́споди, возлюби́х благоле́пие до́му твоего́, и ме́сто селе́ния сла́вы твоея́. Да не погуби́ши с нечести́выми ду́шу мою́, и с му́жи крове́й живо́т мо́й: И́хже в руку́ беззако́ния, десни́ца и́х испо́лнися мзды́. А́з же незло́бою мое́ю ходи́х, изба́ви мя́ Го́споди, и поми́луй мя́. Нога́ моя́ ста́ на правоте́: в це́рквах благословлю́ тя Го́споди.

Мно́гажды, до́ндеже окади́т олта́рь и всю́ це́рковь по обы́чаю.

Внегда́ же архиере́й кади́т, после́дуют по не́м дво́е архимандри́тов, или́ игу́менов, или́ свяще́нников: еди́н кропи́т сте́ны свято́ю водо́ю, а вторы́й держя́ сосу́д ми́ра, помазу́ет стручце́м, обмочя́ в ми́ро, крестообра́зно, пе́рвее во олтаре́ над го́рним ме́стом над окно́м: та́же над церко́вными враты́, я́же к за́паду це́ркве: та́же на ю́жной стране́, и на се́верной над две́рьми, или́ над окно́м на стена́х, а́ще же высо́ко, приставля́ется ле́ствица.

Соверши́вшу же ся кажде́нию и псалму́, и́дет архиере́й во олта́рь и глаго́лет:

Сла́ва Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И прие́млет протодиа́кон кади́ло, и кади́т архиере́а три́жды.

Пото́м глаго́лет ектению́ ма́лую: Па́ки и па́ки: пред Престо́лом, по ле́вую страну́ архиере́а.

Возгла́са же архиере́й не глаго́лет, но протодиа́кон: Го́споду помо́лимся. и снима́ется ми́тра. Архиере́й же пред святы́м Престо́лом глаго́лет моли́тву велегла́сно:

Го́споди небесе́ и земли́, и́же святу́ю твою́ це́рковь неизрече́нною прему́дростию основа́вый, и во о́браз а́нгельскаго на небеси́ служе́ния, свяще́нничества чи́н на земли́ соста́вивый: ты́ Влады́ко великода́рне, приими́ и ны́не моля́щихся на́с, не я́ко досто́йных су́щих о толи́ких проси́ти, но да превосхо́дство пока́жется твоея́ бла́гости: не бо́ преста́л еси́ челове́ческому ро́ду многообра́зне благоде́я. Глави́зну же на́м дарова́л еси́ благодея́ний, е́же во пло́ти единоро́днаго твоего́ Сы́на прише́ствие, и́же на земли́ я́влься, и возсия́в су́щым во тьме́ све́т спасе́ния, принесе́ себе́ о на́с же́ртву, и бы́сть ми́рови всему́ очисти́лище, о́бщники на́с своего́ воскре́сния сотвори́в: и вознесы́йся на небеса́, облече́ своя́ ученики́ и апо́столы, я́коже обеща́ся, си́лою свы́ше, я́же е́сть ду́х святы́й, покланя́емый и всеси́льный, и́же от Тебе́ Бо́га и отца́ исходя́щ: и́мже бы́вше си́льнии де́лом и сло́вом, креще́ние преда́ша сыноположе́ния: це́ркви воздвиго́ша, утверди́ша же́ртвенники, свяще́нства положи́ша пра́вила и зако́ны, и́хже мы́ гре́шнии держа́ще преда́ние, припа́даем ти́ ве́чному Бо́гу, и мо́лимся ти́ благоутро́бне: к твоему́ песнопе́нию созда́нный се́й хра́м, Боже́ственныя твоея́ испо́лни сла́вы, и в не́м воздви́женный же́ртвенник святы́й [и предложе́нныя же́ртвенники святы́я] святы́х покажи́: я́ко на́м предстоя́щым ему́ [и́м] я́ко стра́шному Ца́рствия твоего́ Престо́лу, неосужде́нно служи́ти тебе́, мольбы́ о на́с и о лю́дех все́х возпосыла́ющым, и безкро́вную же́ртву твое́й принося́щым бла́гости, о во́льных и нево́льных гресе́х в проще́ние, во управле́ние жития́, во исправле́ние блага́го жи́тельства, во исполне́ние вся́кия пра́вды.

Я́ко благослови́ся твое́ пресвято́е и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Свяще́нницы: Ами́нь.

Архиере́й же глаго́лет: Ми́р все́м.

Протодиа́кон: Главы́ ва́шя Го́сподеви приклони́те.

Архиере́й глаго́лет моли́тву та́йно:

Благодари́м тя́ Го́споди Бо́же си́л, я́ко ю́же излия́л еси́ благода́ть на святы́я твоя́ апо́столы, и на преподо́бныя на́ши отцы́, сподо́бил еси́ мно́гаго ра́ди твоего́ человеколю́бия, и да́же до на́с гре́шных и непотре́бных ра́б твои́х о́ную простре́ти: и мо́лимся тебе́, Влады́ко многоми́лостиве, испо́лни сла́вы, и святы́ни, и благода́ти же́ртвенник се́й [же́ртвенники сия́] я́коже претворя́тися, я́же на не́м [на ни́х] приноси́мым тебе́ безкро́вным же́ртвам, в пречи́стое те́ло, и честну́ю кро́вь единоро́днаго твоего́ Сы́на и Го́спода и Бо́га и спа́са на́шего Иису́са Христа́, ко спасе́нию все́х люде́й твои́х, и на́шего недосто́инства.

Возгла́с: Ты́ бо еси́ Бо́г на́ш, Бо́г ми́ловати и спаса́ти, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в.

Свяще́нницы: Ами́нь.

По соверше́нии сего́ прино́сится архиере́ю све́щник с невозжже́нною но́вою свеще́ю [Зри́. До сего́ освяще́ния вре́мени во олтари́ свещи́ никаковы́я не возжига́ти], ю́же возже́г архиере́й свои́ми рука́ми, поставля́ет на го́рнем ме́сте во́зле Престо́ла. Посе́м ключа́рь управля́ет, ка́ко идти́ по мо́щи в ину́ю це́рковь со кресты́: архиере́й же отдае́т ева́нглие, и кре́ст свяще́нникам, и свещы́ в олтаре́ раздае́т предстоя́щым, а вы́шед из олтаря́ на амво́не мирски́м лю́дем. Пото́м вхо́дит архиере́й в олта́рь, а из олтаря́ предъиду́щым свяще́нником, и́дет архиере́й Ца́рскими враты́ по мо́щи, прия́в по́сох у Ца́рских вра́т у по́дьяка, и глаго́лет:

С ми́ром изы́дем.

И та́ко и́дут по святы́я мо́щи по чи́ну: напреди́ же и́дут с хору́гви и со ико́ны, я́коже обы́чай хо́ду быва́ти со кресты́. Архиере́а же подде́ржат два́ диа́кона. Свяще́нники же и́дут со ева́нглием и кресто́м напреди́ архиере́а, а протодиа́кон со диа́коном кадя́т.

Пе́вчие пою́т тропа́рь, гла́с 4:

И́же во все́м ми́ре му́ченик твои́х, я́ко багряни́цею и ви́ссом, кровьми́ це́рковь твоя́ украси́вшися, те́ми вопие́т ти́ Христе́ Бо́же: лю́дем твои́м щедро́ты твоя́ низпосли́, ми́р жи́тельству твоему́ да́руй, и душа́м на́шым ве́лию ми́лость.

Сла́ва, и ны́не, гла́с 8:

Я́ко нача́тки естества́ насади́телю тва́ри, вселе́нная прино́сит ти́ Го́споди, богоно́сныя му́ченики: те́х моли́твами, в ми́ре глубо́це це́рковь твою́, жи́тельство твое́, Богоро́дицею соблюди́ многоми́лостиве.

И прише́д архиере́й во хра́м, иде́же поста́влены мо́щи, вхо́дит в олта́рь Ца́рскими враты́, с двумя́ предстоя́щими сослужи́тели: по́сох же отдае́т у Ца́рских вра́т по́дьяку, и покланя́ются святы́м моще́м, и осеня́ет предстоя́щих ту́.

Протодиа́кон же глаго́лет ектению́ ма́лую: Па́ки и па́ки: пред Ца́рскими враты́. Свяще́нницы: Го́споди поми́луй: вне́ олтаря́.

По ектении́ же архиере́й говори́т возгла́с пред Престо́лом:

Я́ко свя́т еси́ Бо́же на́ш, и́же на пострада́вших по тебе́ честны́х му́ченицех почива́еши, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Пе́вчие: Ами́нь. И пою́т трисвято́е.

Пото́м протодиа́кон: Го́споду помо́лимся.

Пе́вчие: Го́споди поми́луй.

И снима́ется с архиере́а ми́тра, и кладе́тся на блю́до. Архиере́й же глаго́лет моли́тву:

Го́споди Бо́же на́ш, ве́рный во словесе́х твои́х, и нело́жный во обеща́ниих твои́х, дарова́вый святы́м твои́м му́чеником по́двигом до́брым подвиза́тися, и тече́ние благоче́стия соверши́ти, и ве́ру и́стиннаго испове́дания сохрани́ти: са́м Влады́ко пресвяты́й, те́х моле́нием умоле́н бу́ди, и да́руй на́м недосто́йным твои́м рабо́м ча́сть и насле́дие име́ти с ни́ми, да подража́телие те́х бы́вше, сподо́бимся и предлежа́щих те́м благи́х.

Возгла́с: Ми́лостию и человеколю́бием единоро́днаго Сы́на твоего́, с ни́мже благослове́н еси́, со пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Пе́вчие: Ами́нь.

Та́же: Ми́р все́м:

Протодиа́кон: Главы́ ва́шя:

Архиере́й же глаго́лет моли́тву та́йно:

Го́споди Бо́же на́ш, моли́твами пресвяты́я Влады́чицы на́шея Богоро́дицы, и все́х святы́х твои́х, дела́ ру́к на́ших недосто́йных ра́б твои́х напра́ви, и во все́х угожда́ти на́с твое́й бла́гости сподо́би.

Возгла́с: Бу́ди держа́ва Ца́рствия твоего́ благослове́на и препросла́влена, отца́ и Сы́на, и Свята́го Ду́ха, ны́не и при́сно, и во ве́ки веко́в.

Пе́вчие: Ами́нь.

Архиере́й прие́млет кади́ло у протодиа́кона и кади́т святы́я мо́щи три́жды, по три́жды: и отда́в кади́ло, и прие́м святы́й ди́кос со святы́ми мощьми́, покрове́н возду́хом по звезде́, поставля́ет на главу́ свою́, и и́дет Ца́рскими враты́, поддержи́мь первосвященнослужи́тельми: ди́скос же де́ржить са́м архиере́й обе́ма рука́ма, и та́ко и́дут по чи́ну. Напреди́ же и́дут с хору́гви и ико́ны хра́ма: пред ико́ною и́дут пе́вчие, та́же и́дут свяще́нницы, пото́м лампа́дчик с посошнико́м, посреди́ же с ми́трою. Та́же протодиа́кон с диа́коном с кади́лы, и кадя́т мо́щи и архиере́а: над ди́скосом же несу́т диа́коны две́ рипи́ды или́ четы́ре: пред архиере́ом иподиа́коны несу́т трики́рий и дики́рий.

Пе́вчие пою́т тропа́рь, гла́с 3:

И́же на ка́мени ве́ры созда́вый це́рковь твою́ бла́же, в то́й испра́ви моле́ния на́ша, и приими́ лю́ди в ве́ре вопию́щыя тебе́: спаси́ ны Бо́же на́ш, спаси́ ны.

А́ще же доста́нет вре́мя, пою́тся и сле́дующии ирмосы́, гла́с 3. Пе́снь 3:

Утвержде́ние на тя́ наде́ющихся, утверди́ Го́споди це́рковь, ю́же стяжа́л еси́ честно́ю твое́ю кро́вию.

Гла́с 8. Пе́снь 3:

Небе́снаго кру́га верхотво́рче Го́споди, и це́ркве зижди́телю, ты́ мене́ утверди́ в любви́ твое́й, жела́ний кра́ю, ве́рных утвержде́ние, еди́не человеколю́бче.

Гла́с 5. Пе́снь 3:

Водрузи́вый на ничесо́мже зе́млю повеле́нием твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей твои́х, це́рковь твою́ утверди́, еди́не бла́же и человеколю́бче.

Егда́ до́йдут до освяща́емаго хра́ма, обхо́дят его́ от за́падных двере́й на ю́жную страну́, к восто́ку вкру́г: а свяще́нник предходя́ кропи́т свято́ю водо́ю сте́ны хра́ма.

Егда́ же прии́дут пред церко́вная вели́кая врата́, пе́вчие пою́т тропари́, на гла́с 7:

Святи́и му́ченицы, и́же до́бре страда́вше и венча́вшеся, моли́теся ко Го́споду спасти́ся душа́м на́шым. Два́жды.

Сла́ва тебе́, Христе́ Бо́же, апо́столов похвало́, и му́чеников весе́лие, и́хже про́поведь Тро́ица единосу́щная. Еди́ножды.

Архиере́й снима́ет со главы́ своея́ ди́скос с мощьми́, поставля́ет его́ на угото́ванном столе́ пред церко́вными враты́, и покланя́ется святы́м моще́м три́жды, и налага́ется ми́тра: и осеня́ет свяще́нников на о́бе страны́.

Егда́ же пе́вчие пропою́т тропари́, и́дут вну́трь хра́ма.

Архиере́й же стоя́ пред святы́ми мощьми́, глаго́лет:

Благослове́н еси́ Христе́ Бо́же на́ш, всегда́, ны́не и при́сно, и во ве́ки веко́в.

Пе́вчие отвеща́ют вну́трь хра́ма: Ами́нь.

Архиере́й глаго́лет:

Возми́те врата́ кня́зи ва́шя, и возми́теся врата́ ве́чная и вни́дет Ца́рь сла́вы.

Пе́вчие же пою́т вну́трь хра́ма:

Кто́ е́сть се́й Ца́рь сла́вы?

А протодиа́кон подно́сит архиере́ю кади́ло. Архиере́й же приня́в, кади́т святы́й ди́скос три́жды, по три́жды, та́же свято́е ева́нглие и кре́ст, и ико́ны, пра́вую и ле́вую страну́, та́же священнослужи́телей.

Врата́м же затворе́нным, или́ за́навесом заве́шенным, со ико́нами, со ева́нглием и со кресты́, стоя́т свяще́нницы за столо́м пред две́рьми, обратя́ся на за́пад на столе́ же постлана́ пелена́, по угла́м стола́ четы́ре подсве́щника, или́ два́: а диа́коны рипи́ды держа́т над святы́ми мощьми́.

По кажде́нии же прие́млет протодиа́кон у архиере́а кади́ло, и кади́т архиере́а три́жды.

Егда́ пе́вчие пропою́т пе́рвое: Кто́ е́сть се́й Ца́рь сла́вы? Па́ки архиере́й глаго́лет второ́е: Возми́те врата́ кня́зи ва́шя, и возми́теся врата́ ве́чная, и вни́дет Ца́рь сла́вы.

Пе́вчие пою́т: Кто́ е́сть се́й Ца́рь сла́вы?

Посе́м протодиа́кон: Го́споду, помо́лимся.

Пе́вчие: Го́споди поми́луй.

С архиере́а отлага́ется ми́тра, и глаго́лет моли́тву велегла́сно:

Бо́же и о́тче Го́спода на́шего Иису́са Христа́, сы́й благослове́н во ве́ки, и́же заве́сою пло́ти его́ обнови́л еси́ на́м в перворо́дных це́рковь на небесе́х впи́саных вхо́д, иде́же жи́тельство пра́зднующих и гла́с ра́дования: са́м человеколю́бче Влады́ко, при́зри на ны́ гре́шныя и недосто́йныя рабы́ твоя́, обновле́ние пра́зднующыя честна́го хра́ма и́мярек во о́браз святе́йшия твоея́ це́ркве, си́речь, са́маго телесе́ на́шего, е́же у́бо и хра́м тво́й, [и у́ды Христа́ твоего́], всехва́льным апо́столом па́влом именова́ти сподо́бил еси́: и утверди́ его́ до сконча́ния ве́ка непоколеби́ма, и просла́влена в тебе́: и сподо́би на́с в не́м хвалы́ и славосло́вия незазо́рна приноси́ти сла́ве твое́й, и единоро́дному твоему́ Сы́ну Го́споду на́шему Иису́су Христу́, и свято́му твоему́ ду́ху, в ра́зуме и вся́ком чу́встве, покланя́ющымся тебе́ во стра́се твое́м, Боже́ственных щедро́т досто́йным показа́тися: и благоприя́тным твое́й бла́гости бы́ти мольба́м си́м, о на́с и все́х лю́дех твои́х неизрече́нному твоему́ благоутро́бию приноси́мым: моли́твами пречи́стыя Влады́чицы на́шея Богоро́дицы, и Присноде́вы Мари́и.

Возгла́с: Я́ко свя́т еси́ Бо́же на́ш, и на святы́х почива́еши, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Пе́вчие: Ами́нь.

Архиере́й: Ми́р все́м.

Протодиа́кон: Главы́ ва́шя Го́сподеви приклони́те.

Пе́вчие: Тебе́ Го́споди.

Архиере́й чте́т моли́тву вхо́да та́йно:

Влады́ко Го́споди Бо́же на́ш, уста́вивый на небесе́х чи́ны, и во́инства а́нгел и арха́нгел во служе́ние твоея́ сла́вы: сотвори́ со вхо́дом на́шим вхо́ду святы́х а́нгелов бы́ти, сослужа́щих на́м и сославосло́вящих твою́ бла́гость.

Возгла́с: Я́ко подоба́ет тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Пе́вчие: Ами́нь.

Та́же архиере́й прие́млет ди́скос со святы́ми мощьми́, и зна́менает врата́ хра́ма крестообра́зно, и глаго́лет:

Госпо́дь си́л, то́й е́сть Ца́рь сла́вы.

Пе́вчие пою́т та́кожде:

Госпо́дь си́л, то́й е́сть Ца́рь сла́вы.

Егда́ пе́вчие запою́т после́днее: Госпо́дь си́л, то́й е́сть Ца́рь сла́вы: в то́ вре́мя оте́млется сто́л, а архиере́й поставля́ет ди́скос с мощьми́ на главу́ свою́ и и́дут во хра́м. В то́ вре́мя пе́вчие пою́т тропа́рь, гла́с 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы твоея́, Го́споди: утверди́ сие́ во ве́к ве́ка, и приими́ на́ша в не́м непреста́нно приноси́мая тебе́ моле́ния Богоро́дицею, все́х животе́ и воскре́сние.

Архиере́й же вхо́дит во святы́й олта́рь Ца́рскими враты́: и поставля́ет ди́скос со святы́ми мощьми́ на святе́м Престо́ле, и покланя́ется святы́м моще́м, и налага́ется на архиере́а ми́тра. А протодиа́кон подно́сит архиере́ю кади́ло, и прие́м архиере́й, кади́т святы́я мо́щи три́жды, по три́жды, и на о́бе страны́ сослужи́телей: протодиа́кон же приня́в у архиере́а кади́ло, кади́т архиере́а три́жды. Архиере́й же помоля́ся осеня́ет сослужа́щих, и отлага́ет с ди́скоса возду́х и звезду́, а ключа́рь подно́сит свято́е ми́ро, и я́щичек для святы́х моще́й, что́ под Престо́л: по не́м подно́сит иподиа́кон воскомасти́х не́сколько приусты́л. И прие́млет архиере́й святы́я мо́щи, разверну́в из бума́жек, в кото́рых заве́рнуто по три́ части́цы, обле́пленныя во́ском, кладе́т, напре́дь ми́ром пома́зав, в я́щичек о́ныя, и залива́ет воскомасти́хом, и отдае́т ключарю́.

Ключа́рь же приня́в и целова́в архиере́йскую ру́ку, закрыва́ет я́щичек, и полага́ет под Престо́лом в сре́днем столпе́.

Та́же архиере́й и в антими́нс [или́ в антими́нсы], пома́зав пе́рвее в меше́чке святы́м ми́ром, влага́ет приугото́вленныя части́цы, и укрепля́ет воскомасти́хом же наро́читою лопа́точкою.

[зри́] Егда́ бли́з освяща́емаго хра́ма друго́й це́ркви не́сть, тогда́ святы́я мо́щи поставля́ются та́кожде с ве́чера на анало́гии пред о́бразом спаси́телевым, что́ у Ца́рских вра́т на пра́вой стране́, в то́мже хра́ме, его́же освяща́ть. Егда́ же прии́дет вре́мя по мо́щи идти́, выхо́дит архиере́й Ца́рскимиж враты́, и стано́вится проти́во моще́й на орлеце́, и помоля́ся осеня́ет сослужа́щих, и прие́млет архиере́й кади́ло, и кади́т святы́я мо́щи, три́жды по три́жды: а пе́вчие пою́т вышепи́санный тропа́рь: И́же во все́м ми́ре му́ченик твои́х:

Сла́ва, и ны́не, конда́к:

Я́ко нача́тки естества́:

А ка́к пропою́т пе́вчие, протодиа́кон глаго́лет ектению́ ма́лую: Па́ки и па́ки: пред мощьми́, и все́ быва́ет по чи́ну, я́коже предписа́ся вы́ше сего́. И прие́млет архиере́й святы́я мо́щи на главу́, и и́дут со кресты́ вкру́г це́ркви по чи́ну. А егда́ не возмо́жно нико́ими ме́ры вокру́г хра́ма с мощьми́ ходи́ти: то пред церко́вная вели́кая врата́ выхо́дят, и поставля́ет архиере́й святы́я мо́щи на угото́ванном столе́, и покланя́ется святы́м моще́м, и прие́млет у протодиа́кона кади́ло, и кади́т святы́я мо́щи, три́жды по три́жды, и быва́ет все́ по предпи́санному чи́ну. По исполне́нии всего́ прие́млет архиере́й святы́я мо́щи на главу́ свою́, и зна́меновав о́ными церко́вная вели́кая врата́, па́ки поставля́ет на главу́ свою́. и́дет во олта́рь Ца́рскими враты́ по обы́чаю: и вше́д во олта́рь, обхо́дит со святы́ми мощьми́ вокру́г Престо́ла еди́ножды, вме́сто того́, е́же что́ идти́ бы́ло вкру́г хра́ма, и поставля́ет святы́я мо́щи на святе́й трапе́зе, и влага́ет о́ныя в я́щичек, и в антими́нсы, и про́чее де́йствует по чи́ну вы́ше пока́занному.

По исполне́нии того́, протодиа́кон глаго́лет: Го́споду помо́лимся.

Свяще́нницы: Го́споди поми́луй.

Архиере́й глаго́лет моли́тву:

Го́споди Бо́же на́ш, и́же и сию́ сла́ву, о тебе́ пострада́вшым святы́м му́чеником дарова́вый, е́же се́ятися по все́й земли́ моще́м и́х, во святы́х хра́мех твои́х, и плоды́ исцеле́ний прозяба́ти: са́м Влады́ко, все́х благи́х пода́тель сы́й, моли́твами святы́х, и́хже благоизво́лил еси́ положе́нию моще́й в се́м честне́м же́ртвеннице твое́м [в си́х честны́х же́ртвенницех твои́х] бы́ти, сподо́би на́с неосужде́нно безкро́вную тебе́ на не́м [на ни́х] приноси́ти же́ртву, и да́руй на́м вся́ я́же ко спасе́нию проше́ния, возме́здие подая́й и в се́м пострада́вшым за свято́е и́мя твое́, е́же чудоде́йствовати те́ми к на́шему спасе́нию.

Возгла́с: Я́ко твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Свяще́нницы: Ами́нь.

Посе́м протодиа́кону ре́кшу: Па́ки и па́ки прекло́ньше коле́на, Го́споду помо́лимся.

Архиере́й приклони́в коле́на своя́ [та́кожде и наро́д стоя́щий во хра́ме приклоня́ет коле́на своя́], чте́т сию́ моли́тву во услы́шание все́м:

Го́споди Бо́же на́ш, и́же тва́рь еди́ным сло́вом созда́вый, и во е́же бы́ти приведы́й, неизрече́нными же о́бразы разли́чно сию́ украси́вый, и́же надноси́мый на ню́ тво́й ду́х собра́вый, и со́лнечный се́й све́т на ню́ излия́вый во обновле́ние ея́: и́же уго́днику твоему́ моисе́ю вдохну́вый хвалу́ не́кую изря́дну приложи́ти добре́йшему твоему́ созда́нию, и рещи́ ви́дети тебе́ све́т я́ко до́брый, и дне́м нарещи́ се́й. его́же у́бо и мы́ ви́дяще, и светле́йшее сие́ со́лнце, обновля́ющее на вся́к де́нь тва́рь, тя́ и́стиннаго дне́ сла́вим со́лнце, и све́т тво́й невече́рний, и́же Сы́ном твои́м на́м запове́давый обнови́тися на́шему естеству́ святы́м твои́м ду́хом, я́ко и по да́ру сему́ пра́ведным возсия́ти я́ко со́лнцу: тебе́ мо́лимся, и тебе́ про́сим отца́ сло́ва, Го́спода и Бо́га на́шего: [поне́же неизрече́нным твои́м человеколю́бием, и безме́рною твое́ю ми́лостию, тва́рь и дре́вний зако́н во о́браз но́ваго заве́та во твое́м боговиде́нии у сина́йския горы́, и в купине́ о́ной ди́вной, и в се́ни свиде́ния, и в предо́брейшем хра́ме соломо́на о́наго обновле́ние прия́]: ми́лостивным о́ком при́зри на ны́ гре́шныя и недосто́йныя рабы́ твоя́, пребыва́ющыя в се́м дому́ небоподо́бном, вселе́нныя похвале́, же́ртвеннице и́стинном неизрече́нныя твоея́ сла́вы, и низпосли́ Пресвята́го твоего́ ду́ха на ны́, и на насле́дие твое́: и по Боже́ственному Дави́ду, обнови́ в сердца́х на́ших ду́х пра́вый и ду́хом Влады́чним утверди́ на́с. И благочести́вейшему, самодержа́внейшему, вели́кому госуда́рю на́шему импера́тору никола́ю алекса́ндровичу всея́ Росси́и, победи́тельная и побе́ды на ви́димыя и неви́димыя враги́ да́руй: на́м же единомы́слие и ми́р. Сотво́ршым же зда́ние сие́ и хра́ма освяще́ние, по любви́ к тебе́ Бо́гу тща́тельно, оставле́ние согреше́ний пода́ждь: да́руй и́м я́же ко спасе́нию проше́ния, воздви́гни я́ к де́ланию за́поведей твои́х: да́руй и́м обновле́ние да́ра свята́го твоего́ ду́ха, да неосужде́нно покло́нятся тебе́ еди́ному и́стинному Бо́гу, и его́же посла́л еси́ Иису́су Христу́, моли́твами Богоро́дицы, [и его́же е́сть хра́м] и все́х святы́х твои́х, ами́нь.

И по моли́тве воста́в архиере́й и про́чии, протодиа́кон глаго́лет:

Заступи́, спаси́, поми́луй, возста́ви, и сохрани́ на́с Бо́же, твое́ю благода́тию.

Пресвяту́ю, пречи́стую: и про́чая.

Архиере́й возгла́с:

Я́ко свя́т еси́ Бо́же на́ш, и на святы́х по тебе́ пострада́вших, честны́х му́ченицех почива́еши, и тебе́ сла́ву возсыла́ем, отцу́ и Сы́ну, и свято́му ду́ху, ны́не и при́сно, и во ве́ки веко́в.

Ли́к: Ами́нь.

Та́же архиере́й и́дет на облача́льное свое́ ме́сто, а́ще е́сть, с по́сохом: а́ще не́т облача́льнаго ме́ста, стано́вится на предъолта́рном амво́не, а свяще́нницы стано́вятся на о́бе страны́ по чи́ну. Архиере́й же ста́в и помоля́ся, осеня́ет предстоя́щих.

Протодиа́кон глаго́лет ектению́:

Поми́луй на́с Бо́же, по вели́цей ми́лости твое́й, мо́лим ти ся, услы́ши и поми́луй.

Пе́вчие: Го́споди поми́луй. три́жды.

Еще́ мо́лимся о все́м и́х Христолюби́вом во́инстве.

Еще́ мо́лимся о блаже́нных и приснопа́мятных созда́телех свята́го хра́ма сего́.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии на́шея.

Еще́ мо́лимся о плодонося́щих и доброде́ющих во святе́м и всечестне́м хра́ме се́м, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Архиере́й глаго́лет возгла́с:

Я́ко ми́лостив и человеколю́бец Бо́г еси́, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Пе́вчие: Ами́нь.

Ключа́рь подно́сит архиере́ю кре́ст на блю́де. Архиере́й прии́м кре́ст, на то́мже облача́льном ме́сте [или́ на предъолта́рном амво́не] стоя́, осеня́ет кресто́м по три́жды на четы́ре страны́: на восто́к, на за́пад, на ю́г и на се́вер. А протодиа́кон кади́т проти́во креста́ по три́жды, и преходя́ глаго́лет:

Го́споду помо́лимся, рце́м вси́.

Пе́вчие: Го́споди поми́луй. По три́жды.

По осене́нии, протодиа́кон: Прему́дрость.

Архиере́й же положи́в кре́ст ключарю́ на блю́до, и́дет [а́ще ли стоя́л на облача́льном ме́сте] на предъолта́рный амво́н с по́сохом, глаго́ля:

Пресвята́я Богоро́дице, спаси́ на́с.

Пе́вчие: Честне́йшую херуви́м:

Архиере́й: Сла́ва тебе́ Христе́ Бо́же, упова́ние на́ше.

Пе́вчие: Сла́ва, и ны́не: Го́споди поми́луй. Три́жды: Влады́ко, благослови́.

Архиере́й, возше́д на амво́н, и отда́в по́сох, па́ки прие́млет кре́ст, и глаго́лет отпу́ст со кресто́м. По отпу́сте возглаша́ет протодиа́кон и́х импера́торским вели́чествам и и́х импера́торским высо́чествам многоле́тствие.

По многоле́тствии же диа́кон подно́сит архиере́ю святу́ю во́ду: архиере́й кропи́т свято́ю водо́ю се́нь, за́пад, се́вер и ю́г. По окропле́нии са́м архиере́й целу́ет честны́й кре́ст, по не́мже и про́чии священнослужи́телие и лю́дие, и кропи́т и́х ка́ждаго свято́ю водо́ю.

А пе́вчие, до́ндеже прикла́дываются лю́дие, пою́т: Мно́гая ле́та.

По пропе́тии же многоле́тия, начина́ют часы́.

На литурги́и, проки́мен освяще́нию, и хра́му. Апо́стол к евре́ем, зача́ло 308, и хра́му. Ева́нглие от Иоа́нна, заⷱ҇ 37 от полу́, и хра́му.

Глава 29. Чи́н благослове́ния и освяще́ния сосу́дов служе́бных: си́есть ди́скоса, ча́ши, звезди́цы и лжи́цы, с тремя́ и́х покро́вцы, предложе́нных вку́пе

Поста́влену су́щу столу́ и че́стно покры́ту пред святы́ми враты́, полага́ются на не́м сосу́ды. Иере́й, оде́ян в епитрахи́ль и фело́нь, с кади́льницею исхо́дит святы́ми враты́, и покади́в крестообра́зно, начина́ет обы́чно:

Благослове́н Бо́г на́ш: Чте́ц же чте́т: Царю́ небе́сный: Трисвято́е: И по О́тче на́ш: Иере́й: Я́ко твое́ е́сть Ца́рство: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 22:

Госпо́дь пасе́т мя́, и ничто́же мя́ лиши́т. На ме́сте зла́чне, та́мо всели́ мя, на воде́ поко́йне воспита́ мя. Ду́шу мою́ обрати́, наста́ви мя́ на стези́ пра́вды, и́мене ра́ди своего́. А́ще бо и пойду́ посреде́ се́ни сме́ртныя, не убою́ся зла́, я́ко ты́ со мно́ю еси́: же́зл тво́й и па́лица твоя́, та́ мя́ уте́шиста. угото́вал еси́ предо мно́ю трапе́зу сопроти́в стужа́ющым мне́: ума́стил еси́ еле́ом главу́ мою́, и ча́ша твоя́ упоява́ющи мя́, я́ко держа́вна. И ми́лость твоя́ пожене́т мя́ вся́ дни́ живота́ моего́, и е́же всели́ти ми ся в до́м Госпо́день, в долготу́ дни́й.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Влады́ко вседержи́телю Го́споди Бо́же на́ш, пода́вый моисе́ю рабу́ твоему́ зако́н, оправда́ния же и слу́жбы, и в святи́лищи твое́м, в сла́ву пресвято́му и́мени твоему́ сооруже́нном, сосу́ды зла́ты и сре́бряны к приноше́нию разли́чных же́ртв тебе́ и́стинному Бо́гу на́шему [я́же бы́ша се́нь и о́браз ны́нешней и́стинной безкро́вной на́шей же́ртвы] твори́ти и освяти́ти повеле́л еси́. Ты́ са́м и ны́не человеколю́бче Го́споди, благослови́ ди́скос се́й, ча́шу, звезди́цу и лжи́цу с покро́вами и́х, и освяти́ я́ си́лою, де́йством и благода́тию всесвята́го и животворя́щаго твоего́ ду́ха, я́ко да прино́сится тебе́ на ни́х и́стинная, жива́я, безкро́вная и слове́сная же́ртва, пресвято́е те́ло вели́каго Бо́га и спа́са на́шего Иису́са Христа́, Сы́на твоего́, и́же на́с де́ля и на́шего ра́ди спасе́ния тебе́ Бо́гу и отцу́ своему́ еди́ною самаго́ себе́ в же́ртву благоприя́тну на кре́стном же́ртвеннице принесе́. Тебе́ бо с ни́м, и с пресвяты́м, и благи́м, и животворя́щим твои́м ду́хом, подоба́ет вся́ческая сла́ва, че́сть и поклоне́ние ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, прекло́нь главу́, глаго́лет моли́тву сию́ та́йно:

Го́споди Бо́же на́ш, при́зри ны́не на моли́тву недосто́йнаго мене́ раба́ твоего́, и низпосли́ бога́тство благослове́ния твоего́ на сосу́ды сия́, и освяти́ я́ ду́хом твои́м святы́м во окропле́нии свяще́нныя сея́ воды́, во е́же бы́ти и́м досто́йное вмести́лище пречи́стаго те́ла, и честны́я кро́ве Христа́ твоего́.

И возглаша́ет: Ты́ бо еси́ исто́чник освяще́ния, и тебе́ со единоро́дным Сы́ном, и с пресвяты́м, и благи́м, и животворя́щим твои́м ду́хом, подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в.

Ли́к: Ами́нь.

И а́бие кропи́т сосу́ды свяще́нною водо́ю, глаго́ля:

Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

А́ще у́бо служи́ти а́бие и́мать, взе́млет са́м сосу́ды, и вно́сит я́ в олта́рь, и поста́вив на же́ртвеннице, слу́жит и́ми. А́ще же служи́ти не бу́дет, сотвори́в обы́чно дневны́й отпу́ст, вно́сит сосу́ды в олта́рь.

Глава 30. Моли́тва над еди́ным ди́скосом но́вым

При освяще́нии еди́наго то́чию ди́скоса, нача́ло быва́ет обы́чное, псало́м 22, и чте́тся сия́ же вышепредложе́нная моли́тва, с опуще́нием то́кмо наименова́ний про́чих сосу́дов, и моли́тва главоприклоне́ния, и кропле́ние, я́коже пока́зано в предъиду́щей главе́.

Глава 31. Моли́тва над поти́ром еди́ным. си́есть, ча́шею но́вою

Нача́ло обы́чное, и псало́м 22.

Та́же диа́кону ре́кшу: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Влады́ко вседержи́телю, Го́споди Бо́же оте́ц на́ших, тебе́ мо́лимся, и тебе́ призыва́ем, и приле́жно про́сим: низпосли́ благода́ть Пресвята́го всеосвяща́ющаго и животворя́щаго твоего́ ду́ха на ча́шу сию́, [а́ще су́ть покро́вцы и лжи́ца, глаго́ли и сие́: и на все́ украше́ние его́,] и благослови́, очи́сти, и освяти́ ю́, я́коже благослови́л, очи́стил и освяти́л еси́ ча́шу свяще́нника твоего́ мелхиседе́ка, и ча́шу святы́х апо́стол на та́йной ве́чери Христа́ твоего́ и досто́йну же́ртвенника твоего́ бы́ти сотвори́, во е́же приноси́тися в не́й тебе́ Бо́гу и отцу́ умилостиви́тельной безкро́вной же́ртве, те́ла и кро́ве единоро́днаго Сы́на твоего́, Го́спода Бо́га и спа́са на́шего Иису́са Христа́: с ни́мже тебе́, и пресвято́му и животворя́щему твоему́ ду́ху, подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в.

Ли́к: Ами́нь.

Про́чее же, ка́к в 28 главе́.

Глава 32. Моли́тва е́же осо́бне благослови́ти но́вую ди́скосную звезду́

Ре́кшу же диа́кону: Го́споду помо́лимся.

И ли́ку: Го́споди поми́луй.

Иере́й чте́т моли́тву сию́:

Го́споди Иису́се Христе́ Бо́же на́ш, в верте́пе от Де́вы роди́выйся, и волхвы́ звездо́ю к поклоне́нию своему́ наста́вивый: посли́ ны́не, смире́нно мо́лим тя́, небе́сное твое́ благослове́ние на звезду́ сию́, и благослови́ и освяти́ ю́, я́коже бы́ти е́й досто́йное ору́жие к служе́нию святы́м твои́м та́йнам, и в воспомина́ние и славосло́вие боготеле́снаго твоего́ от Де́вы рождества́. Ты́ бо еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву возсыла́ем со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

И а́бие по моли́тве главоприклоне́ния [Го́споди Бо́же на́ш, при́зри ны́не:], кропи́т звезду́ водо́ю свяще́нною, глаго́ля:

Освяща́ется звезда́ сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

Глава 33. Моли́тва, е́же благослови́ти но́вую лжи́цу к Боже́ственным та́йнам

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же вседержи́телю, у́глем от серафи́ма клеща́ми взя́тым, и прикоснове́нием усты́ проро́ка очища́ющим, прообрази́вый иногда́ си́лу Боже́ственных та́ин те́ла и кро́ве Христа́ твоего́, лжи́цею ны́не ве́рным твои́м лю́дем во очище́ние грехо́вных скве́рн подава́емых: при́зри ны́не ми́лостивно на моли́тву на́шу: и низпосли́ небе́сное твое́ благослове́ние на лжи́цу сию́, и благослови́ и освяти́ ю́, во е́же бы́ти е́й досто́йный сосу́д к прия́тию и подая́нию пречи́стаго те́ла, и честны́я кро́ве Христа́ твоего́, во оставле́ние грехо́в все́х люде́й твои́х. Ты́ бо еси́ исто́чник освяще́ния, и пода́тель вся́ческих бла́г, и тебе́ сла́ву и благодаре́ние, и поклоне́ние возсыла́ем, со единоро́дным твои́м Сы́ном, и с пресвяты́м и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же сотвори́в моли́тву главоприклоне́ния [Го́споди Бо́же на́ш, при́зри ны́не:], а́бие кропи́т лжи́цу свяще́нною водо́ю, глаго́ля та́яжде, я́же и над звездо́ю, си́есть:

Освяща́ется лжи́ца сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя отца́ и Сы́на, и Свята́го Ду́ха, ами́нь. Три́жды.

И та́ко сочетава́ет ю́ к ины́м свяще́нным сосу́дом.

Ве́стно же бу́ди, я́ко а́ще и ели́жды сосу́ды сия́ служе́бныя обновлены́, или́ изчи́щены бу́дут руко́ю не свяще́нною, толи́жды сицевы́м преднапи́санным благослове́нием благослови́ти, и святи́ти я́ подоба́ет: и́бо ина́ко творя́, о иере́е, сме́ртно согреши́ши, я́ко уничижи́тель Христо́вых та́ин.

Глава 34. Моли́тва, е́же благослови́ти но́выя покро́вцы, к покрове́нию святы́х та́ин служа́щыя

Диа́кону ре́кшу: Го́споду помо́лимся.

И кли́ру: Го́споди поми́луй.

Иере́й чте́т моли́тву сию́:

Го́споди Бо́же вседержи́телю, одея́йся све́том я́ко ри́зою, облага́яй не́бо о́блаки, и покрыва́яй вода́ми превы́спренняя своя́, при́зри ны́не, смире́нно мо́лим тя́, на приле́жное моле́ние на́ше, и низпосли́ небе́сное твое́ благослове́ние на покро́вцы сия́ [или́ на покро́вец се́й] и благослови́, очи́сти и освяти́ я́ [или́ его́] во е́же бы́ти и́м [или́ ему́] досто́йным [или́ досто́йну] к покрове́нию святы́х и Боже́ственных та́ин те́ла и кро́ве Христа́ твоего́, с ни́мже благослове́н еси́, с пресвяты́м, и благи́м, и животворя́щим твои́м ду́хом, ны́не, и при́сно, и во ве́ки веко́в.

Ли́к: Ами́нь.

Иере́й же кропи́т покро́вцы водо́ю свяще́нною, глаго́ля то́жде, е́же и над звездо́ю, си́есть:

Освяща́ются покро́вцы сия́ [или́ освяща́ется покро́вец се́й] благода́тию Пресвята́го Ду́ха, окропле́нием воды́ сея́ свяще́нныя во и́мя Отца́, и Сы́на, и Свята́го Ду́ха, ами́нь. Три́жды.

Глава 35. Чи́н благослове́ния но́ваго киво́та, или́ сосу́да, в не́мже храни́мы бы́ти и́мут Боже́ственныя Христо́вы та́йны

Поста́влену су́щу столу́, и че́стно покрове́нну пред ца́рскими две́рьми, и на не́м но́вому киво́ту, иере́й исхо́дит ца́рскими враты́, оде́ян в епитрахи́ль и фело́нь, с кади́льницею, и покади́в крестообра́зно киво́т, начина́ет обы́чно:

Благослове́н Бо́г на́ш: Чте́ц: Царю́ небе́сный: Трисвято́е. О́тче на́ш: Я́ко твое́ е́сть Ца́рство: Чте́ц: Го́споди поми́луй. 12. Прииди́те, поклони́мся: три́жды.

И псало́м 131:

Помяни́ Го́споди Дави́да, и всю́ кро́тость его́. Я́ко кля́тся Го́сподеви, обеща́ся Бо́гу Иа́ковлю: А́ще вни́ду в селе́ние до́му моего́, или́ взы́ду на о́др посте́ли моея́: А́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма: До́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во евфра́фе, обрето́хом я́ в поля́х дубра́вы: Вни́дем в селе́ния его́, поклони́мся на ме́сто, иде́же стоя́сте но́зе его́. Воскресни́ Го́споди в поко́й тво́й, ты́ и киво́т святы́ни твоея́. Свяще́нницы твои́ облеку́тся пра́вдою, и преподо́бнии твои́ возра́дуются. Дави́да ра́ди раба́ твоего́, не отврати́ лице́ пома́заннаго твоего́. Кля́тся Госпо́дь Дави́ду и́стиною, и не отве́ржется ея́: от пло́да чре́ва твоего́ посажду́ на Престо́ле твое́м. А́ще сохраня́т сы́нове твои́ заве́т мо́й и свиде́ния моя́ сия́, и́мже научу́ я́, и сы́нове и́х до ве́ка ся́дут на Престо́ле твое́м. Я́ко избра́ Госпо́дь сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́: ни́щыя его́ насы́щу хле́бы. Свяще́нники его́ облеку́ во спасе́ние и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному моему́. Враги́ его́ облеку́ студо́м, на не́мже процвете́т святы́ня моя́.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Бо́же на́ш, име́яй Престо́л не́бо, и подно́жие зе́млю, а́ще и вся́ тва́рь вмести́ти тя́ не мо́жет, ниже́ у́м а́нгельский и челове́ческий вели́чество сла́вы твоея́ пости́гнути, и по достоя́нию сказа́ти возмога́ет: но ты́ милосе́рдия ра́ди ми́лости и человеколю́бия, во чре́ве деви́честем неизрече́нно вмести́тися изво́лил еси́, и челове́к бы́в, Бо́г сы́й и́стинен, да челове́ка себе́ присво́иши, под ви́димым ви́дом хле́ба и вина́, пло́ть и кро́вь свою́ в сне́дь ве́рным да́л еси́. Я́ко Бо́г у́бо, а́ще и везде́ еси́, и вся́ исполня́еши, но я́коже Бо́г и челове́к, на небеси́ одесну́ю отца́, и на земли́ в пресвяты́х то́чию те́ла и кро́ве твоея́ та́йнах и́стинно бы́ти изволя́еши: те́мже ны́не смире́нно молю́ тя, при́зри ми́лостивно на моли́тву на́шу, и на сосу́д се́й, в сла́ву твою́ сооруже́нный, и благослове́ние твое́ небе́сное низпосли́ на́нь, благослови́, очи́сти и освяти́ его́, во е́же бы́ти ему́ досто́йное вмести́лище, но́вый же гро́б и храни́лище святы́м и животворя́щым та́йнам Пресвята́го те́ла и честны́я кро́ве твоея́. Ты́ бо еси́ освяще́ние на́ше, и тебе́ сла́ву возсыла́ем со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, главу́ приклони́в, та́йно чте́т моли́тву сию́:

Го́споди Бо́же на́ш, приклони́ у́хо твое́ и услы́ши мя́, и́же ми́лости ра́ди и человеколю́бия с на́ми неотсту́пно до сконча́ния ве́ка пребыва́ти обеща́лся еси́, и посли́ благода́ть Пресвята́го твоего́ ду́ха, и в окропле́нии свяще́нныя сея́ воды́, благослови́ и освяти́ сосу́д се́й, на хране́ние Боже́ственных та́ин те́ла и кро́ве твоея́ сооруже́нный.

И возглаша́ет: Ты́ бо еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву возсыла́ем, со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же взе́м свяще́нную во́ду, кропи́т е́ю киво́т, глаго́ля:

Освяща́ется киво́т се́й благода́тию Пресвята́го Ду́ха, окропле́нием воды́ сея́ свяще́нныя, во и́мя отца́ и Сы́на, и Свята́го Ду́ха, ами́нь. Три́жды.

Сотвори́в же обы́чный дневны́й отпу́ст, взе́млет свяще́нный киво́т, и отно́сит его́ на святу́ю трапе́зу, и влага́ет в не́м Боже́ственныя та́йны.

Глава 36. Чи́н благослове́ния илито́на

Из то́нкой и до́брой льняно́й или́ ше́лковой мате́рии величино́ю не́сколько бо́лее антими́нса, пригото́вленный илито́н, простира́ется на свято́й трапе́зе, иере́й же оде́ян в епитрахи́ль и фело́нь, покади́в крестообра́зно святу́ю трапе́зу, ста́нет спреди́, и обы́чно начина́ет:

Благослове́н Бо́г на́ш: Чте́ц: Царю́ небе́сный: Трисвято́е: и О́тче на́ш: И по возгла́се, Го́споди поми́луй: 12. Прииди́те, поклони́мся: три́жды.

И псало́м 110:

Испове́мся тебе́ Го́споди, все́м се́рдцем мои́м, в сове́те пра́вых и со́нме: Ве́лия дела́ Госпо́дня, изы́скана во все́х во́лях его́. Испове́дание и великоле́пие де́ло его́, и пра́вда его́ пребыва́ет в ве́к ве́ка. Па́мять сотвори́л е́сть чуде́с свои́х: ми́лостив и ще́др Госпо́дь. Пи́щу даде́ боя́щымся его́: помяне́т в ве́к заве́т сво́й. Кре́пость де́л свои́х возвести́ лю́дем свои́м, да́ти и́м достоя́ние язы́к. Дела́ ру́к его́ и́стина и су́д: ве́рны вся́ за́поведи его́: утверже́ны в ве́к ве́ка, сотворе́ны во и́стине и правоте́. Избавле́ние посла́ лю́дем свои́м: запове́да в ве́к заве́т сво́й: свя́то и стра́шно и́мя его́. Нача́ло прему́дрости стра́х Госпо́день, ра́зум же бла́г все́м творя́щым и́: хвала́ его́ пребыва́ет в ве́к ве́ка.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Иису́се Христе́ Бо́же на́ш, Сы́не и сло́ве Бо́га жива́го, изво́ливый спасе́ния ра́ди на́шего от пречи́стыя Де́вы воплоти́тися, и по рождестве́ пелена́ми пови́т бы́ти, и в я́слех положи́тися: по сме́рти же кре́стной, ю́же на́с де́ля во́лею претерпе́л еси́, плащани́цею чи́стою и сударе́м обви́т, и во гро́бе положе́н бы́ти: тебе́ ны́не про́сим и смире́нно мо́лим, посли́ Боже́ственное благослове́ние и благода́ть свята́го твоего́ ду́ха, на илито́н се́й, и благослови́, очи́сти и освяти́ его́, во е́же бы́ти ему́ досто́йну, е́же на не́м освяти́тися Боже́ственным та́йнам Пресвята́го те́ла и честны́я кро́ве твоея́, в сла́ву твою́ и безнача́льнаго твоего́ отца́, и единосу́щнаго и животворя́щаго твоего́ ду́ха, и в спасе́ние все́х люде́й твои́х: я́ко ты́ еси́ освяще́ние на́ше, и тебе́ сла́ву возсыла́ем, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, главу́ приклони́в, та́йно глаго́лет моли́тву сию́:

Го́споди Иису́се Христе́ Бо́же на́ш, приле́жную сию́ мольбу́ приими́ от на́с недосто́йных рабо́в твои́х, и я́ко бла́г и человеколю́бец, благоволи́ ны́не низпосла́ти благослове́ние твое́ свято́е на илито́н се́й, и благослови́, и освяти́ его́ ду́хом твои́м святы́м, в окропле́нии воды́ сея́ свяще́нныя, я́коже освяти́л еси́ святы́я твоя́ гро́бныя пелены́, во е́же бы́ти ему́ но́вому сударю́, и синдо́ну [плащани́це] пресвято́му те́лу и кро́ве твоея́ честны́я.

И возглаша́ет: Ты́ бо еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

И кропи́т иере́й илито́н свяще́нною водо́ю, глаго́ля:

Освяща́ется илито́н се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие твори́т обы́чный дневны́й отпу́ст.

Глава 37. Чи́н благослове́ния или́ освяще́ния но́вых свяще́ннических оде́жд: си́есть стихаря́, епитрахи́ля, по́яса, по́ручей и фело́ни

Пред Ца́рскими врата́ми на пригото́вленном столе́ полага́ются но́выя оде́жды, к освяще́нию принесе́нныя, иере́й же в епитрахи́ли и фело́ни с кади́льницею, исхо́дит в Ца́рския две́ри, и покади́в крестообра́зно оде́жды, обы́чно начина́ет:

Благослове́н Бо́г на́ш: Чте́ц: Ами́нь: Царю́ небе́сный: Трисвято́е. О́тче на́ш: Иере́й же: Я́ко твое́ е́сть Ца́рство: Чте́ц: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 132:

Се́ что́ добро́, или́ что́ красно́, но е́же жи́ти бра́тии вку́пе? Я́ко ми́ро на главе́, сходя́щее на браду́, браду́ ааро́ню, сходя́щее на оме́ты оде́жды его́: Я́ко роса́ аермо́нская, сходя́щая на го́ры сио́нския. я́ко та́мо запове́да Госпо́дь благослове́ние и живо́т до ве́ка.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Бо́же вседержи́телю, изнача́ла поле́зная челове́ческому ро́ду вся́ де́йствуяй, хра́мы руко́ю челове́ческою сотворе́нная и́мени твоему́ свято́му созда́ти, и ты́я в сла́ву свою́ освяща́ти, и ме́сто селе́ния сла́вы твоея́ нарица́ти восхоте́вый? и рабо́м твои́м моисе́ом одея́ния архиере́йская, иере́йская же и леви́тская, и ина́я разли́чная украше́ния в благоле́пие и красоту́ святи́лища и олтаря́ твоего́ бы́ти повеле́вый: услы́ши ми́лостивно ны́не моле́ния на́ша, и оде́жды сия́ [имену́ет и́х], в че́сть и сла́ву Пресвята́го и́мене твоего́, в украше́ние же и благоле́пие служи́телем свята́го твоего́ олтаря́, и святы́х твои́х та́ин угото́вленныя, мно́ю смире́нным и недосто́йным рабо́м твои́м благослови́, очи́сти и освяти́, я́ко да к служе́нию святы́м твои́м та́йнам, и ко вся́кому славосло́вию Пресвята́го и́мене твоего́ досто́йны бы́ти явя́тся, и свяще́нным служи́телем твои́м те́ми одева́ющымся, да бу́дут в избавле́ние и покро́в от все́х ко́зней и собла́знов вра́жиих, в твое́ же благоугожде́ние, и досто́йное служе́ние святы́м твои́м та́йнам, и в снабде́ние твоея́ благода́ти и милосе́рдия: благода́тию и щедро́тами, и человеколю́бием единоро́днаго твоего́ Сы́на, с ни́мже благослове́н еси́, с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, прекло́нь главу́, чте́т та́йно моли́тву сию́:

Влады́ко Бо́же вседержи́телю, все́х благи́х пода́телю и освяще́ния исто́чниче, при́зри ны́не на моли́тву на́шу, и оде́жды сия́ [имену́ет и́х] в украше́ние и благоле́пие свяще́нных служи́телей твои́х сооруже́нныя, благода́тию Пресвята́го твоего́ ду́ха, окропле́нием воды́ сея́ свяще́нныя благослове́нны, свя́ты и освяще́нны, и все́х те́ми оде́ющихся досто́йны святы́м твои́м та́йнам служи́ти, и тебе́ благоугожда́ти всегда́ сотвори́.

И возглаша́ет: Я́ко ты́ еси́ освяще́ние на́ше, и тебе́ сла́ву возсыла́ем со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же взе́м свяще́нную во́ду, кропи́т е́ю предлежа́щыя оде́жды, глаго́ля:

Освяща́ются оде́жды сия́ [имену́ет и́х] благода́тию всеСвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́ще а́бие литургиса́ти и́мать, не творя́ отпу́ста, са́м иере́й вно́сит и́х во святы́й олта́рь, облача́ется в ня́, и слу́жит: а́ще же служи́ти не и́мать, сотвори́в обы́чный дневны́й отпу́ст, вно́сит я́ в олта́рь, и на свято́й трапе́зе полага́ет.

Глава 38. Чи́н благослове́ния инди́тий, или́ оде́жд и покрыва́л Боже́ственныя трапе́зы и же́ртвенника

Положе́нным бы́вшым си́м на столе́ пред святы́ми враты́, и су́щей ту́ и воде́ свяще́нной, иере́й исхо́дит из олтаря́, оде́ян в епитрахи́ль и фело́нь, и покади́в крестообра́зно, начина́ет обы́чно:

Благослове́н Бо́г на́ш: Чте́ц: Ами́нь. Царю́ небе́сный: Трисвято́е. О́тче на́ш: Иере́й: Я́ко твое́ е́сть Ца́рство: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 92:

Госпо́дь воцари́ся, в ле́поту облече́ся: облече́ся Госпо́дь в си́лу, и препоя́сася: и́бо утверди́ вселе́нную, я́же не подви́жится. Гото́в Престо́л тво́й отто́ле, от ве́ка ты́ еси́. Воздвиго́ша ре́ки Го́споди, воздвиго́ша ре́ки гла́сы своя́. Во́змут ре́ки сотре́ния своя́, от гласо́в во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния твоя́ уве́ришася зело́: до́му твоему́ подоба́ет святы́ня Го́споди, в долготу́ дни́й.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же о́тче вседержи́телю, рабу́ твоему́ законополо́жнику моисе́ю на сина́йстей горе́ разли́чная украше́ния, покрыва́ла же и пла́тна, в употребле́ние служе́ния ски́нии свиде́ния, и зако́ннаго твоего́ святи́лища твори́ти повеле́вый: ты́ и ны́не, приле́жно мо́лим тя́, я́коже тогда́ о́ная благоутро́бне прии́м, руко́ю ааро́нею освяти́л еси́, и сия́ ми́лостивно прии́м, ду́хом твои́м святы́м, руко́ю мене́ гре́шнаго благослови́, очи́сти и освяти́, и досто́йна к покрове́нию и обви́тию Боже́ственнаго Престо́ла и же́ртвенника возлю́бленнаго Сы́на твоего́, Го́спода на́шего Иису́са Христа́, бы́ти сотвори́. От тебе́ бо свы́ше вся́ко дая́ние бла́го, и вся́кий да́р соверше́нный исхо́дит: и тебе́ сла́ву возсыла́ем, со единоро́дным твои́м Сы́ном, и с пресвяты́м и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Иере́й же, главу́ приклоня́, глаго́лет моли́тву сию́:

Приклони́ Го́споди у́хо твое́, и услы́ши мя́ недосто́йнаго раба́ твоего́, и сия́ покрыва́льная пла́тна, к употребле́нию свята́го олтаря́ и же́ртвенника Христа́ твоего́ устро́енная, благода́тию твое́ю всеосвяща́ющею, в окропле́нии воды́ сея́ свяще́нныя, благослови́, очи́сти и освяти́.

И возглаша́ет: Ты́ бо еси́ благословля́яй и освяща́яй вся́ческая Бо́же на́ш, и тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же а́бие кропи́т покрыва́ла, глаго́ля:

Освяща́ются покрыва́ла сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. три́жды.

И сотвори́в обы́чный отпу́ст, взе́млет и́х са́м, и покрыва́ет и́ми Престо́л и же́ртвенник.

Глава 39. Чи́н благослове́ния и освяще́ния новосооруже́ннаго Креста́

Поста́влену бы́вшу столу́ че́стно покрове́нну пред святы́ми враты́, иере́й в епитрахи́ль и фело́нь оде́ян, исхо́дит, и крестообра́зно покади́в но́вый кре́ст, начина́ет обы́чно: Благослове́н Бо́г на́ш: Ли́к пое́т: Царю́ небе́сный. Чте́ц: Трисвято́е. О́тче на́ш: и по я́ко твое́ е́сть Ца́рство: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 131:

Помяни́ Го́споди Дави́да, и всю́ кро́тость его́. Я́ко кля́тся Го́сподеви, обеща́ся Бо́гу Иа́ковлю: А́ще вни́ду в селе́ние до́му моего́, или́ взы́ду на о́др посте́ли моея́: А́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма: До́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во евфра́фе, обрето́хом я́ в поля́х дубра́вы. Вни́дем в селе́ния его́, поклони́мся на ме́сто, иде́же стоя́сте но́зе его́. Воскресни́ Го́споди в поко́й тво́й, ты́ и киво́т святы́ни твоея́. Свяще́нницы твои́ облеку́тся пра́вдою, и преподо́бнии твои́ возра́дуются. Дави́да ра́ди раба́ твоего́, не отврати́ лице́ пома́заннаго твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на Престо́ле твое́м. А́ще сохраня́т сы́нове твои́ заве́т мо́й, и свиде́ния моя́ сия́, и́мже научу́ я́, и сы́нове и́х до ве́ка ся́дут на Престо́ле твое́м. Я́ко избра́ Госпо́дь сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́. Лови́тву его́ благословля́яй благословлю́, ни́щыя его́ насыщу́ хле́бы, Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ ро́г Дави́дови, угото́вах свети́льник пома́занному моему́. Враги́ его́ облеку́ студо́м, на не́мже процвете́т святы́ня моя́.

Та́же, псало́м 59:

Бо́же, отри́нул ны́ еси́, и низложи́л еси́ на́с: разгне́вался еси́, и уще́дрил еси́ на́с. Стря́сл еси́ зе́млю, и смути́л еси́ ю́: исцели́ сокруше́ние ея́, я́ко подви́жеся. Показа́л еси́ лю́дем твои́м жесто́кая, напои́л еси́ на́с вино́м умиле́ния. Да́л еси́ боя́щымся тебе́ зна́мение, е́же убежа́ти от лица́ лу́ка. Я́ко да изба́вятся возлю́бленнии твои́, спаси́ десни́цею твое́ю, и услы́ши мя́. Бо́г возглаго́ла во святе́м свое́м: возра́дуюся, и разделю́ сики́му, и юдо́ль жили́щ разме́рю. Мо́й е́сть галаа́д, и мо́й е́сть манасси́й, и ефре́м кре́пость. главы́ моея́, иу́да ца́рь мо́й. Моа́в коно́б упова́ния моего́: на идуме́ю простру́ сапо́г мо́й, мне́ иноплеме́нницы покори́шася. Кто́ введе́т мя́ во гра́д огражде́ния? или́ кто́ наста́вит мя́ до идуме́и? Не ты́ ли Бо́же отри́нувый на́с? и не изы́деши Бо́же в си́лах на́ших? Да́ждь на́м по́мощь от ско́рби, и су́етно спасе́ние челове́ческо. О Бо́зе сотвори́м си́лу, и то́й уничижи́т стужа́ющыя на́м.

Та́же, псало́м 98:

Госпо́дь воцари́ся, да гне́ваются лю́дие: седя́й на херуви́мех, да подви́жится земля́. Госпо́дь в сио́не вели́к, и высо́к е́сть над все́ми людьми́. Да испове́дятся и́мени твоему́ вели́кому: я́ко стра́шно и свя́то е́сть. И че́сть царе́ва су́д лю́бит: ты́ угото́вал еси́ правоты́, су́д и пра́вду во Иа́кове ты́ сотвори́л еси́. Возноси́те Го́спода Бо́га на́шего, и покланя́йтеся подно́жию но́гу его́, я́ко свя́то е́сть. Моисе́й и ааро́н во иере́ех его́, и саму́ил в призыва́ющих и́мя его́: призыва́ху Го́спода, и то́й послу́шаше и́х. В столпе́ о́блачне глаго́лаше к ни́м: я́ко храня́ху свиде́ния его́ и повеле́ния его́, я́же даде́ и́м. Го́споди Бо́же на́ш, ты́ послу́шал еси́ и́х: Бо́же, ты́ ми́лостив быва́л еси́ и́м, и мща́я на вся́ начина́ния и́х. Возноси́те Го́спода Бо́га на́шего, и покланя́йтеся в горе́ святе́й его́: я́ко свя́т Госпо́дь Бо́г на́ш.

Сла́ва, и ны́не: Аллилу́иа, три́жды.

Го́споди поми́луй, три́жды.

И тропа́рь, гла́с 1:

Спаси́ Го́споди лю́ди твоя́, и благослови́ достоя́ние твое́, побе́ды благове́рному импера́тору на́шему никола́ю алекса́ндровичу на сопроти́вныя да́руя, и твое́ сохраня́я кресто́м твои́м жи́тельство. Три́жды.

Сла́ва, конда́к, гла́с 4:

Вознесы́йся на кре́ст во́лею, тезоимени́тому твоему́ но́вому жи́тельству, щедро́ты твоя́ да́руй Христе́ Бо́же: возвесели́ си́лою твое́ю благове́рнаго импера́тора на́шего никола́я алекса́ндровича, побе́ды дая́ ему́ на сопоста́ты, посо́бие иму́щу твое́ ору́жие ми́ра, непобеди́мую побе́ду.

И ны́не, гла́с то́йже:

Животворя́щий кре́ст твоея́ бла́гости, его́же дарова́л еси́ на́м недосто́йным, Го́споди, тебе́ прино́сим в моли́тву, спаси́ царя́ и ве́рныя лю́ди Богоро́дицы ра́ди, о на́с тебе́ моля́щыяся, еди́не человеколю́бче.

А́бие же посе́м пою́т три́жды тропа́рь се́й, гла́с 6:

Посли́ благода́ть твою́ жизнода́вче, и кре́ст се́й освяти́, и все́м лю́дем твои́м яви́ его́ бы́ти по́мощь и утвержде́ние:

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Бо́же сла́вы, о́тче вседержи́телю, Бо́же савао́ф, и́же дре́вом живота́ посреде́ рая́ су́щаго, прообрази́л еси́ животво́рный кре́ст единоро́днаго Сы́на твоего́: и вме́сто дре́ва преслуша́ния, его́же вку́сом вселука́вый зми́й пра́отцы на́шя, и с ни́ми ве́сь ро́д челове́ческий из рая́ изгна́, и в сме́рть привлече́, зна́мение о́наго живоно́снаго креста́, на не́мже возлю́бленный тво́й Сы́н пригвожде́н бы́в у́мре, и сме́ртию сме́рть умертви́, и всю́ си́лу диа́волю упраздни́, и живо́т ми́ру дарова́, це́ркви свое́й ору́жие непобеди́мое, освяще́ние же и покро́в держа́вен, и ве́ре утвержде́ние, и от все́х диа́вольских ко́зней изба́ву, и кре́пкое спасе́ния упова́ние, и живота́ получе́ния непосты́дную наде́жду дарова́л еси́. Те́мже мы́ раби́ твои́, толи́кия благода́ти твоея́ ту́не сподо́бльшеся, благода́рни су́ще, сла́ву и благодаре́ние и смире́нное поклоне́ние прино́сим твоему́ вели́честву, и мо́лимся уми́льно, я́ко да ми́лостивно при́зриши на зна́мение сие́ кре́стное, е́же ве́рнии раби́ твои́ от усе́рдия и тве́рдыя ве́ры и любве́, я́же к тебе́, сооружи́ша, в зна́мение побе́ды Сы́на твоего́, Го́спода на́шего Иису́са Христа́, свобо́ды же и избавле́ния на́шего: и низпосли́ на не́ небе́сное твое́ благослове́ние, и благослови́ и освяти́ е́, и испо́лни си́лы и благослове́ния о́наго дре́ва, на не́мже пригвожде́но бы́сть пресвято́е те́ло Го́спода на́шего Иису́са Христа́ единоро́днаго Сы́на твоего́, и́мже си́ла диа́воля попра́ся, и земни́и свобо́ду улучи́хом, и живота́ сподо́бихомся. Е́й, мо́лим тя́ Влады́ко пресвяты́й, святы́х ра́ди страсте́й, и святы́я кро́ве излия́ния, и животво́рныя сме́рти единоро́днаго Сы́на твоего́, Го́спода на́шего Иису́са Христа́, ю́же сове́том тебе́ Бо́га отца́ безнача́льнаго, и Пресвята́го твоего́ ду́ха во́лею, спасе́ния на́шего ра́ди на дре́ве кре́стном претерпе́, и те́ми дре́во кре́стное, е́же иногда́ согреша́ющым и злотво́рным ка́знь бя́ше, благослове́но, свя́то, животода́тельно же, и изба́ву согреша́ющым бы́ти сотвори́, е́же в мольбу́ ти́ прино́сим: посли́ ны́не благода́ть Пресвята́го твоего́ ду́ха, на зна́мение сие́ кре́стное, и благослови́ и освяти́ е́, и да́ждь ему́ бы́ти зна́мением стра́шным и кре́пким на вся́ враги́ ви́димыя и неви́димыя, прогна́ние же и отраже́ние все́х ко́зней, наве́тов же и прило́гов диа́вольских: лю́дем же твои́м да бу́дет покро́в держа́вен, ве́ре утвержде́ние, наде́жде подкрепле́ние, во бране́х побе́да, и во все́х доброде́телех преспе́яние, и все́м пред си́м зна́мением тебе́ кла́няющымся и мольбы́ принося́щым ми́лостивен послу́шатель, и все́х я́же ко спасе́нию проше́ний бога́тый пода́тель бу́ди. И я́коже кресто́м ми́р от грехо́внаго осужде́ния свободи́л еси́: си́це рабо́в твои́х, сие́ кре́стное зна́мение тебе́ от души́ ве́рно принося́щих, си́лою креста́ возлю́бленнаго Сы́на твоего́, всегда́ победи́тели бы́ти греха́ яви́, и вся́ земна́я и небе́сная твоя́ блага́я и́м да́руй, и кресто́м всегда́ к благо́му все́х ве́рных наставля́я, к восприя́тию небе́снаго венца́ приведи́. Ты́ бо еси́ освяще́ния исто́чник, и все́х благи́х бога́тый пода́тель, и тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Бо́же и о́тче Го́спода на́шего Иису́са Христа́, и́же кресто́м его́ диа́вола победи́в и сме́рть умертви́в, ро́д челове́ческий от ле́сти и мучи́тельства его́ свободи́л еси́: при́зри ны́не на моли́тву на́шу и на зна́мение сие́ кре́стное, в сла́ву тебе́ Бо́га отца́ и единосу́щнаго твоего́ Сы́на и соесте́ственнаго твоего́ ду́ха, и в воспомина́ние о́ныя бы́вшия пресла́вныя над диа́волом, сме́рти же и а́да побе́ды, и на́шего избавле́ния сооруже́нное, ду́хом твои́м святы́м, в окропле́нии воды́ сея́ свяще́нныя благослови́ и освяти́. И изле́й на не́ благослове́ние твое́ свято́е и си́лу, ю́же окропле́нием кро́ве и пригвожде́нием те́ла возлю́бленнаго Сы́на твоего́ о́но преблагослове́нное дре́во стяжа́ло е́сть: и тому́ пода́ждь, во е́же бы́ти ве́рным лю́дем твои́м в сте́ну и покро́в, и в сто́лп кре́пости от лица́ вра́жия, во отгна́ние же вся́каго зла́ сопроти́внаго, и во исцеле́ние душе́вных, и теле́сных неду́гов, и во е́же услы́шанным бы́ти мольба́м и моле́ниям все́х ве́рно пред си́м зна́мением моля́щих ти ся.

И возглаша́ет: Ты́ бо еси́ Бо́г ми́лости, и щедро́т, и человеколю́бия, и тебе́ сла́ву возсыла́ем, со единоро́дным твои́м Сы́ном, и с пресвяты́м, благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т свяще́нною водо́ю, глаго́ля:

Освяща́ется кре́стное сие́ зна́мение благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие посе́м ста́в благогове́йно пред святы́м кре́стным зна́мением, кади́льницу же взе́м кади́т е́ крестообра́зно, поя́ сия́ стихи́ры, гла́с 8:

Кре́ст храни́тель все́й вселе́нней, кре́ст красота́ церко́вная: кре́ст царе́м держа́ва: кре́ст ве́рным утвержде́ние: кре́ст а́нгелом сла́ва, и бесо́м я́зва.

Сла́ва, и ны́не, гла́с 4: О тебе́, треблаже́нне и жизнода́вче кре́сте, лю́дие пита́еми спра́зднуют: с безпло́тными ли́ки, чи́н архиере́йский благогове́йно пое́т: мно́жество же и́ночествующих и по́стников покланя́ется, Христа́ же на тебе́ распе́ншагося вси́ прославля́ем.

Посе́м поя́ стихи́ру сию́ два́жды: Кресту́ твоему́ покланя́емся Влады́ко, и свято́е воскре́сние твое́ сла́вим.

Покланя́ется благогове́йно до земли́, и лобза́ет честны́й и свяще́нный кре́ст. По лобза́нии же па́ки, трети́цею поя́ то́жде, покланя́ется.

Та́кожде и вси́ предстоя́щии покланя́ются, и лобза́ют Честны́й Кре́ст:

Ли́ку пою́щу стихи́ру сию́, гла́с 2:

Прииди́те ве́рнии, креста́ си́ле поклони́мся: дре́во бо в раи́ сме́рть прозябе́, сие́ же жи́знь процвете́, безгре́шна иму́щее пригвожде́нна на себе́ Го́спода. от него́же вси́ язы́цы нетле́ние объе́млюще, зове́м: кресто́м сме́рть упраздни́вый, и на́с от пре́лести и мучи́тельства диа́воля свободи́вый, Го́споди сла́ва тебе́.

А́бие же посе́м твори́т отпу́ст, ре́кшу диа́кону:

Прему́дрость.

И ли́ку: Честне́йшую херуви́м. Сла́ва, и ны́не: Го́споди поми́луй, три́жды. Благослови́.

Иере́й: И́же на дре́ве кре́стном спасе́ния на́шего ра́ди распны́йся, и сме́рть подъя́ти изво́ливый, и тридне́вно из ме́ртвых воскресы́й: Христо́с и́стинный Бо́г на́ш, моли́твами пречи́стыя своея́ ма́тере, си́лою Честна́го и Животворя́щаго Креста́, и все́х ра́ди святы́х свои́х, поми́лует и спасе́т на́с, я́ко бла́г и человеколю́бец.

Ли́к: Ами́нь.

Иере́й же, взе́м кре́ст, вно́сит его́ в олта́рь Ца́рскими враты́, и обра́щься к лю́дем, благословля́ет и́х кресто́м, глаго́ля:

Спаси́ Го́споди лю́ди твоя́, и благослови́ достоя́ние твое́:

И поставля́ет кре́ст на Престо́ле, и отхо́дит благодаря́ Бо́га.

Глава 40. Чи́н благослове́ния и освяще́ния ико́ны пресвяты́я живонача́льныя Тро́ицы, во о́бразе трие́х а́нгелов, или́ креще́ния, или́ преображе́ния, или́ соше́ствия Свята́го Ду́ха

Иере́й обы́чно по предъука́занному о́бразу наче́н, соверши́т все́ да́же до псалма́.

Зде́ же чте́тся псало́м 66:

Бо́же уще́дри ны́, и благослови́ ны: просвети́ лице́ твое́ на ны́, и поми́луй ны́. Позна́ти на земли́ пу́ть тво́й, во все́х язы́цех спасе́ние твое́. Да испове́дятся тебе́ лю́дие Бо́же, да испове́дятся тебе́ лю́дие вси́. Да возвеселя́тся и да возра́дуются язы́цы, я́ко су́диши лю́дем правото́ю, и язы́ки на земли́ наста́виши. Да испове́дятся тебе́ лю́дие Бо́же, да испове́дятся тебе́ лю́дие вси́. Земля́ даде́ пло́д сво́й: благослови́ ны Бо́же, Бо́же на́ш. Благослови́ ны Бо́же, и да убоя́тся его́ вси́ концы́ земли́.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же, в Тро́ице святе́й сла́вимый, его́же ни у́м пости́гнути мо́жет, ниже́ сло́во сказа́ти возмога́ет, его́же никто́же от челове́к нигде́же ви́де, то́чию я́коже от святы́х писа́ний и богогла́сных апо́столов уче́ний научи́хомся, си́це ве́руем, и си́це тебе́ Бо́га отца́ безнача́льнаго, и Сы́на твоего́ единосу́щнаго, и ду́ха твоего́ сопресто́льнаго и соесте́ственнаго испове́дуем. И я́коже писа́ние на́м ве́тхое повеству́ет о явле́нии твое́м во о́бразе трие́х а́нгелов, о́ному пресла́вному патриа́рху Аавраа́му бы́вшем: в но́вей же благода́ти оте́ц во гла́се, Сы́н пло́тию во иорда́не, ду́х же святы́й в ви́де голуби́не яви́ся. и па́ки Сы́н, и́же пло́тию вознесе́ся на не́бо, и одесну́ю Бо́га седи́т, уте́шителя ду́ха на апо́столы в виде́нии о́гненных язы́к посла́: и на фаво́ре оте́ц во гла́се, ду́х святы́й во о́блаце, Сы́н же в пресве́тлом све́те ученико́м трие́м показа́ся: си́це всегда́шняго ра́ди воспомина́ния, тебе́ еди́наго сла́вимаго Бо́га не то́чию усты́ испове́дуем, но и о́браз пи́шем, не е́же боготвори́ти се́й, но е́же на́нь теле́сныма очи́ма взира́юще, у́мныма на тебе́ Бо́га на́шего зре́ти, и того́ чту́ще, тебе́ созда́теля, искупи́теля и освяти́теля на́шего сла́вити и велича́ти и твоя́ неисче́тная благодея́ния воспомина́ти: по́честь бо о́браза на первообра́зное прехо́дит. Предло́жше у́бо ико́ну сию́ ны́не пред твои́м вели́чеством, благоче́стным и́мже предре́хом наме́рением, про́сим и мо́лим, и твоему́ благоутро́бию ми́ли ся де́ем, при́зри ми́лостивно на ню́ и низпосли́ небе́сное твое́ благослове́ние, и во и́мя твое́ трисвято́е благослови́ и освяти́ ю́, во е́же сию́ благоче́стно чту́щии, и пред не́ю тебе́ смире́нно кла́няющиися, и ве́рно моля́щиися обря́щут ми́лость, и благода́ть полу́чат, и от все́х бе́д и скорбе́й свобо́дны бу́дут, грехо́в же проще́ние полу́чат, и Ца́рствия небе́снаго сподо́бятся: благода́тию и щедро́тами, и человеколю́бием тебе́ еди́наго в Тро́ице сла́вимаго Бо́га, Отца́, и Сы́на, и Свята́го Ду́ха, ему́же сла́ва, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Иере́й же чте́т моли́тву сию́ та́йно:

Го́споди Бо́же, в Тро́ице святе́й сла́вимый и покланя́емый, услы́ши ны́не моли́тву на́шу, и низпосли́ благослове́ние твое́ Боже́ственное небе́сное, и благослови́, и освяти́ о́браз се́й окропле́нием воды́ сея́ свяще́нныя, в сла́ву твою́ и во спасе́ние люде́й твои́х.

И возглаша́ет: Ты́ бо еси́ освяще́ние на́ше, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Иере́й же кропи́т свяще́нною водо́ю о́браз, глаго́ля:

Освяща́ется о́браз се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

А́бие же чте́т, или́ пое́т стихи́ру сию́, гла́с 8:

Прииди́те лю́дие, триипоста́сному Божеству́ поклони́мся, Сы́ну во отце́, со святы́м ду́хом: оте́ц бо безле́тно роди́ Сы́на соприсносу́щна и сопресто́льна, и ду́х святы́й бе́ во отце́ с Сы́ном прославля́емь: еди́на си́ла, еди́но существо́, еди́но Божество́. ему́же покланя́ющеся вси́ глаго́лем: святы́й Бо́же, вся́ соде́явый Сы́ном, соде́йством Свята́го Ду́ха: святы́й кре́пкий, и́мже отца́ позна́хом, и ду́х святы́й прии́де в ми́р: святы́й безсме́ртный, уте́шительный ду́ше, от отца́ исходя́й, и в Сы́не почива́яй, Тро́ице свята́я, сла́ва тебе́.

Ве́стно же бу́ди, я́ко а́ще ико́на бу́дет святы́я Тро́ицы, сия́ стихи́ра пое́тся. А́ще же богоявле́ния или́ преображе́ния, или́ соше́ствия Свята́го Ду́ха, пое́тся или́ чте́тся тропа́рь и конда́к пра́здничный, и отпу́ст пра́здничный быва́ет.

Глава 41. Чи́н благослове́ния и освяще́ния ико́ны Христо́вы, пра́здников Госпо́дских, еди́ныя, или́ мно́гих

Поста́влену су́щу пред амво́ном столу́, че́стно покрове́ну, и на не́м о́браз спа́сов, или́ мно́ги о́бразы, ели́ко и́х бу́дет, иере́й в епитрахи́ль и фело́нь оде́ян, крестообра́зно покади́в о́браз, начина́ет обы́чно:

Благослове́н Бо́г на́ш: Чте́ц: Царю́ небе́сный: Трисвято́е: и по О́тче на́ш: Я́ко твое́ е́сть Ца́рство: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 88:

Ми́лости твоя́ Го́споди во ве́к воспою́, ро́д и ро́д возвещу́ и́стину твою́ усты́ мои́ми. Зане́ ре́кл еси́: в ве́к ми́лость сози́ждется, на небесе́х угото́вится и́стина твоя́. Завеща́х заве́т избра́нным мои́м, кля́хся Дави́ду рабу́ моему́: До ве́ка угото́ваю се́мя твое́, и сози́жду в ро́д и ро́д Престо́л тво́й. Испове́дят небеса́ чудеса́ твоя́ Го́споди, и́бо и́стину твою́ в це́ркви святы́х. Я́ко кто́ во о́блацех уравни́тся Го́сподеви, уподо́бится Го́сподеви в сыне́х Бо́жиих? Бо́г прославля́емь в сове́те святы́х, ве́лий и стра́шен е́сть над все́ми окре́стными его́. Го́споди Бо́же си́л, кто́ подо́бен тебе́? си́лен еси́ Го́споди, и и́стина твоя́ о́крест тебе́. Ты́ Влады́чествуеши держа́вою морско́ю, возмуще́ние же во́лн его́ ты́ укроча́еши. Ты́ смири́л еси́, я́ко я́звена го́рдаго, мы́шцею си́лы твоея́ расточи́л еси́ враги́ твоя́. Твоя́ су́ть небеса́, и твоя́ е́сть земля́, вселе́нную и исполне́ние ея́ ты́ основа́л еси́. Се́вер и мо́ре ты́ созда́л еси́: фаво́р и ермо́н о и́мени твое́м возра́дуетася. Твоя́ мы́шца с си́лою: да укрепи́тся рука́ твоя́, и вознесе́тся десни́ца твоя́. Пра́вда и судьба́ угото́вание Престо́ла твоего́: ми́лость и и́стина предъи́дете пред лице́м твои́м. Блаже́ни лю́дие ве́дущии воскликнове́ние: Го́споди во све́те лица́ твоего́ по́йдут, И о и́мени твое́м возра́дуются ве́сь де́нь, и пра́вдою твое́ю вознесу́тся. Я́ко похвала́ си́лы и́х ты́ еси́, и во благоволе́нии твое́м вознесе́тся ро́г на́ш.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же вседержи́телю, Бо́же оте́ц на́ших, хотя́й лю́ди твоя́, избра́ннаго изра́иля, от пре́лести идолослуже́ния изба́вити, и в позна́нии и служе́нии тебе́ еди́ному и́стинному Бо́гу всегда́ неотсту́пно име́ти, е́же не твори́ти себе́ о́браза и подо́бия тебе́ и́стинному Бо́гу сопроти́внаго, во е́же я́ко Бо́гу кла́нятися и служи́ти ему́, преще́нием запрети́л еси́. Па́ки же подо́бия и о́бразы, и́миже не чу́ждых ло́жных бого́в, но тебе́ еди́наго и́стиннаго Бо́га пресвято́е и великоле́пое и́мя сла́вится, моисе́ом пе́рвее в твое́м зако́нном святи́лищи, над киво́том свиде́ния херуви́ма два́ зла́та, два́ же у угло́в очище́ния поста́вити, на опо́нах же мно́жество херуви́мов де́лом шве́нным устро́ити и сооружи́ти повеле́л еси́: и соломо́ном в олтаре́ херуви́ма два́, от дре́ва кипари́са зла́том объя́та поста́влена бы́ста: киво́т же, в не́мже скрижа́ли заве́та ка́менни, ста́мна злата́, и ааро́нов же́зл бя́ху, я́ко ти́и с людьми́ ту́ су́щии, и сла́вы твоея́ вели́чество зна́менующии, и па́мять твои́х пресла́вных чуде́с и благодея́ний име́ющии, [а́ще и де́ло ру́к челове́ческих бя́ху] со стра́хом и тре́петом и благоле́пным поклоне́нием, кажде́нием же и пред те́ми моле́нием, чти́ти сия́ повеле́л еси́, и че́сть о́ную, я́ко тебе́ самому́ отда́нную, ми́лостивно приима́л еси́. Во исполне́нии же време́н посла́л еси́ единоро́днаго Сы́на твоего́, Го́спода на́шего Иису́са Христа́, ражда́емаго от жены́, при́сно же Де́вы Мари́и, и́же зра́к раба́ прии́м и в подо́бии челове́честем бы́в, подо́бие своего́ пречи́стаго о́браза, нерукотворе́нно к своему́ пресвято́му лицу́ убру́с приложи́в, изъобрази́, и а́вгарю еде́сскому кня́зю посла́, и те́м от неду́га того́ исцели́, и все́м ве́рою к тому́ приходя́щым и кла́няющымся, неисче́тная исцеле́ния и мно́гая благодея́ния чудоде́йствуя подава́ше. И мы́ у́бо, о благи́й вседержи́телю Влады́ко, се́й о́браз [или́ сия́ о́бразы] возлю́бленнаго Сы́на твоего́, в воспомина́ние спаси́тельнаго воплоще́ния, и о все́х пресла́вных его́ чуде́с и благодея́ний, я́же на земли́, я́ко челове́к яви́вся, челове́ческому ро́ду показа́, не боготворя́ще сооружи́хом, но ве́дуще, я́ко по́честь о́браза на первообра́зное восхо́дит, пред твои́м вели́чеством че́стно предложи́хом, и припада́юще приле́жно мо́лим: при́зри ми́лостивно на ны́ и на о́браз се́й [или́ на о́бразы сия́] и воплоще́ния и явле́ния ра́ди единоро́днаго Сы́на твоего́, в его́же воспомина́ние се́й [или́ сия́] устро́ихом, посли́ на́нь [или́ на ня́] твое́ небе́сное благослове́ние и и благода́ть Пресвята́го Ду́ха, и благослови́ и освяти́ его́ [или́ я́]: пода́ждь ему́ [или́ и́м] си́лу целе́бну, и все́х ко́зней диа́вольских прогони́тельну, и испо́лни его́ [или́ я́] благослове́ния и кре́пости о́наго свята́го нерукотворе́ннаго о́браза, ю́же от прикоснове́ния свята́го и пречи́стаго лица́ возлю́бленнаго Сы́на твоего́ бога́тно стяжа́, во е́же си́лам и чудесе́м те́м [или́ те́ми] к утвержде́нию правосла́вныя ве́ры, и спасе́нию ве́рных люде́й твои́х де́йствоватися, и во е́же все́м тебе́ и единоро́дному твоему́ Сы́ну и пресвято́му ду́ху пред ни́м кла́няющымся, и ве́рно призыва́ющым, и приле́жно моля́щымся услы́шанным бы́ти, и ми́лость привлещи́ твоего́ человеколю́бия, и благода́ть получи́ти. Ты́ бо еси́ освяще́ние на́ше, и тебе́ сла́ву возсыла́ем со единоро́дным твои́м Сы́ном, и пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Вонми́ Го́споди Бо́же мо́й от свята́го жили́ща, и от Престо́ла сла́вы Ца́рствия твоего́, и ми́лостивно посли́ благослове́ние твое́ свято́е на о́браз се́й [или́ на о́бразы сия́], и в окропле́нии воды́ сея́ свяще́нныя, благослови́ и освяти́ его́ [или́ я́] и да́ждь ему́ [или́ и́м] си́лу целе́бну, вся́кия боле́зни и неду́га, вся́ких диа́вольских ко́зней прогони́тельну от все́х ве́рно к нему́ [или́ к ни́м] прибега́ющих, и пред те́м [или́ те́ми] тебе́ кла́няющихся, моля́щым же ся, и прибега́ющым: и всегда́ услы́шана и благоприя́тна тебе́ да бу́дет и́х мольба́.

И возглаша́ет: Благода́тию и щедро́тами единоро́днаго Сы́на твоего́, с ни́мже благослове́н еси́ и с пресвяты́м и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т свяще́нною водо́ю о́браз, глаго́ля: Освяща́ется о́браз се́й [или́ о́бразы сия́] благода́тию Пресвята́го Ду́ха, окропле́нием свяще́нныя воды́ сея́, во и́мя Отца́, и Сы́на, и Свята́го Ду́ха, ами́нь. Три́жды.

А́бие же иере́й кади́т о́браз, и покланя́ется, поя́ или́ глаго́ля тропа́рь се́й, гла́с 2:

Пречи́стому твоему́ о́бразу покланя́емся благи́й, прося́ще проще́ния прегреше́ний на́ших, Христе́ Бо́же: во́лею бо благоволи́л еси́ пло́тию взы́ти на кре́ст, да изба́виши, я́же созда́л еси́, от рабо́ты вра́жия. те́м благода́рственно вопие́м ти́: ра́дости испо́лнил еси́ вся́ спа́се на́ш, прише́дый спасти́ ми́р.

Лобза́в же о́браз, глаго́лет:

Сла́ва, и ны́не, гла́с 4: Боже́ственный тво́й зра́к на ико́не изъобразу́юще Христе́ Бо́же, е́же от Де́вы рождество́ твое́ я́сно разумева́ем: чудеса́ же твоя́ неизглаго́ланная, и во́льное распя́тие воспомина́юще, пропове́дуем. отню́дуже бе́сове прогоня́ются стра́хом, злосла́внии же в печа́лех рыда́ют, я́ко си́м соприча́стницы.

И а́бие твори́т отпу́ст се́й:

И́же неизрече́нным смотре́нием пре́жде своея́ во́льныя стра́сти, изво́ливый на убру́се нерукотворе́нно изъобрази́ти пречи́стаго и благочелове́чнаго своего́ лица́ о́браз, Христо́с и́стинный Бо́г на́ш, моли́твами пречи́стыя своея́ ма́тере, и все́х святы́х свои́х, поми́лует и спасе́т на́с, я́ко бла́г и человеколю́бец.

И полага́ет о́браз че́стно на свое́м ме́сте, благодаря́ Бо́га.

Глава 42. Чи́н благослове́ния и освяще́ния ико́ны Пресвяты́я Богоро́дицы, еди́ныя или́ мно́гих

Начина́ет же иере́й все́ по предука́занному на благослове́нии о́браза Христо́ва, да́же до псалма́,

Иже зде́ чте́тся, 44.

Отры́гну се́рдце мое́ сло́во бла́го, глаго́лю а́з дела́ моя́ Царе́ви: язы́к мо́й тро́сть кни́жника скоропи́сца. Красе́н добро́тою па́че сыно́в челове́ческих, излия́ся благода́ть во устна́х твои́х: сего́ ра́ди благослови́ тя Бо́г во ве́к. Препоя́ши ме́чь тво́й по бедре́ твое́й си́льне, красото́ю твое́ю, и добро́тою твое́ю, и наляцы́ и успева́й, и Ца́рствуй, и́стины ра́ди, и кро́тости, и пра́вды, и наста́вит тя́ ди́вно десни́ца твоя́. Стре́лы твоя́ изъощре́ны си́льне: лю́дие под тобо́ю паду́т в се́рдцы вра́г царе́вых. Престо́л тво́й Бо́же в ве́к ве́ка: же́зл пра́вости: же́зл Ца́рствия твоего́. Возлюби́л еси́ пра́вду, и возненави́дел еси́ беззако́ние: сего́ ра́ди пома́за тя́ Бо́же Бо́г тво́й еле́ем ра́дости, па́че прича́стник твои́х. Сми́рна, и ста́кти, и касси́а от ри́з твои́х, от тя́жестей слоно́вых, из ни́хже возвесели́ша тя́. Дще́ри царе́й в че́сти твое́й, предста́ Цари́ца одесну́ю тебе́, в ри́зах позлаще́нных оде́яна, преиспещре́на. Слы́ши дщи́, и ви́ждь, и приклони́ у́хо твое́, и забу́ди лю́ди твоя́, и до́м отца́ твоего́. И возжела́ет ца́рь добро́ты твоея́, зане́ то́й е́сть Госпо́дь тво́й, и поклони́шися ему́. И дщи́ ти́рова с да́ры, лицу́ твоему́ помо́лятся бога́тии лю́дстии. Вся́ сла́ва дще́ре Царе́вы вну́трь, ря́сны златы́ми оде́яна и преиспещре́на. Приведу́тся Царю́ де́вы в сле́д ея́, и́скренния ея́ приведу́тся тебе́: Приведу́тся в весе́лий и ра́довании, введу́тся в хра́м Царе́в. Вме́сто оте́ц твои́х бы́ша сы́нове твои́: поста́виша я́ кня́зи по все́й земли́. Помяну́ и́мя твое́ во вся́ком ро́де и ро́де. сего́ ра́ди лю́дие испове́дятся тебе́ в ве́к, и во ве́к ве́ка.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же на́ш, и́же сопредве́чному и единосу́щному твоему́ Сы́ну и сло́ву, от пречи́стыя Присноде́вы Мари́и воплоти́тися изво́лил еси́, и сию́ Богоро́дицу рождество́м его́ пречи́стым из нея́ соде́лав, предста́тельницу, помо́щницу и моли́твенницу все́м ве́рным сотвори́л еси́: при́зри ны́не на на́с смире́нно моля́щих ти ся и Богоро́дицу сию́ и́стинно имену́ющих, и бы́ти ве́рующих, и сию́ в мольбу́ к тебе́ ве́рно призыва́ющих, и моли́твами ея́ услы́шаны сотвори́ проше́ния и мольбы́ на́шя, и низпосли́ благода́ть Пресвята́го твоего́ ду́ха на ико́ну сию́, ю́же раби́ твои́ в че́сть и па́мять ея́ сооружи́ша, и благослови́ и освяти́ ю́ небе́сным твои́м благослове́нием: и пода́ждь е́й си́лу и кре́пость чудотво́рнаго де́йствия. Сотвори́ ю́ враче́бницу и цельба́м исто́чник, все́м в боле́знех к не́й притека́ющым, и Богоро́дицы ра́ди от Тебе́ по́мощи прося́щым: и все́х и́же пред се́ю ико́ною преблагослове́нную Де́ву, и ма́терь Го́спода на́шего Иису́са Христа́, возлю́бленнаго Сы́на твоего́, досто́йно чти́ти, и я́ко предста́тельницу ро́да Христиа́нскаго в мольбу́ к тебе́ и в по́мощь в беда́х и ну́ждах свои́х призыва́ти бу́дут, изба́ву, заступле́ние и ско́рую по́мощь получи́ти сподо́би: согреше́нием же оставле́ние и́м ми́лостивно пода́ждь, и благода́ть проси́мую от Тебе́ ско́ро прия́ти и ми́лость обрести́ от твоего́ человеколю́бия жела́нную, Ца́рствия прича́стники бы́ти сотвори́: щедро́тами из нея́ пло́тию ро́ждшагося единоро́днаго Сы́на твоего́, воплоще́ннаго Бо́га и спа́са на́шего Иису́са Христа́, с ни́мже тебе́ подоба́ет вся́кая сла́ва, че́сть и поклоне́ние, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же чте́т моли́тву сию́ та́йно:

Влады́ко Бо́же о́тче вседержи́телю, изво́ливый еди́ну от всего́ ро́да челове́ча, чи́стую голуби́цу и нескве́рную а́гницу, Присноде́ву мари́ю в ма́терь единоро́дному твоему́ Сы́ну избра́ти, и в жили́ще ему́ наи́тием Пресвята́го Ду́ха освяти́ти, вы́шшую же и честне́йшую херуви́мов и серафи́мов, и всея́ тва́ри сла́внейшую, хода́таицу и моли́твенницу челове́ческому ро́ду сотвори́л ю́ еси́: тоя́ моли́твами и предста́тельством ико́ну сию́, в че́сть и па́мять ея́, и в сла́ву из нея́ рожде́ннаго единоро́днаго и единосу́щнаго твоего́ Сы́на, и тебе́ безнача́льнаго его́ отца́, и Пресвята́го и животворя́щаго твоего́ ду́ха соста́вленную, благода́тию твое́ю в окропле́нии воды́ сея́ свяще́нныя, благослови́ и освяти́, и яви́ ю́ все́м ве́рою пред не́ю моля́щым ти ся, целе́бницу душе́вных неду́гов и теле́сных, и от все́х вра́жиих наве́тов свобожде́ние и покро́в держа́вен, и мольба́м благоприя́тным у тебе́ бы́ти сотвори́.

И возглаша́ет: Щедро́тами единоро́днаго Сы́на твоего́, из нея́ пло́тию рожде́ннаго, Го́спода на́шего Иису́са Христа́, с ни́мже благослове́н еси́, с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т ико́ну, глаго́ля:

Освяща́ется ико́на сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие пою́т тропари́ сия́ богоро́дичны, гла́с 1:

Под твою́ ми́лость прибега́ем Богоро́дице Де́во, моли́тв на́ших не пре́зри в ско́рбех: но от бе́д изба́ви на́с, еди́на чи́стая и благослове́нная.

Богоро́дице Де́во ра́дуйся, благода́тная мари́е, Госпо́дь с тобо́ю, благослове́нна ты́ в жена́х, и благослове́н пло́д чре́ва твоего́, я́ко спа́са родила́ еси́ ду́ш на́ших.

Сла́ва, гла́с 1:

От святы́я Твоея́ ико́ны, Пречи́стая Богоро́дице, цельбы́ и исцеле́ния подава́ются незави́стно все́м, ве́рою к не́й притека́ющым, и твое́ заступле́ние от се́рдца призыва́ющым. те́м и моя́ не́мощи посети́ Де́во, и душе́вныя и теле́сныя я́звы ми́лостивно уврачу́й.

И ны́не, гла́с то́йже:

Любо́вию, чи́стая Де́во, твою́ святу́ю ико́ну почита́ющым, и Бо́жию тя́ и́стинную ма́терь согла́сно возвеща́ющым, и ве́рно покланя́ющым ти ся, храни́тельница яви́ся, и держа́вная предста́тельница, вся́кое зло́ от си́х удаля́ющи, я́ко вся́ могу́щая.

Посе́м: Досто́йно е́сть:

И лобза́вше о́браз, твори́т иере́й отпу́ст обы́чный. Ве́стно же бу́ди, я́ко а́ще ико́на бу́дет от пра́здников богоро́дичных, по освяще́нии ея́ а́бие тропа́рь и конда́к пра́здничный пое́м, пото́м же сия́ преднапи́санныя тропари́.

Глава 43. Чи́н благослове́ния ико́ны свята́го, еди́наго или́ мно́гих

Начина́ет же иере́й все́ по предъука́занному на благослове́ние ико́ны Христо́вы, да́же до псалма́, и́же зде́ чте́тся, 138:

Го́споди, искуси́л мя́ еси́, и позна́л мя́ еси́: ты́ позна́л еси́ седа́ние мое́ и воста́ние мое́. Ты́ разуме́л еси́ помышле́ния моя́ издале́ча: Стезю́ мою́ и у́же мое́ ты́ еси́ изсле́довал, и вся́ пути́ моя́ прови́дел еси́: Я́ко не́сть льсти́ во язы́це мое́м, се́ Го́споди, ты́ позна́л еси́ Вся́ после́дняя и дре́вняя: ты́ созда́л еси́ мя́, и положи́л еси́ на мне́ ру́ку твою́. удиви́ся ра́зум тво́й от Мене́, утверди́ся, не возмогу́ к нему́. Ка́мо пойду́ от ду́ха твоего́? и от лица́ твоего́ ка́мо бежу́? А́ще взы́ду на не́бо, ты́ та́мо еси́: а́ще сни́ду во а́д, та́мо еси́. А́ще возму́ криле́ мои́ ра́но, и вселю́ся в после́дних мо́ря: И та́мо бо рука́ твоя́ наста́вит мя́, и удержи́т мя́ десни́ца твоя́. И ре́х: еда́ тьма́ попере́т мя́, и но́щь просвеще́ние в сла́дости мое́й? Я́ко тьма́ не помрачи́тся от Тебе́, и но́щь я́ко де́нь просвети́тся: я́ко тьма́ ея́, та́ко и све́т ея́. Я́ко ты́ созда́л еси́ утро́бы моя́, восприя́л мя́ еси́ из чре́ва ма́тере моея́: Испове́мся тебе́, я́ко стра́шно удиви́лся еси́. чу́дна дела́ твоя́, и душа́ моя́ зна́ет зело́. Не утаи́ся ко́сть моя́ от Тебе́, ю́же сотвори́л еси́ в та́йне, и соста́в мо́й в преиспо́дних земли́. Несоде́ланное мое́ ви́десте о́чи твои́, и в кни́зе твое́й вси́ напи́шутся: во дне́х сози́ждутся, и никто́же в ни́х. Мне́ же зело́ че́стни бы́ша дру́зи твои́ Бо́же, зело́ утверди́шася влады́чествия и́х. Изочту́ и́х, и па́че песка́ умно́жатся. воста́х, и еще́ е́смь с тобо́ю: А́ще избие́ши гре́шники Бо́же. му́жие крове́й уклони́теся от Мене́, Я́ко ревни́ви есте́ в помышле́ниих, прии́мут в суету́ гра́ды твоя́. Не ненави́дящыя ли тя́, Го́споди, возненави́дех, и о вразе́х твои́х иста́ях? соверше́нною не́навистию возненави́дех я́, во враги́ бы́ша ми́. Искуси́ мя Бо́же, и уве́ждь се́рдце мое́, истяжи́ мя, и разуме́й стези́ моя́: И ви́ждь, а́ще пу́ть беззако́ния во мне́: и наста́ви мя́ на пу́ть ве́чен.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди Бо́же вседержи́телю, Бо́же оте́ц на́ших, и́же дре́вле в ве́тсем заве́те подо́бие херуви́мов от дре́ва, и зла́та, и шве́ннаго де́ла в ски́нии свиде́ния сотвори́ти повеле́л еси́, и ны́не о́бразы и подо́бия святы́х уго́дников твои́х не отмета́яй, но прие́мляй, во е́же ве́рным рабо́м твои́м, на ня́ взира́ющым, просла́вити тебе́ си́х просла́вившаго, и потща́тися житию́ и дело́м и́х, и́миже твоея́ благода́ти и Ца́рствия восприя́тия сподо́бишася, подража́тельми бы́ти: тебе́ мо́лимся, при́зри ны́не на ико́ну сию́ [или́ на ико́ны сия́] в че́сть и па́мять свята́го твоего́ и́мярек, [или́ святы́х твои́х] изъображе́нную и напи́санную [или́ изъображе́нныя и напи́санныя], и небе́сным твои́м благослове́нием благослови́, и освяти́ ю́ [или́ я́], и все́м чту́щым ю́ [или́ я́] и пред то́ю [или́ те́ми] тебе́ кла́няющымся и моля́щымся, и свята́го и́мярек, [или́ святы́х и́мярек], в мольбу́ к тебе́ призыва́ющым, и я́ко раба́ и дру́га твоего́ [или́ рабо́в и друго́в твои́х] ми́лостивый послу́шатель, и благи́й и бога́тый да́тель бу́ди: избавля́я и́х от вся́кия ско́рби и ну́жды, и от вся́кия боле́зни душе́вныя и теле́сныя, сподобля́я и́х жела́емыя твоея́ благода́ти и милосе́рдия моли́твами свята́го твоего́ и́мярек, [или́ святы́х твои́х и́мярек].

Ты́ бо еси́ исто́чник освяще́ния, и благи́х пода́тель, и тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Го́споди Бо́же на́ш, челове́ка по о́бразу и по подо́бию своему́ созда́вый, преслуша́нием же первозда́ннаго растле́нну бы́вшу, вочелове́чением Христа́ твоего́, и́же зра́к раба́ прии́м, о́бразом обре́теся я́ко челове́к, се́й обнови́в, в пе́рвое достоя́ние в святы́х твои́х приве́л еси́, и́хже мы́ изъображе́ния благоче́стно чту́ще, святы́х, и́же тво́й о́браз и подо́бие су́ть, чте́м: о́ных же чту́ще, тебе́ я́ко первообра́знаго чти́м и сла́вим. те́мже тя́ мо́лим, посли́ благода́ть твою́, и окропле́нием воды́ сея́ свяще́нныя благослови́, и освяти́ о́браз се́й [или́ о́бразы сия́] в сла́ву твою́, в че́сть же и па́мять свята́го твоего́ и́мярек [или́ святы́х твои́х и́мярек] и все́х о́браз се́й чту́щих, и пред ни́м мольбы́ своя́ тебе́ отдаю́щих, благослови́, и благода́ть пред тобо́ю обрести́ ми́лостивно сподо́би.

И возглаша́ет: Благода́тию и щедро́тами и человеколю́бием единоро́днаго Сы́на твоего́, с ни́мже благослове́н еси́, с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т свяще́нною водо́ю о́браз, глаго́ля:

Освяща́ется о́браз се́й благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие чте́т или́ пое́т тропа́рь и конда́к свято́му или́ святы́м, и́хже е́сть о́браз, и лобза́в че́стно о́браз, твори́т обы́чный отпу́ст, воспомина́я и свята́го, его́же е́сть о́браз.

Глава 44. Чи́н благослове́ния но́вых сосу́дов церко́вных, вку́пе мно́гих: или́ еди́наго, яковы́ су́ть: кади́льница, ка́ция, блю́до анафо́рное, копие́, куку́мы, си́есть водоно́сные сосу́дцы, и ины́я олта́рныя принадле́жности

Начина́ет иере́й обы́чно. По трисвято́м, и по Прииди́те, поклони́мся:

чте́т псало́м 25:

Суди́ ми Го́споди, я́ко а́з незло́бою мое́ю ходи́х: и на Го́спода упова́я, не изнемогу́. Искуси́ мя Го́споди, и испыта́й мя́, разжзи́ утро́бы моя́ и се́рдце мое́. Я́ко ми́лость твоя́ пред очи́ма мои́ма е́сть, и благоугоди́х во и́стине твое́й. Не седо́х с со́нмом су́етным, и со законопресту́пными не вни́ду. Возненави́дех це́рковь лука́внующих, и с нечести́выми не ся́ду. умы́ю в непови́нных ру́це мои́, и обы́ду же́ртвенник тво́й Го́споди: Е́же услы́шати ми́ гла́с хвалы́ твоея́, и пове́дати вся́ чудеса́ твоя́. Го́споди, возлюби́х благоле́пие до́му твоего́, и ме́сто селе́ния сла́вы твоея́. Да не погуби́ши с нечести́выми ду́шу мою́, и с му́жи крове́й живо́т мо́й, И́хже в ру́ку беззако́ния, десни́ца и́х испо́лнися мзды́. а́з же незло́бою мое́ю ходи́х, изба́ви мя́ Го́споди, и поми́луй мя́. Нога́ моя́ ста́ на правоте́: в це́рквах благословлю́ тя́ Го́споди.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Бо́же вседержи́телю, Бо́же оте́ц на́ших, сосу́дом твои́м избра́нным апо́столом па́влом реки́й, я́ко все́ созда́ние твое́ добро́ и ничто́же отме́тно, а́ще сло́вом твои́м Боже́ственным и моли́твами освяща́ется: при́зри ны́не ми́лостивно, смире́нно мо́лимся, на моли́тву на́шу и на сосу́ды сия́ [или́ на сосу́д се́й] я́же [или́ его́же] раби́ твои́ в сла́ву Пресвята́го и́мене твоего́, и в служе́ние свята́го твоего́ же́ртвенника сооруди́ша, и ми́лостивно твои́м небе́сным благослове́нием, моли́твою же на́с недосто́йных рабо́в и служи́телей твои́х, благослови́ и освяти́, и к служе́нию свята́го твоего́ олтаря́, досто́йны [или́ досто́ин] бы́ти яви́, прине́сшым же небе́сною твое́ю благода́тию возда́ждь, и оставле́ние грехо́в да́руй, и Ца́рствия твоего́ прича́стники сотвори́. Ты́ бо еси́ Бо́г ми́лости, и щедро́т, и человеколю́бия, и тебе́ сла́ву возсыла́ем, со единоро́дным твои́м Сы́ном, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же прекло́нь главу́, та́йно чте́т моли́тву сию́:

При́зри Го́споди Бо́же на́ш на моли́тву на́шу, смире́нно мо́лимся, и низпосли́ благослове́ние твое́ на сосу́ды сия́, [или́ на сосу́д се́й], и окропле́нием воды́ сея́ свяще́нныя благослови́, и освяти́ я́ [или́ его́], во е́же бы́ти и́м [или́ ему́] досто́йным [или́ досто́йну] служе́нию свята́го твоего́ олтаря́.

И возглаша́ет: Я́ко ты́ еси́ освяще́ние на́ше и тебе́ сла́ву возсыла́ем, со единоро́дным твои́м Сы́ном, с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т сосу́ды свяще́нною водо́ю, глаго́ля:

Освяща́ются сосу́ды сия́ [или́ освяща́ется сосу́д се́й] благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие твори́т дневны́й отпу́ст, и вно́сит сосу́ды во олта́рь.

Глава 45. Чи́н благослове́ния но́ваго киво́та, или́ ина́го ко́его сосу́да, или́ ко́его ли́бо храни́лища крестообра́зно или́ и́нако к хране́нию моще́й святы́х сооруже́ннаго

Наче́ншу иере́ю, по трисвято́м, и по Прииди́те, поклони́мся: А́ще мо́щи су́ть не му́ченическия, но ина́го ко́его от святы́х, чте́т псало́м 111:

Блаже́н му́ж боя́йся Го́спода, в за́поведех его́ восхо́щет зело́: Си́льно на земли́ бу́дет се́мя его́. ро́д пра́вых благослови́тся. Сла́ва и бога́тство в дому́ его́, и пра́вда его́ пребыва́ет в ве́к ве́ка. Возсия́ во тьме́ све́т пра́вым: ми́лостив и ще́др и пра́веден. Бла́г му́ж ще́дря и дая́: устро́ит словеса́ своя́ на суде́, я́ко в ве́к не подви́жится. В па́мять ве́чную бу́дет пра́ведник: От слу́ха зла́ не убои́тся. Гото́во се́рдце его́ упова́ти на Го́спода: утверди́ся се́рдце его́, не убои́тся, до́ндеже воззри́т на враги́ своя́. Расточи́, даде́ убо́гим, пра́вда его́ пребыва́ет во ве́к ве́ка: ро́г его́ вознесе́тся в сла́ве. Гре́шник у́зрит и прогне́вается, зубы́ свои́ми поскреже́щет и раста́ет: жела́ние гре́шника поги́бнет.

А́ще же му́ченическия су́ть мо́щи, чте́т псало́м 78:

Бо́же, приидо́ша язы́цы в достоя́ние твое́, оскверни́ша хра́м святы́й тво́й. Положи́ша иерусали́м я́ко ово́щное храни́лище, положи́ша тру́пия ра́б твои́х бра́шно пти́цам небе́сным, пло́ти преподо́бных твои́х звере́м земны́м: Пролия́ша кро́вь и́х я́ко во́ду о́крест иерусали́ма, и не бе́ погреба́яй. Бы́хом поноше́ние сосе́дом на́шым, подражне́ние и поруга́ние су́щым о́крест на́с. Доко́ле Го́споди, прогне́ваешися до конца́, разжже́тся я́ко о́гнь рве́ние твое́? Проле́й гне́в тво́й на язы́ки незна́ющыя тебе́, и на ца́рствия, я́же и́мене твоего́ не призва́ша: Я́ко поядо́ша Иа́кова, и ме́сто его́ опустоши́ша. Не помяни́ на́ших беззако́ний пе́рвых: ско́ро да предваря́т ны́ щедро́ты твоя́ Го́споди, я́ко обнища́хом зело́. Помози́ на́м Бо́же спаси́телю на́ш, сла́вы ра́ди и́мене твоего́ Го́споди изба́ви ны́, и очи́сти грехи́ на́шя, и́мене ра́ди твоего́. да не когда́ реку́т язы́цы: где́ е́сть Бо́г и́х? и да уве́стся во язы́цех пред очи́ма на́шима отмще́ние кро́ве ра́б твои́х пролиты́я. Да вни́дет пред тя́ воздыха́ние окова́нных: по вели́чию мы́шцы твоея́, снабди́ сы́ны умерщвле́нных. Возда́ждь сосе́дом на́шым седмери́цею в не́дро и́х поноше́ние и́х, и́мже поноси́ша тя́ Го́споди. Мы́ же лю́дие твои́, и о́вцы па́жити твоея́, испове́мыся тебе́ Бо́же во ве́к, в ро́д и ро́д возвести́м хвалу́ твою́.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Бо́же бого́м и Го́споди господе́м, тво́рче и созда́телю всея́ ви́димыя и неви́димыя тва́ри: и́же рабу́ твоему́ моисе́ю повеле́л еси́, по о́бразу пока́занному ему́ на горе́, киво́т от древе́с негнию́щих соста́вити, и зла́том чи́стым обложи́ти, в не́мже ста́мну злату́ю, небе́сную в себе́ иму́щую ма́нну, и скрижа́ли заве́та пе́рстом твои́м Боже́ственным напи́санныя, во свиде́тельство бу́дущему ро́ду сохрани́ти: я́же вся́ о́браз бы́вше ны́нешним, воплоще́нием Сы́на твоего́ Го́спода на́шего Иису́са Христа́ испо́лнишася, егда́ те́ло его́, де́йством Свята́го Ду́ха от пречи́стыя Де́вы зача́тое и одушевле́нное, исполне́нием Божества́ всего́ испо́лнил еси́. Тебе́ смире́нно мо́лим вседержи́телю Бо́же, о́тче Го́спода на́шего Иису́са Христа́, из него́же вся́кое оте́чество на небеси́ и на земли́ имену́ется, я́ко да се́й киво́т [или́ киво́ты], или́ сосу́д [или́ сосу́ды], к хране́нию моще́й святы́х твои́х сооруже́нный [или́ сооруже́нныя], моли́твами и предста́тельством те́хже святы́х твои́х, небе́сным твои́м благослове́нием благослови́ши, и освяти́ши, во е́же все́х в не́м [или́ в ни́х] мо́щи святы́я храня́щым и сия́ че́стно чту́щих, и святы́х [и́хже бу́дут мо́щи] призыва́ющих, моли́твами и предста́тельством и́х, от все́х сопроти́вных обстоя́ний належа́щих свободи́ши, и от преходя́щих ну́жд и бе́д изба́виши: вся́ же враго́в ви́димых и неви́димых наве́тования, наше́ствия и нападе́ния от ни́х си́лою твое́ю отжене́ши: и бу́деши и́м стена́ тверда́ от лица́ вра́жия. И сохрани́ и́х невреди́мых от все́х чарова́ний, обая́ний же и злохи́трий злы́х и лука́вых челове́к, гра́д же и оби́тель, село́ и страну́, в ни́хже мо́щи святы́х твои́х в сосу́де се́м [или́ в сосу́дех си́х] че́стно храни́мы бу́дут, изба́ви, соблюди́ и невре́дны сохрани́ от поврежде́ния мо́лнии, злорастворе́ний возду́хов, от гра́да, губи́тельства, тру́са, пото́па, огня́, меча́, наше́ствия иноплеме́нник, и междоусо́бныя бра́ни, и вся́кия смертоно́сныя ра́ны, от звере́й же злы́х, и гадо́в ядови́тых, и по́лзающих разли́чных черве́й, и от вся́каго зла́го обстоя́ния. И бу́ди и́м по́мощь, защище́ние и покро́в, избавля́я и́х от вся́каго зла́: да́руя же и́м в благослове́нии твое́м благорастворе́ния возду́хов, умноже́ния плодо́в земны́х, времена́ ми́рна и вся́кое оби́лие, моли́твами пречи́стыя твоея́ ма́тере и все́х святы́х твои́х, в ни́хже хвали́мь и сла́вимь еси́ со единоро́дным твои́м Сы́ном, и пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й чте́т та́йно моли́тву сию́:

Влады́ко Бо́же о́тче вседержи́телю, и́же при моисе́и уго́днице твое́м ропта́ние лю́дем утоля́я, свяще́нство же ааро́ново благоуго́дное тебе́ бы́ти утвержда́я, же́зл его́ сухи́й прозя́бнути, и цве́т плодоно́сный произвести́ сотвори́л еси́, и се́й в киво́те заве́та в зна́мение твоея́ си́лы и чудотворе́ния вложи́ти повеле́л еси́: и́же и на́м образова́ние бы́сть Христа́ твоего́, его́же на кре́стном же́ртвеннице сме́ртию изсуше́ние, и тридне́вным воскре́снием процвете́ние, це́ркви же сме́ртию его́ прозябе́ние, и но́щию и дне́м плодоно́сное процвете́ние си́м прообрази́л еси́. Тебе́ всеми́лостиваго строи́теля и промы́сленника челове́ческаго ро́да приле́жно мо́лим, при́зри на сосу́ды сия́, к хране́нию моще́й святы́х уго́дников твои́х сооруже́нныя и благода́тию твое́ю всеосвяща́ющею, в окропле́нии воды́ сея́ свяще́нныя благослови́ и освяти́, и иде́же а́ще сия́ отнесе́ни и храни́ми бу́дут, моли́твами и предста́тельствы святы́х твои́х, и́хже мо́щи в ни́х сокры́ются, отту́ду вся́кое сопроти́вное обстоя́ние отжени́, вся́ же поле́зная и блага́я та́мо умно́жи и сохрани́: я́ко да ве́рнии лю́дие твои́, бога́тыя ми́лости и щедро́ты и благодея́ния твоя́ в ма́лой ча́сти моще́й святы́х твои́х, я́коже в це́лом и́х те́ле получи́вше, благодаре́ние тебе́ до́лжное воздаю́т, и жития́ и́х подража́тельми бы́ти потща́тися хода́тайством и́х, и с ни́ми и насле́дники Ца́рствия твоего́ бы́ти да сподо́бятся.

И возглаша́ет: Благода́тию и щедро́тами и человеколю́бием единоро́днаго Сы́на твоего́, с ни́мже благослове́н еси́, с пресвяты́м и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т водо́ю свяще́нною сосу́ды, глаго́ля:

Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

А́ще же та́мо су́ть мо́щи святы́х влага́ет я́ в ня́, глаго́ля: Хвали́те Бо́га во святы́х его́, хвали́те его́ во утверже́нии си́лы его́. Я́ко восхва́лятся преподо́бнии во сла́ве, и возра́дуются на ло́жах свои́х.

И чте́т тропа́рь и конда́к святы́х, и́хже су́ть мо́щи, и сотвори́в отпу́ст, с воспомина́нием святы́х, и́хже су́ть мо́щи, раздае́т я́ те́м, и́же к освяще́нию принесо́ша.

Глава 46. Благослове́ние креста́ к ноше́нию на пе́рсех

Полага́емь быва́ет сицевы́й кре́ст на Боже́ственной трапе́зе, и по соверше́нии Боже́ственныя литурги́и, или́ у́трени, или́ часо́в, или́ вече́рни, пре́жде отпу́ста чте́т иере́й:

Царю́ небе́сный: Трисвято́е. О́тче на́ш: И тропари́ сия́: Спаси́ Го́споди лю́ди твоя́: Сла́ва: Вознесы́йся на кре́ст во́лею: И ны́не: Предста́тельство Христиа́н: И по си́х ре́к, Го́споду помо́лимся.

Ли́к: Го́споди поми́луй.

Иере́й чте́т моли́тву сию́:

Го́споди Иису́се Христе́ Бо́же на́ш, на дре́ве кре́стном во́лею спасе́ния на́шего ра́ди пригвозди́тися восхоте́вый, и пречестно́ю свое́ю кро́вию сие́ освяти́ти изво́ливый, и кресто́м свои́м от рабо́ты вра́жия ми́р искупи́вый, и дре́внее рукописа́ние врага́ на́шего диа́вола кресто́м растерза́вый, и ро́д челове́ческий от мучи́тельства его́ те́м свободи́вый, тебе́ смире́нно мо́лим: при́зри ми́лостивно на зна́мение сие́ кре́стное, и низпосли́ Боже́ственное твое́ благослове́ние и благода́ть, и пода́ждь ему́ си́лу и кре́пость, я́ко да вся́к, и́же в воспомина́ние. спаси́тельных твои́х страсте́й, и животво́рныя твоея́ сме́рти, и в сохране́ние и в защище́ние души́ и те́ла на себе́ носи́ти бу́дет, небе́сное благослове́ние и по́мощь в не́м прия́ти сподо́бится. И я́коже же́зл ааро́нов, к отраже́нию сопроти́вных неве́рствия, и испражне́нию волше́бных мечта́ний благослови́л еси́: си́це и сие́ зна́мение кре́стное благослови́, и сопроти́в все́м ко́знем диа́вольским твоего́ заступле́ния по́мощь в не́ вле́й, я́ко да вся́кому на себе́ нося́щему е́, защище́ние и соблюде́ние от вся́каго зла́ души́ и те́ла спаси́тельное, и в умноже́ние в не́м духо́вных твои́х дарова́ний, и Христиа́нских доброде́телей твое́ю благода́тию бу́дет. Ты́ бо еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву, благодаре́ние и поклоне́ние возсыла́ем, со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, прекло́нь главу́, чте́т та́йно моли́тву сию́:

Го́споди Иису́се Христе́ Бо́же на́ш, в высо́ких живы́й, и на смире́нныя призира́яй, твои́ раби́ недосто́йнии своя́ тебе́ приклони́хом вы́я се́рдца на́шего и телесе́, и смире́нно мо́лим тя́, посли́ небе́сное твое́ благослове́ние на зна́мение сие́ кре́стное, и в окропле́нии свяще́нныя воды́ испо́лни е́ твоея́ си́лы и кре́пости, к прогна́нию и разоре́нию вся́кия диа́вольския ко́зни: вся́кому же нося́щему на себе́ сие́, ве́рному рабу́ твоему́, да́ждь бы́ти защище́ние души́ и те́ла, от лица́ вра́г ви́димых и неви́димых и от вся́каго зла́, и в умноже́ние твоея́ благода́ти. Ты́ бо еси́ освяще́ние на́ше Христе́ Бо́же на́ш, и тебе́ сла́ву возсыла́ем со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не, и при́сно, и во ве́ки веко́в.

Ли́к: Ами́нь.

Иере́й же взе́м свяще́нную во́ду, кропи́т е́ю кре́ст, глаго́ля:

Благословля́ется и освяща́ется зна́мение сие́ кре́стное окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И а́бие твори́т обы́чный отпу́ст, и отдае́т кре́ст тому́, его́же е́сть, в сла́ву Бо́жию.

Глава 47. Чи́н благослове́ния и освяще́ния иконоста́са

Подоба́ет у́бо ве́дати, я́ко поста́влену су́щу иконоста́су в це́ркви, а́ще уже́ от епи́скопа освяще́нной соверше́нно, или́ от его́ наме́стника благослове́нной, а́бие протоиере́ем, или́ его́ изволе́нием от иере́а ме́стнаго освяща́ется. А́ще же в неосвяще́нной, или́ неблагослове́нной, пе́рвее це́рковь освяща́ется, или́ благословля́ется, пото́м же ико́ны, а́бие по миропома́зании сте́н пре́жде кажде́ния. Святи́тель ста́в пред Ца́рскими враты́, ре́кшу диа́кону: Го́споду помо́лимся, чте́т моли́твы ни́же положе́нныя, и свяще́нною водо́ю кропи́т ико́ны, пото́м же кади́т и соверша́ет освяще́ние. А́ще же наме́стник его́ це́рковь благословя́ет, пре́жде отпу́ста пред Ца́рскими враты́, по Го́споди поми́луй, чте́т вся́ ни́же пи́санная, и посе́м твори́т отпу́ст обы́чный. А́ще же в освяще́нной уже́, или́ благослове́нной це́ркви, новопоста́влены су́ть ико́ны, си́це благословя́ются: Иере́й в епитрахи́ль и фело́нь оде́янный, а́ще не и́мать свяще́нной воды́, твори́т пе́рвее ма́лое освяще́ние а́вгустово, пото́м же пред ца́рскими враты́ ста́в, начина́ет обы́чно:

Благослове́н Бо́г на́ш: Ли́к же пое́т: Царю́ небе́сный: И чте́тся Трисвято́е. И по О́тче на́ш: Прииди́те, поклони́мся: три́жды.

Псало́м 131:

Помяни́ Го́споди Дави́да, и всю́ кро́тость его́. Я́ко кля́тся Го́сподеви, обеща́ся Бо́гу Иа́ковлю: А́ще вни́ду в селе́ние до́му моего́, или́ взы́ду на о́др посте́ли моея́: А́ще да́м со́н очи́ма мои́ма, и ве́ждома мои́ма дрема́ние, и поко́й скраниа́ма мои́ма: До́ндеже обря́щу ме́сто Го́сподеви, селе́ние Бо́гу Иа́ковлю. Се́ слы́шахом я́ во евфра́фе, обрето́хом я́ в поля́х дубра́вы: Вни́дем в селе́ния его́, поклони́мся на ме́сто, иде́же стоя́сте но́зе его́. Воскресни́ Го́споди в поко́й тво́й, ты́ и киво́т святы́ни твоея́. Свяще́нницы твои́ облеку́тся пра́вдою, и преподо́бнии твои́ возра́дуются. Дави́да ра́ди раба́ твоего́, не отврати́ лице́ пома́заннаго твоего́. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на Престо́ле твое́м. А́ще сохраня́т сы́нове твои́ заве́т мо́й, и свиде́ния моя́ сия́, и́мже научу́ я́, и сы́нове и́х до ве́ка ся́дут на Престо́ле твое́м. Я́ко избра́ Госпо́дь сио́на, изво́ли и́ в жили́ще себе́. Се́й поко́й мо́й во ве́к ве́ка, зде́ вселю́ся, я́ко изво́лих и́: Лови́тву его́ благословля́яй благословлю́, ни́щыя его́ насыщу́ хле́бы. Свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возвращу́ ро́г Дави́дови, угото́вах свети́льник пома́занному моему́. Враги́ его́ облеку́ студо́м, на не́мже процвете́т святы́ня моя́.

Сла́ва, и ны́не: Аллилу́иа, три́жды.

Ре́кшу же диа́кону: Го́споду помо́лимся, и кли́ру: Го́споди поми́луй.

Иере́й чте́т моли́тву сию́:

Го́споди Бо́же на́ш, Бо́же бого́в и Го́споди господе́й, Бо́же Савао́ф, тво́рче и созда́телю всея́ ви́димыя и неви́димыя тва́ри, о́тче Го́спода на́шего Иису́са Христа́, люде́й твои́х изра́иля, ве́дый удо́бь преложе́нное от Тебе́ и́стиннаго Бо́га к чу́ждым ло́жным бого́м се́рдце, от идолослуже́ния изъима́я те́х, в позна́нии же и служе́нии тебе́ еди́наго и́стиннаго Бо́га всегда́ неотсту́пно име́ти хотя́, о́бразы и подо́бия тебе́ и́стинному Бо́гу проти́вныя себе́ сотвори́ти, во е́же я́ко Го́споду те́м кла́нятися и служи́ти, преще́нием запрети́л еси́: подо́бия же па́ки и о́бразы, и́миже не чужды́х ло́жных и не су́щих бого́в, но тебе́ еди́наго и́стиннаго Бо́га пресвято́е и великоле́пое и́мя сла́вится, [не удовля́я лю́ди своя́ писа́нием то́чию заве́та и зако́на], уго́дником твои́м моисе́ом пе́рвее по о́бразу пока́занному ему́ на горе́, киво́т заве́та от дре́ва негнию́щаго обложе́н зла́том, в не́мже скрижа́ли заве́та, ста́мна злата́ и ааро́нов же́зл пото́м возложены́ бы́ша, и над ни́м херуви́ма два́, и на опо́нах де́лом шве́нным херуви́мов мно́жество устро́ити, два́ же херуви́ма у угло́в очисти́лища: пото́м же и в соломо́новом созда́нном тебе́ хра́ме, херуви́ма два́ от кипари́снаго дре́ва, зла́том объя́та поста́вити повеле́л еси́. И я́ко твое́ с людьми́ пребыва́ние, и сла́вы твоея́ вели́чества зна́мения, и па́мять твои́х превели́ких и пресла́вных чуде́с и благодея́ний в себе́ иму́щыя и собо́ю явля́ющыя, [а́ще и дела́ ру́к челове́ческих бя́ху] стра́хом и тре́петом, оба́че и боголе́пным поклоне́нием, кажде́нием же и пред те́ми моле́нием чти́ти сия́ повеле́л еси́: о́ную же че́сть, я́коже себе́ самому́ отда́нную, ми́лостивно прия́л еси́, безче́стие же си́м сотво́рших, и достодо́лжно сия́ не поче́тших разли́чно я́коже о́зу о́наго му́чил и погуби́л еси́: разли́чие же и ра́знство че́сти богоприя́тных, от богоме́рзких о́бразов, при или́и свяще́ннице и судии́ изра́ильском в сокруше́нии даго́на и́дола, и в уязвле́нии иноплеме́ник я́сно показа́л еси́. Во исполне́нии же време́н посла́л еси́ единоро́днаго Сы́на твоего́ Го́спода на́шего Иису́са Христа́, ражда́емаго от жены́ Присноде́вы Мари́и: и́же зра́к раба́ прии́м, и в подо́бии челове́честем бы́в, подо́бие своего́ пречи́стаго о́браза, к своему́ Боже́ственному лицу́ убру́с приложи́в, изъобрази́, и а́вгарю еде́сскому кня́зю посла́, и те́м от неду́га того́ исцели́, и все́м к нему́ приходя́щым, и ве́рою кла́няющымся, неисче́тная исцеле́ния и мно́гая благодея́ния чудоде́йствуяй подава́ше. И мы́ у́бо, о всеблаги́й и ще́дрый Влады́ко, сия́ о́бразы возлю́бленнаго Сы́на твоего́, в воспомина́ние спаси́тельнаго воплоще́ния, и все́х пресла́вных его́ чуде́с, страсте́й же и распя́тия и сме́рти, и пресла́внаго воскре́сния, и на небеса́ вознесе́ния, и все́х его́ благодея́ний, я́же на земли́, я́ко челове́к яви́вся, челове́ческому ро́ду показа́, о ни́хже на́м Боже́ственная Ева́нглиа я́сно повеству́ют: та́кожде пречи́стой его́ ма́тери, я́ко честне́йшей и всея́ тва́ри вы́шшей, и у тебе́ прия́тнейшей моли́твенницы и предста́тельницы на́шей: а́нгелов же и проро́ков, и апо́столов богогла́сных, му́чеников и святи́телей, и преподо́бных, и все́х святы́х, я́ко твои́х уго́дников, рабо́в же ве́рных и при́сных друго́в, и твои́х и́стинных су́щих о́бразов не боготворя́ще, но ве́дуще, я́ко по́честь о́браза на первообра́зное восхо́дит, в свято́м твое́м се́м хра́ме пред твои́м вели́чеством че́стно предложи́хом, и припа́дающе приле́жно мо́лим: при́зри ми́лостивно на ны́ и на о́бразы сия́, и явле́ния ра́ди во пло́ти возлю́бленнаго Сы́на твоего́, и всего́ его́ спаси́тельнаго плотска́го Боже́ственнаго смотре́ния, в его́же воспомина́ние и сла́ву, и моли́твами пречи́стыя и преблагослове́нныя его́ ма́тере, святы́х небе́сных си́л безпло́тных, честна́го проро́ка предте́чи и крести́теля Иоа́нна, богогла́сных проро́к, духоно́сных апо́стол, добропобе́дных му́ченик, святи́телей же, и преподо́бных и пра́ведных, и все́х святы́х твои́х, в и́хже че́сть и па́мять сия́ устро́ихом, посли́ на ня́ твое́ небе́сное благослове́ние и благода́ть Пресвята́го Ду́ха, и благослови́ и освяти́ я́, и пода́ждь и́м си́лу целе́бную, и все́х диа́вольских ко́зней прогони́тельну, и испо́лни я́ благослове́ния, си́лы же и кре́пости, ея́же бога́тно влия́л еси́ на о́ный святы́й нерукотворе́нный о́браз, прикоснове́нием Пресвята́го и пречи́стаго Боже́ственнаго лица́ единоро́днаго Сы́на твоего́, во е́же си́лам и чудесе́м и те́ми де́йствоватися, во утвержде́ние правосла́вныя ве́ры и спасе́ние люде́й твои́х. Все́х же тебе́ и единоро́дному твоему́ Сы́ну, и пресвято́му и животворя́щему твоему́ ду́ху, пред си́ми о́бразами кла́няющихся, и приле́жно ве́рою моля́щихся, и ми́лость обрести́ прося́щих, святы́х же, я́ко твои́х ве́рных рабо́в и прии́скренних друго́в, в и́хже и́мя и пода́нную студе́ныя воды́ ча́шу прия́ти, и мздо́ю проро́чею или́ пра́ведничею или́ учени́чею возда́ти ми́лостивно обеща́л еси́, в мольбу́ к тебе́ в беда́х и ну́ждах и ско́рбех, и во все́х свои́х тре́бованиях на вся́ ико́ны и́х взира́юще, ве́рою призыва́ющих, мольбы́ и моле́ния и приле́жная проше́ния услы́шаны бы́ти, и ми́лость твоего́ человеколю́бия привлещи́ сотвори́, оставле́ние же грехо́в пода́ждь, и благода́ть получи́ти сподо́би. Ты́ бо еси́ освяще́ние на́ше, и тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, главу́ прекло́нь, та́йно чте́т моли́тву сию́:

Го́споди Бо́же на́ш, пи́санныя о́бразы святы́х твои́х не отмета́яй, но па́че любе́зно прие́мляй, во е́же ели́жды очи́ма теле́сныма взира́юще на ня́, толи́жды у́мныма очи́ма дела́ и житие́ и́х тебе́ благоуго́дное воспомина́ти и размышля́ти, я́коже и в писа́ниих чту́ще бу́дем. Сия́ у́бо ико́ны, приле́жно мо́лимся, я́же в че́сть и сла́ву, и в воспомина́ние спаси́тельнаго воплоще́ния, чуде́с же и благодея́ний единоро́днаго Сы́на твоего́, я́же на́м Боже́ственное ева́нглие веща́ет, да не то́чию чту́ще, но и на изъображе́нныя взира́юще в у́м прие́млем, и в па́мять благода́рно отно́сим: та́кожде и пречи́стыя Де́вы Богоро́дицы, небе́сных си́л безпло́тных, свята́го Иоа́нна предте́чи и крести́теля, святы́х апо́стол, проро́к, му́ченик, и все́х святы́х твои́х сооруди́хом, ми́лостивно небе́сным твои́м благослове́нием, в окропле́нии воды́ сея́ свяще́нныя благослови́ и освяти́, и все́х ве́рно пред ни́ми, тебе́ Бо́га отца́, и единоро́днаго Сы́на, и Пресвята́го и животворя́щаго твоего́ ду́ха, пречи́стую же Богоро́дицу, и все́х святы́х твои́х, и́хже изъображе́ния в си́х ико́нах су́ть, досто́йно чту́ще, твое́ Боже́ственное милосе́рдие, о́ных же, я́ко твои́х при́сных рабо́в и друго́в, моли́твы за себе́ к тебе́ Бо́гу и Го́споду, предста́тельства же и по́мощи прося́ще призыва́ти бу́дут, твои́м благосе́рдием, святы́х же твои́х моли́твами ско́ро получи́ти сотвори́, оставле́ние же грехо́в да́руй, и насле́дники Ца́рствия твоего́, я́ко бла́г, бы́ти сподо́би.

И возглаша́ет: Ты́ бо еси́ Бо́г ми́лости, и щедро́т, и человеколю́бия, и тебе́ сла́ву возсыла́ем. со единоро́дным твои́м Сы́ном, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

Святи́тель же или́ иере́й кропи́т свяще́нною водо́ю ве́сь иконоста́с, от ни́зу да́же до верха́, глаго́ля:

Освяща́ются ико́ны сия́ окропле́нием воды́ сея́ свяще́нныя, в че́сть и сла́ву вели́каго Бо́га и спа́са на́шего Иису́са Христа́, и в па́мять святы́х его́, во и́мя Отца́, и Сы́на, и Свята́го Ду́ха, ами́нь. Три́жды.

А́бие же ли́к пое́т или́ чте́т тропари́ сия́, гла́с 2:

Пречи́стому твоему́ о́бразу покланя́емся благи́й, прося́ще проще́ния прегреше́ний на́ших, Христе́ Бо́же: во́лею бо благоволи́л еси́ пло́тию взы́ти на кре́ст, да изба́виши, я́же созда́л еси́, от рабо́ты вра́жия. те́м благода́рственно вопие́м ти́: ра́дости испо́лнил еси́ вся́ спа́се на́ш, прише́дый спасти́ ми́р.

Сла́ва, гла́с 2:

Апо́столи, проро́цы, святи́телие, преподо́бнии, пра́веднии и вси́ святи́и, до́бре по́двиг сконча́вшии и ве́ру соблю́дшии, дерзнове́ние иму́ще ко спа́су, о на́с того́ я́ко блага́го моли́те, спасти́ ве́рно ва́с призыва́ющих, и ико́ны ва́шя, я́ко друго́в Бо́жиих, благоче́стно чту́щих.

И ны́не, гла́с 1:

Любо́вию, чи́стая Де́во, твою́ святу́ю ико́ну почита́ющым, и Бо́жию тя́ и́стинную ма́терь согла́сно возвеща́ющым, и ве́рно покланя́ющым ти ся храни́тельница яви́ся, и держа́вная предста́тельница вся́кое зло́ от си́х удаля́ющи, я́ко вся́ могу́щая.

А́бие же посе́м твори́т обы́чный отпу́ст.

Глава 48. Чи́н благослове́ния и освяще́ния разноли́чных ико́н, предложе́нных вку́пе

Нача́ло обы́чное, я́коже указа́ся вы́ше. По Прииди́те, поклони́мся: Псало́м 88:

Ми́лости твоя́ Го́споди во ве́к воспою́, ро́д и ро́д возвещу́ и́стину твою́ усты́ мои́ми. Зане́ ре́кл еси́: в ве́к ми́лость сози́ждется, на небесе́х угото́вится и́стина твоя́. Завеща́х заве́т избра́нным мои́м, кля́хся Дави́ду рабу́ моему́: До ве́ка угото́ваю се́мя твое́, и сози́жду в ро́д и ро́д Престо́л тво́й. Испове́дят небеса́ чудеса́ твоя́ Го́споди, и́бо и́стину твою́ в це́ркви святы́х. Я́ко кто́ во о́блацех уравни́тся Го́сподеви, уподо́бится Го́сподеви в сыне́х Бо́жиих? Бо́г прославля́емь в сове́те святы́х, ве́лий и стра́шен е́сть над все́ми окре́стными его́. Го́споди Бо́же си́л, кто́ подо́бен тебе́? си́лен еси́ Го́споди, и и́стина твоя́ о́крест тебе́. Ты́ Влады́чествуеши держа́вою морско́ю, возмуще́ние же во́лн его́ ты́ укроча́еши. Ты́ смири́л еси́, я́ко я́звена го́рдаго, мы́шцею си́лы твоея́ расточи́л еси́ враги́ твоя́. Твоя́ су́ть небеса́, и твоя́ е́сть земля́, вселе́нную и исполне́ние ея́ ты́ основа́л еси́. Се́вер и мо́ре ты́ созда́л еси́: фаво́р и ермо́н о и́мени твое́м возра́дуетася. Твоя́ мы́шца с си́лою: да укрепи́тся рука́ твоя́, и вознесе́тся десни́ца твоя́. Пра́вда и судьба́ угото́вание Престо́ла твоего́: ми́лость и и́стина предъи́дете пред лице́м твои́м. Блаже́ни лю́дие ве́дущии воскликнове́ние: Го́споди во све́те лица́ твоего́ по́йдут, И о и́мени твое́м возра́дуются ве́сь де́нь, и пра́вдою твое́ю вознесу́тся. Я́ко похвала́ си́лы и́х ты́ еси́, и во благоволе́нии твое́м вознесе́тся ро́г на́ш.

Та́же диа́кон: Го́споду помо́лимся.

Ли́к: Го́споди поми́луй.

Иере́й же чте́т моли́тву сию́:

Го́споди вседержи́телю Бо́же оте́ц на́ших, в Тро́ице святе́й сла́вимый и покланя́емый, его́же ни у́м пости́гнути мо́жет, ни сло́во сказа́ти возмога́ет, его́же никто́же от челове́к нигде́же ви́де, то́чию я́коже от святы́х писа́ний научи́хомся, си́це ве́руем и си́це тебе́ Бо́га отца́ безнача́льнаго, и Сы́на твоего́ единосу́щнаго, и ду́ха твоего́ сопресто́льнаго бы́ти испове́дуем. и́же в ве́тсем заве́те, в явле́нии твое́м патриа́рху Аавраа́му во о́бразе трие́х а́нгел, на после́док же дне́й по воплоще́нии единоро́днаго Сы́на Бо́жия, Го́спода на́шего Иису́са Христа́ от Присноде́вы Мари́и, в креще́нии от Иоа́нна на иорда́не, в пресве́тлом преображе́нии на фаво́ре, и в пресла́вном вознесе́нии на елео́не яви́выйся, о́браз пресвяты́я Тро́ицы на́м показа́л еси́: еще́ же и нерукотворе́нный о́браз Го́спода на́шего Иису́са Христа́ чудоде́йственне и́м на убру́се изъображе́нный, и еде́сскому кня́зю а́вгарю по́сланной и те́м того́ и и́ны мно́ги боля́щыя ра́зными неду́ги исцели́вый, на́с же чти́ти се́й научи́вый: та́кожде и о́бразы и подо́бия святы́х твои́х уго́дников не отмета́яй, но прие́мляй: са́м и ны́не при́зри на ико́ны сия́, я́же раби́ твои́ в че́сть и сла́ву тебе́ еди́наго в Тро́ице святе́й сла́вимаго Бо́га, и единоро́днаго Сы́на твоего́ Го́спода на́шего Иису́са Христа́, пречи́стыя и преблагослове́нныя ма́тере его́, Влады́чицы на́шея Пресвяты́я Богоро́дицы и Присноде́вы Мари́и, и в па́мять святы́х твои́х и́мярек сооруди́ша, благослови́ я́ и освяти́, и пода́ждь и́м си́лу целе́бну, все́х ко́зней диа́вольских прогони́тельну, и во е́же все́м приле́жно пред ни́ми моля́щымся услы́шанным бы́ти, и ми́лость твоего́ человеколю́бия привлещи́, и благода́ть получи́ти сотвори́. Ты́ бо еси́ освяще́ние на́ше, и тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

Иере́й же, прекло́нь главу́, та́йно чте́т моли́тву сию́:

Безнача́льне, неви́диме и непостижи́ме Го́споди, и́же дре́вле в ве́тсем заве́те подо́бия херуви́мов от дре́ва и зла́та и шве́ннаго де́ла, в ски́нии свиде́ния. и в хра́ме соломо́нове сотвори́ти повеле́вый, и ны́не о́бразы не то́чию в воспомина́ние твои́х спаси́тельных благодея́ний и Боже́ственных явле́ний ро́ду челове́ческому, в че́сть же и сла́ву твоего́ Пресвята́го и́мене твори́мыя прие́мляй, но и в па́мять и подража́ние святы́х твои́х уго́дников устроя́емыя не отмета́яй, услы́ши смире́нную моли́тву на́шу: благослови́ ико́ны сия́ и освяти́, и пода́ждь и́м благода́ть и си́лу бе́сы отгоня́ти, и вся́ неду́ги исцеля́ти.

Я́ко ты́ еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву возсыла́ем, со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

И а́бие кропи́т иере́й предложе́нныя ико́ны по три́жды, глаго́ля:

Освяща́ются ико́ны сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

И покропи́в, иере́й кади́т я́: и покланя́ются пред ни́ми, и лобыза́ет я́.

Ли́к же пое́т тропари́ пра́здничныя, и посе́м отпу́ст.

Глава 49. Чи́н благослове́ния кампа́на, си́есть ко́локола или́ зво́на

Пове́сивши зво́н при це́ркви, я́коже бы мощи́ и све́рху и извну́трь окропле́нну бы́ти, пре́жде да́же не поста́вити его́ на колоко́льне, си́м благослове́нием благослови́ти его́ подоба́ет: А́ще святи́тель сие́ де́йствует, оде́ян во вся́ святи́тельския оде́жды, или́ то́чию в ма́нтию, в епитрахи́ль, омофо́р и ми́тру, [а́ще же свяще́нник, в епитрахи́ль и фело́нь] исхо́дит из це́ркве, и прихо́дит к зво́ну та́мо у́бо предугото́ванной су́щей воде́ свяще́нной и кропи́льнице, на че́стно покрове́нном столе́, и начина́ет обы́чно:

Благослове́н Бо́г на́ш: Кли́р же пое́т 6-м гла́сом: Царю́ небе́сный: посе́м чте́тся: Трисвято́е: О́тче на́ш: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 148:

Хвали́те Го́спода с небе́с, хвали́те его́ в вы́шних. Хвали́те его́ вси́ а́нгели его́: хвали́те его́ вся́ си́лы его́. Хвали́те его́ со́лнце и луна́: хвали́те его́ вся́ зве́зды и све́т. Хвали́те его́ небеса́ небе́с, и вода́, я́же превы́ше небе́с. Да восхва́лят и́мя Госпо́дне: я́ко то́й рече́, и бы́ша, то́й повеле́, и созда́шася. Поста́ви я́ в ве́к и в ве́к ве́ка: повеле́ние положи́, и не ми́мо и́дет. Хвали́те Го́спода от земли́ зми́еве, и вся́ бе́здны: О́гнь, гра́д, сне́г, го́лоть, ду́х бу́рен, творя́щая сло́во его́: Го́ры и вси́ хо́лми, древа́ плодоно́сна и вси́ ке́дри: Зве́рие и вси́ ско́ти, га́ди, и пти́цы перна́ты: Ца́рие зе́мстии и вси́ лю́дие, кня́зи и вси́ судии́ зе́мстии: Ю́ноши и де́вы, ста́рцы с ю́нотами, да восхва́лят и́мя Госпо́дне, я́ко вознесе́ся и́мя того́ еди́наго: испове́дание его́ на земли́ и на небеси́. И вознесе́т ро́г люде́й свои́х: пе́снь все́м преподо́бным его́, сыново́м изра́илевым, лю́дем приближа́ющымся ему́.

Та́же псало́м 149.

Воспо́йте Го́сподеви пе́снь но́ву, хвале́ние его́ в це́ркви преподо́бных. Да возвесели́тся изра́иль о сотво́ршем его́, и сы́нове сио́ни возра́дуются о царе́ свое́м. Да восхва́лят и́мя его́ в ли́це, в тимпа́не и псалти́ри да пою́т ему́. Я́ко благоволи́т Госпо́дь в лю́дех свои́х, и вознесе́т кро́ткия во спасе́ние. Восхва́лятся преподо́бнии во сла́ве, и возра́дуются на ло́жах свои́х. Возноше́ния Бо́жия в горта́ни и́х, и мечи́ обою́ду остры́ в рука́х и́х: Сотвори́ти отмще́ние во язы́цех, обличе́ния в лю́дех. Связа́ти цари́ и́х пу́ты, и сла́вныя и́х ручны́ми око́вы желе́зными: Сотвори́ти в ни́х су́д напи́сан: сла́ва сия́ бу́дет все́м преподо́бным его́.

Та́же псало́м 108.

Хвали́те Бо́га во святы́х его́, хвали́те его́ во утверже́нии си́лы его́. Хвали́те его́ на си́лах его́, хвали́те его́ по мно́жеству вели́чествия его́. Хвали́те его́ во гла́се тру́бнем, хвали́те его́ во псалти́ри и гу́слех. Хвали́те его́ в тимпа́не и ли́це, хвали́те его́ во стру́нах и орга́не. Хвали́те его́ в кимва́лех доброгла́сных, хвали́те его́ в кимва́лех восклица́ния: Вся́кое дыха́ние да хва́лит Го́спода.

Сла́ва, и ны́не: Аллилу́иа, три́жды.

Диа́кон же глаго́лет ектению́ сию́:

Ми́ром Го́споду помо́лимся: да́же до О пла́вающих:

И а́бие прилага́ет сия́:

О е́же благослови́ти кампа́н се́й, в сла́ву свята́го и́мене своего́, небе́сным свои́м благослове́нием, Го́споду помо́лимся.

О е́же пода́ти ему́ благода́ть, я́ко да вси́ слы́шащии звене́ние его́ или́ во дни́ или́ в нощи́, возбудя́тся к славосло́вию и́мене свята́го твоего́, Го́споду помо́лимся.

О е́же гла́сом звене́ния его́ утоли́тися и ути́шитися и преста́ти все́м ве́тром зе́льным, бу́рям же, громо́м и мо́лниям, и все́м вре́дным безве́дриям, и злорастворе́нным возду́хом, Го́споду помо́лимся.

О е́же отгна́ти всю́ си́лу, кова́рства же и наве́ты неви́димых враго́в, от все́х ве́рных свои́х, гла́с зву́ка его́ слы́шащих, и к де́ланию за́поведей свои́х возбуди́ти я́, Го́споду помо́лимся.

О е́же изба́витися на́м от вся́кия ско́рби:

Заступи́, спаси́, поми́луй:

Пресвяту́ю, пречи́стую, преблагослове́нную:

Возгла́с: Я́ко подоба́ет тебе́ вся́кая сла́ва че́сть и поклоне́ние:

Ли́к: Ами́нь.

По си́х чту́т псало́м 28:

Принеси́те Го́сподеви, сы́нове Бо́жии, принеси́те Го́сподеви сы́ны о́вни, принеси́те Го́сподеви сла́ву и че́сть. Принеси́те Го́сподеви сла́ву и́мени его́: поклони́теся Го́сподеви во дворе́ святе́м его́. Гла́с Госпо́день на вода́х: Бо́г сла́вы возгреме́, Госпо́дь на вода́х мно́гих. Гла́с Госпо́день в кре́пости: гла́с Госпо́день в великоле́пии. Гла́с Го́спода сокруша́ющаго ке́дры, и стры́ет Госпо́дь ке́дры лива́нския. И истни́т я́ я́ко тельца́ лива́нска, и возлю́бленный я́ко сы́н единоро́жь. Гла́с Го́спода пресеца́ющаго пла́мень огня́. Гла́с Го́спода стряса́ющаго пусты́ню, и стрясе́т Госпо́дь пусты́ню кадди́йскую. Гла́с Госпо́день сверша́ющий еле́ни, и откры́ет дубра́вы, и в хра́ме его́ вся́кий глаго́лет сла́ву. Госпо́дь пото́п населя́ет, и ся́дет Госпо́дь Ца́рь в ве́к. Госпо́дь кре́пость лю́дем свои́м да́ст, Госпо́дь благослови́т лю́ди своя́ ми́ром.

По сконча́нии же псалма́, ре́кшу диа́кону: Го́споду помо́лимся,

И кли́ру: Го́споди поми́луй.

Иере́й же чте́т моли́тву сию́:

Го́споди Бо́же на́ш, хотя́й от все́х ве́рных твои́х всегда́ сла́вимь и покланя́емь бы́ти, в ве́тсем заве́те рабу́ своему́ законополо́жнику моисе́ю тру́бы сре́бряны сотвори́ти, и сыно́м ааро́новым жреце́м в ня́, внегда́ жре́ти и́м тебе́, воструби́ти повеле́л еси́: я́ко да услы́шавше лю́дие твои́ гла́с тру́бный, гото́ви е́же поклони́тися тебе́ бу́дут, и ко е́же же́ртвы приноси́ти тебе́ соберу́тся, и в бра́нех тру́б си́х гла́сом оглаше́ни, к побежде́нию враго́в кре́пко вооружа́тся. И ны́не, Влады́ко пресвяты́й, смире́нно мо́лим тя́, при́зри ми́лостивно на приле́жное моле́ние на́с недосто́йных рабо́в твои́х, и кампа́н се́й, к слу́жбе це́ркве твоея́ святы́я, в сла́ву же великоле́паго и всесвята́го и́мене твоего́ сооруже́нный, небе́сным святы́м твои́м благослове́нием и благода́тию всеосвяща́ющаго твоего́ ду́ха благослови́ и освяти́, и вле́й во́нь си́лу благода́ти твоея́: я́ко да услы́шавше ве́рнии раби́ твои́ гла́с зву́ка его́, в благоче́стии и ве́ре укрепя́тся, и му́жественно все́м диа́вольским наве́том сопротивоста́нут, и моли́твами и всегда́шним славосло́вием тебе́ и́стиннаго Бо́га сия́ победя́т, к це́ркви же на моли́тву и славосло́вие свята́го и́мене твоего́, во дни́ и в нощи́ спе́шно, я́ко ведо́ми да веду́тся: да утоля́тся же и утиша́тся, и преста́нут и напа́дающыя бу́ри ве́тренныя, гра́ды же и ви́хри и гро́мы стра́шнии и мо́лния, и злорастворе́ннии и вре́днии возду́хи гла́сом его́. Ты́ бо Го́споди Бо́же на́ш, не то́чию у́мными и одушевле́нными созда́ниями твои́ми, в сла́ву твою́ и в спасе́ние и по́льзу ве́рных твои́х, но и безду́шными, я́коже моисе́овым жезло́м, и ме́дяною змие́ю в пусты́ни, вся́ я́же хо́щеши пресла́вная твори́ши и чудоде́йствуеши: вся́ бо тебе́ возмо́жна су́ть, не возмо́жно же ничто́же: и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

И все́м предстоя́щым главы́ прикло́ньшым, чте́т иере́й та́йно моли́тву сию́:

Влады́ко Бо́же о́тче вседержи́телю, и́же тру́бным гла́сом седмию́ жре́ц иду́щих пред киво́том свиде́ния, иерихо́нским тве́рдым стена́м па́сти и разруши́тися сотвори́л еси́, и вся́ во гра́де су́щыя в ру́це люде́й твои́х пре́дал еси́: ты́ и ны́не кампа́н се́й небе́сным твои́м благослове́нием испо́лни, я́ко да гла́с звене́ния его́ услы́шавше, проти́вныя возду́шныя си́лы дале́че от огра́д ве́рных твои́х отсту́пят, и вся́ раздеже́нныя и́х о́гненныя, я́же на на́с, стре́лы уга́снут, треска́ния же мо́лний, нападе́ние гра́да, и вся́ вре́дныя возду́хов злорастворе́ния, всеси́льною и кре́пкою десни́цею прогони́ма и уде́ржанна да утоля́тся, ути́хнут и отсту́пят: вся́ бо ты́ в сла́ву твою́, к по́льзе и спасе́нию на́шему чрез посре́дства де́йствуеши.

И возглаша́ет: Твое́ бо е́сть, е́же ми́ловати и спаса́ти ны́, Бо́же на́ш, и тебе́ сла́ву возсыла́ем, безнача́льному отцу́, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

И взе́м иере́й свяще́нную во́ду, кропи́т кампа́н от четы́рех стра́н его́ све́рху, о́крест иды́й, глаго́ля:

Благословля́ется и освяща́ется кампа́н се́й окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. [Три́жды.]

Та́кожде и внутри́ его́ кропя́ на четы́ре страны́, то́жде глаго́лет. Посе́м, взе́м кади́льницу, кади́т кампа́н от четы́рех стра́н, извне́ и вну́трь его́.

Сия́ же ему́ соверша́ющу, кли́рицы чту́т псало́м 69:

Бо́же, в по́мощь мою́ вонми́, Го́споди, помощи́ ми потщи́ся: Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о тебе́, вси́ и́щущии тебе́ Бо́же, и да глаго́лют вы́ну, да возвели́чится Госпо́дь лю́бящии спасе́ние твое́. а́з же ни́щ е́смь и убо́г, Бо́же, помози́ ми: помо́щник мо́й и изба́витель мо́й еси́ ты́, Го́споди не закосни́.

Си́м же соверши́вшымся, диа́кон возглаша́ет: Прему́дрость.

Чте́ц глаго́лет: Чи́сл чте́ние.

Диа́кон: Во́нмем.

Чте́ц же чте́т паремию́ сию́ от четве́ртых кни́г моисе́овых, глава́ 10:

Рече́ Госпо́дь к моисе́ю, глаго́ля: Сотвори́ себе́ две́ трубы́ сре́бряны, ко́ваны сотвори́ши я́, и бу́дут тебе́ на созва́ние со́нма, и возставля́ти полки́. И да востру́биши и́ми, и да собере́тся к тебе́ ве́сь со́нм, пред две́ри ски́нии свиде́ния. А́ще же еди́ною трубо́ю востру́бят, да прии́дут к тебе́ вси́ кня́зи и тысященача́льники изра́ильтестии. И воструби́те в зна́мение и воздви́гнутся полцы́, ополча́ющиися на восто́ки: И воструби́те в зна́мение второ́е, и воздви́гнутся полцы́, ополча́ющиися от ю́га: И воструби́те в зна́мение тре́тие, и да воздви́гнутся полцы́, ополча́ющиися от мо́ря: И воструби́те в зна́мение четве́ртое, и воздви́гнутся полцы́, ополча́ющиися от се́вера. Зна́мением да востру́бят в воздви́жение и́х. И егда́ собере́те со́нм, воструби́те не в зна́мение. И сы́нове ааро́ни жрецы́ да востру́бят труба́ми: и да бу́дет ва́м зако́нно ве́чно в ро́ды ва́шя. А́ще же изы́дете на бра́нь в земли́ ва́шей к супоста́том сопроти́вящымся ва́м, и воструби́те и назна́менуйте труба́ми, и воспомяне́тся пред Го́сподем, и изба́витеся от вра́г ва́ших. И во дне́х весе́лия ва́шего, и в пра́здницех ва́ших, и в новоме́сячиих ва́ших, воструби́те труба́ми на всесожже́ния, и на же́ртвы спасе́ний ва́ших, и бу́дет ва́м воспомина́ние пред бо́гом ва́шим: А́з Госпо́дь Бо́г ва́ш.

Посе́м пою́т, или́ чту́т стихи́ры сия́, гла́с 2:

Земли́ и про́чым стихи́ям, гне́ва ра́ди твоего́, гре́х ра́ди на́ших дви́жимаго на ны́, смуща́ющымся и обурева́емым, гла́с зна́мения сего́, я́коже моисе́овых сре́бряных тру́б услы́шав Го́споди, благоутро́бным свои́м о́ком при́зри на ны́, и не я́ростию твое́ю обличи́ на́с, но умилосе́рдився пощади́, вся́каго стра́шнаго преще́ния твоего́ избавля́я, я́ко еди́н милосе́рд.

Гла́с 1:

Основа́ния всея́ земли́ воздвиза́яй, Бо́же, и сотряса́яй еди́н морско́е ло́же, я́ко созда́тель вся́ческих, изба́ви на́с пра́веднаго твоего́ преще́ния, гла́сом зна́мения сего́ отгоня́я зе́льныя бу́ри и ве́тры, гро́мы же и мо́лния: и бо́дрых на́с и тщали́вых всегда́ к твоему́ славосло́вию сотвори́, и ко исполне́нию святы́х твои́х за́поведей, я́ко человеколю́бец.

Сла́ва, и ны́не, гла́с 4:

Вся́ческая еди́ною в нача́ле собо́ю непосре́дственне созда́вый Го́споди, ны́не же вся́ посре́дственне де́йствуяй гла́сом зво́на сего́ освяще́ннаго, вся́кое уны́ние с лени́вством от серде́ц ве́рных твои́х отжени́, стра́х же тво́й в ни́х с благоче́стием вкорени́ и спе́шных на моли́тву, ско́рых же ко вся́кому благо́му де́лу твое́ю си́лою сотвори́, избавля́я на́с от все́х наве́тов вра́жиих: и невре́дных от злорастворе́нных возду́хов заве́трения соблюда́я: моли́твами Богоро́дицы и все́х святы́х твои́х, я́ко еди́н милосе́рд.

По сконча́нии же си́х, святи́тель, или́ нача́льствуяй, ре́кшу диа́кону: Прему́дрость:

И ли́ку: Честне́йшую херуви́м: Сла́ва, и ны́не: Го́споди поми́луй, три́жды, Благослови́, твори́т обы́чный дневны́й отпу́ст.