Триодь постная [на ц.-слав. яз.]

СВЯТАЯ И ВЕЛИКАЯ СЕДМИЦА

В НЕДЕЛЮ ВАИЙ ВЕЧЕРА

На Го́споди воззва́х, поставим стихов 6, и поем самогласны три, повторяюще сия, глас 8:

Ра́дуйся и весели́ся гра́де Сио́не: / красу́йся и ра́дуйся Це́ркве Бо́жия: / се бо Царь твой прии́де в пра́вде, / на жребя́ти седя́, от детей воспева́емый: / оса́нна в вы́шних, благослове́н еси́ / Име́яй мно́жество щедро́т, поми́луй нас.

Прии́де Спас днесь во град Иерусали́м, / испо́лнити писа́ние / и вси прия́ша в ру́ки ва́иа: / ри́зы же подстила́ху Ему́, / ве́дуще, я́ко Той есть Бог наш, / Ему́же херуви́ми вопию́т непреста́нно: / оса́нна в вы́шних, благослове́н еси́ / Име́яй мно́жество щедро́т, поми́луй нас.

На херуви́мех носи́мый, и пева́емый от серафи́м, / возсе́л еси́ на жребя́ Дави́дски Бла́же, / и де́ти Тя воспева́ху Боголе́пно, / иуде́е же ху́ляху беззако́нно: / стро́потное язы́ков, седа́лище жребца́ прообразова́ше, / из неве́рия в ве́ру претворя́емое: / сла́ва Тебе́ Христе́, / еди́не Ми́лостиве и Человеколю́бче.

Слава: Ра́дуйся и весели́ся:

И ны́не: На херуви́мех носи́мый:

Вход. Прокимен обычный: Се ны́не благослови́те:

На стиховне стихиры самогласны, глас 2:

От ве́твий и ва́ий, я́ко от Боже́ственна пра́здника, / в Боже́ственный преше́дше пра́здник, / к честно́му Христо́вых страсте́й, / ве́рнии, стеце́мся та́инству спаси́тельному: / и Сего́ ви́дим за нас страсть терпя́ща во́льную, / Тому́ же пе́ние подо́бное / благодаря́ще воспои́м, уми́льно зову́ще: / благоутро́бия исто́чниче, и спасе́ния приста́нище, / Го́споди сла́ва Тебе́.

Стих: Воспо́йте Го́сподеви песнь но́ву.

Глас 3: Стра́шно е́же впа́сти в ру́це Бо́га жи́ва: / Сей судия́ есть помышле́ний и мы́слей серде́чных. / Никто́же да вни́дет искуша́яй ве́ру непоро́чную, / но в кро́тости и стра́се Христу́ присту́пим, / да прии́мем ми́лость, и благода́ть обря́щем, / во благовре́менную по́мощь.

Стих: Ви́деша вси концы́ земли́ спасе́ние Бо́га нашего.

Глас 7: Со́нмице лука́вая и прелюбоде́йная, / своему́ му́жу не сохра́ншая ве́ру, / что держи́ши заве́т, его́же не была́ еси́ насле́дница? / Что хва́лишися о Отце́, Сы́на отве́ргшаяся? / Проро́ки не прия́ла еси́, Сы́на возвести́вшия. / Поне́ свои́х чад усрами́ся, си́це вопию́щих: / оса́нна Сы́ну Дави́дову, / благослове́н Гряды́й во и́мя Госпо́дне.

Слава, глас 2: От ве́твий и ва́ий:

И ны́не, глас 3: Стра́шно е́же впа́сти в ру́це Бо́га жи́ва:

Ны́не отпуща́еши: И по О́тче наш, тропарь: Богоро́дице Де́во ра́дуйся: И прочая яко обычно. И обычныя поклоны.

Вестно буди, яко Богоро́дице Де́во: и прочая, со сладкопением поются, во святыя Четыредесятницы Недели, такожде и в настоящую. В прочия же дни Великия седмицы поскору глаголются.

Отпуст:

Гряды́й Госпо́дь на во́льную страсть на́шего ра́ди спасе́ния, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

В НЕДЕЛЮ ВЕЧЕРА

Повечерие глаголем малое, на немже поем трипеснец господина Андреа Критскаго. Ирмос по дважды. Тропари колико их есть. И последи ирмос оба лика вкупе. Такожде творим и в прочия Великия седмицы вечеры, на Повечерии. Глас 8.

Песнь 1.

Ирмос: Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре / пои́м Ему́, я́ко Изба́вителю на́шему Бо́гу, / я́ко просла́вися.

Ио́сифово целому́дрие подража́им ве́рнии, / разуме́им Поче́тшаго челове́ческое слове́сное существо́, / вся́цем хране́нием пожи́вше доброде́телию действи́тельною.

До́брых неде́лание уподо́бися смоко́внице: / сего́ у́бо уклони́мся, да не и́зсхнем я́коже она́ тогда́, / собо́рище ли́ствием покрыва́ющееся преднапису́ющая.

О́браз Влады́чень подпису́я Ио́сиф, в ров вве́ржен быва́ет, / продае́тся от сро́дник, вся терпи́т приснопа́мятный, / во о́браз пои́стинне Христо́в.

Смоко́вницы безпло́дствия убежа́вше бра́тие, разуме́им о́браз, / да не и́зсхнем я́коже она́ тогда́, / егда́ возвраща́яся Человеколю́бец прии́де к ней а́лча.

Иису́с за мир тща́ся пострада́ти во́лею, / и́дет со ученики́ Свои́ми во град Иерусали́м к во́льней стра́сти, / ю́же прии́де пострада́ти.

Прилепи́вшеся Го́сподеви вся тща́щемуся пострада́ти, / гото́ви бу́дем на оплева́ние, на поруга́ния, и на уничиже́ния, / я́ко да пречи́стыми Его́ страстьми́ спросла́вимся ве́рнии.

Страстьми́ стра́сти исцеля́ет, Пострада́вый о нас: / хотя́ бо произво́дит, на на́ше существо́ челове́ческое, / животво́рная Своя́ страда́ния, да мы спасе́мся.

Слава: Три безнача́льна прославля́ю, три Свя́та пою́, / три соприсносу́щна во еди́ном Существе́ пропове́даю: / Еди́н бо во Отце́, Сы́не и Ду́се славосло́вится Бог.

И ны́не, Богородичен: Жезл у́бо Моисе́ов, и жезл Ааро́нов, стра́нное претворе́ние, / и па́че ума́ смотре́ние име́ша: / Твое́ же чре́во Богороди́тельнице, / рождество́ обновля́ет но́вое.

Седален, глас 4. Подобен: Яви́лся еси́:

Смоко́вницы осужде́ние да не предвари́т тя, / но благи́я плоды́ потщи́ся / се́рдца брозда́ми душе́ творцу́ Твоему́ Христу́ возвести́, / в покая́нии Ему́ принося́щи.

Песнь 8.

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Целому́дрием украси́вше житие́, / и му́дростию сохрани́вше ве́ру, / пра́вды нра́вы взы́щем, / да в му́жестве спосле́дующе, / Христо́ви сраспне́мся.

Другу́ю Е́ву обре́т еги́птяныню, / не победи́ся к неподо́бному дея́нию патриа́рх Ио́сиф, / но ста я́коже не́кий адама́нт, / от страсте́й не ят грехо́вных.

Преходя́ жите́йская ше́ствия Спа́се мой, / взалка́л еси́ во́лею, спасе́ния всех жела́я: / сего́ бо взалка́л еси́, обраще́ния от Тебе́ удале́нных.

Пра́отец вкуш от дре́ва, я́ко позна́ся наг и посра́млен, / ли́ствие смоко́вное взем препоя́сася: / собо́рище бо обнаже́нное Христа́ прообража́шеся.

Гото́вися душе́ пре́жде исхо́да, / устро́й себе́ ко о́ному житию́: / и Христу́ тебе́ ра́ди пострада́ти тща́щемуся, да тя просла́вит, / потщи́ся спострада́ти, и сраспя́тися, и умре́ти.

Ка́ко не ужа́снется смерть, Спа́се мой? / Ка́ко не убои́тся ад среты́й Тя, / по благоизволе́нию к стра́сти тща́щагося, / и о непра́ведных пра́ведна Тя зря пострада́ти прише́дша?

Ла́зарево воста́ние ви́девше иуде́и, свяще́нницы и леви́ти / кля́твенное согла́сие за́вистию угото́вльше, ле́стию преда́тельства, / Христа́ преда́ша на смерть Пила́ту.

А́гница Твоя́ и Раба́ и Де́ва, / к стра́сти Тя устремля́ющася ви́дящи, / и ду́шу о нас полага́юща, до́браго Па́стыря, / утро́бою Ма́тернею по Тебе́ рыда́ше.

Благослови́м Отца́ и Сы́на, и Свята́го Ду́ха, Го́спода.

Троичен: Я́ко Еди́ницу Существо́м пою́ Тя, / я́ко Тро́ицу Ли́цы Тя чту, / О́тче, и Сы́не, и Ду́ше Пресвяты́й: / безнача́льную держа́ву Твоего́ Ца́рствия сла́влю во ве́ки.

И ны́не, Богородичен: Мо́лит Тя Христе́ Богоро́дица, / мо́лит учени́к Твои́х собо́р: / Твой мир да́руй ми́рови Твоему́, / и щедро́ты Твоя́ пода́ждь нам бога́тно во ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: На горе́ святе́й просла́вльшася:

Песнь 9.

Ирмос: Чу́жде ма́терем де́вство, / и стра́нно де́вам деторожде́ние; / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

Чу́жде есть нечести́вым целому́дрие, / и стра́нно пра́ведником законопреступле́ние, / Ио́сиф же вели́кий уклони́ся греха́, / и целому́дрия бысть о́браз, / и подо́бие вои́стинну Христо́во.

Чу́жде есть беззако́нником благозако́ние, / и стра́нно неве́рным Богоразу́мие: / иуде́е же сия́ отри́нуша за беззако́ние. / Те́мже и еди́ни са́ми насле́доваша, я́коже смоко́вница, кля́тву.

Взалка́ челове́ческаго спасе́ния, / хлеб сый жи́зни, Христо́с и Бог мой. / Те́мже смоко́вницу предвари́в, безпло́дное собо́рище, / ли́ствием обра́стшую зако́нно, я́ко ви́де, прокля́т.

Зако́нное непло́дие прокля́л еси́, / я́ко ли́ствие процвета́ющее писменосе́нный ра́зум, / плодо́в же дел не иму́щее за беззако́ние: / нас же всех благода́ти сыно́в, Спа́се благослови́.

Жезл у́бо Моисе́ов дре́вле в змию́, / Ааро́нов же жезл в зе́лено преложи́ся, и процвете́ ли́ствие: / непло́дное же изсо́хшее собо́рище законопресту́пное, / в непло́дную преложи́ся смоко́вницу.

Гото́ви Иуде́е свяще́нники твоя́, и устро́й ру́це к богоуби́йству: / се бо прии́де кро́ткий и молчали́вый на страсть, / А́гнец сый и Па́стырь наш, Христо́с Царь Изра́илев.

Приими́ Иуде́е Царя́, / се бо на страсть прихо́дит во́лею, да постра́ждет, / и спасе́т зову́щия непреста́нно: / благослове́н Гряды́й спасти́ Кресто́м вся́ческая.

Обрати́л есть Иуде́е, пра́здники твоя́ в плачь Влады́ка, по проро́честву: / богоуби́йца бо показа́лася еси́ обра́щшаго дре́вле ка́мень, / и несеко́мый во исто́чники водны́я и езе́ра, я́коже пое́т Дави́д.

Слава: Чу́жде есть беззако́нным, / е́же Тя сла́вити безнача́льное Существо́, / Отца́, и Сы́на, и Свята́го Ду́ха, несозда́нное вседержи́тельство, / И́мже весь мир соде́лася, ма́нием Боже́ственныя держа́вы Твоея́.

И ны́не: Приво́дим в моли́тву Богоро́дицу: / Тоя́ моли́твами и апо́стол Твои́х, / о́бщники ны сотвори́ Влады́ко благи́х Твои́х, / и све́тлости сподо́би Спа́се Воскресе́ния Твоего́.

И паки ирмос тойже: Чу́жде ма́терем: Таже и прочее обычно. И отпуст.

Ведомо буди, яко в сию святую Великую седмицу единою совершаем Псалтирь, и глаголем на Утрени кафисмы три, и на часех, 3-м и 6-м, две. И совершаются в среду. В Великую же Субботу стихословятся Непорочны, в Вечернях же глаголем обычно: Ко Го́споду внегда́ скорбе́ти ми:

ВО СВЯТЫЙ И ВЕЛИКИЙ ПОНЕДЕЛЬНИК НА УТРЕНИ

По шестопсалмии поем Аллилу́иа, на глас 8, велегласно, и со сладкопением, и поем тропарь косно и велегласно, и со сладкопением равно. Глас 8:

Се, Жени́х гряде́т в полу́нощи, / и блаже́н раб, его́же обря́щет бдя́ща: / недосто́ин же па́ки, его́же обря́щет уныва́юща. / Блюди́ у́бо, душе́ моя́, / не сном отяготи́ся, / да не сме́рти предана́ бу́деши, / и Ца́рствия вне затвори́шися, / но воспряни́ зову́щи: / Свят, Свят, Свят еси́, Бо́же, Богоро́дицею поми́луй нас. (3)

Таже обычное стихословие с поклоны.

По 1-м стихословии седален, глас 1. Подобен: Гроб Твой:

Страда́ния честна́я настоя́щий день, / я́коже свети́ла соверше́нная, возсиява́ют ми́ру: / Христо́с бо гряде́т страда́ти бла́гостию, / вся содержа́й дла́нию, изволя́ет простре́тися на Дре́ве, / е́же спасти́ челове́ка.

Слава, и ны́не, тойже.

По 2-м стихословии седален, глас 1. Подобен:

Неви́димый Судие́, в пло́ти ка́ко ви́ден был еси́, / и и́деши от муже́й беззако́нных убие́н бы́ти, / на́ше осужде́ние осужда́яй стра́стию Твое́ю? / Те́мже хвалу́, вели́чие и сла́ву возсыла́юще вла́сти Твое́й Сло́ве, согла́сно прино́сим.

Слава, и ны́не, тойже.

По 3-м стихословии седален, глас 8. Подобен: Прему́дрости:

Страсте́й Госпо́дних нача́тки, / настоя́щий день светлоно́сит. / Прииди́те у́бо празднолю́бцы, усря́щим пе́сньми: / Созда́тель бо гряде́т Крест прия́ти, испыта́ния и ра́ны, Пила́том суди́мь. / Те́мже и от раба́ уда́рен быв по главе́, / вся терпи́т, да спасе́т челове́ка. / Сего́ ра́ди возопии́м Ему́: / Человеколю́бче Христе́ Бо́же, / прегреше́ний да́руй оставле́ние, / покланя́ющимся ве́рою пречи́стым страсте́м Твои́м.

Слава, и ны́не, тойже.

И абие посем чтение в толковании Евангелия еже от Матфеа. И Слово Иоанна Златоустаго о изсохшей смоковнице, емуже начало: Якоже у́бо видя: И слово Дамаскиново о изсохшей смоковнице, и о притчи винограда. Таже, И о сподо́битися нам:

Евангелие от Матфеа, зачало 84. [Мф. 21, 18 – 43.]

Во вре́мя о́но, возвра́щься Иису́с во град, взалка́. И узре́в смоко́вницу еди́ну при пути́, прии́де к ней, и ничто́же обре́те на ней, то́кмо ли́ствие еди́но, и глаго́ла ей: да николи́же от тебе́ плода́ бу́дет во ве́ки. И а́бие и́зсше смоко́вница. И ви́девше ученицы́ диви́шася, глаго́люще: ка́ко а́бие и́зсше смоко́вница? Отвеща́в же Иису́с рече́ им: ами́нь глаго́лю вам, а́ще и́мате ве́ру, и не усумните́ся, не то́кмо смоко́вничное сотворите́, но а́ще и горе́ сей рече́те: дви́гнися, и ве́рзися в мо́ре, бу́дет. И вся, ели́ка а́ще воспро́сите в моли́тве ве́рующе, прии́мете. И прише́дшу Ему́ в це́рковь, приступи́ша к Нему́ уча́щу архиере́е и ста́рцы людсти́и, глаго́люще: ко́ею вла́стию сия́ твори́ши? И кто Ти даде́ власть сию́? Отвеща́в же Иису́с, рече́ им: вопрошу́ вы и Аз сло́во еди́но: е́же а́ще рече́те Мне, и Аз вам реку́, ко́ею вла́стию сия́ творю́. Креще́ние Иоа́нново отку́ду бе; с небесе́ ли, или́ от челове́к? Они́ же помышля́ху в себе́, глаго́люще: а́ще рече́м, с небесе́: рече́т нам, почто́ у́бо не ве́ровасте ему́? А́ще ли рече́м, от челове́к: бои́мся наро́да: вси бо и́мут Иоа́нна я́ко проро́ка. И отвеща́вше Иису́сови ре́ша: не ве́мы. Рече́ им и Той: ни Аз вам глаго́лю, ко́ею вла́стию сия́ творю́. Что же ся вам мнит? Челове́к не́кий имя́ше два сы́на, и прише́д к пе́рвому, рече́: ча́до, иди́ днесь, де́лай в виногра́де мое́м. Он же отвеща́в, рече́: не хощу́. Последи́ же раска́явся, и́де. И присту́пль к друго́му, рече́ та́коже. Он же отвеща́в рече́: аз, го́споди, иду́. И не и́де. Кий от обою́ сотвори́ во́лю о́тчу? Глаго́лаша Ему́: пе́рвый. Глаго́ла им Иису́с: ами́нь глаго́лю вам, я́ко мытари́ и любоде́йцы варя́ют вы в Ца́рствии Бо́жии. Прии́де бо к вам Иоа́нн Крести́тель путе́м пра́ведным, и не ве́ровасте ему́, мытари́ же и любоде́йцы ве́роваша ему́: вы же ви́девше, не раска́ястеся последи́, ве́ровати ему́. И́ну при́тчу слы́шите: челове́к не́кий бе домови́т, и́же насади́ виногра́д, и опло́том огради́ его́, и ископа́ в нем точи́ло, и созда́ столп, и вдаст и де́лателем, и оты́де. Егда́ же прибли́жися вре́мя плодо́в, посла́ рабы́ своя́ к де́лателем прия́ти плоды́ его́. И е́мше де́лателе рабы́ его́, о́ваго у́бо би́ша, о́ваго же уби́ша, о́ваго же ка́мением поби́ша. Па́ки посла́ и́ны рабы́ мно́жайша пе́рвых: и сотвори́ша им та́коже. Последи́ же посла́ к ним сы́на своего́, глаго́ля: усрамя́тся сы́на моего́. Де́лателе же ви́девше сы́на, ре́ша в себе́: сей есть насле́дник, прииди́те, убие́м его́, и удержи́м достоя́ние его́. И е́мше его́, изведо́ша вон из виногра́да, и уби́ша. Егда́ у́бо прии́дет господи́н виногра́да, что сотвори́т де́лателем тем? Глаго́лаша Ему́: злых зле погуби́т их, и виногра́д преда́ст ины́м де́лателем, и́же воздадя́т ему́ плоды́ во времена́ своя́. Глаго́ла им Иису́с: не́сте ли чли николи́же в Писа́ниих: ка́мень, его́же не в ряду́ сотвори́ша зи́ждущии, сей бысть во главу́ у́гла? От Го́спода бысть сей, и есть ди́вна во о́чию ва́шею. Сего́ ра́ди глаго́лю вам, я́ко оты́мется от вас Ца́рствие Бо́жие, и да́стся язы́ку творя́щему плоды́ его́.

Посем псалом 50. Таже, Спаси Бо́же лю́ди Твоя́: Го́споди поми́луй, 12.

Трипеснец, творение господина Космы, егоже краестрочие: Ти девте́ра, си есть: во вторый день, еже есть понедельник. Ирмос по дважды, тропари на 12.

Припев: Сла́ва Тебе́ Бо́же наш, сла́ва Тебе́.

[Сей во всю седмицу]. Последи ирмос, оба лика вкупе. Глас 2.

Песнь 1.

{Τ} Ирмос: Непроходи́мое волня́щееся мо́ре, / Бо́жиим Свои́м веле́нием изсуши́вшему, / и пешеше́ствовати сквозе́ е́ Изра́ильтеския лю́ди наста́вльшему, / Го́сподеви пои́м, сла́вно бо просла́вися.

{Η} Неизрече́нное Сло́ва Бо́жия схожде́ние, / е́же Христо́с То́йжде есть Бог и Челове́к, / е́же Бог невосхище́нием бы́ти непщева́в, / внегда́ вообража́тися рабо́м, показу́ет ученико́м, / сла́вно бо просла́вися.

{Δ} Послужи́ти Сам приидо́х, / Его́же зра́ком Созда́тель во́лею обложе́н есмь, / обнища́вшему Ада́му, бога́тствуяй Божество́м, / положи́ти хотя́й Мою́ ду́шу избавле́ние зань, / и́же безстра́стный Божество́м.

Кондак, глас 8. Подобен: Я́ко нача́тки.

Иа́ков рыда́ше Ио́сифова лише́ния, / и до́блий седя́ше на колесни́це, я́ко царь почита́емь: / еги́птяныни бо тогда́ сласте́м не порабо́тав, / воспрославля́шеся от Ве́дущаго челове́ческая сердца́, / и Посыла́ющаго вене́ц нетле́нный.

Икос: На рыда́ние ны́не приложи́м рыда́ние, / и излие́м сле́зы со Иа́ковом, / пла́чущеся Ио́сифа приснопа́мятнаго и целому́дреннаго, / порабоще́ннаго у́бо те́лом, ду́шу же непорабоще́ну соблю́дшаго, / и Еги́птом всем ца́рствовавшаго: / Бог бо подае́т рабо́м Свои́м вене́ц нетле́нный.

Синаксарий.

Песнь 8.

{Ε} Ирмос: Устраши́ся отроко́в благочести́вых, / сообра́знаго души́ нескве́рнаго те́ла, / и устрани́ся воспита́нный в безме́рном веществе́, / неутружде́н огнь, / присноживу́щу же изувя́дшу пла́меню, / ве́чнующая песнь воспева́шеся: / Го́спода, вся дела́, по́йте, / и превозноси́те во вся ве́ки.

{Υ} Вас тогда́ Мои́х ученико́в позна́ют вси, а́ще Моя́ за́поведи соблюдете́, / глаго́лет Спас друго́м, ко стра́сти иды́й: / мир име́йте в себе́, и во всех, и смире́нная му́дрствующе возвы́ситеся: / и Го́спода зна́юще Мя по́йте, и превозноси́те во вся ве́ки.

{Τ} Чи́на сопроти́вна вам язы́ческа, да есть держа́ва купноро́дных: / не жре́бий бо Мой, мучи́тельство же ра́зум самоизбра́нный. / И́же у́бо предызя́щный в вас бы́ти хотя́й други́х, / да есть всех после́днейший: / и Го́спода зна́юще Мя по́йте, и превозноси́те во вся ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос. Честне́йшую не поем.

Песнь 9.

{Ε} Ирмос: Возвели́чил еси́ Христе́, ро́ждшую Тя Богоро́дицу, / от Нея́же Созда́телю наш, / в подобостра́стное нам обле́клся еси́ те́ло, / на́ших прегреше́ний реши́тельное: / Сию́ ублажа́юще, вси ро́ди, / Тебе́ велича́ем.

{Ρ} Скве́рну всю страстну́ю отри́нувше, / досто́йный Боже́ственнаго Ца́рствия ра́зум восприи́мем благому́дрственный, / Твои́м апо́столом предре́кл еси́, всех Прему́дросте: / в не́мже просла́витеся, светя́щеся со́лнца светоза́рнее.

{Α} Взира́юще на Мя, рекл еси́ Го́споди Твои́м ученико́м, / не му́дрствуйте высо́кая, но соотведи́теся смире́нными: / Мою́, ю́же пию́, пи́йте ча́шу, / я́ко да во Ца́рствии Отца́ со Мно́ю просла́витеся.

Таже ирмос: Возвели́чил еси́ Христе́: И поклон до земли.

Ексапостиларий глаголем трижды, косно и со сладкопением. Сей же глаголется до Великаго Четвертка, поется же посреде церкве от певца, и противу глашается от нас:

Черто́г Твой ви́жду Спа́се мой, украше́нный, / и оде́жды не и́мам, да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех стихиры самогласны на 4, глас 1:

Гряды́й Госпо́дь к во́льной стра́сти, / апо́столом глаго́лаше на пути́: / се восхо́дим во Иерусали́м, / и преда́стся Сын Челове́ческий, / я́коже есть пи́сано о Нем. / Прииди́те у́бо и мы, очище́нными смы́слы, / сше́ствуим Ему́, и сраспне́мся, и умертви́мся Его́ ра́ди жите́йским сласте́м, / да и оживе́м с Ним, и услы́шим вопию́ща Его́: / не ктому́ в земны́й Иерусали́м, за е́же страда́ти, / но восхожду́ ко Отцу́ Моему́, и Отцу́ ва́шему, / и Бо́гу Моему́, и Бо́гу ва́шему, / и совозвы́шу вас в го́рний Иерусали́м, / в Ца́рство Небе́сное. (2)

Глас 5: Дости́гше ве́рнии спаси́тельную страсть Христа́ Бо́га, / неизрече́нное Его́ долготерпе́ние просла́вим: / я́ко да благоутро́бием Свои́м совоздви́гнет и нас умерщвле́нных грехо́м, / я́ко Благ и Человеколю́бец. (2)

Слава, и ныне, глас то́йже: Го́споди, гряды́й к страда́нию, / Твоя́ утвержда́я ученики́, глаго́лал еси́ осо́бь прие́м их: / ка́ко глаго́л Мои́х не по́мните, я́же пре́жде реко́х вам? / Я́ко вся́кому проро́ку несть пи́сано, то́кмо во Иерусали́ме убие́ну бы́ти. / Ны́не у́бо вре́мя настои́т, е́же реко́х вам: / се бо предаю́ся рука́ма гре́шных пору́ган бы́ти, / и́же и Кресту́ Мя пригвозди́вше, и погребе́нию преда́вше, / оме́рзена вменя́т я́ко ме́ртва. / Оба́че дерза́йте: тридне́вен бо воста́ну / в ра́дость ве́рных, и жизнь ве́чную.

На стиховне самогласен. Глас 5:

Го́споди, к та́инству неизглаго́ланному Твоего́ смотре́ния, / не довле́ющи сыно́в Зеведе́овых ма́ти, проша́ше Тя, / вре́меннаго ца́рства по́чести дарова́тися ча́дом ея́, / но вме́сто тоя́, ча́шу сме́рти обеща́л еси́ пи́ти друго́м Твои́м, / ю́же ча́шу пре́жде сих пи́ти Сам глаго́лал еси́, / грехо́в очище́ние. / Те́мже Тебе́ вопие́м: / спасе́ние душ на́ших, сла́ва Тебе́.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Го́споди, соверше́ннейшая му́дрствовати, Твоя́ наказу́я ученики́, / не уподо́битися язы́ком глаго́лал еси́, / во е́же облада́ти ме́ньшими: / не та́ко бо бу́дет вам Мои́м ученико́м, / я́ко ни́щий хотя́ есмь. / Пе́рвый у́бо вас, да бу́дет всем слуга́: / нача́льствуяй же я́ко нача́льствуемый, / предызя́щный же я́ко после́днейший. / И́бо приидо́х Сам обнища́вшему Ада́му послужи́ти, / и избавле́ние да́ти за мно́гих ду́шу Мою́, / вопию́щих Ми: сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Глас 8: Изсо́хшия смоко́вницы за непло́дие, / преще́ния убоя́вшеся бра́тие, / плоды́ досто́йны покая́ния принесе́м Христу́, / подаю́щему нам ве́лию ми́лость.

Слава, и ныне, глас то́йже: Втору́ю Е́ву еги́птяныню обре́т змий глаго́лы, / тща́шеся ласка́ньми запя́ти Ио́сифа, / но той оста́вив ри́зу, бежа́ греха́: / и наг не стыдя́шеся, я́коже первозда́нный пре́жде преслуша́ния. / Того́ моли́твами Христе́ поми́луй нас.

Таже: Бла́го есть: И прочая по обычаю с поклоны. Таже отпуст: Гряды́й Госпо́дь на во́льную страсть, на́шего ра́ди спасе́ния, Христо́с и́стинный: Сей же отпуст глаголется во вторник и в среду.

Ведомо же буди, яко на 1-м часе и 9-м Псалтирь не глаголем в Великую седмицу: но точию глаголются трипсалмны, но обычаю. Третий же час и шестый поем со Псалтирем. Чтется же и Четвероевангелие, в Понедельник, во Вторник и в Среду совершается. При часе 3-м дне (9-й час утра – А.Р.) ударяет параекклисиарх в било, яко же есть обычай. И собравшеся в церковь, поем 3-й час, с кафисмою: и творяще обычныя поклоны. Таже тропарь: Го́споди, И́же Пресвята́го Твоего́ Ду́ха: и Богоро́дице Ты еси́ лоза́: поклоны 3. И абие украшену аналогию, положат на нем верху святое Четвероевангелие, и двема лампадома возжженнома. Всем же стоящим откровенными главами. Священник же кадит храм весь, и братию. А на 6-м часе кадит токмо Евангелие. На 9-м же часе Евангелие кадит, и храм весь, и братию: И тако чтет Евангелие. По скончании же чтения Евангелия глаголем: Госпо́дь Бог благослове́н: И прочее последование. Глаголется и кондак дне: Иа́ков рыда́ше: И обычныя поклоны. И абие начинаем шестый час. Прииди́те поклони́мся: трижды, и псалмы обычныя: Кафисму рядовую. Таже тропарь: И́же в шесты́й день же и час: и Богородичен: Я́ко не и́мамы дерзнове́ния: и поклоны 3.

Таже тропарь пророчества, глас 6:

Душе́ю сокруше́нною припа́даем Тебе́, / и мо́лим Тя Спа́се ми́ра: / Ты бо еси́ Бог ка́ющихся.

Слава, и ныне, тойже.

Прокимен, псалом 125, глас 4: Внегда́ возврати́ти Го́споду / плен Сионь. Стих: Тогда́ испо́лнишася ра́дости уста́ на́ша.

Пророчества Иезекиилева чтение. [Глава 1, ст. 1 – 20]

Бысть в тридеся́тое ле́то, в четве́ртый ме́сяц, в пя́тый день ме́сяца, и аз бых посреде́ плене́ния при реце́ Хова́р: и отверзо́шася небеса́, и ви́дех виде́ния Бо́жия. В пя́тый день ме́сяца, сие́ ле́то пя́тое плене́ния царя́ Иоаки́ма. И бысть сло́во Госпо́дне ко Иезеки́илю сы́ну Вузи́еву, свяще́ннику в земли́ халде́йстей при реце́ Хова́р. И бысть на мне рука́ Госпо́дня. И ви́дех, и се дух воздвиза́яйся, грядя́ше от се́вера, и о́блак вели́кий в нем, и свет о́крест его́ и огнь блиста́яйся. И посреде́ его́ я́ко виде́ние иле́ктра посреде́ огня́, и свет в нем: посреде́ я́ко подо́бие четы́рех живо́тных: и сие́ виде́ние их, я́ко подо́бие челове́ка в них. И четы́ре ли́ца еди́ному, и четы́ре кри́ла еди́ному. И го́лени их пра́вы, и перна́ты но́ги их, и и́скры я́ко блиста́ющаяся медь, и ле́гка кри́ла их. И рука́ челове́ча под кри́лами их на четы́рех страна́х их. И ли́ца их и кри́ла их четы́рех держа́щаяся друг дру́га, ли́ца же их четы́рех не обраща́хуся, внегда́ ходи́ти им: ко́еждо пря́мо лица́ своего́ хожда́ху. И подо́бие лиц их, лице́ челове́чее, и лице́ льво́во одесну́ю четы́рем, и лице́ те́льчее ошу́юю четы́рем, и лице́ о́рлее четы́рем. [И ли́ца их] и кри́ла их просте́рты свы́ше четы́рем, коему́ждо два сопряже́на друг ко дру́гу, и два покрыва́ху верху́ телесе́ их, и ко́еждо пря́мо лицу́ своему́ идя́ше. Иде́же а́ще бя́ше дух ше́ствуяй, идя́ху, и не обраща́хуся. И посреде́ живо́тных виде́ние я́ко у́глия огня́ горя́щаго, я́ко виде́ние свещ сообраща́ющихся посреде́ живо́тных, и свет огня́, и от огня́ исхожда́ше я́ко мо́лния. И живо́тная теча́ху, и обраща́хуся, я́ко виде́ние везе́ково. И ви́дех, и се ко́ло еди́но на земли́ держа́щееся живо́тных четы́рех. И виде́ние коле́с, и сотворе́ние их, я́ко виде́ние фарси́са, и подо́бие еди́но четы́рем: и де́ло их бя́ше, я́коже а́ще бы бы́ло ко́ло в колеси́. На четы́ри страны́ их ше́ствоваху: не обраща́хуся, внегда́ ше́ствовати им. Ниже́ хребты́ их, и высота́ бя́ше им: и ви́дех та, и плещи́ их испо́лнены оче́с о́крест четы́рем. И внегда́ ше́ствовати живо́тным, ше́ствоваху и коле́са держа́щеся их: и внегда́ воздвиза́тися живо́тным от земли́, воздвиза́хуся и коле́са. Иде́же а́ще бя́ше о́блак, та́мо бя́ше и дух, е́же ше́ствовати: ше́ствоваху и живо́тная, и коле́са воздвиза́хуся с ни́ми, зане́ дух жи́зни бя́ше в колесе́х.

Прокимен, псалом 126, глас 4: А́ще не Госпо́дь сози́ждет дом, / всу́е труди́шася зи́ждущии. Стих: А́ще не Госпо́дь сохрани́т град, всу́е бде стреги́й.

И чтется Евангелие по предписанному чину. По чтении же, Ско́ро да предваря́т ны щедро́ты Твоя́ Го́споди: Трисвятое, с поклоны. По О́тче наш: Кондак дне. Го́споди поми́луй, 40. И прочее по обычаю, и отпуст.

Ведомо же буди: яко Евангелие от Матфеа все чтется, подобне и от Марка, и от Луки: от Иоанна же чтется до начала святых страстей, яве яко до Ны́не просла́вися Сын Челове́ческий: Чтется же тако в трех днех, сиречь, в Понедельник, во Вторник, в Среду: И совершается в Среду на 9-м часе. Бывают же от Луки чтения три. Прочая же по два. Вкупе всех чтений девять, и вящше ничтоже. Девятый же час трех дней стихословия не имать, якоже речеся. Но по трипсалмии поется от учиненнаго монаха: И́же в девя́тый час: Сла́ва, и ны́не: И́же нас ра́ди рожде́йся от Де́вы: И бывает чтение в Четвероевангелии: По немже глаголем: Не преда́ждь нас до конца́: Трисвятое с поклоны. По О́тче наш: Кондак дне. Во Ца́рствии Твое́м: И прочее последование, яко обычно. Глаголем же и кондак дне. Присовокупляем же и Вечерню.

ВО СВЯТЫЙ И ВЕЛИКИЙ ПОНЕДЕЛЬНИК ВЕЧЕРА

По предначинательном псалме обычное стихословие: Ко Го́споду внегда́ скорбе́ти ми, воззвах: На Го́споди воззва́х, поставим стихов 10, и поем стихиры самогласны дне 4 по дважды, а два по единожды, глас 1:

Гряды́й Госпо́дь к во́льней стра́сти, / апо́столом глаго́лаше на пути́: / се восхо́дим во Иерусали́м, / и преда́стся Сын Челове́ческий, / я́коже есть пи́сано о Нем. / Прииди́те у́бо и мы, очище́нными смы́слы, сше́ствуим Ему́, / и сраспне́мся, и умертви́мся Его́ ра́ди жите́йским сласте́м, / да и оживе́м с Ним, и услы́шим вопию́ща Его́: / не ктому́ в земны́й Иерусали́м за е́же страда́ти, / но восхожду́ ко Отцу́ Моему́ и Отцу́ ва́шему, / и Бо́гу Моему́ и Бо́гу ва́шему, / и совозвы́шу вас в го́рний Иерусали́м, / в Ца́рство Небе́сное. (2)

Глас 5: Дости́гше ве́рнии спаси́тельную страсть Христа́ Бо́га, / неизрече́нное Его́ долготерпе́ние просла́вим: / я́ко да благоутро́бием Свои́м / совоздви́гнет и нас умерщвле́нных грехо́м, / я́ко Благ и Человеколю́бец. (2)

Го́споди гряды́й к страда́нию, / Твоя́ утвержда́я ученики́, / глаго́лал еси́ осо́бь прие́м их: / ка́ко глаго́л Мои́х не по́мните, / я́же пре́жде реко́х вам? / Я́ко вся́кому проро́ку несть пи́сано, / то́кмо во Иерусали́ме убие́ну бы́ти. / Ны́не у́бо вре́мя настои́т, е́же реко́х вам: / се бо предаю́ся рука́ма гре́шных пору́ган бы́ти, / и́же и Кресту́ Мя пригвозди́вше, и погребе́нию преда́вше, / оме́рзена вменя́т я́ко ме́ртва. / Оба́че дерза́йте, тридне́вен бо воста́ну, / в ра́дость ве́рных, и жизнь ве́чную. (2)

Го́споди, к та́инству неизглаго́ланному Твоего́ смотре́ния, / не довле́ющи сыно́в Зеведе́овых ма́ти, проша́ше Тя, / вре́меннаго ца́рства по́чести дарова́тися ча́дом ея́, / но вме́сто тоя́, ча́шу сме́рти обеща́л еси́ пи́ти друго́м Твои́м, / ю́же ча́шу пре́жде сих пи́ти Сам глаго́лал еси́, / грехо́в очище́ние. / Те́мже Тебе́ вопие́м: / спасе́ние душ на́ших, сла́ва Тебе́. (2)

Го́споди, соверше́ннейшая му́дрствовати, / Твоя́ наказу́я ученики́, / не уподо́битися язы́ком глаго́лал еси́, / во е́же облада́ти ме́ньшими: / не та́ко бо бу́дет вам Мои́м ученико́м, / я́ко ни́щий хотя́ есмь. / Пе́рвый у́бо вас, да бу́дет всем слуга́: / нача́льствуяй же, я́ко нача́льствуемый: / предызя́щный же, я́ко после́днейший. / И́бо приидо́х Сам обнища́вшему Ада́му послужи́ти, / и избавле́ние да́ти за мно́гих ду́шу Мою́, / вопию́щих Ми: сла́ва Тебе́.

Глас 8: Изсо́хшия смоко́вницы за непло́дие, / преще́ния убоя́вшеся бра́тие, / плоды́ досто́йны покая́ния принесе́м Христу́, / подаю́щему нам ве́лию ми́лость.

Слава, и ныне, глас то́йже: Втору́ю Е́ву еги́птяныню обре́т змий глаго́лы, / тща́шеся ласка́ньми запя́ти Ио́сифа, / но той оста́вив ри́зу, бежа́ греха́, / и наг не стыдя́шеся, я́коже первозда́нный пре́жде преслуша́ния. / Того́ моли́твами, Христе́, поми́луй нас.

Таже вход со Евангелием. Све́те ти́хий:

Прокимен, псалом 127. Глас 6: Благослови́т тя Госпо́дь от Сио́на, / и у́зриши блага́я Иерусали́ма. Стих: Блаже́ни вси боя́щиися Го́спода, ходя́щии в путе́х Его́.

Исхода чтение. [Глава 1, ст. 1 – 20.]

Сия́ имена́ сыно́в Изра́илевых, входя́щих во Еги́пет вку́пе со Иа́ковом отце́м их, ки́йждо со всем до́мом свои́м внидо́ша: Руви́м, Симео́н, Леви́й, Иу́да, Иссаха́р, Завуло́н и Вениами́н, Дан и Неффали́м, Гад и Аси́р. Ио́сиф же бя́ше во Еги́пте. Бя́ше же всех душ изше́дших из Иа́кова, се́дмьдесят пять. У́мре же Ио́сиф, и вся бра́тия его́, и весь род о́ный. Сы́нове же Изра́илевы возрасто́ша, и умно́жишася, и мно́зи бы́ша, и укрепи́шася зело́ зело́: умно́жи же их земля́. Воста́ же царь ин во Еги́пте, и́же не зна́ше Ио́сифа. Рече́ же язы́ку своему́: се род сыно́в Изра́илевых вели́кое мно́жество, и укрепля́ется па́че нас. Прииди́те у́бо прехи́трим их, да не когда́ умно́жатся; и егда́ а́ще приключи́тся нам брань, приложа́тся и си́и к супоста́том, и одоле́вше нам, изы́дут из земли́ [на́шея]. И приста́ви над ни́ми приста́вники дел, да озло́бят их в де́лех: и созда́ша гра́ды тве́рды фарао́ну, Пифо́, и Рамесси́, и Он, и́же есть Илиопо́ль. Поели́ку же их смиря́ху, толи́ко мно́жайшии быва́ху, и укрепля́хуся зело́ зело́. И гнуша́хуся еги́птяне сынми́ Изра́илевыми. И наси́лие творя́ху еги́птяне сыно́м Изра́илевым ну́ждею. И боле́зненну тем жизнь творя́ху в де́лех жесто́ких, бре́нием, и плинфоде́ланием, и все́ми де́лы, я́же в поля́х, во всех де́лех, и́миже порабоща́ху их с ну́ждею. И рече́ царь еги́петский ба́бам евре́йским: еди́ной их и́мя, Сепфо́ра, и и́мя второ́й, Фу́а. И рече́ [им]: егда́ ба́бите евре́аныням, и суть к рожде́нию, а́ще у́бо му́жеский пол бу́дет, убива́йте его́, а́ще же же́нский, снабдева́йте его́. Убоя́шася же ба́бы Бо́га, и не сотвори́ша, я́коже повеле́ им царь еги́петский, и живля́ху му́жеский пол. Призва́ же царь еги́петский ба́бы, и рече́ им: что я́ко сотвори́сте вещь сию́, и оживля́ете му́жеский пол? Реко́ша же ба́бы фарао́ну: не я́ко жены́ еги́птяныни, та́ко и жены́ евре́аныни: ражда́ют бо пре́жде не́же вни́ти к ним ба́бам, и ражда́ху. Бла́го же творя́ше Бог ба́бам, и мно́жахуся лю́дие, и укрепля́хуся зело́.

Прокимен, псалом 128, глас 6: Благослови́хом вы / во и́мя Госпо́дне. Стих: Мно́жицею бра́шася со мно́ю от ю́ности моея́.

Иова чтение. [Глава 1, ст. 1 – 12.]

Челове́к не́кий бя́ше во стране́ Авситиди́йстей, ему́же и́мя И́ов: и бе челове́к он и́стинен, непоро́чен, пра́веден, Богочести́в, удаля́яйся от вся́кия лука́выя ве́щи. Бы́ша же ему́ сы́нове седмь, и дще́ри три. И бя́ху ско́ти его́, ове́ц седмь ты́сящ, вельблю́дов три ты́сящи: супру́г воло́в пять сот, и осли́ц пасо́мых пять сот, и слуг мно́го зело́, и дела́ ве́лия бя́ху ему́ на земли́: и бе челове́к о́ный благоро́днейший су́щих от восто́к со́лнца. Сходя́щеся же сы́нове его́ друг ко дру́гу, творя́ху пир на ки́йждо день, спое́млюще вку́пе и три сестры́ своя́, я́сти и пи́ти с ни́ми. И егда́ скончава́шася дни́е пи́ра, посыла́ше И́ов и очища́ше их, востая́ зау́тра: и приноша́ше о них же́ртвы по числу́ их, и тельца́ еди́наго о гресе́, о душа́х их. Глаго́лаше бо И́ов: не́гли когда́ сы́нове мои́ согреши́ша, и в мы́сли свое́й зла́я помы́слиша проти́ву Бо́га? Та́ко у́бо творя́ше И́ов вся дни. И бысть я́ко день сей, и се приидо́ша а́нгели Бо́жии предста́ти пред Го́сподем, и диа́вол прии́де с ни́ми. И рече́ Госпо́дь диа́волу: отку́ду прише́л еси́? И отвеща́в диа́вол Го́сподеви, рече́: обше́д зе́млю, и проше́д поднебе́сную се есмь. И рече́ ему́ Госпо́дь: внял ли еси́ мы́слию твое́ю на раба́ Моего́ И́ова? Зане́ несть я́ко он, на земли́ челове́к непоро́чен, и́стинен, богочести́в, удаля́яйся от вся́кия лука́выя ве́щи. Отвеща́ же диа́вол, и рече́ пред Го́сподем: еда́ ту́не И́ов чтит Го́спода? Не Ты ли огради́л еси́ вне́шняя его́, и вну́тренняя до́му его́, и я́же вне всех су́щих его́ о́крест? Дела́ же руку́ его́ благослови́л еси́, и скоты́ его́ мно́ги сотвори́л еси́ на земли́. Но посли́ ру́ку Твою́, и косни́ся всех, я́же и́мать: а́ще не в лице́ Тя благослови́т. Тогда́ рече́ Госпо́дь диа́волу: се вся ели́ка суть ему́, даю́ в ру́ку твою́, но самого́ да не косне́шися. И изы́де диа́вол от Го́спода.

Таже, Да испра́вится моли́тва моя́:

И посем Евангелие от Матфеа, зачало 98. [Мф. 24, 3 – 35.]

Во вре́мя о́но, седя́щу Иису́су на горе́ Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут; и что есть зна́мение Твоего́ прише́ствия и кончи́на ве́ка? И отвеща́в Иису́с рече́ им: блюди́те, да никто́же вас прельсти́т. Мно́зи бо прии́дут во и́мя Мое́, глаго́люще: аз есмь Христо́с, и мно́ги прельстя́т. Услы́шати же и́мате бра́ни, и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́к, и ца́рство на ца́рство: и бу́дут гла́ди и па́губы, и тру́си по ме́стом. Вся же сия́ нача́ло боле́знем. Тогда́ предадя́т вы в ско́рби, и убию́т вы, и бу́дете ненави́дими все́ми язы́ки и́мене Моего́ ра́ди. И тогда́ соблазня́тся мно́зи, и друг дру́га предадя́т, и возненави́дят друг дру́га. И мно́зи лжепроро́цы воста́нут и прельстя́т мно́гия. И за умноже́ние беззако́ния, изся́кнет любы́ мно́гих. Претерпе́вый же до конца́, той спасе́тся. И пропове́стся сие́ Ева́нгелие Ца́рствия по всей вселе́нней, во свиде́телство всем язы́ком: и тогда́ прии́дет кончи́на. Егда́ у́бо у́зрите ме́рзость запусте́ния, рече́нную Дании́лом проро́ком, стоя́щу на ме́сте свя́те, и́же чтет, да разуме́ет, тогда́ су́щии во Иуде́и да бежа́т на го́ры. И и́же на кро́ве, да не схо́дит взя́ти я́же в дому́ его́. И и́же на селе́, да не возврати́тся вспять взя́ти риз свои́х. Го́ре же непра́здным и доя́щим в ты́я дни. Моли́теся же, да не бу́дет бе́гство ва́ше в зиме́, ни в суббо́ту. Бу́дет бо тогда́ скорбь ве́лия, якова́ же несть была́ от нача́ла ми́ра досе́ле, ниже́ и́мать бы́ти. И а́ще не бы́ша прекрати́лися дни́е о́ны, не бы у́бо спасла́ся вся́ка плоть: избра́нных же ра́ди прекратя́тся дни́е о́ны. Тогда́ а́ще кто рече́т вам: се, зде Христо́с, или́ о́нде, не ими́те ве́ры. Воста́нут бо лжехри́сти и лжепроро́цы, и дадя́т зна́мения ве́лия и чудеса́, я́коже прельсти́ти, а́ще возмо́жно, и избра́нныя. Се, пре́жде рех вам. А́ще у́бо реку́т вам: се, в пусты́ни есть, не изыди́те: се, в сокро́вищах, не ими́те ве́ры. Я́коже бо мо́лния исхо́дит от восто́к и явля́ется до за́пад, та́ко бу́дет прише́ствие Сы́на Челове́ческаго. Иде́же бо а́ще бу́дет труп, та́мо соберу́тся орли́. А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спа́днут с небесе́, и си́лы небе́сныя подви́гнутся. И тогда́ яви́тся зна́мение Сы́на Челове́ческаго на небеси́, и тогда́ воспла́чутся вся коле́на земна́я, и у́зрят Сы́на Челове́ческаго, гряду́ща на о́блацех небе́сных с си́лою и сла́вою мно́гою. И по́слет а́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их. От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва. Та́ко и вы, егда́ ви́дите сия́ вся, ве́дите, я́ко близ есть, при две́рех. Ами́нь глаго́лю вам, не мимои́дет род сей, до́ндеже вся сия́ бу́дут. Не́бо и земля́ мимои́дет, словеса́ же Моя́ не мимои́дут.

И прочее последование Преждеосвященных, по обычаю. Тако долженствует быти и в Великий Вторник, и в Великую Среду.

Аще же несть Преждеосвященныя: Поем на Го́споди воззва́х, половину от стихир, на 6. Стихира, глас 1: Гряды́й Госпо́дь к во́льной стра́сти: дважды. Дости́гше ве́рнии: дважды. Го́споди, к та́инству неизглаго́ланному: дважды. Сла́ва, и ны́не: Го́споди гряды́й к страда́нию: По сих вход с Евангелием: и Све́те ти́хий: Таже прокимен, и паремии, и Евангелие. Таже, Сподо́би Го́споди: И ектения: Испо́лним вече́рнюю: На стиховне, от техже стихир, стихира, глас 5: Го́споди соверше́ннейшая му́дрствовати: Стих: К Тебе́ возведо́х о́чи мои́: И паки туюжде стихиру. Стих: Поми́луй нас Го́споди: Глас 8: Изсо́хшая смоко́вницы: Сла́ва, и ны́не, глас тойже: Втору́ю Е́ву: Таже, Ны́не отпуща́еши: И прочая обычная с поклоны. И по конечном Трисвятом, и по О́тче наш: Го́споди поми́луй, 12. Таже, молитва, Всесвята́я Тро́ице: и Бу́ди и́мя Госпо́дне: И отпуст.

Сице убо творим во Вторник и в Среду.

На трапезе же ядим сухоядение, и сим удовляемся. И якоже в первую неделю святаго сего Поста: сице и в сия дни, в Великий Понедельник, во Вторник и в Среду поститися подобает.

Ведати бо подобает, яко и Шестый великий Собор повеле, спасительныя страсти дни в посте, и молитве, и умилении сердца сотворяти верным: в полунощи же Великия Субботы, оставляти пост, Божественным евангелистом Матфею и Луце: овому убо позде в субботу глаголанием, овому же утром глубоким, медлемое нам нощи написующим.

ВО СВЯТЫЙ И ВЕЛИКИЙ ПОНЕДЕЛЬНИК ВЕЧЕРА

Повечерие глаголем великое, на Повечерии трипеснец господина Андреа Критскаго. Глас 8.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы ро́ждшагося во спасе́ние на́ше.

По́йдем со Христо́м к горе́ Елео́нстей, / та́йно со апо́столы соводвори́мся Ему́.

Разуме́й смире́нное мое́ се́рдце, / что есть жерно́вная при́тча? / О не́йже пре́жде рече́ Христо́с, / и истрезви́ся про́чее.

Гото́ви сама́ себе́ о душе́ моя́, ко исхо́ду: / прише́ствие приближа́ется неумоли́маго Судии́.

Богородичен: Пречи́стая Богоро́дице Де́во, еди́на всепе́тая, / Сы́на Твоего́ моли́ о рабе́х Твои́х.

Ин, глас тойже.

Ирмос: Ви́дите, ви́дите, / я́ко Аз есмь Бог, / дре́вле Изра́иля сквозе́ Чермно́е мо́ре проведы́й, / и пита́вый, и спасы́й, / и от го́рькия рабо́ты свободи́вый фарао́новы.

Ви́дите, ви́дите, я́ко Аз есмь Бог, / И́же пре́жде бытия́ всех, / и пре́жде сотворе́ния земли́ и не́ба, вем вся: / и весь сый во Отце́, и всего́ ношу́ в Себе́.

Сло́вом соста́вих не́бо вку́пе и зе́млю: / со Отце́м бо бех, и сло́вом ношу́ вся, я́ко Сло́во, / му́дрость, и си́ла, и о́браз, и содействи́телен, и равноде́телен.

Кто времена́ положи́? / Кто ве́ки соблюда́яй? / Кто вся определя́яй и совоздвиза́яй? / Ра́зве Безнача́льный при́сно сый со Отце́м, / я́коже заря́ во све́те.

О безме́рнаго Твоего́ человеколю́бия Иису́се! / Сказа́л бо еси́ нам сконча́ния свы́ше вре́мя, / скрыв час, уясни́в же све́тло о́бразы его́.

Вся ве́си, вся зна́еши Иису́се / я́ко име́яй все в Себе́ Оте́ческое достоя́ние Боже́ственне, / и всего́ Ду́ха всажде́на нося́й в себе́, соприсносу́щнаго Отцу́.

Влады́ко Го́споди, веко́в тво́рче, / сподо́би и нас свяще́нный о́ный тогда́ глас услы́шати, / зову́щий избра́нныя Отца́ в Ца́рство Небе́сное.

Слава: Безнача́льная, несозда́нная Тро́ице, / неразде́льная Еди́нице, тро́е су́щая и еди́но, / О́тче, Сы́не и Ду́ше, еди́ный Бо́же, / приими́ пе́ние от бре́нных язы́к, / я́коже от уст пла́менных.

Богородичен: Селе́ние свято́е яви́лася еси́ Де́во Бо́жие: / в Тя бо Небе́сный Царь всели́вся пло́тию, про́йде кра́сный, / челове́ка в Себе́ вообрази́в Боже́ственне.

Седален, глас 2. Подобен: Милосе́рдия су́щи:

Милосе́рдием дви́жимь Христе́, / во́лею преды́деши страда́ти благоде́телю, / хотя́й страсте́й нас изба́вити, и е́же во а́де осужде́ния. / Те́мже честна́я Твоя́ воспева́ем страда́ния, / и сла́вим Спа́се, кра́йнее Твое́ вси схожде́ние.

Песнь 8.

Ирмос: А́нгели и небеса́, / на престо́ле сла́вы седя́щаго / и я́ко Бо́га непреста́нно сла́вимаго, / благослови́те, по́йте / и превозноси́те Его́ во ве́ки.

Вся́ко слы́шала еси́ душе́, / ка́ко Христо́с Боже́ственным ученико́м Свои́м провозглаша́ше, глаго́ля сконча́ние: / разуме́вши же Твой коне́ц, угото́вися про́чее: / вре́мя исхо́да прии́де.

Позна́ла еси́ непло́дная душе́, лука́ваго раба́ при́тчу, / бо́йся и не небрези́ о дарова́нии, его́же прия́ла еси́, / да не сокры́еши в зе́млю, но да ку́плю де́еши.

Да уясни́тся свеща́, да преизлие́тся сея́ и еле́й, / я́коже де́вам тогда́ сострада́ние, / да обря́щеши душе́ моя́ черто́г Христо́в тогда́ отве́рстый.

В суббо́ту бе́гство и в зиме́ глаго́ля Учи́тель, / седма́го бу́рю предгада́тельствует настоя́щаго ве́ка, / в не́мже на́йдет я́ко зима́ кончи́на.

Я́ко ско́рость мо́лнии преходя́щая, / та́ко тогда́ бу́дет стра́шное о́ное Влады́ки твоего́ прише́ствие, душе́ моя́: / слы́шала еси́, гото́ва про́чее бы́ти потщи́ся.

Егда́ прии́дет Судия́ / с ты́сящами, и тьма́ми а́нгельских чино́в и сил, / тогда́ кий страх душе́ моя́, / кий тре́пет, увы мне! / Наги́м стоя́щим всем.

Благослови́м Отца́ и Сы́на, и Свята́го Ду́ха, Го́спода.

Един Бог у́бо Тро́ица, / ни Отцу́ изступи́вшу в сыновство́, / ниже́ Сы́ну премени́вшуся во исхожде́ние, / но сво́йственная, и обое́ Свет, Бо́га, Три сла́влю во ве́ки.

И ныне, Богородичен: Моли́твами Бо́же, Богоро́дицы, приими́ моли́тву на́шу, / возниспосли́ же ми́лости Твоя́ на вся бога́тно, / и мир Твой пода́ждь лю́дем Твои́м.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Таже ирмос: А́нгели и небеса́, на престо́ле:

Песнь 9.

Ирмос: Проявле́нное на горе́ законополо́жнику во огни́ и купине́, / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Слы́шала еси́ душе́ моя́, / Судии́ предвозглаша́ющу, и уча́щу тя вре́мене кончи́ны: / гото́ви я́же на исхо́д дела́, / да не я́ко неиску́сна, Бо́га отве́ржена бу́деши.

От смоко́вницы о душе́ моя́, научи́ся кончи́ны! / Егда́ мла́до бу́дет ли́ствие, и прозя́бнет ве́твие, жа́твы час про́чее, / и ты егда́ сия́ уви́диши, разуме́й, я́ко при две́рех есть.

Кто ра́зве Тебе́ ины́й Твоего́ зна́ет Отца́? / Или кто кроме́ Тебе́ весть час, или́ день? / У Тебе́ бо сокро́вища прему́дрости вся внутрь суть, Христе́ Бо́же.

Кни́ги у́бо разгну́тся тогда́, престо́лом поста́вленным, / дея́ния же облича́тся, наги́м стоя́щим всем: / ни свиде́телем, ни клеветнико́м прису́тствующим: / обнаже́на бо вся Бо́гу.

Гряде́т всех Судия́, изведе́н бы́ти на суд, / на престо́ле херуви́мсте седя́й, я́ко пови́нный предста́ти Пила́ту, / и вся пострада́ти, да спасе́тся Ада́м.

Прибли́жися Па́сха нам вели́кая и Боже́ственная: / по двою́ бо дни́ю преднауча́ет Христо́с, / страда́ния пропису́я день, / во́ньже Отцу́ же́ртва приведе́тся.

При Кресте́ Твое́м Спа́се предстоя́щи Ма́ти, / и Твое́ непра́ведное зря́щи заколе́ние, вопия́ше: / увы́ Мне Ча́до Мое́! Увы́ Мне незаходи́мый све́те! / Просия́й всем Со́лнце сла́вы свет.

Слава: О еди́нице Свята́я, / Тро́ице еди́но Божество́, и Тро́ица Еди́нице Бо́же, / триипоста́сное Естество́, единоче́стная, и неразде́льная сла́во, / изба́ви от бед ду́ши на́ша!

И ныне, Богородичен: Приими́ Ма́терь Твою́ Христе́ в моли́тву, / да моли́твами Ея́ умири́ши мир, / и утверди́ши ца́рствия ски́птры, / и Це́ркви Твоя́ совокупи́ши во еди́но.

Ирмос 9-я песни: Проявле́нное на горе́: за Досто́йно: И поклон до земли.

Трисвятое. И по О́тче наш: Кондак дне. Таже, Го́споди сил с на́ми бу́ди: И прочее обычное. И отпуст.

ВО СВЯТЫЙ И ВЕЛИКИЙ ВТОРНИК НА УТРЕНИ

Аллилу́иа, на глас 8. Тропарь трижды: Се, Жени́х гряде́т: писан в Понедельник Великий. И обычное стихословие.

По 1-м стихословии седален, глас 4. Подобен: Вознесы́йся на Крест:

Жениха́ бра́тие возлю́бим, / свещи́ своя́ украси́м, / в доброде́телех сия́юще и ве́ре пра́вой: / да я́ко му́дрыя Госпо́дни де́вы / гото́ви вни́дем с Ним на бра́ки: / Жени́х бо да́ры, я́ко Бог / всем подае́т нетле́нный вене́ц.

Слава, и ныне, тойже.

По 2-м стихословии седален, глас 4. Подобен: Удиви́ся Ио́сиф:

Сове́т Спа́се беззако́нный на Тя, / свяще́нницы и кни́жницы за́вистию собра́вше лю́те, / в преда́тельство подвиго́ша Иу́ду: / те́мже безсту́дно исхожда́ше, глаго́лаше на Тя беззако́нным лю́дем: / что ми, глаго́лет, дади́те, / и аз вам Его́ преда́м в ру́ки ва́ша? / Осужде́ния сего́ изба́ви Го́споди, ду́ши на́ша.

Слава, и ныне, тойже.

По 3-м стихословии седален, глас 8. Подобен: Прему́дрости:

Иу́да ра́зумом сребролю́бствует, / на Учи́теля вражде́бне подвиза́ется, / сове́тует, поуча́ется преда́нию, / све́та отпа́дает, тьму прии́м, / соглаша́ет це́ну, продае́т Безце́ннаго: / те́мже и удавле́ние, возме́здие е́же соде́я, / обрета́ет окая́нный, и лю́тую смерть, / преда́в Тебе́ Го́спода. / Того́ нас ча́сти изба́ви Христе́ Бо́же, / прегреше́ний оставле́ние да́руя, / пра́зднующим ве́рою пречи́стую страсть Твою́.

Слава, и ныне, тойже.

Таже, И о сподо́битися нам:

Евангелие от Матфеа, зачало 90. [Мф. 22, 15 – 23, 39.]

Во вре́мя о́но, сове́т прие́мше вси фарисе́е на Иису́са, я́ко да обольстя́т Его́ сло́вом. И посыла́ют к Нему́ ученики́ своя́ со иродиа́ны, глаго́люще: Учи́телю, ве́мы, я́ко и́стинен еси́, и пути́ Бо́жию вои́стинну учи́ши, и неради́ши ни о ко́мже: не зри́ши бо на лице́ челове́ком: рцы у́бо нам, что Ти ся мнит? Досто́йно ли есть да́ти кинсо́н ке́сареви, или́ ни? Разуме́в же Иису́с лука́вство их, рече́: что Мя искуша́ете, лицеме́ри? Покажи́те Ми злати́цу кинсо́нную. Они́ же принесо́ша Ему́ пе́нязь. И глаго́ла им: чий о́браз сей и написа́ние? И глаго́лаша Ему́: ке́сарев. Тогда́ глаго́ла им: воздади́те у́бо ке́сарева ке́сареви, и Бо́жия Бо́гови. И слы́шавше диви́шася: и оста́вльше Его́ отыдо́ша. В той день приступи́ша к Нему́ саддуке́е, и́же глаго́лют не бы́ти воскресе́нию, и вопроси́ша Его́, глаго́люще: Учи́телю, Моисе́й рече́: а́ще кто у́мрет не имы́й чад, да по́ймет брат его́ жену́ его́ и воскреси́т се́мя бра́та своего́. Бе́ша же в нас седмь бра́тия, и пе́рвый оже́нься у́мре, и не имы́й се́мене, оста́ви жену́ свою́ бра́ту своему́. Та́кожде же и вторы́й, и тре́тий, да́же до седма́го. Последи́ же всех у́мре и жена́. В воскреше́ние у́бо, кото́раго от седми́х бу́дет жена́? Вси бо име́ша ю́. Отвеща́в же Иису́с рече́ им: прельща́етеся, не ве́дуще Писа́ния, ни си́лы Бо́жия. В воскресе́ние бо ни же́нятся, ни посяга́ют, но я́ко а́нгели Бо́жии на небеси́ суть. О воскресе́нии же ме́ртвых не́сте ли чли рече́ннаго вам Бо́гом, глаго́лющим: Аз есмь Бог Авраа́мов, и Бог Исаа́ков, и Бог Иа́ковль? Несть Бог, Бог ме́ртвых, но Бог живы́х. И слы́шавше наро́ди, дивля́хуся о уче́нии Его́. Фарисе́е же слы́шавше, я́ко посрами́ саддуке́и, собра́шася вку́пе. И вопроси́ еди́н от них законоучи́тель, искуша́я Его́, и глаго́ля: Учи́телю, ка́я за́поведь бо́льши есть в зако́не? Иису́с же рече́ ему́: возлю́биши Го́спода Бо́га твоего́ всем се́рдцем твои́м, и все́ю душе́ю твое́ю, и все́ю мы́слию твое́ю. Сия́ есть пе́рвая и бо́льшая за́поведь. Втора́я же подо́бна ей: возлю́биши и́скренняго твоего́, я́ко сам себе́. В сию́ обою́ за́поведию весь зако́н и проро́цы ви́сят. Со́браном же фарисе́ом, вопроси́ их Иису́с, глаго́ля: что ся вам мнит о Христе́; чий есть Сын? Глаго́лаша Ему́: Дави́дов. Глаго́ла им: ка́ко у́бо Дави́д ду́хом Го́спода Его́ нарица́ет, глаго́ля: рече́ Госпо́дь Го́сподеви моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма? А́ще у́бо Дави́д нарица́ет Его́ Го́спода, ка́ко сын ему́ есть? И никто́же можа́ше отвеща́ти Ему́ словесе́: ниже́ сме́я кто от того́ дне вопроси́ти Его́ ктому́.

Тогда́ Иису́с глаго́ла к наро́дом и ученико́м Свои́м, глаго́ля: на Моисе́ове седа́лищи седо́ша кни́жницы и фарисе́е. Вся у́бо, е́лика а́ще реку́т вам блюсти́, соблюда́йте и твори́те, по дело́м же их не твори́те: глаго́лют бо, и не творя́т. Связу́ют бо бремена́ тя́жка и бе́дне носи́ма, и возлага́ют на плеща́ челове́ческа, пе́рстом же свои́м не хотя́т дви́гнути их. Вся же дела́ своя́ творя́т, да ви́дими бу́дут челове́ки: разширя́ют же храни́лища своя́, и велича́ют воскри́лия риз свои́х. Лю́бят же преждевозлега́ния на ве́черях, и преждеседа́ния на со́нмищих, и целова́ния на то́ржищах, и зва́тися от челове́к: учи́телю, учи́телю. Вы же не нарица́йтеся учи́тели: еди́н бо есть ваш Учи́тель, Христо́с: вси же вы бра́тия есте́. И отца́ не зови́те себе́ на земли́: еди́н бо есть Оте́ц ваш, И́же на небесе́х. Ниже́ нарица́йтеся наста́вницы: еди́н бо есть Наста́вник ваш, Христо́с. Бо́лий же в вас, да бу́дет вам слуга́. И́же бо вознесе́тся, смири́тся: и смиря́яйся, вознесе́тся. Го́ре вам, кни́жницы и фарисе́е, лицеме́ри, я́ко затворя́ете Ца́рствие Небе́сное пред челове́ки: вы бо не вхо́дите, ни входя́щих оставля́ете вни́ти. Го́ре вам, кни́жницы и фарисе́е, лицеме́ри, я́ко прехо́дите мо́ре и су́шу, сотвори́ти еди́наго прише́льца: и егда́ бу́дет, творите́ его́ сы́на гее́нны сугу́бейша вас. Го́ре вам, вожди́ слепи́и, глаго́лющии: и́же а́ще клене́тся це́рковию, ничесо́же есть, а и́же клене́тся зла́том церко́вным, до́лжен есть. Бу́и и слепи́и, ко́е бо бо́ле есть, зла́то ли, или́ це́рковь, святя́щая зла́то? И и́же а́ще клене́тся олтаре́м, ничесо́же есть, а и́же клене́тся да́ром, и́же верху́ его́, до́лжен есть. Бу́и и слепи́и, что бо бо́ле, дар ли, или́ олта́рь, святя́й дар? И́же у́бо клене́тся олтаре́м, клене́тся им и су́щим верху́ его́. И и́же клене́тся це́рковию, клене́тся е́ю, и Живу́щим в ней. И клены́йся небесе́м, клене́тся Престо́лом Бо́жиим и Седя́щим на нем. Го́ре вам, кни́жницы и фарисе́е лицеме́ри, я́ко одеся́тствуете мя́тву, и копр, и ки́мин, и оста́висте вя́щшая зако́ну, суд и ми́лость, и ве́ру. Сия́ же подоба́ше твори́ти, и о́нех не оставля́ти. Вожди́ слепи́и, оцежда́ющии комары́, вельблу́ды же пожира́юще. Го́ре вам, кни́жницы и фарисе́е лицеме́ри, я́ко очища́ете вне́шнее сткля́ницы и блю́да, внутрью́ду же суть по́лни хище́ния и непра́вды. Фарисе́е слепы́й, очи́сти пре́жде вну́треннее сткля́ницы и блю́да, да бу́дет и вне́шнее и́ма чи́сто. Го́ре вам, кни́жницы и фарисе́е лицеме́ри, я́ко подо́битеся гробо́м пова́пленым, и́же внею́ду у́бо явля́ются красны́, внутрью́ду же по́лни суть косте́й ме́ртвых, и вся́кия нечистоты́. Та́ко и вы, внею́ду у́бо явля́етеся челове́ком пра́ведни, внутрью́ду же есте́ по́лни лицеме́рия и беззако́ния. Го́ре вам, кни́жницы и фарисе́е, лицеме́ри, я́ко зи́ждете гро́бы проро́ческия, и кра́сите ра́ки пра́ведных, и глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли в кро́ви проро́к. Те́мже са́ми свиде́тельствуете себе́, я́ко сы́нове есте́ изби́вших проро́ки. И вы испо́лните ме́ру оте́ц ва́ших. Змия́, порожде́ния ехи́днова, ка́ко убежите́ от суда́ огня́ гее́нскаго? Сего́ ра́ди, се Аз послю́ к вам проро́ки и прему́дры, и кни́жники: и от них убие́те и ра́спнете, и от них бие́те на со́нмищих ва́ших, и изжене́те от гра́да во град. Я́ко да прии́дет на вы вся́ка кровь пра́ведна, пролива́емая на земли́, от кро́ве А́веля пра́веднаго до кро́ве Заха́рии, сы́на Варахи́ина, его́же уби́сте между́ це́рковию и олтаре́м. Ами́нь, глаго́лю вам, я́ко прии́дут вся сия́ на род сей. Иерусали́ме, Иерусали́ме, изби́вый проро́ки, и ка́мением побива́яй по́сланныя к нему́: колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте? Се, оставля́ется вам дом ваш пуст. Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во и́мя Госпо́дне.

Посем псалом 50. Таже, Спаси, Бо́же, лю́ди Твоя́: Го́споди поми́луй, 12. Посем ектения малая.

Таже кондак, глас 2. Подобен: Вы́шних ища́:

Час душе́ конца́ помы́сливши, / и посече́ния смоко́вницы убоя́вшися, / да́нный тебе́ тала́нт / трудолю́бно де́лай окая́нная / бо́дрствующи и зову́щи: / да не пребу́дем вне черто́га Христо́ва.

Икос: Что уныва́еши душе́ моя́ окая́нная? / Что мечта́еши безвре́менно попече́ния неполе́зная? / Что упражня́ешися к мимотеку́щим? / После́днейший час есть отсе́ле, / и разлучи́тися и́мамы от су́щих зде. / До́ндеже вре́мя и́маши, возни́кни зову́щи: / согреши́х Ти, Спа́се мой, / не посецы́ мене́ я́коже непло́дную смоко́вницу, / но я́ко благоутро́бен Го́споди, / уще́дри со стра́хом зову́щую: / да не пребу́дем вне черто́га Христо́ва.

Синаксарь.

Таже двоепеснец, егоже краестрочие: Трити те, сиесть, во вторник же. Творение господина Космы, ирмос по дважды, стихи же на 12. Последи же ирмос, оба лика вкупе. Глас 2.

Песнь 8.

{Τ} Ирмос: Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́дня, Го́спода.

{Ρ} Ле́ность дале́че нас отве́ржим, / и све́тлыми свеща́ми безсме́ртнаго Жениха́ Христа́ пе́нием усря́щим, / благослови́те, вопию́ще, дела́ Госпо́дня Го́спода.

{Ι} Да удовле́ет общи́тельный души́ на́шея еле́й в сосу́дех, / я́ко да не на ку́плю поло́жше вре́мя по́честей, пое́м: / благослови́те дела́ Госпо́дня Го́спода.

{Τ} Тала́нт ели́цы от Бо́га прия́сте, равноси́льную благода́ть, / по́мощию да́вшаго Христа́ возрасти́те, пою́ще: / благослови́те дела́ Госпо́дня Го́спода.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Веле́нию мучи́телеву:

Честне́йшую не поем.

Песнь 9.

{Η} Ирмос: Невмести́маго Бо́га / во чре́ве вмести́вшая, / и Ра́дость ми́ру роди́вшая, / Тя пое́м, Богоро́дице Де́во.

{Τ} Ученико́м Благи́й, бди́те, рекл еси́, / во́ньже час прии́дет Госпо́дь, не разуме́ете, / отда́ти кому́ждо.

{Ε} Во второ́м Твое́м и стра́шном прише́ствии Влады́ко, / десны́м овца́м мя сопричти́, / прегреше́ний презре́в мои́х мно́жества.

И паки вместо, Досто́йно, Ирмос: Невмести́маго Бо́га:

Ексапостиларий, трижды:

Черто́г Твой ви́жду, Спа́се мой, украше́нный, / и оде́жды не и́мам, да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех поставим стихов 4, и поем стихиры самогласны повторяюще, глас 1:

Во све́тлостех святы́х Твои́х, / ка́ко вни́ду недосто́йный? / А́ще бо дерзну́ совни́ти в черто́г, / оде́жда мя облича́ет, я́ко несть бра́чна, / и свя́зан изве́ржен бу́ду от а́нгелов. / Очи́сти Го́споди, скве́рну души́ моея́, / и спаси́ мя я́ко Человеколю́бец.

Глас 2: Душе́вною ле́ностию воздрема́вся, / не стяжа́х Женише́ Христе́, / горя́ща свети́льника и́же от доброде́телей, / и де́вам уподо́бихся бу́им, / во вре́мя де́лания глумля́ся. / Утро́бы щедро́т Твои́х не затвори́ мне Влады́ко, / но оттря́с мой омраче́нный сон, возста́ви, / и с му́дрыми введи́ де́вами в черто́г Твой, / иде́же глас чи́стый пра́зднующих, / и вопию́щих непреста́нно: / Го́споди, сла́ва Тебе́.

Сла́ва, и ны́не, глас 4: Скры́вшаго тала́нт осужде́ние слы́шавши, о душе́ / не скрыва́й словесе́ Бо́жия, / возвеща́й чудеса́ Его́, / да умножа́ющи дарова́ние, / вни́деши в ра́дость Го́спода твоего́.

На стиховне стихиры самогласны, глас 6:

Прииди́те ве́рнии, / де́лаим усе́рдно Влады́це: / подава́ет бо рабо́м бога́тство, / и по ра́венству ки́йждо да многоусугу́бим благода́ти тала́нт: / ов у́бо му́дрость да прино́сит де́лы благи́ми, / ов же слу́жбу све́тлости да соверша́ет. / Да приобща́ется же сло́вом ве́рный та́йны ненауче́нному, / и да расточа́ет бога́тство убо́гим други́й: / си́це бо заимова́нное многоусугу́бим, / и я́ко строи́телие ве́рнии благода́ти, / Влады́чния ра́дости сподо́бимся. / Тоя́ нас сподо́би, Христе́ Бо́же, / я́ко Человеколю́бец.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Егда́ прии́деши во сла́ве со а́нгельскими си́лами, / и ся́деши на престо́ле, Иису́се, разсужде́ния, / да мя Па́стырю Благи́й не разлучи́ши: / пути́ бо десны́я ве́си, / развраще́ни же суть шу́ии. / Да не у́бо с ко́злищи гру́баго мя грехо́м погуби́ши, / но десны́м мя сочета́в овца́м, / спаси́ я́ко Человеколю́бец.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Женише́, добро́тою кра́сный па́че всех челове́к, / призва́вый нас к трапе́зе духо́вней черто́га Твоего́, / неле́пый мой зрак прегреше́ний / совлецы́ прича́стием страда́ний Твои́х, / и оде́ждею сла́вы украси́в Твоея́ красоты́ / сообе́дника све́тла мя покажи́ Твоего́ Ца́рствия, / я́ко Милосе́рд.

Слава, и ныне глас 7: Се тебе́ тала́нт Влады́ка вверя́ет душе́ моя́, / стра́хом приими́ дар, заи́мствуй да́вшему, / раздава́й ни́щим, и стяжи́ дру́га Го́спода, / да ста́неши одесну́ю Его́, егда́ прии́дет во сла́ве, / и услы́шиши блаже́нный глас: / вни́ди ра́бе в ра́дость Го́спода твоего́. / Тоя́ досто́йна мя сотвори́ Спа́се, заблуди́вшаго, / вели́кия ра́ди Твоея́ ми́лости.

И прочее последование яко обычно.

Часы со обычным стихословием, и чтение Евангелия.

На 6-м часе тропарь пророчества, глас 1:

Безме́рно согреша́ющим, / бога́тно прости́ Спа́се, / и сподо́би нас неосужде́нно поклони́тися / Твоему́ свято́му Воскресе́нию, / моли́твами Пречи́стыя Твоея́ Ма́тере, / еди́не Многоми́лостиве.

Прокимен, псалом 129. Глас 6: Я́ко у Го́спода ми́лость, / и мно́гое у Него́ избавле́ние. Стих: Из глубины́ воззва́х к Тебе́ Го́споди, Го́споди услы́ши глас мой.

Пророчества Иезекиилева чтение. [Глава 1, ст. 21 – 28. гл. 2, ст. 1]

Внегда́ идя́ху [живо́тная], идя́ху [и коле́са], и внегда́ стоя́ти им, стоя́ху [и коле́са с ни́ми]: и егда́ воздвиза́хуся от земли́, воздвиза́хуся с ни́ми [и коле́са], я́ко дух жи́зни бя́ше в колесе́х. И подо́бие над главо́ю живо́тных я́ко твердь, я́ко виде́ние криста́лла, просте́ртое над кри́лами их свы́ше. И под тве́рдию кри́ла их просте́рта, паря́ще друг ко дру́гу, кому́ждо два спряже́на, прикрыва́юще телеса́ их. И слы́шах глас крил их, внегда́ паря́ху, я́ко глас вод мно́гих, я́ко глас Бо́га Саддаи́: и внегда́ ходи́ти им, глас сло́ва я́ко глас полка́: и внегда́ стоя́ти им, почива́ху кри́ла их. И се глас превы́ше тве́рди су́щия над главо́ю их, внегда́ стоя́ти им, низпуска́хуся кри́ла их. И над тве́рдию, я́же над главо́ю их, я́ко виде́ние ка́мене сапфи́ра, подо́бие престо́ла на нем, и на подо́бии престо́ла подо́бие я́коже вид челове́чь сверху́. И ви́дех я́ко виде́ние иле́ктра, я́ко виде́ние огня́ внутрь его́ о́крест от виде́ния чресл и вы́ше, и от виде́ния чресл да́же до до́лу ви́дех виде́ние огня́, и свет его́ о́крест. Я́ко виде́ние дуги́, егда́ есть на о́блацех в день дождя́, та́ко стоя́ние све́та о́крест. Сие́ виде́ние подо́бие сла́вы Госпо́дни.

Прокимен, псалом 130, глас 4: Да упова́ет Изра́иль на Го́спода / от ны́не и до ве́ка. Стих: Го́споди, не вознесе́ся се́рдце мое́, ниже́ вознесо́стеся о́чи мои́.

И прочее. Вкупе же поем и 9-й час, без кафисмы, и чтем Евангелие. И блаженны поем, и Помяни́ нас Го́споди, с поклоны. И прочее все, якоже и в Понедельник указася.

В ТОЙЖЕ СВЯТЫЙ И ВЕЛИКИЙ ВТОРНИК ВЕЧЕРА

Во светильничное, обычное стихословие, на Го́споди воззва́х, поставим стихов 10, и поем стихиры самогласны.

Глас 1: Во све́тлостех святы́х Твои́х, ка́ко вни́ду недосто́йный? / А́ще бо дерзну́ совни́ти в черто́г, / оде́жда мя облича́ет, я́ко несть бра́чна, / и свя́зан изве́ржен бу́ду от а́нгелов: / очи́сти Го́споди скве́рну души́ моея́, / и спаси́ мя я́ко Человеколю́бец.

Глас 2: Душе́вною ле́ностию воздрема́вся, / не стяжа́х Женише́ Христе́, / горя́ща свети́льника и́же от доброде́телей, / и де́вам уподо́бихся бу́им, / во вре́мя де́лания глумля́ся: / утро́бы щедро́т Твои́х не затвори́ мне Влады́ко, / но оттря́с мой омраче́нный сон, возста́ви Ми́лостиве, / и с му́дрыми введи́ де́вами в черто́г Твой, / иде́же глас чи́стый пра́зднующих, / и вопию́щих непреста́нно: / Го́споди сла́ва Тебе́.

Глас 4: Скры́вшаго тала́нт осужде́ние слы́шавши, о душе́, / не скрыва́й словесе́ Бо́жия, / возвеща́й чудеса́ его́, / да умножа́ющи дарова́ние, / вни́деши в ра́дость Го́спода твоего́.

Глас 6: Прииди́те ве́рнии, де́лаим усе́рдно Влады́це: / подава́ет бо рабо́м бога́тство, / и по ра́венству ки́йждо многоусугу́бим благода́ти тала́нт: / ов у́бо му́дрость да прино́сит де́лы благи́ми, / ов же слу́жбу све́тлости да соверша́ет: / да приобща́ется же сло́вом ве́рный, та́йны ненауче́нному, / и да расточа́ет бога́тство убо́гим други́й. / Си́це бо заимова́нное многоусугу́бим, / и я́ко строи́телие ве́рнии благода́ти, / Влады́чния ра́дости сподо́бимся: / тоя́ нас сподо́би Христе́ Бо́же, / я́ко Человеколю́бец.

Егда́ прии́деши во сла́ве со а́нгельскими си́лами, / и ся́деши на престо́ле Иису́се разсужде́ния, / да мя Па́стырю Благи́й не разлучи́ши, / пути́ бо десны́я ве́си, / развраще́ни же суть шу́ии. / Да не у́бо с ко́злищи гру́баго мя грехо́м погуби́ши, / но десны́м мя сочета́в овца́м, / спаси́ я́ко Человеколю́бец.

Женише́ добро́тою кра́сный па́че всех челове́к, / призва́вый нас к трапе́зе духо́вней черто́га Твоего́, / неле́пый мой зрак прегреше́ний совлецы́, / прича́стием страда́ний Твои́х, / и оде́ждею сла́вы украси́в Твоея́ красоты́, / сообе́дника све́тла мя покажи́ Твоего́ Ца́рствия, / я́ко Милосе́рд.

Слава, и ныне, глас 7: Се тебе́ тала́нт Влады́ка вверя́ет душе́ моя́: / стра́хом приими́ дар, заи́мствуй да́вшему ти, / раздава́й ни́щим, и стяжи́ дру́га Го́спода, / да ста́неши одесну́ю Его́, егда́ прии́дет во сла́ве, / и услы́шиши блаже́нный глас: / вни́ди ра́бе в ра́дость Го́спода твоего́. / Тоя́ досто́йна мя сотвори́ Спа́се заблуди́вшаго, / вели́кия ра́ди Твоея́ ми́лости.

Вход со Евангелием. Све́те ти́хий:

Прокимен, псалом 131, глас 6: Воскресни́ Го́споди в поко́й Твой, / Ты и киво́т Святы́ни Твоея́. Стих: Помяни́ Го́споди Дави́да, и всю кро́тость его́.

Исхода чтение. [Глава 2, ст. 5 – 10.]

Сни́де дщерь фарао́нова измы́тися на реку́, и рабы́ни ея́ прохожда́ху при реце́: и ви́девши ковче́жец в лучи́це, посла́вши рабы́ню, взя и́. Отве́рзши же, ви́дит отроча́ пла́чущееся в ковче́жце, и пощаде́ е́ дщерь фарао́ня, и рече́: от дете́й евре́йских сие́. И рече́ сестра́ его́ дще́ри фарао́нове: хо́щеши ли призову́ ти жену́ корми́лицу от евре́й, и воздои́т ти отроча́? И рече́ ей дщерь фарао́нова: иди́. Ше́дши же отрокови́ца, призва́ ма́терь отроча́те. Рече́ же к ней дщерь фарао́нова: соблюди́ ми отроча́ сие́, и воздо́й ми е́: аз же дам ти мзду. Взя же отроча́ жена́, и доя́ше е́. Возмужа́вшу же отроча́ти, введе́ е́ ко дще́ри фарао́нове, и бысть ей в сы́на: и нарече́ и́мя ему́ Моисе́й, глаго́лющи: от воды́ взях его́.

Прокимен, псалом 132, глас 4: Се что добро́, или́ что красно́, / но е́же жи́ти бра́тии вку́пе. Стих: Я́ко ми́ро на главе́, сходя́щее на браду́, браду́ Ааро́ню.

Иова чтение. [Глава 1, ст. 13 – 22]

Бысть я́ко день сей, сы́нове И́овлевы и дще́ри его́ пия́ху вино́ в дому́ бра́та своего́ старе́йшаго. И се ве́стник прии́де ко И́ову, и рече́ ему́: супру́ги воло́в оря́ху, и осли́цы пася́хуся близ их. И прише́дше плени́тели плени́ша их, и о́троки изби́ша мече́м, и спасо́хся аз еди́н, и приидо́х возвести́ти тебе́. Еще́ сему́ глаго́лющу, прии́де ин ве́стник, и рече́ ко И́ову: огнь спаде́ с небесе́, и пожже́ о́вцы, и па́стыри пояде́ подо́бне: спасо́хся же аз еди́н, и приидо́х возвести́ти тебе́. Еще́ сему́ глаго́лющу, прии́де ин ве́стник, и рече́ ко И́ову: ко́нницы сотвори́ша нача́льства три, и окружи́ша вельблю́ды, и плени́ша их, и о́троки изби́ша мечми́: спасо́хся же аз еди́н, и приидо́х возвести́ти тебе́. Еще́ сему́ глаго́лющу, ин ве́стник прии́де, глаго́ля И́ову: сыно́м твои́м, и дще́рем твои́м яду́щим и пию́щим у бра́та своего́ старе́йшаго. Внеза́пу ветр вели́к на́йде от пусты́ни, и косне́ся четы́рем угло́м хра́мины, и паде́ хра́мина на де́ти твоя́, и сконча́шася: спасо́хся же аз еди́н, и приидо́х возвести́ти тебе́. Та́ко [услы́шав] И́ов, воста́в растерза́ ри́зы своя́, и остриже́ власы́ главы́ своея́, [и посы́па пе́рстию главу́ свою́,] и пад на зе́млю, поклони́ся [Го́сподеви]. И рече́: сам наг изыдо́х от чре́ва ма́тере моея́, наг и отыду́ та́мо: Госпо́дь даде́, Госпо́дь отъя́т: я́ко Го́сподеви изво́лися, та́ко бысть: бу́ди и́мя Госпо́дне благослове́нно [во ве́ки]. Во всех сих приключи́вшихся ему́ ничто́же согреши́ И́ов пред Го́сподем [ниже́ устна́ма свои́ма], и не даде́ безу́мия Бо́гу.

И абие, Да испра́вится моли́тва моя́:

Евангелие от Матфеа, зачало 102. [Мф. 24, 36 – 26, 2.]

Рече́ Госпо́дь Свои́м ученико́м: о дни и часе́ прише́ствия Сы́на Челове́ческаго никто́же весть, ни а́нгели небе́снии, то́кмо Оте́ц Мой еди́н. Я́коже бо бысть во дни Но́евы, та́ко бу́дет и прише́ствие Сы́на Челове́ческаго. Я́коже бо бе́ху во дни пре́жде пото́па, яду́ще и пию́ще, женя́щеся и посяга́юще, до него́же дне вни́де Но́е в ковче́г, и не уве́деша, до́ндеже прии́де вода́, и взят вся: та́ко бу́дет и прише́ствие Сы́на Челове́ческаго. Тогда́ два бу́дета на селе́: еди́н пое́млется, а други́й оставля́ется. Две ме́люще в же́рновах: еди́на пое́млется, и еди́на оставля́ется. Бди́те у́бо, я́ко не ве́сте, в кий час Госпо́дь ваш прии́дет. Сие́ же ве́дите, я́ко а́ще бы ве́дал до́му влады́ка, в ку́ю стра́жу тать прии́дет, бдел у́бо бы, и не бы дал подкопа́ти хра́ма своего́. Сего́ ра́ди и вы бу́дите гото́ви, я́ко, во́ньже час не мните́, Сын Челове́ческий приидет. Кто у́бо есть ве́рный раб и му́дрый, его́же поста́вит господи́н его́ над до́мом свои́м, е́же дая́ти им пи́щу во вре́мя их? Блаже́н раб той, его́же, прише́д господи́н его́, обря́щет та́ко творя́ща. Ами́нь, глаго́лю вам, я́ко над всем име́нием свои́м поста́вит его́. А́ще ли же рече́т злый раб той в се́рдцы свое́м: косни́т господи́н мой приити́. И на́чнет би́ти клевре́ты своя́, я́сти же и пи́ти с пия́ницами. Прии́дет господи́н раба́ того́ в день, во́ньже не ча́ет, и в час, во́ньже не весть. И проте́шет его́ полма́, и часть его́ с неве́рными положи́т: ту бу́дет плачь и скре́жет зубо́м. Тогда́ уподо́бися Ца́рствие Небе́сное десяти́м де́вам, я́же прия́ша свети́льники своя́, и изыдо́ша в сре́тение жениху́. Пять же бе от них мудры́, и пять юро́дивы. Юро́дивыя же прие́мша свети́льники своя́, не взя́ша с собо́ю еле́а. Му́дрыя же прия́ша еле́й в сосу́дех со свети́льники свои́ми. Косня́щу же жениху́, воздрема́шася вся, и спа́ху. Полу́нощи же вопль бысть: се, жени́х гряде́т, исходи́те в сре́тение его́. Тогда́ воста́вше вся де́вы ты́я, и украси́ша свети́льники своя́. Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам: иди́те же па́че к продаю́щим и купи́те себе́. Иду́щим же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чия де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне, ни часа́, во́ньже Сын Челове́ческий прии́дет. Я́коже бо челове́к не́кий отходя́ призва́ своя́ рабы́, и предаде́ им име́ние свое́. И о́вому у́бо даде́ пять тала́нт, о́вому же два, о́вому же еди́н, кому́ждо проти́ву си́лы его́: и оты́де а́бие. Шед же прие́мый пять тала́нт, де́ла в них и сотвори́ други́я пять тала́нт. Та́кожде и и́же два, приобре́те и той друга́я два. Прие́мый же еди́н, шед вкопа́ его́ в зе́млю, и скры сребро́ господи́на своего́. По мно́зе же вре́мени прии́де господи́н раб тех, и стяза́ся с ни́ми о словеси́. И присту́пль пять тала́нт прие́мый, принесе́ други́я пять тала́нт, глаго́ля: го́споди, пять тала́нт ми еси́ пре́дал, се, други́я пять тала́нт приобрето́х и́ми. Рече́ же ему́ госпо́дь его́: до́брый ра́бе, благи́й и ве́рный, о ма́ле был еси́ ве́рен, над мно́гими тя поста́влю: вни́ди в ра́дость го́спода твоего́. Присту́пль же и и́же два тала́нта прие́мый, рече́: го́споди, два тала́нта ми еси́ пре́дал: се, друга́я два тала́нта приобрето́х и́ма. Рече́ же ему́ госпо́дь его́: до́брый ра́бе, благи́й и ве́рный, о ма́ле ми был еси́ ве́рен, над мно́гими тя поста́влю: вни́ди в ра́дость го́спода твоего́. Присту́пль же и прие́мый еди́н тала́нт, рече́: го́споди, ве́дях тя, я́ко же́сток еси́ челове́к: жне́ши, иде́же не се́ял еси́, и собира́еши, ю́дуже не расточи́л еси́. И убоя́вся, шед скрых тала́нт твой в земли́, и се и́маши твое́. Отвеща́в же госпо́дь его́, рече́ ему́: лука́вый ра́бе и лени́вый, ве́дяше, я́ко жну, иде́же не се́ях, и собира́ю, ю́дуже не расточи́х. Подоба́ше у́бо тебе́ вда́ти сребро́ мое́ торжнико́м, и прише́д аз взял бых свое́ с ли́хвою. Возми́те у́бо от него́ тала́нт, и дади́те иму́щему де́сять тала́нт. Иму́щему бо везде́ дано́ бу́дет, и преизбу́дет: от неиму́щаго же, и е́же мни́тся име́я, взя́то бу́дет от него́. И неключи́маго раба́ вве́рзите во тьму кроме́шнюю: ту бу́дет плач и скре́жет зубо́м. Сия́ глаго́ля возгласи́: име́яй у́ши слы́шати, да слы́шит. Егда́ же прии́дет Сын Челове́ческий в сла́ве Свое́й, и вси святи́и а́нгели с Ним, тогда́ ся́дет на престо́ле сла́вы Своея́. И соберу́тся пред Ним вси язы́цы, и разлучи́т их друг от дру́га, я́коже па́стырь разлуча́ет о́вцы от ко́злищ. И поста́вит о́вцы одесну́ю Себе́, а ко́злища ошу́юю. Тогда́ рече́т Царь су́щим одесну́ю Его́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Взалка́хся бо, и да́сте Ми я́сти; возжада́хся, и напои́сте Мя; стра́нен бех, и введо́сте Мене; наг, и оде́ясте Мя; бо́лен, и посети́сте Мене́; в темни́це бех, и приидо́сте ко Мне. Тогда́ отвеща́ют Ему́ пра́ведницы, глаго́люще: Го́споди, когда́ Тя ви́дехом а́лчуща, и напита́хом; или́ жа́ждуща, и напои́хом? Когда́ же Тя ви́дехом стра́нна, и введо́хом; или́ на́га, и оде́яхом? Когда́ же Тя ви́дехом боля́ща, или́ в темни́це, и приидо́хом к Тебе́? И отвеща́в Царь рече́т им: ами́нь глаго́лю вам, поне́же сотвори́сте еди́ному сих бра́тий Мои́х ме́ньших, Мне сотвори́сте. Тогда́ рече́т и су́щим ошу́юю Его́: иди́те от Мене́, прокля́тии, во огнь ве́чный, угото́ванный диа́волу и а́нгелом его́. Взалка́хся бо, и не да́сте Ми я́сти; возжада́хся, и не напои́сте Мене́. Стра́нен бех, и не введо́сте Мене́; наг, и не оде́ясте Мене́; бо́лен, и в темни́це, и не посети́сте Мене́. Тогда́ отвеща́ют Ему́ и ти́и, глаго́люще: Го́споди, когда́ Тя ви́дехом а́лчуща, или́ жа́ждуща, или́ странна, или́ на́га, или́ бо́льна, или́ в темни́це, и не послужи́хом Тебе́? Тогда́ отвеща́ет им, глаго́ля: ами́нь, глаго́лю вам, поне́же не сотвори́сте еди́ному сих ме́ньших, ни Мне сотвори́сте. И и́дут си́и в му́ку ве́чную, пра́ведницы же в живо́т ве́чный.

И бысть, егда́ сконча́ Иису́с вся словеса́ сия́, рече́ ученико́м Свои́м: ве́сте, я́ко по двою́ дню Па́сха бу́дет, и Сын Челове́ческий пре́дан бу́дет на пропя́тие.

И прочая Преждеосвященных.

ВО СВЯТЫЙ И ВЕЛИКИЙ ВТОРНИК ПОВЕЧЕРИЕ ВЕЛИКОЕ

На немже поем трипеснец, творение господина Андреа Критскаго.

Глас 2. Песнь 3.

Ирмос: Непло́дствовавший мой ум, / плодоно́сен, Бо́же, покажи́ ми, / де́лателю до́брых, насади́телю благи́х, / благоутро́бием Твои́м.

Кончи́ны вре́мя, обрати́мся про́чее, Христо́с учи́т: / прии́дет бо во мгнове́нии, прии́дет и не уме́длит, / суди́ти ми́ру всему́.

Внеза́пное Своего́ прише́ствия Христо́с явля́я, рече́, / Но́ево дре́вле ненаде́жное тле́ние, / навести́ся хотя́щее земли́.

Отве́рзеся черто́г, / украси́ся с ним Боже́ственный брак, / Жени́х близ призыва́яй нас, угото́вимся про́чее.

Си́монов дом, невмести́маго везде́, / вмести́ Тя Иису́се Царю́, / и жена́ гре́шная ми́ром Тя пома́за.

Благово́ния та́инственнаго испо́лнена жена́, / пе́рваго изба́вися злово́ния Спа́се, мно́гих грехо́в. / Ми́ро бо источа́еши жи́зни.

Небе́сная пи́ще а́лчущим, животе́ сам сый, / ял еси́ Христе́ с челове́ки, проявля́я снисхожде́ние Твое́.

Неблагода́рный учени́к, отве́ргся Тебе́ Христе́, / собо́рище всебеззако́нных люде́й сподвиза́ше на Тя, / на преда́ние обра́щься.

Слава: Со Отце́м Тебе́ Сы́ну, и Ду́ху пра́вому, / еди́ному Естеству́ покланя́юся и воспева́ю, / Ли́цы разделя́я, и Существо́м соединя́я.

И ныне, Богородичен: Ро́ждшая Тя А́гница, Па́стыря и А́гнца, / при́сно мо́лит Иису́се Бо́же, / о всех лю́дех ве́рующих в Тя.

Седален, глас 1. Подобен: Лик а́нгельский:

Се лука́вый сове́т вои́стинну собра́ся неи́стовно, / я́ко осу́жденника осуди́ти, горе́ седя́щаго, / я́ко Судию́ всех Го́спода: / ны́не собира́ется с Пила́том И́род, А́нна, вку́пе же и Каиа́фа, / испыта́ти еди́наго долготерпели́ваго.

Песнь 8.

Ирмос: В купине́ Моисе́ю, Де́вы чу́до, / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

Не неве́дый вре́мя на́шего сконча́ния, держа́й ве́ки, / день о́ный не ве́дети предрече́, / но преде́лы всем положи́ к смиреному́дрию.

Егда́ ся́деши Судие́, разлуча́яй, я́коже рекл еси́, / па́стырь от ове́ц ко́злища Спа́се, / стоя́ния о́наго изба́ви нас, / не лиши́ же нас Боже́ственныя десни́цы Твоея́.

Ты еси́ Па́сха на́ша, / пожре́ный за всех, я́ко А́гнец и Же́ртва, / и прегреше́ний очище́ние, / и Твоя́ Боже́ственныя стра́сти превозно́сим Христе́, во вся ве́ки.

Дре́ву уподо́бися, и селу́, и хра́мине, все житие́ душе́ моя́: / те́мже стяжи́ к Бо́гу гото́во се́рдце, / да не что тле́нием пло́ти оста́виши.

Не к фарисе́ом Спа́се, / ни к Си́мону то́кмо изво́лил еси́ во храм на снедь вни́ти, / но уже́ и мытари́ вку́пе и блудни́цы, / Твое́ почерпа́ют милосе́рдие.

Сребролю́бие рачи́тельствуяй преда́тель Иу́да, / о истощи́вшемся ми́ре печа́шеся: / про́чее же о прода́нии Влады́ки, / к беззако́нным прише́д о цене́ согласова́ше.

О блаже́нных рук! / О власо́в и усте́н целому́дренныя блудни́цы! / И́миже возлия́, Спа́се, ми́ро на но́зе Твои́, / отира́ющи я́, и ча́сто облобыза́ющи.

Возлежа́щу Тебе́ Сло́ве, жена́ предста́вши, и у ног рыда́ющи, / сткля́ницу Спа́се истощи́ ми́ра / на главу́ Тебе́ безсме́ртнаго ми́ра.

Благослови́м Отца́ и Сы́на, и Свята́го Ду́ха, Го́спода.

Со Отце́м Сы́на и Свята́го Ду́ха, / Святу́ю Тро́ицу в Божестве́ еди́ном сла́вим, вопию́ще: / Свят, Свят, Свят еси́ во ве́ки.

И ныне, Богородичен: Моли́твами Спа́се, Пречи́стыя Твоея́ Ма́тере, и Твои́х апо́стол, / ми́лости Твоя́ нам низпосли́ бога́тно, / и мир Твой пода́ждь лю́дем Твои́м.

Таже: Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: В купине́ Моисе́ю, Де́вы чу́до:

Песнь 9.

Ирмос: Преесте́ственно пло́тию заче́ншую во чре́ве, / от Отца́ безле́тно предвозсия́вшее Сло́во, / в пе́снех немо́лчных / велича́ем, ве́рнии.

Де́лания вре́мя, спасе́ния наме́рение: / тала́нт взе́мши, дре́вний о́браз, душе́ моя́, / купи́ ве́чную жизнь.

Я́ко свещи́ све́тлыя украси́вше ду́ши, / Жениху́ приходя́щу к нетле́нному бра́ку, / пре́жде заключе́ния двере́й, вни́дем с Ним.

Показа́ти хотя́ Иису́се, / преесте́ственное Твоего́ смире́ния всем, / ял еси́ в дому́ Си́монове вечеря́в, а́лчущих пи́ще.

Хлеб сый животворя́щий, / снел еси́ Иису́се с Си́моном фарисе́ем, / да блудни́ца приобря́щет некупи́мую благода́ть Твою́, истоща́нием ми́ра.

Ру́це мои́ скверна́ве, устне́ блудни́чи во мне, / нечи́сто мое́ житие́, растле́нны у́ды, / но осла́би ми, и оста́ви, вопие́т блудни́ца Христу́.

Присту́пльши жена́ к нога́ма Твои́ма Спа́се, / возлива́ше ми́ро, благоуха́ния исполня́ющи, / и ми́ра исполня́ема дел очище́ния.

Арома́ты богате́ю, доброде́тельми же нище́тствую, / я́же и́мам, Тебе́ приношу́: / даждь Сам, я́же и́маши, и осла́би ми, и оста́ви, / вопие́т блудни́ца Христу́.

Ми́ро у мене́ тле́нное, / ми́ро у Тебе́ жи́зни, / ми́ро бо Тебе́ и́мя излия́нное на досто́йныя, / но осла́би ми, и оста́ви, / вопие́т блудни́ца Христу́.

Слава: Безнача́лен еси́ О́тче, / несозда́нен еси́ Сы́не, / сопресто́лен и Ду́ше, / еди́но три Естество́м, и три Ли́цами, / еди́н Бог и́стинный.

И ныне, Богородичен: Богоро́дице, упова́ние чту́щих Тя при́сно, / не преста́й моля́щи из Тебе́ Роди́вшагося, / изба́вити мя бед, и вся́ких искуше́ний.

ВО СВЯТУЮ И ВЕЛИКУЮ СРЕДУ, НА УТРЕНИ

По шестопсалмии Аллилу́иа, на глас 8, и тропарь трижды Се, Жени́х: Зри в Понедельник Великий.

И стихословие.

По 1 стихословии седален, глас 3. Подобен: Красоте́ де́вства:

Блудни́ца приступи́ к Тебе́, / ми́ро со слеза́ми излива́ющи на но́зе Твои́ Человеколю́бче, / и смра́да зол избавля́ется повеле́нием твои́м! / Ды́ша же благода́ть Твою́ учени́к неблагода́рный, / сию́ отлага́ет, и смра́дом одева́ется, / сребролю́бием продая́ Тебе́. / Сла́ва Христе́ благоутро́бию Твоему́.

Слава, и ныне, тойже.

По 2-м стихословии седален, глас 4. Подобен: Удиви́ся Ио́сиф:

Иу́да льстец, сребролю́бия рачи́тельствуяй, / преда́ти Тя Го́споди, сокро́вище живота́, ле́стно поуча́шеся, / отону́дуже и упи́вся, тече́т ко иуде́ом, / глаго́лет беззако́нным: / что ми хо́щете да́ти, и аз вам преда́м, / во е́же распя́ти Его́?

Слава, и ныне, тойже.

По 3-м стихословии седален, глас 1. Подобен: Гроб Твой:

Блудни́ца в пла́че вопия́ше Ще́дре, / отира́ющи те́пле пречи́стеи Твои́ но́зе власы́ главы́ своея́, / и из глубины́ стеня́щи: / не отри́ни мя, ниже́ омерзи́ Бо́же мой, / но приими́ мя ка́ющуюся, / и спаси́ я́ко еди́н Человеколю́бец.

Слава, и ныне, тойже.

Чтения же вся от сказания, еже от Матфеа святаго Евангелия дне. Таже:

Евангелие от Иоанна, зачало 41. [Ин. 12, 17 – 50.]

Во вре́мя о́но, свиде́тельствоваше наро́д сый со Иису́сом, егда́ Ла́заря возгласи́ от гро́ба и воскреси́ его́ от ме́ртвых. Сего́ ра́ди и сре́те Его́ наро́д, я́ко слы́шаша Его́ сие́ сотво́рша зна́мение. Фарисе́е у́бо ре́ша к себе́: ви́дите, я́ко ника́яже по́льза есть, се мир по Нем и́дет. Бя́ху же не́цыи Е́ллини от вше́дших, да покло́нятся в пра́здник. Си́и у́бо приступи́ша к Фили́ппу, и́же бе от Вифсаи́ды Галиле́йския, и моля́ху его́, глаго́люще: го́споди, хо́щем Иису́са ви́дети. Прии́де Фили́пп, и глаго́ла Андре́ови: и па́ки Андре́й и Фили́пп глаго́ласта Иису́сови. Иису́с же отвеща́ и́ма, глаго́ля: прии́де час, да просла́вится Сын Челове́ческий. Ами́нь, ами́нь глаго́лю вам: а́ще зе́рно пшени́чно пад на земли́ не у́мрет, то еди́но пребыва́ет: а́ще ли у́мрет, мног плод сотвори́т. Любя́й ду́шу свою́, погуби́т ю́: и ненави́дяй ду́шу свою́ в ми́ре сем, в животе́ ве́чнем сохрани́т ю́. А́ще кто Мне слу́жит, Мне да после́дствует: и иде́же есмь Аз, ту и слуга́ Мой бу́дет. И а́ще кто Мне слу́жит, почти́т его́ Оте́ц Мой. Ны́не душа́ Моя́ возмути́ся, и что реку́? О́тче, спаси́ Мя от часа́ сего́, но сего́ ра́ди приидо́х на час сей. О́тче, просла́ви и́мя Твое́. Прии́де же глас с небесе́: и просла́вих, и па́ки просла́влю. Наро́д же стоя́й слы́шав, глаго́лаху: гром бысть. Ини́и глаго́лаху: а́нгел глаго́ла Ему́. Отвеща́ Иису́с, и рече́: не Мене́ ра́ди глас сей бысть, но наро́да ра́ди. Ны́не суд есть ми́ру сему́: ны́не князь ми́ра сего́ изгна́н бу́дет вон. И а́ще Аз вознесе́н бу́ду от земли́, вся привлеку́ к Себе́. Сие́ же глаго́лаше, назна́менуя, ко́ею сме́ртию хотя́ше умре́ти. Отвеща́ Ему́ наро́д: мы слы́шахом от зако́на, я́ко Христо́с пребыва́ет во ве́ки: ка́ко Ты глаго́леши, вознести́ся подоба́ет Сы́ну Челове́ческому? Кто есть Сей Сын Челове́ческий? Рече́ же им Иису́с: еще́ ма́ло вре́мя свет в вас есть. Ходи́те, до́ндеже свет и́мате, да тьма вас не и́мет: и ходя́й во тме, не весть, ка́мо и́дет. До́ндеже свет и́мате, ве́руйте во свет, да сы́нове све́та бу́дете. Сия́ глаго́ла Иису́с, и отше́д скры́ся от них. Толи́ка зна́мения сотво́ршу Ему́ пред ни́ми, не ве́роваху в Него́. Да сбу́дется сло́во Иса́ии проро́ка, е́же рече́: Го́споди, кто ве́рова слу́ху на́шему; и мы́шца Госпо́дня кому́ откры́ся? Сего́ ра́ди не можа́ху ве́ровати, я́ко па́ки рече́ Иса́иа: ослепи́ о́чи их, и ока́менил есть сердца́ их, да не ви́дят очи́ма, ни разуме́ют се́рдцем, и обратя́тся, и исцелю́ их. Сия́ рече́ Иса́иа, егда́ ви́де сла́ву Его́, и глаго́ла о Нем. Оба́че у́бо и от князь мно́зи ве́роваша в Него́, но фарисе́й ра́ди не испове́доваху, да не из со́нмищ изгна́ни бу́дут. Возлюби́ша бо па́че сла́ву челове́ческую, не́же сла́ву Бо́жию. Иису́с же воззва́, и рече́: ве́руяй в Мя, не ве́рует в Мя, но в Посла́вшаго Мя. И ви́дяй Мя, ви́дит Посла́вшаго Мя. Аз свет в мир приидо́х, да всяк ве́руяй в Мя, во тме не пребу́дет. И а́ще кто услы́шит глаго́лы Моя́, и не ве́рует, Аз не сужду́ ему́: не приидо́х бо, да сужду́ ми́рови, но да спасу́ мир. Отмета́яйся Мене́ и не прие́мляй глаго́л Мои́х, и́мать судя́щаго ему́: сло́во, е́же глаго́лах, то су́дит ему́ в после́дний день. Я́ко Аз от Себе́ не глаго́лах, но посла́вый Мя Отец, Той Мне за́поведь даде́, что реку́, и что возглаго́лю. И вем, я́ко за́поведь Его́ живо́т ве́чный есть: я́же у́бо Аз глаго́лю, я́коже рече́ Мне Оте́ц, та́ко глаго́лю.

Псалом 50, и трипеснец, творение господина Космы, егоже краестрочие: Тетра́ди псало́. Сиесть В Сре́ду воспою́. Ирмосы по дважды. Тропари на 12. Последи же ирмос оба лика вкупе. Глас 2.

Песнь 3.

{Τ} Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.

{Ε} Во тще́тных собо́рище беззако́нных, / и мы́слию собира́ется злонра́вною, / осужде́на Изба́вителя изрещи́ Тя Христе́. / Ему́же пое́м: Ты еси́ Бог наш, / и несть свят па́че Тебе́ Го́споди.

{Τ} Лю́тый сове́т беззако́нных, / притворя́ется богобо́рныя души́ су́щий, / я́ко злопотре́бна пра́веднаго уби́ти Христа́. / Ему́же пое́м: Ты еси́ Бог наш, / и несть свят па́че Тебе́ Го́споди.

Кондак, глас 4. Подобен: Вознесы́йся:

Па́че блудни́цы Бла́же, беззако́нновав, / слез ту́чи ника́коже Тебе́ принесо́х, / но молча́нием моля́ся припа́даю Ти, / любо́вию облобыза́я пречи́стеи Твои́ но́зе, / я́ко да оставле́ние мне я́ко Влады́ка / пода́си долго́в, зову́щу Ти Спа́се: / от скве́рных дел мои́х изба́ви мя.

Икос: Я́же пе́рвее блудни́ца жена́, / внеза́пу целому́дренна яви́ся, / возненави́девши дела́ сту́днаго греха́, и сла́дости теле́сныя, / помина́ющи студ мно́гий и суд муче́ния, / его́же претерпя́т блудни́цы и скве́рнии, / от ни́хже пе́рвый есмь аз, и бою́ся, / но пребыва́ю в злом обы́чаи безу́мный. / Блу́дная же жена́ убоя́вшися, и потща́вшися ско́ро прии́де, / вопию́щи ко Изба́вителю: / Человеколю́бче и Ще́дре, / от скве́рных дел мои́х изба́ви мя.

Синаксарий.

Песнь 8.

{Ρ} Ирмос: Глаго́л мучи́телев поне́же превозмо́же, / седмери́цею пещь разжже́нна бысть иногда́, / в не́йже о́троцы не опали́шася, / царе́во попра́вше веле́ние, / но вопия́ху: вся дела́ Госпо́дня Го́спода по́йте, / и превозноси́те во вся ве́ки.

{Α} Излива́ющи жена́ ми́ро честно́е, / Влады́чню и Боже́ственному стра́шному верху́ Христе́, / следо́в Твои́х пречи́стых прикосну́ся, оскверне́ныма дла́ньма, и вопия́ше: / вся дела́ Госпо́дня Го́спода по́йте, / и превозноси́те во вся ве́ки.

{Δ} Слеза́ми омыва́ет но́зе, пови́нная грехо́м, Созда́вшаго, / и отира́ет власы́ свои́ми. / Те́мже в житии́ соде́янных / не погреши́ избавле́ния, но вопия́ше: / вся дела Госпо́дня Го́спода по́йте, / и превозноси́те во вся ве́ки.

{Ι} Священноде́йствуется избавле́ние благонра́вней, / от спаси́тельных утро́б же и слез исто́чника, / в не́мже испове́данием измы́вшися, / не стыдя́шеся, но вопия́ше: / вся дела́ Госпо́дня Го́спода по́йте, / и превозноси́те во вся ве́ки.

Таже, Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Глаго́л мучи́телев:

Честне́йшую, не поем.

Песнь 9.

{Ψ} Ирмос: Душа́ми чи́стыми, и нескве́рными устна́ми, / прииди́те, возвели́чим Нескве́рную и Пречи́стую Ма́терь Емману́илеву, / Е́юже, из Нея́ к Рожде́нному принося́ще моли́тву: / пощади́ ду́ши на́ша, Христе́ Бо́же, и спаси́ нас.

{Α} Неразу́мен я́влься, и лука́в ревнообра́зник, / дар достойнобоже́ствен сло́вом продае́т. / И́мже долг разреши́ся грехо́в, / кра́дый лю́тый Иу́да любобоже́ственную благода́ть: / пощади́ ду́ши на́ша Христе́ Бо́же, и спаси́ нас.

{Λ} Глаго́лет шед беззако́нным князе́м: / что ми хо́щете да́ти, и аз Христа́ вам иско́маго хотя́щим преда́м? / Присвое́ние Христо́во Иу́да отри́нувый зла́том: / пощади́ ду́ши на́ша Христе́ Бо́же, и спаси́ нас.

{Ω} О слепо́тнаго сребролю́бия нечести́ве, / отону́дуже забве́ние получи́л еси́, / я́ко души́ ника́коже равностоя́телен мир, я́коже научи́лся еси́: / отча́янием бо сам себе́ удави́л еси́ вже́гся преда́телю: / пощади́ ду́ши на́ша Христе́ Бо́же, и спаси́ нас.

Таже ирмос: Душа́ми чи́стыми, и нескве́рными устна́ми:

Ексапостиларий, трижды, яко обычно:

Черто́г Твой ви́жду Спа́се мой украше́нный, / и оде́жды не и́мам, да вни́ду в онь, / просвети́ одея́ние души́ моея́ / Светода́вче, и спаси́ мя.

На хвалитех поставим стихи 4, и поем сия самогласны, глас 1:

Тебе́ Де́выя Сы́на, / блудни́ца позна́вши Бо́га, / глаго́лаше, в пла́чи моля́щися, / я́ко слез досто́йная соде́лавшая: / разреши́ долг, я́коже и аз власы́: / возлюби́ лю́бящую, пра́ведно ненави́димую, / и близ мытаре́й Тебе́ пропове́м, / Благоде́телю Человеколю́бче.

Многоце́нное ми́ро, / блудни́ца смеси́ со слеза́ми, / и излия́ на пречи́стеи но́зе Твои́, облобыза́ющи: / о́ную а́бие оправда́л еси́, / нам же проще́ние да́руй / Пострада́вый о нас, и спаси́ нас.

Егда́ гре́шная приноша́ше ми́ро, / тогда́ учени́к соглаша́шеся пребеззако́нным. / О́вая у́бо ра́довашеся, / истоща́ющи ми́ро многоце́нное: / сей же тща́шеся прода́ти Безце́ннаго. / Сия́ Влады́ку познава́ше, / а сей от Влады́ки разлуча́шеся. / Сия́ свобожда́шеся, / а Иу́да раб быва́ше врагу́. / Лю́то есть ле́ность, ве́лие покая́ние: / е́же мне да́руй Спа́се, / пострада́вый о нас, и спаси́ нас.

О Иу́дина окая́нства! / Зря́ше блудни́цу целу́ющую стопы́, / и умышля́ше ле́стию преда́ния целова́ние. / О́ная власы́ разреши́, / а сей я́ростию вяза́шеся, / нося́ вме́сто ми́ра злосмра́дную зло́бу: / за́висть бо не весть предпочита́ти поле́зное. / О Иу́дина окая́нства! / От него́же изба́ви Бо́же, ду́ши на́ша.

Слава, глас 2: Гре́шная тече́ к ми́ру, / купи́ти многоце́нное ми́ро, / е́же пома́зати Благоде́теля, / и миропрода́телю вопия́ше: / Даждь ми ми́ро, да пома́жу и аз / Очи́стившаго вся моя́ грехи́.

И ныне, глас 6: Погруже́нная грехо́м, / обре́те Тя приста́нище спасе́ния, / виждь и ми́ра со слеза́ми растворя́ющую, Тебе́ вопия́ше: / виждь согреша́ющих покая́ния ожида́яй. / Но Влады́ко спаси́ мя от волны́ грехо́вныя, / вели́кия ра́ди Твоея́ ми́лости.

На стиховне стихиры самогласны, глас: 6.

Днесь Христо́с прихо́дит в дом фарисе́ов, / и жена́ гре́шница приступи́вши к нога́м, валя́шеся вопию́щи: / виждь погруже́нную грехо́м, / отча́янную дея́ний ра́ди, / негнуша́емую от Твоея́ бла́гости: / и даждь ми Го́споди оставле́ние злых, и спаси́ мя.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Простре́ блудни́ца власы́ Тебе́ Влады́це, / простре́ Иу́да ру́це беззако́нным: / о́ва у́бо прия́ти оставле́ние, / ов же взя́ти сре́бреники. / Те́мже Тебе́ вопие́м про́даному и свобо́ждшему нас: / Го́споди сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Приступи́ жена́ злосмра́дная и оскверне́ная, сле́зы пролива́ющи, / лю́бящи Спа́се, страсть испове́дающи: / ка́ко воззрю́ к Тебе́ Влады́це? / Сам бо прише́л еси́ спасти́ блудни́цу: / из глубины́ уме́ршую мя воскреси́, / и́же Ла́заря воздви́гнувый из гро́ба четверодне́вна: / приими́ мя окая́нную Го́споди, и спаси́ мя.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Отча́янная жития́ ра́ди, / и уве́домая нра́ва ра́ди, / ми́ра нося́щая приступи́ Тебе́ вопию́щи: / да не отве́ржеши мене́ блу́дную, Роди́выйся от Де́вы: / да не пре́зриши моя́ сле́зы ра́досте а́нгелов. / Но приими́ мя ка́ющуюся, / ю́же не отри́нул еси́ согреша́ющую Го́споди, / вели́кия ра́ди Твоея́ ми́лости.

Слава, и ныне, самогласен, глас 8: Творение Кассианы инокини.

Го́споди, я́же во мно́гия грехи́ впа́дшая жена́, / Твое́ ощути́вшая Божество́, / мироно́сицы взе́мши чин, / рыда́ющи ми́ро Тебе́ пре́жде погребе́ния прино́сит: / увы́ мне, глаго́лющи, / я́ко нощь мне есть разжже́ние блуда́ невоздержа́нна, / мра́чное же и безлу́нное раче́ние греха́. / Приими́ моя́ исто́чники слез, / и́же облака́ми производя́й мо́ря во́ду. / Приклони́ся к мои́м воздыха́нием серде́чным, / приклони́вый небеса́ неизрече́нным Твои́м истоща́нием: / да облобыжу́ пречи́стеи Твои́ но́зе, / и отру́ сия́ па́ки главы́ моея́ власы́, / и́хже в раи́ Е́ва, по полу́дни, шу́мом у́ши огласи́вши, стра́хом скры́ся. / Грехо́в мои́х мно́жества, / и суде́б Твои́х бе́здны кто изсле́дит? / Душеспа́сче Спа́се мой, / да мя Твою́ рабу́ не пре́зриши, / и́же безме́рную име́яй ми́лость.

И абие, Бла́го есть: Трисвятое с поклоны, и час 1-й без стихословия: Бывают же и поклоны по чину их. И лития. И отпуст. И прочее якоже прежде указася в Понедельник Великий.

На 6-м часе тропарь пророчества, глас 8:

Днесь лука́вое собра́ся со́нмище, / и на Тя тще́тная поучи́шася. / Днесь от согла́сия удавле́ние Иу́да обруча́ет, / Каиа́фа же нево́лею испове́дует: / я́ко еди́н за всех восприе́млеши смерть во́лею, / Изба́вителю наш Христе́ Бо́же, сла́ва Тебе́.

Прокимен, псалом 133, глас 4: Благослови́т Тя Госпо́дь от Сио́на, / сотвори́вый не́бо и зе́млю. Стих: Се ны́не благослови́те Го́спода вси раби́ Госпо́дни.

Пророчества Иезекиилева чтение. [Глава 2, ст. 3 – 10, глава 3, ст. 1 – 3]

Рече́ Госпо́дь ко мне: сы́не челове́чь, послю́ тя Аз к до́му Изра́илеву, огорчева́ющим Мя, и́же огорчи́ша Мя, са́ми и отцы́ их отверго́шася Мене́ до дне́шняго дне. И сы́нове жестоколи́чнии, и твердосерде́чнии: Аз послю́ тя к тем, и рече́ши к ним: та́ко глаго́лет Адонаи Госпо́дь. А́ще у́бо услы́шат или́ убоя́тся: зане́ дом огорчева́яй есть, и позна́ют, я́ко проро́к еси́ ты посреде́ их. И ты сы́не челове́чь, да не убои́шися их, ни ужаса́йся от лица́ их: зане́ разсвире́пеют и обы́дут тя о́крест, посреди́ бо скорпи́ев ты живе́ши: слове́с их не убо́йся, и от лица́ их не ужаса́йся, зане́ дом огорчева́яй есть. И возглаго́леши словеса́ Моя́ к ним: а́ще у́бо услы́шат, или́ убоя́тся, зане́ дом прогне́ваяй есть. И ты сы́не челове́чь послу́шай Глаго́лющаго к тебе́, не бу́ди огорчева́яй, я́коже дом преогорчева́яй: отве́рзи уста́ твоя́, и снеждь, я́же Аз даю́ тебе́. И ви́дех, и се рука́ просте́рта ко мне, и в ней сви́ток кни́жный. И разви́ его́ пре́до мно́ю, и в том пи́сана бы́ша пре́дняя и за́дняя: и впи́сано бя́ше в нем рыда́ние, и жа́лость, и го́ре. И рече́ ко мне: сы́не челове́чь, снеждь сви́ток сей, и иди́, и рцы сыно́м Изра́илевым. И отверзо́х уста́ моя́, и напита́ мя сви́тком сим. И рече́ ко мне: сы́не челове́чь, уста́ твоя́ снедя́т, и чре́во твое́ насы́тится сви́тка сего́ да́ннаго тебе́: и снедо́х его́, и бысть во усте́х мои́х я́ко мед сла́док.

Прокимен, псалом 134, глас 6: Боя́щиися Го́спода, / благослови́те Го́спода. Стих: Хвали́те и́мя Госпо́дне, хвали́те раби́ Го́спода.

Чтение Евангелия. И по чину Трисвятое с поклоны и отдаем стихословие часов. Девятый же час начинаем от Трисвятаго: в немже и последнее бывает чтение от Евангелия. Таже глаголем: Не преда́ждь нас: Трисвятое с поклоны. Такожде и блаженны. Творяще и обычныя поклоны. Глаголем же и кондак Великия Среды, и храма святаго, или святыя. Сла́ва, Со святы́ми упоко́й: И ны́не, храма, Богородицы. Аще же ни, глаголем: Предста́тельство христиа́н: Го́споди поми́луй, 40, и 3 великия поклоны, и 12 малыя. Трисвятое: и поклоны 3. Го́споди поми́луй, 12, и молитва: Всесвята́я Тро́ице: Таже, Досто́йно есть: Сла́ва, и ны́не: и вместо отпуста глаголет настоятель молитву: Влады́ко многоми́лостиве: всю до конца. Сей же глаголемей мы ниц падше на землю, молимся. И по исполнении тоя, нам воставшим, преклоняется и той сам к братии, и просит прощения, глаголя: Благослови́те отцы́ святи́и, и прости́те ми гре́шному, я́же согреши́х во всей жи́зни мое́й, и во всей святе́й Четыредеся́тнице, сло́вом, де́лом, помышле́нием, и все́ми мои́ми чу́вствы. Братиям же отвещавшим: Бог да прости́т ти честны́й о́тче. Таже приходят и братия два два, просят подобне и тии прощения, глаголюще: Прости́ мя о́тче святы́й: и прочее, якоже выше писася. И приемше прощение, идем в келлии наша, и молчим до часа вечерняго. В соборных же храмех и приходских росход не бывает, но по прощении трезвон в двои.

ВО СВЯТУЮ И ВЕЛИКУЮ СРЕДУ ВЕЧЕРА

Во светильничное, обычное стихословие от Трисвятаго без поклонов. Стихословим же, и Ко Го́споду внегда́ скорбе́ти ми: без поклонов. На Го́споди воззва́х, поставим стихов 10 и поем самогласны, глас 1:

Тебе́ Де́выя Сы́на, / блудни́ца позна́вши Бо́га, / глаго́лаше, в пла́чи моля́щися, / я́ко слез досто́йная соде́лавшая: / разреши́ долг, я́коже и аз власы́: / возлюби́ лю́бящую, пра́ведно ненави́димую, / и близ мытаре́й Тебе́ пропове́м, / Благоде́телю Человеколю́бче.

Многоце́нное ми́ро, / блудни́ца смеси́ со слеза́ми, / и излия́ на пречи́стеи но́зе Твои́, облобыза́ющи: / о́ную а́бие оправда́л еси́, / нам же проще́ние да́руй / Пострада́вый о нас, и спаси́ нас.

Егда́ гре́шная приноша́ше ми́ро, / тогда́ учени́к соглаша́шеся пребеззако́нным. / О́вая у́бо ра́довашеся, / истоща́ющи ми́ро многоце́нное: / сей же тща́шеся прода́ти Безце́ннаго. / Сия́ Влады́ку познава́ше, / а сей от Влады́ки разлуча́шеся. / Сия́ свобожда́шеся, / а Иу́да раб быва́ше врагу́. / Лю́то есть ле́ность, ве́лие покая́ние: / е́же мне да́руй Спа́се, / пострада́вый о нас, и спаси́ нас.

О Иу́дина окая́нства! / Зря́ше блудни́цу целу́ющую стопы́, / и умышля́ше ле́стию преда́ния целова́ние. / О́ная власы́ разреши́, / а сей я́ростию вяза́шеся, / нося́ вме́сто ми́ра злосмра́дную зло́бу: / за́висть бо не весть предпочита́ти поле́зное. / О Иу́дина окая́нства! / От него́же изба́ви Бо́же, ду́ши на́ша.

Глас 2: Гре́шная тече́ к ми́ру, / купи́ти многоце́нное ми́ро, / е́же пома́зати Благоде́теля, / и миропрода́телю вопия́ше: / Даждь ми ми́ро, да пома́жу и аз / Очи́стившаго вся моя́ грехи́.

Глас 6: Погруже́ная грехо́м, / обре́те Тя, приста́нище спасе́ния, / виждь и ми́ра со слеза́ми растворя́ющую, Тебе́ вопия́ше: / виждь согреша́ющих покая́ния ожида́яй. / Но Влады́ко спаси́ мя от волны́ грехо́вныя, / вели́кия ра́ди Твоея́ ми́лости.

Днесь Христо́с прихо́дит в дом фарисе́ов, / и жена́ гре́шница приступи́вши к нога́м, валя́шеся вопию́щи: / виждь погруже́нную грехо́м, / отча́янную дея́ний ра́ди, / негнуша́емую от Твоея́ бла́гости: / и даждь ми, Го́споди, оставле́ние злых, и спаси́ мя.

Простре́ блудни́ца власы́ Тебе́ Влады́це, / простре́ Иу́да ру́це беззако́нным: / о́ва у́бо прия́ти оставле́ние, / ов же взя́ти сре́бреники. / Те́мже Тебе́ вопие́м про́даному и свобо́ждшему нас: / Го́споди сла́ва Тебе́.

Приступи́ жена́ злосмра́дная и оскверне́ная, сле́зы пролива́ющи, / лю́бящи Спа́се, страсть испове́дающи: / ка́ко воззрю́ к Тебе́ Влады́це? / Сам бо прише́л еси́ спасти́ блудни́цу: / из глубины́ уме́ршую мя воскреси́, / и́же Ла́заря воздви́гнувый из гро́ба четверодне́вна: / приими́ мя окая́нную Го́споди, и спаси́ мя.

Отча́янная жития́ ра́ди, / и уве́домая нра́ва ра́ди, / ми́ра нося́щая приступи́ Тебе́ вопию́щи: / да не отве́ржеши мене́ блу́дную, Роди́выйся от Де́вы, / да не пре́зриши моя́ сле́зы ра́досте а́нгелов, / но приими́ мя ка́ющуюся, / ю́же не отри́нул еси́ согреша́ющую Го́споди, / вели́кия ра́ди Твоея́ ми́лости.

Слава, и ныне, глас 8: Творение Кассианы инокини.

Го́споди, я́же во мно́гия грехи́ впа́дшая жена́, / Твое́ ощути́вшая Божество́, / мироно́сицы взе́мши чин, / рыда́ющи ми́ро Тебе́ пре́жде погребе́ния прино́сит: / увы́ мне, глаго́лющи, / я́ко нощь мне есть разжже́ние блуда́ невоздержа́нна, / мра́чное же и безлу́нное раче́ние греха́. / Приими́ моя́ исто́чники слез, / и́же облака́ми производя́й мо́ря во́ду. / Приклони́ся к мои́м воздыха́нием серде́чным, / приклони́вый небеса́, неизрече́нным Твои́м истоща́нием, / да облобыжу́ пречи́стеи Твои́ но́зе, / и отру́ сия́ па́ки главы́ моея́ власы́, / и́хже в раи́ Е́ва, по полу́дни, шу́мом у́ши огласи́вши, стра́хом скры́ся. / Грехо́в мои́х мно́жества, / и суде́б Твои́х бе́здны кто изсле́дит? / Душеспа́сче Спа́се мой, / да мя Твою́ рабу́ не пре́зриши, / и́же безме́рную име́яй ми́лость.

Вход со Евангелием. Све́те ти́хий:

Прокимен, псалом 135, глас 4: Испове́дайтеся Бо́гу Небе́сному, / я́ко благ, я́ко в век ми́лость Его́. Стих: Испове́дайтеся Бо́гу бого́в, я́ко в век ми́лость Его́.

Исхода чтение. [Глава 2, ст. 18 – 22.]

Бысть во дни мно́гия о́ны, вели́к быв Моисе́й, изы́де к бра́тиям свои́м сыно́м Изра́илевым: разуме́в же боле́знь их, ви́де челове́ка еги́птянина бию́ща не́коего евре́анина от бра́тии его́ сыно́в Изра́илевых. Обозре́вся же се́мо и ова́мо, никого́же ви́де: и порази́в еги́птянина, скры его́ в песце́. Изше́д же во вторы́й день, ви́де два му́жа евре́анина бию́щияся, и глаго́ла оби́дящему: чесо́ ра́ди ты бие́ши и́скренняго? Он же рече́: кто тя поста́ви кня́зя и судию́ над на́ми? Еда́ уби́ти мя ты хо́щеши, и́мже о́бразом уби́л еси́ вчера́ еги́птянина? Убоя́ся же Моисе́й, и рече́: а́ще си́це явле́н бысть глаго́л сей? Услы́ша же фарао́н глаго́л сей, и иска́ше уби́ти Моисе́а. Оты́де же Моисе́й от лица́ фарао́нова, и всели́ся в земли́ Мадиа́мстей: прише́д же в зе́млю Мадиа́мскую, се́де при кла́дязе. Свяще́ннику же Мадиа́мскому бе́ша седмь дще́рей пасу́щих о́вцы отца́ своего́ Иофо́ра: прише́дше же че́рпаху, до́ндеже напо́лниша коры́та, напои́ти о́вцы отца́ своего́ Иофо́ра. Прише́дше же па́стырие изгна́ша я́: воста́в же Моисе́й изба́ви их, и налия́ им, и напои́ о́вцы их. Приидо́ша же к Рагуи́лу отцу своему́, он же рече́ им: что я́ко ускори́сте приити́ днесь? О́ныя же реко́ша: челове́к еги́птянин изба́ви нас от па́стырей, и наче́рпа нам, и напои́ о́вцы на́ша. Он же рече́ дще́рем свои́м: и где есть? И вску́ю си́це оста́висте челове́ка? Призови́те у́бо его́, да яст хлеб. Всели́ся же Моисе́й у челове́ка: и даде́ Сепфо́ру дщерь свою́ Моисе́ю в жену́. Во чре́ве же заче́нши жена́, роди́ сы́на, и нарече́ Моисе́й и́мя ему́, Гирса́м, глаго́ля: я́ко пришле́ц есмь в земли́ чужде́й. Еще́ же заче́нши роди́ сы́на втора́го, и нарече́ и́мя ему́ Елиезе́р, глаго́ля: Бог бо отца́ моего́ Помо́щник мой, и изба́ви мя из руки́ фарао́новы.

Прокимен, псалом 137, глас 4: Го́споди, ми́лость Твоя́ во век, / дел руку́ Твое́ю не пре́зри. Стих: Испове́мся Тебе́ Го́споди всем се́рдцем мои́м, и пред а́нгелы воспою́ Тебе́.

Иова чтение. [Глава 2, ст. 1 – 10]

Бысть я́ко день сей, и приидо́ша а́нгели Бо́жии предста́ти пред Го́сподем: и диа́вол прии́де посреде́ их предста́ти пред Го́сподем. И рече́ Госпо́дь диа́волу: отку́ду ты гряде́ши? Тогда́ рече́ диа́вол пред Го́сподем: проше́д поднебе́сную, и обше́д всю зе́млю, приидо́х. И рече́ Госпо́дь к диа́волу: внял ли еси́ у́бо [мы́слию твое́ю] рабу́ моему́ И́ову; я́ко несть такова́ от су́щих на земли́: челове́к незло́бив, и́стинен, непоро́чен, Богочести́в, удаля́яйся от вся́каго зла, еще́ же придержи́тся незло́бия: ты же рекл еси́ име́ния его́ погуби́ти вотще́. Отвеща́в же диа́вол Го́сподеви, рече́: ко́жу за ко́жу, и вся ели́ка и́мать челове́к, даст за ду́шу свою́. Оба́че посли́ ру́ку Твою́, и косни́ся косте́м его́, и пло́ти его́, а́ще не в лице́ Тя благослови́т. Рече́ же Госпо́дь диа́волу: се предаю́ ти его́, то́кмо ду́шу его́ соблюди́. Изы́де же диа́вол от лица́ Госпо́дня, и порази́ И́ова гно́ем лю́тым от ног да́же до главы́. И взя [И́ов] чреп, да острога́ет гной свой, и той седя́ше на гно́ищи вне гра́да. Вре́мени же мно́гу мину́вшу, рече́ к нему́ жена́ его́ глаго́лющи: доко́ле терпи́ши, се пожду́ вре́мя еще́ ма́ло, ча́ющи наде́жди спасе́ния моего́. Се бо потреби́ся от земли́ па́мять твоя́, сы́нове твои́ и дще́ри, моего́ чре́ва боле́зни и труды́, и́миже вотще́ труди́хся с боле́зньми: ты же сам в гнои́ черве́й седи́ши, обнощева́я вне без покро́ва, и аз скита́ющися и служа́щи, ме́сто от ме́ста преходя́щи, и дом от до́му, ожида́ющи со́лнца, когда́ за́йдет, да почи́ю от трудо́в мои́х, и от боле́зней, я́же мя ны́не обдержа́т. Но рцы глаго́л не́кий ко Го́споду, и умри́. Он же воззре́в рече́ к ней: вску́ю я́ко еди́на от безу́мных жен возглаго́лала еси́? А́ще блага́я прия́хом от руки́ Госпо́дни, злых ли не стерпи́м? Во всех сих приключи́вшихся ему́, ничи́мже согреши́ И́ов устна́ма пред Бо́гом, [и не даде́ безу́мия Бо́гу].

Таже, Да испра́вится моли́тва моя́:

Евангелие от Матфеа, зачало 108. [Мф. 26, 6 – 16.]

Во вре́мя о́но, Иису́су бы́вшу в Вифа́нии, в дому́ Си́мона прокаже́ннаго. Приступи́ к Нему́ жена́, сткля́ницу ми́ра иму́щи многоце́ннаго, и возлива́ше на главу́ Его́ возлежа́ща. Ви́девше же ученицы́ Его́, негодова́ша, глаго́люще: чесо́ ра́ди ги́бель сия́ (бысть)? Можа́ше бо сие́ ми́ро продано́ бы́ти на мно́зе, и да́тися ни́щим. Разуме́в же Иису́с рече́ им: что тружда́ете жену́? Де́ло бо добро́ соде́ла о Мне. Всегда́ бо ни́щия и́мате с собо́ю, Мене́ же не всегда́ и́мате. Возлия́вши бо сия́ ми́ро сие́ на те́ло Мое́, на погребе́ние Мя сотвори́. Ами́нь глаго́лю вам: иде́же а́ще пропове́дано бу́дет Ева́нгелие сие́ во всем ми́ре, рече́тся, и е́же сотвори́ сия́, в па́мять ея́. Тогда́ шед еди́н от обоюна́десяте, глаго́лемый Иу́да Искарио́тский, ко архиере́ом, рече́: что ми хо́щете да́ти, и аз вам преда́м Его́? Они́ же поста́виша ему́ три́десять сре́бреник. И отто́ле иска́ше подо́бна вре́мене, да Его́ преда́ст.

И прочее последование Преждеосвященных. И по пренесении честных Даров поклоны 3. И абие упраждняются совершенно в церкви бываемыя поклоны. В келлиах же даже и до Великаго Пятка совершаются.

ВО СВЯТУЮ И ВЕЛИКУЮ СРЕДУ ВЕЧЕРА ПОВЕЧЕРИЕ ГЛАГОЛЕМ МАЛОЕ

На немже поем трипеснец господина Андреа Великаго Четвертка. Глас 6.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди.

Го́рница по́стланая, прия́т Тя Созда́теля и стаи́нники, / и та́мо Па́сху сконча́л еси́, / и та́мо соде́лал еси́ та́инства: / та́мо бо двема́ по́сланома ны́не ученико́ма Твои́ма, / Па́сха угото́вася Тебе́.

Иди́те ко о́нсице, / вся ве́дый предглаго́лет апо́столом, / и блаже́н есть, и́же мо́жет ве́рно прия́ти Го́спода: / го́рницу у́бо се́рдце предугото́вав, / и ве́черю благоче́стие.

Нрав сребролю́бия, и о́браз твой безу́мия испо́лнь несмы́сленный Иу́до: / вве́рен бо быв еди́н то́кмо ковче́жцу, / вся́ко не преклони́лся еси́ к милосе́рдию, / но заключи́л еси́ жесто́каго твоего́ се́рдца утро́бу, / преда́в еди́наго Благоутро́бнаго.

Нрав богоуби́йц прода́нию сребролю́бца смеси́выйся: / ов у́бо ко убие́нию вооружи́вся, / ов же к сре́бреннком устремля́шеся: / удавле́нием бо тогда́ предразсуди́в покая́ние зле, / е́же жи́ти лиши́ся.

Лобыза́ние испо́лнено льсти, / е́же ра́дуйся, со ору́жием, льсти́вый Иу́до: / язы́ком у́бо провещава́еши я́же к соедине́нию, / нра́вом же помава́еши к разстоя́нию: / преда́ти бо беззако́нником Благоде́теля ле́стне поучи́лся еси́.

Лобыза́еши и продае́ши Иу́до, / целу́еши и не стыди́шися, ле́стию притеки́й. / Кто ненави́дя лобыза́ет треокая́нне? / Кто любя́ продае́т на цене́? / Лобыза́ние твоего́ безсту́днаго злосове́тия облича́ет произволе́ние.

Слава: Неразде́льное Существо́м, несли́тное Ли́цы, / богосло́влю Тя, Тро́ическое еди́но Божество́, / я́ко единоца́рственное и сопресто́льное, / вопию́ Тебе́ песнь вели́кую, / в вы́шних трегу́бо песносло́вимую.

И ныне, Богородичен: Зача́тие па́че сло́ва, / рождество́ Твое́ па́че естества́ Богороди́тельнице: / о́во у́бо от Ду́ха без се́мене, / о́во же зако́нов естества́ тая́щееся, я́ко нетле́нно, / и па́че естества́ вся́каго рожде́ния: / Бог бо ражда́емое.

Седален, глас 4. Подобен: Яви́лся еси́ днесь:

Яды́й Влады́ко со ученики́ Твои́ми, / та́инственно яви́л еси́ / всесвято́е Твое́ заколе́ние, / и́мже тли изба́вихомся, / честна́я Твоя́ почита́ющии страда́ния.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки.

Зако́нное сконча́в повеле́ние, / скрижа́ли зако́нныя Написа́вый в Сина́и, / снеде́ у́бо Па́сху дре́внюю и сено́вную: / бысть же Па́сха та́йная и живоже́ртвенная.

От ве́ка сокрове́нную Христе́ прему́дрость тайноводя́, / показа́л еси́ ку́пно всем апо́столом Спа́се на ве́чери, / ю́же Це́рквам преда́ша богоно́снии.

Еди́н от вас ле́стию преда́ст Мя, / евре́ем прода́в в нощь сию́, / сие́ Христо́с возопи́в смуща́ше дру́ги: / тогда́ еди́н ко еди́ному, недоумева́яся колеба́шеся.

Смири́вся нас ра́ди бога́тый, от ве́чери воста́в, / ле́нтий прие́м, сим препоя́сался еси́, / и прекло́нь вы́ю, омы́л еси́ но́ги ученико́в и преда́теля.

Па́че ума́, и неизрече́нна ра́зума высоте́ Твое́й Иису́се, кто не удиви́тся! / Я́ко бре́нию предста́л еси́, Соде́телю вся́ческих, / омыва́я у́бо но́ги, отира́я же и ле́нтием.

Учени́к, его́же любля́ше Госпо́дь, / на пе́рси возле́г, рече́ к Нему́: / кто есть предая́й Тя? / Христо́с же ко о́ному: / сей вложи́вый в соли́ло ны́не ру́ку.

Учени́к хлеб прие́мый, / по хле́бе отлуча́ется, прода́нию поуча́яйся, / тече́т ко иуде́ем, глаго́лет беззако́нным: / что мне хо́щете да́ти, и аз Его́ вам преда́м.

Благослови́м Отца́ и Сы́на, и Свята́го Ду́ха, Го́спода.

Единаго Бо́га по Существу́ чту, / три Ипоста́си пою́ определи́тельне, / и́ныя, но не и́наковыя: / поне́же Божество́ еди́но, в трие́х Ли́цех, / и́бо Оте́ц, и Сын, и Боже́ственный Дух.

И ныне, Богородичен: Изба́ви нас Иису́се Спа́се наш / от ле́сти лука́ваго, и напа́сти. / Приими́ Богоро́дицу моля́щуюся непреста́нно: / Ма́ти бо есть, и мо́жет Тя умоли́ти.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Его́же во́инства небе́сная: И поклон.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Вели́кое та́инство Твоего́ вочелове́чения, / на ве́чери совозлежа́щу Тебе́ ученико́м Твои́м Человеколю́бче, / откры́в рекл еси́: / яди́те Хлеб живо́тный ве́рою, / пи́йте и Кровь излия́нную от Богоре́бреннаго заколе́ния.

Сень небе́сная яви́ся го́рница, / иде́же Па́сху Христо́с соверши́. / Ве́черя безкро́вная, и слове́сная слу́жба, / трапе́за же та́мо соверше́нных Таин, мы́сленный же́ртвенник.

Па́сха Христо́с есть вели́кая и всечестна́я, / снеде́н быв я́ко хлеб, закла́н же я́ко овча́: / Той бо вознесе́ся о нас Же́ртва. / Того́ Те́ла благоче́стно, и Того́ Кро́ве / вси та́йно причаща́емся.

Хлеб благослови́в, Хлеб сый небе́сный, / благодари́в Отцу́ Роди́телю, / прие́мый, и ча́шу ученико́м дава́л еси́: / приими́те, яди́те, вопия́, / сие́ есть Те́ло Мое́, и Кровь нетле́нныя жи́зни.

Ами́нь глаго́ля, рече́ ро́ждиям Лоза́, / апо́столом Христо́с и́стина: / отсе́ле не и́мам пи́ти от лозы́ питие́, / до́ндеже пию́ е́ но́вое, во сла́ве Отца́ Моего́, / с ва́ми насле́дники Мои́ми.

Продае́ши на три́десятих сре́бреницех Го́спода, / и не помышля́еши Иу́до беззако́нный / Ве́чери та́инство, или́ честно́е умове́ние. / О ка́ко попо́лзся паде́нием / в коне́ц све́та прише́л еси́, удавле́ние облобыза́в!

Ру́це просте́рл еси́, / и́миже хлеб прия́л еси́ нетле́ния, / прия́ти сре́бреники, / уста́ к целова́нию принося́ льсти́вно, / и́миже Те́ло Христо́во и Кровь прия́л еси́, / но го́ре тебе́, я́коже рече́ Христо́с.

Христо́с учреди́ мир, / небе́сный и Боже́ственный хлеб: / прииди́те у́бо христолю́бцы, / бре́нными устна́ми, чи́стыми же сердцы́, / прии́мем ве́рно жре́мую Па́сху, / в нас священноде́йствуемую.

Слава: Отца́ просла́вим, Сы́на превознесе́м, Боже́ственному Ду́ху ве́рно поклони́мся, / Тро́ице неразде́льней, еди́нице по Существу́: / я́ко Све́ту и Све́том, Животу́ и Живото́м, / животворя́щему и просвеща́ющему концы́.

И ныне, Богородичен: Черто́г небе́сный, и Неве́ста Присноде́ва, / еди́на яви́лася еси́, Бо́га носи́вши, / ро́ждши же непрело́жно, из Тебе́ воплоще́нна. / Те́мже Тя вси ро́ди я́ко Богоневе́стную Ма́терь, / правосла́вно велича́ем.

И паки ирмос: Безсе́меннаго зача́тия:

И прочее Повечерия малаго по обычаю, и отпуст, и творим поклоны 3, вси равно косно. И бывшей молитве, от предстоятеля, отходим в келлии своя.

Ведомо же буди, яко от сего святаго дне, Полунощница не поется в церкви, до седмицы Фомины.

ВО СВЯТЫЙ И ВЕЛИКИЙ ЧЕТВЕРТОК НА УТРЕНИ

Клеплет параекклисиарх в седмый час нощи, и собравшимся нам в церковь, и сотворшу священнику начало: Благослове́н Бог наш: Начинаем абие по обычаю: таже шестопсалмие, по исполнении шестопсалмиа, Аллилу́иа, на глас 8.

И тропарь глас 8, трижды:

Егда́ сла́внии ученицы́ / на умове́нии Ве́чери просвеща́хуся, / тогда́ Иу́да злочести́вый / сребролю́бием неду́говав омрача́шеся, / и беззако́нным судия́м Тебе́ пра́веднаго Судию́ предае́т. / Виждь име́ний рачи́телю, / сих ра́ди удавле́ние употреби́вша! / Бежи́ несы́тыя души́, / Учи́телю такова́я дерзну́вшия: / И́же о всех благи́й, Го́споди сла́ва Тебе́.

Таже,

Евангелие от Луки зачало 108. [Лк. 22, 1 – 39.]

Во вре́мя о́но, приближа́шеся пра́здник опресно́к, глаго́лемый Па́сха. И иска́ху архиере́е и кни́жницы, ка́ко бы́ша убили Его́: боя́хуся бо люде́й. Вни́де же сатана́ во Иу́ду нарица́емаго Искарио́т, су́ща от числа́ обоюна́десяте. И шед глаго́ла архиере́ом и воево́дам, ка́ко Его́ преда́ст им. И возра́довашася, и совеща́ша ему́ сре́бреники да́ти. И испове́да, и иска́ше подо́бна вре́мене, да преда́ст Его́ им без наро́да. Прии́де же день опресноко́в, во́ньже подо́бно бе [вре́мя] жре́ти па́сху. И посла́ Петра́ и Иоа́нна, рек: ше́дша угото́вайта нам па́сху, да я́мы. О́на же реко́ста Ему́: где хо́щеши угото́ваем? Он же рече́ има: се восходя́щема ва́ма во град, сря́щет вы челове́к в скуде́льнице во́ду нося́: по нем иде́та в дом, во́ньже вхо́дит. И рце́та до́му влады́це: глаго́лет тебе́ Учи́тель, где есть оби́тель, иде́же па́сху со ученики́ Мои́ми снем? И той ва́ма пока́жет го́рницу ве́лию по́стлану: ту угото́вайта. Ше́дша же обрето́ста, я́коже рече́ и́ма: и угото́васта па́сху. И егда́ бысть час, возлеже́, и обана́десяте апо́стола с Ним. И рече́ к ним: жела́нием возжеле́х сию́ па́сху я́сти с ва́ми, пре́жде да́же не прииму́ мук. Глаго́лю бо вам, я́ко отсе́ле не и́мам я́сти от него́, до́ндеже сконча́ются во Ца́рствии Бо́жии. И прии́м ча́шу, хвалу́ возда́в, рече́: приими́те сию́, и раздели́те себе́. Глаго́лю бо вам, я́ко не и́мам пи́ти от плода́ ло́знаго, до́ндеже Ца́рствие Бо́жие прии́дет. И прии́м хлеб, хвалу́ возда́в преломи́, и даде́ им, глаго́ля: сие́ есть те́ло Мое́, е́же за вы дае́мо: сие́ твори́те в мое́ воспомина́ние. Та́кожде же и ча́шу по ве́чери, глаго́ля: сия́ ча́ша, Но́вый Заве́т Мое́ю кро́вию, я́же за вы пролива́ется. Оба́че се рука́ предаю́щаго Мя со мно́ю есть на трапе́зе. И Сын у́бо Челове́ческий и́дет по рече́нному: оба́че го́ре челове́ку тому́, и́мже предае́тся. И ти́и нача́ша иска́ти в себе́, кото́рый у́бо от них хотя́й сие́ сотвори́ти. Бысть же и пря в них, кий мни́тся их бы́ти бо́лий. Он же рече́ им: ца́рие язы́к госпо́дствуют и́ми, и облада́ющии и́ми, благода́теле нарица́ются. Вы же не та́ко: но бо́лий в вас, да бу́дет я́ко мний. и ста́рей, я́ко служа́й. Кто бо бо́лий, возлежа́й ли, или́ служа́й; не возлежа́й ли? Аз же посреде́ вас есмь я́ко служа́й. Вы же есте́ пребы́вше со Мно́ю в напа́стех Мои́х. И Аз завещава́ю вам, я́коже завеща́ Мне Оте́ц Мой, Ца́рство, да я́сте и пие́те на трапе́зе Мое́й во Ца́рствии Мое́м, и ся́дете на престо́лех, судя́ще обемана́десяте коле́нома Изра́илевома. Рече́ же Госпо́дь: Си́моне, Си́моне, се сатана́ про́сит вас, да бы се́ял, я́ко пшени́цу. Аз же моли́хся о тебе́, да не оскуде́ет ве́ра твоя́: и ты не́когда обра́щься, утверди́ бра́тию твою́. Он же рече́ Ему́: Го́споди, с Тобо́ю гото́в есмь, и в темни́цу, и на смерть ити́. Он же рече́: глаго́лю ти, Пе́тре, не возгласи́т пе́тель днесь, до́ндеже трикра́ты отве́ржешися Мене́ не ве́дети. И рече́ им: егда́ посла́х вы без влага́лища, и без ме́ха, и без сапо́г, еда́ чго лише́ни бы́сте? Они́ же ре́ша: ничесо́же. Рече́ же им: но ны́не и́же и́мать влага́лище, да во́змет, та́кожде и мех, а и́же не и́мать, да прода́ст ри́зу свою́, и ку́пит нож. Глаго́лю бо вам, я́ко еще́ пи́саное се, подоба́ет, да сконча́ется о Мне, е́же: и со беззако́нными вмени́ся. И́бо е́же о Мне, кончи́ну и́мать. Они́ же ре́ша: Го́споди, се ножа́ зде два. Он же рече́ им: дово́льно есть. И изше́д, и́де по обы́чаю в го́ру Елео́нскую: по Нем же идо́ша ученицы́ Его́.

И псалом 50. Молитвы же, Спаси́ Бо́же лю́ди Твоя́: не глаголем.

И начинаем канон, творение господина Космы, глас 6: ирмосы по дважды, тропари же на 6. Канон, егоже краестрочие: Ти макра́ пе́мпти макро́н и́мнон екса́до. Еже есть, В Вели́кий Четверто́к до́лгую песнь пою́.

Песнь 1.

{Τ} Ирмос: Се́ченое, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма / и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

{Η} Всевино́вная и пода́тельная жи́зни, / безме́рная му́дрость Бо́жия, / созда́ храм Себе́ от Чи́стыя Неискусому́жныя Ма́тере: / в храм бо теле́сно оболки́йся, / сла́вно просла́вися Христо́с Бог наш.

{Μ} Тайноводя́щи дру́ги Своя́, / душепита́тельную уготовля́ет Трапе́зу, / безсме́ртия же вои́стинну му́дрость Бо́жия растворя́ет Ча́шу ве́рным. / Присту́пим благоче́стно, и возопии́м: / сла́вно просла́вися Христо́с Бог наш.

{Α} Услы́шим вси ве́рнии, / созыва́ющую высо́ким пропове́данием, / несозда́нную и есте́ственную прему́дрость Бо́жию, / вопие́т бо: вкуси́те и разуме́вше, я́ко Христо́с Аз, возопи́йте: / сла́вно просла́вися Христо́с Бог наш.

Последи же паки ирмос оба лика вкупе.

Песнь 3.

{Κ} Ирмос: Госпо́дь Сый всех, и Зижди́тель Бог, / созда́нное безстра́стный обнища́в Себе́ соедини́, / и Па́сха, за я́же хотя́ше умре́ти, / Сам, Сый, Себе́ предпожре́: / яди́те, вопия́, Те́ло Мое́, / и ве́рою утверди́теся.

{Ρ} Изба́вительною всего́ ро́да челове́ча, / Твое́ю Бла́же Твоя́ ученики́ напои́л еси́ весе́лия Ча́шею, напо́лнив ю́, / Сам бо Себе́ священноде́йствуеши, / пи́йте, вопия́, Кровь Мою́, / и ве́рою утверди́теся.

{Α} Безу́мный муж и́же в вас преда́тель, / ученико́м Твои́м предре́кл еси́ незло́биве, / не уразуме́ет сих, / и той несмы́слен сый не и́мать разуме́ти. / Оба́че во Мне пребу́дите, / и ве́рою утверди́теся.

Седален, глас 1. Подобен: Гроб Твой:

Езе́ра и исто́чники и моря́ сотвори́вый, / смире́нию нас наказу́я изря́дному, / ле́нтием опоя́сався, ученико́в но́ги умы́, / смиря́яся премно́жеством благоутро́бия, / и возвыша́я нас от про́пастей зло́бы, / еди́н Человеколю́бец.

Слава, глас 3. Подобен: Боже́ственныя ве́ры:

Смиря́яся за благоутро́бие, / но́ги умы́л еси́ ученико́в Твои́х, / к тече́нию Боже́ственному сия́ напра́вил еси́: / не повину́яся же Петр умы́тися, / а́бие Боже́ственному повину́ется повеле́нию, / омыва́емь, и Тебе́ приле́жно моля́ся, / дарова́ти нам ве́лию ми́лость.

И ныне, глас 4. Подобен: Яви́лся еси́ днесь:

Яды́й Влады́ко со ученики́ Твои́ми, / та́инственно яви́л еси́ всесвято́е Твое́ заколе́ние, / и́мже тли изба́вихомся, / честна́я Твоя́ почита́ющии страда́ния.

Песнь 4.

{Π} Ирмос: Прови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, О́тче Щедрый, / Единоро́днаго бо Сы́на, Благи́й, / очище́ние в мир посла́л еси́.

{Ε} На страсть всем су́щим из Ада́ма источи́вшую безстра́стие, / Христе́ гряды́й, друго́м Твои́м рекл еси́: / с ва́ми Па́схи сея́ причасти́тися возжела́х: / единоро́днаго бо Мя очище́ние Оте́ц в мир посла́л есть.

{Μ} Причаща́яся Ча́ши, / ученико́м вопия́л еси́ Безсме́ртне: / плода́ ло́знаго ктому́ не пию́ про́чее, с ва́ми живя́: / единоро́днаго бо Мя очище́ние Оте́ц в мир посла́л есть.

{Π} Питие́ но́вое па́че сло́ва, / Аз глаго́лю, во Ца́рствии Мое́м, Христо́с друго́м, пию́, / я́коже бо Бог с ва́ми бо́ги бу́ду, рекл еси́: / единоро́днаго бо Мя очище́ние Оте́ц в мир посла́л есть.

Песнь 5.

{Τ} Ирмос: Сою́зом любве́ / связу́еми апо́столи, / влады́чествущему все́ми себе́ Христу́ возло́жше, / кра́сны но́ги очища́ху, / благовеству́юще всем мир.

{Η} Неодержи́мую держа́щая, / и превы́спреннюю на возду́се во́ду, / бе́здны обуздова́ющая, / и моря́ востязу́ющая Бо́жия прему́дрость, / во́ду во умыва́льницу влива́ет, / но́ги же омыва́ет рабо́в Влады́ка.

{Μ} Ученико́м показу́ет смире́ния о́браз Влады́ка, / о́блаки облага́яй не́бо, препоясу́ется ле́нтием, / и преклоня́ет коле́на, рабо́м омы́ти но́ги, / в Его́же руце́ дыха́ние всех су́щих.

Песнь 6.

{Α} Ирмос: Бе́здна после́дняя грехо́в обы́де мя, / и волне́ния не ктому́ терпя́, / я́ко Ио́на Влады́це вопию́ Ти: / от тли мя возведи́.

{Κ} Го́спода глаша́ете Мя, о ученицы́, и Учи́теля: / есмь бо, Спа́се вопия́л еси́. / Те́мже подража́йте о́браз, его́же во Мне ви́десте.

{Ρ} Скве́рны кто не име́я, омы́ти не тре́бует ног: / чи́сти же, о ученицы́ вы, но не вси: / мгнове́нием бо безчи́нно еди́н от вас неи́стовствует.

Кондак, глас 2. Подобен: Вы́шних ища́:

Хлеб прие́м в ру́це преда́тель, / сокрове́нно ты́я простира́ет, / и прие́млет це́ну Созда́вшаго Свои́ма рука́ма челове́ка, / и неиспра́влен пребы́сть Иу́да раб и льстец.

Икос: Та́йной трапе́зе, в стра́се прибли́жившеся вси, / чи́стыми душа́ми хлеб прии́мем, спребыва́юще Влады́це: / да ви́дим, ка́ко умыва́ет но́ги ученико́в, / и сотвори́м, я́коже ви́дим, / друг дру́гу покаря́ющеся, и друг дру́гу но́зе умыва́юще, / Христо́с бо та́ко повеле́ Свои́м ученико́м, / предре́к та́ко твори́ти, / но не услы́ша Иу́да раб и льстец.

Синаксарь.

Песнь 7.

{Ο} Ирмос: О́троцы в Вавило́не / пе́щнаго пла́мене не убоя́шася, / но посреде́ пла́мене вве́ржени, ороша́еми поя́ху: / благослове́н еси́ Го́споди, Бо́же оте́ц на́ших.

{Ν} Помава́я главо́ю Иу́да зла́я предзре́в подви́же, / благовре́мение иски́й преда́ти Судию́ на осужде́ние, / И́же всех есть Госпо́дь и Бог оте́ц на́ших.

{Υ} Вам Христо́с друго́м вопия́ше: / еди́н преда́ст Мя, / весе́лия забы́вше, ско́рбию и стра́хом одержи́ми бя́ху: / кто сей, скажи́, глаго́люще, Бо́же оте́ц на́ших?

{Μ} И́же со Мно́ю ру́ку свою́ в соли́ло вложи́т де́рзостию, / тому́ оба́че добро́ бы врата́ жития́ пройти́ никогда́же: / сего́, и́же бе преда́тель, явля́ше Бог оте́ц на́ших.

Песнь 8.

{Ν} Ирмос: За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное, / и совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, / и превозноси́те во вся ве́ки.

{Ο} Сообе́дницы блаже́ннии, / в Сио́не сло́вом претерпе́вше апо́столи после́доваху Па́стырю, / я́ко а́гнцы, и совоку́плени, Его́же не разлучи́шася Христа́, / Боже́ственным сло́вом пита́еми, благода́рственно вопия́ху: / Го́спода по́йте дела, и превозноси́те во вся ве́ки.

{Ν} Зако́нныя дру́жбы злоимени́тый Искарио́т во́лею забы́в, / я́же но́зе умы́, угото́ви на преда́ние: / и Твой яды́й Хлеб, Те́ло Боже́ственное, / воздви́же ков на Тя Христе́, и вопи́ти не разуме́: / Го́спода по́йте дела́, и превозноси́те во вся ве́ки.

{Ε} Приима́ше реши́тельное греха́ Те́ло безсо́вестный, / и Кровь излива́емую за мир Боже́ственную, / но не стыдя́шеся пия́, ю́же продая́ше на цене́, / о зло́бе же не негодова́, и вопи́ти не разуме́: / Го́спода по́йте дела́, и превозноси́те во вся ве́ки.

Песнь 9.

{Ξ} Ирмос: Стра́нствия Влады́чня, / и безсме́ртныя Трапе́зы / на го́рнем ме́сте высо́кими умы́, / ве́рнии, прииди́те, наслади́мся, / возше́дша Сло́ва, / от Сло́ва научи́вшеся, Его́же велича́ем.

{Α} Иди́те, ученико́м сло́во рече́, / Па́сху на го́рничном ме́сте, е́юже ум утвержда́ется, / и сию́ тайноводи́тельно угото́вите, / безква́сным и́стинным сло́вом, / тве́рдое же благода́ти велича́йте.

{Δ} Соде́тельницу Оте́ц пре́жде век прему́дрость ражда́ет Мя, нача́ток путе́й, / в дела́ созда́ ны́не та́йно соверша́емая: / Сло́во бо несозда́нное сый естество́м, / гла́сы присвоя́юся, его́же ны́не прия́х.

{Ω} Я́ко челове́к сый существо́м, не мечта́нием, / си́це Бог нра́вом воздая́ния, естество́ соедини́вшееся мне. / Христа́ еди́наго тем Мя зна́йте, / от ни́хже, в ни́хже, я́же есмь, спаса́юща.

Ексапостиларий, трижды.

Черто́г Твой ви́жду Спа́се мой, украше́нный, / и оде́жды не и́мам да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех поставим стихи 4, и поем стихиры самогласны, глас 2:

Стека́ется про́чее собо́рище иуде́йское, / да Соде́теля и Зижди́теля вся́ческих Пила́ту преда́ст: / о беззако́нных, о неве́рных! / Я́ко гряду́щаго суди́ти живы́м и ме́ртвым, на суд гото́вят: / исцеля́ющаго стра́сти, ко страсте́м уготовля́ют. / Го́споди долготерпели́ве, / ве́лия Твоя́ ми́лость, сла́ва Тебе́.

Иу́да беззако́нный, Го́споди, / омочи́вый на Ве́чери ру́ку в соли́ле с Тобо́ю, / простре́ к беззако́нным ру́це прия́ти сре́бреники, / и ми́ра умы́сливый це́ну, / Тебе́ Безце́ннаго не убоя́ся прода́ти: / но́зе простры́й во е́же умы́ти, / Влады́ку облобыза́ льсти́вно, во е́же преда́ти беззако́нным: / ли́ка же апо́стольскаго отве́ргся, / и три́десять пове́рг сре́бреники, / Твоего́ тридне́внаго воскресе́ния не ве́де, / и́мже поми́луй нас.

Иу́да преда́тель льстив сый, / льсти́вным лобза́нием предаде́ Спа́са Го́спода, и Влады́ку всех, / я́ко раба́ продаде́ иуде́ом: я́ко овча́ на заколе́ние, / та́ко после́доваше А́гнец Бо́жий, Сын О́тчий, / еди́н Многоми́лостивый.

Иу́да раб и льстец, учени́к и наве́тник, / друг и диа́вол от дел яви́ся: / после́доваше бо Учи́телю, и на Него́ поуча́шеся преда́нию, / глаго́лаше в себе́: преда́м Того́, и приобря́щу собра́нная име́ния, / иска́ше же и ми́ру про́дану бы́ти, / и Иису́са ле́стию я́ти. / Отдаде́ целова́ние, предаде́ Христа́: / и я́ко овча́ на заколе́ние, си́це после́доваше / еди́н Благоутро́бный и Человеколю́бец.

Слава, и ныне, глас тойже: Его́же пропове́да А́гнца Иса́иа, / гряде́т на заколе́ние во́льное, / и плещи́ дае́т на ра́ны, лани́ты на зауше́ния, / лица́ же не отврати́ от срамоты́ заплева́ний, / сме́ртию же безобра́зною осужда́ется. / Вся Безгре́шный во́лею прие́млет, / да всем да́рует из ме́ртвых воскресе́ние.

На стиховне стихиры самогласны, глас 8:

Днесь е́же на Христа́ лука́вое собра́ся собо́рище, / и на Него́ тще́тная сове́товаше, / преда́ти Пила́ту на смерть непови́ннаго. / Днесь име́нием удавле́ние Иу́да себе́ облага́ет, / и лиша́ется обою́ду жи́зни привре́менныя и Боже́ственныя. / Днесь Каиа́фа нево́лею проро́чествует: / у́не, глаго́ля, еди́ному умре́ти за лю́ди. / Прии́де бо за грехи́ на́ша пострада́ти, / да нас свободи́т от рабо́ты вра́жия, / я́ко Благ и Человеколю́бец.

Стих: Яды́й хле́бы Моя́, возвели́чи на Мя запина́ние.

Днесь Иу́да нищелю́бия сокрыва́ет лице́, / и лихои́мства открыва́ет зрак: / не ктому́ о ни́щих пече́тся, / не ктому́ ми́ро продае́т гре́шныя, / но небе́сное ми́ро, и от него́ усвоя́ет сре́бренники. / Тече́т ко иуде́ом, глаго́лет беззако́нным: / что ми хо́щете да́ти, и аз вам преда́м Его́? / О сребролю́бия преда́теля! / Удобопрода́тельную твори́т ку́плю, к во́ле купу́ющих, / непродае́маго ку́плю твори́т, / не скуп явля́ется к цене́, / но я́ко раба́ бежа́щаго продае́т: / обы́чай бо кра́дущим мета́ти честна́я. / Ны́не же пове́рже Свята́я псом учени́к, / бесова́ние бо сребролю́бия, / на своего́ Влады́ку неи́стовитися сотвори́ его́. / Его́же искуше́ния бежи́м, зову́ще: / долготерпели́ве Го́споди, сла́ва Тебе́.

Стих: Исхожда́ше вон, и глаго́лаше вку́пе.

Нрав твой льсти исполня́ется, беззако́нный Иу́до: / неду́гуя бо сребролю́бием, приобре́л еси́ человеконенавиде́ние. / А́ще бо бога́тство люби́л еси́, / почто́ ко уча́щему о нищете́ прише́л еси́? / А́ще же и люби́л еси́, / вску́ю про́дал еси́ безце́ннаго, / преда́в на убие́ние? / Ужасни́ся со́лнце, возстени́ земле́, / и дви́жащися возопи́й: / незло́биве Го́споди, сла́ва Тебе́.

Стих: Слово законопреступное возложиша на Мя.

Да никто́же, о ве́рнии, / Влады́чния Ве́чери тайноненауче́н, / никто́же отню́д я́ко Иу́да / льсти́вно да присту́пит к Трапе́зе: / он бо укру́х прие́м, на хле́ба уклони́ся. / О́бразом у́бо сый учени́к, ве́щию же сый уби́йца. / Со иуде́и у́бо веселя́ся, / со апо́столы же водворя́яся: / ненави́дя лобыза́ше, / лобыза́я же продава́ше искупи́вшаго нас кля́твы, / Бо́га и Спа́са душ на́ших.

Слава, глас тойже: Нрав твой льсти:

И ныне, глас 5: Тайново́дствуя Твоя́ Го́споди ученики́, / учи́л еси́ глаго́ля: / о дру́зи, зри́те, да ники́йже страх вас разлучи́т от Мене́: / а́ще бо и стражду́, но за мир. / Не блазни́теся у́бо о Мне: / не приидо́х бо, да послу́жат Ми, / но послужи́ти, и положи́ти ду́шу Мою́ избавле́ние за мир. / А́ще у́бо вы дру́зи Мои́ есте́, Мене́ подража́йте: / хотя́й пе́рвый бы́ти, да бу́дет после́дний, / влады́ка я́ко служи́тель. / Пребу́дите во Мне, да грозд принесете́: / Аз бо есмь лоза́ живо́тная.

Бла́го есть испове́датися Го́сподеви: Совокупляем и час первый, в немже глаголем и тропарь пророчества, глас 3:

Зауше́нный за род челове́ческий, и не прогне́вавыйся / свободи́ от истле́ния живо́т наш Го́споди, и спаси́ нас.

Слава, и ныне, тойже.

Прокимен, глас 1: Да разуме́ют язы́цы, / я́ко и́мя Тебе́ Госпо́дь. Стих: Бо́же, кто уподо́бится Тебе́?

Пророчества Иеремиина чтение. [Глава 11, ст. 18 – 23: глава 12, ст. 1 – 15]

Го́споди, скажи́ ми, и уразуме́ю: тогда́ ви́дех начина́ния их. Аз же я́ко а́гня незло́бивое ведо́мое на заколе́ние не разуме́х, я́ко на мя помы́слиша по́мысл лука́вый, глаго́люще: прииди́те и вложи́м дре́во в хлеб его́, и истреби́м его́ от земли́ живу́щих, и и́мя его́ да не помяне́тся ктому́. Госпо́дь Савао́ф, судя́й пра́ведно, испыту́яй сердца́ и утро́бы, да ви́жду мще́ние Твое́ на них, я́ко к Тебе́ откры́х оправда́ние мое́. Сего́ ра́ди сия́ глаго́лет Госпо́дь на му́жы Анафо́фски и́щущия души́ моея́, глаго́лющия: да не проро́чествуеши о и́мени Госпо́дни: а́ще ли же ни, у́мреши в рука́х на́ших. Сего́ ра́ди сия́ глаго́лет Госпо́дь сил: се Аз посещу́ на них: ю́ноши их мече́м у́мрут, и сы́нове их и дще́ри их сконча́ются гла́дом. И оста́нка не бу́дет от них, наведу́ бо зла́я на живу́щия во Анафо́фе, в ле́то посеще́ния их. Пра́веден еси́ Го́споди, я́ко отвеща́ю к Тебе́, оба́че судьбы́ возглаго́лю к Тебе́: что я́ко путь нечести́вых спе́ется? Угобзи́шася вси творя́щии беззако́ния? Насади́л еси́ их, и укорени́шася: ча́да сотвори́ша, и сотвори́ша плод: близ еси́ Ты уст их, дале́че же от утро́б их. И Ты, Го́споди, разуме́еши мя, ви́дел мя еси́, и искуси́л еси́ се́рдце мое́ пред Тобо́ю, собери́ их я́ко о́вцы на заколе́ние, и очи́сти их в день заколе́ния их. Доко́ле пла́кати и́мать земля́, и трава́ вся се́льная и́зсхнет от зло́бы живу́щих на ней? Погибо́ша ско́ти и пти́цы, я́ко реко́ша: не у́зрит Бог путе́й на́ших. Но́зи твои́ теку́т, и разслабля́ют тя. Иди́те, собери́те вся зве́ри се́льныя, и да прии́дут сне́сти е́. Па́стырие мно́зи растли́ша виногра́д Мой, оскверни́ша часть Мою́, да́ша часть жела́емую Мою́ в пусты́ню непрохо́дную. Положи́ша в потребле́ние па́губы. Я́ко сия́ глаго́лет Госпо́дь о всех сосе́дех лука́вых, прикаса́ющихся насле́дию Моему́, е́же раздели́х лю́дем Мои́м Изра́илю: се Аз исто́ргну их от земли́ их, и дом Иу́дин изве́ргну от среды́ их. И бу́дет егда́ исто́ргну их, обращу́ся и поми́лую их, и вселю́ их, кого́ждо в достоя́ние свое́, и кого́ждо в зе́млю свою́.

Прокимен, глас 8: Помоли́теся и воздади́те / Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие и́мя Его́.

Подобает ведати, яко литии за упокой в притворе не бывает до Недели Фомины.

Прочия же часы поются трипсалмны, просто.

ВО СВЯТЫЙ И ВЕЛИКИЙ ЧЕТВЕРТОК ВЕЧЕРА

Во светильничное, клеплет во 8 час, и благословившу архиерею, или священнику, начинаем Вечерню: Прииди́те поклони́мся: и предначинательный псалом. Бывает ектения от священника. Таже, Го́споди воззва́х, на глас 2, поставляем стихов 10. Священник же изменяяй священническую одежду, исходит, и кадит, и по еже возвратитися, творит проскомидию. Мы же поем стихиры самогласны дне, глас 2, повторяюще я.

Стека́ется про́чее собо́рище иуде́йское, / да Соде́теля и Зижди́теля вся́ческих Пила́ту преда́ст. / О беззако́нных, о неве́рных! / Я́ко гряду́щаго суди́ти живы́м и ме́ртвым, на суд гото́вят: / исцеля́ющаго стра́сти, ко страсте́м уготовля́ют. / Го́споди долготерпели́ве, / ве́лия Твоя́ ми́лость, сла́ва Тебе́.

Иу́да беззако́нный, Го́споди, / омочи́вый на Ве́чери ру́ку в соли́ле с Тобо́ю, / простре́ к беззако́нным ру́це прия́ти сре́бреники, / и ми́ра умы́сливый це́ну, / Тебе́ Безце́ннаго не убоя́ся прода́ти: / но́зе простры́й во е́же умы́ти, / Влады́ку облобыза́ льсти́вно, во е́же преда́ти беззако́нным: / ли́ка же апо́стольскаго отве́ргся, / и три́десять пове́рг сре́бреники, / Твоего́ тридне́внаго воскресе́ния не ве́де, / и́мже поми́луй нас.

Иу́да преда́тель льстив сый, / льсти́вным лобза́нием предаде́ Спа́са Го́спода, и Влады́ку всех, / я́ко раба́ продаде́ иуде́ом: / я́ко овча́ на заколе́ние, / та́ко после́доваше, А́гнец Бо́жий, Сын О́тчий, / еди́н Многоми́лостивый.

Иу́да раб и льстец, учени́к и наве́тник, / друг и диа́вол, от дел яви́ся: / после́доваше бо Учи́телю, / и на Него́ поуча́шеся преда́нию, / глаго́лаше в себе́: преда́м Того́, и приобря́щу со́бранная име́ния, / иска́ше же и ми́ру про́дану бы́ти, / и Иису́са ле́стию я́ти, / отдаде́ целова́ние, предаде́ Христа́. / И я́ко овча́ на заколе́ние, / си́це после́доваше А́гнец Бо́жий, / еди́н Благоутро́бный и Человеколю́бец.

Его́же пропове́да А́гнца Иса́иа, / гряде́т на заколе́ние во́льное, / и плещи́ дае́т на ра́ны, лани́ты на зауше́ния, / лица́ же не отврати́ от срамоты́ заплева́ний, / сме́ртию же безобра́зною осужда́ется. / Вся Безгре́шный во́лею прие́млет, / да всем да́рует из ме́ртвых воскресе́ние.

Слава, и ныне, глас 6:

Рожде́ние ехи́днов вои́стинну Иу́да, / я́дших ма́нну в пусты́ни, и ро́пщущих на Пита́теля: / еще́ бо бра́шну су́щу во усте́х их, / клевета́ху на Бо́га неблагода́рнии: / и сей злочести́вый / Небе́сный Хлеб во усте́х нося́й, / на Спа́са преда́тельство соде́ла. / О нра́ва несы́тнаго, и де́рзости безчелове́чныя! / Пита́ющаго продае́т, / и Его́же любля́ше Влады́ку, предая́ше на смерть: / вои́стинну о́нех сын беззако́нный, / и с ни́ми па́губу насле́дова. / Но пощади́ Го́споди, ду́ши на́ша от такова́го безчелове́чества, / Еди́не в долготерпе́нии неизрече́нный.

Вход со Евангелием. Све́те ти́хий:

Прокимен, глас 1: Изми́ мя Го́споди, от челове́ка лука́ва, / от му́жа непра́ведна изба́ви мя. Стих: И́же помы́слиша непра́вду в се́рдце весь день.

Исхода чтение. [Глава 19, ст. 10 – 19]

Рече́ Госпо́дь Моисе́ю: соше́д засвиде́тельствуй лю́дем, и очи́сти я́ днесь и у́тре: и да исперу́т ри́зы. И да бу́дут гото́вы в день тре́тий: в тре́тий бо день сни́дет Госпо́дь на го́ру Сина́йскую, пред все́ми людьми́. И устро́иши лю́ди о́крест, глаго́ля: внемли́те себе́ не восходи́ти на го́ру, и ничи́мже косну́тися ея́: всяк прикосну́выйся горе́, сме́ртию у́мрет. Не ко́снется ей рука́, ка́мением бо побие́тся, или́ стрело́ю устрели́тся, а́ще скот, а́ще челове́к, не бу́дет жив: егда́ же гла́си и трубы́ и о́блак оты́дет от горы́, си́и взы́дут на го́ру. Сни́де же Моисе́й с горы́ к лю́дем, и освяти́ я́: и испра́ша ри́зы своя́. И рече́ лю́дем: бу́дите гото́ви, три дни не входи́те к жена́м. Бысть же в тре́тий день бы́вшу ко у́тру, и бы́ша гла́си и мо́лния, и о́блак мра́чен на горе́ Сина́йстей, глас тру́бный глаша́ше зело́: и убоя́шася вси лю́дие и́же в полце́. Изведе́ же Моисе́й лю́ди во сре́тение Бо́гу из полка́, и ста́ша под горо́ю. Гора́ же Сина́йская дымя́шеся вся, схожде́ния ра́ди Бо́жия на ню во огни́: и восхожда́ше дым, я́ко дым пе́щный: и ужасо́шася вси лю́дие зело́. Бы́ша же гла́си тру́бнии происходя́ще кре́пцы зело́. Моисе́й глаго́лаше, Бог же отвещава́ше ему́ гла́сом.

Прокимен, глас 7: Изми́ мя от враг мои́х Бо́же, / и от востаю́щих на мя изба́ви мя. Стих: Изба́ви мя от де́лающих беззако́ние.

Иова чтение. [Глава 38, ст. 1 – 23: гл. 42, ст. 1 – 5]

Рече́ Госпо́дь И́ову сквозе́ бу́рю и о́блаки: Кто сей скрыва́яй от Мене́ сове́т, содержа́й же глаго́лы в се́рдце, Мене́ же ли мни́тся утаи́ти? Препоя́ши я́ко муж чре́сла твоя́: вопрошу́ же тя, ты же Ми отвеща́й. Где был еси́ егда́ основа́х зе́млю? Возвести́ Ми, а́ще ве́си ра́зум? Кто положи́ ме́ры ея́, а́ще ве́си; или кто наведы́й вервь на ню? На че́мже столпи́ ея́ утвержде́ни суть? Кто же есть положи́вый ка́мень краеуго́льный на ней? Егда́ [сотворе́ны] бы́ша зве́зды, восхвали́ша Мя гла́сом ве́лиим вси а́нгели Мои́. Загради́х же мо́ре враты́, егда́ излива́шеся из чре́ва ма́тере своея́ исходя́щее. Положи́х же ему́ о́блак во одея́ние, мгло́ю же пови́х е́. И положи́х ему́ преде́лы, обложи́в затво́ры и врата́. Рех же ему́: до сего́ до́йдеши и не пре́йдеши, но в тебе́ сокруша́тся во́лны твоя́. Или́ при тебе́ соста́вих свет у́тренний? Денни́ца же весть чин свой, Я́тися крил земли́, оттрясти́ нечести́выя от нея́. Или́ ты бре́ние взем от земли́, созда́л еси́ живо́тно, и глаго́ливаго сего́ посади́л еси́ на земли́? Отъя́л же ли еси́ от нечести́вых свет? Мы́шцу же го́рдых сокруши́л ли еси́? Прише́л же ли еси́ на исто́чники мо́ря? В следа́х же бе́здны ходи́л ли еси́? Отверза́ются же ли тебе́ стра́хом врата́ сме́ртная? Вра́тницы же а́довы ви́девше тя убоя́шася ли? Навы́кл же ли еси́ широты́ поднебе́сныя; пове́ждь у́бо Ми, коли́ка есть. В ко́ей же земли́ вселя́ется свет? Тьме же ко́е есть ме́сто? А́ще у́бо введе́ши Мя в преде́лы их, а́ще же ли и ве́си стези́ их? Вем у́бо я́ко тогда́ рожде́н еси́, число́ же лет твои́х мно́го. Прише́л же ли еси́ в сокро́вища сне́жная, и сокро́вища гра́дная ви́дел ли еси́? Подлежа́т же ли тебе́ в час враго́в в день бра́ней и ра́ти? Отвеща́в же И́ов, рече́ ко Го́споду: Вем я́ко вся мо́жеши, невозмо́жно же Тебе́ ничто́же. Кто есть тая́й от Тебе́ сове́т? Щадя́й же словеса́, и от Тебе́ мни́тся утаи́ти? Кто же возвести́т ми, и́хже не ве́дех, ве́лия и ди́вная, и́хже не знах? Послу́шай же мене́ Го́споди, да и аз возглаго́лю: вопрошу́ же Тя, Ты же мя научи́. Слу́хом у́бо у́ха слы́шах Тя пе́рвее, ны́не же о́ко мое́ ви́де Тя.

Пророчества Исаиина чтение. [Глава 8, ст. 4 – 11]

Госпо́дь дае́т мне язы́к науче́ния, е́же разуме́ти, егда́ подоба́ет рещи́ сло́во: положи́ мя у́тро у́тро, приложи́ ми у́хо, е́же слы́шати. И наказа́ние Госпо́дне отверза́ет у́ши мои́, аз же не проти́влюся, ни противоглаго́лю. Плещи́ мои́ вдах на ра́ны, и лани́те мои́ на зауше́ния, лица́ же моего́ не отврати́х от студа́ заплева́ний. И Госпо́дь Госпо́дь помо́щник ми бысть: сего́ ра́ди не усрами́хся, но положи́х лице́ свое́ а́ки тве́рдый ка́мень, и разуме́х, я́ко не постыжду́ся. Зане́ приближа́ется оправда́вый мя: кто пря́йся со мно́ю; да сопротивоста́нет мне ку́пно: и кто судя́йся со мно́ю: да прибли́жится ко мне. Се Госпо́дь Госпо́дь помо́жет ми: кто озло́бит мя; се вси вы, я́ко ри́за обетша́ете, и я́ко мо́лие изъя́ст вы. Кто в вас боя́йся Го́спода; да послу́шает гла́са о́трока Его́: ходя́щии во тьме, и несть им све́та, наде́йтеся на и́мя Госпо́дне, и утверди́теся о Бо́зе. Се вси вы огнь раждиза́ете, и укрепля́ете пла́мень: ходи́те све́том огня́ ва́шего, и пла́менем, его́же разжего́сте: мене́ ра́ди бы́ша сия́ вам, в печа́ли у́спнете.

Таже, ектения малая. Трисвятое.

Прокимен Апостола, глас 7: Кня́зи лю́дстии собра́шася вку́пе / на Го́спода и на Христа́ Его́. Стих: Вску́ю шата́шася язы́цы, и лю́дие поучи́шася тще́тным.

Апостол к Коринфяном, зачало 149. [1 Кор. 11, 23 – 32.]

Бра́тие, аз прия́х от Го́спода, е́же и преда́х вам, я́ко Госпо́дь Иису́с в нощь, в ню́же пре́дан быва́ше, прие́мь хлеб, И благодари́в преломи́, и рече́: приими́те, яди́те, сие́ есть Те́ло Мое́, е́же за вы ломи́мое: сие́ твори́те в Мое́ воспомина́ние. Та́кожде и ча́шу по ве́чери, глаго́ля: сия́ ча́ша Но́вый Заве́т есть в Мое́й Кро́ви: сие́ твори́те, ели́жды а́ще пие́те, в Мое́ воспомина́ние. Ели́жды бо а́ще я́сте хлеб сей и ча́шу сию́ пие́те, смерть Госпо́дню возвеща́ете, до́ндеже прии́дет. Те́мже и́же а́ще яст хлеб сей или́ пие́т ча́шу Госпо́дню недосто́йне, пови́нен бу́дет Те́лу и Кро́ви Госпо́дни. Да искуша́ет же челове́к себе́, и та́ко от хле́ба да яст и от ча́ши да пие́т. Яды́й бо и пия́й недосто́йне, суд себе́ яст и пие́т, не разсужда́я те́ла Госпо́дня. Сего́ ра́ди в вас мно́зи не́мощни и неду́жливи, и спят дово́льни. А́ще бо бы́хом себе́ разсужда́ли, не бы́хом осужде́ни бы́ли. Суди́ми же, от Го́спода наказу́емся, да не с ми́ром осу́димся.

Аллилуиа, глас 6: Блаже́н разумева́яй на ни́ща и убо́га, в день лют изба́вит его́ Госпо́дь. Стих: Врази́ мои́ ре́ша мне зла́я: когда́ у́мрет и поги́бнет и́мя его́? Стих: Яды́й хле́бы Моя́, возвели́чи на Мя запина́ние.

Евангелие от Матфеа, зачало 107 [Мф. 26, 1 – 20]; от Иоанна, зачало 44 [Ин. 13, 3 – 17]; от Матфеа, зачало 108 от полу [Мф. 26, 21 – 39]; от Луки, зачало 109 [Лк. 22, 43 – 45]; от Матфеа, зачало 108 [Мф. 26, 40 – 27, 2].

Рече́ Госпо́дь Свои́м ученико́м: Ве́сте, я́ко по двою́ дню Па́сха бу́дет, и Сын Челове́ческий пре́дан бу́дет на пропя́тие. Тогда́ собра́шася архиере́е, и кни́жницы и ста́рцы людсти́и во двор архиере́ов, глаго́лемаго Каиа́фы. И совеща́ша, да Иису́са ле́стию и́мут, и убию́т. Глаго́лаху же: но не в пра́здник, да не молва́ бу́дет в лю́дех. Иису́су же бы́вшу в Вифа́нии, в дому́ Си́мона прокаже́ннаго. Приступи́ к Нему́ жена́, сткля́ницу ми́ра иму́щи многоце́ннаго, и возлива́ше на главу́ Его́, возлежа́щу. Ви́девше же ученицы́ Его́, негодова́ша, глаго́люще: чесо́ ра́ди ги́бель сия́ бысть? Можа́ше бо сие́ ми́ро продано́ бы́ти на мно́зе, и да́тися ни́щим. Разуме́в же Иису́с рече́ им: что тружда́ете жену́? Де́ло бо добро́ соде́ла о Мне. Всегда́ бо ни́щия и́мате с собо́ю, Мене́ же не всегда́ и́мате. Возлия́вши бо сия́ ми́ро сие́ на те́ло Мое́, на погребе́ние Мя сотвори́. Ами́нь глаго́лю вам: иде́же а́ще пропове́дано бу́дет Ева́нгелие сие́ во всем ми́ре, рече́тся, и е́же сотвори́ сия́, в па́мять ея́. Тогда́ шед еди́н от oбоюна́десяте, глаго́лемый Иу́да Искарио́тский, ко архиере́ом. Рече́: что ми хо́щете да́ти, и аз вам преда́м Его́? Oни́ же поста́виша ему́ три́десять сре́бреник. И отто́ле иска́ше подо́бна вре́мене, да Его́ преда́ст. В пе́рвый же день опресно́чный приступи́ша ученицы́ Иису́сови, глаго́люще Ему́: где хо́щеши, угото́ваем Ти я́сти па́сху? Oн же рече́: иди́те во град ко óнсице, и рцы́те ему́: Учи́тель глаго́лет, вре́мя Мое́ близ есть, у тебе́ сотворю́ па́сху со ученики́ Мои́ми. И сотвори́ша ученицы́, я́коже повеле́ им Иису́с, и угото́ваша па́сху. Ве́черу же бы́вшу возлежа́ше со oбемана́десяте ученико́ма.

Ве́дый Иису́с, я́ко вся даде́ Ему́ Oте́ц в ру́це, и я́ко от Бо́га изы́де, и к Бо́гу гряде́т. Воста́в с ве́чери, и положи́ ри́зы, и прие́м ле́нтион, препоя́сася. Пото́м же влия́ во́ду во умыва́льницу, и нача́т умыва́ти но́ги ученико́м, и отира́ти ле́нтием, и́мже бе препоя́сан. Прии́де же к Си́мону Петру́, и глаго́ла Ему́ той: Го́споди, Ты ли мои́ умы́еши но́зе? Отвеща́ Иису́с, и рече́ ему́: е́же Аз творю́, ты не ве́си ны́не, разуме́еши же по сих. Глаго́ла Ему́ Петр: не умы́еши но́гу мое́ю во ве́ки. Отвеща́ ему́ Иису́с: а́ще не умы́ю тебе́, не и́маши ча́сти со Мно́ю. Глаго́ла Ему́ Си́мон Петр: Го́споди, не но́зе мои́ то́кмо, но и ру́це и главу́. Глаго́ла ему́ Иису́с: измове́нный не тре́бует, то́кмо но́зе умы́ти, есть бо весь чист: и вы чи́сти есте́, но не вси. Ве́дяше бо предаю́щаго Его́, сего́ ра́ди рече́: я́ко не вси чи́сти есте́. Егда́ же умы́ но́ги их, прия́т ри́зы Своя́, возле́г па́ки, рече́ им: ве́сте ли что сотвори́х вам? Вы глаша́ете Мя Учи́теля и Го́спода: и до́бре глаго́лете, есмь бо. А́ще у́бо Аз умы́х ва́ши но́зе, Госпо́дь и Учи́тель, и вы до́лжни есте́ друг дру́гу умыва́ти но́зе. О́браз бо дах вам, да я́коже Аз сотвори́х вам, и вы твори́те. Ами́нь ами́нь глаго́лю вам: несть раб бо́лий го́спода своего́, ни посла́нник бо́лий посла́вшаго его́. А́ще сия́ ве́сте, блаже́ни есте́, а́ще творите́ я́.

И яду́щим им, рече́: ами́нь глаго́лю вам, я́ко еди́н от вас преда́ст Мя. И скорбя́ще зело́, нача́ша глаго́лати Ему́ еди́н ки́йждо их: еда́ аз есмь, Го́споди? Oн же отвеща́в рече́: омочи́вый со Мно́ю в соли́ло ру́ку, той Мя преда́ст. Сын же Челове́ческий и́дет, я́коже есть пи́сано о Нем. Горе́ же челове́ку тому́, и́мже Сын Челове́ческий преда́стся: добро́ бы бы́ло ему́, а́ще не бы роди́лся челове́к той. Отвеща́в же Иу́да предая́й Его́, рече́: еда́ аз есмь, Равви́? Глаго́ла ему́: ты рече́. Яду́щим же им, прие́м Иису́с хлеб, и благослови́в преломи́, и дая́ше ученико́м, и рече́: приими́те, яди́те, сие́ есть Те́ло Мое́. И прие́м ча́шу, хвалу́ возда́в, даде́ им, глаго́ля: пи́йте от нея́ вси. Сия́ бо есть Кровь Моя́, Но́ваго Заве́та, я́же за мно́гия излива́ема, во оставле́ние грехо́в. Глаго́лю же вам: я́ко не и́мам пи́ти от ны́не от сего́ плода́ ло́знаго, до дне того́, егда́ и́ пию́ с ва́ми но́во во Ца́рствии Oтца́ Моего́. И воспе́вше, изыдо́ша в го́ру Елео́нску. Тогда́ глаго́ла им Иису́с: вси вы соблазните́ся о Мне в нощь сию́. Пи́сано бо есть: поражу́ па́стыря, и разы́дутся óвцы ста́да. По воскресе́нии же Мое́м, варя́ю вы в Галиле́и. Отвеща́в же Петр рече́ Ему́: а́ще и вси соблазня́тся о Тебе́, аз никогда́же соблажню́ся. Рече́ ему́ Иису́с: ами́нь глаго́лю тебе́, я́ко в сию́ нощь, пре́жде да́же але́ктор не возгласи́т, трикра́ты отве́ржешися Мене́. Глаго́ла Ему́ Петр: а́ще ми есть и умре́ти с Тобо́ю, не отве́ргуся Тебе́. Та́кожде и вси ученицы́ ре́ша. Тогда́ прии́де с ни́ми Иису́с в весь, нарица́емую Гефсима́ниа, и глаго́ла ученико́м: седи́те ту, до́ндеже шед помолю́ся та́мо. И пое́м Петра́ и óба сы́на Зеведе́ова, нача́т скорбе́ти и тужи́ти. Тогда́ глаго́ла им Иису́с: приско́рбна есть душа́ Моя́ до сме́рти: пожди́те зде, и бди́те со Мно́ю. И преше́д ма́ло, паде́ на лице́ Свое́м, моля́ся и глаго́ля: Óтче Мой, а́ще возмо́жно есть, да мимои́дет от Мене́ ча́ша сия́: oба́че не я́коже Аз хощу́, но я́коже Ты.

Яви́ся же Ему́ А́нгел с небесе́, укрепля́я Его́. И быв в по́двизе, приле́жнее моля́шеся: бысть же пот Его́, я́ко ка́пля кро́ве ка́плющи на зе́млю. И воста́в от моли́твы, прии́де ко ученико́м, и обре́те их спя́ща, и глаго́ла Петро́ви: та́ко ли не возмого́сте еди́наго часа́ побде́ти со Мно́ю? Бди́те и моли́теся, да не вни́дете в напа́сть: дух бо бодр, плоть же немощна́. Па́ки втори́цею шед помоли́ся, глаго́ля: Óтче мой, а́ще не мо́жет сия́ ча́ша мимоити́ от Мене́, а́ще не пию́ ея́, бу́ди во́ля Твоя́. И прише́д обре́те их па́ки спя́ща, бе́ста бо им óчи отяготе́не. И оста́вль их, шед па́ки помоли́ся трети́цею, то́жде сло́во рек. Тогда́ прии́де ко ученико́м Свои́м и глаго́ла им: спи́те про́чее, и почива́йте: се прибли́жися час, и Сын Челове́ческий предае́тся в ру́ки гре́шников. Воста́ните, и́дем: се прибли́жися предая́й Мя. И еще́ Ему́ глаго́лющу, се, Иу́да, еди́н от обоюна́десяте прии́де, и с ним наро́д мног, со oру́жием и дреко́льми, от архиере́й и ста́рец людски́х. Предая́й же Его́, даде́ им зна́мение, глаго́ля: Его́же а́ще лобжу́, Той есть, ими́те Его́. И а́бие присту́пль ко Иису́сови, рече́: ра́дуйся, Равви́, и облобыза́ Его́. Иису́с же рече́ ему́: дру́же, твори́ на не́же еси́ прише́л. Тогда́ присту́пльше возложи́ша ру́це на Иису́са, и я́ша Его́. И се, еди́н от су́щих со Иису́сом, просте́р ру́ку, извлече́ нож свой, и уда́ри раба́ архиере́ова, и уре́за ему́ у́хо. Тогда́ глаго́ла ему́ Иису́с: возврати́ нож твой в ме́сто его́: вси бо прие́мшии нож ноже́м поги́бнут. Или́ мни́тся ти, я́ко не могу́ ны́не умоли́ти Oтца́ Моего́, и предста́вит Ми вя́щше или́ двана́десяте легео́на А́нгел? Ка́ко у́бо сбу́дутся писа́ния, я́ко та́ко подоба́ет бы́ти? В той час рече́ Иису́с наро́дом: я́ко на разбо́йника ли изыдо́сте со ору́жием и дреко́льми, я́ти Мя; по вся дни при вас седе́х уча́ в це́ркви, и не я́сте Мене́. Се же все бысть, да сбу́дутся писа́ния проро́ческая. Тогда́ ученицы́ вси оста́вльше Его́, бежа́ша. Во́ини же е́мше Иису́са ведо́ша к Каиа́фе архиере́ови, иде́же кни́жницы и ста́рцы собра́шася. Петр же идя́ше по Нем издале́ча, до двора́ архиере́ова: и вшед внутрь, седя́ше со слуга́ми, ви́дети кончи́ну. Архиере́е же и ста́рцы, и сонм весь иска́ху лжесвиде́тельства на Иису́са, я́ко да убию́т Его́. И не обрета́ху: и мно́гим лжесвиде́телем присту́пльшим, не обрето́ша. По́слежде же приступи́ша два лжесвиде́теля. Ре́ста: Сей рече́, могу́ разори́ти це́рковь Бо́жию и треми́ де́ньми созда́ти ю́. И воста́в архиере́й, рече́ Ему́: ничесо́же ли отвещава́еши, что си́и на Тя свиде́тельствуют? Иису́с же молча́ше. И отвеща́в архиере́й, рече́ Ему́: заклина́ю Тя Бо́гом живы́м, да рече́ши нам, а́ще Ты еси́ Христо́с, Сын Бо́жий? Глаго́ла ему́ Иису́с: ты рече́. Oба́че глаго́лю вам: отсе́ле у́зрите Сы́на Челове́ческаго седя́ща одесну́ю си́лы, и гряду́ща на о́блацех небе́сных. Тогда́ архиере́й растерза́ ри́зы своя́, глаго́ля, я́ко хулу́ глаго́ла, что еще́ тре́буем свиде́телей? Се ны́не слы́шасте хулу́ Его́. Что ся вам мнит? Oни́ же отвеща́вше, ре́ша: пови́нен есть сме́рти. Тогда́ заплева́ша лице́ Его́, и па́кости Ему́ де́яху, óвии же за лани́ту уда́риша, Глаго́люще: прорцы́ нам, Христе́, кто есть ударе́й Тя? Петр же вне седя́ше во дворе́, и приступи́ к нему́ еди́на рабы́ня, глаго́лющи: и ты бе со Иису́сом Галиле́йским. Oн же отве́ржеся пред все́ми, глаго́ля: не вем, что глаго́леши. Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом. И па́ки отве́ржеся с кля́твою: я́ко не зна́ю Челове́ка. По ма́ле же приступи́вше стоя́щии, ре́ша Петро́ви: вои́стинну и ты от них еси́, и́бо бесе́да твоя́ я́ве тя твори́т. Тогда́ нача́т роти́тися и кля́тися, я́ко не зна́ю Челове́ка. И а́бие пе́тель возгласи́. И помяну́ Петр глаго́л Иису́сов, рече́нный ему́: я́ко пре́жде да́же пе́тель не возгласи́т, трикра́ты отве́ржешися Мене́. И изше́д вон пла́кася го́рько. У́тру же бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону.

И по чину Божественная Литургиа Великаго Василиа. Вместо же херувимския песни поем тропарь сей, на глас 6, трижды.

Ве́чери Твоея́ Та́йныя днесь, Сы́не Бо́жий, / прича́стника мя приими́: / не бо враго́м Твои́м та́йну пове́м, / ни лобза́ния Ти дам я́ко Иу́да, / но я́ко разбо́йник испове́даю Тя: / помяни́ мя Го́споди во Ца́рствии Твое́м.

Тойже и причастен, и вместо, Да испо́лнятся уста́ на́ша: тойже поем множицею, дондеже причастятся братия Божественных Таин. По заамвонной же молитве бывает умовение, и его последование, якоже являет Устав. Таже дается антидор, и отпуст. На трапезе же причащаемся вина и елеа.

Отпуст:

И́же за превосходя́щую бла́гость путь добре́йший смире́ния показа́вый, внегда́ умы́ти но́ги ученико́в, да́же и до Креста́ и погребе́ния снизше́дый нам, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, и всех святы́х, поми́лует и спасе́т нас, я́ко Благ и Человеколю́бец.

В ТОЙЖЕ ВЕЛИКИЙ ЧЕТВЕРТОК

Повечерие глаголем малое, на немже поем трипеснец. Творение господина Андреа Критскаго. Глас 8.

Песнь 5.

Ирмос: Мрак души́ моея́ разжени́, светода́вче Христе́ Бо́же, / началоро́дную тьму изгна́в бе́здны, / и да́руй ми свет повеле́ний Твои́х, Сло́ве, / да у́тренюя, сла́влю Тя.

Украси́ся ве́черя, и угото́вася Тебе́ па́сха, / я́коже рекл еси́ Христе́, / но Иу́да на преда́ние Твое́ поуча́шеся, / сый с Тобо́ю вне Твоея́ цены́, / соглаша́шеся сребролю́бием.

Востае́т с ве́чери, и ле́нтием препоясу́ется по чре́слом Христо́с во́лею, / и преклоня́ет вы́ю, Петру́ вопию́щу: / никогда́же мои́ но́зе умы́еши Тво́рче мой, но оба́че омы́й.

Прия́т хлеб в ру́це, на преда́ние Иу́да, льсти́вый учени́к, / и́мже и преда́ние соде́ла Тебе́, / простира́ше но́зе, и́хже сам еси́ омы́л и ле́нтием оте́рл.

Лобза́нием льсти́вным Иу́да тогда́ уста́ распира́ше Тебе́, / и́миже те́ло Твое́ Сло́ве недосто́йно омака́ше, / вопия́ Тебе́: ра́дуйся Учи́телю, / лобза́тель и преда́тель, раб и льстец.

Петр я́коже зря́ше содева́емая тогда́, / у́жасом одержи́мь быв / рабы́ни обличи́ся худы́м вопроше́нием: / и́бо отве́ржеся Тебе́ Го́спода, / не то́кмо я́коже рекл еси́, / но и я́ко ве́дал еси́, вся ве́дый.

Зауша́ется Зижди́тель, и ударя́ется тварь поноше́нием Его́: / тро́стию бие́тся хотя́, и вы́шняя преклоня́ются: / оплева́ется Судия́, и основа́ния вся земна́я подвиза́ются.

Слава: Те́рнием венчава́ется Бог, зе́млю всю украше́й цве́ты, / и ра́ны прие́млет, и терпи́т поноше́ние долготерпели́вно, / и багряни́цу поруга́ния но́сит, / и терпи́т вся Бог сый, и стра́ждет Свое́ю пло́тию.

И ныне: Да вопие́т Иоа́нн, сказу́я уче́нии Боже́ственными воплоще́ние Твое́: / Сло́во плоть быв из Де́вы непрело́жно, / и пребы́сть естество́м Бог я́коже бе, / не отступи́в Оте́ческих Его́ недр.

Песнь 8.

Ирмос: Покрыва́яй вода́ми превы́спренняя Своя́, / полага́яй мо́рю преде́л песо́к и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.

Одева́яй о́блаки не́бо Иису́се, / на престо́ле сла́вы ца́рствуя с нетле́нным Отце́м, / Ты прие́мь ле́нтий, сим препояс́ался еси́ омы́ти но́ги бре́ннии, / весь огнь сый Сло́ве, а́ще и воплоти́лся еси́.

Я́коже вся омы́в, возле́г Иису́с, к Свои́м ученико́м глаго́лет: / ве́сте вси, что сотвори́х ны́не: / о́браз бо дах вам смире́ния всем: / да и́же хо́щет пе́рвый бы́ти, / да бу́дет всех после́дний произволе́нием.

Чи́сти у́бо есте́, но не вси вы, / Христо́с друго́м возлежа́щим на ве́чери рече́: / еди́н у́бо к друго́му не дове́дяще, рече́, сло́ва: / те́мже по сих глаго́лет я́ве и́мя преда́теля.

Я́коже сия́ глаго́ля, / на горе́ Елео́нстей прише́д, Судия́ всех со ученики́, / тогда́ у́бо глаго́лаше: / прииди́те и по́йдем отсю́ду, / приспе́ бо уже́ преда́тель: / никто́же отве́ржися Мене́, во́лею бо стражду́.

О ле́стнаго лобза́ния! / Ра́дуйся Учи́телю, Христу́ Иу́да глаго́лет, / вку́пе с сло́вом преда́ст на заколе́ние: / се бо даде́ зна́мение беззако́нным: / Его́же аз лобжу́, Той есть, / Его́же преда́ти вам обеща́хся.

Ят быв Бо́же наш от беззако́нных люде́й, / и не пререку́я отню́д, ни вопия́ А́гнче Бо́жий, / претерпе́л еси́ вся, испыта́тися, и суди́тися, и бие́н бы́ти, / свя́зан и ведо́м бы́ти со ору́жии и дреко́льми к Каиа́фе.

Да ра́спнется, вопия́ху евре́йстии лю́дие со свяще́нники и кни́жники, Иису́с Христо́с. / О лю́дие неве́рнии! / Что бо сотвори́ яви́выйся, воздви́гнувый Ла́заря от гро́ба, / и путь сотвори́вый челове́ком на спасе́ние?

Пила́тову суди́щу беззако́ннии лю́дие, крича́ще вопия́ху: / распни́ Сего́, отпусти́ же нам свя́зана су́ща Вара́вву, уби́йцу: / Христа́ же пе́рвее бив, возми́ возми́, распни́ со злоде́и.

Благослови́м Отца́ и Сы́на, и Свята́го Ду́ха, Го́спода.

О несказа́ннаго истоща́ния! О неизглаго́ланнаго сове́та! / Я́ко огнь сый, омы́л еси́ но́зе преда́телю Спа́се: / омы́в же не опали́л еси́, / и подава́я хлеб на ве́чери, и та́йной слу́жбе науча́л еси́.

И ныне, Богородичен: О но́ваго слы́шания! / Бог Сын Жены́, и безсе́менна рождества́, безму́жная Ма́ти, и рожде́нное Бог: / о ужа́снаго слы́шания! О зача́тия стра́шнаго! / О Де́вы нетле́ннаго рождества́! / Вои́стинну па́че ума́ вся, и вы́ше ве́дения.

Песнь 9.

Ирмос: Благослове́н Госпо́дь, Бог Изра́илев, / воздви́гнувый рог спасе́ния нам, / в дому́ Дави́дове, о́трока Своего́, / в ни́хже посети́ нас Восто́к с высоты́, / и напра́вил ны есть на путь ми́ра.

Па́ки вы спите́, Христо́с ученико́м рече́: / бди́те, прибли́жися час про́чее, воста́ните, / и́дем дру́зи Мои́, / се преда́тель учени́к всю спи́ру име́я, / гряде́т преда́ти Мя человекоуби́йцам.

Лобза́ние твое́ льсти́вное, и целова́ние го́рькое, / кому́ зове́ши ле́стче; глаго́ля бо, ра́дуйся Равви́, / Христо́с ко Иу́де веща́ше: / дру́же, на не́же прише́л еси́, рече́: / а́ще бо целова́ти прише́л еси́, / что предлага́еши нож ме́дом пома́занный?

Пила́тову суди́щу непови́нный Судия́, / во́лею прише́л еси́ предста́ти Христе́, / и изба́вити нас от долго́в на́ших. / Те́мже претерпе́л еси́ Благи́й пло́тию ура́нен бы́ти, / да вси прии́мем свобожде́ние.

Милосе́рдия пучи́на, ка́ко предстои́т огнь Пила́ту, / се́ну и тро́сти и земли́ су́щей, / его́же не опали́ огнь Божества́ Христо́с, но пожида́ше терпели́вно, / и́же естество́м свобо́дь я́ко Человеколю́бец.

Возми́ возми́, распни́ глаго́лемаго Христа́, / иуде́е взыва́ху Пила́ту иногда́: / сей же ру́це омыва́ше, / и тро́стию им писа́ше на Него́ вину́, / всем да́рующую безсме́ртие.

Вопию́ще беззако́ннии Пила́ту изли́ше: / возми́ возми́, распни́ Христа́, / прося́ху уби́ти я́ко осужде́на: / не Сей ли воскреси́ ме́ртвыя, прокаже́нныя очи́сти, / кровоточи́вую исцели́, разсла́бленныя стягну́в?

Что бо зло сотвори́, я́ко взыва́ете вельми́: / возми́ возми́, распни́ Его́? / Пила́т иногда́ вопия́ше лю́дем неразу́мным: / вины́ не обрета́ю в Нем. / Они́ же го́рько вопия́ху: / возми́ возми́, распни́ Спа́са всех.

О иуде́е беззако́ннии! О неразу́мнии лю́дие! / Не помяну́сте ли что от чуде́с Христо́вых, мно́жество исцеле́ний? / Но и всея́ Его́ не разуме́сте ли Боже́ственныя си́лы, / я́коже пе́рвии отцы́ ва́ши, ны́не же и вы не разуме́сте?

Слава: Бие́н быв Зижди́телю мой, и преда́лся еси́ мене́ ра́ди распя́тися, / да спасе́ние мое́ посреде́ земли́ соде́лав, источи́ши ми́рови жизнь: / и обезсме́ртиши честно́ю Твое́ю кро́вию покланя́ющияся Тебе́.

И ныне, Богородичен: А́гница Твоя́ Влады́ко, предстоя́щи у Креста́, / и рыда́ющи Тебе́ Творца́ вся́ческих, / зря́ше Твое́ долготерпе́ние: / во́лею бо роди́лся еси́ пло́тию, / и стра́сти вся в ней претерпе́л еси́, да спасе́ши мир.

ВО СВЯТЫЙ И ВЕЛИКИЙ ЧЕТВЕРТОК ВЕЧЕРА

во 2-й час нощи знаменует. И собравшимся нам во храм, благословившу священнику поем начало по обычаю, якоже в четверток 5-й седмицы. Таже шестопсалмие. Посем ектения великая, и по возгласе поем, Аллилу́иа, на глас 8. И тропарь: Егда́ сла́внии ученицы́: трижды, косно и со сладкопением. Писан в Великий Четверток на Утрени. Таже ектения малая. И даются свещи братии от екклисиарха. И глаголет священник: И о сподо́битися нам:

И чтет первое Евангелие от Иоанна, завета Святых Страстей, зачало 46:

Рече́ Госпо́дь Свои́м ученико́м: ны́не просла́вися Сын Челове́ческий, и Бог просла́вися о Нем. А́ще Бог просла́вися о Нем, и Бог просла́вит Его́ в Себе, и а́бие прославит Его́. Ча́дца, еще́ с ва́ми ма́ло есмь: взы́щете Мене́, и я́коже рех иуде́ом, я́ко а́може Аз иду, вы не мо́жете приити́, и вам глаго́лю ны́не. За́поведь но́вую даю́ вам, да лю́бите друг дру́га: я́коже возлюби́х вы, да и вы лю́бите себе́. О сем разуме́ют вси, я́ко Мои́ ученицы́ есте́, а́ще любо́вь и́мате между́ собо́ю. Глаго́ла Ему́ Си́мон Петр: Го́споди, ка́мо и́деши? Отвеща́ ему́ Иису́с: а́може Аз иду́, не мо́жеши ны́не по Мне ити́, последи́ же по Мне и́деши. Глаго́ла Ему́ Петр: Го́споди, почто́ не могу́ ны́не по Тебе́ ити́? Ны́не ду́шу мою́ за Тя положу́. Отвеща́ ему́ Иису́с: ду́шу ли твою́ за Мя положи́ши? Ами́нь, ами́нь глаго́лю тебе́: не возгласи́т але́ктор, до́ндеже отве́ржешися Мене́ три́щи.

Да не смуща́ется се́рдце ва́ше: ве́руйте в Бо́га, и в Мя ве́руйте: В дому́ Отца́ Моего́ оби́тели мно́ги суть: а́ще ли же ни, рекл бых вам: иду́ угото́вати ме́сто вам. И а́ще угото́влю ме́сто вам, па́ки прииду́, и поиму́ вы к Себе́: да иде́же есмь Аз и вы бу́дете. И а́може Аз иду́, ве́сте, и путь ве́сте. Глаго́ла Ему́ Фома́: Го́споди, не ве́мы, ка́мо и́деши; и ка́ко мо́жем путь ве́дети? Глаго́ла ему́ Иису́с: Аз есмь путь, и и́стина, и живо́т: никто́же прии́дет ко Отцу́, то́кмо Мно́ю. А́ще Мя бы́сте зна́ли, и Отца́ Моего́ зна́ли бы́сте у́бо: и отсе́ле позна́сте Его́, и ви́десте Его́. Глаго́ла Ему́ Фили́пп: Го́споди, покажи́ нам Отца́, и довле́ет нам. Глаго́ла ему́ Иису́с: толи́ко вре́мя с ва́ми есмь, и не позна́л еси́ Мене́, Фили́ппе? Ви́девый Мене́, ви́де Отца́: и ка́ко ты глаго́леши, покажи́ нам Отца́? Не ве́руеши ли, я́ко Аз во Отце́, и Оте́ц во Мне есть? Глаго́лы, я́же Аз глаго́лю вам, о Себе́ не глаго́лю: Оте́ц же во Мне пребыва́яй, Той твори́т дела́. Ве́руйте Мне, я́ко Аз во Отце́, и Оте́ц во Мне: а́ще ли же ни, за та дела́ ве́ру ими́те Ми. Ами́нь, ами́нь глаго́лю вам: ве́руяй в Мя, дела́, я́же Аз творю́, и той сотвори́т, и бо́льша сих сотвори́т, я́ко Аз ко Отцу́ Моему́ гряду́. И е́же а́ще что про́сите от Отца́ о и́мени Мое́м, то сотворю́, да просла́вится Оте́ц в Сы́не. И а́ще чесо́ про́сите во и́мя Мое́, Аз сотворю́. А́ще лю́бите Мя, за́поведи Моя́ соблюди́те. И Аз умолю́ Отца́, и ино́го Уте́шителя даст вам, да бу́дет с ва́ми в век, Дух и́стины, Его́же мир не мо́жет прия́ти, я́ко не ви́дит Его́, ниже́ зна́ет Его́: вы же зна́ете Его́, я́ко в вас пребыва́ет, и в вас бу́дет. Не оста́влю вас си́ры: прииду́ к вам. Еще́ ма́ло, и мир ктому́ не ви́дит Мене́, вы же ви́дите Мя, я́ко Аз живу́, и вы жи́ви бу́дете. В той день разуме́ете вы, я́ко Аз во Отце́ Мое́м, и вы во Мне, и Аз в вас. Име́яй за́поведи Моя́ и соблюда́яй их, той есть любя́й Мя, а любя́й Мя возлю́блен бу́дет Отце́м Мои́м, и Аз возлюблю́ его́, и явлю́ся ему́ Сам. Глаго́ла Ему́ Иу́да, не Искарио́тский: Го́споди, и что бысть, я́ко нам хо́щеши яви́тися, а не ми́рови? Отвеща́ Иису́с, и рече́ ему́: а́ще кто лю́бит Мя, сло́во Мое́ соблюде́т: и Оте́ц Мой возлю́бит его́, и к нему́ прии́дема, и оби́тель у него́ сотвори́ма. Не любя́й Мя, слове́с Мои́х не соблюда́ет: и сло́во, е́же слы́шасте, несть Мое́, но посла́вшаго Мя Отца́. Сия́ глаго́лах вам в вас сый: Уте́шитель же, Дух Святы́й, Его́же по́слет Оте́ц во и́мя Мое́, Той вы научи́т всему́, и воспомяне́т вам вся, я́же рех вам. Мир оставля́ю вам, мир Мой даю вам: не я́коже мир дае́т, Аз даю́ вам. Да не смуща́ется се́рдце ва́ше, ни устраша́ет. Слы́шасте, я́ко Аз рех вам: иду́ и прииду́ к вам. А́ще бы́сте люби́ли Мя, возра́довалися бы́сте у́бо, я́ко рех: иду ко Отцу́: я́ко Оте́ц Мой бо́лий Мене́ есть. И ны́не рех вам, пре́жде да́же не бу́дет, да, егда́ бу́дет, ве́ру и́мете. Ктому́ не мно́го глаго́лю с ва́ми: гряде́т бо сего́ ми́ра князь, и во Мне не и́мать ничесо́же. Но да разуме́ет мир, я́ко люблю́ Отца́, и я́коже запове́да Мне Оте́ц, та́ко творю́: воста́ните, и́дем отсю́ду.

Аз есмь лоза́ и́стинная, и Оте́ц Мой де́латель есть: Вся́ку розгу́ о Мне не творя́щую плода́, и́змет ю́, и вся́ку творя́щую плод, отреби́т ю́, да мно́жайший плод принесе́т. Уже́ вы чи́сти есте́ за сло́во, е́же глаго́лах вам. Бу́дите во Мне, и Аз в вас. Я́коже розга́ не мо́жет плода́ сотвори́ти о себе́, а́ще не бу́дет на лозе́, та́ко и вы, а́ще во Мне не пребу́дете. Аз есмь лоза́, вы же ро́ждие; и и́же бу́дет во Мне, и Аз в нем, той сотвори́т плод мног, я́ко без Мене́ не мо́жете твори́ти ничесо́же. А́ще кто во Мне не пребу́дет, изве́ржется вон, я́коже розга́, и изсы́шет: и собира́ет ю́, и во огнь влага́ют, и сгара́ет. А́ще пребу́дете во Мне, и глаго́лы Мои́ в вас пребу́дут: ему́же а́ще хо́щете, проси́те, и бу́дет вам. О сем просла́вися Оте́ц Мой, да плод мног сотворите́, и бу́дете Мои́ ученицы́. Я́коже возлюби́ Мя Оте́ц, и Аз возлюби́х вас: бу́дите в любви́ Мое́й. А́ще за́поведи Моя́ соблюде́те, пребу́дете в любви́ Мое́й, я́коже Аз за́поведи Отца́ Моего́ соблюдо́х, и пребыва́ю в Его́ любви́. Сия́ глаго́лах вам, да ра́дость Моя́ в вас бу́дет, и ра́дость ва́ша испо́лнится. Сия́ есть за́поведь Моя́, да лю́бите друг дру́га, я́коже возлюби́х вы. Бо́льши сея́ любве́ никто́же и́мать, да кто ду́шу свою́ положи́т за дру́ги своя́. Вы дру́зи Мои́ есте́, а́ще творите́, ели́ка Аз запове́даю вам. Не ктому́ вас глаго́лю рабы́, я́ко раб не весть, что твори́т госпо́дь его́: вас же реко́х дру́ги, я́ко вся, я́же слы́шах от Отца́ Моего́, сказа́х вам. Не вы Мене́ избрасте, но Аз избрах вас, и положих вас, да вы идете и плод принесете, и плод ваш пребудет, да, его́же а́ще просите от Отца́ во и́мя Мое́, даст вам. Сия́ запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы: я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т: а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли: ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли: ны́не же и ви́деша, и возненавидеша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́.

Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу. И сия́ сотворя́т, я́ко не позна́ша Отца́, ни Мене́. Но сия́ глаго́лах вам, да егда́ прии́дет час, помина́йте сия́, я́ко Аз рех вам. Сих же вам испе́рва не рех, я́ко с ва́ми бех. Ны́не же иду́ к Посла́вшему Мя, и никто́же от вас вопроша́ет Мене́, ка́мо и́деши? Но я́ко сия́ глаго́лах вам, ско́рби испо́лних сердца́ ва́ша. Но Аз и́стину вам глаго́лю, у́не есть вам, да Аз иду́: а́ще бо не иду́ Аз, Уте́шитель не прии́дет к вам. А́ще ли же иду́, послю́ Его́ к вам. И прише́д Он, обличи́т мир о гресе́, и о пра́вде, и о суде́. О гресе́ у́бо, я́ко не ве́руют в Мя. О пра́вде же, я́ко ко Отцу́ Моему́ иду́, и ктому́ не ви́дите Мене́. О суде́ же, я́ко князь ми́ра сего́ осужде́н бысть. Еще́ мно́го и́мам глаго́лати вам, но не мо́жете носи́ти ны́не. Егда́ же прии́дет Он, Дух и́стины, наста́вит вы на вся́ку и́стину: не от Себе́ бо глаго́лати и́мать, но ели́ка а́ще услы́шит, глаго́лати и́мать, и гряду́щая возвести́т вам. Он Мя просла́вит, я́ко от Моего́ прии́мет, и возвести́т вам. Вся, ели́ка и́мать Оте́ц, Моя́ суть: сего́ ра́ди рех, я́ко от Моего́ прии́мет, и возвести́т вам. Вма́ле, и ктому́ не ви́дите Мене́: и па́ки вма́ле, и у́зрите Мя, я́ко иду́ ко Отцу́. Ре́ша же от учени́к Его́ к себе́: что есть сие́, е́же глаго́лет нам, вма́ле, и не ви́дите Мене́; и па́ки, вма́ле и у́зрите Мя; и я́ко Аз иду́ ко Отцу́? Глаго́лаху у́бо, что сие́ есть, е́же глаго́лет, вма́ле; не ве́мы, что глаго́лет. Разуме́ же Иису́с, я́ко хотя́ху Его́ вопроша́ти, и рече́ им: о сем ли стяза́етеся между́ собо́ю, я́ко рех: вма́ле, и не ви́дите Мене́: и па́ки, вма́ле, и у́зрите Мя? Ами́нь, ами́нь глаго́лю вам, я́ко воспла́четеся и возрыда́ете вы, а мир возра́дуется; вы же печа́льни бу́дете, но печа́ль ва́ша в ра́дость бу́дет. Жена́, егда́ ражда́ет, скорбь и́мать, я́ко прии́де год ея́: егда́ же роди́т отроча́, ктому́ не по́мнит ско́рби за ра́дость, я́ко роди́ся челове́к в мир. И вы же печа́ль и́мате у́бо ны́не: па́ки же узрю́ вы, и возра́дуется се́рдце ва́ше, и ра́дости ва́шея никто́же во́змет от вас. И в той день Мене́ не вопро́сите ничесо́же. Ами́нь, ами́нь глаго́лю вам, я́ко ели́ка а́ще чесо́ про́сите от Отца́ во и́мя Мое́, даст вам. Досе́ле не проси́сте ничесо́же во и́мя Мое́: проси́те, и прии́мете, да ра́дость ва́ша испо́лнена бу́дет. Сия́ в при́тчах глаго́лах вам, но прии́дет час, егда́ ктому́ в при́тчах не глаго́лю вам, но я́ве о Отце́ возвещу́ вам. В той день во и́мя Мое́ вопро́сите, и не глаго́лю вам, я́ко Аз умолю Отца́ о вас. Сам бо Оте́ц лю́бит вы, я́ко вы Мене́ возлюби́сте, и ве́ровасте, я́ко Аз от Бо́га изыдо́х. Изыдо́х от Отца́, и приидо́х в мир: и па́ки оставля́ю мир, и иду́ ко Отцу́. Глаго́лаша Ему́ ученицы́ Его́: се ны́не не обину́яся глаго́леши, а при́тчи никоея́же не глаго́леши. Ны́не ве́мы, я́ко ве́си вся, и не тре́буеши, да кто Тя вопроша́ет: о сем ве́руем, я́ко от Бо́га изше́л еси́. Отвеща́ им Иису́с: ны́не ли ве́руете? Се гряде́т час, и ны́не прии́де, да разы́детеся ко́ждо во своя́, и Мене́ еди́наго оста́вите: и несмь еди́н, я́ко Оте́ц со Мно́ю есть. Сия́ глаго́лах вам, да во Мне мир и́мате. В ми́ре ско́рбни бу́дете, но дерза́йте, я́ко Аз победи́х мир.

Сия́ глаго́ла Иису́с, и возведе́ о́чи Свои́ на не́бо, и рече́: О́тче, прии́де час, просла́ви Сы́на Твоего́, да и Сын Твой просла́вит Тя. Я́коже дал еси́ Ему́ власть вся́кия пло́ти, да вся́ко е́же дал еси́ Ему́, даст им живо́т ве́чный. Се же есть живо́т ве́чный, да зна́ют Тебе́ еди́наго и́стиннаго Бо́га, и Его́же посла́л еси́ Иису́с Христа́. Аз просла́вих Тя на земли́, де́ло соверши́х, е́же дал еси́ Мне да сотворю́. И ны́не просла́ви Мя Ты, О́тче, у Тебе́ Самаго́ сла́вою, ю́же име́х у Тебе́ пре́жде мир не бысть. Яви́х и́мя Твое́ челове́ком, и́хже дал еси́ Мне от ми́ра: Твои́ бе́ша, и Мне их дал еси́, и сло́во Твое́ сохрани́ша. Ны́не разуме́ша, я́ко вся, ели́ка дал еси́ Мне, от Тебе́ суть. Я́ко глаго́лы, и́хже дал еси́ Мне, дах им, и ти́и прия́ша, и разуме́ша вои́стинну, я́ко от Тебе́ изыдо́х, и ве́роваша, я́ко Ты Мя посла́. Аз о сих молю́: не о всем ми́ре молю́, но о тех, и́хже дал еси́ Мне, я́ко Твои́ суть. И Моя́ вся, Твоя́ суть, и Твоя́ Моя́: и просла́вихся в них. И ктому́ несмь в ми́ре, и си́и в ми́ре суть, и Аз к Тебе́ гряду́. О́тче Святы́й, соблюди́ их во и́мя Твое́, и́хже дал еси́ Мне, да бу́дут еди́но, я́коже и Мы. Егда́ бех с ни́ми в ми́ре, Аз соблюда́х их во и́мя Твое́: и́хже дал еси́ Мне, сохрани́х, и никто́же от них поги́бе, то́кмо сын поги́бельный, да сбу́дется Писа́ние. Ны́не же к Тебе́ гряду́, и сия́ глаго́лю в ми́ре, да и́мут ра́дость Мою́ испо́лнену в себе́. Аз дах им сло́во Твое́, и мир возненави́де их, я́ко не суть от ми́ра, я́коже и Аз от ми́ра несмь. Не молю́, да во́змеши их от ми́ра, но да соблюде́ши их от неприя́зни. От ми́ра не суть, я́коже и Аз от ми́ра несмь. Святи́ их во и́стину Твою́: сло́во Твое́ и́стина есть. Я́коже Мене́ посла́л еси́ в мир, и Аз посла́х их в мир. И за них Аз свящу́ Себе́, да и ти́и бу́дут свяще́ни во и́стину. Не о сих же молю́ то́кмо, но и о ве́рующих словесе́ их ра́ди в Мя. Да вси еди́но су́ть, я́коже Ты, О́тче, во Мне, и Аз в Тебе́, да и ти́и в Нас еди́но бу́дут: да и мир ве́ру и́мет, я́ко Ты Мя посла́л еси́. И Аз сла́ву, ю́же дал еси́ Мне, дах им: да бу́дут еди́но, я́коже Мы еди́но есма́. Аз в них, и Ты во Мне, да бу́дут сверше́ни во еди́но, и да разуме́ет мир, я́ко Ты Мя посла́, и возлюби́л еси́ их, я́коже Мене́ возлюби́л еси́. О́тче, и́хже дал еси́ Мне, хощу́, да иде́же есмь Аз, и ти́и бу́дут со Мно́ю, да ви́дят сла́ву Мою́, ю́же дал еси́ Мне, я́ко возлюби́л Мя еси́ пре́жде сложе́ния ми́ра. О́тче пра́ведный, и мир Тебе́ не позна́, Аз же Тя позна́х, и си́и позна́ша, я́ко Ты Мя посла́. И сказа́х им и́мя Твое́, и скажу́, да любы́, е́юже Мя еси́ возлюби́л, в них бу́дет, и Аз в них. И сия́ рек Иису́с, изы́де со ученики́ Свои́ми на он пол пото́ка Ке́дрска, иде́же бе вертогра́д, во́ньже вни́де Сам и ученицы́ Его́.

И скончавшуся Евангелию, поем: Сла́ва долготерпе́нию Твоему́, Го́споди. И абие поем антифоны, повторяюще вся тропари.

Антифон 1.

Глас 8: Кня́зи лю́дстии собра́шася на Го́спода, / и на Христа́ Его́.

Тойже: Сло́во законопресту́пное возложи́ша на Мя, / Го́споди, Го́споди, не оста́ви Мене́.

Чу́вствия на́ша чи́ста Христо́ви предста́вим, / и я́ко дру́зи Его́, ду́ши на́ша пожре́м Его́ ра́ди, / и не попече́ньми жите́йскими соугнета́емся, я́ко Иу́да, / но в кле́тех на́ших возопии́м: / О́тче наш, И́же на небесе́х, / от лука́ваго изба́ви нас.

Слава, Богородичен: Де́ва родила́ еси́ Неискусобра́чная, / и Де́ва пребыла́ еси́ Ма́ти Безневе́стная, / Богоро́дице Мари́е: / Христа́ Бо́га на́шего моли́ спасти́ся нам.

И ныне, тойже.

Антифон 2.

Глас 6: Тече́ глаго́ля Иу́да беззако́нным кни́жником: / что мне хо́щете да́ти, и аз вам преда́м Его́? / Среди́ же совещава́ющих Сам стоя́л еси́ неви́димо Совещава́емый: / Сердцеве́дче, пощади́ ду́ши на́ша.

Ми́лостию Бо́гови послу́жим, я́коже Мари́я на ве́чери, / и не стя́жим сребролю́бия, я́ко Иу́да: / да всегда́ со Христо́м Бо́гом бу́дем.

Слава, Богородичен: Его́же родила́ еси́, Де́во, неизрече́нно, / вы́ну я́ко Человеколю́бца не преста́й моля́щи, / да от бед спасе́т вся к Тебе́ прибега́ющия.

И ныне, тойже.

Антифон 3.

Глас 2: Ла́зарева ра́ди воста́ния, Го́споди, / оса́нна Тебе́ зва́ху де́ти евре́йския, Человеколю́бче. / Беззако́нный же Иу́да не восхоте́ разуме́ти.

На ве́чери Твое́й, Христе́ Бо́же, / ученико́м Твои́м предглаго́лал еси́: / еди́н от вас преда́ст Мя. / Беззако́нный же Иу́да не восхоте́ разуме́ти.

Иоа́нну вопроси́вшу: / Го́споди, предая́й Тя кто есть? / Того́ хле́бом показа́л еси́. / Беззако́нный же Иу́да не восхоте́ разуме́ти.

На три́десятих сре́бреницех, Го́споди, / и на лобза́нии льсти́вном, / иска́ху иуде́е уби́ти Тя. / Беззако́нный же Иу́да не восхоте́ разуме́ти.

На умове́нии Твое́м, Христе́ Бо́же, / ученико́м Твои́м повеле́л еси́: / си́це твори́те, я́коже ви́дите. / Беззако́нный же Иу́да не восхоте́ разуме́ти.

Бди́те и моли́теся, да не вни́дете в напа́сть, / ученико́м Твои́м, Христе́ Бо́же наш, глаго́лал еси́. / Беззако́нный же Иу́да не восхоте́ разуме́ти.

Слава, Богородичен: Спаси́ от бед рабы́ Твоя́, Богоро́дице, / я́ко все по Бо́зе к Тебе́ прибега́ем, / я́ко неруши́мей стене́ и предста́тельству.

И ныне, тойже.

Седален. [Не седим же на сицевых седальнах, за еже священнику кадити святый олтарь, но, стояще, поем я.] Глас 7:

На ве́чери ученики́ пита́я, / притворе́ние преда́ния ве́дый, / на ней Иу́ду обличи́л еси́, / неиспра́вленна у́бо сего́ ве́дый: / позна́ти же всем хотя́, я́ко во́лею преда́лся еси́, / да мир исхити́ши от чужда́го: / Долготерпели́ве, сла́ва Тебе́.

Слава, конец. И ныне, весь. Таже И о сподо́битися нам:

И чтет священник второе Евангелие, от Иоанна, зачало 58:

Во вре́мя о́но, изы́де Иису́с со ученики́ Свои́ми на он пол пото́ка Ке́дрска, иде́же бе вертогра́д, во́ньже вни́де Сам и ученицы́ Его́. Ве́дяше же Иу́да предая́й Его́ ме́сто, я́ко мно́жицею собира́шеся Иису́с ту со ученики́ Свои́ми. Иу́да у́бо прие́мь спи́ру, и от архиере́й и фарисе́й слуги́, прии́де та́мо со свети́лы и свеща́ми и ору́жии. Иису́с же ве́дый вся гряду́щая Нань, изше́д рече́ им: кого́ и́щете? Отвеща́ша Ему́: Иису́са Назоре́а. Глаго́ла им Иису́с: Аз есмь. Стоя́ше же и Иу́да, и́же предая́ше Его́, с ни́ми. Да я́коже рече́ им, Аз есмь. Идо́ша вспять, и падо́ша на земли́. Па́ки у́бо вопроси́ их Иису́с: кого́ и́щете? Они́ же ре́ша: Иису́са Назоре́а. Отвеща́ Иису́с: рех вам, я́ко Аз есмь. А́ще у́бо Мене́ и́щете, оста́вите сих ити́. Да сбу́дется сло́во, е́же рече́, я́ко и́хже дал еси́ Мне, не погуби́х от них никого́же. Си́мон же Петр, имы́й нож, извлече́ его́, и уда́ри архиере́ова раба́, и уре́за ему́ у́хо десно́е. Бе же и́мя рабу́ Малх. Рече́ же Иису́с Петро́ви: вонзи́ нож в но́жницу. Ча́шу, ю́же даст Мне Оте́ц, не и́мам ли пи́ти ея́? Спи́ра же и ты́сящник, и слуги́ иуде́йския я́ша Иису́са, и связа́ша Его́. И ведо́ша Его́ ко А́нне пе́рвее: бе бо тесть Каиа́фе, и́же бе архиере́й ле́ту тому́. Бе же Каиа́фа да́вый сове́т иуде́ом, я́ко у́не есть еди́ному челове́ку умре́ти за лю́ди. По Иису́се же идя́ше Си́мон Петр, и други́й учени́к: учени́к же той бе зна́емь архиере́ови, и вни́де со Иису́сом во двор архиере́ов. Петр же стоя́ше при две́рех вне. Изы́де у́бо учени́к той, и́же бе зна́емь архиере́ови, и рече́ две́рнице, и введе́ Петра́. Глаго́ла же раба́ две́рница Петро́ви: еда́ и ты учени́к еси́ Челове́ка Сего́? Глаго́ла он: несмь. Стоя́ху же раби́ и слуги́ огнь сотво́рше, я́ко зима́ бе, и гре́яхуся. Бе же с ни́ми Петр стоя́, и гре́яся. Архиере́й же вопроси́ Иису́са о ученице́х Его́, и о уче́нии Его́. Отвеща́ ему́ Иису́с: Аз не обину́яся глаго́лах ми́ру. Аз всегда́ уча́х на со́нмищах, и в це́ркви, иде́же всегда́ иуде́е сне́млются, и тай не глаго́лах ничесо́же. Что Мя вопроша́еши? Вопроси́ слы́шавших, что глаго́лах им: се си́и ве́дят, я́же рех Аз. Сия́ же ре́кшу Ему́, еди́н от предстоя́щих слуг уда́ри в лани́ту Иису́са, рек: та́ко ли отвещава́еши архиере́ови? Отвеща́ ему́ Иису́с: а́ще зле глаго́лах, свиде́тельствуй о зле; а́ще ли до́бре, что Мя бие́ши? Посла́ же Его́ А́нна свя́зана к Каиа́фе архиере́ови. Бе же Си́мон Петр стоя́ и гре́яся. Ре́ша же ему́: еда́ и ты от учени́к Его́ еси́? Он же отве́ржеся, и рече́: несмь. Глаго́ла еди́н от раб архиере́овых, ю́жика сый, ему́же Петр уре́за у́хо: не аз ли тя ви́дех в вертогра́де с Ним? Па́ки у́бо Петр отве́ржеся, и а́бие пе́тел возгласи́. Ведо́ша же Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску.

По Евангелии же поем антифон 4.

Глас 5: Днесь Иу́да оставля́ет Учи́теля, / и прие́млет диа́вола, / ослепля́ется стра́стию сребролю́бия, / отпа́дает Све́та омраче́нный: / ка́ко бо можа́ше зре́ти, / Свети́ло прода́вый на три́десятих сре́бреницех? / Но нам возсия́ Страда́вый за мир. / К Нему́же возопии́м: / пострада́вый и сострада́вый челове́ком, / Го́споди, сла́ва Тебе́.

Днесь Иу́да притворя́ет богоче́стие, / и отчужда́ется дарова́ния, / сый учени́к быва́ет преда́тель: / во обы́чном лобза́нии лесть покрыва́ет, / и предпочита́ет Влады́чния любве́, / несмы́сленно рабо́тати сребролю́бию, / наста́вник быв собо́рища беззако́ннаго: / мы же иму́ще спасе́ние Христа́, / Того́ просла́вим.

Глас 1: Братолю́бие стя́жим я́ко во Христе́ бра́тия, / а не неми́лостивное е́же к бли́жним на́шим: / да не я́ко раб осу́димся неми́лостивый, пе́нязей ра́ди, / и я́ко Иу́да раска́явшеся, ничто́же по́льзуемся.

Слава, Богородичен: Пресла́вная о Тебе́ глаго́лашася везде́, / я́ко родила́ еси́ пло́тию всех Творца́, / Богоро́дице Мари́е, / Всепе́тая и Неискусобра́чная.

И ныне, тойже.

Антифон 5.

Глас 6: Учени́к Учи́теля соглаша́ше це́ну, / и на три́десятих сре́бреницех продаде́ Го́спода, / лобза́нием льсти́вным предая́ Его́ / беззако́нником на смерть.

Днесь глаго́лаше Зижди́тель небесе́ и земли́ Свои́м ученико́м: / прибли́жися час, и приспе́ Иу́да предая́й Мене́, / да никто́же отве́ржется Мене́, / ви́дя Мя на Кресте́ посреде́ двою́ разбо́йнику: / стражду́ бо я́ко челове́к, / и спасу́ я́ко Человеколю́бец, в Мя ве́рующия.

Слава, Богородичен: Неизрече́нно в после́дняя заче́ншая, / и ро́ждшая Созда́теля Твоего́, / Того́ моли́ спасти́ся душа́м на́шим.

И ныне, тойже.

Антифон 6.

Глас 7: Днесь бдит Иу́да преда́ти Го́спода, / Преве́чнаго Спа́са ми́ра, / И́же от пяти́ хлеб насы́тившаго мно́жества. / Днесь беззако́нный отмета́ется Учи́теля, / учени́к быв, Влады́ку предаде́: / сребро́м продаде́, ма́нною насы́тившаго челове́ка.

Днесь Кресту́ пригвозди́ша иуде́е Го́спода, / пресе́кшаго мо́ре жезло́м, / и прове́дшаго их в пусты́ню. / Днесь копие́м ре́бра Его́ прободо́ша, / я́звами ра́нившаго их ра́ди Еги́пта: / и же́лчию напои́ша, / ма́нну пи́щу им одожди́вшаго.

Го́споди, на страсть во́льную прише́д, / вопия́л еси́ ученико́м Твои́м: / а́ще и еди́наго часа́ не возмого́сте бде́ти со Мно́ю, / ка́ко обеща́стеся умре́ти Мене́ ра́ди? / Поне́ Иу́ду зри́те, ка́ко не спит, / но тщи́тся преда́ти Мя беззако́нным. / Воста́ните, моли́теся, / да не кто Мене́ отве́ржется, зря Мене́ на Кресте́. / Долготерпели́ве, сла́ва Тебе́.

Слава, Богородичен: Ра́дуйся, Богоро́дице, / Невмести́маго в небесе́х вмести́вшая во утро́бе Твое́й: / ра́дуйся, Де́во, проро́ков пропове́дание, / Е́юже нам возсия́ Емману́ил: / ра́дуйся, Ма́ти Христа́ Бо́га.

И ныне, тойже.

Седален, глас 7:

Кий тя о́браз, Иу́до, преда́теля Спа́су соде́ла? / Еда́ от ли́ка тя апо́стольска разлучи́? / Еда́ дарова́ния исцеле́ний лиши́? / Еда́ со о́неми вечеря́в, тебе́ от трапе́зы отри́ну? / Еда́ ины́х но́ги умы́в, твои́ же презре́? / О коли́ких благ непа́мятлив был еси́! / И твой у́бо неблагода́рный облича́ется нрав. / Того́ же безме́рное пропове́дуется долготерпе́ние, / и ве́лия ми́лость.

Слава, и ныне, тойже.

Евангелие 3-е от Матфеа, зачало 109:

Во вре́мя о́но, во́ини е́мше Иису́са ведо́ша к Каиа́фе архиере́ови, иде́же кни́жницы и ста́рцы собра́шася. Петр же идя́ше по Нем издале́ча, до двора́ архиере́ова: и вшед внутрь, седя́ше со слуга́ми, ви́дети кончи́ну. Архиере́е же и ста́рцы, и сонм весь, иска́ху лжесвиде́тельства на Иису́са, я́ко да убию́т Его́, и не обрета́ху: и мно́гим лжесвиде́телем присту́пльшим, не обрето́ша. По́слежде же приступи́ша два лжесвиде́теля, реста: Сей рече́, могу́ разори́ти це́рковь Бо́жию, и треми́ де́ньми созда́ти ю́. И воста́в архиере́й, рече́ Ему́: ничесо́же ли отвещава́еши, что си́и на Тя свиде́тельствуют? Иису́с же молча́ше. И отвеща́в архиере́й, рече́ Ему́: заклина́ю Тя Бо́гом живы́м, да рече́ши нам, а́ще Ты еси́ Христо́с, Сын Бо́жий? Глаго́ла ему́ Иису́с: ты рече́. Оба́че глаго́лю вам: отсе́ле у́зрите Сы́на Челове́ческаго седя́ща одесну́ю си́лы, и гряду́ща на о́блацех небе́сных. Тогда́ архиере́й растерза́ ри́зы своя́, глаго́ля, я́ко хулу́ глаго́ла, что еще́ тре́буем свиде́телей; се ны́не слы́шасте хулу́ Его́. Что ся вам мнит? Они́ же отвеща́вше, ре́ша: пови́нен есть сме́рти. Тогда́ заплева́ша лице́ Его́, и па́кости Ему́ де́яху, о́вии же за лани́ту уда́риша, глаго́люще: прорцы́ нам, Христе́, кто есть ударе́й Тя? Петр же вне седя́ше во дворе́, и приступи́ к нему́ еди́на рабы́ня, глаго́лющи: и ты бе со Иису́сом Галиле́йским. Он же отве́ржеся пред все́ми, глаго́ля: не вем, что глаго́леши. Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом. И па́ки отве́ржеся с кля́твою, я́ко не зна́ю Челове́ка. По ма́ле же приступи́вше стоя́щии, ре́ша Петро́ви: вои́стинну и ты от них еси́, и́бо бесе́да твоя́ я́ве тя твори́т. Тогда́ нача́т роти́тися и кля́тися, я́ко не зна́ю Челове́ка. И а́бие пе́тел возгласи́. И помяну́ Петр глаго́л Иису́сов, рече́нный ему́, я́ко пре́жде да́же пе́тел не возгласи́т, трикра́ты отве́ржешися Мене́. И изше́д вон пла́кася го́рько.

Антифон 7.

Глас 8: Е́мшим Тя беззако́нным, / претерпева́я, си́це вопия́л еси́, Го́споди: / а́ще и порази́сте Па́стыря, / и расточи́сте двана́десять ове́ц ученики́ Моя́, / можа́х вя́щше, не́жели двана́десять легео́нов предста́вити А́нгелов. / Но долготерплю́, да испо́лнятся, / я́же яви́х вам проро́ки Мои́ми, / безве́стная и та́йная: / Го́споди, сла́ва Тебе́.

Три́щи отве́ргся Петр, / а́бие рече́нное ему́ разуме́, / но принесе́ к Тебе́ сле́зы покая́ния: / Бо́же, очи́сти мя, и спаси́ мя.

Слава, Богородичен: Я́ко врата́ спаси́тельная, / и рай кра́сный, и Све́та присносу́щнаго о́блак, / су́щую Святу́ю Де́ву, воспои́м вси / глаго́люще Ей, е́же ра́дуйся.

И ныне, тойже.

Антифон 8.

Глас 2: Рцы́те, беззако́ннии, / что слы́шасте от Спа́са на́шего? / Не зако́н ли положи́, и проро́ческая уче́ния? / Ка́ко у́бо помы́слисте Пила́ту преда́ти, / И́же от Бо́га, Бо́га Сло́ва, / и Изба́вителя душ на́ших?

Да ра́спнется, вопия́ху / Твои́х дарова́ний при́сно наслажда́ющиися, / и злоде́я вме́сто Благоде́теля / проша́ху прия́ти, пра́ведников уби́йцы: / молча́л же еси́ Христе́, терпя́ их суровство́, / пострада́ти хотя́ и спасти́ нас, / я́ко Человеколю́бец.

Слава, Богородичен: Я́ко не и́мамы дерзнове́ния за премно́гия грехи́ на́ша, / Ты, И́же от Тебе́ Ро́ждшагося, моли́, Богоро́дице Де́во: / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко Ми́лостив есть, и спасти́ моги́й, / И́же и страда́ти о нас изво́ливый.

И ныне, тойже.

Антифон 9.

Глас 3: Поста́виша три́десять сре́бреников, це́ну цене́ннаго, / Его́же оцени́ша от сыно́в Изра́илевых. / Бди́те и моли́теся, да не вни́дете во искуше́ние, / дух у́бо бодр, плоть же немощна́: / сего́ ра́ди бди́те.

Да́ша в снедь Мою́ желчь, / и в жа́жду Мою́ напои́ша Мя о́цта: / Ты же, Го́споди, / возста́ви мя, и возда́м им.

Слава, Богородичен: И́же от язы́к, пое́м Тя, Богоро́дице Чи́стая, / я́ко Христа́ Бо́га на́шего родила́ еси́, / от кля́твы челове́ки Тобо́ю свобо́ждшаго.

И ныне, тойже.

Седален, глас 8:

О ка́ко Иу́да иногда́ Твой учени́к, / преда́тельству поуча́шеся на Тя, / свечеря́ льсти́вно, наве́тник и непра́ведник, / шед, рече́ свяще́нником: / что ми подае́те, и преда́м вам О́наго, / зако́н разори́вшаго, и оскверни́вшаго суббо́ту? / Долготерпели́ве Го́споди, сла́ва Тебе́.

Слава, и ныне, тойже.

Евангелие 4-е, от Иоанна, зачало 59.

Во вре́мя о́но, ведо́ша Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску. Изы́де же Пила́т к ним вон, и рече́: ку́ю речь прино́сите на Челове́ка Сего́? Отвеща́ша и ре́ша ему́: а́ще не бы был Сей злоде́й, не бы́хом пре́дали Его́ тебе́. Рече́ же им Пила́т: поими́те Его́ вы, и по зако́ну ва́шему суди́те Ему́. Ре́ша же ему́ иуде́е: нам не досто́ит уби́ти никого́же. Да сло́во Иису́сово сбу́дется, е́же рече́, назна́менуя, ко́ею сме́ртию хотя́ше умре́ти. Вни́де у́бо па́ки Пила́т в прето́р, и гласи́ Иису́са, и рече́ Ему́: Ты ли еси́ Царь Иуде́йск? Отвеща́ ему́ Иису́с: о себе́ ли ты сие́ глаго́леши, или́ ини́и тебе́ реко́ша о Мне? Отвеща́ Пила́т: еда́ аз жидови́н есмь? Род Твой и архиере́е преда́ша Тя мне, что еси́ сотвори́л? Отвеща́ Иису́с: Ца́рство Мое́ несть от ми́ра сего́; а́ще от ми́ра сего́ бы́ло бы Ца́рство Мое́, слуги́ Мои́ у́бо подвиза́лися бы́ша, да не пре́дан бых был иуде́ом. Ны́не же Ца́рство Мое́ несть отсю́ду. Рече́ же Ему́ Пила́т: у́бо Царь ли еси́ Ты? Отвеща́ Иису́с: ты глаго́леши, я́ко Царь есмь Аз. Аз на сие́ роди́хся, и на сие́ приидо́х в мир, да свиде́тельствую и́стину: и всяк, и́же есть от и́стины, послу́шает гла́са Моего́. Глаго́ла Ему́ Пила́т: что есть и́стина? И сие́ рек, па́ки изы́де ко иуде́ом, и глаго́ла им: аз ни еди́ныя вины́ обрета́ю в Нем. Есть же обы́чай вам, да еди́наго вам отпущу́ на Па́сху: хо́щете ли у́бо, да отпущу́ вам Царя́ Иуде́йска? Возопи́ша же па́ки вси, глаго́люще: не Сего́, но Вара́вву. Бе же Вара́вва разбо́йник.

Тогда́ у́бо Пила́т поя́т Иису́са, и би Его́. И во́ини спле́тше вене́ц от те́рния, возложи́ша Ему́ на главу́, и в ри́зу багря́ну облеко́ша Его́. И глаго́лаху: ра́дуйся, Царю́ Иуде́йский. И бия́ху Его́ по лани́тома. Изы́де у́бо па́ки вон Пила́т, и глаго́ла им: се извожду́ Его́ вам вон, да разуме́ете, я́ко в Нем ни еди́ныя вины́ обрета́ю. Изы́де же вон Иису́с, нося́ тернове́н вене́ц, и багря́ну ри́зу. И глаго́ла им: се Челове́к. Егда́ же ви́деша Его́ архиере́е и слуги́, возопи́ша глаго́люще: распни́, распни́ Его́. Глаго́ла им Пила́т: поими́те Его́ вы, и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, аще не бы ти дано́ свы́ше: сего́ ра́ди предавый Мя тебе́, бо́лий грех и́мать. От сего́ иска́ше Пила́т пусти́ти Его́. Иуде́е же вопия́ху, глаго́люще: а́ще Сего́ пу́стиши, не́си друг ке́сарев. Всяк, и́же царя́ себе́ творя́й, проти́вится ке́сарю. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется.

Антифон 10.

Глас 6: Одея́йся све́том, я́ко ри́зою, / наг на суде́ стоя́ше, / и в лани́ту ударе́ние прия́т от рук, и́хже созда́: / беззако́ннии же лю́дие на Кресте́ пригвозди́ша Го́спода Сла́вы: / тогда́ заве́са церко́вная раздра́ся, / со́лнце поме́рче, не терпя́ зре́ти Бо́га досажда́ема, / Его́же трепе́щут вся́ческая. Тому́ поклони́мся.

Учени́к отве́ржеся, / разбо́йник возопи́: / помяни́ мя, Го́споди, / во Ца́рствии Твое́м.

Слава, Богородичен: Умири́ мир, от Де́вы изво́ливый, Го́споди, / плоть носи́ти за рабы́, / да согла́сно Тебе́ славосло́вим, Человеколю́бче.

И ныне, тойже.

Антифон 11.

Глас 6: За блага́я, я́же сотвори́л еси́, Христе́, ро́ду евре́йскому, / распя́ти Тя осуди́ша, / о́цта и же́лчи напои́вше Тя. / Но даждь им, Го́споди, по дело́м их, / я́ко не разуме́ша Твоего́ снизхожде́ния.

О преда́тельстве не дово́льни бы́ша, Христе́, ро́ди евре́йстии, / но покива́ху глава́ми свои́ми, / хулу́ и руга́ние принося́ще. / Но даждь им, Го́споди, по дело́м их, / я́ко не разуме́ша Твоего́ смотре́ния.

Ниже́ земля́ я́ко потрясе́ся, / ниже́ ка́мение я́ко разсе́деся, евре́ов увеща́ша, / ниже́ церко́вная заве́са, ниже́ ме́ртвых воскресе́ние. / Но даждь им, Го́споди, по дело́м их, / я́ко тще́тным на Тя поучи́шася.

Слава, Богородичен: Бо́га от Тебе́ воплоще́ннаго / позна́хом, Богоро́дице Де́во, / Еди́на Чи́стая, Еди́на Благослове́нная: / тем непреста́нно Тя, воспева́юще, велича́ем.

И ныне, тойже.

Антифон 12.

Глас 8: Сия́ глаго́лет Госпо́дь иуде́ом: / лю́дие Мои́, что сотвори́х вам? / Или́ чим вам стужи́х? / Слепцы́ ва́ша просвети́х, / прокаже́нныя очи́стих, / му́жа, су́ща на одре́, возста́вих. / Лю́дие Мои́, что сотвори́х вам? / И что Ми возда́сте? / За ма́нну желчь: за во́ду о́цет: / за е́же люби́ти Мя, ко Кресту́ Мя пригвозди́сте. / Ктому́ не терплю́ про́чее, / призову́ Моя́ язы́ки, / и ти́и Мя просла́вят со Отце́м и Ду́хом, / и Аз им да́рую живо́т ве́чный.

Днесь церко́вная заве́са / на обличе́ние беззако́нных раздира́ется, / и со́лнце лучи́ своя́ скрыва́ет, / Влады́ку зря распина́ема.

Законополо́жницы Изра́илевы, иуде́е и фарисе́е, / лик апо́стольский вопие́т к вам: / се Храм, Его́же вы разори́сте, / се А́гнец, Его́же вы распя́сте, и гро́бу преда́сте, / но вла́стию Свое́ю воскре́се. / Не льсти́теся, иуде́е: / Той бо есть, И́же в мо́ри спасы́й, / и в пусты́ни пита́вый. / Той есть Живо́т, и Свет, и Мир ми́рови.

Слава, Богородичен: Ра́дуйся, врата́ Царя́ Сла́вы, / я́же Вы́шний Еди́н про́йде, / и па́ки запечатле́нна оста́ви, / во спасе́ние душ на́ших.

И ныне, тойже.

Седален, глас 8:

Егда́ предста́л еси́ Каиа́фе, Бо́же, / и преда́лся еси́ Пила́ту, Судие́, / небе́сныя си́лы от стра́ха поколеба́шася. / Егда́ же возне́слся еси́ на дре́во, / посреде́ двою́ разбо́йнику, / вмени́лся еси́ с беззако́нными, Безгре́шне, / за е́же спасти́ челове́ка. / Незло́биве Го́споди, сла́ва Тебе́.

Слава, и ныне, тойже.

Евангелие 5-е, от Матфеа, зачало 111:

Во вре́мя о́но, ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́.

Антифон 13.

Глас 6: Собра́ние иудейское у Пила́та / испроси́ша распя́ти Тя, Го́споди: / вины́ бо в Тебе́ не обре́тше, / пови́ннаго Вара́вву свободи́ша, / и Тебе́, Пра́веднаго, осуди́ша, / скве́рнаго уби́йства грех насле́довавше. / Но даждь им, Го́споди, воздая́ние их, / я́ко тще́тным на Тя поучи́шася.

Его́же вся ужаса́ются и трепе́щут, / и всяк язы́к пое́т, Христа́, / Бо́жию Си́лу и Бо́жию Прему́дрость, / свяще́нницы за лани́ту уда́риша, / и да́ша Ему́ желчь: / и вся пострада́ти изво́ли, / спасти́ ны хотя́ от беззако́ний на́ших Свое́ю Кро́вию, / я́ко Человеколю́бец.

Слава, Богородичен: Богоро́дице, ро́ждшая сло́вом па́че сло́ва, / Созда́теля Своего́, / Того́ моли́ спасти́ ду́ши на́ша.

И ныне, тойже.

Антифон 14.

Глас 8: Го́споди, И́же разбо́йника спу́тника прие́мый, / в кро́ви ру́це оскверни́вшаго, / и нас с ним причти́, / я́ко Благ и Человеколю́бец.

Мал глас испусти́ разбо́йник на кресте́, / ве́лию ве́ру обре́те / во еди́ном мгнове́нии спасе́ся / и пе́рвый, ра́йская врата́ отве́рз, вни́де. / И́же того́ покая́ние восприе́мый, / Го́споди, сла́ва Тебе́.

Слава, Богородичен: Ра́дуйся, А́нгелом ра́дость ми́ра прие́мшая. / Ра́дуйся, ро́ждшая Творца́ Твоего́ и Го́спода. / Ра́дуйся, сподо́бльшаяся бы́ти Ма́ти Бо́жия.

И ныне, тойже.

Антифон 15.

Глас 6: Днесь ви́сит на дре́ве, / И́же на вода́х зе́млю пове́сивый: / венце́м от те́рния облага́ется, / И́же А́нгелов Царь; / в ло́жную багряни́цу облача́ется, / одева́яй не́бо о́блаки; / зауше́ние прия́т, И́же во Иорда́не свободи́вый Ада́ма; / гвоздьми́ пригвозди́ся Жени́х Церко́вный; / копие́м прободе́ся Сын Де́вы. / Покланя́емся страсте́м Твои́м, Христе́. / Покланя́емся страсте́м Твои́м, Христе́. / Покланя́емся страсте́м Твои́м, Христе́, / покажи́ нам и сла́вное Твое́ Воскресе́ние.

Не я́ко иуде́е пра́зднуем, / и́бо Па́сха на́ша за ны пожре́ся Христо́с, / но очи́стим са́ми себе́ от вся́кия скве́рны, / и чи́сте помо́лимся Ему́: / воскресни́, Го́споди, спаси́ нас, / я́ко Человеколю́бец.

Крест Твой, Го́споди, / жизнь и заступле́ние лю́дем Твои́м есть, / и нань наде́ющеся, / Тебе́ распя́таго Бо́га на́шего пое́м, поми́луй нас.

Слава, Богородичен: Ви́дящи Тя ви́сима, Христе́, / Тебе́ Ро́ждшая вопия́ше: / что стра́нное е́же ви́жду та́инство, Сы́не Мой? / Ка́ко на дре́ве умира́еши пло́тию водруже́н, / Жи́зни Пода́телю?

И ныне, тойже.

Седален, глас 4:

Искупи́л ны еси́ от кля́твы зако́нныя, / честно́ю Твое́ю Кро́вию, / на Кресте́ пригвозди́вся, и копие́м пробо́дся, / безсме́ртие источи́л еси́ челове́ком, / Спа́се наш, сла́ва Тебе́.

Слава, и ныне, тойже.

Евангелие 6-е, от Марка, зачало 67:

Во вре́мя о́но, во́ини ведо́ша Иису́са внутрь двора́, е́же есть прето́р, и созва́ша всю спи́ру. И облеко́ша Его́ в препря́ду, и возложи́ша на Него́ спле́тше терно́в вене́ц, и нача́ша целова́ти Его́, и глаго́лати: ра́дуйся, Царю́ Иуде́йский. И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́. И егда́ поруга́шася Ему́, совлеко́ша с Него́ препря́ду, и облеко́ша Его́ в ри́зы Своя́; и изведо́ша Его́, да про́пнут Его́. И заде́ша мимоходя́щу не́коему Си́мону Кирине́ю, [гряду́щу с села́, отцу́ Алекса́ндрову и Ру́фову,] да во́змет крест Его́. И приведо́ша Его́ на Голго́фу ме́сто, е́же есть сказа́емо, Ло́бное ме́сто. И дая́ху Ему́ пи́ти есмирнисме́но вино́. Он же не прия́т. И распе́ншии Его́ раздели́ша ри́зы Его́, мета́юще жре́бий о них, кто что во́змет. Бе же час тре́тий, и распя́ша Его́. И бе написа́ние вины́ Его́ напи́сано: Царь Иуде́йск. И с Ним распя́ша два разбо́йника, еди́наго одесну́ю, и еди́наго ошу́юю Его́. И сбы́стся Писа́ние, е́же глаго́лет: и со беззако́нными вмени́ся. И мимоходя́щии ху́ляху Его́, покива́юще глава́ми свои́ми, и глаго́люще: уа́, разоря́яй це́рковь, и треми́ де́ньми созида́яй, спаси́ся Сам, и сни́ди со креста́. Та́коже и архиере́е руга́ющеся, друг ко дру́гу с кни́жники, глаго́лаху: и́ны спасе́, Себе́ ли не мо́жет спасти́? Христо́с, Царь Изра́илев, да сни́дет ны́не с креста́, да ви́дим и ве́ру име́м Ему́.

Таже блаженны, поставим стихов 8, глас 4.

Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Дре́вом Ада́м рая́ бысть изселе́н, / дре́вом же кре́стным разбо́йник в рай всели́ся. / Ов у́бо вкушь, за́поведь отве́рже Сотво́ршаго, / ов же сраспина́емь, Бо́га Тя испове́да тая́щагося: / помяни́ и нас, Спа́се, во Ца́рствии Твое́м.

Блаже́ни ми́лостивии, я́ко ти́и поми́ловани бу́дут.

Зако́ну Творца́ от ученика́ купи́ша беззако́ннии и, / я́ко законопресту́пника, Того́ Пила́тову суди́щу предста́виша, зову́ще: / распни́, в пусты́ни сим Маннода́вшаго. / Мы же, пра́веднаго разбо́йника подража́вше, ве́рою зове́м: / помяни́ и нас, Спа́се, во Ца́рствии Твое́м.

Блаже́ни чи́стии се́рдцем, я́ко ти́и Бо́га у́зрят.

Богоуби́йц собо́р, иуде́йский язы́к беззако́нный, / к Пила́ту неи́стовне зовы́й, и глаго́лаше: / распни́ Христа́ непови́ннаго, / Вара́вву же па́че нам отпусти́. / Мы же веща́им к Нему́ разбо́йника благоразу́мнаго глас: / помяни́ и нас, Спа́се, во Ца́рствии Твое́м.

Блаже́ни миротво́рцы, я́ко ти́и сы́нове Бо́жии нареку́тся.

Живоно́сная Твоя́ ре́бра, / я́ко из Еде́ма исто́чник источа́ющая, / Це́рковь Твою́, Христе́, я́ко слове́сный напая́ет рай, / отсю́ду разделя́яся я́ко в нача́ла, в четы́ри Ева́нгелия, / мир напая́я, тварь веселя́, и язы́ки ве́рно науча́я / покланя́тися Ца́рствию Твоему́.

Блаже́ни изгна́ни пра́вды ра́ди, я́ко тех есть Ца́рство Небе́сное.

Распя́лся еси́ мене́ ра́ди, / да мне источи́ши оставле́ние: / прободе́н был еси́ в ре́бра, да ка́пли жи́зни источи́ши ми: / гвоздьми́ пригвозди́лся еси́, / да аз глубино́ю Страсте́й Твои́х / к высоте́ держа́вы Твоея́ уверя́емь, зову́ Ти: / Живода́вче Христе́, сла́ва Кресту́, Спа́се, и стра́сти Твое́й.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.

Распина́ему Тебе́, Христе́, / вся тварь, ви́дящи, трепета́ше, / основа́ния земли́ колеба́хуся стра́хом держа́вы Твоея́, / свети́ла скрыва́хуся, и церко́вная раздра́ся заве́са, / го́ры вострепета́ша, и ка́мение разсе́деся, / и разбо́йник ве́рный зове́т с на́ми, Спа́се: / е́же помяни́ во Ца́рствии Твое́м.

Ра́дуйтеся и весели́теся, я́ко мзда ва́ша мно́га на Небесе́х.

Рукописа́ние на́ше на Кресте́ растерза́л еси́, Го́споди, / и, вмени́вся в ме́ртвых, та́мошняго мучи́теля связа́л еси́, / изба́вль всех от уз сме́ртных Воскресе́нием Твои́м, / и́мже просвети́хомся, Человеколю́бче Го́споди, и вопие́м Тебе́: / помяни́ и нас, Спа́се, во Ца́рствии Твое́м.

Слава: Отца́, и Сы́на, и Ду́ха Свята́го / вси единому́дренно, ве́рнии, славосло́вити досто́йно помо́лимся, / Еди́ницу Божества́, в Трие́х су́щую Ипоста́сех, / неслия́нну пребыва́ющу, про́сту, неразде́льну и непристу́пну, / Е́юже избавля́емся о́гненнаго муче́ния.

И ныне, Богородичен: Ма́терь Твою́, Христе́, / пло́тию безсе́менно ро́ждшую Тя, и Де́ву вои́стинну, / и по рождестве́ пребы́вшую нетле́нну, / Сию́ Тебе́ приво́дим в моли́тву, Влады́ко Многоми́лостиве, / прегреше́ний проще́нию дарова́тися всегда́ зову́щим: / помяни́ нас, Спа́се, во Ца́рствии Твое́м.

Прокимен, глас 4: Раздели́ша ри́зы Моя́ себе́, / и о оде́жди Мое́й мета́ша жре́бий. Стих: Бо́же, Бо́же Мой, вонми́ Ми, вску́ю оста́вил Мя еси́?

Евангелие 7-е, от Матфеа, зачало 113:

Во вре́мя о́но, прише́дше во́ини на ме́сто нарица́емое Голго́фа, е́же есть Кра́ниево ме́сто, да́ша Иису́су пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю. Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей.

И полагается чтение. Таже псалом 50.

И посем Евангелие 8-е, от Луки, зачало 111:

Во вре́мя о́но, ведя́ху со Иису́сом и и́на два злоде́я с Ним уби́ти. И егда́ приидо́ша на ме́сто, нарица́емое Ло́бное, ту распя́ша Его́ и злоде́я, о́ваго у́бо одесну́ю, а друга́го ошу́юю. Иису́с же глаго́лаше: О́тче, отпусти́ им: не ве́дят бо что творя́т. Разделя́юще же ри́зы Его́, мета́ху жре́бия. И стоя́ху лю́дие зря́ще. Руга́хуся же и кня́зи с ни́ми, глаго́люще: ины́я спасе́, да спасе́т и Себе́, а́ще Той есть Христо́с Бо́жий избра́нный. Руга́хуся же Ему́ и во́ини, приступа́юще, и о́цет приде́юще Ему́. И глаго́лаху: а́ще Ты еси́ Царь Иуде́йск, спаси́ся Сам. Бе же и написа́ние напи́сано над Ним писмены́ е́ллинскими, и ри́мскими, и евре́йскими: Сей есть Царь Иуде́йск. Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́. Бе же час я́ко шесты́й, и тьма бысть по всей земли́ до часа́ девя́таго. И поме́рче со́лнце, и заве́са церко́вная раздра́ся посреде́. И возгла́шь гла́сом ве́лиим Иису́с, рече́: О́тче, в ру́це Твои́ предаю́ дух Мой. И сия́ рек и́здше. Ви́дев же со́тник бы́вшее, просла́ви Бо́га, глаго́ля: вои́стинну Челове́к Сей пра́веден бе. И вси прише́дшии наро́ди на позо́р сей, ви́дяще быва́ющая, бию́ще пе́рси своя́, возвраща́хуся. Стоя́ху же вси зна́емии Его́ издале́ча, и жены́ спосле́дствовавшия Ему́ от Галиле́и, зря́ще сих.

И абие поем трипеснец, творение господина Космы: ирмосы по дважды, тропари на 12. Последи же ирмос оба лика вкупе. Акростихис, или краегранесие трипеснца есть: Просаввато́н те: еже есть, Предсуббо́тие же. Глас 6.

Песнь 5

{Π} Ирмос: К Тебе́ у́тренюю, / милосе́рдия ра́ди Себе́ истощи́вшему непрело́жно / и до страсте́й безстра́стно прекло́ншемуся, / Сло́ве Бо́жий, / мир пода́ждь ми па́дшему, Человеколю́бче.

{Ρ} Умы́вше но́ги, и предочи́стившеся / та́инства причаще́нием Боже́ственнаго ны́не, Христе́, Твоего́, / служи́телие от Сио́на на Елео́нскую го́ру вели́кую с Тобо́ю взыдо́ша, / пою́ще Тя, Человеколю́бче.

{Ο} Зри́те, рекл еси́, дру́зи, не бо́йтеся: / ны́не бо прибли́жися час, я́ту Ми бы́ти, и убие́ну рука́ма беззако́нных: / вси же расточите́ся, Мене́ оста́вивше, / и́хже соберу́ пропове́дати Мя, Человеколю́бца.

Кондак, глас 8:

Нас ра́ди Распя́таго, / прииди́те, вси воспои́м, / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Икос: Своего́ А́гнца А́гница зря́щи к заколе́нию влеко́ма, / после́доваше Мари́я просте́ртыми власы́ со ине́ми жена́ми, сия́ вопию́щи: / ка́мо и́деши, Ча́до? / Чесо́ ра́ди ско́рое тече́ние соверша́еши? / Еда́ други́й брак па́ки есть в Ка́не Галиле́йстей, / и та́мо ны́не тщи́шися, да от воды́ им вино́ сотвори́ши ? / Иду́ ли с Тобо́ю, Ча́до, или́ па́че пожду́ Тебе́? / Даждь Ми сло́во, Сло́ве, / не молча́ мимоиди́ Мене́, Чи́сту соблюды́й Мя: / Ты бо еси́ Сын и Бог Мой.

Синаксарий.

Песнь 8

{Σ} Ирмос: Столп зло́бы богопроти́вныя, / боже́ственнии о́троцы обличи́ша, / на Христа́ же шата́ющееся беззако́нных собо́рище, / сове́тует тще́тная, / уби́ти поуча́ется / живо́т держа́щаго дла́нию. / Его́же вся тварь благослови́т, / сла́вящи во ве́ки.

{Α} От ве́ждей ученико́м ны́не сон, рекл еси́, Христе́, отряси́те, / в моли́тве же бди́те, да не в напа́сть вни́дете, и наипа́че Си́моне: / крепча́йшему бо бо́лий иску́с. / Разуме́й Мя, Пе́тре: / Его́же вся тварь благослови́т, сла́вящи во ве́ки.

{Β} Скве́рна сло́ва усте́н, никогда́же изреку́ Тебе́, Влады́ко, / с Тобо́ю умру́ я́ко благоразу́мен, / а́ще и вси отве́ргутся, возопи́ Петр. / Ни плоть, ниже́ кровь, но Оте́ц Твой откры́ ми Тя: / Его́же вся тварь благослови́т, сла́вящи во ве́ки.

{Β} Глубину́ прему́дрости Боже́ственныя и ра́зума, не всю испыта́л еси́, / бе́здну же Мои́х суде́б не пости́гл еси́, челове́че, Госпо́дь рече́. / Плоть у́бо сый, не хвали́ся, / три́жды бо отве́ржешися Мене́: / Его́же вся тварь благослови́т, сла́вящи во ве́ки.

{Α} Отрица́ешися, Си́моне Пе́тре, е́же сотвори́ши ско́ро, я́коже рече́ся, / и к тебе́ отрокови́ца, еди́на прише́дши устраши́т тя, Госпо́дь рече́. / Го́рце прослези́в, обря́щеши Мя оба́че Ми́лостива: / Его́же вся тварь благослови́т, сла́вящи во ве́ки.

Песнь 9

{Τ} Ирмос: Честне́йшую Херуви́м, / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

{Ο} Па́губное собо́рище богоме́рзских, / лука́внующих богоуби́йц со́нмище, / предста́, Христе́, Тебе́, / и я́ко непра́ведника влеча́ше Зижди́теля всех, Его́же велича́ем.

{Ν} Зако́на не разуме́юще нечести́вии, / гласо́м проро́ческим поуча́ющеся вотще́, / я́ко овча́ влеча́ху Тя, всех Влады́ку, непра́ведно закла́ти, Его́же велича́ем.

{Τ} Язы́ком изда́нную жизнь, / с кни́жники уби́ти свяще́нницы преда́ху, / уя́звлени самозави́стною зло́бою, / естество́м Животода́вца, Его́же велича́ем.

{Ε} Обыдо́ша я́ко пси мно́зи, / и уда́риша, Царю́, лани́ту Твою́ зауше́нием, вопроша́ху Тя, / Тебе́ же ло́жна свиде́тельствоваху: / и, вся претерпе́в, всех спасл еси́.

Таже ексапостиларий, трижды:

Разбо́йника благоразу́мнаго / во еди́ном часе́ ра́еви сподо́бил еси́, Го́споди, / и мене́ дре́вом кре́стным / просвети́, и спаси́ мя.

Таже Евангелие 9-е, от Иоанна, зачало 61:

Во вре́мя о́но, стоя́ху при Кресте́ Иису́сове Ма́ти Его́, и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се, сын Твой. Пото́м глаго́ла ученику́: се, Ма́ти твоя́. И от того́ часа́ поя́т Ю́ учени́к во своя́ си. Посе́м ве́дый Иису́с, я́ко вся уже́ соверши́шася, да сбу́дется Писа́ние, глаго́ла: жа́жду. Сосу́д же стоя́ше полн о́цта. Они́ же испо́лнивше гу́бу о́цта, и на трость во́нзше, приде́ша ко усто́м Его́. Егда́ же прия́т о́цет Иису́с, рече́: соверши́шася. И прекло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́тельствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

И абие: Вся́кое дыха́ние: На глас 3, поставим стихи 4. И поем стихиры самогласны три, повторяюще первый:

Два и лука́вная сотвори́, перворожде́нный сын Мой Изра́иль: / Мене́ оста́ви Исто́чника воды́ живо́тныя, / и ископа́ себе́ кладене́ц сокруше́нный: / Мене́ на дре́ве распя́т, / Вара́вву же испроси́, и отпусти́. / Ужасе́ся не́бо о сем, и со́лнце лучи́ скры: / ты же, Изра́илю, не усрами́лся еси́, / но сме́рти Мя пре́дал еси́. / Оста́ви им, О́тче Святы́й, / не ве́дят бо, что сотвори́ша.

Ки́йждо уд святы́я Твоея́ пло́ти, безче́стие нас ра́ди претерпе́: / те́рние, глава́; лице́, оплева́ния; че́люсти, зауше́ния; / уста́, во о́цте растворе́нную желчь вку́сом; / ушеса́, хуле́ния злочести́вая; / плещи́, бие́ния; и рука́, трость; / всего́ телесе́ протяже́ния на Кресте́; / чле́нове, гво́здия; и ре́бра, копие́. / Пострада́вый за ны, и от страсте́й свободи́вый нас, / снизше́дый к нам человеколю́бием, и вознесы́й нас, / Всеси́льне Спа́се, поми́луй нас.

Распе́ншуся Ти, Христе́, вся тварь, ви́дящи, трепета́ше, / основа́ния земли́ позыба́шася стра́хом держа́вы Твоея́: / Тебе́ бо возне́сшуся днесь, род евре́йский поги́бе, / церко́вная заве́са раздра́ся на дво́е, / и ме́ртвии от гробо́в воскресо́ша: / со́тник, ви́дев чу́до, ужасе́ся. / Предстоя́щи же Ма́ти Твоя́ вопия́ше, рыда́ющи ма́терски: / ка́ко не возрыда́ю, и утро́бы Моея́ не бию́, / зря́щи Тя на́га, я́ко осужде́на, на дре́ве ви́сяща? / Распны́йся и погребы́йся, и воскресы́й из ме́ртвых, / Го́споди, сла́ва Тебе́.

Слава, глас 6: Совлеко́ша с Мене́ ри́зы Моя́, / и облеко́ша Мя в ри́зу червле́ну, / возложи́ша на главу́ Мою́ вене́ц от те́рний, / и в десну́ю Мою́ ру́ку вда́ша трость, / да сокрушу́ их, я́ко сосу́ды скуде́льничи.

И ныне, глас тойже: Плещи́ Моя́ дах на ра́ны, / лица́ же Моего́ не отврати́х от заплева́ний, / суди́щу Пила́тову предста́х, и Крест претерпе́х / за спасе́ние ми́ра.

Таже Евангелие 10-е, от Марка, зачало 69:

Во вре́мя о́но, прии́де Ио́сиф, и́же от Аримафе́я, благообра́зен сове́тник, и́же и той бе ча́я Ца́рствия Бо́жия, дерзну́в вни́де к Пила́ту, и проси́ те́ло Иису́сова. Пила́т же диви́ся, а́ще уже́ у́мре: и призва́в со́тника, вопроси́ его́: а́ще уже́ у́мре? И уве́дев от со́тника, даде́ те́ло Ио́сифови. И купи́в плащани́цу, и снем Его́, обви́т плащани́цею, и положи́ Его́ во гроб, и́же бе изсе́чен от ка́мене: и привали́ ка́мень над две́ри гро́ба. Мари́я же Магдали́на, и Мари́я Иоси́ева зря́сте, где Его́ полага́ху.

Таже Сла́ва в вы́шних Бо́гу: Священник же ектению: Испо́лним у́треннюю моли́тву: И прочее по обычаю, и по возгласе: Я́ко Бог ми́лости:

Абие Евангелие 11-е, от Иоанна, зачало 62:

Во вре́мя о́но, моли́ Пила́та Ио́сиф, и́же от Аримафе́я, сый учени́к Иису́сов, потае́н же стра́ха ра́ди иуде́йска, да во́змет те́ло Иису́сово: и повеле́ Пила́т. Прии́де же и взят те́ло Иису́сово. Прии́де же и Никоди́м, прише́дый ко Иису́сови но́щию пре́жде, нося́ смеше́ние сми́рнено и ало́йно, я́ко литр сто. Прия́ста же те́ло Иису́сово, и обви́ста е́ ри́зами со арома́ты, я́коже обы́чай есть иуде́ом погреба́ти. Бе же на ме́сте, иде́же распя́тся, верт, и в ве́рте гроб нов, в не́мже николи́же никто́же положе́н бе. Ту у́бо пятка́ ра́ди иуде́йска, я́ко близ бя́ше гроб, положи́ста Иису́са.

И поем стихиры самогласны, оба лика вкупе. Глас 1:

Вся тварь изменя́шеся стра́хом, / зря́щи Тя на Кресте́ ви́сима, Христе́: / со́лнце омрача́шеся, / и земли́ основа́ния сотряса́хуся, / вся сострада́ху Созда́вшему вся. / Во́лею нас ра́ди претерпе́вый, / Го́споди, сла́ва Тебе́.

Глас 2. Стих: Раздели́ша ри́зы Моя́ себе́, / и о оде́жди Мое́й мета́ша жре́бий.

Лю́дие злочести́вии и беззако́ннии, / вску́ю поуча́ются тще́тным? / Вску́ю Живота́ всех на смерть осуди́ша? / Ве́лие чу́до, я́ко Созда́тель ми́ра / в ру́ки беззако́нных предае́тся, / и на дре́во возвыша́ется Человеколю́бец, / да я́же во а́де у́зники свободи́т зову́щия: / долготерпели́ве Го́споди, сла́ва Тебе́.

Стих: Да́ша в снедь Мою́ желчь, / и в жа́жду Мою́ напои́ша Мя о́цта.

Днесь зря́щи Тя, Непоро́чная Де́ва, / на Кресте́ Сло́ве возвыша́ема, / рыда́ющи ма́тернею утро́бою, / уязвля́шеся се́рдцем го́рце, / и стеня́щи боле́зненно из глубины́ души́, / лице́ со власы́ терза́ющи. / Те́мже и пе́рси бию́щи, взыва́ше жа́лостно: / увы́ Мне, Боже́ственное Ча́до, / увы́ Мне, Све́те ми́ра, / что заше́л еси́ от о́чию Мое́ю, А́гнче Бо́жий? / Те́мже во́инства безпло́тных, / тре́петом содержи́ми бя́ху, глаго́люще: / Непостижи́ме Го́споди, сла́ва Тебе́.

Стих: Бог же, Царь наш пре́жде ве́ка, / соде́ла спасе́ние посреде́ земли́.

На дре́ве ви́дящи ви́сима, Христе́, / Тебе́, всех Зижди́теля и Бо́га, / безсе́менно Ро́ждшая Тя вопия́ше го́рько: / Сы́не Мой, где добро́та за́йде зра́ка Твоего́? / Не терплю́ зре́ти Тя непра́ведно распина́ема: / потщи́ся у́бо, воста́ни, я́ко да ви́жу и Аз / Твое́ из ме́ртвых тридне́вное Воскресе́ние.

Слава, глас 8: Го́споди, восходя́щу Ти на Крест, / страх и тре́пет нападе́ на тварь, / и земли́ у́бо возбраня́л еси́ поглоти́ти распина́ющих Тя, / а́ду же повелева́л еси́ испусти́ти у́зники, / на обновле́ние челове́ков. / Судие́ живы́х и ме́ртвых, / жизнь прише́л еси́ пода́ти, а не смерть. / Человеколю́бче, сла́ва Тебе́.

И ныне, глас 6: Уже́ омака́ется трость изрече́ния, от суде́й непра́ведных, / Иису́с суди́мь быва́ет, и осужда́ется на крест, / и стра́ждет тварь, на Кресте́ ви́дящи Го́спода. / Но естество́м телесе́, мене́ ра́ди стражда́й, / Благи́й Го́споди, сла́ва Тебе́.

Таже Евангелие 12-е, от Матфеа, зачало 114:

Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: го́споди, помяну́хом, я́ко льстец он рече́, еще́ сый жив: по трие́х днех воста́ну. Повели́ у́бо утверди́ти гроб до тре́тияго дне, да не ка́ко прише́дше ученицы́ Его́ но́щию, укра́дут Его́, и реку́т лю́дем: воста́ от ме́ртвых, и бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те, утверди́те, я́коже ве́сте. Они́ же ше́дше утверди́ша гроб, зна́менавше ка́мень с кустоди́ею.

Таже Бла́го есть испове́датися Го́сподеви: Трисвятое. По О́тче наш:

Тропарь, глас 4:

Искупи́л ны еси́ от кля́твы зако́нныя / честно́ю Твое́ю Кро́вию, / на Кресте́ пригвозди́вся, и копие́м пробо́дся, / безсме́ртие источи́л еси́ челове́ком, / Спа́се наш, сла́ва Тебе́.

Таже ектения обычная. И отпуст:

И́же оплева́ния и бие́ния, и зауше́ния, и Крест, и смерть претерпе́вый за спасе́ние ми́ра, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Первый же час не совокупляем ныне, но о втором часе дне.

СКАЗАНИЕ ЧАСОВ СВЯТАГО И ВЕЛИКАГО ПЯТКА, ТВОРЕНИЕ КИРИЛЛА, АРХИЕПИСКОПА АЛЕКСАНДРИЙСКАГО. Первый час.

О втором часе дне клеплет, и облачится священник, и, благословившу ему, начинаем: Царю́ Небе́сный: Трисвято́е. Пресвята́я Тро́ице: О́тче наш: Возглашение: Я́ко Твое́ есть Ца́рство: Го́споди, поми́луй, 12. Сла́ва, и ны́не: Прииди́те, поклони́мся: трижды. И глаголем псалмы сия, яже зде изъявляются.

Псалом 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог, не хотя́й беззако́ния, Ты еси́, не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма. Возненави́дел еси́ вся, де́лающия беззако́ние. Погуби́ши вся, глаго́лющия лжу, му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их, язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси, упова́ющии на Тя, во век возра́дуются, и всели́шися в них. И похва́лятся о Тебе́ лю́бящии И́мя Твое́. Я́ко Ты благослови́ши пра́ведника, Го́споди, я́ко ору́жием благоволе́ния венча́л еси́ нас.

Псалом 2:

Вску́ю шата́шася язы́цы, и лю́дие поучи́шася тще́тным? Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́. Расто́ргнем у́зы их, и отве́ржем от нас и́го их. Живы́й на Небесе́х посмее́тся им, и Госпо́дь поруга́ется им. Тогда́ возглаго́лет к ним гне́вом Свои́м и я́ростию Свое́ю смяте́т я́. Аз же поста́влен есмь Царь от Него́ над Сио́ном, горо́ю свято́ю его́, возвеща́яй повеле́ние Госпо́дне. Госпо́дь рече́ ко Мне: Сын Мой еси́ Ты, Аз днесь роди́х Тя. Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́. Упасе́ши я́ жезло́м желе́зным, я́ко сосу́ды скуде́льничи сокруши́ши я́. И ны́не, ца́рие, разуме́йте, накажи́теся вси судя́щии земли́. Рабо́тайте Го́сподеви со стра́хом, и ра́дуйтеся Ему́ с тре́петом. Приими́те наказа́ние, да не когда́ прогне́вается Госпо́дь, и поги́бнете от пути́ пра́ведного, егда́ возгори́тся вско́ре я́рость Его́. Блаже́ни вси наде́ющиеся Нань.

Псалом 21:

Бо́же, Бо́же мой, вонми́ ми, вску́ю оста́вил мя еси́? Дале́че от спасе́ния моего́ словеса́ грехопаде́ний мои́х. Бо́же мой, воззову́ во дни, и не услы́шиши, и в нощи́, и не в безу́мие мне. Ты же во Святе́м живе́ши, хвало́ Изра́илева. На Тя упова́ша отцы́ на́ши, упова́ша, и изба́вил еси́ я́. К Тебе́ воззва́ша, и спасо́шася, на Тя упова́ша, и не постыде́шася. Аз же есмь червь, а не челове́к, поноше́ние челове́ков и уничиже́ние люде́й. Вси ви́дящии мя поруга́ша ми ся, глаго́лаша устна́ми, покива́ша главо́ю. Упова́ на Го́спода, да изба́вит его́, да спасе́т его́, я́ко хо́щет его́. Я́ко Ты еси́ исто́ргий мя из чре́ва, упова́ние мое́ от сосцу́ ма́тере моея́. К Тебе́ приве́ржен есмь от ложе́сн, от чре́ва ма́тере моея́, Бог мой еси́ Ты. Да не отсту́пиши от мене́, я́ко скорбь близ, я́ко несть помога́яй ми. Обыдо́ша мя тельцы́ мно́зи, юнцы́ ту́чнии одержа́ша мя. Отверзо́ша на мя уста́ своя́, я́ко лев восхища́яй и рыка́яй. Я́ко вода́ излия́хся, и разсы́пашася вся ко́сти моя́, бысть се́рдце мое́ я́ко воск, та́яй посреде́ чре́ва моего́. И́зсше я́ко скуде́ль кре́пость моя́, и язы́к мой прильпе́ горта́ни моему́, и в персть сме́рти свел мя еси́. Я́ко обыдо́ша мя пси мно́зи, сонм лука́вых одержа́ша мя, ископа́ша ру́це мои́ и но́зе мои́. Исчето́ша вся ко́сти моя́, ти́и же смотри́ша, и презре́ша мя. Раздели́ша ри́зы моя́ себе́, и о оде́жди мое́й мета́ша жре́бий. Ты же, Го́споди, не удали́ по́мощь Твою́ от мене́, на заступле́ние мое́ вонми́. Изба́ви от ору́жия ду́шу мою́, и из руки́ пе́сии единоро́дную мою́. Спаси́ мя от уст льво́вых и от рог единоро́жь смире́ние мое́. Пове́м и́мя Твое́ бра́тии мое́й, посреде́ це́ркве воспою́ Тя. Боя́щиися Го́спода, восхвали́те Его́, все се́мя Иа́ковле, просла́вите Его́, да убои́тся же от Него́ все се́мя Изра́илево. Я́ко не уничижи́, ниже́ негодова́ моли́твы ни́щаго, ниже́ отврати́ лице́ Свое́ от мене́, и егда́ воззва́х к Нему, услы́ша мя. От Тебе́ похвала́ моя́, в це́ркви вели́цей испове́мся Тебе́, моли́твы моя́ возда́м пред боя́щимися Его́. Ядя́т убо́зии, и насы́тятся, и восхва́лят Го́спода взыска́ющии Его́, жива́ бу́дут сердца́ их в век ве́ка. Помяну́тся и обратя́тся ко Го́споду вси концы́ земли́, и покло́нятся пред Ним вся оте́чествия язы́к. Я́ко Госпо́дне есть ца́рствие, и Той облада́ет язы́ки. Ядо́ша и поклони́шася вси ту́чнии земли́, пред Ним припаду́т вси низходя́щии в зе́млю, и душа́ моя́ тому́ живе́т. И се́мя мое́ порабо́тает Ему́, возвести́т Го́сподеви род гряду́щий. И возвестя́т пра́вду Его́ лю́дем ро́ждшымся, я́же сотвори́ Госпо́дь.

Слава, и ныне, аллилу́иа, трижды. Го́споди, поми́луй, трижды.

Слава, тропарь, глас 1:

Распе́ншуся Тебе́, Христе́, поги́бе мучи́тельство, / попра́на бысть си́ла вра́жия: / ниже́ бо А́нгел, ниже́ челове́к, / но Сам Го́споди спасл еси́ нас, сла́ва Тебе́.

И ныне, Богородичен: Что Тя нарече́м, о Благода́тная? / Не́бо, я́ко возсия́ла еси́ Со́лнце Пра́вды. / Рай, я́ко прозябла́ еси́ цвет нетле́ния. / Де́ву, я́ко пребыла́ еси́ нетле́нна. / Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. / Того́ моли́ спасти́ся душа́м на́шим.

Таже поем тропари три от двунадесяти, повторяюще я. Глаголем же первый без стиха, тако бо творим и в прочих часех в первый тропарь. Во вторый же, глаголет наченший лик стих, и поет и. Таже паки другий лик стих, и поет и той и. Третий же глаголем на Сла́ву, и на И ны́не.

Стихира самогласна перваго часа, глас 8:

Днесь церковная завеса / на обличение беззаконных раздирается, / и солнце лучи своя́ скрывает, / Влады́ку зря распинаема.

И паки туюже другий лик.

Таже глаголет стих первый лик: Вску́ю шата́шася язы́цы, и лю́дие поучи́шася тще́тным?

И поем настоящий тропарь:

Я́ко овча́ на заколе́ние / веде́н был еси́, Христе́ Царю, / и я́ко а́гнец незло́бивый / пригвозди́лся еси́ Кресту́, от беззако́нных муже́й, / грех ра́ди на́ших, Человеколю́бче.

Стих: Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́.

И поет паки и другий лик тойже стих. Таже первый лик.

Слава: Е́мшим Тя беззако́нным, / претерпева́я, си́це вопия́л еси́, Го́споди: / а́ще и порази́сте Па́стыря, / и расточи́сте двана́десять ове́ц, ученики́ Моя́, / можа́х вя́щши, не́жели двана́десяте легео́нов предста́вити А́нгелов. / Но долготерплю́, да испо́лнятся, / я́же яви́х вам проро́ки Мои́ми, / безве́стная и та́йная: / Го́споди, сла́ва Тебе́.

И ныне: паки тойже.

Прокимен пророчества, глас 4: Се́рдце его́ / собра́ беззако́ние себе́. Стих: Блаже́н разумева́яй на ни́ща и убо́га.

Пророчества Захариина чтение [Глава 11, ст. 10 – 13].

Та́ко глаго́лет Госпо́дь: прииму́ жезл Мой до́брый, и отве́ргу его́, е́же разори́ти заве́т Мой, его́же завеща́х ко всем лю́дем. И разори́тся в день о́ный, и уразуме́ют ханане́и о́вцы храни́мыя Мне, зане́ сло́во Госпо́дне есть. И реку́ к ним: а́ще добро́ пред вами есть, дади́те мзду Мою́, или́ отрецы́теся: и поста́виша мзду Мою́ три́десять сре́бреник. И рече́ Госпо́дь ко мне: вложи́ я́ в горни́ло, и смотри́ а́ще искуше́но есть, и́мже о́бразом искуше́н бых о них. И прия́х три́десять сре́бреник, и вложи́х их в храм Госпо́день в горни́ло.

Таже Апостол к Галатом, зачало 215, от полу.

Бра́тие, мне да не бу́дет хвали́тися, то́кмо о Кресте́ Го́спода на́шего Иису́са Христа́, И́мже мне мир распя́ся, и аз ми́ру. О Христе́ бо Иису́се ни обре́зание что мо́жет, ни необре́зание, но нова́ тварь. И ели́цы пра́вилом сим жи́тельствуют, мир на них и ми́лость, и на Изра́или Бо́жии. Про́чее труды́ да никто́же ми дае́т: аз бо я́звы Го́спода Иису́са на те́ле мое́м ношу́. Благода́ть Го́спода на́шего Иису́са Христа́, со ду́хом ва́шим, бра́тие, ами́нь.

Таже Евангелие от Матфеа, зачало 110:

Во вре́мя о́но, у́тру бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону. Тогда́ ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́. И прише́дше на ме́сто нарица́емое Голго́фа, е́же есть Кра́ниево ме́сто, да́ша Ему́ пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю. Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей. Бя́ху же ту и жены́ мно́ги издале́че зря́ще, я́же идо́ша по Иису́се от Галиле́и, служа́ще Ему́. В ни́хже бе Мари́я Магдали́на и Мари́я Иа́ковля, и Иоси́и ма́ти, и ма́ти сы́ну Зеведе́ову.

Таже Стопы́ моя́ напра́ви по словеси́ Твоему́: Да испо́лнятся уста́ моя́ хвале́ния: Трисвятое. И по О́тче наш:

Кондак, глас 8:

Нас ра́ди Распя́таго, прииди́те, вси воспои́м. / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Таже Го́споди, поми́луй, 40. И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Священник: Бо́же, уще́дри ны: Христе́, Све́те и́стинный:

ПОСЕМ ПОЕМ ТРЕТИЙ ЧАС.

Глаголем: Прииди́те, поклони́мся: трижды.

И псалом 34:

Суди́, Го́споди, оби́дящыя мя, побори́ борю́щыя мя. Приими́ ору́жие и щит, и воста́ни в по́мощь мою́. Изсу́ни мечь, и заключи́ сопроти́в гоня́щих мя. Рцы души́ мое́й: спасе́ние твое́ есмь Аз. Да постыдя́тся и посра́мятся и́щущии ду́шу мою́, да возвратя́тся вспять, и постыдя́тся мы́слящии ми зла́я. Да бу́дут я́ко прах пред лице́м ве́тра, и А́нгел Госпо́день оскорбля́я их. Да бу́дет путь их тьма и по́лзок, и А́нгел Госпо́день погоня́яй их. Я́ко ту́не скры́ша ми па́губу се́ти своея́, всу́е поноси́ша души́ мое́й. Да прии́дет ему́ сеть, ю́же не весть, и лови́тва, ю́же скры, да объи́мет и́, и в сеть да впаде́т в ню. Душа́ же моя́ возра́дуется о Го́споде, возвесели́тся о спасе́нии Его́. Вся ко́сти моя́ реку́т: Го́споди, Го́споди, кто подо́бен Тебе́? Избавля́яй ни́ща из руки́ кре́пльших его́, и ни́ща и убо́га от расхища́ющих его́. Воста́вше на мя свиде́теле непра́веднии, я́же не ве́дях, вопроша́ху мя. Возда́ша ми лука́вая воз блага́я, и безча́дие души́ мое́й. Аз же, внегда́ они́ стужа́ху ми, облача́хся во вре́тище, и смиря́х посто́м ду́шу мою́, и моли́тва моя́ в не́дро мое́ возврати́тся. Я́ко бли́жнему, я́ко бра́ту на́шему, та́ко угожда́х, я́ко пла́ча и се́туя, та́ко смиря́хся. И на мя возвесели́шася, и собра́шася, собра́шася на мя ра́ны, и не позна́х, раздели́шася, и не умили́шася. Искуси́ша мя, подражни́ша мя подражне́нием, поскрежета́ша на мя зубы́ свои́ми. Го́споди, когда́ у́зриши? Устро́й ду́шу мою́ от злоде́йства их, от лев единоро́дную мою́. Испове́мся Тебе́ в це́ркви мно́зе, в лю́дех тя́жцех восхвалю́ Тя. Да не возра́дуются о мне вражду́ющии ми непра́ведно, ненави́дящии мя туне и помиза́ющии очи́ма. Я́ко мне у́бо ми́рная глаго́лаху, и на гнев ле́сти помышля́ху. Разшири́ша на мя уста́ своя́, ре́ша: бла́гоже, бла́гоже, ви́деша о́чи на́ши. Ви́дел еси́, Го́споди, да не премолчи́ши. Го́споди, не отступи́ от мене́. Воста́ни, Го́споди, и вонми́ суду́ моему́, Бо́же мой и Го́споди мой, на прю мою́. Суди́ ми, Го́споди, по пра́вде Твое́й, Го́споди Бо́же мой, и да не возра́дуются о мне. Да не реку́т в сердца́х своих: бла́гоже, бла́гоже души́ на́шей, ниже́ да реку́т: пожро́хом его́. Да постыдя́тся и посра́мятся вку́пе ра́дующиися злом мои́м, да облеку́тся в студ и срам велере́чующии на мя. Да возра́дуются и возвеселя́тся хотя́щии пра́вды моея́, и да реку́т вы́ну, да возвели́чится Госпо́дь, хотя́щии ми́ра рабу́ Его́. И язы́к мой поучи́тся пра́вде Твое́й, весь день хвале́ Твое́й.

Псалом 108:

Бо́же, хвалы́ моея́ не премолчи́. Я́ко уста́ гре́шнича, и уста́ льсти́ваго на мя отверзо́шася, глаго́лаша на мя язы́ком льсти́вым. И словесы́ ненави́стными обыдо́ша мя, и бра́шася со мно́ю ту́не. Вме́сто е́же люби́ти мя, оболга́ху мя, аз же моля́хся, и положи́ша на мя зла́я за блага́я, и не́нависть за возлюбле́ние мое́. Поста́ви на него́ гре́шника, и диа́вол да ста́нет одесну́ю его́. Внегда́ суди́тися ему́, да изы́дет осужде́н, и моли́тва его́ да бу́дет в грех. Да бу́дут дни́е его́ ма́ли, и епи́скопство его́ да прии́мет ин. Да бу́дут сы́нове его́ си́ри, и жена́ его́ вдова́. Дви́жущеся да преселя́тся сы́нове его́ и воспро́сят, да изгна́ни бу́дут из домо́в свои́х. Да взы́щет заимода́вец вся, ели́ка суть его́, и да восхи́тят чужди́и труды́ его́. Да не бу́дет ему́ засту́пника, ниже́ да бу́дет ущедря́яй сироты́ его́. Да бу́дут ча́да его́ в погубле́ние, в ро́де еди́ном да потреби́тся и́мя его́. Да воспомяне́тся беззако́ние оте́ц его́ пред Го́сподем, и грех ма́тере его́ да не очи́стится. Да бу́дут пред Го́сподем вы́ну, и да потреби́тся от земли́ па́мять их. Зане́же не помяну́ сотвори́ти ми́лость, и погна́ челове́ка ни́ща и убо́га, и умиле́на се́рдцем умертви́ти. И возлюби́ кля́тву, и прии́дет ему́, и не восхоте́ благослове́ния, и удали́тся от него́. И облече́ся в кля́тву я́ко в ри́зу, и вни́де я́ко вода́ во утро́бу его́, и я́ко еле́й в ко́сти его́. Да бу́дет ему́ я́ко ри́за, в ню́же облачи́тся, и я́ко по́яс, и́мже вы́ну опоясу́ется. Сие́ де́ло оболга́ющих мя у Го́спода, и глаго́лющих лука́вая на ду́шу мою́. И ты, Го́споди, Го́споди, сотвори́ со мно́ю и́мене ра́ди Твоего́, я́ко бла́га ми́лость Твоя́. Изба́ви мя, я́ко нищ и убо́г есмь аз, и се́рдце мое́ смяте́ся внутрь мене́. Я́ко сень, внегда́ уклони́тися ей, отъя́хся, стрясо́хся я́ко пру́зи. Коле́на моя́ изнемого́ста от поста́, и плоть моя́ измени́ся еле́а ра́ди. И аз бых поноше́ние им, ви́деша мя, покива́ша глава́ми свои́ми. Помози́ ми, Го́споди Бо́же мой, и спаси́ мя по ми́лости Твое́й. И да разуме́ют, я́ко рука́ Твоя́ сия́, и Ты, Го́споди, сотвори́л еси́ ю́. Проклену́т ти́и, и Ты благослови́ши, востаю́щии на мя да постыдя́тся, раб же Твой возвесели́тся. Да облеку́тся оболга́ющии мя в срамоту́, и оде́ждутся, я́ко оде́ждею, студо́м свои́м. Испове́мся Го́сподеви зело́ усты́ мои́ми, и посреде́ мно́гих восхвалю́ Его́. Я́ко предста́ одесну́ю убо́гаго, е́же спасти́ от гоня́щих ду́шу мою́.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х. Я́ко да оправди́шися во словесе́х Твои́х, и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и Дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Слава, и ныне, аллилу́иа, трижды. Го́споди, поми́луй, трижды.

Слава, тропарь, глас 6:

Го́споди, осуди́ша Тя иуде́е на смерть, Жизнь всех, / и́же Чермно́е мо́ре жезло́м проше́дший, / на Кресте́ Тя пригвозди́ша: / и и́же от ка́мене мед сса́вшии, / желчь Тебе́ принесо́ша. / Но во́лею претерпе́л еси́, / да нас свободи́ши от рабо́ты вра́жия, / Христе́ Бо́же, сла́ва Тебе́.

И ныне, Богородичен: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

И поем три тропари от двунадесяти, повторяюще я. Глас 8:

Стра́ха ра́ди иуде́йскаго, / друг Твой и бли́жний Петр отве́ржеся Тебе́, Го́споди, / и рыдая си́це вопия́ше: / слез мои́х не премолчи́, / рех бо сохрани́ти ве́ру Ще́дре, и не сохрани́х: / и на́ше покая́ние та́кожде приими́, и поми́луй нас.

Паки тойже. Таже стих: Глаго́лы моя́ внуши́ Го́споди, разуме́й зва́ние мое́.

Пре́жде Честна́го Твоего́ Креста́, / во́ином руга́ющимся Тебе́, Го́споди, / у́мная во́инства дивля́хуся: / обложи́лся бо еси́ венце́м поруга́ния, / зе́млю живописа́вый цве́ты, / багряни́цею поруга́ния оде́ялся еси́, / о́блаки одева́яй твердь. / Таковы́м бо смотре́нием разуме́ся Твое́ благоутро́бие, Христе́, / ве́лия Твоя́ ми́лость, сла́ва Тебе́.

Стих: Вонми́ гла́су моле́ния моего́, Царю́ мой и Бо́же мой.

И паки тойже.

Слава, глас 5: Влеко́мь на Крест, си́це вопия́л еси́, Го́споди: / за ко́е де́ло хо́щете Мя распя́ти, иуде́е? / Я́ко разсла́бленныя ва́ша стягну́х, / зане́ мертвецы́ а́ки от сна возста́вих, / кровоточи́вую исцели́х, ханане́ю поми́ловах. / За ко́е де́ло хо́щете Мя уби́ти, иуде́е? / Но у́зрите, в Него́же ны́не пробода́ете Христа́, беззако́ннии.

И ныне, паки тойже.

Прокимен, глас 4: Я́ко Аз на ра́ны гото́в, / и боле́знь Моя́ пре́до Мно́ю есть вы́ну. Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Пророчества Исаиина чтение [Глава 50, ст. 4 – 11].

Госпо́дь дае́т мне язы́к науче́ния, е́же разуме́ти, егда́ подоба́ет рещи́ сло́во: положи́ мя у́тро у́тро, приложи́ ми у́хо, е́же слы́шати, и наказа́ние Госпо́дне отверза́ет у́ши мои́, аз же не проти́влюся, ни противоглаго́лю. Плещи́ мои́ вдах на ра́ны, и лани́те мои́ на зауше́ния, лица́ же моего́ не отврати́х от студа́ заплева́ний. И Госпо́дь Госпо́дь помо́щник ми бысть: сего́ ра́ди не усрами́хся, но положи́х лице́ свое́, а́ки тве́рдый ка́мень, и разуме́х, я́ко не постыжду́ся. Зане́ приближа́ется оправда́вый мя. Кто пря́йся со мно́ю? Да сопротивоста́нет мне ку́пно. И кто судя́йся со мно́ю? Да прибли́жится ко мне. Се Госпо́дь Госпо́дь помо́жет ми. Кто озло́бит мя? Се вси вы я́ко ри́за обетша́ете, и я́ко мо́лие изъя́ст вы. Кто в вас боя́йся Го́спода? Да послу́шает гла́са о́трока Его́. Ходя́щии во тьме, и несть им све́та, наде́йтеся на и́мя Госпо́дне и утверди́теся о Бо́зе. Се вси вы огнь раждиза́ете, и укрепля́ете пла́мень: ходи́те све́том огня́ ва́шего, и пла́менем, его́же разжего́сте. Мене́ ра́ди бы́ша сия́ вам, в печа́ли у́спнете.

Таже Апостол, к Римляном послания, зачало 88 от полу.

Бра́тие, Христо́с су́щим нам немощны́м, по вре́мени за нечести́вых у́мре. Едва́ бо за пра́ведника кто у́мрет: за блага́го бо не́гли кто и де́рзнет умре́ти. Составля́ет же Свою́ любо́вь в нас Бог, я́ко еще́ гре́шником су́щим нам, Христо́с за ны у́мре. Мно́го же у́бо па́че оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше, примири́хомся Бо́гу сме́ртию Сы́на Его́, мно́жае па́че примири́вшеся, спасе́мся в животе́ Его́.

Евангелие от Марка, зачало 66, 67 и 68, в ряд:

Во вре́мя о́но, во́ини ведо́ша Иису́са внутрь двора́, е́же есть прето́р, и созва́ша всю спи́ру. И облеко́ша Его́ в препря́ду, и возложи́ша на Него́ спле́тше терно́в вене́ц, и нача́ша целова́ти Его́, и глаго́лати: ра́дуйся, Царю́ Иуде́йский. И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́. И егда́ поруга́шася Ему́, совлеко́ша с Него́ препря́ду, и облеко́ша Его́ в ри́зы Своя́; и изведо́ша Его́, да про́пнут Его́. И заде́ша мимоходя́щу не́коему Си́мону Кирине́ю, [гряду́щу с села́, отцу́ Алекса́ндрову и Ру́фову,] да во́змет крест Его́. И приведо́ша Его́ на Голго́фу ме́сто, е́же есть сказа́емо, Ло́бное ме́сто. И дая́ху Ему́ пи́ти есмирнисме́но вино́. Он же не прия́т. И распе́ншии Его́ раздели́ша ри́зы Его́, мета́юще жре́бий о них, кто что во́змет. Бе же час тре́тий, и распя́ша Его́. И бе написа́ние вины́ Его́ напи́сано: Царь Иуде́йск. И с Ним распя́ша два разбо́йника, еди́наго одесну́ю, и еди́наго ошу́юю Его́. И сбы́стся Писа́ние, е́же глаго́лет: и со беззако́нными вмени́ся. И мимоходя́щии ху́ляху Его́, покива́юще глава́ми свои́ми, и глаго́люще: уа́, разоря́яй це́рковь, и треми́ де́ньми созида́яй, спаси́ся Сам, и сни́ди со креста́. Та́коже и архиере́е руга́ющеся, друг ко дру́гу с кни́жники, глаго́лаху: и́ны спасе́, Себе́ ли не мо́жет спасти́? Христо́с, Царь Изра́илев, да сни́дет ны́не с креста́, да ви́дим и ве́ру име́м Ему́. И распя́тая с Ним поноша́ста Ему́. Бы́вшу же часу́ шесто́му, тьма бысть по всей земли́ до часа́ девя́таго. И в час девя́тый возопи́ Иису́с гла́сом ве́лиим, глаго́ля: Елои́, Елои́, лима́ савахфани́; е́же есть сказа́емо: Бо́же Мой, Бо́же Мой, почто́ Мя оста́вил еси́. И не́цыи от предстоя́щих слы́шавше, глаго́лаху: се Илию́ гласи́т. Тек же еди́н, и напо́лнив гу́бу о́цта, и возло́жь на трость, напоя́ше его́, глаго́ля: оста́вите, да ви́дим, а́ще прии́дет Илия́ сня́ти Его́. Иису́с же пущь глас ве́лий, и́здше. И заве́са церко́вная раздра́ся на дво́е, свы́ше до ни́зу. Ви́дев же со́тник стоя́й пря́мо ему́, я́ко та́ко возопи́в и́здше, рече́: вои́стинну Челове́к Сей, Сын бе Бо́жий. Бя́ху же и жены́ издале́ча зря́ще, в ни́хже бе Мари́я Магдали́на, и Мари́я Иа́кова Ма́лаго, и Иоси́и ма́ти, и Саломи́я. И́же и егда́ бе в Галиле́и, хожда́ху по Нем, и служа́ху Ему́; и и́ны мно́гия, я́же взыдо́ша с Ним во Иерусали́м.

И посем чтем по сказании, еже от Матфеа, слово крестное. Таже Госпо́дь Бог благослове́н: Трисвятое. И по О́тче наш: кондак: Нас ра́ди Распя́таго: Го́споди, поми́луй, 40. Молитва: И́же на вся́кое вре́мя: Го́споди, поми́луй, трижды. Сла́ва, и ны́не. Честне́йшую Херуви́м: И́менем Госпо́дним благослови́, о́тче. Иерей: Бо́же, уще́дри ны:

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, еди́на си́ла, поми́луй мя гре́шнаго и и́миже ве́си судьба́ми спаси́ мя недосто́йнаго раба́ Твоего́, я́ко благослове́н еси́ во ве́ки веко́в, ами́нь.

И АБИЕ ПОЕМ ШЕСТЫЙ ЧАС.

Глаголем: Прииди́те, поклони́мся: трижды. И псалмы.

Псалом 53:

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя, и кре́пцыи взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го. Я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псалом 139:

Изми́ мя, Го́споди, от челове́ка лука́ва, от му́жа непра́ведна изба́ви мя. И́же помы́слиша непра́вду в се́рдце, весь день ополча́ху бра́ни. Изостри́ша язы́к свой, я́ко змии́н, яд а́спидов под устна́ми их. Сохрани́ мя, Го́споди, из ру́ки гре́шничи, от челове́к непра́ведных изми́ мя, и́же помы́слиша запя́ти стопы́ моя́. Скры́ша го́рдии сеть мне, и у́жы препя́ша сеть нога́ма мои́ма. При стези́ собла́зны положи́ша ми. Рех Го́сподеви: Бог мой еси́ Ты, внуши́, Го́споди, глас моле́ния моего́. Го́споди, Го́споди, си́ло спасе́ния моего́, осени́л еси́ над главо́ю мое́ю в день бра́ни. Не преда́ждь мене́, Го́споди, от жела́ния моего́ гре́шнику: помы́слиша на мя, не оста́ви мене́, да не когда́ вознесу́тся. Глава́ окруже́ния их, труд усте́н их покры́ет я́. Паду́т на них у́глия о́гненная, низложи́ши я́ в страсте́х, и не постоя́т. Муж язы́чен не испра́вится на земли́: му́жа непра́ведна зла́я уловя́т во истле́ние. Позна́х, я́ко сотвори́т Госпо́дь суд ни́щым и месть убо́гим. Оба́че пра́веднии испове́дятся и́мени Твоему́, и вселя́тся пра́вии с лице́м Твои́м.

Псалом 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: засту́пник мой еси́, и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна. Плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́, летя́щия во дни, от ве́щи, во тьме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится. Оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло, и ра́на не прибли́жится телеси́ твоему́. Я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя Мое́. Воззове́т ко Мне, и услы́шу его́; с ним есмь в ско́рби, изму́ его́ и просла́влю его́. Долгото́ю дней испо́лню его́ и явлю́ ему́ спасе́ние Мое́.

Слава, и ныне: Аллилу́иа, трижды. Го́споди, поми́луй, трижды.

Слава, тропарь, глас 2:

Спасе́ние соде́лал еси́ посреде́ земли́, Христе́ Бо́же, / на Кресте́ пречи́стеи ру́це Твои́ просте́рл еси́, / собира́я вся язы́ки, зову́щия: / Го́споди, сла́ва Тебе́.

И ныне, Богородичен: Я́ко не и́мамы дерзнове́ния за премно́гия грехи́ на́ша, / Ты и́же от Тебе́ Ро́ждшагося моли́, Богоро́дице Де́во, / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко ми́лостив есть и спасти́ моги́й, / И́же и страда́ти о нас изво́ливый.

И поем 3 тропари от двунадесяти, глас 8, повторяюще я.

Сия́ глаго́лет Госпо́дь иуде́ом: / лю́дие Мои́, что сотвори́х вам? / Или́ чим вам стужи́х? / Слепцы́ ва́ша просвети́х, прокаже́нныя очи́стих, / му́жа су́ща на одре́ испра́вих. / Лю́дие Мои́, что сотвори́х вам? / Или́ что Мне возда́сте? / За ма́нну желчь, за во́ду о́цет: / за е́же люби́ти Мя, ко Кресту́ Мя пригвозди́сте. / Ктому́ не терплю́ про́чее, / призову́ Моя́ язы́ки, / и ти́и Мя просла́вят со Отце́м и Ду́хом, / и Аз им да́рую живо́т ве́чный.

Стих: Да́ша в снедь Мою́ желчь, и в жа́жду Мою́ напои́ша Мя о́цта.

Законополо́жницы Изра́илевы, иуде́е и фарисе́е, / лик апо́стольский вопие́т к вам: / се Храм, Его́же вы разори́сте: / се А́гнец, Его́же вы распя́сте, гро́бу преда́сте, / но вла́стию Свое́ю воскре́се. / Не льсти́теся, иуде́е: / Той бо есть, И́же в мо́ри спасы́й, / и в пусты́ни пита́вый. / Той есть Живо́т, и Свет, и Мир ми́рови.

Стих: Спаси́ мя, Бо́же, я́ко внидо́ша во́ды до души́ моея́.

Паки туюжде стихиру.

Слава, глас 5: Прииди́те, христоно́снии лю́дие, / ви́дим, что совеща́ Иу́да преда́тель, / со свяще́нники беззако́нными на Спа́са на́шего: / днесь пови́нна сме́рти, Безсме́ртнаго Сло́ва сотвори́ша, / и Пила́ту преда́вше, на ме́сте ло́бнем распя́ша. / И сия́ стражда́ вопия́ше Спас наш, глаго́ля: / оста́ви им, О́тче, грех сей, / да разуме́ют язы́цы из ме́ртвых Мое́ Воскресе́ние.

И ныне, тойже.

Прокимен, глас 4: Го́споди Госпо́дь наш, / я́ко чу́дно и́мя Твое́ по всей земли́. Стих: Я́ко взя́тся великоле́пие Твое́ превы́ше небе́с.

Пророчества Исаиина чтение [Глава 52].

Та́ко глаго́лет Госпо́дь: се уразуме́ет о́трок Мой, и вознесе́тся и просла́вится зело́. Я́коже ужа́снутся о Тебе́ мно́зи, та́ко обезсла́вится от челове́к вид Твой, и сла́ва Твоя́ от сыно́в челове́ческих. Та́ко удивя́тся язы́цы мно́зи о Нем, и заградя́т ца́рие уста́ своя́: я́ко и́мже не возвести́ся о Нем, у́зрят, и и́же не слы́шаша, уразуме́ют. Го́споди, кто ве́рова слу́ху на́шему? И мы́шца Госпо́дня кому́ откры́ся? Возвести́хом, я́ко Отроча́ пред ним, я́ко ко́рень в земли́ жа́ждущей, несть ви́да Ему́, ниже́ сла́вы: и ви́дехом Его́, и не имя́ше ви́да, ни добро́ты. Но вид Его́ безче́стен, ума́лен па́че всех сыно́в челове́ческих: челове́к в я́зве сый, и ве́дый терпе́ти боле́знь, я́ко отврати́ся Лице́ Его́, безче́стно бысть, и не вмени́ся. Сей грехи́ на́ша но́сит, и о нас боле́знует, и мы вмени́хом Его́ бы́ти в труде́, и в я́зве от Бо́га, и во озлобле́нии. Той же я́звен бысть за грехи́ на́ша, и му́чен бысть за беззако́ния на́ша, наказа́ние ми́ра на́шего на Нем, я́звою Его́ мы исцеле́хом. Вси я́ко о́вцы заблуди́хом: челове́к от пути́ своего́ заблуди́, и Госпо́дь предаде́ Его́ грех ра́ди на́ших. И Той, зане́ озло́блен бысть, и не отверза́ет уст Свои́х: я́ко овча́ на заколе́ние веде́ся, и я́ко а́гнец пред стригу́щим Его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся, род же Его́ кто испове́сть? Я́ко взе́млется от земли́ живо́т Его́, ра́ди беззако́ний люде́й Мои́х веде́ся на смерть. И дам лука́выя вме́сто погребе́ния Его́, и бога́тыя вме́сто сме́рти Его́: я́ко беззако́ния не сотвори́, ниже́ обре́теся лесть во усте́х Его́. И Госпо́дь хо́щет очи́стити Его́ от я́звы: а́ще да́стся о гресе́, душа́ ва́ша у́зрит се́мя долгоживо́тное. И хо́щет Госпо́дь руко́ю Свое́ю отъя́ти боле́знь от души́ Его́, яви́ти Ему́ свет, и созда́ти ра́зумом, оправда́ти пра́веднаго благослужа́ща мно́гим, и грехи́ их Той понесе́т. Сего́ ра́ди Той насле́дит мно́гих, и кре́пких раздели́т коры́сти: зане́ предана́ бысть на смерть душа́ Его́, и со беззако́нными вмени́ся, и Той грехи́ мно́гих вознесе́, и за беззако́ния их пре́дан бысть. Возвесели́ся, непло́ды неражда́ющая, возгласи́ и возопи́й, нечревоболе́вшая, я́ко мно́га ча́да пусты́я па́че, не́жели иму́щая му́жа.

Апостол ко Евреем, зачало 306:

Бра́тие, святя́й и освяща́емии от Еди́наго вси: ея́же ра́ди вины́ не стыди́тся бра́тию нарица́ти их, глаго́ля: Возвещу́ и́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола. И изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от Се́мене Авраа́мова прие́млет. Отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́.

Таже Евангелие от Луки, зачало 111:

Во вре́мя о́но, ведя́ху со Иису́сом и и́на два злоде́я с Ним уби́ти. И егда́ приидо́ша на ме́сто, нарица́емое Ло́бное, ту распя́ша Его́ и злоде́я, о́ваго у́бо одесну́ю, а друга́го ошу́юю. Иису́с же глаго́лаше: О́тче, отпусти́ им: не ве́дят бо что творя́т. Разделя́юще же ри́зы Его́, мета́ху жре́бия. И стоя́ху лю́дие зря́ще. Руга́хуся же и кня́зи с ни́ми, глаго́люще: ины́я спасе́, да спасе́т и Себе́, а́ще Той есть Христо́с Бо́жий избра́нный. Руга́хуся же Ему́ и во́ини, приступа́юще, и о́цет приде́юще Ему́. И глаго́лаху: а́ще Ты еси́ Царь Иуде́йск, спаси́ся Сам. Бе же и написа́ние напи́сано над Ним писмены́ е́ллинскими, и ри́мскими, и евре́йскими: Сей есть Царь Иуде́йск. Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́. Бе же час я́ко шесты́й, и тьма бысть по всей земли́ до часа́ девя́таго. И поме́рче со́лнце, и заве́са церко́вная раздра́ся посреде́. И возгла́шь гла́сом ве́лиим Иису́с, рече́: О́тче, в ру́це Твои́ предаю́ дух Мой. И сия́ рек и́здше. Ви́дев же со́тник бы́вшее, просла́ви Бо́га, глаго́ля: вои́стинну Челове́к Сей пра́веден бе. И вси прише́дшии наро́ди на позо́р сей, ви́дяще быва́ющая, бию́ще пе́рси своя́, возвраща́хуся. Стоя́ху же вси зна́емии Его́ издале́ча, и жены́ спосле́дствовавшия Ему́ от Галиле́и, зря́ще сих.

И посем чтение. Таже Ско́ро да предваря́т ны: Трисвятое. По О́тче наш: Кондак: Нас ра́ди Распя́таго: Го́споди, поми́луй, 40. И молитва: И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Священник: Бо́же, уще́дри ны:

Таже молитва святаго Великаго Василиа:

Бо́же и Го́споди Сил, и всея́ тва́ри Соде́телю, И́же за милосе́рдие безприкла́дныя ми́лости Твоея́, Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и Честны́м Его́ Кресто́м, рукописа́ние грех на́ших растерза́вый и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас гре́шных благода́рственныя сия́ и моле́бныя моли́твы, и изба́ви нас от вся́каго всегуби́тельнаго и мра́чнаго прегреше́ния, и всех озло́бити нас и́щущих, ви́димых и неви́димых враг. Пригвозди́ стра́ху Твоему́ пло́ти на́ша, и не уклони́ серде́ц на́ших в словеса́, или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще, и е́же от Тебе́ све́том наставля́еми, Тебе́ непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем Безнача́льному Отцу́, со Единоро́дным Твои́м Сы́ном, и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

СОВОКУПЛЯЕМ ЖЕ И ДЕВЯТЫЙ ЧАС.

Глаголем: Прииди́те, поклони́мся: трижды.

Псалом 68:

Спаси́, мя, Бо́же, я́ко внидо́ша во́ды до души́ моея́. Углебо́х в тиме́нии глубины́, и несть постоя́ния. Приидо́х во глубины́ морски́я, и бу́ря потопи́ мя. Утруди́хся зовы́й, измолче́ горта́нь мой, исчезо́сте о́чи мои́, от е́же упова́ти ми на Бо́га моего́. Умно́жишася па́че влас главы́ моея́ ненави́дящии мя ту́не, укрепи́шася врази́ мои́, изгоня́щии мя непра́ведно: я́же не восхища́х, тогда́ воздая́х. Бо́же, Ты уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне терпя́щии Тебе́, Го́споди, Го́споди сил, ниже́ да посра́мятся о мне и́щущии Тебе́, Бо́же Изра́илев. Я́ко Тебе́ ра́ди претерпе́х поноше́ние, покры́ срамота́ лице́ мое́. Чуждь бых бра́тии мое́й, и стра́нен сыново́м ма́тepe моея́. Я́ко ре́вность до́му Твоего́ снеде́ мя, и поноше́ния понося́щих Ти нападо́ша на мя. И покры́х посто́м ду́шу мою́, и бысть в поноше́ние мне. И положи́х одея́ние мое́ вре́тище, и бых им в при́тчу. О мне глумля́хуся седя́щии во врате́х, и о мне поя́ху пию́щии вино́. Аз же моли́твою мое́ю к Тебе́, Бо́же, вре́мя благоволе́ния; Бо́же, во мно́жестве ми́лости Твоея́ услы́ши мя, во и́стине спасе́ния Твоего́. Спаси́ мя от бре́ния, да не угле́бну, да изба́влюся от ненави́дящих мя и от глубо́ких вод. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне рове́нник уст свои́х. Услы́ши мя, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя. Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. Вонми́ души́ мое́й, и изба́ви ю́; враг мои́х ра́ди изба́ви мя. Ты бо ве́си поноше́ние мое́, и студ мой, и срамоту́ мою́, пред Тобо́ю вси оскорбля́ющии мя. Поноше́ние ча́яше душа́ моя́ и страсть; и ждах соскорбя́щаго, и не бе́, и утеша́ющих, и не обрето́х. И да́ша в снедь мою́ желчь, и в жа́жду мою́ напои́ша мя о́цта. Да бу́дет трапе́за их пред ни́ми в сеть, и в воздая́ние, и в собла́зн. Да помрача́тся о́чи их, е́же не ви́дети, и хребе́т их вы́ну сляцы́. Проле́й на ня гнев Твой, и я́рость гне́ва Твоего́ да пости́гнет их. Да бу́дет двор их пуст, и в жили́щах их да не бу́дет живы́й. Зане́ его́же Ты порази́л еси́, ти́и погна́ша, и к боле́зни язв мои́х приложи́ша. Приложи́ беззако́ние к беззако́нию их, и да не вни́дут в пра́вду Твою́. Да потребя́тся от кни́ги живы́х, и с пра́ведными да не напи́шутся. Нищ и боля́й есмь аз, спасе́ние Твое́, Бо́же, да прии́мет мя. Восхвалю́ и́мя Бо́га моего́ с пе́снию, возвели́чу Его́ во хвале́нии. И уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ бу́дет душа́ ва́ша. Я́ко услы́ша убо́гия Госпо́дь, и окова́нныя Своя́ не уничижи́. Да восхва́лят Его́ небеса́ и земля́, мо́ре и вся живу́щая в нем. Я́ко Бог спасе́т Сио́на, и сози́ждутся гра́ди Иуде́йстии, и вселя́тся та́мо, и насле́дят и́. И се́мя рабо́в Твои́х удержи́т и́, и лю́бящии и́мя Твое́ вселя́тся в нем.

Псалом 69:

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́, да возвратя́тся вспять, и постыдя́тся хотя́щии ми зла́я. Да возвратя́тся а́бие стыдя́щеся, глаго́лющии ми: бла́гоже, бла́гоже. Да возра́дуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну, да возвели́чится Госпо́дь, лю́бящии спасе́ние Твое́. Аз же нищ есмь и убог. Бо́же, помози́ ми, Помо́щник мой, и Изба́витель мой еси́ Ты, Го́споди, не закосни́.

Псалом 85:

Приклони́, Го́споди, у́хо Твое́ и услы́ши мя, я́ко нищ и убо́г есмь аз. Сохрани́ ду́шу мою́, я́ко преподо́бен есмь; спаси́ раба́ Твоего́, Бо́же мой, упова́ющаго на Тя. Поми́луй мя, Го́споди, я́ко к Тебе́ воззову́ весь день. Возвесели́ ду́шу раба́ Твоего́, я́ко к Тебе́ взях ду́шу мою́. Я́ко Ты, Го́споди, благ, и кро́ток, и многоми́лостив всем, призыва́ющим Тя. Внуши́, Го́споди, моли́тву мою́, и вонми́ гла́су моле́ния моего́. В день ско́рби моея́ воззва́х к Тебе́, я́ко услы́шал мя еси́. Несть подо́бен Тебе́ в бозе́х, Го́споди, и несть по дело́м Твои́м. Вси язы́цы, ели́ки сотвори́л еси́, прии́дут, и покло́нятся пред Тобо́ю, Го́споди, и просла́вят И́мя Твое́, я́ко ве́лий еси́ Ты, и творя́й чудеса́, Ты еси́ Бог еди́н. Наста́ви мя, Го́споди, на путь Твой, и пойду́ во и́стине Твое́й: да возвесели́тся се́рдце мое́ боя́тися И́мене Твоего́. Испове́мся Тебе́, Го́споди Бо́же мой, всем се́рдцем мои́м и просла́влю И́мя Твое́ в век. Я́ко ми́лость Твоя́ ве́лия на мне, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя, и сонм держа́вных взыска́ша ду́шу мою́, и не предложи́ша Тебе́ пред собо́ю. И Ты, Го́споди Бо́же мой, ще́дрый и ми́лостивый, долготерпели́вый, и многоми́лостивый, и и́стинный, при́зри на мя и поми́луй мя, даждь держа́ву Твою́ о́троку Твоему́, и спаси́ сы́на рабы́ Твоея́. Сотвори́ со мно́ю зна́мение во бла́го, и да ви́дят ненави́дящии мя и постыдя́тся, я́ко Ты, Го́споди, помо́гл ми, и уте́шил мя еси́.

Слава, и ныне, Аллилу́иа, трижды. Го́споди, поми́луй, трижды.

Слава, тропарь, глас 8:

Ви́дя разбо́йник / Нача́льника Жи́зни на Кресте́ ви́сяща, глаго́лаше: / а́ще не бы Бог был вопло́щся, И́же с на́ми распны́йся, / не бы со́лнце лучи́ [своя́] потаи́ло, / ниже́ бы земля́ трепе́щущи трясла́ся. / Но вся терпя́й, помяни́ мя, Го́споди, во Ца́рствии Твое́м.

И ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны. / И спаси́, Спа́се наш, лю́ди отча́янныя.

И поем тропари три от двунадесяти, глас 7:

У́жас бе ви́дети? / небесе́ и земли́ Творца́ на Кресте́ ви́сяща, / со́лнце поме́ркшее, день же па́ки в нощь прело́жшийся, / и зе́млю из гробо́в возсыла́ющу телеса́ ме́ртвых: / с ни́миже покланя́емся Тебе́, спаси́ нас. (2)

Стих: Раздели́ша ри́зы Моя́ себе́, / и о оде́жди Мое́й мета́ша жре́бий.

Глас 2: Егда́ на Кресте́ пригвозди́ша беззако́ннии Го́спода сла́вы, вопия́ше к ним: / чим вас оскорби́х? Или́ о чем прогне́вах? / Пре́жде Мене́ кто вас изба́ви от ско́рби? / И ны́не что Мне воздаете́, злая за блага́я? / За столп о́гненный, на Кресте́ Мя пригвозди́сте: / за о́блак, гроб Мне ископа́сте: / за ма́нну, желчь Мне принесо́сте: / за во́ду, о́цтом Мя напои́сте. / Про́чее призову́ язы́ки, / и ти́и Мя просла́вят / со Отце́м и со Святы́м Ду́хом.

Стих: Да́ша в снедь Мою́ желчь, / и в жа́жду Мою́ напои́ша Мя о́цта.

И паки тойже.

Слава, глас 6: Днесь ви́сит на дре́ве, / И́же на вода́х зе́млю пове́сивый: / венце́м от те́рния облага́ется, / И́же а́нгелов Царь: / в ло́жную багряни́цу облачи́тся, / одева́яй не́бо о́блаки: / зауше́ние прия́т, И́же во Иорда́не свободи́вый Ада́ма: / гвоздьми́ пригвозди́ся Жени́х Церко́вный: / копие́м прободе́ся Сын Де́выя. / Покланя́емся Cтрасте́м Твои́м, Христе́. / Покланя́емся Страсте́м Твои́м, Христе́. / Покланя́емся Cтрасте́м Твои́м, Христе́. / Покажи́ нам и сла́вное Твое́ Воскресе́ние.

И ныне, тойже.

Прокимен, глас 6: Рече́ безу́мен в се́рдце свое́м: / несть Бог. Стих: Несть творя́й благосты́ню, несть до еди́наго.

Пророчества Иеремиина чтение. [Глава 11, ст. 18 – 23: глава 12, ст. 1 – 15]

Го́споди, скажи́ ми, и уразуме́ю: тогда́ ви́дех начина́ния их. Аз же я́ко а́гня незло́бивое ведо́мое на заколе́ние не разуме́х, я́ко на мя помы́слиша по́мысл лука́вый, глаго́люще: прииди́те и вложи́м дре́во в хлеб его́, и истреби́м его́ от земли́ живу́щих, и и́мя его́ да не помяне́тся ктому́. Госпо́дь Савао́ф, судя́й пра́ведно, испыту́яй сердца́ и утро́бы, да ви́жду мще́ние Твое́ на них, я́ко к Тебе́ откры́х оправда́ние мое́. Сего́ ра́ди сия́ глаго́лет Госпо́дь на му́жы Анафо́фски и́щущия души́ моея́, глаго́лющия: да не проро́чествуеши о и́мени Госпо́дни: а́ще ли же ни, у́мреши в рука́х на́ших. Сего́ ра́ди сия́ глаго́лет Госпо́дь сил: се Аз посещу́ на них: ю́ноши их мече́м у́мрут, и сы́нове их и дще́ри их сконча́ются гла́дом. И оста́нка не бу́дет от них, наведу́ бо зла́я на живу́щия во Анафо́фе, в ле́то посеще́ния их. Пра́веден еси́ Го́споди, я́ко отвеща́ю к Тебе́, оба́че судьбы́ возглаго́лю к Тебе́: что я́ко путь нечести́вых спе́ется? Угобзи́шася вси творя́щии беззако́ния? Насади́л еси́ их, и укорени́шася: ча́да сотвори́ша, и сотвори́ша плод: близ еси́ Ты уст их, дале́че же от утро́б их. И Ты, Го́споди, разуме́еши мя, ви́дел мя еси́, и искуси́л еси́ се́рдце мое́ пред Тобо́ю, собери́ их я́ко о́вцы на заколе́ние, и очи́сти их в день заколе́ния их. Доко́ле пла́кати и́мать земля́, и трава́ вся се́льная и́зсхнет от зло́бы живу́щих на ней? Погибо́ша ско́ти и пти́цы, я́ко реко́ша: не у́зрит Бог путе́й на́ших. Но́зи твои́ теку́т, и разслабля́ют тя. Иди́те, собери́те вся зве́ри се́льныя, и да прии́дут сне́сти е́. Па́стырие мно́зи растли́ша виногра́д Мой, оскверни́ша часть Мою́, да́ша часть жела́емую Мою́ в пусты́ню непрохо́дную. Положи́ша в потребле́ние па́губы. Я́ко сия́ глаго́лет Госпо́дь о всех сосе́дех лука́вых, прикаса́ющихся насле́дию Моему́, е́же раздели́х лю́дем Мои́м Изра́илю: се Аз исто́ргну их от земли́ их, и дом Иу́дин изве́ргну от среды́ их. И бу́дет егда́ исто́ргну их, обращу́ся и поми́лую их, и вселю́ их, кого́ждо в достоя́ние свое́, и кого́ждо в зе́млю свою́.

Апостол ко Евреем, зачало 324:

Бра́тие, иму́ще дерзнове́ние входи́ти во свята́я Кро́вию Иису́с Христо́вою, путе́м но́вым и живы́м, его́же обнови́л есть нам заве́сою, си́речь пло́тию Свое́ю, и Иере́а вели́ка над до́мом Бо́жиим. Да приступа́ем со и́стинным се́рдцем во извеще́нии ве́ры, окропле́ни сердца́ от со́вести лука́выя, и измове́ни телеса́ водо́ю чи́стою. Да держи́м испове́дание упова́ния неукло́нное: ве́рен бо есть Обеща́вый. И да разумева́ем друг дру́га в поощре́нии любве́ и до́брых дел. Не оставля́юще собра́ния своего́, я́коже есть не́ким обы́чай, но (друг дру́га) подвиза́юще: и толи́ка па́че, ели́ко ви́дите приближа́ющся день (су́дный). Во́лею бо согреша́ющим нам по прия́тии ра́зума и́стины, ктому́ о гресе́х не обрета́ется же́ртва. Стра́шно же не́кое ча́яние суда́, и огня́ ре́вность, поя́сти хотя́щаго сопроти́вныя. Отве́рглся кто зако́на Моисе́ова, без милосе́рдия при двою́ или́ трие́х свиде́телех умира́ет. Коли́ко, мните́, го́ршия сподо́бится му́ки, и́же Сы́на Бо́жия попра́вый, и Кровь заве́тную скве́рну возмни́в, в не́йже освяти́ся, и Ду́ха благода́ти укори́вый. Ве́мы бо Ре́кшаго: Мне отмще́ние, Аз возда́м, глаго́лет Госпо́дь. И па́ки: я́ко су́дит Госпо́дь лю́дем Свои́м. Стра́шно есть е́же впа́сти в ру́це Бо́га Жива́го.

Евангелие от Иоанна, зачало 59, 60, 61:

Во вре́мя о́но, ведо́ша Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску. Изы́де же Пила́т к ним вон, и рече́: ку́ю речь прино́сите на Челове́ка Сего́? Отвеща́ша и ре́ша ему́: а́ще не бы был Сей злоде́й, не бы́хом пре́дали Его́ тебе́. Рече́ же им Пила́т: поими́те Его́ вы, и по зако́ну ва́шему суди́те Ему́. Ре́ша же ему́ иуде́е: нам не досто́ит уби́ти никого́же. Да сло́во Иису́сово сбу́дется, е́же рече́, назна́менуя, ко́ею сме́ртию хотя́ше умре́ти. Вни́де у́бо па́ки Пила́т в прето́р, и гласи́ Иису́са, и рече́ Ему́: Ты ли еси́ Царь Иуде́йск? Отвеща́ ему́ Иису́с: о себе́ ли ты сие́ глаго́леши, или́ ини́и тебе́ реко́ша о Мне? Отвеща́ Пила́т: еда́ аз жидови́н есмь? Род Твой и архиере́е преда́ша Тя мне, что еси́ сотвори́л? Отвеща́ Иису́с: Ца́рство Мое́ несть от ми́ра сего́; а́ще от ми́ра сего́ бы́ло бы Ца́рство Мое́, слуги́ Мои́ у́бо подвиза́лися бы́ша, да не пре́дан бых был иуде́ом. Ны́не же Ца́рство Мое́ несть отсю́ду. Рече́ же Ему́ Пила́т: у́бо Царь ли еси́ Ты? Отвеща́ Иису́с: ты глаго́леши, я́ко Царь есмь Аз. Аз на сие́ роди́хся, и на сие́ приидо́х в мир, да свиде́тельствую и́стину: и всяк, и́же есть от и́стины, послу́шает гла́са Моего́. Глаго́ла Ему́ Пила́т: что есть и́стина? И сие́ рек, па́ки изы́де ко иуде́ом, и глаго́ла им: аз ни еди́ныя вины́ обрета́ю в Нем. Есть же обы́чай вам, да еди́наго вам отпущу́ на Па́сху: хо́щете ли у́бо, да отпущу́ вам Царя́ Иуде́йска? Возопи́ша же па́ки вси, глаго́люще: не Сего́, но Вара́вву. Бе же Вара́вва разбо́йник.

Тогда́ у́бо Пила́т поя́т Иису́са, и би Его́. И во́ини спле́тше вене́ц от те́рния, возложи́ша Ему́ на главу́, и в ри́зу багря́ну облеко́ша Его́. И глаго́лаху: ра́дуйся, Царю́ Иуде́йский. И бия́ху Его́ по лани́тома. Изы́де у́бо па́ки вон Пила́т, и глаго́ла им: се извожду́ Его́ вам вон, да разуме́ете, я́ко в Нем ни еди́ныя вины́ обрета́ю. Изы́де же вон Иису́с, нося́ тернове́н вене́ц, и багря́ну ри́зу. И глаго́ла им: се Челове́к. Егда́ же ви́деша Его́ архиере́е и слуги́, возопи́ша глаго́люще: распни́, распни́ Его́. Глаго́ла им Пила́т: поими́те Его́ вы, и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, аще не бы ти дано́ свы́ше: сего́ ра́ди предавый Мя тебе́, бо́лий грех и́мать. От сего́ иска́ше Пила́т пусти́ти Его́. Иуде́е же вопия́ху, глаго́люще: а́ще Сего́ пу́стиши, не́си друг ке́сарев. Всяк, и́же царя́ себе́ творя́й, проти́вится ке́сарю. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется. Пое́мше же Иисуса, и ведо́ша. И нося́ крест Свой, изы́де в глаго́лемое Ло́бное ме́сто, е́же глаго́лется евре́йски Голго́фа. Иде́же пропя́ша Его́ и с Ним и́на два, сю́ду и сю́ду, посреде́ же Иису́са. Написа́ же и ти́тла Пила́т, и положи́ на кресте́. Бе же напи́сано: Иису́с Назоряни́н, Царь Иуде́йский. Сего́ же ти́тла мно́зи что́ша от Иуде́й, я́ко близ бе ме́сто гра́да, иде́же пропя́ша Иису́са. И бе напи́сано: евре́йски, гре́чески, ри́мски. Глаго́лаху же Пила́ту архиере́е иуде́йстии: не пиши́, Царь Иуде́йский, но я́ко Сам рече́: Царь есмь Иуде́йский. Отвеща́ Пила́т: е́же писа́х, писа́х. Во́ини же, егда́ пропя́ша Иису́са, прия́ша ри́зы Его́, и сотвори́ша четы́ри ча́сти, коему́ждо во́ину часть, и хито́н. Бе же хито́н не швен, свы́ше истка́н весь. Ре́ша же к себе́: не предере́м его́, но ме́тнем жре́бия о нем, кому́ бу́дет: да сбу́дется Писа́ние, глаго́лющее: раздели́ша ри́зы Моя́ себе́, и о имати́сме Мое́й мета́ша жре́бия. Во́ини же у́бо сия́ сотвори́ша. Стоя́ху же при кресте́ Иису́сове Ма́ти Его́ и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м же глаго́ла ученику́: се Ма́ти твоя́. И от того́ часа́ поя́т Ю учени́к во своя́ си. Посе́м ве́дый Иису́с, я́ко вся уже́ соверши́шася, да сбу́дется Писа́ние, глаго́ла: жа́жду. Сосу́д же стоя́ше полн о́цта. Они же испо́лнивше гу́бу о́цта, и на трость во́нзше, приде́ша ко усто́м Его́. Егда́ же прия́т о́цет Иису́с, рече́: соверши́шася, и прикло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́телствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

Таже предлагается чтение: Слово крестное. Таже Не преда́ждь нас до конца́: Трисвятое. По О́тче наш: Кондак Нас ра́ди Распя́таго: Го́споди, поми́луй, 40. Молитва: И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иерей: Бо́же, уще́дри ны:

И молитва:

Влады́ко Го́споди Иису́се Христе́ Бо́же наш, долготерпе́вый о на́ших согреше́ниих, и да́же до ны́нешняго часа́ приведы́й нас, во́ньже на животворя́щем дре́ве ви́ся, благоразу́мному разбо́йнику, и́же в рай путесотвори́л еси́ вход, и сме́ртию смерть разруши́л еси́, очи́сти нас гре́шных, и недосто́йных раб Твои́х: согреши́хом бо и беззако́нновахом, и не́смы досто́йни возвести́ очеса́ на́ша, и воззре́ти на высоту́ небе́сную, зане́ оста́вихом путь пра́вды Твоея́, и ходи́хом в во́лях серде́ц на́ших. Но мо́лим Твою́ безме́рную бла́гость, пощади́ нас, Го́споди, по мно́жеству ми́лости Твоея́, и спаси́ нас и́мене Твоего́ ра́ди свята́го, я́ко исчезо́ша в суете́ дни́е на́ши. Изми́ нас из руки́ сопроти́внаго, и оста́ви нам грехи́ на́ша, и умертви́ плотско́е на́ше мудрова́ние, да ве́тхаго отложи́вше челове́ка, в но́ваго облеце́мся, и Тебе́ поживе́м на́шему Влады́це и Благоде́телю: и та́ко Твои́м после́дующе повеле́нием, в ве́чный поко́й дости́гнем, иде́же есть всех веселя́щихся жили́ще. Ты бо еси́ вои́стинну и́стинное весе́лие, и ра́дость лю́бящих Тя, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Таже блаженны скоро: Во Ца́рствии Твое́м, егда́ прии́деши: Сла́ва, и ны́не: Помяни́ нас, Го́споди: Лик небе́сный: Сла́ва: Лик святы́х А́нгел: И ны́не: Ве́рую во Еди́наго Бо́га: Осла́би, оста́ви: Посем О́тче наш: И кондак: Нас ра́ди Распя́таго: Го́споди, поми́луй, 40. И молитва: Всесвята́я Тро́ице: Таже Бу́ди и́мя Госпо́дне: трижды. Сла́ва, и ны́не: Благословлю́ Го́спода на вся́кое вре́мя: И отпуст.

Подобает же и сие ведати, яко прияхом в Палестине, в сей святый день Великаго Пятка, не творити Преждесвященную, ниже паки совершенную Литургию, но ниже трапезу поставляем, ниже ядим в сей день распятия. Аще же кто будет многонемощен, или престарелся, и не могий пребыти постен, дается ему хлеб и вода, по захождении солнца. Сице бо прияхом от святых заповедей святых апостол, не ясти в Великий Пяток. Господне бо слово, еже рече к фарисеем Господь: яко егда отымется от них Жених, тогда постятся в тыя дни. Зде блаженнейшии апостоли восприяша, и сие обрящеши во апостольских преданиих, внимательно сия проходя. Но и правильное послание святейшаго архиепископа Александрийскаго Дионисиа яве сие предпоставляет.

ВО СВЯТЫЙ И ВЕЛИКИЙ ПЯТОК ВЕЧЕРА

О десятом часе дне клеплет. И благословившу священнику, начинающуся светильничному, на Го́споди, воззва́х, поставим стихов 6: И поем стихиры самогласны.

Глас 1: Вся тварь изменя́шеся стра́хом, / зря́щи Тя на Кресте́ ви́сима, Христе́: / со́лнце омрача́шеся, и земли́ основа́ния сотряса́хуся, / вся сострада́ху Созда́вшему вся. / Во́лею нас ра́ди претерпе́вый / Го́споди, сла́ва Тебе́. (2)

Глас 2: Лю́дие злочести́вии и беззако́ннии, / вску́ю поуча́ются тще́тным? / Вску́ю Живота́ всех на смерть осуди́ша? / Ве́лие чу́до, / я́ко Созда́тель ми́ра в ру́ки беззако́нных предае́тся, / и на дре́во возвыша́ется Человеколю́бец, / да я́же во а́де у́зники свободи́т, зову́щия: / Долготерпели́ве Го́споди, сла́ва Тебе́.

Днесь, зря́щи Тя, Непоро́чная Де́ва, / на Кресте́ Сло́ве возвыша́ема, / рыда́ющи ма́тернею утро́бою, / уязвля́шеся се́рдцем го́рце, / и стеня́щи боле́зненно из глубины́ души́, / лице́ со власы́ терза́ющи. / Те́мже и пе́рси бию́щи, взыва́ше жа́лостно: / увы́ Мне, Боже́ственное Ча́до! / Увы́ Мне, Све́те ми́ра! / Что заше́л еси́ от о́чию Мое́ю, А́гнче Бо́жий? / Те́мже во́инства безпло́тных, / тре́петом содержи́ми бя́ху, глаго́люще: / Непостижи́ме Го́споди, сла́ва Тебе́.

На дре́ве ви́дящи ви́сима, Христе́, / Тебе́ всех Зижди́теля и Бо́га, / безсе́менно Ро́ждшая Тя вопия́ше го́рько: / Сы́не Мой, где добро́та за́йде зра́ка Твоего́? / Не терплю́ зре́ти Тя непра́ведно распина́ема. / Потщи́ся у́бо, воста́ни, я́ко да ви́жу и Аз / Твое́ из ме́ртвых тридне́вное Воскресе́ние.

Глас 6: Днесь Влады́ка тва́ри предстои́т Пила́ту, / и Кресту́ предае́тся Зижди́тель всех, / я́ко а́гнец приводи́мь Свое́ю во́лею: / гвоздьми́ пригвожда́ется, и в ре́бра пробода́ется, / и гу́бою напоя́ется ма́нну одожди́вый, / по лани́те зауша́ется Изба́витель ми́ра, / и от Свои́х раб поруга́ется Созда́тель всех. / О Влады́чняго Человеколю́бия! / О распина́ющих моля́ше Своего́ Отца́, глаго́ля: О́тче, / оста́ви им грех сей: / не ве́дят бо беззако́ннии, / что непра́ведное содева́ют.

Слава, глас тойже: О ка́ко беззако́нное со́нмище, / Царя́ тва́ри осуди́ на смерть, / не устыде́вся благодея́ния, / я́же воспомина́я предутвержда́ше, глаго́ля к ним: / лю́дие Мои́, что сотвори́х вам? / Не чуде́с ли испо́лних Иуде́ю? / Не мертвецы́ ли воскреси́х еди́нем сло́вом? / Не вся́кую ли боле́знь исцели́х и неду́г? / Что у́бо Ми воздаете́? / Вску́ю не по́мните Мя? / За исцеле́ния ра́ны Мне наложи́вше, / за живо́т умерщвля́юще, / ве́шающе на дре́ве, я́ко злоде́я, Благоде́теля: / я́ко беззако́нна, Законода́вца: / я́ко осужде́нна, всех Царя́. / Долготерпели́ве Го́споди, сла́ва Тебе́.

И ныне, глас тойже: Стра́шное и пресла́вное та́инство днесь де́йствуемо зри́тся: / неосяза́емый удержава́ется: / вя́жется, разреша́яй Ада́ма от кля́твы: / испыту́яй сердца́ и утро́бы, непра́ведно испыту́ется: / в темни́це затворя́ется, И́же бе́здну затвори́вый: / Пила́ту предстои́т, Ему́же тре́петом предстоя́т небе́сныя си́лы: / зауша́ется руко́ю созда́ния Созда́тель: / на дре́во осужда́ется, судя́й живы́м и ме́ртвым: / во гро́бе заключа́ется Разори́тель а́да. / И́же вся терпя́й милосе́рдно / и всех спасы́й от кля́твы, / Незло́биве Го́споди, сла́ва Тебе́.

Вход со Евангелием. Све́те ти́хий:

Прокимен, глас 4: Раздели́ша ри́зы Моя́ себе́, / и о оде́жди Мое́й мета́ша жре́бий. Стих: Бо́же, Бо́же Мой, вонми́ Ми, вску́ю оста́вил Мя еси́?

Исхода чтение. [Глава 33, ст. 11 – 23].

Глаго́ла Госпо́дь к Моисе́ю лице́м к лицу́, я́коже а́ще бы кто возглаго́лал к своему́ дру́гу, и отпуща́шеся в полк: слуга́ же Иису́с сын Нави́н, ю́ноша не исхожда́ше из ски́нии. И рече́ Моисе́й ко Го́споду: се Ты мне глаго́леши, изведи́ лю́ди сия́. Ты же не яви́л ми еси́, кого́ по́слеши со мно́ю. Ты же мне рекл еси́: вем тя па́че всех, и благода́ть и́маши у Мене́. А́ще у́бо обрето́х благода́ть пред Тобо́ю, яви́ ми Тебе́ Сама́го, да разу́мно ви́жду Тя: я́ко да обре́т бу́ду благода́ть пред Тобо́ю, и да позна́ю, я́ко лю́дие Твои́ язы́к вели́к сей. И глаго́ла [ему́ Госпо́дь]: Аз Сам предыду́ пред Тобо́ю, и упоко́ю тя. И рече́ к Нему́ Моисе́й: а́ще Сам Ты не и́деши с на́ми, да не изведе́ши мя отсю́ду. И ка́ко ве́домо бу́дет вои́стинну, я́ко обрето́х благода́ть у Тебе́, аз же и лю́дие Твои́, то́чию иду́щу Ти с на́ми; и просла́влен бу́ду, аз же и лю́дие Твои́, па́че всех язы́к, ели́цы суть на земли́? Рече́ же Госпо́дь к Моисе́ю: и сие́ тебе́ сло́во, е́же рекл еси́, сотворю́: обре́л бо сей благода́ть пре́до Мно́ю, и вем тя па́че всех. И глаго́ла Моисе́й: покажи́ ми сла́ву Твою́. И рече́ [Госпо́дь к Моисе́ю]: Аз предыду́ пред тобо́ю сла́вою Мое́ю, и воззову́ о и́мени Мое́м, Госпо́дь пред тобо́ю: и поми́лую, его́же а́ще ми́лую: и уще́дрю, его́же а́ще ще́дрю. И рече́: не возмо́жеши ви́дети Лица́ Моего́, не бо у́зрит челове́к Лице́ Мое́, и жив бу́дет. И рече́ Госпо́дь: се ме́сто у Мене́, и ста́неши на ка́мени. Егда́ же пре́йдет Сла́ва Моя́, и положу́ тя в разсе́лине ка́мене, и покры́ю руко́ю Мое́ю над тобо́ю, до́ндеже мимоиду́. И отыму́ ру́ку Мою́, и тогда́ у́зриши за́дняя Моя́: Лице́ же Мое́ не яви́тся Тебе́.

Прокимен, глас 4: Суди́, Го́споди, оби́дящия мя, / побори́ борю́щия мя. Стих: Приими́ ору́жие и щит, и воста́ни в по́мощь мою́.

Иова чтение. [Глава 42, ст. 12 – 17].

Госпо́дь благослови́ после́дняя И́овля, не́же пре́жняя: бя́ху же ско́ти его́, ове́ц четырена́десять ты́сящ, вельблю́дов шесть ты́сящ, супру́г воло́в ты́сяща, осли́ц ста́дных ты́сяща. Роди́ша же ся ему́ сы́нове седмь, и дще́ри три. И нарече́ пе́рвую у́бо, День: втору́ю же Касси́ю: тре́тию же, Амалфе́ев рог. И не обрето́шася подо́бнии в ле́поте дще́рем И́овлевым в поднебе́сней: даде́ же им оте́ц насле́дие в бра́тии их. Поживе́ же И́ов по я́зве лет сто се́дмьдесят: всех же лет поживе́ две́сти четы́редесять осмь. И ви́де И́ов сы́ны своя́, и сы́ны сыно́в свои́х, да́же до четве́ртого ро́да. И сконча́ся И́ов стар, и испо́лнь дней. Пи́сано же есть па́ки, воста́ти ему́, с ни́миже Госпо́дь возста́вит и́: та́ко толку́ется от си́рския кни́ги. В земли́ у́бо живы́й Авситиди́йстей, на преде́лех Идуме́и и Арави́и: пре́жде же бя́ше и́мя ему́ Иова́в. Взем же жену́ ара́вляныню, роди́ сы́на, ему́же и́мя Енно́н. Бе же той отца́ у́бо Заре́фа, Иса́вовых сыно́в сын, ма́тере же Восо́рры, я́коже бы́ти ему́ пя́тому от Авраа́ма.

Пророчества Исаиина чтение. [Глава 52, ст. 13 – 15; 53:1 – 12; 54:1]

Та́ко глаго́лет Госпо́дь: се уразуме́ет о́трок Мой, и вознесе́тся и просла́вится зело́. Я́коже ужа́снутся о Тебе́ мно́зи, та́ко обезсла́вится от челове́к вид Твой, и сла́ва Твоя́ от сыно́в челове́ческих. Та́ко удивя́тся язы́цы мно́зи о Нем, и заградя́т ца́рие уста́ своя́. Я́ко и́мже не возвести́ся о Нем, у́зрят, и и́же не слы́шаша, уразуме́ют. Го́споди, кто ве́рова слу́ху на́шему? И мы́шца Госпо́дня кому́ откры́ся? Возвести́хом, я́ко Отроча́ пред ним, я́ко ко́рень в земли́ жа́ждущей, несть ви́да Ему́, ниже́ сла́вы: и ви́дехом Его́, и не имя́ше ви́да, ни добро́ты. Но вид Его́ безче́стен, ума́лен па́че всех сыно́в челове́ческих: челове́к в я́зве сый, и ве́дый терпе́ти боле́знь, я́ко отврати́ся Лице́ Его́, безче́стно бысть, и не вмени́ся. Сей грехи́ на́ша но́сит, и о нас боле́знует, и мы вмени́хом Его́ бы́ти в труде́, и в я́зве от Бо́га, и во озлобле́нии. Той же я́звен бысть за грехи́ на́ша, и му́чен бысть за беззако́ния на́ша, наказа́ние ми́ра на́шего на Нем, я́звою Его́ мы исцеле́хом. Вси я́ко о́вцы заблуди́хом: челове́к от пути́ своего́ заблуди́, и Госпо́дь предаде́ Его́ грех ра́ди на́ших. И Той, зане́ озло́блен бысть, и не отверза́ет уст Свои́х: я́ко овча́ на заколе́ние веде́ся, и я́ко а́гнец пред стригу́щим Его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся, род же Его́ кто испове́сть? Я́ко взе́млется от земли́ живо́т Его́, ра́ди беззако́ний люде́й Мои́х веде́ся на смерть. И дам лука́выя вме́сто погребе́ния Его́, и бога́тыя вме́сто сме́рти Его́: я́ко беззако́ния не сотвори́, ниже́ обре́теся лесть во усте́х Его́. И Госпо́дь хо́щет очи́стити Его́ от я́звы: а́ще да́стся о гресе́, душа́ ва́ша у́зрит се́мя долгоживо́тное. И хо́щет Госпо́дь руко́ю Свое́ю отъя́ти боле́знь от души́ Его́, яви́ти Ему́ свет, и созда́ти ра́зумом, оправда́ти пра́веднаго благослужа́ща мно́гим, и грехи́ их Той понесе́т. Сего́ ра́ди Той насле́дит мно́гих, и кре́пких раздели́т коры́сти: зане́ предана́ бысть на смерть душа́ Его́, и со беззако́нными вмени́ся, и Той грехи́ мно́гих вознесе́, и за беззако́ния их пре́дан бысть. Возвесели́ся непло́ды, неражда́ющая, возгласи́ и возопи́й, нечревоболе́вшая, я́ко мно́га ча́да пусты́я па́че, не́жели иму́щая му́жа.

Прокимен Апостола, глас 6: Положи́ша Мя в ро́ве преиспо́днем, / в те́мных и се́ни сме́ртней. Стих: Го́споди Бо́же спасе́ния Моего́, во дни воззва́х и в нощи́ пред Тобо́ю.

Апостол к Коринфянам, зачало 125:

Бра́тие, сло́во кре́стное погиба́ющим у́бо юро́дство есть, а спаса́емым нам си́ла Бо́жия есть. Пи́сано бо есть: погублю́ прему́дрость прему́дрых, и ра́зум разу́мных отве́ргу. Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость ми́ра сего́? Поне́же бо в прему́дрости Бо́жией не разуме́ мир прему́дростию Бо́га, благоизво́лил Бог бу́йством про́поведи спасти́ ве́рующих. Поне́же и иуде́е зна́мения про́сят, и е́ллини прему́дрости и́щут: Мы же пропове́дуем Христа́ ра́спята, иуде́ем у́бо собла́зн, е́ллином же безу́мие. Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость. Зане́ бу́ее Бо́жие, прему́дрее челове́к есть, и немощно́е Бо́жие крепча́е челове́к есть. Ви́дите бо зва́ние ва́ше, бра́тие, я́ко не мно́зи ли прему́дри по пло́ти; не мно́зи си́льни; не мно́зи ли благоро́дни. Но бу́яя ми́ра избра́ Бог, да прему́дрыя посрами́т, и не́мощная ми́ра избра́ Бог, да посрами́т кре́пкая. И худоро́дная ми́ра, и уничиже́нная избра́ Бог, и не су́щая, да су́щая упраздни́т, я́ко да не похва́лится вся́ка плоть пред Бо́гом. Из него́же вы есте́ о Христе́ Иису́се, и́же бысть нам прему́дрость от Бо́га, пра́вда же и освяще́ние, и избавле́ние. Да, я́коже пи́шется, хваля́йся, о Го́споде да хва́лится.

И аз прише́д к вам, бра́тие, приидо́х не по превосхо́дному словеси́, или́ прему́дрости, возвеща́я вам свиде́тельство Бо́жие. Не суди́х бо ве́дети что в вас, то́чию Иису́са Христа́, и Сего́ ра́спята.

Аллилуиа, глас 1: Спаси́ Мя, Бо́же, я́ко внидо́ша во́ды до души́ Моея́. Стих: Поноше́ние ча́яше душа́ моя́ и страсть. Стих: Да помрача́тся о́чи их, е́же не ви́дети.

Евангелие от Матфеа, зачало 110:

Во вре́мя о́но, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону. Тогда́ ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́. И прише́дше на ме́сто нарица́емое Голго́фа, е́же есть Кра́ниево ме́сто, да́ша Ему́ пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю.

Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́.

Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей.

Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́тельствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

Бя́ху же ту и жены́ мно́ги издале́че зря́ще, я́же идо́ша по Иису́се от Галиле́и, служа́ще Ему́. В ни́хже бе Мари́я Магдали́на и Мари́я Иа́ковля, и Иоси́и ма́ти, и ма́ти сы́ну Зеведе́ову. По́зде же бы́вшу, прии́де челове́к бога́т от Аримафе́а, именем Ио́сиф, и́же и той учи́ся у Иису́са. Сей присту́пль к Пила́ту, проси́ телесе́ Иису́сова. Тогда́ Пила́т повеле́ да́ти те́ло. И прие́мь те́ло Ио́сиф, обви́т е́ плащани́цею чи́стою, и положи́ е́ в но́вем свое́м гро́бе, и́же изсече́ в ка́мени. И возвали́в ка́мень ве́лий над две́ри гро́ба, оти́де. Бе же ту Мари́я Магдали́на, и друга́я Мари́я, седя́ще пря́мо гро́ба.

Таже обычная ектения: Рцем вси от всея́ души́: И потом: Сподо́би, Го́споди: Испо́лним вече́рнюю моли́тву: И прочая.

И по возгласе поем от стиховных стихир подобны 4. Глас 2:

Егда́ от дре́ва Тя ме́ртва, / Аримафе́й снят всех Живота́, / сми́рною и плащани́цею Тя, Христе́, обви́в, / и любо́вию подвиза́шеся, / се́рдцем и устна́ми / Те́ло нетле́нное Твое́ облобыза́ти. / Оба́че одержи́мь стра́хом, / ра́дуяся, вопия́ше Ти: / сла́ва снизхожде́нию Твоему́, Человеколю́бче.

Стих: Госпо́дь воцари́ся, в ле́поту облече́ся.

Егда́ во гро́бе но́ве / за всех положи́лся еси́, Изба́вителю всех, / ад всесмехли́вый, ви́дев Тя, ужасе́ся, / вереи́ сокруши́шася, сломи́шася врата́, / гро́би отверзо́шася, / ме́ртвии воста́ша, / тогда́ Ада́м, благода́рственно ра́дуяся, / вопия́ше Тебе́: / сла́ва снизхожде́нию Твоему́, Человеколю́бче.

Стих: И́бо утверди́ вселе́нную, я́же не подви́жится.

Егда́ во гро́бе пло́тски / хотя́ заключи́лся еси́, / И́же естество́м Божества́ / пребыва́яй Неопи́санный и Неопределе́нный, / сме́рти заключи́л еси́ сокро́вища, / и а́дова вся истощи́л еси́, Христе́, ца́рствия: / тогда́ и суббо́ту сию́ / Боже́ственнаго благослове́ния и сла́вы, / и Твоея́ све́тлости сподо́бил еси́.

Стих: До́му Твоему́ подоба́ет святы́ня, Го́споди, в долготу́ дний.

Егда́ си́лы зря́ху Тя, Христе́, / я́ко преле́стника от беззако́нных оклевета́ема, / ужаса́хуся неизглаго́ланному долготерпе́нию Твоему́, / и ка́мень гро́ба рука́ми запеча́танный, / и́миже Твоя́ нетле́нная ре́бра прободо́ша. / Оба́че на́шему спасе́нию / ра́дующеся вопия́ху Ти: / сла́ва снизхожде́нию Твоему́, / Человеколю́бче.

Слава, и ныне, глас 5: Тебе́ оде́ющагося све́том, я́ко ри́зою, / снем Ио́сиф с дре́ва с Никоди́мом / и, ви́дев ме́ртва на́га непогребе́на, / благосе́рдный плач восприи́м, / рыда́я, глаго́лаше: / увы́ мне, Сладча́йший Иису́се! / Его́же вма́ле со́лнце на Кресте́ ви́сима узре́вшее / мра́ком облага́шеся, / и земля́ стра́хом колеба́шеся, / и раздира́шеся церко́вная заве́са, / но се ны́не ви́жу Тя, / мене́ ра́ди во́лею подъе́мша смерть. / Ка́ко погребу́ Тя, Бо́же мой, / или́ ка́кою плащани́цею обвию́? / Ко́има ли рука́ма прикосну́ся нетле́нному Твоему́ Те́лу? / Или́ ки́я пе́сни воспою́ Твоему́ исхо́ду, Ще́дре? / Велича́ю Стра́сти Твоя́, / песносло́влю и погребе́ние Твое́ со Воскресе́нием, зовы́й: / Го́споди, сла́ва Тебе́.

Таже Ны́не отпуща́еши: Трисвятое. По О́тче наш:

Тропарь, глас 2:

Благообра́зный Ио́сиф / с дре́ва снем Пречи́стое Те́ло Твое́, / плащани́цею чи́стою обви́в, / и воня́ми, во гро́бе но́ве покры́в положи́.

Другий тропарь:

Мироно́сицам жена́м при гро́бе предста́в А́нгел, вопия́ше: / ми́ра ме́ртвым суть прили́чна. / Христо́с же истле́ния яви́ся чуждь.

Отпуст:

И́же нас ра́ди, челове́ков, и на́шего ра́ди спасе́ния стра́шныя Стра́сти и Животворя́щий Крест, и во́льное погребе́ние пло́тию изво́ливый, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Повечерие же поем в келлиах,

на немже поем канон о распятии Господни и на плач Пресвятыя Богородицы. Ирмос по дважды, тропари на 4: последи же ирмос оба лика вкупе. Творение Симеона Логофета. Глас 6.

Песнь 1.

Ирмос: Я́ко по су́ху, пешеше́ствовав Изра́иль / по без́дне стопа́ми, / гони́теля фарао́на / ви́дя потопля́ема, / Бо́гу / побе́дную песнь / пои́м, вопия́ше.

Запев: Сла́ва Тебе́, Бо́же наш, сла́ва Тебе́.

Обе́шена я́ко ви́де на Кресте́, Сы́на и Го́спода, / Де́вая Чи́стая, терза́ющися, вопия́ше го́рце, / со други́ми жена́ми, стеня́щи, глаго́лаше.

Ви́жу Тя ны́не, / возлю́бленное Мое́ Чадо и люби́мое, на Кресте́ ви́сяща, / и уязвля́юся го́рце се́рдцем, рече́ Чи́стая, / но даждь сло́во, Благи́й, Рабе́ Твое́й.

Слава: Во́лею, Сы́не Мой и Тво́рче, / терпи́ши на дре́ве лю́тую смерть, Де́ва глаго́лаше, / предстоя́щи у Креста́ со возлю́бленным ученико́м.

И ныне: Ны́не Моего́ ча́яния, ра́дости и весе́лия, / Сы́на Моего́ и Го́спода лише́на бых: / увы́ Мне, боле́зную се́рдцем, / Чи́стая, пла́чущи, глаго́лаше.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Стра́ха ра́ди иуде́йска Петр скры́ся, / и вси отбего́ша ве́рнии, оста́вльше Христа́, / Де́ва, рыда́ющи, глаго́лаше.

О стра́шном Твое́м рождестве́ и стра́нном, Сы́не Мой, / па́че всех ма́терей возвели́чена бых Аз, / но увы́ Мне, ны́не Тя ви́дящи на дре́ве, распала́юся утро́бою.

Слава: Хощу́ утро́бу Мою́ на руку́, / и́маже я́ко Младе́нца держа́х, / с дре́ва прия́ти, веща́ше Чи́стая, / но никто́же, увы́ Мне, Сего́ даде́.

И ныне: Се Свет Мой сла́дкий, / Наде́жда и Живо́т Мой Благи́й, / Бог Мой угасе́ на Кресте́, / распала́юся утро́бою, Де́ва стеня́щи глаго́лаше.

Песнь 4.

Ирмос: Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

Со́лнце не заходя́й, Бо́же Преве́чный, / и Тво́рче всех тва́рей Го́споди, / ка́ко терпи́ши страсть на Кресте́? / Чи́стая пла́чущи глаго́лаше.

Пла́чущи, глаго́лаше Браконеиску́сная ко благообра́зному: / потщи́ся, Ио́сифе, к Пила́ту приступи́ти, / и испроси́ сня́ти со дре́ва Учи́теля Твоего́.

Слава: Ви́дев Пречи́стую го́рце слезя́щу, Ио́сиф смути́ся, / и пла́чася приступи́ к Пила́ту, / даждь ми, вопия́ с пла́чем, Те́ло Бо́га моего́.

И ныне: Уя́звена Тя ви́дящи, и без сла́вы, на́га на дре́ве, Ча́до Мое́, / утро́бою распала́юся, рыда́ющи я́ко Ма́ти, / Де́ва провещава́ше.

Песнь 5.

Ирмос: Бо́жиим / све́том Твои́м, Бла́же, / у́треннюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Растерза́яся и рыда́я, и дивя́ся вку́пе с Никоди́мом, / снят Ио́сиф, и уцелова́в Пречи́стое Те́ло, / рыда́ше и стеня́ше, и поя́ Его́ я́ко Бо́га.

Прии́мши Его́ с пла́чем Ма́ти неискусому́жная, / положи́ на коле́ну, / моля́щи Его́ со слеза́ми и облобыза́ющи, / го́рце же рыда́ющи и восклица́ющи.

Слава: Еди́ну Наде́жду и Живо́т, Влады́ко Сы́не Мой и Бо́же, / во о́чию свет Раба́ Твоя́ име́х, / ны́не же лише́на бых Тебе́, / сла́дкое Мое́ Ча́до и люби́мое.

И ныне: Боле́зни и ско́рби, и воздыха́ния обрето́ша Мя, / увы́ Мне, Чи́стая го́рце рыда́ющи глаго́лаше, / ви́дящи Тя, Ча́до Мое́ возлю́бленное, на́га и уедине́на, / и воня́ми пома́зана мертвеца́.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Ме́ртва Тя зрю, Человеколю́бче, / оживи́вшаго ме́ртвыя, и содержа́ща вся, / уязвля́юся лю́те утро́бою. / Хоте́ла бых с Тобо́ю умре́ти, Пречи́стая глаго́лаше, / не терплю́ бо без дыха́ния ме́ртва Тя ви́дети.

Дивлю́ся, зря́щи Тя, / Преблаги́й Бо́же, и Преще́дрый Го́споди, / без сла́вы, и без дыха́ния, и безобра́зна, / и пла́чуся, держа́щи Тя, / я́ко не наде́яхся, увы́ Мне, / ви́дети Тя, Сы́не Мой и Бо́же.

Слава: Не изглаго́леши ли Рабе Твое́й сло́ва, Сло́ве Бо́жий? / Не уще́дриши ли, Влады́ко, Тебе́ Ро́ждшую, / глаго́лаше Чи́стая, рыда́ющи и пла́чущи, / облобыза́ющи Те́ло Го́спода Своего́.

И ныне: Помышля́ю, Влады́ко, / я́ко ктому́ сла́дкаго Твоего́ не услы́шу гла́са, / ни добро́ты Лица́ Твоего́ узрю́, / я́коже пре́жде Раба́ Твоя́: / и́бо заше́л еси́, Сы́не Мой, от о́чию Мое́ю.

Кондак, глас 8:

Нас ра́ди Распя́таго, прииди́те, вси воспои́м, / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Икос: Своего́ А́гнца А́гница зря́щи, к заколе́нию влеко́ма, / после́доваше Мари́я просте́ртыми власы́ / со ине́ми жена́ми, сия́ вопию́щи: / ка́мо и́деши, Ча́до? / Чесо́ ра́ди ско́рое тече́ние соверша́еши? / Еда́ други́й брак па́ки есть в Ка́не, и та́мо ны́не тщи́шися, / да от воды́ им вино́ сотвори́ши? / Иду́ ли с Тобо́ю, Ча́до, или́ па́че пожду́ Тебе́? / Даждь Ми сло́во, Сло́ве, / не молча́ мимоиди́ Мене́, Чи́сту соблюды́й Мя: / Ты бо еси́ Сын и Бог Мой.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Где, Сы́не Мой и Бо́же, благове́щение дре́внее, / е́же Ми Гаврии́л глаго́лаше; / Царя́ Тя, Сы́на и Бо́га Вы́шняго нарица́ше: / ны́не же ви́жу Тя, Све́те Мой сла́дкий, / на́га и уя́звлена мертвеца́.

Избавля́яй боле́зни, ны́не приими́ Мя с Тобо́ю, Сы́не Мой и Бо́же, / да сни́ду, Влады́ко, во ад с Тобо́ю и Аз, / не оста́ви Мене́ еди́ну, уже́ бо жи́ти не терплю́, / не ви́дящи Тебе́ сла́дкаго Моего́ Све́та.

Слава: С други́ми жена́ми мироно́сицами, / рыда́ющи Непоро́чная го́рце, / и носи́ма ви́дящи Христа́, глаго́лаше: увы́ Мне, что ви́жу! / Ка́мо и́деши ны́не, Сы́не Мой, / а Мене́ еди́ну оставля́еши?

И ныне: Изнемога́ющи и рыда́ющи Непоро́чная, мироно́сицам глаго́лаше: / срыда́йте Ми, и спла́читеся го́рце: / се бо Свет Мой сла́дкий, и Учи́тель ваш гро́бу предае́тся.

Песнь 8.

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Де́ву рыда́ющу Ио́сиф ви́дев, / растерза́шеся весь, и вопия́ше го́рько: / ка́ко Тя, о Бо́же мой, ны́не погребу́ раб Твой? / Каки́ми плащани́цами обвию́ Те́ло Твое́?

Па́че ума́ превзы́де стра́нное Твое́ виде́ние, / нося́щаго тварь всю Го́спода: / сего́ ра́ди Ио́сиф я́ко ме́ртва Тя на руку́ свое́ю, / и с Никоди́мом но́сит и погреба́ет.

Слава: Стра́нную ви́жу и пресла́вную та́йну, / Де́ва вопия́ше Сы́ну и Го́споду: / ка́ко в худо́м гро́бе полага́ешися, / ме́ртвыя повеле́нием возставля́яй во гробе́х?

И ныне: Ни от гро́ба Твоего́ воста́ну, Ча́до Мое́, / ни сле́зы точа́щи преста́ну Раба́ Твоя́, / до́ндеже и Аз сни́ду во ад: / не могу́ бо терпе́ти разлуче́ния Твоего́, Сы́не Мой.

Песнь 9.

Ирмос: Бо́га / челове́ком не возмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́ же велича́юще, / с Небе́сными во́и / Тя ублажа́ем.

Ра́дость Мне николи́же отсе́ле прико́снется, / рыда́ющи, глаго́лаше Непоро́чная: / Свет Мой и Ра́дость Моя́ во гроб за́йде: / но не оста́влю Его́ еди́наго, / зде же умру́, и спогребу́ся Ему́.

Душе́вную Мою́ я́зву ны́не исцели́, Ча́до Мое́, / Пречи́стая вопия́ше слезя́щи: / воскресни́, и утоли́ Мою́ боле́знь и печа́ль, / мо́жеши бо, Влады́ко, ели́ко хо́щеши, и твори́ши, / а́ще и погре́блся еси́ во́лею.

Слава: О ка́ко утаи́лася Тебе́ есть бе́здна щедро́т, / Ма́тери в та́йне изрече́ Госпо́дь; / тварь бо Мою́ хотя́ спасти́, изво́лих умре́ти, / но и воскре́сну, и Тебе́ возвели́чу, / я́ко Бог небесе́ и земли́.

И ныне: Воспою́ милосе́рдие Твое́, Человеколю́бче, / и покланя́юся бога́тству ми́лости Твоея́, Влады́ко: / созда́ние бо Твое́ хотя́ спасти́, / смерть подъя́л еси́, рече́ Пречи́стая: / но Воскресе́нием Твои́м, Спа́се, поми́луй всех нас.

Таже за Досто́йно: Ирмос: Бо́га челове́ком не возмо́жно ви́дети: Трисвятое. По О́тче наш: Кондак: Нас ра́ди Распя́таго: Го́споди, поми́луй, 40. И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иерей: Моли́твами святы́х оте́ц на́ших: И молитва: Нескве́рная, Небла́зная: И отпуст.

Полунощницу же поем в келлиах.

ВО СВЯТУЮ И ВЕЛИКУЮ СУББОТУ

клеплет ко Утрени в седмый час нощи. Начинаем Утреню по обычаю. И по шестопсалмии ектения великая.

На Бог Госпо́дь: тропарь, глас 2:

Благообра́зный Ио́сиф, / с дре́ва снем Пречи́стое Те́ло Твое́, / плащани́цею чи́стою обви́в, / и воня́ми во гро́бе но́ве покры́в положи́.

Слава: Егда́ снизше́л еси́ к сме́рти, Животе́ безсме́ртный, / тогда́ ад умертви́л еси́ блиста́нием Божества́. / Егда́ же и уме́ршия от преиспо́дних воскреси́л еси́, / вся си́лы небе́сныя взыва́ху: / Жизнода́вче Христе́ Бо́же наш, сла́ва Тебе́.

И ныне: Мироно́сицам жена́м, при гро́бе предста́в А́нгел вопия́ше: / ми́ра ме́ртвым суть прили́чна, / Христо́с же истле́ния яви́ся чуждь.

И, кадящу священнику весь храм, начинаем пети Непорочны со сладкопением, такожде по коемуждо стисе и похвалы.

Статия первая.

Возглашает певец, во глас 5: Благослове́н еси́, Го́споди, научи́ мя оправда́нием Твои́м.

1. Блаже́ни непоро́чнии в путь, / ходя́щии в зако́не Госпо́дни.

И похвалы, во глас 5:

Жизнь во гро́бе положи́лся еси́, Христе́, / и А́нгельская во́инства ужаса́хуся, снизхожде́ние сла́вяще Твое́.

2. Блаже́ни испыта́ющии свиде́ния Его́, / всем се́рдцем взы́щут Его́.

Животе́, ка́ко умира́еши? / Ка́ко и во гро́бе обита́еши, / сме́рти же ца́рство разруша́еши, / и от а́да ме́ртвыя возставля́еши?

3. Не де́лающии бо беззако́ния / в путе́х Его́ ходи́ша.

Велича́ем Тя, Иису́се Царю́, / и чтем погребе́ние и страда́ния Твоя́, / и́миже спасл еси́ нас от истле́ния.

4. Ты запове́дал еси́ за́поведи Твоя́ / сохрани́ти зело́.

Ме́ры земли́ положи́вый, / в ма́лом обита́еши, Иису́се Всецарю́, гро́бе днесь, / от гробо́в ме́ртвыя возставля́яй.

5. Дабы́ испра́вилися путие́ мои́, / сохрани́ти оправда́ния Твоя́.

Иису́се Христе́ мой, Царю́ всех, / что ища́ к су́щим во а́де прише́л еси́? / Или́ род отреши́ти челове́ческий?

6. Тогда́ не постыжу́ся, / внегда́ призре́ти ми на вся за́поведи Твоя́.

Влады́ка всех зри́тся мертв, / и во гро́бе но́вем полага́ется, / истощи́вый гро́бы ме́ртвых.

7. Испове́мся Тебе́ в пра́вости се́рдца, / внегда́ научи́ти ми ся судьба́м пра́вды Твоея́.

Животе́, во гро́бе положи́лся еси́, Христе́, / и сме́ртию Твое́ю смерть погуби́л еси́, / и источи́л еси́ ми́рови жизнь.

8. Оправда́ния Твоя́ сохраню́, / не оста́ви мене́ до зела́.

Со злоде́и я́ко злоде́й, Христе́, вмени́лся еси́, / оправда́я нас всех от злоде́йства дре́вняго запина́теля.

9. В чесо́м испра́вит юне́йший путь свой? / Внегда́ сохрани́ти словеса́ Твоя́.

Кра́сный добро́тою па́че всех челове́к, / я́ко беззра́чен мертв явля́ется, / естество́ украси́вый всех.

10. Всем се́рдцем мои́м взыска́х Тебе́, / не отри́ни мене́ от за́поведей Твои́х.

Ад ка́ко стерпи́т, Спа́се, прише́ствие Твое́, / а не па́че боле́знует омрача́емь, / блиста́ния све́та Твоего́ заре́ю ослепле́н?

11. В се́рдце моем скрых словеса Твоя́, / я́ко да не согрешу Тебе́.

Иису́се, сла́дкий мой, и спаси́тельный Све́те, / во гро́бе ка́ко те́мнем скры́лся еси́? / О несказа́ннаго и неизрече́ннаго терпе́ния!

12. Благослове́н еси́, Го́споди, / научи́ мя оправда́нием Твои́м.

Недоумева́ет и естество́ у́мное, и мно́жество безпло́тное, Христе́, / та́инства несказа́ннаго и неизрече́ннаго Твоего́ погребе́ния.

13. Устна́ма мои́ма возвести́х / вся судьбы́ уст Твои́х.

О чуде́с стра́нных! / О веще́й но́вых! / Дыха́ния моего́ Пода́тель бездыха́нен но́сится, / погреба́емь рука́ма Ио́сифовыма.

14. На пути́ свиде́ний Твои́х наслади́хся, / я́ко о вся́ком бога́тстве.

И во гроб заше́л еси́, / и недр, Христе́, Оте́ческих ника́коже отлучи́лся еси́: / сие́ стра́нное и пресла́вное ку́пно.

15. В за́поведех Твои́х поглумлю́ся, / и уразуме́ю пути́ Твоя́.

И́стинный небесе́ и земли́ Царь, / а́ще и во гро́бе мале́йшем заключи́лся еси́, / позна́лся еси́ всей тва́ри, Иису́се.

16. Во оправда́ниих Твои́х поучуся, / не забуду словес Твои́х.

Тебе́ положе́ну во гро́бе, Созда́телю Христе́, / а́дская подвиза́шася основа́ния, / и гро́би отверзо́шася челове́ков.

17. Возда́ждь рабу́ Твоему́, живи́ мя, / и сохраню́ словеса́ Твоя́.

Зе́млю содержа́й дла́иию, / умерщвле́н пло́тию, под земле́ю ны́не содержи́тся, / ме́ртвыя избавля́я а́дова содержа́ния.

18. Откры́й о́чи мои́, / и уразуме́ю чудеса́ от зако́на Твоего́.

Из истле́ния возше́л еси́, Животе́ Спа́се мой, / тебе́ уме́ршу, и к ме́ртвым прише́дшу, / и сломи́вшу а́довы вереи́.

19. Пришле́ц аз семь на земли́, / не скрый от мене́ за́поведи Твоя́.

Я́коже све́та свети́льник, / ны́не плоть Бо́жия, под зе́млю я́ко под спуд кры́ется, / и отгоня́ет су́щую во а́де тьму.

20. Возлюби́, душа́ моя́, / возжела́ти судьбы́ Твоя́ на вся́кое вре́мя.

У́мных стека́ется во́инств мно́жество со Ио́сифом и Никоди́мом, / погребсти́ Тя, Невмести́маго во гро́бе ма́ле.

21. Запрети́л еси́ го́рдым, / про́кляти уклоня́ющиися от за́поведей Твои́х.

Умерщвле́н во́лею, и положе́н под земле́ю, / жизното́чне Иису́се мой, / оживи́л еси́ умерщвле́на мя преступле́нием го́рьким.

22. Отыми́ от мене́ поно́с и уничиже́ние, / я́ко свиде́ний Твои́х взыска́х.

Изменя́шеся вся тварь стра́стию Твое́ю, / вся бо Тебе́, Сло́ве, сострада́ху, / Содержи́теля Тя ве́дуща всех.

23. И́бо седо́ша кня́зи, и на мя клевета́ху: / раб же Твой глумля́шеся во оправда́ниих Твои́х.

Живота́ ка́мень во чре́ве прие́м, / ад всея́дец, изблева́, / от ве́ка я́же поглоти́ мертвыя.

24. И́бо свиде́ния Твоя́ поуче́ние мое́ есть, / и сове́ти мои́ оправда́ния Твоя́.

Во гро́бе но́ве положи́лся еси́, Христе́, / и естество́ челове́ческое обнови́л еси́, / воскре́с боголе́пно из ме́ртвых.

25. Прильпе́ земли́ душа́ моя́, / живи́ мя по словеси́ Твоему́.

На зе́млю сшел еси́, да спасе́ши Ада́ма, / и на земли́ не обре́т сего́, Влады́ко, / да́же до а́да снизше́л еси́ ищя́й.

26. Пути́ моя́ возвести́х, и услы́шал мя еси́, / научи́ мя оправда́нием Твои́м.

Сотрясе́ся стра́хом, Сло́ве, вся земля́, / и денни́ца лучи́ скры, / велича́йшему в земли́ сокрове́нному Твоему́ Све́ту.

27. Путь оправда́ний Твои́х вразуми́ ми, / и поглумлю́ся в чудесе́х Твои́х.

Я́ко челове́к у́бо умира́еши во́лею, Спа́се, / я́ко Бог же сме́ртныя возста́вил еси́ от гробо́в, / и глубины́ грехо́вныя.

28. Воздрема́ душа́ моя́ от уны́ния, / утверди́ мя в словесе́х Твои́х.

Слезото́чная рыда́ния, на Тебе́ Чи́стая / ма́терски, о Иису́се, накрапля́ющи вопия́ше: / ка́ко погребу́ Тя, Сы́не?

29. Путь непра́вды отста́ви от мене́, / и зако́ном Твои́м поми́луй мя.

Я́коже пшени́чное зе́рно, / заше́д в не́дра земна́я, / многопе́рстный возда́л еси́ клас, / возста́вив челове́ки, я́же от Ада́ма.

30. Путь и́стины изво́лих, / и судьбы́ Твоя́ не забы́х.

Под земле́ю скры́лся еси́, я́ко со́лнце ны́не, / и но́щию сме́ртною покрове́н был еси́, / но возсия́й светле́йше Спа́се.

31. Прилепи́хся свиде́нием Твои́м, Го́споди, / не посрами́ мене́.

Я́коже со́лнечный круг луна́, Спа́се, сокрыва́ет, / и Тебе́ ны́не гроб скры, / сконча́вшагося сме́ртию пло́тски.

32. Путь за́поведей Твои́х теко́х, / егда́ разшири́л еси́ се́рдце мое́.

Живо́т сме́рти вкуси́вый Христо́с, / от сме́рти сме́ртныя свободи́, / и всем ны́не да́рует живо́т.

33. Законоположи́ мне, Го́споди, путь оправда́ний Твои́х, / и взыщу́ и вы́ну.

Умерщвле́на дре́вле Ада́ма зави́стно, / возво́диши к животу́ умерщвле́нием Твои́м, / Но́вый, Спа́се, во пло́ти явле́йся Ада́м.

34. Вразуми́ мя, и испыта́ю зако́н Твой, / и сохраню́ и всем се́рдцем мои́м.

У́мнии Тя чи́ни, просте́рта ме́ртва зря́ще нас ра́ди, / ужаса́хуся, покрыва́еми крилы́, Спа́се.

35. Наста́ви мя на стезю́ за́поведей Твои́х, / я́ко ту́ю восхоте́х.

Снем Тя, Сло́ве, от дре́ва ме́ртва, / во гро́бе Ио́сиф ны́не положи́, / но воста́ни, спаса́яй вся, я́ко Бог.

36. Приклони́ се́рдце мое́ во свиде́ния Твоя́, / а не в лихои́мство.

А́нгельская, Спа́се, ра́дость быв, / ны́не и печа́ли сим был еси́ вино́вен, / ви́димь пло́тию бездыха́нен мертв.

37. Отврати́ о́чи мои́, е́же не ви́дети суеты́, / в пути́ Твое́м живи́ мя.

Возне́слся еси́ на дре́ве, / и живу́щия челове́ки совозно́сиши: / под земле́ю же быв, / лежа́щия под не́ю воскреша́еши.

38. Поста́ви рабу́ Твоему́ / сло́во Твое́ в страх Твой.

Я́коже лев, Спа́се, усну́в пло́тию, / я́ко не́кий ски́мен мертв возстае́ши, / отложи́в ста́рость плотску́ю.

39. Отыми́ поноше́ние мое́, е́же непщева́х, / я́ко судьбы́ Твоя́ бла́ги.

В ре́бра прободе́н был еси́, / ребро́ взе́мый Ада́мле, / от него́же Е́ву созда́л еси́, / и источи́л еси́ то́ки чисти́тельныя.

40. Се возжела́х за́поведи Твоя́, / в пра́вде Твое́й живи́ мя.

Та́йно у́бо дре́вле жрется а́гнец: / Ты же я́ве жрен быв, Незло́биве, / всю тварь очи́стил еси́, Спа́се.

41. И да прии́дет на мя ми́лость твоя́, Го́споди, / спасе́ние Твое́ по словеси́ Твоему́.

Кто изрече́т о́браз стра́шный вои́стинну но́вый? / Влады́чествуяй бо тва́рию, / днесь страсть прие́млет, и умира́ет нас ра́ди.

42. И отвеща́ю поноша́ющим ми сло́во, / я́ко упова́х на словеса́ Твоя́.

Живота́ Сокро́вище, ка́ко зри́тся мертв? / Ужаса́ющеся А́нгели взыва́ху: / ка́ко же во гро́бе заключа́ется Бог?

43. И не отыми́ от уст мои́х словесе́ и́стинна до зела́, / я́ко на судьбы́ Твоя́ упова́х.

Копие́м прободе́ннаго, Спа́се, из ребра́ Твоего́, / живо́т живото́м из живота́ спа́сшаго мя иска́паеши, / и живи́ши мя с ним.

44. И сохраню́ зако́н Твой вы́ну / в век, и в век ве́ка.

Распросте́рт на дре́ве, собра́л еси́ челове́ки: / в ре́бра же прободе́н, / живото́чное всем оставле́ние источа́еши, Иису́се.

45. И хожда́х в широте́, / я́ко за́поведи Твоя́ взыска́х.

Благообра́зный Спа́се образу́ет стра́шно, / и погреба́ет Тя я́ко ме́ртва благообра́зно, / и ужаса́ется Твоего́ о́браза стра́шнаго.

46. И глаго́лах о свиде́ниих Твои́х пред цари́, / и не стыдя́хся.

Под земле́ю хоте́нием низше́д я́ко мертв, / возво́диши от земли́ к небе́сным, отту́ду па́дшия, Иису́се.

47. И поуча́хся в за́поведех Твои́х, / я́же возлюби́х зело́.

А́ще и мертв ви́ден был еси́, но живый я́ко Бог, / возво́диши от земли́ к небе́сным, отту́ду па́дшия, Иису́се.

48. И воздвиго́х ру́це мои́ / к за́поведем Твои́м, я́же возлюби́х.

А́ще и мертв ви́ден был еси́, но жив я́ко Бог, / умерщвле́ныя челове́ки оживи́л еси́, / моего́ умертви́в умертви́теля.

48. И глумля́хся / во оправда́ниих Твои́х.

О ра́дости о́ныя! / О мно́гия сла́дости! / И́хже во а́де напо́лнил еси́, / во днах мра́чных Свет возсия́в.

49. Помяни́ словеса́ Твоя́ рабу́ Твоему́, / и́хже упова́ние дал ми еси́.

Покланя́юся стра́сти, / воспева́ю погребе́ние, / велича́ю Твою́ держа́ву, Человеколю́бче, / и́миже свободи́хся страсте́й тлетво́рных.

50. То мя уте́ши во смире́нии мое́м, / я́ко сло́во Твое́ живи́ мя.

На Тя меч обнажи́ся, Христе́, / и меч кре́пкаго у́бо притупля́ется, / меч же обраща́ется еде́мский.

51. Го́рдии законопреступова́ху до зела́, / от зако́на же Твоего́ не уклони́хся.

А́гница Агнца зря́щи в заколе́нии, / о́стрием пробода́ема рыда́ше, / сподви́гши и ста́до вопи́ти.

52. Помяну́х судьбы́ Твоя́ от ве́ка, Го́споди, / и уте́шихся.

А́ще и во гро́бе погреба́ешися, / а́ще и во ад и́деши, / но и гро́бы истощи́л еси́, / и ад обнажи́л еси́, Христе́.

53. Печа́ль прия́т мя от гре́шник, / оставля́ющих зако́н Твой.

Во́лею снизше́л еси́, Спа́се, под зе́млю, / умерщвле́ныя челове́ки оживи́л еси́, / и возве́л еси́ во сла́ве О́тчей.

54. Пе́та бя́ху мне оправда́ния Твоя́ / на ме́сте прише́льствия моего́.

Тро́ицы Еди́н во пло́ти, / нас ра́ди поно́сную претерпе́ смерть, / ужаса́ется же со́лнце, и трепе́щет земля́.

55. Помяну́х в нощи́ и́мя Твое́, Го́споди, / и сохрани́х зако́н Твой.

Я́ко от исто́чника го́рькаго, / Иу́дова коле́на исча́дия в ро́ве положи́ша, / Пита́теля маннода́вца Иису́са.

56. Сей бысть мне, / я́ко оправда́ний Твои́х взыска́х.

Судия́ я́ко суди́мь пред Пила́том судие́ю, / и предста́, и сме́ртию непра́ведною осужде́н бысть, дре́вом кре́стным.

57. Часть моя́ еси́, Го́споди, / рех сохрани́ти зако́н Твой.

Го́рдый Изра́илю, / уби́йственнии лю́дие, / что пострада́вше, Вара́вву свободи́сте, / и Спа́са преда́сте кресту́?

58. Помоли́хся Лицу́ Твоему́ всем се́рдцем мои́м, / поми́луй мя по словеси́ Твоему́.

Руко́ю Твое́ю созда́вый Ада́ма от земли́, / того́ ра́ди естество́м был еси́ Челове́к, / и распя́лся еси́ во́лею Твое́ю.

59. Помы́слих пути́ Твоя́, / и возврати́х но́зе мои́ во свиде́ния Твоя́.

Послу́шав, Сло́ве, Отца́ Твоего́, / да́же до а́да лю́таго соше́л еси́, / и воскреси́л еси́ род челове́ческий.

60. Угото́вихся и не смути́хся, / сохрани́ти за́поведи Твоя́.

Увы́ Мне, Све́те ми́ра! / Увы́ Мне, све́те Мой, / Иису́се Мой возжеле́нный! / Вопия́ше Де́ва, рыда́ющи го́рько.

61. У́жа гре́шник обяза́шеся мне, / и зако́на Твоего́ не забы́х.

Зави́стливии, убийственнии и го́рдии лю́дие, / поне́ плащани́цы и сударя́ самаго́ стыдя́тся, воскре́сшу Христу́.

62. Полу́нощи воста́х испове́датися Тебе́ / о судьба́х пра́вды Твоея́.

Прииди́ у́бо, скве́рный уби́йце учениче́, / и нрав зло́бы твоея́ покажи́ ми, / и́мже был еси́ преда́тель Христо́в.

63. Прича́стник аз есмь всем боя́щимся Тебе́, / и храня́щим за́поведи Твоя́.

Я́ко человеколюби́в не́кто притворя́ешися бу́е, и сле́пе, / всегуби́тельнейший, неве́рный, Ми́ро прода́вый на цене́.

64. Ми́лости Твоея́ Го́споди, испо́лнь земля́, / оправда́нием Твои́м научи́ мя.

Небе́снаго Ми́ра ку́ю име́л еси́ це́ну Многоце́ннаго; / ко́е прия́л еси́ противодосто́йное; / неи́стовство обре́л еси́, прокля́тейший сатано́.

65. Бла́гость сотвори́л еси́ с рабо́м Твои́м, Го́споди, / по словеси́ Твоему́.

А́ще нищелю́бец еси́, / и о ми́ре печа́луеши истоща́емом во очище́ние души́, / ка́ко за зла́те продае́ши Светоза́рна?

66. Бла́гости и наказа́нию, и ра́зуму научи́ мя, / я́ко за́поведем Твои́м ве́ровах.

О Бо́жий Сло́ве! / О ра́досте Моя́! / Ка́ко претерплю́ тридне́вное Твое́ погребе́ние? / Ны́не терза́юся утро́бою ма́терски.

67. Пре́жде да́же не смири́ти ми ся, аз прегреши́х, / сего́ ра́ди сло́во Твое́ сохрани́х.

Кто даст Ми во́ду и слез исто́чники, / Богоневе́стная Де́ва взыва́ше, / да воспла́чу сла́дкаго Ми Иису́са?

68. Благ еси́ Ты, Го́споди, / и бла́гостию Твое́ю научи́ мя оправда́нием Твои́м.

О го́ры и хо́лми, и челове́ков мно́жества! / Воспла́читеся, и вся рыда́йте со Мно́ю, / Бо́га ва́шего Материю!

69. Умно́жися на мя непра́вда го́рдых, / аз же всем се́рдцем мои́м испыта́ю за́поведи Твоя́.

Когда́ ви́жду Тя, Спа́се, безле́тнаго Све́та, / ра́дость и сла́дость се́рдца Моего́? / Де́ва го́рько вопия́ше.

70. Усыри́ся я́ко млеко́ се́рдце их, / аз же зако́ну Твоему́ поучи́хся.

А́ще и я́ко ка́мень Спа́се, краесеко́мый, / Ты прия́л еси́ сече́ние, / но источи́л еси́ живу́ю струю́, / я́ко Исто́чник сый жи́зни.

71. Бла́го мне, я́ко смири́л мя еси́, / я́ко да научу́ся оправда́нием Твои́м.

Я́ко от исто́чника еди́наго сугу́бою реко́ю / ре́бром Твои́м излива́ющим напая́ющеся, / безсме́ртную приобрета́ем жизнь.

72. Благ мне зако́н уст Твои́х, / па́че ты́сящ зла́та и сребра́.

Во́лею яви́лся еси́ Сло́ве, во гро́бе мертв, но живе́ши, / и челове́ки, я́коже предре́кл еси́, / воскресе́нием Твои́м, Спа́се мой, воздвиза́еши.

Слава: Воспева́ем Сло́ве, Тебе́ всех Бо́га, / со Отце́м и Святы́м Твои́м Ду́хом, / и сла́вим Боже́ственное Твое́ погребе́ние.

И ныне, Богородичен: Блажи́м Тя, Богоро́дице Чи́стая, / и почита́ем тридне́вное погребе́ние / Сы́на Твоего́ и Бо́га на́шего ве́рно.

И паки первый припев оба лика вкупе. Таже ектения малая. И возглас на первую статию: Я́ко благослови́ся Твое́ И́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в.

И, покадив, начинает вторую статию.

Статия вторая.

Начинает левый лик благочинно тропарь, во глас 5:

Досто́йно есть / велича́ти Тя Жизнода́вца, / на Кресте́ ру́це просте́ршаго, / и сокру́шшаго держа́ву вра́жию.

73. Ру́це Твои́ сотвори́сте мя, и созда́сте мя; / вразуми́ мя, и научу́ся за́поведем Твои́м.

Досто́йно есть / велича́ти Тя, всех Зижди́теля: / Твои́ми бо страда́ньми и́мамы безстра́стие, / изба́вльшеся от тле́ния.

74. Боя́щиися Тебе́ у́зрят мя и возвеселя́тся, / я́ко на словеса́ Твоя́ упова́х.

Ужасе́ся земля́, / и со́лнце Спа́се скры́ся, / Тебе́ Невече́рнему Све́ту Христе́, / заше́дшу во гро́бе пло́тски.

75. Разуме́х, Го́споди, я́ко пра́вда судьбы́ Твоя́, / и вои́стинну смири́л мя еси́.

Усну́л еси́, Христе́, / естественноживо́тным сном во гро́бе, / и от тя́жкаго сна грехо́внаго / воздви́гл еси́ род челове́ческий.

76. Бу́ди же ми́лость Твоя́, да уте́шит мя, / по словеси́ Твоему́ рабу́ Твоему́.

Еди́на жен, кроме́ боле́зней роди́х Тя Ча́до, / боле́зни же ны́не терплю́ Стра́стию Твое́ю нестерпи́мыя, / глаго́лаше Чи́стая.

77. Да прии́дут мне щедро́ты Твоя́, и жив бу́ду, / я́ко зако́н Твой поуче́ние мое́ есть.

Горе́ Тя Спа́се, неразлу́чно со Отце́м су́ща, / до́ле же ме́ртва просте́рта на земли́, / ужаса́ются зря́ще Серафи́ми.

78. Да постыдя́тся го́рдии, я́ко непра́ведно беззако́нноваша на мя, / аз же поглумлю́ся в за́поведех Твои́х.

Раздира́ется церко́вная заве́са Твои́м распя́тием, / покрыва́ют свети́ла Сло́ве свет, / Тебе́, скры́вшуся Со́лнцу под зе́млю.

79. Да обратя́т мя боя́щиися Тебе́, / и ве́дящии свиде́ния Твоя́.

Земли́ изнача́ла еди́нем ма́нием водрузи́вый круг, / бездыха́нен, я́ко челове́к за́йде под зе́млю: / ужасни́ся виде́нием не́бо.

80. Бу́ди се́рдце мое́ непоро́чно во оправда́ниих Твои́х, / я́ко да не постыжу́ся.

Заше́л еси́ под зе́млю, руко́ю Твое́ю созда́вый челове́ка, / да воздви́гнеши от паде́ния собо́ры челове́ческия всеси́льною держа́вою.

81. Исчеза́ет во спасе́ние Твое́ душа́ моя́, / на словеса́ Твоя́ упова́х.

Плач свяще́нный прииди́те воспои́м Христу́ уме́ршему, / я́ко дре́вле жены́ мироно́сицы, / да и ра́дуйся услы́шим с ни́ми.

82. Исчезо́ша о́чи мои́ в сло́во Твое́, глаго́люще: / когда́ уте́шиши мя?

Ми́ро вои́стинну еси́ Ты, Слове неистощи́мое: / те́мже Ти и ми́ра приноша́ху, / я́ко ме́ртву Живо́му, жены́ мироно́сицы.

83. Зане́ бых я́ко мех на сла́не, / оправда́ний Твои́х не забы́х.

А́дова у́бо погребе́н ца́рствия, Христе́, сокруша́еши, / сме́ртию же смерть умерщвля́еши, / и тле́ния свобожда́еши земноро́дныя.

84. Коли́ко есть дней раба́ Твоего́? / Когда́ сотвори́ши ми от гоня́щих мя суд?

То́ки жи́зни пролива́ющая Бо́жия Прему́дрость, / во гроб заходя́щи, животвори́т / су́щия в незаходи́мых а́довых ме́стех.

85. Пове́даша мне законопресту́пницы глумле́ния, / но не я́ко закон Твой, Го́споди.

Да челове́ческое обновлю́ сокруше́нное естество́, / уя́звлен есмь сме́ртию хотя́ пло́тию: / Ма́ти Моя́, не терза́йся рыда́ньми.

86. Вся за́поведи Твоя́ и́стина, / непра́ведно погна́ша мя, помози́ ми.

Заше́л еси́ под зе́млю, Светоно́сец пра́вды, / и ме́ртвыя я́коже от сна воздви́гл еси́, / отгна́в вся́кую тьму су́щую во а́де.

87. Вма́ле не сконча́ша мене́ на земли́: / аз же не оста́вих за́поведей Твои́х.

Зе́рно двоера́сленное естественножи́зненное, / в бока́ земна́я се́ется со слеза́ми днесь: / но прозя́бше мир радостносотвори́т.

88. По ми́лости Твое́й живи́ мя, / и сохраню́ свиде́ния уст Твои́х.

Убоя́ся Ада́м, Бо́гу ходя́щу в раи́: / ра́дуется же, ко а́ду соше́дшу, / пады́й пре́жде, и ны́не воздвиза́емь.

89. Во век Го́споди, сло́во Твое́ / пребыва́ет на небеси́.

Жрет Тебе́ же́ртвы сле́зныя ро́ждшая Тя Христе́, / пло́тию положе́на во гро́бе, вопию́щи: / воста́ни Ча́до, я́коже предре́кл еси́.

90. В род и род и́стина Твоя́, / основа́л еси́ зе́млю, и пребыва́ет.

Во гро́бе Ио́сиф благогове́йно Тя но́вем сокрыва́я / пе́сни исхо́дныя боголе́пныя пое́т Тебе́, / смеше́ныя рыда́ньми Спа́се.

91. Учине́нием Твои́м пребыва́ет день, / я́ко вся́ческая рабо́тна Тебе́.

Гвоздьми́ Тя Кресту́ пригвожде́на, / Ма́ти Твоя́ Сло́ве зря́щи, / гвоздьми́ печа́ли го́рькия пронза́ет, и стрела́ми ду́шу.

92. Я́ко а́ще бы не зако́н Твой поуче́ние мое́ был, / тогда́ у́бо поги́бл бых во смире́нии мое́м.

Тя всех наслажде́ние Ма́ти зря́щи, / питие́м напая́ема го́рьким, / слеза́ми лице́ омака́ет го́рце.

93. Во век не забу́ду оправда́ний Твои́х, / я́ко в них оживи́л мя еси́.

Уязвля́юся лю́те, и растерза́юся утро́бою Сло́ве, зря́щи непра́ведное Твое́ заколе́ние, глаго́лаше Пречи́стая с пла́чем.

94. Твой есмь аз, спаси́ мя, / я́ко оправда́ний Твои́х взыска́х.

О́ко сла́дкое, и устне́ Твои́ ка́ко заключу́ Сло́ве? / Ка́ко же Тя мертволе́пно погребу́? / Ужаса́юся, вопия́ше Ио́сиф.

95. Мене́ жда́ша гре́шницы погуби́ти мя, / свиде́ния Твоя́ разуме́х.

Пе́сни Ио́сиф и Никоди́м надгро́бныя / пою́т Христу́ уме́ршему ны́не, / пою́т же с ни́ми и Серафи́ми.

96. Вся́кия кончи́ны ви́дех коне́ц, / широка́ за́поведь Твоя́ зело́.

Захо́диши под зе́млю Спа́се, Со́лнце пра́вды: / те́мже Ро́ждшая Тя Луна́ печа́льми оскудева́ет, / ви́да Твоего́ лиша́ема.

97. Коль возлюби́х зако́н Твой Го́споди, / весь день поуче́ние мое́ есть.

Ужасе́ся ад Спа́се, зря Тя Жизнода́вца, / бога́тство о́наго упраждня́юща, / и я́же от ве́ка ме́ртвыя возставля́юща.

98. Па́че враг мои́х умудри́л мя еси́ за́поведию Твое́ю, / я́ко в век моя́ есть.

Со́лнце свет возсиява́ет по но́щи Сло́ве: / и Ты же воскре́с, просиява́еши по сме́рти я́сно, / я́ко от черто́га.

99. Па́че всех уча́щих мя разуме́х, / я́ко свиде́ния Твоя́ поуче́ние мое́ есть.

Земля́ Тя Созда́телю, в не́дра прие́мши, / тре́петом содержи́ма Спа́се трясе́тся, / успи́вши ме́ртвыя трясе́нием.

100. Па́че ста́рец разуме́х, / я́ко за́поведи Твоя́ взыска́х.

Ми́ры Тя Христе́, Никоди́м и Благообра́зный, / ны́не новоле́пно помазу́юще, / ужасни́ся, вопия́ху, вся земля́.

101. От вся́каго пути́ лука́ва возбрани́х нога́м мои́м, / я́ко да сохраню́ словеса́ Твоя́.

Заше́л еси́ Светотво́рче, / и с Тобо́ю за́йде свет со́лнца: / тре́петом же тварь содержи́тся, / всех Тя пропове́дающи Творца́.

102. От суде́б Твои́х не уклони́хся, / я́ко Ты законоположи́л ми еси́.

Ка́мень углажде́нный, краеуго́льный покрыва́ет ка́мень: / челове́к же сме́ртный я́ко сме́ртна, / Бо́га покрыва́ет ны́не во гро́бе: / ужасни́ся земле́.

103. Коль сладка́ горта́ни моему́ словеса́ Твоя́, / па́че ме́да усто́м мои́м.

Виждь ученика́, его́же люби́л еси́, / и Твою́ Ма́терь Ча́до, / и веща́ние даждь сладча́йшее, / взыва́ше пла́чущи Чи́стая.

104. От за́поведей Твои́х разуме́х, / сего́ ра́ди возненави́дех всяк путь непра́вды.

Ты Сло́ве, я́ко сый живота́ Да́тель, / иуде́ов, на Кресте́ простры́йся, не умертви́л еси́, / но воскреси́л еси́ и сих ме́ртвыя.

105. Свети́льник нога́ма мои́ма зако́н Твой, / и свет стезя́м мои́м.

Добро́ты Сло́ве пре́жде не име́л еси́, / ниже́ ви́да, егда́ страда́л еси́, / но воскре́с провозсия́л еси́, / удобри́в челове́ки Боже́ственными заря́ми.

106. Кля́хся, и поста́вих / сохрани́ти судьбы́ пра́вды Твоея́.

Заше́л еси́ пло́тию в зе́млю, Невече́рний Светоно́сец, / и не терпя́ зре́ти со́лнце поме́рче, / полу́дни еще́ су́щу.

107. Смири́хся до зела́ Го́споди, / живи́ мя по словеси́ Твоему́.

Со́лнце вку́пе и луна́ поме́ркше Спа́се, / рабо́м благоразу́мным образова́хуся, / и́же в че́рныя оде́жды облача́тся.

108. Во́льная уст мои́х благоволи́ же / Го́споди, и судьба́м Твои́м научи́ мя.

Ви́де Тя Бо́га со́тник, а́ще и умертви́лся еси́: / ка́ко Тя у́бо Бо́же мой, осяжу́ рука́ма? / Ужаса́юся, вопия́ше Ио́сиф.

109. Душа́ моя́ в руку́ Твое́ю вы́ну, / и зако́на Твоего́ не забы́х.

Усну́ Ада́м, но смерть из ребр изво́дит: / Ты же ны́не усну́л еси́ Сло́ве Бо́жий, / источа́еши от ребр Твои́х ми́рови жизнь.

110. Положи́ша гре́шницы сеть мне, / и от за́поведей Твои́х не заблуди́х.

Усну́л еси́ ма́ло, и оживи́л еси́ уме́ршия, / и воскре́с, воскреси́л еси́ спя́щия от ве́ка Бла́же.

111. Насле́довах свиде́ния Твоя́ во век, / я́ко ра́дование се́рдца моего́ суть.

Взят еси́ от земли́, / но источи́л еси́ спасе́ния вино́, живото́чная Лозо́: / прославля́ю Страсть и Крест.

112. Приклони́х се́рдце мое́, / сотвори́ти оправда́ния Твоя́ в век за воздая́ние.

Ка́ко у́мная чинонача́лия Тя Спа́се пою́т, / на́га, окровавле́на, осужде́на, / терпя́ще де́рзость распина́телей?

113. Законопресту́пныя возненави́дех, / зако́н же Твой возлюби́х.

Обруче́нный, стропо́тнейший ро́де евре́йский, / ве́дал еси́ воздвиже́ние хра́ма, / почто́ осуди́л еси́ Христа́?

114. Помо́щник мой, и Засту́пник мой еси́ Ты, / на словеса́ Твоя́ упова́х.

Во оде́жду поруга́ния Украси́теля всех облека́еши, / И́же не́бо утверди́, и зе́млю украси́ чу́дно.

115. Уклони́теся от мене́, лука́внующии, / и испыта́ю за́поведи Бо́га моего́.

Я́коже нея́сыть уя́звлен в ре́бра Твоя́ Слове, / о́троки Твоя́ уме́ршия оживи́л еси́, / иска́пав живо́тныя им то́ки.

116. Заступи́ мя по словеси́ Твоему́ и жив бу́ду, / и не посрами́ мене́ от ча́яния моего́.

Со́лнце пре́жде уста́ви Иису́с, иноплеме́нники секи́й: / Ты же скры́лся еси́, низлага́я тьмы нача́льника.

117. Помози́ ми, и спасу́ся, / и поучу́ся во оправда́ниих Твои́х вы́ну.

Недр Оте́ческих неисхо́ден пребы́в Ще́дре, / и Челове́к бы́ти благоволи́л еси́, / и во ад снизше́л еси́ Христе́.

118. Уничижи́л еси́ вся отступа́ющия от оправда́ний Твои́х, / я́ко непра́ведно помышле́ние их.

Взя́тся распны́йся, / и́же на вода́х зе́млю пове́шей, / и я́ко бездыха́нен в ней ны́не возлега́ет: / я́же не терпя́щи тряса́шеся лю́те.

119. Преступа́ющия непщева́х вся гре́шныя земли́: / сего́ ра́ди возлюби́х свиде́ния Твоя́.

Увы́ мне, о Сы́не, / Неискусому́жная рыда́ше глаго́лющи: / Его́же бо я́ко Царя́ наде́яхся, / осужде́на зрю ны́не на Кресте́.

120. Пригвозди́ стра́ху Твоему́ пло́ти моя́, / от суде́б бо Твои́х убоя́хся.

Сия́ Гаврии́л Мне возвести́, егда́ слете́, / и́же Ца́рство ве́чное рече́, Сы́на Моего́ Иису́са.

121. Сотвори́х суд и пра́вду, / не преда́ждь мене́ оби́дящим мя.

Увы́, Симео́ново соверши́ся проро́чество: / Твой бо меч про́йде се́рдце Мое́, Емману́иле.

122. Восприими́ раба́ Твоего́ во бла́го, / да не оклевета́ют мене́ го́рдии.

Поне́ су́щих от ме́ртвых постыди́теся, о иуде́е! / И́хже Животода́вец возста́ви, / Его́же вы уби́сте зави́стно.

123. О́чи мои́ исчезо́сте во спасе́ние Твое́, / и в сло́во пра́вды Твоея́.

Ужасе́ся ви́девшее, неви́димый Све́те, / Тебе́ Христе́ мой во гро́бе сокрыва́ема, бездыха́нна же, / и помрачи́ со́лнце свет.

124. Сотвори́ с рабо́м Твои́м по ми́лости Твое́й / и оправда́нием Твои́м научи́ мя.

Пла́каше го́рько Пренепоро́чная Ма́ти Твоя́ Сло́ве, / егда́ во гро́бе ви́де Тебе́ Неизрече́ннаго и Безнача́льнаго Бо́га.

125. Раб Твой есмь аз, вразуми́ мя, / и уве́м свиде́ния Твоя́.

Ме́ртвость Твою́ нетле́нная Христе́, / Ма́ти Твоя́ зря́щи, / го́рько к Тебе́ веща́ше: / не косни́ Животе́ в ме́ртвых.

126. Вре́мя сотвори́ти Го́сподеви, / разори́ша зако́н Твой.

Ад лю́тый потрепета́, / егда́ Тя ви́де Со́лнце Сла́вы Безсме́ртне, / и издава́ше ю́зники тща́тельно.

127. Сего́ ра́ди возлюби́х за́поведи Твоя́ / па́че зла́та и топа́зия.

Ве́лие и ужа́сное виде́ние ны́не зри́тся: / живота́ сый Вино́вный, смерть подъя́т, / оживи́ти хотя всех.

128. Сего́ ра́ди ко всем за́поведем Твои́м направля́хся, / всяк путь непра́вды возненави́дех.

Пробода́ешися в ре́бра, / и пригвожда́ешися Влады́ко рука́ми, / я́зву от ребра́ Ты исцеля́я, / и невоздержа́ние рук пра́отец.

129. Ди́вна свиде́ния Твоя́, / сего́ ра́ди испыта́ я́ душа́ моя́.

Пре́жде Рахи́лина сы́на пла́каше всяк и́же в до́му, / и Сы́на Де́выя рыда́ху учени́к лик с Ма́терию.

130. Я́вление слове́с Твои́х / просвеща́ет, и вразумля́ет младе́нцы.

Ударе́ние рук да́ша Христо́вой лани́те, / руко́ю челове́ка созда́вшаго, / и че́люсти зве́ря сокруши́вшаго.

131. Уста́ моя́ отверзо́х, и привлеко́х дух, / я́ко за́поведей Твои́х жела́х.

Пе́сньми Твое́ Христе́, ны́не распя́тие и погребе́ние, вси ве́рнии пра́зднуем, / изба́вльшеся сме́рти погребе́нием Твои́м.

Слава, Троичен: Безнача́льне Бо́же, Соприсносу́щне Сло́ве, и Ду́ше Святы́й! / Лю́ди правосла́вныя в ве́ре укрепи́ на ра́тныя, я́ко Благ.

И ныне, Богородичен: Жизнь ро́ждшая, / Пренепоро́чная Чи́стая Де́во, / утоли́ церко́вныя собла́зны, / и пода́ждь мир, я́ко Блага́я.

И паки первый тропарь оба лика. Таже ектения малая.

Возглас во вторую статию: Я́ко Свят еси́ Бо́же наш, И́же на престо́ле сла́вы Херуви́мстем почива́яй, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

И начинаем третию статию, кадящу священнику.

Статия третия.

Начинает паки со сладкопением десный, сиречь первый лик, на глас 3-й:

Ро́ди вси песнь / погребе́нию Твоему́ прино́сят, Христе́ мой.

132. При́зри на мя, и поми́луй мя, / по суду́ лю́бящих и́мя Твое́.

Снем с дре́ва и́же от Аримафе́а, / плащани́цею обви́в / во гро́бе Тя погреба́ет.

133. Стопы́ моя́ напра́ви по словеси́ Твоему́, / и да не облада́ет мно́ю вся́кое беззако́ние.

Мироно́сицы приидо́ша, / ми́ра Тебе́ Христе́ мой, нося́щия прему́дро.

134. Изба́ви мя от клеветы́ челове́ческия, / и сохраню́ за́поведи Твоя́.

Гряди́ вся тварь, / пе́сни исхо́дныя принесе́м Зижди́телю.

135. Лице́ Твое́ просвети́ на раба́ Твоего́, / и научи́ мя оправда́нием Твои́м.

Я́ко ме́ртва Жива́го / с мироно́сицами, вси миропома́жем му́дренно.

136. Исхо́дища водна́я изведо́сте о́чи мои́, / поне́же не сохрани́х зако́на Твоего́.

Ио́сифе треблаже́нне, / погреби́ те́ло Христа́ Жизнода́вца.

137. Пра́веден еси́ Го́споди, / и пра́ви суди́ Твои́.

Ихже воспита манною, / воздвиго́ша пя́ту на Благоде́теля.

138. Запове́дал еси́ пра́вду, свиде́ния Твоя́, / и и́стину зело́.

И́хже воспита́ ма́нною, / прино́сят Спа́су желчь ку́пно и о́цет.

139. Иста́яла мя есть ре́вность Твоя́, / я́ко забы́ша словеса́ Твоя́ врази́ мои́.

О пребезу́мия и христоуби́йства пророкоуби́йц!

140. Разжже́но сло́во Твое́ зело́, / и раб Твой возлюби́ е́.

Я́коже безу́мный служи́тель, / предаде́ учени́к бе́здну прему́дрости.

141. Юне́йший аз есмь и уничиже́н, / оправда́ний Твои́х не забы́х.

Изба́вителя оста́вив, / пле́нник оста́вися льсти́вый Иу́да.

142. Пра́вда Твоя́ пра́вда во век, / и зако́н Твой и́стина.

По Соломо́ну, ров глубо́кий, / уста́ евре́й беззако́нных.

143. Ско́рби и ну́жди обрето́ша мя, / за́поведи Твоя́ поуче́ние мое́.

В стропо́тных ше́ствиих евре́ов беззако́нных, волчцы́ и се́ти.

144. Пра́вда свиде́ния Твоя́ в век: / вразуми́ мя, и жив бу́ду.

Ио́сиф погреба́ет с Никоди́мом мертволе́пно Зижди́теля.

145. Воззва́х всем се́рдцем мои́м, услы́ши мя Го́споди, / оправда́ния Твоя́ взыщу́.

Жизнода́вче Спа́се, / сла́ва держа́ве Твое́й, ад разо́ршей.

146. Воззва́х Ти, спаси́ мя, / и сохраню́ свиде́ния Твоя́.

Лежа́ща Тя Пречи́стая ви́дящи, Сло́ве, / матероле́пно пла́каше.

147. Предвари́х в безго́дии, и воззва́х, / на словеса́ Твоя́ упова́х.

О сладча́йшая Моя́ весно́, сладча́йшее Мое́ Ча́до! / Где Твоя́ за́йде добро́та?

148. Предвари́сте о́чи мои́ ко у́тру, / поучи́тися словесе́м Твои́м.

Плачь сподвиза́ше Всечи́стая Твоя́ Ма́ти, / Тебе́ Сло́ве уме́ршу.

149. Глас мой услы́ши Го́споди, по ми́лости Твое́й, / по судьбе́ Твое́й живи́ мя.

Жены́ с ми́ры приидо́ша / пома́зати Христа́ Боже́ственнаго ми́ра.

150. Прибли́жишася гоня́щии мя беззако́нием, / от зако́на же Твоего́ удали́шася.

Смерть сме́ртию Ты умерщвля́еши Бо́же мой, / Боже́ственною си́лою Твое́ю.

151. Близ еси́ Ты Го́споди, / и вси путие́ Твои́ и́стина.

Прельсти́ся преле́стник, / прельсти́выйся избавля́ется, / прему́дростию Твое́ю Бо́же мой.

152. Испе́рва позна́х от свиде́ний Твои́х, / я́ко во век основа́л я́ еси́.

Во дно а́дово низведе́н бысть преда́тель, / в кла́денец истле́ния.

153. Виждь смире́ние мое́, и изми́ мя, / я́ко зако́на Твоего́ не забы́х.

Волчцы́ и се́ти путие́ / треокая́ннаго безу́мнаго Иу́ды.

154. Суди́ суд мой, и изба́ви мя, / словесе́ ра́ди Твоего́ живи́ мя.

Вси спогиба́ют распина́телие Твои́ Сло́ве, / Сы́не Бо́жий Всецарю́.

155. Дале́че от гре́шник спасе́ние, / я́ко оправда́ний Твои́х не взыска́ша.

В кла́денец истле́ния вси спогиба́ют му́жие крове́й.

156. Щедро́ты Твоя́ мно́ги Го́споди, / по судьбе́ Твое́й живи́ мя.

Сы́не Бо́жий Всецарю́ Бо́же мой, Созда́телю мой, / ка́ко страсть подъя́л еси́?

157. Мно́зи изгоня́щии мя и стужа́ющии ми, / от свиде́ний Твои́х не уклони́хся.

Ю́ница Тельца́ на дре́ве пове́шена взыва́ше зря́щи.

158. Ви́дех неразумева́ющия и иста́ях, / я́ко слове́с Твои́х не сохрани́ша.

Те́ло живоно́сное Ио́сиф погреба́ет с Никоди́мом.

159. Виждь, я́ко за́поведи Твоя́ возлюби́х Го́споди, / по ми́лости Твое́й живи́ мя.

Взыва́ше Отрокови́ца / те́пле сле́зы точа́щи, / утро́бою пробода́ема.

160. Нача́ло слове́с Твои́х и́стина, / и во век вся судьбы́ пра́вды Твоея́.

Све́те о́чию Мое́ю, / Сладча́йшее Мое́ Ча́до! / Ка́ко во гро́бе ны́не покрыва́ешися?

161. Кня́зи погна́ша мя ту́не, / и от слове́с Твои́х убоя́ся се́рдце мое́.

Ада́ма и Е́ву свободи́ти, Ма́ти не рыда́й, сия́ стражду́.

162. Возра́дуюся аз о словесе́х Твои́х, / я́ко обрета́яй коры́сть мно́гу.

Прославля́ю Твое́, Сы́не Мой, кра́йнее благоутро́бие, / его́же ра́ди сия́ стра́ждеши.

163. Непра́вду возненави́дех и омерзи́х, / зако́н же Твой возлюби́х.

О́цтом напое́н был еси́ и же́лчию Ще́дре, / дре́внее разреша́я вкуше́ние.

164. Седмери́цею днем хвали́х Тя, / о судьба́х пра́вды Твоея́.

На кресте́ пригвозди́лся еси́, / дре́вле лю́ди Твоя́ столпо́м о́блачным покрыва́яй.

165. Мир мног лю́бящим зако́н Твой, / и несть им собла́зна.

Мироно́сицы Спа́се ко гро́бу прише́дшия, / ми́ра принесо́ша Тебе́.

166. Ча́ях спасе́ния Твоего́ Го́споди, / и за́поведи Твоя́ возлюби́х.

Воста́ни Ще́дре, / от про́пастей а́дских возставля́яй нас.

167. Сохрани́ душа́ моя́ свиде́ния Твоя́, / и возлюби́ я́ зело́.

Воскресни́ Жизнода́вче, / ро́ждшая Тя Ма́ти сле́зы точа́щи глаго́лет.

168. Сохрани́х за́поведи Твоя́ и свиде́ния Твоя́, / я́ко вси путие́ мои́ пред Тобо́ю, Го́споди.

Потщи́ся воскре́снути, печаль разреша́я Сло́ве, / чи́сто Ро́ждшия Тя.

169. Да прибли́жится моле́ние мое́ пред Тя Го́споди, / по словеси́ Твоему́ вразуми́ мя.

Небе́сныя си́лы ужасо́шася стра́хом, / ме́ртва Тя зря́ще.

170. Да вни́дет проше́ние мое́ пред Тя Го́споди, / по словеси́ Твоему́ изба́ви мя.

Любо́вию же и стра́хом Стра́сти Твоя́ почита́ющим, / даждь прегреше́ний разреше́ние.

171. Отры́гнут устне́ мои́ пе́ние, / егда́ научи́ши мя оправда́нием Твои́м.

О ужа́снаго и стра́ннаго виде́ния, Бо́жий Сло́ве! / Ка́ко земля́ Тя спокрыва́ет?

172. Провеща́ет язы́к мой словеса́ Твоя́, / я́ко вся за́поведи Твоя́ пра́вда.

Нося́й Тя дре́вле Спа́се, Ио́сиф бе́гает, / и ны́не Тя ины́й погреба́ет.

173. Да бу́дет рука́ Твоя́ е́же спасти́ мя, / я́ко за́поведи Твоя́ изво́лих.

Пла́чет и рыда́ет Тя Пречи́стая Ма́ти Твоя́, Спа́се мой умерщвле́наго.

174. Возжела́х спасе́ние Твое́ Го́споди, / и зако́н Твой поуче́ние мое́ есть.

Ужаса́ются умы́ стра́ннаго, / и ужа́снаго Тебе́ всех Созда́теля, погребе́ния.

175. Жива́ бу́дет душа́ моя́, и восхва́лит Тя, / и судьбы́ Твоя́ помо́гут мне.

Излия́ша на гроб мироно́сицы ми́ра, / зело́ ра́но прише́дшыя.

176. Заблуди́х я́ко овча́ поги́бшее, / взыщи́ раба́ Твоего́, я́ко за́поведей Твои́х не забы́х.

Мир Це́ркви, / лю́дем Твои́м спасе́ние / да́руй воста́нием Твои́м.

Слава: О Тро́ице Бо́же мой, / О́тче, Сы́не и Ду́ше, / поми́луй мир.

И ныне: Ви́дети Твоего́ Сы́на Воскресе́ние, / Де́во, сподо́би Твоя́ рабы́.

И абие поем тропари сия, во глас 5:

Благослове́н еси́, Го́споди, / научи́ мя оправда́нием Твои́м.

А́нгельский собо́р удиви́ся, / зря Тебе́ в ме́ртвых вмени́вшася, / сме́ртную же Спа́се кре́пость разори́вша, / и с Собо́ю Ада́ма воздви́гша, / и от а́да вся свобо́ждша.

Благослове́н еси́, Го́споди, / научи́ мя оправда́нием Твои́м.

Почто́ ми́ра с ми́лостивными слеза́ми, / о учени́цы растворя́ете? / Блиста́яйся во гро́бе А́нгел мироно́сицам веща́ше: / ви́дите вы гроб и уразуме́йте, / Спас бо воскре́се от гро́ба.

Благослове́н еси́, Го́споди, / научи́ мя оправда́нием Твои́м.

Зело́ ра́но мироно́сицы теча́ху / ко гро́бу Твоему́ рыда́ющия, / но предста́ к ним А́нгел и рече́: / рыда́ния вре́мя преста́, не пла́чите: / Воскресе́ние же апо́столом рцы́те.

Благослове́н еси́, Го́споди, / научи́ мя оправда́нием Твои́м.

Мироно́сицы жены́, с ми́ры прише́дшия / ко гро́бу Твоему́ Спа́се, рыда́ху, / А́нгел же к ним рече́, глаго́ля: / что с ме́ртвыми Жива́го помышля́ете? / Я́ко Бог бо воскре́се от гро́ба.

Слава, Троичен: Поклони́мся Отцу́, / и Его́ Сы́нови, и Свято́му Ду́ху, / Святе́й Тро́ице во Еди́ном Существе́, / с Серафи́мы зову́ще: / Свят, Свят, Свят еси́ Го́споди.

И ныне, Богородичен: Жизнода́вца ро́ждши, / греха́ Де́во Ада́ма изба́вила еси́, / ра́дость же Е́ве / в печа́ли ме́сто подала́ еси́: / па́дшия же от жи́зни / к сей напра́ви, / из Тебе́ воплоти́выйся Бог и Челове́к.

Аллилу́иа, трижды.

Таже ектения малая.

Возглас: Ты бо еси́ Царь ми́ра, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

И поем седален дне, глас 1. Подобен: Гроб Твой, Спа́се:

Плащани́цею чи́стою, и арома́ты Боже́ственными / Те́ло Честно́е, испроси́в у Пила́та миропомазу́ет, / и полага́ет Ио́сиф в но́вом гро́бе. / Те́мже ура́нше мироно́сицы жены́, возопи́ша: / покажи́ нам, я́коже предре́кл еси́ Христе́, Воскресе́ние.

Слава: Покажи́ нам, я́коже предре́кл еси́ Христе́, Воскресе́ние.

И ныне, другий подобен:

Ужасо́шася ли́цы А́нгельстии, / зря́ще Седя́щаго в не́дрех О́тчих: / ка́ко во гроб полага́ется, я́ко мертв Безсме́ртный! / Его́же чи́ни А́нгельстии окружа́ют / и сла́вят с ме́ртвыми во а́де, / я́ко Зижди́теля и Го́спода.

Таже бывает чтение во Евангелии толковом, от Матфеа, зачало 114: Во у́трий же день, и́же есть по пятце́: Воскресе́ние Христо́во: не глаголем. Но абие псалом 50. И поем канон, ирмос по дважды, а тропари на 12. И паки последи ирмос оба лика вкупе. Есть же канон, от первыя песни до шестыя, творение Марка монаха, епископа Идруитскаго: ирмосы же творение жены некия, Кассии именуемыя. От 6-я же песни до конца творение господина Космы. Краегранесие же канона: Каи́ си́мерон де Са́вватон ме́лпо Ме́га. Сиесть: И днесь же Суббо́ту пою́ Вели́кую. Глас 6.

Песнь 1.

Ирмос: Волно́ю морско́ю / Скры́вшаго дре́вле, / гони́теля мучи́теля, под земле́ю скры́ша / спасе́нных о́троцы; / но мы, я́ко отрокови́цы, / Го́сподеви пои́м, / сла́вно бо просла́вися.

{Κ} Го́споди Бо́же мой, / исхо́дное пе́ние, и надгро́бную Тебе́ песнь воспою́, / погребе́нием Твои́м жи́зни моея́ вхо́ды отве́рзшему, / и сме́ртию смерть и ад умертви́вшему.

{Α} Горе́ Тя на Престо́ле и до́ле во гро́бе, / преми́рная и подзе́мная, помышля́ющая Спа́се мой, / зы́бляхуся умерщвле́нием Твои́м: / па́че ума́ бо ви́ден был еси́ мертв, Живонача́льниче.

{Ι} Да Твоея́ сла́вы вся испо́лниши, / сшел еси́ в ни́жняя земли́: / от Тебе́ бо не скры́ся соста́в мой, и́же во Ада́ме, и погребе́н, / истле́вша мя обновля́еши, Человеколю́бче.

Песнь 3.

Ирмос: Тебе́, на вода́х / пове́сившаго / всю зе́млю неодержи́мо, / тварь ви́девши / на ло́бнем ви́сима, / у́жасом мно́гим содрога́шеся, / несть свят, / ра́зве Тебе́ Го́споди, взыва́ющи.

{Σ} О́бразы погребе́ния Твоего́ показа́л еси́, виде́ния умно́жив. / Ны́не же сокрове́нная Твоя́ богому́жно уясни́л еси́, и су́щим во а́де Влады́ко, / несть свят, ра́зве Тебе́ Го́споди, взыва́ющим.

{Η} Просте́рл еси́ дла́ни, и соедини́л еси́ дре́вле разстоя́щаяся. / Одея́нием же Спа́се, е́же в плащани́це и во гро́бе, / окова́нныя разреши́л еси́, / несть свят, ра́зве Тебе́ Го́споди, взыва́ющия.

{Μ} Гро́бом и печа́тьми, Невмести́ме, / содержи́мь был еси́ хоте́нием: / и́бо си́лу Твою́ де́йствы показа́л еси́, / богоде́йственно пою́щим: / несть свят, ра́зве Тебе́ Го́споди, Человеколю́бче.

Седален, глас 1:

Гроб Твой Спа́се, во́ини стрегу́щии, / ме́ртви от облиста́ния я́вльшагося А́нгела бы́ша, / пропове́дающа жена́м Воскресе́ние. / Тебе́ сла́вим, тли потреби́теля! / Тебе́ припа́даем, Воскре́сшему из гро́ба, / и Еди́ному Бо́гу на́шему!

Слава, и ныне, тойже.

Песнь 4.

Ирмос: На Кресте́ Твое́ / Боже́ственное истоща́ние / прови́дя Авваку́м, / ужа́сся, вопия́ше: / Ты си́льных пресе́кл еси́ / держа́ву Бла́же, / приобща́яся су́щим во а́де, я́ко Всеси́лен.

{Ε} Седьмы́й день днесь освяти́л еси́, / его́же дре́вле благослови́л еси́ упокое́нием дел: / прево́диши бо вся́ческая и обновля́еши, / суббо́тствуя Спа́се мой, и назида́я.

{Ρ} Си́лою лу́чшаго, победи́вшаго Тебе́, / от пло́ти душа́ Твоя́ раздели́ся, / растерза́ющи бо обоя́ у́зы, / сме́рти и а́да, Сло́ве, держа́вою Твое́ю.

{Ο} Ад Сло́ве, срет Тя огорчи́ся, / челове́ка зря обоже́на, / уя́звлена ра́нами, и Всесильноде́теля, / стра́шным же зра́ком поги́бе.

Песнь 5.

Ирмос: Богоявле́ния Твоего́ Христе́, / к нам ми́лостивно бы́вшаго, / Иса́ия Свет ви́дев Невече́рний, / из но́щи у́треневав взыва́ше: / воскре́снут ме́ртвии, / и воста́нут су́щии во гробе́х, / и вси земноро́днии возра́дуются.

{Ν} Новотвори́ши земны́я Созда́телю, пе́рстен быв, / и плащани́ца и гроб явля́ют е́же в Тебе́ Сло́ве, та́инство. / Благообра́зный бо сове́тник, Тебе́ Ро́ждшаго сове́т образу́ет, / в Тебе́ велеле́пно новотворя́щаго мя.

{Δ} Сме́ртию сме́ртное, / погребе́нием тле́нное прелага́еши, / нетле́нно твори́ши бо, / боголе́пно безсме́ртно творя́ прия́тие, / плоть бо Твоя́ истле́ния не ви́де Влады́ко, / ниже́ душа́ Твоя́ во а́де странноле́пно оста́влена бысть.

{Ε} Из Небра́чныя проше́д, и прободе́н в ре́бра Соде́телю мой, / из Нея́ соде́лал еси́ обновле́ние Е́вино, Ада́м быв, / усну́в па́че естества́ сном есте́ственным, / и жизнь воздви́гнув от сна и тле́ния, я́ко Всеси́лен.

Песнь 6.

{Σ} Ирмос: Ят бысть, / но не удержа́н в пе́рсех ки́товых Ио́на: / Твой бо о́браз нося́, / Страда́вшаго, и погребе́нию да́вшагося, / я́ко от черто́га от зве́ря изы́де. / Приглаша́ше же кустоди́и, / храня́щии су́етная и ло́жная, / ми́лость сию́ оставили есте́.

{Α} Бие́н был еси́, но не раздели́лся еси́ Сло́ве, / ея́же причасти́лся еси́ пло́ти: / а́ще бо и разори́ся Твой храм во вре́мя стра́сти, / но и та́ко еди́н бе соста́в Божества́ и пло́ти Твоея́. / Во обои́х бо Еди́н еси́ Сын, Сло́во Бо́жие, Бог и Челове́к.

{Β} Человекоуби́йственно, но не богоуби́йственно бысть прегреше́ние Ада́мово: / а́ще бо и пострада́ Твоея́ пло́ти пе́рстное существо́, / но Божество́ безстра́стно пребы́сть, / тле́нное же Твое́ на нетле́ние преложи́л еси́, / и нетле́нныя жи́зни показа́л еси́ исто́чник Воскресе́нием.

{Β} Ца́рствует ад, но не ве́чнует над ро́дом челове́ческим: / Ты бо поло́жся во гро́бе Держа́вне, живонача́льною дла́нию, / сме́рти ключи́ разве́ргл еси́, / и пропове́дал еси́ от ве́ка та́мо спя́щим, избавле́ние нело́жное / быв Спа́се, ме́ртвым пе́рвенец.

Кондак, глас 6:

Бе́здну заключи́вый, мертв зри́тся, / и сми́рною и плащани́цею обви́вся, / во гро́бе полага́ется я́ко сме́ртный Безсме́ртный: / жены́ же приидо́ша пома́зати Его́ ми́ром, / пла́чущия го́рько и вопию́щия: / сия́ суббо́та есть преблагослове́нная, / в не́йже Христо́с усну́в, воскре́снет тридне́вен.

Икос: Содержа́й вся на Крест вознесе́ся, / и рыда́ет вся тварь, Того́ ви́дящи на́га ви́сяща на дре́ве, / со́лнце лучи́ сокры́, и зве́зды отложи́ша свет: / земля́ же со мно́гим стра́хом поколеба́ся, и мо́ре побеже́, / и ка́мение распаде́ся, гро́би же мно́ги отверзо́шася, / и телеса́ воста́ша святы́х муже́й. / Ад ни́зу сте́нет, / и иуде́е сове́туют оклевета́ти Христо́во Воскресе́ние. / Жены́ же взыва́ют: / сия́ суббо́та есть преблагослове́нная, / в не́йже Христо́с, усну́в, воскре́снет тридне́вен.

Синаксарий.

Песнь 7.

{Α} Ирмос: Неизрече́нное чу́до, / в пещи́ изба́вивый / преподо́бныя о́троки из пла́мене, / во гро́бе мертв / бездыха́нен полага́ется, / во спасе́ние нас пою́щих: / Изба́вителю Бо́же, / благослове́н еси́.

{Τ} Уязви́ся ад, в се́рдце / прие́м Уя́звеннаго копие́м в ре́бра, / и воздыха́ет огне́м Боже́ственным иждива́емь, / во спасе́ние нас пою́щих: / Изба́вителю Бо́же, благослове́н еси́.

{Ο} Бога́т гроб, / в себе́ бо прии́м я́ко спя́ща Соде́теля, / жи́зни Боже́ственное сокро́вище показа́ся, / во спасе́ние нас пою́щих: / Изба́вителю Бо́же, благослове́н еси́.

{Ν} Зако́ном уме́рших / е́же во гро́бе положе́ние, всех прие́млет Жизнь, / и сего́ исто́чника показу́ет воста́ния, / во спасе́ние нас пою́щих: / Изба́вителю Бо́же, благослове́н еси́.

{Μ} Еди́но бя́ше неразлу́чное, / е́же во а́де, и во гро́бе, и во Еде́ме, / Божество́ Христо́во, со Отце́м и Ду́хом, / во спасе́ние нас пою́щих: / Изба́вителю Бо́же, благослове́н еси́.

Песнь 8.

{Ε} Ирмос: Ужасни́ся боя́йся не́бо, / и да подви́жатся основа́ния земли́: / се бо в мертвеце́х вменя́ется в вы́шних Живы́й, / и во гроб мал странноприе́млется. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

{Λ} Разруши́ся Пречи́стый храм, / па́дшую же совозставля́ет ски́нию: / Ада́му бо пе́рвому Вторы́й, И́же в вы́шних Живы́й, / сни́де да́же до а́довых сокро́вищ. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

{Π} Преста́ де́рзость ученико́в, / Аримафе́й же изря́дствует Ио́сиф: / ме́ртва бо и на́га зря, над все́ми Бо́га, / про́сит и погреба́ет, зовы́й: / о́троцы благослови́те, / свяще́нницы воспо́йте, / лю́дие, превозноси́те во вся ве́ки.

{Ω} О чуде́с но́вых! / О бла́гости! / О неизрече́ннаго терпе́ния! / Во́лею бо под земле́ю печатле́ется, И́же в вы́шних Живы́й, / и я́ко льстец, Бог оклевета́ется. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

Песнь 9.

{Μ} Ирмос: Не рыда́й Мене́ Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся, / и вознесу́ со сла́вою, непреста́нно я́ко Бог, / ве́рою и любо́вию Тя велича́ющия.

{Ε} В стра́ннем Твое́м рождестве́, / боле́зней избежа́вше па́че естества́, / ублажи́хся Безнача́льне Сы́не: / ны́не же Тя Бо́же мой, / бездыха́нна зря́щи ме́ртва, / ору́жием печа́ли растерза́юся лю́те, / но воскресни́, я́ко да возвели́чуся.

{Γ} Земля́ покрыва́ет Мя хотя́ща, / но устраша́ются а́довы вра́тницы, / оде́яна ви́дяще оде́ждею окровавле́ною, Ма́ти, отмще́ния: / враги́ бо Кресто́м порази́в я́ко Бог, / воскре́сну па́ки, и возвели́чу Тя.

{Α} Да ра́дуется тварь, / да веселя́тся вси земноро́днии, / враг бо плени́ся ад: / с ми́ры жены́ да срета́ют, / Ада́ма со Е́вою избавля́ю всеро́дна, / и в тре́тий день воскре́сну.

Ексапостиларий, глас 2: Свят Госпо́дь Бог наш. (3)

На хвалитех поставим стихи 4 и поем стихиры самогласны, глас 2:

Днесь содержи́т гроб Содержа́щаго дла́нию тварь, / покрыва́ет ка́мень Покры́вшаго доброде́телию небеса́: / спит Живо́т, и ад трепе́щет, / и Ада́м от уз разреша́ется. / Сла́ва Твоему́ смотре́нию, / и́мже соверши́в все упокое́ние ве́чное, / дарова́л еси́ нам Бо́же, / всесвято́е из ме́ртвых Твое́ Воскресе́ние.

Что зри́мое виде́ние? / Ко́е настоя́щее упокое́ние? / Царь веко́в, И́же стра́стию соверши́в смотре́ние, / во гро́бе суббо́тствует, но́вое нам подая́ суббо́тство. / Тому́ возопии́м: / воскресни́ Бо́же, судя́й земли́, / я́ко Ты ца́рствуеши во ве́ки, / неизме́рную име́яй ве́лию ми́лость.

Прииди́те ви́дим Живо́т наш во гро́бе лежа́щь, / да во гробе́х лежа́щия оживи́т. / Прииди́те днесь И́же из Иу́ды спя́ща зря́ще, / проро́чески Ему́ возопии́м: / возле́г усну́л еси́ я́ко лев, / кто воздви́гнет Тя Царю́? / Но воста́ни самовла́стно, / да́вый Себе́ о нас во́лею, / Го́споди сла́ва Тебе́.

Глас 6: Проси́ Ио́сиф те́ло Иису́сово, / и положи́ е́ в но́вем свое́м гро́бе: / подоба́ше бо Ему́ из гро́ба, / я́ко из черто́га проити́. / Сокруши́вый держа́ву сме́рти, / и отве́рзый врата́ ра́йская челове́ком, / Го́споди, сла́ва Тебе́.

Слава, глас 6: Дне́шний день та́йно вели́кий Моисе́й / прообразова́ше, глаго́ля: / и благослови́ Бог день седьмы́й, / сия́ бо есть благослове́нная суббо́та. / Сей есть упокое́ния день, / во́ньже почи́ от всех дел Свои́х Единоро́дный Сын Бо́жий, / смотре́нием е́же на смерть, пло́тию суббо́тствовав: / и во е́же бе, па́ки возвра́щься Воскресе́нием, / дарова́ нам живо́т ве́чный, / я́ко Еди́н Благ и Человеколю́бец.

И ныне, Богородичен, глас 2: Преблагослове́нна еси́ Богоро́дице Де́во:

Славословие великое. Священник же облачается во всю священническую одежду, и входит со святым Евангелием. По Трисвятом же глаголет священник: Во́нмем. Мир всем. Прему́дрость. И мы тропарь единожды: Благообра́зный Ио́сиф:

И глаголем тропарь пророчества, глас 2:

Содержа́й концы́, / гро́бом содержа́тися изво́лил еси́, Христе́, / да от а́дова поглоще́ния изба́виши челове́чество / и воскре́с оживи́ши нас, / я́ко Бог Безсме́ртный.

Слава, конец. И ныне, весь.

Таже прокимен, глас 4: Воскресни́ Го́споди, помози́ нам, / и изба́ви нас и́мене ра́ди Твоего́. Стих: Бо́же, уши́ма на́шима услы́шахом и отцы́ на́ши возвести́ша нам.

Пророчества Иезекиилева чтение. [Глава 37, ст. 1 – 14.]

Бысть на мне рука́ Госпо́дня, и изведе́ мя в ду́се Госпо́дни, и поста́ви мя среде́ по́ля, се же бя́ше по́лно косте́й челове́ческих. И обведе́ мя о́крест их о́коло, и се мно́ги зело́ на лицы́ по́ля, и се су́хи зело́. И рече́ ко мне: сы́не челове́чь, оживу́т ли ко́сти сия́? И реко́х: Го́споди Бо́же, Ты ве́си сия́. И рече́ ко мне: сы́не челове́чь, прорцы́ на ко́сти сия́, и рече́ши им: ко́сти сухи́я, слы́шите сло́во Госпо́дне. Се глаго́лет Адонаи́ Госпо́дь косте́м сим: ее Аз введу́ в вас дух живо́тен. И дам на вас жи́лы, и возведу́ на вас плоть, и простру́ по вам ко́жу, и дам дух Мой в вас, и оживете́, и уве́сте, я́ко Аз есмь Госпо́дь. И прореко́х, я́коже запове́да ми Госпо́дь. И бысть глас внегда́ ми проро́чествовати, и се трус, и совокупля́хуся ко́сти, кость к ко́сти, ка́яждо к соста́ву своему́. И ви́дех, и се бы́ша им жи́лы, и плоть растя́ше, и восхожда́ше, [и протяже́ся] им ко́жа верху́, ду́ха же не бя́ше в них. И рече́ ко мне: прорцы́ о ду́се, прорцы́ сы́не челове́чь, и рцы ду́хови: сия́ глаго́лет Адонаи́ Госпо́дь, от четы́рех ве́тров прииди́ ду́ше, и вду́ни на ме́ртвыя сия́, и да оживу́т. И прореко́х, я́коже повеле́ ми: и вни́де в ня дух жи́зни, и ожи́ша, и ста́ша на нога́х свои́х, собо́р мног зело́. И рече́ Госпо́дь ко мне, глаго́ля: сы́не челове́чь, сия́ ко́сти весь дом Изра́илев есть, ти́и бо глаго́лют: су́хи бы́ша ко́сти на́ша, поги́бе наде́жда на́ша, убие́ни бы́хом. Того́ ра́ди прорцы́ [сы́не челове́чь], и рцы к ним, сия́ глаго́лет Адонаи́ Госпо́дь: се Аз отве́рзу гро́бы ва́ша, и изведу́ вас от гроб ва́ших, лю́дие Мои́, и введу́ вы в зе́млю Изра́илеву. И уве́сте, я́ко Аз есмь Госпо́дь, внегда́ отве́рсти Ми гро́бы ва́ша, е́же возвести́ Ми вас от гробо́в ва́ших, лю́дие Мои́: и дам дух Мой в вас, и жи́ви бу́дете. И поста́влю вы на земли́ ва́шей, и уве́сте, я́ко Аз Госпо́дь: глаго́лах, и сотворю́, глаго́лет Адонаи́ Госпо́дь.

Прокимен, глас 7: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́. Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Апостол к Коринфянам, зачало 133:

Бра́тие, мал квас все смеше́ние ква́сит. Очи́стите у́бо ве́тхий квас, да бу́дете но́во смеше́ние, я́коже есте́ безква́сни: и́бо Па́сха на́ша за ны пожре́н бысть, Христо́с. Те́мже да пра́зднуем, не в ква́се ве́тсе, ни в ква́се зло́бы и лука́вства, но в безква́сиих чистоты́ и и́стины. Христо́с ны искупи́л есть от кля́твы зако́нныя, быв по нас кля́тва. Пи́сано бо есть: про́клят всяк ви́сяй на дре́ве. Да в язы́цех благослове́ние Авраа́мле бу́дет о Христе́ Иису́се, да обетова́ние Ду́ха прии́мем ве́рою.

Аллилуиа, глас 5: Да воскре́снет Бог, и расточа́тся врази́ Его́, и да бежа́т от Лица́ Его́ ненави́дящии Его́. Стих: Я́ко исчеза́ет дым, да исче́знут, я́ко та́ет воск от лица́ огня́. Стих: Та́ко да поги́бнут гре́шницы от Лица́ Бо́жия, а пра́ведницы да возвеселя́тся.

Евангелие от Матфеа, зачало 114:

Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: го́споди, помяну́хом, я́ко льстец он рече́, еще́ сый жив: по трие́х днех воста́ну. Повели́ у́бо утверди́ти гроб до тре́тияго дне, да не ка́ко прише́дше ученицы́ Его́ но́щию, укра́дут Его́, и реку́т лю́дем: воста́ от ме́ртвых, и бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те, утверди́те, я́коже ве́сте. Они́ же ше́дше утверди́ша гроб, зна́менавше ка́мень с кустоди́ею.

Таже ектения: Рцем вси: и прочая, яко обычно. Испо́лним утреннюю моли́тву нашу: Такожде и прочая, яко обычно. И бывает отпуст.

И бывает целование плащаницы, а идеже несть плащаницы, целуют образ; певцы же поют стихиру, глас 5:

Прииди́те, ублажи́м Ио́сифа приснопа́мятнаго, / в нощи́ к Пила́ту прише́дшаго, / и Живота́ всех испроси́вшаго. / Даждь ми Сего́ стра́ннаго, / И́же не име́ет где главы́ подклони́ти; / даждь ми Сего́ стра́ннаго, Его́же учени́к лука́вый на смерть предаде́; / даждь ми Сего́ стра́ннаго, / Его́же Ма́ти зря́щи на Кресте́ ви́сяща, / рыда́ющи вопия́ше, / и ма́терски восклица́ше: / увы́ Мне, Ча́до Мое́! / Увы́ Мне, Све́те Мой, / и утро́ба Моя́ возлю́бленная! / Симео́ном бо предрече́нное в це́ркви днесь собы́сться: / Мое́ се́рдце ору́жие про́йде, / но в ра́дость Воскресе́ния Твоего́ / плач преложи́. / Покланя́емся Страсте́м Твои́м, Христе́; / покланя́емся Страсте́м Твои́м, Христе́; / покланя́емся Страсте́м Твои́м, Христе́, / и Свято́му Воскресе́нию.

Первый же час поется в притворе: третий же час, шестый и девятый поются вкупе просто в притворе с блаженными во свое время.

ВО СВЯТУЮ И ВЕЛИКУЮ СУББОТУ ВЕЧЕРА

О часе десятом дне клеплет Вечерню. И облачается священник во одежду, и, благословившу ему, начинаем предначинательный псалом, посем ектения великая. Таже Го́споди, воззва́х, во глас 1. Обители же священницы и диакони вси, достигшу стиху, глаголющу: Паду́т во мре́жу свою́: полагающе поклон, отходят, и облачатся и сии во одежди, и творят проскомидию. И поставим стихов 8. Поем же стихиры воскресныя Осмогласника три, и от стиховны едину.

Воскресны, глас 1:

Вече́рняя на́ша моли́твы / приими́, Святы́й Го́споди, / и пода́ждь нам оставле́ние грехо́в, / я́ко Еди́н еси́, / явле́й в ми́ре Воскресе́ние.

Обыди́те лю́дие Сио́н, / и обыми́те его́, / и дади́те сла́ву в нем Воскре́сшему из ме́ртвых: / я́ко Той есть Бог наш, / избавле́й нас от беззако́ний на́ших.

Прииди́те лю́дие / воспои́м, и поклони́мся Христу́, / сла́вяще Его́ из ме́ртвых Воскресе́ние: / я́ко Той есть Бог наш, / от ле́сти вра́жия мир избавле́й.

Стра́стию Твое́ю Христе́, / от страсте́й свободи́хомся, / и Воскресе́нием Твои́м из истле́ния изба́вихомся: / Го́споди, сла́ва Тебе́.

Ины стихиры самогласны, Великия Субботы три, повторяюще едину, глас 8:

Днесь ад стеня́ вопие́т: / у́не мне бя́ше, а́ще бых от Мари́и Ро́ждшагося не прия́л: / прише́д бо на мя, держа́ву мою́ разруши́, / врата́ ме́дная сокруши́: / ду́ши, я́же содержа́х пре́жде, Бог сый воскреси́. / Сла́ва Го́споди, Кресту́ Твоему́, и Воскресе́нию Твоему́.

Днесь ад стеня́ вопие́т: / разруши́ся моя́ власть, / прия́х Ме́ртваго я́ко еди́наго от уме́рших, / Сего́ бо держа́ти отню́д не могу́, / но погубля́ю с Ним, и́миже ца́рствовах: / аз име́х мертвецы́ от ве́ка, / но Сей [се] всех воздвиза́ет. / Сла́ва Го́споди Кресту́ Твоему́, и Воскресе́нию Твоему́.

Днесь ад стеня́ вопие́т: / поже́рта моя́ бысть держа́ва, / Па́стырь распя́тся, и Ада́ма воскреси́: / и́миже ца́рствовах, лиши́хся, / и я́же пожро́х возмоги́й, всех изблева́х. / Истощи́ гро́бы Распны́йся, / изнемога́ет сме́ртная держа́ва. / Сла́ва Го́споди Кресту́ Твоему́, и Воскресе́нию Твоему́.

Слава, глас 6: Дне́шний день та́йно вели́кий Моисе́й прообразова́ше, глаго́ля: / и благослови́ Бог день седьмы́й. / Сия́ бо есть благослове́нная Суббо́та, / сей есть упокое́ния день, / во́ньже почи́ от всех дел Свои́х, Единоро́дный Сын Бо́жий, / смотре́нием е́же на смерть, пло́тию суббо́тствовав: / и во е́же бе, па́ки возвра́щься воскресе́нием, / дарова́ нам живо́т ве́чный, / я́ко Еди́н Благ, и Человеколю́бец.

И ныне, Богородичен, глас 1: Всеми́рную сла́ву / от челове́к прозя́бшую, / и Влады́ку ро́ждшую, / небе́сную дверь / воспои́м Мари́ю Де́ву, / безпло́тных песнь, и ве́рных удобре́ние; / Сия́ бо яви́ся не́бо, и храм Божества́; / Сия́ прегражде́ние вражды́ разруши́вши, / мир введе́, и Ца́рствие отве́рзе. / Сию́ у́бо иму́ще ве́ры утвержде́ние, / побо́рника и́мамы из Нея́ ро́ждшагося Го́спода. / Дерза́йте у́бо, дерза́йте лю́дие Бо́жии: / и́бо Той победи́т враги́ я́ко Всеси́лен.

Вход с Евангелием. Све́те ти́хий: Прокимен не глаголем, но абие: Прему́дрость. И начинает чтец чтения.

Бытия чтение. [Гл. 1, ст. 1 – 13]

В нача́ле сотвори́ Бог не́бо и зе́млю. Земля́ же бе неви́дима, и неустро́ена, и тьма верху́ бе́здны, и Дух Бо́жий ноша́шеся верху́ воды́. И рече́ Бог: да бу́дет свет. И бысть свет. И ви́де Бог свет, я́ко добро́, и разлучи́ Бог между́ све́том, и между́ тьмо́ю. И нарече́ Бог свет день, а тьму нарече́ нощь. И бысть ве́чер, и бысть у́тро, день еди́н. И рече́ Бог: да бу́дет твердь посреде́ воды́, и да бу́дет разлуча́ющи посреде́ воды́ и воды́. И бысть та́ко. И сотвори́ Бог твердь, и разлучи́ Бог между́ водо́ю, я́же бе под тве́рдию, и между́ водо́ю, я́же бе над тве́рдию. И нарече́ Бог твердь не́бо. И ви́де Бог, я́ко добро́. И бысть ве́чер, и бысть у́тро, день вторы́й. И рече́ Бог: да собере́тся вода́, я́же под небесе́м, в собра́ние еди́но, и да яви́тся су́ша. И бысть та́ко. И собра́ся вода́, я́же под небесе́м, в собра́ния своя́, и яви́ся су́ша. И нарече́ Бог су́шу, зе́млю, и собра́ния вод нарече́ моря́. И ви́де Бог, я́ко добро́. И рече́ Бог: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем по ро́ду на земли́. И бысть та́ко. И изнесе́ земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем по ро́ду на земли́. И ви́де Бог, я́ко добро́. И бысть ве́чер, и бысть у́тро, день тре́тий.

Пророчества Исаиина чтение. [Гл. 60, ст. 1 – 16]

Свети́ся свети́ся Иерусали́ме, прии́де бо твой свет, и сла́ва Госпо́дня на тебе́ возсия́. Се тьма покры́ет зе́млю, и мрак на язы́ки, на тебе́ же яви́тся Госпо́дь, и сла́ва Его́ на тебе́ у́зрится. И по́йдут ца́рие све́том твои́м, и язы́цы све́тлостию твое́ю. Возведи́ о́крест о́чи твои́, и виждь собра́ная ча́да твоя́: се приидо́ша вси сы́нове твои́ издале́ча, и дще́ри твои́ на ра́мех во́змутся. Тогда́ у́зриши, и возра́дуешися, и убои́шися, и ужа́снешися се́рдцем, я́ко преложи́тся к тебе́ бога́тство морско́е, и язы́ков и люде́й. И прии́дут к тебе́ стада́ вельблю́д, и покры́ют тя вельблю́ди Мадиа́мстии и Гефа́рстии: вси от Савы́ прии́дут, нося́ще зла́то, и лива́н принесу́т, и ка́мень че́стен, и спасе́ние Госпо́дне благовозвестя́т. И вся о́вцы Кида́рския соберу́тся тебе́, и овни́ Навео́фстии прии́дут к тебе́, и вознесу́тся прия́тная на же́ртвенник Мой, и дом моли́твы Моея́ просла́вится. Ки́и суть, и́же я́ко о́блацы, летя́т, и я́ко го́луби со птенцы́ ко Мне? Мене́ о́строви жда́ша, и корабли́ Фарси́йстии в пе́рвых, привести́ ча́да твоя́ издале́ча, и сребро́ и зла́то их с ни́ми, и́мене ра́ди Госпо́дня Свята́го, и за е́же Свято́му Изра́илеву сла́вну бы́ти. И созиждут сы́нове иноро́днии сте́ны твоя́, и ца́рие их предстоя́ти бу́дут тебе́: за гнев бо Мой порази́х тя, и за ми́лость Мою́ возлюби́х тя. И отве́рзутся врата́ твоя́ при́сно, день и нощь не затворя́тся, ввести́ к тебе́ си́лу язы́к, и цари́ их ведо́мыя. Язы́цы бо и ца́рие, и́же не порабо́тают ти, поги́бнут, и язы́цы запусте́нием запусте́ют. И сла́ва Лива́нова к тебе́ прии́дет, кипари́сом, и пе́вгом, и ке́дром, вку́пе просла́вити ме́сто свято́е Мое́, и ме́сто ног Мои́х просла́влю. И по́йдут к тебе́ боя́щеся сы́нове смири́вших тя, и раздражи́вших тя, и покло́нятся следа́м ног твои́х вси прогне́вавшии тя: и нарече́шися град Госпо́день, Сио́н Свята́го Изра́илева. За сие́, я́ко был еси́ оста́влен и возненави́ден, и не бе помога́ющаго ти, положу́ тя в ра́дость ве́чную, весе́лие родо́м родо́в. И иссе́ши млеко́ язы́ков, и бога́тство царе́й сне́си, и уразуме́еши, я́ко Аз Госпо́дь спаса́яй тя, и избавля́яй тя Бог Изра́илев.

Исхода чтение. [Гл. 12, ст. 1 – 11]

Рече́ Госпо́дь к Моисе́ю и Ааро́ну в земли́ Еги́петстей, глаго́ля: ме́сяц сей вам нача́ло ме́сяцей, пе́рвый бу́дет вам в ме́сяцех ле́та. Рцы ко всему́ со́нму сыно́в Изра́илевых, глаго́ля: в деся́тый ме́сяца сего́ да во́змет ки́йждо овча́ по домо́м оте́честв, ки́йждо овча́ по до́му. А́ще же ма́ло их есть в дому́, я́ко не дово́льным бы́ти на овча́, да во́змет с собо́ю сосе́да бли́жняго своего́ по числу́ душ, ки́йждо дово́льное себе́ сочте́т на овча́. Овча́ соверше́нно, му́жеск пол, непоро́чно и единоле́тно бу́дет вам, от а́гнец и от ко́злищ прии́мете. И бу́дет вам соблюде́но да́же до четвертагона́десять дне ме́сяца сего́: и зако́лют то все мно́жество собо́ра сыно́в Изра́илевых к ве́черу. И прии́мут от кро́ве, и пома́жут на обою́ подво́ю, и на пра́гах в доме́х, в ни́хже снедя́т то́е. И снедя́т мяса́ в нощи́ той пече́на огне́м и опресно́ки с го́рьким зе́лием снедя́т. Не сне́сте от них су́рово, ниже́ варе́но в воде́, но пече́ное огне́м главу́ с нога́ми и со утро́бою. Не оста́вите от него́ до у́трия, и ко́сти не сокруши́те от него́: оста́нки же от него́ до у́тра, огне́м сожже́те. Си́це же сне́сти е́: чресла́ ва́ша препоя́сана, и сапо́зи ва́ши на нога́х ва́ших, и жезлы́ ва́ши в рука́х ва́ших: и сне́сте е́ со тща́нием: па́сха есть Госпо́дня.

Пророчества Ионина чтение. [Гл. 1, ст. 1 – 16. Гл. 2, ст. 1 – 3]

Бысть сло́во Госпо́дне ко Ио́не сы́ну Амафи́ину, глаго́ля: воста́ни и иди́ в Ниневи́ю град вели́кий: и пропове́ждь в нем, я́ко взы́де вопль зло́бы его́ ко Мне. И воста́ Ио́на, е́же бежа́ти в Фарси́с от Лица́ Госпо́дня: и сни́де во Иоппи́ю, и обре́те кора́бль иду́щь в Фарси́с: и даде́ нае́м свой, и вни́де в онь плы́ти с ни́ми в Фарси́с от Лица́ Госпо́дня. И Госпо́дь воздви́же ветр ве́лий на мо́ри, и бысть бу́ря вели́кая в мо́ри, и кора́бль бе́дствоваше е́же сокруши́тися. И убоя́шася корабе́льницы, и возопи́ша ки́йждо к бо́гу своему́, и измета́ние сотвори́ша сосу́дов, и́же в корабли́, в мо́ре, е́же облегчи́тися от них: Ио́на же сни́де во дно корабля́, и спа́ше ту, и храпля́ше. И прии́де к нему́ ко́рмчий, и рече́ ему́: что ты хра́плеши? Воста́ни, и моли́ Бо́га твоего́, я́ко да спасе́т ны Бог, да не поги́бнем. И рече́ ки́йждо ко и́скреннему своему́: прииди́те ве́ржем жре́бия, и уразуме́ем, кого́ ра́ди есть зло сие́ на нас. И метну́ша жре́бия, и паде́ жре́бий на Ио́ну. И ре́ша к нему́: возвести́ нам, кого́ ра́ди сие́ зло на нас, и что твое́ де́лание есть, и отку́ду гряде́ши, и ка́мо и́деши, и от ко́ея страны́, и от ки́их люде́й еси́ ты? И рече́ к ним: раб Госпо́день есмь аз, и Го́спода Бо́га Небе́снаго аз чту, И́же сотвори́ мо́ре и су́шу. И убоя́шася му́жие стра́хом вели́ким, и ре́ша к нему́: что сие́ сотвори́л еси́? Зане́ разуме́ша му́жие, я́ко от Лица́ Госпо́дня бежа́ше, я́ко возвести́ им. И ре́ша к нему́: что тебе́ сотвори́м, и утоли́тся мо́ре от нас? Зане́ мо́ре восхожда́ше и воздвиза́ше па́че волне́ние. И рече́ к ним Ио́на: возми́те мя, и вве́рзите в мо́ре, и утоли́тся мо́ре от вас: поне́же позна́х аз, я́ко мене́ ра́ди волне́ние сие́ вели́кое на вы есть. И нужда́хуся му́жие возврати́тися к земли́, и не можа́ху, я́ко мо́ре восхожда́ше, и воздвиза́шеся па́че на них. И возопи́ша к Го́сподеви, и ре́ша: ника́коже Го́споди, да не поги́бнем души́ ра́ди челове́ка сего́, и не даждь на нас кро́ве пра́ведныя: зане́ Ты Го́споди, я́коже восхоте́л, сотвори́л еси́. И взя́ша Ио́ну, и вверго́ша его́ в мо́ре, и преста́ мо́ре от волне́ния своего́. И убоя́шася му́жие стра́хом вели́ким Го́спода, и пожро́ша же́ртву Го́сподеви, и помоли́шася моли́твами. И повеле́ Госпо́дь ки́ту вели́кому пожре́ти Ио́ну: и бе Ио́на во чре́ве ки́тове три дни и три но́щи. И помоли́ся Ио́на ко Го́споду Бо́гу своему́ от чре́ва ки́това, и рече́:

Молитва: [Гл. 2, ст. 4 – 11. Гл. 3, ст. 1 – 10. Гл. 4, ст. 1 – 14]

Возопи́х в ско́рби мое́й ко Го́споду Бо́гу моему́, и услы́ша мя: из чре́ва а́дова вопль мой, услы́шал еси́ глас мой. Отве́ргл мя еси́ в глубины́ се́рдца морска́го, и ре́ки обыдо́ша мя: вся высоты́ Твоя́, и во́лны Твоя́ на мне преидо́ша. И аз рех: отри́нулся от о́чию Твое́ю: еда́ приложу́ призре́ти ми к хра́му свято́му Твоему́? Возлия́ся на мя вода́ до души́ моея́, бе́здна обы́де мя после́дняя, понре́ глава́ моя́ в разсе́лины гор. Снидо́х в зе́млю, ея́же вереи́ ея́ закле́пи ве́чнии: и да взы́дет из истле́ния живо́т мой к Тебе́, Го́споди Бо́же мой. Внегда́ скончава́тися от мене́ души́ мое́й, Го́спода помяну́х, и да прии́дет к Тебе́ моли́тва моя́ к хра́му свято́му Твоему́. Храня́щии су́етная и ло́жная, ми́лость свою́ оста́виша. Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́ Го́сподеви.

И повеле́ Госпо́дь ки́тови, и изве́рже Ио́ну на су́шу. И бысть сло́во Госпо́дне ко Ио́не втори́цею, глаго́ля: воста́ни, и иди́ в Ниневи́ю град вели́кий, и пропове́ждь в нем по про́поведи пре́ждней, ю́же Аз глаго́лах тебе́. И воста́ Ио́на, и и́де в Ниневи́ю, я́коже глаго́ла Госпо́дь: Ниневи́а же бя́ше град вели́к Бо́гу, я́ко ше́ствия пути́ трех дней. И нача́т Ио́на входи́ти во град, я́ко ше́ствие пути́ дне еди́наго, и пропове́да и рече́: еще́ три дни, и Ниневи́а преврати́тся. И ве́роваша му́жие Ниневи́йстии Бо́гови, и запове́даша пост, и облеко́шася во вре́тища от вели́ка их да́же до ма́ла их. И до́йде сло́во к царю́ Ниневи́йскому, и воста́ с престо́ла своего́, и све́рже ри́зы своя́ с себе́, и облече́ся во вре́тище, и се́де на пе́пеле. И пропове́дася, и рече́но бысть в Ниневи́и от царя́ и вельмо́ж его́, глаго́лющих: челове́цы и ско́ти, и воло́ве, и о́вцы да не вку́сят ничесо́же, ни да пасу́тся, ниже́ воды́ да пию́т. И облеко́шася во вре́тища челове́цы, и ско́ти, и возопи́ша приле́жно к Бо́гу: и возврати́ся ки́йждо от пути́ своего́ лука́ваго, и от непра́вды су́щия в рука́х их, глаго́люще: кто весть, а́ще раска́ется и умоле́н бу́дет Бог, и обрати́тся от гне́ва я́рости Своея́, и не поги́бнем? И ви́де Бог дела́ их, я́ко обрати́шася от путе́й свои́х лука́вых: и раска́яся Бог о зле, е́же глаго́лаше сотвори́ти им, и не сотвори́. И опеча́лися Ио́на печа́лию вели́кою, и смути́ся. И помоли́ся ко Го́споду, и рече́: о Го́споди, не сия́ ли у́бо словеса́ моя́, я́же глаго́лах, еще́ су́щу ми на земли́ мое́й? Сего́ ра́ди предвари́х бежа́ти в Фарси́с, зане́ разуме́х, я́ко ми́лостив Ты еси́ и щедр, долготерпели́в и многоми́лостив, и ка́яйся о зло́бах [челове́ческих]. И ны́не Влады́ко Го́споди, приими́ ду́шу мою́ от мене́, я́ко у́не ми умре́ти, не́жели жи́ти. И рече́ Госпо́дь ко Ио́не: а́ще зело́ опеча́лился еси́ ты? И изы́де Ио́на из гра́да, и се́де пря́мо гра́да, и сотвори́ себе́ ку́щу, и седя́ше под не́ю в се́ни, до́ндеже уви́дит, что бу́дет гра́ду. И повеле́ Госпо́дь Бог ты́кве, и возрасте́ над главо́ю Ио́ниною, да бу́дет сень над главо́ю его́, е́же осени́ти его́ от злых его́: и возра́довася Ио́на о ты́кве ра́достию вели́кою. И повеле́ Госпо́дь Бог че́рвию ра́ннему во у́трие, и подъяде́ ты́кву, и и́зсше. И бысть вку́пе внегда́ возсия́ти со́лнцу, и повеле́ Бог ве́тру зно́йну жегу́щу, и порази́ со́лнце на главу́ Ио́нину: и малоду́шствоваше, и отрица́шеся души́ своея́, и рече́: у́не ми умре́ти, не́жели жи́ти. И рече́ Госпо́дь Бог ко Ио́не: зело́ ли опеча́лился еси́ ты о ты́кве? И рече́ [Ио́на]: зело́ опеча́лихся аз да́же до сме́рти. И рече́ Госпо́дь: ты оскорби́лся еси́ о ты́кве, о не́йже не труди́лся еси́, ни воскорми́л еси́ ея́, я́же роди́ся обно́щь, и обно́щь поги́бе. Аз же не пощажду́ ли Ниневи́и гра́да вели́каго, в не́мже живу́т мно́жайшии, не́же двана́десять тем челове́к, и́же не позна́ша десни́цы своея́, ниже́ шу́йцы своея́, и ско́ти их мно́зи?

Иисуса Навина чтение. [Гл. 5, ст. 1 – 15]

Ополчи́шася сы́нове Изра́илевы в Галга́лех, и сотвори́ша па́сху в четвертыйна́десять день ме́сяца от ве́чера на за́паде на по́ли Иерихо́нском. И ядо́ша от пшени́цы земли́ о́ныя опресно́ки и но́вая. В той день преста́ ма́нна, повнегда́ ядо́ша от пшени́цы земли́, и ктому́ не бысть сыно́м Изра́илевым ма́нны, но ядо́ша от плодо́в земли́ Фини́ческия в ле́то о́ное. И бысть егда́ бя́ше Иису́с у Иерихо́на, и воззре́в очи́ма свои́ма, ви́де челове́ка стоя́ща пред ним, и меч его́ обнаже́н в руце́ его́. И приступи́в Иису́с рече́ ему́: наш ли еси́, или́ от супоста́т на́ших? Он же рече́ ему́: аз Архистрати́г си́лы Госпо́дни, ны́не приидо́х [се́мо]. И Иису́с паде́ лице́м свои́м на зе́млю, и поклони́ся ему́, и рече́: го́споди, что повелева́еши рабу́ твоему́? И рече́ Архистрати́г Госпо́день ко Иису́су: иззу́й сапо́г с ногу́ твое́ю, ме́сто бо на не́мже ты стои́ши свя́то есть. И сотвори́ Иису́с та́ко.

Исхода чтение. [Гл. 13, ст. 20 – 22. Гл. 14, ст. 1 – 32. Гл. 15, ст. 1 – 19]

Воздви́гшеся сы́нове Изра́илевы от Сокхо́фа, ополчи́шася во Офо́ме при пусты́ни. Бог же вожда́ше их, в день у́бо столпо́м о́блачным, показа́ти им путь, но́щию же столпо́м о́гненным, свети́ти им. И неоскуде́ столп о́блачный во дни, и столп о́гненный но́щию, пред все́ми людьми́. И рече́ Госпо́дь к Моисе́ю, глаго́ля: рцы сыно́м Изра́илевым, и обрати́вшеся да ополча́тся пря́мо придво́рию, между́ Магдо́лом и между́ мо́рем, пря́мо Веельсенфо́ну: пред ни́ми ополчи́шися при мо́ри. И рече́т фарао́н лю́дем свои́м о сыне́х Изра́илевых: заблужда́ют си́и по земли́, затвори́ бо их пусты́ня. Аз же ожесточу́ се́рдце фарао́ново, и пожене́т созади́ их: и просла́влюся в фарао́не и во всем во́инстве его́, и уразуме́ют вси еги́птяне, я́ко Аз есмь Госпо́дь. И сотвори́ша та́ко. И возвеще́но бысть царю́ еги́петскому, я́ко бежа́ша лю́дие. И преврати́ся се́рдце фарао́ново, и рабо́в его́ на лю́ди, и реко́ша: что сие́ сотвори́хом, отпусти́вше сы́ны Изра́илевы, да не рабо́тают нам? Впряже́ у́бо фарао́н колесни́цы своя́, и вся лю́ди своя́ собра́ с собо́ю. И поя́т шесть сот колесни́ц избра́нных, и вся ко́ни еги́петския, и триста́ты над все́ми. И ожесточи́ Госпо́дь се́рдце фарао́на царя́ еги́петскаго, и рабо́в его́, и погна́ созади́ сыно́в Изра́илевых: сы́нове же Изра́илевы исхожда́ху руко́ю высо́кою. И погна́ша еги́птяне в след их, и обрето́ша их ополчи́вшихся при мо́ри: и вси ко́ни и колесни́цы фарао́новы, и ко́нницы, и во́инство его́ пря́мо придво́рию, проти́ву Веельсепфо́на. И фарао́н приближа́шеся. Воззре́вше же сы́нове Изра́илевы очи́ма, ви́деша: и се еги́птяне ополчи́шася в след их, и убоя́шася зело́. И возопи́ша сы́нове Изра́илевы ко Го́споду, и реко́ша к Моисе́ю: за е́же не бы́ти гробо́м во Еги́пте, изве́л еси́ нас умертви́ти в пусты́ни; что сие́ сотвори́л еси́ нам, извед нас из Еги́пта? Не сей ли бя́ше глаго́л, его́же реко́хом к тебе́ во Еги́пте, глаго́люще: оста́ви нас, да рабо́таем еги́птяном; лу́чше бо бя́ше нам рабо́тати еги́птяном, не́жели умре́ти в пусты́ни сей. Рече́ же Моисе́й к лю́дем: дерза́йте, сто́йте, и зри́те спасе́ние е́же от Го́спода, е́же сотвори́т нам днесь. И́мже бо о́бразом ви́десте еги́птян днесь, не приложите́ ктому́ ви́дети их в ве́чное вре́мя. Госпо́дь побо́рет по вас, вы же умо́лкните. И рече́ Госпо́дь к Моисе́ю: что вопие́ши ко Мне? Рцы сыно́м Изра́илевым, и да путеше́ствуют. Ты же возми́ жезл твой, и простри́ ру́ку твою́ на мо́ре, и расто́ргни е́: и да вни́дут сы́нове Изра́илевы посреде́ мо́ря по су́ху. И се Аз ожесточу́ се́рдце фарао́ново, и всех еги́птян, и вни́дут в след их, и просла́влюся в фарао́не, и во всем во́инстве его́, и в колесни́цах, и в ко́нех его́. И уве́дят вси еги́птяне, я́ко Аз есмь Госпо́дь, егда́ просла́влюся в фарао́не, и в колесни́цах, и в ко́нех его́. Взя́тся же А́нгел Бо́жий ходя́й пред полко́м сыно́в Изра́илевых, и по́йде созади́ их: взя́тся же и столп о́блачный от лица́ их, и ста созади́ их. И вни́де посреде́ полка́ еги́петска, и посреде́ полка́ сыно́в Изра́илевых, и ста: и бысть тьма и мрак, и прии́де нощь, и не смеси́шася друг с дру́гом во всю нощь. Простре́ же Моисе́й ру́ку на мо́ре: и возгна́ Госпо́дь мо́ре ве́тром ю́жным си́льным всю нощь, и сотвори́ мо́ре су́шу, и разступи́ся вода́. И внидо́ша сы́нове Изра́илевы посреде́ мо́ря по су́ху: и вода́ им стена́ бысть одесну́ю, и стена́ ошу́юю. Погна́ша же еги́птяне, и внидо́ша в след их, и всяк конь фарао́нов, и колесни́цы, и вса́дники посреде́ мо́ря. Бысть же в стра́жу у́треннюю, и воззре́ Госпо́дь на полк еги́петский в столпе́ о́гненнем и о́блачном, и смяте́ полк еги́петский. И связа́ о́си колесни́ц их, и ведя́ше их с ну́ждею. И реко́ша еги́птяне: бежи́м от лица́ Изра́илева, Госпо́дь бо побора́ет по них на еги́птяны. И рече́ Госпо́дь к Моисе́ю: простри́ ру́ку твою́ на мо́ре, и да совокупи́тся вода́, и да покры́ет еги́птяны, колесни́цы же и вса́дники. Простре́ же Моисе́й ру́ку на мо́ре, и устро́ися вода́ ко дню на ме́сто: еги́птяне же бежа́ша под водо́ю: и истрясе́ Госпо́дь еги́птяны посреде́ мо́ря. И обрати́вшися вода́, покры́ колесни́цы и вса́дники, и всю си́лу фарао́нову, вше́дши в след их в мо́ре, и не оста́ от них ни еди́н. Сы́нове же Изра́илевы проидо́ша по су́ху посреде́ мо́ря: вода́ же им стена́ [бысть] одесну́ю и стена́ ошу́юю. И изба́ви Госпо́дь Изра́иля в день он из руки́ еги́петския: и ви́деша сы́нове Изра́илевы еги́птян изме́рших, при краи́ мо́ря. Ви́де же Изра́иль ру́ку вели́кую, я́же сотвори́ Госпо́дь еги́птяном: и убоя́шася лю́дие Го́спода, и ве́роваша Бо́гу, и Моисе́ю уго́днику Его́. Тогда́ воспе́ Моисе́й, и сы́нове Изра́илевы песнь сию́ Го́сподеви, и реко́ша глаго́люще:

Чтец глаголет: Пои́м Го́сподеви:

И поют на глас 5: Сла́вно бо просла́вися.

И чтец коемуждо лику стихи предглаголет: Коня́ и вса́дника вве́рже в мо́ре. Пои́м Го́сподеви:

И людие на оба лика поют: Сла́вно бо просла́вися.

Помо́щник и Покрови́тель бысть мне во спасе́ние. Пои́м Го́сподеви:

Сей мой Бог, и просла́влю Его́, Бог отца́ моего́, и вознесу́ Его́. Пои́м Го́сподеви:

Госпо́дь сокруша́яй бра́ни, Госпо́дь и́мя Ему́, колесни́цы фарао́новы, и си́лу его́ вве́рже в мо́ре. Пои́м Го́сподеви:

Избра́нная вса́дники триста́ты потопи́ в Чермне́м мо́ри. Пои́м Го́сподеви:

Пучи́ною покры́ их, погрязо́ша во глубине́ я́ко ка́мень. Пои́м Го́сподеви:

Десни́ца Твоя́, Го́споди, просла́вися в кре́пости. Пои́м Го́сподеви:

Десна́я Твоя́ рука́ Го́споди, сокруши́ враги́, и мно́жеством сла́вы Твоея́ стерл еси́ сопроти́вных. Пои́м Го́сподеви:

Посла́л еси́ гнев Твой, пояде́ я́ я́ко сте́блие, и ду́хом я́рости Твоея́ разступи́ся вода́. Пои́м Го́сподеви:

Огусте́ша я́ко стена́ во́ды, огусте́ша и во́лны посреде́ мо́ря. Пои́м Го́сподеви:

Рече́ враг: гнав пости́гну, разделю́ коры́сть, испо́лню ду́шу мою́, убию́ мече́м мои́м, госпо́дствовати бу́дет рука́ моя́. Пои́м Го́сподеви:

Посла́л еси́ Ду́ха Твоего́, покры́ я́ мо́ре: погрязо́ша я́ко о́лово в воде́ зе́льней. Пои́м Го́сподеви:

Кто подо́бен Тебе́ в бозе́х, Го́споди? Кто подо́бен Тебе́? Просла́влен во святы́х, ди́вен в сла́ве, творя́й чудеса́. Пои́м Го́сподеви:

Просте́рл еси́ десни́цу Твою́, пожре́ я́ земля́. Наста́вил еси́ пра́вдою Твое́ю лю́ди Твоя́ сия́, я́же изба́вил еси́. Пои́м Го́сподеви:

Уте́шил еси́ кре́постию Твое́ю во оби́тель святу́ю Твою́. Слы́шаша язы́цы, и прогне́вашася, боле́зни прия́ша живу́щии в Филисти́ме. Пои́м Го́сподеви:

Тогда́ потща́шася влады́ки Едо́мстии, и кня́зи Моави́тстии, прия́т я́ тре́пет: раста́яша вси живу́щии в Ханаа́не. Пои́м Го́сподеви:

Да нападе́т на ня страх и тре́пет, вели́чием мы́шцы Твоея́ да ока́менятся. Пои́м Го́сподеви:

До́ндеже про́йдут лю́дие Твои́ Го́споди, до́ндеже про́йдут лю́дие Твои́ си́и, я́же стяжа́л еси́. Пои́м Го́сподеви:

Введ насади́ я́ в го́ру достоя́ния Твоего́, в гото́вое жили́ще Твое́, е́же соде́лал еси́ Го́споди, святы́ню Го́споди, ю́же угото́васте ру́це Твои́. Пои́м Го́сподеви:

Госпо́дь ца́рствуяй ве́ки, и на век, и еще́. Егда́ вни́де ко́нница фарао́нова с колесни́цами и вса́дники в мо́ре, и наведе́ на них Госпо́дь во́ду морску́ю. Пои́м Го́сподеви:

Сы́нове же Изра́илевы проидо́ша су́шею посреде́ мо́ря. Пои́м Го́сподеви:

Слава: Пои́м Го́сподеви: И ныне: Пои́м Го́сподеви: И последи чтец поет тожде: Сла́вно бо просла́вися.

Пророчества Софониева чтение. [Гл. 3, ст. 8 – 15]

Та́ко глаго́лет Госпо́дь: потерпи́ Мене́ в день воскресе́ния Моего́ во свиде́тельство: зане́ суд Мой в со́нмища язы́ков е́же прия́ти царе́й, е́же излия́ти на ня гнев Мой, весь гнев я́рости Моея́: зане́ огне́м рве́ния Моего́ пояде́на бу́дет вся земля́. Я́ко тогда́ обращу́ к лю́дем язы́к в род его́, е́же призыва́ти всем и́мя Госпо́дне, рабо́тати ему́ под и́гом еди́нем. От коне́ц рек Ефио́пских, прииму́ моля́щия Мя, в разсе́янных Мои́х принесу́т же́ртвы Мне. В день он не и́маши постыди́тися от всех начина́ний твои́х, и́миже нече́ствовал еси́ в Мя: я́ко тогда́ отыму́ от тебе́ укори́зны досажде́ния твоего́, и ктому́ не и́маши приложи́ти велича́тися на горе́ святе́й Мое́й. И оста́влю в тебе́ лю́ди кро́тки и смире́нны, и бу́дут благогове́ти о и́мени Госпо́дни. Оста́нцы Изра́илевы, и не сотворя́т непра́вды, и не возглаго́лют су́етных, и не обря́щется во усте́х их язы́к льстив: зане́ ти́и пожиру́ют, и угнездя́тся, и не бу́дет устраша́яй их. Ра́дуйся дщи Сио́нова зело́, пропове́дуй дщи Иерусали́мова, весели́ся и преукраша́йся от всего́ се́рдца твоего́, дщи Иерусали́мля! Отъя́т Госпо́дь непра́вды твоя́, изба́вил тя есть из руки́ враг твои́х: воцари́тся Госпо́дь посреде́ тебе́, и не у́зриши зла ктому́.

Царств третиих чтение. [Гл. 17, ст. 8 – 23]

Бысть глаго́л Госпо́день ко Илии́, глаго́ля: воста́ни, и иди́ в Саре́пту Сидо́нскую, и пребу́ди та́мо: се бо запове́дах та́мо жене́ вдови́це препита́ти тя. И воста́, и и́де в Саре́пту Сидо́нскую, и прии́де ко врато́м гра́да: и се та́мо жена́ вдова́ собира́ше дрова́. И возопи́ Илия́ вслед ея́, и рече́ ей: принеси́ ны́не ми ма́ло воды́ в сосу́де, и испию́. И и́де взя́ти. И возопи́ вслед ея́ Илия́, и рече́ ей: приими́ у́бо мне и укру́х хле́ба в руце́ свое́й, да ям. И рече́ жена́: жив Госпо́дь Бог твой, а́ще есть у мене́ опресно́к, но то́кмо горсть муки́ в водоно́се, и ма́ло еле́а в чва́нце: и се аз соберу́ два поле́нца, и вни́ду, и сотворю́ е́ себе́ и де́тем мои́м, и сне́мы е́, и у́мрем. И рече́ к ней Илия́: дерза́й, вни́ди, и сотвори́ по глаго́лу твоему́, но сотвори́ ми отту́ду опресно́к мал пре́жде, и принеси́ ми: себе́ же и ча́дом свои́м да сотвориши послежде. Я́ко та́ко глаго́лет Госпо́дь Бог Изра́илев: водоно́с муки́ не оскуде́ет, и чва́нец еле́а не ума́лится до дне, до́ндеже даст Госпо́дь дождь на зе́млю. И и́де жена́, и сотвори́ по глаго́лу Илиину́, и даде́ ему́, и яде́ той и та, и ча́да ея́. И от того́ дне водоно́с муки́ не оскуде́, и чва́нец еле́а не ума́лися, по глаго́лу Госпо́дню, его́же глаго́ла руко́ю Илиино́ю. И бысть по сих, и разболе́ся сын жены́ госпожи́ до́му, и бе боле́знь его́ крепка́ зело́, до́ндеже не оста́ся в нем дух его́. И рече́ ко Илии́: что мне, и тебе́, челове́че Бо́жий? Вшел еси́ ко мне воспомяну́ти непра́вды моя́, и умори́ти сы́на моего́? И рече́ Илия́ к жене́: даждь ми сы́на твоего́. И взят его́ от не́дра ея́, и вознесе́ его́ в го́рницу, иде́же сам почива́ше, и положи́ его́ на одре́ свое́м. И возопи́ Илия́ ко Го́споду, и рече́: увы́ мне Го́споди, свиде́телю вдовы́, у нея́же аз ны́не пребыва́ю, Ты озло́бил еси́ е́же умори́ти сы́на ея́. И ду́ну на о́трочища три́жды, и призва́ Го́спода, и рече́: Го́споди Бо́же мой, да возврати́тся у́бо душа́ о́трочища сего́ в онь, и бысть та́ко. И возопи́ о́трочищ, и сведе́ его́ с го́рницы в дом, и даде́ его́ ма́тери его́. И рече́ Илия́: виждь, жив есть сын твой. И рече́ жена́ ко Илии́: се уразуме́х, я́ко челове́к Бо́жий еси́ ты, и глаго́л Госпо́день во усте́х твои́х и́стинен.

Пророчества Исаиина чтение. [Гл. 61, ст. 10 – 11. Гл. 62, ст. 1 – 5]

Да возра́дуется душа́ моя́ о Го́споде: облече́ бо мя в ри́зу спасе́ния, и оде́ждою весе́лия [оде́я мя]: я́ко на жениха́ возложи́ на мя вене́ц, и я́ко неве́сту украси́ мя красото́ю. И я́ко земля́ растя́щая цвет свой, и я́ко вертогра́д се́мена своя́ прозяба́ет: та́ко возрасти́т Госпо́дь Госпо́дь пра́вду, и весе́лие пред все́ми язы́ки. Сио́на ра́ди не умолчу́, и Иерусали́ма ра́ди не попущу́, до́ндеже изы́дет я́ко свет пра́вда моя́, и спасе́ние мое́ я́ко свети́ло разжже́тся. И у́зрят язы́цы пра́вду твою́, и ца́рие сла́ву твою́, и прозову́т тя и́менем но́вым, и́мже Госпо́дь наимену́ет е́. И бу́деши вене́ц добро́ты в руце́ Госпо́дни, и диади́ма ца́рствия в руце́ Бо́га твоего́. И не прозове́шися ктому́ оста́влен, и земля́ твоя́ ктому́ не нарече́тся пуста́: тебе́ бо прозове́тся во́ля моя́, и земля́ твоя́ вселе́нная: я́ко благоволи́ Госпо́дь в тебе́, и земля́ твоя́ вку́пе насели́тся. И я́коже живя́й ю́ноша с де́вою, та́ко поживу́т сы́нове твои́ с тобо́ю: и бу́дет я́коже ра́дуется жени́х о неве́сте, та́ко возра́дуется Госпо́дь о тебе́.

Бытия чтение. [Гл. 22, ст. 1 – 18]

Бысть по глаго́лех сих, Бог искуша́ше Авраа́ма, и рече́ ему́: Авраа́ме, Авраа́ме. И рече́: се аз. И рече́: пойми́ сы́на твоего́ возлю́бленнаго, его́же возлюби́л еси́ Исаа́ка, и иди́ на зе́млю высо́ку, и вознеси́ его́ та́мо во всесожже́ние, на еди́ну от гор, и́хже ти реку́. Воста́в же Авраа́м у́тро, оседла́ осля́ свое́, поя́т же с собо́ю два о́трочища, и Исаа́ка сы́на своего́, и растни́в дрова́ во всесожже́ние, воста́в и́де, и прии́де на ме́сто, е́же рече́ ему́ Бог, в тре́тий день. И воззре́в Авраа́м очи́ма свои́ма, ви́де ме́сто издале́че. И рече́ Авраа́м отроко́м свои́м: ся́дите зде со осля́тем: аз же и де́тищ по́йдем до о́нде, и поклони́вшеся возврати́мся к вам. Взя же Авраа́м дрова́ всесожже́ния, и возложи́ на Исаа́ка сы́на своего́: взя же в ру́ки и огнь, и нож, и идо́ста о́ба вку́пе. Рече́ же Исаа́к ко Авраа́му отцу́ своему́: о́тче. Он же рече́: что есть, ча́до? Рече́ же: се огнь и дрова́, где есть овча́ е́же во всесожже́ние? Рече́ же Авраа́м: Бог у́зрит Себе́ овча́ во всесожже́ние, ча́до. Ше́дше же о́ба вку́пе, приидо́ста на ме́сто, е́же рече́ ему́ Бог: и созда́ та́мо Авраа́м же́ртвенник, и возложи́ дрова́: и связа́в Исаа́ка сы́на своего́, возложи́ его́ на же́ртвенник верху́ дров. И простре́ Авраа́м ру́ку свою́ взя́ти нож, закла́ти сы́на своего́. И воззва́ и́ А́нгел Госпо́день с небесе́, и рече́: Авраа́ме, Авраа́ме. Он же рече́: се аз. И рече́: да не возложи́ши руки́ твоея́ на о́трочища, ниже́ да сотвори́ши ему́ что: ны́не бо позна́х, я́ко бои́шися ты Бо́га, и не пощаде́л еси́ сы́на твоего́ возлю́бленнаго Мене́ ра́ди. И воззре́в Авраа́м очи́ма свои́ма ви́де, и се ове́н еди́н держи́мый рога́ма в са́де саве́к: и и́де Авраа́м, и взя овна́, и вознесе́ его́ во всесожже́ние вме́сто Исаа́ка сы́на своего́. И нарече́ Авраа́м и́мя ме́сту тому́, Госпо́дь ви́де: да реку́т днесь, на горе́ Госпо́дь яви́ся. И воззва́ А́нгел Госпо́день Авраа́ма втори́цею с небесе́, глаго́ля: Мно́ю Саме́м кля́хся, глаго́лет Госпо́дь, его́же ра́ди сотвори́л еси́ глаго́л сей, и не пощаде́л еси́ сы́на твоего́ возлю́бленнаго Мене́ ра́ди: вои́стинну благословя́ благословлю́ тя, и умножа́я умно́жу се́мя твое́, я́ко зве́зды небе́сныя, и я́ко песо́к вскрай мо́ря: и насле́дит се́мя твое́ гра́ды супоста́тов. И благословя́тся о се́мени твое́м вси язы́цы земни́и, зане́же послу́шал еси́ гла́са Моего́.

Пророчества Исаиина чтение. [Гл. 61, ст. 1 – 9]

Дух Госпо́день на Мне, его́же ра́ди пома́за Мя, благовести́ти ни́щим, посла́ Мя, исцели́ти сокруше́нныя се́рдцем, пропове́дати пле́нником отпуще́ние, и слепы́м прозре́ние. Нарещи́ ле́то Госпо́дне прия́тно, и день воздая́ния, уте́шити вся пла́чущия. Да́ти пла́чущим Сио́на сла́ву вме́сто пе́пела, пома́зание весе́лия пла́чущим, украше́ние сла́вы вме́сто ду́ха уны́ния, и нареку́тся ро́дове пра́вды, насажде́ние Госпо́дне в сла́ву. И сози́ждут пусты́ни ве́чныя, запусте́вшия пре́жде воздви́гнут, и обновя́т гра́ды пусты́я, опустоше́нныя в ро́ды. И прии́дут иноро́днии, пасу́щии о́вцы твоя́, и иноплеме́нницы ора́тели, и виногра́дари ва́ши. Вы же свяще́нницы Госпо́дни нарече́теся, служи́телие Бо́га ва́шего, рече́тся вам: кре́пость язы́к сне́сте, и в бога́тстве их чу́дни бу́дете. Си́це зе́млю свою́ втори́цею насле́дят, и весе́лие ве́чное над главо́ю их. Аз бо есмь Госпо́дь любя́й пра́вду, и ненави́дяй грабле́ния от непра́вды: и дам труд их пра́ведником, и заве́т ве́чен завеща́ю им. И позна́ется во язы́цех се́мя их, и вну́цы их посреди́ люде́й: всяк ви́дяй я́ позна́ет я́, я́ко си́и суть се́мя благослове́нное от Бо́га и ра́достию возра́дуются о Го́споде.

Царств четвертых чтение. [Гл. 4, ст. 8 – 37]

Бысть во еди́н день, и пре́йде Елиссе́й в Сома́н, и ту жена́ ве́лия, и удержа́ его́ сне́сти хле́ба. И бысть ему́ входи́ти, и исходи́ти мно́жицею, и уклоня́шеся та́мо я́сти хле́ба. И рече́ жена́ к мужу своему́: се ны́не разуме́х, я́ко челове́к Бо́жий свят сей ми́мо хо́дит нас при́сно. Сотвори́м у́бо ему́ го́рницу, ме́сто ма́ло, и поста́вим ему́ та́мо одр, и трапе́зу, и престо́л, и све́щник: и бу́дет внегда́ входи́ти ему́ к нам, и уклоня́ется та́мо. И бысть во еди́н день, и вни́де та́мо, и уклони́ся в го́рницу, и спа та́мо. И рече́ ко Гиези́ю о́трочищу своему́: призови́ ми сомани́тяныню сию́. И призва́ ю́, и ста пред ним. И рече́ ему́: рцы у́бо ей, се удиви́ла еси́ нас всем попече́нием сим: что подоба́ет сотвори́ти тебе́? А́ще есть тебе́ сло́во к царю́, или́ ко кня́зю си́лы? Она́ же рече́: [несть.] посреде́ люде́й мои́х аз есмь живу́щи. И рече́ ко Гиези́ю: что подоба́ет сотвори́ти ей? И рече́ Гиези́й о́трочищ его́: вои́стинну сы́на несть у нея́, и муж ея́ стар. И рече́, призови́ ю́. И призва́ ю́, и ста при две́рех. И рече́ Елиссе́й к ней: во вре́мя сие́, я́коже час сей, живу́щи ты зачне́ши сы́на. Она́ же рече́: ни, господи́не, не солжи́ рабе́ твое́й. И зача́т во чре́ве жена́, и роди́ сы́на во вре́мя сие́, я́коже час сей живу́щи, я́коже глаго́ла к ней Елиссе́й. И возмужа́ о́трочищ: и бысть, егда́ изы́де ко отцу́ своему́, к жну́щим. И рече́ ко отцу́ своему́: глава́ моя́, глава́ моя́ [боли́т]. И рече́ ко о́троку: неси́ его́ к ма́тери его́. И несе́ его́ к ма́тери его́ и лежа́ше на коле́ну ея́ до полу́дне, и у́мре. И вознесе́ его́, и положи́ его́ на одре́ челове́ка Бо́жия: и затвори́ его́, и изы́де, и призва́ му́жа своего́, и рече́ ему́: посли́ ми у́бо еди́наго от о́трок, и еди́но от осля́т, и теку́ до челове́ка Бо́жия, и возвращу́ся. И рече́: что я́ко ты и́деши к нему́ днесь? Не нов ме́сяц, ниже́ суббо́та. Она́ же рече́: мир. И оседла́ осля́, и рече́ ко о́трочищу своему́: веди́, и иди́, да не удержи́ши мене́, е́же все́сти, я́коже реку́ тебе́. Гряди́, и иди́, и прииди́ к челове́ку Бо́жию на го́ру Карми́льскую. И и́де, и прии́де до челове́ка Бо́жия в го́ру Карми́льскую. И бысть я́ко ви́де ю́ Елиссе́й гряду́щую, и рече́ к Гиези́ю о́трочищу своему́: се у́бо сомани́тяныня о́ная. Ны́не тецы́ в сре́тение ея́, и рече́ши ей: мир ли тебе́? И тече́ во сре́тение ей, и рече́ ей: мир ли тебе́; мир ли му́жу твоему́; мир ли о́трочищу твоему́? Она́ же рече́: мир. И прии́де к Елиссе́ю на го́ру, и я́тся за но́зе его́: и прибли́жися Гиези́й отри́нути ю́. И рече́ Елиссе́й: оста́ви ю́, я́ко душа́ ея́ боле́зненна в ней, и Госпо́дь укры́ от мене́, и не возвести́ мне. Она́ же рече́: еда́ проси́х сы́на у господи́на моего́, я́ко реко́х: не прельсти́ мене́? И рече́ Елиссе́й ко Гиези́ю: препоя́ши чре́сла твоя́, и возми́ жезл мой в ру́це твои́, и иди́, я́ко а́ще обря́щеши му́жа, да не благослови́ши его́, и а́ще благослови́т тя муж, не отвеща́й ему́: и возложи́ жезл мой на лице́ о́трочища. И рече́ ма́ти о́трочища: жив Госпо́дь, и жива́ душа́ твоя́, а́ще оста́влю тебе́. И воста́ Елиссе́й, и и́де вслед ея́. И Гиези́й и́де пред не́ю, и возложи́ жезл на лице́ о́трочища, и не бе гла́са, и не бе слы́шания. И возврати́ся в сре́тение его́, и пове́да ему́, глаго́ля: не воста́ о́трочищ. И вни́де Елиссе́й в хра́мину, и се о́трочищ уме́рый положе́н на одре́ его́. И вни́де Елиссе́й в дом, и затвори́ дверь за двою́ собо́ю, и помоли́ся Го́споду. И взы́де, и ля́же на о́трочищи, и положи́ уста́ своя́ на усте́х его́, и о́чи свои́ на о́чи его́, и ру́це свои́ на ру́це его́, и плесне́ свои́ на плесну́ его́: и сляче́ся над ним, и ду́ну на него́, и согре́яся плоть о́трочища. И обрати́ся, и походи́ в хра́мине сю́ду и сю́ду: и взы́де и сляче́ся над о́трочищем седми́жды, и отве́рзе о́трочищ о́чи свои́. И возопи́ Елиссе́й ко Гиези́ю, и рече́: призови́ ми сомани́тяныню сию́. И призва́ ю́, и вни́де к нему́. И рече́ Елиссе́й: приими́ сы́на твоего́. И вни́де жена́, и паде́ на но́гу его́, и поклони́ся ему́ до земли́, и прия́т сы́на своего́, и изы́де.

Пророчества Исаиина чтение. [Гл. 63, ст. 11 – 19. Гл. 64, ст. 1 – 5]

Та́ко глаго́лет Госпо́дь: где возведы́й от земли́ па́стыря ове́ц свои́х? Где есть вложи́вый в них Ду́ха Свята́го? Возве́дшая десни́цею Моисе́а, мы́шца сла́вы Его́ раздели́ во́ду пред Лице́м Его́, сотвори́ти Ему́ и́мя ве́чно. Проведе́ их сквозе́ бе́здну, я́коже коня́ сквозе́ пусты́ню, и не утруди́шася, и я́ко скоты́ по по́лю, и сни́де Дух от Го́спода, и наста́ви их. Та́ко прове́л еси́ лю́ди Твоя́, сотвори́ти Тебе́ Самому́ и́мя сла́вно. Обрати́ся, Го́споди, от небесе́, и виждь от до́му свята́го Твоего́ и сла́вы Твоея́: где есть ре́вность Твоя́ и кре́пость Твоя́? Где есть мно́жество ми́лости Твоея́, и щедро́т Твои́х, я́ко терпе́л еси́ нам? Ты бо еси́ Оте́ц наш, поне́же Авраа́м не уве́де нас, и Изра́иль не позна́ нас, но Ты Го́споди, Оте́ц наш, изба́ви ны, испе́рва и́мя Твое́ на нас есть. Что уклони́л еси́ нас, Го́споди, от пути́ Твоего́, и ожесточи́л еси́ сердца́ на́ша е́же не боя́тися Тебе́? Обрати́ся ра́ди раб Твои́х, ра́ди племе́н достоя́ния Твоего́, да [поне́] ма́ло насле́дим горы́ святы́я Твоея́. Проти́вницы на́ши попра́ша святы́ню Твою́. Бы́хом я́ко испе́рва, егда́ не владе́л еси́ на́ми, ниже́ бе нарече́нное и́мя Твое́ на нас. А́ще отве́рзеши не́бо, тре́пет прии́мут от Тебе́ го́ры, и раста́ют. Я́ко та́ет воск от лица́ огня́ и попали́т огнь супоста́ты, и явле́но бу́дет и́мя Твое́ в сопроти́вных Твои́х: от Лица́ Твоего́ язы́цы возмяту́тся. Егда́ сотвори́ши сла́вная, тре́пет прии́мут от Тебе́ го́ры. От ве́ка не слы́шах, ниже́ о́чи на́ши ви́деша Бо́га, разве Тебе́, и дела́ Твоя́, я́же сотвори́ши жду́щим ми́лости. Ми́лость бо сря́щет творя́щих пра́вду, и пути́ Твоя́ помя́нутся.

Пророчества Иеремиина чтение. [Гл. 31, ст. 31 – 34]

Та́ко глаго́лет Госпо́дь: се дни́е гряду́т, и завеща́ю до́му Изра́илеву и до́му Иу́дину заве́т нов. Не по заве́ту, его́же завеща́х отце́м их, в день, во́ньже е́мшу Ми за ру́ку их, извести́ я́ от земли́ Еги́петския: я́ко ти́и не пребы́ша в заве́те Мое́м, и Аз небрего́х их, глаго́лет Госпо́дь. Я́ко сей заве́т, его́же завеща́ю до́му Изра́илеву по днех о́нех, глаго́лет Госпо́дь: дая́ зако́ны Моя́ в мы́сли их, и на сердца́х их напишу́ я́, и бу́ду им в Бо́га, и ти́и бу́дут Ми в лю́ди. И не научи́т ки́йждо бли́жняго своего́, и ки́йждо бра́та своего́, глаго́ля: позна́й Го́спода: я́ко вси позна́ют Мя от ма́ла да́же и до вели́каго их: я́ко ми́лостив бу́ду непра́вдам их, и грехо́в их не помяну́ ктому́.

Пророчества Даниилова чтение. [Гл. 3, ст. 1 – 88]

В ле́то осмонадеся́тое Навуходоно́сор царь сотвори́ те́ло зла́то, высота́ его́ лакте́й шести́десяти, и широта́ его́ лакте́й шести́: и поста́ви е́ на по́ли Деи́ре, во стране́ Вавило́нстей. И посла́ [Навуходоно́сор царь] собра́ти ипа́ты, и воево́ды, и местонача́льники, вожди́ же и мучи́тели, и су́щия на власте́х, и вся кня́зи стран, приити́ на обновле́ние куми́ра, его́же поста́ви Навуходоно́сор царь. И собра́шася местонача́льницы, ипа́ты, воево́ды, вожди́, мучи́тели вели́цыи, и́же над властьми́, и вси нача́льницы стран на обновле́ние те́ла, е́же поста́ви Навуходоно́сор царь: и ста́ша пред те́лом, е́же поста́ви Навуходоно́сор царь. И пропове́дник вопия́ше с кре́постию: вам глаго́лется, наро́ди, лю́дие, племена́, язы́цы. Во́ньже час а́ще услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йска, па́дающе покланя́йтеся те́лу злато́му, е́же поста́ви Навуходоно́сор царь. И и́же а́ще не пад покло́нится, в той час вве́ржен бу́дет в пещь огне́м горя́щую. И бысть егда́ услы́шаша лю́дие глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йскаго, па́дающе вси лю́дие, племена́, язы́цы, покланя́хуся те́лу злато́му, е́же поста́ви Навуходоно́сор царь. Тогда́ приступи́ша му́жие халде́йстии и оболга́ша иуде́ев, отвеща́вше ре́ша Навуходоно́сору царе́ви: царю́, во ве́ки живи́. Ты, царю́, положи́л еси́ повеле́ние, да всяк челове́к, и́же а́ще услы́шит глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йска, и не пад покло́нится те́лу злато́му, вве́ржен бу́дет в пещь огне́м горя́щую. Суть у́бо му́жи Иуде́е, и́хже поста́вил еси́ над де́лы страны́ Вавило́нския, Седра́х, Миса́х и Авденаго́, и́же не послу́шаша за́поведи твоея́, царю́, и бого́м твои́м не слу́жат, и те́лу злато́му, е́же поста́вил еси́, не покланя́ются. Тогда́ Навуходоно́сор в я́рости и гне́ве рече́ привести́ Седра́ха, Миса́ха и Авденаго́: и приведе́ни бы́ша пред царя́. И отвеща́ Навуходоно́сор, и рече́ им: а́ще вои́стинну, Седра́х, Миса́х и Авденаго́, бого́м мои́м не слу́жите, и те́лу злато́му, е́же поста́вих, не покланя́етеся? Ны́не у́бо, а́ще есте́ гото́ви, да егда́ услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йскаго, па́дше поклони́теся те́лу злато́му, е́же сотвори́х: а́ще же не поклоните́ся, в той час вве́ржени бу́дете в пещь огне́м горя́щую: и кто есть бог, и́же и́змет вы из руки́ моея́? И отвеща́ша Седра́х, Миса́х и Авденаго́, глаго́люще царю́ Навуходоно́сору: не тре́бе нам о глаго́ле сем отвеща́ти тебе́. Есть бо Бог наш на Небесе́х, Ему́же мы слу́жим, си́лен изъя́ти нас от пе́щи огне́м горя́щия и от руку́ твое́ю изба́вити нас, царю́. А́ще ли ни, ве́домо да бу́дет тебе́, царю́, я́ко бого́м твои́м не слу́жим, и те́лу злато́му, е́же поста́вил еси́, не кла́няемся. Тогда́ Навуходоно́сор испо́лнися я́рости, и зрак лица́ его́ измени́ся на Седра́ха, Миса́ха и Авденаго́, и рече́: разжжи́те пещь седмери́цею, до́ндеже до конца́ разгори́тся. И муже́м си́льным кре́постию рече́: окова́вше Седра́ха, Миса́ха и Авденаго́, вве́рзите в пещь огне́м горя́щую. Тогда́ му́жие о́нии окова́ни бы́ша с га́щами свои́ми, и покрыва́лы, и сапогми́, и со оде́ждами свои́ми, и вве́ржени бы́ша посреде́ пе́щи огне́м горя́щия. Поне́же глаго́л царе́в превозмо́же, и пещь разжже́на бысть преизли́шше: и муже́й о́ных, и́же вверго́ша Седра́ха, Миса́ха и Авденаго́, уби́ пла́мень о́гненный. И му́жие ти́и трие́, Седра́х, Миса́х и Авденаго́, падо́ша посреде́ пе́щи огне́м горя́щия око́вани, и хожда́ху посреде́ пла́мене пою́ще Бо́га, и благословя́ще Го́спода. И став с ни́ми Аза́риа помоли́ся си́це, и отве́рз уста́ своя́ посреде́ огня́, и рече́:

Благослове́н еси́, Го́споди Бо́же оте́ц на́ших, хва́льно и просла́влено и́мя Твое́ во ве́ки. Я́ко пра́веден еси́ о всех, я́же сотвори́л еси́ нам, и вся дела́ Твоя́ и́стинна, и пра́ви путие́ Твои́, и вси суди́ Твои́ и́стинни. И судьбы́ и́стинны сотвори́л еси́ по всем, я́же наве́л еси́ на ны, и на град святы́й оте́ц на́ших Иерусали́м: я́ко и́стиною и судо́м наве́л еси́ сия́ вся на ны грех ра́ди на́ших. Я́ко согреши́хом и беззако́нновахом отступи́вше от Тебе́, и прегреши́хом во всех. И за́поведей Твои́х не послу́шахом, ниже́ соблюдо́хом, ниже́ сотвори́хом, я́коже запове́дал еси́ нам, да бла́го нам бу́дет. И вся, ели́ка сотвори́л еси́ нам, и вся, ели́ка наве́л еси́ на ны, и́стинным судо́м сотвори́л еси́. И преда́л еси́ нас в ру́ки враго́в беззако́нных, ме́рзких отсту́пников, и царю́ непра́ведну, и лука́внейшу па́че всея́ земли́. И ны́не несть нам отве́рзсти уст, студ и поноше́ние бы́хом рабо́м Твои́м, и чту́щим Тя. Не преда́ждь у́бо нас до конца́ и́мене Твоего́ ра́ди, и не разори́ заве́та Твоего́. И не отста́ви ми́лости Твоея́ от нас, Авраа́ма ра́ди возлю́бленнаго от Тебе́, и за Исаа́ка раба́ Твоего́, и Изра́иля свята́го Твоего́, и́мже глаго́лал еси́ умно́жити се́мя их, я́ко зве́зды небе́сныя, и я́ко песо́к вскрай мо́ря. Я́ко Влады́ко, ума́лихомся па́че всех язы́к, и есмы́ смире́ни по всей земли́ днесь грех ра́ди на́ших. И несть во вре́мя сие́ кня́зя, и проро́ка, и вожда́, ниже́ всесожже́ния, ниже́ же́ртвы, ниже́ приноше́ния, ниже́ кади́ла, ни ме́ста, е́же пожре́ти пред Тобо́ю и обрести́ ми́лость, но душе́ю сокруше́нною, и ду́хом смире́нным, да прия́ты бу́дем. Я́ко во всесожже́ниих о́вних и ю́нчих, и я́ко во тмах а́гнец ту́чных, та́ко да бу́дет же́ртва на́ша пред Тобо́ю днесь, и да соверши́тся по Тебе́, я́ко несть студа́ упова́ющим на Тя. И ны́не возсле́дуем всем се́рдцем, и бои́мся Тебе́, и и́щем Лица́ Твоего́. Не посрами́ нас, но сотвори́ с на́ми по кро́тости Твое́й, и по мно́жеству ми́лости Твоея́. И изми́ нас по чудесе́м Твои́м, и даждь сла́ву и́мени Твоему́, Го́споди. И да посра́мятся вси явля́ющии рабо́м Твои́м зла́я, и да постыдя́тся от вся́кия си́лы, и кре́пость их да сокруши́тся. И да разуме́ют, я́ко Ты еси́ Госпо́дь Бог Еди́н, и сла́вен по всей вселе́нной.

И не преста́ша, вве́ргшии их, слуги́ царе́вы жгу́ще пещь на́ффою, и смоло́ю, и изгре́бми, и хвра́стием. И разлива́шеся пла́мень над пе́щию на ла́кти четы́редесять де́вять. И обы́де и пожже́, и́хже обре́те о́крест пе́щи халде́йския. А́нгел же Госпо́день сни́де ку́пно с су́щими со Аза́риею в пещь. И отрясе́ пла́мень о́гненный от пе́щи, и сотвори́ сре́днее пе́щи я́ко дух росы́ шумя́щь: и не прикосну́ся их отню́дь огнь, и не оскорби́, ниже́ стужи́ им. Тогда́ ти́и трие́ я́ко еди́ными усты́ поя́ху, и благословля́ху, и сла́вляху Бо́га в пещи́, глаго́люще:

Благослове́н еси́, Го́споди Бо́же оте́ц на́ших, и препе́тый и превозноси́мый во ве́ки; и благослове́но и́мя сла́вы Твоея́ свято́е, и препе́тое и превозноси́мое во ве́ки. Благослове́н еси́ в хра́ме святы́я сла́вы Твоея́, и препе́тый и превозноси́мый во ве́ки. Благослове́н еси́ ви́дяй бе́здны, седя́й на Херуви́мех, и препе́тый и превозноси́мый во ве́ки. Благослове́н еси́ на престо́ле сла́вы Ца́рствия Твоего́, и препе́тый и превозноси́мый во ве́ки. Благослове́н еси́ на тве́рди небе́сней, и препе́тый и превозноси́мый во ве́ки.

Востаем зде и поем:

Го́спода по́йте и превозноси́те во вся ве́ки.

Чтец же глаголет стихи:

Благослови́те, вся дела́ Госпо́дня,

И мы: Го́спода по́йте и превозноси́те Его́ во ве́ки.

Благослови́те А́нгели Госпо́дни,

Го́спода по́йте и превозноси́те Его́ во ве́ки.

Благослови́те небеса́,

Го́спода по́йте и превозноси́те Его́ во ве́ки.

Благослови́те во́ды вся, я́же превы́ше небе́с,

Го́спода по́йте и превозноси́те Его́ во ве́ки.

Благослови́те вся си́лы Госпо́дни,

Го́спода по́йте и превозноси́те Его́ во ве́ки.

Благослови́те со́лнце и луна́,

Го́спода по́йте и превозноси́те Его́ во ве́ки.

Благослови́те зве́зды небе́сныя,

Го́спода по́йте и превозноси́те Его́ во ве́ки.

Благослови́те всяк дождь и роса́,

Го́спода по́йте и превозноси́те Его́ во ве́ки.

Благослови́те вси ду́си,

Го́спода по́йте и превозноси́те Его́ во ве́ки.

Благослови́те огнь и вар,

Го́спода по́йте и превозноси́те Его́ во ве́ки.

Благослови́те студь и зной,

Го́спода по́йте и превозноси́те Его́ во ве́ки.

Благослови́те ро́сы и и́ней,

Го́спода по́йте и превозноси́те Его́ во ве́ки.

Благослови́те но́щи и дни́е,

Го́спода по́йте и превозноси́те Его́ во ве́ки.

Благослови́те свет и тьма,

Го́спода по́йте и превозноси́те Его́ во ве́ки.

Благослови́те лед и мраз,

Го́спода по́йте и превозноси́те Его́ во ве́ки.

Благослови́те сла́ны и сне́зи,

Го́спода по́йте и превозноси́те Его́ во ве́ки.

Благослови́те мо́лния и о́блацы,

Го́спода по́йте и превозноси́те Его́ во ве́ки.

Да благослови́т земля́,

Го́спода да пое́т и превозно́сит Его́ во ве́ки.

Благослови́те го́ры и хо́лми,

Го́спода по́йте и превозноси́те Его́ во ве́ки.

Благослови́те вся прозяба́ющая на земли́,

Го́спода по́йте и превозноси́те Его́ во ве́ки.

Благослови́те исто́чницы,

Го́спода по́йте и превозноси́те Его́ во ве́ки.

Благослови́те моря́ и ре́ки,

Го́спода по́йте и превозноси́те Его́ во ве́ки.

Благослови́те ки́ти и вся дви́жущаяся в вода́х,

Го́спода по́йте и превозноси́те Его́ во ве́ки.

Благослови́те вся пти́цы небе́сныя,

Го́спода по́йте и превозноси́те Его́ во ве́ки.

Благослови́те зве́рие и вси ско́ти,

Го́спода по́йте и превозноси́те Его́ во ве́ки.

Благослови́те сы́нове челове́честии,

Го́спода по́йте и превозноси́те Его́ во ве́ки.

Да благослови́т Изра́иль,

Го́спода по́йте и превозноси́те Его́ во ве́ки.

Благослови́те иере́и Госпо́дни,

Го́спода по́йте и превозноси́те Его́ во ве́ки.

Благослови́те раби́ Госпо́дни,

Го́спода по́йте и превозноси́те Его́ во ве́ки.

Благослови́те ду́си и ду́ши пра́ведных,

Го́спода по́йте и превозноси́те Его́ во ве́ки.

Благослови́те преподо́бнии и смире́ннии се́рдцем,

Го́спода по́йте и превозноси́те Его́ во ве́ки.

Благослови́те Ана́ния, Аза́риа и Мисаи́л,

Го́спода по́йте и превозноси́те Его́ во ве́ки.

Благослови́те Апо́столи, проро́цы и му́ченицы Госпо́дни,

Го́спода по́йте и превозноси́те Его́ во ве́ки.

Благослови́м Отца́, и Сы́на, и Свята́го Ду́ха,

Го́спода пое́м и превозно́сим Его́ во ве́ки.

И ны́не и при́сно, и во ве́ки веко́в, ами́нь.

Го́спода по́йте и превозноси́те Его́ во ве́ки.

Хва́лим, благослови́м, покланя́емся Го́сподеви,

Пою́ще и превознося́ще во вся ве́ки.

Таже ектения малая.

Вместо же Трисвятаго:

Ели́цы во Христа́ крести́стеся, / во Христа́ облеко́стеся. Аллилу́ия. (3)

Прокимен, глас 8: Вся земля́ да покло́нится Тебе́, и пое́т Тебе́, / да пое́т же и́мени Твоему́, Вы́шний. Стих: Воскли́кните Го́сподеви вся земля́, по́йте же и́мени Его́.

Апостол к Римлянам, зачало 91:

Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть: да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. А́ще бо сообра́зни бы́хом подо́бию сме́рти Его́, то и воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо, оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним: Ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет. Е́же бо у́мре, греху́ у́мре еди́ною, а е́же живе́т, Бо́гови живе́т. Та́кожде и вы помышля́йте себе́: ме́ртвым у́бо бы́ти греху́, живы́м же Бо́гови, о Христе́ Иису́се, Го́споде на́шем.

Аллилуиа и псалом Давидов не глаголется: но по еже реши иерею: Мир ти, абие чтец глаголет, вместо аллилуиа, во глас 7:

Воскресни́, Бо́же, суди́ земли́, я́ко Ты насле́диши во всех язы́цех. И певцы поют тожде. И чтец, стих: Бог ста в со́нме бого́в, посреде́ же бо́ги разсу́дит. И певцы: Воскресни́, Бо́же:

Стих: Доко́ле су́дите непра́вду, и ли́ца гре́шников прие́млете? Воскресни́, Бо́же:

Стих: Суди́те си́ру и убо́гу, смире́нна и ни́ща оправда́йте. Воскресни́, Бо́же:

Стих: Изми́те ни́ща и убо́га, из руки́ гре́шничи изба́вите его́. Воскресни́, Бо́же:

Стих: Не позна́ша, ниже́ уразуме́ша, во тьме хо́дят. Воскресни́, Бо́же:

Стих: Да подви́жатся вся основа́ния земли́. Аз рех: бо́зи есте́, и сы́нове Вы́шняго вси. Вы же я́ко челове́цы умира́ете, и я́ко еди́н от князе́й па́даете.

И паки: Воскресни́, Бо́же, суди́ земли́, я́ко Ты насле́диши во всех язы́цех. Егда же поют: Воскресни́, Бо́же, суди́ земли́, тогда иереи и диакони извлачаются от черных одежд и облачаются в белыя.

Евангелие от Матфеа, зачало 115:

В ве́чер суббо́тный, свита́ющи во еди́ну от суббо́т, прии́де Мари́я Магдали́на, и друга́я Мари́я, ви́дети гроб. И се трус бысть ве́лий: А́нгел бо Госпо́день сшед с небесе́, присту́пль отвали́ ка́мень от две́рий гро́ба, и седя́ше на нем. Бе же зрак его́ я́ко мо́лния, и одея́ние его́ бело́ я́ко снег. От стра́ха же его́ сотрясо́шася стрегу́щии, и бы́ша я́ко ме́ртви. Отвеща́в же А́нгел, рече́ жена́м: не бо́йтеся вы, вем бо я́ко Иису́са распя́таго и́щете. Несть зде: воста́ бо, я́коже рече́. Прииди́те, ви́дите ме́сто, иде́же лежа́ Госпо́дь. И ско́ро ше́дше рцы́те ученико́м Его́, я́ко воста́ от ме́ртвых; и се варя́ет вы в галиле́и: та́мо Его́ у́зрите: се рех вам. И изше́дше ско́ро от гро́ба, со стра́хом и ра́достию ве́лиею, теко́сте возвести́ти ученико́м Его́. Я́коже идя́сте возвести́ти ученико́м Его́, и се Иису́с сре́те я́, глаго́ля: ра́дуйтеся. Оне́ же присту́пльше, я́стеся за но́зе Его́, и поклони́стеся Ему́. Тогда́ глаго́ла и́ма Иису́с: не бо́йтеся, иди́те, возвести́те бра́тии мое́й, да и́дут в галиле́ю, и ту мя ви́дят. Иду́щема же и́ма, се не́цыи от кусто́диа прише́дше во град, возвести́ша архиере́ом вся бы́вшая. И собра́вшеся со ста́рцы, сове́т сотвори́ша, сре́бреники дово́льны да́ша во́ином, глаго́люще: рцы́те, я́ко ученицы́ Его́ но́щию прише́дше украдо́ша Его́, нам спя́щим. И а́ще сие́ услы́шано бу́дет у иге́мона, мы утоли́м его́, и вас безпеча́льны сотвори́м. Они́ же прие́мше сре́бреники, сотвори́ша, я́коже науче́ни бы́ша. И промче́ся сло́во сие́ во иуде́ех, да́же до сего́ дне. Еди́нии же на́десяте ученицы́ идо́ша в Галиле́ю, в го́ру, а́може повеле́ им Иису́с. И ви́девше Его́ поклони́шася Ему́: о́ви же усумне́шася. И присту́пль Иису́с, рече́ им, глаго́ля: даде́ся Ми вся́ка власть на небеси́ и на земли́. Ше́дше научи́те вся язы́ки, крестя́ще их во и́мя Отца́, и Сы́на, и Свята́го Ду́ха, уча́ще их блюсти́ вся, ели́ка запове́дах вам. И се Аз с ва́ми есмь во вся дни, до сконча́ния ве́ка, ами́нь.

И по чину Божественная Литургия Великаго Василиа.

Вместо же Херувимския песни поется настоящий тропарь, глас 8:

Да молчи́т вся́кая плоть челове́ча, / и да стои́т со стра́хом и тре́петом, / и ничто́же земно́е в себе́ да помышля́ет: / Царь бо ца́рствующих, и Госпо́дь госпо́дствующих, / прихо́дит закла́тися и да́тися в снедь ве́рным. / Предхо́дят же Сему́ ли́цы А́нгельстии / со вся́ким Нача́лом и Вла́стию, / многоочи́тии Херуви́ми, / и шестокрила́тии Серафи́ми, / ли́ца закрыва́юще, и вопию́ще песнь: / аллилу́иа, аллилу́иа, аллилу́иа.

Вместо же Достойно, ирмос:

Не рыда́й Мене́, Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся / и вознесу́ со сла́вою непреста́нно, я́ко Бог, / ве́рою и любо́вию Тя велича́ющия.

Причастен, глас 4: Воста́ я́ко спя Госпо́дь, / и воскре́се спаса́яй нас. Аллилу́иа, трижды.

По отпусте же дается от священника антидор, Таже бывает благословение хлеба и вина.

Диакон: Го́споду помо́лимся.

Хор: Го́споди, поми́луй.

Священник: Го́споди Иису́се Христе́ Бо́же наш, благослови́вый пять хле́бов и пять ты́сящ насы́тивый, Сам благослови́ и хле́бы сия́, пшени́цу, вино́ и еле́й: и умно́жи сия́ во гра́де сем (или в ве́си сей, или во святе́й оби́тели сей) и во всем ми́ре Твое́м: и вкуша́ющия от них ве́рныя освяти́. Я́ко Ты еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Всесвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Ами́нь.

Отпуст Литургии: Христо́с, И́стинный Бог наш:

Иный отпуст:

И́же нас pа́ди и на́шего pа́ди спасе́ния, смиpи́в Себе́ и в на́шy нищетý облече́ся и во́лею Стpа́сти пpетеpпе́ и смеpть вкyси́в и во гpо́бе положи́выйся Хpисто́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, и всех святы́х, поми́лyет и спасе́т нас, я́ко Благ и Человеколю́бец.

Долженствует же екклисиарх имети опасство, да егда скончавается Литургия, будет час вторый нощи. По отпусте же не исходим из церкве, но седим на местех наших: и входит келарь, и дает братии по единому укруху хлеба и по шести смоквей или фиников, и по единому красовулю вина. Нам же возлежащим, бывает чтение великое в Деяниих святых Апостол от начала. Глаголет же чтец начало. Священник же стих: Молитвами святых апостол, Господи Иисусе Христе Боже наш, помилуй нас. И по Амине начинает чтец чести. Таже начинаем ясти. И по скончании чтения вжигает кандиловжигатель вся кандила храма, и, исходя, ударяет в клепало: и престает чтый чтение. Благословившу же священнику, начинаем Трисвятое, и прочее. Прииди́те, поклони́мся, трижды. Псалом 50. И канон Великия Субботы: ирмосы по дважды, тропари же на дванадесять, со стихи песней. Катавасия, ирмос оба лика. По третней песни седален Великия Субботы: Гроб Твой, Спа́се: И чтение в слове святаго Епифаниа, егоже начало: Что сие́ днесь: Или от словес Златоустаго: ищи я в толковании на Евангелие от Матфеа, или на Иоанна, словеса воскресная. По 6-й песни кондак и икос Великия Субботы. Таже чтение. По 9-й же песни Трисвятое. И тропарь, глас 2: Егда снизше́л еси́: Ектениа. И отпуст.