Le Grand Testament

Ballade [de conclusion]

Icy se clost le testament

Et finist du povre Villon

Venez a son enterrement,

Quand vous orez le carrillon,

Vestuz rouge come vermeillon,

Car en amours mourut martir;

Ce jura il sur son coullon,

Quant de ce monde voult partir.

Et je croy bien que pas n'en ment;

Car chassié fut comme ung soullon,

De ses amours hayneusement,

Tant que, d'icy a Roussillon

Brosses n'y a ne brossillon

Qui n'eust, ce dit il sans mentir,

Ung lambeau de son cotillon,

Quant de ce monde voult partir.

Il est ainsi et tellement:

Quant mourut n'avoit qu'un haillon;

Qui plus, en mourant, mallement

L'espoignoit d'Amours l'esguillon;

Plus agu que le ranguillon

D'ung baudrier lui faisoit sentir

C'est de quoy nous esmerveillon,

Quant de ce monde voult partir.

Prince gent comme esmerillon,

Saichiez qu'il fist au departir:

Ung traict but de vin morillon,

Quant de ce monde voult partir.