Акафистник

Ака́фист арха́нгелу Рафаи́лу

Кондак 1

Избра́нный Бо́гом от во́инства небе́снаго на служе́ние ро́ду челове́ческому, Арха́нгеле Бо́жий Рафаи́ле, и чудесы́ вели́кими и сла́вными на земли́ возсия́вый, моли́ Христа́ Бо́га вся́ких искуше́ний, бед и наве́тов вра́жеских избе́гнути нам и насле́дники Ца́рствия Небе́снаго соде́латися, да ра́достными пе́сньми с любо́вию восхваля́ем тя, небе́снаго предста́теля и засту́пника на́шего, зову́ще:

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Икос 1

Арха́нгели и а́нгели и вся во́инства небе́сная, предстоя́ще престо́лу Святы́я Тро́ицы, непреста́нно славосло́вят Творца́ небесе́ и земли́. С ними́ же и ты, всесла́вный Рафаи́ле, воспева́еши ги́мны хвале́бныя Вседержи́телю. Приими́ у́бо и от нас земноро́дных с любо́вию и наде́ждою приноси́мая ти велича́ния си́я:

Ра́дуйся, венце́м побе́дным па́че звезд на небеси́ блиста́яй;

ра́дуйся, тимпа́не сладкозву́чный, сла́ву Бо́жию бряца́яй.

Ра́дуйся, лю́тых и неисце́льных неду́гов теле́сных враче́вателю;

ра́дуйся, не́мощей и страсте́й душе́вных цели́телю.

Ра́дуйся, всем приходя́щим к тебе́ благ преизоби́льный пода́телю;

ра́дуйся, от теплохла́дия и малове́рия нас пресла́вный изба́вителю.

Ра́дуйся, неве́рующих в Про́мысл Бо́жий в ве́ре утвержда́яй;

ра́дуйся, от сна грехо́внаго ду́ши на́ша пробужда́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 2

Ви́дяще очи́ма веры силу и величие молниено́снаго вида твоего, арха́нгеле Божий Рафаи́ле, мы, земноро́днии, а́ще и грешни есмы́ и недостойни, оба́че с любовию и благодаре́нием ко Пресвяте́й Троице зовем вку́пе с тобою и со всеми силами небесными: Аллилу́ия.

Икос 2

Ра́зум человеческий не возмо́жет постигнути всех таинств премудрости и милосердия Творца нашего, ибо человеколюби́вый Господь, видя страдания людей, по неизреченной милости Своей посылает на землю святых ангелов Своих во исцеление неду́гующих и утешение скорбящих. За сие служение твое приими́, архангеле Божий, от нас в смирении и благоговении приносимое ти благодарение сие:

Ра́дуйся, слуго́ Господень, присно волю Владыки твоего творя́й;

радуйся, от оби́телей райских во юдо́ль плачевную нисходя́й.

Радуйся, от Бога повеление и власть человеком помогати прие́мляй;

радуйся, молитвы наша к стопам Вседержителя и Богородицы вознося́й.

Радуйся, сердца́ жесто́кая благодатно преобража́яй;

радуйся, огнь веры истинныя и любве нелициме́рныя возгрева́яй.

Радуйся, яко тобою бездну милосердия Божия призываем;

радуйся, яко тобою спасение вечное улучи́ти ча́ем.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 3

Си́лою благода́ти Божия приял еси власть недуги исцеля́ти и бе́сы изгоня́ти, святый архангеле Божий Рафаиле, яко прослави тя всемогущий Бог многими чудотворе́нии; мы же, на сие взирающе, усердно притекаем к предста́тельству твоему, во еже исцеления прия́ти недугов наших телесных, па́че же душевных, и усердно просим тя: не остави нас всеси́льною помощию твоею в борьбе с грехом и соблазнами мира сего, да беспреткнове́нно путь наш земной пре́йдем и в радости духовной ку́пно с тобою воспоем Триеди́ному Богу благода́рственную песнь: Аллилу́ия.

Икос 3

Иму́ще тя великаго помощника и крепкаго побо́рника на сопроти́вныя силы, молим тя, архангеле Рафаиле, бу́ди нам покровитель на всех путе́х жизни на́шея, да со благодарением взываем ти сице:

Ра́дуйся, паче всего ина́го о Бозе мыслити наставля́яй;

радуйся, волю Его любити и творити подвиза́яй.

Радуйся, заповедь о любви к ближнему исполняти нас науча́яй.

радуйся, миром и кротостию души наши исполня́яй.

Радуйся, дух милосердия в сердцах наших воскреша́яй;

радуйся, от пле́вел ненависти их очища́яй.

Радуйся, от всякаго зла и греха нас сохраня́яй;

радуйся, в добродетели терпения нас утвержда́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 4

Бу́ри искушений и бед изба́ви нас, путеводи́телю наш, Богом данный, и не остави нас беспомо́щных в скорбныя дни житейских испытаний и болезней, яко от Бога премудраго тя ко́рмчаго жизни нашея стяжа́хом; сего ради егда волны мирских попечений, страх и трепет смерти объе́млют нас, на тя, арха́нгеле святы́й, по Бо́зе надежду возлага́ем всерадостно, у тебе ча́юще тихое пристанище спасения обрести́, и благодарственно поем о тебе Вседержителю: Аллилу́ия.

Икос 4

Слы́шав Всемилосердный Господь наш слезныя горячия молитвы верных слуг Своих – праведнаго Тови́та и страждущия от насилия демонскаго девы Са́рры, благоизволи послати к ним тя, всеславный Рафаиле, да вся потре́бная им да́руеши, и в вере, благочестии и милосердии к ближним их утверди́ши. Мы же, вся сия ныне помина́юще, просим тя, арха́нгеле Божий, твоею молитвою исцели и нас, грешных, да благода́рственно зовем ти:

Ра́дуйся, в явлениях твоих образ милосердия Божия яви́вый;

радуйся, ве́стниче Божий, дивная величия Господня верным откры́вый.

Радуйся, исто́чниче Божий, жажду духовную многих утоли́вый;

радуйся, всех к тебе прибегающих милостию твоею покрыва́яй.

Радуйся, от домашния вражды единокро́вныя миром огражда́яй;

радуйся, друга друга тяготы́ носити нас науча́яй.

Радуйся, стра́ждущим усердно служити нас подвиза́яй;

радуйся, на вся блага́я и душеполе́зная нас наставля́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 5

Богоявле́нною звездо́ю путеводною был еси отроку Тови́и, егда отец посла его к сроднику своему на страну далече. И не то́кмо спутник добрый был еси ему, обаче и врачева́тель искусный, егда повелел еси ему в реце́ рыбу изловити и изъяти из нея́ сердце, печень и желчь, во еже асмоде́я, демона–губителя, каждением сим от благочестивыя девы Са́рры отгнати и слепаго Тови́та желчию уврачева́ти. За таковую убо милость Божию к ним воспеша ти́и Го́сподеви благодарственную песнь: Аллилу́ия.

Икос 5

Ви́дим тя взором духо́вным, всехва́льный арха́нгеле Рафаи́ле, у Престола Божия в вели́цей славе предстоящаго и за нас грешных молящагося, и просим тя: буди и нам спутник, якоже Тови́и, в жизни нашей многостра́дальней, сохраняя нас от греха и всякаго злаго обстояния, от врагов видимых и невидимых, да возмогли́ бы́хом и мы в здравии, мире и благоденствии славити Отца Небеснаго, и тебе, святый наш покровителю, величати сице:

Ра́дуйся, отроку Товии путь безмятежен сотвори́вый;

радуйся, мудрый и добрый советода́тель ему бы́вый.

Радуйся, путеше́ствовати хотящим добрый спу́тниче и руководи́телю;

радуйся, путей покаяния и спасения мудрый сказа́телю.

Радуйся, от похоти себялю́бия нас благодатно исцеля́яй;

радуйся, к земным богатствам сердцем не прилепля́тися науча́яй.

Радуйся, сокровища нетле́нная искати нас побужда́яй;

радуйся, за вся Творца благодарити нас наставляяй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 6

Пропове́дует весь мир христианский служение твое человекам, яко ты еси, арха́нгеле, провозвестник суде́б Божиих и всеблагомо́щный молитвенник за ны ко Господу. За таковое служение твое всему роду нашему благодарным сердцем и усты́ поем Богу, благоизво́лившему послати нам ангелы Своя: Аллилу́ия.

Икос 6

Возсия́л еси, светоно́сный архангеле, яко светильник лучеза́рный и богоно́сный, егда возвестил еси праведному Тови́ту, яко ты еси един от седми́ святых ангелов, иже приносят молитвы святых и входят пред славу милосе́рднаго Бога нашего, и заповедал еси всем верным, яко подобает спасения ради ми́лостыню творити, Го́сподеви моли́тися усердно и славосло́вити всесвятое имя Его; и тако, совершив волю Божию, восше́л еси во обители небесныя к Посла́вшему тя. Сего ради и мы, смиренно покланя́ющеся Творцу нашему, в радости духовной приносим тебе славосло́вия сия:

Ра́дуйся, вы́ну пред Господем за всех больных и страждущих хода́тайствуяй;

радуйся, просвещением Боже́ственным умы и сердца́ наша озаря́яй.

Радуйся, яко тобою истина Христова при́сно утверждается;

радуйся, яко тобою лицеприятие и человекоуго́дие посрамляется.

Радуйся, врачей премудростию и человеколюбием обогаща́яй;

радуйся, богатых в милосердии и благотворе́нии утвержда́яй.

Радуйся, бедным отраду и вспоможение всемилостиво да́руяй;

радуйся, к творению дел благих всех нас усердно подвиза́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 7

Хотя́ Человеколю́бец Господь явити в тебе, преславный Рафаиле, Свое неизреченное к людем милосердие, показа тя яко воистину светило многосве́тлое: скорым бо твоим ходатайством ты многая чудеса во дни Ветхаго Завета совершил еси, обаче и в наше преско́рбное и многосу́етное время не оставляеши нас предста́тельством твоим и подвиза́еши Го́сподеви умиленно взывати: Аллилу́ия.

Икос 7

Но́вое чудо сотворил еси, светоза́рный Рафаиле, егда, явлься преподобному Макарию Ри́млянину, указал еси ему место благослове́нное, идеже надлежа́ло ему совершити подвиги своя, и во дни старости посетил еси угодника сего, избавление от искушения тяжкаго ему даровав. Мы же, ныне вся сия воспомина́юще, просим тя, архангеле святый: утверди и нас в вере во всемогу́щество и милосердие Творца нашего, и приими́ милостиво приносимая ти с верою и любовию велича́ния сия:

Ра́дуйся, несумне́нный покрове от бра́ней и упокоение;

радуйся, преподо́бных Христовых утешение.

Радуйся, кротких нравом святое благословение;

радуйся, молитвами твоими нас преобража́яй.

Радуйся, от глада духовного всех нас изба́вляяй;

радуйся, любви к Божию творению нас науча́яй.

Радуйся, образ Божий в ближнем зрети наставля́яй;

радуйся, нрав гневли́вый на кроткий пременя́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 8

Стра́нно и неудобоприя́тельно су́етному миру слышати, ка́ко молитвами твоими, богоно́сный архангеле, богатство милосердия Божия изливается на всех с верою притека́ющих к небесному покрови́тельству твоему. Мы же, славяще Троицу Святую, давшую ти благодать сию, умиле́нно Творцу нашему поем: Аллилу́ия.

Икос 8

Всем хо́щеши спасения, всеблагий наш покровителю, святый архангеле Рафаиле, твоими бо хода́тайствы и молитвами вся полезная нам да́руеши: ибо тобою па́губа отгоняется, здравие возвращается, мир и благоденствие водворяются на земли́, понеже на Небесе́х при́сно предста́тельствуеши о нас. Сего ради просим тя: помози́ нам, заступниче наш, на жи́зненном пути нашем, и молися Господеви о всех вопиющих тебе си́це:

Ра́дуйся, слепых зря́чими сотворя́яй;

радуйся, глухим слух и немым язык отверза́яй.

Радуйся, хребты сокрушенныя укрепля́яй;

радуйся, кости поврежденныя исправля́яй.

Радуйся, хромым радость хождения возвраща́яй;

радуйся, сухия руки и ноги то́ки жизненными исполня́яй.

Радуйся, раны огненныя и смра́дныя стру́пы телесныя исцеля́яй;

радуйся, разума лишившимся молитвами твоими ум подава́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 9

Вся́кия беды́, ско́рби и напа́сти избавляя нас, святый арха́нгеле, твоими к Богу теплыми молитвами, сотвори́, да в претру́дном земном житии́ нашем спасения вечнаго достигнем и с тобою ку́пно в селении праведных воспое́м Го́сподеви: Аллилу́ия.

Икос 9

Вети́йствующий язык не может изрещи́ всю славу твою на небеси́, святый архангеле Рафаиле, яко с огненными лики небесных сил предстои́ши престолу Царя царствующих и Господа господствующих, умоляя Его благость и милосердие о чтущих тя людех, взывающих ти сице:

Ра́дуйся, ангелов нача́льниче и человеков наста́вниче и заступниче;

радуйся, да́ры Духа Святаго стяжати нам помога́яй.

Радуйся, свято и праведно Богородицу почитати науча́яй;

радуйся, всем любящим Господа тихую радость на сердце полага́яй.

Радуйся, дружбу и любовь между христианами укрепля́яй;

радуйся, о благостоянии святых Божиих Церквей Христа умоля́яй.

Радуйся, мона́шествующих похвало и утверждение;

радуйся, мирян в благочести́вом житии укрепление.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 10

Спасти́ся хотящим нам, буди помощник тверд, архангеле Рафаиле, избавляя нас и храня от всяких бед и напастей, наипаче же от грехопаде́ний наших, лишающих нас благодати Божия. Того ради от сетей бесо́вских тобою избавля́еми, благодарным сердцем и усты́ зовем Спасителю нашему: Аллилу́ия.

Икос 10

Стена́ еси крепкая и ограждение неодоли́мое являешися всем прибегающим к твоему заступлению и по́мощи, архангеле Божий Рафаиле; сего ради молим тя: сохраняй нас от коварства врагов видимых и невидимых кро́вом крил твоих. Вси же исцеле́ннии и в пути ше́ствующии, тобою охраняеми, благодарственно взывают тебе сице:

Ра́дуйся, силою Божиею козни диавола и аггелов его разруша́яй;

радуйся, полки́ их низлага́яй и безсилие их явля́яй.

Радуйся, от греховных навыков сердца́ наша свобожда́яй;

радуйся, всякую печаль от чтущих тя удаля́яй.

Радуйся, в вере и благочестии нас утвержда́яй;

радуйся, светом любве нелицеме́рныя нас озаря́яй.

Радуйся, заповеди ева́нгельския исполня́ти нас наставля́яй;

радуйся, на славосло́вие Божие всех нас созыва́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 11

Пе́ние Пресвяте́й Троице на небесе́х непрестанно воспевают всесла́внии архангели и вси девять чино́в ангельских, со страхом глаго́люще: «Свят, Свят, Свят Господь Савао́ф, испо́лнь небо и земля славы Твоея́!» С ними же и ты, светоза́рный архангеле Рафаиле, пребыва́еши в славосло́вии. Мы же, вся сия ныне помина́юще, просим тя: сподоби и нас на земли́ чистым сердцем и усты́ такожде воспевати Триеди́ному Богу хвалебную песнь: Аллилу́ия.

Икос 11

Светоприе́мный проповедник истиннаго света явля́ешися, святый архангеле Божий, просвещаеши бо сердца́ верных, и к разуму Божественному вся наставля́еши, и пути́ спаси́тельныя нам отверзаеши; сего ради молим тя: помози нам воспряну́ти от сна греховнаго и напо́лнити сосуды души наших еле́ем дел благих, исполни же нас духа прему́дрости Божия, сердца́ наша в любви ко Христу и ближним нашим утверди, и приими́ от нас похвалы сия:

Ра́дуйся, немощны́х духом силою благодати Божия исполня́яй;

радуйся, изнемогающих от уныния и скорбе́й всеоружием веры и надежды облека́яй.

Радуйся, на милость Божию уповати нас преславно наставля́яй;

радуйся, младенцев воспитание и благодатное хране́ние.

Радуйся, отроко́в во благочестии преславное укрепле́ние;

радуйся, дев и юношей в целомудрии утвержде́ние.

Радуйся, супругов в любви и единомыслии сохраня́яй;

радуйся, старцем отраду и утешение посыла́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 12

Благода́ть ве́лию приял еси от Бога целити всякий недуг и вся́ку язву в людех, о великий архангеле Рафаиле. Подаждь убо и нашим душа́м и телесе́м исцеление от недугов, нас гнетущих, да Богу, дарова́вшему нам такова́го помощника и врачева́теля, благодари́вше воспоем: Аллилу́ия.

Икос 12

Пою́ще многообра́зная твоя чудеса, во спасение наше соде́янная, хвалим тя, святый покрови́телю и те́плый предста́телю о нас пред Богом, и просим тя: не оста́ви у́бо нас зде, в земно́м нашем странствии, тамо же, в день Страшнаго Суда Божия, буди нам крепкий заступник, да безпреткнове́нно пре́йдем мытарства злых духо́в и Царствия Небеснаго наследники соделаемся; ныне же приими́ ми́лостивно величания сия:

Ра́дуйся, всех приходящих к тебе благодатию озаря́яй;

радуйся, теплотою любве твоея нас согрева́яй.

Радуйся, молитвами твоими от вечныя погибели нас избавля́яй;

радуйся, от внезапныя смерти и кончины лютыя нас изыма́яй.

Радуйся, в смертный час всем нам благонаде́жный помо́щниче;

радуйся, от насилия демонского многомощный наш защи́тниче.

Радуйся, от обычаев душетленных сердца́ наша отвраща́яй;

радуйся, нравы добрыя и благоче́стие в нас насажда́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 13

О пресла́вный арха́нгеле Бо́жий Рафаи́ле! За преди́вное служе́ние твое́ ро́ду челове́ческому приими́ от нас гре́шных и недосто́йных сие́ ма́лое тебе́ хвале́ние и благодаре́ние, и покры́й нас крыло́ма твои́ма от всех враг ви́димых и неви́димых, умоли́ же Христа́ Бо́га сподо́битися нам христиа́нския ми́рныя кончи́ны, изба́витися ве́чных мук и всели́тися во оби́телех Отца́ Небе́снаго, да ку́пно с тобо́ю и со все́ми святы́ми ра́достно воспое́м Царю́ Сла́вы: Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

Икос 1

Арха́нгели и а́нгели и вся во́инства небе́сная, предстоя́ще престо́лу Святы́я Тро́ицы, непреста́нно славосло́вят Творца́ небесе́ и земли́. С ними́ же и ты, всесла́вный Рафаи́ле, воспева́еши ги́мны хвале́бныя Вседержи́телю. Приими́ у́бо и от нас земноро́дных с любо́вию и наде́ждою приноси́мая ти велича́ния си́я:

Ра́дуйся, венце́м побе́дным па́че звезд на небеси́ блиста́яй;

ра́дуйся, тимпа́не сладкозву́чный, сла́ву Бо́жию бряца́яй.

Ра́дуйся, лю́тых и неисце́льных неду́гов теле́сных враче́вателю;

ра́дуйся, не́мощей и страсте́й душе́вных цели́телю.

Ра́дуйся, всем приходя́щим к тебе́ благ преизоби́льный пода́телю;

ра́дуйся, от теплохла́дия и малове́рия нас пресла́вный изба́вителю.

Ра́дуйся, неве́рующих в Про́мысл Бо́жий в ве́ре утвержда́яй;

ра́дуйся, от сна грехо́внаго ду́ши на́ша пробужда́яй.

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Кондак 1

Избра́нный Бо́гом от во́инства небе́снаго на служе́ние ро́ду челове́ческому, Арха́нгеле Бо́жий Рафаи́ле, и чудесы́ вели́кими и сла́вными на земли́ возсия́вый, моли́ Христа́ Бо́га вся́ких искуше́ний, бед и наве́тов вра́жеских избе́гнути нам и насле́дники Ца́рствия Небе́снаго соде́латися, да ра́достными пе́сньми с любо́вию восхваля́ем тя, небе́снаго предста́теля и засту́пника на́шего, зову́ще:

Ра́дуйся, святы́й арха́нгеле Рафаи́ле,

цели́телю неду́гов на́ших

и моли́твенниче о нас пред Бо́гом.

Молитва

О святы́й сла́вный арха́нгеле Бо́жий Рафаи́ле, ско́рый помо́щниче и те́плый пред Бо́гом о нас засту́пниче и моли́твениче! Предстоя престолу Превятыя Троицы, испроси нам у Господа прощение согрешений наших: да преложит Он на милость гнев Свой праведный, грехов ради наших дви́жимый на нас. Не остави же, о архангеле Божий, нас и ты помощию и заступлением твоим, днесь прославляющих имя твое святое. Аще и многогре́шни есмы́, оба́че не хо́щем в беззакониях наших погибнути. Укрепи благодатию Госпо́днею слабую волю нашу на дела благая. Буди и нам, якоже отроку Тови́и, путеводи́тель и советода́тель в нашем многоско́рбнем житии. Помози нам избавитися от гнетущих нас болезней, якоже ты избавил еси Тови́та от многолетныя его слепоты. Егда же приблизится час сконча́ния нашего, не остави нас, архангеле Божий, беззащитных на воздушных мыта́рствах проти́ву духо́в злобы, прегражда́ющих восход в го́рняя, да соблюда́еми тобою достигнем обителей небесных, и купно с тобою и со всеми святыми прославим Единосу́щную и Живонача́льную Троицу, Отца и Сына и Свята́го Духа, во веки веков. Ами́нь.

Ака́фист свято́му А́нгелу, неусыпа́емому храни́телю челове́ческия жи́зни

Кондак 1

Избра́нный от Го́спода Бо́га на хране́ние души́ моея́ и телесе́, святы́й Ангеле, похва́льная ти воспева́ти дерза́ю, недосто́йный раб твой; ты же, я́ко име́яй дернове́ние к Царю́ Небе́сному, от вся́ких мя бед и скорбе́й, от враг ви́димых же и неви́димых защити́, зову́ща:

Ра́дуйся, А́нгеле Госпо́день, неусыпа́емый храни́телю мой.

Икос 1

А́нгеле святы́й, по́сланный с Небесе́, во е́же храни́ти мя и руководи́ти во всей жи́зни мое́й, припа́дая молю́ ти ся: сам наста́ви и вразуми́ мя, начина́юща от серде́чныя любве́ и усе́рдия возглаша́ти пе́сненныя ти хвалы́:

Ра́дуйся, А́нгеле Бо́жий, предста́телю мой у Пресвяты́я Тро́ицы;

радуйся, Царя ца́рствующих безпло́тный во́ине.

Радуйся, Го́спода госпо́дствующих небе́сный слуго́;

радуйся, у́мных и невеще́ственных слуг Его сожи́телю.

Радуйся, творя́й при́сно во́лю Влады́ки своего́;

радуйся, прие́мый от Бо́га повеле́ние и власть храни́ти ду́шу мою.

Радуйся, никогда́же отлуча́яйся мене́, гре́шнаго;

радуйся, вы́ну спребыва́яй ми, недосто́йному.

Радуйся, соблюда́яй мя на всех путе́х мои́х;

радуйся, сохраня́яй мя от вся́каго зла.

Радуйся, от Бо́га да́нный ми руководи́телю на путе́х жития́ моего́;

радуйся, благи́й мой наста́вниче.

Ра́дуйся, Ангеле Госпо́день, неусыпа́емый храни́телю мой.

Кондак 2

Ви́дев человеколюби́вый Господь, яко, по прегреше́нии пра́отца нашего Адама, вси челове́цы удо́бь прекло́нни суть ко греху, по Своей неизрече́нней милости послал есть во всю землю святых Ангелов и коему́ждо от человек приста́ви хранителя. Исполня́юще убо повеление Влады́ки своего, святи́и Ангели всегда готови суть помога́ти нам, богоуго́дно поющим: Аллилу́ия.

Икос 2

Ра́зуму моему просвещение свыше исхода́тайствуй, святый Ангеле, да возмогу позна́ти, что есть воля Божия, благая и угодная и совершенная, и сердце мое направи, еже со усердием творити ю; тебе же, хранителя моего, да не престану восхваляти сицевы́ми гла́сы:

Радуйся, воспламеня́яй сердце мое любовию к Богу, Создателю моему;

радуйся, возбужда́яй мя на всяк день же и час приносити Ему молитвы, прошения и благодаре́ния.

Радуйся, я́коже стражем верным, страхом Господним душевный мой дом огражда́яй;

радуйся, вся помышления моя к распятому за грехи мира Спасителю устремля́яй.

Радуйся, страдания Его и крестную смерть в память мою вперя́яй;

радуйся, воспоминанием Страстей Господних блюсти́ся от грехов мя поуча́яй.

Радуйся, благода́тнаго свыше осенения Святаго Духа просити мя наставля́яй;

радуйся, яко на кроткия точию и смиренныя сердцем ми́лостивне призира́ти Ему, Уте́шителю, уверя́я мя.

Радуйся, мыслию о вездесу́щии Божии всюду окружа́яй мя;

радуйся, всеве́дение Его умным очесем моим представля́яй.

Радуйся, милосе́рдием Его к кающимся грешником сердце мое утеша́яй;

радуйся, правосу́дием Его к ожесточе́нным и нераска́янным душу мою устраша́яй.

Ра́дуйся, Ангеле Госпо́день, неусыпа́емый храни́телю мой.

Кондак 3

Си́лу Боже́ственныя благодати испроси́ ми, хранителю мой Ангеле, во еже неуклонно и непреткнове́нно ходити ми спасительным путем Христовых заповедей, сердцем же и усты́ непрестанно славити всесвятое имя Бога нашего и пети Ему: Аллилу́ия.

Икос 3

Имам тя, богоизбра́нный покровителю мой, якоже светлую зарю, просвеща́ющую души́ моея́ темноту и разгоня́ющую мрак сердечнаго неве́дения моего; сего ради, со умилением припа́дая, молю ти ся, да и вся моя чу́вствия, потемне́нная страстьми́, очистятся, во еже не блужда́ти ми во тьме греховней. Пречу́дную же светлость твою воспеваю си́це:

Радуйся, звездо́ Невечерняго Света, от трисия́ннаго Божества возсиявшая и мене́ вы́ну озаря́ющая;

радуйся, пресветлая луче́, помраченная грехми́ сердечная ми очеса́ осиява́ющая.

Радуйся, яко тщи́шися направити мя на истинный путь во тьме беззаконий заблужда́ющаго;

радуйся, яко предлага́еши ми за́поведи Господни, а́ки зерца́ло для всея жизни моея.

Радуйся, яко поставля́еши ми закон Божий, аки светильник нога́ма мои́ма и свет стезям моим;

радуйся, яко словес Ева́нгелия Христо́ва в сладость послу́шати поуча́еши мя.

Радуйся, яко учению Божественнаго Учителя моего и Господа несумне́нно веровати побужда́еши мя;

радуйся, яко в повинове́нии уставом святы́я Церкве укрепляеши мя.

Радуйся, яко правилом и преданием святых апостол и отец покаря́тися наставляеши мя;

радуйся, яко во испове́дании святыя и православныя веры утвержда́еши мя.

Радуйся, яко за сие испове́дание и на смерть готова мя быти убеждаеши;

радуйся, яко еретиком и отступником истинныя Церкве сообщатися возбраня́еши ми.

Ра́дуйся, Ангеле Госпо́день, неусыпа́емый храни́телю мой.

Кондак 4

Бу́ря житейского моря сокрушает духовный мой корабль волна́ми мирских попечений, и мир убогия души моея мяте́тся, и где обрящу тихое приста́нище спасения? Токмо на тя по Бозе возлагаю надежду, храни́телю мой Ангеле, яко премудраго тя ко́рмчаго в мысленных бурях, смущающих мя, стяжа́х: благода́рственне убо пою Богу моему: Аллилу́ия.

Икос 4

Слы́шаще и зря́ще тя, божественный Ангеле, крепкаго моего блюстителя, зло́бнии ду́си поднебе́снии не смеют приближитися ко твоей пречистей светлости и душегуби́тельная ми па́кости де́яти. Сего ради смиренно молю тя: не отступи от мене за невоздержа́ние мое, но при́сно от лукаваго тех ловительства и ко́зней соблюдай мя, со умилением глаголюща:

Радуйся, крепким кровом крил твоих остеня́яй мя и покрыва́яй;

радуйся, о́крест мене с пламенным мече́м присно ополча́яйся.

Радуйся, проти́ву князя тьмы во бра́ни ми посо́бствуяй;

радуйся, лукавых его служителей побеждати ми помога́яй.

Радуйся, отгоня́яй от мене душепа́губныя демоны, аки хищныя птицы;

радуйся, вразумля́яй мя бесовския ко́зни познати, аки лукавыя лисицы.

Радуйся, зверообра́зная тех на ум и сердце мое нападения отрева́яй;

радуйся, порождения их, гордость и ненависть, из сердца моего исторга́яй.

Радуйся, зависть и злопомне́ние от мыслей моих прогоня́яй;

радуйся, во отражение злых помысло́в крестным зна́мением себе огра́ждати побужда́яй мя.

Радуйся, на а́спида и васили́ска небоя́зненно наступати укрепляяй мя;

радуйся, име́яй непобедимое оружие проти́ву всех врагов моих.

Ра́дуйся, Ангеле Госпо́день, неусыпа́емый храни́телю мой.

Кондак 5

Боготе́чней и лучеза́рней звезде, путеводившей дре́вле волхвы́ на поклонение ро́ждшемуся в Вифлее́ме Спасителю мира, дерзаю уподо́бити тя, благи́й мой хранителю: неотлучным бо и светоносным твоим ми спребыва́нием указу́еши ми правый путь, веду́щий в Го́рний Вифлее́м, в Небе́сное Ца́рствие, да тамо с лики Арха́нгел и Ангел сподоблюся воспевати Преве́чному Царю Славы: Аллилу́ия.

Икос 5

Ви́дя мя но́щию содержима мрачною и темным облаком страстей покрыва́ема, святый хранителю души́ моея́, не огорчися, не остави мене, но подража́яй долготерпению Спасителя моего, пожди́ еще, возбуждая мя к покаянию, до́ндеже очеса́ моя излию́т источники слез на омытие душевныя нечистоты́ моея́. О сем смиренно молю тя и глаголю:

Радуйся, яко вы́ну прино́сиши Богу о мне гре́шнем молитвы своя, яко кади́ло пред Ним благово́нное;

радуйся, яко присно хода́тайствуеши пред Создателем моим о е́же спасти́ся ми.

Радуйся, яко праведный гнев Его, дви́жимый на мя, своим предста́тельством отвраща́еши;

радуйся, яко просиши всемилосе́рдаго Господа подати прощение злых моих деяний.

Радуйся, яко умилостивля́еши Его благость, да не погуби́т мя со беззаконьми моими;

радуйся, яко непрестанно мо́лишися Искупи́телю моему, да дарует ми время ко исправлению.

Радуйся, яко возбужда́еши мя в покаянии препроводи́ти вся дни живота моего;

радуйся, яко внушаеши ми желание, да вы́ну каюся пред Го́сподем во всех моих прегрешениях.

Радуйся, яко вразумляеши мя на всякое время мысленно себе испытова́ти и во гресех моих испове́датися;

радуйся, яко влагаеши в сердце мое сокрушение и скорбь, зане прогневах Преблагаго Бога моего.

Радуйся, яко побуждаеши мя оплакивати окая́нное и скверное житие мое;

радуйся, светоносный и неумолкающий хода́таю спасения моего.

Ра́дуйся, Ангеле Госпо́день, неусыпа́емый храни́телю мой.

Кондак 6

Пропове́дую велегласно при́сное твое, хранителю мой Ангеле, о мне, грешнем, попече́ние: в ско́рбех бо и напа́стех, я́же в сем многомяте́жнем мире смущает мир души́ моея́, явля́еши ми ся скорый уте́шитель, вразумля́я мя, яко вся сия низпосыла́ются от премудраго Создателя, аки врачевство́ проти́ву душевных недугов моих, и поучая благоде́ющему сице Небесному Врачу воспевати: Аллилу́ия.

Икос 6

Возсиява́ет в души́ моей, омрачаемой скорбию и унынием, свет благода́тнаго утешения, и сердце мое исполня́ется веселия и радости, егда непреста́нными твоими, святый Ангеле, наставлении возбужда́ем дерзаю, яко мыта́рь, вопити к щедрому Богу, да милостив будет и простит ми прегрешения моя. Не премолчи убо, наставниче мой, вразумляя и укрепляя мя, зовуща ти:

Радуйся, помога́яй ми благий яре́м спасительнаго терпения с любовию носити;

радуйся, в беда́х и заключениих упованием на Господа Бога укрепля́яй мя.

Радуйся, скорби и болезни мужественне преодолева́ти мя поуча́яй;

радуйся, всякую печаль и уныние от сердца моего отгоня́яй.

Радуйся, проти́ву врага, в сеть отчаяния уловити мя хотяща, бра́тися побуждаяй мя;

радуйся, словесем апостола, яко вси хотящии благоче́стно жити гони́ми будут, веровати убежда́яй мя.

Радуйся, образ терпения и злострадания прияти ми пророки и апостолы внуша́яй;

радуйся, на лик мученик и исповедник, за Христа до излияния кро́ве своея́ подвиза́вшихся, во утеше́ние ми показу́яй.

Радуйся, страдания Самаго Спасителя и Господа вы́ну умным очесе́м моим представля́яй;

радуйся, наде́ждою будущаго воздаяния сердце мое услажда́яй.

Радуйся, всера́достным ожида́нием вечных благ душу мою оживля́яй;

радуйся, благи́й и присный мой уте́шитель.

Ра́дуйся, Ангеле Госпо́день, неусыпа́емый храни́телю мой.

Кондак 7

Хотя́й всем человеком спастися, премилосе́рдый Создатель мой посла Тя, Ангела Своего, яко верна ми стра́жа и пе́стуна до́бра во всем житии моем, да всюду вспомоществу́еши ми святыми твоими вдохнове́нии, защищаеши проти́ву ко́зней диавола и предуготовля́еши мя де́лы благими вни́ти с мудрыми девами в Небесный Чертог, с богокра́сною пе́снию: Аллилу́ия.

Икос 7

Но́вую показу́ет благость Господь и Владыка мой на мне, непотре́бнем и паче всех гре́шнейшем рабе Своем: презирая бо лютая моя и тяжкая, не погубил мя есть со беззако́ньми моими даже до настоящаго дне и часа́, но долготерпя на мне, ми́лостивне ожидает моего обращения и серде́чнаго покаяния. Верую, благи́й хранителю мой, яко твоим присным пред Богом за мя ходатайством досе́ле храним есмь: те́мже, любовию к тебе подвиза́емый, взываю:

Радуйся, яко обурева́ющася мя в мори жития сего от коне́чнаго потопления соблюдаеши;

радуйся, яко из рова беззаконий моих рукою твоея́ по́мощи мя исхищаеши.

Радуйся, яко греховный сон душевре́дныя моея лености отряса́еши;

радуйся, яко ум мой, омраченный небреже́нием, светлым твоим присутствием озаряеши.

Радуйся, яко хладное и мало не угасшее сердце мое молитвами воспламеня́ти ми помогаеши;

радуйся, яко на славословие Божие присно мя возставля́еши.

Радуйся, яко настрояеши глас мой к песнопе́ниям, и́миже достойно и праведно есть хвалити Творца всяческих;

радуйся, яко поучаеши мя прославляти Господа моего не усты́ то́чию, но и сердцем.

Радуйся, яко ко исполнению пресвяты́я воли Его возбуждаеши мя;

радуйся, яко самоотверже́нию и отречению моея злыя воли приобучити мя тщишися.

Радуйся, яко глубину, простоту и а́гнчу кротость стяжати ми преи́скренне желаеши;

радуйся, яко о еже младенческому незлобию и старческому доброрассужде́нию дарова́тися ми хода́тайствуеши.

Ра́дуйся, Ангеле Госпо́день, неусыпа́емый храни́телю мой.

Кондак 8

Стра́нен и пришле́ц есмь на земли́ сей: житие мое суетно и маловре́менно есть; аз же, окаянный, смерти безве́стное во ум никогда́же прие́млю, ни помышляю о Страшнем Суди́щи, в немже и́мам Праведному Судии предстати и дати ответ о всяком деле же и слове. Темже молю тя, души́ моея хранителя, возбуди́ мя скоро от сна греховнаго, да не постигнет мя час смерти неиспра́вленна и да сподо́блюся испросити от Всеми́лостиваго Бога беззаконием моим прощение и во гласе ра́дования воспевати Ему: Аллилу́ия.

Икос 8

Все́х Господь и Создатель мой, егда назна́менует ми преста́витися от жития сего, ты, благи́й хранителю мой, прови́дяй грозныя му́ки, духово́м злобы и нераскаянным грешником угото́ванныя и мене ожида́ющия, покры́й мя твоего милосердия крила́ми, я́коже орел птенцы своя, и внегда́ исчезати от мене духу моему, да узрю́ тя близ мене́ предстояща и лютыя враги отгоняюща. О сем со умилением молю ти ся, веща́я сице:

Радуйся, умным очесе́м моим горький и страшный час смертный представля́яй;

радуйся, яко неизбежен, вкупе же и безвестен час той присно ми напомина́яй.

Радуйся, на ки́йждо день а́ки уже на последний жития моего взирати мя поуча́яй;

радуйся, на всякое время ко исходу во ин мир мя приуготовля́яй.

Радуйся, душевное умиление и сердечное сокрушение во мне рожда́яй;

радуйся, вы́ну желаяй ми, да поне́ при кончине дней моих покаюся.

Радуйся, любити мир и яже в мире ми воспреща́яй;

радуйся, пристрастие к тленному богатству из сердца моего искореняти помога́яй.

Радуйся, вся бла́га земная быти привременна и скоропреходя́ща ми показу́яй;

радуйся, яко вся красная мира сего кри́ну се́льному подобна суть, вразумля́яй мя.

Радуйся, славы человечи, аки тени преходящия, искати возбраняяй ми;

радуйся, от единого Бога славы нетленныя в будущум веце взыскати побуждаяй мя.

Ра́дуйся, Ангеле Госпо́день, неусыпа́емый храни́телю мой.

Кондак 9

Вся́к грех соде́ях в житии́ сем, и весь живот мой во мнозе претек суете, к концу прибли́жихся: врази́ же мои устремляются на мя, а́лчуще поя́ти мя и низри́нути во глубину адову. Темже молю ти ся, благи́й мой хранителю, бу́ди ми защи́титель, егда́ и́мам преходити лютая мыта́рства, и безбедно доведи мя до врат Небеснаго Царствия, иде́же ли́цы ангельстии радостне срета́ют восклицающих: Аллилу́ия.

Икос 9

Вити́йствующий язык не может изрещи́, яже сотворил ми еси, святый хранителю мой, во всем житии моем: прие́м бо душу мою от купе́ли святаго крещения, хранил мя еси во младенчестве, учил и вразумлял еси во о́трочестве, соблюдал мя еси от поползновения ко грехом в возрасте юношестем, наставлял еси пришедша мя в мужество, охранял еси на всех путех моих даже до старости, обличая и утешая, всюду помогая н направляя на путь спасения. Сего ради благодарственно вопию ти:

Радуйся, яко никогдаже лишаеши мя твоея́ по́мощи и заступления;

радуйся, яко от сна востаю́ща мя подвиза́еши ко благодарению Господа, укрепляющаго силы моя.

Радуйся, яко начаток коего́ждо дне молитвою освящати мя поучаеши;

радуйся, яко воспреща́еши ми без молитвы к всеблагому Промысли́телю дерзновенно собою что начинати.

Радуйся, яко самонаде́яние из сердца моего истребити тщи́шися;

радуйся, яко сладчайшее имя Господа Иисуса Христа усты́ непрестанно произносити и во уме держати мя побуждаеши.

Радуйся, яко во всякое время ну́жная точию и полезная вещати язы́ком ми внушаеши;

радуйся, яко от празднословия, многоглаго́лания, паче же и кощунства мя удержава́еши.

Радуйся, яко яду́щу и пию́щу ми или ино что творя́щу присно спребываеши;

радуйся, яко воздержанию в пищи и питии́ приобучити мя пече́шися.

Радуйся, яко спяща мя хранити и врага, хотяща искусити мя сонными мечта́нии, отгоня́еши;

радуйся, яко воспяща́еши мя от любостра́стнаго стремления и во о́чию моею целомудренный стыд влагаеши.

Ра́дуйся, Ангеле Госпо́день, неусыпа́емый храни́телю мой.

Кондак 10

Спасти́ всех прише́дый Иисусе мой преблаги́й, со умилением молю Ти ся, Твоим милосердием прости моих злых премно́жество и безмерие, преклоняемый на сие боже́ственными мольбами Твоего невещественнаго служителя, его́же ми приставил еси из младенства, яко Человеколюбец, хранителя: да достоин явлюся внити в чертог славы Твоея́ и со духи праведных воспети: Аллилу́ия.

Икос 10

Стена́ тверда́ присно являеши ми ся, святый Ангеле, проти́ву ухищрений злобных врагов моих, ищущих вечныя погибели моея́ и разслабляющих душу мою леностию и самозабве́нием. Молю убо тя, хранителю мой, да твоим ходатайством сподоблюся при исходе души́ моея́ из телесе́ причастник быти пречи́стаго Тела и святейшия Кро́ве моего Спасителя, яко да, укрепився сею нетленною пищею и животворя́щим питие́м, безтрепетно прейду́ во ин мир, воспевая тя, моего благодетеля:

Радуйся, яко дана́ ти есть власть и сила отражати де́монская на мя нападения;

радуйся, яко прия́л еси от Бога крепость на побеждение невидимых врагов моих.

Радуйся, яко от всякаго злодейства и козней диавольских моги́й избавити мя;

радуйся, яко горьких мыта́рств начальника, лютаго миродержца нападения от мене отрева́еши.

Радуйся, яко, ограждаемый твоим присутствием, и́мам надежду в час смерти не устраши́тися мрачных лиц духо́в злобы;

радуйся, яко хранимый тобою, уповаю безбедно преити́ воздушная мыта́рства.

Радуйся, яко укрепляемый твоею помощию, ча́ю не удержа́н быти вне врат рая́, ми вожделе́ннаго;

радуйся, яко твое за мя предстательство сильно есть пред Богом, е́же не вве́ржену ми быти во тьму кроме́шную.

Радуйся, яко присно внушаеши ми умилостивля́ти Господа слезами покаяния, да избавлюся гее́нны адския;

радуйся, яко побуждаеши мя день и нощь моли́тися, да не послан буду со демоны мучитися.

Радуйся, неотступный мой руководителю и пе́стуне;

радуйся, крепкий мой засту́пниче и скорый помощниче.

Ра́дуйся, Ангеле Госпо́день, неусыпа́емый храни́телю мой.

Кондак 11

Пе́ние сие, а́ще и от усердия моего ти приноси́мое, святый хранителю мой, вем, яко не довольно есть ко изъявлению моего сердечнаго благодаре́ния за вся благая, яже ми сотворил еси и не престае́ши творити даже до сего дне и часа́; но и о сем молю ти ся, общаго ми с тобою Создателя уми́лостиви, да на Страшнем Суде Своем шу́ия части избавит мя и сподобит со всеми святыми воспевати Ему: Аллилу́ия.

Икос 11

Свети́льник мой угасе́, еле́я же благих дел, во еже возжещи́ и́, несть ми; и где обря́щуся аз, окаянный, сном греховным отягченный, егда постигнет мя внезапу полу́нощь, час кончины моея? Но да не услышу и аз, якоже юро́дивыя девы, грознаго гласа Жениха: не вем тя! Помози́ ми, неусыпаемый хранителю мой, наполнити сосуды души́ моея еле́ем благих дел, па́че же милосердия и смирения. Ныне же приими́ от мене сие́ пение:

Радуйся, Единаго Господа имети в разуме при́сно ми внуша́яй;

радуйся, заповедь о любви к Нему, преблагому, в сердце моем обновля́яй.

Радуйся, любити Его, Создателя, всем умом и всем помышлением мя побужда́яй;

радуйся, и к ближним искреннюю любовь мою богоуго́дну быти непрестанно ми напомина́яй.

Радуйся, любити их не словом или язы́ком, но делом и истиною мя поуча́яй;

радуйся, во всех ну́ждах их помогать желание ми влага́яй.

Радуйся, утешати скорбящих, заступати оби́димых мя наставля́яй;

радуйся, от имений своих уделяти бедным и неимущим сердце мое преклоня́яй.

Радуйся, и душу мою, по заповеди Спасителя, положити за дру́ги своя готову ми быти возбужда́яй;

радуйся, закрыва́яй очеса́ моя, еже не зрети ми прегрешения брата моего.

радуйся, не попуща́яй ми осуждати поползну́вшагося на грех ближняго моего;

радуйся, воспреща́яй ми я́ти веру оглаго́льником клевре́та моего.

Ра́дуйся, Ангеле Госпо́день, неусыпа́емый храни́телю мой.

Кондак 12

Благода́ть дана ти есть от Всемогущаго Господа, святый покровителю мой, еже хранити мя на всех путе́х моих, да не о камень ко́его соблазна преткне́тся нога моя, до́ндеже мя представиши Христу Богу спасе́на, Ему́же немо́лчно вся Силы Небесныя взывают: Аллилу́ия.

Икос 12

Пою́ Твое досточу́дное милосердие и многое снисхождение, быстродви́жный у́ме, безплотный слуго́ Господень: яко не гнуша́ешися греховныя моея́ смра́дности и не престае́ши приносити о мне, непотре́бнем, святыя молитвы своя ко святейшему престолу Триипоста́снаго Бога, еже не погибнути ми во веки, но Царствие Небесное наследовати. Благоволи́ у́бо прияти от душевных сокровищ моих приносимое ти песнопение:

Радуйся, яко воспоминанием грядущаго грознаго Суда Божия от грехов мя отрева́еши;

радуйся, яко душу мою, аки невесту, ко сре́тению прекраснаго Жениха Христа предуготовля́ти возбуждаеши мя.

Радуйся, яко при́сно желаеши достойна мя сотворити брачнаго чертога Его;

радуйся, яко вы́ну учи́ши мя возжигати светильник души́ моея́, да с мудрыми девами, душами праведных, вниду вонь.

Радуйся, яко греховныя одежды моея совлачи́тися побуждаеши мя;

радуйся, яко в ризу непорочности и чистоты облещи́ся ми способствуеши.

Радуйся, яко хода́тайствуеши, да на Страшнем Суде Христовом одесную Его стати сподо́блюся;

радуйся, яко умоля́еши благоутро́бие Божие, да лику избра́нных Своих сопричтет мя.

Радуйся, яко подвиза́еши на молитву ко Господу и сожи́телей твоих небесных, да всели́т мя с ними во Царствии Своем;

радуйся, добрый и бодрый блюсти́телю мой.

Радуйся, теплый о мне, грешнем, молитвенниче и благи́й предстателю;

радуйся, по Господе Бо́зе и Пресвятей Богородице крепкое мое упование.

Ра́дуйся, Ангеле Госпо́день, неусыпа́емый храни́телю мой.

Кондак 13

О пресла́вный и умный све́те, Ангеле Божий! Приими́ благодарственное сие и молебное пение, и, егда́ имам от земли востати на Суд, покажи тогда милосердие твое на мне, грешнем: предста́ни близ мене тих и радостен, надеждою спасения отъе́мля страх мой, да в селениих райских сподо́блюся вку́пе с тобою во веки веков воспевати преве́чному Царю Славы: Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

Икос 1

А́нгеле святы́й, по́сланный с Небесе́, во е́же храни́ти мя и руководи́ти во всей жи́зни мое́й, припа́дая молю́ ти ся: сам наста́ви и вразуми́ мя, начина́юща от серде́чныя любве́ и усе́рдия возглаша́ти пе́сненныя ти хвалы́:

Ра́дуйся, А́нгеле Бо́жий, предста́телю мой у Пресвяты́я Тро́ицы;

радуйся, Царя ца́рствующих безпло́тный во́ине.

Радуйся, Го́спода госпо́дствующих небе́сный слуго́;

радуйся, у́мных и невеще́ственных слуг Его сожи́телю.

Радуйся, творя́й при́сно во́лю Влады́ки своего́;

радуйся, прие́мый от Бо́га повеле́ние и власть храни́ти ду́шу мою.

Радуйся, никогда́же отлуча́яйся мене́, гре́шнаго;

радуйся, вы́ну спребыва́яй ми, недосто́йному.

Радуйся, соблюда́яй мя на всех путе́х мои́х;

радуйся, сохраня́яй мя от вся́каго зла.

Радуйся, от Бо́га да́нный ми руководи́телю на путе́х жития́ моего́;

радуйся, благи́й мой наста́вниче.

Ра́дуйся, Ангеле Госпо́день, неусыпа́емый храни́телю мой.

Кондак 1

Избра́нный от Го́спода Бо́га на хране́ние души́ моея́ и телесе́, святы́й Ангеле, похва́льная ти воспева́ти дерза́ю, недосто́йный раб твой; ты же, я́ко име́яй дернове́ние к Царю́ Небе́сному, от вся́ких мя бед и скорбе́й, от враг ви́димых же и неви́димых защити́, зову́ща:

Ра́дуйся, А́нгеле Госпо́день, неусыпа́емый храни́телю мой.

Молитва

О святы́й А́нгеле, храни́телю и покрови́телю мой благи́й! С сердцем сокрушенным и душею боле́зненною предстою ти, моляся: услыши мя, грешнаго раба своего (имя), с воплем крепким и плачем горьким вопию́щаго: не помяни беззаконий моих и неправд, имиже аз, окаянный, прогневля́ю тя по вся дни и часы, и ме́рзостна себе творю пред Создателем нашим Господем; явися мне милосерд и не отлучайся мене, сквернаго, даже до кончины моея; возбуди́ мя от сна греховнаго и посо́бствуй молитвами твоими прочее время живота моего без порока преити́ и сотворити плоды достойны покаяния, па́че же от смертных падений греховных соблюди мя, да не погибну во отчаянии, и да не порадуется враг о погибели моей. Вем вои́стину и усты́ испове́дую, яко никтоже таков друг и предстатель, защи́титель и поборник, якоже ты, святый Ангеле: предстоя бо престолу Госпо́дню, молишися о мне, непотребнем и паче всех грешне́йшем, да не изымет Преблаги́й души́ моея́ в день нечаяния моего и в день творения злобы. Не престай убо умилостивля́я премилосердаго Господа и Бога моего, да отпустит согрешения моя, яже сотвори́х во всем житии моем, делом, словом и всеми моими чувствы, и и́миже весть судьбами да спасет мя, да накажет мя зде по неизреченней милости Своей, но да не обличит и не истяжет мя она́мо по нелицеприятному правосудию Своему; да сподобит мя покаяние принести, с покаянием же божественное причащение достойне прияти – о сем па́че молю и такова́го дара всеусердно желаю. В страшный же час смерти неотступен бу́ди ми, благи́й хранителю мой, прогоняя мрачныя де́моны, иму́щия устрашити претрепетную душу мою; защити мя от тех ловления, егда́ и́мам преходити воздушная мыта́рства, да храним тобою, безбедно достигну рая́, ми вожделеннаго, иде́же лицы святых и горних Сил непрестанно восхваляют всечестное и великоле́пое имя в Троице славимаго Бога, Отца, и Сына и Свята́го Духа, Емуже подобает честь и поклонение во веки веков. Ами́нь.