Акафистник

Ака́фист святы́м цели́телем, бессре́бренником и чудотво́рцем

Кондак 1

Избра́ннии помо́щницы стра́ждущих, вра́чеве неду́гующих и чудотво́рцы преди́внии, святи́и безме́зднии цели́тели ми́лостивии, похва́льная воспису́ем вам, засту́пником на́шим и в ско́рбех уте́шителем. Вы же, я́ко иму́щии дерзнове́ние ко Всеми́лостивому Спа́су на́шему, изба́вите от страсте́й и боле́зней всех ве́рою и любо́вию воспева́ющих вам:

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Икос 1

А́нгелов и челове́ков Творе́ц избра́ вас, враче́й, цели́телей и чудотво́рцев свя́тое сосло́вие, я́ко любо́вию и сострада́нием ко всем лю́дем горя́щих, и дарова́ вам сугу́бую благода́ть, да бу́дете избавля́ти от бед, скорбе́й, боле́зней и вся́ких лю́тых искуше́ний всех чту́щих святу́ю па́мять ва́шу и с любо́вию восхваля́ющих вас та́ко:

Ра́дуйся, святы́й Проро́че, Предте́че и Крести́телю Госпо́день Иоа́нне, ду́ши на́ша покая́нием обновля́яй;

ра́дуйся, святы́й пра́ведный Симео́не, Богомладе́нца Христа́ на ру́це свои́ прие́мляй и ны́не всех младе́нцев Богодарова́нный храни́телю.

Ра́дуйся, святы́й апо́столе и евангели́сте Иоа́нне Богосло́ве, возлю́бленный Христо́в учениче́, лю́бящим и чту́щим тя любо́вию воздава́яй;

ра́дуйся, му́чениче Ло́нгине, от ка́пли кро́ве Го́спода о́чи свои́ исцели́вый и благода́ть обреты́й духо́вное прозре́ние лю́дем дарова́ти.

Ра́дуйтеся, святы́я му́ченицы Зинаи́до и Филони́лло, сро́дницы апо́стола Па́вла, сугу́бо боля́щим послужи́вшия;

ра́дуйтеся, священному́чениче Киприа́не и му́ченице Иусти́но, от бесо́в и злых челове́к ве́рным кре́пцыи засту́пницы.

Ра́дуйся, великому́чениче Дими́трие Солу́нский, ми́ро благово́нное всем боля́щим на исцеле́ние источа́яй;

ра́дуйся, Кеса́рие Назиа́нзине, царе́й благочести́вых врачу́, от мно́гих тя́жких неду́гов богому́дрый цели́телю.

Ра́дуйся, великому́ченице Варва́ро, а́гнице всеблаже́нная, от внеза́пныя сме́рти ве́рных избавля́ющая;

ра́дуйся, великому́ченице Екатери́но, де́во прему́драя, избра́нный сосу́де чистоты́, омраче́ние ума́ на́шего просвеща́ющая.

Ра́дуйся, великому́ченице Анастаси́е, неду́ги заключе́нных в темни́цех врачева́вшая и от мно́гих скорбе́й нас избавля́ющая;

ра́дуйся, му́ченице Фомаи́до, целому́дрия ра́ди ду́шу свою́ положи́вшая и плотски́я стра́сти побежда́ти лю́дем помога́ющая.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 2

Ви́дев Тя, Ма́ти Всепречи́стая, на Кресте пригвожде́нный Сын Твой и Бог, у Креста предстоящу и болезненно Ему состраждущу, возлюбленному ученику Своему апостолу Иоанну Тя в матерь нарече и сим весь род человеческий Тебе усынови, да будеши воистину Матерь всем скорбящим, страждущим, недугующим, в бедах и тяжких обстояниих сущим, Сына Твоего Христа Бога призывающим и поющим Ему: Аллилу́ия.

Икос 2

Ра́зум человеческий не может постигнути великаго Твоего милосердия, Пресвятая Владычице Богородице, Ты бо еси необоримая ограда, охраняющая ны от всяких болезней душевных и телесных и заступающая всех прибегающих к Тебе с молитвою, печальным утешение, скорбящим радование, обидимым Заступнице, бедствующим по́моще, больных Целительнице, грешных Споручнице. Темже имущи Матернее о всех попечение, благоизволила еси ускори́ти на помощь избранником Божиим, враче́м и целителем, и́хже память празднующе, воспеваем си́це:

Ра́дуйтеся, Пресвятыя Владычицы Богородицы избраннии служители;

радуйтеся, ча́да Ея́ вернии и возлюбленнии.

Радуйтеся, Заступницы усердныя рода христианскаго благоговейнии почитатели;

радуйтеся, воли Тоя́ святыя исполнители.

Радуйтеся, все упование на Матерь Божию возложившии;

радуйтеся, небесную помощь от Нея́ восприе́мшии.

Радуйтеся, милостивое заступление Божия Матере ко всем болящим и страждущим людем приклоняющии;

радуйтеся, велие дерзновение к Ней стяжавшии.

Радуйтеся, яко Преблагословенную Матерь Господа ходатайстовати о нас умоляете;

радуйтеся, яко благословением Ея́ здравие и крепость неисцельно болящим доныне возвращаете.

Радуйтеся, во дни и нощи молитвы к Царице Небесе и земли со слезами возносившии;

радуйтеся, яко с Нею о спасении всех людей православных ко Христу ру́це воздеваете.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 3

Си́лою Всевышняго укрепляем, святый пророче Божий Илие́, послан быв от Господа в Саре́пту Сидо́нскую к жене вдовице препита́тися во гла́де, обаче имея чудотворения благодать, умножил еси муку́ и елей в дому́ ея́ до скончания гла́днаго времене и молитвою твоею воскресил еси уме́ршаго сына ея́, поя Богу благодарственную песнь: Аллилу́ия.

Икос 3

Иму́ще едино попечение, еже Отцу Небесному благоугождати и верно Ему служити, и великия ревности по Бо́зе исполненнии святии пророцы Божии, по слову апостола, «верою победи́ша царствия, соде́яша правду, получи́ша обетования, загради́ша уста львов, угаси́ша силу огненную, избего́ша о́стрея меча, возмого́ша от немощи, обрати́ша в бегство полки чужди́х»; ныне же, во Царствии Небеснем пребывающе, врачуют язвы неисцельныя и всякий недуг всем нам, скорбьми и болезньми отягченным, с верою и надеждою вопиющим вам сице:

Ра́дуйтеся, разум свой воли Божией покорившии;

радуйтеся, светом премудрости от Бога озареннии.

Радуйтеся, посланцы Отца Небеснаго и провозвестницы святых Его велений;

радуйтеся, знамении и чудесы Божественную истину утверждавшии.

Радуйтеся, будущая яко настоящая провидевшии;

радуйтеся, вра́чеве благоиску́снии, люди от всякия болезни исцеляющии.

Радуйтеся, во время глада верных питатели;

радуйтеся, недугующим и разслабленным скории помощницы.

Радуйтеся, отчаянным надежду на спасение подающии;

радуйтеся, миро целебное благодати нам источающии.

Радуйтеся, благодатию Божиею мертвых воскрешавшии;

радуйтеся, Судию Праведнаго за грешныя люди умоляющии.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 4

Бу́ря скорбе́й и напастей, воздвиза́емая злобою мира сего, не ослаби веры и любве твоея́ ко Господу, апостоле святый Иа́кове, первый Иерусалимский архиерее и учителю. Ты бо, Божественным Духом просветився, Бога Слова проповедал еси и восприял еси благодать елеем святым целити всех язвы же и недуги, глаголя в послании своем, яко молитва веры спасет болящаго и воздвигнет его Господь, много бо может молитва праведнаго поспешеству́ема. Темже и ныне исцеления источаеши всем к твоему заступлению притекающим и о тебе Богу вопиющим: Аллилу́ия.

Икос 4

Слы́шавше вернии ве́лию вашу к страждущим любовь и чудесное врачевание ваше, апостоли святии, от всех концев земли устремляхуся к вам с верою в целебную благодать Божию, в вас действующую, ибо Сам Господь по слову апостола даде вам власть на духи нечистыя, яко да изгоните их и заповеда целити всяк недуг и всяку болезнь, глаголя: «Болящия исцеляйте, прокаженныя очищайте, мертвыя воскрешайте, бесы изгоняйте, ту́не прия́сте, ту́не дади́те». Сего ради от любве сердечныя приносим вам со смирением и верою похвалы сия:

Ра́дуйтеся, благовестия евангельскаго трубы́;

радуйтеся, вся концы вселенныя просветившии.

Радуйтеся, серафимскою пламенною любовию ко Господу горевшии;

радуйтеся, Церкве Христовы славо и утверждение.

Радуйтеся, Пресвятей Владычице Богородице верно послужившии;

радуйтеся, покровом Ея осененнии.

Радуйтеся, от Самаго Господа Иисуса Христа благодать и силу целити недужных приявшии;

радуйтеся, на стезю покаяния нас наставляющии.

Радуйтеся, даров духовных всегдашнии податели;

радуйтеся, болезней душевных и телесных целители благодатнии.

Радуйтеся, немощи немощных на себе носившии;

радуйтеся, спасению многих душ человеческих послужившии.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 5

Богото́чный источник дивных чудес явился еси, святителю отче Николае, приял бо еси от Господа дар недуги душевныя и телесныя врачевати, бесы изгоняти и всех сущих в бедах скоро от тех избавляти. Те́мже прибегаем к тебе, яко пленных свободителю, нищих заступнику и благодетелю, врачу благодатному и милостивому, да спаса́еми святым предстательством твоим, воспеваем о тебе Христу Богу хвалебную песнь: Аллилу́ия.

Икос 5

Ви́девше лю́дие вас, отцы богоноснии, святители Христовы, не токмо учи́телей духовных и к жизни вечней путеводителей, но и целителей от всяких телесных и душевных недугов, хвалу Господу воздаваша. Мы же за многая и неисчетная исцеления ваша, на ны изливаемая, ублажаем вас, милостивых предстателей и чудотворцев, похвалами сими:

Ра́дуйтеся, Единому Богу, в Троице славимому, верно послужившии;

радуйтеся, многоразличными дарованьми Духа Святаго укрепленнии.

Радуйтеся, веры истинныя дерзновеннии проповедницы;

радуйтеся, апостольских преданий хранители;

Радуйтеся, архиереи Божии, до́бре упасшии словесное стадо ваше;

радуйтеся, от ересе́й и расколов ограждение.

Радуйтеся, заблудших на путь правый наставляющии;

радуйтеся, бесо́в именем Христовым изгоняющии.

Радуйтеся, любовию вашею всех покрывающии;

радуйтеся, благодатную ро́су исцелений верным источающии.

Радуйтеся, болезньми тяжкими одержимых премудрии врачеватели;

радуйтеся, о всем мире печальницы и молитвенницы.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 6

Пропове́дует весь мир христианский ве́лие чудо, тобою сотворенное, священномучениче Вла́сие, егда́ жена некая, имущая сына своего близ смерти лежаща, положи его при ногу́ твое́ю, плачущи и вопиющи о исцелении его. Ты же, отче, именем Спасителя исцелил еси его, глаголя: «Аще в челове́цех и в скотах что таковое случится, и помянет кто имя мое, тому Ты, Господи, ускори́ на помощь». Те́мже молим тя, не лиши тоя́ благодати и нас, да и мы здравы су́ще телом и душею, поем Богу благодарственную песнь: Аллилу́ия.

Икос 6

Возсия́ в сердцах ваших свет Божественныя любве и благодати, святители Христовы и страстотерпцы, кровию священную одежду свою украси́вшии. Темже прослави вас Господь, видя ваше безмерное ко всем сострадание, яко соблюдаете от всякия болезни не точию человеки, но и скоты, и до́мы верных всяких благ исполняете; не отрините убо и нас, грешных, скорбьми, болезньми и многими печальми обуреваемых, и помозите всем вопиющим вам таковая:

Ра́дуйтеся, души своя за веру православную положившии;

радуйтеся, служители Божия себе быти пред мучители исповедавшии.

Радуйтеся, страстем Христовым мужественнии подражатели;

радуйтеся, священную одежду вашу кровьми страданий обагрившии.

Радуйтеся, яко вами от многих ран грешнии избавляются;

радуйтеся, яко вами от всяких болезней вернии свобождаются.

Радуйтеся, неисчерпаемии источницы исцелений;

радуйтеся, яко возложением рук ваших и звери от болезней исцеляются.

Радуйтеся, нетлением мощей ваших славно от Бога возвеличеннии;

радуйтеся, многими чудесы от них верных возвеселившии.

Радуйтеся, исцеления во славу Божию совершающии;

радуйтеся, теми нас к прославлению Бога призывающии.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 7

Хотя́ Человеколюбец Господь явити милосердие Свое людем, дарова нам тя, великомучениче Пантелеи́моне, великаго целителя болезней душевных и телесных, прогонителя духо́в злобы поднебесных. Ты бо, милости Божии подобяся, от Самаго Вседержителя Спаса по достоянию именование всемилостиваго приял еси, яко сострадателен сый, и милуеши всех, сугубо подая исцеления, словом благодати врачуя и к разуму Божественному наставляя верных, подвизая их пети Подателю всех благ Богу песнь: Аллилу́ия.

Икос 7

Но́вую показа́ милость рабо́м Своим Человеколюбец Господь, егда́ благоволи явити сонм святых мучеников, молитвенников, целителей душ и телес наших и ходатаев спасения вечнаго. Вы бо, святии мученицы, имуще веру во Христа, адаманта твердейшу, мужественно претерпели есте от гонителей темничныя узы и страдания, смерть же лютую приемше, жертвою благоприятною Богу явистеся. И ныне, небесному Престолу всех Владыки предстояще, неоскудно исцеления источаете всем с верою прибегающим к вам и зовущим тако:

Ра́дуйтеся, пресветлому мученическому лику сопричте́ннии;

радуйтеся, яко, мучения ваша зряще, множество людей ко Христу обратишася.

Радуйтеся, Господу своему даже до смерти послужившии;

радуйтеся, чудотворцы преславнии, на утешение нам дарованнии.

Радуйтеся, святии вра́чеве, болезни наша исцеляющии;

радуйтеся, светом добродетелей ваших и нас духовно просвещающии.

Радуйтеся, в сониих и видениих страждущих посещавшии;

радуйтеся, в беда́х и напастех помощь нам подающии.

Радуйтеся, болящих младенцев и отроко́в прибежище и исцеление;

радуйтеся, скорбей родителей их врачевание.

Радуйтеся, на мытарствах воздушных помощь являющии;

радуйтеся, о спасении нашем Господа умоляющии.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 8

Стра́нники и пришельцы на земли себе помышляюще, святии братия, врачеве–бессре́бреницы Космо́ и Дамиа́не, ничесоже от тленных вещей мира сего стяжати себе не возжелали есте, всегда имуще Христа, действующа в вас, и силою Того болящих исцеляете, ибо врачевство ваше источник есть неисчерпаемый, на всяк день умножаемый. Не оставите убо и нас благодатною вашею помощию, да вси с верою и любовию воззовем Богу: Аллилу́ия.

Икос 8

Все житие́ ваше на земли любо́вию к Богу и ближним исполнено бысть, святии врачеве–бессребреницы, миро благоуханное исцелений источающии, от бед и скорбей избавляющии, печали утоляющии всех почитающих вас. Благодарим и величаем прославившаго вас Господа, даровавшаго нам дивный богосветлый собор молитвенников, целителей и чудотворцев, Егоже, святии бессребреницы, умолите спастися всем поющим вам таковая:

Ра́дуйся, святый апостоле Луко́, истинный врачу́ духовный, Евангелие всей твари проповедавый;

радуйся, святителю Спиридо́не Тримифу́нтский, великий чудотворче, всяку болезнь и язву исцеляяй и мертвых преславно воскрешаяй.

Радуйся, священномучениче Анти́по Перга́мский, диавольскую силу поправый и всем христианом благодатная исцеления даруяй;

радуйся, святителю Моде́сте, похвало́ святаго града Иерусалима, источниче милости неизсякаемый и чудотворче.

Радуйся, великомучениче Арте́мие, мучителя злочестиваго царя победителю, страстей разжжение угашаяй и духи нечистыя прогоняяй;

радуйся, священномучениче Ермола́е, пастырю добрый Христова стада и святаго Пантелеимона целителя истинный учителю.

Радуйтеся, три единоименныя и единонравныя двоицы братий Космо́ и Дамиа́не богомудрии, врачеве–бессребренницы, болящих страсти туне исцеляющии;

радуйтеся, мученицы Ки́ре и Ио́анне, божественнии врачеве, яко чудодействуете непрестанно, вся недуги наша исцеляюще.

Радуйся, мучениче Диоми́де, врачу душ и телес, истинный и непобедимый страстотерпче, даров Божественных исполненный;

радуйтеся, Фо́тие славный и богомудрый Аники́то, двоице страдальцев, огнь и муки прошедшии и венец победный приемшии.

Радуйся, мучениче Фалале́е, врачу изрядный, тя бо даде́ Владыка Христос на исцеление всем верным;

радуйся, мучениче Три́фоне, дар божественных исцелений приемый, от козней диавола нас охраняяй.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 9

Вся́кое естество ангельское и человеческое удиви́ся делу милосердия Господня, яко дарова нам, грешным, в помощь и заступление тя, преподобне отче Сампсоне, врача преизряднаго и милостиваго, благодать исцелений подающаго, единым прикосновением руки своея царя исцелившаго; молитвенника благоприятна, алчущих и нищих питателя и сущих в нуждах поборника велика. Темже вси вернии, ведуще тя яко служителя Христова и преподобным отцем причастника, вопиют о тебе благодарственную песнь: Аллилу́ия.

Икос 9

Вети́и многовеща́ннии не возмогут по достоянию восхвалити вас, преподобнии и богоноснии отцы наши, яко наставников монахов и Ангелов собеседников, и прославити подвиги и дела, яже творили есте на земли. Обаче и по преставлении многая и преславная чудеса и исцеления творити не престаете, честны́я бо мощи ваша подобны Силоаму, идеже хромии, недужнии, разслабленнии и одержимии духами злобы здравие улучают. Ибо ради подвигов ваших приясте от Господа власть целити болезни неисцельныя, утоляти страсти наша, возбуждати в людех плач о гресех, да чистою совестию и сокрушенным сердцем воспеваем вам похвалы сия:

Ра́дуйтеся, житию бесплотных поревновавшии;

радуйтеся, во всем христианстем мире яко великия целители прославлениии.

Радуйтеся, образ жития праведнаго нам показующии;

радуйтеся, побеждати мир, плоть и диавола нам помогающии.

Радуйтеся, многая чудеса и знамения от мощей ваших являющии;

радуйся, яко мощей ваших демони трепещут.

Радуйтеся, от Господа власть на духи нечистыя приемшии;

радуйтеся, силою Божиею их прогоняющии.

Радуйтеся, бездетным родителем чадородие дарующии;

радуйтеся, омраченных умом просветители богомудрии.

Радуйтеся, сосуди, елей милосердия Божия источающии;

радуйтеся, живоносныя источницы, струи исцелений нам изливающии.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 10

Спасти́ хотя души людей недугом пиянства одержимых, Всемилостивый Господь дарова помощников и целителей от злыя страсти сея: святаго мученика Вонифатия, преподобнаго Моисея Мурина, преподобнаго Варлаама Серпуховскаго и иных многих угодников Своих и подвижников. Мы же, преклоньше колена и руки своя простерше к вам, святии отцы и матери, молим вас: умолите Господа даровати исцеление погибающим от пиянства братиям и сестра́м нашим, жития трезвеннаго и целомудреннаго начало положити всех нас сподобите, да возможем победити борю́щий нас грех и непрестанно славити Бога, поюще Ему: Аллилу́ия.

Икос 10

Стена́ бысть и заступление всем страждущим людем чудный образ Богоматере, пред нимже некий селянин, исполняя повеление преподобнаго Варлаама Серпуховскаго, молебное пение совершил есть и от страсти винопития исцелися. Та бо икона, Неупиваемою Чашею именуемая, исцеления дарует отчаявшимся и погибающим, наипаче же болезнующим пиянством. Темже молим Тя, Пречистая Владычице, исцели нас, страждущих от страстей греховных, молитвами святых целителей и чудотворцев, помощников наших богодарованных, к нимже благодарственно взываем сице:

Ра́дуйтеся, от мучительнаго недуга пиянства страждущих избавляющии;

радуйтеся, к искреннему покаянию и исправлению их приводящии.

Радуйтеся, глубину милосердия Богоматере страждущим показующии;

радуйтеся, яко благодатию Ея многия от страсти пиянства исцеляются.

Радуйтеся, отчаянным надежду на помощь подающии;

радуйтеся, от рова погибельнаго безнадежныя спасающии.

Радуйтеся, к подвигу воздержания всех призывающии;

радуйтеся, от смертоноснаго зелия нас ограждающии.

Радуйтеся, от страстей, яко от сна погибельнаго, нас пробуждающии;

радуйтеся, всем борющимся с грехми покровители богодарованнии.

Радуйтеся, к новому, праведному и трезвенному житию нас направляющии;

радуйтеся, яко молитвами вашими духовную нашу жажду утоляете.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 11

Пе́ние благодарственное Пресвятей Троице людие земли Русския приносят, прославляюще тя, преподобне отче Се́ргие, яко великаго заступника, целителя и уте́шителя православным христианом в державе нашей и по всему лику земли обитающим, ибо данною тебе Божиею благодатию слепыя просвещаеши, от телесных и душевных болезней исцеляеши, от демонскаго насилия свобождаеши, от напастей ограждаеши и вся наша прошения во благо исполняеши, вопия возлюбленному тобою Христу Богу: Аллилу́ия.

Икос 11

Свети́льницы светоприе́мнии от истиннаго Света озаряемии явистеся, святии земли Русския: иерарси и преподобнии, священномученицы и мученицы, Христа ради юродивии и святых дев и жен сословие, с нимиже собор новомучеников и исповедников Русских, вкупе именуемии и неименуемии, ведомии нами и неведомии. Людие же русстии, обремененнии грехами, болезньми и ско́рбьми многими, обретоша вас заступников и целителей, подаете бо во вся дни бытия народа нашего врачевание страсте́м неисцельным, слепым прозрение, глухим слышание, разслабленным здравие, страждущим раковыми язвами исцеление и всем благодать изливаете, радостию озаряюще сердца верных, чтущих вас и воспевающих с любовию таковая:

Ра́дуйся, преподобне Ага́пите, первый врачу безмездный в земли Русстей и великий чудотворче;

радуйся, святителю Алекси́е Московский, пастырю и учителю премудрый земли нашея, исцеления струи верным источаяй.

Радуйся, преподобне Серафиме Саровский чудотворче, врачу скорый и благодатный;

радуйся, святый праведный Иоанне Кронштадский, страны Русския молитвенниче и чудотворче предивный.

Радуйтеся, святии царю Николае и царевиче Алексие, за землю Русскую пред Богом молитвенницы и преславнии чудотворцы;

радуйтеся, святыя царевны Ольго, Татиано, Марие и Анастасие, сестры милосердные, с материю вашею царицею Александрою.

Радуйся, святителю Крымский и исповедниче Луко́, врачу благи́й и милостивый;

радуйся, преподобне отче Серафиме Вырицкий, житием и подвиги древних отец подражателю, дар чудодейственныя благодати приемый.

Радуйся, преподобне отче Амфило́хие Почаевский, врачу безмездный, силою Божиею неисчетная чудеса и исцеления совершивый;

радуйся, преподобная Евфросиние, Великая княгине Московская, Богу угодившая и дар исцелений от Него прияти сподобившаяся.

Радуйся, святая блаженная Ксе́ние Петербургская, безумием мнимым безумие мира обличившая и дар чудоде́йственныя помощи от Христа стяжавшая;

радуйся, преподобномученице Великая княгине Елисаве́то, духовною и телесною красотою возсиявшая и людем русским истинную любовь и милосердие показавшая.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 12

Благода́ть, ю́же даде́ вам Господь Бог, целити вся недуги душевныя и телесныя, днесь нас собра, да почтим святую память вашу, святии вра́чеве, целители и чудотворцы. Темже убо, благоговейне взирающе на честную икону вашу, угодницы Божии, и со умилением сердец к ней припа́дающе, молим вас: не токмо от недугов и болезней нас исцелите, но чудным светом Божиим нашу жизнь озарите, благословите нас миром и любовию, подайте нам твердую веру, чистоту жизни и страх Божий, от греховныя погибели нас соблюдите, да вашим заступлением достигнем Небеснаго отечества, иде́же с вами воспоим Богу ангельскую песнь: Аллилу́ия.

Икос 12

Пою́ще Господа, дивнаго во святых Своих, хвалим и прославляем ныне святый и великий собор целителей и чудотворцев, с нимже Сама Пречистая Дева Богородица, Архангели и Ангели, божественнии апостоли, пророцы и святители, мученицы и преподобнии, блаженнии и вси праведницы ликовствуют. Славим и величаем прославльшаго вас Христа Бога нашего, излившаго на вас обилие Своих даров благодатных, вас же, святых помощников и предстателей наших, благодарным сердцем и усты ублажаем песньми таковыми:

Ра́дуйся, святый Архистрати́же Божий Рафаиле, всех душевных и телесных недугов благодатный целителю;

радуйтеся, святии праведнии Богоотцы Иоакиме и Анно, неплодство супругов благодатию Божиею разрешающии.

Радуйся, великомучениче и победоносче Георгие, непобедимый воине Христа Бога нашего, немощствующих скорый врачу́ и всем в скорбех и бедах сущим заступниче;

радуйся, священномучениче Иулиа́не, святаго апостола Петра учениче́, младенцы от болезней и смерти благодатно сохраняяй.

Радуйся, преподобне отче Паисие Великий, молитвою душу послушника своего из ада изведы́й, и нас от муки вечныя молитвами твоими избавля́яй;

радуйтеся, святии мученицы Флоре и Лавре, богомудрая двоице пресветлая, трудолюбцы незлобивии и недугов наших целители.

Радуйтеся, преподобный царю Симеоне Мироточивый и святителю Савво, сербская похвало, многими чудесы и даром исцелений от всяких болезней Богом прославленнии;

радуйся, преподобне отче Иоанне Рыльский, лечебную силу от Бога приемый и всем с верою приходящим здравие подаваяй.

Радуйся, преподобная мати Марие Египетская, страсти плотския мечем воздержания посекати нас научающая;

радуйся, страстоте́рпице Христова Параскево, свет благодатный душевным и телесным очам нашим открывающая.

Радуйся, мученице Агриппи́но, прокаженныя от неисцельныя сея болезни свобождающая;

радуйся, великомученице Мари́но, силою Креста главу диавола сокрушившая и многих недугов лютых прогонительнице.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 13

О преди́внии и пресла́внии угодницы Божии, святии вра́чеве–бессре́бреницы и чудотворцы, скории помощницы всем с верою к вам прибегающим, приимите сие хваление наше и мольбы слезныя, вам приносимыя: исцелите многообразныя недуги душ и телес наших и теплым предстательством вашим испросите нам у Христа Бога избавление от всех бед и напастей, прощение прегрешений наших и благую надежду вечнаго спасения, да сподобимся с вами и со всеми святыми воспевати во веки Спасителю нашему: Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

Икос 1

А́нгелов и челове́ков Творе́ц избра́ вас, враче́й, цели́телей и чудотво́рцев свя́тое сосло́вие, я́ко любо́вию и сострада́нием ко всем лю́дем горя́щих, и дарова́ вам сугу́бую благода́ть, да бу́дете избавля́ти от бед, скорбе́й, боле́зней и вся́ких лю́тых искуше́ний всех чту́щих святу́ю па́мять ва́шу и с любо́вию восхваля́ющих вас та́ко:

Ра́дуйся, святы́й Проро́че, Предте́че и Крести́телю Госпо́день Иоа́нне, ду́ши на́ша покая́нием обновля́яй;

ра́дуйся, святы́й пра́ведный Симео́не, Богомладе́нца Христа́ на ру́це свои́ прие́мляй и ны́не всех младе́нцев Богодарова́нный храни́телю.

Ра́дуйся, святы́й апо́столе и евангели́сте Иоа́нне Богосло́ве, возлю́бленный Христо́в учениче́, лю́бящим и чту́щим тя любо́вию воздава́яй;

ра́дуйся, му́чениче Ло́нгине, от ка́пли кро́ве Го́спода о́чи свои́ исцели́вый и благода́ть обреты́й духо́вное прозре́ние лю́дем дарова́ти.

Ра́дуйтеся, святы́я му́ченицы Зинаи́до и Филони́лло, сро́дницы апо́стола Па́вла, сугу́бо боля́щим послужи́вшия;

ра́дуйтеся, священному́чениче Киприа́не и му́ченице Иусти́но, от бесо́в и злых челове́к ве́рным кре́пцыи засту́пницы.

Ра́дуйся, великому́чениче Дими́трие Солу́нский, ми́ро благово́нное всем боля́щим на исцеле́ние источа́яй;

ра́дуйся, Кеса́рие Назиа́нзине, царе́й благочести́вых врачу́, от мно́гих тя́жких неду́гов богому́дрый цели́телю.

Ра́дуйся, великому́ченице Варва́ро, а́гнице всеблаже́нная, от внеза́пныя сме́рти ве́рных избавля́ющая;

ра́дуйся, великому́ченице Екатери́но, де́во прему́драя, избра́нный сосу́де чистоты́, омраче́ние ума́ на́шего просвеща́ющая.

Ра́дуйся, великому́ченице Анастаси́е, неду́ги заключе́нных в темни́цех врачева́вшая и от мно́гих скорбе́й нас избавля́ющая;

ра́дуйся, му́ченице Фомаи́до, целому́дрия ра́ди ду́шу свою́ положи́вшая и плотски́я стра́сти побежда́ти лю́дем помога́ющая.

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Кондак 1

Избра́ннии помо́щницы стра́ждущих, вра́чеве неду́гующих и чудотво́рцы преди́внии, святи́и безме́зднии цели́тели ми́лостивии, похва́льная воспису́ем вам, засту́пником на́шим и в ско́рбех уте́шителем. Вы же, я́ко иму́щии дерзнове́ние ко Всеми́лостивому Спа́су на́шему, изба́вите от страсте́й и боле́зней всех ве́рою и любо́вию воспева́ющих вам:

Ра́дуйтеся, святи́и богоблаже́ннии вра́чеве,

цели́тели ду́ш и теле́с на́ших.

Молитва

О чудотво́рцы сла́внии, вра́чеве безме́зднии, земни́и А́нгели и небе́снии челове́цы, скоропослушливии помощницы всем к вам прибегающим! Вы бо, угодницы Божии, безчисленными чудесы́ весь мир наполняете и не токмо телесныя недуги исцеляете, но и верою Христовою души просвещаете, в терпении болезней укрепляете, в тяжких недузех сущих о исправлении жития вразумляете, ко Христу покаянием направляете и силою Всемогущаго Бога обильныя да́ры благодатныя помощи источаете. Сего ради к вам, яко благодатным враче́м, мы, недостойнии и грешнии, с благоговейною любовию припа́даем и молимся: услышите воздыхания множества страждущих людей, умолите небеснаго Врача душ и телес наших и Его Пречистую Матерь даровати нам исцеление от недугов наших, сохраните нас от лютых и неисцельных болезней, от расслабления тела, от исступления ума и смертоносныя язвы, от внезапныя смерти, от всякия беды и скорби и от всякаго зла; помозите всем в немощи отчаявшимся, к вам же с надеждою прибегающим; утешение и отраду подайте всем в тяжких работах, в заточении и темницех унывающим и теплым ходатайством вашим к Богу соблюдите в вере православней, в богомыслии, в молитвах к Богу прилежных; умолите Господа, да подаст всем нам христианскую кончину безболезненну, непостыдну, мирну, Божественных Таин причастну, и добрый ответ на Страшнем Суде Своем, да с надеждою спасения достигнем Царствия, еже уготова Господь любящим Его, и сподобимся ку́пно с вами, угодницы Божии, славити Отца и Сына и Святаго Духа во веки веков. Ами́нь.

Ака́фист новому́чеником и испове́дником Це́ркве Ру́сския

Конда́к 1

Избра́ннии новому́ченицы и испове́дницы Росси́йстии,

свиде́телие Христо́вы, а́гнцы новозакла́ннии,

кро́вию свое́ю ри́зы Це́ркве на́шея украси́вшии.

Вы, преще́ний мучи́телей не убоя́вшеся,

любо́вь к Бо́гу да́же до сме́рти яви́ли есте́

и в жи́зни ве́чней к Нему́ дерзнове́ние стяжа́ли есте́.

Те́мже, предстоя́ще престо́лу Вседержи́теля,

помина́йте нас, любо́вию вас почита́ющих и вопию́щих:

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

И́кос 1

А́нгелов Творе́ц и ми́ра Зижди́тель от ве́ка предъизбра́ вас, я́ко ве́рныя свиде́тели Своя́ в земли́ Росси́йстей, и в годи́ну тя́жких испыта́ний благода́ть и си́лу вам дарова́. Вы же, ве́ру Правосла́вную ми́ру безбо́жному яви́вше, тве́рдым испове́данием, изгна́нием и терпе́нием страда́ний, Христа́ просла́вили есте́. Сего́ ра́ди и мы прославля́ем вас си́це:

Ра́дуйтеся, измла́да Христа́ возлюби́вшии;

ра́дуйтеся, глас Па́стыря До́браго послу́шавшии.

Ра́дуйтеся, Ца́рства Бо́жия внутрь себе́ при́сно иска́вшии;

ра́дуйтеся, крест на ра́мо свое́ взе́мшии.

Ра́дуйтеся, сла́ву ми́ра сего́ отри́нувшии;

ра́дуйтеся, за Христа́ страда́ния претерпе́вшии.

Ра́дуйтеся, любве́ ра́ди Бо́жия смерть прие́мшии;

ра́дуйтеся, небе́снаго Ца́рствия дости́гшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 2

Ви́дя оте́чество на́ше в беда́х и ско́рбех су́щее, святи́телю о́тче Ти́хоне, богоизбра́нный патриа́рше земли́ на́шея, призыва́л еси́ ве́рная ча́да Це́ркве Росси́йския за Христа́ и ве́ру Правосла́вную му́жественне стоя́ти. Сам же, по вся дни умира́я за па́ству твою́, испове́дник непоколеби́мый яви́лся еси́, воспева́я Бо́гу: Аллилу́ия.

И́кос 2

Ра́зумом Боже́ственным просвеща́емь, святи́телю о́тче Ти́хоне, Це́рковь Ру́сскую му́дре упра́вил еси́, и, безбо́жныя гони́тели облича́я, па́ству твою́ по́двиги новому́чеников почита́ти призыва́л еси́. Сего́ ра́ди вопие́м тебе́ си́це:

Ра́дуйся, первосвяти́телей Моско́вских благода́тный прее́мниче;

ра́дуйся, Земли́ Ру́сския вели́кий печа́льниче.

Ра́дуйся, апо́стольских преда́ний усе́рдный храни́телю;

ра́дуйся, сокро́вищ Правосла́вныя ве́ры благогове́йный блюсти́телю.

Ра́дуйся, благода́ть Ду́ха Свята́го в се́рдце при́сно име́вый;

ра́дуйся, разделе́ния церко́вная любо́вию врачева́вый.

Ра́дуйся, заточе́ние и поруга́ния му́жественне претерпе́вый;

ра́дуйся, кре́стный путь с па́ствою твое́ю проше́дый.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 3

Си́лою, да́нною вам свы́ше, страстоте́рпцы сла́внии, царю́ Нико́лае и цари́це Алекса́ндро, царе́вичю Алекси́е и царе́вны О́льго, Татиа́но, Мари́е и Анастаси́е, лише́ние ца́рства и сла́вы земны́я со смире́нием восприя́ли есте́. Страда́нием же во́льным да́же до сме́рти Христу́ после́довали есте́ и за убива́ющия вы моли́лися есте́, вопию́ще Бо́гу: Аллилу́ия.

И́кос 3

Иму́ще ве́ру несумне́нну, я́ко вся от Бо́га суть, изгна́ние, поруга́ние и темни́чное заточе́ние му́жественне претерпе́ли есте́, ца́рственнии страстоте́рпцы, и му́ченических венце́в сподо́билися есте́. Сего́ ра́ди вопие́м вам си́це:

Ра́дуйтеся, вене́ц и похвало́ ро́да ца́рскаго и богоизбра́ннаго;

ра́дуйтеся, пресла́вныя о́трасли ко́рене благочести́ваго.

Ра́дуйтеся, ца́рствия земна́го лише́ние со смире́нием прие́мшии;

ра́дуйтеся, страда́нии ва́шими Ца́рствия Небе́снаго сподо́бльшиися.

Ра́дуйтеся, за враги́ своя́ усе́рдно моли́вшиися;

ра́дуйтеся, всем се́рдцем Бо́га взыска́вшии.

Ра́дуйтеся, о́браз испове́дничества ве́рным лю́дем показа́вшии;

ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 4

Бу́рею гоне́ний на Це́рковь Ру́сскую обдержи́ми, святи́телие Бо́жии, ве́рою и страда́ньми му́ченическими благода́ть Христо́ву стяжа́ли есте́ и, кора́бль церко́вный неврежде́нно сохрани́вше, подража́тели пе́рвым му́чеником яви́лися есте́. С ни́ми же на Небесе́х взыва́ете Бо́гу побе́дную песнь: Аллилу́ия.

И́кос 4

Ве́дуще глас ева́нгельский, я́ко па́стырь до́брый ду́шу свою́ полага́ет за о́вцы, священному́ченицы до́блии, любве́ ра́ди Христо́вы и па́ствы своея́ изгна́ния, глад, хлад, зной со́лнечный и рабо́ты го́рькия претерпе́ли есте́, сме́ртию му́ченическою житие́ свое́ увенча́вше. Сего́ ра́ди и мы с любо́вию прославля́ем вас си́це:

Ра́дуйтеся, зало́г Христо́в до́бре сохрани́вшии;

ра́дуйтеся, житие́м и сме́ртию о́браз ве́рным показа́вшии.

Ра́дуйтеся, же́ртву безкро́вную благогове́йне соверша́вшии;

ра́дуйтеся, саме́х себе́ в же́ртву живу́ю прине́сшии.

Ра́дуйтеся, Це́ркве Росси́йския сла́во;

ра́дуйтеся, оте́чества на́шего украше́ние.

Ра́дуйтеся, па́ствы ва́шея ко Христу́ путеводи́телие;

ра́дуйтеся, догма́тов церко́вных ре́вностнии блюсти́телие.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 5

Богосве́тлыя зве́зды на не́бе церко́внем яви́лися есте́, священноиспове́дницы Росси́йстии, и, поноше́ния, заточе́ния, изгна́ния и го́рькия рабо́ты претерпе́вше, Го́спода Иису́са Христа́ му́жественне испове́дали есте́. Та́же, благоче́стно в ми́ре пожи́вше, путь ко спасе́нию во тьме безбо́жия яви́ли есте́, науча́юще ве́рныя при́сно благода́рственно пе́ти Бо́гу: Аллилу́ия.

И́кос 5

Ви́девше разоре́ние земли́ Ру́сския и беззако́ние ве́лие, опустоши́вшее ю́, вы, священноиспове́дницы сла́внии, стра́ха и сме́рти не убоя́лися есте́ и, по́двиги испове́дничества благоуха́юще, я́ко кри́ни се́льнии посреде́ пусты́ни, процвели́ есте́. Сего́ ра́ди прославля́ем вас си́це:

Ра́дуйтеся, моли́твою те́плою сердца́ ва́ша в по́двизе утвержда́вшии;

ра́дуйтеся, тве́рдым испове́данием ве́ры просия́вшии.

Ра́дуйтеся, во страда́ниих терпе́ние и кро́тость яви́вшии;

ра́дуйтеся, я́ко а́гнцы незло́бивии посреде́ волко́в ходи́вшии.

Ра́дуйтеся, слу́жбу Бо́жию во у́зах соверша́вшии;

ра́дуйтеся, соу́зники в терпе́нии укрепля́вшии.

Ра́дуйтеся, ду́ши ва́ша за па́ству полага́вшии;

ра́дуйтеся, посреде́ гоне́ний благода́тию Бо́жиею храни́мии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 6

Пропове́дует Це́рковь Росси́йская по́двиги ва́ша, преподобному́ченицы достосла́внии, по́ты трудо́в и кро́вию муче́ний зе́млю на́шу освяти́вшии. Вы бо, слеза́ми покая́ния ду́ши ва́ша омы́вше, в же́ртву живу́ю, благоприя́тную Го́сподеви, себе́ предугото́вили есте́. Ны́не же Ему́ дерзнове́нно предстоите́ и взыва́ете побе́дную песнь: Аллилу́ия.

И́кос 6

Возсия́ свет Христо́в в сердца́х ва́ших, преподобному́ченицы, вы бо, я́ко во́ини добропобе́днии, моли́тву во всеору́жие прие́мше, ве́ры пра́выя ника́коже отпа́ли есте́ и, у́зы темни́чныя, муче́ния тя́жкая и рабо́ты го́рькия претерпе́вше, лю́тую смерть от безбо́жных прия́ли есте́. Сего́ ра́ди прославля́ем вас си́це:

Ра́дуйтеся, путь и́стиннаго Богопозна́ния нам показа́вшии;

ра́дуйтеся, ду́ши ва́ша за Христа́ положи́вшии.

Ра́дуйтеся, я́звы Го́спода Иису́са Христа́ на телесе́х ва́ших носи́вшии;

ра́дуйтеся, вся тле́нная ми́ра сего́ презре́вшии.

Ра́дуйтеся, любо́вь Христо́ву к мучи́телем яви́вшии;

ра́дуйтеся, моли́тву за ненави́дящих вас пролия́вшии.

Ра́дуйтеся, ве́лие дерзнове́ние ко Го́споду стяжа́вшии;

ра́дуйтеся, по́двиги по́стническими и кро́вию ва́шею зе́млю Ру́сскую освяти́вшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 7

Хотя́ще во дни гоне́ний безбо́жных на Це́рковь Ру́сскую, ве́ру тве́рдую и любо́вь ко Го́споду сохрани́ти, преподобноиспове́дницы честни́и, поноше́ния, заточе́ния, изгна́ния и го́рькия рабо́ты, Христа́ ра́ди претерпе́ли есте́. Та́же, благоче́стно в ми́ре пожи́вше, мно́гим путь ко спасе́нию показа́ли есте́, науча́юще пе́ти Бо́гу побе́дную песнь: Аллилу́ия.

И́кос 7

Но́выя испове́дники показа́ вас Госпо́дь, преподо́бнии отцы́ на́ши, егда́ прии́де испыта́ти лю́ди Своя́, вас же, блаже́ннии, обре́те рабы́ бдя́щия, смире́нием и доброде́тельми украше́нныя. Сего́ ра́ди прославля́ем вас си́це:

Ра́дуйтеся, и́го благо́е на ра́мена своя́ взе́мшии;

ра́дуйтеся, по́двиги поста́ и моли́твы просия́вшии.

Ра́дуйтеся, му́жество и кре́пость в страда́ниих яви́вшии;

ра́дуйтеся, испове́данием ва́шим ве́ру запечатле́вшии.

Ра́дуйтеся, ве́рность Христу́ в житии́ ва́шем сохрани́вшии;

ра́дуйтеся, мно́гия лю́ди в ве́ре пра́вей наста́вившии.

Ра́дуйтеся, за́поведей Христо́вых ве́рнии исполни́телие;

ра́дуйтеся, по́двигов новому́чеников и́стиннии свиде́телие.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 8

Стра́нное чу́до ми́ру яви́сте, новому́ченицы Росси́йстии, вы бо, во страда́нии кре́пость показа́вше, си́лою Христо́вою безбо́жныя одоле́сте и сме́ртию ва́шею воскресе́ние Христо́во пропове́дасте. Ны́не же у престо́ла Бо́жия предстоите́ и воспева́ете побе́дную песнь: Аллилу́ия.

И́кос 8

Вся кра́сная ми́ра сего́ презре́вше, святи́и новому́ченицы Росси́йстии, во след Го́споду кре́стным путе́м после́довали есте́ и по за́поведи ева́нгельстей мзду мно́гу на Небесе́х обрели́ есте́. Сего́ ра́ди приими́те от нас похвалы́ сицевы́я:

Ра́дуйтеся, ве́рнии сы́ны Це́ркве Росси́йския, безбо́жных гони́телей не убоя́вшиися;

ра́дуйтеся, у́зы темни́чныя, труды́ го́рькия и изгна́ния претерпе́вшии.

Ра́дуйтеся, дре́вним му́чеником в страда́ниих уподо́бившиися;

ра́дуйтеся, тала́нт, вруче́нный вам Го́сподем, терпе́нием преумно́жившии.

Ра́дуйтеся, блаже́нство изгна́нных пра́вды ра́ди ве́рою дости́гшии;

ра́дуйтеся, кро́вию ва́шею Зе́млю Ру́сскую освяти́вшии.

Ра́дуйтеся, страда́нии ва́шими о́браз ве́рным подаю́щии;

ра́дуйтеся, венцы́ нетле́нныя от Христа́ Бо́га прие́мшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 9

Вся́ческая страда́ния за Христа́ претерпе́вше, испове́дницы пресла́внии, ве́ру Правосла́вную сохрани́ли есте́ и, терпе́нием гони́тели Це́ркве Ру́сския посрами́вше, благоче́стием в ми́ре возсия́ли есте́. Ны́не же престо́лу Бо́жию предстоите́ и воспева́ете хвале́бную песнь: Аллилу́ия.

И́кос 9

Вети́и церко́внии недоумева́ют ка́ко воспе́ти вас по достоя́нию, но́вии испове́дницы Це́ркве Ру́сския, вы бо в ско́рбех, изгна́ниих и заточе́ниих, Христа́ и́стиннаго Бо́га просла́вили есте́ и ве́рным путь ко спасе́нию указа́ли есте́. Мы же, прибега́юще к моли́твенному предста́тельству ва́шему, дерза́ем ублажа́ти вас си́це:

Ра́дуйтеся, все упова́ние на Бо́га возложи́вшии;

ра́дуйтеся, по́двиг испове́дничества в терпе́нии соверши́вшии.

Ра́дуйтеся, мучи́телей безбо́жных не убоя́вшиися;

ра́дуйтеся, немощны́я в ве́ре укрепи́вшии.

Ра́дуйтеся, рабо́ты го́рькия в сла́дость духо́вную восприе́мшии;

ра́дуйтеся, сердца́ ва́ша Бо́гу в же́ртву прине́сшии.

Ра́дуйтеся, страда́нием ду́ши ва́ша очи́стившии;

ра́дуйтеся, житие́м святы́м о́браз ве́рным показа́вшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 10

Спасти́ хотя́ Госпо́дь мно́жество жен и дев, во оби́тели и́ноческия ты́я призва́. Во дни же гоне́ний безбо́жных му́жескую кре́пость им дарова́, е́же за и́мя Свое́ пострада́ти и терпе́нием мно́гим Ца́рствия Небе́снаго дости́гнути, да я́ко му́дрыя де́вы, в черто́зе бра́чнем Христу́ Жениху́ воспева́ют песнь: Аллилу́ия.

И́кос 10

Стена́ и по́мощь благонаде́жная бы́сть Богоро́дица вам, святы́я преподо́бныя жены́, му́ченицы и испове́дницы, в ско́рбех, изгна́ниих и у́зах пребыва́ющим. Вы бо любо́вию и труды́ лю́дем стра́ждущим, я́ко Самому́ Сы́ну Ея́, послужи́сте. Те́мже с благодаре́нием вас ублажа́ем:

Ра́дуйтеся, преподобному́ченицы, я́ко а́гницы непоро́чныя, за Христа́ закла́нныя;

ра́дуйтеся, преподобноиспове́дницы, я́ко голуби́цы чи́стыя, се́тей врага́ изба́вльшияся.

Ра́дуйтеся, жите́йская попече́ния во и́ночестве отри́нувшия;

ра́дуйтеся, во страда́ниих Христу́, я́ко мироно́сицы, после́довавшия.

Ра́дуйтеся, гоне́ний жесто́ких и сме́рти лю́тыя не убоя́вшияся;

ра́дуйтеся, в муче́ниих благода́тию Бо́жиею укрепля́емыя.

Ра́дуйтеся, ева́нгельски, я́ко Мари́я, благу́ю часть избра́вшия;

ра́дуйтеся, я́ко Ма́рфа Христу́, бли́жним послужи́вшия.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 11

Пе́ние всеумиле́нное прино́сим вам, новому́ченицы и испове́дницы Росси́йския, вы бо, благоче́стно в зако́не Госпо́дни пожи́вша, ве́ру Правосла́вную сохрани́ли есте́, и сме́ртию му́ченическою и терпе́нием страда́ний за Христа́ гони́тели Це́ркве Ру́сския посрами́ли есте́. Ны́не же, во Ца́рствии Небе́снем лику́юща, воспева́ете Бо́гу побе́дную песнь: Аллилу́ия.

И́кос 11

Све́том ева́нгельским просвеще́нныя и за́поведи Госпо́дни сохра́ньшия, святы́я жены́ и де́вы, доброде́тельное житие́ во дни гоне́ний лю́тых страда́нием во́льным увенча́ли есте́ и вои́стину но́выя му́ченицы и испове́дницы яви́лися есте́. Сего́ ра́ди воспева́ем вас си́це:

Ра́дуйтеся, му́ченицы, любо́вию ко Христу́ страх сме́рти превозмо́гшия;

ра́дуйтеся, испове́дницы, в страда́ниих за Христа́ ве́ру и наде́жду соблю́дшия.

Ра́дуйтеся, по́двиги ва́шими А́нгелы возвесели́вшия;

ра́дуйтеся, не́мощь естества́ же́нскаго сло́вом Бо́жиим препобеди́вшия.

Ра́дуйтеся, Христо́вы за́поведи житие́м и сме́ртию испо́лнившия;

ра́дуйтеся, му́дрости ева́нгельских дев подража́вшия.

Ра́дуйтеся, муже́м свои́м в гоне́ниих после́довавшия;

ра́дуйтеся, ны́не ку́пно с ни́ми венцы́ Небе́сными увенча́нныя.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 12

Благода́тное утвержде́ние Це́ркве на́шея и́мамы вас, новому́ченицы и испове́дницы Росси́йстии. Вы бо, се́рдцем ве́рующе в пра́вду, усты́ же Го́спода Иису́са Христа́ во спасе́ние испове́давше, заточе́ния, изгна́ния, го́рькия рабо́ты и смерть претерпе́ли есте́. Ны́не же моли́теся ко Го́споду о нас, земны́х сро́дницех ва́ших, да при́сно с ва́ми пое́м Бо́гу: Аллилу́ия.

И́кос 12

Пою́ще ва́шу небе́сную сла́ву, страстоте́рпцы Христо́вы, лобыза́ем я́звы ва́ша, вы бо, стопа́м дре́вних му́ченик после́дующе, не уклони́стеся ско́рби, ни убоя́стеся темни́цы, го́рькими рабо́тами, гла́дом и хла́дом изморе́ни бы́сте и, многови́дными му́ками умерщвля́еми, я́ко а́гнцы незло́бивии, ве́ры ра́ди пострада́сте и смерть прия́сте. Те́мже приими́те от нас похвалы́ сицевы́я:

Ра́дуйтеся, святи́телие Христо́ви, до́бре Це́рковь упра́вившии;

ра́дуйтеся, иере́и Бо́жии, ду́ши за па́ству полага́вшии.

Ра́дуйтеся, ца́рственнии страстоте́рпцы, от богобо́рных власте́й смерть и поруга́ние прие́мшии;

ра́дуйтеся, благове́рнии кня́зие и княги́ни, благоче́стие да́же до сме́рти соблю́дшии.

Ра́дуйтеся, преподо́бнии му́жие, пра́ведное житие́ венце́м страда́ния увенча́вшии;

ра́дуйтеся, преподо́бныя жены́, кре́пость и му́жество в страда́ниих яви́вшыя.

Ра́дуйтеся, вси правосла́внии христиа́не, за преде́лами оте́чества многоразли́чне пострада́вшии;

ра́дуйтеся, вси ве́домии и неве́домии, Бо́гом увенча́ннии лю́дие.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 13

О, пресла́внии новому́ченицы и испове́дницы Росси́йстии! Приими́те ма́лое сие́ моле́ние на́ше, в похвалу́ вам ны́не приноси́мое, и моли́теся ко Христу́ Бо́гу, да укрепи́т в лю́дех дух братолю́бия и благоче́стия, да утверди́т во Оте́честве на́шем ве́ру Правосла́вную и сподо́бит нас ку́пно с ва́ми воспева́ти Ему́: Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

И́кос 1

А́нгелов Творе́ц и ми́ра Зижди́тель от ве́ка предъизбра́ вас, я́ко ве́рныя свиде́тели Своя́ в земли́ Росси́йстей, и в годи́ну тя́жких испыта́ний благода́ть и си́лу вам дарова́. Вы же, ве́ру Правосла́вную ми́ру безбо́жному яви́вше, тве́рдым испове́данием, изгна́нием и терпе́нием страда́ний, Христа́ просла́вили есте́. Сего́ ра́ди и мы прославля́ем вас си́це:

Ра́дуйтеся, измла́да Христа́ возлюби́вшии;

ра́дуйтеся, глас Па́стыря До́браго послу́шавшии.

Ра́дуйтеся, Ца́рства Бо́жия внутрь себе́ при́сно иска́вшии;

ра́дуйтеся, крест на ра́мо свое́ взе́мшии.

Ра́дуйтеся, сла́ву ми́ра сего́ отри́нувшии;

ра́дуйтеся, за Христа́ страда́ния претерпе́вшии.

Ра́дуйтеся, любве́ ра́ди Бо́жия смерть прие́мшии;

ра́дуйтеся, небе́снаго Ца́рствия дости́гшии.

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Конда́к 1

Избра́ннии новому́ченицы и испове́дницы Росси́йстии,

свиде́телие Христо́вы, а́гнцы новозакла́ннии,

кро́вию свое́ю ри́зы Це́ркве на́шея украси́вшии.

Вы, преще́ний мучи́телей не убоя́вшеся,

любо́вь к Бо́гу да́же до сме́рти яви́ли есте́

и в жи́зни ве́чней к Нему́ дерзнове́ние стяжа́ли есте́.

Те́мже, предстоя́ще престо́лу Вседержи́теля,

помина́йте нас, любо́вию вас почита́ющих и вопию́щих:

Ра́дуйтеся, новому́ченицы и испове́дницы Росси́йстии,

Це́ркве на́шея похвало́ и украше́ние.

Моли́тва

О, святи́и новому́ченицы и испове́дницы Росси́йстии:/ святи́телие и па́стырие Це́ркве Христо́вы,/ ца́рственнии страстоте́рпцы,/ благове́рнии кня́зие и княги́ни,/ до́блии во́ини, мона́си и мирсти́и,/ благочести́вии му́жие и жены́,/ во вся́цем во́зрасте и сосло́вии за Христа́ пострада́вшии,/ ве́рность Ему́ да́же до сме́рти свиде́тельствовавшии/ и вене́ц жи́зни от Него́ прие́мшии!

Вы во дни гоне́ния лю́таго,/ зе́млю на́шу от безбо́жных пости́гшаго,/ на суди́щах, в заточе́ниих и про́пастех земны́х,/ в го́рьких рабо́тах и вся́ких ско́рбных обстоя́ниих/ о́браз терпе́ния и непосты́днаго упова́ния му́жественне яви́ли есте́./ Ны́не же, в раи́ сла́дости наслажда́ющеся,/ пред Престо́лом Бо́жиим во сла́ве предстои́те/ и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите.

Сего́ ра́ди мы, недосто́йнии,/ мо́лим вас, святи́и сро́дницы на́ши:/ не забу́дите земна́го оте́чества ва́шего,/ грехо́м Ка́инова братоуби́йства,/ поруга́нием святы́нь, безбо́жием и на́шими беззако́нии отягче́ннаго./ Умоли́те Го́спода Сил,/ да утверди́т Це́рковь Свою́ непоколеби́му в ми́ре сем многомяте́жнем и лука́вом;/ да возроди́т в Земли́ на́шей дух братолю́бия и ми́ра;/ да па́ки бу́дем мы ца́рское свяще́ние,/ род Бо́жий, избра́нный и святы́й,/ при́сно с ва́ми сла́вящий Отца́ и Сы́на и Свята́го Ду́ха во ве́ки веко́в. Ами́нь.