Хуткасць

Хуткасць

Ёсць хуткасць гуку, ёсць — звышгукавая,

Ёсць хуткасць зор, прыкметная для ўсіх.

Яшчэ ёсць хуткасць думкі, хуткасць тая,

Што, як святло, стагоддзе абганяе,

З тысячагоддзем размаўляе ўслых.

О, таямніца кніг, скажы, з якіх

Людскіх глыбінь ты цуды здабывала?

Твой зачынальнік слоў не знаў і мала

Свет разумеў, не меў матык і сох,

Маўчаў, як сом, пакуль бяда не ўзяла

За шчэлепы яго і на пясок

Не кінула, пакуль сярод начы,

Яго душы нямой, сканаць гатовай,

Не загадала: — Дыхай, плач, крычы,

Нябыт цяжкі пазбудзь не рыб'яй мовай.

Свет будзе пець, смяяцца, слёзы ліць

Датуль, пакуль на свеце людзям жыць.

Сабрат мой па пяру, на суд іх смела

Вынось усё, што ў сэрцы набалела.

Слёз не стрымаеш — плач, але не тою,

Пад пачуццё падробленай, слязою,

А той, што смех вяртае з небыцця.

Смяяцца хочаш — смейся, як дзіця.

Перад сабой і светам будзь праўдзівы.

Прымай, як дар, жыццём пасланы дзень,

І, можа, кніга гэта век імклівы

Дагоніць і абгоніць,

як прамень.