Le Grand Testament

XCIII

Ceste ballade luy envoye

Q ui se termine tout par erre.

Qui luy portera? Que je voye…

Ce sera Pernet de la Barre,

Pourveu, s'il rencontre en son erre

Ma damoiselle au nez tortu,

Il luy dira, sans plus enquerre:

«Orde paillarde, dont viens tu?»

Ballade de Villon à s'amye

Faulse beaulté qui tant me couste chier,

Rude en effect, ypocrite doulceur,

Amour dure plus que fer a macher,

Nommer que puis, de ma deffaçon seur,

Cherme felon, la mort d'un povre cueur,

Orgueil mussé qui gens met au mourir,

Yeulx sans pitié, ne veult droit de rigueur,

Sans empirer, ung povre secourir?

Mieulx m'eust valu avoir esté serchier

Ailleurs secours: ç'eust esté mon honneur.

Riens ne m'eust sceu hors de ce fait hacher:

Trocter m'en fault en fuyte et deshonneur.

Haro, haro, le grant et le mineur!

Et qu'esse cy? Mourray sans coup ferir?

Ou pictié veult, selon ceste teneur,

Sans empirer, ung povre secourir?

Ung temps viendra qui fera dessechier,

Jaunyr, flectrir vostre espanye fleur.

Je m'en reisse, se tant peusse mascher

Lors, mais nennil, ce seroit donc folleur:

Viel je seray, vous laide, sans couleur.

Or buvez fort, tant que ru peult courir;

Ne donnez pas a tous ceste douleur:

Sans empirer, ung povre secourir.

Prince amoureux, des amans le greigneur,

Vostre mal gré ne vouldroye encourir,

Mais tout franc cueur doit, par Nostre Seigneur,

Sans empirer, ung povre secourir.