Полный Тропарион. Том I

Начало индикта – церковное новолетие

Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та благости Твоея́, Го́споди,/ сохраня́я в ми́ре лю́ди и град Твой,/ моли́твами Богоро́дицы, и спаси́ ны.

В Вы́шних живы́й, Христе́ Царю́,/ всех ви́димых и неви́димых Тво́рче и Зижди́телю, иже дни и но́щи, времена́ и ле́та сотвори́вый,/ благослови́ ны́не вене́ц ле́та,/ соблюди́ и сохрани́ в ми́ре град и лю́ди Твоя, Многоми́лостиве.

1/141 Преподобного Симеона Столпника (459) и матери его Марфы (ок.428). Собор Пресвятой Богородицы в Миасинской обители (в память обре́тения Её иконы) (864) Черниговской-Гефсиманской (1869), Александрийской, Миасинской (864) и именуемой «Всеблаженная» (в Казани) (1905) икон Божией Матери.

Терпе́ния столп был еси,/ ревнова́вый2 пра́отцем, преподо́бне:/ Иову во страсте́х, Ио́сифу во искуше́ниих,/ и безпло́тных жи́тельству, сый в телеси́,/ Симео́не о́тче наш,/ моли́ Христа́ Бо́га спасти́ся душа́м на́шим.

Вы́шних ища́й, ни́жним совокупля́яйся, / и колесни́цу о́гненную сто́лп соде́лавый,/ тем собесе́дник а́нгелом был еси, преподо́бне,/ с ни́ми Христу́ Бо́гу моля́ся/ непреста́нно о всех нас.

Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель ми́ра, / еди́на бо еси Ма́ти и Де́ва,/ присноблагослове́нная и препросла́вленная,/ моли́ Христа́ Бо́га мир дарова́ти всей вселе́нной.

Торжество́ днесь пра́зднуем све́тлое, / се бо предлежи́т, о Всеблаже́нная, ико́на Твоя́ Всечестна́я,/ к ней же, любо́вию се́рдца вси приходя́ще, Влады́чице, поклоня́емся и те́пло Тебе́ вопие́м:/ изба́ви нас от бед и обстоя́ний.

Во пра́здник Твой соше́дшеся, ве́рнии,/ свяще́нное ко сла́ве Бо́жией торжество́ Твое́, Влады́чице, днесь всеблагогове́йно соверша́ем,/ любо́вию же чту́ще честну́ю ико́ну Твою́,/ Тебе́ песносло́вим вси в ра́дости: / ра́дуйся, Де́во Честна́я Всеблаже́нная.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Пречи́стая Влады́чице Богоро́дице,/ упова́ние всех христиа́н,/ поне́же* ина́го упова́ния не и́мамы ра́зве Тебе́,/ Всенепоро́чная Влады́чице моя́, Госпоже́ Богоро́дице,/ Ма́ти Христа́ Бо́га моего́./ Те́мже поми́луй и изба́ви мя от всех зол мои́х/ и умоли́ Ми́лостиваго Сы́на Своего́ и Бо́га моего́,/ да поми́лует окая́нную ду́шу мою́, / и да изба́вит мя от ве́чныя му́ки, и сподо́бит мя Ца́рствия Своего́.

2 /15 Мученика Маманта (275). Преподобных Антония (1073) и Феодосия (1074) Печерских. Калужской иконы Божией Матери (1771).

Му́ченик Твой, Го́споди, Ма́мант,/ во страда́нии свое́м вене́ц прият нетле́нный, от Тебе́, Бо́га на́шего:/ име́яй бо кре́пость Твою, мучи́телей низложи́,/ сокруши́ и де́монов немощны́я де́рзости,/ того́ моли́твами спаси́ ду́ши на́ша.3

Же́злом, свя́те, от Бо́га тебе́ да́нным,/ лю́ди твоя́ упаси́ на па́житех живоно́сных,/ зве́ри же неви́димыя и неукроти́мыя/сокруши́ под но́ги тя пою́щих,/ я́ко вси́, и́же в беда́х, предста́теля тя те́пла, Ма́манте, и́мут.

Велича́ем тя,/ страстоте́рпче святы́й Ма́манте, / и чтим честна́я страда́ния твоя́, / Я́же за Христа́ претерпе́л еси́.

Зве́зды мы́сленныя,/ просия́вшия на тве́рди Церко́вней,/ и́ноков Росси́йских основа́ние,/ пе́сньми, лю́дие, почтим, ра́достныя похвалы́ сим воздаю́ще,/ ра́дуйтеся, преблаже́ннии отцы́, Анто́ние со Феодо́сием Богому́дрим,/ при́сно моля́щиися о возсле́дствующих* и чту́щих па́мять ва́шу.

Дво́ицу нача́льных росси́йских свети́л почти́м,/ Анто́ния, Бо́гом по́сланнаго, и Феодо́сия, Бо́гом дарова́ннаго:/ тии бо пе́рвии, равноа́нгельным в Росси́и житие́м просия́вше от гор Ки́евских, освети́ша оте́чествия на́шего вся концы́,/ и путь к Небеси́ пра́вый мно́гим показа́ша,/ и,/ первоотцы́ и́ноком бы́вше, ли́ки спаса́емых Бо́гови приведо́ша,/ и ны́не, предстоя́ще в вы́шних немерца́емому Божества́ Све́ту, мо́лятся о душа́х на́ших.

Дво́ицу вели́ких оте́ц и пра́вило и́ноков све́тлое, у́мныя зари́ онебе́сившии Росси́йскую Це́рковь,/ кто по достоя́нию хвала́ми воспое́т,/ тии бо престо́лу Бо́жию предстоя́т;/ но я́ко иму́щии дерзнове́ние к Святе́й Тро́ице,/ Анто́ние преблаже́нне и Феодо́сие приснопа́мятне,/ моли́теся о моле́бная к вам принося́щих, /и любо́вию пе́сньми вас ублажа́ющих.

Тве́рдыя столпы́ благоче́стия,/ недви́жимая и́ноческих законоположе́ний основа́ния, и необори́мыя стены́ Росси́йския восхва́лим:/ Анто́ниа, возлю́бльшаго Бо́га, и Феодо́сиа, возлю́бленнаго Бо́гом:/ труды́ бо о́нех и по́стническия по́двиги прия́т па́че вся́каго всепло́дия,/ Еди́н во святы́х прославля́емый.

Ублажа́ем вас,/ преподо́бнии отцы́ Анто́ние и Феодо́сие,/ и чтим святу́ю па́мять ва́шу, / наста́вницы мона́хов/ и собесе́дницы а́нгелов.

Засту́пнице от враг иноплеме́нных, Необори́мая Калу́жския земли́/ и Изба́вительнице от смертоно́сныя я́звы, Ми́лостивая!/ Изба́ви рабы́ Твоя́ от вся́ких бед и боле́зней,/ с ве́рою и любо́вию прибега́ющия к чудотво́рней ико́не Твое́й,/ и спаси́ ду́ши на́ша.

Не и́мамы пе́сней, ниже́ слове́с,/ ка́ко досто́йно восхваля́ти Тя, Ма́ти Христа́ Бо́га на́шего,/ явле́ния ра́ди чудотво́рныя ико́ны Твоея́ земли́ Калу́жстей,/ то́кмо мо́жем вопи́ти Тебе́: не отврати́ ми́лости Твоея́ от нас,/ и ниспосли́ ю всем притека́ющим к цельбоно́сней ико́не Твое́й.

Велича́ем Тя,/ Богоро́дице Де́во,/ и почита́ем чудотво́рную ико́ну Твою́, / е́юже благоволи́ла еси́ спасти́ зе́млю Калу́жскую/от наше́ствий вра́жиих и всегуби́тельных боле́зней.

3/16 Священномученика Анфима, епископа Никомидийского (302). Преподобного Феоктиста, спостника Евфимия Великого (467). Блаженного Иоанна Власатого, Ростовского чудотворца (1580). Писидийской иконы Божией Матери (VI).

И нр́авом прича́стник... (общий священномученику).

Во свяще́нницех благоче́стно пожи́в,/ и муче́ния путь сконча́в,/ и́дольская угаси́л еси́ служе́ния,/ побо́рник быв твоему́ ста́ду, Богому́дре./ Те́мже тя и почита́ем ны́не, та́йно вопию́ще:/от бед изба́ви нас/ твои́ми моли́твами, приснопа́мятне Анфи́ме.

Велича́ем тя,/ священному́чениче Анфи́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Слез твои́х тече́ньми пусты́ни безпло́дное возде́лал еси,/ и и́же из глубины́ воздыха́ньми во сто трудо́в уплодоноси́л еси, / и был еси́ свети́льник вселе́нней,/ сия́я чудесы́, Феокти́сте о́тче наш,/ моли́ Христа́ Бо́га спасти́ся душа́м на́шим.

В по́стницех присовокупи́вся вели́кому Евфи́мию,/ в по́двизех, я́ко а́нгел на земли́ яви́ся,/ очища́я, преподо́бне, сердца́ ве́рных Боже́ственными зна́меньми повсегда́,/ сего́ ра́ди любо́вию, Феокти́сте, тя почита́ем.

Ублажа́ем тя,/ препо́добне о́тче Феокти́сте,/ и чтим святу́ю па́мять твою́,/ наста́вниче мона́хов/ и собесе́дниче ангелов.

Яви́лся еси́ во гра́де, я́ко в пу́стыни, / в смиренному́дрии, чистоте́, и в труде́х, и по́двизех, и в терпе́нии мно́зе,/ преблаже́нне о́тче Иоа́нне./ Взем бо Крест Христо́в, после́довал еси́ Ему́,/ и в моли́твах и в псалмопе́нии день и нощь пребыва́л еси́, / о спасе́нии всего́ ми́ра и ро́да христиа́нскаго иноязы́чная рече́ния глаго́ля./ Ны́не же, по преселе́нии твое́м к Невече́рнему Све́ту, ко гро́бу твоему́ притека́юще,/ ве́рнии мо́лятся Го́сподеви, Богоро́дице и Предте́чи, и прие́млют от Го́спода исцеле́ния моли́твами твои́ми./ При́сно за ны моли́ся, блаже́нне о́тче Иоа́нне, спасти́ся душа́м на́шим.

Яви́лся еси́ во гра́де, я́ко в пу́стыни, / смиренному́дрием и чистото́ю,/ и взем Крест Христо́в, после́довал Ему́/ в труде́х и по́двизех, и в терпе́нии мно́зе, преблаже́нне о́тче Иоа́нне./ И ны́не моли о нас, соверша́ющих па́мять твою́/ и усе́рдно притека́ющих к ра́це моще́й твои́х,/ изба́витися от бед, и душа́м на́шим пода́ти ве́лию ми́лость.

Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я,/ земна́я же презре́ и нивочто́же вмени́,/ и на земли́ а́нгельское житие́ препроводи́,/ в ве́чный поко́й

дости́же,/ иде́же глас пра́зднующих, с ни́миже моли́ся за ны,/ и душа́м на́шим проще́ние/ и телесе́м исцеле́ние да́руй.

Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я,/ земна́я же вся презре́ и нивочто́же вмени́,/ и на земли а́нгельское житие́ име́я,/ пресели́лся еси́ в

ве́чный поко́й,/ иде́же, предстоя́ Христу́ Бо́гу,/ моли́ спасти́ся нам и всему́ христиа́нскому ро́ду, я́ко да зове́м ти:/ ра́дуйся, преблаже́нне о́тче Иоа́нне.

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Велича́ем тя,/ святы́й блаже́нне Иоа́нне Ми́лостиве,/ и чтим святу́ю па́мять твою́, / ты бо мо́лиши за нас/ Христа́ Бо́га на́шего.

4/17 Священномученика Вавилы, епископа Антиохийского (251). Пророка Боговидца Моисея (1531 г. до Р. Х.). Обрётение мощей святителя Иоасафа, епископа Белгородского, чудотворца (1911). Второе обретение мощей святителя Митрофана, епископа Воронежского (1989)4. Иконы Божией Матери, именуемой «Неопалимая Купина» (1680).

И нра́вом прича́стник... (общий священномученику).

Я́ко благоче́стия пропове́дника и страда́льцев утвержде́ние, / Це́рковь сла́вит тя, Вави́ло сла́вне, освяща́ема днесь;/ но я́ко име́я дерзнове́ние* ко Го́споду,/ в ми́ре соверше́ннем велича́ющия и восхваля́ющия тя/ сохрани́ти Христу́ моли́ся, о многострада́льне.

Велича́ем тя,/ священному́чениче Вави́ло,/ и чтим святу́ю па́мять твою́,/ ты бо мо́лиши за нас Христа́/ Бо́га на́шего.

Проро́ка Твоего́ Моисе́я па́мять, Го́споди, пра́зднующе,/ тем Тя мо́лим: спаси́ ду́ши на́ша.

На высоту́ доброде́телей возше́л еси́, проро́че Моисе́е,/ и сего́ ра́ди сподо́бился еси́ ви́дети сла́ву Бо́жию./ Скрижа́ли* благода́тныя Зако́на прия́т,/ и начерта́ний благода́ть в себе́ нося́,/ и проро́ков был еси́ честна́я похвала́/ и благоче́стия вели́кое та́инство.

Лик проро́ческий с Моисе́ем и Ааро́ном весе́лием днесь весели́тся,/ я́ко коне́ц проро́чествия их на нас испо́лнися: днесь сия́ет Крест, и́мже нас спасл еси́./ Тех моли́твами, Христе́ Бо́же, поми́луй нас.

Велича́ем тя,/ проро́че Божий Моисе́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Святи́телю Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою, я́ко свети́льник пресве́тлый, просия́л еси́,/ и просла́влен от Бо́га яви́лся еси́,/ те́лом у́бо в нетле́нии почива́я, ду́хом же престо́лу Бо́жию предстоя́,/ чудеса́ пресла́вно источа́еши./ Моли́ Христа́ Бо́га, да утверди́т Оте́чество на́ше в Правосла́вии и благоче́стии и спасе́т ду́ши на́ша.

Моли́твенниче изде́тства преизря́дный,/ Богоизбра́нный святи́телю Христо́в Иоаса́фе,/ пра́вило ве́ры и о́браз милосе́рдия благоче́стным житие́м всем явля́еши,/ и с ве́рою к тебе́ притека́ющим оби́льно исцеле́ния источа́еши./ Моли́ Христа́ Бо́га, да утверди́т в держа́ве Росси́йстей правове́рие, мир и благоче́стие и спасе́т ду́ши на́ша.

Многоразли́чныя по́двиги жития́ твоего́ кто испове́сть?/ Многообра́зныя ми́лости Бо́жия тобо́ю явле́нныя кто исчи́слит?/ Дерзнове́ние же твое́ у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,/ святи́телю Христо́в и чудотво́рче Иоаса́фе.

Велича́ем тя,/ святи́телю о́тче Иоаса́фе,/ и чтим святу́ю па́мять твою́, / ты бо мо́лиши за нас/ Христа́ Бо́га на́шего.

Пра́вило ве́ры и о́браз кро́тости/ сло́вом и житие́м па́стве твое́й, о́тче смиренному́дре Митрофа́не, был еси́./ Те́мже и во све́тлостех святы́х/ со́лнца светле́йши возсия́л еси́,/ венце́м нетле́ния и сла́вы украша́емь, / моли́ Христа́ Бо́га/ стране́ на́шей и гра́ду твоему́ в ми́ре спасти́ся.

Кондак, глас 8

Воздержа́нием те́ло ду́ху поработи́в,/ ду́шу же равноа́нгельну сотвори́в,/ святи́тельскою оде́ялся еси́ оде́ждею, я́ко вене́ц свяще́нства,/ и ны́не, всех Влады́це предстоя́,/ моли́, всеблаже́нне Митрофа́не, умири́ти и спасти́ ду́ши на́ша.

Велича́ем тя,/ святи́телю о́тче Митрофа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Иже во огни́ купины́* неопали́мыя, дре́вле Моисе́ем ви́денныя,/ та́йну воплоще́ния Своего́ от Неискусобра́чныя Де́вы Мари́и Прообразова́вый,/ Той и ны́не, я́ко чуде́с Творе́ц и всея́

тва́ри Созда́тель,/ ико́ну Ея́ святу́ю чудесы́ мно́гими просла́ви,/ дарова́в ю ве́рным во исцеле́ние неду́гов и в защище́ние от о́гненнаго запале́ния./ Сего́ ра́ди вопие́м Преблагослове́нней:/ Наде́ждо христиа́н, от лю́тых бед, огня́ и гро́ма изба́ви на Тя упова́ющия, и спаси́ ду́ши на́ша, яко Милосе́рда.

Иже в купине́, огне́м горя́щей и несгора́емей,/ показа́вый Моисе́ови Пречи́стую Твою́ Ма́терь, Христе́ Бо́же, / огнь Божества́ неопа́льне во чре́ве прии́мшую/ и нетле́нну по рождестве́ пребы́вшую./ Тоя́ моли́твами от пла́мене страсте́й изба́ви нас/ и от о́гненных запале́ний град Твой сохрани́, я́ко Многоми́лостив.

Предочи́стим чу́вствия душ и теле́с на́ших,/ да ви́дим та́инство Боже́ственное,/ обра́зно явле́нное дре́вле вели́кому во проро́цех Моисе́ю купино́ю,/ горе́вшею огне́м и не сгора́вшею,/ в не́йже Твоего́ безсе́меннаго Рождества́, Богоро́дице, предвозвеще́ние испове́дуем/ и, благогове́йно покланя́ющеся Тебе́/ и Ро́ждшемуся от Тебе́ Спа́су на́шему,/ со стра́хом вопие́м:/ ра́дуйся, Влады́чице, Покро́ве и Прибе́жище, и Спасе́ние душ на́ших.

Велича́ем Тя,/ Пресвята́я Де́во,/ Богоизбра́нная Отрокови́це, / и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

5/18 Пророка Захарии и праведной Елисаветы, родителей Иоанна Предтечи (1). Преподобномученика Афанасия Брестского (1648). Убиение благоверного князя Российского Глеба, во Святом Крещении Давида (1015).

Свяще́нства оде́ждею обложе́н, прему́дре,/ по зако́ну Бо́жию всесожже́ния прия́тна священноле́пно приноси́л еси́, Заха́рие,/ и был еси́ свети́льник и зри́тель та́йных, / знаме́ния в тебе́ благода́ти нося́ я́вственно, всему́дре,/ и мече́м убие́н быв в хра́ме Божи́и, Христо́в проро́че,/ с Предте́чею моли́ спасти́ся душа́м на́шим.

Пра́ведных Твои́х, Заха́рии и Елисаве́ты, Го́споди, па́мять пра́зднующе, / те́ми мо́лим Тя:/ спаси́ ду́ши на́ша.

Проро́к днесь и свяще́нник Вы́шняго,/ Заха́рия, предложи́ Предте́чев роди́тель трапе́зу своея́ па́мяти,/ ве́рныя пита́я, питие́ бо пра́вды всем раствори́в;/ сего́ ра́ди скончава́ется, яко Боже́ственный таи́нник Бо́жия благода́ти.

Я́ко луна́ полна́,/ Свет Пра́вды от Мы́сленнаго Со́лнца Месси́и прия́ла еси́,/ и во всех за́поведех Госпо́дних с Заха́рием ходи́ла еси́, Боговозлю́бленная Елисаве́то./ Досто́йными у́бо тя пе́сньми ублажа́юще,/ Всеще́драго Све́та, просвеща́ющаго всех, Господа велича́ем.

Величаем вас,/ святи́и пра́веднии Заха́рие и Елисаве́то,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Блаже́н е́си, о́тче на́ш Афана́сие,/ я́ко ве́рно пожи́л еси́, стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруше́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти: о́тче наш, преподобному́чениче Афана́сие, похвало́ и украше́ние на́ше.

Мона́шескаго жития́ украше́ние и му́чеников красоту́ яви́л себе́ житие́м твои́м, Афана́сие,/ и, я́ко со́лнце пресве́тлое, лю́дем правосла́вным возсия́л еси́./ Те́мже и Христо́с да́ром чуде́с обогати́ тя,/ да чту́ще пресве́тлую па́мять твою́, зове́м ти:/ помина́й ста́до твое́ моли́твами твои́ми, препо́добне.

Яко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго,/ той бо зми́я попра́л есть.

Ублажа́ем тя,/ святы́й преподобному́чениче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Му́ченик Твой, Го́споди,/ спа́сшеся ве́ры ра́ди,/ кня́же Гле́бе,/ тружда́ющимся бы́стрый помо́щник/ и ненаде́жным наде́жда./ Ты бо боле́зни врачу́еши притека́ющим к тебе́ с ве́рою./ Те́мже и мы ве́рою мо́лимся: от бед изба́ви нас, чту́щих любо́вию па́мять твою́.

Днесь земля́ ублажа́ется, напи́вшися кро́ви твоея́,/ и храм освяща́ется, приня́вши те́ло твое́,/ великому́чениче княже Гле́бе./ Жела́нием боле́зни твоея́ за гре́зи5 предлага́ема/ и удесы́ благоуха́ния освяща́ющи,/ подаю́щи всему́ ми́ру ве́лию ми́лость.

Велича́ем тя,/ страстоте́рпче святы́й Гле́бе,/ и чтим честна́я страда́ния твоя́,/ я́же за Христа́/ претерпе́л еси́.

6/19 Воспоминание чуда Архистратига Михаила, бывшего в Хо́нех (Коло́ссах) (IV). Священномученика Кирилла, епископа Гортинского (III-IV). Киево-Братской (1654) и Арапетской (Аравийской) икон Божией Матери.

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я нас, припа́дающих приле́жно и вопию́щих:/ от бед изба́ви нас, я́ко чинонача́льник Вы́шних Сил.

Архистрати́же Бо́жий,/ служи́телю Боже́ственныя сла́вы, / а́нгелов нача́льниче и челове́ков наста́вниче,/ поле́зное нам проси́/ и ве́лию ми́лость,/ я́ко безпло́тных Архистрати́г.

Велича́ем тя,/ святы́й арха́нгеле Христо́в Михаи́ле,/ и вас, святи́и а́нгели, арха́нгели, нача́ла, вла́сти, си́лы, госпо́дствия, престо́ли, херуви́ми, серафи́ми,/ прославля́ющих Го́спода. (Из Часослова, изданного в 1742 году в Киево-Печерской лавре.)

Гла́сом боже́ственным от темни́цы изведе́н,/ в Риме братию в боже́ственней ве́ре утверди́л еси́,/ и, от а́нгела глаго́лы прии́м о святи́тельстей па́стве,/ во страда́нии свое́м па́ки гла́су с Небесе́ сподо́бися, / богоповеле́нный святи́телю и страда́льче Кири́лле,/ моли́ за ду́ши на́ша.

Виде́в себе́ ра́ди темни́чныя две́ри отве́рсты в полу́нощи/ и и́долы сокруше́ны,/ и Горти́нскую па́ству святи́тельскую,/ от Бо́га повеле́нную, до́бре упас,/ и по Христе́ наде́ждно пострада́в,/ священному́чениче Кири́лле, моли́ся за чту́щия тя.

Велича́ем тя,/ священному́чениче Кири́лле,/ и чтим святу́ю па́мять твою́, / ты бо мо́лиши за нас/ Христа́ Бо́га на́шего.

7 /20 Предпраздиство Рождества Пресвятой Богородицы. Мученика Созонта (ок. 304). Святителя Иоанна, архиепископа Новгородского, чудотворца (1186). Преподобномученика Макария Каневского, архимандрита Овручского, Переяславского (1678). Преподобного Серапиона Псковского, Спасо-Елеазаровского (1480).

От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам,/ ра́достию бо ра́дуются вся́ческая и обновля́ются./ Сра́дуйтеся ку́пно не́бо и земля́,/ восхвали́те Ю оте́чествия язы́ков./ Иоаки́м весели́тся, и А́нна торжеству́ет, зову́щи:/ непло́ды ражда́ет Богоро́дицу и Пита́тельницу жи́зни на́шея.

Де́ва днесь и Богоро́дица Мари́я,/ Черто́г безконе́чный Небе́снаго Жениха́, ражда́ется от непло́дове,/ Бо́жиим Сове́том, Колесни́ца Сло́ва благоукраша́ется./ На сие́ бо преднарече́ся Боже́ственная Дверь, и Ма́ти су́щия Жи́зни.

Му́ченик Твой, Го́споди... (общий мученику).

И́стиннаго и Богому́драго му́ченика,/ страда́льца благоче́стия иску́снаго,/ соше́дшеся днесь, велегла́сно восхва́лим Созо́нта, таи́нника благода́ти,/ исцеле́ний да́теля богате́йшаго:/ мо́лит бо Христа́ Бо́га о всех нас.

Велича́ем тя,/ страстоте́рпче святы́й Созо́нте,/ и чтим честна́я страда́ния твоя́,/ я́же за Христа́/ претерпе́л еси́.

Днесь све́тло красу́ется сла́внейший вели́кий Но́вград,/ име́я мо́щи твоя́ в себе́, святи́телю Иоа́нне,/ я́ко со́лнечныя лучи́ испуща́ющия,/ и подаю́щия исцеле́ния притека́ющим с ве́рою к ра́це моще́й твои́х;/ моли́ся Христу́ Бо́гу, изба́вити град сей невреди́м от ва́рварскаго плене́ния/ и междоусо́бныя бра́ни, и о́гненнаго запале́ния,/ святи́телю Богому́дре и чудоно́сче,/ небе́сный челове́че и земны́й а́нгеле,/ да соше́дшеся любо́вию в па́мять твою́,/ све́тло пра́зднуем в пе́снех и пе́ниих ра́дующеся,/ и Христа́ сла́вяще, тебе́ такову́ю благода́ть дарова́вшаго исцеле́ний,/ и Вели́кому Нову́граду заступле́ние и утвержде́ние.

Го́споди Бо́же наш,/ творя́й при́сно с на́ми по Твоему́ смотре́нию,/ не отста́ви ми́лости Твоея́ от нас,/ но моли́твами святи́теля Твоего́ Иоа́нна/ в ми́ре устро́й живо́т наш.

Возвесели́ся явле́нно, честна́я Це́рковь Христо́ва,/ в па́мять днесь приснослову́щаго святи́теля Иоа́нна,/ от Вели́каго Нова́града возсия́вшаго,/ и всю страну́ удиви́вшаго пресла́вными чудодея́нии,/ и все́ми доброде́тельми украси́вшагося./ И по преставле́нии бо честно́е те́ло его́ обре́теся нетле́нно,/ источа́ющее ве́лия чудеса́;/ те́мже зове́м ему́:/ о всеблаже́нне,/ моли́ Христа́ Бо́га непреста́нно о всех нас.

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственным жела́нием весь сам себе́ от ю́наго во́зраста Го́сподеви возложи́в,/ яви́лся еси́ свети́льник све́тлый гра́ду твоему́,/ поуча́я всех и́стинней ве́ре и житию́ Богоуго́дному,/ священному́чениче Мака́рие, Овру́чская похвало́./ Сего́ ра́ди, я́ко а́гнец непоро́чный гони́мый от распрелюби́вых враго́в,/ возше́л еси́ во оби́тель Кане́вскую,/ иде́же, я́ко па́стырь до́брый, ду́шу твою́ положи́л еси́ за о́вцы твоя́./ И ны́не ко всечестне́й ра́це многоцеле́бных моще́й твои́х мы гре́шнии со умиле́нием притека́юще,/ дар исцеле́ния прие́млем, многострада́льне./ Ты бо при́сно источа́еши боля́щим здра́вие, печа́льным утеше́ние,/ и всем чту́щим тя вся́кое исполня́еши тре́бование,/ моля́ся Христу́ Бо́гу спасти́ся душа́м на́шим.

Ко всечестне́й ра́це многоцеле́бных моще́й твои́х, преподобному́чениче Мака́рие,/ мы, гре́шнии, со умиле́нием притека́юще,/ дар исцеле́ния прие́млем:/ ты бо при́сно источа́вши боля́щим здра́вие,/ печа́льным утеше́ние/ и всех чту́щих тя вся́кое исполня́еши тре́бование,/ моля́щеся Христу́ Бо́гу спасти́ся душа́м на́шим.

Христу́, нас ра́ди с Небе́с соше́дшему,/ после́довал еси́ в по́двизех твои́х,/ Мака́рие о́тче наш./ Его́же моли́ о нас, ублажа́ющих тя,/ проще́ние прегреше́ний дарова́ти нам,/ любо́вию же и смире́нием сердца́ на́ша озари́ти/ и спасти́ ду́ши на́ша.

По́стническое и равноа́нгельское житие́ твое́/ страда́льческими уясни́л еси́ по́двиги,/ и а́нгелом совсе́льник, яви́лся еси́, Богоблаже́нне Мака́рие:/ с ни́ми Христу́ Бо́гу моля́ся не преста́й о всех нас.

Нетле́нною красото́ю смире́ннаго жити́я твоего́/ Бо́га на земли́ просла́вил еси́/ и Боже́ственныя ве́ры чистоту́/ сохраня́ти лю́ди научи́л еси́,/ страда́льческими же по́двиги кончину́ прие́м,/ от Бо́га просла́влен яви́лся еси́,/ преподобному́чениче Мака́рие, о́тче наш.

Ублажа́ем тя,/ преподобному́чениче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Изря́дством жития́ чистоту́ де́вства прии́м, Серапио́не,/ и вся кра́сная ми́ра сего́ возненави́дев,/ Христа́ Еди́наго возлюби́л еси́./ Сего́ ра́ди во вну́треннюю пусты́ню всели́вся и со зверьми́ живы́й,/ весь Христо́в спо́стник и друг Евфроси́на учи́теля твоего́ был еси́,/ тем же и мо́лим тя, помина́й нас, чту́щих святу́ю па́мять твою́, да зове́м ти:/ ра́дуйся, пусты́нная похвало́, преподо́бне о́тче наш.

От высокоу́мия иску́с прии́м смиренному́дрия,/ благода́тию Бо́жиего яви́лся еси́ рачи́тель, Богоно́сне Серапио́не./ Жела́нием бо Боже́ственныя любве́ вжига́ем,/ жите́йския молвы́ оста́вль,/ ревни́тель учи́телю твоему́ Евфроси́ну был еси́,/ безмо́лвием и жесто́ким пребыва́нием после́дуя Христу́:/ бде́нием же, и моли́твою, и посто́м о́браз был еси́ спо́стником твои́м;/ ны́не же моли́ся Го́сподеви, Богоблаже́нне,/ спасти́ся душа́м на́шим.

Ублажа́ем тя,/ преподо́бне о́тче Серапио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

8/21 Рождество Пресвятой Владычицы нашей Богородицы и Приснодевы Марии. Иконы Софии, Премудрости Божией (Киевской). Чтимые иконы Рождества Пресвятой Богородицы: Изяславская, Сямская (1524), Глинская (XVI), Лукиановская (XVI), Исааковская (1659). Холмской, Курской-Коренной «Знамение» (1295), Почаевской (1559), Леснинской и Домницкой (1696) икон Божией Матери.

Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце пра́вды, Христо́с Бог наш,/ и разруши́в кля́тву, даде́ благослове́ние,/ и упраздни́в сме́рть, дарова́ нам живо́т ве́чный.

Иоаки́м и А́нна поноше́ния безча́дства,/ и Ада́м и Е́ва от тли сме́ртныя свободи́стася, Пречи́стая, во святе́м рождестве́ Твое́м./ То пра́зднуют и лю́дие Твои́, вины́ прегреше́ний изба́вльшеся,/ внегда́ зва́ти Ти:/ непло́ды ражда́ет Богоро́дицу и Пита́тельницу жи́зни на́шея.

Велича́ем Тя,/ Пресвята́я Де́во,/ и чтим святы́х Твои́х роди́телей,/ и всесла́вное сла́вим рождество́ Твое́.

Ве́лия и неизрече́нная Прему́дрости Бо́жия си́ла/ смотре́ния плотска́го та́инства!/ Софи́е Преимени́тая,/ де́вственных душе́ и неизглаго́ланнаго де́вства чистото́,/ смире́нныя му́дрости и́стино,/ поко́ище Свята́го Ду́ха,/ пречестны́й хра́ме непостижи́мыя сла́вы Его́,/ огнезра́чный престо́ле Христа́ Бо́га на́шего,/ в Тя бо всели́ся неизрече́нно Сло́во Бо́жие, и плоть бысть,/ Неви́димый яви́ся,/ и неприкоснове́нный из Тебе́ изы́де,/ и с челове́ком поживе́ врага́ иско́ннаго уловля́я/ и челове́ки от кля́твы дре́вния свобожда́я,/ возводя́ па́ки, отню́дуже испадо́хом./ Мо́лимтися, Влады́чице,/ отягче́нныя ны во гресе́х лю́тых поми́ловати/ и спасти́ ду́ши на́ша,/ и, я́ко человеколюби́вая и милосе́рдая Цари́ца,/ Ма́ти Прему́дрости Бо́жия Сло́ва,/ при́зри на ны, гре́шныя лю́ди Твоя́,/ и умилосе́рдися, заступи́ от напа́стей и скорбе́й лю́тых/ и гра́ды на́ша невреди́мы сохрани́,/ иде́же ны́не и́мя Твое́ пресвято́е боголе́пно сла́вится.

Преве́чная Прему́дросте, Христе́ Бо́же наш!/ Боже́ственным смотре́нием Свои́м преклони́вый Небеса́,/ благоволи́л еси́ всели́тися во утро́бу Чи́стыя Отрокови́цы,/ средосте́ние вражды́ разруши́в,/ освяти́л еси́ естество́ на́ше/ и Ца́рствие Твое́ нам отве́рзл еси́;/ сего́ ра́ди Тебе́, Творца́ на́шего и Изба́вителя,/ и ро́ждшую Тя, спасе́ния на́шего та́йне послужи́вшую Де́ву Чи́стую,/ правосла́вно велича́ем.

Притыце́м, лю́дие, к чу́дному о́бразу Прему́дрости Бо́жия, Цари́цы и Богоро́дицы:/ Царя́ Небе́снаго Ма́ти, Христа́ Бо́га на́шего,/ услы́ши нас, гре́шных и недосто́йных раб Твои́х,/ в час сей припа́дающих и моля́щихся с воздыха́нием и слеза́ми,/ уми́льно глаго́лющих и приле́жно вопию́щих:/ от бед изба́ви нас, Влады́чице, и заступи́,/ и не пре́зри воздыха́ния на́шего и слез,/ и изми́ нас от вся́кия ско́рби и напа́сти,/ я́ко мо́жеши, хотя́щи,/ ра́зве Тебе́ Предста́тельницы ины́я и хода́тая те́пла не и́мамы к Сы́ну Твоему́ и Бо́гу на́шему,/ да спасе́т Тебе́ ра́ди ду́ши на́ша.

Притеце́м, правосла́внии лю́дие,/ к прему́дрости Бо́жией/ и ви́дим чудотво́рную ико́ну Пречи́стыя Богома́тере,/ ю́же имену́ем по явле́нию Софи́ю, Прему́дрость Бо́жию,/ зане́ храм бысть одушевле́н Единоро́днаго Сы́на и Сло́ва Бо́жия./ Сия́ у́бо светолу́чно сия́ет в пречестне́м хра́ме Свое́м/ и сердца́ на́ша весели́т, приходя́щих с ве́рою/ и взира́ющих со стра́хом и благогове́нием на пречи́стую сию́ ико́ну,/ помышля́юще в сердца́х на́ших,/ я́ко вои́стину Прему́дрости Бо́жия есть селе́ние/ и та́инства Его́ смотре́ние,/ на упова́ние бо ве́рным/ воображе́ние огнезра́чное Ея́ зрим/ и покланя́емся, я́ко и́стинному и непоро́чному Ея́ де́вству/ в рождестве́ и по рождестве́ па́ки;/ от Нея́же изы́де Огнь Боже́ственный,/ попаля́я тле́нныя стра́сти/ и просвеща́я ду́ши на́ша и чи́сты сотворя́я,/ и́мже и ве́ки сотвори́ Оте́ц/ Той же и Му́дрость, Сло́во и Си́ла нарече́тся,/ сия́ние сла́вы и О́браз О́тчи Ипоста́си./ И па́ки у́бо мо́лим/ и, припа́дающе, лобыза́ем пречестну́ю ико́ну Прему́дрости Бо́жия Ма́тере/ и велегла́сно вопие́м:/ о Милосе́рдая Влады́чице,/ спаси́ рабы́ Своя́ от наси́лия диа́воля,/ от нахожде́ния иноплеме́нных и междоусо́бныя бра́ни,/ я́ко Ты еси́ всех благи́х Пода́тельница и Покрови́тельница/ притека́ющим к Тебе́ с ве́рою и прося́щим ве́лия ми́лости.

Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

Досто́йно есть блажи́ти Тя,/ Богоро́дице Де́во,/ честне́йшую Херуви́м/ и сла́внейшую без сравне́ния Серафи́м.

Песнь вся́ку духо́вную принесе́м Богоро́дице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.

Велича́ем Тя,/ Пресвята́я Де́во,/ и чтим о́браз Твой честны́й,/ и́мже показа́ла еси́/ пресла́вное зна́мение.

Пред свято́ю Твое́ю ико́ною, Влады́чице,/ моля́щийся исцеле́ний сподобля́ются,/ ве́ры и́стинныя позна́ние прие́млют,/ и ага́рянская наше́ствия отража́ют./ Те́мже и нам, к Тебе́ припа́дающим,/ грехо́в оставле́ние испроси́,/ по́мыслы благоче́стия сердца́ на́ша просвети́/ и к Сы́ну Твоему́ моли́тву вознеси́/ о спасе́нии душ на́ших.

К Богоро́дице приле́жно ны́не притеце́м/ гре́шнии и смире́ннии и припаде́м/ к ди́вному о́бразу Ея́, и́же на горе́ Поча́евскей,/ к нему́же уми́льно взира́юще и моля́щеся,/ Цари́це и Влады́чице, из глубины́ души́ вопие́м:/ о Пречу́дная Де́во, Ма́ти Го́спода Вы́шняго,/ от лет дре́вних избра́вшая оби́тель Поча́евскую в ме́сто селе́ния Своего́!/ Зе́млю оте́чественную на́шу в Правосла́вии и ми́ре утверди́,/ христолюби́вому во́инству спобо́рствуй/ и спаси́ всех предстоя́щих и моля́щихся Тебе́/ умиле́нною душе́ю и сокруше́нным се́рдцем/ пред пречи́стым Твои́м о́бразом со слеза́ми./ Не отврати́ рабы́ Твоя́ тщи:/ Тя бо и еди́ну наде́жду и́мамы.

Исто́чник исцеле́ний и ве́ры Правосла́вныя утвержде́ние/ Поча́евская Твоя́ ико́на, Богоро́дице, яви́ся,/ те́мже и нас, к ней притека́ющих,/ от бед и искуше́ний свободи́,/ Ла́вру Твою́ невреди́му сохрани́,/ Правосла́вие во о́крест стоя́щих страна́х утверди́/ и грехи́ разреши́ моли́твенник Твои́х:/ ели́ка бо хо́щеши, мо́жеши.

Велича́ем Тя,/ Пресвята́я Де́во,/ и почита́ем честну́ю ико́ну Твою́,/ ю́же от лет дре́вних/ на горе́ Поча́евстей просла́вила еси́.

Дне́сь, благове́рнии лю́дие,/ осеня́емии святы́м Богома́тери о́бразом,/ во умиле́нии глаго́лем:/ Влады́чице, помози́ рабо́м Твои́м/ в напа́стех, ско́рбех и боле́знех,/ обремене́ны бо грехми́ мно́гими,/ и изба́ви ны от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Аще и мно́гажды ико́на Твоя́, Богоро́дице,/ уноси́ма бысть с ме́ста явле́ния,/ оба́че чуде́сне в пусты́ню возвраща́шеся,/ отону́дуже всем ве́рным подае́т бла́го потре́бное.

Велича́ем Тя,/ Пресвята́я Де́во,/ и чти́м о́браз Твой святы́й,/ и́мже боле́зни на́ша врачу́еши/ и ду́ши на́ша к Бо́гу возво́диши.

9/22 Попразднство Рождества Пресвятой Богородицы. Праведных Богоотец Иоакима и Анны. Преподобного Иосифа, игумена Волоцкого, чудотворца (1515). Обретение и перенесение мощей святителя Феодосия, архиепископа Черниговского (1896). Воспоминание III Вселенского Собора (431).

Пра́ведных Твои́х Иоаки́ма и Анны, Го́споди, па́мять пра́зднующе,/ те́ми мо́лим Тя,/ спаси́ ду́ши на́ша.

И́же в зако́нней благода́ти пра́ведни бы́вше,/ Младе́нца Богода́ннаго породи́ша нам, Иоаки́м и Анна./ Те́мже днесь све́тло торжеству́ет,/ ве́село пра́зднующи, Боже́ственная Це́рковь/ честну́ю ва́шу па́мять,/ сла́вящи Бо́га, воздви́гшаго рог спасе́ния нам в дому́ Дави́дове.

Ра́дуется ны́не Анна,/ непло́дства разреши́вшися соу́з,/ и пита́ет Пречи́стую,/ созыва́ющи вся воспе́та,/ Дарова́вшаго от чре́ва ея́ челове́ком/ Еди́ну Ма́терь и неискусому́жную.

Велича́ем вас,/ святи́и пра́веднии Иоаки́ме и Анно,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Я́ко по́стников удобре́ние и отце́в красоту́/ ми́лости пода́теля, разсужде́ния свети́льника,/ вси ве́рнии соше́дшеся восхва́лим,/ кро́тости учи́теля, и ересе́й посрами́теля,/ прему́драго Ио́сифа, Росси́йскую звезду́/ моля́щася Го́споду,/ поми́ловатися душа́м на́шим.

Жития́ треволне́ния и мяте́ж мирски́й, и страстна́я взыгра́ния в ничто́же вмени́в,/ пусты́нный граждани́н показа́лся еси́,/ мно́гих быв наста́вник, Ио́сифе преподо́бне,/ мона́хов собра́тель, и моле́бник ве́рен, чистоты́ рачи́тель./ Моли́ Христа́ Бо́га спасти́ся душа́м на́шим.

Ублажа́ем тя,/ преподо́бне о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преудобре́н во архиере́ех, святи́телю Феодо́сие,/ был еси́ свети́ло своему́ ста́ду,/ та́же преста́вился еси́ в ве́чныя оби́тели./ Умоли́ у престо́ла Царя́ сла́вы/ изба́витися нам от находя́щих на ны зол/ и спасти́ся душа́м на́шим, свя́те,/ моли́твами твои́ми.

Па́стырей Нача́льнику Христу́ труди́лся еси́, святи́телю Феодо́сие,/ на па́жити духо́вней пита́я слове́сныя твоя́ о́вцы,/ и прия́л еси́ от Христа́ Спа́са целе́бный дар/ цели́ти не́мощи душе́вныя и теле́сныя вся́каго с ве́рою приходя́щаго к целе́бным твои́м моще́м./ Моли́, свя́те, о призыва́ющих и́мя твое́,/ от наве́тов вра́жиих спасти́ся душа́м на́шим.

Па́стырей Нача́льнику Христу́ труди́лся еси́, святи́телю Феодо́сие,/ на па́жити духо́вней слове́сныя твоя́ о́вцы пита́я,/ и целе́бен дар от Христа́ Спа́са прия́л еси́,/ во е́же не́мощи душе́вныя и теле́сныя цели́ти всех с ве́рою к тебе́ приходя́щих./ Те́мже и ны́не, свя́те,/ моли́ся, всем, и́мя твое́ призыва́ющим, от наве́тов вра́жиих/ спасти́ся и поми́ловатися душа́м нашим.

Велича́ем тя,/ святи́телю о́тче Феодо́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

10/23 Мучениц Минодоры, Митродоры и Нимфодоры (305–311). Преподобного Павла Послушливого, Печерского, в Дальних пещерах почивающего (XII-XIV). Преподобного князя Андрея, в иночестве Иоасафа, Спасокубенского (1453). Святителя Феодорита, архиепископа Рязанского и Муромского (1617).

Агницы слове́сныя Агнцу и Па́стырю приведо́стеся муче́нием ко Христу́,/ тече́ние сконча́вше, и ве́ру соблю́дше./ Те́мже днесь ра́достною душе́ю соверша́ем, досточу́днии, святу́ю ва́шу па́мять,/ Христа́ велича́юще.

За Тро́ицу терпели́во страда́льчествовавшия,/ многоко́зненнаго врага́ победи́сте,/ бра́тски обле́кшеся ду́хом./ Те́мже водвори́стеся с пятьми́ де́вами6/ в Небе́сном, страстоте́рпицы, черто́зе,/ и со а́нгелы Всецарю́/ в весе́лии непреста́нно предстоите́.

Велича́ем вас,/ страстоте́рпицы святы́я Минодо́ро, Митродо́ро и Нимфодо́ро,/ и чтим честна́я страда́ния ва́ша,/ я́же за Христа́/ претерпе́ли есте́.

Послуша́нию Христо́ву подража́вый,/ и и́мени Его́ ра́ди во вся́ком послуша́нии,/ терпели́вне, да́же до сме́рти, Па́вле всече́стне, потруди́выйся,/ мзду же ны́не послуша́ния своего́ трудолю́бно от Го́спода прие́м,/ к Нему́ всегда́ моли́ся о нас, пою́щих тя.

Послу́шника и́стинна и преподо́бным равноче́стна,/ всеблаже́ннаго отца́ на́шего Па́вла,/ прииди́те, люби́мицы, усе́рдие ублажи́м,/ я́ко моля́щася непреста́нно о всех нас.

Ублажа́ем тя,/ преподо́бне о́тче Па́вле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Насажде́нный при вода́х воздержа́ния,/ струя́ми слез твои́х напая́ем,/ я́ко ле́торасль* живоно́сная в вертогра́де Це́ркве Бо́жия процве́л еси́, блаже́нне Иоаса́фе,/ плоды́ доброде́телей возраща́я и ду́ши ве́рующих пита́я./ Те́мже и Христо́с в Небе́сныя страны́ тя пресели́./ Но помина́й нас, любо́вию святу́ю па́мять твою́ чту́щих, благове́рне кня́же,/ и моли́ Пресвяту́ю Тро́ицу, во е́же спасти́ся душа́м на́шим.

Я́ко дре́во насажде́нно при вода́х воздержа́ния,/ струя́ми слез твои́х напая́ем, преподо́бне о́тче Иоаса́фе,/ се́яв бо слеза́ми, в ра́дости жне́ши доброде́тельныя рукоя́ти./ Тем Вели́кий Мздовоздая́тель в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́,/ моли́ Святу́ю Тро́ицу, преподо́бне Иоаса́фе,/ спасти́ся душа́м на́шим.

Яви́ся ве́лие со́лнце Христо́ве Це́ркви,/ просвеща́я тех житие́м свои́м, всече́стне,/ я́ко черпа́лом златы́м от кла́дезя неиско́паннаго,/ чудеса́ поче́рпл еси́ от Исто́чника неистощи́маго,/ на успе́ние свое́ прише́л еси́, всеблаже́нне Иоаса́фе,/ ныне́ всем дае́ши грехо́м проще́ние.

Ублажа́ем тя,/ преподо́бне о́тче Иоаса́фе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Наста́вниче смире́ния и благоче́стия,/ пра́вило ве́ры и доброде́тели,/ Це́ркве свети́льниче, святи́телю Феодори́те,/ па́ству свою́ благоче́стно упа́сл еси́/ и ко Христу́ приве́л еси́,/ те́мже венце́м сла́вы от Го́спода укра́шен,/ моли́ся приле́жно Царю́ Сла́вы,/ да спасе́т ду́ши на́ша.

До́брый ко́рмчий быв кораблю́ Це́ркве ряза́нския,/ моли́твенниче о па́стве свое́й неусы́пный,/ храня́ дух ве́ры в ней и благоче́стия,/ святы́я мо́щи святи́теля Васи́лия прене́сл еси́/ и чудотво́рный о́браз Богома́тери Феодо́тьевския/ в годи́ну напа́стей ей указа́л еси́,/ я́ко исто́чник исцеле́ний и неоску́днаго утеше́ния,/ попече́ние о земле́ Росси́йстей творя́,/ на ца́рство Ру́сское царя́ Михаи́ла воззва́л еси́./ Святи́телю о́тче Феодори́те,/ помина́й нас, досто́йно чту́щих святу́ю па́мять твою́,/ да спасе́т Госпо́дь ду́ши на́ша.

Велича́ем тя,/ святи́телю о́тче Феодори́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

11/24 Преподобного Силуана Афонского (1938). Перенесение мощей преподобных Сергия и Германа, Валаамских чудотворцев (XVIII). Преподобной Феодоры Александрийской (474–491). Каплуновской иконы Божией Матери (1689). На этот день с 12/25 сентября переносится служба сщмч. Автоному, еп. Италийскому.

Христа́ Учи́теля/ в пути́ смире́ния, помоли́вся, прия́л еси́,/ свиде́тельствующу Ду́ху в се́рдце твое́м спасе́ние,/ сего́ ра́ди веселя́тся ны́не лю́дие вси́/ о па́мяти твое́й, на упова́ние зва́ннии;/ преподо́бне о́тче Силуа́не,/ моли́ Христа́ Бо́га спасти́ся душа́м на́шим.

Испове́дник любве́ Христо́вой да́лся еси́ вселе́нней,/ ты, сладча́йший в богосло́вех, преподо́бне о́тче,/ Смире́ннаго и Кро́ткаго узре́л еси́,/ и се́рдце О́наго позна́л еси́;/ те́мже вси мы, Силуа́не преблаже́нне,/ твои́ми богоглаго́ливыми словесы́ просвеща́еми,/ сла́вим просла́вльшаго тя Ду́ха.

Серафи́мския лю́бве ко Го́споду пла́менный ревни́телю,/ и Иереми́и, о наро́де пла́чущему,/ усе́рдный подража́телю,/ всеблаже́нне о́тче Силуа́не,/ ты, зо́ву Ма́тере Го́спода сил вне́мляй,/ зми́я грехо́внаго мужему́дренно изрыгну́л еси́/ и в го́ру Афо́нскую от суеты́ ми́ра удали́лся еси́,/ иде́же в труде́х и моли́твах со слеза́ми/ благода́ть Свята́го Ду́ха оби́льно стяжа́./ Е́юже сердца́ на́ша воспламени́/ и с тобо́ю уми́льно взыва́ти укрепи́:/ Го́споди мой, Жизнь моя́ и Ра́досте Свята́я,/ спаси́ мир и нас от вся́ких лю́тых.

Егда́ на земли́ Христу́ послужи́л еси́,/ непоро́чне в стопа́х Того́ ходя́щи,/ ны́не на Небесе́х зри́ши, Его́же возжеле́л еси́,/ и спребыва́еши Ему́, я́коже обеща́;/ те́мже, о́тче Силуа́не преподо́бне,/ научи́ ны, е́юже шел еси́ стезе́ю.

Смиренному́дрия испове́дниче преди́вный/ и человеколю́бия Ду́хом Святы́м согрева́емая добро́то,/ Бо́гу возлю́бленне Силуа́не,/ о по́двизе твое́м Це́рковь Росси́йская ра́дуется,/ и́ноцы же горы́ Афо́нския и вси христиа́нстии лю́дие,/ веселя́щеся, сыно́внею любо́вию к Бо́гу устремля́ются,/ Его́же моли́ о нас, равноа́нгельне богове́дче,/ во е́же спасти́ся нам, в горе́нии лю́бве тебе́ подража́ющим.

О, преди́вный уго́дниче Бо́жий Силуа́не,/ земли́ Росси́йския благода́тное рожде́ние,/ пустыннолю́бцев горы́ Афо́нския похвало́ и украше́ние!/ Приими́ от нас ма́лое сие́ моле́ние/ и испроси́ у распе́ншагося за мир Христа́ Бо́га на́шего,/ да поми́лует всех нас, чад Свои́х,/ и благода́тию Свята́го Ду́ха в сою́з любве́ Своея́ свя́жет нас,/ и и́миже весть су́дьбами к Себе́ приведе́т,/ во е́же твои́ми моли́твами непосты́дно яви́тися нам/ в день су́дный пред лице́м сла́вы Его́,/ и сподо́битися со все́ми святы́ми и а́нгелы/ воспева́ти побе́дную песнь: Аллилу́иа.

Ублажа́ем тя,/ преподо́бне о́тче Силуа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ева́нгелия Христо́ва и́стиннии послу́шницы яви́стеся, преподо́бнии,/ мир и вся я́же в нем, я́ко не су́щая, преоби́девше любве́ ра́ди Христо́вы, и в морски́й о́стров всели́стеся,/ и трудолю́бно в нем проти́ву ко́зней неви́димых враго́в подвиза́стеся,/ посто́м, бде́нием же и всено́щным стоя́нием пло́ти своя́ ду́ху му́дре повину́ли есте́;/ сего́ ра́ди от Вседержи́тельныя десни́цы досто́йныя венцы́ прия́ли есте́./ И ны́не Пресвяте́й Тро́ице предстоя́ще,/ моли́теся, всеблаже́ннии отцы́ Се́ргие и Ге́рмане,/ сохрани́тися в ми́ре оте́честву на́шему и спасти́ся душа́м на́шим.

От мирски́я молвы́ бе́гающе, безмо́лвия и благоче́стия рачи́тели,/ в ти́хое приста́нище Валаа́ма от восто́ка приидо́сте,/ и в нем ева́нгельски Христу́ доброде́тельми после́довавше, на верх соверше́нства востекли́ есте́./ И ны́не в торжестве́ преми́рном богозре́нием наслажда́ющеся,/ преблаже́ннии отцы́ Се́ргие и Ге́рмане, Человеколю́бца Бо́га моли́те, е́же спасти́ всех нас, благоче́стно вас почита́ющих.

От мирска́го жития́ изше́дше,/ отверже́нием же ми́ра Христу́ после́довасте, и достиго́сте вели́каго Нева́ е́зера,/ и в нем на о́строве Валаа́ме все́льшеся,/ равноа́нгельским житие́м пожи́ли есте́;/ отону́дуже, веселя́щеся, прешли́ есте́ к Небе́сным черто́гам./ И ны́не со а́нгелы Влады́чню престо́лу предстоя́ще,/ помина́йте нас, чад свои́х, я́же собра́ли есте́, Богому́дрии,/ да ра́достно от души́ вопие́м:/ ра́дуйтеся, Се́ргие и Ге́рмане, отцы́ преблаже́ннии.

Ублажа́ем вас,/ преподо́бнии отцы́ Се́ргие и Ге́рмане,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

В тебе́, ма́ти, изве́стно спасе́ся, е́же по о́бразу... (общий преподобной жене).

Те́ло твое́ поста́ми изнури́вши,/ бде́нными моли́твами Творца́ умоли́ла еси́ о гресе́ твое́м,/ я́ко да прии́меши соверше́нное проще́ние,/ и прия́ла еси́ оставле́ние, пу́ть покая́ния показа́вши.

Ублажа́ем тя,/ преподо́бная ма́ти Феодо́ро,/ и чтим святу́ю па́мять твою́,/ ты бо мо́лиши за нас/ Христа́ Бо́га нашего.

12/25 Отдание праздника Рождества Пресвятой Богородицы. Священномученика Автонома, епископа Италийского (313)7. Перенесение мощей праведного Симеона Верхотурского (1704).

И нра́вом прича́стник, и престо́лом наме́стник... (общий священномученику).

Боже́ственная, прему́дре, непоро́чне тайново́дил еси́,/ же́ртва прия́тна был еси́, Богоблаже́нне,/ Христо́ву бо пил еси́ ча́шу, пресла́вне,/ свети́льниче всеми́рный,/ моля́ непреста́нно о всех нас.

Велича́ем тя,/ священному́чениче Автоно́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Днесь ра́дуется сла́вная страна́ Сиби́рь,/ обре́тши святы́я твоя́ мо́щи внутрь себе́./ Архиере́и, свяще́нницы и весь сонм людски́й,/ духо́вне веселя́щеся, вопие́м ти: о богому́дре Симео́не!/ Изба́ви нас, к тебе́ прибега́ющих, от всех бед,/ прося́ще пода́тися всем по коего́ждо проше́нию/ и изба́витися стране́ сей и гра́ду от о́гненнаго запале́ния и пога́нскаго наше́ствия и междоусо́бныя бра́ни и от вся́каго зла./ Чту́ще же ны́не честны́х и многоцеле́бных моще́й твои́х пренесе́ние, но́вый целе́бниче, вси мы вопие́м:/ сла́ва Да́вшему тобо́ю всем исцеле́ние!

Мирска́го мяте́жа бе́гая, все жела́ние обрати́л еси́ к Бо́гу,/ да в виде́ния восхо́д обря́щеши горе́,/ и та́ко не уклони́вся в лука́вствия се́рдца,/ но очи́стив ду́шу и те́ло, прия́л еси́ благода́ть точи́ти цельбы́ ве́рным и неве́рным, притека́ющим к ра́це моще́й твои́х, Симео́не пра́ведне./ Те́мже, по да́нному ти да́ру, испроси́ у Христа́ Бо́га исцеле́ние нам боля́щим душе́вными страстьми́/ и моли́ спасти́ ду́ши на́ша.

Наста́ днесь всечестна́я па́мять но́ваго целе́бника пра́веднаго Симео́на,/ созыва́ет же лю́ди в пречестны́й храм свята́го Бо́жия архиере́я Никола́я,/ иде́же ра́достно соше́дшеся благочести́вых мно́жества,/ ве́село пра́зднуют пренесе́ние честны́х и многоцеле́бных моще́й твои́х пра́здник./ Ты бо яви́лся еси́ гра́ду на́шему и всей Сиби́ри врачевство́ безме́здное,/ подава́я исцеле́ние с ве́рою приходя́щим к тебе́, Симео́не всеблаже́нне!/ Но я́ко име́яй дерзнове́ние ко Влады́це Христу́,/ Того́ моли́ спасти́ град и лю́ди, моля́щияся тебе́,/ па́че же хода́тай бу́ди ко Го́споду во дни наше́ствия печа́ли рабо́м твои́м,/ да зове́м ти: ра́дуйся, Сиби́рстей стране́ похвало́ и утвержде́ние гра́ду на́шему.

Ми́ра суе́тнаго отве́рглся еси́, да бла́га ве́чныя жи́зни насле́диши,/ возлюби́в незло́бие и чистоту́ души́ и те́ла./ Сниска́л еси́, е́же возлюби́л, свиде́тельствуют бо о сем гроб и нетле́ние моще́й твои́х, и благода́ть чудотворе́ния наипа́че./ То́чиши бо цельбы́ всем притека́ющим к тебе́ и непросвеще́нным, Симео́не блаже́нне, чудотво́рче преди́вный.

Ублажа́ем тя,/ святы́й пра́ведный Симео́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

13/26 Память обновления (освящения) храма Воскресения Христова в Иерусалиме (Воскресение словущее) (335). Предпразднство Воздвижения Честного и Животворящего Креста Господня. Священному ченика Корнилия сотника (I). Дубовичской иконы Божией Матери (XVI).

Я́коже вы́шния тве́рди благоле́пие,/ и ни́жнюю споказа́л еси́ красоту́ свята́го селе́ния сла́вы Твоея́, Го́споди,/ утверди́ сие́ во век ве́ка/ и приими́ на́ша в нем непреста́нно приноси́мая Тебе́ моле́ния Богоро́дицею,/ всех Животе́ и Воскресе́ние.

Не́бо многосве́тлое Це́рковь показа́ся,/ вся просвеща́ющая ве́рныя, в не́йже стоя́ще зове́м:/ се́й дом утверди́, Го́споди.

Обновле́ние ду́ха в сердца́х/ и просвеще́ние вну́тренним да́руй,/ ве́рою соверша́ющим свяще́нная обновле́ния хра́ма до́му Твоего́,/ ему́же благоволи́л еси́ созда́тися/ в Твое́ Боже́ственное и́мя,/ Еди́не во святы́х прославля́емый.

Животворя́щий Крест Твоея́ бла́гости,/ Его́же да́ровал еси́ нам, недосто́йным, Го́споди,/ Тебе́ прино́сим в моли́тву, спаси́ град Твой, моля́щийся Богоро́дицею,/ Еди́не Человеколю́бче.

Просте́р Моисе́й ру́ки к высоте́ небе́сней,/ прообразова́вше Крест, Боже́ственное ору́жие ве́рных,/ на не́мже Христо́с грехи́ пригвозди́. Тем враг пла́каше стражда́ боле́зненно чу́вствы, глаго́лаше:/ древя́ное мя копие́ прободе́ посреде́ се́рдца моего́./ Христо́с вся от а́дских уз реши́т.

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодухнове́нне,/ в виде́ния восхо́д./ Сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Корни́лие,/ моли́ Христа́ Бо́га спасти́ся душа́м на́шим.

Нача́ток святы́й тя Це́рковь от язы́к прия́т,/ просвеща́ющаго сию́ доброде́тельными твои́ми дея́нми,/ священнотаи́нниче богому́дре Корни́лие.

Велича́ем тя,/ священному́чениче Корни́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

14/27 Воздвижение Честного и Животворящего Креста Господня. Преставление святителя Иоанна Златоуста (407)8. Леснинской (1683), Лорецкой (1291) и Ченстокрестной икон Божией Матери.

День постный.

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

Вознесы́йся на Крест во́лею,/ тезоимени́тому Твоему́ но́вому жи́тельству9/ щедро́ты Твоя́ да́руй, Христе́ Бо́же,/ возвесели́ си́лою Твое́ю верны́я лю́ди Твоя́,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,/ непобеди́мую побе́ду.

Велича́ем Тя,/ Живода́вче Христе́,/ и чтим Крест Твой Святы́й,/ и́мже нас спасл еси́ от рабо́ты вра́жия.

Сла́ва, Го́споди, Кресту́ Твоему́ честно́му.

Уст твои́х, я́коже све́тлость огня́, возсия́вши благода́ть,/ вселе́нную просвети́,/ не сребролю́бия ми́рови сокро́вища сниска́,/ высоту́ нам смиренному́дрия показа́;/ но твои́ми словесы́ наказу́я, о́тче Иоа́нне Златоу́сте,/ моли́ Сло́ва Христа́ Бо́га спасти́ся душа́м на́шим.

От небе́с прия́л еси́ Боже́ственную благода́ть,/ и твои́ми устна́ми вся учи́ши/ покланя́тися в Тро́ице еди́ному Бо́гу,/ Иоа́нне Златоу́сте всеблаже́нне, преподо́бне,/досто́йно хва́лим тя:/ е́си бо наста́вник, я́ко Боже́ственная явля́я.

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

15/28 Попразднство Воздвижения Креста. Великомученика Никиты (ок. 372). Обретение мощей первомученика архидиакона Стефана (415). Новоникитской иконы Божией Матери (372).

Му́ченик Твой, Го́споди... (общий мученику).

Крест Христо́в, я́ко не́кое ору́жие, усе́рдно восприи́м, и к боре́нию враго́в прите́кл еси́,/ и за Христа́ пострада́в, последи́ огне́м свяще́нную твою́ ду́шу Го́споду преда́л еси́,/ отону́дуже и даро́в исцеле́ния от Него́ сподо́бился еси́ прия́ти,/ великому́че ниче Ники́то./ Моли́ Христа́ Бо́га спасти́ся душа́м на́шим.

Пре́лести посе́к держа́ву стоя́нием твои́м,/ и побе́ды прии́м вене́ц во страда́льчествех твои́х,/ со а́нгелы сла́вне ра́дуешися, Ники́то тезоимени́те,/ с ни́ми Христа́ Бо́га моля́ непреста́нно о всех нас.

Велича́ем тя,/ страстоте́рпче святы́й Ники́то,/ и чтим честна́я страда́ния твоя́,/ я́же за Христа́/ претерпе́л еси́.

Ца́рским ве́нцем венча́ся/ твой верх от страда́ний,/ я́же претерпе́л е́си по Христе́ Бо́зе,/ му́чеников первострада́льче Стефа́не,/ ты бо иуде́йское обличи́вый неи́стовство,/ ви́дел еси́ твоего́ Спа́са одесну́ю Отца́,/ Того́ у́бо моли́ о душа́х на́ших.

Апо́столом совсе́льник/ и страда́льцем первострада́лец,/ Христо́в служи́тель, прехва́льне Стефа́не,/ пе́рвее бо соверши́в муче́ния тече́ние,/ безчи́сленныя ро́ды челове́к ра́вно Подвигополо́жнику Христу́ приведе́./ Те́мже я́ко апо́стола и страда́льца верхо́внаго/ чту́ще тя, мо́лим:/ моли́ Христа́ Бо́га/ дарова́ти нам ве́лию ми́лость.

По́двигом до́брым подвиза́лся еси́,/ первому́чениче Христо́в и апо́столе, и архидиа́коне Стефа́не,/ и му́чителей обличи́л еси́ нече́стие./ Ка́мением бо побие́н от рук беззако́нных, вене́ц от я́же свы́ше десни́цы прия́л еси́,/ и к Бо́гу взыва́л еси́, вопия́:/ Го́споди, не поста́ви им греха́ сего́.

Пе́рвый се́ялся еси́ на земли́ небе́сным Де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, блаже́нне,/ пе́рвый от Него́ побе́ды венце́м увя́злся еси́ на небесе́х,/ страда́льцев нача́ло,/ вене́чниче му́чеников, первострада́льне.

Влады́ка вчера́ нам пло́тию прихожда́ше,/ и раб днесь от пло́ти исхожда́ше;/ вчера́ Ца́рствуяй пло́тию роди́ся,/ днесь раб ка́мением побива́ется:/ Того́ ра́ди и скончава́ется первому́ченик и Боже́ственный Стефа́н.

Велича́ем тя,/ священному́чениче Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Велича́ем тя,/ страстоте́рпче святы́й Стефа́не,/ и чти́м честна́я, страда́ния твоя́,/ я́же за Христа́/ претерпе́л еси́.

16/29 Великомученицы Евфимии всехвальной (304). Святителя Киприана, митрополита Московского, всея России чудотворца (1406). Мученицы Людмилы, княгини Чешской (927). Икон Божией Матери, именуемой «Призри на смирение» (1420) и Каменской «Знамение» (1426).

Жениха́ твоего́ Христа́ возлюби́вши,/ и свещу́ твою́ све́тлу угото́влыни,/ доброде́тельми возсия́вши, всехва́льная Евфи́мие,/ тем возшла́ еси́ с Ним на брак,/ вене́ц страда́ния от Него́ прие́мши,/ но от бед изба́ви нас,/ чту́щих ве́рою па́мять твою́.

Агница Твоя́, Иису́се, Евфи́мия/зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стра́жду Тебе́ ра́ди, я́ко да ца́рствую в Тебе́,/ и умира́ю за Тя, да и живу́ с Тобо́ю;/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами, я́ко Ми́лостив, спаси́ ду́ши на́ша.

Во страда́льчестве твое́м до́бре подвиза́лася еси́,/ и по сме́рти ны освяща́еши чуде́с точе́ньми, всехва́льная./ Те́мже твое́ успе́ние свято́е пое́м,/ ве́рою притека́юще в Боже́ственный храм твой, да изба́вимся неду́гов душе́вных/ и чуде́с благода́ть почерпе́м.

Велича́ем тя,/ страстоте́рпице Христо́ва Евфи́мие,/ и чтим честно́е страда́ние твое́,/ е́же за Христа́/ претерпе́ла еси́.

И́же от Бо́га свы́ше Боже́ственною благода́тию соверше́н/ и благи́ми нра́вы укра́шен,/ Ду́хом Святы́м просвеще́н,/ соверши́в святы́ню в стра́се Бо́жии,/ сподо́блен бысть благода́ти Боже́ственнаго Ду́ха,/ пасы́й Це́рковь Бо́жию Ру́сския митропо́лии,/ посто́м вся побора́я, волне́ния претерпе́,/ гоне́ние примену́в, свята́го Петра́ митрополи́та всегда́ себе́ в по́мощь призыва́я,/ и сего́ помо́щника име́я,/ и того́ стопа́м после́дуя./ Служи́тель благоприя́тный/ за́поведи Бо́жии соблюда́я,/ Ду́хом Бо́жиим наставля́ем,/ просвеща́я ве́рныя лю́ди уче́нием слове́с твои́х,/ поще́нием укра́си житие́ свое́,/ яре́м Госпо́день измла́да восприи́м,/ и па́че всех Христа́ возлюби́./ Того́ ра́ди и архиере́йским седа́лищем почте́н,/ и, я́ко светоза́рное со́лнце от Се́рбский земли́ происше́д,/ и по вся концы́ Ру́сския земли́ доброде́телию просия́в,/ светло́ яви́ся ми́рови,/ и преста́вися ко Го́споду от сея́ жи́зни в ве́чный поко́й,/ вели́кий архиере́ю Бо́жий, Киприа́не митрополи́те,/ учи́телю и наста́вниче Ру́сския земли́,/ всегда́ предстоя́ престо́лу Пресвяты́я Тро́ицы,/ моли́ Го́спода приле́жно об архиере́ех и о всех христиа́нех,/ да спасе́т тебе́ ра́ди ду́ши на́ша.

Необори́м столп Правосла́вия,/ ве́ре Христо́ве утвержде́ние,/ церква́м украси́тель, прему́дрый учи́тель,/ се́рбское воспита́ние, ру́сское процвете́ние,/ Госпо́днею любо́вию распаля́ем,/ Ду́ху Пресвято́му дом яви́ся/ и ду́шу, я́ко же́ртву непоро́чну, Го́сподеви принесе́,/ досточу́дне и всече́стне Киприа́не, святи́телю Христо́в./ Сего́ ра́ди всели́ся в широту́ ра́йскую,/ предстоя́ Христу́ в ли́це святы́х,/ Ему́же моли́ся и спаса́й град и лю́ди от пога́ных нахожде́ния,/ я́ко да зове́м ти:/ ра́дуйся, о́тче Киприа́не,/ учи́телю прему́дрый.

Велича́ем тя,/ святи́телю о́тче Киприа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Оста́вльша тьму идолослуже́ния,/ и с горя́чей любо́вию прия́в свет Правосла́вныя ве́ры Христо́вы,/ яви́ся ты, свята́я Людми́ло, я́ко звезда́ у́тренняя,/ и све́том свя́тости твоея́/ и́стинный день Богопочита́ния в Че́стей земли́ нача́в.

Храм твой всечестны́й, я́ко цельбу́ душе́вную обре́тше... (общий мученице).

Велича́ем тя,/ страстоте́рпице Христо́ва Людми́ло,/ и чти́м честно́е страда́ние твое́,/ е́же за Христа́/ претерпе́ла еси́.

17/30 Мучениц Веры, Надежды, Любови и матери их Софии (ок. 137). Блаженной Любови Рязанской (1921). Цареградской (1071), Макарьевской (Одигитрия) (1442), Макарьевской (XV) икон Божией Матери.

Торжеству́ет це́рковь перворо́дных ,/ и свесели́тся, прие́мля ма́терь о ча́дех веселя́щуюся,/ я́же я́ко му́дрости тезоимени́тая,/ тро́йственным богосло́вским доброде́телем равночи́сленныя породи́./ Ты́я с му́дрыми де́вами зрит уневе́стившияся Жениху́ Бо́гу Сло́ву./ С не́ю и мы духо́вне в па́мяти их свесели́мся, глаго́люще:/ Тро́ицы побо́рницы, Ве́ро, Любве́ и Наде́ждо,/ в ве́ре, любви́ и наде́жде утвержда́йте нас.

Агницы слове́сныя/ Агнцу и Па́стырю приведо́стеся муче́нием ко Христу́,/ тече́ние сконча́вше и ве́ру соблю́дше;/ те́мже днесь ра́достною душе́ю соверша́ем, досточу́днии,/ святу́ю ва́шу па́мять,/ Христа́ велича́юще.

Софи́и честны́я свяще́ннейшия ве́тви,/ Ве́ра, и Наде́жда, и Любо́вь показа́вшеся,/ му́дрость обуи́ша е́ллинскую10 благода́тию,/ и пострада́вше, и победоно́сицы яви́вшеся,/ венце́м нетле́нным от всех Влады́ки Христа́ увязо́шася.

Велича́ем вас,/ страстоте́рпицы святы́я Ве́ро, Наде́ждо, Любо́вь и Софи́е,/ и чтим честна́я страда́ния ва́ша,/ я́же за Христа́/ претерпе́ли есте́.

Любо́вью наречена́ была́ еси́ во Свято́м Креще́нии,/ любо́вь Христо́ву позна́ла еси́,/ в житии́ дерзнове́ние ве́лие стяжа́ла еси́,/ те́мже к тебе́ усе́рдно прибега́ем/ из глубины́ серде́ц на́ших взыва́ющи:/ моли́ся у́бо ко Го́споду,/ Любо́вь блаже́нная, богому́драя,/ дарова́ти ми́рови мир/ и душа́м на́шим ве́лию ми́лость.

Святи́телем Христо́вым Никола́ем исцеле́нная/ и на служе́ние Бо́гу и лю́дем и́мже благослове́нная,/ крест свой юро́дства с любо́вию до конца́ проне́сшая./ Свята́я блаже́нная Любо́вь,/ не оста́ви нас, почита́ющих святу́ю па́мять твою́,/ ны́не предстоя́ в ли́ке святы́х престо́лу Пресвяты́я Тро́ицы,/ моли́ся о благоде́нствии оте́чества твоего́/ и о спасе́нии душ на́ших.

Ублажа́ем тя,/ свята́я пра́ведная Любо́вь,/ и чтим святу́ю па́мять твою́,/ ты бо мо́лиши за нас,/ Христа́ Бо́га на́шего.

Возсия́ нам, я́ко со́лнце светоза́рное от восто́ка в велеле́пии,/ Твоя́, Влады́чице, ико́на,/ озаря́ющи чуде́с сия́нием пресла́вно всех, приходя́щих к ней с ве́рою и любо́вию/ и моля́щихся усе́рдно к Твоему́, е́же о Сы́не Твое́м и Бо́зе, вели́чию./ Сла́ва Бо́гу, Евфроси́ном сию́ да́вшему нам!/ Сла́ва Приве́дшему ю от Царьгра́да!/ Сла́ва Даю́щему то́ю всем исцеле́ния.

Препросла́вленная Вы́шняго Ма́терь/ созыва́ет к песнопе́нию нас Своего́ о́браза прише́ствием от Царьгра́да/ и возбужда́ет зре́нием того́ на по́двиг,/ побежда́ти сопроти́вных си́лу,/ и к Ней, я́ко на́шея ра́дости вино́вней, пе́ти:/ ра́дуйся, Неве́сто Неневе́стная.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

18/1 Преподобного Евмения, епископа Гортинского (VII). Прославление преподобной Евфросинии Суждальской (1698). Молченской (1405), именуемой «Целительница», и Старорусской (возвращение в Старую Руссу, 1888) икон Божией Матери.

Поще́нием житие́ твое́ украси́л еси́,/ ни́щия возлюби́в,/ и тем разда́л еси́ все име́ние твое́,/ в доброде́телех возсия́л еси́, я́ко со́лнце,/ пла́чущия утеша́я и скорбя́щия веселя́,/ и нам испроси́, мо́лимся,/ моли́твами твои́ми, Евме́ние о́тче,/ от Христа́ грехо́в проще́ние.

Све́том Боже́ственным просвети́вся, всеблаже́нне, просвеща́еши ны,/ любо́вию пою́щия твое́ честно́е и сла́вное и свято́е, о́тче, преставле́ние,/ иера́рше Евме́ние, моля́ непреста́нно о всех нас.

Велича́ем тя,/ святи́телю о́тче Евме́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

В тебе́, ма́ти, изве́стно спасе́ся е́же по о́бразу,/ прии́мши бо Крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо:/ прилежа́ти же о души́ ве́щи безсме́ртней./ Те́мже и со а́нгелы сра́дуется, преподо́бная Евфроси́ние, дух твой.

Свята́я твоя́ па́мять Су́ждальскую11 страну́ весели́т,/ ве́рных же вся созыва́ет во всечестны́й храм твой,/ иде́же ны́не соверша́ется всесла́вная па́мять твоя́, Евфроси́ние преподо́бная:/ моли́ Христа́ Бо́га/ спасти́ся душа́м на́шим.

Де́вства чи́стый сосу́д еле́ем моли́твы и любве́ испо́лнивши,/ неугаси́мый свети́льник в се́рдце свое́м возжгла́ еси́, преподо́бная,/ с ни́мже бодре́нно в сре́тение Небе́снаго Жениха́ изше́дши,/ в черто́г Того́ пресве́тлый прия́та была́ еси́,/ иде́же ны́не водворя́лся с ли́ки а́нгелов и святы́х,/ моли́ся, мо́лимся, Христу́ Бо́гу,/ ча́сти дев юро́дивых изба́витися нам.

Женише́ мой Сладча́йший,/ Христу́ взыва́ше прекра́сная Евфроси́ние,/ и́бо сла́дость любве́ Твоея́ ду́шу ми наде́ждею впери́/ и красота́ ми́лости Твоея́ се́рдце ми услади́,/ сопотруди́тися страда́ний по Тебе́ име́я на Тя наде́жду,/ да досто́йну мя черто́га с му́дрыми де́вами/ и лико́вствовати у тебе́ причасти́мся./ Те́мже, преподо́бная, почита́юще по́двиг трудо́в твои́х, мо́лим тя:/ моли́ незазри́тися и нам черто́гу две́ри.

Де́вства чистото́ю возмогла́ еси́ свещу́ своего́ ра́зума/ и просвети́ла еси́ душе́вную чистоту́/ поще́нием же и бде́нием плоть порабо́тила еси́ ду́ху,/ те́мже, преподо́бная Евфроси́ние,/ почита́юще по́двиги трудо́в твои́х, мо́лимся,/ моли́ Христа́ Бо́га спасти́ся душа́м на́шим.

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко Пресве́тлая Звезде́,/ просия́ Боже́ственными чудесы́ святы́й Твой о́браз, Цели́тельнице,/ пода́ждь у́бо и нам, Богоро́дице Мари́е,/ исцеле́ние неду́гов душе́вных и теле́сных,/ спасе́ние и ве́лию ми́лость.

Любо́вию, Чи́стая Де́во, Твою́ святу́ю ико́ну почита́ющим,/ и Бо́жию Тя и́стинную Ма́терь прославля́ющим,/ и ве́рно покланя́ющимтися/ Цели́тельница яви́ся,/ вся́кое зло и боле́зни от сих удаля́ющая,/ я́ко Всемогу́щая.

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву, и потщи́ся на умоле́ние,/ предста́тельствующи при́сно, Богоро́дице, чту́щих Тя.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

19/2 Мучеников Трофима, Савватия и Доримедонта (276). Благоверных князей Феодора Смоленского (1299) и чад его Давида (1321) и Константина, Ярославских чудотворцев. Благоверного великого князя Игоря Черниговского и Киевского (1147).

В Тро́ице хвали́мый Бог тро́ицу му́ченик просла́ви,/ Трофи́ма и Савва́тия и Доримедо́нта,/ в Того́ бо ве́ровавше, врага́ низложи́ша./ Тех моли́твами, Христе́ Бо́же наш, поми́луй нас.

Я́ко страда́льцев основа́ние и благоче́стия утвержде́ние,/ Це́рковь чтит и сла́вит твое́ светоно́сное страда́ние,/ приснопева́емый блаже́нне страда́льче, доблему́дре сла́вне Трофи́ме,/ со страда́вшими с тобо́ю, очище́ние пою́щим тя испроси́, я́ко непобеди́м.

Велича́ем вас,/ страстоте́рпцы святи́и Трофи́ме, Савва́тие и Доримедо́нте,/ и чтим честна́я страда́ния ва́ша,/ я́же за Христа́/ претерпе́ли есте́.

От ю́ности ва́шея Христо́ве любви́ прилепи́вшеся, святи́и,/ усе́рдно зако́н и оправда́ния Того́ сохрани́сте;/ отону́дуже и чуде́сными дарова́ньми обогати́вшеся,/ исцеле́ния источа́ете, Фео́доре, Дави́де и Константи́не,/ о ве́рою вас почита́ющих,/ моли́те Христа́ Бо́га спасти́ся душа́м на́шим.

Я́ко цели́тель преизря́ден и каза́тель благоприя́тен,/ мирски́й мяте́ж оста́вил еси́ и крест свой на ра́мо взем/ и боже́ственным житие́м пожи́л еси́ и воздержа́нием пло́ти украси́лся еси́/ к тебе́ притека́ющим сосу́д избра́нный показа́ тя, всеблаже́нне Фео́доре,/ воспева́ющих твою́ па́мять в псалме́х и пе́снех, преподо́бне, моли́ся о душа́х на́ших.

Измла́да яви́лся еси́, Богому́дре кня́же,/ Боже́ствен сосу́д невозбра́нен Бо́гови,/ ны́не то́чиши нам многоцеле́ния,/ вся е́реси потопля́юще и спаса́я при́сно свой град/ и всех ве́рных сохраня́я невреди́мо от ви́димых и неви́димых враг,/ ве́рою тя мо́лим, преподо́бне о́тче наш, кня́же Фео́доре,/ моли́ спасти́ся душа́м на́шим

Я́ко зве́зды многосве́тлыя от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ во пло́ти, я́ко а́нгели, на земли́ показа́стеся,/ поще́нием насажде́ни бы́сте, я́ко древа́, при вода́х воздержа́ния,/ напое́ни струя́ми слез ва́ших, и скве́рну омы́сте./ Сего́ ра́ди яви́стеся прия́телища Бо́жия Ду́ха,/ Фео́доре, и Дави́де, и Константи́не,/ моли́те Христа́ Бо́га спасти́ся душа́м на́шим.

Я́ко апо́столом соприча́стницы и вра́чеве предо́брии, служи́тели Богоприя́тнии,/ па́мяти ва́шей Боже́ственней притека́ющим,/святи́и Богому́дрии, достоблаже́ннии, благочести́вии кня́зи,/ новоявле́ннии чудотво́рцы Фео́доре, и Дави́де, и Константи́не,/ соше́дшеся любо́вию в па́мять ва́шу све́тло пра́зднуем, в пе́снех и пе́ниих ра́дующеся, Христа́ сла́вяще, такову́ю благода́ть дарова́вшего вам исцеле́нием,/ гра́ду ва́шему Яросла́влю вели́кое утвержде́ние.

Яви́ся ве́лие со́лнце Христо́ве Це́ркви,/ просвеща́я уче́нием светлостьми́, всече́стне,/ я́ко черпа́лом златы́м от кла́дязя неиско́паннаго чуде́с поче́рпл еси́ от Исто́чника неистощи́маго/ на успе́ние свое́ приспе́л еси́, всеблаже́нне Фео́доре,/ ны́не всем дае́ши грехо́в проще́ние.

Многому́дренно пресели́вся, преподо́бне кня́же Фео́доре,/ в град цвету́щ при́сно плоды́ благи́я,/ яви́лся еси́ я́ко ра́и, па́че жи́зни,/ я́ко многосве́тлая звезда́ в ми́ре сия́я, в поще́нии испра́вив жи́знь свою́,/ и ны́не Того́ получи́л еси́ живо́т ве́чный на небесе́х.

Яви́стеся свети́льницы всесве́тлии, во пло́ти я́ко а́нгели,/ и я́ко жи́зни древеса́ ра́йская,/ поще́нием, бде́нием и ве́рою возраща́еми, процвели́ есте́/ моли́твами ва́шими, небе́сныя благода́ти прие́мше./ Вра́чеве же кре́пцы я́вльшеся,/ исцеля́ете неду́гующих ду́ши,/ с ве́рою прибега́ющих к ра́це моще́й ва́ших, чудотво́рцы сла́внии, Фео́доре, Дави́де и Константи́не./ Моли́те Христа́ Бо́га грехо́в оставле́ние дарова́ти,/ ве́рою и любо́вию чту́щим па́мять ва́шу.

я́ко свети́льницы и вра́чеве преизря́днии яви́стеся,/ ве́рним се́рдцем озаря́юще доброде́тельми чуде́с ва́ших,/ в пло́ти бо на земли́ благоугоди́тели,/ Иже во святы́х Прославля́емому непреста́нно моли́те о всех нас.

Велича́ем вас,/ святи́и благове́рнии кня́зие Фео́доре, Дави́де и Константи́не,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Наста́ днесь всечестна́я па́мять страстоте́рпца благове́рнаго кня́зя И́горя,/ созыва́юща лю́ди в пречестны́й храм Спа́сов,/ иде́же ра́достно соше́дшася благочести́вых мно́жество/ моли́твенно пра́зднуют святу́ю па́мять твою́, и с ве́рою взыва́ют ти:/ моли́ся, свя́те,/ стране́ Росси́йстей, гра́ду Черни́гову и всем правосла́вным Христиа́ном в ми́ре и благоде́нствии спасти́ся.

Просвети́вся Боже́ственным креще́нием,/ Ду́ха Свята́го све́тлостьми озаря́ем,/ Ева́нгелие Христо́во в се́рдце твое́ восприя́л еси́,/ де́лом сло́во Сы́на Бо́жия исполня́я, благове́рный кня́же И́горе,/ моли́ Всеблага́го Спаси́теля на́шего дарова́ти нам мир, и ми́лость,/ и спасе́ние душ на́ших, чту́щих честну́ю па́мять твою́.

Измени́л еси́ земна́го княже́ния сла́ву во и́ночества о́браз смире́нный,/ и страда́льчески земно́е житие́ сконча́в, ны́не на Небесе́х ра́дуешися,/ усе́рдие моля́ся о чту́щих тя, И́горе, страда́льцев похвало́.

Кня́жескую диади́му обагри́л еси́ кро́вию твое́ю,/ Богому́дре страстоте́рпче И́горе,/ за скиптр крест в руку́ прии́м, яви́лся еси́ победоно́сец/ и же́ртву непоро́чну Влады́це прине́ся еси́ себе́./ я́ко бо а́гнец незло́бив от раб убие́н был еси́,/ и ны́не ра́дуяся предстои́ши Святе́й Тро́ице,/ моли́ся спасти́ся душа́м на́шим.

Велича́ем тя,/ стратоте́рпче святы́й благове́рный вели́кий кня́же И́горе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

20/3 Великомученика Евстафия Плакиды, жены его Феопистии и чад их Агапия и Феописта (ок. 118). Мучеников и исповедников Михаила, князя Черниговского, и болярина его Феодора, чудотворцев (1245). Преподобного и благоверного князя Олега Брянского (ок. 1285).

Му́ченицы Твои́, Го́споди,/ Евста́фий, Феописти́я, Ага́пий и Феопи́ст, во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами спаси́ ду́ши на́ша.

Стра́сти Христо́вы я́ве подража́в/ и Сего́ испи́в усе́рдно ча́шу,/ о́бщник Евста́фие,/ и сла́вы снасле́дник был еси́,/ от Сама́го всех Бо́га прие́мля с высоты́/ Боже́ственное оставле́ние.

Велича́ем вас,/ страстоте́рпцы святи́и, Евста́фие, Феописти́е, Ага́пие и Феопи́сте,/ и чтим честна́я страда́ния ва́ша,/ я́же за Христа́/ претерпе́ли есте́.

Жизнь ва́шу му́ченически соверши́вше,/ испове́дания венцы́ украси́вшеся, к небе́сным востеко́сте,/ Михаи́ле прему́дре, с до́блим Фео́дором,/ моли́те Христа́ Бо́га, сохрани́ти Оте́чество на́ше,/ град же и лю́ди, по вели́цей Его́ ми́лости.

Блаже́ннии, апо́столов равноче́стнии,/ прия́ли есте́ вене́ц от Христа́,/ зане́же того́ досто́ини, Михаи́ле Богому́дре и Фео́доре ди́вне,/ мир ми́рови испроси́те/ и душа́м на́шим ве́лию ми́лость.

Тро́ичнаго Божества́ осия́нием просвети́вся,/ страстоте́рпче вели́кий кня́же Михаи́ле,/ с прему́дрым боля́рином ти Фео́дором,/ самозва́нна к подвиго́м устреми́стася,/ сквозе́ огнь не идо́ста,/ кусту́ же и и́долом не поклони́стася, но оплева́ста/ и нечести́ваго царя́ обличи́ста,/ Христа́ же Еди́наго от Тро́ицы Бо́га Су́ща испове́даста,/ и Того́ ра́ди крове́й свои́х струя́ми обагри́стася, сла́вная./ Те́мже и венцы́ от Него́ побе́дная прия́ста,/ и нас свы́ше назира́ста,/ мо́лим вас, святы́я, моли́те Того́,/ я́ко да ва́шими моли́твами изба́вит нас от вся́ких обстоя́щих ны зол/ и пода́ст нам вся блага́я,/ и́же Еди́н Сый прославля́емый во святы́х Свои́х.

Ца́рство земно́е в ничто́же вмени́в,/ сла́ву, я́ко преходя́щую, оста́вил е́си,/ самозва́н* прише́д к по́двигом,/ Тро́ицу пропове́дал еси́ пред нечести́вым мучи́телем,/ страстоте́рпче Михаи́ле, с до́блим Фео́дором,/ Царю́ сил предстоя́ще,/ моли́те без вреда́ сохрани́ти Оте́чество на́ше, град же и лю́ди,/ да вас непреста́нно почита́ем.

Ве́рою укре́пльшеся, святи́и, муче́ния претерпе́сте/ и кровьми́ свои́ми погаси́сте пла́мень сопроти́вных безбо́жия,/ Христа́ же испове́даете, с Отце́м и Ду́хом,/ Михаи́ле и Фео́доре, Его моли́те за всех нас.

Вы́шних ища́, ни́жняя оста́вил еси́,/ колесни́цу на небеса́ кровь свою́ сотвори́л еси́,/ тем собесе́дниче первому́чеником бысть, Михаи́ле и Фео́доре,/ с ни́миже Христа́ Бо́га моля́ непреста́нно за вся ны.

Я́ко свети́ло в Руси́ возсия́вше, муче́ния луча́ми сла́вными отрази́сте, страстоте́рпцы сла́внии, Михаи́ле и Фео́доре, тем вопия́сте:/ ничто́же нас отлучи́т от любве́ Христо́вы.

Велича́ем вас,/ страстоте́рпцы святи́и Михаи́ле и Фео́доре,/ и чтим честна́я страда́ния ва́ша,/ я́же за Христа́/ претерпе́ли есте́.

Велича́ем тя, благове́рный кня́же Михаи́ле,/ и с боля́рином твои́м Фео́дором,/ и чтим святу́ю па́мять ва́шу,/ и́же за Христа́ кровь свою́ излия́сте,/ и ны́не моли́те за нас Христа́ Бо́га на́шего.

От ю́ности возлюби́в Христа́ всем се́рдцем, преподо́бне,/ сла́ву земну́ю, я́ко преходя́щую, оста́вил еси́/ и ца́рство земно́е в ничто́же вмени́вше,/ ли́ку и́нок ра́достно приче́лся еси́/ и труды́ мно́гими град Брянск, а́ки со́лнце пресве́тло, озари́л еси́./ Тем быв Тро́ицы украше́ние,/ моли́, кня́же Оле́же, Христа́ Бо́га спасти́ся душа́м на́шим.

Уподоби́лся еси́ плодоно́сней ле́торасли от ко́рене честна́го, Оле́же благоро́дие,/ и́стину возлюби́в и нетле́нный Христо́в живо́т./ Те́мже моли́твою и поще́нием свети́льник вели́кий быв твои́м ученико́м,/ просвети́, блаже́нне, Оте́чество твое́ и спаси́ ду́ши на́ша.

Ублажа́ем тя,/ святы́й благове́рный кня́же Оле́же,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

21/4 Отдание праздника Воздвижения Животворящего Креста Господня. Апостола от 70-ти Кодрата, иже в Магнисии (ок. 130)13. Обретение мощей святителя Димитрия, митрополита Ростовского (1752). Преподобного Иосифа Заоникиевского (1612).

Апо́столе святы́й Кодра́те,/ моли́ ми́лостиваго Бо́га,/да прегреше́ний оставле́ние пода́ст душа́м на́шим.

Я́ко священнонача́льника че́стна,/ и страда́льца тверде́йша,/ вселе́нная прино́сит Тебе́, Го́споди, Кодра́та апо́стола,/ и пе́сньми почита́ет честну́ю его́ па́мять,/ прося́щи всегда́ прегреше́ний оставле́ния/ тем дарова́тися, пою́щим его́, Благоутро́бне.

Велича́ем тя,/ апо́столе Христо́в Кодра́те,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Правосла́вия ревни́телю, и раско́ла искорени́телю,/ Росси́йский целе́бниче, и но́вый к Бо́гу моли́твенниче,/ списа́ньми твои́ми бу́их уцелому́дрил еси́;/ цевни́це* духо́вная, Дими́трие блаже́нне,/ моли́ Христа́ Бо́га спасти́ся душа́м на́шим.

Звезду́ Росси́йскую от Ки́ева возсия́вшую,/ и чрез Но́вград Се́верский в Росто́в дости́гшую,/ всю же страну́ сию́ уче́ньми и чудесы́ озари́вшую,/ ублажи́м златослове́снаго учи́теля Дими́трия,/ той бо всем вся написа́, я́же к наставле́нию,/да все́х приобря́щет, я́коже Па́вел, Христу́/ и спасе́т правове́рием ду́ши на́ша.

Велича́ем тя,/ святи́телю о́тче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Испе́рва житие́ твое́, преподо́бне,/ хи́тростию благоюро́дства от челове́ка утаено́, на небесе́х пред а́нгелы я́влено,/ и а́ще на земли́ тмо́ю оче́с претыка́лся хожда́ше,/ но мы́сленными кри́лы на высоту́ возше́д./ Присносу́щным Све́том облиста́ем,/ во оте́чествии насле́дова,/ и земны́х мня́щихся кра́сных хра́мов не тре́бовав,/ но в Небе́снех се́лех пресве́тлыя оби́тели стяжа́л еси́,/ ни ри́зами мя́гкими одея́лся,/ но па́че власяни́цу возлюби́л еси́,/ и сего́ ра́ди па́че всех име́ний земны́х Небе́сная сокро́вища приобре́л еси́/ и на земли́ пло́тен сый с безпло́тными совокупля́лся,/ Небе́сной Цари́це служа́ и Той приноси́мых а́нгельских пе́сней наслади́вся,/ и́хже мно́гия лю́ди жела́я насладится не мо́гут./ Сего́ ра́ди Всевы́шний Творе́ц о́браз Свой/ и Ро́ждшия Его Богома́тери/ с высоты́ возду́ха на ру́це твоя́,/ я́ко на Херуви́мская носи́ла, дарова́ тебе́./ От Него́же Присносу́щным Све́том о́чи твои́ уясни́,/ и, я́ко росоточа́щий о́блак, моли́твами твои́ми весь мир ми́лованный напои́./ И ны́не в после́дняя времена́ святу́ю персть твою́, я́ко Еде́мский исто́чник, во исцеле́ние неду́гов устро́й,/ Его́же моли́, наста́вниче наш, чудоно́сче Ио́сифе,/ дарова́ти нам мир и ве́лию ми́лость.

Смиренному́дрием наказа́ние благоду́шно прие́мля,/ и́же от Небе́с неизрече́нный дар прия́ти сподо́бися,/ и в пло́ти сый, преподо́бне,/ безпло́тен в служе́нии свое́м к Богома́тери трудолю́бие подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовоздая́тель/ в коне́ц ве́ка сего́ сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,/ дарова́ти нам отпуще́ние грехо́в и ве́лию ми́лость.

От ю́ности Бо́га возлюби́в/ и просты́нею безгла́сие стяжа́л еси́, преподо́бне./ Сего́ ра́ди и с Небе́с сла́дкий Свет о́чию получи́л еси́/ и росоточа́щии ми́лости пресве́тлый о́браз Богома́тери/ с высоты́ возду́ха чрез святы́х безме́здников во объя́тие прия́л еси́,/ и Ей богоуго́дно послужи́л еси́,/ и оби́тель соста́вил еси́,/ власяны́ми вери́гами те́ло свое́ удручи́л еси́,/ от него́же ка́плями кро́вными диа́вола потопи́л еси́./ Сего́ ра́ди и в после́дняя времена́/ гроб твой от Влады́ки на́шего Христа́ точе́нием чуде́с обогати́ся,/ тем и мы, ча́да твоя́, любо́вию притека́юще к тебе́,/ уми́льно глаго́лем:/ ра́дуйся, наста́вниче на́шего спасе́ния;/ ра́дуйся, исцеле́ний пода́телю;/ ра́дуйся, о́тче наш Ио́сифе,/ мона́хов удобре́ние.

Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бысть благоуго́ден служи́тель Богома́тери,/ стра́ждущим в неду́зех явля́яся, ско́ро помога́вши,/ и с ве́рою притека́ющим к тебе́, неоску́дное здра́вие подае́ши./ Сего́ ра́ди зове́м ти:/ разреши́ на́ша боле́зни душе́вныя и теле́сныя,/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,/ мона́хов удобре́ние.

Ублажа́ем тя,/ преподо́бне о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

22/5 Пророка Ионы (VIII в. до Р.Х.) Священномученика Фоки, епископа Синопийского (117). Преподобного Макария Жабынского, Белевского чудотворца (1623). Иконы Божией Матери, именуемой «Услышательница» (Зографская, XIV). Собор Тульских святых.

Проро́ка Твоего́ Ио́ны па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Проро́к ди́вен показа́ся,/ Бо́жие повеле́ние прие́м во о́браз тридне́внаго Воскресе́ния./ В ки́те тридне́вен быв, неврежде́н от зве́ря изы́де/ и яви́ся све́тел пропове́дник Ниневи́и, вели́кому гра́ду./ Сего́ ра́ди тя ра́достно, Ио́но, почита́ем, я́ко человеколю́бия Бо́жия провозве́стника.

Велича́ем тя,/ проро́че Бо́жий Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И нра́вом прича́стник,/ И престо́лом наме́стник... (общий священномученику).

Я́ко архиере́й принося́, о́тче, же́ртвы,/ на коне́ц себе́ прине́сл еси́ же́ртву живу́ю,/ свиде́тельствовав зако́нно о Христе́ Бо́зе,/ от а́нгел укрепля́ем, и смерть изволя́я,/ сый с вопию́щими тебе́:/ прииди́, Фо́ко, с на́ми, и никто́же на ны.

Велича́ем тя,/ священному́чениче Фо́ко,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От мирска́го жития́ изше́д/ в ти́хое приста́нище жи́зни и́ноческия, преподо́бне Мака́рие, вшел еси́,/ в не́йже до́бре подвиза́вся, ду́шу твою́ доброде́тельми превысо́кими обогати́л еси́,/ и яви́лся еси́ до́бр па́стырь и учи́тель и́ноческому собо́ру,/ ему́же и оби́тель возгради́л еси́,/ та́же в безмо́лвие вшед и Богови́дения сподо́бився, ко Го́споду преста́вился еси́,/ и́же да́ром чуде́с тя обогати́./ Его́же ны́не моли́,/ да спасе́т ве́рою и любо́вию почита́ющих святу́ю па́мять твою́.

Житие́ чи́стое, терпе́ние, кро́тость и любо́вь нелицеме́рну,/ воздержа́ние соверше́нное, умиле́ние Боже́ственное,/ ве́ру и наде́жду и́стинну и милосе́рдие стяжа́в,/ равноа́нгельно Мака́рие, на земли́ пожи́л еси́/ и на Небеси́ Бо́гови с ли́ки безпло́тных предстои́ши./ С ни́миже, свя́те, моли́ся,/ мир Росси́йстей Це́ркви дарова́ти и душа́м на́шим ве́лию ми́лость.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хо́в/ и собесе́дниче а́нгелов.

Наста́ день све́тлаго торжества́,/ земля́ на́ша ра́дуется,/ и с не́ю Це́рковь Христо́ва весели́тся,/ в прославле́нии Собо́ра Ту́льских святы́х, Бо́гу угоди́вших,/ к ним же мы притека́юще, взыва́ем си́це:/ о, пресла́внии сро́дницы на́ши,/ моли́те Христа́ Бо́га дарова́ти ми́ру мир,/ Оте́честву благоде́нствие,/ и душа́м на́шим ве́лию ми́лость.

Велича́ем вас,/ святи́и вси, в земли́ Ту́льстей просия́вший,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Велича́ем вас,/ святы́й благове́рный кня́же Дими́трие и му́ченицы – во́ини,/ и почита́ем честну́ю па́мять ва́шу,/ вы бо на по́ле Кулико́ве за ве́ру и Оте́чество ду́ши своя́ положи́вше,/ по́двигом любви́ зе́млю Росси́йскую просла́вили есте́.

23/6 Зачатие честного, славного Пророка, Предтечи и Крестителя Господня Иоанна. Прославление святителя Иннокентия, митрополита Московского (1977). Словенской иконы Божией Матери (1635).

Пе́рвее неражда́ющая непло́ды возвесели́ся,/ се бо зачала́ еси́ Со́лнца свети́льника я́ве,/ просвеща́ти иму́ща всю́ вселе́нную, слепото́ю неду́гующую./Лику́й, Заха́рие, вопия́ со дерзнове́нием:/ проро́к Вы́шняго е́сть, хотя́й роди́тися.

Весели́тся све́тло Заха́рия вели́кий/ со всесла́вною Елисаве́тою сопру́жницею,/ досто́йно зачина́юще Иоа́нна Предте́чу,/ его́же Арха́нгел благовести́ ра́дуяся,/ и челове́цы достодо́лжно почти́м,/ я́ко таи́нника благода́ти.

Святы́й вели́кий Иоа́нне Предте́че Госпо́день,/ моли́ Бо́га о нас.

Во вся стра́ны полу́нощныя изы́де веща́ние твое́,/ я́ко прие́мшия сло́во твое́,/ и́хже боголе́пно научи́л еси́,/ неве́дущия Христа́ све́том Ева́нгелия просвети́л еси́,/ челове́ческия обы́чаи украси́л еси́,/ Росси́йская похвало́, святи́телю о́тче наш Инноке́нтие,/ моли́ Христа́ Бо́га спасти́ся душа́м на́шим.

Пе́рвый учи́тель пре́жде те́мным язы́ческим племена́м,/ пе́рвый возвести́тель им пути́ спаси́тельнаго,/ апо́стольски потруди́выйся в просвеще́нии Сиби́ри и Аме́рики,/ святи́телю о́тче наш Инноке́нтие,/ Влады́ку всех моли́ мир вселе́нней дарова́ти/ и душа́м на́шим ве́лию ми́лость.

И́стинный и нело́жный учи́тель был еси́:/ запове́данная бо Го́сподем сам сотвори́в,/ и́мже учи́л еси́ и наказа́л еси́ ко благоче́стию приходя́щая ча́да,/ неве́рныя вразумля́л еси́ позна́ти ве́ру и́стинную,/ просвеща́я их Святы́м Креще́нием./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

Велича́ем тя,/ святи́телю о́тче Инноке́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

24/7 Первомученицы равноапостольной Феклы (I). Преподобного Никандра пустынножителя, Псковского чудотворца (1581). Преподобномученика Галактиона Вологодского (1612). Мирожской иконы Божией Матери (1198).

Словесе́м Па́вловым научи́вшися, богоневе́стная Фе́кло,/ и ве́рою утверди́вшися от Петра́, богозва́нная/ первому́ченица яви́лася еси́ и первострада́льница в жена́х,/ возшла́ еси́ на пла́мень, я́ко на ме́сто благоцвету́щее,/ зве́ри и юнцы́ устраши́шася тебе́, вооружи́ся бо Кресто́м./ Тем моли́, всехва́льная, Христа́ Бо́га,/ спасти́ся душа́м на́шим.

Де́вства добро́тою просия́ла еси́,/ и му́ченичества венце́м украси́лася еси́,/ апо́стольству вверя́ешися, де́во, я́ко пресла́вная;/ и огня́ у́бо пла́мень в ро́су преложи́ла еси́,/ юнца́ же я́рость моли́твою твое́ю укроти́ла еси́,/ я́ко первострада́льная.

Уязви́вши твое́ се́рдце, доброде́во, любо́вию Христо́вою,/ обру́чника вре́меннаго, я́ко небрего́ма, преоби́дела еси́/ и на о́гнь дерзну́ла еси́; звере́й же уста́ загради́ла еси́,/ и спа́сшися от них, прилежа́ше Па́вла и́щущи,/ Фе́кло первострада́льная.

Велича́ем тя,/ страстоте́рпице Христо́ва равноапо́стольная Фе́кло,/ и чтим боле́зни и труды́ твоя́,/ и́миже труди́лася еси́/ во благове́стии Христо́ве.

Глас Боже́ственный,/ и́же во Ева́нгелии, услы́шав, преподо́бне о́тче Ника́ндре:/ прииди́те ко Мне вси тружда́ющиися и обремене́ннии, и Аз упоко́ю вы,/ и прие́м крест, после́довал еси́ Христу́,/ мир оста́вль, в пусты́ню всели́лся еси́,/ поще́нием же и бде́нием небе́сный дар восприи́м,/ и ду́ши неду́жных, приходя́щих к тебе́ с ве́рою, исцеля́еши./ Те́мже и со а́нгелы сра́дуется, преподо́бне, дух твой.

Свети́ло незаходи́маго све́та стране́ на́шей яви́лся еси́, Богоблаже́нне,/ до́блественне претерпе́в вра́жия озлобле́ния,/ бие́ние и ра́ны, я́ко оде́жда нетле́ния, вмени́шася тебе́,/ со зверьми́ же бра́вся* еси́, и от челове́к злых прободе́ния прия́в,/ о те́х моли́лся еси́, глаго́ля: не поста́ви им греха́ сего́./ Те́мже Влады́це Христу́ уподо́бился еси́, достохва́льне Ника́ндре, о́тче наш,/ моли́ся о душа́х на́ших.

Я́ко лучу́ тя со́лнечную Христо́с показа́, преподо́бне,/ сия́вши бо в земли́ Росси́йстей чуде́с благода́тию,/ и отгоня́вши тьму страсте́й же и скорбе́й от приходя́щих к тебе́ с ве́рою./ Те́мже почита́ем твою́ па́мять, Ника́ндре/ о́тче наш, и вопие́м ти:/ ра́дуйся, пустынножи́телей красото́,/ и стране́ на́шей похвала́ и утвержде́ние.

Во избра́ние Богосия́нная звезда́ ве́ры,/ и́же возсия́ в Ру́сстей земли́, о́тче преблаже́нне Ника́ндре,/ слеза́ми и посто́м и бде́нием и моли́твами удруча́л те́ло свое́,/ те́мже и обре́те Небе́сную жизнь,/ и ра́достно та́йно со а́нгелы ликовству́я, да зове́м ти:/ ра́дуйся, о́тче преподо́бне Ника́ндре, пусты́нный жи́телю.

Ублажа́ем тя,/ преподо́бне о́тче Ника́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь град Во́логда тобо́ю хва́лится, преподо́бне,/ возсия́л бо еси́ пресве́тло, я́ко со́лнце,/ гра́ды и ве́си чудесы́ твои́ми озаря́я./ И ны́не, преподобному́чениче Галактио́не,/ Го́сподеви моли́ся гра́ду на́шему от нахожде́ния сопроти́вных изба́витися,/ и у Христа́ Бо́га прегреше́ний на́ших оставле́ние испроси́,/ и от вся́кия ско́рби избавле́ние пода́ждь, любо́вию чту́щим тя/ и вопию́щим ве́рно: /Бог наш с на́ми, просла́вивый уго́дника Своего́, я́коже благоволи́.

Днесь град Во́логда тобо́ю всеми́рне хва́лится,/ возсия́л бо еси́ пресве́тло я́ко со́лнце,/ и чудесы́ твои́ми град и ве́си, преподо́бне Галактио́не, озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду на́шему от пога́нскаго и всех проти́вных наи́тия,/ и испроси́ у Христа́ Бо́га любо́вию чту́щим тя/ прегреше́ний проще́ния/ и прося́щим твоея́ по́мощи от вся́кия ско́рби избавле́ние,/ и вопию́щим к тебе́: Бог наш с на́ми, просла́вивый уго́дника Своего́, я́коже благоволи́.

Благоче́стно на земли́ пожи́в/ и муче́ния вене́ц прия́л еси́, прече́стне,/ дре́вом во главу́ от наше́дших градоразори́телев убие́н еси́,/ до́брый учени́к Спа́са Христа́,/ оста́вив оте́чественный свой град и дру́ги,/ стра́нствовати любве́ ра́ди Христо́вы ева́нгельски изво́лил еси́./ Сего́ ра́ди тя почита́ем, пе́сньми вопию́ще:/ от бед изба́ви нас при́сно моли́твами твои́ми,/ уго́дниче Бо́жий Галактио́не, о́тче наш.

Ублажа́ем тя,/ преподобному́чениче Галактио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Я́ко звезда́ пресве́тла возсия́ в Росси́йской земли́/ от ико́ны честна́го о́браза Твоего́, Богоро́дице Де́во,/ из обою́ о́чию теку́щи сле́зы Твоя́, я́ко река́,/ и ви́девше наро́ди пско́вский, му́жи и же́ны и с ча́ды,/ с пла́чем моля́щеся о́бразу Твоему́, си́це глаго́люще:/ о, Пресвята́я Влады́чице Богоро́дице,/ не забу́ди гре́шных раб Твои́х,/ моля́щихся Христу́ Бо́гу на́шему спасти́ся нам.

Засту́пнице Христиа́ном непосты́дная/ и Предста́тельнице гра́ду на́шему Пско́ву,/ не пре́зри моле́ния нас гре́шных/ и видя́щих от Твоего́ честна́го о́браза сле́зы теку́ща из обою́ о́чию,/ и моля́щуся приле́жно,/ но предвари́, я́ко Бла́га, на по́мощь на́шу, ве́рно к Тебе́ прибега́ющим,/ услы́ши на́ша моле́ния, Богоро́дице,/ и изба́ви нас от нахожде́ния пога́ных,/ ускори́ же на моли́тву на́шу и потщи́ся на умоле́ние,/ заступа́ющи при́сно, Богоро́дице, чту́щих Тя;/ ра́дуйся, Де́во, Христиа́ном похвало́.

Велича́ем Тя,/ Пресвята́я Де́во,/ Богоизбра́нная Отрокови́це,/ и чти́м о́браз Твой честны́й,/ и́мже показа́ла еси́ пречу́дное зна́мение.

25/8 Преподобной Евфросинии Александрийской (V). Преставление преподобного Сергия, игумена Радонежского, всея России чудотворца (1392). Перенесение мощей святителя Германа, архиепископа Казанского (1595). Преподобной Евфросинии Суздальской, в миру Феодулии (1250). Преподобных Афанасия, Железный посох (1388) и Феодосия (XIV) Череповецких, учеников преподобного Сергия Радонежского.

В Тебе́, ма́ти, Изве́стно спасе́ся... (общий преподобной жене).

Вы́шнюю жи́знь возжеле́вши получи́ти,/ до́льнюю сла́дость тща́тельно оста́вила еси́14 ,/ и саму́ю себе́ смеси́ла еси́ посреде́ муже́й, красне́йшая,/ Христа́ бо ра́ди Жениха́ твоего́/ о обру́чнице привре́менном небрегла́ еси́.

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И́же доброде́телей подви́жник,/ я́ко и́стинный во́ин Христа́ Бо́га,/ на стра́сти вельми́ подвиза́лся еси́15 в жи́зни вре́менней,/ в пе́ниих, бде́ниих же и поще́ниих о́браз быв твои́м ученико́м;/ те́мже и всели́ся в тя Пресвяты́й Дух,/ Его́же де́йствием све́тло укра́шен еси́./ Но, я́ко име́я дерзнове́ние ко Святе́й Тро́ице,/ помина́й ста́до, е́же собра́л еси́ му́дре,/ и не забу́ди, я́коже обеща́лся еси́,/ посеща́я чад твои́х, Се́ргие преподо́бне, о́тче наш.

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклони́тися,/ му́жески в пусты́ню всели́лся еси́,/ и ча́да послуша́ния в ней, плоды́ смире́ния, возрасти́л еси́./ Тем быв в Тро́ице вселе́ние,/ чудесы́ твои́ми всех просвети́л еси́, приходя́щих к тебе́ ве́рою,/ и исцеле́ния всем пода́я оби́льно./ Отче на́ш Се́ргие, моли́ Христа́ Бо́га, да спасе́т ду́ши на́ша.

В чистоте́ жития́ исто́чник слез твои́х,/ исповеда́ния трудо́вныя поты́ совокупи́л еси́,/ и купе́ль духо́вную источи́л еси́, свяще́нный Се́ргие, преподо́бне,/ омыва́вши сугу́бстве, творя́щим любо́вию па́мять твою́,/ скве́рны обоя́мы душе́вныя и теле́сныя./ Сих ра́ди, ча́да твоя́ су́ще, вопие́м ти:/ моли́, о́тче, Святу́ю Тро́ицу о душа́х на́ших.

Днесь пресве́тло красу́ется ца́рствующий град Москва́,/ я́ко светолу́чными заря́ми, мо́лниями чуде́с твои́х осия́емь,/ всю вселе́нную созыва́ет/ похвали́ти тя, Богому́дре Се́ргие,/ пречестна́я же и сла́вная оби́тель твоя́,/ ю́же во и́мя Святы́я Тро́ицы мно́гими труды́ твои́ми созда́л еси́, о́тче,/ иму́щи в себе́ стада́ учени́к твои́х,/ весе́лия и ра́дости исполня́ется./ Мы же, пра́зднующе пресла́вное обре́тение честны́х моще́й твои́х, в земли́ сокрове́нных,/ я́ко цвет благоуха́нен и кади́ло благово́нно,/ любе́зно я лобыза́юще, разли́чная исцеле́ния прие́млем/ и твои́ми моли́твами грехо́в проще́ния сподобля́емся,/ о́тче преподо́бне Се́ргие,/ моли́ Святу́ю Тро́ицу спасти́ ду́ши на́ша.

Христо́вою любо́вию уязви́вся, преподо́бне,/ и Тому́ невозвра́тным жела́нием после́довав,/ вся́кое наслажде́ние плотско́е возненави́дел еси́,/ и я́ко со́лнце Оте́честву твоему́ возсия́л еси́,/ тем и Христо́с да́ром чуде́с обогати́ тя./ Помина́й нас, чту́щих пресве́тлую па́мять твою́, да зове́м ти:/ ра́дуйся, Се́ргие Богому́дре.

Я́ко безпло́тным равножи́тель,/ всех преподо́бных превозше́л еси́ по́стническими труды́ и бде́нии моли́твенными, му́дре Се́ргие,/ тем восприя́л еси́ от Бо́га нецели́ти неду́ги и прогони́ти бе́сы/ и того́ ра́ди вопие́м ти:/ ра́дуйся, о́тче преподо́бне Се́ргие.

Дне́сь я́ко со́лнце пресве́тло,/ возсия́вши от земли́ честны́я мо́щи твоя́, нетле́нны обрето́шася,/ я́ко благоуха́нный цвет, мно́жеством чуде́с сия́юще,/ и всем ве́рным источа́юще разли́чная исцеле́ния,/ и веселя́ще избра́нное твое́ ста́до,/ е́же му́дре собра́в и до́бре па́ствил еси́,/ о ни́хже и ны́не Тро́ице предстои́ши моля́ся,/ да вси вопие́м ти:/ ра́дуйся, Се́ргие Богому́дре.

Ублажа́ем тя,/ преподо́бне о́тче Се́ргие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В тебе́, ма́ти, изве́стно спасе́ся, е́же по о́бразу,/ прии́мши бо крест, после́довала еси́ Христу́/ и де́ющи учи́ла еси́ презира́ти у́бо пло́ть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бная Евфроси́ние, дух твой.

Свята́я твоя́ па́мять Су́ждальскую страну́ весели́т,/ ве́рныя же вся созыва́ет во всечестны́й храм твой,/ иде́же ны́не лежи́т всечестно́е те́ло твое́, Евфроси́ние преподо́бная,/ моли́ Христа́ Бо́га/ спасти́ся душа́м на́шим.

Де́вства чи́стый сосу́д еле́ем моли́твы и любве́ испо́лнивши,/ неугаси́мый свети́льник в се́рдце свое́м возжгла́ еси́, преподо́бная,/ с ни́мже бо́дренно в сре́тение Небе́снаго Жениха́ изше́дши,/ в черто́г Того́ пресве́тлый прия́та была́ еси́,/ иде́же ны́не водворя́лся с ли́ки а́нгелов и святы́х,/ моли́ся, мо́лимся, Христу́ Бо́гу/ ча́сти дев юро́дивых изба́витися нам.

Женише́ мой Сладча́йший,/ Христу́ взыва́ше прекра́сная Евфроси́ние,/ и́бо сла́дость любве́ Твоея́ ду́шу ми наде́ждею впери́/ и красота́ ми́лости Твоея́ се́рдце ми услади́,/ сопотруди́тися страда́ний по Тебе́ име́я на Тя наде́жду,/ да досто́йну мя черто́га с му́дрыми де́вами/ и лико́вствовати у тебе́ причти́мся./ Те́мже, преподо́бная, почита́юще по́двиг трудо́в твои́х, мо́лим тя:/ моли́ неза́зритися и нам черто́гу две́ри.

Де́вства чистото́ю возмогла́ еси́ свещу́ своего́ ра́зума/ и просвети́ла еси́ душе́вную чистоту́,/ поще́нием же и бде́нием плоть порабо́тила ду́ху./ Те́мже, преподо́бная Евфроси́ние,/ почита́юще по́двиг трудо́в твои́х, мо́лимся,/ моли́ Христа́ Бо́га спасти́ся душа́м на́шим.

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же я́ко первонача́льник/ созда́нной тобо́ю во гра́де Свия́жске оби́тели/ и досто́йный первосвяти́телю прее́мник яви́лся еси́./ Ду́хом предстоя́ престо́лу Влады́чню,/ моли́ся, святи́телю Ге́рмане, со святи́телем Гу́рием/ правосла́вней па́стве во благоче́стии преспева́ти,/ тме инове́рия све́том ве́ры разгна́тися.

Я́ко вели́ким па́стырем единонра́вна/ и учи́телем вселе́нныя единомы́сленна,/ Це́ркве Бо́жия служи́теля усе́рдна, и строи́теля та́йн Христо́вых благогове́йна,/ сте́кшеся благове́рнии лю́дие Свия́жския оби́тели Богому́драго основа́теля/ и Каза́нския новопросвеще́нныя па́ствы святи́теля Ге́рмана/ пе́сньми и пе́нии восхва́лим, глаго́люще:/ не преста́й присеща́ти моли́твами твои́ми на всю па́ству твою́, в ве́ре и благоче́стии блюди́ невреди́мо.

До́блестями преподо́бия и пра́вды,/ вруче́нное тебе́ слове́сное ста́до озаря́я,/ и на зла́чных сло́ва Христо́ва па́житях пита́я,/ на пра́вый пу́ть за́поведей Госпо́дних/ си́лою ду́ха твоего́ наставля́л еси́ е./ Те́мже и ны́не осеня́емой цельбоно́сными чудотворе́нии твои́ми,/ в святу́ю па́мять, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

Велича́ем тя,/ святи́телю о́тче Ге́рмане,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко всехва́льнии ученицы́/ вели́каго покрови́теля и засту́пника земли́ Ру́сской,/ Богоно́снии отцы́ на́ши Афана́сие и Феодо́сие,/ от ю́ности ва́шея крест Христо́в на рамена́ взе́мшии,/ усе́рдно Тому́ после́довали есте́/ и до́бре потруди́лись в Се́ргиевой оби́тели./ Отону́дуже Бо́жиим изволе́нием прибы́вша,/ благоче́стно во гра́де на́шем Череповце́ подвиза́лися есте́/ и оби́тель Воскресе́ния Христо́ва устро́иша,/ моли́твою и трудо́м Бо́гу угоди́вше,/ от Него́ вене́ц сла́вы Небе́сной прия́ли есте́,/ и ны́не святы́ми свои́ми телесы́/ в собо́рнем хра́ме под спу́дом почива́юще,/ ду́хом же вку́пе с преподо́бным Се́ргием/ у престо́ла Всевы́шняго предстоя́,/ о нас мо́литеся приле́жно/ изба́витися нам от всех бед и скорбе́й/ и спасти́ся душа́м на́шим.

Волне́ний мно́жество невла́жно проходя́ще... (общий преподобным).

Убла́жаем вас,/ преподо́бнии отцы́ Афана́сие и Феодо́сие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

26/9 Преставление апостола и евангелиста Иоанна Богослова (начало II в.). Святителя Тихона, патриарха Московского и всея Руси (прославление, 1989 г.). Преподобного Ефрема Перекомского, Новгородского (1492).

Апо́столе, Христу́ Бо́гу возлю́бленне,/ ускори́ изба́вити лю́ди безотве́тныя,/ прие́млет тя припа́дающа,/ и́же па́дша на пе́рси прие́мый:/ Его́же моли́, Богосло́ве,/ и належа́щую мглу язы́ков разгна́ти, прося́ нам ми́ра и ве́лия ми́лости.

Вели́чия твоя́, де́вственниче, кто пове́сть?/ То́чиши бо чудеса́, и излива́еши исцеле́ния,/ и мо́лишися о душа́х на́ших,/ я́ко Богосло́в и друг Христо́в.

Велича́ем тя,/ апо́столе Христо́в и евангели́сте Иоа́нне Богосло́ве,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Всеросси́йскаго Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́,/ и мир Бо́жий лю́дем испроси́.

В годи́ну тя́жкую Бо́гом избра́нный/ в соверше́нной свя́тости и любви́ Бо́га просла́вил еси́,/ во смире́нии вели́чие, в простоте́ и кро́тости си́лу Бо́жию явля́я,/ положи́л ду́шу за Це́рковь, за лю́ди своя́,/ испове́дниче патриа́рше свя́те Ти́хоне,/ моли́ Христа́ Бо́га,/ Ему́же сораспя́лся еси́,/ и ны́не спасти́ зе́млю ру́сскую и па́ству твою́.

Ти́хостию нра́ва укра́шен,/ кро́тость и милосе́рдие ка́ющимся явля́яй,/ во испове́дании Правосла́вныя ве́ры и любви́ ко Го́споду/ тверд и непрекло́нен пребы́л еси́,/ святи́телю Христо́в Ти́хоне,/ моли́ся о нас, да не разлучи́мся от любве́ Бо́жия,/ я́же о Христе́ Иису́се, Го́споде на́шем.

Велича́ем тя,/ святи́телю о́тче Ти́хоне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности твоея́ весь Бо́гови порабо́тился еси́, блаже́нне,/ и Того́ ра́ди любве́ оте́чество и род оста́вил еси́,/ в пусты́ню всели́вся, в не́йже жесто́кое житие́ показа́в,/ и чуде́с дарова́ния от Бо́га прия́л еси́, Ефре́ме преподо́бне,/ моли́ Христа́ Бо́га, да спасе́т ду́ши на́ша.

Ангельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́,/ и Того́ за́поведьми огра́ждся, яви́лся еси́ столп непоколеби́м от вра́жиих нападе́ний./ Тем зове́м ти:/ ра́дуйся, Ефре́ме, свети́ло пресве́тлое.

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

27/10 Мученика Каллистрата и дружины его (304). Преподобного Савватия Соловецкого (1435). Священномученика Петра, митрополита Крутицкого (1937). Преподобных Сергия (1392) и Никона (1426) Радонежских.

Му́ченицы Твои́, Го́споди... (общий мученикам).

Всяк труд днесь Це́рковь ны́не соверша́ющи, святи́и,/ восхваля́ет та́инственно,/ я́ко за ню страда́льчествовавшия, му́ченицы Боже́ственнии,/ добропобе́днии, всему́дрии.

Многообра́зныя ра́ны претерпе́вше, и венцы́ от Бо́га я́ве прии́мше,/ о нас моли́теся, блаже́ннии, Христу́,/ па́мять всепра́зднственную ва́шу соверша́ющих,/ велича́йший Каллистра́те со страда́вшими с тобо́ю,/ е́же умири́ти па́ству и лю́ди, Той16 бо есть ве́рных утвержде́ние.

Велича́ем вас,/ страстоте́рпцы святи́и, Каллистра́те со страда́вшими с тобо́ю,/ и чтим честна́я страда́ния ва́ша,/ я́же за Христа́/ претерпе́ли есте́.

Удали́вся ми́ра и водвори́вся в пусты́ни,/ до́брым по́двигом подвиза́лся еси́, злострада́нием, и внима́нием, и моли́твами:/ отону́дуже и по сме́рти источа́еши исцеле́ния, Савва́тие о́тче наш,/ моли́ Христа́ Бо́га спасти́ся душа́м на́шим.

От ю́ности своея́, преподо́бне, весь себе́ Го́сподеви предложи́в,/ и земна́я вся оста́вль,/ Христо́вым стопа́м те́пле после́довал еси́,/ и безпло́тным сожи́тель яви́лся и всем преподо́бным соо́бщник, преблаже́нне Савва́тие./ Тем, мо́лимтися, о́тче, моли́ся о нас непреста́нно Христу́ Бо́гу,/ я́ко да ми́лостив бу́дет нам в день су́дный.

Жите́йския молвы́ отбе́г, всели́лся еси́ в морски́й о́стров, му́дре,/ и крест твой взем, Христу́ после́довал еси́ в моли́твах, и во бде́ниих и в поще́ниих, злострада́ньми плоть твою́ изнуря́я./ Тем был еси́ преподо́бных удобре́ние;/ сего́ ра́ди любо́вию па́мять твою́ пра́зднуем, преподо́бне Савва́тие,/ моли́ Христа́ Бо́га непреста́нно о всех нас.

Я́ко звезда́ всесве́тлая доброде́тельми сия́ющи,/ чуде́с лучи́ испуща́ющи обою́ду,/ богатя́ приходя́щих ду́ши, целя́ и телеса́,/ благода́ть име́я, Савва́тие./ Прославля́ет бо Своя́ Себе́ Вели́кий Дарова́тель.

Ублажа́ем тя,/ преподо́бне о́тче Савва́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Бо́жиим смотре́нием/ к святи́тельскому служе́нию святы́м Патриа́рхом Ти́хоном призва́нный,/ ста́ду Христо́ву яви́лся еси́ страж неусы́пный/ и защи́тник небоя́зненный,/ священному́чениче Пе́тре./ Жесто́кая заточе́ния и да́льняя изгна́ния,/ страда́ния и смерть от богобо́рцев претерпе́л еси́./ Вене́ц му́ченический прия́в,/ на Небеси́ ны́не ра́дуешися./ Моли́ Ми́лостиваго Бо́га,/ да сохрани́т Це́рковь на́шу от нестрое́ний,/ единомы́слие и мир лю́дем Свои́м да́рует/ и спасе́т ду́ши на́ша.

Дух ми́рен и кро́ток стяжа́в,/ тве́рдое упова́ние на милосе́рдие Бо́жие име́я,/ блюсти́тель ве́рный Це́ркве на́шея и испове́дник Христо́в яви́лся еси́,/ священному́чениче Пе́тре,/ при́сный о нас пред Бо́гом предста́телю и моли́твенниче о душа́х на́ших.

Велича́ем тя,/ священному́чениче Пе́тре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко трисве́тлаго со́лнца светоза́рныя зве́зды,/ Тро́йческим све́том озаря́ете сердца́ ве́рных,/ сосу́ди Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щий дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклонится,/ му́жески в пусты́ню всели́лся еси́/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просвети́л еси́, приходя́щих тебе́ ве́рою,/ и исцеле́ния всем подая́ оби́льно, /о́тче наш Се́ргие, моли́ Христа́ Бо́га, да спасе́т ду́ши на́ша.

Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

В по́стницех приобщи́вшеся Вели́кому Анто́нию/ и Евфимию Иерусали́мскому поревнова́вше в по́двизех,/ я́ко а́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Ублажа́ем вас,/ преподо́бнии отцы́ Се́ргие и Ни́коне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

28/11 Преподобного Харитона Исповедника (ок. 350). Преподобных схимонаха Кирилла и схимонахини Марии, родителей преподобного Сергия Радонежского (ок. 1337). Собор преподобных отцев Киево-Печерских, в Ближних пещерах (преподобного Антония) почивающих. Преподобного Иродиона Илоезерского (1541). Благоверного князя Вячеслава Чешского (935).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́/ и был еси́ свети́льник вселе́нней, сия́я чудесы́, Харито́не о́тче наш./ Моли́ Христа́ Бо́га спасти́ся душа́м на́шим.

Наслади́вся, богому́дре, воздержа́ния,/ и пло́ти твоея́ вожделе́ния обузда́в,/ яви́лся еси́ ве́рою возраща́емь/ и, я́ко жи́зни дре́во, посреде́ рая́ процве́л еси́,/Харито́не всеблаже́нне, свяще́ннейший.

Ублажа́ем тя,/ преподо́бне о́тче Харито́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ пра́веднии Кири́лле и Мари́е,/ плод благоче́стия, Се́ргия преподо́бнаго нам яви́вший,/ с ни́мже усе́рдно моли́те Го́спода/ низпосла́ти нам дух любве́ и смиренному́дрия,/ да в ми́ре и единомы́слии просла́вим Тро́ицу Единосу́щную.

Днесь, ве́рнии, соше́дшеся,/ восхва́лим дво́ицу блаже́нную, благове́рнаго Кири́лла и Мари́ю добронра́вную,/ ты́я бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Святе́й Тро́ице Бо́гу/ оте́чество на́ше в правове́рии утверди́ти,/ до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти и спасти́ ду́ши на́ша.

Ублажа́ем вас,/ преподо́бнии Кири́лле и Мари́е,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Столп огнезра́чный и светоно́сное со́лнце, возсия́вшее на горе́ Пече́рстей,/ вели́каго Анто́ния со всем собо́ром Богоно́сных оте́ц приво́дим Тебе́, Христе́, в моли́тву,/ и́хже ра́ди мо́лим пода́ждь оби́тели на́шей благода́ть и душа́м на́шим ве́лию ми́лость.

Егда́ снидо́сте во гро́бы и саме́х себе́ заключи́сте,/ тогда́ стра́сти умертви́вше плотски́я,/ спогребо́стеся Христу́, Богоно́снии,/ и диа́вольския в подзе́мных разруши́сте огра́ды./ Сего́ ра́ди а́нгели венцы́ с Небе́с вам подаю́т.

Отцы́ всечестни́и, ли́че богокра́сный,/ чуде́с мно́гих исто́чницы, ми́ро источа́ющий,/ сокро́вища краснобога́тная Госпо́дня, в земли́ сокрове́нная,/ не преста́йте, мо́лим вы, о нас моли́тися ко Го́споду,/ да зове́м вам:/ ра́дуйтеся, всему́ ми́ру свети́льницы.

Лик по́стнический собра́ся у́мне,/ мы́сленныма зря́ще очи́ма,/ прииди́те, лю́дие, хвала́ми почти́те,/ покланя́ющеся моще́м их,/любо́вныя принеси́те да́ры,/ ти́и бо суть к Бо́гу хода́тае и моли́твенницы о душа́х на́ших.

Велича́ем вас,/ преподо́бнии отцы́ на́ши Пече́рскии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Возсия́ днесь све́тло, ра́дуется град Белое́зеро,/ име́я во о́бласти свое́й вели́каго свети́льника, блаже́ннаго отца́ Иродио́на./ Соше́дшеся у́бо и ви́девше лю́дие многоцеле́бную ра́ку его́, пресве́тло осиява́ющу мно́гими дея́нии чуде́с да́ра./ Прося́щим с ве́рою исцеле́ния,/ стра́ждущим от разли́чных неду́гов подае́т здра́вие./ я́ко фи́никс насажде́н в дому́ Бо́жия Ма́тере,/ я́ко кедр при вода́х благода́тию Христо́вою расту́щ,/ и я́коже шипо́к благово́нен обстоя́нии вода́ми огражде́н./ И мы, ча́да твоя́ су́ще, припа́дающе мо́лимтися:/ моли́ Пресвяту́ю Тро́ицу,/ е́же сохранится гра́ду на́шему от нахожде́ния иноплеме́нник/ и от враг ви́димых и неви́димых./ Я́ко да твои́ми ко Го́споду моли́твами спаса́емии,/ всегда́ про́сим ве́рою у тебе́:/ моли́ о нас Христа́ Бо́га спасти́ся душа́м на́шим.

Слы́шавше, отцы́ и бра́тия, неме́дленно притеце́м/ и немо́лчно и усе́рдно вопие́м ему́, глаго́люще:/ о пресве́тлый наш о Го́споде учи́телю, о́тче Иродио́не!/ Во спаса́емых по́двигах ревни́тель был еси́/ преподо́бному Корни́лию и стопа́м после́довал еси́ его́./ И еди́н Еди́ному Бо́гу изво́ли служи́ти,/ слеза́ми и посто́м и бде́нием изнуря́я те́ло свое́ ве́чныя ра́ди жи́зни./ Го́сподеви рабо́тая, крест Госпо́день на ра́мо взем, после́довал еси́ Ему́/ бо́дренными свои́ми моли́твами вооружа́лся неви́димо на врага́. И ны́не зре́ти сподо́бися во све́те неизрече́нныя ра́дости Пресвяту́ю Тро́ицу./ Сла́ва Бо́гу Все́льшемуся в тя,/ сла́ва Укре́пльшему тя,/ сла́ва Де́ющу тобо́ю все́м исцеле́ние.

Ублажа́ем тя,/ преподо́бне о́тче Иродио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Дне́сь а́нгели с челове́ки ра́дуются вку́пе о́бщим весе́лием./ Не́бо и земля́ све́тло лику́ют в па́мять ти, свя́те. И мы, гре́шнии, приле́жно ти вопие́м:/ помоли́сь к Влады́це о нас, изба́вити ны от напа́сти, ви́димых и неви́димых враг, чту́щих пресве́тлую ти па́мять.

Благочести́ваго ко́рене отра́сль пречестна́я,/ святы́й благове́рный вели́кий кня́же Вячесла́ве,/ побо́рник быв Восто́чныя в Че́хах Це́ркве/ и прибе́жище те́плое убо́гим и си́рым,/ я́ко вторы́й Авель, незло́биве претерпе́л еси́ смерть,/ во главу́ усече́н руко́ю бра́та пред враты́ церко́вными./ Те́мже и всели́ тя Христо́с,/ я́ко испове́дника пра́выя ве́ры во оби́тели Небе́сныя,/ просла́ви всечестну́ю па́мять твою́ в слове́нских язы́цех/ и дарова́ тя ско́раго помо́щника всем, почита́ющим тя./ Моли́ся о лю́дех твои́х ко Го́споду,/ да обрати́т их в ло́но Правосла́вныя Це́ркве и спасе́т ду́ши на́ша.

С ли́ки а́нгельскими предстоя́, блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты,/ и отту́ду благоде́тельныя да́ры поче́рп чуде́с,/ всем притека́ющим ве́рою под твою́ святы́ню/ источа́еши цельба́м дарова́ние.

Велича́ем тя,/ благове́рный кня́же Вячесла́ве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

29/12 Преподобного Кириака отшельника (556).

Пусты́нный жи́тель и в телеси́ а́нгел, и чудотво́рец показа́лся еси́, Богоно́се о́тче наш Кириа́че,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою притека́ющих к тебе́./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Я́ко побо́рника кре́пкаго и засту́пника,/ чту́щи тя свяще́нная Ла́вра всегда́,/ пра́зднует ле́тне* па́мяти,/ но, я́ко име́я дерзнове́ние ко Го́споду,/ от враго́в находя́щих соблюди́ ны, да зове́м:/ ра́дуйся, о́тче треблаже́нне.

Чистото́ю душе́вною боже́ственно вооружи́вся/ и непреста́нную моли́тву, я́ко копие́ вручи́в, кре́пко ссекл еси́ де́монская ополче́ния,/ Кириа́че о́тче наш, моли́ся непреста́нно о всех нас.

Ублажа́ем тя,/ преподо́бне о́тче Кириа́че,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/13 Священномученика Григория епископа, просветителя Великой Армении (ок. 335). Преподобного Григория Пелыпемского, Вологодского чудотворца (1442). Святителя Михаила, первого митрополита Киевского (992).

И нра́вом прича́стник, И престо́лом наме́стник... (общий священномученику).

Благосла́внаго и священнонача́льника вси, я́ко страда́льца и́стины,/ днесь, ве́рнии, в пе́снех и песнопе́ниих восхва́лим,/ бо́драго па́стыря и учи́теля, Григо́рия,/ всеми́рнаго свети́льника и побо́рника:/ Христу́ бо мо́лится, е́же спасти́ся нам.

Велича́ем тя,/ священному́чениче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Любо́вию Христо́вою, Богому́дре, просвети́вся,/ доброде́тельми облиста́л еси́,/ и вся́кое наслажде́ние плотско́е возненави́дев,/ и в пусты́ню всели́вся, в не́йже вельми́ подвиза́лся еси́ в жи́зни сей вре́менней/ в пе́ниих и во бде́ниих, и в поще́ниих./ Сего́ ра́ди и Христо́с да́ром чуде́с обогати́ тя./ Но помина́й нас, чту́щих пресве́тлую па́мять твою́, преподо́бне о́тче Григо́рие,/ и моли́ Христа́ Бо́га спасти́ся душа́м на́шим.

Христо́вою любо́вию уязви́вся, преподо́бне,/ и Тому́ невозвра́тным жела́нием после́довал еси́,/ вся́кое наслажде́ние плотско́е возненави́дев,/ и в пусты́ню всели́вся, в ней вельми́ подвиза́лся еси́./ Тем и Христо́с да́ром чуде́с обогати́ тя, помина́й нас, чту́щих пресве́тлую па́мять твою́, да зове́м ти:/ ра́дуйся, преподо́бне Григо́рие, о́тче наш.

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь проро́чествие во апо́столех Первозва́ннаго испо́лнися,/ се бо на сих гора́х возсия́ благода́ть и ве́ра умно́жися:/ и, и́же неве́рием обветша́вший, Боже́ственною купе́лию отроди́шася,/ и бы́ша лю́дие обновле́ния, ца́рское свяще́ние, язы́к свят, Христо́во ста́до,/ Ему́же ты пе́рвый па́стырь яви́лся еси́, я́ко пе́рвее Креще́нием послужи́вый./ И ны́не, предстоя́ Влады́це Христу́ Бо́гу, моли́ всем сыно́м росси́йским спасти́ся,/ и́маши бо дерзнове́ние, я́ко иера́рх Бо́жий и священнослужи́тель.

Моисе́й вторы́й Росси́и яви́лся еси́, о́тче,/ пренесы́й мы́сленный виногра́д от еги́петскаго идолослуже́ния в зе́млю, проро́чествием предуви́денную./ Бу́дет, рече́, утвержде́ние ве́ры на земли́,/ и на версе́х гор Ки́евских превознесе́тся па́че Лива́на плод, пита́ющ ми́ра всего́,/ от него́же вкуси́вше, ублажа́ем тя, Михаи́ле, Бо́жий иера́рше.

Велича́ем тя,/ святи́телю о́тче Михаи́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

1/14 Покров Пресвятой Владычицы нашей Богородицы и Приснодевы Марии. Апостола от 70-ти Анании (I). Преподобного Романа Сладкопевца (ок. 556). Преподобного Саввы Вишерского, Новгородского (1461). Празднование в честь Хитона Господня и Столпа Животворящего. Люблинской (IX), Псково-Покровской (1581), Касперовской (1840), Браиловской (1635), Гербовецкой (1859), Барской и именуемых Кукузелиса (XII), Мятинская (1766) и Дудинская икон Божией Матери.

Днесь, благове́рнии лю́дие,/ све́тло пра́зднуем,/ осеня́еми Твои́м, Богома́ти, прише́ствием,/ и к Твоему́ взира́юще пречи́стому о́бразу, уми́льно глаго́лем:/ покры́й нас честны́м Твои́м Покро́вом,/ и изба́ви нас от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Де́ва днесь предстои́т в Це́ркви,/ и с ли́ки святы́х неви́димо за ны мо́лится Бо́гу,/ а́нгел и со архиере́и покланя́ются,/ апо́столи же со проро́ки ликовству́ют:/ нас бо ра́ди мо́лит Богоро́дица Преве́чнаго Бо́га.

Велича́ем Тя,/ Пресвята́я Де́во,/ и чтим Покро́в Твой честны́й,/ Тя бо ви́де святы́й Андре́й на возду́се,/ за ны Христу́ моля́щуюся.

Велича́ем Тя,/ Пресвята́я Де́во,/ Ма́ти Христа́, Бо́га на́шего,/ и всесла́вный сла́вим Покро́в твой. (Сие Величание поется на Святой Афонской горе в праздник Покрова Пресвятой Богородицы).

Велича́ем Тя,/ Пресвята́я Де́во,/ Ма́ти Христа́, Бо́га на́шего,/ и́же к Сы́ну Свои́ ру́це простира́ющи, и о ми́ре моля́щися,/ и честны́м Свои́м омофо́ром защища́ющи/ град и лю́ди от враго́в на́ших. (Сие Величание поется на Святой Афонской горе в праздник Покрова Пресвятой Богородицы).

В Уставах XVI века на этот праздник есть тоже Величание: Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и всесла́вный сла́вим Покро́в Твой.

Апо́столе святы́й Ана́ние,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

В моли́твах тепле́йший засту́пниче/ и прося́щим скоре́йший послу́шателю,/ приими́ моле́ние, Ана́ние, на́ше/ и Христа́ моли́ поми́ловати ны,/ Еди́наго во святы́х почива́ющаго.

Велича́ем тя,/ апо́столе Христо́в Ана́ние,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

В тебе́, о́тче, изве́стно спасе́ся е́же по о́бразу... (общий преподобному).

Боже́ственными доброде́тельми ду́ха/ измла́да украси́вся, Рома́не прему́дре,/ Це́ркви Христо́ве пречестно́е украше́ние был еси́,/ пе́нием прекра́сным украси́в ю, блаже́нне./ Тем мо́лим тя, пода́ждь жела́ющим Боже́ственнаго дарова́ния твоего́,/ я́ко да вопие́м ти:/ ра́дуйся, о́тче преблаже́нне, красото́ церко́вная.

Ублажа́ем тя,/ преподо́бне о́тче Рома́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности твоея́ весь Бо́гу порабо́тился еси́, блаже́нне,/ и Того́ ра́ди любве́ оте́чество и род оста́вил еси́,/ в пусты́ню всели́вся, и в ней жесто́кое житие́ показа́в,/ чуде́с дарова́ния от Го́спода прия́л еси́,/ Са́вво преподо́бне,/ моли́ Христа́ Бо́га спасти́ся душа́м на́шим.

Оте́чества, преподо́бне, удади́вся/ и всели́вся в пусты́ню,/ и та́мо на столп вшед, иде́же жесто́кое житие́ показа́л еси́,/ и мно́гих житие́м удиви́в,/ отню́дуже дарова́ние чуде́с от Христа́ прия́л еси́./ Помина́й нас, честву́ющих па́мять твою́, да зове́м ти:/ ра́дуйся, Са́вво о́тче наш.

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь пра́зднует Свята́я Це́рковь,/ чту́щи Столп Животворя́щий и Хито́н Госпо́день,/ и́же Свет просия́ша во вся концы́ вселе́нныя/ и жи́зни свято́е ми́ро источи́ша./ Сего́ ра́ди Всесвяте́й Богома́тери и ро́ждшемуся от Нея́ Христу́/ покланя́емся во спасе́ние душ на́ших.

В Го́рней борьбе́ за мя непобеди́мый помо́щниче,/ Столпе́ святы́й и Богоосия́нный, мир просвеща́яй,/ я́ко мо́лния освеща́яй Небесноподо́бную пелену́ – свы́ше истка́нный Хито́н Госпо́день,/ украша́яй же воспева́ющия и пра́зднующия торжество́ твое́,/ да́руй сугу́бое озаре́ние и ра́дость пою́щим ти:/ ра́дуйся, Столпе́, Бо́гом осия́нный.

Днесь све́тло красу́ется Богоспаса́емый град Псков/ и вся страна́ Росси́йская/ прише́ствием Ма́тери Бо́га Вы́шняго/ на избавле́ние гра́да сего́ от ва́рварскаго плене́ния./ Услы́ша плач и сле́зы раб Свои́х,/ ско́ро приклони́ся на мольбу́ к Сы́ну Своему́ и Бо́гу на́шему,/ и моле́нием Свои́м гнев Бо́жий укроти́ и весь мир просвети́,/ и град сей от ско́рби на ра́дость премени́./ О, ди́вному зна́мению,/ ка́ко Пресвята́я Влады́чице прии́де на возду́се в це́рковь Свою́/ и на забра́ло* гра́да Пско́ва/ и призва́ уго́дников Свои́х, благове́рных князе́й,/ и поноси́ в лю́дех беззако́ние,/ и Свое́ю пречи́стою руко́ю ука́зоваше на пога́наго зла́го ва́рвара/ и его́ сове́т на разруше́ние./ Возвесели́ся, Богоспаса́емый гра́де Пско́ве/ и все Правосла́вие, име́юще такову́ Засту́пницу непобори́му. /Днесь притеце́м, ве́рнии, /в дом спаси́тельный Влады́чицы Богоро́дицы, /све́тло пра́зднуя,/ и ко свято́му Ея́ о́бразу со слеза́ми припаде́м, вопию́ще и глаго́люще:/ О, Всеми́лостивая Госпоже́ Влады́чице Богоро́дице,/ моли́ся Сы́ну Своему́, Христу́ Бо́гу на́шему,/ спасти́ правосла́вныя лю́ди и град сей изба́вит от о́гненнаго запале́ния/ и от нахожде́ния пога́ных и междоусо́бныя бра́ни,/ и спасти́ ду́ши на́ша, я́ко Милосе́рдая.

Засту́пнице христиа́н, Предста́тельнице гра́ду на́шему Пско́ву,/ услы́ши моли́тву раб Свои́х, Влады́чице Богоро́дице,/ и ско́рым Свои́м прише́ствием светолу́чными заря́ми раб Свои́х возвесели́/ и торжествова́ти устро́й, в беде́ и в се́товании возвесели́,/ и завеща́ во гра́де моли́ти Святу́ю Тро́ицу,/ и Сама́ обеща́ся моли́ти Ю./ О, пресла́вному чудесе́,/ ка́ко Небе́сная Цари́це к земны́м прии́де изба́вити рабы́ Своя́ погиба́ющия./ О, ди́вному зна́мению,/ ка́ко вразумля́юще рабы́ Своя́, ка́ко бы умоли́ти Святу́ю Тро́ицу./ О, Всеми́лостивая Влады́чице Богоро́дице,/ а́ще не бы Ты предстоя́ла, моля́щи за ны,/ кто бы нас изба́вил от толи́кия беды́,/ я́ко не и́мамы ины́я по́мощи и наде́жды ра́зве Тебе́, Влады́чице,/ Твои́ бо раби́, да не поги́бнем,/ и потщи́ся на умоле́ние раб Свои́х при́сно,/ Богоро́дице, чту́щих Тя.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

2/15 Священномученика Киприана и мученицы Иустины (304). Блаженного Андрея, Христа ради юродивого (936). Преставление благоверной княгини Анны Кашинской (1338). Преподобного Кассиана Угличского (1504). Святых мучеников Казанских: Иоанна, Стефана, Петра, Бориса, Иакова, Феодора, Сильвана, Феодора, Василия, Феодора, Димитрия, Михаила, Иоанна и Василия (XVI).

И нра́вом прича́стник,/ И престо́лом наме́стник... (общий священномученику).

От худо́жества волше́бнаго обрати́вся, Богому́дре,/ к позна́нию Боже́ственному,/ показа́лся еси́ ми́ру врач мудре́йший,/ исцеле́ния да́руя честву́ющим тя, Киприа́не со Иусти́ною;/ с не́юже моли́ся Человеколю́бцу Влады́це/ спасти́ ду́ши на́ша.

Велича́ем тя,/ священному́чениче Киприа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Глас апо́стола Твоего́ Па́вла услы́шав, глаго́лющ... (общий Христа ради юродивым).

Во юро́дство претвори́вся во́лею,/ ми́ра сего́ красоты́ отню́д возненави́дел еси́,/ плотска́я мудрова́ния увяди́л еси́, посто́м и жа́ждею, и зно́ем,/ и сту́дению мра́за,/ от дождя́ и сне́га, и от про́чия возду́шныя тяготы́ никогда́же уклони́вся,/ очи́стил еси́ себе́, я́ко зла́то в горни́ле,/ Андре́е блаже́нне.

Ублажа́ем тя,/ святы́й пра́ведный Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Днесь восхваля́ем тя, преподо́бная благове́рная вели́кая княги́не и́нокине Анно,/ я́ко лоза́ плодови́та процвела́ посреде́ те́рния,/ во всех благочести́вых вели́ких княги́нях, во и́нокинях же, а́ки крин процвете́ в виногра́де во гра́де Ка́шине доброде́тельми свои́ми/ и всех удиви́ла еси чу́дным свои́м житие́м,/ тем угоди́ла еси́ Христу́ Бо́гу,/ к Нему́же взы́де ра́дующися и веселя́щися,/ и ны́не пребыва́еши с ли́ки преподо́бных жен,/ наслажда́ющихся ра́йския красоты́ и весе́лия./ Мо́лим тя:/ моли́ о нас Человеколю́бца Христа́ Бо́га на́шего/ дарова́ти нам мир и ве́лию ми́лость.

Просвети́вшися Боже́ственною благода́тию, преподо́бная,/ и пра́востию у́мною ду́шу твою́ привяза́вши в любо́вь Христо́ву,/ тле́нныя, и кра́сныя, и вре́менныя нивочто́же вмени́ла еси́./ Кре́стным зна́мением на мы́сленныя враги́ му́жески вооружи́вшися,/ по́стническими по́двиги, посто́м и моли́твами/ у́глие страсте́й угаси́ла еси́, достосла́вная Анно,/ и по сме́рти источа́еши благода́ть притека́ющим к моще́м твои́м./ И ны́не, в Небе́снем черто́зе с му́дрыми де́вами предстоя́щи Христу́/ моли́ о нас, почита́ющих святу́ю па́мять твою́.

Днесь восхваля́ем тя, преподо́бная ма́ти,/ вели́кая княги́не и́нокине Анно:/ я́ко бо лоза́ плодови́та посреде́ те́рния,/ процвела́ еси́ во гра́де Ка́шине твои́ми доброде́тельми,/ всех удиви́ла еси́ чу́дным твои́м житие́м,/ те́мже Христу́ угоди́ла еси́,/ и ны́не, ра́дующися и веселя́щися,/ пребыва́еши с ли́ки преподо́бных жен,/ наслажда́ющися ра́йския красоты́ и весе́лия./ Мо́лим у́бо тя: моли́ о нас/ Человеколю́бца, Христа́ Бо́га на́шего,/ дарова́ти нам мир и ве́лию ми́лость.

я́ко пресве́тлая звезда́ яви́лася еси́ в Росси́йстей земли́,/ во гра́де Ка́шине, преподо́бная ма́ти Анно,/ во всех благочести́вых и ве́рных жена́х,/ а́ки крин, процвела́ еси́ чи́стым и непоро́чным твои́м житие́м,/ во и́нокинях же соверше́нными твои́ми труды́ и по́двиги/ и взошла́ еси́ к вы́шнему гра́ду, ра́дующися и веселя́щися,/ я́ко до́бре соверши́вши твое́ тече́ние./ И ны́не честны́я твоя́ мо́щи, а́ки би́серие драго́е,/ яви́шася на исцеле́ние всем приходя́щим с ве́рою./ Тем и вопие́м ти:/ ра́дуйся, всекра́сная душе́ю, и моли́ Христа́ Бо́га о спасе́нии душ на́ших.

Скоропослу́шную помо́щницу, вси, су́щии в беда́х,/ благоче́стно воспое́м, Анну святу́ю,/ днесь любо́вию соше́дшеся во обре́тение честны́х моще́й ея́./ Воспое́м пе́снь Еди́ному в Тро́ице Бо́гу, ра́дующися,/ сподо́бльшему нас ви́дети пречи́стое сокро́вище честны́х моще́й ея́:/ от мног бо лет сокрове́ны бы́ша,/ напосле́док же нам явле́ны/ и источа́ют мно́га и разли́чна исцеле́ния./ я́ко да моли́твами ея́ к Бо́гу/ от вся́ких находя́щих зол изба́вимся,/ ра́достною душе́ю и весе́лием се́рдца благода́рная воспое́м, глаго́люще:/ ра́дуйся, утвержде́ние гра́ду на́шему.

Ублажа́ем тя,/ преподо́бная ма́ти, вели́кая княги́не Анно,/ и чтим святу́ю па́мять твою́,/ наста́внице и́нокиням/ и собесе́днице а́нгелом.

Днесь пресве́тло красу́ется сла́внейший Углеч град,/ це́рковь же Бо́жия Ма́тере вельми́ ра́дуется,/ име́я многоцеле́бныя в себе́ мо́щи вели́каго чудотво́рца,/ преподо́бнаго Кассиа́на, возсия́вшаго от Ри́ма,/ я́коже со́лнце, всему́ ми́ру издале́ча просвеща́я ве́рных сердца́,/ и́мже укра́си Бог це́рковь Ма́тере Своея́,/ те́мже ны́не мо́лим тя:/ бу́ди покрови́тель и засту́пник непобеди́мый/ от вся́ких бед гра́ду на́шему/ и всем ве́рным храни́лище,/ притека́ющим в дом Бо́жия Ма́тере и кла́няющимся тебе́,/ преподо́бне уго́дниче Христо́в Кассиа́не,/ моли́ Христа́ Бо́га спасти́ся душа́м на́шим.

Ве́тхаго Ри́ма име́я воспита́ние,/ держа́ву оте́чества своего́, град Мангу́пский, оста́вль,/ и нивочто́же вмени́л еси́ княже́ние/ и сла́ву маловре́менную су́етнаго ве́ка Христа́ ра́ди,/ и па́че земна́го бога́тства избра́ бога́тство себе́ небе́сное и сла́ву ве́чную,/ возвы́сив ум свой к Бо́гу,/ и житие́ свое́ со а́нгелы вожделе́л еси восприя́ти,/ промышле́нием Боже́ственнаго Ра́зума направля́ем,/ и Богоспаса́емаго У́глеча гра́да дости́гл еси́,/ и близ в преде́лах о́бласти его́ над Во́лгою реко́ю в пусты́ню всели́вся,/ и оби́тель пресла́вну в честь Бо́жия Ма́тере воздви́гл еси,/ и в ней те́ло свое́ предложи́в, я́ко дар освяще́н./ Тем мо́лим тя, о́тче Кассиа́не,/ моли́ Христа́ Бо́га,/ да спасе́т ду́ши на́ша.

Днесь град У́глич тобо́ю хва́лится,/ в конца́х бо его́ пресве́тло, я́ко ве́лие со́лнце, возсия́л еси́/ и чудесы́ твои́ми вся озари́л еси́,/ и ны́не моли́ся Го́сподеви,/ Кассиане преподо́бне,/ за град У́глич и оби́тель си́ю,/ и всяк град, и страну́ и лю́ди,/ и́же ве́рою тебе́ почита́ющия,/ и о спасе́нии душ на́ших.

Я́коже пресве́тлое со́лнце,/ возсия́ нам от Ри́ма и к ца́рскому гра́ду дости́гл еси́,/ преблаже́нне о́тче Кассиа́не,/ и а́нгельски в Ру́сстей земли́ пожи́л еси́,/ и дре́вних по́стник на высоту́ воздержа́ния востече́,/ и в пусты́ни У́чме, близ Богоспаса́емаго гра́да У́глеча,/ оби́тель пресла́вну и́ноком сооружи́,/ и храм благоле́пен Пречи́стей Богома́тери Ду́хом Бо́жиим уясни́,/ и в ней тобо́ю Бог прославля́ется,/ и ны́не моли́тися Го́сподеви не преста́й о ста́де свое́м,/ и́же мно́гими по́ты и труды́ стяжа́л еси́,/ избави́ти его́ от всех обстоя́ний лука́ваго,/ и от вся́ких ско́рбей и бед невреди́мо сохрани́тися,/ и нам, рабо́м твои́м, грехо́в проще́ние моли́твами твои́ми получи́ти,/ и гра́ду твоему́ У́глечу от напа́стей вся́ческих/ и находя́щих паде́ний гневом Бо́жиим пра́ведным, свободи́тися умоли́,/ преподо́бне и Богому́дре о́тче Кассиа́не.

я́ко многосве́тлая звезда́,/ возсия́л еси́ в Ру́сстей земли́, о́тче Кассиа́не,/ и, я́ко бога́тство драгоце́ннаго би́сера,/ прии́де к нам от ве́тхаго Ри́ма/ и доше́д Богоспаса́емаго гра́да У́глеча,/ и близ его Боже́ственным смотре́нием/ оби́тель всече́стну возгради́,/ и це́рковь Ма́тере Бо́жия чуднови́дну созда́,/ и созва́ и́нок мно́жества,/ с ни́миже моли́ся Христу́ Бо́гу/ изба́вити град сей от ва́рварскаго плене́ния/ и междоусо́бныя бра́ни, и о́гненнаго запале́ния невреди́мо соблюди́,/ преподо́бне и Богому́дре о́тче Кассиа́не.

я́ко светоза́рная звезда́, прише́л еси́ от восто́ка на за́пад,/ оста́вль оте́чество и княже́ние твое́ Христа́ ра́ди,/ и в ца́рствующий град Москву́ прише́л еси́,/ и, промышле́нием Боже́ственнаго Ра́зума направля́ем,/ У́глича гра́да дости́гл еси́,/ и, близ его́, над Во́лгою реко́ю, в пусты́не У́чме всели́вся,/ оби́тель сотвори́л еси́, и це́рковь созда́,/ и созва́ мона́хов во спасе́ние;/ с ни́миже моли́ о нас, чту́щих, па́мять твою́, да зове́м ти:/ ра́дуйся, преподо́бне о́тче Кассиа́не.

Ублажа́ем тя,/ преподо́бне о́тче Кассиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Моли́твами твои́х му́чеников, Го́споди,/ благоче́стие в стране́ Каза́нстей насади́ся,/ и, я́ко пла́менем о́гненным,/ Правосла́вной ве́рой Восто́к озари́ся,/ и ны́не их предста́тельством, Человеколю́бче,/ не помяни́ беззако́ний на́ших,/ но утверди́ нас в ве́ре и́стинней/ и мир пода́ждь, мо́лимся Ти.

Моли́твами святы́х му́чеников Каза́нских/умоле́н бу́ди, Го́споди,/ и вся на́ша боле́зни исцели́,/ и мир умири́, Многоми́лостиве.

Велича́ем вас,/ страстоте́рпцы святи́и земли́ Каза́нския,/ и чтим честна́я страда́ния ва́ша,/ я́же за Христа́ претерпе́ли есте́.

3/16 Священномученика Дионисия Ареопагита, епископа Афинского (96). Преподобного Дионисия, затворника Печерского, в Дальних пещерах почивающего (XV). Иконы Божией Матери «Трубчевская».

Бла́гости научи́вся, и трезвя́ся во всех,/ благо́ю со́вестию священноле́пно обо́лкся*,/ поче́рпл еси́ от сосу́да избра́ннаго неизрече́нная,/ и ве́ру соблю́л, ра́вное тече́ние соверши́л еси́,/ священному́чениче Диони́сие,/ моли́ Христа́ Бо́га спасти́ся душа́м на́шим.

Небе́сная врата́ проше́д ду́хом, я́ко учени́к/ до тре́тияго Небеса́ дости́гшаго апо́стола , Диони́сие,/ неизрече́нных обогати́лся еси́ вся́ким ра́зумом,/ и озари́л еси́ во тьме неве́дения седя́щия./ Те́мже зове́м:/ ра́дуйся, о́тче всеми́рный.

Велича́ем тя,/ священному́чениче Диони́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Же́ртву безкро́вную приноси́вый Го́сподеви непоро́чне/ и служи́вый Ему́ по зва́нию своему́ мно́гое вре́мя неле́ностне,/ свяще́нне Диони́сие,/ моли́ся о нас,/ любо́вию чту́щих тя.

Священноде́йствовавшего на земли́ священноле́пно/ и потруди́вшагося в чину́ свое́м до́бре,/ ны́не же на Небесе́х лику́еши све́тло,/ свяще́нными похваля́ем тя пе́сньми, Диони́сие, и мо́лим:/ моли́ Христа́ Бо́га непреста́нно о всех нас.

Ублажа́ем тя,/ преподо́бне о́тче Диони́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

4/17 Священномученика Иерофея, епископа Афинского (I). Обретение мощей святителей Гурия, архиепископа Казанского, и Варсонофия, епископа Тверского (1595). Благоверного князя Владимира Ярославича Новгородского, чудотворца (1052). Преподобного Аммона, затворника Печерского, в Дальних пещерах почивающего (XIII). Преподобного Пиора, затворника Печерского, в Дальних пещерах почивающего (XIII). Святого праведного Стефана Щиляновича, Сербского (1515). Собор Казанских святых.

Бла́гости научи́вся, и трезвя́ся во всех,/ благо́ю со́вестию священноле́пно обо́лкся,/ поче́рпл еси́ от сосу́да избра́ннаго неизрече́нная,/ и ве́ру соблю́л, ра́вное тече́ние соверши́л еси́,/ священному́чениче Иерофе́е,/ моли́ Христа́ Бо́га спасти́ся душа́м на́шим.

Священнонача́льника Афи́нскаго восхваля́ем тя,/ я́ко тайноучи́вшеся тобо́ю стра́нным и неизре́ченным,/ яви́лся бо еси́ богоприя́тный песносло́вец./ Но моли́, всеблаже́нне Иерофе́е,/ от вся́ких нам грехопаде́ний изба́витися, да зове́м:/ ра́дуйся, о́тче Богому́дре.

Я́коже столп непоколеби́м, Иерофе́е,/ преще́ния враго́в не устраши́лся еси́,/ но пре́лести разруши́л еси́ тверды́ню,/ я́ко ка́мень че́стен валя́яся*, о́тче./ Тем Влады́ка тя хра́брствовавша венча́ет/ Живонача́льною и Боже́ственною десни́цею,/ Его́же о всех нас умоли́.

Велича́ем тя,/ священному́чениче Иерофе́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Пе́рвии учи́телие пре́жде те́мному,/ ны́не же све́тлому и новопросвеще́нному гра́ду Каза́ни,/ пе́рвии возвести́телие пути́ спаси́тельнаго,/ и́стиннии храни́телие апо́стольских преда́ний,/ столпи́ непоколеби́мии, благоче́стия учи́телие/ и Правосла́вия наста́вницы, Гу́рие и Варсоно́фие,/ Влады́ку всех моли́те,/ мир вселе́нней дарова́ти и душа́м на́шим ве́лию ми́лость.

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в, и от неве́рия в ве́ру мно́гих ко Христу́ приве́л еси́,/ и того́ ра́ди от Бо́га нетле́нием почте́н был еси́, и чудесы́ удивля́емь./ Мо́лим тя, святи́телю Гу́рие, моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Воздержа́нием те́ло ду́ху порабо́тив,/ ду́шу же равноа́нгельну сотвори́л еси́,/ сего́ ра́ди святи́тельства са́ном поче́тся,/ чи́сте Чисте́йшему предстои́ши./ Моли́ Христа́ Бо́га, святи́телю,/ спасти́ лю́ди твоя́, свя́те,/ да вси вопие́м ти:/ ра́дуйся, о́тче преподо́бне Варсоно́фие,/ гра́ду на́шему Каза́ни похвала́ и утвержде́ние.

Велича́ем вас,/ святи́телие вели́ции Гу́рие и Варсоно́фие,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Измла́да яви́лся еси́, Богому́дре кня́же Влади́мире,/ Боже́ственный сосу́д избра́н Бо́гови,/ благоче́стием воспи́тан, ве́ру непоро́чну соблю́л/ и храм пречу́ден Прему́дрости Бо́жия/ в Вели́ком Новегра́де сем устро́ив,/ те́ло твое́ в нем предложи́л еси́,/ и ны́не на Небесе́х предстоя́ престо́лу Святы́я Тро́ицы,/ моли́ся низпосла́ти и нам ве́лию и бога́тую ми́лость.

Многому́дренно пожи́в в княже́нии твое́м в Вели́ком Новегра́де,/ благове́рне кня́же Влади́мире,/ плод благи́й в жи́зни сей был еси́, присноцвету́щ доброде́тельми./ Того́ ра́ди получи́л еси́ жизнь ве́чную на Небесе́х,/ те́ло же твое́ нетле́нием просла́влено бысть на земли́,/ и ны́не пра́здник твой све́тло соверша́ющи,/ с любо́вию вопие́м ти:/ ра́дуйся, Вели́кому Новугра́ду и всей Росси́йстей земли́ утвержде́ние.

Велича́ем тя,/ святы́й благове́рный кня́же Влади́мире,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Егда́ изше́л еси́ от ми́ра,/ тогда́ мирска́я вся, я́ко тще́тна, отве́ргл еси́,/ егда́ же о́браз и́ноческий на ся прия́т,/ тогда́ вра́жия кова́рства по́двиги свои́ми и труды́, Аммо́не блаже́нне, попра́л еси́, вопия́:/ Христе́ Бо́же, сла́ва Тебе́.

Да своему́ Воево́де и Го́споду, преподо́бне Аммо́не, благоугоди́вши,/ всех отша́явся* мирских пристра́стий,/ стра́нствовал еси́ Его́ ра́ди вся дни живота́ своего́ многотру́дне,/ тем обре́т ве́чный поко́й,/ моли́ и нас в той всели́тися.

Ублажа́ем тя,/ преподо́бне о́тче Аммо́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Затвори́выйся в ме́сте те́мне, Богоблаже́нне Пио́ре,/ и отню́д све́та сего́ и вся́ких пре́лестей в нем су́щих зре́ти нехоте́вый,/ Све́та же днесь Невече́рняго сподо́блься,/ моли́ и нам Све́том те́мже озари́тися.

Весе́лия дне́сь Ла́вра Пече́рская исполня́ется,/ в па́мять благотво́рнаго затво́рника/ преподо́бнаго Пио́ра,/ вопию́ще ко Го́споду:/ ди́вен еси́ во святы́х Свои́х.

Ублажа́ем тя,/ преподо́бне о́тче Пио́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

На земли́ прему́дрости сла́ву стяжа́л еси́,/ бога́тство Го́сподеви своему́ вручи́л еси́,/ и Той тя с Небе́сными водворя́ет,/ те́ло твое́ на земли́, свя́те, сохрани́ невреди́мо,/ ты бо в целому́дрии и чистоте́/ житие́ пра́ведно пожи́л еси́,/ тем с дерзнове́нием* моли́ спасти́ся нам.

Вы́шняго жела́нием прославля́я,/ и Той тя в па́мяти прославля́ет, пра́ведне,/ восхожде́нием доброде́телей соверши́л еси́ ду́шу,/ прему́дре свя́те Стефа́не,/ на земли́ непоро́чно житие́ соверши́,/ Зижди́телю всех благоугоди́л еси́,/ моли́ непреста́нно о всех нас.

Велича́ем тя,/ святы́й пра́ведный кня́зю Стефа́не,/ и чти́м святу́ю па́мять твою́,/ ты бо мо́лиши за нас/ Христа́ Бо́га на́шего.

5/18 Мученицы Харитины (304). Святителей Петра (1326), Алексия (1378), Ионы (1461), Филиппа (1569) и Ермогена (1612), Московских и всея России чудотворцев. Преподобных Дамиана пресвитера, целебника (1071), Иеремии (ок. 1070) и Матфея (1085) прозорливых, Печерских, в Ближних пещерах почивающих.

Агница Твоя́, Иису́се... (общий мученице).

Кре́пким ра́зумом, Харити́но,/ ду́шу утве́рждши ве́рою,/ бори́теля врага́ я́ве посрами́ла еси́,/ у Христа́ предста́, всеблаже́нная,/ червлени́цу* от крове́й твои́х нося́щи,/ и при́сно со а́нгелы ра́дующися,/ моли́ за ны, страстоте́рпице.

Велича́ем тя,/ страстоте́рпице Христо́ва Харити́но,/ и чтим честно́е страда́ние твое́,/ е́же за Христа́/ претерпе́ла еси́.

Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, Правосла́вия наста́вницы*,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.

Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ проела́вистеся,/ я́ко ученицы́ Бо́жия благода́ти.

Велича́ем вас,/ святи́телие Христо́вы/ Пе́тре, Алекси́е, Ио́но, Фили́ппе и Ермоге́не,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Христо́вых повеле́ний све́том сердца́ своя́ просвети́вше,/ стра́стный мрак прогна́сте,/ те́мже Тро́ицы селе́ние бы́сте тричи́сленнии отцы́,/ Дамиа́не, Иереми́е с Матфе́ем,/ от Нея́же благода́ть прие́мше,/ неду́жныя исцеля́ете, бу́дущая возвеща́ете/ и, а́нгелом соприча́стницы су́ще,/ моли́теся Христу́ Бо́гу дарова́ти нам прича́стие святы́х.

Я́коже дре́вний проро́цы благода́ть проро́чествия прие́мше/ и нело́жне ду́хом прозре́вше, прореко́ша найти́ хотя́щая,/ та́ко и вы в жи́зни на́шей зла́я, грехо́в ра́ди на́ших на ны гряду́щая, предвозвести́сте;/ и ны́не да не пости́гнут ны зла́я,/ испроси́те от Христа́ Бо́га исправле́ние дело́м на́шим и ве́лию ми́лость.

Ублажа́ем вас,/ преподо́бнии отцы́ Дамиа́не и Иереми́е с Матфе́ем,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

6/19 Апостола Фомы (I). Иконы Божией Матери «О Всепетая Мати».

Учени́к Христо́в быв, Боже́ственнаго собо́ра апо́стольскаго соприча́стник,/ неве́рствием бо Христо́во Воскресе́ние извести́в,/ и Того́ пречи́стую страсть осяза́нием уве́рив, Фомо́ всехва́льне,/ и ны́не нам проси́ ми́ра и ве́лия ми́лости.

Прему́дрости благода́ти испо́лнен,/ Христо́в апо́стол и служи́тель и́стинный,/ в покая́нии вопия́ше Тебе́:/ Ты мой еси́ Бог же и Госпо́дь.

Велича́ем тя,/ апо́столе Христо́в Фомо́,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

7/20 Мучеников Сергия и Вакха (290–303). Преподобного Сергия Нуромского, Обнорского (Вологодского), чудотворца (1412), ученика преподобного Сергия Радонежского. Обретение мощей преподобного Мартиниана Белоезерского (1513). Икон Божией Матери Псково-Печерской, именуемой «Умиление» (1524), и «Красностокской» (1877).

Удобре́ние Христо́вых страстоте́рпец,/ и о́чи Христо́вы Це́ркве,/ о́чи просвети́те душ на́ших,/ Се́ргие многострада́льне, и Ва́кхе пресла́вне,/ моли́теся ко Го́споду,/ я́ко да убежи́м тьмы грехо́вныя,/ и све́та яви́мся о́бщницы невече́рняго,/ моли́твами ва́шими, святи́и.

Ра́зум на враги́ му́жески вооружи́вше,/ всю тех лесть разруши́сте/ и побе́ду свы́ше прии́мше, му́ченицы всехва́льнии,/ единомы́сленно вопию́ще:/ добро́ и красно́, е́же бы́ти с Бо́гом.

Велича́ем вас,/ страстоте́рпцы святи́и Се́ргие и Ва́кхе,/ и чтим честна́я страда́ния ва́ша,/ я́же за Христа́/ претерпе́ли есте́.

Жела́нием духо́вным разгара́яся, преблаже́нне,/ слез твои́х тече́нием ду́шу твою́ напои́л еси́,/ и я́же из глубины́ воздыха́ньми уязвля́я се́рдце твое́,/ бо́дренными моли́твами и всено́щным предстоя́нием Влады́це Христу́/ многодоброде́телен плод прине́сл еси́ сам себе́./ Сего́ ра́ди, я́ко Бо́жий уго́дник, свети́ло ми́ру показа́лся еси́,/ сия́я чудесы́, Се́ргие преподо́бне о́тче наш,/ те́плый моли́твенниче, Бо́га всегда́ моли́,/ да спасе́т ду́ши на́ша.

Я́ко звезда́ пресве́тлая, от Святы́я Горы́ провозше́дши,/ добро́ты чуде́с твои́х весь просвети́л мир,/ Христо́в бо крест взем, после́довал еси́ Ему́,/ в пусты́нном озлобле́нии, в моли́твах же и поще́ниих,/ во бде́ниих же и злострада́ниих изнури́в плоть свою́,/ тем и Христо́с да́ром чуде́с одари́ тя,/ Ему́же о нас моля́ся, посеща́й чад свои́х, да зове́м ти:/ ра́дуйся, Се́ргие о́тче наш, пусты́нный жи́телю.

Ублажа́ем тя,/ преподо́бне о́тче Се́ргие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности, о́тче, избра́н и возлю́блен был еси́ Го́сподом Бо́гом,/ И́же, прови́дя до́брое твое́ произволе́ние,/ научи́ тя прийти́ к преподо́бному уго́днику Своему́, Кири́ллу всеблаже́нному,/ от него́же наста́влен быв на путь спасе́ния,/ в стра́се Бо́жии и чистоте́ душе́вней,/ в благогове́нии же и непреста́нных к Бо́гу моли́твах/ житие́ твое́ непоро́чно преше́л еси́/ и ны́не, со дерзнове́нием предстоя́ на Небесе́х Престо́лу Христо́ву,/ о́тче Мартиниа́не всеблаже́нне,/ не преста́й моля́ Христа́ Бо́га спасти́ и поми́ловати ду́ши на́ша.

Бо́гу от ю́ности, о́тче, избра́вшу и возлюби́вшу тя/ и прови́дящу твое́ до́бре произволе́ние,/ наставля́ет тя прийти́ к преподо́бному Своему́ уго́днику – /Кири́ллу всеблаже́нному,/ от него́же наста́влен бысть на путь спасе́ния,/ стра́хом Бо́жиим, и чистото́ю душе́вною, и благогове́нием,/ и непреста́нными к Бо́гу моли́твами/ во мно́зе по́двизе жизнь свою́ препроводи́л еси́/ и за́поведи Бо́жия непоро́чно соблю́л еси́,/ па́стырь и наста́вник и́ноком преди́вен был еси́,/ и ны́не престо́лу Христо́ву со дерзнове́нием предстои́ши на Небесе́х,/ со а́нгелы светлоликоству́я,/ о́тче преподо́бне Мартиниа́не всеблаже́нне,/ не преста́й моля́ся Христу́ Бо́гу/ спасти́ и поми́ловати ду́ши на́ша.

Благоизво́лив, преподо́бне,/ от ю́наго во́зраста рабо́тати Го́сподеви день и нощь,/ в стра́се Бо́жии и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же, злострада́ниих те́ло твое́ изнури́в,/ вся доброде́тели духо́вныя испра́вил еси́/ и о́браз хотя́щим по тебе́ спасти́ся яви́лся еси́./ Те́мже ны́не, при́сно зря на Небесе́х Пресвяту́ю Тро́ицу,/ моли́ся, всеблаже́нне, дарова́ти душа́м на́шим спасе́ние/ и житию́ на́шему исправле́ние,/ да вси ве́рою вопие́м ти:/ ра́дуйся, преподо́бне Мартиниа́не, о́тче наш.

От ю́наго во́зраста Боже́ственным жела́нием разже́гся,/ честно́му учи́телю вдан был еси́/ и в воздержа́нии мно́зе, о́тче, пребы́л еси́,/ ревну́я благо́му наказа́нию,/ плод многодоброде́телен Бо́гу прине́сл еси́,/ тем мо́лим тя, о́тче Мартиниа́не,/ моли́ Христа́ Бо́га спасти́ся душа́м на́шим.

Ублажа́ем тя,/ преподо́бне о́тче Мартиниа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь све́тло красу́ется оби́тель сия́,/ я́ко зарю́ со́лнечную восприе́мши, Влады́чице,/ чудотво́рную Твою́ ико́ну,/ к не́йже мы ны́не притека́юще и моля́щеся Тебе́, взыва́ем си́це:/ о пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит оби́тель сию́/ и вся гра́ды и страны́ христиа́нския невреди́мы от всех наве́т вра́жиих,/ и спасе́т ду́ши на́ша, я́ко Милосе́рд.

Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим чудотво́рный о́браз Твой,/ и́мже спасла́ еси́/ нас от руки́ вра́жия.

8/21 Преподобной Пелагии (457). Преподобного Трифона, архимандрита Вятского (1612). Преподобного Досифея Верхнеостровского, Псковского (1482).

В тебе́, ма́ти, изве́стно спасе́ся, е́же по о́бразу... (общий преподобной жене).

Те́ло твое́ поста́ми изнури́вши,/ бде́нными моли́твами Творца́ умоли́ла еси́ о дея́ниих твои́х,/ я́ко да прии́меши соверше́нное оставле́ние,/ е́же и обрела́ еси́, ма́ти, я́ве,/ пу́ть покая́ния показа́вши.

Ублажа́ем тя,/ преподо́бная ма́ти Пелаги́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От земны́х на Небе́сная помы́слив,/ и́ноческое житие́ измла́да, преподо́бие, возлюби́в,/ и де́лом соверши́в ко Го́споду любо́вь,/ и тве́рдым умо́м Его́ Духнове́нным уче́нием озаря́я мир,/ и, возлюби́в, блаже́нне, все́нощное бде́ние/ и моли́тву непреста́нну и наставле́ния Боже́ственнаго Ра́зума,/ и́нок ста́до собра́, му́дре,/ и наста́вил еси́ ко све́ту Богоразу́мия, Три́фоне о́тче наш,/ Христа́ Бо́га моли́ дарова́ти душа́м на́шим ве́лию ми́лость.

Я́ко светоза́рная звезда́/ возсия́л еси́ от восто́ка до за́пада,/ оста́вль бо свое́ оте́чество,/ доше́л еси́ Вя́тския страны́ и Богоспаса́емаго гра́да Хлы́нова,/ в не́мже оби́тель во сла́ву Пресвяты́я Богоро́дицы созда́в,/ и та́мо на доброде́тель впери́вся,/ собра́л еси́ и́ночествующих мно́жество,/ и, сих наставля́я на путь спасе́ния,/ был еси́ а́нгелом собесе́дник/ и по́стником соприча́стник, Три́фоне преподо́бие,/ с ни́ми Христа́ Бо́га моли́ спасти́ся душа́м на́шим.

Днесь в нача́ле основа́ния доброде́телем, блаже́нне,/ положи́л еси́ в души́ свое́й страх Бо́жий,/ от ю́ности взем крест свой,/ благоче́стно Христо́ви после́довал еси́,/ а́нгельским о́бразом облече́ся и бысть мона́х преди́вен,/ в доброде́телех цветя́ше, к бу́дущим Бо́гови простира́лся./ И свое́й пло́ти, я́ко врагу́, неми́лостив, о́тче, был еси́,/ терпе́нием яви́ся, блаже́нне, я́ко зла́то искуше́но в горни́ле,/ но и ны́не не забу́ди посеща́ти чад свои́х,/ помина́й нас, чту́щих пресвяту́ю па́мять твою́,/ да вси благода́рне вопие́м ти:/ ра́дуйся, прему́дре Три́фоне, наста́вниче мона́хов.

Волне́ний мно́жество невла́жно преходя́,/ безпло́тныя враги́ струя́ми слез твои́х кре́пко погрузи́л еси́,/ Богому́дре Три́фоне,/ и чуде́с дар прие́м,/ моли́ непреста́нно о всех нас.

Ублажа́ем тя,/ преподо́бие о́тче Три́фоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Я́ко свети́льник всесве́тел яви́лся еси́/ во о́строве Пско́вскаго е́зера,/ преподо́бие о́тче наш Досифе́е./ Ты бо крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Те́мже и мы, притека́юще ко святе́й ико́не твое́й, уми́льно глаго́лем:/ о́тче преподо́бие, моли́ Христа́ Бо́га/ спасти́ся душа́м на́шим.

Чистото́ю душе́вною Боже́ственно вооружи́вся/ и непреста́нныя моли́твы, я́ко копие́, вручи́в,/ кре́пко пробо́л еси́ бесо́вская ополче́ния,/ Досифе́е о́тче наш,/ моли́ непреста́нно о всех нас.

Ублажа́ем тя,/ преподо́бие о́тче Досифе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

9/22 Апостола Иакова Алфеева (I). Преподобных Андроника и жены его Афанасии (V). Святого Стефана Нового, Бранковича, Сербского (1427). Корсунской иконы Божией Матери (988; XII).

Апо́столе святы́й Иа́кове,/ моли́ Ми́лостиваго Бо́га,/да прегреше́ний оставле́ние/ пода́ст душа́м на́шим.

Тве́рдо му́дрости догма́ты в ду́шы благочести́вых вложи́вшаго,/ похвала́ми да ублажи́м, я́ко Боговеща́теля, вси Иа́кова,/ престо́лу бо сла́вы Влады́чню предстоя́,/ и со все́ми а́нгелы ра́дуется,/ моля́ непреста́нно о всех нас.

Велича́ем тя,/ апо́столе Христо́в Иа́кове,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Пусты́нный жи́тель и в телеси́ а́нгел... (общий преподобному).

Благоро́дия нра́вом тя че́стно похва́лим, Андрони́че,/ и́же Госпо́дь в лик преподо́бным отце́м сочета́,/ я́ко вои́стину благоро́дия Боже́ственныя сла́вы вене́ц улучи́.

Ублажа́ем тя,/ преподо́бне о́тче Андрони́че,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Процвете́ нам весна́ благода́ти,/ Стефа́на Но́ваго па́мять,/ пра́здновати того́ Просла́влыпаго/ призыва́ет бо всех праздниколю́бцев,/ возсыла́ти благодаре́ние Бо́гови,/ сохрани́вшу те́ло его́/ во гро́бе це́ло и неруши́мо и чудесы́ удивля́емо,/ мо́лится бо о лю́дех свои́х я́ко отечестволю́бец/ и о творя́щих па́мять его́.

Прииди́те, Стефа́на восхва́лим вси́/ и Боже́ственными пе́сньми просла́вим,/ не дале́че бо от апо́стол,/ и к му́чеником прибли́жися,/ и преподо́бных, и пра́ведных блаже́нство насле́дова,/ и воня́ми* моще́й его́ нас облагоуха́ет,/ и мо́лится Го́сподеви о душа́х на́ших.

Велича́ем тя,/ святы́й пра́ведный Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

10/23 Мучеников Евлампия и Евлампии (303–311). Преподобного Амвросия Оптинского (1891). Святителя Амфилохия, епископа Владимиро-Волынского (1122). Блаженного Андрея, Христа ради юродивого, Тотемского (1673). Святых 26 Зографских преподобномучеников (1284). Собор Волынских святых. Иконы Божией Матери «Зографской Акафистной» (ок. 1284).

Му́ченицы Твои́, Го́споди,/ во страда́ниих свои́х... (общий мученикам).

До́блия му́ченики и бра́тию по пло́ти,/ му́драго Евла́мпия и Евлампи́ю почти́м,/ ти́и бо пребеззако́нных козноде́йства посрами́ша си́лою Распе́ншагося;/ сего́ ра́ди яви́шася му́чеников сла́ва, ку́пно и похвала́.

Велича́ем вас,/ страстоте́рпцы святи́и Евла́мпие и Евлампи́е,/ и чтим честна́я страда́ния ва́ша,/ я́же за Христа́/ претерпе́ли есте́.

Я́ко к целе́бному исто́чнику,/ притека́ем к тебе́, Амвро́сие о́тче наш,/ ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в теле́сных и душе́вных ско́рбех утеша́еши,/ па́че же смире́нию, терпе́нию и любви́ науча́еши,/ моли́ Человеколю́бца Христа́/ и Засту́пницу усе́рдную/ спасти́ся душа́м на́шим.

Заве́т Пастыренача́льника испо́лнив,/ ста́рчества благода́ть насле́довал еси́,/ боле́знуя се́рдцем о всех, с ве́рою притека́ющих к тебе́;/ те́мже и мы, ча́да твоя́, с любо́вию вопие́м ти:/ о́тче святы́й Амвро́сие,/ моли́ Христа́ Бо́га спасти́ся душа́м на́шим.

Ублажа́ем тя,/ преподо́бне о́тче Амвро́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От мирска́го мяте́жа изше́д,/ в пеще́рах Ки́евских Феодо́сия блаже́ннаго Богому́дренно всели́лся еси́,/ святи́телю Христо́в о́тче Амфило́хие,/ и отсю́ду во епи́скопа Богоспаса́емей па́стве Влади́миро-Волы́нстей поста́вленный,/ в труде́х, бде́ниих и поще́ниих свя́то подвиза́лся еси́./ И та́ко дости́г доброде́телей соверше́нства,/ па́ки в пеще́ры святы́я возврати́лся еси́,/ иде́же и дух свой благоче́стно преда́л еси́ Го́сподеви, всече́стне,/ к ли́ку преподо́бных Пече́рских пречте́н,/ с ни́миже моли́ся Христу́, всече́стне,/ спасти́ся душа́м на́шим.

Звезду́ Волы́нскую, из пеще́рнаго мра́ка от Ки́ева возсия́вшую,/ и от Волы́ни второ́е пеще́ры заве́тныя житие́м свои́м/ и блаже́нною кончи́ною, и прославле́нием свои́м озари́вшаго,/ всеблаже́ннаго Амфило́хия, архипа́стыря Влади́миро-Волы́нскаго почти́м,/ прося́ще его́, да в ли́ке преподо́бных Пече́рских водворя́лся,/ мо́лится ку́пно о душа́х на́ших.

Велича́ем тя,/ святи́телю о́тче Амфило́хие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Терпе́нием и му́жеством Христа́ ра́ди юро́дство восприя́л еси́, блаже́нне Андре́е,/ в посте́ и бде́нии пребыва́я,/ тя́гость зно́я ле́тняго поне́сл еси́,/ и мра́зы зи́мния терпя́,/ те́мже и ны́не, приходя́щим с ве́рою к тебе́,/ исцеле́ние неоску́дно подае́ши,/ моли́ Христа́ Бо́га спасти́ся душа́м на́шим.

Вы́шния красоты́ жела́я,/ и ни́жния сла́сти теле́сныя то́щно* оста́вил еси́ нестяжа́нием су́етнаго ми́ра,/ а́нгельское житие́ преходя́, сконча́вся, Андре́е блаже́нне,/ с ни́миже Христа́ Бо́га моли́ непреста́нно о всех нас.

Ублажа́ем тя,/ святы́й пра́ведный Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тревелича́йшия свети́льники,/ всех преподобному́ченик Богоизбра́нный полк,/ два́десять и шесть Боже́ственныя оби́тели Зогра́фския оте́ц, почти́м,/ пре́лесть лати́нскую обличи́вшия/ и наси́льственно во огни́ сконча́вшияся;/ Фому́ пастыренача́льника, свяще́ннаго Варсоно́фия,/достосла́внаго Парфе́ния и про́чия, подвиза́вшияся,/ соше́дшеся, пе́сньми почти́м,/ сии́ бо Тро́ицу Святу́ю при́сно о нас умоля́ют.

И́же оби́тели на́шея засту́пницы и храни́телие,/ преподо́бнии отцы́, да похва́лятся,/ ле́сть латиня́н отве́ргшия/ и, огне́м сожже́нныя, сконча́вшияся и венча́вшияся,/ и́хже досто́йно воспои́м, зову́ще:/ ра́дуйтеся, преподо́бнии му́ченицы.

Ублажа́ем вас,/ святи́и преподобному́ченицы дваде́сять и ше́сть,/ во свяще́нной оби́тели Зогра́фския наси́льственно во огни́ сконча́вшияся,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Приспе́ день све́тлаго торжества́,/ лю́дии Волы́нстии ра́дуются,/ и с ни́ми вся Росси́йская Це́рковь ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ святы́х и Богому́жных уго́дников и чудотво́рцев Волы́нских:/ святи́теля Стефа́на чу́днаго,/ иера́рхом Волы́нским первопресто́льника,/ и свята́го благове́рнаго Яропо́лка,/ блаже́ннаго страда́льца Богому́жнаго,/ и с ни́ми Амфило́хия, святи́теля Волы́нскаго,/ и победоно́снаго Фео́дора, Остро́жскаго кня́зя Богодарова́ннаго,/ и преподо́бнаго И́ова, Поча́евскаго присноблаже́ннаго,/ и́хже моли́твами, Го́споди,/ зе́млю оте́ческую на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пресвяту́ю Ма́терь Свою́ Богоро́дицу,/ благода́тне сия́ющую в цельбоно́сней стопе́ Свое́й/ и чудотво́рней ико́не на горе́ Поча́евстей/ и заступле́ньми про́чих уго́дников Волы́нския па́ствы,/ Иулиани́и, блаже́нныя де́вы Ольша́нския,/ и свята́го преподобному́ченика Мака́рия, архимандри́та Овру́чскаго.

Приспе́ день све́тлаго торжества́, оби́тель Пече́рская ра́дуется,/ и с не́ю благослове́нная Поча́евская Ла́вра ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять преподо́бных и Богоно́сных оте́ц Пече́рских,/ от ни́хже во́лею Бо́жиею изы́доша/ первонача́льницы и́ноческаго жития́ на горе́ Поча́евстей,/ и́хже моли́твами, Го́споди,/ зе́млю оте́чественную на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пречи́стую Ма́терь Свою́ Богоро́дицу,/ от лет дре́вних благода́тне сия́ющую в цельбоно́сней стопе́ Свое́й/ и чудотво́рней Свое́й ико́не во оби́тели Поча́евстей/ в просвеще́ние и спасе́ние душ на́ших.

Избра́нным чудотво́рцам и изря́дным уго́дником Волы́нския земли́/ похва́льная воспису́ем вам, святи́и:/ Яропо́лче святы́й, Стефа́не, Амфило́хие, Фео́доре,/ Иулиани́е, И́ове и Мака́рие, присноблаже́ннии!/ Тем, я́ко иму́щий благода́ть и ми́лость у Христа́ Бо́га на́шего,/ от вся́ких нас бед свободи́те,/ да вы́ну ва́шею по́мощию избавля́емии, вопие́м вам благода́рне:/ ра́дуйтеся, пресла́внии уго́дницы Бо́жии и земли́ Волы́нския украше́ние.

Избра́ннии от родо́в уго́дницы Бо́жии,/ преподо́бнии Пече́рстии:/ Мерку́рие и Симео́не, Акинди́не же, Лукиа́не, Па́мво и Полика́рпе,/ Авраа́мие, Алекси́е, Евста́фие, Елла́дие, Ефре́ме, Иерони́ме,/Луко́, Мела́дие, Они́симе, Пе́рсие, Па́вле, Се́ргие,/ Сисо́е и Фео́филе, Анато́лие же, Афана́сие, Исидо́ре, Кассиа́не,/ Лавре́нтие, Пафну́тие, Пио́ре, Сисо́е вторы́й и Софро́ние,/ от ни́хже изыдо́ша первонача́льницы/ и́ноческаго жития́ на горе́ Поча́евстей,/ вас не потаи́ла есть земля́,/ Не́бо же и ра́йския селе́ния отверзо́шася вам./ Те́мже мы похва́льная пе́сни Бо́гу, просла́влыиему вас в па́мяти ва́шей, принося́ще,/ и честны́й Собо́р ваш вселюбе́зно почита́юще,/ из глубины́ душе́вныя вопие́м вам:/ от всех бед ва́шими моли́твами заступа́йте нас, зову́щих:/ ра́дуйтеся, Пече́рстии чудотво́рцы/ и оби́тели Поча́евския сла́ва и утвержде́ние.

Велича́ем вас,/ вси святи́и в земли́ Волы́нстей, просия́вший/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

11/24 Апостола Филиппа, единого от семи диаконов (I). Преподобного Феофана исповедника, творца канонов, епископа Никейского (ок. 850). Собор преподобных отцев и старцев, в Оптиной Пустыни просиявших. Память святых отцев Седьмого Вселенского Собора18. Иконы Божией Матери «Вододательница».

Апо́столе святы́й Фили́ппе,/ моли́ Ми́лостиваго Бо́га, да прегреше́ний оставле́ние/ пода́ст душа́м на́шим.

Язы́ков лове́ц пречу́дный, и ученико́в Христо́вых собесе́дник,/ апо́столов предизбра́нный,/ Фили́пп днесь ми́ру исцеле́ний подае́т бога́тство,/ покрыва́ет от обстоя́ний того́ хва́лящия./ Тем согла́сно зове́м ему́:/ спаса́й вся моли́твами твои́ми, апо́столе.

Велича́ем тя,/ апо́столе Христо́в Фили́ппе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче, архиере́ев Богодухнове́нное удобре́ние,/ Феофа́не прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

Возгреме́в Христо́во Боже́ственное воплоще́ние,/ безпло́тныя враги́ до конца́ обличи́л еси́,/ чу́дне Феофа́не;/ сего́ ра́ди вси ве́рно и благоче́стно вопие́м ти:/ моли́ непреста́нно о всех нас.

Ублажа́ем тя,/ преподо́бне о́тче Феофа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Правосла́вныя ве́ры свети́льницы,/ мона́шества непоколеби́мии столпи́,/ земли́ Росси́йския уте́шителие,/ преподо́бнии ста́рцы О́птинстии,/ любо́вь Христо́ву стяжа́вшии/ и ду́ши своя́ за ча́да полага́вшии,/ моли́теся ко Го́споду,/ да утверди́т земно́е оте́чество на́ше/ в Правосла́вии и благоче́стии/ и спасе́т ду́ши на́ша.

Вои́стину ди́вен Бог во святы́х Свои́х,/ Пу́стынь Оптину, я́коже вертогра́д ста́рчества, яви́вый,/ иде́же богопросвеще́ннии отцы́,/ та́йная се́рдца челове́ческаго ве́дуще,/ наро́да Бо́жия печа́льницы до́блии яви́шася;/ сии́ бо на пу́ть покая́ния/ грехо́м отягоще́нныя наста́виша,/ в ве́ре коле́блющияся/ све́том Христо́ва уче́ния просвети́ша/ и Бо́жией прему́дрости научи́ша,/ стра́ждущим и немощны́м спострада́ша/ и исцеле́ния дарова́ша,/ ны́не же во сла́ве Бо́жией пребыва́юще,/ мо́лятся непреста́нно о душа́х на́ших.

Ублажа́ем вас,/ преподо́бнии отцы́ и ста́рцы в О́птиной Пу́стыни просия́вший,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.

И́же из Отца́ возсия́в Сын неизрече́нно,/ из Жены́ роди́ся сугу́б естество́м,/ Его́же ви́дяще, не отмета́емся зра́ка изображе́ния,/ но сие́ благоче́стно начерта́юще,/ почита́ем ве́рно;/ и сего́ ра́ди и́стинную ве́ру Це́рковь держа́щи,/ лобыза́ет ико́ну вочелове́чения Христо́ва.

12/25 Мучеников Прова, Тараха и Андроника (304). Преподобного Космы, епископа Маиумского, творца канонов (ок. 787). Преподобного Симеона, Нового Богослова (1021) (память переносится с 12 марта). Преподобных Дионисия (1437) и Амфилохия (1452) Глушицких, чудотворцев. Священномученика Иувеналия (Масловского), архиепископа Рязанского и Шацкого (1937). Перенесение из Мальты в Гатчину части Древа Животворящего Креста Господня, Филермской иконы Божией Матери и десной руки Иоанна Крестителя (1799). Иерусалимской (48), Ярославской-Смоленской (1642), Ерманской (732), Мохнатинской (1691), Рудненской (1687) и Калужской (1812) икон Божией Матери.

Святы́х му́ченик исправле́нием/ Небе́сныя Си́лы преудиви́шася,/ я́ко в те́ле сме́ртнем,/ безтеле́снаго врага́ си́лою Креста́,/ подвиза́вшеся до́бре, победи́ша неви́димо,/ и мо́лятся Го́споду,/ поми́ловатися душа́м на́шим.

Тро́ицы нам сла́ву яви́ша,/ до́блии Христо́вы ору́жницы и му́ченицы,/ с Тара́хом Пров же и Андрони́к,/ обличи́ша бо все мучи́телей безбо́жие, ве́рою до́блественне страда́льчествовавше.

Велича́ем вас,/ страстоте́рпцы святи́и Тара́хо, Про́ве и Андрони́че,/ и чтим честна́я страда́ния ва́ша,/ я́же за Христа́/ претерпе́ли есте́.

Боже́ственное озаре́ние, Симео́не о́тче,/ восприя́в в души́ твое́й,/ свети́ло в ми́ре показа́лся еси́ светле́йшее,/ разгоня́я того́ мракобе́сие/ и всех уверя́я иска́ти, ю́же погуби́ша, благода́ть Ду́ха,/ Его́же приле́жно моли́/ дарова́ти нам ве́лию ми́лость.

Вне́шния му́дрости пребыва́я неприча́стен,/ Боже́ственныя же преиспо́лнен был еси́ последи́/ и Но́вый Богосло́в вои́стинну все́ми позна́ся, Симео́не./ Сего́ ра́ди твою́ па́мять, о́тче му́дре, почита́юще, тебе́ вопие́м:/ сла́ва тя просла́вльшему Христу́,/ сла́ва тя ди́вна Показа́вшему,/ сла́ва Де́йствующему тобо́ю всем исцеле́ния.

Я́ко Све́та Трисо́лнечнаго зри́тель/ и таи́нственнаго Богосло́вия сказа́тель,/ освяще́нне Симео́не, о́тче наш,/ испроси́ душа́м на́шим просвеще́ния свы́ше/ и страсте́й отгони́ от нас мглу́,/ я́ко бо, служи́тель ве́лий Христо́в,/ всем подае́ши поле́зная, преподо́бне.

Све́том просвеще́н Трисо́лнечным, Богому́дре,/ Богосло́в яви́лся еси́ Пребоже́ственныя Тро́ицы./ Свы́ше прему́дростию слове́с обогати́вся,/ источи́л еси́ Богому́дрия Боже́ственныя струи́,/ от ни́хже пию́ще, вопие́м:/ ра́дуйся, треблаже́нне Симео́не Богонауче́нне.

Я́ко Богосло́в Бо́жий Боже́ственнейший/ и моли́твенник наш ве́лий ко Го́споду,/ при́сно, Симео́не, моли́ дарова́ти нам грехо́в проще́ние/ и живота́ исправле́ние, преподо́бие.

Ублажа́ем тя,/ преподо́бие о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Космо́ прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Укра́шен доброде́тельми, Космо́ Богодухнове́нне,/ Це́ркве Христо́вы украше́ние был еси́:/ пе́сньми бо украси́л еси́ сию́, блаже́нне,/ но моли́ся ко Го́споду изба́витися нам от вся́ких ко́зней ра́тника*,/ тебе́ зову́щим:/ ра́дуйся, о́тче пребога́те.

Ублажа́ем тя,/ преподо́бие о́тче Космо́,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Свети́льницы све́тлии, я́вльшеся/ добро́ту земну́ю му́дренно оста́вльше/ и идо́ша во вну́треннюю пусты́ню, ку́пно с Диони́сием Амфило́хие,/ смире́ние и всю доброде́тель извыко́ша и обрето́ша безсме́ртие,/ посто́м и бде́нием, и про́чим воздержа́нием себе́ принося́ Христу́,/ и ны́не на Небесе́х Престо́лу Христо́ву предстоя́,/ моли́теся, отцы́ Богому́дрии Диони́сие и Амфило́хие,/ умири́ти мир и спасти́ся душа́м пою́щих вас,/ согреше́нием оставле́ние дарова́ти,/ чту́щим всечестну́ю па́мять ва́шу.

Я́ко свети́ла незаходи́мая мы́сленнаго Со́лнца, просвети́сте вселе́нную,/ ве́рным ду́ши и телеса́ луча́ми чуде́с ва́ших озаря́юще,/ незави́стно* подава́ете от неду́г исцеле́ние,/ те́мже, соше́дшеся ве́рою, вас в пе́снех восхва́лим,/ я́ко на́ши прему́дрыя наста́вники и к Бо́гу хода́таи,/ и непреста́нно вопие́м:/ ра́дуйтеся, отцы́ Богому́дрии Диони́сие и Амфило́хие.

Ублажа́ем вас,/ преподо́бнии отцы́ Диони́сие и Амфило́хие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Люби́миче па́ствы ряза́нския,/ ю́же от нече́стия и безве́рия огражда́я,/ пострада́л еси́ да́же до кро́ве,/ священному́чениче Иувена́лие,/ моли́ся о нас Влады́це Христу́;/да сохрани́т держа́ву Россе́йскую в ми́ре и благоде́нствии/ и спасе́т ду́ши на́ша.

Роди́лся еси́ во гра́де Ли́вны,/ обуче́ние восприя́л еси́ во гра́де Каза́ни,/ епи́скопствовал еси́ в Ка́шине, Ту́ле и Ряза́ни,/ сконча́лся еси́ му́ченически в То́мске./ Ны́не жи́тельствуеши во гра́де Небе́снем./ Моли́ся за ны, святи́телю Иувена́лие,/ да спасе́т Госпо́дь ду́ши на́ша.

Велича́ем тя,/ священному́чениче Иувена́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струях крести́ти сподо́бился еси́ Пропове́даннаго./ Те́мже, за и́стину пострада́в, ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра/ и подаю́щаго нам ве́лию ми́лость.

От за́пада возсия́вши Предте́чева рука́,/ лучи́ испуща́ет нетле́ния ве́рным исцеле́ний,/ свы́ше собира́ет мно́жество а́нгел,/ до́ле же созыва́ет челове́ческий род,/ единогла́сно возсыла́ти сла́ву Христу́ Бо́гу.

У́мнаго Со́лнца свети́льник Боже́ственный Предте́ча,/ показа́вый в конце́х светоно́сную свою́ десни́цу,/ ны́не на се́вере озаря́ет е́ю блаже́нное Оте́чество на́ше,/ просвеща́я и освяща́я ве́рно покланя́ющихся, и Христу́ вопию́щих:/ спаси́ нас моли́твами проро́ка Твоего́, Царю́ Вы́шний.

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ руки́ пренесе́ние.

Святы́й вели́кий Иоа́нне Предте́че Госпо́день,/ моли́ Бо́га о нас.

Богора́дованная Влады́чице,/ препросла́вленная Ма́ти щедро́т и человеколю́бия,/ всеми́лостивая о всем ми́ре Хода́таице!/ Приле́жно раби́ Твои́ ко Твоему́ предста́тельству прибега́ем/ и, ко пречу́дному о́бразу Твоему́ со умиле́нием припа́дающе, мо́лимся:/ моли́тву те́плую Сы́ну Твоему́ и Бо́гу на́шему сотвори́,/ о Всепе́тая Цари́це Богоро́дице,/ да от вся́ких боле́зней и печа́лей нас Тебе́ ра́ди изба́вит,/ и от грехо́в вся́ких свободи́в,/ Ца́рствия Своего́ Небе́снаго насле́дники ны пока́жет;/ ве́лие бо и неизрече́нное я́ко Ма́ти к Нему́ дерзнове́ние и́маши/ и вся от Него́ испроси́ти мо́жеши,/ Еди́на во ве́ки Преблагослове́нная.

Твоего́ предста́тельства увере́ние/ и милосе́рдия Твоего́ явле́ние/ ико́на Иерусали́мская нам, Влады́чице, показа́ся,/ пред не́ю же ду́ши на́ша в моли́тве излива́ем/ и ве́рою Тебе́ вопие́м:/ воззри́, Милосе́рдая, на лю́ди Твоя́,/ вся ско́рби на́ша и печа́ли утоли́,/ утеше́ние благо́е в сердца́ на́ша низпосли́/ и спасе́ние ве́чное душа́м на́шим, Пречи́стая, испроси́.

Не отри́ни, о Милосе́рдая Ма́ти,/ слез и воздыха́ний на́ших,/ но проше́ния на́ша ми́лостивно прии́мши,/ пред Иерусали́мскою ико́ною Твое́ю/ моля́щихся люде́й ве́ру укрепи́,/ умиле́нием сердца́ их испо́лни,/ и крест земна́го жития́ нести́ им помози́,/ ели́ка бо хо́щеши мо́жеши.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Засту́пнице от враг иноплеме́нных, Необори́мая Калу́жския земли́,/ и Изба́вительнице от смертоно́сныя я́звы Ми́лостивая!/ Изба́ви рабы́ Твоя́ от вся́ких бед и боле́зней,/ с ве́рою и любо́вию прибега́ющия к чудотво́рней ико́не Твое́й,/ и спаси́ ду́ши на́ша.

Не и́мамы пе́сней, ниже́ слове́с,/ ка́ко досто́йно восхваля́ти Тя, Ма́ти Христа́ Бо́га на́шего,/ явле́ния ра́ди чудотво́рныя ико́ны Твоея́ земли́ Калу́жстей,/ то́кмо мо́жем вопи́ти Тебе́: не отврати́ ми́лости Твоея́ от нас,/ и ниспосли́ ю всем притека́ющим к цельбоно́сней ико́не Твое́й.

Велича́ем Тя,/ Богоро́дице Де́во,/ и почита́ем чудотво́рную ико́ну Твою́,/ е́юже благоволи́ла еси́ спасти́ зе́млю Калу́жскую/ от наше́ствий вра́жиих и всегуби́тельных боле́зней.

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи:/ Тя бо и еди́ну наде́жду и́мамы.

Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто же бы сохрани́л до ны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́еши при́сно от вся́ких лю́тых.

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́, да не постыди́мся.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

13/26 Иверской иконы Божией Матери (принесение в Москву в 1648 году). Мучеников Карпа, епископа Фиатирского, Папилы диакона, Агафодора и мученицы Агафоники (ок. 251). Преподобного Вениамина Печерского, в Дальних пещерах почивающего (XIV). Обретение мощей святителя Гавриила, архиепископа Рязанского и Зарайского (1999). Седмиезерной иконы Божией Матери (XVII).

От святы́я ико́ны Твоея́,/ о Влады́чице Богоро́дице,/ исцеле́ния и цельбы́ подаю́тся оби́льно,/ с ве́рою и любо́вию приходя́щим к ней,/ та́ко и мою́ не́мощь посети́,/ и ду́шу мою́ поми́луй, Блага́я,/ и те́ло исцели́ благода́тию Твое́ю, Пречи́стая.

Де́рзость ненави́дящих о́браз Госпо́день,/ и держа́ва нечести́вых безбо́жно в Нике́ю прии́де,/ и по́сланнии безчелове́чно вдови́цу,/ благоче́стно чту́щую ико́ну Богома́тере, истязу́ют./ Но та́я но́щию с сы́ном ико́ну в мо́ре пусти́, вопию́щи:/ сла́ва Тебе́, Чи́стая,/ я́ко непроходи́мое мо́ре плещи́ Своя́ подаде́,/ сла́ва правоше́ствию Твоему́, Еди́на Нетле́нная.

А́ще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию́ от враго́в,/ но яви́лася есть Храни́тельница Афо́на/ и Врата́рница оби́тели и́верския, враги́ устраша́ющая/ и в Правосла́вней Росси́йстей стране́/ чту́щия Тя от всех бед и напа́стей избавля́ющая.

Совозси́я днесь Све́ту Воскресе́ния свет чи́стыя ико́ны Твоея́,/ обоя́ ве́село торжеству́юще вопие́м:/ сохрани́ раб Твои́х благода́тию, Влады́чице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Му́ченицы Твои́, Го́споди... (общий мученикам).

Я́ко сокро́вище многоце́нное Влады́ка/ и исто́чник, источа́ющ то́ки исцеле́ний,/ су́щим на земли́ подаде́ мо́щи ва́ша,/ неду́ги у́бо отъе́млющия страсте́й разли́чныя,/ благода́ть же даю́щия душа́м непреста́нно./ Те́мже согла́сно любо́вию/ ва́ше, му́ченицы Боже́ственнии, соверша́ем торжество́.

Венчено́сцы я́вльшеся днесь в ми́ре,/ прему́дрии с Ка́рпом Папи́ле,/ просвеща́ете всех,/ и́же ве́рою и весе́лием чту́щих па́мять ва́шу.

Велича́ем вас,/ страстоте́рпцы святи́и Ка́рпо, Папи́ло, Агафодо́ре и Агафони́ко,/ и чтим честна́я страда́ния ва́ша,/ я́же за Христа́/ претерпе́ли есте́.

Добр купе́ц бысть, Богому́дре Вениами́не,/ бога́тство бо свое́ тле́нно разда́в,/ купи́л еси́ о́ным нетле́нное в Ца́рствии Небе́снем,/ в не́мже ны́не та́мошних благ наслажда́лся бога́тне,/ проси́ нам ми́ра и ве́лия ми́лости.

Ку́плю жите́йскую, я́ко тще́тную, оста́вль/ и шед, купи́л еси́ себе́ многоце́нный би́сер, Христа́,/ Ему́же во и́ночестем о́бразе/ труды́ и по́двиги, безме́нством* же и послуша́нием, преподо́бие Вениами́не, благоугожда́я,/ прия́л от Него́ ве́лию и бога́тую ми́лость.

Ублажа́ем тя,/ преподо́бие о́тче Вениами́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ве́рою и пра́вдою Бо́гу служа́,/ сниска́л еси́ любо́вь па́ствы ряза́нския,/ Гаврии́ле святи́телю,/ до́брый па́стырю слове́сных ове́ц./ В годи́ну испыта́ний а́лчущих пита́л еси́,/ ико́ну Богома́тери Зна́мения, имену́емую Корче́мною,/ я́ко исто́чник неоску́дный утеше́ния па́стве свое́й указа́л еси́./ И ны́не моли́ся о нас приле́жно,/ чту́щих святу́ю па́мять твою́.

Христа́ из мла́да возлюби́л еси́/ и Тому́ любо́вию после́довал еси́,/ му́дростию святи́теля Филаре́та ду́шу свою́ пита́я,/ са́на святи́тельскаго удосто́ен был еси́,/ па́ству ряза́нскую, от Бо́га ти да́нную,/ усе́рдно окормля́л еси́,/ Гаврии́ле святи́телю,/ не преста́й моля́ся о ча́дех твои́х,/ да вси честну́ю па́мять твою́/ ра́достно почита́ем.

Велича́ем тя,/ святи́телю о́тче Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

14/27 Мучеников Назария, Гервасия, Протасия и Келсия (54–68). Преподобной Параскевы Сербской (XI). Преподобного Николы Святоши, князя Черниговского, Печерского чудотворца, в Ближних пещерах почивающего (1143). Преподобного Космы, Яхромского чудотворца (1492). Яхромской иконы Божией Матери (XV).

Му́ченицы Твои́, Го́споди... (общий мученикам).

Свети́льницы све́тлии я́вльшеся,/ Боже́ственнии му́ченицы,/ тварь све́том чуде́с озаря́ете,/ неду́гов разреша́юще глубо́кую нощь всегда́,/ и Христу́ Еди́ному Бо́гу моля́щеся/ непреста́нно о всех нас.

Велича́ем вас,/ страстоте́рпцы святи́и Наза́рие, Герва́сие, Прота́сие и Келси́е,/ и чтим честна́я страда́ния ва́ша,/ я́же за Христа́/ претерпе́ли есте́.

Пусты́нное и безмо́лвное житие́ возлюби́вши/ и во след Христа́ Жениха́ твоего́ усе́рдно поте́кши,/ и Того́ благо́е и́го во ю́ности твое́й взе́мши,/ кре́стным зна́мением к мы́сленным враго́м му́жески вооружи́вшися,/ по́стническими по́двиги, посто́м и моли́твами, и сле́зными ка́плями/ у́глие страсте́й угаси́ла еси́, достосла́вная Параске́во;/ и ны́не в Небе́снем черто́зе с му́дрыми де́вами19 предстоя́щи Христу́/ моли́ о нас, почита́ющих честну́ю па́мять твою́.

Святу́ю вси засту́пницу су́щим в беда́х,/ благоче́стно воспои́м Параске́ву всечестну́ю:/ та бо житие́ оста́вльши тле́нное,/ и нетле́емое прия́т во ве́ки./ Сего́ ра́ди сла́ву обре́те,/ чуде́с благода́ть, Бо́жиим веле́нием.

Ублажа́ем тя,/ преподо́бная ма́ти Параске́во,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Оте́чество и сла́ву княже́ния твоего́ оста́вил еси́,/ Кня́зю смире́ния, Христо́ви усе́рдно после́довал еси́,/ преподо́бне о́тче наш Нико́ло;/ тем прия́л еси́ от Него́ ве́чное ца́рство и сла́ву на Небеси́,/ иде́же лику́я, помина́й нас, чту́щих па́мять твою́ ве́рно.

Вся кра́сная ми́ра сего́/ и тле́нное бога́тство нивочто́же вмени́в,/ обога́тился еси́ мно́гими чудесы́ и зна́мении от Христа́ Бо́га,/ Ему́же в весе́лии предстоя́,/ помина́й нас, чту́щих любо́вию па́мять твою́, да зове́м ти:/ ра́дуйся, Нико́ло пречу́дне.

Ублажа́ем тя,/ преподо́бне о́тче Нико́ло,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Го́рняго жела́я преми́рнаго жития́,/ до́льняя возненави́дел еси́,/ и, взем крест свой, после́довал еси́ Христу́/ и в пусты́ню всели́лся еси́, досточу́дне,/ в ней подвиза́ся в пе́ниих, в бде́ниих и поще́ниих./ Те́мже в тя всели́ся Пресвяты́й Дух,/ но я́ко име́я дерзнове́ние ко Христу́ Бо́гу,/ испроси́ лю́дем правосла́вным здра́вие и спасе́ние,/ и не забу́ди посеща́я чад свои́х,/ соверша́ющих свяще́нную па́мять твою́,/ Космо́, преподо́бие о́тче наш.

Душе́вныя стра́сти из ко́рене исторга́я,/ в пусты́ню всели́лся еси́, преподо́бне,/ и неболе́зненную жизнь в боле́знех восприя́л еси́,/ боле́знем же лю́тым уставля́еши озлобле́ния прося́щим у тебе́ с ве́рою./ Те́мже разреши́ боле́зни на́ша душе́вныя и теле́сныя, да зове́м ти:/ ра́дуйся, Космо́ Богому́дре.

Ублажа́ем тя,/ преподо́бне о́тче Космо́,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

15/28 Преподобного Евфимия Нового, Солунского (889). Преподобномученика Лукиана, пресвитера Антиохийского (312). Святителя Иоанна, епископа Суздальского (1373). Святителя Дионисия, архиепископа Суздальского (1385). Священномученика Лукиана Печерского, в Дальних пещерах почивающего (1243). Иконы Божией Матери «Спорительница хлебов» (XIX).

В тебе́, о́тче, изве́стно спасе́ся е́же по о́бразу... (общий преподобному).

Волне́ний мно́жества невла́жно преходя́,/ безпло́тныя враги́ струя́ми слез твои́х/ кре́пко погрузи́л еси́,/ Богому́дре Евфи́мие, преподо́бне,/ и чуде́с дар прие́м,/ исцеля́вши стра́сти вся́кия:/ моли́ непреста́нно о все́х нас.

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Воздержа́нием по́стничества и муче́ния кро́вию/ ты стяжа́в вене́ц неувяда́емый, священному́чениче Лукиа́не,/ Антиохи́йская похвало́,/ о нас моли́ Христа́ Бо́га,/ творя́щих святу́ю па́мять твою́.

В поще́нии пе́рвее просия́вшаго,/ и во страда́нии второ́е светя́ща,/ вси, я́ко свети́ло пресветле́йшее,/ Лукиа́на пе́сньми сла́вно почти́м,/ моля́щаго непреста́нно о всех нас.

Я́ко святи́тель благоче́стно пожи́в/ и священномуче́ния вене́ц прия́т,/ и́дольския же́ртвы погаси́л еси́,/ до́брый па́стырь Христо́ву ста́ду бысть, прему́дре Лукиа́не./ Сего́ ра́ди тя почита́ем, пе́сньми вопию́ще:/ от бед изба́ви нас при́сно моли́твами свои́ми.

Велича́ем тя,/ священному́чениче Лукиа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Правосла́вия наста́вниче,/ благоче́стия учи́телю и чистоты́,/ Су́здалю пресве́тлый свети́льниче,/ святи́телем Богодухнове́нное удобре́ние, Иоа́нне прему́дре,/ уче́нием твои́м па́ству твою́ просвети́л еси́;/ святи́телю блаже́нне, моли́ Христа́ Бо́га спасти́ся душа́м на́шим.

Управля́я Це́рковь Бо́жию Собо́рную и Апо́стольскую,/ соблюда́я за́поведи Бо́жия,/ вельми́ до́бре упа́с ста́до слове́сных ове́ц;/ зломы́сленным церко́вником моли́твою свое́ю прозре́ти повеле́/ и научи́, я́коже пре́жде святы́й Лео́нтий,/ поспе́шник спасе́нию Ру́сския земли́, учи́тель Росто́вский,/ пре́жде связа́ и па́ки благослови́;/ та́ко святы́й епи́скоп Су́ждальский,/ напа́стем, притека́ющим к тебе́, изба́вниче, чудотво́рче Иоа́нне,/ моли́ Христа́ Бо́га спасти́ся душа́м на́шим.

Богому́дрым уче́нием и святы́м житие́м,/ я́ко свети́льник еси́ в Це́ркви Бо́жией;/ те́мже Боже́ственнаго заступле́ния сподо́бился еси́,/ внегда́ осле́пнути очесе́м злоумы́шленных клеветнико́в твои́х,/ и́хже прозре́ти сотвори́в моли́твою твое́ю,/ вспять возврати́лся еси́ во град твой,/ и до́бре упа́сл еси́ ста́до слове́сных ове́ц;/ и́хже ча́дом помога́й и нам моли́твами твои́ми,/ святи́телю Христо́в Иоа́нне.

Незаходи́мое со́лнце возсия́ днесь,/ пресла́вная па́мять твоя́, святи́телю Христо́в Иоа́нне,/ созыва́юще нас к похвале́нию Христа́ Бо́га на́шего./ Те́мже, притека́юще к тебе́, исцеле́ния да́ры прие́млем/ моли́твами твои́ми.

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Правосла́вия ревни́телю, благоче́стия наста́вниче,/ и́щущим спасе́ния до́брый ко́рмчий,/ мона́шествующих Богодухнове́нное украше́ние,/ Богоно́снаго Евфи́мия собесе́дниче, святи́телю Диони́сие,/ уче́ньми и доброде́тельми оте́чество твое́ просвети́л еси́,/ не забу́ди нас, чту́щих тя,/ но в ми́ре упра́ви живо́т наш.

Звезду́ Росси́йскую, от Ки́ева возсия́вшую/ чрез Ни́жний Но́вград в Су́ждаль дости́гшую,/ и всю страну́ сию́ уче́нием озари́вшую,/ ублажи́м Богому́драго Диони́сия,/ той бо мо́лится Го́споду спасти́ся душа́м на́шим.

Велича́ем тя,/ святи́телю о́тче Диони́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И нра́вом прича́стник и престо́лом наме́стник апо́столом быв,/ дея́ние обре́л еси́, Богодухнове́нне, в виде́ния восхо́д./ Сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Лукиа́не,/ моли́ Христа́ Бо́га спасти́ся душа́м на́шим.

Во свяще́нстве и и́ночестве благоче́стно пожи́в/ и муче́ния путь проше́д,/ мучи́теля и бесо́вское по́лчище посрами́л еси́./ Те́мже почита́юще тя, та́ко вопие́м ти:/ от бед изба́ви ны при́сно твои́ми мольба́ми, о́тче наш Лукиа́не.

Велича́ем тя,/ священному́чениче Лукиа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

О, Пречи́стая Де́во Мари́е,/ Ма́ти Царя́ небесе́ и земли́,/ благоутро́бно призира́вши/ на лю́бящих Сы́на Твоего́, Христа́ Бо́га на́шего,/ и тружда́ющихся во и́мя Его́ ве́чнаго ра́ди спасе́ния,/ и подае́ши им вся оби́льно к наслажде́нию,/ Спори́тельнице су́щи хлебо́в им,/ избавля́я их вся́кия ну́жды и утесне́ния/ и устроя́я им, рабо́м Твои́м су́щим,/ избавле́ние ве́чныя му́ки и жизнь ве́чную.

Предста́тельство христиа́н непосты́дное,/ ходата́йство ко Творцу́ непрело́жное... (общий Божией Матери).

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

16/29 Мученика Лонгина сотника, иже при Кресте Господни (I). Преподобного Лонгина, вратаря Печерского, в Дальних пещерах почивающего (XIII-XIV). Преподобного Лонгина Яренгского (1544–1545). Преподобного Лонгина, игумена Коряжемского, чудотворца (1540).

Му́ченик Твой, Го́споди... (общий мученику).

Ве́село возра́довася Це́рковь/ в па́мять днесь приснопа́мятнаго страда́льца Ло́нгина, взыва́ющи:/ Ты моя́ держа́ва, Христе́, и утвержде́ние.

Велича́ем тя,/ страстоте́рпче святы́й Ло́нгине,/ и чтим честна́я страда́ния твоя́,/ я́же за Христа́/ претерпе́л еси́.

Преподо́бие и Богоблаже́нне о́тче Ло́нгине,/ врат монасты́рских опа́сный* храни́телю,/ опа́снейший же и неусы́пный свои́х чу́вствий/ от вся́каго мирска́го суе́тствия затвори́телю,/ моли́ наре́кшаго Себе́ дверь Го́спода сла́вы,/ да отве́рзет нам дверь ми́лости Своея́.

Врато́м земны́м приседя́ и о́ным с послуша́ния вне́шнима очи́ма наблюда́я,/ Небе́сная врата́ при́сно у́мными свои́ма очи́ма наблюда́л еси́, преподо́бие Ло́нгине,/ в ня́же уже́ вшед и та́мошния красоты́ сподо́бився, моли́ся Го́сподеви,/ да и мы полу́чим вход Ца́рствия Небе́снаго.

Ублажа́ем тя,/ преподо́бие о́тче Ло́нгине,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Свы́ше Боже́ственною благода́тию просвети́вся, Богому́дре,/ мно́гим терпе́нием во вре́менней жи́зни тече́ние соверши́л еси́./ Те́мже и по успе́нии источа́еши чуде́с благода́ть,/ и́же с ве́рою приходя́щим к тебе́, Ло́нгине всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудеса́х,/ сла́ва Де́йствующему тобо́ю всем исцеле́ния.

Вы́шних улучи́ти, прему́дре, жела́я,/ до́лу кра́сных, му́дре, преоби́дел еси́,/ и Христо́ви обнища́вшему, сообнища́,/ ра́дуяся, после́довал еси́, Ло́нгине,/ к Нему́ же приле́жно не преста́й моля́ся о всех нас.

Ублажа́ем тя,/ преподо́бие о́тче Ло́нгине,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От мяте́жа мирска́го удали́вся,/ к немерца́ющему Све́ту прите́кл еси́, преподо́бне о́тче Ло́нгине,/ и ны́не чи́сте зри́ши Святу́ю Тро́ицу,/ ю́же моли́ за ны недосто́йныя,/ да спасе́т ду́ши на́ша.

По словеси́ Учи́теля Христа́,/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́ся еси́,/ ид е́же доны́не изцеле́ния неоску́дно источа́ются/ с ве́рою приходя́щим к тебе́.

Ублажа́ем тя,/ преподо́бие о́тче Ло́нгине,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

17/30 Пророка Осии (820 г до Р. X.). Преподобномученика Андрея Критского (767). Перенесение мощей праведного Лазаря Четверодневного, епископа Китийского (898). Икон Божией Матери, именуемых «Прежде Рождества и по Рождестве Дева» (1827) и «Избавительница» (XIX).

Проро́ка Твоего́ Оси́и па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Пра́выми стезя́ми после́дуя за́поведем Го́спода твоего́, проро́че Оси́е,/ испо́лнився Ду́ха Свята́го/ и, прие́м дар проро́чествия,/ провозгласи́л еси́ Изра́илю Христо́во, хотя́щее в после́дняя ле́та бы́ти, прише́ствие,/ облича́я заблу́ждшия лю́ди от пути́ пра́ваго/ и наставля́я на путь, веду́щий в Вы́шний Иерусали́м,/ иде́же ны́не предстоя́,/ моли́ся непреста́нно о всех нас.

Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая,/ сего́ ра́ди тя почита́ем, проро́че блаже́нне, Оси́е сла́вне.

Велича́ем тя,/ проро́че Бо́жий Оси́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

По́стнически предподвиза́вся на горе́,/ у́мная враго́в ополче́ния всеору́жием креста́ погуби́л еси́, всеблаже́нне,/ па́ки же ко страда́льчеству/ му́жески обле́клся еси́,/ уби́в Копрони́ма мече́м ве́ры,/ и обои́х ра́ди венча́лся еси́ от Бо́га,/ преподобному́чениче Андре́е приснопа́мятне.

Пра́зднует днесь Ца́рствующий град/ пра́здник пресве́тлый светоно́сныя твоея́ па́мяти,/ вся́кий призыва́я град и страну́,/ ра́дуется бо, я́ко име́я сокро́вище ве́лие,/ многострада́льное твое́ те́ло,/ Андре́е му́чениче, Правосла́вия свети́льниче.

Му́жества тезоимени́тому20 благодаре́ние,/ я́ко благоче́стия тайноглаго́льнику,/ похва́льная воззове́м от любве́ тебе́, богоблаже́нне./ Но, я́ко име́я дерзнове́ние ко Го́споду,/ от вся́ких лю́тых ны спаси́, да пое́м:/ ра́дуйся, о́тче приснопа́мятне.

Ублажа́ем тя,/ преподобному́чениче Андре́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Я́ко вели́ко сокро́вище и бога́тство некрадо́мо/ к нам прии́де из Ки́пра, Ла́заре,/ Про́мыслом всех Бо́га, повеле́нием царя́ благочести́ва,/ подая́ чту́щим тя исцеле́ния да́ром,/ избавля́я от бед и от вся́каго вре́да,/ ве́рою взыва́ющих ти:/ спаси́ всех моли́твами свои́ми, Ла́заре о́тче наш.

Взы́де, я́ко звезда́ пресве́тлая,/ от Ки́пра честны́я мо́щи твоя́, Ла́заре,/ Ца́рствующий град освяща́ющи и христолюби́ваго царя́ веселя́щи/ и лю́ди своя́ обогаща́ющи,/ тобо́ю благода́ть исцеле́ния подаю́щи, ве́рно зову́щим ти:/ ра́дуйся, Ла́заре, дру́же Бо́жий.

Велича́ем тя,/ святы́й пра́ведный Ла́зарю,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Избавле́ние Принося́щая всем,/ от се́рдца Тебе́ призыва́ющим,/ принеси́ избавле́ние ско́рое и нам,/ в лю́тых беда́х прибега́ющим/ и в Тебе́ еди́ной избавле́ние на́ше по Бо́зе полага́ющим.

я́ко пресве́тлая звезда́,/ просия́ Боже́ственными чудесы́, святы́й о́браз Твой, Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед, исцеле́ние неду́гов душе́вных и теле́сных, спасе́ние и ве́лию ми́лость.

Ко ико́не Твое́й, Пресвята́я Госпоже́,/ бе́дствовавший с ве́рою прите́кше,/ заступле́нием Твои́м изба́витися от злых,/ но я́ко Ма́терь Христа́ Бо́га,/ и нас свободи́ от лю́тых обстоя́ний, вре́менных и ве́чных,/ да зове́м Ти:/ ра́дуйся, Изба́вительнице от всех бед.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

18/31 Апостола и евангелиста Луки (I). Преподобного Иосифа, игумена Волоцкого (Волоколамского), чудотворца (1515).

Апо́столе святы́й и Евангели́сте Луко́,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Апо́стольских дея́ний сказа́теля/ и Ева́нгелия Христо́ва све́тла списа́теля,/Луку́ препе́таго, сла́вна су́ща Христо́ве Це́ркви,/ пе́сньми свяще́нными свята́го апо́стола похва́лим,/ я́ко врача́ су́ща челове́ческия не́мощи,/ естества́ неду́ги и я́зи* душ исцеля́юща/ и моля́щася непреста́нно за ду́ши на́ша.

И́стиннаго благоче́стия пропове́дника/ и та́йн неизрече́нных ри́тора,/ звезду́ церко́вную, Луку́ Боже́ственнаго восхва́лим:/ Сло́во21 бо его́ избра́ с Па́влом му́дрым, язы́ков учи́теля,/ Еди́н ве́дый серде́чная.

Велича́ем тя,/ апо́столе Христо́в и Евангели́сте Луко́,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Я́ко по́стников удобре́ние и отце́в красоту́/ ми́лости пода́теля, разсужде́ния свети́льника,/ вси ве́рнии соше́дшеся восхва́лим,/ кро́тости учи́теля и ересе́й посрами́теля,/ прему́драго Ио́сифа, Росси́йскую звезду́/ моля́щася Го́споду/ поми́ловатися душа́м на́шим.

Жития́ треволне́ния и мяте́ж мирски́й/ и страстна́я взыгра́ния в ничто́же вмени́в,/ пусты́нный граждани́н показа́лся еси́,/ мно́гих быв наста́вник, Ио́сифе преподо́бие,/ мона́хов собра́тель, и моле́бник ве́рен,/ чистоты́ рачи́тель./ Моли́ Христа́ Бо́га спасти́ся душа́м на́шим.

Ублажа́ем тя,/ преподо́бие о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

19/1 Пророка Иоиля (800 г. до Р. X.). Мученика Уара и с ним семи учителей христианских (ок. 307). Перенесение мощей преподобного Иоанна Рыльского (1238). Священномученика Садока, епископа Персидского, и с ним 128-ми мучеников (342). Благоверного царевича Димитрия, Угличского и Московского (1591).

Предве́дый Бо́жие прише́ствие во пло́ти/ и наи́тие Ду́ха Свята́го и гряду́щий Суд предсказа́вый,/ проро́че Ио́иле,/ спаса́й моли́твами твои́ми/ чту́щия тя от всех скорбе́й.

Просвети́вшееся Ду́хом чи́стое твое́ се́рдце,/ проро́чества бысть светле́йшаго прия́телище;/ зри́ши бо, я́ко настоя́щая, дале́че су́щая;/ сего́ ра́ди тя почита́ем,/ проро́че блаже́нне Ио́иле, сла́вне.

Велича́ем тя,/ проро́че Бо́жий Ио́иле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Му́ченик твой, Го́споди... (общий мученику).

Во́инством святы́х страстоте́рпец стра́ждущих зако́нне,/ зря о́нех, показа́л еси́ му́жески кре́пость свою́,/ и устреми́вся на страсть во́лею,/ и умре́ти вожделе́ за Христа́,/ И́же прия́л еси́ по́честь победы твоего́ страда́ния, Уа́ре,/ моли́ спасти́ся душа́м на́шим.

Христу́ после́дуя, му́чениче Уа́ре,/ Того́ испи́в ча́шу,/ и муче́ния венце́м увязе́ся,/ и со а́нгелы ликовству́еши,/ моли́ непреста́нно за ду́ши на́ша.

Велича́ем тя,/ страстоте́рпче святы́й Уа́ре,/ и чтим честна́я страда́ния твоя́,/ я́же за Христа́ претерпе́л еси́.

Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния,/ равноа́нгельное житие́ твое́ бысть, преподо́бне./ В моли́твах у́бо и поще́ниих, и в слеза́х пребыва́я,/ о́тче Иоа́нне, моли́ Христа́ Бо́га о душа́х на́ших.

А́нгельскому житию́ поревнова́в, преподо́бие,/ вся земна́я оста́вив,/ ко Христу́ прите́кл еси́,/ и, Того́ за́поведьми огражда́яся,/ яви́лся еси́ столп непоколеби́м от вра́жиих нападе́ний./ Тем зове́м ти:/ ра́дуйся, о́тче Иоа́нне, свети́ло пресве́тлое.

Ублажа́ем тя,/ преподо́бие о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

И нра́вом прича́стник, И престо́лом наме́стник... (общий священномученику).

Влады́чню рече́нию усе́рдно в подо́бстве после́дова,/ я́ко бо па́стырь до́брый ду́шу свою́ за Христо́вы о́вцы положи́л еси́,/ священному́чениче Садо́фе, мо́лим тя, многострада́льне,/ моли́ па́стырем Нача́льника Христа́/ и нас причести́ десна́го ове́ц стоя́ния,/ да воспое́м ти:/ ра́дуйся, свяще́нный о́тче Садо́фе,/ и́же за Христа́ кровь свою́ излия́вый.

Велича́ем тя,/ священному́чениче Садо́фе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми крылы́,/душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не кровь твоя́ от земли́ та́йно вопие́т к Бо́гу,/ я́ко Авеля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей Богоуго́дне бы́ти/ и сыново́м ру́сским спасти́ся.

Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно за́клан быв/ и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́еши всем исцеле́ние, достохва́льне благове́рный царе́вичу кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобо́ю всем исцеле́ние.

Вели́ка обрете́ тебе́ целе́бника в после́днем ро́де,/ лю́ди твои́, ру́сстии наро́ди,/ но́вый страстоте́рпче Христо́в, благове́рный царе́вичу кня́же Дими́трие,/ возсия́ бо на земли́ чудесы́ свои́ми, я́ко звезда́ небосве́тлая,/ но, созре́лый у́бо клас* Христу́, испи́в ча́шу,/ я́ко а́гнец непоро́чен, за́клан бысть в же́ртву чи́сту,/ пренесе́ себе́ Влады́це всех,/ от Него́же побе́дным венце́м увязе́ся,/ просия́ ми́рови, я́ко со́лнце,/ преле́сти вся угаси́л еси́/ и Собо́рную обогаща́вши Це́рковь чудотворе́нии,/ стране́ на́шей на враги́ побо́рник,/ одержи́мым же разли́чными неду́ги врач,/ всех нас освяща́еши бога́тыми дарова́нии, всехва́льне,/ и моли́твами, свя́те, твои́ми всем дае́ши Боже́ственное исцеле́ние.

Ца́рскою диади́мою оде́ян, Богому́дре му́чениче,/ за ски́петр крест в руку́ прии́м,/ яви́ся я́ко победоно́сец/ и всесожже́ния же́ртву свяще́нну себе́ прине́ся еси́, Дими́трие,/ показа́ся изря́ден врач ру́сской стране́,/ о́браз в себе́ чудотворе́ния нося́,/ я́ко а́гнец непоро́чен, от раба́ коле́ние прия́т,/ убива́ющаго те́ло, души́ же косну́тися не могу́ща./ Да пла́чется у́бо злый властолю́бец,/ ты же, ра́дуяся, предстои́ши Святе́й Тро́ице,/ моли́ся стране́ на́шей Богоуго́дне бы́ти/ и сыново́м ру́сским спасти́ся.

Возсия́ днесь благоцвету́щая о́трасль благочести́ваго ко́рене,/ от благове́рных Росси́йския страны́ доброра́сленный грозд израсте́/ и Христо́ви кра́сен плод прозябе́./ Те́мже от земли́ Воззва́вый тя к ве́чным оби́телем,/ соблюда́ет и по убие́нии твое́м невреди́мо те́ло твое́,/ страда́льчески обагре́но кро́вию;/ благоро́дне свя́те Дими́трие,/ соблюда́й оте́чество свое́ и град твой невреди́м,/ тому́ бо еси́ утвержде́ние.

Свети́ло яви́ся пресве́тлое днесь Боже́ственная па́мять твоя́,/ Богодарова́нная ти чудеса́ от вся́ких многоразли́чных неду́г подаю́т исцеле́ния/ с ве́рою призыва́ющим тя,/ созыва́ющи нас к похвале́нию просла́вльшаго тя Бо́га,/ Его́же моли́, страстоте́рпче благове́рный Дими́трие,/ мир ми́рови дарова́ти/ и от ви́димых враг лю́ди невре́дны сохрани́ти, да зове́м ти:/ ра́дуйся, ты бо еси́ утвержде́ние гра́ду на́шему.

Велича́ем тя,/ святы́й благове́рный царе́вичу Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

20/2 Великомученика Артемия (362) Праведного отрока Артемия Веркольского (1545).

И́стинною бо Христо́вою ве́рою/ утве́рждься, страстоте́рпче,/ мучи́теля злочести́ва царя́/ победи́л еси́ со и́дольским того́ возноше́нием./ Тем от Царя́ Вели́каго, ве́чно ца́рствующаго,/ пресве́тлым венце́м побе́дным одаре́н бысть,/ вся исцеля́яй боля́щия и призыва́ющия тя, Арте́мие вели́кий,/ моли́ Христа́ Бо́га/ спасти́ ду́ши на́ша.

Благочести́ваго и венцено́снаго му́ченика,/ на враги́ побе́ды взе́мшаго одоле́ние,/ соше́дшеся досто́йно пе́сньми восхва́лим Арте́мия,/ превели́каго в му́ченицех,/ чуде́с же да́теля пребога́таго:/ мо́лится бо ко Го́споду о всех нас.

Велича́ем тя,/ страстоте́рпче святы́й Арте́мие,/ и чтим честна́я страда́ния твоя́,/ я́же за Христа́/ претерпе́л еси́.

Вы́шняго повеле́нием тучено́сным облако́м не́бо помрачи́вшим,/ и мо́лниям блиста́ющим,/ гро́му же возшуме́вшу с преще́нием,/ испусти́л еси́ ду́шу твою́ в ру́це Го́сподеви, прему́дре Арте́мие,/ и ны́не предстои́ши престо́лу Влады́ки всех,/ о и́же ве́рою и любо́вию приходя́щим к ра́де твое́й, подая́ исцеле́ние всем неотло́жно/ и моля́ся Христу́ Бо́гу спасти́ся душа́м на́шим.

Возсия́ днесь пресве́тлая па́мять прему́драго Арте́мия,/ Богода́нная благода́ть, я́ко ре́ки излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся, с ве́рою прие́млюще я и взыва́юще:/ ра́дуйся, Арте́мие Богому́дре.

Велича́ем тя,/ святы́й пра́ведный Арте́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Велича́ем тя,/ страстоте́рпче Христо́в Арте́мие,/ и чтим святу́ю па́мять твою́,/ ты бо мо́лиши за нас/ Христа́

21/3 Преподобного Илариона Великого (371–372). Перенесение мощей святителя Илариона, епископа Меглинского (1206). Преподобного Илариона, схимника Печерского, в Дальних пещерах почивающего (XI). Преподобного Илариона Псковоезерского, Гдовского (1476).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́, /и был еси свети́льник вселе́нней, сия́я чудесы́,/ Иларио́не о́тче наш,/ моли́ Христа́ Бо́га спасти́ся душа́м на́шим.

Я́ко и́ноков утвержде́ние, наста́вник же гра́ждан пусты́нных,/ и чудотво́рец, благода́тию Вели́кому Анто́нию подо́бяся,/ помо́щник в страсте́х бе́дствующим неотсту́пен, Иларио́не о́тче наш,/ моли́ за чту́щия святу́ю па́мять твою́.

Я́ко свети́льника незаходи́маго, у́мнаго тя со́лнца,/ соше́дшеся днесь восхваля́ем в пе́снех,/ возсия́л бо еси́ су́щим во тьме неве́дения,/ вся возводя́ к Боже́ственней высоте́, Иларио́не./ Те́мже вопие́м:/ ра́дуйся, о́тче, всех по́стников основа́ние.

Ублажа́ем тя,/ преподо́бие о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Чу́до яви́вся извеще́ния,/ де́ды возсия́л еси́ доброде́телей Бо́жиих,/ мона́шествующих ли́ки упасл еси́,/ архиере́йская седа́лища исчи́стил еси́,/ ерети́ческаго же нападе́ния не усумне́вся,/ це́ркви Христо́вы воздви́гл еси́,/ преподо́бие Иларио́не,/ у́мер, я́ко спя,/ те́ло же твое́ це́ло и нетле́нно соблюдено́ бысть,/ и подае́т цельбы́ боля́щим от разли́чных неду́г,/ и де́моны прогоня́ет;/ сего́ ра́ди мо́лим тя: моли́ спасти́ся душа́м на́шим.

Я́ко светоно́сна яви́ся, архиере́е, па́мять твоя́,/ тьму разруши́ уны́ния, и свет облиста́ даро́в Небе́сных,/ вся созыва́ющи на ра́дость./ От Бо́га бо, Иларио́не, благода́ть обре́л еси́/ и мона́хом был еси́ сте́пень*.

Велича́ем тя,/ святи́телю о́тче Иларио́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Вои́стину досто́йно нарече́н был еси́ Иларио́н22,/ ти́хостей бо и кро́ток нрав по и́мени твоему́ име́л еси́, блаже́нне,/ и́мже кро́ткому Го́споду Иису́су благоугоди́в,/ моли́ся Ему́ о нас, рабе́х твои́х.

Вели́кий а́нгельский о́браз и́ноческаго чи́на, святу́ю схи́му, я́ко прие́м,/ и второ́е отрица́ние су́етнаго ми́ра сего́ я́ко сотво́рь,/ тща́лся еси́ все́ми о́бразы, преподо́бне Иларио́не,/ обеща́ние де́лом испо́лнити/ и о́бразу свято́му прили́чне пожи́ти,/ тем тя чтим и ублажа́ем.

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В моли́твах бо́дрствуя,/ пресве́тлый храм Ду́ха Свята́го был еси́,/ те́мже и чудотво́рец преди́вный яви́лся еси́,/ преподо́бне о́тче наш Иларио́не./ О нас моли́ Христа́ Бо́га/ све́том Боже́ственнаго позна́ния просвети́ти ны/ и спасти́ ду́ши на́ша.

Чистото́ю душе́вною боже́ственно вооружи́вся... (общий преподобному).

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

22/4 Празднование Казанской иконе Божией Матери (в память избавления Москвы и России от поляков в 1612 году). Равноапостольного Аверкия, епископа Иерапольского, чудотворца (ок. 167). Семи отроков, иже во Ефесе (ок. 250; 408–450). Преподобных Феодора (1409) и Павла (XV) Ростовских, первостроителей Борисоглебского монастыря. Андрониковской иконы Божией Матери (1281–1332).

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́ Христа́ Бо́га на́шего/ и все́м твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́ Цари́це и Влады́чице,/ и́же в напа́стех и в ско́рбех, и в боле́знех, обремене́нных грехи́ мно́гими,/ предстоя́щих и моля́щихся Тебе́/ умиле́нною душе́ю и сокруше́нным се́рдцем/ пред пречи́стым Твои́м о́бразом со слеза́ми,/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй/ и вся спаси́, Богоро́дице Де́во,/ Ты бо еси́ Боже́ственный Покро́в рабо́м Твои́м.

Притеце́м, лю́дие, к ти́хому сему́ и до́брому приста́нищу,/ ско́рой Помо́щнице, гото́вому и те́плому спасе́нию, покро́ву Де́вы,/ ускори́м на моли́тву и потщи́мся на покая́ние,/ источа́ет бо нам неоску́дныя ми́лости Пречи́стая Богоро́дица,/ предваря́ет на по́мощь, и избавля́ет от вели́ких бед и зол/ благонра́вныя и богобоя́щияся рабы́ Своя́.

Велича́ем Тя,/ Пресвята́я Де́во,/ и чтим о́браз Твой святы́й,/ о́т него́ же истека́ет благода́тная по́мощь/ всем, с ве́рою притека́ющим к нему́.

И́стины пропове́дник и чудотво́рец ди́вен показа́лся еси́,/ си́рот оте́ц и ни́щих засту́пник,/ бо́дрый па́стырь слове́снаго ста́да, бесо́м стра́шен,/ всех у́бо от тех нападе́ний заступа́й, вопию́щих ти:/ Аве́ркие о́тче наш,/ моли́ Христа́ Бо́га,/ да спасе́т ду́ши на́ша.

Я́ко свяще́нника превели́каго и апо́столов совсе́льника,/ Це́рковь почита́ет тя вся ве́рных, Аве́ркие,/ ю́же твои́ми моли́твами соблюда́й, блаже́нне,/ непобеди́му и необурева́ему от вся́кия е́реси, и нескве́рну,/ я́ко приснопа́мятный.

Велича́ем тя,/ святы́й равноапо́стольный Аве́ркие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Благоче́стия пропове́дники и воскресе́ния уме́рших изобрази́тели,/ Це́ркви столпы́ седмочи́сленныя,/ о́троки всеблаже́нныя пе́сньми восхвали́м,/ ти́и бо по мно́гих ле́тех нетле́ния, а́ки от сна воста́вше,/ всем возвести́ша Я́ве ме́ртвых воста́ние.

Ве́лия ве́ры чудесе́,/ в пеще́ре, я́ко в черто́зе ца́рском,/ святи́и се́дьм о́троцы пребы́ша и умро́ша без тли,/ и по мно́зех вре́менех возста́ша, я́ко от сна,/ во увере́ние Воскресе́ния всех челове́ков./ Тех моли́твами,/ Христе́ Бо́же, поми́луй нас.

Просла́вивый на земли́ святы́я Твоя́,/ пре́жде втора́го и стра́шнаго прише́ствия Твоего́, Христе́,/ пресла́вным воста́нием отроко́в показа́л еси́ Воскресе́ние неве́дящим е́,/ нетле́нна одея́ния и телеса́ яви́в,/ и царя́ уве́рил еси́ вопи́ти:/ вои́стину есть ме́ртвых воста́ние.

Ми́ра су́щая тле́нная презре́вше,/ и нетле́нныя да́ры прие́мше,/ уме́рше, кро́ме тле́ния пребы́ша;/ те́мже востаю́т по мно́гих ле́тех,/ все погре́бше лю́тых неве́рие;/ я́же во хвале́нии днесь,/ ве́рнии, восхваля́юще, Христа́ воспои́м.

Велича́ем вас,/ святи́и седьм о́троцы, и́же во Ефе́се,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Звезда́м заря́ послуша́ния жизнь лу́чших показа́,/ я́ко два свети́ла сия́юще нам,/ Фео́дор и Па́вел Богому́дрии, Росто́вская похвало́,/ житие́м чи́стым Богу присво́ишася.

Волне́ний мно́жество невла́жно проходя́ще... (общий преподобным).

Ублажа́ем вас,/ преподо́бнии отцы́ Фео́доре и Па́вле,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

23/5 Апостола Иакова, брата Господня по плоти (ок. 63). Преподобного Иакова Боровичского, Новгородского чудотворца (ок. 1540). Преподобного Елиссея Лавришевского (ок. 1250).

Я́ко Госпо́день учени́к, восприя́л еси́, пра́ведне, Ева́нгелие,/ я́ко му́ченик, и́маши е́же неопи́санное дерзнове́ние,/ я́ко брат Бо́жий, е́же моли́тися, я́ко иера́рх;/ моли́ Христа́ Бо́га спасти́ся душа́м на́шим.

О́тчее Единоро́дное Бог Сло́во,/ прише́дшее к нам в после́дняя дни,/ Иа́кове Боже́ственне,/ пе́рваго тя показа́ Иерусали́млян па́стыря и учи́теля/ и ве́рнаго строи́теля та́инств духо́вных./ Те́мже тя вси́ чтим, апо́столе.

Велича́ем тя,/ апо́столе Христо́в Иа́кове,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Боже́ственною благода́тию просвети́вся,/ и по сме́рти да́руеши исцеле́ние/ притека́ющим к ра́це моще́й твои́х, прему́дре Иа́кове;/ те́мже и мы ны́не чтим честны́х моще́й твои́х пренесе́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ве́рою и любо́вию/ твое́ честно́е пренесе́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех Христу́ Бо́гу,/ Его́же моли́ спасти́ лю́ди,/ моля́щия тя, да вси вопие́м ти:/ ра́дуйся, о́тче Иа́кове,/ всея́ Росси́йския земли́ удобре́ние.

Ублажа́ем тя,/ святы́й пра́ведный Иа́кове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Преподо́бие о́тче наш Елиссе́е,/ с Лавре́нтием чу́дным подвиза́лся еси́, учи́телю своему́ подража́я,/ земну́ю сла́ву и честь стопа́м Христа́ пове́ргли есте́,/ те́мже Госпо́дь увенча́ вас/ нетле́нным венце́м сла́вы Своея́.

Ве́чная па́мять ва́ша,/ преподо́бнии Елиссе́е и Лавре́нтие,/ те́мже помина́йте чту́щих свя́то ю́/ и испроси́те земли́ на́шей благоче́стие/ и душа́м спасе́ние.

24/6 Иконы Божией Матери «Всех скорбящих Радость» (1688). Мученика Арефы и с ним 4299 мучеников (523). Преподобного Арефы, затворника Печерского, в Ближних пещерах почивающего (XII). Святителя Афанасия, патриарха Цареградского (после 1311). Блаженного Елезвоя (Елесвана), царя Ефиопского (ок. 553–555).

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и еди́ну наде́жду и́мамы.

Не умолчи́м никогда́, Богоро́дице,/ си́лы Твоя́ глаго́лати недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны;/ не отсту́пим, Влады́чице, от Тебе́:/ Твоя́ бо рабы́ спаса́еши при́сно от вся́ких лю́тых.

Ко исто́чнику приснотеку́щему милосе́рдия,/ Пречи́стей Де́ве Богоро́дице,/ притеце́м лю́дие вси, ца́рие и кня́зи, свяще́нницы же и и́ноцы,/ му́жие и жены́, и ча́да, бога́тии и ни́щий, здра́вии и боля́щий,/ в покая́нии вопию́ще и уми́льно глаго́люще:/ Влады́чице, помози́ гре́шным рабо́м Твои́м,/ яви́, я́ко Блага́я, сла́ву Твою́,/ при́сно потщи́ся умилосе́рдитися на ны,/ испроси́ти очище́ние душ и теле́с на́ших/ от Исто́чника жи́зни на́шея, Бо́га,/ Его́же родила́ еси́, еди́на Благослове́нная.

Днесь пресве́тло красу́ется сла́внейший град Москва́,/ име́я чудотво́рную ико́ну Влады́чицы на́шея Богоро́дицы;/ та бо, ве́рным явля́ющи чудеса́,/ низпосыла́ет да́ры целе́бныя./ Сего́ ра́ди и мы, с ве́рою припа́дающе, мо́лимся,/ и на Тоя́ пречи́стый о́браз взира́юще,/ я́ко и́стинную Саму́ю зри́м Влады́чицу на́шу Присноде́ву Богоро́дицу,/ и уми́льно глаго́лем:/ воззри́, Ма́ти Бо́жия, о́ком ми́лости,/ простри́ к нам ру́це Твои́ пречи́стыя,/ я́коже на ико́не Твое́й сие́ зри́тся,/ и пода́ждь всем скорбя́щим ра́дость,/ больны́м от всех неду́гов исцеле́ние и от бед избавле́ние,/ я́ко Ты еси́ ско́рая Предста́тельница о душа́х на́ших.

Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных утеше́ние,/ обурева́емых приста́нище,/ больны́х посеще́ние,/ немощны́х покро́ве и Засту́пнице,/ же́зле ста́рости,/ Ма́ти Бо́га Вы́шняго Ты еси́, Пречи́стая;/ потщи́ся, мо́лимся, спасти́ся рабо́м Твои́м.

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся, и Тобо́ю хва́лимся,/ Твои́ бо есмы́ раби́,/ да не постыди́мся.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Досто́йно есть велича́ти Тя,/ Богоро́дице,/ честне́йшую Херуви́м/ и сла́внейшую/ без сравне́ния Серафи́м.

Му́жествовавше во Христе́ проти́ву безбо́жнаго царя́,/ му́ченицы святи́и,/ и того́ неве́рие иуде́йское во Христа́ обличи́вше,/ прия́ша мук томле́ние и гла́вам усече́ние;/ тем восхвали́ша тя а́нгели,/ и ве́рных ро́ди тя прославля́ют, Аре́фо,/ и пострада́вших с тобо́ю,/ я́ко моля́щихся при́сно о душа́х на́ших.

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Весе́лия хода́тай нам наста́,/ светоно́сный днесь страстоте́рпцев пра́здник,/ его́же соверша́юще, сла́вим в вы́шних Су́щаго Го́спода.

Велича́ем вас,/ страстоте́рпцы святи́и, Аре́фо со пострада́вшими с тобо́ю,/ и чтим честна́я страда́ния ва́ша,/ я́же за Христа́/ претерпе́ли есте́.

Бога́тство твое́ душе́вное погуби́ти хотя́ враг,/ помрачи́л тя бя́ше бога́тством тле́нным испе́рва,/ но всех спаса́яй Госпо́дь/ бога́тство ги́бнущее окра́сти попусти́,/ душе́вное же невре́дно соблю́л,/ Небе́сных сокро́вищ насле́дника тя показа́, Аре́фо,/ тем тя чтим и ублажа́ем.

И́ова терпеливоду́шнаго ревну́я благодаре́нию,/ окра́денный тле́ннаго своего́ име́ния претерпе́л еси́ бла́года́рне, преподо́бие Аре́фо,/ тем с ним обре́т нетле́нное име́ние на Небеси́,/ моли́ Христа́ Бо́га о всех нас.

Ублажа́ем тя,/ преподо́бие о́тче Аре́фо,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Чистоты́ жития́ све́том стра́стное те́рние попали́л еси́/ и тече́нием слез безпло́дную зе́млю напои́л еси́,/ многопло́дну ни́ву душе́вную соде́лав,/Афана́сие треблаже́нне,/ свети́ло Царюгра́ду, Патриа́рхом удобре́ние,/ моли́ Христа́ Бо́га спасти́ся душа́м на́шим.

В све́тлую свяще́ния оде́жду оде́явся,/ мы́сленно в Небе́сныя ра́достно дости́гл еси́ Ца́рства./ Тем восприя́ша тя селе́ния пра́ведных,/ иде́же есть неизглаго́ланно весе́лие,/ и слова́, и всех святы́х ли́цы,/ святи́телю Афана́сие,/ моли́ непреста́нно о всех нас.

Велича́ем тя,/ святи́телю о́тче Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И́же Боже́ственным раче́нием подви́гся/ на отмще́ние проли́тыя кро́ви пра́ведных,/ я́ко Дави́д от Саму́ила,/ ты же от Зино́на преди́внаго,/ проро́чески я́же сбы́тися тебе́ предре́кша,/ е́же обеща́нием к нему́,/ и того́ благослове́нием побе́ды на враги́ и одоле́ния показа́вшу,/ отню́ду же со отложе́нием ца́рства/ по́стных селе́ний горы́ жизнь соверши́, Елезво́е царю́,/ моли́ Небе́снаго Царя́ Христа́/ спасти́ ду́ши на́ша.

Высоту́ земна́го ца́рства, и венца́ вене́ц све́тлости,/ и багряни́цу отло́жшаго любве́ ра́ди Царя́ Христа́,/ от Него́же на Небесе́х сла́вно ве́нчана, Елезво́я царя́ му́драго, /и́же тле́нным ца́рством и мимоходя́щим, Ца́рство Ве́чное изме́ншаго,/ в пе́ниих пе́сненных восхва́лим,/ моли́твенника о ми́ре вели́ка.

Ублажа́ем тя,/ свя́те блаже́нне Елезво́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

25/7 Мучеников Маркиана и Мартирия (ок. 355). Преподобного Мартирия диакона Печерского, в Дальних пещерах почивающего (XIII-XIV). Праведной Тавифы (I). Иконы Божией Матери «Валкурийская» (II).

Му́ченик дво́ица единонра́вная,/ Маркиа́н с Марти́рием сла́вным, Ариево нече́стие разру́шиша/ и Соприсносу́щна Сы́на Отцу́ и Ду́хови ве́ровати научи́ша,/ Па́влу повину́ющеся, и́стинных повеле́ний учи́телю,/ те́мже, мече́м убие́ни, умро́ша;/ и при́сно со Христо́м живу́ще,/ о нас Того́ мо́лят спасти́/ ду́ши на́ша.

Подви́гшеся до́бре от младе́нства,/ Маркиа́не с му́дрым Марти́рием,/ отсту́пника Ария низложи́сте,/ невре́дно сохра́нше Правосла́вную ве́ру,/ Па́влу после́дующе, му́дрому учи́телю./ Те́мже с ним обрето́сте живо́т,/ я́ко Тро́ицы побо́рницы изря́днейший.

Велича́ем вас,/ страстоте́рпцы святи́и, Маркиа́не и Марти́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Служи́вый в чи́ну диа́конства Го́сподеви до́бре,/ честны́й иеродиа́коне Марти́рие,/ и та́мо я́ко слуга́ Госпо́день обреты́йся,/ ид е́же и Госпо́дь твой,/ моли́ся Ему́ и о нас,/ да пода́ст нам ве́лию ми́лость.

Диа́коне честны́й, и́ночествующим похвало́/ и преподо́бным соприча́стниче, всеблаже́нне Марти́рие,/ моли́ся Го́сподеви непреста́нно о всех нас.

Ублажа́ем тя,/ преподо́бие о́тче Марти́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь ве́ра Христо́ва утвержда́ется ка́менем ве́ры,/ и ликовству́ет в весе́лии Иоппи́я,/ псало́мски славосло́вят Жизнода́вца Сы́на Бо́жия ве́рнии,/ ви́дяще соверша́емо ве́лие чу́до:/ первоверхо́вный апо́стол глаго́лет,/ и уме́ршая востае́т от гро́ба,/ ю́же Низложи́тель сме́рти да́рует Це́ркви,/ да украша́ются во о́браз ея́ доброде́тельми лю́дие./ Прииди́те у́бо, христиа́не,/ принесе́м ко святе́й моле́ния на́ша:/ блаже́нная Тави́фо и милосе́рдная,/ вознеси́ на́ша воздыха́ния Пресвяте́й Тро́ице,/ и моли́ся со дерзнове́нием,/ да сыно́ве Све́та Преве́чнаго бу́дем,/ да сподо́бимся Бо́жия ми́лости,/ да пребыва́ем в любви́ Боже́ственней,/ и да ца́рствует мир во вселе́нней.

Апо́столом сотаи́ннице, ми́лостивая Тави́фо,/ оби́тели же́нския нача́ло положи́ла еси́/ и бе́дным одея́ние была́ еси́,/ послу́шнице смире́нная,/ сло́ву апо́стола Петра́ повину́вшися,/ из ме́ртвых си́лою Христо́вою возста́ла еси́,/ и ны́не на Небесе́х све́тло пра́зднуеши./ Те́мже моли́ Христа́ Бо́га/ всем, помина́ющим тя, дарова́ти живо́т ве́чный.

Ужаса́хуся Иоппи́йстии лю́дие, и дивля́хуся а́нгел и Бо́жии,/ егда́ Исцели́вый Енне́я воззва́ от ме́ртвых се́рну нарица́емую23, милосе́рдием преукра́шенную,/ о не́йже к Нему́ взыва́ху вдови́цы неиму́щия./ И ны́не, Тави́фо блаже́нная, услы́ши моли́твы на́ша, к тебе́ приноси́мыя,/ и испроси́ у вся́ческих благ Пода́теля ми́лости и щедро́ты ве́рным Его́,/ да блажа́ще тя, вопие́м ти:/ ра́дуйся, доброде́тели нас науча́ющая.

Первонача́льная Це́рковь ликовству́ет,/ и Иоппи́я тобо́ю, Тави́фо, просвеща́ется,/ из ме́ртвых твоему́ воскресе́нию ра́дующися,/ и мы, па́мять твою́ ны́не пра́зднующе,/ сла́вим Победи́теля сме́рти – Христа́ Бо́га,/ о́бщаго свята́го Воскресе́ния ча́юще.

Ублажа́ем тя,/ свята́я пра́ведная Тави́фо,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

26/8 Великомученика Димитрия Солунского, мироточца (ок. 306). Преподобного Феофила Печерского, архиепископа Новгородского, в Дальних пещерах почивающего (1482). Святителя Антония, епископа Вологодского (1588). Воспоминание великого и страшного трясения (землетрясения), бывшего в Константинополе 26 октября 740 года.

Вели́ка обре́те в беда́х/ тя побо́рника вселе́нная, страстоте́рпче,/ язы́ки побежда́юща,/ я́коже у́бо Ли́еву низложи́л еси́ горды́ню,/ и, на по́двиг дерзнове́нна сотвори́в Не́стора,/ та́ко, свя́те Дими́трие,/ Христу́ Бо́гу моли́ся дарова́ти нам ве́лию ми́лость.

Крове́й твои́х струя́ми, Дими́трие,/ Це́рковь Бог обагри́,/ Да́вый тебе́ кре́пость непобеди́мую,/ и соблюда́я град твой невреди́м;/ того́ бо еси́ утвержде́ние.

Велича́ем тя,/ страстоте́рпче святы́й Дими́трие,/ и чтим честна́я страда́ния твоя́,/ я́же за Христа́/ претерпе́л еси́.

Пра́вило ве́ры и о́браз кро́тости,/ и воздержа́ния изве́стный учи́тель Христо́ву ста́ду вои́стинну был еси́,/ уча́ е́ вы́ну смире́нию,/ не му́дрствовати е́же высо́кая,/ сего́ ра́ди стяжа́л, я́же жела́ше,/ о́тче святи́телю Фео́филе,/ моли́ Христа́ Бо́га спасти́ся душа́м на́шим.

Я́ко вои́стину, по и́мени твоему́ житие́, ты,/ Боголюбе́зне святи́телю Фео́филе и преподо́бие, соблю́л еси́,/ яви́ся тебе́ Христо́с Спас,/ обеща́я ти живо́т ве́чный и Ца́рствие Свое́,/ в не́мже днесь лику́я, не забу́ди нас, рабо́в твои́х.

Велича́ем тя,/ святи́телю о́тче Фео́филе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И́же от ю́ности, Богому́дре, возсле́дуя Христу́,/ во бде́ниих и в поще́ниих пребыва́я,/ и па́ству, от Бо́га дарова́нную ти, до́бре пасы́й,/ и уче́ний Боже́ственных исполня́я, и в жи́зненный путь наставля́я;/ отну́дуже и архиере́йства са́ном почте́ся,/ Це́рковь и лю́ди возвесели́л еси́;/ и по преставле́нии свое́м чу́дес лучи́ испуща́еши,/ неду́гом с ве́рою приходя́щим к тебе́ исцеле́ние подая́,/ и сле́пу младе́нцу свет дарова́,/ уго́дниче Христо́в, святи́телю Анто́ние,/ предстоя́ престо́лу Христо́ву с ли́ки а́нгельскими,/ с ни́миже моли́ Его́ о нас, притека́ющих к тебе́,/ получи́ти от Него́ оставле́ние грехо́в и ве́лию ми́лость.

Возвесели́ся Христо́ва Честна́я Це́рковь,/ прии́мши тя в не́дра своя́ па́стыря и учи́теля;/ мы же, ве́рнии лю́дие, прославля́ем Пода́вшаго ти благода́ть неоску́дну,/ я́же твори́ши пресла́вная чудеса́./ Тем, святи́телю, не преста́й моля́ Христа́, Ему́же угоди́л еси́,/ о нас хва́лящих и чту́щих тя, к тебе́ притека́ющих,/ пода́ти ми́лость зде и в день су́дный, да зове́м ти:/ ра́дуйся, святи́телю Анто́ние, гра́ду на́шему похвала́ и утвержде́ние.

Велича́ем тя,/ святи́телю о́тче Анто́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Призира́яй на зе́млю и творя́й ю́ трясти́ся,/ изба́ви ны стра́шнаго тру́са преще́ния, Христе́ Бо́же наш,/ и низпосли́ нам бога́тыя ми́лости Твоя́,/ моли́твами Богоро́дицы, и спаси́ ны.

Изба́ви тру́са тя́жкаго всех нас, Го́споди,/ и я́звы нестерпи́мыя, грех ра́ди на́ших./ Пощади́, Го́споди, лю́ди Твоя́,/ я́же стяжа́л еси́ Твое́ю Кро́вию, Влады́ко,/ и град не преда́ждь в поги́бель тру́сом стра́шным,/ ина́го бо ра́зве Тебе́ Бо́га не ве́мы,/ и воззови́ пою́щим:/ Аз есмь с ва́ми, и никто́же на вы.

27/9 Мученика Нестора Солунского (ок. 306). Преподобного Нестора Летописца, Печерского, в Ближних пещерах почивающего (1114). Обретение мощей благоверного князя Андрея Смоленского в Переславле-Залесском (1539).

Му́ченик Твой, Го́споди... (общий мученику).

Страда́льчествовав до́бре, безсме́ртную сла́ву насле́довал еси́ ны́не,/ я́ко во́ин изря́дный Влады́ки был еси́, моли́твами Дими́трия му́ченика;/ с ним у́бо, Не́сторе му́дре, моля́ не преста́й о всех нас.

Благоче́стия непобеди́маго во́ина/ и и́стине согла́сника и ору́жника/ вси по достоя́нию восхва́лим Не́стора вели́каго днесь/ и к нему́ возопие́м:/ моли́ Христа́ Бо́га о всех нас.

Велича́ем тя,/ страстоте́рпче святы́й Не́сторе,/ и чтим честна́я страда́ния твоя́,/ я́же за Христа́/ претерпе́л еси́.

Вели́ких князе́й ру́сских дея́ния/ и преподо́бных оте́ц Пече́рских жития́ и чудеса́ написа́вый,/ свое́ же, Богому́дре Не́сторе, мно́гих ти ра́ди доброде́телей и́мя/ напи́сано на Небеси́ стяжа́вый,/ моли́ и нам написа́тися в Кни́ги Живо́тныя.

Времена́ и ле́та достопа́мятных дея́ний,/ по́двиги и труды́ Богоно́сных оте́ц,/ Не́сторе прему́дре, напису́я,/ любо́вию возгоре́лся еси́ после́довати стопа́м первонача́льных,/ с ни́миже не преста́й моли́тися Христу́ Бо́гу/ спасти́ся душа́м на́шим.

Я́ко сый Богоно́снаго Феодо́сия учени́к,/ и и́стинный жития́ того́ подража́тель,/ пе́рвый честны́х его́ моще́й самови́дец бы́ти сподо́бился еси́,/ я́же с про́чими святоле́пно прене́с,/ насле́дил еси́ с те́миже Ца́рство Небе́сное,/ е́же получи́те и нам, чту́щим тя, Го́сподеви мо́лимся.

Ублажа́ем тя,/ преподо́бие о́тче Не́сторе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Блаже́нство Ева́нгельское возлюби́в,/ Богому́дре кня́же Андре́е,/ чистоту́ се́рдца де́вством почти́л еси́,/ и суету́ ми́ра сего́ презре́в,/ устреми́лся еси́ зре́ти Бо́га,/ И́же тя просла́ви чудесы́/ во врачева́нии разли́чие стра́ждущих./ Сего́ ра́ди мо́лим тя:/ проси́ нам у Христа́ Го́спода/ от вся́ких скорбе́й избавле́ния/ и получе́ния Ца́рствия Небе́снаго.

Град твой Смоле́нск, я́ко чужд, име́я,/ водвори́лся еси́ во град Переясла́вль,/ и в дому́ святи́теля Никола́я/ жесто́ким житие́м вре́менную жизнь соверши́в,/ восте́кл еси́ в го́рняя предстоя́ти Христу́;/ Его́же моли́ о творя́щих па́мять твою́,/ да вси вопие́м ти:/ ра́дуйся, свя́те кня́же Андре́е,/ а́нгелом собесе́дниче и челове́ком помо́щниче.

Возвы́сився на доброде́тель/ и, очи́стив ум свой, к жела́нию прекра́сному дости́гл еси́,/ безстра́стием украси́вся свои́м поще́нием изря́дно,/ в моли́твах безпло́тно вознесе́ся/ и возсия́ в ми́ре, я́ко со́лнце, во гра́де Переясла́вле,/ о́тче преблаже́нне, свя́те кня́же Андре́е Смоле́нский,/ моли́ спасти́ся душа́м на́шим.

Насажде́н во дво́рех Госпо́дних/ свои́ми преподо́бными де́тельми,/ в дому́ свята́го чудотво́рца Никола́я/ кра́сно процве́л еси́,/ ми́ра красоту́ и сла́ву сего́ све́та нивочто́ вмени́в,/ еди́наго Христа́ возлюби́л еси́;/ слез твои́х тече́нием напая́ем,/ уязви́лся еси́ жела́нием бу́дущих даро́в./ Те́мже зове́м ти:/ ра́дуйся, свя́те кня́же Андре́е Смоле́нский,/ гра́ду Переясла́влю похвале́/ и всей Росси́йстей земли́ вели́кое утвержде́ние.

Ублажа́ем тя,/ благове́рный кня́же Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

28/10 Мученицы Параскевы, нареченной Пятницы (III). Мучеников Терентия и Неониллы и семи чад их (249–250). Преподобного Стефана Савваита,творца канонов (IX). Святителя Арсения I, архиепископа Сербского (1266). Преподобного Иова, игумена Почаевского (1651). Святителя Димитрия, митрополита Ростовского (1709). Преподобного Нестора, некнижного, Печерского, в Дальних пещерах почивающего (XIV).

Прему́драя и всехва́льная Христо́ва му́ченица Параске́ва,/ му́жескую кре́пость прии́мши,/ же́нскую же не́мощь отве́ргши,/ диа́вола победи́, и мучи́теля посрами́,/ вопию́щи и глаго́лющи:/ прииди́те, те́ло мое́ мече́м ссецы́те, и огне́м сожги́те,/ аз бо, ра́дующися, иду́ ко Христу́, Жениху́ моему́/ Тоя́ моли́твами, Христе́ Бо́же, спаси́ ду́ши на́ша.

И́же ве́руя, и му́жеством душе́вным, тезоимени́тне,/ диа́вола посрами́ла еси́/ и мучи́тельское преще́ние и ра́ны до́блественне победи́ла еси́,/ му́ченице Параске́во, вопия́:/ мече́м сосеца́йте и огне́м сожиза́йте те́ло мое́,/ я́ко да, ра́дуяся, прииду́ Жениху́ моему́ Христу́ Бо́гу./ Его́же моли́ спасти́ся душа́м на́шим.

Всесвято́е и непоро́чное муче́ние прине́сши,/ я́ко ве́но* пречестно́е безсме́ртному Жениху́ Христу́/ а́нгельское ликостоя́ние возвесели́ла еси́,/ и победи́ла еси́ де́монския ко́зни;/ сего́ ра́ди тя че́стно ве́рою чтим,/ му́ченице Параске́во, многострада́льная.

Велича́ем тя,/ страстоте́рпице Христо́ва Параске́во,/ и чтим честно́е страда́ние твое́,/ е́же за Христа́/ претерпе́ла еси́.

Му́ченицы Твои́, Го́споди... (общий мученикам).

Му́ченическая честна́я па́мять прии́де днесь, веселя́щи вся́ческая,/ Тере́нтия прему́драго и подру́жии его́./ Те́пле у́бо стеце́мся, да прии́мем исцеле́ние,/ си́и бо благода́ть прия́ша от Ду́ха Свята́го,/ исцеля́ти неду́ги и боле́зни душ на́ших.

Велича́ем вас,/ страстоте́рпцы святи́и Тере́нтие и Неони́лле со ча́дами,/ и чтим честна́я страда́ния ва́ша,/ я́же за Христа́/ претерпе́ли есте́.

Правосла́вия наста́вниче... (общий исповеднику).

Воздержа́нием житие́ украси́ и стра́сти умертви́в,/ посрами́л еси́ вра́жия прило́ги, о́тче Стефа́не,/ и приложи́ся к Бо́гу, чудотво́рец показа́ся,/ в ве́чней сла́ве со а́нгелы лику́я,/ с ни́ми же моли́ поми́ловати ду́ши на́ша.

Насади́л еси́ доброде́телей рай,/ и напои́л еси́ то́ками слез твои́х,/ я́ко жи́зни, всесла́вне, дре́во получи́в,/ спаси́ моли́твами твои́ми от тли ста́до твое́,/ изба́ви от обстоя́ний те́пле чту́щих тя, Стефа́не,/ тя бо предста́теля велича́йша, му́дре,/ вси ве́рою и любо́вию стяжа́хом.

Ублажа́ем тя,/ преподо́бне о́тче Стефа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ми́лости наста́вниче, и благоутро́бия сокро́вище,/ е́же всем отве́рзл еси́,/ правове́рия учи́телю, и архиере́ев Боже́ственное удобре́ние,/ о́тче наш иера́рше Арсе́ние,/ ни́щих был еси́ засту́пник./ Тем моли́ Христа́ Бо́га,/ просвети́ти ду́ши на́ша, да не когда́ у́снем в смерть.

В пи́щи слове́с твои́х, Богоно́се Арсе́ние,/ разу́мно ча́да твоя́ пита́я,/ язы́ком хваля́, устна́ми же пе́ние принося́, веща́нием зовы́й:/ Христе́, Ты еси Свет неизрече́нный.

Велича́ем тя,/ святи́телю о́тче Арсе́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́лся,/ тех имена́ досто́йно прия́ти сподо́бился еси́,/ и и́стинныя ве́ры был еси́ пропове́дник безбоя́знен;/ те́мже мона́хов мно́жества ко Христу́ приве́л еси́,/ и вся лю́ди в Правосла́вии утверди́л еси́,/ И́ове преподо́бие о́тче наш,/ моли́ спасти́ся душа́м на́шим.

Возложи́в на ся и́го Христо́во от ю́ности,/ преподо́бие о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели У́горницкой/ и на о́строве Дубе́нстем,/ и прите́кл к горе́ Поча́евской,/ знамена́нней цельбоно́сною стопо́ю Пресвяты́я Богоро́дицы,/ в те́сной пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́лся,/ му́жественно потруди́лся еси́/ на по́льзу оби́тели твоея́,/ ку́пно же и проти́ву враго́в Правосла́вия/ и благоче́стия христиа́нскаго,/ и наста́вив сицево́му ополче́нию и́ночествующих,/ победи́тели тех предста́вил еси́ своему́ Влады́це и Бо́гу./ Того́ моли́ спасти́ся душа́м на́шим.

Яви́лся еси́ и́стинныя ве́ры столп,/ Ева́нгельских же за́поведей ревни́тель,/ горды́ни обличе́ние, смире́нным же предста́тель и науче́ние;/ те́мже и ублажа́ющим тя грехо́в отпуще́ние испроси́,/ и оби́тель твою́ невреди́му сохрани́,/ И́ове о́тче наш,/ многострада́льному подо́бный.

Возсия́ от спу́да земна́го благода́тная луча́ честны́х моще́й твои́х,/ уго́дниче Бо́жий,/ я́же благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́нии, моли́твах и труде́х свя́то потруди́лся еси́,/ и те́ми те́ло твое́ увяди́л еси́./ Ны́не же прише́д к Бо́гу в безмяте́жный и ве́чный поко́й,/ мо́лишися о всех, с ве́рою к тебе́ прибега́ющих./ Те́мже благода́рне вопие́м ти:/ ра́дуйся, о́тче Йове, пресла́вный уго́дниче Бо́жий/ и оби́тели Поча́евския украше́ние.

Ублажа́ем тя,/ преподо́бне о́тче Йове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Правосла́вия ревни́телю, и раско́ла искорени́телю,/ Росси́йский целе́бниче, и но́вый к Бо́гу моли́твенниче,/ списа́ньми твои́ми бу́их уцелому́дрил еси́;/ цевни́це духо́вная, Дими́трие блаже́нне,/ моли́ Христа́ Бо́га спасти́ся душа́м на́шим.

Звезду́ Росси́йскую от Ки́ева возсия́вшую,/ и чрез Но́вград Се́верский в Росто́в дости́гшую,/ всю же страну́ сию́ уче́ньми и чудесы́ озари́вшую,/ ублажи́м златослове́снаго учи́теля Дими́трия,/ той бо всем вся написа́, я́же к наставле́нию,/ да всех приобря́щет, я́коже Па́вел Христу́,/ и спасе́т правове́рием ду́ши на́ша.

Велича́ем тя,/ святи́телю о́тче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Чист и прав сый се́рдцем,/ и свят, преподо́бне Не́сторе, душе́ю,/ прост же па́ки и не уме́я сам чести́ кни́ги,/ сего́ ра́ди чту́щим я приле́жно внима́л еси́,/ и, о́ная в себе́ соблюда́я, спе́шно тща́лся еси́ исправля́ти,/ я́же я́ко разу́мен испо́лнив, обре́л еси́ Ца́рствие Небе́сное.

Ди́вный во святы́х Свои́х Госпо́дь/ удиви́ся изря́дне в сем святе́м Не́сторе,/ я́же а́ще и безкни́жен сый и прост,/ но превзы́де прему́дрых и посрами́ кни́жников,/ чту́щих и не творя́щих,/ насле́ди бла́га ве́чныя/ и мо́лит при́сно е́же спасти́ся нам.

Ублажа́ем тя,/ преподо́бне о́тче Не́сторе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

29/11 Преподобномученицы Анастасии Римляныни (III). Преподобного Аврамия затворника (Хиданского) (ок. 360). Преподобного Аврамия, затворника Печерского, в Ближних пещерах почивающего (XII-XIII). Преподобного Феодосия Сийского (1687). Преподобного Аврамия, архимандрита Ростовского (1073–1077).

Агница Твоя́, Иису́се... (общий преподобномученице).

Де́вства вода́ми очище́нна, преподо́бная,/ му́ченичества кровьми́, Анастаси́е, венча́вшися,/ подае́ши су́щим в ну́ждах неду́гов исцеле́ние и спасе́ние, приступа́ющим от се́рдца,/ кре́пость бо тебе́ подае́т Христо́с,/ источа́яй благода́ть приснотеку́щую.

Велича́ем тя,/ страстоте́рпице свята́я Анастаси́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ве́лия ве́ры исправле́ния*,/ в пеще́рнем затво́ре, я́ко на воде́ упокое́ния,/ преподо́бие о́тче Авра́мие, ра́довался еси́,/ огне́м бо любве́ Боже́ственным распаля́ем,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́,/ того́ моли́твами, Христе́ Бо́же, спаси́ ду́ши на́ша.

Во пло́ти я́ко а́нгел на земли́ яви́лся еси́,/ и поще́нием был еси́ я́ко дре́во насажде́нное,/ водо́ю воздержа́ния до́бре возрасти́вся,/ и тече́ньми твои́х слез скве́рну омы́в;/ сего́ ра́ди яви́лся еси́ прия́телище Боже́ственное, Авра́мие, Ду́ха.

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В тебе́, о́тче... (общий преподобному).

Во пло́ти, я́ко а́нгел, на земли́ яви́лся еси́,/ и поще́нием был еси́, я́ко дре́во насажде́нное,/ водо́ю воздержа́ния до́бре возрасти́вся,/ и тече́ньми твои́х слез скве́рну омы́в,/ сего́ ра́ди яви́лся еси́ прия́телище Боже́ственное, Авраа́мие, Ду́ха.

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Просвети́вся Боже́ственною благода́тию,/ неве́рныя лю́ди наста́вил еси́ к све́ту Богоразу́мия,/ и по сме́рти сия́я све́тлостию жития́ твоего́,/ источа́вши исцеле́ния притека́ющим с ве́рою к тебе́,/ Авра́мие о́тче наш,/ Христа́ Бо́га моли́ дарова́ти нам ве́лию ми́лость.

И́го Христо́во прие́м, Авра́мие,/ и Того́ крест на ра́мо взем,/ после́довал еси́ Ему́,/ насажде́н быв в дому́ Госпо́дни,/ и процве́л еси́ я́ко фи́никс, и я́ко кедр, и́же в Лива́не,/ умно́жил еси́ ча́да твоя́, муж жела́ний духо́вных,/ от возлю́бленнаго же апо́стола Иоа́нна Богосло́ва благода́ть восприи́м,/ жезло́м сокруши́л еси́ и́дола,/ и рассы́пал еси́ его́ я́ко прах,/ и чудотво́рец у́бо ве́лий яви́лся еси́, преподо́бие./ Те́мже Христа́ Бо́га моли́/ непреста́нно о всех нас.

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

По́двигом до́брым подвиза́вся от ю́ности твоея́, преподо́бие Феодо́сие,/ мирску́ю суе́ту отве́ргл еси́,/ де́вство же и целому́дрие возлюби́л еси́ Ца́рствия ра́ди Небе́снаго,/ вина́ и упоя́ющаго пития́ до кончи́ны не вкуси́вый,/ Еди́наго Бо́га взыску́я,/ пусты́ню пречу́днаго отца́ Анто́ния дости́гл еси́/ и в ней во смиренному́дрии и слеза́х все житие́ препроводи́л еси́,/ о́ного житию́ подо́бяся/ и во всем быв о́браз доброде́телей твои́м ученико́м./ И ны́не в Го́рния оби́тели пресели́вся,/ Святе́й Тро́ице предстои́ши,/ помина́й нас, чад твои́х, Пресвяте́й Тро́ице моля́ся,/ от вся́ких бед и скорбе́й изба́вити и спасти́ ду́ши на́ша.

От ю́ности твоея́, преподо́бне, Го́сподеви возложи́в вся,/ плотска́я мудрова́ния воздержа́нием увя́дил еси́,/ в поста́х, моли́твах о́браз быв твои́м ученико́м,/ доброде́тели Богому́драго Анто́ния насле́довав,/ и того́ оби́тель измла́да дости́гл еси́,/ и в ней трудолю́бие свою́ жизнь препроводи́л еси́ в терпе́нии мно́зе,/ и ны́не со все́ми святы́ми Святе́й Тро́ице предстои́ши,/ помина́й нас, чту́щих всечестну́ю па́мять твою́,/ да вси велегла́сно вопие́м ти:/ ра́дуйся, досточу́дне Феодо́сие, наста́вниче духо́вный.

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/12 Священномученика Зиновия, епископа Егейского, и сестры его мученицы Зиновии (285). Святого Стефана Милютина, короля Сербского (1320), брата его Драгутина (1316) и матери их Елены (1306). Численской и Озерянской (XVI) икон Божией Матери.

Му́ченицы Твои́, Го́споди... (общий мученикам).

И́стины свиде́тели, и благоче́стия пропове́дники,/ дво́ицу досто́йно почти́м в Богодухнове́нных пе́снех,/ Зино́вия вку́пе с му́дрою Зинови́ею,/ ку́пно жи́вшия и отше́дшия,/ и муче́нием прии́мшия вене́ц нетле́нный.

Велича́ем вас,/ страстоте́рпцы святи́и Зино́вий и Зинови́я,/ и чтим честна́я страда́ния ва́ша,/ я́же за Христа́/ претерпе́ли есте́.

Ты на земли́ вседу́шно Христа́ возлюби́в/ и Того́ за́поведи соблюда́я,/ я́ко река́, благоутро́бием изсо́хших нището́ю бога́тно напои́л еси́/ и лю́ди своя́ снабде́л* еси́,/ и ра́ка моще́й твои́х благоуха́ния цельбы́ всем подае́т./ Сего́ ра́ди, свя́те, мо́лим тя,/ изпроси́ душа́м на́шим ве́лию ми́лость.

Боже́ственнаго стра́ха огне́м ду́шу свою́ распали́л,/ очи́стився покая́нием и украси́вся кро́тостию и смире́нием,/ восте́кл еси́ к Невече́рнему Све́ту – Христу́, преподо́бие о́тче Феокти́сте,/ и ны́не, трисо́лнечным све́том озаря́емь, на Небеси́ лику́еши,/ моли́ о нас,/ ве́рою почита́ющих честну́ю па́мять твою́.

Яви́лся еси́ от ко́рене блага́го/ о́трасль пресла́вная оте́честву своему́ и прароди́телем свои́м,/ новообра́зен подо́бник быва́вши/ и лю́дем свои́м явля́ешися утварь прекра́сная.

Твоего́ предста́тельства увере́ние/ и милосе́рдия Твоего́ явле́ние/ ико́на Озеря́нская нам, Влады́чице, показа́ся,/ пред не́юже ду́ши на́ша в моли́тве излива́ем/ и ве́рою Тебе́ вопие́м:/ воззри́, Милосе́рдая, на лю́ди Твоя́,/ вся ско́рби на́ша и печа́ли утоли́,/ утеше́ние благо́е в сердца́ на́ша низпосли́,/ и спасе́ние ве́чное душа́м на́шим, Пречи́стая, испроси́.

Не отри́ни, о Милосе́рдая Ма́ти,/ слез и воздыха́ний на́ших,/ но проше́ния на́ша ми́лостивно прии́мши,/ пред ико́ною Твое́ю моля́щихся люде́й ве́ру укрепи́,/ умиле́нием сердца́ их испо́лни и крест земна́го жития́ носи́ти им помози́,/ ели́ка бо хо́щеши, мо́жеши.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

31/13 Апостолов от 70-ти Стахия, Амплия, Урвана, Наркисса, Апеллия и Аристовула (I). Мученика Епимаха (ок. 250). Преподобных Спиридона и Никодима, просфорников Печерских, в Ближних пещерах почивающих (XII). Священномученика протоиерея Иоанна Царскосельского, Петроградского (1917). Преподобного Никодима Кожеезерского (1640).

Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст душа́м на́шим.

Я́ко свяще́нная сокро́вища Всесвята́го Ду́ха,/ и Со́лнца сла́вы сия́ния по до́лгу воспои́м му́дрыя апо́столы:/ Апе́ллия, Урва́на же, и Аристову́ла,/ Ампли́я, Нарки́сса и Стахи́я,/ я́же благода́ть собра́ Бо́га на́шего.

Велича́ем вас,/ святи́и апо́столи, Стахи́е, Ампли́е, Урва́не,/ Нарки́ссе, Апе́ллие и Аристову́ле,/ весь мир уче́ньми свои́ми просвети́вшия/ и вся концы́/ ко Христу́ приво́дшия.

Му́ченик Твой, Го́споди... (общий мученику).

Мнообра́зныя ра́ны претерпе́л еси́/ и вене́ц прие́м от Христа́ Бо́га,/ Ему́же о нас моли́ся, блаже́нне Епима́ше,/ ве́рно соверша́ющих па́мять твою́, да спасе́т ду́ши на́ша.

Велича́ем тя,/ страстоте́рпче святы́й Епима́ше,/ и чтим честна́я страда́ния твоя́,/ я́же за Христа́/ претерпе́л еси́.

Хлебы́ прино́сныя рука́ми свои́ми творя́,/ псалмопе́ние непреста́нное усты́ свои́ми,/ я́ко же́ртву хвалы́, приноша́ше Го́сподеви,/ со честны́м Никоди́мом, блаже́нне Спиридо́не,/ с ни́мже моли́ся Христу́ Бо́гу о душа́х на́ших.

Да яви́ши разжже́нную твою́ ко Го́споду любо́вь,/ чу́дне Спиридо́не,/ разже́гшуюся зело́ пещь/ ма́нтиею свое́ю загражда́вши/ и да пока́жеши исто́чник вод дарова́ний Ду́ха в тебе́ живу́щ,/ оде́ждею свое́ю нося́ во́ду,/ угаша́еши пла́мень о́гненный,/ тем, я́ко име́я дерзнове́ние ко Го́споду,/ со блаже́нным Никоди́мом/ моли́ся при́сно о нас, пою́щих тя.

Ублажа́ем вас,/ преподо́бнии отцы́ Спиридо́не и Никоди́ме,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Любо́вию к Бо́гу распаля́емь,/ жизнь свою́ му́ченически за Христа́ и бли́жних положи́л еси́,/ сего́ ра́ди вене́ц пра́вды от Него́ прия́л еси́,/ моля́ Всеблага́го Бо́га,/ священному́чениче Иоа́нне,/ Це́рковь Святу́ю сохрани́ти в ми́ре/ и спасти́ ду́ши на́ша.

Ре́вностно па́стырское служе́ние свое́ исполня́яй,/ ты, я́ко же́ртву благоприя́тную, ду́шу свою́ Бо́гу прине́сл еси́,/ моли́ Христа́ Бо́га,/ о́тче Иоа́нне,/ мир ми́ру дарова́ти/ и душа́м на́шим ве́лию ми́лость.

Велича́ем тя,/ священному́чениче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От Ца́рствующаго гра́да и, я́же в нем, вели́кия оби́тели/ пресе́льник яви́лся еси́/ и промышле́нием Боже́ственнаго Ра́зума окормля́емь,/ к морски́м страна́м устреми́вся,/ всели́лся еси́ в пусты́ню,/ уклоня́яся мирски́я молвы́/ и си́лою Свята́го Ду́ха вооружа́яся,/ кре́стным ору́жием враги́ своя́ прогоня́я,/ посто́м и непреста́нною моли́твою жизнь свою́ соверша́я,/ ревну́я вели́ким отце́м Анто́нию, и Ону́фрию, и Па́влу Фиве́йскому,/ с ни́ми же Го́сподеви моли́ся, о́тче Никоди́ме, спасти́ся душа́м на́шим.

Яко безпло́тен, о́тче, пожи́л еси́ на земли́,/ смире́нием и в я́ме пребыва́нием с моли́твами превознося́щагося врага́ смири́л еси́,/ я́ко крин, вои́стинну процве́л еси́,/ избра́нный кинамо́н*, и высо́кий кипари́с,/ и плодови́тая ма́слина, и фи́никс сла́дкий,/ и кедр благоуха́нный, и валса́м* чи́стый,/ те́рние злостра́стия искорени́л еси́/ и жили́ще Всесвята́го Ду́ха был еси́,/ те́мже помина́й па́мять твою́ днесь пра́зднующих, Никоди́ме чудотво́рче,/ да вси ра́достными гла́сы воспева́ем Христа́ Бо́га на́шего,/ И́же тебе́ дарова́вшаго исцеле́ний благода́ть.

Пусты́ню, я́ко ца́рский черто́г,/ усе́рдно возлюби́л еси́,/ в не́йже и жесто́кое показа́л житие́,/ многоле́тным пребыва́нием очи́стил еси́ ду́шу и ум от страсте́й./ Сего́ ра́ди и Свята́го Ду́ха преди́вное прия́телище был еси́,/ Никоди́ме преподо́бие,/ Его́же де́йствием чудесы́ обогати́л еси́,/ те́мже и мы почита́ем по́двиги твоя́, всеблаже́нне,/ но, я́ко имея́й дерзнове́ние ко Пресвяте́й Тро́ице,/ моли́ся непреста́нно о всех нас.

Укрепля́емь си́лою Креста́ и благода́тию,/ преоби́дев тле́нная и до́лу влеку́щая мудрова́ния, о́тче,/ бесо́в посрами́л еси́,/ к Вы́шнему тече́ние получи́л еси́,/ устреми́лся еси́ в Хозью́гу пусты́ню,/ Пресвяте́й Тро́ице жили́ще был еси́,/ Е́йже предстоя́, моли́ о нас, почита́ющих тя,/ да возопии́м ти:/ ра́дуйся, преблаже́нне Никоди́ме, о́тче наш.

Ублажа́ем тя,/ преподо́бне о́тче Никоди́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

1/14 Бессребреников и чудотворцев Космы и Дамиана Асийских и матери их преподобной Феодотии (III). Священномученика Иоанна епископа и Иакова пресвитера, в Персии пострадавших (ок. 345). Собор всех святых бессребреников24.

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша,/ ту́не прия́сте, ту́не дади́те нам.

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.

Велича́ем вас,/ чудотво́рцы сла́внии Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы ангелом.

Любо́вию к Бо́гу распаля́емь,/ жизнь свою́ му́ченически за Христа́ и бли́жних положи́л еси́,/ сего́ ра́ди вене́ц пра́вды от Него́ прия́л еси́,/ моли́ Всеблага́го Бо́га, священному́чениче Иоа́нне,/ Це́рковь Святу́ю сохрани́ти в ми́ре/ и спасти́ ду́ши на́ша.

Ре́вностно па́стырское служе́ние свое́ исполня́яй,/ ты, я́ко же́ртву благоприя́тную, ду́шу свою́ Бо́гу прине́сл еси́,/ моли́ Христа́ Бо́га,/ о́тче Иоа́нне,/ мир ми́ру дарова́ти/ и душа́м на́шим ве́лию ми́лость.

Велича́ем тя,/ священному́чениче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Святи́и безсре́бреницы и чудотво́рцы,/ посети́те не́мощи на́ша:/ ту́не прия́сте, ту́не дади́те нам.

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии;/ но ва́шим посеще́нием ра́тников де́рзости* низложи́те,/ мир исцеля́юще чудесы́.

Велича́ем вас,/ чудотво́рцы сла́внии (имена),/ и чтим честна́я, страда́ния ва́ша,/ я́же за Христа́/ претерпе́ли есте́.

Велича́ем вас,/ чудотво́рцы сла́внии (имена),/ и чтим святу́ю па́мять ва́шу,/ наста́вницы заблу́ждшим, исцели́тели боля́щим,/ и собесе́дницы а́нгелом.

2/15 Мучеников Акиндина, Пигасия, Аффония, Елпидифора, Анемподиста и иже с ними (ок. 341–345). Шуйской-Смоленской иконы Божией Матери (1654–1655).

Страстоте́рпцы Госпо́дни,/ блаже́нна земля́ напи́вшаяся кровьми́ ва́шими,/ и свя́та селе́ния/ прии́мшая телеса́ ва́ша,/ в три́знищи бо врага́ победи́сте,/ и Христа́ со дерзнове́нием пропове́даете;/ Того́, я́ко Бла́га, моли́те/ спасти́ся, мо́лимся, душа́м на́шим.

Благочести́выя и Богоно́сныя му́ченики,/ я́ко на земли́ оста́вльшия вся,/ прия́л еси́ в наслажде́ние благи́х Твои́х и упокое́ние,/ Акинди́на, Пига́сия, Анемподи́ста,/ с ни́миже Аффо́ниа и Елпидифо́ра же,/ Еди́не Сый Преблаги́й.

Велича́ем вас,/ страстоте́рпцы святи́и Акинди́не, Пига́сие, Аффо́ние, Елпидифо́ре, Анемподи́сте,/ и чтим честна́я страда́ния ва́ша,/ я́же за Христа́/ претерпе́ли есте́.

Я́ко многоце́нное сокро́вище прия́т град Шу́я/ чуде́сно напи́санную ико́ну Твою́,/ Пресвята́я Влады́чице, Де́во Богоро́дице,/ во исцеле́ние лю́тыя я́звы и во утеше́ние правосла́вных Тобо́ю дарова́нную,/ от нея́же исто́чники благода́тныя и до ны́не оби́льно излива́ются./ Проба́ви, Пречи́стая, и на бу́дущее вре́мя ми́лости Твоя́ ве́дущим Тя,/ храни́ град Твой и всю Ру́сскую зе́млю/ и спаса́й люде́й, к Тебе́ с ве́рою и любо́вию притека́ющих.

Всеблага́я и преми́лостивая Засту́пнице ро́да христиа́нскаго,/ Пречи́стая Де́во Богоро́дице,/ припа́дающе пред святы́м и чудотво́рным Твои́м о́бразом,/ и́мже от лю́таго смертоно́сия град Шу́ю дре́вле изба́вила еси́,/ уми́льно взыва́ем Ти:/ не преста́й под кро́вом Своея́ бла́гости/ сохраня́ти от бед и обстоя́ний град Твой/ и вся гра́ды и ве́си страны́ Росси́йския/ и моли́ти Сы́на Твоего́, Христа́ Бо́га на́шего,/ да спасе́т ду́ши на́ша.

Ма́ти Бо́жия Пресвята́я,/ стено́ Христиа́ном, гра́да на́шего Шу́и покро́в и заступле́ние!/ Моли́твы раб Твои́х, ко ико́не Твое́й припа́дающих, приими́,/ во испове́дании Правосла́вныя ве́ры укрепи́,/ от вся́кия напа́сти и беды́ изба́ви,/ ско́рби земны́я на ра́дость преложи́,/ и Сы́на Твоего́ моли́ гра́ду и лю́дем Твои́м в ми́ре спасти́ся.

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я,/ на по́мощь нас, ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

3/16 Мучеников Акепсима епископа, Иосифа пресвитера и Аифала диакона (IV). Обновление храма святого великомученика Георгия, иже в Лидде, ид еже положено есть честное тело его (IV).

Му́ченицы Твои́, Го́споди,/ Акепси́ма, Ио́сиф и Аифа́л,/ во страда́ниих свои́х венцы́ прия́ша нетле́нныя/ от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами спаси́ ду́ши на́ша.

Боже́ственная, му́дре, непоро́чно тайноводи́л еси́,/ же́ртва прия́тна был еси́, Богоблаже́нне,/ Христо́ву бо пил еси́ ча́шу сла́вно, свя́те Акепси́мо/ со страда́льцы твои́ми,/ моля́ся непреста́нно о всех нас.

Велича́ем вас,/ страстоте́рпцы святи́и Акепси́мо, Ио́сифе и Аифа́ле,/ и чтим честна́я страда́ния ва́ша,/ я́же за Христа́/ претерпе́ли есте́.

Ако пле́нных свободи́тель,/ и ни́щих защи́титель,/ немощству́ющих врач,/ победоно́сче великому́чениче Гео́ргие,/ моли́ Христа́ Бо́га спасти́ся душа́м на́шим.

К возбра́нному и ско́рому заступле́нию твоему́ прибе́гше, ве́рнии,/ мо́лим изба́витися, страстоте́рпче Христо́в,/ от собла́зн вра́жиих, воспева́ющим тя,/ и вся́ких бед и озлобле́ний, да зове́м:/ ра́дуйся, му́чениче Гео́ргие.

Велича́ем тя,/ страстоте́рпче святы́й Гео́ргие,/ и чтим честная страда́ния твоя́,/ я́же за Христа́/ претерпе́л еси́.

4/17 Преподобного Иоанникия Великого (846). Преподобного Меркурия Печерского, в Дальних пещерах почивающего (XIV). Блаженного Симона, Христа ради юродивого, Юрьевецкого нового чудотворца (1584). Священноинока Григория. Собор Карельских святых25. Воспоминание освящения храма Святой Софии в Киеве.

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Иоанни́кие о́тче наш,/ моли́ Христа́ Бо́га спасти́ся душа́м на́шим.

Звезда́ яви́лся еси́ всесве́тлая, в ми́ре просвеща́яй,/ и су́щия во мра́це страсте́й облистава́яй;/ врач же крепча́йший яви́лся еси́,/ но я́ко прия́л еси́ благода́ть исцеле́ний,/ прося́щим тя пода́ждь исцеле́ние, да зове́м:/ ра́дуйся, о́тче Иоанни́кие.

Ублажа́ем тя,/ преподо́бие о́тче Иоанни́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Присносу́щныя, блаже́нне, жела́я сподо́битися жи́зни,/ пра́ведне и непоро́чне/ жизнь свою́ препроводи́л еси́ в ны́нешнем ве́це,/ те́мже, Мерку́рие, жела́емаго ты дости́гл,/ моли́ и нам ве́чныя сподо́битися жи́зни.

Преподо́бному во всех де́лех Го́сподеви преи́скренне рабо́тая,/ и О́наго всегда́ в це́ркви преподо́бных Свои́х/ преподо́бным воспева́я гла́сом,/ насле́дил еси́, преподо́бие Мерку́рие, часть преподо́бных,/ с ни́миже моли́ся о всех нас.

Ублажа́ем тя,/ преподо́бие о́тче Мерку́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ако вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ молв некра́домы,/ терпе́нием у́бо пачеесте́ственным Христа́ подража́в,/ посрами́л еси́ льсти́ваго всю горды́ню,/ тем и в лю́тых ра́нах, я́коже дре́вний Ла́зарь,/ в не́дра Авраа́мля пресели́лся еси́,/ иде́же и ны́не утеша́яся, посеща́й град твой,/ почита́ющий любо́вию святу́ю па́мять твою́.

Возгоре́вся раче́нием Го́рним,/ жестость* во́льнаго юро́дства па́че всех сла́дких ми́ра предпоче́л еси́,/ отону́дуже повину́ся ти о́гнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия быти предре́кл еси́,/ просла́вльшу тя та́ко Бо́гу,/ к Нему́же моля́ся и о нас, пою́щих тя,/ блаже́нне Си́моне, помина́й.

Ублажа́ем тя,/ святы́й пра́ведный Си́моне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственную ти ра́ку обстоя́ще, прему́дре,/ зове́м ти, преподо́бне:/ ко Влады́це всех и Зижди́телю моли́ся,/ изба́вити нас от бед,/ и́же ве́рою и любо́вию тебе́/ душа́ми и сердцы́ воспева́юще досто́йно:/ сла́ва ти, преподо́бне всеблаже́нне Григо́рие.

Кондак, глас 8

Го́рдаго врага́ ты низложи́л еси́/ посо́бием держа́вне Боже́ственнаго Ду́ха/ и побе́ду прие́м кре́пце,/ му́ченическим одея́вся неувяда́емым венце́м свы́ше, Богому́дре, всеблаже́нне,/сего́ же ра́ди зове́м ти:/ ра́дуйся, о́тче Григо́рие.

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

5/18 Мучеников Галактиона и Епистимии (III). Святителя Ионы, архиепископа Новгородского (1470).

Му́ченицы Твои́, Го́споди... (общий мученикам).

Му́ченик Христо́вых полко́м причто́стеся,/ до́бре хра́брствовавшим,/ све́тло подвиза́вшеся, Галактио́не сла́вне,/ с честно́ю супру́жницею и сострада́вшею тебе́ Еписти́миею,/ Еди́ному Бо́гу непреста́нно моли́теся о всех нас.

Велича́ем вас,/ страстоте́рпцы святи́и Галактио́не и Еписти́мие,/ и чтим честна́я страда́ния ва́ша,/ я́же за Христа́/ претерпе́ли есте́.

Исправле́ние* ве́ры, и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши./ И сего́ ра́ди к тебе́ любо́вию прибега́ем и ве́рно вопие́м:/ предста́ни в по́мощь воспева́ющим па́мять твою́ светоно́сную, о́тче Ио́но,/ и моли́ спасти́ся душа́м на́шим.

Свы́ше прия́л еси́ Боже́ственную благода́ть,/ хода́тайствовати Бо́гу и челове́ком,/ я́ко архиере́й возноше́ние вознося́,/ и мир лю́дем твои́м снося́,/ и оби́лие плодо́в, Ио́но блаже́нне,/ ты бо еси́ Вели́каго Нова́града похвала́,/ и су́щих о нем ра́дость.

Велича́ем тя,/ святи́телю о́тче Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

6/19 Святителя Павла, патриарха Константинопольского, исповедника (350). Преставление преподобного Варлаама Хутынского, Новгородского чудотворца (1192). Святителя Германа, архиепископа Казанского и Свияжского (1567). Преподобного Варлаама Керетского (XVI).

Боже́ственныя ве́ры испове́данием,/ друга́го Па́вла тя Це́рковь ревни́теля во свяще́нницех показа́,/ свозопие́т ти и Авель ко Го́споду,/ и Заха́риина кровь пра́ведная,/ о́тче преподо́бне, Христа́ Бо́га моли́/ дарова́тися нам ве́лией ми́лости.

Облиста́вый на земли́, я́ко звезда́ Небосве́тлая,/ Кафоли́ческую просвеща́еши Це́рковь ны́не,/ о не́йже страда́льчествовал еси́,/ ду́шу твою́, Па́вле, предложи́в:/ и я́коже Заха́риина и Авелева,/ я́сно вопие́т твоя́ кровь ко Го́споду.

Велича́ем тя,/ святи́телю о́тче Па́вле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И́же на земли́ лега́нием*,/ поще́нием же и бде́нием/ те́ло твое́ изнуря́я, преподо́бне,/ вся плотска́я мудрова́ния умертви́л еси́,/ и исцеле́ний струя́ незави́стная яви́лся еси́,/ притека́ющим ве́рою к тебе́, Варлаа́ме о́тче наш,/ моли́ Христа́ Бо́га спасти́ся душа́м на́шим.

Богодухо́вныя благода́ти испо́лнився/ и разже́гся любо́вию Животворя́щия Тро́ицы,/ млад яви́ся Бо́гу угожда́яй,/ ревну́я святы́м отце́м преподо́бным,/ вели́кия труды́ возлюби́в,/ и поне́сл еси, и де́монския посрами́в, мно́жества низложи́л еси́,/ и преста́вися в ве́чный поко́й,/ и ны́не подае́ши прося́щим неоску́дное исцеле́ние,/ исцеля́я многоразли́чныя неду́ги,/ мо́лимтися, святы́й преподо́бне о́тче Варлаа́ме,/ непреста́нно моли́ся ко Го́споду о душа́х на́ших.

Я́коже други́й Илия́, о́тче, дождь с небесе́ свел еси́,/ он у́бо огнь сведе́, и царя́ удиви́,/ ты же лю́ди твоя́ возвесели́л еси́,/ и торжествова́ти устро́ил еси́./ Вели́кий бо Но́вград вельми́ тобо́ю хва́лится,/ име́я мо́щи твоя́ в себе́,/ его́же сохраня́й от враг непоколеби́ма, да зове́м ти:/ ра́дуйся, преподо́бне Варлаа́ме, о́тче наш.

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же, я́ко первонача́льник/ созда́нныя тобо́ю в гра́де Свия́жске оби́тели,/ и досто́йный первосвяти́телю прее́мник яви́лся еси́./ Ду́хом предстоя́ престо́лу Влады́чню,/ моли́ся, святи́телю Ге́рмане, со святи́телем Гу́рием,/ правосла́вней па́стве во благоче́стии преспева́ти,/ и тьме инове́рия све́том ве́ры разгна́тися.

Я́ко вели́ким па́стырем единонра́вна/ и учи́телем вселе́нныя единомы́сленна,/ Це́ркве Бо́жия служи́теля усе́рдна/ и строи́теля Та́ин Христо́вых благогове́йна,/ сте́кшеся, благове́рнии лю́дие,/ Свия́жския оби́тели богому́драго основа́теля/ и каза́нския новопросвеще́нныя па́ствы святи́теля Ге́рмана/ пе́сньми и пе́нии восхва́лим, глаго́люще:/ не преста́й присеща́ти моли́твами твои́ми на оби́тель и на всю па́ству твою́,/ и оби́тель во святы́ни, па́ству же в ве́ре и благоче́стии блюди́ невреди́мо.

До́блестьми преподо́бня и пра́вды/ вруче́нное тебе́ слове́сное ста́до озаря́я,/ и на зла́чных Сло́ва Христо́ва па́житех пита́я,/ на пра́вый путь за́поведей Госпо́дних/ си́лою ду́ха твоего́ наставля́л еси́ е́./ Те́мже и ны́не, осеня́емии цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

Бо́дрствуя в моли́твах,/ послуша́ния до́брый рачи́тель быв,/ в терпе́нии стяжа́л еси́ ду́шу твою́,/ де́лы смиренному́дрия и кро́тости изря́дствуя,/ престо́л святи́тельства благове́рием и благоче́стием украси́л еси́,/ о́тче священнонача́льниче Ге́рмане,/ моли́ Христа́ Бо́га об оби́тели и о всем ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем све́тлое украше́ние.

Велича́ем тя,/ святи́телю о́тче Ге́рмане,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственною свы́ше просвети́вся благода́тию, преподо́бне,/ мир оста́вил еси́,/ жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́,/ ева́нгельски Христу́ после́довал еси́,/ и Того́ во всем во́ли повину́лся еси́,/ и весь ра́зум и се́рдце на Него́ неукло́нно возложи́л еси́,/ Христа́ ра́ди и те́ло свое́ изнури́ посто́м и бде́нием, в моли́твах свои́х не усыпа́я,/ Бо́га ми́лостива творя́ и Пречи́стую Богоро́дицу Моле́бницу предлага́я/ и сего́ ра́ди от Бо́га восприе́м си́лу на сопроти́внаго врага́,/ не убоя́ся воздушны́я и морски́я тя́гости и сту́дени, ниже́ уклони́ся,/ и морско́ю пучи́ною в ма́ле лади́ице по вода́м ше́ствие творя́,/ про́тив зе́льнаго обурева́ния пла́ваше,/ промышле́нием Боже́ственнаго Ра́зума направля́ем,/ и о́коло Свята́го Но́са непроходи́мый путь морски́й/ от ядови́таго че́рвия/ благопрохо́ден челове́ком без вреда́ сотвори́л еси́ моли́твами свои́ми,/ и мно́гим терпе́нием во вре́менней жи́зни по́двиг соверши́л еси́,/ и равноа́нгельное житие́ пожи́в,/ те́мже и по преставле́нии источа́еши чуде́с благода́ть,/ и́же ве́рою приходя́ще к тебе́, Варлаа́ме преблаже́нне о́тче наш,/ вопие́м ти: моли́ Христа́ Бо́га,/ да спасе́т ду́ши на́ша.

Все у́мное свое́ жела́ние к Бо́гу впери́в/ и Тому́ невозвра́тно от души́ после́довал еси́,/ и жите́йския молвы́ отри́нув,/ в моли́твах и слеза́х и злострада́ниих плоть свою́ изнуря́я,/ до́бре подвиза́вся проти́ву неви́димаго врага́ ко́знем/ и победи́в я́, веселя́ся преше́л еси́ к Небе́сным черто́гом,/ и ны́не со а́нгелы Святе́й Тро́ице предстоя́,/ отну́дуже и Всеви́дящее Око твоя́ труды́ ви́дев,/ да́ром чуде́с по преставле́нии обогати́ло тя есть,/ и́же тебе́ ве́рою почита́ющим,/ приходя́щим же, и честны́м моще́м твои́м покланя́ющимся от честна́го ти гро́ба/ исцеле́ние подава́еши неви́димо и мо́лишися непреста́нно,/ сохраня́я оте́чество свое́ и лю́ди/ от враг ви́димых и неви́димых ненаве́тны,/ да вси тебе́ вопие́м:/ преподо́бие о́тче наш Варлаа́ме, Христа́ Бо́га моли́ непреста́нно о всех нас.

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

7/20 Мучеников тридесяти и триех, иже в Мелитине (III). Преподобного Лазаря чудотворца, в Галисийской горе постившегося (1053). Мучеников Авкта, Тавриона и Фессалоникии. Обретение мощей преподобного Кирилла Новоезерского (Новгородского) (1649). Иконы Божией Матери «Взыграние» (1795).

Му́ченицы Твои́, Го́споди... (общий мученикам).

Лик му́ченический я́сен, полк светоно́сен,/ соше́д к нам разу́мно,/ Це́рковь днесь просвети́л есть чу́дными заря́ми;/ те́мже пра́зднующе честну́ю па́мять их,/ про́сим от Тебе́, Спа́се наш:/ тех моли́твами от бед изба́ви нас,/ да пое́м Ти: Аллилу́иа.

Велича́ем вас,/ страстоте́рпцы святи́и три́десять и три Мелити́нстии,/ и чтим честна́я страда́ния ва́ша,/ я́же за Христа́/ претерпе́ли есте́.

Еде́нными моли́твами,/ тече́ньми сле́зными столп омочи́л еси́,/ и из глубины́ воздыха́ньми/ во сто трудо́в уплодоноси́л еси́,/ и был еси́ па́стырь, всем подая́ проще́ние,/ преподо́бне о́тче наш Ла́заре,/ моли́ся Христу́ Бо́гу спасти́ся душа́м на́шим.

Я́ко свети́льника превели́каго,/ Це́рковь Христо́ва сла́вит тя с весе́лием псало́мски,/ те́мже не преста́й моля́ся Христу́,/ да́та всем прегреше́ний проще́ние.

Ублажа́ем тя,/ преподо́бне о́тче Ла́заре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Таврио́н сла́вный и Авкт ди́вный,/ о́гневи проти́вистася и всем и́нем ка́знем,/ моли́твами возмога́юща;/ та́ у́бо моле́нием сердца́ похваля́юще,/ ве́рою пресвяту́ю и честну́ю па́мять е́ю соверши́м,/ душа́м просвеще́ние почерпа́юща.

Свети́льницы све́тлии я́вльшеся... (общий мученикам).

Велича́ем вас,/ страстоте́рпцы святи́и Таврио́не и Авкте,/ и чти́м честна́я страда́ния ва́ша,/ я́же за Христа́/ претерпе́ли есте́.

Я́ко свети́льник яви́лся еси́ всесве́тел/ во ото́це Нова́ е́зера на Кра́сном о́строве,/ преподо́бне о́тче Кири́лле,/ ты бо крест Христо́в на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ от Него́же и си́лами чуде́с обогати́ся,/ тем и мы любе́зно прибега́ем к ра́це честны́х моще́й твои́х, уми́льно глаго́лем:/ о, преподо́бне о́тче Кири́лле,/ моли́ Христа́ Бо́га спасти́ся душа́м на́шим.

Бо́жиим Ду́хом подвиза́емь,/ слез твои́х ту́чами изсо́хшее напои́л еси́,/ и безпло́тное в пусты́ни житие́ показа́л еси́,/ и е́же из глубины́ се́рдца бо́дренными моли́твами и посто́м/ благодея́ния труды́ уплодоноси́л еси́,/ и, вселе́нную всю просвети́л еси́ сия́нием чуде́с твои́х,/ о́тче наш Кири́лле,/ моли́ Христа́ Бо́га спасти́ся душа́м на́шим.

Взбра́нному и кре́пкому адама́нту,/ прогони́телю бесо́в, но́вому чудотво́рцу,/ победи́тельная, страсте́й злых свободи́вшеся,/ благода́рственная воспису́ем ти, о́тче наш Кири́лле,/ но я́ко име́я дерзнове́ние у престо́ла Христо́ва,/ ве́рою чту́щих тя, град же и лю́ди, моли́твою твое́ю сохраня́й:/ ты бо еси́ ста́ду твоему́ похвала́ и утвержде́ние.

Христо́в яре́м на ра́мо взем,/ усе́рдно Тому́ после́дова,/ чистото́ю Бо́гови прибли́жився,/ о́тче преподо́бне Кири́лле,/ мо́лим тя, посеща́й ми́лостивно чад свои́х,/ и моли́ непреста́нно о всех нас.

Ублажа́ем тя,/ преподо́бне о́тче Кири́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

8/21 Собор Архистратига Михаила и прочих Небесных Сил бесплотных. Архангелов: Гавриила, Рафаила, Уриила, Селафиила, Иегудиила, Варахиила и Иеремиила.

Небе́сных во́инств Архистрати́зи,/ мо́лим вас при́сно мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще ны припа́дающия приле́жно и вопию́щия:/ от бед изба́вите ны,/ я́ко чинонача́льницы вы́шних сил.

Архистрати́зи Бо́жии,/ служи́телие Боже́ственныя сла́вы,/ а́нгелов нача́льницы и челове́ков наста́вницы*,/ поле́зное нам проси́те и ве́лию ми́лость,/ я́ко безпло́тных архистрати́зи.

Велича́ем вас/ арха́нгели и а́нгели и вся во́инства,/ херуви́ми и серафи́ми,/ сла́вящия Го́спода.

В Часослове, изданном Киево-Печерской лаврой в 1742 году, на 8 ноября находится следующее величание:

Величае́м тя,/ святы́й арха́нгеле Христо́в Михаи́ле,/ и вас, святы́е а́нгелы, арха́нгелы, нача́ла, вла́сти, си́лы, госпо́дствия, престо́ли, херуви́мы, серафи́мы,/ прославля́ющих Го́спода.

9/22 Мучеников Онисифора и Порфирия (ок. 284–305). Преподобной Матроны (ок. 492). Святителя Нектария, митрополита Пентапольского (1920). Иконы Божией Матери, именуемой «Скоропослушница» (X).

Му́ченицы Твои́, Го́споди... (общий мученикам).

Му́ченик дво́ица, пострада́вше кре́пко,/ вра́жию горды́ню на зе́млю низложи́сте,/ озари́вшеся благода́тию Несозда́нныя Тро́ицы,/ сла́внии Ониси́форе и Порфи́рие,/ моли́теся непреста́нно о всех нас.

Велича́ем вас,/ страстоте́рпцы святи́и Ониси́форе и Порфи́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Мужескому́дренно утаи́вшися вра́жиих лука́вых путе́й, Матро́но,/ к жи́зни вои́стину ше́ствовавши несумне́нною во́лею/ и неукло́нное тече́ние Богому́дро сконча́вши,/ от Христа́ прия́ла еси́ благода́ть духо́вную,/ тем и во́ду цельба́м источа́еши/ любо́вию притека́ющим в па́мять твою́ сла́вную,/ мни́хом* похвала́,/ моли́ Христа́ Бо́га спасти́ся душа́м на́шим.

За любо́вь Госпо́дню, преподо́бная Матро́но,/ поко́я жела́ние возненави́дела еси́,/ поще́нием дух твой просвети́вши,/ но твои́ми моли́твами и проти́вных шата́ния разори́,/ кре́пко бо зве́ри побе́дила еси́.

Ублажа́ем тя,/ преподо́бная ма́ти Матро́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Преподо́бнически пожи́л еси́, я́ко му́дрый иера́рх,/ Некта́рие преподо́бне,/ те́мже Уте́шителя просла́влен си́лою,/ де́моны отго́ниши и боля́щия исцеля́еши,/ ве́рою приходя́щия к Боже́ственным моще́м твои́м.

Боже́ственный Гром, труба́ духо́вная... (общий святителю).

Велича́ем тя,/ святи́телю о́тче Некта́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

К Богоро́дице притеце́м су́щии в беда́х,/ и ко святе́й ико́не Ея́ ны́не припаде́м,/ с ве́рою зову́ще из глубины́ души́:/ ско́ро на́ше услы́ши моле́ние, Де́во,/ я́ко Скоропослу́шница наре́кшаяся,/ Тебе́ бо ра́ди раби́ Твои́ в ну́ждах/ гото́вую Помо́щницу и́мамы.

В мо́ри жите́йстем обурева́емии,/ треволне́нию подпа́даем страсте́й и искуше́ний./ Пода́ждь у́бо нам, Госпоже́, ру́ку по́мощи, я́коже Петро́ви Сын Твой,/ и ускори́ от бед изба́вити ны, да зове́м Ти:/ ра́дуйся, Всеблага́я Скоропослу́шнице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

10/23 Апостолов от 70-ти: Ераста, Олимпа (Олимпана), Родиона, Сосипатра, Куарта (Кварта) и Тертия (I). Мученика Ореста врача (304).

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Боже́ственным све́том ум озари́вше,/ вити́йская плете́ния му́дре разори́сте,/ и язы́ки вся улови́вше, апо́столи сла́внии,/ Влады́це приведо́сте,/ Тро́ицу Боже́ственную сла́вити науча́юще.

Яви́ся днесь апо́стол честно́е торжество́,/ подаю́щее я́ве* всем прегреше́ний оставле́ние,/ соверша́ющим их па́мять.

Велича́ем вас,/ святи́и апо́столи Ера́сте, Оли́мпе, Родио́не, Сосипа́тре, Куа́рте и Те́ртие,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Удо́м усекнове́ние терпе́л еси́/ и о́гненную лю́тую му́ку, му́чениче,/ подви́гся, всесла́вне,/ венце́м я́ве увязе́ся нетле́нным, преблаже́нне,/ Престо́лу же предстои́ши Святы́я Тро́ицы,/ ю́же помоли́, да спасе́т ны,/ му́чениче Оре́сте,/ ве́рою пою́щим тя.

Звезда́ све́тлая яви́лся еси́... (общий мученику).

Велича́ем тя,/ старстоте́рпче святы́й Оре́сте,/ и чтим честна́я страда́ния твоя́,/ я́же за Христа́/ претерпе́л еси́.

11/24 Великомученика Мины (304). Преподобного Феодора Студита, исповедника (826). Мучеников Виктора (II), Викентия (304) и мученицы Стефаниды (II). Блаженного Максима, Христа ради юродивого, Московского чудотворца (1434). Преподобного Мартирия Зеленецкого (1603). Мученика Стефана Деча́нского, Сербского (ок. 1336).

Я́ко безпло́тным собесе́дника/ и страстоте́рпцем единовсе́льника,/ соше́дшеся ве́рою, Ми́но, восхваля́ем тя,/ ми́ра ми́рови испроси́/ и душа́м на́шим ве́лия ми́лости.

Во́инства исхити́ привре́меннаго,/ и нетле́ннаго показа́ тя Небе́снаго о́бщника,/ страстоте́рпче Ми́но, Христо́с Бог наш,/ и́же му́чеников нетле́нный вене́ц.

Велича́ем тя,/ страстоте́рпче святы́й Ми́но,/ и чтим честна́я страда́ния твоя́,/ я́же за Христа́/ претерпе́л еси́.

Правосла́вия наста́вниче,/ благоче́стия учи́телю... (общий преподобноисповеднику).

По́стническое и равноа́нгельное житие́ твое́/ страда́льческими уясни́л еси́ по́двиги,/ и а́нгелом совсе́льник, Богоблаже́нне, яви́лся еси́, Фео́доре,/ с ни́ми Христу́ Бо́гу моля́ся/ не преста́й о всех нас.

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Му́ченицы Твои́, Го́споди... (общий мученикам).

И́же сла́ве, Го́споди и всех Соде́телю,/ Ты в ми́ре яви́л еси́ украше́нных доброде́тельми страстоте́рпцы и му́ченики,/ да и́мут непобеди́мую побе́ду.

Велича́ем вас,/ страстоте́рпцы святи́и Ви́ктор, Вике́нтие и Стефани́до,/ и чтим честна́я страда́ния ва́ша,/ я́же за Христа́/ претерпе́ли есте́.

Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стра́жда со́лнечный ва́р/ и ну́ждныя вели́кия сту́дени,/ мра́за и огня́ не чул еси́,/ Бо́жиею по́мощию покрыва́ем,/ Макси́ме прему́дре./ О ве́рою творя́щих па́мять твою́ че́стно,/ и усе́рдно притека́ющих к ра́це моще́й твои́х,/ моли́ изба́витися от бед/ и паде́ния избежа́ти.

Вы́шния красоты́ жела́я,/ ни́жния сла́дости и теле́сная одея́ния в ничто́же вмени́л еси́,/ и нестяжа́ние па́че су́етнаго ми́ра возлюби́л еси́,/ а́нгельское житие́ проходя́,/ сконча́лся еси́, блаже́нне Макси́ме./ С ни́миже Христа́ моли́ непреста́нно о всех нас.

Ублажа́ем тя,/ святы́й пра́ведный Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности, Богоблаже́нне, Христа́ возлюби́в,/ оте́чество оста́вил еси́,/ и всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси,/ отону́дуже уве́дев непрохо́дную пусты́ню,/ крестови́дною заре́ю пока́занную,/ жела́тельне ю обре́л еси́,/ и в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Не́бо,/ трудолю́бно тща́лся еси́ возводи́ти к Бо́гу./ Ему́же моли́ся, богому́дре Марти́рие,/ дарова́ти душа́м на́шим ве́лию ми́лость.

Оте́чества, преподо́бне, и всего́ мирска́го мяте́жа,/ уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:/ ра́дуйся, о́тче Марти́рие,/ безмо́лвия пусты́ннаго люби́телю.

Ублажа́ем тя,/ преподо́бне о́тче Марти́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В терпе́нии добрострада́льных по́двиг твои́х/ многообра́зныя ра́ны претерпе́л еси́,/ и по кончи́не свое́й/ вене́ц от Бо́га с му́ченическими ли́ки восприе́млеши,/ и в земли́ кро́тких досто́йно водворя́ешися, бла́женне,/ о нас Христа́ Бо́га моли́/ дарова́ти душа́м на́шим ве́лию ми́лость.

Ца́рство, е́же на земли́ до́бре окормля́я, страда́льче,/ и, багряни́цу нося́, смире́нно стяжа́л еси́ мудрова́ние,/ ни́щих посеща́я и сим хлеб раздробля́я*,/ тем Пребоже́ственная Тро́ица/ Ца́рствия ку́пно и му́ченичества венце́м увязе́* тя.

В царе́х благоче́стно пожи́в/ и страда́ния пу́ть проше́д, веледу́шне,/ и страда́льцем равноче́стен вене́чник яви́лся еси́,/ и це́рковь твоя́ прославля́ет тя сла́вно,/ святы́ми благоуха́нными мощми́ твои́ми освяща́ема,/ те́мже почита́ем и та́йно вопие́м ти:/ от бед изба́ви нас моли́твами твои́ми, свя́те.

Друга́го Константи́на стяжа́ тя Це́рковь благоче́стием, блаже́нне,/ и кро́тостию, пра́вдою и ми́лостынями,/ но и великому́ченика и страда́льца и́стинна./ Те́мже и, тобо́ю кра́сящися, вопие́т:/ Стефа́н мне похвала́ и утвержде́ние.

Велича́ем тя,/ святы́й пра́ведный царю́ Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

12/25 Святителя Иоанна Милостивого, патриарха Александрийского (620). Преподобного Нила постника (V). Блаженного Иоанна Власатого, Ростовского (1580). Преподобного Нила Мироточивого, Афонского (XVII). Иконы Божией Матери «Милостивая».

В терпе́нии твое́м стяжа́л еси́ мзду* твою́, о́тче преподо́бне,/ в моли́твах непреста́нно терпе́вый,/ ни́щия возлюби́вый и сия́ удовли́вый*./ Но моли́ся Христу́ Бо́гу, Иоа́нне ми́лостиве блаже́нне,/ спасти́ся душа́м на́шим.

Бога́тство твое́ расточи́л еси́ убо́гим,/ и небе́сное бога́тство ны́не восприя́л еси́,/ Иоа́нне всему́дре;/ сего́ ра́ди вси тя почита́ем,/ соверша́юще па́мять твою́,/ ми́лостыни о тезоимени́те!

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Ни́ле о́тче наш,/ моли́ Христа́ Бо́га спасти́ся душа́м на́шим.

Хвра́стная* страсте́й, я́же от телесе́ воста́ния,/ сечи́тельно*, Ни́ле блаже́нне, во бде́нной твое́й ссекл еси́ моли́тве,/ но, я́ко име́я дерзнове́ние ко Го́споду,/ от вся́ких мя бед свободи́, да зову́ ти:/ ра́дуйся, о́тче всеми́рный.

Боже́ственною любо́вию возгоре́вся, всеблаже́нне,/ оста́вил еси́ и́же в житии́ молвы́/ и по́стных сели́тву* в горе́ стяжа́,/ от нея́же, вшед в мрак незахо́дный,/ прие́млеши, я́ко дре́вле Богоно́сец, Богоначе́ртанная писмена́,/ и́миже к Боже́ственней доброде́тели наставля́еми, ве́село вопие́м ти:/ ра́дуйся, о́тче Ни́ле, по́стником добротворе́ние.

Ублажа́ем тя,/ преподо́бие о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Яви́лся еси́ во гра́де, я́ко в пусты́ни,/ во смиренному́дрии, чистоте́ и в труде́х, и по́двизех, и в терпе́нии мно́зе,/ преблаже́нне о́тче Иоа́нне./ Взем бо крест Христо́в, после́довал Ему́/ и в моли́твах и в псалмопе́нии день и нощь пребыва́л еси́,/ о спасе́нии всего́ ми́ра и ро́да христиа́нскаго иноязы́чная* рече́ния глаго́ля./ Ны́не же, по преселе́нии твое́м к Невече́рнему Све́ту, ко гро́бу твоему́ притека́юще,/ ве́рнии мо́лятся Го́сподеви, Богоро́дице и Предте́чи, и прие́млют от Го́спода исцеле́ния моли́твами твои́ми./ При́сно за ны моли́ся, блаже́нне о́тче Иоа́нне, спасти́ся душа́м на́шим.

Яви́лся еси́ во гра́де, я́ко в пусты́ни,/ смиренному́дрием и чистото́ю,/ и взем крест Христо́в, после́довал Ему́/ в труде́х и по́двизех, и в терпе́нии мно́зе, преблаже́нне о́тче Иоа́нне./ И ны́не моли́ о нас, соверша́ющих па́мять твою́/ и усе́рдно притека́ющих к ра́це моще́й твои́х,/ изба́витися от бед и душа́м на́шим пода́ти ве́лию ми́лость.

Христо́вою любо́вию уязви́ся, о́тче Иоа́нне блаже́нне,/ вы́шния красоты́ жела́я,/ земна́я же презре́ и нивочто́же вмени́,/ и на земли́ а́нгельское житие́ препроводи́,/ в ве́чный поко́й дости́же,/ иде́же глас пра́зднующих,/ с ни́миже моли́ся за ны,/ и душа́м на́шим проще́ние/ и телесе́м исцеле́ние да́руй.

Христо́вою любо́вию уязви́ся, о́тче Иоа́нне блаже́нне,/ вы́шния красоты́ жела́я,/ земна́я же вся презре́, и нивочто́же вмени́,/ и на земли́ а́нгельское житие́ име́я,/ пресели́лся еси́ в ве́чный поко́й,/ иде́же предстоя́ Христу́ Бо́гу,/ моли́ спасти́ся нам и всему́ христиа́нскаму ро́ду, я́ко да зове́м ти:/ ра́дуйся, преблаже́нне о́тче Иоа́нне.

Велича́ем тя,/ святы́й блаже́нне Иоа́нне Ми́лостиве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Мона́шествовав Богоуго́дно в горе́ Афо́нстей,/ в моли́твах и поста́х Бо́га взыска́л еси́/ и ста́л еси́ прия́телище чи́стое Ду́ха,/ облистава́я ве́рным доброде́телей лучи́,/ и́миже осиява́еши, Ни́ле, вопию́щих тебе́:/ сла́ва просла́вльшему тя Бо́гу,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Е́же от земли́ явле́ние/ свяще́нных моще́й твои́х, Ни́ле,/ совозсия́ло сия́нию Креста́,/ того́ бо вожделе́л еси́, те́пле от младе́нства,/ ко́сти твоя́, сораспя́вшияся Христо́ви,/ воскре́сшему я́ко Преве́чному Бо́гу,/ Того́ прия́ша благода́ть.

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

13/26 Святителя Иоанна Златоустого, архиепископа Константинопольского (407).

Уст твои́х, я́коже све́тлость огня́, возсия́вши, благода́ть/ вселе́нную просвети́,/ не сребролю́бия ми́рови сокро́вища сниска́,/ высоту́ нам смиренному́дрия показа́;/ но твои́ми словесы́ наказу́я, о́тче Иоа́нне Златоу́сте,/ моли́ Сло́ва Христа́ Бо́га спасти́ся душа́м на́шим.

От небе́с прия́л еси́ Боже́ственную благода́ть/ и твои́ми устна́ми вся у́чиши/ покланя́тися в Тро́ице еди́ному Бо́гу,/ Иоа́нне Златоу́сте, всеблаже́нне преподо́бне ,/ досто́йно хва́лим тя:/ еси́ бо наста́вник, я́ко Боже́ственная явля́я.

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего. 14/27 Апостола Филиппа (I). Святителя Григория Паламы, архиепископа Фессалонитского, Солунского (ок. 1360). Преподобного Филиппа Ирапского (1527).

Благоукраша́ется вселе́нная,/ Ефио́пия ликовству́ет,/ я́ко венце́м красу́ема,/ тобо́ю просвети́вшися,/ све́тло торжеству́ет па́мять твою́,/ богоглаго́ливе Фили́ппе,/ вся бо ве́ровати Христу́ научи́л еси́,/ и тече́ние соверши́л досто́йно Ева́нгелия./ Тем дерзнове́нно вари́т* ефио́пская рука́ к Бо́гу,/ Его́же моли́ дарова́ти нам ве́лию ми́лость.

Учени́к и друг Твой, и подража́тель стра́сти Твоея́,/ вселе́нней Бо́га Тя пропове́да, богоглаго́ливый Фили́пп./ Того́ моли́твами от враго́в пребеззако́нных/ Це́рковь Твою́ и всяк град Твой/ Богоро́дицею соблюди́, Многоми́лостиве.

Велича́ем тя,/ апо́столе Христо́в Фили́ппе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Правосла́вия свети́льниче, Це́ркве утвержде́ние и учи́телю,/ мона́хов добро́то, богосло́вов побо́рниче непреобори́мый,/ Григо́рие чудотво́рче, Фессалони́тская похвало́,/ пропове́дниче благода́ти, моли́ся вы́ну* спасти́ся душа́м на́шим.

Правосла́вия наста́вниче, святи́телем украше́ние,/ богосло́вцем побо́рниче непобеди́мый, Григо́рие чудотво́рче,/ Солу́ню вели́кая похвало́, пропове́дниче благода́ти,/ моли́ Христа́ Бо́га спасти́ся душа́м на́шим.

Прему́дрости свяще́нный и Боже́ственный орга́н,/ Богосло́вия све́тлую согла́сно трубу́,/ воспева́ем тя, Григо́рие богоглаго́льниче,/ но я́ко ум, Уму́ Пе́рвому предстоя́й,/ к Нему́ ум наш, о́тче, наста́ви, да зове́м:/ ра́дуйся, пропове́дниче благода́ти.

Велича́ем тя,/ святи́телю о́тче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко кедр, в пусты́ни дави́дски расту́щ, и я́ко фи́никс, благоуха́нен цвету́щ,/ ревни́тель учи́телю твоему́ был еси́, преподо́бному отцу́ Корни́лию,/ стопа́м бо его́ после́довал еси́/ и, свято́е и́го взем,/ све́тлым житие́м просия́л еси́, я́ко со́лнце,/ я́влься ми́рови мно́гими чудесы́, о́тче Фили́ппе./ И ны́не на Небесе́х предстои́ши престо́лу Пресвяты́я Тро́ицы/ и, я́ко вели́кое име́я дерзнове́ние,/ преподо́бнии свои́ ру́це возде́в,/ моли́ от враг сохраняйся градо́м на́шим и спасти́ся душа́м на́шим.

Воспое́м ны́не преди́внаго в чудесе́х,/ возсия́вшаго во о́бласти Белае́зера, просия́вшаго я́ко со́лнце./ О, неистощи́мый исто́чниче чуде́с, свя́тче Бо́жий Фили́ппе!/ Всегда́ Святе́й Тро́ице предстоя́/ и моле́нием предваря́я за страну́ на́шу и о всем ми́ре,/ не забу́ди нас, твои́х рабо́в,/ призыва́ющих тя моле́бным пе́нием,/ честну́ю па́мять твою́ творя́щих,/ помоли́ся о нас ко Го́споду во святы́х свои́х моли́твах,/ да спасе́т ду́ши на́ша.

Ублажа́ем тя,/ преподо́бне о́тче Фили́ппе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

15/28 Мучеников и исповедников Гурия, Самона (299–306) и Авива (322). Преподобного Паисия Величковского (1794). Купятицкой (1182), именуемой «Благоуханный Цвет» и Ипатменской икон Божией Матери. Начало Рождественского поста.

Чудеса́ святы́х Твои́х му́ченик,/ сте́ну необори́мую нам дарова́вый, Христе́ Бо́же,/ тех моли́твами сове́ты язы́ков* разори́,/ Це́рковь святу́ю укрепи́,/ я́ко Един Благ и Человеколю́бец.

С высоты́, му́дрии, благода́ть прие́мше,/ су́щим во искуше́ниих предстои́те, всехва́льнии./ Те́мже отрокови́цу, святи́и, от сме́рти го́рькия изба́висте,/ вы бо вои́стину есте́ Еде́су сла́ва и ми́ру ра́дость.

Велича́ем вас,/ страстоте́рпцы святи́и Гу́рие, Само́не и Ави́ве,/ и чтим честна́я страда́ния ва́ша,/ я́же за Христа́/ претерпе́ли есте́.

Стра́нен быв на земли́,/ Небе́снаго оте́чества дости́гл еси́,/ преподо́бне о́тче Паи́сие,/ добротолю́бия подви́жниче,/ ве́рных научи́л еси́ ум к Бо́гу возводи́ти/ и се́рдцем к Нему́ взыва́ти:/ Го́споди Иису́се Христе́, Сы́не Бо́жий,/ поми́луй мя гре́шнаго.

Избра́нный и́ноческаго жития́ ревни́телю,/ я́ко пчела́ многотру́дная, писа́ньми оте́ческими ду́ши на́ша снабди́л еси́,/ коего́ждо наставля́я на путь спасе́ния,/ сего́ ра́ди зове́м ти:/ ра́дуйся, Паи́сие прему́дре, ста́рчества духо́внаго в стране́ на́шей возроди́телю.

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

16/29 Апостола и евангелиста Матфея (60). Священномученика Ипатия, епископа Гангрского (ок. 326).

Усе́рдно от мы́тницы ко зва́вшему Влады́це Христу́/ я́вльшуся на земли́ челове́ком за бла́гость,/ Тому́ после́довав, апо́стол избра́нный яви́лся еси́/ и благове́стник Ева́нгелия вселе́нней велегла́сен./ Сего́ ра́ди чтим честну́ю па́мять твою́, Матфе́е богоглаго́ливе,/ моли́ Ми́лостиваго Бо́га,/ да грехо́в оставле́ние пода́ст душа́м на́шим.

Мыта́рства* и́го отве́рг,/ пра́вды и́гу припря́глся еси́,/ и яви́лся еси́ купе́ц всеизря́днейший,/ бога́тство прине́с, ю́же с высоты́ прему́дрость./ Отону́дуже пропове́дал еси́ и́стины сло́во,/ и уны́лых воздви́гл еси́ ду́ши,/ написа́в час су́дный.

Велича́ем тя,/ апо́столе Христо́в и евангели́сте Матфе́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Изволе́нием Боже́ственнаго Ра́зума впери́в ум свой в Небе́сныя оби́тели/ и ра́вно а́нгелом житие́ пожи́в на земли́,/ сего́ ра́ди муче́ния красоты́ вене́ц на свое́м верее́ утверди́в,/ священному́чениче Ипа́тие,/ моли́ Христа́ Бо́га/ спасти́ся душа́м на́шим.

В прекра́сном Це́ркве апо́стольския вертогра́де/ из ю́на во́зраста всеси́льною десни́цею Бо́жиею насади́лся еси́,/ Богоблаже́нне о́тче Ипа́тие,/ и в ней, я́ко ве́рен первосвяще́нник,/ ве́рно Богонача́льное и Всетворя́щее Тро́ическое Еди́нство пропове́дал еси́ во Вселе́нском Собра́нии,/ Ду́ха же Свята́го в доброде́телех испо́лнен быв,/ ве́лия чудеса́ сотвори́в,/ муче́нием за ве́ру Христо́ву сконча́вся,/ прише́л еси́ в Небе́сный град,/ иде́же Триипоста́снаго Бо́га зря,/ моли́ о честву́ющих тя,/ да в Го́рнем Иерусали́ме со святы́ми жи́ти сподо́бимся.

Богови́дное досточу́дных доброде́телей зерца́ло,/ Богоправи́мое Правосла́вныя ве́ры прави́ло*/ и утвержде́ние Це́ркве Христо́вы,/ за ню́же и страда́л еси́, всечу́дне о́тче Ипа́тие,/ чудесы́, Богодарова́нными тебе́, весь мир удиви́в,/ душеспаси́тельныя по́льзы сотвори́л еси́,/ и ны́не ве́рно призыва́ющим тя во вся́ких беда́х и напа́стех/ испроси́ нам у Го́спода Бо́га/ по́мощь и спасе́ние ве́чное душа́м.

Ри́мскому оте́честву свети́льник,/ Богоза́рными луча́ми концы́ светя́,/ ны́не просвети́ твое́ пра́зднество пою́щия, Ипа́тие,/ прося́ свы́ше ми́ра и грехо́в оставле́ния,/ моли́твами защити́ ны, Ипа́тие многострада́льне.

Оби́тель Триипоста́снаго Божества́,/ достоблаже́нне о́тче Ипа́тие, быв,/ во вселе́нную Всетворца́ Бо́га воскли́кнул еси́./ Благода́рственне же чудоде́йствуя,/ вшел еси́ в Небе́сныя оби́тели,/ та́мо моли́ Всесвяту́ю Тро́ицу, мо́лим тя,/ исцели́те телеса́ и ду́ши на́ша/ в Богосозда́нную на́шу красоту́.

О, всеблаже́нный чудотво́рче Ипа́тие,/ предстоя́й в Небесе́х Всетворя́щей Боже́ственней Тро́ице,/ с ли́ки Го́рними богоприя́тне и всера́достне возно́сиши хвалы́./ Приими́ от нас сие́ тебе́ хвалорадостносло́вие,/ и моли́ Го́спода изба́вите ны от вся́ких грехо́в, напа́стей же и боле́зней/ и дарова́ти Ца́рствие Небе́сное всю́ду пою́щим:/ аллилу́иа.

Велича́ем тя,/ священному́чениче Ипа́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

17/30 Святителя Григория чудотворца, епископа Неокесарийского (ок. 266–270) Преподобного Никона, игумена Радонежского, ученика преподобного Сергия (1426). Иконы Божией Матери, именуемой «Елеоточивая».

В моли́твах бо́дрствуя, чуде́с де́ланьми претерпева́я,/ тезоиме́ние стяжа́л еси́ исправле́ния,/ но моли́ся Христу́ Бо́гу, о́тче Григо́рие,/ просвети́те ду́ши на́ша,/ да не когда́ у́снем в смерть.

Чуде́с мно́гих прие́м де́йство,/ зна́меньми ужа́сными де́моны устраши́л еси́,/ и неду́ги отгна́л еси́ челове́ческия, всему́дре Григо́рие,/ чудотво́рец же имену́ешися,/ зва́ние от дел прие́м.

Велича́ем тя,/ святи́телю о́тче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Послуша́ния до́брый рачи́тель быв,/ преподо́бне Ни́коне приснопа́мятне,/ це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Я́ко трисве́тлаго со́лнца светоза́рные зве́зды,/ Тро́йческим све́том озаря́ете сердца́ ве́рных,/ сосу́ды Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие,/ и церква́м благоле́пие, и благове́рным, и святи́телем, и всем лю́дем, вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас: посеща́йте чад свои́х,/ я́ко имущи́е дерзнове́ние ко Святе́й Тро́ице,/ Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

Духо́вному твоему́ настоя́телю, о́тче Ни́коне,/ вся́чески прилепи́вся,/ и от него́ наставля́ем,/ во всем Христо́ви порабо́тився,/ мона́хов был еси́ чинонача́льник,/ и преподо́бных сожи́тель,/ с ни́миже Христа́ Бо́га моли́ непреста́нно о всех нас.

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко а́нгели на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́./ Сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Ублажа́ем тя,/ преподо́бне о́тче Ни́коне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

18/1 Мученика Платона (302 или 306). Мучеников Романа диакона и отрока Варула (303).

Му́ченицы Твои́, Го́споди... (общий мученикам).

Свята́я твоя́ па́мять вселе́нную весели́т,/ созыва́ющи ве́рныя вся в пречестны́й храм твой,/ иде́же ны́не ра́достию совоку́пльшеся*,/ пое́м в пе́снех и све́тлостех./ Сего́ ра́ди, Плато́не, вопие́м ти:/ язы́ческаго наше́ствия изба́ви град твой, свя́те.

Велича́ем вас,/ страстоте́рпцы святи́и Плато́не и Рома́не,/ и чтим честна́я страда́ния ва́ша,/ я́же за Христа́/ претерпе́ли есте́.

19/2 Мученика Варлаама (ок. 304). Преподобных Варлаама и Иоасафа, царевича Индийского, и отца его Авенира царя (IV). Святителя Филарета, митрополита Московского и Коломенского (1867). Преподобного Варлаама, игумена Печерского, в Ближних пещерах почивающего (1065). Обретение мощей преподобномученика Адриана Пошехонского, Ярославского (1625). Иконы Божией Матери, именуемой «В скорбех и печалех Утешение» (1863).

Му́ченик Твой, Го́споди... (общий мученику).

Яви́лся еси́ преудивле́н кре́постию, всесожже́ния/ Лива́н благово́нен себе́ прине́сл еси́, же́ртву Христу́,/ и вене́ц по́чести прии́м, Варлаа́ме,/ при́сно моли́ за ны, страда́льче.

Велича́ем тя,/ страстоте́рпче святы́й Варлаа́ме,/ и чтим честна́я страда́ния твоя́,/ я́же за Христа́/ претерпе́л еси́.

Слез твои́х исто́чники пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоно́сил еси́,/ и был еси́ свети́льник вселе́нныя, сия́я чудесы́, Варлаа́ме о́тче наш,/ моли́ Христа́ Бо́га спасти́ся душа́м на́шим.

От духо́внаго наста́вника научи́вся,/ царю́ Иоаса́фе, Бо́га позна́ти,/ Креще́нием же просвети́вся,/ лю́ди к ве́ре обрати́л еси́,/ и отцу́ твоему́ от купе́ли прие́мник быв,/ ца́рство оста́вив, пусты́ню дости́гл еси́,/ и в ней трудолю́бие подвиза́лся еси́./ Моли́ Христа́ Бо́га со учи́телем твои́м Варлаа́мом/ спасти́ся душа́м на́шим.

Из чре́ва ма́терия/ прекра́сное вселе́ние бысть Свята́го Ду́ха,/ пресла́вне Иоаса́фе,/ и от блаже́ннаго Варлаа́ма безце́нный би́сер, Христа́,/ в се́рдце свое́м прия́л еси́,/ и Боже́ственным Креще́нием И́ндию просвети́л еси́,/ оте́ческое же нече́стие испра́вль,/ приведе́ его́ от тьмы ко све́ту Богоразу́мия/ и, оста́вив тле́нное на земли́ ца́рство,/ пусты́ню дости́г и своего́ учи́теля,/ те́мже на Небесе́х от Живонача́льныя Тро́ицы венце́м ца́рским венча́ся,/ моли́ о нас, чту́щих честну́ю твою́ па́мять.

Ве́дый твое́ из младе́нства благо́е изволе́ние, Иоаса́фе, Еди́н Сердцеве́дец Бог,/ и от ца́рствия земна́го в мона́шеское пребыва́ние приведы́й тя,/ вели́кому Варлаа́му после́довати сподо́би,/ с ни́мже и ны́не, го́рний Иерусали́м всесве́тлый Оте́чество име́я,/ жела́емыя добро́ты кра́сно наслажда́яся Святы́я Тро́ицы./ Мо́лим тя, ца́рская красото́,/ помина́й нас, ве́рою чту́щих тя.

Ве́дый твое́ от младе́нства Благо́е изволе́ние, Иоаса́фе,/ Един Сердцеве́дец Бог,/ и́бо от ца́рствия земна́го во и́ноческое пребыва́ние приве́дый тя,/ и вели́кому Варлаа́му восле́довати сподо́би тя,/ и со а́нгелы с ним в Неизрече́нном Све́те водвори́ся;/ с ни́миже Святе́й Тро́ице предстоя́,/ мо́лим тя, ца́рское красото́,/ помина́й нас, ве́рою пра́зднующих па́мять твою́!

Ублажа́ем тя,/ преподо́бне о́тче Иоаса́фе,/ и чтим боле́зни и труды́ твоя́,/ и́миже труди́лся еси́/ во испове́дании Христо́ве.

Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный,/ па́ству Росси́йскую жезло́м пра́вости сохрани́л еси́./ Сего́ ра́ди ко Христу́ Бо́гу дерзнове́ние име́я,/ моли́ дарова́ти Це́ркве утвержде́ние,/ лю́дем и душа́м на́шим спасе́ние.

Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́,/ богоблаже́нне Филаре́те./ я́ко па́стырь пра́ведный и испове́дник непоро́чный,/ по святе́м преставле́нии от безбо́жных поруга́ние и поноше́ние прия́л еси́,/ Бог же зна́меньми и чудесы́ тя просла́ви/ и засту́пника Це́ркве на́шея яви́.

Велича́ем тя,/ святи́телю о́тче Филаре́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ми́ра кра́сная и сла́ву его́ оста́вль,/ прите́кл еси́ в пеще́ру,/ иде́же от си́лы преуспева́я в си́лу,/ был еси́ вождь Христо́ва ста́да, всесла́вне Варлаа́ме,/ е́же я́ко упа́с до́бре, упаси́ и нас, мо́лим тя,/ сохраня́я от всех зол, да тя ублажа́ем.

Оте́ческаго преще́ния не устраши́лся еси́,/ ласка́ниям того́ не повину́лся еси́,/ ниже́ ле́стию низложи́лся еси́ же́нскою, всече́стне Варлаа́ме,/ но непобеди́м от тех пребы́л еси́,/ наде́яся на Го́спода своего́, Ему́же моли́ся о душа́х на́ших.

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Христо́ву му́ченику тезоимени́т был еси́, преподо́бне ,/ мно́ги труды́ подъя́л еси́ терпе́нием свои́м,/ и убие́ние от окре́стных и ну́ждную* сме́рть претерпе́л еси́,/ и ны́не, о преподобному́чениче о́тче Адриа́не,/ моли́ душе́вныя и теле́сныя на́ша стра́сти уврачева́ти,/ и́же ве́рою и любо́вию обре́тение честны́х моще́й твои́х почита́ющих/ и всечестну́ю па́мять твою́ пра́зднующих.

Христа́ ра́ди до́блественне претерпе́л еси́/ и вене́ц нетле́ния от Него́ восприя́л еси́ страда́ния своего́,/ приходя́щим же с ве́рою к тебе́ подае́ши цельбы́,/ о преподобному́чениче Адриа́не, приснопа́мятне,/ моли́твенниче о душа́х на́ших.

Ублажа́ем тя,/ преподобному́чениче Адриа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

20/3 Предпразднство Введения во храм Пресвятой Богородицы. Преподобного Григория Декаполита (816). Святителя Прокла, архиепископа Константинопольского (446–447). Преподобного Диодора (Дамиана) Юрьегорского, Каргопольского (1633). Иконы Божией Матери «Соболевская» (1282; под Киевом).

Ра́дость предобруча́ет всем Анна ны́не,/ печа́ли сопроти́вный плод прозя́бши, еди́ну Присноде́ву,/ ю́же и приво́дит, моли́твы исполня́ющи,/днесь веселя́щися, в храм Госпо́день,/я́ко су́щий храм Бо́га Сло́ва и Ма́терь Чи́стую.

Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зовуще:/ Та есть сень Небе́сная.

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Образ был еси́ воздержа́ния,/ Боже́ственным Ду́хом вся просвети́в,/ правове́рия тече́ние соверши́л еси,/ уче́нием мир просвети́л еси́/ и злове́рных обличи́л еси́ смы́слы,/ о́тче преподо́бне Григо́рие,/ Христа́ Бо́га моли́ дарова́ти нам ве́лию ми́лость.

Све́тлое тя со́лнце Це́рковь познава́ет,/ доброде́телей красота́ми и исцеле́ний луча́ми/ всех просвеща́я, Христо́в уго́дниче./ Те́мже пра́зднуем честну́ю па́мять твою́/ и почита́ем по́двиги твоя́,/ всеблаже́нне о́тче, прему́дре Григо́рие.

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

И́же Боже́ственным нача́лом прему́дрости,/ стра́хом Госпо́дним утве́рждся,/ отту́ду свяще́нными восхожде́нии возше́л еси́/ во учени́чество Златоу́ста,/ и, архиере́йскаго того́ престо́ла досто́ин быв чистоты́ добро́тами,/ апо́стольским пра́вилом себе́ вообрази́в,/ не себе́ живы́й, но Христу́ и ста́ду твоему́/ Тем в нетле́нный живо́т апо́стольски всели́лся еси́,/ иера́рше Про́кле,/ моли́ Христа́ Бо́га/ спасти́ся душа́м на́шим.

Досто́йно днесь торжеству́ет/ всех градо́в честне́йший вои́стину, в честно́м преставле́нии твое́м,/ о́тче отце́в, Про́кле му́дре.

Всечестна́го святи́теля, Ца́рскаго гра́да престо́л украси́вшаго/ и сокро́вищем безце́нным того́ обога́щшаго, пречестны́ми мощми́ Златоу́стовыми,/ и́мже сло́во живо́тно* стяжа́, просвеща́я ве́рно чту́щия его́,/ пе́сньми похвале́ния того́ ра́достно ублажи́м, зову́ще:/ ра́дуйся, архиере́ю, о́тче свяще́нный.

Велича́ем тя,/ святи́телю о́тче Про́кле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Жела́нием ду́ха распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и Того́ вседу́шне взыску́я,/ во вну́треннюю пусты́ню оты́де,/ при вода́х всели́ся,/ иде́же в слеза́х и труде́х пребыва́я многоде́тное вре́мя,/ в терпе́нии мно́зе житие́ а́нгельское проходи́л еси́/ в наставле́нии Боже́ственнаго Ра́зума,/ ста́до и́нок собра́ му́дре,/ и́хже посеща́я, не оста́ви, Диодо́ре преподо́бне ,/ о́тче наш, Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

От ю́ности, преподо́бне ,/ плотску́ю во́лю в поста́х и моли́твах источи́л еси́,/ крест свой взем, Христо́ви после́довал еси́,/ те́мже и к Вы́шним тече́нием ра́достно устреми́л себе́,/ иде́же со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, богому́дре Диодо́ре, наста́вниче наш пусты́нный.

Ублажа́ем тя,/ преподо́бне о́тче Диодо́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

21/4 Введение во храм Пресвятой Владычицы нашей Богородицы и Приснодевы Марии. Священномученика протопресвитера Александра (1937).

Днесь благоволе́ния Бо́жия предображе́ние/ и челове́ков спасе́ния пропове́дание,/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния Зижди́телева исполне́ние.

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ я́же в Ду́се Боже́ственном,/ ю́же воспева́ют а́нгели Бо́жии,/ Сия́ есть Селе́ние Небе́сное.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим е́же в храм Госпо́день вхожде́ние Твое́.

Кро́тость и смире́ние стяжа́вый,/ любо́вь Христо́ву па́стве свое́й показа́л еси́/ в годи́ну о́гненных искуше́ний Це́ркве Росси́йския/ и, я́ко па́стырь до́брый, ду́шу свою́ за Него́ положи́л еси́./ Моли́ся о нас, священному́чениче Алекса́ндре,/ просвети́ти ду́ши на́ша.

Труды́ и боле́зни на ра́мо свое́ взял еси́/ и, ра́дуяся, путе́м те́сным ше́ствовал еси́,/ страда́ньми за Христа́ Небе́снаго Ца́рства дости́гл еси́./ Моли́ о нас Бо́га Спа́са, священному́чениче Алекса́ндре,/ обрести́ нам ми́лость в день су́дный.

Велича́ем тя,/ священному́чениче Алекса́ндре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

22/5 Попразднство Введения. Апостолов от 70-ти Филимона и Архиппа и мученицы равноапостольной Апфии (I). Благоверного князя Михаила Тверского (1318). Благоверного Ярополка, во Святом Крещении Петра, князя Владимиро-Волынского (1086).

Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст душа́м на́шим.

Учени́че Па́влов и апо́столе Христо́в, Архи́ппе,/ Ева́нгелия провозве́стниче и Колосса́ев учи́телю,/ ка́менное побие́ние прие́мый,/ а́ки драгоце́нное украше́ние,/ и́мже вене́ц муче́ния украси́в, вшел еси́ на весе́лие Ца́рствия,/ иде́же помяни́ нас, пою́щих твою́ па́мять,/ апо́столов сопресто́льниче.

Я́ко зве́зды всесве́тлыя, просвеща́ющия концы́,/ апо́столы Христо́вы, восхва́лим Филимо́на сла́внаго и Архи́ппа свяще́ннаго,/ и Они́сима, и Ма́рка, и Аполло́са, с ни́миже и Апфи́ю всему́друю, вопию́ще:/ моли́те непреста́нно о всех нас.

Я́ко звезду́ вели́кую, тя Це́рковь иму́щи, Архи́ппе,/ чуде́с твои́х луча́ми просвеща́ема, зове́т тебе́:/ спаси́ ве́рою почита́ющия па́мять твою́.

Велича́ем вас,/ святи́и апо́столи Филимо́не и Архи́ппе со равноапо́стольной Апфи́ей,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Возвы́сив ум твой к Бо́гу,/ и жития́ со а́нгелы возжеле́л еси́,/ тле́нную сла́ву земну́ю оста́вил еси́, блаже́нне,/ и положи́л еси́ ду́шу твою́ за лю́ди твоя́,/ восприя́л еси́ вене́ц проти́ву трудо́в твои́х, богому́дре Михаи́ле,/ моли́ Христа́ Бо́га о чту́щих любо́вию святу́ю па́мять твою́.

Вы́шних ища́ и земну́ю сла́ву презре́в,/ Це́рковь Бо́жию обагри́л еси́ твое́ю кро́вию,/ за Ню́же и пострада́л еси́, свя́те Михаи́ле,/ заколе́ние непра́ведное прие́м веселя́ся./ Те́мже со а́нгелы предстоя́ Христу́ Бо́гу,/ моли́ непреста́нно за вся ны.

Велича́ем тя,/ святы́й благове́рный кня́же Михаи́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Велича́ем тя,/ благове́рный кня́же Михаи́ле,/ и чтим святу́ю па́мять твою́,/ и́же за Христа́ кровь свою́ излия́л еси́,/ и ны́не мо́лиши за нас/ Христа́ Бо́га на́шего.

Я́ко благове́рен и пра́веден,/ за любо́вь Христа́ Бо́га от свои́х си смерть прия́л еси́, Яропо́лче,/ страстоте́рпче святы́й, благове́рный кня́же Волы́нский,/ и пролия́л еси́ кровь твою́,/ я́коже пре́жде сро́дницы твои́ и страстоте́рпцы богоблаже́ннии Бори́с и Глеб./ и́хже по́двигом ревну́я благоче́стно,/ Го́сподеви взыва́л еси́ усе́рдие:/ да́руй ми кончи́ну, я́коже бра́тиям мои́м, /да и аз омы́в грехи́ моя́ кро́вию мое́ю,/ и изба́влюся ми́ра сего́ тще́тнаго и мяте́жнаго./ Те́мже здесь соше́дшеся в па́мять твою́/ ве́рою и любо́вию сла́вим Го́спода,/ укрепи́вшаго тебе́ в по́двизе напра́сныя* сме́рти,/ я́коже бо а́гнец незло́бивый/ от раба́ заколе́н еси́,/ и себе́ сама́го же́ртву непоро́чну Го́сподеви прине́сл еси́,/ Его́же моли́, присноблаже́нне,/ спасти́ оте́чество твое́,/ и держа́ве сро́дник твои́х Богоуго́дней бы́ти,/ и сыново́м росси́йским спасти́ся.

Возсия́ днесь пресла́вная па́мять твоя́,/ благоро́дие страстоте́рпче Христо́в Яропо́лче богому́жне,/ созыва́ющи нас к похвале́нию Христа́ Бо́га на́шего./ Те́мже к тебе́ днесь притека́юще,/ с любо́вию взыва́ем ра́достно:/ блаже́нна земля́, упита́вшаяся кровьми́ твои́ми,/ и свя́та селе́ния, прии́мшая дух твой,/ иде́же в раи́ нетле́нныя пи́щи наслажда́яся,/ не забу́ди нас, воспева́ющих тя,/ но при́сно помина́й в моли́твах твои́х к Бо́гу,/ да изба́вимся от всех бед и скорбе́й,/ и́же при́сно па́мять твою́ почита́ющий.

Велича́ем тя,/ святы́й благове́рный кня́же Яропо́лче,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

23/6 Святителя Амфилохия, епископа Иконийского (после 394). Святителя Григория, епископа Акрагантийского (VI-VII). Благоверного великого князя Александра Невского, в схиме Алексия (1263). Святителя Митрофана, в схиме Макария, епископа Воронежского (1703).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Боже́ственный гром, труба́ Ду́ха,/ ве́ры садоде́лателю и се́чиво ересе́й, иера́рше Амфило́хие,/ Тро́ицы уго́дниче вели́кий,/ со а́нгелы предстоя́ при́сно,/ моли́ непреста́нно о всех нас.

Светолу́чными сия́нии Це́рковь Свята́го Ду́ха светово́дит,/ све́тлое соверша́ющия твое́ успе́ние,/ преподо́бне о́тче, всеблаже́нне Григо́рие.

Я́ко доброде́телем учи́теля и святи́телем украше́ние/ Це́рковь, пою́щи тя, сла́вит, Григо́рие,/ моли́твами твои́ми пода́ждь чту́щим тя любо́вию/ доброде́телем исправле́ние и собла́зн избавле́ние,/ я́ко непобеди́м.

Велича́ем вас,/ святи́телие вели́ции Амфило́хие и Григо́рие,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Я́ко благочести́ваго ко́рене/ пречестна́я о́трасль был еси́, блаже́нне Алекса́ндре,/ яви́ бо тя Христо́с, я́ко не́кое Боже́ственное сокро́вище, Росси́йстей земли́,/ но́ваго чудотво́рца пресла́вна и богоприя́тна./ И днесь соше́дшеся в па́мять твою́ ве́рою и любо́вию,/ во псалме́х и пе́ниих ра́дующеся, сла́вим Го́спода,/ да́вшаго тебе́ благода́ть исцеле́ний./ Его́же моли́ спасти́ град сей,/ и стране́ на́шей Богоуго́дней бы́ти,/ и сыново́м росси́йским спасти́ся.

Я́ко звезду́ тя пресве́тлую почита́ем,/ от восто́ка возсия́вшую, и на за́пад прише́дшую,/ всю бо страну́ сию́ чудесы́ и добро́тою обогаща́вши,/ и просвеща́вши ве́рою чту́щия па́мять твою́, Алекса́ндре блаже́нне./ Сего́ ра́ди днесь пра́зднуем твое́ успе́ние, лю́дие твои́ су́щии,/ моли́ спасти́ Оте́чество твое́, и вся притека́ющия к ра́це моще́й твои́х,/ и ве́рно вопию́щия ти:/ ра́дуйся, гра́ду на́шему утвержде́ние.

Велича́ем тя,/ благове́рный вели́кий кня́же Алекса́ндре,/ и чтим свято́е успе́ние твое́,/ и ны́не мо́лиши за нас/ Христа́ Бо́га на́шего.

Пра́вило ве́ры и о́браз кро́тости,/ сло́вом и житие́м па́стве твое́й, о́тче смиренному́дре Митрофа́не, был еси́./ Те́мже и во све́тлостех святы́х/ со́лнца светле́йше возсия́л еси́,/ венце́м нетле́ния и сла́вы украша́ем,/ моли́ Христа́ Бо́га/ стране́ на́шей и гра́ду твоему́ в ми́ре спасти́ся.

Воздержа́нием те́ло ду́ху порабо́тив*, ду́шу же равноа́нгельну сотвори́в,/ святи́тельскою оде́ялся еси́ оде́ждою, я́ко вене́ц свяще́нства;/ и ны́не всех Влады́це предстоя́,/ моли́, всеблаже́нне Митрофа́не, умири́ти и спасти́ ду́ши на́ша.

Велича́ем тя,/ святи́телю о́тче Митрофа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

24/7 Великомученицы Екатерины (305–313). Великомученика Меркурия (III). Мученика Меркурия Смоленского (1238). Преподобного Меркурия, постника Печерского, в Дальних пещерах почивающего (XIV).

Доброде́тельми, я́ко луча́ми со́лнечными,/ просвети́ла еси́ неве́рныя мудрецы́,/ и, я́коже пресве́тлая луна́ ходя́щим в нощи́,/ неве́рия тьму отгна́ла еси́,/ и цари́цу уве́рила еси́,/ вку́пе же и мучи́теля обличи́ла еси́,/ богозва́нная неве́сто, блаже́нная Екатери́но./Жела́нием востекла́ еси́ в Небе́сный Черто́г/ к Прекра́сному Жениху́ Христу́,/ и от Него́ ца́рским венце́м венча́лася еси́./ Ему́же со а́нгелы предстоя́щи,/ за ны моли́ся,/ творя́щия пречестну́ю па́мять твою́.

Лик честны́й Боже́ственне, мучениколю́бцы,/ воздви́гните ны́не, почита́юще всему́друю Екатери́ну:/ сия́ бо в три́знищи* Христа́ пропове́да,/ и зми́я попра́, ри́торов* ра́зумы укроти́вши.

Вити́йствующи* днесь, Екатери́на му́ченица/ и вити́ям обличи́ умовре́дную е́ресь,/ а́нгел бо с Небесе́ к той прии́де, си́лу от Вы́шняго принесе́,/ ю́же прие́мши, му́жески* рече́:/ Христо́с есть му́чеником похвала́.

Велича́ем тя,/ страстоте́рпице Христо́ва Екатери́но,/ и чтим честно́е страда́ние твое́,/ е́же за Христа́/ претерпе́ла еси́.

Му́ченик Твой, Го́споди... (общий мученику).

Во бране́х непобеди́маго во́ина,/ и в беда́х непосты́дна засту́пника,/ пе́сньми Мерку́рия ублажи́м, сла́вяще,/ пра́зднующия бо па́мять его́ ве́село, от бед избавля́ет и скорбе́й.

Велича́ем тя,/ страстоте́рпче святы́й Мерку́рие,/ и чтим честна́я страда́ния твоя́,/ я́же за Христа́/ претерпе́л еси́.

Возсия́в, я́ко звезда́ многосве́тлая,/ в собо́рней це́ркви пред пречи́стым и чудотво́рным о́бразом Пречи́стей Богоро́дицы,/ за Ню́же и за град Смоле́нск пострада́,/ многоко́зненнаго и богоме́рзкаго царя́ Баты́я устраши́,/ и си́льнаго исполи́на победи́, и лю́ди удиви́,/ ду́шу свою́, многострада́льне Мерку́рие, за благоче́стие положи́,/ я́ко Заха́риина и Авелева я́сно вопие́т твоя́ кровь ко Го́споду,/ и ны́не моли́ся за ду́ши на́ша.

Яви́ся во бране́х непобеди́м во́ин,/ от ри́млян ро́дом,/ сыновство́ име́ гра́да Смоле́нска,/ я́ко бо сих ра́ди нарече́ся,/ я́ко от Богоро́дицы страж кре́пок посла́ся гра́ду,/ пе́сньми Мерку́рия ублажи́м,/ пра́зднующе ве́село па́мять его́,/ я́ко да изба́вит град наш от беды́ ра́тник.

Чистото́ю душе́вною ку́пно и теле́сною/ и серде́чною к Бо́гу любо́вию и непреста́нною моли́твою/ ри́мское бога́тство оста́вль/ и прия́т бога́тство от Го́спода – вене́ц,/ прие́м в ру́це копие́, кре́пко злове́рнаго царя́ Баты́я ужаси́,/ и самохва́льнаго исполи́на победи́,/ и вси вну́цы ага́рянския прожену́в,/ страстоте́рпче Мерку́рие,/ моли́ Христа́ Бо́га спасти́ся душа́м на́шим.

Велича́ем тя,/ страстоте́рпче святы́й Мерку́рие,/ и чтим честна́я страда́ния твоя́,/ я́же за Христа́/ претерпе́л еси́.

Присносу́щныя, блаже́нне, жела́я сподо́битися жи́зни,/ пра́ведне и непоро́чне/ жизнь свою́ препроводи́л еси́ в ны́нешнем ве́це,/ те́мже, Мерку́рие, жела́емаго ты дости́гл,/ моли́ и нам ве́чныя сподо́битися жи́зни.

Преподо́бному во всех де́лех Го́сподеви преи́скренне рабо́тая,/ и О́наго всегда́ в це́ркви преподо́бных Свои́х/ преподо́бным воспева́я гла́сом,/ насле́дил еси́, преподо́бне Мерку́рие, часть преподо́бных,/ с ни́миже моли́ся о всех нас.

Ублажа́ем тя,/ преподо́бне о́тче Мерку́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

25/8 Отдание праздника Введения во храм Пресвятой Богородицы. Священномучеников Климента, папы Римского (101), и Петра, архиепископа Александрийского (311). Равноапостольного Климента, архиепископа Охридского, просветителя Словенского, Болгарского чудотворца (916). Исааковской (1661) и Двинской икон Божией Матери.

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

И́же от Бо́га чудоде́йствы/ пресла́вно удивля́я вселе́нныя концы́ ми́ра,/ свяще́нный страда́льче,/ па́че естества́ мо́рю, соста́вы вода́м содева́еши разделе́ние,/ в честне́й па́мяти твое́й,/ всегда́ притека́ющим усе́рдно в Богозда́нную ти це́рковь,/ чуде́сным твои́м моще́м;/ и по всенаро́дном хожде́нии,/ мо́ре во еди́но тече́ние чудоде́тельне твори́ши,/ Кли́менте преди́вный,/ моли́ Христа́ Бо́га спасти́ся душа́м на́шим.

От Вы́шняго суда́ Христо́ва предста́тельствова ста́ду,/ на па́житех благожи́зненных упа́сл еси́ всему́дрыми твои́ми догма́ты,/ отгна́в Ария, я́ко во́лка некро́ткаго,/ вше́дшаго в них безбо́жными уче́нии./ Те́мже и ду́шу твою́ положи́л еси́ за них,/ па́стырь наре́клся еси́, я́ко рече́ Госпо́дь,/ иера́рше Пе́тре блаже́нне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Це́ркве недви́жимии и Боже́ственнии пи́ргове*,/ благоче́стия Боже́ственнии столпи́, вои́стину кре́пцыи,/ Кли́менте с Петро́м всехва́льнии,/ ва́шими моли́твами соблюди́те вся.

Боже́ственнаго виногра́да священнооде́янна/ всем лоза́ яви́ся,/ ка́плющи сла́дость прему́дрости,/ моли́твами твои́ми, всече́стне;/ да тебе́ истка́ну, я́ко багряни́цу,/ песнь мы́сленную принесе́м,/ Кли́менте свя́те,/ спаси́ рабы́ твоя́.

Правосла́вными повеле́нии Це́рковь просвети́л еси́,/ за ню́же и пострада́в, Богоблаже́нне о́тче,/ Ария отсту́пника отгна́в,/ те́мже твою́ пречестну́ю па́мять соверша́юще,/ правосла́вно вопие́м:/ ра́дуйся, Пе́тре, ка́меню ве́ры.

Велича́ем вас,/ святи́телие вели́ции Кли́менте и Пе́тре,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Словесы́ наста́вил еси́ язы́ки* в ве́ру Христо́ву,/ де́лы же возвы́сил еси́ себе́ к Боже́ственней жи́зни,/ святи́телю Кли́менте равноапо́стольне,/ чудесы́ сия́я приступа́ющим к тебе́ ве́рно/ и зна́меньми озаря́я Це́рковь пресла́вно,/ сего́ ра́ди честну́ю твою́ па́мять сла́вим.

Я́ко труба́ арха́нгела Бо́жия/ оглаша́вши ро́ди слове́нстии на вся́ ве́ки/ и к чудеси́ пресла́вному утвержде́ния люде́й твои́х в Правосла́вии/ приглаша́еши неиждива́емо* чудеса́ ве́лия да́же доны́не./ Те́мже с любо́вию почита́ем присночестну́ю па́мять твою́,/ святи́телю Кли́менте равноапо́стольне,/ и мо́лим:/ моли́ся о душа́х на́ших.

Храм твой, свя́те, врачевство́ духо́вное/ пресла́вно показу́ется ве́рно приступа́ющим,/ всех бо разли́чных боле́зней избавля́ет,/ стра́сти же душ вся́ческия усыпа́ет./ Сего́ ра́ди тя, всеблаже́нне,/ те́пла предста́теля имену́ем.

Велича́ем тя,/ святи́телю о́тче Кли́менте,/ и́же уче́ньми твои́ми ро́ды слове́нския просвети́л еси́/ и ко Христу́ приве́л еси́.

26/9 Преподобного Алипия столпника (640). Освящение церкви великомученика Георгия в Киеве, у Златых врат (1051–1054). Святителя Иннокентия, епископа Иркутского (1731). Преподобных Афанасия, зово́мого Желе́зный по́сох, и Феодо́сия Черепове́цких (ок. 1388). Воспоминание освящения храма святого великомученика Георгия в Кипариссе.

Терпе́ния столп был еси́,/ ревнова́вый* пра́отцем, преподо́бне:/ И́ову во страсте́х, Ио́сифу во искуше́ниих,/ и безпло́тных жи́тельству сый в телеси́,/ Али́пие о́тче наш,/ моли́ Христа́ Бо́га спасти́ся душа́м на́шим.

Стра́шен и непресту́пен показа́лся еси́ бесо́м вои́стину,/ уязвля́я сих ра́ною свяще́нных твои́х моли́тв/ и дале́че отгоня́я ополче́ния страстна́я посто́м/ и колеба́ющимся был еси́, всеблаже́нне, непрекло́нное утвержде́ние,/ Али́пие преподо́бне ,/ моли́ Христа́ Бо́га/ спасти́ся душа́м на́шим.

Я́ко доброде́телей вину́* и по́стников удобре́ние*,/ Це́рковь сла́вит тя днесь и воспева́ет, Али́пие./ Моли́твами твои́ми пода́ждь/ чту́щим любо́вию до́блести твоя́ и боре́ния,/ лю́тых прегреше́ний избавле́ние,/ я́ко тезоимени́тый.

Ублажа́ем тя,/ преподо́бне о́тче Али́пие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь блажа́т тя ми́ра концы́,/ Боже́ственных чуде́с испо́лньшеся,/ и земля́ ра́дуется, напи́вшися кро́ве твоея́,/ христоимени́тии же лю́дие гра́да Ки́ева/ освяще́нием Боже́ственнаго хра́ма твоего́ ра́достию возвесели́шася,/ страстоте́рпче Гео́ргие,/ сосу́де избра́нный Свята́го Ду́ха, уго́дниче Христо́в./ Его́же моли́, с ве́рою и мольбо́ю приходя́щим во святы́й твой храм,/ да́та очище́ние грехо́в,/ умири́ти мир и спасти́ ду́ши на́ша.

Боже́ственнаго и венцено́снаго великому́ченика Христо́ва Гео́ргия,/ на враги́ побе́ду взе́мшаго одоле́ния,/ соше́дшеся ве́рою во освяще́нный храм, восхва́лим,/ его́же благоволи́ Бог созда́ти во и́мя его́,/ Еди́н во святы́х почива́яй.

Велича́ем тя,/ страстоте́рпче святы́й Гео́ргие,/ и чтим честна́я страда́ния твоя́,/ я́же за Христа́/ претерпе́л еси́.

Свети́льниче Це́ркве пресве́тлый,/ озари́вый луча́ми добро́т твои́х страну́ сию́/ и исцеле́ньми мно́гими притека́ющих к тебе́ с ве́рою Бо́га просла́вивый,/ мо́лим тя, святи́телю о́тче Инноке́нтие,/ огражда́й моли́твами твои́ми град сей от всех бед и печа́ли.

Непоро́чности соиме́ннаго па́стыря,/ пропове́дника ве́ры в язы́цех монго́льских,/ сла́ву и украше́ние Ирку́тския па́ствы/ любо́вию восхва́лим вси ве́рнии,/ той бо есть храни́тель страны́ сея́ и моли́твенник о душа́х на́ших.

Велича́ем тя,/ святи́телю о́тче Инноке́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко всехва́льнии ученицы́/ вели́каго покрови́теля и засту́пника земли́ Ру́сской,/ Богоно́снии отцы́ на́ши Афана́сие и Феодо́сие,/ от ю́ности ва́шея крест Христо́в на ра́мена взе́мшии,/ усе́рдно Тому́ после́довали есте́/ и до́бре потруди́лися в Се́ргиевой оби́тели./ Отону́дуже Бо́жиим изволе́нием прибы́вша,/ благоче́стно во гра́де на́шем Череповце́ подвиза́лися есте́/ и оби́тель Воскресе́ния Христо́ва устро́иша,/ моли́твою и трудо́м Бо́гу угоди́вше,/ от Него́ вене́ц сла́вы Небе́сной прия́ли есте́,/ и ны́не святы́ми свои́ми телесы́/ в собо́рнем хра́ме под спу́дом почива́юще,/ ду́хом же вку́пе с преподо́бным Се́ргием/ у престо́ла Всевы́шняго предстоя́,/ о нас моли́теся приле́жно/ изба́витися нам от всех бед и скорбе́й/ и спасти́ся душа́м на́шим.

Волне́ний мно́жество невла́жно проходя́ще... (общий преподобным).

Ублажа́ем вас,/ преподо́бнии отцы́ Афана́сие и Феодо́сие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

27/10 Иконы Божией Матери, именуемой «Знамение». Знамение Пресвятой Богородицы, бывшее в Новгороде Великом в 1170 году. Великомученика Иакова Персянина (421). Преподобного Палладия (VI-VII). Преподобного Диодора (Дамиана) Юрьегорского, Каргопольского (1633). Преподобного Феодосия Терновского, на Кефаларской горе постившегося (1363). Святителя Иакова, епископа Ростовского (1392). Обретение мощей благоверного князя Новгородского Всеволода, во Святом Крещении Гавриила, Псковского чудотворца (1192). Икон Божией Матери «Знамение»: Курской-Коренной (1295), Абалацкой (1637), Царскосельской (XVII), Серафимо-Понетаевской (1879), Вологодской (1571), Московской, Владимирской, Златоустовской и Соловецкой.

Я́ко необори́мую сте́ну и исто́чник чуде́с/ стяжа́вше Тя, раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Честна́го о́браза Твоего́ зна́мение/ пра́зднующе, лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н Похвало́.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Досто́йно есть блажи́ти Тя,/ Богоро́дице Де́во,/ честне́йшую Херуви́м/ и сла́внейшую без сравне́ния Серафи́м.

Или: Песнь вся́ку духо́вную принесе́м Богоро́дице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.

Велича́ем Тя,/ Пресвята́я Де́во,/ и чтим о́браз Твой честны́й,/ и́мже показа́ла еси́/ пресла́вное зна́мение.

Вели́чаем Тя,/ Пресвята́я Де́во,/ и чтим о́браз Твой честны́й,/ и́мже побе́ду на враги́ дарова́/ гра́ду на́шему.

Муче́нии странноужа́сными и до́блестию терпе́ния/ всех преудиви́л еси́, многострада́льне,/ над ко́имждо соста́вом удеси́ ре́зания/ благода́рны мольбы́ преди́вне изре́кл еси́ Го́споду./ Тем, во страда́нии твое́м вене́ц прие́м,/ к престо́лу возше́л еси́ Небе́снаго Царя́ Христа́ Бо́га, Иа́кове,/ Того́ моли́ спасти́ ду́ши на́ша.

Уве́рився до́брою сопру́жницею, терпеливоду́шне,/ и стра́шнаго суди́ща убоя́вся,/ пе́рсское повеле́ние и страх, Иа́кове, поплева́л еси́,/ и яви́лся еси́ му́ченик честны́й,/ те́лом я́ко розга́ ре́жемь.

Велича́ем тя,/ страстоте́рпче святы́й Иа́кове,/ и чтим честна́я страда́ния твоя́,/ я́же за Христа́/ претерпе́л еси́.

Мона́шествовав Богоуго́дно, Богоно́сне о́тче наш,/ моли́твою и посто́м Бо́га взыска́л еси́/ и был еси́ прия́телище чи́сто Ду́ха,/ блиста́я ве́рным доброде́тельныя зари́,/ и́миже просвеща́еши вся чту́щия тя./ Сла́ва просла́влыиему тя Христу́,/ сла́ва Укре́плыпему тя,/ сла́ва Де́йствующему тобо́ю всем исцеле́ние.

Чистото́ю душе́вною боже́ственно вооружи́вся... (общий преподобному).

Ублажа́ем тя,/ преподо́бне о́тче Палла́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Избра́н от ю́ности Бо́гови быв,/ святи́телю Иа́кове,/ сего́ ра́ди архиере́йства са́ном почте́н,/ упа́сл еси́ лю́ди, я́же тебе́ Бо́гом вруче́нныя,/ те́мже и по преставле́нии/ чуде́с дарова́ния от Бо́га прия́л еси́/ исцеля́ти разли́чныя неду́ги./ Моли́ о нас, соверша́ющих честну́ю па́мять твою́,/ да тебе́ непреста́нно велича́ем.

Я́ко архиере́ев сопресто́льник/ и святи́телем изря́дный побо́рник был еси́, святи́телю Иа́кове,/ непреста́нно сохраня́й оте́чество твое́, град же и лю́ди,/ тебе́ ве́рою почита́ющия и честны́м моще́м твои́м покланя́ющияся,/ да велегла́сно тебе́ вопие́м:/ ра́дуйся, Иа́кове Богому́дре.

Велича́ем тя,/ святи́телю о́тче Иа́кове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Наста́ днесь всечестны́й но́вый пра́здник,/ обре́тение честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Возвесели́ся Христо́ва це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ во обре́тение честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ я́ко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

Велича́ем тя,/ благове́рный кня́же Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ублажа́ем тя,/ благове́рный кня́же Гаврии́ле,/ и чтим обре́тение честны́х моще́й твои́х,/ и ны́не мо́лиши за нас/ Христа́ Бо́га на́шего.

В блаже́ннем безмо́лвии пусты́ннем,/ и на собо́рех, любо́вию к Бо́гу горя́,/ посрами́л еси́ лука́вых бесо́в и ерети́к злочести́вых./ На моли́тве же стоя́, огня́ све́тлостию просия́л еси́/ и преставле́нием твои́м а́нгелов пою́щих обвесели́л еси́,/ Феодо́сие о́тче наш,/ сего́ ра́ди мо́лим тя:/ моли́ся о душа́х на́ших.

Пропове́дник велегла́сный Боже́ственных догма́т/ на собо́рех святы́х был еси́, о́тче му́дре,/ цари́ умудря́я и в ве́ре утвержда́я;/ благода́тию же Боже́ственною осиява́ем,/ загради́л еси́ уста́ злосла́вных, Феодо́сие./ Сего́ ра́ди вопие́м ти:/ ра́дуйся, Болга́рская похвало́/ и Правосла́вия све́тлое ра́дование.

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Жела́нием ду́ха распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и Того́ вседу́шне взыску́я,/ во вну́треннюю пусты́ню оты́де,/ при во́дах всели́ся,/ иде́же в слеза́х и труде́х пребыва́я многоде́тное вре́мя,/ в терпе́нии мно́зе житие́ а́нгельское проходи́л еси́/ в наставле́нии Боже́ственнаго Ра́зума,/ ста́до и́нок собра́ му́дре,/ и́хже посеща́я, не оста́ви, Диодо́ре преподо́бне ,/ о́тче наш, Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

От ю́ности, преподо́бне,/ плотску́ю во́лю в поста́х и моли́твах источи́л еси́,/ кре́ст свой взем, Христо́ви после́довал еси́,/ те́мже и к Вы́шним тече́нием ра́достно устреми́в себе́,/ иде́же со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, Богому́дре Диодо́ре, наста́вниче наш пусты́нный.

Ублажа́ем тя,/ преподо́бне о́тче Диодо́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

28/11 Преподобномученика и исповедника Стефана Нового (767). Священномученика митрополита Серафима (1937). Святителя Феодора, архиепископа Ростовского, сродника преподобного Сергия Радонежского (1394).

По́стнически предподвиза́вся* на горе́,/ у́мная враго́в ополче́ния/ всеору́жием Креста́ погуби́л еси́, всеблаже́нне,/ па́ки же ко страда́льчеству му́жески вооружи́лся еси́,/ уби́в Копрони́ма мече́м ве́ры,/ и обои́х ра́ди венча́лся еси́ от Бо́га,/ преподобному́чениче Стефа́не приснопа́мятне.

Я́ко предпросия́вый, Стефа́не, житие́м по́стническим/ и в ми́ре облиста́л еси́ тече́нием страда́льчества,/ разгна́л еси́ мра́чную пре́лесть ерети́чествующих,/ показа́вый и́стинную сла́ву правосла́вных,/ сего́ ра́ди просла́вился еси́,/ я́ко боже́ственный свиде́тель и́стины Христо́вы.

Из непло́дна, преподо́бне , ко́рене/ возрасте́ ветвь,/ первострада́льцу тезоимени́те,/ мона́хов наста́вник вели́к, о́тче, яви́лся еси́/ и, я́рости не убоя́вся царя́,/ не хотя́ща Христо́в чествова́ти о́браз:/ сего́ ра́ди сконча́вся,/ му́ченический вене́ц прия́л еси́, Стефа́не.

Тро́ицы рачи́теля и боже́ственнаго Стефа́на/ восхва́лим ве́рно пе́сньми, празднолю́бцы, от се́рдца,/ я́ко почествова́вша начерта́ние кра́сное Влады́ки и Ма́тере Его́,/ и согла́сно ны́не от любве́ возопии́м ему́, ра́дующеся:/ ра́дуйся, о́тче присносла́вне.

Ублажа́ем тя,/ преподобному́чениче Стефа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Во́инство Царя́ Небе́снаго/ па́че земна́го возлюби́в,/ служи́тель пла́менный Святы́я Тро́ицы яви́лся еси́./ Наставле́ния Кроншта́дтскаго па́стыря/ в се́рдце свое́м слага́я,/ да́нная ти от Бо́га многообра́зная дарова́ния/ к по́льзе наро́да Бо́жия преумно́жил еси́./ Учи́тель благоче́стия/ и побо́рник еди́нства Церко́внаго быв,/ пострада́ти да́же до кро́ве сподо́бился еси́./ Священному́чениче Серафи́ме,/ моли́ Христа́ Бо́га/ спасти́ся душа́м на́шим.

Саро́вскому чудотво́рцу тезоимени́т быв,/ те́плую любо́вь к нему́ име́л еси́,/ писа́ньми свои́ми по́двиги и чудеса́ того́ ми́ру возвести́в,/ ве́рныя к его́ прославле́нию подви́гл еси́/ и благода́рственнаго посеще́ния/ сама́го Преподо́бнаго сподо́бился еси́./ С ни́мже ны́не, священному́чениче Серафи́ме,/ в Небе́сных черто́зех водворя́яся,/ моли́ Христа́ Бо́га/ серафи́мския ра́дости на́м прича́стником бы́ти.

Велича́ем тя,/ священному́чениче Серафи́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности твоея́ до́бре воспита́вся труда́ми,/ воздержа́нием, посто́м и моли́твами,/ чисту́ и непоро́чну сотвори́л еси́ ду́шу твою́./ Сего́ ра́ди на престо́л святи́тельства сел еси́/ и, я́ко звезда́ многосве́тлая, просвеща́я ве́рных сердца́/ заря́ми чуде́с твои́х, о́тче наш святи́телю Фео́доре,/ и ны́не моли́ Христа́ Бо́га, да спасе́т ду́ши на́ша.

От ю́ности, прему́дре, приле́жно подвиза́вся,/ и извеще́нием Свята́го Ду́ха/ превели́кую оби́тель воздви́же Пресвя́тей Богоро́дице/ в похвалу́ Рождества́ Ея́,/ струя́ми же слез твои́х безпло́тныя враги́ погрузи́л еси́/ и жития́ твоего́ целому́дрием со а́нгельскими ли́ки совокупи́вся,/ преподо́бне о́тче Фео́доре,/ с ни́миже Христа́ Бо́га моли́/ спасти́ся душа́м на́шим.

В моли́твах Го́сподеви предстоя́,/ я́коже кре́пкий адама́нт во у́твари,/ по вся дни и но́щи пред лице́м Бо́жиим светя́ся моли́твами,/ и́хже ра́ди трудо́в Незаходи́маго Све́та сподо́бився,/ но, я́ко име́я дерзнове́ние/ к ро́ждшемуся от Святы́я Де́вы Христу́ Бо́гу на́шему,/ Его́же моли́ непреста́нно о всех нас.

Велича́ем тя,/ святи́телю о́тче Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

29/12 Мученика Парамона и с ним 370-ти мучеников (250). Преподобного Акакия, иже в Лествице свидетельствованного, Синайского (VI). Преподобного Нектария Печерского, в Ближних пещерах почивающего (XII). Воспоминание освящения церкви святых мученик Сергия и Вакха.

Му́ченик Твой, Го́споди... (общий мученику).

Звезда́ све́тлая яви́лся еси́, непреле́стная ми́рови... (общий мученику).

В тебе́, о́тче, изве́стно спасе́ся е́же по о́бразу... (общий преподобному).

Мир оста́вль, Христу́ после́довал еси́ от младе́нства,/ прему́дре Ака́кие преподо́бне ,/ Того́ подража́я во́льное смире́ние,/ низве́ргл еси́ го́рдостнаго мучи́теля,/ моли́ непреста́нно о всех нас.

Ублажа́ем тя,/ преподо́бне о́тче Ака́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В тебе́, о́тче, изве́стно спасе́ся... (общий преподобному).

Чистото́ю душе́вною Боже́ственно вооружи́вся,/ и непреста́нныя моли́твы,/ я́ко копие́ вручи́в, кре́пко/ пробо́л еси́ бесо́вская ополче́ния,/ Некта́рие о́тче наш,/ моли́ непреста́нно о всех нас.

Ублажа́ем тя,/ преподо́бне о́тче Некта́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/13 Апостола Андрея Первозванного (62).

Я́ко апо́столов первозва́нный/ и верхо́внаго су́щий брат,/ Влады́це всех, Андре́е, моли́ся/ мир вселе́нней дарова́ти/ и душа́м на́шим ве́лию ми́лость.

Му́жества тезоимени́таго Богоглаго́льника/ и Це́ркве возсле́дователя верхо́внаго,/ Петро́ва сро́дника восхва́лим,/ зане́ я́коже дре́вле сему́, и ны́не нам воззва́:/ прииди́те, обрето́хом Жела́емаго.

Велича́ем тя,/ апо́столе Христо́в Андре́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

1/14 Пророка Наума (VII в. до Р.Х.). Праведного Филарета Милостивого (792).

Проро́ка Твоего́ Нау́ма па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Просвети́вшееся Ду́хом чи́стое твое́ се́рдце,/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая;/ сего́ ра́ди тя почита́ем,/ проро́че блаже́нне, Нау́ме сла́вне.

Велича́ем тя,/ проро́че Бо́жий Нау́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Авраа́му в ве́ре подража́я,/ И́ову же в терпе́нии после́дуя,/ о́тче Филаре́те,/ блага́я земли́ разделя́л еси́ неиму́щим/ и лише́ние сих терпе́л еси́ му́жественне./ Сего́ ра́ди све́тлым тя венце́м увенча́ Подвигополо́жник, Христо́с Бог наш,/ Его́же моли́ спасти́ся душа́м на́шим.

В терпе́нии твое́м стяжа́л еси́ мзду* свою́, пра́ведне,/ и в за́поведех Госпо́дних соверше́ние пожи́л,/ ни́щих возлюби́л и сих удово́лил* еси́,/ но моли́ся Христу́ Бо́гу, блаже́нне,/ спасти́ся душа́м на́шим.

В терпе́нии твое́м стяжа́л еси́ мзду твою́, о́тче преподо́бне ,/ в моли́твах неприста́нно терпе́вый,/ ни́щия возлюби́вый и сия́ удовли́вый,/ но моли́ся Христу́ Бо́гу, Филаре́те ми́лостиве блаже́нне,/ спасти́ся душа́м на́шим.

И́стинно всеизря́дная твоя́ ку́пля зри́тся/ и му́дрою бы́ти су́дится все́ми благому́дрствующими:/ отда́л бо еси́ до́льняя и кратковре́менная, взыску́я Го́рних и ве́чных./ Те́мже и досто́йно стяжа́л еси́ ве́чную сла́ву, ми́лостиве Филаре́те.

Доброде́тельми украша́лся и стра́хом Бо́жием/ преди́вен во всех яви́ся Ца́рскаго гра́да26,/ ни́щим сокро́вище бога́тства разда́в/ и нетле́нно благи́х бога́тство на Небесе́х прие́м./ Те́мже всю́ду и везде́, Филаре́те, чту́щих тя помина́й,/ сла́во пра́ведным и похвало́.

Бога́тство твое́ расточи́л еси́ убо́гим/ и Небе́сное бога́тство ны́не восприя́л еси́, Филаре́те всеблаже́нне,/ сего́ ра́ди тя почита́ем, соверша́юще па́мять твою́, доброде́тели о тезоимени́те.

Велича́ем тя,/ святы́й пра́ведный Филаре́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

2/15 Пророка Аввакума (VII в. до Р.Х.) Преподобного Афанасия, затворника Печерского, в Ближних пещерах почивающего (ок. 1176). Преподобного Афанасия, затворника Печерского, в Дальних пещерах почивающего (XIII). Святого Стефана Уроша, царя Сербского (1367). Преподобного Иоанни́кия Девиченского, Сербского (1430). Мученицы Миропии (ок. 251).

Проро́ка Твоего́ Авваку́ма па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Возгласи́вый вселе́нней от ю́га прише́ствие Бо́жие от Де́вы, Авваку́ме богоглаго́ливе,/ и на Боже́ственней стра́жи предстоя́нием/ слы́шания от светоно́сна а́нгела/ Христо́во Воскресе́ние возвести́л еси́ ми́ру,/ сего́ ра́ди ве́село зове́м ти:/ ра́дуйся, проро́ков све́тлая добро́то.

Велича́ем тя,/ проро́че Бо́жий Авваку́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Блаже́нство пла́чущих получи́ти жела́я,/день и нощь непреста́нно пла́кал еси́,/ име́я во уме́ час Су́дный,/ тем по кончи́не твое́й обре́л еси́ утеше́ние на Небеси́,/ преподо́бне Афана́сие./ Пода́ждь и нам пла́катися зде грехо́в на́ших вы́ну*,/ я́ко да пла́ча безконе́чнаго избы́вше,/ та́мо прии́мем ве́чное утеше́ние.

Я́ко безсме́ртия тезоимени́т,/ по уме́ртвии свое́м воста́л еси́ жив,/ показу́я же, я́ко зело́ лю́та есть смерть, пла́кался еси́ го́рько./ Ны́не обре́тши неконча́емую ра́дость,/ моли́ся о нас, я́ко да пла́ча ве́чнаго избу́дем.

Ублажа́ем тя,/ преподо́бне о́тче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

По и́мени своему́ за труды́ ве́лия/ и всегда́шнее зде умерщвле́ние пло́ти в затво́ре,/ безсме́ртную ны́не на Небеси́/ жизнь насле́довавый,/ мо́лим тя приле́жно:/ моли́ся о нас,/ я́ко да и мы тоя́жде сподо́бимся получи́ти.

Ве́дый ми́ра сего́ суету́ бы́ти тще́тну,/ отврати́лся еси́ ея́,/ не ктому́ сами́ма очи́ма,/ но и всего́ себе́ всеконе́чне, преподо́бне , отврати́в,/ затвори́лся еси́ в те́мней пеще́ре,/ в не́йже в моли́твах и слеза́х многовре́менне потру́ждся/ и обре́т на Небеси́ безконе́чную радость,/ моли́ся непреста́нно за ду́ши на́ша.

Ублажа́ем тя,/ преподо́бне о́тче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ю́ношески процве́л еси́/ во оте́чествии твое́м, добро́тою украше́н,/ и непра́ведную и безвре́менную смерть подъя́л еси́,/ У́роше всече́стне;/ ца́рскаго ко́рене плод сла́док,/ а́ще и не во вре́мя созре́в,/ в Госпо́дню жи́тницу всели́лся еси́/ и жа́лость ве́лию сро́дству твоему́ оста́вил еси́./ Моли́ся о нас, творя́щих святу́ю па́мять твою́.

Отрасли благоро́дныя цвет прекра́сный яви́лся еси́, У́роше всече́стне,/ за́вистию бо убие́н был еси́ от твои́х при́сных,/ Бо́жиим же Ду́хом просвеще́н,/ святоро́днаго пле́мене свят был еси́/ и, му́ченическим венце́м увя́зся*, в черто́зе Небе́снем водворя́ешися./ Моли́ся о нас, свя́те, творя́щих любо́вию па́мять твою́.

Велича́ем тя,/ святы́й У́роше всече́стне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Поще́нием, моли́твами и благода́тию Боже́ственною просвети́вся,/ земны́я концы́ све́тло озаря́вши благоче́стно,/ чуде́с благода́ть от Бо́га прие́м,/ исцеля́еши неду́ги, ду́хи же лука́выя от челове́ков отгоня́вши,/ и́же с ве́рою притека́ют к ра́це моще́й твои́х святы́х,/ преподо́бне о́тче наш Иоанни́кие./ Сла́ва Да́вшему ти благода́ть,/ сла́ва Укрепи́вшему тя,/ сла́ва Де́йствующему тобо́ю всем исцеле́ния.

От ю́ности, Богому́дре, возлюби́в а́нгельское житие́,/ вся кра́сная оста́вил еси́,/ за́йде бо, я́коже звезда́ от ми́ра,/ восте́к к разу́мному и пра́ведному со́лнцу, Христу́/ от Него́ же прие́мь благода́ть исцеле́ния,/ разли́чныя неду́ги врачу́еши притека́ющих к свяще́нней ра́це твое́й./ Те́мже и мы, соверша́юще любо́вию всечестну́ю твою́ па́мять, вопие́м ти:/ ра́дуйся, о́тче Иоанни́кие.

Ублажа́ем тя,/ преподо́бне о́тче Иоанни́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Доброму́ченице Миропи́е и Христа́ неве́сто нетле́нная,/ ны́не Ему́же предстои́ши, прекра́сная,/ ра́ны нося́щи пло́ти,/ я́ко ка́мни све́тлы и светообра́зны,/ и в крова́вую порфи́ру, я́ко цари́ца, облече́нная, пресла́вная,/ умоли́ Его́ за ны,/ я́же с любо́вию восхваля́ющия/ хвалы́ побе́дными и пе́сньми твою́ Боже́ственную страсть.

По и́мени, о страстоте́рпице Миропи́е,/ ми́ро источа́еши благода́ти чуде́с/ и пасе́ши всех, подоба́ющих и взыска́ющих/ и ве́рою и доброде́телию прибега́ющих к ра́це твое́й пречестне́й,/ я́же держи́т прах твой.

Велича́ем тя,/ страстоте́рпице Христо́ва Миропи́е,/ и чтим честно́е страда́ние твое́,/ е́же за Христа́/ претерпе́ла еси́.

3/16 Пророка Софонии (635–605 г. до Р.Х.). Преподобного Саввы Сторожевского (Звенигородского) (1406). Святого мученика Ангелй (Ангелиса) (1813). Преподобного Феодула Цареградского (ок. 440). Пахромской иконы Божией Матери (1472).

Проро́ка Твоего́ Софо́нии па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Яви́лся еси́ светоза́рен Боже́ственным Ду́хом, проро́че Софо́ние,/ Бо́жие явле́ние возгласи́в:/ ра́дуйся зело́, дщи Сио́ня Иерусали́мова, пропове́ждь:/ се Царь твой гряде́т, спаса́яй.

Велича́ем тя,/ проро́че Бо́жий Софо́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Пусты́ни яви́лся еси́ до́брое прозябе́ние*, преподо́бне:/ от ю́ности бо изво́лил еси́ чи́стое житие́,/ духо́вному твоему́ учи́телю после́дуя,/ и того́ уче́нием ум к Небе́сным впери́в,/ и ста́ду твоему́ прему́др наста́вник показа́лся еси́,/ тем и Христо́с, я́ко пресве́тла тя свети́льника, чудесы́ обогати́,/ Са́вво, о́тче наш, моли́ спасти́ся душа́м на́шим.

От ю́ности Боже́ственною распаля́ем ре́вностию,/ возлюби́л еси́ чи́стое житие́,/ презре́в ми́ра сего́ кра́сная и су́етная,/ после́довал еси́ твоему́ Богому́дрому учи́телю, преблаже́нному Се́ргию,/ в труде́ и бде́нии, в посте́ и по́двизе:/ на Сторо́жи я́влься безмо́лвия ра́ди и стра́жи духо́вныя/ недре́мленным на Боже́ственней стра́жи предстоя́нием/ стяжа́л еси́ ум, зряй к Бо́гу,/ и де́монския ко́зни и обстоя́ния прозира́яй,/ озаре́ние Преевята́го Ду́ха в себе́ восприе́м,/ я́ко звезда́ пресве́тлая еси́ ве́рным./ Те́мже и прему́др и светоза́рен предстоя́тель/ и па́стырь ста́ду твоему́ яви́лся еси́,/ све́том твои́м просвеща́й и всех,/ приходя́щих к тебе́ ве́рою, о́тче наш Са́вво, и моли́ Христа́ Бо́га, да спасе́т ду́ши на́ша.

Безмо́лвия ра́ди и пло́ти распина́ния/ всели́выйся на горе́ Сторо́жи,/ яви́лся еси́, преподо́бне Са́вво, сто́лп ве́ры непоколеби́мый,/ от Пресвята́го Ду́ха осия́нный,/ оби́тель пречестна́я Тро́ицы,/ и непреста́нными моли́твами, сле́зными воздыха́нии и по́двигами благода́ти Боже́ственныя соприча́стник;/ те́мже и Христо́с в нетле́нии моще́й твои́х просла́ви тя,/ и да́ром чуде́с украси́ тя./ Мы же ра́достно ти вопие́м:/ ра́дуйся, Са́вво, вели́кий чудотво́рче.

Госпо́дним жела́нием распали́вся,/ стра́сти плотски́я воздержа́нием оттря́с,/ Боже́ственнаго све́та незаходи́мое свети́ло яви́лся еси́,/ чуде́с луча́ми всех просвеща́еши,/ притека́ющих к ра́це моще́й твои́х,/ Са́вво, преподо́бне о́тче наш.

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Лик а́нгельский, Ангели́ новому́чениче,/ и со́нмы страстоте́рпец/ восплеска́ша вы́спрь*/ твоему́ ве́ры ра́ди терпе́нию и прекосло́вию/ и дух твой по благому́дрию возведо́ша на Небеса́/ со сла́вою ко Христу́ Бо́гу на́шему.

Свята́го тя му́ченик лик, Ангели́, прия́,/ ты же, на Небесе́х ны́не ра́дуяся, пострада́л еси́,/ и зако́нно, благому́дрый, посрами́л еси́ мучи́телей безбо́жную си́лу,/ и вене́ц взял еси́ нетле́ния, ору́жием посече́нный.

Велича́ем тя, страстоте́рпче святы́й Ангели́,/ и чтим честна́я страда́ния твоя́,/ я́же за Христа́/ претерпе́л еси́.

В тебе́,о́тче, изве́стно спасе́ся... (общий преподобному).

Царя́ тле́ннаго и скороги́бнущия сла́вы,/ му́дре о́тче, измени́л еси́ ве́чно пребыва́ющими,/ от сто́лпнаго же и приско́рбнаго жития́ в Го́рнее и всера́достное взы́де,/ превели́чества сла́вы Небе́сному Царю́ сца́рствуя, Феоду́ле,/ моли́ непреста́нно о всех нас.

Ублажа́ем тя,/ преподо́бне о́тче Феоду́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

4/17 Великомученицы Варвары (ок. 306). Преподобного Иоанна Дамаскина (ок. 780). Святителя Геннадия, архиепископа Новгородского (1504). Дамаскинской иконы Божией Матери (VIII).

Варва́ру святу́ю почти́м:/ вра́жия бо се́ти сокруши́/ и я́ко пти́ца изба́вися от них,/ по́мощию и ору́жием Креста́, всечестна́я.

Агнице всеблаже́нная Варва́ро,/ Боже́ственне озари́вшися Све́том Святы́я Тро́ицы Трисо́лнечным/ и в купе́ли Креще́ния утверди́вшися,/ в побежде́ние ле́сти оте́ческия,/ ве́ру испове́дала еси́ Христо́ву./ Те́мже, всечестна́я, свы́ше благода́ть тебе́ дарова́ Бог,/ исцеля́ти неду́ги и боле́зни вся./ Его́же моли́, великому́ченице, да спасе́т ду́ши на́ша.

В Тро́ице благоче́стно пева́емому/ после́довавши Бо́гу, страстоте́рпице,/ и́дольская притупи́ла еси́ чти́лища,/ посреде́ же по́двига страда́льчествующи, Варва́ро,/ мучи́телей преще́ния не устраши́лася еси́, мужему́дренная,/ велегла́сно пою́щи при́сно:/ Тро́ицу чту, еди́но Божество́.

Велича́ем тя,/ страстоте́рпице Христо́ва Варва́ро,/ и чтим честно́е страда́ние твое́,/ е́же за Христа́/ претерпе́ла еси́.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодохнове́нное удобре́ние, Иоа́нне прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Песнопи́сца и честна́го Богоглаго́льника,/ Це́ркве наказа́теля* и учи́теля,/ и враго́в сопротивобо́рца, Иоа́нна воспои́м:/ ору́жие бо взем, Крест Госпо́день,/ всю отрази́ ересе́й пре́лесть,/ и я́ко те́плый предста́тель к Бо́гу,/ всем подае́т прегреше́ний проще́ние.

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Уподо́бился еси́ дре́вним отце́м,/ святи́телю о́тче Генна́дие,/ Свяще́нныя кни́ги собра́в и еретики́ посрами́в,/ ре́вность по Бо́зе показу́я, па́ству огради́л еси́,/ моли́ и ны́не Христа́ Бо́га/ мир Це́ркви дарова́ти/ и спасти́ся душа́м на́шим.

Ве́лия исправле́ния о церко́вном благоле́пии явля́я,/ Правосла́вную ве́ру утверди́л еси́,/ святи́телю о́тче Генна́дие,/ не преста́й моли́тися о нас,/ во Ца́рствии Небе́снем безсме́ртныя тра́пезы наслажда́лся.

Велича́ем тя,/ святи́телю о́тче Генна́дие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

5/18 Преподобного Саввы Освященного, Иерусалимского (532). Святителя Гурия, архиепископа Казанского (1563).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Са́вво о́тче наш,/ моли́ Христа́ Бо́га спасти́ся душа́м на́шим.

Я́ко от младе́нства Бо́гу же́ртва непоро́чная/ прине́слся еси́ доброде́телию, Са́вво блаже́нне,/ садоде́латель быв благоче́стия./ Те́мже был еси́ преподо́бных удобре́ние,/ граждани́н же пусты́нный достохва́лен./ Те́мже зове́м ти:/ ра́дуйся, Са́вво пребога́те.

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния, даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди,/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.

От мла́дости удаля́лся земна́го мудрова́ния/ и после́довав ско́рбным путе́м Законоположи́телю своему́ Христу́ Бо́гу,/ те́мже и Он тя воздарова́ на земли́ нетле́нием,/ на Небесе́х же со угоди́вшими Ему́ архиере́и ликовству́еши,/ Гу́рие святи́телю,/ моли́ Христа́ Бо́га/ пода́ти оте́честву на́шему на враги́ побе́ду,/ и мир ми́рови,/ и душа́м на́шим ве́лию ми́лость.

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́;/ того́ ра́ди от Бо́га нетле́нием почте́н, чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный,/ гра́ду Каза́ни похвала́ и утвержде́ние.

И́стине основа́ние и ве́ры утвержде́ние/ и в поуче́ниих преизя́щнаго све́мы* тя благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником купноревни́теля, похваля́ем тя, Гу́рие святи́телю,/ и ве́лия таи́нника Бо́жия благода́ти.

Велича́ем тя,/ святи́телю о́тче Гу́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

6/19 Святителя Николая, архиепископа Мир Ликийских, чудотворца (ок. 345).

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й и́стина;/ сего́ ра́ди стяжа́л еси́ смире́нием высо́кая,/ нището́ю бога́тая./ О́тче священнонача́льниче Нико́лае,/ моли́ Христа́ Бо́га/ спасти́ся душа́м на́шим.

В Ми́рех, свя́те, священноде́йствитель* показа́лся еси́:/ Христо́во бо, преподо́бне , Ева́нгелие испо́лнив,/ положи́л еси́ ду́шу твою́ о лю́дех твои́х/ и спасл еси́ непови́нныя от сме́рти;/ сего́ ра́ди освяти́лся еси́, я́ко вели́кий таи́нник Бо́жия благода́ти.

Велича́ем тя,/ святи́телю о́тче Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

7/20 Святителя Амвросия, епископа Медиоланского (397). Преподобного Нила Столобенского (1554). Преподобного Антония Сийского (1556). Селигерской (Владимирской) иконы Божией Матери.

Пра́вило ве́ры и о́браз кро́тости... (общий святителю).

Боже́ственными догма́ты облиста́я,/ помрачи́л еси́ Ариеву пре́лесть,/ священнотаи́нниче и па́стырю Амвро́сие,/ чудоде́йствуя же си́лою Ду́ха,/ стра́сти разли́чныя я́ве исцели́л еси́, о́тче преподо́бне ,/ Христа́ Бо́га моли́ спасти́ся душа́м на́шим.

Изря́дно сло́во жи́зни стяжа́в, о́тче му́дре,/ не усумне́ся высоты́ ца́рския, богонаказа́тельне царя́ обличи́ и умудри́в./ Тем па́че че́стне почте́ся и люде́й свои́х па́ству к Бо́гу наста́ви./ Сего́ ра́ди зове́м ти:/ ра́дуйся, Амвро́сие преди́вне.

Велича́ем тя,/ святи́телю о́тче Амвро́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко свети́льник всесве́тел/ яви́лся еси́ во о́строве Селиге́ра е́зера,/ преподо́бне о́тче Ни́ле:/ ты бо Крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне ,/ моли́ Христа́ Бо́га спасти́ся душа́м на́шим.

Оте́чества, преподо́бне , удали́вся,/ в пусты́ню всели́лся еси́,/ и на о́стров Селиге́ра е́зера возше́д,/ жесто́ко житие́ показа́л еси́,/ и мно́гих доброде́тельми удиви́в,/ дарова́ния чуде́с от Христа́ прия́л еси́./ Помина́й нас, чту́щих па́мять твою́, да зове́м ти:/ ра́дуйся, Ни́ле о́тче наш.

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Желанием духо́вным распали́вся/ и мяте́жи мирски́я отри́нув,/ ко Еди́ному Бо́гу любо́вию прилепи́лся еси́,/ и Того́ вседу́шне взыску́я27,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное вре́мя,/ в терпе́нии мно́зем житие́ а́нгельское проходи́л еси́,/ в наставле́нии Боже́ственнаго Ра́зума,/ и мно́жество мона́хов собра́л еси́, му́дре,/ и́хже посеща́я, не оста́ви, Анто́ние, преподо́бне о́тче наш,/ Пресвяте́й Тро́ице моля́ся,/ от зол вся́ческих изба́вити и спасти́ ду́ши на́ша.

И́же вои́стинну на земли́ тя а́нгела/ и на Небеси́ челове́ка Бо́жия почти́м,/ сию́ жизнь су́етную оста́вль,/ я́ко вои́стинну преудо́брен во́ин Христа́ Бо́га,/ на стра́сти душепа́губныя подвиза́вся в жи́зни сей су́етней/ бде́нием и поще́нием,/ во всем быв о́браз свои́м ученико́м./ Те́мже бо в тя всели́ся Пресвяты́й Дух,/ Его́же де́йствием све́тло укра́шен,/ но я́ко име́я дерзнове́ние ко Святе́й Тро́ице,/ помина́й святу́ю оби́тель сию́/ и ста́до свое́, е́же собра́, му́дре,/ и не забу́ди, я́коже обеща́ся,/ посеща́й чад свои́х,/ Анто́ние преподо́бне , о́тче наш.

От ю́ности, преподо́бне , плоть твою́ в поста́х и моли́твах источи́л еси́/ и крест твой взем, Христу́ после́довал еси́,/ те́мже и к вы́шним тече́ние ра́достно соверши́л еси́,/ иде́же со все́ми святы́ми Святе́й Тро́ице предстои́ши./ И ны́не ста́до твое́ посеща́я,/ помина́й чту́щих пресвяту́ю па́мять твою́,/ да вси благода́рне вопие́м ти:/ ра́дуйся, богому́дре Анто́ние, наста́вниче пусты́нный.

Христа́ еди́наго вожделе́в*,/ и к Тому́ любо́вию уязви́вся*,/ и Тому́ неотло́жным путе́м после́довал еси́./ Вся́кое жите́йское наслажде́ние возненави́дев,/ те́мже, я́ко второ́е со́лнце, чудесы́ сия́я,/ и сего́ ра́ди тя да́ром обогати́ Влады́ка,/ помина́й нас, чту́щих пресве́тлую па́мять твою́, да зове́м ти:/ ра́дуйся, Анто́ние преподо́бне о́тче наш.

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

8/21 Преподобного Патапия (VII). Преподобного Кирилла Челмогорского (1367).

В тебе́, о́тче, изве́стно... (общий преподобному).

Храм твой, свя́те, духо́вное врачевство́ лю́дие обре́тше,/ со тща́нием к нему́ приходя́ще,/ цельбу́ неду́гов про́сят прия́ти,/ реше́ние же в житии́ прегреше́нных,/ ты бо всех су́щих в ну́ждах предста́тель яви́лся еси́,/ Пата́пие преподо́бне .

Ублажа́ем тя,/ преподо́бне о́тче Пата́пие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь возсия́ нам пресве́тлая па́мять твоя́, сла́вне,/ я́ко со́лнце светоза́рное,/ луча́ми благода́ти озаря́ющи весь мир/ и тьму но́щи злых духо́в и от нас отгоня́ющи./ Днесь Небе́сныя си́лы святы́х а́нгел, и мирски́й наро́д,/ и ду́ши пра́ведных мы́сленно торжеству́ют, ра́дующеся;/ днесь и мы, гре́шнии, припа́дающе мо́лимся:/ о́тче преподо́бне Кири́лле,/ Христа́ Бо́га моли́ непреста́нно/ спасти́ оби́тель твою́, град и лю́ди,/ и́же любе́зно тебе́ почита́ющия.

От ю́ности, преподо́бие, вся оста́вль жите́йская, кра́сная же и ле́потная*/ и в пусты́ню всели́вся, усе́рдно после́довал еси́ Зва́вшему тебе́, преблаже́нне,/ в труде́х же и посте́х, о́тче, тело свое́ изнури́л еси́,/ отону́дуже тя па́стыря Свои́м овца́м до́бре устроя́ет всебога́тый Госпо́дь,/ Кири́лле чудоде́йственниче, моли́ Христа́ Бо́га/ о приходя́щих с ве́рою и прося́щих свои́х прегреше́ний оставле́ния дарова́ти,/ чту́щим любо́вию святу́ю па́мять твою́.

Ублажа́ем тя,/ преподо́бне о́тче Кири́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

9/22 Зачатие праведной Анною Пресвятой Богородицы. Иконы Божией Матери, именуемой «Нечаянная Радость».

Днесь безча́дия у́зы разреша́ются,/ Иоаки́ма бо и Анну услы́шав Бог,/ па́че наде́жды, роди́ти тем я́ве обещава́ет Богоотрокови́цу,/ из Нея́же Сам роди́ся Неопи́санный, Челове́к быв,/ а́нгелом повеле́в вопи́ти Ей:/ра́дуйся, Благода́тная, Госпо́дь с Тобо́ю.

Пра́зднует днесь вселе́нная Аннино зача́тие,/ бы́вшее от Бо́га:/ и́бо та породи́ па́че сло́ва Сло́во ро́ждшую.

Велича́ем Тя,/ Пресвята́я Де́во,/ и чтим святы́х Твои́х роди́телей/ и всесла́вное сла́вим/ зача́тие Твое́.

Днесь, ве́рнии лю́дие, духо́вно торжеству́ем,/ прославля́юще Засту́пницу усе́рдную ро́да христиа́нскаго,/ и притека́юще к пречи́стому Ея́ о́бразу, взыва́ем си́це:/ о, Преми́лостивая Влады́чице Богоро́дице,/ пода́ждь нам неча́янную ра́дость,/ обремене́нным грехи́ и скорбьми́ мно́гими,/ и изба́ви нас от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице./ Ты нам помози́,/ на Тебе́ наде́емся,/ и Тобо́ю хва́лимся,/ Твои́ бо есмы́ раби́,/ да не постыди́мся.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

10/23 Мучеников Мины, Ермогена и Евграфа (ок. 313). Святителя Иоасафа, епископа Белгородского, чудотворца (1754). Блаженного Иоанна (1503) и родителей его блаженного Стефана (1446) и блаженной Ангелины, Бранковичей, правителей Сербских.

Воздержа́нием страсте́й огнепа́льныя/ умертви́вше зра́ки и движе́ния, Христо́вы му́ченицы,/ прия́ша благода́ть неду́ги отгоня́ти немощны́х,/ и жи́вше и по кончи́не чудоде́йствовати;/ вои́стину чу́до пресла́вно,/ я́ко ко́сти на́ги источа́ют исцеле́ния,/ сла́ва Еди́ному и Созда́телю Бо́гу.

Ми́ну чу́днаго, Ермоге́на боже́ственнаго, и Евгра́фа ку́пно,/ свяще́нными сладкопе́нии почти́м вси,/ я́ко почествова́вшия Го́спода, и страда́льчествовавшия за Него́,/ и ли́ка безпло́тных на Небесе́х дости́гшия,/ и чудеса́ точа́щия.

Добропе́сненный глас твои́х слове́с,/ Ермоге́на из глубины́ поги́бели возве́д,/ поста́ви на ка́мени жи́зни,/ отону́дуже и Евгра́ф, царя́ обличи́в,/ ра́дуяся, посека́ется в сла́вную главу́/ Но приле́жно моли́, Ми́но, спасти́ся всем, любо́вию чту́щим тя.

Велича́ем вас,/ страстоте́рпцы святи́и Ми́но, Ермоге́не и Евгра́фе,/ и чтим честна́я страда́ния ва́ша,/ я́же за Христа́/ претерпе́ли есте́.

Святи́телю Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый просия́л еси́,/ и просла́влен от Бо́га яви́лся еси́;/ те́лом у́бо в нетле́нии почива́я,/ ду́хом же престо́лу Бо́жию предстоя́,/ чудеса́ пресла́вно источа́еши./ Моли́ Христа́ Бо́га,/ да утверди́т нас в Правосла́вии и благоче́стии/ и спасе́т ду́ши на́ша.

Моли́твенниче изде́тства преизря́дный,/ Богоизбра́нный святи́телю Христо́в Иоаса́фе,/ пра́вило ве́ры и о́браз милосе́рдия благоче́стным житие́м всем явля́еши/ и с ве́рою к тебе́ притека́ющим оби́льно исцеле́ния источа́еши./ Моли́ Христа́ Бо́га, да утверди́т в держа́ве Росси́йстей правове́рие, мир и благоче́стие и спасе́т ду́ши на́ша.

Многоразли́чныя по́двиги жития́ твоего́ кто испове́сть?/ Многообра́зныя ми́лости Бо́жия тобо́ю явле́нныя кто исчи́слит?/ Дерзнове́ние же твое́ у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,/ святи́телю Христо́в и чудотво́рче Иоаса́фе.

Велича́ем тя,/ святи́телю о́тче Иоаса́фе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ди́вен, творя́й пресла́вная чудеса́/ и прославля́яй по кончи́не сла́вящия Тя,/ нетле́нная телеса́ их явля́я/ и чудоде́йствии лю́ди обогаща́я/ во сла́ву свята́го и́мени Своего́,/ дарова́вый нам те́ло уго́дника Своего́ Иоа́нна,/ моля́щагося о душа́х на́ших.

Прииди́те, достодо́лжно* почти́м Иоа́нна, но́выя благода́ти служи́теля новопросла́вленнаго,/ сла́ву ве́ры на́шея и на́шего моли́твенника,/ созыва́ет бо пе́ти благода́рными гла́сы/ и просла́вити Просла́влынаго святы́я Своя́/ и мо́лится о творя́щих па́мять его́ и о зову́щих ему́:/ ра́дуйся, Иоа́нне, но́вое процвете́ние.

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

11/24 Преподобного Даниила Столпника (489–490). Преподобного Никона Сухого, Печерского, в Ближних пещерах почивающего (XII).

Терпе́ния столп был еси́,/ ревнова́вый* пра́отцем, преподо́бне:/ И́ову во страсте́х, Ио́сифу во искуше́ниих/ и безпло́тных жи́тельству,/ сый в телеси́, Дании́ле о́тче наш,/ моли́ Христа́ Бо́га спасти́ся душа́м на́шим.

Я́коже звезда́ многосве́тлая ты возше́д, блаже́нне, на столп,/ мир просвети́л еси́ преподо́бными де́лы твои́ми/ и тьму пре́лести отгна́л еси́, о́тче./ Те́мже мо́лим тя:/ и ны́не облиста́й в сердца́х раб твои́х незаходя́щий свет ра́зума.

Ублажа́ем тя,/ преподо́бне о́тче Дании́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Бо́га Блага́го возлюби́в,/ и́ноческое прия́л еси́ житие́/ и, до́бре в нем подвиза́вся,/ плене́н был еси́ по́ловцы,/ и́миже мно́го му́чим, крепкоду́шне Ни́коне,/ благода́тию Христо́вою свободи́лся еси́ от них неви́димо,/ и ны́не во Све́те пребыва́я непресту́пнем,/ моли́ спасти́ся нам, твою́ па́мять почита́ющим.

Первому́ченику подобя́ся,/ о мучи́теле твое́м моли́лся еси́/ и, изба́вив того́ от сме́рти, приве́л еси́ ко Христу́,/ преподобному́чениче Ни́коне сла́вне,/ те́мже, с первострада́льцем зря Христа́ одесну́ю Отца́,/ моли́ся о нас, да не пребу́дем вне черто́га Христо́ва.

Ублажа́ем тя,/ преподо́бне о́тче Ни́коне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

12/25 Святителя Спиридона, епископа Тримифунтского (Тримифийского), чудотворца (ок. 348). Преподобного Ферапонта Монзенского (1597).

Собо́ра Пе́рваго показа́лся еси́ побо́рник и чудотво́рец,/ Богоно́се Спиридо́не о́тче наш. /Те́мже ме́ртву ты во гро́бе возгласи́в/ и змию́ в зла́то претвори́л еси́,/ и внегда́ пе́ти тебе́ святы́я моли́твы,/ а́нгелы, сослужа́щия тебе́, име́л еси́, свяще́ннейший./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Любо́вию Христо́вою уязви́вся, свяще́ннейший,/ ум впери́в заре́ю Ду́ха,/ де́тельным виде́нием твои́м дея́ние обре́л еси́, Богоприя́тне,/ же́ртвенник Боже́ственный быв,/ прося́ всем Боже́ственнаго сия́ния.

Велича́ем тя,/ святи́телю о́тче Спиридо́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Любо́вию Христо́вою, богому́дре, просвети́вся,/ доброде́тельми Васи́лию блаже́нному подража́л еси́,/ вся́кое же наслажде́ние плотско́е возненави́дев/ и в пусты́ню всели́вся,/ та́мо вельми́ подвиза́лся еси́ в пе́нии, во бде́нии и в поще́нии./ Те́мже и Христо́с да́ром чуде́с обогати́ тя./ Помина́й у́бо нас, чту́щих пресве́тлую па́мять твою́,/ преподо́бне о́тче Ферапо́нте,/ и моли́ Христа́ Бо́га спасти́ся душа́м на́шим.

Любо́вию Христо́вою, Богому́дре, просвети́вся, и доброде́тельми/ сожи́тельствовал еси́ Васи́лию блаже́нному,/ и, вся́кое наслажде́ние плотско́е возненави́дев,/ в пусты́ню всели́лся еси́,/ в ней же вельми́ подвиза́лся еси́, в жи́зни сей вре́менней/ плоть умерщвля́я свою́ в пе́ниих, и во бде́ниих, и в поще́ниих./ Те́мже и Христо́с да́ром чуде́с обогати́ тя,/ но помина́й у́бо нас, чту́щих пресве́тлую па́мять твою́,/ преподо́бне о́тче Ферапо́нте,/ и моли́ Христа́ Бо́га спасти́ся душа́м на́шим.

Возложи́в себе́ Бо́гу от ю́ности, преподо́бне,/ Того́ па́че всех возлюби́в,/ и Тому́ от всея́ души́ любо́вию после́довал еси́,/ тле́нная и кра́сная ми́ра нивочто́же вмени́в,/ в пусты́ню всели́вся,/ в не́йже до́бре подвиза́лся еси́ проти́ву неви́димых враго́в ко́зней/ и, я́ко светоза́рное со́лнце, в конца́х Га́лическия земли́ возсия́л еси́,/ отону́дуже, веселя́ся, прише́л еси́ к Небе́сным оби́телем,/ и ны́не со а́нгелы Влады́чню престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Ферапо́нте о́тче наш.

Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

13/26 Мучеников Евстратия, Авксентия, Евгения, Мардария и Ореста (284–305). Преподобного Аркадия Новоторжского, Вяземского (XI). Преподобного Германа Аляскинского, равноапостола Алеутского (1837). Преподобного Мардария, затворника Печерского, в Дальних пещерах почивающего (XIII). Преподобного Арсения Латрийского (VIII-IX). Неделя святых праотец (празднование бывает в Неделю предыдущую или приидущую).

Му́ченик всечестны́х све́тлость,/ пяточи́сленных страстоте́рпцев воспое́м,/ сла́ву земны́х презре́вших,/ со́лнца све́тлаго Евстра́тия,/ прему́драго вити́ю* со страда́льцы,/ на огнь и му́ки дерзну́вших за всех Царя́ Христа́/ и от престо́ла Того́ сла́вы по́честьми венце́в обдаре́нных./ Тех моли́твами, Христе́ Бо́же,/ спаси́ ду́ши на́ша.

Вити́йствуя пред беззако́ннующими Боже́ственная,/ бие́ния претерпе́л еси́ му́жественнейшим се́рдцем,/ облиста́л еси́ богозна́меньми, пречу́дне,/ угаси́л еси́ возвы́шенный пре́лести пла́мень,/ сего́ ра́ди тя че́ствуем, всеблаже́нне му́чениче Христо́в Евстра́тие.

Свети́льник яви́лся еси́ светле́йший во тьме неве́дения селя́щим, страстоте́рпче./ Ве́рою бо, я́ко копие́м, обложи́вся,/ враго́в шата́ния не убоя́лся еси́, Евстра́тие,/ ри́торов сый благоязы́чнейший.

Велича́ем вас,/ страстоте́рпцы святи́и Евстра́тие, Авксе́нтие, Евге́ние, Марда́рие и Оре́сте,/ и чтим честна́я страда́ния ва́ша,/ я́же за Христа́/ претерпе́ли есте́.

От духо́внаго наста́вника, преподо́бнаго Ефре́ма, наставля́ем,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́,/ и и́нок быв изря́дный,/ до́брым по́двигом ревну́яй,/ от Христа́ Бо́га вене́ц сла́вы Небе́сныя прия́л еси́,/ и ны́не вку́пе с преподо́бным отце́м Ефре́мом у престо́ла Вы́шняго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

К глуби́нам Боже́ственнаго Ра́зума впери́в ум свой,/ в Небе́сныя оби́тели восте́кл еси́/ и равноа́нгельное житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у престо́ла Влады́ки Христа́,/ моли́ся непреста́нно о всех нас.

Ублажа́ем тя,/ преподо́бне о́тче Арка́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ло́зу Правосла́вия прине́ся еси́ в Аме́рику из Росси́и благочести́выя/ и, удобри́в ко́рень по́стническими труда́ми/ и напои́в оби́льне моли́твенными слеза́ми,/ плоды́ прине́сл еси́ – виногра́д возлю́бленный,/ Ге́рмане, преблаже́нне о́тче наш./ Те́мже и Бог тя просла́ви, я́ко апо́стола преподо́бнаго,/ нетле́нием моще́й и благода́тию чуде́с,/ от ни́хже почерпа́юще благодея́ния, восхваля́ем тя:/ сла́ва Да́вшему ти кре́пость,/ сла́ва Венча́вшему тя,/ сла́ва Дарова́вшему тя Аме́рице свети́ло Правосла́вия.

Преподо́бне о́тче наш Ге́рмане,/ пе́рвый свети́льниче, в земли́ на́шей просия́вый,/ прино́сим вси тебе́ похвалы́ сия́,/ ты же, я́ко име́яй дерзнове́ние ко Го́споду,/ бу́ди засту́пник нам, и уте́шитель,/ и Це́ркви на́шея покрови́тель ди́вный,/ да вси со умиле́нием зове́м ти:/ ра́дуйся, о́тче наш Ге́рмане, Аля́ски и всея́ Аме́рики пресла́вный чудотво́рче.

Взбра́нному Воево́де свои́нствовався,/ в брань вступи́л еси́ на ду́ха зло́бы в по́ле препо́добия и апо́стольства./ И, пожа́в побе́ды обою́дныя,/ воздвиза́еши нас вопи́ти тебе́:/ ра́дуйся, свя́те Ге́рмане, апо́столе преподо́бный.

Валаа́ма постри́жник,/ честны́й возлю́бленник Бо́жией Ма́тери бы́вый,/ ревни́тель по́двигов дре́вних подви́жник но́вый,/ моли́тву, я́ко копие́ и щит, прие́мый,/ стра́шен де́моном и тьме язы́честей ста́вый,/ Ге́рмане преподо́бне , моли́ Христа́ Бо́га спасти́ ду́ши на́ша.

Велича́ем тя,/ святы́й равноапо́стольный Ге́рмане,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Бы́вый, блаже́нне Марда́рие,/ нестяжа́тель Христа́ ра́ди,/ и Того́ за мно́гая твоя́ благодея́ния/ в се́рдце твое́ всели́вый,/ моли́ся о нас, пою́щих тя.

Вы́шних ища́, ни́жних не стяжа́л еси́,/ и колесни́цу о́гненну к Небеси́, нестяжа́ние, себе́ поста́вль,/ со а́нгелы жи́ти сподо́бился еси́,/ Марда́рие сла́вне,/ с ни́миже Христа́ Бо́га моли́/ непреста́нно о всех нас.

Ублажа́ем тя,/ преподо́бне о́тче Марда́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и де́я, учил еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне Арсе́ние, дух твой.

И́же на земли́ вся оста́вль и Христо́вым стопа́м после́довал еси́ те́пле,/ Того́, сла́вне, на ра́мо свое́ честны́й крест взем,/ умертви́л есй труды́ по́стническими теле́сная жела́ния, всеблаже́нне./ Тем зове́м ти: ра́дуйся, о́тче Арсе́ние.

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ве́рою пра́отцы оправда́л еси́,/ от язы́к те́ми предобручи́вый Це́рковь,/ хва́лятся в сла́ве святи́и,/ я́ко от се́мене их есть плод благосла́вен,/ без се́мене Ро́ждшая Тя./ Тех моли́твами, Христе́ Бо́же, поми́луй нас.

Рукопи́саннаго о́браза не поче́тше,/ но Неопи́санным Существо́м защити́вшеся, треблаже́ннии,/ в по́двизе огня́ просла́вистеся,/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый, и потщи́ся*, я́ко Ми́лостив, в по́мощь на́шу,/ я́ко мо́жеши хотя́й.

14/27 Мучеников Фирса, Левкия и Каллиника (249–251). Святителя Илариона, митрополита Суздальского и Юрьевского (1707).

Му́ченицы Твои́, Го́споди... (общий мученикам).

Благоче́стия ве́ры побо́рницы, злочести́ваго мучи́теля оплева́вше,/ обличи́сте зверообра́зное его́ кровопроли́тие,/ и победи́те того́ я́ростное противле́ние,/ Христо́вою по́мощию укрепля́еми, Фи́рсе и Левки́е,/ с пострада́вшими, о нас моли́теся.

Велича́ем вас,/ страстоте́рпцы святи́и Фи́рсе, Левки́е и Калли́ниче с пострадавшими,/ и чтим честна́я страда́ния ва́ша,/ я́же за Христа́/ претерпе́ли есте́.

Воспо́йте у́бо, вси лю́дие,/ в Трие́х Ипоста́сех Еди́наго Бо́га,/ на Небесе́х непости́жно пребыва́ющаго,/ манове́нием же вся́ческая управля́ющаго,/ на зе́млю же щедро́тно призира́ющаго,/ в пусты́нном же пребыва́ющаго проти́ву неви́димых враго́в,/ уго́дника Своего́ преподо́бнаго Иларио́на укре́плыпаго,/ того́ моли́твами, Бо́же, поми́луй и спаси́ нас.

Боже́ственный Гром, Труба́ духо́вная... (общий святителю).

Велича́ем тя,/ святи́телю о́тче Иларио́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

15/28 Священномученика Елевферия (II). Преподобного Павла Латрийского (955). Святителя Стефана исповедника, архиепископа Сурожского (VIII). Преподобного Трифона Печенгского, Кольского (1583). Собор Крымских святых.

И нра́вом прича́стник,/ и престо́лом наме́стник... (общий священномученку).

Я́ко удобре́ние свяще́нников, преподо́бне ,/ и предувеща́ние страстоте́рпцев вси восхваля́ем/ и про́сим тя, священному́чениче Елевфе́рие,/ любо́вию па́мять твою́ пра́зднующия/ бед многообра́зных свободи́,/ моля́ непреста́нно о всех нас.

Велича́ем тя,/ священному́чениче Елевфе́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко безпло́тных единовсе́льника/ и всем преподо́бным соо́бщника,/ всесла́вне Па́вле, пое́м тя и мо́лим тя:/ моли́ся всегда́ о нас,/ я́ко да обря́щем ми́лость.

От ю́ности, му́дре, я́же па́че смы́сла вожделе́л еси́ му́жески,/ мирски́й мяте́ж оста́вил еси́/ и был еси́ Боже́ственнаго ра́ди жи́тельства Тро́ицы жили́ще/ и просвети́л еси́ ве́рою приступа́ющий тебе́./ Тем зове́м: ра́дуйся, Па́вле пребога́те.

Ублажа́ем тя,/ преподо́бне о́тче Па́вле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Я́ко святи́тель со безпло́тными единожи́тель быв,/ священному́чениче Стефа́не,/ восприе́м бо Крест, я́ко ору́жие,/ и став кре́пко сопроти́в иконоукори́теля и духобо́рцев,/ не покланя́ющихся Пречи́стому О́бразу Христа́ Бо́га на́шего,/ и отсе́кл еси́ вся́ку е́ресь лука́вых./ Того́ ра́ди прие́м муче́ния вене́ц,/ изба́вил еси́ град твой Суро́ж от вся́кия неприя́зни./ И ны́не мо́лим тя, свя́те,/ да изба́виши нас от вся́ких злых искуше́ний, и бед,/ и ве́чныя му́ки.

Вы́шняго си́лою, свяще́нне, укрепи́вся,/ царе́ва низложи́л еси́ иконобо́рная шата́ния./ Днесь Суро́жу и нам ве́рным предлежа́т/ сла́ва и бога́тство, святы́я твоя́ мо́щи,/ и́хже свы́ше дароно́сят* а́нгельстии чи́нове,/ пе́сньми и пе́нием славосло́вят тя,/ вели́кий свяще́нный Стефа́не.

Велича́ем тя,/ святи́телю о́тче Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Пути́ вводя́щаго в жизнь наста́вник и учи́тель был еси́;/ пе́рвее бо, преподо́бне о́тче наш Три́фоне,/ прише́л еси́ в часть Норве́гския земли́,/ и в после́дних конце́х се́верныя страны́ язы́ки просвети́л еси́,/ породи́в водо́ю и Ду́хом Святы́м,/ и свяще́нная твоя́ ча́да в безпло́дней пусты́ни,/ я́ко древа́ ма́сличная, насади́л еси́,/ ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́/ и мона́хов мно́жество собра́л./ Тем, я́ко апо́столом и пустынножи́телем равноче́стна чту́ще тя,/ приле́жно припа́дающе, вопие́м:/ моли́ всех Бо́га за о́бласть твою́, и за вся лю́ди,/ почита́ющия па́мять твою́.

Все твое́ у́мное жела́ние к Бо́гу впери́в,/ и Того́ зва́нию невозвра́тно от души́ после́довал еси́,/ в пусты́ню коне́чную всели́вся,/ и та́мо а́нгельски и равноапо́стольне пожи́в,/ мно́гим путь был еси́ ко спасе́нию./ Сего́ ра́ди и Христо́с тя просла́ви, и да́ром чуде́с обогати́,/ и́бо вели́ких царе́й Иоа́нна и Фео́дора Росси́йских чудесы́ удиви́л еси́./ Те́мже вси вопие́м ти:/ ра́дуйся, испове́дниче Христа́ Бо́га на́шего,/ ра́дуйся, гра́ду твоему́ непоколеби́мое утвержде́ние, Три́фоне о́тче наш.

Ублажа́ем тя,/ преподо́бне о́тче Три́фоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

16/29 Пророка Аггея (500 г. до Р. X.). Преподобной Софии Суздальской (Суждальской) (1542).

Проро́ка Твоего́ Агге́я па́мять, Го́споди, пра́зднующе,/ тем Тя мо́лим: спаси́ ду́ши на́ша.

Просвети́вшееся Ду́хом чи́стое твое́ се́рдце... (общий пророку).

Велича́ем тя,/ проро́че Бо́жий Агге́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Вы́шняго красото́ю я́вственно украша́лся,/ по́стнически бо труды́ подвиза́ся преподо́бная Софи́я/ и бысть насле́дница Небе́сному Ца́рствию,/ и вни́де в Небе́сный Черто́г наслади́тися Христо́вы красоты́,/ Его́же моли́ спасти́ся гра́ду Су́ждалю/ от пога́ных нахожде́ния и междоусо́бныя бра́ни/ и пода́ждь душа́м на́шим ве́лию ми́лость.

Но́щи стра́стныя избе́гши, богому́драя Софи́е преподо́бная,/ к Незаходи́мому же Со́лнцу, Христу́, прише́дши,/ умертви́ла еси́ пло́тское мудрова́ние посто́м же, воздержа́нием и моли́твами,/ показа́ся ра́вна а́нгелом,/ на земли́ бо поживе́ и ду́хи нечи́стыя от челове́к отгна́ла еси́,/ и разли́чная исцеле́ния подава́еши, от мно́гих бед и зол избавля́еши,/ Софи́е преподо́бная,/ моли́ спасти́ся душа́м на́шим.

Ублажа́ем тя,/ преподо́бная ма́ти Софи́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

17/30 Пророка Даниила и трех отроков: Анании, Азарии и Мисаила (600 г. до Р.X.)

Ве́лия ве́ры исправле́ния*,/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л львом па́стырь, я́ко овца́м, явля́шеся./ Тех моли́твами Христе́ Бо́же, спаси́ ду́ши на́ша.

Просвети́вшееся Ду́хом чи́стое твое́ се́рдце,/ проро́чества бысть светле́йшаго прия́телище,/ зри́ши бо, я́ко настоя́щая, дале́че су́щая,/ львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.

Рукопи́саннаго о́браза не поче́тше,/ но Неопи́санным Существо́м защити́вшеся, треблаже́ннии,/ в по́двизе огня́ просла́вистеся,/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый,/ и потщи́ся*, я́ко Ми́лостив, в по́мощь на́шу,/ я́ко мо́жеши хотя́й.

Велича́ем тя,/ проро́че Бо́жий Дании́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Велича́ем вас,/ святи́и трие́ о́троцы Ана́ние, Аза́рие и Мисаи́ле,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

18/31 Мучеников Севастиана и дружины его (ок. 287). Священномученика архиепископа Фаддея (1937). Преподобного Севастиана Сохотского, Пошехонского (ок. 1500).

Прославление праведного Симеона Верхотурского (1694). Святителя Модеста, архиепископа Иерусалимского (633–634).

Му́ченицы Твои́, Го́споди... (общий мученикам).

Хвала́ Бо́гу и же́ртва жива́я/ житие́ твое́, священному́чениче Фадде́е, яви́ся./ Посто́м, бде́нием и моли́твою Небе́сная дарова́ния прии́м,/ мно́гим до́брый помо́щник и уте́шитель бысть./ Па́стырскою му́дростию и ти́хостию нра́ва укра́шен,/ лука́вства враго́в Христо́вых препобеди́л еси́./ Сла́ва Да́вшему тебе́ во страда́ниих кре́пость,/ сла́ва, я́ко му́ченика, Венча́вшему тя,/ сла́ва Де́йствующему тобо́ю всем исцеле́ния.

Ду́ха небоя́зни, си́лы, любве́ и упова́ния/ даде́ Пастыренача́льник ти, святи́телю Фадде́е,/ во страда́нии бо твое́м благодаре́ние Бо́гу воздава́л еси́/ и в гоне́ниих стра́ждущия утеша́л еси́, глаго́ля:/ не уныва́йте, Христо́с бо с на́ми есть.

Велича́ем тя,/ священному́чениче Фадде́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Удали́вся ми́ра и водвори́вся в пусты́ни,/ до́брым по́двигом подвиза́ся,/ злострада́нием, и внима́нием, и моли́твами,/ отню́дуже и по сме́рти источа́еши исцеле́ния,/ Севастиа́не о́тче наш,/ моли́ Христа́ Бо́га/ спасти́ся душа́м на́шим.

Сия́нием Ду́ха Пресвята́го, му́дре Севастиа́не, просве́щся,/ оста́вил еси́ я́же в житии́ молвы́,/ пусты́ню же дости́гл, преподо́бне о́тче,/ возвесели́л еси́ и́же над все́ми Бо́га и Зижди́теля./ Сего́ ра́ди прославля́ет тя Христо́с, блаже́нне, Вели́кий Дарода́тель.

Ублажа́ем тя,/ преподо́бне о́тче Севастиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Мирска́го мяте́жа бе́гая,/ все жела́ние обрати́л еси́ к Бо́гу,/ да в виде́ния восхо́д обря́щеши горе́,/ отню́дуже не уклони́вся в лука́вствия се́рдца,/ но очи́стив ду́шу и те́ло,/ прия́л еси́ благода́ть точи́ти цельбы́ ве́рным и неве́рным,/ притека́ющим к тебе́, пра́ведный Симео́не. Те́мже по да́нному ти да́ру,/ испроси́ у Христа́ Бо́га исцеле́ние нам,/ боля́щим душе́вными страстьми́,/ и моли́ спасти́ ду́ши на́ша.

Ми́ра суе́тнаго отве́рглся еси́,/ да бла́га ве́чныя жи́зни насле́диши,/ возлюби́в незло́бие и чистоту́ души́ и те́ла./ Сниска́л еси́, е́же возлюби́л,/ свиде́тельствует бо о сем гроб и нетле́ние моще́й твои́х/ и благода́ть чудотворе́ния наипа́че./ То́чиши бо цельбы́ всем притека́ющим к тебе́ и непросвеще́нным,/ Симео́не блаже́нне, чудотво́рче преди́вный.

Ублажа́ем тя,/ святы́й пра́ведный Симео́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Преподо́бно пожи́в, богому́дре Моде́сте,/ и святи́тельскою оде́ждою украше́н,/ па́стырю Иерусали́ма блаже́ннейший,/ в весе́лии ны́не Христу́ предстои́ши/ и концы́ озаря́еши чудесы́,/ помо́щник у́бо бу́ди тя призыва́ющим,/ моля́ся, о́тче, о всех нас.

Све́тлых по́двигов твои́х тве́рдость/ и сострада́ния ко всем бога́тство ви́дя,/ Всеблаги́й Подвигополо́жник Бог/ бога́тых дарова́ний Свои́х сподо́би тя, Моде́сте,/ сла́вный иера́рше и чудотво́рче./ Тем, моля́щеся тебе́, вопие́м:/ свобожда́й нас от лю́тых обстоя́ний/ и неду́гом на́шим пода́ждь исцеле́ние.

Велича́ем тя,/ святи́телю о́тче Моде́сте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

19/1 Мученика Вонифатия (290).

К сосло́вию по́слан му́чеников,/ му́ченик был еси́ и́стинен,/ пострада́в за Христа́ крепча́йше, всехва́льне,/ мощми́ же возврати́лся еси́ ве́рою посла́вшей тя, Вонифа́тие блаже́нне,/ моли́ Христа́ Бо́га прия́ти нам грехо́в проще́ние.

Свяще́ние непоро́чное самово́льне Тебе́ приве́л еси́, и́же от Де́вы тебе́ ра́ди роди́тися Хотя́щему,/ свя́те венчено́сче, прему́дре Вонифа́тие.

Изы́де к прия́тию страстоте́рпческих моще́й и стра́ждущих зако́нне ве́ры ра́ди зря́,/ показа́л еси́ му́жески кре́пость свою́,/ устреми́вся на стра́сти испове́данием во Христа́,/ и́же прие́м по́честь побе́ды твоего́ страда́ния,/ Вонифа́тие, при́сно моли́ за ны.

Велича́ем тя,/ страстоте́рпче святы́й Вонифа́тие,/ и чтим честна́я страда́ния твоя́,/ я́же за Христа́/ претерпе́л еси́.

20/2 Предпразднство Рождества Христова. Неделя пред Рождеством Христовым, святых отец (в Неделю пред Рождеством Христовым). Священномученика Игнатия Богоносца (107). Праведного Иоанна Кронштадтского (1908). Преподобного Игнатия, архимандрита Печерского, в Дальних пещерах почивающего (1435). Святителя Даниила, архиепископа Сербского (1338). Новодворской и Леньковской (Новгород-Северской), именуемой «Спасительница утопающих», икон Божией Матери.

Гото́вися, Вифлее́ме,/ отве́рзися всем Еде́ме,/ красу́йся Евфра́фо,/ я́ко Дре́во Живота́ в верте́пе* процвете́ от Де́вы,/ рай бо О́ная чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем./ Христо́с ражда́ется пре́жде па́дший возста́вити о́браз.

Де́ва днесь Преве́чное Сло́во в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со а́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.

(аще внутрь предпразднства)

Весели́ся, Вифлее́ме, Евфра́фо, гото́вися:/ се бо Агница, Па́стыря вели́каго во утро́бе нося́щи, е́же роди́ти тщи́тся,/ Его́же зря́ще, Богоно́снии отцы́ веселя́тся,/ с па́стырьми пою́ще Де́ву доя́щую*.

(аще вне 20-го числа)

Рукопи́саннаго о́браза не поче́тше,/ но Неопи́санным Существо́м защити́вшеся, треблаже́нии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый,/ и потщи́ся, я́ко ми́лостив, в по́мощь на́шу,/ я́ко мо́жеши хотя́й.

Апо́стольских нра́вов подража́телю/ и престола́ их снасле́дниче,/ архиере́ев удобре́ние/ и му́чеников сла́во, богодухнове́нне,/ на огнь, и меч, и зве́ри дерзну́л еси́ ве́ры ра́ди/ и, сло́во и́стины исправля́я,/ до кро́ве пострада́л еси́, священному́чениче Игна́тие,/ моли́ Христа́ Бо́га спасти́ся душа́м на́шим.

Све́тлых по́двиг твои́х светоно́сный день/ предпропове́дует всем в верте́пе Рожде́ннаго28:/ Сего́ бо жажда́я от любве́ наслади́тися,/ потща́лся еси́ от звере́й снеде́н бы́ти;/ сего́ ра́ди и Богоно́сец наре́клся еси́, Игна́тие всему́дре.

Велича́ем тя,/ священному́чениче Игна́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Правосла́вныя ве́ры побо́рниче,/ земли́ Росси́йския печа́льниче,/ па́стырем пра́вило и о́бразе ве́рным,/ покая́ния и жи́зни во Христе́ пропове́дниче,/ Боже́ственных Та́ин благогове́йный служи́телю/ и дерзнове́нный о лю́дех моли́твенниче,/ о́тче пра́ведный Иоа́нне,/ цели́телю и преди́вный чудотво́рче,/ гра́ду Кроншта́дту похвало́/ и Це́ркве на́шея украше́ние,/ моли́ Всеблага́го Бо́га/ умири́ти мир и спасти́ ду́ши на́ша.

Со апо́столы изы́де веща́ние твое́ в концы́ вселе́нныя,/ с испове́дники страда́ния за Христа́ претерпе́л еси́,/ святи́телем уподо́бился еси́ Сло́ва пропове́данием,/ с преподо́бными во благода́ти Бо́жией просия́л еси́./ Сего́ ра́ди вознесе́ Госпо́дь бе́здну смире́ния твоего́ превы́ше небе́с,/ и дарова́ нам и́мя твое́ во исто́чник преди́вных чуде́с./ Те́мже во Христе́ во ве́ки живы́й, чудотво́рче,/ любо́вию ми́луй су́щия в беда́х,/ слы́ши ча́да твоя́, ве́рою тя призыва́ющия,/ Иоа́нне пра́ведне, возлю́бленный па́стырю наш.

Росси́йския земли́ па́стырь до́брый показа́лся еси́,/ в служе́нии пресви́терстем жизнь во Христе́ стяжа́в,/ Богому́дре о́тче Иоа́нне./ Благода́ть изоби́льную от Влады́ки Христа́ прия́л еси́:/ неду́ги отгоня́ти,/ малоду́шный утеша́ти,/ в Та́йне Пречи́стаго Те́ла и Кро́ви ве́рныя со Христо́м соединя́ти./ Сего́ ра́ди восхваля́ем тя,/ я́ко моли́твенника о душа́х на́ших.

Днесь па́стырь Кроншта́дтский предстои́т престо́лу Бо́жию/ и усе́рдно мо́лит о ве́рных/ Христа́ Пастыренача́льника,/ обетова́ние* да́вшаго:/ «Сози́жду Це́рковь Мою́/ и врата́ а́дова не одоле́ют ей».

От младе́нства Бо́гом избра́нный,/ и во о́трочестве дар уче́ния/ чуде́сно от Него́ прие́мый,/ и к пресви́терству в со́нном виде́нии/ пресла́вно призва́н быв,/ па́стырь ди́вный Це́ркве Христо́вы/ яви́лся еси́, о́тче Иоа́нне,/ благода́ти тезоимени́те29./ Моли́ Христа́ Бо́га/ всем нам с тобо́ю в Ца́рствии Бо́жием бы́ти.

Пропове́дником и́стины, богоно́сным отце́м подража́я,/ всего́ себе́ на служе́ние Бо́гу и бли́жним вдал еси́,/ и сан свяще́нства нося́, поко́я не ве́дал еси́,/ слу́жбы Бо́жия в Хра́ме при́сно соверша́я,/ и в доме́х ве́рных моле́бныя пе́ния воспева́я,/ нужда́ющимся ще́дро благотворя́,/ та́ко наименова́ние благотво́рца и безсре́бреника стяжа́л еси́, Иоа́нне./ Те́мже и по успе́нии твое́м росси́йския лю́дие прославля́ют и́мя твое́,/ и ве́чную па́мять тебе́ возглаша́юще,/ пою́т Бо́гу: аллилу́йя.

Велича́ем тя,/ святы́й пра́ведный о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Чи́стаго ра́ди и непоро́чнаго твоего́ жития́,/ Богоно́се о́тче Игна́тие,/ прие́мый от Го́спода чудотво́рныя да́ры исцеля́ти немощны́я,/ исцели́, мо́лим тя, и не́мощи на́ша,/ моля́ о нас Едина́го Человеколю́бца.

Проходя́, всеблаже́нне, доброде́тельми от си́лы в си́лу,/ и всех, с тобо́ю су́щих, о́ными превозвыша́я,/ всем служи́л еси́, Игна́тие, и угожда́л,/ тем избра́н был еси́ всем, в дому́ Бо́жия Ма́тере су́щим, в старе́йшину и вождя́,/ в чесо́м па́че Го́сподеви благоуго́ждь и ста́до Его́ до́бре упа́сши,/ моли́ся о нас, ча́дех твои́х.

Ублажа́ем тя,/ преподо́бне о́тче Игна́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Чу́до яви́ся извеще́ния,/ дела́ми доброде́телей Бо́жиих возсия́л еси́,/ мона́шествующих ли́ки упасл еси́,/ архиере́йская седа́лища утверди́л еси́,/ ерети́ческаго нападе́ния не усумне́вся,/ Це́рковию Христо́вою управля́я,/ преподо́бне о́тче, Дании́ле прему́дре,/ усну́в, я́ко спя,/ те́ло же твое́ це́ло и нетле́нно соблюде́но бысть,/ и подае́т цельбы́ боля́щим от разли́чных неду́гов,/ и де́моны прогоня́ет./ Сего́ ра́ди мо́лим тя:/ моли́ спасти́ся душа́м на́шим.

Возбра́нному и ди́вному на́шея земли́ свети́льнику днесь любо́вию притека́ем/ и песнь тебе́, Богоно́се, плете́м,/ я́ко иму́щему дерзнове́ние ко Го́споду:/ изба́ви нас от многообра́зных обстоя́ний, да зове́м ти:/ ра́дуйся, утвержде́ние оте́честву на́шему и вели́кий покрови́телю оби́тели своея́.

Велича́ем тя,/ святи́телю о́тче Дании́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

21/3 Мученицы Иулиании и с нею 500 мужей и 130-ти жен, в Никомидии пострадавших (304). Преставление святителя Петра, митрополита Московского и всея России чудотворца (1326). Благоверной княгини Иулиании Вяземской (1406). Преставление блаженного Прокопия, Христа ради юродивого, Вятского (1627). Перенесение мощей святителя Гавриила, архиепископа Рязанского и Зарайского (2000).

Агница Твоя́, Иису́се... (общий мученице).

Де́вства добро́тами преочище́нна, деви́це,/ и муче́ния венцы́, Иулиани́е, ны́не венча́вшися,/ дае́ши су́щим в ну́ждах и неду́зех исцеле́ние и спасе́ние/ приступа́ющим к ра́це твое́й,/ Боже́ственную бо благода́ть Христо́с источа́ет и жизнь ве́чную.

Велича́ем тя,/ страстоте́рпице Христо́ва Иулиани́е,/ и чтим честно́е страда́ние твое́,/ е́же за Христа́/ претерпе́ла еси́.

Я́же пре́жде безпло́дная земле́, ны́не весели́ся:/ се бо Христо́с свети́льника в тебе́ показа́,/ я́ве сия́юща в ми́ре/ и исцелева́юща неду́ги и боле́зни на́ша./ Сего́ ра́ди лику́й и весели́ся со дерзнове́нием:/ святи́тель бо есть Вы́шняго, сия́ соде́ловаяй.

Лику́й све́тло, благосла́внейший гра́де Москва́,/ име́яй в себе́ архиере́я Петра́,/ я́ко зарю́ со́лнца, всю Росси́ю чудодея́нии озаря́юща,/ той бо не́мощи врачу́ет/ и неду́ги, я́ко тьму прого́нит от вопию́щих ему́:/ ра́дуйся, иера́рше Бо́га Вы́шняго,/ тобо́ю сия́ па́стве твое́й соде́ловающаго.

Благове́рно пожи́в в ми́ре,/ житие́м чи́стым просвети́вся,/ уче́нием святи́тельства прии́м па́ству,/ апо́столом насле́дниче./ Тем прие́м дар чуде́с от Бо́га, о́тче Пе́тре,/ моли́ Христа́ Бо́га да спасе́т ду́ши на́ша.

Взбра́нному и ди́вному на́шея земли́ чудотво́рцу,/ днесь любо́вию к тебе́ притека́ем, песнь, богоно́се, плету́ще,/ я́ко име́я дерзнове́ние ко Го́споду,/ многообра́зных изба́ви нас обстоя́ний, да зове́м ти:/ ра́дуйся, утвержде́ние гра́ду на́шему.

Яви́ся днесь пресве́тлая па́мять твоя́, святи́телю преблаже́нне Пе́тре,/ в ми́ре све́тло сия́ющи/ и явля́ющи всем Боже́ственное сия́ние.

Велича́ем тя,/ святи́телю о́тче Пе́тре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Благоче́стно в зако́не пожи́вши/ и благи́ми де́лы украси́вшися,/ я́ко кре́пкий адама́нт яви́лася еси́,/ целому́дренная свята́я благове́рная княги́не Иулиани́е:/ тле́нную бо сла́ву и добро́тство теле́сное презре́вши,/ злоко́зненнаго врага́ победи́ла еси́/ и целому́дрия ра́ди му́ченическую смерть прия́ла еси́./ Сего́ ра́ди от Христа́ Бо́га нетле́нным и ве́чным венце́м венча́вшися,/ ны́не с ли́ки му́ченик лику́еши,/ и нам ве́лия чудеса́, приходя́щим ко гро́бу твоему́,/ оби́льно источа́еши./ Те́мже ти вопие́м:/ моли́ся Христу́ Бо́гу о всех нас,/ с ве́рою и любо́вию страда́ния твоя́ почита́ющих.

Воспое́м днесь Благоде́теля всех Бо́га,/ просла́вльшаго в Росси́и Иулиани́ю богому́друю,/ да моли́твами ея́ пода́ст душа́м на́шим/ грехо́в оставле́ние и ве́лию ми́лость.

Велича́ем тя,/ святая благове́рная княги́не Иулиани́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

И́же на земли́ Христа́ ра́ди во́лею в бу́йство преложи́ся,/ и ми́ра сего́ красо́ты отню́д возненави́де,/ и плотска́я игра́ния увяди́в посто́м и жа́ждею/ и на земли́ лега́нием,/ от зимы́ студе́нию и мра́зом,/ и от зно́я со́лнечнаго и дождя́/ и про́чия тяготы́ никогда́ же уклони́ся под кров,/ и на те́ле свое́м не име́я одея́ния,/ Бо́жиею по́мощию покрыва́ем,/ и ду́шу очи́стил еси́ доброде́тельми свои́ми, я́ко зла́то в горни́ле,/ Проко́пие прему́дре,/ с ве́рою творя́щим па́мять твою́ че́стно/ и усе́рдно притека́ющим к моще́м твои́м,/ прославля́юще твое́ свято́е успе́ние,/ Христу́ Бо́гу моля́ся, благою́роде,/ да изба́вит ны Госпо́дь от ва́рварскаго наше́ствия и междоусо́бныя бра́ни/ и мир ми́рови дару́ет/ и душа́м на́шим ве́лию ми́лость.

Ве́лию любо́вь ко Го́споду в себе́ име́я,/ все претру́дное житие́ твое́/ во гра́де Хлы́нове, юро́дствуя, прове́л еси́, блаже́нне Проко́пие,/ зной и мраз, глад и жа́жду благоду́шно терпя́,/ бие́ние и поноше́ние от люде́й безбо́жных/ ра́достно принима́л еси́, подви́жниче добропобе́дный,/ любо́вию же и добро́м ве́лиим за зло воздава́я,/ мно́зем предрека́л еси́ их ожида́ющее/ и от неду́гов исцеля́л еси́, беззло́бие./ Те́мже, наслажда́лся ны́не в со́нме святы́х,/ моли́ Го́спода поми́ловати град и лю́ди, тя почита́ющия.

Ангельски живя́ на земли́ Богоуго́дно,/ мно́гия ско́рби и труды́ терпели́во неся́,/ доброде́тельми и дарова́ниями от Бо́га украси́вся,/ предвеща́я гряду́щая и исцеля́я боле́зни,/ безмо́лвно, непреста́нно моля́ся,/ юро́дствуя, скрыв дарова́ния своя́,/ ны́не наслажда́яся в селе́ниих святы́х,/ святы́й блаже́нне Проко́пие,/ моли́ Христа́ Бо́га спасти́ся душа́м на́шим.

Возбра́нному и ди́вному в пра́ведницех му́жу,/ во́лею во юро́дство претвори́вшуся,/ ми́ра сего́ красоты́ возненави́дел еси́,/ плотска́я мудрова́ния30 увяди́л еси́ посто́м и жа́ждею,/ студе́нию мра́за, сне́га и зно́я, и дождя́,/ и от про́чия возду́шныя тя́готы никогда́ же уклони́ся/ и очи́стил еси́ себе́, я́ко зла́то в горни́ле, Проко́пие блаже́нне,/ всей Вя́тской земли́ похвала́ и утвержде́ние.

Мно́гою любо́вию к Бо́гу пламене́я,/ любви́ и смире́нию люде́й безмо́лвно учи́л еси́,/ дея́нием бу́дущая явля́я,/ неду́ги и боле́зни цели́л еси́./ На путь спасе́ния нас наста́ви,/ от язв грехо́вных исцели́,/ Проко́пие блаже́нне,/ о всех нас Христа́ Бо́га моли́.

Ублажа́ем тя,/ святы́й пра́ведный Проко́пие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ве́рою и пра́вдою Бо́гу служа́,/ сниска́л еси́ любо́вь па́ствы ряза́нския,/ Гаврии́ле святи́телю,/ до́брый па́стырю слове́сных ове́ц./ В годи́ну испыта́ний а́лчущих пита́л еси́,/ ико́ну Богома́тери Зна́мения, имену́емою «Корче́мною»,/ я́ко исто́чник неоску́дный утеше́ния па́стве свое́й указа́л еси́./ И ны́не моли́ся о нас приле́жно,/ чту́щих святу́ю па́мять твою́.

Христа́ из мла́да возлюби́л еси́/ и Тому́ любо́вию после́довал еси́,/ му́дростию святи́теля Филаре́та ду́шу свою́ пита́я,/ са́на святи́тельскаго удосто́ен был еси́,/ па́ству ряза́нскую, от Бо́га ти да́нную, усе́рдно окормля́л еси́,/ Гаврии́ле святи́телю,/ не преста́й моля́ся о ча́дех твои́х/ да вси честну́ю па́мять твою́ ра́достно почита́ем.

Велича́ем тя,/ святи́телю о́тче Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

22/4 Великомученицы Анастасии Узорешительницы (ок. 304).

Победоно́снаго Воскресе́ния/ истинноимени́тая31 нарече́на еси́, му́ченице Христо́ва,/ побе́ды на враги́ поста́вила еси́ мук терпе́нием,/ Христа́ ра́ди, Жениха́ твоего́,/ Его́же возлюби́ла еси́./ Того́ моли́/ спасти́ ду́ши на́ша.

Во искуше́ниих и ско́рбех су́щии,/ к твоему́ хра́му притека́юще,/ прие́млют честна́я дарова́ния от живу́щия в тебе́ Боже́ственныя благода́ти, Анастаси́е,/ ты бо при́сно ми́ру то́чиши исцеле́ния.

Велича́ем тя,/ страстоте́рпице Христо́ва Анастаси́е,/ и чтим честно́е страда́ние твое́,/ е́же за Христа́/ претерпе́ла еси́.

23/5 Мучеников, иже в Крите: Феодула, Саторнина, Евпора, Геласия, Евникиана, Зотика, Помпия, Агафопуса, Василида и Евареста (III). Преставление святителя Феоктиста, архиепископа Новгородского (1310). Равноапостольного Наума Охридского, сотрудника просветителей славян (IX).

Многочу́дный Крит почти́м,/ процве́тший честны́я цветы́,/ Христо́вы би́серы,/ му́чеников сора́сленых,/ де́сять бо суть число́м, блаже́ннии,/ и́же весь и́дольский наро́д посрами́ша,/ те́мже и венцы́ прия́ша, добледу́шнии.

Денни́ца возсия́ му́чеников/ честно́е страда́льчество, предозаря́ющее нам в верте́пе Ражда́емаго,/ Его́же Де́ва безсе́менно роди́32.

Велича́ем вас,/ страстоте́рпцы святи́и Феоду́ле, Саторни́не, Евпо́ре, Гела́сие, Евникиа́не, Зо́тике, Помпи́е, Агафо́пусе, Васили́де и Еваре́сте,/ и чтим честна́я страда́ния ва́ша,/ я́же за Христа́/ претерпе́ли есте́.

Бо́жия Сло́ва Прему́дрости изря́дный служи́тель,/ а́нгельскаго жи́тельства и́стинный подража́тель,/ Боже́ственныя чистоты́ рачи́тель,/ архиере́ом сопристо́льниче, преподо́бным сожи́тельниче,/ па́стырская красота́,/ Вели́кому Нову́граду похвала́,/ святи́телю пречестны́й Феокти́сте, о́тче наш,/ Ему́же, Сло́ву Бо́жию, в житии́ сем послужи́л еси́,/ моли́ спасти́ся душа́м на́шим.

Архиере́йское украше́ние, Вели́кому Нову́граду Богодухнове́нное удобре́ние,/ су́щия бо в нем лю́ди на па́житех живоно́снаго зако́на Госпо́дня упасл еси́,/ и сего́ ра́ди в лице́ святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в не́йже тя почи́тающе, ра́дуйся, от души́ вопие́м ти, святи́телю о́тче Феокти́сте,/ Вели́кому Нову́граду похвала́ и утвержде́ние.

Велича́ем тя,/ святи́телю о́тче Феокти́сте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Мир оста́вил еси́, прилепи́вся Христу́,/ плоть распя́л еси́, пожи́в Ду́ху,/ Нау́ме всеблаже́нне,/ потща́лся еси́ апо́стольским подвиза́тися тече́нием/ и улови́л еси́ к ве́ре Болга́рская неисче́тная мно́жества./ Те́мже моли́твами твои́ми/ изба́ви нас от искуше́ний.

Све́тлых твои́х по́двигов пречестна́я па́мять, я́ко ве́лие со́лнце, всем возсиява́ет,/ ли́ца воспева́ющих тя просвеща́ет,/ де́моны и вся́ку боле́знь отгоня́ет./ Сего́ ра́ди, соше́дшеся, любо́вию сию́ ве́рно восхва́лим.

Велича́ем тя,/ святы́й равноапо́стольный Нау́ме,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

24/6 Навечерие Рождества Христова (Рождественский сочельник). Преподобномученицы Евгении и иже с нею (ок. 262). Строгий пост.

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние:/ наста́ же вре́мя рождества́,/ и ме́сто ни еди́но же бе обита́лищу,/ но, я́коже кра́сная пала́та,/ верте́п Цари́це показа́шеся:/ Христо́с ражда́ется пре́жде па́дший воскреси́ти о́браз.

Де́ва днесь Преве́чное Сло́во в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со а́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Агница Твоя́, Иису́се... (общий мученице).

Благоро́дия нра́вом тя, честноподо́бне, украси́в обожи́вый Госпо́дь,/ в ра́бии о́бразе от Де́вы нам соедини́ся,/ и́же тя в лик дев свещено́сиц вчини́/ и с му́ченики сочета́, Евге́ние,/ я́ко вои́стину благоро́дия Боже́ственныя сла́вы вене́ц улучи́.

Велича́ем тя,/ страстоте́рпице Христо́ва Евге́ние,/ и чтим честно́е страда́ние твое́,/ е́же за Христа́/ претерпе́ла еси́.

25/7 Рождество Господа Бога и Спаса нашего Иисуса Христа. От 25 декабря до 5 января – Святки (святые дни). Нет поста в среду и пятницу.

Рождество́ Твое́, Христе́ Бо́же наш,/ возсия́ ми́рови свет ра́зума,/ в нем бо звезда́м служа́щий/ звездо́ю уча́хуся/ Тебе́ кла́нятися, Со́лнцу пра́вды,/ и Тебе́ ве́дети с высоты́ Восто́ка./ Го́споди, сла́ва Тебе́!

Де́ва днесь Пресу́щественнаго ражда́ет/ и земля́ верте́п Непресту́пному прино́сит,/ а́нгели с па́стырьми славосло́вят,/ волсви́ же со звездо́ю путеше́ствуют,/ нас бо ра́ди роди́ся/ Отроча́ Мла́до, Преве́чный Бог.

Велича́ем Тя,/ Живода́вче Христе́,/ нас ра́ди ны́не пло́тию ро́ждшагося/ от Безневе́стныя/ и Пречи́стыя Де́вы Мари́и.

26/8 Попразднство Рождества Христова.

Собор Пресвятой Богородицы. Праведного Иосифа Обручника, Давида царя и Иакова, брата Господня (переходящее празднование в Неделю по Рождестве Христовом). Виленской-Остробрамской и именуемых «Трех радостей», «Милостивая», Барловской «Блаженное Чрево» (1392), Байбузской (1852) и именуемой «Помощь в родах» икон Божией Матери.

Пречи́стая Богома́ти, Богоро́дице,/ Собо́р Твой честны́й украше́н многоразли́чными добро́тами,/ да́ры Ти прино́сят, Госпоже́, мно́ги мирсти́и лю́дие,/ у́зы на́ша гре́шныя раздери́ Свое́ю ми́лостию/ и спаси́ ду́ши на́ша.

И́же пре́жде денни́цы от Отца́ без ма́тере Роди́выйся,/ на земли́ без отца́ воплоти́ся днесь из Тебе́,/ те́мже звезда́ благовеству́ет волхво́м,/ а́нгели же с па́стырьми пою́т/ несказа́нное рождество́ Твое́, Благода́тная.

Благовеству́й, Ио́сифе, Дави́ду чудеса́ Богоотцу́/Де́ву ви́дел еси́ ро́ждшую,/ с па́стырьми славосло́вил еси́,/ с волхвы́ поклони́лся еси́,/ а́нгелом весть прие́м,/ моли́ Христа́ Бо́га спасти́ ду́ши на́ша.

Весе́лия днесь Дави́д исполня́ется боже́ственный,/ Ио́сиф же хвале́ние со Иа́ковом прино́сит,/ вене́ц бо сро́дством Христо́вым прие́мше, ра́дуются/ и неизрече́нно на земли́ Ро́ждшагося воспева́ют и вопию́т:/ Ще́дре, спаса́й Тебе́ чту́щия.

От святы́я ико́ны Твоея́,/ ра́дости неизрече́нныя преиспо́лнила еси́ се́рдце благочести́выя жены./ О, Пречи́стая Влады́чице ми́ра,/ всемо́щная Цари́це, ра́досте, Присноде́во, тва́ри,/ егда́ возврати́ла о́ной му́жа и сы́на и достоя́ние ея́./ Та́кожде и всем нам милосе́рдствуеши,/ да́руй исполне́ние благи́х жела́ний,/ источа́я при́сно теку́щий исто́чник ра́дости моля́щимся Тебе́/ и вседу́шно вопию́щим:/ Ра́дость всему́ ми́ру роди́вшая,/ ра́дости испо́лни неоскудева́ющия чту́щих Тя.

Взбра́нной Воево́де победи́тельная... (общий Божией Матери).

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

27/9 Апостола первомученика и архидиакона Стефана (34). Преподобного Феодора Начертанного, исповедника (ок. 840). Обретение мощей преподобного Ферапонта Можайского, Лужецкого чудотворца (1514). Иконы Божией Матери, именуемой «Милостивая».

По́двигом до́брым подвиза́лся еси́,/ первому́чениче Христо́в и апо́столе, и архидиа́коне Стефа́не,/ и мучи́телей обличи́л еси́ нече́стие./ Ка́мением бо побие́н от рук беззако́нных,/ вене́ц от я́же свы́ше Десни́цы прия́л еси́,/ и к Бо́гу взыва́л еси́, вопия́:/ Го́споди, не поста́ви им греха́ сего́.

Апо́столом совсе́льник/ и страстоте́рпцем первострада́лец,/ Христо́в служи́тель, прехва́льне Стефа́не,/ пе́рвее бо соверши́в муче́ния тече́ние,/ безчи́сленныя ро́ды челове́к ра́вно Подвигополо́жнику Христу́ приведе́./ Те́мже я́ко апо́стола и страда́льца верхо́внаго/ чту́ще тя, мо́лим:/ моли́ Христа́ Бо́га/ дарова́ти нам ве́лию ми́лость.

Ца́рским венце́м/ венча́ся твой верх от страда́ний,/ я́же претерпе́л еси́ по Христе́ Бо́зе,/ му́чеников первострада́льче Стефа́не:/ ты бо иуде́йское обличи́вый неи́стовство,/ ви́дел еси́ твоего́ Спа́са одесну́ю Отца́,/ Того́ у́бо моли́ о душа́х на́ших.

Влады́ка вчера́ нам пло́тию прихожда́ше,/ и раб днесь от пло́ти исхожда́ше;/ вчера́ Ца́рствуяй пло́тию роди́ся,/ днесь раб ка́мением побива́ется./ Того́ ра́ди и скончава́ется первому́ченик и боже́ственный Стефа́н.

Пе́рвый се́ялся еси́ на земли́ Небе́сным Де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, блаже́нне,/ пе́рвый от Него́ побе́ды венце́м увя́злся еси́ на небесе́х,/ страда́льцев нача́ло,/ вене́чниче му́чеников, первострада́льне.

Велича́ем тя,/ первому́чениче архидиа́коне Стефа́не,/ и чтим честна́я страда́ния твоя́,/ я́же за Христа́/ претерпе́л еси́.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодохнове́нное удобре́ние,/ Фео́доре прему́дре,/ уче́ньми твои́ми вся просвети́л еси́, цевни́це духо́вная;/ моли́ Христа́ Бо́га спасти́ся душа́м на́шим.

Житие́м чи́стым просвети́вся,/ в моли́твах и посте́х пусты́ни яви́лся еси́ до́брое прозябе́ние/ и, духо́вному твоему́ учи́телю после́дствуя,/ ум свой к Небе́сным упра́вль,/ ста́ду твоему́ наста́вник был еси́,/ тем тя мо́лим, о́тче Ферапо́нте,/ моли́ Христа́ Бо́га спасти́ся душа́м на́шим.

Преблаги́й Спас наш Христо́с/ умно́жил есть ми́лость Свою́ к нам,/ дарова́в нам в засту́пника и цели́теля/ преподо́бного отца́ на́шего Ферапо́нта,/ и́же просвеща́ет нас о́бразом свята́го жития́ своего́/ и ны́не моли́твами свои́ми огражда́ет оби́тель свою́ от враго́в и от разруше́ния,/ страну́ сию́ от гла́да и напра́сныя сме́рти,/ чту́щих же па́мять его́ всех/ от боле́зней и от лю́тых страсте́й.

Христо́вым жела́нием распали́вся,/ стра́сти плотски́я воздержа́нием оттря́с,/ по́стническое стяжа́в жи́тельство, преподо́бне ,/ сего́ ра́ди Госпо́дь труды́ твоя́ ви́дев,/ да́ром чуде́с обогати́ тя,/ источа́еши бо исцеле́ния и мо́лишися о нас к Бо́гу,/ мы же, ра́дующеся, вопие́м ти:/ ра́дуйся, Ферапо́нте, о́тче наш.

Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

28/10 Мучеников 20 000, в Никомидии в церкви сожженных, и прочих, тамо же вне церкви пострадавших (302).

Страстоте́рпцы Госпо́дни,/ блаже́нна земля́, напи́вшаяся кровьми́ ва́шими,/ и свя́та селе́ния, прии́мшая телеса́ ва́ша:/ в по́двизе бо врага́ победи́сте/ и Христа́ со дерзнове́нием пропове́даете./ Того́, я́ко Бла́га, моли́те/ спасти́ся, мо́лимся, душа́м на́шим.

Тве́рди душе́ю по ве́ре, святи́и,/ огне́м страда́ния прие́мше две тьмы33 страда́лец,/ вопию́ще Ро́ждшемуся от Де́вы:/ приими́ всесожже́ния на́ша за Тя,/ я́коже да́ры пе́рсских царе́й, зла́то и сми́рну, и Лива́н,/ Преве́чный Бо́же.

Велича́ем вас,/ страстоте́рпцы святи́и Никомиди́йстии,/ и чтим честна́я страда́ния ва́ша,/ я́же за Христа́/ претерпе́ли есте́.

29/11 Мучеников 14 000 младенцев, от Ирода в Вифлееме избиенных (I). Преподобного Маркелла, игумена обители «Неусыпающих» (485). Преподобных Марка гробокопателя, Феофила и Иоанна Печерских, в Ближних пещерах почивающих (XI-XII).

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Звезда́ волхвы́ посла́ к Ро́ждшемуся,/ и и́род непра́ведное во́инство посла́ лю́то,/ уби́ти мня во я́слех,/ я́ко Младе́нца лежа́ща.

В Вифлее́ме ро́ждшуся Царю́, волсви́ от Перси́ды с да́ры прихо́дят,/ звездо́ю свы́ше наставля́еми,/ но И́род смуща́ется и пожина́ет младе́нцы, я́ко пшени́цу,/ и рыда́ет себе́,/ я́ко держа́ва его́ вско́ре разори́тся.

Велича́ем вас,/ святи́и младе́нцы четырена́десяти тысящ, в Вифлее́ме Иуде́йстем Христа́ ра́ди от и́рода избие́ннии,/ и чтим честна́я страда́ния ва́ша,/ я́же за Христа́/ претерпе́ли есте́.

В тебе́, о́тче, изве́стно спасе́ся... (общий преподобному).

Я́ко звезда́, кра́сно сия́я,/ от Ефе́са провозсия́л еси́ нам, всеблаже́нне, пости́жно,/ и доброде́тельми возгреме́л еси́,/ наста́вник и́ноком мно́гим быв, преподо́бне ,/ того́ ра́ди и ца́рствующий град просвети́л еси́,/ и сего́ ра́ди вопие́м ти:/ ра́дуйся, о́тче всеблаже́нне Марке́лле.

Ублажа́ем тя,/ преподо́бне о́тче Марке́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Умертви́в плотски́я по́хоти, мно́гим вздержа́нием/ и копа́нием гробо́в святы́м,/ при́сно, а́ки мертв, в пеще́ре живя́,/ ме́ртвыя повеле́нием свои́м воздвиза́л еси́,/ Ма́рко прехва́льне,/ мертви́ и на́ша мудрова́ния пло́тская/ и наста́ви нас на тече́ние доброде́телей,/ моля́ о нас Еди́наго Человеколю́бца.

Врача́ изря́дна и чудотво́рца любо́вию, ве́рнии, ублажи́м, прося́ще его́:/ да моли́твами свои́ми уврачу́ет на́ша стра́сти, душе́вныя и теле́сныя,/ и́мать бо на сие́ благода́ть от Бо́га,/ и прого́нит ду́хи лука́выя от всех, ве́рно ко гробу его́ притека́ющих и зову́щих:/ ра́дуйся, Ма́рко, цели́телю не́мощей на́ших.

Ублажа́ем тя,/ преподо́бне о́тче Ма́рко,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

30/12 Святителя Макария, митрополита Московского (1563). Мученицы Анисии (285–305) Священномученика Зотика пресвитера, сиропитателя (IV). Обретение мощей преподобного Даниила, игумена Переяславского, чудотворца (1652).

Я́ко вели́ким па́стырем единонра́вна/ и учи́телем вселе́нныя единомы́сленна,/ Бо́жии Прему́дрости служи́теля изря́дна, и́же блаже́нству тезоимени́ту,/ днесь, ве́рнии, вси воспои́м:/ Христа́ Бо́га моли́, святи́телю Мака́рие,/ умири́ти мир и спасти́ ду́ши на́ша.

Богому́дрым уче́нием и кни́жным списа́нием/ потща́лся еси́, святи́телю Мака́рие,/лю́ди Росси́йския просвети́ти/ и святы́х земли́ на́шея просла́вити./ Сего́ ра́ди чу́ден пронарече́ся,/ прее́мниче первопресто́льников росси́йских./ Моли́ сохраняйся нам в ве́ре и благоче́стии невреди́мо.

Велича́ем тя,/ святи́телю о́тче Мака́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

А́гница Твоя́, Иису́се... (общий мученице).

Храм твой всечестны́й,/ я́ко цельбу́ душе́вную обре́тше, вси ве́рнии,/ велегла́сно вопие́м ти,/ де́во му́ченице, Ани́сие великоимени́тая:/ Христа́ Бо́га моли́ непреста́нно о всех нас.

Наста́ светоно́сный день чуде́сных по́двиг твои́х, страстоте́рпице пресла́вная,/ днесь Бо́жия честна́я Це́рковь пра́зднует и созыва́ет вопи́ти тебе́:/ ра́дуйся, де́во му́ченице Ани́сие всеблаже́нная.

Велича́ем тя,/ страстоте́рпице Христо́ва Ани́сие,/ и чтим честно́е страда́ние твое́,/ е́же за Христа́/ претерпе́ла еси́.

И нра́вом прича́стник, и престо́лом наме́стник... (общий священномученику).

За любо́вь Христо́ву, преподо́бне , ни́щия возлюби́в,/ и сих удово́лил еси́,/ и Небе́сное бога́тство ны́не восприя́л еси́, Зо́тике пребога́те./ Сего́ ра́ди вси тя почита́ем,/ соверша́юще па́мять твою́.

Велича́ем тя,/ священному́чениче Зо́тике,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности, блаже́нне, всего́ себе́ Го́сподеви возложи́в,/ вы́ну повину́яся Бо́гу,/ проти́вяся же диа́волу,/ над страстьми́ грехо́вными воцари́лся еси́,/ те́м сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув/ и со́бранное тобо́ю в ней ста́до Христо́во Богоуго́дно упа́сши,/ преста́вился еси́ к ве́чным оби́телем,/ о́тче Дании́ле,/ моли́ Триипоста́снаго во еди́ном Существе́ Бо́га спасти́ся душа́м на́шим.

От позна́ния себе́ прише́д в позна́ние Бо́га/ и благоче́стием к Нему́ восприи́м нача́ло чу́вства вну́тренняго,/ ра́зум свой плени́л в послуша́ние ве́ры;/ тем и, по́двигом до́брым подвиза́вся,/ дости́гнул еси́ в ме́ру во́зраста соверше́нна исполне́ния Христо́ва,/ я́ко Бо́жие тяжа́ние*, Бо́жие зда́ние, дела́л еси́ бра́шно*, не ги́блющее,/ но бра́шно, пребыва́ющее в живо́т ве́чный./ Да бу́дут единоду́шно вси насажде́ние Госпо́дне в сла́ву,/ моли́, блаже́нне, Еди́наго Человеколю́бца Бо́га.

Ублажа́ем тя,/ преподо́бне о́тче Дании́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

31/13 Отдание праздника Рождества Христова. Преподобной Мелании Римляныни (439) (служба преподобной Мелании поется в 30-й день декабря).

В тебе́, ма́ти, изве́стно спасе́ся... (общий преподобной жене).

За любо́вь Госпо́дню, преподо́бная Мела́ние,/ поко́я жела́ние возненави́дела еси́,/ поще́нием, дух твой просвети́вши,/ кре́пко бо зве́ри победи́ла еси́;/ но моли́твами твои́ми проти́вных шата́ния разори́.

Де́вства чистоты́ возлю́бльши и обру́чника к благи́м увеща́вши,/ премно́жество бога́тства расточи́/ в пребыва́ние и́ночествующим, богоблаже́нная, и оби́тель воздви́же./ Те́мже в Небе́сная оби́тели всели́ся,/ помина́й нас, Мела́ние всечестна́я.

Ублажа́ем тя,/ преподо́бная ма́ти Мела́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

1/14 Обре́зание Господа Бога и Спаса нашего Иисуса Христа. Святителя Василия Великого, архиепископа Кесарии Каппадокийской (379).

На престо́ле огнезра́чнем/ в вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ роди́тися на земли́/ от Отрокови́цы Неискусому́жныя, Твоея́ Ма́тере, Иису́се,/ сего́ ра́ди и обре́зан был еси́, я́ко Челове́к осмодне́вный./ Сла́ва всеблаго́му Твоему́ сове́ту,/ сла́ва смотре́нию Твоему́,/ сла́ва снизхожде́нию Твоему́, Еди́не Человеколю́бче.

Всех Госпо́дь обре́зание терпи́т/ и челове́ческая прегреше́ния, я́ко Благ, обре́зует,/ дае́т спасе́ние днесь ми́ру./ Ра́дуется же в Вы́шних и Созда́телев иера́рх,/ и светоно́сный, Боже́ственный таи́нник Христо́в Васи́лий.

Велича́ем Тя,/ Живода́вче Христе́,/ и почита́ем пречи́стый пло́ти Твоея́/ зако́нное обре́зание.

Во всю зе́млю изы́де веща́ние твое́,/ я́ко прие́мшую сло́во твое́,/ и́мже боголе́пно научи́л еси́,/ естество́ су́щих уясни́л еси́34,/ челове́ческия обы́чаи украси́л еси́,/ ца́рское свяще́ние35, о́тче преподо́бне ,/ моли́ Христа́ Бо́га/ спасти́ся душа́м на́шим.

Яви́лся еси́ основа́ние непоколеби́мое Це́ркве,/ подая́ всем некра́домое госпо́дство36 челове́ком,/ запечатле́л твои́ми веле́ньми37,/ небоявле́нне38 Васи́лие преподо́бне .

Велича́ем тя,/ святи́телю о́тче Васи́лие,/ и чтим святу́ю па́мять твою́, ты бо мо́лиши за нас/ Христа́ Бо́га на́шего.

Велича́ем тя,/ святителю Христов Василие,/ благочестно Це́рковь Христо́ву непоро́чну сохра́ншаго.

2/15 Предпразднство Богоявления. Святителя Сильвестра, папы Римского (335). Преставление (1833), второе обретение мощей (1991) преподобного Серафима, Саровского чудотворца. Праведной Иулиании Лазаревской, Муромской (1604). С этого дня по 5 января – предпразднство Богоявления.

Гото́вися, Завуло́не,/ и красу́йся, Неффали́ме,/ Иорда́не реко́, ста́ни,/ подыми́, взыгра́я, крести́тися гряду́ща Влады́ку;/ весели́ся, Ада́ме с прама́терию,/ не кры́йта себе́, я́коже в раи́ пре́жде,/ и́бо, на́ги ви́дев вы яви́ся,/ да облече́т в пе́рвую оде́жду./ Христо́с яви́ся, всю тварь хотя́ обнови́ти.

Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

Прави́ло ве́ры И о́браз кро́тости... (общий святителю).

Во свяще́нницех свяще́нник яви́лся еси́ Царя́ и Бо́га, богоно́се,/ по́стником собесе́дник быв,/ отону́дуже, сра́дуешися ны́не лико́м а́нгельским, о́тче, веселя́ся в Небе́сных,/ Сильве́стре, сла́вне па́стырю,/ спаса́й любо́вию соверша́ющия па́мять твою́.

Я́ко звезду́ тя вселе́нней, свя́те,/ яви́ и́же сла́вы Госпо́дь,/ доброде́тели предложи́в па́че денни́цы, блаже́нне./ Свет бо еси́ нам, о́тче Сильве́стре.

Велича́ем тя,/ святи́телю о́тче Сильве́стре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности Христа́ возлюби́л еси́, блаже́нне,/ и Тому́ еди́ному рабо́тати пла́менне вожделе́в39,/ непреста́нною моли́твою и трудо́м в пусты́ни подвиза́лся еси́,/ умиле́нным же се́рдцем любо́вь Христо́ву стяжа́в,/ избра́нник возлю́блен Бо́жия Ма́тере яви́лся еси́./ Сего́ ра́ди вопие́м ти:/ спаса́й нас моли́твами твои́ми, Серафи́ме, преподо́бне о́тче наш.

Ми́ра красоту́ и я́же в нем тле́нная оста́вив, преподо́бне ,/ в Саро́вскую оби́тель всели́лся еси́,/ и та́мо а́нгельски пожи́в,/ мно́гим путь был еси́ ко спасе́нию./ Сего́ ра́ди и Христо́с тебе́, о́тче Серафи́ме, просла́ви/ и да́ром исцеле́ний и чуде́с обогати́./ Те́мже вопие́м ти:/ ра́дуйся, Серафи́ме, преподо́бне о́тче наш.

Ублажа́ем тя,/ преподо́бне о́тче Серафи́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Просвети́вшися Боже́ственною благода́тию,/ и по сме́рти све́тлость жития́ твоего́ яви́ла еси́,/ источа́еши бо ми́ро благово́нное всем боля́щим на исцеле́ние,/ с ве́рою приходя́щим к моще́м твои́м,/ пра́ведная ма́ти Иулиани́е,/ Христа́ Бо́га моли́/ спасти́ся душа́м на́шим.

На ра́мо взе́мши крест свой,/ после́довала еси́ Христу́ ми́лостынею, посто́м и моли́твою,/ всехва́льная Иулиани́е ми́лостивая,/ и всем, в ми́ре живу́щим, пра́вило яви́лася еси́ жития́,/ те́мже Вы́шнее Ца́рствие насле́довавши,/ непреста́нно моли́/ спасти́ся душа́м на́шим.

Скоропослу́шливую помо́щницу вси, су́щии в беда́х и боле́знех,/ воспое́м Иулиани́ю святу́ю,/ та бо в ми́ре благоуго́дно поживе́/ и ми́лостыню к ни́щим безме́рну показа́,/ сего́ ра́ди обре́те благода́ть чу́дес Бо́жиим виде́нием.

Велича́ем тя,/ свята́я пра́ведная Иулиани́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

3/16 Пророка Малахии (400 г. до Р. X.). Мученика Гордия (IV).

Проро́ка Твоего́ Малахи́и па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Проро́чества дарова́нием богате́я, проро́че,/ Христо́во предвозвести́л еси́ прише́ствие я́ве и ми́рови спасе́ние,/ Его́же сия́нием мир просвети́ся.

Я́ко а́нгел послужи́л еси́, всеблаже́нне,/ и сподо́бися пре́ди* бу́дущая веща́ти,/ Госпо́дне бо вочелове́чение всем уясни́л еси́,/ те́мже вопие́м ти:/ ра́дуйся, проро́че Бо́жий Малахи́е, приснопа́мятне.

Велича́ем тя,/ проро́че Бо́жий Малахи́е,/ и чтим святу́ю па́мять твою,/ ты бо мо́лиши за нас/ Христа́ Бо́га на́шего.

Му́ченик Твой, Го́споди... (общий мученику).

Твоя́ по́ты, пресла́вне, всю зе́млю напои́ша,/ и честны́ми кровьми́, Горди́е, мир весь возвесели́л еси́;/ моли́твами твои́ми, богому́дре,/ спаса́й вся, ве́рою тя воспева́ющия и ублажа́ющия,/ вопию́щия песнь досто́йную, всехва́льне, я́ко многострада́лец.

Все́ю любо́вию днесь Це́рковь твою́ па́мять соверша́ет, Горди́е,/ восхваля́ющи та́йно,/ я́ко по той пострада́л еси́,/ му́чеником добро́то/ и всем ве́рным во Христа́ похвало́.

Велича́ем тя,/ страстоте́рпче святы́й Горди́е,/ и чтим честна́я страда́ния твоя́,/ я́же за Христа́/ претерпе́л еси́.

4/17 Собор 70-ти апостолов. Преподобного Феоктиста, игумена Кукума Сикелийского (800). Святителя Евстафия I, архиепископа Сербского (ок. 1285). Преподобного Ахилы, диакона Печерского, в Дальних пещерах почивающего (XIV).

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Христо́вых ученико́в лик се́дмьдесят/ Боже́ственно, ве́рнии, в пе́снех восхва́лим,/ те́ми бо вси навыко́хом Тро́ицу почита́ти Неразде́льную,/ и пребыва́ют свети́льницы Боже́ственныя ве́ры.

Зве́зды све́тлыя, я́ко двунадеся́тем спосо́бницы,/ Христо́с вас яви́, прему́дрии,/ озаря́ющия мир све́том про́поведи/ и в ве́ру приве́дший мно́жество безчи́сленно язы́к, апо́столи Боже́ственнии./ Сего́ ра́ди днесь восхваля́ем ве́рою ва́шу па́мять,/ моли́те спасти́ся душа́м на́шим.

Велича́ем вас,/ святи́и апо́столи,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

В тебе́, о́тче... (общий преподобному).

Я́ко а́нгел во пло́ти на земли́ показа́ся,/ поще́нием насажде́н бысть, о́тче преподо́бне Феокти́сте,/ наста́вник и́ноком мно́гим быв,/ сего́ ра́ди вопие́м ти:/ моли́ Христа́ Бо́га дарова́ти нам ве́лию ми́лость.

Ублажа́ем тя,/ преподо́бне о́тче Феокти́сте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

По́стническое житие́ облобыза́в/ и мно́гими труды́ от млады́х ногте́й себе́ обложи́в,/ на степе́нь диа́конства произведе́н быв, всече́стне,/ в ко́ем служи́л еси́ в це́ркви Бо́жия Ма́тере непоро́чне,/ Е́йже моли́ся,/ во е́же спасти́ся душа́м на́шим.

Ве́лие име́л еси́ вои́стину воздержа́ние, сла́вне,/ и мно́гое показа́л еси́ поще́ние, о Ахи́ло, зане́ едва́ еди́ною в седми́це,/ и се еди́ну ма́лу просфору́ снеда́ше/ и бде́нным стоя́нием к Нему́ вы́ну друча́шеся*,/ тем тя, я́ко по́стника и преподо́бным соо́бщника/ чту́ще, ублажа́ем.

Ублажа́ем тя,/ преподо́бне о́тче Ахи́ло,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Избра́н от Бо́га, возлю́блен от люде́й,/ архиере́ов Боже́ственная красото́,/ о́тче Евста́фие, а́нгелов сослужи́телю,/ та́йн же Боже́ственных пропове́датель был еси́,/ те́мже моли́ Христа́ Бо́га со все́ми святы́ми/ изба́витися от вся́ких зол/ моли́твами твои́ми, блаже́нне,/ и спасти́ся нам,/ чту́щим любо́вию святу́ю па́мять твою́.

Свы́ше благода́ть прие́м от Бо́га,/ во святи́тельское подо́бие обле́клся еси́/ и от уст твои́х благоче́стно всех научи́л еси́ покланя́тися Тро́ице Единосу́щней./ Те́мже па́мять твою́ чту́ще,/ прославля́ем Бо́га, просла́влыпаго тя.

Велича́ем тя,/ святи́телю о́тче Евста́фие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

5/18 На́вечерие Богоявления (Крещенский сочельник). День постный.

Возвраща́шеся иногда́ Иорда́н река́ ми́лотию* Елиссе́евою,/ возне́сшуся Илии́, и разделя́хуся во́ды сю́ду и сю́ду,/ и бысть ему́ сух путь, и́же мо́крый,/ во о́браз вои́стину Креще́ния,/ и́мже мы теку́щее жития́ прехо́дим ше́ствие./ Христо́с яви́ся во Иорда́не освяти́ти во́ды.

Во струя́х днесь Иорда́нских быв Госпо́дь,/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

Всех, Христе́, Благоутро́бне, отъе́мляй прегреше́ний мно́жество,/ ми́лости ра́ди безме́рныя,/ Иорда́нскими вода́ми крести́тися гряде́ши, я́ко Челове́к,/ оде́ждею мя одева́я,/ сла́вы дре́вния обнаже́на лю́те.

6/19 Святое Богоявление. Крещение Господа Бога и Спаса нашего Иисуса Христа.

Во Иорда́не креща́ющуся Тебе́, Го́споди,/ Тро́ическое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не,/ изве́ствоваше словесе́ утвержде́ние./ Явле́йся, Христе́ Бо́же,/ и мир просвеще́й, сла́ва Тебе́.

Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́ и яви́лся еси́,/ Свет Непристу́пный.

Велича́ем Тя,/ Живода́вче Христе́,/ нас ра́ди ны́не пло́тию крести́вшагося/ от Иоа́нна/ в вода́х Иорда́нских.

Глас Госпо́день на вода́х вопие́т, глаго́ля:/ прииди́те, приими́те вси/ Ду́ха прему́дрости,/ Ду́ха ра́зума,/ Ду́ха стра́ха Бо́жия,/ я́вльшагося Христа́. (трижды.)

Днесь вод освяща́ется естество́,/ и разделя́ется Иорда́н,/ и свои́х вод возвраща́ет струи́,/ Влады́ку зря креща́ема. (дважды).

Я́ко челове́к на реку́ прише́л еси́, Христе́ Царю́,/ и ра́бское креще́ние прия́ти тщи́шися, Бла́же,/ от Предте́чеву руку́,/ грех ра́ди на́ших, Человеколю́бче! (Дважды.)

Ко гла́су вопию́щаго в пусты́ни:/ угото́вайте путь Госпо́день,/ прише́л еси́, Го́споди, зрак ра́бий прии́м,/ креще́ния прося́, не ве́дый греха́./ Ви́деша Тя во́ды и убоя́шася,/ тре́петен бысть Предте́ча, и возопи́, глаго́ля:/ ка́ко просвети́т свети́льник Све́та?/ Ка́ко руку́ положи́т раб на Влады́ку?/ Освяти́ мене́ и во́ды, Спа́се, взе́мляй ми́ра грех.

7/20 Попразднство Богоявления. Собор Предтечи и Крестителя Господня Иоанна. С этого дня по 14 января – попразднство Богоявления.

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стину и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в, ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра/ и подаю́щаго нам ве́лию ми́лость.

Плотска́го Твоего́ прише́ствия убоя́вся,/ Иорда́н стра́хом возвраща́шеся,/ проро́ческое же служе́ние исполня́я,/ Иоа́нн тре́петом спря́ташеся,/ а́нгельстии чи́ни ужаса́хуся,/ зря́ще Тя во струя́х пло́тию креща́ема,/ и вси су́щии во тьме озаря́хуся,/ воспева́юще Тя, я́вльшагося и просвети́вшаго вся.

Велича́ем тя,/ Предте́че Спа́сов Иоа́нне,/ и почита́ем вси всечестны́й собо́р твой.

Святы́й вели́кий Иоа́нне Предте́че Госпо́день,/ моли́ Бо́га о нас.

8/21 Преподобных Георгия Хозевита (VII) и Емилиана исповедника (IX). Священномученика Исидора пресвитера и с ним 72-х, в Юрьеве Лифляндском пострадавших (1472). Преподобного Григория, затворника Печерского, в Дальних пещерах почивающего (XIII-XIV). Преподобного Григория, чудотворца Печерского, в Ближних пещерах почивающего (1093). Преподобного Паисия Угличского (1504).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Яви́лся еси́ свети́ло пресве́тлое, Гео́ргие,/ озаря́я Боже́ственными заря́ми ве́рно зову́щия ти:/ моли́ о нас Влады́ку Христа́,/ я́вльшагося во струя́х/ и просве́щшаго земноро́дныя.

До́бляго тя побо́рника по Тро́ице я́вльшагося,/ Це́рковь сла́вит пою́щи, Емилиа́не,/ за ню́же пострада́л еси́./ Сего́ ра́ди почита́ем па́мять твою́,/ язы́ческаго наше́ствия изба́ви рабы́ твоя́.

Велича́ем вас,/ святи́и отцы́ Гео́ргие и Емилиа́не,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Страстоте́рпцы Госпо́дни блаже́ннии,/ Правосла́вную ве́ру Христо́ву со дерзнове́нием пропове́даете/ и на суди́щи уче́ния враго́в непра́вая обличи́сте./ Того́ ра́ди и вве́ржени бы́сте, святи́и,/ во глубину́ ре́чную,/ду́ши же ва́ши всели́шася в Небе́сныя кри́вы,/ иде́же со святы́ми предстоя́ще престо́лу Царя́ всех Бо́га,/ моли́теся Ему́ за вся правосла́вныя лю́ди,/ по́двиги ва́ша че́стно почита́ющия.

Му́ченик Христо́вых лик пе́сньми почти́м,/ пострада́вших кре́пко Христо́вы ра́ди ве́ры и́стинныя/ и вра́жию горды́ню до конца́ низложи́вших./ Озари́вшеся бо благода́тию несозда́нныя Тро́ицы, сла́внии,/ со священному́чеником Иси́дором пострада́вший,/ я́ко зве́зды сия́ете во всем ми́ре,/ и ны́не мо́литеся Христу́ непреста́нно,/ и нас защища́ете от вражде́бных язы́к наше́ствия,/ неусы́пнии моли́твенницы о душа́х на́ших.

Велича́ем тя,/ священному́чениче Иси́доре со пострада́вшими,/ и чтим честна́я страда́ния ва́ша,/ я́же за Христа́/ претерпе́ли есте́.

Пеще́рный жи́тель и в телеси́ а́нгел/ и чудотво́рец яви́лся еси́, богоно́се о́тче наш Григо́рие,/ посто́м, бде́нием, моли́твою/ Небе́сная дарова́ния прии́м,/ исцеля́вши неду́жныя и ду́ши ве́рою приходя́щих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ве́лием воздержа́нием/ и нощны́ми моли́твами,/ преподо́бне чудотво́рче о́тче Григо́рие,/ прия́л еси́ от Бо́га дар чудотворе́ния/ исцеля́ти неду́жныя,/ с ве́рою к тебе́ притека́ющия,/ те́мже и на́ша мно́гия боле́зни исцели́, мо́лимся.

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Вели́ких дарова́ний прие́мниче/ и вели́ких чуде́с си́лою Бо́жиею твори́телю,/ пречу́дне о́тче Григо́рие,/ я́ко ве́лие дерзнове́ние име́я ко Христу́ Бо́гу,/ непреста́нно о нас моли́ся Ему́,/ да грехо́в оставле́ние/ пода́ст душа́м на́шим.

Запреща́я беззако́ннующим беззако́нновати,/ вве́ржен был еси́ те́ми в струи́ ре́чныя, досточу́дне Григо́рие,/ иде́же блаже́нную восприе́м кончи́ну./ Ны́не со а́нгелы предстоя́ престо́лу/ Влады́чню,/ моли́ся о душа́х на́ших.

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Христо́вы ра́ди любве́ оте́чество и род оста́вил еси́,/ и, а́нгельскому житию́ поревнова́в,/ в пусты́ню всели́лся еси́,/ в не́йже многотру́дное житие́ яви́л еси́/ и чуде́с дарова́ния от Бо́га прия́л еси́,/ Паи́сие преподо́бне ,/ моли́ Христа́ Бо́га спасти́ся душа́м на́шим.

Христо́вы ра́ди любве́ оте́чество и род оста́вил еси́/ и, а́нгельскому житию́ поревнова́в,/ духо́вному отцу́ твоему́, преподо́бному Мака́рию, подража́тель быв,/ гра́да У́глеча дости́гл еси́/ и близ того́ при вода́х в пусты́ню, а́нгелом пока́занную, всели́лся еси́,/ и оби́тель прекра́сну Ма́тери Бо́жией воздви́гл еси́,/ и мно́жество мона́хов собра́л еси́,/ и́мже и наста́вник ко спасе́нию быв,/ и чуде́с дарова́ния от Бо́га прия́л еси́,/ Паи́сие преподо́бне ,/ моли́ Христа́ Бо́га спасти́ся душа́м на́шим.

Слез твои́х тече́ньми пусты́ни безпло́дное возде́лал еси́/ и, и́же из глубины́ воздыха́ньми, во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Паи́сие, о́тче наш,/ моли́ Христа́ Бо́га/ спасти́ся душа́м на́шим.

Чистото́ю душе́вною боже́ственно вооружи́вся/ и непреста́нныя моли́твы, я́ко копие́, имы́й,/ кре́пко ссе́кл еси́ бесо́вское ополче́ние,/ Паи́сие, о́тче наш,/ моли́ непреста́нно о всех нас.

Укра́шен доброде́тельми, преподо́бне Паи́сие Богодухнове́нне,/ Це́ркве Христо́вы красота́ был еси́,/ по́двиги бо и́ноческими украси́ ю́*, блаже́нне./ Те́мже мо́лим тя:/ моли́ся ко Го́споду сподо́бити нас от вся́кия бра́ни бори́теля, вопию́щих ти:/ ра́дуйся, о́тче преблаже́нне.

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

9/22 Мученика Полиевкта (259). Святителя Филиппа, митрополита Московского и всея России, чудотворца (1569). Воспоминание труса (землетрясения), бывшего в Сигме (869).

Му́ченик Твой, Го́споди... (общий мученику).

Спа́су прикло́ншу во Иорда́не главу́,/ сокруши́шася змие́в главы́,/ Полие́вктова же глава́ отсе́кшаяся,/ льсти́ваго посрами́.

Велича́ем тя,/ страстоте́рпче святы́й Полие́вкте,/ и чтим честна́я страда́ния твоя́,/ я́же за Христа́/ претерпе́л еси́.

Первопресто́льников прее́мниче,/ сто́лпе Правосла́вия, и́стины побо́рниче,/ но́вый испове́дниче, святи́телю Фили́ппе,/ положи́вый ду́шу за па́ству твою́./ Те́мже, я́ко име́я дерзнове́ние ко Христу́,/ моли́ за град и лю́ди,/ чту́щия досто́йно святу́ю па́мять твою́.

Правосла́вия наста́вника и и́стины провозве́стника,/ Златоу́стаго ревни́теля,/ Росси́йскаго свети́льника, Фили́ппа прему́драго восхва́лим,/ пи́щею слове́с свои́х разу́мно ча́да своя́ пита́юща,/ той бо язы́ком хвале́ния поя́ше,/ устна́ма же пе́ние веща́ше,/ я́ко таи́нник Бо́жия благода́ти.

Велича́ем тя,/ святи́телю о́тче Фили́ппе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

10/23 Святителя Григория, епископа Нисского (после 394). Преподобного Дометиана, епископа Мелитинского (601). Святителя Феофана, Затворника Вышенского (1894). Преподобного Павла Комельского (Обнорского) (1429).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

О́ком душе́вным бо́дрствуя, святи́телю,/ бодр па́стырь яви́лся еси́ ми́ру,/ и жезло́м му́дрости твоея́, и те́плым предста́тельством твои́м/ вся отгна́л еси́ злосла́вныя, я́ко во́лки,/ невре́дно соблю́л ста́до,/ Григо́рие прему́дре.

Це́ркве Боже́ственный иера́рх,/ и прему́дрости честны́й тайноглаго́льник,/ Нисси́йский бо́дрый ум, Григо́рий,/ со а́нгелы ликовству́я/ и наслажда́яся Боже́ственным све́том,/ мо́лится непреста́нно о всех нас.

Правосла́вия наста́вниче,/ благоче́стия учи́телю и чистоты́,/ Вы́шенский подви́жниче святи́телю Феофа́не богому́дре,/ писа́ньми твои́ми Сло́во Бо́жие изъясни́л еси́/ и всем ве́рным путь ко спасе́нию указа́л еси́,/ моли́ Христа́ Бо́га спасти́ся душа́м на́шим.

Богоявле́нию тезоимени́тый,/ святи́телю Феофа́не,/ уче́нии твои́ми мно́гия лю́ди просвети́л еси́,/ со а́нгелы ны́не предстоя́ престо́лу Святы́я Тро́ицы,/ моли́ непреста́нно о всех нас.

Велича́ем тя,/ святи́телю о́тче Феофа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственною любо́вию от ю́ности распала́емь, Па́вле преподо́бне ,/ вся, я́же в ми́ре кра́сная, возненави́дев,/ Христа́ еди́наго возлюби́л еси́,/ и сего́ ра́ди во вну́треннюю пусты́ню всели́лся еси́,/ со зверьми́ жи́ти весь Христу́./ Отону́дуже и Всеви́дящее бко, твоя́ труды́ ви́дев,/ да́ром чуде́с и по преставле́нии обогати́ тя./ Те́мже вопие́м ти:/ моли́ непреста́нно о всех нас,/ честну́ю па́мять твою́ при́сно в пе́снех почита́ющих.

Все твое́ у́мное жела́ние к Бо́гу впери́в,/ и Тому́ невозвра́тно от души́ после́довал еси́, в пусты́ню всели́вся,/ и та́мо а́нгельски пожи́в, мно́гим путь был еси́ ко спасе́нию./ Сего́ ра́ди и Христо́с тя просла́ви, и да́ром чуде́с обогати́./ Те́мже вси вопие́м ти:/ ра́дуйся, Па́вле преподо́бне , пусты́нный жи́телю.

Ублажа́ем тя,/ преподо́бне о́тче Па́вле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

11/24 Преподобного Феодосия Великого, общих житий начальника (529). Преподобного Михаила Клопского, Новгородского (ок. 1453–1456). Икон Божией Матери: Елецкая (1060) и Египетская (1060).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Феодо́сие о́тче наш,/ моли́ Христа́ Бо́га спасти́ся душа́м на́шим.

Насажде́н во дво́рех Го́спода твоего́,/ преподо́бными твои́ми доброде́тельми красно́ процве́л еси́,/ и умно́жил еси́ ча́да твоя́ в пусты́ни,/ слез твои́х ту́чами напая́емая,/ стадонача́льниче Бо́жий Боже́ственных дворо́в./ Темже зове́м: ра́дуйся, о́тче Феодо́сие.

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

И́же на земли́ Христа́ ра́ди во́лею в бу́йство преложи́вся,/ ми́ра сего́ красоты́ отню́д возненави́дел еси́,/ и плотска́я игра́ния увяди́в посто́м и жа́ждею, и на земли́ лета́нием,/ от зно́я же и сту́дени, от дождя́ и сне́га/ и от про́чил возду́шныя тя́гости никогда́же уклони́лся еси́,/ ду́шу же очи́стил еси́ доброде́тельми, я́ко зла́то в горни́ле,/ о́тче преподо́бне богоно́сне Михаи́ле,/ и ны́не на Небесе́х предстои́ши престо́лу Пресвяты́я Тро́ицы,/ но я́ко име́я дерзнове́ние мно́гое,/ моли́ Христа́ Бо́га спасти́ся душа́м на́шим.

Ду́ха Свята́го си́лою уподо́бился еси́ богоглаго́ливым дре́вним проро́ком,/ сказа́в безве́стная и та́йная, и е́же го́де* судьба́м Бо́жиим в сбытие́,/ и и́на мно́га чудеса́ о Христе́ сотвори́в,/ и лю́ди удиви́в, торжествова́ти устро́ил еси́, вопию́щия:/ сла́ва Бо́гу, прославля́ющему святы́я Своя́.

Ублажа́ем тя,/ преподо́бне о́тче Михаи́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

12/25 Мученицы Татианы и с нею в Риме пострадавших (226–235). Святителя Саввы, архиепископа Сербского (1237). Преподобного Мартиниана Белоезерского (1483). Икон Божией Матери, именуемых «Акафистная», «Млекопитательница» и «Попская».

Агница Твоя́, Иису́се... (общий мученице).

Агнцу Пречи́стому и Па́стырю после́дуя,/ а́гнице слове́сная Татиа́но,/ мы́сленных звере́й не убоя́лася еси́,/ но зна́мением кре́стным вооружи́вшися,/ до конца́ тех низложи́ла еси́,/ и вошла́ еси́ в Небе́сную огра́ду,/ иде́же помяни́ и нас, му́ченице Христо́ва многому́драя.

Све́тло во страда́нии твое́м возсия́ла еси́, страстоте́рпице,/ от крове́й твои́х преиспещре́на*,/ и я́ко кра́сная голуби́ца к Небеси́ возлете́ла еси́, Татиа́но,/ те́мже моли́ при́сно за чту́щия тя.

Велича́ем тя,/ страстоте́рпице Христо́ва Татиа́но,/ и чтим честно́е страда́ние твое́,/ е́же за Христа́/ претерпе́ла еси́.

Пути́, вводя́щаго в жизнь/ наста́вник и первопресто́льник и учи́тель был еси́./ Пе́рвее бо прише́д, святи́телю Са́вво,/ оте́чество твое́ просвети́л еси́,/ и породи́в то́е Ду́хом Святы́м,/ я́ко древа́ ма́слинная/ в мы́сленнем раи́ насади́л еси́ всеосвяще́нная твоя́ ча́да./ Тем, я́ко апо́столом и святи́телем сопресто́льна,/ чту́ще тя мо́лим:/ моли́ Христа́ Бо́га дарова́ти нам ве́лию ми́лость.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ов Богодухнове́нное удобре́ние,/ Са́вво прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

Я́ко первосвяти́теля вели́каго, и апо́столов соо́бщника,/ Це́рковь прославля́ет тя люде́й твои́х, преподо́бне ./ Но я́ко име́я дерзнове́ние ко Христу́ Бо́гу,/ моли́твами твои́ми от вся́ких нас бед спаса́й, да зове́м ти:/ ра́дуйся, о́тче Са́вво богому́дре.

Струя́ми слез твои́х, Богоно́сне Са́вво,/ це́рковь теле́сную очи́стив,/ слуга́ бысть Святы́я Трои́цы,/ сохраня́й оте́чество свое́ непобеди́мо,/ тому́ бо ты еси́ утвержде́ние.

Избра́ннаго от пеле́н Христо́вою благода́тию/ и возлю́бленнаго от ю́ности Бо́жиим Ду́хом,/ ю́ностный цвет, Са́вву блаже́ннаго,/ похва́льныя венцы́, ве́рнии, днесь спле́тше/ и Боже́ственную главу́ его́ венча́юще, воззове́м:/ ра́дуйся, о́тче, Бо́жие жили́ще.

Велича́ем тя,/ святи́телю о́тче Са́вво,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От ю́ности, о́тче, избра́н и возлю́блен был еси́ Го́сподом Бо́гом,/ и́же, прови́дя до́брое твое́ произволе́ние,/ научи́ тя прийти́ к преподо́бному уго́днику Своему́ Кири́ллу всеблаже́нному,/ от него́же наста́влен быв на путь спасе́ния,/ в стра́се Бо́жии и чистоте́ душе́вней,/ в благогове́нии же и непреста́нных к Бо́гу моли́твах/ житие́ твое́ непоро́чно преше́л еси́,/ и ны́не со дерзнове́нием предстоя́ на Небесе́х престо́лу Христо́ву,/ о́тче Мартиниа́не всеблаже́нне,/ не преста́й моля́ Христа́ Бо́га спасти́ и поми́ловати ду́ши на́ша.

Бо́гу от ю́ности, о́тче, избра́вшу и возлюби́вшу тя/ и прови́дящу твое́ до́брое произволе́ние,/ наставля́ет тя прийти́ к преподо́бному Своему́ уго́днику –/ Кири́ллу всеблаже́нному,/ от него́же наста́влен бысть на путь спасе́ния,/ стра́хом Бо́жиим и чистото́ю душе́вною, и благогове́нием,/ и непреста́нными к Бо́гу моли́твами/ во мно́зе по́двизе жизнь свою́ препроводи́л еси́/ и за́поведи Бо́жия непоро́чно соблю́л еси́,/ па́стырь и наста́вник и́ноком преди́вен был еси́,/ и ны́не Престо́лу Христо́ву со дерзнове́нием предстои́ши на Небесе́х/ со а́нгелы светлоликоству́я,/ о́тче преподо́бне , Мартиниа́не всеблаже́нне,/ не пре́стай моля́ся Христу́ Бо́гу/ спасти́ и поми́ловати ду́ши на́ша.

Благоизво́лив, преподо́бие,/ от ю́наго во́зраста рабо́тати Го́сподеви день и нощь,/ в стра́се Бо́жии и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же и злострада́ниих те́ло твое́ изнури́в,/ вся доброде́тели духо́вныя испра́вил еси́,/ и о́браз хотя́щим по тебе́ спасти́ся яви́лся еси́./ Те́мже ны́не при́сно зря на Небесе́х Пресвяту́ю Тро́ицу,/ моли́ся, всеблаже́нне, дарова́ти душа́м на́шим спасе́ние/ и житию́ на́шему исправле́ние,/ да вси ве́рою вопие́м ти:/ ра́дуйся, преподо́бне Мартиниа́не о́тче наш.

От ю́наго во́зраста Боже́ственным жела́нием разже́гся,/ честно́му учи́телю вдан был еси́/ и в воздержа́нии мно́зе, о́тче, пребы́л еси́,/ ревну́я благо́му наказа́нию*,/ плод многодоброде́телен Бо́гу прине́сл еси́,/ тем мо́лим тя, о́тче Мартиниа́не,/ моли́ Христа́ Бо́га спасти́ся душа́м на́шим.

Ублажа́ем тя,/ преподо́бне о́тче Мартиниа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Без Се́мене от Боже́ственнаго Ду́ха,/ во́лею же Отчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́./ Те́мже не преста́й моли́ти/ изба́витися от бед душа́м на́шим.

Душ на́ших чу́вствия очи́стивше,/ у́зрим на ико́не та́инство пресла́вное,/ Творца́ Вселе́нныя и Го́спода вы́шних сил,/ во объя́тиих держи́ма и от сосцу́ Твое́ю я́ко Младе́нца пита́ема,/ и, со стра́хом и ра́достию покланя́ющеся Тебе́/ и ро́ждшемуся от Тебе Спа́су на́шему, воззове́м:/ ра́дуйся, Влады́чице, жи́зни на́шея Пита́тельнице.

Велича́ем Тя,/ Пресвята́я Де́во,/ Млекопита́тельнице Спа́са на́шего,/ и чтим о́браз Твой святы́й,/ от него́же благода́ть исцеле́ния/ нам при́сно подае́ши.

13/26 Преподобного Иринарха, затворника Ростовского (1616). Преподобного Елеазара Анзерского (1656). На этот день переносится служба преподобным отцам, в Синае и Райфе избиенным (см. 14 января).

Я́ко му́ченика добропроизво́льна,/ и преподо́бных удобре́ние,/ звезду́ Росто́вскую,/ в затво́ре, у́зах и вери́гах Го́сподеви благоугоди́вшаго/ и чуде́с благода́ть от Него́ прие́мшаго,/ Ирина́рха преди́внаго пе́сньми хвале́бными/ почти́м и, к нему́ припа́дающе, уми́льно глаго́лем:/ о́тче преподо́бне , моли́ Христа́ Бо́га/ спасти́ся душа́м на́шим.

Волне́ний мно́жество жесто́ким житие́м преходя́,/ изгна́ние, затво́р и у́зы желе́зныя претерпе́л еси́ му́жески, Ирина́рше терпеливоду́шне,/ нам оста́вль о́браз злострада́ния и терпе́ния твоего́,/ озаря́я чуде́с блиста́ньми с ве́рою приходя́щих к честно́му гро́бу твоему́,/ у него́же, я́ко по́честь побе́дную, вери́ги твоя́ тя́жкия ви́дим,/ от ни́хже подае́ши исцеле́ния неду́жным./ Сего́ ра́ди зове́м ти:/ ра́дуйся, Ирина́рше, о́тче преди́вный.

Ублажа́ем тя,/ преподо́бие о́тче Ирина́рше,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Отве́рг пло́ти тле́нная,/ нетле́нных потщи́лся еси́ дости́гнута,/ и, ми́ра удали́вcя,/ всели́лся еси́ в морски́й о́стров/ и на нем усе́рдно мно́га ле́та Го́сподеви порабо́тал еси́./ Сего́ ра́ди и да́ры прозре́ния и чуде́с обогати́лся еси́,/ о́тче преподо́бне Елеаза́ре,/ Христа́ Бо́га моли́ дарова́ти нам мир и ве́лию ми́лость.

Я́ко лучу́ тя со́лнечную Христо́с показа́, преподо́бне ,/ сия́ющу во стране́ примо́рстей чуде́с благода́тию,/ уставля́еши бо пла́вающим тишину́ морску́ю, ве́рою моля́щимся тебе́ и вопию́щим:/ ра́дуйся, Елеаза́ре о́тче наш,/ страны́ Беломо́рския похвало́ и утвержде́ние.

Ублажа́ем тя,/ преподо́бне о́тче Елеаза́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

14/27 Отдание праздника Богоявления (Просвещения). Преподобных отец, в Синае и Райфе избиенных (IV-V) Святителя Мелетия, епископа Рязанского и Зарайского (1900). Равноапостольной Нины, просветительницы Грузии (Иверии) (335). Служба преподобным отцам, в Синае и Райфе избиенным, совершается 13 января.

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

От мирски́я молвы́ избего́сте и к ти́хому приста́нищу преста́вистеся,/ му́ченичества кровьми́ и по́стничества труда́ми венча́еми. /Те́мже и показа́стеся му́чеников и преподо́бных единовсе́льницы.

Ублажа́ем вас,/ преподо́бнии отцы́ в Сина́е и Райфе избие́ннии,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Сло́ва Бо́жия служи́тельнице,/ во апо́стольстей про́поведи Первозва́нному Андре́ю/ и про́чим апо́столом подража́вшая,/ просвети́тельнице Иве́рии и Ду́ха Свята́го цевни́це*,/ свята́я равноапо́стольная Ни́но,/ моли́ Христа́ Бо́га/ спасти́ся душа́м на́шим.

Прииди́те днесь вси,/ воспои́м избра́нную от Христа́/ равноапо́стольную пропове́дницу Бо́жия Сло́ва,/ му́друю благове́стницу,/ лю́ди Картали́нии приве́дшу на путь живота́ и и́стины,/ Богома́тере учени́цу,/ усе́рдную засту́пницу и неусыпа́ющую храни́тельницу на́шу,/ Ни́ну прехва́льную.

Велича́ем тя,/ свята́я равноапо́стольная Ни́но,/ всю страну́ и́верскую све́том Ева́нгелия просвети́вшую/ и ко Христу́ приве́дшую.

Це́ркве Христо́вы свети́льниче,/ земли́ Ряза́нстей и Сиби́рстей украше́ние,/ святи́телю Меле́тие,/ Влады́це всех моли́ся,/ мир вселе́нней дарова́ти/ и душа́м на́шим ве́лию ми́лость.

Днесь Собо́р Ряза́нских и Сиби́рских святы́х предстои́т в Це́ркви,/ и неви́димо за ны мо́лится Бо́гу./ Днесь Це́рковь Небе́сная и земна́я ликовству́ет,/ а́нгели и святи́и ра́дуются,/ ку́пно па́ства с ни́ми весели́тся,/ прославля́я обре́тение моще́й святи́теля Меле́тия,/ нас бо ра́ди мо́лят вси Преве́чнаго Бо́га.

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

15/28 Преподобных Павла Фивейского (341) и Иоанна Кущника (V). Преподобного Варлаама Керетского (XVI).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Я́ко свети́ло незаходя́щее мы́сленнаго Со́лнца,/ соше́дшеся днесь, восхва́лим в пе́снех,/ возсия́л бо еси́ су́щим во тьме неразу́мия,/ вся возводя́ к Боже́ственней высоте́,/ Фиве́ев украше́ние, Па́вле преподо́бне , отце́в и по́стников тве́рдое основа́ние.

Возлюби́в, прему́дре, нищету́ неокра́дому,/ роди́телей твои́х бога́тство возненави́дел еси́/ и, Ева́нгелие в рука́х твои́х держа́,/ после́довал еси́ Христу́ Бо́гу, Иоа́нне,/ моля́ся непреста́нно о всех нас.

Вы́шних улучи́ти, прему́дре, жела́я,/ до́лу кра́сных, му́дре, преоби́дел еси́/ и, Христу́ обнища́вшему сообнища́в,/ ра́дуяся, после́довал еси́, Иоа́нне. /К Нему́же приле́жно не преста́й моля́ся о всех нас.

Уклони́лся еси́ жите́йскаго треволне́ния,/ и к приста́нищу Боже́ственному упра́вил еси́, блаже́нне, ше́ствия своя́,/ и источи́л еси́ исцеле́ния, я́ко струи́,/ ве́рою и любо́вию, Иоа́нне, к тебе́ притека́ющим и вопию́щим:/ предста́ни в День Суда́ восхваля́ющим светоно́сную па́мять твою́, о́тче,/ и страсте́й и мук изба́ви.

Ублажа́ем вас,/ преподо́бнии отцы́ Па́вле и Иоа́нне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Боже́ственною свы́ше просвети́вся благода́тию, преподо́бне ,/ мир оста́вил еси́,/ жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́,/ ева́нгельски Христу́ после́довал еси́,/ и, Того́ яре́м взем, во все́м во́ли Его́ повину́лся еси́, /и весь ра́зум и се́рдце к Нему́ неукло́нно возложи́л еси́,/ Христа́ ра́ди те́ло свое́ изнуря́я посто́м и бде́нием, в моли́твах свои́х не усыпа́я,/ Бо́га ми́лостива творя́ и Пречи́стую Богоро́дицу Моле́бницу предлага́я,/ и сего́ ра́ди от Бо́га восприе́м власть и си́лу на сопроти́внаго врага́,/ не убоя́ся возду́шныя и морски́я тяготы́ и сту́дени, ниже́ уклони́ся,/ и морско́го пучи́ною в ма́ле лади́ице по вода́м ше́ствие творя́,/ про́тив зе́льнаго* обурева́ния пла́ваше,/ промышле́нием Боже́ственнаго Ра́зума направля́ем,/ и о́коло Свята́го Но́са непроходи́мый путь морски́й/ от ядови́таго че́рвия/ благопрохо́ден челове́ком без вреда́ сотвори́л еси́ моли́твами свои́ми,/ и мно́гим терпе́нием во вре́менней жи́зни по́двиг соверши́л еси́,/ и, равноа́нгельное житие́ пожи́в,/ те́мже и по преставле́нии источа́еши чуде́с благода́ть,/ и́же ве́рою приходя́щим к тебе́, Варлаа́ме, преблаже́нне о́тче наш,/ вопие́м ти: моли́ Христа́ Бо́га,/ да спасе́т ду́ши на́ша.

Все у́мное свое́ жела́ние к Бо́гу впери́в,/ и Тому́ невозвра́тно от души́ после́довал еси́,/ и жите́йския молвы́ отри́нув,/ в моли́твах, и слеза́х, и злострада́ниих плоть свою́ изнуря́я,/ до́бре подвиза́вся проти́ву неви́димаго врага́ ко́знем,/ и, победи́в я, веселя́ся, преше́л еси́ к Небе́сным черто́гом,/ и ны́не со а́нгелы Святе́й Трои́це предсто́я,/ отню́ду же и Всеви́дящее Око, твоя́ труды́ ви́дев,/ да́ром чуде́с по преставле́нии обогати́ло тя есть,/ и́же тебе́ с ве́рою почита́ющим/ исцеле́ние подава́еши неви́димо/ и мо́лишися непреста́нно, сохраня́я оте́чество свое́ и лю́ди/ от враг ви́димых и неви́димых ненаве́тны*,/да вси тебе́ вопие́м:/ преподо́бне о́тче наш Варлаа́ме,/ моли́ непреста́нно о всех нас.

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче Ангелов. 16/29 Поклонение честным веригам апостола Петра. Праведного Максима, иерея Тотемского (1650).

Ри́ма не оста́вль, к нам прише́л еси́/ честны́ми вери́гами, я́же носи́л еси́, апо́столов первопресто́льне, /и́мже ве́рою покланя́ющеся, мо́лимся:/ твои́ми к Бо́гу моли́твами/ да́руй нам ве́лию ми́лость.

Верхо́внаго и пе́рваго апо́столов,/ и́стины Боже́ственнаго ученика́,/ Петра́ вели́каго восхва́лим/ и того́ ве́рою целу́ем вери́ги,/ прегреше́ний разреше́ние прие́млюще.

Ка́мень Христо́с ка́меня ве́ры прославля́ет све́тло, ученико́в первопресто́льника,/ созыва́ет бо вся пра́здновати, Пе́тре, чудеси́ твоея́ честны́я вери́ги/ и подае́т согреше́ний проще́ние.

Непоро́чным свяще́нством Бо́гови послужи́в,/ посреде́ мирска́го мяте́жа юро́дство избра́л еси́,/ взем бо крест после́довал еси́ Христу́, невозвра́тным по́мыслом/ и с любо́вию к Нему́ приближа́лся,/ земна́я оста́вив, Небе́сная восприя́л еси́,/ блаже́нне Макси́ме о́тче наш,/ моли́ Христа́ Бо́га/ сохрани́тися гра́ду То́тьме невреди́му/ и спасти́ся душа́м на́шим.

Боже́ственный Ева́нгельский глас услы́шав,/ ра́достною душе́ю Тому́ после́дуя,/ прише́л еси́ в ти́хое приста́нище безстра́стия,/ ча́стыми моли́твами и посто́м, и сле́зными струя́ми ду́шу с те́лом омыва́я,/ возду́шною тя́гостию плоть умерщвля́я,/ руга́нием людски́м помышле́ния смиря́я,/ о напа́дствующих моли́лся еси́:/ Го́споди, не поста́ви им греха́./ Тем и по сме́рти чудесы́ тя Бог прославля́ет/ и всех зва́ти тебе́ науча́ет: /ра́дуйся, богому́дре Макси́ме о́тче наш.

Боже́ственному гла́су после́дуя,/ возревнова́л еси́ наставля́ти па́ству свою́/ не му́дростию сло́ва, но бу́йством жития́ безмяте́жнаго,/ непреста́нными моли́твами и сле́зными струя́ми/ ду́шу и те́ло омыва́я,/ возду́шными стихи́ями плоть изнуря́я,/ те́мже и по сме́рти чудесы́ тя Госпо́дь просла́ви,/ да с ве́рою зове́м к тебе́:/ ра́дуйся, Богому́дре о́тче наш Макси́ме.

Велича́ем тя,/ святы́й пра́ведный Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

17/30 Преподобного Антония Великого (356). Преподобного Антония Дымского (1224).

Ревни́теля Илию́ нра́вы подража́я,/ Крести́телю пра́выми стезя́ми после́дуя,/ о́тче Анто́ние,/ пусты́ни был еси́ жи́тель/ и вселе́нную утверди́л еси́ моли́твами твои́ми./ Те́мже моли́ Христа́ Бо́га/ спасти́ся душа́м на́шим.

Жите́йския молвы́ отри́нув,/ безмо́лвно житие́ сконча́л еси́,/ Крести́теля подража́яй вся́ким о́бразом, преподо́бнейший,/ с ним у́бо тя почита́ем,/ отце́в нача́льниче Анто́ние.

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Доброде́телей ревни́телю,/ пусты́нный жи́тель,/ подви́жниче ве́ры Христа́ Бо́га на́шего,/ поще́нием и труды́ умертви́вый плотска́я вожделе́ния,/ тезоимени́те вели́кому Анто́нию,/ его́же житию́ поревнова́л еси́/ и во его́же и́мя Боже́ственный храм воздви́гл еси́./ Ку́пно с ним, преподо́бне Анто́ние, моли́ Спаси́теля всех,/ да и нас сотвори́т победи́тели плотски́х по́хотей/ и хра́мы Ду́ха Свята́го,/ по вели́цей Его́ ми́лости.

Све́рстник и подража́тель преподо́бному Варлаа́му,/ послуша́ние к нему́ и́стинное стяжа́в,/ досто́ин яви́лся ему́ прее́мник,/ упа́сши до вре́мене ста́до его́,/ доброде́телем же его́ поревнова́в,/ в ту́южде ме́ру во́зраста дости́гл еси́,/ безмо́лвие пусты́нное возлюби́в,/ и уго́ден Го́сподеви показа́лся еси́,/ первонача́льник быв пусты́ни при е́зере Ды́мском,/ тем ти вопие́м: с преподо́бным Варлаа́мом, о́тче Анто́ние, моли́ о нас Бо́га,/ да даст нам та́кожде угоди́ти Ему́, я́коже и ты,/ о́бразе послуша́ния и безмо́лвия ти́хий рачи́телю.

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

18/31 Святителей Афанасия (373) и Кирилла (444), архиепископов Александрийских. Преподобных схимонаха Кирилла и схимонахини Марии (ок. 1337), родителей преподобного Сергия Радонежского. Праведного Афанасия Наволоцкого (XVI-XVII). Святителя Максима Нового, бывшего деспота Сербского, архиепископа Влахозапланинского (1516).

Де́лы возсия́вше Правосла́вия,/ все погаси́вше злосла́вие,/ победи́телие, победоно́сцы бы́сте,/ благоче́стием вся обогати́вше,/ Це́рковь вельми́ украси́вше,/ досто́йно обрето́сте Христа́ Бо́га,/ да́рующаго нам ве́лию ми́лость.

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви жи́вот наш.

Священнонача́льницы велича́йшии благоче́стия/ и до́блии побо́рницы Це́ркве Христо́вы,/ вся соблюди́те пою́щия:/ спаси́, Ще́дре, ве́рою чту́щия Тя.

Столп был еси́ Правосла́вия,/ Боже́ственными догма́ты подтвержда́я Це́рковь,/ священнонача́льниче Афана́сие,/ Отцу́ бо Сы́на единосу́щна пропове́дав,/ посрами́л еси́ А́рия./ О́тче преподо́бне ,/ Христа́ Бо́га моли́/ дарова́ти нам ве́лию ми́лость.

Правосла́вия насади́в уче́ния,/ злосла́вия те́рния изсе́кл еси́, умно́жив се́мя ве́ры одожде́нием Ду́ха, преподо́бне ;/ те́мже тя пое́м, Афана́сие.

Бе́здну нам уче́ний Богосло́вия источи́л еси́/ Я́ве от исто́чник Спа́совых, е́реси погружа́ющую,/ блаже́нне Кири́лле,/ и ста́до невреди́мо от треволне́ний спаса́ющую:/ страна́м бо всем наста́вник, преподо́бне ,/ я́ко Боже́ственная явля́я.

Велича́ем вас,/ святи́телие вели́ции Афана́сие и Кири́лле,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ пра́веднии Кири́лле и Мари́е,/ плод благоче́стия, Се́ргия преподо́бнаго, нам яви́вший,/ с ни́мже усе́рдно моли́те Го́спода/ низпосла́ти нам дух любве́ и смиренному́дрия,/да в ми́ре и единомы́слии просла́вим Тро́ицу Единосу́щную.

Днесь, ве́рнии, соше́дшеся,/ восхва́лим дво́ицу блаже́нную,/ благове́рнаго Кири́лла и Мари́ю добронра́вную,/ ти́и бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Святе́й Тро́ице Бо́гу/ Оте́чество на́ше в правове́рии утверди́ти,/до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти и спасти́ ду́ши на́ша.

Ублажа́ем вас,/ преподо́бнии Кири́лле и Мари́е,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Боже́ственною благода́тию просвети́вся,/ и по сме́рти да́руеши исцеле́ния притека́ющим к ра́це моще́й твои́х, прему́дре Афана́сие./ Те́мже и мы ны́не чтим честны́х моще́й твои́х явле́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Вы́шния красоты́ жела́я... (общий).

Ублажа́ем тя,/ святы́й пра́ведный Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Стра́нное рожде́ние и воспита́ние был еси́, о́тче, но па́ки водвори́ся во вла́сти у своего́ наро́да,/ Небе́снаго Ца́рствия жела́я,/ земно́е ца́рствие оста́вил еси́/ и смире́нием Вы́шнее сокро́вище получи́л еси́,/ преблаже́нне Макси́ме,/ моли́, мо́лимся, о душа́х на́ших.

Крест взем, мно́гия ско́рби и изгна́ния подъя́л еси́,/ святи́телю Макси́ме всеосвяще́нне,/ оте́чества твоего́ и Бо́гом вруче́ннаго ста́да лиша́емь,/ вся бо до́блественне терпе́л еси́,/ душе́внаго ра́ди твоего́ просвеще́ния.

Велича́ем тя,/ святи́телю о́тче Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

19/1 Преподобного Макария Великого, Египетского (390–391). Святителя Марка Евгеника, архиепископа Ефесского (1457). Обретение мощей преподобного Саввы Сторожевского, Звенигородского (1652). Преподобного Макария Римлянина, Новгородского (XVI-XVII). Преподобного Макария, постника Печерского, в Ближних пещерах почивающего (XII). Преподобного Макария, диакона Печерского, в Дальних пещерах почивающего (XIII-XIV). Блаженного Феодора, Христа ради юродивого, Новгородского (1392).

Пусты́нный жи́тель, и во пло́ти а́нгел,/ и чудотво́рец яви́лся еси́, Богоно́се о́тче наш Мака́рие,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

В дому́ Госпо́дь воздержа́ния вои́стину тя положи́,/ я́коже звезду́ непреле́стную, световодя́щу концы́,/ о́тче отце́в, Мака́рие преподо́бне.

Блаже́нную жизнь сконча́в в житии́ с му́ченическими ли́ки,/ в земли́ кро́тких досто́йно водворя́ешися, Богоно́сне Мака́рие,/ и пусты́ню, я́коже град, насели́в, благода́ть прия́л еси́ от Бо́га чуде́с,/ те́мже тя почита́ем.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности Боже́ственною распаля́емь ре́вностию,/ возлюби́л еси́ чи́стое житие́,/ презре́в ми́ра сего́ кра́сная и су́етная,/ после́довал еси́ твоему́ Богому́дрому учи́телю, преблаже́нному Се́ргию,/ в труде́ и бде́нии, в посте́ и по́двизе:/ на Сторо́жи я́влься безмо́лвия ра́ди и стра́жи духо́вныя/ недре́мленным на Боже́ственней стра́жи пред стоя́нием/ стяжа́л еси́ ум, зряй к Бо́гу,/ и де́монския ко́зни и обстоя́ния прозира́яй,/ озаре́ние Пресвята́го Ду́ха в себе́ восприе́м,/ я́ко звезда́ пресве́тлая еси́ ве́рным./ Те́мже и прему́др и светоза́рен предстоя́тель/ и па́стырь ста́ду твоему́ яви́лся еси́,/ све́том твои́м просвеща́й и всех,/ приходя́щих к тебе́ ве́рою, о́тче наш Са́вво,/ и моли́ Христа́ Бо́га, да спасе́т ду́ши на́ша.

Пусты́ни яви́лся еси́ до́брое прозябе́ние,/ преподо́бне: от ю́ности бо изво́лил еси́ чи́стое житие́, духо́вному твоему́ учи́телю после́дуя,/ и того́ уче́нием ум к Небе́сным впери́в,/ и ста́ду твоему́ прему́др наста́вник показа́лся еси́;/ тем и Христо́с, я́ко пресве́тла тя свети́льника, чудесы́ обогати́,/ Са́вво о́тче наш,/ моли́ спасти́ся душа́м на́шим.

Безмо́лвия ра́ди и пло́ти распина́ния всели́выйся на горе́ Сторо́жи,/ яви́лся еси́, преподо́бне Са́вво, столп ве́ры непоколеби́мый,/ от Пресвята́го Ду́ха осия́нный,/ оби́тель пречестна́я Тро́ицы,/ и непреста́нными моли́твами,/ сле́зными воздыха́нии и по́двигами/ благода́ти Боже́ственныя соприча́стник;/те́мже и Христо́с в нетле́нии моще́й твои́х просла́ви тя,/ и да́ром чуде́с украси́ тя./ Мы же ра́достно ти вопие́м:/ ра́дуйся, Са́вво, вели́кий чудотво́рче.

Госпо́дним жела́нием распали́вся,/ стра́сти плотски́я воздержа́нием оттря́с,/ Боже́ственнаго све́та незаходи́мое свети́ло яви́лся еси́,/ чуде́с луча́ми всех просвеща́еши,/ притека́ющих к ра́це моще́й твои́х,/ Са́вво, преподо́бне о́тче наш.

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Правосла́вия наста́вниче, но́вшеств противобо́рниче,/ степе́нь ве́ры, Це́ркве свети́льниче,/ учи́телей Богодухнове́нная печа́те, Ма́рко всему́дре,/ писа́нии твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Прему́дрыми слове́с твои́х исплете́нии, всеблаже́нне,/ вся́кая уста́ ху́льная загради́л еси́/ и ве́рныя Боговеща́нии просвети́л еси́ чести́ Тро́ицу в то́ждестве естества́.

Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе.

Велича́ем тя,/ святи́телю о́тче Ма́рко,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Рим, оте́чество твое́, оста́вив,/ в пусты́ню всели́лся еси́,/ и та́мо, в пу́сте ме́сте, обре́т жили́ще себе́,/ отбе́гл еси́ суеты́ ми́ра сего́,/ и в безмо́лвием приста́нищи до́бре направля́л еси́ себе́ ко Го́споду./ Сего́ ра́ди и мы, чту́щии тя,/ притека́юще, мо́лим тя, о́тче Мака́рие:/ моли́ о нас Го́спода,/ да поми́лует нас в день су́дный.

Оте́чество твое́, ве́тхий Рим, оста́вив,/ во страну́ Росси́йскую прише́л еси́, преподо́бне,/ и в пусты́ни бла́тней* всели́вся,/ та́мо приста́нище ти́хое ко спасе́нию обре́л еси́/ и безмо́лвное житие́ благоуго́дно провожда́л еси́,/ направля́я себя́ ко Го́споду моли́твами непреста́нными./ Сего́ ра́ди Христо́с тя возлюби́/ и чудесы́ просла́ви, о́тче Мака́рие,/ яви́в тя па́стыря до́бра слове́снаго ста́да Своего́./ Те́мже и мы, притека́юще к тебе́, уми́льно глаго́лем:/ моли́ Просла́вльшаго тя спасти́ся душа́м на́шим.

От Ри́ма возсия́л еси́, я́коже звезда́ пресве́тлая,/ преподо́бне о́тче наш Мака́рие,/ и, в пусты́ни всели́вся,/ просвети́л еси́ чи́стым житие́м твои́м/ ве́рно притека́ющия к тебе́./ Те́мже и мы, прославля́юще све́тлую па́мять твою́, вопие́м ти:/ ра́дуйся, преподо́бне о́тче Мака́рие.

Я́коже пресве́тлая звезда́, от Ри́ма возсия́л еси́, преподо́бне,/ и, Бо́гом наставля́емь, Росси́йскую страну́ све́том чуде́с твои́х озари́л еси́ духо́вно,/ созыва́я ве́рныя к моще́м твои́м,/ от ни́хже исцеле́ния неду́жным подае́ши./ Те́мже мо́лимся тебе́:/ научи́ нас, о́тче, твоему́ Богоразу́мию/ и уврачу́й неду́ги на́ша душе́вныя и теле́сныя,/ да зове́м ти:/ ра́дуйся, преподо́бне о́тче Мака́рие.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Бы́вший нестяжа́телем Христа́ ра́ди/ и Того́ за мно́гия твоя́ доброде́тели/ в се́рдце твое́ всели́вый,/ блаже́нне Мака́рие,/ моли́ся о нас, пою́щих тя.

Вы́шних ища́, ни́жних не стяжа́л еси́,/ и нестяжа́ние, я́ко колесни́цу о́гненну к Небеси́ себе́ угото́вав,/ со а́нгелы жи́ти сподо́бился еси,/ Мака́рие сла́вне,/ с ни́миже Христа́ Бо́га моли́ о всех нас.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности Христа́ усе́рдие возлюби́в,/ вда́лся еси́ Тому́ весь, я́ко непоро́чна же́ртва,/ и, и́го Его́ благо́е на себе́ взем,/ рабо́тал в нем, всече́стне Мака́рие, спе́шне;/ те́мже у́бо мо́лим тя: моли́ся о душа́х на́ших.

Вда́вшагося Христу́ Бо́гу на служе́ние от младе́нства/ и Тому́ во и́ночестве и диа́констве послужи́вша священноле́пно,/ восхваля́ем тя любо́вию, Мака́рие свяще́нне, и мо́лим:/ я́ко и́мый дерзнове́ние,/ моли́ Христа́ Бо́га о нас, пою́щих тя.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Правосла́вно пропове́дав, изъясни́л еси́ догма́ты,/ Бо́га ми́лостива сотвори́,/ и сего́ ра́ди во юро́дство претвори́ся,/ и шиба́ние* ве́лие сотвори́л еси́,/ и снег, и зной прии́м на свое́м телеси́,/ по преставле́нии же свое́м дае́ши мно́га исцеле́ния/ с ве́рою приходя́щим к ра́це моще́й твои́х./ Сего́ ра́ди вопие́м ти, Фео́доре блаже́нне,/ моли́ Христа́ Бо́га непреста́нно о всех нас.

И́же на земли́ Христа́ ра́ди в бу́йство преложи́вся,/ ми́ра сего́ красоты́ отню́дь возненави́дев,/ пло́тская взыгра́ния увяди́в,/ от дождя́ и сне́га и про́чия возду́шныя тя́гости никогда́ же уклони́лся еси́,/ от ненака́занных челове́к поруга́ние, ра́дуяся, претерпе́л еси́,/ подо́бяся Творцу́ своему́ и вопия́:/ Го́споди, не поста́ви им греха́ сего́,/ ду́шу же предочи́стив, я́ко зла́то в горни́ле,/ те́мже Христо́с прия́т ю́,/ и я́ко светоза́рную звезду́ к Свое́й сла́ве прича́стну соде́ла./ Те́мже ны́не, преблаже́нне Фео́доре, предстоя́ Святе́й Тро́ице,/ моли́ Христа́ Бо́га за град же и лю́ди,/ почита́ющия любо́вию пречестну́ю па́мять твою́.

И́же на земли́ Христа́ ра́ди во́лею в бу́йство преложи́вся,/ ми́ра сего́ красоты́ отню́д возненави́дел еси́/ и, плотска́я игра́ния увяди́в посто́м и жа́ждею и на земли́ лега́нием,/ от зно́я же и сту́дени, от дождя́ и сне́га/ и от про́чия возду́шныя тя́гости никогда́же уклони́лся еси́,/ ду́шу же очи́стил еси́ доброде́тельми, я́ко зла́то в горни́ле,/ о́тче преблаже́нне Фео́доре,/ и ны́не на Небесе́х предстои́ши Престо́лу Пресвяты́я Тро́ицы,/ но я́ко име́я дерзнове́ние мно́гое,/ моли́ Христа́ Бо́га спасти́ся душа́м на́шим.

Я́ко зла́то в горни́ле, Фео́доре блаже́нне,/ ми́ра сего́ красоту́ отню́д возненави́дев,/ плоть свою́ зно́ем и жа́ждою увяди́л еси́/ и от про́чия возду́шныя тя́гости никогда́ же уклони́лся еси́,/ и сего́ ра́ди во́лею в юро́дство претвори́ся,/ Фео́доре блаже́нне.

Вы́шния красоты́ жела́я,/ ни́жняя сла́дости и теле́сное одея́ние то́щно* оста́вил еси́,/ нестяжа́ние паче су́етнаго ми́ра возлюби́л еси́,/ а́нгелом житие́ проходя́, блаже́нне Фео́доре,/ с ни́миже Христа́ Бо́га моли́ непреста́нно о всех нас.

Велича́ем тя,/ святы́й пра́ведный Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

20/2 Преподобного Евфимия Великого (473). Преподобного Евфимия Архангелогородского (ок. 1523). Преподобного Евфимия, схимника Печерского, в Дальних пещерах почивающего (XIV). Преподобного Лаврентия, затворника Печерского, в Дальних пещерах почивающего (XIII-XIV). Святителя Евфимия, патриарха Терновского (Тырновского), Болгарского (XIV).

Весели́ся, пусты́ня неражда́ющая,/ благоду́шствуй, неболя́щая,/ я́ко умно́жи тебе́ ча́да муж жела́ний духо́вных,/ благоче́стием насади́в,/ воздержа́нием воспита́в доброде́телей в соверше́нство./ Того́ моли́твами, Христе́ Бо́же,/ умири́ живо́т наш.

В честно́м рождестве́ твое́м ра́дость тварь обре́те/ и в Боже́ственней па́мяти твое́й, преподо́бне ,/ благоду́шие прия́т мно́гих твои́х чуде́с,/ от ни́хже пода́ждь бога́тно* в ду́ши на́ша, и очи́сти грехо́в скве́рны,/ я́ко да пое́м: Аллилу́иа.

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Я́ко сокро́вище многоце́нно/ и исто́чник, излива́ющ то́ки исцеле́ний,/ подаде́ нам Христо́с честны́я мо́щи твоя́,/ преподо́бне Евфи́мие,/ боле́зней у́бо отье́млющия страсте́й разли́чных,/ благода́ть же душа́м точа́щия непреста́нно,/ Его́же моли́ дарова́ти нам ве́лию ми́лость.

Пра́зднует днесь Арха́нгелов град пра́здник пресве́тлый светоно́сныя твоея́ па́мяти,/ вся созыва́я окре́стныя его́,/ ра́дуется бо, я́ко стяжа́в сокро́вище ве́лие, честны́я мо́щи твоя́, преподо́бне Евфи́мие,/ его́же сохраня́й всегда́ моли́твами твои́ми от всех зол, да зове́м ти:/ ра́дуйся, о́тче, благоду́шию тезоимени́те.

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Евфи́мие всече́стне,/ преподо́бным единоревни́телю и а́нгелом собесе́дниче,/ получи́вый с ни́ми житие́м свои́м чи́стым и безмо́лвным ве́чная блага́я,/ моли́ся Го́сподеви при́сно о всех нас,/ да и мы тех же благ сподо́бимся.

Я́ко прия́л еси́ схи́му,/ бысть вы́ну тих и молчали́в, преподо́бне,/ никогда́же бо ни с ким, ра́зве моли́тв ко Го́споду,/ ничесо́же глаго́лал еси́,/ и пи́щи, ра́зве зе́лия суро́ва, нико́ея же вкуша́л еси́./ Тем обре́т днесь пи́щу неижди́вшую* на Небеси́, Евфи́мие,/ моли́ и нам то́яжде причасти́тися.

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Затвори́вый себе́ Го́спода ра́ди в те́мней пеще́ре,/ преподо́бне о́тче Лавре́нтие, многоле́тне,/ и О́ному до́бре в ней угоди́вый,/ пода́ждь и нам от вся́каго зла чу́вствия затвори́ти,/ и тьмы страсте́й отврати́тися,/ и све́тлость получи́ти Ца́рствия Небе́снаго.

Бог, реки́й из тьмы све́ту возсия́ти,/ просия́ тебе́ из те́мна ме́ста, я́ко свет,/ и зна́ема всем показа́, Лавре́нтие,/ яви́ же и Све́ту невече́рнему тя прича́стника, преподо́бне ,/ в не́мже лику́я, поми́луй нас, хва́лящих тя.

Ублажа́ем тя,/ преподо́бне о́тче Лавре́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

По́двигом пусты́нным просия́л еси́/ и на престо́л первосвяти́тельства по достоя́нию возше́л еси́,/ отону́дуже луча́ми Богове́дения и доброде́тели всех озари́л еси́/ и ча́шу му́ченичества безкро́вно отпи́л еси́./ Ны́не же предстоя́ престо́лу Го́рняго Иерусали́ма, Евфи́мие,/ моли́ сидя́щаго на нем Христа́ Бо́га на́шего/ о почита́ющих честну́ю па́мять твою́.

Во бра́ни неви́димой быв победи́тель,/ от Вы́шния десни́цы вене́ц прия́л еси́,/ Евфи́мие, преподо́бне о́тче наш,/ во бра́ни же с злочести́выми неодоле́нный,/ усугу́бил еси́ мзду твою́ в кро́вех Небе́сных./ Темже воспева́ем ти такова́я:/ ра́дуйся, страда́льче безкро́вный земли́ Болга́рския.

Велича́ем тя,/ святи́телю о́тче Евфи́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

21/3 Преподобного Максима исповедника (662). Преподобного Максима Грека (1556). Икон Божией Матери: Ктиторской (IV), Ватопедской, именуемой «Отрада» или «Утешение» (807), «Одигитрия Ксенофская» (1730) и «Закланная».

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодухнове́нное удобре́ние,/ Макси́ме прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

Свет Трисия́нный, все́льшийся в ду́шу твою́,/ сосу́д избра́н показа́ тя, всеблаже́нне,/ явля́юща Боже́ственная конце́м,/ неудобопости́жных разуме́ний ты сказу́яй, блаже́нне,/ и Тро́ицу всем, Макси́ме, возпропове́дуяй я́сно,/ Пресу́щную, Безнача́льную.

Тро́ицы рачи́теля и вели́каго Макси́ма,/ науча́юща я́сно ве́ре Боже́ственней,/ е́же сла́вити Христа́ во дву́ естества́х, во́лях же и де́йствах су́ща,/ в пе́снех досто́йных, ве́рнии, почти́м, взыва́юще:/ ра́дуйся, пропове́дниче ве́ры.

Ублажа́ем тя,/ преподо́бне о́тче Макси́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Заре́ю Ду́ха облиста́емь,/ вити́йствующих богому́дренно сподо́бился еси́ разуме́ния,/ неве́дением омраче́нная сердца́ челове́ков све́том благоче́стия просвеща́я,/ пресве́тел яви́лся еси́ Правосла́вия свети́льник, Макси́ме преподо́бне ,/ отону́дуже ре́вности ра́ди Всеви́дящаго,/ оте́чества чужд и стра́нен, Росси́йския страны́ был еси́ пресе́льник,/ страда́ния темни́ц и заточе́ния от самодержа́внаго претерпе́в,/ десни́цею Вы́шняго венча́ешися и чудоде́йствуеши пресла́вная./ И о нас хода́тай бу́ди непрело́жен,/ чту́щих любо́вию святу́ю па́мять твою́.

Богодухнове́нным Писа́нием и богосло́вия пропове́данием/ неве́рствующих суему́дрие обличи́л еси́, всебога́те,/ па́че же в Правосла́вии исправля́я, на стезю́ и́стиннаго позна́ния наста́вил еси́,/ я́коже свире́ль богогла́сная, услажда́я слы́шащих ра́зумы,/ непреста́нно весели́ши, Макси́ме досточу́дне,/ сего́ ра́ди мо́лим тя:/ моли́ Христа́ Бо́га грехо́в оставле́ние низпосла́ти/ ве́рою пою́щим всесвято́е твое́ успе́ние, Макси́ме о́тче наш.

Ублажа́ем тя,/ преподо́бне о́тче Макси́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

О, Покро́в благода́тный и спаси́тельный стяжа́хом/ честну́ю Твою́ ико́ну, Богоро́дице./ На сию́ у́бо со умиле́нием взира́юще, Тебе́ вопие́м:/ Влады́чице, низпосли́ отра́ду и утеше́ние,/ на Тя упова́ние возлага́ем гре́шнии и смире́ннии,/ на Твое́ предста́тельство наде́емся недосто́йнии,/ ускори́ нас изба́вити от бед и скорбе́й/ и умоли́ Сы́на Твоего́, Христа́ Бо́га на́шего,/ поми́ловати и спасти́ ду́ши на́ша.

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний./ Не отврати́ Твоя́ рабы́ тщи́,/ Тя бо и еди́ну наде́жду и́мамы.

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

22/4 Апостола Тимофея (ок. 96). Преподобномученика Анастасия Персянина (628). Преподобномученика Анастасия, диакона Печерского, в Ближних пещерах почивающего (XII). Преподобного Макария Жабынского, Белевского чудотворца (1623).

Бла́гости научи́вся и трезвя́ся во всех,/ благо́ю со́вестию священноле́пно обо́лкся*,/ поче́рпл еси́ от сосу́да избра́ннаго неизрече́нная,/ и ве́ру соблю́л, ра́вное тече́ние соверши́л еси́,/ апо́столе Тимофе́е./ Моли́ Христа́ Бо́га/ спасти́ся душа́м на́шим.

Му́ченик Твой, Го́споди, Анаста́сий... (общий мученику).

Боже́ственнаго ученика́ и спутеше́ственника Па́влова Тимофе́я,/ ве́рнии, воспои́м вси,/ с сим почита́юще му́драго Анаста́сия,/ возсия́вшаго от Перси́ды, я́ко звезду́,/ и отгоня́ющаго душе́вныя на́ша стра́сти/ и неду́ги теле́сныя.

Велича́ем тя,/ апо́столе Христо́в Тимофе́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Велича́ем тя,/ страстоте́рпче святы́й Анаста́сие,/ и чтим честна́я страда́ния твоя́,/ я́же за Христа́/ претерпе́л еси́.

Плотско́е, я́ко безпло́тный а́нгел, возненави́девши препита́ние*,/ духо́вную во и́ноческом чи́ну возлюби́л еси́ пи́щу,/ и в нем Богови́дцу на Сина́и Моисе́ю/ до́брым жития́ твоего́ по́двигом уподобля́яйся,/ мно́гими на горе́ Бо́жией Пече́рской возвы́сился еси́ доброде́тельми,/ иде́же в моле́нии к Вы́шнему непреста́нно пребыва́л еси́,/ ны́не же со отцы́ преподо́бными Пече́рскими,/ а́ки би́сер пресве́тло сия́еши,/ а душе́ю со а́нгелы пред престо́лом Бо́жиим,/ святы́й преподобному́чениче Анаста́сие, предстои́ши,/ о нас всегда́ моля́ся ко Го́споду/ спасти́ся душа́м на́шим.

По́стническим пло́ти твоея́ умерщвле́нием/ ду́шу оживи́л еси́,/ у́бо твоего́ ра́ди презе́льнаго* воздержа́ния/ и превре́меннаго терпе́ния/ жизнь непрее́мная и диади́ма* неувяда́емая/ от пострада́вшаго за ны пло́тию/ и из ме́ртвых воскре́сшаго Христа́ Бо́га на́шего,/ тебе́, свя́те, преподобному́чениче Анаста́сие,/ я́ко злочести́вых победи́телю/ несумне́нно* вои́стину угото́вася,/ зане́же Бо́жие тридне́вное Воскресе́ние/ всем, живу́щим на земли́,/ тобо́ю, я́коже иногда́ от отроко́в Ефе́сских правосла́вно воспропове́дася,/ и сего́ ра́ди, о́тче, днесь к тебе́ вси вопие́м немо́лчно:/ святы́й преподобному́чениче Анаста́сие Пече́рский,/ моли́ приле́жно воста́вшаго Христа́ тридне́вно из ме́ртвых,/ да изба́вит от сме́рти ве́чныя ду́ши на́ша.

Ублажа́ем тя,/ преподобному́чениче Анаста́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Пусты́нный жи́тель и во пло́ти а́нгел, и чудотво́рец яви́лся еси́, Богоно́се о́тче наш Мака́рие,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя, и ду́ши ве́рою приходя́щих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

От мирска́го жития́ изше́д/ в ти́хое приста́нище жи́зни и́ноческия,/ преподо́бне Мака́рие, вшел еси́,/ в не́йже до́бре подвиза́вся,/ ду́шу твою́ доброде́тельми превысо́кими обогати́л еси́/ и яви́лся еси́ добр па́стырь и учи́тель и́ноческому собо́ру,/ ему́же и оби́тель возгради́л еси́,/ та́же в безмо́лвие вшед и Богови́дения сподо́бився,/ ко Го́споду преста́вился еси́,/ и́же да́ром чуде́с тя обогати́./ Его́же ны́не моли́,/ да спасе́т ве́рою и любо́вию/ почита́ющих святу́ю па́мять твою́.

В дому́ Госпо́дь воздержа́ния вои́стину тя положи́,/ я́коже звезду́ непреле́стную, световодя́щу концы́,/ о́тче отце́в, Мака́рие преподо́бне .

Житие́ чи́стое, терпе́ние, кро́тость и любо́вь нелицеме́рну,/ воздержа́ние соверше́нное,/ умиле́ние Боже́ственное,/ ве́ру же и наде́жду и́стинну и милосе́рдие стяжа́в,/ равноа́нгельно, Мака́рие, на земли́ пожи́л еси́/ и на Небеси́ Бо́гови с ли́ки Безпло́тных предстои́ши./ С ни́ми же, свя́те, моли́ся/ мир Росси́йстей Це́ркви дарова́ти/ и душа́м на́шим ве́лию ми́лость.

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

23/5 Священномученика Климента, епископа Анкирского (312). Преподобного Геннадия Костромского и Любимоградского (Любомирского) (1565). Перенесение мощей святителя Феоктиста, архиепископа Новгородского (1786). Собор Костромских святых. Воспоминание VI Вселенского Собора (680–681).

Лоза́ преподо́бства и сте́бль страда́льчества,/ цвет свяще́ннейший и плод богода́нный/ ве́рным, всесвяще́нне, присноцвету́щ дарова́лся еси́,/ но я́ко му́чеников сострада́лец/ и священнонача́льников сопресто́льник,/ моли́ Христа́ Бо́га/ спасти́ся душа́м на́шим.

Лозы́ был еси́ честна́я розга́ Христо́ва,/ многострада́льне Кли́менте всехва́льне, я́влься,/ со стра́ждущими же взыва́л еси:/ Ты му́чеников, Христе́, све́тлое ра́дование.

Сад благоцвету́щ израсте́ во оте́чествии свое́м,/ красе́н плод прозябе́ по вселе́нней во вре́мя страда́ний твои́х,/ те́мже па́мять твою́ чтим, преподо́бне Кли́менте./ Сего́ ра́ди источа́еши ми́ро, веселя́щее ду́ши на́ша.

Велича́ем тя,/ священному́чениче Кли́менте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко пустыннолюби́вая го́рлица,/ от су́етнаго и многомяте́жнаго ми́ра в пусты́ню удали́вся,/ чистото́ю и гове́нием, моли́твами и тружде́нием/ просла́вил еси́ Бо́га в душе́ и телеси́ свое́м./ И та́ко благоче́стно пожи́в,/ яви́лся еси́, преподо́бне Генна́дие, пусты́ни Любимогра́дския украше́ние,/ и́ноком честна́го жития́ о́браз/ и те́плый моли́твенник за всех,/ притека́ющих к тебе́ с ве́рою.

Моли́твою и посто́м, тружде́нием и терпе́нием/ умертви́вый вся́кое пло́ти мудрова́ние,/ чистоты́ сосу́д благоле́пен,/ Боже́ственных даро́в и чуде́с прича́стник,/ и́ноком же до́блий наста́вник был еси́,/ сподвиза́яся блаже́нному Корни́лию, о́тче Богому́дре./ Сего́ ра́ди вопие́м:/ моли́ся ко Го́споду,/ да моли́твами твои́ми да́рует мир и спасе́ние душа́м на́шим.

Ублажа́ем тя,/ преподо́бне о́тче Генна́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Днесь град Кострома́ вельми́ ва́ми хва́лится:/ в преде́лах бо земли́ Костромски́я,/ я́ко зве́зды светоза́рныя, возсия́вше,/ чудесы́ свои́ми вся озари́ли есте́./ И ны́не мо́литеся ко Го́споду, отцы́ преблаже́ннии Генна́дие, Паи́сие, Авраа́мие, Иа́кове, Мака́рие и Пахо́мие, со и́ными мно́гими на́шего края́ Небе́сными покрови́телями/ за град Кострому́ и всяк град, и страну́, и лю́ди,/ ве́рою и любо́вию вас почита́ющия,/ и о спасе́нии душ на́ших.

Костромска́го кра́я благоче́стия подви́жники и за гра́ды и ве́си страны́ Росси́йския те́плыя предста́тели яви́стеся,/ отцы́ преблаже́ннии, Христа́ Бо́га моли́те о нас,/ свяще́нный ваш собо́р почита́ющих/ и с любо́вию вопию́щих:/ ра́дуйтеся, отцы́ преди́внии, Костромска́го кра́я и всея́ Росси́и похвало́ и утвержде́ние.

Велича́ем вас,/ вси святи́и земли́ Костромски́я,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Ублажа́ем вас,/ преподо́бне о́тче Генна́дие/ и всех святы́х отце́в собо́р, Костромска́го края покрови́телей,/ вы бо мо́лите за нас/ Христа́ Бо́га на́шего.

Бо́жия Сло́ва Прему́дрости изря́дный служи́тель,/ а́нгельскаго жи́тельства и́стинный подража́тель,/ Боже́ственныя чистоты́ рачи́тель,/ архиере́ом сопресто́льниче, преподо́бным сожи́тельниче,/ па́стырская красота́,/ Вели́кому Но́вуграду похвала́,/ святи́телю пречестны́й Феокти́сте, о́тче наш,/ Ему́же, Сло́ву Бо́жию, в житии́ сем послужи́л еси́,/ моли́ спасти́ся душа́м на́шим.

Архиере́йское украше́ние,/ Вели́кому Но́вуграду Богодухнове́нное удобре́ние,/ су́щия бо в нем лю́ди на па́житех живоно́снаго зако́на Госпо́дня упа́сл еси́,/ и сего́ ра́ди в лице́ святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в не́йже, тя почита́юще, ра́дуйся, от души́ вопие́м ти,/ святи́телю о́тче Феокти́сте,/ Вели́кому Но́вуграду похвала́ и утвержде́ние.

Велича́ем тя,/ святи́телю о́тче Феокти́сте,/ и чтим святу́ю па́мять твою́, /ты бо мо́лиши за нас/ Христа́ Бо́га на́шего.

24/6 Преподобной Ксении (в миру Евсевии), Миласской (V). Блаженной Ксении Петербургской (XIX). Святителя Герасима Великопермского, Устьвымского (1441). Мученика Иоанна Казанского (1529).

В тебе́, ма́ти, изве́стно спасе́ся... (общий преподобной жене).

Твою́ страннонра́вную, Ксе́ние, па́мять соверша́юще,/ любо́вию почита́ющий тя, пое́м Христа́,/ во всех тебе́ подаю́щаго кре́пость исцеле́ний,/ Ему́же всегда́ моли́ся о всех нас.

И́же во святы́х свята́я/ Христа́ Преблага́го всем се́рдцем возлюби́ла еси́, Богому́драя Ксе́ние сла́вная,/ того́ ра́ди омерзи́ла еси́ мирску́ю сла́дость./ Крест же Его́ взе́мши честны́й,/ возлюби́ пе́ти при́сно: аллилу́иа.

Ублажа́ем тя,/ преподо́бная ма́ти Ксе́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Нищету́ Христо́ву возлюби́вши,/ безсме́ртныя трапе́зы ны́не наслажда́ешися,/ безу́мием мни́мым безу́мие ми́ра обличи́вши,/ смире́нием кре́стным си́лу Бо́жию восприя́ла еси́./ Сего́ ра́ди дар чудоде́йственныя по́мощи стяжа́вшая,/ Ксе́ние блаже́нная, моли́ Христа́ Бо́га/ изба́витися нам от вся́каго зла покая́нием.

Му́дрость вы́сшую соу́за бра́чнаго разумева́я, раба́ Бо́жия Ксе́ние,/ Боговенча́нный брак уцелому́дрила еси́,/ тем плоды́ покая́ния возрасти́ла еси́,/ блаже́нство о Христе́, я́ко тала́нт, преумно́жив, Заимода́вцу Благо́му возврати́,/ То́йже бога́тством чуде́с тя одари́, неду́ги цели́ти и ду́ши спаса́ти,/ помина́ющих тя.

Суеты́ земна́го ми́ра отве́ргшися,/ крест жития́ бездо́мнаго во стра́нничестве прия́ла еси́,/ скорбе́й, лише́ний, людска́го осмея́ния не убоя́лася еси́,/ любо́вь же Христо́ву позна́ла еси́,/ е́юже ны́не на небеси́ услажда́ешися,/ Ксе́ние, блаже́нная богому́драя,/ моли́ся о спасе́нии душ на́ших.

Тебе́, о стра́ннице, яви́ нам Христо́с Госпо́дь моли́твенницу те́плую за род наш,/ в житии́ бо твое́м страда́ния и ско́рби восприя́вши,/ Бо́гу же и челове́ком любо́вию послужи́вши,/ дерзнове́ние ве́лие стяжа́ла еси́./ Те́мже тебе́ в напа́стех и ско́рбех усе́рдно прибега́ем,/ из глубины́ серде́ц на́ших взыва́юще:/ упова́ния на́шего не посрами́, Ксе́ние блаже́нная.

Днесь све́тло лику́ет град свята́го Петра́,/ я́ко мно́жество скорбя́щих обрета́ют утеше́ние,/ на твоя́ моли́твы наде́ющеся,/ Ксе́ние всеблаже́нная,/ ты бо еси́ гра́ду сему́ похвала́ и утвержде́ние.

Юро́дством о Христе́ суему́дрия ве́ка устрани́ся,/ стра́нствуя к Ца́рству Преми́рному, Андреезва́вшаяся,/ оде́жды паде́ния прама́тери совлекла́ся еси́,/ поруга́ния порфи́ру ца́рскую стяжа́ла еси́./ Те́мже соверше́нную любо́вь твою́ ублажа́ем,/ ра́ны сострада́тельныя твоя́ лобыза́ем,/ юро́дство Кре́стное твое́ велича́ем,/ ма́ти блаже́нная Ксе́ние.

На земли́ я́ко стра́нна пребы́вши,/ о Небе́снем же оте́чествии воздыха́ющи,/ юро́да от бу́иих и неве́рных,/ прему́дра же и свя́та от ве́рных познава́ешися,/ и от Бо́га сла́вою и че́стию венча́ешися,/ Ксе́ние мужеу́мная и богоу́мная,/ сего́ ра́ди зове́м ти:/ ра́дуйся, я́ко по стра́нствии земне́м в дому́ О́тчем водворя́ешися.

Ублажа́ем тя,/ свята́я блаже́нная ма́ти Ксе́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственныя ве́ры пропове́данием/ зе́млю Зыря́нскую озари́л еси́/ и ко Христу́ лю́ди мно́гия приве́л еси́./ Возопие́т е́же с тобо́ю и Авель ко Го́споду/ и Заха́риина кровь пра́ведная,/ о́тче Гера́симе, моли́ Христа́ Бо́га/ па́стве твое́й и всем, любо́вию па́мять твою́ соверша́ющим,/ дарова́ти ве́лию ми́лость.

Я́ко свяще́нника превели́ка/ и апо́столов и му́чеников совсе́льника,/ Це́рковь Ру́сская почита́ет тя, святи́телю Гера́симе./ Сию́ твои́ми моли́твами соблюда́й, блаже́нне,/ непобеди́му и необурева́ему, и нескве́рну/ и всем нам испроси́ у Бо́га мир и ве́лию ми́лость.

Велича́ем тя,/ святи́телю о́тче Гера́симе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Страстоте́рпче святы́й Иоа́нне,/ блаже́нна земля́, напи́вшаяся кро́ве твоея́,/ Христа́ бо со дерзнове́нием пропове́дав,/ мно́гая му́ки от неве́рных ага́рян прия́л еси́,/ страда́ньми свои́ми проти́вных де́рзости низложи́в,/ Тро́ицы побо́рник яви́лся еси́,/ ю́же и моли́ дарова́ти нам ве́лию ми́лость.

Звезда́ све́тла среди́ неве́рных яви́лся еси́,/ многострада́льне Иоа́нне,/ заря́ми твои́ми Со́лнце – Христа́ возвеща́ющи,/ пре́лесть ага́рянскую посрами́л еси́/ и нам подае́ши свет,/ моля́ непреста́нно Христа́ Бо́га о всех нас.

Велича́ем тя,/ страстоте́рпче святы́й Иоа́нне,/ и чтим честна́я страда́ния твоя́,/ я́же за Христа́/ претерпе́л еси́.

25/7 Святителя Григория Богослова, архиепископа Константинопольского (389). Священномученика Владимира, митрополита Киевского и Галицкого (1918). Собор новомучеников и исповедников Российских40: святителя Тихона, патриарха Московского и всея Руси (1925); священномученика Петра, митрополита Крутицкого (1937); священномученика Владимира, митрополита Киевского и Галицкого (1918); священномученика Вениамина, митрополита Петроградского и Гдовского, и иже с ним убиенных священномученика архимандрита Сергия и мучеников Юрия и Иоанна (1922); священномученика митрополита Серафима (1937), священномученика архиепископа Фаддея (1937), священномученика протоиерея Иоанна (1917), священномученика протопресвитера Александра (1937), преподобномучениц великой княгини Елисаветы и инокини Варвары (1918). Святителя Моисея, архиепископа Новгородского (1362). Праведного Софрония Ибердского (1914). Иконы Божией Матери, именуемой «Утоли моя печали» (принесена в Москву в 1640 г.). Поминовение всех усопших, пострадавших в годину гонений за веру Христову41.

Па́стырская свире́ль богосло́вия твоего́/ ри́торов победи́ трубы́,/ я́коже бо глубины́ ду́ха изыска́вшу,/ и добро́ты веща́ния приложи́шася тебе́./ Но моли́ Христа́ Бо́га, о́тче Григо́рие,/ спасти́ся душа́м на́шим.

Богосло́вным язы́ком твои́м сплете́ния ри́торская разруши́вый, сла́вне,/ Правосла́вия оде́ждею, свы́ше истка́нною, Це́рковь украси́л еси́,/ ю́же и нося́щи, с на́ми зове́т твои́ми ча́ды:/ ра́дуйся, о́тче, богосло́вия у́ме кра́йнейший.

Велича́ем тя,/ святи́телю о́тче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Влади́мире,/ Христа́ всем се́рдцем возлюби́в,/ па́ству твою́ до́бре упа́сл еси́,/ незло́биво му́ченическую смерть прия́л еси́./ Сего́ ра́ди в ве́чной сла́ве пребыва́я,/ моли́ спасти́ся душа́м на́шим.

Ве́ру Правосла́вную непоро́чно соблю́л,/ по́двигом до́брым во святи́тельстве подвиза́лся еси́,/ священному́чениче о́тче Влади́мире,/ и убива́ющим тя рекл еси́:/ Госпо́дь да прости́т вас./ Сего́ ра́ди угото́вася ти вене́ц пра́вды от Христа́, Бо́га на́шего,/ Его́же, я́ко име́яй дерзнове́ние, моли́,/ оправда́ние дарова́ти нам в День Су́дный.

Образ Христо́ва милосе́рдия явля́я,/ покро́в и защище́ние па́стве твое́й был еси́,/ святи́телю о́тче Влади́мире,/ в кро́тости страда́ния прие́мля, безбо́жных мучи́телей,/ благословля́я, прости́л еси́./ Те́мже и нам испроси́ у Христа́ Бо́га дух ми́рен и ве́лию ми́лость.

Велича́ем тя,/ священному́чениче Влади́мире,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Днесь ра́достно лику́ет Це́рковь Ру́сская,/ я́ко ма́ти ча́да, проелавля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы, благове́рныя кня́зи и княги́ни,/ преподо́бныя мужи́ и же́ны и вся правосла́вныя Христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дшия./ Тех предста́тельством, Долготерпели́ве Го́споди,/ страну́ на́шу в Правосла́вии сохрани́ до сконча́ния ве́ка.

Цвети́ Росси́йскаго лу́га духо́внаго/ в годи́ну лю́тых гоне́ний ди́вно процве́тший/ новому́ченицы и испове́дницы безчи́сленнии:/ святи́телие и па́стырие,/ мона́си и мирсти́и, му́жие, жены́ же и де́ти,/ до́брый плод в терпе́нии Христу́ прине́сшии,/ моли́теся Ему́, я́ко насади́телю ва́шему,/да изба́вит лю́ди Своя́ от безбо́жных и злых,/ да утвержда́ется же Це́рковь Ру́сская/ кровьми́ и страда́нии ва́шими/ во спасе́ние душ на́ших.

Днесь новому́ченицы Росси́йстии в ри́зах бе́лых предстоя́т Ангцу Бо́жию/ и со а́нгелы песнь побе́дную воспева́ют Бо́гу:/ благослове́ние, и сла́ва, и прему́дрость,/ и хвала́, и честь, и си́ла, и кре́пость/ на́шему Бо́гу во ве́ки веко́в. Ами́нь.

Но́вии страстоте́рпцы Росси́йстии,/ испове́днически по́прище зе́мное прете́кшии,/ страда́ньми дерзнове́ние прии́мшии,/ моли́теся Христу́, вас укрепи́вшему,/ да и мы, егда́ найде́т на ны испыта́ния час,/ му́жества дар Бо́жий восприи́мем./ О́браз бо есте́ лобыза́ющим по́двиг ваш,/ я́ко ни скорбь, ни теснота́, ни смерть/ от любве́ Бо́жия разлучи́ти вас не возмого́ша.

Велича́ем вас,/ святи́и новому́ченицы и испове́дницы Росси́йстии,/ и чтим честна́я страда́ния ва́ша,/ я́же за Христа́/ претерпе́ли есте́.

Чистоты́ ра́ди жития́ твоего́,/ поще́ния же и моли́тв и трудо́в,/ сосу́д благопотре́бен был еси́ Влады́це Христу́/ и́же дарова́ тя ста́ду твоему́/ я́ко сокро́вище неотъе́млемо, чудесы́ всех обогаща́юща./ Тем и мы, соше́дшеся к ра́це моще́й твои́х,/ ве́рою и любо́вию вопие́м:/ моли́ о нас, пречестны́й архиере́ю, Моисе́е о́тче наш.

я́ко венце́м пресве́тлым украси́вся днесь, вели́кий Но́вград/ лику́ет в па́мять па́стыря своего́ и учи́теля,/ и, я́ко диади́му ца́рскую возложи́вши,/ честна́я о́на оби́тель све́тло ра́дуется,/ просла́ви бо тя Бог, уго́дника Своего́,/ и прояви́ после́днему ро́ду на́шему цельбоно́сныя мо́щи твоя́,/ святи́телю Моисе́е,/ Це́рковь же Бо́жия весели́тся,/ созыва́ющи и́нок сосло́вие велегла́сно вопи́ти:/ ра́дуйся, гра́ду твоему́ и оби́тели похвало́/ и всея́ Росси́йския страны́ пресве́тлый свети́льниче.

Велича́ем тя,/ святи́телю о́тче Моисе́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Боже́ственною благода́тию просвети́вся,/ терпе́нием, слеза́ми, посто́м и моли́твою/ подвиза́лся еси́ во вре́менней жи́зни сей/ и по сме́рти да́руеши исцеле́ния,/ с ве́рою притека́ющим к тебе́./ Те́мже и мы ны́не чтим обре́тение честны́х моще́й твои́х,/ утеша́ющих ду́ши на́ша ско́рбныя,/ напоя́я их ра́достию и слеза́ми умиле́ния./ Святы́й пра́ведный Софро́ние,/ моли́ся приле́жно о нас ко Го́споду,/ да страну́ на́шу Росси́йскую в ми́ре сохрани́т/ и спасе́т ду́ши на́ша.

Оста́вив все зе́мное попече́ние,/ преподо́бнаго Серафи́ма Саро́вскаго житию́ подража́я/, оби́тель же́нскую в пусты́ннем ме́сте основа́л еси́,/да прославля́ется здесь непреста́нно и́мя Бо́жие./ И мы, ви́дя сбыва́ющееся се́рдца твоего́ жела́ние,/ из глубины́ души́ к тебе́ взыва́ем:/ святы́й пра́ведный Софро́ние,/ прииди́, ста́ни с на́ми,/ да просла́вим вку́пе Христа́ Бо́га на́шего/ и Пресвяту́ю Де́ву Чи́стую,/ Упова́ние Христиа́ном,/ да спасе́т Госпо́дь ду́ши на́ша.

Ублажа́ем тя,/ святы́й пра́ведный Софро́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Утоли́ боле́зни/ многовоздыха́ющия души́ моея́,/ Утоли́вшая вся́ку слезу́ от лица́ земли́,/ Ты бо челове́ков боле́зни отго́ниши/ и гре́шных ско́рби разруша́еши,/ Тебе́ бо вси стяжа́хом наде́жду и утвержде́ние,/ Пресвята́я Ма́ти Де́во.

Не вве́ри мя челове́ческаму предста́тельству,/ Пресвята́я Влады́чице,/ но приими́ моле́ние раба́ Твоего́,/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам,/ ниже́ где прибе́гну окая́нный/ всегда́ побежда́емь,/ и утеше́ния не и́мам, ра́зве Тебе́ Влады́чице ми́ра,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

26/8 Преподобных Ксенофонта, супруги его Марии и сыновей их Аркадия и Иоанна (V-VI). Преподобного Ксенофонта Робейского (1262).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Жите́йскаго мо́ря избе́гше, Ксенофо́нт пра́ведный/ с супру́жницею честно́ю, на Небесе́х свеселя́тся с ча́ды,/ Христа́ велича́юще.

В за́поведех бо́дрствовал еси́ Влады́чних,/ ни́щим расточи́вый твое́ бога́тство, блаже́нне,/ ти́хо с супру́жницею и ча́ды твои́ми;/ те́мже насле́дуете/ Боже́ственное наслажде́ние.

Ублажа́ем вас,/ преподо́бнии Ксенофо́нте и Мари́е со ча́дами,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Пусты́ни яви́лся еси́ до́брое прозябе́ние,/ о́тче преподо́бне,/ от ю́ности бо чи́стое житие́ изво́лил еси́,/ духо́вному учи́телю после́дуя,/ и, того́ уче́нием ум твой к Небе́сным впери́в,/ в пусты́ню всели́лся еси́,/ и в ней оби́тель созда́л еси́,/ и ста́ду твоему́ прему́др наста́вник показа́лся еси́,/ Вели́кому же Но́вуграду похвала́ и утвержде́ние,/ те́мже и Христо́с, я́ко пресве́тла свети́льника,/ чудесы́ обогати́ и просла́ви тя./ Ксенофо́нте, о́тче наш,/ моли́ Христа́ Бо́га спасти́ся душа́м на́шим.

Чистото́ю душе́вною боже́ственно вооружи́вся... (общий преподобному).

Ублажа́ем тя,/ преподо́бне о́тче Ксенофо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

27/9 Перенесение мощей святителя Иоанна Златоуста (438).

Уст твои́х, я́коже све́тлость огня́, возсия́вши благода́ть,/ вселе́нную просвети́,/ не сребролю́бия ми́рови сокро́вища сниска́,/ высоту́ нам смиренному́дрия показа́./ Но твои́ми словесы́ наказу́я, о́тче Иоа́нне Златоу́сте,/ моли́ Сло́ва Христа́ Бо́га спасти́ся душа́м на́шим.

Возвесели́ся та́инственно честна́я Це́рковь/ возвраще́нием честны́х твои́х моще́й/ и, сия́ сокры́вши, я́ко зла́то многоце́нное,/ пою́щим тя неоску́дно подава́ет/ моли́твами твои́ми исцеле́ний благода́ть,/ Иоа́нне Златоу́сте.

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

28/10 Преподобного Ефрема Сирина (373–379). Преподобного Феодосия Тотемского (1568). Преподобного Ефрема Новоторжского (1053). Преподобного Ефрема Печерского, епископа Переяславского (ок. 1098). Суморинской-Тотемской иконы Божией Матери (XVI).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Ефре́ме о́тче наш./ Моли́ Христа́ Бо́га спасти́ся душа́м на́шим.

Час при́сно прови́дя Суда́,/ рыда́л еси́ го́рько, Ефре́ме, я́ко любобезмо́лвный,/ де́лателей же был в де́лех учи́тель, преподо́бне ./ Те́мже, о́тче всеми́рный, лени́выя воздвиза́еши к покая́нию.

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От ю́ности, преподо́бне Феодо́сие,/ жела́ние твое́ ко Христу́ Бо́гу впери́в,/ Его́же ра́ди град и оте́чество оста́вль,/ и сла́ву су́етную, я́ко прах, вмени́в,/ после́довал еси́ преподо́бному Дими́трию/ и оби́тели его́ сожи́тель был еси́./ Пресели́вся ко гра́ду То́тьме/ и в междоре́чие всели́вся,/ посто́м и бде́нием и власяны́м одея́нием,/ и вери́гами те́ло свое́ удручи́л еси́./ Сего́ ра́ди Бог, ви́дев твоя́ труды́,/ и по преставле́нии чудесы́ обогати́ тя:/ бе́сы изгоня́вши, и слепы́я просвеща́вши,/ от вся́ких неду́г и бед избавля́вши приходя́щия к тебе́ с ве́рою, и вопию́щия:/ сла́ва Да́вшему ти кре́пость,/ сла́ва Венча́вшему тя,/ сла́ва Даю́щему тобо́ю всем исцеле́ние.

От мирска́го мяте́жа изше́д,/ преподо́бне о́тче наш Феодо́сие,/ и в ти́хое приста́нище дости́г,/ преподо́бному Дими́трию сожи́тель был еси́,/ и отту́ду, Бо́жиим Ду́хом направля́ем,/ во град То́тьму пресели́лся еси́,/ и во ото́цех водны́х оби́тель себе́ воздви́гл еси́,/ иде́же равноа́нгельное житие́ пожи́в,/ после́довал еси́ Христу́,/ Его́же ра́ди влася́ну ри́зу и вери́ги на те́ле твое́м носи́л еси́./ Смире́нием и нищелю́бием украси́вся,/ сла́ву су́етную презре́л еси́/ и оте́ческое име́ние до́бре расточи́л еси́,/ моле́нием же к Бо́гу и сле́зными струя́ми бе́сы посрами́л еси́./ Те́мже по успе́нии твое́м Христо́с да́ром чуде́с обогати́ тя./ Име́я у́бо дерзнове́ние ко Го́споду,/ преподо́бне о́тче наш Феодо́сие,/ моли́ Христа́ Бо́га, да спасе́т ду́ши на́ша.

Воздержа́нием плоть изнури́л еси́/ и непреста́нными моли́твами я́ко а́нгел возвы́сился еси́,/ струя́ми же сле́зными бесо́вския полки́ погрузи́л еси́,/ и ны́не во све́те невече́рнем лику́еши у Христа́ Бо́га/ и приходя́щим ко свято́му твоему́ гро́бу неоску́дно исцеле́ние подае́ши,/ ве́рою вопию́щим тебе́:/ ра́дуйся, о́тче Феодо́сие, Богому́дре.

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Боже́ственною свы́ше просвети́вся благода́тию, преподо́бне,/ мно́гим терпе́нием во вре́менней жи́зни по́двиг соверши́л еси́,/ те́мже источа́еши чуде́с благода́ть/ всем с ве́рою приходя́щим к ра́це моще́й твои́х, Ефре́ме преблаже́нне./ Сего́ ра́ди зове́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Я́ко Богоявле́нная Росси́йская звезда́,/ днесь сия́я чудесы́, яви́лся еси́, преподо́бне о́тче Ефре́ме./ Тем не преста́й моля́ся о ста́де свое́м,/ сохраня́яй оте́чество твое́, град же и лю́ди,/ и́же тебе́ ве́рою почита́ющих/ и к честны́м моще́м твои́м усе́рдно притека́ющих,/ да велегла́сно тебе́ вопие́м:/ ра́дуйся, Богому́дре Ефре́ме о́тче наш.

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Ду́хом горя́ путеше́ствия к святы́м место́м,/ стра́нствовал еси́ в Гре́ческую зе́млю,/ святи́телю Ефре́ме,/ отню́дуже со мно́гою по́льзою возвраща́яся,/ уста́в свята́го Студи́йскаго монастыря́ списа́в,/ а́ки не́кий многоче́стен дар, се́мо* прине́сл еси́,/ и́мже и днесь Це́рковь Росси́йская управля́ема/ сла́вит тебе́, и́стиннаго о ней промы́сленника.

Це́ркви Правосла́вной Росси́йской по жела́нию Богоно́снаго Феодо́сия уста́в Студи́йский прине́сшаго,/ во святи́телех же све́тло просия́вшаго,/ и ста́до свое́ до́бре упа́сшаго,/ восхваля́ем тя, Ефре́ме,/ я́ко моля́щася Го́сподеви о всех нас.

Велича́ем тя,/ святи́телю о́тче Ефре́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

29/11 Перенесение мощей священномученика Игнатия Богоносца (107). Святителя Лаврентия, затворника Печерского, епископа Туровского, в Ближних пещерах почивающего (1194). Святителей Герасима (1441–1467), Питирима (1455) и Ионы (1470), епископов Великопермских, Устьвымских.

И нра́вом прича́стник,/ и престо́лом наме́стник... (общий священномученику).

Апо́стольских нра́вов подража́телю/ и престо́ла их снасле́дниче,/ архиере́ев удобре́ние и му́чеников сла́во, Богодухнове́нне,/ на огнь, и меч, и зве́ри дерзну́л еси́ ве́ры ра́ди/ и, сло́во и́стины исправля́я,/ до кро́ве пострада́л еси́,/ священному́чениче Игна́тие,/ моли́ Христа́ Бо́га/ спасти́ся душа́м на́шим.

От восто́ка днесь возсия́вый/ и тварь всю просвети́вый уче́ньми,/ му́ченичеством украси́ся богоно́сный и боже́ственный Игна́тий.

Велича́ем тя,/ священному́чениче Игна́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Всеблаже́нне Лавре́нтие,/ затвори́вый себе́ Го́спода ра́ди в ме́сте те́сне/ и в нем мно́га ле́та трудолю́бие пожи́вый,/ моли́ся о нас ко Го́споду,/ я́ко да и мы от вся́каго греха́ чу́вства затво́рше,/ полу́чим отверзе́ние двере́й ми́лости Госпо́дни в день су́дный.

Усе́рдие Ла́вре Пече́рстей жела́я от чуде́с прославле́ния,/ себе́ же сама́го смиря́я,/ отре́клся еси́ о́наго,/ бе́дне диа́волом му́чима, исцели́ти,/ отсла́в его́ ко пеще́ре,/ иде́же он исцели́вшися,/ блаже́нне Лавре́нтие,/ просла́ви с тобо́ю Го́спода,/ прославля́ющаго святы́х Свои́х.

Велича́ем тя,/ святи́телю о́тче Лавре́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Равноапо́стольному святи́телю Стефа́ну насле́довавший/ и Правосла́вия све́том страну́ Зыря́нскую озари́вший,/ святи́телие Христо́вы Гера́симе, Питири́ме и Ио́но,/ престо́лу Пресвяты́я Тро́ицы ны́не предстоя́ще,/ моли́теся па́стве ва́шей от враго́в ненаве́тованней бы́ти/ и всем правосла́вным лю́дем в ми́ре спасти́ся.

Первопресто́льницы Пе́рмстии/ и и́стиннии храни́телие апо́стольских преда́ний,/ столпи́ непоколеби́мии,/ благоче́стия учи́телие,/ Пе́рмстии наста́вницы,/ Гера́симе, Питири́ме и Ио́но,/ Влады́ку всех моли́те мир вселе́нней дарова́ти/ и душа́м на́шим ве́лию ми́лость.

Правосла́вия наста́вницы,/ благоче́стия учи́телие и ми́лости сокро́вища,/ архиере́ом украше́ние,/ ду́ши своя́ за па́ству свою́ положи́вший,/ Гера́симе, Питири́ме и Ио́но,/ святи́телие Це́ркве Пе́рмския,/ со равноапо́стольным Стефа́ном моли́те Христа́ Бо́га/ мир вселе́нней дарова́ти/ и душа́м на́шим ве́лию ми́лость.

Во святи́телех благоче́стно пожи́вше/ и Пе́рмския лю́ди к Богоразу́мию наста́вивше,/ до́бре Бо́гу угоди́сте./ Сего́ ра́ди Устьвы́мь и земля́ Зыря́нская хва́лятся,/ име́юще мо́щи ва́ша,/ я́ко исто́чник исцеле́ний/ всем, с ве́рою притека́ющим к вам,/ вы бо чудесы́ просла́вистеся,/ я́ко ученицы́ Бо́жия благода́ти.

Велича́ем вас,/ святи́телие вели́ции Гера́симе, Питири́ме и Ио́но,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

30/12 Собор вселенских учителей и святителей Василия Великого (379), Григория Богослова (389) и Иоанна Златоустого (407). Преподобного Зинона, постника Печерского, в Дальних пещерах почивающего (XIV).

Я́ко апо́столов единонра́внии/ и вселе́нныя учи́телие,/ Влады́ку всех моли́те,/ мир вселе́нней дарова́ти/ и душа́м на́шим ве́лию ми́лость.

Свяще́нныя и боговеща́нныя пропове́дники,/ верх учи́телей, Го́споди, прия́л еси́ в наслажде́ние благи́х Твои́х и упокое́ние,/ труды́ бо о́нех и смерть прия́л еси́ па́че вся́каго всепло́дия,/ Еди́не прославля́яй святы́я Твоя́.

Велича́ем вас,/ святи́телие вели́ции Васи́лие, Григо́рие и Иоа́нне,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Велича́ем вас,/ святи́телие Христо́вы Васи́лие Вели́кий, Григо́рие Богосло́ве и Иоа́нне Златоу́сте,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Преподо́бне о́тче Зино́не,/ преподо́бне и че́стне житие́ твое́ на земли́ препроводи́вый/ и тем Бо́гови по премно́гу благоугоди́вый,/ моли́ о нас, чту́щих па́мять твою́.

Восхваля́лся днесь, преподо́бне Зино́не,/ я́ко преподо́бен во сла́ве,/ и ра́дуяся дави́дски на ло́жи свое́м во Ца́рствии Небе́снем,/ не премолчи́ о нас мольбу́ принести́ ко Го́споду.

Ублажа́ем тя,/ преподо́бне о́тче Зино́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Чудеса́ святы́х Твои́х му́ченик/ сте́ну необори́му нам дарова́вый, Христе́ Бо́же,/ тех моли́твами сове́ты язы́ков разори́,/ Це́рковь Святу́ю укрепи́, я́ко е́дин Благ и Человеколю́бец.

Тро́ичная благода́ть все́льшися в честна́я сердца́ ва́ша,/ преблаже́ннии Ки́ре и Иоа́нне,/ на ду́хи нечи́стыя стра́шни прогони́телие яви́стеся./ И не то́чию явле́нным, но и та́йным/ неду́гом вра́чеве бы́сте./ Те́мже, дерзнове́ние иму́ще к Человеколю́бцу Бо́гу,/ непреста́нною моли́твою душе́вныя на́ша стра́сти исцели́те.

Святи́и сла́внии Ки́ре и Иоа́нне,/ безсре́бреницы, му́ченицы и чудотво́рцы,/ милосе́рдием свои́м, я́ко стено́ю необори́мою,/ нас огради́те от всех бед/ и от враго́в ви́димых и неви́димых сохрани́те/ непреста́нною ва́шею моли́твою ко Го́споду.

Прему́дрии вселе́нней вра́чеве,/ Ки́ре и Иоа́нне,/ от Бо́га прия́сте власть цели́ти неду́ги душе́вныя,/ вку́пе же и теле́сныя,/ и ны́не моли́теся/ сохрани́ти град и лю́ди от одержа́щих зол/ и спасти́ моли́твами ва́шими ду́ши на́ша.

От Боже́ственныя благода́ти дар чуде́с прие́мше, святи́и,/ чудоде́йствуете непреста́нно,/ вся на́ша стра́сти рукоде́йством секу́ще неви́димо,/ Ки́ре богому́дре со Иоа́нном сла́вным:/ вы бо боже́ственнии вра́чеве есте́.

Вели́кое врачевство́ вселе́нней,/ супряже́ние Христо́во возлю́бленное,/ свети́льники сия́ющия, зарю́ исцеле́ний,/ воспое́м, ве́рнии, велегла́сно,/ внутрь це́ркве им вопию́ще:/ Ки́ре и Иоа́нне,/ пода́тели чудесе́м, вра́чеве неду́жным,/ освяща́ете вся стра́ны.

Велича́ем вас,/ чудотво́рцы сла́внии Ки́ре и Иоа́нне,/ и чтим честна́я страда́ния ва́ша,/ я́же за Христа́/ претерпе́ли есте́.

Велича́ем вас,/ чудотво́рцы сла́внии Ки́ре и Иоа́нне,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы а́нгелом.

Наслади́вся, богому́дре, воздержа́ния/ и жела́ние пло́ти твоея́ обузда́в,/ на престо́ле святи́тельства сел еси́,/ и я́ко звезда́ многосве́тлая, просвеща́я ве́рных сердца́/ заря́ми чуде́с твои́х, о́тче наш, святи́телю Ники́то,/ и ны́не моли́ Христа́ Бо́га, да спасе́т ду́ши на́ша.

Небе́снаго простра́нства жела́я,/ от ю́ности в те́сне ме́сте затвори́лся еси́,/ в не́мже прельще́н быв от врага́,/ па́ки смире́нием и послуша́нием/ победи́л еси́ преле́стника* кре́пце, Ники́то,/ и ны́не, предстоя́ Христо́ви,/ моли́ спасти́ся всем нам.

Архиере́йства са́ном почти́вся/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою свел еси́,/ о́вогдаже и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га/ спасти́ лю́ди твоя́ моля́щияся,/да вси вопие́м ти:/ ра́дуйся, святи́телю, о́тче преди́вный.

Победи́в вра́жия ле́сти до́бле/ и све́тло доброде́тельми просия́в,/ святи́тельства оде́ждою обле́клся еси́, пресла́вне Ники́то,/ в не́мже све́том жития́ твоего́ и чудесы́ сия́я па́че со́лнца,/ мно́гих просвети́в, приве́л еси́ Христо́ви,/ Его́же моли́ о нас, пою́щих тя.

Велича́ем тя,/ святи́телю о́тче Ники́то,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

1/14 Предпразднство Сретения Господа Бога и Спаса нашего Иисуса Христа. Мученика Трифона (250).

Небе́сный лик небе́сных а́нгел,/ прини́к на зе́млю, Прише́дша зрит, я́ко Младе́нца/ носи́ма ко хра́му, Перворожде́нна всея́ тва́ри, от Ма́тере Неискусому́жныя:/ предпра́зднственную у́бо с на́ми пою́т песнь, ра́дующеся.

Со Отце́м Сло́во сый неви́димо,/ ны́не у́бо ви́димь е́сть пло́тию,/ неизрече́нно от Де́вы роди́ся/ и на руку́ ста́рчу дае́тся святи́телю./ Поклони́мся Тому́,/ и́стинному Бо́гу на́шему.

Му́ченик Твой, Го́споди, Три́фон... (общий мученику).

Пи́щи Боже́ственныя, треблаже́нне,/ наслажда́яся на Небесе́х неоску́дно,/ сла́вящих пе́сньми па́мять твою́, покры́й/ и сохрани́ от вся́кия ну́жды,/ отжени́ вредя́щих ни́вам живо́тных,/ да тебе́ от любве́ вопие́м всегда́:/ ра́дуйся, Три́фоне, му́чеников укрепле́ние.

Тро́ическою тве́рдостию/ многобо́жие разруши́л еси́ от коне́ц, всесла́вне,/ че́стен во Христе́ быв, и, победи́в мучи́тели во Христе́ Спаси́теле,/ вене́ц прия́л еси́ му́ченичества твоего́/ и дарова́ния Боже́ственных исцеле́ний,/ я́ко непобеди́м.

Велича́ем тя,/ страстоте́рпче святы́й Три́фоне,/ и чтим честна́я страда́ния твоя́,/ я́же за Христа́/ претерпе́л еси́.

2/15 Сретение* Господа нашего Иисуса Христа.

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

Утро́бу Деви́чу освяти́вый Рождество́м Твои́м/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же,/ но умири́ во бране́х жи́тельство/ и укрепи́ лю́ди, и́хже возлюби́л еси́, еди́не Человеколю́бче42.

Велича́ем тя,/ Живода́вче Христе́,/ и чтим Пречи́стую Ма́терь Твою́,/ Е́юже по зако́ну ны́не/ прене́слся еси́ в храм Госпо́день.

3/16 Попразднство Сретения Господня. Праведных Симеона Богоприимца и Анны пророчицы (I). Равноапостольного Николая, архиепископа Японского (1912). Благоверного князя Романа Угличского (1285). Иконы Божией Матери, именуемой «Умягчение злых сердец» или «Симеоново проречение».

Симео́н ста́рец днесь весели́тся,/ восприя́т на руку́ свою́ Младе́нца, Преве́чнаго Бо́га,/ от уз пло́ти разреши́тися прося́/ и вопия́:/ ви́деста о́чи мои́/ спасе́ние Твое́ ми́рови.

Ста́рец днесь отреши́тися от уз моля́шеся/ сего́ жития́ тле́ннаго,/ Христа́ восприя́т на ру́ки/ Зижди́теля и Го́спода.

Велича́ем тя,/ святы́й пра́ведный Симео́не Богоприи́мче,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Апо́столов единонра́вне и сопресто́льне,/ служи́телю Христо́в ве́рный и богому́дрый,/ цевни́це избра́нная Боже́ственнаго Ду́ха,/ сосу́де преизлива́ющийся любве́ Христо́вы,/ Япо́нския земли́ просвети́телю,/ святы́й Нико́лае, иера́рше равноапо́стольне,/ моли́ся Живонача́льней Тро́ице/ о всем твое́м ста́де и о всем ми́ре.

Я́ко апо́столом соприча́стника в труде́х и в возме́здиих/ Це́рковь тя с любо́вию почита́ет,/ святи́телю о́тче Нико́лае равноапо́стольне./ Положи́в бо мно́гими по́двиги нача́ло Правосла́вия в Япо́нии язы́честей,/ умно́жил еси́ в ней ча́да спасе́ния,/ и по кончи́не прия́т тя Бог во оби́тели апо́стол Свои́х по достоя́нию./ Сего́ ра́ди мо́лим тя,/ моли́ся Го́сподеви пребы́ти и в пре́дняя де́лу твоему́ незы́блему на ве́ки,/ и ввести́ся в ло́но Це́ркве Правосла́вныя всем поги́бнути иму́щим,/ умири́тися ми́рови/ и спасти́ся душа́м на́шим.

Стра́нника и прише́льца прия́т тя страна́ Япо́нская,/ равноапо́стольне святи́телю Нико́лае,/ в не́йже испе́рва позна́л еси́ себе́, я́ко чужда́го,/ оба́че теплоту́ и свет Христо́в источа́я,/ прелага́л еси́ враги́ твоя́ в сы́ны духо́вныя,/ и́мже раздая́ благода́ть Бо́жию, созида́л еси́ Це́рковь Христо́ву,/ о не́йже ны́не мо́лися,/ и тебе́ бо сы́нове ея́ и дще́ри взыва́ют:/ ра́дуйся, па́стырю до́брый наш.

Тве́рдаго и боговеща́ннаго пропове́дателя Ева́нгелия Твоего́, Го́споди,/ возме́здил* еси́ боголе́пно,/ труды́ бо его́ и боле́зни прия́л еси́ па́че всех жертв зако́нных и всесожже́нии́./ Того́ моли́твами соблюди́ нас от неприя́зни.

Велича́ем тя,/ святи́телю о́тче Феодо́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Измла́да яви́лся еси́, богому́дре/ кня́же Рома́не всеблаже́нне,/ Боже́ственный сосу́д избра́н Бо́гови,/ и ны́не то́чиши нам мно́гая исцеле́ния,/ и вся неду́ги потопля́еши,/ и спаси́ град твой Углеч,/ и всех ве́рных сохраня́й от неви́димых и ви́димых враг,/ ве́рою, мо́лим, блаже́нне кня́же Рома́не,/ моли́ Христа́ Бо́га спасти́ся душа́м на́шим.

От младе́нства яви́лся еси́,/ правове́рный кня́же Рома́не,/ и́збран от Бо́га/ благоче́стия столп необори́м,/ ве́ру непоро́чну соблю́л еси́,/ моли́твами и ми́лостынею и посто́м Бо́гу угоди́л еси́;/ те́мже и по сме́рти яви́ся све́тлость жития́ твоего́,/ исцеля́еши, бо неду́ги немощству́ющих,/ ве́рою притека́ющих ко свято́му твоему́ гро́бу./ Сего́ ра́ди вопие́м ти:/ ра́дуйся, уго́дниче Бо́жий Рома́не,/ гра́да У́глеча похвало́ и утвержде́ние.

Яви́ся, я́ко звезда́ пресве́тлая,/ благове́рный кня́же Рома́не,/ в Бо́гом пору́ченном ти гра́де У́глече,/ в животе́ свое́м просвети́вся/ воздержа́нием и всено́щным стоя́нием,/ посто́м и моли́твою и слеза́ми,/ моля́ся ко Всеми́лостивому Спа́су за град свой/ и за вся страны́ Ру́сския земли́,/ и по преставле́нии твое́м источа́еши исцеле́ния неоску́дно/ приходя́щим с ве́рою,/ те́мже вопие́м ти:/ моли́ Христа́ Бо́га спасти́ся душа́м на́шим.

Сконча́в до́брый по́двиг,/ и ве́ру соблюде́ в сердцы́ свое́м,/ и вене́ц нетле́нный от Бо́га прия́л еси́,/ блаже́нный кня́же Рома́не,/ и сла́ве Его́ сподо́бился еси́,/ и престо́лу предста́л еси́ Спа́сову./ Моли́ся Го́сподеви спасти́ град У́глеч и вся гра́ды/ от наше́ствия иноплеме́нных, и междоусо́бныя бра́ни, и пога́ных,/ и, твое́ честно́е преставле́ние почита́ющим,/ грехо́в оставле́ние дарова́ти,/ чту́щим любо́вию святу́ю па́мять твою́.

Красоту́ ми́ра сего́, княже́ние и сла́ву,/ я́ко вре́менно помышля́я,/ и сего́ ра́ди благоче́стно в ми́ре пожи́л еси́,/ блаже́нне кня́же Рома́не,/ ми́лостынею и моли́твами Бо́гу угоди́в,/ и по преставле́нии свое́м чуде́с дар прии́м от Христа́ Бо́га/ и свети́льник яви́ся пресве́тлый,/ просвеща́я свои́ми чудесы́, приходя́щим к тебе́ с ве́рою здра́вие подае́ши и от бед избавля́еши./ Те́мже Христо́ва Це́рковь сла́вит тя,/ благочести́вый кня́же Рома́не,/ гра́ду своему́ У́глечу вели́кий побо́рниче.

Яко многосве́тлая звезда́,/ всепра́зднственная па́мять твоя́ возсия́ днесь, благове́рный кня́же Рома́не,/ созыва́ющи к похвале́нию лю́ди твоя́,/ пе́сньми славосло́вити честно́е житие́ твое́/ и ве́рно торжествова́ти свято́е твое́ успе́ние,/ в не́мже моли́ся, свя́те, ко Христу́ Бо́гу на́шему,/ е́же изба́витися нам от всех наве́тов вра́жиих,/ да вси зове́м ти:/ ра́дуйся, Рома́не пребога́те, но́вый Росси́йский чудотво́рче.

Ублажаем тя,/ благове́рный кня́же Рома́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Восприе́мши ду́ши челове́ческия/ и утоли́вши* злый сове́т,/ сокруши́, Богома́ти Влады́чице,/ и разгони́ тьму прегреше́ний,/ и нас наста́ви на путь смире́ния,/ я́ко да и мы бу́дем во све́те дел ходи́ти,/ и Твоея́ ико́ны явле́нию торжествова́ти,/ и на по́мощь Твою́ упова́ти,/ и уми́льным гла́сом звати́, Влады́чице, из глубины́:/ помози́, Еди́на Благослове́нная.

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ Еди́на вско́ре предста́тельствующая.

О́ко се́рдца моего́ смущаю́т,/ и злы́й сове́т разоря́ет мя,/ сих сокруши́, Де́во Чи́стая,/ и не пре́зри мое воздыха́ние,/ и супоста́ты на нас умягчи́, Преблагослове́нная Влады́чице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

4/17 Преподобного Исидора Пелусиотского (ок. 436–440). Благоверного великого князя Георгия (Юрия) Всеволодовича Владимирского (1238). Преподобного Кирилла Новоезерского (Новгородского) (1532).

В тебе́, о́тче, изве́стно спасе́ся... (общий преподобному).

Денни́цу другу́ю тя Це́рковь обре́тши, пресла́вне,/ твои́х слове́с мо́лниями освеща́ема,/ взыва́ет ти:/ ра́дуйся, всеблаже́нне Богому́дре Иси́доре.

Ублажа́ем тя,/ преподо́бне о́тче Иси́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

На высоте́ вели́каго княже́ния седя́,/ яви́лся еси́ благоче́стием и ве́рою сия́я оте́честву своему́, я́ко со́лнце;/ по Святе́й Тро́ице ре́вностию разже́гся,/ и за ве́ру кре́пко пострада́в, кро́вь свою́ пролия́л еси́;/ тем и отсече́нная твоя́ за Христа́ глава́ свиде́тельствует я́ве о тебе́,/ приле́пшая по сме́рти к телеси́ твоему́/ с не́юже и до днесь нетле́нны пребыва́ют мо́щи твоя́,/ от ни́хже источа́еши исцеле́ния душа́м и телесе́м на́шим./ Но, я́ко дерзнове́ние име́я ко Христу́, страстоте́рпче Гео́ргие,/ непреста́нно моли́, держа́ву твою́ и сро́дник твои́х/ безвре́дну сохрани́ти моли́твами твои́ми.

Христо́ве сме́рти подо́бяся,/ и Того́ испи́та ча́шу возжеле́в, я́ко живота́,/ за Него́же му́жески подвиза́лся еси́, презре́в земно́е ца́рство,/ от безбо́жных ва́рвар пострада́в до сме́рти,/ Гео́ргие Богому́дре;/ тем моли́ спасти́ся правосла́вным Христиа́ном, моли́твами твои́ми.

Велича́ем тя,/ благове́рный вели́кий кня́же Гео́ргие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Бо́жиим Ду́хом подвиза́емь,/ слез твои́х ту́чами изсо́хшее напои́л еси́,/ и безпло́тное в пусты́ни житие́ показа́л еси́,/ и е́же из глубины́ се́рдца бо́дренными моли́твами и посто́м/ благодея́ния труды́ уплодоноси́л еси́,/ и, вселе́нную всю просвети́л еси́ сия́нием чуде́с твои́х,/ о́тче наш Кири́лле,/ моли́ Христа́ Бо́га спасти́ся душа́м на́шим.

Я́ко свети́льник яви́лся еси́ всесве́тел/ во ото́це Нова́ е́зера на Кра́сном о́строве,/ преподо́бне о́тче Кири́лле,/ ты бо крест Христо́в на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ от Него́же и си́лами чуде́с обогати́ся,/ тем и мы любе́зно прибега́ем к ра́це честны́х моще́й твои́х, уми́льно глаго́лем:/ о, преподо́бне о́тче Кири́лле,/ моли́ Христа́ Бо́га спасти́ся ду́шам на́шим.

Взбра́нному и кре́пкому адама́нту*,/ прогони́телю бесо́в, но́вому чудотво́рцу,/ победи́тельная, страсте́й злых свободи́вшеся,/ благода́рственная воспису́ем ти, о́тче наш Кири́лле,/ но, я́ко име́я дерзнове́ние у престо́ла Христо́ва,/ ве́рою чту́щих тя, град же и лю́ди, моли́твою твое́ю сохраня́й:/ ты бо еси́ ста́ду твоему́ похвала́ и утвержде́ние.

Христо́в яре́м на ра́мо взем,/ усе́рдно Тому́ после́дова,/ чистото́ю Бо́гови прибли́жився,/ о́тче преподо́бне Кири́лле,/ мо́лим тя, посеща́й ми́лостивно чад свои́х,/ и моли́ непреста́нно о всех нас.

Ублажа́ем тя,/ преподо́бне о́тче Кири́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

5/18 Мученицы Агафии (251). Святителя Феодосия, архиепископа Черниговского (1696). Елецкой-Черниговской (1060), Сицилийской, или Дивногорской (1092), и именуемой «Взыскание погибших» (XVII) икон Божией Матери.

Агница Твоя́, Иису́се... (общий мученице).

Да украси́тся днесь Це́рковь порфи́рою сла́вною, омоче́нною от чи́стых крове́й Ага́фии му́ченицы,/ ра́дуйся, вопию́щи, Ката́нская похвало́.

Велича́ем тя,/ страстоте́рпице Христо́ва Ага́фие,/ и чтим честно́е страда́ние твое́,/ е́же за Христа́/ претерпе́ла еси́.

Преудобре́н во архиере́ех, святи́телю Феодо́сие,/ был еси́ свети́ло своему́ ста́ду,/ та́же преста́вился еси́ в ве́чныя оби́тели./ Умоли́ у престо́ла Царя́ сла́вы изба́витися нам от находя́щих на ны зол/ и спасти́ся душа́м на́шим, свя́те, моли́твами твои́ми.

Па́стырей Нача́льнику Христу́ труди́лся еси́,/ святи́телю Феодо́сие,/ на па́жити духо́вней слове́сныя твоя́ о́вцы пита́я,/ и целе́бен дар от Христа́ Спа́са прия́л еси́,/ во е́же не́мощи душе́вныя и теле́сныя цели́ти всех,/ с ве́рою тебе́ приходя́щих./ Те́мже и ны́не, свя́те, моли́ся/ всем, и́мя твое́ призыва́ющим,/ от наве́тов вра́жиих спасти́ся/ и поми́ловатися душа́м на́шим.

Велича́ем тя,/ святи́телю о́тче Феодо́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Взыщи́ нас погиба́ющих, Пресвята́я Де́во,/ не по грехо́м бо на́шим наказу́еши нас,/ но по человеколю́бию ми́луеши,/ изба́ви нас от а́да, боле́зни и ну́жды,/ и спаси́ нас.

Ра́дуйся, Благода́тная Богоро́дице Де́во,/ во объя́тиях Свои́х Преве́чнаго Младе́нца и Бо́га носи́вшая./ Проси́ Его́ да́та ми́ру умире́ние и душа́м на́шим спасе́ние./ Сын бо Тебе́, Богома́ти, веща́ет,/ я́ко вся проше́ния Твоя́ во благо́е испо́лнит./ Сего́ ра́ди и мы, припа́дающе, мо́лимся/ и, наде́ющийся на Тя, да не поги́бнем,/ и́мя Твое́ имену́ем:/ Ты бо еси́, Влады́чице,/ Взыска́ние поги́бших.

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Пречи́стая Де́во,/ Ты нам помози́,/ на Тебе́ наде́емся/ и Тобо́ю хва́лимся:/ Твои́ бо есмы́ раби́,/ да не постыди́мся.

Велича́ем Тя,/ Пресвята́я Де́во,/ и чтим о́браз Твой святы́й,/ и́мже взыску́еши погиба́ющих/ и нам да́руеши благода́ть и исцеле́ние.

6/19 Преподобного Вукола, епископа Смирнского (ок. 100). Елецкой – Харьковской иконы Божией Матери (XVII).

Пра́вило ве́ры, И о́браз кро́тости... (общий святителю).

Боже́ственный гром, труба́ духо́вная,/ ве́ры насади́телю и отсека́телю ересе́й,/ Тро́ицы уго́дниче, вели́кий святи́телю Вуко́ле,/ со а́нгелы предстоя́ при́сно,/ моли́ непреста́нно о всех нас.

Велича́ем тя,/ святи́телю о́тче Вуко́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Твоего́ милосе́рдия дарова́ния воспомина́юще, Влады́чице,/ и Твой чудотво́рный о́браз благогове́йно лобыза́юще,/ упова́нием же Твоея́ по́мощи сердца́ на́ша веселя́ще,/ а́ки среди́ нас прибыва́ющую Тя помышля́ем/ и ве́рою Тебе́ вопие́м:/ Твоего́ моли́ Сы́на и Го́спода,/ да научи́т нас за́поведи Его́ всегда́ твори́ти/ и злы́я искуше́ния побежда́ти,/ и Тебе́, Предста́тельницу на́шу,/ досто́йно пе́ти и сла́вити во ве́ки.

На неувяда́емом дре́ве уго́днику яви́вшися,/ Твое́ же предста́тельство всем моля́щимся при́сно явля́ющи, Влады́чице,/ и на́шего не отврати́ смире́ннаго моле́ния,/ но прегреше́ний на́ших проще́ния испроси́/ и, ско́рби душ на́ших отъе́мши,/ благода́рственное на́ше приими́ поклоне́ние,/ да любо́вию Тя во ве́ки сла́вим, Всепе́тая.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

7/20 Преподобного Парфения, епископа Лампсакийского (IV). Преподобного Луки Елладского (ок. 946).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Чуде́с прия́л еси́ Боже́ственную благода́ть,/ Богому́дре свяще́нне Парфе́ние,/ чудотво́рче Богоно́се,/ вся ве́рных стра́сти очища́я, ду́хи лука́вства, о́тче, изгоня́я./ Сего́ ра́ди тя воспева́ем,/ я́ко ве́лия таи́нника Бо́жия благода́ти.

Избра́вый тя Бог пре́жде созда́ния во Свое́ благоуго́дие,/ и́миже ве́дяще су́дьбами,/ при́сно от утро́бы освяща́ет/ и Своего́ раба́ показа́ тя,/ исправля́я твоя́ стопы́, Луко́, я́ко Человеколю́бец,/ Ему́ ны́не, ра́дуяся предстои́ши.

Велича́ем вас,/ святи́и отцы́ Парфе́ние и Луко́,/ и чтим святу́ю па́мять вашу,/ вы бо мо́лите за нас/ Христа́ Бо́га на́шего.

8/21 Великомученика Феодора Стратилата (319). Святителя Саввы II, архиепископа Сербского (1269). Блаженной Любови Рязанской (1921).

Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре,/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою при́сно ублажа́ем.

Му́жеством души́ в ве́ру оболки́йся,/ и глаго́л Бо́жий, а́ки копие́, в ру́ку взе́м,/ врага́ победи́л еси́, му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.

Велича́ем тя,/ страстоте́рпче святы́й Фео́доре,/ и чтим честна́я страда́ния твоя́,/ я́же за Христа́/ претерпе́л еси́.

Исправле́ние ве́ры и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши,/ сего́ ра́ди к честне́й ра́це моще́й твои́х любо́вию прикаса́емся,/ лобыза́ем их и ве́рно вопие́м:/ предста́ни в по́мощь воспева́ющим па́мять святу́ю твою́ и светоно́сную,/ святи́телю о́тче Са́вво пребога́те, мо́лимся,/ Христу́ Бо́гу мо́лися/ спасти́ся душа́м на́шим.

Я́ко архиере́ем сопресто́льник/ и святи́телем изря́дный побо́рник был еси́, святи́телю Са́вво,/ сохраня́яй оте́чество, оби́тель, град же и лю́ди, почита́ющия тя, ве́рою/ и честны́м твои́м моще́м покланя́ющияся,/да велегла́сно* тебе́ вопие́м:/ ра́дуйся, Са́вво Богому́дре.

Велича́ем тя,/ святи́телю о́тче Са́вво,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Любо́вью наречена́ была́ еси́ во Свято́м Креще́нии,/ любо́вь Христо́ву позна́ла еси́,/ в житии́ дерзнове́ние ве́лие стяжа́ла еси́,/ те́мже к тебе́ усе́рдно прибега́ем,/ из глубины́ серде́ц на́ших взыва́ющи:/ моли́ся у́бо ко Го́споду,/ Любо́вь блаже́нная, богому́драя,/ дарова́ти ми́рови мир/ и душа́м на́шим ве́лию ми́лость.

Святи́телем Христо́вым Никола́ем исцеле́нная/ и на служе́ние Бо́гу и лю́дем и́мже благослове́нная,/ крест свой юро́дства с любо́вию до конца́ проне́сшая./ Свята́я блаже́нная Любо́вь,/ не оста́ви нас, почита́ющих святу́ю па́мять твою́,/ ны́не предстоя́ в ли́ке святы́х престо́лу Пресвяты́я Тро́ицы,/ моли́ся о благоде́нствии оте́чества твоего́/ и о спасе́нии душ на́ших.

Ублажа́ем тя,/ свята́я пра́ведная Любо́вь,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

9/22 Мученика Никифора, из Антиохии Сирской (ок. 257). Обретение мощей святителя Иннокентия, епископа Иркутского (1805). Преподобного Панкратия Печерского, в Дальних пещерах почивающего (XIII).

Му́ченик Твой, Го́споди... (общий мученику).

Любве́ сою́зом связа́вся, Ники́форе,/ разруши́л еси́ я́ве зло́бу не́нависти,/ и мече́м во главу́ твою́ усече́н был еси́,/ му́ченик Боже́ственный вопло́щшагося Спа́са,/ Его́же о нас моли́, пою́щих сла́вную па́мять твою́.

Впери́вся, сла́вне, Госпо́днею любо́вию/ и Сего́ сла́вный крест на ра́мо взем, посрами́л еси́ диа́воли ко́зни,/ пострада́л еси́ да́же до сме́рти,/ и и́стины яви́лся еси́ победоно́сец,/ ору́жник и таи́нник Бо́жия благода́ти.

Велича́ем тя,/ страстоте́рпче святы́й Ники́форе,/ и чтим честна́я страда́ния твоя́,/ я́же за Христа́/ претерпе́л еси́.

Свети́льниче Це́ркве пресве́тлый,/ озари́вый луча́ми добро́т твои́х страну́ сию́,/ и нецеле́ньми мно́гими, притека́ющих к ра́це твое́й с ве́рою,/ Бо́га просла́вивый,/ мо́лим тя, святи́телю о́тче Инноке́нтие,/ огражда́й моли́твами твои́ми град сей/ от всех бед и печа́ли.

Непоро́чности соиме́ннаго па́стыря,/ пропове́дника ве́ры в язы́цех монго́льских,/ сла́ву и украше́ние Ирку́тския па́ствы,/ любо́вию восхва́лим вси ве́рнии,/ той бо есть храни́тель страны́ Сиби́рския/ и моли́твенник о душа́х на́ших.

Велича́ем тя,/ святи́телю о́тче Инноке́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Панкра́тие Богому́дре,/ свяще́нниче Госпо́день изря́дне,/ и чуде́с мно́гих самоде́телю,/ моли́ся Го́сподеви,/ во е́же спасти́ ду́ши на́ша.

В по́стницех яви́лся еси́ вели́к,/ во иере́ех же нарочи́т/ и в чудотворе́ниях да́ре показа́ся сла́вен,/ свяще́нне о́тче Панкра́тие,/ тем тя чтим и ублажа́ем.

Ублажа́ем тя,/ преподо́бне о́тче Панкра́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

10/23 Священномученика Харалампия, епископа Магнезийского и иже с ним (202). Преподобного Лонгина Коряжемского (1540). Преподобного Прохора Печерского, Лебедника, в Ближних пещерах почивающего (1107). Благоверной княгини Анны Новгородской (1056). Собор Новгородских святителей. Иконы Божией Матери «Огневидная».

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре, показа́ся, Харала́мпие,/ возсия́ в ми́ре муче́нием,/ разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Моли́твами твои́ми ко Го́споду/ от зол, бед, напа́стей свободи́,/ ве́рно к тебе́ прибега́ющих/ и сете́й изба́ви вра́жиих,/ ве́лий страстоте́рпче Харала́мпие.

Подо́бствовав благода́тию свяще́нства, сла́вне,/ Це́рковь све́тло украси́л еси́ Боже́ственным страда́нием,/ е́же за Христа́ прия́л еси́ до́блественно, ра́дуяся, Харала́мпие,/ честны́й, свети́льниче всеми́рный, осиява́яй концы́,/ я́ко непобеди́мый.

Страстоте́рпцу Харала́мпию присту́пим/ и о́бразу его́ поклони́мся, от се́рдца вопию́ще:/ му́чениче Харала́мпие и о́тче,/ от вся́каго обстоя́ния и всех бед свои́х раб изба́ви нас,/ в Це́ркви Бо́жией вы́ну пребыва́ющих.

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре показа́ся, Харала́мпие,/ возсия́ в ми́ре муче́нием,/разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Пострада́вый му́жески и му́ченическим увенча́н венце́м,/ священному́чениче пресла́вне Харала́мпие,/ свободи́ раб твои́х от губи́тельства и вся́каго зла, напа́стей и бед,/ свя́те, с любо́вию твое́ призыва́ющих чу́дное и́мя.

Я́ко му́ченик и испове́дник цвет,/ двойны́м венце́м Христо́с тя увенча́,/ возвели́чив безчи́сленными чудесы́ на земли́,/ но я́ко благода́ть Госпо́дню явля́я нам,/ ве́рно к тебе́ прибега́ющим,/ да́руй мир, помози́ в напа́стех и лю́тых беда́х,/ святе́йший Харала́мпие.

Велича́ем тя,/ священному́чениче Харала́мпие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

От мяте́жа мирска́го удали́вся,/ к немерца́ющему Све́ту прите́кл еси́,/ преподо́бне о́тче Ло́нгине,/ и ны́не чи́сте зри́ши Святу́ю Тро́ицу,/ ю́же моли́ за ны недосто́йныя,/ да спасе́т ду́ши на́ша.

По словеси́ Учи́теля Христа́/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́ся еси́,/ иде́же доны́не исцеле́ния неоску́дно источа́ются/ с ве́рою приходя́щим к тебе́.

Ублажа́ем тя,/ преподо́бне о́тче Ло́нгине,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподо́бне чудотво́рче, о́тче Про́хоре,/ препита́вый во гла́де а́лчущия хле́бом от бы́лия и со́лею от пе́пела./ Напита́й и нас пи́щею духо́вною,/ моля́ Христа́ Бо́га о душа́х на́ших.

Ве́лием воздержа́нием удруча́я плоть свою́, свя́те,/ лиши́вся пи́щи челове́ческия,/ зе́лием и траво́ю вме́сто хле́ба, пе́пелом же, а́ки со́лею, пита́лся еси́,/ чудоде́йственне Про́хоре./ Е́же ви́дя, Госпо́дь приложи́ зе́лие во хлеб и пе́пел в соль,/ и́миже ты мно́жество гла́дных препита́л еси́,/ тем тя чтим и ублажа́ем.

Ублажа́ем тя,/ преподо́бне о́тче Про́хоре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От за́пада возсия́вши, я́ко звезда́ небосве́тлая,/ прия́ти Правосла́вную ве́ру сподо́билася еси́,/ в не́йже плод благосла́вный Росси́йстей земли́ прине́сши,/ свята́я благове́рная княги́не Анно,/ Христа́ всем се́рдцем возлюби́ла еси́,/ Того́ оправда́ния и зако́ны храня́щи./ Те́мже днесь всесвяту́ю па́мять твою́ пра́зднующе,/ грехо́в оставле́ние моли́твами твои́ми прие́млем.

Днесь в све́тлой па́мяти твое́й/ Вели́кий Но́вград весели́тся,/ созыва́я всех ве́рных све́тло пра́здновати па́мять твою́,/ и мы ны́не, духо́вно ликовству́юще,/ ра́достно сла́вим тя и мо́лим:/ свята́я благове́рная княги́не Анно,/ предстоя́ Святе́й Тро́ице/ моли́ изба́вити Вели́кий Но́вград и всю зе́млю Ру́сскую/ от вся́ких бед и обстоя́ний и всем нам спасти́ся.

Ублажа́ем тя,/ свята́я благове́рная княги́не Анно,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

11/24 Священномученика Власия, епископа Севастийского (ок. 316). Преподобного Димитрия Прилуцкого, Вологодского (1392). Благоверного князя Всеволода, во Святом Крещении Гавриила, Псковского (1138). Мученика Георгия Софийского (болгарское имя Борба) (1555).

И нра́вом прича́стник,/ и престо́лом наме́стник... (общий священномученику).

Боже́ственное прозябе́ние, цвет неувяда́емый,/ лозы́ Христо́вы розго́ многострада́льная, Богоно́се Вла́сие,/ ве́рою чту́щия па́мять твою́ весе́лия твоего́ испо́лни,/ моля́ся непреста́нно о всех нас.

Свяще́ния пома́занием, и муче́ния кро́вию украси́лся еси́, сла́вне Вла́сие,/ и сия́вши всю́ду, в Вы́шних лику́я/ и нас назира́я, в храм твой прише́дшия,/ и в нем тебе́ непреста́нно зову́щия:/ всех нас соблюди́.

Велича́ем тя,/ священному́чениче Вла́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Свы́ше от Бо́га, преподо́бне , благода́ть прия́л еси́ духо́вную,/ и от Него́ у́бо позна́лся еси́, блаже́нне./ Того́ ра́ди и ты ду́хом позна́л еси́ лу́чшая Его́, бу́дущаго ве́ка пребыва́ние,/ по́стнически испыта́вся во свои́х оби́телех./ И ны́не со а́нгелы ликовству́я,/ Спа́су всех за ны моли́ся, свя́те Дими́трие,/ да вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Свы́ше от Бо́га, преподо́бне , благода́ть прия́л еси́, Дими́трие пресла́вне,/ и Того́ си́лою укрепля́ем,/ Ева́нгельски ходи́ти изво́лил еси́,/ отону́дуже и от Христа́ возме́здие трудово́м обре́те, всеблаже́нне,/ Его́же моли́ спасти́ся душа́м на́шим.

От ю́ности, преподо́бне , крест твой взем, Христу́ после́довал еси́,/ в моли́твах и поще́ниих, во бде́ниих же и злострада́ниих плоть твою́ изнуря́я./ Те́мже и Всеви́дящее О́ко твоя́ труды́ ви́дев,/ чудесы́ тя прославля́ет, и всех зва́ти тебе́ науча́ет:/ ра́дуйся, преподо́бне о́тче Дими́трие, по́стников удобре́ние.

Жезло́м, свя́те Дими́трие, от Бо́га да́нным ти,/ люди́ своя́ упасе́ на па́житех зако́на живоно́сна,/ зве́ря же неви́димаго шата́ние сокруши́ под но́зе тебе́ пою́щих,/ я́ко в беда́х тя те́пла предста́теля и́мамы.

Ублажа́ем тя,/ преподо́бне о́тче Дими́трие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Измла́да яви́лся еси́, Богому́дре кня́же Гаврии́ле,/ Боже́ственный сосу́д избра́н Бо́гови,/ благоче́стием воспита́н, ве́ру непоро́чну соблю́л/ и мно́ги святы́я це́ркви устро́ив,/ изгна́ние претерпе́л еси́ от свои́х,/ я́коже и целому́дрии прароди́тели твои́ от бра́та убие́ние./ С ни́миже предстоя́ Святе́й Тро́ице,/ моли́ся держа́вы Росси́йския нача́льником сохране́нным бы́ти, и всем нам спасти́ся.

Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми, и я́коже Дави́д незло́бием./ Того́ ра́ди получи́л еси́ жизнь ве́чную на небесе́х,/ всегда́ зря Святу́ю Тро́ицу,/ моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.

Велича́ем тя,/ благове́рный кня́же Все́володе-Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

В терпе́нии многоиску́снем, блаже́нне му́чениче Гео́ргие,/ огнеиску́сную смерть претерпе́л еси́/ и по кончи́не твое́й вене́ц от Христа́ нетле́нный/ с му́ченическими ли́ки прия́л еси́./ И ны́не, на земли́ кро́тких досто́йно водворя́лся,/ Христа́ Бо́га о нас непреста́нно моли́,/ и́же ве́рою покланя́ющихся ра́це моще́й твои́х.

Боже́ственным жела́нием от ю́наго во́зраста/ весь сам себе́ Го́сподеви возложи́в,/ в моли́твах и посте́х о́браз быв доброде́тели,/ бога́тство же и сла́ву, и доброро́дство теле́сное, я́ко не су́щее, презре́в,/ и Христа́ еди́наго от души́ возлюби́л еси́,/ и Того́, и́стиннаго су́ща Бо́га, в Тро́ице покланя́ема,/ пред нечести́выми ту́рки пропове́дал еси́,/ и, срацы́нскую43 ве́ру, и зако́ны Моаме́фовы44 под нога́ми попра́в/ и мучи́теля ужаси́в*,/ му́чения венце́м украси́вся, сла́вне,/ к Небе́сным восте́кл еси́ ликостоя́нием,/ прему́дре Гео́ргие./ Моли́ Христа́ Бо́га/ сохрани́ти оте́чество твое́ и спасти́ лю́ди и град,/ и́же твоя́ по́двиги при́сно почита́ющия.

Боже́ственною уя́звлен любо́вью,/ прему́дре Гео́ргие сла́вне,/ Христа́ Бо́га нечести́вым пропове́дал еси́/ и злоче́стие турское нога́ми попра́л еси́;/ муче́ния же венце́м украси́вся,/ к Небе́сным восте́кл еси́ ликостоя́нием./ Моли́ Христа́ Бо́га/ сохрани́ти оте́чество твое́, град и лю́ди,/ по́двиги твоя́ при́сно почита́ющия.

Вы́шния сла́вы жела́я, многострада́льне Гео́ргие,/ ага́рянскую пре́лесть поплева́в, попра́л еси́/ и побе́ды вене́ц прия́л еси́,/ а́нгелом же ны́не свеселя́ся и му́чеником соводворя́яся,/ с ни́миже Христу́ Бо́гу моли́ся непреста́нно о всех нас.

Я́ко звезда́ пресве́тлая, яви́лся еси́ непреле́стная ми́рови,/ пра́веднаго со́лнца Христа́ возвеща́ющи страда́нии твои́ми, страстоте́рпче,/ вели́кий му́чениче Христо́в Гео́ргие,/ и пре́лесть погаси́л еси́ срацы́нскую,/ и Моаме́фова преда́ния и зако́ны под нога́ми твои́ми попра́л еси́,/ и беззако́ннаго царя́ и мучи́телей ужаси́л еси́ кре́пким твои́м терпе́нием,/ и ве́рным подае́ши свет,/ моля́ся к Бо́гу непреста́нно/ о всех нас.

Велича́ем тя,/ страстоте́рпче, святы́й Гео́ргие,/ и чтим честа́я страда́ния твоя́,/ я́же за Христа́/ претерпе́л еси́.

12/25 Иверской иконы Божией Матери (IX). Святителя Мелетия, архиепископа Антиохийского (381). Святителя Алексия, митрополита Московского и всея России, чудотворца (1378). Святителя Мелетия, архиепископа Харьковского и Ахтырского (1840). День тезоименитства Святейшего Патриарxа Московского и всея Руси Алексия II.

От святы́я ико́ны Твоей,/ о Влады́чице Богоро́дице,/ исцеле́ния и цельбы́ подаю́тся оби́льно/ с ве́рою и любо́вию приходя́щим к ней./ Та́ко и мою́ не́мощь посети́/ и ду́шу мою́ поми́луй, Блага́я,/ и те́ло исцели́ благода́тию Твое́ю, Пречи́стая.

Де́рзость ненави́дящих о́браз Госпо́день,/ и держа́ва нечести́вых безбо́жно в Нике́ю прии́де,/ и по́сланнии безчелове́чно вдови́цу,/ благоче́стно чту́щую ико́ну Богома́тере, истязу́ют./ Но та́я но́щию с сы́ном ико́ну в мо́ре пусти́, вопию́щи:/ сла́ва Тебе́, Чи́стая,/ я́ко непроходи́мое мо́ре плещи́ своя́ подаде́,/ сла́ва правоше́ствию Твоему́, Еди́на Нетле́нная.

А́ще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию́ от враго́в,/ но яви́лася есть Храни́тельница Афо́на/ и Врата́рница оби́тели и́верския, враго́в устраша́ющая/ и в Правосла́вней Росси́йстей стране́/ чту́щия Тя от всех бед и напа́стей избавля́ющая.

Совозсия́ днесь Све́ту Воскресе́ния свет чи́стыя ико́ны Твоея́,/ обоя́ ве́село торжеству́юще вопие́м:/ сохрани́ раб Твои́х благода́тию, Влады́чице.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Пра́вило ве́ры, и о́браз кро́тости... (общий святителю).

Духо́внаго твоего́ дерзнове́ния убоя́вся,/ отсту́пник бе́гает Македо́ний,/ моли́твенное же служе́ние соверша́юще, твои́ раби́,/ любо́вию притека́ем,/ а́нгелом собесе́дниче Меле́тие,/ о́гненный мечу́ Христа́ Бо́га на́шего,/ вся безбо́жныя закала́яй,/ воспева́ем тя, свети́льника, просвети́вшаго вся.

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Я́ко апо́столом сопресто́льна,/ и врача́ предо́бра, и служи́теля благоприя́тна,/ к ра́це твое́й честне́й притека́юще, святи́телю Алекси́е, богому́дре чудотво́рче,/ соше́дшеся любо́вию в па́мять твою́, све́тло пра́зднуем,/ в пе́снех и пе́ниих ра́дующеся и Христа́ сла́вяще,/ такову́ю благода́ть тебе́ дарова́вшаго исцеле́ний/ и гра́ду твоему́ вели́кое утвержде́ние.

Апо́стольских догма́т опа́сна* храни́теля,/ Це́ркве росси́йския па́стыря и учи́теля,/ преблаже́ннаго Алекси́я святи́теля па́мять пра́зднующе,/ славосло́вим Христа́ Бо́га на́шего пе́сньми достодо́лжными,/ дарова́вшаго нам уго́дника Своего́,/ я́ко оби́льный исто́чник точа́щь врачева́ния,/ гра́ду же Москве́ похвалу́ и утвержде́ние.

Я́ко светоно́сная возсия́ днесь па́мять твоя́, сла́вне,/ ве́рных озаря́ющи ду́ши и телеса́, и/ исцеле́ния струи́ Богоприя́тными ти моли́твами источа́еши,/ о́тче святи́телю Алекси́е./ Те́мже тя мо́лим, я́ко архиере́ом сопресто́льна и чудоде́йственника изря́дна:/ и́же Христо́ву престо́лу предстоя́й,/ о нас не оскудева́й моля́ся спасти́ся душа́м на́шим.

Боже́ственнаго и пречестна́го святи́теля Христо́ва,/ но́ваго чудотво́рца Алекси́я,/ ве́рно вси пою́ще, лю́дие, любо́вию да ублажи́м, я́ко па́стыря вели́каго,/ служи́теля же и учи́теля прему́дра земли́ Росси́йстей./ Днесь, в па́мять его́ прите́кше,/ ра́достно возопие́м песнь богоно́сному:/ я́ко име́я дерзнове́ние к Бо́гу,/ многообра́зных нас изба́ви обстоя́ний, да зове́м ти:/ ра́дуйся, утвержде́ние гра́ду на́шему.

Велича́ем тя,/ святи́телю о́тче Алекси́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ми́ра сего́ вре́менная, я́ко преходя́щая уразуме́л еси́,/ от ю́ности по́стническое и многотру́дное житие́ возлюби́л еси́, всеблаже́нне,/ иера́рхов сла́во и преподо́бных похвало́,/ Предве́чнаго Сло́ва усе́рдный благове́стниче,/ си́рых и неиму́щих кро́ве и прибе́жище./ Те́мже в моли́твах пребыва́я, Христу́ у́треневати прилежа́л еси́/ и, сего́ взыску́я, вене́ц неувяда́емый со все́ми святы́ми стяжа́л еси́,/ о́тче наш святи́телю Меле́тие,/ моли́ Христа́ Бо́га спасти́ся душа́м на́шим.

Ревну́я, поревнова́л еси́ к Бо́гу, Его́же возлюби́л еси́/ и Его́же всем се́рдцем возжела́л еси́, о́тче наш Меле́тие,/ и Его́же ра́ди к и́ноческому по́двигу поте́кл еси́/ и закла́тися Христу́ Бо́гу сама́го себе́ приве́л еси́,/ я́ко па́стырь до́брый, вруче́нное тебе́ ста́до ове́ц Христо́вых му́дре упа́сл еси́./ Моли́ о нас Христа́ Бо́га, святи́телю достохва́льне.

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

13/26 Преподобного Мартиниана (V). Преподобного Стефана, в иночестве Симеона, царя Сербского, Мироточивого (1200). Долинской иконы Божией Матери.

Пла́мень искуше́ний слез тече́ньми погаси́л еси́, блаже́нне,/ и, морска́я волне́ния и звере́й стремле́ния обузда́вый, взыва́л еси́:/ препросла́влен еси́, Всеси́льне, огня́ и бу́ри спасы́й мя.

Я́ко подви́жника благоче́стия иску́сна,/ и страда́льца произволе́нием честна́го,/ и пусты́ни жи́теля и все́льника,/ в пе́снех досто́йно восхва́лим Мартиниа́на присночестна́го,/ той бо зми́я попра́.

Ублажа́ем тя,/ преподо́бие о́тче Мартиниа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Боже́ственною благода́тию просвети́вся,/ и по сме́рти показу́еши све́тлость жития́ твоего́,/ источа́еши бо ми́ро благоуха́ния/ притека́ющим к ра́це моще́й твои́х,/ и лю́ди твоя́ наста́вил еси́ к све́ту Богоразу́мия,/ Симео́не о́тче наш,/ Христа́ Бо́га моли́/ дарова́ти нам ве́лию ми́лость.

А́нгельское возлюби́в на земли́ житие́,/ миродержа́ние и мир оста́вив,/ поще́нием Христу́, Симео́не, после́довал еси́,/ к Нему́же, лю́бящих тя апо́стольски наста́вил еси́, вопия́:/ возлюби́те Бо́га, я́коже Он возлюби́л нас.

И́го Христо́во прие́м, Симео́не,/ и, Того́ крест взем, после́довал Ему́/ насажде́н в дому́ Госпо́днем, процвете́, я́ко фи́никс,/ я́коже кедр, и́же в Лива́не, умно́жил еси́ ча́да твоя́,/ муж жела́ний духо́вных, чудотво́рец бо яви́ся,/ Христа́ Бо́га моли́ непреста́нно о всех нас.

Оби́тели Хиланда́рския свяще́нных строи́телей/ и Афо́на свети́льники, Се́рбии похвалу́/ Симео́на велича́йшаго, преподо́бных ле́поту/ и род его́ чу́дный, святи́теля, – глаго́лю, – Са́вву,/ придайте согла́сно почти́м, глаго́ля:/ моли́те Христа́ Бо́га/ о па́стве ва́шей, блаже́ннии,/ и о е́же Це́ркви свобо́дней бы́ти от обстоя́ний.

И́же те́плыя засту́пники в ско́рбех и напа́стех иму́ще,/ Симео́на Богоно́снаго и Са́вву первосвяти́теля,/ припаде́м к ни́ма с ве́рою,/ я́ко да моли́твами их от напа́стей избавля́еми,/ по до́лгу благове́рно Спа́са и Бо́га просла́вим, глаго́люще:/ сла́ва Да́вшему вам кре́пость,/ сла́ва Просла́влыпему вы чудесы́,/ сла́ва Изба́влынему нас от скорбе́й моли́твами ва́шими.

Днесь Симео́н с Са́ввою, блаже́ннии, в ду́се прише́дше,/ спаса́ют от обстоя́ний па́ству их:/ сии́ бо Тро́ицу пропове́даша Еди́наго Бо́га,/ Це́ркве яви́шася утвержде́ние,/ в преподо́бных Мироточи́вый и во святы́х чудотво́рец:/ сии́ бо и во бра́нех необори́мии защи́тницы показа́шася,/ Афо́на похвала́ и наро́да се́рбскаго кре́пость.

Го́рнюю жи́знь возлюби́вше, сла́внии,/ жизнь су́щую на земли́ презре́сте./ Сего́ ра́ди в вы́шних со а́нгелы всегда́ лику́юще,/ моли́те о всех нас.

Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

14/27 Преподобного Авксентия (ок. 470). Равноапостольного Кирилла Философа, учителя Словенского (869). Преподобного Марона, пустынника Сирийского (IV). Преподобного Исаакия, затворника Печерского, в Ближних пещерах почивающего (ок. 1090). 12-ти греков, строителей соборной Успенской церкви Киево-Печерской Лавры (XI). Перенесение мощей благоверного князя Михаила Черниговского и болярина его Феодора (1578).

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Авксе́нтие,/ посто́м, бде́нием, моли́твою Небе́сная дарова́ния прии́м,/ исцеля́вши неду́жныя, и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Наслади́вся, Богому́дре, воздержа́ния,/ и жела́ния пло́ти твоея́ обузда́в,/ яви́лся еси́ ве́рою сия́я,/ я́коже сад посреде́ рая́ процве́л еси́,/ Авксе́нтие о́тче свяще́нне.

Ублажа́ем тя,/ преподо́бне о́тче Авксе́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

От пеле́н приле́жно Прему́дрость сестру́ себе́ сотвори́в, Богогла́се,/ пресве́тлую ви́дев, я́ко деви́цу чи́сту,/ ю́же прие́м, приведе́,/ я́ко мони́сты златы́ми, се́ю укра́сив свою́ ду́шу и ум,/ и обре́теся я́ко други́й Кири́лл, блаже́нне,/ ра́зумом и и́менем, му́дре.

Тве́рдым и Богодухнове́нным уче́нием/ просвеща́я мир пресве́тлыми заря́ми,/ обтече́, я́ко мо́лния вселе́нную, Кири́лле блаже́нне,/ разсева́я пресве́тлое Бо́жие сло́во,/ на за́паде, и на се́вере, и ю́зе, мир просвеща́я чудесы́.

Велича́ем тя,/ равноапо́стольне Кири́лле,/ и чтим боле́зни и труды́ твоя́,/ и́миже труди́лся е́си/ во благове́стии Христо́ве.

Фарисе́йскаго тщесла́вия удаля́лся,/ преподо́бие о́тче наш Ма́роне,/ на го́ру высо́кую возше́л еси́,/ и та́мо побе́ду показа́л еси́ на диа́вола,/ тре́бище бо бесо́вское обре́т и Бо́гу освяти́в,/ в нем пребы́л еси́,/ моли́твами твои́ми огневи́цу и тряса́вицу утоля́я,/ и бе́сы прогоня́я,/ и от разли́чных неду́г свобожда́я./ Того́ ра́ди, свя́те, моли́ся Христу́ Бо́гу,/ да спасе́т ду́ши на́ша.

Я́ко незаходи́мое со́лнце возсия́ нам днесь/ светоза́рными твои́ми моли́твами, преподо́бие о́тче наш Ма́роне,/ и́же не́кия горы́ дости́гл еси́,/ и та́мо на ней живу́щими нечести́выми чтом бысть,/ за превосходя́щую твою́ к Бо́гу доброде́тель,/ и та́мо обре́т тре́бище и́дольское, Бо́гу освяти́в, в нем пребыва́л еси́;/ и ви́дев Человеколю́бец Бог твой по́двиг и труды́,/ дарова́ тебе́ дар Свой,/ и́мже пронесе́ся и́мя твое́ в челове́цех,/ цели́ти ско́рби, огневи́цу и тряса́вицу прибега́ющим к тебе́ с ве́рою./ Те́мже и зове́м:/ ра́дуйся, цели́телю наш ско́рый;/ ра́дуйся, засту́пниче наш те́плый,/ предстои́ши бо у Пресвяты́я Тро́ицы,/ моли́ся Той о призыва́ющих и́мя твое́ свято́е,/ да изба́вимся от сих тя́жких скорбе́й и спасе́т ду́ши на́ша.

Пресве́тлое житие́ твое́, о́тче Ма́роне,/ а́нгелы удиви́ло есть/ и бесо́вская шата́ния я́ве устраши́./ Ве́рных же собра́ния све́тло украси́,/ к Небе́сному Христо́ву жили́щу повелева́я ше́ствовати всегда́./ Его́же моли́ от тли и бед изба́витися,/ ве́рою творя́щим всече́стную па́мять твою́.

Страсте́й пещь, преподо́бне, угаси́л еси́ воздержа́ния росо́ю,/ дарова́нием обогати́лся еси́ исцеле́ний от Бо́га, Ма́роне,/ прия́л еси́ цели́ти ве́рным боле́зни тя́жкия,/ и бесо́в отгони́ти полки́./ Сего́ ра́ди с весе́лием почита́ем тя.

Ублажа́ем тя,/ преподо́бне о́тче Ма́роне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Све́тлости святы́х наслади́тися вожделе́в,/ в те́мную всели́лся еси́ пеще́ру, прехва́льне,/ и до́бре подвиза́лся еси́, Исаа́кие,/ прельще́н же быв от врага́,/ па́ки кре́пко попра́л еси́ того́ вся кова́рства./ И ны́не, я́ко победи́тель,/ в весе́лии предстоя́ Христу́ Бо́гу,/ проси́ нам ми́ра и ве́лия ми́лости.

Вра́жию пре́лесть низложи́вша и в по́стничестве све́тло просия́вша,/ прииди́те, ве́рнии, восхва́лим Исаа́кия победоно́снаго,/ и́же, я́ко зла́то, во искуше́ниих просия́/ и просвеща́ет сердца́ ве́рно к нему́ притека́ющих,/ моля́ся Го́сподеви непреста́нно о душа́х на́ших.

Ублажа́ем тя,/ преподо́бие о́тче Исаа́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преблаже́ннии и Богоно́снии отцы́ на́ши,/ двоенадеся́тице честна́я,/ устрое́нию вели́кия це́ркве Киево-Пече́рския послужи́вший/ и равноа́нгельным житие́м Бо́гу угоди́вший/ и Того́ ра́ди дерзнове́ние ве́лие у Него́ стяжа́вший,/ мо́лим вас приле́жно,/ испроси́те душа́м на́шим очище́ние и ве́лию и бога́тую ми́лость.

Бога́тство благода́ти и сыноположе́ния стяжа́вше/ мно́гими по́двиги и доброде́тельми,/ и́хже ра́ди Христо́с всели́ ду́ши ва́ша в Небе́сная Селе́ния Своя́,/ дарова́в благода́ть нетле́ния и чуде́с моще́м ва́шим./ Сего́ ра́ди вопие́м вам:/ ра́дуйтеся, двоенадеся́тице честна́я,/ вели́кия це́ркве Пече́рския зда́тели*/ и лико́в и́ноческих похвало́ и утвержде́ние.

Велича́ем вас,/ двоенадеся́тице честна́я,/ устрои́тели вели́кия це́ркви Киево-Пече́рския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тро́ичнаго Божества́ осия́нием просвети́вся,/ страстоте́рпче вели́кий кня́же Михаи́ле,/ с прему́дрым боля́рином ти Фео́дором,/ самозва́нна к подвиго́м устреми́стася,/ сквозе́ огнь не ид о́ста,/ кусту́ и и́долом не поклони́стася, но оплева́ста/ и нечести́ваго царя́ обличи́ста,/ Христа́ же Еди́наго от Тро́ицы Бо́га Су́ща испове́даста,/ и Того́ ра́ди крове́й свои́х струя́ми обагри́стася, сла́вная./ Те́мже и венца́ от Него́ побе́дная прия́ста,/ и нас свы́ше назира́ета,/ мо́лим вас, свята́я, моли́те Того́,/ я́ко да ва́шими моли́твами изба́вит нас от вся́ких обстоя́щих ны зол/ и пода́ст нам вся блага́я,/ и́же Един Сый прославля́емый во святы́х Свои́х.

Со́лнца мы́сленнаго пра́веднаго, – Христа́,/ озари́вся сия́нием, пребога́те Михаи́ле,/ ви́димому со́лнцу не поклони́лся еси́/ и тва́ри па́че Творца́ не послужи́л еси́/ и нече́стие обузда́л еси́,/ я́рости царя́ не убоя́вся/ и кро́ве своея́ обагре́нием/ Христо́ви предста́л еси́, ра́дуяся./ И ны́не в пренесе́нии моще́й твои́х/ нас свы́ше назира́й и Христа́ Бо́га моли́,/ мо́лимся, я́ко спасти́ся нам/ и Правосла́вию непоколеби́му пребы́ти,/ Оте́честву на́шему соблюсти́ся во всем/ моли́твами твои́ми, свя́те,/ по вели́цей Его́ ми́лости.

Велича́ем вас,/ страстоте́рпцы святи́и Михаи́ле и Фео́доре,/ и чтим честна́я страда́ния ва́ша,/ я́же за Христа́/ претерпе́ли есте́.

Велича́ем тя,/ благове́рный кня́же Михаи́ле,/ и с боля́рином твои́м Фео́дором,/ и чтим святу́ю па́мять ва́шу,/ и́же за Христа́ кровь свою́ излия́сте,/ и, ны́не моли́те за нас Христа́ Бо́га на́шего.

15/28 Апостола от 70-ти Онисима (ок. 109). Преподобного Пафнутия, затворника Печерского, в Дальних пещерах почивающего (XIII). Виленской (перенесение в Вильно в 1495 году), Далматской (1646) и Венской икон Божией Матери.

Апо́столе святы́й Они́симе,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Я́ко луча́ возсия́л еси́ вселе́нней,/ заря́ми сия́я со́лнца, блаже́нне,/ всесве́тлаго Па́вла, мир просвети́вшаго;/ те́мже тя почита́ем, Они́симе сла́вне.

Велича́ем тя,/ апо́столе Христо́в Они́симе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче Пафну́тие, ра́довался еси́,/ огне́м бо любве́ Боже́ственныя распаля́ем,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́,/ того́ моли́твами, Христе́ Бо́же, спаси́ ду́ши на́ша.

Кондак, глас 8

Помышля́я исхо́д души́ твоея́/ и пра́ведное мздовоздая́ние по дело́м,/ непреста́нными слеза́ми умоли́л еси́ Го́спода/ дарова́ти тебе́ неизрече́нных ра́достей насле́дие,/ я́же уже́ со святы́ми предвкуша́я, Пафну́тие преподо́бне,/ помина́й и нас пред Бо́гом чту́щих тя.

Ублажа́ем тя,/ преподо́бне о́тче Пафну́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

16/1 45 Мучеников Памфила пресвитера и иже с ним (307–309). Кипрской иконы Божией Матери.

Му́ченицы Твои́, Го́споди... (общий мученикам).

Муче́нием стра́шным предлежа́щим,/ Госпо́дни страда́льцы до́блии,/ в небоя́зненном ра́дующеся мудрова́нии,/ сим собесе́доваша, о пло́ти неради́вше./ Те́мже насле́дствоваша ве́чнующую сла́ву,/ о нас моля́щеся при́сно, восхваля́ющих их по́двиги.

Велича́ем вас,/ страстоте́рпцы святи́и Памфи́ле со пострада́вшими,/ и чтим честна́я страда́ния ва́ша,/ я́же за Христа́ претерпе́ли есте́.

17/2 Великомученика Феодора Тирона (ок. 306) Священномученика Ермогена, патриарха Московского и всея России, чудотворца (1612).

Ве́лия ве́ры исправле́ния*,/ во исто́чнице пла́мене, я́ко на воде́ упокое́ния,/ святы́й му́ченик Фео́дор ра́довашеся,/ огне́м бо всесожже́гся,/ я́ко хлеб сла́дкий Тро́ице принесе́ся./ Того́ моли́твами, Христе́ Бо́же, спаси́ ду́ши на́ша.

Ве́ру Христо́ву я́ко щит внутрь прии́м в се́рдце твое́м,/ проти́вныя си́лы попра́л еси́, многострада́льче,/ и венце́м Небе́сным венча́лся еси́ ве́чно, Фео́доре,/ я́ко непобеди́мый.

Велича́ем тя,/ страстоте́рпче святы́й Фео́доре,/ и чтим честна́я страда́ния твоя́,/ я́же за Христа́/ претерпе́л еси́.

Росси́йския земли́ первопресто́льниче,/ и неусы́пный о ней к Бо́гу моли́твенниче!/ За ве́ру Христо́ву и па́ству твою́ ду́шу свою́ положи́в,/ держа́ву на́шу утверди́л еси́ и страну́ на́шу от нече́стия изба́вил еси́./ Те́мже вопие́м ти:/ спаса́й нас моли́твами твои́ми,/ священному́чениче Ермоге́не, о́тче наш.

Приспе́ день све́тлаго торжества́,/ град Москва́ ра́дуется,/ и с ним Русь Правосла́вная ликовству́ет/ пе́сньми и пе́ньми духо́вными:/ днесь бо свяще́нное торжество́/ в явле́нии честны́х и многоцеле́бных моще́й/ святи́теля и чудотво́рца Ермоге́на,/ я́коже со́лнце незаходи́мое возсия́ светоза́рными луча́ми,/ разгоня́я тьму искуше́ний же и бед/ от вопию́щих ве́рно:/ спаса́й нас, я́ко предста́тель наш, вели́кий Ермоге́не.

Темни́цею и гла́дом изнуря́ем,/ да́же до сме́рти ве́рен пребы́л еси́, блаже́нне Ермоге́не,/ малоду́шие от серде́ц люде́й твои́х изгоня́я/ и на о́бщий по́двиг вся призыва́я./ Те́мже и нечести́вых мяте́ж низложи́л еси́ и держа́ву на́шу утверди́л еси́,/ да вси зове́м ти:/ ра́дуйся, засту́пниче Росси́йския земли́.

Велича́ем тя,/ священному́чениче Ермоге́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

18/3 Святителя Льва, папы Римского (461). Преподобного Космы Яхромского (1492).

Правосла́вия наста́вниче... (общий).

На престо́ле, сла́вне, свяще́нства сед/ и львов уста́ слове́сных загради́в,/ догма́ты Богодухнове́нными Честны́я Тро́ицы озари́л еси́ свет Богоразу́мия твоему́ стаду́/ Сего́ ра́ди просла́вился еси́,/ я́ко Боже́ственный таи́нник Бо́жия благода́ти.

Велича́ем тя,/ святи́телю о́тче Льве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Го́рняго жела́я преми́рнаго жития́,/ до́льная возненави́дел еси́,/ и взем крест, после́довал еси́ Христу́/ и в пусты́ню всели́лся еси́, досточу́дне,/ и в ней подвиза́лся еси́ в пе́ниих, и бде́ниих, и поще́ниих./ Сего́ ра́ди в тя всели́ся Пресвяты́й Дух./ Те́мже, я́ко име́я дерзнове́ние ко Христу́ Бо́гу,/ испроси́ лю́дем правосла́вным здра́вие и спасе́ние,/ и не забу́ди посеща́я чад твои́х,/ соверша́ющих свяще́нную па́мять твою́,/ Космо́ преподо́бне, о́тче наш.

Душе́вныя стра́сти из ко́рене исторгая,/ в пусты́ню всели́лся еси́, преподо́бне,/ и неболе́зненную жизнь в боле́знех восприя́л еси́,/ боле́знем же лю́тым уставля́еши озлобле́ния* прося́щим у тебе́ с ве́рою./ Те́мже разреши́ боле́зни на́ша душе́вныя и теле́сныя, да зове́м ти:/ ра́дуйся, Космо́ Богому́дре.

Ублажа́ем тя,/ преподо́бне о́тче Космо́,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

19/4 Апостолов от 70-ти Архиппа и Филимона и мученицы равноапостольной Апфии (I).

Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст душа́м на́шим.

Учени́че Па́влов и апо́столе Христо́в, Архи́ппе,/ Ева́нгелия провозве́стниче и Колосса́ев учи́телю,/ ка́менное побие́ние прие́мый,/ а́ки драгоце́нное украше́ние,/ и́мже вене́ц муче́ния украси́в, вшел еси́ на весе́лие Ца́рствия,/ иде́же помяни́ нас, пою́щих твою́ па́мять,/ апо́столов сопресто́льниче.

Я́ко звезду́ вели́кую тя Це́рковь иму́щи, Архи́ппе,/ чуде́с твои́х луча́ми просвеща́ема, зове́т тебе́:/ спаси́ ве́рою почита́ющия па́мять твою́.

Велича́ем вас,/ святи́и апо́столи Филимо́не и Архи́ппе,/ со равноапо́стольной Апфи́ей,/ весь мир уче́ньми свои́ми просвети́вшия/ и вся концы́ ко Христу́ приво́дшия.

20/5 Преподобного Льва, епископа Катанского (ок. 780). Преподобномученика Корнилия Псково-Печерского (1570). Преподобного Агафона Печерского, в Дальних пещерах почивающего (XIII-XIV). Священномученика Садока, епископа Персидского (342–344).

Пра́вило ве́ры, и о́браз кро́тости... (общий святителю).

Я́коже свети́льника превели́ка Це́рковь и́мать, всеблаже́нне/, тебе́ па́че со́лнца сия́юща,/ ю́же твои́ми моли́твами сохрани́, блаже́нне,/ непобеди́му и непоколеби́му от е́реси вся́кия, и нескве́рну,/ я́ко приснопа́мятный.

Велича́ем тя,/ святи́телю о́тче Льве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Пско́во-Пече́рская оби́тель,/ издре́вле сла́вная чудесы́ ико́ны Богома́терни,/ мно́гия и́ноки Бо́гови воспита́,/ та́мо и преподо́бный Корни́лий/ по́двигом до́брым подвиза́ся,/ чу́дную Богома́терь сла́вя,/ инове́рныя просвеща́я,/ и́ноки и мно́гия лю́ди спаса́я,/ оби́тель же свою́ ди́вно украша́я и огражда́я./ Та́мо и му́ченичества вене́ц,/ по мно́гих лета́х па́стырства своего́, до́блестне прия́т./ Те́мже воспои́м, лю́дие,/ Христа́ Бо́га, и Пречи́стую Его́ Ма́терь возблагодари́м,/ я́ко дарова́ нам преподобному́ченика сла́вна/ и моли́твенника о душа́х на́ших достоблаже́нна.

Све́тлый свети́льник Правосла́вия/ и сугу́бая Пско́вския земли́ защи́та был еси́,/ многобо́жие искореня́я и лю́ди к Бо́гу наставля́я./Дом Богома́тери тобо́ю укрепи́ся и просла́вися,/доброде́тельми же укра́шен, вене́ц му́ченика прия́л еси́,/ помина́й нас, чад твои́х, и у Го́спода, преподобному́чениче Корни́лие.

Измла́да, Корни́лие чу́дный,/ трудо́м и по́двигом себе́ преда́в,/ игу́меном Псково-Пече́рстей оби́тели поста́влен был еси́,/ о́бразом ве́ры и по́стническаго жития́ всем быв,/ мно́гия лю́ди к Бо́гу приве́л еси́./ За своя́ же вели́кия доброде́тели/ за́вистию от злых гони́м,/ му́ченически ду́шу свою́ Бо́гови преда́л еси́./ Того́ ра́ди с ве́рою возопии́м:/ преподобному́чениче Корни́лие достосла́вный,/ моли́ Христа́ Бо́га спасти́ся душа́м на́шим.

Ублажа́ем тя,/ преподобному́чениче Корни́лие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Бла́га Небе́сная ра́ди дел твои́х стяжа́вый,/ бла́гости тезоимени́те, Агафо́не,/ моли́ Блага́го Го́спода, мо́лим тя те́пле,/ я́ко да не лиши́т нас ве́чных благ Свои́х.

Ве́дый изве́стно, я́ко сне́дию род челове́ч испа́де из рая́,/ посто́м же па́ки вни́де в онь,/ по́стное избра́л еси́ себе́ житие́,/ в не́мже кре́пце подвиза́лся, блаже́нне Агафо́не,/ и бесо́вская шата́ния тем низлага́я,/ прия́л еси́ целе́бныя да́ры от Христа́ Бо́га,/ Ему́же при́сно моли́ся о душа́х на́ших.

Ублажа́ем тя,/ преподо́бне о́тче Агафо́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

И нра́вом прича́стник,/ И престо́лом наме́стник... (общий священномученику).

Влады́чню рече́нию усе́рдно в подо́бстве после́дова,/ я́ко у́бо па́стырь до́брый ду́шу свою́ за Христо́вы о́вцы положи́л еси́,/ священному́чениче Садо́фе, мо́лим тя, многострада́льне,/ моли́ па́стырем Нача́льника Христа́/ и нас причести́ десна́го ове́ц стоя́ния,/ да воспое́м ти:/ ра́дуйся, свяще́нный о́тче Садо́фе,/ и́же за Христа́ кровь свою́ излия́вый.

Велича́ем тя,/ священному́чениче Садо́фе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

21/6 Преподобного Тимофея в Символех (795), и святителя Евстафия, архиепископа Антиохййского (337). Козелыцанской иконы Божией Матери (1881).

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Я́ко звезда́ многосве́тлая/ от восто́ка возсия́в,/ озари́л еси́ в сердца́х ве́рных/ доброде́тели чуде́с твои́х,/ чудоно́сче всеблаже́нне Тимофе́е.

Велича́ем вас,/ святи́и отцы́ Тимофе́е и Евста́фие,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Весели́ся земле́ Полта́вская/ и все Оте́чество на́ше правосла́вное:/ се бо, я́ко светоза́рное со́лнце,/ яви́ся пречу́дная ико́на Твоя́, Преблагослове́нная Богома́ти,/ мир озаря́ющи мно́жеством чуде́с Твои́х,/ те́ми у́бо обрета́ем, я́же на земли́, вся блага́я и поле́зная,/ и су́щих, я́же на Небеси́, сокро́вищ сподобля́емся./ Сего́ ра́ди вопие́м Ти:/ ра́дуйся Похвало́ на́ша, приснопокланя́емая,/ спаси́ ны, моля́щияся Тебе́,/ еди́ная Наде́ждо и Ра́дование ве́чное пою́щих Тя.

Боголе́пно во смире́нии красу́ется оби́тель Красного́рская,/ осеня́емая и спаса́емая преди́вным о́бразом Влады́чицы Пречи́стыя,/ Небесе́ и земли́ Цари́цы Богоро́дицы,/ от него́же исто́чники благода́ти и ча́ша чуде́с оби́льно излива́ются,/ и усе́рдно притека́ющий исцеле́ния ве́рою прие́млют,/ и неве́рнии ве́рою кре́пкою сердца́ исполня́ют,/ и мы раби́ Твои́, Богома́ти, благода́рне вопие́м Ти:/ ра́дуйся, Предста́тельство христиа́н непосты́дное и оби́тели Твоея́ красото́ и ра́дование.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Велича́ем Тя,/ Пресвята́я Де́во,/ и почита́ем светоно́сный о́браз Твой,/ его́же во утвержде́ние оби́тели сея́ положи́ла еси́,/ да пребу́дет непрекло́нна в век ве́ка от смяте́ния ересе́й.

22/7 Обретение мощей мучеников, иже во Евгении (395–423).

Му́ченицы Твои́, Го́споди,/ во страда́ниих свои́х... (общий мученикам).

От земли́ возсия́вше, я́ко свети́ла пра́вды,/ нече́стия всю отрази́сте мглу,/ и ве́рных просвеща́ете,/ му́ченицы Боже́ственнии,/ Тро́ицы побо́рницы.

Кре́пцыи ве́ры столпи́, добропобе́днии му́ченицы,/ за Христа́ подъе́мше разли́чныя му́ки/ и на ле́та мно́га сокрове́ни бы́сте,/ и ны́не яви́стеся, я́ко многоце́нное бога́тство,/ и в це́рковь Бо́жию че́стно носи́ми архиере́я Бо́жия дла́ньми,/ прося́щим раздава́ете, е́же на по́льзу./ Тем моли́теся о душа́х на́ших.

Велича́ем вас,/ страстоте́рпцы святи́и иже во Евге́нии,/ и чтим честна́я страда́ния ва́ша,/ я́же за Христа́/ претерпе́ли есте́.

23/8 Священномученика Поликарпа, епископа Смирнского (167). Преподобного Поликарпа Брянского (1620–1621). Сокольской иконы Божией Матери (1737).

И нра́вом Прича́стник,/ И Престо́лом наме́стник... (общий священномученику).

Плоды́ слове́сныя Го́сподеви принося́, Полика́рпе му́дре, доброде́телей же́ртвы,/ те́мже и от Бо́га досто́ин иера́рх просла́вился еси́./ Сего́ ра́ди днесь просве́щшеся твои́ми словесы́,/ воспева́ем твою́ достохва́льную па́мять, сла́вяще Го́спода.

Велича́ем тя,/ священному́чениче Полика́рпе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ветри́лом креста́ душе́вный кора́бль окорми́в,/ жите́йская кра́сная оста́вил еси́,/ и от мирска́го мяте́жа изше́д,/ плотски́я по́хоти воздержа́нием мно́гим, о́тче, умертви́л еси́,/ поще́нием и слеза́ми, моли́твами и пе́сньми непреста́нно прилепля́яся Бо́гу./ Те́мже и жили́ще досто́йно Ду́ха Пресвята́го показа́лся еси́./ Моли́, Полика́рпе преподо́бне, Христа́ Бо́га/ оставле́ние прегреше́ний дарова́ти нам и ве́лию ми́лость.

Я́коже оте́ц духо́вно, князь чу́вственно,/ лю́дем росси́йским яви́лся еси́, преподо́бне Полика́рпе,/ мудрова́ние бо и сла́ву мирску́ю презре́в,/ боже́ственным житие́м после́довал еси́,/ мона́хом же был тве́рдое укрепле́ние и свети́льник све́тел./ Те́мже похваля́юще честну́ю па́мять твою́, зове́м ти:/ моли́ Христа́ Бо́га спасти́ и просвети́ти ду́ши на́ша.

Ублажа́ем тя,/ преподо́бне о́тче Полика́рпе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

24/9 Первое (IV) и второе (452) обретение главы Иоанна Предтечи. Преподобного Еразма Печерского, в Ближних пещерах почивающего (ок. 1160).

От земли́ возсия́вши Предте́чева глава́,/ лучи́ испуща́ет нетле́ния, ве́рным исцеле́ний,/ свы́ше собира́ет мно́жество а́нгел,/ до́ле же созыва́ет челове́ческий род,/ единогла́сную возсыла́ти сла́ву Христу́ Бо́гу.

Проро́че Бо́жий и Предте́че благода́ти,/ главу́ твою́,я́ко́ шипо́к свяще́ннейший,/ от земли́ обре́тше,/ исцеле́ния всегда́ прие́млем,/ и́бо па́ки, я́коже пре́жде в ми́ре пропове́дуеши покая́ние.

Велича́ем тя,/ Крести́телю Спа́сов Иоа́нне,/ и почита́ем вси честны́я твоея́ главы́ обре́тение.

Святы́й вели́кий Иоа́нне Предте́че Госпо́день,/ моли́ Бо́га о нас.

Благоле́пие до́му Госпо́дня любя́,/ расточи́л еси́ неща́дно име́ние твое́ во украше́ние того́,/ преподо́бне Ера́зме,/ тем ны́не живя́ в дому́ Госпо́дни на Небеси́,/ моли́ и нам освяти́тися в жили́ще Госпо́дне.

Украси́вый це́рковь Богома́тере/ расточе́нием име́ния ти на сие́ ико́нами, Ера́зме сла́вне,/ себе́ же о том нераска́янием;/ пода́ждь и нам расточе́нием грехо́в свои́х/ и покая́ния лепото́ю* украси́вшимся/ це́рковию све́тлою Ду́хови Свято́му яви́тися.

Ублажа́ем тя,/ преподо́бне о́тче Ера́зме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

25/10 Святителя Тарасия, архиепископа Константинопольского (806).

Пра́вило ве́ры, и о́браз кро́тости... (общий святителю).

Правосла́вными догма́ты Це́рковь уясни́в/ и Христо́ву, блаже́нне, честну́ю ико́ну почита́ти/ и покланя́тися всех научи́в,/ обличи́л еси́ иконобо́рцев безбо́жное веле́ние./ Сего́ ра́ди вопие́м ти:/ о, о́тче, ра́дуйся, му́дре Тара́сие.

Велича́ем тя,/ святи́телю о́тче Тара́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

26/11 Святителя Порфирия, архиепископа Газского (420). Преподобного Севастиана Пошехонского (ок. 1500). Межетской иконы Божией Матери (1492).

Пра́вило ве́ры, и о́браз кро́тости... (общий святителю).

Труды́ и боле́зни твоя́, я́же по благоче́стию,/ кто испове́сть, о́тче?/ день бо и нощь не преста́л еси́ трудя́ся,/ до́ндеже* от нече́стия* Га́зу очи́стив, благоче́стие насади́л еси́,/ тем я́ко всегда́ еси́ предста́тель о ста́де твое́м,/ та́ко, свя́те Порфи́рие,/ моли́ Христа́ Бо́га да спасе́т ду́ши на́ша.

Свяще́ннейшими твои́ми нра́вы украша́емь,/ свяще́нства оде́ждею озари́лся еси́,/ всеблаже́нне Богому́дре Порфи́рие,/ и исцеле́ний удобря́еши возвыше́ньми,/ моля́ся непреста́нно о всех нас.

Велича́ем тя,/ святи́телю о́тче Порфи́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Удали́вся ми́ра и водвори́вся в пусты́ни,/ до́брым по́двигом подвиза́ся,/ злострада́нием и внима́нием, и моли́твами,/ отню́дуже и по сме́рти источа́еши исцеле́ния,/ Севастиа́не о́тче наш,/ моли́ Христа́ Бо́га/ спасти́ся душа́м на́шим.

Сия́нием Ду́ха Пресвята́го, му́дре Севастиа́не, просве́щся,/ оста́вил еси́ я́же в житии́ молвы́,/ пусты́ню же дости́гл еси́, преподо́бне о́тче,/ возвесели́л еси́ и́же над все́ми Бо́га и Зижди́теля./ Сего́ ра́ди прославля́ет тя Христо́с, блаже́нне, Вели́кий Дарода́тель.

Ублажа́ем тя,/ преподо́бне о́тче Севастиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

27/12 Преподобного Прокопия Декаполита, исповедника (ок. 750). Преподобного Тита, пресвитера Печерского, в Ближних пещерах почивающего (1190). Преподобного Тита Печерского, бывшего воина, в Дальних пещерах почивающего (XIV).

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Проко́пие о́тче наш./ Моли́ Христа́ Бо́га спасти́ся душа́м на́шим.

Денни́цу днесь Це́рковь иму́щи,/ вся́кую злосла́вия мглу разгоня́ет,/ почита́ющи тя, Небеснотаи́нниче, Проко́пие пресла́вне.

Ублажа́ем тя,/ преподо́бне о́тче Проко́пие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Братолю́бие тя живу́ща ви́дев любве́ ненави́стник,/ победи́л тя во гнев,/ но, ве́дый твоя́ пре́жния труды́ лю́бве исто́чник Госпо́дь,/ преложи́ тя па́ки на братолю́бие,/ в не́мже ты про́чее пожи́в Богоуго́дне,/ моли́ся о нас, я́ко да поживе́м братолю́бие.

Смире́нию Госпо́дню подо́бяся,/ смири́лся еси́, свяще́нник сый пред лице́м го́рдаго диа́кона Ева́грия,/ беззло́бие Ти́те,/ за что прия́л еси́ не то́кмо вре́менныя жи́зни неотпа́дение,/ а́нгелу тя воздви́гшу,/ но и ве́чныя наслажде́ние,/ в не́йже лику́я, избавля́й нас лю́таго гне́ва и памятозло́бия.

Ублажа́ем тя,/ преподо́бне о́тче Ти́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Во́инство тле́нное оста́вль,/ в нетле́нном ввоени́лся еси́ Христо́ви,/ и ору́жием Его́ кре́стным победи́в подзе́мных эфио́пов,/ побе́ды вене́ц от Христа́, Ти́те, сла́вно прия́л еси́,/ Ему́же моли́ся дарова́ти нам мир и ве́лию ми́лость.

Во́ина Христо́ва хра́браго,/ щито́м преподо́бия обло́жшагося/ и во́ев неви́димых кре́пко победи́вша,/ прииди́те, ве́рнии, восхвали́м/ Ти́та крепкоду́шнаго и возопии́м:/ прииди́, свя́те, к нам и никто́же озлоби́т ны.

Ублажа́ем тя,/ преподо́бне о́тче Ти́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

28/13 Преподобного Василия исповедника (750). Блаженного Николая, Христа ради юродивого, Псковского (1576). Преподобного Кассиана Римлянина (435) (память переносится с 29 февраля). Преподобного Мелетия, архиепископа Харьковского и Ахтырского (1840). Девпетерувской (1392), Девпетерувской Тамбовской (1833) икон Божией Матери (празднование переносится с 29 февраля).

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Васи́лие,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя, и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

С высоты́ прии́м Боже́ственное Открове́ние,/ изше́л еси́, му́дре, от среды́ молв/ и, мона́шествовав преподо́бно,/ чуде́с прия́л еси́ де́йство,/ и неду́ги исцеля́ти благода́тию,/ Васи́лие всеблаже́нне, свяще́ннейший.

Ублажа́ем тя,/ преподо́бне о́тче Васи́лие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Слове́нска язы́ка, Пско́вския земли́/ пло́тски в юро́дстве быв,/ юро́дства притворе́нием Го́рняго Иерусали́ма граждани́н яви́ся,/ а́нгелом свесели́шися,/ мироточи́ваго святи́теля Никола́я зва́ние восприи́м,/ с ни́мже всегда́ Христа́ Бо́га моли́/ дарова́ти нам ве́лию ми́лость.

Чудотво́рец яви́ся, Никола́е,/ ца́рску держа́ву и смы́сла свире́пства на ми́лость обрати́в,/ и сего́ ра́ди своему́ оте́честву тепл моле́бник показа́ся/ и ны́не мо́лим тя, свя́те,/ пребу́ди в нас еще́, защити́ от кова́рств вра́жиих,/ ты бо еси́ гра́ду Пско́ву и всем Христолюби́вым лю́дем похвала́ и утвержде́ние.

Ублажа́ем тя,/ святы́й пра́ведный Никола́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ми́ра сего́ вре́менная, я́ко преходя́щая уразуме́л еси́,/ от ю́ности по́стническое и многотру́дное житие́ возлюби́л еси́, всеблаже́нне,/ иера́рхов сла́во и преподо́бных похвало́,/ Предве́чнаго Сло́ва усе́рдный благове́стниче,/ си́рых и неиму́щих кро́ве и прибе́жище./ Те́мже в моли́твах пребыва́я, Христу́ у́треневати прилежа́л еси/ и, Сего́ взыску́я, вене́ц неувяда́емый со все́ми святы́ми стяжа́л еси́,/ о́тче наш, святи́телю Меле́тие,/ моли́ Христа́ Бо́га спасти́ся душа́м на́шим.

Ревну́я, поревнова́л еси́ к Бо́гу, Его́же возлюби́л еси́/ и Его́же всем се́рдцем возжела́л еси́, о́тче наш Меле́тие,/ и Его́же ра́ди к и́ноческому по́двигу поте́кл еси́/ и закла́тися Христу́ Бо́гу сама́го себе́ приве́л еси́,/ я́ко па́стырь до́брый вруче́нное тебе́ ста́до ове́ц Христо́вых му́дре упа́сл еси́./ Моли́ о нас Христа́ Бо́га, святи́телю достохва́льне.

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Посто́м предочи́стився, прему́дрости пости́гл еси́ разуме́ние,/ от пусты́нных же Богоно́сных оте́ц научи́лся еси́ страсте́й обузда́нию./ Того́ ра́ди пода́ждь нам, твои́ми моли́твами,/ пло́ти на́шея ду́ху послуша́ние,/ еси́ бо наста́вник, Кассиа́не преподо́бне,/ всем пою́щим о Христе́ твою́ па́мять.

Преподо́бен был, Богу возложи́лся еси́/ и, просвеща́я до́брыми ви́ды, Кассиа́не,/ я́ко со́лнце облиста́л еси́/ сия́нием боже́ственных твои́х уче́ний,/ сердца́ всех чту́щих тя всегда́ просвеща́я./ Но приле́жно моли́ Христа́/ о и́же любо́вию те́пле восхваля́ющих тя.

Ублажа́ем тя,/ преподо́бне о́тче Кассиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.