Славянская книга Еноха (Книга тайн Еноха)

ОТ ПОТАЕННЫХ КЬНИГЪ О ВСХИЩЕНИИ ЕНОХОВЕ ПРАВЕДНАГО

О Господи, благослови, Владыко!

Мужа мудраго, книжника великаго, егоже приа Господь видите любите вышняго житиа, и премудраго и великаго непременнаго и Вседръжителева цесарства Божиа, — превеликаго, многоочитаго и неподвижимаго престола Господня, пресветлаго стоаниа слуго Господень и степень дръжавенъ, огнь роденъ, вои небесными нескажема сложениа, многа множества стихий и различна видениа, и неповедаемаа пениа херувимских вой, света безмерна видецъ быти.

И во время оно рече Енохъ: "Егда наполни ми ся 365, въ месяць пръвыи, в нарочитыи день месяца 1-го,^{1} бех в дому моемъ единъ, плача ся и скорбя ся очима моима. Егда почивах на одре моемъ, спах, явиста ми ся два мужа велика зело, якоже их не видех николиже на земли: лице их яко солнце светя ся, очи их яко свещи горяста, изо устъ ею яко огнь исходя, и одеаниа ею пению раздаанию,^{2} и руце ею яко криле злате,^{3} — у главы одра моего и възваста именемъ моимъ.

Аз же ускорих и встах, и прклоних ся има, и блеща ся привидениемъ лице мое от страха.^{4} И ркоста ко мне мужа: “Дръзай, Еноше, не бой ся,^{5} Господь вечный посла ны к тобе, и се ты днесь въсходиши с нами на небо. И ты глаголи сыномъ своим все, елико створят на земли и о дому твоемъ, да никтоже тебе да не ищетъ, дондеже възвратит тя Господь к нимъ”.

И послушавъ их, и идох, и позвах сыны своа Мефусалома и Ригима,^{6} и поведах има, елико ркоста ми мужа: “И се вемъ, чаде, не веде камо гряду или что срящет мя. И ныне, чада мои, не отступайте от Бога, и пред лицемъ Господнимъ ходите,^{7} и судьбы его схраните,^{8} и не отвратите жрътвы спасениа вашего — и не отвратитъ Господь труда рукъ ваших; не лишайте даровъ Господа — не лишит Господь снискании своих и во хранилницах ваших.^{9} Благословите Господа пръвенци стадными нуты вашими — и будете благословени Господеви въ веки. Не отступайте от Господа, ни поклоните ся богомъ пустошным, иже не сотвориша ни небеси, ни земли.^{10} Увери Господь сердца ваша въ страх свои!^{11} И ныне, чада моя, никтоже мене не взыскай, донележе мя Господь обратитъ к вамъ”.

И быхъ, егда глаголах сыномъ своимъ, възваста мя мужа и взяста мя на криле свои.