Избранные сочинения

Радости сердце мое исполнися,

яко предстати тебѣ приключися,

Богом нам даный православный царю,

России всея вѣрный гасподарю!

5 Яко бо солнце весь мир просвѣщает,

сице во сердцах радость проникает

От лица царска. Тѣмже припадаем

к стопам ти, яже лобзати желаем.

Лобзаем вѣрно крѣпку ти десницу,

10 юже имамы за свѣтлу денницу,

Царю восточный, царю стран премногих,

нас избавивый от противник многих.

Прогнавы мрачны з Руси еретики,

будиж в побѣдах преславен во вѣки!

15 Царствуй над всѣми вселенныя страны,

из язык мрачных твори христианы.

Разшири вѣру, свѣт омрачным буди,

иже во смертнѣй сѣни гибнут люди.

Настави на путь заблуждших ко аду,

20 даждь обижденным щедрую отраду.

Дабы им с нами сице воспѣвати:

много лѣт царю дай бог царствовати!

Кто не весело в солнце возглядает,

егда от него просвѣщен бывает!

25 Из красны весны кто не веселится,

в ню же благ всяких много исполнится!

Солнце твое нам зрится лице быти,

пресвѣтлый царю! В твоем свѣтѣ жити

Всегда желаем; в твоей благодати

30 скуднии будут изобиловати.

Як в веснѣ красной. Тѣмже веселуем,

егда прекрѣпку десницу цѣлуем.

Ей же от бога молим быти данным

в державу вѣчну всѣм скипетром странным.

35 День есть веселый, день превожделенны,

вонь же предстати тебѣ сподобленны

Мы, твои раби, и десну лобзати,

веселым сердцем сице цѣловати:

Царствуй, пресилен, преславен повсюду,

40 гдѣ солнца запад и встает откуду!

Подай ти господь во мирѣ сияти,

второму солнцу, всѣми обладати,

Дабы тобою мрака избѣжати

всим родом земли и вѣру познати.

45 Буди Константин и Владимир миру,

сотри кумира и прослави вѣру.

Подай ти господь миром обладати,

а в вѣк будущий в небѣ царствовати.

Уста вѣтийска глагола лишатся,

50 радости нашей егда присмотрятся,

Юже с твоего лица изчерпаем,

яко тя здрава, крѣпка соглядаем.

Пресвѣтлый царю и непреборимый,

в кончинах земли ужасна славимый,

55 Кто свѣтла солнца не видѣ на небѣ,

сей не зна славы, яже есть о тебѣ;

Земля и море, аер исполнь ея,

буди ж и в небѣ глас славы твоея.

Коль чысло много звѣзд пресвѣтлых в небѣ,

60 вся солнца свѣтом украшают себе;

Сице на земли всея Русси грады

чрез тя сияют, приемлют отрады.

Без тебе тма есть, як в мирѣ без солнца,

свѣти ж нам всегда и будь оборонца

65 От всѣх противник, иже поношаху

благочестивым и зѣло стужаху.

Буди милосерд к державным ти градом,

яко обыче отец своим чадом.

А мы вси молим превѣчнаго бога,

70 да даст ти в мирѣ лѣта жити многа.

Мойсий иногда на гору высоку

возшед бѣ с творцем миру прешироку

Бесѣдова с ним, потом же оттуду

75 повращен, лучми сияя повсюду.

Мы твоей воли царстей послушливы

здѣ притекохом, чаем, яко и мы

Лучми твоея будем благодати

возвратившеся изрядно сияти.

Прочиим дабы по нас ревновати,

80 под твою милость всегда прибѣгати,

Ея же ради милость ти от бога,

молим, да дасться на лѣта премнога.

Солнце на землю не само дѣйствует,

но и луна с ним много изводствует.

85 Ты, царю, солнце, а луна Мария

царица. Ея лучами Россия

Премного свѣтла и в нуждах охладу,

во скорбѣх скору приемлет отраду.

Ея молбами и труды по бозѣ

90 царство и грады состоят премнози.

Оныя щедрость бога преклоняет,

да всѣм милостив и прещедр бывает.

Тѣмже пред нею главы преклоняем,

на многа лѣта сияти желаем.

95 Небом Россию нарещи дерзаю,

ибо планиты в онѣй обрѣтаю.

Ты — солнце; луна — Мария царица;

Алексий свѣтла царевичь денница,

Его же зари пресвѣтло блистают,

100 его бо щастем врази упадают;

На имя его вси трепещут страхом,

бѣжат от славы, яко уповахом,

А щастѣ ему имать работати,

многия страны в область подавати,

105 Дабы яко солнце денница свѣтила,

славою концы земли исполнила.

Утро денница обыче сияти,

о дни будущем благовѣствовати.

Вомалѣ даст бог день пресвѣтлый будет,

110 егда денницы свѣтлости прибудет

В многих побѣдах на вси страны свѣта,

точию дай бог многа ему лѣта.

Зѣло Россия в свѣтила богата,

як звѣздами небо; сице в ней полата

115 Царска сияет царевен лѣпотами,

звѣздам подобных всими добротами.

Спросить бы солнца, аще видѣ ровну,

яко Ирину в Руси Михайловну;

Ей подражает благородна Анна,

120 в единых стопах с нею Татианна,

Царя Михайла дщи Федоровича,

царств многих и князств истинна дѣдича.

Что Евдокиа з Марфою сестрою

есть в руском свѣтѣ, аще не звѣздою!

125 Равнѣ Софиа имать возсияти,

Екатерина також з благодати

Дателя всѣх благ. Твоя дщери, царю,

возраст приемше по вышняго дару.

И нова свѣтлость новонарожденна

130 просвѣтит сей мир Мария царевна.

Вси бо суть свѣт нам. Тѣмже молим бога,

да соблюдет я на лѣта премнога.

Еще свѣтила и аз усмотряю,

в них же солнечну силу обрѣтаю.

135 Князи, боляре не мрачно сияют,

егда ти царску волю исполняют.

А зари свѣтлы в онѣх суть тобою,

яко же солнцем в звѣздах со луною.

К тому не мала суть свѣтила власти,

140 иже о твоем молѣбствуют щасти.

Да побѣдитель будешь всего мира

и да исполнит мир тобою вѣра.

Всим того дѣля сердцы привѣтствуем,

на многа лѣта жити усердствуем.

145 Ничто во мирѣ лучше, яко глава

крѣпкаго тѣла, егда умна, здрава:

Вся тамо чинна бывают строенна,

идѣже глава умом есть бодрственна.

Велие тѣло славная Россия,

150 ты еси глава, царю велий, сия;

Глава же честным каменем вѣнчанна,

волею бога на царства созданна.

Тобою тѣло царства окормися,

умом и храбрством въсюду прославися.

155 Блаженный град сей, царство все блаженно,

яко тобою зѣло укрѣпленно.

Удобнѣй да есть солнце сострѣляти,

нежели град сей богом храним взяти

Богопротивным: кто любо на тебе,

160 прекрѣпка царя, вооружит себе!

Бог есть с тобою, с ним буди царь свѣта;

царствуй над людми, им же многа лѣта.

Да благословит тя господь от Сиона

на высокочестнѣм мѣсте царя фрона,

Да благоволит же вѣнчанную главу

40 на премнога лѣта соблюдати здраву

И да не престанет на ню изливати

по вся дни своея даров благодати.

Яже содержит божия десница

благая людем, всѣх тебѣ царица

45 И мати твоя усердно желает,

молбы о тебѣ к богу возсылает.

Да царствуеши на многая лѣта

во свѣтлых зарях превѣчнаго свѣта.

Иоан имя благодать являет,

50 тоя ти брат твой от бога желает.

Да тою душа ти будет живленна

и рука царска выну укрѣплѣнна

Скипетр держати вѣрных в правление,

на супостаты мечь во отмщение.

55 Петр имя камене толком знаменает,

камен же твердость собою являет.

Петр убо, брат твой, тверду тебѣ быти,

непозыблему на престолѣ жити

Радостно хощет и да побѣдиши

60 вся Голиафы, егда я узриши.

Ирина мирная имать сказание;

от Ирины тебѣ сие жалание,

Да мир во державѣ твоей водворится,

да кождо о своих благих веселится,

65 Да мечы на рала будут прекованы,

сулицы на серпы будут предѣланы.

Анна во имени своем радость носит;

радости царевна Анна тебѣ просит

От всещедра бога. Да радость отвсюду

70 тебѣ ся приносит, печаль ниоткуду.

От всѣх твоих предѣл да есть веселие,

яко бѣ в дни царя Августа велие.

Повелителница толк есть Татианы;

повелителства ти, царю богом данны,

75 Пресвѣтла царевна усердно желает,

да твой странным царствам жезл повелѣвает;

Правлению его да ся покаряют,

иже за пространным морем обитают.

Евдокии толк есть благоволение;

во тоя к тебѣ, царю, доброхотѣние

Есть, да благих правых всѣх ся насытиши,

желаний сердца ти да ся не лишиши.

И да благоволит бог всещедрый в тебѣ,

по временном царствѣ даст и вѣчно в небѣ.

85 Марфа сказанием есть попечение;

Марфы убо тебѣ сие хотѣние:

Да господь всещедрый печется тобою,

управляя путь твой своею рукою,

И в попечениих твоих да поможет,

90 иже все что хощет преудобно может.

Имя София мудрость знаменает;

София сестра мудрости желает

Главѣ ти царстей, да мудро правиши

данное царство и вся свѣтло зриши,

95 Яже во оном добрѣ знати требѣ,

Первосудии всѣх дѣл сущу тебѣ.

Екатерина надежду являет,

истинну купно таже знаменает;

Надежды она молит ти у бога

100 и да истинна возсияет многа

В дни царствия ти, за ню же на небѣ

вѣнец нетлѣнный господь воздаст тебѣ.

Мария тожде есть, что владущая:

сестра хощет ти под солнцем сущая

105 Имѣти власти, да вся приведеши

ко Христу богу, души их спасеши.

Да Владимиру точен ся явиши,

многия роды вѣрны сотвориши.

Феодосии имя си толкует —

110 богоданная: таже усердствует

Богом данному царю ти нашему,

да подаст господь скипетру твоему

Вся управляти, яже обливает

окиан роды, и неба желает.

120 Имя Наталиа есть день рождения;

сия желает тебѣ владѣния

Вездѣ, гдѣ нужда есть от рождения

водою духом, богу въсынения;

Сих же множество родов безчисленно,

125 до конец земли в мирѣ разширенно.

Что Феодора сестра ти желает,

царю пресвѣтлый, имя изъявляет;

Седмочислием писмен заключенных,

седми ти хочет даров божественных.

130 Да тѣми будет душа исполненна,

царства держава всечинно строенна.

Архиереи богу служащии,

жертву безкровну ему носящии,

Вси ти всѣх благих усердно желают,

135 молбы о тебѣ выну возсылают

Ко богу щедру, да изволит дати

здраво, щасливо тебѣ царствовати.

Сигклит твой царский, свѣтлая полата,

не ищет богатств, бисерей и злата

140 Тако, яко же царстей ти свѣтлости

желает тощно здравия цѣлости.

Занеже кождо готов умирати

за тя, всѣх главу, главу полагати.

Лик преподобных отец ти желает

145 и кождо, иже в церкви ся труждает,

Да яко солнце на небѣ свѣтиши,

мрак невѣрия в мирѣ истребиши

И вся ереси, вѣру же святую

распространиши во страну всякую.

150 Кто видѣ, како пчелы матери радѣют,

вся ея правителством во ульи си дѣют,

За ню, яко за царя, главы полагают;

тако сии за тебе готови бывают

На вся бѣдства и на смерть; желают же тебѣ

155 и в мирѣ царствовати и в премирном небѣ.

Любезная вещь: солнце яко освѣщает

и теплотою в мирѣ плоды содѣвает.

Ты православных солнце за точная дѣла,

тѣмже вси тя желаем здрава, славна, цѣла,

160 Свѣтла, побѣдоносна всегда созерцати,

дондеже господь даст ти миром обладати.

Буди же обладатель чрез время толико,

в подложенней скрижали возможно елико

Многа лѣта считати многими премѣны,

165 от среды на вся страны будиж без измѣны.

Желания благих всѣх чинов явленна

та да исполнит милость божественна.

И да приложит ина блага тебѣ,

яже ти жизни бог вѣсть быти требѣ.

170 Аз привѣтствия благая вѣщаю,

гуслию сею любезнѣ звяцаю.

В небеси многи старцем гусли бяху,

вси же едину всѣми пѣснь пояху,

Аз единою многи пѣсни пою

175 по числу гуслей их в честь царску твою,

Желая, да вси вѣрнии ликуют,

царствия тебѣ вѣрно привѣтствуют.

Ты же изволи любезно слушати,

мене в милости своей соблюдати.

180 По темной нощи день свѣтлый бывает,

солнце лучами всю тму изтребляет.

Вся веселятся, егда освѣщенна

солнцем бывают и преукрашенна;

Человѣк грядет дѣла совершати,

185 их же не даде нощный мрак дѣлати;

Птицы из гнѣзд си тощно излѣтают,

сладкими гласы аер исполняют;

Звѣрие токмо лютии хранятся,

злобы своея явити срамятся;

190 И чада нощи свѣта дне гонзают,

дѣла лукава тмою покрывают.

Дне же сынове любят в свѣтѣ жити

и дѣлеса дне похвално творити;

Тѣмже, егда день желанный приходит,

195 в сердцых их радость превелику родит;

И плаватели зѣло веселятся,

от волн злолютых егда свободятся.

Обще всѣм людем радость ся рождает,

егда по многих дождях возсияет

200 День доброведрный, аки узлащенный,

лучесы солнца ясно просвѣщенный.

Сицев день нынѣ в России сияет

и вѣрных сердца свѣтло озаряет.

Мрачная нощь бѣ во Российстей странѣ,

205 егда пресвѣтлый царь во гробнѣй ямѣ,

Царь наш Алексий Михайловичь славный,

тѣлом положен, царь всѣм родом явный.

Дождь слезный тогда на землю лияся,

яко свѣт очес наших сопрятася

210 Во земли мрачней и досаден бяше,

яко отял бѣ ведро сердца наше.

Днесь же день велий мирови сияет,

тму в свѣт и слезы в радость прелагает,

Егда от бога ты нам дарованный,

215 царь на престолѣ сѣдиши вѣнчанный.

О Феодоре Алексиевичю,

Российска царства истинный дѣдичу,

Солнце ты наше, убо день великий

тобою бысть нам от вѣчна владыки.

220 В нем же имамы безбѣдно ходити

на дѣла наша и радостно жити,

Яко же птенцы сладкогласно пѣти,

на твою свѣтлость несмѣженно зрѣти.

Токмо кто звѣрем дивым подобится,

225 той в своем ложи негли сохранится,

Не могий свѣта твоего терпѣти,

яко не может сова солнца зрѣти.

И чада нощи, дѣлатели злаго,

гонзати имут дне ти пресвѣтлаго,

230 Да не во злобах будут обличени

и правдолюбнѣ по дѣлом суждени.

Чада же свѣта живущии благо

возцѣнят день твой паче злата драго,

Возлюбят в его сиянии жити,

235 дѣлеса свѣта на всяк час множити.

Толику дневи приемшу начало,

есть веселие во сердцах немало

Рабов ти вѣрных, Феодоре царю,

царств и князств многих правый государю.

240 И вящше напред имать возрастати,

егда будеши день той озаряти

Лучесы доброт, богу возлюбленных,

миру полезных, тебѣ же спасенных.

Ибо имать я господь ти воздати

245 умножением свѣта благодати

В мирѣ сем мрачнем и в горнем Сионѣ

днем безсконечным при всесвѣтлом фронѣ,

Их же благ вѣрно аз тебѣ желаю,

о дни сем свѣтлом привѣтство вѣщаю.

250 Многа свѣтила богом сотворенна,

во препространном небѣ положенна.

Число их творец сам всесилный знает

и имена им сам же нарицает.

Звѣзд блюстители немногая знают,

255 силу и действо онѣх разсуждают.

Между же всѣми седмь тѣх обретоша

свѣтил, планиты яже нарѣкоша.

Их же два токмо велика реченна,

во дне и нощи область устроенна.

260 Луна во область нощи положися,

солнце же над днем богом поставися,

Еже в срединѣ планит насажденно

и красотою свѣта исполненно.

Источник свѣта то ся именует,

265 яко свѣтилом прочим обществует.

Свѣт свой и мир весь дивне озаряет,

вся ростущая с земли оживляет;

Течением си круг земной обходит,

всякия плоды из земля изводит

270 И в нѣдрѣх ея крушцы устрояет,

из них же злато и сребро бывает.

Все, еже благо здѣ и красно зрится,

солнца то дѣйством в мир изводится.

Тѣмже кто велик солнцем нарицаем

275 и царя мира солнцу уравняем.

Что аще иным прилично бывает,

кто-либо хощет, то да разсуждает.

Царем российским во правду годствует,

да ся от вѣрных кождо именует

280 Солнце за свѣтлость истинныя вѣры,

ею же свѣтит во мирѣ без мѣры,

В ней же, егда ся дѣла прилагают

благая, солнце всяко сотворяют.

Солнце ты убо, царю богом данный,

285 будеши вправду от раб вѣрных званный,

Ибо свѣт вѣры от тебе сияет

и дѣлес благих надежда блистает.

Хощещи быти по бозѣ ревнитель,

православныя вѣры разширитель,

290 Хощеши раскол всякий изтребляти,

добронравие в людех насаждати,

Имаши умом вѣздѣ обходити,

да яко солнце можеши живити

Всякое древо во раи мыслѣнном,

295 в царствии твоем благонасажденном.

А яко солнце зодий претекает,

тако и тебѣ тещи подобает.

Дванадесять суть знамени в зодии,

в нем же суть люди и звѣри нѣкии.

300 Первый есть агнец, в нем же ты ходиши,

повнегда тихость агнчую храниши,

Со незлобием в сердцы ти спряженну,

со смирением духа съединенну.

Вторый есть телец, вон же ты вшел еси,

305 егда царствия бремя приял еси,

Еже достоит не без труд носити,

бог же изволит в нем ти пособити.

Третие мѣсто близнецы заяша,

в них же царская будет свѣтлость ваша,

310 Внегда потщится с Христом всегда жити

и сердцем своим ему во храм быти,

Иже сугуб есть бог бо совершенный,

в человѣчество наше облеченный.

В четвертом мѣсте рак вспятный витает,

315 его же свѣтлость ваша прехождает,

Егда от гнѣва к милости вспятится

и в день ярости к щедротам вратится.

На пятом мѣстѣ лев есть утверженный,

зубы и ногты дивнѣ въоруженный.

320 То знамение тогда ты пройдеши,

егда на враги престрашно пойдеши

И злогордыя будеши терзати,

ли понудиши гласа ти гонзати.

На мѣстѣ шестом дѣва почивает,

325 юже пресвѣтлость ваша присещает,

Егда ся молит Марии дѣвицѣ,

всѣх правовѣрных скорой заступницѣ.

Та да изволит тебе соблюдати,

яко же чадо свое хранит мати.

330 На сѣдмом мѣстѣ мѣрила блистают,

яже хранити правду поучают.

Ты, солнце наше, тая присѣтиши,

егда во царствѣ правду утвердиши,

Лесть же всякую велиши прогнати,

335 в нем же ти господь хощет помощь дати.

Осмое знамя скорпий, исполнь яда;

сего ти нужда есть попрати гада,

Общаго врага рода христианска,

змия глаголю люта агарянска,

340 Нан же ти господь сам в помощь буди,

да свободиши плененныя люди.

Мѣстом девятым стрѣлец обладает,

иже из лука стрѣлы изпущает.

Того ты тогда славно претечеши,

345 егда скифския страны попереши,

Луки и стрѣлы онѣх сокрушити,

гордыя главы до стоп понудиши.

О, даждь то, боже, тебѣ совершиши,

что твой родитель умыслил творити!

350 В мѣстѣ десятом есть козел рогатый,

по горам скачющь, власами богатый.

В Писании же козел знаменует

царя греческа, — Даниил сказует.[6]

Прилично убо нынѣ царствующа

355 в грѣчестей странѣ чрез козла скачюща

Есть сказывати: ибо есть рогатый

гордостию си и в тлѣнных богатый;

По горам скачет, егда похищает,

яже высока в мирѣ созерцает.

300 Господь же, иже гордым противится,

тебѣ на помощь молим да потщится,

Еже под твоя пречестныя ноги

гордости его преклонити роги.

Тогда ты козла славно претечеши,

365 егда тѣх рогов оному притреши.

Аз же и весма желаю сломити,

с власов и кожи в конец обнажити,

Да и всѣм тѣлом в користь будет тебѣ.

О даждь то, боже, царствуяй на небѣ!

370 Первонадесят мѣсто державствует

водолий мокрый. В нем днесь бышествует

Твоя пресвѣтлость, егда обладает,

что водолию горню подлегает.

Еще и тогда будеши ходити

375 по водолию, егда будут плыти

Ратници твои чрез морския воды

к престолну граду гречески породы,

Еже из скверных взяти агарянских

рук и предати до рук христианских

380 Твоих пресвѣтлых. Того ти желаю,

молитвы к богу о сем возсылаю.

Второнадесять мѣсто рыбы знают,

яже во водах глубоких плавают.

Ты, солнце наше, тыя преходити

385 имаши, егда будеши ловити

Морем пространным роды окруженны,

яко же рыбы в водах заключенны,

И внегда невод твой будет ходити

по нѣдрам морским и всяк род ловити

390 Рыб, тамо сущих, чистых же и скверных,

еже есть вѣрных людей и невѣрных;

Ты же будеши оны избирати

чистыя тебѣ, скверны же вергати;

Еще и тогда, внегда ти крестити

395 дасть бог агарян и рыботворити

Из скверных змиев водами святыми,

да будут богу рыбами чистыми.

Яко же святый Владимир содѣя

в царствѣ пространном державы твоея.

400 Тако и тебѣ даждь бог сотворити,

где царь Констянтин изволил бѣ жити.

Вѣры ты его наслѣдник всеправы,

буди стяжатель купно и державы.

Негли речет кто, яко неудобно

405 лву из зуб взяти овцу ни подобно,

Сицев да помнит, яко изхищаше

Давыд из зубов и лва убиваше;[7]

Тожде и лютым медвѣдем творил есть,

овцы отемля и самы давил есть.

410 Аще Голиаф враг той зрится кому,

воспоминаю аз Давида тому,

Иже и мал быв порази велика,

яко с ним бяше царь всѣх и владыка;

Взем мечь свой ему отсѣкл горду главу,

415 воздаде богу пособлшему славу.

Тако и нынѣ что нам не подобно

видится быти богу есть удобно.

Токмо потребно есть давыдствовати,

со богом жити и в нем уповати.

420 То есть извѣстно, враг голиафствует,

Христа истинна бога безчествует,

Глаголя хулы, в силѣ уповает,

на Исраиля нова наступает.

Ты, божий даре новоувѣнчанный,

425 буди от бога Давыд нам посланный,

Именем его ты вооружися,

десницѣ святѣй надежно вручися.

Да укрѣпит тя, даст торжествовати,

пѣснь побѣдную свѣтло воспѣвати!

430 Того весь сонмь наш вѣрный ти желает,

руцѣ молебно к богу воздѣзает.

Орел российский под небом лѣтаяй,

гласом славы си весь мир исполняяй,

Егда во свѣтѣ мысленнаго солнца

435 крилы си царства покрываше конца,

От вселютыя смерти устрѣлися

и в вѣнценосной главѣ уязвися.

Низъпаде в яму, в земли ископанну,

сотвори слезми землю облиянну,

440 Остави вѣнъцы честныя си главы,

яко бысть тако годѣ царю славы.

Пал есть и умре, но паки воскресе

во своем сынѣ, егда тя вознесе

Бог вмѣсто его, еже царствовати,

445 скипетр российский преславно держати.

О божий даре, из царя рожденный

и на престолѣ царстѣм посажденный,

Живет наш орел в тебѣ и лѣтает,

во солнце славы възлѣтѣти желает.

450 Яко же отец миру бяше явен,

тако даст господь ты будеши славен.

И выше даждь бог быти вознесенну

во честь и славу орлу обновленну.

Гоняше орел старый птицы многи,

455 прострет и младый на ня своя ноги,

Изряднѣе же на нощныя враны,

въгнѣздившияся в людей вѣрных страны.

О орлѣ вѣстно: той ся обновляет,

да бодрѣй к дѣлу своему бывает.

460 Тако со орлом нашим сотворися,

ветхий во млада орла претворися,

Да дѣйствѣннее во сынѣ лѣтает,

на то и господь днесь тебе вѣнчает,

Царю пресвѣтлый, и хощет ти дати

465 силу на враги, еже я терзати.

О даждь то, боже, да тебе страшатся

врази, як орла вся птицы боятся;

Хищныя тогда на лов не дерзают,

егда близ быти орла познавают;

470 Даст бог, при тебѣ не будут дерзати,

иже обычай имѣша хищати,

Во гнѣздах своих спрятатися будут,

да в них главами безбѣдны пребудут.

Вкрилися токмо пѣрнатѣй блаженно,

475 в добрых перие дѣлес божественно,

А господь даст ти пресилно лѣтати,

многи користи от врагов взимати.

И яко орел обыче творити,

будеши твой лов с твоими дѣлити,

480 Иже вслѣд воли твоея лѣтают

и слово дѣлом тощнѣ исполняют.

А яко орел птенцы си вращает

к солнцу чювственну, да тако познает,

Кий не отроден естества пребудет

485 и кий лѣнивец непотребный будет:

Бодрый бо свѣтло на солнце глядает,

отродный паки очеса смѣжает;

Тогда он бодра прилежит живити,

гнюснаго паки скоро изгнѣздити, —

490 Подобнѣ и ты люди обратиши

к солнцу мысленну, да тако узриши,

Кто к свѣту Христу весело смотряет

или кто очи вѣры си смѣжает:

Свѣтлозрящыя будеши щадити,

495 мрачноочныя велиши лѣчити,

Коллурием я духовным мазати,

еже о вѣрѣ в Христа наставляти;

Аще же тогда будут слѣпствовати,

изгнѣздиши я из нѣдр благодати.

500 Еще о орлѣ и то повѣдают,

иже естества его свойства знают,

Яко обыче пред птенцы лѣтати,

да ся научат на аер дерзати.

И ты, наш орле, чаем, сотвориши,

505 вся твоя люди к небу возбудиши

Вѣры и благих дѣл крилы лѣтати

образ тобою изволиши дати.

На то бо еси Христом возвышенный

и на престолѣ царстем посажденный.

510 Лѣтай ты убо пред нами высоко,

гдѣ есть бдящее неусыпно око

Крилами духа. А славы благия

пери крилама в концы вселенныя:

Да идѣже свѣт солнечный сияет,

515 тако слава ти вездѣ превитает.

Отчества гнѣздо покрывай крилами,

вражия сѣти разтерзай ногами.

Вси, иже на тя ковы умышляют,

в ногтех орла ти конец да познают.

520 Агарян гордых луна своя роги

да сложит кротко под орла ти ноги.

Инако взем я, луну да терзает

или во круглость ту да согибает.

Да кругла суща свѣтом исполнится,

525 от тебе, солнца, вся да просвѣтится

Благочестия свѣтлыми лучами,

да иже врази, друзи будут с нами.

О свѣте присный, просвѣти вся страны,

даждь Феодору царю агаряны,

530 Божиим даром да будут владоми,

орлом российским к небеси ведоми.

Орел наш к тебѣ научит я зрѣти,

к солнцу истинны, яко своя дѣти.

Во чрепокожих нѣции считают,

535 инии в рыбах порфиру вмѣняют,

Яже прибыток людем содѣвает,

багр источает.

Им же овчая бывает крашена

волна, послѣжде во нити прядена,

540 Из них же сукно потом содѣвают,

багр нарицают

Или порфиру, бѣ же честна зѣло,

царское токмо покрываше тѣло

Или, им же царь изволяше дати,

545 лѣть бѣ ношати.

Изряднѣе же царем багряницы

во честь и в знамя ткаху человѣцы,

Яко изрядно багрян цвѣт блистает

и украшает.

550 То в древних вѣцех во похвалу бяше.

Лутшая строит царем время наше:

Златом, бисерми свѣтло украшает,

честь умножает.

Тако ты нынѣ, царю, украшенный,

555 всѣм яко солнце еси проявленный.

Вси на тя очи своя обращают,

честь должну дают.

Не тако луна полная сияет,

егда лик свѣтлых звѣзд ю окружает,

560 Яко лице ти от бога почтенно

есть украшенно.

Внѣшню красоту есть любезно зрѣти,

бог же внутрнюю велит нам имѣти,

Сирѣчь доброты, — тыя ему любезны,

565 суть бо небесны.

Твоя прѣсвѣтлость, вѣм, яко желает,

да небесными бисеры сияет

Душа ти царска; тѣмже и потщится

да украсится

570 Тѣлесе паче; во еже бы богу

быти любимѣй в щедротах премногу;

Сам же изволит бог ти пособити

душу красити.

Тебѣ достоит тѣх бисер искати,

575 тщанием бог же изволит я дати,

Да ся оными преобогатиши,

преблаг явиши.

Внутрный человѣк твой есть облаченный

в Христа, егда вонь был еси крещенный;

580 Он ему риза, дѣла же ти блага

красота драга.

Си душевная твоя багряница,

юже украсит божия десница;

Брачна одежда имать быти тебѣ,

585 да яси в небѣ

Брака вечерю агнца безконечну,

сладостию же и временем вѣчну,

И да будеши тамо облеченный

в свѣт божественный.

590 Здѣ даждь ти господь свѣтом благодати,

славы, крѣпости долгий вѣк сияти

Вездѣ, гдѣ солнце лучи си пущает

и согрѣвает.

По земном царствѣ буди царь и в небѣ;

595 от славы в славу аз желаю тебѣ

Внити и во свѣт небесна чертога,

гдѣ радость многа.

Егда на крестѣ Христос царь висяше,

тогда содѣя спасение наше,

600 Врага же люта в конец побѣдил есть,

смерть умертвил есть.

Того нам знамя креста даровати

благоволил есть, да бы побѣждати

Тѣм враги наша безтщетно и цѣло,

605 в купѣ весело.

Его бо сила дивная дѣйствует,

чтущым распята побѣды дарствует.

Ей, божественно сие орудие

и оружиё!

610 Егда Констянтин Велий воеваше

со Максентием и ратно идяше,

Еже бы горда тиранна смирити

и побѣдити,

Прият от бога знамение сие;

615 во извѣстное своим спасение

Велѣ бо господь ему крест сдѣяти,

с тѣм воевати.

Царь вѣрив богу повелѣ дѣлати

образы креста и ты утвержати

620 На знамениих, и бысть побѣдитель,

врагу отмститель.

Ибо Максентий, елма кресты зряше,

абие страхом с полки объят бяше,

Чрез мост глубоких вод в бѣгство пустися,

но погрузися.

625 Оле чюдесе! Древле фараону

образом креста в мори, здѣ оному

Погружение не случаем бяше,

но бог творяше.

630 Того извѣстна церковь, наша мати,

обыче цари крестом украшати,

Да силни будут вопреки стоящым,

брани хотящым.

Крест убо, царю благовѣрный, тебѣ

635 бог даровал есть ко всяцей потребѣ,

Да, егда его на персѣх носиши,

враги смириши

Силою того, и в защищение

тебе имаши сие знамение:

640 Щит бо извѣстный крест есть божественный,

вѣрным спасенный.

Креста образно Мойсий воздвизаше

руцѣ ко богу, егда воеваше

Иисус враги, и дал бог попрати

645 злы супостаты.

Ты крест на перси честны воздвигл еси,

ум воздвизая к живущу в небеси,

Да в силѣ его враги побѣдиши,

Христа славиши.

650 Врагом крест соблазн и поношение,

тебѣ он слава есть и хваление;

Тѣм на вѣнцы и на персѣх носиши,

Христа в нем чтиши.

Род некрещеных очи отвращает,

655 идѣже знамя креста созерцает;

Ты же близ сердца честный крест держиши,

Христа любиши.

За что Христос ти любовь си да явит,

противу врагом пресилна поставит;

660 Вѣнцем побѣды тя да украшает

и прославляет.

В четырех странах мира превелика,

яже создал есть небесный владыка;

Восток и Запад, Юг, Сѣвер являют

665 крест, да тя знают.

Тамо сущии дары да приносят,

гаваонитски милости да просят.

О даждь то, Христе, вѣрным созерцати,

тя величати!

670 Златыя вѣнцы художник дѣлает,

камением я честным украшает;

Но главы тѣми царския венчати,

есть то божия дѣло благодати;

Иже сим родом цари уставляет

676 и главы онѣх свѣтло украшает.

Да вси знающе, яко живый в небѣ

царь царя в мирѣ ко общей потребѣ

Сам утвержает, достойно бы чтили,

сущу от бога вѣрно бы служили.

680 И аще зрится первый жрец вѣнчаяй,

но сам есть господь тайно украшаяй;

Орудие есть в дѣлѣ сем святитель,

во мѣсто бога самого служитель;

Сам же создател есть избратель главы

685 и возложитель честна вѣнца славы.

Ибо и пророк богу причитает,

яко он вѣнец славы возлагает;

Возлагает же, да знает вѣнчанный,

яко на дѣло царско есть избранный,

690 Не празден быти, но труд полагати,

о всѣх безбѣдствѣ людей промышляти,

Хранити правду, бѣдных защищати,

на супостаты мечь остр извлекати.

Красен есть убо вѣнец и блистает

695 свѣтом каменей, но в тай увѣщает,

Яко, елико злато превосходит

вся крушцы, яже земля мати родит,

Толико царю должно лучшу быти

от всѣх, яже бог изволил вручити

700 Его державе. И тако свѣтити

благими дѣлы донели же жити

Паче всѣх людей, яко же сияют

камени, иже главу украшают,

Паче каменей верху земли сущих,

705 не сровнимую тым цѣну имущих.

И тягость злата, мню, то знаменает,

яко не легко бремя возлагает

На вѣнценосца рука щедра бога,

ибо в царствии дѣла зѣло многа.

710 Аще и то есть в златѣ знамение,

не буди тебѣ о сем сумнѣние,

Пресвѣтлый царю, от бога избранный

и вѣнцем честным свѣтло увѣнчанный.

Вѣсть бог, елико кому налагати

715 бремя, да может удобно двизати;

К тому и сам он пособник бывает

тѣм, им же бремя велие взлагает.

Не сумнив буди, паче веселися,

яко сей вѣнец на тя возложися.

720 К нему от бога ты предуставленный,

к нему от ложесн ты царских рожденный.

Не обременит он главы твоея,

бог не лишит тя помощи своея;

Хощет ти ону выну посылати,

725 в дому и в полцѣх свыше подаяти.

Лобзай вѣнец сей, с ним на твою главу

бог изливает благодать и славу;

Иже от бога устроен есть в небѣ,

той днесь праведно воздадеся тебѣ.

730 Дар он есть божий, тебе украшаяй,

взаем от тебе свѣтлость си общаяй.

Он тебѣ злато, ты адамант ему,

дар божий сличный дару божиему.

В нем же тя зряще точнѣ восклицаем,

735 что Соломону восклицанно знаем:[8]

Дщери Сиона руска, изыдите,

царя во вѣнцѣ Феодора зрите,

Им же вѣнча и церковь, наша мати,

еже многими царствы обладати!

740 Зряще же, руки воздѣйте до бога,

да даст вѣнчанну царю лѣта многа.

Бог богов и всѣх господь, егда посылаше

Мойсия во Египет и бога прозваше

Его фараонова, жезл ему вручил есть

745 во знамение власти, ею же почтил есть.

Тѣм он божественная чюдеса творяше,

земля, море, воздух того послушаше.

Преславный царь Артаксеркс жезл держа рукою,

им же обыкл являти людем милость свою;

750 Елма бо непризванным внити не лѣть бяше,

к нему протягнением жезла проявляше

Милость, во еже к нему волно приступити,

яко же Есфирѣ ту восхотѣ явити.

И правителем иным жезлы ся вручаху,

755 иже власть им над людми данну знаменаху.

Псаломник жезл правости и жезл правления

именует я в псалмѣх и жезл казнения.

Изряднѣе же царю жезл приличествует,

иже безчисленныя люди державствует,

760 Во знамение власти данныя от бога,

на право правление сонма людей многа.

Сей именем скипетра мудрыми прозванный,

бывает же из злата чистаго созданный,

И честным камением украшен бывает,

765 лѣпотою иныя жезлы превыжшает;

Царскому достоинству да будет приличен,

нижае сановитым людем не обычен.

Сицев твоей свѣтлости царстей есть врученный

во знамение власти скипетр божественный,

770 Царю наш Феодоре, из царя рожденный,

из Алексия славна; вѣнцем днес почтенный,

Той да будет в жезл силы дарованный тебѣ

от господа сил горних, живущаго в небѣ.

Да с ним данныя силы вси врази страшатся

775 и главами ногам ти царским поклонятся.

Мойсиева да будет при нем жезла сила,

яже бы церкве враги в мори погрузила.

Христоимѣнитых же полки да спасает,

от гонителей лютых вся да свобождает.

780 Внутрь царствия да будет он жезл правления,

заблуждшым на истинны путь наставления,

Законопреступником язв наложения,

неисправивым паки главна казнения.

Тако он жезл правости будет пребывати,

785 знаяй мзду коемуждо по дѣлом воздати.

Два жезла Захарии господь поминает,

„доброты“ и „схинизмы“ сам я нарицает.[9]

Твой един обѣ силѣ да содержит в себѣ:

доброты к правовѣрным, к невѣрным же требѣ,

790 Да будет жезл схинизмы, да бы я вязати

вервием учинения и Христу плѣняти.

Противящымся паки да будет желѣзны,

сокрушаяй я, яко сосуды скуделны.

Церковь православную он да утвержает,

795 волки овцохищныя вся да прогоняет.

Иеремиа пророк усмотрѣ жезл бдящий.[10]

Твой жезл царский да будет на вся страны зрящий

Еже подданных своих нужды созерцати,

от обилия царска скудость исполняти,

800 В запредѣлных же странах вся да усмотряет,

кто есть храняй дружество, кто яму копает.

Той, егда изволиши к вѣрным протязати,

милость приступления к тебѣ проявляти,

Яко же Есфир конец жезла цѣловаше,

805 тако лобзати имать жезл твой сердце наше.

Его же ти желаем много лѣт держати,

даже сам восхощеши в небеси витати.

Егда царь на царство помазан бывает,

шуйцѣ архиерей державу вручает.

810 Тѣмже хотяй лице царско написати,

сей хранит обычай, да бы начертати

В десницѣ жезл скиптра, в шуйцѣ же державу

обладающему землею во славу;

Ту же кругловидну вси изображают,

815 верху же ея крест честный утвержают;

В шуйцѣ негли за то, яко добродесно

не земно богатство, но царство небесно.

И о мудрости то Приточник вѣствует,[11]

что в шуйце славу и богатство пѣстует.

820 Мудрости царие убо подобятся,

ими же земная во шуйцѣ держатся.

Кругловидность ея негли знаменует,

яко в единой руцѣ непостоянствует,

Но из руки в руку скоро претекает

825 и паки во ину, что коло, бѣгает.

Крест выше державы честный написуют,

крестом мир спасенный быти извѣствуют,

Или яко Христос вѣрных си державу

вручествует в свою божественну славу.

830 Его ради славы тебѣ есть врученна

Руская держава, свѣтом просвѣщенна,

Тебѣ, Феодору Алексиевичю,

многих царств, княжств и земль правом дѣдичу.

Ея же пространство хотяй описати

835 должен бы премного путешествовати;

Во странѣ Еуропстей, в далецей Азии

безчисленнии гради нам незнаемии.

Сокращеннѣ убо хотяй ю познати

полну твою титлу да тщится читати:

840 Ей же да приложит господь и новыя

от стран супостатов Христовых многия,

Да твои предѣлы вездѣ пространятся,

чюждии родове ти да поклонятся.

Вся же сия в славу тебе воцаривша,

845 на отчѣ престолѣ честно посадивша.

А он взаим тебе изволит славити,

воинство державы твоея крѣпити

На полки вражия. К тому и на небѣ

вѣнец славы вѣчны уготует тебѣ.

850 Соломон мудрый, егда царствоваше,

мир имѣ велий и пребогат бяше,

Умысли престол себѣ соружити,

ему же точну в мирѣ бы не быти.

И сооружи велий и богатый

855 из костей слоних и внѣ чисто златый.

Сѣдалище двѣ руцѣ держастѣ,

от падения оно утверждастѣ.

Има же два лва страшна пристояста,

аже зрящыя на ня устрашаста.

860 Шестистепенный восход к нему бяше,

два скимна кийждо степень содержаше.

Вся сия зѣло люди устрашаху,

приступ ужасный к царю знаменаху.

Тако в законѣ ветсѣ подобаше:

865 закон бо страха тогда людем бяше.

Не тако нынѣ закон благодати

велит престолы царем созидати.

К добродѣтелем паче увѣщает,

неже богатство злата совѣщает;

870 Тѣмже твой престол, царю правовѣрный,

ни костми слонов, ни златом безмѣрный,

Ниже многими лвами окруженный,

ни паче нужды есть многостепенный;

Да бы не выше мѣры страшну быти,

875 ни неприступну людем тебѣ жити.

Добродѣтелми паче он сияет,

яже пресвѣтлый род ваш умножает.

Чистота сердца и любы ко богу

и ко подданным красоту премногу

880 Дѣет престолу; суд же утвержает,

ему же милость помощь прилагает.

В мѣсто лвов страшных многи благодати

окрест престола вѣсте утвержати;

Восхождения в сердцах полагати,

885 да бы и в небо по оным ступати.

Сице престол ваш свѣтло украшенный

мощно есть звати престол божественный.

На нем же сѣдя, живи долго, царю,

тезоименне божиему дару,

890 И сияй свѣтло вышняго дарами,

яко полна луна со звѣздами.

Паче же солнцу весма подобися,

в средѣ словесных планит ти свѣтися,

Лучми твоими оны озаряя

895 и вся вѣрныя тѣплѣ согрѣвая.

Мы же имамы господа молити,

да благоволит престол утвердити

Ваш в царствѣ; яко течение солнца,

имать пребыти до всемирна конца.

900 Мафусаилов ты вѣк да сѣдиши,

потом небесно царство наслѣдиши.

Донели же Москва во Оку впадает

и та во Волгу пространну вплывает,

Престол ваш царский недвижим да будет

905 и сѣмя твое на нем да пребудет.

До их же времен рыбы вод желают

и пернатая воздух прелѣтают,

Дотолѣ дажд бог престолу стояти

и твоей крови на оном сияти.

910 И донели же от пресвѣтла солнца

день ся раждает во вся мира конца,

Дотолѣ слава ваша да лѣтает

вездѣ, гдѣ воздух вѣтры си пущает.

Бог херувиму повелѣ хранити

915 земнаго рая, да бы приступити

Никто же дерзал, и мечь вручи ему,

слузѣ своему.

Меч же огненный, скоровращный зѣло,

да бы едемский сад пребывал цѣло

920 И древо жизни да бы некосненно

тому врученно.

Ты слуга божий вѣрный, царю, еси

Точн херувиму, аще и в тѣлеси;

Тебѣ от бога жива есть врученный

925 рай наш мысленный —

Церковь святая, в ней же процвѣтает

древо животно, еже оживляет

Всѣх души вѣрных выну же всецѣло

Христово тѣло.

930 Суть в ней и ина многа насажденна

бога рукою древеса мысленна —

Вси христиане, иже хвалу богу

дают премногу.

Сего ты рая херувим избранный,

935 тѣмже ти мечь есть от господа данный,

Да бодрый его будеши хранитель

и защититель.

Желѣзный убо мечь изволи дати.

но ты огненна должен содѣвати,

940 Да во ревности пламене палает,

тѣм ся вращает;

В ревности паки, яже есть по бозѣ,

не в ярости, но во любви мнозѣ.

Тако же горяй от рая ти прага

945 отсѣчет врага.

Есть обоюду мечь сей изощренный,

на обѣ странѣ да будет дѣйственный,

Сирѣчь в державѣ и за предѣл праги

на злыя враги.

950 Вънутрь царства убо на зло творящия,

благих гражданом тщеты дѣющыя,

На иже закон божиих не знают,

казнь презирают;

Тыя бо весма должно изтребляти,

955 яко же волки в стадѣ избивати,

Да овец кротких ни когда снедают,

ниже вреждают.

Внѣ же предѣлов имать дѣйствовати

мечь твой на враги, сирѣчь я смиряти

960 Первѣе страхом да будут покорни,

а не упорни.

Аще же роги будут возносити,

мечем есть нужда раны наложити,

В конец же гордым и живот отяти,

965 гробом предати.

Найпаче иже врази суть Христови,

рай наш мысленный терзати готови;

Яко молния, мечь твой страшен буди

на тыя люди.

970 Яко Иисус Наувин посѣцаше

полки и цари и грады плѣняше

Вражия мечем, тако дажд бог тебѣ,

живый на небѣ,

Скоро и силно мечем изтребляти

975 нехотящия Христа бога знати,

Полки их с вожды славно побѣждати,

грады взимати.

Яко Самуил заклал ест Агага,

Тако даждь, боже, заклати ти врага

980 Паче всѣх горда, род же обратити

Христа хвалити.

Лукоратники даждь бог побѣдити,

яко косою траву искосити

Или яко серп класы пожинает,

985 сонм да падает

Пред твоим мечем скифов некрещеных

или да видим Христови плененных.

Твоя же полки бог да сохраняет

и помощ дает.

990 Соломон в царствѣ егда утвердися,[12]

бог в Гаваонѣ спящему явися,

Веля у себе что хощет просити,

во благо жити.

Он же смиренно к богу глаголаше:

995 „Боже мой, твоя милость царство даше

Мнѣ управляти, люд твой возлюбленный

сущь безчисленный.

Аз же отрочищь мал есмь и исхода

не свѣм моего, ниже знаю входа.

1000 Тѣмже, молю тя, изволи ми дати

смысльнно вся знати,

Да могу что зло, что благо судити

и между людми правый суд творити“.

Се слово богу преугодно бяше,

1005 любо прияше.

Тѣм рече к нему: „Зане же просиши

мудрости, не лѣт премногих молиши,

Ни душ вражиих, ни богатства многа

от мене, бога,

1010 Се дам ти мудрость паче бывших прежде

царей и паче будущих послежде,

И той ти приложу славу и богатство

во твое царство“.

О щедрот бога! Многша даровал есть,

1015 неже Соломон от него желал есть.

Сице смиренным бог милость являет,

что требѣ дает.

А занеже ты точнѣ смирен еси,

царь нашь, пред царем, живущим в небеси,

1020 Тѣмижде дары изволит тя чтити,

мудрость дарити.

Даст ти богатства, приложит и славу;

смирившуюся вознесет он главу:

Его бо свойство смиренным даяти

1025 си благодати,

Их же ти церковь усердно желает,

молбы о тебѣ к богу возсылает.

И приложити многа лѣта просит,

руки возносит.

1030 Ты же изволи страж ей вѣрен быти,

от сопротивных прилѣжно хранити,

За что извѣстно возмеши от бога

лѣта премнога.

Самуил пророк елма помазаше

1035 Савла на царство и людем являше,

Сказа от бога изъбранна и быти

люди правити.

И рече к людем: „Се зрите избранна,

не имать весь род мужа ему равна“.

1040 Люди „да живет царь наш!“ вопияху

и ликоваху.

Днесь Иоаким пастырь Руси всея

миром помаза во мѣсто елея,

Царю пресвѣтлый, и людем являше

1045 тя, солнце наше,

Глаголя быти тя богом изъбранна

и не имуща во всем роде равна.

Род же, тя видя, лики составляет,

богу честь дает,

1050 „Да живет царь наш, — свѣтло восклицая, —

многая лѣта здраво пребывая!“.

Купно и аз с ним тожде восклицаю,

всѣх благ желаю.

На Соломонов верх от иерея

1055 Садока рог бѣ излиян елея,

Егда на царство маза и с Нафаном

исраилтяном.

Людие рогом абие трубиша,

„да живет царь наш Соломон!“ гласиша;

1060 Прочии рода тожде глаголаху,

лик составляху.

Днесь Иоаким патриарх святѣйший

на главу твою вѣнец пречестнѣйший

Егда взложил есть, царю правовѣрный,

1065 лик есть безмѣрный,

Ибо людие гласно восклицают,

„да живет царь наш Феодор!“ глашают,

Прелагающе глас обща совѣта

на многа лѣта.

1070 Иоаса жрец Иодай вѣнчал есть

вѣнцем на царство и елей лиял есть

На главу его, людие же плескаху

. и глаголаху:

„Да живет царь наш Иоас в Сионѣ

1075 на превысоцѣ отец своих фронѣ!“.

И бысть во градѣ тогда веселие

зѣло велие.[13]

Тебе же, царю благочестивѣйший,

днесь Иоаким патриарх святѣйший,

1080 Егда пречестным вѣнцем украсил есть,

благословил есть.

И внегда миром священнымь мазаше,

духа святаго на тя призываше,

Да бы изволил души ти подати

1085 дар благодати.

Бог убо тогда на тя излиял есть

благодать духа святаго ти дал есть,

Укрѣпляя тя благо царствовати,

мир устрояти.

1090 Чесо мы ради бога прославляем,

„да живет царь наш!“ весело глашаем,

К тому многая лѣта глаголюще,

руки плещуще.

Сигклит исраилск видя Соломона

1095 приемша славу исраилска фрона,

Господу о нем славу возсылаше

и вопияше:

„Да ублажит бог имя Соломоне

и возвеличит фрон его в Сионѣ,

1100 Паче Давыда онаго родивша,

преславно живша!“.[14]

Подобнѣ руский сигклит возглашает,

ублажения, царю, ти желает,

Да паче отца возрастеши в славу

1105 и странным в главу.

Егда Соломон в земли воцарися

и на престолѣ отче посадися,

Услышав Хирам царь тирск глаголаше

и восклицаше:

1110 „Благословен бог, изволивый дати

Давыду сына могша царствовати

Над сими людми умна Соломона

в земли Сиона!“.[15]

Подобнѣ и мы нынѣ восклицаем,

1115 господа славим и благословляем.

Яко дарова Алексию царю,

земль государю,

Сына могуща скипетр восприяти,

многи народы мудро управляти,

1120 Тя, Феодора Алексиевича,

права дѣдича.

Его же нынѣ увѣнчанна зряще,

гласы возносим, господа моляще:

Даждь, боже, царю многа лѣта жити,

1125 щасливу быти!

Историограф Страбо нареченный

пишет во книзѣ, яко сочиненный

Столп во Египтѣ от Аммона бяше,

мир удивляше.

1130 Бѣ бо поставлен на горѣ велицѣ,

внутр же имѣл есть стройныя цѣвницы;

Нан же столп егда солнце возсияше,

сам пѣснь играше,

Аки цѣлуя встекшее свѣтило,

1135 еже пѣние и мир веселило

Близ горы живший. Ей, предивно дѣло,

слуху весело!

Тому аз столпу род уподобляю

руский преславный, ибо созерцаю

1140 Внутрь всѣх цѣвницы быти заключенны

и устроенны

Благих желаний, — ими же играют,

государем си всяких благ желают.

Яко же нынѣ дѣлом исполнися,

1145 ВСЯК присмотрися.

Се бо егда ты, царю, солнце наше,

на престолѣ ти роду возсияше,

Абие пѣсни нача он играти,

тя цѣловати.

1150 Пѣснь же есть сия: Живи многа лѣта,

о божий даре, в лучах вѣчна свѣта!

Благополучен и здрав выну буди,

щади же люди.

Плиний, прилѣжный естеств изслѣдитель

1155 и дивных в мирѣ вѣщей изъявитель,

Олимпиину горницу изъяви,

вѣсть нам остави;[16]

Яко та дивнѣ устроена бяше,

седмкраты отглас гласу воздаяше.

1160 Ей, дивно дѣло, но нам не равнится,

ни подобится.

Ибо в России церковь восклицает

царю лѣт много, а отглас бывает

Без числа многий; ибо поет кождо

1165 много лѣт тожде.

Сам то слышиши, царю православный,

всякая уста глас издают явный,

Да живет царь наш здрав на многа лѣта

кромѣ навѣта.

1170 Царю всѣх вѣков во плоти рожденну,

вмѣсто престола в яслѣх положенну,

Цари с Персиды дары принесоша,

честь воздадоша.

Миро и злато, вонное кадило

1175 во дарѣх ему от тѣх царей было;

Благогражданство они сотвориша,

яко почтиша.

И тебѣ, мѣсто царя всѣх приемшу,

и на престолѣ во России сѣдшу,

1180 Царю пресвѣтлый, миру подобает,

да дары дает.

Да несуть убо от всѣх кралей странных

множество даров тебѣ преизбранных;

Един другаго посел да варяет,

1185 чтити желает.

Твое же царство на трое дѣлится:

Афет, Сим и Хам в оном быти зрится,.

Благороднии, жрецы и селяне

здѣ христиане.

1190 Афет со миром пред тобою стает,

за тя и на смерть готовость являет.

Сим ти кадило вонное приносит,

бога бо просит,

Еже ти многа лѣта царствовати.

1195 Хам же ти злато желает даяти,

Еже есть вѣрно дани приносити,

работен быти.

Тако три сыны Ное раздѣлил есть,

особну службу комуждо вручил есть.

1200 Царство все тѣми хощет ти служити,

превѣрно быти.

Ты благохотство изволи прияти

за дар, а ко всѣм потщися являти

Милость царскую, да суть доброхотни

1205 вси и работни.

Вси же единым сердцем ти желают

жити вѣк долгий, тѣмже восклицают

Многая лѣта православному царю,

божию дару.

1210 Савска царица, егда услышаше,

яко премудрый царь Соломон бяше

Во Иудеи и яко от бога

дарования приял есть премнога,

Прия путь к нему со дары многими,

1215 с богатством злата, с каменми драгими,

Сладости зелей принесе к Сиону,

дары безцѣнны даде Соломону.

Тако и тебѣ, православный царю,

России богом данный государю,

1220 Престол отца ти славно восприемшу,

венец на главу, скипетр в руку вземшу,.

Царие мира вси да почитают,

многия дары ти да посылают,

Ищуще мира и любве с тобою,

1230 видяще, яко бог десницу твою

Высоку творит и мудрость дарует,

и ины тебѣ престолы готует.

Того свѣтлости аз твоей желаю,

а сам ся царстей милости вручаю,

1235 Моля прилѣжно, да мя не презриши,

но в кровѣ крилу твоею храниши,

Иже имам твой богомолец быти,

дондеже душа в тѣлѣ будет жити.

А бог всещедрый имать ти воздати,

1240 яже явиши на мнѣ благодати,

Воздаст на земли, возмездит и в небѣ,

вѣнец небесный мзда да будет тебѣ.

По темной нощи свѣтлый день бывает,

егда свѣтлое солнце востекает;

1245 Страхи и бѣдства далече гонзают,

егда свѣт солнца златый созерцают.

Ты нам пресвѣтлый день сотворил еси;

иже не древле денница был еси,

О божий даре, днес же точность солнца

1250 свѣтом имаши во вся стран ти конца,

Егда во вѣнцѣ царстем сияеши,

свѣтлость на люди ти изливаеши,

Восприем престол Русска государства,

достодолжный ти великаго царства.

1255 На нем же сѣди, богом утверженный,

державствуй скипетр десницѣ врученный

Здраво, щасливо чрез лѣта премнога, —

того ти молю от превѣчна бога.

Весь вѣк твой буди солнечно сияющ,

1260 свѣт благостыни во весь мир блистающ.

День в странах нощи тобою да будет,

к свѣту отца ти твой свѣт да прибудет.

Отец твой, яко Давыд, царствоваше,

Ты соломонски царствуй, солнце наше,

1265 Мирно и мудро, — бог же ти во помощь

на всяко время буди во день и в нощь.

Время слезам есть, веселию время,

иго Христово благо, легко бремя;

Дал вину слезам, но утѣшает,

1270 не в конец люди своя ослезяет.

Отял есть отца славна Алексия

Михайловича, царя Руси всея,

Но вмѣсто его изволил нам дати

пресвѣтла сына, еже царствовати,

1275 Тя, Феодора Алексиевича,

всея Росии истинна дѣдича.

Да содержиши скипетр и державу,

свѣтлу имаши венцем царским главу.

Что мы, видяще, печаль отлагаем,

1280 новую радость в сердцах зачинаем;

Очеса наша весело возносим

к свѣтлости твоей и господа просим,

Да даст ти выну всевеселу быти,

от всѣх изволит печалей хранити;

1285 Предѣлы царства да разпространяет,

грады и веси миром ограждает;

Воинским силам силу да дарует,

сам я во бранех да правителствует.

Яко с Наввиным сыном аггел бяше,

1290 егда из земля враги истребляше,

Тако с твоими да есть воеводы,

ратующими о цѣлость породы.

И яко той же за израилтяны

в дни Езекии сѣкл ассирианы,

1295 Сто осмьдесят пять тысящь поразил есть,

во нощь едину вѣрным пособил есть, —[17]

Тако в днех твоих за род христианский

да истребляет зол сонм агарянский,

Брани ищущий, мира нехотящий,

1300 но еже чуждо восхищати зрящий.

Тебѣ же господь да даст здраву быти,

многая лѣта в славѣ свѣтлѣй жити.

Ему же вечер слезы источает,

многажды утро того утѣшает.

1305 То в сие время России случися,

дѣлом явися.

Ибо недавно слезы проливахом,

царския смерти всеслезно рыдахом;

Время же сие нас возвеселило

1310 и бысть всѣм мило,

Яко яви нам богом данна

царя России свѣтло увѣнчанна.

О божий даре, убо ти от бога

чрез лѣта многа

1315 Жити желаем и преславну быти,

царство данное премудро правити,

Православную вѣру разширяти,

род прославляти.

Божия рука тя да укрѣпляет,

1320 во всяких путех тя да наставляет,

Да бы похвално долгий вѣк прежити

и в небо внити.

Радуйся, царю богом увѣнчанный,

миром священным свято помазанный!

1325 Радуйся, яко бог постави тебе

в Российстем царствѣ царя в мѣсто себе

И дал ти роды многими владѣти,

на престолѣ же очестем сѣдѣти.

Нынѣ ты Христов божий содѣянный,

1330 егда священным миром помазанный;

Нынѣ ты нам царь Христом утвердися,

вѣнец на главу ти егда взложися,

На честну честный, и егда царственый

скипетр десницѣ твоей бысть врученный,

1335 И внегда царским сакком украсися

и порфирою сияющь явися;

Крест елма честный на тя возложенный

да будет выну в щит ти божественный.

Тако тя лѣпо суща устроенна,

1340 яко аггела видим божественна,

Солнце образна, ему же вручил есть

бог рай, его же в Руси насадил есть, —

Церковь непщую, ея же хранитель

поставлен еси бодр и защититель.

1345 Тѣмже на тебе весь мир обращает

очеса своя и лик составляет

О славѣ твоей, от бога желая,

да приимеши всякая благая.

С ним же аз, раб твой, тѣх же ти желаю,

1350 гласом привѣтным вѣрно восклицаю:

Здравствуй, глаголю, царю православный,

на престолѣ ти буди миру явный

Премудростию царя Соломона,

силою паки славна Македона.

1355 Да яко има дары приношаху

от стран далеких и мира желаху,

Тако к свѣтлости вашей притекают,

множеством даров покой умоляют.

А иже горди восхотят пребыти,

1360 да изволит бог мечь твой изострити

На выя онѣх, да я преклониши,

божий намѣстник, гордыя смириши.

Мечь твой господень мечь да прозовется,

егда сонмь врагов онѣмь изсѣчется.

1365 Да течет скоро молнии подобно,

силою бога дѣйствуя угодно,

Вся покаряя чрез тебе правому

едину в тройцы богу небесному.

Ты слуга его должный промышляти,

1370 люди на службу ему обращати,

Иже невѣрством к врагу заблудиша

или ересми аду ся вручиша.

Сам бог на тыя будет в помощь тебѣ,

вѣнец побѣдный уготовит в небѣ,

1375 Десницу твою изволит крѣпити,

где солнце свѣтит, вездѣ ю славити.

Того свѣтлости аз твоей желаю,

молитвы к богу о сем возсылаю;

Молю и о том прещедраго бога,

1380 да ти дарует жити лѣта многа,

Праздну печалей преблагоденьственну,

а веселием присноисполненну.

Ты же изволи мене соблюдати,

яко отец твой, в своей благодати.

1385 Ей же аз мене смиренно вручаю,

при сем привѣтствѣ стопы ти лобзаю.

Сия привѣтства с всѣми желании

тщахся писати во уповании,

Яко не презрѣн с ними имам быти,

1390 иже на всяк час готов ти служити

Желах сим гуслѣм печатаным быти,

да бы им царску славу возгласити

По всей России и гдѣ суть словяне,

в чюждых далече странах христиане.

1395 Да в книгах идет слава во вся страны

царя пресвѣтла, иже богом данны.

И род российский да ся прославляет,

что стихотворцы свойственны питает.

Ничто бо тако славу разширяет,

1400 яко же печать, та бо разношает

Вездѣ и вѣком являет будущим

во книгах многих и заморем сущим.

Мало словенских стих досѣлѣ бяше,

поне да явит тыя время ваше

1405 В вашу же славу. Но отчаеваю,

рачителей бо тоя мало знаю.

Аще возмнит кто се быти убыток,

аз обѣщаю славу и прибыток.

Прибыток мимо; слава же есть благо,

1410 паче сокровищ честно же и драго;

Тою Александр и днесь животствует,

кто ону стяжа, во вѣк бышествует;

За ню же и Павел хотя умирати,

иже все злато вѣдѣ обругати; —

1415 Ту же тип носит. Убо подобает,

да и Россия славу разширяет

Не мечем токмо, но и скоротечным

типом, чрез книги сущым многовѣчным.

Но увы нравов! Иже истребляют,

1420 яже честный трудове раждают.

Не хощем с солнцем мирови сияти,

в тмѣ незнания любим пребывати.

Благородный, благочестивии,

государие премилостивии!

Не тако слово в памяти держится,

яко же аще что дѣлом явится.

5 Христову притчю дѣйством проявити

здѣ умыслихом и чином вершити.

О блуднѣм сынѣ вся рѣчь будет наша,

аки вещь живу, узрит милость ваша.

Всю на шесть частѣй притчю раздѣлихом,

10 по всяцей оных нѣчто примѣсихом

Утѣхи ради, ибо все стужает,

еже едино без премѣн бывает.

Изволте убо милость си явити,

очеса и слух к дѣйству приклонити:

15 Тако бо сладость будет обрѣтенна,

не токмо сердцам, но душам спасенна.

Велию ползу может притча дати,

токмо изволте прилѣжно внимати.

Благословен бог отнынѣ до вѣка,

20 иже от земля созда человѣка!

Ему честь, слава во вся вѣки буди,

яко преблаго своя правит люди!

Всѣх есть промыслник, их же есть создатель,

во благо время всѣх живых питатель.

25 Кто несумѣнно в него уповает,

того никако господь оставляет.

Сам искусих се во всяцей потребѣ,

егда уповах на живуща в небѣ.

Он мою юность добрѣ есть управил,

30 на живот честный в мирѣ мя наставил;

Он ми науку дал и разум благий;

даде богатства господь мой предрагий.

К тому изволил з своей благодати

вас на утѣху сынов мнѣ подати.

35 Им же богатства в наслѣдства премнога

суть ми врученна от всещедра бога;

Всѣх благ доволно: отчин, сребра, злата,

мнози раби суть и красна полата.

Токмо есть требѣ бога вам хвалити,

40 в любви и правдѣ ему послужити.

Благодарствие в сердцах ваших буди,

милость храните на нищыя люди;

Мир, смирение, кротость сохраняйте;

всякия злобы от вас отрѣвайте;

45 Мудрость стяжите, правда будет с вами,

лжя не изиди вашими устами.

С честными людми дружество держите,

прелюбытворцев далече бѣжите.

Бѣжите всѣх злых, яко люта змия,

50 вся заповѣди сохраните сия.

Тако изволит бог благословити

вас и даст многа в мирѣ лѣта жити.

Аз уже стар есмь, смерти ожидаю,

помощи от вас при кончинѣ чаю.

55 Все вам вручаю, токмо мене чтите,

между собою мир, любовь храните.

Отче мой драгий! Отче любезнѣйший!

Аз есмь по вся дни раб ти смиреннѣйший.

Не смерти скоро аз желаю тебѣ,

60 но лѣт премногих, як самому себѣ.

Честнии руцѣ твои лобызаю,

честь воздаяти должну обѣщаю.

Уст твоих слово в сердци моем выну

сохраню, яко подобает сыну.

65 На твое лице хощу выну зрѣти,

всю мою радость о тебѣ имѣти.

Во ничто злато и сребро вмѣняю,

паче сокровищ тебе почитаю.

С тобою самым изволяю жити,

70 неже всѣм златом обогащен быти.

Ты моя радость, ты ми совѣт благий,

ты моя слава, отче мой предрагий!

Вижду аз свѣтло, како нас любиши,

егда твоих благ общники твориши.

75 Нѣсм аз достоин тоя благодати,

за твой труд и нам бог то волит дати.

Благодарствие убо возсылаю

богу, а твои руцѣ лобызаю.

Любо приемля благословение,

80 обѣщая ти повиновение,

Желаю выну аз с тобою быти,

в обоем щасти с отцем моим жити.

Всякия труды готов подимати,

отчия воли прилѣжно слушати.

85 Весь аз твой раб есмь, рад выну служити,

в послушании живот мой кончити.

Буди на тебѣ благословение

бога всесилна за то смирение!

Ты обѣщался с нами пребывати,

90 бог имать на тя милость излияти.

Радости наша, сынов твоих славо,

между пречестных честнѣйшая главо,

Отче любезный, нам даный от бога,

живи в радости здрав на лѣта многа!

95 Благодарствие тебѣ возсылаем

за милость, юже днесь от тебе знаем,

Мудрость словес ти любезно прияхом,

в скрижалѣх сердец наших написахом.

Еже велиши, того мы желаем;

100 а бог поможет, тако уповаем.

Поучаеши нас благо пожити

и славу рода нашего множити, —

Вседушно того аз, сын твой, желаю,

попечение о том полагаю.

105 Брат мой любезный избра в дому жити,

славу в предѣлѣх малых заключити.

Бог ему в помощ при твоей старости

изжити лѣта красныя юности!

Вящшая мой ум в ползу промышляет,

110 славу ти в мир весь простерти желает.

Идѣже восток и гдѣ запад солнца,

славен явлюся во вся мира конца.

От мене дому разширится слава,

и радость примет отчая ти глава.

115 Точию изволь милость си явити,

уму моему помощ сотворити.

Вся нам даеши, нѣсть требѣ толико

часть мнѣ достойну отдаждь, мой владыко,

Ею же имам много пристяжати,

120 всякая страна имать нас познати.

Свѣщи под спудом не лѣпо стояти,

с солнцем аз хощу тещи и сияти.

Заключение видит ми ся быти, —

в отчинной странѣ юность погубити.

125 Бог волю дал есть: се птицы летают,

звѣрие в лѣсах волно пребывают.

И ты мнѣ, отче, изволь волю дати,

разумну сущу, весь мир посѣщати.

Твоя то слава и мнѣ слава будет,

130 до конца мира всяк нас не забудет.

И егда даст бог вездѣ посѣтити,

воскорѣ имам в дом ся возвратити

В славѣ и чести, — тогда радость тебѣ

будет на земли и аггелом в небѣ.

135 Не медли, отче! Часть ми изволь дати,

благословенство свое излияти.

Путь бо мой близ есть, мысль моя готова,

токмо от тебе жду отческа слова.

Даждь ми десницу твою цѣловати,

абие хощу путь мой начинати.

Добро есть славы, сыне мой, искати,

чуждыя страны с умом посѣщати.

За славу люди главу полагают,

морския волны с бѣдством преплавают.

145 Но то удобно таковым творити,

иже начаша славно в дому жити.

Не хощу тебѣ аз воли отяти,

юже всякому бог изволил дати;

Точию в дому вящше приучися,

150 странству удобен пред нами явися.

Сын юнѣйший к отцу

Отче любезный, время мнѣ губиши,

аще един день мене удержиши.

Пусти мя, егда охотно желаю:

славно ти будет, вѣрно обѣщаю.

155 Что стяжу в дому? Чему изучуся?

Лучше в странствии умом сбогачуся.

Юнших от мене отци посылают

в чюждыя страны, потом ся не кают.

Не держи, отче, молю со слезами!

160 Се пред твоими падаю ногами.

Печаль ми, чадо, велику твориши,

егда у мене отпуста молиши.

Вижду тя не у добрѣ изученна,

юности воля сия нѣсть спасенна.

165 Но да увѣси, коль добро слушати,

шествуй со богом, не хощу держати.

Часть ти достойну всѣх добр отлагаю,

храни опасно, тощно увѣщаю.

Раби вѣрнии! Злато несите,

170 многоцѣнныя одежды дадите,

Много колесниц сребром наполняйте,

турския кони уборно сѣдлайте.

Государю наш! Се на твоя слова

злато, одежды и вся суть готова.

175 Приемли, чадо, то благословение,

точию твори доброе строение.

Цѣлую руцѣ твоѣ, родителю!

Любо приемлю вся, благодѣтелю!

Возы и кони на дворѣ ставляйте,

180 вся потребная в путь уготовляйте.

Вся совершенна, ни мало медлихом,

по твоей воли дѣло совершихом.

Се, чадо мое, тя обогащаю,

по твоей воли тебе отпущаю

185 И подаю ти благословение:

имѣй о себѣ сам попечение.

Отче любезны! Се ти челом бию,

под твоѣ нозѣ преклоняю выю,

Благодаря тя за вся благодати,

190 яже ми еси изволил подати.

Любо цѣлую благословение,

с ним рад приемлю путетворение.

И тебе, брате любезный, лобзаю,

милости вашей сам ся поручаю.

195 В молитвах ваших мене поминайте,

крове своея не пренебрегайте.

Аз уже иду, вы мя проводите,

с благословенством в путь мя отпустите.

Щасливый путь ти от господа буди!

200 Вездѣ мя, молю, брате, не забуди.

Аз хощу выну любовь сохранити,

се иду со отцем тебе проводити.

Хвалю имя господне, свѣтло прославляю,

яко свободна себе нынѣ созерцаю.

205 Бѣх у отца моего, яко раб плѣненный,

во предѣлѣх домовых, як в турмѣ замкненный.

Ничто бяше свободно по воли творити:

ждах обѣда, вечери, хотяй ясти, пити;

Не свободно играти, в гости не пущано,

210 а на красная лица зрѣти запрещано.

Во всяком дѣлѣ указ, без того ничто же.

Ах! Колика неволя, о мой святый боже!

Отец, яко мучитель, сына си томляше,

ничесо же творити по воли даяше.

215 Нынѣ, слава богови, от уз свободихся,

егда в чуждую страну едва отмолихся.

Яко птенец из клетки на свѣт изпущенный,

желаю погуляти, тѣм быти блаженный.

Богатство имам много и доволно хлѣба,

220 нѣсть кому его ясти, слуг болши потреба.

Аще ся кто обрящет охотник служити,

имам сладцѣ питати и цѣнно платити.

Милостивый государю, аз хощу искати

таковых, иже тебѣ будут работати.

225 Друг ми будеши, не раб, егда со слугами

многими немедленно станеши пред нами.

Возми на путь сто рублев, за труды другое;

егда возвратишися, дам ти еще втрое.

Аз иду; ты, государь, изволь ожидати,

230 имам ти со слугами абие предстати.

Не добро богатому мало слуг имѣти.

С ким имам ясти, пити? Кто нам будет пѣти?

Прискорбно ми есть без слуг. Вина чашу дайте,

сами по десяти чаш полных испивайте.

235 Тѣ чаши испиваем мы за тебе, свѣта.

Буди, государь наш, здрав на многа лѣта!

Радуйся, государю! Свѣтло веселися!

Се раб твой со многими слуги возвратися.

Добрѣ, о благий рабе! Прими себѣ за то,

240 яко же обѣщах ти, сребро или злато.

Но повѣждь ми, что сии искусни творити.

Аз готов комуждо сто рублев платити.

За мзды воздаяние ручку ти цѣлую,

о сих людѣх искусных вѣрно извѣствую,

245 Яко вси суть потребни в пути, в людех, в дому:

пити, ясти, шутити обычай всякому.

Ха! ха! ха! ха! Ха! ха! ха! То добрии люди.

Слыш! Даждь им по сту рублев. Дай же, не забуди!

Преблагий государю! За то ся кланаем,

250 а во услугах наших вѣрность обѣщаем.

Добрѣ, слузи вѣрнии! Ну ж возвеселимся!

Общая днес нам радость, вином прохладимся.

Сядите, слузи мои! Вина наливайте,

а за наше здравие до дна испивайте!

255 Кто из вас в зерни умѣет, той сяди со мною;

прочий в карты, в тавлѣи играйте с собою;

Аще кто пройграется, та на мнѣ утрата;

а кто добре выйграет, за труд гривна злата.

Аз бывах искусен зернию играти,

260 с тобою, государь, не хощу дерзати.

Сяди, брате, со мною; дерзай, як у брата;

аще обыграеши, сто рублев заплата.

А вы, прочии друзи, весело играйте,

мои богатства, вземше, смѣло пройгравайте.

265 Добрѣ игравши, се сто рублев тебѣ;

но щастия ради напиймыся себѣ.

Еще ли, государь, изволиш играти?

Подвеселил есм себѣ, лучше пойду спати.

Востаните, братие, добрѣ послужите,

270 государя своего на постель ведите.

Встаним, друзи, и пойдем: время почивати,

уже благодѣтель наш изволил престати.

Чуждуся зѣло, вскую болит глава, —

постель бѣ мякка, не твердая лава.

275 К тому не помню, како положихся.

Негли та вина, яко утрудихся,

Вчера играя? А крѣпко стужает

болѣзнь, даже мир весь ся обращает.

Пил есмь опасно, а вѣм, что причина

280 прилѣжный промысл, о чести кручина.

Но, даст бог, будет все по мысли нашей,

вземшу искус благ мнѣ о службѣ вашей.

Государю наш, тому не чюдися: .

младый нрав, пити не научися.

285 Аз есмь искусен, вѣм, како лѣчити:

изволь скляницу днес вина испити.

О чести всуе трудиши ти главу,

наш лик разширит вездѣ твою славу.

Здравый совѣт твой. Вина мнѣ дадите,

290 себѣ по чашѣ того ж наполните.

Будите здрави, любезнии друзи!

Пий на много лѣт! Мы ти вѣрни слузи.

Бог ти заплати за твой совѣт здравый!

Вѣм у лѣкарство от болѣзни главы.

295 Еще на печаль кто врачество знает?

Молю, мнѣ службу в том да изъявляет.

Утѣхою печаль обычно лѣчити,

сладкоигрателем вели приходити.

Сам пригласи их скоро, да играют,

300 и пѣвцы купно сладцѣ воспѣвают.

Правда, утѣшно и сладцѣ играют,

и гласы пѣвцов зѣло украшают.

Достойны мзды суть, даждь им, слуго, злата,

да утѣшит их многая заплата.

305 Государю мой, злато расточися,

все сокровище уже истощися;

Не на свирѣли денег есть потреба,

было бы за что утро купить хлѣба.

Не буди скорбен, сии мои слузи

310 дадут нам взаим, як добрии друзи;

А мусикием отдаждь ту одежду.

Имам аз в друзѣх извѣстну надежду.

Государю наш, хлѣб твой понуждает,

да гортань моя правду ти вѣщает.

315 Господь и мешок — то приятель правы,

людская приязнь токмо для забавы.

Не дам ти взаим, не хощу служити,

не имаши бо чим нам заплатити.

И аз не мышлю болше работати,

320 не можеши мя без злата наяти.

И за сей мѣсяц изволь ми платити,

не хощу к тому аз с тобою быти.

Рад бых аз служил вѣрно твоей славѣ,

аще бы еси имѣл разум в главѣ.

325 Злато и разум слуги собирает;

кто буй, то трое купно погубляет.

Доволно служих, заплаты не чаю,

тѣмже от тебе днесь ся отдаляю;

А что заслужих, изволь ми отдати.

330 Аще не даси, буду награждати.

Не надѣяхомся мы того по тебѣ,

егда призвал еси нас служити себѣ.

Много обѣщався, ни мало платиши,

тѣм нас на услугах своих не узриши.

335 Кто сладко яст, пиет, вскорѣ обнищает,

то нам священное писмо извѣщает.

Кто отцу преслушник, не послушен богу;

за то тя обыдут скорби по премногу.

Не слузи мы тебѣ, сам будешь служити,

340 токмо бы кто хлѣбом изволил кормити.

Государю наш, челом бием тебѣ

за хлѣб и за соль, а слуг ищи себѣ;

Мы прочь отходим, пьяницу лишаем,

за свои труды сами мзду воздаем.

345 Чего, братия, у него нам ждати?

Что по том за труд возможем прияти?

Емлим останки, сам да погибает,

како в пред жити, юноша да знает.

Еще тебѣ милость сию сотворяем,

350 яко тя, безумна, в живых оставляем.

Моли бога за нас, не являй никому,

возвратися скоро к отцу до дому.

Увы мнѣ! Увы мнѣ! Что се сотвориша?

Вся вземше, едва мя жива оставиша.

355 Что сотворю? Пойду, велю их имати,

еда что сокровищ возмогу сыскати.

Горе мнѣ, бѣдну! Горе окаянну,

сущу безкровну, безпомощну, странну!

Людие злыи вси ми расхитиша,

360 ниже на пищу мало оставиша.

Глад стражду велий. Кто мя напитает?

Во странѣ чюждей никто мя не знает.

Едина токмо оста ми одежда,

на ту о хлѣбѣ послѣдня надежда.

365 Что ти, юноше? Кая печаль тебѣ?

Не сумнив буди, а мужайся себѣ.

Добрый человѣче! Кая ми отрада!

Вчера богат бѣх, днесь гибну от глада.

Глад мощно хлѣбом скоро утолити,

370 аз продам хлѣба, изволи купити;

За ту одежду хлѣб ти продаваю

и мою ризу свыше прилагаю.

Бог тя даде ми, человѣче благий!

Гладну ми сущу, хлѣб зѣло не драгий.

375 На моя риза, изволь свою дати,

нужда ми зѣлна урок чреву дати.

Яждь во здравие, хлѣбом насытися,

а чрева ради трудом приложися.

Аще хощеши вѣрно послужити,

380 имам тя добрым людем предъявити.

Вѣм человѣка богатаго зѣло,

тому на службу предадися смѣло.

Аггел ми еси, свято твое слово:

се мое сердце служити готово.

385 Откуду людие и что дѣло ваше,

яко в стрѣтение случистеся наше?

Аз куплю дѣю и тѣм ся питаю,

аще в товарѣх прибыль обрѣтаю.

Сей же клеврет мой хощет работати,

390 аще изволит кто его наяти.

Аще есть вѣрен, не должен никому,

приму служити до моего дому.

Слыш, человѣче! Хощеш ли служити

и во всем вѣрен господину быти?

396 Рад, государю, тебѣ работати

и во всем вѣрность мою сохраняти.

Даждь же ми руку на праведном словѣ

да будеш крѣпок нам по сей умовѣ.

И обѣ руцѣ рад ти простираю,

400 яко охочо тебѣ работаю.

Се уже крѣпок раб ми сотворися,

в дом мой на труды абие потщися.

Но вѣждь обычай, яко аз никому

в началѣ службы честны не дам в дому.

405 Иди на село; что велят, трудися,

на честну службу прежде заслужися.

Покажи руцѣ, да могу познати,

в кую тя службу подобает дати.

О, нѣсть мозолей, зѣло мягки длани!

410 Бодрствуй отселѣ, лѣности престани.

Слышиш, прикажчик! На село возмите,

а свини пасти ему прикажите.

Добро, государь мой! Творю веление,

прикажу ему свинѣй пасение.

415 Ходи к свинарем, паси купно с ними,

сия сапожки из ног твоих сними.

Премѣни кафтан, в хуждший облецися,

свиней погубити опасно блюдися.

Слыши ты, малче! Се товарищ тебѣ,

420 свинѣй сгубити блюдитеся себѣ.

Аз имам вскорѣ к вам ся возвратити

и по заслугам обѣма платити.

Ну, друже милый! Корито с рожцами

принеси сѣмо, постав пред свинями.

425 И аз есм гладей, а нѣсть ми что ясти,

рожци ми будут за всякия сласти.

Что дѣлаеши? Свини отгоняет?

Всуе от рожцев оны отбивает,

Се побѣгоша, аще погубити,

430 язвами хребта бѣднѣ заплатити.

Малци! Что у вас добраго ся дѣет?

Труд ваш о стадѣ еда добрѣ спѣет?

Государю мой! Винни пред тобою,

враг се, а не друг у свиний со мною:

435 Сам рожци ял есть, и свини разгнаше,

аз не вѣм, стадо гдѣ поутекаше.

Возмите врага, плетьми разсѣчите,

а потом свинѣй прилѣжно ищите.

Бий врага добрѣ, да вѣсть свое дѣло,

440 да пасет бодро, хранит стадо цѣло.

Ищи свинѣй, враже! Блюдис погубити,

ибо до смерти велю тя убити.

Увы мнѣ! Увы! Что имам творити?

Свини погубих, хотят мя убити.

445 Гладом и хладом весма помираю

и бичми лютѣ посѣчен бываю.

О коль бѣ благо в дому отчим быти,

нежели в страны чюждыя ходити!

Хлѣб у наемник тамо избывает,

450 а мое чрево гладом погибает.

Пойду ко отцу, до ног поклонюся,

глаголя сице, пред ним умилюся:

Отче! Согрѣших на небо и к тебѣ,

прими мя поне в наемника себѣ;

465 Нѣсмь бо достоин сын твой нарещися.

О даждь ми, боже, к отцу довлещися!

Туга велика сердце ми смущает,

лютая печаль душу исполняет.

Не вѣм, гдѣ сын мой юнший обратися,

460 иже от мене древле удалися.

Жив или умре, никто же вѣщает,

отчее сердце толма умирает.

Сыне мой драгий! Сыне возлюбленный!

Коль ты от мене еси удаленный!

465 Кая тя страна, сыне мой, питает?

Кто тя на разум правый наставляет?

Кто тя утѣшит, во печали суща,

никого сродна в тых странах имуща?

Кто бы ми дал то сына созерцати,

470 хотя бы нага в дом мой восприяти!

Радуйся, государь наш, и возвеселися!

Сын твой, иже погибл бѣ, к тебѣ приближися.

По благодати божей возвратися цѣло,

токмо не скорбен буди, что обнища зѣло.

475 Нага от бога приях того сына;

аще и днес наг, то мнѣ не кручина.

Кто его видѣ, идѣте, срѣтайте,

мнѣ о приходѣ абие вѣщайте.

Во вратѣх сын твой идет со слезами,

480 встыдится лютѣ худыми ризами.

Се идет в двери,

что не даш вѣры?

Сыне мой милы, отнюд нечаянный,

днесь паки богом ты ми дарованный!

485 Согрѣших, отче, на небо и к тебѣ,

прими мя поне в наемника себѣ.

Нѣсм удостоин сын твой нарещися,

ты яко отец умилостивися.

Одежду перву сыну изнесите,

490 честно на плеща его возложите.

Дадите перстень, на руку взлагайте,

первую почесть ему сотворяйте.

Сапоги дайте и взуйте на нозѣ,

вижду и, яко бяше в скорби мнозѣ.

495 Идите, телца тучна заколите,

со мною ядше, вси ся веселите,

Яко сын мой сей, иже мертв вмѣнися,

се, слава богу, жив к нам возвратися.

Иже погибл бѣ, обрѣтеся нынѣ.

500 Возвеселися всяк о моем сынѣ!

Слушай, отроче! Кия в дому лики?

Кая пѣния и пир превеликий?

Брат твой прииде, а отец заклати

повелѣ телца и всим ликовати,

505 Яко жив и здрав к нему возвратися,

аще всѣх благих в конец отщетися.

Аще брат в дому, аз не хощу внити,

при нем и с отцем мнѣ отнюд не жити.

Государю наш, изволь здѣ пождати,

510 аз отцу тайно имам вѣсть, подати.

Сыне мой прелюбезный! Гнѣвен ми не буди,

вниди в дом, обрадуй мя, и брата, и люди.

Отче мой драгий! Аз ти работаю

толика лѣта и не преступаю

515 Воли твоея, а ты мнѣ заклати

никогда даде и мала козляти,

Дабы со други мнѣ пир сотворити,

по трудех мало ся возвеселити.

А егда сей в дом сын твой возвратися,

520 иже имѣний даных отщетися,

Ядый с блудницы, ты велѣл заклати

телца питанна и пир совершати.

Сладкое чадо! Ты всегда со мною

не отлученно, и аз есьм с тобою;

525 Моя твоя суть, вся свободна тебѣ,

вели заклати, что изволиш себѣ.

Токмо радуйся и возвеселися,

яко сей брат твой к нама возвратися,

Иже мертв бяше, а жив соблюдеся;

530 уже изгибл бѣ и днесь обрѣтеся.

Вниди в радости в веселу полату,

прояви любовь обрѣтенну брату.

Не хощу ти, отче, преслушником быти,

иду аз с тобою любовь сотворити.

535 Боже превѣчный! Буди слава тебѣ,

его же хвалят аггели на небѣ!

Вся тварь да поет имени твоему,

да творит почесть господу своему,

Яко премудрѣ вся устроил еси,

540 яже на земли и что на небеси.

Мѣрилом правым вся суть размѣренна,

вся по естеству в чинѣ положенна.

Горѣ прекрасно свѣтила сияют,

землю пространну плоды украшают;

545 Рибами море зѣло исполнися,

воздух птицами красно удобрися.

Но изряднѣе род наш украшенны,

образом твоим зѣло удобренны,

Его же кто вѣсть добрѣ почитати,

550 удобен в небѣ вѣнец восприяти.

Аз же сын блудный здѣ обезчестихся,

образу тому позорник явихся,

Егда, не слушав отчя велѣния,

низвергох иго его правления.

555 Идох в чюждыя далекия страны,

погубих блудно мнѣ пожиток даны,

Обнищах в конец, пасох свинѣй стада

и рожцы ядох свиныя от глада.

А что пострадах, стыждуся являти:

560 то поминая, должен есмь плакати.

Найпаче долг мой есть бога хвалити,

что мя изволил на путь наставити,

Да, раскаявся, к отцу возвращуся,

горкими слезы пред ним умилюся.

565 То ми сотворшу, отец мой преблагий

не устыдися, яко придох нагий:

Приях любезно, над мою надежду,

в древнюю мене облече одежду,

Паки изволил мя обогатити,

570 во прежднѣй чести в дому своем быти.

О коль велика, отче, любовь твоя!

Недостойна бѣ тоя грубость моя.

О что воздам ти, отче мой сладчайший,

над всяку цѣну отче мой дражайший!

575 Ты мя восприят в гноище верженна,

ты мя оживи, бывша умерщвленна.

Что убо благо могу ти творити

и како имам тя благодарити

За толикия твоя благодати,

580 яже изволи на мя излияти!

Отец небесный сам ти воздарует,

иже всим милость за милость готует.

Аз же отселѣ хощу пребывати

в послушании, себе подчиняти;

585 Познах бо нынѣ юность дурность быти,

аще кто хощет без науки жити.

Каюся о злых, содѣянных мною,

о мой любезный отче, пред тобою.

Буду во притчю аз всѣм человѣком,

590 найпаче младым во вся вѣки вѣком.[20]

Но и отец мой не внѣ притчи будет:

кто его милость толику забудет?

Божия милость им вообразися.

Кто богу винен к богу возвратися!

595 Любезнѣ руцѣ и он простирает,

удобнѣ злобы грѣшником прощает,

За что аз его выну прославляю,

вашим милостем сицев поклон даю.

Благороднии, благочестивии,

600 государие премилостивии!

Видѣсте притчю, Христом изреченну,

по силѣ дѣлом днесь воображенну,

Дабы христовым словам в сердцах быти

глубже писанным, чтобы не забыти.

605 Юным се образ старѣйших слушати,

на младый разум свой не уповати;

Старим, да юных добрѣ наставляют,

ничто на волю младых не спущают.

Найпаче образ милости явися,

610 в нем же божая милость вобразися,

Да и вы богу в ней подражаете,

покаявшимся удобь прощаете.

Мы в сей притчи аще согрѣшихом,

ей, огорчити никого мыслихом;

615 Обаче, молим, изволте простити,

а нас в милости господстей хранити,

За что хранени будете от бога

в милости его на лѣта премнога.