Избранные сочинения

Радости сердце мое исполнися,

яко предстати тебе приключися,

Богом нам даный православный царю,

России всея верный гасподарю!

5 Яко бо солнце весь мир просвещает,

сице во сердцах радость проникает

От лица царска. Темже припадаем

к стопам ти, яже лобзати желаем.

Лобзаем верно крепку ти десницу,

10 юже имамы за светлу денницу,

Царю восточный, царю стран премногих,

нас избавивый от противник многих.

Прогнавы мрачны з Руси еретики,

будиж в победах преславен во веки!

15 Царствуй над всеми вселенныя страны,

из язык мрачных твори христианы.

Разшири веру, свет омрачным буди,

иже во смертней сени гибнут люди.

Настави на путь заблуждших ко аду,

20 даждь обижденным щедрую отраду.

Дабы им с нами сице воспевати:

много лет царю дай бог царствовати!

Кто не весело в солнце возглядает,

егда от него просвещен бывает!

25 Из красны весны кто не веселится,

в ню же благ всяких много исполнится!

Солнце твое нам зрится лице быти,

пресветлый царю! В твоем свете жити

Всегда желаем; в твоей благодати

30 скуднии будут изобиловати.

Як в весне красной. Темже веселуем,

егда прекрепку десницу целуем.

Ей же от бога молим быти данным

в державу вечну всем скипетром странным.

35 День есть веселый, день превожделенны,

вонь же предстати тебе сподобленны

Мы, твои раби, и десну лобзати,

веселым сердцем сице целовати:

Царствуй, пресилен, преславен повсюду,

40 где солнца запад и встает откуду!

Подай ти господь во мире сияти,

второму солнцу, всеми обладати,

Дабы тобою мрака избежати

всим родом земли и веру познати.

45 Буди Константин и Владимир миру,

сотри кумира и прослави веру.

Подай ти господь миром обладати,

а в век будущий в небе царствовати.

Уста ветийска глагола лишатся,

50 радости нашей егда присмотрятся,

Юже с твоего лица изчерпаем,

яко тя здрава, крепка соглядаем.

Пресветлый царю и непреборимый,

в кончинах земли ужасна славимый,

55 Кто светла солнца не виде на небе,

сей не зна славы, яже есть о тебе;

Земля и море, аер исполнь ея,

буди ж и в небе глас славы твоея.

Коль чысло много звезд пресветлых в небе,

60 вся солнца светом украшают себе;

Сице на земли всея Русси грады

чрез тя сияют, приемлют отрады.

Без тебе тма есть, як в мире без солнца,

свети ж нам всегда и будь оборонца

65 От всех противник, иже поношаху

благочестивым и зело стужаху.

Буди милосерд к державным ти градом,

яко обыче отец своим чадом.

А мы вси молим превечнаго бога,

70 да даст ти в мире лета жити многа.

Мойсий иногда на гору высоку

возшед бе с творцем миру прешироку

Беседова с ним, потом же оттуду

75 повращен, лучми сияя повсюду.

Мы твоей воли царстей послушливы

зде притекохом, чаем, яко и мы

Лучми твоея будем благодати

возвратившеся изрядно сияти.

Прочиим дабы по нас ревновати,

80 под твою милость всегда прибегати,

Ея же ради милость ти от бога,

молим, да дасться на лета премнога.

Солнце на землю не само действует,

но и луна с ним много изводствует.

85 Ты, царю, солнце, а луна Мария

царица. Ея лучами Россия

Премного светла и в нуждах охладу,

во скорбех скору приемлет отраду.

Ея молбами и труды по бозе

90 царство и грады состоят премнози.

Оныя щедрость бога преклоняет,

да всем милостив и прещедр бывает.

Темже пред нею главы преклоняем,

на многа лета сияти желаем.

95 Небом Россию нарещи дерзаю,

ибо планиты в оней обретаю.

Ты — солнце; луна — Мария царица;

Алексий светла царевичь денница,

Его же зари пресветло блистают,

100 его бо щастем врази упадают;

На имя его вси трепещут страхом,

бежат от славы, яко уповахом,

А щасте ему имать работати,

многия страны в область подавати,

105 Дабы яко солнце денница светила,

славою концы земли исполнила.

Утро денница обыче сияти,

о дни будущем благовествовати.

Вомале даст бог день пресветлый будет,

110 егда денницы светлости прибудет

В многих победах на вси страны света,

точию дай бог многа ему лета.

Зело Россия в светила богата,

як звездами небо; сице в ней полата

115 Царска сияет царевен лепотами,

звездам подобных всими добротами.

Спросить бы солнца, аще виде ровну,

яко Ирину в Руси Михайловну;

Ей подражает благородна Анна,

120 в единых стопах с нею Татианна,

Царя Михайла дщи Федоровича,

царств многих и князств истинна дедича.

Что Евдокиа з Марфою сестрою

есть в руском свете, аще не звездою!

125 Равне Софиа имать возсияти,

Екатерина також з благодати

Дателя всех благ. Твоя дщери, царю,

возраст приемше по вышняго дару.

И нова светлость новонарожденна

130 просветит сей мир Мария царевна.

Вси бо суть свет нам. Темже молим бога,

да соблюдет я на лета премнога.

Еще светила и аз усмотряю,

в них же солнечну силу обретаю.

135 Князи, боляре не мрачно сияют,

егда ти царску волю исполняют.

А зари светлы в онех суть тобою,

яко же солнцем в звездах со луною.

К тому не мала суть светила власти,

140 иже о твоем молебствуют щасти.

Да победитель будешь всего мира

и да исполнит мир тобою вера.

Всим того деля сердцы приветствуем,

на многа лета жити усердствуем.

145 Ничто во мире лучше, яко глава

крепкаго тела, егда умна, здрава:

Вся тамо чинна бывают строенна,

идеже глава умом есть бодрственна.

Велие тело славная Россия,

150 ты еси глава, царю велий, сия;

Глава же честным каменем венчанна,

волею бога на царства созданна.

Тобою тело царства окормися,

умом и храбрством въсюду прославися.

155 Блаженный град сей, царство все блаженно,

яко тобою зело укрепленно.

Удобней да есть солнце состреляти,

нежели град сей богом храним взяти

Богопротивным: кто любо на тебе,

160 прекрепка царя, вооружит себе!

Бог есть с тобою, с ним буди царь света;

царствуй над людми, им же многа лета.

Да благословит тя господь от Сиона

на высокочестнем месте царя фрона,

Да благоволит же венчанную главу

40 на премнога лета соблюдати здраву

И да не престанет на ню изливати

по вся дни своея даров благодати.

Яже содержит божия десница

благая людем, всех тебе царица

45 И мати твоя усердно желает,

молбы о тебе к богу возсылает.

Да царствуеши на многая лета

во светлых зарях превечнаго света.

Иоан имя благодать являет,

50 тоя ти брат твой от бога желает.

Да тою душа ти будет живленна

и рука царска выну укрепленна

Скипетр держати верных в правление,

на супостаты мечь во отмщение.

55 Петр имя камене толком знаменает,

камен же твердость собою являет.

Петр убо, брат твой, тверду тебе быти,

непозыблему на престоле жити

Радостно хощет и да победиши

60 вся Голиафы, егда я узриши.

Ирина мирная имать сказание;

от Ирины тебе сие жалание,

Да мир во державе твоей водворится,

да кождо о своих благих веселится,

65 Да мечы на рала будут прекованы,

сулицы на серпы будут пределаны.

Анна во имени своем радость носит;

радости царевна Анна тебе просит

От всещедра бога. Да радость отвсюду

70 тебе ся приносит, печаль ниоткуду.

От всех твоих предел да есть веселие,

яко бе в дни царя Августа велие.

Повелителница толк есть Татианы;

повелителства ти, царю богом данны,

75 Пресветла царевна усердно желает,

да твой странным царствам жезл повелевает;

Правлению его да ся покаряют,

иже за пространным морем обитают.

Евдокии толк есть благоволение;

во тоя к тебе, царю, доброхотение

Есть, да благих правых всех ся насытиши,

желаний сердца ти да ся не лишиши.

И да благоволит бог всещедрый в тебе,

по временном царстве даст и вечно в небе.

85 Марфа сказанием есть попечение;

Марфы убо тебе сие хотение:

Да господь всещедрый печется тобою,

управляя путь твой своею рукою,

И в попечениих твоих да поможет,

90 иже все что хощет преудобно может.

Имя София мудрость знаменает;

София сестра мудрости желает

Главе ти царстей, да мудро правиши

данное царство и вся светло зриши,

95 Яже во оном добре знати требе,

Первосудии всех дел сущу тебе.

Екатерина надежду являет,

истинну купно таже знаменает;

Надежды она молит ти у бога

100 и да истинна возсияет многа

В дни царствия ти, за ню же на небе

венец нетленный господь воздаст тебе.

Мария тожде есть, что владущая:

сестра хощет ти под солнцем сущая

105 Имети власти, да вся приведеши

ко Христу богу, души их спасеши.

Да Владимиру точен ся явиши,

многия роды верны сотвориши.

Феодосии имя си толкует —

110 богоданная: таже усердствует

Богом данному царю ти нашему,

да подаст господь скипетру твоему

Вся управляти, яже обливает

окиан роды, и неба желает.

120 Имя Наталиа есть день рождения;

сия желает тебе владения

Везде, где нужда есть от рождения

водою духом, богу въсынения;

Сих же множество родов безчисленно,

125 до конец земли в мире разширенно.

Что Феодора сестра ти желает,

царю пресветлый, имя изъявляет;

Седмочислием писмен заключенных,

седми ти хочет даров божественных.

130 Да теми будет душа исполненна,

царства держава всечинно строенна.

Архиереи богу служащии,

жертву безкровну ему носящии,

Вси ти всех благих усердно желают,

135 молбы о тебе выну возсылают

Ко богу щедру, да изволит дати

здраво, щасливо тебе царствовати.

Сигклит твой царский, светлая полата,

не ищет богатств, бисерей и злата

140 Тако, яко же царстей ти светлости

желает тощно здравия целости.

Занеже кождо готов умирати

за тя, всех главу, главу полагати.

Лик преподобных отец ти желает

145 и кождо, иже в церкви ся труждает,

Да яко солнце на небе светиши,

мрак неверия в мире истребиши

И вся ереси, веру же святую

распространиши во страну всякую.

150 Кто виде, како пчелы матери радеют,

вся ея правителством во ульи си деют,

За ню, яко за царя, главы полагают;

тако сии за тебе готови бывают

На вся бедства и на смерть; желают же тебе

155 и в мире царствовати и в премирном небе.

Любезная вещь: солнце яко освещает

и теплотою в мире плоды содевает.

Ты православных солнце за точная дела,

темже вси тя желаем здрава, славна, цела,

160 Светла, победоносна всегда созерцати,

дондеже господь даст ти миром обладати.

Буди же обладатель чрез время толико,

в подложенней скрижали возможно елико

Многа лета считати многими премены,

165 от среды на вся страны будиж без измены.

Желания благих всех чинов явленна

та да исполнит милость божественна.

И да приложит ина блага тебе,

яже ти жизни бог весть быти требе.

170 Аз приветствия благая вещаю,

гуслию сею любезне звяцаю.

В небеси многи старцем гусли бяху,

вси же едину всеми песнь пояху,

Аз единою многи песни пою

175 по числу гуслей их в честь царску твою,

Желая, да вси вернии ликуют,

царствия тебе верно приветствуют.

Ты же изволи любезно слушати,

мене в милости своей соблюдати.

180 По темной нощи день светлый бывает,

солнце лучами всю тму изтребляет.

Вся веселятся, егда освещенна

солнцем бывают и преукрашенна;

Человек грядет дела совершати,

185 их же не даде нощный мрак делати;

Птицы из гнезд си тощно излетают,

сладкими гласы аер исполняют;

Зверие токмо лютии хранятся,

злобы своея явити срамятся;

190 И чада нощи света дне гонзают,

дела лукава тмою покрывают.

Дне же сынове любят в свете жити

и делеса дне похвално творити;

Темже, егда день желанный приходит,

195 в сердцых их радость превелику родит;

И плаватели зело веселятся,

от волн злолютых егда свободятся.

Обще всем людем радость ся рождает,

егда по многих дождях возсияет

200 День доброведрный, аки узлащенный,

лучесы солнца ясно просвещенный.

Сицев день ныне в России сияет

и верных сердца светло озаряет.

Мрачная нощь бе во Российстей стране,

205 егда пресветлый царь во гробней яме,

Царь наш Алексий Михайловичь славный,

телом положен, царь всем родом явный.

Дождь слезный тогда на землю лияся,

яко свет очес наших сопрятася

210 Во земли мрачней и досаден бяше,

яко отял бе ведро сердца наше.

Днесь же день велий мирови сияет,

тму в свет и слезы в радость прелагает,

Егда от бога ты нам дарованный,

215 царь на престоле седиши венчанный.

О Феодоре Алексиевичю,

Российска царства истинный дедичу,

Солнце ты наше, убо день великий

тобою бысть нам от вечна владыки.

220 В нем же имамы безбедно ходити

на дела наша и радостно жити,

Яко же птенцы сладкогласно пети,

на твою светлость несмеженно зрети.

Токмо кто зверем дивым подобится,

225 той в своем ложи негли сохранится,

Не могий света твоего терпети,

яко не может сова солнца зрети.

И чада нощи, делатели злаго,

гонзати имут дне ти пресветлаго,

230 Да не во злобах будут обличени

и правдолюбне по делом суждени.

Чада же света живущии благо

возценят день твой паче злата драго,

Возлюбят в его сиянии жити,

235 делеса света на всяк час множити.

Толику дневи приемшу начало,

есть веселие во сердцах немало

Рабов ти верных, Феодоре царю,

царств и князств многих правый государю.

240 И вящше напред имать возрастати,

егда будеши день той озаряти

Лучесы доброт, богу возлюбленных,

миру полезных, тебе же спасенных.

Ибо имать я господь ти воздати

245 умножением света благодати

В мире сем мрачнем и в горнем Сионе

днем безсконечным при всесветлом фроне,

Их же благ верно аз тебе желаю,

о дни сем светлом приветство вещаю.

250 Многа светила богом сотворенна,

во препространном небе положенна.

Число их творец сам всесилный знает

и имена им сам же нарицает.

Звезд блюстители немногая знают,

255 силу и действо онех разсуждают.

Между же всеми седмь тех обретоша

светил, планиты яже нарекоша.

Их же два токмо велика реченна,

во дне и нощи область устроенна.

260 Луна во область нощи положися,

солнце же над днем богом поставися,

Еже в средине планит насажденно

и красотою света исполненно.

Источник света то ся именует,

265 яко светилом прочим обществует.

Свет свой и мир весь дивне озаряет,

вся ростущая с земли оживляет;

Течением си круг земной обходит,

всякия плоды из земля изводит

270 И в недрех ея крушцы устрояет,

из них же злато и сребро бывает.

Все, еже благо зде и красно зрится,

солнца то действом в мир изводится.

Темже кто велик солнцем нарицаем

275 и царя мира солнцу уравняем.

Что аще иным прилично бывает,

кто-либо хощет, то да разсуждает.

Царем российским во правду годствует,

да ся от верных кождо именует

280 Солнце за светлость истинныя веры,

ею же светит во мире без меры,

В ней же, егда ся дела прилагают

благая, солнце всяко сотворяют.

Солнце ты убо, царю богом данный,

285 будеши вправду от раб верных званный,

Ибо свет веры от тебе сияет

и делес благих надежда блистает.

Хощещи быти по бозе ревнитель,

православныя веры разширитель,

290 Хощеши раскол всякий изтребляти,

добронравие в людех насаждати,

Имаши умом везде обходити,

да яко солнце можеши живити

Всякое древо во раи мысленном,

295 в царствии твоем благонасажденном.

А яко солнце зодий претекает,

тако и тебе тещи подобает.

Дванадесять суть знамени в зодии,

в нем же суть люди и звери некии.

300 Первый есть агнец, в нем же ты ходиши,

повнегда тихость агнчую храниши,

Со незлобием в сердцы ти спряженну,

со смирением духа съединенну.

Вторый есть телец, вон же ты вшел еси,

305 егда царствия бремя приял еси,

Еже достоит не без труд носити,

бог же изволит в нем ти пособити.

Третие место близнецы заяша,

в них же царская будет светлость ваша,

310 Внегда потщится с Христом всегда жити

и сердцем своим ему во храм быти,

Иже сугуб есть бог бо совершенный,

в человечество наше облеченный.

В четвертом месте рак вспятный витает,

315 его же светлость ваша прехождает,

Егда от гнева к милости вспятится

и в день ярости к щедротам вратится.

На пятом месте лев есть утверженный,

зубы и ногты дивне въоруженный.

320 То знамение тогда ты пройдеши,

егда на враги престрашно пойдеши

И злогордыя будеши терзати,

ли понудиши гласа ти гонзати.

На месте шестом дева почивает,

325 юже пресветлость ваша присещает,

Егда ся молит Марии девице,

всех правоверных скорой заступнице.

Та да изволит тебе соблюдати,

яко же чадо свое хранит мати.

330 На седмом месте мерила блистают,

яже хранити правду поучают.

Ты, солнце наше, тая присетиши,

егда во царстве правду утвердиши,

Лесть же всякую велиши прогнати,

335 в нем же ти господь хощет помощь дати.

Осмое знамя скорпий, исполнь яда;

сего ти нужда есть попрати гада,

Общаго врага рода христианска,

змия глаголю люта агарянска,

340 Нан же ти господь сам в помощь буди,

да свободиши плененныя люди.

Местом девятым стрелец обладает,

иже из лука стрелы изпущает.

Того ты тогда славно претечеши,

345 егда скифския страны попереши,

Луки и стрелы онех сокрушити,

гордыя главы до стоп понудиши.

О, даждь то, боже, тебе совершиши,

что твой родитель умыслил творити!

350 В месте десятом есть козел рогатый,

по горам скачющь, власами богатый.

В Писании же козел знаменует

царя греческа, — Даниил сказует.[6]

Прилично убо ныне царствующа

355 в гречестей стране чрез козла скачюща

Есть сказывати: ибо есть рогатый

гордостию си и в тленных богатый;

По горам скачет, егда похищает,

яже высока в мире созерцает.

300 Господь же, иже гордым противится,

тебе на помощь молим да потщится,

Еже под твоя пречестныя ноги

гордости его преклонити роги.

Тогда ты козла славно претечеши,

365 егда тех рогов оному притреши.

Аз же и весма желаю сломити,

с власов и кожи в конец обнажити,

Да и всем телом в користь будет тебе.

О даждь то, боже, царствуяй на небе!

370 Первонадесят место державствует

водолий мокрый. В нем днесь бышествует

Твоя пресветлость, егда обладает,

что водолию горню подлегает.

Еще и тогда будеши ходити

375 по водолию, егда будут плыти

Ратници твои чрез морския воды

к престолну граду гречески породы,

Еже из скверных взяти агарянских

рук и предати до рук христианских

380 Твоих пресветлых. Того ти желаю,

молитвы к богу о сем возсылаю.

Второнадесять место рыбы знают,

яже во водах глубоких плавают.

Ты, солнце наше, тыя преходити

385 имаши, егда будеши ловити

Морем пространным роды окруженны,

яко же рыбы в водах заключенны,

И внегда невод твой будет ходити

по недрам морским и всяк род ловити

390 Рыб, тамо сущих, чистых же и скверных,

еже есть верных людей и неверных;

Ты же будеши оны избирати

чистыя тебе, скверны же вергати;

Еще и тогда, внегда ти крестити

395 дасть бог агарян и рыботворити

Из скверных змиев водами святыми,

да будут богу рыбами чистыми.

Яко же святый Владимир содея

в царстве пространном державы твоея.

400 Тако и тебе даждь бог сотворити,

где царь Констянтин изволил бе жити.

Веры ты его наследник всеправы,

буди стяжатель купно и державы.

Негли речет кто, яко неудобно

405 лву из зуб взяти овцу ни подобно,

Сицев да помнит, яко изхищаше

Давыд из зубов и лва убиваше;[7]

Тожде и лютым медведем творил есть,

овцы отемля и самы давил есть.

410 Аще Голиаф враг той зрится кому,

воспоминаю аз Давида тому,

Иже и мал быв порази велика,

яко с ним бяше царь всех и владыка;

Взем мечь свой ему отсекл горду главу,

415 воздаде богу пособлшему славу.

Тако и ныне что нам не подобно

видится быти богу есть удобно.

Токмо потребно есть давыдствовати,

со богом жити и в нем уповати.

420 То есть известно, враг голиафствует,

Христа истинна бога безчествует,

Глаголя хулы, в силе уповает,

на Исраиля нова наступает.

Ты, божий даре новоувенчанный,

425 буди от бога Давыд нам посланный,

Именем его ты вооружися,

деснице святей надежно вручися.

Да укрепит тя, даст торжествовати,

песнь победную светло воспевати!

430 Того весь сонмь наш верный ти желает,

руце молебно к богу воздезает.

Орел российский под небом летаяй,

гласом славы си весь мир исполняяй,

Егда во свете мысленнаго солнца

435 крилы си царства покрываше конца,

От вселютыя смерти устрелися

и в венценосной главе уязвися.

Низъпаде в яму, в земли ископанну,

сотвори слезми землю облиянну,

440 Остави венъцы честныя си главы,

яко бысть тако годе царю славы.

Пал есть и умре, но паки воскресе

во своем сыне, егда тя вознесе

Бог вместо его, еже царствовати,

445 скипетр российский преславно держати.

О божий даре, из царя рожденный

и на престоле царстем посажденный,

Живет наш орел в тебе и летает,

во солнце славы възлетети желает.

450 Яко же отец миру бяше явен,

тако даст господь ты будеши славен.

И выше даждь бог быти вознесенну

во честь и славу орлу обновленну.

Гоняше орел старый птицы многи,

455 прострет и младый на ня своя ноги,

Изряднее же на нощныя враны,

въгнездившияся в людей верных страны.

О орле вестно: той ся обновляет,

да бодрей к делу своему бывает.

460 Тако со орлом нашим сотворися,

ветхий во млада орла претворися,

Да действеннее во сыне летает,

на то и господь днесь тебе венчает,

Царю пресветлый, и хощет ти дати

465 силу на враги, еже я терзати.

О даждь то, боже, да тебе страшатся

врази, як орла вся птицы боятся;

Хищныя тогда на лов не дерзают,

егда близ быти орла познавают;

470 Даст бог, при тебе не будут дерзати,

иже обычай имеша хищати,

Во гнездах своих спрятатися будут,

да в них главами безбедны пребудут.

Вкрилися токмо пернатей блаженно,

475 в добрых перие делес божественно,

А господь даст ти пресилно летати,

многи користи от врагов взимати.

И яко орел обыче творити,

будеши твой лов с твоими делити,

480 Иже вслед воли твоея летают

и слово делом тощне исполняют.

А яко орел птенцы си вращает

к солнцу чювственну, да тако познает,

Кий не отроден естества пребудет

485 и кий ленивец непотребный будет:

Бодрый бо светло на солнце глядает,

отродный паки очеса смежает;

Тогда он бодра прилежит живити,

гнюснаго паки скоро изгнездити, —

490 Подобне и ты люди обратиши

к солнцу мысленну, да тако узриши,

Кто к свету Христу весело смотряет

или кто очи веры си смежает:

Светлозрящыя будеши щадити,

495 мрачноочныя велиши лечити,

Коллурием я духовным мазати,

еже о вере в Христа наставляти;

Аще же тогда будут слепствовати,

изгнездиши я из недр благодати.

500 Еще о орле и то поведают,

иже естества его свойства знают,

Яко обыче пред птенцы летати,

да ся научат на аер дерзати.

И ты, наш орле, чаем, сотвориши,

505 вся твоя люди к небу возбудиши

Веры и благих дел крилы летати

образ тобою изволиши дати.

На то бо еси Христом возвышенный

и на престоле царстем посажденный.

510 Летай ты убо пред нами высоко,

где есть бдящее неусыпно око

Крилами духа. А славы благия

пери крилама в концы вселенныя:

Да идеже свет солнечный сияет,

515 тако слава ти везде превитает.

Отчества гнездо покрывай крилами,

вражия сети разтерзай ногами.

Вси, иже на тя ковы умышляют,

в ногтех орла ти конец да познают.

520 Агарян гордых луна своя роги

да сложит кротко под орла ти ноги.

Инако взем я, луну да терзает

или во круглость ту да согибает.

Да кругла суща светом исполнится,

525 от тебе, солнца, вся да просветится

Благочестия светлыми лучами,

да иже врази, друзи будут с нами.

О свете присный, просвети вся страны,

даждь Феодору царю агаряны,

530 Божиим даром да будут владоми,

орлом российским к небеси ведоми.

Орел наш к тебе научит я зрети,

к солнцу истинны, яко своя дети.

Во чрепокожих неции считают,

535 инии в рыбах порфиру вменяют,

Яже прибыток людем содевает,

багр источает.

Им же овчая бывает крашена

волна, послежде во нити прядена,

540 Из них же сукно потом содевают,

багр нарицают

Или порфиру, бе же честна зело,

царское токмо покрываше тело

Или, им же царь изволяше дати,

545 леть бе ношати.

Изряднее же царем багряницы

во честь и в знамя ткаху человецы,

Яко изрядно багрян цвет блистает

и украшает.

550 То в древних вецех во похвалу бяше.

Лутшая строит царем время наше:

Златом, бисерми светло украшает,

честь умножает.

Тако ты ныне, царю, украшенный,

555 всем яко солнце еси проявленный.

Вси на тя очи своя обращают,

честь должну дают.

Не тако луна полная сияет,

егда лик светлых звезд ю окружает,

560 Яко лице ти от бога почтенно

есть украшенно.

Внешню красоту есть любезно зрети,

бог же внутрнюю велит нам имети,

Сиречь доброты, — тыя ему любезны,

565 суть бо небесны.

Твоя пресветлость, вем, яко желает,

да небесными бисеры сияет

Душа ти царска; темже и потщится

да украсится

570 Телесе паче; во еже бы богу

быти любимей в щедротах премногу;

Сам же изволит бог ти пособити

душу красити.

Тебе достоит тех бисер искати,

575 тщанием бог же изволит я дати,

Да ся оными преобогатиши,

преблаг явиши.

Внутрный человек твой есть облаченный

в Христа, егда вонь был еси крещенный;

580 Он ему риза, дела же ти блага

красота драга.

Си душевная твоя багряница,

юже украсит божия десница;

Брачна одежда имать быти тебе,

585 да яси в небе

Брака вечерю агнца безконечну,

сладостию же и временем вечну,

И да будеши тамо облеченный

в свет божественный.

590 Зде даждь ти господь светом благодати,

славы, крепости долгий век сияти

Везде, где солнце лучи си пущает

и согревает.

По земном царстве буди царь и в небе;

595 от славы в славу аз желаю тебе

Внити и во свет небесна чертога,

где радость многа.

Егда на кресте Христос царь висяше,

тогда содея спасение наше,

600 Врага же люта в конец победил есть,

смерть умертвил есть.

Того нам знамя креста даровати

благоволил есть, да бы побеждати

Тем враги наша безтщетно и цело,

605 в купе весело.

Его бо сила дивная действует,

чтущым распята победы дарствует.

Ей, божественно сие орудие

и оружиё!

610 Егда Констянтин Велий воеваше

со Максентием и ратно идяше,

Еже бы горда тиранна смирити

и победити,

Прият от бога знамение сие;

615 во известное своим спасение

Веле бо господь ему крест сдеяти,

с тем воевати.

Царь верив богу повеле делати

образы креста и ты утвержати

620 На знамениих, и бысть победитель,

врагу отмститель.

Ибо Максентий, елма кресты зряше,

абие страхом с полки объят бяше,

Чрез мост глубоких вод в бегство пустися,

но погрузися.

625 Оле чюдесе! Древле фараону

образом креста в мори, зде оному

Погружение не случаем бяше,

но бог творяше.

630 Того известна церковь, наша мати,

обыче цари крестом украшати,

Да силни будут вопреки стоящым,

брани хотящым.

Крест убо, царю благоверный, тебе

635 бог даровал есть ко всяцей потребе,

Да, егда его на персех носиши,

враги смириши

Силою того, и в защищение

тебе имаши сие знамение:

640 Щит бо известный крест есть божественный,

верным спасенный.

Креста образно Мойсий воздвизаше

руце ко богу, егда воеваше

Иисус враги, и дал бог попрати

645 злы супостаты.

Ты крест на перси честны воздвигл еси,

ум воздвизая к живущу в небеси,

Да в силе его враги победиши,

Христа славиши.

650 Врагом крест соблазн и поношение,

тебе он слава есть и хваление;

Тем на венцы и на персех носиши,

Христа в нем чтиши.

Род некрещеных очи отвращает,

655 идеже знамя креста созерцает;

Ты же близ сердца честный крест держиши,

Христа любиши.

За что Христос ти любовь си да явит,

противу врагом пресилна поставит;

660 Венцем победы тя да украшает

и прославляет.

В четырех странах мира превелика,

яже создал есть небесный владыка;

Восток и Запад, Юг, Север являют

665 крест, да тя знают.

Тамо сущии дары да приносят,

гаваонитски милости да просят.

О даждь то, Христе, верным созерцати,

тя величати!

670 Златыя венцы художник делает,

камением я честным украшает;

Но главы теми царския венчати,

есть то божия дело благодати;

Иже сим родом цари уставляет

676 и главы онех светло украшает.

Да вси знающе, яко живый в небе

царь царя в мире ко общей потребе

Сам утвержает, достойно бы чтили,

сущу от бога верно бы служили.

680 И аще зрится первый жрец венчаяй,

но сам есть господь тайно украшаяй;

Орудие есть в деле сем святитель,

во место бога самого служитель;

Сам же создател есть избратель главы

685 и возложитель честна венца славы.

Ибо и пророк богу причитает,

яко он венец славы возлагает;

Возлагает же, да знает венчанный,

яко на дело царско есть избранный,

690 Не празден быти, но труд полагати,

о всех безбедстве людей промышляти,

Хранити правду, бедных защищати,

на супостаты мечь остр извлекати.

Красен есть убо венец и блистает

695 светом каменей, но в тай увещает,

Яко, елико злато превосходит

вся крушцы, яже земля мати родит,

Толико царю должно лучшу быти

от всех, яже бог изволил вручити

700 Его державе. И тако светити

благими делы донели же жити

Паче всех людей, яко же сияют

камени, иже главу украшают,

Паче каменей верху земли сущих,

705 не сровнимую тым цену имущих.

И тягость злата, мню, то знаменает,

яко не легко бремя возлагает

На венценосца рука щедра бога,

ибо в царствии дела зело многа.

710 Аще и то есть в злате знамение,

не буди тебе о сем сумнение,

Пресветлый царю, от бога избранный

и венцем честным светло увенчанный.

Весть бог, елико кому налагати

715 бремя, да может удобно двизати;

К тому и сам он пособник бывает

тем, им же бремя велие взлагает.

Не сумнив буди, паче веселися,

яко сей венец на тя возложися.

720 К нему от бога ты предуставленный,

к нему от ложесн ты царских рожденный.

Не обременит он главы твоея,

бог не лишит тя помощи своея;

Хощет ти ону выну посылати,

725 в дому и в полцех свыше подаяти.

Лобзай венец сей, с ним на твою главу

бог изливает благодать и славу;

Иже от бога устроен есть в небе,

той днесь праведно воздадеся тебе.

730 Дар он есть божий, тебе украшаяй,

взаем от тебе светлость си общаяй.

Он тебе злато, ты адамант ему,

дар божий сличный дару божиему.

В нем же тя зряще точне восклицаем,

735 что Соломону восклицанно знаем:[8]

Дщери Сиона руска, изыдите,

царя во венце Феодора зрите,

Им же венча и церковь, наша мати,

еже многими царствы обладати!

740 Зряще же, руки воздейте до бога,

да даст венчанну царю лета многа.

Бог богов и всех господь, егда посылаше

Мойсия во Египет и бога прозваше

Его фараонова, жезл ему вручил есть

745 во знамение власти, ею же почтил есть.

Тем он божественная чюдеса творяше,

земля, море, воздух того послушаше.

Преславный царь Артаксеркс жезл держа рукою,

им же обыкл являти людем милость свою;

750 Елма бо непризванным внити не леть бяше,

к нему протягнением жезла проявляше

Милость, во еже к нему волно приступити,

яко же Есфире ту восхоте явити.

И правителем иным жезлы ся вручаху,

755 иже власть им над людми данну знаменаху.

Псаломник жезл правости и жезл правления

именует я в псалмех и жезл казнения.

Изряднее же царю жезл приличествует,

иже безчисленныя люди державствует,

760 Во знамение власти данныя от бога,

на право правление сонма людей многа.

Сей именем скипетра мудрыми прозванный,

бывает же из злата чистаго созданный,

И честным камением украшен бывает,

765 лепотою иныя жезлы превыжшает;

Царскому достоинству да будет приличен,

нижае сановитым людем не обычен.

Сицев твоей светлости царстей есть врученный

во знамение власти скипетр божественный,

770 Царю наш Феодоре, из царя рожденный,

из Алексия славна; венцем днес почтенный,

Той да будет в жезл силы дарованный тебе

от господа сил горних, живущаго в небе.

Да с ним данныя силы вси врази страшатся

775 и главами ногам ти царским поклонятся.

Мойсиева да будет при нем жезла сила,

яже бы церкве враги в мори погрузила.

Христоименитых же полки да спасает,

от гонителей лютых вся да свобождает.

780 Внутрь царствия да будет он жезл правления,

заблуждшым на истинны путь наставления,

Законопреступником язв наложения,

неисправивым паки главна казнения.

Тако он жезл правости будет пребывати,

785 знаяй мзду коемуждо по делом воздати.

Два жезла Захарии господь поминает,

„доброты“ и „схинизмы“ сам я нарицает.[9]

Твой един обе силе да содержит в себе:

доброты к правоверным, к неверным же требе,

790 Да будет жезл схинизмы, да бы я вязати

вервием учинения и Христу пленяти.

Противящымся паки да будет железны,

сокрушаяй я, яко сосуды скуделны.

Церковь православную он да утвержает,

795 волки овцохищныя вся да прогоняет.

Иеремиа пророк усмотре жезл бдящий.[10]

Твой жезл царский да будет на вся страны зрящий

Еже подданных своих нужды созерцати,

от обилия царска скудость исполняти,

800 В запределных же странах вся да усмотряет,

кто есть храняй дружество, кто яму копает.

Той, егда изволиши к верным протязати,

милость приступления к тебе проявляти,

Яко же Есфир конец жезла целоваше,

805 тако лобзати имать жезл твой сердце наше.

Его же ти желаем много лет держати,

даже сам восхощеши в небеси витати.

Егда царь на царство помазан бывает,

шуйце архиерей державу вручает.

810 Темже хотяй лице царско написати,

сей хранит обычай, да бы начертати

В деснице жезл скиптра, в шуйце же державу

обладающему землею во славу;

Ту же кругловидну вси изображают,

815 верху же ея крест честный утвержают;

В шуйце негли за то, яко добродесно

не земно богатство, но царство небесно.

И о мудрости то Приточник вествует,[11]

что в шуйце славу и богатство пестует.

820 Мудрости царие убо подобятся,

ими же земная во шуйце держатся.

Кругловидность ея негли знаменует,

яко в единой руце непостоянствует,

Но из руки в руку скоро претекает

825 и паки во ину, что коло, бегает.

Крест выше державы честный написуют,

крестом мир спасенный быти извествуют,

Или яко Христос верных си державу

вручествует в свою божественну славу.

830 Его ради славы тебе есть врученна

Руская держава, светом просвещенна,

Тебе, Феодору Алексиевичю,

многих царств, княжств и земль правом дедичу.

Ея же пространство хотяй описати

835 должен бы премного путешествовати;

Во стране Еуропстей, в далецей Азии

безчисленнии гради нам незнаемии.

Сокращенне убо хотяй ю познати

полну твою титлу да тщится читати:

840 Ей же да приложит господь и новыя

от стран супостатов Христовых многия,

Да твои пределы везде пространятся,

чюждии родове ти да поклонятся.

Вся же сия в славу тебе воцаривша,

845 на отче престоле честно посадивша.

А он взаим тебе изволит славити,

воинство державы твоея крепити

На полки вражия. К тому и на небе

венец славы вечны уготует тебе.

850 Соломон мудрый, егда царствоваше,

мир име велий и пребогат бяше,

Умысли престол себе соружити,

ему же точну в мире бы не быти.

И сооружи велий и богатый

855 из костей слоних и вне чисто златый.

Седалище две руце держасте,

от падения оно утверждасте.

Има же два лва страшна пристояста,

аже зрящыя на ня устрашаста.

860 Шестистепенный восход к нему бяше,

два скимна кийждо степень содержаше.

Вся сия зело люди устрашаху,

приступ ужасный к царю знаменаху.

Тако в законе ветсе подобаше:

865 закон бо страха тогда людем бяше.

Не тако ныне закон благодати

велит престолы царем созидати.

К добродетелем паче увещает,

неже богатство злата совещает;

870 Темже твой престол, царю правоверный,

ни костми слонов, ни златом безмерный,

Ниже многими лвами окруженный,

ни паче нужды есть многостепенный;

Да бы не выше меры страшну быти,

875 ни неприступну людем тебе жити.

Добродетелми паче он сияет,

яже пресветлый род ваш умножает.

Чистота сердца и любы ко богу

и ко подданным красоту премногу

880 Деет престолу; суд же утвержает,

ему же милость помощь прилагает.

В место лвов страшных многи благодати

окрест престола весте утвержати;

Восхождения в сердцах полагати,

885 да бы и в небо по оным ступати.

Сице престол ваш светло украшенный

мощно есть звати престол божественный.

На нем же седя, живи долго, царю,

тезоименне божиему дару,

890 И сияй светло вышняго дарами,

яко полна луна со звездами.

Паче же солнцу весма подобися,

в среде словесных планит ти светися,

Лучми твоими оны озаряя

895 и вся верныя тепле согревая.

Мы же имамы господа молити,

да благоволит престол утвердити

Ваш в царстве; яко течение солнца,

имать пребыти до всемирна конца.

900 Мафусаилов ты век да седиши,

потом небесно царство наследиши.

Донели же Москва во Оку впадает

и та во Волгу пространну вплывает,

Престол ваш царский недвижим да будет

905 и семя твое на нем да пребудет.

До их же времен рыбы вод желают

и пернатая воздух прелетают,

Дотоле дажд бог престолу стояти

и твоей крови на оном сияти.

910 И донели же от пресветла солнца

день ся раждает во вся мира конца,

Дотоле слава ваша да летает

везде, где воздух ветры си пущает.

Бог херувиму повеле хранити

915 земнаго рая, да бы приступити

Никто же дерзал, и мечь вручи ему,

слузе своему.

Меч же огненный, скоровращный зело,

да бы едемский сад пребывал цело

920 И древо жизни да бы некосненно

тому врученно.

Ты слуга божий верный, царю, еси

Точн херувиму, аще и в телеси;

Тебе от бога жива есть врученный

925 рай наш мысленный —

Церковь святая, в ней же процветает

древо животно, еже оживляет

Всех души верных выну же всецело

Христово тело.

930 Суть в ней и ина многа насажденна

бога рукою древеса мысленна —

Вси христиане, иже хвалу богу

дают премногу.

Сего ты рая херувим избранный,

935 темже ти мечь есть от господа данный,

Да бодрый его будеши хранитель

и защититель.

Железный убо мечь изволи дати.

но ты огненна должен содевати,

940 Да во ревности пламене палает,

тем ся вращает;

В ревности паки, яже есть по бозе,

не в ярости, но во любви мнозе.

Тако же горяй от рая ти прага

945 отсечет врага.

Есть обоюду мечь сей изощренный,

на обе стране да будет действенный,

Сиречь в державе и за предел праги

на злыя враги.

950 Вънутрь царства убо на зло творящия,

благих гражданом тщеты деющыя,

На иже закон божиих не знают,

казнь презирают;

Тыя бо весма должно изтребляти,

955 яко же волки в стаде избивати,

Да овец кротких ни когда снедают,

ниже вреждают.

Вне же пределов имать действовати

мечь твой на враги, сиречь я смиряти

960 Первее страхом да будут покорни,

а не упорни.

Аще же роги будут возносити,

мечем есть нужда раны наложити,

В конец же гордым и живот отяти,

965 гробом предати.

Найпаче иже врази суть Христови,

рай наш мысленный терзати готови;

Яко молния, мечь твой страшен буди

на тыя люди.

970 Яко Иисус Наувин посецаше

полки и цари и грады пленяше

Вражия мечем, тако дажд бог тебе,

живый на небе,

Скоро и силно мечем изтребляти

975 нехотящия Христа бога знати,

Полки их с вожды славно побеждати,

грады взимати.

Яко Самуил заклал ест Агага,

Тако даждь, боже, заклати ти врага

980 Паче всех горда, род же обратити

Христа хвалити.

Лукоратники даждь бог победити,

яко косою траву искосити

Или яко серп класы пожинает,

985 сонм да падает

Пред твоим мечем скифов некрещеных

или да видим Христови плененных.

Твоя же полки бог да сохраняет

и помощ дает.

990 Соломон в царстве егда утвердися,[12]

бог в Гаваоне спящему явися,

Веля у себе что хощет просити,

во благо жити.

Он же смиренно к богу глаголаше:

995 „Боже мой, твоя милость царство даше

Мне управляти, люд твой возлюбленный

сущь безчисленный.

Аз же отрочищь мал есмь и исхода

не свем моего, ниже знаю входа.

1000 Темже, молю тя, изволи ми дати

смысльнно вся знати,

Да могу что зло, что благо судити

и между людми правый суд творити“.

Се слово богу преугодно бяше,

1005 любо прияше.

Тем рече к нему: „Зане же просиши

мудрости, не лет премногих молиши,

Ни душ вражиих, ни богатства многа

от мене, бога,

1010 Се дам ти мудрость паче бывших прежде

царей и паче будущих послежде,

И той ти приложу славу и богатство

во твое царство“.

О щедрот бога! Многша даровал есть,

1015 неже Соломон от него желал есть.

Сице смиренным бог милость являет,

что требе дает.

А занеже ты точне смирен еси,

царь нашь, пред царем, живущим в небеси,

1020 Темижде дары изволит тя чтити,

мудрость дарити.

Даст ти богатства, приложит и славу;

смирившуюся вознесет он главу:

Его бо свойство смиренным даяти

1025 си благодати,

Их же ти церковь усердно желает,

молбы о тебе к богу возсылает.

И приложити многа лета просит,

руки возносит.

1030 Ты же изволи страж ей верен быти,

от сопротивных прилежно хранити,

За что известно возмеши от бога

лета премнога.

Самуил пророк елма помазаше

1035 Савла на царство и людем являше,

Сказа от бога изъбранна и быти

люди правити.

И рече к людем: „Се зрите избранна,

не имать весь род мужа ему равна“.

1040 Люди „да живет царь наш!“ вопияху

и ликоваху.

Днесь Иоаким пастырь Руси всея

миром помаза во место елея,

Царю пресветлый, и людем являше

1045 тя, солнце наше,

Глаголя быти тя богом изъбранна

и не имуща во всем роде равна.

Род же, тя видя, лики составляет,

богу честь дает,

1050 „Да живет царь наш, — светло восклицая, —

многая лета здраво пребывая!“.

Купно и аз с ним тожде восклицаю,

всех благ желаю.

На Соломонов верх от иерея

1055 Садока рог бе излиян елея,

Егда на царство маза и с Нафаном

исраилтяном.

Людие рогом абие трубиша,

„да живет царь наш Соломон!“ гласиша;

1060 Прочии рода тожде глаголаху,

лик составляху.

Днесь Иоаким патриарх святейший

на главу твою венец пречестнейший

Егда взложил есть, царю правоверный,

1065 лик есть безмерный,

Ибо людие гласно восклицают,

„да живет царь наш Феодор!“ глашают,

Прелагающе глас обща совета

на многа лета.

1070 Иоаса жрец Иодай венчал есть

венцем на царство и елей лиял есть

На главу его, людие же плескаху

. и глаголаху:

„Да живет царь наш Иоас в Сионе

1075 на превысоце отец своих фроне!“.

И бысть во граде тогда веселие

зело велие.[13]

Тебе же, царю благочестивейший,

днесь Иоаким патриарх святейший,

1080 Егда пречестным венцем украсил есть,

благословил есть.

И внегда миром священнымь мазаше,

духа святаго на тя призываше,

Да бы изволил души ти подати

1085 дар благодати.

Бог убо тогда на тя излиял есть

благодать духа святаго ти дал есть,

Укрепляя тя благо царствовати,

мир устрояти.

1090 Чесо мы ради бога прославляем,

„да живет царь наш!“ весело глашаем,

К тому многая лета глаголюще,

руки плещуще.

Сигклит исраилск видя Соломона

1095 приемша славу исраилска фрона,

Господу о нем славу возсылаше

и вопияше:

„Да ублажит бог имя Соломоне

и возвеличит фрон его в Сионе,

1100 Паче Давыда онаго родивша,

преславно живша!“.[14]

Подобне руский сигклит возглашает,

ублажения, царю, ти желает,

Да паче отца возрастеши в славу

1105 и странным в главу.

Егда Соломон в земли воцарися

и на престоле отче посадися,

Услышав Хирам царь тирск глаголаше

и восклицаше:

1110 „Благословен бог, изволивый дати

Давыду сына могша царствовати

Над сими людми умна Соломона

в земли Сиона!“.[15]

Подобне и мы ныне восклицаем,

1115 господа славим и благословляем.

Яко дарова Алексию царю,

земль государю,

Сына могуща скипетр восприяти,

многи народы мудро управляти,

1120 Тя, Феодора Алексиевича,

права дедича.

Его же ныне увенчанна зряще,

гласы возносим, господа моляще:

Даждь, боже, царю многа лета жити,

1125 щасливу быти!

Историограф Страбо нареченный

пишет во книзе, яко сочиненный

Столп во Египте от Аммона бяше,

мир удивляше.

1130 Бе бо поставлен на горе велице,

внутр же имел есть стройныя цевницы;

Нан же столп егда солнце возсияше,

сам песнь играше,

Аки целуя встекшее светило,

1135 еже пение и мир веселило

Близ горы живший. Ей, предивно дело,

слуху весело!

Тому аз столпу род уподобляю

руский преславный, ибо созерцаю

1140 Внутрь всех цевницы быти заключенны

и устроенны

Благих желаний, — ими же играют,

государем си всяких благ желают.

Яко же ныне делом исполнися,

1145 ВСЯК присмотрися.

Се бо егда ты, царю, солнце наше,

на престоле ти роду возсияше,

Абие песни нача он играти,

тя целовати.

1150 Песнь же есть сия: Живи многа лета,

о божий даре, в лучах вечна света!

Благополучен и здрав выну буди,

щади же люди.

Плиний, прилежный естеств изследитель

1155 и дивных в мире вещей изъявитель,

Олимпиину горницу изъяви,

весть нам остави;[16]

Яко та дивне устроена бяше,

седмкраты отглас гласу воздаяше.

1160 Ей, дивно дело, но нам не равнится,

ни подобится.

Ибо в России церковь восклицает

царю лет много, а отглас бывает

Без числа многий; ибо поет кождо

1165 много лет тожде.

Сам то слышиши, царю православный,

всякая уста глас издают явный,

Да живет царь наш здрав на многа лета

кроме навета.

1170 Царю всех веков во плоти рожденну,

вместо престола в яслех положенну,

Цари с Персиды дары принесоша,

честь воздадоша.

Миро и злато, вонное кадило

1175 во дарех ему от тех царей было;

Благогражданство они сотвориша,

яко почтиша.

И тебе, место царя всех приемшу,

и на престоле во России седшу,

1180 Царю пресветлый, миру подобает,

да дары дает.

Да несуть убо от всех кралей странных

множество даров тебе преизбранных;

Един другаго посел да варяет,

1185 чтити желает.

Твое же царство на трое делится:

Афет, Сим и Хам в оном быти зрится,.

Благороднии, жрецы и селяне

зде христиане.

1190 Афет со миром пред тобою стает,

за тя и на смерть готовость являет.

Сим ти кадило вонное приносит,

бога бо просит,

Еже ти многа лета царствовати.

1195 Хам же ти злато желает даяти,

Еже есть верно дани приносити,

работен быти.

Тако три сыны Ное разделил есть,

особну службу комуждо вручил есть.

1200 Царство все теми хощет ти служити,

преверно быти.

Ты благохотство изволи прияти

за дар, а ко всем потщися являти

Милость царскую, да суть доброхотни

1205 вси и работни.

Вси же единым сердцем ти желают

жити век долгий, темже восклицают

Многая лета православному царю,

божию дару.

1210 Савска царица, егда услышаше,

яко премудрый царь Соломон бяше

Во Иудеи и яко от бога

дарования приял есть премнога,

Прия путь к нему со дары многими,

1215 с богатством злата, с каменми драгими,

Сладости зелей принесе к Сиону,

дары безценны даде Соломону.

Тако и тебе, православный царю,

России богом данный государю,

1220 Престол отца ти славно восприемшу,

венец на главу, скипетр в руку вземшу,.

Царие мира вси да почитают,

многия дары ти да посылают,

Ищуще мира и любве с тобою,

1230 видяще, яко бог десницу твою

Высоку творит и мудрость дарует,

и ины тебе престолы готует.

Того светлости аз твоей желаю,

а сам ся царстей милости вручаю,

1235 Моля прилежно, да мя не презриши,

но в крове крилу твоею храниши,

Иже имам твой богомолец быти,

дондеже душа в теле будет жити.

А бог всещедрый имать ти воздати,

1240 яже явиши на мне благодати,

Воздаст на земли, возмездит и в небе,

венец небесный мзда да будет тебе.

По темной нощи светлый день бывает,

егда светлое солнце востекает;

1245 Страхи и бедства далече гонзают,

егда свет солнца златый созерцают.

Ты нам пресветлый день сотворил еси;

иже не древле денница был еси,

О божий даре, днес же точность солнца

1250 светом имаши во вся стран ти конца,

Егда во венце царстем сияеши,

светлость на люди ти изливаеши,

Восприем престол Русска государства,

достодолжный ти великаго царства.

1255 На нем же седи, богом утверженный,

державствуй скипетр деснице врученный

Здраво, щасливо чрез лета премнога, —

того ти молю от превечна бога.

Весь век твой буди солнечно сияющ,

1260 свет благостыни во весь мир блистающ.

День в странах нощи тобою да будет,

к свету отца ти твой свет да прибудет.

Отец твой, яко Давыд, царствоваше,

Ты соломонски царствуй, солнце наше,

1265 Мирно и мудро, — бог же ти во помощь

на всяко время буди во день и в нощь.

Время слезам есть, веселию время,

иго Христово благо, легко бремя;

Дал вину слезам, но утешает,

1270 не в конец люди своя ослезяет.

Отял есть отца славна Алексия

Михайловича, царя Руси всея,

Но вместо его изволил нам дати

пресветла сына, еже царствовати,

1275 Тя, Феодора Алексиевича,

всея Росии истинна дедича.

Да содержиши скипетр и державу,

светлу имаши венцем царским главу.

Что мы, видяще, печаль отлагаем,

1280 новую радость в сердцах зачинаем;

Очеса наша весело возносим

к светлости твоей и господа просим,

Да даст ти выну всевеселу быти,

от всех изволит печалей хранити;

1285 Пределы царства да разпространяет,

грады и веси миром ограждает;

Воинским силам силу да дарует,

сам я во бранех да правителствует.

Яко с Наввиным сыном аггел бяше,

1290 егда из земля враги истребляше,

Тако с твоими да есть воеводы,

ратующими о целость породы.

И яко той же за израилтяны

в дни Езекии секл ассирианы,

1295 Сто осмьдесят пять тысящь поразил есть,

во нощь едину верным пособил есть, —[17]

Тако в днех твоих за род христианский

да истребляет зол сонм агарянский,

Брани ищущий, мира нехотящий,

1300 но еже чуждо восхищати зрящий.

Тебе же господь да даст здраву быти,

многая лета в славе светлей жити.

Ему же вечер слезы источает,

многажды утро того утешает.

1305 То в сие время России случися,

делом явися.

Ибо недавно слезы проливахом,

царския смерти всеслезно рыдахом;

Время же сие нас возвеселило

1310 и бысть всем мило,

Яко яви нам богом данна

царя России светло увенчанна.

О божий даре, убо ти от бога

чрез лета многа

1315 Жити желаем и преславну быти,

царство данное премудро правити,

Православную веру разширяти,

род прославляти.

Божия рука тя да укрепляет,

1320 во всяких путех тя да наставляет,

Да бы похвално долгий век прежити

и в небо внити.

Радуйся, царю богом увенчанный,

миром священным свято помазанный!

1325 Радуйся, яко бог постави тебе

в Российстем царстве царя в место себе

И дал ти роды многими владети,

на престоле же очестем седети.

Ныне ты Христов божий содеянный,

1330 егда священным миром помазанный;

Ныне ты нам царь Христом утвердися,

венец на главу ти егда взложися,

На честну честный, и егда царственый

скипетр деснице твоей бысть врученный,

1335 И внегда царским сакком украсися

и порфирою сияющь явися;

Крест елма честный на тя возложенный

да будет выну в щит ти божественный.

Тако тя лепо суща устроенна,

1340 яко аггела видим божественна,

Солнце образна, ему же вручил есть

бог рай, его же в Руси насадил есть, —

Церковь непщую, ея же хранитель

поставлен еси бодр и защититель.

1345 Темже на тебе весь мир обращает

очеса своя и лик составляет

О славе твоей, от бога желая,

да приимеши всякая благая.

С ним же аз, раб твой, тех же ти желаю,

1350 гласом приветным верно восклицаю:

Здравствуй, глаголю, царю православный,

на престоле ти буди миру явный

Премудростию царя Соломона,

силою паки славна Македона.

1355 Да яко има дары приношаху

от стран далеких и мира желаху,

Тако к светлости вашей притекают,

множеством даров покой умоляют.

А иже горди восхотят пребыти,

1360 да изволит бог мечь твой изострити

На выя онех, да я преклониши,

божий наместник, гордыя смириши.

Мечь твой господень мечь да прозовется,

егда сонмь врагов онемь изсечется.

1365 Да течет скоро молнии подобно,

силою бога действуя угодно,

Вся покаряя чрез тебе правому

едину в тройцы богу небесному.

Ты слуга его должный промышляти,

1370 люди на службу ему обращати,

Иже неверством к врагу заблудиша

или ересми аду ся вручиша.

Сам бог на тыя будет в помощь тебе,

венец победный уготовит в небе,

1375 Десницу твою изволит крепити,

где солнце светит, везде ю славити.

Того светлости аз твоей желаю,

молитвы к богу о сем возсылаю;

Молю и о том прещедраго бога,

1380 да ти дарует жити лета многа,

Праздну печалей преблагоденьственну,

а веселием присноисполненну.

Ты же изволи мене соблюдати,

яко отец твой, в своей благодати.

1385 Ей же аз мене смиренно вручаю,

при сем приветстве стопы ти лобзаю.

Сия приветства с всеми желании

тщахся писати во уповании,

Яко не презрен с ними имам быти,

1390 иже на всяк час готов ти служити

Желах сим гуслем печатаным быти,

да бы им царску славу возгласити

По всей России и где суть словяне,

в чюждых далече странах христиане.

1395 Да в книгах идет слава во вся страны

царя пресветла, иже богом данны.

И род российский да ся прославляет,

что стихотворцы свойственны питает.

Ничто бо тако славу разширяет,

1400 яко же печать, та бо разношает

Везде и веком являет будущим

во книгах многих и заморем сущим.

Мало словенских стих доселе бяше,

поне да явит тыя время ваше

1405 В вашу же славу. Но отчаеваю,

рачителей бо тоя мало знаю.

Аще возмнит кто се быти убыток,

аз обещаю славу и прибыток.

Прибыток мимо; слава же есть благо,

1410 паче сокровищ честно же и драго;

Тою Александр и днесь животствует,

кто ону стяжа, во век бышествует;

За ню же и Павел хотя умирати,

иже все злато веде обругати; —

1415 Ту же тип носит. Убо подобает,

да и Россия славу разширяет

Не мечем токмо, но и скоротечным

типом, чрез книги сущым многовечным.

Но увы нравов! Иже истребляют,

1420 яже честный трудове раждают.

Не хощем с солнцем мирови сияти,

в тме незнания любим пребывати.

Благородный, благочестивии,

государие премилостивии!

Не тако слово в памяти держится,

яко же аще что делом явится.

5 Христову притчю действом проявити

зде умыслихом и чином вершити.

О блуднем сыне вся речь будет наша,

аки вещь живу, узрит милость ваша.

Всю на шесть частей притчю разделихом,

10 по всяцей оных нечто примесихом

Утехи ради, ибо все стужает,

еже едино без премен бывает.

Изволте убо милость си явити,

очеса и слух к действу приклонити:

15 Тако бо сладость будет обретенна,

не токмо сердцам, но душам спасенна.

Велию ползу может притча дати,

токмо изволте прилежно внимати.

Благословен бог отныне до века,

20 иже от земля созда человека!

Ему честь, слава во вся веки буди,

яко преблаго своя правит люди!

Всех есть промыслник, их же есть создатель,

во благо время всех живых питатель.

25 Кто несуменно в него уповает,

того никако господь оставляет.

Сам искусих се во всяцей потребе,

егда уповах на живуща в небе.

Он мою юность добре есть управил,

30 на живот честный в мире мя наставил;

Он ми науку дал и разум благий;

даде богатства господь мой предрагий.

К тому изволил з своей благодати

вас на утеху сынов мне подати.

35 Им же богатства в наследства премнога

суть ми врученна от всещедра бога;

Всех благ доволно: отчин, сребра, злата,

мнози раби суть и красна полата.

Токмо есть требе бога вам хвалити,

40 в любви и правде ему послужити.

Благодарствие в сердцах ваших буди,

милость храните на нищыя люди;

Мир, смирение, кротость сохраняйте;

всякия злобы от вас отревайте;

45 Мудрость стяжите, правда будет с вами,

лжя не изиди вашими устами.

С честными людми дружество держите,

прелюбытворцев далече бежите.

Бежите всех злых, яко люта змия,

50 вся заповеди сохраните сия.

Тако изволит бог благословити

вас и даст многа в мире лета жити.

Аз уже стар есмь, смерти ожидаю,

помощи от вас при кончине чаю.

55 Все вам вручаю, токмо мене чтите,

между собою мир, любовь храните.

Отче мой драгий! Отче любезнейший!

Аз есмь по вся дни раб ти смиреннейший.

Не смерти скоро аз желаю тебе,

60 но лет премногих, як самому себе.

Честнии руце твои лобызаю,

честь воздаяти должну обещаю.

Уст твоих слово в сердци моем выну

сохраню, яко подобает сыну.

65 На твое лице хощу выну зрети,

всю мою радость о тебе имети.

Во ничто злато и сребро вменяю,

паче сокровищ тебе почитаю.

С тобою самым изволяю жити,

70 неже всем златом обогащен быти.

Ты моя радость, ты ми совет благий,

ты моя слава, отче мой предрагий!

Вижду аз светло, како нас любиши,

егда твоих благ общники твориши.

75 Несм аз достоин тоя благодати,

за твой труд и нам бог то волит дати.

Благодарствие убо возсылаю

богу, а твои руце лобызаю.

Любо приемля благословение,

80 обещая ти повиновение,

Желаю выну аз с тобою быти,

в обоем щасти с отцем моим жити.

Всякия труды готов подимати,

отчия воли прилежно слушати.

85 Весь аз твой раб есмь, рад выну служити,

в послушании живот мой кончити.

Буди на тебе благословение

бога всесилна за то смирение!

Ты обещался с нами пребывати,

90 бог имать на тя милость излияти.

Радости наша, сынов твоих славо,

между пречестных честнейшая главо,

Отче любезный, нам даный от бога,

живи в радости здрав на лета многа!

95 Благодарствие тебе возсылаем

за милость, юже днесь от тебе знаем,

Мудрость словес ти любезно прияхом,

в скрижалех сердец наших написахом.

Еже велиши, того мы желаем;

100 а бог поможет, тако уповаем.

Поучаеши нас благо пожити

и славу рода нашего множити, —

Вседушно того аз, сын твой, желаю,

попечение о том полагаю.

105 Брат мой любезный избра в дому жити,

славу в пределех малых заключити.

Бог ему в помощ при твоей старости

изжити лета красныя юности!

Вящшая мой ум в ползу промышляет,

110 славу ти в мир весь простерти желает.

Идеже восток и где запад солнца,

славен явлюся во вся мира конца.

От мене дому разширится слава,

и радость примет отчая ти глава.

115 Точию изволь милость си явити,

уму моему помощ сотворити.

Вся нам даеши, несть требе толико

часть мне достойну отдаждь, мой владыко,

Ею же имам много пристяжати,

120 всякая страна имать нас познати.

Свещи под спудом не лепо стояти,

с солнцем аз хощу тещи и сияти.

Заключение видит ми ся быти, —

в отчинной стране юность погубити.

125 Бог волю дал есть: се птицы летают,

зверие в лесах волно пребывают.

И ты мне, отче, изволь волю дати,

разумну сущу, весь мир посещати.

Твоя то слава и мне слава будет,

130 до конца мира всяк нас не забудет.

И егда даст бог везде посетити,

воскоре имам в дом ся возвратити

В славе и чести, — тогда радость тебе

будет на земли и аггелом в небе.

135 Не медли, отче! Часть ми изволь дати,

благословенство свое излияти.

Путь бо мой близ есть, мысль моя готова,

токмо от тебе жду отческа слова.

Даждь ми десницу твою целовати,

абие хощу путь мой начинати.

Добро есть славы, сыне мой, искати,

чуждыя страны с умом посещати.

За славу люди главу полагают,

морския волны с бедством преплавают.

145 Но то удобно таковым творити,

иже начаша славно в дому жити.

Не хощу тебе аз воли отяти,

юже всякому бог изволил дати;

Точию в дому вящше приучися,

150 странству удобен пред нами явися.

Сын юнейший к отцу

Отче любезный, время мне губиши,

аще един день мене удержиши.

Пусти мя, егда охотно желаю:

славно ти будет, верно обещаю.

155 Что стяжу в дому? Чему изучуся?

Лучше в странствии умом сбогачуся.

Юнших от мене отци посылают

в чюждыя страны, потом ся не кают.

Не держи, отче, молю со слезами!

160 Се пред твоими падаю ногами.

Печаль ми, чадо, велику твориши,

егда у мене отпуста молиши.

Вижду тя не у добре изученна,

юности воля сия несть спасенна.

165 Но да увеси, коль добро слушати,

шествуй со богом, не хощу держати.

Часть ти достойну всех добр отлагаю,

храни опасно, тощно увещаю.

Раби вернии! Злато несите,

170 многоценныя одежды дадите,

Много колесниц сребром наполняйте,

турския кони уборно седлайте.

Государю наш! Се на твоя слова

злато, одежды и вся суть готова.

175 Приемли, чадо, то благословение,

точию твори доброе строение.

Целую руце твое, родителю!

Любо приемлю вся, благодетелю!

Возы и кони на дворе ставляйте,

180 вся потребная в путь уготовляйте.

Вся совершенна, ни мало медлихом,

по твоей воли дело совершихом.

Се, чадо мое, тя обогащаю,

по твоей воли тебе отпущаю

185 И подаю ти благословение:

имей о себе сам попечение.

Отче любезны! Се ти челом бию,

под твое нозе преклоняю выю,

Благодаря тя за вся благодати,

190 яже ми еси изволил подати.

Любо целую благословение,

с ним рад приемлю путетворение.

И тебе, брате любезный, лобзаю,

милости вашей сам ся поручаю.

195 В молитвах ваших мене поминайте,

крове своея не пренебрегайте.

Аз уже иду, вы мя проводите,

с благословенством в путь мя отпустите.

Щасливый путь ти от господа буди!

200 Везде мя, молю, брате, не забуди.

Аз хощу выну любовь сохранити,

се иду со отцем тебе проводити.

Хвалю имя господне, светло прославляю,

яко свободна себе ныне созерцаю.

205 Бех у отца моего, яко раб плененный,

во пределех домовых, як в турме замкненный.

Ничто бяше свободно по воли творити:

ждах обеда, вечери, хотяй ясти, пити;

Не свободно играти, в гости не пущано,

210 а на красная лица зрети запрещано.

Во всяком деле указ, без того ничто же.

Ах! Колика неволя, о мой святый боже!

Отец, яко мучитель, сына си томляше,

ничесо же творити по воли даяше.

215 Ныне, слава богови, от уз свободихся,

егда в чуждую страну едва отмолихся.

Яко птенец из клетки на свет изпущенный,

желаю погуляти, тем быти блаженный.

Богатство имам много и доволно хлеба,

220 несть кому его ясти, слуг болши потреба.

Аще ся кто обрящет охотник служити,

имам сладце питати и ценно платити.

Милостивый государю, аз хощу искати

таковых, иже тебе будут работати.

225 Друг ми будеши, не раб, егда со слугами

многими немедленно станеши пред нами.

Возми на путь сто рублев, за труды другое;

егда возвратишися, дам ти еще втрое.

Аз иду; ты, государь, изволь ожидати,

230 имам ти со слугами абие предстати.

Не добро богатому мало слуг имети.

С ким имам ясти, пити? Кто нам будет пети?

Прискорбно ми есть без слуг. Вина чашу дайте,

сами по десяти чаш полных испивайте.

235 Те чаши испиваем мы за тебе, света.

Буди, государь наш, здрав на многа лета!

Радуйся, государю! Светло веселися!

Се раб твой со многими слуги возвратися.

Добре, о благий рабе! Прими себе за то,

240 яко же обещах ти, сребро или злато.

Но повеждь ми, что сии искусни творити.

Аз готов комуждо сто рублев платити.

За мзды воздаяние ручку ти целую,

о сих людех искусных верно извествую,

245 Яко вси суть потребни в пути, в людех, в дому:

пити, ясти, шутити обычай всякому.

Ха! ха! ха! ха! Ха! ха! ха! То добрии люди.

Слыш! Даждь им по сту рублев. Дай же, не забуди!

Преблагий государю! За то ся кланаем,

250 а во услугах наших верность обещаем.

Добре, слузи вернии! Ну ж возвеселимся!

Общая днес нам радость, вином прохладимся.

Сядите, слузи мои! Вина наливайте,

а за наше здравие до дна испивайте!

255 Кто из вас в зерни умеет, той сяди со мною;

прочий в карты, в тавлеи играйте с собою;

Аще кто пройграется, та на мне утрата;

а кто добре выйграет, за труд гривна злата.

Аз бывах искусен зернию играти,

260 с тобою, государь, не хощу дерзати.

Сяди, брате, со мною; дерзай, як у брата;

аще обыграеши, сто рублев заплата.

А вы, прочии друзи, весело играйте,

мои богатства, вземше, смело пройгравайте.

265 Добре игравши, се сто рублев тебе;

но щастия ради напиймыся себе.

Еще ли, государь, изволиш играти?

Подвеселил есм себе, лучше пойду спати.

Востаните, братие, добре послужите,

270 государя своего на постель ведите.

Встаним, друзи, и пойдем: время почивати,

уже благодетель наш изволил престати.

Чуждуся зело, вскую болит глава, —

постель бе мякка, не твердая лава.

275 К тому не помню, како положихся.

Негли та вина, яко утрудихся,

Вчера играя? А крепко стужает

болезнь, даже мир весь ся обращает.

Пил есмь опасно, а вем, что причина

280 прилежный промысл, о чести кручина.

Но, даст бог, будет все по мысли нашей,

вземшу искус благ мне о службе вашей.

Государю наш, тому не чюдися: .

младый нрав, пити не научися.

285 Аз есмь искусен, вем, како лечити:

изволь скляницу днес вина испити.

О чести всуе трудиши ти главу,

наш лик разширит везде твою славу.

Здравый совет твой. Вина мне дадите,

290 себе по чаше того ж наполните.

Будите здрави, любезнии друзи!

Пий на много лет! Мы ти верни слузи.

Бог ти заплати за твой совет здравый!

Вем у лекарство от болезни главы.

295 Еще на печаль кто врачество знает?

Молю, мне службу в том да изъявляет.

Утехою печаль обычно лечити,

сладкоигрателем вели приходити.

Сам пригласи их скоро, да играют,

300 и певцы купно сладце воспевают.

Правда, утешно и сладце играют,

и гласы певцов зело украшают.

Достойны мзды суть, даждь им, слуго, злата,

да утешит их многая заплата.

305 Государю мой, злато расточися,

все сокровище уже истощися;

Не на свирели денег есть потреба,

было бы за что утро купить хлеба.

Не буди скорбен, сии мои слузи

310 дадут нам взаим, як добрии друзи;

А мусикием отдаждь ту одежду.

Имам аз в друзех известну надежду.

Государю наш, хлеб твой понуждает,

да гортань моя правду ти вещает.

315 Господь и мешок — то приятель правы,

людская приязнь токмо для забавы.

Не дам ти взаим, не хощу служити,

не имаши бо чим нам заплатити.

И аз не мышлю болше работати,

320 не можеши мя без злата наяти.

И за сей месяц изволь ми платити,

не хощу к тому аз с тобою быти.

Рад бых аз служил верно твоей славе,

аще бы еси имел разум в главе.

325 Злато и разум слуги собирает;

кто буй, то трое купно погубляет.

Доволно служих, заплаты не чаю,

темже от тебе днесь ся отдаляю;

А что заслужих, изволь ми отдати.

330 Аще не даси, буду награждати.

Не надеяхомся мы того по тебе,

егда призвал еси нас служити себе.

Много обещався, ни мало платиши,

тем нас на услугах своих не узриши.

335 Кто сладко яст, пиет, вскоре обнищает,

то нам священное писмо извещает.

Кто отцу преслушник, не послушен богу;

за то тя обыдут скорби по премногу.

Не слузи мы тебе, сам будешь служити,

340 токмо бы кто хлебом изволил кормити.

Государю наш, челом бием тебе

за хлеб и за соль, а слуг ищи себе;

Мы прочь отходим, пьяницу лишаем,

за свои труды сами мзду воздаем.

345 Чего, братия, у него нам ждати?

Что по том за труд возможем прияти?

Емлим останки, сам да погибает,

како в пред жити, юноша да знает.

Еще тебе милость сию сотворяем,

350 яко тя, безумна, в живых оставляем.

Моли бога за нас, не являй никому,

возвратися скоро к отцу до дому.

Увы мне! Увы мне! Что се сотвориша?

Вся вземше, едва мя жива оставиша.

355 Что сотворю? Пойду, велю их имати,

еда что сокровищ возмогу сыскати.

Горе мне, бедну! Горе окаянну,

сущу безкровну, безпомощну, странну!

Людие злыи вси ми расхитиша,

360 ниже на пищу мало оставиша.

Глад стражду велий. Кто мя напитает?

Во стране чюждей никто мя не знает.

Едина токмо оста ми одежда,

на ту о хлебе последня надежда.

365 Что ти, юноше? Кая печаль тебе?

Не сумнив буди, а мужайся себе.

Добрый человече! Кая ми отрада!

Вчера богат бех, днесь гибну от глада.

Глад мощно хлебом скоро утолити,

370 аз продам хлеба, изволи купити;

За ту одежду хлеб ти продаваю

и мою ризу свыше прилагаю.

Бог тя даде ми, человече благий!

Гладну ми сущу, хлеб зело не драгий.

375 На моя риза, изволь свою дати,

нужда ми зелна урок чреву дати.

Яждь во здравие, хлебом насытися,

а чрева ради трудом приложися.

Аще хощеши верно послужити,

380 имам тя добрым людем предъявити.

Вем человека богатаго зело,

тому на службу предадися смело.

Аггел ми еси, свято твое слово:

се мое сердце служити готово.

385 Откуду людие и что дело ваше,

яко в стретение случистеся наше?

Аз куплю дею и тем ся питаю,

аще в товарех прибыль обретаю.

Сей же клеврет мой хощет работати,

390 аще изволит кто его наяти.

Аще есть верен, не должен никому,

приму служити до моего дому.

Слыш, человече! Хощеш ли служити

и во всем верен господину быти?

396 Рад, государю, тебе работати

и во всем верность мою сохраняти.

Даждь же ми руку на праведном слове

да будеш крепок нам по сей умове.

И обе руце рад ти простираю,

400 яко охочо тебе работаю.

Се уже крепок раб ми сотворися,

в дом мой на труды абие потщися.

Но веждь обычай, яко аз никому

в начале службы честны не дам в дому.

405 Иди на село; что велят, трудися,

на честну службу прежде заслужися.

Покажи руце, да могу познати,

в кую тя службу подобает дати.

О, несть мозолей, зело мягки длани!

410 Бодрствуй отселе, лености престани.

Слышиш, прикажчик! На село возмите,

а свини пасти ему прикажите.

Добро, государь мой! Творю веление,

прикажу ему свиней пасение.

415 Ходи к свинарем, паси купно с ними,

сия сапожки из ног твоих сними.

Премени кафтан, в хуждший облецися,

свиней погубити опасно блюдися.

Слыши ты, малче! Се товарищ тебе,

420 свиней сгубити блюдитеся себе.

Аз имам вскоре к вам ся возвратити

и по заслугам обема платити.

Ну, друже милый! Корито с рожцами

принеси семо, постав пред свинями.

425 И аз есм гладей, а несть ми что ясти,

рожци ми будут за всякия сласти.

Что делаеши? Свини отгоняет?

Всуе от рожцев оны отбивает,

Се побегоша, аще погубити,

430 язвами хребта бедне заплатити.

Малци! Что у вас добраго ся деет?

Труд ваш о стаде еда добре спеет?

Государю мой! Винни пред тобою,

враг се, а не друг у свиний со мною:

435 Сам рожци ял есть, и свини разгнаше,

аз не вем, стадо где поутекаше.

Возмите врага, плетьми разсечите,

а потом свиней прилежно ищите.

Бий врага добре, да весть свое дело,

440 да пасет бодро, хранит стадо цело.

Ищи свиней, враже! Блюдис погубити,

ибо до смерти велю тя убити.

Увы мне! Увы! Что имам творити?

Свини погубих, хотят мя убити.

445 Гладом и хладом весма помираю

и бичми люте посечен бываю.

О коль бе благо в дому отчим быти,

нежели в страны чюждыя ходити!

Хлеб у наемник тамо избывает,

450 а мое чрево гладом погибает.

Пойду ко отцу, до ног поклонюся,

глаголя сице, пред ним умилюся:

Отче! Согреших на небо и к тебе,

прими мя поне в наемника себе;

465 Несмь бо достоин сын твой нарещися.

О даждь ми, боже, к отцу довлещися!

Туга велика сердце ми смущает,

лютая печаль душу исполняет.

Не вем, где сын мой юнший обратися,

460 иже от мене древле удалися.

Жив или умре, никто же вещает,

отчее сердце толма умирает.

Сыне мой драгий! Сыне возлюбленный!

Коль ты от мене еси удаленный!

465 Кая тя страна, сыне мой, питает?

Кто тя на разум правый наставляет?

Кто тя утешит, во печали суща,

никого сродна в тых странах имуща?

Кто бы ми дал то сына созерцати,

470 хотя бы нага в дом мой восприяти!

Радуйся, государь наш, и возвеселися!

Сын твой, иже погибл бе, к тебе приближися.

По благодати божей возвратися цело,

токмо не скорбен буди, что обнища зело.

475 Нага от бога приях того сына;

аще и днес наг, то мне не кручина.

Кто его виде, идете, сретайте,

мне о приходе абие вещайте.

Во вратех сын твой идет со слезами,

480 встыдится люте худыми ризами.

Се идет в двери,

что не даш веры?

Сыне мой милы, отнюд нечаянный,

днесь паки богом ты ми дарованный!

485 Согреших, отче, на небо и к тебе,

прими мя поне в наемника себе.

Несм удостоин сын твой нарещися,

ты яко отец умилостивися.

Одежду перву сыну изнесите,

490 честно на плеща его возложите.

Дадите перстень, на руку взлагайте,

первую почесть ему сотворяйте.

Сапоги дайте и взуйте на нозе,

вижду и, яко бяше в скорби мнозе.

495 Идите, телца тучна заколите,

со мною ядше, вси ся веселите,

Яко сын мой сей, иже мертв вменися,

се, слава богу, жив к нам возвратися.

Иже погибл бе, обретеся ныне.

500 Возвеселися всяк о моем сыне!

Слушай, отроче! Кия в дому лики?

Кая пения и пир превеликий?

Брат твой прииде, а отец заклати

повеле телца и всим ликовати,

505 Яко жив и здрав к нему возвратися,

аще всех благих в конец отщетися.

Аще брат в дому, аз не хощу внити,

при нем и с отцем мне отнюд не жити.

Государю наш, изволь зде пождати,

510 аз отцу тайно имам весть, подати.

Сыне мой прелюбезный! Гневен ми не буди,

вниди в дом, обрадуй мя, и брата, и люди.

Отче мой драгий! Аз ти работаю

толика лета и не преступаю

515 Воли твоея, а ты мне заклати

никогда даде и мала козляти,

Дабы со други мне пир сотворити,

по трудех мало ся возвеселити.

А егда сей в дом сын твой возвратися,

520 иже имений даных отщетися,

Ядый с блудницы, ты велел заклати

телца питанна и пир совершати.

Сладкое чадо! Ты всегда со мною

не отлученно, и аз есьм с тобою;

525 Моя твоя суть, вся свободна тебе,

вели заклати, что изволиш себе.

Токмо радуйся и возвеселися,

яко сей брат твой к нама возвратися,

Иже мертв бяше, а жив соблюдеся;

530 уже изгибл бе и днесь обретеся.

Вниди в радости в веселу полату,

прояви любовь обретенну брату.

Не хощу ти, отче, преслушником быти,

иду аз с тобою любовь сотворити.

535 Боже превечный! Буди слава тебе,

его же хвалят аггели на небе!

Вся тварь да поет имени твоему,

да творит почесть господу своему,

Яко премудре вся устроил еси,

540 яже на земли и что на небеси.

Мерилом правым вся суть размеренна,

вся по естеству в чине положенна.

Горе прекрасно светила сияют,

землю пространну плоды украшают;

545 Рибами море зело исполнися,

воздух птицами красно удобрися.

Но изряднее род наш украшенны,

образом твоим зело удобренны,

Его же кто весть добре почитати,

550 удобен в небе венец восприяти.

Аз же сын блудный зде обезчестихся,

образу тому позорник явихся,

Егда, не слушав отчя веления,

низвергох иго его правления.

555 Идох в чюждыя далекия страны,

погубих блудно мне пожиток даны,

Обнищах в конец, пасох свиней стада

и рожцы ядох свиныя от глада.

А что пострадах, стыждуся являти:

560 то поминая, должен есмь плакати.

Найпаче долг мой есть бога хвалити,

что мя изволил на путь наставити,

Да, раскаявся, к отцу возвращуся,

горкими слезы пред ним умилюся.

565 То ми сотворшу, отец мой преблагий

не устыдися, яко придох нагий:

Приях любезно, над мою надежду,

в древнюю мене облече одежду,

Паки изволил мя обогатити,

570 во преждней чести в дому своем быти.

О коль велика, отче, любовь твоя!

Недостойна бе тоя грубость моя.

О что воздам ти, отче мой сладчайший,

над всяку цену отче мой дражайший!

575 Ты мя восприят в гноище верженна,

ты мя оживи, бывша умерщвленна.

Что убо благо могу ти творити

и како имам тя благодарити

За толикия твоя благодати,

580 яже изволи на мя излияти!

Отец небесный сам ти воздарует,

иже всим милость за милость готует.

Аз же отселе хощу пребывати

в послушании, себе подчиняти;

585 Познах бо ныне юность дурность быти,

аще кто хощет без науки жити.

Каюся о злых, содеянных мною,

о мой любезный отче, пред тобою.

Буду во притчю аз всем человеком,

590 найпаче младым во вся веки веком.[20]

Но и отец мой не вне притчи будет:

кто его милость толику забудет?

Божия милость им вообразися.

Кто богу винен к богу возвратися!

595 Любезне руце и он простирает,

удобне злобы грешником прощает,

За что аз его выну прославляю,

вашим милостем сицев поклон даю.

Благороднии, благочестивии,

600 государие премилостивии!

Видесте притчю, Христом изреченну,

по силе делом днесь воображенну,

Дабы христовым словам в сердцах быти

глубже писанным, чтобы не забыти.

605 Юным се образ старейших слушати,

на младый разум свой не уповати;

Старим, да юных добре наставляют,

ничто на волю младых не спущают.

Найпаче образ милости явися,

610 в нем же божая милость вобразися,

Да и вы богу в ней подражаете,

покаявшимся удобь прощаете.

Мы в сей притчи аще согрешихом,

ей, огорчити никого мыслихом;

615 Обаче, молим, изволте простити,

а нас в милости господстей хранити,

За что хранени будете от бога

в милости его на лета премнога.