Минея праздничная

На малей вечерни

Стихиры, глас 1. Подобен: Небе́сных чино́в:

Неопи́санное Сло́во и Пресу́щное, / Небе́сными престо́лы носи́мое со сла́вою, / прие́млет на ру́ки Симео́н, вопия́: / ны́не отпусти́ мя, / по глаго́лу Твоему́, Спа́се, / ве́рных спасе́ние и наслажде́ние. Дважды.

Младе́нца ви́дев Тя, вопия́ше чу́дный Симео́н: / Преве́чнаго Сло́ва, от Отца́ рожде́нна, / страшу́ся и бою́ся / рука́ми мои́ми объя́ти, Влады́ко, / но с ми́ром раба́ Твоего́ ища́й, / ны́не отпусти́, я́ко Милосе́рд.

Ны́не да отве́рзется дверь Небе́сная, / И́же от Отца́ без се́мене ро́ждься Бог Сло́во, / роди́ся от Де́вы, / плоть прие́м челове́чу во́лею, / обнови́ти естество́, я́ко Благ, / и посади́ти одесну́ю Отца́.

Слава, и ныне, глас 4, самогласен.

Андрея Критскаго: Днесь свяще́нная Ма́ти и святи́лища вы́шши / во святи́лище прии́де, / я́вльшая мíру Законода́вца и зако́на Творца́. / Его́же на ру́ки прие́м ста́рец Симео́н, ра́дуяся взыва́ше: / ны́не отпуща́еши раба́ Твоего́, / я́ко ви́дех Тя, Спа́са душ на́ших.

На стиховне стихиры, глас 2. Подобен: До́ме Евфра́фов:

Днесь Спаси́тель, / я́ко Младе́нец принесе́н бысть / в це́рковь Госпо́дню, / и рука́ми престаре́лыми / ста́рец Того́ подъе́млет.

Стих: Ны́не отпуща́еши раба́ Твоего́, Влады́ко, / по глаго́лу Твоему́, с ми́ром.

Угль, проявле́йся, Боже́ственному Иса́ии, – Христо́с, / я́ко клеща́ми, / рука́ми Богоро́дицы / ны́не ста́рцу дае́тся.

Стих: Свет во открове́ние язы́ков / и сла́ву люде́й Твои́х Изра́иля.

Стра́хом же и ра́достию / на рука́х Влады́ку / Симео́н держа́, / живота́ проша́ше разреше́ния, / поя́ Богома́терь.

Слава, и ныне, глас и подобен тойже:

Приими́, о Симео́не, / Всечи́стая вопия́ше, / во объя́тия я́ко Младе́нца / Го́спода сла́вы / и мíра спасе́ние.

Тропарь, глас 1: Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние.

Таже, ектениа малая. И отпуст.

На велицей вечерни

Блаже́н муж: 1-й антифон.

На Го́споди, воззва́х: поем стихиры на 8, глас 1-й самогласны. Германа патриарха:

Глаго́ли, Симео́не, / Кого́ нося́ на руку́ в це́ркви ра́дуешися? / Кому́ зове́ши и вопие́ши: / ны́не свободи́хся, ви́дех бо Спа́са моего́? / Сей есть от Де́вы рожде́йся, / Сей есть от Бо́га Бог Сло́во, / воплоти́выйся нас ра́ди и спасы́й челове́ка, / Тому́ поклони́мся. Трижды.

Приими́, Симео́не, / Его́же под мра́ком Моисе́й законополага́юща прови́де в Сина́и, / Младе́нца бы́вша, зако́ну повину́ющася. / Сей есть зако́ном глаго́лавый, / Сей есть во проро́цех рече́нный, / воплоти́выйся нас ра́ди и спасы́й челове́ка, / Тому́ поклони́мся. Трижды.

Прии́дем и мы, пе́сньми Боже́ственными Христа́ усря́щем / и прии́мем Его́, / Его́же спасе́ние Симео́н ви́де. / Сей есть, Его́же Дави́д провозвести́, / Сей есть во проро́цех глаго́лавый, / воплоти́выйся нас ра́ди и зако́ном веща́вый, / Тому́ поклони́мся. Дважды.

Слава, и ныне, глас 6. Иоанна монаха:

Да отве́рзется дверь Небе́сная днесь: / Безнача́льное бо Сло́во О́тчее, / нача́ло прии́м под ле́ты, / не отсту́пль Своего́ Божества́, / от Де́вы я́ко Младе́нец четыредесятодне́вен / Ма́терию во́льне прино́сится в це́рковь зако́нную, / и Сего́ на ру́ки прие́млет ста́рец, / отпусти́, зовы́й, раба́, Влады́ко, / и́бо о́чи мои́ ви́деста спасе́ние Твое́. / Прише́дый в мiр спасти́ род челове́чь, / Го́споди, сла́ва Тебе́.

Вход. Прокимен дне и чтения 3.

Исхо́да чте́ние (Исх 12:51; 13:1–3, 10–12, 14–16; 22:29; Лев 12:1–4, 6, 8; Числ 8:15–17).

Глаго́ла Госпо́дь к Моисе́ю в день он, во́ньже изведе́ сы́ны Изра́илевы от земли́ Еги́петския, глаго́ляй: Освяти́ Мне вся́каго пе́рвенца перворожде́ннаго, разверза́ющаго ложесна́ в сыне́х Изра́илевых. И и́де Моисе́й, и собра́ вся лю́ди, и рече́: по́мните день сей, во́ньже изыдо́сте от земли́ Еги́петския, из до́му рабо́ты, руко́ю бо кре́пкою Госпо́дь изведе́ нас отту́ду, и сохрани́те зако́н Его́. И бу́дет, я́ко а́ще введе́т вас Госпо́дь Бог в зе́млю ханане́йску, и́мже о́бразом клятся отце́м твои́м. И отлучи́ши вся́каго перворо́днаго, разверза́ющаго ложесна́, му́жеск пол Го́споду: и бу́дет, я́ко а́ще вопро́сит тя по сих сын твой, глаго́ля: что сие́? И рече́ши ему́: я́ко руко́ю кре́пкою изведе́ нас Госпо́дь от земли́ Еги́петския, из до́му рабо́ты. Егда́ бо ожесточи́ фара́она не отпусти́ти нас, поби́ Госпо́дь вся перворо́дныя в земли́ Еги́петстей, от перворо́дных челове́ческих, да́же до перворо́дных ско́тских. Сего́ ра́ди аз же́ртву Го́споду приношу́: вся́каго, отверза́ющаго ложесна́, му́жеска по́лу и вся́каго перворо́днаго сыно́в мои́х изба́влю. И бу́дет в зна́мение непоколеби́мо пред очи́ма твои́ма. Я́ко та́ко рече́ Госпо́дь Бог Вседержи́тель: я́ко перворожде́нная сыно́в твои́х да́си Мне. И бу́дет: всяк, и́же а́ще роди́т отроча́ му́жеск пол, в день осмы́й обре́жете ему́ плоть кра́йнюю его́. И три́десять и три дни не вни́дет во святи́лище Бо́жие ко свяще́ннику, до́ндеже испо́лнятся дни́е очище́ния. И по сих принесе́ши Го́споду а́гня единоле́тно, непоро́чно во всесожже́ние и птенца́ голуби́на или́ го́рличищна при две́рех ски́нии свиде́ния, ко святи́телю. Или́ вме́сто сих принесе́ши пред Го́сподем два птенца́ голуби́на или́ два го́рличища, и помо́лится о нем свяще́нник. Я́ко воздая́ние воздаю́щии си́и Мне суть от всех сыно́в Изра́илевых, и прия́т их. И освяти́т я́ Мне вме́сто перворо́дных еги́петских: во́ньже день порази́х вся́каго пе́рвенца в земли́ Еги́петстей, от челове́ка до скота́, – рече́ Бог Вы́шний Святы́й Изра́илев.

Проро́чества Иса́иина чте́ние (Ис 6:1–12).

Бысть в ле́то, в не́же у́мре Ози́я, царь, / ви́дех Го́спода, седя́ща на престо́ле высо́це, и превознесе́нне, и испо́лнь дом сла́вы Его́. И Серафи́ми стоя́ху о́крест Его́, шесть крил еди́ному, и шесть крил друго́му, и двема́ у́бо покрыва́ху ли́ца своя́, двема́ же покрыва́ху но́ги своя́ и двема́ лета́ху. И взыва́ху друг ко дру́гу, и глаго́лаху: Свят, Свят, Свят Госпо́дь Савао́ф, испо́лнь вся земля́ сла́вы Его́. И взя́тся наддве́рие от гла́са, и́мже вопия́ху, и дом испо́лнися ды́ма. И рех: о, окая́нный аз! Я́ко умили́хся, я́ко челове́к сый, и, нечи́сты устне́ име́я, посреде́ люде́й, нечи́стая устна́ иму́щих, аз живу́, и Царя́ Го́спода Савао́фа ви́дех очи́ма мои́ма. И по́слан бысть ко мне еди́н от Серафи́мов, и в руце́ свое́й имя́ше угль о́гненный, его́же клеща́ми взят от же́ртвенника. И прикосну́ся устом мои́м, и рече́: се прикосну́ся сие́ устна́м твои́м, и оты́мет беззако́ния твоя́ и грехи́ твоя́ очи́стит. И слы́шах глас Го́спода, глаго́лющаго: кого́ послю́? И кто по́йдет к лю́дем сим? И реко́х: се аз есмь, посли́ мя. И рече́: иди́ и рцы лю́дем сим: слу́хом услы́шите, и не уразуме́ете, и, ви́дяще, у́зрите и не уви́дите. Одебеле́ бо се́рдце люде́й сих, и уши́ма свои́ма тя́жко слы́шаша, и о́чи свои́ смежи́ша, да не ка́ко уви́дят очи́ма, и уши́ма услы́шат, и се́рдцем уразуме́ют, и обратя́тся, и исцелю́ я́. И реко́х: доко́ле, Го́споди? И рече́: до́ндеже а́ще запусте́ют гра́ди, от е́же не пожи́ти, и до́ми, от е́же не бы́ти челове́ком, и земля́ оста́влена бу́дет пуста́. И по сих продолжи́т Бог челове́ки, и умно́жатся оста́вльшиися на земли́.

Проро́чества Иса́иина чте́ние (Ис 19:1, 3–5, 12, 16, 19–21).

Се Госпо́дь седи́т на о́блаце ле́гце и прии́дет в Еги́пет, и сотрясу́тся рукотворе́нная еги́петская от Лица́ Его́, и се́рдце их ума́лится в них. И смяте́тся дух их в них, и сове́т их разори́т. И преда́ст Еги́пта в ру́ки господе́й, зане́ сия́ глаго́лет Госпо́дь, Влады́ка Святы́й Савао́ф. Пию́т еги́птяне во́ду я́же при мо́ри. Река́ же оскуде́ет и и́зсхнет. Сия́ глаго́лет Госпо́дь: где суть ны́не прему́дрии твои́? Да возвестя́т ти и да реку́т тебе́ что совеща́ Госпо́дь Савао́ф на Еги́пта. В день он бу́дут еги́птяне в стра́се и тре́пете от лица́ руки́ Го́спода Савао́фа, ю́же Он возложи́т на них, и бу́дет олта́рь Госпо́день в стране́ еги́петстей и столп в преде́лех его́ Го́сподеви. И бу́дет в зна́мение в ве́ки Го́споду Савао́фу в стране́ еги́петстей. Я́ко воззову́т ко Го́споду, и по́слет им Госпо́дь челове́ка, и́же спасе́т их. И ве́дом бу́дет Госпо́дь еги́птяном, и позна́ют еги́птяне Го́спода в день он, и сотворя́т же́ртву и дар, и помо́лятся, и воздадя́т обе́ты своя́ Го́сподеви.

На литии стихиры самогласны, глас 1.

Анатолия: Ве́тхий де́ньми, / И́же зако́н дре́вле в Сина́и дав Моисе́ю, / днесь Младе́нец ви́дится / и по зако́ну, я́ко зако́на Творе́ц, / зако́н исполня́я, во храм прино́сится, / и ста́рцу дае́тся. / Прие́м же Сего́ Симео́н пра́ведный / и, обеща́ний сбытие́ ви́дев соверша́емое, ра́достно вопия́ше: / ви́деша о́чи мои́ е́же от ве́ка та́инство сокрове́нное, / напосле́док дний сих я́вльшееся, / свет, разоря́я неве́рных язы́ков / омраче́ние и сла́ву дая́ новоизбра́нному Изра́илю; / те́мже отпусти́ раба́ Твоего́ от соу́з сея́ пло́ти / к нестаре́емому и чу́дному некончае́мому животу́, / подая́ мíрови ве́лию ми́лость.

Иоанна монаха: Днесь дре́вле Моисе́ю в Сина́и зако́н пода́вый / зако́нным повину́ется веле́нием, / нас ра́ди, я́ко Милосе́рд, по нам быв. / Ны́не Чи́стый Бог я́ко Отроча́ Свя́то, ложесна́ разве́рз чи́стыя, / Себе́ Самому́ я́ко Бог прино́сится, / зако́нныя кля́твы свобожда́я / и просвеща́я ду́ши на́ша.

Глас 2. Андрея Пирра: Ему́же вы́шнии служи́телие с тре́петом мо́лятся, / до́лу ны́не Симео́н ве́щными рука́ми прие́мь, / Бо́га челове́ком соедини́тися пропове́да, / и Челове́ка Небе́сна Бо́га ви́дяй, / отлуча́яся су́щих на земли́, ра́достно взыва́ше: / И́же во тьме́ су́щим Невече́рний Свет открыва́яй, / Го́споди, сла́ва Тебе́.

Германово: Днесь Симео́н на ру́ки Го́спода сла́вы подъе́млет, / Его́же под мра́ком пе́рвее Моисе́й ви́де, / на горе́ Сина́йстей скрижа́ли даю́ща ему́. / Сей есть, И́же во проро́цех глаго́ляй и зако́на Творе́ц. / Сей есть, Его́же Дави́д возвеща́ет, И́же всем стра́шный, / име́яй ве́лию и бога́тую ми́лость.

Свяще́ннаго свяще́нная Де́ва принесе́ во святи́лище святи́телю, / просте́р же ру́це, Симео́н прия́т Сего́, ра́дуяся, / и возопи́: ны́не отпуща́еши раба́ Твоего́, Влады́ко, / по глаго́лу Твоему́ с ми́ром, Го́споди.

Зижди́тель Небесе́ и земли́ / на рука́х ноша́шеся святы́м Симео́ном ста́рцем днесь, / той бо Ду́хом Святы́м глаго́лаше: / ны́не свободи́хся, ви́дех бо Спа́са моего́.

Анатолия: Днесь Симео́н ста́рец во храм вхо́дит, ра́дуяся ду́хом, / Законода́вца Моисее́ва и Исполни́теля зако́на на ру́ки восприя́ти. / Он у́бо мра́ком и гла́сом неявле́нным Богови́дец сподо́бися бы́ти, / покрове́нным лице́м евре́ев неве́рная сердца́ изобличи́, / сей же Первове́чное Сло́во О́тчее воплоще́нное понесе́ / и язы́ком откры́ Свет, Крест и Воскресе́ние. / И А́нна проро́чица показа́ся, / Спа́са Изба́вителя Изра́илю пропове́дающи. / Тому́ возопии́м, Христу́ Бо́гу на́шему: / Богоро́дицы ра́ди поми́луй нас.

Слава, глас 5. Андрея Критскаго:

Испыта́йте писа́ния, / я́коже рече́ во Ева́нгелиих Христо́с Бог наш, / в них бо обрета́ем Того́, ражда́ема / и пелена́ми повива́ема, / в я́слех полага́ема и млеко́м пита́ема, / обре́зание прие́млюща и Симео́ном носи́ма, / не мне́нием, ни привиде́нием, но и́стиною мíрови я́вльшася. / К Нему́же возопии́м: / Преве́чный Бо́же, сла́ва Тебе́.

И ныне, глас тойже. Германово:

Ве́тхий де́ньми, младе́нствовав пло́тию, / Ма́терию Де́вою в це́рковь прино́сится, / Своего́ зако́на исполня́я обеща́ние, / Его́же Симео́н прии́м, глаго́лаше: / ны́не отпуща́еши с ми́ром, по глаго́лу Твоему́, раба́ Твоего́, / ви́деша бо о́чи мои́ спасе́ние Твое́, Святы́й.

На стиховне стихиры, глас 7. Космы монаха:

Украси́ твой черто́г, Сио́не, / и подыми́ Царя́ Христа́, / целу́й Мари́ю, Небе́сную Дверь: / Та бо престо́л Херуви́мский яви́ся, / Та но́сит Царя́ Сла́вы. / О́блак све́та есть Де́ва, / нося́щи на рука́х Сы́на пре́жде денни́цы, / Его́же прие́мь Симео́н на ру́ки своя́, / пропове́дуя лю́дям Влады́ку Сего́ бы́ти живота́ и сме́рти / и Спа́са мíру.

Стих: Ны́не отпуща́еши раба́ Твоего́, Влады́ко, / по глаго́лу Твоему́, с ми́ром.

Возсия́вшаго пре́жде век от Отца́, / напосле́док же от ложе́сн Деви́ческих / нося́щи в це́рковь неискусобра́чная Ма́ти, / в Сина́йстей горе́ Законоположи́вшаго, / повеле́нию зако́нному повину́ющася / принесе́ святи́телю ста́рцу и пра́веднику, / Христа́ Го́спода ви́дети обеща́нна. / Его́же прие́мь Симео́н на ру́ки своя́, возра́довася, вопия́: / Бог есть Сей, Отцу́ Соприсносу́щный, / и Изба́витель душ на́ших.

Стих: Свет во открове́ние язы́ков / и сла́ву люде́й Твои́х Изра́иля.

Носи́маго на колесни́це Херуви́мстей / и пева́емаго в пе́снех Серафи́мских / нося́щи на руку́ Богоро́дица Мари́я, / неискусобра́чно из Нея́ вопло́щшагося, / Законода́вца, зако́на исполня́юща чин, / подая́ше рука́м ста́рца иере́я. / Живо́т же нося́й живота́ проша́ше разреше́ния, глаго́ля: / Влады́ко, ны́не отпусти́ мя возвести́ти Ада́му, / я́ко ви́дех непрело́жна Отроча́, Бо́га Преве́чнаго / и Спа́са мíра.

Слава, и ныне, глас 8. Андрея Критскаго:

И́же на Херуви́мех носи́мый и пева́емый от Серафи́м, / днесь в Боже́ственное святи́лище по зако́ну приноси́м, / на ста́рческих, я́ко на престо́ле, седи́т рука́х / и от Ио́сифа прие́млет да́ры Боголе́пно, / я́ко супру́г го́рличищ, / нескве́рную Це́рковь и от язы́к новоизбра́нныя лю́ди, / голуби́на же два птенца́, / я́ко Нача́льник Ве́тхаго же и Но́ваго. / Е́же к Нему́ обеща́ния Симео́н коне́ц прие́м, / благословя́ Де́ву Мари́ю Богоро́дицу, / страсте́й о́бразы, И́же из Нея́, провозгласи́ / и от Него́ проша́ше отпуще́ния, вопия́: / ны́не отпусти́ мя, Влады́ко, / я́коже пре́жде возвести́ ми, / я́ко ви́дех Тя, Первове́чнаго Све́та / и Спа́са Го́спода христоимени́тым лю́дем.

Таже, Ны́не отпуща́еши: Трисвятое и по О́тче наш:

На благословении хлебов тропарь праздника трижды, глас 1:

Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние. Трижды.

И чтение.

На утрени

На Бог Господь: тропарь праздника трижды, глас 1:

Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние. Трижды.

По 1-м стихословии седален, глас 1. Самоподобен:

Лик А́нгельский да удиви́тся чудеси́, / земни́и же гла́сы, возопие́м пе́ние, / зря́ще неизрече́нное Бо́жие снизхожде́ние, / Его́же бо трепе́щут Небе́сныя си́лы, / ны́не ста́рчи объе́млют ру́це Еди́наго Человеколю́бца.

Сла́ва, и ны́не, тойже.

По 2-м стихословии седален, глас 1. Подобен: Лик А́нгельский:

Сый со Отце́м на Престо́ле святе́м, / прише́д на зе́млю, от Де́вы роди́ся / и Младе́нец бысть, ле́ты Сый неопи́сан, / Его́же при́им Симео́н на ру́ки, ра́дуяся глаго́лаше: / ны́не отпуща́еши, Ще́дре, возвесели́в раба́ Твоего́.

Сла́ва, и ны́не, тойже.

Полиелей и величание:

Велича́ем Тя, / Живода́вче Христе́, / и чтим Пречи́стую Ма́терь Твою́, / Е́юже по зако́ну / ны́не прине́слся еси́ в храм Госпо́день.

Псалом избранный:

¹ Отры́гну се́рдце мое́ сло́во бла́го.

² Глаго́лю аз дела́ моя́ Царе́ви.

¹ Язы́к мой трость кни́жника скоропи́сца.

² Красе́н добро́тою па́че сыно́в челове́ческих.

¹ Препояши мечь Твой по бедре́ Твое́й, Си́льне.

² И наляцы́, и успева́й, и ца́рствуй,

¹ И́стины ра́ди, и кро́тости, и пра́вды.

² Возлюби́л еси́ пра́вду, и возненави́дел еси́ беззако́ние.

¹ Слы́ши, Дщи, и виждь, и приклони́ у́хо Твое́,

² И забу́ди лю́ди Твоя́, и дом отца́ Твоего́.

¹ И возжела́ет Царь добро́ты Твоея́,

² Я́ко той есть Госпо́дь Твой, и поклони́шися Ему́.

¹ Лицу́ Твоему́ помо́лятся бога́тии лю́дстии.

² Госпо́дь во хра́ме святе́м Свое́м; Госпо́дь на небеси́ престо́л Его́.

¹ Ви́дена бы́ша ше́ствия Твоя́, Бо́же,

² Ше́ствия Бо́га моего́ Царя́, И́же во святе́м.

¹ Свят храм Твой, ди́вен в пра́вде.

² До́му Твоему́ подоба́ет святы́ня Го́споди, в долготу́ дний.

¹ Помяну́ и́мя Твое́ во вся́ком ро́де и ро́де.

² Я́ко бла́го пред преподо́бными Твои́ми.

Сла́ва, и ны́не: Аллилу́иа, трижды.

По полиелеи седален, глас 4. Подобен: Удиви́ся Ио́сиф:

Младе́нствуеши мене́ ра́ди, Ве́тхий де́ньми, / чище́нием приобща́ешися, Чисте́йший Бо́же, / да плоть уве́риши мне, ю́же от Де́вы. / И сим Симео́н, поуча́яся, позна́ Тя, Бо́га, я́вльшагося пло́тию, / и, я́ко Жизнь, лобза́ше и, ра́дуяся, ста́рчески взыва́ше: / отпусти́ мене́, Тебе́ бо ви́дех, Живота́ вся́ческих.

Сла́ва, и ны́не, тойже.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4: Помяну́ и́мя Твое́ / во вся́ком ро́де и ро́де.

Стих: Отры́гну се́рдце мое сло́во бла́го, глаго́лю аз дела́ моя Царе́ви.

Другий прокимен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие Луки, зачало 8 (Лк 2:25–32).

Во вре́мя о́но, бе челове́к во Иерусали́ме, eму́же и́мя Симео́н. И челове́к сей пра́веден и благочести́в, ча́я уте́хи Изра́илевы, и Дух бе Свят в нем. И бе eму́ обеща́но Ду́хом Святы́м, не ви́дети сме́рти, пре́жде да́же не ви́дит Христа́ Госпо́дня. И прии́де ду́хом в це́рковь. И eгда́ введо́ста роди́тeля Oтроча́ Иису́са, сотвори́ти и́ма по обы́чаю зако́нному о Нем. И той прие́м Eго́ на руку́ своéю, и благослови́ Бо́га, и рече́: Ны́не отпуща́еши раба́ Твоего́, Влады́ко, по глаго́лу Твоему́ с ми́ром. Я́ко ви́десте óчи мои́ спасе́ние Твое́, Éже eси́ угото́вал пред лице́м всех люде́й. Свет во открове́ние язы́ком и сла́ву люде́й Твои́х Изра́иля.

По 50-м псалме.

Слава: Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ныне, тойже.

И посем, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6: Да отве́рзется дверь Небе́сная днесь: / Безнача́льное бо Сло́во О́тчее, / нача́ло прии́м под ле́ты, / не отсту́пль Своего́ Божества́, / от Де́вы я́ко Младе́нец четыредесятодне́вен / Ма́терию во́льне прино́сится в це́рковь зако́нную, / и Сего́ на ру́ки прие́млет ста́рец, / отпусти́, зовы́й, раба́, Влады́ко, / и́бо о́чи мои́ ви́деста спасе́ние Твое́. / Прише́дый в мiр спасти́ род челове́чь, / Го́споди, сла́ва Тебе́.

Канон, егоже краегранесие: Христа́ ра́достне ста́рец объе́млет. Творение господина Космы, глас 3. Ирмос по дважды, тропари на 12:

Песнь 1

Ирмос: Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешомореходя́щим и Богоуго́дно пою́щим: / пои́м, Го́сподеви, сла́вно бо просла́вися.

Припев: Сла́ва, Тебе́, Бо́же наш, сла́ва Тебе́.

Да ка́плют во́ду о́блацы, / Со́лнце бо, на о́блаце ле́гце носи́мо, наста́ло есть, / на нетле́нную руку́, Христо́с в це́ркви я́ко Младе́нец. / Те́мже, ве́рнии, возопии́м: / пои́м Го́сподеви, сла́вно бо просла́вися.

Слава: Крепи́теся, ру́це Симео́ни, ста́ростию осла́бленнии, / лы́ста [82] же претружде́нна ста́рча правобыстро́ движи́тася Христу́ на сре́тение, / лик со безпло́тными соста́вльше, / пои́м Го́сподеви, сла́вно бо просла́вися.

И ныне: Ра́зумом просте́ртая Небеса́, весе́литеся, и ра́дуйся, земле́, / из Пребоже́ственных бо недр Хитре́ц проше́д Христо́с, / Ма́терию Де́вою Бо́гу Отцу́ прино́сится Младе́нец, И́же пре́жде всех, / сла́вно бо просла́вися.

Катавасия: Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешомореходя́щим и Богоуго́дно пою́щим: / пои́м, Го́сподеви, сла́вно бо просла́вися.

Песнь 3

Ирмос: Утвержде́ние на Тя наде́ющихся, / утверди́, Го́споди, Це́рковь, / Ю́же стяжа́л еси́ / честно́ю Твое́ю Кро́вию.

Припев: Сла́ва, Тебе́, Бо́же наш, сла́ва Тебе́.

Перворожде́н из Отца́ пре́жде век, / Перворожде́н Младе́нец из Де́вы нетле́нныя, / Ада́му ру́ку простира́я, яви́ся.

Слава: Младоу́мна бы́вша пре́лестию первозда́ннаго / па́ки исправля́яй Бог Сло́во, младе́нствовав, яви́ся.

И ныне: Земли́ исча́дие, па́ки поте́кшее в ню, / Божества́ сообра́зное естество́ Зижди́тель / я́ко непрело́жне, младе́нствовав, яви́.

Катавасия: Утвержде́ние на Тя наде́ющихся, / утверди́, Го́споди, Це́рковь, / Ю́же стяжа́л еси́ / честно́ю Твое́ю Кро́вию.

Седален, глас 4. Подобен: Удиви́ся Ио́сиф:

На горе́ Сина́йстей дре́вле ви́де Моисе́й за́дняя Бо́жия, / и то́нкий Боже́ственный глас сподо́бися во мра́це же и ви́хре слы́шати. / Ны́не же Симео́н воплоще́ннаго Бо́га непрело́жне нас ра́ди на ру́ки прия́т / и ра́достно тща́шеся ити́ от су́щих зде к животу́ ве́чному. / Те́мже вопия́ше: / ны́не отпуща́еши раба́ Твоего́, Влады́ко.

Сла́ва, и ны́не, тойже.

Песнь 4

Ирмос: Покры́ла есть Небеса́ доброде́тель Твоя́, Христе́: / из киво́та бо проше́д святы́ни, Твоея́ нетле́нныя Ма́тере, / в хра́ме сла́вы Твоея́ яви́лся еси́, / я́ко Младе́нец руконоси́м, / и испо́лнишася вся Твоего́ хвале́ния.

Припев: Сла́ва, Тебе́, Бо́же наш, сла́ва Тебе́.

Ра́дуйся, Симео́не, неизрече́нных таи́нниче, Богоро́дица вопия́ше, / о Не́мже от Свята́го дре́вле извести́ся тебе́ Ду́ха, / младе́нствовавшаго Сло́ва Христа́ на ру́ки приими́, зовы́й Ему́: / испо́лнишася вся Твоего́ хвале́ния.

Слава: На Него́же упова́л еси́, Симео́не, во́зраст де́тищный, / ра́дуяся, подыми́ Христа́, Изра́иля Боже́ственнаго утеше́ние, / зако́на Творца́ и Влады́ку, исполня́ющаго зако́на чин, зовы́й Ему́: / испо́лнишася вся Твоего́ хвале́ния.

И ныне: Ви́дя Симео́н Сло́во Безнача́льное, с пло́тию, я́ко на престо́ле Херуви́мстем, Де́вою носи́мо, / вино́внаго е́же бы́ти вся́ческих, я́ко Младе́нцу дивя́ся, вопия́ше Ему́: / испо́лнишася вся Твоего́ хвале́ния.

Катавасия: Покры́ла есть Небеса́ доброде́тель Твоя́, Христе́: / из киво́та бо проше́д святы́ни, Твоея́ нетле́нныя Ма́тере, / в хра́ме сла́вы Твоея́ яви́лся еси́, / я́ко Младе́нец руконоси́м, / и испо́лнишася вся Твоего́ хвале́ния.

Песнь 5

Ирмос: Я́ко ви́де Иса́ия обра́зно на престо́ле превознесе́на Бо́га, / от А́нгел сла́вы дориноси́ма, / о, окая́нный, – вопия́ше, – аз: / прови́дех бо воплоща́ема Бо́га, / Све́та Невече́рня и ми́ром влады́чествующа.

Припев: Сла́ва, Тебе́, Бо́же наш, сла́ва Тебе́.

Разуме́в Боже́ственный ста́рец проявле́нную дре́вле проро́ку сла́ву, / рука́ми Сло́во зря Ма́терними держи́мо, / о, ра́дуйся, – вопия́ше, – Чи́стая! / Я́ко престо́л, бо держи́ши Бо́га, / Све́та Невече́рняго и ми́ром влады́чествующа.

Слава: Покло́нься ста́рец, / и стопа́м Боже́ственне прикосну́вся неискусобра́чныя и Богома́тере, / Огнь, – рече́, – но́сиши, Чи́стая: / Младе́нца бою́ся объя́ти Бо́га, / Све́та Невече́рняго и ми́ром влады́чествующа.

И ныне: Очища́ется Иса́ия, от Серафи́ма угль прие́м, / ста́рец вопия́ше Богома́тери, / Ты, я́коже клеща́ми, рука́ми просвеща́еши мя, пода́вши, Его́же но́сиши, / Све́та Невече́рняго и ми́ром влады́чествующа.

Катавасия: Я́ко ви́де Иса́ия обра́зно на престо́ле превознесе́на Бо́га, / от А́нгел сла́вы дориноси́ма, / о, окая́нный, – вопия́ше, – аз: / прови́дех бо воплоща́ема Бо́га, / Све́та Невече́рня и ми́ром влады́чествующа.

Песнь 6

Ирмос: Возопи́ к Тебе́, ви́дев ста́рец очи́ма спасе́ние, / е́же лю́дем прии́де от Бо́га: / Христе́, Ты Бог мой.

Припев: Сла́ва, Тебе́, Бо́же наш, сла́ва Тебе́.

Сио́ну Ты ка́мень возложи́лся еси́, / непокори́вым претыка́ние и собла́зна ка́мень, / неруши́мое ве́рных спасе́ние.

Слава: Изве́стне нося́ начерта́ние / И́же пре́жде век Тя израсти́вшаго, / земны́х за милосе́рдие ны́не не́мощию обложи́ся.

И ныне: Сы́ну Вы́шняго, / Сы́ну Де́вы, / Бо́гу, Отроча́ти бы́вшему, / покло́ньшася Тебе́ ны́не отпусти́ с ми́ром.

Катавасия: Возопи́ к Тебе́, ви́дев ста́рец очи́ма спасе́ние, / е́же лю́дем прии́де от Бо́га: / Христе́, Ты Бог мой.

Кондак, глас 1: Утро́бу Деви́чу освяти́вый Рождество́м Твои́м / и ру́це Симео́не благослови́вый, / я́коже подоба́ше, предвари́в, / и ны́не спасл еси́ нас, Христе́ Бо́же, / но умири́ во бране́х жи́тельство / и укрепи́ лю́ди, и́хже возлюби́л еси́, Еди́не Человеколю́бче.

Икос: К Богоро́дице притеце́м, хотя́щии Сы́на Ея́ ви́дети, к Симео́ну носи́ма, / Его́же с Небесе́ Безпло́тнии ви́дяще, дивля́хуся, глаго́люще: / чу́дная зрим ны́не и пресла́вная, непостижи́мая, несказа́нная! / И́же бо Ада́ма созда́вый но́сится я́ко Младе́нец, / Невмести́мый вмеща́ется на рука́х ста́рчих, / И́же в не́дрех неопи́санных Сый Отца́ Своего́ / во́лею опису́ется пло́тию, а не Божество́м, / Еди́н Человеколю́бец.

Песнь 7

Ирмос: Тебе́ во огни́ ороси́вшаго / о́троки Богосло́вившия, / и в Де́ву нетле́нну все́льшагося / Бо́га Сло́ва пои́м, / благоче́стно пою́ще: / благослове́н Бог оте́ц на́ших.

Припев: Сла́ва, Тебе́, Бо́же наш, сла́ва Тебе́.

Ада́му извести́ти хотя́й иду́, во а́де живу́щу, / и Е́ве принести́ благове́стие, Симео́н вопия́ше, со проро́ки лику́я: / благослове́н Бог оте́ц на́ших.

Слава: Ро́да зе́мна избавля́яй Бог да́же до а́да прии́дет, / пле́нным же пода́ст всем оставле́ние и прозре́ние слепы́м, я́ко и немы́м вопи́ти: / благослове́н Бог оте́ц на́ших.

И ныне: И Твое́ се́рдце нетле́нная ору́жие про́йдет, Симео́н Богоро́дице провозгласи́, / на Кресте́ зря́щи Твоего́ Сы́на, / Ему́же вопие́м: / благослове́н Бог оте́ц на́ших.

Катавасия: Тебе́ во огни́ ороси́вшаго / о́троки Богосло́вившия, / и в Де́ву нетле́нну все́льшагося / Бо́га Сло́ва пои́м, / благоче́стно пою́ще: / благослове́н Бог оте́ц на́ших.

Песнь 8

Ирмос: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Припев: Сла́ва, Тебе́, Бо́же наш, сла́ва Тебе́.

Лю́дие Изра́илевы, Твою́ сла́ву Емману́ила зря́ще Отроча́ из Де́вы, / пред лице́м Боже́ственнаго ковче́га ны́не лику́йте: / благослови́те, вся дела́ Госпо́дня, Го́спода / и превозноси́те во вся ве́ки.

Благослови́м Отца́ и Сы́на и Свята́го Ду́ха, Го́спода.

Се, Симео́н вопия́ше, пререка́емое зна́мение Сей бу́дет, / Бог Сый и Отроча́, / Сему́, ве́рнии, возопии́м: / благослови́те, вся дела́ Госпо́дня, Го́спода / и превозноси́те во вся ве́ки.

И ныне: Живо́т Сы́й, Се́й бу́дет паде́ние непокори́вым, младе́нствовав Бо́г Сло́во: я́ко воста́ние все́м ве́рою пою́щым: благослови́те, вся́ дела́ Госпо́дня, Го́спода, и превозноси́те во вся́ ве́ки.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Ведомо да будет, яко два сущия припевы в начале припеваем ко ирмосу. Таже к коемуждо тропарю припеваем по 4 припевы. И по совершении 14 припевов с тропари к катавасии поем оба лика вкупе припев 1-й: Богоро́дице Де́во, / упова́ние христиа́ном:

Песнь 9

Богоро́дице Де́во, / упова́ние христиа́ном, / покры́й, соблюди́ и спаси́ на Тя уповаю́щих.

Богоро́дице Де́во, / мíру блага́я помо́щнице, / покры́й и соблюди́ от вся́кия ну́жды и печа́ли.

Ирмос: В зако́не се́ни и писа́ний / о́браз ви́дим, ве́рнии, / всяк му́жеский пол, ложесна́ разверза́я, свят Бо́гу. / Тем Перворожде́нное Сло́во, Отца́ Безнача́льна, / Сы́на, Первородя́щася Ма́терию неискусому́жно, / велича́ем.

Богоно́се Симео́не, / прииди́, подыми́ Христа́, / Его́же роди́ Де́ва Чи́стая Мари́я.

Объе́млет рука́ми ста́рец Симео́н / Соде́теля зако́на / и Влады́ку вся́ческих.

Не ста́рец Мене́ держи́т, / но Аз держу́ его́: / той бо от Мене́ отпуще́ния про́сит.

Клеще́ та́инственная, / ка́ко угль но́сиши? / Ка́ко пита́еши Пита́ющаго вся?

И́же дре́вним новорожде́нных го́рличищ супру́г дво́ица же бя́ше птенце́в, / в ни́хже ме́сто Боже́ственный ста́рец и целому́дренная А́нна проро́чица / от Де́вы рожде́нному и Сы́ну Единоро́дному О́тчу, / в це́рковь приноси́му, слу́жат, велича́юще.

О дщи Фану́илева! / Прии́ди, ста́ни с на́ми / и благодари́ Христа́ Спа́са, Сы́на Бо́жия.

А́нна целому́дренная / провеща́ет стра́шная, / испове́дающи Христа́, Творца́ не́бу и земли́.

Непостижи́мо есть соде́янное о Тебе́ / А́нгелом и челове́ком, / Ма́ти Де́во Чи́стая.

Чи́стая Голуби́ца, / нескве́рная А́гница, / А́гнца и Па́стыря прино́сит в це́рковь.

Возда́л еси́ мне, вопия́ше Симео́н, / спасе́ния Твоего́, Христе́, ра́дование, / восприими́ Твоего́ служи́теля, се́нию претружде́ннаго, / но́выя благода́ти Священнопропове́дника та́йнаго во хвале́нии велича́юща.

О Христе́, всех Царю́! / Побе́ды на враги́ / ве́рным люде́м Твои́м да́руй.

О Христе́, всех Царю́! / Пода́ждь ми сле́зы теплы́, / да пла́чу мою ду́шу, ю́же зле погуби́х.

Вместо, Славы: Трисия́тельное / и Триипоста́сное Божество́ / благоче́стно да похва́лим.

Вместо, И ныне: О Деви́це Мари́е!/ Просвети́ мою́ ду́шу, / помраче́нную лю́те жите́йскими сластьми́.

Священноле́пно испове́дашеся А́нна, прорица́ющи, / целому́дренная, и преподо́бная, и ста́рица, Влады́це в це́ркви я́вственно, / Богоро́дицу же, пропове́дающи всем су́щим, велича́ше.

Припев: Богоро́дице Де́во, / упова́ние христиа́ном, / покры́й, соблюди́ и спаси́ на Тя уповаю́щих.

Катавасия: В зако́не се́ни и писа́ний / о́браз ви́дим, ве́рнии, / всяк му́жеский пол, ложесна́ разверза́я, свят Бо́гу. / Тем Перворожде́нное Сло́во, Отца́ Безнача́льна, / Сы́на, Первородя́щася Ма́терию неискусому́жно, / велича́ем.

Светилен самоподобен: Ду́хом во святи́лищи предста́в, / ста́рец на ру́ки восприя́т зако́на Влады́ку, вопия́: / ны́не соу́з мя плотски́х разреши́, я́коже рекл еси́, с ми́ром: / ви́дех бо очи́ма открове́ние язы́ков и Изра́илю спасе́ние. Трижды.

На хвалитех стихиры на 4, глас 4. Подобен: Дал еси́ зна́мение:

Зако́н, и́же в писа́нии, / исполня́я, Человеколю́бец / в це́рковь ны́не прино́сится, / и Сего́ прие́млет ста́рыми рука́ми Симео́н ста́рец, / ны́не отпуща́еши мя, вопия́, / ко о́ному блаже́нству: / ви́дех бо Тя днесь, пло́тию ме́ртвенною обложе́ннаго, / живото́м госпо́дствующа / и сме́ртию влады́чествующа. Дважды.

Свет во открове́ние язы́ков / яви́лся еси́, Го́споди, / на о́блаце седя́ ле́гце, / Со́лнце Пра́вды, / зако́на сено́вное исполня́я / и нача́ло изъявля́я но́выя благода́ти. / Тем, Тя ви́дев, Симео́н взыва́ше: / из истле́ния мя разреши́, / я́ко ви́дех Тя днесь.

Недр Роди́теля не отлу́чься Божество́м, / вопло́щься, я́коже изво́лил еси́, / объя́тиями держи́м Присноде́вы, / на ру́ки пода́лся еси́ Богоприи́мца Симео́на, / руко́ю Твое́ю держа́й вся́ческая; / те́мже ны́не отпуща́еши мя, / ра́достно взыва́ше, / в ми́ре раба́ Твоего́, / я́ко ви́дех Тя, Влады́ко.

Слава, и ныне, глас 6. Германово:

На рука́х ста́рческих во дне́шний день, / я́ко на колесни́це Херуви́мстей, / восклони́тися благоизво́ливый, Христе́ Бо́же, / и нас, пою́щих Тя, / страсте́й мучи́тельства призыва́емый изба́ви / и спаси́, я́ко Человеколю́бец.

Славословие великое. По Трисвятом тропарь праздника:

Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние.

Ектении и отпуст:

И́же во объя́тиях пра́веднаго Симео́на носи́тися изво́ливый на́шего ра́ди спасе́ния, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и всех святы́х, поми́лует и спасе́т нас, я́ко Благ и Человеколю́бец.

И час 1-й. На 1-м часе тропарь праздника. По О́тче наш, кондак праздника, и прочее, и совершенный отпуст. О часе же втором дне исходим с литиею вне обители, поюще стихиры праздника и канон, по обычаю. И, возвращшеся, поем часы и Литургию.

На литургии

Блажeнны от канона праздника, песни 3-я на 4, и 6-я на 4. Аще изволит предстоятель, антифоны праздника.

Антифон 1-й, псалом 44, глас 2.

Стих 1: Отры́гну се́рдце мое́ / сло́во бла́го.

Моли́твами Богоро́дицы, Спа́се, / спаси́ нас.

Стих 2: Язы́к мой / трость кни́жника скоропи́сца.

Моли́твами Богоро́дицы, Спа́се, / спаси́ нас.

Стих 3: Излия́ся благода́ть / во устна́х Твои́х.

Моли́твами Богоро́дицы, Спа́се, / спаси́ нас.

Стих 4: Сего́ ра́ди / благослови́ Тя Бог во век.

Моли́твами Богоро́дицы, Спа́се, / спаси́ нас.

Сла́ва, и ны́не: Моли́твами Богоро́дицы, Спа́се, / спаси́ нас.

Антифон 2-й, псалом 44, глас 2.

Стих 1: Препоя́ши мечь Твой / по бедре́ Твое́й, Сильне.

Спаси́ ны, Сы́не Бо́жий, / во объя́тиях пра́веднаго Симео́на носи́выйся, / пою́щия Ти: аллилу́иа.

Стих 2: И наляцы́, и успева́й, / и ца́рствуй.

Спаси́ ны, Сы́не Бо́жий, / во объя́тиях пра́веднаго Симео́на носи́выйся, / пою́щия Ти: аллилу́иа.

Стих 3: Стре́лы Твоя́ изощрены́, Си́льне, / лю́дие под Тобо́ю паду́т.

Спаси́ ны, Сы́не Бо́жий, / во объя́тиях пра́веднаго Симео́на носи́выйся, / пою́щия Ти: аллилу́иа.

Стих 4: Жезл пра́вости / жезл Ца́рствия Твоего́.

Спаси́ ны, Сы́не Бо́жий, / во объя́тиях пра́веднаго Симео́на носи́выйся, / пою́щия Ти: аллилу́иа.

Сла́ва, и ны́не: Единоро́дный Сы́не:

Антифон 3-й, псалом 44, глас 1.

Стих 1: Слы́ши, дщи, и виждь, / и приклони́ у́хо твое́.

Таже тропарь праздника, глас 1:

Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние.

Стих 2: Лицу́ твоему́ помо́лятся / бога́тии лю́дстии.

Тропарь: Ра́дуйся, Благода́тная Богоро́дице Де́во:

Стих 3: Помяну́ и́мя твое́ / во вся́ком ро́де и ро́де.

Тропарь: Ра́дуйся, Благода́тная Богоро́дице Де́во:

Вход: Сказа́ Госпо́дь спасе́ние Свое́, / пред язы́ки откры́ пра́вду Свою́.

Тропарь, глас 1: Ра́дуйся, Благода́тная Богоро́дице Де́во, / из Тебе́ бо возсия́ Со́лнце Пра́вды – Христо́с, Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, / да́рующаго нам воскресе́ние.

Сла́ва, и ны́не, кондак, глас тойже:

Утро́бу Деви́чу освяти́вый Рождество́м Твои́м / и ру́це Симео́не благослови́вый, / я́коже подоба́ше, предвари́в, / и ны́не спасл еси́ нас, Христе́ Бо́же, / но умири́ во бране́х жи́тельство / и укрепи́ лю́ди, и́хже возлюби́л еси́, Еди́не Человеколю́бче.

Прокимен, глас 3, песнь Богородицы: Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м.

Стих: Я́ко призре́ на смире́ние Рабы́ Своея́, се бо, отны́не ублажа́т Мя вси ро́ди.

Апостол ко Eвреeм, зачало 316 (Евр 7:7–17).

Бра́тие, без вся́каго прекосло́вия ме́ншее от бо́льшаго благословля́ется. И зде у́бо десяти́ны челове́цы умира́ющии прие́млют, та́мо же свиде́тельствуемый, я́ко жив eсть. И да си́це реку́, Авраа́мом и Леви́й прие́мляй десяти́ны, десяти́ны дал eсть. Eще́ бо в чре́слех óтчиих бя́ше, eгда́ сре́те eго́ Мелхиседе́к. А́ще у́бо соверше́нство леви́тским свяще́нством бы́ло, лю́дие бо на нем взаконе́ни бы́ша: ка́я eще́ потре́ба по чи́ну Мелхиседе́кову ино́му воста́ти свяще́ннику, а не по чи́ну Ааро́нову глаго́латися? Прелага́ему у́бо свяще́нству, по ну́жди и зако́ну премене́ние быва́ет. О не́мже бо глаго́лются сия́: коле́ну ино́му причасти́ся, от него́же никто́же приступи́ ко oлтарю́. Я́ве бо, я́ко от коле́на Иу́дова возсия́ Госпо́дь наш, о не́мже коле́не Моисе́й о свяще́нстве ничесо́же глаго́ла. И ли́шше eще́ я́ве eсть, я́ко по подо́бию Мелхиседе́кову воста́нет Свяще́нник ин, И́же не по зако́ну за́поведи плотски́я бысть, но по си́ле живота́ неразруша́емаго. Свиде́тельствует бо, я́ко Ты eси́ свяще́нник во век по чи́ну Мелхиседе́кову.

Аллилуиа, глас 8.

Стих: Ны́не отпуща́еши раба́ Твоего́, Влады́ко, по глаго́лу Твоему́, с ми́ром.

Стих: Свет во открове́ние язы́ков и сла́ву люде́й Твои́х Изра́иля.

Евангелие Луки, зачало 7 (Лк 2:22–40).

Во вре́мя о́но, вознесо́ста роди́теля Отроча́ Иису́са во Иерусали́м, поста́вити Eго́ пред Го́сподем. Я́коже eсть пи́сано в зако́не Госпо́дни: я́ко всяк младе́нец му́жеска по́лу, разверза́я ложесна́, свя́то Го́сподеви нарече́тся. И éже да́ти же́ртву, по рече́нному в зако́не Госпо́дни: два го́рличища или́ два птeнца́ голуби́на. И се бе челове́к во Иерусали́ме, eму́же и́мя Симео́н. И челове́к сей пра́веден и благочести́в, ча́я уте́хи Изра́илевы, и Дух бе Свят в нем. И бе eму́ обеща́но Ду́хом Святы́м, не ви́дети сме́рти, пре́жде да́же не ви́дит Христа́ Госпо́дня. И прии́де ду́хом в це́рковь. И eгда́ введо́ста роди́тeля Oтроча́ Иису́са, сотвори́ти и́ма по обы́чаю зако́нному о Нем. И той прие́м Eго́ на руку́ своéю, и благослови́ Бо́га, и рече́: Ны́не отпуща́еши раба́ Твоего́, Влады́ко, по глаго́лу Твоему́ с ми́ром. Я́ко ви́десте óчи мои́ спасе́ние Твое́, Éже eси́ угото́вал пред лице́м всех люде́й. Свет во открове́ние язы́ком и сла́ву люде́й Твои́х Изра́иля. И бе Ио́сиф и Ма́ти Eго́ чудя́щася о глаго́лемых о Нем. И благослови́ я́ Симео́н, и рече́ к Мари́и, Ма́тери Eго́: се лежи́т Сей на паде́ние и на воста́ние мно́гим во Изра́или, и в зна́мение пререка́емо. И Тебе́ же Само́й ду́шу про́йдет ору́жие, я́ко у́бо да откры́ются от мног серде́ц помышлéния. И бе А́нна проро́чица, дщи́ Фану́илева, от коле́на Аси́рова. Сия́ заматоре́вши во днех мно́зех, жи́вши с му́жем седмь лет от де́вства своего́. И та вдова́ я́ко лет óсмьдесят и четы́ре, я́же не отхожда́ше от це́ркве, посто́м и моли́твами служа́щи день и нощь. И та в той час приста́вши, испове́дашеся Го́сподеви, и глаго́лаше о Нем всем ча́ющим избавле́ния во Иерусали́ме. И я́ко сконча́шася вся по зако́ну Госпо́дню, возврати́шася в Галиле́ю, во град свой Назаре́т. Oтроча́ же растя́ше и крепля́шеся ду́хом, исполня́яся прему́дрости: и благода́ть Бо́жия бе на Нем.

Вместо Достойно: Богоро́дице Де́во, / упова́ние христиа́ном, / покры́й, соблюди́ и спаси́ на Тя уповаю́щих.

Ирмос, глас 3: В зако́не се́ни и писа́ний / о́браз ви́дим, ве́рнии, / всяк му́жеский пол, ложесна́ разверза́я, свят Бо́гу. / Тем Перворожде́нное Сло́во, Отца́ Безнача́льна, / Сы́на, Первородя́щася Ма́терию неискусому́жно, / велича́ем. И до отдания.

Причастен: Ча́шу спасе́ния прииму́ / и и́мя Госпо́дне призову́. / Аллилу́иа, трижды.

На велицей вечерни

Аще не есть пост: Вечер поем Блаже́н муж: 1-й антифон.

Аще же пост, стихологисуем обычную кафизму, и поется служба Предтечи с Триодию.

На Го́споди, воззва́х: стихиры на 6. Глас 5. Подобен: Радуйся:

Ра́дуйся, свяще́нная главо́, и светоно́сная, / и А́нгелом гове́йная, / я́же мече́м отсе́чена дре́вле, / и о́стрыми обличе́ньми нечистоты́ студ посе́кшая, / исто́чник чуде́с, ве́рныя напая́юща, / и я́же Спа́сово спаси́тельное прише́ствие возвести́вшая, / и наи́тие Ду́ха дре́вле уви́девшая, / к Сему́ все́льшаяся, / ве́тхой же и но́вой хода́тайствовавшая благода́ти. / Христа́ умоли́ душа́м на́шим дарова́ти ве́лию ми́лость. Дважды.

В сосу́де скуде́льне сокрове́нная иногда́ / Предте́чева глава́ яви́ся, / от земны́х недр изда́вшаяся я́вственне / и чуде́с струи́ источа́ющая, / и́бо в вода́х главу́ омы́, / превы́спренняя ны́не покрыва́ющего вода́ми / и одождя́ющаго челове́ком Боже́ственное оставле́ние. / Сию́ у́бо ублажи́м, и́стинно пресла́вну, / и в сея́ обре́тении ра́достно пра́зднуем, / Христа́ моля́ще дарова́ти душа́м на́шим ве́лию ми́лость. Дважды.

Глава́, я́же А́гнца Бо́жия пропове́давшая, / пло́тию я́вльшагося, / и всем покая́ния спасе́нныя пути́ Боже́ственными за́поведьми извести́вшая, / я́же пре́жде И́родово законопреступле́ние обличи́вшая / и сего́ ра́ди отсе́чена от телесе́, / и на вре́мя подъе́мшая сокрове́ние, / я́коже светоявле́нное нам возсия́ со́лнце, / пока́йтеся – вопию́щая – и ко Христу́ ны́не предложи́теся во умиле́нии душе́внем, / подаю́щему мíру ве́лию ми́лость. Дважды.

Слава, глас 6: Сокро́вище Боже́ственных даро́в, / Богохрани́мая глава́ твоя́, Предте́че, / от земны́х недр возсия́, / ю́же мы, ве́рно прие́млюще / и покланя́ющеся, сла́вне, / обогаща́емся от тебе́, Христо́в Крести́телю, / чудесы́ пресла́вными и согреше́ний проще́нием.

И ныне, Богородичен, глас тойже: Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Вход. Прокимен дне и чтения.

Проро́чества Иса́иина чте́ние (Ис 40:1–3, 9; 41:17–18; 45:8; 48:20–21; 54:1).

Та́ко глаго́лет Госпо́дь: утеша́йте, утеша́йте лю́ди Моя́. Глаго́лет Бог: свяще́нницы, глаго́лите в се́рдцы Иерусали́му, умоли́те его́, я́ко умно́жися смире́ние его́, разреши́ся бо грех его́, я́ко прия́т из руки́ Госпо́дни сугу́ба согреше́ния своя́. Глас вопию́щаго в пусты́ни: угото́вайте путь Госпо́день, пра́вы твори́те стези́ Бо́гу на́шему. На го́ру высо́ку взы́ди, благовеству́й Сио́ну, возвыша́й кре́постию глас свой, благовеству́яй Иерусали́му, вознеси́те, не бо́йтеся. Аз Госпо́дь Бог, Аз услы́шу убо́гих, Изра́илев, и не оста́влю тех. Но отве́рзу от гор ре́ки и посреде́ по́ля исто́чники, сотворю́ пусты́ню в луг и жа́ждущую зе́млю во исто́чники водны́я. Да возвесели́тся Не́бо свы́ше, и о́блацы да кропя́т пра́вду, да возсия́ет земля́, и да прозя́бнет ми́лость, и пра́вда да возсия́ет вку́пе. Глас весе́лия возвести́те, и услы́шано да бу́дет. Возвести́те да́же до коне́ц земли́, глаго́лите: я́ко изба́ви Госпо́дь раба́ Своего́ Иа́кова. И а́ще вжа́ждут в пусты́ни, источи́т им во́ду из ка́мене. Возвесели́ся, непло́ды неражда́ющая, расто́ргни и возопи́й, неболе́вшая, я́ко мно́га ча́да пусты́я па́че, не́жели иму́щия му́жа.

Проро́чества Малахи́ина чте́ние (Мал 3:1; Мк 1:2; Мал 3:1–3, 5–7, 12, 18, 17; 4:4–6).

Та́ко глаго́лет Госпо́дь Вседержи́тель: се Аз посыла́ю А́нгела Моего́ пред Лице́м Твои́м, и́же угото́вит путь Твой пред Тобо́ю и прии́дет во храм Свой Госпо́дь, Его́же вы и́щете. И кто стерпи́т день вхо́да Его́? Зане́же Тому́ приити́, я́ко огнь в горни́ле и я́коже бы́лие перу́щих. И очи́стит, пояда́я и очища́я, я́ко сребро́ и зла́то. И прии́дет к вам судо́м, и бу́дет свиде́тель скор на лука́выя, и на прелюбоде́йцы, и на клену́щияся И́менем Мои́м во лжу, и на лиша́ющия мзды нае́мника, и на наси́льствующия вдови́цы и пха́ющия си́рыя, и на уклоня́ющия суд прише́льца, и на небоя́щияся его́, глаго́лет Госпо́дь Вседержи́тель. Зане́ Аз Госпо́дь Бог ваш и не изменю́ся. И вы, сы́нове Иа́ковли, уклони́стеся от зако́на и не сохрани́сте. Сего́ ра́ди обрати́теся ко Мне, и обращу́ся к вам, глаго́лет Госпо́дь Вседержи́тель, и ублажа́т вас вси язы́цы. И разуме́йте, я́ко Аз Госпо́дь, смотря́яй посреди́ пра́веднаго и посреди́ беззако́нника в день он, во́ньже сотворю́ снабде́ние лю́бящим Мя. Позна́йте у́бо и помяни́те зако́н Моисе́ов, раба́ Моего́, я́коже запове́да вам в Хори́ве, ко всему́ Изра́илю повеле́ние и оправда́ние. И се Аз послю́ вам Илию́ Фесви́тянина, пре́жде да́же не приити́ дню Госпо́дню вели́кому просвеще́нному, и́же напра́вит се́рдце отца́ к сы́ну и се́рдце челове́ка ко и́скреннему своему́, да не прише́д, поражу́ зе́млю вско́ре, глаго́лет Госпо́дь Вседержи́тель, Бог Святы́й Изра́илев.

Прему́дрости Соломо́новы чте́ние (Прем 4:7, 16А, 17, 19–20; 5:1–7).

Пра́ведник, а́ще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. У́зрят бо кончи́ну пра́веднаго и не разуме́ют, что совеща́ша о нем, я́ко пове́ржет Госпо́дь нечести́выя безгла́сны ниц и поколе́блет их от основа́ний, и до после́дняго исче́знут в боле́зни, и па́мять их поги́бнет. Прии́дут бо в помышле́ние согреше́ний свои́х ужа́сни, и обличи́т их сопроти́в беззако́ния их. Тогда́ ста́нет в дерзнове́нии мно́зе пра́ведник пред лице́м оскорби́вших его́ и отмета́ющих труды́ его́. Ви́девше же его́, смяту́тся стра́хом мно́гим и ужа́снутся о пресла́внем спасе́нии его́. Реку́т бо в себе́, ка́ющеся, и в тесноте́ ду́ха воздо́хнут и реку́т: сей бе, его́же име́хом не́когда в посме́х и в при́тчу поноше́ния, безу́мнии, житие́ его́ вмени́хом неи́стово и кончи́ну его́ безче́стну. Ка́ко вмени́ся в сыне́х Бо́жиих, и во святы́х жре́бий его́ есть? У́бо заблуди́хом от пути́ и́стиннаго, и пра́вды свет не облиста́ нам, и со́лнце не возсия́ нам. Беззако́нных испо́лнихомся стезь и поги́бели, и ходи́хом стези́ непрохо́дны, пути́ же Госпо́дня не разуме́хом.

На стиховне стихиры, глас 2. Подобен: Егда от Древа:

Прииди́те, честну́ю главу́, отсе́ченную мече́м, Крести́телеву, / ве́рнии, днесь почти́м, / во обре́тении ея́ срета́юще пе́сньми, / чту́ще от любве́, благода́ть пролива́ющую исцеле́ний нам, / ю́же буесло́вящий И́род дре́вле предотсече́, / неи́стовством Иродиа́де спле́тся.

Стих: Честна́ пред Го́сподем / сме́рть преподо́бных Его́.

Я́коже от руды́ зла́то, / та́ко от земли́ Предте́чева глава́ просиява́ет, / в сосу́де скуде́льнем светя́щися и веща́ющи я́сно, / И́родово облича́ющи прелюбоде́йство и уби́йство, / зарю́ же просвеща́ющую помышле́ния на́ша. / Ю́же облобыза́юще, ве́рнии, днесь почти́м пе́сньми, / я́ко о нас Бо́гу моля́щуюся.

Стих: Пра́ведник, я́ко фи́никс, процвете́т, / я́ко кедр, и́же в Лива́не, умно́жится.

Дре́вле, я́коже Боже́ственное сокро́вище / в сосу́де, сокрове́нная глава́ Крести́телева в земли́ / днесь конце́м открыва́ется, / я́коже бога́тство пролива́ющая исто́чники исцеле́ний, / боле́зни исцеля́ющая, ду́ши просвеща́ющая. / Те́мже, утеше́ния вся́каго благода́ть восприе́млюще, / пе́сньми сию́ благогове́йно похва́лим.

Слава, глас 2: Я́коже Боже́ственных умышле́ний всечестна́я ра́ка, / Неизрече́ннаго Существа́ я́сно прови́девшая та́инство, глава́ твоя́, / я́ко от ложе́сн ма́терних, от сокро́вищ земны́х днесь возсия́, / Иоа́нне всехва́льне, / и облагово́ни всю подсо́лнечную, освяще́ния пролива́ющая мν́ро, / и мы́сленно пропове́дающая путь покая́ния, / и Спа́су всех моля́щаяся о душа́х на́ших.

И ныне, Богородичен, глас тойже: О чудесе́ но́ваго всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и ма́тернее дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Тропарь, глас 4: От земли́ возсия́вши, Предте́чева глава́ / лучи́ испуща́ет нетле́ния ве́рным исцеле́ний, / свы́ше собира́ет мно́жество А́нгел, / до́ле же созыва́ет челове́ческий род, / единогла́сную возсыла́ти сла́ву Христу́ Бо́гу.

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

На утрени

На Бог Госпо́дь: тропарь дважды, глас 4:

От земли́ возсия́вши, Предте́чева глава́ / лучи́ испуща́ет нетле́ния ве́рным исцеле́ний, / свы́ше собира́ет мно́жество А́нгел, / до́ле же созыва́ет челове́ческий род, / единогла́сную возсыла́ти сла́ву Христу́ Бо́гу. Дважды.

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По 1-й стихологии седален, глас 4. Подобен: Скоро предвари:

Я́ко Боже́ственное сокро́вище, сокрове́но в земли́, / Христо́с откры́ главу́ твою́ нам, проро́че и Предте́че: / вси у́бо, соше́дшеся в сея́ обре́тение, / пе́сньми Богогла́сными Спа́са воспои́м, / спаса́ющаго на́шу жизнь моли́твами твои́ми. Дважды.

Слава, и ныне, Богородичен: Пое́м Тя, Богоневе́сто, Ма́ти Христа́ Бо́га, / славя́ще Рождество́ Твое́ непостижи́мое, / и́мже изба́вихомся от ле́сти диа́воли и вся́кия беды́, Богоро́дице Влады́чице, / и ве́рно вопие́м: / поми́луй ста́до Твое́, Еди́на Всепе́тая.

По 2-й стихологии седален, глас 4. Подобен: Вознесыйся:

Изда́вшися, я́ко зла́то от руды́, / свяще́нная твоя́ глава́ пресла́вно / от незаходи́мых недр земны́х, / обогати́ ве́рных вся мы́сли разуме́нием Боже́ственным, / ны́не пока́йтеся, вопию́щи обы́чно. / Е́йже покланя́ющеся, Предте́че, Христа́ велегла́сно ве́рою сла́вим. Дважды.

Слава, и ныне, Богородичен: Никогда́же премолчи́м, Богоро́дице, / благода́рно пе́ти от души́ Твоя́ ми́лости, Влады́чице, / раби́ Твои́, зову́ще и глаго́люще: / Пресвята́я Де́во, предвари́ / и изба́ви от враг ви́димых и неви́димых и вся́каго преще́ния, / Ты бо еси́ нам заступле́ние.

Полиелей и величание:

Велича́ем тя, / Крести́телю Спа́сов Иоа́нне, / и почита́ем вси / честны́я твоея́ главы́ обре́тение.

Псалом избранный.

¹ Блаже́н муж, боя́йся Го́спода.

² В за́поведех Его́ восхо́щет зело́.

¹ Сла́ва и бога́тство в дому́ его́.

² И пра́вда его́ пребыва́ет в век ве́ка.

¹ В па́мять ве́чную бу́дет пра́ведник.

² Пра́ведник я́ко фи́никс процвете́т, я́ко кедр, и́же на Лива́не, умно́жится.

¹ Возвесели́тся пра́ведник о Го́споде, и упова́ет на Него́.

² Се́ устна́м мои́м не возбраню́, Го́споди.

¹ Ты разуме́л еси́ пра́вду мою́, и и́стину мою́.

² И язы́к мой поучи́тся пра́вде Твое́й, весь день хвале́ Твое́й.

¹ Свет возсия́ пра́веднику, и пра́вым се́рдцем весе́лие.

² Род пра́вых благослови́тся.

¹ Сла́вою и че́стью венча́л еси́ его́.

² Я́ко Ты благослови́ши пра́ведника, Го́споди.

¹ Я́ко ору́жием благоволе́ния венча́л еси́ нас.

² В ни́хже посети́ нас Восто́к с высоты́.

¹ Яви́тися во тьме и се́ни сме́ртней седя́щим.

² Напра́вить но́ги на́ша на путь ми́ра.

Сла́ва, и ны́не: Аллилу́иа, трижды.

По полиелеи седален, глас 8. Подобен: Повеленное тайно:

Крести́телева глава́ кры́яшеся, я́ко би́сер, в земли́ вла́жней / и, я́ко све́щник Богосве́тел, укра́шена, / озаря́ет, чудотворя́щи, мiр весь: / я́ко у́тро, возсия́ всеблаголе́пно Со́лнцу Предте́ча / и невече́рним све́том возвеща́я па́ки нам: / се, – взыва́я, – А́гнец Бо́жий! Дважды.

Слава, и ныне, Богородичен: Благодари́м Тя при́сно, Богоро́дице, / и велича́ем, Чи́стая, и покланя́емся, / воспева́юще Рождество́ Твое́, Благода́тная, вопию́ще непреста́нно: / спаси́ ны, Де́во Всеми́лостивая, я́ко Блага́я, / и де́монов исхити́ словоположе́ния стра́шнаго в час испыта́ния, / да не посрами́мся, раби́ Твои́.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4: Та́мо возращу́ рог Дави́ду, / угото́вах свети́льник пома́занному Моему́.

Стих: Помяни́, Го́споди, Дави́да / и всю кро́тость его́.

Другий прокимен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 31 (Лк 7:17–30).

Во вре́мя о́но, изы́де сло́во о Иису́се по всей Иуде́и, и по всей стране́. И возвести́ша Иоа́нну ученицы́ его́ о всех сих. И призва́в два не́кая от учени́к свои́х Иоа́нн, посла́ ко Иису́су, глаго́ля: Ты ли еси́ Гряды́й, или ино́го ча́ем? Прише́дша же к Нему́ му́жа, ре́ста: Иоа́нн Крести́тель посла́ нас к Тебе́, глаго́ля: Ты ли еси́ Гряды́й, или́ ино́го ча́ем? В той же час изцели́ мно́ги от неду́г и ран, и дух злых, и мно́гим слепы́м дарова́ прозре́ние. И отвеща́в Иису́с рече́ и́ма: ше́дша возвести́та Иоа́нну, я́же ви́деста и слы́шаста, я́ко слепи́и прозира́ют, хро́мии хо́дят, прокаже́ннии очища́ются, глуси́и слы́шат, ме́ртвии востаю́т, ни́щии благовеству́ют. И блаже́н есть, и́же а́ще не соблазни́тся о Мне. Отше́дшема же ученико́ма Иоа́нновома, нача́т глаго́лати к наро́дом о Иоа́нне: чесо́ изыдо́сте в пусты́ню ви́дети, трость ли ве́тром коле́блему? Но чесо́ изыдо́сте ви́дети? Челове́ка ли в мя́кки ри́зы оде́яна? Се, и́же во оде́жди сла́вней и пи́щи су́щии, во ца́рствии суть. Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка. Сей бо есть, о не́мже пи́сано есть: се, Аз послю́ А́нгела Моего́ пред лице́м Твои́м, и́же устро́ит путь Твой пред Тобо́ю. Глаго́лю бо вам: бо́лий в рожде́нных жена́ми проро́к Иоа́нна Крести́теля никто́же есть, мний же во Ца́рствии Бо́жии бо́лий его́ есть. И вси лю́дие слы́шавше и мытари́е оправди́ша Бо́га, кре́щшеся креще́нием Иоа́нновым. Фарисе́е же и зако́нницы сове́т Бо́жий отверго́ша в себе́, не кре́щшеся от него́.

По 50-м псалме.

Слава: Моли́твами свята́го сла́внаго Проро́ка, Предте́чи и Крести́теля Госпо́дня Иоа́нна, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира самогласна, глас 6:

Я́же пе́рвее на блю́де, / И́родову беззако́нную нечистоту́ обличи́вшая, / покая́ние же всем пропове́давшая ве́рным, / честна́я глава́ Крести́теля Христо́ва, / от сокро́вищ земны́х я́вльшаяся, предлежи́т, / ве́рно притека́ющим к ней, / и прикаса́ющимся со стра́хом, / и покланя́ющимся любо́вию душе́вною / да́рующая разреше́ние прегреше́ний, / проше́нием подае́т потре́бная и ве́лию ми́лость.

Канон Богородицы со ирмосом на 6 и Предтечи канон на 8, глас 6.

Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Гряди́те, благохва́льным язы́ком / и всеси́льным пле́щуще ду́хом, из усте́н нечи́стых / глас Сло́ва – Предте́чу пе́сньми духо́вными, ве́рнии, просла́вим.

Ми́рным устрое́нием утиша́ется / и безме́рными мно́жествы Христо́ва Це́рковь благостоя́тельне упаса́ется, / тебе́ ле́тнюю песнь вопию́щи, Предте́че.

Слава: Ю́же от Бо́га да́руемую я́ко сокро́вище нам неотъе́млемо / Богоно́сную главу́ Предте́чеву, вси пе́сньми досто́йно, соше́дшеся, ве́рнии, почти́м.

И ныне, Богородичен: Твоего́ прие́мши Соде́теля, / я́ко Сам восхоте́, из безсе́меннаго Твоего́ чре́ва па́че ума́ воплоща́ема, Чи́стая, / тва́рей вои́стинну яви́лася еси́ Влады́чица.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Утро́ба непло́дна прозябе́ние тя изнесе́ Боже́ственно, / я́же от язы́к це́рковь, сла́вна невестово́дца, / Христу́, и́стинному Бо́гу и Жениху́, сию́ обруча́юща.

Твоего́ Боговеща́ннаго гла́са, Предте́че Иоа́нне, / ниже́ мече́м удержа́ окая́нная прелюбоде́йца: / Боже́ственную бо твою́ нам явля́еши главу́ от земли́.

Слава: Торжеству́ющий све́тло, жела́ющ тя град учрежда́емь быва́ет, / я́ко бога́тство обре́тш та́йное / и исто́чник неоску́ден исцеле́ний, Предте́че, главу́ твою́.

И ныне, Богородичен: Боже́ственнаго Рождества́ Твоего́, Чи́стая, / вся́кий естества́ чин прехо́дит чу́до: / Бо́га бо преесте́ственно зачала́ еси́ во чре́ве / и, ро́ждши, пребыва́еши при́сно Де́ва.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8. Подобен: Повеленное тайно:

Я́ко в храни́лищи сокро́вище вложена́ Предте́чева глава́ храня́шеся, / в водоно́се кры́ющася, глас Сло́ва; / я́ко пшени́ца покрове́на, во глубине́ земли́ изцвете́, / плодонося́щи Боже́ственную жизнь. / Тоя́ вси почита́ем обре́тение, Христа́ сла́вяще, / пода́вшаго той благода́ть источи́ти исцеле́ния. Дважды.

Слава, и ныне, Богородичен: Повеле́нное та́йно прие́м в ра́зуме, / в кро́ве Ио́сифове тща́нием предста́ безпло́тный, глаго́ля Неискусобра́чней: / приклони́вый схожде́нием Небеса́ вмеща́ется неизме́нно весь в Тя. / Его́же и ви́дя в ложесна́х Твои́х, прие́мша ра́бий зрак, / ужаса́юся зва́ти Тебе́: / ра́дуйся, Неве́сто Неневе́стная.

Песнь 4

Ирмос: Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста, о Го́споде пра́зднующи.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Ветхаго был еси́ печа́ть, всебога́те, я́ве заве́та, / и проро́ков коне́ц извести́л еси́, / и чертогокраси́тель же Боже́ственный Но́ваго яви́лся еси́, Предте́че.

Власяны́ми ру́бы обы́чно, Предте́че, / честну́ю претерпе́л еси́ и сла́вную главу́ твою́ покры́ти ца́рскою багряни́цею, / я́ко ри́зою, ра́дуяся.

Боже́ственную главу́ твою́ отбеже́нием ни́щий и скита́яйся / твои́ми Боже́ственными наставле́ньми, / я́коже незави́стно бога́тство, Иоа́нне, показу́ет.

Слава: Заре́ю, Предте́че, Боже́ственнаго Ду́ха чту́щий тя град всегда́ моли́ уясни́ти / и Боже́ственней па́мяти твое́й безпло́тным сра́доватися.

И ныне, Богородичен: Ме́ртва мя показа́ сада́ вкуше́ние, / живо́тное же дре́во, из Тебе́ я́вльшееся, Пречи́стая, воздви́же / и ра́йския пи́щи насле́дника мя сотвори́.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Не был еси́ трость, Крести́телю, искуси́тельными злополуче́ния ве́тры всегда́ коле́блемь, / столп же Боже́ственных люде́й непоколеби́м, / си́лою бо Илиино́ю яви́лся еси́ и Ду́ха.

И́же Божество́ отмета́яй, и умаля́я сла́ву от тебе́ кре́щшагося Христа́, / и Боже́ственную благода́ть твою́ утаева́я, / пра́ведно от огра́д Боже́ственных возбраня́емь есть.

Слава: Отве́рзл еси́ незави́стнаго Боже́ственнаго исто́чника дверь / пою́щим тя любо́вию, сла́вный Предте́че, / Боже́ственныя благода́ти источа́ющия во́ды и струи́ исцеле́ний, всех веселя́щия.

И ныне, Богородичен: Нося́щи добро́ту мы́сленную красне́йшия души́ Твоея́, / неве́ста Бо́жия была́ еси́, / запеча́тствованна де́вством, Чи́стая, и заре́ю чистоты́ мiр просвеща́ющи.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Проро́ка тя рече́ И́стина-Христо́с, и проро́ков превы́шша, / Крести́теля же и Предте́чу Жи́зни: / Того́ бо узре́л еси́, Его́же зако́н и проро́цы провозвести́ша.

Не терпя́ше кры́тися чуде́с исто́чник, сокро́вище благода́ти, / сла́вная глава́ твоя́, Крести́телю, проро́че и Предте́че, / но, я́вльшися, пролива́ет исцеле́ний исто́чники.

Слава: Всебога́тно похвале́ние, и украше́ние све́тло, / и щит спаси́телен христолю́бный сей / и благосла́вный предлага́ет град твой, / честну́ю и Боже́ственную твою́ главу́, Предте́че.

И ныне, Богородичен: Вели́кий прописа́ во проро́цех Моисе́й Тя, киво́т, и трапе́зу, и све́щник, / и ста́мну обра́зне, назна́менуя воплоще́ние, / е́же из Тебе́, Вы́шняго, Ма́ти Де́во.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 6. Подобен: Вышних ища:

Проро́че Бо́жий и Предте́че благода́ти, / главу́ твою́, я́ко ши́пок свяще́ннейший, от земли́ обре́тше, / исцеле́ния всегда́ прие́млем, / и́бо па́ки, я́коже пре́жде, в мíре пропове́дуеши покая́ние.

Икос: От Го́спода свиде́тельство прие́м, Иоа́нне, па́че всех челове́к вы́шший был еси́, / отону́дуже похвалы́ пе́сней принести́ тебе́ ужаса́юся, / но, любо́вию понужде́н, песнь нача́ти дерзну́х. / Те́мже да не унедосто́иши споспе́шник мне бы́ти, всехва́льне, / да возмогу́ венча́ти твой верх, святы́й требога́те, / и́бо ты в мíре пропове́дуеши покая́ние.

Песнь 7

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Де́вы прозябе́ние, тя па́че всех рече́ в рожде́нных жена́ми, / я́ко бо безпло́тен и равноа́нгелен на земли́ Тому́ пожи́л еси́, вопия́: / благослове́н еси́, Бо́же оте́ц на́ших.

Во утро́бе де́вственней Все́льшася позна́л еси́ из непло́дна чре́ва / и, употреби́в ма́терня, Предте́че, гла́са, игра́я взыва́л еси́ Ему́: / благослове́н еси́, Бо́же оте́ц на́ших.

От пусты́ни, Пресвяты́м Ду́хом науче́н, яви́лся еси́, / я́коже у́тро светоно́сно, / А́нгел Све́та, нас науча́я вопи́ти: / благослове́н еси́, Бо́же оте́ц на́ших.

Слава: Ублажи́ся я́ко вои́стинну во граде́х сей ны́не, приснопа́мятне, / стяжа́вый тя град сокро́вище, Предте́че Христо́в. / Те́мже, пра́зднуя, вопие́т: / благослове́н еси́, Бо́же оте́ц на́ших.

И ныне, Богородичен: Тобо́ю, Ма́ти Де́во, Свет возсия́ всей вселе́нней све́тлый, / Ты бо Зижди́теля всех родила́ еси́, Бо́га: / у Него́же испроси́, Пречи́стая, нам низпосла́ти ве́рным ве́лию ми́лость.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

По́слан бысть вопию́щаго глас – Предте́ча запусте́вшим сердца́м, / Сы́на Бо́жия ве́ру благочести́вую водружа́яй, су́щаго Бо́га, / Его́же превозно́сим во вся ве́ки.

Угото́вите, глаго́лет и ны́не Предте́ча, Госпо́дню стезю́: / Сей бо святы́ни ра́ди, прише́д, со Отце́м и Ду́хом / в на́ша сердца́ всели́тся во ве́ки.

Слу́хом у́бо гла́су Роди́телеву, очи́ма же Боже́ственнаго Ду́ха зре́нию, / вся́чески же осяза́нием Иоа́нн Предте́ча, на Тебе́ ру́ку положи́вый, Христе́, / Богоно́сец быва́ет.

Благослови́м Отца́ и Сы́на и Свята́го Ду́ха, Го́спода.

Из чре́ва освяти́ся Боже́ственным Ду́хом / и проро́к яви́ся, во чре́ве носи́м, / ны́не же наслажде́ние и́же в не́дрех тя иму́щему гра́ду показа́ся, проро́че.

И ныне, Богородичен: Златоза́рный Тя све́щник предизобрази́, / прие́мшую неизрече́нно Свет Непристу́пный, / позна́нием Того́ озаря́ющ вся́ческая, / Его́же превозно́сим во вся ве́ки.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Я́ве исполне́ния десяти́цы, Предте́че, за́поведей ты храни́тель кре́пок быв, / прили́чне от Христа́ почте́н был еси́ дарова́ний десяти́цею. / Те́мже тя, Ду́ха таи́нника и дру́га Сло́ву, ве́дуще, ублажа́ем.

Христо́в проро́к же и апо́стол, А́нгел же и Предте́ча, / Боже́ственнаго воплоще́ния Крести́тель, / и свяще́нник, и му́ченик ве́рен, / пропове́дник же су́щим во а́де ты был еси́, / и де́вствующим пра́вило, и пусты́ни прозябе́ние.

Души́ неве́рие облича́ется священноде́йственныя руки́ умерщвле́нныя чудесе́м, / прозя́бший же па́ки ве́ре и твое́й я́вльшейся главе́, блаже́нне, / поже́ртая длань обновля́ется.

Слава: Твое́ явле́ние провозвеща́юще зри́телю, / возвеща́ху А́нгельстии чи́ни нело́жно, / Гаврии́ла подо́бящеся Боже́ственному благове́щению, / е́же пре́жде Рождества́ твоего́ свяще́нный Заха́рия прие́млет.

И ныне, Богородичен: Страсте́й исцеле́ния да почерпа́ем, в сла́вный храм Предте́чев притека́юще: / в той бо прихо́дят А́нгельстии ли́цы, / ду́си же пра́ведных всех, / Влады́чица с Крести́телем Иоа́нном, исцеле́ния подава́юще.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен. Подобен: Учеником:

Светоявле́нная возсия́ честна́я твоя́ глава́ от незаходи́мых недр земны́х, Предте́че Иоа́нне, / свети́льниче Све́та невеще́ственнаго, / ея́же обре́тение любо́вию соверша́юще, мо́лим тя / лю́тых обрести́ разреше́ние и вре́мя удо́бне соверши́ти воздержа́ния / моли́твами твои́ми, всехва́льне, Крести́телю Спа́сов. Дважды.

Слава, и ныне, Богородичен: Утеша́ется, Всечи́стая, ве́рных Богому́дрое собра́ние служа́щее / и ве́рно воспева́ющее Тя, Богоро́дицу и́стинно. / Те́мже моли́твами Твои́ми поста́ тече́ние даждь нам соверши́ти Боголе́пно, / и Кресту́ Честно́му поклони́тися, и страсте́м спаси́тельным Сы́на и Бо́га Твоего́.

На хвалитех стихиры на 4, глас 4. Подобен: Дал еси знамение:

Отве́рзе преддве́рия воздержа́ния / всечестна́я глава́ твоя́, всехва́льне, / и пи́щу предложи́ сладча́йшую всем Боже́ственных дарова́ний, / и́хже причаща́ющеся ве́рно, / поста́ те́рпкое услажда́ем, / и ве́рою восхваля́ем тя, / и вопие́м Христу́ Бо́гу: / Иису́се Всеси́льне, Спа́се душ на́ших. Дважды.

Мν́ра, я́коже во́ды, / глава́ иска́пающи Предте́чева приснотеку́щая / и, на трапе́зе днесь возло́жшися та́йней и Боже́ственней, / благоуха́ет мы́сленне, / и го́ресть отгоня́ет скорбе́й, / и весе́лия вся исполня́ет любо́вию зову́щия: / Иису́се Всеси́льне, Спа́се душ на́ших.

Посече́ глава́ твоя́, я́коже меч остре́йший, / главы́ беззако́ннующих враг / и исцеле́ния источи́ в благозако́нии су́щим всем / Боже́ственных дарова́ний. / И сего́ ра́ди тя ве́рно восхваля́ем, / дру́га и Предте́чу, Иоа́нне, Зижди́телева, / и вопие́м Ему́ приле́жно: / Иису́се Всеси́льне, Спа́се душ на́ших.

Слава, глас 6: Всечестну́ю главу́ Крести́теля Твоего́, Го́споди, / я́вльшуюся днесь от земли́, / со гла́сом хвале́ния прие́мшии ве́рно, / в моли́тву, Человеколю́бче, гре́шнии раби́ Твои́ приводя́ще, мо́лимся, / Тоя́ ра́ди улучи́ти в день Суда́ от Тебе́ очище́ние и ве́лию ми́лость.

И ныне, Богородичен: Благолюби́вый Бо́же и Спа́се, / рабы́ Твоя́ спаса́й от вся́каго обстоя́ния лю́таго / моли́твами Предте́чи Твоего́ и всех святы́х / и Ма́тере Твое́й мольба́ми.

Славословие великое. По Трисвятом тропарь праздника:

От земли́ возсия́вши, Предте́чева глава́ / лучи́ испуща́ет нетле́ния ве́рным исцеле́ний, / свы́ше собира́ет мно́жество А́нгел, / до́ле же созыва́ет челове́ческий род, / единогла́сную возсыла́ти сла́ву Христу́ Бо́гу.

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Ектении́ и отпу́ст.

На литургии

Блаженны от канона на 8, песни 3-я и 6-я.

Тропарь святому, глас 4:

От земли́ возсия́вши, Предте́чева глава́ / лучи́ испуща́ет нетле́ния ве́рным исцеле́ний, / свы́ше собира́ет мно́жество А́нгел, / до́ле же созыва́ет челове́ческий род, / единогла́сную возсыла́ти сла́ву Христу́ Бо́гу.

Кондак, глас 6. Подобен: Вышних ища:

Проро́че Бо́жий и Предте́че благода́ти, / главу́ твою́, я́ко ши́пок свяще́ннейший, от земли́ обре́тше, / исцеле́ния всегда́ прие́млем, / и́бо па́ки, я́коже пре́жде, в мíре пропове́дуеши покая́ние.

Прокимен, глас 7: Возвесели́тся пра́ведник о Го́споде / и упова́ет на Него́.

Стих: Услы́ши, Бо́же, глас мой, внегда́ моли́ти ми ся к Тебе́.

Послание к коринфяном второе, зачало 176 (2 Кор 4:6–15).

Бра́тие, Бог реки́й из тмы све́ту возсия́ти, и́же возсия́ в сердца́х на́ших, к просвеще́нию ра́зума сла́вы Бо́жия о лице́ Иису́с Христо́ве. И́мамы же сокро́вище сие́ в скуде́льных сосу́дех, да премно́жество си́лы бу́дет Бо́жия, а не от нас. Во всем скорбя́ще, но не стужа́юще си, не ча́еми, но не отчаява́еми, гони́ми, но не оставля́еми, низлага́еми, но не погиба́юще. Всегда́ ме́ртвость Го́спода Иису́са в те́ле нося́ще, да и живо́т Иису́сов в те́ле на́шем яви́тся. При́сно бо мы живи́и в смерть предае́мся Иису́са ра́ди, да и живо́т Иису́сов яви́тся в ме́ртвенней пло́ти на́шей. Те́мже смерть у́бо в нас де́йствует, а живо́т в вас. Иму́ще же то́йже дух ве́ры, по пи́санному: ве́ровах, те́мже возглаго́лах, и мы ве́руем, те́мже и глаго́лем, ве́дяще, я́ко Воздви́гий Го́спода Иису́са, и нас со Иису́сом воздви́гнет, и предпоста́вит с ва́ми. Вся бо вас ра́ди, да благода́ть умно́жившаяся, мно́жайшими благодаре́нии избы́точествит в сла́ву Бо́жию.

Аллилуия, глас 4.

Стих: Пра́ведник, я́ко фи́никс, процвете́т, я́ко кедр, и́же в Лива́не, умно́жится.

Стих: И́стина от земли́ возсия́, и пра́вда с Небесе́ прини́че.

Евангелие от Матфея, зачало 40 (Мф 11:2–15).

Во вре́мя о́но, слы́шав Иоа́нн во узи́лищи дела́ Христо́ва, посла́ два от учени́к свои́х, рече́ Ему́: Ты ли еси́ Гряды́й, или́ ино́го ча́ем? И отвеща́в Иису́с рече́ им: ше́дша возвести́та Иоа́ннови, я́же слы́шита и ви́дита. Слепи́и прозира́ют и хро́мии хо́дят, прокаже́ннии очища́ются и глуси́и слы́шат, ме́ртвии востаю́т и ни́щии благовеству́ют. И блаже́н есть, и́же а́ще не соблазни́тся о Мне. Те́ма же исходя́щема, нача́т Иису́с наро́дом глаго́лати о Иоа́нне: чесо́ изыдо́сте в пусты́ню ви́дети? Трость ли ве́тром коле́блему? Но чесо́ изыдо́сте ви́дети? Челове́ка ли в мя́кки ри́зы облече́нна? Се, и́же мя́ккая нося́щии, в доме́х ца́рских суть. Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка. Сей бо есть, о не́мже есть пи́сано: се, Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю. Ами́нь глаго́лю вам, не воста́ в рожде́нных жена́ми бо́лий Иоа́нна Крести́теля, мний же во Ца́рствии Небе́снем бо́лий его́ есть. От дней же Иоа́нна Крести́теля досе́ле Ца́рствие Небе́сное ну́дится, и ну́ждницы восхища́ют е́. Вси бо проро́цы и зако́н до Иоа́нна прореко́ша. И а́ще хо́щете прия́ти, той есть Илия́ хотя́й приити́. Име́яй у́ши слы́шати да слы́шит.

Причастен: В па́мять ве́чную бу́дет пра́ведник, / от слу́ха зла не убои́тся. / Аллилу́иа, трижды.