Собрание творений

Слово святаго Афанасия о иконе Господа нашего Иисуса Христа

Афанасий Великий, архиепископ Александрийский, поведаше: чюдо преславно, достойно памяти, сотворшееся в граде Вурите от иконы Христа Бога нашего. Некто хрестианин, живяше в хлевине близ собора жидовска, имеяше же икону, на нейже написан образ Христа Бога нашего по человеческому естеству. По времени же купи собе ин дом и отъиде от хлевины тоя, взем свое, остави икону Господню в хлевине. Се же бысть по смотрению Божию, вселижеся в ту хлевину жидовин, идеже бе икона Господня, и внес своя, живяше ту, но не ведяше, яко икона Господня стояше ту. По времени же позва на обед иного жидовина, друга своего. Обедающема же има, и возре званный жидовин, и виде икону Господню стоящу, и рече к звавшему его: како ты, жидовин сый, сию икону в храме своем держиши? Живяй же ту жидовин нача ротитися и клятися, глаголя: яко и доселе несмь ея ведел. Отшед же званный жидовин, навади к иереем, глаголя: яко он сый жидовин имеет икону Назарянина в дому своем. И исполнишася на нь все гнева, но тогда умолчаша, понеже бе уже вечер. Наутрия же собра мног народ архиерей и старци, и приидоша в дом, идеже бе икона Господня, и вскочивше в храмину, обретоша икону стоящу, и изнесше ю, поставиша посреде собора своего и реша: якоже отци наши поругашася ему, тако и мы сотворим иконе сей. И начаша плевати на икону и бити по образу лица Христова сюду и овоуду, и посем рекоша: слышали есмы, яко и на древе пригвоздиша отци наши, да сотворим и мы иконе сей такоже. И вземше гвоздия в образ руку и ногу его вбиша, и вознесше на трость губу со оцтом, приложиша к образу уст Господень. Посем принесоша копие и повелеша некоему ударити его в ребра образа Господня, и яко удари в икону копием, и абие потече кровь и вода, и бысть страх велик на всех жидех, видящих чюдо преславно, и наполниша сосуд текущие воды и крови. Совет же сотвориша, глаголюще сице: приведем слепыя и хромыя и бесныя, помажем сею кровию, да аще видим знамение, вси веруем Распятому: страх бо ны одержит о сем чюдесе. И принесоша единого хрома ногама от рождества, ти яко помазаша от крове, и абие воскочи и бысть весь здрав человек. Посем приведоша слепыя и ти помазани прозреша, и беснующияся безсчислене от помазаниа крове очистишася. И увидено же бысть по всему граду, и вси течаху к неизглаголанному тому чюдеси, своя несуще недужныя, разслабленыа, прокаженныя, сухия и плазящая, и все целбу прияша. Тогда весь народ жидовеск вероваша в Господа нашего Исуса Христа, и падше пред образом иконы Господня, вопияху глаголюще со слезами: слава Тебе Христе Сыне Божий, яко таковая твориша чюдеса; слава Тебе Христе, егоже отци наши распяша. Но в тя веруем, приими ны припадающа ти, Владыко! Вси же жидове града того, мужи и жены и дети, к епископу приидоша, моляще и прияти от него крещение. Икону же Господню показаша епископу, и вся яже на ней поругания створиша исповедаша, и истекшую кровь и воду показаша, и многа от нея чюдеса сказаша. Ихже приим епископ и на многы дни поучив и вся с женами и с детьми крести и, и сборище их створи церковь Господа нашего Исуса Христа. Тогда бысть радость велика в граде том не токмо о исцеливших недужных, но и крестившихся неверных жидех, иже приаша святую веру чюдесе ради бывшаго от иконы Господа нашего Исуса Христа. Того ради всяк христиан верою и любовию покланяние творит святым иконам. Тому слава с Отцем и Святым Духом ныне и присно и в веки веком. Аминь.