Владимир Святой [3-е издание]

ПРИЛОЖЕНИЯ

Месяца июля в 15 день. Память и похвала князю Володимиру, како крестися Володимир и дети своя крести и всю землю Рускую от конца и до конца, и како крестися баба Володимерова Олга преже Володимера. Списано Иаковом мнихом.

Паул святыи апостол, церковный учитель и светило всего мира, посылая к Тимофею писание, глаголаше: «Чядо Тимофею, еже слыша о[т] мене многы послухы, тоже предай же верным человеком, иже доволне будут и ины научити». И блаженыи апостол Лука еуангелист к Феофилу писаше, глаголя: «Понеже мнози начаша повести деяти о известных вещех, бывших в нас, изволися и мне, ходившю исперва и по всех, писати тебе, державный Феофиле, да разумевши о них же начат Исус творити же и учити». К тому Феофилу написа Деания апостолская и Еуангелие святыи апостол Лука. Потом многых святых писати начаша житиа и мучениа. Тако же и аз, худыи мних Иаков, слышав от многых о благовернем князи Володимери всея Рускиа земля, о сыну Святославле, и мало събрав от многыя добродетели его, напи-сах, и о сыну его, реку же святою славную мученика Бориса и Глеба, како просвети благодать Божиа сердце князю Рускому Володимеру, сыну Святославлю, внуку Игореву, и възлюбивыи[146] человеколюбивый Бог, хотяи спасти всякого человека и в разум истинный прити, и вжада святаго крещения. Яко же жадаеть елень на источники водныа, тако вжада благоверный князь Володимир святаго крещениа, и Бог сътвори хотение его; пишеть бо: «Волю боящихся его творить и молитву их услышит и спасеть я»; и сам рече Господь: «Просите и приимете, ищете и обрящете, толчете и отверзется вам, всяк просяи прииметь, ищаи обрящеть, толкущему отверзается»; и паки рече: «Иже веру иметь и крестится, и спасен будеть, а иже веры не имать, не крестится, уже осужен будеть». Взиска спасениа и прия о бабе своей Олзе, како шедши к Царюгороду, и приала бяше святое крещение, и пожи добре пре[д] Богом, всими добрыми делы украсившися и почи с миром о Христе Исусе и в блазе вере. То все слышав князь Володимер о бабе своей Олзе, нареченеи в святем крещении Елена, тоя и жизни подража святыя царица Елены, блаженыа княгини Олги; то слышав князь Володимер, разгарашется Святым Духом сердце его, хотя святаго крещениа. Видя же Бог хотение сердца его, провидя доброту его, и призри с небесе милостью своею и щедротами и в Троици славимый Бог Отець и Сын и Святыи Дух на князя Володимера, испытал сердца и утробы, Бог праведен, вся преже ведыи, и просвети сердце князю Рускыя земля Володимеру приати святое крещение.

Крести же ся сам князь Володимер, и чада своя, и всь дом свои святым крещением просвети и свободи всяку душю, мужеск пол и женеск, святаго ради крещения. И възрадовася и възвеселися о Бозе Давыдьскы князь же Володимир и акы святыи пророк дивный Амбакум о Господе веселяся и радуася о Бозе Спасе своем. О блаженое время и день добрый, исполнен всего блага, в он же крестися Володимер князь! И наречен бысть в святем крещении Василеи, и дар Божий осени его, благодать Святаго Духа освети сердце его, и навыче по заповеди Божий ходити и жити добре о Бозе и веру тверду удержа и неподвижиму. Крести же и всю землю Рускую от конца и до конца, и поганьскыя богы, паче же и бесы, Перуна и Хъроса и ины многы попра, и скруши идолы, и отверже всю безбожную лесть, и церковь созда каменну во имя Пресвятыа Богородица, прибежище и спасение душам верным, и десятину ей вда, тем попы набдети, и сироты, и вдовича, и нищая. И потом всю землю Рускую и грады вся украси святыми церквами, и отвержеся всея диаволя льсти, и приде от тмы диаволя на свет с чады своими, приде к Богу, крещение приим, и всю землю Рускую исторже из уст дьяволь и к Богу приведе, и к свету истинному. Рече бо Господь пророком: «Изводяи от нечестия нечестиваго, акы уста моа еси». И бысть князь Володимир акы уста Божиа и человекы от лести диаволя к Богу приведе. О колика радость и веселие бысть на земли! Ангели възвеселишася и архангел и, и святых дуси взыграшася; сам рече Господь: «Колика радость бываеть на небесех о единем грешници кающимся». Толико бещисла душь по всей земли Рускои приведены к Богу святым крещением. Похвалы всякыя дело то достойно створи и радости духовныя полно.

О блаженыи и треблаженыи княже Володимере, благоверне и христолюбиве и страннолюбче, мъзда твоа многа зело пред Богом! То же блаженыи Давыд глаголаше: «Блажен человек, его же ты накажеши, Господи, и от закона твоего научиши и, да укротиши и от днии лют». Блаженыи князь Володимер, уклонився от службы диаволя, и приде к Христу Богу, Владыце своему, и люди своа приведе и научи я служити Богу; сам бо Господь рече: «Иже створить и научит, се велик наречется в царствии небеснем». А ты, о блаженыи княже Володимере, бысть апостол в князех, всю землю Рускую приведе к Богу святым крещением, и научи люди своя кланятися Богу, славити и пети Отца и Сына и Святаго Духа. И вси людие Рускыя земля познаша Бога тобою, божественыи княже Володимире. Възрадоваша же ся ангельстии чини, агнеце честнии; ныне радуются вернии и воспеша и въсхвалиша; акы младенци иевреистии с ветвьми устретоша Христа, вопиюще: «Осана Христу Богу, победителю смерти», тако и новоизбраннии людие Руския земля въсхвалиша Владыку Христа с Отцем и Святым Духом, и к Богу приближившеся крещением и диавола отврьгшеся, и службы его поругашася и поплеваша бесы и познаша Бога истиннаго, творца и съдетеля всей твари, и поють по вся дни живота и на всяк час песнь чюдную, хвалу архангельскую: «Слава в вышних Богу и на земли мир, в человецех благоволение». И ты, блаженыи княже Володимеру, подобно Костянтину великому створи. Яко же он верою великою и любовью Божиею подвихся, утверди всю вселеную любовию и верою, и святым крещением просвети весь мир, и закон Божий по всей вселенеи заповеда, и раздруши храмы идольскыя с лжеименьными богы, и святыя же церкви по всей вселенеи постави на хвалу Богу, в Троици славимому, Отцю и Сыну и Святому Духу, и крест обрете, всего мира спасение, с божественою и богомудрою матерью своею святою Оленою и с чады многы, приведе к Богу святым крещением бещисленое множество, и требища бесовьская потреби, и храмы идольскыа раздруши, и церквами украси всю вселеную и грады, и заповеда в церквах памяти святых творити пении и молитвами и празникы празновати на славу и на хвалу Богу: тако же и блаженыи князь Володимир створи с бабой своей Олгои.

Похвала княгине Олги, како крестися и добре поживе по заповеди Господни.

Та бо блаженая княгине Руская Олга, по смерти мужа своего Игоря, князя Рускаго, освещена бывши Божиею благодатию и в сердци приимши Божию благодать. О како похвалю блаженую княгиню Олгу, братие? Не виде! Телом жена сущи, мужеску мудрость имеющи, просвещена Святым Духом, разумевши Бога истиннаго, творца небу и земли, въставши, иде в землю Гречьскую, в Царьград, идеже цари крестиании и крестьаньство утвердися, и пришедши, проси крещения, и примши святое крещение, възвратися в землю Рускую, в дом свои и к людем своим с радостию великою, освещена духом и телом, несущи знамение честнаго креста. И потом требища бесовьская ськруши и нача жити о Христе Исусе, възлюбивши Бога всим сердцем и всею душею, и поиде въслед Господа Бога, всими добрыми делы осветившися и милостынею украшьшися, нагыя одевающи, жадныя напаяющи, и странныа покоивающи, и нищаа и вдовица и сироть вся милующи, и потребу дающи всяку с тихостию и любовью сердца, и молящи Бога день и нощь о спасении своем. И тако поживши и добре славящи Бога в Троици, Отца и Сына и Святаго Духа, почи в блазии вере, сконча житие свое с миром о Христе Исусе Господе нашем. И Бог прослави тело своеа си Олены, ей же имя в святем крещении наречено блаженыя княгини Олгы: и есть в гробе тело еа честное и нераздрушимое пребывае[ть] и до сих днии; Бог бо своя рабы славить, рече бо пророком: «Славящая мя прославлю и укаряаи бещести будеть». Блаженая бо княгини Олга прослави Бога всими делы своими добрыми, и Бог прослави ю. И ино чюдо слышите о ней: в гробе, идеже лежить блаженое и честное тело блаженыа княгине Олгы, гроб камен мал в церкви Святыя Богородица, ту церковь създа блаженыи князь Володимер каменую в честь Святей Богородици, и есть гроб блаженыа Олгы и на верху гроба оконце сътворено и ту да видети тело блаженыя Олгы лежаще цело; да иже с верою придеть, отворится оконче и видеть честное тело лежаще цело и дивяся чюду таковому, толико лет в гробе лежащю телу не раздрушимуся. И человеце же верней, видевше чюдо толико, славять Бога, дивящеся милости Божий, юже имать на святых своих. О дивное и страшное чюдо, братие, и преславно, достойно и похвалы всякоя! Тело то честное в гробе цело, акы спя почивает. Поистине «дивен Бог в святых своих, Бог Израилев». То видя, верней человеце прославят Бога, прославляющего рабы своя. А другым, иже не с верою прихо[дя]ть, не отворится оконче гробное, и не вилять тела того честнаго, но токмо гроб. Тако Бог прослави рабу свою Олгу, Рускую княгиню, нареченую в святем крещении Елена. По святем же крещении си блаженая княгини Олга живе лет 15, и угодив Богу добрыми делы своими, и успе месяца июля в 11 день в лето 6477-е (969), душу свою честную предавши в руце Владыце Христу Богу. Послушайте, възлюблении.

Блаженыи же князь Володимир, внук Олжин, крестився сам, и чада своя, и всю землю Рускую крести от конца и до конца, храмы идольскыя и требища всюду раскопа и посече, и идолы ськруши, и всю землю Рускую и грады и честными иконами церкви украси, и памяти святых в церквах творяще пением и молитвами, и празноваше светло празникы Господьскыя, три трапезы поставляше: первую митрополиту с епископы и с черноризце и с попы, вторую нищим и убогы[м], третьюю собе и бояром своим и всим мужем своим, подобяся царем святым блаженыи князь Володимир пророку Давыду, царю Езекею, и треблаженому Иосею, и великому Костянтину, иже избраша и изволиша Божий закон боле всего и послужиша Богу всим сердцем и получиша милость Бо-жию и наследиша рай и приаша царство небесное и почиша с всеми святыми, угожьшими Богу. Тако же блаженыи князь Володимир послужив Богу всим сердцем и всею душею. Не дивимся, възлюбленеи, аще чюдес не творить по смерти, мнозе бо святии праведней не створиша чюдес, но святи суть. Рече бо негде о том святыи Иоанн Златоусты: «От чего познаем и разумеем свята человека, от чюдес ли, или от дел?» И рече: «От дел познати, а не от чюдес», много бо и вльсви чюдес створиша бесовьскым мечтанием, и бяху святей апостоли и бяху лжии апостоли; беша святей пророци и бяху лжии пророци, слугы диаволя; ино чюдо, и сам сотона преображается в ангел светел; но от дел разумети святаго, яко же апостол рече: «Плод духовный есть любы, терпение, благоверие, благость, кротость и въздержание; на таковых несть закона». Блаженыи же князь Володимер всим сердцем и всею душею Бога возлюби и заповеди его взыска и схрани. И вся страны бояхуся его, и дары приношаху ему. И възвеселися и възрадовася о Бозе и о святем крещении и хваляше и славяше Бога о всем том князь Володимер и сице в радости смирением сердца глаголаше: «Господи Владыко благыи, помянул мя еси и привел мя еси на свет, и познах Тя, всея твари Творца. Слава Ти, Боже всех, Отче Господа Бога нашего Исуса Христа! Слава Ти с Сыном и Святым Духом, сице мя помиловав. Во тме бях, диаволу служаи и бесом, но Ты мя святым крещением просвети; акы зверь бях, многа зла творях в поганьстве и живях, акы скотина, но Ты мя укроти и наказа своею благодатью. Слава Ти, Боже, в Троици славимый, Отче и Сыне и Святыи Душе, Троице Святая, помилуй мя, настави мя на путь Твои и научи мя творити волю Твою, яко Ты еси Бог мой». Князь же Володимир поревнова святых мужь делу и житию их и възлюби Аврамово житие и подража страннолюбие его, Иаковлю истину, Моисеову кротость, Давыдово безлобие, Костянтина царя великаго, перваго царя крестианьскаго, того подражая правоверие. Боле же всего бяше милостыню творя князь Володимер; иже немощней и старей не можаху дойти княжа двора и потребу взяти, то в двор им посылаше, немощным и старым всяку потребу блаженыи князь Володимир даяше. И не могу сказати многыя его милостыня: не токмо в дому своем милостыню творяше, но и по всему граду, не в Киеви едином, но и по всей земли Рускои и в градех, и в селех, везде милостыню творяше, нагыа одевая, алчьныя кормя и жадныа напаяа, странныа покояа милостью, церковникы честя и любя и милуя, подавая требование, нищая, и сироты, и вдовица, и слепыа, и хромыа, и трудоватыа вся милу[я], и одеваа, и накормя, и напаяа. Тако же пребывающу князю Володимеру в добрых делех, благодать Божиа просвещаше сердце его, и рука Господня помагаше ему; и побежаше вся врагы своа, и бояхутся его вси. Идеже идяше, одолеваше: радимице победи и дань на них положи, вятичи победи и дань на них положи на обоих, и ятьвягы взя, и сребреныа болгары победи, и на козары шед, победи а и дань на них положи. Умысли же и на греческыи град Корсунь и сице моляшеся князь Володимир Богу: «Господи Боже Владыко всех, сего у тебе прошю: даси ми град, да прииму и да приведу люди крестианы и попы на свою землю, и да научать люди закону крестианьскому». И послуша Бог молитвы его; и прия град Корсунь, и вся съсуды церковныа и иконы и мощи святаго священномученика Климента и иных святых. И в ты дни беаста царя два в Цариграде: Костянтин и Василеи. И посла к ним Володимир, прося у них сестры оженитися, да ся бы болма на крестиань[с]кыи закон направил. И даста ему сестру свою и дары многы присласта к нему и мощи святых даста ему; и положь и. Тако добре поживе благоверный князь Володимир и сконча свое житие в правоверней вере о Христе Исусе Господемь нашим и с благоверною Олгою; и та бо шедши Царюграду, приала бяше святое крещение и много створив добра в житии семь пред Богом, и сконча житие свое в добрей вере и почи с миром, в руце Божий дупло предавши. И еще живу сущю Володимиру князю, рать бяше от печенег; Володимер же бяше болестью одержим, в той же болезни предасть душю свою в руце Божий.

Молитва князя Володимера.

Володимир князь, отходя света сего, сице моляшеся, глаголя: «Господи Боже мои, не познал Тебе бях, но помиловал мя еси и святым крещением просветил мя еси, и познах Тя, Боже всех, святыи Творче всея твари, Отче Господа нашего Исуса Христа. Слава Ти [с] Сыном и Святым Духом! Владыко Боже, не помяни моей злобы, не знал есмь Тебе в поганьстве, ныне же Тя знаю и виде; Господи Боже мои, помилуй мя. Аще мя хощеши казнити и мучити за грехы моя, казни сам мя, Господи, бесом не предай же мене». И сице глаголя и моляся Богу, преда душю свою с миром ангелом Господним и успе. Праведных бо души в руку Божию суть, и мъзда им от Господа и строение им от Вышняго; того ради приимуть венець красоты от руку Господню. По святем же крещении поживе блаженыи князь Володимир 28 лет. На другое ле[то] по крещении к порогом ходи, на третьее Корсунь город взя, на четвертое лето церковь камену Святыа Богородица заложи, а на пятое лето Переяславль заложи, в девятое лето десятину блаженыи христолюбивый князь Володимир вда церкви Святей Богородице и от имениа своего. О том бо и сам Господь рече: «Идеже есть скровище ваше, ту и сердце ваше будеть»; блаженыи князь Володимир имяше скровище свое на небесех, ськрыв милостынею и добрыми своими делы: тамо и сердце его бе в царствии небеснем. И Бог поможе ему, и седе в Киеве, на месте отца своего Святослава и деда своего Игоря. А Святослава князя печенези убиша; а Ярополк седяше в Киеве на месте отца своего Святослава, и Олег идыи с вой, у Вруча града мост ся обломи с вой, и удавиша Олга в гребли, а Ярополка убиша в Киеве мужи Володимерове. И седе в Киеве князь Володимер в осмое лето по смерти отца своего Святослава, месяца июня в 11, в лето 6486 (978). Крести же ся князь Володимир в 10-е лето по убьении брата своего Ярополка. Каашется и плакашется блаженыи князь Володимир всего того, елико створи в поганьстве, не зная Бога. Познав же Бога истиннаго, Творца небесе и земли, покаявся всего, и отвръжеся дьавола и бесов и всея службы его, и послужи Богу добрыми делы своими и милостынею. Успе с миром месяца июля в 15 день, в лето 6523 (1015) о Христе Исусе Господемь на[шимь].

Проложное Житие князя Владимира издавалось неоднократно по различным спискам. Ниже печатается один из наиболее ранних и авторитетных списков Жития по пергаменному Прологу первой половины XIV в. (РГАДА- Ф- 381, № 173. Л. 162 об. — 163 об.). Житие читается под 15 июля, днем памяти святого князя.

В тъ же день успение блаженаго князя Володимира, крестившаго[147] Рускую землю.

Сь бысть сын Святославль от племене варяжьска князь Володимир, пьрвое к идолом много тыцание творя по отчю преданию. Да егда Бог въсхоте собе избьрати люди новы, въдъхну в сего благодать Святаго Духа. И възбну акы от сна от лютаго идолослужения, и посла по всем языком, испытая закон их, како верують, и уведев святую гречькую веру, яко свещю на светиле, и рече в собе: «Сице створю, пойду в землю их и пленю грады их и обрящю учителя». Да еже умысли, то и створи. Шед, взя Кърсунь и посла к цесарю грецкому, глаголя: «Дай за мя сестру свою, аще ли не даси, створю граду твоему яко и сему створих». Он же отвеща: «Несть еде таковаго обычая крестьяном даяти за поганыя. Аще ли ся крьстишь, то и се получиши, и вяще сего царство небесное». И рече Володимир: «Тако створю. Пришедъше от тебе с цесарицею крестять мя». И в то время въпал бяше Володимир в недуг лют обема очима. И рече пославши цесарица к нему: «Аще не крестишься, не избудеши болезни сея». Он же рече: «Крестите мя, ибо на то вы еемь призвал». И егда крестиша и, створися чюдо велие: въшедъшю бо ему в святую купель, и отвьрзостася ему очи, и // (л. 163) бысть акы николи не имев недуга. Прозрев, похвали всех Бога и просвещен быв, радовашеся душею и теломь. И пришел Кыеву, изби вся идолы: Перуна, Хърса, Дажьбога и Мокошь и прочая вся кумиры. Посемь съзва все множьство людии и заповеда им креститися, нарек им день, рек: «Аще кто не обрящеться утро на реце, тъ будеть противьник мне». И сниде на Почаину реку всь въздраст мужь и жен и младеньци. Съвершении же стояху в воде, ови до пояса, инии до выя, а друзии бродяху, а прозвутери, по брегу стояще, молитвы глаголаху, яко над крестимыми. И оттоле наречеся место святое, идеже ныне цьркы есть Петрова, и тъ бысть пьрвыи ходатаи нашему спасению. Володимир же възрев на небо, помолися за крестьяны, глаголя: «Призри на новопросвещеныя люди сия и дажь им, Господи, уведети Тебе, истиньнаго Бога, утвьрди в них правую веру и мне помози, Господи, на супостатьныя врагы, да надеяся на Твою дьржаву, поперу къзни его». Повеле же людьм ставите церкви по всем градом, а сам създа церковь Святую Богородицю, удивив. Пребыв же неколико лет, нача болети и преставися к Богу месяца июля 15 день. Тело же его положиша в церкви Святыя Богородица, юже сам създа. И плакася его все множьство людии: бояре акы отца, люди акы заступника, сироты акы помощника, нищий и вдовице яко печалника и кърмителя.

Да како тя възможем по достоянию похвалите, створьшаго де(л. 163 об.)ло равьно апостолом. Хвалить убо Римьская земля Петра и Павла, Асья Иоана Богословьца, Егюпьтьская Марка, Антиохииская Луку, а Грецкая Андрея. Вся же Русьская земля тебе, Володимире, яко Господня апостола, мольбными песньми память твою празднующе. Похвалныя веньца приносим ти, глаголюще: Радуйся, Володимире, приимыи венець от Вседьржителя Бога! Радуйся, святая главо, вожю и учителю нашь, имьже избывъше от тьмы, свет познахом! Радуйся, честьное древо самого рая, иже въздрасти нам святей леторасли святою мученику Бориса и Глеба, от нею же ныне сынове русьстии насыщаються, приемлюще недугом исцеление! Радуйся, делателю веры Христовы, растьрзав лестьное тьрние и раздрушив, възорав крещениемь всю землю и насеяв святыми книгами, от них же жнють русьстии сынове полезныя рукояти покаянию и друзии уже ядять нескудную пищю в царствии небеснемь, ея же тряпезы сподобимъся и мы, недостоинии, кающеся о съгрешениих своих.

Распространенная редакция Проложного жития князя Владимира издавалась лишь один раз по единственному известному тогда списку Торжественника XV в. Румянцевского собрания, № 435 (Соболевский А.И. Памятники древнерусской литературы, посвященные Владимиру св. // Чтения в Историческом обществе Нестора Летописца. Кн. 2. Киев, 1888. С. 30–32). Ниже публикуется еще один, ранее неизвестный список этого произведения, находящийся в Соборнике XVI в.: РГБ. Ф.113 (Иос.-Вол.). № 652. Л. 422 об. — 425 об. Он имеет важные отличия по сравнению со списком, изданным Соболевским, и в ряде случаев дает более исправный текст. В этом списке также отсутствуют рассказ об освящении и украшении Десятинной церкви и молитва князя Владимира по завершении строительства храма (извлеченные, вероятно, из летописи), что сближает данный текст с его основным источником — обычным Проложным житием князя Владимира. Житие читается в рукописи под 15 июля, днем памяти святого князя.

В той же день успение благовернаго велика! о князя Владимера, нареченнаго в святем крещение Василья.

Сии Володимер князь, сын Святославль, от племени варяжьска, преже убо во идолы верова, по очию преданию. Егда же въсхоте Бог люди многи к себе привести, и вдохну в него Бог благодать Святаго Духа. Он же возбнув, яко от сна, от лютаго идолослужения, и посла во // (л. 423) вся языкы испытати закона, како верують, и уведа святую веру греческую, яко свещу на светиле, и рече: «Сице сътворю, пойду в землю их и пленю град их, и обрящю тамо учителя». Да еже умыслить, ‘то како творю’[148]. И шед, взя Корсунь, князя и княгиню убии, а дщерь ею дасть за Жберну. И не распусти полков, но посла Ольга, воеводу своего, с Жьберном в Царьград ко царема, прошает за ся сестры их. Царие же реша ему: «Аще крестишися, то не се едино получиши, но и царьство приимеши, с нами единоверник будеши». Он же рече: «Аще дасть за мя сестру свою, то и аз крещюся. Аще ли не даете, то створю граду вашему, яко и сему створих». Они же убояшася страхом, по//(л. 423 об.)имше потриарха и сестру свою, и вшедше в церковь Святыя Богородица, и поклонишася, глаголющи сице: «Госпожа Святая Богородица, яко тобою познахом истиннаго Бога, воплощашагося и рожьшагося ис тебе, не дай же, Госпоже, осквернити рабы своя поганому сему, но приведи его во крещение, да и ти познають Сына Бога твоего». И се рекши, отпустиша ю с кресты, и с епископы, и с попы, и с крилосом, и проводиша в Корсунь. В то же время Владимер очима боляше. И посла к нему царица, глаголющи: «Царю Владимере! Аще не крестишься, то не избудеши болезни сея». Он же рече: «Крестите мя, ибо на то вы есмы призвал». Егда же крестишася, и створи чюдо велие: вшедшю же ему в святую купель, отверзошася ему очи, и бысть яко нико(л. 424)лиже не болел. И похвали всех Бога, и просвещен бысть, радовашеся душею и телом. И пришед в Киев, и изби вся идолы: и Перуна, Хърса, Дажьбога, Мокошь и прочая вся идолы. Посем заповеда всем людем крестися и рече им: «Аще кто не обрящется утре на реце, той будеть мне противник». И заутра приидоша на Почаину реку вси мужи и жены и дети, свершении же в воде стояху, овии до пояса, а друзии до выя, а инии бродяху, а прозвитери по брегу стояща молитвы глаголаху, и та крестиша множество людии. Оттоле нарече святое место, идеже есть церкви Петрова. Сии же блаженный Владимер первый бысть наставник нашему спасению. Въздев руце на небо и помолися Богу за вся люди своя, глаголя: «Господи, Царю небесный, и призри, Господи, на // (л. 424 об.) новокрещение люди сия и дай же им, Господи, увидети Тебе, истиннаго Бога, утверди в них правоверную сию веру, и мне помози, Господи, на противныя врагы, да надеюся на Твою силу и помощь и попру вся козни их». Повеле же людем ставити церкви по всем градом и селом, а сам созда церковь Святую Богородицю Десятинную. Пожив же лет 28 и преставися к Богу месяца июля 15 день, и положиша тела его в церкви Святыя Богородица, юже сам созда. И плакася его множество бояр и людии: бояре аки оца, людие аки заступника, сироты и вдовици аки помощника и кормителя. Да како тя можем по достоянию похвалити, сътворшаго равно апостолом! Хвалити убо Римъская[149] земля Петра и Павла, а Асииская Ивана Богослова, а Его//(л. 425) упетьская Марка, а Онтиохииская Луку, а Греческая Андрея, вся же земля Руская тобе, Владимере, я[ко][150] Божия апостола, молебными песньми память твою празнующе. Похвалнью венца принесем ти, глаголюще: Радуйся, Владимере, приими венець от Вседержителя Бога! Радуйся, святая глава, вожю и учителю нашь, тобою бо мы избывше тмы и свет познахом! Радуйся, красное древо святаго рая, [и]же[151] възрасти нам честней леторасли святую мученику Бориса и Глеба, от нею же ныне рустии сынове насыщаются, приемлюще недугом исцеление. Радуйся, делателю веры Христовы, растерзав лестъное терние, взорав крещением всю землю и насеяв книгами, от них же жнугь рустии сынове полезныя рукояти покоянию, // (л. 425 об.) а друзии ядять неоскудную пищю в царствии небесном, ея же трапезы сподобимся и мы, недостоини, кающеся грехов своих. Ему же слава.

Проложное сказание об освящении церкви Пресвятой Богородицы до недавнего времени оставалось неизданным (если не считать крайне неудовлетворительного издания О.М. Бодянского «Об одном прологе Московской духовной типографии…» // Чтения в Обществе истории и древностей российских. 1846. Кн. 2. С. 22). Оно известно в огромном количестве списков, прежде всего в Прологах, в которых читается под 12 мая. Ниже печатается текст Проложного сказания в двух разновидностях (редакциях) по пергаменным Прологам первой половины XIV в. из собрания Синодальной типографии Российского государственного архива древних актов: РГАДА.Ф. 381. № 179. Л. 97; № 173. Л. 89 об. — 90.

Первая редакция^{496}

В тъ же день священие церкве Святыя Богородица, юже созда благоверный князь Володимир, иже святымь крещениемь просвети всю землю Русьскую.

И видев цьрковь съвьршену, и въшьд в ню, помолися: «Господи Боже, призри с небесе, и посети винограда своего, и съвьрши иже насади десница Твоя новыя люди, им же обратил еси сердца в разум познати Тя, истиннаго Бога, и призри на церковь сию, юже создах недостойный раб Твои в имя рожьшая Тя Матере приснодевыя Богородица. И аще кто помолится в ней, услыши молитву его и отпусти грехы его молитвы ради Пречистыя Богородица». И помолься, рече: «Се даю Святей Богородици цьркви сей от имения моего и от град моих десятую часть». И тако съвьрши праздник боголепьн в лето 6504-е (996).

Вторая редакция^{497}

В тъ же день священие церкви Пресвятыя Богородица, юже създа благоверный князь Василии, зовомыи Володимир, пьрвыи князь земля Русьскыя, иже обнови Божиею помощию крещениемь.

И видев цьрковь свершену, и вшед в ню, помолися: «Господи Боже, призри с небесе, и посети винограда своего, и свьрши иже насади десница Твоя новыя люди, им же обратил еси сердца в разум познати Тя, Бога истиньнаго, и призри на церковь свое, юже създах не//(л. 90)достоиныи раб Твои в имя рожьшая Тя Матере приснодевыя Богородица. И аще кто помолиться в церкви сей, то услыши молитву его и отпусти грехы его молитвы ради Пресвятыя Богородица». И помолившюся ему, рек сице: «Се даю Святой Богородици церкви сей от имения моего и от град моих десятую часть». И тако свьрши праздник благолепьн в лето 6504 (996).