Новый Завет (на цсл., гражданский шрифт, с ударениями)

Глава 1

¹ Апока́липсис [290] Иису́са Христа́, его́же [291] даде́ Ему́ Бо́г, показа́ти рабо́м Свои́м, и́мже подоба́ет бы́ти вско́ре. И сказа́, посла́в чрез А́нгела Своего́ рабу́ Своему́ Иоа́нну,

² И́же свиде́тельствова сло́во Бо́жие и свиде́тельство Иису́с Христо́во, и ели́ка ви́де.

³ Блаже́н чты́й, и слы́шащии словеса́ проро́чествия, и соблюда́ющии пи́саная в не́м: вре́мя бо бли́з.

⁴ Иоа́нн седми́м це́рквам, я́же су́ть во Аси́и: благода́ть ва́м и ми́р от Су́щаго, и и́же бе́, и гряду́щаго, и от седми́ духо́в, и́же пред престо́лом Его́ су́ть,

⁵ И от Иису́са Христа́, и́же е́сть свиде́тель ве́рный, пе́рвенец из ме́ртвых и кня́зь царе́й земны́х: лю́бящу ны́ и омы́вшу на́с от гре́х на́ших Кро́вию Свое́ю,

⁶ И сотвори́л е́сть на́с цари́ и иере́и Бо́гу и Отцу́ Своему́, тому́ сла́ва и держа́ва во ве́ки веко́в. Ами́нь.

⁷ Се́, гряде́т со о́блаки, и у́зрит Его́ вся́ко о́ко и и́же Его́ прободо́ша, и пла́чь сотворя́т о Не́м вся́ коле́на земна́я. Е́й, ами́нь.

⁸ А́з е́смь А́льфа и Оме́га, нача́ток и коне́ц, глаго́лет Госпо́дь, сы́й, и и́же бе́, и гряды́й, Вседержи́тель.

⁹ А́з Иоа́нн, и́же и бра́т ва́ш и о́бщник в печа́ли и во ца́рствии и в терпе́нии Иису́с Христо́ве, бы́х во о́строве нарица́емем Па́тмос за сло́во Бо́жие и за свиде́тельство Иису́с Христо́во.

¹⁰ Бы́х в ду́се в де́нь неде́льный, и слы́шах за собо́ю гла́с ве́лий я́ко трубы́ глаго́лющия: Аз е́смь А́льфа и Оме́га, Пе́рвый и После́дний:

¹¹ И: я́же ви́диши, напиши́ в кни́гу, и посли́ це́рквам, я́же су́ть во Аси́и: во Ефе́с и в Сми́рну, в Перга́м и в Фиати́р, и в Сарди́с и в Филаделфи́ю и в Лаодики́ю.

¹² И обрати́хся ви́дети гла́с, и́же глаго́лаше со мно́ю: и обрати́вся ви́дех се́дмь свети́лник златы́х,

¹³ И посреде́ седми́ свети́лников подо́бна Сы́ну Челове́чу, облече́на в поди́р [292] и препоя́сана при сосцу́ по́ясом златы́м:

¹⁴ Глава́ же Его́ и вла́си белы́ а́ки яри́на [293] бе́лая, я́коже сне́г: и о́чи Его́ я́ко пла́мень о́гнен:

¹⁵ И но́зе Его́ подо́бне халколива́ну, [294] я́коже в пещи́ разжже́нне: и гла́с Его́ я́ко гла́с во́д мно́г:

¹⁶ И держя́ в руце́ Свое́й десне́й се́дмь зве́зд: и из у́ст Его́ ме́чь обою́ду о́стр изостре́н исходя́й: и лице́ Его́ я́коже со́лнце сия́ет в си́ле свое́й.

¹⁷ И егда́ ви́дех Его́, падо́х к нога́ма Его́ я́ко ме́ртв. И положи́ десни́цу Свою́ на мне́, глаго́ля ми́: не бо́йся: А́з е́смь Пе́рвый и После́дний

¹⁸ И живы́й: и бы́х ме́ртв, и се́, жи́в е́смь во ве́ки веко́в, ами́нь: и и́мам ключи́ а́да и сме́рти.

¹⁹ Напиши́ у́бо, я́же ви́дел еси́, и я́же су́ть, и и́мже подоба́ет бы́ти по се́м.

²⁰ Та́инство седми́ зве́зд, я́же ви́дел еси́ на десни́це Мое́й, и се́дмь свети́лник златы́х: се́дмь зве́зд А́нгели седми́ церкве́й су́ть: и се́дмь свети́лников, я́же ви́дел еси́, се́дмь церкве́й су́ть.

Глава 2

¹ А́нгелу Ефе́сския це́ркве напиши́: та́ко глаго́лет Держя́й се́дмь зве́зд в десни́це Свое́й, Ходя́й посреде́ седми́ свети́лников златы́х:

² Ве́м твоя́ дела́, и тру́д тво́й, и терпе́ние твое́, и я́ко не мо́жеши носи́ти злы́х, и искуси́л еси́ глаго́лющияся бы́ти апо́столы, и не су́ть, и обре́л еси́ и́х ло́жных:

³ И поне́сл еси́, и терпе́ние и́маши, и за и́мя Мое́ труди́лся еси́ и не изнемо́гл еси́.

⁴ Но и́мам на тя́, я́ко любо́вь твою́ пе́рвую оста́вил еси́.

⁵ Помяни́ у́бо, отку́ду спа́л еси́, и пока́йся, и пе́рвая дела́ сотвори́: а́ще же ни́, гряду́ тебе́ ско́ро и дви́гну свети́лник тво́й от ме́ста своего́, а́ще не пока́ешися.

⁶ Но се́ и́маши, я́ко ненави́диши де́л Николаи́тских, и́хже и А́з ненави́жду.

⁷ Име́яй у́хо да слы́шит, что́ Ду́х глаго́лет це́рквам: побежда́ющему да́м я́сти от дре́ва живо́тнаго, е́же е́сть посреде́ рая́ Бо́жия.

⁸ И А́нгелу це́ркве Сми́рнския напиши́: та́ко глаго́лет Пе́рвый и После́дний, и́же бы́сть ме́ртв, и [се́,] жи́в е́сть:

⁹ Ве́м твоя́ дела́ и ско́рбь и нищету́, но бога́т еси́, и хулы́ глаго́лющихся бы́ти Иуде́й, и не су́ть, но со́нмище сатанино́.

¹⁰ Не бо́йся ничесо́же, я́же и́маши пострада́ти. Се́, и́мать диа́вол всажда́ти от ва́с в темни́цы, да искуси́теся: и име́ти бу́дете ско́рбь до десяти́ дни́й. Бу́ди ве́рен да́же до сме́рти, и да́м ти́ вене́ц живота́.

¹¹ Име́яй у́хо слы́шати да слы́шит, что́ Ду́х глаго́лет це́рквам: побежда́яй не и́мать вреди́тися от сме́рти вторы́я.

¹² И А́нгелу Перга́мския це́ркве напиши́: та́ко глаго́лет Име́яй ме́чь обою́ду изощре́н:

¹³ Ве́м дела́ твоя́, и где́ живе́ши, иде́же престо́л сатани́н: и держи́ши и́мя Мое́, и не отве́рглся еси́ ве́ры Моея́ и в [Моя́] дни́, в ня́же Анти́пас свиде́тель Мо́й ве́рный, и́же убие́н бы́сть в ва́с, иде́же живе́т сатана́.

¹⁴ Но и́мам на тя́ ма́ло, я́ко и́маши ту́ держа́щих уче́ние Валаа́мово, и́же уча́ше Вала́ка положи́ти собла́зн пред сынми́ Изра́илевыми, я́сти же́ртвы и́долския и любы́ твори́ти.

¹⁵ Та́ко и́маши и ты́ держа́щия уче́ние Николаи́тско, его́же ненави́жду.

¹⁶ Пока́йся: а́ще ли ни́, прииду́ тебе́ ско́ро и бра́нь сотворю́ с ни́ми мече́м у́ст Мои́х.

¹⁷ Име́яй у́хо слы́шати да слы́шит, что́ Ду́х глаго́лет це́рквам: побежда́ющему да́м я́сти от ма́нны сокрове́нныя, и да́м ему́ ка́мень бе́л и на ка́мени и́мя но́во напи́сано, его́же никто́же ве́сть, то́кмо прие́мляй.

¹⁸ И А́нгелу Фиати́рския це́ркве напиши́: та́ко глаго́лет Сы́н Бо́жий, име́яй о́чи Свои́ я́ко пла́мень о́гнен, и но́зе Его́ подо́бне халколива́ну:

¹⁹ Ве́м твоя́ дела́ и любо́вь, и слу́жбу и ве́ру, и терпе́ние твое́ и дела́ твоя́, и после́дняя бо́лша пе́рвых.

²⁰ Но и́мам на тя́ ма́ло, я́ко оставля́еши жене́ Иезаве́ли, глаго́лющей себе́ бы́ти проро́чицу, учи́ти и льсти́ти Моя́ рабы́, любоде́йствовати и сне́сти же́ртву и́долскую.

²¹ И да́х е́й вре́мя, да пока́ется от любоде́йства своего́, и не пока́яся.

²² Се́, А́з полага́ю ю́ на одре́ и любоде́ющия с не́ю в ско́рбь ве́лию, а́ще не пока́ются от де́л свои́х:

²³ И ча́да и́х у́мрут сме́ртию [295]: и уразуме́ют вся́ це́ркви, я́ко А́з е́смь испыта́яй сердца́ и утро́бы: и да́м ва́м кому́ждо по дело́м ва́шим.

²⁴ Ва́м же глаго́лю и про́чим су́щим в Фиати́ре, и́же не и́мут уче́ния сего́ и и́же не разуме́ют глуби́н сатанины́х, я́коже глаго́лют: не возложу́ на вы́ тяготы́ и́ныя:

²⁵ То́кмо, е́же и́мате, держи́те, до́ндеже прииду́.

²⁶ И побежда́ющему и соблюда́ющему дела́ Моя́ до конца́, да́м ему́ вла́сть на язы́цех,

²⁷ И упасе́т я́ жезло́м желе́зным, я́ко сосу́ды скуде́льничи сокруша́тся, я́коже и А́з прия́х от Отца́ Моего́:

²⁸ И да́м ему́ звезду́ у́треннюю.

²⁹ Име́яй у́хо слы́шати да слы́шит, что́ Ду́х глаго́лет це́рквам.

Глава 3

¹ И А́нгелу Сарди́йския це́ркве напиши́: та́ко глаго́лет Име́яй се́дмь духо́в Бо́жиих и се́дмь зве́зд: ве́м твоя́ дела́, я́ко и́мя и́маши я́ко жи́в, а ме́ртв еси́.

² Бу́ди бдя́ и утвержда́я про́чая, и́мже умре́ти: не обрето́х бо де́л твои́х сконча́ных пред Бо́гом твои́м. [296]

³ Помина́й у́бо, ка́ко прия́л еси́ и слы́шал еси́, и соблюда́й и пока́йся. А́ще у́бо не бди́ши, прииду́ на тя́ я́ко та́ть, и не и́маши почу́ти, в ки́й ча́с прииду́ на тя́.

⁴ Но и́маши ма́ло име́н и в Сарди́и, и́же не оскверни́ша ри́з свои́х, и ходи́ти и́мут со Мно́ю в бе́лых, я́ко досто́йни су́ть.

⁵ Побежда́яй, то́й облече́тся в ри́зы бе́лыя, и не и́мам отмы́ти [297] и́мене его́ от кни́г живо́тных, и испове́м и́мя его́ пред Отце́м мои́м и пред А́нгелы Его́.

⁶ Име́яй у́хо да слы́шит, что́ Ду́х глаго́лет це́рквам.

⁷ И А́нгелу Филаделфи́йския це́ркве напиши́: та́ко глаго́лет Святы́й И́стинный, име́яй клю́ч Дави́дов, отверза́яй, и никто́же затвори́т, затворя́яй, и никто́же отве́рзет:

⁸ Ве́м твоя́ дела́: се́, да́х пред тобо́ю две́ри отве́рсты, и никто́же мо́жет затвори́ти и́х: я́ко ма́лу и́маши си́лу, и соблю́л еси́ Мое́ сло́во, и не отве́рглся еси́ и́мене Моего́.

⁹ Се́, даю́ от со́нмища сатанина́ глаго́лющияся бы́ти Иуде́и, и не су́ть, но лгу́т: се́, сотворю́ и́х, да прии́дут и поклоня́тся пред нога́ма твои́ма, и уразуме́ют, я́ко А́з возлюби́х тя́.

¹⁰ Я́ко соблю́л еси́ сло́во терпе́ния Моего́, и А́з тя́ соблюду́ от годи́ны искуше́ния, хотя́щия приити́ на всю́ вселе́нную искуси́ти живу́щия на земли́.

¹¹ Се́, гряду́ ско́ро: держи́, е́же и́маши, да никто́же прии́мет венца́ твоего́.

¹² Побежда́ющаго сотворю́ столпа́ в це́ркви Бо́га Моего́, и бо́ле [298] не и́мать изы́ти ктому́: и напишу́ на не́м и́мя Бо́га Моего́ и и́мя гра́да Бо́га Моего́, но́ваго Иерусали́ма, сходя́щаго с небе́с от Бо́га Моего́, и и́мя Мое́ но́вое.

¹³ Име́яй у́хо да слы́шит, что́ Ду́х глаго́лет це́рквам.

¹⁴ И А́нгелу Лаодики́йския це́ркве напиши́: та́ко глаго́лет Ами́нь, [299] свиде́тель ве́рный и и́стинный, нача́ток созда́ния Бо́жия:

¹⁵ Ве́м твоя́ дела́, я́ко ни студе́н еси́ ни те́пл: не да студе́н бы бы́л ни те́пл. [300]

¹⁶ Та́ко, я́ко обуморе́н еси́, и ни те́пл ни студе́н, изблева́ти тя́ от у́ст Мои́х и́мам. [301]

¹⁷ Зане́ глаго́леши, я́ко бога́т е́смь и обогати́хся и ничто́же тре́бую: и не ве́си, я́ко ты́ еси́ окая́нен и бе́ден, и ни́щь и сле́п и на́г.

¹⁸ Совеща́ю тебе́ купи́ти от Мене́ зла́то разжже́но огне́м, да обогати́шися, и одея́ние бе́ло, да облече́шися, и да не яви́тся срамота́ наготы́ твоея́: и коллу́рием [302] пома́жи о́чи твои́, да ви́диши.

¹⁹ А́з, и́хже а́ще люблю́, облича́ю и наказу́ю. Ревну́й у́бо и пока́йся.

²⁰ Се́, стою́ при две́рех и толку́: а́ще кто́ услы́шит гла́с Мо́й и отве́рзет две́ри, вни́ду к нему́ и вечеря́ю с ни́м, и то́й со Мно́ю.

²¹ Побежда́ющему да́м се́сти со Мно́ю на престо́ле Мое́м, я́коже и А́з победи́х и седо́х со Отце́м Мои́м на престо́ле Его́.

²² Име́яй у́хо да слы́шит, что́ Ду́х глаго́лет це́рквам.

Глава 4

¹ По си́х ви́дех: и се́, две́ри отве́рсты на небеси́, и гла́с пе́рвый, его́же слы́шах я́ко трубу́ глаго́лющь со мно́ю, глаго́ля: взы́ди се́мо, и покажу́ ти, ему́же подоба́ет бы́ти по си́х.

² И а́бие бы́х в ду́се: и се́, престо́л стоя́ше на небеси́, и на престо́ле Седя́щь:

³ И Седя́й бе́ подо́бен виде́нием ка́мени Иа́спису и сарди́нови: и [бе́] дуга́ о́крест престо́ла подо́бна виде́нием смара́гдови.

⁴ И о́крест престо́ла престо́ли два́десять и четы́ри: и на престо́лех ви́дех два́десять и четы́ри ста́рцы седя́щия, облече́ны в бе́лыя ри́зы, и имя́ху венцы́ зла́ты на глава́х свои́х.

⁵ И от престо́ла исхожда́ху мо́лния и гро́ми и гла́си: и се́дмь све́щников о́гненных горя́щих пред престо́лом, и́же су́ть се́дмь духо́в Бо́жиих:

⁶ И пред престо́лом мо́ре сткля́но, подо́бно криста́ллу: и посреде́ престо́ла и о́крест престо́ла четы́ри живо́тна испо́лнена оче́с спреди́ и созади́.

⁷ И живо́тно пе́рвое подо́бно льву́, и второ́е живо́тно подо́бно телцу́, и тре́тие живо́тно иму́щее лице́ я́ко челове́к, и четве́ртое живо́тно подо́бно орлу́ летя́щу.

⁸ И живо́тна четы́ри, еди́но ко́еждо и́х име́яху по ше́сть кри́л о́крест, и внутрьу́ду испо́лнена оче́с: и поко́я не и́мут де́нь и но́щь, глаго́люще: свя́т, свя́т, свя́т Госпо́дь Бо́г Вседержи́тель, и́же бе́ и сы́й и гряды́й.

⁹ И егда́ да́ша живо́тная сла́ву и че́сть и благодаре́ние Седя́щему на престо́ле, Живу́щему во ве́ки веко́в,

¹⁰ Падо́ша два́десять и четы́ри ста́рцы пред Седя́щим на престо́ле, и поклони́шася Живу́щему во ве́ки веко́в, и положи́ша венцы́ своя́ пред престо́лом, глаго́люще:

¹¹ Досто́ин еси́, Го́споди, прия́ти сла́ву и че́сть и си́лу, я́ко Ты́ еси́ созда́л вся́ческая, и во́лею Твое́ю су́ть, и сотворе́на.

Глава 5

¹ И ви́дех в десни́це Седя́щаго на престо́ле кни́гу напи́сану внутрьу́ду и внеу́ду, запеча́тану седмию́ печа́тию.

² И ви́дех А́нгела кре́пка пропове́дающа гла́сом вели́ким: кто́ есть досто́ин разгну́ти кни́гу и разреши́ти печа́ти ея́?

³ И никто́же можа́ше ни на небеси́, ни на земли́, ниже́ под земле́ю, разгну́ти кни́гу, ниже́ зре́ти ю́.

⁴ И а́з пла́кахся мно́го, я́ко ни еди́н обре́теся досто́ин разгну́ти и прочести́ кни́гу, ниже́ зре́ти ю́.

⁵ И еди́н от ста́рец глаго́ла ми́: не пла́чися: се́, победи́л е́сть ле́в, и́же сы́й от коле́на Иу́дова, ко́рень Дави́дов, разгну́ти кни́гу и разреши́ти се́дмь печа́тей ея́.

⁶ И ви́дех, и се́, посреде́ престо́ла и четы́рех живо́тных и посреде́ ста́рец А́гнец стоя́щь я́ко заколе́н, иму́щь рого́в се́дмь и оче́с се́дмь, е́же е́сть се́дмь духо́в Бо́жиих, по́сланных во всю́ зе́млю.

⁷ И прии́де и прия́т кни́гу от десни́цы Седя́щаго на престо́ле.

⁸ И егда́ прия́т кни́гу, четы́ри живо́тна и два́десять и четы́ри ста́рцы падо́ша пред А́гнцем, иму́ще ки́йждо гу́сли и фиа́лы зла́ты по́лны фимиа́ма, и́же су́ть моли́твы святы́х:

⁹ И пою́т пе́снь но́ву, глаго́люще: досто́ин еси́ прия́ти кни́гу и отве́рзти печа́ти ея́, я́ко закла́лся и искупи́л еси́ Богови на́с Кро́вию Свое́ю от вся́каго коле́на и язы́ка и люде́й и племе́н,

¹⁰ И сотвори́л еси́ на́с Богови на́шему цари́ и иере́и: и воцари́мся на земли́.

¹¹ И ви́дех, и слы́шах гла́с А́нгелов мно́гих о́крест престо́ла и живо́тных и ста́рец, и бе́ число́ и́х ты́сяща ты́сящами, [303]

¹² Глаго́люще гла́сом вели́ким: досто́ин е́сть А́гнец заколе́нный прия́ти си́лу и бога́тство, и прему́дрость и кре́пость, и че́сть и сла́ву и благослове́ние.

¹³ И вся́ко созда́ние, е́же е́сть на небеси́ и на земли́, и под земле́ю и на мо́ри я́же су́ть, и су́щая в ни́х, вся́ слы́шах глаго́лющия: Седя́щему на престо́ле и А́гнцу благослове́ние и че́сть, и сла́ва и держа́ва во ве́ки веко́в.

¹⁴ И четы́ри живо́тна глаго́лаху: ами́нь. И два́десять и четы́ри ста́рцы падо́ша и поклони́шася Живу́щему во ве́ки веко́в.

Глава 6

¹ И ви́дех, егда́ отве́рзе А́гнец еди́ну от седми́ печа́тей, и слы́шах еди́наго от четы́рех живо́тных глаго́люща я́коже гла́с гро́мный: гряди́ и ви́ждь.

² И ви́дех, и се́, ко́нь бе́л, и седя́й на не́м име́яше лу́к, и да́н бы́сть ему́ вене́ц: и изы́де побежда́яй, и да победи́т.

³ И егда́ отве́рзе печа́ть втору́ю, слы́шах второ́е живо́тно глаго́лющее: гряди́ и ви́ждь.

⁴ И изы́де други́й ко́нь ры́жь: и седя́щему на не́м дано́ бы́сть взя́ти ми́р от земли́, и да убию́т дру́г дру́га: и да́н бы́сть ему́ ме́чь вели́кий.

⁵ И егда́ отве́рзе тре́тию печа́ть, слы́шах тре́тие живо́тно глаго́лющее: гряди́ и ви́ждь. И ви́дех, и се́, ко́нь во́рон, и седя́й на не́м име́яше ме́рило в руце́ свое́й.

⁶ И слы́шах гла́с посреде́ четы́рех живо́тных глаго́лющий: ме́ра пшени́цы за дина́рь и три́ ме́ры ячме́ня за дина́рь: и еле́а и вина́ не вреди́.

⁷ И егда́ отве́рзе четве́ртую печа́ть, слы́шах гла́с четве́ртаго живо́тна глаго́лющий: гряди́ и ви́ждь.

⁸ И ви́дех, и се́, ко́нь бле́д, и седя́й на не́м, и́мя ему́ сме́рть: и а́д идя́ше всле́д его́: и дана́ бы́сть ему́ о́бласть на четве́ртей ча́сти земли́ уби́ти ору́жием и гла́дом, и сме́ртию и зверьми́ земны́ми.

⁹ И егда́ отве́рзе пя́тую печа́ть, ви́дех под олтаре́м ду́ши избие́нных за сло́во Бо́жие и за свиде́тельство, е́же име́яху.

¹⁰ И возопи́ша гла́сом вели́ким, глаго́люще: доко́ле, Влады́ко Святы́й и И́стинный, не су́диши и не мсти́ши кро́ве на́шея от живу́щих на земли́?

¹¹ И даны́ бы́ша коему́ждо и́х ри́зы белы́, и рече́но бы́сть и́м, да почи́ют еще́ вре́мя ма́ло, до́ндеже сконча́ются и клевре́ти и́х и бра́тия и́х, иму́щии избие́ни бы́ти, я́коже и ти́и.

¹² И ви́дех, егда́ отве́рзе шесту́ю печа́ть, и се́, бы́сть тру́с ве́лий, и со́лнце мра́чно бы́сть я́ко вре́тище вла́сяно, и луна́ бы́сть я́ко кро́вь:

¹³ И зве́зды небе́сныя падо́ша на зе́млю, я́коже смоко́вница отмета́ет пу́пы своя́, от ве́тра вели́ка дви́жима:

¹⁴ И не́бо отлучи́ся я́ко сви́ток свива́емо, и вся́ка гора́ и о́стров от ме́ст свои́х дви́гнушася:

¹⁵ И ца́рие зе́мстии и вельмо́жи, и бога́тии и ты́сящницы и си́льнии, и вся́к ра́б и вся́к свобо́дь скры́шася в пеще́рах и ка́мении го́рстем,

¹⁶ И глаго́лаша гора́м и ка́мению: пади́те на ны́ и покры́йте ны́ от лица́ седя́щаго на престо́ле и от гне́ва а́гнча:

¹⁷ Я́ко прии́де де́нь вели́кий гне́ва Его́, и кто́ мо́жет ста́ти?

Глава 7

¹ И по се́м ви́дех четы́ри А́нгелы стоя́щия на четы́рех у́глех земли́, держа́щия четы́ри ве́тры зе́мския, да не ды́шет ве́тр на зе́млю, ни на мо́ре, ни на вся́ко дре́во.

² И ви́дех и́наго А́нгела восходя́ща от восхо́да со́лнца, иму́ща печа́ть Бо́га жива́го. И возопи́ гла́сом ве́лиим к четы́рем А́нгелом, и́мже дано́ бы́сть вреди́ти зе́млю и мо́ре, глаго́ля:

³ Не вреди́те ни земли́, ни мо́ря, ни древе́с, до́ндеже запечатле́ем рабы́ Бо́га на́шего на челе́х и́х.

⁴ И слы́шах число́ запечатле́нных: сто́ четы́редесять четы́ри ты́сящи запечатле́нных от вся́каго коле́на сыно́в Изра́илевых.

⁵ От коле́на Иу́дова двана́десять ты́сящ запечатле́нных: от коле́на Руви́мова двана́десять ты́сящ запечатле́нных: от коле́на Га́дова двана́десять ты́сящ запечатле́нных:

⁶ От коле́на Аси́рова двана́десять ты́сящ запечатле́нных: от коле́на Неффали́мля двана́десять ты́сящ запечатле́нных: от коле́на Манасси́ина двана́десять ты́сящ запечатле́нных:

⁷ От коле́на Симео́нова двана́десять ты́сящ запечатле́нных: от коле́на Леви́ина двана́десять ты́сящ запечатле́нных: от коле́на Иссаха́рова двана́десять ты́сящ запечатле́нных:

⁸ От коле́на Завуло́ня двана́десять ты́сящ запечатле́нных: от коле́на Ио́сифова двана́десять ты́сящ запечатле́нных: от коле́на Вениами́нова двана́десять ты́сящ запечатле́нных.

⁹ По си́х ви́дех, и се́, наро́д мно́г, его́же исчести́ никто́же мо́жет, от вся́каго язы́ка и коле́на, и люди́й и племе́н, стоя́ще пред престо́лом и пред А́гнцем, облече́ны в ри́зы белы́, и фи́ницы в рука́х и́х.

¹⁰ И возопи́ша гла́сом ве́лиим, глаго́люще: спасе́ние седя́щему на престо́ле Бо́гу на́шему и А́гнцу.

¹¹ И вси́ А́нгели стоя́ху о́крест престо́ла и ста́рец и четы́рех живо́тных: и падо́ша на лицы́ пред престо́лом и поклони́шася Бо́гу,

¹² Глаго́люще: ами́нь: благослове́ние и сла́ва, и прему́дрость и хвала́, и че́сть и си́ла и кре́пость Бо́гу на́шему во ве́ки веко́в. Ами́нь.

¹³ И отвеща́ еди́н от ста́рец, глаго́ля ми́: си́и облече́ннии в ри́зы бе́лыя кто́ су́ть и отку́ду приидо́ша?

¹⁴ И ре́х ему́: го́споди, ты́ ве́си. И рече́ ми: си́и су́ть, и́же приидо́ша от ско́рби вели́кия, и испра́ша ри́зы своя́, и убели́ша ри́зы своя́ в Кро́ви А́гнчи:

¹⁵ Сего́ ра́ди су́ть пред престо́лом Бо́жиим и слу́жат Ему́ де́нь и но́щь в це́ркви Его́, и Седя́й на престо́ле всели́тся в ни́х:

¹⁶ Не вза́лчут ктому́, ниже́ вжа́ждут, не и́мать же па́сти на ни́х со́лнце, ниже́ вся́к зно́й:

¹⁷ Я́ко А́гнец, и́же посреде́ престо́ла, упасе́т я́ и наста́вит и́х на живо́тныя исто́чники во́д, и оты́мет Бо́г вся́ку сле́зу от о́чию и́х.

Глава 8

¹ И егда́ отве́рзе седму́ю печа́ть, бы́сть безмо́лвие на небеси́ я́ко по́л часа́.

² И ви́дех се́дмь А́нгелов, и́же пред Бо́гом стоя́ху: и дано́ бы́сть и́м се́дмь тру́б.

³ И други́й А́нгел прии́де и ста́ пред олтаре́м, име́яй кади́лницу зла́ту: и даны́ бы́ша ему́ фимиа́ми мно́зи, да да́ст моли́твам святы́х все́х на олта́рь златы́й су́щий пред престо́лом.

⁴ И изы́де ды́м кади́лный моли́твами святы́х от руки́ А́нгела пред Бо́га.

⁵ И взя́т А́нгел кади́лницу, и напо́лни ю́ от огня́ су́щаго на олтари́, и положи́ на земли́: [304] и бы́ша гла́си и гро́ми и блиста́ния и тру́с.

⁶ И се́дмь А́нгел, и́же име́яху се́дмь тру́б, угото́вашася, да востру́бят.

⁷ И пе́рвому А́нгелу воструби́вшу, бы́сть гра́д и о́гнь, сме́шены с кро́вию, и падо́ша на зе́млю: и тре́тия ча́сть дре́ва погоре́, и вся́ка трава́ зла́чная погоре́.

⁸ И вторы́й А́нгел воструби́, и я́ко гора́ вели́ка огне́м жего́ма вве́ржена бы́сть в мо́ре: и бы́сть тре́тия ча́сть мо́ря кро́вь,

⁹ И у́мре тре́тия ча́сть созда́ний су́щих в мо́ри, иму́щих ду́ши, и тре́тия ча́сть корабле́й поги́бе.

¹⁰ И тре́тий А́нгел воструби́, и паде́ с небесе́ звезда́ вели́ка, горя́щи я́ко свеща́, и паде́ на тре́тию ча́сть ре́к и на исто́чники водны́я:

¹¹ И и́мя звезде́ глаго́лется а́псинфос: и бы́сть тре́тия ча́сть во́д я́ко пелы́нь, и мно́зи от челове́к умро́ша от во́д, я́ко го́рьки бе́ша.

¹² И четве́ртый А́нгел воструби́, и уя́звена бы́сть тре́тия ча́сть со́лнца и тре́тия ча́сть луны́ и тре́тия ча́сть зве́зд, да затми́тся тре́тия ча́сть и́х, и дне́ тре́тия ча́сть да не све́тит, и но́щь та́кожде.

¹³ И ви́дех и слы́шах еди́наго А́нгела паря́ща посреде́ небесе́, глаго́люща гла́сом вели́ким: го́ре, го́ре, го́ре живу́щим на земли́ от про́чих гласо́в тру́бных трие́х А́нгел хотя́щих труби́ти.

Глава 9

¹ И пя́тый А́нгел воструби́, и ви́дех звезду́ с небесе́ спа́дшу на зе́млю: и да́н бы́сть е́й клю́чь студенца́ бе́здны:

² И отве́рзе студенца́ бе́здны, и взы́де ды́м от студенца́ я́ко ды́м пе́щи вели́ки, и оме́рче со́лнце и возду́х от ды́ма студени́чнаго.

³ И от ды́ма изыдо́ша пру́зи на зе́млю, и дана́ бы́сть и́м о́бласть, я́коже и́мут о́бласть скорпи́и земны́я.

⁴ И рече́но бы́сть и́м, да не вредя́т травы́ земны́я, ни вся́каго зла́ка, ни вся́каго дре́ва, но челове́ки то́чию, и́же не и́мут печа́ти Бо́жия на челе́х свои́х.

⁵ И дано́ бы́сть и́м, да не убию́т и́х, но да му́ку прии́мут пя́ть ме́сяцей: и муче́ние и́х я́ко муче́ние скорпи́ево, егда́ усе́кнет челове́ка.

⁶ И в ты́я дни́ взы́щут челове́цы сме́рти, и не обря́щут ея́: и вожделе́ют умре́ти, и убежи́т от ни́х сме́рть.

⁷ И уподобле́ния пруго́в подо́бна ко́нем угото́вленым на бра́нь: и на глава́х и́х я́ко венцы́ уподо́блени зла́ту, и ли́ца и́х я́ко ли́ца челове́ческа:

⁸ И име́яху власы́, я́ко власы́ же́нския, и зу́бы и́х, я́ко льво́в бе́ша:

⁹ И име́яху броня́, я́ко броня́ желе́зны, и гла́с кри́л и́х, я́ко гла́с колесни́ц, егда́ ко́ни мно́зи теку́т на бра́нь:

¹⁰ И име́яху о́шибы подо́бны скорпи́иным, и жа́ла бя́ху во о́шибех и́х: и дана́ бе́ о́бласть и́м вреди́ти челове́ки пя́ть ме́сяц.

¹¹ И име́ли над собо́ю царя́ а́нгела бе́здны, ему́же и́мя Евре́йски Ава́ддон, а е́ллински Аполли́он. [305]

¹² Го́ре еди́но оты́де: се́, гряду́т еще́ два́ го́ря по си́х.

¹³ И шесты́й А́нгел воструби́, и слы́шах гла́с еди́н от четы́рех рого́в олтаря́ злата́го су́щаго пред Бо́гом,

¹⁴ Глаго́лющий шесто́му А́нгелу име́ющу трубу́: разреши́ четы́ри А́нгелы свя́заны при реце́ вели́цей Евфра́т.

¹⁵ И разреше́ни бы́ша четы́ри А́нгели угото́вани на ча́с и де́нь, и ме́сяц и ле́то, да избию́т тре́тию ча́сть челове́к.

¹⁶ И число́ во́инов ко́нных две́ тме́ те́м: и слы́шах число́ и́х.

¹⁷ И та́ко ви́дех в виде́нии ко́ни, и седя́щия на ни́х иму́щия броня́ о́гненны и иаки́нфовы и жу́пелны: и главы́ ко́нем [и́х] я́ко главы́ льво́м, и из у́ст и́х исхожда́ше о́гнь и ды́м и жу́пел.

¹⁸ И от трие́х я́зв си́х поги́бе тре́тия ча́сть челове́ков, от огня́ и от ды́ма и от жу́пела, исходя́щих из у́ст и́х:

¹⁹ О́бласть бо ко́ней во усте́х и́х бе́ [и во о́шибех и́х], и [306] о́шиби и́х подо́бни змие́м, иму́ще главы́ и те́ми па́кости де́юще.

²⁰ И про́чии от челове́к, и́же не врежде́ни бы́ша [307] я́зывами си́ми, ниже́ пока́яшася от де́л ру́к свои́х, да не покло́нятся де́моном, ни и́долом златы́м и сре́бряным, и ме́дяным и ка́менным и древяны́м, и́же ни ви́дети мо́гут, ни слы́шати, ни ходи́ти:

²¹ И не пока́яшася от уби́йств свои́х, ни от волхвова́ний свои́х, ниже́ от блуда́ своего́, ниже́ от та́тьб свои́х.

Глава 10

¹ И ви́дех и́наго А́нгела кре́пка сходя́ща с небесе́, оболче́на во о́блак, и дуга́ над главо́ю [его́], и лице́ его́ я́ко со́лнце, и но́зе его́ я́ко столпи́ о́гнени,

² И име́яше в руце́ свое́й кни́гу разгибе́ну: и поста́ви но́гу свою́ десну́ю на мо́ри, а шу́юю на земли́,

³ И возопи́ гла́сом вели́ким, я́ко ле́в рыка́я: и егда́ возгласи́, глаго́лаша се́дмь громо́в гла́сы своя́.

⁴ И егда́ возгласи́ша [308] се́дмь громо́в гла́сы своя́, хоте́х писа́ти: и слы́шах гла́с с небесе́ глаго́лющь ми́: запечатле́й, я́же глаго́лаша се́дмь громо́в, и сего́ не пиши́.

⁵ И А́нгел, его́же ви́дех стоя́ща на мо́ри и на земли́, воздви́же ру́ку свою́ на не́бо

⁶ И кля́тся Живу́щим во ве́ки веко́в, и́же созда́ не́бо и я́же на не́м, и зе́млю и я́же на не́й, и мо́ре и я́же в не́м, я́ко ле́та уже́ не бу́дет:

⁷ Но во дни́ гла́са седма́го А́нгела, егда́ и́мать воструби́ти, тогда́ сконча́ется та́йна Бо́жия, я́коже благовести́ Свои́ми рабы́ проро́ки.

⁸ И гла́с его́ слы́шах с небесе́ па́ки глаго́лющь со мно́ю, и глаго́ла: иди́ и приими́ кни́жицу разгну́тую в руце́ А́нгела стоя́щаго на мо́ри и на земли́.

⁹ И идо́х ко А́нгелу, глаго́ля ему́: да́ждь ми́ кни́жицу. И рече́ ми́: приими́ и сне́ждь ю́: и горька́ бу́дет во чре́ве твое́м, но во усте́х ти́ сладка́ бу́дет я́ко ме́д.

¹⁰ И прия́х кни́гу от руки́ А́нгела и снедо́х ю́: и бе́ во усте́х мои́х я́ко ме́д сладка́: и егда́ снедо́х ю́, горька́ бя́ше во чре́ве мое́м.

¹¹ И рече́ ми́: подоба́ет ти́ па́ки проро́чествовати в лю́дех и во племене́х, и во язы́цех и в царе́х мно́зех.

Глава 11

¹ И дана́ ми́ бы́сть тро́сть подо́бна жезлу́, глаго́ля: воста́ни и изме́ри це́рковь Бо́жию и олта́рь, и кла́няющияся в не́й:

² А дво́р су́щий вну́трь [309] це́ркве изнеси́ [310] внеу́ду, ниже́ изме́ри его́, зане́ да́н бы́сть язы́ком: и гра́д святы́й поперу́т четы́редесять и два́ ме́сяцы.

³ И да́м обе́ма свиде́телема Мои́ма, и прорица́ти бу́дут дни́й ты́сящу две́сте и шестьдеся́т, оболче́на во вре́тище.

⁴ Си́и су́ть две́ ма́слицы и два́ све́щника пред Бо́гом земли́ стоя́ща.

⁵ И и́же и́м непра́вду сотвори́т, о́гнь исхо́дит из у́ст и́х и поя́ст враги́ и́х: и и́же восхо́щет оби́дети и́х, сему́ подоба́ет убие́ну бы́ти.

⁶ И си́и и́мут о́бласть затвори́ти не́бо, да не сни́дет до́ждь [на зе́млю] во дни́ прорица́ния и́х, и о́бласть и́мут на вода́х, обраща́ти я́ в кро́вь и порази́ти зе́млю вся́кою я́звою, ели́жды а́ще восхо́щут.

⁷ И егда́ сконча́ют свиде́тельство свое́, зве́рь, и́же исхо́дит от бе́здны, сотвори́т с ни́ми бра́нь и победи́т и́х и убие́т я́,

⁸ И тру́пы и́х оста́вит на сто́гнах гра́да вели́каго, и́же нарица́ется духо́вне Cодо́м и Еги́пет, иде́же и Госпо́дь на́ш ра́спят бы́сть.

⁹ И зре́ти и́мут от люди́й и племе́н, и от язы́к и коле́н, телеса́ и́х дни́ три́ и по́л, и тру́пы и́х не оста́вят положи́ти во гробе́х.

¹⁰ И живу́щии на земли́ возра́дуются и возвеселя́тся о ни́х, и да́ры по́слют дру́г ко дру́гу, я́ко о́ба сия́ проро́ка му́чиста живу́щия на земли́.

¹¹ И по трие́х дне́х и по́л, ду́х живо́тен вни́дет в ня́ от Бо́га, и ста́нут [о́ба] на нога́х свои́х: и стра́х ве́лий нападе́т на зря́щих и́х.

¹² И услы́шат гла́с ве́лий с небесе́, глаго́лющь и́м: взы́дита се́мо. И взыдо́ста на не́бо на о́блацех, и ви́деша я́ врази́ и́х.

¹³ И в ча́с то́й тру́с бы́сть ве́лий, и деся́тая ча́сть гра́да паде́, и поги́бе тру́сом име́н челове́ческих се́дмь ты́сящ: и про́чии пристра́шни бы́ша и да́ша сла́ву Бо́гу небе́сному.

¹⁴ Го́ре второ́е оты́де: се́, го́ре тре́тие гряде́т ско́ро.

¹⁵ И седмы́й А́нгел воструби́, и бы́ша гла́си вели́цы на небесе́х, глаго́люще: бы́сть ца́рство міра Го́спода на́шего и Христа́ Его́, и воцари́тся во ве́ки веко́в.

¹⁶ И два́десять и четы́ри ста́рцы, пред Бо́гом седя́щии на престо́лех свои́х, падо́ша на ли́ца своя́ и поклони́шася Бо́гу,

¹⁷ Глаго́люще: хва́лим Тя́, Го́споди Бо́же Вседержи́телю, и́же сы́й и бе́ и гряды́й, я́ко прия́л еси́ си́лу Твою́ вели́кую и воцари́лся еси́:

¹⁸ И язы́цы прогне́вашася: и прии́де гне́в Тво́й, и вре́мя ме́ртвым су́д прия́ти, и да́ти мзду́ рабо́м Твои́м проро́ком и святы́м и боя́щимся и́мене Твоего́, ма́лым и вели́ким, и растли́ти посмра́ждшия [311] зе́млю.

¹⁹ И отве́рзеся хра́м Бо́жий на небеси́, и яви́ся киво́т заве́та Его́ в хра́ме Его́: и бы́ша блиста́ния и гла́си, и гро́ми и тру́с, и гра́д вели́к.

Глава 12

¹ И зна́мение ве́лие яви́ся на небеси́: жена́ облече́на в со́лнце, и луна́ под нога́ма ея́, и на главе́ ея́ вене́ц от зве́зд двоюна́десяте:

² И во чре́ве иму́щи, вопие́т боля́щи и стра́ждущи роди́ти.

³ И яви́ся и́но зна́мение на небеси́: и се́, зми́й вели́к че́рмен, име́я гла́в се́дмь и рого́в де́сять, и на глава́х его́ се́дмь вене́ц:

⁴ И хо́бот его́ отто́рже тре́тию ча́сть зве́зд небе́сных и положи́ я́ в зе́млю [312]. И зми́й стоя́ше пред жено́ю хотя́щею роди́ти, да, егда́ роди́т, сне́сть ча́до ея́.

⁵ И роди́ сы́на му́жеска, и́же и́мать упасти́ вся́ язы́ки жезло́м желе́зным: и восхище́но бы́сть ча́до ея́ к Бо́гу и престо́лу Его́.

⁶ А жена́ бежа́ в пусты́ню, иде́же име́ ме́сто угото́вано от Бо́га, да та́мо пита́ется дни́й ты́сящу две́сте шестьдеся́т.

⁷ И бы́сть бра́нь на небеси́: Михаи́л и А́нгели его́ бра́нь сотвори́ша со зми́ем, и зми́й бра́ся и а́нгели его́,

⁸ И не возмого́ша, и ме́ста не обре́теся и́м ктому́ на небеси́.

⁹ И вложе́н [313] бы́сть зми́й вели́кий, зми́й дре́вний, нарица́емый диа́вол и сатана́, льстя́й вселе́нную всю́, и вложе́н [314] бы́сть на зе́млю, и а́ггели его́ с ни́м низве́ржени бы́ша.

¹⁰ И слы́шах гла́с ве́лий на небеси́, глаго́лющь: ны́не бы́сть спасе́ние и си́ла и ца́рство Бо́га на́шего и о́бласть Христа́ Его́, я́ко низложе́н бы́сть клеветни́к бра́тии на́шея, оклевеща́я и́х пред Бо́гом на́шим де́нь и но́щь.

¹¹ И ти́и победи́ша его́ кро́вию А́гнчею и сло́вом свиде́тельства своего́, и не возлюби́ша ду́ш свои́х да́же до сме́рти.

¹² Сего́ ра́ди весели́теся, небеса́ и живу́щии на ни́х. Го́ре живу́щим на земли́ и мо́ри, я́ко сни́де диа́вол к ва́м, име́я я́рость вели́кую, ве́дый, я́ко вре́мя ма́ло и́мать.

¹³ И егда́ ви́де зми́й, я́ко низложе́н бы́сть на зе́млю, гоня́ше жену́, я́же роди́ му́жеска.

¹⁴ И дана́ бы́ша жене́ два́ крила́ орла́ вели́каго, да пари́т в пусты́ню в ме́сто свое́, иде́же препита́на бя́ше ту́ вре́мя и време́н и по́л вре́мене, от лица́ змии́на.

¹⁵ И испусти́ зми́й за жено́ю из у́ст свои́х во́ду я́ко реку́, да ю́ в реце́ потопи́т.

¹⁶ И помо́же земля́ жене́, и отве́рзе земля́ уста́ своя́, и пожре́ реку́, ю́же изведе́ зми́й от у́ст свои́х.

¹⁷ И разгне́вася зми́й на жену́ и и́де сотвори́ти бра́нь со оста́вшим се́менем ея́, и́же соблюда́ют за́поведи Бо́жия и име́ют свиде́тельство Иису́с Христо́во.

Глава 13

¹ И ста́х на песце́ морсте́м: и ви́дех из мо́ря зве́ря исходя́ща, иму́ща гла́в се́дмь и рого́в де́сять, и на ро́зех его́ вене́ц де́сять, а на глава́х его́ имена́ ху́лна.

² Зве́рь, его́же ви́дех, бе́ подо́бен ры́си, и но́зе ему́ я́ко медве́ди, и уста́ его́ я́ко уста́ льво́ва: и даде́ ему́ зми́й си́лу свою́ и престо́л сво́й и о́бласть вели́кую.

³ И ви́дех еди́ну от гла́в его́ я́ко заколе́ну в сме́рть, и я́зва сме́рти его́ исцеле́. И чуди́ся вся́ земля́ всле́д зве́ря, и поклони́шася зми́ю, и́же даде́ о́бласть зве́рю,

⁴ И поклони́шася зве́рю, глаго́люще: кто́ подо́бен зве́рю и кто́ мо́жет ра́товатися с ни́м?

⁵ И дана́ бы́ша ему́ уста́ глаго́люща вели́ка и ху́лна, и дана́ бы́сть ему́ о́бласть твори́ти ме́сяц четы́редесять два́.

⁶ И отве́рзе уста́ своя́ в хуле́ние к Бо́гу, ху́лити и́мя Его́ и селе́ние Его́ и живу́щия на небеси́.

⁷ И дано́ бы́сть ему́ бра́нь твори́ти со святы́ми и победи́ти я́: и дана́ бы́сть ему́ о́бласть на вся́цем коле́не [люди́й] и на язы́цех и племене́х.

⁸ И покло́нятся ему́ вси́ живу́щии на земли́, и́мже не напи́сана су́ть имена́ в кни́гах живо́тных А́гнца заколе́наго от сложе́ния міра.

⁹ А́ще кто́ и́мать у́хо, да слы́шит.

¹⁰ И́же а́ще в плене́ние веде́т, в плене́ние по́йдет: а́ще кто́ ору́жием убие́т, подоба́ет ему́ ору́жием убие́ну бы́ти. Зде́ е́сть терпе́ние и ве́ра святы́х.

¹¹ И ви́дех и́наго зве́ря восходя́щаго от земли́, и име́яше ро́га два́, подо́бна а́гнчым, и глаго́лаше я́ко зми́й.

¹² И вла́сть пе́рваго зве́ря всю́ творя́ше пред ни́м: и творя́ше зе́млю и вся́ живу́щия на не́й поклони́тися пе́рвому зве́рю, ему́же исцеле́на бы́сть я́зва сме́ртная:

¹³ И сотвори́ чудеса́ вели́ка, да и о́гнь сотвори́т сходи́ти с небесе́ на зе́млю пред челове́ки.

¹⁴ И льсти́т живу́щия на земли́, ра́ди зна́мений, я́же дана́ бы́ша ему́ пред зве́рем твори́ти, глаго́ля живу́щим на земли́, сотвори́ти о́браз зве́рю, и́же и́мать я́зву ору́жную и жи́в бы́сть.

¹⁵ И дано́ бы́сть ему́ да́ти ду́х о́бразу звери́ну, да проглаго́лет ико́на звери́на и сотвори́т, да и́же а́ще не покло́нятся о́бразу звери́ному, убие́ни бу́дут.

¹⁶ И сотвори́т вся́ ма́лыя и вели́кия, бога́тыя и убо́гия, свобо́дныя и рабо́тныя, да да́ст и́м начерта́ние на десне́й руце́ и́х или́ на челе́х и́х,

¹⁷ Да никто́же возмо́жет ни купи́ти, ни прода́ти, то́кмо кто́ и́мать начерта́ние, или́ и́мя зве́ря, или́ число́ и́мене его́.

¹⁸ Зде́ му́дрость е́сть. И́же и́мать у́м, да почте́т число́ звери́но: число́ бо челове́ческо е́сть, и число́ его́ ше́сть со́т шестьдеся́т ше́сть.

Глава 14

¹ И ви́дех, и се́, А́гнец стоя́ше на горе́ Сио́нстей, и с Ни́м сто́ и четы́редесять и четы́ри ты́сящи, иму́ще и́мя Отца́ Его́ напи́сано на челе́х свои́х.

² И слы́шах гла́с с небесе́, я́ко гла́с во́д мно́гих и я́ко гла́с гро́ма вели́ка: и гла́с слы́шах гуде́ц гуду́щих в гу́сли своя́

³ И пою́щих я́ко пе́снь но́ву пред престо́лом и пред четы́ри живо́тными и ста́рцы: и никто́же можа́ше навы́кнути пе́сни, то́кмо си́и сто́ и четы́редесять и четы́ри ты́сящи иску́плени от земли́.

⁴ Си́и су́ть, и́же с жена́ми не оскверни́шася, зане́ де́вственницы су́ть: си́и после́дуют А́гнцу, а́може а́ще по́йдет. Си́и су́ть ку́плени от люди́й пе́рвенцы Бо́гу и А́гнцу,

⁵ И во усте́х и́х не обре́теся ле́сть: без поро́ка бо су́ть пред престо́лом Бо́жиим.

⁶ И ви́дех и́наго А́нгела паря́ща посреде́ небесе́, иму́щаго Ева́нгелие ве́чно благовести́ти живу́щим на земли́ и вся́кому пле́мени и язы́ку, и коле́ну и лю́дем,

⁷ Глаго́люща гла́сом вели́ким: убо́йтеся Бо́га и дади́те Ему́ сла́ву, я́ко прии́де ча́с суда́ Его́, и поклони́теся Сотво́ршему не́бо и зе́млю, и мо́ре и исто́чники водны́я.

⁸ И и́н А́нгел всле́д и́де, глаго́ля: паде́, паде́ Вавило́н гра́д вели́кий, зане́ от вина́ я́рости любодея́ния своего́ напои́ вся́ язы́ки.

⁹ И тре́тий А́нгел всле́д его́ и́де, глаго́ля гла́сом вели́ким: и́же а́ще кто́ покланя́ется зве́рю и ико́не его́ и прие́млет начерта́ние на челе́ свое́м или́ на руце́ свое́й,

¹⁰ И то́й и́мать пи́ти от вина́ я́рости Бо́жия, вина́ нерастворе́на [315] в ча́ши гне́ва Его́, и бу́дет му́чен огне́м и жу́пелом пред А́нгелы святы́ми и пред А́гнцем:

¹¹ И ды́м муче́ния и́х во ве́ки веко́в восхо́дит, и не и́мут поко́я де́нь и но́щь покланя́ющиися зве́рю и о́бразу его́ и прие́млющии начерта́ние и́мене его́.

¹² Зде́ е́сть терпе́ние святы́х, и́же соблюда́ют за́поведи Бо́жия и ве́ру Иису́сову.

¹³ И слы́шах гла́с с небесе́, глаго́лющь ми́: напиши́: блаже́ни ме́ртвии, умира́ющии о Го́споде отны́не. Е́й, глаго́лет Ду́х, да почи́ют от трудо́в свои́х: дела́ бо и́х хо́дят всле́д с ни́ми.

¹⁴ И ви́дех, и се́, о́блак све́тел, и на о́блаце седя́й подо́бен Сы́ну Челове́ческому, име́я на главе́ свое́й вене́ц зла́т, и в руце́ его́ се́рп о́стр.

¹⁵ И и́н А́нгел изы́де из хра́ма, вопия́ ве́лиим гла́сом седя́щему на о́блаце: посли́ се́рп тво́й и жни́, я́ко прии́де ча́с пожа́ти, зане́ и́зсше трава́ [316] земна́я.

¹⁶ И положи́ [317] седя́й на о́блаце се́рп сво́й на зе́млю, и пожа́та бы́сть земля́.

¹⁷ И и́н А́нгел изы́де из це́ркве су́щия на небеси́, имы́й и то́й се́рп о́стр.

¹⁸ И и́н А́нгел изы́де от олтаря́, имы́й о́бласть на огни́, и возопи́ кли́чем вели́ким ко иму́щему се́рп о́стрый, глаго́ля: посли́ се́рп тво́й о́стрый и объе́мли [318] гро́зды виногра́да земна́го, я́ко созре́ша уже́ гро́здие ея́.

¹⁹ И положи́ [319] А́нгел се́рп сво́й на земли́, [320] и обере́ виногра́д зе́мский и вложи́ в точи́ло вели́кия я́рости Бо́жия.

²⁰ И испра́но бы́сть точи́ло вне́ гра́да, и изы́де кро́вь от точи́ла да́же до у́зд ко́нских, от ста́дий ты́сяща и ше́сть со́т.

Глава 15

¹ И ви́дех и́но зна́мение на небеси́ ве́лие и чу́дно, се́дмь А́нгел иму́щих се́дмь я́зв после́дних, зане́ в те́х сконча́ется я́рость Бо́жия.

² И ви́дех я́ко мо́ре сткля́но сме́шено со огне́м, и победи́вшия зве́ря и о́браз его́, и начерта́ние его́ и число́ и́мене его́, стоя́щия на мо́ри сткля́нем, иму́щия гу́сли Бо́жия:

³ И поя́ху пе́снь Моисе́а раба́ Бо́жия и пе́снь А́гнчу, глаго́люще: ве́лия и ди́вна дела́ Твоя́, Го́споди Бо́же Вседержи́телю: пра́ведни и и́стинни путие́ Твои́, Царю́ святы́х:

⁴ Кто́ не убои́тся Тебе́, Го́споди, и просла́вит и́мя Твое́? Я́ко еди́н преподо́бен еси́, я́ко вси́ язы́цы прии́дут и покло́нятся пред Тобо́ю: я́ко оправда́ния Твоя́ яви́шася.

⁵ И по си́х ви́дех, и се́, отве́рзеся хра́м ски́нии свиде́ния на небеси́:

⁶ И изыдо́ша се́дмь А́нгел из хра́ма, и́же име́яху се́дмь я́зв, облече́ни в ри́зы льня́ны чи́сты и све́тлы, и препоя́сани на пе́рсех по́ясы златы́ми.

⁷ И еди́но от четы́рех живо́тных даде́ седми́м А́нгелом се́дмь фиа́л златы́х, испо́лненых я́рости Бо́га живу́щаго во ве́ки веко́в.

⁸ И напо́лнися хра́м ды́ма от сла́вы Бо́жия и от си́лы Его́, и никто́же можа́ше вни́ти во хра́м, до́ндеже сконча́ются се́дмь я́зв седми́х А́нгел.

Глава 16

¹ И слы́шах гла́с ве́лий от хра́ма глаго́лющь седми́м А́нгелом: иди́те и изли́йте се́дмь фиа́л я́рости Бо́жия на зе́млю.

² И и́де пе́рвый А́нгел и излия́ фиа́л сво́й на зе́млю: и бы́сть гно́й зо́л и лю́т на челове́цех иму́щих начерта́ние звери́но и кла́няющихся ико́не его́.

³ И вторы́й А́нгел излия́ фиа́л сво́й в мо́ре: и бы́сть кро́вь я́ко мертвеца́, и вся́ка душа́ жива́ у́мре в мо́ри.

⁴ И тре́тий А́нгел излия́ фиа́л сво́й на ре́ки и на исто́чники водны́я: и бы́сть кро́вь.

⁵ И слы́шах А́нгела водна́го глаго́люща: пра́веден еси́, Го́споди, сы́й и и́же бе́, и преподо́бен, я́ко сия́ суди́л еси́:

⁶ Зане́ кро́вь святы́х и проро́к излия́ша, и кро́вь и́м да́л еси́ пи́ти: досто́йни бо су́ть.

⁷ И слы́шах друга́го от олтаря́ глаго́люща: е́й, Го́споди Бо́же Вседержи́телю, и́стинни и пра́ви суди́ Твои́.

⁸ И четве́ртый А́нгел излия́ фиа́л сво́й на со́лнце: и дано́ бы́сть ему́ опаля́ти челове́ки огне́м.

⁹ И опали́шася челове́цы зно́ем вели́ким, и ху́лиша и́мя Бо́жие, и́же и́мать о́бласть на я́звах си́х, и не пока́яшася да́ти Ему́ сла́вы.

¹⁰ И пя́тый А́нгел излия́ фиа́л сво́й на престо́л звери́н: и бы́сть ца́рство его́ омраче́но, и жва́ху язы́ки своя́ от боле́зни,

¹¹ И ху́лиша Бо́га небе́снаго от боле́зни и от я́зв свои́х, и не пока́яшася от де́л свои́х.

¹² И шесты́й А́нгел излия́ фиа́л сво́й на реку́ вели́ку Евфра́т: и изся́че вода́ ея́, да угото́вится пу́ть царе́м су́щим от восто́к со́лнечных.

¹³ И ви́дех из у́ст зми́я и из у́ст зве́ря и из у́ст лжа́го проро́ка ду́хи три́ нечи́стыя, я́ко жа́бы исходя́щия:

¹⁴ Су́ть бо ду́си де́монстии творя́ще зна́мения, и́же исхо́дят к царе́м всея́ вселе́нныя, собра́ти я́ на бра́нь в де́нь то́й вели́кий Бо́га Вседержи́теля.

¹⁵ Се́, гряду́ я́ко та́ть: блаже́н бдя́й и блюды́й ри́зы своя́, да не на́г хо́дит и у́зрят срамоту́ его́.

¹⁶ И собра́ и́х на ме́сто нарица́емое евре́йски Армагеддо́н.

¹⁷ И седмы́й А́нгел излия́ фиа́л сво́й на возду́х: и изы́де гла́с ве́лий от хра́ма небесе́ от престо́ла, глаго́ля: бы́сть.

¹⁸ И бы́ша блиста́ния и гро́ми и гла́си, и бы́сть тру́с вели́к, яко́в николи́же бы́сть, отне́леже бы́ша челове́цы на земли́, толи́к тру́с, та́ко ве́лий.

¹⁹ И бы́сть гра́д вели́к в три́ ча́сти, и гра́ди язы́честии падо́ша, и Вавило́н вели́кий помянове́н бы́сть пред Бо́гом, да́ти ему́ ча́шу вина́ я́рости гне́ва Своего́.

²⁰ И вся́к о́стров бежа́, и го́ры не обрето́шася:

²¹ И гра́д вели́к, я́ко тала́нтес, сни́де с небесе́ на челове́ки: и ху́лиша челове́цы Бо́га от я́звы гра́дныя, я́ко ве́лия е́сть я́зва его́ зело́.

Глава 17

¹ И прии́де еди́н от седми́ А́нгел иму́щих се́дмь фиа́л, и глаго́ла со мно́ю, глаго́ля ми́: прииди́, да покажу́ ти су́д любоде́йцы вели́кия, седя́щия на вода́х мно́гих:

² С не́юже любоде́яша ца́рие зе́мстии, и упи́шася живу́щии на земли́ от вина́ любодея́ния ея́.

³ И веде́ мя в пу́сто ме́сто ду́хом: и ви́дех жену́ седя́щу на зве́ри червле́не, испо́лненем име́н ху́лных, и́же име́яше гла́в се́дмь и рого́в де́сять.

⁴ И жена́ бе́ облечена́ в порфи́ру и червлени́цу, и позлащена́ зла́том и ка́мением драги́м и би́сером, иму́щи ча́шу зла́ту в руце́ свое́й по́лну ме́рзости и скве́рн любодея́ния ея́:

⁵ И на челе́ ея́ напи́сано и́мя: та́йна, Вавило́н вели́кий, ма́ти любоде́йцам и ме́рзостем зе́мским.

⁶ И ви́дех жену́ пия́ну кровьми́ святы́х и кровьми́ свиде́телей Иису́совых, и диви́хся, ви́дев ю́, ди́вом вели́ким.

⁷ И рече́ ми А́нгел: что́ диви́шися? а́з ти́ реку́ та́йну жены́ [сея́] и зве́ря нося́щаго ю́, се́дмь гла́в иму́ща и рого́в де́сять.

⁸ Зве́рь, его́же ви́дел еси́, бе́, и не́сть, и и́мать взы́ти от бе́здны, и в па́губу по́йдет: и удивя́тся живу́щии на земли́, и́мже имена́ не напи́сана су́ть в кни́гу живо́тную от сложе́ния міра, ви́дяще, я́ко зве́рь бе́, и не́сть, и преста.́ [321]

⁹ Зде́ у́м, и́же и́мать му́дрость. Се́дмь гла́в го́ры су́ть се́дмь, иде́же жена́ седи́т на ни́х,

¹⁰ И ца́рие се́дмь су́ть: пя́ть и́х па́ло, и еди́н е́сть, [а] други́й еще́ не прии́де: и егда́ прии́дет, ма́ло ему́ е́сть пребы́ти. [322]

¹¹ И зве́рь, и́же бе́ и не́сть, и то́й осмы́й е́сть, и от седми́х е́сть, и в па́губу и́дет.

¹² И де́сять рого́в, я́же ви́дел еси́, де́сять царе́й су́ть, и́же ца́рства еще́ не прия́ша, но о́бласть я́ко ца́рие на еди́н ча́с прии́мут со зве́рем.

¹³ Си́и еди́ну во́лю и́мут, и си́лу и о́бласть свою́ зве́рю даду́т:

¹⁴ Си́и со А́гнцем бра́нь сотворя́т, и А́гнец победи́т я́, я́ко Госпо́дь господе́м е́сть и Ца́рь царе́м: и су́щии с Ни́м зва́ннии и избра́ннии и ве́рни.

¹⁵ И глаго́ла ми́: во́ды, я́же еси́ ви́дел, иде́же любоде́йца седи́т, лю́дие и наро́ди су́ть, и племена́ и язы́цы.

¹⁶ И де́сять рого́в, я́же ви́дел еси́ на зве́ри, си́и любоде́йцу возненави́дят, и запусте́вшу сотворя́т ю́ и на́гу, и пло́ть ея́ снедя́т, и сожгу́т ю́ огне́м:

¹⁷ Бо́г бо да́л е́сть в сердца́ и́х, сотвори́ти во́лю Его́, и сотвори́ти еди́ну во́лю, и да́ти ца́рство свое́ зве́рю, до́ндеже сконча́ются глаго́лы Бо́жии.

¹⁸ И жена́, ю́же ви́дел еси́, гра́д е́сть вели́кий, и́же и́мать ца́рство над цари́ земны́ми.

Глава 18

¹ И по си́х ви́дех и́на А́нгела сходя́ща с небесе́, иму́ща о́бласть ве́лию: и земля́ просвети́ся от сла́вы его́.

² И возопи́ в кре́пости, гла́сом ве́лиим глаго́ля: паде́, паде́ Вавило́н вели́кий, и бы́сть жили́ще бесо́м и храни́тель вся́кому ду́ху нечи́сту, и храни́лище все́х пти́ц нечи́стых и ненави́димых: я́ко от вина́ я́рости любодея́ния своего́ напои́ вся́ язы́ки,

³ И ца́рие зе́мстии с не́ю любы́ де́яша, и купцы́ зе́мстии от си́лы пи́щи ея́ [323] разбогате́ша.

⁴ И слы́шах гла́с и́н с небесе́, глаго́лющь: изыди́те из нея́, лю́дие Мои́, да не причастите́ся грехо́м ея́ и от я́зв ея́ да не вреди́теся:

⁵ Я́ко прилепи́шася [324] греси́ ея́ да́же до небесе́, и помяну́ Бо́г непра́вды ея́.

⁶ Воздади́те е́й, я́ко и та́ воздаде́ ва́м, и усугу́бите е́й сугу́бо по дело́м ея́: ча́шею, е́юже черпа́ [ва́м], черпли́те е́й сугу́бо.

⁷ Ели́ко просла́вися и разсвире́пе, [325] толи́ко дади́те е́й му́к и рыда́ний: я́ко в се́рдцы свое́м глаго́лет, [я́ко] сежу́ цари́цею, и вдова́ не́смь, и рыда́ния не и́мам ви́дети.

⁸ Сего́ ра́ди во еди́н де́нь прии́дут я́звы е́й, сме́рть и пла́чь и гла́д, и огне́м сожжена́ бу́дет, я́ко кре́пок Госпо́дь Бо́г судя́й е́й.

⁹ И возрыда́ют и воспла́чутся ея́ ца́рие зе́мстии, любы́ де́явшии с не́ю и разсвире́певшии, егда́ у́зрят ды́м запале́ния ея́,

¹⁰ Издале́ча стоя́ще за стра́х му́к ея́, глаго́люще: го́ре, го́ре, гра́д вели́кий Вавило́н, гра́д кре́пкий, я́ко во еди́н ча́с прии́де су́д тво́й.

¹¹ И купцы́ зе́мстии возрыда́ют и воспла́чутся о не́м, я́ко бреме́н и́х никто́же купу́ет ктому́,

¹² Бреме́н зла́та и сребра́, и ка́мения драга́го и би́сера, и ви́сса и порфи́ры, и ше́лка и черве́ни, и вся́каго дре́ва Фии́нна, и вся́каго сосу́да из ко́сти слоно́выя, и вся́каго сосу́да от дре́ва честна́го, и ме́дяна и желе́зна и мра́морна,

¹³ И кори́цы и фимиа́ма, и ми́ра и Лива́на, и вина́ и еле́а, и семида́ла и пшени́цы, и скота́ и ове́ц, и ко́ней и колесни́ц, и теле́с и ду́ш челове́ческих.

¹⁴ И ово́щи похоте́й души́ твоея́ отыдо́ша от тебе́, и вся́ ту́чная и све́тлая отыдо́ша от тебе́, и ктому́ не и́маши обрести́ и́х.

¹⁵ Купцы́ си́ми обога́щшеся от нея́, издале́ча ста́нут за стра́х муче́ния ея́, рыда́юще и пла́чущеся,

¹⁶ И глаго́люще: го́ре, го́ре, гра́д вели́кий, облече́нный ви́ссом и порфи́рою и червлени́цею, и позлаще́ный зла́том и ка́мением драги́м и би́сером

¹⁷ Я́ко во еди́н ча́с поги́бе толи́ко бога́тство. И вся́к ко́рмчий, и вся́к пла́ваяй в корабле́х, и вся́к ели́к в мо́ри де́лаяй, [326] издале́ча ста́ша,

¹⁸ И вопия́ху, ви́дяще ды́м раждеже́ния его́, глаго́люще: ки́й подо́бен гра́ду вели́кому?

¹⁹ И положи́ша пе́рсть на глава́х свои́х, и возопи́ша пла́чущеся и рыда́юще, глаго́люще: го́ре, го́ре, гра́д вели́кий, в не́мже обогати́шася вси́ иму́щии корабли́ в мо́ри, от че́сти [327] его́: я́ко еди́нем часо́м запусте́.

²⁰ Весели́ся о се́м, небо, и святи́и Апо́столи и проро́цы, я́ко суди́ Бо́г су́д ва́ш от него́.

²¹ И взя́т еди́н А́нгел кре́пок ка́мень вели́к я́ко же́рнов и ве́рже в мо́ре, глаго́ля: та́ко стремле́нием вве́ржен бу́дет Вавило́н гра́д вели́кий, и не и́мать обрести́ся ктому́:

²² И гла́с гуде́ц и мусики́й, и писка́телей [328] и тру́б не и́мать слы́шатися ктому́ в тебе́: и вся́к хитре́ц вся́кия хи́трости не обря́щется ктому́ в тебе́, и шу́м же́рновный не бу́дет слы́шан в тебе́:

²³ И све́т свети́лника не и́мать свети́ти в тебе́ ктому́, и гла́с жениха́ и неве́сты не и́мать слы́шан бы́ти в тебе́ ктому́: я́ко купцы́ твои́ бе́ша вельмо́жи зе́мстии, я́ко волхвова́нии твои́ми прельще́ни бы́ша вси́ язы́цы.

²⁴ И в не́м кро́вь проро́ческа и святы́х обре́теся и все́х избие́нных на земли́.

Глава 19

¹ И по си́х слы́шах гла́с ве́лий наро́да мно́га на небеси́, глаго́лющаго: аллилу́иа: спасе́ние и сла́ва, и че́сть и си́ла Го́споду на́шему,

² Я́ко и́стинни и пра́ви суди́ Его́: я́ко суди́л е́сть любоде́йцу вели́ку, я́же посмради́ [329] зе́млю любодея́нием свои́м, и отмсти́л кро́вь рабо́в Свои́х от руки́ ея́.

³ И второ́е ре́ша: аллилу́иа. И ды́м ея́ восхожда́ше во ве́ки веко́в.

⁴ И падо́ша два́десять и четы́ри ста́рцы и четы́ри живо́тна и поклони́шася Богови седя́щему на престо́ле, глаго́люще: ами́нь, аллилу́иа.

⁵ И гла́с изы́де от престо́ла глаго́лющь: по́йте Бо́гу на́шему, вси́ раби́ Его́ и боя́щиися Его́, и ма́лии и вели́цыи.

⁶ И слы́шах я́ко гла́с наро́да мно́га, и я́ко гла́с во́д мно́гих, и я́ко гла́с громо́в кре́пких, глаго́лющих: аллилу́иа, я́ко воцари́ся Госпо́дь Бо́г Вседержи́тель:

⁷ Ра́дуимся и весели́мся, и дади́м сла́ву Ему́: я́ко прии́де бра́к А́гнчий, и жена́ Его́ угото́вила е́сть себе́.

⁸ И дано́ бы́сть е́й облещи́ся в виссо́н чи́ст и све́тел: виссо́н бо оправда́ния святы́х е́сть.

⁹ И глаго́ла ми́: напиши́: блаже́ни зва́ннии на ве́черю бра́ка А́гнча. И глаго́ла ми́: сия́ словеса́ и́стинна Бо́жия су́ть.

¹⁰ И па́д пред нога́ма его́, поклони́хся ему́: и глаго́ла ми́: ви́ждь, ни́: клевре́т ти́ е́смь и бра́тий твои́х иму́щих свиде́тельство Иису́сово: Бо́гу поклони́ся: свиде́тельство бо Иису́сово е́сть Ду́х проро́чествия.

¹¹ И ви́дех не́бо отве́рсто, и се́, ко́нь бе́л, и седя́й на не́м Ве́рен и И́стинен, и правосу́дный и во́инственный:

¹² О́чи же Ему́ [еста́] я́ко пла́мень о́гнен, и на главе́ Его́ венцы́ мно́зи: имы́й и́мя напи́сано, е́же никто́же ве́сть, то́кмо О́н Са́м:

¹³ И облече́н в ри́зу червле́ну кро́вию. И нарица́ется и́мя Его́, Сло́во Бо́жие.

¹⁴ И во́инства небе́сная идя́ху всле́д Его́ на ко́нех бе́лых, облече́ни в виссо́н бе́л и чи́ст.

¹⁵ И из у́ст Его́ изы́де ору́жие остро́, да те́м избие́т язы́ки: и то́й упасе́т я́ жезло́м желе́зным, и то́й пере́т точи́ло вина́ я́рости и гне́ва Бо́жия Вседержи́телева.

¹⁶ И и́мать на ри́зе и на стегне́ Свое́м и́мя напи́сано: Ца́рь царе́м и Госпо́дь господе́м.

¹⁷ И ви́дех еди́наго А́нгела стоя́ща на со́лнце: и возопи́ гла́сом ве́лиим, глаго́ля все́м пти́цам паря́щим посреде́ небесе́: прииди́те и собери́теся на ве́черю вели́кую Бо́жию,

¹⁸ Да сне́сте пло́ти царе́й и пло́ти кре́пких и пло́ти ты́сящников, и пло́ти ко́ней и седя́щих на ни́х, и пло́ти все́х свобо́дных и рабо́в, и ма́лых и вели́ких.

¹⁹ И ви́дех зве́ря и цари́ земны́я и во́и и́х со́браны сотвори́ти бра́нь с Седя́щим на кони́ и с во́инствы Его́.

²⁰ И я́т бы́сть зве́рь и с ни́м лжи́вый проро́к, сотвори́вый зна́мения пред ни́м, и́миже прельсти́ прие́мшия начерта́ние звери́но и покланя́ющияся ико́не его́: жи́ва вве́ржена бы́ста о́ба в е́зеро о́гненное горя́щее жу́пелом:

²¹ А про́чии убие́ни бы́ша ору́жием Седя́щаго на кони́, изше́дшим из у́ст Его́: и вся́ пти́цы насы́тишася от пло́тей и́х.

Глава 20

¹ И ви́дех А́нгела сходя́ща с небесе́, име́юща клю́чь бе́здны и у́же вели́ко в руце́ свое́й:

² И я́т зми́я, зми́я дре́вняго, и́же е́сть диа́вол и сатана́, и связа́ и́ на ты́сящу ле́т,

³ И в бе́здну затвори́ [330] его́, и заключи́ его́, и запечатле́ над ни́м, да не прельсти́т ктому́ язы́ки, до́ндеже сконча́ется ты́сяща ле́т: и по си́х подоба́ет ему́ отреше́ну бы́ти на ма́ло вре́мя.

⁴ И ви́дех престо́лы и седя́щия на ни́х, и су́д да́н бы́сть и́м: и ду́ши расте́саных за свиде́тельство Иису́сово и за сло́во Бо́жие, и́же не поклони́шася зве́рю, ни ико́не его́, и не прия́ша начерта́ния на челе́х свои́х и на руце́ свое́й. И ожи́ша и воцари́шася со Христо́м ты́сящу ле́т:

⁵ Про́чии же мертвецы́ не ожи́ша, до́ндеже сконча́ется ты́сяща ле́т. Се́ воскресе́ние пе́рвое.

⁶ Блаже́н и свя́т, и́же и́мать ча́сть в воскресе́нии пе́рвем: на ни́хже сме́рть втора́я не и́мать о́бласти, но бу́дут иере́е Бо́гу и Христу́ и воцаря́тся с Ни́м ты́сящу ле́т.

⁷ И егда́ сконча́ется ты́сяща ле́т, разреше́н бу́дет сатана́ от темни́цы своея́ и изы́дет прельсти́ти язы́ки су́щия на четы́рех у́глех земли́, Го́га и Маго́га, собра́ти и́х на бра́нь, и́хже число́ я́ко песо́к морски́й.

⁸ И взыдо́ша на широту́ земли́ и обыдо́ша святы́х ста́н и гра́д возлю́бленный.

⁹ И сни́де о́гнь от Бо́га с небесе́ и пояде́ я́:

¹⁰ И диа́вол льстя́й и́х вве́ржен бу́дет в е́зеро о́гненно и жу́пелно, иде́же зве́рь и лжи́вый проро́к: и му́чени бу́дут де́нь и но́щь во ве́ки веко́в.

¹¹ И ви́дех престо́л вели́к бе́л и Седя́щаго на не́м, его́же от лица́ бежа́ не́бо и земля́, и ме́сто не обре́теся и́м.

¹² И ви́дех мертвецы́ ма́лыя и вели́кия стоя́щя пред Бо́гом, и кни́ги разгну́шася: и и́на кни́га отве́рзеся, я́же е́сть живо́тная: и су́д прия́ша мертвецы́ от напи́саных в кни́гах, по дело́м и́х.

¹³ И даде́ мо́ре мертвецы́ своя́, и сме́рть и а́д да́ста своя́ мертвецы́: и су́д прия́ша по дело́м свои́м,

¹⁴ И сме́рть и а́д вве́ржена бы́ста в е́зеро о́гненное. И се́ е́сть втора́я сме́рть.

¹⁵ И и́же не обре́теся в кни́зе живо́тней напи́сан, вве́ржен бу́дет в е́зеро о́гненное.

Глава 21

¹ И ви́дех не́бо но́во и зе́млю но́ву: пе́рвое бо не́бо и земля́ пе́рвая преидо́ста, и мо́ря не́сть ктому́.

² И а́з Иоа́нн ви́дех гра́д святы́й, Иерусали́м но́в сходя́щь от Бо́га с небесе́, пригото́ван я́ко неве́сту укра́шену му́жу своему́.

³ И слы́шах гла́с ве́лий с небесе́, глаго́лющь: се́, ски́ния Бо́жия с челове́ки, и всели́тся с ни́ми: и ти́и лю́дие Его́ бу́дут, и Са́м Бо́г бу́дет с ни́ми Бо́г и́х:

⁴ И оты́мет Бо́г вся́ку сле́зу от о́чию и́х, и сме́рти не бу́дет ктому́: ни пла́ча, ни во́пля, ни боле́зни не бу́дет ктому́, я́ко пе́рвая мимоидо́ша.

⁵ И рече́ Седя́й на престо́ле: се́, нова́ вся́ творю́. И глаго́ла ми́: напиши́, я́ко сия́ словеса́ и́стинна и ве́рна су́ть.

⁶ И рече́ ми: соверши́шася. А́з е́смь А́льфа и Оме́га, нача́ток и коне́ц: а́з жа́ждущему да́м от исто́чника воды́ живо́тныя ту́не.

⁷ Побежда́яй насле́дит вся́, и бу́ду ему́ Бо́г, и то́й бу́дет Мне́ в сы́на.

⁸ Страшли́вым же и неве́рным, и скве́рным и уби́йцам, и блу́д творя́щим и ча́ры творя́щим, идоложе́рцем и все́м лжи́вым, ча́сть и́м в е́зере горя́щем огне́м и жу́пелом, е́же е́сть сме́рть втора́я.

⁹ И прии́де ко мне́ еди́н от седми́ А́нгел, иму́щих се́дмь фиа́л испо́лненых седми́х я́зв после́дних, и рече́ ко мне́, глаго́ля: гряди́, покажу́ ти неве́сту А́гнчу жену́.

¹⁰ И веде́ мя ду́хом на гору́ вели́ку и высоку́ и показа́ ми гра́д вели́кий, святы́й Иерусали́м низходя́щь с небесе́ от Бо́га,

¹¹ Иму́щь сла́ву Бо́жию: и свети́ло его́ подо́бно ка́мени драго́му, я́ко ка́мени Иа́спису кристаллови́дну:

¹² Иму́щь сте́ну вели́ку и высоку́, иму́щь вра́т двана́десять, и на врате́х А́нгелов двана́десять и имена́ напи́сана, я́же су́ть имена́ двана́десятим коле́ном сыно́в Изра́илевых:

¹³ От восто́ка врата́ тро́я и от се́вера врата́ тро́я, от ю́га врата́ тро́я и от за́пада врата́ тро́я.

¹⁴ И стена́ гра́да име́яше основа́ний двана́десять, и на ни́х име́н двана́десять Апо́столов А́гнчих.

¹⁵ И глаго́ляй со мно́ю име́яше тро́сть зла́ту, да изме́рит гра́д и врата́ его́ и сте́ны его́.

¹⁶ И гра́д на четы́ри у́глы стои́т, и долгота́ его́ толи́ка е́сть, ели́ка же и широта́. И изме́ри гра́д тро́стию на ста́дий двана́десять ты́сящ: долгота́ и широта́ и высота́ его́ ра́вна су́ть.

¹⁷ И разме́ри сте́ну его́ во сто́ и четы́ридесять и четы́ри ла́кти, в ме́ру челове́ческу, я́же е́сть А́нгела.

¹⁸ И бе́ созда́ние стены́ его́ Иа́спис: и гра́д зла́то чи́сто, подо́бен стклу́ чи́сту.

¹⁹ И основа́ния стены́ гра́да вся́ким драги́м ка́мением укра́шена бя́ху: основа́ние пе́рвое Иа́спис, второ́е сапфи́р, тре́тие халкидо́н, четве́ртое смара́гд,

²⁰ Пя́тое сардо́никс, шесто́е са́рдий, седмо́е хрисо́лиф, осмо́е вири́лл, девя́тое топа́зий, деся́тое хрисо́прас, первоена́десять иаки́нф, второена́десять амефи́ст.

²¹ И двана́десять вра́т двана́десять би́серов: еди́на ка́яждо врата́ бе́ша от еди́наго би́сера. И сто́гны гра́да зла́то чи́сто, я́ко сткло́ пресве́тло.

²² И хра́ма не ви́дех в не́м: Госпо́дь бо Бо́г Вседержи́тель хра́м ему́ е́сть, и А́гнец.

²³ И гра́д не тре́буя со́лнца и луны́, да све́тят в не́м, сла́ва бо Бо́жия просвети́ его́, и свети́лник его́ а́гнец.

²⁴ И язы́цы спасе́ни во све́те его́ по́йдут, и ца́рие зе́мстии принесу́т сла́ву и че́сть свою́ в него́.

²⁵ И врата́ его́ не и́мут затвори́тися во дни́: но́щи бо не бу́дет ту́.

²⁶ И принесу́т сла́ву и че́сть язы́ков в него́:

²⁷ И не и́мать в него́ вни́ти вся́ко скве́рно, и творя́й ме́рзость и лжу́, но то́кмо напи́саныя в кни́гах живо́тных А́гнца.

Глава 22

¹ И показа́ ми чи́сту реку́ воды́ живо́тныя, све́тлу я́ко криста́лл, исходя́щу от престо́ла Бо́жия и А́гнча.

² Посреде́ сто́гны его́ и по обапо́лы реки́ дре́во живо́тное, е́же твори́т плодо́в двана́десяте, на ки́йждо ме́сяц воздая́ пло́д сво́й: и ли́ствие дре́ва во исцеле́ние язы́ком.

³ И вся́ка ана́фема не бу́дет ктому́: и престо́л Бо́жий и А́гнечь бу́дет в не́м, и раби́ Его́ послу́жат Ему́,

⁴ И у́зрят лице́ Его́, и и́мя Его́ на челе́х и́х.

⁵ И но́щи не бу́дет та́мо, и не потре́буют све́та от свети́лника, ни све́та со́лнечнаго, я́ко Госпо́дь Бо́г просвеща́ет я́: и воцаря́тся во ве́ки веко́в.

⁶ И рече́ ми: сия́ словеса́ ве́рна и и́стинна: и Госпо́дь Бо́г святы́х проро́к посла́ А́нгела Своего́ показа́ти рабо́м Свои́м, и́мже подоба́ет бы́ти вско́ре.

⁷ Се́, гряду́ ско́ро: блаже́н соблюда́яй словеса́ проро́чества кни́ги сея́.

⁸ И а́з Иоа́нн ви́дех сия́ и слы́шах. И егда́ слы́шах и ви́дех, падо́х поклони́тися на но́гу А́нгела показу́ющаго ми́ сие́:

⁹ И глаго́ла ми́: ви́ждь, ни́: клевре́т бо тво́й е́смь и бра́тии твоея́ проро́ков и соблюда́ющих словеса́ кни́ги сея́: Бо́гу поклони́ся.

¹⁰ И глаго́ла ми́: не запечатле́й слове́с проро́чествия кни́ги се́я: я́ко вре́мя бли́з е́сть.

¹¹ Оби́дяй да оби́дит еще́, и скве́рный да оскверни́тся еще́: и пра́ведный пра́вду да твори́т еще́: и святы́й да святи́тся еще́.

¹² И се́, гряду́ ско́ро, и мзда́ Моя́ со Мно́ю, возда́ти коему́ждо по дело́м его́.

¹³ А́з е́смь А́льфа и Оме́га, нача́ток и коне́ц, Пе́рвый и После́дний.

¹⁴ Блаже́ни творя́щии за́поведи Его́, да бу́дет о́бласть и́м на дре́во живо́тное, и враты́ вни́дут во гра́д.

¹⁵ Вне́ же пси́ и чароде́е, и любоде́е и уби́йцы, и идолослужи́теле и вся́к любя́й и творя́й лжу́.

¹⁶ А́з Иису́с посла́х А́нгела Моего́ засвиде́тельствовати ва́м сия́ в це́рквах. А́з е́смь ко́рень и ро́д Дави́дов, и звезда́ у́тренняя [331] и денни́ца.

¹⁷ И Ду́х и неве́ста глаго́лют: прииди́, и слы́шяй да глаго́лет: прииди́. И жа́ждяй да прии́дет, и хотя́й да прии́мет во́ду живо́тную ту́не.

¹⁸ Сосвиде́тельствую бо вся́кому слы́шащему словеса́ проро́чества кни́ги сея́: а́ще кто́ приложи́т к си́м, наложи́т Бо́г на него́ я́зв напи́санных в кни́зе се́й:

¹⁹ И а́ще кто́ оты́мет от слове́с кни́ги проро́чествия сего́, оты́мет Бо́г ча́сть его́ от кни́ги живо́тныя, и от гра́да свята́го, и напи́санных в кни́зе се́й.

²⁰ Глаго́лет свиде́тельствуяй сия́: е́й, гряду́ ско́ро: ами́нь. Е́й, гряди́ Го́споди Иису́се.

²¹ Благода́ть Го́спода на́шего Иису́са Христа́ со все́ми ва́ми. Ами́нь.