ПСАЛТИРЬ

Псалом 125.

Внегда возвратити Господу плен Сiонь, быхом яко утешени. Тогда исполнишася радости уста наша, и язык наш веселiя; тогда рекут во языцех; возвеличил eсть Господь сотворити с ними. Возвеличил eсть Господь сотворити с нами; быхом веселящеся. Возврати, Господи, плененiе наше, яко потоки югом. Сеющiи слезами, радостiю пожнут. Ходящiи хождаху и плакахуся, метающе семена своя; грядуще же прiидут радостiю, вземлюще рукояти своя.