ПСАЛТИРЬ

Псалом 77.

Внемлите, людiе мои, закону моему, приклоните ухо ваше во глаголы уст моих. Отверзу в притчах уста моя, провещаю гананiя исперва. Елика слышахом и познахом я, и oтцы наши поведаша нам; не утаишася от чад их в род ин, возвещающе хвалы Господни, и силы eго и чудеса eго, яже сотвори. И воздвиже свиденiе во iакове, и закон положи во Израили, eлика заповеда oтцeм нашым сказати я сыновом своим, яко да познает род ин, сынове родящiися, и востанут и поведят я сыновом своим; да положат на Бога упованiе свое, и не забудут дел Божiих, и заповеди eго взыщут; да не будут якоже oтцы их, род строптив и преогорчеваяй, род иже не исправи сердца своего и не увери с Богом духа своего. Сынове eфрeмли наляцающе и стреляюще луки возвратишася в день брани; не сохраниша завета Божiя, и в законе eго не восхотеша ходити. И забыша благодеянiя eго и чудеса eго, яже показа имъ пред oтцы их, яже сотвори чудеса в земли eгипетстей, на поли танеосе; разверзе море и проведе их; представи воды яко мех, и настави я облаком во дни и всю нощь просвещенiем oгня. Разверзе камень в пустыни и напои я яко в бездне мнозе; и изведе воду из камене и низведе яко реки воды. И приложиша eще согрешати eму, преогорчиша вышняго в безводней; и искусиша Бога в сердцах своих, воспросити брашна душам своим. И клеветаша на Бога и реша; eда возможет Бог уготовати трапезу в пустыни? Понеже порази камень, и потекоша воды, и потоцы наводнишася; eда и хлеб может дати? или уготовати трапезу людем своим? Сего ради слыша Господь и презре, и oгнь возгореся во iакове, и гнев взыде на Израиля; яко не вероваша Богови, ниже уповаша на спасенiе eго. И заповеда облаком свыше, и двeри небесе отверзе; и одожди им манну ясти, и хлеб небесный даде им. Хлеб ангельскiй яде человек; брашно посла им до сытости. Воздвиже юг с небесе, и наведе силою своею лiва; и одожди на ня яко прах плоти, и яко песок морскiй птицы пернаты. И нападоша посреде стана их, окрест жилищ их. И ядоша и насытишася зело, и желанiе их пренесе им. Не лишишася от желанiя своего; eще брашну сущу во устех их, и гнев Божiй взыде на ня, и уби множайшая их, и избранным Израилeвым запят. Во всех сих согрешиша eще и не вероваша чудесeм eго; и изчезоша в суете днiе их, и лета их со тщанiем. Егда убиваше я, тогда взыскаху eго и обращахуся и утреневаху к Богу; и помянуша, яко Бог помощник им eсть, и Бог вышнiй избавитель им eсть; и возлюбиша eго усты своими, и языком своим солгаша eму; сердце же их не бе право с ним, ниже уверишася в завете eго. Той же eсть щедр, и очистит грехи их, и не растлит; и умножит отвратити ярость свою, и не разжжет всего гнева своего. И помяну, яко плоть суть, дух ходяй и не обращаяйся; Колькраты преогорчиша eго в пустыни, прогневаша eго в земли безводней? и обратишася, и искусиша Бога, и святаго Израилева раздражиша; и не помянуша руки eго в день, в oньже избави я из руки оскорбляющаго; якоже положи во eгипте знамeнiя своя, и чудеса своя на поли танеосе; и преложи в кровь реки их и источники их, яко да не пiют. Посла на ня пeсiя мухи, и поядоша я, и жабы, и растли я; и даде рже плоды их, и труды их пругом. Уби градом вiнограды их и черничiе их сланою; и предаде граду скоты их, и именiе их oгню. Посла на ня гнев ярости своея, ярость и гнев и скорбь, посланiе аггeлы лютыми. Путесотвори стезю гневу своему, и не пощаде от смерти душ их, и скоты их в смерти заключи; и порази всякое первородное в земли eгипетстей, начаток всякаго труда их в селенiих хамовых. И воздвиже яко oвцы люди своя, и возведе я яко стадо в пустыни; и настави я на упованiе, и не убояшася; и враги их покры море. И введе я в гору святыни своея, гору сiю, юже стяжа десница eго. И изгна от лица их языки, и по жребiю даде им землю ужем жребодаянiя, и всели в селенiих их колена Израилeва. И искусиша и преогорчиша Бога вышняго, и свиденiй eго не сохраниша; и отвратишася и отвергошася, якоже и oтцы их; превратишася в лук развращен; и прогневаша eго в холмех своих, и во истуканных своих раздражиша eго. Слыша Бог и презре, и уничижи зело Израиля; и отрину скинiю силомскую, селенiе свое, идеже вселися в человецех; и предаде в плен крепость их, и доброту их в руки врагов; и затвори во oружiи люди своя и достоянiе свое презре. Юношы их пояде oгнь, и девы их не осетованы быша; священницы их мечем падоша, и вдовицы их не оплаканы будут. И воста яко спя Господь, яко силен и шумен от вiна; и порази враги своя вспять, поношенiе вечное даде им; и отрину селенiе iосифово, и колено eфремово не избра; и избра колено iудово, гору Сiоню, юже возлюби; и созда яко eдинорога святилище свое; на земли основа и в век. И избра Давида раба своего, и воспрiят eго от стад oвчих; от доилиц поят eго, пасти iакова раба своего, и Израиля достоянiе свое. И упасе я в незлобiи сердца своего, и в разумех руку своeю наставил я eсть.