ПСАЛТИРЬ

Псалом 79.

Пасый Израиля вонми; наставляяй яко oвча iосифа, седяй на херувiмех, явися; пред eфремом и венiамiном и манассiем воздвигни силу твою, и прiиди во eже спасти нас. Боже, обрати ны, и просвети лице твое, и спасемся. Господи Боже сил, доколе гневаешися на молитву раб твоих? Напитаеши нас хлебом слезным, и напоиши нас слезами в меру. Положил eси нас в пререканiе соседом нашым, и врази наши подражниша ны. Господи Боже сил, обрати ны, и просвети лице твое, и спасемся. Вiноград из eгипта пренесл eси; изгнал eси языки, и насадил eси и; путесотворил eси пред ним, и насадил eси корeнiя eго, и исполни землю. Покры горы сень eго, и ветвiя eго кедры Божiя; простре розги своя до моря, и даже до рек отрасли eго. Вскую низложил eси оплот eго, и обимают и вси мимоходящiи путем? Озоба и вепрь от дубравы, и уединенный дивiй пояде и. Боже сил, обратися убо, и призри с небесе и виждь, и посети вiноград сей; и соверши и, eгоже насади десница твоя, и на сына человеческаго, eгоже укрепил eси себе. Пожжен oгнем и раскопан; от запрещенiя лица твоего погибнут. Да будет рука твоя на мужа десницы твоея и на сына человеческаго, eгоже укрепил eси себе, и не отступим от тебe; оживиши ны, и имя твое призовем. Господи Боже сил, обрати ны, и просвети лице твое, и спасемся.