Стихотворения

Аще когда наипаче ныне нам желати

Достоит многих устен, ибо ниже златый

Орган рифмотворческий воспети довлеет

Нашей ныне радости, ниже что успеет

5 Ветийских устен слово. О боже всесилный,

Еще наш приял еси вопль и плач умилный,

Еще нас не судиши в конец отринути!

Победихом! Падеся супостат наш лютый,

И отступник приять казнь, отчества враг велий,

10 Ко нам же возвращенный грядет мир веселий

И безбедно здравие ведеть со собою.

Ныне и день лучшею красен добротою,

И солнце множайшая луча испущает,

И лице краснейшее цвет полный являет.

15 Но коим прийде видом победа нам сия

И погрузи во крови главы проклятыя,

Ты рци, славо гласная! По всей же вселенной

Разсей велегласие вести торжественной!

Уже брань десятое лето начинаше

20 (Время брани Троянской), егда уже бяше

Внутр отчества супостат сверепий и дивый,

Зменническим полчищем силу умноживый.

Тогда бог всемогущий, с высоты небесной

Призрев на люди своя и не терпя лестной

25 Ереси на избранных вию находити,

«Всуе, — рече, — вся сия вражия наветы,

Да и всю лютость и вес изнурит яд зверный,

Хотя церковь попрати и род благоверный.

Аще рука зменнича тебе прилучися,

30 О свею, моя, яже в силе прославися

И сотре ад, десница со Петром на брани

Будет, и узрим, коей победа ждет страни».

Сия изрек, абие ожесточи тогда

Сердца супостатския; яко же иногда

35 Лютаго фараона обять убо дивна

Гордость ум их и мечта, естеству противна.

Помыслиша бо себе от твердой сложенных

Руды и во стикгийской воде измовенных,

И не мощи своему язвитися телу:

40 Таковую безумне мняху в себе силу.

В полках же православных бог непостижимый.

Хотя им дати крепость и щит нерушимый,

Всех сердца осязает и мысли подробну,

И, аще страх и трепет или неудобну

45 Ярость ко согласию тайне ощущает,

Изъемлет, и всех дивне духи сопрягает

Крепким любве союзом, и вливает тверду

Дерзость, но не безбожну и не жестосерду,

Дабы ни на смертную силу полка многа,

50 Ни на лук свой уповал воин, чтущий бога.

Твое наипаче сердце смотрителне строит,

О Петре, царей славо, и, яже достоит,

Потребныя времени подает советы

И благополучными веселит обеты.

55 Тако егда обоим странам бог высокий

Судбы своя устрой, абие жестокий

Марс сию часть и ону начат поощрати;

Скорим бегом и ветру подобним до рати

Полки устремишася; сих ревность по вери

60 И отчестве раждеже, овех же без мери

Распали бес яростный и жаждущий крови.

Летит свей, летит купно зменник неистовый.

Камо духом бесовским бежиши носимий,

Студе веку нашего, вреде нестерпимий?

65 На отца отчествия мещеши меч дерзкий!

О племя ехиднино! О изверже мерзкий!

Забыв любов отчую и презрев самаго

Твердий закон естества! Обаче се благо,

Яко скорий ест на казнь, косний сий на дело.

70 Бежете, скорой мести требе, скорой зело!

Но и зде непостоян злый зменник явися,

Зменив царю и Марсу: егда бо открися

Поле бою страшнаго, не токмо входити

Во ратный огнь, но ниже издалече зрети

75 Не дерзну; но сугуб студ приять вместо рани,

Непостоян во вере, трепетен во брани.

Зрем же, что и свей дерзкий силою своею

Успе храброй России, боряся со нею.

Блисну огнем все поле; многия воскоре

80 Излетеша молния; не таков во море

Шум слышится, егда ветр на ветр ударяет,

Ниже тако гром з темных облаков рыкает,

Яко гримят армати, и гласом и страхом,

И уже день помрачи дым, смешен со прахом.

85 Страшное блистание, страшний и великий

Град падает железный; обаче толикий

Страх не может России сил храбрих сотерти:

Не боится, не радит о видимой смерти.

Но егда тя, о царю и воине силный,

90 Узре посреде огня, объять ю страх зелный,

Вострепета и крайней убояся страсти,

Да бы в едином лицу всем не пришло пасти.

Но не попусти прийти бедству таковому

Бог силный. Абие бо от горняго дому

95 Низпосла щит (щит, им же во лютое время

Хранит грады, и царства, и людское племя)

И вся на главу твою и на твоя силы

Летущия сотвори безделныя стрелы.

Свей же, во оружии своем уповая,

100 Гинет явственне, егда коей избивая

Смерти, огнем летущой; лиется кровь всюду;

Стелет землю трупие; мало уже люду

Зрится во полках его. И недолго бяше

Сумнительна победа. О блаженство наше!

105 Царю богом венчанный, ты, силен о бозе,

Сокрушив, повергл еси гордаго под нозе.

О день благополучний! Кий язык и кое

Слово изрещи может блаженство такое!

Укри труп свейский поле, падеся род лютый,

110 Наша покусивыйся главы низринути.

Что о воех и вождах речем во плень взятых?

О користех, знаменах и бронях богатых?

Аки бы з тым супостат пришел к нам советом,

Да бы нас наследники благ своих заветом

115 Крайним яве сотворил; инных скороногий

Страх изнесе, и уже во силе немногий

Сам лев, иже многия устрашаше грады,

В лесы, в чащы побеже искати отрады.

С малою ли бежиши, звере, срамотою,

120 Хоботом заглаждая след твой за собою?

Кое убо торжество, кий лик будет равный

Сей победе? Тебе же, монархо державный,

Что в дар твоя Россия принесет и кия

Воспоет песни? Ибо победити свея

125 Коим либо образом дивно бы всем дело

Было, яко в повестех славимаго зело.

Что же, егда лютая в отчества пределы

Внийде брань и ко врагом зменничия силы

Приставше зваху роди, царствию твоему

130 От древле враждебныя, ко числу своему;

И молвы великия повсюду восташа,

И аки море земля потрясеся наша.—

Коликия зде врагом возрастоша роги,

Тебе же неудобства и труды премноги!

135 Требе бяше на много частей разделяти

Воинство и многия грады укрепляти,

Укрощевати молвы, пределы хранити,

Блюсти и познавати двоих врагов сети.

Обаче в толь тяжкий год (О безсмертной славы

140 Дело!) победил еси. Позна величавый

Свей суетну бров быти гордины своея

И, поражен силою десници твоея

Аки с небес молнием, достиже злонравный

В конец Фаетоновой погибели равный.

145 Темже прийми, о храбрий царю, цвет победный

И силы, яже в тебе Марс сей многобедный

Изнури и сотрясе трудом непрестанным,

Обновляй всерадостне торжеством избранным.

Совосплещут градове на слух сей веселий,

150 Пройдет стены и врата глас торжества велий.

Ныне тебе родися слава, царству равна,

И титла, паче царских титл честна и славна,

О сем преславном деле, в песнех неслыханном:

Пети будет веселник по морю пространном;

155 Пети будет на холме путник утружденный,

И оповесть иногда леты изнуренный

Старец внуком, и, яко своима очима

Виде то, внуци старца нарекут блажима.

Мало се: пройдет скоро глас сей торжественный,

160 На мир весь сугубому верху подложенный.

Всяк слышай сумненныя мысли в сердце приймет,

И всех силы твоея страх велий обиймет;

Вси твоей начнут дружбы, вси мира желати

И не дерзнут рускаго Марса раздражати.

165 Бог же, сие блаженство давый нам тобою,

Тожде твоим здравием и дний долготою

Да укрепит, желаем, всегда ти победну

Дая помощ, да бы и лютую ехидну,

Пиющую кровь святых, твоим же убити

170 Дал тебе оружием, и вся сокрушити

Темници варварския и ярем безмерный,

И от долгих узилищ извести род верный,

Да же, вся победныя совершивше рати,

Крест на стенах Сионских водрузиши златый.