Вертоград многоцветный

ВЕРТОГРАД

МНОГОЦВЕТНЫЙ

ползы ради душевныя

православных христиан,

Божиим наставлением

и пособием, а тру-

доположением много-

грешнаго во иеро-

манасех Симеона По-

лоцкаго утяжанный

и насажденный в лето от

создания мира 7186, а от

Рождества еже по плоти Бога

Слова 1678 совершися

месяца августа в

день

Предисловие ко благочестивому читателю

Твари, светом разума во плоти от Бога украшенной, обычай есть, еже аще кому прилучится во вертоградех богатых быти, и различных цветов сладким благовонием и сердцевеселящим доброличием и краснолепым цветением увеселитися, и о ползе их здравию телесному много и скоро успешной извещенну быти, то абие всеусердное тщание полагати, да от тех же обилия нечто себе получит, и в домашних своих оградех или насеет семена, или насадит корение во общую ползу и веселие всем домашним и не успевшым отстоящих посещати вертов цветоносных. Благопохвалный же той обычай непщуется всеми, и воистинну есть таков, ибо егда друг от друга, их же в домех наших лишаемся вещей, угождение, или даяния средством, или продаяния образом, приемлем, союз друголюбия и склевретства состяжем, его же и само по нам требует естество, поне же человек несть зверь дивый, но содружный, отнюду же градове и села вину насаждения прияша, да во содружестве жительствующе взаим помощ нам деем, и купно Создавшего ны о всяческих Его благотворениих славословим. И Сам всяческих естеств Вина и Господь яве истяжущ быти показуется, зане же не единому человеку, не единому селу, граду или царству вся нуждная отдал есть, но различным странам различныя земли, плоды, роды их, виды и силы, художества же, обилия, богатства, искуства благоволил дарствовати, да вси всех требующе, нуждею ко знаемости и дружеству убеждаеми, любовь взаим творимую стяжем. Аще же в чювственных мирскому сожитию полезных сидев обычай, не токмо II[2^v] гаждения не причастен, но ублажения достоин, колми паче во духовных вещех стяжемый, ими же не что ино первонам ерствуется, точию слава, честь, хвала, благодарствие, величание Создателя всяческих, второ же усмотряется всех душевная верных полза и спасение, есть весма блажителен и подражателен? Тем же аз, многогрешный раб Божий, Его божественною благодатию сподобивыйся странных идиомат пребогатоцветныя вертограды видети, посетити и тех пресладостными и душеполезными цветы услаждения душеживителнаго вкусити, тщание положих многое и труд немалый, да и в домашний ми язык славенский, яко во оплот или ограждение Церкве Российский, оттуду пресаждение кореней и пренесение семен богодухновенноцветородных содею, не скудость убо исполняя, но богатому богатство прилагая, зане же имущему дается. Потщахся убо дому Божию, святей Церкви восточней, яко Едему мысленному, раю духовному, вертограду небесному присовокупити сей мой верт многоцветый, во славу всяческих Содетеля и во ползу душевную всех благочестно жити тщящихся, непрелестну имея надежду, яко всяк хотяй душевнаго услаждения и ея здравия желаяй известнаго, доволны себе обрящет зде цветы во ползу. Иже убо удобнейшаго ради обретения, не яко трава на поли не хитростию художника искуснаго, но естеством изводимая, смешенно раждается и не скоро ищущым обретаема бывает, насадишася, но яко же есть обычай цветовертником искусным всяческих цветов и зелий, роды же и виды благочинно по сподом и лехам сеяти и садити, тако и во моем сем верте многоцветном художественне и по благочинию вся устроишася, ибо по алфавитному славенскаго диалекта сочинению. Елико убо обрящеши, благочестивый читателю, II[3] писмен зде начинателных именованием вещей обретаемых, толико непщуй спод или лех быти верта сего. А елико вещей изменных, толико родов на них сеянных или сажденных да разумевши. Еще, колико вещей от части изменяемых узриши, толико видов цветовных да имевши. Напоследок, елико статий числы надзнаменанных усмотриши единыя вещы, толико числ единовидных цвет да числиши. Или различие родов цветов сих духовных сице да сочтеши: ин род суть подобия, ин род — образы, ин — присловия, ин — толкования, ин — епитафия, ин — образов подписания, ин — повести, ин — летописная, ин — молитвы, ин — увещания, ин — обличения, и тако о прочих да умствуеши. Вся же сия имуть силу здравых душ веселиемь исполнения, в здравии утвержение и от недугов предсоблюдения, к тому и украшения Богу любезнаго и человеком, болезнующих же греховными недуги душеврачевания, прилежно чтущым я и во уме си, яко во изъящнейшей силе душевней, часто разсуждающым и во сокровище памяти, яко в хранилище душы, во соблюдение дающым. Обрящет зде юный укротителная стремлений страстей си и угасителная пламеней ярости и похоти, отьемлющая непщевание о многолетствии, показующая прелести сего мира и от Бога удаляющая. Обрящет старый утвержающая немощь его ко подвигом духовным и наставляющая ко памяти краткости века и поминанию близ сущыя смерти и прочих последних. Обрящет зде благородный и богатый врачевства недугом своим, гордости — смирение, сребролюбию — благорасточение, скупости — подаяние, велехвалству — смиренномудрие. Обрящет худородный и нищий своим недугом целебная, роптанию — терпение, татбе — трудолюбие, зависти — тленных презрение. Обрящет неправду творящий врачебное недугу си былие, II[3^V] правды творение, гневливец — кротость и прощение удобное, ленивец — бодрость, глупец — мудрость, невежда — разум, усумлящийся в вере — утвержение, отчаянник — надежду, ненавистник — любовь, продерзивый — страх, сквернословец — языка обуздание, блудник — чистоту и плоти умерщвление, пияница — воздержание и всякими инеми недуги одержимии обрящут по своей нужде полезная былия и цветы. Иже убо не ветийскаго художества ухищрением мною насадишася, но пиитическаго рифмотворения равномерием слогов по различным устроишася родом, того ради да присвойственною себе сладостию сердцам читателей приятнейший суще, аки нуждею влекут я ко читанию частейшему. И яко в немнозе пространстве многшая заключающеся, удобнее памятию содержатися могут, и на память изученная внегда провещаются временно, благосладящая суть слухи и сердца слышащых. К тым и того ради, да рифмотворное писание распространяется в нашем славенстем книжном языце, еже во инех волею честь имать и ублажение и творцев си достойнаго не лишает от Бога и от человек возмездия и славы, ея же аз ми не требуя в мире сем, яко оставлей й со всеми его красными суетами и суетными красоты, не ищу оныя от человек написаниемь книги сея, но глаголю со царствующым пророком: Не нам, Господи, не нам, но имени Твоему даждь славу. Тебе, Господи, слава, яко дал еси, и еже хотети, и еже мощи, и еже начати, и еже трудитися, се же здраво и благополучно, и еже совершити добровременно по желанию сердца моего. Тебе слава о всех и зде и в небеси и ныне и во вся будущыя веки. Мне же грешному даждь славу, от Тебе Самаго сущую, наипаче в жизни будущей пред Твоими небесными гражданы, ея же не пренебрезати, но искати всеми силами нашими повелеваемся Тобою, елма пренебрегателие II[4] тоя, искателие же славы человеческия, сице от Тебе суть обличаеми: Како вы можете веровати, славы друг от друга приемлюще и славы, яже от единаго Бога, не ищете? Возмездие же временное потолику ми желателно, поелику нуждно к доволному препитанию мене грешнаго и труды всегда полагающих в моих потребах. Но то по превелицей милости и премногим щедротам святопочившаго о Господе Бозе святыя и блаженныя памяти благочестивейшаго, тишайшаго и самодержавнейшаго Великаго Государя Царя и Великаго Князя Алексиа Михаиловича всеа Великия и Малыя и Белыя России Самодержца, не скудное, но доволное по моему чину и званию чрез лет тринадесят имея, прерадостно во царствующем и богоспасаемом граде Москве прежих, присно ко Господу Богу теплыя моя молитвы о нем Великом Государе возсылая и труды трудом, ово по повелению началствующих, ово по моему свойственному благохотению, да не празден жизни моея вотще иждиву время, прилагая. По блаженном же его Царскаго величества во вечная отшествии присно во моих иноческих молбах молю и до последняго моего издыхания имам неименно Господа Бога молити, о еже проститися всякому его согрешению и вселитися души его в селения приснаго велелия и жизни безконечныя со духи небесными и душами всех праведных, от век благоугодивших Господеви. Его же благочестиваго и приснопамятнаго Самодержца

выну во памяти отшествие от мира содержи и в благодарном сердци, аки на твердом адаманте, премногая его царская ко мне благотворения написанная читая, не возмогл бым никогда же веселию места во сердце моем дати, аще не бы ми печалнаго ума лучесы милости и щедрот своих возбуждал ко веселию от его же царских чресл равне добротворный нам свет возсиявший и солнце, и на его же царстем престоле Богом посажденнный сын его, а наш II[4V] Великий Государь, благочестивейший, тишайший, самодержавнейший Великий Государь Царь и Великий Князь Феодор Алексиевичь всеа Великия и Малыя и Белыя России Самодержец. Его бо царскимь благоутробнымь милосердиемь и множеством щедрот и отцеподражателною царскою призрен есмь милостию и в равном бывшему храним доволстве, ни в чесом скудости стражду и въпред упование в Господе Бозе имам, яко благая о мне грешном на его царстем сердци положит. Он же Богом венчанный Монарха не отвратит пресветлаго лица своего от худости моея, но по врожденной милости своей благоволит веселыма на мя призирати зеницама и нуждных жителству моему от обилия Богом себе даннаго подаяние доволное творити. И се ми есть возмездие превеликое, нудящее мя ко благодарствию непрестанному и к молбам повседневным, от скипетродержца благочестивейшаго. От вас же, благочестивых читателей, богатое ми будет за труды воздаяние, егда, ползу от цвет верта сего приемше, речете о мне ко Господу молитву, о еже оставитися грехом моим. Аще живу ми сущу, аще по преставлении моем, то ми едино от вашея любве желателно. Вем бо, яко внушает Господь молитвы верных раб Своих и по прошению их милость проявляет. И мне убо за ваши святыя молитвы простит долги моя и сотворит возмездие вечное во царствии Си небесном, его же аз единаго рачитель есмь и искатель, а вашему благочестию всяческих благ душевных и телесных, вечных и временных присно истинный желатель.

Благочестию твоему

временных и вечных благ истинный желатель,

Симеон Полоцкий, иеромонах недостойный

А

Аарон

Аарон во пустыни телца сотворил есть,

смерти бояся плоти, тяжко согрешил есть.

Уне бяше умрети телом, не душею,

но смерть страшна комуждо косою своею.

Аарон златым телцем древле поползеся,

Петр же во благодати Христа отречеся.

Началницы падоша, да грех поминают

и грешащих не люте судом исправляют.

Аарон телца злата сотворил есть.

Богу всещедру люте согрешил есть.

Людей бояся, забы жива Бога,

тем подобаше казнь оному многа.

Уне же бяше оному страдати

вся муки и смерть, неже соблазн дати.

Обаче Моисий его не убил есть,

архиерейство, сущее в нем, чтил есть,

И яко воли к телцу не слагаше,

точию за страх то зло содеяше.

Аарон егда телца злата сотворил есть,

Моисий онаго сожег, во прах претворил

есть, И изсыпа во воду, яже изтекаше

из Хоривы пречюдно. Ту егда пияше

Поклонивыйся телцу, зело надымася,

потому от Моисия винен быти знася. Аарон

аще пил есть, не бяше надменный,

яко сердцем ко телцу не бе приклоненный.

Яко не охотою того сотворил есть.

Бог убиенну ему быти не судил есть.

Авва отче

Авва языком сирским знаменает,

что нам славенски отец изъявляет.

Двакраты паки отче положися,

очество двое Божие явися:

Общее, еже есть чрез творение

благих же и злых в мир изведение,

И особное, им же присвояет,

яже праведны люди созерцает.

Авель

Авель Богу любезен, а Каин й губит;

боголюбезных людей мир тако не любит.

Авель девственник и жрец, и мученик бяше

первый, Христа Господа прооброзоваше.

Авеля праведнаго достойно хвалити,

яко лучшими дары хотел Бога чтити,

И егда тыя ему во честь приношаше,

священник Бога жива преугодный бяше.

К тому чистоту девства до смерти хранил есть

и страдалческий венец в небе получил есть,

Ибо от завидяща брата си убися,

у Отца же небесна жизни сподобися

Вечныя за временну, днесь в ней пребывает,

подражателей своих к себе отжидает.

Авеля праведнаго брат Каин убил есть,

перваго мученика того сотворил есть.

Мученик бысть он, яко невинне страдаше,

за жертву благу брат на нь ненависть прияше

И уби й каменем. Тогда смерть познася

Адамом, яже за грех оному сказася.

Тогда земля кровию перво обагрися,

аще чистою, скверна, не красна явися;

Злоба ю Каинова паче осквернила,

нежели Авелева кровь красну явила.

Авесолом

Авесолом о власех главы согрешаше,

их ради гордостию исполнь в сердце бяше.

Но теми и казнь прият, ибо повесися

ими на дубе, и ту стрелы умертвися.

Се отнюду же грех есть, ту смерть ся раждает;

грех вина смерти, а смерть казнь грехов бывает.

Авесолом власы си прекрасны имяше,

премного злата за ня на всяк год взимаше.

Но теми же на дубе власы уцепися,

красота в сило смертно ему обратися.

Тако и нам красота, и яже суть люба

мирская, множицею бывают пагуба.

Авесолом Давидов сын прекрасен бяше,

на всей плоти порока ни мала имяше.

Власы же главы его тако лепи бяху,

даже я девы златом многим куповаху

Всяк возревый на него абие любил есть,

дивною красотою Бог его почтил есть.

Но в том красном телеси душа скверна бяше,

ибо закон Господень зело преступаше.

Отца гнал есть и ложе его осквернил есть,

перворожденна брата Аммона убил есть.

Авимелех

Авимелех началство зело возлюбил есть,

седмьдесят брат на едном камени побил есть.

Авраам

Авраам друг Господень именован бяше,

вины сего многия разум мудрых даше.

Перва есть, яко Бога он зело любил есть

и в заповедех Его прилежно ходил есть.

Вторая — яко лиши отчинную страну,

послушав Бога и вшед в землю Ханааню.

Иде же, яко странник, живот провождаше,

но гражданин небесный душею си бяше.

Третия — яко в деле трудном муж явися

крепкий, елма о жертве сына искусися.

Четверта — яко Богу уподоблен бяше,

егда сына во жерту своего даяше.

Бог Сына Си во жертву в плоти не щадил есть,

и Авраам сына си жрети готов был есть.

Пятая — яко Аврам благ всем и щедр бяше

богоподобне, за то Господь й любяше.

Шестая — яко ум свой в небеси держал есть,

в нем душею, на земли телом пребывал есть.

Не толико с гражданы наземными был есть,

елико со аггелы небесными жил есть.

Седмая — яко славу Господню множаше,

едина Бога знати люди поучаше.

Осмая — яко в делех всех меру хранил есть,

праведно, постоянно дни своя вся жил есть.

За сия вины друг он Богу живу был есть,

воли Его пресвятей сице угодил есть.

Ему же и вы друзи возможете быти,

аще, яко Авраам, потщитеся жити.

Достойно же и право его подражати,

дерзающим Отца И себе нарицати.

Правый сын отческия нравы сохраняет,

теми в себе умерша отца изъявляет.

Да убо Авраамля мы чада явимся,

добронравие его стяжати потщимся,

И будем Богу друзи, и в небо вселимся,

со отцем Авраамом светом насладимся.

Агарь

Агарь Аврааму сына Исмайла

скоро и удобно, но злаго родила.

Сарра же не скоро, но чадо святое

Исаака роди, чадо преблагое.

Тако мы пред Богом во злых агарствуем,

в благих паки делех обычно сарствуем.

Агарь душу знаменает

Агарь, егда от Сарры госпожи бежаше,

во безводной пустыни ели жива бяше.

Ей же аггел Господень велел ся вратити

и пред госпожею си в смирении быти.

Душа наша Агаре подобна бывает,

егда воли Божия работы бегает.

Заблуждает в пустыню грехов, мерзких Богу,

без воды благодати страждет беду многу,

Даже ко смерти лютей. Что убо творити?

Лучше есть воли Бога себе покорити

И Ему по вся лета верно работати.

Он бо весть пищу, ризы и жизнь подаяти.

Зле свободен, кто рабства Божия бегает,

всячески того демон грехми в плен хищает.

Блага Его работа, ибо той царствует,

иже Господу Богу всеверно рабствует.

Аггел

Аггел хранитель нам ся приставляет,

егда ся кождо во Христа крещает.

Или с начала бытия дается,

да тем от всех зол чрез весь век стрежется.

Аггел пастырем Христа рожденна вещаше,

род жидовск явлением своим научаше.

Яко рождейся отрок Царь есть в светлом небе.

аще в худе пещере избра место Себе,

И яко падение хощет исправити,

праздная человеки места населити.

Но и тайно видится собою учити,

яко аггелоточным подобает быти.

Желающим с онеми в небе вчинения

и пресветлаго лица Господня зрения.

Тыя же безгрешием подражати требе,

яко ничто же скверно может быти в небе.

Еще и любовию к Богу, к человеком,

та бо приятна Тому, Иже Царь есть веком.

Наконец, в хвалении безпрестанном Бога

сия творяй достоин небесна чертога.

Аггел от зла отводит

Валаам Израиля иде проклинати,

аггел же скота его острым мечем вспяти.

И нас аггел, грядущих на грех, воспящает,

егда грехом противны помыслы вливает.

Умове небесный, присущий Богу,

Царю си угождают чрез службу премногу.

Служба же их есть выну Онаго хвалити,

и еже завещает, не косно творити.

Тем же я Исаиа виде предстоящы

Богу, трисвятую песнь на всяк час гласящы.

Паки, их служение мир в мире хранити,

царства блюсти и от нас демоны гонити.

На добрая делеса люди наставляти,

от лукавых же тощно дел ны отвращати.

Еще их служителство ходатайми быти

о человецех к Богу, тепле И молити.

Се виде Захария аггела, моляща

Бога о Исраили, милости просяща.

Наконец, их есть дело от враг ны хранити,

демона, мира, плоти, силы их кротити.

Они бо непрестанно на ны наступают,

различны наветы новы устрояют.

Но велением Бога, аггелы святыми

от тех на всяко время бываем храними.

Еще ина благая безчисменно многа

средствием аггел святых имамы от Бога.

Яже токмо в Священном Писании знаю

помяненна, отчасти се зде предлагаю.

Аггел Агарь, утекшу, утеши советом,

от зачатаго сына изчадий обетом.

Аггели из Содомы Лота изведоша

со женою и дщерми, от огня спасоша.

Аггел паки изгнанну Агарь утешаше,

егда та сына, мруща от жажды, плакаше,

И показа ей воду сына напоити

и самей пити, да бы обема ожити.

Аггели Авраама трие посетиша,

обет о Исааце ему сотвориша.

Аггел нож Аврааму веле удержати,

хотевшу Исаака во жертву заклати.

Аггели Иакова в странствии стрегоша,

яже виде он, яко с небесе снидоша.

Аггели паки ему в стретение быта,

не боятися брата тако утвердиша.

Аггел еще с ним брася, жилу усушил есть,

имя на Исраиля ему пременил есть.

Аггел и во купине горящей явися

Моисию, иже посем в Египт устройся.

Аггел в столпе огненне и в облаце бяше,

из Египта во Сион жиды провождаше.

Аггелским служением жидом закон данный,

иже нарицахуся род богоизбранный.

Аггел путь Валааму клятвенный препял есть

и несмысленну скоту провещати дал есть.

Аггел сыну Наввину, яко вождь, явися,

им же на Иерихон град он укрепися.

Аггел к покаянию люди устроил есть,

егда мир их с поганы яве обличил есть.

Аггел и Гедеону Господень явися,

тем он на Мадиамли люди утвердися.

Аггел о рождении Сампсони сказал есть,

иже зело велику силу восприял есть.

Аггел же во пустыни Илию питаше

и путь к горе Хориве оному сказаше.

Аггел паки Илию к царю утвердил есть,

и еже глаголати име, научил есть.

Аггели Елисея пророка храняху,

повнегда супостата яти й искаху.

Аггел сто осмьдесят пять тысящ поразил есть

вой Асирских, верны люди свободил есть.

Аггел Товии юну спутник добрый бяше

и премногу благодать ему содеяше:

От рыбы сохранил есть, жену ему стяжа

и, демона от Сарры прогнав, в дебре связа,

И како отца слепа име исцелити,

изволил есть Товию тому научити.

Аггел честну Иудиф во пути храняше,

егда Олофернову главу отсекаше.

Аггел Божий отроки три соблюде в пещи,

егда Навходоносор вовергл я сожещи.

Аггел ко Даниилу, во рве заключенну,

Аввакума и пищу принесл устроенну.

Аггел о Иоанне рождшему сказаше,

яко от неплодныя прияти имяше.

Аггел воплощение сказа Бога Слова

Марии, да то будет прияти готова.

Аггелский лик пастырем с пением явися,

егда Божие Слово плотию родися.

Аггел Иосифови веле путь прияти

с Иисусом во Египет, Ирода гонзати.

И паки из Египта в отчество настави

в сонном убо зрении, но бе, яко яви.

Аггели по победе Христу слузи бяху,

егда искусителя побежденна зряху.

Аггел на всяко лето во купель схож дате

и в ней здравия ради воду возмущаше.

Аггел во вертограде Христа укрепляше,

егда близкия смерти страхом держим бяше.

Аггел мироносицам камень отвалил есть,

о востании Христа оным возвестил есть.

И паки им двоица аггелов явися,

слово воскресения паки утвердися.

Аггели учеником, на горе стоящым,

явишася, в след Христа вознесшася зрящым.

Аггел два апостола из уз свобод ил есть

и жизнь благовестити в церкви увестил есть.

Аггел и паки Петра свобод и святаго,

воверженна в темницу от Ирода злаго.

Аггел Филиппа на путь из града настави,

иде же каженнику Христа он прослави.

Аггел и Корнилию повеле призвати

Петра, да бы от него свет веры прияти

Аггел и на Суд Страшный имут вострубити

и уды плоти от стран различных носити.

Аггел и злых отлучат от полка блаженных,

ошуию поставят спиру осужденных.

Аггели в живот вечный имут провождати

добрыя с веселием вечно царствовати.

О, колико от аггел добра нам ся деет,

язык изглаголати мой недоумеет!

Отчасти зде явленно, а всех неудобно

знати благ ими сущих паче неподобно.

Аще бо бдим, аще спим, они соблюдают,

аще ямы ли пием, они сохраняют,

И внегда нам грешити, душ наших жалеют,

обаче оставити никако умеют.

А внегда покаемся, то и в самом небе

новую неку радость приобщают себе.

Блюдут ны в дни и в нощи, ни имут престати,

даже благоволит Бог смерть на ны послати.

Но и в то время они нас не отступают,

всеми силами на путь благий наставляют.

Возбуждают, да сердца наша сокрушаем

о гресех и милости от Господа чаем.

И аще послушаем здрава их совета,

увещают ны ждати благаго ответа.

Потом со радостию к Богу провождают,

о блаженстве нам вечном приветство вещают.

О вседобрии дуси. слузи жива Бога,

колико к нам доброта от вас есть премнога!

Что за сие имамы вам мы воздавати?

Кия венцы похвалы должни соплетати?

Ум наш оскудевает, вы нас научите.

его же лишихомся, то вы исполните.

Мы с всего усердия честь вам сотворяем,

добродетели ваша выну прословляем.

Благодарныя гласы любезно возносим,

охранение в конец всесмиренно просим.

Дева Мария в плоти не плотски живяше,

но аггелски, тем аггел к оней послан бяше

Благовестити, яко совета велика

аггел, к ней имать снити, сый небес Владыка,

Благоволя от нея плоть Себе прияти

и с человечим родом в мире пребывати.

Да возведет ны в лики аггел божественных,

в служение и в хвалу Ему устроенных.

Всяк же хотяй с аггелы на небеси быти

да потщится небесно и аггелски жити,

Не плотски, плоть бо и кровь дуты не спасает,

паче страстми своими во ад низвлекает.

Аггел, иже днесь демон, коль благолеп бяше,

едва разумение то объемлет наше.

Бе печать подобия истиннаго Бога,

исполнен мудростию, красота бе многа.

Во сладостех бе райских и в камени драги

облечен бе, донеле пребываше благий.

Что же то камение умне знаменает?

Правоверная глава сице да смышляет.

Во-первых, яко дух он чистый зело бяше,

примешения плоти нимало имяше.

Паки, яко безсмертен от Бога созданны,

умом и мудростию улепотсвованны.

Еще, яко свобод бе, что хоте, творити,

ко злу уклонитися или благ пребыти.

К тому веждество много ему даровася

всякия твари, яже от Бога создася.

Восприят же и крепость паче всея твари

и свят бе, яко име благодати дары.

Емпирейскаго неба житель сотворися,

еже видети Бога в себе устроися.

И могл бы ту благодать во мале стяжати,

аще бы восхотел был благо постояти.

Но неблагодарный дух, зря красоту сию,

воздвиже ко гордости непокорну выю.

Помысли в сердце своем равен Богу быти,

не под Его началом на небеси жити.

За то враг окаянный с высоты вержеся,

яко молние, скоро в тму вечну падеся.

Ни даде места ему Судия всеправый,

да бы обратитися возмогл враг лукавый,

Яко от совершенны злобы согрешил есть,

а не от немощи си, ибо силен был есть.

Сия зря, человече, тщися разсудити,

како и тебе Господь изволил почтити:

Уподоблением Си, ума красотою

и во всяческих делех твоих свободою.

Помысли, колик промысл о тебе Он деет:

живит, хранит, питает, яко мати, греет.

Разсуди, колико благ тебе даровал есть

в мире, и само небо тебе сготовал есть.

Ты же благодарствие кое приносиши,

тако ли, яко лепо, Оному служите?

Оле неблагодарства многа и велика

ко Святому от грешна Богу человека!

Бога и благодати Его забываем,

от Творца си ко твари сердца обращаем

И противная воли божественней деем,

не в благих деяниих, но во злобах спеем.

Аггел злый единощи токмо согрешил есть

гордостию самою и ту помыслил есть.

Мы же многими роды грехов согрешаем,

мыслию я и словом, и делом свершаем,

Тоже не еднократно, но на всяко время,

даже главы преходит греховное бремя.

Над всеми сими, яко суще искуплени

кровию Христовою, ада свобождени.

Цену ту безценную зде пренебрегает,

егда волею ада себе подчиняем.

Та кровь божественная вся ны очищает,

а злоба наша душы грехми оскверняет.

Что убо мы имамы, грешнии, творити?

Потщимся сердца наша довле сокрушити.

Праведнаго Судии право да боимся,

долготерпению же Его удивимся.

А тому дивящеся, молим со слезами,

да изволит явити милость Си над нами.

Явит же всеконечно, аще умилимся;

обратится к нам. аще к Нему обратимся.

Ибо Он готов паче милость нам явити,

нежели нам удобно о ней помыслити.

Яко то Его свойство милость проявляти

и обратившыяся от грехов спасати.

За что буди честь, слава во вся веки Ему,

яко Избавителю и Богу нашему.

Аггели срящут святых душы

Егда путник во дом свой возвращен бывает,

множество другое искрних онаго сретает

И со великою в дом радостию вводит,

во нь же со веселием путствовавый входит.

Тако, елма святии странство окончают

мира и во отчество небес ся вращают.

Из него же в Адаме еще изыдоша,

елма преступлением его вси падоша.

Тогда друзи вернии аггели сретают

и с веселием в небо душы провождают.

Яко древле Лазаря в недра проводиша

Аврамля, егда в небо двери нам не быша.

Ныне же того дверем отключенным сущым,

много паче честь деют в небеса грядущым.

Аггелов не искупи Господь, человеки же искупи, чесо ради

Аще вол или осел во кладязь впадает,

немедленно господин того извлекает.

Тако и Бог содея человечу роду,

извлече й из ада в горнюю породу.

Не остави онаго тамо погибати,

чтый, благодарен буди тоя благодати.

Разсуждай, колику нам милость проявил есть,

аггелом толикия падшым не дарил есть.

Паде человек во грех, и аггел падеся;

пренебрежеся аггел, человек спасеся.

О судеб божественных! Лучший оставися

в погибели, а хуждший тоя избавися.

Кая же сего вина, потщимся взискати,

елико нам изволит ума Господь дати.

У Григориа сию перву обретаю,

егда нравныя книги еговы читаю.

Аггели вси падшии волею падоша,

егда противу стати сатане могоша.

Род же человеческий паде во Адаме,

не всеродным, но его грехом стахом в яме.

Аще не бы он согрешил, вси быхом спасени,

в благодати Божией были бы ствержени.

Паки, яко аггели не суть искушени

от вышшаго естества, но чрез ся прелщени;

Человека же много вящший искусил есть,

безплотный бо плотнаго кознми си прелстил есть.

К тому, яко дух силен, в нас же повредися

разум и воля, тем же Господь умилися.

Еще, яко аггели вящшая прияша

дарования Богом, неже худость наша,

Вящшее убо онех бяше падение,

последователно, есть вящше отмщение.

К тому, яко от аггел премнози осташа,

иже в Божией воли неподвижно сташа;

Род же весь человеческ купно осудися,

того ради над онем Господь умилися.

Наконец, яко весь мир человека ради

бысть, тем Бог человеку во казни отради.

Но что сия глаголю? Волно Богу бяше

естество истребити до кончины наше.

Кто бы Ему реши могл: Вскую то твориши,

всех убо паче сию вину да судиши?

Милосердие Его едино содея,

яко сподобил ны есть милости Своея.

Истинно же то творит, яко осудися

на вечну казнь, иже горд пред Онем явися.

Ты убо, человече, тщися разеуждати,

божественныя яже к тебе благодати.

Хвали на всяко время Господа твоего

и чай восприяти мзду в небеси от Него,

Иде же Он рабом Си венцы хощет дати

и еже безконечно в славе царствовати.

Священоначалия тричисленна в небе,

девять же чинов сочти во аггелех тебе,

Их же служения суть различна у Бога,

никим же извещенна, лица их коль многа.

Аггели в чине первом снизу положении,

по них же арханггели Богом устроении.

Выше онех суть силы. По тех ся считают,

яже именем властей книги нарицают.

Начала, господствия над теми числятся;

престоли, херувимы выше тех славятся.

Последний серафимом чин в небе есть данный,

сей же ближайший Богу, миру есть сказанный.

Вси же сии нам грешным спастися желают,

внегда кается грешник, радостни бывают.

Аггелы чтити

Аггелы нам святыя должно почитати.

Да веете того вину, изволте внушати.

В первых, яко раби суть истиннаго Бога

и честнии граждане небесна чертога.

Паки, яко они нам любовь си являют

и молитву ко Богу о нас проливают.

Еще, яко хранят ны и творят нам благо

чрез век жизни нашея по воли Вышняго.

К тому, яко по смерти тщатся ны хранити

на мытарствах воздушных и в небо вводити.

Напоследок, в небеси имут с нами жити,

вечнии нам клеврети во блаженстве быти.

Убо с любовию я вси да почитаем,

празденство их в радости зде да совершаем.

Они в празденство наше будут ликовати,

егда нам в небе быти Бог изволит дати.

Агнец

Агнец Божий Иисус с теми пребывает

душами, яже овцы будущия знает.

Со смрадными козлищи не обыче быти,

не имать их во стадо небесно впустити.

Ад в мысли имети

Иже в животе во ад мыслию низходит,

тому страх Божий в сердце абие ся родит.

Иже его по смерти во ад не пущает.

Всяк убо во ад умом днесь да низхождает.

Адам

Во Иерусалиме мыслном Адам бяше,

егда во благодати Божией живяше.

Сшел же во Иерихон, егда согрешил есть,

и все племя си в себе в той путь обратил есть.

В нем убо вси впадохом в руки разбойников,

добра ненавидящих богопротивников.

Иже убо душевных риз ны обнажиша

и красоты честныя вконец разхитиша.

Ризы веры, одежду надежды отьяша,

любве хитон, чистоты пояс отвязаша.

Хламиду безсмертия, милоть терпения

взяша и вся иная душекрашения.

Запястия дел благих, златы усерязи

послушания сняша, и быхом все нази.

Оле злых грабителей! но и приложиша,

смертоносныя язвы душам наложиша.

Велия зело рана: правды незнание

и Богом творимых нам благ забывание.

Люта язва: несклонность к благих творению,

склонность же скоростию злых к совершению.

Оле язв смертоносных! душы посекоша,

но и плоти удесем раны нанесоша.

Гордости язву смертну в главе сотвориша,

зависти во очесех рану положиша.

Безстудие на челе, в устех злая слова,

ушеса словес вредных слушати готова.

Сердце есть яростию люте уязвленно,

чрево несытства вредом излиха разтленно.

Бубрези похотию велми повреждении,

персти суть граблением чуждых развращении.

В руках вред биения много разширися,

в ногах, яко во гнезде, леность водворися.

И тако от стоп ножных до верха самаго

не имехом без язвы уда единаго.

Ели убо живии на пути сем тлехом,

помощи ни от кого во мире имехом.

Мимо иде священник, и леввит не сташе,

первый и вторый закон не пособствоваше,

Донде же Самарянин милосердый сниде,

еже есть страж, сей Христос, к язвленным прииде

И сотвори нам милость, язвы обвязал есть,

вино же со елеем на ня возлиял есть.

Милость с наказанием взя на Своя рама,

елма взя грехи наша и принес до храма

Гостинницы церковны, повеле целити,

гостинником духовным обещав платити.

Иже убо целят ны, егда поучают

и Таин божественных врачбы прилагают.

Благодарствие убо приносим Христови,

врачбы же приимати да будим готови,

Воеже бы удоб нам уздравленным быти,

к небесному Сиону возврат сотворити.

Адам первый нам тщету многу сотворил есть,

ибо блаженства райска нас грехом лишил есть.

Но Вторый ту изволил много возмездити,

лучшее от блаженства онаго дарити.

Адам бяше мудр паче царя Соломона.

мы будем мудри, яко слузи горня трона.

Адам паче Сампсона телом силен бяше,

силнее огня и лвов будет тело наше.

Адам можаше смерти никогда познати,

нам будет невозможно оней подлегати.

Адаму покой велий бяше дарованный,

наш во веки не будет покой растерзанный.

Адамля плоть духови всепокорна бяше.

амо же восхощет дух, пойдет тело наше.

Адам друг бе Богови, мы и паче будем,

ибо в дружестве Его во веки пребудем.

Адаму мощно бяше никогда грешити,

нам же немощно будет греха сотворити.

Адаму падения леть бяше не знати.

нам невозможно имать быти упадати.

Адам во рай красном кратко житель бяше,

в небе светлом во веки место будет наше.

Иеремия пророк прилежно смотряше.

како хитрец скуделы из глины делаше.

И се во руках сосуд первый сокрушися,

хитрец же из тоя же глины устремися

Вторый изряднший сосуд чинно устроити,

еже бы на лучшую службу тому быти.

Во духовном разуме Адам сосуд бяше.

его же Бог из глины чермныя создаше.

Иже лестию врага люте сокрушися.

но ис тояжде глины Господь приложися

Другий сосуд изряднший от того создати

и честь превеликую оному воздати.

Сей есть Христос Спаситель, от Девы рожденный.

Бог сый существом, во плоть нашу облеченный;

Сосуд всех благодатей, Богом препочтенный,

в небеси одесную Отца посажденный.

Адам вся чада своя погубил есть.

Христос же Господь вся ны исправил есть.

Адам на весь род грех един наведе,

Христос из грехов многих нас изведе.

Адам гнев Божий на весь мир нанесе.

Христос благодать Господню принесе.

Адамом смерти есмы припряжени,

Христом в жизнь вечну будем возбуждени.

Адамом есмы скотом подоблени,

Во Адаме семенно вси людие бяху,

едина мужа чресла весь мир содержаху.

Егда убо падеся Адам, вси падохом

прежде, неже рождении, с Адамом умрохом

За вкушение плода возбраненна древа,

иже подаде ему первомати Евва.

Адам праотец егда изгнан бяше

из рая в сие место странства наше.

Во прямо рая бяше водворенны,

да плачет, смотря на рай погубленный.

Полезно человеку часто разсуждати,

како первозданнаго Бог хоте создати,

О нечестныя убо вещы честно дело:

из земля сотворил есть Адамово тело.

Но како украси и. мощно ся дивити

и щедроты Божия на всяк час хвалити.

Вдохнул бо духа жизни и плоть оживил есть,

человека из плоти и души сложил есть.

Благоволи же его сице украсити,

образ и подобие Си в нем положити.

И дарова благодать, юже елма взяше,

абие в сына Богу присвоенны бяше.

Началную истинну благоволил дата,

тою страсть всяка ума должна бе слушати.

Даде и, еже мощи без смерти пребыти,

аще токмо хотел бы послушливо жити.

И мощно бе печалей и скорбей не знати,

яже нам ныне нужда во мире страдати.

К тому, видимых тварей господь сотворися,

знанием естества их Богом умудрися,

Ибо скотом и зверем имена даяше

по свойству естества их, в нем же кое знаше.

На месте же веселом жити устроенны,

яко царь мира, в рай честно посажденны,

Отнюду же на небо был бы преселенны

во прославленной плоти, и вены почтенны,

Не вкусив смерти плотски, аще не сгрешил бы

и во послушании Господни пребыл бы.

Но увы, не блаженства, окаянства многа!

неблагодарный Адам преслушал есть Бога.

Прелщенною от змия Еввою сведеся,

в грех непослушания, увы нам, падеся.

Возбраненный плод прият и яде от него,

забыв повеления Господа своего.

Да Еввы не оскорбит, Бога не слушает,

тем праведный гнев на ся Его подвизает.

И бысть с Еввою купно лишен благодати,

стяжа долг неизбежный, еже умирати,

И инех скорбей всяких, в ня же мы впадохом,

иже от чресл Адама и Еввы снидохом.

Началныя же правды тщету восприяша,

тогда похоти на ум непокорно сташа.

И бысть род человеческ вечны должен казни,

Бога и аггел Его люты неприязнни.

Тем же из рая светла изгнанника быста,

хлеб от поту лица си имеюще жиста.

Но и земля проклята ею ради бяше,

в плодов место терние и волчец даяше.

То видя, Адам слезы многи проливаше,

молитвами Господа умилостивляше.

Девятьсот лет во мире, каяся, прежил есть,

тем послежде Бог ему милость Си явил есть,

Егда посла Сына Си врага победити,

прародителя с чады с ада исхитити.

Сия аз разсуждая, на мя возглядаю,

не ли прародителя в гресех подражаю.

Но увы мне, грешному! плоть мене прелщает,

паче Еввы духа ми к греху прилагает.

Вижду гордость во сердце, ибо присвояю

мне та, яже Божия быти добре знаю,

И за един Адамов аз грех преступаю

толико часто, даже и числа не знаю.

Увы мне, прегрешному! что имам творити?

Како казни вечныя леть будет избыти?

По вся дни хощу к Тебе, Боже мой, рыдати,

стенание и слезы к небу испущати,

Да мя ныне всем казнем изволиши дата,

бита, сещи и жещи, зде хощу страдати.

Точию от вечныя свободи мя муки,

не даждь немилостивым томителем в руки.

Адам с Еввою прежде, неже согрешиста,

нага, кроме одежды всяческия, быста;

Обаче никоего срама взаим знаста,

яко страстми своими силно обладаста.

Егда же плод древесе возбраненна взяста,

срам о наготе своей абие прияста.

Крыстася друг от друга, тогда Господь има

дал есть кожу в одежду рукама Своима.

Одежда убо грех наш выну обличает

паче, неже красоту плоти содевает.

Тем несть лепо ризами почести искати,

паче на ня возревшым должно есть рыдати

О тщете невинности, юже погубихом,

елма еще семенно во Адаме жихом.

В преступлении много Адам согрешил есть,

многия во едином гресе сотворил есть,

Ибо гордость от него тогда в деле бяше,

егда, яко Бог быти, сердцем си желаше.

Святотатсва грех паки тогда исполнил есть,

елма Господу себе умом исхитил есть.

Убийство скаредное онем совершися,

егда с племенем смерти должен сотворися.

И блуд духовный бысть им в той час сотворенны,

елма в целости ума змием бысть растленны.

Татбы преступление злое содеяся,

егда плод запрещенный в снедь от него взяся.

Лакомства же пороком тогда осквернися,

елма паче доволства имети стремися.

О греха злоплоднаго! един умножися,

им же весь сонм нашего рода умертвися.

Адамово блаженство превелико бяше,

сам един во всем мире область содержаше.

Но недолгое время онем веселися,

ибо во малех часех блаженства лишися.

Преслушания ради изгнася из рая,

стан невинности погубль, впаде во лютая,

Во труды и болезни, смертен сотворися,

преестественных даров обнажен явися.

Адомим

Из Сиона в Ерихон путь беден лежаше,

ибо разбой кровь многу на нем приливаше.

Тем некое в нем место Адомим прозвася

еврейски, нам же крове место столковася.

Из Сиона духовна аще кто бегает

в Ерихон, той в Адомим убиен бывает,

Или поне посечен, яко же случися,

ему же Самарянин милосерд явися.

Академия

Платон философии иде же учаше,

Академия то ся место нарицаше.

Трус земли тамо часто обыче бывати,

учившымся мудрости страх мног содевати.

Им же они к мудрости себе устрояху,

яко же учителем заповедь прияху.

Александр

Александр Макидонский елма услышаше,

многи миры вне сего быти, воздыхаше:

Горе ми есть, глаголя, яко ни едина

доселе сотворих мя мира господина.

Земный о земных плака. Нам же подобает,

да о небесном мире сердце воздыхает,

Яко в нем обители душам не стяжахом,

яже многи в небеси от Христа познахом.

Небесный Он Человек, тем же нам о небе

возвестил есть, амо же достизати требе.

Александр Леонида в нравех подражаше,

его же учителя в детстве си имяше,

И хождение его того подобися

ступанию: никогда того отлучися.

Нрави же злии бяху. Отсюду да знаем,

како чада пестуны злыми развращаем.

Алкион

Алкион птица мала яйца полагает

при брезе моря и ту птенцы выседает.

В то время воды морски безбурны бывают,

малы птицы потребе тако угождают.

Алкион птенец малый в зиме ся раждает,

на брезе моря гнездо свое полагает.

Дивный промысл Господень! како не топится

воды свирепа моря, елма то бурится?

Не топится, зане же егда он гнездится

и изьяичествив птицы, возпитати тщится,

Дни четыринадесять тишина бывает,

море не волнуется. Бог то устрояет

Премалых ради птенцев, да не погибают;

ты дни корабелницы искуснии знают

И тогда плавание безбедное деют,

амо намерение имут, тамо спеют.

Аман

Артаксерксов раб Аман Иудеом бяше

враг лютый, Мардохея сгубити хотяше.

Повеле высокое древо водрузити,

на нем же Мардохея хоте повесити.

Но строением Бога впреки обратися,

за Мардохея Аман на нем умертвися.

Точне виновник смерти диавол творяше,

праведну Христу на смерть древо сготоваше

Служением злых жидов, хотя истребити

живот и память его, еже бы не быти.

Но Христос тем прославлен, а враг победися,

силы своея лишен, вечно посрамися.

Аминадав

Елма име Исраиль море преходити,

между стены водныя всяк бояся ити.

Моисий вниде с Ароном, людие стояху,

друг на друга, да идет, трепетно смотряху.

Князь колена Иуды великосерд бяше,

Аминадав во первых в путь морский идяше

С полком своим, имея надежду во Бозе,

яко проведет здравы море Чермно сквозе.

За то ему честь многа дадеся и слава,

а колену в наследство скипетр и держава.

Анафема

Анафема колику беду содевает,

добре ю разсуждаяй известити знает.

Отлучает от Бога, а сатане в руки

предает, да во плоти содевает муки.

Тако в начале Церкве обычно бываше,

демон тело проклятых жестоко мучаше.

Муж некто благородный ни во что вменяше

анафему пастырску, токмо ся смеяше.

То видя авва некий, хотя научити,

яко проклятство много есть сил но вредити,

Нача пред ним хлеб белый клятвою вязати

и абие той черн бысть, даже едва знати

Оного бе возможно, и плеснь исполнила

хлеб здравый, во согнилость вмале изменила.

Образ тем показася, что душе бывает,

егда кого правилно пастырь проклинает.

В некоем граде церковь состроена бяше,

Викентия святаго имя содержаше.

В ней врабиев множество велие плодися,

их же калом и престол часто осквернися.

Епископ с досадою ту пакость терпяше,

на стужащыя птенцы анафему дате.

Оле силна действия! вси не постояху,

и вновь приносимии скоро исчезаху

Во показ человеком, да известно знают,

яко словеса клятвы действенна бывают.

Велможная госпожа сад некий стяжаше,

иже на земли блазей и добр древы бяше,

Но плодов желаемых не могл есть родити.

Она, не знающи, что с тем садом творити.

Древних обитателей вины вопросила:

Кая бы того вина неплодствия была?

Они реша, что древле сад иерейск бяше,

иже и анафеме в ревности отдаше,

Яко юнии службу святу оставляху,

а плоды в дни святыя тайно в нем хищаху.

Госпожа благословну вину разсудила,

абие иерея в сад той пригласила.

Разрешения клятвы у него прошаше,

он же не отрек того, немедленно даше.

От того сад времене преплоден явися,

о нем же госпожа та велми веселися.

Оттуду подобие мощно собирати,

яко и человецы тожь имут страдати

От анафемы правды, безплодни бывают,

ибо ничто достойно жизни содевают,

Разве аще от клятвы будут разрешени

и благословением Богу примирени.

Антихрист

Егда приидет конец вселенныя веков

и восхощет Суд быти дел всех человеков.

Разрешится диавол, от Христа связанный,

силою воли Его в аде удержанный,

И будет живущия во мире прелщати,

от веры и дел благих к злобам обращати.

Обрящет же по своей воли человека,

противника Христова, реченна от века.

Антихриста онаго тии именуют,

иже о пришествии его нам сказуют.

Сей кто и каков будет, кратко предлагаю,

не от мене, но яко в книгах обретаю.

Антихрист по естеству человек родится,

а не демон притворне мирови явится.

Ни же воплощен будет соединением

ипостасным с душею, с плоти смешением,

Но токмо демон в него имат ся вселити,

яко орудия си в зло употребити.

Родит же ся из жены излиха блудныя,

на всяку нечистоту всегда готовыя.

Непщуют же неции, яко враг смесится

прежде женски со мужем, та же пременится

В мужа, и к той блуднице имать прилетети,

и совокупление скверное имети.

Ту зачнется антихрист из семене того,

еже демон воспримет от мужа онаго,

С ним же прежде смесится во образе жены,

и тако отец будет муж он предреченны.

А яко то демоном семя пренесется,

от Августина демон родитель зовется.

От Иудей изьидет, из Данова рода,

а град Вавилон будет оному порода.

Коразин, Вифсаида имут воспитати,

или во тайне месте будет возрастати.

Во чреве же материи дух зол во нь вселится,

тем смешение его ко злу устроится.

Всяко без вреда воли, тем же человеки

вся злобою превзидет, иже во вся веки

В мире бяху, имать бо превсеблудно жити,

волхв и чародей быти и Бога хулити.

На вся злобы демоны наставляем будет,

их же службою коварств ему преизбудет.

Враг в нем, яко в жилищи, имать обитати,

яко орудием си, вся злобы деяти.

Обаче аггел благий будет й хранити,

донели же враг Божий в мире имать жити.

Но в жестосердом вразе успеет ничто же,

о колика Ти благость, всещедрый наш Боже!

И толикому врагу хощеши терпети,

колми помилуеши паче Своя дети!

В начале враг явится велми благочестив,

но егда воцарится, будет всезлочестив.

Не имать Богу живу чести воздаяти,

но ни же идол яве будет почитати.

Сам себе честь Божию велит приносити

и будет мечтанием чюдеса творити.

Обаче в тайне имать чтити Маозея

демона, аки Бога крепости своея.

Образ ему сотворит и всем велит чтити,

злато, сребро в красоту его приносити.

Се же, яко той демон будет пособитель

ему в делех лукавых, мира же прелститель.

Веру в начале Ветха Закона появит,

обрежется, законы Божия прославит.

Храм во Сионе жидом потщится наздати,

да бы им за Мессию онаго прияти.

Егда же прият будет, закон их оставит,

свой же всезлосвободный в то место уставит.

Имат же всякий недуг скоро исцеляти,

демоны изгонити, мертвых воскрешати.

Но вся сия содеет мерзским чародейством,

по видению токмо, а не правым действом.

То бо злохудожество всех паче познает,

вся возможет мечтати, их же возжелает.

Царства Римска власть себе имать восхищати

и Христа себе быти имать глаголати.

Сим именем род жидовск, иже Христа чает,

прелстит богопротивник; ах, кто й познает?

Языки же волшебством возможет сводити,

едва кто сетей его улучит изьити.

Тако возвеличився, имать посылати

демоны во вселенну, еже мир прелщати,

Да вси идут онаго яко царя чтити

и велелепной славе его ся дивити.

Прелстится Гог и Магог, будет помогати

антихристу, а верных мечем воевати.

Сам враг в храме Сионстем престол си поставит

и сед на нем, за бога себе людем явит.

Повелит себе жертвы, яко богу, жрети,

оле, како леть будет верным мерзость зрети?

Римско на десять царей царство разделится,

их же седмеро под власть его подчинится.

Три же падут от меча, иже в Афркии

и в Египте царь будет, и в Ефиопии.

Во всей злобник вселенней силно воцарится,

Аравиа точию цела сохранится,

Яко в пустыни ея имут убегати

святии и в ней чрез зло время пребывати.

Первее в Вавилоне царством утвердится,

та же в Иерусалим с престолом вселится,

И будет треобразно верныя сводити,

страхом, даровании и чюдесы лстити.

Не сам токмо, и раби таяжде возмогут

лукавая деяти и ему помогут

Толико силно, даже будут ся дивити

правый, како леть есть злым дивна творити?

Имать враг на десницах, на челех печати

некия уверившым в него полагати.

Да им свободно будет продати, купити,

верныя же всех свобод имать злый лишити.

Десницы делес десных значат лишение,

чела веры Христовы суть отречение.

Но и чювственна печать весма хощет быти,

юже прилучимися негде изследити.

Образ ея сицев есть: ☧ хри нам изъявляет,

яко враг Христа себе нарещи дерзает.

Откровением себе явленно вещает,

иже сию будущу печать утвержает.

Тогда жертва безкровна во мире не будет,

яве мни. а во тайне конечно пребудет,

Ибо обеща Христос выну с нами быти,

до конца века слово будет ся истити.

Чрез полчетверта лета гонение будет,

а Господь рабов Своих верных не забудет.

Пошлет двоицу пророк во утвержение

верных, а антихристу во обличение.

Илиа со Енохом прийдут и проявят

прелесть антихристову, Христа же прославят.

За то от противника будут убиени

и чрез три дни на стогнах града повержени.

По триех днех имать я Господь воскресити,

рек: Возидите семо, в небо преселити.

По смерти святых в месяц будет отмщение,

злый противник погибнет чрез убиение.

Егда из Елеонски горы вознесется

демоном горе, словом свыше убиется.

Христос речет: Изчезни, тогда возмолнится

из облак, и противник смертно поразится.

Или непщуют, яко мечем Михаила

убиется, и тако счезнет его сила.

Ини глаголют, яко будет поглощенный

землею, яко Корей, Суд то божественный.

Како-либо точию изчезнет конечно

и во геенне огнем будет мучен вечно.

Четыридесять пять дни мирови останет,

да кождо, покаявся, ко Христу пристанет.

День же всяк или себе, или год являет,

то премудрость Божия совершенно знает,

Много бо в Писании день есть вместо лета.

По сем числе известно будет конец света.

Но в дни тыя останок Иудей спасется,

чрез пророки вестися ко Христу начнется.

Потом страшный день Суда имать наступите,

во нь же изволи, Боже, мук ны свободити.

Апостоли

Челюсть осла мертваго Сампсон похитил есть,

Филистынов тысящу тою поразил есть.

Христос мертвыя миру трудники прияше

и теми лесть идолску во мире попраше.

Агнцы смиреннии волки поразиша,

егда апостоли гордыя смириша.

Царие мира сего слуги собирают

честны, мудры и силны, им же вся вручают.

Царь же небесный Христос противно содела —

худы, буи, немощны взят на Своя дела,

Благородных худыми хотя обратити,

буими же мудрыя мира посрамити.

Чрез немощныя паки силныя попрати;

вскую же то сотвори, полезно есть знати.

Не едниу аз вину того обретаю

и во ползу христиан оны полагаю.

Перва есть — да явится не от людей быти

послание, еже мир к Богу обратити.

Иже мудрых, пречестных, силных посылают.

егда послование камо совершают.

Но да явственно будет быти то от Бога

чрез творимая ими дивная премнога.

Вторая вина — да бы гордость укорити

мирскую чрез смиренных и рог злых сломити.

Третяя — да бы делом слово показати,

что хотеша мирови благовествовати,

Сиречь, простои сердцы простоту да хвалят,

смиреннии смиренность праведно да славят.

Четвертая — да знаем, яко всяка чина

приемлются на службу от Божия Сына.

Пятая — воеже бы пресмиренным быти

апостолом и по них имевшым учити.

Шестая — епископству еже бы не быти

по благородству крови, ни же восходити

По заступе, богатству, но иже явится

достоин добротами, той да посвятится.

Последняя вина есть — да бы всем то знати,

что епископом в трудех должно пребывати.

Яко же художници присно ся труждают,

днем и нощию в деле своем пребывают.

В избрании апостол мудрость показал есть

Христос, яко нищыя люди в мир послал есть,

Ведя бо, яко, аще избрал бы велики,

славныя и мудрыя на то человеки,

Всяко бы гордостию были напыщени

и от начинания добраго сведени.

Аще бы советника изволил избрати,

рекл бы он: Чести моей должно то бе дати.

Богатый паки рекл бы: За богатство мое

избран на достоинство есмь апостолское.

Аще бы царь был избран, могл бы глаголати:

Крепость мою изволил Христос Бог избрати.

Философ могл бы рещи: Аз за мудрость мою

украшен почестию есмь апостолскою.

Ритор рекл бы: За красно аз глаголание

имам во апостолску службу избрание.

Нищым, буим и худым сице глаголати

не леть есть, тем же Бог я изволи послати.

Рыбарие, идите, мрежы запущайте

в море мира, словесы рыбы уловляйте.

Соль мира апостолы Христос нарицаше,

яко их слово душы от тли снабдеваше.

Апостоли святии раби Христа бяху,

проповедь словес Его миру возвещаху.

Из невеждь богословцы дивне сотворени,

от Духа Свята вены сими украшени.

Во-первых, послании службу восприяша,

словом Христовым люди в мире просвещаша.

Паки Духом Всесвятым исполнени быша,

Им же действенно слово миру обносиша.

Еще прияша силу чюдес творения

ради, яко печатми, слов утвержения.

Наконец, Духа Свята присущие взяху,

Им же во всех делесех си правими бяху.

Апостоли святии зело честни бяху,

яко Царю небесе и земля служаху,

Творяще волю Его, мир же оставиша,

души своя за Христа Бога положиша.

Его же по Божеству суща невидима,

видеша воплощенна своима очима.

Неприкосновенному зело близци бяху,

с живым Словом Божиим устно глаголаху,

Иже везде есть, выну в след Того ходиша,

со питающим всю тварь ядоша и пиша.

Неопределенному сожители бяху,

словом вся сотворшаго глаголы внушаху.

Вселенную языки Христу уловиша,

яко мрежами, везде со словом ходиша.

Прелести, яко куколь, прилежно терзаху,

яко терние неко, требы упражняху.

Капища со идолы в мире истребиша,

демоны, яко волки хищны, поразиша.

Церковь, яко же стадо некое, собраху,

правоверныя, яко птеницу, избраху.

Ереси, яко плевы, умно изтребиша,

жидовство, яко сено сухо, сотвориша.

Еллинская суетства, яко же некое

стеблие, вовергоша в родство огненное.

Человеческое же естество тяжаша

крестом, слово же, яко семя, насеяша.

Наконец, делеса их. яко звезды, бяху,

в подражание миру изрядно сияху.

Тем вы есте свет миру, Господь глаголаше,

егда апостолы Си добротам учаше.

Апостоли мир к Богу чрез любовь клониша,

ибо не нужду ему, но совет твориша,

Еже верити в Христа, Бога в Троице знати

и Его заповеди тощно соблюдати.

Пророци паки страхом ко Богу нудиша,

ибо многими язвы от Бога претиша.

Чрез сия убо Господь жезлом наставляше,

чрез овы — бичем токмо, ибо увещаше.

Тем Новый Завет любве закон наречеся,

Ветхий же закон страха вправду прозовеся.

Егда Божия Мати живот си кончаше,

велие Богом чюдо содеянно бяше.

Апостоли святии, иже провещаху

слово Божие в мире и далече бяху.

Облаки в град Сионский принесени быша,

погребение телу честно сотвориша

Во Гепсиманстей веси, аггелский слышаху

глас, иже на воздусе пресладко пояху.

Потом во своя места паки отнесении

облаки, отнюду же быша пренесенни.

Ариан

Феодорику кралю Африки раб бяше,

его же он советов усердно слушаше.

Бе же той правоверный родом христианин,

краль паки ересию бяше арианин.

Прелстився, раб той хоте кралю угодити,

потщася в арианску ересь приступити.

Краль, то уведев, суди онаго казнити,

яко дерзнул есть Богу веру измените.

Рек: Аще бо им Богу вера измененна,

мне, человеку, како будет сохраненна?

Не бояйся муж Бога краля не боится,

тем же преострым скоро мечем да казнится.

И тако окаяный Бога удалися

и кралевы милости с животом лишися.

Архиерей

Первым жрецем Египта сей обычай бяше,

яко кийждо на персех висящь имеяше

Сапфир камень, на нем же образ извааху

и ему имя Правда в напись полагаху,

Тем являюще, яко жрецу подобает,

да правда в сердце его выну пребывает.

Архиереи паки, иже в Ветсе быша

Законе, на персех си во храме носиша

Судное слово, еже писано держаше:

ПРОПОВЕДАНИЕ И ИСТИННА. Являше

Сих словес ношение, яко учение

жрецем подобает, и правды хранение.

Архиереем к тому, сущим в благодати,

желал бым речение ОБРАЗ приписати,

Еже бы не точию истинне учите,

но и житием святым образы всем быте.

Август

Октавиан Август в Риме кесарь бяше,

шед ко Аполлону лжебогу, прошаше:

Кто по нем на престол имать наступити

и скиптра держатель хощет в Риме быти?

Лжебог же словесе не даде едина,

а кесарь молит: Есть кая того вина?

Он же даде ответ: Не могу вещати,

противу малому Отроку стояти.

Отрок мя еврейский — Бог — Сам пребогатый

Правитель отселе велит уступати

И во ад плачевный нудит отходити,

и ты молчя тщися отселе отьити.

Он убо возвращся, жертвенник создал есть

Первородну Богу, напись тому дал есть.

Бысть же сие, егда Христос Бог родися,

от Бога истинна лжебог обличися.

Августа кесаря людие любяху,

в число написати богов й хотяху.

Но явися ему, близ солнца стоящи

в крузе злате, Дева, Младенца держащи.

И та есть жертвенник во пресветлом небе,

нача помышляти оттоле сам в себе,

Яко болей его той Младенец бяше,

Его же та Дева на руках держаше.

Абие возбрани себе нарицати

Господа, донде же в мире обитати.

Бысть и сие, елма Христос Бог родися,

се поганым приход Его возвестися.

Август преславный тогда царствоваше,

егда Христос Бог, спасение наше,

Изволил телом в мире Ся родити,

еже бы люди Своя искупити.

Сей божественных дел рачитель бяше,

с прилежанием тех испытоваше.

Слыша же, яко книги в мире бяху,

яже сивиллы мудрыя писаху,

Тех по всем странам велел есть искати,

велику цену злата за ня дата.

Сивиллы паки девы чисты бяху,

дар пророчества от Бога прияху.

Многия тайны веры написаша,

яко един есть Бог в мире, сказаша,

И яко хоте Бог человек быти,

от Девы чисты телом Ся родити.

О волной страсти Его прописаху

и смерть лютую писмены предаху.

И яко хощет вселенней судити,

то даде им Бог мирови вестити.

И многи ины составы писаху

нашея веры, яже Богом знаху.

Сицевы книги Август си стяжал есть,

с прилежанием оны прочитал есть,

Из них же изчерп, яко хощет быти

Царь новый в мире с Девы Ся родити.

Образ Оному изрядный создаше,

сый в нечести Христа почиташе,

Надписав сице: Первородна Бога

жертвенник сей есть. Честь се Христу многа

От царя, веры правыя не знавша,

но в службе идол скверных пребывавша.

Возбудися же той образ ставити

знаменем, еже сподобися зрети.

Возвед он очи на небесну страну,

зрит на воздусе Деву преизбранну,

Лучесы солнца предивне светящу,

во объятии Младенца держащу.

Ту сразумел есть того Царя быти,

иже от Девы име ся родити.

Сице движеся образ соружити,

от Бога данну Царю честь творити.

Сей же царь Август Аполлона чтяше,

идола скверна, и за бога знаше.

Отцем й своим выну нарицал есть,

храм ему в своей полате создал есть.

В некое время тому поклонися,

да будущая скажет, помолися.

А демон, иже в идоле живяше,

силою Бога нудим, ответ даше:

Детищь еврейский — Бог, богов Правитель

манием Своим бысть ми Повелитель,

Из места сего днесь ми уступити

и во ад мрачный возврат сотворити.

Ты же отселе молча да идеши,

ответов моих не к тому возмеши.

То царь услышав, силе удивися

Детища, Иже от Еврей родися.

Обаче веры правы не прияше,

в идолстей службе жизни конец взяше.

Пятьдесят шесть лет царство содержаше,

паче всех царей римских блажен бяше.

Восток и запад, паче вся вселенна

его началству бяше покоренна.

Мир во дни его толик даровася,

колик от всех век едва в мире знася.

Се же бысть, яко Царь мира хотяше

в царствие его спасение наше

Строити в мире, Христос, наш Спаситель,

рода нашего падша Возставитель.

Мир бысть, да слово Его разширится,

и сила чюдес везде прославится,

Да тако роди вси к Богу влекутся,

во Нь веровавше, душевно спасутся.

Ибо в дни мира удобно ходити

и слово благо мирови вестити.

И людем спона к слову не бывает,

егда мир сладкий в мире пребывает.

Б

Бдение

Полезно выну бдети, не много же спати,

ибо силен сон делом злым пищы даяти.

Безбедство

Несть нужда тому стражи утвержати,

кто весть, як отец, чадом царствовати.

Бездна

Во бездне грехов скверных не люби лежати,

но тщися в бездну щедров Божиих бежати.

В овей лежя, погибель души содееши,

в сию бегая, ону конечно спасеши.

Бездна бо греховная во ад погружает,

бездна щедрот Божиих в небо возвышает.

Бездна аз ничесого, невеждества, злобы,

окаянства, достойный адския утробы.

Бог же бездна бытия, блажества, мудрости

и неизреченныя глаголы благости.

Бездна убо скудости, Боже мой, моея

бездну днесь призывает полности Твоея:

Исполни бездну мою, яко же есть требе,

яко даянием несть лишение в Тебе.

Яко солнце лучеса выну изсыпает,

а ни на мало время в них оскудевает,

И яко свеща свещи многи возжигает,

обаче в полности си огнем пребывает,

Тако дарове Твои весь мир исполняют,

а в Тебе в полности си всегда пребывают.

Выну от сокровища даеши Твоего,

а еще полно, аки не нача Ты его.

И аще восхощеши во веки даяти.

в неоскудной полности имать пребывати.

Оттого бездну мою изволи полнити,

да вечно возмогу Ти раб и певец быти.

Безказние

Иже злобы злобником без казни прощает.

сам есть тать ли разбойник, яко попущает,

И зело люте Богом сужден имать быти,

яко мог, не хотяше злобы истребити.

Безместие

Отрок некто Александр Ликургу мудрому

избил бе жезлом око, за что он самому

Предан бысть, да казнит й, яко же сам знаше,

но он нимало тому злаго содеяше,

Паче же учением в дому си наставил,

безместия благ образ по себе оставил.

Давид елма от сына из града бежаше,

Семей хулы на него и песок меташе.

Царь кроткий претерпе то и потом не мстися,

егда на престол во град паки возвратися.

Кикерон Иулия кесаря блажаше,

яко паче всяческих обид забываше.

На нь же некто книжицу хулну написал есть,

он, не мстив, на вечерю к себе й призвал есть.

Августа некто главы кесаря искаше,

еже убити его извета желаше.

Кинна бе имя врагу. Кесарь не отмстил есть,

но между советники честными вместил есть.

В граде некоем жена честная живяше,

яже единородна сына си имяше,

Ему же прилучися в торжище изьити

и случаем некоим убиену быти.

Убийца же, гонзая, в дом ея притече

и: Христа ради молю, сохрани мя, рече.

Она показа место, в нем же сохранися,

но абие о смерти сына увестися,

Яко единородна ея той убил есть,

иже именем Христа ону умолил есть,

Да бы утаила й. Тогда возридаше,

многи слезы о смерти сына проливаше,

А за любовь Христову того не явила

убителя, его же в доме сохранила.

Но, давши на путь, пусти из града бежати.

О, дивная в Христови любви сия мати!

Потом, елма во клети о сыне молися,

светозрачен пред лицем ея сын явися,

Глаголя: Благодарю тебе, моя мати,

яко ты изволила убийцу прощати,

Ибо, егда ты его свободна пустила.

во жизнь мене вечную тогда ты родила.

Лучшая ты мне ныне мати сотворися,

неже егда плоть моя тобою родися.

Егда ты Христа ради дала прощение

убийце, мне Христос Бог дал оставление

Грехов моих и казни, и се иду к Нему

во страну небесную ко Творцу своему.

Сия изрек, весело в небо восхождаше,

что очима своима мати его зряше.

О. блаженная, тако сотворшая мати!

Достоит ея дело многим подражати.

Безумие

Сердце безумнаго — сосуд сокрушенный,

во нь же дар мудрости не будет вложенный.

Беседа

Юже кто пищу во стомах въпущает,

тоя он воню усты отригает.

Тако что в сердце свое кто влагает,

о том словеса часто составляет.

Беседуя со други, да ся не хвалиши,

но о немощех твоих умно да тужиши.

Со аггелом лукавым Евва глаголаше

и злым его советом зде прелщенна бяше.

За слово его взя плод, Богом возбраненный,

прелсти мужа, и бысть их весь плод умерщвленный.

Со аггелом же благим бе глагол Марии,

и бяху глаголи их миру спасеннии.

Со аггелским бо словом плод свят восприяла,

во чреве своем Слово Божие зачала

Плотию, им же плодом весь плод оживися,

иже древле в Адаме плодом умертвися.

Хотяй с Богом беседу присную держати

да молится и книги да тщится читати.

Ибо елма молимся, глагол наш есть к Богу,

егда чтем, Господь творит к нам беседу многу.

Блага убо премена сих делес бывает,

егда кто и молится, и книги читает.

Во отцех древних прозорлив муж бяше,

иже тайная иным сам видяше.

Тому некогда прилучися быти,

иде же нрав бе братии ходити

И со собою беседы имети.

яко же кому и о чем хотети.

В едино убо время мнози бяху,

седше, беседы взаим си творяху.

Егда же нечто от книг глаголаху,

тогда аггели при онех стояху,

Веселящеся, ибо им есть тое

любезно, егда глаголют святое.

А егда они ж мирско что вмесиша,

аггели тогда от них отходиша,

Посупным лицем на оныя зряху,

за глагол тщетный гневни ся являху.

Въместо же аггел вепри приходиша

сквернии зело, между неми быша.

Се же демони тамо ся явиша,

иже беседы скверныя любиша.

То видев старец, умилно плакате,

в келии об нощь о том разсуждаше:

Коль тщету многу зла беседа деет,

коль же во ползу та благая спеет.

Потом братию старец увещаше

к добрым беседам, елико можаше,

Сказуя, еже Бог ему открыл есть,

си видение повнегда явил есть.

Бисери сокрушеннии быша исцеленнии

Егда Иоанн святый из Патма вратися

и во граде Ефесстем с верными вселися,

Грядушу ему путем видети случися,

яко Кратон философ пред людми славися

О презрении мира, ибо собрал бяше

позорище велие и ту извождаше

Два юна человека, аже два иместа

бисеря, яже за вся отчества куписта.

Зело красна и драга. Та им наученна,

да содеют бисеря яве сокрушенна.

Она же по словеси его сокрушиста

пред множеством народа, что драго куписта.

То зря. Богослов святый Кратона призваше,

хуля славолюбие, сице глаголаше:

Безумное есть сие мира презрение,

еже от человеков имать хваление,

А божественным судом праведно хулится.

яко без ползы бисер драгии ничтожится.

Мой Учитель, Христос Бог, юношу видяше,

хотяща жизни вечны сице й учаше:

Хощеши ли совершен во благости быти,

продаждь имение ти, тщися расточити

Нищим людем на нужды. Сие учение

в совершенство приводит и во спасение.

Философ рече: Честный мужу, присмотрися,

се плод лакомства сердец людских сокрушися.

Но аще твой учитель Бог есть и желает,

да ся на нищи люди богатство раздает.

Моли его, да хощет, иже сокрушении

бисери паки будут онем исцеленни.

Да мы, чюдо видяще, к нему обратимся,

бисерей цену нищим раздати потщимся.

Еже нам в славу мирску леть бе сокрушити,

то ты во славу Христа тщися исцелити.

Тогда апостол, собрав частицы дробныя

и на едине месте совокупив тыя,

Возвед очи к небеси, Господа моляше,

в умилении сердца сице глаголаше:

Господи Иисусе Христе, Боже правый,

вся из ничесого же сущая создавый,

Тебе вся суть возможна, изволь сотворити,

да бисери возмогут сии цели быти,

Да, иже славы ради мира сокрушении,

славы ради твоея будут исцеленни,

Да не без ползы цена онех погубится,

но на потребу нищих людей обратится.

Вели аггелом твоим целы содеяти,

да бы то людем зрящым тя Бога познати.

Ту бывший верный Аминь возопиша,

и се цели бисери пред всем миром быша,

Даже ни знамению скрушения быти,

сице изволи Господь силу Си явити.

Тогда Кратон с юношми до стоп поклонися

Иоанну святому, верен сотворися,

И ученицы его ко Христу присташа,

истинна Бога быти Его возвещаша.

Юноши же, бисери продавше оныя,

с радостию раздаша на люди нищыя.

И тако вместо тщеты полза сотворися,

имя Христа Господа во граде вславися.

Благая мира прелщают

Безгласну рыбу пища услаждает,

юже на уде она похищает.

Не знающи, что внутрь тоя таится,

бедная лстится.

Ибо абие рыбарь ю терзает

удою тую, к себе привлекает;

тако в болезни бывает ловленна.

таже снеденна.

Подобный случай есть в мире живущих,

благая его в блаженство имущих,

ибо. егда та тщиво собирают,

уду глощают.

Егда же о них сердцем веселятся,

в житейстем море с удою носятся,

ею же потом бывают влачими,

врагу ловими.

В то убо время светло познавают,

како благая мира я прелщают.

Но уже несть леть тогда пособити,

в снедь аду быти.

Благо

Блага вещь, аще вся цела бывает.

Худа же, аще и мал вред являет.

Благо истинное

Ничто ино есть сребро и драгое злато,

точию есть белое и желтое блато.

На земли цену имут у чад сего века

погрешением ума бренна человека.

Бренный брение любит и ценит е драго,

а не во сребре с златом праведное благо.

То бо добродетели, любезныя Богу,

яже цену имеют и в небеси многу.

Небеснии мужие сими богатеют,

известни суще, яко ты самы не тлеют

И со стяжателем си имут отходити,

пред Страшным Судиею того защитити.

Паче же и в небеси имут увенчати,

устроят со Господем вечно царствовати.

Бренная же богатства не многих спасают,

а безчисленным людем в погибель бывают.

Добродетели убо тщитеся стяжати,

иже хощете с Богом вечно царствовати.

Мощно тыя и нищым имети безценно,

токмо требе есть жити в мире божественно.

Удобно и богатым тыяжде стяжати.

за тленное богатство нетленное взяти.

Оба убо тщитеся, нищий со богатым,

с добродетелми в небо к ликом аггел святым,

Да вечная богатства можете прияти,

безъконечно будете блаженни и святи.

Благоговеинство

Елма во храме Божием стоиши,

очеса смири, усты да молчиши.

Собери ум твой, возведи ко Богу,

взиди от земля к небесну чертогу.

Стой благочинно, блюдися дремати,

разуму службы прилежи внимати.

Не дерзай прежде в дом твой исходити,

тщися во службе до конца пребыти.

Тако полезно в церкви постоиши,

яже ти в ползу, свыше получиши.

Благодарствие

Благодарствие правое бывает,

аще кто благотворение знает.

И, помня оно, тщится прославляти,

и егда может, по силе воздати.

Благодарствия степень трегуб обретают

мудрии, иже тому вся ны научают.

Первый того есть степень благотворение

выну знати, не дати его в забвение.

Вторый — благодарити и милость хвалити,

третий — воздаяние по силе творити.

Неблагодарник убо, иже не воздает;

вящший, благодетеля кто не ублажает;

Величайший, не знаяй данны благодати,

не хотяй во памяти ея содержати.

Проклятый же есть злобник, иже за благая

тщится благодетелем воздаяти злая.

Мало менший есть того, благодать гаждаяй;

третие имать место, в злобу ю вменяяй.

Чтый, неблагодарствия всячески блюдися,

злободеянию же ни перстом коснися,

Но благодарен буди, тако бо та многа

милость от человеков будет и от Бога.

Реки тайно из моря в страны исплывают,

но, яве разширшеся, в оно ся вращают.

Учат благотворящым милость воздаяти

благодарствием явным, и то разширяти.

Благодарствие дары людем умножает,

неблагодарствие же и малых лишает.

Благородных чада рождшым честь творяют,

утро я и вечер любезно лобзают,

Возблагодаряще за вся благодати,

яже изволиша оным содевати.

Мы, православнии, есмы благородии

благодатию бо (аще не природни).

Сынове Божии есмы сотворени

и благ неизчестных Богом сподоблени.

Должни есмы убо честь Ему творити,

утро и во вечер поклон приносити

Со благодарствием. Он же нам дарует

наследие вечно, в нем же Сам царствует.

Благодарствие бо и у Бога может,

во отчество небес кумуждо поможет.

Нива благодарствие учит ны творити,

едно зерно обыкше в сто усугубити

Всяк, благая приемый, одолжен бывает,

да благодарство Творцу благих содевает.

Благодарствие паки сия составляют

четыри вещи и то добре совершают.

В первых, благодетелство явленное знати

ценно класти, а своя нужды разсуждати.

Второе — забвению того не даяти,

но любезно в памяти выну содержати.

Третье — воздаяти некосно хотети

сердцем, словом и делом, за долг то имети.

Наконец — благотворца своего любити

и благотворения в людех не таити.

Сице сущь благодарен достоин бывает,

да ся и впредь оному добро содевает.

Благодать

В Завете Ветсе огнь присно горяше

в храме Господнем и не угасаше.

Иереи бо вещы подлагаху,

да не угаснет, прилежно стрежаху.

Кийждо человек долженствует быти

храм Богу живу и в себе храните

Огнь благодати Его божественный,

да никогда же будет угашенный.

Аще же когда грехами сгасится,

вещию паки слез да возгнетится,

Яко елей бо, стихийна питати

весть, точне слезы огня благодати.

К тому делеса благая есть требе

деяти жити хотящему в небе.

Тех бо держится той огнь божественный,

при них никогда бывает гашенный.

Да черплет воду кладязь ископавый;

благо да деет благодать стяжавый.

Тлится бо вода, нечерплема сущи;

гибнет благодать, благих не деющи.

Без света лучь солнечных в мире тма бывает,

душа без благодати в тме грех изчезает.

Его же ум правая мудрость украшает,

в скверный сосуд пития чиста не вливает.

А самая мудрость — Бог — дара благодати

не обыче во душу нечисту вливати.

Благодать душы свет есть, иже просвещает,

да человек скудости своя познавает,

И наставляет паче всех Бога любити

и Ему единому сердце прилепити.

Егда убо человек грехи своя знает

и паче всех Господа Бога возлюбляет,

Прилепляяся сердцем, знамя благодати,

яко Господь изволи внутрь его витати.

Тогда убо должно есть сокровище тое

блюсти непогубимо, яко же святое.

Блюдет же. кто благая тщится совершати,

а от всякия злобы сердце отвращати.

Терпение благодать тако соблюдает,

яко же сокровище ковчег сохраняет.

Аще убо стяжа ту, вся тщися терпети,

неоскудну благодать будеши имети.

Благодать Божия

Яко тело без душы труп смрадный бывает,

тако без благодати душа истлевает.

Егда от тела душа удалится,

абие тело в землю относится.

От душы паки егда отступает

благодать, душа в ад ся низревает.

Бездушна тела ближнии гонзают,

душу безбожну аггели метают.

При киоте Господнем Дагон не стояше,

не терпя силы его, на землю падаше.

Тако иде же сердце полно благодати,

исчезают вси греси, не могут стояти.

Благодать чрез тайны

Егда Адам и Евва в рай согрешиста,

вся чада си на уме и воли язвиста.

Во уме всех слепота ко благим бывает,

воля же разслабленна, к тем же не востает.

Тем же Бог даде закон, иже сказоваше

путь, им же шествовати к Нему подобаше.

А зане же той силы не даде хождати,

нужда бяше Божия свыше благодати,

Без нея же несть мощно закона хранити

и противу Господу смертно не грешити.

Тем даде Бог благодать Свою божественну,

да бы мирови быти чрез ону спасенну.

Юже да мы возможем удобно прияти,

чрез видима знамена благоволил дати

Тайны божественныя, в Церкви сокровище,

да та общее верным будет прибежище,

Да в ней чрез тайны воду Бога благодати,

яко чрез водотечи, можем притягати,

Да тою, яко здравым врачеством, целимся

и в немощех душевных известно твердимся.

Наконец, грехи нашя да потопим въскоре,

яко Фараон с вой погибл в Чермном море.

Благодать есть живот

Рыба воды вне скоро умирает;

вне благодати душа исчезает.

Прилежим убо в благодати быти,

душами жити.

Благодать добродетелей виновна

Солнце светлое егда отступает

от нас далече, мал день содевает,

Нощь же велику и мразы наводит,

земля померзнет и ничто же плодит.

Подобне, егда Господь удалится

от душы грешны, тма в ней сотворится

И, оледевшы, неплодна бывает,

деяний благих никако раждает,

Яже требуют солнца благодати

теплоты лучес, да бы ся раждати.

Во благодати человеческой не уповати

На трости руце свои утвержает,

кто в человецех силных уповает.

Трость сокрушится, падет утверженный,

умрет велможа, он будет прелщенный.

Тем же псаломник светло увещает,

да никто в князех мира уповает.

Егда бо душа из князя изъидет,

на помощь к тому никогда приидет,

И сам в персть земну будет обращенный,

из нея же бе Богом сотворенный.

Иеремия того проклинает,

кто в человеце тленнем уповает,

Оставив Бога. Се бо грех великий

пред лицем святым всех сущих Владыки.

Обаче мнози во них уповают,

вся в них надежды своя полагают.

В то время мнятся блажени и святи,

егда общницы суть их благодати.

Заповедь Бога жива презерают,

да их лукавей воли угождают.

За слово онех готови умрети,

а за Божие нимало терпети.

Не тщатся Богу тако угодити,

яко велможным послугу явити.

И аще у них милость обретают,

то гордостию сердца исполняют.

Суть яко говор на воде надменный,

и ходят, яко павлин напыщенный.

Вящшую себе милость обещают,

но окоянне тако ся прелщают,

Ибо внезапно вящший гнев бывает,

нежели милость, юже отвращает

Гневный велможа и не хощет знати

того, его же име в благодати.

Вящшая повем: во врага вменяет

и, аще мощен, абие отмщает.

Приял искуство Аман горделивый

истинны сея, царю си служивый,

Иже всех паче бе превознесенный

в чести, в богатствах, тем же и надменный,

От всех поклоны и дары имаше,

первый по царе во царствии бяше.

И Есфир ему почесть сотворила,

на пир бо к себе с царем пригласила.

На нь же прииде в чести и во славе,

не усмотряя бедства своей главе.

Мало утехи тамо восприял есть,

но суд велия казни услышал есть.

Древняя милость на гнев преложися,

Аман на древо царем осудися.

И тако над вся в чести возвышенный,

выше всех злодей бяше повешенный.

Зри кождо, како благодать прелщает,

никто надежды в ней да полагает.

Благо на Бога выну уповати,

он косен к казни, скор же миловати.

Благоденствие

Благоденствие грешных безблаженно зело,

яко разрешает я согрешати смело.

В благоденствии не превозносися,

в злоключении терпелив явися.

Благородие

Зле благородия си муж употребляет,

иже, менших обидя, тем ся защищает.

Благость Божия

Велику Бог нам благость изволил явити,

восхотев во образ Свой род наш сотворити.

Вящшую благоволил тогда показати,

егда благодать Свою изволил нам дати.

Величайшую паки тогда изъявил есть,

естество Свое с нашим елма съединил есть.

Последния точию требе ожидати,

да даст нам лице Свое светло созерцати.

Во стране света вечна даст же то известно,

аще во блазей вере поживем нелестно.

Благость общится

Еже благо, то себе прочым вообщает;

Бога вся суть причастна, благ бо пребывает.

Человек и аггели выше естественных

общество восприяша даров божественных.

Прочая тварь чрез дары своего естества

причастие восприят благаго божества.

Особным же образом людем вообщися,

егда ипостасию вочеловечися.

Над сию благость кая может вящша быти?

Ты, читателю, изволь мене научити.

Речеши: Яко на страсть дав за ны Си тело

и. смерть восприем, вящше сотворил есть дело.

Велие воистинну, но сего основа

вочеловечение лица Бога Слова.

Даждь ми ино общество Бога с человеки,

вящшее сего. Ей. ей. не даси во веки.

Благотворение

Благо творя недругу, в друга преложиши,

из жестокаго Савла Павла сотвориши.

Ничто во человецех есть божественнее,

яко же бедным людем благотворение.

Тит кесарь римский благотворив бяше,

никто от него без блага хождаше.

В един же вечер дела разсуждая,

себе внимая,

Помяну, яко в день той не содея

никому благо. Абие жалея,

рече: О, друзи, благо не створил есмь,

день погубил есмь.

О, добродетель право христианска

от человека изьиде поганска!

Нам бы то сице достойно творити,

вся дни судити.

Еда что в кий день благо сотворихом,

алчнаго, нища еда насытихом,

или что ино, яко подобает,

кто закон знает.

Аще же узрим, яко работахом

чреву, а ничто благо содеяхом,

рцем: Оле, ничто добро сотворихом,

день погубихом!

Но негли вся дни тако изживаем,

ничто же благо ближним содеваем,

наши ковчеги наполняти тщимся,

на то трудимся,

Забывше, яко, что кто засевает,

во время жатвы ту вещь пожинает,

и мало сеяй малы рукояти

имать прияти.

Кто же обилно семена метает,

обилны плоды в гумне сопрятает

в препитание и себе самому,

и всему дому.

Подобне, аще кто творит премногим

благо ближним си, найпаче убогим,

воздаяния приимет от Бога

в небеси многа.

Творяй же мало и мзды не толики,

яко же щедрый, примет от Владыки,

а ничто сотворшь, ничто же на небе

спрятнул есть себе.

Не имать почто той ити до неба,

не вкусить вечно животворна хлеба,

с несотворшими милости часть тому

в огненном дому.

С козлы, не с овцы оному стояти,

егда по делом имать воздаяти

Судия правый и осудит его,

врага Своего.

Идете, речет, во огнь проклятии,

милости ближним си не сотворшии,

с демоны купно в огнь вечный идите,

муки терпите.

Сие ведуще, вы благо творите,

не чреву тучну, но ближним живите.

Вся Бог всещедрый вам за человеки

воздаст во-веки.

Бисер под ноги вепром посыпает,

неблагодарным кто благо творяет.

Благотворение Божие

Великая благодать великаго Бога

великая нам творит, а та зело многа.

Многогрешным нам велит отцем Себе звати

и благоволил ны есть во сыны прияти.

Попечение о нас отческое деет,

к болшым нуждам скорее с помощию спеет.

Множицею же нужды наша предваряет

благодатми Своими, в путь благ устрояет.

Частократ же обыче множае даяти,

нежели мы дерзаем от Него желати.

Дает же благим и злым, да не одолеет

Его благости наша злоба. Бог то деет.

Его же благость и нам должно подражати,

неодоленным злобы дружными бывати.

Благотворения зело суть премнога,

яже вси приемлют людие от Бога.

Он из ничесого плоть нашу создал есть

и дух оживляющь во ону влиял есть,

Его же образом Своим украсил есть

и вся животная ему покорил есть.

Мир и вся, яже в нем, кому подчиняет?

Человеком, яже держит, соблюдает,

О всех промысл деет, живит и питает

и венец в небеси славы соплетает.

Сия суть общая от трилична Бога,

суть же и чрез Христа иная премнога.

Первое чрез него добротворение

преестественное есть воплощение.

Яко благоволил плоть нашу прияти.

по человеческу нас деля страдати.

Второе есть, яко Сам люди учаше,

на путь спасения в правде наставляше.

Не яко языки светом естественным,

или чрез твари Си законом присенным,

Ни яко Исраилск древле род учаше,

аггелы, пророки егда посылаше.

Не в сенех, в образах нам тайны явил есть,

но Сам Христос Господь правде научил есть.

Да знаем Господа в Троицы единаго.

Отца купно с Сыном и Духа Святаго.

Третее суть образы, яже подаяше,

вся добродетели егда проявляше:

Смирение, кротость, милость, любление,

пост, молитву, труды верным в спасение.

Четвертое есть нам добротворение,

от греха и смерти нас изволение,

Еже страстию Си изволи свершити

и смертию плоти, да бы вечно жити.

Пятое есть, яко не токмо остави

грех и казнь, но к тому сыны нас постави

Отцу небесному, еже наследите

царствие небесно и в нем вечно жити.

Шестое добро есть грехов прощение

Его заслуг ради, за сокрушение,

Ибо, елижды кто во грехи впадает,

токмо бы жаль имел, Бог тыя прощает.

Седмое есть благотворение Его,

яко сотвори ны общники Своего

Тела пречистаго и крове святыя,

кающихся душам живот дающия.

Оле благодатей, оле щедрот Бога!

Паче песка морска та нам суть премнога.

Что имамы Тебе, Боже наш, воздати?

Должни имя Твое выну прославляти.

Благо творити

Судии Страшнаго да ся не страшиши,

уклонися от зла, благо да твориши.

Благоумие

Еже древо благия может плоды дати,

безумен, кто в здание тщится посекати.

Точне, кто благоумна чада обращает

в нечестна художества, безумен бывает.

Блаженство

Не кто в злато богат есть, истинно блаженный,

но верою с благими делы исполненный.

Во день блаженства мнози друзи бяху

мне, а минувшу тому, мя не знаху.

Блаженство грешных

Не завиди грешнику, во блаженстве сущу,

здраво, богато, славно живот свой ведущу.

Паче плачися о нем, ибо есть забвенный

от Бога и на вечну казнь Им сохраненный.

Блаженство мира

Яко же птица скоро прелетает,

тако блаженство мирское гонзает.

По птице следа нимало явится,

и по блаженстве память истребится.

В того дни убо будущая зрите,

со всеми людми добротно живите,

Да ся измене вашей не ругают,

но паче руку помощи подают.

Близость

Близ царя еси? Честь ти сотворися,

но тощно вины всякия блюдися.

Ибо тяжко есть оттуду падати

и неудобно есть паки востати.

Блуд

Аще блуда гонзнути желателно тебе,

времене же и места гонзати есть требе,

Ибо время и место и святых прелстиша,

светилники чистоты, увы, угасиша.

Очеса человечя отраду си знают,

егда часто три вещы любезно смотряют:

Источник, зеленую траву и зерзало,

тым бо силу неправы естество подало.

Точне умнии очи ползуются зело.

на мысленный Источник смотряще весело:

На Иисуса сладка, Иже и травою

нарицатися может за чисту плоть Свою,

И зерцало за живот Свой пребожественный,

во образ и исправу миру положенный.

На Нь убо кто обыкнет умом си смотряти,

несть леть болезни умных очес тому знати.

Детищь, видя яблоко на древе красное,

многим трудом приложит стяжати оное.

Егда же, стяжав, узрит внутрь червие быти,

суетны труды своя обыче хулити.

Тако иже похотми искушен бывает,

утехи ради плотски много ся труждает.

По ней же червь в совести лютый проявится,

тогда грешник зле прелщен быти осудится.

Но содеянны злобы не мощно вратити,

слезами того червя нужда есть морити.

Слезами подобает скверну очищати,

да бы первую душы красоту стяжати.

Блуд со сыном сотворшая мати

Муж некто благочестный в Риме ветсем бяше,

иже прекрасну жену и благу имяше.

Славно же и богато и законно жиста,

токмо о лишении чад зело тужиста.

Твориста же убогим милостыню многу,

да, еже дата чада, помолятся Богу.

И, услышав Бог молбы, сына дароваше,

его же та двоица радостно прияше

Со благодарением. И всяк веселися,

кто токмо дому тому знаем сотворися.

Посем муж он умысли Богу работати.

Его ради в странствии живот свой кончати.

Яви умысл супрузе и ят ю просити,

да бы изволила й свободна пустити.

Она, услышавши то, излиха рыдаше,

никако любезнаго мужа отпущаше.

Иже по вся дни паче моля настоял есть,

все богатство свое ей с сыном отдаял есть.

Она к богатством сердца си не прилагаше,

с ним, не с богатством жити усердно хотяше.

Наконец ю именем Божиим просил есть,

им же любовь честныя жены победил есть,

Ибо та рече ему: Несть леть не творити

кто мя о что именем тем хощет просити,

Яко и Он молитву нашу восприял есть,

не имевшыма сына милостивно дал есть.

Буди убо, яко же ты умыслил еси,

да правит пути твоя Живый на небеси.

Аз въместо тебе имам на сына смотрети,

о нем радость присную за тебе имети.

Сию прием свободу, муж он божественный,

оставив вся. отшел есть во путь умышленный.

Она же младенца си любезно питаше,

сама сосцама того своима дояше.

Излишеством же любве побеждена бяше,

ни на степень от себе сына отпущаше.

Иже, пространно питан, даже возраст взял есть,

а выну с материю в ложе купно спал есть.

Неопасная мати выну й лобзала,

отроку паче, неже Богу, угождала.

То видя, враг лукавый плоть ея палил есть,

да бы похотети ей, к тому приводил есть.

Она же, не терпевши телесныя страсти,

всячески возбуждаше сына к скверней сласти,

Иже со материю дерзнул есть блудити

и, яко муж с женою, с нею ся смесити.

А негли не един крат то с нею творяше,

даже от сына мати сына внутрь прияше.

Что сама сразумевши, яла есть тужити,

не знающи, что имать во беде творити.

Грех зело лютый виде, срама ся бояше

и казни достойныя. Тем же ся таяше

Пред человеки, а внутрь к Богу воздыхала,

молитвы дея многи, и велми рыдала.

Покаяся всем сердцем, ни же утешися,

и в печали сущей сын зачатый родися.

Его же, яко узре, не могла терпети,

еже пред очима си грех выну имети.

Вящшую злобу к меншей, увы, приложила,

прелщением вражиим чадо удавила

И в отходе скаредном, оле дела злаго!

младенца погрузила, блудно рожденнаго,

Еже, аще не явно человеком бяше,

но всезрящее око Божие видяше.

Долготерпелив же сый, зла дела не мстил есть,

да покается о сих, время попустил есть.

Враг же, в покаяние не хотя пустити,

умысли ея злобу мирови явити

И претворся в клирика, властем показася,

искусен Писания муж быти сказася.

Даже удобно ми есть, рече, и гадати,

что в тайне обыкоша людие деяти.

Рцыте ми, рече, кому что есть покрадено,

абие лице татя будет вам явленно,

И вещи краденныя камо сохраненны,

моим вам художеством будут изъявленны.

Слышав то, царь с боляры веле искусити,

о содеянных татбах его вопросити.

Мнози убо о многих тщетах вопрошаху,

а вси праведный ответ от него прияху,

И лица татей своих удобно познаша

и вещы, где он рекл есть, спрятанны сыскаша.

Радость всем бысть велия о муже толице,

о мудром сравнения кроме человеце.

Он же долгое время тако прорицаше,

злодеющия люди граду извещаше.

Даже из града татем нужда бе гонзати

или творения злых делес си престати.

И тако вещанием лукавец вславися,

даже всяк глагол его верен сотворися.

К тому же, привед люди, да веруют ему,

приступи о той жене к промыслу своему.

Представ царю с боляры, нача глаголати:

Имам вам тайну неку страшную сказати.

Весте глаголы моя достоверны быти,

ибо многия тайны умех вам явити.

Ныне кая во граде злоба сотворенна,

неслышанная от век, а есть утаенна,

За ню же Бог не может вам терпелив быти,

имать люте град Римский воскоре казнити.

Ту аз вам, вас жалея, верно изъявляю,

токмо веру имите, о то вас желаю,

Ибо неподобное дело помыслите,

о нем же лици оно от нас услышите.

Царь же с боляры рече: Тщися глаголати,

а мы словесем твоим хощем веру яти.

Тогда нача всезлобник слово си ширити,

еже во тайне бяше дело износити,

Глаголя: Есть жена зде, яже мнима честна,

а она зело зла есть и велми прелестна,

Лицемерием славу сотворила себе,

яко мнети ону всем уже жити в небе,

А она есть блудница, и страшная зело,

ибо сыну си на блуд даде свое тело,

От него же заченши сына, есть убила

и во отходе тело его утопила.

Та же есть жена она, сказа имя ея,

бохма недостойнная суща жизни сея.

Аще же аз клеветник на ону явлюся,

народно без милости огнем да сожгуся.

Аще же она будет яве обличенна,

такожде среде града да будет сожженна.

Царь с боляры, егда сей глагол услышаху,

во недоумении превелице бяху.

От единыя страны, яко глаголаше

сия, иже истинну во всем сказоваше,

И толицей сам казни себе подсудил есть,

чесого с неправдою никако творил есть.

От другия же страны трудно бе верити,

да бы толика жена могла то творити.

Рекоша убо к нему: Что есть сие дело,

яко о жене честной зло рекл еси смело?

Она во граде Римстем свята быти мнится,

добротами паче всех жен римских светится.

От юности никто же запрашил ей ока,

всячески она честна, живет без порока.

Блюдися, о клириче, да неси прелщенный

лстивых людей повестми, негли ты сведенный.

Клирик же мнимый рече: Предвидех аз тое,

яко усумнитеся вы на слово мое.

Но истинный мой глагол хощу доказати,

точию повелите злу жену призвати.

Царь с боляры по ону абие послаша,

но честно приити ей рабом приказаша.

Прииде убо жена, честно устроенна,

не знающи, по что бысть пред суд приглашенна.

Царь, видя усрамленну, веле сотворити

честь оней и на месте честном посадити.

Та же в кротости глагол оней предложиша,

что клирик на ню рече, явно известиша.

И повелеша жене на то отвещати,

да, аще не есть винна, тщится очищати.

Она же, множеством слез сущи исполненна,

яко тайна мирови бяше проявленна.

Воздохнувши от сердца, нача глаголати:

Пресветлый царю, несть леть днесь ми отвещати,

Ибо. срамом и страхом сущи исполненна.

мнюся вам предстояти разума лишенна.

Молю, изволте время на ответ ми дати,

аз пособием Бога хощу отвещати.

И право прошение вси быти судиша,

на дни неколикия ответ отложиша.

Она, полна горести, в дом свой возвратися,

яко согрешение ея проявися.

В мнозе же тузе сущи, нача промышляти,

откуду бы пособство себе восприяти.

Не уповаше в людех, обратися к Богу,

к Нему сотвори молбу и слезну, и многу;

И тече к Лукияну, епископу града,

молящи, да им дастся совет и отрада,

Есть ли покаяние тако согрешившей,

во блуд со сыном впадшей и чадо убившей?

Вопрошаше умилно. Грех свой обличаше,

а от слез многих едва слово глаголаше.

Папа, сокрушение сердца созерзая,

прощения достойну быти разсуждая,

Утеши ю глаголы, яко же можаше

блудницу плакавшую, в образ ей даяше

И Петра слезившаго, яко согрешил есть,

а оба Христос Господь от грехов простил есть.

Тем и ей прощение свыше обещал есть.

о помощ же к Марии Деве совещал есть

Вдаятися всем сердцем, яко помогает

она скоро, кто-либо слезен притекает.

Жена, в печали совет здравый получивши

и поклон всесмиренный отцу сотворивши,

С надеждею милости в дом свой возвратися,

в посте Богородице прилежно молися,

Даже уреченному времени приити,

в не же подобаше ей ответ сотворити.

Призвана убо сущи, ко царю идяше,

а Господь сердце ея тогда укрепляше,

Яко не устрашенней оному предстати,

аки невинну себе и лицем являти.

Царь с боляры пришедшей почесть сотвориша,

на месте ю достойне паки посадиша

И реша ко клирику: Слыши, человече,

се обличению ти днесь время притече,

Се на обаждения престрашнаго слова

жена обажденная с ответом готова.

Изъявляй вину ея, тщися доводити,

да мы, правду обретше, возможем судити.

Клирик ов, на ню возрев, устрашен явися,

не знаяй лица ея Богом сотворися

И нача к предъседящим слово глаголати:

Не могу аз на сию жену клеветати.

Не есть она блудница, ни убийца чада,

сия слава и венец есть Римскаго града.

Сию мати Божия в защите имеет;

враг, кто на ню клеветно слово рещи смеет.

Аз на честность ея уст ми не отверзаю,

се бо при ней Божию Матерь усмотряю.

Сия вси собраннии егда услышаху,

крестным ся знамением тогда знаменаху,

Дивящеся измене того человека,

ему же равен не бе во граде от века.

Клирик же мнимый креста силы не терпяше,

пред знаменавшимися изчез, незрим бяше.

Ту вси уразумеша, что демон явися

лукавый, во клирика лице претворися.

Тогда ко обажденней жене глаголаша:

Ты, о честная жено, слава еси наша,

Иди со миром в дом твой и за ны молися.

И тако свобожденна от бед сотворися

Богом и Матернею; сия бо моляше

Бога о жене, а Он милость показаше.

Честнии же людие в дом ю отведоша,

вси преподобночестну, святу нарекоша

И паче прежних времен ону почитаху,

яко Богорождею храниму слышаху.

Она же, в дом пришедши, велми умилися,

милосердию Бога всещедра дивися,

Яко толику милость изволил явити,

от срамоты и смерти люты свободити.

Тем до кончины жизни во посте живяше,

благодарствие Богу выну возсылаше

И пречистую Деву, Матерь Христа Бога,

за благодеяния от нея премнога,

Во беде явленная, присно величаше,

скорую помощницу всем исповедаше.

Прочее же живота тако тщася жити,

во еже бы в пороце оттоле не быти.

Сие чтуще, матери, опасны бывайте,

любви, яже к сыновом, брозды возлатайте.

Не полагайте в ложах с собою их спати,

найпаче, елма начнут возраст приимати,

Да не демон искусит плоти люблением,

та же душы убиет скверным смешением.

Не ими тебе веры, яко еси мати;

похоть разум и память силна есть отьяти.

Не веруй и сынови, плоть бо в нем играет,

яже, воспалившися, на все зло дерзает.

Не единой то матери и сыну случися;

чуждым всякая грехом от того блюдися.

Блуд со сродником

В обители единей многи сестры бяху,

яже игумению жестоку имяху,

Ибо свободно жити им не попущаше,

безчинно живущыя в наказе держаше.

За что сестры оныя велми не любиша,

о правлении твердом излиха уныша.

Та вражиим искусом сама согрешила,

со сродником, в службе си бывшым, соблудила.

Даже в ложеснах своих младенца зачаше;

времени же растущу, чрево ей растяше.

Еже наблюдше, сестры грех бывший познаху

и зело оней беды за той грех желаху.

Писаша к епископу, да тщится судити,

из обители соблазнь ту искоренити.

Епископ отписа им, яко сам прибудет

и тогда суд содеет, аще правда будет.

Игумения о том егда услышаше,

а уже рождения час ся приближаше,

Вшедши во камару си, сердце обратила

ко Матери милости, слезно ю просила,

Да и греха, и срама изволит изъята,

в толицей нужде руку помощы подати.

Чрез многи же дни тако молитвы творяше,

во Христе и в Матери Его уповаше.

Ни прелстися в надежде, ибо ей явися

Божия Мати, егда она утрудися

Постом и молитвами, а по труде спаше;

се бо с двома аггелъма Дева ей предсташе

И нача сладким гласом к бедней глаголати:

Веждь, яко скора аз есмь слезных миловати.

Умолила есмь Сына и Бога моего,

да не помянет греха ко казни твоего

И от срамоты люты да тебе избавит,

винну сущу, яко же невинну поставит

То рекши, аггелома повеле изьяти

из утробы младенца и на руки взяти.

То има сотворшема нести приказаше

к пустыннику, иже близ во лесе живяше.

Аггели убо слово делом сотвориша,

младенца пустыннику питати вручиша.

Божия паки Мати невидима бяше,

игумения от сна ужасно восташе

И абие познася испраздненна быти.

Христа и Матерь Его яла есть хвалити

За свобождение то от греха и срама

и не престаше пети хвалы их устнама.

Сему бывшу, епископ прииде в обитель

паче яко судитель, неже посетитель,

И во время подобно веле сестрам стати,

и началницу на суд пред себе призвати.

Собранным же всем бывшым, слово сотворил есть.

вину пришествия си в обитель явил есть,

И повелел есть сестрам на ню доводити,

и знамения блуда ея проявити.

Сестры ужасошася, яко не видяху

знамений, яже прежде у оныя бяху.

Обаче обвиняху. Епископ вещаше:

аще извещение неложно есть ваше,

Да идут два клирици тощно, да смотряют,

аще следы некия бремене познают.

Изшедше убо, яко лепо есть, смотреша,

но ни мала знамене бремене узреша;

Сказаша епископу невинну ю быти.

Он, мня, яко дерзнула клирики умздити.

Сам изшед, знамения на оней смотряше,

но ни же малейшее обретенно бяше.

Тем же сам прощения от нея просил есть,

а обадившыя ю изгнати судил есть.

То слышавши, винная избра не таити

вины своея, да бы сестры извинити,

Сама посрамитися о гресе хотяше,

того ради истинну пред всими сказаше

И о младенце оном, в пустыню несенном,

мужу в препитание святому врученном.

Епископ рабы своя абие послал есть,

Писанием святаго мужа испытал есть:

Аще ему когда, ким младенец вручися?

И все истинно быти ему известися

От пустынножителя, ибо той сказаше,

како от дву муж юных младенца прияше.

Епископ, извещен быв, винну наказаше,

к тому опасно жити сестры увещаше,

Да, юже Бог чюдесно простил, почитают,

на милость к ней Божию, не на грех взирают.

Пустыннику же веле младенца питати

до седми лет, по них же изволи й взяти.

Своим иждивением в учение вдал есть;

отрок же в младых летех мудрость пристяжал есть

И яко честный живот свято провождаше,

по смерти епископа он епископ бяше.

О, милости Божия! Како возвыжшает

и коль велики грехи некосно прощает!

О, премилосердая Христа Бога Мати!

Кто не дивится, како веси помогати?

К тебе убо во скорбех наших прибегаем,

благоутробие ти выну прославляем,

Умилно моляще тя, да и нам явиши

милость, егда во скорбех нас быти узриши,

Да тобою ся хвалим и тя величаем,

донеле же во мире тленном обитаем.

Блуд восприемника со дщерию

Муж, богатством обилный и рода дворянска,

забыв себе закона быти христианска,

Прочтите, что содея и како казнися,

мне страшно есть писати; ты, чтый, ужаснися.

Обычай древле бяше во Церкви крестити

во Велику Субботу хотевшыя жити

Во вере христианстей. Потому случися,

яко сей окаянный в той день сотворися

Восприемник девице благолепой зело,

прият ю от купели святыя весело.

Взем же в дом свой на обед, безумно упися;

паче рождшаго отца, милостив явися,

Но во сердце лукавом злое промышляше,

на чистоту девицы враг ся устрояше

И во нощи пришедшей бедную растлил есть,

отчества духовнаго за похоть забыл есть.

Мало же отрезвився, ят печален быти

и умысли во бани плоть свою обыти,

Аки бы порок греха воде очищати,

но не то требе бяше за грех содеяти.

Иде убо, омыся, но совесть снедаше,

во церковь на молитву внити трепеташе.

В толикий день не ити в церковь срамно бяше,

ити же, суда свыше зело ся бояше.

Одолен убо срамом, во храм запустися

и тамо молящымся Богу приложися.

Стояше убо бедник, но в страсе велице,

чая казни от Бога по злобе толице,

Непщуя, яко демон имать похитите

и всенародно его за то зло томите.

Но Бог, не хотяй грешных погибели вдати,

покаяния его изволил есть ждати.

До седмаго дне казнь Си щедрый удержаше,

а окаянный грешник того не познаше.

Видя, яко в день первый Бог й не казнил есть,

с дерзновением в церковь чрез дни шесть ходил есть,

Глаголя в себе: Негли Бог греха не зряше,

или яко милосерд прощение даше.

Злобник покаяния не тщася творити,

живе, аки бы ему кроме греха быти.

Господь убо в день седмый местник сотворися:

внезапною той злобник смертию убися.

Его же тело егда гробу вдано бяше,

оле страшное чюдо Господь показаше!

Огнь чрез долгое время во гробе горел есть,

еже всяк бывый тамо с многим страхом зрел есть.

И дотоле горяше, даже й спалити,

кости и гроб грешника в пепел обратити.

И сама земля, яже надсыпана бяше,

от пламене горяща дивне исчезаше.

О, казни престрашныя! Бог то показал есть,

что душею сей грешник за грех свой приял есть.

Блуда бегство

Демосфин ветий на блуд глашен бяше;

первее о мзде дела вопрошаше.

Егда же реша ему мзду велику,

рече: Не хощу на цену толику

Покаяния себе куповати;

изволнее ми чисто пребывати.

Се еллин злата дати не хотяше,

а мзды чистоты в небе не чаяше.

Ты, христианин, душу отдаеши

сатане за блуд, егда на нь течеши.

Оле срамоты! А то вестно тебе,

яко мзда честна за чистоту в небе.

Не купуй убо блуда тако драго,

мзды чай от Бога жития чистаго.

Блудник

Краль Наварры Каруль всеблудно живяше,

тем тепла природна скоро лишен бяше.

Еже врачи ему хотяще целити,

судиша Карула в сукно впеленити.

Во водце горящей добре моченное,

по хитрости врачев на то строенное.

Един убо от раб сукном обвиваше

и, яко велеша, на нем обшиваше.

Приключися нужда отрезанной быти,

ею же обвива сукно, овей нити.

Не случися же нож. свещу раб хитил есть

и нить помяненну огнем запалил есть.

От нити же сукно, в водце моченное,

яко же молние, бысть запаленное.

Вопль велий врачеве и вси сотвориша,

но горящу кралю ничто пособиша.

Згоре огнем, яко похотми горяше

чрез всю юность свою, а не угошаше.

Телец на жертву идет упитенный;

грядый ко блудней — лицем уловленный.

Агнъцев заклатель егда нож готует,

скачет въслед агнец, смерти не чювствует.

Тако блудодей скачет и играет,

грядый к блуднице смерти забывает.

Блудница

Авесолом прекрасный власы си любяше,

но теми завис в дубе, люту смерть прияше.

Тако мнози блудницы любят и питают,

и от тех едва не вси люте погибают.

^Сот медвен из дву вещию строится:

с воска и с меда, сей в оном хранится.

И жена блудна двема устрояет

лице си вещма, да люди прелщает:

Украшает е, слово сладко строит,

сице юношы безумныя ловит.

Воск огню подпал, мед сладость раждает,

красота похоть в юных возпаляет,

А слово мягко сладит, изумляет,

яко мед квасный, егда упояет.

Бежи от меда сего, человече,

тецы от воска пагубна далече,

Да не прилип ей пияны будеши,

яко безумен в гресе пребудеши

Корабль на мори, ветрами гонимый,

от рыбы малы бывает держимый,

Юже удержку мощно нарицати,

яко есть силна корабль удержати.

И в мира мори суть рыбы такия,

от течения блага держащыя.

Блудницы юных удержки бывают,

егда путь благий тещи препинают.

Бог

Кому кто сердце свое и ум прилагает,

раболепен творится и всю честь воздает.

Той оному бог мнится, а праваго знати

не хощет, да бы Ему честь должную дати.

Тем сребролюбцу сребро въместо Бога честно,

чревонесытну мужу бог есть чрево бесно.

Гордому человеку честь воместо Бога,

славолюбивым людем бог есть слава многа.

А иже блудным женам сердце прилепиша,

оны себе богини, увы, сотвориша.

И прочий прочыя творят боги себе,

вся же сия истребит Бог, живый на небе.

Тем же, возлюбленнии. Бога права знайте,

Ему Самому славу должну воздавайте.

Твари творцевы чести никако творите,

Ему же раби есте, мзды от Того ждите.

Бог есть все, мы же всячески ничто же.

Он всеблаг, аз зол, помилуй мя. Боже.

Ты добра бездна, аз же бездна злобы,

ищу милости Твоея утробы.

Без нея несть леть мне спасенну быти,

благоутробне изволь мя щадити.

Бог везде

Како Господь Бог везде пребывает

и вся собою самем исполняет?

Везде естеством, всем бо присущьствует;

везде силою, всем бо господствует;

Везде зрением, ибо созерцает

вся, его ока ничто же гонзает.

Естеством, присущием, силою со всею

везде, выну есть Господь тварию Своею.

Но не всегда есть везде даром благодати,

ту бо благим точию обыкл есть давати

Бог возлюби мир

Дивная любы Богом к людем проявленна,

посла Сына Своего единорожденна.

Еже воплотитися, страдати, умрети,

да бы токмо мир Себе примирен имети.

Егда же Сын соверши, еже подобаше,

посадив Его в десных. Духа низпослаше

Прочая устроити. Оле благодати!

Кроме заслуг предварших дар изволил дати.

Дар неисповедимый по Своей благости,

токмо любовь являя ко нашей худости.

Иже убо чрез страсти Христовы рождении,

яко же питателем, Духом воспитенни.

Христос, яко учитель, на путь мир наставил.

Дух Святый, яко пестун, в шествии управил.

Христос душы верных Си в храм сооружил есть.

Дух Святый благодати дары освятил есть.

Христос душы человек, яко деки готует,

Дух Святый живошарне образ написует.

Христос в корабль воведе. Дух же силно веет,

да корабль к небесному пристанищу спеет,

К нему же дожени ны. Душе Божественный,

в шуме ветра бурнаго верным низпущенный.

Бог казнит нудим нами

Пчелам, жала имущым, несть свойство язвити,

но нужда дражнением; свойство же медити.

Тако Богу казнити есть по нужде дело,

свойство же миловати, милостив бо зело.

Мы некогда Онаго к казни понуждаем,

егда много противу Ему согрешаем,

А Он выну готов есть милость проявляти,

токмо хощет, да тщимся мы тоя искати.

Бог необьемлем

Иже оплазиво киот созерцаху

во Завете Ветсе, казними бываху

Внезапно от Бога. Тако днесь казнится

душевно, кто Бога обьяти стремится

Необьемлемаго умом си созданным,

во благопотребство от Господа данным.

Зряй прямо во солнце очи повреждает;

изследуяй Бога ум свой изтребляет.

Бог с нами

Аще Бог с нами, никто одолеет;

что врабий с орлом, то враг в нас успеет.

Бог, яко хощет, творит

Фараону в Египте раби согрешиша,

иже ему по вся дни во дворе служиша.

Един бе. чашу с вином ему подаваяй,

другий, хлебы во пищу бяше предлагаяй.

Оба в мрачну темницу вовержени бяху,

оба суда царскаго на ся ожидаху.

Прииде час. се чашник чести привратися,

а старейшина житарск на смерть осудися.

Ов чашу царю с вином паки подаяше,

сей повешен на древе, кончину прияше.

И никто ему того дерзнул обхудити,

все леть царю в державе, что хощет, творити.

Подобне Господь деет, егда ны спасает,

падшыя во Адаме, а не погубляет;

Аггелы же падшыя адови остави,

милости им Своея никако изъяви.

Яко же изволися, тако сотворил есть.

истинны и на един влас не отступил есть.

Свободен есть скуделник сосуд устроити.

яко хощет и како волит обратити.

Много паче свободен Господь есть над нами,

по естеству сущими Онаго рабами.

Благодарим убо И, яко сотворил есть

милость с нами и огня вечна избавил есть.

И да тщимся заповедь Его соблюдати,

воеже бы жизнь вечну в небеси прияти.

Бог что есть

Что Бог? Не может человек сказати,

да бы естество Его описати.

Неизреченный Он Ся нарицает,

яко всякое слово превыжшает.

Августин рече: Уне есть явити,

что Бог несть, неже что есть, известити.

Мыслим ли небо, землю, воздух, море

и вся. сущая низу же и горе,

Яже зеница может созерцати,

всех тех не леть есть Богом нарицати.

Огнь, звезды, луна и солнце самое

несть Бог, аще есть и велми светлое.

Дуси горнии, воинства премнога —

не Бог, но раби истиннаго Бога.

Что убо есть Бог? паки вопросиши.

Не вем сказати. вотще мя трудиши.

Око не виде и ухо не слыша

и в сердце, что Бог, помысли не быша.

Аще же сердце не може пояти,

язык никогда возможет сказати.

Бог всевидец

Муж страннолюбец в сию злобу въпаде:

близка соседа свинию украде.

Посем Христос Бог оному явися,

в нища, власата, странна претворися,

Желая его умиленным гласом,

еже стриженным быти себе власом.

Страннолюбец же в любви й приял есть,

власы острищи сам ножицы взял есть.

Начен же стрищи, к заду главы прийде

и ту две оце светле зело виде.

Страхом одержим, к странну глаголаше:

Каково чюдо сие? вопрошаше.

Странный мужь к нему милостивно рече:

Знай Мя ты быти Христа, человече,

Иже отвсюду тайны созерцаю,

зрением Моим бездны проницаю.

Тема очима Аз видех с небеси,

егда свинию ты чюжду крал еси

И где заключи в яме устроенней,

вся Ми суть вестна во всей стране земней.

Сия известив, не увидим бяше;

странноприимец о гресе ридаше.

Виждь, читателю, яко бденно око

Божие видит и что есть глубоко,

Тем же и в тайне зла да не твориши,

завет Господень выну да храниши.

Бог в коих сердцах

Дивен Бог во святых Си, пророк возвещает,

в них же, яко во храме Своем, пребывает.

Аще в нас Господь живет, по чесому знати?

Лва святаго и мудра изволте слушати.

Той глаголет: Аще кто познати желает,

еда во душе его Господь обитает.

Праведно стязание сердца да содеет,

по тому познание прияти успеет.

Аще бо смирением противен гордости

и благоволением въпреки есть зависти:

Аще язык ласкающ сердца не прелщает

и о чуждем блаженстве радость в себе знает,

И аще зла не хощет за зло воздаяти,

паче же благостынми злобы побеждати;

Аще хощет обиды многия забыти,

подобие Божие в себе сохранити,

Иже на праведники дождь Свой изливает

и неправедных дара того не лишает,

И елма на благия солнце Си сияет,

в то же время и злыя люди озаряет;

Аще наконец любовь совершенну в себе,

во-первых, к царствующу Господу на небе

Обрящет, потом к ближним, во мире живущим,

паче же и ко врагом, злохотником сущим ,

Им же, яко самому себе, благ желает

и молитву ко Богу о них возсылает,

Подобяся Христови, о вразех молившу

Отца и прощения грехов им просившу;

Сия аще кто в сердце своем обретает,

известно, яко в нем Бог живет, то да знает.

Ибо сия доброты не могут пребыти,

амо же не изволит Бог всещедрый жити.

Бог неизменен

Господь Бог неизменен выну пребывает,

ибо по естеству Си смерти не познает.

Ни иначествуется, выну единаков,

каков бяше прежде век, присно будет таков.

Ни же местом пременен, ибо недвижимый,

вся места исполняет, не местно держимый.

И воля постоянна есть во веки Его,

никогда хотения менит Он Своего.

И действа образ той же выну соблюдает;

словом. Бог непреложен всяко пребывает.

Бога не знающий

Иже Бога не хощет в животе си знати,

того в год смерти Господь не имать познати.

Богоподобие

Демосфин, вопрошенный: Что уподобляет

Богови человека? сице отвещает:

Подобит Богу, еже всем благотворити

и, лжю ненавидяще, истинну любити.

Бога славити о всех

Вся мы во славу Бога должнствуем творити,

донде же нам дарует Он под небом жити.

От Него день начата, с Ним же и вершити,

во славу Его ясти и жажду толити.

Егда хлеб в устне наше хощем приимати,

давшу й в крепость сердца должни хвалу дати,

Ему же вся животна хвалу содевают,

яко Им питаема по вся дни бывают.

Егда сладкаго вина чашу исполняем,

давшу е веселие честь да возсылаем.

И егда удовлени будем совершенно,

воспоем Господеви песнь благодарственно.

Блюдися паки зело, егда сыть будеши,

давшаго ти доволство да не забудеши.

Егда ризу на плеща хощеши прияти,

помни покрывша нагость нашу ублажати

И, милость вземля, тщися Господа хвалити,

одеждею брачною тя хотяща чтити.

Исходя из дому ти, помолися Ему,

да тя здрава возвратит жилищу твоему.

Возвращался от дел, благодари Бога,

яко тя сохранил есть от бедства премнога.

Пришедшу же на запад солнцу, нам сиявшу,

дажд поклон во светило то миру подавшу.

Свещу в нощь возжигая, тщися прославляти.

Иже в прогнание тмы огнь изволил дати.

Отходя на постелю, тепле умилися,

покайся о гресех ти, давыдски слезися.

Моли, да ложе не гроб и сон не смерть будет,

сице тебе творяща Господь не забудет.

Богатии неудобь входят в небо

Неудобь богатии во царствие входят,

зане же им богатства препятия родят.

Неудобь богатии ко Божию слову,

еже послушати, мысль имеют готову.

Яко бо клас в тернии удавлен бывает,

тако слово в печалех богатств исчезает.

К тому, чуждая оным нрав есть удержати

или от родителей в наследстве прияти.

Чуждая же держащим несть мощно спастися;

яко от праха, от тех требе оттрястися

Спасения хотящим, яко увещает

Христос, да прах от ног си кождо отрясает.

Еще, яко неверно тии устрояют

богатства, яже Богом врученная знают.

Не на нищих потребы, ни во славу Бога

истрошают имений сокровища многа,

Но на суеты мира, паче же на злая,

на пиянства и на блуд обращают тая.

Неции жены своя тако устрояют,

даже конца множеству риз не обретают.

Точне на дщери юны толик наклад деют,

даже, одолжившеся, в град ити не смеют.

О, аще бы то нищым было расточено,

доволны бы я в домы во век устроено.

Но не о том их мысли, выну промышляют,

како дом к дому, село к селу прилагают.

Тем же и на молитве хладно пребывают,

не с Богом их беседа, но сердцем бегают

По селам и по торзех, да бы что стяжати,

или обыкоша то с златом заключати

Во железных ковчезех, ибо злато камо

бывает положенно, и сердце есть тамо.

Аще же и зовет Бог во покаяние,

не попущает к тому злата собрание,

Яко юношу того, иже глаголаше

с Христом о совершенстве, сребро удержаше

От шествия в след Христа, бе бо богат зело,

не пустися с нищими к совершенству смело.

Напоследок, богатство и тем препинает,

яко премногих грехов виновно бывает.

Богатии гордятся, нищих презирают,

лихвами томят бедных, биют, досаждают.

Уповающе в злато, дерзают на многа,

яже мерзка пред лицем суть живаго Бога.

Сих вин ради есть трудно богатым на небе

наследие вечное заслужите себе.

Обаче не речеся невозможно быта,

силен Господь богатых в небо водворите,

Дает Он доволную благодать богатым

во спасение, яко и всем людем святым.

Токмо суть должни нужду себе сотворити,

от злата ко Господу сердца обратити,

Возлюбити сотворша, паче Его твари

и благоустрояти врученныя дары.

Тако и действенную благодать получат,

ея же пособием силным в небо влучат.

О даждь, Боже, богатым пребогатым быти —

добродетелми златом Тебе угодити.

Богатство

Еллином богатств бог бе, нареченный Плутон;

аз его именую: воистинну плут он.

Плутает бо излиха и зело вплетает

в сети диаволския, яже уловляет.

Хрома же писааху, егда в дом вхождаше,

а крилата, оттуду елма исхождаше,

Знаменати хотяще косно стяжание

богатств быти, скоро же тех изчезание,

Яко зело медленно стяжанна бывают,

а многажды в един час въконец исчезают.

Аще же и послужат до кончины кому,

но по смерти нужда есть лишити иному.

Богатства три некия имут вещи в себе,

яже не попущают вселитися в небе.

Перва — яко богатый тщится то множити

несытно, а без греха то не может быти,

Ибо Господь убогим повеле даяти,

а хотяй богат быти хощет везде взяти.

Второе — Господь сердец всех Себе желает:

Сыне, отдажд ми сердце твое, совещает.

Богатии же сердца злату прилагают,

а не Богу святому во жилище дают.

Наконец, велит Господь не велми пещися,

ни же упованием в злате погрестися.

А златолюбцы лише потребы пекутся.

да к ним прибытки многи отвсюду несутся,

И в собрании мнозе много уповают,

паче Творца своего ту тварь почитают.

Блажен во мире той ся нарицает,

кто златом, сребром, людми обладает.

Той славен, честен и мудр быти мнится,

иже честными каменми красится.

Вси почитают злат перстень имуща,

востают скоро, егда зрят грядуща.

Аще бы той же багатства лишился,

толики чести не бы свободился.

Яве есть убо богатству честь быти,

не человеку, могшу то прижити.

Но прелесть си есть зело превелика,

богатство чтити, а не человека.

Честь есть достойна всечестно живущым,

а не богатства велика имущым.

Добродетелей Бог в людех смотряет,

а не богатства, еже исчезает

Зело воскоре. Помните Навана,

велика мужа людми глаголанна.

Иже, зане же нещедр проявися

Давыда нужде, от Бога убися.

Вся же богатства ему исчезоша,

ина владыку себе обретоша.

Богат бе и ов, иже разоряше

житницы ветхи, новы назидаше,

Да плоды нив си возможет вместите.

но яко благо не хоте творити

Нужды имевшым, на смерть осудися,

богатство иным людем оставися.

Во правду мощно то уподобити

Ионы тыкве, а не лучшо быти.

Ибо, яко та мал час утешаше

Иону, егда его засеняше,

Тако богатство кратко утешает,

потом воскоре из рук утекает.

Тыкву червь малый обнощь низвалил есть,

пророку печаль и скорбь сотворил есть.

Богатство паки скоро огнь снедает

и вода топит, и тать украдает,

И само время может оно тлити,

где-либо тщится кто е сохраните.

К тому багатство несытство раждает,

глад выну сердцу скупых наношает.

Яко же, аще кто слатину пита

будет, не может жажды утолите,

Но паче ону в гортани раждает,

тако, кто сердце злату прилагает,

Никогда может быта насыщенны,

аще ковчеги имать исполненны

Вся сия мало, ничто же довлеет,

рещи: Полно есть, скупец не умеет.

Везде он сети своя запущает,

да в дом богатства многша привлекает.

Мало яст, пиет, а не может спати,

нужда от должник слово приимати.

Оле, колики труды полагает,

егда ту беду к себе привлекает!

Но, истяжав ю, покой имать, мниши?

Выну печаль, скорбь у него узриши,

Никому верит, когождо боится,

кождо наветник ему быта мнится.

Жене не явит, и сын не познает,

когда он злато в землю закопает.

Потом вънезапу случится болети

и нечаянно ко гробу приспети.

Без вести злато в земли погибает,

а жену с чады нищы оставляет,

И сам небогат отходит предстати,

еже за талант слово Богу дати.

Тамо познает, яко зол раб бяше,

зле талант в земли Господень копаше,

И мзду приимет, юже заслужил есть,

обрящет постель, юже положил есть.

Аще же сия злато содевает,

никто несытно на не да зияет.

Течет ли оно, в сердце не кладите,

но в руце нищых прещедро дадите.

Они на небе злато полагают,

иде же несть тля, ни тати копают.

Аще ли кому то не подается,

яко свободен сый, да возсмеется.

В добродетели он да богатеет,

лучше всех богатств тыя да имеет.

Теми бо полну царствие небесно

во наследие от Бога известно.

А богачь злобный, не веете ли камо,

где еваггелский, кийждо пойдет тамо?

Есть ли кто купно богат и благ нравы,

приимет венец от Господа славы.

В пособство ему есть сребро и злато,

яко щедр бяше, приимет мзду за то.

Въскую горе богатым? правда глаголаше,

яко скорби их оком своим созерзаше,

Яко кроме вечных мук (в ня же вси въпадают,

иже неправедная богатства держают),

И зде многия муки обыкли страдати,

их же нищетствующий мужь не может знати.

Богатии во мыслех покоя не знают,

ядят со боязнию, с страхом почивают.

Аще суть и на пирех, не знают радости,

но воздыхают, ни же во меде сладости

Чювствуют, ни пищею добре утывают,

но от печалей, аки гладни, изсыхают.

На постелях мягчайших бдят, не могут спати,

мысль о богатствах мира не может им дати.

Сладше на земли тверде нищий почивает,

вкуснее хлеб с водою во сытость снедает.

И свободней есть нищий, ничим обвязася,

яко оков богатства несть восприял на ся.

Богатый же муж, златом в уме окованный,

честными веригами по сердцу связанный,

Ни знает того бедный, яко есть плененный

злату, а не господин, тому сотворенный,

Яко не держит злата, но златом держится,

обаче, аки свободь, о злате хвалится.

А лучша есть свобода, кроме злата драга,

мысль свободная к Богу в ней есть и преблага.

Яко же скоро вода уплывает,

тако богатство вмале исчезает.

Но вода может жажду утолити,

богатству несть леть хоти наполнити.

Паче, елико оно умножится,

толь желание его разширится.

Несть убо нужда онаго желати,

да бы несытства выну не страдати.

Бога искати паче подобает,

он желание въконец угашает.

Он есть источник, Его тщяйся пити,

имать во веки, жажды кроме, жити.

Им всяка скверна душевна чистится,

и огнь геенский от Него гасится.

Он вода жива выну пребывает,

душы пиющих оживотворяет.

Убо от Него вси потщимся пити,

да бы нам о Нем вечно в небе жити.

На вредная богатство свое истрошаяй,

есть истукан Ваалу златый устрояяй.

Богатство благих

Благий Бог и богатый в Своей благодати

благоволит и благим богатство даяти,

Да не вся, непщуем, злы богатыя быти

истяжатели златом во ад низходити.

Не злато богатыя люди погубляет,

но употребление, еже зло бывает.

Мнози же богатии златом ся спасоша,

иглино ухо с горбом велбудим пройдоша.

Тем Бог и днесь богатство добрым людем дает,

да тем небо от онех стяжано бывает.

Тщащеся бо нищыя люди утешати

милостинею, ведят сии рай стяжати.

Не отчайтеся убо, сущии богати,

возможно вам общество небесе прияти.

Токмо употребляйте, яко подобает,

вместо коней богатство в небо да бывает.

Весть убо оно во ад скоро злых возити,

но добрыя весть в небо люди возносити,

Чрез употребление по воли держащих

сия кони на гору или въниз правящих.

Богатство Бог отьемлет

Отец чадолюбивый, егда усмотряет,

яко сын к жене блудне в дому прилипает.

Тщится увещанием тоя отлучити

и казнию смиряет, да бы не грешити.

Аще же непослушлив сын тому явится,

в заточение жену блудну слати тщится.

Богатство жене блудне есть зело прилично,

нас, чада Бога жива, прелщает удобно.

К нему же егда сердца наша прилагаем.

блудодейство мыслное с онем содеваем.

То зря, Отец небесный разно увещает

скорбми, печалми, раны иногда нам дает.

Аще же непослушны тым ны обретает,

имения случайми от нас удаляет.

Да, тому не присушу, сердцы отлепимся,

к праву Жениху душ наших обратимся.

Богатство безгрешное

Возможно есть богатства без греха стяжати;

аще хощете знати, аз имам сказати.

Без греха стяжание, аще то взищеши

нелакомо и кроме зависти будеши,

И аще впред царствия взыщеши небесна,

потом мирских и яже блага суть телесна,

И аще без обиды инех та держиши,

ни упования ти в онех положиши;

К тому, аще ти радость малая бывает,

яко к твоему брегу злато приплывает;

Аще сердца ти к нему не прилагаеши,

ни любиши, но паче то презираеши,

А внегда ся приключит того отщетити,

аще веси во печаль нимало входити,

Но со Иовом святым сице глаголати:

Бог даде, слава Ему, что изволи взяти.

Наконец, аще мерно то употребиши,

нищыя по силе твоей ущедриши.

Не сотворит богатство сице споны тебе,

ко наследию жизни вечныя на небе.

Богатства чуждая

Яко же молния скоро угасает,

подобне богатство чуждо изчезает.

Яже ся хищением животна питают,

паче инех во гладе часто пребывают;

Тако чуждым богатством хотя богат быти,

никогда скудости си может исполнити.

Паче же своя губит, чужда бо снедает

вещь, и юже праведну в доме обретает.

Богатство и нищета

Богатый златом нимало вредится,

аще то добре им употребится.

Нищаго скудость ничто ублажает,

аще во блате грехов ся валяет.

Раздранна риза, хождение низко

не творит мужа Богу быти близко.

Глас отонченный, лице помраченно,

власы сплетенны несть дело спасенно.

Весь тленных укор не в ползу бывает,

аще под сими злоба обитает.

Паче вся во грех за притвор бывают,

лицемерие та ся называют.

А горе, Христос лицемером рече;

блюдися сея злобы, человече.

Мощно и нищу мужу, и богату

праведну быти пред Богом и святу.

Иосиф чистый и егда нищ бяше,

и во богатстве доброты являше.

Даниил пророк с отроки святыми

между народы живе поганскими.

Сердцем угоден Богу небесному

и делы службы цареви земному.

Мардохей, Есфир пребогата быста,

а смирением гордость победиста.

И мнози ини Богу угождают,

аще богатствы много обладают.

Тако чрез ухо иглы велбуд ходит,

тесную скважню горбатый проходит.

Богатства убо да винит никто же,

многим бо оно к небеси поможе.

Равне в нищете да не уповает

убогий, ибо не она спасает.

Но во обою доброта хвалится;

кто стяжет ону, на небо вселится.

Богатству сердца не прилагати

Река текущи, вещи уношает,

яже при брезе своем обретает.

Аще богатство течет человеку,

да непщует то быти себе реку,

Хотящу сердце его похитити

и в мори адстем вечно затопити.

Ни да приложит сердца си оному,

повинуяся пророку святому,

Рекшу: Богатство аще притекает,

сердца никто же си да прилагает.

Богатый

Земля, злата и сребра жилы держящая,

не обыче та быти плодоносящая.

Точне, иже богати сокровищем многим,

неплодии суть Богови и людем убогим.

Богатых обычай

Богатым есть обычай щедро раздаяти

сребро тым, иже ведят кощунства деяти,

И на суеты мира; а где подобает

в ползу нуждную дати, богачь скуп бывает.

Болезнь

Иулий кесарь с полки ратных в пути бяше

и в некоей хизине нощь спати хотяше,

Но услыша воина, излиха боляща

и без крова с иными на земли лежаща.

Изьиде из хизины, болну место дате,

сам без крова на поли с вой нощеваше.

О, царския милости! Кто не почюдится,

како воин кесарем любится и чтится!

Инок благоговейный многажды боляше

и то в посещение Божие вменяше.

Единою чрез лето ему прилучися

не болети, тем зело он опечалися

И глаголаше к Богу: Боже, сый в небеси,

вскую мя посетити ныне забыл еси?

Непобедима Твоя есть милость святая,

не престани болезнми мене посещая.

Готов аз еемь на раны за вся моя злобы,

точию исхити мя адовы утробы.

О, дивнаго инока, терпелива зело,

на болезни издавша тленное си тело,

Да душею здрав будет! Того подражати

всем верным подобает, любезно страдати

Вся болезни, паче же Господа просити,

да зде грехи изволит в милости казнити,

Яко же преблаженный Августин творяше,

иже ко щедру Богу сице вопияше:

Зде мя сецы и пали, а даждь вечно жити,

зде казни, а в будущь век изволи щадити.

Юноша некто плотию боляше,

здравия себе безмерно желаше.

Благоговейный мужь, то созерцая,

глагола ему сице, увещая:

Вещи полезны избыти хощеши,

егда здравия сице желаеши.

Аще бо еси злато, болезнь тебе

огнь к чищению угодный потребе.

Аще железо, сей огнь тя чищает,

ржы греховныя тебе свобождает.

Болезни врачевство

Врачевство есть болезни и печаль толится,

егда кто сболезнуяй кому проявится.

Паче, аще есть кому болезнь си сказати,

и ту есть нека сила ону утоляти.

Болшему уступити

Светилник, возжъженый, тму нощы просвещает;

в день, яко менший, солнцу действа уступает.

Тако менший во тайне может глаголаши,

в явлении же болшу должен уступати.

Боязнь

Бойся геены, та ся не кончает;

тартара бойся, сей не угасает.

Убойся и тмы, та не просветится;

тмы червей бойся, яко не мертвится.

Брань

Брани в мире откуду начало имеют?

Яко чюждая люди своити умеют.

Два местоимения: мое се, не твое,

кроволитие деют во мире многое.

Аще бы речения та в людех не быша,

не бы взаим мечами кровей си пролита.

Желание богатства брани возбуждает,

увы, главами многих то ся набывает.

Тварь, словесную сущу, меним зле за злато,

ничто бо оно, токмо есть желтое блато.

Хотяй во благостынях живот провождати

не может от противных брани не страдати.

Егда бо токмо в уме своем предлагает

благо жити, абие враг брань начинает.

Возбуждает ненависть в своих угодницех,

возгнетит пламень гнева во злых человецех.

Наченша правду в суде прилежно хранити

правды не хранящий тщатся изгоните.

Воздержание вземшу опилци стужают;

кротка мужа гордии люте обхуждают.

Правы глаголы мужу тщащуся вещати

лживии человеци тщатся спону дати.

Чисто слово из устен аще кто пущает,

зла сквернословцев спира тому ся ругает.

Имать кто щедру руку милостыню дати,

скупец лицемерием начнет клеветати.

Тако добродетели от злобы иныя

выну страждут наветы и досады злыя.

И во правду речеся, что хотящым жити

благочестно о Христе, нужда лежит быти

Терпящым гонение. Подобне и сие:

Житие человека есть искушение,

Или паче брань, ибо враг выну ратует,

токмо Господь на него нам да пособствует.

Брань молитвою крепка

Меч потребен на брани, но паче молитва,

тою бо преблаженно съвершается битва.

Иисус Наввин бися, Моисий же молися,

Амалик молитвою, не мечем, побися.

Егда бо Моисий руце к Богу воздезаше,

тогда Иисус враги крепко побеждаше;

Егда же Моисий руце име низпущенны,

тогда Амаликов полк бываше крепленны.

Мечь убо во руках всем годствует держати,

а молитву от сердца к Богу возсылати.

Брань душы с плотию

Плоть и дух в человеце всяком пребывают,

выну же друг на друга бранно наступают.

Имут своя воинства в пособие рати,

взаим тщатся победу над собою взяти.

Плоти похоть, чювствия, страсти помагают,

уди вси, мечтания и мысль работают.

Дух веру и надежду, и любовь имеет,

и вся добродетели, ими же брань деет

На похоти плотския и на оны воя,

а различна изводства видим того боя.

Но частее победа плоти ся случает,

а она пленники си во ад посылает

Князю тмы века сего в жестокия руки,

не в работу краткую, но на вечны муки.

И сама плоть такожде огнь имать страдати,

егда ю со душею имать Бог в ад дати.

Духови паки едва когда то случится,

яко плоть от воинства его победится;

Но святая победа онаго бывает,

ибо душе победный венец возлагает

И Царю небесному к горнему Сиону

во чести превелицей посылает ону,

Не в горце пленении и работе быти,

но во сладце пении и свободе жити,

Иде же в конце веков и плоть возвращенна

душе будет, во радость вечну водворенна.

Помози убо, Христе, духу на той брани

пособием Ти силным, преко плоти стани,

Да духа победою душами спасемся,

во царствие небесно в чести воведемся.

А плоти не попусти победы стяжати,

да никогда торжества сподобится знати.

Да раболепна будет си победителю,

яви нам милость сию, Христе Спасителю.

Мы благодарственная хощем нести Тебе,

и на земли живуще, даждь и в светлом небе.

Братство

Есть братство крове и братство Христово,

лучше же сие есть, нежели ово.

В братстве бо крове зла вражда бывает,

един другаго часто убивает,

Яко же Каин Авеля убил есть,

а Иакова Исав брать гонил есть;

И еже обще прилунится быти,

без при и гнева не могут делити.

Христово паки братство мирно зело,

своя общает друг другу весело.

Не кровь бо тленна сие сочетает,

но любовь вечна крепко содружает.

Бремя

Хотяй на гору взыти бремя низлагает

в юдоли, да без него удобь поступает.

Нам, правоверующым, комуждо есть требе

на вечну ити гору, яже есть на небе.

Имамы же велико греховное бремя,

еже днесь низложити угодное время,

Потом же не леть будет. Убо низложити

тщимся покаянием, да бы легко ити.

Низложим еще бремя и богатств, нам данных,

да внидем во град нищих, к Лазарю собранных.

Еже Бог бремя нести возлагает,

человек того да не отрицает,

имать бо быти в ползу обращенно,

что возложенно.

Божия воли благо есть слушати

и, что Он велит, прилежно делати,

а выше силы не будет то дело,

глаголю смело.

Не весть бо Господь бремене даяти,

его же не леть есть кому двизати,

а трудящимся помощь посылает

и мзду воздает.

Будете, яко бози

Враг человека в рай лукаво прелщаше:

Будете, яко бози, Евве глаголаше.

Ругася он в то время, но сам есть прелщенный,

ибо человек потом Бог есть сотворенный,

Не по существу убо, но по благодати,

и возможе демона ногами попрати.

И тако, в нем же хоте род наш посрамити,

тем же делом заслужи сам посмеян быти.

Буйство

Буй муж каплю щастия паче избирает,

нежели ума делву, ничто же бо знает.

Буйство грешных

Велие буйство грешных человеков,

яко всех Творца отпадают веков

И вдают себе в демонския сети,

иже в огнь влечет во веки горети.

О, буйства люта, яко себе сами

смертными грехов язвляют стрелами!

Всех же благ душы бедныя лишают,

егда от добра вечно отпадают.

О, безумия! Суще омовени

кровию Христа, предраго куплени,

Скверными грехи сами ся каляют

и за сласть мерзку душы си продают.

О, премудрости Христе небесная,

даруй нам знати делеса десная,

Шуих гонзати и всякаго буйства,

Тебе поддати, Боже, наша чювства.

Изми ны сетей и огня вечнаго,

сподоби жизни рая небеснаго.

Бытия степени

Различно человеци во мир изведени,

мнози бо суть нашего бытия степени.

Первый бе во Адаме, ни отец, ни мати

роди его, но сам Бог изволи создати.

Вторый степень — во Евве, та из мужа бяше

Богом, яко из отца, матере не знаше.

Третий — общий всем людем изводити дети,

всякому чаду отца и матерь имети.

Четвертый в Христе Бозе степень проявися,

точию из матере, без отца родися.

Разве сих возможно ли человеком быти?

Аз о силе Божией несмь силен судити.

Бегание из церкве

Брат некий на молитве уныло стояше

и во время пения из церкве бегаше,

За что от началника много наказася,

но нимало исправлен быти показася.

Авва рече братии молитву творити,

еже бы уныние брату отложите.

По дву днию молитвы во церкви стояху

и мала ефиопа пришедша видяху,

Иже за воскрилие риз брата влечаше

из храма, а он по нем неспорно идяше.

Изъшедшу же из храма вси ся удивиша

и паки о брате си Господа молиша.

Егда же вси из храма купно изьидоша,

брата празно ходяща того обретоша.

Тогда началник брата жезлом си побил есть.

а зане же смирися. Бог й ущедрил есть.

Даде ему охотность во церкви стояти,

не к тому соборныя милитвы лишати.

Бегати

Бегаем проказою мужа поврежденна,

паче бегати нужда злонравием тленна.

Проказа бо токмо плоть обыче вредити,

а злонравие душу весть въконец губити.

Бегати злых

Слон козла смрада ради прескоро гонзает,

муж благий злонравнаго тако да бегает.

Бедство

Бедство: конем бегати, чрез море плавати,

под мучителем лютым живот провождати.

Бедство в пути

Исраиль ветхий, егда исхождаше

с Египта в Сион, препинаем бяше

множеством градов, твердо остененных,

вооруженных.

К тому и земля народ поглощаше,

иже в тех странах в то время живяше;

исполинове зело страшны бяху,

гибель прещаху.

Что бедным людем видеся творити?

Точию слезы горкия точити,

найпаче бывшым без утвержения

их спасения.

Точне новому слезы подобают,

яко отвсюду врази окружают:

демон, мир и плоть велиции зело

настоят смело.

А мы помощи недостойни свыше,

яко гневаем Господа излише,

но милость Его грешныя милует,

помощь готует.

Беды нудят ко Богу

Егда Авесолом отца прогневаше,

ко умолению средствия искаше.

Посла к Иоаву, вожду полков царских

и многих общнику тайн государских.

Моля, да приидет к нему и поможет

здравым си советом, поелику может.

Он же небрег молбы, ити не хотяше

и тем царска сына зело огорчаше.

Что же Авесолом? Рабы посылает

и севбы на нивах его сожигает.

Тако понужден быв. ко Авесолому

Иоав прииде из своего дому.

Совет сотворил есть, како благодати

от отца воможно сыну восприяти.

Нечто подобное и Дух Святый деет,

егда милостию ничто в нас успеет.

Обыче бо казни тяжки насылати,

да тыя возмогут к нему убеждати.

Елма убо кому беды досаждают

по согрешении, к Богу понуждают.

Да бы обратился; убо требъ знати,

яко во печалях к Богу притекати

Зело есть полезно, не унылу быти,

но покаяние по гресех творити.

Беды добрых

Вскую обыче Господь добрым попущати

людем беды лютыя во мире страдати?

Да подобии образу будут Сына Его.

беды страдавша во дни странствия Своего.

Беды и скорби благим благо деют,

аще точию терпети умеют.

Не того ради скорбь я угнетает,

да озлобленны оны содевает,

Но да благость их будет проявленна.

яже внутрь сердец бяше утаенна.

Грозды точило елма согнетает,

сладкое вино из них изтекает.

Точне маслины, егда ся стаскают.

сладостный елей из себе пущают.

Класы пшеницы обычно есть бити

или топтати, да бы отлучити

Зерно от плевел, иначе во класе

согнити имать в неколиком часе.

Огнь палящь злато и сребро чищает,

прание платно бело содевает.

Подобне беды, благим напущенны,

благости онех творят проявленны,

И еже худо внутрь их обретают,

то от благости добре отлучают.

Добро есть добрым беды своя знати,

да бы безбедно в небо шествовати.

Тех же числом осмь мудрии считают,

яже подробну сице полагают.

Беда первая — вина первородна,

съпадшая на ны от отца всеродна,

В нем же, согрешшем, и мы согрешихом;

не ядше плода в рай, винны быхом.

Яко с Адамля семене исходим,

праотча греха общницы ся родим.

Вторая беда греха делом суща,

душу в погибе вечную ведуща.

Его же никто может избежати,

кроме Божия живущ благодати.

Третия беда — немощь превелика,

обдержащая всяка человека.

Ею же к злобе приклонни бываем,

неудобно же ко благости встаем.

Четвертая есть беда превелики

нищеты мира, яже человеки

Благия часто люте озлобляет,

егда и нуждных житию лишает.

Пятая беда — от злых гонения,

лишающаго нас утешения.

Еже той может удобно страдати,

кому изволит Господь помощь дати.

Шестая беда есть искушение

врага проклята на злотворение.

Ему же может той противен быти,

кто тщится с Богом лета своя жити.

Седмая беда есть грядуща века

вечна погибель грешна человека.

Ея же муж добр удобь избегает,

яко, ту помня, злобы отбегает.

Осмая беда скорбна, но спасенна —

епитимия, за грех возложенна,

Юже кто чистым сердцем совершает,

беду на радость вечну изменяет.

Иаков святый велит нам страдати

беды всякия, слезити, рыдати.

Рыдати, беды вся познавающе,

им же подлежим, грешни люди суще.

Грех бо виновен от начала века

бед всех, на грешна сущих человека.

Второе — беду вины обрыдати

нам подобает и казнь налагати,

Да не изволит Бог за ню казнити,

но кающымъся милость си явити.

Третие — в слезах должно пребывати,

во терпении вся скорби страдати,

Яже в жизни сей нам ся приключают,

судбами Бога посланы бывают.

Четвертое — нам хранити есть требе

вечныя муки, разсуждати в себе,

Покаянием тыя искупати

зде, да бы тамо онех не страдати.

Пятое — беды вражих искушений

терпети нужда и лютых гонений,

За ня же в небе мзда вечна готова

от Христа Бога, Бога Отца Слова.

Шестое — требе чужды беды знати,

яко судом си соболезновати.

Се бо небесну Отцу зело годе,

таковы селит во вечной породе.

Седмое — труды жизни сея требе

непрестанными стати в светлом небе,

Трудящым бо ся покой тамо будет

и радость, яже во веки пребудет.

Наконец, нужда от бед воздыхати

странствия сего к небесной полате,

В жилище вечно, в очество святое:

О, даждь нам, Христе, получити тое.

Не всегда Господь от бед избавляет.

егда праведник молбы возсылает.

Хощете вину тайны сея знати.

подобие се изволте читати.

Яко нудужный, егда воспалится

внутрь себе огнем и просити тщится.

Да бы хладныя дано воды пити,

еже бы огнь той в себе утолити,

Аще зря врача, тощно возглашает:

Зри, яко огнь мя всего сожигает;

Виждь, зело стражду, ни могу терпети,

прииде время от жажды умрети.

Се дух исходит, уже умираю;

даждь воды мало, слезно умоляю.

Доколе имам толь люте страдати?

Ты не хощеши мя помиловати.

Услыши, молю. И подобне многа

вещает, воды прося ради Бога.

Тогда врачь мудрый ему отвещает:

Вем, прелюбезне, когда подобает

Воды ти дати. Еще да терпеши;

милосердия еще не узриши,

Ибо та милость лютость есть велика,

в гроб реющая болна человека.

И твоя воля противна есть тебе:

вреднаго хощет, претерпети требе.

Тако Господь Бог. вся съвершенно знаяй,

меру милости Своей полагаяй,

Иногда гласа не хощет внушити.

аще и тощно нудимся просити.

Весть, что полезно и что ны вреждает;

ово дарует, сие отрицает.

Иногда паки, да бы искусити,

или в теплшыя молбы возбудити.

Да. яко в огни, мужа изваренна

в чистоте, в правде явит совершенна.

Апостол, егда оному стужаше

пакостник плоти. Господа прошаше

Трикраты тощно, да изволит дата,

еже не к тому пакости страдати,

Не бысть услышан, молба отречеся.

Благодать Моя довле ти, речеся.

Сила ся Моя в немощи свершает,

Бог рекл, терпети тебе подобает.

Тако и иным весть Бог отрицати

прошения их и не подаяти,

Чесого молят, а вскую. Сам знает.

То есть известно: добра нам желает.

Ты, читателю, да ся не сумниши,

егда молбу ти не вняту узриши.

Подчини твою волю воли Бога,

и дастъся тебе свыше радость многа.

Даст ти на земли, еже в ползу требе,

и жизнь вечную во пресветлом небе.

Хотящу с враги подвиг совершати

многия беды нужда есть страдати

В хладе и в гладе, в трудех требе быти,

с дерзновением на брань исходити.

Точне праведным беды подобают

и скорби многи, елма совершают

Брань духовную, аще венцы славы

хотят красити верх своея главы.

В

Варавва

Иудеи излиха Бога прогневаша,

егда себе Варавву, не Христа избраша.

Подобне и днесь оным тии согрешают,

иже с грехом, не с Богом жити избирают.

О безумия страшна! Ради малы сласти

не усумневаются от Бога отпасти!

Оле буйства велика! За тленно богатство

Бога оставляют и небесное царство!

Оле изумления! Тварь предпочитают

Творцу, егда сердца си тленным прилепляют!

Вдовство

Закон естества вдову поучает,

да ся от сластей всяких удаляет;

А в благодати мертва та зовется

вдовица, яже сластно питается.

Сласть бо грех родит, иже умерщвляет

душу, тако смерть душевна бывает.

Вредно есть вдове много раб имети,

часто на тыя весело смотрети.

Найпаче, иже красно устроени,

брад не имуще, власы утрефлени.

Лица их стрелы во сердце пущают,

неопасную вдову уязвляют,

И девы красны, яже живут с нею,

дух красотою летят ея своею.

Елма бо оны женихов желают,

между собою дерзостно играют.

О тех их песни, о тех всяко слово,

а вдовы сердце любити готово.

Срам возбраняет любве изъявляти,

а в персех пламень — нужда есть страдати.

Аще девицу в супружество дает,

сама во тайне месте воздыхает.

Не реку, плачет, тако бо явится

слезами, еже во сердци таится.

Глаголет вдова: Мужа не желаю,

до смерти тако уже пребываю.

Но не есть твердо сие ея слово,

сердце жениха любити готово.

Славится токмо, да во чести будет,

но сей цвет славы недолго пребудет.

Егда бо жених лепый проявится,

абие ему в область поручится.

Повержет вдовство, волит быти мати,

неже едина в ложи почивати.

Сия о юных вдовах провещаю,

о старых ино слово помышляю.

Обаче может и во юных быти.

яже до смерти хощет в вдовстве жити.

Сицевой велми блюстися есть требе,

зазора в людех да не стяжет себе.

Едва бо не вси обыкли зазрети

хотящей выну без мужа седети.

Что яст и пиет, камо, како ходит,

зрят, и с коими лицы дружбу водит.

Мало от чина, то вси осуждают,

и что не бяше, миру оглашают.

Тем же, о вдово, всесохранна буди

от дел таковых, яже блазнят люди.

Не имей раба красна пред тобою,

ни в красну ризу одежди плоть твою.

В доме ти пиров да не сотвориши

и на чуждыя да не участиши.

Гусли ушию да не услаждают,

очы на землю твои да смотряют.

Ягодиц твоих да не румяниши,

бровей не черни, лица не белиши, —

Вся бо сия суть страсти буждение,

наводящая всех осуждение.

Аще начнеши вина довле пити,

трудно можеши чистоту хранити.

Вино бо мужы святыя прелщает

и девы в жены удобь претворяет.

Трезво, смиренно буди тебе жити,

аще хощеши в чистоте пребыти.

Блуднаго весма опасися ока,

да кроме всяка живеши порока.

Молитва тебе выну подобает

и дело благо, еже рука знает.

Жилище твое яко церковь буди,

мало да видят по стогнам тя люди.

Честныя вдовы тя да окружают,

девы чистыя ти да работают.

Да гнило слово от них не слышится,

но слава Богу всеми да гласится.

Тако в целости вдовство сохраниши,

за чистоту мзду в небе получиши

И у человек добре прослывеши,

правая вдова реченна будеши.

Велий кто

Кто есть велий во мире, хощете ли знати?

Иже выше суетствий мирских весть стояти

Веление противное

Бог от Евреов жертвы иногда хотяше,

а Фараон я плинфы делати нуждаше.

И днесь Господь дел благих от верных желает,

а демон на лукава делеса прелщает.

За благая дела Бог мзду готует благу,

а за злая злу возмут, иже раби врагу.

Избери убо тебе. еже сердцу годе,

или во аде быти. ли в горней породе.

Вервь Божия

Неудобь треплетена вервь ся растерзает,

Екклисиаст во книзе нам своей вещает.

Тако твердою Господь вервию ны к Себе

на всяко влечет время, да будем на небе:

Любовию и срамом, купно же и страхом.

Вервь любве суть благая, яже восприяхом

И приемлем по вся дни от Его десницы,

недостойни тех суще, грешни человеци.

Вервию влечет срама, егда представляет

образы нам святых муж, незрящих срамляет.

Вервь страха прилагает, казнию прещая,

иногда временныя язвы налагая.

Кто ся сею вервию не привлечет к Богу,

вовлечется иною во муку премногу.

Вервь демонская

Вервь треплетену враг на ны готует,

ею же пленив, верныя связует.

Первая — похоть очес ны хищает,

второе — плоти похоть уловляет,

Третия — гордость живота ны ловит:

сими похитив, враг грешники томит.

Но аще кто я хощет растерзати,

се орудия имам ему дата.

Очию похоть удобь растерзает,

кто в милостыню злато си раздает.

Похоть же плоти постом сокрушится,

тако бо буйство ея укротится.

Гордость живота молитва святая

вконец истребит, сущи смиренная.

Веселие духовное

Миролюбив муж радости не знает,

яже духовных сердца исполняет;

непщует выну в печали ты быти,

присно тужити.

Но раби Бога живаго велие

имут внутрь себе в сердцах веселие,

еже добрая совесть им раждает

и обещает

Блаженство вечно, к тому сравнения

ни мала имут мира веселия,

яко же чеснок манне не равнится,

ни подобится.

Исрайлтяне его же желаху,

и лука точне; о манне стужаху.

Смрадная пища радость изъявляет,

юже мир знает.

Ея же паки не весть он, чрез манну

ведите быти прообразованну.

От тоя аще кто козмик вкушает,

мир презирает.

Та не внешними чувствы объемлется,

но в сосуд душы во ум приемлется.

Не от струй твари, но из моря Бога

течет премнога.

Мирская радость бедами истлится,

духовная же теми не малится.

Паче во скорбех та ся разширяет,

Бог умножает.

Пир Валтасаров в печаль обратися,

егда Суд пишем на стене явися.

Царь возмутися, вси ся ужасоша,

в своя текоша.

Иродов точне приде в смущение

за Иоанна главы сечение.

Вси мира пири тако ся кончают,

в плач ся вращают.

Не тако умный в душах пир бывает,

той бо на всяк час выше возрастает

и не престает даже въврасти в неба,

в дом жизни хлеба.

Веселие есть истинное, еже о Бозе

Мир юдоль плача древле наречеся,

яко никогда радость обретеся

в нем постоянна; аще бо явится,

мало светится,

Яко вся зело воскоре преходят,

яже зде радость временную родят.

По ней же паки печаль ся вращает,

люте стужает.

Аггел Товии стару глаголаше:

Да водворится радость в сердце ваше.

Он же отвеща, прием слова силу,

ко Рафаилу:

Кая ми радость будет, в тме седящу,

света небесна нимало видящу?

Тако несть радость в тме греховней сущим,

зол путь текущим.

Токмо сущии в свете благодати

мощни суть радость истинную знати,

яже о Бозе в дуты ся вселяет

и просвещает.

Есть же о Бозе, тогда веселие

постоянное и зело велие,

егда кто умом си в Бозе вселится,

тем веселится.

Яко имамы Отца всебогата,

всесилна, мудра, прещедра, всесвята,

Иже нас деля сущая создал есть,

в сыны призвал есть.

Есть же повсюду, мысли наша знает,

видит вся нужды и молбы внушает.

Врач есть недужным, скорбным Избавитель,

всем Покровитель,

Всеистинный же по делом Воздатель,

даров небесных Безмезднодаятель.

О Нем аще кто чисто веселится,

той не прелстится.

Веселие есть истинное Христос

Радость Исраиль ветхий имеяше,

егда кто от враг его свобождаше,

от них же часто в пленении бяше,

люте страдаше.

Вящшая нову радость подобает

о Христе Бозе, яко Он спасает

от враг душевных, от вселюта ада

Адамля чада.

Иисус Христос, должни мы писати

на сердцах наших и усты вещати

выну всечестно Имя пресвятое

и всесладкое.

В Нем бо держится дело строения

человеческа рода спасения,

еже во триех делесех бывает,

все совершает:

В искуплении и оправдании,

славы вечныя во доровании,

ими же что нам хоте Христос дата,

изволь читати.

Искуплением свободил из ада,

из рук демонских и смертнаго яда,

иже есть грех злый, душы повреждаяй

и убиваяй.

Оправданием Отцу примирил есть,

из врагов сыны Ему сотворил есть

и наследники славы содевает,

в небо вселяет.

Прославлением имать то нам дати,

еже в небеси вечно царствовати,

по скорбех мирских вся блага прията,

в них вечновати.

Сия Христос Бог всещедро нам деет,

тем имя Его кийждо да говеет;

услышав оно, да возвеселится

и поклонится.

Веселие мира есть суета

Церковник мудрый егда царствоваше,

во всяких вещех богат зело бяше.

Сам он глаголет: Сотворих ограды

и винограды.

Насадих древа плода всероднаго,

вкусу гортани зело угоднаго;

купели создах, мнози раби быша,

иже служиша.

Скоты и стада стяжах пребогата,

множество сребра и доволство злата,

имений много, собрах сладкопевцы

и виночерпцы.

Стяжах премудрость, имех вся велия,

не браних сердцу всяка веселия,

и очи мои что-либо хотеша,

свободно зреша.

Но по сих зрите, что он же вещает:

вся та суету светло нарицает;

и не без правды, скоро бо преходят,

а грех мног родят.

Долго ли вино гортань услаждает?

А коль бед много лютых содевает:

свар и убийство от того исходит,

то болезнь родит.

Кая есть радость лики составляти,

аки без ума скакати, плясати?

Безчинно действо верным непотребно,

душам бо вредно.

Что о богатстве, кая полза с него?

Выну печалит державца своего,

а неискусна душу погубляет,

во ад вселяет.

Что честь велия может ползовати?

Скорби, печали весть та умножати,

отъемлет покой, а ум надымает,

гордость раждает.

Не могут долго веселити сия;

да ищет кож до радости иныя,

яже духовне ум возвеселяет,

вечна бывает.

Ветхий человек

Что есть ветхий человек, знати подобает,

кто-либо извлещися онаго желает.

Есть порок, иже оста от греха перваго,

и налог приклоняли к творению злаго,

С ними же похоть плоти досадная зело,

палящая злолюте рода наша тело.

Вечеря небесная

Вечеря небесная будет превелика,

юже строит рабом Си Царь всех и Владыка.

В Священном Писании пир есть похваленный,

иже от Артаксерккса царя устроенный

На неколико время, богато и славно;

но той яко сень прейде, яко всем есть явно,

И царь, и пировници древле упомроша,

и пищи вся сладкия въмале исчесоша.

Вечеря же небесна во веки пребудет,

донеле же Бог небом обладати будет,

И пировници ея никогда окончатся,

и сладости пределы никим положатся.

Та вечеря — блаженство небесныя хвалы,

есть уготованнная от Господа славы,

Да по трудех временных вечно покоимся,

по гладе сего мира довле насытимся.

Различныя же пищы тамо поставятся,

всегда ядомы суще никогда снедятся.

Тыя же духовныя, ибо в светлом небе

снедей, плоти приличных, никому же требе.

Первая пища святым тамо представится:

здравие без немощи, ибо не вредится

То вечно в человецех, но в крепости будет.

Тоя пищы желати кто от нас забудет?

Вторая пища: юность тамо без старости,

яже в мире виновна бывает слабости.

Вси во Христове веце имут в небе быти,

ни на степень к старости тленней поступити;

Иже в мире един час точию пожиша,

или чрез тысящу лет дни своя числиша,

Равни тамо предстанут во красней юности

и точни имут быти чрез весь день вечности.

Третия пища тамо: сытость без остуды

угодником Господним будет за их труды.

Тамо всякая душа довле насытится,

егда слава Господня от нея узрится.

Четвертая снедь тамо: красота вечная,

никоего порока в себе имущая;

Тамо бо праведници светло возсияют,

яко же по стеблию искры возблистают.

Паче же, яко солнце имут светли быти,

тма никогда же онех имать помрачити.

Пятая пища будет плоти безстрастие

и тояжде от силы душы безсмертие,

Ибо ничто же имать телу досадити,

или, е изменивше, к смерти приближити,

Ей же тамо несть место, но во слезном аде,

живот же безконечный во небесном граде.

Шестое будет брашно без скудости полность,

внутрь же и от вне благих всяческих доволность,

Ибо что-либо душе и телу есть требе,

всего изобилие будет в светлом небе.

Седмое тамо брашно: мирно сожитие

без разгласил всяка, во Бозе бытие.

Осмое: безбоязнство, ибо не боится

никто тамо, да вечных благ не отщетится.

Никто бо тамо крадет, никто разбивает,

вечный покой всех сердца превозвеселяет.

Девятая снедь в небе: знание свершенно,

ему же невеждество не будет смешенно.

Всяческая святии имут тамо знати,

яже потребна будут; Бог хощет являти.

Десятая снедь тамо слава имать быти,

ея же безславие не будет мрачити.

Первая на десять снедь: сладко веселие,

еже имать во веки быти превелие,

А печаль ни едина может препинати;

тамо ей места Господь не изволи дати.

Вторая на десять снедь: свобода вечная.

О сих радость родится всем безконечная.

Общая же та брашна святым имут быти,

о особных немощно есть мне известити.

Искуством она самем вам знати желаю,

к сим присно воздыхати точно увещати.

Сказую то известно, яко глад страдати

имать вечный, кто пир сей весть пренебрегати.

Неищущии пира сего имут в аде

в неутолном, яко пси алчни, быти гладе.

Неищущии пира сего имут в аде

в неутолном, яко пси алчни, быти гладе.

Взаим даяние

Домад рече: Кто другу сребро взаим дает,

друга и сребро свое купно погубляет.

Се негли того ради, яко гнев ся родит,

егда сребро си взяти давый к нему ходит.

Паче же множицею зла вражда бывает,

и во наших временех сие ся случает.

Видение

Человек та зрит, яже суть явленна;

Бог же вся видит, яже утаенна.

Видение Бога

О видении Бога учитель великий

Августин свят вопросы деет неколики,

И сам отвещания кратка на ня дает,

да бы нам разумети, сице разсуждает:

Аще мя вопросиши, леть ли Бога зрети?

отвещаю, яко леть есть нам И смотрети.

Речеши: Откуду вем? Аз ти отвещаю:

Чистии сердцем узрят Бога, обретаю.

Како убо невидим Бог Ся нарицает?

По естеству Своему невидим бывает.

Может же, егда хощет, Сам виденны быти.

и кому, когда, како хощет Ся явити.

Речеши: Аще токмо Бога соглядают,

иже чистоту сердца целу соблюдают,

Како убо нечестный Каин Его зряше,

егда Богом обличен о убийстве бяше?

Знай, яко не вси видят, иже глас внушают,

мнози точию в гласе Бога познавают.

Яко, иже глас, Христу реченный, слышаша:

Прославих и прославлю, а Бога не зреша.

Вопросиши и паки: Аще мощно, како

Сам в Себе есть. Онаго видети нам тако?

Веждь, яко сыном Его то есть обещанно,

ибо явлшуся точни будем, есть сказанно.

Вопросиши: Откуду можем И видети?

Отнюду же аггел и могут Его зрети,

Им же мы равни будем и уподобимся,

егда в царствии Его быти сподобимся.

Вопросиши ли: Како невидим бывает,

поне же в неприступном свете обитает?

Невидим естественне, но может зрим быти,

егда кому изволит лице Си явити.

Но никим никогда же тако зрим бывает,

да Ся зрением чиим весь определяет;

Но воеже бы Его достойне нам зрети,

вся зла приключения нужда есть терпети,

За злых бо страдание хощет Бог воздати

нам по заслугам, лице Его созерцати.

Вина

Един от многих закон кто пренебрегает,

всех законов Дателя люте оскорбляет.

Тако в едином винный всех винен судится

и по вине праведно судящим казнится.

Вино

Полезно есть вино, но греха блюдися:

множеством чашь того ума не лишися.

Сладко оно в гортань обыче входити,

но адскую горесть весть в души родити.

Вино сердце веселит, но и упояет,

тем же мерность в питии его да бывает.

Андрокид кровь землену вино нарицает,

ин же мудрец кровь нищих оно прозывает,

Убо кровь нищих тии людей испивают,

иже в мнозе пиянстве век свой провождают.

Излишняя светлость очы помрачает;

излишество вина здравие вреждает.

Мернопитое вино в здравие бывает;

излише приятое излише вреждает.

Аще вина во меру кто употребляет,

то сердце утвержает и возвеселяет.

Тожде аще безъмерно ким употребится,

во яд плоти и душы вредный претворится.

Тако еже естеством полезно бывает,

наша злоба то вредно люте содевает.

Не в вине убо вина есть вреда толика:

безвинно вино, в нас есть вина превелика.

Лоза грозды сладкия обыче раждати,

их же кровию тела леть есть услаждати.

Но душу сладящее вино источает.

Иже Лоза истинна Сам Ся нарицает.

Христос Господь: от Него небо веселится

и весь собор праведных Онем упоится.

Егда на пир небесный будут воведени

и пищею вечною обилно почтени.

О блажен, иже того пира сподобится!

Радостию без конца той возвеселится.

Вино хвалити или хулити — не знаю,

яко в оном и ползу, и вред созерцаю.

Полезно силам плоти, но вредныя страсти

возбуждает силою свойственныя сласти.

Обаче дам суд сицев: добро мало пити,

тако бо здраво творит, а не весть вредити.

Сей Павел Тимофею здравый совет дате,

той же совет да хранит достоинство ваше.

Вино новое

Новое вино повнегда вливают

в мехи ветхия, меси ся терзают.

Новое вино есть Христос Спаситель,

в Евхаристии верных Упоитель.

Ветсии меси суть в злобе сущии,

обаче к Тайнам Святым грядущий.

В сицевы мехи аще ся вливает

вино се ново, весма я терзает.

Первый во образ Иуда дадеся,

иже, пив оно, полма расторжеся.

В недостоинстве иже е приемлют,

не в жизнь вечную, но в суд и в смерть вземлют.

Власть

Всякая власть от Бога, Он бо благи дает

властелины, а злыя за грех попущает.

Весма убо должно есть власти почитати

и в благих велениих им не пререкати.

Противник бо сый власти Богу ся противит,

за что Господь отмститель, иже благих живит.

Бог власть дарует народы правящым,

златыя скиптры в десницах держащым.

Тем же я должни вси суть почитати,

гласа слушати.

Властелин глава, прочий же люди

суть во гражданстве, яко в теле уди.

Глава все тело, власть люд управляет

и промышляет.

Тем же на царех венци суть златии,

яко из чинов они изъятии,

в них же камени честнии блистают,

то знаменают,

Яко ко чести припряжеся бремя,

отъемлющее все покоя время.

Началником си весь народ стужает,

суда протает.

Вси я говеют, их же долг хранити,

еже когождо по правде судити,

на лица силных и сродных не зрети,

равн суд имети.

Еще блюстися оным подобает,

да в сердца гордость никогда вхождает,

та бо гнев Божий наводит жестокий

на сан высокий.

Навходоносор древле горд явися,

о Вавилоне в сердцы си хвалися,

яко прекрасен и крепок наздаше,

но зле страдаше,

Ибо его же забыл Бога бяше,

от того раба казни суд прияше,

яко есть нужно ему в поле ити

и зверю быти

Различновидну, и траву с скотами,

из нив прозябшу, терзати зубами.

Едва пророк суд сконча изнесенный,

бысть совершенный,

Ибо царь в дивна зверя преложися,

избежа в поле. Кто не устрашися?

И нача скотен между скоты быти,

на поли жити.

Оле чюдесе! Им же Бог смирил есть

гордаго царя, нискоро простил есть!

Ибо седмицу лет тако живяше,

зверь пребываше.

Даже на конец со умом собрася,

и винен быти Вышнему познася.

Отверг же гордость из сердца, смирися,

слезно молися.

Тогда Бог скорый, еже миловати,

изволи ему милость Свою дати.

Вид привратил есть; людие познаша,

на престол взяша.

Сие есть должно умом разсуждати,

ему же дал Бог миром обладати,

и смирение усердно любити,

тем Бога чтити.

Елико бо кто сам себе смиряет,

толико Господь его возвыжшает

и не престанет, даже и на небе

представит Себе,

Еже нетленным венцем увенчати,

за смирение вечную честь дати,

во обителех светлых водворити,

во веки жити.

Внушение

Многих Бог не внушает по их хотению,

да внушит глас их о том, что есть к спасению.

Тогда же не гнев им Свой, но милость являет,

ибо, добра им хотя, злых не попущает.

Гнев паче изъявил бы, аще то подал бы,

его же на зло свое некто возжелал бы.

Тако врачь в фебре сущым воды не подает,

зная вредну ту быти, а он благ желает.

Возвращение чуждых

От праведных имений милостыня честна,

та приходит во руце Господа небесна.

Та грехи чистит, душу смерти избавляет

и в царствие небесно по смерти вселяет.

А еже неправедне сребро соберется,

обижденным конечно то да воздается.

А тым несущым, сродству то отдано буди,

разве аще ближнии изведутся люди.

Тогда Церкви и нищым мощно раздаяти,

от маммоны неправды други си стяжати.

Иначе милостыня неприятна Богу

и пути не устроит к небесну чертогу.

В первых убо, аще что кому похищенно,

обижденному буди весма возвращенно.

Паки, еже лихвою богатство собранно,

обижденным да будет и сие отданно.

Еще, что от подданных неправо вземлется

нуждею владеющих, им да воздается.

К сим, святопроданием что будет стяжано,

святокупцем да будет некосно отдано.

Да ся оба каета за грех той лукавый,

и купивый святая, и та же продавый.

Наконец, краденая вещ да возвратится,

могущым бо отдати грех не оставится.

Сицева имения и точная многа

не взятна в милостыню от праведна Бога,

Разве аще никако мощно возвратити,

или возвращением беда имать быти.

Тогда духовна мужа совет восприяти

полезно и по тому сребро расточати.

Не о сребре же токмо сие знати требе,

о всех злых стяжаниих всяк да мыслит себе.

Ризы, скоты и села нужда возвращати,

и все ино, что чюждо может ся назвати.

Иначе неподобно есть спасенну быти,

аще кто не воздает, могий возвратити.

Воздаяние

Кто-либо в дом свой Христа Господа прияше,

комуждо возмездие благое творяше.

На браце в Галилейстей Кане егда был есть

в скудости вина, воду в вино претворил есть.

Симоном фарисеем елма учредися,

тогда грешница от грех многих свободися.

Егда в дому Закхея мытаря виташе,

спасение домови его всему даше.

Паки у фарисея в дому возлежал есть,

водный труд имевшему здравие подал есть.

Матфей же Христа Бога брашны учредил есть,

а Господь апостола его сотворил есть.

У Марфы и Марии Христос Бог витал есть,

брату их умершему живот даровал есть.

В дом Петров елма вниде, тещу уздравил есть,

весма везде благая людем Он творил есть.

Тако и нам достоит благая деяти,

во воздаянии благ Христа подражати.

Христианско есть дело досады страдати,

а злобы никако же за зло воздаяти,

Но паче побеждати благостию злое,

дело то воистинну есть божественное.

Зло паки воздаяти за дела благая,

воистинну есть сия злоба демонская.

Егда же кто за добро добра содевает,

человеческо дело тогда совершает,

А егда кто зло за зло тщится сотворити,

лютосверепу зверю хощет точен быти.

Ты, человече, хоти лучшее избрати,

еже за зло благое людем воздаяти,

Да будеши подобен Богу всещедрому,

не людем, ни демону, ни зверю лютому.

Воздаяние злое

Василий святый, хотя честь воздати

Иулиану, умысли послати

Хлебы ячменны три, яже имяше

и сам во пищу плоти приимаше.

Посла усердно, чая благодати,

но злый отступник зле тщася воздати,

Посла бо за то Василию сена,

рек: Се за ячмень буди ти премена.

Скотску ты пищу ячмень дал нам еси,

скотску и от нас сено в мзду отнеси.

Святый же отец сице отвещаше:

Что сами ямы, то бысть тебе наше

Приношение; ты же воздаеши

весма снедь скотску, из нас ся смееши.

Подобне мир сей обыче творити,

за дары честны худыми дарити.

Кто ему службу и дружбу являет,

многажды вражду во мзду познавает.

Или тленныя вещи, точны сену,

миролюбивым дает во замену.

Не тако Господь Бог нам содевает,

за дары худы благия воздает;

За временныя — вечныя на небе,

убо даяти дары Ему требе.

Не хощет Он их, но нам есть полезно,

сице бо стяжем царствие небесно.

Не хощет даров Бог, но воли благи,

та с чистым сердцем дар Ему предрагий.

Тем же две цате нищыя вдовицы

Христос приял есть над многи златницы.

Усердство ея изволил прияти,

паче богатых ей похвалу дати.

Воздержание

Двоицу древес в рай насадил есть

Бог изряднейших, егда мир творил есть:

Едино жизни, веждества другое,

что в мире благо или что есть злое.

От сего ясти древа возбранил есть

прародителем, от ова пустил есть.

Враг же лукавый преко совещаше,

от возбраненна ясти увещаше.

Вкусиша убо и смерть заслужиша,

вся в себе чада своя умертвиша.

Ибо за грех их весь род осудися,

иже во чреслех Адамлих таися.

И в сей юдоли равне усмотряю

двоицу древес, юже извещаю:

Едино жизни, смерти же другое.

Воздержание есть древо святое,

К нему же Господь вся ны приглашает,

яко то ползу многу содевает,

Душу бо от ков врага соблюдает,

ум светло чистит, живот продолжает,

Здравие хранит, в нищету не вводит,

заслуги многи пред Господем родит,

И тако жизни сподобляет вечны,

купно радости в небе безконечны.

Второе древо есть пресыщение,

к нему же демон деет глашение,

Желая злых нам, все бо родит злое

людем грешным то древо проклятое.

Ум помрачает, болезни раждает

и нуждных жизни имений лишает.

На всяку злобу приводит дерзати,

душу лишает жизни благодати.

Врагу пленит ю, тако вечно губит.

Кто убо мудрый древо то возлюбит?

Аз увещаю пост святый хранити,

от пищ и питий превоздержну быти,

Не множеством пищ плоть сластных питати,

Не многим вином стомах исполняти.

Здравия мати есть воздержание;

вина болезней — чрева наткание.

Без мяс и вина похоть угасает,

вино и мясо ону возжигает.

Воздержание от брашн малу ползу деет,

аще друга своего снедати кто смеет.

Воздержанием тонку плоть свою имети,

душею же надменно пред други кичети,

Кая есть полза? Или от вина не пити

что ползует, пьяну же ненавистми быти?

Воздержанием не плоть, но страсти мертвити

подобает, да Богу возможем служити.

Воздержанием часто согрешаем,

егда не злобы, но плоть истребляем;

Страсти во плоти нужда умертвити,

плоть же питати, грети и щадити.

Многия пищи вреда тым не деют,

иже воздержно ясти я умеют.

Единым брашном Исав согрешил есть,

яко несытно оно потребил есть.

Воздержание аще безмерно храниши,

множицею души ти вред велий твориши.

Плоти бо изнемогшей ум не добр бывает,

разсуждение в меру вся да устрояет.

Аще не тщится игрец натягати

струны во гуслех, та не может дати

Сладкаго гласа; тако силы тела

невоздержанна не дают весела

Богови гласа. Убо сохраните

воздержание, тем Богу служите.

Адам и Евва невоздержна быста,

весь мир единым яблоком вредиста.

Воздержание тогда не хранится,

аще ястия время предварится.

Иоанафан тако согрешил есть,

прежде времене от меда вкусил есть.

Воздержание и той разоряет,

кто сластнейшаго брашна взискивает.

Исраилтяне сице преступиша,

манну презревше, егда мяс просиша.

Воздержание и тем не хранится,

иже строити яд излише тщится.

Тако Илии сынове твориша.

Господа к гневу на ся возбудиша.

Воздержание растленно бывает,

егда кто чрево свое пресыщает.

Яко в Содоме жившии твориша,

за что казненни огнем свыше быша.

Воздержанию и то есть противно,

аще и худы пищы хощет силно,

Яко же Исав сочива желаше,

зане же брату первородство даше.

Всех тех образов ты, брате, блюдися,

всяко воздержне век твой жити тщится.

Аще воздержник в злобе пребывает,

демону точна себе проявляет,

Той бо безпищен выну, но во злобе

тлеет всескверный во адстей утробе.

Отьими дрова — пламень у гасится;

отьими пищу — страсть ти умалится.

Пекло, жупел, слама огнь велий раждает;

вино, масло и тук похоть умножает.

Мерно от пищы и вина вкушаяй

есть остряй разум, память соблюдаяй.

Дрова многая мал огнь угашают,

брашна лишняя разум истребляют.

Яко от огня дым всегда бывает,

тако от вина похоть ся раждает.

Воздержание мысли благи родит,

добродетели в человецех плодит.

Во всяких делех благия советы

дает и мудры на вопрос ответы.

Уне есть мерно по вся дни вкушати,

нежели долго от пищ ся держати.

Пост бо безмерный силу истребляет,

дух уныния и печаль раждает.

Многу воздержание ползу содевает,

человека в здравии благом соблюдает.

Продолжает житие, весть душу строити,

еже своя делеса изрядно творити.

И страстми владети то деет, ум чищает

и к небесней мудрости прямо обращает.

Добродетели плодит, злонравие губит;

блажен, кто благостыню сию выну любит.

Бог же воздержание воздает благими

во мире временными и в небе вечными.

Отроци еврейстии брашен не вкусиша

скверных во Вавилоне и прекрасни быша.

Моисий четыредесять древле дний постися

и собеседовати Богу сподобися.

Точне Илиа пророк в воздержности бяше,

а Господь в содружество Свое й прияше.

Оба же на Фаворе Христа соглядаста,

славу Си явившаго; исход глаголаста.

Дает воздержания мзду Бог и на небе,

приседети трапезе вечной, а кто ж себе

Тоя обилием сыт быти не желает?

Разве кто во скудости ума пребывает.

Вознесеся Христос

Совершив Христос Господь дело спасения

рода человеческа, не вкуси тления

Во гробе плотию Си; воста в нетлении,

посеща ученики в часте явлении.

Напоследок, извед я на Елеон гору,

вознесеся чрез аер к небесному двору.

Со тленными, сый тли чужд, жити не хотяше,

небесну Человеку небо подобаше.

Прият И небо честно в радости велице,

седшу одесну Отца честь творит Владыце.

Не то содея волхву Симону лукаву,

Божию восхитити хотевшему славу,

Иже, собрав народы, им проповедаше,

яко чрез аер в небо летети хотяше.

Возлете убо нечто бесов служением,

со великим народов всех удивлением,

Иже его за бога хотеша имети,

но небо того врага не хоте терпети:

Елико бо высоко на воздух взнесеся,

толь низко окаянный на землю падеся

И сокруши нозе си, а не умертвися,

да будет во смех людем, тако лстец казнися.

Христос же Бог истинный преславно идяше,

еже лик учеников очима си зряше.

Не отьиде же, да ны печалны оставит,

но да свыше вящшую милость верным явит.

В первых же, яко царство Свое глаголаше

не на земли сущее, но в небе сказаше,

Отьиде убо в небо, да в вере крепимся

и по Нем путем благих дел ити потщимся.

Паки, хотя надежду в верных утвердити,

яко и нам некогда тамо требе быти;

Иде же бо глава есть Христос, тамо тело

да чает вселитися и да идет смело.

Еще наставляяй ны горняя любити,

желания ко Богу сердец обратите,

Не мудръствовати земных, токмо небесная,

не гоните дел шуйцы, но яже десная.

К тому, хотя у Отца ходатай нам быти,

прощение грегов и милость упросити.

К сим воеже бы Духа Святаго послати,

яко же учеником изволи вещати:

Аще не пойду Аз, не придет Утешитель,

отшед убо, прислал есть Того наш Спаситель.

По сих учение Си хоте показати

с небес быти и закон, да бы веровати.

Людем без сомнения и тако бы жити,

яко благоволил есть словом Си учити.

Наконец, подобаше плоти божественней

по смирении земном быти вознесенней

И достойную заслуг мзду в небе прияти,

светом славы вечныя безмрачно сияти.

Восшел есть убо Господь, мы низу остахом,

да раби ко Господу шествуем со страхом,

К Его вечней трапезе очи да пущает,

да просим и ищем, и прилежно толцаем.

Елма плоть смертну Бог Слово прияше,

в юдоли плача с людми обиташе.

Егда в безсмертну ту же облечеся,

в радости место славно вознесеся,

Еже с аггелы в небе пребывати,

честь же и славу от них приимати.

Аще же мира сего удалися,

Церковь никако от Него лишися,

Выну бо с нею Христос пребывает,

яко же глава плоть си управляет.

И отшествием Он плоти Своея

многия ползы удом Си содея.

Во-первых, полза Церкви есть велика,

яко на небо возшел всех Владыка.

Да веру нашу велику содеет,

яже в незрима верити умеет.

Блаженни тогда ученици бяху,

елма, видяще Христа, вероваху.

Не менше тыя леть блаженны звати,

иже, не зревше, тщатся веровати.

Сам сицевыя Господь ублажил есть,

егда сумнива Фому уверил есть.

Вторая полза верным сотворися,

яко надежда онех возвысися,

Еже и телу вознестися тамо,

глава онаго вознесеся камо.

Третия полза Церкви сотворенна,

любовь к небеси ея обращенна.

Да сущих тамо потщимся искати,

а яже мира, во ничто вменяти.

Четвертая есть, яко добре знаем,

яко не проста мужа почитаем

Славою Бога, но из Бога суща,

тожде существо со Отцем имуща.

Пятая полза, яко божественный

путь нам к небеси, Христом проявленный,

Да бы из странства в отчество желати,

мир сей презрети, премирных искати.

Шестая полза. еже заключенно

всем бяше небо, то бысть отверзенно,

Да святых души не во ад отходят,

но во жилища небесная входят.

Седмая полза, яко всем известно,

святым устрой Христос место честно

В радости вечней, еже тамо жити

и во светлости безконечней быти.

Осмая полза, яко Христос в небе

выну ходатай есть в нашей потребе

К Отцу Своему, всегда заступает,

язвы Оному Своя предъявляет,

Да онех ради изволит простити,

что мы дерзнухом пред Ним согрешити.

Девятая есть полза сотворенна,

яко посла в мир Духа Божественна

Христос Спаситель, егда воцарися,

и на престоле Отче посадися.

Десятая же полза нам бывает,

яко всех сердца Христос привлекает

По Себе в небо, да к тому желаем

и сокровище тамо наше знаем.

Царствуй же, Христе, в небе во вся веки,

управляй свыше Твоя человеки,

Да и мы в небо возможем приити,

с Отцем и с Духом Святым Тя хвалити.

Вознесение Христово

Недолго Христос Господь на земли виташе,

отнеле же из гроба плотию восташе;

Едва четыридесят дни токмо пребыл есть,

по тех во пресветлая небеса вступил есть

Благословных вин ради, яже предлагаю,

яко же в писаниях отец обретаю.

Первая — да закон Си и слово святое

не земно явит быти, токмо небесное.

Вторая — да бы небо было отверзенно,

еже грехом Адамлим бяше заключенно.

Третия — да царство Си явит быти в небе,

не на земли, яко же помышляху в себе

Ученици святии, того да желают,

а не во мире славы суетныя чают.

Четвертая — да плоти Его божественней,

многи раны страдавшей, даже умерщвленней,

Мзда и слава воздастся и место пристойно,

прославленной же плоти небо место стройно.

На земли рождаемых есть и тлимых место,

свободных же тления на небеси есть то.

Пятая — да аггели в небе веселятся

присутствием Христовым и тем украсятся.

Шестая — да по шуйцы досад мира сего

посадится во десных у Отца Своего.

Седмая — да ниспошлет Духа Пресвятаго

на ученики Своя от Отца вечнаго.

Осмая — да Отцу Си воздаст слово дела,

еже в мире содея приятием тела.

Девятая — да по Нем мы сердца пущаем

в небо и тамо умы выну пребываем,

Земная пренебрегше, тамо бо есть наше

сокровище, отчество, тамо Бог ны зваше.

Десятая — да знаем, яко возвышает

того Господь, кто в мире сам себе смиряет.

Первая на десять есть, еже бы являти,

яже за ны изволил раны восприяти,

Да теми ходатайство о нас содевает

ко Отцу небесному и в милость скланяет.

Последняя — да, зряще мы возвыжшение

Его по страстех многих, стяжем терпение,

Еже бы самым за то возвыжшеным быти,

мзду в царствии небесном вечну наследити.

Воин

Воин аще оружий свойственных лишится,

удобь от супостата своего язвится.

Тем же добродетелей и нас враг лишает,

яко оружий, тотом грехми убивает.

Филопатр воин храбрый хром ногама бяше,

Арист аки негодна его осмеваше,

Но он рече Аристу: Ты сердца лишенный

на брань, тем же человек неси ты военный.

Мне же хромы суть ноги, не могу бежати

с брани, имам же сердце враги побивати.

Егда Евреи идол сотвориша,

Господа Бога зело огорчиша.

Согласи Моисий верныя леввити,

повеле мечем согрешшия бити.

Егда же слово делом сотвориша,

братию свою за грех той побиша,

Боговидцева уста глаголаша:

Днесь посвятисте Богу руки ваша.

Точне днесь воин руце посвящает,

егда за веру враги убивает.

Сам же умерый от меча вражия

не лишен будет милости Божия,

Наипаче аще тщится тако жити,

еже заветы Божия хранити.

Лев егда ходит, ногты сопрятает,

разве на корысть тех употребляет.

И воин мечь свой должен сопрятати,

токмо на враги извлечен держати.

Кто в дому лев есть, зайчествует в рати,

прилежно смотрит, камо убежати.

Воля

Навклир парусы строит. Бог ветры пущает;

Бог много, навклир мало корабль устрояет.

Тако в благих делесех Бог онех правитель,

а человек от малы части есть творитель,

Яко свободну волю подчиняет Богу,

за то имать прияти мзду в небеси многу.

Самоволен человек. Богом сотворенный,

и никогда от Него бывает нужденный.

Огнь и вода пред лицем нашим положися,

что ти годе явится, к тому обратися.

Обаче ко благому Господь увещает

и различными средствы от зла отвращает.

Самоволству без вреда выну всяка сущу,

ни мала насилия от Бога имущу.

Блажен же человек есть, аще изменится

от злыя воли и на благу преложится.

Ту бо ся спасение наше начинает,

егда воли годное зло ум отвергает,

И елма о том слезы будут источенны.

о нем же прежде бехом зле возвеселенны.

И противне, егда то потщимся любити

благо, его же воля не хоте творити,

И еже презерахом, восхощем искати,

и его же гонзахом, добро будем гнати.

Си измена есть Бога щедраго десницы

ходатайством Марии, небесе Царицы.

О Пресвятая Дево, изволи молити,

да бы в сей прежеланней нам измене быти,

Да не еже аз хощу, произвожду в дело,

но Богу волю мою да подчиню цело.

Еже Ему есть годе, то бы ми творити,

а свое хотение зло искоренити.

Не веди в жертву Богу упитанна вола,

но да будет покорна твоя ему воля.

Воля свободная

Корабль на море елма ся пущает,

навклир парусов недра простирает.

Ветри, веюще, женут, камо требе,

навклир и ветри нуждни в сей потребе.

Точне жизнь наша в мире сем витает:

человек воли парус простирает,

Бог пособием в ту, як в парус, веет,

тако корабль наш ко небеси спеет.

Воли нашея и Бога есть требе

со пособием, да будем на небе.

Парусов кроме ветр не помагает,

без воли нашей Бог ны оставляет.

Волк мысленный

Кто есть волк, овцы Христовы хищаяй,

или единство онех растерзаяй?

Григорий папа на то отвещает:

Волк, кто смиренных души озлобляет.

Волк, и невинне чуждая хищаяй,

и неправедне навет содеваяй.

Волк есть, ереси иже начинает,

люте бо овцы Христовы глощает.

Но тех особней волк есть дух лукавый,

на стадо верных вся козни сковавый,

Иже, яко лев, въкруг стада бегает,

да хитит овцу, престрашно рыкает.

Волк он есть, яко все стадо владычне

наветом своим разгонит различна.

Иныя на блуд скверный убеждает,

ины к лакомству злата возбуждает.

Иным гневливым совеицает быти,

иным на гору гордости всходити.

Неким же зело услаждает зависть,

другия острит на злую ненависть.

Многия нудит, еже клеветати,

лжю глаголати и славу терзати.

Се есть волк лютый, стадо разгоняяй,

вся искушенми овцы разсыпаяй.

Волсви трие

Христу рождшуся, волсви с восток приидоша,

честными его дары смиренно почтоша.

Первому имя Малхир, стар же и сед бяше,

власы его и брада долга украшаше.

Сей, яко царю, Христу в дар принесе злато,

а царствие небесно стяжа себе за то.

О предобрыя купли волхва сего, се бо

нетленную за тленну вещ купи си, небо.

Второму имя Каспар, чермен лицем бяше,

юноша бе, на браде власов не имяше.

Ливан благоуханный даде, яко Богу,

главу си приклоняя до стоп святу ногу.

За что в сладковонное небо преселися,

ибо послежде крещен. Богу всыновися.

Третий Валтасар, лицем Ефиопским был есть.

сей миром драгоценным Христа Бога чтил есть

Во знамение, яко умрети хотяше,

смертию Си деяти спасение наше.

За то миро мир вечный приобрел есть себе

и жизнь безсмертну, ибо водворися в небе.

Волхв

Волхвы к немощным иже призывает,

Врача небесна оныя лишает.

Прелестно демон волхвом послугует:

мало утешив, вечный огнь готует.

Иже от волхвов будущая знает,

огневи в пищу сам себе вергает.

Воплощение Христово

Егда Бог Слово восхоте плоть быти,

изволи Свою дивность проявите;

Дивно бо дело велми сотворил есть,

разстоящая два соединил есть:

С человечеством Божество Святое,

на ипостаси единой обое.

Чесого ради свойства ся общают,

праведно взаим вещанна бывают.

Бог бысть человек. право есть вещати;

человек Бог есть, мощно глаголати.

Сие единство познайте колико,

во величество превзиде толико.

Яко вящшаго не леть сотворити

Богу Самому, изволте судити.

Человек с Богом егда съединися,

выше не может того вознестися.

Ничто бо выше есть Бога Святаго,

убо единства не ищи выжшаго.

О превелика любы божественна!

Тако возлюби человека тленна,

Яко изволи плоть на Ся прияти

Бог Сын и за ны лютая страдати.

Иже невидим человеки бяше,

да видим будет, взят естество наше.

Необьемлемый обьятен явися

и безвременный летом подчинися.

Всяческих Господь зрак рабий приял есть,

нам же, рабом Си. господство подал есть.

Бог, страстей чужд сый, бысть человек страстный,

безсмертный в Себе смерти бысть причастный.

Сия вся любы Его сотворяет,

что убо Ему всяк воздаст, да знает.

Любве за любовь Он от нас желает

и ту во ползу нашу обращает.

Да тою небо может заслужити

и в нем наследство вечно получити.

Возлюбим убо прежде возлюбивша,

да почитаем зело ны почтивша.

Дадимся Ему, а Он, взем ны Себе.

возмет от земных и водворит в небе.

Облачится кто в ризу, а два помогают

ему в облачении, три дело свершают,

Обаче облеченный един в ризу ову.

Тако воплощения нам тайну Христову

Разумети есть требе, ибо Тройцы дело

всея, яко Бог Слово облечеся в тело.

Благоволи бо Отец, Дух содействоваше,

а един Сын в естество облечеся наше.

Три члени в персте, перстень на едином,

три лица в Бозе, плоть есть токмо с Сыном.

Удобь бе падение Адаму страдати,

но неудобь от него бе самому встати.

Нужда бяше на землю Богу низходити,

от люта падения его возводити.

Тем же Бог Сын изволил плоть на Ся прияти

и тако падший род наш Собою подьяти.

Чесо ради изволил Бог Слово плоть быти?

Три изрядншыя вины мощно положите.

Искупление наше вина есть первая,

наставление на путь благий есть вторая,

Третия — образ доброт, да на Нь возглядаем,

по подобию Его себе устрояем.

Велия царска милость подданым бывает,

им же богатство, славу и честь умножает.

Вящшая, аще чию дщерь во жену себе

поймет, ту благодарства величайша требе.

Блаженный дом сицевый мощно нарицати,

ибо всякия нужды может пристяжати

Ходатайством царицы, вся тому готова

дому за молебная жены царски слова.

То нашему естеству блаженство случися,

егда Божие Слово вочеловечися.

Недоволен бе Господь Адама создати

по образу Си и нас, и много благ дати.

К тому естество наше Себе сочетал есть

ипостасным единством, аки в жену взял есть.

Его же ради много благ нам содевает,

богатит благодатми, честь и славу дает.

Выше того, хощет ны в небе водворити

и общники царствия Своего творити.

О благость необъятна непостижна Бога,

тако дарования готует нам многа!

Что-либо нам есть нуждно от Него просити,

леть за воплощение сподобленным быти.

Сию милость разсуждше, что можем воздати

всещедрому Богу за ты благодати?

Воздадим самы себе, да бы нам служити

на всяко время Ему и тако явити

Знамя благодарствия, а Он всеконечно

в царствие Си небесно приимет ны вечно.

Слово сердца нашего внутрь нас пребывает,

потом, елма глаголем, в глас ся облекает

И является людем, обаче осташе

не отступивше сердца, в нем же прежде бяше.

Тако Божие Слово предвечно родися

внутрь Отца, послежде же в мире воплотися.

Пребываше со людми, а во Отце жило

неотступно, яко же прежде плоти было.

Востание

Из греха велика скоро востается,

ибо грех великий удобно знается.

Пренебрегоми же малии бывают,

тем же мнози из них надолзе не встают.

Восток Христос

Вскую ся восток Христос нарицает?

Яко от Отца выну Ся раждает,

и не престает.

Восхищение Павла

Свыше призванный гласом Христа Бога,

откровения имеяше многа.

Когда же в небо третее взят бяше,

не достизает видение наше.

Мудрии егда лета сочисляют,

к началу веры его то сношают

И повествуют, яко, егда был есть

слеп во Дамасце, ни яде, ни пил есть.

Тогда восхищен в небо, ли в рай бяше,

неизреченны глаголы слышаше.

Слепо бе тело, но дух очит зело,

виде бо Бога в небе превесело.

О преблаженна слепота такая,

ей же вослед суть зрения святая!

Враг

Всякое дело твое ублажаяй

не друг есть тебе, но враг, тя прелщаяй.

Иже Пребожественней Тройце работают,

от триех врагов лютых борими бывают:

От мира прелестнаго, от плоти злострастны

и от демонски силы, излиха напастны.

На сию злую тройцу Тройца Пресвятая

даде нам оружия зело полезная.

На мир есть всех суетий его презрение,

на плоть — всех страстей ея злых умерщвление,

На демона — советов Его поправие;

теми вечно бывает торжествование.

Добрым злии суть врази, того бо желают,

да я во погибели лютей созерцают.

Учитель их диавол тому научает,

яд свой ими на люди благи изливает.

Тако Савл завистный Давида гоняше,

истребити от земля оного хотяше.

Аман же злочестивый от злобы своея

повесити тщашеся честна Мардохея.

Верныя истребити жела Иулиан,

с ним же Диоклитиан и враг Максимиан.

Фараон Иудеи вселюте томил есть

и мужеский пол в воде еврейский топил есть.

Но безумнии врази ров себе копают,

во нь же напрасно впадше, сами погибают.

Ибо и Давид виде Савла убиенна.

и Мардохей Амана срамно повешана.

И мучители ови сами погибоша,

христиан истребити никако могоша.

Исраиль Фараона виде потопленна,

пучиною Чермнаго моря погубленна.

И инии такожде враг си гибель зреша,

иже им зло лютое деяти хотеша.

Моисий бо и Аарон очесы си зряху,

егда Корей, Авирон, Давин погибаху.

Святый царь Езекия зело весел бяше,

егда трупы врагов си лежащы смотряше.

И с градом си Иудиф светло веселися,

егда Олофернова глава повесися.

Царь великий Констянтин светлоличен бяше,

елма в реце тонуща Максентия зряше.

А того паче имут веселие взяти,

егда имать я Христос в огнь вечный сказати.

Не о отмщении же та радость их будет,

но яко в свершении истинна пребудет.

Аще убо, братие, суть вам неци врази,

не творите им злаго, но будите блази.

Благостию их злобу выну побеждайте,

Учителя вашего Христа подражайте,

И восприимете мзду за сие немалу,

небо с животом вечным и многу похвалу.

Врагом добротворение

Христос повелевает враги нам любити,

злобы онех множеством доброт победити.

То бо христианское благо отмщение —

за злая дела врагом добротворение.

Трудное людем дело враги си любити

и злодеющым себе благая творити.

Тягостно кленущыя есть благословляти

и о гонителех си мол бы возсылати.

Но Господь бремя сие верным облегчает,

егда мзду превелику за то обещает.

На ню же възирающым мощно вся деяти,

яже благоволил есть Господь завещати.

Страшно бе с Голиафом на брань исходите,

неудобно видеся щуда победита.

Тем же Исраилстии вой трепетаху,

на исполина силна ити не дерзаху.

Что убо Савл деет? Много обещает,

и се абие Давид на щуда дерзает.

Малый на големаго, ни же посрамил есть

Савла и полк его, ибо победил есть.

Обет Савлов бяше во зятя прията,

аще возможет Давид врага зла попрати.

Нас же Бог в сыны хощет восприяти Себе,

аще трудность победим в реченной потребе.

Давиду богатств много Савл обещаше,

нам же царство небесно Бог уготоваше.

Мало бе Давидови даров предложенно,

обаче его сердце на брань возбужденно.

Нам безмерно велию мзду Бог обещает,

всяк убо на той подвиг да ся устремляет.

Мал труд сердцу содеем, аще понудимся,

но мзда велия, ибо вечно воцаримся.

Врази в пути

Ветхий Исраиль подвиг мног имяше,

егда с Египта в Сион град идяше,

везде бо врази пакость содеваху,

путь препинаху.

Точне новому подвиг взяти требе,

жити хотящу во пресветлом небе;

вражия козни нужда есть познати

и истребляти.

Врази три

Кийждо человек врага си имеет,

иже пакости в пути ему деет.

Мир, плоть и демон обычно стужают,

рай заключают.

Торжище кратко, в пути беда многа,

нуждна есть сладость Божия чертога.

Кто ж ту хищает? Нужду деяй себе

вселится в небе.

Вран Ноев

Вран, иже из ковчега Ноем испустися,

обрет трупы, не к тому в корабль возвратися,

Но от едина трупа на другий леташе,

донде же утонути, теми ся питаше.

Точне богатитися хотяй содевает,

аки из трупа на труп лакомо летает,

Егда из торга на торг, с греха в грех приходит,

из злобы в злобу, токмо да прибытки родит.

Не вращается в ковчег Христа благодати,

тако нужда бывает в бездне утопати.

Врата в небо

Святое Писание мощно врата звати,

яже учителие ведят отверзати

Ключами языков си. Сими вход бывает

к истинне веры живы, яже впровождает,

Яко же дверь творая ко Самому Христу,

Его же даде нам Бог за Дверь исту чисту,

Да очистшеся от грех, идем Им к чистому,

во нь же скверна не входит, граду небесному.

Аз есмь дверь, рече Христос, иже Мною идет,

вечну пажит обрящет, елма в небо внидет.

Сими дверми, братие, троими ходите,

Бога в Тройце едина онеми ищите.

Тройцею дверей Тройцу обрящем Святую,

пошли нам, Христе, милость на то действенную.

Врачь

Врачь аще сечет, палит, досаждает,

страдалец любит и мзду ему дает.

Душевна паче требе есть любити,

хотяща язвы смертныя целити.

Аще и жесток негли ся являет,

та бо жестота смерти избавляет.

Врачи ови найпаче блажими бывают,

иже не чрез рабы си болных посещают.

Но сами приходяще, касаются делу

и пособие деют уязвленну телу.

Низложше с плещу паллий, лентие приемлют,

тем препоясавшеся, от раны отъемлют

Платенца и своима персты отщущают

раны и в них смердящий оток очищают,

Не гнушающеся тем, но вся тощно деют,

яже хитростию си во ползу умеют.

Сицев Врачь Христос Господь показася быти,

ибо Сам с небесе к нам изволил приити

И отлож ризу славы, в плоть препоясася,

и за дело врачевства всеприлежно взяся.

Разреши связанныя, язвы ощущаше,

оток грехов чищая, всячески целяше.

И не преста делати, даже совершил есть,

недугующий род наш от язв устрабил есть.

И аще въпред случится нам язвенным быти,

благоволил врачевство в Церкви оставити:

Тайны божественныя, да теми целимся,

егда на душах наших паки уязвимся.

О всеблагий се Врачь есть, предобрый Целитель,

с небесе в мир пришедый Христос, наш Спаситель!

Ему же за ту милость что хощем воздати?

Аз от сущих во мире ничто могу знати.

Добр наших не требует, не мзда Ему за то

имения пространна, сребро же и злато.

Жертва хвалы точию приятна Оному,

яко всеми благими зело богатому.

Потщимся убо хвалу Ему возсылати,

благодарство за милость выну воздаяти.

Врачь Христос

Недужный аще врача изгоняет,

врачь во болезни его оставляет.

Он же, не зная себе врачевати,

приходит в нужду, еже исчезати.

Мы вси немощни тяжкими грехами

и целитися не умеем сами.

Прииде убо Христос ны целити.

Иже и мертвых силен есть живити.

Врачь пренебесный, всемирный Целитель,

от смерти рода земна Свободитель.

Но мы, увы нам. Того отгоняем,

егда пластыри Его отвергаем

Здравотворныя, то же часто зело.

Сие Онаго понуждает дело

Оставляти ны в недузе лежати,

потом душами вечно погибати.

Престаним убо Того мы гневити,

да не приложим злобами грешити;

А Он готов есть нас уврачевати,

в болезни место здравие подати;

То же безмездно, токмо покоримся,

заповедь Его творити потщимся.

Врачевание

Немощствуя, к Богу прежде обратися,

та же врачевствы плоти от врачев целися,

Да Бог даст и врачю ум недуг твой познати

и во врачевствах силу благодействовати.

Без Божия помощи врачь не помогает,

и врачевство вящшую язву содевает.

Врачевство на грехи

Приде мних некий ко врачевней газе,

взискуя целбы греховной проказе.

Рече ко врачю в смирении слова:

Повеждь ми ради имене Христова,

Аще имаши былие лечебно,

на грехов болезнь скорбящым потребно?

Врачь даде ответ, всем полезный зело,

им же духовно грехми страждет тело:

Аще хощеши болезнь исцелити,

подобает ти совет мой хранити,

Иже ти буди сицевый от мене:

Послушания поищи корене,

Терпения же листвие приими

и расплоди плод чистоты со всими

Добродетелей превонными цветы,

яже смешь купно, потщися сотрете

Во беззлобия котле, и в сосуде

всесмирения съсыпано то буди.

Раствори посем слезными водами,

а милостыни пореж щедротами.

Возгнети под ним огнь любве ко Богу,

им же теплоту елма примет многу,

Братолюбием тщися прохладите,

да возможеши от него вкусите

Покаяния лжицею святаго,

а помощию Всемилостиваго

Стяжеши целбу, здравие влучиши,

аще сей совет верно сохраниши.

Аз бо истинно тебе совещаю,

тебе, як себе, здравия желаю.

Время

Всяческое дело время устрояет,

безвремение же оно истребляет.

Добро есть во ино время глаголати,

во ино же лучше слово удержати.

Преступство, егда требе есть слова, молчати

и в молчания время слово разширяти.

Воин в потребно время мечь свой извлекает,

в таково же язык твой слово да вещает.

Муж некто преподобный Господу молися,

и се душа плачюща оному явися.

Вопросившу ответа: Аз есмь осужденна

на муки вечныя и во огнь воверженна

За множество грех моих. Но то люто бремя

стражду, яко благое погубих аз время,

В не же мощно ми бяше Богу угодити,

не во аде, но в небе безконечно жити.

О тщеты великия время си губящих,

и пагубна делеса во оном творящих!

Летит время си часами

во дни, в нощи, як крилами.

Быстрая река бреги подмывает,

время жизнь нашу выну сокращает.

В кое время исправа жизни не творится,

то яко погибшее тебе да вменится.

Злато погубленное может ся нажити,

времене же претекша несть леть возвратити,

Обаче мы о злате печални бываем.

а время во суетах мира иждиваем.

Не зрим, яко все царство хотел бы царь дати

за един час, слез ради, внегда умирати.

Время чювственная вся и чювства свершает,

тоже послежде силу действа раздрушает.

Время златое

Златое время въправду леть есть нарицати,

отнеле же дал Христос закон благодати.

Ибо ныне возможно небо всем купити

и нетленным богатством пребогатым быти.

Не ценою же злата, но за добродетель

царствие небесное продает Спаситель.

Имей добродетели, небо будет твое

и за саму нищету пристяжеши тое.

Сам Христос царство нищих поведает быти,

кто убо не потщится онаго купити?

Тем же благодарствие за то благодати

должни мы есмы Богу щедру возсылати,

И блаженство велие причитати себе,

яко Господь угоди нас грешных потребе.

Прежде нас пожившии окаянни бяху,

толики бо милости Богом не прияху.

Во тме неведения век свой проводиша,

демоны въместо Бога истиннаго чтиша.

Сотворша всяческая Бога не познаша,

царствия небеснаго никако стяжаша.

Кроме света истинны мира отьидоша,

в тму непросветимую адскую впадоша.

Оле окаянства их! Мы же преблаженни

Христовым пришествием есмы сотворении.

Он бо, Солнце истинны, свет нам даровал есть,

идолослужителства тму смертну прогнал есть,

И свободу от ада изволи дарствити,

и небостяжанию добре научити.

Аще убо премудрый Сократ тем хвалися,

яко в граде Афинстем родися, учися,

И аще Македонский Филипп весел бяше,

яко Бог Александра ему дароваше

Во Аристотелева учения лета,

да общник его будет премудрости света,

Много паче нам должно радость восприяти

и хвалитися о том, яко в благодати

Время рождени есмы, можем бо набыти

небесныя мудрости и во веки жити.

За вся же сия славу возсылаем Тебе,

Боже в Тройце единый, живущий на небе

Ведение

Благо есть человеку веждество имети,

но како держателно, нужда есть умети.

Суть бо, иже ведети, да ведят, желают,

сии оплазивости порок набывают.

Суть, хотяще вежества, да ведени будут,

сии тщетна суетства неудобь избудут.

Суть, и иже ведети усердно желают,

да на скверны прибытки дар той обращают.

То же мытоимство есть, пред Богом скаредно

и душам продающих вежество си вредно.

Но и еще инии желают ведети,

да бы назидание духовно имети.

Сие же есть разума похвална у Бога,

сицевым благодать есть готова премнога.

Напоследок, неции тщатся много знати,

да бы иныя люди благо назидати.

Сие дара любве есть и угодно Богу,

заслугующее мзду и вечну, и многу.

Два токмо последняя веждества суть честна,

прочая неполезна, яко суть прелестна.

Зрите убо, веждество хотящий взяти,

како в ползу душевну то употребляти.

Иначе, полезнее без вежества жити,

нежели то стяжавшым в казни вящшей быти.

Веждество

Веждеству образ древний даяху,

зрящую в нощи сову писааху;

Яко бо она во тме созерцает.

тако в трудностех вежда дела знает.

Век сокращенный

Иже прежде потопа во мире живяху,

чесо ради век долгий жизни си имяху?

Днесь, тогожде естества человеци суще,

много меншая лета суть в мире живуще.

Пять вин того разнствия мощно знаменати,

яже видятся правду уму представляти.

Первая вина — яко иже тогда бяху,

доброустроение во плоти имяху,

Еже в последних вецех излиха растлися,

чесо ради житие наше сократися.

Вторая вина — яко превоздержни быша,

яко требе, по мере ядоша и пиша

Перва века людие. Днесь меры не знают;

много ядят. а болше того испивают,

Чесо ради болезни в телеси родятся,

и с теми дние наши ко кончине тщатся.

Третяя вина, яко тогда вся снедная

много лучшая бяху, неже нынешняя.

Ибо потопом земля много повредися.

чесо ради плод ея силы си лишися.

Тем и ядущих себе не толь укрепляет,

едва частицу неку силы древних дает.

Четвертая вина есть, яко и на небе

действо светил лучшее бе живших потребе.

Ибо во изряднейшей стране мира бяху,

иже тогда житие свое провождаху.

Пятая вина — яко мало людей бяше,

да умножатся убо, долг век Бог даяше.

Ныне же вселенная людми наполнися,

даже едва воместно миру сотворися.

О часть малую земли днесь ся убивают,

едва воздуха волно во потребу дают.

Тем же лета изволи Господь сократити,

да бы сицевым злобам во людех не быти.

Век

Век настоящий многи услаждает,

но мали, яже в небо устрояет.

Многи зовет Бог на пир вечный к Себе,

но мали тщатся, да бы быти в небе.

Не хотят путем тесным шествовати,

узкими враты в радость прохождати.

Оле безумства! Временная любят,

за та вечная вся благая губят.

Яко цвет селный скоро оцветает,

тако человек век свой преживает.

Венец

Егда благая дела Бог твоя венчает,

на Своя тогда дары венец возлагает,

Что бо имаши, чесо свыше не взял еси?

Благодатию убо будеши в небеси.

Вено

Вено со дщерми обычно дается,

егда некая мужеви вдается

Во супружницу. Что же демон дает,

егда лжю, дщерь си, человеку вдает?

Геенна и огнь от него дарится,

множество червей к тому приложится.

О вена злаго! Его же гонзайте,

и дщерь демоню злобну обругайте!

Вера

Светилник не елеем, но огнем сияет,

но огнь сам без елея скоро угасает.

Тако вера не из дел бывает рожденна.

обаче онех кроме тщетна, умерщвленна.

Веру убо з делесы сьединити требе

хотящым душам жити и быти на небе.

Корень здравый ветви здравыя пущает,

листвием и плоды древо украшает.

Тако вера блага имать плодна быти.

плоды делес благих из тебе родити.

Аще же неплодно древо пребывает,

сечется и во огнь въвержено бывает.

Тако, аще вера без благ дел пребудет,

во огнь вечный душа воверженна будет.

Тело без душы мертво; вера умерщвленна,

аще с делы добрыми не будет спряженна.

Глас Иаковль, руце же Исавли имеет,

иже, веруя добре, лукавая деет.

Во часех зубец един аще отломиши,

всех колес течение тако удержиши.

Подобне в вере аще един член растлится.

вся, яко часы, вера унепотребится.

Тем же собори ничто велят отьимати

от состав веры, точне ничто прилагати.

Верити Бога есть умом держати,

яко есть Господь, могий вся создати.

Верити Богу есть всем веру яти,

яже изволи Господь глаголати.

Верити в Бога есть во Нь ум вперити

и волю, яко в цель свой, обратити.

Чрез веру, любовь в Онаго нестися,

си вера жива, леть ею спастися.

Хотяй дом себе духовный создати,

основание должен усмотряти.

Да крепко будет, иначе падется,

аще и к небу стенми вознесется.

В доме духовном вера есть основа

по сведетелству апостолска слова,

Юже да крепку имате, слушайте

и средства ея тощно сохраняйте.

Первое средство, что вам Бог являет —

веруйте присно, ум да ся склоняет

На слово Его без испытания.

сего требует Бог почитания.

Второе средство — духи искушайте,

от Бога ли суть, и ум прилагайте

К словам, аще суть праздна сумнения,

известен ли путь в них есть спасения.

Третее средство — аще светло зриши

Божий глас быти, да ся не сумниши.

Яко о воде Моисий усумнися,

за что вшествия в град Сион лишися.

Четверто средство — да благовременно

сие творится дело преспасенно;

Не от легкоты, некосно, ни въскоре,

тако леть быти в Бога жива дворе.

Пятое средство — Символ Святый знати

и члены его крепко веровати;

Не обще токмо, но чинно, подробну,

тако содеем вещ, Богу угодну.

Шестое средство — да основание

веры дел благих имать наздание.

Ибо основу тщетно полагает,

иже ничто же на нем назидает.

К тому, мертва есть вера кроме делес

благих, ни вводит в чертог светлых небес;

Яко же взаим и дела благая

без веры не суть пред Богом живая.

Вы, любимицы, веру сохраните

живу и дела не мертва творите.

Да сами живот стяжете у Бога,

внидете в радость небесна чертога.

Вера христианская

Вера христианская Христом насадися.

Божественным же Духом зело утвердися.

Многими свидетелствы Богом укрепленна,

тем же истинна, свята, всяко божественна.

Первое сведетелство есть инстинны ея,

согласие род многих, приемшых от нея

Звание христианства. К тому, божественных

отец единомудрство, дарми исполненных.

Иже, аще в различных летех, в странах жиша,

обаче един разум веры сохраниша.

Второе сведетелство мученицы даша,

иже за правость веры до смерти страдаша,

Вселютыя болезни крепко презираху,

на муки, яко на пир, радостно идяху,

Возглядающе в небо, иде же готова

неизглаголанная мзда от Бога Слова.

Третие — чюдес многих яве творение,

правды христианския во утвержение,

Коих бо чюдес древле отци не твориша

и мученици, егда за Христа терпеша.

Четвертое пророчеств есть исполнение,

еже в верных отьемлет всяко сомнение.

Пятое — яко нрави в людех изменении,

иже веры правыя светом просвещенни.

Гордость во смирение лепо преложися,

зверская лютость в честну кротость претворися.

Волци бывший, яко овцы ся смириша,

аггелско человеци жити возлюбиша.

Шестое — яко мнози сведетелствоваху

о вере христианстей, иже чужди бяху.

Сивиллы во Еллинех немало писаша,

им же ся ублажает честно вера наша.

И Евреин Иосиф свидетелство дал есть

о Христе в книгах, яже во Риме писал есть.

Последнее возможно сие положите,

яко никая ересь долго может быта,

Ибо что не от Бога сажденно бывает,

яко прах от бурнаго ветра исчезает.

Христианская паки вера есть блаженна,

от Христа и до ныне растет разширенна,

И до кончины мира имать пребывати,

аще и гонения нужда пострадати.

Вера и дела

Мертва есть вера без дел и дела без веры,

мертвым же страны живых заключенны двери.

Живот веры — делеса, Богу угодная,

душа делес есть вера в Бога праведная.

Живой вере и делом живым путь до неба

свободен, убо жива имети потреба.

Мертвая не ползует, яко же и кони

не возят бездушнии во двери Сиони.

Вера христианская солнечно сияет,

ересь паки, яко червь, что в траве блистает,

Или, яко часть древа гнилаго, видится

в нощи светла, во дни же нимало светится.

Благо есть веру праву комуждо держати

и делеса благая ей совокупляти.

Ибо вера дел кроме людей не спасает,

двема сима летети в небо подобает.

И яко нищий словом не есть одеянны,

ни сыт, но одеждею и хлебом питанны,

Тако и нагость душы не есть покровенна

верою единою, ни в гладе сыщенна.

Дела благая к вере плиложити требе

во сицевей душевней грешных нас потребе.

Яко тело без душы живо не бывает,

но мертво, и помале во тлю ся вращает,

Тако вера дел кроме, живота лишенна,

нимало есть полезна, ибо не спасенна.

Плодное по естеству древо, аще плода

не даст тяжателеви, яко есть природа,

Неполезно судится, съсечено бывает

и во огнь въверженное, пламень е снедает.

Веры добрыя плод суть делеса благая;

аще же где от веры не плодятся тая,

Неполезно есть древо, во огнь вовержется,

никто же без дел благих верою спасется.

Кому-либо бе время плод сей проносити,

он же небрежением не тщася плодити,

Непщуя саму веру доволну вещь быти,

кое же спасение Богом получити.

Прелщается муж сицев и други прелщает,

аще хранити токмо веру увещает.

Не слушайте вы того, к вере приложите

дела добрая, тако спасения ждите.

Аще бы вера без дел доволна спасати,

возможно бы демону спасения ждати;

И беси бо веруют и трепещут Бога,

Иаков повествует; но за злая многа

Делеса спасения не могут прияти,

но вечно во геенне огнь имут страдати.

Не буди ты им точен, тщися приложити

к вере дела благая, да бы вечно жити.

Авраам не верою токмо оправдася,

но яко и тщив делом добрым показася;

Благо бо велми дело тогда сотворил есть,

егда единородна в жертву приносил есть.

Велия зде с верою любовь сопряжеся,

тем же и оправдася. потом и спасеся.

Мы — чада Авраамля, убо подобает,

да кождо верный того отца подражает.

Еже есть к вере дела блага прилагати,

тако от щедра Бога спасения ждати.

Вера без дел несть вера, ибо умерщвленна;

труп сущи, в жертву Богу не буди несенна.

Богу живу живая жертва подобает,

мертвечиною живый велми ся гнушает.

Ким же вера мертвится? Удобно есть знати:

иже не хощет душы ея оней дати.

Душа же веры — любовь с делесы благими.

оживляй убо кождо веру свою теми.

Тако приятна будет жертва твоя Богу.

приимет ю во воню небесну чертогу.

Приимет же и жреца тоя жертвы к Себе,

тебе сиречь и вселит во пресветлом небе.

Светилник без елея не может светити;

вера без дел не может жива Богу быти.

Любве отлучение, смерть веры благия;

да жива будет вера, совокупи тыя.

Веру дела благая живу да творяют,

сама взаим верою жива да бывают,

Ибо и дела кроме веры благи мертва,

ни могут Богу быти приятная жертва.

Вера щит

Вера нам щит есть, ибо защищает

от стрел неверства, егда враг стреляет.

Сей щит аще кто дерзнет отложити,

нужда есть тому убиенну быти,

Яко же Саул убиен простреся,

егда щит его от него вержеся.

Верение

Легкость есть скоро верити всякому,

злоба же — веры не яти никому.

Веру емлем тым паче, яже око видит,

нежели гласом, яже ухо наше слышит.

Веры соблюдения средства

Исраилтяне егда путствоваху

сквозе пустыню, столп огнем имяху

Во вожда место и в просвещение,

да не приидут во заблуждение.

И мы в тме нощней свещу возжигаем,

да в свете ея добре вся делаем.

Волсви с Персиды по звезде идяху,

вождеством ея Христа поискаху.

Нам столп, светилник и звезда светлая

в пути житейстем — вера известная,

Ея же светлость да не угасится,

сие прилежно нами да хранится.

Во-первых, да не будем оплазиви,

во божественных лише испытливи;

Яко бо хотяй свет солнца обьяти

имать зеницы своя зле вреждати;

Так испытаяй величество славы

скоро повредит ум своея главы.

Паки есть нужда грех смертных гонзати,

иже отъемлют живот благодати,

И иже веру велми ослабляют,

многащи в ересь бедных устрояют.

Яко бо корабль, котвы си лишенный,

удобь бывает о камень крушенный,

Тако добрую совесть погубивый

влеком бывает на путь злостроптивый,

На нем же люте бедник уподает,

корабль душевный въконец сокрушает.

Еще общества должно есть гонзати

с еретиками, и дев не поимати,

Учения их нимало слушати,

книг богомерзких ни в руде взимати.

Словопрения с ними ты вреждают,

иже ответов дати им не знают.

Тем, уне тому ту борбу вручити,

кто Голиафу Давид может быти.

Наконец, требе благая творити,

да может вера в сердцах жива быти.

Яко бо елей огню живот дает,

сущу в лампаде, тако оживляет

Веру во сердцах благих деяние.

Обою буди вам сочетание.

Веры смерть

Иже из сердца любовь извергает

и въместо ея ненависть вселяет,

Ту вера жива не может стояти,

нужда бывает оней умирати.

Яко бо пламень водою гасится,

ненавистию вера умертвится.

И яко пламень вещи сожигает,

тако ненависть веру истребляет.

Вериши в Христа? Его да твориши

дела, да веру живу сохраниши.

Любовию ти веру да живи ши,

делы благими благу да явиши.

Земное дело тех да не сляцает,

яже небесных вера возвыжшает.

Аще хочеши право глаголати,

Христа Господа в тебе обитати,

И яко ты сам во Христе живеши,

Христу подобне да пребываеши.

Яко же Христос изволи ходити,

тако достоит твой путь ти творити.

Аще же славы желавши тебе

въпред, неже Богу, славимому в небе;

Аще блаженству завидиши чужду

и немощному наносиши нужду;

Не присущему аще увлачиши,

прогневавшу тя мужу аще мстиши;

Не Христа Бога подражатель еси.

Его закона хранити не веси.

Тех зол Христос Бог никогда творяше,

свят и праведен выну пребываше.

Ты усты токмо исповедавши,

яко Господа истинна знавши,

А делесы ти отрицаешися,

егда противен противляешися

Неправо весма, язык бо даеши

Христу, а душу врагу предавши.

Подобаше же Христу дати тое,

язык и душу в целости обое.

Веры уподобление

Зерно горушно мало в себе телом,

но есть велико довле силы делом;

Вначале мало, худо и презренно,

обоняния и вкуса лишенно.

Но возраст вземше, елма ся стирает,

абие воню из себе пущает;

Острую горесть, пламени подобну

горячесть родит, но зело угодну,

Яже во хладе тело согревает

и влаги его силно изъсушает.

Греет, внутрьняя огня не имуще,

теплоту родит, извне хладно суще.

Подобне вера вначале бывает

мала, немощна, худа ся являет.

Но елма возраст приемши, притрется

скорбми, бедами, тогда является

Сила, яже внутрь оныя таится.

острота, теплость тогда изьявится.

Паче, горячесть любве превелики

ко славе Христа Царя и Владыки,

Толь же многая, даже ей творити

иным от нея горячими быти.

Зерно горушно тело согревает,

теплота веры грехи сожигает.

Оным жестота студени толится,

сею хлад демонь грехов ничтожится.

Зерно телесе влаги изсушает,

вера похоти мокрость изнуряет.

Оно есть силно главу врачевати.

сия весть Христу Главе угождати,

И благу воню та ны содевает,

яже Господу любезна бывает.

Имамы убо веру божественну,

паче горушных семен в нас действенну.

Да Христу Богу можем угодити,

в страну небесну преселени быти.

Вера во сердци есть основание

добродетелей, та держит здание

И яко корень ветви оживляет,

вера делеса жива содевает.

Яко светилник она просвещает,

егда Божии воли поучает,

Учя благая делеса творити,

от лукавых же и мысль удалити.

Г

Гавриил

Гавриил Даниилу древле сказоваше,

яко человек плотян Бог быти хотяше.

Он же к Деве Марии вестник сотворися,

егда то сказание к делу приближися.

Бога и человека именем являет

Гавриил, яко же Прокл епископ вещает.

По имени убо си службу совершаше,

что именем содержа, то усты вещаше.

Имени же и слову ответова дело,

ибо, Бог сый существом, прия наше тело

И бысть человек, купно и Бог совершенный,

во спасение наше Отцем положенный.

По иным, крепость Бога то истолковася

имя Гавриил, тем же он к Деве послася,

Яко крепость Божия бяше превелика

во соединении с Богом человека,

И еже Деве Сына Пречистой зачати,

и Бога необъятна чревом си объяти.

Обое сказание с делом согласися,

егда Бог Слово в чрево Девицы вселися.

Тако мудрость Божия мудро устрояет,

имена, приличная службе, нарицает.

Гадание

Рыбарие Омиру гадание дата,

яко славну поете, и ответа ждаша:

Что-либо емлем, реша, то все оставляем,

а его же не емлем, с собою ношаем.

Он много мыслив время, не може познати,

и на то гадание им ответа дати.

Нача быти печален и зело гневася,

во срам себе считая, и тако скончася.

Оле славолюбия! Коль зелно тужаше

о недосмыслии си, даже смерть прияше!

Бе же рыбарей дело: червие ловяху,

пристающее коже, и емше, вергаху,

А еже кожы ятся, того не ловиша,

обаче то по нужде при коже носиша.

О дела безделнаго! Яко человека

мудраго гаданием есть лишило века.

Глава

Славу Бога живаго требе проявляти.

человеческу паки нужда утаяти.

Муж есть слава Божия, яко образ Его.

Жена паки есть слава супруга своего.

Муж имать разум, волю, память и почтися

от Бога, яко жена ему подчинися.

Жена по трием первым аще и почтенна.

имать внутрь образ Бога, но внешня лишенна.

Не владеет бо мужем. Тем же подобает.

да муж главу во церкви свою откривает

Во славу Бога жива. Жена же, вопреки.

слава мужня, да криет главу пред чловеки.

Человеком суть главы горе вознесенны,

да мысли нашя тамо будут обращенны.

Еще да и сердце всех в небо обратится,

иде же сокровище всеродно хранится.

Да не мудрствуем земных, но яже небесна,

чесо ради создани тварь емы словесна.

Глава медная глаголавшая

Алверт великий муж премудрый бяше,

тайны естества преискусно знаше.

И художеством из меди состави

главу, и хитрость дивну в ней постави:

Глас, человечю точный, издаяше

и аки живый глагол изпущаше.

Но той же Алверт послал бяше Фому,

иже с Аквина. до своего дому

В некоей нужде. Иже елма вниде

в дом его. и ту дивну главу виде.

Воздухом вшедшим глава подвиженна.

нача вещати, яко устроенна.

Он же, непщуя чародейство быти,

потщася главу млатом сокрушити.

О чесом взем весть Алверт преученный,

о тшете дела бысть преоскорбленный

И рече Фоме: Увы мне грешному,

что ты содея трудолюбивому?

В едином часе глава сокрушенна,

яже чрез лета многа бысть строенна.

Тако многажды и мы содеваем,

труд многодетный в часе погубляем.

Чрез долго время прилежим искати,

благодать Бога всещедра стяжати,

А потом егда в грех смертный впадаем.

в единой черте ону погубляем.

Тогда праведно Увы! глаголати

о превелицей тщете благодати.

Но уне ону прилежно хранити,

да бы никогда ея погубити.

Ибо по тщете трудно ю стяжати.

Да тщимся убо крепко ту держати.

Глад

Егда глад во Египте лютый досаждаше,

Идите к Иосифу, Фараон вещаше.

Глад духовный во мире, убо подобает,

да всяк от князя мира к Христу притекает.

Христос бо Иосифа паче есть питатель,

небесныя пшеницы, не земныя, датель.

Глад хлеба тело томит, убивает,

глад же Словесе душу умерщвляет.

Глад хлеба во работу людску понуждает,

глад же Слова в демонску душы убеждает.

Глас Божий страх

Адам во рай пред Богом сокрися,

егда глашати его приближися.

А егда закон людем подаяше

и громогласно слова испущаше,

Терпети гласа Его не можаху.

Да не глаголет Бог к нам, вопияху.

Тем же, восхотев благодать явити.

Бог мал младенец благоволи быти

И малогласен, да не ужасает

людей страшливых, но да приступает

Всяк дерзновенно Его целовати

и все, что нуждно, смело глаголати.

Глас народа

Что найпаче от правды далеко бывает,

гласу народа мудрый муж то причитает.

Яко что-либо народ обыче хвалити,

то, конечно, достойно есть хулимо быти

И, что мыслит, суетно, а что поведает,

то никоея правды в себе заключает.

Еже гаждает дело, то весма благое,

а еже ублажает, то бохма есть злое.

Вкратце, что-либо хвалит, то неправо в чести,

мир сей непостоянный весь лежит в прелести.

Не веруй убо гласу общему народа,

ищи в деле правды человеча рода.

Слово ветр развевает, а кто тому верит

безъразсудно, срамоты мзду себе возмерит.

Гнев

Благо часто без греха гнев свой изьявляти,

неже редко со грехом той же прозябати.

Гнев есть огнь велий, вещи сожигаяй,

печаль наносяй, душы истребляяй.

Жрецы Ваала егда избиваше

Илиа пророк, яр и жесток бяше.

Тем хотя Господь ему Ся явити,

слово творити,

Не показася во бурливе дусе,

ни же во огни, ни во страшне трусе,

но в гласе тонка и приятна света,

ради ответа.

Тем поучая, яко не витает

тамо, иде же в сердце гнев бывает,

ни в смущении. Но кто ум покоит,

дом Богу строит.

Имеим убо сердце всепокойно,

жилище Богу сотворим достойно,

а гнев и ярость в нас да не бывает,

грех бо раждает.

На огненно углие аще ся возложит

фимиан, воню сладку во дому умножит.

Аще же на то жупел смрадный возложится,

все жилище от того смрадом исполнится.

Тако гневом горящу аще приложиши

слово кротости, кротка того сотвориши.

Аще же досадное что речеши тому,

смущение целому содееши дому.

Страсть гнева в человеце в то время бывает,

егда кто отмщения ближнему желает,

Обтекшей крови сердце, и есть грех ко Богу

за прилучающуся злобу к нему многу.

Трегубо же бывает грех, гневом рожденный,

мыслию, словом, делом, плод небожественный.

Мыслию многовидне той ся исполняет,

в первых, аще ненависть во сердце бывает

К лицу согрешившему. Паки, егда тщится

некто, да отмщение злобно сотворится.

Еще, аще кто злаго обиждшу желает,

или о случшемся зле радостен бывает,

Или о благих его печален явится,

греха тяжка, конечно, сей не извинится.

Словом же грех бывает гнева сотворенный,

елма кто на зло слово будет разрешенный,

Или славу отъемлет глаголы хулными,

или злая вещает речми клятвенными,

Или свар велий движет. И само прение

гневное не обыче быти в спасение.

Найпаче, аще мести кто сердцем желает,

сия глаголя, вины кроме не бывает.

Делом гнев во изводство тогда ся приводит,

егда кто в отмщение убыток наводит

Или на теле ближним, или в стяжании,

или в коем-либо их отчин держании.

Аще же и законом суда пристужает,

а отмщения паче, не правды желает.

Не без вины есть сицев, и кто не прощает,

егда доволне винный пред ним ся смиряет.

Не удалится вины и сам не простится

в день ярости Божия, аще не смирится.

Яко же бо кто мерит. возмерено будет

натрусно. преобилно, даже преизбудет.

Не дейте убо мести, гнев искореняйте.

согрешения взаим охотно прощайте.

Да сами от Господа будете прощени,

а не по злым делесем яростно суждени.

Аще же страсть гневная сердцу досаждает,

то ко злобе, не к лицу да ся изливает.

Воеже бы от лица злобу истребити,

а лицу ни малаго вреда сотворити,

Паче в исправление привести святое.

Сицев гнев не есть злоба, но дело благое.

Сицевым гневом Богу никто согрешает,

но Его благостыню чинно подражает.

И он бо. человека любя, гнев являет.

но злобу в нем. не лице, тако истребляет.

Разве аще кто въконец злобы не лишится,

то со злобами лице вечно потребится.

Трегубо человеци гневливи бывают,

яко же философи о сем возвещают.

Первый есть вид гневливых, иже наречени

острии, а втории горции вменени,

Третий же — труднии. Вси гнев проявляют,

но различнии нрави в гневе их бывают.

Острии, иже скоро во гнев распалятся,

но абие от того сами отрезвятся.

Сей вид гнева блажайший, яко проявляет,

что человек во сердце своем заключает,

И ничто же обыче в себе утаяти,

отмщения никогда мыслит содевати.

Сего врачевство — кротость, та бо угашает

пламень, иже от гнева воспален бывает.

Холерици обычно сим гневом ярятся

и врачевством кротости от того целятся.

Горции наричутся, иже долго время

носят в сердцех и таят тяжко гнева бремя.

Суть же и в себе самех зело огорчени

и ко ближним такови ж бывают явлени.

Сей мелянхоликове вид гнева имеют,

а возвеселитися никогда умеют.

Врачевство сего вида тихость быти может,

та противу горести изрядно поможет.

Труднии во гневе си речении бывают,

иже зачата гнева никогда лишают,

Денде же отмщение оным сотворити.

Сему во христианех не лепо есть быти.

Сей благоговеинством токмо ся смиряет;

аще того лишится, беды содевает.

Вы, братие, во гневе умни пребывайте,

без гнева несть леть быти, но не согрешайте.

Гневайтеся на злобы, тыя истребляйте,

а озлобившыя вы удобно прощайте,

Внегда им каятися. Паче же любите

злая вам сотворшыя и благо творите.

За то бо ко милости Бог Ся преклоняет,

согрешения наша скоро оставляет.

Гнев Божий

Во стране Английстей некогда случися,

яко множество жита велие родися,

И до времене жатвы преблаго стояше,

полную обилия надежду творяше.

Жатве приближившейся, безчисленно мнози

неизвестно откуду прилетеша прузи

И на то изрядное жито нападоша,

еже и со стеблием до конца снедоша.

Людие страны тоя во ужасе бяху,

вземше от прузей нечто, что суть, разсмотряху.

И се крила имеша дивне пописана,

на них же два словеса бяху прочитана.

На едином криле: Гнев. мнози обретоша,

на другом паки: Божий, со ужасом чтоша.

Се человеком Господь дал есть знамение,

яко во грехов бяше та казнь отмщение.

Неции же глаголют, что та казнь бывает

в стране, яже милости нищым не являет.

Яко бо кто не сеет, не имать что жати,

тако ненищелюбным Бог не имать дата.

Любите убо нищих, нуждная давайте,

за то сами от Бога мзду прията чайте.

Год века образ

Годищное поприще образ нам бывает,

како век свой комуждо жити подобает.

Весна есть образ детства, ибо отребляют

вредная в ея время, ветви прицепляют

Полезныя к древесем. Во оградех сеют,

хврастие исторгают, да благая спеют.

Тако во время детства нужда истребляти

нравы злыя, благи же в сердцах насаждати.

Лето лучесы палит, вси же ту трудятся,

траву косят, жнут класы, различно томятся.

Тому юность подобна, до мужеска века,

ибо та страстми палит бедна человека,

Яже хотящу в себе добре угасити,

плоть трудами многими нужда есть томити.

Есень плоды приносит, люди насыщает,

в мужестем веце сущым точне подобает

Благих деяний плоды обилно носити,

государству и дому всеполезным быти.

Зима снегом всю землю белым покрывает,

человек готовыми брашны ся питает.

Тако старость белыми покривает власы

главу и ознобляет тело в своя часы.

И плоды трудов бывших нуждает снедати,

что кто в юности посла, на том имать спати.

В зиме кождо ко огню рад ся приближает,

в старости к молитв огню всяк да притекает.

Тех теплотою может душу си согрети

и яко лебед сладко с Симеоном пети:

Ныне отпущаеши раба Си, Владыко,

с миром. Приими дух мой в царство Ти велико.

Голубь евхаристический

Древний обычай в Церкви святей бяше:

сребренный голубь в олтари висяше

Над трапезою. В нем положенная

Евхаристия бяше священная.

И ныне в неких местех той остаем

древний обычай. То же знаменает:

Да хотяй тело Христово прияти

цел, яко голубь, тщится пребывати.

Голубь небесный

Голубица Ноева егда испустися,

мало время летавши, в корабль возвратися,

Яко не обрела есть, иде же почити,

а на воде не хоте и ног омочити.

Точне Голубь небесный. Дух Пребожественный.

егда благодатию бывает пущенный

Из ковчега небесна, зрит, где бы почити,

с потопом вод греховных не хотя пребыти,

И аще суха места си не обретает,

в ковчег паки небесный скоро ся вращает.

Да будут убо сердца наша от грех суха,

хощем ли в них жития Пресвятаго Духа.

Голубь и вран

Ноева голубица трупы презираше,

егда испущенная над воды леташе.

Не хоте сести на них, в корабль возвратися.

Не тако вран воздержен тогда проявися,

Ибо испущен, трупом смрадным приложися,

теми себе питал есть, воспять не вратися.

Чесого голубица зрети не хотяше,

то вранови скверному прелюбезно бяше.

Тако грядый из храма Божия до дому,

напитанный духовне, да зрит, где и кому

Имать прилеплятися, или ся вратити

в храм, яко не имать, где умом си почити.

Аще убо абие на грех кто падает,

крадет, блудит, враждует, ли раны задает,

Вран есть труполюбивый, от Ноя презренный,

водам потопа вечна право оставленный.

Аще же кто греховных трупов обегает,

во слезах потопленных нимало касает,

Егда ничто от мирских сердцу его годе,

но к Христу и к небесной желает породе.

Голубь есть прелюбезный, его же наш Ное

небесный имать взяти во жилище Свое,

В ковчег вечныя жизни, во покои быти,

тамо ся божественным брашном насытити.

Гонение

Кремень аще железом ударен бывает,

светлыя огня искры из себе пущает.

Христиан гонения егда притирают,

огнь любве ко Господу тогда проявляют,

Ибо вся скорби терпят, богатства вергают,

и главы си радостно под мечы ставляют,

Боляще от телес си разлучени быти,

нежели неверствием от Бога отьити.

Иакова Исав брат вражески гоняше,

яко Каин Авеля убити хотяше.

Тем в Месопотамию Иаков вдадеся,

тамо убиения братняго спасения.

Знаменует же слово Месопотамия

по нам возвыжшение некаго звания.

Образно учение история сия,

да умеем гонзати и мы гонения.

Иаков духа, плоть же Исав знаменает.

Первая плоть от дуты первым ся являет,

Менший же от болшаго брат гонимый бяше,

яко и во нас духа гонит тело наше.

К возвыжшению убо нужда есть гонзати,

еже есть ум ко Богу в небо возвыжшати

С прилежным молением, с теплыми слезами,

да спасет ны, милостив сотворся над нами.

Вещь веселия многа — от враг гонение,

токмо да приближится того терпение,

Ибо, иже гонимый за правду бывает,

блаженство Христос Господь тому обещает.

Паки, терпяй о Бозе и за Его славу,

в любезну Богу жертву кладет свою главу.

Еще, долг велий Христу Господу воздает,

егда за Нь плоть, кровь, душу свою полагает.

К тому, страданием тем добродетель многу

веры, любве, крепости изъявляет Богу.

Напоследок, заслуги тыя полагает,

ими же небесныя силы превыжшает,

Ибо аггели в небе не могут страдати,

мученическа венца от Бога прияти.

Блаженший убо сан их, но креплший гонимых,

ли от злых мучителей нещадно мучимых.

Егда убо гонят вы врази, вы терпите

за Бога, а от Бога возмездия ждите.

Аще кто, яко Авель, без вины хранится,

и той Каином своим с зависти гонится.

Обычно бо есть благим в гонении жити;

не терпяй того, Авель той не хощет быти.

Авеля Каин брат ненавидяще,

Исаака же Исмаил гоняше.

Иакова брат Исав не любил есть,

Иосифа лик братий удалил есть

Из отчя дому во чуждую страну,

на сребреников цену, оным дану.

Ненавистници вси не блази бяху,

блази же, иже от онех страдаху.

Тако и ныне гонят благих злии,

страждут досады от грешник святии.

Но Бог им венец в небе соблюдает,

за терпение светло увенчает.

Гонители же казни предадятся

огненней, аще зде не обратятся.

Гонят благих злии

Мир, лежяй во зле. обыче гонити

добрыя люди, хотя истребити,

И чада его его подражают,

истребление добрым помышляют.

Всяко доброты не могут и зрети,

иже во злобах любят выну тлети.

Яко вода огнь горящь угашает.

тако благим злый противен бывает.

Благий сияет доброты лучами,

и любве в небо несется зарями.

Зол муж, противне, мрачен делы злыми,

земным прикован похотми своими.

Благий вся добре желает творити,

благости праздный — миру угодити.

Благий терпелив, ов же промышляет,

да како злобу благим содевает.

В начале мира зрим, что сотворися:

Авель праведный злым братом убися.

Потом Иаков из дому гонзаше

за гнев Исава, иже й гоняше.

Что Иосифу братия зделаша?

За сребренники варваром продаша.

Весь род Еврейский зело утомися,

егда в Египте к работе нудися.

И Савл кротка Давида искаше,

еже убити, но Бог защищаше.

Самому Христу Господу и Богу

род Еврейск злобу коль содея многу?

Ученицы же Его что страдаша,

егда Божество Его прославляша?

Беды от Еллин велики терпеша,

точне от Еврей скорби вся имеша.

Даже до смерти. И днесь что ся деет?

Благость попранна, злоба везде спеет.

Правда безместна, лжи ухо готово,

сердцу любезно, еже скверно слово.

Хотяй о Бозе ныне глаголати,

смехи кощунных имать пострадати.

И в домех Бога жива умножися

слово гнилое, чисто умалися.

Оле злых нравов и лукавых времен!

О нестерпимых врага люта бремен!

Гордость

Говор на воде въмале исчезает,

гордый во мире тако погибает.

Яко же вино пиюща прелщает,

подобне гордость мужа изумляет.

Гордии в небо очы возношают,

яко же демон, высоты желают.

Пустынник некто чюдотворец бяше,

но о святости горд быти начаше.

Усмотрев демон, в деву претворися

и, аки блудяй, к нему прилучися.

Нача со плачем онаго просити,

да во келию изволит пустити

Пренощевати, да не расторжется

зубами зверей дивых, но спасется.

Прояви милость пустынник блудящей,

именем Бога онаго просящей.

Впусти в келию. Оле люта врага!

Егда преступи предел храмна прага.

Нача беседу честную творите,

потом блудныя глаголы вносите,

Ими же разжже мужа пустыннаго,

иже сложи мысль до дела блуднаго

И нача себе к тому устрояти,

со заблуждшею блудодействовати.

Тогда диавол смех велий содея

и ко прелщенну глаголаше сия:

Камо, монаше, уже ныне еси,

непщевавый тя жити на небеси?

Уже днесь даже сшел еси до ада.

иде же быте не имать отрада.

То слышав монах, нача отпадати

надежды в Бозе, умысли бежати

В мир, и сотвори, еже смыслил бяше,

прочее жизни во блуде живяше.

Оле, что гордость людем содевает!

Даже во адску бездну низревает.

Всяк убо ея верный да блюдется,

зане же с нею ни един спасется.

Говор, елико болше надменны бывает,

потолику скорее в очех исчезает.

Тако гордии, елма себе напыщают,

судом Божиим правым тогда погибают.

Гордость есть, аще тощно высоты желает,

из благ плоти, ли душы, себе возвыжшает.

Четырми же образы обыче бывати,

яже комуждо верну требе отревати.

В-первых, егда кто себе тая причитает,

яже точию Богу дати подобает.

Паки, аще и Богу нечто прочитаем,

но то яко долг заслуг наших воменяем.

Еще, елма более мнимся содержати,

нежели изволи Бог благих нам подати.

Наконец, елма мнимся ины преходити

в благих или желаем тех превыше быти.

Из сея же матере дщери ся раждают,

яже душу, яко же змии, уязвляют.

Дщерь ея — тщеславие и любочестие,

похваление себе и лицемерствие.

Дщи ея — продерзивость и упорство злое,

и пренебрежение ближних недоброе,

От них же происходят непослушания,

разгласия и свары, хул отригания,

Брани и злословия и яже им точна,

та же вся человека деют зле порочна.

Господь же люди горды обыче смиряти,

отъем дар благодати, в злобы попущати

И началнику гордых, демону, даяти,

еже с ним казнь вечную во аде страдати.

Гордость и смирение

Гордость аще до небес будет возвыжшенна,

даже до ада Богом будет низверженна.

Смирение, противне, аще в ад снизится,

Богом даже до небес честно возвышится.

Праздна плодов ветвь горе взносится,

и клас безплодный таможде стремится.

Тако человек, дел благих лишенный,

высоко держит ум свой напыщенный.

Муж паки благий, полный благодати,

низу обыче сердце приклоняти.

Яко же и ветвь, плоды украшена,

к земли бывает с теми преклоненна.

И клас, семены добре исполненный,

выну ко земли висит преклоненный.

Гордым Бог противится

Лев стоящыя звери обыче терзати,

простершим же ся низу язв не задаяти.

Подобне Господь Бог наш гордым Ся противит,

смиренным же благодать дает, душы живит.

Горе имеим сердца

Орлу егда птенцы пернати бывают,

но еще крилами парити не знают,

Летит сам из гнезда на аер высоко,

да то созерцает быстрое их око,

И возбудит хоть в них подобне летати,

тако начинают и птенци дерзати.

Орлу Христос Бог наш подобен явися,

пред ученики Си в небо возвысися.

Возбуждая сердца, еже бы желати

умы в небесную страну возлетати,

Да бы сердцы тамо с Ним им выну быти

и по смерти плотстей духом ся вселити.

Тем, Горе имеим сердца, воспевает

Церковь, чада своя к небу возбуждает.

Убо в небо очи, братия, пущайте,

из Египта в Сион горний воздыхайте.

Не имате града зде пребывающа,

тем же возьищите прилежно грядуща.

Горе воздыхати

Огнь пламенем си стремится ко небу,

природну тамо имея потребу.

Паче нам к нему нуждно воздыхати,

да в нем возможем вечно пребывати.

Железо к магниту скоро ся вращает,

сродство в нем некое к себе обретает.

Тако воздыхаяй ко пресветлу небу

явствуется тамо имети потребу.

Кто часто сердцем к небу воздыхает,

небесна себе быти проявляет.

Егда на небо зряще воздыхаем,

отчество наше прияти желаем.

Господь с тобою

С ним же Бог человеком в мире пребывает,

той всяческая дела удобь совершает.

Иисусу Наввинну Господь глаголаше:

Не бойся. Бог с тобою, и преблажен бяше,

Ибо враги порази Исраилска рода,

и обетованная взяся им порода.

Господь с тобою, аггел Гедеону рече,

а он Медианиты без меча посече.

Яко скуделы сокруш, страх им сотворил есть,

даже друг друга мечем своим потребил есть.

Моисий слышав от Бога: Аз буду с тобою,

прославися в Египте дивною силою,

Ибо чюдодействии Египт поразил есть,

Израиля свободил, царя потопил есть

Со премногими вой в пучине велице

и воспе победная небесе Владыце.

Гряди, Господь с тобою, Саул глаголаше,

елма на Голиафа Давида пущаше,

И поможе оному небесе Владыка,

порази бо каменем щуда превелика.

Июдифе Озия егда слово рече:

Господь да есть с тобою, та главу отсече

Олоферну гордому женскою рукою,

ибо ей даровал есть Господь помощ Свою.

Над всеми сими, егда аггел глаголаше:

Господь с тобою, Деве, к ней же послан бяше

От Бога во Назврет, тогда сподобися

она, яко Бог Слово во чрево вселися

Действом Духа Святаго, и человек бяше,

изволивый естество восприяти наше.

Се колика благая Господь содевает

тому человекови, с ним же пребывает!

Потщимся убо и мы тощно добротами

привлекати Господа, да будет Он с нами.

Оному же присущу, вся будут во благо,

не устрашимся силы и демона злаго.

Гавриил божественный Деве глаголаше:

Господь с тобою, егда ону целоваше.

Како же бе Бог с нею, того не явил есть

светлым словом, да ищем, нам труд оставил есть.

Различным же образом того дела сущым,

како сопребывает Господь Себе чтущым,

Да узрим, како Господь пребывание с нею,

от нея же родися плотию Своею.

В-первых, со человеки Господь пребывает,

егда что силою Си оным содевает,

Чесого естественне не могут творити,

ту Он естества паче не коснит прибыти.

Сим образом бе Господь с Девою Святою,

ибо удиви на ней чюдну силу Свою.

Устрой ю достойну приятия быти

Бога Слова и плотски Онаго родити,

То же семене кроме, браку непричастно,

без истления девства, всячески безстрастно.

Пречюдно со матерством девство сочетал есть,

нов плодоношения образ показал есть,

Каков прежде не бяше в мире, ни же будет,

донде же в течении си солнце пребудет.

Въторым образом Господь с людми пребывает

правително, повнегда кого управляет

Изряднейшим тщанием во всех делех его,

да никако погрешит от конца своего.

Бяше и сице Господь с Благословенною

Девою Мариею, от век избранною,

Ибо изрядней ея житие правляше,

во всяких деяниих тайно наставляше,

Еже бы ей нимало правды отступити,

но выну греха кроме всякаго век жити.

Яко кормчий корабль свой, ону управляше,

от всяка волнения и бури спасаше.

Тем безбедно к тихому пристанищу приде,

во Сиона горняго покой вечный вниде.

Третий покровителства образ обретаю,

им же со человеки Бога быти знаю.

С Мариею и сице Господь выну бяше,

ибо от бед всяческих ону защищаше.

Яко орел гнездо си выну наблюдает,

аще на время того мало отлетает,

Тако Девицу Господь сохраняше выну,

яко гнездо бывшую едину Си Сыну.

Он ю от гонителя Ирода хранил есть

и во Египте страж ей неусыпный был есть.

Он завистныя люди в гневе укрощаше,

яко никто ей словом тяжким досаждаше.

Егда Сынови ея хулы глаголаху,

на ню же загражденна уста содержалу.

И в год страстей Христовых она бе едина,

со Иоанном зрящи кончину си Сына,

Ему же ругахуся, яко же можаху,

а на Матерь Святую уст не разверзаху.

Покровителством сия Божиим вся быша,

яко никогда врази на ню наступиша.

Четвертый есть промысла образ всеизвестный,

им же со человеки живет Царь небесный.

Бе сице с Мариею Господь твари всея,

ибо выну о нуждных промышляше ея,

Да, истиннаго Бога сущи Сына Мати,

богодостойне может Того воспитати.

Он в Вифлиеме сущей волхвы устроил есть

и злато во потребу нести наставил есть.

Он во Египте жившу с Сыном препиташе,

варварская к ней сердца в милость претворяше;

И по страстех Христовых даде Иоанна,

да тем будет до конца жизни си питанна.

Пятый есть присущия образ божественна,

во печалех сущаго деет утешенна.

Бяше и сим образом Господь с Мариею,

ибо благодатию тешил ю Своею

Во всяческих печалех, наипаче творяше

утеху, егда она при кресте стояше,

Плачющи смерти Сына, ни могла бы жити,

аще не бы изволил Господь ю крепити.

Шестый есть присутствия образ всем Владыки,

елма сослагает Си волю с человеки.

Сице бяше с Девою Господь Пресвятою,

ибо Христос слагаше ея воли Свою.

Сниде с нею в Назарет и послушлив бяше,

еже виде потребно, некосно творяше.

И в Кане Галилейстей тем Матерь почтил есть,

на ея слово воду в вино преложил есть.

Наконец, преимущством даров благодати

и лично Бог Сын с нею изволи витати,

Егда во чреве ея изволи плоть быти

и паче всея твари облагодатити.

Тогда она превзыде светлы херувимы,

превознесеся над вся страшны серафимы.

Нижше Бога точию в чести сотворися,

потом и в небе выше всех лик водворися.

Един Бог болей ея, равнаго не знает,

вся, яко солнце звезды, чины превыжшает.

И мы ю паче всея твари почитаем,

сущу Богородицу песнми величаем.

Гость

Гостя чредит радость

паче, неже сладость.

Аще косвенно зриши,

зле ты гостя чредиши.

Гражданство

Како гражданство преблаго бывает,

гражданствующым знати подобает.

Разная седми мудрых суть мнения,

но вся виновна граждан спасения.

Премудрый Виас даде слово свое,

гражданство быти преизрядно тое,

В нем же закона як царя боятся,

и царя, яко закона, страшатся.

Хилон блажит, где законов слушают,

велесловных же ритор не глашают.

Клеовул паки той град похваляет,

где безчестия всяк ся устрашает

Гражданин паче закона самаго,

на преступники в книгах писаннаго.

Периандер же то славит гражданство,

в нем же, всем прочим имущым равенство,

Добродетелми зовутся лучшая

и наричутся злобы вся хуждшая.

Питтак похвалу дает граду тому,

в нем же началство не дается злому.

Фалес град блажит, где граждане мнози

ни пребогати, ни зело убози.

Солону град люб, в нем же обид творцы

вся равно имут праведныя борцы,

Не токмо беду от них страдавшыя,

но ни едины тщеты познавшыя.

Еще, иде же блазии блажатся,

честь приемлюще, злии же казнятся.

Еще, и в нем же граждане слушают

началных, сии закон почитают.

Сия суть, яже крепят государства,

чинна и славна содевают царства.

Гроб Христов

Егда плотию Христос Господь умертвися,

во вертограде в гробе нове положися.

Да яко Адам первый в верте согрешил есть

и вкушением плода умерщвленны был есть,

Тако вторым в ограде грех той испразднится

и смерть, мертвящая ны, тамо ж умертвится.

Новому же Адаму гроб нов подобаше,

обновите естество пришедшему наше.

В каменном яко камень гробе положися,

на нем же создание Церкве утвердися.

Гробный камень многими язвы уковася,

многи язвы и Христос за ны прия на Ся,

Ими же исцелехом от змиевы раны.

О коль велика, Христе, милость Твоя на ны!

Свет наш Христос во гробе темне положися,

тако род наш от нощи люты свободися,

За что вечная слава буди, Христе, Тебе,

живый с Отцем и с Святым Духом в светлом небе.

Греси противу Духу Святому

Различным видом грех ся содевает,

иже противу Духови бывает.

Шесточислен есть; хощеши ли знати,

изволь слушати.

Отчаяние, еже не даст знати,

яко Бог хощет грешных миловати.

Аще же хощет, то, конечно, может;

чай, и поможет.

Упование лишнее заводит

в надежду щедрот Бога, грехи родит.

И сие к слезам за грех не пущает,

в нем погубляет.

Некаяние Духа благодати

приходу споны обыче деяти,

ея же кроме сердце не крушится,

душа мертвится.

Жестосердие уши затыкает,

да увещений ничиих слушает.

И наковало иногда крушится,

сей не мягчится.

Правды боритель, хотяй ю попрати,

во нощи лести сердцем пребывати,

Духу Святому есть противен зело,

биет на Нь смело.

И ненавидяй в ближних благодати

хощет дар Духа Свята угашати.

Яве нелюбовь демонску являет,

сам исчезает.

Вси сии трудно простими бывают,

что сущии в них вправду ся не кают.

Бог же вся может и схощет прощати

мощным плакати.

Греси ума

Светилник тела око, то бо просвещает

вся уды, к делесем их благо управляет.

Души же светилник ум, ибо тем правится

всякое дело ея и чинно творится.

А яко плоти око иногда мрачится,

егда болезнь или вред некий прилучится,

Тако не кроме мрака и ум может быта,

поне же многа могут онаго вредити.

Та же праведно грехи ума нарицати,

а обыкоша душу слепу содевати.

Первый грех — невежество, елма кто не знает,

что в вере или в делех знати подобает.

Вторый — неразсудие, елма неко дело

неразсудно творится, ни бывает цело.

Третий — скоросудие, им же согрешаем,

елма ближния скори судити бываем.

Ту досада Богови Самому ся деет,

яко ум наш суд Его восхищати смеет.

Его бо токмо дело тайная судити,

а мы како дерзаем суд тайных творити?

Обида есть и ближним, яже осуждаем,

ибо неразмыслием оным досаждаем,

И самы себе вредим, Бог бо попущает,

да о них же кто судит, сам в тая падает.

Грех и непостоянство, им же отпадаем

твердости суда, и в том изменни бываем.

Мало плоть или демон начнет искушати,

а мы в благом умысле не тщимся стояти.

Трости, зыблемей ветром, всяко подобимся,

в след мечтания блудна и умом носимся.

Грех и упор жестокий, ибо раскол родит,

свар, непослушание от него исходит.

Грех и мудрование плоти, елма тая

взискуем, яже токмо телу угодная,

То же лщенми многими и хитростми деем,

а на божественная ума не имеем.

Грех есть и оплазивость, егда тщимся знати,

яже ни малы ползы могут нам подати,

Или неприличных нам вежества желаем,

или со пристрастием лишних взискиваем,

Или въконец суетный, ли чрез средства злая,

или в намерения Богу противная.

Вся сия словом онем Павел заключает:

Не мудритеся паче, неже подобает.

Греси святых

Писание грехи святых изъявляет,

да никто в житии своем уповает.

Аще бо крепции столпи упадают,

вскую немощнии в себе уповают?

Ты, слыша грехи их, сердцем ужаснися,

от подобных грехов опасно хранися

И обрати очы на покаяние,

еже выну буди ти в подражание.

Греси, вопиющии в небо

Четыри в Писании греси положении,

иже вопиющии в небо наречении.

Вопют же, еже бы изволил Бог мстити

дерзающым грешником оныя творити.

Первый тех есть убийство неповинна суща,

тако Каин Авеля, без вины живуща,

Дерзнул смерти предати, тем выну кровь его

вопиет отмщения до Творца своего.

Вторый грех есть содомский, сий бо вопияше

в небо, яко же Троица аггелов вещаше

Аврааму святому, елма хоте ити

созерцати Содому и огнем казнити.

Третий — удержание мзды, рабом должныя

и всем труждающимся людем достойныя.

О сем Иаков Святый светло извещает,

яко слезно вопити к Богу не престает.

Четвертый вдов и сирот есть утиснение,

за сие скоро Господь деет отмщение,

Яко за Исраиля обижденна мстил есть

Египту, егда люди Своя свободил есть.

Блюдитеся, братие, злодействия сего,

да не страждете казни, достойныя его.

Аще ли уже делом сия совершисте,

праведнаго Судию на гнев возбудиете,

Тщитеся молитвами Его примирите

и, им же должни есте, довле сотворите.

Рабом удержанная скоро воздавайте,

взятая вдовам, сирым цело возвращайте.

Иначе не престанут ко Богу вопити,

а Судия праведный не может не мстити.

Аще же и терпит, но никако забудет

и по еже терпети лютшая казнь будет.

Греси тайнии

Аще тя совесть и не обличает,

обаче не у безвинна Бог знает.

Может бо совесть многих грех не знати,

яже Бог видит и казнь хощет дата.

Молися убо и о тайных гресех,

да Бог, простив я, вчинит тя в небесех.

Грех

Обычай человеком нагость покривати

и срамная зрению тощно сопрятати.

Тако прародители в рай сотвориша,

срамоту си листвием от древес сокриша.

Не токмо же телесну, но духовну точно

покривают, ставяще дело непорочно.

Гордость во смирения милость облекают,

нелюбители чести быта ся являют.

Тако вне, внутрь же сердцем паче ищут чести,

нежели тающ гладом алчет брашно снести.

Сребролюбию ризу щадения дают,

аки случаев ради сребро собирают,

Или помняще старость, да бы в ней имети

себе доволство, чим бы удовлити дети.

Зависть любве ризою обыкоша крыти,

нехотящии злобы являются быта.

Токмо исправления, но сердцы болеют,

яко ближнии в мире паче онех спеют.

Гнев в одежду ревности ведят облекати,

глаголюще, не лепо толико прощати,

Яко Самаго Бога делом огорчиша,

и многи человеки люте соблазниша

Прогневавшии онех. И тако месть деют,

обаче ревность быти лестно разумеют.

Опилство во гражданства милоть облекают.

нужду учреждения быти извещают.

Леность безвремением покрыта бывает,

или бедства ризою себе утаяет.

Всяк грех не ходит наго, ибо кождо ему

дает одеяние, а брату своему,

Мразом умирающу, никто хощет дати,

да не рекут, рад бы был, что имать, отьяти.

Буия мати спящи угнетает,

еже с собою чадо полагает.

Подобне мертвит дела си благая,

уснувши в гресех, душа безумная,

Ибо та грех ом весма исчезают,

от Бога щедра безмездна бывают,

Разве ко Богу грешник обратится,

то паки благих дел плод оживится.

Иже во гресе смертном пребывает,

сам свою онем душу умерщвляет;

То бо грех души, что смерть телу деет,

во гробе тело, в гресе душа тлеет.

Что благо, сый во смертном гресе содевает?

Мертвец мертвая чада пред Богом раждает.

Аще убо грех смертный в совести узриши,

абие сердцем твоим да ся сокрушиши,

Ибо сокрушение грехи истребляет.

мертву душу оживлше, плод жив изношает.

Не грешники, но грехи истребляти требе,

да, грехом изтреблшымся, брат твой будет в небе.

Соизвол греха иде же бывает,

по нем во дело той ся привождает.

Та же нрав внидет часто й творити,

к тому потщится кто защитник быти

Грехов деемых, недобро бывает,

ибо неудобь сицев ся спасает.

Удобь же течет во вечну темницу,

имея в помощь нрава колесницу.

Человеческо дело, еже в грех въпадати,

но демоское — в оном выну пребывати.

Пад на пути, абие тщишися востати;

подобне, пад в грех некий, не дерзай лежати.

Иже малыя грехи своя презирает,

громаду великую въкратце собирает.

Ею же отягчився, начнет ся скланяти,

еже во великая лукавства впадати.

Та же дерзнет велику злобу сотворити,

и тако будет нужда погруженну быти

Во огненном Тартаре, и вечно страдати

волны лютых мучений, избавы не знати.

То же разумей, аще в жизни ся не кает,

но до кончины века в гресех пребывает,

А иже ся покает в дни жизни своея,

не внидет в место муки, ни постраждет ея.

Многовременным хладом лед ся утвержает,

даже во твердый кристал преложен бывает.

Иже не к тому в воду может ся менити,

но во твердости своей выну имать быти.

Тако озяблость сердца грехи огущает

и во обычай твердый оны устрояет.

Иже неудобь в слезы может ся решити,

без них же невозможно в спасении быти.

Во время зимы дуга не бывает,

яже мир с Богом мира знаменает.

Грех — зима, душы мир отъемлющая

с Богом, в то место гнев наводящая.

Зима листвие из древес терзает;

грех благостыню в душах истребляет.

Грех велий — недуг велик, требует велика

врача. Бога Самаго, а не человека.

Никто же бо власть имать грехи оставляти,

токмо Бог, сущ виновник всея благодати.

Несть грех милость, щедра Бога побеждаяй;

Он огнь, яко сено грехи сожигаяй.

Аще и грех может огнь ся нарицати,

Бог источник, могущь огнь той угашати.

Рцы, грехи — мног пламень, вселенную жгущий;

Бог — океан щедрот сгасити могущий.

Тако един грех смертный умерщвляет,

яко множество тех же, погубляет,

Но не толико, ибо есть за многа

преступления лютша казнь от Бога.

За грех един казнь достойная будет,

за множество же многая прибудет.

Обаче вечно имут пребывати

обе, ты тщися обею гонзати.

Мнози творити малых грехов не дерзают,

а великия тщиво делом совершают.

Сии комары цедят, велбуды глощают

и теми душевную гортань удавляют.

Совесть их паучинной есть подобно сети,

ею же леть малы, болших мух не леть терпети.

Похоть с волею аще съвокупится,

абие чадо злое грех родится.

Воля як отец, похоть яко мати

окаянному тому отрочати.

В сласти плотстей жена плод в чреве зачинает,

но в велицей болезни во мир й издает.

Елма же рождения болезнь окончится,

тогда родилица та весела творится.

Точне душа в сладости грехи зачинает,

а с болезнию отцу духовну являет.

Но минувшей болезни, грешник веселится,

яко плода тяжкаго, тако свободится.

Мирска ради прибытка егда согрешаем,

или сласти плотския зле употребляем,

что ино тогда деем, точию Ворравуизбираем,

а Христа мещем, Церкве Главу?

Искушение несть грех, паче за то многа,

аще ся одолеет, мзда будет от Бога,

Но во искушении утеху прияти

и во мыслех влаему своих пребывати.

За неразсуждение простим грех родится,

соизволом же целым смертный грех плодится.

Грех человека внутрня в зверя претворяет,

аще лице телесе тожде пребывает.

Псаломник поминает, яко приложися

скотом человек в чести и уподобися.

Колми днесь паче оным внутрь нас подобимся,

егда во нравы онех грехми облачимся.

Лакомство человека в волка прелагает,

егда чюжда благая насилно хищает.

Терзаяй чюжду славу лживыми устами

между лайливыми ся сам вчиняет псами.

Тайнолстивец елма что лстиво похищает,

во лукаваго лиса сам ся претворяет.

Гневом и яростию иже напыщенни,

во жестокаго лва суть грехом преложени.

Иже иде же несть страх ужасно боится,

в еленя ли в заяца озречь облачится.

Кто леностию гнусен, трудов обегает,

во правду той ся осел гнусный нарицает.

Кто во скверне нечистот любит ся валяти,

не во лжу свиниею может ся назвати.

Непостоянный умом и в делех изменный

в птицу скоропарящу мнится преложенный.

Иже ядовитая словеса пущает

вредотворне, той в змия претворен бывает.

Словес увещения не хотяй прияти,

той есть аспид, обыкшии ушы затыкати.

Тако убо человек деянии злыми

со скоты, зверми тожде и с змии лютыми.

Блюдимся убо, друзи, злых делес творити,

да возможем и внутрь нас непреложни быти,

Да внешнему образу внутрний отвещает,

на той бо паче око Божие смотряет.

Тем, кто благообразен, того возмет к Себе

Царь небесный жити во пресветлом небе.

Зверообразным паки тамо затворенна

врата, будет же место им вечна геенна,

В ней же вечногорящий огнь не угасает,

зверонравных во пищу себе ожидает.

Грех тма

Писание Священно грех тме приравняет,

яко он в подобии с тмою пребывает,

Ибо, яко же тма есть света лишение,

та ко грех благодати есть погубление,

И, яко в тме сущии ничто созерцают,

множицею о спону преткнени бывают.

Тако грешници в пути блазе слепотствуют,

преткновением лютым излиха бедствуют.

Еще, яко тма в яму ходящих вревает,

тако грех человеки во ад низвергает.

Наконец, тма от света скоро исчезает,

и грех от благодати точне погибает.

В лепоту убо грех тма в Писании чтется,

соблюдение, да в нем не ходим, дается.

Грех первородный

Корене врежденнаго повреждены плоды;

чада суть несвободна рабския природы.

Обычно родителей сан в чадех бывает,

селянин селянина точна си раждает.

Адам корень бе всех нас, но грехом врежденны,

тем же и мы плод грешный онем изведенны.

Он свободу погуби и раб сотворися,

а в нем все семя его свободы лишися.

Он грехом окаляся, мы скверни ся родим,

егда из чресл матерних во мир сей исходим.

Но лучший Адам — Христос — сих бед нас избавил,

ибо свободу даде и вред той исправил.

Искупи кровию Си и очистил ею,

щедроты над тварию прояви Своею.

Невинность природную Адам погубил есть,

на все рождение си вину возложил есть,

Юже благодатию Христа низлагаем,

во воде крещения егда ся гружаем.

Града началник аще царю изменяет,

и власть градску, и честность свою погубляет,

Не сам точию, но и вси сынове его

в нечестие впадают чрез отца своего.

Адам наш прародитель Богу изменил есть,

егда сам Богом быти в рай восхотел есть.

Тем изгнася из рая, за врага вмененны,

в том безчестии вси мы бываем рожденны,

И никто сея вражды порока гонзает,

токмо иже во воде грехи погружает.

Грех содомский

Некто от премудрых в книгах написаше,

яко, егда Христос Господь рожден бяше,

Вси, иже содомски себе оскверниша,

огнем даже в пепел обращени быша

Во всей подсолнечной. Господь за зло мщаше,

иже изтребити скверну прихождаше.

Он же поядаяй огнь есть нареченны,

тем им, яко сено, всяк скверный сожженны.

Елма царие ризы на ся возлагают,

прежде от всяки скверны тыя очищают.

Царь небесный — Христос Бог — прияти хотяше,

тем, як ризу, очистил есть естество наше

Водою та же огнем. А егда родися,

всяк мужеложник везде огнем потребися.

Грех простимый

Сверботу краста в телеси раждает,

грех же простимый душе досаждает.

Ова телеси не дает почити,

сей не даст душе покойно пожити.

Аще ты убо красты не терпиши,

греха и мала зри, да не твориши.

Множество песка корабль погружает,

аще в нем велий камень не бывает.

Точне и малых грех умножение

душы кораблю деет топление.

Простимии бо к смертну устрояют

и тако душу онем погубляют.

Блюдыйся смертных, простимых блюдися,

сих и тех кроме спастися потщися.

Мал грех противу великому Богу

тщету и беду в людех деет многу,

Благодати бо действо препинает

и ко велику греху устрояет.

Грех смертный

Грех смертоносный есть проказе точен,

простимый, яко краста, есть порочен.

Ов умерщвляет, сей творит скаредна,

с чистыми жити деет непотребна.

Грех смертный точен есть смерти мертвящей,

простимый паки — болезни вредящей.

Ов, что секира, древо посецает,

сей, яко кожу древа, повреждает.

Аще во смертном гресе от мира идеши,

никако во царствие небесно внидеши.

Потщися убо прежде смерти грех избыти,

слезами того порок скаредный омыти.

Тако во страну жизни будеши впущены.

со духи праведными в славе водворены.

Грех братний покрити

Авва некий вопрошен, у не ли явити

грехи брата падшаго или утаити,

Даде отвещание: Елма грех тобою

братний таится. Господь скриет злобу твою.

Егда же грех тобою братний проявится,

и твой Господем Богом грех не утаится.

Грех смертный и простимый

Грех. иже есть смертный, душу умерщвляет,

сокрушением сердца очищен бывает

Или исповедию, инако не может

прощен быти, ничто же иное поможет.

Грех паки не ко смерти простимый зовется,

яко многими средствы людем прощается.

В первых, сокрушением очищен бывает,

паки, исповедь того в ничто обращает,

Третие, биение персей есть в помощы,

четвертая, молитва во дни или в нощы,

Пятое, Пречестнаго Креста знамение,

шестое, священныя воды кропление,

Седмое, причастие Божественных Таин,

осмое, ближнему си оставление вин.

За сия вся простимый грех Бог оставляет,

благодать Свою в душах наших умножает.

Грех бывает различно

Во различныя грехи человек впадает,

и различными вины грех ся содевает.

Неции, невеждеством суще помрачени,

аки тмою, бывают во грех вриновени.

Инии от демонска зла искушения

смертоносно падают во согрешения.

Мнози и от немощи во грехи въпадают

и без помощи Бога из них не востают.

Суть и злобою в гресех любящий жити,

сицевым неудобно в рай небесный внити.

Наконец, от налога мнози согрешают,

из него же ко Богу мали ся вращают.

Сими всеми не хотяй человек грешити,

должен Бога о помощь прилежно просити,

Без Него же несть мощно благо содевати

и безгрешно во мире долго пребывати.

Грех оставляется

Аще пал еси в грех некий великий,

проси милости у Христа Владыки.

Скоро ту явит, токмо не вращайся

но исправляйся.

Грех паче скорбей

ягота людем есть скорби терпети,

глад, огнь и врачи с оружием зрети

ли губителства язвы созерцати,

беды страдати.

Но мало сия зло мощно вменяти,

аще восхощем с грехом уравняти,

той бо лютшую беду содевает,

где ся вселяет.

Скорбь телу токмо может досадити,

или во вещех тщету сотворити.

Душы нимало вредит, ни отьяти

весть благодати.

Грех паки смертный душу умерщвляет,

ибо ю с Богом живым разлучает,

съединяет же с врагом всегубящым,

смерть наносящим.

Тем же, аще бы каменми дождити

свыше, снизу же рекам огня плыти,

ни мала может сотворити вреда

сицева беда.

Всем, иже тако живот провождают,

яко Божия Слова поучают.

Незлобивым бо что-либо случится,

в добро вратится.

Несть то печаль им богатств ся лишати,

раны без вины лютыя страдати,

И на саму смерть за Божие Слово

сердце готово.

Греха степени

Простое прежде входит во ум мышление,

та же крепкое злобы воображение.

Последует утеха с плоти движением,

наконец грех ся родит соизволением.

Тако враг совершенно в сердце ся вселяет,

душу, без благодати сущу, умерщвляет.

Грехи чуждыя извиняти

Блюдися, возлюбленне, любопытлив быти

жития ближних твоих и грехов судити.

Аще негли видиши дело и лукаво,

деемое онеми, ты сам живи право.

Оны же в сердце твоем тщися извиняти,

неведение, случай ли скорость вменяти.

Аще же сими ум твой не упокоится,

напоследок мысль в тебе сия да родится:

О, коль велие терпе брат искушение!

Люто на нь демонское бяше стремление.

Что бых аз, окаянный, могл тогда творити,

егда бы взял враг на мя власть тако кусити?

О Человеколюбче, блюди мя от него

и падшаго возстави ближняго моего!

Грешен кийждо

Кто есть человек, в мире пребываяй,

Богу грехами си не досаждаяй?

Ей, неудобно и мал час пребыти,

да бы нимало Богу согрешити.

Немного зело Адам в рай бяше.

аки в полате царстей пребываше,

Едва шесть часов (Ефрем нам явил есть),

но многу злобу тамо сотворил есть.

Прогнева Бога снеди вкушением

и Еввы паче Бога люблением.

Избра бо паче Бога прогневати,

нежели Еввы гласа не слушати.

Что же бысть посем? Всех даров лишися

и невинности ризы отщетися.

Смерти суд прият, уби в себе чада

и бысть изгнанник из Едемска града.

В труде и поте брашно си стяжаше,

разным болезнем плоти подлежаше.

Наконец умре и взятся до ада,

имевый быти житель горня града.

От его же мы семене идуще,

истлевша древа тленни плоди суще.

Тленная деем, грехи умножаем,

образ в нас Божий всескверно каляем.

Движем ко гневу всещедраго Бога

чрез лукавая дела зело многа.

Тем благодати лишени бываем

и тако душы своя убиваем.

Яко бо тело душа оживляет,

благодать тако душе живот дает,

И яко тело кроме душы тлеет,

без благодати душа тако гниет.

Потщимся убо не без благодати

житие наше в мире провождати.

Грешныя Бог оставляет

Егда патриарх Иаков видяше,

яко тесть Лаван его не любяше

И нача слово ему изменяти,

что должно бяше. того не даяти.

Оставив его, иде в свою страну.

Кая же полза бысть, зрите, Лавану?

Дщерей и внуков, и стад отщетися,

благословенства Божия лишися.

Точне с грешники Господь содевает,

егда нелюбовь от них усмотряет,

Егда обетов си не соблюдают,

должныя чести Ему не воздают.

Отходит от них светом благодати,

в тме оставляет грехов истлевати.

Тогда велика тщета им бывает,

всяко бо дело их не успевает.

Добродетели мертвы ся раждают,

ползы в жизнь вечну им не содевают.

Ничто приятно Господу бывает,

донде же грешник о злых ся не кает.

Убо ты, брате, аще согрешиши,

встани от блата, в нем да не лежиши.

Омыйся скоро теплыми слезами,

угождай Богу добрыми делами.

Тако приятна та будут у Бога,

жива, успешна в жизнь Его чертога.

Грешныя прародители Христос име

Родословие читаяй Христово,

еваггелисты сущее готово,

Обрящет, яко от Девы родися,

яже мужеви никогда общися

И цело девство выну сохранила,

чистаго чисто чистая родила.

Яко чистоту пришедша вселити

достойно бяше всечисто родити,

И Всесвятому подобаше Мати

Святая, да бы из нея плоть взяти.

Но постепенно к Авраму идуще,

не весма родство зрится чисто суще,

Ибо четыри жены обретаю,

яже зазорны во чистоте знаю.

Фамарь свекра си Иуду прелстила,

блудницу себе быти притворила

И тако свекру плотию смесися; .

Фарес и Зара оттуду родися.

Вирсавия же, Уриина жена,

Давиду блудно бе прежде спряжена,

Потом законно ему свокупися,

с нея Соломон премудрый родися.

Раав блудница есть именованна,

яже Салмону в сожитие данна.

И Руф Воозу тайно подложися,

юже ощутив. Вооз свокупися.

Вся сия жены чистоты лишенны,

хотя послежде быша исправленны.

Что от позорных сице прародитель

изволи, Христе, изъити. Спаситель?

Учителие зде ся потрудиша,

вопрошению ответ сотвориша,

То глаголюще: яко воля бяше

устроившему спасение наше

Грешныя от грех чисты сотворити,

тем же бе требе с грешных Ся родити.

Да чистотою Его очистятся,

от грехов в святость удобь изменятся.

Вторая вина: то знаменоваше,

яко нечисту пояти хотяше

Христос невесту, еже есть языки.

блуд со идолы творшы человеки,

И ту всечестну, чисту сотворити,

яко же Глава тело Си любити.

Третия вина: тако научает,

яко безчестность рождьших не вреждает

Чести пред Богом чад, благо живущих,

путем благости изрядно текущих,

И сопротивно, несть похвала тому,

иже родися в честнославном дому,

Аще делеса нечестная творит,

безчестно чадо дом честный позорит.

Уне есть убо от худых рожденну

во славу быти роду положенну,

Неже славою рода ся хвалити,

самому без дел доброчестных быти.

Давид от овец Богом восприяся,

но царства скипетр в руце его дася,

И мнози ины, от рал отлучени

суще, на престол царский возведени,

Что им никако в нечесть может быти,

паче достоит благость их хвалити,

Яко достойни явишася Богу,

да честь приимут и славу толь многу.

А то комуждо знати подобает,

яко честь в роды пременно вхождает.

Един род ныне до облак восходит,

а другий с облак на землю нисходит,

И несть род честный, во нем же не быша

людие, иже малочестни жиша.

Несть и нечестный, во нем же никто же

во чести бяше и быти не може.

Тем мудрец некто слово написаше,

памяти людей потомных предание:

Вси, рекл, царие из рабов рождении,

раби из царей вси суть изведенни.

И правду рече, ибо вси чрез Ноя

суть от Адама чрез колена своя.

Адам же и Ной всем миром владеша,

царие мира всеизвестно беша.

А по коленом суетно читати,

кто бо изъследит, кто отец, кто мати,

За лет тысящу кто своего дому

степени явит, известно никому.

Како ли убо всяк еси рожденны,

не буди в твоем уме возмущенны.

Аще в доме преславном родися,

сам живот вести честный, славный тщися.

Аще ти род худ, ты благ тщися быти,

можеши славу дому сотворити,

А пред Господем род ся не считает,

житие благо любезно бывает.

Он и со престол злыя люди губит,

благия паки и в гноищи любит;

В показ нам Лазарь со богатым буди.

Настави, Боже, благо жити люди,

Да от своих дел всяк ся прославляет,

Тебе угоден онеми бывает.

Д

Дар

Древеса в саде сожденна бывают,

не да безплодно место упражняют,

Паче да плоды обилно приносят.

о них же люди Бога щедра просят.

Аще не плодят, то ся изъсекают

и во снед огню верженна бывают.

Тако Бог дары нам Своя дарует,

да кождо ими благая плодствует

Не в себе токмо, но и в своих друзех,

сущих по долгу Царя твари слузех.

Иначе, смерти косою ссеченны

будет и во огнь вечный воверженны,

Во нь же да бы нам верженным не быти,

потщимся дары плод мног приносит

Иаков Исава дарми укротил есть,

гнев лютый на любовь теми преложил есть,

Ибо с оружием на него идяше

Исав, а зря дары, брата целоваше.

И ныне дарове ярость укрощают

и Самаго Бога к милости склоняют.

Дым руце греет, но очи вреждает;

дар тешит сердце, совесть развращает.

Приемляй дары свободу продает,

истинны путем косно поступает.

Яко же путы по ногам скованный

не может быти в шествии пространный.

Дары умилостивляют

Иаков егда в отчество вратися,

во стретение Исав устройся,

с ним же святому вражда древле бяше,

и не знаяше,

Что хощет быти: любовь ли мщение?

Нападе страх на нь и усумнение,

умысли дарми брата благодати

себе искати.

Тем же от всех стад часть ему предслал есть,

жестоко сердце тако умягчал есть

и утоли гнев, ибо не отмщаше,

но целоваше.

Мы Христу Богу выну досаждаем,

на гнев грехами Его подвизаем,

и въмале хощем возврат сотворити,

в отчество ити.

Имать же Христос в стретение быти.

с множеством аггел и злобы судити.

Должно есть убо выну трепетати

и промышляти,

Да въместо гнева любовь нам проявит,

не между козлы, но с овцы поставит.

Предпошлим дары от имений сущых

в страну живущим.

Нищии, вдовы, странницы, сироты

зело у го дни до тоя работы.

Что им дается, Христос приимает,

вину прощает.

Дароимство

Судия некто дароимец бяше,

от прю имущих дары восприяше.

Сосуд елея взя от единаго,

а вепра тучна прия от другаго,

И сего судом своим оправдил есть,

онаго паки винна сотворил есть.

Пришедшу же в дом, иже елей дал есть,

судия кривый сице отвещал есть:

Прости мя, рече, забых благодати,

яко ты елей изволи ми дати.

Вина же тому вепр питанный бяше,

иже, вшед в дом мой, елей пролияше.

Оле судии! Ни же усрамися,

яко от правды вепром отлучися.

Даяние

Блаженно паче есть иным даяти,

рече Христос Бог, нежели взимати.

Вины различны сего обретаю,

яже подробну сице полагаю.

Обилия есть знамя даяние,

скудости паки знамя взимание.

Болшую любовь даяй изъявляет,

нежели вземляй, и мзды многи чает.

Даяй свободен, вземляй же должится,

к воздаянию в совести нудится.

И честно паче дары кому дати,

неже от иных оныя прияти.

И господственно есть подаяние,

скудных же людей дело взимание.

Наконец, полза вящшая дающым

людем бывает, нежели вземлющым,

Ибо подают вещы временныя,

а восприемлют в небеси вечныя.

Прилежи убо койждо иным дата,

нескор же буди даров приимати,

Да то блаженство останет при тебе,

и да примеши вечну мзду на небе.

Имаши злато и сребро от Бога,

ущедри мужа онеми убога.

Тако на ниве блазе посееши,

со многим плодом на небе пожнеши.

Даяти блаженней, нежели взимати

Сребролюбие руки обыче стискати,

а блаженней даяти. нежели взимати,

Ибо даяй богата себе воменяет,

вземляй же нищету си делом изъявляет.

Паки, щедрости знамя есть подаяние,

нужды же ли лакомства знамя — взимание.

Еще, любовь вящшую даяй содевает,

неже иже дания приимец бывает.

К тому, даяй свободен от долга хранится,

ко благодарствию же приемляй должится.

И почитаем паче бывает даятель

от Бога и человек, нежели взиматель.

Дело бо божественно иным подаяти,

человеческо паки — от иных взимати.

Наконец, яко вземляй приемлет земная,

даяй же имать взяти добра небесная,

Зде благословение, благодать и хвалу,

в будущем паки веце — жизнь вечну и славу.

Вси убо потщитеся ближним подаяти,

не будите же скори от онех взимати.

Да вящшее блаженство над вами явится,

и дар лучший за худый в небе воздарится.

Двоедушие

Иже. моляся Богу, сердцем си сумнится,

двоедушен есть, ибо надвое делится.

Во молитве надежду видится являти,

усумнением паки зрится не чаяти.

Единою душею свыше щедрот чает,

другою от Господа казни ожидает.

Отсюду верит, яко Господь то дарует,

его же молитвою от Него требует.

Отонуду не верит то от Него взяти,

о нем же тщится слезы теплы проливати.

И тако не исправлен пред Вышним бывает,

еже бо назда, паки сам то разъзидает.

Иже упование си в Бозе утвержает,

купно надежду в князех мира полагает.

Двоедушный се муж есть неугоден Богу,

ибо деет досаду Ему вел ми многу.

Яко мнит недоволна Его в помощь быти,

или нехотящаго ему пособити.

Того ради ко князем себе обращает,

скоршаго пособия от них себе чает.

А Бог готов и может помощь подаяти,

токмо единодушно требе уповати.

Аще убо не дает в помощь руки кому,

за двоедушство себе да причтет самому.

Лицемерник инаго себе вне являет,

а инаков во сердце своем пребывает.

Двоедушен убо есть, разве исправится

в единодушность, тогда Богом возлюбится.

Демон

Вран осла ненавидит, над ним же летает,

очеса изклевати носом си желает.

Точне вран адский, демон, хощет излупити

нам очеса умная, да бы слепым быти

И власти в яму греха, за то благодати

Божия лишитися и вечно страдати.

Демон служаше

Муж некто благородный домом си живяше,

ему же демон в лице юношы служаше

Верно же и угодно, тем же возлюбися

раб мнимый господином и велми им чтися.

Не яко раба его господин вменил есть,

но яко брата родна за службу любил есть.

Он же всякое дело чинно совершал есть,

помыслом господина благо угождал есть.

К тому благообразен и словесен бяше,

благочинно и в дому, и в людех служаше.

Во едино же время оба путствоваху,

а врази господина убити искаху.

В пути убо господин воспять обратися,

и се множество врагов гонящых явися,

А сопреде велия река предлежаше,

яже гонзати ему препону деяше.

Тогда рече господин: Увы! погибохом,

се в руце гонящих мя супостат впадохом.

Гонзати несть удобно, река препинает,

братися с ними, сила онех превыжшает.

Увы! что творително? Раб же отвещаше:

Да не боится сердце, господине, ваше,

Аз реку сию знаю, мощно чрез ню ити,

в бедстве утопления ни отчасти быти.

Последуй ми точию, и въпред путствоваше.

Господин же, веру ят, вслед его идяше

И преидоста реку безбедно, весело,

благодарен господин рабу бяше зело.

Врази же над брег реки прибегше, ту стаху

и Демон й пренесе, гласно вопияху,

Ведяху бо, что река бе непребродима

и неудобь приступна брегама своима.

И тако вратишася, не достигше его,

его же воменяху за врага своего.

Господин же со рабом радостен идяше,

благодарен за верность служащему бяше.

Потом, путь совершивше, в дому пребываху,

всякая дела, яко достоит, творяху.

Случися же господней жене болней быти,

даже едва можаше слово изпустити.

Мнози врачеве много врачевств подаяху,

но нимало во ползу теми успеваху.

Того ради печалну господину бывшу,

и безмерно о жене оному тужившу,

Рече раб той: Аз знаю, чим леть пособити,

и в том хощу аз тебе службу проявите.

Лвицы млеком госпожу помазати требе,

тогда познает ползу она многу в себе.

И то изрек, отьиде. Потом возвратися,

яко часу минувшу, и с млеком явися,

Им же елма госпожа помазана бяше,

абие ползу в себе здравия познаше,

И во мале времени здрава сотворися,

с господином си млеку тому почюдися.

Призвав убо господин раба, вопрошаше,

где тако скоро млека того он досташе.

Раб ему ответ даде: Отшед аз от Тебе,

в Аравитския горы нудих ити себе,

И тамо вшед в пещеру, скимна аз отгнал есмь

и от сосцу матере его млеко взял есмь,

Еже принесох семо, служя верно тебе,

во последней твоея супруги потребе.

Сия слышав господин, приужасен бяше

и, Кто убо ты еси? раба вопрошаше.

Он рече: Господине, печален не буди,

се аз раб твой есмь готов на всякия труды.

Господин вопрошати его прилежаше,

а он потом истинну не тая сказаше,

Глаголя: Аз есмь демон, с небесе верженный,

от видения Бога вечно отлученный.

Ту паче ужасеся господин, и рече:

Что тя работати ми толь верно привлечет

Даде ответ: Годе ми с человеки жити,

тем же недосадно ми верно ти служити.

Господин рече ему: въпред ти отрицаю,

зане ты еси демон, службы не желаю.

Демон рече: Не бойся, не хощу вредити,

но до конца имамь ти всеверно служити.

Господин глаголаше: не хощу тя знати,

к тому во службе не леть тебе уповати,

А за службу бывшую имам ти воздати,

что хощеши от злата, токмо хоти взяти.

Полъимения возми, охотно ти даю,

верность службы твоея тако ти воздаю.

Помню, яко от смерти еси мя избавил,

и супрузе здравие млеком ты возставил.

Человек человеку не может служити

тако верно, яко ты, и угоден быти.

Велми убо достойну мзду за труды твоя,

а отьиди от мене во жилища своя.

Демон рече: Поне же не леть ми есть быти

с тобою и верныя службы ти творити,

Изволи ми за службу пять златых воздати,

более тех не хощу аз у тебе взяти.

Господин скоро дал есть. Он же злато взяше,

та же возвратив ему, сице глаголаше:

Не имам нужды злата, ты изволи взяти,

а нищей оней церкви благо содеяти,

И нарек церковь, проси, да звон к ней купится

и звонения ради при ней утвердится,

Да христиане в церковь тщатся приходити,

егда гласу во уши того звона внити.

То обещав господин весма сотворити,

с радостию колокол ко церкви купити.

Демон, обет услышав, исчезе от него,

возвратися до адска жилища своего.

Зде хитрость демонскую мощно есть познати,

вскую он злато на звон восхоте отдати.

Зрите вину правую. Зане церковь тая,

отстоящи от града, велми бе нищая.

Людие звона кроме к оней прихождаху

зело рано и в молбах долго пребываху.

То ему бе досадно. Да убо от часа

того ожидают вси того звона гласа

И не рано приходят Богу ся молити,

ту пакость враг умыслил людем сотворити.

Иже, аще и благо нечто содевает,

но намерение зло весма сокривает.

Никто же убо добра от него да чает,

в сладце меде яд смертный он нам устрояет.

Демон изочает

Навходоносор гордый егда разорил есть

Сион и Седекию царя в плен хитил есть.

Умысли связаннаго в Вавилон послати,

но прежде очи ему повеле изьяти.

Подобне деет демон, егда разоряет

град Божий в душах наших и ум в плен хищает.

Первее очи его лестми избодает,

та же путем пагубы во ад провождает.

Се же да бы во пути стези не узрети,

ею же бы могл в Сион горний улетети.

Демон, яко пес прицепленный

Псу прикованну несть леть кого уязвити,

аще сам соблюдется к нему приходити.

Тако демон проклятый никого кусает,

разве кто ся волею ему приближает.

О коль безумна того мощно нарицати,

кто ся псу прицепленну дает угризати!

Точно безумен, иже сластми приближится

демону, и от него смертно у язвится.

Не приближайся ему. человече, теми,

он тебе не яузвит зубами своими.

Лаяти ему мощно, сиречь подущати,

язвити же не леть есть, то есть в грех нуждати,

Разве самохотяща; он бо не нуждает,

просит токмо извола, на грех увещает.

Ты удалися его, ушы да заткнеши,

имей ми веру, вреда никогда возмеши.

Демон ловит

Внегда мыш коту во снедь уловити,

не тщится ея абие убити,

Но прежде с нею надолзе играет,

та же. утрудив, мертвит и снедает.

Подобне демон человека ловит,

егда он на грех сердцем соизволит.

Та же. летя его. пагубне играет,

малый грех быти оному являет,

И велит в бозе тогда уповати,

яко изволит прощение дати.

Поминает же, яко несть леть жити

во плоти сущу, а не согрешити.

К покаянию долг век обещает,

а к делу злому тайно подущает.

Елма же тако довле поиграет,

тогда душевне делом убивает,

А егда частым делом нрав ствердится,

тогда весь снеден грешник сотворится.

Что вы знающе, врага не слушайте,

изволения на грех не давайте,

Да не будете онем уловлени,

убиени же, купно и снедени.

Демон исповеди пакость

Пустынножитель некто путем си идяше,

и се прямо себе тры демоны видяше,

Яже вопроси, кая имена им бяху.

Они же друг по друзе сице отвещаху.

Первый рече: Имя ми — сердца заключителъ,

яко, егда приводит церковный учитель

Ко исповеди грехов, аз то заключаю,

со жалем воздыхати к Богу не пущаю.

Вторый рече: Имя мне — устен затворитель,

яко та моя служба есть и добродетель

Кающагося мужа устне затворяти,

да бы не могл духовну грехов си сказати.

Третий рече: Мне имя — чпага завязатель,

ибо творю, да чюждых не будет отдатель

Вещей, иже ся кает. Тако удержится

нами от прощения и Бога лишится.

Дружно же мы с собою велми обитаем,

друг другу, поелику мощно, помогаем.

Сия слыша, пустынник позна врага ковы,

како выну ловити, яко лев, готовы.

Того и мы, слышаще козни вселютыя,

потщимся растерзати и попрати тыя.

Не дадим сердца и уст наших заключати,

не хотим чуждых вещей себе удержати,

Но отдадим я, кому право подобает,

иначе бо грехов Бог никому прощает.

Да сказу ем вся грехи со воздыханием,

точаще слез источник со упованием,

Яко благоволит Бог прощение дати,

и тако из грешников сотворимся святи.

Демон в образе аггела служаше

Бе некто раб Господень, с ним же демон бяше

въместо аггела блага, ему сослужаше

Чрез немалое время, и в нощи сиял есть,

даже муж он лампады никогда взимал есть.

Часто откровения оному творил есть.

но се десныя козни, ими же й лстил есть.

По мнозе же времени злый враг совет дате,

да его же при себе раб Божий имяше

Сына, того заколет в жертву Богу благу,

паче всех приношений сущу ему драгу.

Да тако Аврааму подобен явится

в приношении жертвы, и равне блажится.

Раб Божий неискусен козней врага бяше.

нож острил есть и верви уже готоваше.

Им же бы любезнаго отрока заклати

связанна, и во жертву Господеви дати.

Отрок, необычное дело усмотряя,

Божиим Духом движим, умысл познавая.

Во бегство себе вдал есть, и тако спасеся

от заклания отча, ни огнем сожжеся.

От коварства вражия! Како он прелщает.

во аггела светлости себе претворяет.

Но совещает темна делеса творити,

еже бы человека душевно убити.

Демон в аггела светла претворися

В обители некоей честный отец бяше.

во посте и молитвах живот провождаше.

С ним же купно живяше плотский сын онаго,

да воспитает в возраст отрака юнаго.

Того старца житию завистен явися

демон и во аггела светла претворися.

Пришед к нему, благости его ублажил есть

и, яко служай ему, в келлии сожил есть.

Во нощи время светлость от себе даяше,

даже никогда свещи старцу требе бяше.

Радовашеся бедный, мня добраго быти

аггела, не чаяше хотевша прелстити.

Но той притворно добрый время улучил есть,

старцу неопасному сей совет творил есть:

Добрый рабе Господень, блази твои труди,

но к совершенству тещи неленостен буди.

Многих добродетели отец светлы в тебе,

токмо подобитися Аврааму требе.

Имаши сына юна, того отдаждь Богу,

пожри й и стяжеши мзду от Него многу.

Старец, веру ем злобе, хоте то творити,

уже приготовав нож, начал есть острити.

Сын, видя дело ново, Богом наставленный,

позна, яко от врага отец бысть прелщенный,

Хоте его во жертву скверную заклати.

Избегл, не хотя смерти от отца си ждати,

Иже сыноубийство всяко сотворил бы,

аще юный гонзнути сын не ускорил бы.

Се како враг прелщает, кождо присмотрися,

козни его познати всеприлежно тщися.

День и нощь

1. Денница

Темную нощь денница светла разсыпает,

красным сиянием си день в мир впровождает,

Нудит люди ко делу. Ов в водах глубоких

рибствует, ов в пустынях лов деет широких,

Иный что ино творит. Спяй же на день много

бедне, раздраноризно поживет убого.

2. Полудень

Уже среде небесе солнце бег свой деет,

палит нивы, а скоты лучми зело греет.

Иже в сени при водах от трудов хладятся,

жнеци пищею и сном по трудех крепятся.

Так естество отчески строит, еже быти,

закон всем пишет вещем нуждный сохранити.

3. Вечер

Як заря день вещает, так нощь вечер вводит,

в хлевину си скот идет, орач в дом приходит.

Рало оставив, хлебом стомах укрепляет,

утружденныя силы пищми обновляет.

Та же сном сладким плоть си покоит стружденну,

сон бо Богом дадеся в покой труду дневну.

4. Нощь

Нощь мрачная тму страшну на землю наводит,

изветы часто, злобы и поводы родит

В готовых на вся злая, что злый ум вмещает.

Обаче своя игры, утехи нощь знает,

Временем есть полезна. Но мудр сый блюдется

тмы нощныя, день любит, да в ней не преткнется.

День смерти

Лучший день смерти людем, мудрец поведает,

неже во нь же ся во мир человек раждает.

Ибо день рождения на море изводит

зело бурное, еже всяки беды родит.

День же смерти от всяких скорбей свобождает,

в пристанище тихое, в небо преселяет.

Дни злии и добрии

Дни века сего зли ся нарицают,

яко в них многа зла людем бывают.

В них огнь, глад и мечь люди погубляет,

мор, печаль, беда, болезнь умерщвляет.

Вся же грех ради сия озлобляют,

блаженни, иже злых делес гонзают.

Дни же будуща века, иже в небе.

благи и святы звати всем нам требе,

Яко ничто же зло тамо бывает,

но вся благая в себе заключает.

Всяко же тии оны имут жити,

иже зде тщатся блази в делех быти.

Потщимся убо благо содевати,

да бы благия дни нам восприяти,

Или един день, но той безконечный.

радостный, сладкий, светлый, святый, вечный.

Десница и шуйца

Разбойник, иже страну десную держаше,

егда с распятым Христом на кресте висяше,

Десная из уст своих славеса вещал есть;

за то прощен, десная от Христа приял есть.

Ибо Христос Бог ему сие слово рече:

Днесь будеши со Мною в рай, человече.

Иже паки на шуйце разбойник висяше.

шуия в мире дея, шуия вещаше,

За то шуия страны жребий получил есть.

на вечную погибель Христос й судил есть:

Точне, иже шуия ныне содевают,

или усты своими ложно отригают,

Ошуию в день Суда будут поставлени

и на вечныя муки во ад низринени.

Десных же творители станут одесную

и воведени будут в страну небесную,

Еже в десных Божиих вечно пребывати,

с небесными силами выну ликовати.

Десятина

Воин некто виноград отчинный имяше,

из него же на всяк год плоды собираше,

И тех десятую часть обыче даяти

Церкви, благодарен быв Бога благодати.

Во едино же лето неплодство случися,

едва десятая часть всех плодов родися.

Он и ты собрав плоды, к Богу глаголаше:

За грех мой отьял еси, что мне подобаше,

А еже Тебе должно, все изволи взяти,

аз недостоин части Твоея вкушати.

И се рек, от да Церкви, что-либо собрал есть,

но Господь многократне оному воздал есть,

Ибо во тожде время брат к нему прииде,

исполнь виноград гроздов, мимо грядый, виде.

И пришед во дом брата, ему глаголаше:

Вскую из винограда гроздов не взимаше,

Толиким плодом сущым? Он же ответ дал есть,

яко уже вся плоды из него собрал есть.

Брат рече: Аз днесь видех плоды безчисленны,

паче прочих виноград зело умноженны.

Воин, удивлея, иде с братом соглядати,

и се изъобилие изволи Бог дати

Чюдодейственне, паче, неже в ина лета,

за что возблагодари воин Христа-Света,

И то чюдо мирови яве провещаше,

а десятины Церкви радостно даяше.

Диавол

Продерзивая жена мужем обладает

кротким, прением, хулы тому досаждает.

Аще же грозна имать мужа, то боится,

ран блюдется, слушает и молчати тщится.

Подобне враг диавол тако сверепеет,

иде же человек й прати не умеет,

А иже добротами муж вооружится,

на того наступити зело он боится.

Мравиолев воправду может он зван быти,

яко в лва и мравия весть ся претворити.

Мравий он мужем силным, ибо презирают

силу его, а кости удобь раздрушают.

Лев он грешным жестокий быти ся являет,

страшливых мужей сердца велми ужасает.

Нам, христианом, Христос оружие дал есть,

како й побеждати образ показал есть.

Да не боимся убо мы козней еговых,

гонзати имать, аще обрящет готовых.

Аще диавол чрез тя когда посрамится,

не абие в очеса с бранию явится,

Но козни и коварства имать сострояти.

Ты да не впадеши в ня, тщися бодрствовати.

Диадима

Благоразумный некто, на царство избранный.

егда хотяше быти на то увенчанный,

Взем диадиму в руце, сице глаголаше:

О честное увясло, крашение наше!

Честно ты паче еси, нежели блаженно.

ибо, аще бы то ким было разсужденно.

Кия скорби, печали и бедства по тебе

последуют, не взял бы тя из земли себе,

Оставил бы тя в персти земней истлевати,

и перстом не хотел бы тебе ся касати.

Диоген

Диоген философ егда умираше,

от друг объстоящих вопрошаем бяше,

Где изволит телу погребенну быти.

Изволте мя, рече, в поли положити

На верее земленнем. Они отвещают:

Тамо тело твое звери растерзают.

Он рече: Палицу при мне положите.

Они: Что ти есть в ней. друже нарочите?

Не почюеши бо, сый души лишенный.

Он же: Вскую убо бываю смущенный?

Аще не почую, звери не досадят,

егда растерзавше тело мое снедят.

Где-либо хощете, тамо погребите,

мне во ин век с миром отьити дадите.

Добро

Добро плоти — здравие, душы — Бога знати;

даждь нам. Боже прещедрый, обое стяжати.

О благих мира сего сердце веселится,

егда имамы многа, и душа сладится.

Паче о величайшем добре, еже в небе.

Сердцам и душам нашим сладитися требе:

О добре, еже жизнь есть, свет, блаженство, сладость,

вечность, мудрость, красота и присная радость,

Вседоволное выну и вся добрящее

быти и благо быти сущым творящее.

То же добро Отец есть с прежде век рожденным

Сыном и с Духом Святым, тогда жь испущенным.

Сие добро благ всяких сладость имать в себе,

яко Творец доволну всяческой потребе.

Аще созданный живот кого услаждает,

создавший многу паче сладость заключает.

Аще здравие благо, колми паче Датель

здравия благ есть, купно сый здравых Создатель?

Аще любезна мудрость, яко твари знает,

колми любезней, Иже ону людем дает

И вся премудростию Своею создал есть,

любящым Себе небо светло сготовал есть?

Аще многи утехи красота раждает

в твари сущая, колми паче утешает.

Иже красот Красота и утехам Радость.

всем созданным радостем создавшая Сладость?

О коль блажен, добро то возмогий стяжати!

В коей вещи и когда скудость имать знати?

Вскую убо мятемся, тленных благ ищуще,

а нетленное добро пред нами имуще?

Возлюбим едно добро, всех благ Творца, Бога,

и довлеет нам радость, яже в Нем всемнога.

Добро за зло

Филиппа Македонска муж некий гаждаше,

хулы яве и отай о нем глаголаше,

Даже вернии раби царю известиша

и кое же отмстити онаго нудиша.

Царь же не оружием ту обиду мщаше,

но много число златниц тайно ему даше.

От того он времене Филиппов хулитель

велегласный благости бысть его хвалитель.

По мале времени царь слуг си вопрошаше,

аще оглаголанный муж его хуляше.

Реша единогласно, яко изменися,

уже во хвалителя его преложися.

Тогда царь слугам рече: Вестно то вам буди,

яко в моих есть руках изменяти люди.

Хулители во хвалцы. Аз ту хитрость знаю,

отселе не восхулит он нас, добре чаю.

О дивныя победы! Не злым зло воздает,

но благостынею си злобу побеждает.

Христианску доброту в себе проявил есть

прежде, неже Христос Бог сему мир учил есть.

Добродетель

Добродетели суть и во поганех,

яже должнетвуют быти в христианех.

Но не подобне, яко сень бо в овех,

яко свет паки во рабех Христовех.

На песце овех благости назданны,

себе бо ради бывают деянны,

Да славу мира возмогут стяжати,

глас благ о себе во людех слышати.

Христианских же мужей благостыни

суть на каменней зиждемы твердыни.

Яко во славу Божию бывают,

от Него же вся в люди истекают.

Чрез седм лет елень роги своя возращает,

на всяко лето една ветвь в них прирастает.

Мы чрез седмь десятин лет должнствуем растити

добродетели в сердцах и присно множити.

Еже есть чрез весь век наш, в нем же седмдесят лет

изволил положити Бог наш немрачный свет.

Сокровище видимо скоро погибает,

добродетель явная равне исчезает.

Добродетели и злобы

Горам добродетели нами подобятся,

юдолем же глубоким злобы вся равнятся;

Овы, яко к небеси люди приближают,

сия, яко ко аду оны низревают.

Неудобно на горы высоки ходити,

точне добродетели неудобь творити.

Удобно паки с горы в юдоль низпадати,

тако от добрых делес к злым ся уклоняти.

Седми добродетелей богословских и главных начертания, прехитростно изображенная, историами святыми освященная, полезная благоговейных употреблению. и образы медяными изваанная. Добродетели аще не к Богу возносятся, преступление есть.

Августин, в книзе о Граде Божий.

Воздержание

Сия добродетель учит мерно жити,

сладкая, сластная воздержно вкусити.

Любы

Надежду и веру любы превыжшает,

добре ю Агапен еллин нарицает.

Правда

Аз есмь правда, яже право содеваю

мерилом, что сие, всякому воздаю.

Надежда

Вера надежду родит, та котва бывает

твердая души, и путь в небо полагает.

Разум

Се разум лучший силныя десницы,

вся деяй благо умными зеницы.

Крепость

Крепость добродетель умы укрепляет,

всяк случай терпети крепце наставляет.

Вера

Се образ веры, яже сьединяет

верныя люди, та ны оправдает.

Добронравие

Жених душ наших красен лица добротою,

паче всех человеков украшен есть тою.

Желает же и душам нашим красным быти,

да бы красну с красными вселюбезно жити.

Красота же душевна суть блазии нравы,

удостояющии небесныя славы.

Убо добронравие потщимся стяжати,

аще хощем со Христом в небе пребывати.

Вонею приятен цвет и красотою;

отрок благолеп есть нравов добротою.

Кто хощет. яко цвет, приятен быти,

годствует тому благонравно жити.

Доброта по гресех приятна

Нива от терний егда очистится,

тяженна сущи, уплодотворится,

Земледелцеви любезна бывает

и паче ону тоя ублажает,

Яже не име терния на себе.

а несть полезна ко плодов потребе.

Тако и душа, от грех очищенна,

елма бывает уплодотворенна

Благими делы, паче Богу мила,

нежели, яже грехов не плодила,

А пребывает в неплодовании.

Зри, кая сила в благодеянии.

Доволство

Кто малым доволен, есть муж богат зело,

жителствует честно и присно весело.

Долг чад

Родителие чада во мир привождают,

за то от онех чести достойни бывают.

А яко наставляют благочестно жити,

в покорении оным должна чада бити.

За воспитание же и одеяние

должна суть старым чада благопитание.

Долгорук

Артаксеркс, царь персидский, десницу имяше

должшую, неже шуйца, и то глаголаше:

Царская ми десница долга есть даяти,

кратка же ми есть шуйца, не хощу бо взяти.

Воистинну десница долга и у Бога,

ибо всем даяния Его зело многа.

Кратка же велми шуйца, не хощет взимати

злата и сребра от нас. Его свойство — дати.

тем Божие и царско есть даяти дело,

има точен будеши, токмо давай смело.

Не страшися нищеты, ибо не скудеет

десница, яже чинно даяти умеет.

Должник безпечалный

Гражданин некто во Риме живяше,

иже премного должен злата бяше.

Обаче мирно век си проводил есть,

весело жил есть.

Концу пристигшу, иже вручьствоваху,

должнаго сребра судом поискаху.

Судия веле сущая ценити,

долги платити.

Все имение ни во что вменися

противу злату, им же одолжися.

Тогда град Римский почудися зело,

что жил весело.

Август же кесарь веле одеяло

его купити, аще бяше мало,

приглагола бо: Благ сей покров бяше,

под ним же спаше

Толикий должник. Мощно и мне спати

под тем покровом, печали не знати.

Дворски то рече, но печали знаше,

донде же бяше.

Дом добродетелей

Высокое здание хотяй съоружити,

должен основание низу положити.

Та же на нем жилища многа назидати,

иначе бо немощно крепко им стояти.

Без основания бо все ся разоряет,

что человеческая рука назидает.

Подобне и во нравех, аще назидает

дом кто добродетелей и тверди желает,

Нужда основание смирения дата,

та же на нем доброты ины утвержати.

Без него бо молитва и пост исчезает,

милостина суетна, и все погибает,

Что-либо может добро вправду нарещися.

Тем же, всяк человече, смирен быта тщися,

Да не вотще доброты ины положиши,

но дом честный в жилище Богу утвердиши.

За нь же вечный от Него уготован тебе

от сложения мира во пресветлом небе.

Дом плача и дом пира

Уне в дом рыдания комуждо входити.

неже в нем же пирове обыкоша быти.

Ибо во доме плача смерть ся поминает,

о ней же в доме пира слово не бывает.

Поминаяй смерть паки не хощет грешити,

а пируяй приклонен вся злобы творити.

На пирех плясания безчинно бывают,

нечистая делеса часто ся свершают.

В домех же плача слезы грех ся омывает,

помысл нечистый во ум внити не дерзает.

Множицею убийства в пирех сотворенна,

во дому плача никто виде уязвенна.

С слезами смирение обычно бывает,

пирование паки горду мысль раждает.

На пирех слово скверно, кощунство мерзкое,

в доме плача глас чистый, ничто же дерзкое.

Кратко рекше, пирове вся злая раждают,

слезы же умилныя в благость привождают.

Всячески убо благо в дом плача входити,

нежели во дом пира комуждо вступити.

Досада

Велия есть досада мужу честну зело

злое слово прияти, скорбно невесело.

Не болше язва плоти честным досаждает,

яко же слово злое оны уязвляет.

Иже обыче ближним своим досаждати,

безумна человека дерзаю й звати.

Достоинство

Детищем малым, неразсудным сущым,

близ гор высоких детски играющым.

Видится небо на горе лежати,

и оверх ея солнце путь свершати.

Тем же стремятся на ню восходити,

да бы близ солнца и небесе быти,

Еже бы персты оным ся касати,

каково небо есть и солнце знати.

Елма же взидут на верх горы тоя,

суетны мысли видят быти своя.

Ибо ту знают, яко ся прелстиша,

на горе небо егда быти мнеша.

Мысленне, гора — всяко достоинство.

честь высокая и мироначалство.

Тех лишеннии, елма возглядают

на высоту их. умом помышляют,

Яко на них есть блаженсто небесно

душевное же, купно и телесно.

И в чести сущих мнят в небеси быти.

яко аггелы безпечално жити.

Ризам их светлым, спире раб дивятся,

красным полатам и пиром чюдятся.

Смотрят на славу и глаголют в себе:

Ей, сии в мире живут, яко в небе.

О кто бы нам дал на ту гору взити,

тако блаженным, яко они, быти?!

Пожили быхом светли и весели,

яко же живут в небеси аггели.

К таким же мыслем дело прилагают,

на гору чести труды полагают.

Всякими средствы достигнути тщатся,

имением же и здравством томятся,

И елма тако взидут на верх ея.

постигнут хоти сбытие своея,

В то время знают, яко ся прелстиша,

егда блаженство ту быти судиша.

Тогда искусят, что блаженни быша,

елма в юдоли мирно, лепо жиша.

Ту бо печали многи досаждают.

ту в своих скорбех людие стужают.

Ту многа бедства, зависти и ковы,

вражды и нужды, необъятны словы.

А болезнь равне тело грешно томит

и смерть, яко ветр, прежде древо ломит.

Еже на горе стоит вознесенно,

потом в юдоли, еже есть смиренно.

Тогда бы ради возврат сотворили,

в юдоли паче, неже в верху жили.

Но человеческ срам я побеждает,

до конца в тузе жити понуждает.

Кто-либо убо лишен еси чести,

не тщися ея высоты долезти.

Веру ми ими. у не тако быти.

аще хощеши безъскорбно пожити

И спасенно же. ибо ничто тебе

препону деет, еже быти в небе.

О началных же святый Златоусты

своими реши изволил то усты:

Чюждуся, аще спасен может быти

кто от началных и на небо взити.

Аще же тако, здравствуй, о начало,

несть ми с тобою дело ни же мало.

К небесней горе хощу аз творити

путь, да бы на ней во век веков жити.

Древо

Еже в пустыни древо неплодно бывает,

или горкоквасныя овощы раждает,

Аще в сад земли благи чинно пресадится,

доброплодное древо тамо сотворится.

Мир сей — пустыня, в нем же елма пребываем,

неплодии есмы или злы плоды раждаем.

В сад же покаяния суще пресаждени,

пребогато бываем уплодотворени.

Неплодное же древо зсечено бывает

и со злоплодным в люте огни согаряет.

Мы неплодства блюдимся и злая плодити.

да бы посеченным и сожженным не быти.

Учителие в сад ны добрый пресаждают,

елма к покаянию тепле увещают.

Тщимся убо в той сердцы пресаждени быти.

да бы плоды добрыя Богу приносите.

За ня же в сад небесный будем преселени,

не тлением. жизнию вечною почтени.

Еже при пути древо благий плод раждает.

того прежде свершенства лишено бывает.

Мимоходящии бо нещадно терзают.

множицею и ветвем вред лютый делают.

При пути древо — в мире человек живущий,

аще добродетелей есть плоды несущий.

Не может в совершенство онех додержати,

путници бо мирстии тщатся отерзати,

И аки палицами ветви обивают.

елма смехи, руганми. кощунствы стужают.

Хотяй убо Господу плоды совершите,

да тщится в сад духовный пресажденны быти.

Хотяй древо из места злаго пресадити

на доброе, еже бы доброплодну быти.

Должен от корене злу землю оттрясати,

да бы при нем ни части оныя остати.

Иначе бо от тоя земли повредится,

и в блазе порок саде древний проявится.

Точне, хотяй из мира быти пресажденны

в житие духовное, во сад божественны,

Должен намерения корень очистити,

да бы прихотем мира в нем нимало быти.

Иначе бо труд всуе саждения будет,

ибо порок с ним мира и в саде пребудет.

Друг

Хощеши друга истиннаго знати,

послушай мало, имам ти сказати:

Друг есть, иже тя в гресех обличает

и злонравие твое обхуждает.

Друг есть, заочно тебе ублажаяй,

а в лице правду выну ти вещаяй.

Друг, иже в нужде тебе помогает,

во день печали тщиво утешает.

Друг, иже за тя готов изтрошати,

яже изволил Господь ему дати.

Друг, иже к благим делом увещает,

а в злых нимало помощник бывает.

Друг, кто о благих твоих веселится,

о злых случаех купно печалится.

Друг, иже в скорби время не оставит,

и неизменну любовь си проявит.

Сицева друга требе есть искати,

паче сокровищ богатых стяжати.

Стяжаннаго же истинно любити,

и взаим добро оному творити.

Егда краснотеплыя весны дни сияют,

в то время ластовицы с нами пребывают.

Гнезда лепят на домех, сладко воспевают,

зиме же приближшейся от нас отлетают.

Точне деют лжедрузи, ибо есть доколе

благо кому щастие, дружатся дотоле.

Блажат, служат, а егда щастие менится,

тогда лжедругов любы к иным отвратится.

Кто друг трапезы, тому ся въверяти,

есть то на трости себе утвержати.

Нескоро права леть друга познати,

надолзе требе правость усмотряти.

Мнози бо себе други притворяют,

словесы токмо дружество являют.

Егда хощеши друга полезно избрати,

три в нем добродетели нужда усмотряти:

Да есть благоразумен, знаяй разсудити,

сицевый бо друг имать в ползу тебе быти.

Противным же образом, аще избереши

безумна друга, беды многи понесеши.

Паки, да благ муж будет, ибо удобрится,

кто-либо с мужем благим истинно дружится.

С лукавым же дружество лукавству научит,

за что Бог огнем вечным во аде умучит.

Третье, подобает в друзе усмотряти,

да бы на горда мужа в дружество избрати.

Ибо гордый не может право ся дружити,

яко смиренну равен он не хощет быти,

Но. аки господин сый, почести желает,

смиренномудра мужа удобь презирает.

Друг друга снедает.

Имеяй желание сын наследник быти

купно желает отцу кратко время жити,

И хотяй от друга си прибыток прияти

понуждается тщеты оному желати.

Желаяй малоценно купли покупити

рад бы с продающаго тщетою набыти.

Всяко друг друга в мире лукавом прелщает,

не вещи токмо, но и самаго снедает.

Но яко в мори рыба, поглощши иную,

и сама снедается часто чрез другую,

Тако зде, болей менша елма поглощает,

во мале от инаго сам снеден бывает.

Дуга

По всемирном потопе дуга положися

на облацех во знамя, яко Бог смирися

С человеческим родом, ни имать казнити

к тому толь люте, аще и будет грешити.

Та дуга вообрази Христа воплощенна,

в знамя мира со Богом в мире положенна.

Ибо яко же дуга в облаце родится,

егда на нь сияние солнца изводится.

Тако есть сияние славы божественны

Христос, в человечестей плоти проявленны.

И яко дуга в себе два содержит рога,

подобне два естества суть у Христа Бога.

Во дузе три суть цвети: багряный, зеленый,

третий им примесися видом си червленый.

В Христе три суть образы жития святаго:

земнаго, небеснаго и болезненнаго.

Небесно, веселое, значится в зеленом,

болезненное паки во цвете червленом.

Иже по человеку земное — в багряном,

проявленное в ползу верным христианом.

Яже на облаце дуга утвердися,

образ лука имать, к Богу обратися.

Учит стрелы любве ко Богу пущати.

царствие небесно нуждею стяжати.

Красная во облаце дуга знаменает,

яко на ны скотныя иго возлагает

Свое Господь, да мы в нем любезно трудимся,

на упокоение в небе заслужимся.

Трисветла та дуга есть, учит Троицу знати,

веру, надежду, любовь к Ней всегда вращати.

Красотою своею то нам изъявляет,

яко красная за труд мзда ны ожидает.

От триипостаснаго Бога положися.

Всяк убо игу Бога щедра покорися.

Дух Святый

Егда Дух Святый в сердце Ся вселяет.

три благодати действом исполняет:

Ум наставляет, что есть благо знати.

волю же движет благаго желати,

А память будит, еже совершити

дело благое, да бы ползе быти.

В голуба виде Дух Святый явися,

егда во водах Иисус крестися.

В огненных паки языцех низшел есть

на апостолы и на главах сел есть.

То знаменуя, яко, кто крестится,

в голуба цела той да претворится.

Хотяй же в мире апостолствовати.

ревность по Бозе должен есть стяжати.

Дух Святый в Церкви кая содевает?

Ведети хотяй сия да читает.

Что в мире солнце светлое действует,

то в душах наших Дух Святый явствует.

Освещает бо ум. да может знати.

како достоит Богу работати,

И согревает, да приносит плоды

в душах, достойны горния породы.

Еще, что в рай ов источник бяше,

иже всю землю довле напояше.

То Дух Пресвятый в Церкви содевает.

ибо водою даров напаяет

Христиан души в плодотворение

и во вечное возвеселение.

Паки, яко ветр аер очищает,

светл и здрав деет, смрады истребляет.

Тако Святый Дух чистит душы верных

от вреда страстей, от грехов безмерных.

Еще, что сердце в персех содевает,

то Дух во Церкви Святый устрояет.

Сердце животный дух дает составом,

Дух животворны — дары христианом.

Сердце, всем спящым составом, бодрствует.

тако Дух Святый в Церкви не сонствует.

Яко невеста во Песнех вещает:

Аз сплю, а сердце бдети не престает.

Паки, что в дому домовит творяет,

то Дух Свят в Церкви выну содевает,

Чистит и зиждет, строит и готует,

да всеми благи Церковь обилует.

Еще, учитель что во училище,

то есть Святый Дух в Церкве святилище.

Ибо вся учит веру добре знати

и дела блага право содевати.

Паки, что зодчий есть зданию дому,

то Всесвятый Дух храму мысленному:

Вся чинно строит, благо украшает,

благодостойный дом соделовает.

Еще, что в пути вожд и что правитель

в корабли, то есть в Церкви Утешитель.

Правым к небеси путем вождествует,

и чрез океан сей правителствует

Ко пристанищу страны небесныя,

хотя в ню въвести овцы словесныя.

Паки, что в верте оградарь делает,

тожде Дух Святый в Церкви содевает.

Яже суть вредна, не медлит терзати,

полезная же — тщиво насаждати.

Напоследок что детель в винограде,

то Божественный Дух в Церковном саде:

Вредная режет, чистит, насаждает,

копает, хранит, да плоден бывает.

И ина творит блага безчисленна

благость и милость Его Божественна,

За что мы должни Его величати,

благодостойный поклон воздаяти.

Дух во огня виде

Огнь есть снедаяй Бог Пресущественный,

тем в огня виде Дух Пребожественный

сниде на собор ученик Христовых.

на смерть готовых.

И вещественный что огнь содевает,

духовно Святый Дух то совершает.

еже ты аще хощеши познати,

тщися внушати.

Огнь в хладе греет, а Дух утешает,

яже во скорбех слезных обретает.

Огнь сохли палит, палит и Дух правый

всяк ум лукавый.

Огнь во тме светит, и Дух озаряет,

яже во нощи буйства обретает.

Огнь светлы творит вещы временныя,

Дух — спасенныя.

Дух Святый деет

Параклит Божественный амо же вселится,

то светом благодати сердце просветится.

Далече греховная тма Его гонзает,

яко пред светом солнца сень нощы бегает.

Ни же празден Святый Дух тамо пребывает,

но ко добродетелем всяким наставляет.

Живет, яко домовит в дому, управляя,

стеною благодати окрест ограждая.

Седит, яко учитель в своем училище,

учя и мудрость дая в ума хранилище.

Седит, правя, яко царь в своем царстем граде,

и делаяй оградник во своем ограде.

Седит. яко же солнце, ибо освещает,

и теплотою лучес своих согревает.

Живет, яко же кормчий, добре управляя

к тихому пристанищу и от бедств спасая.

Или, яко же душа тело оживляет,

тако Дух Святый душу живу содевает.

Кто убо не потщится Господа молити,

да изволит Духа Си во сердце вселити?

Дух Святый ограждает

Мечем огненным Бог рай оградил есть,

в нем же живота древо насадил есть.

Се же, да будет приступно никому,

от прародитель крове рожденному.

Дух Святый, в нем же сердци обитает,

Божиим страхом силно ограждает,

Да демон, мир, плоть тамо благодати

Его не могут лестми похищати.

Духа Святаго дари

Дарове седмь суть Духа Пресвятаго,

ими же влечет люди Си от злаго

И к добрым делом теми устрояет,

на лукавая же вооружает.

Противу буйству мудрости дар дал есть,

на простоту же разум даровал есть.

На неразмыслство совет излился,

на невеждество ведение дася.

От Него крепость на малодушие.

на жестосердство есть благочестие.

Страх же на гордость, иже ум смиряет,

егда кто немощь свою помышляет.

Духа Святаго жилище

Духа Святаго хотяй благодати

в жилище Ему сердце соделати,

Ум свой от земных суетств да отводит

и ко небесным тощно да возводит.

Милосердия дела да являет,

мир со ближними си да соблюдает.

Да возсылает молитвы ко Богу,

защиту святых да соберет многу.

Да Пресвятая Христа Бога Мати

пощится о нем ходатайствовати

С Предитечею. с инеми святыми

и со аггелы невещественными.

Сердце да имать мирно устроенно,

покаянием от грех очищенно.

Сия кто хранит, может уповати,

яко непразден Духа благодати.

Духа Святаго благодати знамение

Несть дано людем совершенно знати,

кто когда сосуд Духа благодати.

Обаче, яко огнь явлен бывает

чрез знамения, где ся обретает,

Тако Святый Дух творит знамения

благодати Си в душах вселения.

Есть же первое знамя благодати,

аще ся начнет сердце подвизати

Ко ненависти всяких дел лукавых,

к люблению же всех деяний правых.

Второе — аще нрав ся изменяет,

и аки нов муж человек бывает.

Еже есть, аще гордый кто смириться,

и муж гневливый безгневен явится.

Ли миролюбец презрит временная,

начнет искати, яже суть вечная.

Третие — егда прилуд кто бегает

греховных и страх Божий сердцем знает.

Четвертое есть, егда благо дело

без страха людска делает кто смело.

Пятое — аще готов кто страдати

за веру праву и главу отдати.

Шестое — егда душа есть готова

послушна быти Божиего слова.

Наконец, аще свершенства желает,

в добродетелех выну поступает.

Благохотен же Богу работати,

не весть во скорби ропта испущати.

Та знамения где ся обретают.

Духа Святаго жилище являют.

Духи искушати

Птиц ловители глас их притворяют,

им же я лестно к себе призывают.

Оны несмысльно к ловцем прилетают,

и погибают.

Раби демона деют подобная.

Христовым словам глаголют точная,

люди Христовы онеми прелщают

и уловляют.

Тем блюдитеся, духи искушайте,

яда во меде смертна усмотряйте,

ибо к словесем Христовем мешают,

яже вреждают.

Яко даяй яд в яди утаяет

или в питии, да ся лесть не знает,

тако и врази лесть во слове честне

дают прелестне.

Ты аще тоя не можеши знати,

тщися искусных о том вопрошати,

ими же аще глас той обхудится,

яд ти да мнится.

Душа

Жилища метлами часто уметаем,

душы паки в сквернах тлети оставляем,

Что зело нелепо, ибо подобает,

да без скверны всяки душа пребывает.

Лице плоти прилежно обыкохом мыти,

тожде душам найпаче достоит творити.

Да не порочны будут Жениху небесну,

душевну любящему благость, не телесну.

Благо есть руки своя часто мыти,

но лучше душу нескверну хранити.

Птица некая в мире видима бывает.

яже ся людми райска птица прозывает

Красоты ради, яже данна ей от Бога,

зело дивная, в цветех различна и многа.

Даже видится цветы вся имети в себе,

аки изведенная не в мире, но в небе.

Глас ея толь есть сладкий и преумиленный,

даже слышяй бывает в радость возбужденный.

Сия от ловителей егда уловится,

и яко пленная во клеть посадится.

Плачевныя дотоле гласы испущает,

даже, сожалив себе, ятель ю пущает.

Та птица — душы образ человека верна,

в нем же есть благодати красота безмерна,

И образа Божия, тем бо украсися,

и дарами многими благоупестрися.

Даже во правду леть ей тужде титлу дати,

небесну или райску птицу нарицати.

Сию елма лукавый ловитель хищает

мрежею прелестей си и в клеть заключает.

Что ино имать птица бедная творити?

Токмо, стенящи, слезы многия точити,

Даже покаянием плена свободится,

из птицы демонския райска сотворится,

Паки благодатию Человеколюбца,

изъбегши вселютыя власти душегубца.

Сея птицы жалея. Жених призывает

небесный, Христос Господь, к Себе ю, глашает:

Сумантяныни Моя, ко Мне возвратися,

лобзанием Ми сладким паки насладися,

Аки бы глагол дая: О душе плененна,

диаволскими сетми злобными прелщенна.

От помыслов лукавых ко Мне возвратися,

и словес неправедных скоро удалися.

Возвратися от делес недобрых налога

ко обьятию Творца своего и Бога.

Сокрушением сердца ко Мне возвратися,

грехов исповедию от злоб свободися,

И довлетворением буди возвращенна,

благочестным житием паки исправленна.

Да соглядаю тебе во красоте сущу,

образ и подобие Божие имущу.

Сей глас душа слышащи должна прилежати,

еже слезы точити и много рыдати,

Донде же бы вражия сети растерзати

и небесную паки свободу стяжати,

Донде же бы в рай горний возвращенней быти,

еже во веселии тамо вечно жити.

Душу питати

Елма плоть есть немощна, дух ся укрепляет,

егда дух есть безсилен, плоть ся утвержает.

Умерщвляй убо тело, да то изнеможет,

питай словом Божиим душу, и преможет.

Душу питати прежде

Господину снедь прежде подобает,

потом раб его от пищы вкушает.

Господин — душа, ту словом питати

прежде достоит, потом плоти дати

Пищу приличну, да не ослабеет,

но что дух велит, то она да деет.

Души цена

Хощеши ли твоея душы цену знати?

Христос на ню изволи кровь Свою отдати.

Душы питати, тело смиряти

Царь некий, отшелствуя, дал слузе питати

сына си. а с ним раба сыну работати.

Слуга, возлюбив раба паче царска чада.

того сластно питал есть; сей едва от глада

В животе соблюдеся. Та же возвратися

царь из пути своего и зело дивися

Безумию слуги си, веле его взяти

и по достоянию язвы налагати.

Чрез царя Царь небесный да ся помышляет.

Иже душы нашя нам. як сына, вручает.

Телеса, яко рабы, душам послужити,

нам слугам, яко должно, велит я хранити.

Мы. душы пренебрегше, телеса питаем,

сына царска оставлше. раба почитаем.

Алчет плоть или жаждет, тщимся ю чредити,

и ко немощней врачы скоро приводити.

Душа паки от нужд си аще умирает,

никако же призрима нами пребывает.

Ту елма Царь небесный узрит худу зело.

а тучно упитенно в нас увидит тело.

Что речет нам за сына, нами небреженна?

Кая мзда нам от Него будет положенна?

Воистинну велит ны всяких благ лишити

и достойными казнми во веки томити.

Еже да не случится, тщимся почитати

душы и духовными пищми я питати.

Плоти же. яко рабы онех, да имеем,

тако мзды преблагия от Царя доспеем.

Дева

Срам честный лице девы велми украшает,

егда та ничесо же нелепо дерзает.

Знамя же срама того знается оттуду.

аще очес не мещет сюду и онуду.

Но смиренно я держит низу низпущенны

постоянно, аки бы к земли пристроенны.

Паки, аще язык си держит за зубами.

а не разширяетъся тщетными словами.

Мало бо подобает девам глаголати.

много же к чистым словом ушы приклоняти.

Дева-инок, оклеветанная блудом

Мирянин некто вдовец по жене осташе.

от нея же едину токмо дщерь прияше.

Ту имея, восхоте монашествовати,

токмо не име кому тоя дщере дати.

Обаче сродну мужу питати отдал есть;

сам. отшед во обитель, монашество взял есть.

И тако началнику угодно служаше,

даже паче сверстник си тому любим бяше.

Сей. помянув дщерь свою, начал есть тужити,

даже печали не могл в себе утаити.

Авва, видя печална брата, вопрошаше.

кая печали тоя ему вина бяше.

Он. пад к ногама слезен, рече: Поминаю

сына, оставша в мире, и жив ли. не знаю.

Не сказа, яко дщи бе. Тогда авва рече:

Иди и возми сына к тебе. человече.

Да ся во обители святей воспитает.

сердца твоего печаль та да не снедает.

Он. благословение прием, в путь пустися,

достиг града, о дщери си возвеселися,

Юже взем со собою, имя преложил есть.

Марину во Марина, пол ея таил есть

И. пришед во обитель, за сына питаше

и книжному чтению учити отдаше.

Расте мнимый юноша, изрядно учися

и ко добродетелем добре приложися.

Егда четыри лета выше десятицы

возраста приидоша таимы девицы.

Отец ят ю всячески к тому увещати,

еже бы ей никому пола си сказати.

Да умеет же страсти плотския терпети.

да бы искусителя вконец одолети.

Девица учение отчее лобзаше,

слово его хранити всегда обещайте,

И живе благочинно, всеми ублажися,

потом в три лета отец ея преставися.

Она в келии отца жити повеленна

и различными службы благоискушенна.

Везде Марин послушлив и делен явися.

всяко бо дело чинно от него творися.

Тем и ко пристанищу того посылаху,

из кораблей нуждная возити вручаху.

Бе же у пристанища нека гостинница.

у гостинника паки — красная девица.

Зде множицею Марин нощи совершаше.

егда в обитель ити позно быти знаше.

Во некое же время воин прилучися,

с дщерию гостинника блудно свокупися.

Яже от него сына прияла во чреве,

еже бе неудобно утаити деве.

Познавше родители непраздну дщерь быти,

яше вопрошающе тяжко ону бита.

Да повесть, кто ю девства честнаго лишил есть,

и в чреве зачатаго кто виновник был есть.

Она отца праваго, воина, таила.

на Марина монаха вину возложила.

Марин, рече. со мною съвокупися блудно,

с ним то дело содеях, еже рещи студно.

Отец, веру ем дщери, зело гневен бяше,

тек в монастырь, то авве со жалем сказаше.

Он усрамися, слыша о Марине тако,

не хоте веры яти о онем никако.

Обаче гостинника словесы нужденный,

о неповинном лице к вере приклоненный.

Призвав убо Марина, кротко вопрошаше,

аще он блудодейство оно содеяше.

Марин грешника себе поведаше быти

и обыкша делеса лукава творити,

Но уже хощу, рече. право каятися;

Ты о мне. отче. изволь Богу молитися.

Авва на гнев подвигся, люте й бияше,

из обители святы нещадно изгнаше.

Марин от обители не хотел есть ити.

но умысли пред враты безпокровно жити.

На земли твердей лежа, по вся дни плакате,

покаяние деющ, в гладе пребываше.

Что хлеба от братии когда упросил есть.

или подаянием верных ся живил есть.

Всяку нужду претерпе и срамоту многу,

а пола не явил есть за любовь ко Богу.

Егда же клеветница сына си родила

и, питавши сосцама, уже отдоила,

Отец ея, взем чадо, принес до Марина,

со злословием верже, аки его сына.

Марин же с терпением онаго прияше

и яко свое чадо прилежно питаше.

Что братия от пищи Марину даяху,

того лучшая во снедь отрочати бяху.

Тако без вины пять леть девица страдаше,

младенца отцем себе зовуща слышаше

Со срамом превеликим, с руганием многих

братии неразсудных и людей убогих.

Та же милость во сердца братия прияша,

началника просити о Марине яша,

Да приимет в обитель, аще согрешивша,

но казнь предоволную уже претерпевша.

Он, стужанием многих едва умоленны,

веле, да будет Марин в монастырь впущенны,

Не в первую честь убо, но да работает

в самых нижайших службах и да очищает

Уметы обители, и где смрадно бяше,

у всех келий чистити ему завещаше.

Марин же прощению и тому рад бяше,

вшед в обитель, вся труды тыя содержаше.

Младенца, яко сына, с собою питаше,

иже, яко за отцем, вслед его хождаше,

Тато, тато, глаголя, даждь ми ясти хлеба!

Бог терпение ея созерцаше с неба.

Егда детищ подрасте и добре хождаше,

тогда терпеливую деву Господь взяше.

Братия, яко умре, авве возвестиша,

внезапною смертию того удивиша.

Он, не разсудив дела, сице глаголаше:

Се Бог покаяния его не прияше.

Не сподобил есть тайн онаго прияти,

нам с ним, что подобает ныне, содеяти.

Грядите, о братия, омывше несите,

вне обители того тело погребите.

Братия, шедше, er да тело облачиша

и се женск пол. не мужеск, быти ощутиша.

Тому удивившеся, ко авве послаху,

о неслышанном деле весть ему сказаху.

Иже притек воскоре, узре деву быти,

ят от очию слезы премноги точити.

Тело ея святое любезне лобзаше,

прощения от девы святыя моляше.

Яко разсуждения кроме ю томил есть,

неповинну бывшую надолзе казнил есть.

То видяще братия слезы изливаху,

от долготерпевшия отпуста прошаху

Согрешений всяческих, яже сотвориша,

егда оней страждущей злодосадни быша.

Многу покаянию бывшу, понесоша

тело святое в церковь и в ней погребоша.

Тогда же клеветницу демон похитил есть

и люте за клевету на деву томил есть.

Яже, бегши в монастырь, гласно вопияше,

яко клевета ея на Марина бяше.

Исповеда воина греху винна быти.

а демон не престаше оныя томити.

Даже до седмицы дней, по ней же простися

и здрава к родителем в дом их возвратися.

Потом многа чюдеса в храме оном бяху,

яже святость Марины сведетелствоваху.

Ея же молитвами с нами, Боже, буди,

от блуда и клеветы храни твоя люди.

Девства не сохраншей обличение и наказание

Велия нечесть девице бывает,

егда зла слава о ней пролетает;

И тщета люта, повнегда растлится,

венца бо злата в небеси лишится;

И туга тяжка ону оскорбляет,

червь бо ю лютый в совести снедает.

О злая страсти и смрадная зело!

яже скверниши и душу, и тело.

На мало время тело усладиши,

а люте душу и тело губиши.

Уне желчь горку в то время испити,

елма хощеши ты кого сладити;

Лучше в тернии всенаго страдати,

неже от лести твоея вкушати,

Болше бо твоя сладость удручает

душу, неже плоть пламень опаляет.

Тебе искуство сего зла дадеся,

дево без девства, повнегда падеся.

О коль велика потом скорбь ти бяше!

Колик источник горких слез лияше?

И днесь, егда то дело помянеши,

не от всего ли сердца возстенеши?

Разве аще страх Божий погубила,

въконец из сердца еси изтребила.

Стени до смерти, а не к тому еси

дева во мире, тако жь и в небеси.

Девственна венца не имаши взяти,

покаянием тщися ин стяжати.

О сем мужь некто во жалости бяше,

ко падшей деве в сей разум писаше:

О злобедная! что ты сотворила?

Чистоту и честь девства погубила.

Девою несть леть тебе нарицати

без мужа сущу и женою звати.

Познавши мужа, кроме того еси,

како тя звати, сама с срамом веси.

Аз что о тебе имам глаголати?

Не вем, откуду требе начинати:

Благих ридати, яже погубленна,

ли злых плакати, яже обретенна

Тобою, чадо? Обою рыдаю,

съболезнуя ти, слезы проливаю.

Яко цвет в рай, в церкви была еси

дева, любезна Живущу в небеси

Храм Бога жива, Невеста Христова.

возлюбленная дева Бога Слова.

Духа Святаго ты жилище бяше,

чистоты злато тебе украшаше.

О тщеты люты! За вся сия тебе

горкия слезы изливати требе,

Поминающу мне. что была еси,

яко, бедная, днесь такова неси.

Хождаше в церкви, яко голубица

златокрылата, егда бе девица.

Яко же сребро, изрядно сияла

и яко злато чистое, блистала.

Яко же звезда в руце Бога бяше.

житие твое вся ны удивляше.

Но увы люте! Како изменися,

из девы чисты во блядь претворися?

Божая прежде званная девица

бысть сатанина скверная блудница.

Жениха Христа невеста чистая,

женишца еси демонска скверная.

Храм Божий, Духа Святаго жилище,

претворилася в демонско капище.

Не голубице ныне еси точна,

но нетопырю, яко зле порочна.

В ней же цвет девства блиста, яко злато,

днесь мрачна еси, яко скверно блато.

Не звезду светлу днесь тя созерцаю,

но углю черну тя уподобляю.

Высоко прежде была вознесенна,

яко с небесе ныне низверженна.

О горе тебе! И паки ти горе!

В беззакония люте падшей море.

Горе ти, яко толь благих лишенна

за сладость кратку и в блуд погрушенна.

Возведи очи, аще леть есть тебе,

поднеси главу, зри сущыя в небе.

Зри их иконы. Но страх ти великий

смотрети на тя за грех твой толикий.

Егда тя совесть о зле обличает,

что камень, тяжко сице ти бывает.

Аще зде тако, како возведеши

очи на Христа, егда предстанеши

Ему судима? Како на святыя

девы пустиши очи ти скверныя?

Како аггелы возможеши зрети?

О страшно будет славу их терпети!

Аки пламенем, будеши спаленна

и ко нечистых лику низверженна.

Негли речеши: Плоть немощна моя,

не леть бе страсти претерпети тоя.

Но дадут ответ вся девицы тебе:

Плоти винити никако есть требе,

В немощней плоти равне и мы жихом,

обаче обет девства сохранихом.

Плоть растления не может страдати

прежде, неже то душе восприяти.

Душа первее соизволом тлится,

от нея на плоть та злоба валится.

Убо никако тебе извиниши,

праведным Судом казни претерпиши.

Аще слезами греха не смыеши,

огнем палима во веки будеши.

О злобедная дево! Жено паче.

сугубо бляди разтленна, обаче

Девам свойственны ризы облачиши,

скаредство греха под ними таиши.

Дева печется (апостол вещает),

да свята телом и духом бывает.

Ты сопротивно обема твориши,

тело оскверни и душу скверниши:

Плоть блудодейством, душу, яко лжеши,

елма дев ризы на тебе кладеши.

Толь тебе, скверней, каятися требе,

аще хощеши быти с Богом в небе.

Каяти же ся нужда потолику,

да отплачеши злобу превелику.

Вся сласти жизни требе оставити,

мертвой душею, мертву ся вменити.

Да возможеши быти оживленна,

греховна гроба слезми свобожденна.

В ризы печалны да ся облечеши,

казнь, достойную плоти, да дееши.

Власы достоит тщетныя отьяти,

иже ко блуду могли вину дати.

Очи да плачут за зрение злое.

еже на мужеск бе пол непростое.

Лице, заеже бяше прикрашенно

в ловитву юных, буди изнуренно.

Всю плоть за страсти нужда изнурити,

и яко силна бе душу прелстити.

Сердце да стенет и да воздыхает,

о скверных мыслех слезно ся да кает.

Велицей язве велий пластырь требе,

покаяние той да будет тебе.

То же некосно буди ти толико,

согрешение коль твое велико.

И паче тщися в каянии быти,

а Бог изволит грех и казнь простити,

О еже и аз Его умоляю.

за сие слово прости мя, желаю.

Тяжкий грех тяжко обличати требе,

терпи и кайся, а будеши в небе.

Девство

Девство мученичеством леть есть нарицати,

яко то хранящему долг — много страдати

Искушений демонских и пламеней тела.

О блажен могий себе сохраняти цела!

Между многими бранми сия тяжка зело,

еже чисту имети душу же и тело,

Мнози бо телом чисти, а скверни душею,

яко соизволяют на сласть блудну ею.

Брань се повседневная излиха стужает,

а едва кто победу на ней обретает.

Благо есть чистоту девства соблюдати,

но со смирением нужда сочетати,

Ибо аще дева тем ся возвыжшает,

удобно ю демон чистоты лишает.

Богу попустившу за ту гордость ея,

и тако бывает блудница из нея.

Честно есть супружество, но девство чистое

пред очима Вышняго — паче, неже тое,

Супружници бо взаим себе угождают

и телесным утехам много работают.

Девы же промышляют Богу угодити,

вся дни жизни своея Оному служити.

Аще же плодов плоти в мир не изпущают,

но плоды духа Богу обилно раждают.

Аггелом девство сродно, не естеством убо,

но духовным житием, еже Богу любо.

Воистинну бо в плоти выше плоти жити

есть небесный на земли живот проводите.

И вящшая заслуга — аггелско стяжати

житие в плоти, неже с естеством держати.

Ибо аггелом быти есть то дело Бога,

а еже девствовати — добродетель многа,

Яже с благодатию тщанием вершится.

в аггелех же естеством чистота хранится.

Сия вам благостыня, о девы чистыя,

точится благодатно с горы небесныя.

Жених ваш есть небесный, тли всякия Тлитель,

целости девственныя Любитель, Хранитель.

Елма убо мысль, дево, о женисе тебе

плотстем начнет стужати, имей ум на небе.

В небе пребывание твое да бывает,

во чертозе Христове ум да пребывает.

Тако чистоту верно ему да храниши,

елма сердце от земных твое отвратиши.

В нем твое сердце выну да есть водворенно,

любовию Самаго Его исполненно.

Сия внутрь уду слава в тебе да бывает,

тажде и от вне уду всегда да сияет.

Светилник твой сердечный не угасим будет,

огнь любве в нем Христовы горяй да пребудет.

Донде же свыше Ему тебе присетити

и во небесный чертог любезно впустити.

Тамо терпение ти венца сподобится,

тамо душа и тело вечно усладится.

Временная утеха кратко услаждает,

а всегда ю тяжкая горесть изменяет.

Яже в небе, та вечна, тоя всяко требе,

о невесты Христовы, вам искати в небе.

Девство аггелом чтити подобает,

яко то людми небо исполняет.

Землю женитва обыче селити,

доволно убо людем ю храните.

Девство — цвет плода Церкве божественный,

образ сил горних, дивне украшенный.

Девство — пахвала человеча рода,

отчество его — горняя порода.

Девство аггелом люди уравняет,

болше глаголю: и превозношает.

Девственник Христос и Дева Мария

вся превосходят силы небесныя.

Мария яко есть Христова Мати

есть сподобленна тоя благодати.

Христос же яко Бог и ту преходит.

Иже предвечно от Отца Ся родит.

Зрите, о девы, достоинство ваше,

коль честь велику девство восприяше.

И чтите оно, пребодро блюдите,

паче всех драгих опасно храните.

Аще бо оно един крат съгубится,

всем мира златом уже не купится.

Не точию же плоть целу храните,

но дух первее от скверны блюдите.

Аще бо прежде душа не растлится

изволом на грех, плоть не осквернится.

Начало блуда во душе бывает

изволением, та же плоть свершает

Дело скверное и мерзское Богу,

за что страдати нужда казнь премногу.

Еще и того, девы, ся блюдите,

да не от юношь кого соблазните

Красными лицы, черныма очима

не буди юным сеть людем твоима,

Ибо многажды егда уловляет

сеть, тогда сама терзанна бывает.

Ты красотою юна вомрежиши,

сама от него тление стерпиши.

Но буди яко попереши страсти,

ближнему дати несть требе напасти,

Иже всячески духом погибает,

егда тя красну зело усмотряет.

Главы твоея власы устроении

суть его душы сети заставленни.

Доброта твоя и глас сладкий зело

возпалит его злострастное тело.

Красная риза злобу умножает,

похоть во юных к тебе возбуждает.

Ты не знаеши, он въслед тебе ходит,

воздыхания от сердца изводит.

Глас твой услышав, полма умирает.

да есть с тобою, и смерть забывает.

Ты убо ему мечь в погибель еси,

убийца сущи, не будеш в небеси.

В доме ти убо, дево, да седиши,

красоты мира весма да лишиши.

Самому Богу красна тщися быти,

да бы ти вечно с Ним на небе жити.

Не лстися сама, не лсти и другаго,

да в жизнь внидеши царства небеснаго.

Зде любы с юным да не будет тебе,

як овце волка, гонзати й требе.

Та бо в погибель любовь низревает,

Богу любезны красоты лишает.

Сладко змий Евве древле глаголаше,

но яд всесмертный в плоде древа даше.

Змий тебе, дево, — юноша, блюдися,

и гласа его слышати хранися.

Словом тя прелстит, лишит тебе рая,

удалит благих, наведет вся злая.

Соблуди око, да его не зриши,

радостей райских сладость наследиши,

Ея же тебе вседушно желаю,

кончя, блюдися юных, увещаю.

Честнее злато меди, кто того не знает?

Над супружество девство Церковь прелагает.

Добро есть супружество, но девство блажайше;

велик есть закон брака, девство величаише.

Брак соизволен, девство токмо совещанно,

яко превосходное, а не завещанно.

Блажится девства целость, не да брак хулится,

но да преимущество девства проявится,

Еже брак превосходит честию толико,

лучшее от благаго, честнее елико,

И яко небесная выше земных ходят,

ли духовная паче плотских славу родят,

Яко паче немощи сила есть приятна.

и луна паче звезды светом благодатна.

Еще мощно есть рещи: тако удалися

от девства супружество, еже попустися

Богом за нужду мира, яко удаленно

от аггелска жития скотство несмысленно.

Ибо в браце дух к земным приклонен бывает,

в девстве же плоть к небесным дух чист возвыжшает.

Блаженны суть чистыя девицы у Бога,

яко за ту их благость мзда готова многа,

И зде от проклятия свободны суть девы,

еже сниде на жены вся, сущыя с Еввы.

Не имут зачатием плода си стенати,

ни яже в рождении чад болезней знати.

Несть им печаль о дщерех, о сынех не тужат,

ни же, яко господем, мужем своим служат.

Един им Господь — Христос, Иисус — их Глава,

нетленный Жених им есть, небесная слава.

Ини аггелом точни будут человеци

по общем востании во грядущем веце.

Девы зде начинают подобны им быти;

не посягают, и чад не знают родити.

О блаженны вы девы! Аггелом сравненны,

будете с аггелскими лики водворенны.

Точию сугубое девство соблюдите,

яко тело, тако ум в целости храните,

Ибо аще плоть цела будет, а ум тлится,

венца девственна в небе та целость лишится.

Девство растленное

Девство аще растленно, не к тому вратится,

хотя покаянием грех и оставится.

Бог всемогущий того не может вратити,

знавшей бо мужа несть леть не познавшей быти.

Мощен есть телесную целость паки дати,

но не может девственным венцем увенчати,

Той бо не искусившым брака подобает,

знавшая мужа того венца ся лишает.

Иный и вящший венец мощно ей стяжати,

но девственныя славы несть леть восприяти.

О, тщеты великия! Убо ся блюдите.

девы, от искушений, сохранно живите.

Очеса от лиц юных ваша отвращайте,

аще спит похоть, на то вы не уповайте.

Спит бо, а не умерла; скоро может встати,

покой во душах ваших люте возмущати.

Стрела лица краснаго елма в вы пустится,

нечаянно враг, спящий в плоти, возбудится

И злолюте имет вам огнем досаждати

любве плотския, юже трудно умерщвляти.

Уне есть люта зверя спяща не будити,

неже от возбужденна зле боримым быти.

Дела

Егда отрок писати писмена учится,

рука от учителя егова водится,

Пишет убо отрочищь, но учитель паче.

Во благих делех наших действо не ипаче.

Деем убо мы дело. Бог же управляет;

от нас скудость, от Него свершенство бывает.

Ему убо вся слава, а нам ради Его

будет воздаяние в небеси от Него,

Яко подчинихомся Его правлению

и дахом волю нашу Его хотению.

Дел своих благих несть полезно знати,

грешника себе подобает звати.

Тако я Господь познает, сый в небе,

и призовет тя мзду воздати тебе.

Моисий егда жезл в руце си держаше,

не змиевиден ему ся видяше.

Верженный паки в змия претворися,

даже во бегство Моисий обратися.

Тако рук наших дела разсуждаем,

яко суть наша, безгрешна вменяем,

А егда тажде иными творятся,

абие грешна нами та судятся.

Обличаем я, дружества гонзаем,

но таким делом себе осуждаем.

Во Египте Фараон бабам завет даше,

да егда ся от Еврей мужеск пол раждаше,

Абие погубят й, в воду вовергают,

девы же рожденныя целы соблюдают.

Подобне демон творит, верным совещает,

да кождо пол мужеский в себе погубляет,

Еже есть дела духа, а противне, дела

плоти, яко пол женеск, соблюдати цела.

Но мы тщимся пол мужеск цело снабдевати,

деяния духовна тощно умножати;

Женский пол паки — дела плотская — мертвити,

да бы за смерть их вечно нам в небеси жити.

Дела благая

Хотяй благо творити должен усмотряти,

еже бы тогда быти в горней благодати,

Ибо я ко же мертвец жива не раждает,

тако дело грешников живо не бывает.

Не суть жива делеса умерших душами;

оле тщеты, братие, оживимся сами!

Перстень медян, имеяй адамант нелестный,

не себе ради, но за адамант есть честный.

Точне, делеса наша, суща в благодати,

драгоценно обыче Господь приимати.

Не яко наша, ибо тако меди равна.

но яко в благодати, за то честна, славна.

Ибо заслуги Христа цену возвыжшают

и делатели неба светла сподобляют.

Царь Артаксеркс во жену Есфиру поял есть

нищу, плененну. Аще с нея чада взял есть.

Тым наследство бысть должно, не яко бе мати

Есфир, но яко царь ю изволи пояти

Во жену и от нея чада си родил есть.

Тако с нами Христос Бог право сотворил есть,

Душы наши в невесты Себе приобращает

зело нищы и с ними чада дел раждает.

Яже яко от нас суть, худа и нечестна.

но яко от Христа суть, царствия небесна

Наследствия достойна. Убо в благодати

вся благотворения нужда содевати,

Да Христа заслугами въведут ны до неба

и сотворят общники аггелскаго хлеба.

Рука со орудием дело совершает.

честь же не орудию, но руце бывает.

Тако мы благотворим Богу ны правящу.

убо честь не нам должна, но Богу строящу.

Он же и нам изволит мзду за труды дати,

яко сработни есмы Его благодати.

Душа верная, сущи в благодати.

должна благая дела содевати,

Ибо благодать без тех исчезает,

яко без пищи пламень угасает.

Благое дело да причтеши Богу.

тако постоит на своею ногу.

Аще же тебе оно присвоиши,

ни во что дело твое обратиши.

Дела благая любы украшает.

яко соль пищу всяку услаждает.

Брашна без соли невкусна бывают,

без любве дела Богу не вгождают.

Несть вредно яве благая творити,

како бо мощно иным в ползу быти.

Аще вся тайно будем содевати.

благая дела весма сокривати?

Намерение доволно имети,

еже от мира славы не хотети.

Но токмо Богу делми угодити,

яве и тайно Оному служити.

Егда без греха смертна сый творит благая

дела, та пред Богом суть жива, не мертвая,

Еже есть, мзды вечныя достойна бывают

детеля си, в небеси венца сподобляют.

Егда паки той же во грех смертный впадает,

всякое дело благо тогда умирает

И аще не каявся в том гресе окончится,

за бывшая делеса в небо не вселится,

Ибо вся забвению преданна бывают.

яко покаянием ся не оживляют.

Аще же покается смертно согрешивый.

яко от гроба воскрес, паки будет живый,

И дела вся благая будут оживленна,

яже от греха смертна бяху умерщвленна.

Сый же во гресе смертном, аще и что благо

деет, то не есть живо у Бога живаго.

Яко жизни вечныя кроме благодати

Божия живущему не может подати.

И елма покается грешник, дела тая,

яко мертва рожденна, не будут живая.

Не сподобят от Бога мзду вечну прияти,

точию в гресех суща могут устрояти

К покаянию, или здешняя бывает

мзда от Господа за ня. Иже вся воздает.

Блюдитеся вси убо смертно согрешати,

аще же согрешисте, тщитеся плакати,

Да не мертвая дела родите благая,

их же есть воистинну тщета немалая.

Тщитеся в благодати Бога жива быти,

да делеса живая можете родити,

Воеже бы за она жизнь вечну прияти

от Господа, а смерти вторыя не знати.

Иероним блаженный сице поведает:

В тернии семя благо той муж засевает.

Иже дела добрая обыче творити,

в не же время оному в смертном гресе быти.

Ибо та пред Господем безмездна бывают,

яко от мертвы душы мертва ся раждают.

Тщимся убо грех смертный весма истребити,

та же дела благая прилежно творити.

Тогда бо творимая суть приятна Богу

и делателю стяжут мзду у Него многу.

Дела нощи

Паук обыче сеть и в нощи ткати

и чрево свое на то истощати,

Но дни пришедшу раба усмотряет,

с делом паука, стерши, попирает.

Подобне иже в нощи ся труждают

греховней, сети многи содевают

На ловление светлотлена злата,

яко мух неких или иста блата.

Душ си доброты на то истощают,

прихода смерти не воспоминают.

Она ж вънезапу приходит с метлою,

як раба, скоро отирает тою

Пауки тыя, яко сети, дело

вергши на землю, попирает смело.

Оле деланий нощных! ли безделий,

мир отъемлющых страны всех веселий!

Делати

Алфонс краль Арагонский неким обличися,

яко своима в деле рукама трудися.

Даде ответ краль мудрый: Еда Богом крали

и естеством не к делу руце восприяли?

Научи сим ответом, царем не срам быти

рукама дело честно своима робити.

Детствование

Повеле Господь верным дети подражати,

но срамно непщуется старым детствовати.

Срамно убо есть, умы яко детем быти,

но пречестно злобою детми ся творити,

И добродетели их благо есть стяжати,

не в несмыслстве же тыя, но умно являти.

Во-первых, смирение во детех бывает;

благ же и старец, иже оно подражает.

Вторая чистота есть, юже имут дети;

блажен же и старец, ту сподоблся имети.

Третее, трезвение дети соблюдают;

блаженни старци, иже трезвенни бывают.

Четверто, сострастие во детех бывает:

плачющей доилице и детищь сридает.

Блаженни же и старци, иже сострадати

умеют и немощем людским ся слагати.

Пятая, есть приклонность в детех к человеком,

яже небезпохвална и старому веком,

Ибо иже любезно всем ся приклоняет,

приятен человеком и Богу бывает.

Шестое, даяние бывает во детех,

а то доброхвално есть и старому в летех,

Ибо щедру имеяй десницу блажится,

воздаяния вечна Богом сподобится.

Седмое, безгневие в детех обитает,

а то и стара мужа велми ублажает.

Осмое, злоб непамять дети соблюдают,

яко досаждения скоро забывают

И послежде не тщатся досады отмстити,

малым нечим удобно оны примирити.

Сия же добродетель и старым есть честна

ничто бо похвалнее есть мужа безместна.

Иже могий досаду злобою отмстити.

Бога деля готов есть виннаго простити.

Сицево детство старым есть украшение,

детствующии тако имут спасение.

Тем же. братие, дети сицеви бывайте,

во царствие небесно внити уповайте.

Ибо аще будете блази, яко дети,

волно в небо въшествие будете имети.

Детем благословение

Дом утвержает благословение

родителское, зло же речение

Матере корень детей извращает.

весь дом в ничто же скоро обращает.

Колми же паче на Божие слово

сие и ово бывати готово.

Христос Бог егда хлеб благословяше,

умножение коль велико взяше!

Егда же прокля, изше смоковница.

не стерпе клятвы Божественна лица.

Его знающе сил но слово быти.

жены тщахуся п нему приносите

Младенцы своя, да благословляет,

руце Си святе на ня возлагает

И молит Отца, еже здравым быти

и жизнь во мире блаженную жити.

Господь же щедрый милость им являше,

на дети малы руце возлагаше.

Апостоли же егда возбраняху,

глас прещения от Него прияху.

Не браните им. Господь глаголаше,

приити ко Мне, несть то дело ваше,

Таковых бо есть царствие небесно

и седение в нем во веки десно.

Сей же обычай благословения,

на дети юны рук возложения

В Еврейстем роде от многих век бяше,

ибо Иаков подобне творяше.

Иосифовым сыном возложил есть

на главы руце и благословил есть.

А яко руки бяху преложенны,

крест честный тако бе предображенны

Во знамение, яко име быти,

еже знамением тем благословити.

Что событием днесь ся исполняет,

ибо крестом ся всяк благословляет.

Кресту же сила благословения

от Виновника всех нас спасения.

От Христа Бога тогда даровася,

егда на онем нас ради распяся,

И негли Сам Он крест изобразил есть,

елма на небо с горы восходил есть,

Ученики бо Си благословяше,

мнози непщуют, сие знамя бяше.

То или не то — зде не словопримся,

о Кресте честном мы выну хвалимся.

Добрый обычай в Церкви быти знаем,

тем знамением вси ся ограждаем.

И от презвитер тем благословимся,

яко есть полза, нимало сумнимся.

Е

Еммануил

Дева Мария нам Еммануила

во Вифлееме нетленно родила,

Еже С нами Бог имя ся толкует,

и самем делом то ся изводствует.

Есть бо Бог с нами, ибо воплотися

и нам подобен человек явися.

Есть еще с нами в тайнах божественных,

из хлеба, вина, в плоть, в кровь преложенных,

Иде же тако есть человечество

и всесилное Христово Божество,

Яко на земли древле в плоти бяше,

егда во мире Господь странствоваше,

И яко ныне в небе пребывает,

седя во десных, и славим бывает.

Тем же и нам зде хвалити и требе,

яко аггели Его славят в небе.

Той же бо един зде есть и онамо,

тажде кровь сама, тожде тело само,

Аще инако, зде бо покровенно,

видами вещей, в небе всеявленно.

Но се не творит не Тогожде быти,

тем же всеточне требе есть хвалити.

Еще есть с нами и по благодати,

елма безгрешно тщимся пребывати,

Ею же Он ны светло просвещает

и от немощей силно воздвизает,

И падших во грех зовет, да востанем,

увещает же, да от злых предстанем.

Наконец, с нами Бог днесь бывает,

ибо Церковь Си хранит, защищает.

Глава — Христос ей, она — Ему тело,

Он защищает, да то будет цело.

Кая бо глава не любит си тела,

ли не печется, да плоть будет цела?

Есть убо с нами Бог и хощет быти,

токмо мы тщимся благочестно жити.

Аще ж Бог с нами, кто на ны возможет,

на вся нам враги Господь Бог поможет.

Помогай, Спасе, и настави жити,

да бы нам к тому Тебе не грешити.

Епископ

Царь великий Константин тако почиташе

сан епископский, даже сице глаголаше:

Аще бых епископа усмотрел блудяща,

ризою си покрил бых от мира, на нь зряща.

Не тако днесь деется, невинных клевещут,

отмщения Божия руки не трепещут.

Егда собор в Никей отци совершаху,

на епископы неки челобитны бяху

Ко царю Константину. Он их не читаше,

но абие всеядцу огневи предаше,

Глаголя: Не хощу аз тех судия быти,

их же благословенства нужда ми просити.

Днесь и тайных взыскуют и лжы промышляют

всяких санов людие, и тех обличают:

Но таким клеветником Сам Христос Спаситель

имать быти праведный за то зло отмститель.

Епископ некто с царем на трапезе бяше,

его же царь ко правде словом увещаше.

Он, ублажив царское слово, рече к нему:

Изволи богомолцу сказати своему,

Рыбу предлежащую откуду начата?

От главы, ли ошиба? Аз не могу знати.

Царь отвеща: От главы. Он же подложил есть:

Право твой царский разум сие осудил есть.

И сотвори такожде, изволи начати

от царскаго ти лица правду совершати.

Отпусти сродницу си, несть та жена тебе,

довле сотвори плотстей законно потребе.

Таковым епископом быти подобает,

да ся и царю реши правды не страшает.

Яко же и Креститель древле сотворил есть,

о законе Божием главу положил есть.

Царь некто епископа сице вопросил есть:

Вскую днесь епископы Дух Святый лишил есть,

Не деет чюдес ими, яко древле бяше,

внегда чрез епископы чюдодеиствоваше?

Даде ответ епископ: Тогда на степени

духовныя чрез Дух Свят бяху возведени,

Ему же есть свойственно чюдеса творити,

тем же им дароваше чюдотворцем быти.

Днесь же на епископство царие возводят,

ини родом, богатством на оно восходят,

В нем же не благоволит Дух Пребожественный,

за то днесь епископи не чюдодейственни.

Епископ не господин имать стаду быти,

но отца себе чадом должен есть творити,

Словом паче разеудным грешныя смиряти,

неже духовным мечем оны ударяти.

Аще же и жестоты нужда проявится,

та не мучителская, отчя да творится.

Епископство

Пустынножитель некто сродника имяше,

иже епископ быти вседушно желаше.

Он его увещал есть мысль ту отложити,

яко бедственно зело на высоте быти.

Послушал сродник старца, мысль ону лишил есть,

Потом мало жив, век сей на ин пременил есть.

Явив же ся старцеви, слово глаголаше

благодарное, яко совет ему даше,

Еже бы епископска сана не желати,

но в смирении век свой выну провождати,

И рече: Веждь то, яко был бым осужденны,

аще на епископство был бых возвыжшенный.

Оле бедства страшнаго во сане велице!

Ну ж дно есть спасение кому ж до владыце,

Яко за многи душы имать отвещати,

уне убо на той сан самем не желати.

Но аще возведет Бог, тогда бодрым быти,

а, яко на стражнице, неусыпно жити.

И Златоустый святый: Чюждуся, глаголет,

аще кто от началных спасен быти может.

Аще тако началство беду имать многу,

в подначалстве трудимся истинному Богу.

Епитафион Преподобному отцу Епифанию Славинецкомубогослову и многих язык мужу искусну

Стани, путниче, зде и умилися,

где Епифаний те лом положися,

Иеромонах, богослов искусный,

честно поживый, днесь уже бездушный.

Душу бо вручил Царствующу в небе,

иде же и ты строй жилище тебе.

Или сице

Зде Епифаний муж, исполнь мудрости,

иеромонах, спрята своя кости.

По честней жизни свято преставися,

ты, читателю, о нем помолися.

Или сице

В гробе сем кости Епифаний честный

положил своя, учитель известный,

Иеромонах, ты за нь помолися,

а сам в путь той же присно готовися.

Или сице

Грядый человече, возри зде и стани,

иде же положен отец Епифаний,

Иерей в монасех, кроткий, мудрый, честный.

Рцы, да водворит й Господь в рай небесный.

Или сице

Зде лежит честный отец Епифаний,

изследник правый Священных Писаний,

В многих языцех мнози его труди,

за что вечная память ему буди.

Епитафион Преосвященному Павлу митрополиту Сарскому и Полонскому

Павел митрополит Сарский и Подонский,

отходя с Египта мира в град Сионский,

В сем гробе остави честное си тело,

души подаждь Боже, место всевесело.

Или сице

Павел митрополит зде преосвященный,

многотрудным те л ом в гробе положенный,

Пастырь и учитель, страннолюбец велий,

душею да вселится во стране веселий.

Или сице

Павлу митрополиту Сарску и Подонску

дажде, Христе, со аггелы песнь пети Сионску,

В сем гробе многотрудны мощи положившу,

Богу, Церкви и царству весь век свой изжившу.

Или сице

Зде лежит сирых отец и нищих питатель,

странных, книжных, церковных в дом свой призыватель.

Зде Павел митрополит положи си кости,

Ты, Христе, всели душу в вечныя радости.

Или сице

Многотрудный зде Павел телом почивает,

митрополит бе саном, востания чает,

Странных, нищих, церковных и книжных чредитель,

за что да подаст ему пир в небе Спаситель.

Епитафион Благородному Георгию Пласковицкому

Зри, како благородный в землю обращенный

Георгий Пласковицкий, в пути убиенный,

Зде плоть лежит, а душа к небеси желает,

рцы вечна ему память, тебе упрашает.

Или сице

Грядый, помоли о мне милостива Бога,

да ми беззакония оставит премнога.

Георгий Пласковицкий зде опочиваю,

ты чай гроба, аз уже востания чаю.

Или сице

Зде Пласковицкий Георгий ждет неба,

твоея молбы душы его треба.

Убит разбоем, тебе увещает:

Живи опасно, татски смерть хищает.

Или сице

Георгий Пласковицкий зде опочивает,

от разбойник убиен, от Тебе желает

Молитвы, читателю, Кирие елейсон

рцы, а веждь, яко и тя смертный не минет сон.

Ересь

Проказа есть ересь, тою поврежденный

воистинну душею есть муж прокаженный.

Таковаго блюстися верным подобает,

общество бо с сицевым смертно повреждает.

Авва Агафон зело смирен бяше,

грешнейша себе от всех нарицаше.

Егда кто ему задаяше злобы,

не воспалися гневом си утробы.

Но елма некто его клеветаше

еретичеством, тогда не молчаше,

Не исповеда греха в себе того,

яко излише Богови мерзскаго.

Не буди тако, глагола, в словеси

вашем, да аз есмь виновен ереси.

Лютшее то зло от многих злоб иных,

за немощь от нас преступно творимых.

Оны бо яко за немощь творятся,

удобь от Бога щедраго простятся.

Еще, верою Бога съединенна

душы оставят не все отрешенна.

Ересь же, яко от злобы бывает

и от упора, весма отрешает

От душы Бога, без Него же быти,

яко без душы телу, несть леть жити.

Иоанн Богословец в баню пришел бяше,

в ней же еретик Херынт себе обмываше.

Того узрев, апостол скоро воспятися,

никако внити в баню ону увестися.

Вопрошающым вины не ину даяше,

точию яко в бани враг Божий седяше,

С ним же и мало время бояшеся быти,

да бы ся верху бани на ня не свалити.

Отсюду подобает нам ся научати,

еже со еретики общества не знати.

Ересеначалници

Иже ереси в Церкви начинают,

местию Бога люте исчезают,

Да видит народ мерзки Богу быти,

иже неправо дерзают учити.

Симон волхв егда чрез воздух летал есть

демоним деиством, и люди прелщал есть,

Паде на землю, ноги сокрушил есть,

о то бо святый Петр Бога молил есть.

И тако, иже лестно вокрилися,

праве дне ногу своею лишися,

Терпя же болезнь лютую, скончася,

душа мерзкая от демона взяся.

Манес проклятый, Манихей ся звавый,

аки из облак манну изсыпавый,

От царя Перска страшне искожися,

яко врачь сыну его сотворися,

Обещаяся недуг исцелити,

но лстец возможе живота лишити.

Монтан нечистый силом удавися

с пророкинями, с ними же прелстися.

Донатистове, иже ся ругаху

Евхаристии и псом ю метаху,

Сами от тех псов люте растерзани,

достойней казни от Бога предани.

Арий блядивый, во нь же день хотяше

храм Божий взяти, и к нему идяше

Торжищем гордо, восхоте отьити

в тайная места чрево изпразднити.

Амо же отшед, с гноем излиял есть

чрево, и душу демоном отдал есть.

Иулиан враг, отступивый Бога

и злая верным сотворивый многа,

Егда на Персы силно ратоваше,

христианом же смертию прещаше,

От невидима воина убися,

свыше копие в перси водрузися.

Несторий хулник от Бога казненны,

червием язык ему расточенны.

Валент, Ария зла поборник бывый,

Христа Господа тварь быти учивый,

Воюя Готты, побежден бежаше,

скрився в хизине, огнем конец взяше.

И мнози ини Богом истреблении

от мира сего, и неба лишении

За своя хулы. Ты, брате, блюдися

ересей всяких, Церкви же держися.

Ересеначалников нужда есть гонзати,

да бы казни от Бога с ними не страдати.

Иоанн божественный в баню пришел бяше,

в ней же Херинт проклятый тело обмываше.

Но егда злаго узре, не хоте ту внити,

еже бы прибиенну с ним кровом не быти.

Еретик

Ересеначалници люди погубляют,

и сами во погибель вечную впадают

За ереси хулныя. Бог я осуждает

и во плотстей их смерти казнь люту являет.

Симон волхв во начале злый еретик бяше,

чаровне по воздусе демоны леташе,

Но молитвами Петра святаго низпал есть,

нозе сокруш, помале душу врагу дал есть.

Манес или Манихей люте удрученны,

от царя Персидскаго кожи извлечении,

Яко сына обеща его исцелити,

паче же у би его, не мог устрабити.

Монтан с пророкинями, с ними же мир лщаше,

удавлению себе скаредному вдаше.

Донатистове Тайны Христовы метаху

и псом во снедение оны отдаяху,

Но пси вращшеся на ня, самы растерзаша,

тако мзду по делом си достойную взяша.

Арий, грядый во церковь, хотя ю отьяти

внезаапу восхоте чрево испражняти,

И шед во тайно место, афедроном злое

со скверною душею изли чрево свое.

Иулиан отступник с Персы воеваше,

христианы мучити, возвращся, хотяше,

Но Господь невидимым воином казнил есть,

иже его, копием пронзнув, умертвил есть.

Прискилиан еретик на смерть осудися

от Максима тиранна, и скоро казнися.

Лев Армении иконы честныя боряше,

но убиен во церкви, кончину си взяше.

Феодорик краль Гофский ересь арианску

защищаше, но люте смерть страда тиранску.

Валент арианствова, бысть же побеждены

от Готфов, во хлевину вбег, огнем сожженны.

Нестория блядива язык расточиша

черви, иже из него жива ся родиша.

Гунерик арианин верныя гоняше,

но такожде от червий живо снеден бяше.

Евтихий бл я дословный от Бога казнися,

ибо молнием свыше мстителным убися.

Лютер еретик лютый по мнозей вечери

напрасно умер, сниде во адския двери.

Калвин лютший от Лютра во ересех бяше,

но лютшу и кончину живота си взяше,

Ибо, снеден от червий, хулы глаголал есть,

вечным червием во снедь злу душу отдал есть.

Тако зле еретици злии погибоша

и во ад на вечную муку отъидоша,

Их же вы блюдитеся злаго учения,

да не впадете с ними в люта мучения.

Поликарп, Иоаннов ученик блаженный,

от сретша еретика бяше вопрошенный,

От Мартиона студна: Еда его знаше?

Первенца тя демоня знаю, отвещаше.

Еффафа, еже есть Разверзися

Слепаго и глухаго Христос исцеляше,

и евреиски Еффафа к нему глаголаше,

Еже есть Разверзися. И нам подобает,

да, еже затворенно в нас, ся разверзает.

Во-первых же, умови то деяти требе,

да, Бога познав мыслми, пребывает в небе.

Земная вся да презрит, в сердцы же имеет,

яко паче всех сущых един Бог довлеет.

Второе, волю требе нашу разверзати,

да в сердце страх Господень может ся вселяти

И любовь совершенна к Его благостыни,

яко ко источнику всякия святыни.

Третие, нам достоит устне отверзати,

еже благодарствие Богу возсылати

О всех благих, от Него нам происходящих,

душевных же и плотских, живот наш держящих,

И еже грехи на ся нам исповедати,

ближния учити и здрав совет даяти.

Напоследок, го детву ет разверзати руки

в подаяние нищым, тем гонзнути муки.

Ехидна

Ехидна елма ся самцу свокупляет,

главу его, в уста вземши, огризает.

Но чада смерть отца матери отмщают,

ибо, в чреве суще, оно пригризают.

Тако в зачатии чад отец мертвится,

в рождении тех же зла мати губится.

Еваггелисти

Род Христов по плоти Матфеем писася,

яко от Ессея в чине не прервася.

Имать же юношу, себе прилученна,

сия есть честь, слава мужа божественна.

Марко благовестник глас нам провещает,

иже путь Господень строити вещает,

Глас вопиющаго во пустыни мира,

тем же при ногу си имеет лва зверя.

Лука божественный имать тучна телца,

яко начат книгу от законна жреца,

Иже в жертву Богу принесе кадила,

егда во храме многа сияша кандила.

Орел выше всех птиц под небом летает,

тако Иоанн всех сверстник превыжшает,

Ибо извести нам Слово Божественно,

яко благоволи быти воплощенно.

Евхаристиа

Древо жизни во рай Господь насадил есть,

в не же силу неправы живота вложил есть,

Да егда теплотою влага коренная

притребится, то плодом будет целенная.

Тако въкушая плод той, могл бы долго жити

человек в его силе, и без смерти быти.

О коль благ плод той бяше! Трудна оценити,

ныне всемирным златом немощно купити.

Дал бы кож до вся своя за плод силный тако,

но обрести во мире возможно никако.

Не ищите, братие, таковаго плода,

токмо бо райска име онаго порода.

Обаче не плачите, лучший нам дадеся,

иже аггелом с неба на землю снесеся

И всем верным без цены во Церкви дается,

кто токмо о гресех си истинно кается.

Той есть Евхаристиа пребожественная,

тело Христово и кровь душеспасенная.

Сия ядый и пияй душу исправляет,

еже жити безсмертно, ону утвержает.

Елма бо душа нечто в себе ослабится,

вкусивши сего плода, паки устрабится.

Блажени убо есмы, сидев плод имуще,

им же оживляемся, достойне ядуще.

Велика милость убо Бога превелика,

яко сидев дар да де ради человека,

За нь же благодарствие мы должни творити,

на всяко время и час Господа славити.

Егда глад человеку телесный стужает,

той трапеза пищная скоро утоляет.

На стужание паки душегубных страстей

да де нам Бог трапезу божественных сластей,

Тело и кровь Христову, та бо укрощают

стужатели лютыя и уму смиряют.

В Евхаристии чюдеса премнога

содеваются в силе Христа Бога.

В черте времене чрез едино слово

хлеб вращается во тело Христово

И вино во кровь Его божественну,

общающимся душевно спасенну.

Случаи хлеба и вина остают,

кроме подлога дивне пребывают.

С количеством Си Христос пребывает

в агнце священном, ум се превыжшает.

Еще же, аще агнец раздробится

на части, Христос в части не делится,

Но весь в коейждо цело пребывает,

и всего Христа причастник снедает.

Яко же цело мнози слышат слово,

тако все тело вси ядят Христово,

А не по частем, всего бо дал Себе

кому ж до от нас в сем священном хлебе.

Егда же агнца жрец дробит, снедает,

Христос без страсти телом пребывает.

Оле чюдодейств! Кто может сказати?

Но сице веру требе есть держати.

Тело Христово и кровь пресвятая

творит изводства зело различная.

Злым в суд есть и в смерть, благим в спасение,

един хлеб двое деет строение,

Живит и мертвит. Ты же не чюдися,

но в естественных точным присмотрися.

Мед ясти вредно сущим холериком,

той же есть в ползу сущим флегматыком;

И столп Евреи древле просвещаше,

Египтяны же мрачны содеваше;

И во Египте, где воду черпаху

жиди, тамо кровь Египтяне взяху;

И где мед пчела сладкий собирает,

тамо яд смертный паук обретает;

И вода здравым есть в прохлаждение,

огнем жегомым та ж в запаление.

Тако та Тайна пребожественная

злым смертоносна, благим спасенная.

Евхаристия есть жертва словесна,

содержит в себе Владыку небесна,

Христа Господа, под видома суща,

в небе со Отцем и Духом живуща.

Тайна си дивна, ибо дивна многа

в ней положенна от дивнаго Бога.

Первое чюдо в себе заключает,

яко весь Христос в ней ся обретает.

Толик плотию, колик есть на небе,

под виды токмо, не в вине и хлебе.

Второе чюдо, яко в ней остают

случай вещей, подлога не знают,

Что по естеству не обыче быти,

Бог токмо силен сие сотворити.

Третее, яко хлеб, вино во цело

прелагается Христа кровь и тело.

Четвертое есть, яко не множится

тело Христово, аще посвятится

И много агнцев, ибо в мнозех тое

едино равно тело пресвятое,

Еже во агнце едином бывает,

и количеством ничто прибывает.

Пятое чюдо, яко тожде тело

на мнозех местех пребывает цело

В едино время, где-либо святится

Евхаристия, то жь тело творится.

Тожде и в небе в славе пребывает,

и зде от верных ядомо бывает.

Шестое чюдо, яко не делится

тело Христово, егда раздробится

Агнец на части, но во всяцей цел есть

Христос Бог, колик в десных Отца сел есть.

Седмое, яко, повнегда держится

агнец рукама, ту Христос не зрится,

Но токмо види вина же и глеба,

тако во ползу нашу есть потреба,

Ибо кто могл бы зря живаго ясти

Христа, ту суща, ли делити в части?

Всемудрый убо мудро устроил есть,

под виды тело ясти уставил есть.

Осмое, яко, егда исчезает

образ тех видов, и тело престает

Ту пребывати Христа Божественна.

О коль та дивно тайна устроенна!

Девято чюдо — с видами остает,

яже существу сила подобает.

Несть хлеб в сей тайне, обаче питает,

не есть и вино, а упоявает.

Вся сия паче естества бывают,

феологове о сем поучают.

Юже вы тайну зряще, почитайте,

очесы ума Христа в ней смотряйте,

И яко Богу честь, хвалу несите,

нуждных над еж дно от Него просите.

Зде невидимо Он с нами витает,

вся тайны наша светло проницает.

[154v] Всечестно убо да тщимся стояти,

внегда ся тайнам страшным совершати.

Со страхом паки оны да вкушаем,

аще жизнь вечну имети желаем.

Благочестно иерей некий пребываше,

но о Евхаристии сумнителен бяше,

Не мог совершенныя тому веры яти,

еже Самому Христу в оной пребывати.

Тем же к Богородице молитвы творил есть,

да известит истинну, прилежно просил есть.

В едино убо время, оному служившу

литургию святую и дары святившу,

По тех освящении агнец утаися,

невидим от очию его сотворися.

Иерей, удивився, преужасен бяше,

что творити достоит, недоумеваше.

И се внезапу Дева Мария явленна,

держащи Младенца си в руках Божественна,

И глаголющи ему: Сей Бог есть Младенец,

Бога Отца превечный, в часех мой первенец.

Сего родих нетленно и сосцы доила,

волею плоть Приемша честно пеленила.

Сей есть, Иже во тайнах невидим бывает,

er да ся литургия вами совершает.

Сей, Иже, служащю ти, днесь пресуществися,

под видом хлеба, вина в Тайнах устройся.

Сего имаши снести, Сей — священна жертва,

Бог же и человек есть, ни да мниши мертва,

Елма в части делится, Он бо не делится,

но точию вид зримый рукама дробится.

Он же цел в агнце целом, цели в частех его;

прими, о иерею, Господа твоего.

Сия рекши, на дискос Младенца слагаше,

иерей же вид хлеба паки созерцаше,

На дискосе лежащий, и возрадовася,

яко таинство ему известно сказася,

Еже Христа живаго в видех пребывати,

я дома и пиема ничто же страдати.

И тако наученный, не к тому держаше

сумнения, что Христос под видома бяше,

Но, веруя всетвердо, благодарил Бога,

и Деве хваления возсылаше многа

О наставлении том, еже сотворила,

елма ся со превечным Младенцем явила.

То слышаще, братие, тайны почитайте,

благо достойную честь оным сотворяйте.

Евхаристиа

Дивна трапеза в Церкви устройся,

в Евхаристии Бог нам предложися,

Да, ту ядуще, и мы обожимся,

главе Христови уды свокупимся,

Да Его Духом будем ожив лени,

иже змиевым ядом умерщвлени.

Яко бо глава духи посылает

в тела вся уды и ты оживляет,

Тако от Христа, главы Церкве, тело

Духом живится и есть здраво, цело.

Яко и ветви корене влагою

имут красоту и всю силу свою.

Блажен муж убо, с Христом обитаяй,

яко главе си всю жизнь подчиняяй.

Евхаристию ядый есть блаженны,

яко бывает тою оживленны

На души своей, Сам бо глаголаше,

Иже плоть Свою нам во пищу дате:

Ядый Мою плоть жив будет во веки.

Тако Христос Бог живет с человеки.

От сея пищи кто чисто вкушает,

благодать многу свыше получает,

От вин вседневных удобь свободится,

от смертоносных грешений хранится.

Хлеб зде по виду, но несущественне,

тело Христово зде есть божественне.

Ино видится, ино же есть требе

верити, ибо Христос в зримом хлебе.

Разве духовно хлеб сей наречеши,

ли ради вида тако назовеши.

По существу же не знай в виде хлеба,

Бог пресуществил, Обладатель неба.

Се тело Мое, Христос Господь рече,

ты Его слову вери, человече.

Подобне, елма вина вид узриши

в Евхаристии, не вино да мниши,

Но кровь Христову, за ны излиянну,

за спасение всего мира данну.

Зрение того не может познати,

что Бог изволи зде у готова

Вся твоя чювства на Христова слова,

еже верити, да будут готова.

Се есть кровь Моя, Христос Господь рече,

ты Его слову вери, человече.

Не оку веруй, но Создавшу оно.

и наследиши Авраамле лоно.

Зрение может временем грешити,

а Бог словом Си не может нас лстити.

Хлеб таинственный душу насыщает,

немощь отгонит, силу умножает.

Вино духовно веселие родит,

ум на небеса светла возводит.

Хлеб зримый несть хлеб, и вино — не вино,

но много лучше воистинну ино,

Тело бо и кровь воплощенна Бога,

има же полза душам зело многа.

Ядый то тело имать живот вечный

и ясти имать обед безконечный

В небесном дому, токмо есть потреба

в совести блазей вкушати от хлеба.

Вино же сие душу упояет

не во страсть греха, но ту угашает.

Сим веселие души раждается,

а похоть плоти кротка творится.

Токмо достойне требе приимати,

не в злобе сущым, но во благодати.

Тем кождо тщится сих причастник быти,

хотяй зде с Богом и на небе жити.

Ж

Жабы послушливыя

Брат некий в обители смиренно живяше,

и без прекословия началных слушаше.

Тамо близ бяше блато, во нем же живяху

многи жабы и воплем своим досаждаху

Молящымся иноком. Такожде случися

жабам кричати, егда жертва приносися.

Началник, не претерпев, инока послаше,

да велит им молчати, ему завещаше.

Се же рече смеяся, а брат послушливый,

вправду посланна себе быти помысливый,

Иде к жабам и рече: Именем Христовым,

завещаю вам, жабы, не быти таковым.

Престаните отселе досадно кричати.

Оттоле гласа тамо жаб не бе слышати.

Ныне же человеци, во церкви стояще,

мол бы си при безкровной жертве приносяще,

Многим глаголанием досады творяют.

Речеши ли молчати, никако слушают.

Еще огорчившеся, хулят иерея,

обличения злобы не любят своея.

Наипаче сокочут язычныя бабы,

досаждающе паче, неже овы жабы.

Тщитеся убо, бабы, жабы подражати,

во время жертв духовных глас свой удержати.

Жатва

На ниве мира сего демон — севбы жатель,

Бог же — токмо оставших класов собиратель.

Их же не може демон серпом си заяти,

Тыя Бог благоволит в гумно Си взимати.

Жезл

Родителем древяный жезл буди на чада,

да не страждут железна от судии града.

Уне в дому древяным в детстве оны быти,

неже возратших градским железом казнити.

Моисий донеле же жезл в руце си держаше,

не что ино, точию жезл древяный бяше.

Егда же й поверже, в змия превратися,

даже и Моисий его зело устрашися.

Тако, аще на чада жезл в руках бывает

отчих, наказания жезл он пребывает,

Не могущ умертвите. Аще же пустится

из руку, тогда в змия люта претворится,

Абие бо ко грехом чада ся склоняют,

и теми уязвлени бывше, умирают.

Жезл Ааронов сухий цветы и плод даше,

егда разсуждение о священстве бяше.

Жезл, и от Иессея корене рожденный,

без искуса мужеска у плод отворенный,

Пренесе нам плод Христа, чистая Мария,

ей же в чистоте мир весь не виде точныя.

Аще единою пес жезлом ударится,

уже на всяко время жезла он боится.

Адский пес жезлом крестным пораженный

единою о Христа, но есть устрашенный

Излиха, тем же, аще где крест созерцает,

не терпя силы его, всескоро гонзает.

Желание

Многих сердц желания Бог не исполняет,

да, яже им спасенна, теми надаряет.

Желание движется чим

Зелену лву траву аще появиши,

алчбы во сирищи его не взбудиши,

Яко по естеству к траве не сложися,

но мяса зверь лютый ясти научися.

Противне, чрез мясо, телцу предложенно,

алкание в чреве не будет рожденно,

Яко не обыче он мяса снедати,

но травою токмо чрево си питати.

Сице плотским людем глагол о небесных

несть в сладость, но слово сладко от телесных.

Духовну же мужу мерзка телесная,

желание родят, яже небесная.

Желанием край

Желанием край Бог есть. Он упокояет

желателства сердц наших, Он вся удовляет,

А прежде, неже Его может кто стяжати,

и всем миром не мощно покоя прияти.

Ищет сердце желанми утехи конечны,

яже несть во всей твари, та бо Сам Бог вечны,

Ибо Того стяжавый не к тому желает

ино нечто, ибо вся в Бозе обретает.

Игла корабленная, магнитом тренная,

не будет в движении упокоенная,

Даже прямо северу обращенна будет,

тогда от трясения в покои пребудет.

Тако от желания мы не утолимся,

даже лицем Божиим в небе усладимся.

Жена

Карфагинский град древле врази обступиша

и чрез долгое время гражданы нудиша.

Силнии силный отпор врагом си творяху,

даже лучныя верви им оскудеваху.

Не имевшым же шелка тех на творение,

жены сотвориша глав своих стрижение.

Отдаша власы своя на потребы ратны,

и бе дар их гражданом преблагоприятны,

Ибо из тех вервицы к луком сотвориша,

от супостатов град свой добре защитиша.

Адам не змием ветхим прелщен бяше,

но от супруги, юже зле любяше,

Зане изволи Бога прогневити,

нежели Евву мало оскорбити.

Многи и ныне мужи жены лщают,

ума и правды и неба лишают.

Нин царь Семирамиду толико любяше

подложницу, яко же сам оней служаше.

Та, видящи плененна царя себе быти,

рече к нему: О царю, хощу тя просити

О вещь едину, токмо не могу дерзати,

да бы отречением срама не прияти.

Царь рече: О царице любезная зело,

ничто ти отреку аз, извести ми смело.

Она лстивыя речи нача глаголати,

ласканием царское сердце умягчати:

О, царю прелюбезный, аще мя любиши,

едино прошение да ми исполниши.

Имам злата и сребра излише от Тебе,

и самаго ты еси мне поручил себе.

Едины токмо вещы лищенна тобою,

но, молю, ты мя тоя сподоби собою.

Желание ми в сердцы по вся дни стужает

и возвеселитися, право, мне не дает.

Хотение мя томит, да мя ты почтиши,

и поне на един день царство да вручиши,

Да аз изиду яве, царски украшенна,

и от всех, яко же ты, да буду почтенна.

Веления моего вси да послушают,

слово абие делом вси да совершают.

Царь, слышав, разсмеяся и рече си слово:

О, любезная жено, сие ти готово,

И абие повеле миру возвестити,

яко царь хощет жену свою воцарити,

И назнаменова день, во нь же быти делу,

тако Семирамиду сотвори веселу.

Приближившуся тому дни, царь завещает,

да всяк Семирамиды гласа послушает,

И аще бы кто дерзнул непослушен быти,

того, яко же врага, смертию казнити.

Приде день нареченный, место сготовася,

безчисленно множество народа собрася.

Изводится царица, честно посадися,

в царская облеченна, народу явися.

Вси ей поклонение, аки царю, даша

и приветство пречестно оней глаголаша.

Она повеления различна творила,

яко власть имущая, винныя судила.

Что-либо велела есть, во всем послушаху

и слово ея делом абие творяху.

По многих велениих, оле что дерзает!

царя Нина связати воем завещает.

Сотвориша то скоро, потом представити

себе повелела есть, и обезглавите.

Послушливии раби слово сотвориша,

царя своего царства и жизни лишиша.

Тако зла подложница любовь возмездила,

воцаривша ю царя смертию казнила

И сама на престоле царстем утвердися.

Коварству злыя жены, читаяй, дивися

И веждь, яко несть злоба под солнцем лютшая,

по сведетелству мудрых, яко жена злая.

Адама прелсти жена, и силна Сампсона,

кротка царя Давида, мудра Соломона.

Кто убо днесь от жены без бедства пребудет?

Всякому мужу жена в прелесть есть и будет.

Соломон, Давид, Сампсон и Адам женами

прелщени, блюдитеся и вы от них сами.

Три жена стрелы из себе пущает,

ими же мужа силна побеждает:

Зрение и глас и осязание,

сими бывает смерти предание.

Яко василиск оком умерщвляет,

яко же сирин гласом сон впущает

Смертный, аще прикоснется телу,

яко от огня не леть быти целу.

От сея кож до троицы стрел блюдися,

к животворящей Троице обратися,

Яже мертвыя силна есть живити

и всяку язву смертную целити.

Жена злая

Змий ядовитый тело усекает,

а жена злая душу убивает.

Тем некто рече, муж добре учены,

яко несть злоба, яко злоба жены.

Ин же: Уне есть со лвом обитати,

неже с женою злою пребывати.

Та бо мужеви зело досаждает,

а лев за пищу покорен бывает.

Питай злу жену снедми всесладкими,

она ти воздаст кознми всегоркими.

За мед яд она уготует тебе,

никогда жене злой верити требе.

Тоя злы нравы демон добре знает,

тем ю на прелесть он употребляет.

Где изнеможет сам демон прелстити,

тамо женищу злу тщится пустити.

Евва и не зла во Едеме бяше,

а что чрез ону демон содеяше?

Коль паче много зла чрез злыя деет,

мой известити язык не умеет.

Иову, егда чада враг побил есть,

недобру жену на зло оставил есть,

Да может того прелстити женою,

ему же не бе доволен собою,

Да непозыбна всякими тщетами

лестными жены позыблет словами.

Но иже Богом крепким утвердися,

и тоя словом недвижим явися.

О злая буря на Иова бяше,

егда й жена на злая прелщаше!

Токмо укрепи й десница Бога,

яко творяше дела блага многа.

Точне Иосиф во зле бедстве бяше,

елма госпожа онаго прелщаше,

Да соизволит скверно с нею быти,

похоти ея блудом угодити,

И аще Господь его не хранил бы,

всячески красный юноша блудил бы.

И ини мнози от жен погибоша,

или блудиша, или в гроб падоша.

Сампсон женою пресилный прелстися,

связан и врагом дан, обезочися.

И Соломона жены злы прелстиша,

от Бога жива к идолом свратиша.

Иоанн святый живота лишенный,

Ирод осуди, женою прелщенный.

И елма Христос спасение наше

чрез страсти Своя и смерть содеваше,

Чрез Пилатову тщася демон жену

действию тому быти оставленну.

Во сне ей страхи и беды творил есть,

да бы таинство препяти, мыслил есть,

Еже бы Христу за ны страдати,

а спасения нам бы не прияти.

Всячески убо злы жени хранися,

яко ко огню, к ней не приближися,

Ибо конечно имать опалити,

аще близ ея хощеши пожити.

Змий изъдалеча никого язвляет,

разве аще ся телу прикасает,

А злая жена, далече седящи,

может убити, токмо оком зрящи.

Глас ея — стрела, ядом напоенна,

ею же душа бывает мерщвленна.

Тем хотяй смерти от нея не знати

да опасется жен злобных и знати.

Жена равная

Аще хощеши жену в супружницу взяти,

вящшыя тебе родом блюдися пояти,

Вящшая бо восхощет тобою владети,

равная тя за главу потщится имети.

Жена блудная

Фенелла царица, Кемефова жена,

Скотийскаго царя, лести исполненна,

Потщася яблоку сотворенну быти

из чистаго злата, и внутрно таити

Стрелы смертоносны, да кто прикоснется,

абие стрелами теми убиется,

Изпадающыми из того яблока

до коснувшагося человека бока.

Имеющи же гнев на царя Кемефа,

искаше угодна ко смерти извета.

Усмотревши же час, царя си моляше

внити в храм, в нем же то яблоко держаше

Истукан стоящий. Царь, не зная кова,

послушал есть жены прелестныя слова.

Вниде в ту храмину и, егда увиде

красно то яблоко, скоро к нему приде

И, неопасен быв, коснулся рукою,

но абие извнутрь пронзеся стрелою.

Оле жены лстивы! О яблока лестна,

в нем же в виде злата смерть бе неизвестна!

Тому леть яблоку жену подобити,

хотящу с юношы любодейно жити,

Ибо злато светло она ся являет,

красотою юных к себе прилуждает,

Иже безопасно егда ся касают

скверней плоти ея, тогда излетают

Таимыя стрелы и в сердца язвляют,

и тако смерть душам верных содевают.

Много же обыче и смерть плотска быти,

лют бо муж от жены приседит убити.

Тем же красну жену блудну да презриши,

перстом не коснися, ни оком да зриши,

Ибо и в то стрелы оныя летают,

яко окном, оком сердце уязвляют.

Имей же ты очи выну обращении

ко Богу и руце к Нему ж воздвигненны.

Он оком Своим свыше призрит к тебе

и десницею Си водворит тя в небе.

Женам не сообщаться

Из лиха дерзновен есть тщяйся тамо ити,

иде же виде шедших выя си ломити;

И зело немощен есть, иже не боится

тамо ити, иде же всяк ходяй валится.

Зло есть упование в бедство ся вревати,

и в известну погибель живот свой даяти;

И ползска есть надежда, егда уповает

тамо кто спастися, где кождо погибает.

Несть подобно спастися огнем окруженну,

во пламенех седети, не быти паленну.

Неудобно отраву пиющему жити,

на стремине у сну вшу не сваленну быти.

Уне есть в сих случаех добре ся бояти,

нежели продерзиво худе уповати.

И полезнее себе немощна познати,

воеже бы послежде крепку пребывати,

Нежели крепка тогда себе проявити,

послежде же немощна вконец сотворити.

Мней от страсти лакомства досады бывает,

егда злата и сребра кто не соглядает.

Зело же оно видяй страстию томится,

всячески стяжати е и со грехом тщится.

Тако искушения страждет превелика,

иже ся сообщает красным женска лика,

В них же ничто ино есть, токмо еже губит

того, иже надолзе с ними быти любит.

Жало бо греха бысть нам женская красота,

сеть душепленящая — лица их доброта.

Речеши: Неискусим пребываю тою.

Воистинну сам лстиши, друже, душу твою.

О коль мнози мужие, сущие священни,

столпи суще мненнии, тою уловлении!

О мирских же суетно есть и глаголати,

тех бо и величайшых та сеть весть пленяти.

Мнози от овех дивна чюдеса твориша,

послежде жен обществом тех лишени быша.

От сих же мнози враги своя победиша,

потом сами женами побеждени быша.

Превыше волн житейских бывше вознесении,

в слабых плоти кораблех вконец погружении.

Лви мнимии в крепости, от немощи страсти

укротишася, женстей приложшеся сласти.

О коль безчинна близость, яже со женами,

ибо язвит во сердце злы любве стрелами!

Яко же из углия искры испадают,

яко смертоносный яд аспиди пущают,

Еще, яко из ризы моль вредный ся родит,

тако общество женско смертный грех изводит.

Паче, само зрение на лица жен красных

изводственно от очес их есть стрел напрасных,

Егда бо зряй на красну от нея воззрится,

из лука очес стрелми страсти у язвится.

Лучше же василиска свищуща слышати,

неже глас поющыя в уши жены взяти.

Всяко неприличное общество с женами

множества грехов клей есть смертных между нами,

Паче, лип смертоносный, им же уловляет

враг, яко птицу, кто ся женам сообщает.

Везде убо общества их нужда гознати

хотящым погибели люты не страдати.

Аще же нужда кому беседу имети,

да есть мимоходная, несть требе седети.

Седение бо, яко огнь, я распаляет,

аще и со благим то умыслом бывает.

Но увы буйства сердец, вси то бедство знаем,

обаче женска пола нескоро гонзаем.

Паче прилежно ищем с онеми седети,

аще бы пришло от них сердцу исгорети.

Видим инех погибель, а ту презираем,

сами в ту ж де волею впадати дерзаем.

Опасни быти чюждым злым мы не учимся,

собою гибель знати пребезумно тщимся.

Не дивлюся днесь, яко Адам сведен бяше

от Еввы во грех, егда с оною живяше,

Зане умерших прежде и падших не зрел есть,

образом погибели нимало имел есть.

Едино веление онаго вязаше,

еже ему от Бога положено бяше.

Мы же, тысящи многи прикладов имуще,

не гонзаем общества, опасени суще.

О аще бы Адаму смерти созерцати

и беды, яже мы днесь нудимся страдати,

Негли бы не прелщен был, к Богу бы вратился,

за что бы в благодати Богом утвердился.

Адам извинение в гресе может дати,

нас ни едино слово может извиняти.

Убо паче достоит извет ся хранити,

иже могут нам во грех смертный вина быти,

Неже в защищение греха вин искати,

то бо тщету Божия деет благодати,

Без нея же нежива душа пребывает,

яко тело без души мертвенно бывает.

Жен близость

Соль из воды родится, а егда сближится

к воде, абие в воду сама растопится.

Тако муж, сый от жены, к жене приближенный,

зело скоро бывает ею растопленный

От крепости во мягкость, мужества забудет,

яко едина от жен, во слабости будет.

Железо каменеви егда приразится,

огнь с того, а не вода действия родится.

Тако, аще муж жене будет приближенны,

не вода слез, похоти огнь будет рожденны.

Честный муж честней да ся не сближает

жене, тако бо честность исчезает,

ибо лен с огнем не может терпети,

нужда сгорети.

Друг другу лен есть, огнь взаим бывает,

демон углие плоти разжизает,

да пожар душам обою сотворит,

грехом уморит.

Хотяй чистоту свою сохранити

должен есть с полом противным не жити,

сожитие бо похоть возбуждает,

девства лишает.

Женитва

Фороней царь великий егда умираше,

брату си Леонтию сице глаголаше:

Совершенно прежил бых дни моя блаженны,

аще бых в супружество не приимал жены.

Брат вопроси: Что тако? Царь же отвещает:

Кож до жену имеяй вину того знает.

Человек, иже мудрость от Бога прияше,

о ней же во юности труды полагаше,

Аще восхощет жену в супружество взяти,

нужду имать мудрости тщету восприяти,

Ибо не будет мощно с книгами седети,

удалит от них жена, удалят и дети.

Епикур аще лютый сластолюбец бяше,

обаче женитися мудрым возбраняше.

И Феофраст в книзе си того возбраняет,

препятие мудрости женитву вещает.

Ей неудобно книги доволно читати

и хотение жены в доме исполняти,

А коль многи потребы жена вымышляет,

кождо оженивыйся совершенно знает.

Ризы драгоценныя, бисери и злато

промышляй, супружниче, да имать богато.

Одеяния нова часто вымышляет,

на своя угодия весь дом истощает.

Рабынь хощет имети много украшенных,

в колесницах яздити драго позлащенных.

Раби да последуют, вси да почитают,

камо ли двигается, да ю провождают.

А утружденну мужу не даст обнощь спати,

в ложи обыче ему о нуждах стужати.

Ту жалостне глаголет, мужа укоряет,

аки о ней недобре в нуждах промышляет.

Инех мужей во образ супруги приводит:

Се она красней мене одеянна ходит.

Ову же вси людие зело почитают,

а мене за тобою сущыя не знают.

К сим ревнивая жена обыче стужати:

Что ты на ону жену любиши смотряти?

И что со рабынею ты глаголал еси?

Где был еси в гостине? То ми да повеси.

Из торжища грядуща гневно вопрошает:

Что принесл еси? Аще ни, то люте лает.

В гости аще пустиши, то обыкнет пити,

аще же не пустиши, не хощет и жити.

Увы ми, возопиет, коль есмь неблаженна

за злым мужем, от добрых другинь отлученна!

Сия и подобная досадно страдати,

а злыя изменити несть леть, и продати.

Аще поймется нища, в питании скудность;

аще богата, нравы претерпети трудность.

Хощет бо, да на ону выну светло зриши,

красоту лица ея и нравы хвалиши.

Аще на ину когда возрети случится,

то аки презренная велми оскорбится.

Честным именем выну хощет звана быти

и праздник именинный на всяк год храните,

Да о здравии ея весело пиеши

и наследницу богатств ону содееши,

Да желаеши оней по тебе остати

все имение твое во область прията.

Хощет, да отца ея и рабыню чтиши,

а кормилице ея и дары носиши.

Кого-либо возлюбит, и ты да любиши,

по хотению ея присно да ходиши.

Аще дом ей вручиши, за нос возмет тебе,

аще же не вручиши, мнит презрену себе.

И тако к ненависти тебе обратится,

весь твой дом возмутите свары устремится.

Аще не потщишися скоро примирите,

дерзнет о смерти твоей промысл сотворити.

Аще ризами ону светло украсиши,

многих очи на ея лице обратиши

И она разгордеет, ту бедство творится,

чистота ея в скверну да не претворится.

Аще же красны ризы жене отречеши,

ропот, свар и котору ея понесеши.

Негли же потщишися ону соблюдати,

не устрежеши, аще хощет ины знати.

Неверный чистоты стражь свое на ню око

впустит и чрез забрало, хотя есть высоко.

Не соблюдеши, аще сама не блюдется;

ей же леть, но не хощет, чиста та зовется.

Красна ли? То многими любима бывает.

Нелепа ли? То сама лепых лиц желает.

Любиму же от многих трудно сохраните,

а никому годныя неудобь любите.

Обаче скорбь меншая — нелепу имети,

неже лепыя нравы срамныя терпети.

Велие бедство тамо, где мнози желают

и различными кознми жену оболщают.

Не леть есть во целости той стене стояти,

на ню же тщатся от всех стран наветовати.

Суть и ина многая в супружестве злая,

яже ты, человече мудрый, добре зная,

На покойное место ко книгам склонися,

кроме бед супружества век твой жити тщися.

Жених — Христос, невеста — душа

Царь некий пребогатый дщерь красну имяше,

юже от всего сердца своего любяше,

И во знамя любве си царство оней дал есть,

еже во власти Своей присно содержал есть.

То услышав, мучитель некий издалече

к царствующей девице некосно притече

И нача ю словесы лестно увещати,

да бы хотела ему соизвол свой дати.

Обеща ей богатства, честь и многу славу,

и ят веру девица словеси лукаву.

Даде соизвол ему. но зело прелстися.

и чести, и царствия своего лишися.

Изгна ю той мучитель, она же ридаше

и, при пути седящи, милости прошаше.

Во едино же время ей плакавшей зело,

яждяше воин некий светло и весело,

Иже, видев ю красну, велми умилися

и вопроси, како ей нищета случися?

Она рече: Дщи аз есмь, от царя рожденна,

но мучителем лютым всех благих лишенна.

Славу девства, богатства враг лютый отьял есть,

из царствия отчинна бедну мя изгнал есть.

Сия услышав, воин нача глаголати:

аще ми восхощеши слово право дати,

Яко мя приимеши во жениха себе,

аз имам возискати царство твое тебе.

Подвигну брань на него, имам воевати,

да бы ему месть за тя достойну воздати.

Аще же на той брани буду умерщвленны,

требую, да от Тебе не буду забвенны.

Оружия с кровию изволь моя взята,

в знамя любве моея присно соблюдати,

Да елижды на онех кровь мою узриши,

обещанную любовь ко мне обновиши.

Девица с радостию все то обещаше,

ему ся во невесту любезно вдаяше.

Воин абие иде и брань сотворил есть,

самаго мучителя живота лишил есть.

Взискав царство невесты, ей паки отдал есть,

но сам на брани язву смертную приял есть,

От нея же и умре. Невеста ридаше

и по обещанию оружия взяше,

В крови очервленная, яже сохранила

во тайнейшей камаре, и к ним приходила

Множицею на всяк день, слезы же лияше,

любовь, проявленную себе, поминаше.

Елма же к царствующей мнози прихождаху

и в супружество себе оную прошаху,

Вшедши в камару ону, оружия зряше

и во слезах глаголы сицевы вещаше:

О, Господи любезный, ты мя отмстил еси,

не имам тя забыти по данну словеси.

Тобою от нищеты аз есмь свобожденна

и во царствии моем паки утверженна.

Не забуду любве ти, ни хощу избрати

въместо тебе супруга, инаго познати.

По сицевых глаголех к гостем исхождаше

и в супружество ити оным отрицаше.

О преблагодарная любве явленныя!

Да множатся невесты ныне сицевыя.

Но духовным разумом что та знаменает

притча? Тое любовь ваша да внушает.

Царь той есть Царь небесный, всяческих Создатель,

един горе и низу сущих Обладатель.

Сей имать дщерь прекрасну, зело возлюбленну,

душу всяку верную, в образ Свой творенну,

Украшенну дарами зело богатыми,

паче бисерей честных предрагоценными.

Той даде Царь небесный царство Си святое,

да имать рай превыспрний во жилище свое.

О том слышав мучитель, князь тмы мира сего,

потщася шествовати ко дщере сей Его,

Еще в прародителех, елма в рай бяху

и всею вселенною сами обладаху.

Нача превеликия отбеты творити,

обещая: Имате, яко бози, быти.

И нашым много выну душам обещает,

честь, славу и богатство уму предлагает,

Здравие и век долгий, и ина приводит,

но всеми враг лукавый бедну душу сводит,

Да ему согласует. Елма же прелстится

и его вселукавым советом сложится,

Тогда ю оскверняет, обнаженну творит

и далече от царства небеснаго гонит,

Яко образ во Евве с Адамом явися,

ибо в них душа рая и неба лишися.

И сущи в изгнании, при пути седяше,

милостини просящи, тщеты же ридаше.

Путь той сей мир есть, в нем же все естество наше

изгнания нищету лютую страдаше,

И в нем пребывающе, о рай ридало,

благодати от Бога слезно ожидало,

Дон де же силный Воин о нем умилися

в той день, егда кончина веков приближися,

Иже есть Христос Господь, и совет содея

с девою, еже царство возвратити ея

И злато мучителя въконец поразити,

отмщение обиды над ним сотворити,

Точию да невеста Ему сотворится,

чрез любовь духовную сердцем свокупится.

И медления кроме в броня облечеся,

на брань противу князю тмы мира вдадеся.

Яко непобедимый, того поразил есть,

невесте царство ея в державу вратил есть.

Сия сотвори Христос, егда пострадаше,

ибо тогда демона пресилно попраше.

Обаче на той брани тако уязвися,

даже, мертв быв плотию, в гробе положися.

Его же ран и смерти душа да ридает,

и оружия Его честно да лобзает.

Крест честный, окропленный кровию святою,

да прятает в камару сердечную свою.

Гвоздие, трость, копие, бичы и иная

орудия да хранит во сердци святая.

Множицею на всяк день на та да смотряет,

благодарство Жениху слезно да воздает.

Елма же некто иный начнет искушати,

еже бы в супружество оному ся дати,

Да смотрит во камаре оружия тая,

любве ради оныя суща кровавая.

Зрящи же, да ридает и да умилится,

благодарная любве быти да явится.

Искусителем мира ответ да воздает,

яко ина жениха ни же помышляет

До кончины живота приимати себе,

яко имать Жениха Христа Бога в небе.

Аще сице невеста Жениху своему

благодарна явится, честна будет Ему,

Во вечныя радости будет воведенна,

во чертозе небесном светло украшенна

Славою и честию, что да бы прияти,

да будут благодарны душы благодати

Христовы, юже тогда Он нам сотворил есть,

егда душу Си за ны грешны положил есть.

Жертва

В законе ветсе многи жертвы бяху,

но, благодати пришедшей, престаху,

Яко же звезды сияти престают,

егда встекшее солнце соглядают.

Еще, яко свет всех звезд превосходит

солнце, его же л учесы в них родит.

И жертва наша древния превзиде,

тем вся престаша, внегда она вниде.

Златоустый учитель жертвы собирает,

и десять видов онех мудро сочитает.

Первая Сам Христос Бог жертва Отцу бяше,

егда на жертвеннице креста пострадаше.

Вторая мученици святии бывают

жертва, егда за Бога тело на смерть дают.

Третяя есть молитва жертва живу Богу

со воздеянием рук честна попремногу.

Четвертая есть жертва хвалы, ту свершает,

кто безпрестанно Богу хвалу возсылает.

Пятая жертва — правды, юже поминает,

кто псалом пят десятый частократ читает.

Шестая — в скорбех сущы люди посещати

и нескверна от мира себе соблюдати.

Седмая жертва — Богу воскликновение,

еже от любве Ему есть во хваление.

Осмая жертва Ему есть дух сокрушенный,

яко же извещает Давид божественный.

Девятая есть сердце на всяк час смиренно,

сего не презирает око божественно.

Десятая Господу жертва приносится,

повнегда слово Его ким благовестится.

Всяк зде жертву обрящет, юже приносити

возможет Господеви, тою Его чтити.

К сим да приложу и аз, жертва есть святая

тайна Евхаристии пребожественная

И даяние всяко, еже на нищыя,

тако ж приношение во храмы Божия

Жертва Богу угодна воправду зовется,

и что-либо Господа ради подается.

В Завете Ветхом агнца цела избираху

и Господеви в жертву того приношаху.

Иже паки на члене своем врежден бяше,

того закон во жертву нести возбраняше.

Целый агнец человек той быти вменится,

иже юн и здрав телом к Богу обратится

Покаянием святым. Той — приятна жертва

всемогущему Богу, жива бо, не мертва.

Иже убо к старости своей отлагают

покаяние чисто, зри, что содевают:

Не цела хотят агнца в жертву Богу дати,

ибо тогда в немощех нужда пребывати.

Слух бо оскудевает, очеса мрачатся

и вси члени силы си за старость лишатся.

Како убо приятна жертва могут быти?

Изволь кождо разумом здравым разсудити.

Не человек в то время грехи оставляет,

паче грех человека стараго лишает.

Не грешит бо. яко у не может грешити,

а аще бы еще могл, рад бы в злобе жити.

Ту кая есть заслуга пред Богом, хотящим

воли, а не на дело внешнее смотрящым?

Праведно убо верным во юности время

каянием греховно отвергати бремя,

Егда здравствуют уды и чювствами всеми,

ибо целии агнцы воменятся с теми.

С теми аще ся Богу принесут во жертву,

яко целу приимет и живу, не мертву.

Обаче и старии, иже не успеете

Богови принести ся, не отметни есте.

Не по вам убо, токмо по щедротам Бога,

и вас Он до небесна ждет выну чертога.

Не злато Он точию древле приимаше,

егда сень Исраилю создати хотяше,

Но и козию шерсть Он от многих приял есть,

что може принести кто, в дело все взимал есть.

Вы, яко шерсть козию, старость приносите,

а прощения грехов умилно просите.

Не отринет и шерсти, слезми омовенны,

в здание Церкве Его будете въмещенни.

Вы же, юнии, в силе добре цветущии,

будите, яко злато. Богу несущий

Лучший век ваш во службу, а возмете за то

любве Бога и жизни небесныя злато.

Покаяния в старий век не отлагайте,

но днесь, время имуще, истинно ся кайте,

Несть бо известно, аще достигнем старости,

не прекратит ли Господь века во юности.

И обычно со зрелых лет не достигают,

иже покаяние в старость отлагают.

Правым Судом Божиим та им казнь бывает,

да никто в гресех жити долго продерзает.

Аще же и век долгий кому попустится,

едва той со слезами к Богу обратится,

Ибо, приложившуся лукаву налогу,

обращение трудно ко благому Богу.

Жребят ослих в законе Бог не приимаше,

но въместо онех овцы жрети завещаше.

Осел же есть несмыслен, ленив, непоятен,

того ради досадлив путным, неприятен.

Осляя же жребята сыны знаменают,

иже буи, лениви, несмыслни бывают.

Сицевых в чин священный несть лепо въводити,

ни людем бо, ни Богу годни могут быти.

Но оле злонравия, противне ся деет,

иже глуп, ничесо же смыслит и умеет!

Того родителие в попы устрояют,

осла Богу во жертву тако полагают.

А во священство нужда умных избирати,

да бы проказу грехов знали разсуждати,

И могли стадо пасти, данное от Бога,

паче всех чинов, ума зде есть требе многа,

Да не слепый вожд будет, да не губит стада,

но да вождествует е в злак небесна града.

Но вся противна, вижду, днесь в мире бывают,

ибо слепыя вожды овцам приставляют

Словесным, а зрящыя на службу мирови,

ему же за тленная в рабство вси готови.

Оле времен и нравов! Миру вся благая

воздают, а Господу — яже суть худая.

Миру осла ленива вдати подобает,

Бог овцы полезныя в жертву Си желает.

Хужшая пожре Каин, за то бысть презренны

и с жертвами своими Богом отверженны.

Авель же избранная Богу даровал есть,

и Бог тая от него любезно приял есть.

Авеля убо и нам нужда подражати,

лучшая чада в службу Господу даяти,

И будет жертва наша Оному приятна,

сотворит душам нашим Того благодатна,

Его же, вси людие, милости ищите,

лучшая всеблагому Богу приносите.

Жертва неправая

Иже чюждая в жертву Богу посвящает,

аки сына в очесех отчих закалает.

Жестосердие

Сердце без благодати Божия жестеет,

яко блато без воды, густея, твердеет.

Наковално, млатами биемо, твердится,

злобно сердце ранами паче ожестится.

Образ есть в Фараоне, иже, быв казненны,

не умягчися, даже в понте погруженны

Терпение Божие, не крепкая сила

Фараоново сердце в злобе ожестила,

Ибо, яко легчае Бог его казнил есть,

он, не умягчаяся, сердце ожестил есть.

Аще же был бы тяжше от Бога казненны,

негли абие был бы сердцем умягченны.

Чесо же ради Господь сие сотворил есть,

судбы Си праведныя от нас утаил есть?

Яве, яко достоин исчезнути бяше,

иже род Исраилский излиха томяше.

Живописание

Бе живописец добре изученный

в Роде, именем Протоген реченный.

Сей рябку тако живо написаше,

даже к ней живых множество леташе.

Инде змий тако живописан бяше,

яко же в птенцех пение держаше,

Иже Лепиду не даяху спати,

змий за то страхом не дал им пискати.

На Клавдиеве феатре прелщаху

род вранов окна, яже от вап бяху,

Непщующе бо праведная быти,

тщахуся теми на ветр излетети.

Апеллес коня тако написаше,

яко же кони живыя прелщаше,

Мняще бо того коня жива быти,

не престаяху рзание творити.

Им же некая лица ся писаху,

яже знамена и черты являху

Живых, яко же бе возможно знати

физиогномом, что о них вещати.

Живот

Иов живот наш кораблю равняет,

иже во морских пучинах бегает

Излише скоро, а егда случится

стретити другий, то людем видится,

В корабли сущым, другий пребегати,

а свой на месте недвижно стояти,

Или мало что ветром гоним быти,

зело медленно к пристанищу плыти.

А в самом деле равно он другому

течет по водам ко брегу земному.

Тако живот наш видится стояти,

а инех скоро к гробу притекати.

Но лстимся сице, ибо в самом деле,

яко в корабли, течем в нашем теле

Подобне прочим скорым течением.

равными ветры, точным стремлением.

Аще трудимся или почиваем,

выну ся к гробну брегу приближаем.

Убо достоит то нам выну знати,

добре ко гробу себе устрояти,

Да бы непраздным к оному приплыти,

но благих плодов исполненным быти,

О них бы вечно в небе пребывати,

душевна глада во век не страдати.

Живот человеческий сугуб ся считает:

временный сей и вечный, всяк верный то знает.

Сугубо и рождество того познаваем:

в мир сей и в век грядущий, его же вси чаем.

Зде из чрева материя обще ся родити,

онамо всем из гроба обще исходите,

Во нь же труп, яко семя, вложенный бывает,

да, яко клас, послежде в вечность ся раждает.

Из земленны матере всяк в мир сей родится,

от земля и всяк мертвец Богом возродится.

Яве убо, яко вси земли есмы чада,

но создани в жителство небеснаго града,

Во нь же имамы Богом водворени быти,

аще тщимся небесно зде, не земно, жити,

К чесому нас апостол Павел увещает,

горняя мудрствовати егда завещает.

Тщимся убо, братие, божественно жити,

да бы в небо ко Богу в живот вечный внити.

Живот временный аще вечну уравниши,

смерть паче, неже живот быти и узриши,

Ибо повседневное телесе тление

что ино, токмо смерти есть продолжение?

Живот человеческий скоро претекает,

ибо, яко цвет селный, тако отцветает.

Здрав кто утро и весел, надеется жити

с Мафусайлом долго, силен, славен быти,

И се навечер коса смерти посекает,

прекрасный цвет юности во тлю обращает.

Веселится кто ныне, славно торжествует,

а смерть невидимая косу на нь готует,

И се солнцу западшу, и он тожде деет,

падает в гроб, утро же смердит, ибо тлеет.

Оле непостоянства жития нашего!

Никто же есть известен бытия своего.

Несть блаженство под солнцем, то бо токмо в небе,

хотяй жити блаженно, то заслужи тебе.

Тамо жизнь безсконечна и вечно блаженна,

тамо здравие присно, радость божественна.

Тамо мир есть без бедства, безбедство мирное

и вечность блаженная, блаженство вечное.

Любы совершенная тамо обитает,

совершенство любимо вечно пребывает.

Тамо страху несть место и печаль не будет,

ликование, радость во веки пребудет.

Нощи тамо не знают, день выну сияет,

а никому никогда варом досаждает.

Вси же единодушно в Бозе пребывают,

Его зрением умы своя услаждают.

Тамо здравие вечно, болезнь ни едина,

океан веселия, радости пучина.

Тамо правда царствует, никто же прелщает

и сам ни от кого же прелщаем бывает.

Оттуду блаженнии никогда гонятся,

окаяннии тамо никогда впустятся.

Тамо ум без поблуды имать вечно быти,

память паки ничто же возможет забыти.

Воля ввеки Богу будет подчиненна,

любы непритворная, сладость неизменна.

Чювства без вреждения имут пребывати,

никто печално имать тамо воздыхати,

Ибо отвеюду радость всего человека

изъвне и внутрь обидет без кончины века.

Живот тамо без смерти, без горести — сладость,

о Бозе, в Бозе, с Богом вечно будет радость.

О всеблаженная жизнь живущих на небе!

Кто тамо вечновати не желает себе?

Желайте, любимицы, вседушно желайте,

на всяко время и час в небо воздыхайте,

А зде тако живите, да бы угодити

делы Богу, и за ня восприятым быти

Во страну вечны жизни, ибо не вхождает

тамо, кто жизнь во злобах свою провождает.

Благодатию убо Господь ны спасает,

но и добрых деяний от нас Он желает,

Да содействуем Его святей благодати,

тако удостоимся жизнь вечну прията,

Ея же аз всем верным усердно желаю,

и сам ко Богу щедру о том воздыхаю,

Да, простив моя грехи по Своей милости,

общника мя сотворит вечныя радости.

Жид

Яже полза в сад дробных рыб щуку впущати,

та — между христианы жида водворяти.

Щука малыя рыбы несытно глощает,

жид люди убогия лихвами снедает.

Яко Авеля Каин брата си любляше,

тако жидовин любит христианство наше.

Что в недра своя есть змия влагати,

то в граде верных есть жида держати.

Змий жалом тело смертно усекает,

жид хулы словом душу прободает.

Жизнь

Бог есть жизнь наша, убо в Бозе жити

комуждо требе, да бы живу быти.

Яко без света — тма, тако без Бога —

смерть, в ней же мука вовеки премнога.

Коль сладко человеком, еже в мире жити,

и коликую цену жизни возложити?

Аз не имам искуства, космицы то знают,

иже временну вечной жизни прелагают,

Зде хотяще весело и богато жити,

а о вечной не мыслят, аки бы не быти,

О ней же в Писаниих то нам извещенно,

яко тамо житие всячески блаженно

В сладости и радости, к тому безконечно,

измена бо не будет тех в небеси вечно.

И зде житие наше чему подобится?

Имеяй ума очы право присмотрится.

Не блистание отвне нужда созерцати,

но от основания полезно есть знати.

Тако бо совершенней вещь ся познавает,

егда тоя природа сужденна бывает.

Что же житие наше? Оле окаянно,

суетно, худо, кратко и непостоянно!

Едина есть времене черта невелика,

а беды окаянства во оней колика,

Язык человеческий может ли гадати,

недоумеваюся аз грешник сказати.

Есть оно, яко роса, утро низпадшая,

а, солнцу возсиявшу, скоро обсохшая.

Есть подобная дыму, горе возшедшему,

от веяния ветров въмале изчезшему.

Есть мрачней сени точно, яже изчезает,

егда солнце лучеса своя проявляет.

Подобно есть и цвету, лепокрасну сушу,

но зело сокращенно бытие имущу.

Есть оно, яко капля, в прах многий впадшая,

но следа бытия си премало явлшая.

Есть говору подобно на воде надменну,

но в мгновении ока ветром расторгненну;

Или, яко же река скоро мимо ходит,

тако во море смерти жизнь наша отходит;

Или, яко посланник въмале пребегает,

тако житие наше въскоре претекает.

Мощно и кораблеви пловущу равнити,

весть бо море житейско вократце преплыти.

Яко же птица скоро воздух прелетает,

тако наш ко пределу живот прибегает.

Ни скорее ко целю остра стрела летит,

неже человеческий живот к смерти бежит;

И не толико быстро бури ветра веют,

елико человеци ко тли гробней спеют.

Не тако на свой запад солнце светло тщится,

яко человек грешный ко гробу ближится.

Слаба — сеть паучины, а слабша есть тоя,

о человече грешный, краткая жизнь твоя.

Что убо ту воправду возможеши звати?

Суетие суетий лепо имя дати.

Паче, егда ничто же имя возложиши,

тогда ся ко истине право приближиши.

Что убо, человече, жизнь твоя, толико

кратку и худу сущу, ты мниши велико?

Презри жизнь временную, во вечную тщится,

горняя да любиши, земными не лстися.

Жизнь и смерть сугуба

Сугуба смерть есть душы человека:

смерть греха во днех настояща века,

Смерть же геенны во веце грядущем,

лютыя казни грешником несущем.

Подобне живот сугуб ся считает:

зде — благодати, та бо оживляет,

Онамо — славы, яже будет в небе.

Чтый, тщися жити, аз желаю тебе.

Жизни время

Время жизни комуждо Господь уставляет,

его же предел никто живый изменяет.

В Его руце ключь жизни и смерти держится,

Онем пробавляется время и кратится.

Продолжает же то Бог за молитвы слезны,

яко Езекии, лежавшу в болезни;

Или ради славы Си, яко сотворил есть,

егда мертвыя Христос Господь воскресил есть;

Или инех вин ради, яже Сам Он знает,

и по них милость людем Свою изъявляет.

Сокращает жизнь паки, да кто не прелстится,

и злобою в разуме си да не растлится;

Или казнь дея грехов, яко ся вещает,

мужь крове и лсти дней си не преполовляет;

Или зде очищая от вины порока,

яко онаго мужа свята и пророка,

Иже паче завета Божия вкусил есть

пищу, со лжепророком, иже и прелстил есть.

За то преслужание, елма ся вращаше,

от лва смерти предан быв, на пути лежаше.

Житие Христово

Житие Христа Бога все правило бяше,

еже на благи нравы люди наставляше.

Вся суетия мира Он в ничто вменил есть,

что в ползу спасения, то токмо творил есть.

Еже миру противно, то Онем любися,

и что Богу угодно, в образ нам творися.

Мира сонм всесуетный богатства желаше,

Христос Господь нищету любезно избраше.

Ов начало держати излиха хотел есть,

Христос Господь царь быти конечно презрел есть.

Мир чада во блаженство себе почиташе,

Христос чадородия ни же помышляше.

Досад и скорбей мира питомец гонзает,

а Христос на вся скорби Сам Себе предает.

Обид ни же мало мир страдати желаше,

Христос же премногия обиды терпяше,

Кая бо болши может обида ся звати,

яко до крестны смерти муки пострадати?

Болезни плоти миру досадны суть зело,

а Христово биенно все святое тело.

Страшно бе и ужасно миру на крест зрети,

а Христос Господь на нем изволи умрети.

Вся, их же мир рачитель, Христос обхудил есть,

онем же гонимая велми возхвалил есть,

Яко во зле лежащий правых благ не знает,

но горестная сладка быти возвещает,

И противне, худая мнит преблага быти,

и та весть неискусным да ищут блажити.

Вы же, православнии, Христу слухи дайте,

лестных мира советов всескоро гонзайте.

Лучше мало со Христом на земли терпети,

потом вечный в небеси с Ним покой имети,

Нежели с миром ныне во утехах жити,

по смерти в огни вечном во век веков быти.

Житие наша — пара

Житие человека беднаго кто знает?

Ни единей от вещей твердых уравняет,

Но скоропреходящим то уподобляют,

их же во любомудрих почтени бывают.

И в Писании Святом тожде обретаю,

Иоакова святаго слово поминаю,

Иже между многими подобии дал есть

житию имя пары, нимало солгал есть,

Ибо, яко же пара въсходит теплотою,

тако жизнь наша — тою, обое — малою.

Паки, яко же пара в аер ся вращает,

тако житие наше скоро исчезает.

Третее, пара тонка и едва видится,

тако жизнь наша кратка и в немнозе зрится.

Еще, пару ветр малый скоро развевает,

тако жизнь нашу мала беда истребляет.

Пятое, пара мрачна во облак густеет,

тако в мраце невеждства вся жизнь наша тлеет.

Шестое, мятеж в паре премногий бывает,

жизнь наша безмятежно стояти не знает.

По сих, пара обыче в воду ся вращати,

а жизнь наша во слезы весть ся изменяти.

Наконец, яко пара к земли ся вращает,

подобне тело наше в ту ся обращает.

Оле непостоянства! Оле изменности!

Скоро в тлю превратятся и бедныя кости.

Житие временное недолго пребудет,

а вечное каково кому, Бог весть, будет.

Ты, Боже, настави ны тако в мире жити,

еже бы вечность в небе светлом наследите.

Жребий

На место Иудино два мужа избраху:

Иуста и Матфия, оба честей бяху.

Иуста толк — праведник, Матфий же дар Бога

знаменает, и не бысть о онех пря многа,

Духом бо правимии, жребия метаху,

яко, кто есть достойней, знати не можаху.

И па де на Матфия жребий сотворенный,

тем он во апостолство, не Иуст, причтенный

Во знамение, яко не, иже прав мнится,

но кого Бог дарует, той престолом чтится.

Жребием дело некое свершати

днесь возбраняет Церковь, наша мати,

Еже Евреом не возбранно бяше,

их синагога в нраве то держаше.

О двою козлу жребие метаху,

ову пущенну, ова закалаху.

Жребием землю повеле делити

Моисий Евреем, внегда в ону внити.

Жребием татбы сын Наввин искаше,

юже сын Зарин Ахар содеяше.

Сыном Иуды земля разделися,

яко же кому жребий прилучися.

Иосифовым сыном землю дати,

иде же паде жребий, ту прияти.

Манасиево то колено взяше

земли, что жребий падением даше.

Седми коленом Исраилска рода

жребием в область дадеся порода.

Леввиный чадом жребие метаху,

тем во державу грады восприяху.

При Самуиле жребие метаху,

егда на царство Савла избираху.

Иоанафан яко преступил есть

заповедь отчю, жребий изъявил есть.

Егда Леввитом службы разделяху,

яже во Церкви, жребие метаху.

Певцы такожде жребием строени,

точне вратари в службу поставлени.

Жребии священным в древней Церкви бяше,

когда служити кому подобаше.

Во апостолство Матфий божественный

въместо Иуды жребием възведенный.

Но сие дело различии различне

непщуют быти, не людско владычне.

Неции лучю свыше божественну

непщуют светлу быти низпущенну.

Ини голуба разумеют быти,

его же свыше Бог хоте пустити.

Еще инии тако непщеваху,

яко то дари пророчества бяху,

Или премудрость свыше низпосланна,

в знамя Божия избрания данна.

Но что-либо бе от сих положенных

во избрании знамен божественных,

Обаче и людск жребий тогда бяше,

лик святых древний обычай держаше.

Днесь в таких делех лучше избирати,

честь церковную достойным даяти.

З

Злая, грехом наносимая

Человек грешный аще могл бы зрети тая,

яже приключаются ему грехом злая,

Не престал бы в сем веце по вся дни ридати,

да бы в жизни будущей вечно не плакати.

Ибо грехом человек Бога в гнев двизает,

ко отмщению ярость Его возбуждает,

Содружества всех святых бывает лишенный

и от ликов аггелских грехом удаленный,

Единородную си душу грехом морит,

демону подчиненна злому себе творит,

Им же во бездне адстей вечно погрузится

и никогда же огня люта исхитится.

Сия зла разсуждая, кто жесток пребудет?

Чие, яко адамант, сердце твердо будет,

А не паче во слезы многи разрешится,

елма на всяку страну себе осмотрится

И отвсюду усмотрит злая належати,

тщетою и мукою вечною прещати?

Аще бо горе очы будут обращении,

тамо на отмщение Бог вооруженны,

Или мечь ярости Си страшно изощряет,

или лук со стрелами во казнь наляцает.

И врата небесная грешным заключенна,

и едва есть надежда входа оставленна.

Аще тажде очеса низу обратятся,

тамо муки адския во огни узрятся,

Яже не токмо люто есть дело терпети,

но есть и нестерпимо, токмо еже зрети.

Одесную же страну тщета проявится,

яко общества блага сил горних лишится.

От шуйцы содружество зело устрашает,

ибо тамо злых духов спира ся являет.

Пред очима лютая смерть стоит с косою,

готова душу вдати во огнь со смолою.

Созаде тщета вечна от Церкве помощи,

плачь же не утолится и во дни, и в нощи.

А плачю конец тому и мукам не будет.

донеле же Бог в небе с святыми пребудет.

Оле муки вечныя, оле тщеты злыя!

Кто не престанет от грех, разсуждая сия?

Разсуждайте, братие, а злых сих гонзайте,

покаянием святым грехи очищайте.

Омыйтеся слезами, душы убелите,

очистшеся от грехов, к небеси идите.

Чистии к Всечистому будете впущени,

во веселия ризы вечно облечени.

Злоба

Ничто же Богом зло есть, вся Им быша блага,

но злым врагом деются благостыни нага.

Но и супостат к злобе не может нудити,

аще не хощем воли ему покорити.

Злонравие

Срам родителем, аще гнусно, наго чада,

или в рубищех ходят пред жители града.

Много паче пред Богом о них посрамятся,

аще душами гнусна, злонравна явятся.

Аще тя о злом нраве некто обличает,

не железом десница твоя да отмщает,

Но тщися злонравие въконец истребити

и благия в то место нравы насадите.

Сребролюбива некто тебе нарицает,

дары твоя десница ему да подает.

Аще тя невоздержна имут нарицати,

тщися винопития частаго престати.

Аще тя злопамятна мужа прорицают,

безмстива, тиха, кротка выну да видают.

Тако тебе велику ползу сотвориши

и обличители ти в други преложиши.

Злоплодие и безплодие

Неплодная древеса секома бывают

и, огню пища бывше, в пепел согарают.

Колми паче злоплодным лепо то творити,

и еже посекати, и огнем палити?

Тако и человеком, плода не творящым,

сечь и казнь имать быти в огни всепалящем.

Колми же лютшая тым вправду имать быти,

иже в богомерзкая дела плодовита?

Лучше сих — безплодие. Тем зле не творите,

а в безплодстве дел благих никако живите,

Их бо кроме в жизнь вечну никого пущают,

но во пламень геенский лютый вовергают.

Злословник

Иже из пса язвенна стрелу извлекает,

того он зубами си острыми язвляет.

Сице от злословника нещадно язвится,

им же от злословия он мужем целится.

Злосовестный

Главострупливый гребеня гонзает,

яко той ему, чешя, досаждает.

Злосовестный же слов полезных бежит,

аки досадных, а во злобе лежит.

Злый от добрых и с добрыми

Не место человека честное спасает,

ни рода изящество, ни сан ублажает,

Но своя добродетель комуждо полезна

и во жилище въводит царствия небесна.

Аще кто от неблагих родитель родися,

не вредит ему, аще сам благ сотворися.

И вопреки, от благих родитель рожденный,

аще зол, спасения бывает лишенный.

И от места высока мнози низпадают

и по сане пречестном в низости бывают.

От родителей благих злии происходят,

и собори честный недобрых изводят.

Что лучше небесе есть? А с него свалися

денница с воинством си, егда разгордися.

Кий сад красней есть рая? А в нем согрешиста

Адам с Еввою и вне изверженна быста.

Потом има на земли первородный был есть

Каин, а он Авеля брата си убил есть.

Ное в корабли своем самоосмый бяше,

и тамо Хам лукавый посреде живяше.

Авраамль благочестив дом Богом судися,

и ту Агарь со сыном неправа явися.

Исаак из Ревеки два сына родил есть,

Бог перваго отверже, втора возлюбил есть.

Иаков дванадесять сынов имеяше,

из них Рувим на ложи отчи скверно спаше.

Со архиерейскаго престола падеся

в Ветсе Завете, иже Илий наречеся.

Из царска седалища Савл риновен есть

и, ратуя со враги, мечем прободен есть.

Давид царь бе и пророк, сын сестру растлил есть,

ин отче сквернил ложе, самаго гонил есть.

Наконец, апостоли со Христом хождаху,

а в среде продателя Иуду имяху.

Не дивно убо, аще злый ся обретает,

иде же благочестных собор обитает.

Точию злыя требе из среды гонити,

аще в исправлении не прилежат быти,

Яко крастову овцу пастырь извергает,

да здравых сущых вредом скверным не вреждает.

Не дивитеся убо, егда вам случится

видети, яко зол муж благим примесится,

И от добрых родитель рожденная чада,

иже нечесть суть рода и погибель града.

Множицею и в древних то вецех бываше,

Господь же злыя казнил, добрыя спасаше.

И ныне койждо свое имать нести бремя,

и елма всемирное окончится время.

Зле просите

Зле той просит от Бога, кто пренебрегает

заповеди творити, а горних протает.

Паки, иже, пренебрег горняя благая,

молится, да приимет суетства земная,

Аще же и та хощет от Бога прияти,

еже бы на сластная плоти отбращати;

Излише прошение его есть худое,

не будет Богом дано то оному в злое.

Змий

В некоей стране змий превелий бяше,

близ моста лежя, вред лютый творяше.

Кони и волы, и всяк скот хищал есть

и путь творшыя люди поглощал есть.

Тем путем святый епископ пустися

Донат, а змий на нь гладный устремися.

Разверз челюсти. Святый наплеваше

в гортань и знамя крестно содеяше.

Того не терпя, змий той умертвися,

о нем же страна вся возвеселися.

Осмь супруг волов зла гада везоша

на поле, тамо огнем й сожгоша.

Змий ругаемый

Кит есть, иже змий пророком реченный,

в поругание Богом сотворенный,

сей бо плотию есть великий зело,

и вся ясть смело.

В морстей пучине престрашен плавает,

что ся прилучит, то все поглощает;

рыбы всякия бывают во пищу

его сирищу.

Тем же, видяще его, утекают

ко земну брегу, а его прелщают,

ибо он егда на ня разъярится,

к брегу стремится.

Тамо на песце за мелкость остает

и от рыварей убиен бывает,

тако ся ему рыбицы ругают,

себе спасают.

Змий враг

Егда змий ветхий в рай Евву искусил есть

и ею плод Адама вкусити прелстил есть,

Казни Бог первозданных, казни же и змия,

да по земли ползает выну его выя,

В пищу да имать землю, донеле же жити,

в неприязни со людми безпрестанно быти.

На чювственном то змии частно совершися,

яко его в то время вид употребися.

На мысленном же паче, иже враг лукавый,

той бо ползает низу, не вознося главы.

Он ясть землю, люди бо земныя снедает,

земная мудрствующих люте поглощает.

Ему неприязнь люта от начала века,

найпаче на благаго выну человека,

Ибо завидением о том всегда тщится,

да человек от неба во ад низвалится.

Убо ты, человече, по вся дни блюдися,

главу его попрати всеприлежно тщися.

Предвари ты онаго главу сокрушити,

еже есть, грех вначале с сердца изтребити,

Да не он, вселся в сердци, тебе одолеет,

ему же сущу тамо, едва кто довлеет,

Кое же истребити, тем начало требе,

яко главу змиеву, попирати тебе.

Демон проклятый змий ся нарицает,

яко ядом си душы убивает,

Сиречь, советом на дела лукава,

полна злых лестей проклятая глава,

И яко змиин тогда вид прияше,

егда в Едеме прабабу прелщаше.

Змий же есть ветхий, ибо лета многа

язвляет люте рабы жива Бога.

Седмь уже тысящь лет род наш читает,

яко покоя от змия не знает.

Еще во рай нача ны гонити,

а еще и днесь хощет поглотита.

О коль есть хитрый, кто изрещи может?

Той его гонзнет, кому Бог поможет.

Вся искушений зело роды знает,

вся лести ковы в себе соблюдает.

Чрез саму древность злобе приучися,

всяк человече, от него блюдися.

Петр святый о нем всем нам извещает,

яко, аки лев гладный, окружает,

Некий, кого бы возмогл поглотити,

во пищу себе грехом сотворити.

Многообразно обыче прелщати,

всякими виды ко греху склоняти.

Пред очи ставит лица украшенна,

да творит сердца теми уязвленна,

Да к делу скверну может преклонити,

тако чистоту честную растлити.

Сладкия гласы в ушеса въпущает,

христианскую твердость умягчает,

Да, разъслаблшеся, въдаемъся во сласти

и последуем вождению страсти.

Гортани сладость брашен представляет

и вина въкусом к пиянству възбуждает,

Да, насыщшеся, раби чреву будем,

вся же создавша Господа забудем.

Обонянию воню услаждает,

ко излишеству тоя прилуждает,

Да благостию тоя усладимся,

от благ нетленных к тленным обратимся.

Осязанию мягкость представляет,

острыя в сердце тем стрелы пущает,

Даже, кто мягку прикоснется телу,

едва возможет мысль имети целу.

Сквернословию язык научает,

на лжи, клеветы, хулы наставляет.

Руце грабити, дары приимати,

зла вся делати, учит убивати.

Скверны прибытки обыче блажити,

да бы онеми душу уловити.

Мирскую славу и честь обещает,

да небесныя во веки лишает.

Яже суть лестна, украшает людем,

да за ня правых вещей в тщете будем.

Аще же отай не может прелстити,

дерзает яве наветы творити.

Во время мира всем кознем довлеет,

в гонении же насилие деет.

При пути всяком соблазнь полагает,

на стезях наших мрежи сокрывает.

Блюдет прилежно, да бы уязвити,

яко же Кераст, смертно повредити.

Ты же, любиме, его да блюдеши,

да главу его ногою сотреши.

Елико он тя готов узвити,

ты его главу тщися сокрушите.

Да бы победе при тебе остати,

тщися прилежно, а Бог хощет дати.

Забвение

Алверт Великий зело премудр бяше,

тайны естества дивны исписаше.

Егда же века старости дожил есть,

мудрости всея конечно забыл есть.

Феодорик же, Канисий реченный,

о смерти брата Петра увещенный.

Толь ужасеся, даже забы всего:

книг, писания, имене своего.

Подобне Корвин ветий преученный,

недугом долгим люте удрученный,

Забы имене своего вещати.

Коль память слаба, мощно по сих знати.

Заблуждение

Елма человек в нощи путь правый погубит,

близ пути ходя, об нощь делу часто блудит,

Не может бо праваго и крива познати,

дон де же на небеси солнцу возсияти.

Тако в нощы греховней иногда жившии,

и от пути закона в нечесть сблудившии,

Пути правды никако могоша познати,

донде же Бог изволи Свет свыше послати,

Свет, от Света истинна прежде век сиявший,

Христос Господь, путь в небо нам познати давший.

В Его лучес светлости мы тщимся ходити,

тако правым возможем в небо путем внити.

Зависть

Пес егда инаго питаема видит,

обыче лаяти, тому бо завидит.

Тако муж завистный обыче роптати,

видя творимыя иным благодати.

Благих блаженство в людех злых зависть раждает,

и еже враждовати добрым вину дает.

Виде Каин, яко Бог изволи послати

огнь на жертвы Авеля и любоприяти,

Его паки отринул. Нача ков творити,

завидением движим, донде же убити.

Виде Исав, яко брат Иаков блаженный

от отца Исаака бе благословенный,

Предварив первородна. Нача промышляти,

воеже бы убийством смерти й предати.

Сынове Иаковли брата си видеша

Иосифа прелюба отцу, и презреша

Любовь прирожденную, абие начата

ненавидети люте, даже й про дати.

Египтяне, узревше Исраилска рода

умножение Богом преизрядна плода,

Яко красная чада и многочисленна

бяху, Исраилеви женами рожденна,

Даже пришелци граждан чады прехождаху,

ненавидети за то и томити яху.

И в новой благодати Евреи узреша,

яко апостоли дар от Бога имеша

Вся чюдеса творити, странно глаголати,

люди ко Христу Богу словом обращати,

Распыхахуся сердцы и яростни быша,

в темницы я саждаху и до смерти бити.

И ныне миролюбцы егда созерцают,

яко благочестнии правду соблюдают,

Яко сова на солнце, зрят на ня косвенно,

клевещут, зле толкуют дело божественно.

Но Бог. благих любитель, их не оставляет,

сладки им скорби творит и в небо вселяет.

Веете ли, зависть что в сердцах раждает?

Яко пес, совесть смертне согризает.

Завистник себе враг, завидяй бо тлеет

во нечести, честь же завиденну спеет.

Похвала благих мучит завидяща,

богатства полных суть его мучяща.

Завистнику есть мука, а завидит кому,

множицею бывает користь и честь тому.

Иакову завистник лютый Исав бяше,

даже пред ним из дому к Лавану гонзаше.

Но от него двополчен в своя возвратися

и дивне от Господа у благословися.

Иосиф завистию в Египт продан бяше.

но въмале раб. яко царь, всем повелеваше.

Тем же въправду речеся, Авель не бывает,

аще злоба Каина кому не стужает.

Солнцу светящу, сень при теле ходит;

где добродетель, ту зависть приходит.

Яко ехидну плод чрева снедает,

тако завистна зависть умерщвляет.

Ржа тлит железо, в нем же ся раждает,

а зависть сердце завистных снедает

Супи ко трупом смердящым летают,

вонныя луги мимо претекают.

Мухи на струпы обычны падати,

здраву те леей не тако стужати.

Тако завистник худость усмотряет,

добрая дела весма презирает.

Пса и лва брашном леть есть укротити,

завистна и хлеб не может смирити.

Твердое древо червь мягкий снедает,

завистно сердце зависть растлевает

Зло есть пагубно, зависть проклятая,

роду Адамлю от демон взятая,

Зло демонское в не же ся вселяет,

тыя демоном злым уподобляет.

Демоня зависть в мире смерть родила,

егда чрез Евву Адама прелстила.

Зависти ради Каин огорчися,

Авеля брата убити стремися.

Чрез зависть Саул Давида гоняше,

винный невинна убити искаше.

РодИудейский чрез зависть велику

роспя на крест е Христа, всех Владыку.

Яко жюк гноем чюждым ся питает,

тако завистник бед чюждых желает.

Гонзай зависти, яже вся терзает

сердца, наипаче в них же ся раждает.

Гордости дщерь есть зависть проклятая,

ея же мати зело плодна злая.

Ты аще дщере сея не любиши,

некосно матерь злу да истребиши.

Кром е матере дщерь ти ся не родит,

тако душа ти Господу угодит.

Отсецым зависть, вся нам обща будут,

не оскудеют, но и преизбудут.

Демонска злоба — прескверная зависть,

чужда блаженства есть она ненависть.

К выжшым есть она, яко превосходят,

к нижним, да в радость никогда приходят,

К равным, зане же равенство в них видит,

чесого зависть люте ненавидит.

Авелю Каин блаженства завиде,

Рахиль Лиина плодства ненавиде.

Савл во Давиде щастие гоняше,

весь мир чрез зависть люте пострадаше.

Яко ржа тлит железо, тако согризает

зависть сердце злолюте, в нем же ся вселяет.

Ехидны чада чрево ея прогризают,

егда ся родят, ону тогда умерщвляют.

Тако зависть ид е же иматся родити,

гризет сердце, донде же въконец е истлити.

Завистию демона смерть в мире родися,

его чадо челов ек, в нем же та вселися.

Завистию небесе аггел злый лишися,

тою челов ек рая изгнанник явися.

Невиннаго Авеля зависть умертвила,

елма ся в Каиново сердце вогнездила.

Тою на Иосифа зле вооружении,

иже бяху от отца егова рождении,

Перв ее во ровенник безводный всаждаху,

потом за сребренники странным й продаху.

Зависть и Даниила царю клеветаше

и между лвы лютыя в яме заключаше.

Она и Царя славы кресту пригвоздила,

а Иуду несытна силом удавила.

Зависть, злоба мерекая, веру погубляет,

согласия разор, правду истребляет.

Зависть всякия злобы обыче родити,

а завидящих душы во веки губити.

Та Иерусалима стены разорила,

та царствия славная скипетров лишила.

Домы людей богатых та в нищету вводит,

та мятежи и брани в неискусных родит.

Бегайте убо тоя. вси раби Христови,

да наследницы в небе будете Спасови.

Отнюду же та злоба древле низъверженна

а нелицемерная любовь водворенна.

Гнусная зависть в нем же ся раждает,

то сердце само злолюте снедает,

Яко железо, ржа в нем же родится,

от тоя дщере своея все тлится.

Зависти вина — блаженство чуждое,

исчезнет зависть, елма умрет тое.

Мучение лютое зависть в сердце творит,

чувства томит, мысль множит, душу грехом морит.

Кто ю приимет себе, в казни пребывает,

от нея же покоя никогда же знает.

Не в дом бо, но во сердце мучитель вселися,

егда зависть лютая кому прицелися.

И конец мучения не возможет быти,

донели же во мире с людми тому жити,

Ибо блаженство инех выну имать зрети,

а о нем нужда муки ему есть терпети.

В человеческих страстех зависть — праведнейша,

купно же пребывает и неправеднейша.

Неправедна тогда есть, егда всем завидит,

яже во обилии и в блаженстве видит.

Праведна паки она тем ся проявляет,

яко зла завистника сердце зле снедает.

Завет

Домовит некто живот временный лишаше,

призвав сыны, к ним слово сие глаголаше:

Возлюбленная чада, се вы оставляю,

а где есть сокровище мое, извещаю.

В виннограде закопах, того вы ищите,

а мене, отходяща во ин век, простите.

То изрек, преставися. Погребше и, чада

с мотыками идоша на труд винограда.

Воскопаша и везде, но не обретоша

искомаго, лозы же плод мног принесоша,

Иже елма собрася, много сребра взяша,

и то быти реченно от отца познаша.

Тем же яша на всяк год виноград копати,

не в земли, но от трудов сокровищ искати.

Задняя

Слову рождшуся в плоти, мир Бога видяше,

обаче лица Его божества не зряше.

Виде плоть, приятую во последних века,

зряше Бога, но яко суща человека.

Виде, яко задняя, и дела премнога,

яже яве твориша, быти Его Бога.

Яко Моисий во скважни каменней стояше,

Бога преходящаго задняя видяше,

Тако днесь на камени Церкве стоящим

и сквозе скважню веры на Христа зрящии

Могут, яко задняя, Его созерцати

добродетели, яже обыче деяти.

Во-первых, благость дивна светло ся являет,

аще кто дела щедрот Его разсуждает,

Како, солнцу подобне, грады обхождаше

и благоразумия светом просвещаше.

Паки, милосердие Божие в Нем зрится,

яко то и мытарем и грешным творится

От Него неотвратно, и вся исцеляет,

яже уязвленныя от враг обретает.

Еще любовь Божию леть в Нем созерцати,

ибо, да мы живем, смерть изволит подьяти.

И во Евхаристии Себе нам остави,

душам врачбу духовну во Церкви устави.

К тому мудрость Божию в Оном усмотряем,

егда мудры глаголы Его разсуждаем,

Ими же мудрых мира силно обличаше,

а таинства Божия верным сказоваше.

К сим промысл божественный удобно есть знати,

ибо в пустыни люди потщася питати,

Немногою снедию сонм многочисленный,

дивным умножением довле насыщенный.

При сих и крепость Его леть есть разсудити,

ибо Богу свойственна возможе творити.

Вся целил есть недуги, по водам хождаше,

немым глагол, а слепым зрение даяше,

Мертвыя воскресил есть, изгна духи злыя,

из челюстей адовых взя отцы святыя.

Победив смерть, из гроба тридневно воскресе

и во светлое небо в славе Ся вознесе.

Удобно и истинну Егову познати,

юже на лица не зря изволи являти,

Егда куплю деющих из церкве изгнал есть,

а каявшимся в церкви прощение дал есть.

Младенцы смиренныя к Себе приимаше,

гордыя фарисеи право отвергаше.

Разбойника умнаго во рай водворил есть,

безумнаго же смерти вечной оставил есть.

Петра, слезы точивша, изволил прияти,

Иуду отчаявша — смерти не отьяти.

И вся ина праведно по вся дни творяше,

мерила правды в делех всяческих держаше.

Леть же есть и безмерность умным зрети оком,

яко везде бе присущ во мире широком,

Поне же в отсущии болныя целил есть,

яко присущь, тамо бо божеством Си был есть.

Возможно и богатства Его наблюдати,

ибо и рыбы статир ведят Ему дати.

О богатстве же славы довод нам явися,

егда на Фавор горе в свет преобразися.

Напоследок, всесвятость Его светла бяше,

ибо богодостойне со людми живяше,

Никому же творя зло. но всем дея благо,

еже есть свойство свято Бога всесвятаго.

Тем же, Кто мя обличит о гресе? вещаше,

яко выну безгрешен и свят пребываше.

Сия дела суть знамя божества Христова,

сия видяй задняя зрит Божия Слова.

Даст же Он и лице Си божественно зрети,

иде же имать в десных во веки седети,

Еже есть во царствии без конца будущем,

того да сподобит ны Бог в веце грядущем.

Задняя Божия

Моисий лице Божие видети желаше,

тем: Яви ми лице Си, к Богу глаголаше.

Господь отвеща ему: Несть леть созерцати

человеку лице Ми и живу остати.

Иди в скважню камене, тамо да стоиши,

Преходящаго в славе задняя узриши.

Что же сия задняя Его знаменают?

Неции от учитель размуно вещают,

Яко чрез лице лепо божество гадати,

чрез задняя — во плоти явление знати,

Еже Моисий на горе Фаворстей видяше,

елма Христос славу Си рабом проявляше.

А лица не возможе божества видети

живый на земли, то бо в небе леть есть зрети.

Закон

Благо есть за страх казни злаго не творити,

лучше — за любовь Бога законы хранити.

Душевны недуги закон устрабляет,

яже телесныя врачба исцеляет.

Закон благодати небо обещает,

ветхий же земная токмо поминает.

Врачевства во ковчезе егда пребывают,

недужным ни малую помощь содевают.

Подобне, аще злато замкненно хранится,

стяжателю прибыток ни един творится.

Тако закони в книгах всуе положени,

аще прилежно в царстве не будут хранени.

Закон естества до Моисия бяше,

им же ся род наш в мире управляше.

Чрез Моисия же вторый Богом данны,

на деках каменных иже бе писанны.

Третий чрез Христа людем принесеся

и благодати закон наречеся.

Закон Христов есть иго, но легко и благо,

яко привязует ны до дела добраго.

Не попущает плотски христианом жити,

но убеждает дела святая творити.

Прицепляет бо Христу, еже И любити

и раболепно выну Оному служити.

Привязует ко ближним, любовь им являти,

ни единаго же зла дела содевати.

О ига пресвятаго! О бремене честна,

им же радость стяжется жителства небесна!

Закон ветхий бе страха, яко Бог претил есть

и тяжкими язвами преступства казнил есть.

Благодать — любве закон, яко укрощает

Бог от грех любовию, и рай обещает

Творящым волю Его. Убо нам достоит,

да кождо слово Его с радостию творит,

Воздая любовию любовь показанну,

и возводя очеса на мзду обещанну.

Что слаждше меда? А сей горек мнится,

от нездраваго повнегда вкусится.

Мед в себе сладок, гортань болных лстится,

недугом тлится.

Тако нам закон тяжек ся являет,

а он прелегок выну пребывает.

Леность то наша неправедно судит,

ум с нею блудит.

Что есть в законе Господнем пребыти?

Есть мысли своя к нему обратити,

о нем словити, что учит, творити,

то есть в нем быти.

Закон благодати

Прежде благодати Бог любовь Си являше

в естестве и в законе, но не тако бяше

Силна и многа, яко ныне в благодати

благоволил есть миру ону проявляти.

Тогда бо чрез аггелы, рабы Си, учил есть,

в благодати Собою Сам учитель был есть.

Оным благая многа прещедро творяше,

а нам Себе Самаго во пищу подаше.

Небо, землю искони всех ради создал есть,

нас же деля страсть и смерть волею страдал есть.

Благая земли Оным в державу даяше,

а нам царство небесно дати обещаше.

Всяко милосердие Его умножися

к человеком, отнеле жь Сам Бог воплотися.

Сродство бо прият с нами, еже привлекает,

да сродником Си добро вящше содевает,

За что мы дол жни есмы благодарни быти,

милосердие Его на всяк час славити.

Закона ветхаго и новаго разнствие

Жестокосердый род Исраилск бяше,

противу Бога выю возношаше.

Тем на жестоце камени писал есть

Бог оным закон, и Моисием дал есть.

Благодати же Христом даровася

закон, и в сердцах плотских написася.

Ов бе образы и сенми премрачный,

сей, яко солнце, верным светлозрачный.

Ов в Палестине токмо заключенный,

сей во вся конца мира разширенный.

Ов бе временен, до дне благодати,

сей до конца век имать пребывати.

Ов бремя тяжко людем возлагаше,

сей — бремя легко, иго благо наше.

Ов закон рабов от Павла прозвася,

сей закон сынов им именовася.

Ов не бе силен грешных оправдати,

сей грехи чистит даром благодати.

Ов, яко детем, бяше написанный,

сей, яко мужем, Христом дарованный.

Ов временная людем обещает,

сей же вечная верным извещает.

Ов име небо твердо заключенно,

сей имать оно Христом отверзенно.

Елико убо небо превыжшает

землю, и свет тму в чести предваряет,

Толико новый закон превосходит

ветха, и не страх, но любовь наводит.

Заповедь первая

Кая от заповедей Божиих первая?

Любовь есть и первая, любы и болшая.

Христос Господь Сам тако изволил сказати,

аз же вины словесе того хощу дати.

Первая вина, яко любовь верных людей

есть от Бога поданых конец заповедей

И всех добродетелей, веры и закона,

вся бо та суть, да с нами Бога спряжет она.

Она бо нерешимый соуз тым бывает

во соединение, яже собирает.

Вторая вина, яко в ней ся заключают

вся заповеди, яже нам ся Богом дают,

Ибо любяй ничто же зло хощет творити,

но, яко себе, ближним тщится угодити.

Третяя, яко любовь есть дар пречестнеиший,

источник всех благих и даров обилнеиший,

И ничто ся лучшее может Богу дати

за вся ко человеком Его благодати.

Четвертая, зане же любовь проявляет,

кто сыном Богу быти усердно желает.

Пятая, яко она есть совершения

соуз и всех деяний благих творения,

Без нея же вся дела благая ничто же,

без нея в страну жизни впустится никто же.

Наконец, яко за ню мзда есть превелика,

юже уготовал есть небесе Владыка.

Око тоя не виде и ухо не слыша

и на сердце не взыде. Ту, иже любиша

Бога истинно, имут в небеси прията

от всещедра Бога и вечно быти святи.

Убо да любим Бога и вся человеки,

аще хощем блаженни во вся быти веки.

Заслуга

Яко тело душею животно бывает,

тако делеса наша Христос оживляет

Заслугами Своими, без них же ничто же

суть служения наша пред Тобою, Боже.

Затвор

Древо при пути, суще плодовито,

терзает кождо и бывает бито

от путствующих, плоды погубляет

и исчезает.

А еже в саде оградном бывает,

сицевых обид ни от кого знает,

Плод свой во время дает господину

без тщеты выну.

И кладязь, иже всем есть откровенны,

прахом, уметы бывает скверненны

от приходящих, унепотребится,

яко сквернится,

А иже добре заключен пребудет

и употреблен всеопасно будет,

чист сохранится и пресветл водою,

угоден тою.

Тако пол женский аще заключится

и неудобно мирови явится,

чистоту свою может сохранити,

без скверны быти.

Аще же в граде девица хождает,

чистоты въскоре лишена бывает,

душевны прежде, послежде и тело

не будет цело,

Ибо юноши на ню возглядают,

цвет девства ея отьяти желают,

извета ищут, да бы ю растлити,

хотя купити.

Аще же приступ могут получити

и близ беседу с нею сотворити,

бедство ту весма чистоте бывает,

враг бо прелщает.

Имамы в образ дщерь отца велика,

Богу любезна бывша человека,

от Иакова Лиею рожденну,

Дину реченну.

Та град Салимский сниде соглядати,

да дщери градски возможет познати,

како суть лепы, чим ся украшают,

что содевают.

Смотре на девы, сама усмотренна

юным Сихимом и бысть восхищенна,

на ложе его скоро возложися,

дева растлися.

Оле позора! Яже соглядает

девы, та девство свое погубляет.

Аще же мужем кая присмотрится,

како не тлится?

Матери, дщери ваша соблудайте,

на вся позоры оным возбраняйте,

аще хощете чисто им пребыти,

в сраме не быти.

Не слушайте их, аще и прошают

ити на стогны, бедства си не знают.

Вы усмотряите, что может вредити,

умы их тлити.

Честно есть девам и женам седети

в дому, а не лиц по стогнам смотрети;

тако бо могут чистоту хранити,

ума не тлити.

Аще из дому волно избегают,

очи свободно на юных пущают,

тлеют во сердцех, любы в них родится,

ум тако тлится,

И начинают тогда промышляти,

како бы лице любимо стяжати;

То елма стяжут, срама забывают,

на грех дерзают.

Зачатие Христово

Гавриил Деве елма предстояше,

о зачатии Сына возвещаше,

и она его глаголом сложися,

Бог воплотися.

Найде Дух на ню и Вышняго сила

Отчим изволом ону осенила,

и вниде в чрево Девыя готово

Божие Слово.

Из чисты крове тело сотворил есть,

То же душею в той час оживил есть

и соединил ипостасно Себе,

яко бе требе.

И бысть Слово плоть, плоть же обожися,

а Мати в девстве целом сохранися,

ибо от Духа Святаго зачала,

мужа не знала.

Тамо тление чистоты бывает,

иде же дева с мужем пребывает.

Иде же паки Дух Святый находит,

ту Дева родит,

Ибо естества чин Бог побеждает,

иде же дело странно содевает.

Каково сие во мире явися,

всяк почюдися.

Древле образы сие прописанно,

ныне же делом самем показанно

во спасение грешна человека

на конец века.

Ныне есть Адам из земля целыя

создан, егда плоть от Девы чистыя

изволи Господь Себе сотворити,

человек быти.

Ныне купина огнем не сгорает,

аще Бог огнь есть, иже поядает.

От Слова Дева без тли сохранися,

а в ню вселися.

Яко бо слово с гласом проницает

стены, а вреда в них не содевает,

тако Бог Слово вниде в Матерь Деву,

сохранив целу.

Днесь закон Божий безплотска писала,

на скрижалех си Дева восприяла.

Перст Божий, Дух Свят изволи писати,

миру подати.

Жезл Ааронов ныне прозябает

и плод небесный миру в ползу дает;

той есть Христос Бог, от Девы зачатый,

Господь Всесвятый.

Роса на руно чисто днесь падает

тихо, мужа бо Девица не знает,

а зача в чреве от Духа Святаго

Бога праваго.

Новое днесь Бог в мире сотворил есть,

муж в чреве Девы весь ся воместил есть,

Христос, Иже муж и во чреве бяше,

яко вся знаше.

Днесь камень горы, без рук отсеченный,

во основание Церкви положенный,

без рук, мужа бо Девица не знаше,

егда зачаше.

В десять степеней днесь солнце вратися,

яко под девять Бог чинов смирися

небесных воинств до нас человеков,

Господь всех веков.

За что мы должни Его величати

и Деву Матерь песнми прославляти,

юже и Сам Бог прия в славу к Себе

в пресветлом небе.

Зачатие Христово и Предитечи

Елма солнце путем в высоту вратися,

тогда Христос Господь вочеловечися

В знамение, яко закон благодати

Его пришествием име процветати

Пресветло, обилно всеми добротами,

тайнами, правилы, чинми и жертвами,

Яко же на весну мир ся обновляет,

различными цветы землю украшает.

Противным образом, Предитеча святый,

во время есени во чреве зачатый,

Егда земля цветов лишенна бывает

и злак исчезати всякий начинает

В знамение, яко, иже обетшаше

закон, с Иоанном быти престаяше,

Иже Иоанном вообразовася

последним пророком, и по нем скончася.

Заяц

Муж некто преподобный во путь шествоваше,

случаем сонм псов скорых заяца гоняше.

Заяц бедный ко ногам его прибежал есть,

он, умилився, от псов онаго отьял есть

И рече к спутствующым: Братия святая,

тако демоны душа гонится всякая.

О блаженна та, юже Господь защищает

и тако от демонов лютых избавляет!

Яко же сей есть заяц нами избавленны,

да будем и мы от тех Господем спасенны.

Звание

Не престает мирови солнце свет даяти,

не престает Бог верных к Себе призывати.

Различии же образы суть звания Его,

не пренебрегает Он здания Своего.

Зовет ны Писанием к Себе божественным,

священными книгами, советом спасенным.

Гласит проповедники, правды сказателми

и отцы духовными, грехов казнителми.

Точне чрез родители зовет преблагая

чрез образы жития благаго святыя.

Много благоденствием Господь призывает,

злоключением паки, аки понуждает.

Снедением совести премнози зовутся,

въдуховенми внутрними такожде влекутся.

Всяким Господь образом к Себе привлекает,

яко всем человеком спастися желает.

Точию нам есть должно не пренебрегати

звания Его, паче абие слушати.

Звезда

Звезды во человецех воли не вреждают,

токмо страстми плоти нечто преклоняют.

Тем же на звезды вины несть леть возлагати,

егда кто зло некое обыче деяти.

Зверь

Прежде греха Адама звери почитаху,

повелетелству его себе покаряху.

Егда же согрешил есть, не хотеша знати,

но и устремишася сопротивно стати.

За непокорство к Богу службы их лишися,

от безсловесных во казнь греха обличися.

Здравие

Мравий пшеницу в лете собирает,

ею же в зиме алчбу укрощает.

Мы во здравии Богу да молимся,

да теми молбы в недузех твердимся,

Ибо в них часто ум ся помрачает

и что деяти, человек не знает.

Зеленость

Во праздник Сошествия Духа Пресвятаго,

на апостолы Христом Богом посланнаго,

Восприяхом обычай ветвми и травою

украшати и церковь и дом зеленою.

Кая же того вина, полезно есть знати;

что хощем чрез зеленость тую изьявляти?

В первых, яко зеленость радость знаменает,

в день сей радости Церковь ту употребляет.

Паки, яко же Христа, на осле седяща,

во Иерусалим град смиренно входяща,

С ваиами и ветвми людие сретаху,

честь Ему таким действом велию творяху.

Тако Церковь Святаго Духа почитает,

со ветвми зелеными грядуща сретает.

Еще, яко же голубь принесе до Ноя

ветвь масличну во знамя будуща покоя

И милости Божия, яко осушаше

воды потопа, яже во гневе послаше.

Тако нам Дух Пресвятый ветви благодати

и даров в корабль Церкве изволил есть дати

В знамение милости и покоя с нами,

яко не потопит нас ярости водами.

Духовных убо ветвей то есть знамение,

чювственных в сей святый день ветвей ношение.

Еще, яко, сошедшу Духу Пресвятому,

яве начало дано новому закону.

Отставление паки ветхаго явися,

или ветхий на новый закон пременися.

Убо зеленостию новость знаменаем,

зиму прешедшу, весну пришедшу являем.

Ветхий закон зима бе, яко грозен бяше,

новый — весна, яко в нем благодать Бог дате.

Тем весны чювственныя носим знамение,

зеленость во духовны весны явление.

Еще, знамя живота зеленость являет,

яко, низшед, Дух Святый Церковь оживляет.

Еще, яко Святый Дух есть вода живая,

в оживление Церкве свыше текущая,

При ней же насажденный имать возрастати,

яко древо велие, и плоды даяти.

Листом не падающым сие знаменает

зеленость ветвей, яже носима бывает.

Еще, чрез ветви древес и то знаменаем,

яко мы ветви древа Церкве пребываем,

Да убо и нас Дух Свят туком благодати

изволит со Церквию всею исполняти,

Да уплодотворимся, того ради носим

ветви в Церковь и сердцы о то Духа просим.

И трава зеленая вносима бывает,

вся человеки траву быти знаменает,

Юже убо грех смертный зело изсушает,

а благодать Святаго Духа оживляет.

Сами убо травою себе увещаем,

да жизни ради сердца к Духу обращаем.

А зане же зеленость вечность знаменает,

та благодати Церковь вечну проявляет.

Наконец, чрез зеленость и то знаменаем,

не увядати в благих от Духа желаем.

Земля

Земли три части мокнут под водами,

четверта токмо суха под ногами

всех есть ходящих и разум имущих

и зверей сущих.

Земля есмы

От земля человеку Творец плоть создал есть,

в оживление тоя душу жизни дал есть.

Вскую же плоть из земля, поне же можаше

из ничесого, яко душы нам создаше?

Во-первых, да, вещь худу зряще, не гордимся,

землю себе знающе, пред Богом смиримся.

Паки, да благость Бога тщимся прославляти,

яко в землю худу дух чист изволил дати

И образ божественный Свой в нас положити,

да бы и нравы точным нам Оному быти.

Но увы, зело скоро в Адаме забыхом,

яко от худы персти сотворени быхом,

Ибо в той же день, во нь же Адам создан бяше,

Еввою прелщен, яко Бог быти желаше.

И мы прародителя часто подражаем,

ибо без числа против Богу согрешаем.

Адам за грех из рая Богом бе изгнанны,

той же лежит и на нас суд, древле сказанны,

Ибо во изгнании ныне пребываем,

на породу райскую ели въепоминаем.

Подобает же всяко рая нам искати,

да бы отчество свое паки пристяжати.

Но где земный рай? Бог весть. Нам вместо онаго

нужда лежит искати рая небеснаго.

К тому, братие, тщимся всякими трудами,

а Господь Бог готов есть в помощь быти с нами.

Земля будем

Человек перстный Адам яко согрешил есть,

да в персть паки вратится, Господь й казнил есть,

Да, иже начала си перстна не помняше,

егда кичиво, яко Бог, быти желаше,

Той на персть последнюю выну поминает,

сердце си от гордости тако обуздает.

Еще и того деля в землю ся вращаем,

да злобу греха люту оттуду познаем,

Яко, иже имехом без тля пребывати,

ныне за грех должнствуем в землю ся вращати.

Наконец, да, помняще в землю вращение,

земных пристрастей мертвим во нас стремление

И ко покаянию сердца обращаем,

да в небо пресел имея из тли, яко чаем.

Зерцало

Зерцало лицем к солнцу егда обратится,

светлость и образ солнца в нем изобразится.

Тако, егда человек сердцем к Богу будет,

благодать в нем Божия и слава пребудет.

Злато

Краль Галлийский Бреун деву возлюбил есть

и, яко с женою, с нею нечто жил есть.

Она же неправо онаго любяше,

но точию злато лестию взимаше.

Позна лицемерство краль хитрыя жены,

уразуме, яко бе ею прелщенны.

Умысли ю златом довле насытити

и лесть не без казни должныя пустити.

Повеле воинству злато ей метати,

ей же, седшей, от них оно приимати.

Метающе убо, купу сотвориша

толь велику, даже жену завалиша,

Яже, не стерпевши тяготы от нея,

и злата лишенна, и жизни своея.

Златый гроб стяжала любившая злато,

но горе бяше ей тогда зрети на то.

Содержяй злато может царство наследити,

златом же муж держимый не может в не внити,

Ибо злато тяжкое низу влечет его,

аки оковы взложши на раба своего.

Не зло есть злато, благо создание,

но зло есть злое того стяжание,

И зла есть скупость в того держании,

тако ж безмерность во расточании.

Аще кто болезнуяй вознеможет спати,

несть требе тому злата при себе держати,

Сиречь, перстеней, манист и яже подобна,

ибо всяка вещь злата сну есть неугодна.

Бдение бо, а не сон злато содевает,

яко же Авиценна врачь хитрый вещает.

Злато и сребро

Драго есть сребро, паче того драго злато,

мало обретаемо, убо ценно за то,

А ничто же есть ино, токмо часть земленна,

ова белым, си желтым цветом украшенна.

Людие честь велику оным наложиша

и сердца несмысленно к оным прилепиша.

А кая в них есть полза? Ни ясти, ни пити

мощно их, ни же древо леть едно срубити.

Сама красота цену оным сотворила,

а безчисленны люди во ад погрузила.

Многополезнее есть железо твердое,

обаче у человек несть тако честное,

Яко много есть везде, и неукрашенно,

цены в людех достойны за то есть лишенно.

Кроме злата и сребра леть комуждо быти,

без железа ни един дом может пребыти.

Всяко дело железом делано бывает,

само злато и сребро им ся устрояет

На всякия потребы, обаче неценно,

красотою их наше естество прелщенно.

Вси лакомо желают оная имети,

мужие, жены, старцы и малый дети.

О проклятаго глада и неутоленна,

им же томится люте весма вся вселенна!

Младенци съсущии по земли ползают,

ногами и руки в ню ся опирают.

Совершеннии же ей ся не касают

руки, токмо ноги ону попирают.

Земля — злато, сребро, та должен есть прати

хотяй совершенна себе показати,

А иже рукама има ся касает,

взимая, младенец стар ся появляет.

Горе паки мужем, зле младенствующым,

в совершенном веце детский ум имущым.

Златом напоенный

Еразии воевода Римских полков бяше,

иже град Вавилонский крепко обстояше.

Вавилоняне к нему послы си послаху,

да не разорит града, прилежно моляху,

Обещающе ему богатства отдати,

токмо да хощет мирно она, вшед в град, взяти.

Воевода лакомый мало воев взяше,

хотя сам богат быти, во град той идяше.

Граждане егда силу малу созерцаху,

вой с воеводою, яко враги, яху

И, растопивше злато, во уста влияша

воеводе лакому, и та глаголаша:

Пий злато, окаянне, его же хотяше

во торжество имети, пленив гнездо наше.

И тако конец прият златом напоенны,

иже преострым мечем не бе побежденны.

Знамения

Егда Иерусалим казнь взяти имяше,

знамения Господь Бог чюдная впред даше.

Во девятый час нощи церковь облистася,

чрез полчаса день быти тамо непщевася.

Крава в жертву ведена, агнца есть родила

посреде церкве, им же люди удивила.

Дверь церкве медяная, бывши затворенна,

в час шестый нощи никим бяше отверзенна.

На воздусе множество воев зримо бяше,

град колесниц железных страхом ужасаше.

А в день Пятдесятницы глас в храме слышася:

Прейдем отсюду, а кто бяше, не познася.

По сих знамениих град Божий разорися,

за мучение Христа род жидовск казнися.

Оттоле лишен церкве, жертвы и святыни,

разсеян между роды живет не своими.

Знамения прежде Суда

Егда кончина веков мира приближится,

тогда солнце на небе тмою помрачится,

Луна не даст света си, но яко кровь будет,

звезды низъпадут свыше, ни небо пребудет

Подвижения кроме, ибо подвижутся

силы его, и горы земли потрясутся.

Страх будет из небесе, страх велий отвсюду,

трепет во всяком сердце, радость ниоткуду

Живущым возсияет, всяк восплачет зело,

яко ничто явится под небом весело.

Помрачится же солнце, да прознаменает,

яко тма вечна грешных в аде ожидает.

Луна кровава будет, да то изъявится,

яко. ярости исполнь. Судия ближится.

Звезд падение миру то хощет явити,

яко и славных бывших падеж имать быти

Во пропасть геенскую на вечныя муки,

в нечеловеколюбных диаволов руки.

Возмутится и море, земля разверзется,

смятутся вся стихии; кто тогда спасется?

Будет то в знамение мятежа велика,

иже нагрешна от враг лютых человека.

Изъсохнет лице всяко от страха велика,

снесть совесть сердце люте всякаго грешника.

И праведници будут во трепете мнозе,

но упование си утвердят о Бозе,

Иже елма приидет Суд Свой сотворити,

имать добрыя от злых людей отлучити,

Злым бывшым достойную казнь Судом воздати,

добрыя в жизнь вечную со Собою взяти,

Ея же не лиши нас тогда, Христе Боже,

Ты умилостиви И, Мариа Госпоже.

Знамя

Врачь, недужныя целя, многих возбраняет

пищь и питий, не в ползу яже быти знает,

Донеле же надежду имать преблагую

о исцелении тех, а погубив тую,

Вся оным попущает и ясти и пити,

видя, яко немощно в животе им быти.

Тако Господь с верными людми поступает,

в надежде сущым многих вещей возбраняет;

Скорби и противности попущает на ня,

то же есть спасения будущаго знамя,

А им же попущает всепомыслно жити

и о гресех без казни временныя быти.

Отчаянных есть знамя, геенне блюдомых,

а не во жизнь вечную и в радость брегомых.

И вол. на заклание хранимый, тучится,

все ему дают ясти, что-либо случится,

На труды же блюдомый тяжко иго носит,

ни абие пасется, егда риком просит;

Множицею глад терпит, часто утрудится,

но за то от обуха чрез долго хранится.

Человек же, в сем мире многоутружденный,

от вечны смерти будет Господем спасенный.

Елма Христос во мире плотию родися,

елея ток во Риме из земли явися.

Елей же есть милости знаменование,

яви милости свыше нам излияние.

Виноград Енгадийский цветы изпустил есть,

процветение веры в Христа изъявил есть.

Егда Артаксеркс жезл си кому подаяше

в конец лобзати, знамя благодати бяше.

Отец небесный — корень, Сын жезл есть из Него,

той Он до создания протяже Своего,

Да целует, егда в мир во плоти явися,

тогда милосердия знамя сотворися,

Яко гнев Свой отложи, иже бе от века

преступления ради перва человека.

Знание

Знаяй Бога вся быти, себе же ничто же,

превеликую мудрость стяжати возможе.

Не мни тебе вся знати, то бо Бога дело,

ни ничто же ведуща возглаголи смело,

Сие бо скотов свойство. Средство может быти,

с ведением невежство требе растворити.

Знание Бога

Никто же знает Отца, токмо Сын любимый,

и Сына токмо Отец Сам знает единый

Знанием естественным. Обаче Дух Святый

от тогожде знания никако изъятый,

Вся бо три во Божестве лица Себе знают,

в единой бо мудрости равне пребывают.

Не помянен же Дух Свят чрез уста Христова,

егда о знании сем провещаше слова,

Яко не у прославлен Дух Свят миру бяше,

но в знание принта послежде имяше.

Мы паки знаем Отца со Сыном и Духом,

От Бога Слова слово восприемше слухом

Или откровением, а не по естеству.

Буди слава лиц триех едину Божеству.

Зная, Христос невесть

Вся ведый Господь премногих не знает,

егда бо притчу усты Си вещает,

Весть, яко нищий Лазарь речей бяше,

богата паки имене не знаше.

И иным многим имать благодати:

Невем вас, егда приидет Суд дати.

Како вся Ведый невесть и не знает?

Отречение тако изъявляет,

Еже есть, яко отринет от неба

грешници, ни даст псом животна хлеба.

Невесть во славу онех воводити,

знает же во огнь вечный осудити.

Зрение

Добро есть свою совесть, не чуждую знати,

свою душу от грехов, не инех чищати.

Бервно из очесе си да ся изъимает,

сучец в чуждем очеси зрим да не бывает.

Уне бо токмо себе единаго зрети,

нежели всех живущих грехи разумети.

Аще же око твое не может терпети,

но оплазиво хощет иная смотрети,

Да зрит убо на небо и да созерцает,

кую мзду зрящым себе Бог уготовляет.

Да зрит и во геенну вся муки познати,

в ня же презревших себе имать Бог сказати.

Зри онем и вспять тебе, да грехи узриши

и за ня сердечныя слезы да точиши.

Смотри и пред тобою, да бы ти не впасти

в неисходную яму вечныя пропасти.

Вижд одесную тебе образы святыя,

от мужей преподобных в ползу поданныя.

Вижд на шуйце злых казни и злобы хранися,

да бы в их не приити жребий, соблюдися.

Тако око умное тщися соблюдати,

аще хощеши за не муки не страдати.

Зрение Божие

Зрит Бог на люди, деющыя злая,

и иже творят делеса благая,

Но на оныя очима ярости,

на сия паки очесы милости.

Ты, чтый, избери сими видим быти,

буди благ, да бы милость ти влучити.

Зубы

Зубы вси купно пищу сожувают,

алчное тело угодно питают.

По едину же аще разделятся,

пакостят паче, неже впотребятся.

Тако иноци вси премного могут,

вкупе сущии, и многим помогут.

Разлучени же, ничто содевают,

себе губяще, инех соблазняют.

Зубы грешником Господь сокрушает,

егда силныя онех погубляет,

Или зло слово зле глаголющыя,

невинне славу растерзающыя.

Врагом Давида зубы сокрушенны,

Ахитофель бысть егда повешенны,

И ини врази елма погибоша,

иже зловослово на него рекоша.

Мысленно тело, Церковь Христа Бога,

имать различных удобь действа многа.

Глава Христос Бог Сам Ся нарицает,

яко все тело живит, управляет.

Архиереи суть очеса мысленни,

еже вся зрети, в Церкви устроении.

Уши суть, иже слова послушают

и велению покорни бывают.

Презвитери же уста мощно звати,

славу бо Богу тщатся возсылати

И беседуют о людех ко Богу,

ползу творяще тако миру многу.

Гортани певцы леть уподобляти,

яко их дело — песни воспевати.

Зубом же кого леть уподобити?

Разсуждение нужда положити.

Проповедником аз уподобляю,

ибо в действе их подобе знаю.

Зубом свойственно есть вся пищи жвати,

мягки сотворше, в стомах посылати.

Проповедницы егда поучают,

пищу духовну тогда преживают

И дают людем, да не гладни будут,

но насыщени душами пребудут.

Зубы суть тверды, твердая скрушают,

проповедницы претверди бывают,

Егда трудятся в слове мужественно,

трудных толк дают невеждам явственно.

Зубы во устех поелику белы,

толико здравы бывают и целы.

Проповедницы, чисто живущии,

суть здравы, здраву пищу дающии.

Аще же черны зубы ся являют,

недуг имеют и смрад испущают.

Проповедницы в то время чернеют,

егда закону противная деют.

Тогда нездрави они пребывают,

смрад делес скверных от себе пущают,

Досадный людем, неприятный зело,

осмражающии всея Церкве тело.

Зубы болныя нрав есть истерзати,

да бы ся здравым от их не вреждати.

Проповедницы, иже повреждении,

точне да будут скоро исторгнени,

Да подобных си ядом не вреждают,

иже внутрь себе смертно сокрывают.

Червие в зубах повнегда бывает,

телу живому люте досаждает.

Зла совесть червь есть, та аще вселится

в проповедницех, досада творится

Живому телу, даже истерзати

зуб вредный нужда, или червь изгнати.

Сие вы чтуще, им же есть врученно

проповедати слово божественно,

Тщитеся здравы, белы зубы быти,

яко достоит во Церкви служити,

Да честь сугубу можете имети

зде, и в небеси с честными седети

Во вечней славе у всещедра Бога,

у Него же вам мзда готова многа.

И

Иго

Иже иго Христово ныне низвергает,

во иго демонское Сам ся запрягает.

Человеци дети си вяжут пеленами,

коея вины ради, добре веете сами.

Егда же возрастают, ходят свободою,

того искуство имать всяк земен собою.

Скоти паки в малости свободни бывают,

возраетшим человеци иго налагают.

С добрыми человеки подобне бывает,

ибо иго Христово зде я связывает.

В будущем паки веце все свободни будут,

бремене всяка кроме во веки пребудут.

Скотски же живущии зде не хотят знати

ига Христова и в нем Богу работати.

За то демонско иго будет им во веки,

где связанныя мучат врази человеки.

Иго Христово

Враг душевный диавол выну нам стужает,

многовидныя стрелы на ны испущает,

Желая душы наша онеми язвити,

иго свое лютое на ны возложити,

Еже иго бремене пророк нарицает

Исаиа, тяжко бо быти усмотряет.

Тяжко повелением, ибо то творити

велит, еже не может Богу любо быти,

Но яже богомерзка и люте безчестна,

во ад влекут, лишают жилища небесна.

Тяжко есть мздою, ибо что хощет воздати

служащим себе, страшно и в ум восприяти.

Неугасимым огнем имать я палити,

гладом, хладом, червием во веки томити.

Сицеву мучителю себе подчиняти

есть волею си смерти безумно искати,

Смерти же безсмертныя, ея же есть дело

безконечно томити и душу, и тело,

Никогда же мертвити. Оле казнь велика,

от ея же да хранит нас Христос Владыка!

Сохранит же конечно, аще мы Христови,

не демону служити пребудем готови.

Аще не подчинимся злому томителю,

но поработим себе Христу Спасителю,

Его же иго благо есть и легко бремя,

покой приносящее в безконечно время.

Иго Свое Христос Бог людем ублажает,

и бремя легко быти светло возвещает.

Истинна рече правду, но како, есть требе

всякому человеку разсуждати в себе.

Како бо иго благо, зане утруждает?

И бремя како легко, еже отягчает?

Легко се, ово благо многими винами,

яже аз предлагаю отчасти пред вами.

В первых, иго Христово есть, по воли жити

Божией и Самому Оному служити,

А во Божией воли благо пребывати

и служити Оному, есть то царствовати.

Царствовати же и зде, и во веки в небе,

его же кто царствия не желает себе?

Зде над страстми, онамо царство в славе будет,

иде же радость верным без конца пребудет.

Сие легко и благо, убо возлюбите

иго Христово, и то любезно носите.

Аще же тягота в нем чювствуется нека,

благодать легчит, иго крепит человека,

Еже трудности кроме то бремя носити

и вся со веселием заветы творити.

Та же изветы греха от нас удаляет,

или враги лютыя наши укрощает.

Или искушения смиряет велика,

или утешением твердит человека.

Всяко не оставляет под игом падати,

тщится руку помощи временно подати.

Легко то иго имать и за сие быти,

яко с ним Христос Господь изволил варити,

Нося крест Свой пред ними, нам образ подал есть,

яко знаменоносец, вслед Себе призвал есть.

Имамы же во образ и люди святыя,

иго Христово сладце в мире носившыя,

Их же доброту и нам мощно подражати,

в ношении онаго нимало стужати.

Облегчает и любовь, ибо, что любится,

не тягостно, но сладко в дело изводится.

Ни досадно любезну вещь людем носити,

яко бо птицу, та вещь весть я укрилити.

Несть бремя птице криле, паче облегчают,

тако любителие Христа не стужают

Под Его святым игом, но выспрь возносятся,

яко птицы небесе, в небеси гнездятся.

И употребление иго облегчает,

что бо есть в обычаи, не отягощает.

Напоследок, иже зрят, еже есть готово

возмездие в небеси за иго Христово,

Несть тым оно бременно, но несут в радости,

ожидающе за то вечныя сладости.

Яко же земледелец труды полагает,

поя песни, на плод бо будущий взирает.

Воин бедства подьемлет, чая користь взяти,

ни прилежит покоя от трудов прияти.

Купец кораблем море страшно преплавает,

за корысть будущую всех бед забывает.

Аще же временная корысть сия деет,

чесого мзда вечная в верных не успеет?

Иаков лет седмицу за Рахиль служаше,

а за любовь немноги дни быти вменяше.

Пасе овцы, терпя хлад, мало почивая,

страда зной во дни лютый, на Рахиль взирая.

Колми паче за радость будущую в небе

радостно трудитися Христианом требе

И вся скорби мирския во ничто въменяти

за мзду, юже изволи Бог уготовати.

За сия убо вины иго благо зело,

бремя легко Христово, вземли всяк я смело.

Веру ими, не токмо тебе не погубят,

но ни же тя излише плотию утрудят.

Услышиши глас оный, от трудов зовущий

и от бремене здешня во покой будущий:

Приидите, трудницы обремененнии,

будите в небе Мною упокоеннии.

Иже глас Твой пресладкий даждь нам услышати,

Иисусе сладчайший, внегда Ти предстати

Имамы на Судищи, да мы хвалу Тебе

со аггелы святыми вечно поем в небе.

Иго благо, время легко

Иго Христово — закон, бремя — гонение,

ов хранителен, а зде да есть терпение.

Онаго хранением Бог Ся прославляет,

за терпение скорбей мзда вечна бывает.

Иго Иудейское

Иго ветха закона зело тяжко бяше,

никто его носити удобно можаше.

Тяжко, яко премноги заповеди бяху,

шестьсот и тринадесять нецыи считаху.

Тяжко, яко заветы неудобь носими

в пищи, в жертвах, во чинех, в судех бяху ими.

Тяжко, яко вся сени и образы бяху

во благодати сущих, и не оправдаху.

Тяжко, яко и греси, от неведения

бывший, требоваху жертв очищения.

Тяжко, яко и казни велми тяжки быша,

егда завет закона некий преступиша.

Не тяжко ли каменми убиенну быти

мало дерзну вшу дело в субботу робити?

Не тяжкую ли болезнь имеша и дети,

елма обрезание нужда бе терпети?

Сие иго пришедшым от Еллин задати

хотеша Иудеи в новой благодати,

Но Петр святый возбрани, яко обретаем,

егда книгу Деяний апостол читаем.

Иго Еллинское

Иго Еллин неверных бе тяжко без меры,

не имеша бо правы в Бога жива веры,

Но скверныя идолы за боги имяху

и богодостойную честь им воздаяху.

Инии солнце, луну, звезды обожиша,

инии огню, древом и гадом служиша.

Въкратце, различную тварь за боги въменяху

и многими жертвами студне почитаху.

Инии в честь их чада си огнем палиша,

инии девы тлиша и всяко блудиша.

Оле мерзкия жертвы! Неции иная

в честь проклятых демонов со деваху злая.

Змием лютым чада си во снедь отдаяху

и краснейшыя лицы, увы, закалаху.

Сие иго коль тяжко, несть требе вещати,

по сему мучителству леть кому ж до знати,

А тем бе тяжше, яко ни един спасеся

душею, иже в сие иго запряжеся.

Тем же Павел апостол верных увещает,

да никто ярму поган припряжен бывает.

Иго мира

Иго мира коль тяжко, то миряне знают,

иже днем и нощию миру работают.

Трудятся безпрестанно, не могут почити,

водою и землею ищут, что прижити.

Бедства всякая страждут, совесть попирают,

смерти. Суда и ада весма завывают.

Что Фараон в Египте Евреем деяше,

плинфоделанием я выну удручаше,

Нимало им почити от труд попущая,

к тому раны велики во мзду прилагая,

То мир любимцем своим выну содевает,

работою присною смертно удручает,

А скорбми и печалми и бедами мучит,

сушит кости тугою, а мнят, яко тучит.

Яд подает, а сладость медвенну являет,

неусмотримо люди Божия прелщает.

Враг — мир Богу и людем, обаче вси любят,

а любовию тою души своя губят.

Не любим убо мира и суетий его.

ибо мзда трудов рабом смерть вечна от него.

Отвержим иго его, а изберим себе

иго благое Бога, живущаго в небе.

Иго греха

Всяк человек, творяй грех, раб греха бывает,

иго его тяжкое на ся возлагает.

Не к тому еже хощет, по воли си деет,

но веления греха презрети не смеет.

Како грех строит, идет, аки ослепленный,

яко же вол на ниве, под иго впряженный.

Строит паки грех душу от злобы ко злобе,

даже бы погрузити во адстей утробе.

Разве кого защитит Господь Си рукою,

яко царя Давида защитил есть тою,

Егда прелюбодейства грех й пленил бяше

и от злобы во злобу пагубно гоняше,

Их же бяше чин сицев: тайно умышляше

коварства, ими же грех покрыта хотяше.

Призва Урию из полк, веле к жене ити,

да бы верил от себе плод зачатый быти,

Иже супруга его из царя прияла,

прелюбы с ним сотворши, во чреве зачала.

Урию не хотевшу того сотворити,

приложи вином его доволно поити,

Да бы поне пияный к жене воспалился,

и шед к ней нощевати, плотию смесился.

Но ни тако успев что, в полки посылает,

суд смертный в писании оному вручает,

Веле бо й на месте бедственном ставити,

да бы от враг удобне могл убиен быти.

Несе убо невинный воин суд о себе.

его же миловати царю бяше требе

За его верность в службе, а се осудися

неправо и на месте люте поставися,

Иде же убиен бысть, и негли инии

мнози падоша, с онем тамо стоявший.

Прочий утекоша, а царь ублажает

дело вожда, о падших неслезен бывает.

Сице един грех царя в многи убедил есть

царя, иже Господу Богу любим был есть,

Что он, ощутив в себе помощию Бога,

от сердца испущаше стенания многа.

Слез источники теплых из очес лияше,

жалостною душею сице глаголаше:

Беззакония моя главы выше быша,

яко бремя тяжкое, мя отяготиша.

Бог же, не презираяй сердца сокрушенна,

призрел есть на раба Си, душею смиренна,

Простил согрешения, милость проявил есть,

во Бога защитника потом ему был есть.

То видяще, братие, греха вси гонзайте,

ига его на выя ваша не взимайте,

Но истинне и Богу ся поработите,

веления Господня иго приимите.

То намале утрудит, вечно упокоит,

истинна и Бог в небо светлое устроит.

Аще же кто греховно иго восприял есть

и ему во работу себе люту дал есть,

Да расторгнет то иго, к Богу да вратится

чрез смирение, а Он скоро примирится.

Имать руце простерте грешника объяти,

кающася в отчество небесно прияти.

Избранных мало

Много Бог изволил земли сотворите,

из нея же мощно скуделы строите.

Мало паки тоя, что златом бывает,

егда ю художник умно престрояет.

Тако мнози люди в мире суть создании,

но мало тех, иже в небо суть избрании.

Капли число избранных Ездра подобляет,

волнам — погибающых, и правду вещает.

По собрании гроздов мало их остает,

тако избранных число немного бывает,

Или класом по жниве точно остающым;

причти ны, Христе Боже, путем Ти грядущым.

Лот в Содоме сам четверт без порока бяше,

весь же град Господь за грех огневи предаше.

Тако есть во вселенней немного избранных,

а много во погибель адску сготованных.

Многи тмы из Египта людей изъидоша,

но в землю обещанну токмо два внидоша

От изшедших оттуду до Сионска града,

вси во пути помроша, внидоша их чада.

Тако из мира в небо немнози вхождают,

вси на пути сем ползком грехом умирают.

Яко болши плевел есть, менше же пшеницы,

тако многши грешници, неже праведници.

Скуделных сосуд много, мало в дому златых,

тако грешных есть много в мире, мало святых.

Извинение

Адам и Евва листвие сошиша,

тем нагость плоти своея покрыта.

О коль нетленный покров оным бяше,

ибо недолго пребыти можаше!

Листвие и днесь тии сошивают,

иже вину си лжею покрывают,

Невинны себе быти глаголюще,

или на ины вину си кладуще.

Но тленен кров сей, вомале изтлится,

а нагость вины пред всеми явится.

Излишество

Часть святотатства той муж содевает,

иже излишних нищым не раздает,

Вся бо лишняя ко нищых потребе

благоволил есть Бог вручити тебе,

Да, расточая, мзду ти заслужиши,

нищыя к молбам теплым возбудиши.

Тако ты нищим, нищии же тобою

спасется, Бог же венчатель обою.

Измена

Во Тарсе Киликийстем муж некий живяше

именем Вавила, сей волхв и блудник бяше.

Име две жене блудне и вся зла творил есть,

да сокращенне реку, демону служил есть.

Во едино же время въшед в храм, помолися,

Еваггелию чтому умом приложися.

Услышав же ов святый глас увещания:

Сотворите достойный плод покаяния,

И еже покайтеся, царство приближися!

Со сокрушенным сердцем в дом свой возвратися

И, призвав блуднице си, нача глаголати:

Не к тому имам с вами аз безчиновати.

Доволно жих демону, к Богу обращуся,

о спасении души уже попеку ся.

Слышах, к покаянию Господь призывает,

никого кающася небесе лишает.

Се имения моя вама оставляю,

сам в нищете и слезах жити избираю,

Да возмогу вся грехи онеми омыти

и милость у всещедра Бога получити.

Блуднице, услышавши глас сокрушения,

отвещасте оному глас умиления:

О честный господине, с тобою жихоме

и лукаво пред богом купно творихоме.

Днесь, тебе ся обращшу, сообращаеме

и всех согрешениих уже ся каеме.

Вся убо на нищыя богатства раздаша,

сами пути спасенна прилежно ся яша.

Прочее века чисто и свято пожиша,

благонадеждно, яко небо получиша.

О колико действенно есть Господне слово!

Тем всяко ухо буди слушати готово,

Яко бо искра, на прах егда нападает,

абие й во пламень велий обращает,

Тако, иде же слово Божие родится,

грешник во божественна мужа преложится.

Савл елеем егда помастися

в царя, в пророка скоро претворися.

Апостоли же Духом помащени,

мудри из простых дивне сотворени.

Днесь аще злобник благость возлюбляет,

знамя, яко Дух Свят й помащает.

Град, иже царю дерзнет изменити,

не хотя в его владении быти,

Всеми образы взискуем бывает

и, обдержан быв, казни подлегает.

Град всяк человек Богу есть мысленный,

в нас жити Его извол божественный,

Но мы, увы нам, Богу изменяем,

в державу себе демону предаем

И его волю тщимся исполняти,

Бога же на гнев грехи поощряти.

За что кая мзда грешных ожидает?

Имеяй разум светло сие знает.

Мечь смертоносный люте изострися

и оружие гнева очистися,

Еже от живых земля потребите

и огнем вечным во аде казните,

Его же аще гонзнути желаем,

времени сущу, днесь ся да покаем.

Изженим врага, к Богу да вратимся,

о злобах наших пред Ним да винимся,

А Он, всещедр Сый, изволит простите

вину принесшых, на смерть не судите.

Паче, аще в нас заслуга явится,

Судия грозный в Отца претворится,

И наследство нам в небеси дарует,

еже от веков чадом Си готует.

Имя Божие

Садъдай есть имя Богу, еже знаменает

Доволен, яко Он нас един удовляет.

Вся ина не могут нам сердца исполняти,

нудимся по естеству доволна искати.

Того елма обрящем в небе, удовлимся,

зрением славы лица Его насытимся.

Имя царицы Савския

Царица, яже при де ко граду Сиону

и дары многи даде царю Соломону,

От юга из острова Савскаго та бяше,

имя себе собственно Никавла имяше.

Иосиф летописец о том извещает,

иже многи древности миру изъявляет.

Имение

Много тщимся имений на земли стяжати,

аки не имущии конца, восприяти.

Со нищых обидою злато собираем,

о смерти помянута люте забываем.

Не разсуждаем того, ни же мыслим в себе,

яко вся имения оставити требе.

А Господь весть, кому та в держание будут,

стяжателя, державцы всячески забудут.

Греси же незабвенни выну имут быти,

аще ся не покаем, донеле же жити.

Тии бо написани, аки на камени,

и за ня вечно быти нужда во пламени.

Не помогут в год смерти имения многа,

не снидут заступити пред Всевидца Бога.

Паче, неправедная будут глаголати,

да за лакомство Господь Суд изволит дати.

Уне убо богатства ныне раздаяти

и за ня прощение от Бога стяжати.

Лучше в добродетели ныне богатети,

тыя доброполезно при смерти имети.

Пойдут бо со умершим к Судии Страшному

и действенное явят ходатийство к Тому.

Заступят от вечныя злолютыя муки,

не предадут во врага лукаваго руки.

Мощно есть имение без греха держати,

паче же, спасение тем себе стяжати.

В первых, да не несытно то будет стяжано,

потом не сердцем, руки да будет держано.

Держимое же щедро нуждным да дается,

сице имеяй сребром всячески спасется.

Имения держание благо

Муж праведный сердце си тако укрощает,

да своими доволен выну пребывает,

Аще негли и мала, от чюждых же око

имений отвращает к Живущу высоко,

И тех, яже содержит, весть употребляти

на нужды си, и нищым щедро раздаяти.

Сердца своего оным не порабощает,

имений не имуща ся быти вменяет.

Ни страхом обдержится нищеты велики,

и на ту готов ради Христа всех Владыки.

Тому же работает, не за вещы тленны,

но яко достоин Он всегда быти чтенны

Любовию теплою и всех служением,

яко всяческих Господь сущий творением.

Потом же и за сие Ему работает,

яко вечных от Него благ тощно желает.

Тех бо желати благо, честно и спасенно,

само искати учит слово божественно,

Ищете прежде (рекше) царствия небесна

и правды Его. Сия вещь зело словесна,

Словесну созданию велми подобает,

а иже сих прилежно ищет, обретает.

Искание царствия

Христос Господь изволил верным завещати,

еже царства и правды прежде всех искати.

Многообразно паки сие может быти,

то аз вам Писанием тщуся предложити.

В первых, аще небесных вседушно желаем,

и та паче земленных благих почитаем.

Второе, аще дела вся наша бывают

в славу Бога, и Его за цел предлагают.

Третие, аще дела плотска оставляем.

духовна же радостным сердцем совершаем.

Четвертое, внегда нам имети печали,

да быхом всегда в воли Божией ступали.

Пятое, аще прежде всех дел призываем

Бога в помощь, и вся с Ним дела совершаем.

Шестое, аще в мирских сердца не гружаем,

но к небесным то выну прямо обращаем.

Наконец, аще дела душевная нами

полагаются в чести, над плоти делами.

Христос повелевает правды нам искати

прежде всех. Та сугуба имать ся считати.

Едина есть внутрьняя, та — дар благодати,

силный душу приятну Богу устрояти,

Стяжемый крещением, егда же губится,

покаянием святым паки возродится.

Чрез прочыя же тайны множенна бывает,

без нея наследия царства никто знает,

Ибо, яко не сеяй не имать, что жати,

тако не внидет в славу праздный благодати.

Другая есть внешняя, лежит в хранений

велений Бога и дел благих творений.

Сию обею нужда есть верным искати,

хотящым во царствии небесном сияти

Невечерняго света сладкими лучами;

будем же, аще будет Господь выну с нами.

Искание душ

Душ рода Исраилска Христос Бог искаше,

тожде сонм фарисеев о Христе творяше,

Но противообразно, он бо оживити,

а фарисее Христа искаху убити.

Он, яко пастырь овец, духовно питати,

они, як волци агнца, зубы растерзати.

Искати неба

Магнитом натренная стрела ся вращает

безпрестанно, донде же север обретает.

Мы Христовою есмы кровию натренни,

долженствуем к небеси быти обращении,

И не престати, еже онаго искати,

донде же бы пред Христом на небеси стати.

Искушение

Аще зло что на добрых Господь попущает,

не казнь деет, ни лишил, токмо искушает.

Радости сердце да ся исполняет,

искушение ему же стужает,

ибо благодать вослед его ходит,

в славу приводит.

Рагуилова дщерь Сарра вещает:

Аще живот чий Господь искушает,

за постоянство обыче венчати,

не оставляти.

Аще же скорби на кого пущает,

Сам свободитель воскоре бывает;

аще накажет, то милость проявит,

зело прославит.

Некто от отец врага вопрошаше,

чим он братию зело искушаше?

Рече: Да косно в дом Божий приходят,

скоро из него в келлии отходят.

Донеле же диавол враг не умирает,

искушения выну верным содевает.

Отвсюду козней его нужда есть смотряти,

на всяк час не престает сетей сокривати,

Еже бы душы нашя теми уловити,

и себе раболепны в злобах сотворити.

Блюдимся убо врага, козней да гонзаем

всячески, донеле же в мире пребываем.

Искушение досадно терпети,

но нужда венец хотящым имети,

Поне же, кто ся зде не подвизает,

того в небеси Господь не венчает.

Движение же чювств егда терпиши,

несть вина, токмо да не изволиши.

Паче, что тебе борбою труждает,

то победивша в небе увенчает.

Отче, не воведи нас во искушение,

творим по вся дни к Богу тепло прошение,

А искушения Бог на ны попущает;

негли прошений наших, за грех не внушает?

Ни, в искушение бо не той ся воводит,

на нь же искушение некое приходит,

Но, иже без помощи оставлен бывает

и абие сердцем си на грех изволяет.

Не молим убо кроме искушений быти,

но да бы не дал на ня нам соизволити,

Или да зело тяжких на ны не пущает,

яже немощь неудобь наша побеждает.

Но сицевых не обыкл Господь попущати,

зная, яко не можем сопротиву стати,

За что слава вечная Христу Богу буди,

и да благодарят И вси вернии люди.

Искушение Господь на ны попущает,

да ся в добродетелех ум наш утвержает,

И еже бы о тех нам гордым не бывати,

но смирение паче и паче являти;

Наконец, да бы мзду нам вящшу получити.

Сия ведуще, тщимся постоянни быти.

Девица во затворе чистая живяше,

во посте и молитвах дни си провождаше,

Ей же завидя демон, начаше стужати

раздежением плоти, к блуду возбуждати.

Она в слезы въдадеся и в молитву многу,

о ослабу искуса вопияше к Богу.

По немале времени аггел ей явися,

его же пришествием дева утешися,

И нача ей всечестно сице глаголати:

аще искушения хощеши прияти

Ослабу от Господа, еще помолися

и стих царя Давида глаголати тщися:

Пригвозди плоти моя страхови Твоему,

даждь мир от искушений умови моему.

Сия рек, невидим бысть. Она глаголаше

стих той. потом ослабу желанну прияше.

Возрадовася дева, но на кратко время.

ибо вящшее на ню бысть от врага бремя,

Зане нача ей мыслми хулными стужати,

даже в усумнение о вере впадати,

И о Бозе помыслы злии досаждаху,

даже отчаяния близ ю содеваху.

Она, в беде велице сущи, паки к Богу

в слезах, в посте молитву возсылаше многу,

Да паки помилует, мысль утолит злую,

а даст воместо тоя имети святую.

По мнозех прошениих аггел паки сниде,

ко подвизающейся девице прииде

И рече: Что ты, дево, к Богу вопиеши,

без искушения ли жити желаеши?

Вся жизнь искушение в мире имать быти,

ты терпением тщися врага победита.

Обаче Господь милость Си тебе являет,

искушение тебе избирати дает.

Перво или второе, рци, кое хощеши

до кончыны терпети, в том присно будеши.

Она, то услышавши, Богу славу даше,

яко человеческо первое избраше,

А яко демонскаго втора не хотела,

тем же искушение похотей терпела

В прочыя дни живота, донели же бяше

на земли, а Господь Бог помощь подаяше.

И мы искушения весма не лишимся,

точию во подвизе пребывати тщимся.

Не престанет враг на ны брани наносити,

токмо Бога о помощь нужда есть просити,

Иже выну готов есть ту нам подаяти,

точию терпения требе прилагати.

Демон искушением тех не нападает,

ими же у покойно людми обладает,

Но аще зрит от себе сердца удаленна,

добродетелей стены крепко огражденна,

На та вся козни своя и силу вращает,

да, разорив ты стены, грады восхищает.

Бдите убо, братие, во гресех не спите;

бдит враг вас погубити, вы спастися бдите.

Старец некий демоном искушаем бяше,

и множицею того врага побеждаше,

Даже ему никогда того боятися,

аще яве оному тщася являтися.

Видя демон от него себе побежденна,

и, аки нековарна, во ничто вмененна,

Умыслил есть образом странным искусити,

потщася подобие Христа притворити

И, пришед к тому старцу; Веселися, рече,

яко днесь Мя видиши Христа, человече.

Старец зеницы своя абие смежил есть,

и лице от пришедша гостя отвратил есть.

Враг рече: Аз Христос еемь, что на Мя не зриши

и достойныя чести нимало твориши?

Старец рече: Не хощу аз зде Христа зрети,

в небе о Нем желаю утеху имети.

Демон зане же и ту старцем победися,

не к тому искушати онаго явися.

Аще искушение кого нападает,

месту изменения да не помышляет,

Ибо где-либо мирно жити обратится,

чесо нужда гонзати, того не лишится.

Исповедь

Стомах аще мокроты в себе заключает

и пищи вредны, вина болезнем бывает.

Аще же вся вредная изверженна будут,

вся внутрняя в здравии желанном пребудут.

Тако, аще в совести греси удержатся,

вся силы душевныя люте удручатся.

Аще же извергутся исповеданием,

испразднятся вся вины недугованием.

Юноша некий безчинно живяше,

демону всяко делы угождаше,

Юже работу хотя возмездити

оному демон, тщася й убити.

В клирика виде юноши явися.

и друг искренни ему сотворися.

Усмотр же время, нача его звати

на брег выскокий отраду прияти

От вод текущих и лугов зеленых,

многими цветы лепо украшенных.

Юноша бедный коварства не знаше,

на место оно ити предприяше.

Тем же текущым, се храм божественный

близ, говейными людми исполненный.

Иже грехов си исповедь творяху,

от храма и в храм пременно хождаху.

Видя то, юный ко клирику рече:

Потщимся и мы внити, человече,

Да видим, что ся в святом храме деет.

Клирик же лестный ити во нь не смеет,

Рече юноши: Изволь, друже, ити,

токмо не хоти во храме медлити.

Аз же зде тебе хощу ожидати

и инех другое в спутничество взяти.

Оста лукавый, юноша отьиде

и во храм Божий со прочими вниде.

Тамо же стоя, от Бога призренны,

о гресех сердцем бяше сокрушенны

И, шед к духовну отцу, вся сказал есть,

яже на своей душе грехи знал есть

И, быв разрешен, от вин очистися,

в новаго мужа чиста преложися.

Елма же молбы в храме совершаше,

враг исходящих о нем вопрошаше:

Скоро ли имать он из храма ити?

Чрез ины сказа ему не медлити.

И юну убо, из храма идущу,

но паче снега убеленну сушу,

Рече враг: Рцы ми, человече благий,

видел ли еси где спутник мой драгий?

И что во храме долго время деет,

Вскую во путь свой с медлением спеет?

Се же к юноши тому глаголаше,

яко онаго к тому не познаше.

Юный, познав вещь, ко демону рече:

Мощно ли знати тебе, человече,

Друга твоего? Демон отвещает:

Или кто друга своего не знает?

Познаю его, токмо да изыдет,

да в путь со мною предприятый идет.

Юноша рече: О враже лукавый,

убити мене на брег высок звавый,

Аз еемь изъшедый из града с тобою,

изчезни ныне, Бог бо есть со мною,

Иже из рук ти мене свободил есть,

и очы твоя на мя ослепил есть.

Не к тому имам тебе работати,

но хощу весь ся Богови отдати,

Да, яко хощет, на путь мя наставит

и весь живот мой к благости исправит.

То слыша демон, люте усрамися,

с воплем великим во ад возвратися.

Юноша паки Богу хвалу дал есть,

яко от смерти онаго изъял есть.

Сие вам. чтущым, знати подобает,

яко враг выну убити желает

Грешника всяка, но Богом кротится,

да не вся могущь в грешницех явится.

Ко Богу убо вси ся обращайте,

о гресех ваших умилно ся кайте,

А Он не даст вас злу врагу губити,

но вселит в небо, еже вечно жити.

Исповедаю Ти ся, Отче

В Священном Писании елма ся читает

глас Исповедания, тогда знаменает

Или благодарствие, или хваление

Бога щедра за Его благотворение.

Тем, егда Христос Отцу Си исповедает,

о том Его святости хвалу возсылает,

Яко тайнства Своя от мудрых таил есть,

яко от гордящихъся, младенцем открыл есть.

Сие — за милость Свою, за истинну — ово,

праведно бо Божие и дело, и слово.

Исправление

Иже грешяща раба си не исправляет,

сам греха того должник пред Богом бывает.

Адам благо и злое видети хотяше.

подобия мудрости Божия желаше

И, впад в неразумие, скотом вподобися,

невинности и рая краснаго лишися,

Его же хотя Христос Господь исправити,

вид несмыслна младенца изволил носити

И во скотстем вертепе во яслех лежати,

смирением Адамлю гордость исправляти.

Истинна

Царь Локренский Салевкий егда царствоваше,

закон во своем царстве сей народствоваше:

Да кто прелюбодейству виновен явится,

абие очию си света да лишится.

В мале времени потом сын его единый

тому преступлению содеяся винный.

У веде отец о том, совет собирает,

на обезочение сына осуждает.

Граждане со слезами к царю припадают,

оставления казни сынови желают:

Прости сына, о царю, грех его остави,

наследника царствия от казни избави.

Мы, иже под законом, должни казнь страдати,

аще веления ти будем презерати,

Но сын законодавец твой нам имать быти,

убо изволи его казни свободити.

Царь, истинны хранитель, вопреки вещаше,

всяко обезочити сына осуждаше.

По мнозем же прении царь гневен явися,

сей суд последний из уст его испустися:

О граждане честнии, болезнь ми отвсюду,

сын любезен, а правды не растлю отнюду.

Грех винен отмщению, от вас моление,

да преложу на милость злобы отмщение.

Обое ми досадно, и еже простити,

и ваше желание презренно пустити.

В недоумении есмь, что лучши избрати:

вам ли, или истинне делом у гож дати?

Но обема угожду: вас ради простится,

единаго сын ока весма да лишится,

За правду же другое мне изъято буди,

да не рекут неправа мене царя люди.

Да очы, а не око, аще не в едином,

но во отце изъяты будут купно с сыном.

И совершися суд сей с великим ужасом,

в образ правды будущым сотворенный часом.

Подобне Бог изволи щедрый сотворите,

хотев роду нашему ослабу явити.

Дал есть Сына Своего до смерти страдати

плотию, да бы во век нам не умирати.

И тако довле правде Христом сотворися

казнь на Него и на ны полма положися.

За наш Он грех пострада, остави в нас око,

с ним же мощно нам взити на небо высоко.

Тем же Он есть Свет мира, яко Сам речеся,

Его светом в свет вечный род наш возведеся,

За что Ему честь, слава во вся веки буди.

Слава Ти, щедрый Боже, да рекут вси люди.

Пилат: Что есть истинна? Христа вопрошаше,

и абие изъиде, ответа не ждаше.

Бысть се, яко сынове века сего слова

правды слышати уха не имуть готова.

Истинна есть трегуба: ума, уст и дела,

сия же неврежденна бывает и цела,

Аще ум самой вещы уравнится право,

уста же уму точне словят нелукаво.

Дела паки закону аще отвещают,

истинна пред Господем Богом ся въменяют.

Есть истинна во вере, во нравех — другая,

ова душеспасенна, сия полезная.

Истинна веры, аще кто верит свершенно,

что Писание велит верити священно.

Истинна нравов, аще живет кто по Бозе,

храня законы Его во тщании мнозе.

Обе те человека во ад не пущают.

но на вечную радость в град горний вселяют.

Егда Христос Бог Пилату предсташе:

Царь ли еси Ты? Пилат вопрошаше.

Отвеща Господь: Ты се глаголеши,

яко Аз царь есмь, сиречь, в том не лжеши,

Ибо Аз царь есмь, имам царствовати

чрез веру в людех и чрез благодати.

Приидох же в мир сведетелствовати

истинне, еже всем глас Мой слушати.

Истинна сия да знаете кая,

аз извещаю, есть еваггелская,

Яже в триех делех содержится,

о них же всяко се вам изъявится.

Перво, воеже право Бога знати,

лжебоги Еллин во ничто въменяти,

Знати же, три лица суть Бога

права, естество едино немнога.

Отец, Сын и Дух, три лица числятся,

но Бог един есть, а не бози мнятся.

Второ, в знании Слова божественна,

Божия Сына быти воплощенна,

Его же Отец изволи послати

в плоть и во мир сей спасение дати,

Им же единем кождо ся спасает,

кто-либо веру в Него соблюдает.

Се бо жизнь вечна — Бога Отца знати

с Сыном, Его же изволи послати.

Третие, право блаженство познати,

не во суетных мира уповати,

Не то блаженство право разумети,

еже богатство и славу имети,

Или в сладости и прохладе жити,

любомудрием напыщенну быти,

Яко мудрецы внешний учиша,

и себе Самы и вся люди лстиша,

Но яко то есть в царствии небесном,

в зрени Бога, в седении десном,

Еже да леть вам будет получити,

покаяние тщится творити.

Тем леть есть царство небесно стяжати,

в блаженстве правом вечно пребывати.

Иаков и Христос

Иаков двадесять лет Лавану служаше,

за что Лию и Рахиль в супружество взяше,

Из нею же доволна чада получил есть,

чрез ня же племя свое зело разширил есть.

Христос же тридесять лет три и пол служаше

прежде, неже сонмицу и языки взяше.

Оттуду ученики приял есть святыя

и всю Церковь умножи во мире чрез тыя.

Идол

Иже мало идолу в честь Ливана дает,

мерзких идол служитель абие бывает.

Колми паче, кто весь век чреву работает

или сребру, служитель идолский бывает.

Идол бо чрево, не бог, тако жь сребро, злато,

служителю в тартаре вечный пламень за то.

Моисий на горе с Богом Святым глаголаше,

Аарон в полце телца злата с дела л бяше,

Его же, сошед с горы, Моисий сокрушил есть

и огнем всеядущым на пепел спалил есть.

Подобне Христос Господь в мире сотворил есть,

сошед с неба, кумиры скверны истребил есть,

Во-первых же, в Египте, егда бо внесеся

рукама Матере Си, всяк идол падеся.

Сие же знамение истинное бяше,

яко идолску службу попрати хотяше

И душегубителны грехи истребити,

народы к Богу и в жизнь благу наставити,

Еже самем в то время делом совершися,

егда имя святое Его прославися,

О нем же вся колена себе преклоняют,

честь благо достойную должно сотворяют.

Идолослужителство

Идолослужителство есть во мире трое,

а коеждо истинну Богу противное.

Первое — Еллинское, тии почитают

тварь вместо Бога жива и зле согрешают.

Второе — сребролюбцев, тии бо говеют

паче Бога богатство и грех лют имеют.

Третее — чревобесных, иже, аки Богу,

пищь жертву паче меры приношают многу,

Ни потолику тщатся Богу работати,

елико несытному чреву угождати,

Его бо ради грехи многи содевают,

лгут, крадут, похищают, грабят, разбивают.

Но Бог правый лжебоги имать истребити

и тех почитатели во аде казнити.

Мы аще бог Еллинских никако же знаем,

но втораго со третим велми почитаем,

Ибо сребру и чреву работаем зело,

с прилежанием творим их всякое дело.

Заповеди Божия забвению вдахом,

а сих лжебог заветы любезно прияхом.

Тру ж даемся день и нощь, да бы что стяжати

от сребра, и то в жертву чревеси от дати,

Ту же зело тучную, ибо, что стяжанно

чрез дни многи бывает, то в час чреву данно

Во обезумляющем питии бывает.

Тако едино чрево вся труды глощает,

А многих жены с детми гладом помирают,

о них же пияници весма забывают.

Но и Бог их забудет на пир вечный взята,

да возалчют, яко пси, и будут проклята.

Иерей

Свят Господь Бог наш, и нам завещает,

да всяк раб Его чист и свят бывает.

Изряднее же иереом требе

святость имети пред Господем в себе,

Вин ради многих, наипаче за сия,

яко во мире постави Бог тыя

Въместо лица Си, убо подобает,

да иерей всяк святость соблюдает.

Паки за сие, яко суть пожренни

они Богови, егда суть священни.

Жертва же Его имать цела быти,

свята и чиста, ту Он весть любити.

Еще же, яко священнодействуют,

в руках си тело Христово пестуют,

И дело их есть иныя святити,

прилично убо самым святым быти.

Наконец, яко с Богом примиряют

люди, есть нужда, да святи бывают.

Иереи Божии должни пребывати

кроме всяка порока, преподобии, святи,

Да престолу Господню предстояти могут

достойно и праведно, и людем помогут

Молитвами своими, и жертвы святыя

Богу щедру приносят приятно за тыя.

Имут, яко аггели небеснии, жити,

яко ови — в небеси, они зде служити,

А зане же аггели суть невещественни,

плоти, костей и страстей всяческих лишении,

Таковым иереом подобает быти.

не по существу убо, но воздержно жити,

Да, аки плоти кроме, быти проявятся,

победители страстей тела сотворятся,

Да воправду духовни могут ся назвати,

егда духовно будут в плоти пребывати.

Паки, аггел и умни суть и мудри зело,

выну хвалят Господа, правду хранят цело.

Подобне иереи должни умни быти,

да бы стадо Христово полезно правити

Во двор Отца небесна, во радости страну,

на небесныя злаки, к безсмертия стану.

Подобает и мудрость священным имети,

да бы словом Божиим препитати дети

Духовныя, яже им Господь Бог вручает,

и не морити гладом слова совещает.

Иначе бо возраста не могут прияти,

прежде добродетелей, та же благодати,

Ибо, яко младенци млеком ся питают

и в количество плоти тем же возрастают,

Тако чада духовна словом божественным

питаются и растут, яко всеспасенным,

Первее яко млеком, донеле же млада,

та же яко пищею избывают глада.

Еще мужем священным нужда точным быти

небесным силам, сиречь, Господа хвалити

На всяко время и час за вся благодати,

яже изволи миру нескудно даяти.

К сим истинну в словесех и в делех хранити,

и вся люди Божия к правде приводити,

Да лжи семя вражие в них ся не вселяет,

нив сердечных тернием грех не загущает.

Наконец, аггел и суть мира правители

и рода человеча присно хранители.

Подобне иереи должни суть правити,

яже крива суть в мире, падшая ставити,

Люди же Бога жива от демон хранити,

даже бы и душы си за ня положити.

Иже сицев иерей, правый раб у Бога,

аггел в мире плотяный, и мзда ему многа

Во жилищех вечности есть уготованна,

по свершении трудов имать быти данна.

Тем же, о иереи, аггелски живите,

ко мзде уготованной прилежно теците,

Да бы на трижнение вам то восприяти,

еже изволи Господь Бог уготовати.

Аггелское естество благо сотворися,

свободною волею Богом украсися.

Не име злобы в себе, обаче неции

сотворишася злобни, от Бога падшии.

Подобне иерейство есть свято и благо,

достойно же и честно у Бога Святаго,

Но мнози свободою Бога отпадают

иереи, аггела злобна подражают

И бывают аггели не Бога благаго,

но злобоначалника, демона лстиваго.

Сицеви суть, во-первых, иже отступают

от единства Церковна и гордость являют

В непокорстве началным, мняще себе быти

равно мудры, достойны, и пресвято жити.

А сие их мнение от врага вложися,

иже противу Богу горделив явися.

Паки, сатанины суть аггели и тии,

иже суть служители сребролюбивии,

Не хвалы ради Бога труды полагают,

но сквернаго прибытка везде усмотряют.

Не о ползе душевной верных промысл деют,

но ковчегу своему лакомо радеют,

И тайн божественных без сребра не служат,

на не имущих того ярятся и тужат.

Недоволны доволством нуждных, но желают,

да, яко князи мира, богати бывают.

Сии — раби маммоны, не живаго Бога,

недостойнии зрети небесна чертога.

Сии — слузи демона, неключими Богу,

стяжущии погибель и казнь себе многу.

Сия имать лакомство во ад погрузити,

еже со Сатаною тамо вечно быти.

Напоследок, аггели и тии суть злато

врага, иже не любят жития чистаго,

Но блудодеяние скверное творяют,

и подобу мужеска пола развращают.

Грехи паче естества тщащеся творити,

и инеми видами дерзают блудити.

Сицевии аггели в небо не вселятся,

но из земли в подземну пропасть водворятся

От Сатаны за службу возмездие взяти,

и с ним вечно во огни страшном пребывати.

Егда светло есть око, плоть чиста бывает,

ибо то зрением си порок наблюдает

И нудит руце, еже тело омывати,

от всякаго порока скоро очищати.

Аще же око темно в главе чией будет,

того тело в породе и скверне пребудет,

Яко око не видит на теле порока

и скверны, аще будет долга и широка.

Очеса иереи Церкве сотворени,

те лесе досмотряти Богом поставлени.

Должни суть убо светли, без порока жити,

воеже бы видети, где тело омыти.

Аще же очи сии будут помраченны,

како удове Церкве будут очищенны?

Прочий уди могут дело си творити,

аще негли случится и в пороках быти,

Ибо нога скверная хождение деет

и рука окалянна в деле своем спеет,

А в око аще и прах малый прилунится,

абие действия си дотоле лишится,

Донде же праху тому изъчищену быти,

яко с ним невозможно оку светло зрети.

Подобне в иереи порок и малейший

паче, неже в мирянех, бывает вреднейший,

Даже не мощи ему дела совершати,

на не же благоволи Господь й призвати.

Убо, о иерею, от всяка порока

да прилежно блюдеши душевнаго ока.

Блюдися же и тела твоего сквернити,

да бы священных действа не лишенну быти.

Иерей есть зерцало миру духовное,

во нем же вреждение зрит си греховное.

Зерцало же есть благо, аще светло, чисто

и пороки являет зрящих право, исто.

Точне иерей благ есть, аще чюжд порока

нечистоты, ни мрачит пред миром си ока,

Но, не смотря на лица, грехи обличает,

обаче лица, кое грешно, не являет,

Да сам согрешший, токмо зря грех свой, чистится,

а иных порок тайный никако явится.

Стомах во человецех елма здрав бывает,

тогда всего телесе уды утвержает.

Елма паки немощен стомах сотворится,

в то время все немощно тело проявится.

Тако в Церкви иерей аще благий будет,

все тело оныя во благости пребудет.

Аще паки иерей к злобе обратится,

всяк уд телесе Церкве к той же преклонится.

Зри убо, иерею, да благо живеши,

да благи благу Богу люди приведеши.

Блюдися же от всех злоб, да не соблазниши,

сам погибая, людей да не погубиши.

Иерейство

Не кождо знает, что есть иерейство,

и службы его колико есть действо.

Тем же днесь сан сей мало почитают,

иже священных Писаний не знают,

И в их же сердцах Бог не пребывает,

но с велиаром маммона витает.

Есть же велико достоинство зело,

паче всех мирских, глаголю то смело,

Ибо Священным Бог изволи дати,

еже плачющым грехи оставляти.

Иерей может хлеб в тело вращати

Христово, и в кровь вино прелагати,

Яко служитель, а не детель того,

то бо есть дело Господа Самаго.

Всем же миряном та власть неприлична,

тако бо воля сотвори Владычня.

Иерей простый царя знаменает

знаменем крестным, и благословляет,

А царь пресылный не имать толики

силы от Христа, всемирна Владыки.

Священных свойство — жертву приносити,

а царем того несть волно творити.

Савл иногда жрети дерзнул бяше,

но за то царства тщету пострадаше.

Иозия же возжегл есть кадила,

но лице его проказа разтлила.

К тому иерей закона учитель,

Божия воли людем изъявитель,

Его же уста, яко хранилище,

издающее благо сокровище

Слова Божия. Точна и стомаху,

ибо вежество, еже восприяху

Чрез Писание от Господа Бога,

произливают на удеса многа,

Яко же стомах, яже изваряет,

по удом плоти вся разпосылает.

Есть и ходатий, Бога примиряяй

ко человеком и гнев утоляяй.

Иерей кож до стене подобится,

Гнев Божий от грех тем наших делится.

Яко Аарон с кадилом стояше,

посреде живых и мертвых кадяше,

И тако Бога умилостивил есть,

гнев Его правый от полк отвратил есть.

Сице иерей посредствуя молит

Бога и ярость праведную толит.

Паче, яко же Моисий удержаше

десницу Бога, юже протязаше

С мечем на люди, смерть заслужившыя,

телцу прокляту честь сотворившыя,

Тако священник своими молбами

у держу ет мечь, висящий над нами,

Держит десницу прогневанна Бога

за дела злая, яже творим многа.

Толику убо иерею сущу,

божественную власть в мире имущу,

Како смеете чести не даяти,

Бога Самаго в нем не почитати?

Честь бо священных к Богу возносится,

яже и в мире, и в небе платится.

Подобне нечесть, священным творима,

к Богу несется, адом же платима.

Что днесь слышаще, священники чтите,

на сан, не на грех умным оком зрите.

Но и ты честный тщися, иерею,

благостынею превзити своею

Вся твоя овцы, яко превосходит

безсловесное стадо, иже водит,

И яко солнце вся превозвыжшает

светила, яже светом озаряет.

Тогда должная честь ти принесется,

стадо Христово с тобою спасется.

Приемлем иерейство, но едва кто знает,

како служити Богу право подобает.

Гоним, яже суть мира, горних забываем,

воместо Бога чрево наше почитаем.

За малейшим прибытком всеприлежно тщимся,

аще того не видим, служити ленимся.

Но увы, како леть есть ны духовны звати,

иже токмо мирская обыкохом гнати?

По числу даров Духа Пребожественнаго

седмь числятся степени чина священнаго,

Яже по единому должно преходити

хотящым иерейства степень получити.

Первый степень — вратарей, сих долг есть храните

у врат церкве, еже бы скотом не входити,

Такожде анафеме человеком данным,

стояти же внутрь храма точию избранным.

Ту службу Христос Господь в Себе исполняше,

егда торжники бичем из храма гоняше.

Вторый степень есть четцев, им же подается

власть, да всяко чтение ими в церкви чтется.

Сию службу Христос Бог тогда показал есть,

егда из Исаии пророка читал есть:

Дух Господень на мне есть, Им же помазахся,

благовестите нищым во мир сей послахся.

Третий — заклинателей, им же призывати

имя Господне дано, и бесы прогнати

Из человек, страждущих онех мучение,

чрез Создателя ради грех попущение.

Сию службу Христос Бог тогда совершаше,

елма из бесных людей бесы изгоняше.

Четвертый — свещеносцев, им же подобает

свещы носити, егда служба ся свершает.

Христос Господь службу си тощно совершаше,

ибо: Аз есмь свет мира, о Себе вещаше.

Пятый — подъ диаконов, иже та творяют,

яже им диакони в службе завещают.

Сия служба от Христа Бога показася,

егда лентием чистым Сам препоясася,

Хотя учеником Си ноги омывати,

в подражание верным образ показати.

Шестый есть диаконов, им же есть читати

Еваггелие должно и вся совершати,

Яже при священницех оным подобают,

егда божественную службу совершают.

Сию службу Христос Бог тогда совершаше,

егда слово Божие миру сказоваше.

Седмый есть призвитерей, сими божественны

тайны преблагочинно бывают свершенны,

И все священнодейство ими ся свершает,

еже в честь Бога, в ползу всех верных бывает.

Сию службу Христос Бог тогда сотворил есть,

егда Тайну Вечерю чюдне совершил есть.

Преложив хлеб и вино в тело и в кровь Свою,

чредя апостолы Си пищею дивною.

И паки, егда Себе жертву сотворил есть

на кресте Отцу за мир, иже возлюбил есть.

Сугубо же священство требе полагати,

велие и малое мощно нарицати.

Велие — епископство, ерейство — малое,

а Сам Христос Спаситель знамена обое:

Велие, апостолы егда посылаше

со словом и власть чюдес творение даше.

Малое, ученики повнегда избрал есть

седмъдесят и два, в помощь велиим послал есть,

Их же днесь место держат в Церкви иереи,

яко въместо апостол суть архиереи.

Епифаний разнствие онех полагает,

егда сицев во книзе глагол оставляет:

Епископский чин отцев родитель бывает,

зане же иереи во Церкви раждает.

Иже суть духовнии отци Церкве чадом,

купно и пастырие над врученным стадом.

Презвитерский паки чин отцев не раждает,

но бани рождением чада сотворяет.

Суть и ина разнствия, яже во велику

честь, паче иереов, возносят владыку,

Иерей бо и мира не может святите,

еже дело епископ мощен совершите.

Иерей убо отец есть точию стада,

епископ иереов отец есть и града.

Мы иереом должни честь многу творите,

архиереи паче онех величити,

Зане отци суть отцем, и власть им от Бога

духовная дедеся в ползу нашу многа.

Иереов не осуждати

Во некоем от градов иерей живяше,

иже словом Божиим стадо си питаше.

Пороком же единем позор себе дея,

вси его знаху быти скверна любодея.

Блазнишася убо вси, найпаче зла слава

того соблазнила есть, иже бяше глава.

Сей и слова Божия не хоте внушати,

глаголя: Не может той добре поучати,

Иже сам в злобе лежит, зане люботворит,

не оживляет наших душ, но всяко морит.

Той же человек честный ниву си имяше,

яже пшеницею вся насеяна бяше.

Ту он, в едино время изшед, осмотряше,

а солнце зноем тяжким ему досаждаше,

Донде же изнеможе, и се ток явися,

иже чрез ниву его ново источися.

Он от воды вкусил есть, а та сладка бяше;

утолив жажду, тока начала искаше.

И се при конце нивы пес лежит смердящий,

из согнивших челюстей ту воду точящий.

Он, видя нечистоту, зело удивися,

како сладкая вода из него родися.

То оному мыслившу, глас бяше от Бога:

Что тя усумнения возмущают многа?

Зриши, из пса чистая вода изтекает,

сладка пити, и жажду плоти утоляет.

Тако, аще иерей нечисть быти зрится,

но чистая из его уст вода точится.

Егда слово Божие он проповедает,

то жажду души толит, ону оживляет.

Не зри, откуду течет, тщися ползу знати,

отселе иерея не смей осуждати.

Бог ему Судия есть, ты тебе да зриши,

еже благо вещает, делом да твориши.

Аще он злая деет, что есть к нему тебе?

Бог — зритель и возмездник, живущий на небе.

Сие чтите, братие, купно разсуждайте,

Богу иерейских суд грехов отдавайте.

Сами своя совести прилежно блюдите,

по делом их лукавым ничто же творите,

Но, что добре вещают, тщитеся деяти,

ибо Господь изволи тако увещати,

Глаголя к учеником: На месте Моисея

зрите книжны седети, точне фарисея.

Вы учимая ими прилежно творите,

а яже злая деют, тех ся отвратите.

Иеросалима разорение

Град, избивый пророки, и пророкованна

Мессию сотворш быти, ах, укрествованна,

Каковых бе достоин казнений от Бога,

несть требе возвещати о сем слова многа.

Царя славы жидове лютии распяти,

Жизнодавца и Творца злой смерти предати.

Убо достойни быша всеистребления,

всякими смерти роды скоро отмщения.

Но долготерпеливый Господь ожидаше

покаяния грешных, и вестно творяше

О ближящейся казни, да ся поне кают,

прещения видяще, и Христа познают.

Знамения же бяху всему граду явна

чрез Иосифа мудра, историка славна.

Во-первых, бе комита, вид меча носящий,

чрез целое годище брань граду претящий.

Паки, в дни опресночны нощь в день преложися

окрест храма Божия, кто не почюдися?

Кравою, яже в жертву Богу приведеся,

агнец посреде храма из чрева дадеся.

Врата храма медная, яже затворяху

двадесят человецы, яко тяжка бяху,

Сама ся в нощь едину дивне отверзоша,

известно знамение казни принесоша.

На аере воинства взаим ся сражаху

и колесницы ратны велий страх творяху.

Во день Пентикостии сей глас слышан бяше:

Прейдем отсюду. Аггел сия глаголаше.

Напоследок, бе некто, Иисус реченный,

простолюдин, но Богом яве наставленный,

Иже чрез седм лет и пять месецей бегаше

по стогнам града, и глас сицев издаяше:

Горе, горе будет ти, Иерусалиме!

Многия о сем язвы от началник прийме.

Наконец, егда враги пред стенами зряше,

возбег на стену, тожде вослух вопияше.

Приложив: Горе и мне! абие убися

каменем, иже от полк вражиих пустися.

Оле знамений чюдных! Обаче не знаху

жидове, что та свыше роду их прещаху.

Не знаху же за упор, ни хотеша знати,

тем недостойни бяху свыше благодати,

Но казни вселютыя, яже наступила,

егда Римская прийде в Июдею сила.

Тою бо род Иудейск страшно погубися

огнем, гладом и мечем, останок пленися.

Пятьсот по вся дни жидов врази распинаху,

даже места окрест стен крестом не имяху,

Ни же крестов на жиды доволство им бяше,

тако за распятие Христа Бог отмщаше.

Стены града и храма въконец разорении,

на камени не бяше камень оставленны.

Оле страшныя казни! Обаче в слепоте

останци жидов живут, и в люте жестоте.

Не хотят Распятаго за Мессию знати,

божественныя чести по долгу отдати.

Иисус

Елма печаль кому велия стужает,

имя Иисуса да воспоминает.

Не сердцем точию, но купно языком,

Он же, яко солнце Сый в свете великом,

Облаки печалей разсыплет известно,

веселие в сердце воведет нелестно.

И впадый в грех велик аще ся отчает,

и сило на выю взята помышляет,

Иисуса токмо да призовет к себе,

помощь восприимет в конечней потребе,

Спаситель бо спасет, от сила избавит,

въпред жити спасенно грешника наставит.

Игнатий Богоносец откуду речеся?

Между мудрыми люд ми то слово промчеся,

Яко он пресладкаго Иисуса любяше

велми, тем Иисуса выну глаголаше.

Егда же мучителю злому представися,

имя то глаголати ему возбранися.

Он рече ко Трояну: Не могу престати

пресладкаго имене усты провещати.

Мучитель рече: Аз тя сотворю молчати,

егда уста с главою велю отрезати.

Мученик святый рече: Аще отсечеши

главу, но Иисуса мне не отьимеши,

Его бо имам в сердце моем написанна,

Ему же во жилище душа моя данна.

То услышав, томитель повеле изьяти

сердце и того на нем имене искати.

Искавше убо. тое имя обретоша

златописно, и царю чести принесоша.

О всезлатое имя и сердце златое,

достойное имети в себе имя тое!

Не имя же точию во сердце том бяше,

но и Сам Иисус в нем истинно живяше,

За что душа святая со Христом вселися

во царствии небесном и в нем воцарися.

Благо убо со Христом Христианом жити,

имя Его во устех и в сердцех носити,

Любовию писанно, ибо Он воздати

весть, имя взаим наше в небеси писати

В книгах жизни вечныя. Сию милость с нами

Игнатия сотвори, Христе, молитвами.

Некто от учителей повесть нам остави,

како Ареопагит верен бысть, изьяви.

Бывшу, рече, в Афинех Павлу божественну,

случися сему быти с ним мужу ученну,

Яже стоящя слепец некий прехождаше,

о нем же Дионисий Павлу глаголаше:

Аще сего слепаго ныне исцелиши

именем того Бога, Его же хвалиши,

Аз имам веру яти, яко Он Бог правый,

и преклоню Оному верх моея главы.

Токмо словес волшебных да не глаголеши,

ими же исцелити негли возможеши.

Аз ти напишу имя Господа твоего,

чти и сотвори чюдо о имени Его.

И написал есть сице: Во имя рожденна

Иисуса из Девы, кресту пригвожденна,

Умерша и в третий день из гроба воскресша,

потом Ся со славою на небо вознесша,

Ты, слепче, да видиши. То Павлу подаше.

Апостол же всяк зазор отсещи хотяше,

Видев то писание, рекл есть ко оному:

Тебе соизволяю прочести самому,

И узриши Божию силу превелику,

и познай Христа Бога суща всех Владыку.

Дионисий словеса оная читаше,

слепец же он абие зрение прияше.

То видя, Дионисий верен сотворися,

Христа почет, ученик Павлу устройся.

О имя пресилное! Слепца воочает

и Дионисию ум мрака свобождает.

Се имя святое выну почитайте,

услышавше Иисус, главы преклоняйте.

О сем всякое колено себе преклоняет,

небо, земля и вся тварь оно почитает.

Иисус Христос

Святый Павел апостол ко Христу горяше

огнем любве велиим, тем же поминание

Имя Его пречасто, даже написати

Иисус в посланиих выше двусту крати

Девятьнадесят, Христос паки божественно

четыриста еднижди имя положенно.

Отсюду мощно любовь его познавати,

яко Любима часто тщася поминати,

За что ныне со Христом царствует на небе.

Любя, поминай и ты; даст Он часть и тебе.

Иисус сладость

Иисус есть всех сладость, вся бо услаждает,

иде же благодать Си Господню вливает.

Горка есть смерть излиха, найпаче чрез муки,

егда мучителския дручат кого руки.

Обаче и та горесть Христом осладися,

ибо мучеником смерть сладка сотворися,

Зане же, яко на мед, вернии течаху,

иде же мучители онех убиваху.

Друг друга предваряя, на муки бежаше,

яко мзду всесладкую в небе быти знаше.

Вящшею охотою тогда смерть искася

и мучение люто от верных страдася,

Неже епископская днесь ся честь желает,

и неже стяжанная сердце утешает.

О всесладкий Иисусе, ослади жизнь мою,

горку зело грехами, чрез благодать Твою.

Дажд ми сладко чрез весь век работати Тебе

и вечно наследити Твою сладость в небе.

Икона

Образ Спасов над враты медяными бяше

во Констянтине граде, егда царствоваше

Лев царь иконоборец; на той образ святый

возьярився, враг Божий дал завет проклятый,

Повеле й из того места рабом снята,

да бы не к тому людем того почитати.

Един убо от воин Лествицу пристави

и стопы своя на ту по образ устави.

То благочестивыя жены увидевше,

низъринули воина, Лествицу сваливше.

Пад убо, воин издше, а жены честныя

преданы мучителем на муки лютыя,

И тако за честь икон святых пострадаша,

венец нетленный Богом в небеси прияша.

Икона Богородицы

Иконописец некто благочестив бяше,

ко Матери Божией любовь соблюдаше.

Обыкл же образ ея прекрасно писати,

а демона под ноги ея полагати,

Скаредно писаннаго, за что разьярися

враг, и жестоко ему претяй появися.

Обещая велику пакость сотворити,

аще не престанет й тако скаредити.

Зограф же врагу рече: Аз тя не боюся,

паче скаредство твое явити потщюся.

Исчезе демон с гневом, потомслучай бяше:

зограф образ Девыя на стене писаше

В храме некоем. Тамо не забы явити

и скаредства вражия под ноги вместити,

Изображая, яко та есть она жена,

ею же змия того бе глава сотрена.

Враг, не терпя досады, хотя й свалити,

потщася вся подставы древяны ломити.

Тым убо падающым, зограф он смутися,

но Божией Матери молебно вручися.

И простре образ руку, мужа похищая,

от падения смертна чюдне свобождая.

Падоша вси подставы, зограф же висяше,

держим рукою Девы. Оле чюдо бяше!

Что видяще людие, подмоет пристроиша,

зографа кроме вреда к земли низпустиша,

А Христа Бога Матерь честно величаху,

содеянное чюдо миру возвещаху.

Демонския же козни въконец обругаша,

его же падению винна быти знаша.

Инок

Рыба, извлеченная из вод, умирает;

инок, из монастыря изшед, погибает.

Антоний, во пустыни живый, глаголаше

ко учеником, яже с собою держаше:

Инок, изшедый во град, рыбе подобится,

яже, из воды взята, на суши держится.

Ей, як рыба на суши скоро умирает,

тако инок во граде скоро погибает.

Егда честнии мира иноци бывают,

от покоя на труды Богу себе дают.

Егда же простолюдин инок сотворится,

от повседневных трудов во покой вселится,

Ибо ему же бяше нужда работати,

той у делу не хощет перстом ся касати.

Ови же, в сластех бывше, нужду деют себе

по силе трудитися, да бы быти в небе.

Тако честнии мира небо получают,

а нечестнии в нечесть вечную впадают.

Празден есть чести инок, иже чести любит,

мирскую честь приемля, небесную губит,

Яко, яже остави, к тым паки вратися,

мира славу возлюбив, Бога удалися.

Зле умыслил человек иночествовати,

иже бысть инок, хотя празден пребывати,

Иже в мире рукама пищу си стяжаше,

и от трудов никогда престати можаше,

Быв же инок, нимало трудов полагает,

но праздно живя, труды чюждыя глощает.

Тунеядец, не инок сей может ся звати,

ни удобь спасение возможет стяжати.

Аще бо плотска праздну Павел бранит хлеба,

найпаче тунеядец лишен пищи неба.

Инок-мясоядец

Инок некто во граде сестру си имяше,

к ней же в дом пришед, ясти у нея прошаше.

Она хоте обилно рыб ему сварити,

он же, забыв грех, ят ю о мясо просити

И повеле безстудно жарити часть неку,

но горе преступившу закон человеку!

Не терпя бо, уреза от мясныя части,

упек на огни, ят ю прелакомо ясти.

Но ста мясо в гортани, в стомах не идяше,

ни же вспять изверженно из гортани бяше.

Тако неприличным си брашном удавися.

Чтый се, иноче, от мяс всячески блюдися.

Подобне ин, к сроднику пришед, сотворил есть,

да представит снедное прилежно присил есть.

Елма же сродник рыбу хоте ему дати,

инок ят с яростию к нему глаголати:

Что ми рыбы даеши? Зрети их не могу,

даждь ми, яже шествует рыба на дву ногу.

И у би кокош, яже близ его хождаше:

Се ми рыба днесь буди, бедник глаголаше.

Рыба, рече, из воды в начале родися,

но и все парящее с нея изпустися.

Убо едино, рече, сродство есть обою,

устрой ми кокош ныне на потребу мою.

По велению его кокош устройся,

юже токмо ят ясти, грешник удавися.

Бито в плещи рукама, да бы изглотита,

что потщался есть бедник со грехом вкусити.

Но всуе трудишася, инок удавися,

праведная живаго казнь Бога явися.

Убо и днесь, иноче, от мяса блюдися,

обычай, яко закон, хранити потщися.

Обычай бо во закон преложен бывает

и нам ко совершенству тещи подобает.

Иноком не лгати

Муж некто духовный в келии седяше

и богомыслием ум свой услаждаше.

Братия, пришедше, его искушаху,

вола по аере летати вещаху.

Он, ум в Бозе имев глубоко втопленный,

изиде смотрети, от юных прелщенный.

Юнии начата ему ся смеяти,

яко в неподобном хоте веру яти.

Он глагола им: Мнех подобней летати

волом выспрь, нежели монахом солгати.

Зрите вы, иноци, како вам хранити

должно правду слова, а не лживым быти.

Иночество

Мнози родителие чадом препинают

путь спасения, елма онех не пущают

Во иночестем чине Богу работати,

хотящих весь живот свой в жертву Ему дати.

Охотно же на службу мирску устрояют,

на ней же вечно, увы, в гресех погибают.

Оле развращения! Иже бо родиша

плотию чада, тии на душах убити.

Не видят несмыслнии, что Богу служити

есть всеблаженно и зде, и в небесех жити.

О, аще бы велел Бог чада закалати,

яко же Аврааму веле содеяти.

Не дивил бых ся тому, яко преслушают

и ножем прелюбезных чад не закалают.

Жалость прирожденная грех бы умаляла,

и любовь бы по части оны извиняла.

А днесь не велит Господь чад си закалати,

но токмо в службу Себе совещает дати,

Яже служба пречестна, мирна, божественна,

славна, свята и душам смиренных спасенна.

То добре знавши, Анна сына Самуила,

еще в детстве бывшаго, Богу есть вручила,

Иже послежде пророк Бога жива бяше

и цари на царствие елеем мазаше.

Такожде Елисавеф с сыном сотворила,

во детстве Иоанна в пустыню пустила,

Иже бысть Предитеча Бога воплощенна

и крестил есть во воде Отцем Проявленна.

Подобне Иоаким с Анною женою

содеяста, даста бо в храм Божий дщерь свою,

Трилетную на службу Божию юницу,

предуготованную Марию Девицу,

Яже удостойся Мати Богу быти,

в целости девства Слово плотию родити.

О величия славна Богови служащих!

О чести превысоки Онаго любящих!

Въскую убо чад ваших жалеете дати

во службу Богу, зряще Его благодати?

Авраам и заклати хоте ради Бога

Исаака, за что бысть мзда ему премнога,

Ибо умножи семя без числа онаго,

елико число звезд есть и песка морскаго,

И Мессия желанный из того родися,

о Нем же сонмь всех родов ублагословися.

От вас заколения чад Богу несть требе,

но живити я хощет и вселити в небе.

Авраамля вы чада, отца подражайте,

Исааки вы вашя Богу в жертву дайте,

Не закалающе их, но в их место скота,

в тернии грехов суща, иже есть работа

Миру, плоти, демону, тоя избавляйте,

лукавыя онех нравы тощно закалайте

Ножем наставления. Тако ваша жертва

Господу жива будет, врагом душы мертва,

И благословение приимет от Бога,

о нем же имать быти вам радость премнога.

Не браните им к Богу в службу приходити,

егда во иночестве желают век жити.

Лучше есть Царю небес в службу ся вращати,

нежели царем земным присно работати.

От земных мзда земная, и та не вовеки,

от небесна — небесна на вся человеки.

Иоанн

Иоанн крести люди, сам еда крестися?

Крещен, егда посечен, кровию омыся.

Иоанн Предитеча чюдес не творил есть

Иоанн Предитеча честен жидом бяше,

всяк й пророка быти яве нарицаше.

Бе он и паче пророк, Христом похваленны,

никто болей его бе, женами рожденны,

Обаче не дал ему Бог чюдес творити.

Кая того вина есть? Леть есть известити.

Не чюдействова он, да Христос вславится,

множеством чюдодействий Бог быти явится,

Да жидове от чюдес божество в Нем знают,

не пророка, но Бога истинна познают.

Июдеи бо чюдес излиха искаху

и от Христа знамений многащи желаху.

Еже убо прилично Христу дело бяше

чюдодействия, того Бог рабу не даше.

Иоанн Богослов

Богослову святому, Христа прославлявшу

и многи ко истинней вере обращавшу

Чюдодействий множеством, муж некий смутися,

иже противен слову его сотворися,

Аристодем именем, иже балство знаше,

еже жизнь человеку скоро отьимаше.

Он убо, видев многа очима своима

от Иоанна свята чюдеса творима,

Рече ко апостолу: Человече, слыши,

иже многа чюдеса пред людми твориши,

И мнози веру емлют словеси твоему,

аз же никако хощу веру яти ему,

Разве аще то дело можеши творити,

еже аз имам тебе абие явити.

Всесилна вещаеши Христа быти Бога,

о Нем же чю до действа являеши многа.

Аще Его силою испиеши нашу

ядом исполненную, юже дам ти, чашу,

А не повредишися, Христу поклонюся,

абие христианин верный сотворися.

Услышав то, Иоанн зело весел бяше,

чашу смертную пити яве слово даше.

В то время Аристодем к судии бежаше,

должных смерти на искус отравы прошаше,

И дал пред Иоанном чаши тым испита,

да зрит, яко абие смерть им хощет быти.

Елма убо испиша, внезапу падоша

и по мале времени от яда умроша.

То зря, святый апостол ничто усумнися,

упованием в Христе Бозе утвердися.

Рече к Аристодему: Дажд ми яд сей пити,

он мне, рабу Христову, не имать вредити.

О имени Онаго смело испиваю,

тебе христианином видети желаю.

Аристодем слово си обеща хранити

и да де Иоанну чашу смертну пити,

Юже прием, апостол святый потребил есть,

очеса предстоящих на ся обратил есть,

Вси бо зреша прилежно, ждуще падения

его, и духа с плоти чисты гонзения.

Но, Богом укрепленный, нимало вредися,

паче, аки врачевством исправлен, явися.

Удивишася тому, иже предстояху,

силнаго быти Бога Христа ту познаху.

И Аристодем равно с ними удивися,

от Богослова свята чюдно победися,

Иже к тому другое чюдо приложил есть,

ибо тем же мертвыя ядом оживил есть.

Оле чюдесе, како яд не умерщвляет,

но противно естеству мертвых оживляет!

Ей, иде же Бог хощет, естество смирится,

противу природе си Богу покорится.

Един токмо человек противен бывает.

Творцу своему воли си не покоряет,

За что, оле вечная смерть ему готова,

да слушает убо всяк божественна слова.

Аще благо на Суде хощет взяти слово,

и вечное блаженство в небеси готово.

Иоанн достохвалный, от Христа почтенный,

ученик наречеся Ему возлюбленный

По превосхождению, ибо вся любяще

Христос ученики Си. яже Себе взяше.

Но Иоанну паче любовь изъявил есть.

егда на персех Своих лежати пустил есть,

И елма Матерь ему изволи вручити,

девственнику Девицу, да бы при нем жити.

Матерь Свою за матерь оному отдал есть,

Матери же во сына его преподал есть.

О превелика честь се святу Иоанну!

Но и ину он имать, от Господа данну.

Честно ему есть велми, яко сродник бяше

Богу и Человеку, Ему же служаше,

И между апостолы во честнших почтенный,

и во еваггелистех высочайш реченный.

Яко он о Христове божестве писаше,

что овеми лишенно, он миру предаше;

И мученичества честь велику приял есть,

ибо Христу при кресте сердцем сострадал есть;

И послежде в елей лютая страдаше,

егда в коноб кипящий в Риме всажден бяше;

И пророчества чести Богом сподобися,

ибо в откровении оному явися.

Что до кончины мира в людех имать быти,

он же то нам потщася книгою явити.

Бяше и архиерей Асийския страны,

в устроение Церкве от Бога посланны.

Наконец, и сын громов Христом наречеся,

а век его временный долго провлечеся,

Паче всех апостолов. Но и конец бяше

предивный его, ибо, повнегда хотяше

От временных отьити, жив во гроб вселися,

от учеников своих землею покрыся.

Но во утрий день тело в день не обретенно,

Бог весть, камо и како то бысть пренесенно.

Неции же непщуют, яко не скончася,

но жив, яко Илия, от аггелов взяся

И имать пред Судищем Христовым принта

с Енохом, с Илиею и умерщвлен быти.

Но несть се достоверно, вернее первое,

что пренесенно тело егово святое,

Амо же Бог изволи, а душа святая

преселися на небо в вечная благая,

Иде же о нас Богу ходатийство деет,

да кождо верный путем правды в небо спеет,

За что мы должни его песнми величати,

Богу, прославлшему и, хвалу возсылати.

Иов

Столп каменный, высоко стоя утверженный,

множеством бурных ветров есть непозыблемый.

Тако Иов праведный неподвижим бяше,

елма искушения лютая страдаше.

Или, яко во мори камень пребывает

недвижно, и вся волны выну разбивает,

Яже на нь безпрестанно страшно нападают,

но, того не подвигше, самы изчезают,

Тако на праведника сего нападаху

болезней бури, яже от демона бяху,

И скорбей многовидных, но ничто могоша,

от постоянства его нимало двигоша.

Паче же тыя беды его утвердиша,

терпение многое в онем возбудиша.

Чесо ради Василий его ублажает,

адамантово сердце его нарицает.

Ин же муж наковалну й уподобляет,

яко то от язв млата твердее бывает.

Тако бо и святый сей елико страдаше

более искушений, толико твердш бяше.

Чесо ради и Богом Самем ублаженны,

над вся люди, жившия в мире, похваленны,

Его же и мы хвалу выну да вещаем,

во помощь терпения в скорбех призываем.

Иов Борец пресилный в гноище седяше,

болезнми и тщетами врага побеждаше,

Им же оружием враг хоте й сразити,

в яму нетерпения и ропта свалити.

Тем он злокозненнаго дивне поразил есть,

ему срам, себе славу вечну сотворил есть.

Егда же люты язвы плотию терпяше,

тогда силен бе духом и тайны вещаше.

Не о здравии плоти слово си плодил есть,

но священныя с други глаголы множил есть,

И болнаго словеса крепка паче бяху,

нежели другов, иже телом здравствоваху.

Паче же, и сам себе дивне побеждаше,

елма мудршая болный, неже здрав, вещаше.

Боля бо телом, име дух здравый свершенно,

яко сердце не плоти в нем бе прилепленно,

Но Богу и добротам, тем же не ропташе

за немощь плоти, но глас духа глаголаше:

Да к Богу, иже дух есть, будет вознесенны,

а не бременем плоти низу низверженны.

Вы, иже болни есте, сего подражайте

мужа святаго, ропта никогда являйте.

И во тщете имений онаго смотрите

и сугубых прибытков, яко он взя, ждите.

Блажен бе Иов, егда в богатстве живяше,

ибо ни на един перст правды отступаше,

Но елма обнищал есть, блаженш проявися,

ибо искушением праведнш сотворися.

Блажен бе, егда десят чад своих видяше,

но блаженш, егда купно всех их лишен бяше,

Ибо ту постоянство свое изъявил есть,

яко паче всех сущих Господа любил есть.

Блажен бе во здравии, но блаженш в немощи,

ту бо не отчаяся в Божией помощи.

Блажен бе, живя в дому, но блаженш он был есть,

егда на гное смрадне истлевая жил есть,

Ибо, елико тело его истлеваше,

толико ся он духом в Бозе утвержаше,

Даже тако терпелив миру показая,

каков во подсолнечней муж не созерцася.

В естественном законе Иов терпеливый

терпения Христова образ бяше живый,

Иов бо, всех лишився, даже наг лежаше,

а Христос Бог риз кроме на кресте висяше.

Иов чад си любезных жалостно лишися,

Христос же апостолов Своих отщетися,

Егда во страстей время в бегство себе вдаху,

от Иудейска рода вдани бывше страху.

Иов от главы до стоп злы язвы имел есть,

и Христос точне раны всем телом терпел есть.

Иов укорения от друг си страдаше,

Христос многия хулы от Своих прияше.

Иов от жены слова страдаше худая,

Христос же от сонмицы слыша люте злая.

Иов и душею си име страдания,

скорби, страхи, печали и сетования,

И Христос во ограде душею страдаше,

елма та в Нем прискорбна даже к смерти бяше.

Иова томя демон, весь ся изнурил есть,

паче противу Христу то он сотворил есть.

Иова вси ближнии в болезни лишиша,

тожде и Христу в страсти друзи сотвориша.

Иов царь Идумейский, ли поне князь бяше,

а вся во смирении болезни терпяше.

Христос Царь царствующих всесмирен явися,

даже на древе крестом от враг умертвися.

Иов по страстех паче Богом ублажися,

Христос Господь по смерти воскрес, прославися.

Благ убо образ Иов, но образованный,

сама есмь благость Христос Господь всежеланный.

Иова яко раба Его почитаем,

Христа яко Господа всех нас прославляем,

Желающе, да и нас со Иовом Себе

вечны певцы устроит во пресветлом небе.

Иосиф

Иосиф, сын Иаковль, отцу любим бяше,

а ненависть братняя в Египт й продаше,

Иосиф же обручник Богом возлюбися,

но со Христом в Египет Иродом гонися.

Ов верность господину своему храняше,

смеситися с женою его не хотяше.

Сей Богу и Марии веру сохранил есть,

коснутися пречистей ни же помыслил есть.

Ов от Божия дар сей прия благодати,

еже сновидения право толковати.

Сей же общник небесных таинств сотворися

и во сне чрез аггела делу научися.

Ов пшеницу во пищу людем сопряташе,

сей хлеб жизни и вино радости стяжаше

Себе и всему миру. Оба превелика

Иосифа пред Богом беста человека.

Иосиф святый, обручник блаженный

Девы Марии и страж божественный.

Колики чести Богом сподобися,

ты, читателю, читая дивися.

От Иудова колена рожденный,

от рода царска в мир сей изведенный,

Деве Марии в мужа обручися,

страж девства ея Богом сотворися,

Бог бо чюдесне изволи сказати,

еже Марии его сочетати.

Жезл сух прозябе, яко Аарону,

да в сожитие чисто поймет ону.

Господа его Дева нарицаше,

о коль честь многа тогда ему бяше!

А Христос Господь отца его звал есть,

честь над вся чести тако ему дал есть.

Царица Мария его почиташе,

и Господь славы почесть воздаяше.

Может ли убо вящша слава быти,

ты, читателю, изволи судити.

Григорий святый, Богослов реченный,

словом и делом муж пресовершенный,

Сестры си мужа хотя ублажити,

изволи слово сице заключите:

Се, иже супруг Горгонии бяше,

ничто ми вящше рещи подобаше.

О Иосифе то паче вещати

нам подобает, и то глаголати:

Се муж Марии чистыя Девицы,

возлюбленныя Богу голубицы.

Се отец мнимый воплощенна Бога,

кому случися честь толико многа.

Он от своих труд Марию питаше,

во всяких нуждах преугоден бяше.

Он Царю веков верно работал есть,

егда нас деля плоть Он восприял есть.

Ту сподобися любезно лобзати,

в обьятиих честно содержати.

Несуменно же, яко божественны

многия тайны име откровенны,

Поне же толик быти сподобися,

яко Мария оному вручися.

Неции сие елма разсудиша,

вышша всех святых онаго возмнеша.

От Иоанна реша вящша быти,

яко есть болше отцем Христа слыти,

Нежели рабом. Яков бе креститель,

но сия чести весть Христос Спаситель.

Мы обу песнми честно величаем,

их ся молитвам святым поручаем.

К

Казнь

Навходоносор гордый царь Богом смирися,

из лица человеча в скотско преложися.

И Тиридат мучитель от Бога казненны,

из царя Армейскаго в вепря претворении.

Попеля краля Полска мышы нападоша,

с женою, с двома сынма на пирзе снедоша.

Валериан Canopy подножие бяше,

иже прежде на царстем престоле седяше.

Не токмо злотворшыя имать Бог казнити,

но и пренебрегшыя благая творити.

Тем же не у безбеден, иже зла гонзает,

но иже и благая дела прилагает.

По мере грехов мера казни будет,

не умалится, ни же преизбудет,

Токмо временно смертный сотворенный

грех будет вечно во аде казненный.

Оле братие, престаним грешити,

да бы нам вечно казненным не быти.

Богатый еваггелский во огни горяше,

яко имений нищым своих не даяше.

Колми паче геенна тех чает лютшая,

иже нищыя грабят, хищают чюждая.

Егда Каином Авель брат смерти предася,

братоубийца бедно по земли скитася,

Кровь бо неповинная к Богу вопияше,

Иже праведным судом ту на нь казнь послаше.

Подобне, отнели же от жидов убися

лучший Авель, Христос Бог, род жидовск казнися;

Лишен града святаго и земли святыя,

скитается, вселяся во страны чюждыя.

Кровь Христова вопиет, казнь есть на нем выну,

обаче непокорен Бога жива Сыну.

Во страсе и трепете выну пребывает

и телом, и душею вечно погибает.

Оле жестосердия! Сам, Боже, исправи,

к познанию и Сына Твоего настави.

Валериан царь Церковь Христову гони л есть,

даже Александрийский Дионисий мнил есть

Кончину век приспети, антихриста время

прежестокое на все христианско племя.

Но по немногих летех Бог врагу отдал есть,

царю Перси деку во плен онаго предал есть,

Иже, егда на коня своего вседаше,

воместо подножия того подставляше.

Тако даже до смерти оному творил есть,

а сын Галлиен отца си не искупил есть

Божиими судбами. Се казнь царю злому,

за что слава Судии буди праведному.

Злым человеком казни отпущаяй

сам есть добрыя люди убиваяй.

Аще тя изволит Господь наказати

язвами Своими, тщися не роптати,

Но целуй жезл Его, усердно смирися,

достоин тех казней быти глаголися.

Умилостивиши тем образом Бога

и будет от Него тебе милость многа.

Казнь сыну за отца

Отец некто изрядно сына воспиташе,

жене его сочетав, наследие дате.

Помале обнищав сам. нача приходити

в дом сыновей, еже бы алчбу утолити.

Питаше кратко время сын отца своего,

потом нача косвенно смотрети на него,

И ял есть бобом токмо онаго питати,

сам же сластная тайно с женою кушати.

В един день убо отец к нему прихождаше,

а он печена певня с женою ядяше.

Сын, восхитив то брашно, во скров сохранил есть,

отцу по обычаю бобы представил есть,

Иже, насыщся, иде, иде же бе требе,

а сын потщася взяти ово брашно себе.

Прииде к скрову, и се, иже сохранися

петел на снедь, во жабу страшну преложися,

И в ненасыщенныя злаго мужа очи

и на лице безстудно, неизбежно скочи,

Ему же тако силно чревом прилепися,

даже никим образом того отлучися,

И тако всескаредно на лици лежаше,

то гризущи, ядом си всего исполняше,

Даже от того яда оному умрети.

Кайтеся, не чтущии родителей дети.

Инии пишут, яко бысть ему ослаба,

за слезы прежде смерти отпаде та жаба.

Казнь тщеты и чувства

Всяк грешник две лукаве грехом сотворяет:

от величайша добра себе отвращает,

Обращается паки к вещем, подлежащим

тлению и во мале часе преходящим.

За сие двое имать казнь сугуба бити

от Господа, хотяща мирови судити.

Казнь тщеты вечна будет за отвращение,

казнь чювства — за ко тленным ся обращение.

Она отчества небес сладкаго лишает,

во нем же лик блаженных вечно почивает,

Сия нестерпимыя грешным деет муки,

преданным от Господа в демонския руки.

Она светлости славы вечныя лишает,

сия тмою вечною горце ослепляет.

Она святых дружества не дает имети,

сия творит общество с демоны терпети.

Она лица Божия отъемлет зрение,

сия страшных диавол творит видение.

Она в места прохладна внити не пущает,

сия в огнь всепалящий грешных вовергает.

Оле тщеты и муки, юже поминати

подобает комуждо, да бы не страдати!

Ибо кто в сия казни жив мыслию входит,

душею и плотию потом не приходит.

Казнь и грех

Казнь временная аще и велика,

несть, яко же грех, в досаде толика,

Грех бо Самаго Бога огорчает,

а казнь грешника к Богу наставляет.

Врачь егда сечет и кровь изливает,

задает болезнь, но тем исцеляет.

Точне, егда Бог скорби посылает,

душы спасает.

Малу врачь язву в теле содевает,

егда кровь злую из жил испущает,

но великое тем добро строится,

здравство правится.

Мала и Богом язва наносится,

егда тщетою вещей грех казнится.

Вину отъемлет греха, да душами

спасемся сами.

Казнь вечная

От всего сердца Бога должно есть любити

и заповеди Его прилежно хранити,

Ибо сынове Его есмы наречении,

егда пакибытия банею рождении.

Но увы, любовь наша прескудна бывает,

мало кто ея ради завет соблюдает;

Едва на всех страх казни токмо укрощает,

иже из сынов рабы Богу содевает.

Сынове бо за любовь отца почитают,

раби же заповеди за страх соблюдают.

Но что есть деятелно во времена злая,

егда изъсяче любы в нас совершеная?

Поне убо страх казни нас да устрашает,

заповеди хранити нужду да творяет.

Кия же казни имать Господь сотворити

нехотящым по воли Его святей жити?

Писание Святое оны изъявляет,

любовь ваша подробну тыя да читает.

Первая казнь огнь будет во веки горящий,

нестерпимыя муки грешником творящий,

Его же бы и море не могло сгасити,

аще бы все то мощно в геенну впустити.

Огнем же тамо будут грешници палени,

яко похотей огнем в мире бяху жжени.

Вторая казнь хлад будет нестерпимый зело,

проникающий душу, не точию тело.

От того хлада скрежет зубов имать быти,

на премены со огнем грешники томити.

Хлад паки того ради будет досаждати,

яко зде любве теплы небрегли держати.

Третяя казнь — червие, никогда спящее,

но вечным снедением душу мучящее.

То будет, яко в мире в сердцах ся снедаху,

егда благоденствие ближних созерцаху.

Четвертая казнь будет нестерпима смрада

от жупелнаго огня внутрь сквернаго ада.

Се же, яко во мире смрад плоти любиша,

егда в блуде прескверно лета своя жиша.

Пятая казнь — премногих язв наложение,

или разных мучений люто томление,

Еже за подчиненным творенныя муки

будет, отмстят по делом вражия им руки.

Шестая казнь тма имать престрашная быти,

в ней же вовеки веков горе будет жити.

Сия будет, яко тму греховну любиша,

елма в светлости солнца чювственнаго быша.

Седмая казнь срам велий имать в аде быти,

яко скаредства грехов не леть утаити.

Будет же, яко ради срама утаиша

в исповеди, яже зле срамная твориша.

Осмая казнь — страх лютый имать досаждати,

даже в трепете выну полма умирати

Грешным от прещения и грозы велики,

яже не скончается во вся веков веки.

Будет же, яко Божий страх преобидиша,

в жизни того временней в сердцех не храниша.

Девятая казнь будет связание вечно

огнем, яко узами, в лето безконечно

А то будет, за еже сами ся связаху

в мире страстми, и врагу в плен себе отдаху.

Последняя казнь будет, яко отлучатся

от Искупителя си, врагом предадятся.

За еже в мире сами себе отлучиша

от Христа, а демону послушливи быша.

Сия казни во уме требе содержати

желающым вечныя муки избежати,

Ибо, кто последняя часто поминает,

во веки ко Господу той не согрешает.

Казнь за сожжение нищих

Епископ Могунтийский нищих не любяше,

тунеядущы мышы оны нарицаше.

Егда же глад во стране велий сотворися,

тогда число убогих велми умножися.

Он нищененавистник скупством держим бяше,

от демона лукавый совет восприяше.

Собра нищих множество в житницу пространну,

милостину сказуя им уготованну.

Егда же собраннии от глада стеняху,

от него хлеба в пищу умилно прошаху,

Рече ко рабом своим: Се воплствуют мыши,

восхити кождо пламень, тыя да палиши.

Раби житницу с теми нищими спалиша,

веление безбожна мужа исполниша.

Но злому делу зла казнь Богом сотворися,

нечестивый епископ червми расточися,

И где-либо на стенах имя его бяше,

дивне род мышей того писмо истребляше

В знамение известно, яко бяше тое

из книг жизни истренно имя проклятое,

И душа премерзкая яко в ад вержеся,

червием неусыпным ко снеди дадеся.

От праведна Судии прав суд сотворися;

сия слышяй, ко нищым милостив творися,

Да Господь нищых милость Свою явит тебе

и питает тя хлебом жизни зде и в небе.

Казнь хулы

В еретичестей стране жена една бяше,

яже во рождении болезни страдание.

Стекошася другини, в них же бе едина,

яже чтила есть Матерь Бога Отца Сына.

Та раждающей рече: Аще ся вручиши

Деве Марии, помощь скорую узриши.

Она скверными усты хулу отригаше,

Деву чисту именем свинии назваше,

Глаголющи: Не хощу свинии призвати,

не имам ся во веки аз оней вручати.

Оле скверная уста! Что не онеместа?

Како толику хулу глаголати сместа?

Но не стерпе ей Господь буйства изреченна,

ибо блядословица тужде бысть казненна,

Ибо въместо младенца прасята родила

черная и мертвая, тем же ся явила

Сама быти свиния мерзкая душею,

и вепрь адский живяше в супружестве с нею.

Камень

Аилотроп есть камень, иже содевает,

да носяй й невидим инеми бывает.

Камень есть Христос

Чесо ради Христос Бог камень нареченный?

Хотяй вину познати, буди наставленный.

Во-первых, яко Христос есть основание,

на нем же утвердися Церковно здание.

Основания паки каменна бывают,

да на твердых здания долго пребывают.

Паки, яко же камень с высоты падает

тяготою своею и низу бывает,

Тако Христос с небесе любве тяготою

сниде на землю спасти грешную тварь Свою.

Еще, яко же камень тверд и крепок выну,

тако свойственна крепость Бога крепка Сыну.

К сим, яко же каменем Давид поразил есть

гордаго Голиафа и жизни лишил есть,

Тако от Христа Бога демон пораженны

и сверепыя силы от него лишенны.

Наконец, яко Христос во вере живущым

есть камень прибежища и в надежде сущым.

За сия вины камень Он именовася

и многими каменми предобразовася.

Его седмоочитый камень знаменаше,

о нем же Захария пророк написаше,

И на нем же Иаков патриарх лежал есть,

егда Лествицу в небо сущу созерцал есть,

Образ бе Христа Бога, кто бо почивает

на Христе, тому небо отверсто бывает.

И камень, им же Моисий древле утвердися,

егда, простер руце си. Господу молися,

О еже Исраилю укрепленну быти,

Исусу Амалика врага победити,

Христа знаменовал есть. Он бо утвержает

молящыяся люди и победы дает.

Такожде источивый камень живу воду

чрез пустыню шедшему Исраилску роду

Прообразова Христа, Иже источает

воду духовну миру и вся оживляет.

И камень разселины. во ней же стояше

Моисий, егда Божию славу созерзаше

Во мимохождении, Христа знаменал есть,

Он бо в Себе стоящым Бога зрети дал есть.

И камень, от Давида из пращи верженный,

им же Голиаф гордый бяше пораженный,

Прообразова Христа, ибо вселукава

Им пораженна бяше врага горда глава.

Еще камень скрижалей Его знаменаше,

на нем же перстом Своим Бог завет писаше.

И камень сведетелства, его же постави

Иисус Наввин, Христа образно предъяви.

Точне камень, на нем же киот Божий сташе,

егда из Филистински земли везом бяше,

И камень пособия, пророком реченный

Самуилом, во память победы ставленный,

Христа прообразиша, Киприан вещает,

иже сия образы Христу причитает.

Не прост же Христос камень, но предрагоценный,

ибо весь мир ценою Его искупленный.

Тем в чести величайшей имети И требе,

Он и венчати имать рабы Своя в небе.

Камень прибежище заяцем

Заяц морский прежде волн камень похищает,

да ся того бременем на дне утвержает,

Еже бы не мещему волнами пребыти.

Подобне и нам грешным полезно творити

Во время волнения моря мира сего,

да не постраждем л юте от волнений его.

Христос Господь есть камень, Того требе взяти

в сердца и о Нем себе благо утвержати.

Его силы бременем от волн защитимся,

от мятежа и бури безвредни явимся.

Камение из снедных

Купци у пристанища с кораблем стояху

и доволная во снедь брашна содержаху.

Пришед к ним мужь убогий, начат я просити,

еже бы милостыню ему сотворити.

Они реша: Ничто же зде сне дно имамы,

камение зде токмо, то ли тебе дамы?

Нищий абие рече: Да будет вам тако,

в камение снедное да вратится всяко.

И бысть слово то делом, ибо, яже быша

пищная, в камение вся ся претвориша,

Обаче цвет и образ вещей сохранися,

тако скупство тех купцев от Бога казнися.

Каятися

Греши л ли еси, не отчаевайся,

но скоро в слезах к Богу обращайся.

Малыя слезы всяк грех омывают,

аще от сердца умилна бывают.

Клевета

Хотяй мужу клеветну уста заградити

да тщится благочестно пред народом жити.

Аще тя сребролюбца некто нарицает,

рука ти милостину щедрую да дает.

Неблагоговейна ли тебе прозывают,

часто тя на молитве в церкви да видают.

И ина противная клеветам творити

подобает хотящым клеветы избыти.

Иже пса лающаго грядый презирает,

стужания онаго удобь избывает.

Иже паки со жезлом на него стремится,

лютее стужанием того озлобится.

Тако, иже клеветы весть пренебрегати,

ничто же от них может досадно страдати.

Сопротивляяй же ся много оскорбится,

яко противлением она разширится.

Старца Сусанну чисту клеветаста,

с юным блудившу ону глаголаста.

Жена без вины на смерть осудися,

но чрез пророка Богом свободися,

Ибо Даниил мудре испытал есть,

абие старцев клевету познал есть.

Жене добрую славу возвратил есть,

старца каменми убити судил есть.

Клеветы многи Христу наношаху

врази, обаче блудна И не зваху.

Стрела вонзенная люте досаждает

нозе грядущаго и мира не дает,

Донде же искусно извлеченней быти,

тогда бо престает досаду творити.

Точне клеветнику досада бывает

от слова держима, аще когда знает

Грех друга своего, не может держати,

нудится, да бы то и прочым сказати.

Краставый человек дерет, копысает

плоть везде пред всеми, и срама не знает.

Тако муж клеветный не может держати

от клевет языка, тщится обхуждати.

Бритва с власов скоро главу обнажает,

не скоро же ими она обрастает.

Тако клеветами скоро слава тлится,

но зело неудобь тажде возвратится.

А конечно нужда славу возвращати,

кто-либо кому есть дерзнул ю терзати.

Кто славу чужду клеветник терзает,

слышащых душы зело уязвляет,

Ибо, егда с я оному слагают,

общницы греху егову бывают.

Но речеши ми: Что имам творити,

егда сбеседник словесы хулити

Ближняго начнет? Егда утекати,

или пястию усне заграждати?

Никако, но та изволи творити,

яже хощу ти въкратце предложите.

Егда кто слово начнет глаголати,

еже обыче славу окаляти

Лиц коих-либо, кротко спротивися,

не блажяй хулы оному явися;

Или потщися прекратите слово,

в ползу сущее предложите ново;

Или печален о том покажися,

не любяй клевет лицем проявися.

Аще же мощно из собора ити,

и то полезно тебе сотворите.

Отврати ушы ко иному слову,

прояви волю, к хулам не готову.

Слух же сердечный всяко да заткнеши

несогласием, тако не преткнеши

Ноги твоея о соблазни камень,

ни опалит тя душегубный пламень,

Но сам пребыв цел, возможеши быти

и иным вползу, еже лепо жити.

Стрела в камень вонзенна никогда бывает,

но отпадши от него, иногда язвляет

Стрелца своего. Тако клевета пущенна

аще ушеса твоя обрящет каменна,

Не пронзаема ею, въспять ся обращает,

клеветника многажды самаго вреждает.

Ветр северный жестоту дожда укрощает,

лицем мрачным язык ся клеветный смиряет.

Не яви токмо лица ему ты весела,

престанет он чуждая обхуждати дела.

Козел смрадный древеса в саде огризает,

клеветник славу чюжду в людех истребляет.

Яко убо козла в сад несть требе пущати,

тако в дружество мужа клеветна взимати.

Зла стрела есть клевета, триех уязвляет,

егда ю из уст своих клеветник пущает;

Паче же многих купно, ибо всех слышащых

во сладость слово, его никако претящых.

Язвит и человека оклеветаема,

славы словесы злыми в людех лишаема.

Извит и клеветника, егда бо гаждает

он инех живот, свою душу повреждает.

Во граде превелице некто цраствоваше,

многими земли страны славно обладаше,

Ему же даде Господь супругу благую,

благочестным житием доброцветущую.

Той умыслил святая места посетити,

иде же страда Христос, поклон сотворите.

Восприем убо путь свой, странствие творяше,

а супруга во граде царственном осташе,

При ней же и брат царский, юный те лом, был есть,

иже немало время доброчинно жил есть.

Елма же прият возраст, нача сверепети

и на красная лица женская смотрети.

А зане же царица зело красна бяше,

очы своя на ону часто обращаше

И нача безвременно к оней приходите,

та же не убояся мысли си открити,

Что любовию ея велми палим бяше

и плотска сожития с оною желаше.

Царица, удивлшися безстудствию его,

не яви лица ему весело своего,

И яла есть к чистоте словом увещати,

да бы не мыслил братня ложа оскверняти.

Он, посрамлен тогда быв, печален явися

и воздержен на неко время сотворися.

Но демону палящу паки его тело,

еще дерзнул к царице приступите смело

И о нечистом деле точне глаголати,

даже не зна царица, что с ним содеяти.

Рече убо оному: Имам на пирг ити,

воеже бы ся нечто тамо утешите.

Ты мене аще тамо един предвариши,

желаемое дело удобь получиши.

Он с ра достаю и де и на пирг возшел есть,

ожидая царицы надолзе седел есть.

Она в той час Лествицу велела отьяти,

да бы не к тому дерзал словом ей стужати.

Пристави же два раба оному служите,

и две деве нуждная по вся дни носите,

Яже свыше вервием он к себе влачаше,

и сосуды вниз тем же вервием спущаше.

Тако седе целое лето и другое,

даже царь возвратися во царствие свое,

Ему же близ пришедшу, царица мыслила,

да бы честь достойную царю сотворила.

Грады, веси и пути строити веляше,

сама во стретение царское идяше

С бол яры и велможи. Но и заключенна

царска брата содея тогда свобожденна,

Иже, предварь царицу, ко царю течаше,

целование ему достойное даше.

Царь, видя брата бледа и во долгих власех,

непщева, яко болен бяше в многих часех.

Ят его о здравии плоти вопрошати,

худости и влас долгих хоте вину знати.

А зане же брат с царем наедине бяше,

на честную царицу клеветы вещаше,

Глаголя, яко: Жена не есть верна тебе,

многи прелюбодеи собрала есть себе,

С ними же ложе твое выну оскверняше,

и мене на зло дело часто увещаше.

Но бояся аз Бога, не хотех пребыти,

аще бы ми от нея и убиту быти.

Она яко по воли мене не имяше,

на пирзе мене гладом и хладом томяше.

Царь, услышав глаголы, веру брату ял есть,

царицу погубити во ум себе взял есть,

Яже о беде своей ниотчасти знаше,

во стретение царю радостно идяше,

И пришедши, смиренно ему поклонися,

лобзание подати царю приближися,

Иже, гневом палимый, ону похитил есть

за власы и о землю люто ударил есть,

Яже ели живая на земли лежаше,

ничто слышя слов мужа, ничто глаголаше.

И он в ярости блудом ону обвинил есть

и смертию казнити абие судил есть.

Призвав же рабы своя, веле восхитити

жену на колесницу, скоро овозити

В далекочюжду страну и смерти предати,

воеже бы никому о ней вести взяти.

Раби царское слово делом сотвориша,

вземше, на колесницу ону возложиша

И в далеку пустыню бедну отвезоша,

в ню же по мнозех дниех егда приидоша,

Зашедше во глубину, хотеша убити,

но сердца жену красну начаша любити.

Первие убо ону блудити хотеша,

потом же погубити волю си имеша

И, елма яша ону к земли полагати,

она к Господу яла слезы источати,

Просящи пособия, не да оживится,

но точию от злых раб да не осквернится.

Егда же паки ону нудиша лежати,

она гласом велиим яла есть кричати.

В то время некто силный близу путь течаше

и вопль, сущий в пустыни, во уши прияше.

Притек с людми, обрете борющуся жену

со скверными рабами, но не одоленну.

Мня разбойники быти, оны погубил есть,

а благочестну жену скверны свободил есть

И, зря благообразну, нача вопрошати,

да бы о случаи си хотела сказати.

Она достоинство си пред ним утаила,

да приимет во рабу, прилежно просила,

Токмо да не понудит в чистоте страдати,

а она верно во всем хоте работати.

Велможа, видев беду, то ей обещал есть

не прикоснутися ей, и с собою взял есть.

Пришед же в дом свой, жене по чину сказаше,

яко ту жену честну во рабу си взяше.

Жена, зрящи лепоту ея, удивися,

благонравию паче того почюдися.

Егда же дни доволны верно им служаше,

Божиим пособием всем любима бяше.

Князь убо со женою сына ей вручиста,

да наставляет его, яко весть, просиста.

Она того младенца тощно пествоваше,

здравие его паче своего храняше,

И о сане ни слова своем известила,

но, елико можаше, в тайне сохранила.

Присно же ко Господу молбы возсылаше,

во бдении и посте мнозе пребываше,

Ему же враг завидев, хоте спону дати,

да бы ю в супружество кому-либо взяти.

В то время в дворе князя брат его живяше,

иже воинску службу храбро совершаше.

Тому демон во сердце любовь к ней вложил есть,

иже ю в супружество прилежно просил есть.

Она всеми образы ему отрицаше,

яко в чистоте жити имать, глаголаше.

Брат княжий, разгневався, ял есть промышляти,

како бы отмщение жене той отдати.

Во едину убо нощь, егда утрудися

жена и с отрочатем спати положися,

Он во первосоние отрока заклал есть,

а ей спящей во руку нож держати дал есть.

Бедная, не знающи, что враг ей содея,

возбнувши познала нож у руки своея.

Потом кровь отрочате многу ощутила,

страшным гласом абие мног вопль сотворила.

Тогда со свещами к ней мнози притекоша,

отрока закланнаго при ней обретоша

И нож, во руце ея держимый, узреша,

ону заклавшу быти вси согласно реша.

Родители со страхом ту же прибегоша,

от жалости о сыне едва не умроша.

И враг, брат княжий, ту же абие явися,

аки не знаяй дела, на жену ярися,

Всяких мук достойную осуждая быти,

и не престаше брата к тому приводити.

Но Господь сердце его кротко сотворил есть,

о жене того дела никако мыслил есть.

Аггел Божий во сердце его полагаше,

яко онаго врага то зло дело бяше.

Тем же не хоте жены на муки отдати,

точию умысли ю за море изгнати.

К корабленником убо слезную послал есть,

в чюждых ю оставите странах приказал есть.

Они, приемше жену, за море плаваху,

а зряще жену красну, похотми горяху,

Наченше ей безстудно о том глаголати,

да бы ся не отрекла с ними пребывати.

Она яко глас змиин сей от них слышаше,

всячески неистовым себе защищаше.

Яша убо лютии плачущей претити,

яко, аще не ляжет, имут утопити.

Она рече: Убийте, или утопите,

точию плоти грешней скверны не творите.

Сквернии, елма ничто успети могоша,

на пустый остров некий ону извергоша,

По нем же она хождши, зело утрудися,

хладна сущи и гладна, спати положися.

Елма же уснула есть по молитве мнозе

с упованием целым о Господе Бозе,

Тогда Мати Божия спящей ей явися,

ея же, яко солнце, лице просветися,

И рече ей: О жено, много ты страдала,

да бы супружескую чистоту сдержала.

Отселе не имаши искусов прияти,

Бог ти имать от всех враг свободу подати.

Обида и невинность твоя проявится,

а злокознство врагов ти светло обличится.

Собери токмо траву, яже под главою,

прокаженных будеши исцеляти тою.

Тем художеством имать Бог тя прославити,

и пред лицем мужа ти здраву поставите.

Возбудившися, она зело рада бяше,

с молитвою слезною траву собираше

И рукава оною своя исполнила,

потом, во корабль вшедши, чинно усушила,

Ибо в третий час на день корабль приближися,

правлением Божиим к оней устройся.

Она корабленники яла есть просите,

да бы ю изволили в корабль свой пустите.

Они, видяще жену честну, сотвориша

милость с нею и в корабль, да плывет, впустиша.

Преплывши убо море, в град некий вступила,

прокаженна травою тамо исцелила.

Потом и ины многи тою исцеляше,

мало ея во вине пита подаяше.

Слава о ней велика везде разширися,

даже и князю тому слышати случися,

Его же брат отрока при оней заклаше,

той же враг проказою в то время боляше.

Хотя убо князь брата того исцелити,

посла рабы ту жену к себе умолити,

Яже по многих молбах в град его идяше

и в дом вниде, но никто оныя познаше.

Прием ю, князь начал есть прилежно просити,

да бы хотела брата его исцелити.

Она, Богом правима, сице глаголаше:

Исцеления дело несть то сила наша,

Бог врачь есть всемогущий, убо того требе,

да грехи своя скажет брат твой при мне тебе

И при седми послусех, тогда исцелеет,

без того врачба моя силы не имеет.

Князь брату слово ея скоро известил есть,

а на исповедь его едва увестил есть.

Собравшымся убо всем, грехи сказоваше

многи, а о убийстве сына не сказаше.

Целителница рече: Вижду тя таити

грех некий, того ради не могу целити.

Князь брата всеприлежно нача увещати,

да бы, ничто же тая, потщался сказати.

Видя же, яко болный страхом держим бяше,

аще бы на нь смерть мыслил, сказати веляше,

С клятвою обет дея, что имать простити,

о отмщении злобы никогда мыслити.

Тогда веру ем, болный нача воздыхати

и многия из очес слезы изливати.

С покаянием сердца грех свой изъявил есть,

яко он княжа сына иногда убил есть,

Отмщая кормилице, юже он любяще,

а она в супружество с онем не идяше.

Сей глагол князь услышав, зело умилися,

изгнания честныя жены прослезися.

Жаль бе сына умерша, но одолеваше

жаль, яко невинную жену он изгнаше.

Поплакав же час некий, просил есть от жены,

да бы брат, аще и враг, был у исцеленны.

Она по обычаю вином напоила

с травою и абие целбу сотворила.

Вси, возрадовавшеся, жену ту блажиша,

но о изгнанней жене умилно тужиша.

Она же им рекла есть: Печаль отложите,

аз — изгнанная вами, Бога восхвалите,

Яко чрез мене грешну целбу сотворил есть,

здраву мя на ту вашу нужду возвратил есть.

Князь со женою слышав, зело веселися,

да с нима пребывает, прилежно молися.

Многая ей богатства радостно даяху,

исцеленному да есть супруга, прошаху.

Но она рече: Несть леть того ми творити,

еще бо ми далече подобает ити.

И почивши ту нечто, в путь свой запустися,

от князя же ей почесть многа сотворися.

Даров от них прияти никаких хотяше,

но целениём болных в пути ся питаше,

И прииде во град свой, в нем же обитала,

но яко бе царица, никому сказала.

И тамо убо болных премного целяше,

даже глас ушес царских о ней дохождаше.

А в то время брат оный, ю оклеветавый,

близ смерти проказою бе изнемогавый.

Посла убо царь скоро жену пригласити,

да бы брата недуга того свободити.

Целебница, пришедши, недуга смотряше

и о исцелении надежду творяше,

Аще токмо изволит вся грехи явити

пред царем, яже ему случися творити,

Пред архиерем же и пред всем сигклитом,

и нетяжка бысть царю тем она советом.

Царь убо рече брату вся грехи сказати,

нимало и о смертных страха содержати.

Собранным убо бывшым, грехи сказоваше,

но иже о царице, во сердце держаше.

Целебница рекла есть: Нечто ты таиши,

от моего врачевства целбы не влучиши.

Царь прилежно ят брата о сем увещати,

да бы не боялся всех грехов си сказати.

Тогда он рече, слезы из очес пущая:

Оле, беззакония моя суть тяжкая!

Аз невинну царицу разлучих с тобою,

о царю, яко она не пребысть со мною.

Аз окаянный ону умышлях прелстити,

а она никако же хоте блуд творити.

Моею клеветою она погубленна,

се великая злоба моя всем явленна.

Царь, услышав, ят себе за власы терзати,

по лицу бити: Увы! Увы! глаголати,

Како аз без вопроса дерзнух осудити,

тако чистую жену живота лишити?

О горе мне бедному, имам ответ дати,

от Царя небеснаго казнь люту прията.

Сицевая прогласив, к брату обратися,

о гресе и болезни его умилися

И, плакався доволно, к целящей вещаше:

Потщися исцелити, се брат вся сказаше.

Она дала есть траву ему с вином пита,

и абие в здравие нача приходити,

И по мале времени весь здрав сотворися,

о нем же царь с боляры радостен явися.

Но слезы радость его полма преплетаху,

о невинной царице из очес течаху,

Что и боляре зряще, умилно седеша,

о той же во печали превелицей беша.

То видящи, царица слез не удержаше,

но, яко струи воды, из очес точаше.

Егда же вины тех слез от нея прошаху,

от словес ю царицу бывшую познаху,

Поряду бо вся сказа, яже с нею быша.

Царь, егда ты глаголы от нея услыша,

Нападе ей на выю, нача лобызати,

прощения за грех свой, иже к ней, желати,

И в веселии мнозе хоте ю пояти

с собою, яко прежде, с нею обитати.

Царь во супругу ону себе приимаше,

сигклит ю за царицу имети хотяше.

Но она к епископу слово обратила:

Веждь, отче, яко обет в скорбех сотворила,

Еже не к тому мужа до кончины знати,

но в иночестем чине Богу работати.

Аще убо обет сей ты мой разрешиши,

аз не буду виновна, ты же да узриши,

Бог истяжет от Тебе за мене ответа,

за злопреступление моего обета.

Аще ся человеком угоден явиши,

всяко разрешением Бога огорчиши.

То слышав архиерей, обет утвердил есть,

иноческия ризы на ню возложил есть.

И тако до конца си Богу работаше,

Его же пособием сохраненна бяше

От скверны и от смерти, купно Матерь Бога

Марию прославляше за благая многа,

Яже ей, в беде бывшей, матерски явила,

егда траву сказавши целбы научила.

О жены предоблия! Коль много терпяше

чистоты ради? А Бог ону соблюдаше.

Тако всем женам требе доблетвенным быти

и во нуждах чистоту невредну хранити,

Паче нестерпимую смерть себе избрати,

неже осквернению плоть свою предати.

Клеветати себе грех есть

Елма ся смиряеши, не буди ти лгати,

неправедныя грехи на ся извещати,

Не согрешив бо делом, словом согрешиши,

егда клеветник тебе сам ся сотвориши.

Зло — друга клеветати, недобро и себе,

убо ни же похвали, ни клевещи тебе.

Клеветник

Василиск свистанием птицы убивает,

клеветник словом живот славы истребляет.

Губителство грады пусты содевает,

клевета же славу благу умерщвляет.

Пса беста во граде нужда есть убити,

яко той когождо тщится уязвити.

Клеветника требе есть поне смиряти,

да престанет славу благих муж терзати.

Клевещуща тай други Давид изгоняше;

вси в ласте лини, знайте сие дело ваше.

Вран из ковчега Ноем испутися,

па де на трупы, а не возвратися;

Из трупа смрадна на ин прелеташе

и кривоострым носом я терзаше.

Тако клеветник обыче делати,

грех, аки трупы, ближних усмотряти;

Изобрет того, миру проявляти,

много неправды к тому прилагата.

И тако блжиних си славу терзает,

но, яко вран ов, и он погибает,

Вран бо во водах он бысть утопленны,

клеветник в огни будет погруженны.

Вран птица скверна, яко труп терзает

и тем свой гладный стомах насыщает.

Скверней того есть, иже живо тело

благия славы весть терзати смело,

Или мертвыя из гробов копати,

хулны глаголы на тыя вещати.

Песня муха на трупах седает,

здравому телу не тако стужает.

Точне клеветник грехами пасется,

от благостынь же далече несется.

Что в ближнем тленно, то всем изъявляет,

а что есть цело, то и утаяет.

Петель ногами обыче копати

землю и пищи в ней себе искати,

И аще злату цату ископает,

со молчанием ону презирает;

А случит ли ся червя ископати.

кричит и тщится кокоши призвати.

Равне клеветник доброты честныя

презренны имать, что цаты златыя,

А черви грехов аще усмотряет,

всякое око зрети призывает.

О злобы люты, яже таителна

явленна творит, таит явителна!

Клирик

Клирос толком есть Жребий, от сего речении

клирици, иже Богу в службу отлучении,

Аки бы рещи, яко они жребий Его,

или жребий си имут Господа своего.

Но аще Бог их жребий, или они Ему,

должни суть угождати Господу своему

Преподобным житием, да обдержат Бога

и обдержатся Богом за благая многа.

Ключь

Ключи царствия Христос Петрови вручил есть,

не Иоанну, аще зело й любил есть,

Яко Иоанн святый греха не знаяше

и жесток быти грешным казнию можаше.

Петр же бываше грешен, тем же сострадати

ведяше согрешившым, и удобь прощати.

Четыри ключы Бог Себе спрятает,

их же, где хощет, Сам употребляет.

Первый ключь — жизни и чад рождения,

та от Его суть благословения.

Вторый ключь — дожда, той бо низпущает

от сокровищ их, егда изволяет.

Третий ключь, им же землю отверзает

и плоды в пищю людем испущает.

Четвертый — гробов, то бо Его дело,

еже мертвое оживити тело.

Держит Он сия, да ся мы смиряет

и с молитвами к Нему притекаем.

Ключа два злата в небесна врата

Христос небо отверзе, егда пострадаше

человечеством, дея спасение наше.

Крест Его честный ключем леть есть нарицати,

яко действием того в небо леть вхож дати.

Но и комуждо от нас мощно ключь имети

в небо, в нем же свободно Бога в лице зрети.

Паче же и два ключа удобно стяжати,

егда благоволит Бог помощь Свою дати.

Первый ключь может быти любы божественна,

елма ся в чием сердце родит совершенна,

Та же есть — целым сердцем Бога возлюбити

Его ради Самаго, над вся Его чтити,

Яко Он безчисленно любве есть достоин,

даже в сравнении с Ним ничто и никто ин.

Ни вся купно достойна тако в любви быти,

яже изволил в мире Сам Он сотворити.

Елижды убо сице кто возлюбит Бога,

согрешения его аще зело многа

И излиха велика, Господь вся прощает,

сия любы множество грехов покривает.

Хотяй же словом любовь к Богу показати

глаголы сия к Богу да тщится пущати:

О Человеколюбче Боже всех живущих,

Тебе люблю всем сердцем, паче везде сущих.

Тебе от всея душы и от силы всея

люблю, Боже, Ты еси цель душы моея.

Твоя повеления хощу совершати

Твоею помощию, а грехов гонзати.

То всетвердо во воли моей полагаю,

а не ину во уме вину представляю,

Точию безмерную Твою благостыню,

совершенство, премудрость, дивную святыню,

Или Тебе Самаго, в мире и в небеси

суща, Ты всея любве всех достоин еси,

Боже Отче и Сыне и Душе Святейший,

Троице Святая, Творче всяческих добрейший.

Вторый ключъ ко небеси есть сокрушение

сердце право за всяко грехов творение.

То паки есть, егда кто грехи разсуждает

и болезнь за ня в сердце своем возбуждает,

Или жалость усердну, рад бы тому быти,

да бы не хотел онех никогда творити.

Се же не того ради, яко отщетится

неба, или вечною казнию казнится,

Но яко греси Богу мерзостни бывают

и Его величеству люте досаждают,

Иже за Свою благость, сущу безконечну,

достоин, да честь, славу, любовь творим вечну.

Сице в нас творяй своя грехи истребляет,

сый готов, да ся в свой час тех исповедает.

Хотяй же усты сердца стрение явити,

да тщится моление сицево творити:

Господи Иисусе Христе Боже правый,

с Отцем и с Духом Святым все, что есть, создавый,

Из недр Отческих прежде всех веков рожденный,

под леты из Марии Девы проявленный,

Его же величие красоты, блаженства

без меры превосходит вся твари свершенства,

Боже безконечныя мудрости, благости,

Источниче всяких благ, щедрот и милости,

Творче, Искупителю мой, мене создавый,

И Сам Себе за мене на страсти предавый,

На страсти, яже к смерти, смерти же крестныя,

о любве великия, любве предивныя!

Се аз раб Твой люблю Тя паче твари всея

от всего сердца, душы и мысли моея.

Радуюся о силе Твоей безконечней,

о преизяществе Ти и благости вечней.

Весма того желаю, да Тя вся тварь знает

умная, вечно благость Твою почитает.

Даждь ми, Боже, да могу Тебе угодити,

любовь мою ко Тебе делесы явити,

Да их же воля Твоя дел от нас желает,

та воля совершенне моя исполняет.

Ей Господи, люблю Тя и хощу любити

паче, нежели весь мир, и неже ми жити.

Даждь, да тем совершенством любовь имам к Тебе,

яко аггели любят Тя святии в небе,

И яко вси святии Тя любят в небеси,

Ты бо всякия любве вседостоин еси.

А зане же Тя люблю толико велико,

каюся всем ми сердцем, святый мой Владыко,

Яко дерзах грехами Тебе огорчати,

Тебе преблага Бога мало почитати,

Внегда творити ми та, яже мерзка Тебе,

их же не припущает Твое сердце к себе.

Каюся безконечно, хотел бым не быти

тым, яже пред Тобою дерзнух согрешите.

О кто ми слез источник горких может дати,

да бы ми моя злобы достойне рыдати?

Отныне предлагаю в сердци ся храните,

неугодных дел Тебе никогда творити,

Но вся по Твоей воли, Христе, содевати,

точию Ты изволи пособие дати,

Яко ничто без Тебе благое бывает,

вся благая благодать Твоя содевает,

А что-либо без Тебе человек сотворит,

то не есть во жизнь душе, но, яко зло, морит.

О гресех же, доселе содеянных мною,

всеистинно каюся, Боже, пред Тобою.

Имам волю отцу я духовну явити,

да бы мя он изволил от тех разрешити.

Епитемию, юже разеудит ми дати,

потщуся с жалостию сердца содержати.

Точию помози ми. Боже, та творити,

дерзаю Тя, Христе мой, аз грешник молити.

Днесь в довлетворение за грехи премноги

не имам, что Ти пожру, человек убогий.

Саму убо кровь Твою, за мя излианну.

жру Ти, приими ону в жертву преизбранну.

Точне заслуги Твоя, яже безконечны,

приими в жертву сладку, Христе Боже вечны.

Еще отдаю Тебе век жизни моея,

что благо в нем, содею с милости Твоея,

И аще что постражду за имя святое

Твое, Христе, приими все во жертву тое.

Уповаю же твердо, яко благость Твоя

непобедимая вся простих грехи моя

Язв ради восприятых и крове святыя,

мене ради нещадно из ран точенныя,

И яко смерти ради на кресте Твоея

послеши ми благодать милости Своея,

Да возмогу житие мое исправити,

отселе до кончины в Твоей воли жити,

От суетствий житейских очи отвращати,

Тебе Самому сердце мое прилепляти.

О дажд то, Христе Боже, молбы дею Тебе,

да в мире тако живу, яко живут в небе

Раби Твои святии, всегда Ти служяще,

непрестанно пением Тя сладким хваляще

С безначалным Ти Отцем и со Параклитом,

Духом Всебожественным во вся веки веком.

Клятва

Авва некто злат перстень у себе храняше,

он же врана питенна в келию впущаше,

Иже по обычаю си перстень он взял есть

и во жилище своем онаго спрятал есть.

Авва по неколицем времени искаше

в келии си перстеня, но не обреташе.

Вопрошаше братию и работны люди,

но безполезни бяху вси онаго труди.

Тем же на гнев подвигся, клятву испустил есть

на того, кто злат перстень его восхитил есть.

Вран от того времене нача сосыхати

и перие из крилу своею пущати,

Весма ко издшению уже приближися.

Тогда некто из житель вины домыслися,

Иде с други ко гнезду, перстеня искаше

и, обрет его тамо, Авве глаголаше,

Да, взем свой перстень, клятву изволит решити,

ту бо вину недуга птицы позна быти.

Авва, прием перстень си, прощение даше,

вран же исправлятися оттоле начаше

И помале прииде во здравие благо;

се, что клятва можаше на врана чернаго.

Сотвори Бог се чюдо, а не клятва тая,

не имать бо та силы на несмысленная,

Но да бы человеком клятвы ся бояти,

яже оны есть силна и небес лишати.

Клятва во лжу

Купец некто богатый во граде живяше,

но, расточив богатство, зело обнищаше.

Сей, пришед к жидовину, у него просил есть

взаим сребра на куплю. Жид не отвратил есть

Лица от просящаго, токмо ему рече:

Даждь ми залог на сребро, добрый человече.

Купец отвеща ему: Не имам, что дати,

но споручника дам та, ты изволи взяти,

Споручника же велми честна и благаго

дам Николая тебе, отца пресвятаго.

Жидовин рече: Слышу того мужа быти

праведна, ни обыкша никого же л стати;

Споручению его хощу веру яти

и тебе взаим сребра, яко требе, дати.

Совещавшася убо, в монастырь идоста,

в храм свята Николая оба приидоста,

И внегда пред образом его има стати,

купец он христианин ял есть глаголати:

Олтарь, пред ним же стою, и отца святаго

Николая даю ти яко праведнаго

Споручника за сребро, яко ти воздати

имам в день нареченный, а никако лгати.

Жид на глаголы сия сребра ему дал есть,

он тем благополучно куплю содеял есть.

Пособием Божиим богат сотворися,

скоро нужда нищеты бывшия забыся.

Пришедшу же дни, во нь же долг нужда воздати,

моли купец ов жида, еже еще ждати.

Жид трикраты оному время продолжаше,

а он в сердци лукавый умысл соблюдаше.

Напоследок, егда жид оному стужал есть,

он со клятвами рече, яко долг отдал есть.

Жидовин пред судии онаго призваше

и суда правдиваго на лживца прошаше.

Судии жидовина судом оправдиша,

да купец сребро отдаст, чинно присудиша,

Или да клятву деет, яко долг отдал есть.

Он сие средство, точне и жид, восприял есть.

В день убо уреченный мнози ся стекоша,

с купцем и с жид овином в монастырь и дота.

Купец же злокозненный жезл свой издолбаше

и во нь цену во злате за долг вложил бяше.

Егда убо нужда бе клятву содеяти,

дал купец жидовину жезл свой подержати,

Да тако правда будет, яко отдал ему

яко взаимъдателю, что должен, своему.

Жидовин жезл со златом в руках си держаше,

о козни купца того ни же помышляше.

Оному жезл держащу, клятву сотворил есть

купец пред Николаем, люте согрешил есть.

По клятве паки жезл свой от жида прияше,

тако не во лже клятву быти непщеваше,

И с многим веселием в дом свой возвратися,

но недолго о лести своей веселися,

Ибо жид он к святому рече Николаю:

Рабе Божий, аз тебе споручника знаю.

Не лживому аз купцу ях веру, но тебе,

буди убо прав ныне, воздаждь, еже требе.

А в то время купец той в дом ся возвращаше

и, на пути быв, тяжким сном одолен бяше,

Его же не претерпев, спати положися

на распутай, ничто того устранися.

Тогда же колесницу волове тягнуша

тяжку зело, и спяща мужа не минуша.

Нашедше на нь, бременем лестца умертвиша

и жезл, при нем лежавший, с златом сокрушиша.

Он окаянно издше, злато источися,

то видети путником многим прилучися,

Иже судиям града вестно сотвориша.

Тии, пришедше к трупу, зело ся дивиша

Скорой мести Божией, и злато то взяша,

жиду, тамо жь притекшу, все цело отдаша.

Жид абие в монастырь путь скорый приял есть,

святому Николаю благодарство дал есть,

Глаголя: Отче правый, благодарю тебе,

яко правду сотворил во моей потребе.

От споручения ты ныне свобожденный,

ибо долг ми тобою цело возращенный.

Имам тя яко раба аз Господня чтити

и правдотворение повсюду славити.

Аще же ину милость можеши явити,

со всем аз домом имам христианин быти.

Аще того мертвеца жива сотвориши,

во Христа мя верити чюдом наставиши.

Сия ему изрекшу, люди приидоша,

о востании мертва вести принесоша.

По них и сам оживый, с многими слезами

пришед, паде святому отцу пред ногами,

Пред образом онаго усердно рыдая,

прощения лжеклятвы от Бога желая.

Плакав доволно, с жидом онем примирися,

о лукавом деле си яве обличися.

Жид, тем чюдодействием бывый удивленны,

потщася со всем домом си быти крещенны.

И тако единаго мужа падение

другому устройся Богом в спасение,

Иже убо, яко же в жидовстве тверд бяше,

тако во христианстве доблестно живяше,

Имея в защитника Николая себе,

ему ся поручая во всяцей потребе.

Книга

Иероним блаженный зело книжен бяше,

но и Еллински книги любезно читаше.

Единою от Бога болезнь на нь пустися,

и даже к смерти плотстей уже приближися,

И бысть в восторзе страшном, показася ему,

аки уже представлен Судии своему.

От Него же вопрошен бяше: Ты кто еси?

Коего муж закона, да Ми исповеси.

Он же ответ сотвори: Аз есмь христианин.

Судяй рече: Лжеши, се кикерониянин

Ты еси, зане книги Кикерони чтеши

паче христианских, тем казнь да приимеши.

И веле его бичми добре наказати,

да бы на теле язвы возможно считати.

Служителие убо язвы наложиша,

а инии молитву о нем сотвориша.

И бысть помилованны, во плоть отпустися,

и абие, яко же от сна, возбудися,

Но страха преисполнен, на теле язвенны,

аки по хребте бичми оными сеченны.

Оттоле преста книги Еллински читати

и ятся христианским тощно прилежати.

Сам о себе святый муж сия извещает,

да никто паче святых книг ины читает.

О аще толь святый муж тако наказася,

чесо грешный человек имать ждати на ся?

Лучше убо, братие, святым прилежати,

а ины книги разве с потребы читати.

Различны книги нам суть Богом предложены,

да благонравно жити будем наученны.

Первая книга — мир сей, в ней же написася,

что-либо от всемощна Господа создася.

То же мы писание в то время читаем,

егда от твари Творца силу познаваем,

И егда, строение всяческих видяще,

величаем Строяща, премудрость хваляще,

И егда всех доволство нуждных созерцаем,

за то благость Дателя славно прославляем.

Вторая книга перстом Божим начертася,

егда писанный закон Моисием предася

Роду Исраилскому, сия поучаше,

како богоугодно жити подобаше.

А зане же ту токмо един род читал есть

и во добродетелех мало успевал есть,

Третия всеизрядна всем Книга дадеся,

живая, всекрасная с небес принесеся.

Та есть Иисус Христос, в Нем же написанно,

что яве усты Его миру бе вещанно.

Всяких добродетелей учаше свершенства,

да будем причастници вечнаго блаженства.

Сию книгу полезно людие читают,

иже словеса Его делом совершают

И образу жития Его подобятся,

да снаследници Христу быти сподобятся.

Четвертая есть книга Девица Мария,

в ней же добродетели писаны всякия,

Яже кто житием си тщится подражати,

той сию книгу святу умеет читати.

В ней и превечно Слово, перстом написанно

Отчим, во спасение всем людем есть дано,

Его же слова аще кто не почитает,

яко зверь безсловесный, неба не познает.

Пятая книга — совесть, комуждо свойственна,

яже ныне пред людми лежит заключенна,

Но на Всестрашном Суде она отключится

и всему миру, да чтет, яве предложится.

О блажен, иже пишет ныне в ней благая!

Горе же тому люто, кто чертает злая!

Благ бо за писание благих ублажится,

а злый за злая во огнь вечный осудится.

О братие, потщимся благая писати,

да бы Богом блаженство вечное прияти.

Не пишим же лукавых, да бы посрамленным

не быти пред всем миром, и в огнь воверженным.

Шестая книга — тайна, Сам ту Бог читает,

Церковь книгу живота ону нарицает,

В памяти же Божией выну содержится.

О блажен муж, иже в ней написан явится,

Пишут бо ся имена в ней Богом избранных,

на вечную жизнь в небо предуготованных.

Обаче и инии пишеми бывают,

иже в благодати суть, потом же падают.

Сии начинателно, а не совершенне

написани бывают в книзе божественне.

А до смерти живущих в Своей благодати

совершенно изволил Бог в ней написати.

Мы, братие, потщимся совершенно жити,

да можем совершенно написани быти

В той книзе божественной, яже изъявится,

егда кождо на воздух правый восхитится

Во стретение Христа, грядуща судити,

в их же сонме даруй нам, Христе Боже, быти.

Езекиилю книгу во снедь аггел дате,

та во устех мед сладкий, в чреве горка бяше.

Образ книг еваггелских аз непщую быти,

ты бо душу в начале силны усладити

Словом сотоподобным, потом огорчают,

егда в покаяние горкое въправляют.

Но вслед тоя горести вечна идет сладость,

по временней печали — безконечна радость.

Книга жизни

Во книзе животней кто несть написанны,

в езеро огненно той будет посланны.

Книга и молитва

Негли некто желает, что есть лучше, знати:

молитися Господу, ли книги читати?

Августин отвещает: Чрез молитву многу

мы благоговейную беседуем к Богу,

А егда Писание Святое читаем,

Бога к нам глаголюща быти познаваем.

Благо убо молитву к Богу возсылати,

добро и Писание Священно читати.

Козли, иже зли

В стаде Христове суть овцы благия,

обрящеши в нем и козлищи злыя,

Яко в ковчезе Ноеве держими

зверие быша добрии со злыми.

Ныне суть купно, но вся разделятся,

егда от добрых злии отлучатся

На казнь вечную, ови же во славу

на Суде Страшном вознесут си главу.

Козлищи во снедь аду предадятся,

овцы во оград небесный вселятся.

Кто же козел есть, мощно познавати,

егда и от свойств будем разсуждати.

Козлом обычай чрез забор скакати

и во оградех древа огризати.

Забор есть закон, кто й преступает —

козел, и древа правил зле снедает.

Паки козлищи люте смрадны телы,

грешници смердят скаредными делы.

Козлищь из паствы на ину бегает,

грешник из греха во грехи падает.

Козлищем мал есть обычай глашати,

грешник молитвы не рад возсылати.

На козле власы к земли обращении,

грешных сердц мысли земным прелеплены.

Козли рогами людей нападают,

грешници тако ж ближним досаждают.

Яве убо есть тыя козлы быти,

иже во гресех любят присно жити,

Иже на Страшнем Суде возмездятся,

демоном в руце творцы предадятся

Вечную муку за тыя страдати,

Горе и увы, выну воплствовати.

Кознь

Вран человека рода кознь вымышляет,

ими же человеки различно прелщает,

Отводя от дел благих, ко злым же скланяя,

да бы не вселитися им в места святая.

Кокош

Кокош Себе Христос Бог мысленну прозваше

и нас птенцы под крыле Свое собираше.

Днесь, яко кокош гласы различныя дает,

егда птенцы на нужды различны глашает,

Инако под криле си, ко пищи инако,

от ястреба блюстися ин глас дает всяко,

Тако Он различными гласы ны глашает,

яко же различныя нужды быти знает.

Зовет некия люди благотворением,

иныя чрез печали, ины явлением,

Словом некия токмо, а жезлом иныя,

наказанием злыя, чрез милость благия.

Конец

Живый благо обычно благо умирает,

а злому Бог благия кончины не дает.

Конец жизни

Не леть есть человеку без болезни быти,

егда приидет время жизнь си окончити,

Ибо то с болезнию бывает лишенно,

еже со любовию в жизни бе снабденно.

Во-первых же, богатства, ах, жаль оставляти,

яже бяше велия радость содержати,

Чесо ради писано: О смерти лютая,

коль горка память твоя, зело не любая

Человеку, имущу в мире имения,

не чающу от Тебе скора хищения!

Паки жалость возмутит хотяща умрети,

яко жаль оставити супругу и дети,

Вся сродники ближния, вся благия други

и работу явлшыя доброверно слуги.

В то время ум помыслит: Ах, смерть не прощает,

от всем любимец моих, увы, разлучает!

Наконец, жалость многа имать исполнити

сердце, яко от него хощет отходити

Друг вселюбезный душа, яже оживляше

и вся делеса купно с плотию деяние.

Отьидет же далече Богу слово дати,

а за делеса почесть или казнь прияти.

Само же тело имать в землю ся вселити,

истлению данное, червем пища быти.

Оле изменения! Кто не умилится,

како человек на две части разделится?

Сие комуждо верных поминати требе,

да бы соединшуся вечно жити в небе,

Егда тело душею будет возживленно

и пред грозным Судием на Суд поставленно.

Елма человек в конце живота бывает,

о коль печаль велика тогда нападает!

Готуется Судии Страшному предстати

и о всех делех жизни слово Ему дати.

Трепещет душа бедна, ум ся ужасает,

яко изречения будуща не знает.

Видит путь пред собою, а камо пристати

имать, то не дается и отчасти знати.

Знает, яко смерть плоти — вечности начало,

но коея случится, не знает и мало.

Из единыя страны, надежда велика

о спасении, яко щедр небес Владыка.

От другия страх велий люте ужасает,

егда на грехи своя совесть возглядает.

Тако в среде надежды и страха сумнится,

не знающи, на кую страну обратится.

Тогда же искуситель потщится стужати,

да бы на конце жизни надежду отьяти.

Премногими образы натужит сводити,

воеже бы ко злобы изволу прел стати.

Сия временно помни, к смерти готовися,

всяк человече верный, благ быти потщися,

Да надежда нетщетна твоя может быти,

а страх тя не возможет вконец возмутити.

На искусителя же лук да налячеши

молитвы горячия, тако убиеши

Стрелою говеинства врага вселукава,

и попрана тобою будет его глава.

Тоя победы верно аз желаю тебе,

да торжество дееши вечно в светлом небе.

Конец дело блажит

Не иже нача благо, совершен бывает,

но добре совершивый, той ся ублажает.

Благо нача Иуда, но люте скончася,

предав бо на смерть Христа, сам смерти предася.

Зло начало бе Савла, но добр конец взяше,

ибо из гонителя всех учитель бяше.

Ов от Христа в геенну огненну вселися,

сей от сонмища во рай светлый водворися.

Начало благо в делех надежду раждает,

но множицею она при конце прелщает.

Добре Савл начаше, но в конце падеся,

Иуда со Христом бе, но в ад низвержеся.

Конец убо всякое дело ублажает,

аще благ и по злобном начале бывает.

Савл бе гонитель верных и свереп творися,

но в Павла апостола потом преложися,

Иже тако угоден бысть Церкви и Богу,

даже во век имети хвалу ему многу.

Конца зрети

Егда хощеши дело начинати,

конец первее требе разсуждати.

Корень грехов

Христос в мире явися дела раздрушити,

яже демон лукавый тщася насадити.

Тех же три суть корени, яко поминает,

его же Богослова Церковь нарицает.

Глаголя: Все, что в мире, есть похоть плотская,

или гордость живота и похоть очная.

Похоть плоти есть любовь сладостных те леей,

вторая — любы богатств, приятных очеси,

Гордость паки живота — чести любление,

на сих нуждна секира есть посечение

На три корени троя. Тыя Христос взял есть,

егда на Себе тело наше восприял есть.

На сладости те лесе — горко страдание,

еже терпел есть чрез все в мире витание.

На любовь богатств скудость изволил прияти,

благоволив в нищете весь век пребывати.

На гордость же живота прият смирение

чрез во вертепе худом Свое рождение,

Се же образ дая нам, да корени злыя

сечем, аки секирми, чрез доброты сия.

Кощун

Кощунник некий князю глаголаше,

егда он ратно в чюждая идяше:

Княже великий, тощно ты мыслиши,

како чуждую землю всю ему тиши.

Но вижду, мало ум твой помышляет,

возвратитися како подобает.

А то первее достоит мыслити,

како бы цело в дом ся возвратити.

Два кощунника купно долго время жиста,

и смехотворством сребро у людей ловиста.

Един, омерзив себе живот свой прелестный,

обратися Божиим званием на десный.

От виде во пустыню и в яму вселися,

и не малое время тамо потрудися.

Друг же, о нем жалея, прилежно искаше,

от различных человек о нем вопрошаше.

Та же уведев, и де и нача й звати,

да ся возвратит паки с ним кощунствовати.

Он же на путь спасенный его увещаше,

да друг будет во слезах, яко в гресех бяше.

Но ничто здравый совет на нем успеваше,

тем же друг благий в мир с ним ити слово даше

И, изшед из ямы си, нача путствовати,

мало же отшед, ял есть аки сетовати.

Увы, рече, друже мой, сребра забых взяти,

еже тщахся от щедрот муж добрих собрати.

Возвратимся, молю тя, и вспять отьидота.

Елма же над оную яму приидоша,

Рече затворник другу: Брате, в яму слези,

да возмеши со чпагом сущия пенези.

Соизволша вервию в яму низпустил есть,

вервь восхитив, каменем яму надвалил есть

И глаголаше ему: Брате, потрудися,

общник покаяния ты мне сотворися.

И тако затворенна надолзе держаше,

а сам о нем Господа прилежно моляше,

Да от жестосердия в мягкость преложится

и друг в покаянии ему сотворится.

Ов же, долго ярився, уже й моляше,

обаче из вертепа испущен не бяше.

По некоем времени нача помышляти,

яко лучше волею о гресех рыдати.

Ятся покаяния, и друга просил есть

о нуждных, яже ему друг тощно носил есть.

И обык, во затворе волею седяше,

и друг другу своему до кончины бяше.

Светилник да светит, огнем ся снедает,

кощунник да тешит, сам ся изнуряет.

Иже кощуннодеем дары умножает,

не ино, токмо жертву демонови дает,

Иероним глаголет, убо не блюдите

кощуннодеев, паче нищыя храните;

За сих бо питание будете блаженни,

за овех держание — от Бога суждении.

Иже кощунства деет, тать любый бывает,

ибо любим есть людем, а он украдает

Время, Богом данное на дела святая,

за что ожидает и казнь свыше лютая.

Красота

Аще тя красота лиц чуждых прелщает,

помяни, какова по смерти бывает:

Гной, смрад, червие из тех лиц родится,

разсуди ж, что с грехом тобою любится.

Елма тя прелщает бисер красотою,

мысль, яко вода бе, мещема водою.

Аще злато, сребро кого прилуждает,

яко земля бяше и есть, то да знает.

Риза шелковая аще ти любится,

помни, шелк из червя скаредна родится,

Яко паук задом шелк он испущает,

а твой ум красоты от того желает.

Срамися красоты оттуду искати,

где тоя естество не восхоте дати.

Не шелком и златом кож до красен буди,

но добродетелми, ублажат тя люди.

Крины селны Господь зело ублажает,

красот Соломоних паче похваляет.

Но како истинно? Не ли царь имяше

светлокрасных одежд? Не ли в тех сияше?

Бе царь светлокрасен, но не потолику,

яко цвети имут красоту велику,

В цветех бо природна красота сияет,

в ризах притворная очесем блистает.

Во кринех цвет живый, в ризах — умерщвленный,

тем же ов над сего Христом вознесенный.

Блага воня в кринех от Бога бывает,

а царь чу жду себе во сладость общает.

Цвета красоты Сам Господь устроитель,

ризам же художник умный притворитель.

По сим убо винам крини ублажении,

паче Соломони красоты почтении.

Красоты плоти премнози желают

и ту в блаженство себе воменяют,

Но малу ползу аз в ней созерзаю,

множицею же и вред познаваю.

Прекрасен лицем Авесолом бяше,

все тело его порока не знаше,

Но горд бе в сердцы, скареден душею,

двигл брань на отца кознию своею.

Оскверни ложе и яти искаше,

но благий Господь злу не помогаше.

Паче ими же власы он гордися,

теми во ветвех дуба усилися,

Богу казнящу, и бысть прободенны

треми копиими, злый зле истребленны.

Где же толико красный погребеся?

В яму глубоку тело вовержеся

И камением многим наметанно,

да никогда же будет созерцано.

Оле измены! Вчера вси любиша

красоту его, днесь же истребиша.

Тленно благо красота, недолго блистает,

в един час огневица ону истребляет.

Многим красота лица погибель родила,

купно душы с плотию смертно повредила.

Зря во зерцало, аще красна тебе зриши,

точне дела красная в мире да твориши,

Красная бо прекрасным дела подобают,

скаредная же душу и плоть погубляют.

Аще паки некрасно лице ти у зриши,

ту красотою нравов скудость да пол ниши.

Тако красен будеши, и во красном небе

красота превечная даруется тебе.

Лице видя красное, твари не дивися,

но Давшему красоту хвалу дати тщися.

Яко же цветов преходит лепота,

тако избранных отроков красота.

Красота бедственна

Красоту плоти мощно нарицати

липом душевным, ибо уловляти

Ея есть свойство, кто бо засмотрится

на ея светлость, скоро прилепится

Сердцем, и трудно изьятися может,

аще Господь Бог кому не поможет.

Аммон, первенец царя и пророка,

не отвратил есть от Фамари ока,

Абие сердцем липу прилепися

и, яко птенец, уловлен явися.

Забы заповедь Бога всемогуща,

забы и бедства, оттуду идуща.

Не помянул есть на близкое сродство,

ни на гнев отчий, впаде во юродство.

Лицемерствова немощь в себе быти,

проси, да Фамарь внидет снедь варити.

Отец сынови то соизволяет,

пророк сыновня коварства не знает.

Веле Фамаре брата присетити,

снедию от рук своих покрепити.

Вниде девица и послуговаше,

не знающи, что брат о ней мышляше.

Принесе брашно, он ю похитил есть

и. яко чюжду, брат сестру растлил есть.

Оле страшнаго в чадех царских дела!

Прииде в девстве, отьиде нецела.

Грех, срам, зла слава оттуду родися,

братоубийство к тому приложися.

Авесолом бо срам сестры отмстити

потщався, веле Аммона убити.

Призвал есть на пир, но зле учредил есть,

за девство сестры кровь братню пролил есть.

Се, что красоты ради сотворися,

всяк на ню зрети прилежно блюдися.

Зряше на Сарру Авимелех красну

и впал в казнь бяше от Бога напрасну.

Пентефриева жена тако ж зряше

на Иосифа, и огнь возжигаше

В сердце си и в нем безстыдна явися,

а целомудрый бегством избавися

Греха скаредна, но оклеветанный,

всажден в темницу и бе окованный,

Донде же Господь изволи изъяти

и весь Египет ему в руце дати.

Еще Сусанны красота телесна

лиши два старца разума словесна,

Аже, похотна ко Сусанне бывша,

но чисты жены никако прелстивша,

Клевету на ню люту нанесоста,

но камением сама погибоста.

Наконец, Давид коль люте душею

красоты ради язвен бысть своею?

Бысть, Вирсавии тело свое мыти,

царю же тамо очи обратити.

Елма узре ю, абие язвися,

прелюбодейства помыслом сложися,

И что умысли, сотворил есть делом,

тако царь красным победися телом.

Прогнева Бога, душу си убил есть,

благодати бо Господни лишил есть.

Тому прибави Урия убити,

ко злобе злобу вящшу приложити.

Се, что красота в мире содевает,

кождо во уме си да разсуждает

И да сотворит совет со очима,

еже не зрети долго красных има,

Яко же Иов праведный творяше,

зеницы от дев присно отвращаше.

Красота плоти

Иде же древле град Содомск стояше,

Мертвое море ту землю обьяше.

Близ того брегов древа возрастают,

яже плод зело красный прозябают

И светлый видом, но егда рукою

отторгнет й кто, губит светлость свою.

Смрад нестерпимый извнутрь испущает

и, яко пепел, с дымом изсыпает.

Тако красота человека грешна

появствуется быти нам утешна,

Любезна, светла, но егда острою

смерть посечет ю своею косою,

Во прах и в пепел и в смрад ся вращает,

мерзска в очесех и страшна бывает.

Красоты краткость

В свитцех священных прекрасныя жены

от древ и цветов имены реченны,

Фамар от финик, от крина Сусанна,

Есфир от мирры есть именованна.

Красных имены вещей нареченны,

но тайный разум тем есть залюченны.

Аз помышляю сию вину быти,

хощет ны Божий Дух тем научити,

Яко подобне скоро изчезает

красота плоти, як цвет увядает,

И яко древо есень обножает,

тако красоту недуг изтребляет.

Воправду убо образ прописася

в тыкве Ионы, яже зготовася

В кратце времени, мало утешаше,

об нощь едину изтребленна бяше.

Точне бо плоти цвет ны утешает,

вомале явлся, вскоре оцветает.

Крест

Во древних вецех мерзость древо креста бяше,

яко злодеев онем суд правый казняше.

Ныне же Христианом честь есть превелика,

отнеле же бе на нем небесе Владыка.

Древле иже на кресте за злобы висяху,

проклята от закона Господня бываху.

Ныне кто знамением тем ся знаменает,

благословен от Бога всещедра бывает.

Древле смерть телесная на кресте бываше,

днесь же крестом бысть честным спасение наше.

Безчисленна благая крест нам содевает,

ибо от заблуждений душы свобождает.

Крест седевшыя во тме смертней просветил есть,

праотцы из заклепов адских свободил есть.

Крестом честным работы есмы избавлени

и во свободу вечну Христом воведени.

Иже от Бога грехи удалени быхом,

ныне к Его милости тем ся приближихом.

Странници бывше, ныне гражданство стяжахом

небеснаго Сиона и честь восприяхом.

Крест честный супостатов есть погубление,

всех благих сокровище, верных спасение,

Утвержение мира, Лествица небесна,

ею же путь стяжа си в небо тварь словесна.

Креста ради не будет в невеждестве жити,

правду на нем Распятый изволил явити.

Несмы уже вне царства вечнаго вменени,

тем бо соуди наши в то суть воведени.

Огненных стрел демонских не боимся к тому,

источник бо дадеся жизни Церкве дому.

Ни же ужасаемся днесь волка хищнаго,

крест бо нам есть, яко жезл Пастыря добраго,

На нь же демон не смеет оком возглядати,

яко тма от солнца, тем нудится гонзати.

Не боимся тиранна, крест святый имуще,

небесна Царя вой его ради суще.

Тем же любезно святый крест мы почитаем,

распята на нем песнми Христа величаем.

Крест Господень всемирну ползу лепо звати,

ибо небо и землю може ползовати.

Премирным веселие онем содеяся,

земным паки свобода от уз даровася.

Противная действием креста примиренна

средством волныя страсти Христа божественна.

Бог, изменяяй нечестное блато

во вещь драгую, во светлое злато,

Вещь нечестную во честь преложил есть,

крестное древо свято сотворил есть.

То орудие древле смерти бяше,

и кто бе злодей, на кресте висяше,

Но егда Христос Господь на нь вступил есть,

нам орудие жизни сотворил есть.

Всех Благодетель егда пригвоздися

кресту, тогда крест благ миру явися,

Тогда бо греси мира изстреблени,

кровию Христа вси мы иску плени.

Егда Христос Бог на кресте простреся,

тогда человек небеси дадеся.

Враг же лукавый силы есть лишенный

и ад всемрачный Христом разоренный.

Всем спасаемым крест бысть спасение,

плененным душам в рай воведение.

Демон и иже раби его быша,

тем спасения себе не влучиша

За злобу свою, а кто обратися

от злобы к Христу, с благими вменися.

Разбойник умный, иже глаголаше

благо ко Христу, светлый рай прияше.

Безумный паки, яко И хулил есть,

по казни крестной адску заслужил есть.

Благий разбойник одесную бяше,

за десно слово десная прияше

И знаменает, яко имут стати

одесну Христа и десная взяти

На Суде Страшном, иже содевают

десная, яже Богу угождают.

Злый же разбойник шуию держал есть,

шуия изрек, шуйцу восприял есть

И знаменает, яко имут быти

в шуией стране, шуия влучити

На Страшном Суде, иже содевают

шуия, яже Богу досаждают.

Благих убо крест спасение деет,

буй муж спастися и тем не успеет.

Нам крест в похвалу и во славу буди,

им же крест буйство, да погибнут люди.

Крест есть ложе

Господне мирстии елма почивают

в день, идут на ложа си, окна затворяют.

Точне Господь всяческих изволи творити,

елма по трудех мнозех восхоте почити,

Ибо от юности Си во трудех Он бяше,

егда о спасении нашем промышляше.

В самой дне половине, в год часа шестаго

иде спати на ложе креста пречестнаго.

Тогда окна небесе затворенна бяху,

ибо солнце и луна свет свой сопрятаху,

И уснул есть Господь наш, да бы всем почити,

их же не престаяше враг лютый трудити

Работою тяжкою. Егда же лежаше

на том ложи, не един токмо почиваше,

Но два беста в едином ложе; един взяся,

еже страсти терпети, другий же остася,

Сиречь, человечество на кресте страдало,

божеству не причастну страстем ни же мало.

О коль твердый покой Твой бяше, Христе Боже,

егда крестное Тебе избрал еси ложе!

Да мы на мягких ложах вечно веселимся,

елма силою креста на небе вселимся.

Что же за милость Твою имамы воз дати?

Потщимся страсти Твоя присно величати.

Креста знамение

Знамения крестнаго демони гонзают,

яко тем побеждени быша, поминают.

Подобне яко же пес. жезл узрев. гонзает,

им же биенны бяше, стати не дерзает.

Еще крестное знамя имать силу многу,

аще знаменаяйся верен есть ко Богу.

Елма бо с усердием той ся знаменает,

заслуги Распятаго в помощь призывает,

Их же лукавый демон не может терпети,

бежит знамене крестна, не дерзая зрети.

Наконец, яко Христос Бог изволил дати

крест нам за оружие врага побеждати,

Тем же и невернии неции страшиша

демоны тем знаменем, елма сотвориша.

Иулиан, демоны узрев, прекрестися,

и абие враг лестных зрак прогнан явися.

Жид, в капище нощевавш, крестом оградися,

тем от демонов лютых нимало вредися.

Он, познав силу креста, ко Церкви бежаше,

известив виденное, христианин бяше.

О даждь, Христе, всем жидом силу креста знати,

крещение святое любезно прията.

Крестообразное благословение

В креста образ Иаков руце прелагаше,

благословение си егда подаяше

Манасию с Ефремом, убо непщевати

мощно, яко и Христос изволи подати,

Отходя, крестовидно благословение

апостолом, такожде прочым в спасение.

Кресты три

Три кресты на Голгофе водружении бяху

и триех повешенных на себе держаху:

На едином Христос Бог, спасение наше,

на другом благоумный разбойник висяше,

На третем разбойник же, но ума лишенный,

от шуия при кресте страны повешенный.

Крест Христов есть похвала христинаску роду,

крест умна разбойника введе й в породу.

Крест, иже ошуию водруженный бяше,

бысть во страмоту тому, кто на нем висяше.

На первом вины праздный казнен прославися,

на втором казнен винный, но Христом простися,

На третем бе за вину судом повешенный,

а за хулу и в вечну муку осужденный.

Ныне казнь всяка может крест ся нарицати,

но коему есть точна, подобает знати.

Терпяй во невинности или за истинну

есть на Христовом кресте, и свят воистинну,

А кто страждет за вину и ту возвещает,

суд за ону поданый праведен глашает,

И терпит сокрушенно, с десным повешенны

разбойником казнь страждет, будет же спасенны.

Наконец, иже за грех праведно казнится,

а, не каяся, к хулам правды обратится,

Со шуим разбойником телом исчезает

с ним же и душею си в аде погибает.

Три кресты на Голгофе во един час бяху,

егда нечестивии Господа распяху,

Но велие разнствие между ими бяше

по взгляду лице, еже на кресте висяше.

Первый крест Христа Бога тамо водрузися,

к нему же Он плотию от враг пригвоздися.

Вторый крест — разбойника, одесную бывша:

Помяни мя. Господи, ко Христу вестивша.

Третий крест — разбойничь же, но иже висяше

ошуию Христови и буйство вещаше.

Во кресте Христа Бога хвала есть велика,

яко на оном спасе падша человека.

Во кресте разбойника, одесну распята,

бяше утешение от Христа всесвята.

В кресте же разбойника, шуию державша,

посрамление и смерть хулы глаголавша.

Во первом вины кроме казнь лютая бяше,

но той слава велия послежде идяше.

Во втором за вину казнь право сотворися,

но исповедь вина послежде простися.

В третием за вину же казнь бе сотворенна,

но не каявшагося яви осужденна.

Тым крестом кресты наши точни могут быти,

аще потщимся дело добре разсудите.

Аще кто в невинности страждет дручение,

со Христом крест свой нося, имать хваление.

Иже паки, за вину казнимый, ся кает,

хваля суд, с разбойником десным крест двизает.

Аще же винный казни суд и казнь хухнает,

с шуим крест нося, и зде, и в век погибает.

Крещение

Егда во крещении дети погружаем,

во гресе потопленны быти извещаем.

Елма же изьемлются из воды святыя,

свободны знаменаем греха быти тыя.

Крещаемый во воде погружен бывает

трижды, тридневную смерть Христову являет.

Изгружается паки кроме вреждения,

знаменая, что Христос встал без истления.

Да весть же. яко Христу бяше спогребенны,

смертию Его смерти вечны избавленны.

Нееман Сирианин проказу страдаше,

врачевства всеприлежно на ону искаше.

Не обрет же в Сирии, съниде в Иудею

целбы ради проказы ко Иелисею,

Его же велением повнегда омыся

во Иорданстей реце, благоисцелися.

Плоти прежде бывшая доброта вращенна

водою и пророка словом божественна.

Равне род человеческ проказу терпяще

греха первороднаго и скареден бяше,

Ни же обрете врачбы, токмо в Йордане

мысленном с словом Христа в Иудейстей стране.

Еже есть в крещении, Христом уставленном,

в очистилище наших душ пребожественном.

В том бо егда человек омывает тело,

душа чиста бывает и здрава всецело.

Христос всем креститися верным завестил есть;

кто же апостолы и Марию крестил есть?

Святый Евводий, иже по Петре седяше

в Антиохии, сице в книзе написаше:

Христос едину из жен Сам крестил есть,

из муж Сам же едина Петра погрузил есть.

Петром Андрей, Иаков, Иоанн крещени,

прочий ученици сими омовени.

Кто водою и Духом Святым не крестится,

той в царство небесное никако вселится,

Сама рече Истинна. Обаче неции

без крещения в небе бывают святии,

Мнози бо, не крещшеся, за Христа страдаша,

и веруем, яко мзду небесну прияша.

Сие да разрешится, знати подобает,

трегубо крещение Церковь познавает.

Таинственное в первых, Духом и водою,

еже узаконил есть Христос Бог Собою.

Второе есть кровию, егда кто познает

истинна Бога и за Нь душу полагает.

Тому излияние крове воменится

во крещения место, и в небо вселится.

Третие желанием обыче бывати,

егда кто крещение желает прията,

А препятия ради онаго лишится,

той за крещенна мужа от Бога вменится.

Иоанн крещение во водах творил есть,

каятися о гресех народы учил есть,

И точию то лице во водах крещаше,

еже злая дела си ему извещаше.

Христос паки Спаситель никогда сгрешил есть:

чесо ради рабом Си в водах Ся крестил есть?

Сего дела мудрии седмь вин обретают,

яже с я зде во ползу верных полагают.

Первая вина того, да Им крещение

Иоанново возмет Си ублажение.

Втора, да Им закона правда исполнится,

еже иным завеща, Самем да творится.

За сию обрезася, в церковь принесеся

и пасха законная от Него ядеся.

Третяя — смирения образ нам явил есть,

егда Ся рабом Своим Господь Сый крестил есть.

Четверта, — да бы водам силу тако дати,

еже крещаемыя от грех очищати.

Пятая, — да бы видом голубим явити,

на крестимыя Духа Свята низходити.

Шестая, — да бы никто дерзнул глаголати

от силных крещения нужде не лежати,

Аще бо Царь всех царей и Бог Сый крестися,

кто крещения нужды свободен явися?

Седмая — крещением Своим то являет,

яко кто-либо онем отрожден бывает

Богу в Сына, той Ему уже брат творится,

убо всяк чада своя крестити да тщится.

Не медлите крестити, ибо пребывает

в братстве демонем чадо, даже ся крещает.

Крещением всесвятым того свободится,

ибо грех первородный в то время решится.

Крещение кощуна

Елма Диоклетиан тиранн царствоваше,

началник смехотворцев Генесий живяше,

Иже, хотя кесарю утеху творити,

умысли из церковных таинств смех явити.

Содея позорище, болен притворися,

лег на одре, и аки к смерти приближися.

Призва сокощунники, всмех нача просити

привести иерея, да бы ся крестити,

И кощунно словеса сия глаголание:

Увы мне, велми тяжко чюю тело наше.

Сокощунници реша: Како тя легчити?

Еда теслами тело имамы тончити?

Ту смеху бывшу многу, Господь посетил есть,

притворно болевша сердце просветил есть,

Иже не всмех, но вправду ял есть глаголати:

Безумнии, за Христа хощу умирати.

Вскую? глаголют ему. Он же отвещает:

Да беглец мира буду, душа ми желает.

Кесарь, сия услышав, во смех разрешися,

весел о кощунстве их народу явися.

Тогда же презвитера к нему приведоша,

и с ним заклинателя, а егда взидоша

На позорище сии, яша вопрошати

Генесия, по что я изволи призвати?

Он не к тому кощунно, но вправду вещает:

Благодати Христовы сердце ми желает,

Да крещением святым духовно рождуся,

от беззаконий моих лютых очищуся.

Елма же чин таинства они совершиша

и одежды белыя на него взложиша,

Тогда от воев восмех бяше похищении,

да подобием верных будет удрученны.

И представися царю, еже судим быти,

како повелит его во посмех казнити.

Но на лжемучение бывый приведный,

ко исповеданию праву обращенный,

Взлез на высоко место, где кумир стояще

Афродиты скверныя, сице глаголаше:

Царю, со всем народом изволи слушати,

слово душеполезно хощу вам сказати.

Аз имя христианско ненаведех зело

и гоних христианы, скорбих и бих смело,

Ругах ся им и народ тщахся подущати,

еже им пребытия мирна не даяти.

Родители с родници в ненависти быша

моей, яко во Христа Господа вериша.

Испытовах прилежно о тайнех и чинех

Церкве, не да верую, но в поганских сынех

Да смехи из тех дею, ругание строю,

яко и ныне, царю, тщахся пред тобою.

Но егда крещения омыт есть водою,

видех руку Божию свыше надо мною.

Егда рех аз: Верую, аггел ми явися

с огненным мечем, дух мой того устрашися,

Ибо вся дела моя злая, яже мною

содеянна суть в мире чрез всю юность мою,

Явил ми есть во книзе, а с ним мнози быша,

иже за злобы моя люте ми претиша

И реша: Вода сия вся та очищает,

аще кто покаянно в ней ся омывает.

Аз же в покаянии тогда тщахся быти,

егда мя кощунници имеша крестити.

Елма же окрестихся, видех омовенны

вся грехи моя, книги белы сотворенны,

Даже ни знамению писания быти,

и познах, яко Бог мя изволил простити.

И тако угодити, царю, хотя тебе,

угоден бых Цареви, живущему в небе.

Егда тщахся, людие, смех вам сотворити.

Бог ми даде аггелом в веселие быти.

Ныне убо, о царю, купно и вы, люди,

приимите совет мой, к тому вам не буди

Гонити христианы, но то сотворите,

еже мене сотворша днесь пред вами зрите.

Веруйте в Христа Бога, яко Он спасает

крестящыяся, от грех чисто омывает.

Просвещает же душы и хощет воздати

верующым истинно в небе царствовати.

То царь слышав, излиха гневом распаленны,

веле, да вси кощуни будут зле биении.

Тии клятву на Христа абие рекоша,

Генесия самаго на муки дадоша.

Того царь веле бити, игемону дал есть,

иже жрети идолом того увещал есть,

А яко не послуша, различне дручил есть

и нестерпимым огнем жестоце палил есть.

Страдалец рече ему: Аще приложиши

в стократ муки, от Христа мене не прелстиши.

В устех и в сердце Того аз хощу имети,

аще бы ми вся раны во веки терпети.

Сия царю сказаша, он веле убити

страстотерпца Христова, жития лишити.

Лиши убо временна, но он в жизнь вселися

вечну и венцем славы в небе украсися.

Се зле наченший дело благое творити

от Бога сподоблен есть добре совершите.

Крила имети

Орел птенцев из гнезда си не испущает

летати и ловите, донели же знает

Во крылех гноевито перие им быти,

ждет, дон де же возмогут добре ся вкрилити.

Не пущает и Христос Господь гной имущих

грехов смертных во славу благ вечно будущих,

Донде же тую скверну потщатся сложите,

верою и делесы благокрилни быти.

Крило

Крилами орел высоко летает,

нам же летети в небо подобает.

Нужда крил убо: та же веси, кая?

Вера добрая и дела благая.

Кровь

Мучеников святых кровь семя Церкве бяше,

ибо, поелику та из них изтекаше,

Потолику вернии умножени бяху

и охотнее на страсть за Христа течаху.

Иже елей на пламень горящь возливают,

не угошают того, паче возжигают.

Тако мучителие христиан творяху,

егда кровь христианску нещадно лияху,

Ибо пламене веры в них не угасиша,

но паче в многих сердцах тако возпалиша.

Крокодил

Крокодилу аще труп обрести случится,

по естеству на онем богато слезится,

Не за умиление, но труп обливает,

яко от слез во трупе кость ся сокрушает,

А он мозгом пасетъся, из костей текущим,

ему во сладчайшыя место пищы сущым.

Сему змию подобии человеци ови,

иже по сродницех си плаката готови,

Не от болезни сердца, но плачь притворяют,

а в деле самом смерти скорыя желают,

Да наследие богатств возмогут прията,

аки мозгом, несытство свое насыщати.

Кроткоглаголание

Кротко о тебе слово умей глаголати,

иныя паче себе тщися похваляти.

Тако похвалу от всех тебе получиши,

пред Богом благ, пред людми честен ся явиши.

Кротость

Врачь, иже легко язвы осязает,

от врачюемых похвален бывает.

Точне, кто язвы душевны врачюет

духом кротости, благ ся именует.

Врачь, имеяй гнилыя уды отсецати,

не помышляет сердца гневом исполняти,

Но паче кротостию дело совершает,

да хитростию в деле благоуспевает.

Тако и врачь духовый, раны устрабляяй,

буди кротость сердечну делу соблюдаяй,

Да не како гнев ума возможет мрачити,

еже паче потребы винныя смирити.

Крепкодушие

Хотяй велие дело добре совершити

да тщится без унылства крепкодушен быти.

Крепость же душевная в триех ся являет,

той мужествен речется, кто та соблюдает.

Во-первых, хотяй дело трудное начати

крепостно да потщится к тому приступа™.

Второе, начен дело, терпети да тщится,

аще что сопротивно и тяжко случится.

Третие, во обою постоянну быти

достоит хотящему дело совершити.

В первом сих подложений той оскудевает,

кто дело от дне до дне свое отлагает

И кто, в путь посылаем, лва глаголет быти

на пути, иже хощет онаго убити.

Во втором той есть скуден, иже, прием рало,

зрит воспять, трудитися не хотя и мало,

И кто, на время верив, скоро отпадает,

егда искушение ему ся случает,

Не разсуждая, яко Сам Христос страдал есть,

аще согрешения ни едина знал есть.

Колми нам паче грешным должно есть страдати,

обыкшым множицею люте согрешати.

Во третем, скудость имать, иже свое дело

и нача во гнусности, и деет несмело.

Кто, начен созидати дом, не совершает,

но о безумии си всем в посмех бывает.

Сицевых оскудений ты, чтый, опасися,

в крепости душы дела совершати тщися,

Да не в поругание зрящым тя впадеши,

но, яко же исполин, путь делес течеши.

Крепость

Крепость Божию имя Гавриил являет,

крепкаго Бога быти Христа знаменает,

Его же зачатие благовествовал есть,

егда: Радуйся, Деве Марии вещал есть.

О воистинну крепкий Бог Христос во веки,

ибо, победив ада, отьят человеки,

И смерть непобежденну Он Сам победил есть

смертию Си, а люди смертны оживил есть.

И служителство идол Им есть истребленно,

благочестие паки в мире насажденно.

Напоследок, имать Он крепость Си явити,

егда приидет живым и мертвым судити.

Тогда бо мечем уст Си имать поразити,

яко скуделы, жезлом железным крушити,

Вся нечествовавшыя и огню предати,

еже во веки муки лютыя страдати.

О святый крепкий Боже, тех нас Ты избави,

ныне на пути Твоя живот наш направи,

Да страшнаго меча Ти тогда не страшимся,

но с угодившими Ти в небо водворимся.

Мира питомцы крепость ублажают

и тоя телу своему желают,

Мняще ту нечто божественно быти,

и ею хотят выну ся хвалити.

Но прелщаются желанием ея,

ибо не имать твердости своея.

Днесь кому служит, утро же гонзает,

лвов борца червем во снедь полагает.

Помяни кождо, каков Сампсон бяше,

тысящу врагов един убивает,

Но того жена едина прелстила,

власы остригши, врагом й пленила.

И тако бедник очию лишися,

камень вращати жернов приставися.

И Голиафа леть есть поминати,

иже бе страшен Исраилстей рати,

Яко в час, во нь же зверски разгордися,

малым Давидом из пращи убися.

весма немощно того глаголати,

что крепость вконец имать пребывати,

Ибо, яко день по дни убывает,

тако и крепость в людех погибает,

Наипаче лета свершенна имущих,

и ко старости веком си грядущих.

Есть же многажды извет злодеяний

и неполезных в себе упований,

Ибо нелепо крепции дерзают,

на силу свою бедне уповают.

Кротониатский Милон то содея,

держа надежду крепости своея.

Руки ударом телца убиваше,

тогожде мясо в един день снедаше.

Ему случися в путь ити ед ину,

не быти же с ним спутнику ину.

Узре пень, клины въдвое разцепленный,

но не до конца в жилах ослабленный.

Дерзнул рукама онаго терзати,

да силу свою возможет познати.

Пня раздираше, клини испадоша,

а его руце во пни увязоша.

Ослабе силник, пособия ждаше,

но всуе всюду очи обращаше.

Никто же приспе помощь ему дати,

ту нужда бяше люте пострадати,

Ибо зверие люти притекоша,

Милона бедна до костей снедоша.

Зрите вы убо, како его сила

паче надежды бедника прелстила,

И в силах ваших не преуповайте,

но всю надежду в Бозе полагайте,

А Он даст силу, елика есть требе,

и ветвь победы восприяти в небе.

Асаил в ногах силен зело бяше,

с еленми равно бегати можаше,

Но на зло свое, ибо, егда гнаше

он Авенира и яти желаше,

Копием его воспять убиенны,

тако своею силою прелщенны.

Плотская крепость мужа не спасает,

егда душевный враг на нь нападает,

Но крепость духа требе есть стяжати,

та бо есть сил на врага сокрушати.

А плоти немощь полезна бывает,

ибо тогда дух крепость проявляет.

Купецтво

Чин купецкий без греха едва может быти,

на многи бо я злобы враг обыче лстити.

Изряднее лакомство в купцех обитает,

еже в многия грехи оны убеждает.

Во-первых, всякий купец усердно желает,

малоценно да купит, драго да продает.

Грех же есть велий драгость велию творити,

малый прибыток леть есть без греха строити.

Вторый грех в купцех часто есть лживое слово,

еже ближняго в вещех прелстити готово.

Третий есть клятва во лжу, а та умноженна

паче песка, на брезе морстем положенна.

Четвертый грех татбою излише бывает,

та же в мире в мерилех часто ся свершает,

Ибо они купуют во меру велику,

а внегда продаяти, ставят не толику.

Инии, аще меру и праву имеют,

но неправо мерити вся вещы умеют.

Инии хитростию вещы отягчают,

мочаще я, неции худыя мешают.

А вся сия без греха немощна суть быти,

яко Бог возбраняет сих лукавств творити.

Пятый есть грех, неции лихоимства деют,

егда цену болшити за время умеют,

Елма бо мзды чрез время неко ожидают,

тогда цену вящшую в куплях поставляют.

Шестый грех, — егда куплю являют благую,

потом лестно ставляют ину, вещь худую.

Седмый грех, — яко порок вещы сокрывают,

вещь худую за добру купующым дают.

Осмый, — яко темная места устрояют,

да худыми куплями ближния прелщают,

Да во темности порок купли не у зрится,

и тако давый сребро в купли да прелстится.

О сынове тмы люты, что сия творите?

Летяще ближния вашы, сами ся морите.

В тму кромешную за тму будете ввержени,

от света присносущна вечно отлучени.

Отложите дела тмы. во свете ходите,

да взидете на небо, небесно живите.

Купина

Виде Моисий купину, на горе горящу

огнем, но сожжения онем не терпящу.

Купина есть Мария, огнем же горяше,

егда огнь суща Бога в ложеснах ношаше,

Но никако тем огнем она опалися,

ибо и по рождестве цела сохранися.

Купина, яже огнем не опална бяше,

по писмени Еврейск род томим знаменаше,

Обаче, яко скорбми непобедим будущь,

но цел благодатию Вышняго пребудущь,

Еже во самом деле послежде явися,

егда из Египетска рабства свободися.

Духовным же разумом сие изьявляше,

яко в целости девства родити хотяше

Дева Мария Бога Слова воплощенна,

огнем светлогорящым произображенна,

Бог бо огнь поядаяй есть именованны,

а цвет девства от Него несть тлению данны,

Ибо прежде рождества пребысть Мати цела,

и в рождестве не бысть вред пречистаго тела,

И по рождестве равне бе Мати нетленна,

ибо и зача без тли Сына божественна.

Не по естеству сие дело совершися,

но паче обычая Богом устройся.

Купля

Всяк драго купли хощет си про дати,

малоценно же иныя стяжяти,

Да бы прибыток от вещей имети,

тем же питати и жену, и дети.

Но прибытку лесть враг примесил есть,

на удицу то пищу возложил есть.

Прибыток пища, лесть уда бывает,

хищаяй пищу тою ся хищает.

И едва мощно кроме лести быти,

иде же нужда продати, купити.

Зде душа туне продана бывает,

ибо многажды купец согрешает.

Цату едину хотя пристяжати,

нудится бедник стократы солгати.

Кленется во лжу, купли изменяет,

доброе хулит, худо ублажает.

Иде же вред есть, таит, яко может,

да желанию прибытка поможет.

О зла прибытка! Кто бо его любит,

конечно душу его ради губит.

Что же в измену за ню может быти?

Всеми богатствы несть леть искусити

От огня вечна, егда осужденна

будет от Христа, и во нь воверженна.

Уне есть убо без прибытков быти,

неже души си их сих ради губити.

Правду во торзе, купче, да храниши,

словом и делом никого да лстиши.

Ей, ей и ни, ни с куплею да будет,

лучше та, аще и мало прибудет

При святей правде, нежели премнога

прижитая зла с гневом права Бога,

Ибо малое то благословится,

еже с правдою приплодотворится.

Во великое богатство возрастает,

яко Сам оно Господь умножает.

Л

Лакомство

Аще кто море могл бы все испити,

жажды никако могл бы утолити,

Несть бо в нем свойство ону утоляти,

но горесть люту и немощь раждати.

Сладкия воды есть искати требе

хотящу жажду угасити в себе.

Точне, аще кто и весь мир обьимет,

сердцу лакомства никако отьимет,

Но болше скорбей с богатствы прибудет

и безпрестанно тех искати будет.

Александр Велий миром обладаше,

а еще миров инех вопрошаше.

Не мира убо требе нам искати,

но Изволивша онаго создати.

Той един сердце может исполнити,

жажду душевну весма утолити.

Екклисиаст богатство немощь именует,

яко всяк негли богачь выну недугует

Болезнию лакомства, яже всего томит

держателя си, мучит, разелабляет, ломит.

Мучатся богатии, во-первых, главою,

ибо выну печални пребывают тою.

Безчисленными мыелми ону удручают,

да выну злато, сребро в ковчег прилагают.

Дручатся промыслами, како я щадити,

да бы сохраненнаго нимало изжита.

Еще и очима си тии болезнуют,

иже лакомо злато сокровиществуют,

Не могут бо оныма на нищих взглядати,

воеже бы просящым ничесо же дати,

Яко богачь Лазаря никогда смотряше,

иже пред домом его при вратех лежаше.

Не дугу ют и слухом, не могут слушати,

обыкоша ушеса своя отвращати

От просящих милости, всуе стенание

пред ними пущается и воздыхание.

Не слышат гласа сирых и вдовство терпящих,

ни вредами тлеющих, на гнои лежащих.

Едино речение На могут слышати,

а еже Дай, во уши не любят впущати.

Умеют же добре Дай усты прорицати,

а еже На, никогда хотят глаголати.

Оле болезни, злыя творящыя глухи

люди, неврежденныя имущыя слухи!

Неду жни и гортанем, тому бо хуждшая

пищь дают, а за сребро продают лучшая.

Паче ковчеги любят богатством полнити,

нежели чрево свое благоучредити.

Болезнуют и сердцем, то бо озябает,

егда в ковчезе с хладным златом пребывает.

Не в теплых персех сердца их суть утверженна,

но с сокровищем, увы, многим погребенна.

Недужны имут руки, пребедно согбенны,

на даяние нищим зело разслабленны.

Томит болезнь и ноги, ибо ты не знают

во дни, в нощы покоя, но всегда бегают

По всем путем, еже бы прибыток имети.

О коль много лакомым нужда бед терпети!

Дипсас змий всегда жаждет, и им усеченный

никогда может быти в жажде утоленный,

Но пиет тако много, даже расторжется.

Подобне с человеком лакомым деется,

Его же бо то мужа в сердце уязвляет,

неутолиму жажду сребра в нем раждает.

Течет сребро, он пиет. ни хощет престати,

дон де же смерть приидет его растерзати.

Делвы диравы несть леть водою налита,

мужа паки лакома златом насытите.

Муж лакомый огневи весма подобится,

огнь бо дровами, а ов златом не сытится.

Вран егда пищу себе обретает,

лакомо чрево свое насыщает,

прочее тщится в землю закопати,

впред соблюдати.

Но то инии звери обретают,

и алчбу чрева брашном утоляют,

а вран, прилетев, ничто обретает,

гладей бывает.

Подобне врану сребролюбцы деют,

несытно сребро собирати смеют,

ковчежцы полнят, прочее копают,

впред сопрятают.

И се зверие приходят лютии,

людие злобы, зверско живущим,

вся расхищают, а, иже собрали,

суть во печали

И не могуще утехи прияти,

приходят в нужду, еже умирати

и, нищи суще сребром, добротами,

погибнут сами.

Потом во веки глад неутоленны

грешнии страждут в глубине геенны.

К тому огнь лютый имать я мучити,

вечно палити.

Тем нелакомо злато собирайте,

еже в избытцех, то нищым раздайте,

да обрящете разданное в небе

к вечной потребе,

Ибо кто нищым милостину дает,

ту со прибытком в небе обретает,

А вечно имать в обилии жити,

Бога хвалити.

Ласкание

Пифик утешный зверь есть, чада зело любит,

но ласканием лишним смертно тая губит.

Подобне ласканием матери си чада

в грехи смертныя въводят и в погибель ада.

Ласкатель

Хамелеон вся цветы весть восприимати,

зерцало — всяки вещы в себе проявляти,

Отглас всякия гласы дивне отглашает;

тако ласкатель вся есть тым, яже прелщает.

Хамелеонту точен есть ласкатель,

ибо, яко ов — всех цветов прииматель

Тако сей нравы вся изъображает,

яко господем любы быти знает.

Лев

Андрод раб некоему господину бяше

и в бегство чрез пустыню от него ся вдаше.

Стрете его лев хромый, язву показу я,

терния изъятия от него требуя.

Андрод, приступив к зверю, терн острый изъял есть,

оток язвы очистив, ногу обвязал есть.

За то лев чрез три лета оному служаше

и во пещере своей ловом препиташе.

Случися же некогда из тоя изъити

Андроду, и от сверстник своих яту быти,

Иже господину си елма представися,

на снедь зверем в град Римский абие судися.

Но в то же время и лев ов бе уловленны,

на утеху кесарю во Рим приведенны.

Егда убо бысть время ему ся тешити,

на снедь зверем бедныя люди изводити,

Первый на позорище Андрод поставися,

и по случаю ов лев на него пустися,

Иже уврачеван им и сожитель бяше

во единой пещере. Лев же й познаше,

Начал есть ласкатися, к ногам припадати,

вместо жестоты, любовь древнюю являти.

То кесарь чародейство вознепщева быти,

повеле люта рыся на него пустити.

Рысь гладный вержеся на нь, но лев защитил есть,

самого рыся вскоре мертва сотворил есть.

Тому кесарь удивлся, вины взискиваше

и, егда праведную Андродом познаше,

Живот ему дарова, судив право быти

прощеннаго от зверя кесарю простити.

Людие паки любовь ему проявиша,

кесаря, да Андроду даст лва, умолиша,

Иже прием лва, в граде в домы с ним хождаше,

подаяние злата и сребра взимаше.

Людие на смиренна лва цветы вергаху,

о вожде и водимом сице глаголаху:

Сей лев бе человеку в пещере сожитель,

сей же человек лву бе сему исцелитель.

Оле чюдодействия! Лви ся покаряют,

благодарствие свое за милость являют.

Купцы Венетийстии море преплаваху,

у некоего брега с кораблем си стаху

И, возшедше на гору, брань люту узреша,

лев бо дивый со змием борущеся беша.

Аще же силен есть лев, но змий премогаше,

ошибом уплетенна лва в яму влечаше.

Людие милость лвови свою проявиша,

змия сострелявше, лва смерти свободиша.

Он, отшед во пустыню, благодарен бяше,

ибо на всяк день кожу оным приношаше

Зверску в благодарствие, донели же сташа.

Се от зверя благодать возблагодать взята.

Мы же, суще людие, нашым добродеем

многократно негли зло возблагая деем.

Лженищии

Человек некий, здрав сый, леностно живяше,

милостиню с нищими людми приимаше.

Не хоте трудитися, но токмо лежати,

ясти, пити и спати, праздно пребывати.

Сей во едино время яве сонствоваше,

а муж й преподобный лежаща видяше

И, приступль к нему, пиру его разрешил есть,

взем часть хлеба, на персех его положил есть.

Он нача воздыхати, выти и кричати,

даже муж он потщася хлеб из персей съяти

И возбудив лежавша: Что есть, вопрошаше,

кое соние злое, елма спа, видяше?

Ответ даде лженищий: Гора ми явися

велия, ею же плоть моя привалися

И даже во глубину мене погружаше

адскую, донеле же на персех лежаше.

Муж святый рече ему: Не гора лежала

на персех твоих, брате, но хлеба часть мала,

Взятая из пиры ти, та ти тяжка бяше,

яко неправо рука твоя ю прияше

В милостыню, ибо ты силен работати,

неправо милостыню тщишися взимати.

Виждь убо, како вредна милостыня тебе,

трудами хлеб во пищу стяжати ти требе.

Лице

От Иакова Лаван лицем отвратися,

никогда ему светлым зраком появися.

Тем Иаков от него с женами утече

и во отчество свое от виде далече.

Тако, егда от Бога лице отвращает

грешник и к созданию Его обращает,

Абие Бог обыче его оставляти,

из дому сердца грешна в Свой дом отхож дати.

Лице красное

Не толико стеблие илектр привлекает,

или магнит железо к себе похищает,

Елико лицем жены благоукрашенны

юноши к смешению бывают влеченны.

Лицемерие

Весть злоба милоть доброты взимати,

ризами ея себе покривати.

Струфион имать криле, но невесть летати;

лицемер свят видится, но чюжд благодати.

Жена некая хоте в славе мира быти,

святы жизни о себе разум положити.

В мале хизине сама една затворися,

неплотски живущая в плоти притворися,

И отца духовнаго часто призываше,

о молитву святую прилежно прошаше,

Глаголющи: Отче мой, потщися молити

Господа, да изволит грехи ми простити.

Ибо зело есмь грешна паче человеков,

сущих ныне и бывших от начала веков,

Даже ми боятися всем людем от Бога

казни за дела моя, яже люте многа.

Сими глаголы часто отцу си стужаше,

он лицемерия в ней зазор усмотряше.

Умысли сердца ея искус восприяти,

да бы женския правды известие взяти.

В едино убо время он мимо идяше,

жена по обычаю молитвы прошаше,

Обхуждающи себе грехами многими,

он же, к ней привратився, рекл усты своими:

Вскую ми, дщи, многажды глаголеши тая?

древле о тебе слышах от людей вся злая.

Она, оскорбившися, нача й лаяти:

Лжю, рекши, дерзавши, отче, глаголати

И, иже о мне злая тебе глаголаху,

клевеници суть на мя, неправду вещаху.

Тако познав духовный лицемерну быти,

потщася неправдиву жену обличити,

Глаголя: Ныне знаю зло твое притворство

и гордость сердца паче, нежели покорство,

Ибо, яже о тебе сама глаголеши,

тех от инех слышати нимало хощеши.

То же знамя гордости, а не смирения,

достойна еси, жено, уничижения.

Услышавши то, жена посрамленна бяше,

яко лесть обличися, яже покрываше.

Лицемерный человек кому подобится?

Идолу бездушному подобен творится,

Ибо, яко же идол вне уду являет

образ человеческий и златом блистает,

Внутрь же сердца не имать и духа лишенный,

иногда пауками, мухи исполненный.

Тако муж лицемерный является быти

свят и во благодати Бога щедра жити.

Извнеуду прекрасен добротами зрится,

аки злато чисто во очесех светится,

Но внутрь мертв есть грехами, лишен благодати,

злоб гади обыкоша часто в нем витати.

Тем лицемерных Господь зело обличает,

ко гробом, повапленным извну, прилагает,

В них же кости смрадныя с червием бывают,

человеком смотрящим мерзость содевают.

Царь Ирод лицемерник зело хитрый бяше,

тако языком, яко жидом угождаше.

Кесарю угождая, капище постави,

ради жидов храм Богу правому состави.

Лихва

От аспида человек елма уязвится,

сном сладким утешився, напрасно мертвится.

Тако вземляй на лихву сребро от инаго

тешится, аки ползу вземый от онаго,

Но егда разсмотрит вся, и се обратити

на долг нужда отчество, и вся погубите.

И тако снедается от аспида сего,

что-либо бе имений во державе его.

Сребра на лихву ближним дати возбранися

в ветхом законе, чуждым паки попустися

Но в пророцех и того Господь возбраняет,

яко же Иероним святый поучает.

Злата не даждь на лихву, разум тщися дати,

учи, дажд совет благий, будеш в благодати.

В некоем граде жена честна бяше,

яже две дщере у себе имяше.

Тема по смерти богатства премнога

остави, яже име неубога.

Едина убо на лихву даяше

богатство свое, и прескупа бяше,

Тем злым прибытком преобогатися,

потом ко смерти плотстей приближися,

И призва сестру себе послужити

и в правителстве дому пособити,

Яже, пришедши, всем домом строяше

и сестре, сущей в болезни, служаше.

По днех немнозех познала по себе

болная жена, что умрети требе.

О имении препечална бяше,

яко лишити того не хотяше.

Умысли убо со собою взята,

еже лихвою возможе стяжати.

Тем же сестру си некамо послала,

а сама злато в чпага два собрала,

И тема себе есть препоясала,

сестре и слова о том не сказала.

Токмо проси ю, да егда скончится,

никим же нага от людей узрится,

Но яко тогда бяше облеченна.

тако бы во гроб была положенна.

Сестра обеща то ей сотворити,

яко же веле, в гробе положити

И, елма умре, тако сотворила,

не осмотревши, в гроб труп положила.

Точию тому зело ся дивляше,

яко гроб с трупом вел ми тяжек бяше.

Погребу бывшу, слово разширися,

яко богатство много оставися,

Даже владыка града то услыша,

яко богатства многа оней быша.

Той посла слугу сестры вопрошати

и оставшая сокровища взяти.

Шед убо, раб той сестры вопрошаше,

где сокровище умершыя бяше.

Ковчег заключен к нему принесоша,

но отключивше, ничто обретоша.

Бедную сестру мучити начаша,

невинней раны многи налагаша.

Она страждущи к Богу вопияше,

избавления от муки прошаше.

Таже помысли, камо обратися

богатство сестры, и како сокрися?

Яла есть о том тощно помышляти,

Вскую не веле себе обнажати,

И чесо ради тяжек трупищь бяше?

Не с собою ли злато сестра взяше?

И сказа слово слузе присланному,

иже, е внушив, прилепися тому.

Шед к иерею, соизвол приял есть,

труп погребенный скоро откопал есть.

И се вся нага зла жена лежаше,

великим змием превязанна бяше,

Иже, в уста вшед, златницы меташе

и на зрящия претително зряше.

Раб с иереем егда то узреша,

землею скоро покрыта велеша,

Рекше: Сосуд свой демон удручает,

с ней и злато все да исчезает.

И тако гроб той землею покриша,

бедную сестру от мук свободиша.

О лихоимцы, что бысть, разсуждайте,

зле собранная добре расточайте,

Да не от змиев будете мучени,

но со аггелы в небе водворени.

Закхея в образ тщитеся прияти,

долг обижденным людем отдаяти.

Да спасение есть вашему дому,

сами да есте дом Духу Святому.

Лихвоимец

Яко щука в купели рыбы поглощает,

тако лихвоимствуяй муж люди снедает.

Лихвоимцы суть тати, волно крадущий

от чуждых благ, цепь злату на ся кладущий.

Болше крадут от татей, во нощи ходящих,

и за тайно взятие на древе висящих,

Обаче суть без казни; но их ожидает

огнь геенский, и демон мзду уготовляет.

Лихоимство

Человек некий богат временными бяше,

но то чрез лихоимство сребро собираше.

Имяше же сына два, и един от нею

промысл злохитростию держаше отчею.

В лихоимстве отца си выну подражаше,

богатства и злых нравов наследитель бяше.

Другий же, Богом правим, мир возненавиде,

вся в нем суетна быти пресветло увиде

И, отшед во пустыню, Богу работаше,

вместо временных богатств, вечных возжелаше.

По мнозех трудех его отец преставися

и брат без медления по нем в путь пустися.

Пустынник же наследства не иде прияти,

недобра собрания не хоте держати.

Но прилежа Господа умилно молити,

да бы ему изволил быт их изьявити.

По мале же времени во восторг хищенны

и во ад преисподний был есть отведенны.

Но ту брата и отца си не созерцаше,

яко не тамо ею место казни бяше.

По немнозе времени страх мног сотворися,

и се кладезь огненный кипящь проявися.

Из его же глубины пламень изпадаше,

отца его и брата люте изметаше,

Аже себе зубами взаим согризаста

и друг друга глаголы злыми проклинаста.

Проклят буди, ко сыну отец глаголаше,

яко ты мне виновник сея муки бяше.

Тебе ради аз сребро зле тщахся собрати,

за что нужда лежит ми огнь лютый страдати.

А сын отцу точная словеса вещал есть:

Проклят еси, злый отче, страшно глаголал есть,

Яко, аще не бы ты злаго собрания

оставил ми и подал до об держания,

Не пришел бых аз семо, не страдал бым муки,

днесь же впадох с тобою в демонския руки,

От них же невозможно свободы стяжати,

но, увы, нужда лежит вечно огнь страдати.

То видя, муж пустынный Бога восхвалил есть,

яко его от суетств мирских отвратил есть.

Лихоимство есть злоба излише велика,

продателя Иуды негли не толика,

Ибо той, раскаявся, сребро возвратил есть,

аще прощения си греха не влучил есть.

Лихоимец же сребра не хощет отдати,

еже дерзнул неправо от ближняго взяти.

Иуда единою ту злобу содея,

за тридесят сребреник прода Добродея.

Лихоимец толь краты Христа есть про дате ль,

елижды неправаго есть прибытка взятель,

Ибо, егда прибыток паче Христа любит,

аки предав Онаго, душу свою губит

И, елма сребра деля себе погубляет,

уд те лесе Христова за сребро продает.

Аще убо Иуда, тщавыйся отдати

сребреники, не може прощения взяти,

Лихоимец, не хотяй чюждых возвратити,

коим образом может Богом прощен быти?

Ей горей лихоимец от ада самаго,

ибо и той не с держа долга неправаго,

Зане чюждыя рабы и он возвратил есть,

егда Христос Спаситель оны присетил есть,

А лихоимец, слышя о посещении

Христове, не помыслит о возвращении.

Ад за долг Адамль душы людски похищаше,

искупившу я Христу абие отдаше;

Лихоимец сам душу свою одолжает,

за мал сребра прибыток аду ю отдает.

Но горе окаянну и беда велика,

яко не придет тоя изъята Владыка.

Приидет паче его праведно судити,

за несытство в несытный ад й погрузити

Праведным Своим Судом. То зная, востани,

лихоимче, от греха, ко правде пристани.

Малым доволен буди, а право стяжанным,

яко же подобает от Бога избранным.

Многое не спасет тя, найпаче погубит,

не богатство бо правый Бог, но правду любит.

Земная жаба выну землею пасется,

винограду цветущу, вон скоро несется.

Благовония цветов не может терпети,

в смраде и блате любит обычно седети.

Подобне лихоимец прибытки земныя,

яко пищу, снедает излиха вредныя.

Из винограда Церкве скоро утекает,

егда в ней слово правды цвести начинает.

Благи тех цветов вони и мало не любит,

но, в скверней сверстник спире седя, душу губит.

Жидовинов хвалити нимало желаю,

но и в тех правды сущи, никако гаждаю.

Жидовин от рода си лихвы не приемлет,

токмо от инородных той прибыток вземлет.

А христиане наши зрите, что дерзают,

и от христиан лихвы велики сдирают.

Верою убо токмо христиане блази

лихоимствующии, а дел благих нази,

А зане же кроме дел вера не спасает,

со жидом лихоимец равно погибает.

В некоей лихоимец стране обиташе,

иже лихоимством си многи обидяше.

Обычай же имяше духовных просити,

да бы о нем Господа тщалися молити.

Но сам не престояше лихоимствовати,

аще мнози тщахуся его увещати.

Тако живущу, болезнь тяжка прилучися,

даже ко смерти вратом бедне приближися.

И се пса два лютая к оному внидоста,

ждуще кончины его. ложе облегоста.

Он же, язык из устну изпустив, лежаше,

иже, яко пядь, долго извлеченный бяше.

Та же, дыхая страшно, душу изпустил есть,

спасения надежды ничто оставил есть.

Лов

Мрежею слова Христос люди уловляет

и в сад небесный на жизнь вечную пущает.

Демон же удицею ловит человеки,

язвит совесть и морит во аде во веки.

Удицы убо его нужда есть блюстися,

а в мрежу Христа ити, хотящым спастися.

Лов духовный

Петр со Андреем тем ся упражняста,

рыбы во мори мрежами ловяста.

Христос же Господь она пригласил есть

и человеком ловца сотворил есть,

Еже в жизнь вечну словом я ловити

из моря мира, и в небо носити.

Оле измены пребожественныя

ловцем и лову душеспасенныя!

О апостола, лов аз хощу быти,

ва мя тщитася небу уловити.

Сам ся въмрежаю, ва токмо влецита,

рыбу словесну Богу мя несита.

Апопстоли на мори обнощь ся трудиша

Тивериадстем, а рыб ничто уловиша.

Став же при брезе, Христос веле мрежа взяти

и на десну корабля страну запущати.

То апостоли егда тощне сотвориша,

множество рыб различных скоро уловиша.

И днесь, кто в нощи греха ловитву рыб деет

словесных, трудами си нимало успеет.

Молити Христа требе, да при брезебудет,

тако ловитва в мрежесилно преизбудет.

На десную же страну нужда есть вергати,

сиречь, намерение правое держати.

То паки есть правое, егда иерейство

приемлется от кого, ли архиерейство

Во честь и в славу Бога и душ в спасение,

а не в мирския славы себеловление.

И егда священная деема бывают,

не за мзду, но да верным ползу содевают.

Шуия паки в Церкве корабли есть страна,

егда ловитва неким будет содеяна

Не во славу Божию, но в свою похвалу,

скоро преходящую, и ту велми малу;

Или прибытка ради богатства тленнаго,

а не мыслнаго деля душам спасеннаго.

Си страна есть шуия, имать бо ставити

ошуию Христови, грядущу судити.

Сицевых делатели. И на сей ловяще

стране, без Христа ловцы труждаются вотще.

Но увы времен и нрав! Нынемнози зело

на шуйцу своя мрежа вовергают смело.

Аще ловцы человек Христом сотворени

и на десней ловити странеувещени,

Славу, честь и богатство прилежат ловити,

аки безсмертно в мирехотящий жити.

Своих ищут прибытков, никако Христовых,

оле, душы за злато продати готовых!

Ведети же достоит, яко леть продати,

но невозможно будет окуп за ня дати.

Ловитва

Рыбарь на удицу пищу возлагает.

юже рыба вземши, лов тому бывает.

Тако демон сладость вержет временную,

внутрь тая удицу преизощренную,

Юже кто лакомо устны си хищает,

прелестно ловитва врагови бывает.

Лож в духовных

С иноком белец в пути нецем бяше,

яко Божия раба почиташе,

Но нача инок суесловствовати

и кощунная пред ним глаголати.

Между иными то к нему вещает:

Вижд, человече, се осел летает.

Муж простодушный абие си око

смотряя пусти на аер высоко.

Инок в утеху весь ся разливает.

простодушнаго мужа укоряет,

Глаголя его малоумна быти,

яко в том делевосхотеверити.

Он же отвеща: Отче, не дивися.

яко веровах, паче исправися,

Бех бо непщуя, удобей летати

ослу, нежели иноку солгати.

Тако воправду выну подобает,

язык духовных лжи да не вещает.

Ложе

То ложе исполнь цветов прекрасных бывает,

еже слезами часто спяй в нем окропляет.

Цвети — богомыслие и покаяние,

ими же сладит Свое Бог обоняние.

Лоза

Лоза винная в зимемертва быти мнится,

без плода, без листвия, и некрасна зрится.

Лету паки пришедшу, тажде оживится,

красна и доброплодна людем сотворится.

Тако Лоза истинна мертва тогда бяше

во зимесмерти, елма во гробе лежаше.

В год же воскресения жива сотворися

и прекрасными плоды дивне украсися.

Издаде грозд светлости паче звезд и солнца,

в ней же имать пребыти вовеки без конца.

Точнегрозд безстрастия проявила в Себе,

им же прекрасна зрит Ся во пресветлом небе.

Тонкости и борзости грезны предивныя

содержит, и многия прики душевныя,

Ими же ся во веки имать кросовати,

и вся жители небес превозвеселяти.

Христос Господь Лоза есть, мы рождие Его,

тем же Он питает ны от тука Своего.

Веру имеяй живу в Христе пребывает,

Его благодатию оживлен бывает.

Иже паки грехами верный умертвится,

яко сухая розга, в той Лозе узрится,

Достойная нещадно отрезана быти,

яко не может плода никогда творити.

Яко лоза розгам си сок свой посылает,

от них паки ничто же себевообщает,

Тако нам Христос Господь дает благодати,

ничто же от нас Себе хотяй взаим взяти.

Лук

Иже на небо умом человек стреляет,

той мысленным разумом лук правый бывает.

Егда же к земным вещем умом обратится,

тогда лук развращенный бедне сотворится.

Леность

Леность — души бремя, в небо не пущает,

покаяние оно скоро низвергает.

Леностию объятый выну печалится,

отвергай же ту гнусность светло веселится.

Иноци ленивии в келиах лежаху,

утренее пение лежаще читаху.

Тогда прииде демон, смрада наполнил есть,

и к лежащым иноком глагол сотворил есть:

При сицевой молитве кадило такое

в обоняние ваше зело приличное.

Лествица

Иаков божественный Лествицу видяше,

яже от земля в небо утверженна бяше.

Тою аггели свыше на землю схождаху

Божии, и от земля в небо восхождаху.

Сам же верху Лествицы Господь утвердися,

сице воплощения тайна проявися.

Лествица со степенми сие знаменаше,

яко чрез многи роды с Адама идяше

Христос даже до чрева Пресвятыя Девы,

вторый Адам небесный до лучшыя Еввы.

Низ земли, а верх Богу прикосновен бяше,

Бога и человека быти знаменаше.

Два же бока Лествицы виденныя бяху,

милость, купно истинну Его изъявляху.

Аггли низшествием то изобразиша,

яко чрез Воплощенна друзи миру быша.

Восхождением паки прознаменоваху,

яко тем люди в небо возьити имяху,

Или сице: аггели вести в мир ношаху,

воплощения Слова пророком являху,

И паки в двор небесный от земля входиша,

славословием Богу вечному служиша.

А степени лествичны доброты являху,

яже во Воплощенном сияти хотяху,

Ими же Христос Господь послежде сияше,

и нам добродетелей образ подаяше,

Тыя путь неблазненный нам являя быти,

им же во страну жизни есть удобно внити.

Первая же доброта от Него явися

смирение, повнегда до плоти смирися.

Вторая есть нищета, ту Он изъявил есть,

елма Ся во вертепе убогом родил есть.

Любовь чрез все житие делесы являше,

егда цели недуги и добре учаше.

Во страсти терпение много показал есть,

послушание в смерти, егда ту подъял есть

За спасение наше. Иногда иныя

проявляше доброты в образ нам святыя,

Да тако мы Лествицу святу съоружаем,

и тою в рай небесный благ путь совершаем.

Восхождения убо, братие, творите

духовная во сердцех, и в небо грядите.

От доброты в доброту выну поступайте,

задних забывше, к предним себе устремляйте.

Тако в светлое небо леть есть ся вселити

и в нем с духи горними вечно веселити.

Лет отъятие

Аще сын имение худо расточает,

даяния си отец онаго лишает.

Равне, аще век юный зле ким проводится,

от Бога век старости тому не вручится.

Бог на покаяние сто двадесять дал есть

лет людем пред потопом, слез их ожидал есть.

Видя же их безслезность, век той сократил есть,

двадесять отьем, потоп страшный напустил есть.

И днесь не кающымся лета умаляет,

во вящшее приити злобы не пущает.

Любве изводства

Несть доволно языком Господа любити,

изводства любве требе в делесех явити.

Первое же есть выну о Бозе мыслити,

все желание к Нему прямо обратити.

Второе — благочестно о Нем глаголати,

имене Его из уст си не испущати.

Третее — тайны сердца извещати Ему,

аще всеведущему и вся видящему.

Четвертое — охотно с Оным пребывати,

молитися и слова Божия слушати.

Пятое — заповеди Его вся хранити,

и яже Ему годе, та токмо творити.

Шестое — дел лукавых всяческих гонзати

и ближния от онех нрава отвождати.

Седмое — славу Его разширяти тощно,

по ней поборствовати, поелику мощно.

Осмое — на вся бедства готовость имети,

приключающаяся радостно терпети.

Девятое — без страха правду глаголати

и ненаказанныя благоувещати.

Десятое — не токмо любити Самаго,

но и вся, яже Его, найпаче ближняго.

Сия творяй изводства по себе являет,

яко правую к Богу любовь соблюдает.

Любовь

Его же солнце лучми велми согревает,

той абие из себе ризы отвергает.

Точне, его же любы Божия согреет,

абие вся мирская из сердца си реет.

Любы крепка, яко смерть, ибо побеждает

вся люди, яко же смерть, и страха не знает.

И паче смерти силна, смею глаголати,

ибо и самую смерть весть та презерати.

Любы Христа ко смерти за мир понудила,

Его смертию нашу смерть есть умертвила.

Любы христианская за Бога терпети

мученики понуди, и плотми умрети.

Любовь граждан к отчеству нудит воевати

противу супостатом и смерть подъимати.

Любовь чад в человецех смерть пренебрегает,

ибо за ня умрети всяк готов бывает.

И во зверех матери чада защищают

и множицею за ня самы умирают.

Егда аггел люди мечем убиваше,

Давид ко Господу слезно вопияше:

Аз есмь согрешивый, аз деях неправо,

сии овцы суть, что деяша лукаво?

На мя мечь изволи острый обратите

и дом мой казните, люди же простите.

За сие Давида царя смирение

царю Бог и людем даде прощение.

Благо добродетели всякия стяжати,

теми, яко бисери, душу украшати,

В них же да имать первство любы истинная,

во основание им всем положенная.

Вся бо добродетели мертвы суть без нея,

не могут оживити душы ничиея,

Ибо, яко ризами труп сущ покровенный,

не греется, ни может быти оживленный,

Яко во внутренних си теплоты лишися,

и тоя лишением нежив сотворися,

Подобне добротами душа покровенна

извне, аще во внутрних любве есть лишенна,

Праздна теплоты ея, жива не бывает,

та бо душу, яко плоть — душа, оживляет.

Любовь ко Богу и ко ближним тебе

да есть в крил место, и будеши в небе.

Глава Церкве — Христос, мы вси Его уди,

яко в удех тела, и в нас любы буди.

Уди себе взаим ведят сострадати

и о чести друга соликовствовати.

Тако нам достоит с слезными ридати,

с радующимися радость восприймати.

В ногах любы верная, ибо помогает

едина другой, егда та ся поползает.

Вера с добрыми делы душу оживляет,

егда любовь правая ону украшает.

Душа, яко лампада, яко елей — дела,

любы да есть, яко огнь, и будет весела

Во сиянии своем. Инако суетна,

яко лампада кроме елея, отметна.

И с тым же огня кроме не может светити,

тако без любве душе несть подобно жити.

Вера без любве мертва, никого спасает,

с нею паки есть жива, нас бо оживляет.

Тем, аще бы кто горы возмогл преставляти

верою, а не хотел любве изъявляти,

Ничто во спасение успел бы душевно,

но был бы низриновен в езеро огненно.

Тем же, возлюбленнии, и веру храните,

и любовь присно к Богу и ближним блюдите.

Она же, благих делес сущи плодна мати,

пособствуема Богом, имать я раждати

Во славу Господеви, вам во спасение,

за та будет в небеси вам водворение.

Яко же солнце светом весь мир просвещает,

тако добродетели любовь украшает.

Без солнца в мире тма есть, вся красот лишенна,

без любве добродетель всяка вничтоженна.

Елей вся пищи сладки содевает,

любовь доброты Богу услаждает.

Брачную одежду мощно любовь звати,

могущу множество грехов покривати,

В ону бо человек иже облечется,

из вечери вечны никако вержется.

Огнем любовь теплая прозванна бывает,

тою горети всяцей души подобает

Ко Богу и ко ближним. Аще же не будет,

то во огни геенстем во веки пребудет.

Многи добродетели без любве ничто же,

она едина без всех у Бога возможе,

Сама бо есть доволна спасение дати,

его же кроме ея никто может взяти.

Что есть от всего сердца Господа любити?

Паче всех сущих Того во любви храните,

Ничто же выше Его ни точно держати,

но Его выше всея твари почитати.

Аще хощеши другом любим быти,

потщися прежде сам любовь явити.

Из океана реки начало си знают

и к нему со множеством вод ся возвращают.

Наш океан — Господь Бог, от Него творимся,

убо к Нему с множеством любве возвратимся.

Доброта, подобие, взаим любление

творят в сердцах наших любве рождение.

Любяй бо воз любится, и кто подобится

нам, или есть добротлив, весма той любится.

Хотяй любовь правую ко Богу явити

должен есть волю Его во всем сохранити.

Подобный подобнаго обыче любити,

и зверь дивый в пустыни с точным любит жити.

Аще безсловеснии тако содевают,

колми паче людие долг свой да познают,

Им же не токмо един вид, но к тому слово,

найпаче в любви стадо да живет Христово,

Ему же общества суть духовна премнога,

любве ради данная от всещедра Бога.

Во-первых, вси общаго Отца Бога знаем.

Отче наш, глаголюще, равне призываем.

Паки единою вси кровию куплени,

от смерти, ада, клятвы Христом искуплени.

Едино же имамы свято крещение,

грехопадений скверны на омовение.

Тело и кровь Христова тажде ны питает,

виды хлеба и вина к любви увещает,

Да, яко из множества хлеб един пшеницы,

тако едино будут мнози человеци,

И, яко от грозд многих есть едина чаша,

тако в мнозех едина будет любовь наша.

К тому веру едину к Богу сохраняем

и едина небесе в наследствие чаем.

Сих общество вина есть, да взаим любимся,

за любовь в рай небесный Богом да вселимся.

Седмь лет за Рахиль Иаков служаше

а яко мало дней быти вменяше.

Любовь велия бремя облегчила

и многа лета в малы дни скратила.

Вскую Бог хощет любим нами быти?

Что Ему ползы тем можем творити?

Нам Бог всеблагий не Себе желает

ползы, повнегда любовь завещает.

Хощет, да удобь путь сей претекаем,

и сладко море жизни преплаваем,

Поне же любы бремя облегчает

и горесть люту в сладость прелагает.

Паки хощет Бог, да будем богата

в злато духовно, да бы тем стяжати

Бисер небесный, иже не купится,

токмо тем златом, что любовь словится.

Кроме всех инех доброт мощно внити

в небо, а кроме любве в том не быти.

Еще, яко та есть вящшее благо,

и ничто имать сердце си точнаго.

Ею человек весь Богу дается,

с душею, с телом Ему вручается.

Наконец, любве за любовь требует,

юже без числа Сам к нам изьявствует,

Да цена вещи подобная будет,

купля си блага, полза преизбудет.

Убо, братие, возлюбите Бога,

да вам от Него полза будет многа.

Люби друга в Бозе, врага — ради Бога,

за то тебе в небеси дается мзда многа.

Любы две нозе имать, заповеди сия:

любити, в первых, Бога, потом же ближния.

Сима двема ногама иже в мире ходит,

в царствие небесное преудобно входит.

Иже паки едину любовь соблюдает,

хромец есть, ни удобно неба достизает.

Вы не будите хромцы, две имейте нозе

целе, внидете в небо, почиете в Бозе.

Две любве в мире есте, едина ко Богу,

другая к миру, а те имеете многу

Разность между собою, первая бо блага,

вторая благостини всеконечно нага.

Такожде согласие есть взаим обою,

яко же тма со светом имеют с собою,

Поне же, яко, сущей тме, свет уступает

и тма свету пришедшу нуждне место дает,

Тако, иде же любы мира водворится,

оттуду любы Бога всяко изселится.

И противным образом, иде же бывает

вселенна любовь Бога, мирская гонзает.

Вы, братие, тщитеся лучшей место дати,

да бы Богу во сердце х ваших пребывати.

Изпраздните из сердец любовь суетную,

водворите в то место любовь полезную,

Ибо любы Божия аще обретает

лядину терний в сердци, скоро изтребляет

И насаждает древа, в плоды гобзовита,

божественных деяний зело нарочита,

Их же плодоносив — в небесех жизнь вечна

и со умы горними радость безконечна.

Невеста в ризы честны себе облекает,

повнегда жениху си пред стати желает.

Душа христианская — невеста Христова,

да будет убо Ему предстати готова

В одеянии честном, еже добродетель

любве, ту зело любит Христос наш Спаситель.

В ту елма души наша себе облекают,

воведенны во чертог небесный бывают.

Аще же тою душа красна не явится,

с инеми красотами от Христа презрится.

Любовь чада Божия люди содевает

и от сынов демонских оны разлучает.

Вси крестным знамением да ся ограждают,

да ответуют Аминь, и да воспевают

Аллил у иа Богу, аще вси крестятся

и во храмех Божиих прилежно молятся;

Да назидают храмы Господу щедрому,

ли некоему рабу Егову святому,

Не различна Божия от демоних чада,

не то их есть разнствие, не та их преграда.

Любовь совершенная она разделяет,

та единым от других преграда бывает.

Имущий любовь суть от Бога рож дени,

не имущии тоя — врагом изведени.

Аще что-либо ино пристяжеши себе

от доброт, любве кроме без ползы есть тебе.

Не имаши инех благ? Любовь да храниши,

во ползу тебе будет, закон исполниши.

Егда любве Божия недостойни быхом,

яко не Богу живу, но греху служихом,

Бог человеколюбец тогда возлюбил есть

нас и от греховнаго рабства свободил есть,

За что мы долженствуем Его возлюбити,

и Оному по вся дни раболепни быти.

Не дахом Ему любве, воздадим Давшему,

притецим ко Пастырю, овцы взискавшему.

Возлюбим И, Его же долг наш есть любити,

хвалим Того, Его же хвала есть хвалити.

Тщимся целование Тому подаяти,

Его же чистота есть любо целовати

Совокупимся Тому, с ним же кто бывает

в супружестве, во веки в девстве пребывает.

Преклонимся под ноги Того пресвятыя,

Иже гордо стоящих сокрушает выя,

Преклонших же возносит и превозвыжшает,

даже я во премирных селех водворяет.

Смиримся Его ради, тако бо востанем,

умрем за Нь. яко от сна. от смерти воспрянем,

Он бо есть Живот верных и Воскресение,

Он наш Творец, Промыслник и Избавление.

Известь негашенная и хладна бывает,

и внутрь себе силою горячесть питает;

Аще бо на ню хладну вода возлиется.

дивно дело, горячесть извнутрь издается,

И потолику вода на ней воскипает,

поелику же всегда на огни бывает.

Извести любяй точен, ибо неявленно

в нем любление друга бывает храненно.

Нужде не сущей, хладна любовь мнится быти,

даже леть угашенну некому судити,

Но елма, яко вода, беда прилучится,

тогда сокровенная любовь проявится,

Тогда бо начинает любитель кипети,

от сердца си о друзе печали имети.

Сице любы правая верным подобает,

да друг другу во нужде тепле помогает.

Камение разное известь съединяет,

тоя силою крепко жилище бывает.

Сердца же различная тогда единятся,

повнегда любовию друг другу лепятся.

Сице и Царю небес полата творится

в душах человеческих, ту бо Он вселится.

На небо и на землю несть леть купно зрети,

тако любве ко Богу и к миру имети.

Гекатон рече: Потщися любити,

аще хощеши от друг любим быти.

Иде же любы вещей мира обитает,

ту любы Бога жива никако витает,

Любы бо мира вражда есть Богу святому,

иждени ту, Бог внидет до сердца ти дому.

Любовь Божия к нам

Вскую Бог Отец изволил есть дати

Сына во окуп мира, хощу знати.

В первых, да явит богатство благости

и сокровище Своея милости.

Правды жестоту изволил явити,

егда демоны нужда бе казнити.

Милосердие избра показати,

егда бе требе род наш казни дати.

Паки, яко смерть Сына Его бяше

временна, а мир вечно умираше.

Изволи убо на временну дати

Сына, еже бы мир вечны изьяти.

Наконец, явил любовь превелику,

да и мы точне возлюбим Владыку,

Чад за Нь и себе самех не щадяще,

на чюдный образ любве Его зряще.

Любовь Бога

Кто Бога любит, слово соблюдает,

заповедь Его делом исполняет.

Небрегий паки того соблюдати

не может прав ся христианин звати.

Любовь ко врагом

Не любящыя тебе ты да возлюбиши,

тако богоподобен сын ся сотвориши.

Бог и на враги свет Свой и росу пущает,

тебе благо творити врагом научает.

Любовь к воем

Александр Македонский воина у виде,

иже от хлада люта к вратом смерти приде.

Воста от седалища, того посадил есть

и теплотою огня в живот возвратил есть.

Оле воинолюбца! Честь си забывает,

тоя паче воинов живот почитает.

Троян кесарь Римский с враги воеваше;

егда многи вой си язвенны зряше,

Не имущыя же язвам вязания,

не жале л есть царска си одеяния,

Ибо то раздерл есть и даде вязати

раны уязвленным: оле благодати!

Любовь к подданым

Егда за грех Давыдов Бог люди казняше

всегубителством, тогда Давыд вопияше:

Аз есмь грех сотворивый, Боже, обратися

на мя с казнию Ти, сим милостив явися.

Оле любве царския! Сам хощет умрети,

аки отец ли мати за любыя дети.

Любовь и ненависть

Иде же скудость света, тамо тма бывает,

иде же не есть любовь, ненависть витает.

Аще же Бог любы есть, ненависть конечно

демона нарицати — дело человечно.

Убо, яко, иде же любы обитает,

тамо, по Богослову, Сам Бог пребывает,

Последователно есть, да демон вселится,

в не же сердце ненависть злая вкоренится.

Любовь мира

Григорий святый, Богослов ременный,

на патриарший престол бе прошенный

От иерархов восточныя страны,

яко изряднший между христианы.

Египетский въпреки тому быша,

мятеж великий во Церкви твориша.

Видя то, отец, полный благодати,

ко иерархом нача восклицати:

Отци святии, аще мене ради

молва движется во Христове стаде,

Яко Иону, верзите мя в море,

да бы оставят волны сия вскоре.

О дивный зело се мира любитель,

единства в Церкви Христове рачитель!

Любовь к людем

Телца Исраиль ветхий сотворил есть,

Господа Бога велми огорчил есть,

Иже за то й хоте истребите,

мечем в пустыни острым положите.

Ста на молитве Моисий и плакате,

отпущения народу прошаше,

И рече слезен: Боже, щедр нам буди,

согрешшыя Ти днесь пощади люди.

Не хощеши ли онех пощадите,

изволи мене из книг истребите

Животных, в ня же мене вписал еси,

да Тя восхвалю в мире и в небеси,

И умолил есть. Чтый, любви дивися,

ближния точне сам любите тщися.

Любодейство

Жена любодеица Сампсона прелстила

и сладкаго света й очию лишила.

Знаменовася тогда, яко ослепляет

любодейство когождо, кто в нем истлевает.

Далида же ей имя наречено бяше,

еже толком нищету люту знаменаше

Во явление того, яко нищь бывает,

кто-либо в любодействе живот провождает.

Найпаче добротами обыче нищ быти

живый блудно, а вечно тому в аде жити

Нужда есть конечная, паче умирати,

ибо не живот, но смерть достоин прияти.

Любоимение

Сребролюбия злоба в мире умноженна,

объят простолюдина и мужа священна.

Оба пола и всяк век тем изнемогают,

забывше Бога, правды, сребро собирают.

Сердце, еже должнствуют обращати Богу,

ко стяжанию земных обратиша многу.

А кая мзда того есть? Зело казнь велика.

В первых, порабощает грешна человека

И нудит й богатства выну собирати,

от трудов во дни, в нощи покоя не знати.

Паки, бедную душу безпрестанно томит

снедением совести, яко правду ломит.

Аки в тернии остром, бедная мучится

во печалех и скорбех, а не свободится.

И тако благ небесных лишенна бывает,

но и земных покойно не употребляет.

А долготерпеливый Бог, ту видя злобу,

имеяй к человеку милости утробу,

Милость божественную на гнев обращает,

яко Судия правый, казни посылает.

Иуда сребролюбец яко прилепися

сердцем си имению, враг Христу явися.

За тридесят сребреник Господа продал есть,

но сам удавлению себе люту вдал есть.

Отъят Господь благодать от него святую,

да сам казнь себе деет, дела достойную.

Из ковчежца общаго, яко тать, крадяше

и на древе висети Господа предаше.

Яко предатель убо и тать, повесися,

повис на древе силом, срамно удавися,

И проседеся люте всескверное чрево,

недоволно бо бяше во казнь ему древо.

Земля смраднаго трупа не хоте прияти,

лежа, червми точимо, ах, страшно вещати!

А душа проклятая камо обратися?

Во езеро огненно демону вручися,

Еже вечныя муки зле тамо страдати.

Приидет же и скверно тело паки взяти,

Да с ним согрешившая с ним же в казни будет

и в ней милости кроме вовеки пребудет.

Суть и инии мнози, иже зле страдаху,

яко сребролюбию сердца своя даху.

Внегда Иерихон град Богом разорися,

тогда от вещей града взяти возбранися,

Аще и мало нечто являшеся быти,

ту заповедь дерзнул есть Ахар преступити.

Взя некия от вещей, но бысть обретенны

в гресе, и камением за то убиенны.

Наван и яко своя зле скупо держаше,

Давиду просившему нуждных не даяше,

Праведна Бога судом праведным убися,

внезапною смертию живота лишися.

Иезавель скверная от злобы своея

винограда и жизни лиши Навуфея,

Но и сама от Бога страшно бысть казненна,

из полаты на стогну бяше низверженна.

Тамо вся растоптася конскими ногами,

труп скаредный снедеся псов гладных зубами.

Ананий и Сапфира село си продаша

и не всю того цену во Церковь отдаша,

Но часть некую себе того утаиша,

за то словом от Петра умерщвлени быша.

Иелисеев слуга, Гиезий реченный,

без веления его бяше дерзновенный

От Неемана тайно дары многи взяти,

за то Бог на нь проказу изволил послати

Словом Иелисея, тако, иже взяше

дар за целбу болезни, и болезнь прияше.

Над всеми сими благо есть воспоминати,

яко нищету люту нужда пострадати

Сребролюбцев во веки во гнубине ада,

иде же присно мука, никогда отрада.

Богатый еваггелский во образ дадеся,

иже люте жаждею во огни сожжеся,

А едниыя капли воды не имяше,

иже и сладка вина доволно пияше.

Просил у Авраама Лазаря послати

и концем перста воды на язык влияти,

Но и то прошение неполезно бяше,

Авраам бо Лазаря к нему не послаше.

Оле нищеты люты по богатстве мнозе

богатеющым в сребро, не о Христе Бозе!

Блаженно паки в Бога людем богатети,

то бо богатство мощно во веки имети,

И во будущей жизни нищеты не знати;

то за вся нам богатства изволь, Боже, дати.

Любочестие

Онагрь ловимый елма созерцает

ловителя си, стоя пребывает.

Тому ж пришедшу, устремится прати

и утекает, егда хощет взята.

Честь любители си тако прелщает,

удобь емлема быти ся являет,

Елма же ловец ея приближится

и аки взята рукама ю мнится,

Бежит далече, ловца же оставит

в смех прочым людем, и безчестна явит.

Полезно убо чести не искати,

паче пред нею посилно гонзати,

Сама бо она ищет гонзающых,

а бежит скоро та себе ищущых.

Литургия

Земледелец некто Господа любяше,

литургию выну охотно слушаше.

Во едино время престал есть орати,

иде литургии святыя слушати.

Но егда он в церкви Господу молися,

аггел въместо его на ниве трудися.

И вы убо точно изволте творити,

на священну службу любезно ходити,

И вам аггел будет Божий помогати,

и дела рук ваших в ползу обращати.

Аще же видимо аггел ся не явит,

невидимо дела Бог ваша исправит.

Иерей некий странство в град Сион прияше,

гробу поклонитися Господню желаше.

Име спутники многи, с ними же трудися

чрез море и землю, даже приближися

Ко Иерусалиму. Суббота же бяше,

в ню же Господь во гробе плотию лежаше.

В той день места святая они посетиша,

в день же Пасхи святыя в путь свой умыслиша.

Утру бывшу, спутницы иерея зваху,

литургии слушати никако хотяху.

Иерей праздник святый зело почиташе,

литургию служити усердно желаше.

Тем моли спутники си мало ту пождати

и священныя службы радостно слушати.

Невежди того гласу непослушни быша,

иерея оставлше, во путь ся пустиша.

Он в благоговеинстве службу совершил есть,

прием пищу и плотску, вслед ся их пустил есть.

Егда же в труде мнозе онех достизаше,

се муж, на кони седяй, его дохождаше

И рекл ему: Радуйся, вопрос сотворил есть,

Вскую един точию в путь ся той пустил есть,

В бедный от разбойников, к тому в день толикий,

иже бе христианом паче всех великий?

Он и вину и нужду истинно сказал есть,

тогда яздец на конь свой иерея взял есть,

Глаголя: Седи, отче, на кони со мною,

негли спутники твоя достигну с тобою.

Егда же на кони с ним иерей седяше,

утружденый плотию, дремати начаше,

Даже солнце на запад добре преколнися,

тогда иерей от сна сладка возбудися,

К нему же яздец добрый нача глаголати:

Можешь ли, человече благий, распознати,

Кия суть нивы сия, кий град пред тобою?

Камо ты притекл еси вомале со мною?

Иерей даде ответ: Аз ся удивляю,

села, град, церковь и дом мой зде усмотряю,

Но в недоумении быти сотворихся,

не знаю, како скоро к дому приближихся.

Яздец рече: Се тебе от Бога явленна

милость, яко тобою служба совершенна.

Почтил еси ты Христа в тайнах божественных,

тя Христос избавил есть трудов тяжких земных.

Дал еси честь дню Пасхи, Бог тя почитает,

се тя без трудов многих в дому поставляет.

Иди во мире в дом твой, Христа да хвалиши,

милосердие Его люд ем да явиши.

Сия рек, невидим бысть; иерей познал есть,

яко Господь аггела ему в помощь дал есть.

Нача хвалу щедрому Богу возсылати

и, въшед в церковь, чюдо то верным возвещати,

О нем же вси радостно Бога восхвалиша,

иерея честнаго, як отца, любиша.

Бог Слово в плоти что-либо деяше,

все в спасение рода земна бяше.

Житие Его и смерть божественна

во нашу ползу бяше устроенна.

Что-либо в жизни Его сотворися

или по смерти, нам в благо вратися.

Тем благодарно Церковь поминает

та Его действа, и любовь являет

За Его любовь, к людем сотворенну,

во страдании и в смерти явленну.

В честь литургию святу совершает,

странствие Его все изображает,

Найпаче, како Себе в пищу даше,

егда тайную вечерю строяше,

И како за ны изволи страдати,

на распятие Сам Себе предати,

Како воскресе тридневен от гроба,

не удержа И адова утроба,

И како в небо вознесеся яве,

и како снидет судити во славе.

Сим действуемым како предстояти,

верным есть нужда, полза разсуждати.

Всячески убо стояти есть требе

в то время в церкви, яко же на небе,

Ту бо Христос Бог Сам Ся обретает

в тайнах священных, и вся созерцает,

Знает вся мысли, видит всяко дело.

Кто убо может предстояти смело,

Помня то, яко Он имать судити

вся дела наша и мзду сотворити?

Страшно есть земну царю предстояти,

иже не может сердца тайн знати,

И аще может на теле убити,

но не есть мощен души погубити.

Колми же паче в страсе быти требе

пред царствующем Господем на небе,

Пред Ним же силы трепетны бывают,

яже пред лицем Его обитают?

Со страхом убо, братие, бывайте,

с трепетом службы Божия слушайте.

Тщитеся милость Его разсуждати,

юже изволи люд ем показати.

Ту благодарным сердцем прославляйте,

честь, хвалу Христу Богу возсылайте,

Иже вам небо благоволит дати,

в нем пиром жизни вечно учреждати.

М

Магнит

Магнитом натренное железо приемлет

силу магнита, иглы железныя вземлет

К себе, едину по едной, доколе есть сила,

юже Божия крепость в той камень вложила.

Подобне праведници в мире сем творяют,

данную себе мудрость иным ю подают,

Да, тою умудршеся, мира отвратятся,

ко Богу же живому сердцем обратятся,

И друг друга да ведет во небесну страну,

служащих ради верно Богом сготовану.

Мало спасающихся

Потопу бывшу, осмь ся душ спасоша,

прочий в водах люди погибоша.

Тако во аде мнози погибают,

а зело мали того избегают.

Вси убо человеци Богом сотворени,

да будут в пресветлое небо воведени,

Ибо то есть отчество, нам обещанное,

во вечное жителство уготованное.

Но не вси воведутся, яко не вси блази,

паче, едва не вси суть благостыни нази.

Тем же, поелику злых число превыжшает,

потолику мней благих в небеси бывает.

Множество паки грешных может ся познати,

аще будем образы неки разсуждати.

Во время потопное зело мнози бяху,

иже жителство в мире свое провождаху.

Числа их неудобно есть изглаголати,

зане Бог не изволи во книгах сказати,

Но елици, елици тогда обитаху,

вси растленни сквернами греховными бяху,

Чесо ради потопом изволи казнити

Бог пречистый, еже бы скверных истребити.

В толице же множестве осмь точию бяху

с Ноем в корабли, иже скверны не познаху.

Тако и днесь злых число болше, неже благих,

яко же вещей худых вящше, неже драгих.

Из плена Египетска мнози свобождени,

шестьсот тысящь мужие ратнии сочтени,

Разве старых и малых, кроме жен и девиц

и инех, неугодных с враги братися лиц,

А из всех тех точию два в землю внидоста

обетованну, иже с плена изьидоста:

Иисус со Халевом, прочий падоша

во пустыни за грехи, дети их внидоша.

О погибели многи! Точне днесь ся деет,

един бо или другий едва в небо спеет,

Прочий во пустыни мира погибают,

пища несытну аду, увы нам, бывают.

Или, яко же в земли мала часть есть злата,

а безмерная просты часть тоя и блата,

Тако мало человек, душы спасающих,

безмерно же множество есть погибающих.

Ли, яко сламы, плевел вземлют человецы

болше с нивы, нежели чистыя пшеницы,

Тако погибающих множае бывает,

нежели тех, яже Бог в небе водворяет.

Или, яко безплодна древеса суть многа,

а яже плодотворна, числом суть убога,

Сице чад погибели множества велика,

мало же число, яже приемлет Владыка

Небесный в Свое царство. Оле окаянства,

яко спасающася мало христианства!

Сия слыша, кто может неужасен быти,

не зная, камо тамо велят ему ити?

Бойся, всяк человече, и трепещи зело,

не дерзай обещати неба тебе смело.

Бойся Бога истинна, от греха блюдися,

а при истинней вере добр быти потщися.

Заповеди Господня прилежи храните,

тако бо возможеши небо получити.

Не зри на страну многих, та бо погибает,

не по числу лиц, но дел благих Бог спасает.

Уне со немногими считатися тебе,

а с ними во пресветлом вселитися небе,

Нежели со множеством буих пребывати

и с ними муку вечну во аде страдати,

От нея же нас, Христе, изволи хранити,

а даждь Тебе с аггелы в небеси хвалите.

Маммона

Иже любити сребро подущает,

той ся маммона демон нарицает.

Кто убо сребро, той маммону любит,

обема служя, душу свою губит.

Манна

Хлеб во пустыни Исраилю бяше

манна из облак, юже Бог даяше.

Дивен бе той хлеб, ибо не родися,

но из аера аггел ми стройся.

Аще кто его много собираше,

не болше инех в кущи обреташе,

И аще менше манны кто собрал есть,

меру гомора полну обретал есть.

Негли лишнее аггел отьимаше

и ко скудости оно прилагаше,

Или лишнее той же огущаше,

а что бе мало, то редко творяше,

Да гомор будет на кождо едина

манною полный Исраилска сына.

Вкус же бе ея, кто чесо желаше,

то ядый манну в устех чювствоваше.

От лучь солнечных, яко снег, таяше,

от огня паки твердо изсыхаше.

Точию чрез день може пребывати,

в утрий день черви обыче раждати,

Разве субботы, ибо в пяток рано

по два гомора манны собирано,

Да и в субботу не будут без хлеба,

в ню же та манна не падаше с неба;

И токмо сия им не истлеваше,

давый Бог манну и силу даяше

Праздника деля. Ни преста дождити,

донде же в землю обещанну внити

Исраилеви, а что сохраненно

в ковчег завета, бяше неистленно

Чрез веки многи. Ты сему дивися,

Богу вся леть суть, тем же не сумнися.

Маранафа

Хощеши, что являет Маранафа, знати?

Есть: Господь ваш прииде. Хоте бо сказати

Апостол, кто пришедша Господа не любит,

буди проклят, и Бог й вовеки погубит.

Мариа

Мариа Дева — град царя велика,

в ней бо поживе всех сущих Владыка.

На превысоких горах основася,

ибо доброты над весь мир превзяся.

Славная о ней глаголанна быша,

яже ум всякий зело удивиша.

Первая слава — бысть без мужа Мати,

кроме семене плод може издати.

Вторая — яко, егда плод ношаше,

тяготы кроме природныя бяше.

Третия — яко, егда Сын родися,

не зна болезни, но здрава явися.

Четвертая есть, Отцу си бысть Мати,

ибо Творца си достойна раждати.

Пятая — яко, Его же родила,

Того дщерь она по зданию была.

Сих слав что может преславнее быти?

И Богу несть леть паче прославити

Твари Своея. Тем тя, Дево Мати,

имамы присно песнми прославляти.

Пресвятая Мариа корабль есть мысленный,

им же гл а дну миру Хлеб внесеся спасенный.

В день зачатия корабль сей сооружися,

на море мира пущен в день, во нь же родися.

В день благовещения Хлебом исполненный,

егда от Духа Свята Бог есть воплощенный

В день Рождества Христова корабль изпразднися,

и в дому Хлеба миру Хлеб той предложися.

Хлеб, глаголю, животный — Христос наш Спаситель,

от вечна глада верных людей Избавитель,

Ему же честь и слава во вся буди веки,

над аггелы Владыце и над человеки.

Мариа безгрешна

Посреде мира лукаваго жити,

а его лестми не прелщенну быти,

едва есть мощно силе человека

до конца века,

Разве Бог кому то изволит дати

особным Своим даром благодати.

Тому удобно есть и в мире жити,

и не грешити.

Сидев дар име Дева пресвятая,

во Матерь Христу Богу избранная,

да Мати будет Бога превысока

кроме порока.

Она едина под солнцем изъята,

да и зачнется, и родится свята,

и век свой живет, вины не деющи,

всечиста сущи.

Она преплыве море мира сего,

не бывши мокра водою злоб его,

но выну ветром Пресвятаго Духа

пресвято суха.

Она терние прейде всеострое

суетий мира, всем душевредное,

сама ни малым нечим уязвися,

Богом хранися.

Она, в союзе с Иосифом сущи,

яко посреде пламеней живущи,

пребысть всецела, неприкосновенна,

ни окуренна.

Яко купина, аще и горяше

огнем, обаче неопална бяше,

тако Мариа с супругом живяше,

брака не знаше.

Девство до смерти всячески хранила,

чистому чисто Сынови служила.

Чиста бе телом, чиста и душею

выну своею.

И вся доброты стяжаше иныя

в сосуд божествен душы всесвятыя,

за что всех паче Богом есть почтенна,

превознесенна.

Вся силы небес ону почитают,

яко царицу всего мира знают,

с ними же и нам долг есть ону чтити,

выну хвалити.

Мариа Дева

Муж некто книжный о том усумнися,

еда Мариа в девстве сохранися

чрез всю жизнь свою. Иде ко иному

мужу святому,

Хотя от него известие взяти.

Той же, узрев й, нача глаголати,

предварь й словом: Брате, не сумнися,

но научися.

Прежде рождества цела Дева бяше.

То рек, жезлом си землю ударяше,

из нея же крин прекрасный явися;

муж почудися.

Паки ударив землю, глаголание:

Пречиста Дева и в рождестве бяше.

Абие другий крин бысть испущенны

из персти земны.

Втретие тожде сотворь, провещаше:

И по рождестве чиста Дева бяше.

Тогда и третий крин произведеся,

в знамя дадеся

Чистоты девства, до конца храненны.

Тем чюдодейством муж он воверенны,

пред наставником до земля смирися,

в гресе простися.

Оттоле преста недоверен быти,

иныя правде потщася учити

во честь и славу честныя Девицы

Богородицы.

Мы, сие чтуще, не будим сумниви

о девстве ея, донеле же живи,

но от всех чистшу да исповедаем

и величаем.

Марии детство

Иаков, Иосифов сын, книгу писаше

о детстве Спасителя, в ней же се сказаше,

Яко Дева Мариа, Мати Христа света,

егда возраста име точию три лета,

Толь постоянно в делех всяческих хождаше,

аки во тридесят лет, и вся глаголаше

Совершенноразсудне, выну же молися,

лице ея предивне светом украсися,

Даже едва инии то можаху зрети,

трудно бе зари его очесем терпети.

Дело руку оныя прядение бяше,

вся женская паче всех жен старих творяше.

Правило сама себе сие сотворила;

до третяго дне часа Богу ся молила.

Та же до девятаго святу руку уды

ткателем приличными упраждняше труды.

От девятаго паки молитву творяше,

закон чтущи, аггела с брашном к себе ждаше,

Ибо от того руку пищу приимала,

ею же ся по вся дни под вечер питала.

Всяк ея глагол исполнь бяше благодати,

даже из слов, яко Бог с нею, леть бе знати.

Выну мол бы и закон Господень читаше,

то дело духовное присно оней бяше.

О сотруждших ся себе промысл есть творила,

да бы ни едина их Богу согрешила,

Да не обидит инех, ни да возгордится

над сверстницы своими, но кротка творится.

Безпрестанно Господа си благословяше;

егда ж целование некто ей даяше:

Благодарствие Богу, выну отвещала

за возцелование, то слово даяла.

Юже пищу из руку аггела взимаше,

тою сама точию алчбу утоляше,

А что от архиерей оней бе даянно,

то на нищия люди бысть ею разданно.

Множицею аггелы, с нею сословящы,

виденно, и аки ей служите хотящы.

Сицево Иаковле слово обретаем

о Марии, юже мы песнми величаем,

Паче всех ю небесных сил почитающе,

перву в небъ по Бозе исповедающе.

Мария Магдалыни

Ученицы Христовы егда Дух Свят взяху,

дерзновенно правую веру возвещаху,

Утвержающе слово чюдесы многими,

Господь бо выну бяше со рабы Своими.

Злочестивии паки Иудеи тому

препятие деяху делу пресвятому.

Яша люди верныя излиха гоните,

имения грабити, самы зле томите.

В то время Магдалыню всесверепо взяша,

с Максимином блаженным с отчества изгнаша.

С нею бяше и Марфа, и инии мнози,

вси имений лишении, до конца убози.

Изведше же я к морю, в лодию всадиша,

кормчия и парусов, и всех нужд лишиша,

Воеже бы им без тех погруженным быти

абие, егда токмо от брега отплыти.

Отринуша их убо в лодии на воды,

они. Богу вручшеся, плыша от породы.

И прият я Сам Господь чрез море правите,

не попустил есть бури волн в нем возбудити.

Безбедно убо в Его хранении плыша,

даже ко Марсилийску брегови пребыша,

На нь же излезше, во град языческ внидоша

и в нем капище идол скверных обретоша,

Его же в предверии избраша пожити,

во посте и в молитвах нощь перву пребыти.

Во утрии день людие мнози приидоша,

жертвы идолом скверным несоша, ведоша.

То зрящи, Магдалыни зело умилися,

яко множество людей врагом помрачися.

Прият дерзновение, начала учити,

еже идолом мерзким жертвы не творити,

Но Бога, создавшаго всяческая, знати,

Ему жертвы во славу Самому даяти.

Людие, зряще жену, доброзрачну сущу

и учения слово сладце глаголющу,

Зело ся удивиша, ничто глаголаху

противно, но ту верным жити попущаху.

По второй убо нощи пришел есть онамо,

иже началник бяше всея страны тамо,

Несый жертвы доволны, но печален бяше,

яко чад от своея жены не имяше.

Тогда Мария, Духа Свята исполненна,

ят словеса вещати ему божественна,

Да не идолом о сем жертвы мертвым носит,

но да Бога живаго о плод жене просит.

Он, дав место словеси, в дом ся возвратил есть,

супрузе своей дело бывшее явил есть.

Ей слово возлюбися, нача промышляти,

како бы тому Богу молбу возсылати.

Мария же в притворе с святыми живяше,

приходящыя люди по вся дни учаше,

А жена велможнаго нача их питати,

отай мужа снедная оным посылати,

Бояше бо ся его, да не возъярится,

и развратна народа, да не возмолвится.

Во едину же нощей егда покойся,

Мария Магдалыни во сне ей явися,

Увещающи, да бы святыя питала,

в притворе живущыя, и мужу сказала,

Еже ему наготу онех одевати

и от хлада жилищем теплым защищати,

Зане богат бе зело, вся удобь можаше.

Она же того мужу слова не сказаше.

Явися убо паки во сне ей святая,

с прещением вознови словеса ей тая,

Но и паки мужеви того не явила,

за недерзновение в сердцы си таила.

Третицею святая обема явися,

жестокими словесы на оны пустися:

Спиши ли, мучителю, с ехидною тою,

с непослушною слову твоею женою,

Яже увещание мое утаила,

о питании верных тебе не явила?

Враже креста Христова, чрево ти питаяй

сладостно, а Божиих святых забываяй,

Сам на мягцей постели в полатах лежиши,

Вскую рабом Божиим любве не явиши,

Иже хлад, глад и нагость нудятся страдати?

Зри, да бы ти отселе их не забывати,

Иначе и за сие онех презрение

праведно не мимо тя пойдет казнение.

Сия изглаголавши, невидима бяше.

Тогда жена велможи за страх трепеташе,

Возбнувши, рече к мужу, сущу устрашенну:

Господи, не ли и ты видел страшну жену,

Люте нам претящую за тех презрение,

им же есть во притворе храма вселение?

Он же рече, въздыхая: Видех, но не знаю,

что содею; негли же лучше, да слушаю

Повеления ея, неже ожидати

казни Бога могуща нам ю содеяти?

Жена утверди слово, благо глаголаше:

Да будет призрение на святыя наше,

И помолим Марию, да помолит Бога,

еже восприяти нам плод сего чертога.

Согласен бысть муж слову, милость сотворил есть,

всяких нуждных Божиим рабом наделил есть.

По мале же времени жена плод зачаше,

от Бога Мариина дан быти познаше.

Сие видя, велможа ял есть помышляти,

Мариина словесе правду искушати,

Во Иерусалим град шествие творити,

о Иисусе Христе в нем ся увестити,

Аще толь чюдотворец превеликий бяше,

яко же Магдалыни о нем сказаваше.

И явил жене своей то умышление,

да приимет от нея соизволение.

Она, то услышавши, рада бяше зело,

соизволи мужу си то творити дело,

Точию и ону в путь да возмет с собою:

Хощу, рече, и аз в путь сей ити с тобою.

Муж ей бедства путная и труд предлагаше,

и яко рождения чада близу бяше.

Бури ветров и волны морския сказаше,

но отсоветовати пути не можаше.

Тем же оба во корабль себе сготоваста

и благословение от Марии взяста,

Ей же имение си во власть поручиста,

о молитвы ко Богу правому просиста.

Она на рамех ею крест есть положила,

да враг не прелстит ею, тем я утвердила

И прорече, яко вожд Петр им сотворится,

вся тайны христианства сказати потщится.

Она, время приемша, во путь свой поплыста,

во тишине желанней нечто дней пребыста.

По неколицех же днех море возьиграся,

корабль волнами люте надолзе метася,

Чесого не могущи жена претерпети,

яла есть рождением ко смерти болети

И, в безпокойстве сущи, сына есть родила,

но сама от болезни, яко мертва, была.

Муж и сыну не рад бысть, прегорко ридаше,

яко любезну жену мертву созерцаше.

К тому, яко и сына несть кому питати,

сугуба печаль нуди излиха ридати.

Корабленници паки на него восташа:

Изверзи скоро в море труп сей, глаголаша,

Яко море не терпит трупа содержати,

естеством бо нудится на брег изметати.

Он от жалости едва дух в себе имел есть,

и се поблизу остров некий усмотрел есть.

Дал цену многу, да бы ко брегу пристати

и тако тело жены и чадо спрятати.

Приплыша убо к брегу, труп на нь изнесоша,

пещеру во камени тамо обретоша.

Тело одеянием доволно покриша,

сына к сосцем матере слезно присадиша.

Плака муж честный жены, и сына ридаше,

яко жива лишити того нужда бяше,

В корабли бо немощно того бе питати,

млеко не бе, а ничто можаше взимати.

Лия же слезы многи, сице глаголаше:

Мария Магдалыни, что ты содеяше?

Откуду во отчество наше пришла еси,

того ли ради Бог тя, живый на небеси,

Посла к нам, да у Него Сына умолиши,

и того рождением матерь умертвиши?

Се рождьшая есть мертва, и еже родися,

оле горести сердца, смерти приближися!

В корабли не есть, кто бы могл его питати,

нужда зде оставити живаго, где мати,

Да бы умирающа от глада не зрети,

кто бо отец возможет ту болезнь терпети?

И обращ ко Марии слово, глаголаше:

О честная Марие, ты нам вина бяше

Сего лютаго пути, в нем же стражду сия,

аще можеши, ты нам помози, Мария.

Тебе тело вручаю и чадо живое,

соблюди молитвами, яко веси тое.

Мощно твоему Богу оное живити

и умершую жену в живот возвратити.

Сия изрек, с слезами в корабль возвратися

и во путь предприятий по водам пустися.

Корабелници парус ветру воздвигоша,

вмале ко пристанищу здраво притекоша.

Тамо велможа цену оным всю отдал есть,

сам со людми своими путь пешо приял есть.

Претекшу дни немноги, Петр святый явися

во стретение ему и возвеселися,

Видев знамя крестное на раме онаго,

непщевал быти его мужа крещенаго

И нача вопрошати, откуду он бяше?

Велможа вину пути своего сказаше,

И еже о Марии, и что приключися

во плавании ему, како оскорбися,

И вопросил есть его, кто именем бяше?

Он же: Петр есмь апостол, велможи сказаше.

Муж, услышав имя Петр, радостен явися,

яко Марии слово о нем исполнися.

Нача Петра святаго усердно просити,

да бы ему ко Христу вожд изволил быти,

Да научит о вере и места являет

страдания Христова, и что в ползу знает.

Петр рече: Честный мужу, аз ти имам быти

вожд в желании твоем, вся тайны явити.

И шед в Иерусалим, с онем пребываше,

о чюдесех и тайнах Христовых сказаше.

По всем священным местам онаго водил есть,

муж от радости духа слез своих забыл есть,

Ибо даже две лете с онем пребываше,

еже слыша о Христе, на сердцы писаше.

Елма же довле о всех Петром научися,

возвратитися в дом свой онем отпустися.

Лобзастася любезне, Петр благословил есть,

велможа, во корабль шед, в путь ся отпустил есть.

По днех доволных к тому месту приближися,

на нем же тело жены и сын оставися,

Еже узрев, восплака, тщася цену дати

корабльником, да бы ко брегу пристати.

Близу же бывшым брега, младенец зрим бяше,

иже вскрант моря един на песце ползаше,

Камение малое персты пребирая,

яко обычай детем, песок пресыпая.

Но и младенец узре корабль приплавати,

нача от брега того плежя утекати,

Ибо никогда виде людей, и вбежаше

в пещеру, в ней же тело матере лежаше,

И влез под одеяло, к сосцам привратися,

непщуя, яко тамо от зрящих сокрися.

Велможа, сие видя, вслед его течаше,

вниде в пещеру, в ней же жену спрятал бяше.

И се детищь при сосцу материю сокрися,

лице жены прекрасно, не мертво явися.

Он от радости сердца к лицу земли пал есть,

Богу, соблюдшу чадо, благодарство дал есть,

И возопи усердно: Слава Тебе, Боже,

и тебе, о Марие святая госпоже,

Яко твоим тщанием сын мой соблюдеся,

от глада же и хлада, и смерти спасеся.

За твоя Бог молитвы сей плод сохранил есть,

и за печали моя днесь мя утешил есть.

Взем же чадо на руце, любезно лобзаше,

радостными слезами оно обливаше.

Помале престав от слез, ял есть глаголати:

Марие Магдалыни, пречестная мати,

Верую, яко Бог ти изволи вручите

чадо сие, еже бы живу ему быти.

Силен Бог твой и жену живу ми отдати,

точию помолися, о святая мати.

Видех места святая, иде же востаху

живи на слово Христа, иже мертви бяху.

Верую, яко может, токмо помолися.

То ему глаголющу, жена возбудися,

Аки от сна сладкаго, и нача вещати:

Благодарствие тебе, о Мария мати,

Яко ты в рождении чада ми служила

и во всех нуждах моих, яко раба, была.

Сие видя и слыша, муж ю вопрошаше:

Жива ли еси, душе моя? глаголаше,

Жива ли, сердце мое, или сон есть сие?

Истинное ли дело, ли привидение?

Отвеща возбнувшая: Несть сон сие тебе,

жива есмь милостию Бога, суща в небе.

Жива есмь воистинну, и се возвратихся

от странства, в нем же купно с тобою трудихся.

Бяше вождь нам святый Петр, и вся нам сказаше,

тужде и Магдалыни с нами путствоваше.

О сем муж удивися, а она начала

сказовати подробну, яже соглядала,

И что от апостола святаго слышаше,

вся совершенно мужю своему сказаше.

Он, познав чюдодейство то быти от Бога,

хвалы Богу словеса воздаде премнога

И, поем жену, в корабль радостно идяше,

величие Божие всем людем сказаше.

И тако с радостию в отчество вратися,

иже в пути доволно слезми напойся.

Егда же в Марсилию весело внидоста,

Марию во множестве людей обретоста,

Учящу правой вере, Бога жива знати,

бездушныя идолы вконец истребляти.

Пришедша убо к оней, нозе лобызаста

и велегласно сия глаголы вещаста:

О преблаженна еси, Мария святая,

яко возвещаеши миру спасенная.

Вел ий есть Господь Бог твой, веру ем в Онаго,

не хощет разве Того знати мы инаго.

О Нем же вещаеши, Бог нам выну буди,

Того всегда возславят даннии нам люди.

И начаста народу поряду вещати,

колики сподобленни Богом благодати.

Народ, чюдеса слышав, Богу приклонися,

и тако Марсилия в вере просветися.

Крестися со женою велможа блаженный

и со сыном (иже бе чюдне воспитенный)

От Максимина свята, епископа бывша,

во Марсилийстем стаде Богови служивша.

То видяще, людие ко Христу пристаху,

к бани паки бытия радостно течаху.

Скверныя же идолы вскоре сокрушиша,

а капища во храмы Богу освятиша.

И тако весь род светом веры просветися,

от демона ко Богу праву обратися,

О Нем же буди слава, Христе Боже, Тебе,

обладаяй сущими на земли и в небе.

Благодарим и тебе, о Мария мати,

ей же сице дал Господь ползу содеяти.

Ты же о нас молитву сотвори до Бога,

еже не лишити нас небесна чертога.

Мертвец

Мертвецу слезы и вопль не в ползу бывает,

милостыня, молитва ему помогает.

Мертвец свят, не его еже весь град провождает,

но его же сонм доброт всяких окружает.

Мертвых не плакатися

Преставлшихся во вечность несть плаката требе,

благословныя вины се сказую тебе.

Смерть Богом уставися, Ему годе тако,

да вси мы умираем, не слезим же всяко.

И есть нам она нуждна, ибо несть леть в небе

без нея вселитися, убо слез не требе.

К тому множицею смерть полезна бывает,

мертва болезней, нас же туги избавляет,

А слезы ни едины ползы содевают

умершым, а нам много здравие вреждают.

Наконец, того ради несть нужда слезити,

яко мертвыя Господь имать воскресити

В общее востание и жизнь лучшу дати,

в радости безконечней в небе пребывати.

За сие и апостол Павел увещает,

да никто о усопших скорбети дерзает.

Мертвии мертвых егда погребают,

достойне слезы многи проливают,

Яко не чают им воскресения

и в селех жизни вечна вселения.

Живии паки верою живою

и надеждею, в любви преблагою,

Нечто естеству могут снисходити,

немноги слезы над успшим пролита,

Яко отходит, а силне ридати

не подобает и власов терзати,

Ибо отходит из мира ко Богу

мзду трудов, радость прията премногу.

Имать же паки тем телом ожити,

в светлостех святых вечно весел быти.

Мертвых како плакати

Ближних тщету нам смерть соделовает,

но в жизнь вечную оны впровождает.

О тщете мало леть есть возрыдати,

утеху о их жизни приимати.

Меск

Меск из сосцу материю егда изсысает

млеко, копытами ю абие бияет.

Мы тому подобимся, ибо, елма многа

дарования вземлем от всещедра Бога,

Скоро противу Ему теми ся вращаем,

егда данных на добро зле употребляем.

Дает Господь богатства в благостроение,

мы в гордость обращаем и на блужение.

Дает Бог власть и крепость, еже защищати

бедныя, мы же тщимся оны обиждати.

Дает Бог силу плоти, да бы ся трудити

Ему в славу, си в ползу, не вотще ронити,

Мы же на безчиния ону обращаем,

Ему и ближним нашым тою досаждаем.

Дает доброличие, да И прославляем,

мы же тем на блуд скверный други возбуждаем.

Дает остроту ума всех благих искати,

мы тщимся тою лстити, правду изстребити.

Дает сладкословие в устех и в языце,

мы горкими словесы досадни Владыце.

Оле богопротивства! Каятися требе

и исправити дела, тако будем в небе.

Месть, или Отмщение

Иустиниан вторый елма царствоваше,

нос ему урезаху, и изгнаны бяше.

По неколицех летех цасртву присудися

и от заточения к престолу вратися.

Пловущу же чрез море, волны злы востаху,

надежду всем отъемше, смертию прещаху.

Тогда царю советник нача глаголати,

еже бы обет дати врагом не отмщати

Урезания носа, да за смирение

его тое утолит Господь волнение.

Он же в ярости рече: Да потоплен буду,

аще отмстити тоя обиды забуду.

И отмщаше жестоце, велел бо имати

противники бывшыя и в юзы ввергати.

Потом, егда из мокрот нос свой очищаше,

единому от враг си главу отсекаше,

И дотоле люту смерть нещадно творил есть,

донде же супостаты своя изтребил есть.

О лютаго мщения, еже вы вергайте,

но на Христово слово слух вашь отверзайте,

Иже отмщения всем верным возбраняет,

паче, любити враги своя увещает.

На отмстители паки казни посылает,

яко же вам искуство пресветло являет,

Ибо и сего царя смертию казнил есть,

егда с сыном заклану быти попустил есть.

Диоген, вопрошенный: Что требе творити

хотящым врагом своим обиду отмстити?

Даде ответ: Аще ты добр ся сотвориши

и честен, от человек доволно отмстити.

И правый даде ответ, ибо творяй тако

себе ползует, врагу сердце дручит всяко,

Ибо, аще враг, видя ниву управленну,

сердце имать и душу зело возмущенну,

Колми паче во уме своим возмутится,

егда в тебе самом честь и благость явится?

Ей, яко Аман сердце свое зле снедаше,

егда царем почтенна Мардохея зряше,

Тако враг твой конечно будет ся дручити,

егда за благость честна узрит тебе быти.

Албоин Лонгобардов краль жену имяше,

яже ся Росимунда по имени зваше.

Тоя отца Албоин некогда убил есть,

из кости главы его чашу устроил есть.

Во некое же время с женою пияше,

и в той чаши вино ей пити подаяше,

Глаголя: Пий весела с отцем, рождшим тебе,

от меча десницы ми не соблюдшим себе.

Росимунда в обиду то себе вменила,

отмщение творити в сердци положила.

Бе же в дворе Лонгобард, Хелмехилд реченный,

добротою лица си велми украшенный.

Муж зело храбрый, той же девицу любяше,

Росимунде служшую, еже она знаше

И совеща девице блудно с онем жити,

чесого елма дева не хоте творити,

Проси ю, да зовет й на место известно,

сама с ним да пребудет, той отшедши лестно.

Сотвори дева тако, место показала,

на нем же Росимунда того ожидала.

Хелмехилд в нощи время приде, девы чая,

пребысть с Росимундою, кто бяше, не зная.

Егда же, грех содеяв, хоте отходити,

Росимунда, явлшися, ят слово творити:

Виждь, что ти избереши, едино от двою,

да можеши имети целу главу твою.

Или оглаголю тя кралю за се дело,

и конечно лишится главы твое тело,

Или ты Албоина днесь да убиеши,

а с царством за супругу мене да поймеши.

Он, окаянный, избра краля си убити

и со Росимундою в супружестве жити.

Шед убо, уби краля, обагрил есть ложе

кровию его, жена злобе допоможе.

Бывшу погребению, Росимунда тщится,

да злобник ону поймет, и краль сотворится.

Лонгобарди вопреки тому делу сташа,

Хелмехилда онаго за краля не взяша.

Она с ним совещаше из страны бежати,

злата, сребра доволство великое взята.

И тако сотворивше, кораблем отплыша

морем, и до Равенны тем града приплыша,

Иде же некто Лонгин обладатель бяше

и приплывшыя гости всечестно прияше.

Жиша тамо убийцы, казни не прияша,

но зри, кую кончину жития си взяша.

Лонгин, видя прекрасну Росимунду быти,

к тому богатства зная, хоте с нею жити.

Нача ю, да погубит мужа, увещати:

Благо, рече, со мною тебе ся счетати,

Будем бо Италии страною владети

и Лонгобарды в нашей области имети.

А жена безумная зол совет прияла,

о смерти Хелмехилда тощно промышляла.

Уготова питие, отраву положила,

усмотревши час на то, мужеви вручила,

Иже пия, познал есть смертну чашу быти,

похищь ону за врасы, веле ей допити,

Еже оста во чаши, и мечем прещаше;

она той же яд испи, аще не хотяше.

И тако отравою оба погибоста,

погубившая краля, сама исчезоста,

А богатство многое в чюжди и де руки,

злыя же душы в люты отьидоша муки.

Мечь

Образ Богородицы, седмь мечев имущий

в перси ея вонзенных, есть знаменающии

Седмь болезней оныя, яже пострадаше,

егда седмь крат кровь Свою Христос излияше.

Во-первых, во день осмый елма обрезася,

с болезныю Матере кровь Его лияся.

Вторицею, в ограде кровь пребожественна,

образом пота с плоти Его источенна.

Третее, елма бичми у столпа И биша,

злолютии вой кровь Его источиша.

Четвертое, во нь же час венец возложися

тернов на главу Христа, кровь многа точися.

Пятое, егда ризы нуждно извлекаху,

одирающе раны, кровь тещи нуждаху.

Шестое, елма кресту Христа пригвоздиша,

из руку и из ногу многу кровь пролиша.

Седмое, егда ребра Его прободенна,

в то время кровь с водою купно источенна,

Яже святая Мати елма соглядаше,

болезни, яко мечы, сердцем си страдаше.

Ты, в персех видя мечы, сердцем сокрушися,

за кровь Христа, за болезнь Девы умилися.

Мечь истинны

Дионисий мучитель Сиракусов страны,

от ласкателя бяше Дамокла прелщаны

Блажением щастия, богатства и славы,

даже не утерпети царю тоя хвалы

И глаголати сладце к тому ласкателю:

Хощеши ли то знати, любый приятелю?

Ему же соизволшу, царь веле садити

Дамокла на престоле и всем его чтити.

Слузи абие слово царско сотвориша,

ласкателя на златый престол возсадиша.

Багряницу царскую вскоре принесоша,

в златозарную ризу его облекоша.

Венец златый на главу его возложиша,

скипетр неоцененный всечестно вручиша.

Приидоша краснии юноши служите,

повеления слово делом сотворите.

Представиша трапезу, златом украшенну,

брашны и питиями дивне исполненну.

Различный мусикии род ту предстояше,

сладкими гласы ушы с сердцем веселяше.

Въкратце буди реши ми: вся ту дана быша,

яже царя самаго сердце веселиша.

Сице Дамокл почтенный, превозвеселися,

в жребии блаженнейших быти воменися.

Но тогда повеле царь власом увязати

мечь острый, и над главу его низпущати,

Его же узрев, Дамокл зело устрашися,

вострепетав всем телом, лицем изменися.

Преста ясти и пити, всепечален бяше,

песней слушати. зрети юнош не хотяше.

Моляше царя слезно, еже пущен быти,

не на престоле злате, но в дому си жити.

Не желаше блаженства себе царска к тому,

но покоен седети возлюбил есть в дому.

Сицев есть воистинну живот человека

от начала бытия до кончины века,

Егда бо яст и пиет, ничто ино деет,

егда в чести, в богатствах и во славе спеет.

В то время мечь истинны Божия блистает,

на тонце висящь власе, смертию прещает.

Что зная, человече, како ся снееши?

Вскую сластей от Тебе плотских не вержеши?

Остави о суетных в мире весел быти,

помни, яко смерть славных не знает щадити.

Избери в мире слезы, да радость на небе

Богом данная будет безконечна тебе.

Мечь из уст Христовых

Мечь обоюду острый из уст изхождаше

Христовых, в явлении Богослов видяше.

Той на Страшном Судище действен имать быти,

егда имать по делом Христос ны судити.

Тем на десную страну будет сечение,

ко благим людем Его благоречение,

Зовущее в царствие небесное в радость,

по горестех житейских во вечную сладость.

Того меча на шуйцу удар сотворится,

егда изречение грешным возгласится:

Идите, проклятии, от Мене в огнь вечный,

в нем же мука, зуб скрежет и плач безконечный.

Блажен тогда муж будет, иже сподобится

одесную стояти, той возвеселится.

Окаянен же вечно, кто на шуйце будет,

ибо мукам преданна Бог вечно забудет.

Мзда

Пустынножитель некто Богу работаше,

к воздаянию вечну выну воздыхание.

В некое время Господь изволи открыти,

яко близ Григория папы имать быти

Во царствии небесном, егда преставится,

от временныя жизни в вечну преселится.

[281V] Он, воздохнув от сердца, нача сетовати,

яко за нищету си то имать прията.

Глаголаше бо в себе: Аз нищ сотворихся,

волею Христа ради всех благ отщетихся.

Григорий же богатством премногим кипяше,

в обилии временных преславно живяше,

А не имам аз вящше от него прията;

кая си благодать есть, не могу познати.

Елма же часто сия в себе помышляше,

ответ от Мздодателя сицев услышаше:

Имеяй злато аще в нем не усладится,

нищь духом, а не богат человек судится.

Не имеяй же того аще возжелает,

не нищь духом, но богат весма ся вменяет.

Григорий паки аще богатство имяше,

сердца своего к нему не прилепил бяше.

Ты кота си, его же по вся дни гладиши,

во келии держима, множае любиши,

Нежели он все злато, он бо расточает

тое на нищих нужды, сам ся не слаждает.

Ты же утеху неку котом приемлеши,

всуе убо богатства его поемлеши.

Он, сицев глас услышав, ят скоро слезити

и прощения греха от Бога молити.

Благо исправився же, не преста желати,

да бы близ Григория место восприяти.

Иже Христа ради мир сей презирает,

того Он в царствие небесно вселяет,

А кто родителей своих отлучится,

со аггелы жити в небе сподобится.

Кто же скорби терпит благодаря Бога,

возмездие возмет небесна чертога.

Иже о гресех зде умилно слезится,

в стране веселия превозвеселится.

Мзда небесная

Что нам у готова Бог на небеси дати,

полезно есть кому ж до благо разсуждати,

Да, мзду знающе честну, красну и премногу,

не миру лстиву служим, но щедрому Богу.

О, аще разсуждали быхом небесная,

во ничто же вменили быхом вся земная,

Яко сия небесным аще приравнятся,

не блаженство, но бремя тягостно явятся.

И жизнь временна аще вечней уравнится,

смерть паче, неже живот уму проявится,

Ибо повседневное плоти требление

что ино есть, точию смертное тление?

Кий паки язык может то изглаголати

блаженство, или умом доволно объяти,

Еже возвеселити имать человеки,

егда с аггелы будут жити чрез вся веки

И со всеми силами Богу предстояти,

славою паче солнца без конца сияти,

Лице Бога безсмертна несредственно зрети,

во свете его жити, хвалу вечно пета?

Не имут же тления во веки познати

и страшныя зде людем смерти ся бояти.

О блаженства велика! Кто тя не желает?

Моя душа и сердце к тебе исчезает.

Милость

Егда во Вифлееме Христос Бог родися,

в Риме поток елея из земля явися

И в реку, нареченну Тивер, истекаше,

Богом данную миру милость знаменаше.

Милость Божия

Ко Елисею вдова вопияше,

яко до зела обнищала бяше.

Взаим же датель долга изпрошаше,

ли сына взяти в работу хотяше.

Он повеле ей сосуды собрати,

елико мощно, и елей влияти.

Та, веру емши, сосуды собрала

и из сосудца в ня елей влияла.

Многи исполни и еще прошаше

от чад сосуда, но к тым ин не бяше.

Оскудением сосуд и елея

умножение преста в дому ея.

Подобне милость с небес истекает,

донеле в сердци сосуд обретает.

Аще же того будет лишение,

милости Бога станет течение.

Милость есть Господня, егда отрицает,

яже душевредна быти усмотряет.

Милость велия

Юже Господь мирови милость проявляет,

ту великую мати Церковь нарицает

Того ради, яко есть от велика Бога

на грешны человеки, та же велми многа,

И яко чрез аггела совета велика

миру бывает, иже есть Христос Владыка.

Еще, яко велию худость воздвизает,

яже род человеческ излиха смиряет.

К тому, яко дарове Его суть велици,

яже от щедрот Его вземлют человеци.

Велика и за сие, яко чрез вся веки

везде и всегда она есть на человеки.

Наконец, яко блага готует нам многа,

и великия дары, небо же и Бога.

Тем влепоту велика милость нареченна,

во ней же да хранит ны любы божественна.

Милость господская

У господ милость трудно есть стяжати,

труднее того — выну ону знати,

Ибо воскоре та ся изменяет

и множицею в гнев ся прелагает.

Аще у муж велможных есть благодать тебе,

употребляти ея всеопасно требе.

Яко со огнем, с ними есть полезно жити,

ни же ся удаляти, ни велми близ быти.

Огня удаляяйся озноблен бывает,

а близ зело сущыя сам огнь опаляет.

Тако, иже от господ себе удаляют,

презренни и безчестни у онех бывают.

Иже паки дерзают ближитися зело,

мало за дерзость свою до конца суть цело.

Средство убо в житии сем храните требе,

иже хощет безбедства и дружбы их себе.

Милость изменна

Света источник, солнце лучеродно,

егда сияет найпаче погодно,

Множицею то обыче бывати,

еже бурливу дожду низпадати,

И егда море кротко ся являет,

часто внезапно волны воздвизает,

Пловцем велие бедство творящыя,

иногда корабль с людми топящыя.

Тако непщуйте и о благодати

велможных мира: невесть та стояти

В тишине долго, егда бо сияет

найпаче, тогда в надежде прелщает.

Беду наносит и добре служившим,

во всяцех делех веру сохранившим.

Иосиф буди в память приведенный,

целомудрием богоукрашенный,

Иже коль верен господину бяше,

и вся по воли его совершаше,

От словес его мощно то познати,

яже леть в книзе Бытия читати.

И коль Пентефрий его миловаше,

яве, зане вся оному вру чаше.

В велицей весма бяше благодати,

паче, нежели леть ми глаголати.

Но и та скоро на гнев преложися,

юноша верный в темницу всадися.

Блудная жена мужу клеветаше,

на Иосифа свой грех возлагаше,

Иже, нужденный на блуд, не содея,

господне ложе во чести имея.

Обаче прелесть паче правды може;

како терпиши, о всевидяй Боже?

Страда Иосиф, в темницу вверженный,

донде же Богом бяше изведенный.

А жена блудна живяше в полате,

сладце питанна, и хождаше в злате.

Чиста оковы душу прохождаху,

а блудницу вси чести сподобляху.

Вы, измену ту чтуще, разсуждайте,

в милости силных не преуповайте.

Слон зверь превелий егда хощет спати,

обыче к древу хребет прислоняти.

Ловцы, наблюдше, древо подсецают

и отхождают.

Время спания егда приближится,

по обычаю ту слон прислонится,

но тяготою древо обваляет,

сам упадает.

Подобне, камо люди прибегают,

надежду свою в нем же полагают,

смерть си косою того подсецает

и вся прелщает,

Тому бо падшу, падают и они

в надежде, яко несмыслнии слони.

К тому не могут на нозе востати

ко благодати.

Милость ко врагом

Град во обстоянии от враг некий бяше

и скорбь превеликую от онех терпяше.

Бяше же в верее реки мост сооруженны,

сей, воем преходящим, весма расторгненны,

Яко же множеству вой в реце погибати,

иным же на древесех вниз к граду сплывати.

Граждане враг тонущих от воды спасаху

и, воведше во град свой, милость проявляху.

Потом, я учредивше, ко князю отслаша,

ни единаго смерти от онех предаша.

Князь, видя граждан милость, велми удивися

и взаим сам на милость к оным преклонися.

Посла благодарствие за толико дело

гражданом и отшел есть, град оставив цело.

И к тому не приложи на ня ратовати.

Се милость весть к милости сердца преклоняти.

Милостыня

Отец некий ко смерти недугом лежаше,

сыны своя с богатством многим оставляше.

Вопроси я, како й будут поминати,

кое благо за душу его содевати?

Един обеща жертвы выну приносити,

ин милостыню всегда щедрую творити,

Третий рече: Ничто же аз ти обещаю,

но и брата солжета, совершенно знаю.

Аще бо имение ты цело имея,

не твориш ради душы благаго твоея,

Како, по части вземше, мы будем творити?

Не хощу аз тя, отче любезный, прелстити.

Сам ныне да твориши теплою рукою,

тако блаженно душу устроиши твою.

Мы восхощем имети, а не раздаяти,

несытно сердце юных, сам тщися подати.

Отец, слыша истинну, часть нищым отдаде,

прочее в наследие сыновом предаде.

Зри кож до и мудр буди, твори благостыню,

тщися сам за душу ти дати милостыню.

Не надейся на чада, та забудут тебе,

ибо обогатити возжелают себе.

Златоустый глаголет: Лучше есть творити

милостыню, нежели царем в мире быти.

Яко же огнь водою угашен бывает,

точне милостынею грех ся изтребляет.

Милостыня приятна, яже предваряет

прошение убогих, ли скоро бывает

Не едину, но многим, требующым ея,

и аще не в скупости, от силы своея,

И егда не от хуждших вещей та творится,

и нужда требующых егда разсудится;

Ин бо велику нужду имать, ин не тако.

Да будет же во славу Бога жива всяко,

Аще бо славы деля мирския творится,

та на земли возмездна, в небе не платится.

Вся суть от Бога и ничто же наше,

тем же апостол сице вопрошаше:

Кто прежде Богу дал, да воздаст ему?

Аз, Павле святый, дам слову твоему

Ответ: яко той прежде Богу дает,

иже нищыя люди ущедряет,

Ибо послежде Богом воздается,

еже убогим люд ем раздается.

Богоугодна жертва — рук воздеяние,

егда есть милостыни нищым даяние.

Егда грешник пред Богом смертно согрешает,

жезл железный прияти Бога понуждает.

Творя же милостыню, в милость преклоняет,

вместо жезла масличну ветвь Бог проявляет.

Аще убо, братие, грешни есте Богу,

милостыню творите благохотно многу,

Кающеся во сердцех, а Бог всеконечно

не будет вас казнити огнем адским вечно,

Но преложит на милость ярость Свою праву,

вместо осуждения даст живот и славу.

В гресех смертных живущым спастися немощно,

аще и милостыню дают нищым тощно.

И всяко дело ино отметно бывает,

еже во гресех живый благо содевает.

Аще убо хощеши тщеты не прияти

дел благих, прежде тщися от грехов престати.

Покаяв же ся онех, сребро да даеши

в милостыню, за то жизнь вечну приимеши.

Обаче и во гресех милость творенная,

не всячески своея мзды есть лишенная.

Токмо сие о вечней непщевати требе,

яко лежяй во гресех не будет на небе.

Имат же временную мзду от щедра Бога,

здравие, крепость или обилия многа,

Или что от подобных. Еще то бывает,

яко за милостыню Бог ум просвещает,

Еже познати злобу и казнь разсудити,

да бы ту оставити, к Богу ся вратити.

Наконец, и та полза грешников бывает,

яко за милостыню казнь Бог умаляет,

Еже аще и вечна имать оным быти,

но лютость тоя имать Господь уменшити.

Аще убо праведник, аще грешник еси,

скудным щедрую людем милостыню неси,

Ибо, аще невечна мзда ти будет в небе,

то поне временная пригодится тебе.

Весма же увещаю в гресех не лежати,

да бы не временну мзду, но вечну прияти.

Кая бо полза будет, аще обдержиши

всего мира богатства, душу же сгубиши?

Или кой есть прибыток чрез час ся тешити,

потом вечно во аде зле мучиму быти?

Уне покаяния казни зде страдати

кратко, и в милостыню сребро си раздати,

За то бо жизнь вечная от Бога дается,

без покаяния же щедрый не спасется.

Богатым милостыню людем подаяти

есть пшеницу добрую в тернии сеяти,

Яко бо ту терние возраста лишает,

тако та милостыня безплодна бывает.

Не сластноядцем сребро умей раздаяти,

но им же алчбу чрева нужда утоляти.

У сих царство небесно мощно есть купити,

овым что-либо даси, знай тщету ти быти.

Аще хощеши благий купец быти,

царство небесно на земли купити,

Нищих есть оно, с ними содружися,

им милостыню подаяти тщися.

Даждь им, его же несть леть удержати,

да то от Бога можеши прияти,

Чесо съгубити невозможно будет,

но вечно в твоей державе пребудет.

Зде мало даси, а возмеши многа

воздаяния от всещедра Бога,

За вещ тленную — нетление в небе,

его же аз ти хощу, яко себе.

О блажен муж есть, сию куплю деяй,

на земли небо купити умеяй!

Мир

Князь мира — Христос Господь, и в мирно родися

время, егда от браней мир упокойся

В дни кесаря Августа, а егда рожденны,

мир агтелми на земли тогда извещенны.

И Сам миру найпаче люди поучаше,

миротворцы блаженны быти извещаше.

И отходя от мира, мир зело блажаше,

паче всего хранити мир завещеваше.

Тогда трегубый. Первый есть с Богом и с нами

Христом устроен, яко отцу со сынами.

Сей смертными грехами весма ся терзает,

вместо его гнев Божий на ны наступает.

Убо всячески грехов хранитися требе,

аще хощем со Богом мир имети себе.

Вторый мир между людми учаше хранити,

еже бы во единстве веры, любве жити.

Того ради Он Церковь везде разширил есть,

вся роды во единство свести возлюбил есть.

Сей неверие и пря, обида терзает,

сих вин всяк христианин всяко да гонзает.

Третий мир с совестию комуждо своею

нужден есть Христианом; о коль благо с нею

Всегда во мире жити! Ови добре знают,

иже противно оней нимало дерзают,

Но вся деют опасно, злоб ся удаляют,

на показы закона Божия смотряют.

Сей мир разоряется, елма неко дело

с презрением совести деет некто смело.

Но о коль люте совесть тогда досаждает,

ясти, пити, ни спати мирно попущает.

Знает то, кому-либо в грех впасти случися,

аще токмо разумом падеж разсудися.

Вся миры сия нужда прилежно хранити,

ничто же им пакостно никогда творити.

Тако леть будет и зде век жити в радости,

и в небесныя внити вечныя сладости.

Нами то невозможно, Ты изволи дати,

Царю мира, нам в мире выну пребывати.

Мирны вся птицы, егда орел прилетает;

мир всего мира приход Христов предваряет.

Аще брат согрешивый жесток пребывает

и. люте досадив ти, себе не смиряет.

Поищи души его, ты пред ним смирися,

виновник спасения его сотворися,

Всячески бо зря тебе при правде смиренна,

явит себе во сердци благо исправленна,

Совесть бо своя ему будет досаждати,

да потщится ти благим досаду воздати.

Ни же помышляй в тебе неправедно быти

невинному пред винным смиренность творити.

Зри на Бога Самаго, что Он содевает,

грешныя человеки Сам Он предваряет.

Посылает благодать, да ся обращают,

возбуждает, да от сна греховна востают.

Толцает до врат сердец, да бы отверзали,

мир и милость несуща любо приимали.

Не Сам ли Бог пророки к грешным посылаше

и ко покаянию от грех увещаше?

Не Сам ли Христос Господь изволил ступити

с небесе, да бы с Отцем люди примирити?

Не предварил ли рабов своих посылати,

еже и язык роды ко миру призвати?

Аще убо Господь Сам грешныя варяет,

оскорбившыя Себе во мир приглашает,

Несть неправедно и нам подобне творити,

паче же добродетель есть себе смирити

В невинности сущему. Убо ся смиряйте,

за то вознесения от Господа чайте.

Малыя вещы миром велики бывают,

не миром превелия вконец погибают.

Благо есть в мире, еже мир хранити

с Богом, с ближними, с совестию жити.

Но с миром самем не мир есть блаженный,

ибо той во зле тлеет положенный.

Орел ко птицам егда прилетает,

вся между ними брани укрощает.

Орел есть Христос, внегда же родися,

всяка брань в царех мира утолися.

Мир — богатств мати, та гордость раждают,

гордии мечев на ся добывают.

По мечах скорби, по тех смирение,

еже приносит упокоение.

Донде же еси в пути мира сего,

да суперника мириши твоего,

Яко ти несть весть, когда жизнь скончиши,

по ней же мира неудобь влучиши,

Ибо судиа, раб зол и темница

по той останет, где не зрит зреница.

Аще же зде й мирна сотвориши,

вместо судии отца получиши.

За раба люта — аггела служяща,

ко Аврааму душу ти носяща,

В темницы место, во рай просвещенный

в светлости святых будеши введенный.

Дух человеческ уды оживляет,

яже союзны в плоти обретает.

Отсеченных же невесть он живити.

Тако Дух Божий обыче творити

В телеси Церкве, ибо осеченных

не сподобляет даров божественных.

Единым тыя в согласии сущым,

дарствуя, сыном царствия будущым.

Мир правде друг есть, тем же ю лобзает,

без нея нигде долго пребывает.

Убо, аще ти любо в мире жити,

должно есть правду сестру его чтити,

Ея же аще ты не возлюбиши,

и брата ея в дому не узриши.

Миротворитель сын Бога живаго

есть, а расколник — чадо врага злаго.

Мир вещей ради с други разоряяй

есть паче другое вещи возлюбляяй.

Благ есть мир благих, миру бо полезен,

зол паки злых мир, многим бо болезней.

Есть брань, лучшая мира, тогда же бывает,

егда брань к Богу ближит, мир же удаляет.

Царь мира мир наш тако ублажает,

посреде мирных жити обещает.

В мире собранным велит вся просити,

яко тех молбы весть Бог исполнити.

Мир благим да есть, злым же не мир буди.

тако безбедно могут жити люди,

В мире бо благих вся блага бывают,

злых же не миром злобы исчезают.

Мир правый внутрь есть, егда души тело,

душа же Богу работна есть цело.

Воля уму, ум Богу аще покорится,

мир истинный во сердце тогда водворится.

Мое и Твое речь да упразднится,

въместо же тоя Наше да слышится.

Тогда желанный мир во мире будет,

всяк, обогатев, нищеты забудет.

Страшен в руках мечь, ветвь маслична люба,

знамя бо мира, ов — миру пагуба.

Мир душевен, не еже страсти истребити,

но тыя терпеливо ведети носити.

Мир есть в сердци, аще кто истинно ся кает,

снедение совести ему не стужает.

Благо есть в мире мир сладкий имети,

без бедства от враг в дому си седети.

Лучше того — мир совести стяжати,

снедения в ней от злоб не страдати.

Добрейше тех есть мир в небе влучити,

вечно со Богом во премирных жити.

В мире сем мира праздном дар есть благодати

Божия, немятежный мир себе стяжати,

Ибо, тому присушу, все добро бывает,

человек, яко в рай, безбедно витает.

Весело трудов своих собирает плоды,

мнится в сладостех жити райския породы.

Многи ползы и ины мира обретаю,

их же всем человеком верным аз желаю.

Во-первых, всеприятен мир Богу бывает,

и мира любители Он благословляет.

Сам изволи Бог мира нарицаем быти,

яко, иде же мир есть, тамо любит жити.

И Бог Слово егда в мир сей изволи снити,

вина бе, еже бы мир миру сотворити

Со Богом Отцем Своим, небу со землею,

яко же и сотвори смертию Своею.

Егда же плотию Си во мир прихождаше,

мир чрез аггелы Своя мирови вещаше.

И елма апостолы во мир посылал есть,

мир всякому даяти дому увещал есть.

Паче, егда на страсти водныя идяше,

мир имети с собою слугам завещаше

И: Мир вам оставляю, Сам усты вещал есть.

всячески над все мира верным Си желал есть,

Блаженство бо велие совершен имети

мир отвсюду, и браней никоих терпети.

Вторая полза мира — яко он есть десный

путь христоименитым людем в рай небесный.

Паче, начало жизни он есть небесныя,

сготованныя ради твари словесныя.

Ибо в небе из вящших едино веселий —

яко без конца имут святии мир велий.

Третяя полза — яко в себе заключает

мир подобие Троицы, та бо пребывает

В триех лицех, едину волю содержащи,

едину силу, мудрость, весма мир хранящи.

Четверта полза — яко многа в мире сладость,

умножение благих и велия радость,

Чесо ради псаломник мир нам ублажает,

благу красну братии купность совещает.

Того глас вы внушайте, наипаче Христова

да будут в сердцах ваших написана слова,

Иже верным рабом Си мир велит хранити,

во божественней любви лета своя жити.

В плоти человечестей зело мирни уди;

тако требе, да в Церкви вси мирствуют люди.

Страждет един уд, ему состраждут инии,

сице да творят Церкве уди мысленнии,

Их же глава едина Христос Божественный,

в основание Церкве Богом положенный,

Да вси в едино тело будем съвокупленни

едным духом, за веры единство живлени.

В разгласная бо сердца Дух Божий не входит,

плодов дарований Си никако изводит.

Едина в христианех древле душа бяше,

тем же Дух Божественный во онех живяше.

И нам ныне едину достоит имети

согласием, да будем Царя мира дети.

Союз любве в единстве нас да сохраняет,

а Дух Божий готов есть, да ны оживляет,

Им же во град вечнаго мира воведемся,

от немирнаго мира в премирных спасемся.

Мир Христов

Христос Спаситель мира егда крест страдал есть,

на триех быв древесех, трегуб мир нам дал есть.

Первый мир есть совести, та бо не снедает,

яко грех умерщвленный быти Христом знает.

Вторый мир — согласие со роды чуждыми,

Исраиль съединися с людми Еллинскими.

Оба во плоть едину под Христом главою

совокуплени быша, суть мирни с собою.

Третий мир есть со небом, ибо божественный

праведный гнев уже есть Христом утоленный.

Аггели, с человеки иже в вражде быша,

уже ся во единство любве свокупиша.

Сия три миры Троица в нас да утвержает,

да кождо треми силы ону прославляет,

Умом и памятию и волею вечно

в мире временном и где мир есть безконечно.

Мирножитие

От аввы Агафона юн инок прошаше,

како с братиею мир имети летъ бяше?

Рече: Каков был еси первый день прихода,

таков буди чрез весь век твоего похода,

Или, яко каменный столп, выну пребуди,

досадами, хвалами неподвижим буди,

Столп бо хвалит ли кто, или досаждает,

ни высится, ни гнева восприяти знает.

Тако творя, во мире можеши пожити,

страстми острожелчия непобедим быти.

Мир

Юдоль плачевная мир ся нарицает,

гора веселия в небе пребывает.

Тем зде в слезах лепо семена метати,

да бы горе класы радости пожата.

Мир сей непостоянный, невем, Вскую честен,

зане исполни бед, скорбей и велми есть лестен.

Его же утро любит, пестует, лобзает,

того о камень смертный ввечер разбивает.

Александра Велика колико лобзаше,

едва не вся царствия ему в руце даше,

Но елма покой себе хоте сотворити,

понужден во тлю смерти и прах отходити.

Егда же во гроб златый тело положися

монарха всего мира, червием растлися.

Тогда от стран различных люди прихождаху,

измене того царя зело ся дивляху,

Ибо мнози Божия мняху сына быти,

неискуснаго смерти, имевшаго жити.

Тогда ж любомудреци трие присетиша

и, стояще над костми, глагол сотвориша.

Первый, хотя суетство мира показати

и царствия в нем тщетна, начат провещати:

Сей царь вчера во мире целом не вместися,

днесь же малым сим гробом доволен явися.

Вторый хоте явити, яко есть суетство

злата, сребра многое имити богатство,

Рече: Вчера он злато в ковчезех храняше,

а днесь его ковчег злат в себе сопряташе.

Третий, желая словом люд ем то сказати,

яко буйство есть тело сластми утучати,

Рече: Вчера си тело сладостно питася,

днесь червием во пищу скаредным отдася.

Оле изменения! Како се бывает?

Все, еже зрится в мире, скоро претекает.

Тем не любите мира и в нем красных сущих,

яко облак, воскоре мимо нас текущих.

Возлюбите же Того, Иже мир создал есть

и вещы, в нем сущыя, вам в потребу дал есть,

Да, употребляюще онех, яко требе,

в славу Божию, за то вселитеся в небе.

Море горести мир сей мощно нарицати,

яко жители своя обыкл огорчати

Различными печалми, скорбми и бедами,

недугами тяжкими, многими трудами.

Толь же сущему горку, толику являют

любовь ему людие, сердца прилепляют,

Даже мощно бы о нем смело глаголати,

сладка, яко мед, быти, полна благодати.

Се же есть того ради, яко горесть пити

обыкоша, як воду, и в ней выну быти.

Яко же и во горком море пребывают

рыбы, а злы горести онаго не знают,

Тако чювства налогом противная любят,

аще многажды вредят, или паче, губят.

Человека ради мир, от Бога созданны,

оному во жилище есть уготованны,

Да в нем рождением сущ, Творца си познает,

познав же Его право, честь Ему воздает,

Почитая же, служит, а за службу тую

восприимет от Него мзду в небе вечную.

Тако же уподоблен силам горним будет

и во славословии Божии пребудет.

Си есть таинство мира, сего ради быша,

иже ся от Адама семенно родиша,

А зане же волею Бога отпадают

зело мнози, небесе лишени бывают.

Сию вину собою злии содевают,

аще мнози вселожно Бога обвиняют.

Бог всем хощет спастися, всем и помогает,

но наше неистовство Его отревает.

Не Бог убо виновен погибших во аде,

сами ся водворяют во геенстем граде.

Бог же вина приемших жилища на небе,

яко помощь Онаго возлюбиша себе.

Мир есть предатель, его же лобзает,

воинству врагов душевных предает,

яко Иуда Господа предание,

егда лобзание.

Уне есть убо язвы пострадати

от мира, неже лобзание взяти,

ибо его же мир сей ненавидит,

того Бог видит,

А яже лстец сей любезно лобзает,

тех Бог не любит, за Своя не знает.

Кто бо друг миру — не друг Христу Богу

чрез злобу многу.

Христос благая завеща творити,

а мир во гресех поучает жити.

Кто убо миру сердце свое дает,

Христа лишает,

За что от Христа сам будет лишенный,

яко враг Его во ад осужденный.

Тем же не миру вы друзи бывайте,

но Христа знайте.

Море мертвых человек трупы изметает,

мир умершыя себе гонит, озлобляет.

Мир — мерра, или горесть может ся назвати,

яко горкими слезы обыкл чествовати

Люди, яже содержит. Аще же явится

услаждаяй вомале, скоро изменится.

Толико бо сладости в нем, елико злата,

толь же много горести, елико есть блата.

Обаче любим его, оле несмысленна

рода человеческа, и суда лишенна!

Аще толико горку любовь приложихом,

что, аще был бы сладок, сотворили быхом?

Аще терние его нам годе толико,

что бы с шипки деяли? Пощади. Владыко.

Яко же в мори рыба в беде пребывает.

ибо, яже велика, малу поглощает,

И многажды малая великую морит,

подобне ся во мире всепрелестном творит,

Ибо малаго болей томит, озлобляет,

невиннаго сый винен люте погубляет.

Множицею и малый великаго губит;

мир сей, во зле лежащий, в злобах жити любит.

Сладко птицеловитель свирелми пискает,

егда птицы ловити лестно промышляет.

Сладшыя человеком мир поет обеты,

хотя уловити й, но деет наветы.

Тем же гласов онаго несть слушати требе

хотящым пресвободно жити вечно в небе.

Сугуба любы в людех обитает,

к Богу и к миру та ся протязает.

Бог, любяй люди, хощет любим быти

от нас, мира же не велит любити,

Яко те любви купно не бывают,

но една друзей възаим уступают.

Есть любы мира сего в сердцы кому?

В том любы Бога не витает дому.

Хощеши к Богу любовь содержати,

нужда есть любовь мира вон изгнати,

Яко бо с тмою свет не обитает.

велиар с Христом купно не бывает,

Тако и любовь едина с другою,

Бога и мира, не живут с собою

За противства си, к Богу бо благая,

яко к благому, к злому миру злая.

Ова спасает, сия душы губит,

безумен убо есть, кто мир сей любит.

Противне, мудр есть муж, любящий Бога,

тому зде милость, в небе слава многа.

Мир гонит благих

Аще тя мир сей ненавидит зело,

Бог тебе любит, ими веру смело,

Ибо, его же Господь мужа любит,

того своими рабы мир сей губит.

Авеля Господь праваго любил есть,

мир же Каином онаго убил есть.

Бог Исаака от чрева избраше,

того Исмаил, раб мира, гоняше.

Иаков, точне Богом возлюбленный,

много Исавом братом бе гоненный.

Род Исраилский сын Богу вменися,

а Фараоном из лиха гонися.

Давид по сердцу Господню мужь бяше,

а Савл его убити искаше.

Сокращу: Христос, единый Сын Бога,

коль от злочтивых злая страда многа?

Пришедый мир сей смерти свободити,

биен и распят, даже в гробе быти.

Искони добрым злии врази быша,

Божия чада мирстии гониша.

Но что у спеша сотворшии злия?

Гоняще благих, введоша в благая.

Иосиф аще не был бы проданы,

не обладал бы всеми Египтяны.

Вси гонимии, иже претерпеша,

зде или в небе во благо успеша.

Тем же несть требе нам ненавидети

ненавидящих, но добле терпети,

Да не подобии онем сотворимся,

ненавистию мзды свыше лишимся.

Зло есть злобою побежденну быти,

благим же злое добро победита.

Не может Авель правый ся назвати,

не хотяй брата Каина страдати.

Постраждим убо от мира лукава,

ибо пострада Христос, наша Глава.

Благо, да уди точни будут главе

и терпением достигнут ко славе.

Уне нам, егда злый мир нас не любит,

иже лобзая, любимых си губит,

Яко Иуда Христу содеял есть,

лобзанием си Господа предал есть.

Уне есть вражду от мира терпети,

нежели с онем дружество имети.

Друг бо мирови Богу враг бывает,

всяк же враг Божий вечно погибает.

Уне есть и нам мира не любити

и суетств его в сердцах не храните,

Но целым сердцем возлюбити Бога,

от Него же мзда и блага, и многа.

Вечная в небе любящих И чает,

Бог вся спасает, а мир погубляет.

Мир губит, кого любит

Мир своя други повнегда лобзает,

то, что Иуда Христу содевает,

Делом глаголет к демоном геенны:

Его же лобжу буди похищенны.

Того имете и крепко держите,

того на муки и на смерть ведите.

Лучше есть убо в ненависти быти

мира прелестна, неже в любви жити,

Зане, его же человека любит,

он того весма душевно погубит,

А его же мир ненавидит зело,

того Бог любит, соблюдает цело

Во жизнь вечную, еже ликовати,

в радости в небе всегда пребывати.

Мир есть Вавилон

Исраилтяне в странах Вавилонских

не пеша песней весело Сионских,

но повесиша на вербех органы,

в пение даны.

Мир Вавилон есть, мы — Исраиль новый,

весело пети не будем готовый.

Вербам органы отдадим неплодным

лик людем злобным.

Сами к Сиону должни воздыхати,

в радостей Алфе его поминати,

да ся из плена се мирна свободим,

на небо всходим.

Мир есть книга

Мир сей преукрашенный книга есть велика,

юже словом написа всяческих Владыка.

Пять листов препространных в ней ся обретают,

яже чюдна писмена в себе заключают.

Первый же лист есть небо, на нем же светила,

як писмена. Божия крепость положила.

Вторый лист — огнь стихийный под небом высоко,

в нем, яко писание, силу да зрит око.

Третий лист преширокий аер мощно звати,

на нем дожд, снег, облаки и птицы читати.

Четвертый лист сонм водный в ней ся обретает,

в том животных множество удобь ся читает.

Последний лист есть земля с древесы, с травами,

с крушцы и с животными, яко с писменами.

В сей книзе есть возможно комуждо читати,

коль велик, Иже ону изволи создати,

И коль силен есть, могий ону утвердити,

ни на чем же основу ея положити,

И колико премудр есть, Иже управляет

вся сущая и тайны всяческия знает.

Ту книгу читающе, рцем вси: Слава Тебе,

о Человеколюбче, царствуяй на небе!

Мир злобы покрывает

Мир, лежяй во зле, злобы покрывает,

в милоть доброты оны облекает.

Гордость богатых честноту весть звати,

сребролюбие — промысл нарицати.

Прелюбодейство любовь именует,

ярость велию ревность повествует.

Правды именем зовет отмщение,

пианство ставит в доброчреждение.

Коварству имя мудрости воздает,

вся злая весма благо нарицает.

Горе же злобу благость наричущым,

желчь — мед и тму — свет быти глаголющым.

Мира любление

Сияет небо, яко чисто злато,

каляет мир сей, яко скверно блато.

Обаче небо глупо презираем.

мир, яко блато — вепри, улюбляем.

Мира непостоянство

Плавающий морем в тишине велице

молитвы возсылают к небесе Владыце,

Да хранит я и вопред от хотящих быти

обуреваний лютых, могущих топити.

В тишины время страхом держими бывают,

непостоянство моря присно помышляют.

Тако нам, во мире сем живущым, есть требе

о хотящих приити помышляти себе,

Никогда же безбедства тверда обещати,

мир бо, яко же море, невесть постояти.

Аще возвеселяет на время малое,

обыче наводити печалей и втрое.

Аще богатит кого, может обнажити,

с Лазарем на гноищи нищим положити.

Возносит он высоко, но и низвергает,

поругание деет и во притчу дает.

Во дни убо блаженства зри, что хощет быти,

и не престани Бога о милость просити.

Да тя от злых случаев выну соблюдает

и Сам житие твое на путь наставляет.

Без Него никому же леть спасенну быти,

с Ним сущаго и весь ад не может глотити.

Михаил

Михаил — кто яко Бог — толком знаменает,

тем словом ста при Бозе, тем ся нарицает.

Младость

От рождества младенца мати повивает,

нозе, руце, да прямо растут исправляет.

Много паче от девства нравы исправляти

требе юных, да бы им в благость возрастати.

Многоглаголание

Муж многоглаголивый лжю часто сплетает,

едва бо правда уста его присещает.

Муж многоглаголивый елма разширится

словом, яко на море ковчег отрешится,

Сущий кормила кроме, иже приплавает,

амо же ветр принудит, не где подобает.

Тако бо, иже уст си не тщится держати,

нужду имать зла бедства в словесех страдати,

В них же сюду и сюду зле носим бывает,

донде же во погибель главу си вревает.

Глаголяй много знамение дает,

яко полезных вещати не знает.

В многом глаголании выну грех бывает,

ибо язык вещает, их же ум не знает.

Лучше есть язык от словес держати,

нежели много онем глаголати,

Молчание бо мало повреждает,

а глагол многий многих погубляет.

Многоглаголание со грехом бывает,

ибо то обычно лжю в себе заключает.

Множицею же вражды обыче раждати

и древняя дружества неправо терзати.

Буйства же глаголющих есть обличение

и таимых во сердце мыслей явление.

Свойственно есть безумным, тии бо готово

в конце языка имут всяческое слово.

Никоими мерами могут умолчати,

яко же стрелы в язве не могут держати,

А яко же стрелою иныя пронзают,

множицею на славе ближних убивают,

Частократно и себе в погибель вревают,

вина, яко языка не обуздавают.

Уне убо есть мало словес изпущати,

и та первее умом благо разсуждати,

Да полезна нам самым и людем бывают,

никогда же да блазнят, вся да созидают.

Мнози суть звании

Многих ради человек сей век сотворися,

будущий же немногих Богом уставися,

Зане, яко вещь скудел земля многу дает,

мало же, из нея же злато ся делает.

Тако малочисленны в мире между нами

блещащиися, яко злато, добротами.

Мнози же, яко глина, ли яко скуделы

сокрушеннии, зрятся, лукавыми делы.

Тем же и Господь рече: Мнози суть призвании,

но от того множества мали суть избрании.

В ратующую Церковь премнози приходят,

но в торжествующую зело мали входят.

Едва не вси на брани с врагом погибают,

о треблаженни, иже того побеждают.

Молитва

Моляйся о себе нужду исполняет,

моляйся о ближних любовь изъявляет.

Аще хощеши Бога умолити,

сия в молитве тщися сохраните:

Буди во стане Его благодати

и не престани в Бозе уповати.

Да приложиши к тому смирение

и сохраниши долготерпение.

Внемли прилежно, да благо просиши,

сия храня вся, Бога умолиши.

Егда моляйся сердцем ся смиряет,

тогда молитва горе возлетает.

Егда главою в землю ударяет,

тогда молитва небо пробивает,

Ни же оттуду праздна возвратится,

но, яко посел, с дары отпустится.

Зде молитва деема, прощение дает,

искушение врага силно побеждает.

Ею жизнь временную надолго приемлем,

небес отключение оную вземлем.

Убо, братие, Богу тепло мы молимся,

да тех благ и небесе светла сподобимся.

К праведному цвету пчелы прилетают

и на нем мед сладкий в пищу собирают.

На писаном паки скверная седает

муха и калом си того оскверняет.

Тако на праве дну молитву Дух сходит

и плод благодати Си в души изводит.

На лицемерну же мухи прилетают

из скаредства адска, мерзску содевают.

Блюдися всяк убо лицемерен быти

и за тщеславие молитвы творити.

Въшедый во баню аще ся не омывает,

яко же пришел бяше черн, и исхождает.

Тако входяй во церковь аще ся не молит,

грешен, яко бе прежде, из церкве исходит.

Теплая вода в бани чисто омывает,

теплая слеза в церкви грехи очищает.

От плоти и духа человек сложися,

убо ты душею и телом молися.

Еже ум внутрь себе мыслми начинает,

то тело уст гласом к Богу да глашает.

Душа имать нужду грехов прощения,

благодати, света и прославления.

Плоть — здравия, пищи, риз, управления,

о обою убо да суть моления.

Благо умом в тайне молитися Богу,

но и уст молитва имать ползу многу,

Ибо в самом уме теплость возбуждает,

разумну со Богом беседу делает.

Моляйся Богу сбеседник бывает,

что благо просит, все то получает.

Обоняние воня услаждает,

молитва Богу приятна бывает.

Тем же пророком кадилу равнится,

еже и вонно, и горе носится.

Рафаил Товии молитвы святаго

ношаше в небо да Бога живаго.

Отсюду явно честны оны быти,

потщимъся убо всегда ся молити.

Вода телесе скверны омывает,

молитва души брение чищает.

Вечер и утро агнца закалаху

в жертву Евреи, образно учаху,

Да кийждоверный молитву приносит

утро и в вечер, Бога о всем просит.

Утро молитву к Богу возсылати

требе, да дела наша управляти

Сам благоволит. В вечер же молити

должно, да грехи изволит простити,

Яже в поприще дневном сотворихом

словом и делом, ли зле помыслихом,

И да нощь даст нам в здравии прежити,

не искушенным от демона быти.

Мощно есть нищым вправду глаголати,

яко не могут милостины дати.

Мощно есть неким малопостно жити

за немощь тела, да бы крепким быти,

Но моления несть леть отрицати

кождо бо может молбы возсылати

На всяцем месте и без труда многа,

поне мыслию. Вси убо до Бога

Теплыя молбы выну возсылайте,

желания сердц ваших изъявляйте.

Кто царем мира прошенми стужает,

часто безделен отгоним бывает.

Бог же, противне, любит стужание,

стужящым дает сердец желание.

Жилы все тело наше утвержают,

молитвы теплы душу укрепляют.

Пресецы жилу, член ослабевает,

лишися молитв, дух изнемогает.

Без воды рыба скоро умирает,

без молитв теплых душа исчезает.

Молитва мечь есть, врага посекаяй

душы от него верных защищаяй.

Без оружия воин исчезает,

молитвы кроме душа погибает.

Дух бурен облак мрачный развевает,

молитва тепла грехи разсыпает.

Моляйся ум свой к Богу возвыжшает,

оставль земная, горним близ бывает.

Кадилу жгому подобна бывает

молитва, яко то ся исправляет.

Сладит кадило чювство ухания,

смрад разгоняет от обоняния.

Тако молитва, огнем любления

жгомая. Богу деет слаждения,

Смрад грехов наших силне изтребляет,

милость Господню на ны обращает.

Моисий на горе с Богом пребываше,

от света Его свет лицу стяжаше,

Даже немощно иным бяше зрети

на лице его и света терпети.

Кто к Богу сердце в молбах воздвизает,

на горе с Богом беседен бывает

И озаряем светом благодати,

им же подажд нам. Боже наш, сияти.

Просите, и дастъся вам, Господь глаголаше.

Бог исполнити готов желание наше.

Мы не хощем молбами сердец готовати,

еже достойным быти дары восприяти.

Внегда ти в скорби досадливей быти,

тщися прилежно Богу ся молити,

Ибо молитва ум возвеселяет,

облак печали силне прогоняет.

Разбойник, воина зря вооруженна

и во пути на вся страны пребодренна,

Никако дерзает его нападати,

видит бо ко брани готова стояти.

Точне молитвою кто вооружится,

враг наветовати на того боится.

Теплых словес, яко стрел острых, гонзает,

слово бо всякое его прободает.

Иулиан Отступник егда воеваше

Персиду, из запада весть взяти желаше.

Призва волхва едина и веле собрати

пред лице си демоны, еже бы послати

Скора гонца на запад, и бысть на то слово

чрез волхва духов много на службу готово.

Вручиша путь едину, иже и приял есть,

яко молние, скоро на запад бежал есть.

Внегда же прилетети ему, где живяше

Поплий монах, тамо удержан он бяше

Чрез дний десять недвижно, святый бо молися

безпрестанно, а ему стена сотворися

Преграждения, еже пути не свершити,

но безделну со срамом вспять ся возвратити.

Возвратившася убо царь злый вопросил есть,

чесо ради во службе сице умедлил есть?

На то дух прелукавый: Поплий монах, рече,

безделна мя возврати, путь бо ми пресече.

Разгневався, мучитель Поплию прещаше,

яко лютей й смерти предати хотяше.

Оле ума прелщенна! Лестца не гаждает,

но праведнаго мужа убити желает.

Но лукавых советы Господь развращаяй,

и елико желают, им не попущаяй,

За смерть, ею же мужу прещаше святому,

мучителю смерть посла напрасну самому,

Ибо невидимою силою убися,

душею проклятою во ад преселися.

Зрите, любимици, что молитва творяет,

и духов поднебесных пути преграждает.

Путника аще срящет зверь лют, то гонзает

он на древо, и тако без вреда бывает.

Нас аще злыя мысли имут нападати,

чрез молитву ко Богу нужда есть бежати.

Аще просимых Господь не дарует,

лучшая тех нам конечно готует.

Хамелеонту вражда естеством всадися

к животным, их же жало яда исполнися.

Видя убо он змия, на древо всхож дает

и из уст нить на него некую пущает,

В ея же конце капля, что бисер, сияет,

юже он ногою на змия управляет.

Та повнегда змиевей главе прикоснется,

абие ядоносный умерщвлен прострется.

Подобно действо имать молитва святая,

на змия ветха из уст наших пущенная,

В ней же имя Иисус, як бисер, сияет,

демона лукаваго в силе умерщвляет.

Трепещут сего беси, отвсюду гонзают,

чрез то заклинаеми, где-либо бывают.

В морстей пучине есть рыба малая

в меру ножныя стопы, не вящшая.

Удержка мощно имя ей даяти,

по естества бо имать благодати,

Яко, под корабль егда прилепится,

той от ветр и волн недвижим держится.

Подобне си л на молитва святая,

и паче, ибо Бога держит тая,

Егда на кого Он вооружится

и изтребити от живых потщится.

Чрез ту Моисием Господь удержася,

егда избити люди готовася.

Молитвы убо выну изливайте,

во всяцей нужде тех употребляйте.

Аще не дает Господь, их же ты просиши,

веждь, яко неполезных ти вещей молиши.

Имеяй ключи двери отверзает

и, яже нуждна суть ему, взимает.

Тако моляйся выну сподобится,

о их же добре Господу молится.

Ключь есть молитва от сокровищь Бога,

яже богата и зело премнога.

Тем Фезвитянин небо заключаше,

еже замкненно росы не даяше.

Тем же и паки оно отключил есть

и дожд обилный земли низпустил есть.

Тем боговидец из камене воду

извел обилну Еврейскому роду.

Крастели многи и из облак манну

томужде прият, от Господа данну.

И прежде того море разделил есть,

аки бы двери его отключил есть.

Сим ключем вы рай себе отверзайте,

темницу адску тем же заключайте.

В скверне сосуде дары той приносит,

кто, любя грехи, прощения просит.

В чисте сосуде дары приносите,

грех не любяще, молитвы творите.

Некто, не зная, что бы у Бога прошати,

сама писмена обыкл подробну читати.

Глаголя ко Господу: Боже, живый в небе,

Ты лучше мене веси, что ми есть к потребе.

Сам писмена изволь в ползу мне сложити,

и что Тебе есть годе, тем мя надарити.

Странный образ молитвы, но Христос Спаситель

не словес, но усердий верный Возмездитель.

Рече Господь: Просите, ищите, толцыте,

еже есть, всеприлежно молитися тщите.

Фимиам аще огнем жегом не бывает,

дым горе не восходит, вони не издает.

Молитва огнем любве аще не возжется,

не благовонна Богу, в небо не несется.

Немного во молитве требе глаголати,

но много воздыхати, стенати, плаката.

Донеле же железо в язве пребывает,

врачевство пособия ей не содевает.

Точне, донеле же грех во сердцы гнездится,

молитвы пластырем то никако целится.

Кто день всяк от молитвы жити начинает,

благо основание делом полагает,

На нем же дом дел благих зиждется высоко,

на нь же любезно смотрит божественно око.

Молитва о грешнице, иже ся не кает,

чуждая в спасение ничто помогает.

Самому каятися нужда, и молити

Бога, аще желает пособствован быти.

Брат некий Антония отца посетил есть

и, да молится о нем, прилежно просил есть.

Отец рече: Ни аз тя могу миловати,

ни Бог милосердия может ти являти,

Аще сам не тщишися во молитве быти

и о гресех сердца ти умилно съкрушити.

Вскую молитву к Богу требе возсылати,

Иже и нужды знает, и готов даяти,

Прежде, неже просим И? Вина того сия,

да смирение явит пред Ним наша выя,

И да бы заслугою то у Него взяти,

еже Он прежде веков умыслил нам дати.

Слезы с воздыханием молитвы вкрыляют,

до престола Божия в небо возвыжшают.

Молитва да действенна твоя сотворится,

изводетва того вина чрез тя да хранится.

Та же перва есть, аще мнози согласятся

во молитве, просимых Богом не лишатся.

Паки, совершенна вера имать быти,

яко зерно горушно, тщящихся просити,

Сицева бо молитва внушенна бывает

и горы великия в море преставляет.

К молитве милостыня аще приложится,

никако прошения человек лишится.

К тому союзы злобы нужда разрешите

и ко делесем благим руце устроити.

Аще же скорби найдут, ты нужда страдати

с благодарствием, и глас к Богу возсылати

Умиленный о помощь, а Бог, живый в небе,

готов руку помощы подаяти тебе

И желание сердца твоего та дати,

аще токмо полезных будеши желати,

Ибо, яже не в ползу, та Он возбраняет,

а мы стужаем о сем, яко ум не знает

Наш, что душеполезно, и что вред наносит,

Бог же, зная, то дает, что ся в ползу просит.

Праведная молитва силна есть у Бога,

удобно содевает изводства премнога,

Она бо гнев Господень удобь утоляет,

яко стена твердая, грешных защищает.

Она вся весть нуждная свыше упросите,

к творению милости Бога приклоните.

Она аггелы творит присутственны быти

молящымся, и мол бы к Богу возносите,

Яко же то Рафаил архаггел творяше,

елма Товию раба Божия храняше.

Она рабы Божия от зол избавляет,

здравие, благоденство, радость упрошает.

Она зде лета многа стяжет и жизнь вечну,

верным людем — в небеси светлость безконечну.

Она плоть от демона люта свобождает

и душе коснутися того не пущает.

Тоя трепещет враг той, зело бо боится,

молитвенников завет творити нудится.

Молитвою сын Наввин солнце удержаше,

Илиа же огнь свыше тоюжде призваше

И силен бяше тою небо заключити,

еже на землю дожда в прохлад не точити.

Тоюжде разрешите облаки можаше,

стихиами владел есть, яко же хотяше.

Молитва глубокия воды разделила

и мертвыя от гробов люди воскресила.

Сокращенне да реку: Вся мощно прията

от Бога молящымся, вся бо хощет дати.

Иеремия пророк в юзах укрепися,

егда ко щедру Богу прилежно молися.

Даниил с молитвою во рве ликоваше,

аще посреде гладных лвов вовержен бяше.

Трие отроцы в пещи огненней пояху,

молитвою с верою пламень укрощаху.

Иов, лежя во гнои, врага победил есть,

яко в теплей молитве безпрестанно был есть.

Сусанна от клеветы свобожденна бяше,

яко со молитвою в Бозе уповаше.

Разбойник елма Христу на кресте молися,

помилован быв, рая житель сотворися.

Стефан каменуемый молитву творяше

и абие отверсто себе небо зряше.

Всегда убо и везде молитвы есть требе

возсылати ко Богу, живущему в небе,

Он бо обыче молбы теплы приимати

и пачеестественно помощь подаяти.

Аще и в зубах смерти, человече, еси,

пролий молитву теплу к Сущему в небеси.

Он тебе и оттуду силен исхитити

и во числе живущих людей водворити.

Помяни Манасия, в юзах тяжких бывша,

травою питаннаго, аки уне живша

Злочестиваго царя, обаче и сего

милосердия Господь не лиши Своего,

Елма бо со слезами Ему помолися,

свобожден, на престол свой паки возвратися.

И Навходоносора горда помяните,

милость на нем Божию предивною зрите,

Елма бо за гордость си звероличен бяше

и, яко скот, травою с скоты ся питаше,

Пришед в чювство, ко Богу слезно помолися,

а Бог ему милосерд абие явися,

Лице человеческо паки возвратил есть

и на престоле царстем его посадил есть.

Тако, аще в духовны ты юзы впал еси,

обратися в молитве к Сущему в небеси.

Он к тебе обратится, адских уз избавит

и в свободе небесней радостна поставит.

Аще и скотен нравы еси сотворенны,

тщися ко Богу быти слезно обращении.

Он тя паки словесна во мире сотворит

и в царствие небесно по смерти водворит,

Его же усердствую аз вседушно тебе

за любовь христианску, яко же сам себе.

Молитва праведнаго ключь неба бывает,

вшедши бо к Богу, милость к нему низсылает.

Молитвою Илия небо заключил есть,

чрез полчетверта лета дожда не пустил есть

На землю, казня грехи, и егда хотяше,

тоюжде дождь из облак преобилный даше.

Молитвою сын Наввин солнце удержал есть,

елма от нечестивых землю очищал есть.

Тою царь Езекия солнце возвратил есть

в десять степеней, елма знамене просил есть.

На Елисеову же молитву от Бога

ополчения воинств снидоша премнога,

Еже от вой Сирийских его защитити,

яко Бог рабу его изволил явити.

Над всеми сими, сила молитвы премнога,

ибо Самаго держит прогневанна Бога,

Яко же Моисиева молитва держаше

Его, егда казнити Он люди хотяше

За то, яко от Него злии отступиша

и. злат телец сотворше, обоготвориша.

Толь же силно держаше, яко же просити

Богу Моисия, да бы хотел И пустити.

Аще сила молитвы святыя толика,

с нами есть во всех нуждах помощь всевелика.

Тоя, братие, выну вы употребляйте,

умилныя молитвы к Богу возсылайте.

Тою восприимете, что-либо вам требе,

от царствующа Бога на земли и в небе.

Егда Бога молиши, ум во Нь да впериши,

аще бо сердце блудит, втще язык трудиши.

Иже Господу Богу часто не молится

и с Ним беседовати умом си не тщися,

Того безумна, паче бездушна, мню быти,

не хотящя душею жизнь блаженну жити.

Златоустый глаголет и уподобляет,

яко тело без душы неживо бывает,

Тако душа, кроме молб прилежных сущая,

всех благ тща, окаянна, мертва, смердящая.

Егда кого узриши, молитв не любяща.

хвалу Богу даяти в церковь не ходяща,

Вежд, яко Дух Господень в нем не почивает,

Иже леность изгонит, к молбам возбуждает,

Но дух тамо лукавый сон гнусный наводит,

из матере лености душы гибель родит.

Яже душа молитвы не хощет творити,

добродетелми красна не возможет быти,

Яко не сеяй плодов не имать, что жати,

трудом Бог и молитве любит вся даяти.

Иже крепкими стены град не оградится,

удобь от супостатов силы разорится,

И яже в нем благая граждане спрятают,

без великаго труда врази расхищают.

Подобне душа, яже святыми молбами

не будет огражденна, яко же стенами,

Нетрудно от демонов лютых разорится

и мзды благ, содеянных прежде, отщетится.

К тому насквернят ону смрадными грехами,

яко град разоренный — врази мотылами.

В саде древо требует напоенно быти,

да бы благия ему плоды приносити.

Иначе благих плодов древо не раждает,

за ненапоение само изсыхает.

Тако в Церкви человек имать нужду многу

проливати молитвы ко Господу Богу.

Тогда бо душа, яко водою, поится,

егда ум со слезами теплыми молится.

От того поения преплодна бывает,

всякия благостыни обилно раждает.

Кроме же молитв сущи, неплодна творится,

праведно же изреку: конечно мертвится.

Молитва враги побеждает

Молитва паче враги низлагает,

нежели острый мечь я посецает,

Егда бо Моисий молитву творяше

и руце к Богу свои простираше,

Тогда Исраиль враги побеждайте,

силныя полки удобь попираше.

Егда же Моисий руце низпущал есть,

враг Исраиля люте попирал есть.

Отсюду должно сие нам познати,

что без молитвы тщетно ратовати.

Молитва грешнаго

Грешник аще молитву к Богу возсылает,

а от согрешения никако престает,

Кая полза ему есть? Въсходит ли та к Богу,

да возведет грешника к небесну чертогу?

О сем ведети благо, яко ни едина

кроме мзды от Господа будет благостыня.

Праведный Бог с правдою выну пребывает

и комуждо по делом праведно воздает.

И грешнича молитва убо не презрится,

точию не вечною жизнию платится,

Ибо, аще ся грешник не хощет каяти,

не имать ему жизни вечныя Бог дати,

Обаче милость сию ему содевает,

сердце к покаянию удобно творяет,

Да, аще тщание си хощет приложити,

может ся кроме труда многа сокрушити.

Или благая мира ему умножает,

а в небеси ничто же дати уставляет.

Или во муках вечных ослабу содеет,

в них же разно действие творити умеет.

Един бо вся грешники огнь имать палити,

а не равно досадлив имать оным быти.

Ибо по злобам действо будет совершати,

менше грешным меншую муку задаяти,

А иже во множестве грехов умирают,

много болшую муку от огня познают.

Молитва на восток

Обычай христианом Богу ся молити,

на восток лица своя прямо обратити

Вин ради благословных, от их же едина,

яко восход на небо Божияго Сына

Бе на восточней стране Сионскаго града

из горы Елеоски, маслична ограда.

Вторая — прямо солнцу лица обращаем,

свет нам от Бога данный быти извещаем,

Не чювственный точию, но купно мысленный,

обоего виновник Христос Божественный,

Ему же имя восток, на востоки убо

моления деяти христинаном любо.

Напоследок, яко рай во мире широце

Богом бе насажденный на светле востоце,

Его же яко за грех мы есмы лишени,

молимся Господеви, к раю обращени,

Да благоволит в мыслный рай ны возвратити,

жители пресветлаго неба сотворити.

Молитва соборная

Блага на всяком месте молитва святая,

от благоговейных муж к Богу творимая,

Ибо везде Господь, Сый везде, ю внушает

и желание сердца верных исполняет.

Обаче яже в храме Божием творится

общая, полезншая людем быти мнится.

Во-первых, яко в храме народно бывает,

в мнозе соборе хвалу Богу возсылает.

Хвала же народная дело есть пречестно,

Богу угодно паче, неже тайноместно.

Паки, яко Бог в храме Своем обитает,

в нем найпаче к молитвам ушеса склоняет,

Яко же Соломону древле обещася

о храме, иже Ему во славу создася.

Еще за содружество собора велика

молящихся соборно небесе Владыка

Скорее глас молитвы обыче внушати,

и просимыя нужды верным исполняти.

К сим, яко, их же мощи в храме почивают,

тии смолитвенници ко Богу бывают.

Наконец, яко в церкви кто тепле молится,

образ прочым теплыя молитвы творится.

За сия убо вины должно есть ходити

в храм Божий на молитву, ту Его хвалити.

И единственны молбы аз не обхуждаю,

но соборную паче тоя полагаю.

Овая, яко свеща едина, сияет

и немногу теплоту из себе раждает.

Сия паки, яко пещь, огнем исполненна,

просвещает и греет молба божественна.

Тем, живый наедине, един сам молися,

аще при храме еси, в он ити потщися,

Иначе бо сущыя в храме соблазниши,

претыкание ближним твоим положиши.

Иже нехождением твоим соблазнятся,

на тя зряще, в храм Божий ити возленятся.

А горе человеку, иже соблазняет,

Священно Писание гласно восклицает.

Молитва нищих

Яко же лоза древом крепима бывает,

по нему же ветви си тонки обвивает,

Тако молбами нищих богатый крепится,

нищий бо твердо о нем за милость молится.

Молитва силам небесным уподобляет

Молитва говейная к Богу возвыжшает

человека, и духом горним уточняет:

Огненным серафимом — чрез любовь велику,

ею же тепле любит всяческих Владыку;

Святым херувимом — чрез веждества многа,

яже о Бозе Самом и сущих от Бога;

Престолом божественным — во покое мнозе,

иже во неизменном и всемирном Бозе;

Господствием превыспрним — господствованием,

еже есть над всяческим сердца желанием;

Преимеющым властем — крепким владением

и еже над демоны силным велением;

Силам великомощным — в чюдес творении,

удивителных делес странном явлении;

Началом — подчиненных благим правлением

и ко почитанию начал учением;

Архаггелом священным — в делех крепостию

неудобных, сие же Бога благостию;

Напоследок, аггелом — во послушании

и во скором велимых делес деянии;

Обще же, всем небесным духовом — в святости

и богодаруемой святым премудрости.

Молитва во грех

Молитва тогда во грех ко Богу бывает,

егда кто возбраненных от Него желает,

А кто злых вещей просит, хулы отригает,

ибо злых виновника Бога содевает.

Молитва в скорби сущаго и клевету терпящаго

Господи всея твари, Боже вседержящий,

естества благостию род Адамль любящий,

Призри оком милости на мене скорбяща,

от неправедна мужа клевету терпяща.

Супостат мой душевный на мя наступает,

лстивый язык онаго л гати поучает.

Их же ум мой не мыслил, он на мя клевещет,

а душа в невинности от страха трепещет.

Крове моея хощет, пагубы желает,

но сердце мое в Тебе, Боже, уповает,

Яко не попустиши без вины страдати;

Боже, изволи помощь ныне мне подати.

Тяжкия волны на мя ныне нападоша

и скорби великия главу превзидоша,

От них же не могу аз себе свободити,

ты, Человеколюбче, изволь исхитити.

Веси мою невинность, сердце мое зриши,

глас убо многослезный раба Си услыши.

Не даждь ми, Владыко мой, без вины терпети,

пощади мя, яко же щадит отец дети.

Немощен аз есмь зело, не имам совета,

язык при невинности лишен есть ответа.

Токмо убо к милости Твоей притекаю,

заступи мя, Боже мой, на Тя уповаю.

Не даждь невинну сущу быти посрамленну,

от клевещуща мужа в суде одоленну.

Знаю аз вины моя. Боже, пред Тобою,

тыя же безчисленны вем на душу мою,

Но настояща дела никако же знаю,

Ты Сам веси, Творче мой, к Тебе прибегаю.

Защити мя, Всещедре, дажд руку помощи,

со слезами молю Тя во дни же и в нощи.

И ты, о Пресвятая Христа Бога Мати,

благоволи ми руку помощи подати.

Благоутробие си изволи явити,

от лютыя напасти скоро свободити,

Ибо аз от печали вконец погибаю,

от туги безпрестанно тяжко воздыхаю.

Небесная Царице, на помощь потщися,

днесь милосердием си, Мати. мне явися,

Да, тобою свобожден, тебе величаю,

скорую помощницу тя миру вещаю.

И вы, вси угодници истиннаго Бога,

честнии жителие небесна чертога,

Молящийся Ему о всех правоверных,

о мне днесь молитеся, иже во безмерных

Печалех исчезаю, мне днесь помозите,

скорыя помощники себе проявите.

Заступите у Бога, да от бед избавит

мене, да глас мой выну имя Его славит.

Но и вашу аз помощь имам прославляти,

скорыя помощники людем возвещати.

Молитва плачевная ко Пресвятей Богородице от бывшых в напасти,

сложенная в лето 1663, егда образ Пресвятыя Богородицы из града Полатска из соборныя церкве Софии святыя взятся в царствующий град Москву преподобным господином отцем Иосифом архимандритом Смоленским обители Аврамиевския

Молитва

В матерстве Дево и во девстве Мати,

могшая Бога чревом ти объяти,

Вскую град Полотск и его гражданы

оставлявши в сирстве без обраны?

Честный твой образ вся ны защищаше,

от всех супостат забрало нам бяше.

Он безпомощным бе поможение,

скорбящым — радость и утешение,

В нуждах — надежда и помощь велика,

та бо творяше при нем всех Владыка.

Ныне, о Мати, Дево Пресвятая.

вземлется от нас икона чюдная.

Кое зде будет знамя во обрану,

кой возвеселит залог нашу страну,

В тебе надежду свою положившу,

верно, любезно честь ти в ней творившу?

Аще и много к тебе согрешихом,

завет твоего Сына преступихом,

Обаче Бога инаго не знаем,

разве Онаго, Ему ся кланяем.

Ты веси немощь всяка человека,

един безгрешен Сын твой и Владыка.

Мы вси зачата в гресех и рождени,

в Адаме древле грехом умерщвлени.

Ты токмо сея от язвы изъята,

зачата чиста и рожденна свята,

Жила безгрешно, едина пречиста,

ты токмо, и Сын твой, без греха быста.

Мы страстни, грешни к злобам преклонни,

лестию змия в Едеме прелщенни.

Тем же от Тебе милости желаем,

ходатийством ти прощения чаем,

Яко ты веси немощь земнородных,

знаеши силу супостат безплотных.

Есть же ти сила враги побеждати,

певцем ти радость и мир даровати.

Се мы предстоим твои, Дево, раби,

во настоящих бедах нам ослаби.

Отради скоро, не дажд погибати,

без вины крове и слез проливати.

Увы нам, Вскую от нас отходиши

образом твоим. Негли не радиши?

Тако ли в тузе оставиши чада?

О Мати сирых, буди нам отрада!

Ныне есть время, ныне приближися,

в помощи скора ныне прославися.

Се туга и скорбь толико стужает,

даже в надежде дух изнемогает.

Отвеюду беды и скорби отвеюду,

несть разве тебе помощь ниоткуду.

Тем же твой слезно образ мылобзаем,

буди нам Мати, смиренно глашаем.

Не остави нас без помощи жити,

поношение врагом нашым быти.

Да не речет враг: Где есть помощь ваша,

в ню же толико сердца уповаша?

Аще образом от нас отходиши,

но благодати да не удалиши.

Солнце со небес на землю действует,

тако ти милость, где любителствует.

Призри с небесе, издалече види

чада ти верна, и во помощь приди.

Приди, Царице, в помощь сего града,

храни от скорби, огня, меча, глада.

От всех напастей изволь соблюдати,

блюди ны присно в твоей благодати.

Прилог к преподобной матери Евфросинии

Ты паки, мати, о Евфросиние,

жителей града всех удобрение,

Яже потщася икону святую

внести из далны в страну Полотскую

Из Царяграда, камо из Ефесе

царь благоверный всечестно принесе.

Твоего ради многа прошения,

Российских деля стран украшения,

Припади к стопам небеснаго Царя,

да не лишит нас толикаго дара.

Умоли паки возвращенней быти

иконе святей, Полотск украсити

Отчинный град твой, в нем же ты трудися,

Христу жениху си уневестися,

Ибо толико град наш украшает

Девыя образ, и везде вславляет,

Елико солнцем небо украшенно,

светлыми звезды дивне упещренно.

Полотску граду бе утвержение,

столп, стена, помощь и ограждение.

Ныне без него како нам пребыти?

Аки без солнца, неудобно жити.

Убо, о мати, припади за нами

к Господу Богу твоими рабами,

Да возвратит нам икону святую,

просветит землю Белороссийскую.

Моли прилежно и Деву Марию,

да проявит нам милость свою сию.

Да не небрежет отчинна ти града

и не оставит правоверна стада.

Удобно тебе мощно умолити,

изволи токмо ходатийца быти,

Моли за нами, о святая мати,

храни ны в твоей выну благодати.

Ея же аще ты ны не лишиши,

вся на похвалу твою обратиши.

По вся дни тебе будем величати,

венец похвалы песней соплетати.

Молитвы образ кадило

Олтарь кадилный в храме ветсе бяше,

на нем фимиам иерарх паляше.

Еда Бог воню сладку обоняет

и Своя чювства тою услаждает?

Не буди тако верным непщевати;

чювств тленных чюжд Бог, невесть обоняти,

Но яко образ молитвы кадило,

самое знамя за вещь Богу мило.

Молитвы ко святым

Егда молитвы к святым Божиим бывают,

како, далече суще, слышат или знают?

По естеству не могут слышати и знати,

найпаче мыслей наших несть леть усмотряти.

Их же един есть Господь совершенный Знатель,

яко Сый Сердцевиден, тех же и Создатель.

Паче естества убо святии то знают,

о чесом людие к ним молбы возсылают.

Се же егда Господа Бога созерцают,

в Нем же, яко в зерцале, вся зрима бывают,

Тогда молитвы нашя и вся, яже требе,

и самыя помыслы видят они в небе,

Иже во их похвалу и во честь бывают,

да нам ползу во нуждах наших содевают.

Молитися присно

Молитися Господу присно подобает,

но како сие дело от кого бывает,

Поне же ина многа нужда есть творити

и неподобно выну в молитве пребыти?

О сем ведателно есть, яко требе знати,

како выну в молитве нужда пребывати.

Не то завещается, да весь день молимся,

но присно сердце к Богу имети да тщимся,

Желание и любовь к Нему возносяще,

тою, аки молбами, потребных просяще.

Сия же безпрестанно может в сердце быти

и внегда нам иная делеса творити.

Непрестанно молится, иже соблюдает

всяко время молитвы, а не унывает,

И еже, аще деет, то во славу Бога;

сицеву мужу в небе мзда готова многа.

Молчание

Велегласный пророк древле вопияше:

Горе ми есть, яко язык мой молчаше,

Сиречь, грехи людей своих обличати,

Озию о жертве кадилней смиряти.

Многим и днесь горе прилично вещати,

яко не хотят слов во ползу даяти.

Горе, иже грех си не исповедают,

и братии в гресех их не обличают.

Горе и совета здрава не дающым,

удобне той бедным даяти могущым.

Горе не тщящымся правды защищати

и истинны словом правым утвержати.

Горе благо дарства Богу не поющым

и добротворцем си того не деющым.

Совершенныя любве благостяжание,

языка от слов многих твердо держание,

Тожде покой истинный людем соблюдает

и к сожитию благу други умножает.

Тожде добродетелей есть совершение

и во страну вечныя жизни вселение.

Пифагор ученики егда наставляше,

молчание хранити пять лет завещаше.

Та же научившымся добре мудрствовати

соизволил веждество языком вещати.

Кто не умеет временно молчати,

не научится добре глаголати.

Монастырь

Из моря рыбы в сады людие всаждают

и, внегда им хотети, тех употребляют.

Христос из моря мира яже уловляет,

в монастыри, яко в сад свойствен, пресаждает

Монах

Иже мирская монах содевает,

чину святому позор наношает.

Любяй зрим быти и прочыя зрети

монах несть могущь хвалу Богу пети.

Несть монах хотяй часто целовати

и честь велику от мирных примата.

Пища, дар, хартия монаха прелщает,

ибо от жен теми искушен бывает.

Око прямо оку женскому не буди,

да иночестии не погибнут труди.

Огнь есть со сеном, инок со женами

неугасимый многими водами.

В кремень железо тогда ударяет,

егда пол женский инока касает.

Монаху подобает в келии седети,

во посте молитися, нищету терпети,

Искушения врагов силно побеждати

и похоти плотския труды умерщвляти,

Аще хощет в небеси мзду вечную взяти,

неоскудным богатством преобиловати.

Пагубно же оному по граде ходити,

из едина в другий дом преходяще, пити.

Но увы безчиния! Благ чин погубися,

Иночество в безчинство в многих преложися.

О честных несть зде слово, тыя почитаю,

безчинныя точию с плачем обличаю.

Не толико миряне чреву работают,

елико то монаси поят, насыщают.

Постное избравший житие водити

на то устремишася, да бы ясти, пити,

То же, не поелику есть во славу Бога,

но излише, даже скорбь раждается многа:

Скорбь чреву, болезнь главе, а ум изчезает,

тако постник не знает, еже содевает.

Множицею есть зрети по стогнам лежащих,

изблевавших питие и на свет не зрящих.

Мнози колесницами возими бывают,

полма мертвии суще, народ соблазняют.

Мнози, от вина буи, сквернословят зело,

лают, клевещут, срамят и честныя смело,

А за то во утрий день без казни бывают,

яко без обителей в граде ся скитают.

Неции постригайся посестры питают

неправым собранием, и с неми бывают.

Инии тайно от поп в струзех пострижени,

ходят летяще мир, аки на то устроени.

Мнози нестрижении монашеско ходят,

безчинными делесы соблазнъ в мире родят.

Оле развращения! Ах, соблазнъ велика!

Како стерпети может небесе Владыка?

В одеждах овчих волци хищнии бывают,

чреву работающе, духом погибают.

Узриши еще в ризы красны облеченны,

иже во убожество волное стрижени.

Ни жених иный тако себе украшает,

яко инок несмыслный, за что погибает,

Ибо мысль его часто, да от жен любится,

под красными ризами, увы, дух сквернится.

Таковии ко женам дерзают ходити,

дружество приимати, ясти же и пити.

Сродство себе с онеми ложне поведают,

или тетки, матери, сестры нарицают,

Под ними же имены хотят мужи быти,

без брачнаго союза зол брак сотворити.

О безчиния люта! Оставлше сродныя,

притворяют сродники себе неправыя,

Им же делом от Христа себе удаляют,

суща Жениха своих душ пренебрегают,

За что, яко блудници, будут отлучени,

аще не обратятся, и вечно казнени.

Престаните, иноцы, сия зла творити,

тщитеся древним отцем святым точни быти,

Да иде же они суть во вечной радости,

будете им общници присныя сладости.

Море

В мори чюветвенном рыба рыбу же глощает,

тако в мори житейстем друг друга снедает.

Море преплавается в куколе

Царь некий живот блудный провождаше;

отцу духовну вину приношаше,

Иже обыче его увещати,

еже бы ему от блуда престати.

Царь страхом Бога жива обдержася,

выну престати ему обещася,

Но в самом деле того не творил есть,

всегда с тем страхом к нему приходил есть.

Отец духовный стужи себе зело,

нача цареви глаголати смело,

Да, аще того не хощет престати,

не имать ему прощения дати.

Царь всесмиренно ему отвещаше,

выну исправу нравов обещаше.

Слезы лияше, но егда вратися

в дом свой, злым нравом паки победися.

Того вознемог дыховный носити,

отпущения у царя просити

Нача, да в свою страну отпустится

и ему тяжек не к тому явится.

Царь моли зело, да не оставляет,

корабля ему дати отрицает.

Он, огорчився, корабль наимаше,

но царь превоза везде возбраняше.

Он, Духом движим, на брег прибегает,

куколь на воде морстей простирает

И, яко в корабль, вшед во нь, крепко сташе,

в паруса место параман держаше.

Жезл за кормило восприял есть себе,

и вся угодна бяху в той потребе,

Иже, всем зрящым, пустися на море

и преплы его пучину воскоре.

В шесть часов к брегу иному пристал есть,

тако Бог чюдо дивно показал есть,

Хотя блуднаго царя наказати,

да бы поне, то видевшу, престати

От злаго дела. О коль благ Создатель!

Всяко ведет ны в благость всех Питатель.

Моисий тайно погребеся

Моисий боговидец егда преставися,

архаггелом тело его утаися,

Яко никому же и до ныне знати,

на коем то месте Бог веле спрятати.

Бысть се, воеже бы не быти почтенну,

яко Богу живу, бывшу телу тленну,

Ибо Иудеи могоша ся лстити,

помняще чюдеса могшаго творити.

Мудр кто

Несть мудр читавый много, видевый и знаяй,

но яже знает, добре тех употребляяй.

Мудреци мира

Сова птица в тме нощней может вещы зрети,

во дни паки не может очима смотрети.

Тако мира мудреци остро усмотряют

суеты мира сего, в тех мудри бывают,

В божественну же светлость тупо возникают,

неудобно делеса света познавают.

Мудрствование

В уме (всех паче) своем мудрствовати

несть мудрым быти, но есть буйствовати,

Вящше бо очи видят, неже око,

и свещи многи светлы суть широко.

Мудрость

Земная мудрость мирским поучает,

по чювствам судит, плоти работает.

Небесная же учит божественным,

сущым духовным, вышеестественным,

И многа, яже оная гаждает,

сия, противне, зело ублажает;

Яже оною бывают хвалима,

сею праведне остают хулима.

Что ова в буйство безумно вменяет,

сия мудростна быти поведает,

И не прелестно, несть бо лесть на небе,

ты небесную мудрость прими тебе.

Елико небо земли удаленно,

и паче ея светло украшенно,

Толико мудрость, юже небо родит,

земную светом правды превосходит.

И паче земли коль небо велико,

мудрость небесна над земну толико.

Премудрость есть светилу велику подобна,

ибо, яже о Бозе, являет удобна.

Егда дождь землю тихий напояет,

плоды родити ону устрояет;

Елма же мудрость в ум некий вселится,

ко правым делом муж Богом строится.

Кто себе мудр есть, буй конечно Богу,

буй мнящься себе, имать мудрость многу.

Мудрость в сем мире видится велика,

яко преславна творит человека.

Тою Соломон преславен явися,

даже царица Савска удивися

И глаголаше: Мудрость ти сияет

вящшая, неже славы глас вещает.

Обаче он сам буй ся нарицаше:

Несть во мне мудрость людска, глаголаше,

Ибо елика елика бывает,

ума аггелска та не достизает,

И малу всегда мощно нарицати

вин ради многих, яже хощу дати.

Первая, яко есть скоротекуща,

образом воды мимо нас плывуща.

Кто Соломона полней тою бяше?

Обаче к концу и той обуяше.

Идолом скверным храмы назидаше,

оставив Бога, в путь жен си идяше.

Буией соли он уподобися,

раб неключимый Богови явися.

К тому, аще есть много притяженна,

не обрящется нигде совершенна,

Ибо суть многша, их же мы не знаем,

нежели, яже умом созерцаем.

Верх моря видим, а бездну кто знает?

Тако в мудрости кож до верх лобзает,

Внутрняя паки в сокровищех неба,

к ним же всем верным тещи есть потреба.

Еще и беду разум содевает,

зане же сердце грешных надымает.

Кичити творит, а начало всяко

ересей мерзких произыде тако.

Ересей творцы вси премудри бяху,

падоша, яко в себе уповаху.

Уне им бяше мудрости не знати,

нежели тою ада достизати.

Простец смиренный друг есть Богу правый,

мудрец гордостный — враг Тому лукавый.

Поли Ахитофел муж совета бяше,

но за кичивость зол конец страдаше,

Ибо на выю сило возложил есть,

на древе вися, душу погубил есть.

Аще кто убо умом украшенны,

да тщится быти всех паче смиренны,

Смиренная бо мудрость люба Богу,

гордая мерзка Ему попремногу.

Мудрость имеяй аще утаяет,

чистое злато во землю копает.

Что раздаянием в скудость не приходит,

но умножение даятелю родит?

Мудрость, елма бо та иным ся общает,

в уме учителя множенна бывает.

Мудрость есть дар Господень, им же просвещает

умы наши на благо и в жизнь устрояет.

Сия ны поучает небесных желати

и в небеси мыслию сердец обитати.

Есть же и ина мудрость, но та не от Бога,

яко учит коварства устрояти многа,

Еже земныя вещы злохитро ловити,

суеты мира сего из лиха любити.

А та земная может быти нареченна,

яко сущая земным вещем припряженна.

Есть и плотская мудрость, яже наставляет

плотских сластей искати, теми ся слаждает,

Учит чреву служити, скотом точны деет,

в блудницех и пияных та место имеет.

Есть мудрость и демонска, яже наставляет

гордитися демонски, и зависть вселяет,

Демон бо, позавидев Богу, разгордися,

точен быти Оному в небеси стремися,

Но елико лукавый умом вознесеся,

толико в мрачный тартар глубоко падеся,

Во нь же подражатели своя низвлекает,

яже злохитрием си в гордость устрояет.

Три убо си мудрости буйства да вмениши,

первую, яже свыше, токмо да любиши.

Тройца сих злых мудростей от Троицы благия

далече влечет душы человеческия.

Едина же горняя к Богу единому

приближает, во Святей Троице живущему.

Есть мудрость истинная, есть же и неправа,

ова свыше и блага, си снизу, лукава.

Горняя выну и мирна, нижня любоприва,

ова кротка, чинна, та безчинна, кичива.

Горняя уветлива, нижняя вопреки

неуветливо идет с всеми человеки.

Горняя согласие с добрыми имеет,

нижняя свар, противство и зависть умеет.

Вышняя милостивна всем людем бывает,

нижняя миловати никого же знает.

Вышняя делес благих плоды производит,

нижняя токмо злая деяния родит.

Овая никого же обыче судити,

сия о человецех всех суд весть творити.

Горняя во истинне всегда пребывает,

долная благость себе выну притворяет.

Вы, иже горе в небе желаете быти,

горнюю потщитеся мудрость возлюбити,

Та бо вы на путь правый наставити может

и во шествии трудном удобно поможет.

Та о вас пред Господем имать глаголати,

да благоволит венцем славы вас венчати.

Вознелюбите паки мудрость сего века,

та бо в буйство вечное вводит человека

И с буими девами чертога лишает

небеснаго, во ад же огненный вревает.

Буйствуйте миру сему, а мудри бывайте

Богу, Ему служите, мир же обругайте.

За то с мудрыми девы во светлость чертога

вопущени будете от всещедра Бога.

Яже свыше премудрость, есть та феодора,

ея же противница есть демонодора.

Вышняя бо от Бога Самаго исходит,

нижнюю демон лстивый из главы си родит.

Вышняя в отчество си небесное вводит,

нижняя в преисподний ад люди низводит.

Мы горния породы сынове речени,

горнею мудростию да будем правлени.

Тако на гору взьидем превечнаго Бога,

иде же живот вечный и радость всемнога.

Паче бисерей честных премудрость ценится,

и ничто ей ценою во вещех равнится.

Буйством обдержимии премудрость хухнают,

слепи суще, светлости оныя не знают.

Мудрость и буйство

Мудрии века сего суть, иже гордятся,

буи суть паки, иже пред всими низятся.

Премудрии с младенцы знаменают то же,

Ты смирению мене сам научи, Боже.

Мнози суть мудри на зло, безумии на благо,

вси косни в благостыню, скори же до злаго.

Тем неудобь к благому Богу выспрь восходим,

скоро же к злому врагу в дебрь плача низходим.

Мудрость и вежество

Премудрость есть светилу велику подобна,

ибо, яже о Бозе, являет удобна.

Веждество же — малому, ибо в мире мрачне,

яко в нощи сущая, являет прозрачне.

Мудрости таение

Приемый в стомах пищу, аще не сваряет,

не сытость плоти, но вред лютый в ней познает.

Тако имеяй мудрость, аще в себе крыет,

зело немоществует душевно, не тыет.

Мудрый

Мудрый три лета должен есть хранити,

да бы во ползу могл он в мире жити.

Во-первых, нравы благо устрояти,

потом же грехи в людех обхуждати,

Третее. нижших изрядно чинити,

еже бы людем благочинно жити.

Муха победи хулника

В Испании муж некий легкоумный бяше,

иже пребытка ради жребийми играше.

Тому в едино время случися играти

и всех, яже имяше, тщету пострадати.

Видя он свой убыток, Богу помолися:

Боже мой, помощи ми в жребии потщися.

Но поелику паче Бога призываше,

потолику болшую тщету приимаше,

Ибо Господь ко греху помощи не дает,

по случаеви тамо быти попущает.

Елма же окаянник и риз отщетися,

во безумную ярость и гнев обратися.

Нача хулны глаголы на Бога вещати

и з безумным псаломским: Несть Бог, глаголати.

Та же возсед на коня, оружие себе

взя, аки хотяй брати Живущаго в небе.

Возложив шлем на главу, на стогну течаше,

иде же людей силных собрание бяше

И, вскочив во среду их, аки изумленный,

нача глас издаяти, врагом подущенный:

Аще кто друг есть Богу, или кто И знает

и быти Его в небе людем возвещает,

Аз имам сопротивно оному стояти

и, яко несть Бог в небе, силно показати.

Призови И кто в помощь, а иди со мною

на брань о Бозе твоем, аз готовый стою

Силою показати, яко несть, ни может,

и исповеднику Си нимало поможет.

Людие, ужасшеся о слове, стояху,

ума лишенна мужа быти непщеваху,

И того ради никто ему отвещаше,

но всяк украшения оному желаше.

Но Бог, не хотяй грешным в злобе погибати,

изволил милостивно его наказати,

Да знает, яко есть Бог, и силен смирити

дерзающыя Его имя похулити.

Времени зилы сущу, муху возводил есть

и, яко древле Египт мухами казнил есть.

Едну на единаго силника послал есть

и того победита силу оней дал есть.

Елма убо безумник на брань призываше

люди, тогда та хуха противу восташе

И ят нападающи в лице усекати,

даже никако може себе защищати.

Егда бо он рукою лице отираше,

тогда муха от лица его отлиташе,

Но, паки возвращшися, его угрызала,

до изнеможения злому досаждала.

Он, шлем низверг из главы, мужествен творися,

но от досады мухи с коня низвалися

И лице окаянно ко земли храняше,

но муха тогда паче ему досаждаше,

Даже, познав злобу си, ят исповедати,

яко: Есть Бог, везде Сый, Того имам знати

Едина, всесилна, и хощу раб быти

Ему выну, донде же даст ми в мире жити.

Тако хулы отрекшу и честь Богу давшу,

народно вечна Его суща провещавшу,

Изволил есть Всещедрый прощение дати

и победителницу ту муху отьяти.

Он же тоя свобод быв, видя свое тело.

мухою посеченно, раскаяся зело

О неисповстве своем, и велми слезися,

не хулити Господа тако наставися.

Мухокол

Домитиан злый кесарь егда царствоваше,

в храме си мухи ловя, иглою бодяше

Въместо утешения, но и сам заклася

от иконома, яко в безделие вдася.

Мученик

Мученик за Христа кровь свою проливает,

а Христос грехи его тогда омывает

И, яко в крещении, казнь купно с виною

всеизвестно бывает очищенна тою.

Тем же абие душа венчана бывает,

егда ся тою в небо страдалец вселяет.

Вселяет же ся в той час, во нь же, люты муки

претерпев, отдает ю Богу Отцу в руки.

Образом сего Стефан, за Христа страдавый,

небо отверсто и в нем Христа созерцавый,

Стояща в десных славы, известно прияти

душу его хотевша и венец воздати.

Аще же то есть правда, то обиду творит

мученику, кто о нем Господу ся молит.

Тако рече Августин, ибо не у верит,

яко Бог праведную мзду оному мерит.

А Бог правый обыче венец воздаяти,

елико за Нь кто скоро душу волит дати.

Ибо любы вящшая в мире не бывает,

яко, егда душу си за Нь кто полагает.

Убо о мученицех несть молитвы требе,

и о всех святых, с Богом царствующих в небе.

Токмо им молитися мы дол жни бываем,

да их заступление ко Богу познаем

Во всяких нуждах наших, они же ко Богу

готови проливати молбу о нас многу,

За что нам подобает оны величати,

венчавшему я Богу славу возсылати.

Честно есть мучение за Христа прияти,

сведетелство Оному кровию си дати,

Но не кому ж до леть есть сие сотворити,

с мученики святыми главу положити.

Тем же не вси должнствуем того поискати,

доволно есть духовным образом страдати,

Его же страдания первый образ буди,

им же в обилстве мерность сохраняют люди,

Яко же царь и пророк Давид сохраняше,

точне многострадалный Иов содеваше.

Оба во обилии превелице бяху,

а меры преступити никогда дерзаху.

Вторый образ того есть — в нищете даяти

нуждным, елико сила возможет подъята.

Тако Товиа дея, и вдова оная,

о подании дву цат Христом хвалимая.

Третий того есть образ — юность си прежити,

а чистоту без вреда Богу сохранити,

Яко Иосиф древле красный сотворил есть,

нудим от госпожи си, не соизволил есть.

Четвертый — вся иныя страсти умерщвляти,

чювства уму, ум Богу благо покоряти,

Яко же угодници Божии твориша,

волю свою Божией воли подчиниша.

Сие есть духовное себе мучение,

еже всеизвестное деет спасение.

Тем поне сицевыми образы страдати

потщимся, да бы в небе венец восприяти.

Кто за Христа страдати готов пребывает,

страстотерпческа венца не лишен бывает,

Ибо Господь, зряй сердце, за волю самую,

яко за дело, дает мзду совершенную.

Мученици суть, иже страдати желают

о имени Христове, и бедств не гонзают.

Мученици и, иже терпят ради Бога

скорби, досаждения от недруг си многа.

Мученици и тии, иже ниществуют

волею, а Господа сил благодарствуют.

Мученици суть девство хранящий цело,

многажды бо палимо тех бывает тело.

Мученици — иже плоть выну укрощают

труды, постом, бдением страсти умерщвляют.

Мученици — за любовь нищым служящии

и ина дела любве ближним творящии.

Без крове убо и ран, ибо духовное

сие мученичество, но точне святое.

Иже постом и труды плоть си удручает,

той духовным образом мученик бывает.

Инок некто за Христа страдати желаше,

у аввы Пахомия отпуста прошаше.

Он рече ему: Брате, страдалец будеши,

аще по иноческу право поживеши.

Потщися звание ти благо сохранити,

общник в небе страдалцем возможеши быти.

Храни послушание, на всяк час молися,

пости, досады терпи, по вся дни трудися.

Умерщвляй страсти плоти, бди, покорен буди,

мученика содеют сии тебе труди.

Мучителство

Махмет Оттоман солтан Цариграда

вниде с отроки треми внутрь ограда

Красноутешна, и в нем веселися.

Яблко едино ему возлюбися

На древе нецем и, не взем, отьиде.

Потом же отрок отай к нему прийде

И сластолюбне предал е си чреву.

Солтан по часе возвратися к древу,

Да видит паки. Не обрет же плода,

на три отроки пречестнаго рода

Вселюте яр бысть, грозно вопрошаше,

кто от них плод ов во снедь себе взяше.

Они же за страх вси ся отрицаху,

клятвы велики на ся возлагаху.

Солтан же лютый веле сещи чрева,

да знает, им же снеден ов плод древа.

Взяша перваго, чрево разсекоша,

и ту в стомасе яблко обретоша

Не у сваренно, тако утолися

от гнева зверь ов, иже разьярися.

Оле жестоты! Яблко оценил есть

паче юнош тех, ума ся лишил есть.

Мысль

Муж младенцы о камень тогда разбивает,

егда в начале мысли злыя истребляет.

Еже есть в древе корень, то в нас мышление,

с того словес и делес всяких рождение.

Благая мысль благия отрасли пущает

и душеспасенныя плоды возращает.

Злое же мышление злым делесем мати,

тем же блюдися, брате, злая помышляти.

Ум дву мыслей купно не может держати,

должна есть едина другой место дати.

Егда убо мысль тя злая нападает,

восхищай благую, да злу изгоняет.

Мысль злая, нападши, душы не вреждает,

аще твое сердце ей ся не слагает.

Не хощеши злаго, а мысль ти стужает?

Не бойся, венец ти оттуду бывает.

Отревай ту токмо, елико ся тщиши

ону победита, вящший получиши.

Елма лукавый помысл кому досаждает:

Гряди за мя. Сатано, ум да отвещает.

Сопротивися тому, и несть во вред тебе,

паче же есть заслуга, да будеши в небе.

Мысли злыя от сердец нужда отложити

хотящым в них Господу Богу выну жити.

Четыри же родове злых мыслей бывают,

яже Бога во сердцах жити не впущают.

Первый тех род — егда кто сердцем умышляет,

да вред ближним в чим-либо своим содевает.

Тако зла мысль во Савле о Давыде бяше,

егда его убити по вся дни мышляше.

Зле и о Иосифе братия мышляху,

хотяще й убити, и елма продаху.

Вторый род есть злых мыслей, елма кто желает,

да высокия чести в мире получает.

Та мысль в Авесоломе доброличном бяше.

елма люди прелщаше и отца гоняше.

Третий род есть злых мыслей, елма кто, от страсти

палим плотию, мыслит блудодейны сласти.

Сими во Вавилоне старци согрешаху,

иже похотми к чистей Сусанне горяху.

Четвертый род злых мыслей во сердцех бывает,

егда кто суетныя мысли собирает

И тщетно о будущих промысл в уме деет,

о неподобных вещех умствовати смеет.

Тако суетны мысли богатый имяше,

иже новы житницы себе назидаше,

Обещая многая лета душе жити

в мире, и увещая ясти же и пити.

Сице суетно и вси в себе помышляют,

иже долгий век себе жити обещают,

Предавше забвению смерть, никогда спящу,

но выну на всякаго человека блящу.

Вся сия мысли злыя, братие, мещите,

в сердцех ваших жилище Богу готовите,

А Он, яко благий Бог, любяй человеки,

поживет в вас, вы жити сотворит во веки.

Еже корень есть в древе, то мысль в человеце,

обое же есть тайно в настоящем веце.

Корень есть под землею, невидим бывает,

мысль в глубине есть сердца, никто ея знает,

Но, яко, что в корени от силы таится,

то послежде во ветвех и в плодех явится,

Тако, что сокровенно во мысли пребудет,

то помале во делех проявленно будет.

Тем же, кто древо плодно имети желает,

да здрав корень пребудет, тощно промышляет.

Тако хотяй сам плоды благи приносити

да тщится в сердце мысли добрыя хранити,

От добрых бо помыслов делеса благая

производна бывают, от злых паки — злая.

Обычай всех есть уста в чистоте хранити,

ничто скверно дерзаем во она вложити.

Тако мысли достоит чисты соблюдати,

яже уста суть сердца, а не оскверняти.

Мысль злая

Змий аще кого в ногу усекает,

яд его всю плоть абие вреждает.

Злая мысль яд есть, аще та вселится

в главу, вся душа весма повредится.

Злыя мысли в начале тщися истребити,

егда бо силу возмут, не леть победита.

Людин обрете змия, умерщвленна

мразом и на путь во снег изверженна.

Милость сотвори, в недра положил есть,

иже, согревся, воскоре ожил есть.

Нача ползати, потом уязвил есть

мужа безумна, иже й согрел есть.

Тако и тому обыче бывати,

кто злыя мысли любит согревати,

Ибо помалу ты ся оживляют

и мыслителя смертне убивают.

Мысли скверныя

Многажды человеком мысли досаждают,

и во отчаяние многи понуждают.

Еже умови мерзко, то в мысли родится

и многими трудами не искоренится.

Борба безпрестанная, брань зело велика

с лютым медведем и лвом не будет толика.

Хощет кто чисто жити, а мысль скверны родит,

различны грехов виды, ах, досадно плодит.

Плачет, стенет человек, к Богу воздыхает,

а мысль скверная мира оному не дает.

Что сия терпящему достоит творити?

Негли некто желает в том известен быти?

То, что и жене честной требе есть деяти,

егда кто увещает ону блудствовати.

Та на гласы скверныя уши затыкает,

очи от безстуднаго лица отвращает,

Не вземлет радований, отходит от него

и в пособие мужа глашает своего,

Иже, притек, завистно лестца прогоняет,

а жену за ту верность любезно лобзает,

И потом начинает болше ю любити,

яко не хоте на грех соизволна быти.

Точне, ему же демон чрез мысли стужает,

на блуд, на хуление тощно увещает,

Творити есть достойно, мысли отревати,

очы душы и ушы от них отвращати,

Никако соизвола на грехи творити,

но и на помощь Христа прилежно гласите,

Иже невесть медлити пособие дати,

прелестника с лукавым советом прогнати.

Душу же, яко верну жену, не погубит,

но за верность явленну найпаче возлюбит.

Даст ей венец победы за одоление,

возмездие велико за то терпение.

Не убойтеся убо, егда нападают

скверныя на вы мысли и ум возмущают.

Токмо соблюдитеся в них ся услаждати

и на сладкую прелесть соизвола дати.

Несть грех, яко находят мысли всескверныя,

грех же есть с радостию восприяти тыя.

Несть наше дело приход оным возбранити,

наше же — не дати им в сердце ся вселити.

Егда оны в дверь сердца натужят полцати,

тогда нам двери его нуждно заклепати,

Да, ничто же успевше, мимо претекают

и, яко дым от ветра, скоро изчезают.

Аже дева, мужеви сущи обрученна,

будет в граде от кого чистоты лишенна,

Не гласившы помощи, каменми убити

веле Господь с дерзнувшим девства ю лишити.

Подобне душа, Богу обручница сущи,

аще не кричит к Нему, молящи помощи

Противу мыслем скверным, тлити ю хотящим,

чистоты отьятие оной наносящим,

Винна прелюбодейства будет осужденна

и вечною смертию во аде казненна.

Кто в начале скверныя мысли истребляет,

той о камень младенцы своя разбивает.

Елма скверныя мысли душе ти стужают,

не абие блудницу ону содевают,

Но егда, услаждшися в них, соизволяет

на дело скверно, тогда блудница бывает.

Аще же отрицает, есть невеста Богу

верная, и небесну достойна чертогу.

Точне, яко муж жену, на блуд увещанну,

не соизволшую же, имать преизбранну,

И того ради паче любовь ей являет,

тако с нашими душы Господь поступает

Аще скверныя мысли тебе досаждают,

токмо не соизволи, тя не окаляют.

Брат некий от демона искушаем бяше

блудными помышленми, и едва терпяще.

Тем шед ко началнику, брань си известил есть

и, да молится о нем, прилежно просил есть.

Авва, соболезнуя, о нем помолися

и во нощных бдениих прилежно трудися.

Бог же небрежение оному явил есть

брата онаго, яко в нетщании был есть,

Еже противу врагу преборно стояти

во время искушений, а не гнусно спати.

Виде же авва брата онаго седяща,

а пред ним духа блудна, с женами творяща

Играния различна, он же веселися

о играниих того, а не оскорбися.

Виде же и аггела печална стояти

и со гневом на того инока смотряти,

Яко о лести врага утеху имяше,

а на молитву к Богу себе не вдаяше.

Познав убо то старец, яко брат любяше

мысли скверны хранити, тем же борим бяше,

Рече к нему пришедшу: Брате, что дееши?

Вскую сам злыя мысли держати смееши?

Не тщишися противу оным востаяти,

но обыкл еси теми сердце услаждати.

Аще и весь мир за тя имется молити,

ты же в небрежении восхощеши быти.

Не имать быти полза, но сам потрудися,

нападающим мыслем противник творися.

Елма тебе дух блудный начнет искушати,

ты труды и поклоны потщися деяти.

Молитву же со постом прилежи творити,

тако злых искушений мощно ти избыти.

Брат, услышав истинну, вину си явил есть,

прощения от отца смиренно просил есть.

То же прием, послежде опаснее жил есть,

моляся, плоть трудами многими томил есть,

Да, непразднаго обрет, демон не приходит,

но со искушенми си посрамлен отходит.

Мысли растерзание

Муж некто преподобный на осле яздяше,

и се некий знаемец стретен ему бяше,

С ним же нача беседу долгую творити,

о нетвердости мысли в молитве тужити,

Яко мысль растерзанна обыче бывати,

егда во молении хотяше стояти.

Собеседник, то слышя, тому удивися

и о себе пред отцем онем похвалися,

Рек: Аз растерзания помыслов не знаю,

в не же время молитву к Богу возсылаю.

Преподобный же отец к нему глаголаше:

О коль дивно есть, чадо, постоянство ваше!

Но молю тя, изволи сие сотворити,

отступи от нас мало, изволся молити.

Проглаголи Отче наш точию едино,

да, аще ничто же ти приидет в мысль ино,

Ей дам ти осла сего, токмо да явиши

истинну о помысле, а нас не прелстиши.

Иначе Судию ти Бога представляю,

от Него же месть скору за ложь обещаю.

Муж он, возрадовався, правду обещаше

и, отступив, Отче наш молитву начаше.

Но абие мысль ему яла есть стужати:

Яко седла ми отец не восхощет дати,

Зане же о нем слово реченно не бяше.

Та же моляйся грех свой со срамом познаше

И, совестию нудим, к отцу возвратися,

винна себе сотворив, пред онем смирися.

Отец же, наказав й впредь опасну быти,

тако ся о твердости мысли не хвалити,

С миром отпусти его и сам совершаше

путь, себе предприятий, яко подобаше.

Мера

Яжд обед малый, немногу вечеру,

здрав пребудеши, сохраняя меру.

Аще бы муха токмо носом си мед ссала,

а не вся на сладости онаго падала,

Могла бы во животе сохраненна быти,

и гортань свою медом довле насытите,

Но зане же лакомо вся на мед падает,

за сладость медвенную жизни ся лишает.

Подобне, аще бы мы от богатств толико

искали, на потребу доволно елико.

Без греха были быхом, ни ниществовали,

а царствие небесно удобь бы стяжали.

Но зане же всем сердцем богатства желаем,

Бога забывше, того ради погибает.

Несть же богатство винно, но лакомство злое,

то бо от Бога реет в родство огненное.

Мера возраста Христова

Аще тридесят и два краты положиши

меру сию, долготу Христову смериши.

Мера креста Христова

Шестьдесят крат мера та егда положится,

креста Христова долгость праведно явится,

Пятнадесят бо в кресте честном стопы бяху,

четыри же меры си в равность стопы стаху.

Или четыри длани в стопе положиши,

а меру сию во длань едину вмениши.

Мера дски титлы Христовы

Дщица типлы Христовы шесть мер сих имяше,

ибо в полторы стопы долготою бяше.

Мерность

Елико дожда нивам сеянным желаем,

толико сами питий да употребляем.

Желаем же им воды, елико есть требе,

да токмо ся напиют по семен потребе.

Не хощем излишества, тем бо измокают

семена, а нивы их студены бывают.

Не хотим убо и нас излише поити,

да бы семен Божиих и нив не вредити.

Место

Гордость и смирение не местом ся деет,

бывает выжший смирен, а низкий гордеет.

Дионисий мучитель некогда ярися,

Аристипп им философ ниско посадися

С досадою, обаче мудрый осклабися,

рек: О царю, то место днесь мною почтися.

Тако есть воистинну от начала века,

место есть ради умна честно человека.

Место вечное

Древо елма сечется и падает камо,

неподвижно собою пребывает тамо.

Падет ли на юг, выну тако пребывает,

аще падет на север, оттуду не встает.

Тако человек чрез смерть елма посечется,

тамо во веки будет, амо же падется.

Падет ли на юг правых, во блаженстве будет,

аще на север грешных, в геенне пребудет.

Место не спасает

Мнози от людей в месте уповают,

спасение си о нем обещают.

В святе (глаголют) месте обитаем,

на святе месте святи быти чаем,

Се же молбами отец божественных,

на том же месте трудами спасенных.

Но се есть прелесть и слово лукаво,

совещание от врага неправо,

Ни едино бо место ны спасает,

аще и свято само пребывает.

Что святше неба? А в нем не спасеся

демон лукавый, но, сгрешив, падеся.

Падеся, иже Богу предстояще,

в славе и чести превелице бяше.

Что лучше рая? А в том согрешиста

Адам и Евва, яже перва быста.

Изъгнание оттуду страдаста,

преступления достоину казнь взяста.

Сладостей место ничто им поможе,

на место свято уповай никто же.

Иуда с Христом Богом обиташе,

Его учении спасенных слушаше,

Обаче погибл, сам бо развратися,

предав Господа, отшед, удавися.

Всячески убо место не спасает,

ни же общество святых освящает,

И впреки место не погубит злое,

аще в среде злых житие благое

Имать кто, яко Лот правый имяше,

иже в Содоме с кверными живяше,

Обаче прав бе, яко сам блюдеся

от дел лукавых, тем же и спасеся.

Не где, но яко кождо пребывает,

тамо от Бога мзды себе да чает.

Место не святит, но святым святится,

да никто убо святым местом лстится.

А святых молбы помощны бывают

тым, иже от грех к Богу ся вращают.

Иде же-либо житие ведеши,

свят будет, аще свято поживеши.

Аще же прежде грехи творил еси,

кайся, можеши быти на небеси,

Мнози бо земни небесни бывают,

егда житие свое исправляют,

И небеснии земнии творятся,

аще от блага к злобе приложатся.

Иуда прежде небу точен бяше,

а преданием земных вид прияше.

Павел бе земля, повнегда гонил есть,

верою же ся в небо претворил есть.

Ты аще небо, бедства соблюдайся,

аще же земля, не отчаявайся.

Исправи живот, будеши на небе,

везде и всегда свято жити требе.

Н

Навходоносор

О Навходоносоре Августин писал есть,

яко покаянием небо он стяжал есть.

Нагость

Нагость плоти на земли срам нам содевает,

тем же кождо одежду на ся возлагает.

На небеси же в ризах никто проявится,

тамо нагота честна святым сотворится.

Будет же в ризы место слава божественна,

паче солнечных лучес на ня возложенна,

В ню же иже облечен быти сподобится,

непостыдно во веки честен сотворится.

Тоя наготы, тоя ризы нам искати

всеми силами требе, да бы ю стяжати.

Иначе бо студ вечный лица имать крыти,

и лице Бога жива от нас отвратити,

Без его же светлости нощь будет во веки,

и мраз лют на грешныя с огнем человеки.

Надежда

Надежда есть сугуба: едина мертвая.

яже есть тленных вещей, та часто лестная.

Другая есть живая многими винами:

та между Божиими бывает сынами;

Жива есть паки, яко есть о жизни вечней

и о радости, сущей в небе безконечней.

Жива, яко известна, никогда прелщает,

аще усумнения та кроме бывает.

Жива, яко никогда знает умирати,

донде же чаемое верным восприяти.

Жива, яко во скорбех люди утвержает

и весело им жити выну совещает.

Жива, яко делеса жизненна творити

совещает, и в трудех неослабным быти.

Жива, яко и саму веру оживляет

и воместо душы ей во верных бывает.

Жива, яко ко Богу живу обращает,

Иже всяко животно живит и спасает.

Сицеву нам надежду нужда есть стяжати,

да бы чаемую жизнь известно прияти.

Человек болный о жезле твердится,

и утружденный о том же крепится.

Домы велия столпи утвержают,

да тяготою си, не уподают.

Корабля котва в мори соблюдает,

да ся от морских волн не сокрушает.

Тако надежда крепит человека

и возставляет в скорбех сего века.

Та возбуждает в трудностех дерзати

и великия труды приимати.

И тако, еже страшно бяше зрети,

человек может в державе имети.

Имеим убо надежду крепкую,

яко возъидем на гору святую,

Яже есть небо; на ню да нудимся,

в множестве трудов никогда ленимся,

А Бог пособит за надежду въскоре,

даст нам в небесном вечно жити дворе.

Надежда и страх

На двою крюку небо все ся обращает,

двема добродетелма жизнь наша бывает

Твердостна: надеждею и страхом спасенным,

истинныя мудрости в сердцах изводственным.

Надежда ум возносит, да ся не отчаем,

страх же смиряет, да не в себе уповаем.

Надежда купно с страхом выну буди в тебе,

аще хощеши вечну жизнь имети в небе.

Страх не попустит в грехи смертныя впадати,

а надежда достойна явит благодати

Действующия, яже в небо наставляет

и, аки вземши руку, в оно провождает.

Назирание

Ближних преступления тощно назирати,

ненависть проклятая того чада мати.

Иже паки доброты онех насмотряет,

святая мати любовь то чадо раждает.

Наказание

Врачь аще из язвы оток истискает

и вредная режет, тело устрабляет.

Тако, аще грехи брата истребиши

чрез наказание, душу уздравиши.

Благо есть милостыню убогим творити,

но лучше грешна мужа к Богу обратити,

Милостиня бо тело нищаго питает,

наказание душу грешнаго спасает.

Уне грешника словом наказати,

нежели о нем молбы возсылати.

Несть срам от менша наказанну быти,

елма кто имать обычай грешити.

Нафан Давида егда обличаше,

не гневен бысть царь, но грех свой вещаше.

Хотяй согрешившаго брата наказати

должен наказания образ добрый знати.

Сей же есть, не от гнева наказ изводити,

горкодосадных глагол из уст испустите,

Ни же во укоризну, но в наставление,

да есть же в благо время то обличение.

Инако досадою брата разьяриши,

вместо неправы, хуждша его сотвориши.

Без вины самому требе пребывати

хотящу о гресе друга наказати.

Наказание тяжко мнится быти,

но плоды правды обыче родити,

ими же душа от греха целится,

свята творится.

Любите убо вси наказание,

то приведет вы во покаяние

о злобах бывшых, к благости наставит,

Богу представит.

Его же Господь любит, того и смирает,

в отчество небесное тако устрояет.

Налог

Лот из Содомы ити не хотяше,

тамо бо жити наложил ся бяше.

Старци нравы си трудно оставляют,

в них же от дедства лета провождают.

Аггелски нужды Лоту бяше требе,

аггел, о старче, нужден есть и тебе,

Да, яко Лота, взем тя за десную,

ведет из нрав злых в страну небесную.

Юноша им же путем хождаше в юности,

неудобно оставит той путь во старости.

Древний недуг неудобь может ся целити,

ветхий налог нескоро леть есть изменити.

Написание

Написание мира всего тогда бяше,

егда Мессия правый мир сей посещаше

Пришествием Си плотским; бысть же того ради,

да вси идут людие в колен своих грады,

Да и Мария убо идет к Вифлеому,

тамо родитися Христу Пресвятому,

Яко Михея пророк древле прорицаше,

и тогда событие слово его взяше.

Паки и того деля, да будет явленно,

яко из Давыдова колена рожденно

Отроча то святое, егда скиптр отьяся

от Иуды, и Риму Иудея вдася,

Да разумеют убо, яко той Мессия

в Вифлееме рожденный от Девы чистыя.

Наследие

Хощеши наследие чадом оставити,

прилежи благостыни оныя учити,

Та бо наследство право, и зде препитает,

и в царство небесное прямо устрояет.

Началник

Пастыр с овцами образ предлагает,

како нам жити в мире подобает.

Пастырь началны знаменует люди,

стадо подданых во образ нам буди.

Егда же пастырь стадо присещает,

овца на пути не лежит, но встает,

Аки честь ему хотящи творити.

Таков к началным подначалный быти

Выну да тщится, сиречь, да говеет,

яко же отца, елико умеет,

И яко место Божие держаща,

от безбедствии подначалных бдяща.

Взаим же пастырь овцы соблюдает

и на рамах си блудныя ношает,

Тако начал ник должен есть творити,

бремя подданых крепостно носити,

Не презирати и за псы имети,

паче, любити, яко своя дети,

И то в памяти выну содержати,

яко земля тех и его есть мати.

Паче, овчата пастырска боятся

жезла, и свиста едина страшатся.

Подначалници страх дол жни началным,

о их целости по вся дни печалным.

Тем и апостол к страху увещает

и мечем острым началных прещает.

Пастырь же жезлом укрощает стада,

женет на паству, женет и внутрь града.

Тако началник жезлом да управит,

винна накажет, невежду наставит.

Обаче косен да будет язвити,

иде же довле есть токмо страшити.

Еще, глас пастырск овцы добре знают

и того выну прилежно слушают,

Шествуют тамо, амо же глашает,

едина другу въслед его варяет.

То под дании дол жни суть хранити,

гласу началных послушливи быти.

Всякая душа властем да бывает

благопокорна, Павел увещает.

Пастыри взаим пред овцами ходят,

овцы на паству благую возводят.

Сице началных долг есть предходити

стаду подданых, на пажит водити

Здраву, спасенну: Божию канону,

ни же гражданску противну закону.

Образ да будут себе подчиненным,

еже ходити путем божественным.

К сим овцы млеком пастыря питают

и на одежды волну свою дают.

Под дании же долг свой да воздают,

господы своя хлебом да питают.

И ины нужды должни исполняти,

не ропчюще же, но во благодати,

А яко пастыр от волк защищает,

во дни и в нощи мало усыпает,

Егда же стрижет, волну, а не тело

живое режет, то бо хранит цело

И кожу блюдет, да не повредится,

да паки стрищи волну прилунится,

Тако державци должни снабдевати

подданыя си, от враг защищати

И, егда дани от онех взимают,

долг свой да вземлют, а не изкожают,

Да и впред мощно будет постригати,

дань, яко волну, праведно взимати.

Но оле времен развращенных зело!

Режут днесь волну и кожу, и тело.

Сам, Врачю вышний, изволь исцеляти,

скудости бедных людей исполняти,

Да Твою милость выну прославляют,

в звании своем честно пребывают.

Блаженна страна и град той блаженный,

в них же началник благий поставленный.

Горе же граду и стране бывает,

юже началник неблаг управлят.

Гнев тамо Божий, где начало злое,

милость Тогожде, иде же благое.

Да будет же благ, должен есть храните,

яже аз хощу сим словом явите.

Перва начална сия добродетель,

благочестия да будет хранитель,

С благодарствием о всех Богом данных,

сану приличных многими желанных.

Живущ же тако Богом снабдеваем,

бывает правим, от бедств защищаем,

И, яко Бога он выну говеет,

от подначалных точну честь имеет.

Вторая сану началных прилична

есть добродетель в мире необычна.

Та смирение есть божественное,

Христом Господем вконец храненное.

Имать началник в памяти держати,

яко не ввеки будет обладати,

Смерть бо, пришедши, хощет власть отьяти,

с прочими людми во персти сравняти.

Третия — властей добротворение,

еже храните им разсуждение

Во всяких делех, а не уповати

на един свой ум, выну вопрошати

Умных совета, тако бо вершите

благо вся мощно, а не грешите.

Очеса лучше видят, неже око,

никто о себе да держит высоко.

В мнозе совете есть спасение,

в едином уме — поползновение.

Четвертая есть добродетель властей

правду хранити, блюсти от напастей

Подчиненныя, и чести даяти

достойным, а не на злато смотряти.

Равно судити мала и велика;

на лице зрящым прещает Владыка.

Не яко сеть, им закон да бывает,

юже некрепку паук соплетает,

Та бо животно мало уловляет,

болшее сети самыя терзает.

Не буди тако, но един суд буди

всем, иже в едной суть области люди.

Пятая — крепость прилична владущым,

не склонным быти к прелесть глаголющым,

Ни же златыми вериги влеченным

быти, ни другое прошенми прелщенным.

Шестая — кротость и приступность буди,

за ню же Господь возлюбит, и люди,

Яко Моисия кротка Бог любяше

и во всех нуждах ему помогаше.

Варвари некогда град крепкий разориша,

жители в пленение мечем восхитиша,

Зело безчеловечно оныя дручаху,

трупие людей мертвых к хребтом их вязаху,

Им же гниющым, они купно согниваху

от смрада и от червей, даже умираху.

О безчеловечия! Откуду си дело?

От самаго демона, глаголю то смело.

Точную людем муку ови содевают,

иже злы началники добрым поставляют,

Ибо тех злонравием и блазии тлятся

соблазнми, яко червми, и смрадом мертвятся.

На началники очи всех суть обращении,

они во образ делес миру положении.

Пред полки Израиля столп огнен идяше,

иже в путном шествии оны управляше.

Идущу столпу, полци такожде идяху,

тому ставшу, подобне и они стояху.

Столпи суть началници людем подчиненным,

иже к добродетелем водят божественным.

Они аще к степени совершенства тщатся,

по них подчиненнии таможде стремятся.

Им же в гнусности ставшым, в ней стоят и люди,

Тем же, всяк началниче, тщалив в добро буди.

Кождо началник должен разсуждати,

еже бы осла с конем не спрязати,

Ни овцы с волом, ибо ся трудити

равне не могут, и буйство та бити.

Пчела мед носит, но и уязвляет;

началник щадит, но и раны дает.

Егда пред Фараона жезл Моисий вергаше,

во змия вид страшнаго той ся обращаше.

Егда паки во руце свои приимал есть,

по змиеве виде жезл той же пребывал есть.

Кому жезл правления от Бога вручися,

употребляти како имаши, учися:

На враги Церкве жезл твой змиевиден буди,

жезл крепости вернии да знают й люди.

Язви тем злонравия, защищай благия,

казни беззаконники, утвержай добрыя.

Отец обыче чадом угождати,

немощным сущым пощаду даяти.

Тако началник должен есть творити,

во всяцей нужде разсмотритель быти.

Без воеводы вся рать смущенна бывает,

кроме кормчия корабль в мори погибает.

Тако без началника во коемждо сане

известная погибель, яко в океане.

Человече началный, нужда тебе знати,

яко о подначалных требе ответ дати.

Не рцы: Доволно ми есть промысл сотворити,

еже бы душе моей в спасении быти.

Не глаголи: Что к иным мне? Аз себе знаю,

о моей токмо душе печаль полагаю.

Да не мыслиши того, бедства суть велика

спасение строити ина человека.

Да не речеши: Несмь аз книгам наученны

и блага вещания словом украшенны.

Мало ми есть искуство, не хощу дерзати,

еже согрешающих в крепости держати.

Не глаголи сицевых, но токмо молися

и подначалныя ти правити потщися.

Бог лишение твое имать исполнити

и во нужде спасенней тебе пособити.

Койждо началник имать власть, еже учити,

иде же словом скуден, образ леть явити.

Образ же паче слова силен ползу дати,

твори благо, не могий словом поучати.

Обаче и малая слова суть велика

тех, яже устрояет в началство Владыка.

Должен убо епископ Церковь управляти,

яко же пастырь — стадо, благовождствовати.

И человек убогий дом да устрояет,

родитель чадом своим благ путь да являет.

Богатый, иже имать рабы многи зело,

путем я божественным да наставит цело.

Муж должен жену свою в правости держати,

да бы закон Господень оней соблюдати.

Судии подобает судимых хранити,

да бы взаем обиды оным не творити.

Царь всеродный властитель то да соблюдает,

злоба да истребится, благость да сияет.

Во всех же милость чинех буди сохраненна

и казнь, яже достоит, не буди забвенна.

Ни един от правитель себе да прелщает,

неможением себе да не извиняет.

Поелику можеши, потолику тщися

ползовати Божия люди, не сумнися.

Аще много знаеши, возглаголи многа,

за то мзда немалая будет ти от Бога.

Мало знаеши? И то тщися глаголати,

Бог ти мзду достойную имать за то дати.

Аще едина в тебе доброта сияет,

и та да не есть праздна, ползу да раждает.

Аще многи имаши, многи назидати

тщися, да бы ти многу мзду от Бога взяти.

Иначе, яко скрывый талант, осудится,

кто плода сотворите в ближних не потщится.

Яже болезнь от главы в телеси бывает,

та паче инех вреды людем содевает.

В гражданстве же, от начал еже зло родится,

тем все царствие люте растленно творится.

Началство

Царя Лва о началство муж некий прошаше,

да пошлет й в град некий, надолзе стужаше.

Царь приклонен явися, аки хотящ дати,

но инаго внезапу изволил послати.

Муж он, воспечалився, к царю приступил есть,

край багряницы его в руку похитил есть

И рече: Кто сицеву ризу одевает,

тому лгати никогда людем подобает.

Царь же рече к оному: И то нужда знати,

яко несть требе царю власти си поддати

Никому от подданных и того творите,

еже гражданом его может вредно быти.

Неблагодарствие

Неблагодарство велие являет,

кто, что Бог дал есть, себе причитает.

Вящшее того, кто себе благая

некая своит, Богови же злая.

Яко, внегда кто трудом приписует

благ плод на нивах, иже Бог дарует,

Егда же плодов земля не раждает,

ту скудость Богу щедру причитает.

Не тако, друже, требе глаголати,

благ плод есть лепо Богу причитати,

Неплодия же грех си вину быти,

сице возможно Бога примирити.

Неблагодарен дара мала кто явится,

той воправду велика того да лишится.

Филиппу Макидонску воин любый бяше,

иже в некое время кораблем плаваше.

Случи же ся кораблю сокрушенну быти

и воину живому ко брегу приплыти,

Его же Македонии некий в дом приял есть,

честно, угодно чрез дни тридесят питал есть.

По сих во путь отпусти, дав доволно хлеба

и чесого-либо в путь бе ему потреба.

Воин с клятвами рече: Елма с царем буду

беседуяй, благих ти никако забуду,

Яже изволил еси ты ми сотворити,

бедника обнищавша обилно чредити.

Возвращ же ся в отчество, к царю припущенный

и прежния милости онем сподобленный,

О корабли скрушенном часто глаголаше

и плавание на дсце свое поминаше.

О странноприемце же нимало явил есть,

паче же пакость ему люту сотворил есть,

Ибо умолил царя, да ему дарует,

еже Македонии ов село державствует.

О треклята воина! Клятву преступил есть

и за благодать мужа злобу сотворил есть.

Но мало веселися, ибо весть приял есть

муж ов о его злобе, и к царю писал есть

Писание молебно, дело извещая,

и како за благодать воин творит злая.

Царь, прочет писание, велми удивися,

на неблагодарнаго мужа разьярися

И, познав его злобу, веле крепость дати

Македонину, еже село си держати,

Воина же безчестно веле обнажити

и на плещех огненну печать положити,

Изображшу: Се странник безблагодарственный.

Тако имения бе и чести лишенный.

О, аще бы такия ныне знаменати,

не стало бы у купцев желез на печати.

Иудеи в пустыни о манне ропташа,

Египетских же брашен безумно желаша.

За то я огненнии змиеве язвляху,

со болезнию язвы и смерть наношаху.

Тако, иже от Бога суть обогащении

обилием всяческих, и дарми почтени,

Аще неблагодарни суть, будут казненни,

огнем вечным жегоми, живо умерщвлении.

Неблагодарство в людех злоба есть велика,

люты казни достойна творит человека.

Четырми же образы обычно бывает,

душу человеческу некрасну являет.

Первый образ — егда кто, прием что благое,

в ничто ценит, глаголет: Дело то худое.

Вторый образ — егда кто благих забывает

и благодетеля си во нужде не знает.

Третий — егда кто могущ благодать воздати

презирает, не хощет взаем содевати.

Четвертый — егда кто зло деет за благая,

не людская си злоба есть, но демонская.

Небо

Колико есть блаженство на небеси сущих,

со аггелы всех Царя и Бога живущих?

Язык человеческий не может сказати,

сердцу есть непостижно, ум не может знати.

Обаче премудрии писати дерзают,

елико по видимым оно достизают.

Августин преблаженный, глаголя о небе,

сицевая словеса остави по себе:

Небо есть высокая гора и святая,

на ней же покой вечный, и вся суть благая.

Тамо живот жизненный, блажество вечное,

житие блаженное, бытие святое.

Тамо радость без конца, печаль нималая,

тамо покой без труда и честь великая.

Тамо есть достоинство без опасения,

богатство превелико без оскудения;

Здравие без болезни, и кроме скудости

обилие всякия нужды и благости.

Тамо живот безсмертный, вечность без тления,

блаженство радостное без оскорбления.

Тамо нищеты страха никто же боится

и болезни плотския ни един страшится.

Тамо вред ни от кого может ся творити,

гнев же, ярость и зависть не имать пребыти.

Желание не томит, алчба не стужает,

любочестие тамо никогда дерзает,

Ибо вси суть доволни, в богатстве и славе,

по достоинству всяцей тамо венец главе.

Несть тамо, яко в рай лесть от врага бяше,

кознем места еговым тамо Бог не даше.

От геенны боязни никто в небе знает

и о смерти обоей никто помышляет,

Ибо тело никогда имать умирати,

и душа не возможет греха содеяти.

Ни едино зло тамо может ся явити,

несогласию воли неподобно быти,

Но вся будут согласна, яко подобает.

любы, мир, веселие вечно пребывает.

Вся тамо суть покойна, ничто же противно.

О жилище святое! О небо предивно!

Кто блаженства твоего не имать желати?

Аз не престану к тебе присно воздыхати.

Отчество наше — небо, земля — изгнание,

тем же нуждно и скорбно зде пребывание.

[327v] К отчеству небесному всячески потщимся;

елма во оно внидем, всех бед свободимся,

Тамо бо несть печаль, скорбь и воздыхание,

но есть безконечное ликовствование.

Рыбам отчество в водах, человеком — в небе,

к тому нам воздыхати безпрестанно требе.

Яко бо рыба кроме воды умирает,

тако человек неба кроме погибает.

Ныне бо желанием тамо нужда быти,

да бы в грядущем веце самолично жити.

Аще же кто в нем ныне умом не витает,

не в небо, но в ад мрачный себе устрояет.

Христу крещшуся, небо отверзенно бяше,

и Стефан святый тожде отверсто видяше.

Еда убо телеса небес ся терзают?

Или двери некия в онех ся являют?

Никако, ибо небу несть леть ся терзати,

а двери не изволи Господь в нем создати.

Точию убо небо прозрачно бывает,

да сподобленный зрети оком проницает,

И то видит, что Господь хощет в нем явити,

тому же естественно невозможно быти.

Божия сила око того возвыжшает

ко зрению сицевых, яже изъявляет.

Но и егда телеса верных воведутся

в небо, и тогда тела их не разверзутся.

Точию, яко лучы кристал проницают,

а целости онаго нимало вреждают,

Тако та сквозе небо имут прохождати,

силою тонкости си их же не вреждати;

То бо едино от вен в святых имать быти,

плотию безпрепятно вещы проходити.

Красоту небес трудно описати,

и несть языком леть изглаголати.

Паче и ум наш в том оскудевает,

да ту познает.

Малое нечто о той помышляет,

а за блаженство велико вменяет.

Внешня токмо мощно нам слышати,

отчасти знати,

А яже внутрь суть и тайна глубоко,

ухо не слыша и не виде око,

в сердце не входят, мысль не помышляет,

яко не знает.

Отчасти убо сие изьявленно,

яко благими небо исполненно

от Бога щедра ради человека

с начала века.

Что же благое мощно тамо знати?

Кратко вещаю, изволте внимати.

Трое блаженство ныне поминаю,

вам изъявляю.

Первое — яко доволства велика

положи тамо всяческих Владыка,

всех благ духовных, та же без скудости

во век вечности.

Второе — яко без печали радость

и без горести тамо вечна сладость.

Труд, болезнь, страх, смерть тамо не явится,

зло не вселится.

Третее — яко тма в небе не будет,

но непостижна светлость преизбудет

от тел блаженных, от Самаго Бога,

о светлость многа!

Сия красоты выну помышляйте,

того блаженства усердно желайте

и в мире тако потщитеся жити,

да бы в рай внити,

В нем же откуду радость есть премнога,

от видения лица жива Бога,

еже кто-либо зрети сподобится,

в век веселится.

С того зрением все дано бывает,

что-либо душа и плоть возжелает,

и паче, неже можем мы желати.

Бог имать дати.

Паки, зрением, яко человека,

Христа Бога будет превелика

радость зрящым на Нь, ибо Его тело

будет весело

Сиянием си, и зане же глава

Христос есть Церкве, убо Его слава

возвеселит ны, преумножит радость

и душе сладость.

Наконец, того ради имать быти

вечная радость, яко дастъся жити

в дружестве святых, безчисленных сущих,

в славе живущих.

О даждь нам, Христе, той дар благодати

Божество Тройчно в небе созерцати

и плоть святую Твою светло зрети,

хвалу Ти пети.

Со угодники съобщи нас Твоими,

вчини с аггелы невещественными,

да, егда с ними в славе ся поставим,

Тя вечно славим.

Некто от учителей о небе вещает,

даже в удивление ум ся восхищает,

Поведает бо оно толь велико быти,

яко, аще бы в оно человеком внити

Всем, от перваго в мире бывша человека

до последняго, иже будут в конец века,

Кому ж до часть болшая могла бы ся дати,

нежели вся есть земля, ужасно вещати.

То мы пространство неба, увы, погубляем,

егда мал у часть земли ближних восхищаем.

Небо благих сокровище

К разным вещем человек сердце прилагает,

днесь сию, утро ону стяжати желает

И, ту стяжав, покоя не может прияти,

ибо на всяк час иных обыче желати.

Се же, яко не может сердце сыто быти

ни единою тварей, донеле же жити.

Творец токмо доволен оно насытите

и желанием его конец положити.

Тем всуе, человече, тленных желаеши,

в неизвестных известна благаго ищеши.

Не в мире, во премирных то добро витает,

еже все желание сердца исполняет.

Ко премирным убо то тщися обратити,

единаго паче всех Господа любити.

Пренебрези земная, к небесным вратися,

тамо благ совершенных сердцем насытися.

Аще кросоты светлость желаема тебе,

святии, яко солнце, просветятся в небе.

Аще свободы сердце твое днесь желает,

в небе всяк, яко аггел, свободен бывает.

Аще здравие долго хощеши стяжати,

на небеси то вечно Господь имать дати.

Аще желаеши зде алчбу утолити,

тамо вечно тя Господь имать насытите.

Аще ти жажда в мире суетном стужает,

тамо обилием Си Господь упояет.

Аще глас мусикии пресладкий любиши,

в небе аггелских гласов сладость услышиши.

Аще благо дружество сердцу ти есть годе.

дружество всех святых есть в небесной породе.

Аще богатство и честь в желании кому,

то обое в небесном есть найпаче дому.

Сокращенне да реку, вся благая в небе,

ибо не инамо тех всем искати требе.

На небо, человече, сердца пущай око,

не низу ищи тленных, но вечных высоко.

Оттуду ныне помощь стяжи благодати,

тамо по смерти имать Бог мзду славы дати.

Небрежение

Душу честншу телесе быти добре знаем,

обаче тело паче душы почитаем,

Ибо, аще телеси язва сотворится,

абие врачь искусный, да целит, гласится.

Душу паки во гресех тлети оставляем,

Врача небесна звати надолзе не знаем.

Аще глад или жажда плоти досаждает,

о брашне и питии скор промысл бывает.

Душе же глад и жажду страждущей, недбаем,

насытити духовно ту пренебрегаем.

Цата едина аще когда погубится,

кождо обрести ону всеприлежно тщится.

Егда же благодати Господни лишимся,

увы, искати тоя из лиха ленимся.

Одежду по случаю аще раздираем,

абие ту сошити швеца призываем.

Совесть же аще вконец растерзанна лежит,

никто же целителя возъискати бежит.

О пренебрежения! Сламу сопрятаем,

а пшеницу забвенну в поли пометаем.

В тощне попечении худо держим блато,

в презрении имамы многоценно злато.

Падает осел в кладязь, есть, кто извлекает;

падает в грех человек, всяк пренебрегает.

Невежда

Невежда пути вожд да не бывает,

книг неискусный да не поучает.

Невежда мудраго елма поучает,

слепец очитаго мужа провождает.

Сова о лучах солнца разсуждает,

егда невеглас о мудрых вещает.

Невеждество трегубо

Невеждество трегубо мощно разчитати.

Первое — егда можем, а не хощем знати;

Сицево нас никако греха извиняет,

яко и само грех есть и грехи раждает.

Второе — елма знати нуждных не радеем,

или за многи труды искати не смеем;

И сие невеждество со грехом бывает,

аще вину отчасти меншу содевает.

Третие — егда хощем веждество стяжати,

но не имамы, како или где прияти;

Сие не есть во грех нам, но казнь ся вменяет,

яко за прешедшыя то грехи бывает.

Не всяк убо невежда казни свободится,

по сим образом вина его разсудится.

Неверие

Фомино неверие ползу сотворила,

ибо чрез язвы Христа Бога изследило.

Но не кому ж до тако может ся случити,

уне убо есть веру всем людем храните.

Неделя

Чесо ради суббота ныне оставися,

вместо ея неделя Церкви освятися?

Вина есть, яко многи тайны совершенны

от Бога всемогуща в день святый неделный.

В неделю положися вселенней начало,

сухо пройде Израиль морское забрало.

Манна нача в неделю в пустыни росити,

Христос в сей день плотию избра рожден быти.

Волхвом звезда в неделю начала светити,

Иоанн сподобися Христа в ню крестити.

Пять тысящей народа насыти хлебами

пятми Христос Питатель, и двема рыбами.

В сей день воскресл из мертвых, двери затворенны

пройде к учеником Си, мир дая спасенны.

Посла в мир апостолы правду возвестити,

у чаще вся народы во Троицу крестити.

Сошествие в неделю бысть Духа Святаго,

приход мнится в ню будущь Судии Страшнаго.

В сей день и Богословцу бысть откровение,

тем й Церковь празднует верным в спасение.

Незнание

Не знаяй себе ничесо же знает,

аще и звезды небесны считает.

Немощь

Плотская немощь болезни раждает,

красоту лица люте изменяет.

Алчба и жажда весма ею тлится,

на всяко дело унепотребится

Человек болный, точию строится,

да всеми уды мертвец сотворится.

Точне грех в душах людем содевает,

иже ся недуг онех нарицает.

Болезни люты от него родятся,

егда в совестех излиха томятся.

Брашен небесных алчба изчезает,

словес спасенных грешник не внушает.

Красота честных нравов вся губится,

яко друг благих муж грешный хранится.

К делесем благим неугодна творит,

грех весма к смерти душу бедну сроит.

Что убо грешным достоит творити?

Нужда врачеством душы есть целити.

Есть же известно тех врачевание,

то о всех гресех есть покаяние.

Кайся, грешниче, злобы удалися,

дела творити благая потщися,

А Бог тя хощет скоро исцелити,

на живот вечный в небо устроити.

Немощи человеческия

Благо есть человеку самаго ся знати

и, кия в нем немощи, выну разеуждати.

Аще кто здрав и силен, обаче в немощи

пребывает на всяк час и во дни и в нощи.

Суть же неизбежныя оны в человеце,

и во младом и в старом в настоящем веце.

Та же суть сия: присность оскудевания,

невозможность во благом выну стояния.

Немощь есть великая скорость падения

и общая всем людем худость рождения,

И жития тягота немощь обличает,

неизвестие смерти тужде проявляет.

Сия вся полезно есть верным поминати

и смиренно о себе всегда непщевати.

Ненависть

Хощеши ли ненависть чужду изтребити?

Да потщишися ему благая творити

И смиренна пред онем себе проявляти,

по нелюбви бу дети тако в благодати.

Ненавидяй брата си сам себе вреждает,

смертным бо душу грехом свою убивает.

Мир святых человеков не хощет любити,

паче гонит я, хотя память погубите.

Кия сего вины суть, полезно есть знати,

да бы лукавых делес онаго гонзати.

Первая вина того — яко нрав и дело

обою различна суть и противна зело.

Мирстии человеци благ мирских желают,

а святей к небесным выну воздыхают.

Мирстии плоти своей сластми угождают,

святии же тело си страстми умерщвляют.

Мирских желание есть в мире всегда быти,

святии во премирных усердствуют жити.

Сие противство нравов ненависть раждает

в миролюбцех, и в ярость слепу возбуждает.

Вторая вина — зависть, ибо елма видят

спеяние в блаженство святых, им завидят,

Яко сами не могут к оному востати,

избравше волею си в злобах пребывати.

За ня же знают казни будущыя себе,

обаче, оле злобы! не мыслят о небе,

Но, яко же демони святых ненавидят,

тако ненавиствуют они и завидят.

Третяя того вина — елма созерцают,

яко дружества мирска святии гонзают,

Яко отступников си не хотят любити

и всячески прилежат оныя гонити.

Четвертая вина есть, яко обличают

нравы злыя святии и искореняют.

Паче, яко самое житие святое

святых обличение злобам есть страшное.

И молчаще, святии мира обличают,

елма суетства его делом попирают.

Пятая вина — яко ови себе любят

не божественне, тем же душы своя губят.

Святии же всю любовь к Богу обращают,

душы своя губяще, тако я спасают.

То зряще, миролюбци снедаются сами

и вчинени бывают с адскими сынами.

Та знающе, братие, мира не любите,

но горе сердца ваша к Богу устремите.

Рабом Божиим святым любовь проявляйте,

житие их святое благоподражайте.

Непокоривыя Бог оставляет

Недужный аще врача не слушает

и веления его преступает,

врачь й оставит, а недуг множится,

болящ мертвится.

Тако с грешники Господь содевает,

непокорныя помощи лишает,

а грех, взем силу, в иныя приводит,

смерть душы родит.

Непокорство

Бог началники в мире уставляет,

их же бодрости люди Си вручает,

Еже в житии добре управляти,

на путь доброты право наставляти,

Благия убо честми возвыжшати,

в злобах тлеющым — раны налагати.

Убо суть должни послушливи быти

подначалнии, а не преко ити,

Ибо слушаяй началных Самаго

слушает Бога всемилостиваго,

А кто противен началным бывает,

Богу противна себе проявляет.

Что коль безумно? Удобно всем знати,

даже несть требе того изъясняти.

Страшный гнев Божий сицевым отмщает,

живых многажды земля поглощает.

Дафан, Авирон, Корей купно с ними

в показ того суть с общники своими,

Иже противу Моисиеви сташа,

но тем Господа небес прогневаша,

За что огнь лютый оны сожигаше,

земля, отверзши пропасть, я глощаше.

И елма пророк Самуил блаженный

от Исраиля бе пренебреженный,

Судию его знати не любиша,

но царя роду своему просиша.

Тогда к пророку Господь провещает:

Не тебе, Мене род сей отревает,

Да царь не буду. Оле непокорства,

зверскаго паче во людех упорства!

Но что успеша, послежде познаша,

егда царем си рабски работаша.

Движет бо на гнев Бога, а началных

непокоривость деет препечалных,

Яко видятся власть им отьимати,

юже изволи Господь оным дати,

Егда не деют им почитания,

отрицающе долг послушания.

К тому и ближним зла соблазнь бывает,

егда их сердца к точну возбуждает

Неслушанию, яко сотворися,

егда в небеси демон разгордися.

Не сам бо токмо змий в пропасть падеся,

но часть третия ошибом свлечеся

В ту ж де погибель аггел несмысливших,

согласие с ним злобне сотворивших.

Наконец, себе зол непокоривый,

ибо и Богу есть он нелюбимый

И человеком ненавидим зело,

ни едино на нь зрит око весело.

Последует же в мире казнь велика,

и в век грядущий судит й Владыка,

Еже с Кореом часть в аде имети,

со Авироном, с Дафаном горети,

Его же огня кождо да боится,

послушлив быти началу да тщится.

Непослушание

В мале кто, или в мнозе Церкви не слушает,

равне, яко язычник и мытарь, бывает,

Яко же точне мертвец от малыя раны,

или от великия, земли есть преданы,

Или, яко в кладязи кто есть погруженны,

точне погибл, яко кто в мори потопленны.

Непристойная 12

Дванадесят суть в мире непристойна,

в людех чести, мзды свыше недостойна:

Мудрый человек, словом исполненный,

деланий благих аще есть лишенный;

Мужь, сединами изрядно сияющь,

благочестия хранити не знающъ;

Юноша кроме повиновения,

непослушливый старых учения;

Богачъ лакомый, выну собираяй,

а милостыни никогда же даяй;

Жена, ея же лице не срамится,

язык злоречив, яже не кротится;

Господин, иже рабы обладает,

добродетелей хранити не знает;

Мужъ христианский, прение любящий,

не во кротости путем си ходящий;

Человек нищий, иже возгордится,

Богом и людми никако любится;

Царь, на престоле славы си седящий,

а суда права людем не творящий;

Епископ, овцы леностно пасущий,

прибытки, яко волну, их стригущий;

Народ, лишенный сущъ наказания,

в свободе живущь без обуздания;

Град без закона, ту бо изчезает

истинны благость, все ся зло раждает.

Нерадение

Врачь болна оставляяй, аки убивает;

иерей нерадивый душы погубляет.

Нестерпимая

Бог и грех во едином сердцы не бывают

купно, ибо друг другу весма уступают.

Аще воведеши грех, Бога изведеши,

аще изведеши грех, Бога воведеши.

Свету со тмою несть леть купно быти,

тако со грехом Богу в сердцы жити.

Несытство

Птица финике ветви многи собирает,

на них же сам возлег, огнем согаряет.

Тако несытнии много пищь сне дают

и питий пиют, от них же умирают.

Неудобная и неподобная

Четыри неудобна дела обреташе,

пятое неподобно, Платон глаголаше.

Неудобно, рекл, дело — гордому служити

и от сребролюбива мужа что просити;

Еще со лживым мужем куплю совершати,

и со искуства праздным беседы творяти;

А неблагодарному доброе творити

исповедую весма неподобно быти.

Не хвалитися

Благо живеши, нимало хвалися,

но да укрепит Господь, помолися.

Неясыть

В стране Египетстей птица пребывает,

яже ся неясыть в людех нарицает.

Той, во гнезде птенци егда укрылятся

и от змия смертне ядом повредятся,

Обыче си перси ли глезне терзати,

на уязвленныя птенцы изливати

Кровь теплую, яже яд в них умерщвляет,

самы же к здравию добру устрояет.

От тоя же язвы в недузе бывает

неясыть, из гнезда нимало летает.

В то оживлении время излетают

и, стяжавше пищу, матерь си питают.

Аще же неции от них возленятся

и, еже питати ея, не потщатся,

В здравие пришедши, из гнезда вергает,

в общество с тщивыми птенцы не пущает,

С ними же послежде сама веселится

и, пищу обретши, любезне живится.

Неясыть мысленный есть Христос Спаситель,

рода человеча смертна Оживитель,

Его же змий адский смертно язвил бяше

во гнезде Едемстем, даже исчезаше.

То зря Христос Господь, милость проявил есть,

прият в персех рану и кровь источил есть

Святу, ею же мы есмы оживлени

и еже летати умом утвержени.

Сам Христос в небесном гнезде почивает,

пищы от нас благих деяний желает

И, аще кто теми тщится И питати,

во гнезде небесном имать пребывати.

Не хотящий же в благих ся трудити

отвержени того гнезда имут быти.

Пища вечносладка в небе дастся тщивым,

огнь же вечный и червь во аде — ленивым.

Оле любимици! Кто не убоится

жестокия казни, и не приложится

Деянию благих? И кто не желает,

да по трудех в небе вечно ся слаждает?

Низость и высота

Шествуяй низу безбеден бывает,

ходяй по версех зданий низпадает.

Тако смиренный чином не боится

беды, ею же высокий томится.

Нищ

Имеяй муж много ничто же имеет,

аще ему злато свое не довлеет.

Бог пребогатый нищеты не знаше,

яко в небеси всебогат Он бяше.

Восхотев убо нищету познати,

изволи наше естество прияти.

Познавше, яко та нелегка бяше,

царствие нищым Свое дароваше

За терпение, тем же суть блаженни,

иже нищии духом обретенни.

Вениамин десницы Сын истолковася,

Венони — Сын болезни о том же сказася.

Нищии зде Венони воправду зовутся,

но Вениаминове вечно нарекутся,

Яко зде во болезнех выну пребывают,

в небеси же во десных жити ожидают.

Иосиф егда брата малейша видяше,

представша себе, сердцем возмущся, плакаше.

Христос Господь братию нарекл малейшую

нищыя за любовь Си к оным теплейшую.

Ту братию егда мы в бедах созерцаем,

достойно и праведно да ся умиляем

И, поелику сила, им да помогаем,

то бо любезно быти Господеви знаем.

Нищета

Честное человеком мерзость есть у Бога,

ни во что суть у Него богатства премнога.

Ненавистная людем нищета почтенна

от Него, во царствии небесном вселенна,

Блаженни бо нищии, Христос глаголаше,

яко царство небесно им Бог Отец даше.

Бог всяческих Владыка и Творец всех веков,

человек быв, обнища ради человеков.

Но кая вина сего богатств презрения?

Може с ними строитель быти спасения.

Богословцы две вине того обретают,

яже нам в писаниих своих оставляют.

Первая того вина — яко подобаше

от земных отвратити благих сердце наше

И наставити благих небесных искати.

Нужда убо Самому бяше обнищати,

Хотевшему богатства словом обхудити,

а нищету скорбную людем ублажити,

Да в Себе подаст образ искания горних

чрез пренебрежения тленных богатств долних,

Яже препинание люто содевают

тым, иже благ небесных искати желают.

Вторая вина того — да не причитает

мир богатству и славе, еже содевает

Божества сила, мудрость и милость велика

в обращении к Богу грешна человека.

За то и апостолы нищыя избраше,

и не книжны бывшыя, яже посылаше,

Да богатыя мира и мудрыя славно

обличат о их буйстве пред народы явно,

Да Божию в немощных силу созерцают,

от прелести идолски к Богу притекают.

Блаженни суть нищии, но требе есть знати,

коим блаженство вправду лепо приписати.

Нищета трегуба есть: первая — скудости,

втора именуется нищета честности,

Третяя — суетствия, яже разсудите

подобает, да знаем, кую благо чтите.

Первая окаянна, ибо досаждает,

яко противна воли нищих та бывает.

Ради бы они злато и сребро держати,

но того не умеют, ни могут стяжати.

Тем же ю нелюбезно обыкли терпети,

но ропщут много, яко не могут имети.

Неправо строение Богу причитают,

ближния скупостию присно обвиняют,

А себе нещастие злое прилагают

и без разсуждения злобы умножают.

Обычай имут красти, со клятвами лгати

и всякими образы чуждая хищати.

Злая их суть делеса, обаче деяти

милостыню им благо, да бы им престати

От тех злых начинаний и благотворите,

за творящыя милость Господа молите.

Блажен муж, иже нища знает и убога,

от богатаго Бога мзда есть тому многа,

Ни же от милостыни то да отражает,

яко грешником сущым милость ся являет,

Ибо милуяй нища не грех ублажает,

но лице человека беднаго питает,

И щедряй нища не грех хощет ущедрити,

но соестественнику милость сотворите.

Тем не грехи, но праву природу питает,

кто человеку милость, не злобам являет.

Вторая нищета есть похвалная зело,

яко волею взята бывает весело,

Егда кто Христа ради мир сей оставляет

и богатства имети сердцем не желает.

Зде трегубо блаженство мощно усмотряти

и блаженны нищыя сицевыя звати.

Первое их блаженство — яко Христу Богу

подобници деются чрез нищету многу,

Ибо, яко волею Христос убог бяше

в рождении, в животе, нищь и умираше,

Тако они волею убози бывают,

Учителя своего верно подражают.

Сих убо есть царствие, еже в светлом небе,

к нему же воздыхати комуждо есть требе.

Второе их блаженство — во искушении,

ибо неудобь могут быти плененнии;

Яко бо нага мужа неудобно яти,

зане не имать, за что рукою й взяти.

Тако нищий неудобь уловлен бывает,

яко за что й взяти, враг не обретает.

Глаголют же неции, яко не язвляет

змий нага человека, но того гонзает.

Облеченнаго паки дерзает язвити

и смерть ядом оному своим наносити.

Аще то истинна есть, аз не извещаю,

но сию неложную правду быти знаю,

Яко змий ветхий демон от нищих бегает,

зане теми удобно побежден бывает.

На богатыя паки смело нападает

и часто смертоносно тыя уязвляет.

Третее их блажеснтво — во воздаянии,

ибо во честном зело суть обещании.

Царствие небесное им есть обещанно,

веселие вечное им уготованно.

Апостоли нищетни во мире сем бяху,

но суждения миру обет восприяху,

Что, колико есть честно, мощно разсудити

и оттоле нищыя любити и чтити.

Третяя нищета есть — суетства лукава,

яже ни полезна есть, и зла ея слава.

Сию тии людие в мире соблюдают,

иже имения си тщетно оставляют,

Тогда славу мирскую у людей ловяще,

а не за любовь Христа нищету храняще.

Сицеви философи в древных вецех бяху,

иже богатства своя в мори потопляху.

Инии камение честное крушиша

в знамя, яко мирская во ничто вмениша.

Сие вы различие нищеты судите,

а яже есть праведна, тую ублажите.

Первии христиане нищету любиша,

имения на нищих потребы делиша,

Под ноги апостолов сребро пометаху,

они же, яко лепо бяше, устрояху.

Се же кими винами движени твориша,

мудрии в писаниих своих изьявиша.

Первая вина — яко от Христа слышаху,

яко нищии духом преблаженни бяху,

Их бо царство небесно. Апостоли слово

тожде в поучении имеша готово.

Втора — яко нищета похоть изтребляет

очес, яже богатствы рожденна бывает.

Есть же корень злоб всяких, гордости, пиянства,

лихоимства и блуда и всеокаянства.

Третяя — яко нищий свободен бывает,

да ся богомыслием часто упражняет,

Не имея печалей многих сего века,

яже суть богатаго спона человека.

Четвертая — яко мзда нищым обещася,

богатство, еже в небе, Богом зготовася.

Пятая — яко к Богу нищета приводит,

сердце с упованием к Оному возводит.

Наконец, яко Христос Сам образ подал есть,

в нищете бо до смерти в мире пребывал есть,

На Нь же, вернии, зряще, нищету любите,

нищыя от имений ваших ущедрите,

А воздаяние вам известно у Бога

царство небесно, и в нем богатства премнога.

Птиц хранители птицам крила подсекают,

да не выспрь и далече от них отлетают.

Тако Бог человеку богатство отьемлет,

да ся того ради выспрь во гордость не вземлет

И да не отлетает, тем нудим, далече;

брозда нищета, тщета есть ти, человече.

Нищета сугуба

Сугуба в мире нищета бывает:

едина плоти люте досаждает.

Егда кто брашен и одежд лишися,

ты страждущему милосерд явися;

Напитай его, тщися ризу дати,

Бог же с лихвою имать ти воздати.

Аще же скудость и тебе стужает,

поне сердце ти да ся умиляет

Скудости ради ближняго твоего,

жалея скорби и печалей его,

И за то Господь имать ти воздати,

саму Он волю обыче венчати.

Иде же делу невозможно быти,

чтый, тщися поне сердцем ущедрити.

Вторая — духа нищета реченна,

егда душа есть всех благих лишенна

И благодати Вышняго лишися,

за грехи своя небес удалися.

Сице нищаго должно миловати,

святым советом к благим наставляти,

И Бога о нем прилежно молити,

да бы изволил его просветити.

Милостыня си зело есть велика,

любит ю выну Царь всех и Владыка.

Леть же комуждо ону содевати,

никто ся может сея извиняти.

Нищета царей

Царие и князи, суще пребогата,

обыкоша скудость едину страдати.

Много рабов имут, сокровище в злато

соблюдают иным зело пребогато,

Но нищи суть в други, правду глаголивы,

вси бо по их сердцу глагол деют лстивы.

Нищих питание

Муж некто благочестно житие имяше,

веру, надежду, любовь ко Богу держаше,

И на всякое лето вообычаися

в день, во нь же Христос Господь на земли родися.

Жену нищу с младенцем и старца взимати

во дом свой на трапезу, и честно питати

В честь Христа и Марии с обручником ея,

и не лишися он мзды за сие своея,

Ибо, егда в старости к смерти прихождаше,

Спас, Мария, Иосиф к нему глаголаше:

Ты ны на всяко лето в нищих чредил еси,

от днесь чрежден будеши вечно на небеси.

Ты тщался еси в дом свой нас в нищих примати,

гряди ныне на небо за то царствовати.

О радостна звания! О воздаяния!

Творите убо нищым честь и даяния,

Да подобную и вы мзду восприимете,

на вечную трапезу во царство внидете.

Нос, скушенный отцу

Лукретий некто родил сына бяше,

его же велми ослабно питаше,

Дав ему волю, что хощет, творити,

и мало того не хоте скорбити.

Сын же растяше, к злобе привыкая,

страха и срама ни отчасти зная.

Быв же в возрасте, нечто сотворил есть,

им же висети делом заслужил есть.

Осужден убо, елма ведом бяше

на место казни, отца си призваше.

Лице си к лицу его преклонил есть,

аки лобзати, но нос откусил есть,

Воплствуя сице: О злый родителю,

враже, не отче мой, и губителю,

Ты мя на сию смерть хоте предати,

яко не хоте в девстве наказати.

Егда безчинно житие ми бяше,

ты ми достойных язв не возлагаше.

О аще бы ты потщался мя бити,

не бых на сию могл аз смерть приити.

Щадя, мя убил, чрез тя погибаю,

но се та за то знамя оставляю.

Живи без сына, и носа лишенны,

не казнил ты мя, ты мною казненны.

Та же казнен сын, а отец отьиде

без носа в дом свой, с него же прииде.

Сей случай из уст священных слышание

вдовица, яже два сына имяше.

Та, в дом пришедши, нача оны бити,

у чащи добре и пречестно жити,

И притчу сию во обычай взяше:

Не дам скусити носа, глаголаше.

Нощ и день мысленный

В нощи обычай есть зверем ходити

и пищу себе потребну ловити.

Человеци же тогда ся валяют

на ложах своих, сон употребляют.

Возсиявшу же солнцу, день бывает,

зверь в ложе свое всякий ся прятает,

А человеци исходят на дело,

вся нужды деют безбедно, весело.

Нощь бе велика, зверми исполненна,

прежде во мире Христа проявленна.

Зверие, греси вселютии бяху,

иже Адамль род зубы си терзаху.

Звери — ад и смерть ненасыщеннии,

сими сне дени, врагом прелщеннии.

Человеци же в одрех злобы спаху

чрез ту нощь люту и безделни бяху,

Но егда Солнце истинны явися,

Христос от Девы Марии родися

И светом Своим мир сей облистал есть,

вся звери тыя в ложа их прогнал есть.

Людие паки от сна си восташа

и дела света деяти начаша,

Да сами чада света нарекутся

и в страну света вечна воведутся.

Отвержим убо и мы дела нощы,

а творим света в Божией помощы,

И будем в светлу ризу облечени,

в светлостех святых вечно водворени.

Нрав

Пси псами пса ядома, притекше, снедают,

людие скорбна мужа в скорби погружают.

Оле лютаго нрава! Вместо пособите,

псий нрав восприемлюще, тщатся погубите.

Древо старое трудно пресаждати,

такожде нравы старых изменяти.

Древо младое удобно клонится,

тако юноша всяческим учится.

Им же туком сосуд новый исполнится,

чрез многая лета той в нем сохранится.

Тако нрав юноши, от детства всажденный,

даже до старости бывает храненный.

Нуждно есть царствие небесное

Воинство к граду егда приступает,

елико может, взяти промышляет,

И внегда един на стену восходит,

надежду благу взятия всем родит.

Нам к граду неба должно приступати,

нуждное царство нуждею хищати.

Огненны стрелы молитв да пущаем,

средостения вся да разоряем.

Христос надежду благу сотворил есть,

Он бо в средину града предварил есть,

И яже врата бяху заключенна,

силою Его уже отверзенна.

По Себе и нас в небо призывает,

да кождо оно нуждею хищает.

Потщимся убо вся нужды терпети,

да бы со Христом часть в небе имети.

Вся нужды, страсти временнаго мира

не суть достойны с радостми примера,

Яже в небеси, убо потрудимся,

желаний сердец всяко сподобимся.

Еже человек возможе создати,

то ин нуждею силен есть отьяти,

Но небо словом Бога сотворенно,

зело высоко, велми утверженно.

Обаче и то нужду имать неку,

леть царство Его взяти человеку.

Сама то правда, Христос Бог вещает,

Его же слово никогда прелщает,

Но како правда, изволте слушати,

аз имам волю то истолковати.

Бог Иудеи чада нарицаше,

тем Его царство им достойно бяше,

А не Еллином; иже со деваху

нужду некую, егда вероваху

Во Христа Бога паче, неже чада,

достойни бяху небеснаго града.

Сонму Еврейску царство подобаше,

яже от Еллин Церковь то отьяше.

Егда сынове Христа укориша,

тогда ся Ему чужди поклониша

И быша царства Его снаследницы,

то похитиша, аки бы нуждницы.

Паки, бысть нужда царству небесному,

яко премнози вдашася к оному

Покаяния путем божественным,

числом текущих некако стесненным.

Еще бысть нужда, ибо весма требе

хотящым взяти царствие на небе

Многая в пути злая пострадати

от враг душевных, и брань содевати,

Ея же нужды кая болша будет?

Блажен, кто сию злу беду пребудет.

И еще нужда Самому бывает

Богу, егда ся грешник от грех кает

И молит Его щедроты явити,

наследника Си царству сотворити.

Нужду мы убо Богу содеваем,

егда плачемся, а не убеждаем,

Не обидяще, но слезно моляще,

не нашу волю, но Его творяще.

О блаженна есть сицевая нужда,

Богу бо своит человека чужда,

Не гнев наводит, но милость раждает,

сыны тмы в чада света прелагает.

Бог сию нужду рад от нас терпети,

не за враги нас имать, но за дети,

И поелику вящше кто И нудит,

Он потолику того паче любит.

Святый се разбой, злодейство святое,

дейте вси сие Богу, не иное.

Сице небесно царство похищайте,

силно на Бога силна нападайте.

Он ту в обиду не вменяет Себе,

даст за то царство и вся благая в небе.

О

Образ

Образ дах вам, Христос Бог Своим глаголаше

учеником, и тожде делати учаше,

Еже Сам Он делаше; тем же возглядати

и нам требе на Него, и тажде делати.

Представим убо уму на кресте висяща,

многим добродетелем показом учяща.

Зри, гордый человече, како Бог смирися

за тя, и с разбойники невинный вменися,

И смири сердце твое до стоп святых Его,

да тя вознесет во град царствия Своего.

Смотри, сребролюбиве, нагость Христа Бога,

и твори от имений даяния многа,

Да нищих молитвами внидеши в богатства

(следом Христа нищаго) небеснаго царства.

Зри, нечистот детелю, Христа умерщвленна,

да тя, очистив от грех, явит оживленна,

И умерщвляй плоть свою, да духом живеши

и во жилище святых на небо взидеши.

Узри, гневливе, кротость, како Бог мол чаше,

егда на заклание Агнец ведом бяше,

И возлюби доброту кротости святыя,

да внидеши до земли, кротким готовыя.

Зри Христа, пияницо, чим бе чествованны,

желчь горкая и оцет бяше Ему данны,

И престани чрево ти вином исполняти,

да бы вечны радости чашу ти прияти.

Зри, мужу ненавистный, любовь превелику,

како иже распяша нашего Владыку,

Он о тех молбу к Отцу небесну приносит,

извиняет и грехов прощения просит,

И отвержи ненависть, а возлюби други,

паче, образом Христа люби и недруги,

Да Бога друга тебе тако содееши,

и в наследие Его восприят будеши.

Смотри, нетерпеливче, Христа терпение,

како на кресте висит за всех спасение.

Мощно бяше низъити, но Сам не хотяше,

терпения нам образ Собою деяше,

Да во скорбех до конца храним терпение,

ибо то содевает душам спасение.

Терпи убо любезно, что ти ся случает,

искушением в небо Бог тя устрояет.

И всех добродетелей от Христа учися,

всяк рожденный во мире Ему подобися,

Он бо есть сокровище всея благостыни,

Он неоскудевающ источник святыни.

Что-либо содеявшя Онаго узриши,

тожде и ты по силе твоей да твориши,

Не чудодейства убо, но дела благая,

та тя возведут в небо в жилища святая,

В них же даруй нам, Христе, пред Тобою стати,

с Отцем и Духом Святым Тебе воспевати.

Егда неверием Фома удалися

от Христа Господа, в осмый день явися

Христос его ради, язвы показал есть

и, уверив его, образ нам подал есть,

Еже падших во грех не пренебрегати,

но всяким образом недуг исцеляти,

Не, яко о брате Каин глаголаше:

Еда в стражи моей Авель брат мой бяше?

Ни же яко жрецы Иуде рекоша

и в отчаяние паче приведоша,

Егда кающуся реша неистово:

Что к нам? Ты узриши, неутешно слово.

Ведети всем должно, и печаль имети,

еже ближних падших Господу снабдети.

Найпаче началным, им же суть вручени,

прилежателно есть, да будут спасени.

Иулий кесарь образ Александров зряше,

младоизображенный, тяжко воздыхаше,

Глаголя: О коль много юн он благ содея!

Аз ничто содеях в дни юности моея.

Тако нам на образы святых подобает

зрети, да блага дела их ум разсуждает

И подобных им тщится скор творитель быти,

да бы с ними в царствии горнем вечно жити.

Франтиск именем первый краль Францийский бяше,

сей, яко писание и мудрость любяше

(Ея же родители его не любяху,

но подобием варвар в простоте живяху),

Абие честных дети писаний взискаша,

кралевску люблению тако угождаша,

И бысть в мале времени мудрость разширенна,

образом краля по всей земли умноженна.

Обычай бо есть в людех царя подражати,

еже ему любезно, всем то возлюбляти.

Благо убо есть царству, егда благи нравы

царствуяй восприемлет ради всех неправы.

Не толь магнит железо к себе привлекает,

коль благий образ люди к Богу наставляет.

Жестоковидно бяше писана икона

честнаго в философех мужа Палемона,

Пред нею же случися увещанней быти

жене блудодейце, еже соблудити.

Она, готова сущи на скверное дело.

неистову блуднику дати свое тело,

Узре образ он страшный, люте ужасеся,

в смешение блудному мужу не дадеся,

Страхом лютым объята, казни убояся,

образом мужа честна злая страсть прогнася.

Колми паче нам верным страх должно имети,

повнегда на иконы святыя воззрети,

На распятие Христа мира Спасителя,

и чистоты плотския и душ любителя,

На Пречистыя Девы икону святую,

или на кую-либо иную честную?

Пред всеми ими страх нам в сердцех да бывает,

от делес нечистоты да преустрашает.

Паче же и самый в нас образ положенный

Божий, по нему же всяк из нас сотворенный,

Боязнь во сердцех наших весма да раждает,

егда похоть на злое дело возжигает.

Действеннейшая сила буди в христианех

образов святых, неже мирских во поганех,

Инако осудит ны блудница оная,

токмо мудра Еллина образ почетшая.

Аще мы божественных чтити не потщимся,

где суть оны, деяти блуд не убоимся.

Александр Макидонский Тир град обстояше,

ров велий, бывш пред градом, засыпать хотяше.

Видя же воев леность, в первых, насыпал есть

сам кошь землею и в ров пред всеми всыпал есть.

То видяще, ратници царя подражаху,

в яму ону носяще землю, засыпаху,

И тако приход к граду себе содеяша,

и по мале времени град силою взяша.

Сице царие делом своим возбуждают

на дело вой, елма образ им являют.

Образ богатых и нищих

Ное праведный, в корабли плавая.

милосердия свыше ожидая,

Испустил врана во искушение,

аще обрящет вод осякнение.

Той, узрев трупы на воде многия,

не возвратися, но паде на тыя,

Что видя, Ное нечто умедлил есть

и голубицу тако ж испустил есть.

Та, не обретши ногам си покоя.

вратися паки во корабль до Ноя.

Он же, ю прием, паки ожидаше

милости свыше, и не прелщен бяше.

Образ в тех птицах быти созерцаю:

чрез врана черна богатых смышляю,

Тии бо, в мир сей искушени суще,

и трупы богатств многия имуще,

В корабль небесный не мыслят летети,

волят на трупах тех смрадных седети

З бедством великим душы спасения,

не зряще адска близ потопления.

Чрез голубицу паки убогия

люди смышляю и зело бедныя,

Яко, ничто же они зде имуще,

упокоити душы их могуще,

В корабль небесный тщатся возлетети,

с праведным Ноем безбедно седети.

Ты, любимиче, выну голубь буди,

егда инии врани будут люди.

Образы добродетелей

Яко пчелы от цветов многих собирают

мед и сладкия соты из того творяют.

Тако, иже желают совершении быти,

медом добродетелей душы исполнити,

В жития раб Божиих прилежно вникают,

от тех добродетелей себе собирают.

Многи же Писание образы Священно

являет нам, да живем в мире божественно.

От Авеля праведна можем ся учити,

еже лучшая в жертву Богу приносити.

Енох благочестиво пред Богом живяше,

благочестия образ нам во ползу даше.

Ное путем истинны праведный спасеся,

истинны хранения в образ нам дадеся.

Авраам веру к Богу чисту сохранил есть,

Исаак же во страсе Егове пожил есть.

Иаков житие си свято провождаше,

за что умножение чад ему Бог даше.

Иосиф доброличный чистоты любитель

бяше, и поставися Египта правитель.

Моисий кроток бе зело, много бед терпяше

о людех согрешивших Господа моляше.

Исус Наввин послушлив Моисию и Богу

явися, и получи благодать премногу.

Самуил немздоимный поживе судитель,

а днесь сия погибе вконец добродетель.

Давиду в безместии, в хвалении Бога,

во кротости похвала в Писании многа.

Илия ревностию по Бозе горяше,

небо молитвою си долго заключаше.

Езекия молитву слезну сотворил есть,

а Бог пятьнадесять лет ему приложил есть.

Иосия совершен всячески явися,

тем в Святом Писании много ублажися.

Иовле терпение добре кождо знает,

его благочестие Сам Бог похваляет.

Даниил бе воздержник от пищь иноземных

и правый осудитель судий неправедных.

Товия милостыню прещедру творяше

и мертвецы во плене тайно погребаше.

Исаиа без страха правды возвеститель,

юже сказа оному всяческих Творитель.

Сия в Ветсе Законе образы имамы,

но от Нова вократце ползы ради дамы.

Мария Пресвятая Христа Бога Мати

вся доброты собою возможе обьяти,

Но дивно с плодным девством име смирение,

им же заслужи быти Богу селение.

В Петре вера изрядно правая сияше

и ревность превелику о Христе держаше.

Иоанн божественный девственник пребыл есть,

а пречистый чистаго Господь возлюбил есть.

Инии апостоли любовь сохраниша

ко Христу, Его ради мир сей оставиша.

Шедше во вселенную, истинну вещаша,

телеса си на муки за Христа предаша.

Мария Магдалыни выну бе готова

во сердце приимати учения слова.

Павел многими труды Господу служил есть,

яко сосуд избранный, славу обносил есть

Имене Бога жива в премногия страны

и с радостию прият казнь, многия раны.

Много инех образов мощно есть собрати,

яже изволи Господь нам во ползу дати,

От них же вы, братие, себе назидайте,

во Церковь Христа Бога тощно возрастайте,

Да в вас, яко в храмех Си. изволит Сам жити,

потом вы во град вышний велит преселити,

Да вы в нем тако живот приимете вечный,

веселие присное, покой безконечный.

Общество

Бог Слово плоть восприем, брат нам сотворися,

естество же Божеству наше приобщися.

Тем же взаим наследство обще нам бывает,

Бог скорби, беды наша Себе вообщает.

Мы же Его богатства, честь вземлем и славу,

за что вечну деяти дол жни Ему хвалу.

У не со Иудеи на Сионе жити,

неже на Гаризиме с Самаряны быти,

Еже есть со верными благо пребывати,

со неверными паки зле жителствовати.

Благо есть со благими общество держати,

их бо ради обыче Бог благодеяти

И недостойным сущым, яко сотворил есть

Павла ради, егда вой много сохранил есть

От погибели морски; а дом Пентефрия

не лишил есть милости Си божественныя

Иосифова ради в нем пребывания.

Равная и Лавану благодеяния

Сотвори Иакова ради преблагаго,

и многим благотворит ради единаго.

Овца

Егда человек в чести поставися,

ума лишенным скотом приложися.

За что из райски полаты изгнася

на поле мира, иде же скитася

Чрез многи веки, пастыря не зная,

донде же роди Дева Пресвятая

Пастыря добра, Иже избра Себе

из всех скот овцы, да будут на небе.

Мы аще Его овцы хощем быти,

овчая свойства достоит хранити.

В первых же, кротость, да, яко лишенны

всяких оружий овцы сотворенны,

Ибо неведят битися рогами,

ниже вредити стригущих зубами.

Не дерут ногти, не перут копыты,

аще бывают и жестоце биты,

Тако по нраву нам быти достоит,

вся оружия отврещи пристоит,

Гордости роги никого же бити,

пазногты мести нимало вредити,

Зубами клевет ближних не кусати,

благих деяний зле не толковати.

Вторая свойство овец — терпение,

ибо ведутся на заколение

Без сопротивства и без глашения.

Сицева и нам требе терпения,

К нему же Пастырь Сам нам образ дал есть,

всетерпеливо егда пострадал есть.

По нем. иже вслед Его шествоваху,

терпением си образ нам писаху,

Егда вся муки терпеша в радости,

за что внидоша в вечныя сладости.

Третее свойство их — яко питают

млеком и мясом, кожми одевают

Стяжатели си. Такожде творити

нам подобает, питати, поити

И ризы нищым лишния даяти,

да бы на Суде в стаде овец стати.

Четверто свойство их — соли желати

и ту любезно в стомах приимати.

Нам соль духовну снедати полезно,

слова Божия слушати прилежно.

Пятое — егда мраз с снегом несется,

завистно овца травою пасется,

Аки знающи мразоварение

трав и снегами нив покровение.

Тако нам овцам достоит пастися

тайною жертвы, хотящым спастися,

Найпаче, егда грех ны омражает

и зима смерти гладом си прещает,

Да грех истает огнем божественным

и смерть не вредит тайн сподобленным.

Шестое страх есть, овцы во нь вподают,

егда хищнаго волка созерцают.

Нам же демона страх имети требе,

да не похитит грехами нас себе.

Седмое — часто овцы возглашают

и смирение выну соблюдают.

Мы должни к Богу присно глас даяти,

во смирении выну пребывати.

Тако живуще, въправду будем овцы

благия Бога единаго в Троицы,

И егда Христос приидет судити,

благоволит ны с овцы поставити

Одесную Си, приобщая Себе,

да с Ним Пастырем вечно будем в небе.

Овцам точни есмы

Во Писании часто обретаем,

яко мы овцам сравними бываем,

Ни безприлично, ибо мы с оными

зело подобии нравами нашими.

Глупы суть овцы, скоро заблуждают,

аще ся бодра пастыря лишают.

Точне людие буи, и от блага

пути в пустыню блудят люта врага,

Егда не имут благо я пасуща

пастыря, и в дом небесный ведуща.

Овца едина аще скочит в яму,

иныя по ней в ту же скачут саму.

Тако людие, егда усмотряют

злотворящаго, тожде содевают.

Овцы от волка не знают бегати,

егда обыче он я нападати.

Равне людие нимало гонзают

волков геенских, егда я хищают.

Овцы в ограду не знают возврата.

в чюждая идут несмысленно врата.

Тако ж людие в дом ся возвратити

горний не знают и на путь ходити

Душеспасенный, но прямо шествуют,

камо-либо я чувства вождествуют.

Овцы безстрашно и тамо бегают,

иде же оны ножем закалают.

Точне людие безопасно к тому

шествуют, иже ко геенску дому

На смерть вечную оны посылает,

и въторой смерти в снедение дает.

Вся злая сия безпастырство деет,

пастырь же бодрый спасати умеет.

Пастыря убо Христа да держимся.

во дом небесный по Нем возвратимся.

Овцы Христовы

Иже веруют в Бога единаго в Троицы

православно, суть Его истинныя овцы;

Изряднее же, аще живут благочестно,

яко же завещает правило небесно.

Преблаго же вернии овцам уравними,

яко многая имут подобия с ними.

Овца по естеству си невооруженна,

тако верна Бог быти хощет укрощенна.

Овчая вожда кроме не бывают стада,

тако вожда требует сонмь всякаго града.

Овцы из права пути часто заблуждают,

такожде человеци много содевают.

Овцы блудныя хищный волк выну хищает,

люди же заблуждшыя враг демон глощает.

Пастыри убо знайте, овцы словесныя,

тако не лишитеся страны небесныя.

Пастыря Христа овцам долг сугубо знати:

верити во Нь и любовь правую держати.

Овца своего глас пастыря знает,

кождо человек Христа да слушает.

В тысящи овец овча матерь знает

и глас посреде гласов разсуждает.

Тако вернии Церковь дол жни знати,

гласа слушати, она бо есть мати.

Овцы род Иудейский Христос нарицаше,

но еще и иныя некия имяше,

Глаголание бо: Имам Аз овцы иныя,

подобает Ми в стадо привести и тыя.

Тыя овцы языци суть Христом речении,

иже чрез апостолы в стадо приведени.

Тии днесь во единстве Церкве пребывают,

единым учением душы си питают.

Едиными законы бывают правими,

теми же и святятся тайнами святыми.

Овцы стада знает Христос

В начале мало стадо Христу бяше,

Иудея бо токмо то держаше.

Днесь же велико, ибо вся вселенна

верными рабы Его насажденна

Добрый же Пастырь знает овцы стада,

яже содержит Церковна ограда,

И знаменает перстом божественным

лице душевно в небо нареченным.

Нам несть известно, кто есть овчествуяй,

и кто из стада есть козлиществуяй,

Ни же о самех нас можем то знати,

гнева ли чада, или благодати.

Тем же со страхом спасение требе

нам содевати, да бы быти в небе.

Егда мы овцы быти непщуемся,

страх, да не козли от Христа знаемся.

Зеница в себе наша не зерцает

сучца, а бервно Христос усмотряет,

Еже прилежно изврещи пецымся,

грешници быти, а не прави мнимся.

Тако бо, егда осудимся сами,

зла не услышим Судища над нами.

Овчя

Овчата глас матере совершенно знают,

инех же овец гласов никако слушают,

Аще вся блеют овцы, и зело подобно,

даже несть разпознати словесным удобно.

Обаче глас матере овчата познают,

к ней, вся минувше овцы, самей притекают.

Что чюднее, и внегда мати острижется,

овчя в знании ея никако преткнется,

Яко не видением, но по гласе знает,

тем всяка овца чада не чужда питает.

Мы овчата словесна есмы наречении,

от Агнца Божия и от Церкве рождении.

Должни убо глас ея преискусно знати

и к ея единыя персем притекати,

Да млеком учения ея ся питаем,

чюждаго же никако в сирище впущаем.

Не тако видением требе ону знати,

яко же слушанием должно почитати,

Видящым бо хлеб, вино егда возвещает,

в тех видех тело Христа и кровь пребывает,

Всяко должно верити и тако держати,

яко же гласом своим Церковь учит мати.

Огнь

Огнь воврещи на землю прииде Спаситель,

да мыслей земных в сердцах будет испалитель.

Огнь сей есть любы Бога, яже обращает

горе сердца, яко огнь к небу пламень дает.

Теплота естества сердце распаляет,

присно дыхание оно прохлаждает

Огнь похоти силу душевну сне дает,

той воздыхание к Богу угашает.

Иже днесь огнем гнева и блуда палятся,

огнем в будущем веце во веки казнятся.

Огнь Антониев

Антония святаго образ честный бяше,

его же христианский народ почиташе.

Того образоборцы в части разсекоша

во граде Бузходуце, но месть отнесоша,

Ибо огнь, от него же святый исцеляше,

егда кто с молитвою к нему притекаше,

Зовомый Антониев, оны повредил есть

и неисцелно в гробы вскоре водворил есть.

Огнь любве

Аще свещу горящу к земли преклонный,

абие угашенный огнь ея узриши.

Точне, аще человек, огнем воспаленный

любве Бога и ближних, будет преклоненный

К вещем мира суетна, сгаснет, помрачится,

услаждением земных благ горних лишится.

Огнь похоти

Праздножитие, сон мног и пища сладкая

огнь похоти раждают, и риза красная.

Огнь мира геенны

Лютый огнь мира сего, вся бо сожигает,

много лютший — геенский, кто й разсуждает.

Пять разнствий между има мощно обретати,

яже со страхом сердца изволте считати.

Первое богомудрый Августин вещает,

егда уравнение страшно полагает.

Каков, рече, писаный огнь с нашим вменится,

таков наш со геенским в равности творится.

Инии повествуют, яко, аще кого

исхитил бы из огня аггел геенскаго

И в нашем посадил бы, мнил бы ся седети,

аки в прохладной воде, яко трие дети

Иногда Вавилонстей во пещи седеша,

не муку огнем люту, но прохлад имеша.

Второе есть разнствие, огнь наш тело дручит,

геенский же и тело, и с ним душу мучит.

Третее — огнь наш палит, купно просвещает,

геенский токмо палит, а света не дает,

В нем же бы утешная грешным созерцати,

но мук множителная может изьявляти.

Четвертое разнствие — наш огнь сожигает

вещь палиму, геенский целу оставляет.

Пятое — огнь наш мощно нечим угасити,

а геенский во веки имать горяй быти.

Аще бы океан весь на него пустити,

и тому бы немощно его угасити.

В той бо огнь зело лютый Господь человеки

грешныя имать дати в муку на вся веки.

О Боже милосердый, кто стерпети может?

Нам й гонзнути милость Твоя да поможет.

Огнь пред Судом

Прежде Страшнаго Суда огнь имать палити

вся. на земли сущая, и аер чистити.

Толь же взъидет высоко, коль иногда бяху

воды потопа, егда мир сей погружаху.

Сожгутся им градове, села и пустыни,

горы, холми, вся древа и зверие с ними.

Вся стихии пламенем онем очистятся,

а грешници в геенну тем же похитятся

И будут безконечно во оном мучени,

всегда горяще, имут не быти сожжени.

Оле страшнаго огня! А немощно знати,

когда Господь изволит онаго послати.

Яко же в дни Ноевы ядоша и пиша,

не чающе потопа, человеци жиша,

И се внезапу воды облацы пустиша,

яже всю вселенную люте потопиша;

Еще, им же образом граждане Содомы

винограды садиша, созидаху домы

И ина вся деяша, яже человеков

обычай несет в мире от начала веков,

А нечаянно свыше огнь лютый свалися

и вся страна Содомска им въконец спалися,

Тако и огнь всемирный имать послан быти,

егда, того не ждуще, будут в мире жити.

Неведят о дни оном и аггели в небе,

тайну ту единому Бог остави Себе.

Тем же тако во мире жити подобает,

да на всяк час всяк верный того огня чает,

Ибо тако чающых не имать вредити,

Бог же даст во прохладе им небесном жити.

Огнь геенский

О асбесте камени Солин возвещает,

яко, аще зажжется, никогда сгасает.

Есть подобен железу, чудно весма дело,

яко огнем жегомый пребывает цело.

Аще естеству сие подобно творити,

еже без сгорения огнем вещы быти,

Колми паче удобно Творцу содеяти

во геенне никогда огню угасати?

Аще вещи не будут к тому приложении,

имать всегда горети, един крат возжженны.

Не духовный же огнь той, а имать палити

силу духи лукавы, будет бо служити

Велению Божию пачеестественно,

як орудие казни Богом устроенно.

Удобно и то Богу телом грешных дати,

еже без сгорения в муках пребывати.

И ради бы сгорети, да бы не терпети,

но безконечно тамо нужда есть горети.

Донеле же в славе Си Бог в небе пребудет,

дотоле грешных мука неослабно будет.

Оле муки страшныя! Тоя нас избави,

Христе Боже, а в небе прохладне постави,

Да с аггелы святыми Тебе величаем,

хвалу песнословием вечным возсылаем.

Огнем осолитися

Всяк огнем осолится, Христос глаголаше.

Огнь — скорбь, разеуждение соль знаменоваше,

Ибо, яко же чрез огнь соль ся совершает,

тако человек скорбми разсужден бывает.

Око

Слепорожденна Христос повнегда целил есть,

плюнув на землю, блато с того сотворил есть.

Тем брением помазав места очес его,

даде красоту зрети здания Своего.

Естество наше слепо от век многих бяше,

Божия лица света зрети не можаше.

Тем Бог Отец Слово Си на землю пустил есть,

с блатом плоти нашея Оно сьединил есть.

Тем помазав, естество слепоты избави,

коллирием духовным очеса исправи.

Светла убо очеса нам суть сотворенна,

к видению Божия лица устроенна.

Точию нам есть нужда она соблюдати,

да бы суетствы мира их не помрачати,

Ибо, яко же белмо очи заслоняет,

тако суетство мира ум наш ослепляет.

Вода, трава, зерцало очи исправляют,

в зерцало токмо егда здравы да смотряют.

Аще некаго око соблазняет,

изьяти оно Христос совещает,

Ибо, яко тать окном окрадает,

тако диавол оком уловляет.

Скважня есть око здания телесна,

сим сокровища окраден небесна

Грешник бывает, тем же заградити

нужда есть, да не придет в тщете быти.

Тем Иов древле с очима совета

стяжал есть, да не на девицу зрита,

Ибо зрение начало есть злато,

раждает в уме помысла сквернаго.

Услаждение из того ся родит,

та же соизвол мерзостный приходит.

Посем же делом помысл исполнится,

по нем злу нраву грешник приучится.

Злый же нрав нужду велию наводит,

извинение грехов ту ся родит.

Посем поборник си бывает злобе,

в некаянии тако ляжет гробе.

Конечно, впадет в ров отчаяния,

откуду едва есть мощь востания.

Та же ад вечный с огнем последствует,

сим путем око во ад вождествует.

Око, избоденно образу

Во Константейском граде столяр некий бяше,

иже в едино время волами яждяше.

Случися мимо церковь ему путствовати,

в ней же бе написанна Христа Бога Мати.

В ту церковь он вшед, узре образ написанный,

избоде око десно муж преокаянный

Остном си, им же волы своя погоняше.

А ты что зде твориши? глупец глаголаше,

Бе бо образоборец. Но злоба отмстися,

ибо, елма из церкве к волом си вратися,

Убоде вола остном, в путь й погоняя,

остен, отломлся, скочи в око, избодая.

Тако ока за око безчестник лишися,

десное за десное праведно избися.

То Константин епископ Кипрский известил есть

Никийскому собору, егда на нем был есть.

Око простое и лукавое

В делех намерение имеяй доброе

око имать простое, дел тело светлое.

Зло же намерение — око лукавое,

имать тело делес си всячески темное.

Зла милостиня, яже на блуд намеряет,

злое намерение дело помрачает.

Орел

Хищныя птицы менших восхищают,

терзают ногты мясо и снедают.

Егда же орел силнший прилетает,

все их множество далече гонзает.

Хищныя птицы диаволи бяху,

род человеческ люте похищаху

Прежде рождества воплощенна Бога,

и мучения деяху премнога,

Всех людей душы во ад низвождаху

и во заклепех его заключаху.

Но егда Орел небесный явися,

страшный и силный в вертепе родися

Христос Бог крепкий, тогда птицы тыя

вся утекоша, пред благим худыя.

Ни к тому яве хищати дерзают,

разве точию лестми украдают.

Всяк убо от них страж да будет себе

бояйся ада, хотяй быти в небе.

Оружие

Егда на Голиафа Давид исхождаше,

жезл в руце и пять камень пращеметных взяше.

Ты жезл креста и пращу молитвы святыя

возми, и пять слов умных на враги лютыя,

Сиречь, не многословне, но часто молися,

мало да глаголеши, много же слезися.

Бог и естество зверем оружие дает,

много бо от животных с онем ся раждает.

Неким бо рози дани, да ся защищают

и противники своя теми побеждают.

Иным ногты острыя изводи Бог дати,

ко еже наветники своя им терзати.

Иным сила во зубах естеством дается,

да от хотящих бити теми спасается.

Неции во копытах звери сидни зело,

ими же поражают противныя смело.

Птицы в пазногтех, в носе силу свою знают,

и крилами вся обще от беды гонзают.

Ежу шерсть оружие, иным люто жало,

иным яд прирожденный естество есть дало.

Человек ничто же сих в оружие взял есть,

да бы не на брань себе созданна познал есть,

Но еже во покой безпрестанно жити,

единодушно Творца своего хвалити.

Но увы нам, немирно в мире пребываем,

чесо Бог нам не даде, то мы сотворяем.

Смертная оружия тщимся устрояти,

теми ближния нашы на смерть убивати.

О аще бы на враги токмо я вращали,

иже противны Богу себе содеяли,

Извинение неко могло бы служити,

не ожидали быхом осуждении быти.

Но то люте, не благо, яко и на други

и на Божия мечь остр обращаем слуги,

За что милость не может быти нам от Бога,

но Суд лютый и в вечном огни мука многа,

От ея же свободу стяжати потщимся,

со ближними нашими всеми примиримся.

Отец Бог

Сын Божий нас Своему Отцу всыновляет,

Отцем нам нарицати Его завещает.

Иже есть премногими Отец нам винами,

яже аз полагаю вократце пред вами.

Во-первых, Отец нам Он, яко сотворил есть

и душы нашя Своим образом почтил есть.

Вторая вина — яко изволил питати,

яко кокошь птенцы си, от враг защищати.

Третия — яко благим делом научает

и отчески грешащым язвы налагает.

Четвертая — яко Им есмы умножени

всяческими благими, аки Им рождени.

Пятое — яко хощет наследство нам дати,

окрест трапезы в небе Своея саждати.

Толика убо Отца грешнии имуще,

тщимся сынами быти, пресвято живуще.

Святаго Отца чадом требе святым быти,

божественне Божиим нужда сыном жити,

И любовь сынолепну достоит стяжати,

воеже бы ся въправду сынми Его звати.

Ветхий Закон Господа Отцем не прозваше,

зане яко царь людем и судия бяше,

Ибо и они рабски Оному служаху,

плотски живуще, за страх Бога почитаху.

Мы днесь Его дерзаем Отца нарицати

за любовь, волю Его хощем исполняти.

От Христа Света суще тому научени,

чаем и в наследие быти воведени.

Новии мы людие, нову титлу даем

Ветху деньми, за любовь Отца нарицаем.

Бог всемогущий, Создатель всех веков,

вправду зовется Отец человеков,

Не естественне, несть бо рождением

Отец нам плотским, но сотворением.

Он созда тело, душу сотворил есть,

и во тлю падших Он нас возстроил есть.

Еще Отец Он нам есть, любовию

искупивый ны Сына Си кровию.

О любве дивны! Изволил предати

Единородна за ны пострадати,

Да мы от страсти тако свободимся,

чрез Сына Его Ему всыновимся.

Еще Ся Он нам Отец нарицает,

яко отчески о нас промышляет,

Да во всех нуждных не оскудеваем,

но во доволстве онех обитаем.

Наконец, яко во пресветлом небе

наследники ны устрояет Себе.

Точию требе нам есть тако жити,

еже бы волю Егову творити.

За то бо хощет небо нам отдати

и венцем славы улепотствовати.

Кто убо, сия зная, не потщится,

да воли Его весма покорится?

Аз волю мою, Боже, вдаю Тебе,

да устроиши, яко же Ти требе.

Волю неволник и раб Тебе быти,

неже по моей воли злой ходити.

Развратна воля моя зде бывает,

донеле в моих руках пребывает,

А в Твоих руках она исправится,

по Твоей воли благо утвердится.

Тем же Ти, Боже, аз ону отдаю,

душу и тело, весь ся Ти вручаю.

Отец Христос

Отец будуща века Христос нареченны,

на век Нова Закона Богом устроенны,

Ибо Он в благодати вся чада раждает,

егда вере и нравом благим научает.

Паки страстми Своими от грех ны омыл есть,

плен из ада свободив, в небо водворил есть.

Заслужил нам жизнь ону, ея же желаем,

тем И века будуща Отца нарицаем.

Напоследок, в грядущем веце имать быти

истинно Он Отец нам, хощет бо вселите

В наследие небесно, и вечно питати

трапезою славы Си, и преуслаждати,

Яко же обыкоша отцеве творите,

окрест трапезы чада посаждше, чредити.

О Отче наш, сподоби Ты ны того хлеба,

да насытимся онем в дворе светла неба.

Отец светов

Отец светов есть Троица вся божественная,

вся бо светлость от Нея есть изведенная.

Во-первых же, в существе Бог есть свет превечный,

незданный, безначалный, сущь и безконечный.

Паки, от Него вторый свет произведеся

вне, егда умом горним свет ума дадеся.

Третие, свет чювственный Им же есть созданный,

в просвещение очес живущих поданный.

Еще, и иже паче естества бывают

светове, от Его же начало си знают,

Яко вера, премудрость и просвещение,

и иныя доброты людем в спасение.

Такожде пророчествий свет от Него бяше,

никто же бо собою онаго прияше

Но во всякой потребе Бог ум просвещая есть,

егда пророки с словом во мир посылал есть.

Наконец, и свет славы, им же видят Бога

святии и аггелов воинства премнога,

От Господа дается, за что мы хвалити

должни Отца светов, донде же даст быти.

Отца подражати небеснаго

Плоди близу древесе своего падают,

чада родители си в делех подражают.

Тем и Господь глагола: Аще бысте были

сынове Авраамли, то бысте творили,

Что делаше Авраам. Убо подобает,

да кождо христианин Бога подражает.

Поне же сын Его есть чрез присвоение,

божественных дел ему нуждно творение,

Не чюдесных, но нравных, да любовь являет

другом же и недругом, всем благ да бывает,

Яко Отец небесный свет сияет солнца

на злыя и благия во вся мира конца,

И дождь в оживление нив их изливает,

кроме избору милость Свою источает.

Ничесо же нелепо достоит творити,

да бы Сыну Божию не безчестну быти.

Егда убо ко сластем тело тя нуждает,

рцы: Сын Божий аз есмь, то мине подобает.

Не чреву работати аз во мир родихся,

но да хвалю Господа, Онем сотворихся.

Егда тя мир прелестный искушает златом,

рци: Сын Божий аз есмь, то ми равно со блатом.

Отчества небеснаго требе ми искати,

а не с тленными мира вещми истлевати.

Егда враг искушает, чести обещаяй,

буди: Сын Божий аз есмь, ему отвещаяй.

Не имам пленник быти демону лукаву,

созданный, да наслежду небесную славу.

Егда красная лица в сердце ти стреляют,

глаголи: Сын есмь Божий, та мя да не знают.

Нетленнаго красоту лица хощу зрети,

с аггелы славу Его безконечно пети.

Всяко в земнем телеси весь онебесися,

небесну человеку точен сотворися,

Да, егда отложиши земное тление,

стяжеши небесное тебе нетление

И наследник бу дети царствия на небе,

его же аз усердный есмь желатель тебе.

Отче наш

Благо есть Богу присно ся молити,

нуждных от Него прилежно просити.

Отец Он нам есть, вся готов Сый дати,

токмо нам сердца требе устрояти

На достойное даров приятие,

инако труд наш суетен, братие.

Отче наш, вотще тщимся глаголати,

аще сыновне не хощем слушати.

Иже в небеси еси, тще читаем,

поне же сердцы земным привыкаем.

Да святится Ти имя пречестное,

слово си несть нам благополезное,

Зане же грехи хулу содеваем,

имене Его честь пренебрегаем.

Да придет царство Твое, что вещаем,

поне же князю тмы раби бываем?

Да будет воля Твоя, словим како,

суще противни воли Его всяко?

Хлеб наш насущный даждь нам, вскую молим,

зане же нищим дания не творим?

Остави долги наша, в суд читаем,

поне же иным тех не оставляем.

Не воведи нас во искушение,

в кую есть ползу сие моление,

Поне же сами себе искушаем,

в многая бедства волею вреваем?

Но избави нас сам от лукаваго,

без ползы молим Бога всеправаго,

Зане не тщимся избавлени быти,

но во лукавстве годе нам есть жити.

Аще мы убо от Бога желаем

благих ременных, да ся исправляем.

Бог же готов есть вся нам блага дати

по несказанней Своей благодати.

Отче наш, Иже еси создавый вся веки,

на небеси царствуяй, любяй человеки,

Дух гордости отьими от нас, и тщи славы,

дажд смирение, молим, преклонше Ти главы.

Да святится имя в нас Твое пресвятое,

во всех делесех наших да славится тое.

Отьими от нас похоть суетств мира сего,

и любовь тленных богатств, и всех красот его.

Да придет царство Твое нами обладати,

приносящее Церкви дары благодати,

Да совершенне в сердцах Ты наших будеши,

яко царь на престоле си, в них пребудеши.

Да будет воля Твоя пребожественная

всескоро и радостне нами творенная.

Нашу же лукавую изволь отсецати,

яко обыче к вредным сердца привлекати.

Яко же на небеси, и на земли тако,

воля Твоя от всех нас да хранится всяко.

Хлеб наш насущный даждь нам днесь, могущь живити,

плотский, тайны и слова, да бы о нем жити

Зде крепко на противных, потом в силе хлеба

тайственна внити в дом пресветлаго неба.

А яже излишняя, изволи отьяти,

яко не пособствуют, но ведят вреждати.

И остави нам долги наша, яко и мы

оставляем должником нашым онех вины.

Не помняще их злобы, благих им желаем,

злии от Тебе блага благих, Боже, чаем.

И не воведи нас Ты во искушение,

даруй же нам крепкое того стерпение.

Но избави от врага нас вселукаваго,

от совета зла и от дела неправаго.

Аминь, аминь молим Тя верно Твои люди,

отческая на чадех милость всегда буди.

Отчество

Три отчества на земли Христос Бог имяше.

Первое есть Вифлеем, в нем же рожден бяше;

Второе бе Назарет, в нем пребывание;

Третее — Каперноум, в нем воспитание

Бе возрастшу свершенно, егда мир учаше

и премудро строил есть спасение наше.

Отчество Христово

Христос Спаситель егда в мире бяше,

всещедро строя спасение наше,

В нищете мнозе изволил есть жити,

странник и пришлец, не отчичь зде быти.

Лисове имут ямы устроенны,

в них же покой им, егда утружденны,

И птицы гнезда себе обретают,

иде же птенцы своя изьяйчают.

Он же всех Господь не хоте имети

места покоя, ибо сниде бдети

Во стаде Отчи, а не почивати,

заблуждших овец прилежно искати.

Обаче Ему три отчества даху,

иже житие Его написаху.

Первый бе малый градец Вифлиемский,

вторый — Назареф, иже Галилейский.

Капернаум же третий положися,

яко отчество Христово въменися.

Се же вин ради, яже предлагаю,

в Феофилакте оны обретаю.

Вифлеем буди отчество реченный,

яко в нем Христос Господь есть рожденны.

Назареф точну славу прият на ся,

яко в нем Христос Господь воспитася.

Капернаум же во отчество бяше,

яко найпаче в онем пребываше

И в нем премнога чюдеса творил есть,

егда мирови благая вестил есть.

Но та отчества гостинницы бяху,

на мало время Христа приимаху.

Правое Ему отчество на небе,

к нему же и нам воздыхати требе.

Тамо Он в десных Отчих пребывает

и нам при Себе место устрояет,

Зде постоянна града не имущым,

но небеснаго выну желающым,

Во нь же Сам, Христе, изволи въводити,

мы Тебе кроме не возможем внити.

Ты Путь небесный, Ты и Пастырь еси,

веди нас овцы к светлому небеси.

Мы Твой глас знаем, той хощем внушати,

чюждаго гласа не хощем прияти.

Веди ны в поле вечно божественно,

пажити жизни вечны исполненно.

Даждь нам с Тобою тамо всегда быти,

с Отцем и с Духом Святым Тя хвалити.

В отчестве зависть и ненависть злая

хулит рожденных в ней дела благая.

В отчестве, в сродстве и во своем дому

трудно гонзнути безчестия кому.

Сам то Христос Бог о Себе вещаше,

егда в отчестве поругаем бяше,

В нем же и чюдес немного творил есть,

не яко силы на та не имел есть.

Ибо, яко Бог, вся везде можаше,

но яко в людех неверие бяше.

Не хоте убо ту чюдес творити,

да бы не паче им судимым быти.

Яко милосерд, грешныя щадяше,

покаянию оны поучаше.

Безчестен паки в отчестве бывает

всяк пророк, яко кож до его знает.

Аще от честна кто дому рожденны,

той за ненависть бывает хуленный.

Аще же с худых родителей исходит,

зависть укоры на того наводит.

Век детства его ради поминают,

воспитанием нищим укоряют,

И тако пророк в своих есть без чести,

аще во устех не имеяй лести.

Отчество святых

Святии, иже в мире обитают,

за изгнание мир себе въменяют.

Отчество небо знают свое быти,

тем же во веки тамо хотят жити.

Яко путницы, путь свой совершают.

зелены луги вскоре преминают,

Ничто нимало теми ся сладяще,

мимошественне токмо оно зряще.

Тако святии вся мира сладости

пренебрегают, и светлы радости.

Косвенным оком на ня возглядают,

драгия вещи в уметы вменяют.

Все стремление обращают к тому,

да бы приити ко граду святому,

В нем же правая Богом сокровенна

благая от век, яже суть нетленна.

К тым и ты сердце, чтый, да обратиши,

отчество право тамо получиши.

П

Павел

Излиха по закону Павел ревноваше,

Христа во удех Его жестоце гоняше.

Но не зная истинны, сие он творил есть,

а не по злобе, тем же Бог й просветил есть.

Егда бо тече в Дамаск верныя томити,

Бог изволи на пути его озарити

Светом сияния Си, гласом увещая:

Савле, Савле, что Мене гониши, не зная?

Он же рече: Господи, рцы ми. кто Ты еси?

Аз есмь Иисус, ответ даде Царь небеси,

Его же ты гониши, а жестоко прати

противу рожну. Тогда Савл благодати

Бысть Божия причастник и внутрь изменися,

десницею Вывшаго в лучша претворися,

Бысть бо из волка хищна овца всесмиренна,

гонитель преложися в раба божественна,

И бысть вскоре по смерти Стефана святаго

сосуд слова, апостол Христа истиннаго.

Егда бо Стефанова уста умолкоша,

уста Павла, яко же труба, глас дадоша,

Им же вси концы земля, аки от сна, въсташа,

по незнании правды истинну познаша.

Павел сосуд избран

Павел сосуд избранный Христу Богу бяше,

Его же во удесех первее гоняше.

Десница й Господня дивне изменила,

из волка хищна овцу смирну сотворила

И, иже бе во нечесть сосуд устроенный,

во сосуд, иже в чести, бяше преложенный

Вин деля многих, яже чтущым изъявляю,

знания божественны воли им желаю.

В-первых, сосуд избранный свят Павел прозвася,

яко во апостолство из мног тем избрася

Дивным званием Христа небесе Владыки

ити с благовестием к жидом и в языки.

Паки, яко от Бога бе предуставленный

во благодать и славу Павел божественный.

Третяя вина — яко ревностен он бяше,

закона ревностию ветхаго горяше.

Да убо возревнует и по благодати,

в сосуд слову Си Господь изволи избрати,

Да человек, к убийству нравом устроенный,

на убийство неверства будет обращенный.

Четверта вина — яко чистоты хранитель

бе Павел, избра его в сосуд Си Спаситель,

Еже Духом й Святым исполнь содеяти

и тем чрез уста его к людем глаголати.

Пятая вина — яко в нем Господь видяше,

яко паче инех труд подъяти хотяше.

Шестая — яко солнце сосуд удивленный

в Писании за светлость имамы реченный,

Тако Павел сосуд есть света мысленнаго

во озарение тем рода наземнаго,

Ибо он Иудеи светом облисташе

и Еллины, егда я истинне учаше.

Сед мая — яко он бе ковчег божественный,

содержяй слово Бога и закон священный

В просвещение родов, в неверии бывших,

и во сени закона ветхаго поживших.

Осмая — яко исполнь премудрости бяше,

ею же предоволно роды наставляше.

Девятая — яко бе доброты всякими

улепотствован, аки бисерми честными.

Десятая — яко он бяше уставленный

на скорби, гонения, на труд божественный

О имени Христове, да вся привлекает,

яко солнце вселенну лучми озаряет.

Сих ради вин апостол от Христа избрася

и сосуда избранна именем прозвася,

От него же премудрость и мы изчерпаем,

егда мудрыя книги посланий читаем,

За что благодарствие ему возсылати

долженствует, а Христу о нем хвалу дати,

Яко благоволи й из сени изъяти,

нам в светилник духовный и за вожда дати,

В его же след идуще, спасемся известно,

ибо его вождество право, а не лестно.

Пакость

Пакостник плоти праведну дается,

да о правде си не превознесется,

Мнози бо, прави бывше, упадоша

и ко гордости князю отьидоша.

Память смерти

Всяк день последний непщуй тебе быти,

тако можеши благочестно жити,

Ибо кто близку смерть си помышляет,

благо умрети печаль полагает.

Параклит послася

Елма далече отец отхождает,

пестуну сына своего вручает;

питателнице обыче въдаяти

дщерь свою мати.

Тако Христос Бог егда отхождаше

в небо, ученик сирых не вергаше.

Параклита им изволи послати,

в потеху дати.

Да бы во скорбех утеху имети

и гонения в доблести терпети,

путь же дерзостно проходити тесный

во рай небесный,

В искушениих да не ослабеют,

в трудностех многих помощь да имеют,

разбойник путных да не убоятся,

но горе тщатся.

Пастырь

В двор овчий дверми той пастырь приходит,

иже чрез Христа Спасителя входит,

Той же есть, иже правилно избранный,

не златом вшедый, ни чрез силу данный;

И паки, иже Бога Христа знает,

вся истинная о Нем возвещает;

И учимая тщится соблюдати,

высоты службу под бремя скланяти,

Не желателством суетныя славы,

венцем красити верх своея главы;

И бдяй о стаде, да бы сохраните

в целости Богу, а не погубите;

Не своих иский обретений тленных,

но душам овец полезноспасенных;

Иже за овцы душу полагает,

видя грядуща волка, не гонзает;

И сребро свое нищым расточаяй,

сам токмо в Бога богат ся творяяй.

Аще кто пастырь овец си не знает,

Христос в овцах Си того не считает.

Пастырем должно овцы своя знати,

яко о всех тех слово имут дати.

Горе пастырем, чрево си пасущым,

на ризы волну из овец стригущым,

млеко ядущым, тучная биющым,

их не стрегущым.

Не пастырь, идол, овец си не знаяй,

пищею слава тех не насыщаяй.

Аще могутным пастырь попущает

овцы терзати, наемник бывает.

Пастырю словеснаго стада подобает,

да пасение овец трегубо являет:

Умом, словом и делом. Первое творится,

егда печется о них и сердцем молится.

Второе в учении бывает явленно,

елма проповедует слово божественно.

От лукавых делес я онем отстрашая,

на благая же дела тощно наставляя.

Третий образ в то время пасения явит

пастырь, егда во образ овцам ся поставит

Дел благих творением, да на нь возглядают

и, зряще дела добра, тажде сотворяют.

Сице паствуя, пастырь благий наричется,

упас же стадо, спасет, и сам с ним спасется.

Трой образ пасения его ублажится,

за нь к несозданней Троице в небе приближится.

Пастырь Христос

Пастырю Христос Сам уподобися

чесо же ради? Слушая, учися:

Яко же пастырь стадо соблюдает,

пасет и правит, водит, защищает,

Тако Он Церковь блюдет прелюбезно,

уготова ей в снедь брашно небесно,

Евхаристию и тайны иныя,

овцам словесным душеспасенныя.

Правит ю жезлом благостроения,

водит по Себе словом глашения,

Жезлом же крестным от бес защищает,

ибо тем врагов зубы сокрушает.

Вся имать Христос, яже имевают,

иже над овцы пастыри бывают.

Сия суть: пира, жезл, милоть, свирели,

свист устен и псы, да бы в стаде бдели.

Пира есть ковчег тайн божественных,

врачевств духовных, верным устроенных.

Жезл есть крест честный, им же победися

демон проклятый, а мир защитися.

Милоть из овчих кожиц устройся,

егда плоть наша Ему впотребися.

Свирель духовна — пение святое,

книги закона и слово живое.

Уст свистание есть вдухновение

в сердца помыслов благих в спасение.

Тем зовет к Себе, от злоб отзывает,

точию овца гласа да слушает.

Псы в Его стаде суть проповедници,

учителие и исповедници,

Иже лаянми Церковь обраняют,

от волков хищных овцы защищают.

Сия имуща леть пастыря звати,

и его гласа прилежно слушати.

Слушайте убо, о стада святая,

да въведетеся в села небесная.

Пастырь добрый Христос

Многим есть мощно зватися благими

пастырми овец, яко благо с ними

Паступовати в Церкви обыкоша,

паче, за целость стада си умроша.

Но изряднее прозватися сице

прилично бяше Христу всех Владыце,

Превосходно бо благ Он пребывает.

существом Бог Сый, всем благость общает,

И по Нему же человек есть правы,

не отщетися благостыни славы,

Никогда же бо злобы Он творяше,

вящше глаголю, яко ни можаше,

И пастырскую службу совершил есть,

яко никто же точне сотворил есть,

Зане же многи раны пострадаше,

егда за овцы подвиг содеваше.

Розги и бичи, терние острое

претерпе, крест и гвоздие лютое.

Наконец, душу Свою положил есть.

тако от волков стадо защитил есть.

Оле благости Пастыря велика,

неслышанныя от начала века!

Положи живот, мира драгший всего,

от смерти вечны да искупит его.

Любовию же самою влеченны,

сотвори сие, а не понужденны.

Не прибытка Си коего смотряя,

но туне, саму благость изъявляя,

Юже ты видя, о овца Христова,

буди слушати Пастыря готова,

И Пастырь добрый от волков тя спасет,

на злацех горних вечно тя упасет.

Пастырь и наемник

Любве ради Христовы пасый Его стадо

пастырь есть добрый, вечна предостойный града.

Прибытков же временных от овец смотряяй

наемник есть, пастырско имя оскверняяй.

Пастырско держяй место аще не печетъся

о ползе душ, наемник, не пастырь речется.

Любяй честь и прибытки, а не душы стада,

наемник есть, не пастырь, враг небесна града.

Паучина

Елиогавал веле в Риме всем собрата

паучинныя сети, да бы ему знати

От их веса множество людей, в нем живущых.

Оле и на престоле в безумии сущих!

Печаль

Дидак Озорий, в узы воверженный

кралем Испанским, обнощь измененный

Бысть юный в старца, ибо его власы

из черных быша седы в малы часы.

Се печаль како скоро изменяет,

всяк земнородный то да разсуждает.

Краль же, уведев то изменение,

дарова ему вины прощение.

Веселие правое в мире не бывает,

ибо, аще явится, скоро ся кончает.

Множицею печали начало творится,

яко из веселия печаль нам родится.

Мало же веселийца вомале преходит,

а превелику печаль душам грешным родит,

Множицею вечною, яже в человеце

без конца ризширится и во ином веце.

Юдоль убо печалей мир сей нареченный,

яко многия туги и слез исполненный.

Различии же суть роди во печали сущих,

никогда веселия праваго имущих.

Первии — завистници печални бывают,

веселия в дни своя никогда же знают,

Сне дают бо ся сердцы, видяще блаженных,

в чести, в богатстве паче себе возвыжшенных,

И поелику они радостни бывают,

от блаженства своего на лицех сияют,

Толико завистников нужда воздыхати

(яко блаженших видят), сердцем ся снедати.

Вторый род есть печалных — лицемеров сущих,

да бы прелщати люди, притворно живущих.

Сии благочестие себе притворяют,

и того ради лица своя помрачают,

Да, явлшеся говейни, или славни будут,

или прибытки себе некия набудут.

Сии извне печални являются быти

и пред люд ми умилно творятся ходити.

Внутрь же блуда суть полни, готови хищати

и всякую неправду в тайне содевати.

Третий род есть печалных, иже сребро любят;

сии выну боятся, да того не сгубят.

Стяжут е во печали и, внегда стяжати,

не умеют без тоя стяжанна держати.

Ибо татей боятся, да их не окрадут,

или во разбойники да некогда впадут.

Аще их милостыни нищии прошают,

они в болезнь и печаль велию впадают.

Аще требе на нужды общыя даяти,

или Церкви дание неко содеяти,

С роптом и стонанием нечто уделяют,

не благохотно, токмо злословят и лают.

Тако живот свой мучат во печали выну,

донде же вовергутся во адску пучину,

И тако в безконечном стонании будут,

его же, и мук лютых, никогда избудут.

Четвертый род печалных — иже ся отчают

и во Бозе надежды си не полагают.

Мнят, яко болей они дерзнуша грешити,

неже милость Божия силна есть простити.

Се же есть безумие и прелесть вражия,

ею же тщится рабы ловити Божия.

Пучину греховную уму представляет,

да ся в ню отчаяный грешник вовергает.

Милости же Божия бездну утаяет

от ума, да ся в ону бедный не пущает,

И тако егда прелщен, к Богу не вратится,

из пучины греховны в геенску въвалится,

Иде же по временней печали вечная

и мука в родстве огня есть безконечная.

Пятый род есть печалных, но сущых блаженных,

виновником радости Христом похваленных.

Сии суть христиане житием святой,

множеством доброт многих Богу угоднии,

Иже в печали, в скорбех дни си провождают,

временная презревше, к вечным воздыхают.

Печални о гресех си, да бы я омыти

источники слезными и в чистоте жити;

Печални и о ближних, яко презерают

небесная, а земным сердца прилепляют;

Печални, яко закон Божий не хранится,

но совет мира, плоти и демонск творится;

Печални, яко мира вси красная любят,

яже, яко яд сладкий, грешники вся губят.

Тем сами скоро мирских прелестей гонзают,

скорби, беды, печали в мире избирают,

Да во премирных радость могут получити,

без всяких бед и скорбей в небе вечно жити,

Ибо, им же мирская благая даются,

обычно сии вечных благих лишаются,

Разве аще потщатся с ними благо жити,

то и зде и онамо могут в благих быти,

А иже злая в мире избраша страдати,

тым благая в небеси обыкл Бог даяти.

Яко же Лазареви по печали — радость

на лоне Авраамле, днесь же в небе сладость,

Богату же по лицех — вечно рыдание

и мук в неугасимом огни страдание.

Тем же не радуйтеся, егда в мире благо,

но бойтеся грядуща огня люте злаго.

Зде паче злая мира страдати хотите,

а вечных в небе благих от Господа ждите.

Печаль грешному

Его же сребра долг обременяет,

никогда весел, сна мало внушает.

Паче печален должник имать быти,

иже во гресех обыче ходити.

Печемся о мире

Что капля противу пространнаго моря,

то мир во примере небеснаго двора;

Обаче о мире печаль полагаем,

о часть земли люди многи убиваем.

Пространно же небо — отчество блаженно,

аки изгнание имамы забвенно.

Пир

В мире живущым несть леть пиров кроме жити,

но в христианех честным тым достоит быти,

Да будут же честнии, сия подобает

тому хранити, иже пировник бывает.

Во-первых, в славу Бога пири да бывают,

от Его хваления да ся начинают.

Паки, в пищах, в питии мерность да хранится,

да ни тело, ни душа теми тяготится.

Третее, всяк пировник да внимает себе,

что есть деяти или глаголати требе.

Четвертое, полезно седети безлестно,

мирно, кротко, смиренно, весма благочестно.

Пятое, перва места несть требе желати,

но дол жни суть друг друга взаим почитати.

Наконец, благодарство Богу возсылати

подобает за Его на ны благодати.

Тако пир христианский благо совершится,

людем же и Господу онем угодится.

Ни един в христианех пир непщую быти,

на нем же бы седящым без греха пребыти.

Пир христианский — иже и плоть насыщает

и душу брашном слова благоучреждает.

Пирове смертнии

В Священном Писании мнози помяненни

пирове, от различных иже сотворени,

Но мало на них добра везде обретаю,

ибо кровави бяху и смертни, читаю.

Израилтяне, ядше и пивше, скакаху,

златому телцу жертвы скверныя творяху,

За что от чад Леввиных быша избиени,

многи тысящы мечем острым истреблени.

Филистинове егда светло пироваху,

из слепаго Сампсона кощуны творяху,

Со всею полатою быша низвалени

от ругаема мужа, и зле умерщвлени.

Ратници Амалика Секелаг плениша,

возвращшеся с корыстми, ядоша и пиша.

Тогда напад я, Давид вконец паразил есть

и плененныя люди от враг свободил есть.

От Авесолома пир бяше сотворенны,

но ту Аммон сын царский бысть им убиенны.

Иовля чада егда купно пироваху,

падением храмины вси смерть пострадаху.

Валтасар в Вавилоне елма пироваше

и из сосуд священных жены чествоваше,

Изречение смерти перстами писася,

еже во пришедшую нощь действом скончася,

Ибо град супостати во нощи плениша,

осквернивша сосуды святыя убиша.

Иуды Маккавея брат превозлюбленный

Симон лестию в пире мертвым есть причтенный.

Во время Ноя люди пиша и ядоша,

но, пришедшу потопу, в водах погибоша.

И егда нечестивый Ирод пироваше,

Иоанн Предитеча обезглавлен бяше.

Всяко пиршества мало без крове бывают,

яко людие умы в вине потопляют,

Без них же свирепеют, ярятся без меры,

яко же прелютии во пустыни звери.

Не тщися убо, брате, на пиры ходити,

или умей изветов ковных уходити.

Писа на земли Христос что?

Христос во церкви люди поучаше,

сонм же Иудейск жену неку яше

В прелюбодействе, представи Оному,

да суд сотворит греху толикому,

И глаголаху: Моисий сицевыя

веле убита жены блядивыя.

Ты что речеши? То же глаголаху,

во слове яти Господа желаху.

Но Сердцевидец, их коварства зная,

яко премудрость рече сицевая:

Иже без греха в вас ся обретает,

первый на ону камень да вергает.

Та же преклонен, на земли писаше

перстом Си святым. Что же тамо бяше,

Различен глас есть. Обычно же сие

мудрых учитель есть разумение,

Яко едино нечто написаше,

а то комуждо грех его являше,

И тако кийждо, грех свой познавая,

бегл есть из храма, срама избывая,

Даже единей блуднице остати,

пред Судиею зело трепетати.

Но щедрый Господь милость проявил есть,

наказав ону, с миром отпустил есть.

Оглаголники писмом обличаше,

комуждо себе знати совещаше,

И с милостию о гресех судити,

яко несть мощно всебезгрешно жити.

Писание

Зряй на реку текущу верх вод созерцает,

а тайн, во глубине сущих, не видает.

Подобно Писание писменно читаяй

внешняя токмо его есть муж разсуждаяй.

Внутрних паки не видит, яже суть глубока,

преходяща зрение неискусна ока.

На сей глубине агнец смиренный плавает,

а слон великий удобь потоплен бывает.

Священно Писание кто рай нарицает,

нимало от истинны словом погрешает,

Суть бо в нем различная древеса сажденна,

жития лиц. от века бывших, помяненна.

В среде их — древо жизни, житие Христово,

еже воплощенное жизнь есть наша Слово.

Из чювственна четыри реки истекают,

яже наводнением землю напаяют.

Из мысленнаго паки разум исплывает

четверогубый, иже душы оживляет.

Первый разум — писменный, иже деяния

исторически миру дают Писания.

Вторый — аллегоричный, иже под покровом

иноглаголания дает дела словом.

Третий — нравом учящий, иже вся приводит

к благих дел творению, да ся благость родит.

Есть онагогический в четвертом лежащий

месте, вся ко небесным духовно родящий.

Иерусалим образ сих всех проявляет,

иже писменно град нам чювствен знати дает,

Иносказателно же Церковь нам святую

знаменает, во мире сем воюющую.

Нравом учящым паки душу знаменает,

вся бывшая в Сионе к нравом обращает.

Анагогический же уму показует

Церковь, яже в небеси светло торжествует.

Сия из духовнаго рая изплывают

реки живоносныя, и нас оживляют.

Священно Писание море мысленное

бисерей есть небесных доволно полное,

Сиречь, учений святых, и зело глубоко,

даже ели умное тайны видит око.

При том мори полезно есть верным ходите,

да бы доволность бисер небесных нажити

В красоту душевную, яже люба Богу,

достойность содевает к небесну чертогу.

Светилник Писание есть божественное,

ибо ум просвещает человеком тое.

Сей от того сосудом покровен бывает,

кто странными словесы оно затрудняет,

Ищя славы своея, а не хвалы Бога,

ни душевна слышящих прибытка премнога.

Под одр же той й ставит, и одр запаляет,

кто своим толком ересь в людех возбуждает.

На свещнице же теми людми он ставится,

их же благим житием слово удействится.

Писание Святое

Брат некий Писание Святое читаше,

но не сокрушашеся, яко ничто знаше.

Тем же ко Арсению отцу путь приял есть,

яко мудрому мужу, печаль си сказал есть.

Арсений богомудрый ответ ему рече:

Не буди о сем в тузе, Божий человече,

Яко бо обаватель, елма обавает,

аще обавания словес и не знает,

Обаче сила того змии укрощает,

тому ядоносныя гады покаряет,

Тако ты Писание егда тощно чтеши,

аще силы онаго нимало знаеши,

Обаче знают оно змии проклятии,

страшатся и гонзают демони всезлии,

Не могуще терпети словес божественных.

Шед убо, не престани чести книг священных.

Пити нудящым ответ

Мужа честнаго на пир иногда призваху

и пити паче меры онаго нуждаху.

Он, видя пса лежаща, первее стужавша

о пище, а послежде стужати преставша,

Рече понуждающым: Сей пес меру знает.

Се, яко насытися, к тому не стужает.

Аз ли убо пса худей имам у вас быти,

паче скотов без меры чаши вина пити?

Человек приидох к вам, с умом отпустите,

разума вином вашим мне не истребите.

Не хощу аз за вино разума отдати,

кому разум несть честен, изволте искати.

Пища и питие

Яжд и пий, человече, да можеши жити,

не того живи ради, да можеши пити.

Пища тебе есть деля, не ты ради пищи,

царства небес и правды прежде всего ищи.

Пиявица

Две пиявице во нас всегда пребывают,

непрестанно Принеси! Принеси! вещают.

Едина хоть есть души, та суетств желает,

другая — похоть плоти, та сластей прошает,

А никогда ся могут теми насытити,

не престают, яко же море реки пити.

Пияница душу продаде демону

В дому винопродажном людие седеша,

пиюще вино, иже беседу имеша

О безсмертии душ си, яко пребывают

и по смерти, не яко тело, истлевают.

Един от них неверен тому слову бяше:

Неправду глаголете, оным отвещаше,

Ибо, яко же скотска душа исчезает,

тако и наша купно с телом погибает.

Прелщают духовнии повестми своими,

да ся обогащают богатствы людскими.

Никогда глаголющым им веры имите,

но сладко вино пийте и сластно ядите.

Собеседници его тому ся смеяху,

в кощунныя глаголы безумство вменяху.

Он и паче начал есть буйство глаголати:

Баснь то есть, что глаголют душы пребывати.

О кто бы душу мою изволил купити,

имел бым ныне за что вино сладко пити,

И за ваш долг отдал бым. Они ся смеяша,

надходящыя беды ни же мало знаша,

Ибо вниде муж некий, телом велий зело,

и ят беседовати со онеми смело,

Вопрошая: Что, друзи, ныне глаголасте,

и чему ся утешно велми разсмеясте?

Они ответ сказаша: Яко друг продати

хощет душу за сребро, а нас чествовати,

Но купца душе своей где взяти, не знает.

Несть ли тебе известен? Рцы ему, желает.

Он рече: И аз куплю, токмо оцените;

сребро имам готово, дела не дражите.

Смех велий между ними от слова восташе,

а он, душепродавца, и цену сказаше.

Враг, засвидетелствовав, цену ему дал есть,

он же, в смех обращая, с радостию взял есть.

Яша убо весело и обидно пити,

а продавшаго душу словесы хвалити.

Вечеру же пришедшу, нача глаголати

душу купивый: Время уже всем востати,

Да кождо во жилище свое возвратится,

ибо уже темная нощь близу творится.

Но прежде неже идем, изволте судити;

егда ся кому случит где коня купити,

Не с уздою ли того имать себе взяти,

ею же держимаго тщася торговати?

Вси судиша согласно, яко подобает

да ся конь со уздою купцеви отдает.

Тогда продавый душу ял есть трепетати,

ибо зла купца быти нача позновати.

Купец же, похитив й, высоко вознесл есть,

душу купно и с телом в геенну понесл есть.

И тако окаянный погибе во веки.

а събеседовавшыя ему человеки

Страх велий исполнил есть, и то сразумеша,

яко с демоном лютым беседу имеша.

Оле пиянства злаго! К чесому приводит?

Во вечную погибель грешника низводит.

Пиянство

Земля множеством воды безплодна творится,

человек многим вином в буйство обратится.

От воды древо скоро согнивает,

пиянством тело в недуги въпадает.

Пиянство кладязь адский, во нь же кто впадает,

неудобне извлечен из него бывает.

Сладки воды вкусови его мнятся быти,

сам впадый не желает из них исходити.

Волею в них грузится, рад, да в чрево входит,

елико лоза крове ягодныя родит.

Аще кто тебе много понуждает пити,

да престанеши с онем во дружестве жити,

Уне бо человеча дружества не знати,

неже Бога пиянством на гнев подвизати.

Безумно о здравии чюждем много пити,

а тем здравие свое и душу вредити.

Иже многия чашы вина испивает,

тело вредит, а душу грехом убивает.

Лакедемонове рабы упояху

и сыном я своим тако предстовляху,

Да, зряще их буйство, пиянством мерзятся,

пития безмерна прилежно хранятся.

Кую ползу пиянство людем содевает,

божественный Василий сице извещает:

Сини очи пияных, кожа побледеет,

дыхание тяжкое, язык же коснеет,

Глас снижен и смущенный, ноги позыбленны,

обычаем младенцев суть неутверженны.

Окаянный позор есть Христианом зрети

юноши в безсилии быти, яко дети.

Муж младый, телом крепкий, на всяк труд годится

и в полках, и в дому. Зри, а он в дом носится,

Чюждыми пособствуем из корчмы руками,

яко своими несть леть ступати ногами

За лишнее питие, и тако страх бывый

врагом в брани во граде идет ели живый,

Детищи поругаем. Оле зла пиянства,

ведуща до толика мужи окаянства!

Отрок Иелисеев древле яд варяше

и сыном пророческим в пищу представляше.

От нея же вкусивше: Смерть в конобе, реша,

и к тому пищи тоя ясти не посмеша.

Истиннее то ныне тым мощно гласити,

иже приучишася из конобов пити

Многими вино чашы, ибо умирают

душами, и телесы мнози погибают.

Ни же вино есть винно, но буйство пиющых

паче меры питие доброе вземлющих.

Мало употребляяй здравство исправляет,

и печалми держимый веселый бывает.

Несть убо зла вина тварь, но зол нрав пияниц,

истощающих много с несытствием скляниц.

Не вино убо турски требе истребляти,

но пияныя люди достойно смиряти.

Муж, любяй вино паче меры пити,

не может богат и здрав долго жити,

Ибо, что долгим временем сбирает,

то во един день сластно пропивает.

Пропив же много, к тому одолжится;

то часто дея, весь нищь сотворится.

Тем, иже прежде господне быша,

рабом си рабски со срамом служиша.

Тако мудрии безумии бывают,

ибо весь разум в вине потопляют,

И богатии в нищету приходят,

в домы корчемны иже часто ходят.

Напоследок же, недуг набывают,

им же помалу в плоти изсыхают.

Иным и скоро смерть ся прелучает,

поелику кто сам себе вреждает.

Но оле купно и душу си губит,

безпокаянно кто пиянство любит.

Не толь мечь многи люди посецает,

яко пиянство злое умерщвляет.

Елей огня не гасит, но й возжигает,

пьянство жажды не толит, но ту возбуждает.

Человек некий винопийца бяше,

меры в питии хранити не знаше.

Тем же многажды повнегда упися,

в очию его всяка вещь двоися.

В едино время прииде до дому,

и вся сугуба зрешася оному.

Име два сына, аже предстояста,

ему четыри во очию стаста.

Он нача жену абие мучити,

да бы ей правду хотела явити,

Когда два сына новая родила

и своим мужем она приблудила.

Жена всячески его увещаше,

вино виновно быти сказоваше,

Но он никако хоте веры яти,

муку жестоку нача умышляти.

Взял есть железо, огнем распаляше,

ко жене бедней жестоко вещаше:

Аще ты инем мужем не блужденна,

сим не будеши огнем опаленна.

Аще же с инем блуд еси творила,

имать ожещи тя огненна сила.

Бедная жена в люте беде бяше,

обаче умно к нему глаголаше:

Рада железо огненное взяти,

невинность мою тебе показати,

Токмо потщися своею рукою

подати оно ты на руку мою.

А все железо распаленно бяше,

чесо пияный во ум не прияше.

Ятся железа, люте опалися,

болезни ради въмале отрезвися,

И се два сына точию видяше,

невинность жены, свою вину знаше.

Срамом исполнен, во печали был есть

и прощения у жены просил есть.

Тако пиянство ум наш помрачает,

всяк убо того верный да гонзает.

Многая злая вино содевает,

егда ся им кто часто упивает.

Первое зло есть — разум исчезает,

человек паче скота буй бывает.

Второе зло есть — в нищету впадают,

иже ся вином часто упражняют.

Третяя злоба — яко муж пияный

от всех бывает умных осмеянный.

Четвертое зло — здравие вредится

и болезнь люта пиянством множится.

Пятое зло есть — время исчезает,

еже в пиянстве грешник преживает.

Шестое зло есть в грехи падение,

к ним же пиянство деет склонение.

Седмое — яко ничто же есть тайно

в пияном муже, но все словом явно.

Осмое — яко всем той досаждает

нравы своими, кто ся упивает.

Девятое зло — яко удалится

весма от Бога, кто пиян творится.

Наконец, неба пиянство лишает,

жажду во аде страдати нуждает.

Убо пиянства, братие, гонзайте,

в трезвенном уме выну пребывайте,

Да Богу годно возможете быти

и с Ним в небеси светлом выну жити.

Велий недуг пиянство в людех содевает,

тело купно и душу люте растлевает.

Не точию онем плоть удесы вредится,

но и дух растлению лютому общится.

В телеси глава болит, очеса темнеют,

руки студно трясутся, перси же хрипеют,

Язык косно глаголет, или зело тщится,

и яже в ногах сила, излиха слабится.

Стомах излишествие нудится блевати,

чревеса помет своих не могут держати.

Всячески силу плоти вино истребляет,

но и душу сил ея пагубно лишает,

Ибо ума здравие тамо потребится,

иде же излишество сикеры вселится.

Заблуждает ту разум, несть разеуждение,

волею наводится ту изумление.

А о памяти хмелных что есть глаголати?

Яко же мех дирявый не может держати

Вложенных в себе вещей, но ты погубляет,

тако память пияных всетщетна бывает.

Слыша что, ли глагола вином исполненный,

утро пуст, яко же мех, будет изпражненный.

Наконец, сила воли весма погибает,

ибо не того хощет, еже подобает,

Но на душевредная тогда паче тщится,

яд смертный паче сота оней быти мнится.

Того ради пиянства, братие, гонзайте,

во трезвении ума выну пребывайте.

Да не заблудите в ад, огнем умноженный,

но прямо да идете во рай божественный.

Несть друг, иже тя пити много понуждает,

ибо недруга тебе Богу содевает,

Бог бо несть друг пияным, но иже трезвенни,

бывают во дружестве Его утверженни.

Плакати в мире

Иже пучину моря преплавают,

водам и ветром живот си вверяют,

выну суть должни Господа молити,

да бы преплыти.

И купец егда пустыню преходит,

яже разбои на путех си плодит,

не может светлым сердцем ликовати,

но воздыхати

Нудим ко Богу, да бы совершити

путь той в здравии, не разбиту быти

от разбойников, вся расхищающих,

убивающих.

Мир сей — пучина, мы по ней плаваем

в кораблех плоти, а где смерть, не знаем.

Несть убо в ползу зде веселовати,

но воздыхати,

Да не постраждет бедства превелика,

да преплавит ны всесилный Владыка

в здравии целом ко брегу тихому,

к раю светлому.

Той же пустыня мир ся нарицает,

кийждо человек путь в ней совершает,

а разбойници всегда наветуют,

ковы готуют

Демони злии, еже расхитити

добродетелей купли, и убита

душы. Кто убо может ся смеяти,

а не плакати

В толице бедстве? Аз не разумею,

и человека звати й не смею.

Кто претекл цело и в небо вселися,

той веселися.

Не может должник, во узы всажденный,

в сердца веселость быти возбужденный,

яко не знает, что суд с ним сотворит,

живит, ли морит.

Тем непрестанно к Богу воздыхает,

к судии молбы слезен посылает,

да й возможет в милость преклонити,

свободен быти.

Во узах плоти души нашя тлеют,

на Суд о делех ко Судии спеют,

выну им убо нужда воздыхати,

молебствовати,

Да Хотяй живым и мертвым судити

благоизволит вины им простити,

и в смерти место живот да дарует,

где Сам царствует.

Плакати в юдоли плача

Что есть на ползу в мире нам творити?

Радоватися, ли слезы точити?

Подобитися слезну Ираклиту,

ли Демокриту?

Христос Спаситель аще возсмеяся,

несть в Писании, но яко плакася,

много обрящен, Златоуст вещает,

нас увещает,

Да слезы паче умыслим избрати,

нежели смехом устне разширяти,

да нам по слезах в небе будет радость,

по мерре — сладость.

Блаженни бо суть, иже днесь рыдают,

истинны уста неложно вещают,

яко в грядущем веце возсмеются,

возрадуются.

Чесо же ради имамы плакати?

Хощу вам вины некия подати,

точию сердца ваша приложите,

добре внемлите.

Первая вина — яко согрешаем

пред Богом выну, на гнев И двизаем;

в нем же сущь, како может ликовати,

не могу знати.

Вторая — яко есть лепо никому

веселитися светло в плача дому;

мир же сей юдоль есть плача велика,

не светла лика.

Третия — яко враг не усыпает,

иже на душы нашы нападает,

хотя я люте во ад поглотити,

вечно убита.

Четвертая есть присущие Бога,

видяща наша злоб действа премнога,

Иже, яже зрит, вся имать судити,

и не щадити.

Пятая — яко несмы извещени,

еда спасемся, или осуждени

на муки будем, их же нас избави,

Сам Царю славы.

Шестая — яко смерть никому трубит,

егда косою сечет ны и губит,

а в них же делех она обретает,

Бог мзду воздает,

Сед мая буди, яко в радость неба

воздыхати нам слезне есть потреба,

да по мгле плача радость возсияет,

ум насыщает.

Плачь

Аароновы смерти людие плакаху,

по Исусе Наввине слез не изливаху,

Ов бо люди закона ветха знаменаше,

сей же во благодати сущыя являше.

О овех слезы въправду проливаны быша,

яко и правых душы в небо не входиша,

О сих новозаконных слез людем несть требе,

яко правии прямо бывают на небе.

Слезы о мертвых верных леть есть проливати,

токмо за кия вины, подобает знати.

Вина первая — да ся человеци быти

явим, знающий смерть, а не скотски жити,

Ибо токмо имеяй разум может знати,

что есть, и чесо ради нужда смерть прияти.

Паки, да изьявится к смертным любовь наша,

иже и древле оным отци проявляша,

И Сам Христос Лазарю другу Си явил есть,

егда, заплакав, духом Себе возмутил есть.

Еще, да ся оплачет тщета немалая,

юже подъят во уде си Церкви святая.

К тому, знающе грех наш тому винен быти,

яко полезну мужу сократи Бог жити.

Наконец, да теплыми възбудимся слезами

к покаянию за грех истинному сами,

И прочыя возможем к тому ж возбудити,

еже бы конец жизни христиански жити.

Царь некто царства враги лишен бяше,

его же тщеты всеслезно ридаше.

Мати, то видя, сия к нему рече:

Благо плачеши, бедный человече.

Неведе мужно ты царства держати,

право ти слезы женско проливати.

Тако грешником речется во аде,

плачющым выну о небесном граде:

Плачите женско, рыдайте во веки,

яко немужны себе человеки

В брани твористе, слезы проливайте,

утешения никогда же чайте.

0 ругателства! Сие да не будет,

всяк мужественно в брани да пребудет.

Плачь грешному

Его же сребра долг обременяет,

никогда весел, сна мало вкушает.

Паче, печален должник имать быти,

иже во гресех обыче ходити.

Плод безмужный

Творец всех сущих еже хощет, деет,

из жен без мужей плод дати умеет.

Вся пчелы жены, обаче раждают,

и орли, супи безмужно плод дают.

Не не леть убо бе Ему творити,

еже без мужа Марии родити.

А безверници что в естестве знают,

то о Марии Деве отрицают,

За что от Сына ея осуждени

будут и во огнь вечный вовержени.

Плоть

Плоть что есть души, не знаю вещати;

друг или враг есть, не могу сказати.

На сожитие егда возглядаю,

друга союзна быти усмотряю.

На согласие егда ми смотрети,

немощно врага лютшаго имети.

Ум душы хощет Богу угодити,

а страсти плоти влекут грешно жити.

Хощет плоть венец с душею прияти,

трудов ленится с нею полагати.

Душа на небо усердно желает,

а плоть мирския суеты слаждает.

Весма противно духови плоть деет,

кто убо ону друга рещи смеет?

Аз ону врага люта нарицаю.

по страстем убо вещи не хухнаю,

Та бо сосуд есть, хотяй блажен быти,

яко светило, в небеси светити.

Токмо Ты, Боже, похотей избави,

по Твоей воли ходити постави.

Покори страсти уму телесныя,

дух и плоть всели в страны небесныя.

Периандр, вопрошенный: Что есть малейшее,

еже в себе содержит что величайшее?

Рече: Плоть человечю такову вменяю,

во ней же содержимый ум благ обретаю.

Внутрь нас искушения многа пребывают,

негли ся из матерей та с нами раждают.

Ибо та суть во плоти, яже враг бывает,

егда противу духу брани воздвизает.

Но тажде и друг велий может звана быти,

елма духу во благо тщится пособити.

Друг убо плоть и недруг нам грешным бывает,

но вина того действа в нас ся обретает,

Ибо, егда ту паче нужды удовляем,

оружия вражия в руце ея даем.

Елма же, яко требе, от нас ся питает,

яко друг, к делом благим помощь содевает.

Толико убо плоть нам требе есть питати,

да бы могла во благо духу помогами.

Излишество же вредно, яко тем тучится

и неукротимая, яко конь, творится.

Плоть покаряти

Хотящий ястреба дива присвоите

и, еже птицы ины удобно ловите,

Безсонием й томят. Конем же не дают

доволства, егда скоком, бегу поучают.

Точне плоть безсонием и постом смиряти

достоит, да навыкнет благая деяти.

Плоть смиряти

Пища, жезл, купно бремя ослу подобает,

аще кто ползу с него имети желает.

Хлеб же, наказание и дело да будет

рабу, в послушании твоем да пребудет.

Тело наше есть осел, нужда е питати,

да бы во трудех нуждных за глад не устати.

Жезл же ему полезен во наказание,

да не противу рожну будет в нем прание.

Бременем паки оно требе есть смиряти,

да не навыкнет от дел гнусно праздновати.

Есть и раб душы тело, тем же ему требе

в деле, в наказании быти, но при хлебе

Ради вин предреченных, иначе, яко же

питанный раб во сластех не чтит никого же,

Но и господину си упорен бывает,

вся противная воли его содевает,

Подобне и плоть деет, сладостно питанна,

воли душы противна есть, ни удержанна,

Востает на ню страстми, тщится обладати.

Ты, чтый, научися ю от Павла смиряти,

Глаголюща: Аз тело мое умерщвляю

и порабощением уму покоряю,

Да бы, внегда ми иным слово сказовати,

самому неключиму пред Богом не стати.

Плоть наша создание всемогуща Бога,

о ней же промысл людем и печаль есть многа,

Да здрава, красна, крепка выну пребывает,

но от нея многажды зла пакость бывает,

Ибо, разсверепевши, душы пакость деет,

похотми си стужати люте оней смеет.

Нам же ю благоумно нужда управляти,

не в господство, но в службу духови питати;

Аще вредных желает, тех не попустити,

к полезным, хотя мерзит, тощно ю нудити.

Мудрец пищу, жезл, иго ослу ублажает,

хлеб, наказание, труд рабу совещает.

Плоть же наша осел наш, убо ону требе

жезлом, игом, пищею покаряти себе.

Пищу нужда даяти, да не изнеможет,

но делеса нуждная деяти возможет.

Жезл наказания ей всяко подобает,

да противу духови стати не дерзает.

Во трудех ю держати нужда есть велика,

да не тлит леностию всего человека.

Ей, иже осла сего не в трудех питает,

сверепение его на себе познает.

Кто бе святый апостол Павел? А смиряше

тело свое и духу то порабощаше.

Подобне человеку всяку подобает

плоть смиряти, да разум ею обладает.

Во-первых, того ради, да не может прати

похотми преко духу, и тем обладати.

Плоть бо духови дана, да владеет ею,

як всадник коня правит рукою своею.

Скаредно же, аще конь яздца низвергает

и ногами своими того попирает.

Точне, аще плоть духа возможет попрати,

мерзко, а неудобно паки на ню встати.

Паки за сию вину нужда плоти смиряти,

да не возможет духа страстми ослепляти,

Иже, аще въслед плоти имется ходити,

яко слепец в ров, во ад имать ся вволити.

Еще, да служит духу, ибо наше тело

яко рабу Господь Бог душе дал на дело.

Душа да господствует, плоть раба да будет,

да в чине, Богом данном, та и та пребудет.

Безчинно же есть дело рабе власть имети,

госпоже под началом оныя седети.

Тако безчинно телу духом обладати,

духови же велений телесе слушати.

Не буди в христианех безчиние тое,

плоть бо аще владеет, ведет на все злое.

Еще, да плоть не токмо душе работает,

но и преступления слезми да смывает,

Да, чиста сущи от грех, ко всечисту Богу

в чистое внидет небо на радость премногу.

Плоть и кровь Христова

Дивна трапеза, плоть и кровь Христова,

лежит нам в храмех Господних готова,

Ея же аще ясти не потщимся,

душевней смерти Богом предадимся.

Аще же снемы, недостойни суще,

суд в жизни место приимем, ядуще.

Что же содеем? В сердцах умилимся,

в недостоинстве сами осудимся.

Яко же сотник древле сотворил есть

и Христа Бога в милость преклонил есть,

Тако бо и нам милосерд явится,

не Судия, но Отец поставится.

Плоти укрощение

Хотяй коня в потребу свою изучити,

донеле же конь юн есть, нужда укротити;

Егда бо состареет, некротим бывает,

во жестоте природней свереп погибает.

Тако хотяй плоть свою благим обучити

долженствует в юности ону укротити;

Аще бо в страстех ону к старости пустиши,

погибель, не исправу оныя узриши,

Но ея со твоею погибель случится,

яко конь со всадником в ров купно валится.

Плотское смешение

Смешение плотско мало услаждает,

велику же мерзость послежде раждает.

Аммон, сын Давидов, с сестрою смесися,

но колико сердцем потом возмутися:

В болшей ненависти ону имеяше

по гресе, нежели первее любляше.

Побор

Во Епире на суше источник явися

зело хладный и здравый, всем же возлюбися.

Яша болнии мнози тамо притекати

и, пиюще ту воду, здравие приимати.

Князь страны от советник на то понуждены,

да побор на пиющих будет уставлены.

Егда убо от воды побор уставися,

абие той источник в землю возвратися.

И тако чрез лакомство воду погубиша,

ею же немощь туне людие целиша.

Погибель

От главы начинает рыба истлевати,

от началных обычай градом погибати,

Какови бо в начале сущии бывают.

тако прочий жити весма подражают.

Корабль иногда извне от волн погибает,

иногда от бремене внутрня потопает.

Мы иногда от лукавств врага изчезаем,

иногда же от наших внутрних погибаем

Погребение

Симонид рифмотворец по мори плаваше,

егда у пристанища некоего сташе,

Обрете тело наго, земли не отдано.

Взем е, сотвори быти в яме закопано.

Обноществовав тамо, виде погребенна

человека собою, во сне си явленна,

Глаголюща то к себе: Се тя увещаю,

утро да не плывеши, милость ти воздаю.

Возбнув, Симонид начат сон той разсуждати,

веру поем, не хоте от брега отстати.

Инии, смеющеся, от брега отплыша

и, возвеявшей бури, потоплени быша,

Видящу Симониду. Тако возплатися

соблюдением милость, яже сотворися.

Он же в горнице нецей вечерю ядяше,

от предстоящих людей сие слово взяше:

Се у врат два юноша надолзе толцают,

да изыдеши скоро, тебе призывают.

Он, не ведый, кто бяше, изшед, соглядаше

и се ни единаго мужа обреташе,

А в то время горница она повалися

и кто-либо в ней бяше, до смерти убися.

О чюдо! Егда кого Вышний соблюдает,

необычными средствы от смерти спасает.

Подобие

Подобие ко Богу в праведнице зрится

трегубо. Во-первых же, Тому подобится

Естеством, ибо, яко словесен небесный

Царь, тако и праведник естеством словесный.

Паки, благодатию, яже преклоняет

праведника, в благости да точен бывает.

Третее подобие во небесней славе

будет, егда взложится венец его главе

И дастся лицем к лицу Бога созерцати,

образ Его во уме своем устрояти,

И даруется в небе блаженство вечное.

Сподоби ны, о Христе, восприяти тое.

Подражание

Полезно есть святыя мужы подражати,

яже нам изволи Бог в образ жизни дата.

Аще же и в них некий порок усмотрится

бывший, подражания той кроме лишится.

Отрекшася Петра несть требе подражати,

но на слезы и ревность пол за возглядати;

Ни же на гонителя смотретелно Савла,

но на проповедника требе зрети Павла;

Ни же зрим на Леввия, в мытнице седяща,

но на Матфея, во след Господа ходяща;

Ни Фомы неверие нужда созерцати,

но Господь мой и Бог мой, лепо с ним вещати.

Не образ нам Давида блудодеяние,

но слезы, яже точи во покаяние.

Аще же подражахом святых падение,

отселе подражаим их покаяние,

Да иде же Господем они водворени,

таможде и мы будем от Него вселени.

В мире иже от господ милости желают,

нравы их и скудости тощне подражают.

Царя Македонскаго Филиппа ласкатель

Клисоф толико бяше его подражатель,

Целу имея ногу, хрому притворяше,

яко Филиппу една нога хрома бяше,

И им же образом царь очи обращаше,

подобным он светила своя устрояше,

И егда царь едина ока си лишися,

он, завязав око си, пред людми явися,

Аки бы и оному такожде страдати

и лишения ока вмале ожидати.

И егда что квасное царь усты взимаше,

он устне и лице си абие сврескаше,

Аки бы ему кваса остроту терпети

и вся досады царски в плоти си имети.

Дионисий же тиранн елма прислеп бяше,

сонм ласкателей тожде себе притворяше,

Седяще у трапезы, чашы превращаху,

аки недовидяще, притворно деяху.

Харисип же, здалеча зря й кощуняща,

и сам себе притвори смех мало творяща.

Вопрошен же о вине, вскую разсмейся:

Достосмешен ми, рече, глас ваш показася.

О лестна ласкателства! Слепо подражают

тех немощи, милости их же ожидают.

Тако бы Христа верным должно подражати,

добродетели Его на себе являти,

Не скудости муж тленных, а то есть известно,

яко сицевым царство готово небесно.

Елма на столе равне воду проливши

и от нея по столу перстом поведеши,

Вслед перста вода течет. Точне содевают

подначалнии, вослед началных бегают,

Подражающе дела, творимая ими,

аще в рай, аще во ад, скоро текут с ними.

Зри убо, началниче, да живеши благо,

аще твое и ближних блаженство ти драго.

Благо есть дело святым честь даяти,

свещы палити, гробы украшати.

Лучшее того — тако благо жити,

яко же они, в делех святым быти.

Подражание им есть возлюбленно,

подражателем есть душеспасенно.

Покаяние

В мире покаяние действенно бывает,

тем грешник Бога в милость удобь преклоняет.

В будущей паки жизни то не оценится,

слезы вечныя будут, но казнь не простится.

Жена, хотящи чадо свое отдоити,

тщится на сосца горесть неку положити,

Да, егда чадо хощет сосца ея съсати,

обретше на них горесть, боится дерзати.

Тако хотяй демону приступ возбраняти

к своей души должен есть мысли огорчити

Покаянием святым, да тем огорчится,

от душы и от мысли нуждно отвратится.

Покаяние весма гордость изтребляет,

лакомству сверепому брозды возлагает,

Нечистоте отьемлет лютую сверепость

и гневу укрощает сверепую дерзость.

Онем чревобесие до конца мертвится

и несытная зависть невращно губится,

А леность проклятая бегает далече.

Кайся убо на всяк день, всякий человече.

Доброплодная лоза есть покаяние,

от нея же есть триех гроздов даяние.

Первый есть свершенное душы смирение,

вторый — во исповеди грехов явление,

Третий епитемий есть содержание.

Сими веселость духа и ликование

Безконечно дается, убо вси ся кайте,

грехов злобу мерзите, благо содевайте.

Ползок путь мира, бедство им ходити,

без падения трудно й пребыти.

Тем несть то дивно, яко кто падает,

но то и гневно, яко не востает.

Падение ти аще прилучися,

скоро востати от него потщися.

Совести риза аще окалянна,

скоро во слезах да будет испранна.

Светлее реку: Аще еси грешен,

к покаянию да будеши спешен.

То будет в ползу превелику тебе,

во ад не спустит, водворит же в небе.

Действие его и сила велика,

тако устрой всех Царь и Владыка.

В первых же, грехи чисто омывает

и огнь геенский силно угашает.

Паки, благодать весть то возвращати,

душам умершым живот возновляти.

И дари, иже чрез грех погубленни,

покаянием бывают вращении.

Еще, делеса, яже умерщвленна

быша, бывают онем оживленна,

И заслуги их возмездны бывают,

вечныя славы венец соплетают.

К тому, в совести благ покой раждает,

паче всякаго пира услаждает,

И славу добру, бывшу поврежденну,

деет во людех благоисцеленну.

Блажим днесь Петра, и Давида славим,

и разбойника благоумна хвалим.

Не зрим грехов их, но покаяние

блажим, и в образ вземлем востание,

Еже есть силно судбы божественны

делати весма быти премененны.

Яко содея древле с Нинивиты.

тыя бо Господь суди изтребити

И чрез пророка то проповедаше,

яко воскоре сгубити хотяше.

Они же слезы к слезам приложиша.

пост всеживотный три дни сотвориша.

Покаяшася, всесмиренни быша,

тако гнев Божий в милость претвориша.

О коль пресилно есть покаяние

судеб Божиих на изменение!

Изменяет же и мужа в инаго,

плотскаго бывша в мужа духовнаго.

Отчаяннаго престроит грешника

во любимаго Богу праведника.

Паче, из скота творит человека,

яко обносит повесть древня века.

Навходоносор царь преложен бяше

в скота за грехи, и с скоты живяше,

Но елма приде во покаяние

чрез грехов своих исповедание,

Во человека паки преложися

и на престоле своем посадися.

К сим, о нем и то лепо глаголати,

яко ближния может назидати.

Кто бо плачуща мужа созерцает,

а сам во сердцы сотрен не бывает?

Егда Марии житие читаем

Египетския, еда ся не каем?

Разве есть кому сердце каменное,

не сокрушится всеконечне тое,

А иже имать то в себе плотяно,

не может быти от слез удержано.

Наконец, небу силу содевает,

ибо каяйся небо похищает.

В законе ветсе то образоваше,

егда в Святая Святых въход творяше

Жрец в тое время, егда ся постиша

людие за грех, и тело томиша.

Си я чтущии, о гресех ся кайте,

милости свыше от Господа чайте.

Аще и зело много согрешисте,

милости Бога не у победисте.

Вси греси мира суть искра едина,

море же милость есть Божия Сына.

Коль же удобно морю угасити

искру, толь Ему — грехи истребити.

Капля — вси греси, океан — щедроты

Божия, к тым ты теци и в доброты,

Еже есть, кайся и добрая дела

тщися творити, да душа есть цела.

Всяк человек есть грешен во мире рожденный,

разве тех, яже изъят промысл божественный.

Мало таковых зело, вси же согрешаем,

в гресех ся зачинаем, в гресех и раждаем,

А елико должае век наш пребывает,

потолику множае грехов прибывает,

Ибо вся дела наша с грехами смешенна,

и мысли, и словеса с теми соплетенна,

Чесо ради гнев Божий готов выну на ны,

еже по мере злобы возложити раны.

Аще же ся не каем, то имать предати

во огнь неугасимый вечно в нем страдати,

Его же, о грешници, днесь ся ужасайте,

о содеянных злобах истинно ся кайте.

Кайтеся неотложно, Бога умоляйте,

милостинями грехи вашы искупляйте.

Аще милостыни вам несть чим сотворити,

можете поне сердца ваша сокрушити.

Сокрушение паки сердца есть у Бога

приятно паче, неже жертва скотов многа.

Аще поста несть леть вам крепкаго хранити,

тщитеся с блудницею слезы источити,

Ибо тыя душевну скверну омывают

и паче снега белу душу содевают.

Отчаянию места во вас не дадите,

аще падосте люте, скоро востаните,

Ведуще, яко не толь тяжко есть падати,

яко от падения того не востати.

Человеческо — пасти, демонско — лежати,

аггелское же дело — из рова востати.

Плоти убо болящей, веете призывати

врача и о здравии ея промышляти.

Вскую же вещь лучшую, душу, лишаете,

в недузе греха тлети ту оставляете?

Плачете мертвых ради, о душах никако

печални есте, мрущих вредми грехов всяко.

Аще и многи язвы душам положенны.

веруйте, скоро могут быти исцеленны.

Образы суть пред нами: се блудная жена

вкратце за слезы Христом от грех устраблена;

И разбойник на кресте мало глаголаше,

а целбу душевную от Христа прияше;

И гонитель жестокий из сверепа Савла

вомале преложися в апостола Павла;

И иже во мытнице сребро собираше,

бысть апостол и дела Христова писаше.

Скоро Господь прощает и милость являет

тому, иже о гресех немедля ся кает.

Не многаго времене Он от нас искатель,

но сердца сокрушенна о гресех желатель.

Колико же Он любит душу человека?

Никто толик явися любитель от века.

Тем же не отчайтеся, но слезно кайтеся,

пред хотящим спасти вы Богом смиряйтеся.

Обновляйте ветхаго во вас человека,

да в новости ходите духа в конец века.

Обыкосте ветхия домы исправляти,

ветха бервна извергше, нова подлагати;

Много паче достоит душ дом обновляти,

за грех ветхий новую благость подставляти.

Аще же и много вам случися грешити

и видится, яко несть спасенным леть быти,

Не отчайтеся, молю, Бог спасти вы может

и хощет, токмо ся вы кайте, Он поможет.

Омыет грехи многи, следа не оставит,

аки ныне крещенны, безгрешны проявит.

Он, бездну грехов ваших во щедрот Си море

воверг, премилостивно погрузит воскоре

И, яко искра в море падшы, исчезает,

тако Он грехов бездну удобь истребляет,

И паче того, ибо море есть конечно,

а милость Его конца не приимет вечно.

Тою движим, изволил мир сей посетити,

за спасение наше Сам человек быти,

Многия страсти и смерть лютую страдати,

воеже бы за грехи наша долг воздати.

Аще часть имения Отча погубисте

и недостойны себе любве сотвористе,

Он, яко щедрый Отец, блудных ожидает

и лучшу имения часть уготовляет.

Сам идет в стретение, хощет вы лобзати,

ризы, перстень, сапоги и прочая дати.

Возвратитеся токмо от страны чуждыя,

Отец на ваша падет милостивно выя.

Погубили есте вся? Часто си бывает;

купец, обнищав, паки злато наживает,

И по сокрушении корабля премнога

мнози купцы приемлют богатства от Бога.

Возвратная то тщета, токмо ся вратите

сами к Отцу и вины своя приносите,

А Он вины оставит и по благодати

Своей казни вас лютей не изволит дати,

Ибо не нас Он деля возжегл есть геенну,

всеядущым пламенем страшне исполненну,

Но диявола ради, в гордости стояща,

каятися во веки весма не хотяща.

Кяющым же ся людем небо есть готово,

к нему же увещает Божие нас слово,

Елма велит царствия небесна искати.

Ищите убо того, Господь готов дати.

Покаянием к тому истинным теците,

оставлше дела злая, благая творите,

А Бог щедрый конечно даст вам царство в небе,

его же аз желаю всем вам, яко себе.

Покаяние право — злых дел ридание,

и обриданых к тому не содевание.

Неправо же кается, иже ся вращает

ко злых дел творению, о них же ся кает.

В смертном гресе три вещи мудрии считают:

вину, порок, долг с ними купно полагают.

Вина сокрушением сердца исчезает,

порок исповедию омовен бывает,

Долг довлетворением удобь отдается;

сице деяй человек известно спасется.

Горесть покаяния должен есть страдати

хотяй сладость вечную в небеси прияти.

Горестна суть врачевства, но полезна зело,

ибо от лютых недуг свобождают тело

И желанна здравия виновна бывают,

его же ради радость во сердце раждают.

Точне покаяние горко мнится быти,

но великую ползу обыче родити,

Ибо прогневаннаго Христа примиряет,

гнев Его праведнейший в милость претворяет,

Держит Его десницу, с мечем протягненну,

источаем благодать на ны божественну.

Паки, аггелом святым родит веселие,

то бо о кающихся имеют велие.

Ово, яко хранитель не всуе трудится,

но о ползе врученны души веселится,

Ово, яко исполнен лик их имать быти

кающимися людми, им же в небе жити,

Ово, яко множатся друзи в славу Бога,

хвалити имущии вънутрь горня чертога.

Еще покаяния сила есть толика,

во благий претворяет образ человека.

Его же яд греховный в скота изменяет,

покаянием паки человек бывает.

Наконец, тем демони смущени бывают,

яко раби бившии онех побеждают.

Имут же от князя тмы казни превелики,

яко упустити им тыя человеки,

Яже в хранении си от него держаху,

а привести в ад к нему никако можаху.

Убо покаяния не пренебрегайте,

на небесную сладость умы обращайте.

Не имать то досадно и горестно быти,

еже вечную сладость обыче родити.

Зрите и ползы сия, их же ради требе

покаяния горесть услаждати себе.

Благо есть мал у горесть временно страдати,

а толикия ползы душам си прияти.

Покаяние право — от грехов престати

и за сотворенныя слезы проливати.

Треми образы греси наипаче бывают:

сердцем, словом и делом, Богу досаждают.

Тем же три суть образы, како врачевати;

во-первых, подобает сердце сокрушати

О злых мыслех, наипаче, яко ум сложися

тому, что от демона злое подложися.

Паки, усты есть должно грехи си явити,

в исповеди пред отцем себе обличите

Кроме утаения, кто бо обличится

сице, той от Господа Судом не казнится.

Напоследок, да будет довлетворение,

яко отца духовна будет веление.

Найпаче, аще чюждо нечто удержится,

весма, аще возможно, то да возвратится.

Право покаяние хотяй сотворите

должен есть болезнь в сердци своем возбудите,

Яко пред благим Богом люте согреши л есть,

лукавая делеса пред Ним сотворил есть.

Поелику же болезнь та вящшая будет,

потолику скорее грехов си избудет,

Ибо велия болезнь и в малое время;

велие изтребляет дел лукавых бремя.

На сокрушение бо Господь возглядает

паче, нежели время дний слезных смотряет.

Скоро Господь блуднице грехи оставил есть,

Петра, плакавша горко, абие простил есть,

Виде бо ею болезнь в сердцех тяжку быти,

вократце прощение достойну влучите.

Покаяние Оригеново

Увы мне, мати моя, яже мя носила,

горе мне, мати моя, яже мя родила,

Законоискуснаго убо мужа бывша,

но у беззаконием себе осквернивша;

Благочестива прежде, но уже явивша

нечестие, тем Богу люте согрешивша;

Яко столп превеликий, древле вознесенна,

но внезапу до земли лютек поверженна;

Яко плодоносное древо, процветавша,

но уже изсохшаго и неплодна ставша;

Яко светоносную лампаду, светивша,

но, увы, угашенна и зломрачна бывша.

Кто даст главе ми воду и источник слезный

очима, да плачюся, увы, мужь болезный,

О мне самом, яко у толь люте скрушихся,

преокаянный грешник пред Богом явихся.

Зрю иерейство с плачем, амвона рыдаю,

егда паука, секти ткуща, созерцаю.

Взищи мя, Господи мой, яко падох зело

от Сиона горняго, да зрю к Тебе цекло.

Увы мнек. учителю прежде в Церкви бывшу,

днесь же и учеников вместе не пребывшу.

Яко по нужде падох, Ты, Господи, веси,

сердце мое Ты зришы, живый на небеси.

Егда иныя люди тщахся просвещати,

сам, увы, помрачихся, ни могох стояти.

Хотя в благочестии доблествен пребыти,

нужду приях противен тому ся явити.

Уязви мя диавол силою навета,

преобразивый себе во аггела света.

Ридах древле Сампсона, жалея слезихся,

а сам днесь горши его, увы ми, явихся.

Плаках и Соломона, яко он падеся,

а мое лице ныне лютей низвержеся.

Падох паче всех грешник и грешнейш явихся,

Создателя моего, увы, удалихся.

Сампсон власов на главе женою лишися,

из моея же главы венец низвалися.

Он женою своею бысть люте прелщенны,

аз языком моим в ров греха низверженны.

Поперите мя, иже мали и велици,

соль истлевшу топчите, вси мя человеци.

Недостоин есмь Бога, соль быв божественна,

сотворих мя в гноище быти воверженна.

Вижду, яко ми облак главу засеняет,

а солнце лучы своя от Мене скривает.

Покрый мя, Господи мой, изволи послати

Духа Святаго на мя в дарех благодати,

Да огневидным зраком диавола злаго

проженет днесь от Мене мужа прегрешнаго,

И рукописание да будет раздранно,

еже от Мене грехом тяжким ему данно.

Сице Ориген греха своего рыдаше,

аще же прият, Господь знати нам не даше.

Мнози суть учители, иже защищают,

мнози, и иже его неба отсуждают.

Мы то судбам Божиим дело оставляем,

его же не яви Бог, не испытоваем.

Покаяние повседневное

День пребых, благодарю Господа всех Бога,

Ему же буди слава о сем и честь многа,

Во нь же аще что благо содеяся мною,

от Тебе есть, о Боже, да есть и в честь Твою,

А грехопадения, яже безчисленна,

от моея суть злобы, увы мне, творенна.

Страсть, сласть и тварь возлюбих паче ея Творца,

тем же в немилостива въпадох руце борца,

Им же томим злолюте, падеж познаваю,

согреших, Отче, в небо слезно восклицаю.

Прогневах Тебе Бога, но плачу, рыдаю,

каюся вседушевно, всем ся сердцем каю.

Въпредь же имам блюстися от всякия злобы,

Ты ми помози, Сыне Девыя утробы.

Ничто бо могу благо творити собою,

аще не поможеши милости рукою.

Ты ми даждь струи слезны, дажд горко рыдати

за грехи, а впредь даждь ми злобы отбегати.

А ныне прийми слезы и вопль умиленный,

и настави отселе на путь мя спасенный,

Им же бы мне текущу, доспети чертога

небесна и славити в нем Тя права Бога.

Покаяния не отлагати

Люте человек той себе прелщает,

покаяние иже отлагает

К веку старости, ибо како знати,

даст ли Бог ему старости дождати?

Но буди, яко оныя дождется,

како весть, аще к слезам призовется?

А обычно есть старым таким быти,

како тщахуся во юности жити.

Ни же то время есть покаяния,

паче по трудех год почивания.

Аще кто тогда и не согрешает,

грех его, не он греха оставляет.

Негли хоте л бы старец согрешити,

но уди воли не могут служити,

А то мощно ли благость нарицати?

Разве то буй муж слово хощет дати.

Но буди и то, да ся кто покает,

и страстем плоти воли не слагает.

То судително, яко часть худая

века воздастся Богу, а лучшая

Миру и плоти и врагу дается,

аще к старости безчинно живется.

А дол жни есмы всю жизнь Богу жити,

в жертву благую весь век приносити.

Худыя жертвы не имать прияти,

с Каиновою хощет ю вменяти.

От детства убо Богу работайте,

покаяние ныне начинайте.

Невесте, аще утро будет ваше;

что ныне пожнем, то во вечность наше.

Поклон

В некоей христианстей стране звычай бяше,

егда на литургии символ ся читаше,

И вочеловечшася, елма глаголаху,

вси стоящий лицем к земли припадаху,

Честь творяще Господу, на землю зступившу,

во спасение наше человеку бывшу.

Единою монаху некому случися,

яко чтому словеси он не поклонися,

И се напрасно демон его заушает:

О горделиве старче! всем вослух вещает,

Тако неблагодарен ты, человек еси,

не покланяешися Живущу в небеси,

Тебе ради плоть бывшу, до смерти страдавшу,

и безсконечную ти жизнь уготовавшу.

О аще бы Он мене хотел искупити,

яко же благоволи людем сотворити,

Кланял бым ся во веки Божиему Сыну,

благодарствие много проявлял бым выну.

Зрите, возлюбленнии, демон ударяет,

за непоклонение гордаго смиряет.

Вы убо воплощенна Бога почитайте,

слово о Нем слышаще, поклон воздавайте.

Покорение

Обличаем о гресе, не творися спорен,

но, яко винный делом, буди всепокорен,

Спорну бо Бог противен со гневом бывает,

а покориву мужу грехи оставляет.

Бог скоты человеку изволил поддати,

человек должен Богу ум свой покаряти.

Невесть скуделодею глина пререкати,

тако мы должни Богу покорни бывати.

Овцы гласа пастыря слушают своего

и по горам высоким шествуют вслед его.

Пастырь наш есть Христос Бог, Того мы слушати

должни и во след Его выну шествовати.

Покрыти грех

Хам, яко нагость отчю братии сказал есть,

отец его и чада проклятию дал есть.

Сим с Иафетом яко наготу покрыти,

благословени Ноем и со чады быти.

Грех убо родителей благо покрывати

чадом, а не мирови онаго являти.

Помазание

Самуил ко Саулу егда глаголаше:

В царя тя помазати Господь мя послаше,

Абие приложил есть: Глас Божий услыши,

иди на Амалика, да й победиши.

Мы от самаго Бога есмы помазани

благодатию и брань деяти послани,

Да сотрем Амалика врага душевнаго,

демона, мир и тело, борца трегубаго.

Не возленимся убо трудов полагати,

да бы не всуе быти вънутрь нас благодати,

А венец от Господа всезлат предложися,

возмеши несуменно, токмо потрудися.

Помин мертвых

Иерей благочестно Богу работаше,

о покой усопших по вся дни моляше,

Ему же прилучися нечто погрешити,

архиерей оному запрети служити,

И тако о умерших жертвы не творяше,

чесо ради им тщета превелика бяше.

Некогда же епископ к утрени идяше,

и се множество мертвых от гроб си восташе

И яша друг ко другу сице глаголати:

Сей епископ не тщится службы совершати,

Да есть нам покой вечный, к тому запретил есть

иерею служити, иже благ нам был есть.

Аще не исправится, воскоре умрети

имать и в темном гробе, точне нам, истлети.

То епископ услышав, простил иерея,

о умерших молися от души си всея.

Помощь

Царска добродетель — помощь подаяти

требующым ея, нищыя питати.

Помысл

Помысл злый егда уму напрасно стужает,

не вредит, аще сладость о нем не бывает.

Помыслы злыи змию подобятся,

стропотно лестне во сердца гнездятся

И, нескоро ли изметных бывают,

услаждения яд в ня изливают.

Ему же аще ум соизволяет,

грех смертный душу живота лишает.

Попечение

Яко же врачь о болном прилежно печется,

тако жрец — о грешнице, да душа спасется.

О утре пещися Господь возбраняет,

о излишних промысл людем отсекает

И о неизвестных, яже суть будуща,

доволна бо печаль времене присуща.

И о временных ум верных Си отводит,

к вечных исканию мысль нашу возводит.

Не все попечение Господь отсецает,

но безчинна имети верным возбраняет.

Есть же нечинно в первых, аще полагают

временная за конец, иже тех желают,

Она за блаженство си сердцем вменяюще,

далей их к Богу мысли не простирающе.

Паки, попечение нечинно бывает,

егда о тленных печаль лише возрастает.

Третее, елма некто умом помрачится,

собою что стяжати, а не Богом мнится.

Четвертое, аще кто время предваряет,

прежде времене лише печален бывает.

Пятое, о излишних елма кто печется,

тех ради стяжания во сердци мятется.

Шестое, аще ся кто от службы Божия

отвратит за множество печали земныя.

Седмое, аще велми печалми крушится

некто, да не потребных житию лишится.

Сицева суть безчинна в нас попечения,

ибо лишают душу вечна спасения.

Чинну паки имети печаль подобает,

Богу пособствующу, всяк ся да труждает.

Попущает Бог грех

Попущает Бог людем иногда грешити,

яко Сам весть из злаго добро изводити.

Добро истинна Его, та ся проявляет,

егда за грехи раны Господь налагает.

Аще же бы не был грех, тоя бы не знати,

се виною греха Бог весть благо являти.

Паки, милосердие бывает явленно,

елма беззаконие бывает прощенно.

Еще, воплощение Бога Слова бяше

из вины греха, да бы спасти родство наше.

К тому спасаемии в славу возносятся,

егда от сопротивных человек гонятся.

Гонением Иудей Христос прославися,

елма ко древу крестну теми пригвоздися.

Мученици святии прославлени быша

виною мучителей, иже я томиша.

Иосиф продания виною вселися

в Египет, и паче всех велий сотворися.

Елма же Мардохея Аман враг гонил есть,

тогда царь гонимаго преславно потчтил есть.

Попущение

Моисий, Давид, Петр, Фома Богу согрешиша,

яко никто безгрешен, явно сотвориша.

Попусти же им Господь во грехи впадати,

еже бы не аггелы, но плоть себе знати,

Да. знающе и прочих немощь, оставляют,

егда о гресех своих истинно ся кают.

Попущение Божие

Петр апостол и Фома мужественни бяху

и умрети со Христом слово Ему даху,

Но оба слово свое натвердо явиша,

ибо Христу Господу оно измениша.

Петр отрекся трикраты, Фома не ем веры,

яко видеша Христа, проникшаго двери.

Вскую же попусти Бог им то падение?

Да в силах наших мало нам будет мнение,

Да не уповаем в них, ибо благодати

Божия кроме никто силен есть стояти.

Порок

На ногах блато мощно есть имети,

на главе паки не летъ есть терпети.

Тако всяк порок стерпим есть в смиренных,

зело безчестит лица вознесенных.

Послушание

Еже велит началник непротивно Богу,

ты без разсуждения да кладеши ногу.

Авраамов служитель елма обручал есть

Исааку Ревеку, первый дар ей дал есть

Усерязи златыя, яже украшают

ушы, послушание паки знаменают.

Христос же душы нашя егда обручает,

послушанием оны честно украшает,

Да заповедем Его ушы наставляем.

ими слово, як дверми, во сердце впущаем.

Вторый дар даде ов раб запястия драга,

Христос нам завещает деяния блага,

Да кто слово Божие в сердце полагает,

то рука в славу Его делом совершает.

Сия дары по вся дни душа носящая,

есть невеста, Христови добре служящая,

Яже в чертог небесный будет воведенна

и сладостем Христовым вечным приобщенна.

В обители некоей старец работаше,

иже в послушании пивничестем бяше.

Сей во едино время шед, пиво точил есть,

тогда й к ночалнику брат ин пригласил есть.

Он за скорость забыл есть дел вы загвоздити,

воеже бы пития вон не источити.

Гвоздь несый во руце си. тече ко началну,

потом опамятася, узрев вещь печалну —

Гвоздь, с собою снесенный, зело возмутися,

со тщанием ко делве пива возвратися,

Непщуя все на землю быти источенно,

и се выше сосуда сташе вознесенно

Без всяка пролития. О чуда велика!

Сице послушание чтит небес Владыка.

Воздухом держашеся пиво над сосудом

не естества силою, но Божиим чудом.

Последование

Возлюби человека Бог, создавый его,

и хоте сподобити царствия Своего,

Но человек, грехами преобремененный,

не можаше на небо быти возведенный.

Тем же Бог благоволи на землю ступити,

человека от грехов тяжких свободити

И жезл Си благодати оному подати,

да безпрепятно может вслед Его ступати.

Ступай же, человече, а не претыкайся,

аще же преткнешися, скоро исправляйся,

Да бы ти не остати от впреде грядуща

и прямым путем в небо Христа ны ведуща.

Последование Христу в небо

Предтеча Христос человечю роду

вниде плотию в небесну породу,

Да, иде же Он глава всех ликует,

тако и тело быти усердствует.

Что в конце веков может делом быти,

ныне инако нужда восходити,

Сиречь, всетеплым сердца желанием

и несумнивым всеупованием;

К тому суетствии мира презрением,

страха Божия в сердце хранением;

Наконец, живот непорочный жити

требе хотящу к Христу восходити.

Посмеяние

Посмеяние честным досадно бывает,

тем же и грех есть велик, и Бог казнь воздает.

Четыридесять и два детища стужиша

Иелисею, егда смех о нем твориша,

Ругающеся словом. Но Бог казнь воздал есть,

два медведя из леса на дети послал есть,

Иже ругавшыяся до смерти побита,

неучение рождьших во чадех казниша.

Пособие

Егда нужду ближняго твоего узриши,

пособие скорое ему да твориши.

Не зри. яко инии онаго лишают,

обретеннаго злата буии не знают.

Ты, яко злато первый тщал бы ся подьяти,

ни потерпел бы иным к тому тя варяти.

Первый тщися во нужде ближним пособити,

за то изволит Господь тя благословити.

Будет во нуждах твоих Сам помощник тебе

и подаст возмездие в златосветлом небе.

Плиний о слонех то нам поведает,

яко, аще слон во яму впадает,

Друзии слони ветви древ вметают,

песок рыюще, во яму всыпают,

Да тако яма земли уравнится

и впадшии в ону удобь свободится.

Оле чудесе! Во зверех колика

любы! Кто бы дал, да бы в нас толика

Во человецех любовь могла быти,

да бы друг другу тщался пособити.

Но увы, преко в нас ся обретает,

яму друг другу, да впадет, копает,

Или впадшаго засыпати тщится,

да никогда же беды свободится.

Что же за сие приимут от Бога?

Во адстей яме мучения многа.

Корабелници егда преплавают

пучину моря, аще усмотряют

Иныя в бедстве тонения быти,

всячески тщатся оным пособити.

Прибытков своих тогда не смотряют,

удержат корабль, парус низпущают,

Верви подают, да бы ся имати

тонущым за ня, а не погибати.

Деки и древеса различна вергают,

елико могут, помощь сотворяют.

Сия комуждо требе подражати,

егда ближняго видит утопати

В лубине грехов; вся лишити дела

мирска достоит, да бы друга цела

Соблюсти Богу. Си любовь правая,

верным полезна, Богу любезная.

Пособие Божие

Бог в творении благих людем помогает,

аще кто о тех кичив, того остовляет.

Остав же бедный токмо в силе естественней,

немощен есть путь тещи в воли божественней,

Паче, приклонен пасти. Убо не кичимся,

но в страсе спасение деяти потщимся,

Непотребныя рабы сами ся зовуще,

смиренно на высоту доброты грядуще.

Внегда зримся стояти, падежи блюдимся,

о приснопособие Богу да молимся.

Ему пособствующу, ползский путь пребудем

на гору доброт. в небо возведени будем.

Иде же брат брата си в нужде утвержает,

тамо житие, яко град крепкий, бывает.

Пост

Егда на горе Моисий в посте бяше,

усты ко устом с Богом глаголаше.

В полцех Исраиль брашном приложися,

тем же прелстися,

Яде бо и пи и нача играти,

во честь идолом лики состовляти

и, сотворь телца, почте й за бога.

О злоба многа!

Ту видев Моисий, возбуди Леввиты,

веле злотворшых мечем погубити,

и многи тогда тысящи падоша,

во век умроша.

Подобне, елма Церковь наша мати

пост велит чадом своим содержати,

аще суть, иже гласа не внушают,

зле погибают,

Брашном бо сладким, питием сикеры

но неистовство приходят без меры,

лики безчинны беззаконно водят,

демону годят;

И. яко телца, чрево почитают,

забывше Бога, тому работают,

а Бог в ярости велит то отмстити,

злыя губити.

Постите убо. егда пост бывает,

никто во сластех дни да иждивает,

иже от Церкве посвященны Богу

во славу многу,

Слава бо Богу велико множится,

елма сонм верных изрядно постится,

и душам нашым полза ся приводит,

к небу возводит.

Пост долгий, иже словом людем ся являет

и бледостию лице печално творяет,

Немощна показует и глас отончает,

людем токмо похвален, не Богу бывает.

Вопрошен авва некий, како подобает,

да хотяй поститися от брашен вкушает?

Рече: Лепо на всяк день брашна приимати,

толико да бы еще стомаху алкати.

Дводневну и тридневну посту зазираю,

тамо бо тщеславие быти усмотряю.

Пост и молитва

Врачевство яд из тела крепкое вон гонит,

пост с молитвою мысли скверныя преломит.

Пост на блуд

Благоговейный некто муж сына имяше,

его же со собою во пустыню взяше

И пита от лет детских даже до возраста,

в нем же мысль с похотию стужати начаста.

Не мог терпети юный, отцу си явил есть

и в мир отпущен быти прилежно просил есть.

Отец увеща его мало потерпети

и на воздаяние небесное зрети.

Потом стужающаго ял точно просити,

да бы четыридесять дни прежде постити

Потщался, та же шел в мир. Сын то обещал есть

и с благоговеинством постити начал есть.

По днех же двадесятих, елма утрудися,

внезапу скаредная женища явися

Нагая, смердящая, на нь пасти хотящи,

на смешение скверно с собою нудящи.

Он же, смрада лютаго не могий терпети

и на срамну наготу очима си зрети;

Всеми силами ону от ся отганяше,

она же к нему сия глаголы вещаше:

Вскую мя, о юноше, днесь омерзил еси,

юже доселе сердцем целым любил еси?

Аз еемь зрак блудодейства, от людей любимый

и в сердцах их пресладко и присно хранимый.

И в тебе мощно бы мне взяти вселение,

аще бы еси презрел отца веление,

Но. яко повинулъся ты отцу ти еси,

не к тому на блуд скверный прелстят тя и беси.

То изрекши, скверная невидима бяше,

юноша же свободу от мыслей прияше

Молитвами отца си, и по благодати

Божией утвердися в пустыни витати.

Похоть

Похоть плоти не грех есть, но в ней ся сладити

и согласие воли грех есть приложити.

Похоть егда есть искра, тогда да гасиши;

егда воспламенится, у не утолиши.

Похоть псу есть подобна, гонима гонзает,

аще же питается, в тебе пребывает.

Похоть есть естественна, но зле похотети

есть от воли, тоя Бог не велит имети.

Егда тя похоть начнет обьимати,

не дажд изволу ея целовати,

Грех не зачнется. Аще изволиши,

тогда мерзкое чадо грех родиши.

Похоть немощна, аще ум гонзает

и мысли своя к Богу обращает.

В начале похоть тщися обуздати,

инако несть леть ея удержати.

Жестокоусту коню подобится,

разпущенная, неудобь держится.

Аще огнь похоти кого распаляет,

в источник Писаний скоро да гонзает.

Тамо учением огнь той угасится

и хлад благодати Божия родится.

Амвросий святый повесть дивну предлагает,

яже люди разумны вправду удивляет.

Феотим (рече) некто очима боляше

и от врачев искусных помощи искаше.

Бяше же ему жена лицем удобренна

и его любовию держа всеплененна.

Того врачь от болезни хотя свободити,

возбрани смешения с женою творити.

Он же нетерпеливец лютый проявися,

похотию на жену вел ми распалися.

Не потщася завета того сохранити

врачева, воеже бы устрабленну быти.

Избрал есть лишение очию страдати,

нежели без утехи плотски пребывати

И рек: Здравствуй, мой свете любезный, смесися,

помале света вконец очию лишися.

Подобне и мы творим, егда за мир лестный

погубляем волею свет славы всечестный,

За временная вечну радость оставляем,

за сласть малу в тму вечну сами ся вреваем.

Огня смола и слама, дрова умножают,

похоть плоти различны вещи возбуждают.

Во-первых, мысли скверны, та же чувства ея

не попустят чистоты хранити своея.

К тому, общество с жены чистоту вреждает,

а пиянство до конца ту искореняет.

И праздное житие чистоте противно,

аще праздный чист будет, дело велми дивно.

На вся сия врачевство хощу предложити,

токмо изволи его ты употребити.

Аще тебе скверныя мысли досаждают

и на скверная дела тайно увещают,

Помяни, яко Господь весь мир исполняет

и вся дела тайная светло созерцает.

Разсуди, яко срам есть пред людми блудити:

колми паче пред Богом скверная творити?

Помяни, яко Христос изволи омыта

кровию ны Своею, да вы чистым быта.

Разсуди, яко вскоре имаши умрети,

за временную сладость вечный огнь терпети.

Ужаснися Божия праведнаго Суда,

молися Ему, тако избегнеши блуда.

Чювств вредотворению то врачевство буди,

от красных отвращати очес не забуди.

Ушеса на скверный глас имей затворенна,

аки тернием, от злых словес огражденна.

Осязати не дерзай мягкаго телесе,

найпаче, еже близу страстнаго чревесе.

Не жителствуй с женами, сено бо палится,

егда опаляющу огню приближится.

Не силен с ними Сампсон, Далида едина

силы и очес лиши Маноева сына.

Иже тысящи врагов един побиваше,

един всем Филистыном зело страшен бяше.

Не мудр тым есть Соломон, того бо прелстиша

жены, ибо к идолов чести обратиша.

Жены ради и Давид преступник явися,

блудодей и убийца елма сотворися.

Не дерзай со женами весма пребывати

чюждыми, и на крепость твою уповати.

Растаеши, яко воск, огню приложенны,

яко иней, будеши зноем растопленны.

Демону и всем врагом против да стоиши,

женскаго паки пола весма да бежиши.

Сей бо побеждается не противлением,

но всескорым общества его лишением.

На пиянство врачевство пост да будет тебе,

яжд и пий не излише, но елико требе,

Яко бо упитанный конь обыче прати,

тако и плоть тучная духа не слушати.

Питай токмо, да бы ей силу содержати,

в послушание духу, не противу стати.

Празднования гнусна вел ми опасайся,

во благих неких делех выну обретайся.

Тако тя не возможет на зло враг прелстити,

со срамом понудится тебе отходите.

Вражия стрела — похоть, лук — пресыщение;

отьими сытость, мало будет стремление.

Жупел огня есть пища, а вино — похоти;

лиши вино, не бойся оныя во плоти.

Адам аще бы не ял плода возбраненна,

не вредила бы Евва, аще и прелщенна.

Ни Адаму, ни чадом, сама бы страдала,

яко змия лукава гласа послушала.

Тако, аще в нас похоть от сласти вкушает,

не вредит, аще воля ей ся не слагает.

Повнегда же похоти воля приложится,

в то время грех ся родит и душа вредится.

Похоть всех злоб корень, злы ветви пущает,

брань бо со плотию духови раждает.

Препятие душе к благим делом деет,

аки бо связанна сущи, в тех не спеет.

Печаль присну родит, люте разжигает,

ко греху скверному волю прилуждает.

Уму мрак наводит, бесным точно творит,

совесть истребляет, и вконец позорит.

Адама Евва яблоком прелстила,

сладостей райских онаго лишила.

И похоть сластми плоти нас прелщает,

радости рая горняго лишает.

Инок благоговейный в келии живяше

и прилежно Господу выну работаше.

Тому враг позавидев, нача возбуждати

похоти в плоти его, к блуду искушати.

Он терпе долго время, даже увидяше,

яко не к тому стати противу можаше.

Пришед ко Распятаго образу святому

и нача глаголати, аки ко самому:

Молю Тя, Христе Боже, чрез раны святыя,

изволи утолити страсти ми лютыя,

Уже бо не могу их аз к тому терпети,

виждуся во пламени жестоце седети.

Страсть мя одолевает, помози ми, Боже,

уже бо в том подвизе дух мой изнеможе.

Аще не изволиши скоро пособити,

иночества одежды имам низложити.

В образе мирянина во мир возвращуся,

донде же сластми плоти довле насыщу ся.

По изречении сих, елма нощеваше,

искушение люто излиха страдаше,

Обаче претерпел есть пособием Бога,

дающаго терпящым возмездия многа.

Утру же бывшу, нача ризы низлагати

и к образу распята Христа глаголати

Со многими слезами: О всещедрый Боже,

се от бремене страстей раб Твой изнеможе.

Не к тому их сверепству могу преко стати;

се иночества ризы, изволи прияти.

Аз в печали сердечной в мир ся возвращаю

насытити плоть сластми. да свободу знаю.

Тогда Распятый рече: Брате, что твориши?

Тако страстей телесе ти не угасиши.

Облецы ризы паки, Аз тя не оставлю,

скорое пособие в брани тебе явлю.

Да веси же то, яко паче распят быти

хотел бых паки за тя, да бы искупити,

Аще бы нужда была, неже тя пустити

от иночества во мир, еже бы блудити.

То слышав, инок в слезы многи разлияся,

о нестерпении си излиха каяся

И рече к Распятому: О Боже всеблагий.

Искупителю душы моея предрагий,

Поне же Ты хощеши помощь мне даяти,

еже противу кознем демонским стояти,

Аз паче имам душу мою положити,

неже противу Тебе волею грешити.

До конца жизни раб Твой хощу пребывати,

токмо изволи помощь мне Твою даяти.

По сей сладцей беседе инок ползовася,

пособствован от Христа Господа познася,

Ибо толиких к тому страстей не страдаше,

но во удобь стерпимых до конца живяше.

Не веруй плоти, аще и смирится

и безпохотна негли ти явится.

Не умре похоть, но токмо таится,

и малым ветром в пламень возгорится.

Аще стар еси, не ими ей веры,

весть и старыя палити без меры.

Негли немлади ови старци бяху,

иже Сусанну сквернити желаху?

Но зри, како я похоть распалила,

даже к каменней смерти пристроила.

Аще пустынный обитатель еси,

возврастш доброты даже до небеси,

Не веруй плоти, еще ся распалит

и от небесе даже во ад свалит.

Хладно естество имам, помыслиши?

Огненно будет, от жены сгориши.

Токмо ти аще жена приближится,

абие в сердце искра проявится

И начнет пламень по всему пущати,

вся уды твоя страшно раздезати.

Хладно железо, хладен же и камень,

а прирожшеся, родит искры, пламень

И великия вещы сожигают.

Токмо из леда искры не бывают.

Уне есть убо жен ся удаляти

хотящым чисто живот провождати,

А иже с неми сожити дерзает,

в огни не спален быти уповает.

Враг чрез Евву Адама в рай искусил есть,

от Бога возбраненный плод ясти прелстил есть.

Нам комуждо есть Евва, из нас изведенна,

в теле и в душах похоть, от греха рожденна.

Чрез тую Евву враг нас лютый искушает,

от Создателя к твари сердца обращает.

То ведяще, братие, не соизволяйте

ласкателству похоти, паче отрицайте.

Совет ея лукавый отводит от Бога,

всяческих благ лишает, зла наводит многа.

От жены мужа жена блудная прелщает,

да, честную пренебрег, с нею пребывает.

Тако и похоть душу от Жениха ея

от Бога отвлекает к твари лестем сея.

Но горе слушателем зла ея совета,

слышатели бо будут во муку ответа.

Похоть егда во плоти начинает быти,

с соизволением ти желает пребыти,

Да от него приимет зло чадо и родит,

без того бо никако она греха плодит.

Неплодна грехом похоть, аще истужает,

мысли семо, овамо в уме обращает.

Не сложи с соизволом, неплодна явится;

без того то зло чадо грех ти не родится.

Аще убо тя похоть к сласти обращает,

отрини ту блудницу, на зло тя прелщает.

Хощет от Бога жива тебе отторгнута

и во адову вечну погибель вринути.

Объемлет ли тя похоть, не обьемли ея,

но да отринеши ту от силы ти всея.

Аще бо обьимеши, зачнет чадо злое —

грех, и помале родит во смерть тебе тое.

Видиши лице красно, похоть ся раждает,

плоть ся твоя подвигнет, с ним быти желает.

Не то грех, но и мысли начнут ти стужати,

еже быти с тем лицем, блудно пребывати.

Не то грех. но утеха о том ти пребудет

в воли и во разуме. Аще же не будет

Соизвол совершенный и разсуждение,

токмо ту простимое есть согрешение.

А внегда разсудиши и соизволиши,

токмо в сердцы ти смертно без дела сгрешиши.

Похоти движения перваго не дата

не имамы во силе тоя благодати,

Но мысли и утеху можем отревати,

и сам Господь изволит в том нам помогати.

Много паче соизвол на скверныя сласти

создание словесно имать в своей власти.

О первом движении плоти не пецися,

но мысли и утеху смирити потщися.

Аще же не могл еси онех удержати,

соизвола конечно прилежи не дата,

Иначе бо грех смертный от Тебе родится,

а душа ти бедная онем умертвится.

Феотим некто очима боляше,

има же целбы прилежно искаше.

Врачеве ему совет здравый даша,

не смеситися жене завещаша.

Он, невоздержно выну обык жити,

не хоте слова онех сотворити.

Зная и ведя, яко ослепится,

аще с женою плотски свокупится,

Избрал есть паче слепоту страдати,

неже от жены себе удержати,

И рече буй муж: Здравствуйте, светила.

сласть ми с женою вас паче есть мила.

То изрек, жене плотски свокупися,

по деле света очию лишися.

О безумия! О буйства велика!

Не имам сего аз за человека

И скота хуждша его нарицаю;

скот бы не деял тако, добре знаю.

Похоть от естества есть, соизвол от воли;

ова греха кроме, сей без греха николи.

Похоти искру в тебе елма ощутиши,

абие угасити ону да ся тщиши,

Иначе бо во пламень велий разродится

и многими трудами едва угасится.

Коль жестока есть похоть, несть требе писати;

комуждо по себе то есть удобно знати.

День и нощь человеку не дает почити,

а никто же от нея может свобод быти.

О коль мнози юнии тою сверепеют!

Аки огнем жегоми, люте пламенеют,

Даже до неистовства. Паче и старии

немнози от тояжде беды свободнии,

Ею же нудящеся, чесого не деют,

да желаемое зло по воли имеют?

Страждут бедства имений, главы забывают,

аще стрелы в очеса, обаче дерзают.

Сию страсть похотную да бы укротити,

чесого не тщахуся святии творити

Пустонножителие? Плоть си удручаху

постом, труды, поклоны, и низу лежаху.

Неции от них огнем персты си палиша

и по тернии босо ногами ходиша.

Хлад и вар нестерпимый волею страдаху,

а едва утолити похоть си можаху.

Инии же и тако ничто же могоша

успети, но злобедне в грех блудный падоша

И, еже чрез многая лета заслужиша

благодатей у Бога, в часе погубиша.

Силнии и мудрии, паче и святии

тоя лютыя страсти не суть свободнии.

Кто бо силней Сампсона? А той победися

похотию, от жены едины прелстися.

Кто мудрей Соломона? И сей царь чрез жены

страстию любве плотски бяше побеждены.

Кто святей бе Давида? А похоть онаго

привлече лицем жены да дела блуднаго.

Никто же убо может в себе уповати,

яко силен противу той страсти стояти.

Кто-либо есть бременем плоти обложенный,

удобно может быти страстми побежденный,

Аще Бог не изволит ему пособити;

с Богом точию мощно похоть победити.

Умерщвляйте плоть убо, труды ей давайте

и, донеле же в искре похоть, попирайте

При Господней помощи, Его же просите,

да пособит, и волю Егову творите,

А Он не умедлит Сам пособие дата.

Тоя себе желаю и вам благодати.

У Евагрия отца добр ученик бяше,

иже имя Ираклид на себе ношаше.

Сей, палим похотию, зело си стужил есть,

обаче никому же досады явил есть.

Но тайно во пустыню внутрнюю пустися,

иде же Пахомия авву сподобися

Обрести близ финика, мужа стара суща,

седмьдесять лет века си от Бога имуща.

Тому приближен, ял есть скорбь свою являти

и глас воздыхания от сердца пущати.

Старец рече умилно: Чадо любезное,

да не мнит ти ся быта си нечто новое.

Не един ты терпиши то искушение,

обще воем Христовым то досаждение.

Не небрежением же тебе ся случает,

ни от гнусности ума страсть сия бывает.

Ибо во месте пусте в нищете седиши

и женския красоты никогда же зриши,

Но паче искушаем еси ради того,

яко чисто пребыти прилежиши много,

Или яко плоть, здрава сущи, безчинует,

или от помысл праздных то ся изводствует.

Или, наконец, демон ратует на тебе,

завистию о благих сам снедаяй себе.

Аз, рече. яко зриши, сподоблен стар быта

и четыредесят лет во скифе сем жити.

Много о спасении душы ми пекуся,

а зла искушения и ныне боюся.

По пятадесятиц лет дванадесят зело

похотми досаждаше грешное ми тело.

Днем и нощию та скорбь люте мя боряше,

даже чюждь Бога быта дух мой помышляше.

Тем же избрал бых паче смерть люту прияти,

неже плоть мою скверне мерзостней предати.

Тек убо во пустыню, узрев вход пещеры,

в ней же познах лютыя обитати зверы,

Обнажься, падох тамо, еже снеден быти,

елма имут гладнии звери исходити.

Но погреших тем словом, ибо не вредиша

звери ми тии, паче милость проявиша.

Мужеск пол бе и женеск, оба мя лизаста

от ногу и до главы, та же путь прияста.

Аз, видя чюдо сие, начах помышляти,

яко Бог грехи моя изволил отдати.

Абие возвратихся в келлию убогу,

благодарствие дея всещедрому Богу,

И жих дни неколики без досаждения,

но паки враг содея лютша стремления.

Тако потщася мене злолюте кусити,

даже вмале не дерзух хулных изпустити,

Ибо, преобразився в зрак девы юныя,

юже иногда видех в дни моя младыя,

Во время жатвы класы собиравшу, та же

притекши, на колена, увы, ми возляже,

Даже ми всеми уды подвиженну быти,

аки бы ся с оною плотски свокупити.

За то аз, разгневався, зауших зрак скверный.

Той изчезе, а смрад бысть в келлии безмерный

И, яже зауши ту десница, смердяше

две лете, яко едва то зло нос терпяше.

Впад же в усумнение, во пустыню вдахся

и по безпутным дебрем печален скитахся.

Ем же мала аспида, срамным удом моим

присадих й, да секнет смертным жалом своим,

Избрах бо паче люте от змия умрети,

неже искушение толь люто терпети.

Умыслно дражних гада и досаждах ему.

да бы сотворил смертный телу вред моему,

Но Бог возбрани ему того сотворити

и аз познах, яко Он хощет мя щадити.

Тем воздохнух умилно и слышах глас к себе:

Пахомие, в келию ити нужда тебе.

Возвратися во ону, а то нужда знати,

яко Господь изволил на тя попущати

Силнаго диавола, да ся не кичиши,

и о тебе крепостей быти да не мниши,

Но, зная твою немощь, да бежиши к Нему

и вся причитавши твоя дела Ему.

Ныне иди в келию, прочее трудися,

о помощи Божией никогда сумнися.

И тако, рече, ид ох во келию жити,

и не даде Бог врагу силну на мя быти.

Чювствия во мне мирна уже познаваю,

за что Господу славу присно возсылаю.

Враг, презренна от Мене зная себе быти,

не тако ми дерзает досады творити.

Читателю любезный, зри пакость велику,

от демона творенну мужеви толику.

О твоей не дивися, но Богом крепися,

с борющым непрестанно до конца борися,

А Господь Бог готов есть в пособие тебе,

за труды и победу, венец дата в небе.

Почитание

Почитай менших, почтут они тебе;

тех нечествуяй безчествует себе.

Друг друга чтите, место почитайте,

за то от Бога чести ожидайте.

Его бо ради кто ся унижает,

в царствии горнем предпочтен бывает.

Прав никто же

Аще в совести твоей хреха и не зриши,

не абие тя права и свята да мниши,

Ибо чесого око ти не созерцает,

то Божие пресветло в тебе усмотряет.

Мы в сердцы тмы не видим, а пред Богом тое

имать помрачение в светлости некое.

Правда

Знающе правду, а оней молчати,

есть злато в землю тщетно закопати.

Правда началная

Егда Адам, созданный Богом, в рай бяше.

не в естественных токмо силах пребываше.

Но дар преестественный Богом получил есть,

яко в правде началной немятежно жил есть.

Правда же началная не что ино бяше,

токмо дар Бога щедра, иже покаряше

Разум Адамль Богови, а разуму тело,

еже противно стати оному не смело.

Егда убо праотец Богу согрешил есть,

ту правду началную, увы, погубил есть.

Ея же мы лишени, страсти в себе знаем

и в брани плоти на дух часто погибаем.

О. аще бы праотец с правдою стоял был.

весь род наш зол толиких никако бы знал был.

Правда и ложь

Правда дщерь есть Божия, благо ю любити,

да бы спрягшым ся с нею, в сродстве Бога быти.

Лож паки — дщи демоня, кто ей прилепится,

оле врага душевна зять той сотворится.

Зрите убо, братие, с ким ся сочетати,

еже бы не погибель, но живот стяжати.

Правду глаголющий страждут

В капищи некоем кумир хранен бяше.

иже вещей храма татя изьявляше.

Случися некому тамо татствовати.

сокровища храма бывшая забрати.

Вопрошаем, кумир татя изъявил есть.

тать же пришед в нощи, в главу й язвил есть.

Да не изъявляет. Потом прилучися,

инех тамо поклад татски восхитися.

Иже ко кумиру притекше, моляху,

да известит татя, но ничто слышаху,

Молчаше бо идол. Они умножиша

жертвы, и молитвы теплы приложиша

Тогда нача кумир устне отверзати

и жалостне оным сице глаголати:

Времена суть злая, людие в них злеют,

правду глаголющым главу бити смеют.

Негли и днесь злоба сицева бывает,

друг друга за слово правды измождает

Правды безместие

Правда ипостасная егда воплотися,

недр Отчих не оставлши, во мир сей вселися.

Не обрете жилища, достойнаго Себе.

по путем странствовати Оней бяше требе.

Тем же и глаголаше: Лисом суть язвины.

птицам гнезда небесным, в них же родят сыны.

Сын же человеческий, низшедый в мир жити,

не имать, иде же бы главу приклонити.

Се же бысть, яко правды мир лестный не любит.

правдоглаголивыя мужы скоро губит.

С небесе правда — Христос, мир И не любяше,

извлек из Сион града, на кресте распяше.

Тако днесь правда словес и дел и сгонится.

от всяких чинов людей изгнанна влачится.

В дворы некогда господ великих вхож дате.

ту абие в темницу воверженна бяше.

[390] 374 Искуство того прият Михей божественный.

Ахаву правду рекший, в узы воверженный.

И Предитеча Спасов, правду глаголавый.

во темницу всадися и лишися главы.

Прииде та к дворяном. но всуе трудися,

ибо в них ласкателство с притворством вселися,

С нима же она невесть купно пребывати,

яко же агнец с волки не может играти.

Посем к деющым купли людем прихождаше,

гнезда себе покойна в сердцех их искаше.

Но ту прелесть со лжею на ню обострися.

к тому клятва смертная. Правда удалися

И к законоискусным, к судиям толцаше,

златая и сребрняя ту страж не впущаше.

Виде же издалеча, яко вся вращает,

злато, яко же хощет, закон изменяет.

Возсетовавши зело, иде ко гражданом

и ко землю тяжущым безхитрым селяном.

Но и между онеми недолго живяше,

ибо кождо пожитков прелестно искаше.

Наконец, обруга мир. к духовным пустися,

в учителех и отцех духовных вселися.

Ту мало время почи, а внегда узрети,

дерзновения должна и сих не имети.

Паче же молчанием злобы покрывати,

яже им подобаше остро обличати.

Потщася и от онех странство восприяти

и во царства небесна страну возлетати.

Тем же Христос изволи древле увещати

царствия небеснаго и правды искати.

Аки бы реши Ему: Правды гнездо в небе.

в царстве небесном правды искати есть требе.

Монах некто ревности к Богу исполнися.

еже мучен за Нь быти. зело устремися,

И тече к агарянску солтану злочтиву

веру проповедати всеблагочестиву.

Дерзнувша приступити солтан вопрошаше,

чесого с дерзновением у него искаше?

Рече монах: Правду ти хощу глаголати,

да возмогу за Христа от тебе страдати.

Тогда солтан рек ему: Труд тщетно дееши,

яко смерти за Христа от нас желаеши.

Мы не имамы о сем тя смерти предати:

у князей христианских дерзай глаголати

Правду, у них конечно ону обрящеши,

каковы от мусулман, монаше, ишеши

Болный очима на свет не глядает.

сердцем лукавый правды обегает.

Камвизес царь Персидский вину прилежаше,

что величеству его неприлично бяше.

Име же в друзех своих болярина думна,

вернаго себе во всем, Праксаспа разумна,

Иже за любовь к царю дерзнул увещати,

воеже бы пития многаго престати.

Огорчися Камвизес за увещание,

и за праведна слова к нему вещание.

Рече: Вмале узриши, яко ум мой цело

в пиянстве пребывает, и рук моих дело.

По времени немнозе много вина пил есть,

сын же Праксаспов царю у стола служил есть,

Ему же царь повеле за прагом стояти

и леву руку горе подьемшу держати.

Сам же взем лук и стрелу остру наложил есть,

в сердце того юношы прямо угодил есть,

Еже велев из персей юнаго изьяти,

и обличителю си оно показати

С сицевыми словесы: Вижд, не погрешает

рука царская, аще чашы истощает.

Оле лютаго правды ненавидения,

и безчеловечнаго за ту отмщения!

Тиранское убийство пиянству придал есть,

кровь невинну за слово правды излиял есть

Оле злобы пиянства! того вси гонзайте,

правды слово любите, не месть содевайте.

Праведник едва спасется

Нуждно есть спасение во мире живущым,

не грешником токмо, но и праведным сущым.

Вины сего многи суть, яже труды дают,

яко и праведници едва ся спасают.

Первая есть, яко плоть на духа ратует

и того в спасения пути удержует.

Вторая — яко тело дух обременяет,

тлением своим спону ему содевает.

Третия — яко страсти всяка человека

не содостойны славе будущаго века.

Четвертая есть, яко в небеси бывают,

иже нуждею оно себе восхищают.

Нужду же и праведным тяжко есть деяти.

яко ту деяй и сам должен ю страдати.

Пятая — яко тесен путь, в небо ведущий,

не всяк онаго прейдет и право живущий.

Шестая — яко несмы и о том известни,

аще праведни есмы, или паче лестни.

Седмая — яко Божий суд истинный зело

и грозный тем немощно глаголати смело

Яко праведник днешний конечно спасется,

неизвестно бо, аще утро не падется.

Но и правды судимы наша могут быти.

аще право тщахомся оныя творити.

Тем в страсе спасение нужда содевати

хотящым е известно от Бога прияти.

Правитель

Благ есть началник. люди управляли,

купно и себе сам не забывали.

И прежде, себе лепо управляти,

та же иныя мощно устрояти.

В первых же, кождо три силы душевны

да имать в себе чинно управлении:

Ум. волю, память. Первый да вратится

выну ко Богу, во всем да корится.

Вторая — того присно да желает,

что Господеви любо быти знает.

Противных паки не должна хотети,

аще бы пришло за то и умрети.

Третяя — должна Бога благодати

на адаманте всетвердом писати.

Да незабвенны выну содержатся.

благодарствием присным да платятся.

Обиды паки, от ближних деянны,

не должни бити тою содержанны.

На быстрой воде ты должно писати.

да бы их следа никогда познати.

Ли яко птица аер прелетает

безследно, тех след да ся не являет.

Паки, потребно душевныя страсти

ума искусна покорити власти.

Радость и печаль да в мере бывают,

надежда и страх в брезех да остают.

Равне прочил да не лишествуют,

душеполезно да в ней бышествуют.

Третее — чювства лепо есть правити,

еже бы всеми ими не грешити.

Зрение к Богу да ся обращает.

слух гласу Его выну да внимает.

Во вкушении да будет воздержность,

в обонянии да хранится мерность.

Осязание да ся не касает,

их же Господен закон возбраняет.

Наконец, тело и вся уди его

звания службу да знают своего.

Аще их страсти начнут сверепети,

в наказании полезно имети.

Постом, трудами благо есть смиряти

и сна доволна нужда не даяти.

Аще кто сице сам ся управляет,

добрый правитель и инех бывает

Праздник

Во праздник некий жена работаше,

да упекутся, хлебы в пещь саждаше.

Дивное дело, вси, иже всаждени,

во камение Богом обращении

В показание, яко в праздник дело

плотское Ему есть безгодно зело.

Исраиль из Египта егда изхождаше,

во субботу Евреин дрова собираше.

Бог его камением повеле убити,

яко дне празднственна пренебреже чтити.

Мелник некто в неделю жернов наковаше,

но оружие к рукам онаго присташе.

Даже никим образом мощно бе отьяти.

да бы знал день Господень впреде почитати.

Тако бедник к духовну мужу обратися

с плачем, того молбами юза разрешися.

Жена некая, дара веры не имущи,

верных владетелница пребогата сущи.

Понуди христианы в день свят работати:

Не подобает, рекши, ныне праздновати.

И сама шедши в поле, серп остр восприяла.

во укор Богу верных пшеницу пожала.

Бог же хотя верныя люди утешити,

изволил ону жену пречюдне казнити.

Серп прилпе руце. класы ко другой присташа,

язык ожесте, устне ничто глаголаша.

Очеса изостренне и престрашне зряху.

ноги неподвижимо на земли стояху.

Сама яко жала есть, сляченна стояше.

страшное видение людем верным бяше.

Иже к покаянию ону увещаху,

известную от Бога целбу обещаху.

Ей же ничто вещавшей, тщахуся я взяти,

но никако от земли можаху подъяти.

Видяще же явную казнь Господню быти,

хотеша ю на селе тамо оставите.

И се внезапу юзы бяше разрешена

и тайною силою на землю вержена,

На ней же окаянне зла жена скончася,

и душа лукавому духови предася.

Вернии тело вземше, ко дому везоша:

Се сноп, в праздник ужатый, мирови рекоша.

То раби зряще, иже не у верни бяху,

кроме отложения в Христа вероваху.

Людие же оттоле день свят почиташа.

иным людем казнь сию сведетелствоваша.

Праздники подобает честно совершати.

божественная дела прилежно деяти,

От дел мисрких и плотских всяко праздным быти,

песнми же духовными Господа хвалити.

Тако Богу празднуем. Ему угождаем.

аще книги чтем, или слов Божиих слушаем.

Инако диаволу празднество бывает,

егда кто в праздник дела его совершает.

Такова суть пиянство и объядение,

играния нелепа, кощун смотрение,

Безчинно плясание, ристание конско.

присещение скверных мест, дело демонско.

Картами играние. зерней метание.

позорища безчестна, блуднодеяние.

И ина сим подобна демона говеют.

яже вернии в праздник днесь всетощно деют.

Несть божественно дело и много спание.

такожде с зазорными лицы гуляние.

И рабская делеса Богом возбраненна,

пиршества нестройная весма отреченна

И купледеяния немощно хвалити,

то бо от божественных силно отводити

В оном лакомство и ложь с клятвою спряжеся.

прелщение вселися, правда изженеся,

Яже вся суть угодна демону, не Богу,

яко людем погибель содевают многу.

И риз красота, яже выше, неже требе.

никого водворяет во пресветлом небе.

Паче же во ад мрачный премноги вселяет,

яко и красящася и ины прелщает.

Сих всех в день празденственны несть требе творити

хотящему празденством Богу угодити.

Некто от благоверных обычай имяше.

псами заяца в праздник поутру ловяше.

Потом жена оному родила есть сына

с песнею главою, с долгима ушима.

Уразумев вину си. слезы изливаше.

оттоле всякий праздник благопочиташе.

Дважды три дни в седмице плоти работаем,

нуждам ея трудами тощно угождаем.

Душе едва един день тщимся отложити,

его же веле Господь празднественно чтити.

Не праздным убо быти, чрезь весь день лежати,

но яже душы в ползу, та дела деяти.

Во-первых, жертвы в славу Богу приносити,

яже внутрния или внешни могут быти.

Внутрния жертвы сия — благодарение,

молитва, говеинство, сердца скрушение,

Вера со надеждею, и любы правая.

Вся сия — Господеви жертва угодная.

Внешняя есть — безкровну жертву приносити.

или при служении литургийном быти.

Паки, во веселии духовном годствует.

да всяк благодать Бога возблагодарствует.

Разсуждая множество Его дарований

и всяческих, яже к нам, прешедрых даяний

Еще требе в день святый страсти умерщвляти,

сию Бог жертву живу хощет от нас взяти.

К тому, подаяние нуждно есть творити.

сею бо жертвою леть Богу угодити.

Наконец, Писанию благо прилежати.

или проповедь слова Божия слушати.

Сия упражнения суть дне торжественна,

си, ея же Бог хощет, жертва божественна.

Вси убо да потщимся сице праздновати,

всяческих же безделий всетощно гонзати.

Тако удостоимся в небе праздновати,

чрез субботу вечности с Богом почивати.

Муж некто родовитый в церковь не вхождаше.

празднику приспевшу, он в поле отхождаше.

В празднество неко презрев службу божественну,

иде бедник в дубраву, себе возлюбленну.

Ходит, ездит, тешится, внезапу преткнеся

конь на главу, всадник же на землю вержеся.

Глас слышан бысть демонский: Се ти, человече.

яко от литургии сердце ти утече.

Не пел еси Трисвяты песни со святыми,

пой же во веки: Горе, горе, яко и мы.

По сем гласе ов яздец, зело разбиенный,

бысть от тела душею скоро разлученный

Кроме покаяния Знамя се явися,

яко в вечну погибель грешник осудися.

Сего вси убойтеся, дни святыя чтите,

Божию честь Богови весма воздадите.

В празденство раб Господних благо ликовати

духовно, а не ясти, пити и скакати.

Нелепо бо есть чтити тех пресыщением,

иже угодни быша Богу лощением.

Празднование

Нива неделанная терние раждает.

вода нетекущая черви умножает.

Тако во уме праздне злы мысли бывают

и желания скверных делес ся раждают

Празность

Хврастие и терние та нива раждает,

на ней же плод насеян благий не бывает.

Тако нива сердечна в злых плодех преспеет.

аще ся полезными семены не сеет.

Прах отрясите

Иде же апостолов святых не слушаху.

изшедше из града их. и прах отрясаху

В знамя благовестия. ими укоренна.

яко отрясет оны рука божественна.

Паки, да явят труд свой ползы не имущий,

на презревшыя Себе гнев Божий будущий.

Еще в знамя, яко им ни праха хотети

от земля нечестивых с собою имети.

Наконец, яко имать казнь я отрясати,

яко от лица земли весть ветр прах веяти.

То же или в жизни сей. ли в веце грядущем,

на Страшном Суде, кроме милости будущем.

Пребывание

Аще хощеши, кто каков, познати,

зри. с ким обыче часто пребывати.

Аще со злыми, зол конечно будет,

аще с добрыми, в доброте пребудет.

Пребывание в Христе

Яко лоза розги си соком оживляет.

тако благодатию Христос укрепляет

Пребывающыя в Нем. А иже въне Его,

не могут благодати прияти от Него.

Яко и розги, яже лозы отпадают,

тука ея причастны не суще, ссыхают.

Пребываяй во Христе в солнце ся вселяет.

при Его же лучесех в мраце не бывает.

Паче, из света во свет вечный преселится,

из благодати в славу вечну водворится.

Истинна рече: Иже во Мне пребывает,

и Аз в нем, той муж плоды многи сотворяет.

Слово сие нелестно, но хощете знати,

кии суть плоды тоя Его благодати?

Первый — яко человек от грехов хранится.

ими же с Христом Богом сожитие тлится.

Вторый — яко на дела благая бывает

благохотен, со Христос иже пребывает.

Третий — яко прочыя может созидати

добронравием своим чрез дар благодати.

Наконец, ожидати мзды творит вечныя,

ею же обогатит Бог люди святыя.

Потщимся убо с Христом выну пребывати.

воеже бы нам плоды сицевы стяжати.

Предание Христа

Различными образы Христос предадеся,

Его же милостию человек спасеся.

Предаде И Бог Отец за любовь велику,

юже ко погибшему име человеку.

Того хотя из плена вечнаго изьяти,

изволи Сына на страсть лютую предати.

Паки, Сам Себе Христос Господь наш предал есть

послушанием, образ того нам подал есть.

Еще предаде Его Иуда лукавый.

сребролюбия ради богатства желавый.

Точне нечестивии жидове предаша

зависти ради, юже ко Христу держаша.

Преда Его и Пилат судия неправый,

страха ради жидовска суд лукав издавый.

Наконец, и демони Онаго предаша.

яко ся отщетити плененных бояша.

Непщеваху бо, яко. аще долго жити

в мире будет, и люди добротам учити

С праведною верою, может исхитити

паче, неже повнегда мертву Ему быти

Но прелстишася лестцы, ибо смерть Христова —

спасения и жизни нашея основа.

Аще бы не умерл Он. нам бы в плене быти

адском нужда лежала, и в тли смертней гнити.

А зане же волею Христос предадеся

всяко за ны, и род наш падший Им спасеся.

Потщимся мы волею Ему ся предати.

еже по вся дни верно Ему работати.

Предуставление

Вернаго человека предуставления

от Бога во жизнь вечну три суть знамения.

Аше воздержание от грехов имеет.

покаяния плоды достойная деет,

И дела творит жизни, надежда велика,

яко предустави й в жизнь вечну Владыка.

Прелесть

Егда Авеля убити хотяше

Каин, брата й тогда нарицаше.

Во устех брат бе. в сердце враг таися,

в поли бо Авель Каином убися.

Иоав точне Амеза лобзаше

усты, и брата себе нарицаше,

Но отай прелесть люту сотворил есть.

ибо мечь острый в чрево водрузил есть

Сисарру млеком Иаиль поила,

но спящу в главу коль острый вдрузила.

Христа Иуда усты целоваше,

ризою любве лесть си покрываше.

Тако иже яд смертный кому дают.

питий приятных в то употребляют.

Авесолом, сын царя и пророка,

точна под солнцем не имев отрока,

Егда отца си ринути хотяше

с престола царска. ков сицев творяше.

Обыче у врат отческих стояти

по вся дни рано и люди прелщати

Егда бо на суд кто к царю идяше,

он. объем главу, того целоваше

И глаголаше, яко он жалеет,

что человека отец не имеет,

Могуща правду в людех разсудити

и обидящих местию смирити.

Оле прелести! отца сын гаждает,

да ся во сердца народа въкрадает.

Что властолюбец лукавый творяше

Ирод? Егда весть о Христе прияше.

Яко родися хотяй царствовати

во Иудеи, нача умышляти

Ковы и козни. Волхвы призывает,

о явлении звезды вопрошает.

И повеле им искома искати.

обретше же И, весть к себе послати:

Да ся. рек, и аз поклоню Оному.

яко от Бога цареви данному.

Оле лукавства! поклон обещает,

а сердцем лестным убити желает.

Прелщение

Иерон во пустыни подвижно живяше.

чрез пятьдесят лет труды многи полагаше.

Молчание соблюде и всяко томися.

но напоследок врагом душевным прелстися,

Ибо вложи ему в мысль мнение о себе.

яко равен есть святым, живущым на небе.

И яко никоего бедства пострадати

уже может, тем нача безумно дерзати.

Верова. яко свыше аггели служите

снидут ему и от бедств всяческих хранити.

Во кладязь убо глубок волею вержеся,

но за гордость от аггел святых не спасеся.

Разбися падением, весма сокрушися.

и от извлекших дух в нем едва ощутися.

Иже познавше вину, яша увещати,

еже бы о гордости ялся сокрушати.

Но прелшей ожесточи сердце злопрелшенна.

не даде провещати словесе спасенна

Яко первее свят ся быти нарицаше.

и в ожесточении том конец прияше.

О коль неизследимы судбы жива Бога!

Кто весть, за что погуби сей лета толь многа?

Весь день века своего Господу трудися,

а в вечер согрешив. мзды всея отшетися.

Евва сведе Адама, плоть духа прелщает,

егда услаждением во извол евлекает.

Премена

Яко же нощь по дни обычно бывает,

тако по радости печаль наступает.

Праведници в мире сем обычно плачут,

грешници противным обычаем скачут.

Но в жизни будущей грешници восплачут,

праведници преко весело возскачут.

Богачь еваггелский в мире пресыт бяше,

Лазарь же пред враты глад лютый страдаше.

В оном преко веце Лазарь в хладе бяше,

богачь же во огни геенстем горяше.

Лазарь во сытости радостне почил есть,

богачь воды капли на язык просил есть.

Пременение

Егда человек о гресех ся кает,

Бог казнь готову в милость прелагает.

Егда же правый к злобе обратится,

Бог в гневе Своем на нь вооружится.

Пренебрежение

Ослу падшу господин тошно помогает,

а раба, во грех падша, тлети оставляет.

О пренебрежения! о осле радеют,

о души же брата си мысли не имеют.

Препоясание чресл

Чресла помышления нам препоясати

Петр святый завещает, и твердо стояти.

Препоясание же, во-первых, бывает.

егда кто в путь далекий себе устрояет.

Нам же путь в страну небес требе совершати,

убо нужда есть чресла си препоясати.

Паки, препоясуют чресла своя люди,

егда ся ими деют немалии труди.

Наши трудове зело велици бывают.

иже ся в славу Бога велика свершают.

Тем же есть лепо чресла ума поясати.

во бодрости Божия дела совершати.

Еще, иже ко брани себе устрояют.

обычно чресла своя поясом стисцают

Наша жизнь — брань присная со враги крепкими,

с миром, телом. демоном, а зело лютыми.

Убо. конечно, требе ум препоясати

и в дерзости на враги сия ратовати.

Напоследок, хотяще в служении быти.

обыкоша людие поясы твердити.

Наше же есть звание — Христу работати,

тем же должно есть чресла ума поясати,

Еже есть ума бодрость и верность стяжати.

охоту и готовость без споны держати.

На та четыри дела убо вси творите

препоясание то. а за труд мзды ждите.

Препятие в небо

Долгая риза в пути ноги запинает,

богатство души в небо спону содевает.

Отрежи, что лишнее, подражай Мартина.

подаждь нагому ради Божияго Сына.

Удели имения скудному твоего,

не лишен будеши мзды раздания сего.

Господь нищих, Христос Спас, имать ти воздати

земная небесными, и жизнь вечну дати.

Преселение

Егда кто во пустыни древо изкопает,

с ним убо купно ветви в сад свой пресаждает.

Древо есть Христос Господь, мы же — ветви Его,

потщимся не отторжни пребыти от Него.

Да с Ним во ад небесный преселени будем

в преселение, еже в концы мира людем

Общее имать быти, праведным в жизнь вечну.

грешным во ад огненный, в муку безконечну.

Пресыщение

Иже плоть свою пространно питает,

похоти злыя в себе умножает.

Пресыщения злоба тако умножися,

яко едва не всяка тем душа растлися.

Вси чреву неистово тщатся угождати,

едва не все блаженство на том полагати.

То чревонеистовство может звано быти,

яко невесть сытости меры положити.

Шесть же числом образы ту ся обретают,

иже в грех человека пред Богом вревают

Грех есть, аще заповедь Церкве преступаем

и в дни возбраненныя чрево насыщаем.

Грех — и сотворенныя отбеты ломити,

нужду совести своей сластми сотворити.

Грех есть, и егда мера презренна бывает,

поне же вред телеси и душе творяет.

Телеси во здравии вред мера велика,

душу в разсуждении вредит человека.

Грех — и не по чину си сласти устрояти,

и тех ради во нуждных скудость зле страдати.

Грех — часто, безвременно сластем ся вдаяти,

на месте неприличне тех употребляти.

Грех — и завистно ясти за сладость самую,

и блаженство с питием непщевати тую.

Греху же последует казнь выну от Бога,

во-первых, чревобесным болезнь плоти многа.

Та же ума. памяти есть помрачение,

ко богомыслию же неугождение.

И Бог несытство люте обыче казнити,

яко обыче грехи то многи родити.

Прародителя в рай плод древа снедоста,

но породы райския за то отпадоста.

Жидове во пустыни пищь многих желаху,

отмщение от Бога за сие страдах у.

Пророк яко в Вефили брашном причастися,

возвратився в своя си. от зверя убися.

Богатый еваггелский. иже пироваше.

от огня во геенне злолюте страдаше.

И Вавилон колико в сластех величася,

толиких мук, печалей, суд ему сказася.

Исав яко на пищу несытно стремися,

первородства своего напрасно лишися.

Тако страсть несытная благ многих лишает,

всяк убо благоверный тоя да гонзает.

Претворение

Прилежяй Демосфину ветий сотворится,

слушаяй же Платона философ явится.

Тако иже Господу себе покаряет,

в бога плотска на земли себе претворяет.

Преходят вся

Что-либо в мире украшает тело

и на что оку зрети есть весело,

подобне сени, все то претекает.

след не остает.

Ли яко гонец, скоро пребегаяй

и на един час нигде почиваяй.

вся мимо идут, печаль оставляют.

не утешают.

Еще, подобне кораблю текущу.

морския воды носом си секущу,

иже океан всескоро преходит,

следа не родит.

Мощно и орлу быстру уравняти,

иже есть силен всескоро летати.

и недовидне стреле, в цель идущей,

аер секущей.

Напоследок же, яко изчезает

безплодный облак. а не одождает

нив земных, тако все. что в мире красно,

тлится напрасно.

Приближение ко Богу

Удалейся от Бога скоро погибает,

яко слепец без вожда во яму впадает.

Хотяй же паки себе к Нему приближити

долженствует сицева делеса хранити.

В первых, от диавола отступити требе.

тако милость у Бога приобрящет себе.

Иже толико Ему с тою приближится.

елико от демона зла он удалится.

Паки, нужда себе есть самаго смиряти.

за то бо Бог обыкл есть благодать даяти.

Еще, покаянием нужда очищати

душу от грехов скверных, и тогда чаяти

Милости от Господа, иже не приходит,

иде же греховная скверна порок родит.

Пречистый Бог чистыя есть души любитель,

а от сквернолюбивых далече Спаситель.

При сем, любовь теплую требе есть имети

ко Господу. яко же к отцу имут дети,

И дела, достойная любве, содевати,

с сицевым любит Господь мужем пребывати.

Напоследок, молитвы должно есть творити

и ко совершению волю устроити.

Сии — приближения степени до Бога,

сими обретается милость Его многа,

В ней же да даст нам Господь выну пребывати

и никогда от нея в грехи отпадати.

Да раби со Господем выну пребываем,

а врага диавола славно побеждаем.

Прибыток

Прибыток, иже с грехом. есть тщета велика,

ибо душу грешнаго губит человека.

Прилог грехов

Арсений святый в пустыни живяше

и о житии человек мышляше.

В едино время услыша: Изьиди,

человеческа дела в притче види.

Изшед же святый, ефиопа зряше.

се секирою той дрова сецаше.

И налож бремя, хоте то подъяти.

но за тяготу не возможе взяти.

Помыслив себе, да бы облегчити.

потщася древес еще приложити,

И множ идею то дело творяше,

даже муж святый удивился бяше

Чернаго мужа безделной работе.

яко тяготу прилагал тяготе.

Сей же ефиоп люди знаменаше.

черныя грехми, яко он черн бяше.

Иже. велико бремя грех носяще.

не хощут от злоб престати, творяще.

Еже у главы онех превосходит.

обаче грешник грех ко грехом плодит.

Тако бывает преобремененный,

даже нудится быти погруженный

В море геенны и в нем исчезати.

Божия света никогда видати.

Ты, Христе Боже, донде же есть время.

изволи снята с нас толико бремя.

Да облегчени работаем Тебе

и хвалим вечно Тебе в светлом небе.

Примирение

Аще оскорбил еси ближняго твоего,

потшися примирите сердце к тебе его.

Да не буде ж Господем дар твой отверженный,

иже Ему за грехи твоя принесенный.

Аще токмо мыслию оскорблен тобою,

токмо убо онаго примириши тою.

Сиречь, аще ненависть к нему есть храненна.

да будет та во любовь праву преложенна.

Аще же и словом он чрез тя озлобленны,

смиренным же да будет словом примиренны.

Наконец, аще делом чрез тя оскорбися,

делом и примирите онаго потщися.

Тако же сотворь, дерзай со даром предстати

Господу, иначе бо не имать прията.

Причастие

Причащение Таин верным подобает,

ибо тем Христос Господь душы оживляет

Сохранително от грех. смертоносных сущих,

от преданных в непамять и быти могущих.

Кто же оживления не желает себе?

зане мертвым душами нелеть быти в небе.

Духовне. таинственно, и купно обое

приемлемо есть Тело Христово святое.

Духовно то приемлют, иже не дерзают

грехов ради прияти, а сердцем желают.

И яже недуг нудит пречасто блевати.

сицевым Таин святых невозможно дати.

Аще суть и при смерти, обаче спасени

будут, благодати бо Таин не лишени,

Поне же приятия тех сердцем желаша

и в благоговеинстве себе готоваша.

Еще не могущий грех исповедати

за скудость иерея, и Таин прияти,

Аще сокрушение сердцем сотвориша,

духовно сиды Таин причастници быша.

И их же духовнии отци отлучают,

а они в смирении мнозе пребывают.

Желающе Таинства Христова прияти.

и не приемлющым Бог подаст благодати.

Таинственно же телу Христову бывают

причастници, иже е примата дерзают.

Знающе грехи смертны на душах си быти,

ибо сим благодати несть деть получити.

Приемлют убо Тайны, но в суд и смерть себе,

тыя бо не во гресе приимати требе.

Но чрез покаяние благодать стяжавшым.

постом и молитвами демона прогнавшым.

Таинственно же купно и духовно тыя

приемлют человеци Тайны пресвятыя.

Егда и самех Таинств снеди сподобятся

и действа их духовна общници творятся.

Сие есть причастие всяко совершенно,

то нам в год смерти буди прияти спасенно.

Велия милость Бога всещедраго бяше,

егда Израилтяны манною питаше.

Вящшая христианом ныне ся явствует.

елма Сам Себе Христос во пищу дарует

Под виды хлеба, вина в Тайне божественной.

многия ради ползы верным устроенной.

В первых же, тую пищу должно нам вкушати,

да Жениху душ наших можем спребывати

Любве сьединением. ту бо мы Онаго

восприемлем во сердца духовно Самаго.

Паки, да от недугов будем уздравлени.

суще стрелами грехов смертно уязвлени.

Ту бо и Врачь небесный к нам Ся приближает

и врачевство животно в плоти Своей дает.

Еще, да бы чрез сию жертву утолити

гнев Отца небеснаго, милость же влучити,

Умилостивителна сия бо есть жертва

и живит человека, суша грехи мертва.

К тому, да в тайне сущим Христом свободимся

от скорбей настоящых елма причастимся.

Выше того, благодать да можем прияти,

юже с телом Си Христос обыче даяти.

К сим, да благодарствие Богу Отцу явим,

егда бо Сына Его во сердцах представим

Наших жителствующа, сладко Ему дело,

Сына ради вся творит, зрит на ны весело.

По сих, и преставленным да милость упросим.

елма ту жертву о них Господу проносим.

Ничто же бо ко Отцу толь благо глашает,

яко же кровь Христова, да я в рай вселяет.

Наконец, изряднейший сего конец дела,

пием кровь Христа Бога и вкушаем тела.

Да, преобразившеся в Христа, Христос како

живяше добротворно. и мы живем тако.

Добродетелми Его да преукрасимся,

и любезни превечну Отцу сотворимся,

Да, яко же Иаков ризами первенства

братняго взял есть отчя глас благословенства,

Тако, в доброт Христовых ризы облечени,

мы Богом Отцем будем у благословени.

Сия суть вины, их же ради есть полезно

часто восприимати брашно пренебесно.

Убо к Тайнам Христовым мы да не ленимся,

но часто приимати я любезно тшимся.

Причаститися како

Змиев род некий яд свой извергает,

егда ся к воде живой присмыкает.

Сице нам мудрым подобает быти,

егда желаем воду живу пити

От источника Таин божественных,

во спасение верным устроенных.

Всяк грех, яко яд, требе отметати,

гнев отлагати, чисто приступати.

Пришлец человек

Пришелци в мире есмы, егда бо ся родим,

мало время поживше, во ин век отходим.

Сие нам есть полезно выну поминати.

к суетам мира сердцем ся не прилепляти.

Но тако посреде их со опаством жити.

аки абие нужда есть оны лишити.

Яко же путник течет, красоты лишая

селныя и ограды светлыя миная.

Точию же ко граду намеренну тщится,

мимоходне из путных красот веселится,

Тако и нам мирская нужда есть лишати,

токмо концами перстов оным ся касати.

Все же намерение в небо устремити,

к тому в благих делесех шествие творити.

Продаяние церковных

Во стране Вавилонстей село неко бяше,

еже к Римстей соборней Церкви достояше.

Оттуду дань валсама воннаго носися.

иже при гробе Петра святаго палися

В лампаде цело лето, церковь озаряше

и благовонием си люди услаждаше.

Послежде папа некий то село продал есть,

светило валсамово на злато отдал есть.

Досада бысть святому Петру превелика

от златолюбиваго велми человека.

Но не туне то прейде, излиха отмстися,

ибо. елма лакомец пред гробом молися,

Явися ему честный мужь и украшенный

сединами брады си. яко божественный.

Иже возрев на папу, тяжко заушил есть

и со грозою слово сие изпустил есть:

Ты светилник на земли мой угасил еси,

аз твой сгашу пред Богом светилник в небеси.

Сия рек, бысть невидим. Папа же свалися

на землю и по мале живота лишися.

То разсуждайте, иже веете продерзати

имения церковна за злато даяти,

Найпаче кроме нужды. Сами ся щадите,

да не мстит владяй домом того ся блюдите.

Проказа

Прокаженныя люди древле изгоняху

ис полков Израилских и вне их вселяху.

Донде же очищенным от проказы быти.

тогда бо волно бяше в полк ся возвратити.

Прокаженни суть, иже в злобе пребывают

и иныя злобою своею вреждают.

Сицевы из общества требе изгоняти,

еже бы прочым от них вреда не прияти.

Удалени от благих, да ся исправляют,

аще во общение приити желают.

Трегуба проказа в Иудеи бяше:

плоти, домов и риз. та бо оскверняше.

Точне духовная трегуба бывает,

яже многи люди сквернит, умерщвляет.

Плоти есть проказа блудодеяние.

всех вид нечистоты неотбегание.

Проказа есть дому, елма злыми нравы

дом некий растлится с пороком неславы,

Яко блудилища или корчемницы.

в них же злая деют злии пияницы

Проказа ризная тыя оскверняет,

излишествовати яже враг прелщает,

В множестве риз светлых. и изобретати

образы новыя, како сострояти

Паче обычая, цены не щадяще,

имению тщету многу наносяще.

Проклятие

Апостоли святии яже проклинаху.

в измождение плоти демоном даяху.

Попущением Бога тии зле страдаша,

абие бо демони оны похищаша

И тяжкими муками тело их дручиша.

донде же прощение слезми получиша.

Амвросий святый о сем мирови вещает,

ему же Феодорит согласен бывает.

Промысл Божий

Дивне Господь о людех Своих промышляет

и в последних потребах помощник бывает.

Случися иерею некогда ходити

чрез горы Алпииския и в лес заблудити

Во время зимы; к тому, в ров великий пасти

и не мощи из тоя излести пропасти.

Чрез дни некия тамо хлад и глад страдаше,

подлез под камень висящь, смерти ожидаше.

В нощи луна возсия, и се змии мнози

пресмыкаются мимо лежащаго нозе.

Ползут ко некоему каменю, языки

лижут чрез неко время той камень великий

И по часе в ямины своя ся вращают,

сие же чрез три нощи рядом сотворяют.

Бедный иерей нача в себе помышляти,

яко не всуе ходят каменя лизати.

Востав, прииде к нему, такожде лизаше,

абие в себе крепость от того познаше.

Без пищи насыщен бысть. и возвеселися.

благодаря Бога, тем каменем живися

До месяца априля, во нь же наидоша

случаем людие. и его извлекоша.

О Господи всещедрый! коль милосерд еси.

из зуб смертных бедныя исхищати веси.

Проповедник

Егда проповедник грехи обхуждает,

любо грешащу нож в язву въдружает.

Кто от недостойнаго честно отлучает,

той муж яко же уста Божия бывает.

Но то проповедници слова содевают.

егда от злоб к благости люди обращают

Увещанием своим; того ради звати

леть я уста Божия и честь воздаяти.

Слушати словес онех конечно есть требе,

яко же изходящих из уст Суща в небе.

Ибо и Христос рече: Иже вас слушает,

о апостоли. Моя словеса внушает.

Проповедници слова како имут жити

и какови учимым людем должни быти?

Божественный Василий оны наставляет,

елма добронравия им правило дает.

В первых, яко пастыри овцам да бывают,

в нужде да своя за ня душы полагают.

Паки, яко врачеве должни оным быти,

всеснисходно болезни душевны целити

По завету Господню, да в устрабление

приведут душы онех и во терпение,

Яко силнии слабых немощи носяше

и за любовь Христову досады терпяще.

Еще родителскую любовь проявляти

должни и, яко чадом своим, угождати,

Словом благовестия сладко питающе,

и живот свой за онех живот отдающе.

К сим. яко споспешници Богу имут быти,

в обращении людей тощно ся трудити,

Работни творящеся за Церковь Божию.

да делесы благими разширяют сию.

При сем насадители древес да бывают

словесных в саде Церкве. ли да прицепляют

Рождие к Христу Спасу, Древу благу сущу:

Аз Лоза, вы рождие, яве глаголющу.

Вредныя да от древа ветвы отсецают

и плодотворящыя вся да отребляют.

Наконец, зодчым точни они да бывают.

Церковь Божию в славу Его назидают

На камени, иже есть Христос божественный.

в основании Богом Отцем положенный.

Сей долг — проповедников, о нем же помните,

иже ся учители в Церкви быти мните.

Пророк

Род Израилск Божия гласа не терпяше,

да Моисий к ним глаголет, не Сам Бог, прошаше.

Бог же обещался есть им пророка дати.

точна Моисию. и тем к оным глаголати.

То же обещание делом исполнися.

егда во Вифлееме Христос Бог родися:

Подобен Моисиеви приятием тела,

Иже паче Моисия творил чудна дела.

Бог бо есть по существу, обаче смирися,

не на горе, но в худе пещере явися.

Не в величестве славы, но во смирении,

промышляя о нашем от грех спасении.

Не на горе горящей огнем показася.

но в скотских лежяй яслех, пелены связася.

Не во гласе труб страшных, но яко младенец,

молчяй или рыдаяй. Левыя первенец.

Не в молниих и громех, но егда молчаху

всяческая, во среде нощи тиха бяху.

О смирения многа Бога превелика!

Нам бысть точен плотию Царь всех и Владыка.

Смиряйтеся убо вси. Христа подражайте.

Бога паче И, неже пророка вси знайте.

Пророчевство

Три вещи пророчество быти содевают,

яже вся имущии, пророци бывают.

Единей же не сущей, не могут ся звати

пророци. Тыя же суть, хошете ли знати?

Во-первых, подобает взяти видение

будушых от Господа чрез откровение.

Паки, то видение подобает знати,

что им благоволил есть Господь знаменати

Третее — да умеет людем изьявити,

еже Господь изволи оному открити.

Навходоносор виде сон. но не сказаше

людем, яко забыл бе и тайны не знаше

Того ради не может пророк прозван быти,

не изводи Бог его тем даром почтити.

Фараон виде седмь крав и паки другое,

и кдасов тодикожде, и сказал есть тое,

Но яко толковати сна си не можаше,

в сословии пророков места не прияше.

Каиафа ничто же откровений взяше,

ни же разуме, токмо усты провещаше.

Яко за мир едному достоит умрети.

тем титлы пророчества не может имети.

Может же пророчество и чрез грешных быти.

егда во ползу Церкве Бог хощет явити

Нечто сокровенное, а не в ползу того

особную изволит сказати чрез кого.

Не вси убо суть святи, иже прорицают,

неции Валааму подобии бывают,

Иже, аще идолов почитатель бяше,

обаче пророчески глаголы вещаше.

Просим и не приемлем

Просите, и дастся вам. Господь глаголаше.

обаче не коеждо прошение наше

Исполненно бывает. Что же сего вина?

Разсудим и обрящем, яко не едина.

Первая — не крепкое есть упование,

вторая — не частое Богу стужание.

Третия вина — яко не сличных желаем.

четвертая же — яко в гресех пребываем.

Пятая — благословна сия может быти.

яко негли то просим, что может вредити.

Убо, аще от Бога хощем что прияти,

зрително, да на могут сия препинати.

Просити

Несть требе богатств у Бога просити.

токмо бы в нуждных удовленну быти.

И Соломон бо онех не прошаше.

точию да бы не был нищь. моляше.

Богатство гордость во сердцех раждает.

нищета бедных красти понуждает.

О средство убо Господу молися

и неленостно рукама трудися.

Даст Бог доволство. ты же не забуди

нищыя хлебом насыщати люди.

Просити полезных

Просяй полезных от Господа Бога

та восприемлет и ина премнога.

Соломон яко мудрости прошаше.

не злата, ни душ недруг си моляше,

Угоден Богу зело проявися,

прият премудрость, овех не лишися.

Просвещение

Вскую мнози людие не у просвещени,

в стане суть погибели, яко не крещени?

Вскую к ним апостолов Господь не послал есть

и на путь спасения многих не призвал есть?

Не вопрошай испытно, несть вина известна.

токмо яво воля си есть Царя небесна.

Иже. не просвещая, обиды не деет,

кто бо должна И на то нарещи посмеет?

А яко ины светом веры просвещает.

не долг то заслуг платит, но милость являет.

Прошение

Триех вещей достоит найпаче просити

от Христа Бога, да бы изволил творити.

Да грехи прешедшыя щедро оставляет,

в настоящих случаех от них сохраняет,

От хотящих же быти да соблюдение

дарует спасения во получение.

Прошение неполезное

Иоанн со братом дерзнуста просити

у Христа чрез матерь, да бы има быти

Седящыма при Нем отсюду и сюду

во царствии Его, но ничто оттуду

Весело слышаста. Паче рече: Чашу

имата испити в ваю время нашу,

Ею же изволи страсти знаменати,

яже за Нь иместа от враг пострадати.

Прощение

Царь Феодосий егда грех кому простил есть,

себе то во благодать Божию вменил есть.

Царие мира рабом не скоро прощают

грех и казнь, егда на них гнев свой возлагают

И аще ходатайством многим утолятся.

не абие лицем си светло им явятся.

Авесолом во образ буди приведенны.

иже, аще за вину отцем бе прощенны,

Обаче чрез две лете царя не видяше.

пред лицем его стати припущен не бяше.

Не тако Царь небесный с нами поступает,

ибо покаявшымся скоро грех прощает

И ко трапезе Своей обыче пущати

телом и кровию Си во Тайнах питати.

Припушает ны к Себе и Сам во нас входит.

божественну благодать в душах производит.

Ни к тому содеянных грехов поминает,

но аки не грешивших любит, соблюдает.

О щедрот божественных! о милости многи!

Кто убо не припадет под Христовы ноги.

Слезы лия о гресех с блудною женою,

да прощение грехов получит с оною?

Аз ноги Твоя, Христе, умилно лобзаю,

стеню от сердца слезно и горце рыдаю.

Прости мя грешна о всех. неугодных Тебе.

и сподоби трапезы вечныя на небе.

Дажд ми лице светлое Твое созерцати,

с угодники Твоими Тебе величати.

Пря

Елма словопрение начинает быти,

ты же хощеши правый победитель быти.

Победи прежде тебе, потщися молчати.

тако скоро можеши победу прияти,

Вси бо тя мудра, кротка станут нарицати,

спорници прошения смиренно желати.

Пустынник прелщенный

Человек некий велми богат бяше.

сына же токмо едина имяше.

Иже от девства добру обучися,

кроток бе нравом, книгам научися.

В юности мира прелести познал есть.

тем во пустыню ити возжелал есть,

Еже Богови тамо работати,

да бы жизнь вечну в небеси прияти.

И яко мыслил, тако сотворил есть.

во места пуста в путь ся заступил есть.

Егда же дому отча удалися,

слезно Господу Богу помолися,

Да благоволит место показати.

на нем же могл бы труды полагати.

И се вънезапу орел прилетел есть.

являя себе, яко он хотел есть,

Путем вести й и место сказати,

иде же ему Богу работати.

Он орла видя, готоваго ити

на службу ону. мнил аггела быти,

И камо орел пред онем летяше,

тамо юноша надеждно идяше,

Даже приити на место некое.

житию его зело угодное.

Иде же финик плоды издаяше,

при нем источник изрядный течаше.

Ста ту юноша, даде хвалу Богу

за проявленну ему милость многу,

И нача тамо благочестно жити,

в посте, в молитвах и во трудех быти.

Имея пищу от того финика,

его же дал есть небесный Владыка,

От источника жажду утоляя.

труды же трудом выну прилагая.

Тому завидя враг делу благому.

нача строити козни си оному.

Во мужа путна лстивец претворися

и к пустыннику тому приближися.

Притворив себе утружденна быти.

аки хотя ту немного почити.

Потом прилежно на мужа смотряше

и сам до себе сице глаголаше:

Не он ли се есть, о нем же труд дею,

толико иский, но искус содею.

И приближився. паче познаваше,

и аки познал, слово си вещаше:

О святче Божий, коль много трудихся

аз, тебе ищя. днесь же сподобихся

Обрести тебе. Ныне ми есть благо,

яко обретох долго искомаго.

Пожих во отца аз твоего дому,

при мне случися умрети оному.

Богатства многа по нем ти остают.

еже сродници забрати желают.

Но между ими зла пря сотворися,

негли у много и крове пролися,

И не есть мощно брани в них не быти.

аще ты, дедичь, не имаши ити,

Еже богатва наследно прияти

и брани люты в сродницех препяти.

Зри, чия душа винна будет крови,

ты ответ даси конечно Христови.

Сугубо добро леть ти сотворити:

первое — в сродстве вражды утолити.

Та же богатства, яже приимеши.

нищим раздати спасенно можеши,

За что ти въдвое мзда будет от Бога

в жизни будущей, в ней же радость многа.

Сия пустынник слышав, удивися,

како позна й, и право явися

Вражие слово, козни не познаше,

ити в дом отчий с онем предприяше.

Прелстися, увы, Богу работавый,

помрачи очи ему враг лукавый.

Яко не могл есть коварства познати

и крестом честным лстителя прогнати.

Пустися бедный пустынник до дому,

и внегда с врагом приближися к тому.

Враг невидим бысть, он же в дом идяше,

отца си жива суща созерцаше.

Ту лесть позна он, но в себе смутися,

в пустыню паки жити не вратися,

Но мирски избра живот провождати,

в сладостех плотских житие кончати.

Жив же в дому си. в злобы распустися,

заслуг прешедших и неба лишися.

В отчаянии житие скончал есть,

покаяния знамене не дал есть.

Тако диавол умеет прелщати

и многи труды в ничто обращати.

Не иже убо благо начинает.

но кончай добре, увенчай бывает.

Благ ли начаток? Лучше окончите.

тако небесный венец получите.

Пустыня

Миряном звери лов суть во пустыни.

Бог же — корысть в ней тщателем святыни.

Путь

Скори суть ноги лукаво текущих.

велми же косны в благости живущих.

Ови, что птица, путь свой совершают,

сии, яко желвь, едва ся двизают.

Но сих цель — небо, овех же — огнь вечный,

обою конец будет безконечный.

Скорее к смерти путствуют грешници.

нежели во жизнь идут праведници.

Овех бо путь есть во юдоль глубоку,

сих же — на гору излише высоку.

Пути пространна несть требе искати.

сам он доволен себе представляти.

Блудящих то путь. Тесна ели мощно

обрести людем и ищушым тощно.

Но и обретше, мали начинают.

а много менше, иже совершают.

Едва бо не вси въспят идут ко сластем,

угаждающе телес своих страстем.

Путь пространный

Широка врата и путь есть пространный,

множеством людей к аду утоптанный.

обаче и он путных утомляет,

мудрец вещает.

Трудный и той путь, обаче им тщимся,

в горестех его безумне сладимся,

яже духови зело досаждают.

в огнь устрояют.

Труден путь гордых, ибо имать горы

достоинств, честей, ходящым нескоры,

их же без пота несть леть преходити,

труд чрез ня ити.

Труден лакомых путь, ибо бодущым

тернием богатств досаден грядущым,

богатство зело держящым стужает,

печаль раждает.

Труден и тех путь, иже блуд творяют,

яко бо вепри в блате ся валяют,

тако и они во сквернах си тлеют.

ко аду спеют.

Путь завистников зело затрудненный,

ибо есть мраком лютым затемненный,

поне же зависть умы ослепляет.

в бездну вревает.

Путь сластолюбцев, чреву си служащих,

зело жесток есть, и чаши гонящих,

ибо вся своя скоро иждивают

и жизнь скращают.

Что о гневливых пути глаголати?

Той не обыче без скорбей бывати,

велми мятежен, покой возмущает,

огнь возгнещает.

Путь же ленивых и унылых зело

никогда может тешися весело,

ибо лежати выну убеждает,

хлад, глад раждает.

В конец же всех их кое пристанище?

Вечно слезное адское огнище,

иде же будут путници ввержени.

во веки жжени.

Оле всезлаго пути окаянна!

Не буди земля та никим топтанна

Самому врагу сей буди известен,

нам же невестен.

Нам уне узкий путь прешелствовати.

аще и нужда нечто пострадати,

в конце бо его жизнь вечна сияет,

нас ожидает.

Путь пространный и узкий

Миролюбии пространно обыкоша жити

и препространным путем желают ходите.

Узка же в небо врата, тем я презирают,

и стезя тесна к нему, тем ю оставляют.

А в конце пространнаго пути смерть есть вечна.

в конце паки теснаго жизнь есть безконечна.

Обаче мнози путем пространным шествуют.

аще и смерть вечную в конце наследствуют.

Мали же путем тесным бег свой совершают,

тем немнози суть, иже живот получают.

Вы, братие, на время тесноту любите.

на пространство вечное разумом смотрите.

Лучше есть мало ныне тесноту страдати,

а в будущ век пространство вечное прияти.

Нежели днесь пространно мало время жити,

а во грядущем веце в тесном аде быти.

Путя два

Два путя еста в подсолнечней стране,

има же идут в вечность христиане.

Един путь жизни, смерти ин зовется,

добродетелми ко овей течется.

Преступлением заповедей Бога

прямая к смерти душевней дорога.

Жизни вечныя той путь совершает,

кто мира сего прелестей гонзает.

На пути смерти той есть утверженны,

иже суетствы мира есть прелщенны

Зри убо кождо, что в ползу избрати,

жити ли вечно, или умирати?

Пути три к Троице

Три пути, иже к Богу провождают,

теми людие Троицы достизают.

Первый путь сердца есть сокрушение,

вторый — грехов си чисто явление

Отцу духовну. без утаения.

Последний путь есть доблетворения.

Сими кто-либо право путми ходит,

к Богу едину во Троице приходит,

Милость от Него вечну получает.

ибо наследник царствия бывает,

И жизнь вечную приемлет на небе,

сими да ищет кождо жизни себе.

Пути непостижнии четыри

Мудростию от Бога царь преукрашенный,

от царя и пророка Давида рожденный.

Всех негли вещей може естества познати,

обаче сих четырех не може пояти.

Следа среде воздуха орла парящаго,

и пути по камени змия плежащаго.

Еще, стези по морю корабля пловуща,

такожде пути мужа, во юности суща.

Трудна убо суть сия. и во благодати

что же духовне могут нам знаменовати,

Амвросий божественный Церкви изъявляет,

яко светило, умы верных просвещает.

Путь, глаголя, чрез воздух есть вознесение

Орла Христа в светлое небес селение.

Путь змия по камени — Его же въстание

из гроба, а печати нерастерзание.

Путь корабля на мори есть пребывание

Его в мире, что в мори, и волн страдание.

Путь же мужа в юности — зачатие в чреве,

яко безмужно в чистей воплотися Деве.

Воистинну немощно всех сих разумети,

мудрии немотствуют в сих, яко же дети.

Нам во непостижимых довле ся дивити.

сия сотворша Христа на всяк час хвалити.

Путник

Путник обыче три вещы хранити.

да бы безбедно путь свой совершити.

Несома сребра никому являет,

но всячески то тайно сохраняет.

В гостиннице став, опасно хранится,

да гостинником никако прелстится.

Себе самаго не обременяет,

да путь приятый легко совершает.

Путници мы зде, отчество нам в небе,

убо ты вещы хранити есть требе.

Сребра дел благих никому являти,

точию Богу вестна соблюдати,

Да, видя тайно, возмездит я яве

в хотящей быти верным в небе славе.

Аще же тая будем изьявляти,

то беду весма имамы страдати.

Ибо разбойник в пути усмотряет,

да, та восхитив, самы убивает.

Паки нам нужда и то усмотряти.

от гостинника да бы не страдати

Лести и смерти. Сей же мир есть лестный,

являяйся нам быти зело честный.

Но лстит он выну, сладкая вещает.

и, яко Христа — Иуда, лобзает.

Кормит и поит и чести доводит,

но в конце жизни в дно ада низводит.

Наконец, бремя возлагати себе

в путь не тяжкое, но легкое требе.

Елико нуждно. довле есть носити,

прочее богатств нищым разделите.

Тако возможно путь благо свершите

и во отчество небесное внити,

В нем же нам помощь Сам даждь, Христе Боже,

а ты заступи, Марие Госпоже,

Молитвами ти у Сына и Бога.

да не лишит нас небесна чертога,

К нему же в слезах многих воздыхаем

и тебе в помощь, Лево, призываем.

Пчелы

Во пчелах началная жала есть лишенна,

началным безгневия в образ устроенна.

Пытливость

Зряй в светло солнце очеса вреждает.

пытлив о Бозе ум свой погубляет.

Песнь

Царю стран земных и в пресветлом небе,

слава в Сионе готова есть Тебе.

Тамо обети, иже обещанни,

будут Ти данни.

К Тебе. Иже молб не презераеши

во плоти сущих, паче внушавши,

приити имут, славу вси несуще

и песнми чтуще.

Древния ныне злобы нам стужают.

но раби Твои на Тя уповают,

Боже всещедрый, яко нас простиши,

милость явиши.

Блажен, его же избрал еси Тебе

за друга, имать той жити на небе.

И мы от благ Ти чаем полни быти,

в храме Ти жити.

Услыши, Боже щедрый. Твоя люди,

в мире живущих Ты надежда буди,

иже пучины моря преплавают,

Тя помощь знают.

Горы Тобою ставлены бывают

и воды моря волны возвыжшают

от глубин своих. Ты люди кротиши,

мир в них твориши.

Твой гром престаашный люди ужасает

и в концех мира страх мног содевает.

Утро и вечер Твой свет озаряет,

возвеселяет.

Промыслом Твоим вода прохлаждает

землю, а она плоды прозябает.

Реки вод полны Тобою бывают,

вся оживляют.

Ты росу нощну веси низпущати

на землю суху и дождь изливати.

Благословиши Ты безчисленному

плоду земному.

Ты венец лета Сам благословиши.

множеством плодов онаго красиши.

Тобою из нив нам полность бывает.

мир насыщает.

Пустыни красны, горы веселятся.

Тобою стада животных множатся.

Юдоли плодны, а кто засевает,

песнь восклицает.

Песнь Богу

Им же сердце полно, уста изливают,

еже в нем зачася, то устне раждают.

Вы песнь Богу в сердцах ваших зачинайте.

ту хвалами многу чрез устне раждайте.

Да за песни хвалы во певцех небесных

получите славу во Божиих десных.

Песнь о святом Феодоре Стратилате

Хвалити Бога в святых подобает.

Иже я славы венцем украшает

И дает силу враги побеждати,

преестественно муки, смерть страдати.

Во Феодоре Стратилате убо

хвалити Его зело нам есть любо,

Яко дал ему крепость превелику.

благородному бывшу человеку.

Ибо Феодор силою Онаго

убил есть змия излиха лютаго.

Иже живыя люди поглощаше,

яже род Еллинск ему пожираше.

И Ликиния царя посрамил есть,

иже идолом жертвы приносил есть.

Идолы его сокруш, обругал есть,

в препитание злато нищым дал есть.

Много ран прием, кресту пригвоздися,

от множества стрел умерщвлен явися.

Но аггел Божий с креста й снял бяше.

он же народу Христа прославляше.

Обрати многи во веру святую,

царь веле главу отсещи честную.

Умре он убо за истинна Бога,

чюдеса бяху тогда зело многа.

Умер же миру, нача небу жити,

с аггелы вечно Господа хвалити,

Иде же живя, Феодоре святе.

молися Богу, честный стратилате,

О Феодоре царе православном.

Российским странам Богом дарованном.

Да подаст ему многа лета жити.

лютаго змия мечем поразите,

Иже царствия многа поглощает

и на ны ныне прелюте зияет.

Потщися в помощь ты на того врага,

отжени его от Российска прага.

Тезоименник твой да веселится.

род верных славен в силе да явится.

Церковь святая да возторжествует.

победителны песни восписует,

Во-первых, Богу, потом же и тебе,

егда тобою помощь стяжет себе,

О ней же к Богу царь руце возносит

с людми, и тебе о молитвы просит.

По имени ти Божий дар нам буди,

соблюдай царя, сохрани и люди

Правоверныя от меча поганска,

буди Стратилат рода христианска.

Стани сопротив врагом невидимо,

моли, да Божий гнев прейдет мимо

Без вреда верных, смирит же поганы,

да аггел Его будет с христианы.

Воинства окрест страшно ополченны,

им же да будет враг наш побежденны.

Мы тя за милость потщимся хвалити,

а в тебе Бога всех Царя славити.

Яко благ всяких Виновника суща

и безконечно всем Царя будуща.

Петель оживе

В Бононии неции друзи пироваху,

петеля на трапезу принесенна зряху,

По членом разрезанна. Яша глаголати:

не леть сему петелю целому востати

Чюдодействием Петра, паче, ни Христово

может й воскресити пресилное слово.

Сия им глаголющым, петель исцелися

Божиею силою и жив поставися.

Вострепетав же крилы, юхою полил есть

оны, а Бог проказу на ня напустил есть

Казнь дея словес хулных, и да впред вси знают,

что о Христе и Петре в беседах вещает.

Пети разумно

Иже словеса псалмов тако разсуждает,

яко сладости брашен гортань познавает.

Той Господу своему, живущему в небе,

поет разумно, яко всем пети есть требе.

Иже словеса псалмов тако разсуждает,

яко сладости брашен гортань познавает.

Той Господу своему, живущему в небе,

поет разумно, яко всем пети есть требе

Но поне же не всем есть дано разумети.

како незнающий могут псалми пети?

Всяко ли убо оным нужда есть молчати,

никако с поющими гласа воздвизати?

Сие вопрошение сице разсуждаю;

чтый веру да имеши, ибо не прелщаю.

Воистинну лучше есть тако Богу пети,

да бы пения разум во главе имети,

Да не усты точию Господь Бог хвалится,

но и первее умом чистым да славится.

Внешнии и вънутрнии Онем человек созданны,

сей и ов в Его хвалу да будет отданны.

Яко листвие — хвала, яже с уст исходит,

яко плод — юже сердце чистое изводит.

Богу же не листвие, но плод подобает,

сей приятен, не ово Оному бывает.

Недоволен во Ветсем Он Законе бяше

жертвами кожь животных, тех не приимаше.

Но с мясом купно кожу изволи приимати,

та угодна бе жертва Его благодати.

Кожи устно пение мощно подобити,

мясу же сердца хвалу леть точну творити.

Без сея убо оно в жертву не бывает

всеугодну, обое нести подобает.

Обаче, читателю, и сие да веси,

яко щедр и милостив Господь. Сый в небеси.

Видя, яко не кождо разум может знати,

заключенный в песнех, ин же ни читати

Паче реку, никто же совершенно знает,

что книга псаломская тайн заключает.

Намерение сердца приемлет благое,

егда токмо хвалити Бога хошет тое.

Усердием доволен душевным бывает,

аще разум пения и мало ся знает.

Иначе бы суетно было детем пети,

иже никако могут тайн разумети.

А Христос хвалу из уст младенец приял есть,

за невежество пети им не возбранял есть.

И псаломник всяк возраст к хвале возбуждает,

усердия теплаго во хвале желает.

И простии людие что во Церкви знают?

обаче псалмы поют, молитвы читают.

Речем ли убо, яко суетно трудятся,

кроме всякия ползы поют и молятся?

Не буди сие, ибо Господь сердец Зритель,

намерения права правый Возмездитель.

А всяк человек во Церкви поет, ли читает,

в намерение хвалы Бога содевает.

Человецы немощем знают низходити,

Бог ли убо не имать того нам творити?

Царие и велможи, иже обладают

многими человеки, зри, что содевают.

Простолюдин, незнаяй книги прочитати.

на хартии нужду си молит написати

Искусна человека, сам писмен не знает,

а царю или князю подати дерзает.

Ничто знает вручивый, но царь разумеет

и прошение того, аще право, деет.

Множицею на страннем языце бывает

моление, повнегда странный обладает.

Вручаяй ни словесе писмен разумеет,

обаче владеющу то вручити смеет,

Иже взем писание, нужду познавает

и, аще достоин есть, милость проявляет

Колми паче Господь Бог, повнегда нам пети,

аще ни можем тайн псалмов разумети,

Сам зная, нужды наша щедро исполняет,

яко отец с чады си, с нами поступает.

За что нам милость Его нужда величати,

пети же и молити никогда престати.

С разумом убо лучше, а где неудобно,

тамо намерение Богу есть угодно.

P

Раб

Раб во тму вовержеся. талант сохранивши,

колми паче въвержется того погубивши?

И аще казнь толику прият непотребный

раб. колику приимет. иже выну вредный?

Раб верный

Паноплион воин раба имеяше.

иже ему верен потолику бяше,

Яко же за н душу тому положити,

да бы господину токмо живу быти.

Бысть же дело сице: Паноплион бяше

чести отсужденны, тем же й искаше

Сонм своинствовавшых. еже бы убити.

Раб то ведый, хоте его застипити.

Взят его одежды, украсися ими,

господина дверми испусти задними.

Взложил перстень на перст, в ложи положися.

Паноплион быти тако притворися.

Егда же воини ови прибегоша.

в ложи лежащаго его обретоша.

Непщующе быти собою искома,

разсекоша раба за Паноплиона.

Паноплион тако смерти свободися,

а раб за любовь си славы сподобися.

Яко и днесь в книгах его похваляют.

во образ служащым верность предлагают.

Аще умре телом, но слава во веки

обносима будет между человеки.

Во древния веки сицев раб живяше.

точна ему время не раждает наше.

Работа

Иже врагу работни, мзда им есть колика?

Во огни и жупеле мука всевелика.

Оле воздаяния! Молю вы, гонзайте

люты врага работы, Богу работайте.

Иже покой пресладкий рабом Си готует

и царствие вечное в небеси дарует.

Радость небесная

Радость небесная зело есть велика,

зане же не входит она в человека,

Но человек в ону, яко Господь рече:

В радость Господа ти вниди. человече.

Отвсюду ти радость имать тя объяти.

аки море пловца воды облияти.

Свышше будет радость вседоволно многа

видения ради истиннаго Бога.

Снизу тажде имать изобилна быти.

яко изволи Бог враги осудите.

Будет и внутрь она, яко душа с телом

ублаженна будет в рай превеселом.

Будет и вне тажде, яко будут друзи

вечно вси святии Бога жива слузи.

Сию радость мощно без сребра стяжати,

токмо волю Бога требе исполняти.

Оле окаянства! ту мы погубляем,

яко в нашей воли весь век иждиваем.

Яже земных сущи, к земным низвлекает.

а Бог в подземная за то осуждает.

Уне бы небесну волю совершати.

за то радость сию в небеси прияти.

Радость сугуба

Не всяка радость — веселие право,

есть бо истинно, есть же и лукаво.

Правую радость имут Бога друзи,

лестную паки — мира сего слузи.

Правую совесть благая раждает.

лестная извне сердцу ся случает.

Ова от Творца идет благодати,

сия из твари обыче бывати.

Правая во век веков пребывает,

и никто ея из сердца хищает.

Есть источнику точна всетекущу,

черплему выну, конца не имущу.

Лестная в часы немноги преходит,

по себе печаль велику наводит.

Водотечи же токмо подобится,

в ней же чрез малый вода час держится.

Ибо. случаю бывшу. истлевает.

воду текущу сквозе изпущает.

Права сосудом ума приемлема,

лестная чувствы плоти обьемлема

Ова в будущем веце совершится,

сия и в мире в печаль обратится.

Ову красота родна знаменает,

ея же вода ни ветр изменяет.

Лестныя образ — лице убеленно,

еже различне бывает сотренно

И вси пороцы явственни бывают,

вяшший красоты срам жене творяют.

Вы праведныя радости ищите,

лестную лестным людем оставите.

Радость о кающихся

Грешнику кающуся, в небеси велие

горния исполняет умы веселие,

Яко вместо сил падших с ними имут быти,

иже каются, и впред добре тщатся жити.

И на земли праведным радость превелика.

яко грешник приходит в общество их лика.

Всем суть в обращении грешнаго до Бога

боголюбивым людем празднества премнога.

Первое им празднество — Христа рождение

в душе кающагося чрез обращение,

Ибо сокрушением Христа си раждает

в нем, он же в живот духа сам ся отрождает.

Второе празденство им есть обрезание.

ибо ветвей злых делес есть отсецание

И ветха человека всеотложение.

вражд, гнева, ненависти отриновение.

Третие — въведения, ли очищения,

ибо очищается от согрешения

Оправданием Бога, и в дом воводится

Божий примирением, и в жертву носится.

Четвертое празденство — преображение,

ибо в мужа инаго есть изменение.

Ризы добродетелей ту ся облекают,

рубища же делес злых верженна бывают.

Пятое есть празденство Пасхи пречестныя,

еже есть во благодать из грех прешествия.

Или воскресения, ибо в живот встает

благодати из гроба грехов. кто ся кает.

Шестый — вознесение ту праздник святится.

ибо от ада грешник в небо возносится.

Седмый — Пентикостии. ибо божественный

Дух в душу кающуся бывает вселенный.

О колика празденства чрез покаяние

суть на земли и в небе! и радование

Коль есть превеселое! Тем же вси ся кайте,

веселие небесным и земным творяйте.

Да с ними вы о прочих возвеселитеся.

егда во дворы Бога жива вселитеся

Радость печалию вершится

Радости мира кратко пребывают.

а в конце печаль часто содевают.

По многопишных пирех и пиянстве,

главы болезни обычно в гражданстве.

По сласти блудней — телесе тление.

купно совести присно гризение.

Гордости выну вслед грядет ненависть,

обилству вещей — людей скудных зависть.

Честь великая покоя лишает,

по высости же низость прихождает.

Высок бе Аман, честию хвалися,

но въкратце низ бе и обезчестися.

Ибо, елико в чести голем бяше.

толико высок на древе висяше.

Олоферн егда Иудифу зряше,

светло лице си и сердце являше,

Но во нощь ту ж де радости лишися,

жены рукою главы отщетися.

Антиох, гордый сопротивник Богу,

изчезе люте чрез болезнь премногу.

Вров кичивый. восприем похвалы

от мирян, а не преклонивый главы

Всяческих Творцу, абие казнися.

аггелом язвен, червми расточися.

Тако обычне под солнцем бывает,

велию радость печаль навершает.

Тем же и Христос Господь глаголаше

к учеником Си. егда поучаше:

Горе вам, иже ныне ся смеете,

восплачете бо и возридаете.

Радости Девы Марии

Ей же Гавриил Радуйся вещаше,

Дева радостей в мире седмь имяше

В юдоли плача, теми веселенна

от Бога. Мати Сына божественна.

Первая радость оней принесенна.

елма о Сыне бяше увещенна,

Яко безмужна име И зачати,

Божию Сыну хоте быти Мати.

Вторая радость — егда посещаше

Елисавету, и ту услышаше

Целование и проречение,

яко бысть мати всем во спасение.

Третию радость она получила,

егда превечна Младенца родила

Кроме болезни и девства в целости.

кроме печали, но в светлой радости.

Четверту име радость превелику,

елма почтиша поклоном Владыку

И Сына ея волсви со дарами,

положше главы под Его стопами.

Пятая радость чистей Деве бяше.

егда Симеон в объятия взяше

Христа Господа и благословил есть,

отпущения от Него просил есть.

Шестая — елма в пути погубленный

Христос, с мудрыми в церкви обретенный.

Дивно вопросы, ответы даяше,

даже вся люди умом удивляше.

Седмая радость оней даровася.

егда на небо Сыном своим взяся.

В той безконечно имать пребывати,

с Богом единем в Троице царствовати.

Царствуй, о Лево, во вся веки в небе,

нас не забуди. вопиющих к тебе.

Радуйся. Бога истиннаго Мати,

тебе достоит вечно царствовати.

Разбойник

Морский разбойник, Дионид реченный.

от Александра царя вои хищенный.

Егда от царя вопрошаем бяше.

вскую на мори разбои творяше,

Отвеща: Яко едным разбиваю

кораблем, за то злу титлу ношаю,

Разбойника мя люди именуют.

Тебе же царя обычно титлуют.

Яко многими полки брань твориши,

морем, землею вся люди плениши.

Аще то правда, изволи судити,

потом же мене по делом казнити.

Царь слышав ответ, дерзости дивися,

обаче сердцем на нь не разьярися.

Обличение оному простил есть,

близ правды быти слово разеудил есть.

Увеща токмо разбоя престати,

паче же честно с враги воевати.

Разгласие

По всемирном потопе, егда созидаху

столп велий Вавилонский, добре успеваху

Людие во здании, доколе имеша

един язык, ибо вся взаим разумеша.

Егда же изволи Бог в многи разделите

и седмьдесят со двема язык сотворити,

Абие глаголаний друг друга не знаша,

тако начинания своего престаша.

Подобне в нынешняя времена бывает,

иде же една воля, дело ся свершает,

А где различны воли, тамо благо дело

несогласия ради не бывает цело.

Иде же разгласив во людех бывает,

тамо благодатию Бог не обитает.

Хотящым убо с Богом во единстве быти,

подобает с ближними единство храните

Раскаяние о милостини

Во Риме нове некто житель бяше

зело богатый, но к смерти боляше.

Хотя же жити, умысли у Бога

живот стяжати чрез дар злата многа.

Посла тридесят гривен нищым злата

и затвори тем себе смерти врата.

Въскоре бо здрав бысть. Но зле раскаяся,

яко богатства толь много раздася.

Что в нем усмотрев некто от сожитель,

потщася быти ему утешитель.

Не буди, рече. о сем печаль тебе,

много бо лучша приимеши в небе.

Он на глас его уши затыкаше,

на друга верна косвенно смотряше.

Что видя друг он. приложи вещати-.

аще ти годе, друже. злато взяти.

Гряди в храм Божий, глаголи ко Богу,

что не ты. но аз дах ту милость многу

Да аз прииму возмездие за то.

ты же от мене все приими злато.

Рад сребролюбец тому делу бяше,

иде во церковь, слово глаголаше.

Восприят злато, но елма вратися,

на празе церкве Богом умертвися.

И тако душу златом погубил есть,

друг же взем и то, нищым расточил есть.

Разнствие

Кто есть царь и кто тиран, хощеши ли знати?

Аристотеля книги потщися читати.

Он разнствие обою сие полагает:

царь подданным прибытков ищет и желает.

Тиран паки прижитий всяко ищет себе,

о гражданстей нимало печален потребе.

Разслабление

Иже тридесят осмь лет в разслабе лежаше:

Не имам человека, Христу глагол аше.

Да мя вовержет в купель, егда возмутится,

ин бо прежде мене в ню притек, погрузится.

Паче наше естество бяше разслабленно.

и чрез многая лета лежа поверженно.

Не име человека в пособие себе,

да бы руку помощи дал его потребе.

Тем же Бог человек бысть. хотяй пособити

и от разслабления люта свободити.

Не леть нам убо ныне того глаголати:

Не имам человека силна помощь дати.

Имамы бо пресилна ныне Человека,

каковаго не виде никто же от века.

Сей есть Иисус Христос, Сам Бог воплощенный,

в пособие нашему роду низпущенный.

К Нему руку комуждо нужда простирати.

Он же никому руки хощет отрицати,

Но и едино слово Его помогает,

всяко Его естество конечно слушает.

Несть Оному пластырей нужда прилагати

всякий недуг на слово должен уступати.

К нему убо глаголим: Господи, рцы слово,

а здравие всячески будет нам готово.

Муж некто разслабленный на одре лежаше,

случаем огнь храмину палити начаше.

Он, страха исполнився, встати устремися,

собрав силу, востал есть, окном низпустися

На землю. О чюдесе! огнем сгорения

свободен бысть, купно же и разслабления

Лежим и мы на одрех. зело разслаблени,

благодатныя силы за грехи лишени.

Огнь же геенский близ нас хощет сожигати.

потщимся всеми силы того избежати

Чрез окно щедрот Бога на землю живущих,

в безконечныя веки в здравии будущих.

Муж при купели овчей разслаблен лежаше,

иже принта к Христу врачу не можаше.

Чрез тридесят и осм лет ту болезнь страдал есть,

помощы ни от кого себе восприял есть.

Сам убо Христос Господь к нему приближися,

Врачь небесный, и тому милостив явися.

Благоволил есть словом того исцелити

и, одр вземшу, в жилище свое отходити.

Подобне со всим родом нашим сотворил есть,

иже многи тысящи лет в разслабе гнил есть.

Лежа на грехов одре, и не востаяше,

приити к небесному Врачю не можаше.

Сам убо Врачь небесный изволил приити

и словом учения недуг исцелити,

И повеле ити в дом жилища небесна,

тако уврачевася тварь Его словесна.

За что Ему во веки честь и слава буди,

да хвалит И аггели и славят вси люди.

Разсуждение добродетелей Божиих

Солнца лучы чрез кристаль егда ся збирают,

на вещы подложенной огнь скоро раждают.

Добротворения же прещедраго Бога,

во уме собранная, кая и коль многа?

Любовь превеликую ко Господу родят

во благодарных сердцех, и в ревность приводят.

Разточение

Дел вы дирявы несть мощно налита,

меха раздранна не леть исполнити.

Подобне мужа, иже росточает,

множество злата не обогащает.

Тем же Алфонс краль воину, просящу

даров у себе, но тех не щадящу.

Рекл: Аще тебе приложу даяти,

о них же обыкл мне еси стужати.

Прежде сам ся нищ могу сотворити.

нежели дарми тя обогатити.

Разум

Разум, без страха Божия держимый,

мечь есть, от мужа безумна носимый

Разум есть прешедшая добре разсуждати,

настоящая паки б даго устрояти.

Еще предвидение будущих имети.

Сих делес не творяют, иже умом дети.

Раны от Бога лобзати

По Соломоне Ровоам царь бяше,

сын его, иже бремя умножаше,

не хотя рода своего щадити.

уветлив быти.

Людие послы к нему си послаху,

ослабы в дани прилежно прошаху.

Он. юных совет прием, свереп бяше.

зло прилагаше

И рече к миру, еже не стужати,

но дани болши ему готовати.

нежели отцу егову даяху.

и страх держаху.

Аще бо (рече) отец мой смиряше

ранами сердце жестокое ваше,

аз приложу вам и расточение

во смирение.

Оле сверепства! Се же образует,

что Бог и демон грешником готует

Бог Соломонски раны налагает.

ум исправляет.

Демон же хощет то им сотворити,

еже от Бога вечно расточити

во изгнание тартарскаго града,

огненна ада.

Что убо хощем, братие, избрати:

от Господа ли язвы приимати,

или от врага быти расточени,

огнем палени?

Царь во пророцех возлюби палицу

в наказание, из жезлом десницу

щедраго Бога, да та уязвляет

и утешает.

Се аз на раны готов есмь. вещаше,

яко не к смерти язвит Господь, знаше.

Убо Господних язв и вы желайте,

врага бегайте.

Бог ны да язвит, жезлом да смиряет,

демон елея да не возливает,

ов бо спасает, а сей умерщвляет,

огнь зол питает.

Распятие в сердце

Муж христоименитый в пленении бяше.

его же сам пленитель во чести держаше.

Иже вопроси его, что печален был есть,

никогда уст си во смех с други растворил есть?

Он рече: Есм печален, ибо поминаю

распята Бога за мя, Его же аз знаю,

В сердце моем аз Его имам водворенна.

Того память держит мя от смеха временна.

Пленитель разгневався: Узрю, глаголаше.

Абие сердце мужа из персей изъяше,

А елма то разреза, и се на едине

печать Распята, в друзей образ половине,

Светло напечатаный. Тому удивися

пленитель, тем же со всем домом си крестися.

Распятие ветха человека

Глава наша Христос Бог на кресте страдаше

и умре, егда дея спасение наше.

Мы же сотраждем Ему, с Ним и умираем,

ветха в нас человека егда умерщвляем.

Совостаем же Ему. воскресшу от гроба.

егда вставшими в благость лишается злоба

Еще и тогда Христу себе сраспинаем.

егда страсти с похотми в плоти утоляет.

Или греси главнии егда истребятся.

тогда на крестех своих они умерщвлятся.

Суть же главнии греси в нас седмочисленни,

им же свои суть кресты и гвозди свойственни.

Первый главный грех — гордость, крест ея бывает

смирение, на нем бо гордость умирает,

четверицею сущи гвоздов прибиенна,

от них же первый чтется мысль душеспасенна,

худости коегождо, ту бо кто познает,

ко кресту смирение гордость прибивает.

Вторый гвозд — познание ближних си благости,

спасеннаго жития, и в делех святости.

Третий — разсуждение противности к Богу.

Четвертый — мысль о казни, юже даст Он многу.

Вторый грех есть лакомство главный нареченный,

егда кто имением есть ненасыщенный.

Сего крест — даятелство, а гвозди онаго:

Первый возвращение есть добра чуждаго.

Вторый — своих имений нишым даяние.

Третий — сущия в небе мзды поминание.

Четвертый — казни память, иже ожидает,

кто-либо богатства си лакомо сбирает.

Третий грех — нечистота, главный в человецех,

безчисленны губящий люди во всех вецех.

Сего крест есть чистота, а гвоздие ея:

первый умерщвление есть плоти своея.

Вторый — зла содружества себе блюдение,

от бесед тайных с жены присно бежение.

Третий — сердце от мыслей нечистых хранити.

Четвертый — казни люты за ню не забыти.

Четвертый грех есть главный зависть проклятая.

ея же крест свойственный есть любы святая.

Тому пригвождается, яко же острыми

гвоздми, от благочестных разсужденми симы:

перво разсуждение — яко зависть кому

влепится в сердце, муку люту деет тому.

Второе — яко вотще мысли умножает,

ими же паче себе, не ближних вреждает.

Третее — яко зависть демону подобит,

его же завистию смерть во мире ходит.

Четвортое — вечныя казни помнение,

на ню же заслугует зло завидение.

Пятый чрева несытство грех есть велий зело,

егда ся брашны, пьянством лишше тучит тело.

Крест сея злобы — мерность, а пригвождается

к ней. егда четверица си разсуждается.

Во-первых, яко тело в силах си скудится

и сладкое здравие излишеством тлится.

Второе — яко брашна и пития многа

с богата мужа творят нища и убога.

Третее — яко память и ум повреждают.

Четверто — яко чести и неба лишают,

ибо чревоугодник — идолослужитель,

не могущь быти неба светла наследитель.

Шестый грех главный гнев есть, имеяй крест себе,

кротость прелюбезную Богу, сушу в небе.

Сей яко же гвоздием прибиен бывает,

елма четыри сия ум чий разсуждает:

во-первых, яко Господь гнев Свой изливает

на того, иже ближним гневом отмещает.

Паки, яко здравие излиха вредится

и разум того мужа, иже яр творится.

Третее — яко ближних любовь отвращает,

никто бо того любит, в нем же гнев рыкает.

Четверто — яко, аще гнев кто укрощает.

безгневно лице Христа на Суде познает.

Седмый грех главный — леность, та смертна бывает,

егда кто работати Богу унывает.

Сея крест есть бодренность, а яко гвоздие

остро — четырех вещей сих разсуждение.

Во-первых, яко время краткое нам жити,

в нем же целом едва что можем заслужити.

Второе — яко проклят, кто пренебрегает,

елма дело Божие щапно совершает.

Третее — яко вечну мзду нужда сгубити

тому, иже не тщится Господу служити.

Наконец, и во мире бедится страдати

хлад со гладом не хотяй в трудех пребывати.

Се кресты грехов главных с острыми гвоздами,

тщимся я распинати, да поживем сами,

смерть бо грехов — жизнь наша, нам же смерть бывает,

егда живут в нас греси, кождо то да знает.

Уне убо вся грехи и страсти мертвити,

да бы нам грехов кроме и нестрастно жити.

Растение

Душеспасенно есть, растущу веку,

расти во благость всяку человеку.

Горе же люто тым есть человеком,

иже с растущым растут в злобу веком

Риза

Нагость в рай Адамля зело красна бяше.

прежде неже от Еввы яблоко прияше.

Срамнии уди тогда срама не творяху.

яко воли противно движими не бяху

Егда же на плод Адам Еввою сведеся,

в то время срамом нагость его облечеся,

Даже нужда бысть ему листвие терзати

и тем срама рубище в членех покривати.

Но зане же листвие недолго ся носит,

аггел твердшу одежду кожану приносит,

И изгна из райскаго Адама жилища,

богата прежде бывша поставил есть нища.

Не во честь убо в ризы Адам облеченный,

но срам его покрися, от греха рожденный.

Тем же и мы елико в ризы облачимся.

о сраме и о гресе сами обличимся.

Безумно убо чести неции желают,

егда в ризы красныя себе облекают.

Не чести риза знамя, грех нам поминает,

всяк убо, зря на ризы, себе да смиряет.

Из финиксов листвия Павлу риза бяше.

иже пустынножитель чрез век пребываше.

Оному преставлшуся, ту Антоний взял есть

и яко сокровище честно почитал есть.

В Пентекостию токмо на ся возлагаше,

и в день Пасхи святыя в ту ся облачаше.

Добре убо вернии честная говеют.

егда некия вещы муж святых имеют.

Философ в худых ризах обычно хождаше.

ему же во двор царский нужда нека бяше.

Прииде убо к вратом, стражи й отгнаху,

дважды, трижды и паче то ему деяху.

Он, шед, премени ризу, к вратом запустися,

абие неудержно в двор царский пустися.

Пришед же к царю, нача ризу целовати

и, елико можаше. честь ей воздаяти.

Царю же вопросившу. что то знаменаше?

Чтущую мя чествую, смело отвещаше.

Ибо его же входа мудрость не имяше,

то ми сия честная риза содеяше.

Оле суетства суетств! доброта не зрится,

красная риза паче человека чтится.

Яже добродетели дана не бывает.

та честь от людей ризе новей ся творяет.

Художничее дело во чести хранится,

а лице естественно нечестно творится,

Аки бы художество человека тленна

изрядно было паче дела божественна.

Неполезно во верных человецех дело.

драгоценными ризы украшати тело.

Душевредное же есть о тех ся хвалити.

убо во христианех не имать то быти

Суетно одеждами похвалы искати.

буйство за красны ризы кого почитати.

Риза бо несть достойна вина хваления,

или буих человек в чести имения.

Ибо Адам не во честь в ризу облеченны,

но срам его и студ есть тою покровенны.

Без вины он и нагий Богом сотворися.

елма же в вину въпал есть, ризою покрися.

Не хвалы убо знамя, но согрешения

риза, да видим выну вещь обличения.

И елико на ризы очы обращаем.

толико ся о гресех усердно да каем.

Аще же и злата есть одежда на тебе,

и о тей хвалитися никако есть требе,

Ибо, яко же царю, от враг си плененну.

и во златы вериги сущу воверженну.

Не похвалу вериги драгия раждают,

но прежде бывшы чести тщету предъявляют.

И не может он о тех утехи прияти,

паче же имать вину, ко еже ридати.

Тако нам златы ризы не в похваление.

но погибшия чести во обличение,

Еже нам имать сердце к слезам возбуждати,

да тщимся тоя чести смиренно искати.

Паки, егда другия ризы облекаем,

суетствий любители себе проявляем.

Не помним, яко Господь Адаму не злато,

егда согреши, в ризу возложил есть за то,

Но зверинную кожю, и ту не деланну,

не из мягкаго шелка доброхитротканну.

То же в увещение ко покаянию,

и ко мертвенности си воспоминанию.

Не по-нашему древле святии твориша,

но яко Адам, ризы кожяны носиша.

Пророк святый Илия в кожяне хождаше

милоти. Иелисей такожде творяше.

Иоанн Предитеча во полсти ходил есть

велбуждых власов, пояс усмянны носил есть.

Точию да бы нагость телесе покрити,

а не красоту неку тому сотворити.

А днесь, найпаче жены что не вымышляют?

От конец мира вещы на то собирают

Предрагою ценою, да бы ся красити

и сердца юношеска во любовь ловити.

Оле развращения! не смерть поминают,

ризы зряще, но жити долго помышляют.

А смерть не зрит на ризы, и кожу и злато

без избору во тожде вовергает блато.

Но немощну сосуду леть ся не дивити,

яко некрасоту си тщится украсити.

То излиха есть дивно, яко и велици

крепостию мнимии в мире человеци

Внутрнюю красоту си, доблесть оставляют,

Суд, мудрость, добродетель, смысл пренебрегают.

А подражанием жен мнят быти доброту

внешнюю восприяти ризную красоту.

Яже не потолику мужы украшает,

поелику несмыслство онех обличает.

Усрамитеся убо женам точни быти.

мужие, иже мужно должни есте жити.

Не внешния красоты телесем желайте.

но внутрь добродетелми прекрасни бывайте,

Да Богу души ваши красны сотворятся.

Его любве и венца вечна сподобятся.

Риза духовная

Иаков, хотя благословения

от отца себе приобретения.

РизыИсава брата украсися,

чесо желаше, тако сподобися.

Мы в благостыни Христа облецимся,

от Бога Отца да удостоимся

Желаемаго благословения

и душевнаго в веки спасения.

Риза Богородицы

Князь Нарманский град некий с полки отстояше,

в нем же риза Матере Божия лежаше.

Ту взем епископ града вместо знамения.

изьиде сопротиву полк обстояния.

И абие вси врази быша ослепленни

Божиею силою, и ума лишении.

Трепещуще плотию, страхом одержими,

за нашествие на град от Бога казними.

То познавше граждане, к тому приложиша

сечь мечную и многи от врагов побиша.

Не яко Иелисей древле сотворил есть,

иже из Самарии живы испустил есть

Вражия полки, иже ослеплени бяху,

егда в град сопротивных незряще вхождаху

Не токмо же зрение оным привратил есть,

но и хлебом напитав, целы отпустил есть.

Не подражаша сего пророка граждане,

аще и правоверни бяху христиане.

Тем же безгодно дело то Богу явися.

и Матери милости велми не любися.

Ибо абие риза невидима бяше,

немилостивым Господь защиту отьяше.

И супостат останки зрение прияху.

оттуду безумство си граждане познаху.

По сему леть образу и нам ся учити.

яко и врагом милость требе есть явити,

Найпаче егда Сам Бог чудесне смиряет,

тогда человек милость свою да являет.

Родители питати

В некоем граде сын у отца бяше.

его же отец излиха любяше.

Таможде ин муж девицу имел есть.

юже с тем сыном счетати хотел есть

Точию с отцем его совещаше,

да все богатство, еже ему бяше.

Сынови отдаст, а сын име его

довле питати, як отца своего.

Он, хотя сыну благо сотворити.

деву с богатством ему обручити,

Вся отдал сыну, сам при нем живяше.

Сын неко время его почиташе,

Послежде любовь к рождшым изменил есть.

в жилища ина оны удалил есть

И пита скудно, сам же пироваше,

еже досадно родителем бяше.

В неко же время усмотрела мати,

яко сын гуся дал есть готовати

Рече мужеви сына посетити,

да может тем ся брашном насытите.

Сын. отца узрев, гуся сохранил есть.

Что пришел еси? отца вопросил есть.

Родитель, видя неохотность быти,

потщася слезен в дом ся возвратити.

А сын до гуся онаго вратися,

и се страшная жаба прилепися

Гусеви тому, юже он отгнати

хотя, начал есть ону отревати

Жаба на лице его возскочила

и неотторжно тому ся слепила.

Оле чюдесе! Премнози дерзаху

отторгнути ю, но не успеваху.

Скаредно бяше на лице смотрети,

а ему болезнь нужда бе терпети,

Ибо и жабу аще ударяху,

телеси его болезнь задаяху.

Тако Господь Бог изволи казнити,

да знают чада родители чтити.

Надолзе бедник с жабою хождаше,

вся человеки дивом ужасаше,

Та же ко Богу с плачем обратися,

покаянием от грех очистися

Пред епископом, иже ему дал есть

епитимию, а он ту приял есть:

В окрестных странах яве путствовати,

преступление свое извещати.

То ему творшу. Господь щедр явися,

скверная жаба с лица низвалися,

И бысть, яко же прежде красен бяше,

оттоле рождших во чести имяше.

Сию казнь чтуще, сынове и дщери,

умейте чтити отцы и матери.

Да не горшее вам что прилучится,

или дух во ад да не осудится.

Родителие вас малых питаху,

немощи ваша многия терпяху.

Вы я в старости любезно питайте,

немощи, яже в них суть, покрывайте.

Должни до конца вы оным служити,

благословен, кто тщится то творити.

Родителей благословение и проклятие

Иже от родителя сын благословится,

дом яко на камени его утвердится.

А еже чадо мати свое проклинает,

основание дому того извращает.

Родителем не смеятися

Иже родитель своих осмевают,

очеса враны онех да терзают.

Хам посмеяся родителю Ною.

клятву на семя си внесе собою.

Рождество Христово

Виде мир жезл Моисиев древле измененный

и во страшнаго змия Богом преложенный.

Днесь зрит Самаго Бога во плоть облеченна

и человеком грешным весма подобленна.

Тогда Фараон гордый в мори погрузися,

Израиль же работы его свободися.

Днесь же демон проклятый поражен бывает,

род наш лютых томителств онаго гонзает.

Трегубое рождество Христа Бога знаем,

от Священных Писаний тако собираем.

Первое — превечное, во плоти — второе.

третее — чрез благодать во сердцах святое.

В первом матере кроме из Отца родися,

во втором из Матере без отца явися,

В третием ни матере. ни же отца знает,

то бо духовно в сердцах Сам Он совершает.

Первым рождеством выну Слово Ся раждает,

вторым же единою начало си знает,

А. третим частократно обыкл Ся раждати

в сердцах удостоенных Его благодати.

Первое внутрь Божества, на земли — второе,

третее — в сердцах чистых, все трое святое.

Во первом родится Бог, во втором — человек,

Богочеловек в третем. Иже Создатель век.

Первое божественно, людское — второе,

третее — духовное, все трое дивное.

Ибо язык не может наш изглаголати

дивнаго их тайнства, ни же ум обьяти.

Да верим убо токмо, и да почитаем

тако Родящагося, и за Бога знаем.

Розга

Плевелы от пшеницы жезл тверд отбивает.

розга буйство из сердец детских прогоняет.

Роптание

Аарон и Мария на брата роптаста,

и люте тем роптом си Бога прогневаста.

Тем проказою Господь Марию казнил есть,

Ааронови паки вину ту простил есть,

Яко жрец велий бяше. Отсюду леть знати,

яко честным иногда мощно есть прощати.

Что во менших без казни не обыче быти.

Везде ползу и вред есть полезно судити.

Пес камень гризет, на него верженный,

слово ропотник гризет обличенный.

Аще во праздну делву будеши толцати,

извнутрь себе звук некий имать ти воздати.

Исполненная паки гласа не раждает.

Тако праздная доброт душа содевает,

Егда обличением мало ю толкнеши,

глас роптания извнутрь ея изведеши.

Полная же доброты не хощет роптати,

егда обличением будеши толцати.

Колесо скрипящее путнику стужает,

человек же ропотный Богу досаждает.

Иудеи в пустыни о пище роптаху,

но с пищею гнев Божий купно восприяху.

В езеро Лукернийско камень воверженный.

по естеству вся воды творит возмущенный.

Даже наводнению великому быти.

окрест поля сущая с плоды их топити.

Подобне ропотницы ум си возмущают,

егда обличения камень усмотряют.

Роса

Тиху воздуху сущу, роса низпадает,

а егда бурен аер, она не бывает.

Христос — Роса небесна, тем же низпустися,

егда во всей вселенней тишина явися.

Рота или клятва

Кто ротитися часто навыкает,

безсудным словом Бога огорчает.

Налогом в клятву лживую приходит,

неверство себе у сверстников родит.

Рота есть чинна, аще со правдою,

с разсуждением, купно с истинною.

Едино от сих аще ся лишает, рота падает.

Ругание

Иже ся обещает грехов не творити.

а по мале дерзает к ним ся возвратити,

Непоругаемому Богу ся ругает.

за что его в геенне вечна мука чает.

Рук воздеяние

Елма нам на молитве руки воздвизати

горе, что знамением сим хощем являти?

Винныя ны являем связания быти,

яко не бояхомся пред Богом грешити.

Сипе смиряющеся. молим щедра Бога,

да нам согрешения оставит премнога.

Он бо кающыяся обыче прощати.

яко не хотяй смерти, но живот нам дати

Кто милостиню нищым обыче даяти,

к тому они руки си тщатся протязати.

Мы нищии, с небесе милостыни чаем,

тем же к небеси руки нашя воздвизаем.

Руки к небеси того ради воздвизаем,

сердце с молбы пожренно Господу являем.

Елма креста образно руки воздеваем,

Распятаго заслуги Богу поминаем,

Да тех ради услышит наше моление.

грехи оставив, подаст душам спасение.

Рука Божия

Тяжко бе древле в руки Божия впадати,

тем Христос, рождься, дал я пелены связати,

Да нескоро с казнию оны простирает,

всяк грешник приступити к Нему да дерзает.

Руно

Гедеоново руно прежде оросися,

а вся земля без росы суха оставися.

Потом земля росою окропленна бяше,

руно же влаги тоя кроме пребываше.

Тако прежде Израиль Христом приглашенный

к благодати, язык же бе род оставленный.

А послежде язы́цы приглашени бяху

апостолми, жиди же без тоя остаху.

Тем же. яко без росы трава, изсушени

имуть быти, в снедь огню адску повержени

Рыбы

Егда Христос воскресе, не всем яве бяше,

временем ученики Своя посешаше.

На Тивериатстем им Он мори явися,

егда Петр со инеми рыбарством трудися.

Трудишася нощь целу, но яша ничто же,

без помощи Христовы труд нимало може.

Елма же Он явися и веле пустити

мрежу на страну десну, еже бы ловити.

Тогда сто пятдесят три рыбы уловленны,

даже едва ко брегу бяху извлеченны

Чюдо то бе велие, а другое бяше,

яко никто же огня на брезе възгнещаше

Обаче апостоли егда изыдоша

на брег, рыбу на огни сущу обретоша

И хлеб, близу лежащий, им же я питаше

всемогущий Господь нашь, спасение наше.

Чюдно дело, кто рыбу на огнь возложил есть

и хлеб в насыщение трудных промыслил есть.

Кирилл святый непщует, яко извлечеся

тайно Христом из моря рыба, и печеся.

Златоустый умствует, яко вновь создаше

Господь из ничесого, а прежде не бяше.

Феофилакт, Евфимий и инии нецы

разумом украшении свыше человецы

Глаголют из воздуха вся та устроенна,

или от инех вещей, сила божественна

Тако то устроила, яко же строяша,

елма хлебы и рыбы людем умножаше.

Что-либо от сих бяше, то известно буди,

яко та содея вся Христос, а не люди.

Вина того первая сицевая бяше:

лов не труд апостолских быти показаше

Христос, но силу Свою яви божественну,

да знают ловитву си тою умноженну.

Вторая — да покажет, яко в мире Себе

ничто же временных плоти имать требе,

Но яко онех деля и рыбы множаше,

и ина всяческая их ради творяше.

С

Самоубийство

Иже нетерпением себе умерщвляют,

в жертву себе демону лютому отдают,

Иже во огни вечном имать ю палити;

скверншая сея жертвы не возможет быти.

Сампсон

Сампсон дом с Филистины силно низвалил есть.

хулители имене Божия побил есть,

Но купно и сам себе напрасной предаше

смерти, рцы убо, како спастися можаше,

Зане, кто-либо смерти си винен бывает,

яко убийца лютый той ся осуждает?

Августин преблаженный ответ сотворил есть,

яко он, Духом движим, враги си побил есть,

А поне же той же Дух Святый не изьяше

тогда его от смерти, он без вины бяше.

Сан невинности

Во стане невинности многа блага бяху,

яже первозданныя зело украшаху.

Первое — бе веждество вещей естественных

совершенное, Богом в мире сотворенных.

Второе — яко к благим преустроен бяше

человек и от злобы отвращен живяше.

Третие — плоть духови бяше покоренна,

всяческая страсть воли благоподчиненна

Четвертое — вся силы совершенны бяху,

удобно своя дела творити можаху.

Пятое — яко ничто вредити можаше,

еже днесь смертоносне язвит тело наше.

Шесто блаженство — яко вся може имети,

леть бывших естественне стяжати. хотети.

Седмо — яко животна вся покорна бяху,

послушанием яко царя почитаху

Осмое — яко леть бе многи веки жити

и. смерти не вкусивше, в небо ся вселити.

Сих всех и инех благих грех ны отщетил есть,

блаженство в окаянство люто изменил есть.

Оле греха лютости! Нужда истребити

онаго, да бы паки во блаженстве быти.

Свадник

Кто обыче в братии непокой творити,

люте имать Господь Бог онаго казнити.

Свобода

Свобода истинная — Богу работати,

ига грехов на выю свою не прияти.

Паче же, есть царствие Господу служити.

ибо слузи венчани Его имут быти.

Свобода нам от Бога, не еже грешити,

но от работы врагов свободно почити.

Зле убо свободу си той муж погубляет,

иже под иго грехов себе подчиняет.

Христос Господь изводи свободу нам дати

по мнозей Си милости в новой благодати.

Та четверогуба есть мудрыми сочтенна,

из дивных Писания тайн божественна.

Во-первых, от Закона Ветха свободил есть,

суды и чины того унепотребил есть.

При Десятословии точию остахом,

яко от естественна закона познахом

Того исхождение, а не чрез Моисия

первее заповеди дадошася тыя.

Паки, нас от демона Христос Бог избави,

от греха же и ада свободны постави.

Не могут бо вси сии нас насиловати,

аще ся им не будем сами подчиняти.

Третие, от боязни свободу прияхом,

под любовию бо днесь есмы, не под страхом.

По любви, не по нужде аще хощем, деем,

во след Возлюбивша ны любовию спеем.

Четвертая свобода тогда нам явится,

егда кождо праведник смерти свободится

Вторыя и во славу водворенны будет,

в ней же во веки веков со Богом пребудет.

Свойство Божие

Четыри свойства Господь найпаче являет

человеком, ими же весь мир управляет.

Та суть: крепость, премудрость и благость святая,

четвертая — истинна пребожественная,

Их же Езекиилю образ божественный

в четырех древле бяше зверех проявленный.

Крепость чрез крепка телца ему показася.

мудрость чрез солнцезряща орла знаменася,

Благость чрез человека бе образованна,

истинна чрез лва страшна дивне показанна.

Крепость же Свою Господь наипаче явил есть,

егда из ничесого весь мир сотворил есть.

Мудрость во правлении мира изъявляет,

егда вся мудре строит, хранит, управляет.

Благость возстроением мира показал есть,

елма Сына Своего за ны на смерть дал есть.

Истинну совершенну имать проявити.

егда Христос вся люди приидет судити.

Тогда не осуди мя. щедрый Христе Боже,

по делом моим скверным во огненно ложе.

Но по милости Твоей изволи ми дати

во светлостех святых Ти со аггелы стати.

Естественная свойства у всех Творца Бога,

та же и совершенства предоволно многа,

Яже обаче миру не купно являше,

но подробну, яко Сам ползу быти знаше.

Всемощество показа, егда мир творяше.

от еже не быти. вся в бытие ввождаше.

Благость божественную светло показал есть,

егда по образу Си Адама создал есть.

Любовь же ко Адаму тогда изъявил есть,

егда дал помощницу, звери покорил есть.

Истинна Его над ним тогда проявленна,

елма изгна из рая в кожу облеченна.

Тажде воды потопа всемирна явися,

и егда огнем лютым Содома спалися.

Еще же во Египте, егда затверженный

в злобе Фароон морем бяше истребленный.

Премудрость Си дивную тогда Бог явил есть,

егда в многи языки роды разделил есть.

Промысл Свой Божественный тогда показал есть,

Иосифа в Египет елма предпослал есть.

Да во время гладное род свой препитает,

Египтяны и ины люди насыщает.

И паки, Израилю елма манну дате

в пустыни вместо хлеба, и долго питаше.

Милость прародителем в рай проявил есть,

егда наготу онех кожами окрыл есть.

И внегда Израиля работы избави,

Нинивитяном же казнь смертную остави.

Подробну сия свойства дотоле являше,

донеле же не взятся Словом тело наше.

Егда паки изволи то человек быти,

многа свойства изволил купно проявити.

Благость божественную тогда проявил есть,

егда Ся человеку Сам Бог сообщил есть,

Свойство бо есть благости себе вообщати,

да благо будет иным прещедро даяти.

Любы превеликая дивне изьявися.

егда Бог с человеком лицем съединися

В Христе Бозе, да весь род Богу прилепится

любве союзом, аки едно сотворится.

Милость несказанную в той час показал есть,

егда недуги нашя Господь на Ся взял есть.

Да ны содеет силны враги победита

и на гору небесну неослабно ити.

Всемощество изволил Свое изьявити,

божество с человеком изволил споити

Во едину ипостась со свойствы обою,

слития не содеяв во существу двою.

Истинну удивил есть, егда могий взяти

силою ны от врага не хоте отьяти.

Но чрез прав путь истинны долг за ны воздал есть,

казнь болезни и смерти Христос Бог страдал есть.

Мудрость непостижная тогда бысть явленна,

егда мзда предивная за ны устроенна.

Никто от человеков в мзду доволен бяше,

тем ради мзды естество Бог восприят наше.

Да за грех наш плотию постраждет святою,

Божества ради будет предоволен мздою.

Промысл Свой отеческий Господь изъявил есть,

егда о спасении нашем устроил есть.

Да заслугами Христа будем примирении

и верою с делесы благими спасении.

За что мы должни есмы Господа хвалити,

донде же нам дарует Он во мире жити.

Свет Христос

Христос Господь Свет мира Сам Ся нарицает,

не чювственный, духовный, ибо просвещает

Умы человечески, еже правду знати

и лукавых деяний всескоро гонзати.

Закон естества в мире силно утвердил есть,

или, да правду реку, истлевш обновил есть,

И чрез Моисия данный, иже бе растленный

законоучителми. Им есть исправленный.

Ибо праведный разум изволил явити,

а их неправедныя толки обличити.

К тем новыя законы благоволил дати,

да спасения стезю благо можем знати,

И тою безбеднее потщимся ходити,

да бы в царство небесно неблазненно внити.

Святость

Три дела человека свята содевают

и вечныя у Бога жизни сподобляют.

Первое — трезвенное себе питание

во пищах и питии есть воздержание,

Ибо воздержанием чистота хранится.

яже в твари словесней от Бога любится.

Второе — дело право, то сице бывает.

аще намерение право ударяет

Купно с разсуждением и с ползою ближних,

сие благ человека сподобляет вышних.

Третее — благочестив разум содержати

си есть, о Бозе веру крепкую стяжати,

Яко Он есть всемогущ, всемудр и всеблагий,

немощи, невеждества и злобы всенагий.

Силою же Си нашу немощь укрепляет.

чрез мудрость невеждество наше умудряет.

Благостию Своею чистит злобу многу,

сия добродетели свойственны суть Богу.

Сия три дела храняй удобь свят бывает,

вся ны стяжати она Бог да сподобляет.

Святый

Речение си: Святый, что нам знаменает?

Что Агиос гречески, то Святый являет.

Агиос же: без земли право толковати,

яко святым земленных требе есть гонзати.

Еще чиста, ли крепка, или вознесенна

Святый являет мужа. Богу отлученна.

Святии о нас молятся

Святии, иже в небе почивают

в радости мнозей. нас не забывают,

Но молят Бога, еже ны щадити,

от бед всяческих свободны творити.

Ведят бо. яко мир, во зле лежащий,

рабы Божия есть люте гонящий.

Ведят случаи в мире многи быти.

яко в нем без бед несть удобно жити.

И вся иныя добре нужды знают,

яже им Богом явленны бывают.

Имут же любовь к нам неизмененну,

дерзаю рещи. паче умноженну,

Яко во стане блаженства живуше

и к совершенству споны не имуще.

Во-первых убо, та их возбуждает.

да молба за ны их к Богу бывает.

Второе — нужды нашя поощряют.

яже, в небеси суще, добре знают.

Третие — скудость нашя оны будит

ко ходатайству, да не реку, нудит.

Ведят бо, яко мы благо деяти

немощни есмы, и Господа знати.

Яко же требе, и право любити,

яко достоит, несмы нарочита.

Наконец, знают волю Бога быти,

да тщатся уди другим пособити.

Иже силнии — во немощы сущым,

Христа главу си едину имущым.

Яко же они силни пребывают,

а мы немощни, тем нам помогают.

За что мы должни Господа хвалити

и рабы Его, яко лепо, чтити,

Уповающе Бога щедротами

спасени быти за святых молбами.

Святыя чтити

Святии угодницы Всесвятаго Бога

достойни, да хвала им от нас будет многа,

В первых — яко раби суть вернии Создавша

и подражателие Христа, въслед Си звавша.

Второе — яко друзи Ему сотворени,

тако бо от Христа суть они наречени.

Третие — яко Богу домашний быша,

чрез апостола сие имя получиша.

Четвертое — яко суть от Бога почтени,

сотрапезницы Христу в царстве устроени.

Пятое — яко чада суть Бога живаго,

над сие может ли что датися вяшшаго?

Шестое — яко Богу наследницы сташа,

снаследие же с Христом Господем прияша.

Напоследок. яко вси, иже ся трудиша

в мире со Христом, с Ним ся в небе воцариша.

Велия воистинну сия честь и слава

святых Божиих, тем я да чтит всяка глава.

Честни друзи Божии Давиду святому

быша. и днесь да будут от верных всякому.

Они же ходатайством имут то воздати,

еже бы и нам с ними в небе царствовати.

О даждь то, Христе Царю, святых молитвами,

яви щедроты Твоя, Боже, и над нами.

Священник

Крещения святаго вода омывает

человеки и в небо оны посылает.

Сама же в землю идет, сущи излиянна,

иначе не бывает она соблюданна.

Той воде иереи мощно подобити,

им же власть дана свыше грешники чистити.

Иже кающыяся елма разрешают,

чистят от грех и в небо ити устрояют.

Сами же аще живут не по воли Бога.

под землю идут во ад в мучения многа.

О тяжка окаянства! Иныя спасают,

а сами во век веков л юте погибают.

Священство

Стомах в телеси аще не неможет,

немощным удом удобне поможет.

Аще же ему недуг прилучится,

все тело въскоре сил своих лишится.

Тако, аще где сан священных цело

пребудет в вере, то все Церкве тело

Твердо ся держит. Аще же священный

сан в вере, в нравех будет развращенный,

Тамо вси уди въконец развратятся,

в проказе грехов всяческих истлятся.

Седмь крав

Фараон виде седм крав, яже тучны бяху,

толикожде и худых, ты первых снедаху.

Чрез первыя седмь даров мощно толковати,

яже Дух Божественный обыче даяти.

Тии бо туком горним душу исполняют,

крепку, красну, веселу ону содевают.

Чрез худыя же кравы грехи ся толкуют,

числом седмь, иже смертни, быти ся непщуют,

А сия кравы первых люте поглощают,

яко греси дары вся Духа истребляют.

Сердце

Иде же сокровище наше сопрятаем,

тамо мыслию сердца выну пребываем.

Тиверий, кесарь Римский, желал есть почтити

Христа и со своими лжебоги вместити.

Но не благоволившу Христу делу быти,

нужда бяше той совет в ничто обратити.

Не хоте Бог истинный со лжебоги стати

и от идолских жрецев скверных жертв взимати.

Точне. несть воля Его в сердци пребывати,

в нем же сквернии греси обыкли витати.

Въсего сердца в жилище Он Себе желает;

аще не цело дастъся, то Он оставляет.

Он есть солнце, а грех — тма, нужда уступите

единому от двою, обема не быти.

Впустиши грех. то Христос абие отходит;

изжени грех. благодать Христова приходит.

Зри убо, возлюбленне. что полезно тебе:

грех. иже смерть, ли Христа жизнь имети в себе?

Сердца мудраго в стране десней пребывает,

безумнаго — во шуйце, церковник вещает,

Яко мудрый вся дела ближних судит право.

противным обычаем, безумный — лукаво,

И яко мудрый дела любит вся правая,

безумный, сопротивно, любит лукавая.

Сердце чисто

Хотяй сердце имети во мире чистое

и во жилище Богу посвятити тое.

Во-первых, страх Господень должен в нем имети,

и месть Страшнаго Суда выну умом зрети.

К тому, страсти плотския нужда есть мертвити,

да бы оным возмогшим сердца не скверните.

Еще. противу мирским прелестем стояти.

вся ласкателства его силно отревати.

Ибо теми человек излиха сквернится,

егда им неопасно сердцем прилепится.

Наконец, выну сердце в небо обращати,

тамо пребывание себе утвержати.

Сия хранящу деть есть имети чистое

сердце и посвятити во храм Богу тое.

Сердце простое

Простое человеку сердце подобает,

ибо в сицевом Господь сердце обитает.

Простое паки то есть, еже не двоится,

любовию на части многи не делится.

И юже язык другом любовь извещает,

ту сердце в себе носит, а не притворяет.

Паки, простое сердце нелицеприятно,

нищым же и богатым равно благодатно.

Еще, другом прибытков ищет, а не себе,

их паче угождает, не своей потребе.

Обаче не ласкает, но праведно слово

в обличение злобы у него готово.

Не блажит гаждателных, но хвалит, что благо,

ни терпит молчанием нрава лукаваго.

В дусе любит ближняго, не на плоть взирая,

душевных благ, не плотских пристрастен желая.

И что словом глаголет, то делом являет,

от истинны на един влас не отступает.

Напоследок, зависти не обыче знати,

паче своя прещедро любит подаяти,

И о добре ближних си радуется зело,

о благоденствии их ликует весело.

Сицева сердца верным есть имети требе.

в сицевых жителствует Господь, яко в небе.

Сердцем чистии и сквернии

Ядший манну сладку манну отригает.

снедый чеснок смрадный смрад из уст пущает.

Точне сердцем чистый чисто дает слово

в скверномыслном скверно на всяк час готово.

Сила

Зле силный силы си употребляет,

аще не Богу тою работает.

Сион наследити

Елма Израиль в Сион путь творяше,

со Иисусом воды прохождаше

Иорданския. та же воевати

нужда бедила враги изстребляти.

Потом же Сион и вся окрест страны

во наследие ему бяху даны.

Подобне нову Израилю требе

творити, быти хотящему в небе.

По Иисусе воду преходити

бани святыя и грехи омыти.

Та же со враги треми воевати,

с демоном, с миром и плоть изнуряти.

По тех победе леть торжествовати

в Сионе горнем и в нем вечновати.

Скакание

В день Господень девица некая скакаше

с юношы. а в храм Божий ити не хотяше.

По скакании егда в дом свой возвратися

и возлеже на ложи, демон в ню вселися.

Нача гласом нелепым бедная кричати,

даже нужда бе ону домашним вязати.

Связавше, во храм Божий ону приведоша

и молебныя гласы к Богу вознесоша.

Милосердый же Господь отрока малаго

дванадесятолетна на змия ветхаго

Вооружи честнаго креста знамением

и, еже оставити деву, велением.

Отрок убо девицу крестом знаменает,

а враг, силы крестныя не терпя, гонзает.

Зрите вы, плясавицы, како мерзка Богу,

найпаче яже в день свят, плясания ногу.

Сываритове в сласти всех себе предаша,

ядоша препространно, пиша и скакаша.

К тому же, изучиша кони си скакати

по гласу мусикии, внегда ей играти.

То Кротониатове елма ощутиша,

брань на ня восприемше, удобь победиша.

Ибо не в ратны трубы велеша играти.

но гласом мусикии искусно пискати.

Что услышавше кони, скакати начаша,

седящия на себе на землю свергаша.

И тако полк смятеся, врази наступиша,

род, во утехах живший, хитро победиша.

Науклир историк дивная вещает,

умы чтущих та зело удивляет.

В веси, глаголет, Колбеке реченней,

в Алверстаденстей земли населенней.

Жителие в нощь Рождества Христова,

презревше чтити воплощенна Слова,

Пияни бывше, начаша скакати,

лики по стогнам веси составляти.

Мужие с жены безчинно скакаша.

девы с юноши безстудно плясаша,

И достигоша молитвенна храма,

на кимитирий взидоша ногама,

Забывше Бога, и на нем скакаху

и безчинными гласами кричаху.

Иерееви зело досадиша,

яко Божией службе пакостиша.

Иже прилежно начат я молити,

да бы дом Божий хотели почтити.

Но пиянии его не слушаша,

от скакания нимало престаша.

Он убо, гневом правым запаленный,

рвением дому Божия снеденный,

Изпусти из уст сия речения:

Вижду. не имам у вас говения.

Не боястеся храма обругати,

буди вам убо чрез весь год скакати.

Оле чудесе! Не втще глаголаше,

ибо словеси дело отвещаше.

От того часа беднии скакаху

годище цело, ничто же ядяху.

Ни хлада ради от воды вкусиша,

ни же на ребрех своих сном почиша.

Яму велику ноги утопташа,

скакания же никако престаша.

Тайная спреде и созаде сила

Божия оны скакати нудила.

Скакаху убо. но не в веселии,

в утомлении излише велии.

Негли яко труп лицы побледеша,

или от труда мурински чернеша.

Един же людин сестры си плакате,

яко скакати долго не престаше.

Дерзнул за руку ону похитите,

да бы силою труда свободити.

Но оле беды! и руку и рамо

отторже, она паки скака тамо.

Бяху и молбы от онех велики,

но неизменен суд пребысть Владыки.

Годище цело день и нощь скакаху,

тому претекшу, скакати престаху

Едини мертви на землю падоша,

инии в чювство помалу придоша

И, живи бывше, о гресех ридаху,

казнь божественну яве сказоваху.

Сквернословие

Сквернословие да ся истребляет,

то бо скверная делеса раждает

Устам, яже Тело приемлют Христово,

зело неприлично есть скверное слово.

От него же скверная словеса слышиши.

скверно того и сердце воправду возмниши,

Ибо сосуд из себе ту вещь изливает,

ею же сам исполнен доволно бывает.

Скорбь

Не всуе Господь скорби попущает

и теми люди Своя посещает.

Вся Он па ползу деет Своим людем,

да в сластех мирских Творца не забудем.

Бичи суть скорби, иже ударяют,

к добродетелем тещи убеждают.

Скорбь и ко Богу грешника вращает,

да под кров Его слезен притекает.

Скорбь весть из сердец злобы изгоняти

и затверделость онех умягчати.

Что рало ниве земней содевает,

то скорбь душевней ползы сотворяет.

В благоденствии Давид согрешил есть,

в скорбех же выну Богу годне жил есть.

И сын от отца блудный отхождаше,

егда в богатстве и во сластех бяше,

А егда гладом и скорбми томися.

скоро ко отцу с плачем возвратися.

К тому, скорбь от злых будущих храняет,

яко соль мясо от тли соблюдает.

Павлу святому скорбь велика бяше,

пакостник плоти егда досаждаше.

Но егда он тем досадно томися.

высоты мыслей удобь сохранися.

Напоследок, скорбь полезна бывает,

ибо терпящым Господь мзду воздает.

Скорбь человеку аще досаждает,

но часто ползы многи содевает.

В умиление скорбяща приводит.

и смирение удобь в сердцы родит.

А за то Господь его присещает,

дар благодати в душу изливает.

Яже чистится чрез покаяние

и вселяется на упование.

От грех будущих скорбь предсохраняет

и в небо душу к Христу возвождает.

Скорби — путь тесный и узкая врата,

теми входится внутрь града пресвята.

Бичь древяный пшеницу от плевел чищает,

пила твердо железо светло углаждает.

В горниле злато огнем палящым чистится.

человек правый скорбми прав паче творится.

Соль от тления мясо соблюдает,

скорбь тело и дух от грех свобождает.

Хотяй платну белу и чистому быти

со многими труды должен оно мыти.

Точне душу от грех скорби очищают,

егда многи телу труды содевают.

Злато огнем ся чистит, и сребро подобне.

а человек от грехов — чрез скорби удобне.

Пилою железо светло и острится.

скорбми же человек от грехов чистится.

Ваалом древо хитрец устрояет,

Господь же душы скорбми исправляет

Точило вино из грезнов изводит.

скорбь добродетель в человецех плодит

Битый орех полезен, а скорбь человеки

благопотребны деет. и живут во веки.

Елей тиснением точила бывает,

скорбь же тук доброты из сердец раждает.

Хотящым благочестно живот провождати

многи беды и скорби нуждно есть страдати,

В первых, от своих страстей, от злоб и налога,

в их же побеждение требе труда многа.

Паки, от супостата, иже искушает

и различныя козни на ны устрояет.

Наконец, от человек, ибо ся ругают

мнози тым. иже честно жити жизнь желают.

Ненависть к кним имуще, клевещут, злословят,

хулят и всяческими сетми злоб я ловят.

Но Человеколюбец их не оставляет,

пособство и утехи выну посылает.

Не всуе Господь в мире скорби попустил есть,

печалем и недугом быти изволил есть.

Но хотя от суетствий его отвратити

люди, и ко небесным благим привратити.

Яко же доилица, внегда отучает

младенца от сосцу си. горесть возлагает,

Тако Господь горести скорбей положити

в мире изволи, да бы люди отлучити,

Приучити же к пищам твердым, постоянным,

в получение силы, в путь небесный данным.

Елма на человека Бог скорби пущает,

не от ярости деет, но токмо чищает.

Тем же не подобает в скорбех унывати.

паче веселодушно в Бозе уповати.

Многи скорби праведным Бог же избавляет.

а радость в них, не печаль верным подобает.

В первых, яко скорби обращают к Богу,

деют суету мира презирати многу.

Паки, яко скорбь знамя предуставления

бывает и известна верных спасения.

Третие, яко Христу Богу точна деет

и скорбный Того в помощь призывати смеет.

Четвертое, яко скорбь похоть умерщвляет

и от греховна нрава люди удаляет.

Пятое, яко в скорбех заслуги множатся,

елма с благодарствием истинным терпятся.

Шестое, яко к делом благим вину творят,

а лукавых помыслы во младенстве морят.

Наконец, ум возносят ко щедрому Богу,

устрояют имети в Нем надежду многу.

Убо, братие, в скорбех вы не унывайте,

но о свободе от них в Бозе уповайте

Злато огнем, пилою железо чистится.

горячею пещию хлеб в пищу строится.

Тако человека скорбь в совести чищает

и душу его годну Богу содевает.

Бичь коня сверепаго благоукрощает.

скорбь мужа жестокаго кротка содевает.

Добродетель велия есть скорби терпети.

но нужда есть в том крепость до конца имети.

Вторая — Христа ради та скорбь да бывает.

аще бо есть за вину, заслуги лишает.

Третяя — да спряженна будет с добротами,

та совершенно творит Божими слугами.

Яко из гроздов вино точило изводит,

тако скорбь в христианех говеинство родит.

Ибо. скорби постигшей, усердно до Бога

воздыхания с слезы возсылают многа,

А Господь, яко Отец, милость Си являет,

егда полезно, тогда скорби облегчает.

Злато огнем чистится, и егда биется

млатом от художника, сосуд благ деется

Во употребление на престоле сущым,

или иным во славе пречестно цветушым.

Подобне человека скорби исправляют,

к покаянию нудят, от грех очищают.

Яко же камением честным украшают,

егда к добродетелем того убеждают,

И тако часто сосуд пречестный бывает.

во нь же Бог благодати вино изливает.

И вечныя источник славы хощет влити.

егда имать в небеси вечно й чредити.

Аще еси железо, ржу скорбь истребляет,

аще же злато еси, светлость умножает.

Скорби в час смерти

Егда Савл Давыда убити искаше,

аки умрети хотяй, Давыд вопияше:

Болезни мя смертныя люте обдержаша,

потоцы беззаконий смятением яша.

Адовы же болезни окрест обьидоша,

смерти вечныя сети нозе соплетоша.

Сими четырми скорбми то нам возвещает,

яко умирающым сих всяка стужает.

Первая знаменает болезнь належащу,

душу из тела, тело ко гробу гонящу

Вторая — яко в той час вси греси приходят

на память и лютое смятение родят.

Адовы же болезни то нам знаменают,

яко муки вечныя тогда устрашают.

Сети паки смертныя суть искушения,

демоны творимая ради прелщения,

В то бо время наипаче демон искушает.

последнее бо время тое быти знает.

Сия чтущий, ко смерти добре готовися,

на лукава демона Тайны утвердися

Покаянием чистым, причастием Тела

и Крове Христа Бога, да тя деют смела.

И елеем священным тщися мазан быти,

тако готова демон не может вредити.

Скорбь и благоденствие

Праведником днесь скорби, беды, гонения

нужду имут велику многа терпения.

Грешницы же богатствы, честми отбилуют,

вся им ко веселию в мире прислугуют.

Но елма время сие мира отщетится.

тогда коло щастия онех превратится,

Ибо грешником скорби, печали и муки

будут, елма приидут во демонски руки.

Праведником же слава, честь и веселие

в небесной будет стране со миром велие.

Обема же во веки сия приключатся.

злых злая и благая благих не скончатся.

Не завиди убо днесь грешных благоденству,

имей очи к праведных вечному блаженству.

Кратко есть зло и благо, еже ся кончает,

то долго, еже конца никогда познает

Скорпий

Скорпий единадесять купно чад раждает,

десятицу же снед их. ед но оставляет.

Да вид рода из мира их не истребится.

ядом же их не лише род наш повредится.

Скотонравие

Отнеле же человек скотом приложися,

в различных нравы зверей весь род развратися.

Неции ядовита, яко змии. быша.

ближния своя ядом аспидим губиша.

Инии. яко тигри. люте сверепеша,

друзии лвом подобну жестоту имеша.

Неции. яко волцы овцохищни, бяху.

инии, яко пави, гордостне хождаху.

Неции. яко жребцы стаднии. блудиша.

инии. яко вепри, в блате ся грузиша.

Неции, яко осли. в лености живяху.

инии же. яко пси, всем завиствоваху.

Прочий зверем прочым уподобишася.

весма человечества чужди творишася.

Чесо ради Бог Отец посла Слово Свое,

еже ословесити лютозверство тое.

И отнели же Слово Отчее въплотися,

нрав зверский в человеческ паки преложися

Скупость

Григорий папа Римский егда преставися,

Савиниан на месте его посадися.

Гладу бывшу, пшеницы сей не раздаяше

нищым, яко Григорий пред онем творяше.

Но веле на немалой цене продаяти,

тако бе нужда многим глад лютый страдати

Яви жи ся Григорий, увещая его,

да от начинания престанет своего.

Да туне даст пшеницу, он же не слушаше.

Святый увещание по трижды творяше,

Потом жесток явися и в главу ударил.

Изнеможе зле папа и мир сей оставил.

Шести месяц не прежив на власти толице,

иде ответ воздати всяческих Владыце.

Калифа, Вавилонск царь, столп велий создал есть,

его же златом, сребром довле насыпал есть.

Выну утешашеся богатством толиким

и каменей предрагих множеством великим.

Единою случися врагом обстояти

град, а он не хотел есть ратников наяти

В защищение града, сокровищ щадяше.

тем же полк супостатов град и краля взяше.

Победитель, удивлся богатству велику,

во укор глаголаше скупу человеку:

Въскую за сие злато полк не стяжал еси?

Убо за скупство твое мзду сию отнеси:

Иди живи со златом и сребром питайся,

того ты выну желал, убо учреждайся.

То рек, повеле его в столпе заключити,

возбранив хлеба ему и воды носити.

Заключен убо скупец, прегорко ридаше,

яко сребролюбитель и зол скупец бяше.

Но ничто же успел есть горкими слезами,

сокровище многое зряше под нагами.

А хлеба ни крупицы во пищу имяше,

все бы то за един хлеб злато отдал бяше,

Но невозможно, тем же гладом изморенны.

на злате валяяся, бысть краль разлученны

Душею от телесе. Не поможе злато,

тем же никто надежды да положит на то.

Слава

Слава, яко ветр, скоро прелетает,

яко дым, в гору идущь. исчезает.

Кто ради славы сребро си дарует,

точен тому, кто ветр и дым купует.

Уне есть мясо ясти, вино сладко пити,

неже ближняго славу злым словом вредити.

Добро ли друга в людех прославляти?

Добро, но лучше слово удержати.

Дотоле молчание нужда есть храните,

даже тя вопрос будет к ответу нудите.

Слава Богу

Елма благое дело сотвориши.

опасен буди, да ся не хвалиши,

Ибо не тебе слава подобает,

егда ся нечто благо содевает.

Но Богу хвалу тщися возсылати,

давшему тебе оно содеяти,

Ибо. кто дары себе причитает

благотворении, яже Господь дает.

Божия хвалы тать злобный творится.

достоин смерти вечныя судится.

Добре псаломник древле глаголаше.

егда имени Господню моляше

Хвалы, не себе. Тако подобает.

да от нас кождо Его прославляет

Имя святое, сице провещая:

Боже великий, буди великая

От всея твари честь и слава Тебе,

вся правящему на земли и в небе.

Что-либо можем благо нарицати,

то от Твоея есть нам благодати.

Тем же мы Тебе славу возсылаем,

едина в Троице Бога прославляем.

Слава Ти. Отче, вся ны сотворивый,

слава Ти. Сыне, вся ны искупивый.

Слава Ти. Душе, прославивый люди.

едному Богу една слава буди.

Неразделимей Троице слава вечна.

Ея же сила и власть безконечна.

Слава свойственная

Благородие кто свое являет,

родители си тогда ублажает.

Аще богатством некто похвалится,

щастию хвала сия приносится.

Свойственная же комуждо похвала,

добродетелми стяжанная слава.

Никто же убо чуждыми хвалися.

добродетелей сам быти потщися

За то бо и Бог имать ны венчати,

за наша дела возмездие дати.

Чуждая благость никого спасает,

яко чужд стомах никого питает.

Слава Божия насыщение духа

Духу нашему вся в мире стужают,

аще и сладка, и красна бывают.

Лучшаго хощет, то же обретает.

егда Божия слава насыщает.

Славий

Славий не леп перием. сладко воспевает,

во дне и в нощи Богу славу возсылает.

Иноци. учитеся худоризни быти,

выну гласом уст ваших Господа хвалити

Славолюбие

Кая есть полза славу в мире взяти.

огнь же в геенне во веки страдати?

Много есть лучше зде без славы быти,

во прохладе же светла рая жити.

Князь Карфагинскии, Ганнон нареченный,

славолюбием бяше побежденный,

И хотя в мире бог наречен быти.

птиц глаголивых веле накупити,

И учащым я тому наставляти:

Князь Ганнон бог есть, светло глаголати.

Егда же тыя изучены быша

то глаголати, волно я пустиша,

Да, летающе, то слово вещают,

Ганнона бога миру проглашают.

Но прелщен Ганнон, ибо спира она

птиц изученных забыла Ганнона.

На воли суще, на глас естественны

вся птицы скоро бяху возвращении.

Ганнон же цены и труд отщетися,

сам в посмех людем умным обратися.

Точне и ныне славы ловители,

чести, достоинств, хвалы любители

Глаголивыя люди собирают.

хлебом и дары тому изучают.

Да глаголют я боги земны быти,

мудры, богаты, всяко нарочиты.

И поют убо, добре глаголюще.

сребром и хлебом прикормлени суще,

Но внегда хлебом оным оскудети.

тщатся и птицы тыя отлетети

На волю свою, в ней же забывают

оныя песни, ину же глашают.

В похвалы место поют хуления,

ругателства, смех и поношения.

Несть убо требе славы нам любити

и птиц сицевых ловити, учити.

Божия славы нужда нам искати.

Он же изволит в небе нам воздати

Велию славу и честь безконечну

в светлостех святых, и радость превечну.

Славу таити

Пришедый свыше образ нам подати.

како во мире лепо пребывати,

Утаил в плоти славу божественну,

избра во матерь Девицу смиренну,

И не во светлей полате родися.

но до пещеры скотския смирися.

Чюдодействия многа сокрываше,

ли учеником немногим являше.

Точию трие апостоли бяху,

иже Преславна на Фаворе зряху.

А егда срамно изволи страдати.

всем людем бяше свободно смотряти

Образ се дал нам. да честь утаяем,

безчестия же мирска не гонзаем,

Найпаче того, еже ради Бога,

за что мзда в небе готова есть многа.

Славы Моея иному не дам

Пентефрий Иосифу весь дом вручил бяше,

токмо едины жены знати не веляше.

Бог же всяческая нам благая общает,

токмо славы Своея никому же дает.

Егда кто благо нечто совершает.

руководитель Бог ему бывает.

Тем слава дела не нам имать быти,

но Благоволшу помощь сотворити

Хитрец орудием дела совершает.

честь не орудию, но хитрцу бывает.

В благих орудия мы делех убога,

убо не нам слава, но Богу премнога.

Славы не искати от человек

Не ищи славы от человек тленных

за творение делес божественных.

Лучше бо есть мзду от Бога прияти.

в небесной славе вечно пребывати.

На ту взирая, Константин Великий

Божия храмы создал есть елики.

Вестно есть миру, и коль украсил есть,

словом заключю: царско сбогатил есть.

Обаче нигде имене писати

веле своего, да бы не прияти

Славы от мира, но паче от Бога,

в светлостех вечных небесна чертога.

Противне. Троян царь имя писаше

на всех делех си. яже созидаше,

Да славен будет зде пред человеки.

(а не у Бога) чрез многия веки.

И бысть зде славен, ибо й прозваша

траву стенную. Тако обругаша,

Уподобивше на стене растущей

траве и скоро всеизсыхающей.

Славы увлачение

Славы отьятие различне бывает

и грех пред Господем немалый раждает.

Во-первых, егда грех тайный изьявится

чуждый от некого, слава блага тлится.

Второе — егда кто грехи извергает

в очи согрешившу, зле славу терзает.

Третие — клевета ложная отьемлет

славу, внегда лжу кто на кого поемлет

Четвертое — внегда чуждо благо дело

отричет кто, или умаляет смело.

Пято — егда чужда благодеяния

зла намерений си имут сказания.

Напоследок, слава добра увлачится,

егда клеветников слушати кто тщится.

Вся сия грех смертный пред Богом раждают,

аще вреда ради деема бывают.

Аще же с легкоты, ли безразсудия,

несвободна, вины тогда простимыя.

Сладость

Вящше едино солнце мир сей просвещает,

нежели множество звезд землю озаряет.

Тако един Бог паче всю тварь услаждает.

нежели вся тварь сердце наше утешает.

Источник бо сладости Бог есть безконечно,

а утеха от твари не пребудет вечно.

Сладость небесная

Инок некий прилежно Богу работаше.

спасения души усердно желаше.

Помышляя же часто о пресветлом небе,

умысли благодать ту упросити себе,

Да изволит часть Господь сладости явити,

яже святым в небеси имать дана быти.

И абие мал птенец к нему прилетел есть

и зело сладким гласом пискание пел есть.

Им же сладкопением инок усладися.

и откуду бе птенец, много удивися.

Егда же того птенца он хотяше яти,

птенец в близку пустыню нача улетати.

Он, ему последуя, сладости слушаше

и на красоту его прилежно смотряше.

Та же сладкопевец он во лес удалися,

а слушатель пения в своя возвратися,

Непщуя, яко токмо час един стояше

и сладости пения птенцева слушаше.

Возвратив же ся. виде всех вещей измену,

града, врат, обителей, жителей премену.

И дивяся сам в себе, в обитель идяше.

но ни же единаго из братии знаше.

Такожде и братия онаго не знаху,

откуду бе и по что прииде, прошаху.

Он отвеща, глаголя: Едва час есть тому,

яко аз от святаго сего изшед дому.

Сладкопением мало птенца насладихся

и паки во обитель святу возвратихся.

Но дивлюся, яко вся вижду измененна.

в мале времени зело преинотворенна.

Братия, дивящеся. в недомысле бяху.

изумленнаго брата быти непщеваху.

Сказаша началнику, иже вопросил есть,

кто оному игумен в обители был есть.

И кии с ним братия купно обитаху,

и кии началници в градех миру бяху?

Он по чину сказал есть, тогда принесоша

книги, и в них имена бывших обретоша.

Таможде обретеся и имя пришедша,

со сказанием: быти невестно отшедша.

И егда тому лета бытию сочтоша,

триста лет с излишеством быти обретоша.

Оле чюдесе странна! Птенец услаждает,

даже триста лет яко един час бывает.

Аще тако частица душу усладила,

что бы целая сладость в сердце устроила?

За ту сладость тысящу лет Давид считает

яко день, или стражу нощную вменяет

Пред очесы Господа. Кто убо до нея

не обратит сердца си и душы своея?

Вы. братие. и горесть всякую терпите.

да ту сладость дивную в небе наследите.

Сладость временна, мука вечна

Мгновенно то есть, что в мире сем тучит.

вечно же ово. что бо аде мучит.

Слезы

Велика слез есть сила, за грехи точимых

из сокрушенна сердца, в любви содержимых.

Ибо в небо восходят, скверну омывают,

огнь геенны лютыя удобь угашают,

И Суд казни, на грешных готовый, отводят,

изречение вечна спасения родят.

Дажд же ми слезы, Христе, за грехи точити,

дажд ми всесовершенно сердце сокрушити,

Да благодатию Ти право умилюся

и достоин милости Твоея явлюся.

Без Твоея милости не могу ридати,

изволи ми, Боже мой, слезы теплы дати.

Токмо грешити могу. Боже мой, без Тебе,

а тем злым можением погубляю себе.

Дажд ми паче, Всещедрый, ту изнемогати,

иде же хощу дело грешно содевати,

И волю мою от злых дел да отвратиши.

Сам на стезю правую да мя наставиши.

Слезы благочестивых потоп содевают

грехом, мир же от скверны люты очищают.

Добра есть уст молитва, но яже есть слезна,

много лучшая, ибо паче есть полезна,

Поне же слово может без усердства быти,

слез же без усердия несть мощно точити.

Краснии от слез очи зело красни Богу,

таковым благодати светлость дает многу

Мало зде слез точаще, радость заслугуют

вечную, юже в небе светлом наследствуют.

Отречением Христа Петр зде осквернися,

но источником слезным пречисто омыся.

Яко же бо водою бани омовенный.

тако он бысть слезами снежно убеленный.

Яже от нас теплыя слезы истекают.

тыя зело горячи демону бывают.

Ибо он огнь геенский паче претерпети

может, нежели слезы кающыхся зрети

Слезы пламень демону лукаву бывают,

яже кающийся тепле изливают.

Аггели же Божии теми веселятся.

аки вином духовным, в небеси сладятся.

Точите убо оны, да будет велие

аггелом божественным в небе веселие.

Изливайте я тепле, да врагу лукаву,

яко змиеву. пламень сей испалит главу.

Иде же капли часто на камень падают.

частым падением си того пробивают.

Вящшая сила слезных капль в людех бывает,

ибо горе восходят, иде же сияет

Слава царства Божия, и небо проходят,

аки пробивше твердость. Бога же приводят

Ко благоутробию. Убо источайте

обилиыя слез токи, небо пробивайте.

Да будут вам двери в нем выну отверзени.

да будете онеми к Богу приведени

В чертог Его всесветлый, еже вечно жити

и во некончаемом веселии быти.

Слезы сердца смиренна силу имут многу,

невозбранно приходят к Царю всех и Богу.

Царствие небесное удобь получают.

Суд грознаго Судии в милость претворяют.

Общаго клеветника нимало боятся,

в дерзновении мнозе пред Богом ставятся,

И вяжут Всекрепкаго, да бы не казнити

мечем ярости грешных, но милость явити.

Держат Неудержима, да мира не губит,

но кающихся людей отческо возлюбит.

Слезы мягкия твердо небо отверзают,

а огнь неугасимый адский угашают.

Ими демон лукавый побежден бывает,

паче, неже пламене многа. тех гонзает.

Не щадите слез убо. обилно точите,

теми на милость Бога к себе приклоните.

Теми от огня вечна себе свобождайте,

теми же небесныя двери отверзайте.

Да внидете во радость Бога жива теми,

получите общество со святыми всеми.

Лвица с пардом обыче в смешении быти.

но лев. вонею познав, тщится ей отмстити.

Она, то сразумевши, в воде ся купает;

лев, вони не чювствовав, мести не воздает.

Тако душа демону егда приложится,

Лев от Иуды. Христос, отмстити ей тщится.

Но аще тажде в слезах будет окупанна.

без отмщения будет, аки непознанна.

Пламень геенский хотяй угасити

слезныя воды да тщится точити.

Океан велий на то не довлеет,

а слез ток малый ту силу имеет.

Яко вода телесе скверны омывает.

тако источник слезный душу очищает.

И яко суха земля водами живится,

душа мертвая слезми оживотворится.

И яко земля плодна бывает водами,

точне плодна деется и душа слезами.

Того ради блаженни. иже зде ридают.

вечнаго веселия за то ожидают.

Рыба не может долго воды кроме быти.

нужду имать без нея дух скоро пустити.

Точне человек кроме слез покаяния

не имать душевнаго животования.

Ибо огнь греха душу скоро сожигает,

аще того источник слез не угашает.

Слезы покаяния полезны суть зело,

ибо врачуют душу, устрабляют тело.

Мокры суть по естеству, тем же омывают

скверны, яже от грехов на душах бывают,

Крещения благодать, грехи погубленну,

к душе человечестей творят возвращенну.

Сланость же имут в себе, да плоть утвержают

и от истечений ю крепко удержают.

Теплота им свойственна, да хлад истребляют.

иже в вере, и любовь теплу соблюдают.

Светлозрачны же велми. да светлыя плоды

изводят, достойныя горния породы.

Юноша некто сердцем сокрушися.

отцу духовному слезен представися.

Написав грехи, хотяше являти,

за плачь же велий не може читати.

Видя презвитер то сокрушение:

Даждь ми. рек, да чту грехов списание.

Даде юноша, он хотя читати,

нача в хартию прилежно глядати.

Но ни же писмя на ней обретеся,

силою Бога дочиста сотреся

Во знамение грехов прощения,

за покаянных слез источения.

Плачите убо. братие, о гресех.

да, омывшеся. будете в небесех.

Не всегда отец духовный случится.

покаяния тайна да свершится.

Слезы же выну возможно точити.

тако надеждным спасения быти.

Слезы за грехи

Александр Великий слезы изливаше.

яко един мир им побежден не бяше

Мы злобы едины что не побеждаем,

праведно, да слезы горки изливаем.

Слезы епископския

Жена некая во граде живяше,

красная лицем и богата бяше.

Ту видя некто епископ грядущу.

в светлыя ризы облеченну сущу.

Пад лицем низу, начал есть ридати,

премноги слезы из очес пущати.

Тогда людие, иже при нем быша,

воздвигше. вины плача вопросиша.

Он отвеща им: О сем аз ридаю,

яко жену ту умом усмотряю,

Вящше тщащуся миру угодити,

неже аз тщуся Богу послужити.

И шед во дом свой, о жене плакате,

молитвы теплы к Богу возсылаше,

Яже Бог внушив, милость Си явил есть,

от неверия жену обратил есть.

Епископ паки елма почиваше,

во видении будущее зряше.

Виде черную птицу, прилетевшу

во руце его и смиренно седшу,

Юже прием он, в воду погрузил есть.

и тако черность в белость преложил есть.

Черную бывшу в воду погружаше,

белу из воды тужде восприяше.

Воспрянув отец, сонию дивися,

но яве делом оно исполнися.

Утру бо бывшу. жена со слезами

оная приде, паде пред ногами,

Нача умилно онаго просити,

да бы, ю прием, изволил крестити.

Епископ сердцем в радость разрешися.

яко та жена к Богу обратися.

Потщася ону по чину крестити,

демоню рабу Богу водщерити.

И тако, яже грехми черна бяше,

белость от Духа Святаго прияше

Со веселием верных, тамо бывших,

в дружество свое жену приобщивших

Сия слышаще, действо слез судите

мужа духовна, епископы чтите,

Яко молитва их силна у Бога,

доходит даже небесна чертога.

То же разсуждше, молитв их желайте,

благословящих их руки лобзайте,

А их молбами Бог изволит дати.

еже во ползу может вам бывати.

Слезы Петровы

Петр святый егда словом Христа отречеся,

не в словеса молитвы, но в слезы дадеся.

Чтем, яко плака горко; не чтем, что вещаше,

Петр убо плака сердцем, усты же молчаше.

Яко. о нем же слезы достоит лияти,

не подобает того словом извиняти,

А неизвинимое слезы омывают.

Бога ко прощению удобь преклоняют.

Омывают грех слезы, его же сказати

словом усрамляемся, тем благо плакати.

Сам Христос Бог блаженны люди нарицает,

их же сердце в миресем в плачепребывает.

И блаженней во дом есть плачющих входити,

неже во ликующих храмы тщивым быти.

По слезах бо обыче радость возблистати,

по веселии паки — печаль наступати.

Слова слушателие

Дети в книгах образом крашенным дивятся.

разума же писаний познати не тщатся,

И чтуще убо, ползы не могут прияти,

яко силы писаний не хотят искати.

Точни им слушатели словесе бывают.

иже высококрасных учений желают,

Презирающе слово неукрашенное,

новыми вещании не исполненное.

Гладни сии отходят от трапезы к дому,

ни себеползу вземше, ни кому иному.

Оле несмылства! Кто есть в орехах смотряяй

красоты кожи, а не сладости желаяй

От ядра гортани си? Разве изумленный.

Ты, чтый сия, не буди тако несмысленный.

Ядра снедай Писаний, коже не дивися.

в Божий, а не во мирский разум богатися.

Слова отметание

Елма пищы стомах не хощет взимати,

о близости смерти требепомышляти.

Точне. аще душа Слово отметает.

близость своея смерти проявляет.

Слова неслушание

Слон нелеполичный и велбуд горбатый

имеют обычай, естеством завзятый,

Еже. внегда воду оным чисту пити,

первее ногами ону возмутити.

Сие негли того ради содевают,

да нелепия си в ней не созерцают.

Подобнелюдие злии препинати

слово обыкоша, и книг не читати.

Да худоличия си не усмотряют

и злых дел не видят, яже содевают.

Затыкают уши, да бы не слышати,

яже проповедник хощет обличати.

Словеса Христова, на крестеизреченная

Слово Божие елма телом умираше,

вися на кресте срамно. Спасение наше.

Первое слово Его к Отцу испустися.

о убивающих И прилежно молися:

Отче, остави им грех, поне же не знают,

умом помрачении, что Ми содевают.

Второе к разбойнику слово Христос дал есть:

Днесь будеши со Мною в рай, обещал есть.

Третие ко Марии изболи вещати:

Се Иоанн сын тебе, любезная мати;

Тебеже, Иоанне, мати есть Мария,

буди служитель чистый Девы Пречистыя.

Четвертое дал слово: Жажду, вопияше,

от враг же оцет и желчь за воду прияше.

Пятое: Или, Или, Лимасавафани.

изпусти из святыя Своея гортани.

Шестое: Свершишася, сиречь, исполненна

вся, яже о Мне быша древле прореченна.

Седмое, елма уже дух Си изпущаше:

Отче, дух Мой вручаю Тебе, вопияше.

По сих Сам умре плотски, а нас оживил есть,

ибо смертию Си смерть нашу умертвил есть.

За что Ему вечная честь и слава буди,

да хвалят И аггели, купно и вси люди.

Слово

Единою птица сущи упущенна,

неудобно паки бывает вращенна.

Много паче слово, еже испустится,

неудобно воспять из мира вратится,

Но на всяк час летит далее во люди,

того ради косен глаголати буди.

Со спящым слово человеку тому,

иже мудрая вещает глупому.

Птицу из клетки скоро мощно испустити,

но труд есть паки в тужде ону возвратити.

Точне без труда слово из уст ся пущает,

но никоим образом воспят ся вращает.

Егда убо хощеши нечто глаголати,

потщися прежде оно умом разсуждати.

Да не како печаль ти велику содеет,

егда в ушесех людских везде ся разсеет

Среброкузнец пилуяй, еже отпадает,

не вержет, но во един сосуд собирает.

Еже послежде ему прибыток содеет,

елма претопити все огнем возумеет.

Подобне правоверным есть творити требе,

от божественных словес собирати себе,

Что-либо услышится, а не забывати,

имать бо в свое время ползу многу дати.

Аще Слову Божию ухо приклониши

и то во сердце твоем любезно храниши,

Уповай, яко слово молитвы твоея

внушит Господь Бог ради милости Своея,

И прием я во сердце, имать сотворити,

о нем же ты тщишися во ползу просити.

Слово Божие

Дождь пламень огня может угасити,

Слово Божие — похоти кротити.

Мечь правы во кривое место не вхождает,

право место правому мечю подобает.

Мечь есть Слово Божие, а мечь правый зело,

место есть сердце, убо да есть право, цело.

Инако в нем Божие Слово не вместится,

Дух бо мудрости в злобней души не селится.

Огнь есть Слово Божие, его же пустити

сниде Христос на землю, да бы очистити

От грех естество наше, тем ся воспаляет,

иже нечистотою не влажен бывает.

Иже паки в мокроте скверны пребывают,

неудобь воспаленни тем огнем бывают.

Нищий — древо сухое, мокрое — богатый,

не сего, онаго огнь воспаляет святый.

Сиречь, Слово Божие, нищий бо слушает,

а богатый печалми ушы затыкает.

Слово Божие есть мечь правоукованный,

в кривое влагалище никогда прятанный.

Правому слову сердце да будет правое,

яко же влагалище мечю некривое.

Евреи изначала манну возлюбиша,

наконец, тужде пищу себе омерзиша.

Тако Слово Божие мнози возлюбляют

вначале, потом тожде сердцу омерзяют.

Сладкое сота паче прегорко им мнится,

яко тем злоба грешных нещадно казнится.

Хотяй блаженно жизнь си провождати

Божия Слова должен есть слушати,

Еже блаженству виновно всякому.

не токмо земну, но и небесному

Действенно зело, тем же подобится

различным вещем, яко же явится.

У Исаии Слово Божественно

велегласнаго воде подобленно

За вину сию, яко утоляет

жажду душевну и дух охлаждает,

И еще. яко скверны омывает

душ кающихся, в ня же ся вселяет.

Паки, сладкому вину подобится,

яко тем радость во сердцах родится,

И яко душы силны упояет,

забвение в них мирских благ раждает.

Тем пустынницы вином ся упиша,

всех красных мира и сластных забыша.

Еще и млеку Слово уравненно,

яко из персий Бога источенно

Сосцама Ветха и Нова Завета

в воспитание житель сего света,

Чад Бога жива, да бы возрастати

в телеси церкве, и мужествовати.

Такожде хлебу Слово уравнися,

ибо во пищу Церкви предложися

И сердца верных силно укрепляет,

во путь небесный дивне утвержает.

Наконец, дожду у него сравненно,

яко на землю с небесе сточенно.

Что дожд из облак. Душы окропляет,

к плодом духовным оны устрояет.

Без дождя земля вел ми усушится.

душа без Слова в камень преложится.

Аще и мягко Слово ся являет,

но яко капля камень пробивает

Не твердостию, частым падением,

тако и Слово — в сердце толцанием.

Дождь черви нудит из земли изьити,

Слово весть грехи из душ понудити.

Персть курящуся дождь благ укрощает,

мысль мятущуся Слово уставляет.

Дождь пламень гасит. Слово же похоти

Божие гасит в тленней нашей плоти.

Тем же полезно ушы сердца дати

ему. да течет с даром благодати.

Иеремиа, пророк божественный,

благодатию Бога исполненный,

О Слове Его то нам возвещает,

что Бог е огню и млату равняет,

Иже камени силен есть крушити,

а наковално найпаче твердити.

Огню есть Слово Божие подобно,

яко терзает вся споны удобно.

Не может в персех заключенно быти,

елико может, тщится вон изьити.

Заключити то тирании хотеша

в персех апостол, но ничто успеша.

Елико они страхом заключаху

и словоносцем раны налагаху,

Да бы молчати, потолику тии

оно вещаху мужие святии,

Даже изьиде до всемирна конца,

иде же злата зари светят солнца.

Еще огневи и тем подобится,

яко, егда в огнь железо вложится,

Все есть огненно, вид свой изменяет,

тако, где Слово Божие вхождает.

Во ин вид сердце зрится преложити,

в духовна мужа плотска претворити,

Даже возможно ему глаголати

Христа во сердце своем обитати,

Яко же Павел древле глаголаше,

не себе в себе, но Христа, вещаше.

Млату же Слово Божие подобно.

яко скрушает твердости удобно.

Твердосерд бяше Савл, и гонитель.

но скруши млатом Си Христос Спаситель.

Жестоку выю Киприан имяше.

но млатом Слова умягченны бяше.

Идолов жрецы зело тверди быша.

но мнози сему млату уступиша.

Обаче, егда млат вся сокрушает,

он наковално само укрепляет.

Ты наковално оному не буди.

но мягкотворимь по вся дни пребуди.

Псалмописатель, Духом исполненный,

светилник зовет Глагол Божественный,

И стрелам острым его подобил есть,

ими же враги Господь победил есть.

И вправду рече светилника быти.

ибо без него душе вредно жити.

Яко бо в нощи ногу претыкает.

иже без свещи путь свой совершает.

Тако без света Слова Божественна

душа бывает зело соблазненна.

И стрелам лепо Слово подобится.

ибо. где оно во сердце вонзится.

Яко же стрела, язву содевает,

равне нескоро изъято бывает.

Стрела телесну выю покоряет,

а Слово душу Богови пленяет.

Тем вселенная Христу подчиненна,

а не железным мечем подбиенна.

Разнствие токмо — стрела умерщвляет.

Слово же мертву душу оживляет

Бог Слово Свое слово приравняет

семени, еже севец засевает.

Яко подобне нивы добротою.

нам проявляет плодотворность Свою.

И паки, яко в семени держится

по силе корень, и плод что таится,

Тако во Слове Божием есть вера

по силе, купно и благая дела,

Ибо от слуха вера ся раждает,

вера же дела плодоприношает.

А яко кроме семене не плодит

нива пшеницы, подобне не родит

Сердце без Слова делес божественных,

небозаслужных, нам душеспасенных

Зерну горушну Слово Божественно

от Христа Бога есть уподобленно,

Яко в малости силу соблюдает

зело велию и здраво бывает.

Точне бо Слово мало посеянно

растет велико и в действе избранно.

Горушица же егда ся стирает,

вящшую силу из себе пущает.

Подобне Слово, аще умягчится

ума зубами, силнее явится.

Павел апостол, сосуд всесвященный

славы Божия, Духом умудренный.

Божие Слово мечь остр нарицает.

Златоустый же вину того дает:

Яко же (рече) мечь остр сечет плоти,

тако Божие Слово — вся похоти.

Тем, егда похоть в человеце въстает,

книги святыя скоро да читает.

Абие похоть будет отсеченна

мечем всеострым Слова Божественна.

Иаков святый зерцалу равняет

Божие Слово, яко содевает

То человека немощь свою знати,

аки в зерцале лице созерцати.

И яко вещи, прямо положенны,

во сткле зерцалном бывают виденны.

Тако во Слове воля Божественна

верным бывает Словом изьявленна.

И еще, яко огнь ся возжигает

от зерцал неких, егда возсияет ю

Солнце лучами си остро на тая.

тако проповедь есть божественная,

Словом Божиим пламень раждающа

любве святыя, и просвещающа.

Соломон мудрый врачество свершенно

глаголет быти Слово Божественно.

Ибо всяк недуг в душах устрабляет,

яко врачевство тело исцеляет.

Бедство болному, аще врачбы презирает,

вящшее — грешну, егда Слова не слушает

Божественнаго, еже весть целити,

от смерти душы в живот возвратити.

Благо есть Слову Божию внимати

и присно в уме своем содержати

Божие Слово, есть бо ума пища,

як плоди земля суть пажит сирища

Убо, яко же, внегда не сваряет

пищы сирище, или изметает,

Знамя известно смерти близу быти.

хотящей тело червми расточити,

Тако умови, Слова не держащу

Божия, судом добре не варящу,

Смерти есть знамя душы человека,

червей, хотящих ясти во век века

Многих вин ради Слово Божественно

возможет быти воде подобленно.

Во-первых, вода жажду утоляет

и пламень огнен силно угашает.

Подобне Словом Божиим творится,

жажда душевна во людех толится

И пламень страстей угашен бывает,

им же множество людей исчезает.

Паки, водою всяка вещь чистится,

а Словом душа нескверна творится.

Еще, повнегда вода напояет

нивы собою, плодны содевает.

Слово же душы, яже орошает,

добродетелми плодны содевает.

Еще, во воде мощно себе зрети,

и кто каков есть лицем, разумети.

В Божием Слове леть есть совесть знати,

лице душевно и скверны чищати.

Наконец, яко воду возмущает,

кто в ней ногама землю воздвизает.

Тако и Слово Божие смущают,

иже неправо толк ему творяют.

Сице смутиша еретици злии,

проклята врага бывше в учении.

Мы яко воду мутну оставляем,

чистою жажду нашу утоляем,

Тако и слово да лишим смущенно,

а то да внушим, еже очищенно.

От сего ползу имамы прияти

и с Богом Словом за то пребывати

Во стране жизни, во пресветлом небе,

еже да даст Бог. читателю, тебе.

Мечь правый во кривое место не вхождает,

право место правому мечю подобает.

Мечь есть Слово Божие, а мечь правый зело,

место есть сердце, убо да есть право, цело.

Инако в нем Божие Слово не вместится.

Дух бо мудрости в злобней души не селится.

Слова Божия правым той сердцем слушает,

иже не обличити, но знати желает.

Слово царское

Елико клятва людска тверда ся вменяет,

толико слово царско в делех да бывает.

Слово блудное

Словеса блудная сердце уязвляют,

яко же острая стрела, е пронзают.

Слон

Елма слона ловитель пленити желает,

ищет древа, о нем же слон ся утвержает,

Хотя почити, и то наблюд, подсекает.

Сам утаився в лесе, слона ожидает.

Иже по обычаю к древу приклонится,

ему же падшу, и он на землю свалится.

Не могий же востати. плен ловцу творится,

и тако зверь превелий человеком лстится.

Аще же не присущу ловцу слон падется.

тогда им стенание и рык издается.

То слышаще, слонове инии приходят

и всячески прилежат, да падша свободят.

Не возмогше же ему помощи подати,

начнут слезы точити и тяжко ричати.

Тогда малейший всех их, но силнший. приходит

и носом своим падша сей слона возводит.

Сице естествословцы о нем поведают,

духовнии сему толк духовный издают.

Изрядно Иероним глаголет блаженный,

яко сице падеся праотец, прелщенный

Древом от ловца адска, и не леть бе встати,

тем нача падения своего ридати.

Прилежа его Моисий лежаща подьяти,

но не може помощи доволны подати.

По нем й воздвигнута пророцы хотеша,

но и тии во ползу падша не успеша.

Начата яко горце ко Богу ридати,

да пошлет могущаго падшу помощь дати.

Их убо молитвами сниде Умаленный.

Бог Сын свышше, ибо в плоть нашу облеченный.

И силою Своею падша возставил есть.

егда должника с Отцем Своим примирил есть.

Солин в книгах си пишет, како слон ловится,

иже паче всех зверей к разуму ближится.

На пути его яму ловитель копает

и тайну творит, слон же в ню грядый впадает.

Не могуща же встати, биет. убодает,

но зверь силный укрощен тако не бывает.

Хитрым убо вымыслом ин ся ловец явит,

иже перваго биет притворно и давит.

Та же прогнав оного, слону пособствует

и из ямы подъяти его усердствует.

Подъем же. дает пищу, зверя оглаждает,

ту зверь, милость восприем, его возлюбляет,

И абие быв кроток, пред ловцем корится,

идет по нем, послушлив во делех творится.

Правда ли то. несть ми спор, но разум духовный

о Адаме и Христе ползы зело полный.

Ловитель убо первый есть демон лукавый,

яму Адаму в рай и нам ископавый

Греховну. в ню же вси мы в Адаме падохом,

язвими от демона, встати не могохом.

Егда же искушенми зело досадил есть.

тогда вторый Ловитель, Христос. Ся явил есть,

И во правду перваго поразив, прогнал есть,

роду нашему помощь велику подал есть.

Изьят из рва греховна, Телом Си питает,

кровию пресвятою поит, очишает.

Сию мы зряще милость, должни кротцы быти,

Спасителя нашего усердно любити,

И вослед Его ити всяко подобает,

иго носити. еже на ны возлагает.

Иго же Его благо, и легко есть брямя.

не отягощающе чрез все жизни время.

Но увы нам, яко мы слоном посрамлени.

поне же милостию несмы укрощени.

Зверь дивый благодарство тщится воздаяти,

мы словеснии того не хощем являти.

Паче слона зверствуем, зрим убо. да с звери

не будем не впущени в небесныя двери.

Слон в новомесячий во реку вхождает

и водою оныя себе омывает.

Нам на всяк день годствует слезами ся мыти,

еже бы чисты душы Богу представите.

Служитель Таин

Что златая на воске печать изтискает.

то равне костяная в нем изображает.

Точне, что преподобный жрец в Тайнах действует,

то ж грешный чрез заслуги Христа изводствует.

Тажде цена бисеру в руках оскверненных.

яже ему. держиму сущу в очищенных.

Тако Евхаристии Тайна божественна

грешным. яко же святым, бывает священна.

Служити богу выну

О коль позно есть дело тогда начинати

Богу служити, егда время умирати!

Вся дни мы долженствуем работати Ему.

яко всяческих благих Дателю нашему.

Он вся дни о нас промысл имать божественный,

да кождо не погибнет, но будет спасенный.

Мы ли убо не должни по вся дни служити

Творцу и Промыслнику. и выну хвалити?

Он нам вечно благая в небеси готует,

мзду вечну за временну службу обетует.

Он Сына дал Своего на смерть люту зело,

да бы нам жити вечно, блаженно, весело.

Вся ина благая без числа премнога

ни от кого инаго. токмо суть от Бога.

Мы раби по естеству. Он — Господь во веки,

сотворивый аггелы и вся человеки.

Аггел и служат Ему во время всякое,

славят и хвалят имя Его пресвятое.

И мы убо все должни Оному служити

вся дни жизни нашея. и присно хвалити.

Слушати Бога

Бога слушати верным подобает

во всяцем деле, еже завещает.

паче человек. грешити могущих,

изменных сущих.

Князь кто. или царь? а то завешает.

что неугодно Богови бывает?

Того слушати — беззаконно дело.

глаголю смело.

Уне есть муки всякия страдати.

нежели Богу противно деянии;

аще бо за то плотию умреши,

духом живеши.

А тело Духом будет оживленно,

на небе в славу вечну воведенно.

и с Богом вечно имать царствовати,

венцем сияти.

Слепец

Слепец аще слепцу руковожд бывает,

и вожд, и водимый во яму падает.

Слепота

Товия старый егда зрети не можаше,

Рафаил же: Радуйся, ему глаголаше,

Рече: Како удобно мне радость имети,

ему же лучес солнца невозможно зрети?

Аще слепота плоти тако досаждает,

зри. кую душевная беду содевает.

Кто, в тей седяй, возможет радость в сердце взяти?

Аз умом моим грешным не могу пояти.

Епископ Халкедонский слеп очима бяше,

Иулиан Отступник тем й укоряше.

Рече епископ: Хвалу Богу возсылаю,

яко отьят ми очи. да не созерцаю

Тебе, богохулника, Церкве гонителя,

правды ненавистника, верных мучителя.

Слепота сребролюбивых

Кротория животно есть в мире слепое,

еже ничто же видит чрез житие свое

И ничто ино деет, токмо землю рыет,

в ней корение древес плодных яст и тыет.

А внегда приближится житие кончати,

в то время начинает очеса являти.

Их же не име в жизни, по смерти бывают,

но ни едины ползы тогда содевают.

Сему животну точни сребролюбивии,

иже ничто же видят, елма суть живии.

Не имут очес в небо, да бы е стяжати,

не видят ада, да бы его избежати.

Присно же землю рыют, ибо пребывают

в стяжании земленных, тем ся упражняют.

То их всегда радость, то и услаждение,

тщетных земля пребытков приобретение.

Плодоносных же древес корень согризают.

елма добронравныя люди развращают.

Божия благодати кожю отсецают,

егда я злых советов зубы огризают.

Живут же тако весь век в слепоте конечней,

не помняще о жизни и о казни вечней.

А егда ко пределу жизни приближатся,

тогда отчасти очи онех проявятся.

Начнут то усмотряти, яко зле век жиша,

внегда суетам земным сердца приложиша.

Но ничто же во ползу деяти возмогут

за жестоту, а злато сребром не помогут.

Наипаче же по смерти очи отверзутся,

елма во тму кремешню или в огнь вергутся,

Яко же богатому бяху отверзенны,

егда бе во геенский пламень воверженны,

Ибо тогда Лазаря с Авраамом зряше,

его же на гноище прежде не видяше,

И единыя капли во прохлад просил есть,

но не подавый крупиц тоя лишен был есть.

Мы да не творим тако, зде будим очити,

горе потщимся сердца наша обратити.

Очи наши ко Богу выну да возносим,

от Него непрестанно милости да просим.

Донде же ущедрит ны, да зрим на нищыя.

препитания от нас зде требующыя

А Господь имать на ны выну призирати,

временная нуждная обилно даяти,

И во грядущей жизни даст нам в свете жити.

видения лица Си не лишенным быти.

От трапезы вечныя имать насыщати,

глада, жажды и муки не попустит знати.

О блажен, иже хлеб той ясти сподобится,

яко вечно в радости жити укрепится.

Укрепи ны днесь. Боже, даром благодати,

а в небе хлеб той святый изволи нам дати.

Смерть

Неправо есть смерть злу именовати,

яже весть злобам конец полагати.

Горка и страшна смерть есть человеку,

яко предел есть коегождо веку.

Ах, страх и трепет ону помянути,

но никомуждо леть ея минути.

Малый и велий должен умирати,

душу Судии, плоть же земли дати.

Ужасна люте и плачевна нужда,

обаче утех неких есть не чюжда.

То на страх ея врачевство бывает.

яко смерть врага наша умерщвляет.

Плоть супостатну. рать на дух движущу.

ко душевредным сластем и влекущу.

Вторая может си утеха быти,

яко вся труды она весть кончити,

Скорбем, печалем предел полагати

и от юз плоти душу свобождати.

Третие сие есть утешение.

яко по смерти душам вселение

Во светлых местех Свет Христос дарует,

кто токмо добре она заслугует.

Чесо ради смерть в мире оставися.

а не изгнася. егда победися

От Христа Бога? Мнится уне жити

без страха смерти, неже с оным быти.

Не тако, друзи. благо, яко мнится,

но яко Богом всемудрым судится.

Брозду то Господь людем наложил есть,

егда смерть телес в мире оставил есть.

Смерть бо от грехов люди отстрашает

и мирских суетств презоры раждает.

Силнии егда ону поминают,

гордости роги абие слагают.

Бедным утеха ею ся раждает.

смерть бо всем скорбем предел полагает.

Нищым смерть силных скудость утоляет,

милостыня бо им щедра бывает.

Избранницы же смертию блаженни.

ибо в рай светлый бывают вселенни.

Инии чрез смерть венчани бывают,

егда за Христа душы полагают.

Наконец, слава Христови родится.

егда от гроба мертвец воскресится

Сих ради вин смерть в мире оставися,

ты. читателю, к ней уготовися

Добрыми делы. не даст вреда тебе.

я врата ея станеши на небе.

Доспевшая яблока сама отпадают,

старии аки сами хотно умирают.

Зеленыя же плоды нужда обивати,

смерть юныя видится силою хищати.

Смерть тела — егда душы оно ся лишает.

смерть душы — елма ону Господь оставляет.

Яко же бо душею плоть наша живится,

подобне душа Богом живуща творится.

Ни мала радость воину бывает,

егда враг с мечем его достизает.

Всяк человече. смотри, за тобою

смерть есть с косою.

Горка смерть бяше, но у осладися,

егда Иисус сладкий умертвися.

Во мерре древом вода исправленна,

смерть креста древом миру услажденна.

Тем мученицы, что меда, желаху

смерти, и под мечь радостно течаху.

Аще кто вещь худу на добру меняет,

весел, не печален, тогда он бывает.

Мы вскую печални. елма умираем.

и тлю в нетление чрез смерть пременяем?

Волк аще кого вопредь созерцает,

той страхом обьят. безгласен бывает.

Аще же прежде волк ким усмотрится,

той не страшится.

Сицева смерть есть, творит ны ужасны.

аще впредь зрит ны, и деет безгласны.

Нужда нам убо. да бы не немети,

прежде ю зрети.

Зрит же ю прежде, кто воспоминает

выну, яко смерть косу изощряет

и въмале хощет его покосити,

во гроб ввалити.

Сие же помня, честно жителствует,

на Суд Господень тощно ся готует.

Сицевый смерти муж не убоится.

смел преселится.

Красныя цветы человек терзает,

смерть же лютая его посецает.

Известно человеком. яко смерть всех чает,

никого же безсмертно жити оставляет,

Но не благоволи Бог известия дати,

в кий день или час она имать кого взяти.

Ни же образа смерти комуждо явил есть,

токмо готовым всегда быти увестил есть,

Да не купно с плотию умрем и душею,

но да во живот вечный водворимся ею.

Аще убо здрав еси, к смерти готовися

и силою многою никогда же лстися,

Весть бо смерть и здравыя люди умерщвляти

и силныя во гробех мужы полагати.

Множицею же мала вина им бывает,

яже сладкия жизни внезапу лишает.

Анакреонт поета ягоды ядяше,

от них же во гортани единая сташе

И бысть смерти виновна, здрава умертвила.

безсилная силнаго во гроб низвалила.

Товий же благородный елма млеко ял есть,

случаем во гортани влас тонкий остал есть.

Его же не возмог он никако изьяти,

нужду име кончину тако восприяти.

Оле злоключения! иже не бояся

остра меча, той власом претонким скончася.

Ахилон Спартаниский егда веселися,

яко сын победитель егов сотворися,

Елма с радостию си сына обьял бяше,

излишеством радости живот свой скончаше.

Оле развращения! и радость бывает

смерти виновна, яже живот продолжает.

Подобне Софокл мудрый, егда совершил есть

трагедию премудро и ублажен был есть,

От множества радости притече до конца.

ни ктому сподобися видети свет солнца.

Точне Кандим торжество егда совершаше

и венец на главу си златый приимаше,

Веселия виною дух свой испустил есть,

радость велику в слезы многи преложил есть.

Такожде и Диагор, три сыны имевый

и за победу тыя венчаемы зревый,

Егда тии венцы си ему возложиша

на главу, яко отца любимаго чтиша,

За великую радость живота лишися.

Сия ты. читателю, слышя. удивися.

Како и радость мертвит, яже услаждает,

колми же паче печаль, яже огорчает.

Дивяся паки, готов буди умирати.

да смертию можеши жизнь вечну прияти.

Ибо яже готовы смерть люди хищает,

не мертвит, но во вечность жизни преселяет.

А иже не готови ко смерти бывают,

зде телом. а душею вечно умирают.

Смерть известна комуждо. но время несть вестно.

того ради достоит жити свято, честно.

Да. обретши во благих делесех живуща.

в небо вселит, не в зубы ада всеядуща.

Аще древо на страну юга упадает

или на север, тамо выну пребывает.

Подобне и человек по дни смерти будет:

вшед в небо или во ад, тамо в век пребудет.

Лежит нам единою комуждо прияти

кончину смертну, по ней тамо пребывати

Невозвратно во мир сей, иде же кто себе

устроит деды место, во аде, ли в небе.

Тщитеся убо, молю, благая творити,

да бы не в темном аде, но в небеси быти.

Во аде — тма. зуб скрежет, глад, огнь, мука вечна,

в небе — свет, мир, честь, радость и жизнь безконечна.

Любомудрие — смерти плоти не ридати,

буйство же — в смерти душы утеху прияти.

Смерть честная

Честна смерть преподобных у Господа Бога,

яко свободны деет труждения многа,

И яко радость оным нову откривает,

яже предивно душы их возвеселяет;

Напоследок, яко я безбедственны деет

о вечности блаженней, к ней же всяк благ спеет

Смерть судит право

Суд смерти праведен есть, лиц не избирает,

ни единому смертных прошение дает.

Равне обыче юных и старых хищати,

великия с малыми во тлю прелагати.

Не смотрит благородных, силных не боится,

честных жен и дев лепых нимало стыдится.

Богатыя с нищыми равны содевает,

егда равне в платенцех во гроб полагает.

От мудрых мудростию смерть не прехитрится,

и буй муж буйства ради ею не презрится.

И сего, и онаго не знает лишати,

должен кож до под косу ея главу дати.

Помни убо, всяк царю и великий княже,

яко. яже смерть нищым, и тебе есть та же.

Образ исхода разный, а всем отходити

едина нужда лежит, и в прах тьлом ити.

Знай тебе смертна суща и во гроб грядуща,

яко земля днесь еси, землю и будуща.

Разсмотри прежде тебе во мире жившыя,

тебе славою равны и честми бывшыя.

Где суть царие. иже роды победиша?

Где суть силници, иже весь мир покориша?

Где суть, иже торжества светла содеваху,

на лвах, еленех, слонех во град свой вхождаху?

Где страшнии тирании и где воеводы?

Где непобедимии монарси и роди?

Не вси ли в земней персти трупы положиша,

и из нея же взяти, в землю ся вратиша?

Инех едва немноги кости обретаем,

а чия оны бяху, ели неких знаем.

Сниди в древния гробы и вижд обнаженны

кости, и разсуди ми, кто се положенны:

Раб или господь его? нищ или богатый?

на престоле седевый, с гноища ли взятый?

Разпознай от немощна во крепости бывша,

и от худороднаго — в славе мнозе живша.

Воистинну несть мощно того разсудити,

знай токмо, яко долг есть в земли всем нам быти.

Чрез Навходоносором он образ виденный,

иже от различных бе крушцев сотворенный.

Изрядно сила смерти есть изображенна.

яже на вся мирския саны низпушенна.

Ибо, яко той образ каменем скрушися

малым, иже от горы некия свалися.

Тако всех санов мира смерть люди стирает,

честных, славных, богатых в землю обращает,

Сущи яко от горы сама отваленна,

чрез первозданных врагом во мир воведенна.

Тоя суд праведнейший в памяти держите,

вси живущии в мире, и тако живите.

Да бы добре умрети, паче же уснути,

потом от земля в живот вечный воспрянути.

Еже не осужденным от Господа быти,

но во небесной славе с Ним радостно жити.

Смерть равнит

Различныя цветы поле прозябает,

ими же ся зло лпо украшает.

Цвет цвета изрядней, весело есть зрити

количеством разни и качеством цвети.

Различна в них воня и силы различны,

яже от благости прияху Владычны.

Но едина коса вся ты уравняет,

егда без избора косец посецает.

Равно уведают, сохнут и во пищу

отдаются скотску алчному сирищу.

Тако во всем мире от начала веков

много различие в среде человеков.

Друг друга во нечем знатне превосходит,

сего честный отец, того худый родит.

Сей в богатом доме, ов в нищем рожденны,

сей крепок плотию, ов силы лишенны.

Ин разума исполнь, ин мало что знает,

всяк же косы смерти неизбжно чает,

Яже вся во гробех имать уравнити,

в тление и во прах земный преложити.

Равне всех по смерти кости обнажатся

и тыя временем в землю претворятся.

Не хвалися убо. человече тленный,

аще выше инех еси вознесенный,

Но благодарствие да твориши Богу.

яко благодать ти сотворил есть многу.

Он же и приложит, еже тя почтити

и во небесное царствие вселити.

Смерть близкая

Трех перстов от смерти есть разстояние

деющих на пучине морстей плавание.

Деки дебелость стена им. та аще скрутится,

кождо. сущий в корабли, водами топится.

Точне воин близ смерти, аще есть и здравы,

глава бо его ищет смерти, а смерть — главы.

Течет воин по чужду главу, а бывает,

яко въместо чуждыя свою полагает.

Смерть трегуба

Треми образы в мире смерть бывает:

первая душу с телом разлучает,

Вторая грех есть, душу убиваяй.

благодати ю Божия лишаяй,

Третия во день Судный совершится,

егда с душею и тело казнится.

Первая страшна, но вреда не деет,

вторая зла есть, но врачбу имеет —

Покаяние; третьяя зла вечно,

огнем бо лютым мучит безконечно.

Смерти ждати

Седяй в темнице, на смерть осужденный,

не может быти в радость возбужденный.

Сладкий глас гуслей не возвеселяет,

вся, яже честна миру, презирает.

Едино мыслит о смерти грядущей.

в гроб тело, душу к Судии ведущей.

Комуждо сице подобаше жити,

яко в темнице душевней пребыти

В слезах премногих, а не во радости,

в воздыханиях, а не во сладости.

Убо вси на смерть есмы осуждении,

в темнице плоти на ту заключении.

А то несть вестно, когда изведется

кто и косою смерти посечется.

Тем же на всяк час подобает ждати

и христиански к ней ся готовати.

Да, аще тело грешное истлится,

дух в нетления страну да вселится.

Смерти память

Егда тя радость исполнит велика,

помни, яко смерть мертвит человека.

По ней же слезы за радость бывают.

конца не знают.

Имеяй очи да тщится смотрети,

имеяй уши да тщится слушати.

По вся дни мертвец ко гробу несется,

вечная память умилно поется.

Обаче очи не любо смотряют,

уши надгробных песней не слушают.

Узрит же око Судию Страшнаго,

услышит ухо си глаголющаго:

Идите во огнь во веки горети,

общество люто с демоны имети.

Всяких вещей кончина ум наш увещает,

да никогда смертнаго конца забывает.

Течет солнце на запад, бегут в море реки,

преходят дни и нощи, лета и вся веки.

Да во памяти держим смертную кончину

и слезами очистим грех, ея причину.

Но мы со еваггелским богачем смышляем

жизнь себе долговечну, и к душе вещаем:

Душе. яжд. пий. радуйся, се многа суть тебе

благая пристяжанна ко всяцей потребе,

Не зряще того, яко смерть на ны с косою

выну бдит, да посечет, что траву с росою,

Ни же разсуждающе, яко вся земная

непостоянна зело, скоро изменная.

Яже чрез лета многа стяжанна бывают

премногими трудами, в часе погибают.

Сие же во памяти требе есть держати

хотящим во Божией жити благодати.

Смерти время

Страшно есть время смерти, оле страшно зело,

яко имать лишенно быти душы тело.

Страшно и сего ради, яко представятся

вси греси пред душею, иже днесь творятся,

И злодосадне имут, увы, нам стужати,

еже бы ко милости надежду препяти.

В то болезни смертныя время окружают,

потоцы беззаконий грешныя смущают.

Адовы же болезни и смертныя сети

невем, кому без страха удобно терпети.

Чесо ради о гресех и прешедших требе

не предлагати во ум безстрашия себе.

Приидет тогда в память, еже погубихом

время всуе, и ово, еже в сластех жихом.

Жаль того велий будет, но не возвратится,

ни всего мира златом един час купится.

Тогда восхощет душа благая деяти,

но времене не имать на то Господь дати,

Яко. времени бывшу, нерадиви быхом,

аки не умрущии, в сластех плоти жихом.

Раскаянию может тогда быти время,

но каятися право не даст грехов бремя.

Яко же Антиоху иногда случися,

иже, время зле прежив, при смерти слезися.

Молитву ко Господу многу возсылаше,

но Господь отчаянна мужа не слушаше.

Будут тогда и лести мира проявленны,

ими же от демона всяк бывает лщенны.

Светло и вся суеты тогда ся познают,

яже ныне в погибель душы услаждают.

Но вся во печаль будут, не в исправление.

ныне убо потщимся наше спасение

Во страсе содевати, донеле же время.

Днесь требе низложити греховное бремя.

Да легка душа будет во небо парити,

еже тамо с аггелы Божиими жити.

Смерти забвение

Забвение смертнаго часа ны вреждает.

яко дерзати на вся злобы попущает

И в тех, яко во нощи, полагают спати,

да бы ничто будущих казней разсуждати.

Но горе забывшему конца жизни сея,

ибо в ноши греховней лишен будет ея.

И из сея темности будет восхищенны.

и во тму кромешную на смерть воверженны,

Яже втора и вечна, и стяжут же он у

вселютии демони. и снесут к демону

На ложе огненное в мучителски руки,

еже безконечныя зле страдати муки.

Смерти не боятися

Тому прилично смерти ся бояти.

иже не хощет к Христу шествовати.

Той же не хощет к Христу Богу ити.

кто с Ним не чает вечно в небе жити.

Нам скорби и смерть презирати требе,

чающым с Христом вечно быти в небе.

Той в человецех смерти да боится,

кто к смерти второй от первыя тщится.

Кому век долгий любезен бывает,

яко казнь вечну нечто отдаляет.

Враги Христовы зле смерть погубляет.

а рабы Его в небо преселяет.

Никако убо смерти да боимся,

дверь она в вечность, чинно готовимся.

Ко безсмертию смертию преходим,

тою ся в вечность небесную родим.

Ея же несть леть кому наследити,

токмо чрез двери смерти преходити.

Исход убо смерть, паче преход, реку,

из пути во дом добру человеку.

От изгнания та — возвращение

в отчество небес, не погубление.

Той в мире долго жити да желает.

иже всю сладость в мирских быти чает,

Его же сласти земныя прелщают,

от вечных благих к себе отвлекают.

Мы христиане, их же мир не любит,

паче же гонит, томит, мучит, губит.

Не любим его, нас ненавидяща,

любим же Христа, верно нас любяща.

За Его имя смерти не страшимся,

охотно на ню. яко на пир, тщимся.

Не умрем, паче живи вечно будем,

жизнь есть Христос Бог за Нь умершим людем.

Тело на время в тление вселится

а дух в небесну радость водворится.

В конце же веков снидет и по тело.

еже востанет здраво, честно, цело.

И будет купно с душею на небе.

то. читателю, да даст Господь тебе.

Смирение

Велий честию аще мужь смирится,

зело приятен Богу сотворится,

ибо той Ему любезен бывает.

кто ся смиряет.

И поелику болий в мире бяше

и Христа ради низость восприяше.

потолику Бог онаго прославит.

в чести поставит.

Сущий убо на высоте славы,

смиряйте сердца, смиряйте и главы.

Бог вознесет вы, елико есть требе,

и вселит в небе.

Главы смиренныя мечь не посецает,

но и тяжку вину всяк удобь прощает.

Бог же смиренныя обыкл возносити,

тем смиряйся, хотяй Богом почтен быти.

Епископ Трекасинский. Люпус нареченный,

еже толкуется Волк, но муж божественный.

Аттиле град обступлшу: Кто сей, вопросил есть,

иже полки своими град наш обступил есть?

Услышав ответ, яко деет то Аттила,

бичь Божий, и его то обступила сила.

Воздохнув, рече: Увы. аз волк окаянный.

расхищах овцы, должен быти наказанный.

Накажет мя бичь Божий, врата отверзите,

преклоняю хребет мой. безспорно впустите.

Людие. яко овцы, его послушаху.

отверзше врата, бичу путь свободный даху.

Оле чудесе! варвар кроток сотворися,

от множества вои лютых град цел сохранися.

Идоша сквозе, града ничто же вредяще,

аки ни единаго жителя видяще.

Смирением пастыря стадо все спасенно.

сице милосердие деет божественно.

Лев зверя, низу падша, никогда терзает,

грешника смирившася Бог не погубляет.

Хотяй обрести на землю смотряет,

а не на небо очеса пущает.

Тако зря мытарь, благодать обрел есть,

ибо оправдан из храма изшел есть.

Противне, в небо фарисей смотряше,

благая дела своя изчиташе.

Тем, яже име, всех благ отщетися,

мзды онех лишен, грешник сотворися.

Лучший греси суть со смирением.

нежели правда с превозношением.

Мытарь, смирився, Богом оправдися,

фарисей, горд быв. Тем же осудися.

Иде же себе человек смиряет,

тамо достоин милости бывает.

Петр, егда Христос ему приближися,

в лодию его внити устремися,

Возопи зело: Изволи изьити,

несмь бо достоин аз с Тобою быти.

Изьиди, Христе, есмь бо грешен зело,

со огнем сену несть леть быти цело.

За то Христос Бог его возлюбил есть,

за друга присна Себе приобщил есть.

Дева Мария егда себе звати

рабу изволи, бысть Божия Мати.

Креститель Христов егда себе быти

рекл недостойна сапог разрешити,

Христу Господу тогда сподобися,

яко Христос Бог от него крестися.

Мытарь во церкви себе осудил есть,

что недостоин в небо зрети был есть.

За то от Бога паче прав явися.

неже фарисей, иже восхвалися.

Сотник, смирився, Христу глаголаше,

яко под кров свой недостоин бяше.

Его прияти, за то получил есть

здравие рабу, о нем же молил есть.

Кому ж до убо смирения требе,

милости свыше желающу себе.

Смирение и кротость — две криле велице,

ими же летим в небо ко Христу Владыце,

Еже по трудех мира любезно почити,

кроме скорбей, печалей во век веков жити.

Елма тя людие словом ублажают,

праведна и свята мужа нарицают,

Рцы: Ноеммин мене никако зовите,

но Мерра имя ми паче возложите.

Яко не красен есмь доброт красотами,

но горек на душе многими злобами.

Тако злоба твоя Богом истребится,

сладость и красота в то место дарится,

Ибо смиренныя Господь украшает

светом благодати и в небо вселяет.

Смирение истинно кто доволен знати.

да потщится доволне оно показати.

Аз онаго степени сия обретаю,

яже писанием си верным предлагаю.

Во-первых, непритворно оно да бывает,

но от сердца, ибо то Господь наблюдает.

Паки, глубоко оно долженствует быти.

да иныя доброты может преходити.

Еще, не пред смертными токмо человеки.

но пред Богом, живущим в безконечны веки.

Смирение же право есть себе познати

и Бога величество умом разсуждати:

Себе, яко ничто есть и бездна буести,

грехов, злобы, нечистот и всякия лести;

Бога паки, яко Он — море всяких благих,

мудрости, славы, щедрот и всех доброт драгих.

Вся же дела благая Богу причитати,

себе точию грехов виновника знати

Наконец, везде суща непщевати требе,

на мори, на воздусе, на земли, на небе,

И того ради тако благочестно жити,

еже бы присущия Его не гневити.

Но вся по воли Его святей содевати.

да бы изволил на ны светло возглядати.

Сице смиряющихся Бог не презирает,

но временно и вечно во славу вселяет.

Смирение не равно во людех бывает,

ин бо от нужды с гневом в себе то являет,

Ин терпеливо токмо смирен проявится,

ин же о смирении своем веселится.

Первый греху повинен, вторый вины странный.

третий же есть пред Богом праведник избранный.

Аще и вины странность ко правде приходит,

но последний точию оный глас изводит;

Благо мне грешну, яко Ты смирил мя еси.

о Боже наш, царствуяй вечно на небеси.

Во Фиваиде старец некий обиташе.

иже прилежно Богу день и нощь служаше.

К нему мужа беснаго людие ведоша:

Молим, да изженеши демона, рекоша.

Он себе грешна мужа быти глаголаше.

не силна тому суща, смирен ся творяше.

Егда же прошением многим понудиша,

рече: Изьиди, враже. Он же то услыша

И ответа: Изьиду, токмо да скажеши,

кто козел и кто овца, како непщуеши?

Старец рече: Аз козел, а овцы Бог знает,

Иже в царствие Свое оны соблюдает.

Ответ демон услышав, ят гласно вопити:

То смирение твое нудит мя изьити.

И абие остави того человека,

не вращаяся к нему до кончины века.

Смирение истинно мужь хотяй стяжати,

имать сия средствия выну содержати:

Во-первых, волю свою весма умертвити,

во умерщвленней плоти да бы ей не жити.

Второе, не точию дела си являти

началнику. но и мысль верно откривати.

Третее, судови си ничто уповати,

но вся началническу судови вручати.

Четвертое, хранити повиновение,

кротость и постоянство, купно терпение.

Пятое, никому же обиды творити,

но и себе творимых терпеливу быти.

Шестый. ничто же ино деяти дерзати,

токмо правила с отцев образы держати.

Седмое. всяку худость причитати себе,

и раба недостойна себе знати требе.

Осмое, от всех нижша себе разумети,

не словом, но в серди мысль сию имети

Девятое, от вопля уста обуз дати,

мало, и то разсудных, словес изпущати.

Десятое, ко смеху не удобну быти.

но воздержно от него устне си хранити.

Сия Кассиан святый яко знамения

истиннаго судил есть быти смирения.

Яже вы, о иноци, прилежно стяжите,

и зрящым на вы в образ ползы проявите.

Всех хуждша тебе тщися непшевати,

за то вси тебе имут почитати.

Макарию святому диавол явися,

с острою на нь косою сещи запустися.

Но никако онаго язвити можаше.

тем же и велегласно сия вопияше:

О Макарие, много аз стражду тобою,

велику ты дееши силу надо мною.

Постиши множицею, но то ми ничто же,

ибо от начала век аз ям ничесо же.

Часто ты во бдении, аз же не вкушаю

сна сладости, что он есть, искуством не знаю.

Едино смирение твое побеждает

силу мою, ничто та деяти пущает.

Макарий тогда в сердце своем сокрушися,

в смирении глубоце Богу помолися,

И абие лукавый дух невидим бяше,

а святый в безбедствии от него осташе.

Смирение правое во сердци бывает,

егда человек сия дела соблюдает:

Послушание к старшим, за грех жаление,

во трудех и во скорбех благотерпение.

Достойныя же чести люди почитает,

а вся лучшия себе быти разсуждает.

Сия вся, человече верный, да храниши,

благодать от Господа всяко получиши.

Смирение и гордость

Муж смиренный Господу Богу подобится

и в его персех, яко в храме. Он селится.

Гордый паки человек демону есть точен,

Богу же ненавистен, яко зле порочен.

Смиренный аще зрится лицем худеишь быти,

но славен добротами тщится выну жити.

Гордый же аще светел быти ся являет,

но непотребна делы себе сотворяет.

Из ступания гордость его удобь знати,

и из глагол суетных — легкость разсуждати.

Желает от человек выну хвалим быти

и добротами, их же празден, благо слыти.

Не терпит под началом инех пребывати,

но на вышших степенех хощет первствовати.

И аще заслугами стяжати не может,

тако любочестием хоти си поможет.

Ходит присно кичиво, яко мех надменный,

всякия сущ честныя вещы испраздненный.

И яко без кормчия корабль зле мятется

в волнах, тако он в своих делех зле несется.

Смиренный же. противне, вся пренебрегает,

яже честна мир в себе лстивый появляет,

И менша всех человек судит себе быти,

кротко и благочинно тщится всегда жити.

Худ же и неугоден лицем ся являет,

но Господь й велика мужа созерцает.

Елма вся заповеди ему сохранити,

глаголет непотребна раба себе быти.

Добродетели своя всяко утаяет,

точию в сокровище душевном прятает.

Да, егда храм телесе тленна разорится,

тогда утаенное Богом проявится.

Бог же делеса его и зде изъявляет,

и во будущей жизни честно увенчает.

Смирению вси убо выну ся учите,

кротость в слове и деле прилежно храните.

Богопротивныя же гордости гонзайте,

демонско сие свойство, с ним е отметайте.

Господь гордым противен и вечно я губит,

смиренным же — милосерд и зело я любит.

Любве убо Божия и щедрот ищите,

от погубления же весма ся храните.

Смирения степени 6

Любезни Богу, иже суть смирении,

тии бывают Онем возвыжшенни.

На тех благодать Его почивает,

тым небо дает.

Смирение же то есть совершенно,

еже в степенех шести заключенно,

ими же, иже выну право ходит.

во небо входит.

Первый есть степень себе подчиняти

началником си и гласу вънимати

их веления, той бо не заводит,

в благодать вводит.

Вторый степень есть тако с людми жити.

выше ся сверстник не превозносити.

но за равныя себе оны знати.

честь воздаяти.

Третий степень есть менших людей саном

не презирати верным христианом.

но немощем их выну снисходити,

благо творити.

Четвертый степень — худа себе знати

и пред ближними смиренно вещати

о себе самом; сие смирение

есть спасение.

Пятый есть степень, еже непщевати

немногу мудрость в себе пребывати,

но безхитростна себе мужа быти,

в простоте жити.

Шестыя степень есть имети готово

сердце слушати началника слово,

еже и худы службы совершати,

а не роптати.

Сими степенми мощно восходити,

где Бог изволил престол утвердити,

и тако почесть от Него стяжати.

венец прияти.

Смиренномудрие

Елма перие пав свое смотряет,

зело кичиво весь ся надымает;

Егда же ног си черность созерцает,

абие гордость свою оставляет.

Ты аще дела благая узриши

в тебе, и того деля ся гордиши,

Призри на злая, коль люта и многа.

отрини гордость, знай тебе убога.

Смиряяйся вознесется

Поелику человек сам себе смиряет,

потолику Господь Бог его возвыжшает.

Христос Господь на земли до креста смирися,

но в небе на престоле с Отцем посадися.

Елико в трубах водных источник низходит,

толико той же в гору обычно восходит.

Вода живота с небес в юдоль земну сниде,

Христос Господь, и паки на небо возьиде.

И яко в мире смирен паче всех явися,

тако выше всех в небе в славе утвердися.

Со разбойники в мире лестном вмемен бяше.

выше всех сил в небеси почесть восприяше.

Убо кождо ся в сердце своем да смиряет

и пред человеки, кто высоты желает.

Смущение

Елма Царь небесный во мире родися,

тогда злый Ирод, царь земный, возмутися.

Земная высота тако ся смущает,

егда смиренно Бог миру Ся являет.

Снисхождение

Иелисей со жезлом слугу посылание

воскресити отрока, но той не можаше.

Даже сам шед ко мощем, на них положися,

смерив им себе, тогда мертвец воскресися.

Точне подначалнии движимы бывают,

аще началници им снисход проявляют.

Любовь бо есть действенна, а жезл не успеет

того деяти, ибо сердце тем жестеет.

Собор

Фома апостол от друг своих отлучися.

тем же видети Христа унедостоися.

В день же осмый, егда им бе совокупленный,

явися, увери й Христос Божественный.

Знамя си, яко благо во единстве жити,

в собрании бо Христос рекл Ся выну быти.

Соблазнь

Иероним блаженный от преданий взял есть

Еврейских и нам верным в книгах си подал есть.

Яко Аврама Сарра за то понудила,

да изгонит Агару, с нею Исмаила.

Яко виде из глины идолы творяща

Исмаила и сына ея в тех блазняща.

Бояся бо, да, егда оны научится

делати, яко богом, тым не поклонится.

О преблагая мати, яко не терпяше

того в дому, что сыну соблазнь приношаше.

Тако, родителие, и ныне творите.

еже блазнит вам чада, из дому жените.

Совершенство

Не точию иноком нуждно совершенство,

но и белцем потребно сие есть блаженство.

Ко всем бо глаголется: Будите свершении,

яко Отец небесный, да есте блаженни.

Мощно же есть комуждо совершенну быти,

иже сия восхощет прилежно хранити:

В первых, любити право Бога подобает

и хранити, яже Он в заповедех дает.

Паки, согрешения скоро истребляти

и о исправлении всегда промышляти.

Еще. страсти плотския умерщвляти в себе

и умови благому подчиняти требе.

К тому, в добродетелех выну поступати.

совершенны сущыя мужы подражати.

По сих. не заповеди точию хранити.

но советы Божия делом исполнити.

Напоследок, простимых падений блюстися.

сице во совершенство леть есть воснестися

Совершен не токмо, кто не согрешает

но и кто во скоре грехи истребляет.

Иже несовершенна себе быти знает,

тем самем совершенства степень начинает.

Совесть

Совесть коегождо есть грехов сведитель

и зело досадный во уме томитель.

Внешних есть послухов мощно убежати,

внутрний не престает повсюду стужати.

Его же аще кто желает избыти,

да престанет злая делеса творити.

О содеянных же сердцем да скрутится,

тако томителя сего свободится.

Совесть по гресе аще не стужает,

зло знамение то в душе бывает,

несть бо Святый Дух тамо возбуждаяй,

но враг прелщаяй.

Аще не преста совесть обличати

по гресе, есть то знамя благодати.

Послушай ея, кайся, а у Бога

есть милость многа.

В белых древле одеждах в храм Божий вхождаху.

белу совесть имети пред Богом учаху.

Сладкое возглавие есть совесть благая,

мучилище есть паки совесть лукавая.

Здравому постеля есть упокоение,

та же немощному есть мужу мучение.

Точне совесть есть мужу покой преблагому,

та же — ложе терново человеку злому.

Виас вопрошен: Како леть без страха жити?

рече: Благую совесть есть нужда хранити.

Сократ вопрошен: Когда мирно мощно жити?

рече: Егда не может совесть обличити.

Лице красное людем приятно бывает,

чистая паки совесть Богу представляет.

Лучше есть совесть благу пред Богом стяжати,

нежели ведение сущих набывати.

Сие бо человеку грехи отягчает,

оная грехов тяжких бремя низвергает.

Совесть благая, радость правая

Кто право сердце возможе стяжати.

правую радость той может познати.

Печаль не имать досаждати тому

в душевном дому.

Мирна ту совесть, сердца не снедает,

еже о Бозе лики составляет.

Несть червь греховный, души досаждаяй,

грех поминаяй.

Отвсюду радость сияет такому

с Богом живущу мужу преблагому.

Удобь сей козни демонския знает

и разоряет.

Имать надежду, яко написася

в книзе животней, небу сготовася.

Токмо печется, да бы в благодати

присно стояти.

О веселия зело превелика,

кому дарует то небес Владыка!

Совесть благая — истинная радость,

присная сладость,

Ея же хотяи содержатель быти,

заповедь Бога да тщится хранити.

ту бо хранящим выну веселие

будет велие.

Совести истязание

Труд дневный или нощный елма совершают,

иже мрежами рыбы во водах ловляют.

Мрежа си обыкоша от трав очищати,

и что неполезное яша, извергати.

К тому, чисто измывше, ветром изсушают,

и еже проторжеся, тошно исправляют.

Рыбарем мы подобии, и ловителствуем

мрежми совести, яже потребна непщуем.

Чрез день целый трудимся и в нощы лов деем,

и аще не со Христом, то ничто успеем.

Яже изврещи требе, на брег извлекаем,

а множицею мрежы совестей терзаем.

Что убо деятелно? В вечер, утро требе.

яко на брезех, совесть разсмотряти в себе

И вся неполезная из нея метати.

водами же слезными ону измывати,

И аще расторжеся, скоро исправляти,

да ся дира не будет паче разширяти.

Та же воздыхания ветром изсушити,

да бы впред полезнее ловитву творити.

На всяк вечер и утро верным подобает,

да кийждо совесть свою добре разсмотряет,

Что есть сотворил благо, и о сем хвалити

наставившаго Бога сие сотворити,

Или кая лукавства дерзнул содеяти,

о сих же деянии себе обличати,

Покаяние к Богу слезно приносити

и довлетворение некое творити,

Елико возможно есть, тоже предприяти,

еже тым злоб подобных не ктому деяти.

Тако творяй надежден да есть спасения,

яко сам себе судяй за согрешения,

Писано бо: Аще бы сами ся судили,

не быхом от Господа осуждени были.

В лодию вода выну помалу вплывает,

бедство погружения оней содевает.

Тем же часто есть требе воду изливати

хотящему потопа в воде не страдати.

Подобне злобы присно во нас ся вливают

и бедство спасения душам содевают.

Убо нужда на всяк день оны истребляти,

да бы потопа в мори адстем не познати

Руф на ниве класы чрез день собираше,

яже в вечер жезлом тощне измлатяше,

И ячмень от плевел чисте отлучала,

со свекровию ся тем сама питала.

Дней наших делеса суть нам яко класы,

измлатителнии в вечерния часы

Жезлом сокрушения, и плевелы требе

от зерн отлучати, да не будут в хлебе,

Иже собираем в житницу горнюю

душам нашым грешным во пищу вечную.

Вертоградарь оград свой выну очищает,

сущая непотребна изторг, изметает.

Тако нам совесть присно чистити есть требе

от делес душевредных, да вселимся в небе.

Совет

Брат некто бесом блудным томим бяше,

иже мысль блудну на него пущаше.

Он, стужив зело, искаше совета,

и пришед к старцу с тайною навета,

Сказа вся мысли, яви стужание,

откры свершенно свое страдание.

Старец же мало искуства имяше,

пластыря язве здраваго не даше,

Зле окаянна рече его быти

и недостойна в монашестве жити.

Он же, возридав, велми усумнися

и спасения надежды лишися.

Не зная ктому, что имать творити,

весма умысли в мир ся возвратити,

И делом уже помысл совершаше,

в лютей печали ко граду идяше.

Но Бог всещедрый его не остави,

инаго старца во путь той настави,

Иже стрет его, печална идуща,

и познав брата из пустыни суща,

Целовав его, нача вопрошати,

словеса сладце к нему глаголати,

Моля, да явит шествия си вину,

купно печали да скажет причину.

Он, видя любовь старца вопросивша,

позна й умна, а не проста бывша,

Сказа поряду, что в мысли страдаше

и яко старцем престрашеный бяше,

И уже рече: Иду миру жити,

поне же несть леть мне спасену быти,

Искушения толика терпящу,

помыслы выну скверныя носящу.

Старец же умный егда вещь познаше,

умилно его молити начаше,

Глаголя сице: О брате любезный,

не остави тя Владыка небесный.

Попустил на тя врага прелукава,

да чрез тя его поперется глава.

Нимало сердце твое да сумнится,

яко бес скверный на тя оружится.

Несть вина твоя, яко ся раждают

срамныя мысли и душе стужают.

Токмо ты тщися оны отметати,

а соизвола никогда же дати.

Елико оны силно отразиши,

толижды врага злаго победиши,

За что от Христа мзда будет велика,

зрит на твой подвиг небесе Владыка.

Мужайся, брате, Богом укрепися,

а во келию паки возвратися.

Аз уже и стар, а с мыслми борюся,

от юны версты тем бесом томлюся,

Но Бог мя крепит, того побеждаю,

за труды венца в небе ожидаю.

То брат услышав, аки возродися,

честному отцу до стоп поклонися,

Прося молитвы с благословением,

и возвратися его учением.

Се показ, яко нуждно дело знати,

где полезнаго совета искати.

Се малоумный брата соблазнил есть,

даже искусный его исправил есть.

О слава, Христе Боже, за то Тебе,

яко возвратил сего брата к Себе.

И нас от вредных советов избави,

благоумными во путь Твой настави.

Совет и заповедь

Заповеди Божия ну ж дно есть храните,

яко без тех спасенну невозможно быти.

Совета же — не тако, ибо тех нуждают

токмо, иже съвершенства степене желают.

Совет бяше юноше вся своя продати

и во след Христа нища стопы полагати.

Аще же и не продал и с Ним не хождаше,

за то й казни вечней Христос не предаше,

Но токмо совершенства честншаго лишися,

а спасения весма тем не отщетися.

Согласие

Камень фирреос егда цел хранится,

плавает верху вод, а не грузится.

Той же на части малы сокрушенный,

во воде тонет, аки отягченный.

Тако община аще есть согласна,

не убоится случая напрасна.

Аще же в разны части разделится,

крепости праздна, въскоре разорится.

Скиф некто умный, богатый сынами,

при конце жизни даде тул с стрелами,

Повелевая им той преломити,

но не могоша того сотворите.

Та же особно комуждо си сыну,

еже ломити дал стрелу едину.

Удобно тии стрелы преломиша,

нимало труда к тому приложиша.

Тогда ко чадом отец возглашает,

еже согласно жити, увещает:

Аще союзни будете, вещаше,

непреломимо странство будет ваше.

Аще же союз будет разрешенный,

удобь от врагов будете сотренны.

Содома

На Содому горящу лицем обратися

жена Лотова, тем же в слан столп претворися.

Нам ум тою солию довле осолила,

не зрети на содомска дела научила,

Яже бяху огненна, ибо вси горяху

друг на друга похотми, себе распаляху.

По делом же и казнь им от Господа бяше,

огнь домы со жителми погибели въдаше.

Сокол

Сокол аще под небо крилы возлетает,

на глас носителя си к рукам прилетает.

Грешник егда во гордость умом возносится,

на глас пастырск со плачем к нему да вратится.

Сокрушение сердца

Аще кто сердце свое сокрушает,

грехи пред Богом на ся извещает,

Имея волю въпред ся соблюдати,

таковых грехов ктому не деяти,

Уповает же в Божией милости,

яко оставит, и к Его благости

Молитвы деет, себе устрояет,

да Господь ему грехи оставляет,

Аще и тайна исповедания

не прилучится против желания.

На всяк день убо сия вси творите,

утро и вечер сердца сокрушите.

Тако безбедно возможете жити,

жизнь безконечну в небе наследити.

Сокрушение сердца

Сокрушение сердца хотящу творити

шесть нуждных подобает делес сохранити.

Во-первых, грехи своя тощно разсудите,

яже пред лицем Бога дерзнул сотворити.

Второе, скаредость их пред очеса взяти,

како сквернят нам душу, добре разсуждати.

Третее, подобает срам задати себе,

яко дерзнул грешите пред Живущым в небе.

Четвертое, страх Суда нужда восприяти

и казнь, яже за грехи будет, разсуждати,

Како Судия Христос жесток проявится

ко множеству грешником, и не умилится,

Иже днесь, яко отец, милость проявляет

и удобь кающымся грехи оставляет.

Пятое, должно отсуд стояния десна

и тщету помянути царствия небесна,

Яко за грехи скверны небо погубляем,

жизни вечныя, венца славы ся лишаем.

Шестое, есть надежду возбудити требе

отпуста, благодати и славы на небе.

Отпуста, яко Господь изволит простите,

елма покаяние потщимся явити,

Благодати, яко Бог изволит нам дати

помощь святую, да бы благая деяти,

Славы, яко за дела воздастъ нам добрая

в царствии Своем славу и вся в нем благая.

Елма кто во сердце си право сокрушится,

исповедати грехи своя устроится,

И прежде исповеди Бог грехи прощает,

на сердце кающася очи обращает.

Но зане же никто же того познавает,

аще ся, яко требе, сердцем сокрушает,

Подобает исповедь грехов си творити,

да бы усумнению с презором не быти.

Юноша некто в мире свободно живяше,

на вся беззакония излиха дерзаше,

О покаянии же не хоте мыслити,

срамляяся духовну грехов си явити.

И уже отчаянно живот провождаше,

ни малы спасения надежды имяше.

Но Человеколюбец даром благодати

к покаянию того не преста възбуждати.

Выну во сердце его страх Свой посылаше,

спящее в ложи грехов тощно возбуждаше.

И нача той юноша о гресех тужити,

поминая геенну во печали быти.

Та же паче и паче совесть й снедаше,

во дни и в нощи ему покоя не даше.

Тузе же в сердце бывшей, лице изменися,

аки болезнию, плоть его изнурися.

Потом милость Божия то в нем сотворила,

страхом казни вечныя срам в нем победила.

В его же место любовь Господня вселися

и тако отчаянник надежден явися.

Тече к отцу духовну, Виктору реченну,

прося совершите с ним Тайну божественну

Покаяния свята, а того готово

сердце бяше прияти исповеди слово.

Наченшу убо отцу сына увещати,

сын нача неудержно слезы изливати,

Воздыхати же тяжко, даже не можаше

грехов изглаголати, аще и хотяше.

То видя отец Виктор: Иди в дом твой, рече,

и написав, принеси грехи, человече.

Юноша, шед во дом свой, грехи написал есть

и утру бывшу, отцу духовну подал есть.

Он же повеле ему самому читати,

усты своими себе в гресех обличати.

Ятся чтения юный, но паки слезяше,

даже слова изрещи никако можаше.

Виктор же, видя грехи тяжки зело быти

и не доумея их благо разсудити,

Рече ко плачущему: Буди, чадо, тебе

изволно прияти ми совет в сей потребе

От мудрша началника. Он изволи ити.

Виктор, шед к тому и ят совета просите,

И рукописание юнаго подал есть,

началник, хотя чести, от того приял есть.

Развинув свиток, ничто писмен на нем зряше:

Что ми хартию даде празну? глаголаше.

Виктор рече: Не праздна, изволи читати,

и о писанных гресех суд правый подати.

Началник паки рече: Или ся смееши,

яко праздну хартию чести ми даеши?

Возрев же в ню и Виктор, зело почудися,

како хартия праздна писаний явися,

И рече со клятвою: Отче мой пречестный,

праведный та вещаю глагол, а не лестный.

Приях многими грехи исполненну сию

от юноши плачуща, и дах та хартию.

А како писание на ней истребися,

аз не вем, ты разсмотри, на мя не ярися.

Сия слышяначалник, и яко рыдаше

юный безмерно, милость Господню познаше,

И разсудиста оба знамя сие быти,

яко изволи Господь грехи оставити

За скрушение сердца юноше оному,

за что воздаста хвалу Богу всещедрому

И, призвавша юношу, словом утвердиста,

хартию, грехов праздну, оному явиста.

Он познав хартию си, праздну писмен сущу,

хвалу воздаде Богу, милость являющу.

Уразуме прощенны грехи своя быти,

прият намерение греху не случити,

Но всещедрому Богу выну работати,

донеле же в животе ему пребывати.

Виктор же и началник его утешиста

и довлетворение канона не даста,

Судиста бо и всю казнь оставленну быти,

яко сие изволи Бог чудо явити.

Ко благотворению токмо й ведоста,

и еже благо жити, по сем отьидоста,

Отпустивша юношу, иже хвалу Богу

не преста возсылати за милость премногу.

Сокрытие

Проклятый есть во людех жито сокрываяй

и талант премудрости в себе утаяй,

И Божиему Слову не хотяй учити

требующых онаго, егда леть творити.

Соль

Соль яко нетление телес содевает,

или яко на долзе от тли соблюдает,

Знамение есть дружбы, тем ю полагают

пред други с хлебом в первых, а то знаменают,

Яко дружеству хотят неразстлиму быти,

донде же даст обема Бог странама жити.

Во Троаде соли Бог премножество даше,

юже свободно людем выну брати бяше.

Но послежде Лизимах, лакомством обьятый,

веле мыто за соль ту от вземлющих брати,

Что Богу не бе годе. Тем же прогневася,

и то множество соли абие отьяся,

Донде же паки мыто оно отставил есть

Лизимах, тогда Бог соль паки возвратил есть.

Солнце

Солнце мало в очесех наших ся являет,

но сто шестьдесят шесть крат землю превыжшает.

В не же время Христос Бог на земли родися,

во Испании чудо велие явися:

Три солнца на небеси созерцана бяху,

яже потом в едино вся себе собраху.

То явление ничто ино знаменаше,

точию, яко Христос трие содержаше:

Плоть, душу и божество, их же бе едино

лице Слова Божия, а не бяше ино.

Во двою бо существу един лицем бяше

Христос, Иже мирови спасение даше.

Зверь исходит зверя во нощи ловити,

воеже бы чрево свое насытити.

А егда светлое солнце возсияет,

зверь дивый во ложе свое ся спрятает.

И тако бывает мир во время света,

един от другаго не страждет навета.

Нощь бе превелика прежде воплощенна

Божия Слова и миру проявленна.

Человеци, яко звери диви бяху,

род рода, друг друга снедати ловяху.

Егда паки Христос, Солнце правды наше,

Бог во плоти, миру лучы разсыпаше,

Варварстии роди мир взаим прияху,

друг наветствовати на друга престаху.

И тако вселенней мир Христом явися,

егда Он плотию на земли родися.

Солнце чувственно елма к нам ся приближает,

теплотою лучес си землю оживляет.

Зелие же и древа уплодотворяет,

да всяко по своему виду плоды дает.

А елма тожде солнце от нас удалится,

земля, ствердевши мразом, аки умертвится.

Тако мыслное солнце, Христос божественный,

в ня же благодатию сердца есть вселенный,

Живит я и заслуги жизни устрояет,

а от них же далече, благих сих лишает.

Тщимся убо, братие, близу Христа жити,

да возможем от Него оживлении быти

И заслуги вечныя жизни умножати,

да бы в царстве небесном ону восприяти.

Удаления паки от Него блюдимся,

без благодати Его да не умертвимся.

Лучеса солнца светло нам сияют

и всяких вещей красоты являют.

Тем же я сладко человеку зрети,

никто же долго хощет в тме седети.

Но суть три вещи, яже застеняют

солнце, егда ся в среде полагают.

Во-первых, земля то нам содевает,

елма под ону солнце ся прятает.

Паки, облаком тожде нам творится,

ибо им солнце от очес хранится.

Третия, луна то нам помрачает,

егда под солнцем прямо нам бывает.

Солнце есть наше и Христос Спаситель,

человек верных светло Просветитель,

Иже умныя очи просвещает,

егда милости зари изливает.

И Его три нам вещи застеняют,

сладкий свет Его от нас похищают.

Во-первых, вещей земных желание

ко свету тому есть препинание,

Ибо, кто земным вещем прилепится,

тому Свет Христов невидим явится.

Паки, яко же облак застеняет,

истинны Солнца зрети нам не дает

Суетство мира, во чести и в славе

спону нам деет Бога зрети яве.

Наконец, луна в нас изменения

пакость нам деет до сладка зрения

Истинны Солнца, Христа божественна,

во спасение наше устроенна.

Непостоянство наше во благости

лишает света Христова сладости.

Соломон

У Соломона царя егда Савска бяше

царица и мудрости его искушаше,

Отроки и девицы собравши младыя,

вся в одежды устрой весма подобныя,

И представивши царю, от него желаше,

да распознает пол их, аще премудр бяше.

Царь, видя вся младыя, веле лица мыти,

да от умовения возможет судити.

Вси убо умывати лица си начаху

и платенцы послежде она отираху.

Девицы зело мягко то твориша дело,

а отроцы мышася и трошася смело.

Потому разеудив, царь, царице сказаше,

кая из них девица и кто отрок бяше.

То видящи царица, мудрости дивися

и исповеда, яко точный не родися.

Мы же лица совести елма умываем,

отроцы, а не девы да ся проявляем.

Крепко она да мыем слезными водами

и довлетворения да трем пеленами.

Тако отроцы бодрии и красни явимся,

знания Соломона горня сподобимся.

Сон

Сон брат есть смерти, тем же, егда спиши,

ничто знаеши и ничто же зриши.

Множицею же сон брату отдает,

яже на ложах сладце учреждает.

Егда Олоферн исполни вина спаше,

рукою жены обезглавен бяше.

Сном и Сисарра елма усладися,

в скрания колом от жены пробися.

И Гевостей спящь от недруг заклася,

бойся и кождо чрез сон смерти на ся.

Сампсон пресилный спящь власов лишися

чрез жену, от враг во плен похитися.

Тем же достоит Христокрасным людем,

готови на смерть да во всяк час будем.

Сон — образ смерти, пред сном дремание

являет плоти изнемогание.

По дремоте сон обычно бывает,

по немощи смерть в жупища вселяет.

А яко сон есть покой от работы

дневныя в мире всесуетном плоти,

Тако от трудов мира свобождает

смерть человека, егда преставляет.

Паки, яко спяй заслуги не деет,

тако умерший заслуг не имеет.

Еже из мира им есть принесенно,

по достоинству то будет цененно.

А в оном веце никто заслужится,

токмо что в мире заслужил, мездится.

Сосуд

Гордии человецы — полнии сосуди;

тщии суть паки, иже смиреннии люди.

Егда же Иелисей елей умножил есть,

праздныя тем сосуды туком исполнил есть.

Тако в праздныя злобы душы Бог вливает

милосердие, еже елей знаменает.

Извержим убо злобы, праздни тех явимся,

да милосерда Бога даров исполнимся.

Союз

Тирреос камень, цел сущь, верху вод плавает,

елма же раздробится, в онех потопает.

Град, союз храняй, выше всяких бедств носится,

тому же растерзанну сущу, испразднится.

Спаси Бог

Иерарх некто преподобен бяше,

по званию си вся дела творяше.

Тому некий муж яблок сосуд дал есть,

вящша от него дара ожидал есть.

Он же прием дар, ничто воздаяше,

токмо Спаси Бог ему провещаше.

Отьиде скорбен яблока принесый

и ят роптати хулными словесы

На мужа свята, иже, увешенный,

веле, да будет призван оскорбленный.

Тому пришедшу, сице глаголаше:

Да зриши, брате, яко слово наше

Спаси Бог имать вящшу силу в себе,

нежели дар твой, делом суди тебе.

На мале убо свитце написал есть

Спаси Бог, и в длань мерила приял есть.

На едной чаше свиток положил есть,

на другой — сосуд со плоды въместил есть.

Мерила подъят, слово тяжко бяше,

плоды с сосудом преодолеваше.

Раб Божий рече: Се суд божественный,

зри, како мною еси обижденный.

Роптавый, видя вину свою быти,

архиерея начал есть молити

О прощение. Он же дарова то,

и бысть прощенну честно, яко злато.

Иже наставлен, к тому не ропташе,

слово Спаси Бог всечестно держаше.

И ты, чтый, словом тем доволен буди,

егда за дары рекут тебе люди

Спаси Бог, ибо сам Господь воздает

небом, кто слово сие почитает.

Сребреник

Самарянин ов благий, иже уязвленна

от разбойник на пути мужа поверженна

Помиловав, прилежа, еже исцелити,

даде два сребреника, да бы й лечити.

Христос Самарянин есть, ибо страж есть правый,

уязвленный демоны род помиловавый.

Дал гостинником Церкве сребряны две цаты

во иждивение, да леть есть врачевати.

Два сребреника еста Ветхий Закон с Новым,

или Таинства Церкве со словом Христовым,

Или две заповеди о любви спасенней,

о хранителной ближним и о божественней.

Сих употребление язвы исцеляет,

здравие первобытно и в путь крепость дает.

Сребро

Сребро аще ся о вещь белу отирает,

черно знамя по себе на ней оставляет

В знамение, яко, кто сребру приложится,

аще чист есть от всех вин, сребром очернится,

Яко то мрак греховный имать выну в себе,

и злата, яко блата, хранитися требе.

Сребролюбец и злорасточитель

Мерзостен Богу есть сребролюбитель,

равне — безчинный того расточитель,

Ов бо несытно чуждая хищает,

сей себе и дом потребных лишает.

Сребролюбие

Сребролюбец человек тому подобится.

иже водотрудною язвою томится.

Яко бо сей. елико болше испивает

воды, толико паче оныя желает,

Сице сребролюбив муж елма богатеет

златом и сребром, толма паче безсытеет.

В человеце вся страсти мошно истребити,

сребролюбия несть леть весма умертвити.

Иныя немощь, старость иныя погубит,

а немощный и старый злато, сребро любит.

Ад. вся поглощая, не речет: Доволно,

сребролюбца сердце никогда есть полно.

Море всеми реками не пренаводнится,

сребролюбец богатствы всеми не полнится

Гроб телеса мертвых людей поглощает,

сребролюбец нищих пищи изнуряет.

Делва, скважней полная, неудобь полнится,

сребролюбив муж сребром никако сытится.

Честному безчестие, аще прилепится

таковей жене, яже нечестна судится.

Человек честный егда безчестное любит

сребро и злато, славу сам безчинно губит.

Дипсас змий во Ливии воина язвил есть

и толико лютую жажду в нем родил есть.

Яко же вбегшу в море воду слану пити.

донде же нужда бяше жизни ся лишити.

Тако дипсас геенны кого усекает

жалом сребролюбия, того не престает

Жаждею злата жещи, даже бы хотети

вся, яже око видит, оному имети.

Тем. несытством палимый, богач исчезает.

лакомо собранная иным оставляет.

Страж винограда мало от гроздов снедает.

иным в питие или в пищу соблюдает.

Тако сребролюбив муж иным хранит злато,

сам глад и жажду терпит, возглядая на то.

Лакомец сребром своим не владеет.

коснутися бо оному не смеет.

Сребро же ему господин бывает,

он бо. яко раб, сребро соблюдает.

Калигула кесарь зело богат бяше.

за любовь злата в нем сам себе валяше.

Но долго ли тако о нем веселися?

Три лета и десять месяц, и убися.

Елико путь есть кратший, толь менше о хлебе

и о всем на путии промышляти требе.

Краткий путь есть старости лета преходящих,

единою ногою в гробе у стоящих.

Обаче имения многаго желают,

сребролюбия злобу выну разширяют.

Тою к иным несилных злобам враг прелщает,

златою удицею себе я пленяет.

Сребролюбитель что не умышляет,

да корысть везде себе обретает?

Морем, землею куплю многу деет,

да что успеет.

Везде промыслов протязает сети,

яко на птицы обыкоша дети,

ли яко паук себе изчревяет,

сети свивает,

Еже бы мухи во пищу ловити,

тако он себе тщится изнурити,

а вправду ловит всегда, яко мухи,

сребра укрухи.

Иже никогда его насыщают,

но. яко мухи, безстудно стужают,

не пущающе сладко ясти. пити,

ни мирно жити.

Егда же сия уловляет мухи,

сам ся душею злыми ловит духи,

сетми их во ад низвлачим бывает

и погибает.

Нози силнолютии при горах витают,

в них же ся камения честная раждают.

Не припущают тамо людей приступати,

воеже бы в потребу камения взяти.

Но всего человека цело поглощают

и узброенна мужа с конем похищают.

Сами же камения нужды не имеют.

обаче требующым тако спону деют.

Ногом тым сребролюбии подобии бывают.

иже горы сокровищъ в тайне соблюдают.

Сами их во потребу не смеют держати,

а скудным в пособие не помыслят дати.

С прошением пришедших словом уязвляют,

а стужающым нищым и раны задают.

Оле сребролюбия! что нам содевает?

словесна человека в зверя претворяет.

Не точию же ногу подобнаго деет,

но и псу завистному подобити смеет,

Ибо пес на сене егда почивает,

сена не яст. а краве алчущей не дает.

Тако и сребролюбец не употребляет

сам сокровищ держимых, а нищым не дает.

Но приидет то время, в не же рад бы дати,

не возможет же слова усты глаголати.

А егда от телесе душа разлучится,

Бог весть, кому то сребро в державу случится.

Негли и злым недругом. Уне убо дати

нищым. донеле же леть самому держати.

Тако бо живот вечный мощно есть купити

и временным богатством вечнаго набыти.

Стареющуся мужю, всяка страсть стареет,

токмо сребролюбие по вся дни младеет.

Сребролюбец несытный псу точен бывает,

яко многа точная тому содевает.

Пес гладный аще пищу случит обоняти,

ищет, трудится, да бы ону си стяжати.

Тако и сребролюбец, иде же познает

користь, всеми образы о ней промышляет:

Бегает и труд деет, ложно, лестно ходит,

а правды стяжания ни во ум приводит.

Пес в домех пищных, в лавках мясных пребывает

и детем, хлеб имущым, ласкатель бывает.

Сребролюбец ко простым тщится приходити.

аще видит богатство, да бы их прелстити.

Смирение, дружество являет по себе,

донде же похитити, чесо ему требе.

Пси завистно на мясо скот мертвых падают,

ови другое умерших отчины хищают.

Крадут мертвых заветы, своя подлагают,

всякими неправдами злобы соплетают.

Наследники обидят, ослезяют вдовы.

за что ад им несытный в жилище готовый.

На кровь, еже локтати, пси охотни зело:

сребролюбцы людскую кровь лочут злосмело.

Егда кровавый нищих труд людей глощают,

кожу от плоти, а плоть от костей терзают.

Но сицевым псом кое возвестится слово

на Суде? Вне, пси, неба, пекло вам готово.

Оле страшна ответа! Сребролюбцы, зрите,

а от сребра ко Богу любовь обратите.

Да, не псом точни суше, но Божия чада,

наследие стяжете небеснаго града.

Сребролюбия казнь

Яко же Израиля Фараон томяше,

егда во пленении своем содержаше.

Подобне сребролюбцы нищым содевают,

томят я работою, язвы возлагают.

Но яко же Фараон за язвы язвися,

даже наконец в мори Чермном потопися.

Тако и сребролюбцы страждут своя раны,

ими же не бывает покой оным даны.

Яко песия мухи, печаль им стужает,

нимало во покои жити попущает.

Вместо скнип досадливых совесть оны томит,

сердца выну снедает, аки кости ломит.

За жабы кричащыя гласы им стужают

тех, иже их немилость миру оглашают.

Воместо тмы лютыя — мрак, во умех сущий,

и страх Суда Страшнаго, выну я трясущий.

Яко же вреди плоти и красты вредныя,

суть им их нечестия и злобы тяжкия.

Во крове место имут кровных себе суших

за род Адамль убогих, в небо вопиющих.

В прузей место несытных бывают им тати,

иже выну прилежат сребро их хищати.

За смерть перворожденных чада здочестива

им бывают, имений всуе расточива.

По сих. яко Египет утварей лишися

и Фараон с воинством в понте погрузися,

Тако они богатств си смертию лишатся

и в погибели адстей вечно погрузятся.

Си слышаще, братие. сребра не любиде.

нищым людем обиды нималы творите.

Но тем. что вам Бог дает, доволни бывайте

и то по Его воли чинно устрояйте,

А неправых прибытков никогда хотите,

Богови. не маммоне по вся дни служите.

Бог же имать вам дати во мзду живот вечный,

от маммоны же рабом мзда — огнь безконечный.

Средина добродетелей место

В добродетелех скудость похвалы лишает,

излишество такожде обхудно бывает.

Везде средство есть честно, тем же явствовася

часто восреде Господь, плоть приемый на Ся.

Всреде двою животну в пещере родися,

посреде учителей в церкви мудр явися.

Посреде Иудеов в Йордане бяше.

посреде учеников вечерю съвершаше.

Посреде разбойников на горе распяся.

и по воскресении въсреде явствовася

Луки со Клеопою, и где затворенным

дверем ко учеником прииде смущенным.

Сие же дващи бяше, но и в небо взяся

оттуду, иде же лик апостол собрася.

К тому, в небесней славе в средине царствует,

со Отцем Си и Духом вся правителствует.

Напоследок. множеством святых окруженный,

приидет миру дати Суд Свой божественный.

Среду убо. братие, всегда вы держите.

да Христом средствовавшым небо наследите.

Сродник

Сродницы егда нам земных благ желают,

препятие к вечным благим содевают.

Старость

Стар Муж аще юности дела содевает,

безчестие сединам главы сотворяет

И сверстники честныя в срам велий воводит,

юным в посмеяние сам себе приводит.

Лакон некто, седыми власы украшенный,

от юных человеков бяше вопрошенный,

Вскую браду пространну любезно держаше,

и множицею на ню очы обращаше?

Рече: Того ради ю держу и смотряю,

да, видя в ней седины, присно поминаю

Ничто же недостойно тех седин творити,

но тщуся. яко лепо мужу стару, жити.

Слышите то, старии, старость почитайте,

ничто вам неприлично и на ум пушайте.

Найпаче, таковых делес не творите,

яже старости вашей нечестна узрите.

Класы повнегда к земли приклонятся,

знамя, яко у ко жатве ближатся.

И человек стар елма согорбится,

к смерти ближатся.

Да есть же. яко зерны исполненный

клас, добротами муж обогащенный,

да бы в житницу внестися небесну

во страну десну.

Старость честная

Полза есть во юности благ разум стяжати,

да бы о нем в старости благо пребывати.

Яко же бо, что в лете собрано бывает.

человека во время зимы то питает.

Тако, еже в юности стяжати ся может,

безсилной то старости премного поможет.

Донеле же убо вы младость украшает,

память тверда и ум остр в главе пребывает,

Всяк род добродетелей тщитеся набыти,

да бы старости теми вашей честней быти.

Ибо не власы седы мужа украшают,

но доброты, яже й людем ублажают.

Егда же Бог дарует старости дожита,

еще добродетели требе приложити.

Во-первых, подобает мир сей презирати

и вся красная его в уметы вменяти,

Сребролюбия злобу конечно презрети,

руку щедру к убогим на всяк день имети,

Невеждам совет благий в нуждах подаяти.

образом делес благих пред всеми снята.

На молитвы ко Богу неленостну быти,

слова суетна из уст никогда пустити.

Тако же без измены всегда пребывати,

косы смертны готову на всякий час ждати.

Той же приближившейся. дом свой устроити.

найпаче душу от грех Тайнами чистити,

Ими же укрепленну. елма смерть сближится.

готов к преселению дух да появится

И благохотно к Богу живу да отходит,

сице жившая душа прямо в небо входит.

Сице Ты ны, о Христе. Сам жити настави,

непостыдны престолу Твоему представи.

Да, сущии Тобою в мир сей изведени,

Тобою в премирная будем воведени.

Старым увещение

О мравиих повесть сия обносится.

яко, егда старость онех приближится,

Тогда естественне криле израстают.

теми на высоко место возлетают.

Не ктому с инеми в трудех присных суще,

но до конца живут, горе летающе.

К мравию юнаго мудрец посылает,

да от млада трудом себе обучает.

К томужде старому старцы аз глашаю.

окрилети умом тощно увещаю,

И от земных к горним сердцем возлетати,

в размышлении тех выну пребывати.

Ни возвращатися на труды земныя

до дне последняго жизни временныя.

Сице же небесным елма приложится

старец, за то в небо Богом водворится.

Овцы на вечер лакомо пасутся,

нощь о тей пище жити готуются.

Ты, старче, на нощь смертну готовися,

добре пасися

Духовным брашном, всеми добротами,

покаяния чистаго слезами.

Тайны святыя тщися восприяти,

еже бы спати

Нощь смертну, тебе добре насыщенну

и на путь вечный быти укрепленну,

им же бы в небо воведенну быти,

в нем вечно жити.

Старче, яко же инок въсреде мирян буди,

преходяй честнотою жития вся люди.

Преобиди суеты мира лукаваго,

обратися на службу весь Бога праваго.

Лучше бо ти в старости Богу работати,

нежели скипетр царства мирскаго держати,

Ибо скипетр удобно может погубити,

а работа Господня имать воцарити.

Мир прелестный за старость тебе презирает,

паче убо от тебе презрен да бывает.

По мале времени он хощет тя лишити,

потщися прежде ему ты то сотворити.

Да не он твою старость лстивец обругает,

но обруган тобою, да ся посрамляет.

Веси непостоянство и яже в нем беды,

отврати лице твое от него и следы.

Содоме он подобен, гонзай си Содомы,

ни обратися воспять зрети ея домы.

Еже есть, ко прелестем мира не вращайся,

но во покаяния Сигоре спасайся.

Стенати к небеси

Естествословец некто поведает,

яко о птице некоей ведает,

Из рая сущей, зело украшенней.

цветы имущей, иже во вселенней.

Та своим гласом сладким содевает,

сердца человек в говейность взбуждает.

Ята же сущи. жалостне стенати,

даже пустится, не хощет престати.

Райския птицы и красныя зело

суть души наши, повествую смело.

Убо достоит всесладко им пети.

да бы у Христа милости доспети,

И к горню раю на всяк час стенати.

даже долетят, никогда престати.

Тако учитель языков стеняше,

от смерти тела свободы желаше,

И Давид, яко его удалися

зде пришелствие: Увы! рекл. слезися.

Их стенание и нам подражати

зело полезно. Христе, изволь дати.

Степени ко Богу

К престолу Соломоню шесть степени бяху.

ими же служащий к нему прихождаху.

И к престолу Божию толици степени

хотящим приходити к Богу положени.

Суть же сокрушение, исповедь правая,

бдение, милостыня, пост, молба святая.

Кроме сих невозможно к Богу приступити.

того ради да тщимся теми к Богу ити.

Стихии четыри

Четыри Богом стихии созданньг.

земля, вода, огнь и воздух пространный.

Земля во жилище людем сготовася

и зверем, всех же нижше основася.

Во водах рыбы хладных преплавают,

по ним корабли путь свой совершают.

Жадным в прохлад суть, в них ся снедь готует,

ими круг земный весь ся обшествует.

Воздух над воды висит и землею,

ты легкостию преходит своею.

Тягший от огня, им птицы летают

и вся животна онем отдыхают.

Огнь воде ратник, с кремене сечется.

в различны нужды людем придается.

Сваряет пищы, вкус благий дарует

невкусным ядем, в хладе пособствует.

Стихии Христа исповедаху Бога

Кому стихии себе покаряют,

того господа си исповедают.

Но Иисусу себе покаряху,

егда словеса Его сотворяху.

Вода в естестве своем изменися.

егда во вино словом претворися.

И паче свойства Ему послужила,

егда по морю ходяща носила.

Земля покорна слову Его бяше.

егда Лазаря из гроба пущаше,

И ад познал есть Господа И быти,

егда возможе врата сокрушити.

Воздух же Ему благопокорися.

егда запрещшу ветр бурный смирися.

И внегда в небо грядуща ношаше,

от твари Творцу та честь подобаше.

Убо Господа Его быти знаху.

род Иудейский сице обличаху.

Стомах

Иже сластолюбиви, тощно промышляют,

да пищы и пития сладко устрояют.

Что-либо по аеру пернато летает,

того стомах лакомо во пищу желает.

И яже либо рыбы во водах плавают,

тыя сетми рыбари их ради хищают.

И что зверей пустыня обыче питати,

все то сластолюбивый желает заяти.

Домашняя животна скудна суть во пищу,

вся негли суть работна несытну сирищу.

Поля и вертограды что-либо раждают.

все то в насыщение стомахом отдают.

Древа плодоносная и плод винограда

не могут утолити жажды их и глада.

Оле сластолюбия! Оле несытости!

ею же лишаемся вечныя сладости.

Страдание

Велие достоинство — за Христа страдати,

тело свое на муки за Его предати,

Ибо тако ся любовь велия являет,

юже сердце ко Христу в себе заключает.

И воинствования крепость тако зрится,

яже венцем небесным в год свой возмездится.

Честно есть страдание, сущее за веру,

ибо то облекает, аки во порфиру

Царскую, мученики, егда обагрятся

кровию си святою, и красни явятся.

Язвы их знамения царская бывают.

тех бо силою царством небес обладают.

Честно и того ради, яко есть почтенно.

егда страда Христово тело божественно.

Честно, яко вся Троица Пресвятая чтится,

егда страдалец в жертву Оней приносится,

В жертву же словесную, по воли сущую,

сведетелство истинны чрез кровь дающую.

Честно и возмездием, ибо мзда премнога

обещася страдалцем от всещедра Бога:

Венец неувядающ во жизни небесной

с багряницею славы в стране Его десной,

И еже сообразным Христу пребывати

в славе, за Нь же волиша во мире страдати

Честно, и яко Церковь светло украсися

кровми святых мученик, ибо разширися

Их исповеданием и слава Божия

распространися теми во страны многия,

От восток и до запад, весма во вся конца.

иде же либо лучы в мире светят солнца.

Тем Церковь их святыя мощы почитает

лобзанием и страсти присно ублажает.

Возбуждающи чада в терпение точно

и во соблюдение веры непорочно.

Страдание венчается

Христос Спаситель первое страдаше.

та же на небо взнесл естество наше,

Да вемы, яко требе есть страдати

первее, потом небо обдержати.

Иже на брани благ подвиг являет,

той возмездие и честь получает.

Жизнь наша брань есть, требе ратовати

хотящым в небе венец восприяти

Исраиль море Чермно прехождаше.

с многими враги брани имеяше.

Та же Иордан нужда бе пребыти,

по сих дадеся во Сион град внити.

Равне многими скорбми ити требе

хотящу быти во пресветлом небе.

Стражие совести

Ложе Соломоново вои обстояху,

шестьдесят из крепчайших, и мечы держаху,

Искуснейшии в бранех страхов ради нощных.

Сицевых нам есть требе вои духовномощных.

Да ложа нам обстоят, от страхов блюдуще,

в нощы случающихся, и от враг стрегуще.

Доволно же есть шести, а первый сей буди:

совесть свою прилежно при ложи разсуди.

Вторый воин о гресех есть умиление,

третий — исправления предположение.

Четвертый — моление грехов прощения.

пятый — самодействие довлетворения.

Шестый есть прошение помощы от Бога.

От сицева воинства есть защита многа

Противу страхом нощным, еже есть тмы делом.

яже погибелна суть душам же и телом.

Странноприятие

Страннолюбив зело есть приятно Богу,

то хранящий имут мзду прияти многу.

Ктому Григорий Папа верных увещает,

сице писанием си люди поучает:

Разсуждайте, братие. добро дело сие.

странствующих человек в домы приятие.

Тщитеся на трапезы ваша приимати

Христа, да вечну в небе можете снедати.

Странна Христа во домы ваша приемлите,

царство Его прияти тако заслужите.

Христос же приемлется в людех странствующих,

яко во удех тела Церкве Его сущих.

Сия истинна делом светло изьявися,

егда в дом страннолюбца Христос прилучися.

Бе некто страннолюбец, иже приимаше

Христа ради странныя и хлебом питаше.

В день же некий странники многия приял есть,

и смирився, на руце их воду давал есть.

Елма же к некоему странну приближися.

и взяти сосуд мало от него вратися.

Егда паки с сосудом к нему возвратися,

и се странник невидим в дому сотворися.

Тем удивленный, муж он в себе помышляше.

что то необычное дело знаменаше.

В пришедшую убо нощь, бывшу ему в дому,

странных Отец. Христос Бог. явися оному,

Глаголя: В дни иныя ты Мя в Моих удех

приимал еси в дом твой, в странных сущих людех.

Вчера же Самаго Мя ты восприял еси,

за что прият будеши Мною на небеси.

Оле добродетели! яже сподобляет.

да Христос в лице странна мужа посещает.

Любите благостыню сию превелику,

да приемлете Христа, всех сущих Владыку.

И Он вы да приимет в дом Отца Своего

вечно трапезовати во сладостех его.

Странноприятство ползу многу содевает,

четыри же доброты найпаче творяет.

Во-первых, устрояет Бога познавати

тщащыяся во дом свой странных приимати.

Тако, иже в Еммаус Господа прияша.

в преломлении хлеба Онаго познаша.

Паки, вещей временных деет множение

препитанию нуждных во исполнение.

Тако Илия пророк вдове сотворил есть.

приемшей его, муку, масло умножил есть.

Еще и от Божия казни свобождает,

яко же во Рааве делом ся являет.

Та людей Исраилских сходники прияла,

за то разорения с градом не страдала:

Егда весь град силою Бога разорися.

Раав со домом своим цела сохранися.

Наконец, и аггелы неции прияша.

иже странноприимство людем показаша.

Тако Авраам святый бяше ублаженный.

от аггелов Господних был есть посещенный

И от неплодны жены сына восприял есть,

его же чрез аггелы Господь ему дал есть.

Тояжде благодати и Лот сподобися,

от аггелов в жилище своем посетися.

Иже и от пагубы его свободиша,

егда Содому огнем за грехи спалиша.

Странноприимство убо, братие, любите,

приятием созданных Создателя чтите.

Странноприимство Богу велми угождает,

то любящыя люди Он благословляет.

Авраам яко сию доброту храняше.

Бога в лицех аггелских во храм си прияше

И заслужи в старости сына восприяти,

да неплодная Сарра сотворится мати.

И Лот странноприимством того сподобися,

яко от аггел святых в дому посетися

И теми из Содомска пожара спасеся,

взят бо быв за десницу, из града ведеся

Со женою и дщерма, а иже осташа,

казнь от Бога праведна люту пострадаша.

Раав блудница точне цела сохранися,

елма Иерихон град чудне разорися.

Се же, яко сходники странныя прияла

и страннолюбив им свое показала.

Тако и вы можете Богом благодати

за странных приятие в дом ваш пристяжати.

Токмо страннолюбия вы не забывайте,

а от Господа щедра возмездия чайте.

Страсть

Грех то во человеце бедном содевает,

яко страстми своими он не обладает.

Прежде греха покорны тыя уму бяху,

без веления его ничто же дерзаху.

Днесь ума не слушают, волю предваряют,

яко кони сверепи всадника ношают,

И яко разслабленный не употребляет

удов плоти, яко же в потребу желает,

Подобне ум и воля страстми не владеют,

во укрощение тех за грех не довлеют.

Оле греха пакости! Что требе творити?

Во мори слез достоит грехи потопити.

Презвитер некто жены удалися

по согласию, и Богу трудися

Четыридесят лет во службе Его.

хваля И яко Господа своего.

Егда же к жизни концу приближися,

лежа на одре, полма мертв явися,

Прииде жена, ухо приклонила

ко устам его, да бы сразумела,

Аще жив еще. Он ю познал бяше,

и немым гласом сице глаголаше:

Не у угасе огнь, отступи, жено,

не буди и днесь близу огня сено.

О страстей плотских! коль люте стужают,

в кончине сушу покоя не дают.

Кто же здрав телом мир от них имети

может? Не могу аз уразумети.

Болшее дело — страсти в себе умертвити,

неже из инех телес бесы изгонити,

Мнози бо могут бесы удобь изгоняти,

а страстей, внутрь их сущих, несть леть не страдати.

Страсти Христовы

Не токмо Иудеи с Еллины распяша

Христа на кресте, но и злая дела наша.

Чревобесие оцтем и желчию наше

на смерть грядуща Христа, увы, напаяше.

Гордость наша вомени Его с разбойники.

Иже почитаем есть небесными лики.

Красноризие наше Его обнажило.

нетерпение, увы. кресту пригвоздило.

Любочестие венцем острым увенчаше,

прелюбодейство телу многи раны дате.

За безстудство лиц наших в лице оплеванны,

за клеветы уст грешных Господь клеветанны.

За дела наша злая руце прибиенне,

за ног скорость на злое нозе пригвожденне.

За гнев же наш и ярость в ребра прободеся,

копием рана в сердце Его отверзеся.

И за вся ины злобы нашя Бог страдал есть

всеми уды святыми, нам врачевство дал есть

Что знающе, братие, Христу воздадите

благодарствие, славу и хвалы несите.

Деяния же злая весма оставляйте

и нравы лукавыя вся искореняйте.

Тако страсти Христовы не в осуждение

будут на Суде Страшном, но во спасение.

Страсти сердца

Человек донеле же в мире пребывает.

четыри страсти в сердце своем соблюдает,

Яже суть болезнь, радость, надежда, страх с ними,

всеми же должно Богу работати сими.

И той всем сердцем к Богу себе обращает,

кто сими страстми Ему угоден бывает.

Угоден паки, в нем же болезнь сердце родит,

яко грехи противны Господеви плодит.

В радость же того ради найпаче множится,

яко он к Богу, а Бог к нему обратится.

Страха ни о чем тако умеет держати,

яко, да бы истинна Бога не гневати.

Надеет же ся выну токмо благодати

от Господа, и славу вечну восприяти

Всем сердцем сице Господь Бог иском бывает,

и Сам ищущих ищет, и обрет, спасает.

Страсти умерщвляти

Алкаманес, на мори люди разбивая,

со инеми ял бяше и кесаря Кая.

Его же держя в плене, кощунно вещаше,

яко повесити й на древе хотяше.

Помале свободи й, он же воцарися,

и Алкаману яту быти прилучися.

Приведен на суд Каев и осужден бяше

висети, яко Каю иногда прещаше.

Грядый убо на древо, себе укоряше,

яко осудителя не повесил бяше,

Егда име в руку си. Точне ся случает

тому, иже во плоти си не умерщвляет

Страстей зловредных, яже, егда возмогают,

смертными душу грехи смертно убивают.

Страх

Кто страшен многим, сам многих боится,

иже вся любит, сам всеми любится.

Страшный престол иногда Христос Бог имяше,

даже возглядати на нь страх и трепет бяше.

Егда же плоть изволи нашу восприяти,

в вертепе и во яслех потщася лежати,

Да не ктому страшит нас, но да приступаем

и вся нужды Оному нашя предлагаем.

Страх Господень в сердци должно есть имети

комуждо от верных, и опасно зрети

Горе Бога суща, Иже вся смотряет,

что кто творит, словит и что помышляет;

Низу ад зияющ, хотящь поглотити.

огнем негасимым во веки палити;

Созаде — прешедших бездну прегрешений,

сопреде — хотящих быти преступлений.

Внутрь же нас — естества люто растление.

вне — душеубийцев враг ополчение.

Аще тя совесть и не обличает,

обаче в сердце страх да пребывает,

ибо человек может и не знати

и забывати,

Что согрешил есть, а Божие око

вся в мире видит, и в безднах глубоко

весть вся свершенне и не забывает.

Суд прав свершает.

Авва Илия к своим глаголаше,

яко три вещы престрашны имяше.

Первая бе вещь час разлучения

души от тела за согрешения.

Вторая — время от тли востания

ради Судии Страшну предстания.

Третяя вещь мя, рече, устрашает.

Суд ми будущий, иже не прощает.

Сия комуждо благо поминати

и страх их в сердце своем содержати.

Да предзренная мало повреждают,

паче к небеси страхом устрояют.

Страх Божий

Зачало премудрости страх Божий бывает,

той заутра и вечер тя да умудряет,

Тако бо небесная леть ти мудрствовати.

земная пренебрегшу, в небе пребывати

Сердцем, иде же Христос во славе царствует,

любящым Ся обитель вечную готует.

Валфасар древле пир устроил бяше,

из сосуд храма Господня пияше.

Быв же превесел при царстем обеде,

персты у виде.

На стене писмо полагающыя,

грех и смерть его знаменающыя.

Ужасом объят, преста пировати,

нача стенати.

Мы аще ямы, пием, ли играем.

Бога присуща нам быти да знаем,

Иже вся видит, право знаменает,

ни Ся прелщает.

Знает помыслы, слышит же словеса,

во дни и в нощи вся видит делеса.

Тем же на всяк час Его да страшимся,

не веселимся.

Страх паки Божий — начало мудрости,

залог изрядный вечныя радости.

Кто его в сердце своем соблюдает.

с Богом бывает.

Благо есть страх Божий в сердци содержати.

яко той мудрости есть правыя мати

И грехи изгонит из сердца смиренна,

и впред от них деет мужа защищенна.

Во божественней же крепит благодати

и страх человеческ силен есть изгнати.

И ина благая премнога раждает.

благословение и радость вселяет.

Кончину мирную, безбедство приводит.

в жизнь вечну и в покой небесный возводит. 10

Тем же страх Господень, вернии, храните,

по воли Его век, данный вам, живите.

По временном страсе блаженствовав вечно,

в стране ликующих приимет конечно.

Каменная стена грады утвержает,

жители безбедны от враг сотворяет.

Страхом же Божиим сие оградится

сердце, мой демонов лютых не боится

Яко по игле острой нить во платно входит.

тако по страсе в сердце благодать ся вводит

Иде же у врат дому страж бодрый бывает,

тамо тать приходити нескоро дерзает.

Тако, иде же страх есть, за страж поставленный,

в то сердце тать диавол не будет впущенный.

Кто ся сердцем Божию страху пригвождает,

той на злодеяние рук не простирает.

Нескоро угасает углие огненно.

пепелом изобылно суще покровенно.

Аще паки пепелна покрова лишится.

во немнозе времени оно угасится.

Тако святость истинна в душы пребывает,

аще я страх Господень добре покривает.

Без того же покрова нужда исчезати.

тщися убо всяк в сердце страх Божий стяжати

Еврейския бабы Бога ся бояху,

в Египте жидовских чад не убиваху.

Яко же веле им Фараон творити,

за то Бог изволил я благословити,

Умножи их домы, даровал есть чада

и не лишил жилишь небеснаго града.

Бойтеся убо вси всесилнаго Бога.

да восприимете благая премнога

От десницы Его. яже всем готова.

хранящым заповедь божественна слова.

Обитель мужев честных в едном граде бяше,

та житие чистое зело соблюдаше.

И аще к доброличным женам исхождаху.

никогда страстей плоти свободных творяху.

Той славе царь чудяся, к рабом глаголаше:

Како сим чистота есть? Кто знати можаше?

Един от предстоящих рекл: То не велие

чудо, имут они сицево зелие.

Еже пиемо, страсти плоти умерщвляет,

огнь похоти во чреве весма угашает.

Царь, веру ем глаголом, слугу си познал есть

в обитель к началнику, иже вопрошал есть:

Рцы. честный господине, царь тя вопрошает.

кое оно зелие имя знаменает.

Его же вы силою веете чисто жити?

Молю, не медли мене, ни изволь таити.

Началник тому слову велми удивися,

откуду необычный той вопрос родися.

Мало помыслив, рече: Не имам таити,

тако ми Бога правду хощу изьявити.

Исповедую, яко имамы зелие.

содержащее в себе действо превелие.

Не точию чистоту плоти хранящее,

но и душу от всяких дел злых чистящее.

То гордость от сердц наших вконец истребляет,

смирение же в того место вкореняет.

Тем ненависть морится, а любы живится,

и между враг дружество силно коренится.

То слышя слуга царев, сердцем подвиженный,

моли, да будет скоро с ответом пушенный.

Тогда началник нача светло глаголати:

Рцы, господине, царстей слово благодати.

То зелие духовно, а не вещественно.

имя ему — страх Божий, ему же свойственно

На вся добродетели сердца наставляти.

от всех же злодеяний силно соблюдати.

Той в соборе чистоту нашем сохраняет,

той и ко добротам вся иным увещает.

А кто того зелия не хощет носити,

несть подобно чистоту тому сохранити.

То посланник услышав, зело усумнися,

яко пречудный ответ ему сотворися.

Взем прощение, иде. царю вся сказал есть,

яже от началника мудраго слышал есть.

Царь о невежествии своем усрамися,

а о мудром ответе превозвеселися,

И посла милостыню, прося прощения,

да помолит у Бога грех отпущения.

Жезл Моисиев во змия егда преложенны,

жезлозмии злых волхвов тем суть поглощенны.

Тако страх Божий страха людскаго снедает.

человека на благ путь выну наставляет.

Страх на Суде

Повнегда во Египте братия познаша

Иосифа, его же варваром продаша,

И увидеша царства начало держати,

яша о гресе своем зело трепетати.

Много паче людие будут ся страшити,

внегда увидят Христа, пришедша судити.

Помянут, яко Его зело озлобиша,

егда противу воли Онаго грешиша.

Да убо страха кроме тогда можем быти,

потщимся заповеди Господня хранити.

Стреляние

Лакедемони чада стреляти учаху,

хлеб на месте высоце оным представляху.

Да из лука стрелою той хлеб избивают

и тако пищу себе с трудом обретают.

Суббота

Велможный некто люди в субботу собрал есть

и делати некое дело завещал есть,

Презвитеру к вечерни не велев звонити

даже в нощь, воеже бы дело совершити.

Тогда, невидимою ударен рукою,

паде и мучен бяше болезнию злою.

Глас удара людие онаго слышаху.

но биющаго лица нимало видяху.

От тоя язвы бедник прелюте страдаше,

Богу месть сотворившу, жизни лишен бяше.

Зрите, не хотящий дней Господних чтити,

како обыче Господь то дело платити.

Суд

Камвисий, царь Персидский, повеле судити

Сисамну своя люди и правду творити.

Он же златолюбив, не щадил си главы,

прелстився дары злата, изнесл суд неправый.

Уведев то Камвисий, веле и убити

и из всего телесе кожу излупити.

Тою же судийское покры седалище

на присное судиям последним зрелище.

Изволи на ней сына его посадити

Отана, да учится по правде судити.

Видя отчюю кожу. Оле отмщения

люта зело и страшна правды учения!

Кто ся сам в пути мира осуждает,

на Суде Страшном судим не бывает.

Моисий от Бога с горы егда сниде

и люди телцу играти уведе,

Собра Леввиты, веле мечы взяти

и согрешшыя Богу убивати.

Точне и Христос имать сотворите,

егда с небесе приидет судити.

Кроток бе в мире, днесь же терпеливый,

но снидет на Суд злобам яромстивый.

Велит грешники огню поглотити,

во безконечна времена палити.

Правый суд выну достоит творити,

да бы обидам во мире не быти.

На лица зрети Господь возбраняет,

равно судити всяк чин завещает.

Но оле суда, ныне в людех суща!

Едва узриши правду глаголюща.

А в деле правды не леть есть хранити

хотящу силным сушым угодити.

Изгнася правда, а ложь господствует,

попрася благость, злоба торжествует.

Но не пред Богом. Той бо правду любит.

лжу со лживыми человеки губит.

Разврат же правды во суде бывает

четырикратно, а мир исполняет.

Во-первых, страхом в суде правда тлится,

егда силнаго судия боится.

Не может бедный истинны вещати,

да бы от силна беды не страдати.

Сребролюбие тожде содевает.

сребро судии уста затыкает.

Да не дерзает истинны вещати,

паче да тщится по лжи поборяти.

Еще ненависть ту силу имеет,

правду гонити умеет и смеет.

Егда бо прав есть, его же не любим,

с правдою суща, обвинивше, губим.

Наконец, любовь правду развращает,

ибо всяк друга тощно защищает.

На лица ныне очы обращаем,

купно на руки судимых смотряем.

Аще не тщы суть, винный оправдися,

аще ничто в них, правый осудися.

Оле разврата! Оле лжи велики!

Но казнь сим будет от Христа Владыки,

Иже их суды имать разсуждати

и мзду комуждо по делом воздати.

Каков сам кто, таковы ины судит быти,

по своему житию нрав есть всем судити.

Тем чистоты любитель чисты провещает

иныя быти, яко сам чист пребывает.

Неудобь веру емлет глаголющым въпреки.

по своему вся нраву судит человеки.

Нечистоту же любяй о всех помышляет,

яко нечисто живут, по себе суд дает.

Со упором глаголет: Невозможно быти,

еже кому в чистоте юность си прежити.

Забыв, яко, яже суть не леть человеком,

та удобно прияти от Творца всем веком.

Траян кесарь на войну из Рима идяше.

Егда уже на коня своего вседаше,

Се вдовица некая ногу похитила

и со многими слезы суда есть просила,

Да изволит праведный суд свой сотворите

на дерзнувшыя сына оныя убита.

Глаголаше ко царю: Ты царство правиши,

аз же обиду стражду, молю, да судиши.

Кесарь рече: Потерпи, егда возвращюся,

тогда ти суд праведный творити потщуся.

Она рече: Аще ся, царю, не вратиши,

како ми праведный суд бедней сотвориши?

Царь паки-. То наследник мой содеет тебе.

Она: Како то могу обещати себе?

Но аще и содеет, то в ползу не твою.

он тем делом прославит правду людем свою.

Аз от тебе требую, да ся ты славиши,

егда обиду мою судом ти отмстиши.

Ты мне днесь должен еси, твое то есть дело,

жаль мой нудит мя к тебе глаголати смело.

Лесть же есть, егда того кто-либо не дает,

что по долгу звания дати подобает.

Наследник твой за себе имать то творити.

ему мзда, аще право потшится судити.

Тебе ничто же за то, ты ми да явиши

милость, да бы во мире славу получиши.

Сими глаголы кесарь в сердци умягчися,

абие суд ей дати правый приложися.

Ссед с коня, дела ея абие слушаше,

взыскав правду, осуди, яко подобаше.

И тако жалость вдовы тоя утолил есть,

возсед на коня, в путь свой стопы положил есть.

Суд Божий

Малому Давиду братия велици

и красни весма бяху человеци.

Бог же, видяй сердца, малаго избрал есть

и скипетр царствия оному предал есть.

Не тако Божии, яко наши. суди.

тем же косен кождо осуждати буди.

Се во малой плоти доброта велика,

юже токмо виде небесе Владыка.

Не таков есть Суд Божий, каков человъков,

иначе тварь, инако судит Творец веков.

В суде человечестем аще кто винится,

по мере преступлений некако казнится

На Суде же Христовом кто вину приносит,

конечно прощение от Него относит.

Суд человечь милости двери заключает,

иже казни достойни, на ту понуждает.

На Суде же Христовом милость ся являет,

кто исповестся быти грешен, Бог прощает.

Суд Христов

Богом Христом судити миру уставленны,

человек человеком будет проявленны.

Судия всем судимым. Божество же тайно,

имать тогда судити вселенней, не явно.

Сице собор Ефеский верных поучает

в тридесять первой главе. Хотяй да читает.

Суд Страшный

Во Иосафатове поляне, при граде

святом и Елеонстем оном славном саде,

На местех, иде же бе Христос озлобленный.

Страшный Суд имать быти миру сотворенный.

Да. иде же безславен, безчестен явися

и между разбойники безвинный вменися.

Ту явится во славе с аггелы святыми

и со неисчетными вои небесными.

Ту имать по делесем комуждо воздати,

благих небу, злыя же огневи предати.

О Судие всеправый, милостив нам буди.

тогда нас грешных людей во огнь не осуди,

Но даждь покаяние временно творити,

еже бы со святыми в светлый град Твой внити.

Суд сна прежде

Пес утружденный егда хощет спати,

обыче прежде сам ся обращати,

Нежели ляжет. Егда осмотрится

окрест на месте, тогда положится.

Он — по естеству, нам же подобает,

да кождо во нрав то себе взимает.

Еже, на ложе спати отходящу.

быти окрест ся прилежно смотрящу.

Еже есть, весь день умом разсудити,

не случи ли ся во нь что согрешити.

И аще кая злоба успотрится,

абие овцы да уподобится.

Овца бо егда приидет время спати.

нрав на колена имать припадати.

Овчествуй кождо. прежде преклонися

на колена ти. сердцем сокрушися

О твоих гресех. та же положися.

Божией стражи говейно въручися.

Полезно ктому ложе измывати,

Давидски слезми постель омочати.

Ибо. кто сице в вечер умилится.

в утрий день светло той возвеселится.

Суда память

Иероним блаженный многажды вещаше,

яко. аще что ял есть или что пияше.

Выну слышася ему труба глас даяти.

мертвыя и живыя на Суд призывати.

Аще тако святый муж. нам что есть творити?

Его подражателем в страсе Суда быти.

Суда поминание

Христос Спаситель егда в небо восхождаше,

лик апостол въслед Его очи си пущаше.

Тогда в одежде беле мужа име предстаста:

Что стоите, на небо зряще? глаголаста.

Христос, возшедшый в небо, тако имать прити,

яко отьиде, сиречь, снидет мир судити.

Вскую се во день светлый Суд ся поминает,

иже печаль велию, не радость раждает?

Негли да талантами верно потрудимся,

слово дати хотяще, а не возменимся.

Или хотяще веру Суда утвердити,

яко имать Судия в свое время прити.

Или учаще, яко внезапу вострубит

аггел, мертвыя будяй, и Бог злых погубит,

Или да ся научим надежду держати

в Бозе, купно же и страх гнева соблюдати.

Наконец, того деля, да бы утешити

апостолы аггелми. яко отцу — дети.

Судбы

Не яко человецы, вышний Господь судит.

Человечь суд блазнен есть, Божий — не соблудит.

Множицею, что светло нам ся видит быти.

у Господа обыче за тму ся судити,

И яже нам угодна, неприятна Богу,

нам честная у Него мерзость имут многу.

Судбы Божия

Судбы человек и живаго Бога

имут с собою различия многа.

Елико восток от запад далече,

тако Суд Божий от тя. человече.

Или коль небо от нас удалися,

толь Суд Господень нам далек явися

В очесех наших гора есть велика,

с небесе Зрящу не будет толика.

Но малу праву подобна явится,

тако вся земля небесным судится.

Аще ты убо умом твоим еси

благоговейно в превыспрнем небеси.

Вся ти земная будут невелика,

един ти велик будет всех Владыка.

Иже велика содеет и тебе,

егда поставит одесную Себе.

Егда род Иудейский любим Богу бяше

и во правоверии изрядно сияше,

Тогда языци во тме неверия бяху,

лучес Солнца истинны нимало видяху.

Елма паки язы́цы веру восприяша,

единаго во Тройце Господа познаша.

Иудеи от Бога тогда отступиша,

ибо Сынови Его глав не покориша.

Его же чрез пророки обещанна ждаху,

Мессию пришедшаго. Того не прияху.

Дивны судбы Божия, а праведны зело.

о них же никто дерзай вопрошати смело.

Или вскую иныя Сам туне спасает,

иныя же по делом право отметает.

Не испытуй продерзно, токмо хвали Бога,

Его же и истинна, и милость премнога,

А при вере истинней тако тщися жити,

да милостию спасен возможеши быти.

Судия

Судия, злых не казняй. без ума мечь носит,

за ту милость милости свышше не упросит.

Судия жестокий

Кроток Христос на небо взыде. но вратится

в ярости, ибо Агнец во Лва пременится.

Иже в кротости волил нам заповедати,

о тех в ярости имать грешники стязати.

Елико терпение ныне проявляет.

толику ярость тогда грешник в Нем познает.

Уне убо к Нему днесь слезно прибегати,

егда щедр, неже тогда гневна созерцати.

Сусанна

Кто Богу щедру скорбь свою вручает,

помощи руку Господь тому дает.

От старцу егда бе оклеветанна

прелюбодейством честная Сусанна,

Сердце ко Богу свое возношаше

в надежде блазе и на смерть идяше.

Тем не отврати Бог от нея ока.

дал Даниила в помощь ей пророка.

Иже мудрое сотворь възискание,

обличи старцу оклеветание.

Невинну жену смерти свободил есть,

клеветника же на смерть осудил есть.

Сын благий

Царь некто име сына, его же любяще

и купно царя его сделати хотяше.

Сын смиренно отрече. глаголя: Боюся,

да не, егда царь буду, сына извлекуся.

Весть бо царска высота власти не терпети,

самой бо желателно инеми владети.

Аз же волю сын тебе всесмиренный быти,

нежели на царстве сын непокорный слыти.

О благоговеинства! О любве велики!

едва обретаемы между человеки.

Сын, прежде отца умерший

Аран, сын Фарин, прежде отца преставися,

за идолы родитель на сыне казнися,

Дотоле бо пред отцем сын не умираше,

яко же Епифаний святый непщеваше.

Сын праведный отца почитает, богатств ради в сердце не стреляет

Муж некто богатый с женою живяше,

юже во зазоре ложа имеяше.

Прият же из нея праведна си сына,

она же послежде подверже два ина.

Он о тою аще зазор содержаше,

но до смерти сердцем ту беду терпяше.

Точию в завете тщася положити,

еже праву сыну наследнику быти

Всех его имений. Егда разлучися

душею от тела, пря в сынех родися

О наследстве богатств, ов бо глаголаше,

яко сын праведный умершаго бяше.

Ова же вопреки ему глаголаста,

блядиваго сына его нарицаста.

Кождо имения державы желаше,

даже на суд ити нужда оным бяше.

Судия коварный, не могий познати,

кого праведнаго сына нарицати.

Умысли коварство, никогда слышанно,

да будет отца их тело ископанно

И за цель да стоит, им же стрелы взяти

с луком повелел есть, и в сердце стреляти.

Рек быти праведна того сына его,

иже влучит отца во сердце своего.

Взят стрелу, блядивый близ сердца л у чает,

вторый ему точный в сердце ударяет.

Имеет надежду наследство прияти,

праведному велит скоро стрелу взяти.

Он же. слезы точя, умилно вещаше:

Буди имений всех наследствие ваше.

Аз на любимаго отца не стреляю,

тело, рождшее мя. всегда почитаю.

Паче орудие хощу в руце взяти.

да от трудов моих могу ся питати.

То слышя судия, сына познавает.

всех наследство богатств ему присуждает.

Яко в сердце отца влучил есть стрелою

лубве сыновния. а не древяною.

Ова же безчестив, из града изгнал есть.

блядива бо чада тако я познал есть.

Сытость

Ястреб сытый из руки аще испустится,

сед на древе, к пустившу нескоро вратится

Подобне и человек, er да сыт бывает.

Бога отбег, нескоро к Нему ся вращает.

Никогда огнь во воде возпален бывает,

сокрушения сердца сытость не раждает.

Седина

На нивах класы егда оплавеют,

уже во жатву серпу остру спеют.

Главы людския елма убедятся,

к смерти ближатся.

Тем на седину всяк муж да смотряет.

ко смерти чинно да ся усмотряет.

да бы готову от мира отьити

и в небо внити.

Седина от печали

Севир, князь Баварский, зазор имеяше

на жену Марию и всегневен бяше.

Быв же неразсуден, веле ю убити.

судя недостойну чертога си быти.

Но послежде познав, яко сам прелстися,

убийца безвинны жены сотворися,

Въпаде в печаль люту. даже в нощь едину.

юн сый. превелику восприят седину.

Двадесят и седмь лет токмо имеяше,

а престаревшему точен власы бяше.

Секира

Секира при корени древ мира лежаше,

егда во Назарете Христос возрасташе.

Начат же та секира древа изсекати

неплодная, повнегда ял есть истребляти

Обличением нравы, Богу негодныя,

и садити корени благих дел плодныя.

Семя Авраамле

Авраам яко сына пожрети хотяше

Богу, умножение семене прияше,

Абие бо рече Бог: Умножю Аз тебе

семя, як песок моря и звезды на небе.

Звездам небесным семя то уподобляше.

еже неба достойно будущее знаше.

Еже в мире делесы с даром благодати

в небе, як звезды име славою сияти.

Песком же моря семя то образовал есть,

еже в земных мудрости будущее знал есть.

Еже, яко во мори песок погрузися,

в потоп огня адскаго само устройся.

О коль множество много будет потопленных!

мало же сравнителне человек спасенных.

Разсуди, человече, сердцем ужаснися,

а во подобных песку быти соблюдися.

Тщися от подобленных звездам числа быти,

да в светлости небесней возможеши жити.

Сеть

Сетми врага лукава весь мир исполненный,

виде иногда духом Антоний блаженный

И, воздыхая, рече: О кто может сия

пребыти и до страны внити небесныя?

Абие услыша глас: Кто право смирится,

той множества сих сетей удобь свободится.

Будим убо, братие, на всяк час смирении,

да во страну небесну будем водворении.

Демон ловитель душ есть, а не усыпает

и на всех путех наших сети полагает.

Да, аще на едином будем соблюдени.

то на ином от него будем уловлении.

Аще похоти плотски сетей свободимся.

то мрежею суетны славы восхитимся.

Или сребролюбия, или любве сластей,

или инех некоих душевредных страстей.

Не доволно нам убо от едины сети

опасение бодро по вся дни имети,

Но на вся пути очы должно обращати,

да бы везде коварства врага созерцати

И пособием Бога вся та истребити,

яко мрежи паука унепотребити.

Сице аще содеем, Бог имать венчати,

мзду вечную за подвиг временный воздати.

Симония

Иже Духа Святаго благодать купуют,

тии Симону волхву делом последствуют

И злата тщету страждут, и Духа Святаго

во сердца не приемлют, туне даемаго.

Грех бо то есть противу Духови Святому,

туне дарования Своя дающему.

Тем некто, святокупство сие сотворивый

и во грех себе того нимало вменивый:

Слава Отцу и Сыну егда глаголаше,

и Духу Святу рещи никако можаше.

И аще множицею изрещи нудися,

Богу обличающу грех. всуе трудися.

И благо от языка Дух Святый отьяся.

Иже в душу злобную никако же дася.

Муж некто епископства излиха желаше

чести ради и богатств, и златом стяжаше.

Еже Богу есть мерзско. Тем же казнь оному,

яко согрешившему ко Духу Святому,

Сицеву даде, яко. елма в молбе бяше.

Слава Отцу и Сыну изрядно читаше,

И Святому же Духу не могл есть вещати,

да оттуду грех смертный удобь может знати.

Петр со Филиппом в Самарии бяху,

на крещенныя руки возлагаху.

Бог же благодать Свою посылаше,

чюдодействия силу подаяше.

Яко, на ня же руки возложиша,

чюдеса велика удобно твориша.

Языки странны, не учшеся, знаху

и будущая право прорицаху.

То видя Симон, волхв зело великий.

иже дотоле лщаше человеки

Волшебством своим, умысли купити

сребром толик дар и чюдодей быти.

Взем того много, святым подаяше,

да то приимут, прилежно прошаше.

Дадут же ему дары благодати,

да бы власть сию и ему прияти.

На нь же бы ему руце возложити,

тому бы Духом Святым полну быти.

И им подобне чюдействовати,

болных целити, пророчествовати.

Име же умысл той волшебник лстивый

и ненасытне муж сребролюбивый.

Еже. повнегда Дух ему прияти,

иным за сребро Того продаяти.

Да тако паче всех обогатится

и в Самарии болей всех явится

То зря святый Петр, сребра не прияше

и ко Симону сице глаголаше:

В погибель сребро твое тебе буди,

яко дар сребром сей купити суди.

Иже от Бога туне подается

веру имущым, а не продается.

Вижду ти сердце пред Богом неправо,

помышление ума ти лукаво.

Сице лукава волхва укорил есть,

нрав святокупства добре обличил есть,

Узаконяя ничто продаяти,

от святых сущих, ни же куповати.

Тем же. кто веши святыя купити

тщится, без греха не возможет быти,

И кто за сребро в чины поставляет,

Симону точен тем грехом бывает.

Симония же сей грех нареченны,

от Симона бо перво изведенны

В Нове Завете. Ты, чтый, соблюдися

святых купити, ни продати тщися.

T

Таение

Медведь, хотяй во ложи своем почивати,

задом в не. да след губит, обыче вхождати.

Заяц же издалеча обыкл есть скакати,

еже бы ловцем следа к ложу си не дати.

Тако нам подобает души си хранити

в ложах добродетелей, еже бы не быти

Уловленным от ловца, на всяк час ловяша,

вечныя погибели присно нам хотяща.

Таин седмь

Не вотще Бог изволи Тайны Церкви дати,

но да кождо в потребу вземлет благодати.

Ибо Тайны известно оны приношают,

аще во приемлющих спон не обретают.

Имать же всяка Тайна действа особная.

такожде изводствия, душам угодная.

Крещение святое в живот возраждает

духовный и грех всякий весма измывает.

Миропомазание силно есть даяти

во восприятой вере твердостне стояти.

Тело Христово и Кровь душу насыщает

и силы к пребытию в благих подавает.

Покаяние лечит вреды душевныя,

помыслом, словом, делом зле совершенныя.

Масломастие паки останки стирает

грехов и во час смерти пособие дает.

Презвитерство благодать в души содевает,

приятна творящую, жрети устрояет.

Супружество благодать чадорождения

дает и страстей плоти злых умерщвления.

На седми столпех Церковь утверженна,

от премудрости яже устроенна.

Суть же седмь столпи Тайны пресвятыя,

во Церкви сущым зело полезныя.

Первый тех есть столп свято крещение,

им же бывает верных рождение

Во сыны Богу даром благодати,

юже изволил Бог чадом даяти.

Вторый паки столп — миромащение.

им же бывает чад утвержение

Во святей вере, и на мучители,

на провославных людей гонители.

Третий имамы столп покаяние,

им же бывает грешных востание

От грех. по святом крещении бывших,

и к благодати сердца сокрушивших.

Четвертый столп есть Плоть и Кровь Христова,

пища от Бога всем верным готова.

Да бы душевны силы утвержати.

добродетели удобь умножати.

Пятый елеем есть помазание,

егда приходит жизни престание.

То во последней борбе утвержает.

грехов останки чисто истребляет.

Шестый столп в Церкви — священство святое.

Таин детели устрояет тое.

Еже всем верным теми угождати,

души си и их удобне спасати.

Последний есть столп супружество свято,

еже во Церкви уставися на то.

Да сопрягшымся дает благодати

законно чада родити. питати.

Ими же Церковь пространна бывает.

Бога хвалити выну не престает.

Священно Писание повнегда читаем,

множицею седмично число обретаем,

Еже вся мира веки в себе заключает,

от Адама до Судна дне определяет,

Ими же ко вечности текут человеци,

даждь. Боже, ко блаженной. Тии же суть веци.

Первый есть от Адама, иже конец взяше.

егда потоп за грехи во вселенней бяше.

Вторый бысть от потопа, иже оконченны,

егда Авраам в мире жил есть божественный.

Третий от Авраама до Моисия был есть,

иже верно Господу в законе служил есть.

Четвертый от Моисия бяше протяженный,

даже Давид на царстве седе утверженный.

Пятый век — от Давида царя положенный.

до внегда род Еврейский в Вавилон плененный.

Шестый от пленения того положися

до времене, в не же Бог плотию родися.

Седмый от Христа Бога леты претекает,

кто весть день Судный, конец сего века знает.

Но и о днех тожь число в мире утвердися,

седмию денми всяк век к концу приточися,

И последний теми же имать ся точити,

даже вечности дневи осмому приити.

Во нь же дней вращение и времен не будет,

но вечная суббота, ли покой пребудет.

Того к обдержанию удобни бывают,

яже седмь дари Духа Свята исполняют.

Иже добродетелей седмь тщатся хранити.

в четырех главных, в триех богословских быти.

И седмь Таин церковных в покой провождают,

иже их благочестно си употребляют.

Яже Тайн седмица есть полезна зело,

тем я различным вещем уподоблю смело.

Сия суть седмь печатей, ими ж божественна

Агнца книга с обеты Его заключенна.

Сия седмь столпи ови, яже утвердила

премудрость, егда себе храм честен строила

Седмь крат Нееман в воде елма погрузися.

от проказы плотския весма очистися.

Образ то бяше Таин, яже очищают

от проказы душевны, грех бо омывают.

Иерихона града вся стены падоша,

егда седмь труб глас велий окрест изнесоша.

Тако демоня града стены упадают

от тех, иже седмь Таин чинно соблюдают.

Мощно и седмь рог Агнчих тыя нарицати.

яко теми нам крепость Бог изволил дати

На враг поражение, демона скрушити,

силою Агнца Христа того победити.

Назову я и звезд седмь во Церковном небе,

их же светом греха тму прогоняти требе.

Зари же любве к Богу светло возблистати,

да леть будет во свете вечном пребывати.

Нареку седмь светилник. изрядно светящих.

неоскудно елеем милости кипящих.

Ими бо благодати свет верным блистает.

и милости Божия елей истекает.

Убо Тайны святыя вси изрядно чтите.

их средствием к небесну покою теците

Тамо Уставителя онех созерцати.

благодарствие за ня вечно возсылати.

Тайна

Божая дела достоит являти,

тайны же царски — в сердце соблюдати.

Таити братний грех

Елма ся кому случит обнажити,

срамная тщится рукама закрыти.

Честншии уди срамных покрывают.

срам удов тайных за свой почитают.

Тако друг другу должен есть творити,

паче, сый честнший хуждших нагость крыти.

Егда брат убо нечто согрешает.

наставник от всех то да утаяет.

Казнь в тайне дея, разве аще злобен

пребудет яве, в благость неудобен.

Талант

Талант в земли сокрыта есть то благодати

данныя на тлетворны вещи обрашати.

Яко. аще кто разум к земным прилагает

и сердца ко небесным никако възношает.

Елма мирская гонит, дух пренебрегает

и душы забывает, плоти угождает.

Таланты чювств телесных той в землю копает,

иже не во ползу си тех употребляет.

Аще кто видение от благих отвратит

и на срамна, нечестна волею обратит.

Слушание же аще на Божие слово

заткнено. а суетных слушати готово.

Вкушение ко сластным егда приложится,

пренебрегше простая, овеми сладится.

Обоняние елма сладких вонь желает

и в тех ся паче меры всегда услаждает.

Осязание аще будет обращенно

ко срамных касанию, еже возбраненно.

Не копайте вы сице талантов чювственных,

аще хощете быти в селех божественных.

Всякий дар Божий леть есть талант звати

и нужда того есть употребляти.

Аще кто силен, той да защищает.

аще кто мудр есть, сей да поучает.

Богатый нищым податель да будет,

тако к таланту и другий прибудет.

Тать

Тать егда крадет нечто, вещь приобретает,

но на верности тщету многу отношает.

Прибыток ковчежцу си видится творити,

а без тщеты совести то не может быти.

О измены глупыя! за малый прибыток

великий пострадати сам хощет убыток.

Подобне хотящему погубити злато

обрести же скверное в того место блато.

Татба

В некоей стране бяше обитель святая

мужеска пола и близ — женскаго другая.

В мужестей екклисиарх преподобен бяше,

в женстей екклисиарха пресвято живяше.

Та два лица никогда себе соглядаста,

а любовь духовную друг к другу держаста

Токмо за добродетель, яже равна бяше,

и друг о друзе слово доброе слышаше.

Егда же долго время в той любви пожиста.

неблазненно Господу в звании служиста,

Екклисиарх умысли образ написати

пресвятыя Марии, яже Богу Мати,

Ибо благоговейно ону почиташе

и многая в ея честь делеса творяше.

Прекрасным убо лицем ону написал есть,

демона под ногама ея начертал есть

Люте скаредным зраком. За то озлобися

враг, яко тем скаредством мерзостен явися.

В едино убо время, егда инок всташе

от сна и ко утрени звонити идяше,

Демон в скаредстве точном оному явися

и за написание люте на нь грозися.

Глаголя: Калугере, что мя безчестиши,

под ногама Марии скаредна местиши?

Веждь. яко. аще того лица не сотреши.

отмщение от мене люто понесеши.

Екклисиарх изперва врага устрашися,

но послежде силою Бога укрепися

И рече ко демону: О враже лукавый.

аз есмь скаредство твое написати давый,

Да от всех человеков будеши руганный

и. яко от Марии, такожде попранный

От людей правоверных. Днесь да исчезнеши,

а мне вреда деяти никако можеши.

Аще же потщишися некако прелстити,

Христос мене от тебе силен свободити.

По сих словесех демон изчезе от него,

он до послушания отьиде своего

И доволна во мире лета потрудися.

даже им прещение демонско забыся.

В небрежении убо елма пребываше,

тогда демон злокознство свое восприяше.

Во инокиню ону лстивец претворися

и зело рано к его окну приближися.

Еще во полунощи, и к нему толцаше.

Ему же вопросившу, кто толцаяй бяше,

Рече: Аз есмь другиня, любящая тебе.

пришла есмь, да утешу лицем твоим себе.

От многа тя времен е в сердце соблюдаю.

а лица желаннаго мне не соглядаю.

Поне убо во тайне ныне ми явися,

аз о твоей красоте, ты мною сладися.

Екклисиарх прелщенный ят на ню смотрети

и во сердце утеху некую имети.

Она к нему рекла есть: Аще мя любиши,

знамя любве твоея днесь ми да явиши.

Изволи ты со мною в сладости пребыти,

аз с тобою умыслих до кончины жити.

Тецым в чуждую страну, аз есмь неубога,

се бо взях сокровища на потребу многа.

Такожде возми и ты, яже ти врученна.

теми можева жити, богатств исполненна.

Инок же, любовию девы помраченный,

ово лестию врага ко греху сведенный.

Шед во церковь, побрал есть злато, еже знаше,

и с мнимою девою в путь ити начаше.

Враг, аки забыв нечто, ему глаголал есть,

дон де же возвратится, да бы ту стоял есть.

Обеща инок ждати, демон же бежаше,

в обители вся возбужд, о татбе сказаше.

Началник с братиею во церковь внидоша

и се злато и сребро взято обретоша.

Скоро рабы искати покрадша послаша

и абие на пути стояща й яша

С покраденными вещми. Авве представиша

и в глубоку темницу его заключиша.

Иде же седя бедник, себе удивися,

како на зло толико демоном прелстися.

Помысли убо. помощь откуду прияти.

но в человецех тоя не можаше знати.

Тем же к Богородице слезен обратися,

неутолимым плачем о помощь молися.

Тогда став пред ним, демон сице глаголаше:

Помни не скаредити писмом лице наше.

Еда не глаголах ти, да образ сотреши,

иначе мною в беду велию впадеши?

Се ти воздаяние, где днесь твоя слава?

Зри. яко не останет и на плещу глава.

Бедный инок ко Деве Марии рыдаше,

в нуждно время помощи от нея прошаше.

Тогда демон изрекл есть: Не могу творити,

да бы ми до конца ти мщение явити.

Нудит мя Мати Бога за тя узы взяти,

тебе же из темницы скоро свобождати.

То рек, снял есть вериги и вон испустил есть,

сам в темнице и в узах себе заключил есть.

Инок бедный в радости свобожден идяше,

времене ко утрени звона ожидаше.

Тому пришедшу, во звон инок позвонил есть,

екклисиарха нова делом удивил есть.

Иже, притек ко звону: Кто есть? вопрошаше.

Инок: Екклисиарх есмь, тому ответ дате.

Новый, тек к началнику. диво известил есть,

яко тать заключенный к утрени звонил есть.

Началник, шед и видев того, удивися,

яко от толиких уз винный свободися.

Ял есть екклисиарха в деле вопрошати.

он себе глаголаше ничесо же знати.

Тем же скоро в темницу видети текоша,

тамо екклисиарха лице обретоша

Заключенно, скованно, паки ся вратиша,

в церкви екклисиарха такожде видеша.

Братию ужас обьят, что то сотворися,

яко един человек во два претворися.

Началник, мышля в себе, иным глаголаше:

Видим, яко чрез нощь нам демон ся ругаше.

Священную ми воду некосно дадите,

а что ся нам изъявит, тому ся дивите.

И взем воду священну. инока кропляше,

инок со смирением руку целоваше.

Шедше же во темницу, ону отключиша,

первому подобнаго токмо покропиша.

Он абие изчезе, смрад оставль по себе,

даже скоро гонзати от того бысть требе

Братия, удивлшеся, брата обравдиша,

не знающе таинства, а врага виниша.

Екклисиарх же потом опасно живяше,

скорую помощницу выну величаше.

Егда же конец жизни его приближися.

призвав началника си, пред ним обличися.

Сказав, яко истинно врагом прелщен бяше

и како от Марии помощь восприяше.

По отшествии его дело объявленно,

да есть имя Марии выну прославленно.

Терпение

Без крове врага силно победиши,

аще обиду от него стерпиши.

Познает вину свою пред тобою,

поклонит главу пред лицем ти свою.

Зело изрядный верным вид победы

от дасадитель терпети обиды.

Си бо есть крепость истинно спасенна.

не яже в мечи остром положенна.

Крепость и дерзость Петру обхудися,

яко на Малха с мечем устремися.

Бог со смиренным мужем поступает,

яко с детищем, нужды попущает,

да ся научит в терпении жити,

раб Ему быти.

Тако Иосиф с братом постулате

с Вениамином, его же любяще:

впредь, аки татю, казнию претил есть,

а сердцем чтил есть.

Потом любовь си изволил явити,

паче всех братий прочиих дарити

ризами, брашном и уста лобзаше,

честь ему дате.

Точне и Господь его же смиряет,

во честь лучшую того соблюдает.

Да терпим убо скорби ради Бога,

будет честь многа.

Терпения степени три ся обретают,

иже разну терпящым мзду приобретают

Первый степень есть скорби в кротости терпети,

вторый есть к терпению охотность имети.

Третий радостным сердцем нуждает страдати.

скорбей и гонения усердно желати.

Христофор святый, мученик блаженный,

от язычника люте заушенный.

Рече: Возмогл бых аз тебе воздати

равне в ланиту, в долзе не остати,

Но христианин сущ, Христа слушаю,

другу ланиту тебе обращаю.

Титлы Христовы

Исаия о Христе егда прорицаше,

честныя Ему титлы в славу написаше.

Нарече Его Чудна, Советника, Бога,

Крепка и Властелина. Князя мира многа,

Отца будуща века, и право вешаше.

вся бо сия Христос Бог в Себе показаше

Чуден в рождестве Своем мирови явися,

без отца бо из Девы чистыя родися.

Советник же бе людем, егда увещаше

на путь покаяния и правде учаше.

Бог быти проявися чудес творением,

истинным делом бывшых, не привидением.

Крепок же паказася в страстей терпении,

в светил изменении, земли трясении.

Отец будуща века — во воскресении

и душ Праотец — святых в небо въведении.

Князь же мира явится, во блаженстве вечной

егда будем, в покой даст Бог безконечном.

Тма

Тма во Египте люте тяжка бяше,

никто ничто же зрети в ней можаше,

И недвижими на одрех лежаху.

иже противни Иудеом бяху.

Велия страхи нужда бе терпети,

привидения нелепая зрети.

Но много лютша тма во аде будет,

во нь же никогда свет солнца прибудет.

Тамо страх вечный, узы несконченый,

червь неусыпный будет напущенный.

Ничто узрится, разве что в досаду,

то бо свойственно всетемному аду.

Огнь не даст света, а имать палити.

донде же Богу в Своей славе быти.

Оле тмы страшны! Ты, Боже, избави

Тебе хвалящих и в свете постави.

Тма душевная

Вран плотоядец егда обретает

падшу скотину, очи изклевает.

Тать, приходяй в дом, тщится огнь гасити,

да бы удобно татбу совершити.

Волци на скоты в нощи нападают,

на грады врази в той же наступают.

Во воде мутней рыбарь уловляет

рыбы, яко в ней сеть ся не познает.

Тако, егда ум кому помрачится,

тогда найпаче демоном ловится.

И прежде очы ума он отъемлет,

та же во снедь си человека емлет.

Возмутив сердце гневом. ставит сети,

да бы ловимым тех не усмотрети.

Тогда, як рыбы, люди уловляет,

жарити огню адску устрояет.

Всяк убо от тмы умныя блюдися,

в свете разума всегда быти тшися.

Да тя волк хищный не возможет яти,

зубы своими во аде терзати,

Ни же душевна успеет пленити

града и благ в нем сущих расхитити.

Ходи всяк в свете, да ся не преткнеши

во тме, в град света паче да внидеши.

Томление

Фараон во Египте люди озлобляше

Божия работою и люте бияше,

Иже к Господу Богу слезно вопияху,

свободы от бремене усердно желаху.

И внушив Бог глас вопля, люди свободил есть,

мучителю же отмсти, в мори погрузил есть.

О коль мнози днесь люди Божия пленяют,

нестерпимое бремя на ня налагают!

Верою единаго знающий Бога,

братии си зла люте налагают многа

Чрез труды, грабление и раны велики,

их же глас плача входит во уши Владыки.

Что убо имать Господь за ня сотворити?

Известно, яко имать жестоко отмстити.

Аще ся не покают, будут погружени

в мори адстем и огнем без конца дручени

Торг

Торжники из церкве Христос избивает,

яко торг без греха никогда бывает.

Торжество

Сесостр шах Перский силно воеваше,

враги же сокрушь, торжество свершаше

Четыри крали в коней место бяху,

возторжественный иже с ним влечаху.

Он же, на возе седя, веселися,

гордостно славен людем си явися.

Егда же тако напыщен седяше,

един от царей на коло смотряше

Часто, прилежно. То шах видя, рече:

Что на колеса зриши, человече?

Он же отвеща: То мя удивляет,

яко, что горе, то низу бывает,

И еже низу, то к верху восходит,

скора измена див ми в уме родит.

Сразуме Сесостр мудро гадание,

взя в ум щастия непостояние.

Яко то кого превыспрь возвышает.

в мале времени излиха смиряет

И низу сущих возносит высоко,

даже едва их смеет зрети око.

Отверже гордость, испряже три крали,

иже в скот место под ним работали.

Тофеф

Тофеф во Иудеи место негде бяше,

на нем же скверный кумир Молоха стояще,

Ему же Иудеи чада приношаху

и на огни во жертву, увы, сожигаху.

Глаголет же ся Тофеф, от тоф изведенно,

что языком еллинским тимпан преведенно,

Ибо. елма жидове сыны сожигаху.

в то время тимпанници тимпаны бияху.

Да тех гласом глушится вопль сынов кричащих

и не печалит сердец жертву приносящих

Трезвение

Амефист камень — образ трезвения,

а коня хранит от преткновения.

Плоть наша конь есть, требе есть держати

амефист мыслный. да бы не падати.

Той трезвение право ся толкует,

кто живет трезвен, нимало бедствует.

Трезвение доброты всякия раждает,

пиянство паки злоб всех виновно бывает.

Того ради трезвенни, братие. бывайте,

яко змия, пиянства вреднаго гонзайте.

Триумф, или торжество победное

Рим ветхий егда в силе своей бяше

и негли весь мир во власти держаше,

Внегда случися на нь кому востати,

брань кровавую мечем воздвизати,

Ратныя люди против посылал есть

и воеводе все дело вручал есть.

Той аще промысл знатный проявляше

и силны враги бранию смиряше.

Аще воинства Римска не губил есть,

а враг пять тысящь боем поразил есть

Единем, тому закон ликовати

повелеваше, ли триумфовати.

Еже есть, светло в град Римский входити,

славу победы народно явити.

Иже вход каков бяше. да знается,

се пером моим миру предается.

Во-первых, иже вожд торжествоваше,

собрав вся воя, крепость их блажаше

И раздаяше венцы им различны,

по коегождо службе преприличны.

Овым — златыя, иным — сребреныя,

неким же в почесть — токмо дубовыя.

Различнии же их образы бяху,

противу делу вси ся устрояху.

Аще кто первый на стену возьиде,

стенообразный тому венец приде.

Аще кто град взя, тому венец бяше

дан. иже града образ имеяше.

Аще на мори корабль вражий ял есть,

тако образный венец восприял есть.

Раздель же венцы, яко подобаше.

на колесницу пресветлу въсхождаше.

Торжеству сличну. под ню же впряжени

иногда бяху скории елени.

Иногда паки лвове прелютии,

иногда кони, яко снег, белии.

Теми вожд возим, чрез врата вхождаше

торжественная, яже град создаше

Во славу его нарочито зело.

да торжествует грядый в град весело.

Но въпреде его мусикия бяше.

яже различне радость восклицаше.

Трубы, органы, кимвалы звяцаху,

сердца зрителей в радость возбуждаху.

По них волове, венцы украшени,

златорозии бываху ведени,

Иже ся в жертву Дию закалаху,

не убо Бога истиннаго знаху.

Та же користи. титлы побежденных,

род и образы градов заплененных

Преднесошася. и вод ими бяху

звери страннии, народ удивляху.

Тужде древеса ношаху странная,

во Римстей стране не у виденная.

Въслед их ступаху, иже побежденни,

и железными оковы скрепленни.

Изряднее же вожди вражих полков

сляцаху выя от тяжестных оков.

По сих златии венцы возблистаху,

яже вождеви страны присылаху.

Наконец, сам вожд, седя в колеснице,

в порфире, в злате явствова си лице,

Запястиами златыми блистая,

венец Дафниев на главе ношая.

Такожде и ветв в деснице держаше,

чрез украшенна в град врата вхождаше.

О воистинну честь велика зело,

име в нем быти сердце превесело.

На торжество то людие бежаху

белоодеждни и вси восклицаху,

Приветствующе победы оному,

яко вождеви преумнохраброму.

В той же самый час бяху отверзени

идолов храмы, венцы украшени.

Дым фимиама сладкий испущаху,

обоняющых чувство услаждаху.

Торжествуяй же в главное здание,

в Капитолиум, твори ступание,

Иде же пленных, яко же хотяше,

или в работу, ли на смерть даяше.

И до конца дне он бе повелитель,

в делех известных по воли правитель.

Но прежде тех дел, жертвы приносил есть,

благодарныя Дию, и просил есть.

Еже и вопред Рим ему хранити,

противу врагом в пособие быти.

Потом народне сам пиршествоваше.

царства велможы к себе призываше.

Но к тым же скоро посыла молити,

да не изволят на пир приходите.

Еже бы болшу не приити кому

и не преяти в той день чти оному.

В конец торжества к людем исхождаше.

сребро за радость щедро раздаяше.

Иже весоло ему восклицаху,

подобных торжеств и напред желаху.

В домы отшедше. во книги писаша,

веком последним память оставляша.

Сию же светлость не всуе твориша.

иныя вожды к рвению будиша

И люди ратны, да сии ратуют

храбро, ови же умно вождествуют.

Троица непостижима

Иерарх Иппоненский, Августин реченный,

богословским разумом зело украшенный,

О Божественней Троице книгу составляше

и многая таинства мудро изьявляше.

Желая же глубее в то море вникати

и, яже сокровенна, умом си пояти.

Изьиде на брег моря един, мышля в себе.

како Троицы таинства написати требе.

И елма в мышлении доволно трудися.

внезату младенец прекрасный явися.

Седяй на брезе, яму малу сотворивый,

яко детем обычай, пятою сравнивый.

Лжицею непрестанно из моря взимаяй

воду и в ту ямицу прилежно вливаяй.

Удивися иерарх тому отрочати

и, приступив ближае. нача вопрошати:

Прелюбезное чадо, что ти зде есть дело?

Мал сый, на брезе морстем сам седиши смело

И чесо ради воду вземлеши во лжицу

и во малую ону лиеши ямицу?

Младенец ответ дал есть: Труд, рек, полагаю,

море сие в ямицу вместите желаю.

То услышав, иерарх светло осклабися,

аки детским ответом нечто утешися,

И рече: О любезно чадо, что твориши?

Се море превелико пред тобою зриши.

Лжица же твоя мала, яма невелика.

несть подобно вместити моря в ню толика.

Тогда младенец рече: Изволи верити.

яко удобее аз могу зде вместити

Море сие. нежели ты умом обьяти.

о нем же ти тщание книги написати.

Мыслиши в малой книзе неизглаголанну

Божественныя Троицы описати тайну.

Но вежд, впред море в яму аз могу вместити,

неже ты — мыслимое дело совершити.

Сия рек. невидим бысть, а отец блаженный,

сразумев, яко аггел бе ему явленный.

Возблагодари Бога, истинну познал есть,

яко выше потребы умом си летал есть.

Труба

Трубитель некий рыбы ловите хотяше

и. пришед на брег реки, надолзе трубяше.

Призывая ко себе, но ты не идяху,

токмо во быстрой воде с собою игряху

Он же. восприем мрежу, нача я ловите

и, заем множество их, на брег извлачити.

Рыбы же, елма из вод извлеченны бяху,

по обычаю пред ним от нужды скакаху.

Он рече: Престаните прочее скакати,

ибо аз уже престах трубный глас даяти

В не же время трубих вам. в то вы не скакасте,

но елма ях мрежею, скакати начасте.

Не скаканию время ныне вам дается,

но во сладкое брашно всяка заколется.

И нача по единой оны закалати

и во пиру мертвыя свою полагати.

Тако грядущий Господь во последнем часе

во трубе божественней, в архаггелстем гласе.

Над морем мира сего трубит ныне выну

усты проповедников человечю сыну

Всякому, да приходит из пучины к Нему.

яко ко истинному Господу своему,

Да из глубины грехов к Нему притекает

и от адских челюстей тако ся спасает.

Аще убо кто гласа непослушлив сего.

играя в бездне хрехов, бегает от него.

Мрежею смерти имать уловленный быти,

ею же никому же подобно избыти.

Изъят же на брег Суда, имать не скакати,

но от страха и беды люте трепетати.

Наконец, заклан будет ножем казни вечны

и вовержется во ад. в муки безконечны.

Тамо огнем сжарится и сварится зело,

будет в пищу демоном и душа, и тело.

Оле казни лютыя! тоя вси гонзайте,

на глас проповедников к Богу притекайте

Бежите грехов бездны, ко Спасу теците,

донеле же есть время, бегством ся спасите.

Не ожидайте мрежи смерти, ибо тако

заятый поневоли не спасется всяко.

Труд

Чрез лето пчелы тошно работают.

сладкий из цветов мед людем сбирают.

Аще не хощет кая работати.

не дадут в рои своем пребывати.

Огрызше криле, вон ю извергают.

Гражданом мира образ проявляют,

Да праздных людей не имеют в себе,

ибо комуждо трудитися требе.

Да своим трудом питаем бывает,

а не чуждыя труды поглощает.

Не хотящым же трудов полагати

не подобает хлеба подаяти.

Праздный да не яст, апостол сказаше,

иже от Христа правде учен бяше.

Подобает же вон я изгонити,

да научаться в трудех выну быти.

Труд и молитва

Благо богомыслием ум наш упражняти,

купно же и ко трудом руки прилагати.

Марфа бо с Мариею купно пребываше,

богомыслие сия. ова труд являше.

Единою Мария труда удалися,

егда слушати слово Христа приложися.

Абие сестра Марфа на ню скорбна бяше

и Христу Спасителю ту оглаголаше.

И преобщая притча обыче вещати,

молися и трудися. Господь готов дати.

Рахиль и Лия сестры себе бяху,

с единым мужем спряжены живяху.

Видение же Рахиль знаменает,

трудящуюся Лия изъявляет.

Красна бе Рахиль. Лия паки — плодна,

и та, и ова мужу бе угодна.

Богомыслие чрез Рахиль непщуйте

красно, чрез Лию труд плоден умствуйте.

И обе сестре во вас сочетайте.

в богомыслии и в трудех бывайте.

Тако Христови угодни будете,

в чертозе Его вечно пребудете.

Трудимся за временная, презревше вечная

Тленный прибыток ценен в мире драго,

его бо ради много страждем злаго.

Ратай все лето труды полагает.

мало сна знает.

Купец богатый плавает чрез море,

часто глаголет: Увы ми и горе,

повнегда волны кораблю стужают

и сокрушают.

Или на земных егда разбивают

путех разбийцы и вся разхишают.

много о трудех ту покаяние.

несть престание.

Воин прехрабрый чесо не дерзает?

Раны приемлет, насмертник бывает,

хлад и глад страждет, за мзду и за славу

несет си главу.

Мнози суть труди, а мзда их колика?

Миролюбивым видится велика,

а в правде истей есть, яко ничто же;

яви то, Боже.

Да вси познают прелесть сего мира,

сладость возлюбят небеснаго пира,

иже избранным уготовал еси

в светлом небеси.

Око не виде, глас в ухо не приде,

ни же на сердце человеком взыде,

что Тя любящым храниши готово

чрез Твое слово.

О мзда велика, мзда неизреченна,

Бога любящым тамо сопрятненна!

Сам Бог та мзда есть. Его же зрение

есть спасение.

Тем бо вся чувства вконец усладятся.

душы и тела зарми просветятся.

Тогда блаженством благий человеки

ублажит ввеки.

Обаче мало мы о нем радеем,

в трудех полезных у Бога не спеем,

знающе, яко Богу работати

есть царствовати.

Вемы и, яко скорби мира сего

суть недостойны возмездия Его.

обаче на страсть, на труды не тщымся.

весма ленимся.

Ты, щедрый Боже, изволи будити

сердца, да можем Тебе послужите

отныне въконец и за благодати

Тя величати.

Трудность

Въсреде ликовствующих трудно чисту быти.

честми обилующу — в смирении жита,

Богатствы обдержиму — вселюбити Бога,

в молве слышати Его глас трудность премнога.

Достоинства имущу — Богу работати

спонно, и в сетех мира — завет соблюдати.

Между блюды и чашы страх вон изгонится.

и всреде блудных юный Бога не боится.

Трудность Писания аггел изъявил есть

Старец некий Священно Писание чтяше,

в нем же трудностей неких знати не можаше.

Ят убо поститися. един крат взимати

пищу в седмице, да бы Бог изволил дати

То ему познание, и тако трудися

седмьдесят седмиц, а вещь ему не открися.

Потом, не видя ползы, ят си глаголати.

Пойду к брату своему, буду вопрошати.

Да негли от онаго уползован буду.

безпечален в трудности искомой пребуду.

То рек. абие иде, дверь си заключил есть,

и се аггел Господень ему ся явил есть,

Глаголя: Слыши. старче, много ты постился,

но ближши ко Господу тем не сотворился.

Се, яко ныне в сердце ты смирил ся еси,

аз еемь к тебе посланны от Бога с небеси,

Да желание твое мною исполнится

и трудность Писания светло ти явится.

По сих научив старца, отьиде от него

до пославша и к старцу Господа своего.

Тщеславие

Сампсон егда скимна люта растерзаше.

родителема си того не сказаше.

Мы аще и мало нечто содеваем,

велегласно трубим, всем людем являем.

Кокош. снесши яйце, обыче кричати.

тако тщету плода своего страдати.

Ибо. то человек зная, ищет плода

и. обрет, вземлет от тщеславна юрода.

Подобне человек аще содевает

нечто благо, миру абие являет.

Славы ищя себе, тем же мзды лишится

у Бога, яко зде пред людми хвалится.

Перие сверепая буря развевает.

добродетели слава тщетна изтребляет.

Червь, ризы тлящий, из риз ся раждает.

и древо червя из себе пущает.

Внутрь сладких яблок червие родится.

извнутрь ореха тожде изводится.

Тако из благих дел ся наших плодит

грех тщеславия и тлю в ня наводит.

Ибо, яко же червием вещь тлится

та, из нея же оно изводится.

Тако славою тщетною вся тлятся

дела благая и воничтожатся.

Из них же самех та слава родится.

Добрая мати злым плодом губится.

Тщета

Лучше есть греха кроме тщету пострадати,

неже со грехом неким прибытки взимати.

Тщета бо печаль кратку человеку родит,

а грех долгу тугу и вечну казнь приводит.

Тело Христово

Илиа пророк елма отхождаше,

Иелисея в мире оставляше,

Остави ему, юже сам ношаше,

милоть. Он паки егда ю прияше,

Чудодействия оною творил есть.

Иорданския струи разделил есть.

Христос же Господь, возносяся горе,

остави плоть Си во Церковном дворе

Верным во пищу, но и взя с Собою,

ибо и в десных Отца седит тою.

Илия наг бысть, лишися милоти,

Христос и дал плоть верным, и во плоти

Отьиде в небо, и в ней пребывает,

тоюжде в Церкви верныя питает.

Оле чудесе! Како то пояти?

А тако веру требе есть держати.

Зряй во зерцало видит лице свое,

то же в едином токмо единое.

Тожде зерцало егда раздробится,

в коейждо части цело лице зрится.

Не раздробленно. Тако знати требе

о божественном Святых Таин хлебе.

Ибо, егда той раздроблен бывает,

во всяцей части весь Христос остает

А не почастно. Тем же не сумнися.

целому Христу в частице общися.

Тело мысленное

Тело человеческо из член составленно.

Церковь всех правоверных — тело же мысленно,

В нем же глава есть Христос, Дева же Мария

(яко из нея Христос) — того тела выя.

Архиереи — очи. яко усмотряют,

что деятелно удом и что содевают.

Уста — молитвенници, язык — учители,

гортань лици суть певцев, зубы — сказатели.

Уши покаяние суть приемлющии,

устне — во свое время вся глаголющий.

Руки — иже благая дела содевают,

ноги — иже в храм ходят и странство свершают.

Рамена — иже бремя носят возложенно,

перси суть, иже слово хранят божественно.

Сердце есть Пресвятый Дух, Григорий вещает,

пастырь низския церкве, и уподобляет.

Яко же тело сердце духи оживляет.

тако Дух благодатми живу сотворяет

Церковь. Убо егда нам Дух Святый послася,

сердце от Бога церкви во жизнь даровася.

Тело Церкве

Мнози суть уди в Церкви, но едино тело,

аще гонимо, страждет, обаче есть цело.

Глава Церкве есть Христос, а святая выя

Преблагословенная есть Дева Мария.

Очи — архиереи, их же свойство — зрети,

неусыпно о удех всего тела бдети.

Уста проповедници суть Божия слова.

в них же пища духовна всем удом готова.

Рамена суть царие благочестивии,

иже бремена Церкве носити тщивии.

Плеща лепо боляры и дворяны звати.

яко готови царем си пособствовати.

Руце суть богатии, иже деют многа

изтрошением богатств ради жива Бога.

Перси суть иереи, ибо изпущают

глас к небу, егда Богу славу возсылают.

Чрево нищия люди мощно нарицати,

яко им есть обычно о пищу стужати.

Ноги суть чадь простая, вси иже трудятся,

их бо и вышни уди пособством носятся.

Иныя мощно иным удом подобити

по числу плоти удов, всем же требе жити

В любви точней, яко ю имут плоти уди,

та свыше всем нам дана буди, буди. буди.

Тело красное

Красное тело

егда растлится,

Тое кто любит,

ибо то будит,

Не люби тела,

душа конечно.

При жизни хлебе

Душы любите,

Да его страсти

никогда вводят,

Ничто вредивше

зрети весело.

мерзско явится,

душу си губит,

да всяк с ним блудит,

и будет цела

поживет вечно

со Христом в небе,

тело мертвите.

вас во напасти

но да отходят,

целы лишивше.

Тело красное, Тело Христово

Тело Христово — пища божественна.

во спасение душам устроенна.

И Кровь святая — питие священно.

в спасение же верным учиненно.

Ибо Христос Бог изволи вещати: 5

Кто тщится Тело и Кровь Ми вкушати.

Той живот вечный имать наследите.

О дай нам. Христе, того получити.

А зане Тело ясти и Кровь пита

едва удобно может кому быти,

Отца небесна премудрость святая

мудре изволи строити дивная.

Хлеб, от пшеницы сущ, изволи взяти

и словом силы в Тело прелагати.

Подобне вина чашу наполненну

претворил во Кровь Свою божественну.

Вид хлеба, вина цело оставляя.

въкуса природна в них не изменяя.

Да не ужасно будет приимати,

грешныя душы тако оживляти.

Дал учеником Тайну Си святую,

уставив и им совершати тую,

От них же и мы, приемше, свершаем,

пищу священну с верою вкушаем.

Видим хлеб, вино, веруем инако

Христово Тело и Кровь быти всяко.

Существа хлеба никако зде знаем,

паче чювствия Христу веру даем.

Чювствие наше может ся прелстити,

а слову Христа не леть не правдити.

Причастницы же различно бываем

Таин священных, егда ся общаем.

В первых — духовно, се же не ядуще

Тела, ни Крове Христовы пиюще,

Но егда в царстве единстве бываем.

общества духом тех Таин желаем.

Аще кто тогда и не причастится

за препятие. обаче творится

Общник Таиства, ибо благодати

сицевым Христос обыче даяти.

Яже приемшым даяны бывают,

обою душы приятны творяют.

А таиственно токмо вземлют тое

усты своими Таинство святое.

Иже, во гресех суще, приступают,

не отчищшеся, прияти дерзают

В гресех же смертных, сим есть знати требе,

яко с Тайнами Суд приемълют себе.

Тако Иуда Тайну сю взяше,

но во погибель, яко в злобе бяше.

Ини духовно купно таинственно

врачевство сие вземлют божественно.

Сии суть, иже от Таинств вкушают

и благодатей общницы бывают.

Тако мы часто приимати тшимся.

первее от грех всяких очистимся,

А Христос Господь нашь благословити

зде ны изволит и в небо вселити.

Еже во жизни вечней пребывати,

с аггелов лики сладце воспевати.

Телу и Крови кто ся причащает,

достойне приступль, очищен бывает

От грех простимых, благодать твердится

на нем Божия, и душа сладится

В той сладости, яже есть на небе,

тоя желатель буди кождо тебе.

А кто во смертном гресе приступает,

без ползы пищи от сея вкушает,

Яко же бо хлеб живыя питает.

а мертвым телом ничто помогает.

Тако Тайна си сущым в благодати

обыче помощь, негрешным, даяти.

Вящшее реку, вред великий творит,

новым бо грехом душу грешник морит,

Суд бо яст себе и осуждение,

ходатайствует вечно казнение.

Тем же всяк верный от греха блюдися,

найпаче смертна, о всех умилися.

Очищен Духом, тщися приступати,

тако стяжеши дары благодати.

У

Убийца чюдесно явлен

Блудник некий супругу пречестну имяше,

яже Богородице выну ся моляше.

Той имение свое блудно расточил есть,

жену кормилицею быти понудил есть

У благородна мужа, яже тамо жила

честно и чадо данно всечинно доила.

Муж, ненавидя жены, тайно приходил есть

и, ей спящей, то чадо ножем враг убил есть.

Она. возбнувши, хоте тому отрочати

по обычаю в пищу сосца своя дати.

И се закланно, увы, чадо ощутила.

абие страшным гласом велми возопила.

Родителие скоро к оней притекоша,

и се чадо закланно при ней обретоша.

Плачь велий сотворися, а что бысть, не знаху,

кормилицы о смерти вопрошати яху.

Она, не знающи, что име глаголати:

Не вем, отвещающи, не преста ридати.

Взята бысть убо на суд, не зна, что творити,

нача Богородицу умилно молити.

Да руку даст помощы в последней потребе

невинней сущей рабе, послужившей себе.

Внезапу предста жена, младенца имущи

на руку и судиам сице глаголющи.

Потерпите, судии, сей хощет судити

младенец, да возможет суд праведный быти.

И рече той младенец: Мертва принесите.

Принесоша, он рече: Вы право судите.

Та же рече мертвому: Ты во имя Бога,

убиение, востани из гробна чертога

И яви, кто тя закла. А на сие слово

закланное отроча скоро ста готово

Убийцу проявите, и ят глаголати

и перстом заклателя присуща являти

Судии, зряще дело то Божие быти,

абие повелеша жену свободити.

Тому бывшу. госпожа с младенцем отьиде

невидимо пред всеми, яко и прииде.

Судящий убийцу повелеша яти,

ошибом конским злаго мужа привязати.

Раби, то сотворивше, конми й влачаху,

даже окаяннаго вконец растерзаху.

И тако достойную злоба казнь прияше.

а невинная жена в свободе осташе

Помощию Марии действом Христа Бога.

Ему же буди всегда слава и честь многа.

Убийство

Жрец идола Вакхова, Макарий реченный,

бысть на сребролюбие во уме прелшенный.

Единою странника во дом свой прияше

и. вовед во капище, смерти й предаше.

Утаися убийство на время некое.

но отмстися после ж де дело лукавое.

Ибо сынове его идолу хотяху

жрети, яко же отец, и прю содеяху.

И разгневався един, брата си убил есть,

им же делом матере сердце возпалил есть.

Яже, вземшы палицу, того уязвила

толико люте, даже живота лишила.

За что жрец, разьярився, нача ону бита

и не преста, донде же жизни ю лишити.

За то на суд похищен. Елма мучен бяше.

грех убийства странника не себе сказаше

И ту на мучении с телом разлучися

прежде, неже народно за злобу казнися.

Вдовица некая два сына имяше

и мужеви в жену вдати ся желаше.

Но тех сынов деля никто поят ея.

Она убо крове не щадя своея,

Рукама си уби невинная чада.

потом избегла есть из своего града

И в корабль вкупися. за море плаваше.

Корабль же от брега нечто отшед, сташе.

Чрез пятнадесять дний пребысть недвижимо,

иным по потребе плавающым мимо.

Корабелник убо к Богу обратися

и теплыми слезы пред Ним умилися,

Прося явления вины казни тоя,

и исповедал есть Ему грехи своя.

Потом уснув мало, чрез глас божественный

не держати жены бяше увещенный.

Он, воспрянув, призва жену окаянну,

именем Мария от рождших прозванну,

И прилежно ону о том вопрошаше,

что зло пред Господем Богом содеяше.

Она. таившися мало, грех явила,

яко чада своя зла мати побила.

Корабелник, слыша слово, устрашися,

како над чады си жестока явися.

Абие веле ей в лодию вступити

и, камо же хощет, в той чрез море плыти.

Она с лодиею елма отпустися

от корабля, пять крат кругом обратися.

Потом во глубину морску погрузися.

Тако чад убийца от Бога казнися,

А корабль абие, аки отрешенный,

камо требе бяше. прият путь блаженный.

Тече тако скоро, яко достигнути

ему ины пловцы, ины же минута.

Скорым плаванием Бог то награждаше

время, в не же корабль недвижим стояше.

Убийство родителей

Иулиан юноша благородный бяше.

иже часто в пустыни елени ловяше.

Единою случися в лесе ему быти,

изрядна еленя с стрелами гонити.

Еленъ, обращся к нему, нача глаголати:

Что мя, о человече, тщишися догнати?

Никоим мя образом зде ты доженеши,

а отца и матере убийца будеши.

Он, сия слышав, зело сердцем устрашися

и, умом возмущен быв, в дом свой возвратися.

Не сказав родителма, в себе помышляше,

яко не всуе елень сия провещаше.

Преестественно дело сие зная быти.

умыслил во странствие из дому изьити.

Да бы не случитися слову делом тому.

да не убиет рождших, живя с ними в дому.

Остави убо дом свой, рождших утаися

и во чюждую страну от них удалися.

Иде же некоему велможи служаше,

ему же преугоден службою си бяше.

Быв же воин в той стране, силен проявися,

в неколицем времени славен сотворися

И богатства стяжал есть. Та же поят жену,

велможи реченному в сродстве приближенну,

С нею же житие си честно провождаше

и от всего народа почитаем бяше.

Родители же его излиха ридаху

отшествия онаго, а где бе, не знаху.

Тем же оставлше дом свой, по странам хождаху

различным и о сыне своем вопрошаху.

По мнозе же времени в ту страну случися

приити им, в ней же сын онех водворися,

И уведевше о нем, в дом его внидоша,

но желаннаго сына в нем не обретоша.

Точию жену его, ей же вся сказаша,

кто быша и коль долго сына си искаша.

Она радующися любезно прияше,

аки ону рождшыя, чреди, почиташе.

Приближшей же ся нощи, честь им сотворила,

на своей я постели спати положила,

А утру возсиявшу. сама отлучися,

шедши во храм Господень. Оному молися.

Ей не бывшей в дому си. муж с пути пришел есть

и прямо во ложницу, яко к жене, вшел есть.

И се узре двоицу, на одре лежящу

вознепщевал есть жену, со инем блудящу.

Абие похитив мечь. убил есть обое

и изьиде на стогну, сотворь дело тое.

И се жена, из церкве грядущи, явися,

он, ю увидев, страха сердцем исполнися

И ят о спавших в ложи лицех вопрошати,

кто бяху? Она рече: Отец ти и мати,

Яже аз любве ради твоея почтила,

утружденных на одре нашем положила.

Он. услышав то слово, излиха ридаше,

яко убийца отца и матере бяше,

И рече: Се еленя слово исполнися,

иже ми во пустыни сия рекш явися.

И вшед во дом свой, нача к жене глаголати:

Сестро моя, не имам отселе престати

От очию моею слез горких точити,

яко мне родители случися убита.

Остани здрава в дому, аз тя удалюся.

даже о прощении Богом извещуся.

Она же со слезами ему отвещаше:

Буди брата с сестрою сожитие наше.

Аз греха есмь общница. яко в наше ложе

родители положих. прости ми, мой Боже.

Аще не бы от мене тамо положении,

никако бы тобою быша убиении.

Винна есмь греху тому, убо аз с тобою

иду плаката горко. буди брат с сестрою.

Тако увестившеся, мертвых погребоша.

Богатство расточивше нищым, отьидоша,

И пришедше над реку, людей удаленну.

поставиша храмину, утехи лишенну.

В ней же начаху слезы за грех проливати

и путныя чрез реку ону преплавляти

Безмездно, в них же трудех много лет пребыша,

а. яко брат с сестрою, во чистоте жиша.

И угодиша Богу. Иже грех простил есть

и сицевым образом оным известил есть.

Слыша Иулиана глас сестра зовуший.

службы его чрез реку ону требующий.

Возбуди брата, а он нечто обленися

хлада ради, но ею на труд понудися.

Шед убо, и се нищий человек лежаше,

от хлада изнемогий, помощи прошаше.

Он, взем нища, превезл есть и ят согревати

в хизине теплом огня, нищий же желати

Нача. да между има будет положенны.

теплотою телес их в живот возвращенный.

Она его на ложи своем положиста.

сама с обею страну его легша быста.

Тогда нищий он мнимый ял есть глаголати:

Иулиане. Бог мя изволил послати.

Да возвещу ти. яко молбу ти внушил есть,

за труды и за слезы грех вам отпустил есть

И по мале времени имать вы призвати,

по трудех вечный покой в небеси воздати.

Сия рек, невидим бысть. она сразуместа,

яко аггела между собою иместа.

Въставша убо, начаста Господа хвалити,

себе ко отшествию от мира строити

Потом, нечто поживша. к Богу отьидоста.

мзду трудов восприяти на небо взыдоста.

Амо же и нас. Боже, изводи вседити,

да бы нам с ними Тебе во веки хвалити.

Ублажение

Иже тя в очи твоя ублажает,

не славит тебе, но люте гаждает,

Ибо тя деет славы любителя,

дел же никако благих творителя.

Да молчат уста, да глаголют дела,

тако ти слава будет блага, цела.

Лобзание Иуды муж ти содевает,

иже присущаго тя много ублажает.

Увлачение славы

Человекоубийца тело убивает,

от него же язвами душу отлучает.

Увлачитель же славы чести есть убитель,

своея и слышащих душ лютый губитель.

Он бо увлачением себе убивает.

а слышяй согласием бедне погибает.

Пять же увлачения славы видов знаем.

Первый — клеветно слово быти полагаем.

Егда бо невинному злобу кто задает,

клеветным зубом славу тому увлачает.

Паки, обличением лишним та вредится,

ибо пред слышащыми слава умалится.

Третее, аше тайный грех будет явленный.

ближний на славе своей уже оскорбленный.

Четвертое, аще зле благость кто толкует.

или умалително ону изьявствует.

Пятое, кто не хощет добрых дел хвалити,

греха увлачения волну не леть быти.

Вси види сии славе вред творят ближняго,

ты, да не погрешиши. блюдися всякаго.

Увещение к детем, да учатся

Варварска. не искусна, глупа вся бывают

во граде, в нем же нравов добрых не стяжают.

Что ползует мудрость, что — злато и род славный,

что — устная благодать и дом. миру явный.

Аще тя злонравие дива звера деет,

аще житием гнусным вся честь твоя тлеет?

Убо к даром естества тщися приложити

благи нравы, будеши отрок нарочитый.

Изрядный есть плод мудрости доброта,

доброты образ есть нравов красота.

Доброты кроме мудрость ума тщетна,

прелести туча, яко дым. отметна.

Красота лица и вредна бывает,

ея же благий нрав не украшает.

Уже, юноше благородовитый,

отрини всякий нрав ненарочитый.

Иже светлую славу помрачает,

красоту твою и весь дом каляет,

А научися добронравно жити.

тако приятен всем можеши быти.

Углие огненное на главу

Алчуща врага хлебом ты да насытиши.

аще жажду имать. ты ту да утолиши.

Тако на главу его углие огненно

в ползу твою и его будет возложенно.

Ибо, яко огненным срамом, украсится

и вражду измените в дружество потщися.

Всяко бо благость твоя имать убедите,

еже ти незлобием ону возмездити.

И огнь любве твоея в нем пламень возбудит

любве теплы, да взаим он тебе возлюбит.

Аще же на благость ти он не обратится,

то огнь геенны ему Богом присудится.

Уготовление себе ко смерти

Человек христианский должен промышляти.

воеже бы преблаго смерть плоти прияти.

Обычно же блаженно тии умирают,

иже выну готови ко смерти бывают.

Готовитися паки сице подобает:

смерть. Суд, ад лютый в мысли выну да бывает.

Завет чинно, временно да есть устроенный,

да без него не будет дом потом смущенный.

Годствует же Тайнами себе оградити,

без них же несть подобно в небо ся вселити.

Прощения просити и взаим то дати

комуждо требе весма, а не отрицати.

Веру, надежду, любовь сохраните требе,

тако устрояяйся водворится в небе.

Уд целити

Уд некий аще тлети начинает.

не отсекаем, но целим бывает.

Разве, конечно, аще вредом тлится.

от здрава тела ножем отлучится.

Мы взаим есмы Церкве тела уди:

аще кто тлится, не абие буди

Отсечен от нас, но требе целити,

врачем подобне. да бы устрабити.

Аще же всяко нецелим пребудет,

тогда от Церкве отцечен да будет.

Удаление Бога

Время ко зиме егда приближится

и солнце от нас велми удалится.

Множество снега свыше низпадает

и севбы часто в земли удушает.

Тако, аще Бог от душы отходит,

зима есть люта, яже часто родит

Снеги богатства, попустившу Богу,

еже наносит скорбь и печаль многу.

Та же все семя доброт согнетают,

душу неплодно древо содевают,

Яже преострым Судом посечется

и во огнь вечный, во ад вовержется.

Егда ся от нас солнце удаляет,

молние и гром тогда не бывает;

По них же благ дождь обыче бывати,

земныя нивы уплодотворяти.

Точне, егда Бог душы отступает,

прещения ю и казней лишает,

Им же дождь слезный вслед обыче ити,

ниву душевну преплодну творити.

Елма ся солнце от нас удаляет,

красота селна весма изчезает.

Хладный мраз всяк злак в черность прелагает

и древа аки суха содевает.

Ничто же плодов может издаяти,

донде же паки теплоту прияти.

Тако, егда Бог душы удалится.

красоты всяка та вконец лишится

И мразом гнева помраченна будет,

и нага плодов духовных пребудет,

Донде же паки светом благодати

близ Сый изволит душу согревати.

Удаление от Бога

Благо есть себе выну Богу прилепляти,

погибель же — от Него себе удаляти.

Удаляются паки, иже забывают

Бога и присущыя Онаго не знают,

Что есть злобы источник, ибо, яко Бога

поминание женет зла дела премнога.

Подобне забвение Его в зло приводит,

множество дел лукавых в сердцах удобь родит.

Паки греси смертнии с Богом разлучают,

ибо душу милости Его отчюждают,

Без нея же душа есть в человеце мертва,

враном геенским пища, и адови жертва.

Уединение

Мудрии человеци егда изберают

житие наедине, тщету содевают.

Ибо еликих леть бе оным научити,

о селицех суть должни ответ положити.

В землю талант копают, им же подобает,

да ся купля честная Богу совершает.

Авва Арсений пустыню любяше.

избег из мира, во оней живяше.

Быв же вопрошен, вскую един жил есть

его же Господь зело украсил есть

Премудростию, и дал свято жити,

им же он могл бы многим образ быти

И ползовати. он же отвещаше:

Господь мне силы толики не даше.

Да ся на двое могу разделити,

еже бы Богу и людем служити.

Любил он Бога всех паче едина,

и та единства его бяше вина.

Едину Богу един работал есть.

мирския молвы всячески гонзал есть.

Зная то, яко подобнее быти

едному мужу от мног ся прелстити,

Неже едину многих ползовати,

к Богу от мира словом увешати.

Украшение

Муж некто преподобный, видев украшенну

жену и одеждами лепо облеченну,

Ят. слезы источая. Господа молити:

О всещедрый мой Боже, изволи простити

Мене окаяннаго, яко победихся

от сея жены блудны и тщетен явихся,

Ибо чрез все житие душу не толико

мою украсих, грешник, плоть свою елико

Сия жена чрез един день есть украсила,

се же, да бы любезна человеком была.

Егда же присущий вины слез прошаху.

святый ответ от мужа честнаго прияху.

Две. рече, вине есте, о них же ридаю.

Первая, яко гнусность в себе усмотряю,

Поне же не тщахся аз тако угодити

Господу житием ми и Ему служити.

Яко же сия жена людем угождает,

да их очем любезна пагубно бывает.

Вторая вина слез ми — жалость мя снедает.

яко блудница сия душу убивает

Свою блудными делы. Отсюду достоит

учитися нам, яко найпаче пристоит

Душы си украшати всеми добротами,

да благо духовными светят лепотами,

Тело же. яко врага зла, пренебрегати,

да бы на дух не смело никогда востати.

Умовение рук

Приносяй жертву руце умывает,

чистоты душы нужду изъявляет.

Умовение ног

Христос, тайну вечерю хотя совершити,

ноги апостолом Си изволи умыти,

Образно поучая, яко подобает

чисту быти душею, кто Таин желает

Тела Его и Крове полезно вкусити

и спасен, не осужден тех обществом быти.

Христос учеником Си ноги умываше,

апостолом творити тожде образ дате.

Обаче, апостоли аще умываху,

невестно, а завета Церкви не предаху.

Тем ныне несть обычай, еже ноги мыти

странным людем, обаче не мнимся грешити.

Златоустый и Кирилл узел разрешают,

егда в писаниих си сице поучают:

Христос умовением ног любовь являше

и смирения образ по Себе им даше.

Смирятися им убо веле, и любити

вся ближния, не ноги их водою мыти.

Тем же умовение водно не ни хранится,

а любы с смирением всегда да держится.

Иначе не подобно в спасении быти

без сих добродетелей дерзаюшым жити.

Упование

Упование в Бозе благо полагати,

но купно нужда в деле промысл сотворяти.

Иначе искушаяй есть, не уповаяй.

человечески в деле си не промышляяй.

Саул Давида невинне гоняше.

еже убити онаго, искаше.

Избеже Давид, в пустыни сокрися

и во Енгадску пещеру вселися.

Вслед его Саул даже до пещеры,

но узре сетми паучими двери

Вся заплетенны. (Сие обретает,

иже халдейский толк искусно знает)

Егда бо Давид в пещере сокрися.

Богом посланный паук потрудися,

Заплете сетми дверь, и не бе знати,

что тамо Давид потщася гонзати.

Вина сего бысть, яко уповаше

на Бога жива, Иже и храняше.

В сени крил Его паче надеяся,

неже в пещерней сени сопрятася.

Тем же помощи чужды сподобися.

ей же чтый сия кождо почудися.

Во мужа некоего бес лютый вселися,

иже абие всего разума лишися

И бегаше по стогнам, люди нападая

и зубами, яко пес, зловредно кусая.

Того емше, ближнии прекрепко связаша

и с ним к Павлу святому Простому ся вдаша.

Моляще й прилежно, да молбу сотворит

и беса лукаваго из мужа изгонит.

Он тепле ко Господу молбы возсылаше,

о изгнании беса Господа прошаше.

Егда же долго время без ползы трудися,

тогда детищу святый муж уподобися

И, аки гневаяся. Богу глаголаше,

ибо в милости Его велми уповаше:

Ей, рече. Господи мой, не имам вкусити

днесь пищы. донде же Ты изволиш явити

Милость Свою над бесным, врага изгониши,

а бедна человека здрава сотвориши.

За то упование Бог милость явил есть,

человека от беса люта свободил есть.

Уповати в Бозе

В благоденствии не превозносися.

в злоключении в печаль не вринися.

Но возвержеши печаль ти на Бога,

и будет тебе свыше милость многа.

Упокоение

Бог обремененныя како покаяет?

В первых, демонска рабства иго низлагает.

Та ж, елма Закон Ветхий в Новый преложил есть.

от бремене тяжкаго люди свободил есть.

Еще, елма им совесть людская чистится

от грехов, тогда бремя тяжкое легчится.

Утаение хреха

Юноша некий живот мирско провождаше,

не Богу, но плоти си выну угождаше.

Ему же прилучися болезнь злу страдати,

даже нужда прииде к смерти помышляти.

Пришед к нему, иерей тошно увещаше,

да исповесть хрехи си, яже содеяше.

Соизволи на слово, но грех утаил есть,

тем же, Таин Христовых взем. не потребил есть,

Но долго во устех си оныя держаше.

отшедшу иерею, тайно исплеваше.

Та же страхом обьят быв, начал есть ридати

и паки иерея повеле призвати.

Ему же совершенно грехи изъявил есть

и, Тайны прием паки, чинно потребил есть.

Отнюду же бысть явно, яко не можаше

Таин снести, яко грех первее таяше.

Повнегда же истинно с винами открися,

тогда Евхаристиа удобь потребися,

И он. мало дни наджив, отьиде ко Богу

благонадеждно, яко к небесну чертогу.

Утреневати ко Богу

Полезно человеку есть утреневати,

прежде всех дел молитву к Богу возсылати.

Да изволит на дела дне благословити.

еже бы благо, здраво оная творити.

Господь же с милостию обыче варяти,

заутра молящимся утехи даяти.

Утро Израиль манну сладку собираше,

и женам: Радуйтеся! Христос глаголаше.

Тем же и пророк утро Богу ся моляше:

Заутра услыши глас, к Нему вопияше.

Утренюйте вы убо. братие, ко Богу,

приимете от Него благодать премногу.

Утро и вечер

Воспрянув от сна. абие молися

Господу Богу, а врага блюдися,

иже мысль тщится твою осквернити

и ум растлити,

Да ему весь день во скверне живеши,

во делех смрадных до нощи течеши.

Чие бо утра начало твоего,

весь день есть его.

И в вечер точне грядый уже спати,

от козней врага помни си внимати.

он бо обыче злу мысль подметати.

в блуд возбуждати.

Или да поне, скверны умышляя,

в покои сонном страждеши точная,

ими же тело твое осквернится.

и ум сблазнится.

Потшися убо утро начинати,

во святых мыслех си день совершати.

В вечер со страхом спати положися.

Богу вручися.

Тако день и нощь посвятиши Богу,

за то благодать приимеши многу

в мире, а в небе славу получиши.

Бога узриши.

В Нем же есть сладость и жизнь безконечна,

слава велика и радость превечна.

и в Нем богатство неоскудно знаю,

тебе желаю.

Ухищрение Ревекино

Елма Иаков к смерти плотстей близу бяше,

чада благословити усердно желаше.

Хоте первороднаго ублагословити

Исава и на оном руце положити.

Ревека Иакова в ризы устроила

Исавли. любяши й, отцу представила.

Старец, воню риз учюв, руце возложил есть

на Иакова младша и благословил есть.

Тако нас Церковь мати в ризы облекает

Христовы, егда святых Таин сподобляет,

И представляет Отцу с вонею благою,

да Отец наш небесный, усладився тою.

Благословение Си изволит нам дати.

еже всякими благи изобиловати.

Ухо

Кто на слово Божие ушы затыкает,

от глада умираяй, пищу отвергает.

Перст Христос во ушеса глухаго вложил есть.

егда слух ему дати благоизволил есть.

Перст Божий Дух Святый есть. Он егда влагает

дары во ум, ушеса душы отверзает.

Ухо Малхово исцели Христос

Елма Петр святый Малху урезал есть ухо.

еже слова слушати Христова бе глухо.

Христос Господь абие оно исцелил есть

и дерзати прочее Петру запретил есть.

Чесо же ради сие хоте сотворити?

Различныя причины мощно есть мыслити.

Первая есть, да бы тем чюдом обратити

пришедшыя на Нь вои, еже похитити.

Вторая — ученики хоте утвердити,

аще страждет, обаче Бога Себе быти.

Третия, да бы верны люди научити

и недругом си сушым благая творити.

Четвертая, да явит, яко силен бяше

отьятися врагом Си, волно же страдаше.

Пятая, да бы жидом вины не стяжати

о язве пред судящым на Нь слово сказати

Учение

Бог усты учителей люди наставляет.

Иже и ослицы речь чрез аггела дает.

Долгим путем водит словом поучаяй,

кратко наставляет образ делом даяй

Яко же любезни суть прекраснии цвети,

тако научении всеми приятии дети.

Цвет лепокрасны очы привлекает,

отрок ученный сердце прилуждает.

Не тако чювства услаждают цвети,

яко же отца — искуснии дети.

Ученик

Христос Господь егда мир к Богу обращаше.

ученики достойны во службу избраше,

Воеже бы послухи дел Своих имети

и чрез ты мир учити, яко малы дети,

И теми бы здание Церкве назидати.

духовно камение чинно устрояти.

Да и слава Божия будет разширенна

и ловитва духовна Ему умноженна.

Учитель

Учитель не творяй того, чему учит,

слушателей слова никако получит.

Со властию учит творяй прежде дело,

стяжет ученики и глаголет смело,

совесть бо не зазрит, и вси на глас ухо

дают неглухо.

Иже хощет учитель человеком быти.

долженствует три вещи всячески хранити.

Первое, да, искусен сам сый, наставляет,

иначе бо не учит, но люди прелщает.

Второе — должен слово свое украсити

правдою, действом, да бы приятному быти.

Третие — преклоняти сердца подобает

ко творению делес, к ним же увещает.

Сия храняй учитель благий наречется,

спасаяй человеки сам Богом спасется.

Учитися и учити

Их же не вемы. тым ся нужда есть учити.

яже вемы, та иным верно изьявити.

Учяй, а не творяй

Мнози к добротам инех увещают,

сами же онех нимало творяют.

Сии подобии суть звоном звонящым,

в церковь зовущым, самым не входящим.

Иже желает прав учитель быти,

ему же учит, достоит творити,

Ибо на дела паче возглядают

слушателие и та подражают.

Кто паки, уча, не благая деет,

в царство небесно никако успеет,

Ибо суть средства делеса благая.

им же стяжется радость небесная,

А ради злых дел добро учение

приходит людем в уничижение.

Достоит убо въпред ся очистити

Хотящу ины в чистоту възводити.

Въпредь подобает мудрость пристяжати.

та же иныя оней наставляти

Добро да сам свет первее бывает,

кто просветите иныя желает.

Лепо самому к Богу приступити,

та же иныя к Нему приводите.

Самому прежде святу требе быти,

та же иныя в святость возводите.

Чисте имети руце подобает,

кто подаяти убогим желает.

Иже житие сице провождают,

вечныя славы в небеси да чают.

А учителю единаго слова

казнь от Господа известно готова.

Яко, сам зная, что Бог завещает,

обаче плоти служя работает.

Уне было бы не толико знати,

неже знающу греху работати.

Ф

Фарисей

Во Иудеех ересь фарисейска бяше,

юже Заммай с Гиллелом учити начаше.

Вомале пришествие Христа предвариста.

многая предания вотще приложиста.

Вся во мире случаем быти поведаста,

о душах человечих не добре держаста.

У чиста, яко оны. егда разлучатся

от телес, то в иная лица преселятся.

Яко Питагорове древний держаху

и ученики своя держати учаху.

Тем о Христе Господе сонмь их непщеваше,

что Илии пророка душа во Онем бяше.

Или Иеремии, и многа иная

поучаху, истинне нимало сличная.

Толковании злыми закон развращаху,

а житие доброе себе притворяху.

Злобу в сердцех имуще, лицемерствоваша.

пред человеки токмо доброту являша.

За что Христос я Господь велми обличаше.

егда праву доброту имети учаше.

Фарисей же еврейски тожде нам являет,

что отлучен в языце нашем знаменает.

Тем же ся фарисеи тии нарицаху,

иже ся от Июдей правых отлучаху.

Фебра

Фебра его же держит мужа, искушает,

да хладною водою жажду утоляет.

Егда же он испиет, огнь велий родится,

им же люте недужный человек дручится.

Подобне похоть деет, влечет соблудити,

а казнь Божия за то имать ны томити.

Фебра то проклятая, елма искушает

воды блуда испити, никто да слушает.

Аще хощет вечныя муки не страдати,

но здравие душевно от Бога стяжати.

Фебра — сребролюбие, то бо подущает,

да чюждая кто крадет, или похищает.

Егда же вещь кто чужду крадет, или злато,

от судии бывает люте мучим за то.

Фебра — любочестие, искати бо учит

началства. а обретша безпрестанно мучит.

Фебра есть ярость сердца, ко брани приводит,

потом язвы и плоти, и душе наводит.

Не слушайте убо сих фебр лукавых зело,

аще хощете здраво пожити и цело.

Философия

Философии конец — тако людем жити.

еже бы посилному Богу точным быти.

Фалес Милеский любомудрец бяше,

философию велми похваляше.

Неции ему словом досаждаху,

яко нищь бяше, мудрость укоряху.

Он отвеща им: Люблю нищо жити.

яко не хощу злату пленник быти.

Яко вы есте. Аше же потщуся,

скоро паче вас аз обогащуся.

Они начата ему ся смеяти,

рекше: не леть ти того доказати.

Он паки рече: Чрез лето ми ждите,

да мя богата паче вас узрите.

Они во буйство глаголы вменяху,

истинны слова никогда чаяху.

Он же с хитрости то своея знаше,

яко в будущ год плод быти хотяше

Мног на маслинах, сады откупил есть,

тем весь маслин плод тогда его был есть.

Иже он собрав, маслом събогатися,

а за то златом велми умножися

И, призвав люди оны, глаголаше:

Знайте истинно слово быти наше.

Се вы богатствы преодолеваю,

но в них утехи аз не полагаю.

Мудрость ми годе, с нею хощу жити,

а о богатстве не имам мыслите,

Ибо, егда ми того восхотети,

нетрудно могу доволи имети,

Яко же ныне видите имуща,

а впред стяжати множае могуща.

То суперници егда услышаша

и богатств много велми созерцаша,

Посрамившеся. прощение взяху,

любомудрие много почитаху.

И тому мужу честь многу твориша.

елико в мире согражданы жиша.

Естество дает, токмо еже быти,

философия учит благо жити.

Ово со скоты обще нам бывает,

сие аггелом нас уподобляет.

Диогена человек некий вопрошаше,

кая с философии ему полза бяше.

Он рече: Доволно мя она совершает.

егда всяку премену нести наставляет.

Аще бы ничто ино могла ми даяти,

за то само должно ми ону прославляти.

Аристип, вопрошенный, что ползы имяше,

яко философии весь век прилежаше,

Отвеща: Предоволну ползу обретаю.

яко со всяким саном глаголати знаю.

Силных аз не боюся, ни пренебрегаю,

яже во смирении люди познаваю.

Дионисий мучитель Аристиппу рече:

Кая в философии полза, человече?

Зрю, яко философи пред богатых враты

часто стоят и в домы их тщатся вхождати.

Аристип ответ дал есть: И врачи то творят,

часто в домы богатых человеков ходят.

Но здравия им ползу плоти подаяти,

а философи — нравы онех исправляти.

Никто же болен паче возжелает быти,

нежели врачь искусный у человек слыти.

Яко врачевство болезнь исцеляет,

философиа нрав зол душы истравляет.

Пчела мед сладкий из цвет собирает,

их красотою ся не подвизает.

Тако философ тщится собирати,

яже и могут добре ползовати.

Красная в ничто себе воменяет.

яко та мал ветр в ничто изменяет.

X

Хвала себе самаго и хула

Аристотелес рече, что себе хвалити

есть суетство, глупство же есть себе хулити.

Хвалы презрение

Иоанн Милостивый нищым хвалим бяше,

яко имение си щедро расточаше.

Обращъся к нему, рече: Брате, да молчиши.

не у бо кровь ми за тя излиянну зриши.

Яко же Христос Господь нам повелевает.

да душу си за овцы пастырь полагает.

Хитрость

Слепец некто пять сотъниц златых цат имяше,

яже в некоем месте в земли спрятал бяше.

Тыя сосед усмотрев. тайно ископал есть,

но слепец татбу его домыслом познал есть.

Умыслил дивну хитрость, да бы то сьискати,

притворися совета его требовати

И. пришед к нему, рече: Друже мой предрагий,

молю тя, изволи ми совет дати благий.

Имам тысящу златниц: пять сот закопанных,

а другое толико. в дому удержанных.

Рцы ми, имам ли тыя тамо ж закопати,

или на ином месте тайно сопрятати.

Сосед. велев на ином, слепца отпустил есть,

яко тать, в сердце своем сице помыслил есть:

Не весть он. яко взях аз, пойдет ощутити,

да знает, коль далече ин поклад хранити.

Иду положу паки, да. ощутив сия,

не усумнится в сердце хранити другия.

Аз же положения имам наблюдати.

да возмогу тех златниц всю тысящу взяти.

И сотвори, что мысли, злато закопал есть,

иде же прежде татски оно ископал есть.

Слепец же хитрый пошед, обрет злато свое,

возрадовася и взя, изрек слово тое:

О соседе лукавый, сотворш татя себе,

ты слеп умом, аз видящь. прехитрих бо тебе.

Хлеб

Иже праведне хлебом ся питает.

тому из рук Си Господь пищу дает.

Кто же со грехом промысл имать хлеба,

от демона хлеб имать, а не с неба.

Хлеб убо Божий, но промысл от врага,

потому пища есть ему неблага.

Хлеб в камень преложися

Жена некая во ереси бяше,

Христа во Тайнах знати не хотяше.

Но то пред мужем прилежно таила

и лицемерно в храм Божий ходила.

Единою же верна притворися,

Тело Христово взяти приближися.

Но уклоншися, прост хлеб в уста взяше.

его же, егда снедати хотяше.

Абие в камень твердый преложися,

им же намале та не удавися.

Исповеда грех, той же камень взяся

и в Цариграде долго соблюдася

В показ неверным. да той созерцают.

из хлеба камень врашен быти знают.

То же знающе, да хотят верити,

яко из хлеба тело может быти.

Хлебов пять

Пять хлебов Христос Господь древле умножил есть

и пять тысящь народа теми насытил есть.

Проповедник же Христа Бога подражает,

егда пятерицею хлебов насыщает

Духовных имущыя пять чювствий телесных.

и душевных толико ж. в странах поднебесных.

Первый же хлеб духовный, иже людем дают —

егда что есть верити требе, научают.

Дванадесяточастен хлеб сей вам бывает,

толико членов веры в себе заключает.

Вторый хлеб православном они разделяют,

егда что творително, светло изъявляют.

Сей десяточастен есть, ибо имать в себе

Завет десятословный, иже блюсти требе.

Третий хлеб учители верным предлагают,

елма чесо блюстися нуждно, извещают.

В сем хлебе седмь есть частей — седмь грехов познати,

иже силны суть душу грешну умерщвляти.

Четвертый хлеб духовный верным они дают,

егда убоятися казни поучают.

Яже грешныя имать мучити во веки

во геенне агггели купно с человеки.

Пятый хлеб сладкий зело онеми дается,

елма что желателно верным является.

Сей же есть жизнь вечная и радость велика,

юже уготовал есть рабом Си Владыка.

Сими хлебы в пустыни мира утружденный

народ насыщался, бывает свершенный,

Еже ся во отечество свое возвратити,

в Иерусалим горний вечно с Богом жити.

Храм

Царь, во златых полатах обыкший витати.

не желает в скаредных храмех пребывати

Обаче случит ли ся путь некий творити,

не гнушается во храм всехудый вступити.

Точию слуги своя прежде посылает

и вся устроения взяти завещает.

Да храмина худая будет украшенна

на пришествие его, богатств исполненна.

Царь же неба и земли во всезлатых бяше

живый храмех небесных, обаче желаше

От недр Отца превечна на землю ступити

и нищету нашего рода посетити.

Не предъпосла же рабов со множеством злата.

да ся Ему украсит храмина богата.

Но во вертепе скотстем изволил витати.

да бы худым не страшен приступ содеяти.

Ныне же в божественных Тайнах пребывая

и в кающихся сердца входити желая.

Воли токмо нашея Господь наш желает.

ибо немощь естества совершенно знает.

Сам же предпосылает дары благодати,

еже храмы сердц наших благоустрояти

Во приятие Свое, а за витание

нам многое творится Им воздаяние.

Исправим убо волю, братие, конечно,

да желаем Христова прихода сердечно.

Очистим храмы сердец от всякия скверны

слезми покаяния, а Господь есть верны:

Приидет и вселится, еже в сердцах жити,

и предпошлет благодать сердца украсити.

Да будут пришествия Онаго достойна,

всея Цареви твари жилища покойна.

Хранилище

Александр Великий вопрошенны бяше.

где сокровища си царская спряташе.

Простер руку к другом: В сих (рекл) сопрятаю,

еже бо пристяжу, оным разделяю.

Добро хранилище Александр имяше,

подобно да будет хранилище наше,

Друзи же нищии, им же что дается,

во царствии небесном верно воздается.

Християнин

Вси христиане Христа в помощь призывают,

но не Христовым делом руки прилагают.

Воевода воина ленива имяше.

а честное Александр имя ему бяше.

Вознегодовав о сем, воевода рече:

Или премени имя, гнусный человече,

Или буди Александр явлением дела,

инако не явлю ти лица ми весела.

Тако христианину жити подобает,

да Христово житие делесы являет.

Иначе несть достоин имене святаго

и не узрит Христова лица пресветлаго.

Кто житием си Христа Бога подражает,

той Отца Его себе вправду нарицает.

Христианин воправду той ся именует,

иже в добродетелех Христу последует.

Вотще тем ся именем кождо похваляет,

иже Христа житием си не подражает.

Не имать на Судище Христом познан быти

не хотяй христиански века сего жити.

Безчестие имени есть то Христа Бога,

аще кто христианин творит злая многа.

Праведный христианин хощеши ли быти.

тщися веру и дела благая хранити.

Христианом имена многа мощно дати.

различными я титлы леть есть нарицати.

Ученици Христови во-первых речении,

яко от Христа Света правде научении.

Аще же ученици есмы, подобает.

да от нас разум Христов мирови сияет.

Ученик бо истинный должен то даяти

иным, от учителя что могл восприяти.

Наш же Учитель Христос изволил учити

ничто зло, но все благо во мире творити.

Убо да ученици мы Христови будем,

да творим вся благая всяких чинов людем.

Паки, овцы Христовы есмы наречении,

яко Его пастырству от Отца вручении.

Аще же овцы есмы, то должни слушати

Пастыря и глас Его совершенно знати.

И вслед добродетелей Онаго ходити,

вся заповеди Его прилежно хранити.

Чуждаго паки гласа нужда есть гонзати.

да бы смерти душевны от враг не прияти.

Еще Христос Лоза есть, мы — рождие Его.

тщимся убо имети всю тучность от Него,

Да сладкое дел благих гроздие раждаем.

яже Он завещал есть, тая мы издаем.

Блюдимся же неплодства, да не отсечемся

и огневи вечному во снедь не вержемся.

Еще уди Христови мы ся именуем

тем, яко Главе Ему да ся повинуем,

Ибо в теле, что глава в себе умышляет.

то уд кроме противства тщиво содевает.

Наша Глава, Христос Бог, умствует благая

вся, убо со тщанием мы да творим тая.

К сим благоволи Господь любовь показати

и во невесту душы наша восприяти.

Ибо, яко невеста то должна творити,

ему же ея жених есть желатель быти.

Тако и нам достоит токмо то деяти,

еже изводи Христос Господь завещати.

Не вознегодова нас и за храм Свой знати,

в нем же с Отцем и Духом любит обитати.

Тщимся убо достойный мы Ему храм быти,

красотою дел благих лепо ся красити.

Да благоволит в сердцах наших пребывати

и благословение Свое нам даяти.

И жертва приятная мы Богу бываем,

егда житие наше Ему посвящаем

Во службу и во славу, токмо должни быти

без порока и скверны, всечисто служити,

Ибо. яже порочна обрящется жертва.

несть та жива Богови, но мерзка и мертва.

Еще чада Вышняго есмы наречени.

благодатию Его суше присвоени.

Образом изволи ны Своим украсити,

наследники хощет нас Себе сотворити.

Токмо потщимся волю Его соблюдати,

яко же чада отца, во всем послушати.

А Он наследие нам конечно дарует,

ибо нас деля тое от веков готует.

И свет мира верныя Христос нарицаше,

верою и деянми сияти учаше.

И нам убо не мрачным нужда в мире жити,

но яко же светила, оному светити

Благих деяний лучми и веры зарями,

да будем в свете вечном с горними силами

Напоследок, соль земли апостоли звани,

яко во нетление миру быша дани.

Да. яко же солию нетленно бывает

тело животных, тако да ся утвержает

Дух учением онех в людех, в мире живших,

суетствия мирская всетщетно любивших.

И нам убо, яко соль, в мире нужда быти,

учением в нетленность ума приводити,

За что неистление хощет Бог нам дати

в небе по божественной Своей благодати.

И ина суть многая имена честная,

христианскому роду зело приличная.

Но скращения ради она оставляю,

а христиански жити вся вы увещаю,

Да христиане делы, не именем будем,

за что со Христом Богом во веки пребудем.

Мнози Христа усты чтут, сердце же далече,

даже к демону делы и нравы утече.

Христиаство

Христианство есть право Христа подражати.

в себе, яко в зерцале. Того проявляти

Благими деянии, за ня же на небе

подражателя Христос восприимет к Себе

Христос

Христос сниде с небесе за различны вины:

перва, да ны верою сотворит Си сыны.

Вторая, да Отцу Си содеет ны чада

чрез усыновление, дивна си отрада.

Третия. восхоте ны богаты творити.

избавль нищеты, даров облагодатити.

Четвертая, да буйства вражия избудем

учением, мудрости Божия набудем.

Пятая, да, о гресех суще наказании,

в добродетелех будем Ему преизбранни

Шестая, еже бы нам наследником быти

царствия небеснаго и с Ним вечно жити.

О всещедрый Господи, что Тебе воздати

имамы? Будем Тебе присно величати.

Род наш недугом смертным излиха боляше

и. аки разслабленный, на одре лежаше.

Бог всещедрый милость Си изволи подати.

Врача животворяща с небесе послати.

Той есть Христос Спаситель. Он бо исцелил есть

род наш, егда кровь Свою за ны источил есть.

Он же борющыяся с враги укрепляет,

егда плоть и кровь Свою нам в снедь предлагает.

Побеждающыя же имать увенчати

и торжество в небеси безконечно дати.

О благодеяния предивно велика,

еже содевает нам всешедрый Владыка!

Что мы Ему имамы за сие воздати?

Честь и славу во веки тщимся возсылати.

Два естества во Христе, ипостась едина,

рожденнаго от Отца роди Мати Сына.

Отец прежде всех веков, Мати же под лета

Бога и Человека роди Христа Света.

Ипостась Бога Слова взя естество наше,

ипостаси же людски никако прияше.

Тем же не два мы лица в Христе Бозе знаем,

но едино точию верно возвещаем.

И тако бысть единство Бога с человеком.

никогда виденное прежде бывшым веком.

Его же ради мощно дивная вещати,

о воплощенном Слове сице глаголати.

Превечный бысть временен, создан — несозданный,

необьемлемый — обьят, видим — невиданный,

Неприкосновенный же косновен явися.

безстрастный — страстен, а смерть безсмертным вкусися

Оле чудесе! Како сия съединенна

противная? Деет то сила божественна.

Многия нужды миру всему досадиша.

егда людие во тме греха родна быти,

И не имеша отнюд во бедах помощи

чрез все время естества и закона нощы.

Даже на конец веков всех сущих Создатель,

сожалив Себе о нас. бысть помощы Датель.

Посла единородна к нам Сына Своего.

да в нуждах наших помощь приемлем от Него.

Он бо во всем доволен миру пособити.

требования наша щедро исполнити.

В нощы неведения бывшым нужда бяше

света, той Христос Господь миру возсияше,

Егда учением Си люди осветил есть.

вере правой и делом благим научил есть.

Тогда блудяще люди, яко овцы, бяху,

тем вожда и пастыря велми требоваху.

Бысть убо Христос Пастырь и Вожд на путь правый.

яко пасый духовно и прелесть поправый.

Он же немощны овцы на рама Си взяше

и во стадо Отца Си прилежно ношаше.

И предхождаше стаду, доброты являя.

да всяк вслед Его идет, на Него взирая.

Требовахом и врача, да бы исцелити

язвы душ наших, а не во немощы жити.

Бысть нам и Врачь Христос Бог, искуства полн зело.

сотворивый естество наше здраво, цело

И врачевства нам давый Таин божественных,

целителная вредов. врагом нанесенных.

Не бе нам искупитель, могуш долг отдати

за ны и свободу нам вечну даровати.

Бысть нам Христос Господь Бог шедрый Искупитель

и от работы люта врага Свободитель.

Искупил ны кровию Своею святою,

паче всяких сокровищь всечестно драгою,

И даде нам свободу вечную на небе.

в ню же добродетелми входити есть требе.

Возбудителя нужда велика нам бяше,

да от сна греховнаго будит сердце наше.

И то сотворил есть нам Христос Избавитель,

бысть всеприлежный сердец наших Возбудитель.

Будит бо я различно: ово учением.

ово добродетелей многих творением.

Иногда наказуя. иногда толцая,

всегда же пламень любве к Богу возжигая.

Наконец, ходатай нам бе достойный требе.

да выну заступает нас у Бога в небе.

Есть же нам и Ходатай Христос наш Спаситель.

силным ходатайством Си Отца Умолитель,

Иже, егда язвы Си Оному являет,

что-либо нам нуждно есть, скоро упрощает.

За толики милости, данныя от Бога.

благодарствия присна велми нужда многа

Благодарим мы убо Отца божественна.

песнословим и Сына, от Него рожденна,

Славим Духа Святаго. Отцем винованна,

но чрез Сына мирови явленна и данна.

Детство Христово прооброзоваше,

каков в кончине Он быти хотяше,

Ибо безречен младенец родися,

и в страсти время яко нем явися,

Яко овчя бо на закол, идяше,

не отверз уст Си. и поруган бяше.

Елма бе мудрость превечнаго Бога,

в мир сошедшая с небесна чертога.

Родися же нищ, места не имея

в приклонение главицы Своея.

В чужде вертепе, в яслех положися.

и то вне града, кождо умилися.

Подобне, в страсти время нищ бе зело,

на кресте наго повешенно тело,

И в чуждем гробе вне града лежаше.

места Своего на то не имяше.

Еще, рожден быв, пелены повися,

а прежде смерти вервием крепися.

Младенец в смрадне месте положенный,

безсловесными скоты окруженный.

И умирая, на злосмрадном бяше

месте Голгофы, иде же казняше

Суд люди злыя. Окрест Его бяху.

иже за разбой крестну смерть страдаху.

Плака во яслех. егда детищь бяше,

плака и распят быв, силно вопль даше.

Се знамения в детстве проявленна,

яже при смерти делом совершенна.

Вся же волею сия пострадал есть.

свободу от бед нам дати желал есть.

И дал свершен но, за что Ему слава

буди во веки и с поклоном хвала.

В двадесят пятый марта день Христос зачася,

в той же на древе крестном нас ради распяся.

В двадесят седмый воскресл светлоторжественно,

свободив племя наше, еже бе плененно.

Мая в день пятый в небо славно возвратися,

в пятый на десят того ж Дух Свят низпустися

Во огненных языцех на апостол главы.

обет Свой исполнил есть Господь и Царь славы.

Христос кокоши Себе точна глаголание.

яко, аки под крыле птенцы, собираше

Люди Исраилския, да ся сокривают,

егда от врана адска гоними бывают.

Он же орлу подобен всяко сотворися,

елма от земли в небо телом возвысися.

Видящым апостолом, в оно восхождаше,

горе сердца имети оны возбуждаше.

Да, земная презревше, умствуют о небе.

о нем же правоверным всем мыслити требе.

Горе убо, братие, сердца возношайте.

пренебрегше мирская, небесных желайте,

Зде бо вся суть временна, прелестна и тленна,

онамо паки — вечна, права, неизменна.

Имеяй Христа в себе вся блага имеет,

за вся, сущая в мире. Сам Христос довлеет.

Аще кто болезнь имать. Он — Врачь совершенный.

Им на теле и душе будет исцеленный.

Аще огнем жегом кто, Христос охлаждает.

ибо Источник живый Он Ся нарицает.

Аще беззаконие кого отягчает,

Христос — Истинна, яже грехи облегчает.

Аще помощы кому нужда есть в потребе,

Христос есть Сила, того да держит при Себе.

Аще смерти трепещет и гроба боится.

Христос Жизнь есть, имеяй Его оживится.

Аще кто желанием небесе держится.

Христос Путь есть, по Нему того сподобится.

Аще кому тма страшна, и ея гонзает,

Христос Господь — Свет мира, иже просвещает.

Аще кто алчет пищи душу напитати,

Христос Хлеб есть животный, изволте вкушати.

Христос — Путь, им же ходяй не может блудити.

Он же Истинна, яже не может прелстити.

Он и Живот есть, иже верных оживляет,

кто убо в Христе живет, той не умирает.

Путь есть добродетелей образов данием.

Истинна есть нелестным мзды обешанием.

Живот же, яко живит, егда мзду воздает

во царствии небесном, тако ны спасает.

Повнегда Христос Господь из мертвых восташе.

где четыридесят дни в мире пребываше.

Поне же к апостолом временем хождаше

и по кратких беседах невидим бываше?

Обычно непщуется, яко тамо был есть,

в нем же месте Илия со Енохом жив есть.

Тамо и души святых с Оным пребываху.

донде же Им на небо возведены бяху.

То же место или рай. или мочно тому.

от живущих на земли известно никому.

Христа на казнь жестоку Пилат осудил есть.

Он за ны чашу смерти горкую испил есть.

Яд змия смертоносна вредный истребляет,

всякий грех кровию Си Спас наш омывает.

Христос и Иоанн

Христу расти достоит, Иоанн вещаше,

мне же — умалитися. Когда сие бяше?

Иоанн, пророк велий, тогда умаленны,

егда мечем Ирода главы бысть лишенны.

Христос Бог возраст прият, егда вознесеся

на высоту крестную, повнегда распнеся.

Христос нищь

Содержяй всяческая Бог зело смирися,

егда во Вифлееме от Девы родися.

Ибо не во царския вселися полаты.

ни облечеся в ризы бисерны ли златы.

Но место рождению — не людей жилище,

паче скотское Себе избра стоялище.

Ни же людское ложе, в нем же положися,

ибо во яслех скотских Бог наш воместися.

Постелю не из перий Себе избирает,

но на сене жестоце телом возлегает.

Друзи не человеци, но скотове быша,

вол бо с ослом в вертепе Его обступиша.

Не драгими коврами вертеп украсися,

но сетми паучими много исполнися.

Вони ради благия фимиам не бяше.

но смрад скот безсловесных ноздрям досаждаше.

Вся нечеловеческа во потребу бяху,

токмо пелены, яко младенца, вязаху.

О смирения многа! Кто не удивится.

яко Бог всебогатый тако нищ творится?

Не по нужде же нецей, Сам тако хотяше,

да терпением строит спасение наше.

Христос Господь щедр

Никогда Ся Христос Бог грешными гнушает.

но на смиренных сердца скоро призирает.

Не презре разбойника, первее хуливша,

но послежде исповедь верно сотворивша.

Блудницу плакавшуся от грехов простил есть

и ятую на блуде смерти избавил есть.

Жена Хананейская зане же смирися.

дщерь ея от демона Христом свободися.

Не презре на мытнице Леввия седяща,

ни мытаря, смиренно милости просяща.

Не ринул отрекшася, и неверна бывша,

и прият в апостолство Церковь Си гонивша.

Наконец, не гнушался распеншими Себе;

дерзай же, всяк грешниче, не отринет тебе.

Тецы со смирением, моли со слезами,

а Господь есть с тобою, Той же есть и с нами.

Христос Сын десницы

Рахиль, родивши сына, умираше,

Венони имя ему нарицаше.

Что Сын болезни право ся толкует,

за болезнь ея имя приличствует.

Иаков паки прозва того сына

Сына десницы, ли Вениамина.

Христос Спаситель синагоге бяше

Венони. ибо она умираше.

Ему рождшуся, но Отцу небесну

Вениамин есть, приемый часть десну.

Есть Сын десницы, ибо возлюбленный,

во высочайшей славе посажденный.

В вечном блаженстве вечно пребывает

и нам Помощник во нуждах бывает.

Христос взыде на небо

Енох в рай прекрасный Богом пренесеся

колесницею же Илия въвезеся.

Оба не своею силою внидоста,

чрез воздух ходите в теле не могоста.

Ибо тягость плоти тленныя не дает,

да кто ею аер легкий попирает.

Сам создавый воздух, тленность отложивый,

тело посагами Свое украсивый.

О свойственней силе воздух превозшел есть,

и превыше небес на престоле сел есть.

Ему. яко Творцу, воздух покорися,

ту же облак светлый с службою явися.

Не яко требова Господь в помошь его.

но в честь Создателя послужи своего,

О Нем же глаголет Духом Писание.

Полагаяй облак на восхождение

И ходяй на крилу ветра скоротечна.

тако Христос вниде, где радость превечна.

Христос вся освяти

Всяческая Христос Бог в мире освятил есть,

егда со человеки плотию пожил есть.

Водное естество Им тогда освятися,

елма от Иоанна во воде крестися.

Земля освящение в то время прияше,

в не же по ней ходил есть и в гробе лежаше.

Аер вознесением Его освященный,

елма бысть силою Си по нем вознесенный

Небо Им украсися, егда в оно вшел есть

и одесную Отца в славе Его сел есть.

Христос дверь

Дверь Христос Господь Сам Ся нарицает,

Собою верным внити завещает.

Дверь же есть Церкве. в ню же хотяй внити

должен, во-первых, чрез веру ходити,

Яже во Христа, и быти крещенны,

и тако будет Церкви вообшенны.

Он же дверь паству хотящым прияти.

его же бо Он изволит избрати

Пасти овца Си. той есть пастырь правый,

без Него вшедый волк есть вселукавый.

Еще Христос есть и Дверь благодати,

чрез заслуги бо Его ту даяти

Бог благоволит всем благочестивым,

в добродетелех сущим благотщивым.

Наконец, Он же Дверь горня Сиона,

ибо приходим до Божия трона

Заслужением Его божественным

и ходатайством мирови спасенным.

Христос с нами

Обет от Христа имать Церковь мати,

яко до конца имать пребывати

С нею. аще и на небо отьиде

и в десных Отца со славою седе.

Како убо Он с нами пребывает?

Се изъявляю, да кождо познает.

Есть же, во-первых, чрез соблюдение

Христос в Церкви Си, ибо хранение

Ей содевает. да не истребится.

донели жь небо вкруг земли точится.

Паки, особным есть в ней правлением,

правыя веры в ней утвержением.

Еще есть с нею чрез покровение,

аггелов святых окрест ставление.

Иже во скорбех ону утешают

и во наветех силно зашишают.

К тому есть в оней и чрез благодати,

яже за любовь обыкл ей даяти.

При сем с нею же Си пребывание

светло являет чрез наказание.

Ибо, егда ны за грех наказует.

отеческую любовь к нам явствует.

Наконец, есть Он в Церкви божественней

в Евхаристии верным всеспасенней.

Во видех хлеба и вина таится.

Сам же Христос Бог быти веруется.

Вид хлеба, вина оком созерцаем,

но Христа быти верно возглашаем.

Христос есть Давид

Елма Давид овцы отца си пасяше.

бодрый и силный пастырь онех бяше.

Егда лев овцы, ли медведь хищал есть,

он, гнав, плен отьем, самы убивал есть.

Точне Христос Бог в мире сотворил есть,

род наш из зубов лютых исхитил есть.

Смерть бо, яко лев, люди похищаше,

ад. яко медведь, жестоце глощаше.

Но Христос Господь от них исхитил есть

род человеческ, Самы поразил есть.

Смерти стерл жало, ад Им разорися,

тако сей Давид славно прославися.

Христос со крестом

Ведется на смерть Христос, мятежми нужденный,

и несет плещами Си крест, на Нь возложенный.

Его же тягость Ему нести помогает

Симон, нас подобне крест нести увещает.

Художество

Художество художеств есть себе познати

и наученну быти добръ умирати.

Худородия память

Агатокл Сикилийский сын скуделничь бяше,

тем же царь быв, сосуды скуделны ставяше

На трапезъ си царстей, да бы поминати.

яко от худа рода взят есть царствовати

Архиепископ некто худороден бяше.

родителя бо колес детеля имяше.

Сей, видя честь велику, богатство и славу.

бояся, да бы в гордость не вознести главу.

Велъ везде колесо в доме си писати,

еже бы рода худость выну поминати.

На то возглядающу, к тому на печати

колесо же повелъ своей изваати.

О пресмиренна мужа! Ныне есть ли тако?

Велиции знают ли худость си? Никако.

Хула

Жид со христианином зернием играше.

польем тщету, на Христа хулы глаголаше

Взя зерния, абие рука та согбеся,

нектому еже кости метати, простреся.

Он, разгневався, нача стол рукою бити,

Христа и Матерь Его более хулити.

Абие завращь очы, земли приразися

хуливый Жизнодавца живота лишися.

Христианин же за страх ума бысть лишенны

и лютою смертию скоро умерщвленны.

Поликарпа страдалца на огнь полагаху.

да поне хулит Христа, жестоце нуждаху.

Он рече: осмьдесят лет и шесть уже Ему

служу яко Господу и Богу моему,

А ни едино ми зло доселе содея.

Како имам хулити того Благодея.

Иже мя сотворил есть, хранит и питает

и на путь спасения душу наставляет?

Юноши некоему враг чрез мысль стужаше.

да хулная речет на Христа, совещаше.

Он. досады не терпя, Пимину явил есть

авве помыслы злыя, той же научил есть

Онаго, да глаголет: Хотел бых хулити

Бога, но вины несть леть на Него смыслити

Достойны хуления, тем же не дерзаю.

но тебе, о лукавый враже. проклинаю.

Изчезни ты от мене с советы твоими,

аз не восхулю Христа устами моими

Иноку некоему дух хулы стужаше,

даже в отчаяние ели не впадаше.

А срамляшеся того отцем изьявити,

яко непщева себе всех грешнейша быти.

И ко авве Пимину тщася прихождати,

еже бы совет благий от него прияти.

Но срамом побеждаем, паки отходил есть,

досады люта врага тому не открил есть.

Богодухновенный же отец то познаше,

яко в печали брат той от него хождаше

Нача любезным словом того вопрошати,

да бы вину печали потщался сказати.

Брат, Богом пособствован, оному сказаше.

яко искушение злы хулы страдаше,

А. срамом побеждаем. не может явити

и годе бысть умрети паче, неже жити.

Сия брату сказавшу, бысть облегчение,

и абие чю в себе волн утишение.

Авва же приложил есть того увещати,

еже ся о тех ему хулах не смущати,

Яко не хотением онаго бывают.

но. аки мухи скверны на мед нападают

Наветом диаволим, ни могут вредити,

точию подобает оны отгонити.

Повеле же нападшым мыслем глаголати:

Не имам хулам мерзким согласия дати.

Сатаны семя сие, с ним да исчезает.

на тя. враже лукавый, казнь да ся вращает.

Аз Бога истиннаго присный есмь хвалитель.

твоих же. враже, навет лукавых хулитель.

Сия прием советы, брат воз весел ися

и не ктому о хулных помыслех смутися,

Но пособием Бога врага посрамляше,

в духовном веселии прочее живяше.

Хулник в камень преложися

Виноград человеку некоему бяше,

из него же доволны плоды собираше

И сладостию благи. От тех богатися

и, в дому вино из тех пия, веселися.

Во едино же лето плоди не созреша,

числом негобзовиты и приквасни беша.

Он, с печалию собрав, в точило вложил есть

и, яко подобаше. вино устроил есть.

Но от грозд несозревших вино квасно бяше,

о нем же неразсудный на Бога ропташе.

Во едино же время случися оному

путь восприяти немал из своего дому.

Веле убо от того вина сосуд взяти,

и другий от лучшаго в той путь наливати.

Путь же ему текущу, при пути стояше

образ распята Христа, иде же он сташе,

И от утруждения жажду утолити

хотя, повеле чашу вином исполнити,

Еже бе изрядншее, и сам то испил есть,

глаголя: Здравствуй, Христе, потом же налил есть

От квасна вина чашу, образу даяше:

Пий Сам, каково даде вино, глаголаше.

Оле безумна мужа и дерзостна зело,

нелепо глаголавша и деявша смело!

Но Его же бе образ, ту злобу казнил есть,

мужа с чашею в руце в камень претворил есть.

Яко жена Лотова в столп слан преложися,

тако и сей хулитель в камень пременися

Во показ иным людем, да бы не дерзати

точна дела, и словес таких не вещати.

От

Ответовати нужда

Сынове века сего мудрши сынов света,

яко ищут на слово всякое ответа.

Тщатся неправду свою Священным покрыти

Писанием, да бы им себе защитити.

Мы же, сынове света, не тщимся искати.

да бы сопротивником ответ крепкий дати.

Православныя себе именуем быти,

а мрачных еретиков не можем учити.

Сами бо не учимся, избрахом лежати,

во тме невеждествия тайн почивати.

Осудят супостати Церкве нашу леность,

яко пренебрегаем веры правды целость.

Они неправость свою тщатся украсити,

мы же правды нашея ленимся учити.

Светилник правды у нас, а в свете без света

живем, яко не знаем творити ответа

На вопросы супостат. Петр же увещает,

да на ответ вопроса всяк готов бывает

Отмщение

Враги любити Господь людем завещает,

отмщения творити не повелевает.

И егда ученици хотеша казнити

Христови, на весь неку огнь с неба пустити.

Возбранил есть им Господь того содеяти.

не попусти Илию делом подражати.

Той бо в ревности огнем многи попалил есть

и жрецы идолския жестоко побил есть.

О сем ведети благо, яко он то дея

не от ярости сердца и воли своея.

Но яко Господь ему изволил явити,

яко то подобаше оному творити

Над достойными смерти, того ради смело

толи кое Илия совершаше дело.

Иначе огнь бы ему не возмогл служити,

низходя свыше, люди грешныя палити.

Отпадение в грех

Елма прелюбодейством Давид согрешил есть,

смертию единаго сына Бог казнил есть.

Егда же впаде в другий. люди си считая,

за гордость последова казнь превеликая.

Ибо многи тысящи народа казненны,

невидимо аггелским мечем истребленны.

И Ахав за убийство Навуфея честна

приял бе прощение от Царя небесна.

Но послежде дерзнул есть Бога превысока

Михея во темницу воврещи пророка.

За то сам от Господа Бога бе казненны,

ибо, изшед на войну, души бысть лишенны.

Тако отпадение в грех Богом казнится,

за неблагодарствие казнь усугубится.

Блюдитеся, братие, убо отпадати

в грех, еже бы лютыя казни не страдати.

Птица из сила аще изхитится.

никако к тому паки возвратится,

И елень из мреж егда избегает,

впредь ся от онех всяко соблюдает.

Сам человек есть толь обезумленный,

яко, из сетей врага свобожденный,

Сиречь. из грехов, паки ся врашает,

и самохотне плен ему бывает.

В болезнь отпадение к смерти приближает,

равне. и еже во грех, смерть душы творяет.

За грех во узы человек вверженный

от стражей тощно бывает храненный.

Аще же ему избещи случится,

а он далече тещи обленится,

Пойман скоро от стражей бывает,

тогда отрады нимало познает.

Будет железы многшими кованы

и стражем лютшым в хранение даны.

Исхождения пути заградятся,

вси ругатели ему сотворятся.

Подобне, аще враг, нам сый от века,

запленит себе грехом человека.

Он же гонзнути оттуду потщится

и пособием Бога свободится.

Леть будет тогда врага обругати

и некрепости его ся смеяти.

Но полезно есть далече гонзати.

еже бы паки не возмогл поймати.

Иначе, аще леностей явится,

близ сущь, демоном паки похитится.

Тогда крепчае начнет й хранити,

ни пренебрежет оков умножити.

Окует нозе. окует и руце,

немилостивно храня вечней муце.

Ругатества же содеет из него,

яко пленника озлобит своего.

Аще бо въсхощет грех исповедати.

срам и страх тогда начнет задаяти.

Аще к Божию слову обратится,

тогда ум его врагом помрачится.

Аще духовных бесед возжелает,

враг уныние подложити знает.

Аще умыслит тело умертвите,

весть демон немощь в память приводити.

Аще молитве всхошет прилежати.

весть враг суетны мысли подметати

Аще умыслит сребро расточити,

обнищанием потщится страшити.

От трезвения подаст изъятие,

стран нолюбие, гостей приятие.

Весма вси пути будут загражденны,

да никако же будет свобожденны.

Блюдимся убо во грех отпадати,

аще не хощем сицевых страдати.

Кто во покаянии паки согрешает,

в работу Египетску глупец ся вращает

Фараону мысленну люте работати,

нестерпимыя язвы от него взимати.

Отрождение

Рождение едино от Бога прияхом,

егда ся во Адаме семенно создахом.

Отрождение паки сугубо бывает,

им же естество наше Господь обновляет.

Первое есть, егда Бог грешных оправдает,

в жизнь благодати с греха смерти возставляет,

Ею же во Адаме праотце умрохом,

повнегда. ему падшу в грех, и мы падохом.

Второе будет обще всех отрождение,

от гробов во жизнь вечну нас воскресение,

Еже, да сподобимся Богом получите.

нужда первым образом отрожденным быти,

Сиречь. от смерти греха в благодать востати.

без тоя бо втораго Бог не имать дати.

Отрезание

Вредных ветвей на древе терпети не можем.

абие тыя тщимся отребити ножем.

Паче же уд от тела гнилый отметаем.

аще и болезнь многу ту претерпеваем.

Тако Господь не хощет злых ветвей терпети

во древе, еже Христос, ни терпит имети

Гнилыя уды в теле Церкве Си святыя.

режет сия нещадно, хранит же здравыя

Отступници Церкве

Агарь от Сарры госпожи гонзаше,

наказания ея не терпяше.

Зайде в пустыню Египта неплодну

и пребезводну.

Тако от Церкве матере гонзают.

иже терпети казни презирают,

но заблуждают в ереси пустыню.

в грехов густыню.

Агару аггел Божий увещаше

на возврат к Сарре, мы же деем наше:

вся заблуждшыя к Церкви увещаем

и умоляем.

Отступство

Мнози отступници от Церкве бывают.

не яко вне ея веру добру знают,

Но яко, их же зол Церковь возбраняет,

то оным сонмище ино попущает

Церковь велит посты многия хранити,

тамо волно ясти пресластно и пити.

За грех канон Церковь острый возлагает,

тамо скоро всяк грех разрешен бывает.

В Церкви служба долга, досадно стояти,

тамо нрав седети, скоро отпущати.

И ина многая Церковь возбраняет,

а сонмь отторгшихся все то попущает.

Отчаяние

Во обители нецей калугер живяше,

иже рукоделием ковачь благий бяше.

Но нравы зело худ бе, ибо много пил есть

и ины злобы дея, в церковь не ходил есть.

Кузницу паче Церкве и Бога любяше,

не духовный, но мирский живот провождаше.

Началници многажды его увешаху,

но за рукоделие казни удержаху.

Он же нимало тщася себе исправити,

даже бы иноческо поне мало жити.

Но елма конец жизни его приближися.

болезнию тяжкою одру прилепися.

Братия же по любви его посещаху

и ко покаянию часто увешаху.

И единою, егда мнози ся собраша

и. еже каятися, его увещаша,

Рече: Оле мне грешну! Что имам творити?

Вижду, яко аз спасен не возмогу быти.

Се бо вижду геенну, злолюте горящу

и мене окаянна глотити хотящу,

Сатану, во глубине страшней погруженна,

и Каиафу при нем, всего распаленна

Купно с инеми, иже Христа осудиша

на смерть крестну. и иже люте Его биша.

С онеми и мне место, ах, уготовася,

пламень в постели место тамо ми послася.

В нем же имам во веки л юте палим быти,

никто же мя возможет того исхитити.

То слышаще братия, благ совет даяху,

ко исповеданию грехов увещаху,

Да, донели же жив есть, о них ся покает,

яко Бог кающимся милость проявляет.

Но он. в отчаяние впад, их не слушаше,

тогда отчаяния глаголы вещаше.

Глаголя: Невозможно уже дело быти.

еже к милости Бога щедра приклонити.

Уже бо, рече, слышах Суд на мя реченный.

яко имам в геенну быти воверженный.

Сицевая глаголя, смерти ожидаше,

Таин животворящих нимало желаше.

От увещающих же лицем отвращася,

и тако окаянне грешник той скончася.

Спасения надежды до конца лишенный,

и бысть вне обители телом погребенный.

Ни от кого же помин душы его бяше,

скотско живый скотскую кончину прияше.

Плутарх о Милисийских девах написал есть,

неистовство их мира памяти предал есть.

Тыя без вины всяки сами ся вещаху:

Токмо хощу умрети. вину полагаху.

Граждане не ведяху, что деяти с ними,

печаль многу имеша со дщерми своими.

Даде некто муж мудрый совет тому делу,

да повесившу себе саму всяку деву

Паки яве повесят весма обнаженну,

в посмеяние миру всему представленну.

Сице егда с онеми творити начаху.

за срам наготы себе вешати престаху.

Точне отчаянници себе содевают,

кроме всякия вины смерти ся предают.

Тошнят в житии, к смерти самохотно тщатся,

но лукавым демоном окаянне лстятся.

По смерти бо временней вечну начинают.

нагость. скаредство. буйство тамо ся являют.

Их же срама достойно им ся убояти,

от смерти творения руки удержати.

Ц

Царие, или Кесари Рима ветхаго

1. Иулий кесарь

Иулий кесарь, силный Рима покоритель.

непобедимый родов бранми укротитель

От ближних, ков сотворших, живота лишенны,

во Преторе мечами многими пронзенны.

2. Октовиан кесарь Август

Сему кесарствовавшу. Слово воплотися.

Бог безплотный от Девы Человек родися.

Мир бяше во вселенней, даже ся коваху

лемеши из оружий, и теми ораху.

З. Тиверий

Тиверий изъначала вел ми добр явися,

но пред смертию жесток людем сотворися.

Изби вся советники, Гая же избрал есть,

лютый лютшаго царя Римляном подал есть.

4. Гай

Гай Калигула кесарь зол мучитель бяше.

за бога хвалим быти безумно желаше.

Во Иерусалиме образ свой ставити

веле, да бы от жидов почитану быти.

От ратных тридесят язв прием, зле скончася,

тогда человек быти без ползы познася

5. Клавдий

Клавдий милость Евреом в начале явил есть,

потом изгнати вся я из Рима судил есть,

Яко немирни бяху. Жена Агрипина

отрави й, да узрит на престоле сына.

6. Нерон

Нерон мучитель матерь свою погубил есть.

Рим сожже. учителя Сенеку казнил есть,

Христианы гоняше, всем враг сотворися,

утек, в яме железом сам острым пробися

Елма же не абие враг той умираше,

раб Епафродит мечем конец ему дате.

7. Галба

Сервий Сулпитий Галба престол восприяше,

но точию седмь месяц на оном седяше,

Ибо вои престола онаго лишиша,

паче же и живота, ибо й убиша.

8. Отфон

Сылвий Отфон на царство силою вступил есть,

но токмо три месяцы на оном пребыл есть.

Ибо от Вителия зело престрашися,

да не будет ят онем, сам волно убися.

9. Вителлий

Вителлий на престоле не благо седяше

и точию осмь месяц правителствоваше.

От Веспасиана бо ратници внидоша

в Рим и, победивше й, в части разсекоша.

10. Веспезиан

Веспезиан жидовску землю воеваше,

от воинства на царство тамо избран бяше.

Шед в Рим. Тита остави сына преблагаго

разорения ради града Сионскаго.

Того разорь, торжество в Риме совершил есть

с Титом сыном преславно, верным кроток был есть.

11. Тит

Тит бе кесарь преблагий, никому отмщаше,

аще и врага себе быти кого знаше.

Во един день никому благо сотворил есть,

тем : Оле. погубих день! в вечер возопил есть.

Домитианом братом живота лишися,

ибо от того ядом смертным напойся.

12. Домитиан

Домитиан гонитель верныя мучаше.

наперстника Христова умучив, изгнаше.

Бога себе нарекл бе. велми зол явися,

от изгнанныя жены си раба убися.

Римляне вся образы его истребиша,

по смерти мучителство его тако мстиша.

13. Нерва

Нерва кесарь преблагий мир возвеселил есть,

яко по мучителстве мир всем сотворил есть.

Верныя от изгнаний велъ возвратити

и ни малым пакостем от язык им быти.

Но четыренадесять токмо царствоваше

месяц, а мир лет многих оному желаше.

14. Траян

Траян бе худороден, но храбрость являше,

егда в полках Титовых воевода бяше.

Прием царство, гонитель христиан явися,

пияница и блудник содомск сотворися.

За мало прежде смерти престал есть гонити

Церковь, ей же даде Бог в то время почити.

15. Адриян

Адриан христианом лют бяше гонитель,

Евстахия Плакиды жестокий мучитель.

Антиноа отрока, с ним же блудно жил есть,

по смерти въместо Бога чтити осудил есть.

В болезни ножа, яда прилежно прошаше,

хотя смерти, Антонин того возбраняше.

16. Антонин

Антонин нова суда на верных не даше

гонити, но древняго не оставил бяше.

Тем гонение пребысть. в старости скончася.

пролиянием крове сосед не смазася.

17. Марко Аврелий и Лукий

Аврелий со Лукием царство восприял есть,

но ов, аки бы отец, началство держал есть.

Яко умаление идол чести зряше,

на христианы люту жестоту являше.

С Норкоманы ратуя, в болезнь тяжку впаде

и умре. яко ничто от них долго яде.

18. Коммод

Сын Аврелиев Коммод егда воцарися,

мучитель граждан Римских лютый сотворися.

Христиане же покой желанный прияху,

яко языци мира в то время не знаху.

Он жену и боляры побити мыслил есть.

а его некто Наркис, пришед, удавил есть.

19. Севир

Севир по Коммоде царством бысть почтенны,

от него же в боги Коммод вознесенны.

20. Пертинакс

Вои же Пертинакса в Риме возлюбиша.

но осмьдесят и два дни пребывша, убиша.

21. Дидий Иулиан

По нем Иулияна Дидия возваша,

того в шестьдесят шесть дни гробови предаша,

И паки на престоле Севир посадися,

от него же первее с срамом удалися.

Севир паки

Севир же аше имя жестоты ношаше.

но зело христианом милосердый бяше.

Во его дни вернии зело ся множаху,

и великороднии к Христу притекаху.

То в начале, вконец же велми развратися,

ибо гонитель Церкве лютый сотворися.

Сын его Каракалла убита хотяше,

он от печали яда смертнаго прошаше.

Тому не дану бывшу, мяса много ял есть,

от того конец жизни тяжкий восприял есть.

22. Каракалла

Каракалла брата си повеле убита

и множество невинных людей погубити.

Отца си други изби, врачи истребил есть,

яко тому радеша, без милости мстил есть.

Авгарь, Едеский царь, им царства бысть лишенны,

но сам близу Едеса бысть враг убиенны.

23. Макрин

Убийца Каракаллы Макрин воцарися.

но и сам от воставших на нь воев убися.

24. Илиогавал

Илиогавал тиранн потом наступил есть,

многи изгна невинне, многи погубил есть,

Но и сам убиен бысть, а Римляне тело,

влачивше ругателно, утопиша смело

И злую матерь его злой смерти предаша,

яко сыновни злобы винну быти знаша.

25. Александр

Потом Александр скипетр царский восприял есть.

сей идолы и Христа купно почитал есть.

Много на дворе своем христиан держаше

и место некое им на церковь отдаше.

Лукавством Максимина на войне убися,

Маммея, мати его, тако ж погубися.

26. Максимин

Максимин злый мучитель худа рода бяше.

христианы излиха мучи. би. гоняше.

Четыри их тысящи в дворе си снискал есть,

бывшыя с Александром, вся смерти предал есть.

Папы и епископы найпаче губил есть,

страшное гонение Церкви он творил есть.

вои главу скверную оному отьяша,

купно сыну, и во Рим боляром послаша.

27. Гордиан

По Максимине лютом Гордиан избрася.

иже зело приятен царь всем показася.

Победи Персы, Готфы, Римляны смирил есть.

но Филипп некто вои на него взбудил есть,

Иже, совлекше ризы царския, убиша,

Филиппа же на месте его посадиша.

28. Филипп

Филипп с сыном Филиппом егда воцарися.

от Фавияна папы Христу присвоися.

Христианско житие свято провождаше,

на месте кающихся смиренно стояше.

Декий вои наусти онаго убити

в Вероне, тожде в Риме сыну сотворити.

29. Декий

Наступи посем Декий вселютый мучитель,

несытный кровопийца, всех верных гонитель.

Вся поганы на Церковь сей враг обратил есть,

кто бе лютший гонитель, того он почтил есть.

От Готфов побежденный, елма утекаше,

в езере, а сын мечну кончину прияше.

30. Галл и Волусиан

Галл царский престол с сыном взят Волусияном,

в начале зело блага быста Христианом.

Послежде гонение люто сотвориста,

предваршым мучителем подобника быста.

Дань даяста Татаром, оба убиенна,

и тако злоба ею бяше оконченна.

31. Валериан и Галлиен

Валериан на престол Римский возвысися,

в начале Христианом велми благ явися.

Послежде чародеем неким бысть прелщенны

на кровь детску в волшебство и в то приведенны.

Да гонитель христиан лютый сотворится,

чрез полчетверта лета, яко зверь, ярится.

По мнозе мучителстве Персы пленен бяше,

иде же Сапор его хребет царь склоняше

Воместо подножия, внегда восхотети,

ему путшествующу, на кони седети.

Потом повеле его всего искожити

и кровавое тело солию солити.

Тако лютый мучитель кончину приял есть,

за христианы Господь отмщение дал есть.

Бе же ему Галлиен общник правителства.

сын его, и христиан люта томителства,

Но видя отмщение над отцем от Бога,

преложи сверепство си на благая многа

Свободу христианом везде даровал есть,

но житие нечисто велми провождал есть.

Потом в Медиолане с сыном убиенны,

и Валериан брат с ним живота лишенны.

32. Клавдий

Клавдий по Галлиене кесарь сотворися,

христианом мучитель лютый проявися.

Седевшыя во юзах веле убивати,

вины не вопросивше, живота лишати.

Но и сам от Господа того бысть лишенный,

моровым поветрием страшне умерщвленный.

33. Квинтилл

Квинтилла по Клавдии вои воцариша,

но по седминадесят дниех й убиша.

Инии повествуют, яко себе жылы

мотверзе, яже и кровь, и жизнь источилы.

34. Аврелиан

Аврелиан мучитель жесток верным бяше,

велие гонение на ня воздвизаше.

Прежде смерти бысть громом велми престрашенны,

послежде от домашних своих убиенны.

35. Такит

По Аврелиане шесть месяц празден бяше

престол, на нь же Такита воинск полк избраше.

Сей люди надеждою веселы содея

благости, но скор конец взят жизни своея.

36. Флориан

Флориан брат Такитов кесарь сотворися.

но в два месяца от вой у Тарса убися.

37. Пров

Пров честный на престоле царстем посадися.

Готфом, Фраком и Персом силен сотворися

Христиан не гоняше, милость проявляше,

но от мятежных воев кончину прияше.

38. Кар

Кар Манлий на престоле царстем посажденны,

грядый ратно на Персы, громом убиенны.

Ини глаголют, яко сам в пути скончася,

кая известна повесть, то нам не сказася.

39. Карин и Нумериан

Карин и Нумериан царство восприяста,

ов Запад, сей же Восток во власти держаста.

Сей от тестя си Апра живота лишися,

от Диоклитианих ов ратник убися.

40. Диоклитиан

Диоклитиан, лютый христиан гонитель.

безчисленных мученик бе жизни лишитель.

В обществе Максимиан царства ему бяше.

его же Иркулея народ нарицаше.

Та, яко не могоста верных изтребити,

умыслиста царствие волно оставити.

Гневастася на себе, яко не могоста

христиан победита, во нужде умроста.

Неции повествуют. яко изумися

Диоклитиан, егда на верных ярися.

41. Константий Хлор и Максимин Галерий

Константин Христианом милость проявляше,

Максимин на Востоце зол гонитель бяше.

И на Западе точне злобу си явил есть.

егда во Британии Константий пожил есть.

Иже, паки быв в Риме, остави си сына,

отходя в Британию, юна Константина.

Сего Максимин даде стражем си храните,

но он к отцу промысли бегство сотворите,

Его же зрев кончину, вой воцаренны,

а во Риме Максентий царь бысть посажденный,

Иже в начале верным милосерд явися,

но послежде мучитель велий сотворися.

Канстантин же Христову веру восприял есть,

Церковь от гонителей силно защищал есть.

На Максентия с полки своими пустися.

иже, гонзая, в руце с теми потопися.

Царие Рима новаго

Константин Великий

Сей Константин Великий егда воцарися,

тогда имя Христово велми прославися,

Ибо он нача веру праву разширяти,

идолы и капиша везде разоряти.

Созда Константинополь и в нем водворися,

и тако на Востоце царство сотворися.

Мир Церкви сотворил есть, храмы назидаше,

всех доброт христианских царь исполнен бяше.

Собор в Никейстем граде изволи собрата,

везде славу Христову светло умножати.

Пожив лета доволна, отьиде ко Богу

за добродетели си мзду прията многу.

Константий, Константин, Констант

По Константине царе три сыны осташа,

иже Римское царство на трое разъяша.

Константий в Цариграде избра царствовати,

Константин за горами вся изволил взяти,

Германию, Англию, Испанию с неми,

Констант — Рим, Сикилию и Африку с теми.

Сему Константин тщася часть неку хитити,

но вои Константовы вариша убити.

И тако весь Константу Запад прилучися,

но от Магнентиевых ратник той убися.

Константый в Цареграде зол мучитель бяше,

изби сродники, в вере арианствоваше.

Изшед ратно на Персы, паки возвратися,

Иулианом гоним, в ин век преселися.

Иулиан

Иулиан во вере правей воспитася,

царь быв, Христа отрекъся, ко идолом вдася.

Гонение воздвиже на Церковь святую,

яко же може, дея ей злобу всякую.

Паче всякаго зверя жесток верным бяше,

вся мученик кровию страны исполняше.

Жидом друг, христианом лютый враг явися.

невидимо Божиим копием убися.

Иовиниан

По злом Иулиане царь благий дадеся,

иже Иовиниан именем речеся,

Христианин истинный, благостынный зело,

сотворшь проповедати Христа верным смело.

Веселие всех верных, но то сократися,

ибо углия духом скоро умертвися.

Неции пищу грибов в вину полагают,

теми насыщся, умре, свободно вещают.

Валентиниан и Валент

Валентиниан изгнан веры ради бяше

Иулианом, потом царство восприяше.

Брата Валента в царстве друга сотворил есть,

кровь плюя из персей си, живот окончил есть.

Валент бяше гонитель, с Готфы воеваше,

поражен, тех гонзая, в куше сожжен бяше.

Гратиан и Феодосий и Валентиниан Юный

По Валентиниане Гратиан въсадися

на престол родителский и благ всем явися.

По Валентовей смерти на царство приял есть

Феодосия, яко силна быти знал есть.

Правдолюбив, милостив, всячески благ бяше.

но от недруг кончину мечную прияше.

Феодосию паки содруг сотворенный.

Валентиниан Юный, зело муж смиренный.

Иже в оглашении веры преставися,

но Амвросием святым велми ублажися.

Феодосий же веру зело разширяше,

паче инех Господу царей угождаше.

Со благоговеинством многим преставися.

Церковь о его смерти жалостно слезися.

Аркадий и Онорий

Аркадий по отце си престол восприяше

на Востоце, а Запад Онорий обьяше.

Пожиста благочестно, токмо зле содея

ов, яко Златоуста из церкве своея

Посла во изгнание, за что отлучися

папою от общества, но потом простися,

Сконча живот свой в мире. По нем оставися

сын Феодосий Малый и царь поставися.

Онорий же изрядно век свой провождаше,

веру православную тощно утвержаше.

Доволно быв на царстве, в вечность преселися,

его же отшествием Запад прослезися.

Феодосий Малый

Феодосий Рим ветхий сестричишу дал есть

Валентианови и с ним царствовал есть.

Поживе благочестно, в лове с конем пал есть,

от того болезнова, кончину си взял есть.

В болезни Маркиана сестре ублажаше.

того на царство взяти оней совещаше.

Маркиан

Маркиан, из воина воин же рожденный,

на царство возведеся, бысть браком спряженны

Пулхерии царевне, с нею же живяше,

девство храня в целости, что та обешаше.

Царь бе мудрый, праведный, милостивый зело,

Константинови точен, могу реши смело.

Исполнь добродетелей, жизнь свою скончал есть

надеждно, яко царство вечное стяжал есть.

Лев

По добром Маркиане Лев благий избрася,

иже злым суров бяше, с враги силно брася.

По Церкви поборствова, духовныя чтил есть,

мирским онех судити людем возбранил есть.

Добродетелми славен, с миром разлучися,

к Воздаятелю Богу по мзду преселися.

Зинон Исаврик

Лев блаженнопочивый в жизни погрешил есть,

не знав добре Зинона, царству ублажил есть,

Иже, сед на престоле, зол еретик бяше,

еретики изгнанны паки возвращаше.

Чрево име за бога и нечисто жил есть,

за что на нь Василиска Господь попустил есть,

Им же изгнан с престола, в пустыни скитася

сам един и зелием во гладе питася.

Василиск

Василиск, стяжав царство, лакомо живяше,

от всяких чинов людей злато зле взимаше.

Сего Зинон обступив, преданием взял есть,

в изгнании от глада конец восприял есть.

Зинон паки

Зинон. наказан Богом, нечто исправися,

правоверным приклонен людем проявися.

Обаче бе еретик, блудник и грабитель,

и Пелагия, мужа мудраго, убитель.

От пиянства черная немощь й меташе,

тем Ариадне жене ненавидим бяше.

Та его, немощию аки умерщвленна,

сотвори жива в гробе быти затворенна,

В нем же воспрянув, стражей милости прошаше,

но страж: Имамы царя, ему глаголаше.

Он: Монах буду, не царь, стражем отвещал есть,

но не услышан, конец тамо гладом взял есть.

Анастасий

Анастасий не славен в дворе царстем бяше,

но со Ариадною прелюбы творяше,

Яже бе жена царска, тою возвысися

и царь страны Восточный, оле, сотворися.

В начале притворися верен и благ быти,

но долго не можаше злобы си таити,

Ибо друг еретиком велий показася,

много им епископов из царства изгнася.

Многи же и умучи, но сам бысть казненный,

страшным громом от Бога злый царь убиенный.

Иустин 1

Иустин худороден, но благ нравы бяше,

за то его Цариград на престол свой взяше.

Царствова благочестно, не оставив чада,

во старости отьиде к Царю вечна града.

Иустиниан

Иустин сестричища Иустиниана

сотвори в себе место быти увенчана.

Той аще писания ни отчасти знаше,

но законы царствию преизрядны даше.

До старости жил свято, но в той изменися,

негли с покаянием живота лишися.

Иустин 2

Иустин на престоле царстем посадися,

от Иустиниана сестры сей родися.

Муж православный, добрый и благоговейный,

но скоро ко лакомству, неправде прелшенный.

Множицею в болезни ума отхождаше,

но и паки онаго целость получаше.

За живота си царству царя обмыслил есть,

честнаго Тиверия на то возвысил есть,

С ним же жив лет четыри, мирно преставися,

а Тиверий на царстве един оставися.

Тиверий

Тиверий паче инех царей благ муж был есть,

правоверно, щастливо и чинно пожил есть.

Мудрый во правителстве, силный в бранех бяше,

мирно, благонадеждно Богу дух предаше.

Маврикий

Маврикий правоверно на царстве си жил есть,

но за скупство от пленших пленных не купил есть.

За то от Христа Бога в мире сем казнися.

со женою и чады от Фоки убися.

Фока

Фока яко же лицем злообразен бяше,

такожде душу праздну красоты имяше

Мучитель, винопийца и нечист явися,

обаче в вере правей в ин век преставися.

Ираклий

Ираклий на царствие честно вознесенный,

в начале мало радив и не мужественный,

Но в средине царствия велми исправися,

поборник истинныя веры сотворися.

Креста Господня древо от Перс свободил есть.

во Иерусалим град честно возвратил есть.

В конце единоволцем прелщен приложися,

воду на лице пущав, живота лишися.

Константин, или Ираклий 2

Константин Ираклиев сын бысть увенчанный,

быв четыри месяцы, во гроб бысть посланный.

Глаголют, отравою матере вторыя.

Ираклиону сыну царства желавшыя.

Ираклион

Ираклион чрез промысл матере всадися

на царствие, но мало тем возвеселися,

Ибо боляре ему носа урезаша,

матери же — языка, и в даль заточиша.

Сына Константинова на царство избраша

Константа, Константина неции й зваша.

Констант

Констант Константинов сын ересь разширяше,

едину в Христе волю, яко дед, вещаше.

В Сыракузе во бани несохранно мыся.

от Траилова сына Андрея убися.

Константин Погонат

Константов сын Константин царство восприял есть.

в благочестивей вере весь век пребывал есть.

Потщася собор шестый в Цариград собрати.

ересь единоволцев проклятию дати.

В благочестии конец жития приял есть.

а по нем сына его Бог на царство дал есть.

Иустиниан Младший

Иустиниан чадо Погоната бяше,

иже по отце своем скипетр восприяше

В начале царствия бе муж благочестивый

и противу врагом си на бранех щасливый.

Егда же злобами си Бога отступил есть,

тогда онаго Господь царствия лишил есть.

К тому нос урезаша ратници оному

и, изгнавше, царствие предаша иному.

Леонтий

Леонтий на предварша место вознесенный,

но по триех сей летех бяше низверженный

Тиверий Авсимара носа й лишил есть

и в монастырь Далматски страны заточил есть

Тиверии 3

Тиверий лет седмицу царствие держаше,

потом Иустиниан паки царство взяше.

Иустиниан паки

Иустиниан егда паки царствовал есть,

мучителство многое, месть дея, являл есть.

Леонтию ругався. мечем ссече выю,

такожде сотворил есть царю Тиверию.

Други их и воинство люте убиваше,

безчестия своего мщение деяше.

Вои же Филиппика на престол избраша,

царствующий град ему во державу даша.

Филиппик

Филиппик вои в Царьград ускори послати,

иже сына царскаго дерзнуша заклати.

Потом и царю главу от выи отьяша

и Филиппику ону яко дар послаша.

Но и сам в малех часех очию лишися,

Анастасий на его месте посадися.

Анастасий

Анастасий на царстве преблаго живяше,

на Сарацины вой доволны послаше,

Иже началника си во пути убиша,

Феодосия царя себе сотвориша,

Иже, объем Цариград, царя бывша ял есть,

живот даровав ему, в монастырь послал есть.

Феодосий 4

Феодосий силою на царство всадися.

аще и утекаше, вой понудися.

Оному Лев Исаврик царства завидяше,

тем, быв монах и с сыном, престол Лву отдаше.

Лев Исавр

Лев Исавр елма царства державу прияше,

еретик сый, образы хулити начаше.

Потом нача из Церкве оны изметати,

сещи и сокрушати, огнем сожигати.

Чрез все царства си время Церкви враг творися,

не примирився с нею, во ад преселися.

Константин Копроним

По злом отце сын хуждший на царство всадися,

иже от юности си злобам приучися.

Отступил есть от Бога, образы крушаше

и кровь многу за честь их верных проливаше.

Превзыде зла Нерона, чародейство знал есть,

до конца живота си правоверных гнал есть.

В Халандии скончася. люте вопияше.

яко Бог й живаго огневи предаше.

Каяся окаянник о злобах творенных,

но не удостойся щедрот божественных.

Егда крещен бысть, воду калом насквернил есть

и за то Копронима имя получил есть.

Еще и Кабалина народ его зваше,

яко гной конск и воду безчинно любяше.

Лев 4

Злаго родителя сын недобрый явися.

златом умздив боляры, на царство всадися.

Изначала доброту себе притворяше,

потом иконоборец нечестивый бяше.

Венец с камением честным из образа взял есть,

возложь на главу, вреды в казнь себе стяжал есть,

Ими же расточенны, живота лишися,

тогда от мучителя Церковь свободися.

Константин и Ирина

Константин по отце си на царство вступил есть,

иже десятолетен токмо тогда был есть.

Име благочестиву матерь си Ирину,

яже соцарствовала есть своему сыну.

Потом сын изгна матерь, а послежде мати

потщася на царствие и сына си яти,

Ему же повелела очеса изьяти,

тако бысть нужда ему во гроб ся потщати.

Ирина

Ирина благочестно зело царствоваше,

еже сын разорил бе, она исправляше.

Потом от Никифора в царстве пременися.

в монастырь и в далекий остров заточися.

Никифор

Никифор по Ирине люте царствоваше,

Манихейскую нечесть до конца держаше.

О Крума, Болгарскаго царя, победися,

глава его на древо острое всадися.

Потом из кости главны Крум чашу содея,

из нея в день радости пияше своея

И велможи чествова, а во Цариграде

плачь бе от тщете полков, радость о отраде,

Ибо паче о смерти мучителя бяху

радостни, неже тщеты избитых ридаху.

Ставратий

Ставратий Никифоров сын царство прияше

во Адрианополи, но недолго бяше.

Ненавидим боляры, в монастырь прогнася,

Михаилом же царства скипетр восприяся.

Михаил Куропалат

Михаил Куропалат царством бысть почтенный,

бе всяко благочестив, муж бе божественный.

Честь иконам должную даяти веляше,

иконоборцы паки в царстве истребляше

Агаряны порази, болгары избися,

Лвом из царства пременен, в монастырь вселися.

Феофилакт сын его скопец сотворенны,

мати с ним и братия бяху заточенны.

Лев Арменин

Лев Арменин от воев на царство всадися,

враг иконом всечестным лютый сотворися.

Михаила повеле Гугнива мертвити,

но царица умоли того не творити

В день Рождества Христова, но от сковник его

бысть лишенны во церкви живота своего.

Тело его в торжище безчестно влечеся,

рука ему и глава тамо отсечеся.

Михаил Гугнивый

Михаил, иже от Лва во узы вверженны,

в оковах на престоле царстем посажденны,

Яко ключь не абие обретенны бяше,

ибо Лев убиенный при себе храняше.

На царстве си Михаил в начале явися

благочестив, но вконец в вере развратися.

Ни жид, ни христианин быти показася.

сие слово Кедреном о нем написася.

Воды удержанием конец восприял есть,

по нем сын на царствие Феофил настал есть.

Феофил

Феофил еретик бе, икон не любяше,

идолы ругателне оны нарицаше.

Правды же бе любитель, при конце болел есть

поносом, разверженне устне си имел есть.

Даже внутреним его теми зреным быти,

лобза образ, а Бог те даде затворити.

Феодора царица к добру й вождаше,

еже покаятися, та же конец взяше.

Михаил

Михаил по отце си царь бысть нареченный,

во детстве материю бе добре правленный.

Возраст прием, матерь си в монастырь изгнаше,

без нея, яко хоте, безчинно живяше.

Василий Македонии посла й убити,

егда ему от вина нетрезвенну быти.

Посланнии первее руце отсекоша,

послежде же до смерти мечы прободоша.

Василий Македонин

Василий Македонин лето царствоваше,

праведен, благочестив и милосерд бяше.

Иудеи ко вере правой приводил есть,

многи храмы Богови в честь сооружил есть.

От еленя за пояс рогом похитися,

даже мечем воина пояс разрешися.

Сию ему заслугу царь зле возмездил есть,

за добытие меча живота лишил есть.

Но и сам по случаи том мало живяше,

утробою поврежден, жизни конец взяше.

Лев Премудрый

Лев Мудрый на престоле отчем посадися,

книгам бяше рачитель, добре им учися

В церковная делеса вдаяшеся смело

и законы написа изрядныя зело.

Поноса болезнию живота лишенный,

Александр брат на царстве его посажденный.

Александр

Александр пияница и блудитель бяше,

покрыв главу, во церковь ходити начаше.

Петр святый во сне би й, тем бысть престрашенны,

кровь плева и червием бяше расточенны.

Константин 8

Константин сын Лва Мудра седмилетен был есть,

егда ся на престоле царстем посадил есть.

Его же Алексиев Константин гоняше.

того отсеченную царь главу видяше.

Прият в общество царства лютаго Романа,

от него же сам терпе, яко от тиранна,

Его же сын Стефан ем, в монастырь заслал есть,

Константин же на царстве свободен остал есть.

Но от сына Романа отравлен, скончася,

иже по нем на царство от всех людей взяся.

Роман

Роман, отца умертвив, бысть сам увенчаны,

но в пиянство и на блуд зело бяше вданы.

Тем сил скоро лишися и живот скончал есть,

два сына оставль, но ин царство восприял есть.

Никифор Фока

Никифор на царствие вои понужденны,

вдове царице в мужа бяше сопряженны.

Щастие име добро, благ и щедр живяше,

но воинство в ненависть свою его взяше,

Яко изменил бяше нравы си благия

царскому достоинству на неподобныя.

Царица Феофана на нь есть наустила

Иоанна Земиску и жизни лишила,

Ибо той уби царя, главу отрезаша,

да не востанет молва, людем показаша.

Иоанн Земиска

Иоанн Земиска бысть скипетром почтенны,

славными победами миру прославленны.

Торжество совершая, Богоматерь чтил есть,

на колеснице царстей образ поставил есть.

Сам пред колесницею оною идяше,

Богородице славу победы даяше.

Во Сирии в Дамасце скопцем отравися,

умре во Цариграде, егда возвратися.

Василий и Константин

Василий и Константин, Романова чада,

правая наследника взяста царство града.

Василий держа первство и прещаслив бяше,

множицею над враги си торжествоваше.

Пятьнадесять тысящь вой Болгар ослепил есть,

в сотни с оком единым мужа оставил есть,

Иже ослепленныя к дому проводити,

не подобаше тако жестоко творити.

Живе лета доволна, та же преставися,

на царстве Константин брат его оставися.

Константин

Константин по брате си престол содержаше,

чреву и страстем плоти выну работаше,

О них же зазор име, очию лишил есть,

чрез воеводы враги неки победил есть.

Романа же Аргира во зятя приял есть,

царство оному отдав, жизнь свою скончал есть.

Роман Аргир

Роман царство от Бога свое начинаше,

храмы во славу Его многи созидаше.

К людем бяше милостив, вси его любиша,

во добром правителстве, во радости жиша.

Зоя токмо царица зла ему явися,

ко среброхудожнику сердцем обратися.

Тому имя Михаил нареченно бяше,

красен лицем, с Зоею прелюбы творяше.

Зоя убо первее царя отравила,

болнаго удавити потом наустила.

Потщася Михаила на царство венчати,

о коль зло со женою злою пребывати!

Михаил Пафлагон

Михаил на престоле егда посадися,

недоброй царице муж Зои сотворися.

Но, бояся от нея пакости, храняше

за стражею злу жену, веры ей не яше.

На самаго же его казнь Бог попустил есть,

ибо демон, хищая онаго, мучил есть,

И бысть не в ползу царству, брат убо правяше

царствие, донеле же Михаил живяше.

Сестричища своего на царство подал есть,

та же жизни своея кончину приял есть.

Михаил Калафат

От смоливша корабли сей отца родися,

Михаилу и Зои за сына въменися.

Царь быв, поживе злобно и Зою изгнал есть,

сродники царски скопив, далече ссылал есть.

Елма же Зоя паки к царству возвратися,

сей низвержен с престола, к тому изочися.

Константин Мономах

Брат царя Пафлогона царь бысть сотворенны

и царице во мужа Зои свокупленны.

Плоти угодно жил есть, а Зои рыдаше

женски, егда кончину она жизни взяше.

Церкве бяше поборник, благо ей творяше,

монастырь создав, конец сам во оном взяше.

Феодора

По Константине царство Феодора взяла,

мирно же и щастливе оно содержала.

За живота своего царя сотворила

Стратоника воина ветха Михаила.

Михаил 6 Стратоник

Сей царь гражданом кроток, милосерд явися,

но воинству прижесток делом сотворися.

Исакия Комнина вой воцариша,

Михаила духовни на то увестиша,

Да царствие оставит, небеснаго чая.

Абие сотвори то душа та святая.

Исакий Комнин

Исакий Комнин царство расточно строяше

и правила некая церковником даше.

Громом бысть ударенны, монах сотворися,

в послушании чисто до смерти трудися.

Оставляя же престол. Константина дал есть

на царствие, его же добра быти знал есть.

Константин Дука

Константин благочестив и правду любил есть,

добронравныя люди и умныя чтил есть.

Соседы си не мечем, златом побеждаше,

жену оставль и сыны три, кончину взяше.

Евдокия с сынами

Евдокия со сыны суды совершаше

и похвалне кормило царствия держаше,

Но не содержа клятвы, мужу сотворенны,

еже не посягати, писанми стверженны.

Рукописание си хитро свободила,

Романа Диогена в мужа си общила.

Роман Диоген

Сей в начале царствия благоденствен был есть,

во две лете Турския полки поразил есть,

В третее побежден, ят, тотом свободися,

Михаилом Дукою очию лишися.

Михаил Дука

Отца втора изочив. сей сам воцарися,

но велми неполезен царствию явися.

Глад во время онаго в Цариграде бяше,

Восток же Никифора на царство избраше,

Иже, взем Михаила, в монастырь послал есть,

елма токмо шесть месяц престол содержал есть.

Никифор Ботониат

Сей, еже Михаилу царю сотворил есть,

Алексием Комнином то сам получил есть.

По триех царствия си летех низверженны,

неугодный скипетру, монах постриженны.

Алексий Комнин

Сей много добра и зла царствию творил есть,

Скифы и Турки часто мечем поразил есть.

Книг любитель, царь мудрый, уставы даяше,

Манихеи ко вере правой обращаше.

Долго недуговавша вси раби лишиша,

едва бяху, иже плоть мертву сохраниша.

Калоиоанн Комнин

Егда сего родитель при кончине бяше,

вшед, не жале, но аше живет еще. зряше.

Весть же прием о смерти, сам царь сотворися

и добр правитель того мирови явися.

Риз и трапез лишество в царстве укротил есть

и скверная словеса добре утолил есть.

В ловех в шуйцу стрелою сам он уязвися,

яко бе ядовита, живота лишися.

Мануил Комнин

Сын Калоиоанна, Мануил реченный,

на престоле царствия бяше посажденный.

Мало ползы содеяв, инок сотворися,

по нем Алексий Комнин царь всем известися.

Алексий Комнин

По отце си Алексий в детстве увенчанный,

ему же воспитатель бысть Андроник данный.

Сей, власть любя, повеле царя удавити

и главу отсеченну к себе приносити.

Тело во оловяне гробе положися

и во пучине морстей от раб утопися.

Андроник Комнин

Андроник за убийство царя мерзок бяше,

царь Сикилейский ему отмстити хотяше.

Тогда Исакий Аггел онаго хитил есть,

око избод, на струплив велбуд возсадил есть

Увенчав ругателно, ошиб в руку дал есть,

от жен мучитель ссечен, злу кончину взял есть.

Исакий Аггел

Царь бе правдолюбивый и мира хранитель,

брата си Алексия от Турк искупитель,

Иже послежде ят й. очию лишил есть

и во заключение тяжкое всадил есть.

Отнюду же пособством Венет свободися.

но во кратце времени жития лишися.

Алексий Аггел

Сей преблагаго брата царствия лишил есть,

купно же и очию, сам царь по нем был есть.

Егда и сына братня убити хотяше,

той, бег к Венетом, помощь от онех стяжаше,

И взем град царствующий, сам в нем воцарися.

и от тезоименна онаго лишися.

Алексей Аггел

Сей Алексей юноша преизрядный бяше,

молву царства премудро утолити знаше.

От Алексия Дуки миру обхужденны.

ов убо царство прият, се бысть удавленны.

Алеский Дука Мурзуфл

Сему бывшу на царстве, град Латини взяша,

бегша во Пелопонес царя в пути яша.

Многи муки задавше, очы избодоша,

напоследок с высоты люте низвергоша.

Балдвин Фландир

Егда град Константинов Латинницы взяша,

Балдвина на царствие сил наго избраша.

С Болгары и со Скифы егда воеваше,

побежден, ят, во узах кончину прияше.

Инрик Фландир

Инрик по брате своем царство восприял есть,

великая замыслив, конец жизни взял есть.

Петр Антисиодоренский

Внук Инриков из дщере, в Риме помазася,

Феодором Ласкардом на Востоце яся.

Чрез две лете держан быв, потом же чредися.

но на пире убийством живота лишися.

Роверт Антисиодоренский

Петров сын Роверт во град царствующ прибыл есть,

слышя о узах отца, аки заблудил есть,

И бысть царством почтены, на нем же живяше

лет яко девят, по нем сын наследоваше.

Болдвин

Балдвин детищь на царство Иоанна взял есть

Бренна, тому умершу, един царствовал есть.

Многи беды от варвар лютых пострадаше,

но от Венетов помощь и от Франк имяше.

От Палеолога же изгнан Михаила,

тако паки ко Греком власть ся возвратила.

Михаил Палеолог

Сей именем Ласкаров прежде воеваше,

послежде сам на себе царство восприяше

И Греки на латинский разум обратил есть,

от вращшихся по смерти гроба не влучил есть.

Андроник Палеолог

Сей видя, яко отцу погреб возбранися,

гречески мудрствовати скоро возвратися

От Андроника Юна много пострадал есть,

та же кончину жизни своея приял есть.

Андроник Юный

Умершему бе сродник, но того гоняше.

царства лишил бе его, и паки призваше.

Тому же преставлшуся, един бе правитель,

победами многими славы разширитель.

Иоанн Кантакузен

Андроник два по себе сына си остави,

има же Иоанна во стража пристави.

Сей восприят царствие, но бысть утисненны

от Калоиоанна и мних сотворенны.

Калоиоанн Палеолог

Калоиоанн венцем елма украсися,

друг Римляном и папе яве сотворися.

Родил есть Андроника, сей отца гонил есть

и не един крат в узы онаго всадил есть.

Андроник Палеолог

Андроник ко отцу си немилосерд бяше,

два краты онаго со престола меташе

И во узах держаше, Но егда изшел есть,

сына си Мануила на царство возвел есть.

Мануил Палеолог

Мануил Палеолог егда царствоваше,

ничто, славы достойно, чрез век содеяше.

Седмицу прижи сынов, потом преставися,

Иоанн вместо его на царство всадися.

Иоанн Палеолог

Сей, Турки наветуем, помощи желаше

от Римска престателя, но тоя не взяше.

В Флорентию на собор сам путь восприял есть,

на единство с Римляны руку подписал есть.

Константин Последний

На Константине царство в Царьграде начася,

на тезоименитом онаго скончася,

Сему бо царствовавшу, Цариград пленися,

царь, силно мечем деяв. от врагов убися.

Во множестве труп тело его обретеся,

глава отсеченная на древо вонзеся.

Оттоле христиане царствия лишени

на Востоце, а Турки на престол всаждени.

Царь смиренный

Октовиан царь Римский кроток зело бяше

и с простолюдинами беседы творяше.

О том й советници яша увещати,

да бы ся не изволил толико смиряти.

Рече: Таков аз хощу царь ко малым быти,

какова аз хоте л бым царя к себе зрети,

Аще был бым из чина родом умаленных,

славою и богатством в мире не почтенных.

Царство

Царство мирское честно людем ся являет,

кто его от человек честми не венчает?

Но ненадолзе может цари утешати,

яко предел оному Бог изволил дати.

Ибо или царя смерть лютая хищает,

или царству премену Господь попущает.

Где они суть царие, иже славни быша.

и едва не всю вселенну себе покориша?

Александр Макидонский где днесь пребывает,

ни же гроба, ни костей еговых кто знает?

Где он пресилный Август, мечь в место вложивый,

во всей вселенней брани и кровь утоливый?.

В персти земней изтле весь, червие снедоша,

таможде и прочий князи отьидоша.

Или Ассирийское где есть ныне царство?

Где Греческое оно славно государство?

Во чужде впаде руце, иже работаше

Греческу царству мечем, той скипетр прияше.

Точне с инеми царствы под солнцем ся деет,

ни едино недвижно стояти умеет.

Едино токмо царство постоянно зело,

неизменно будуще, непленимо, цело,

И един есть Царь вечный, без измены сущий,

в том царствии небесном выну царствующий.

Он Царь над цари всеми власть Си простирает,

садит я на престолы и паки ссаждает.

Его царство велико паче всяки хвалы,

славно же есть и хвално над вся мира славы.

В нем непостижимая мудрость и всевечна,

в нем хвала, слава, радость и жизнь безконечна.

В нем есть исполнение любве, мира, света,

чести, утехи, славы в безконечна лета.

В нем радость и блаженство выну пребывает,

и собрание всех благ вечно обитает.

Благ, их же языком несть леть изглаголати,

ни же умом созданным возможно объяти.

А то царство Господь Бог даст Его любящым

и путем заповедей спасенным ходяшым.

Тщимся убо, братие, тех путем ходити,

прилежим волю Бога всещедра творити,

Да, казни огня вечна возмогше гонзнути,

то царствие леть будет с Богом достигнута.

Царствие Божие

Царство Божие в небе есть и Церковь то же:

из сего царства в оно пресели ны. Боже.

Царство небесное

В Священном Писании царство знаменает

Церковь, правду и небо, их же подобает

Кому ж до нас искати прежде земных сущих,

аще хощем общници быти благ грядущих.

В первых же, царства Церкве искати есть требе,

без нея бо несть вера, без веры кто — в небе?

Чрез Церковь путь ко правде, та бо научает

правды, чрез правду паки небо ся стяжает.

Царствие небесное продажно от Бога,

а цена уставися предивно немнога.

Елико кто имеет. Бог продает за то,

не за цаты сребряны, ни токмо за злато.

Имей добродетели, купиши за тыя.

леть же оны имети и нищым в златыя.

Дажд и сам себе Богу, даст за тя самаго

безценное богатство царства небеснаго.

Драго Он тебе ценит, аще ты сам мниши,

яко в толику куплю никако стоиши.

Дажд тебе, не сумняся, небо твое будет,

и цена вратит ти ся. и купля прибудет.

Но речеши: Аз зол есмь, Богу неприятен.

Дажд ся токмо, приимет. Он бо благодатен.

И злаго тя удобрит, добр ся сотвориши,

егда Богу благому сам тебе вручиши.

А елма добр будеши, цена будет в тебе,

достойна купли, ты ту взем, будеши в небе.

Земное царство едному дается,

а в небесное всяк верный зовется.

Земное мало царю единому,

сущу смертному,

Ибо пределы своя разширяет.

иная царства обьяти желает,

аще по смерти в малый гроб вложится

и воместитъся.

Небесное же многи вомещает,

а всем пространно доволне бывает.

К тому, безсмертно имут царствовати

и бедств не знати.

Дивно то царство, а велми недраго,

малоценнаго не слышах инаго.

Аще нищь еси, можеши купити

и царь в нем быти.

Услыши. яко за мало купиша,

иже на земли прежде тебе жиша.

Вдовица за две то купила цате,

и те не злате.

Разбойник токмо за едино слово

восприят царство, комуждо готово.

Инии, яко токмо воздыхают,

то приимают.

Христос же Господь и за воды чашу

обеща дати то во область нашу.

О безцения царства безценнаго,

безконечнаго!

Потщимся убо мы тое купити,

да бы в нем вечно и весело жити.

Мощно комуждо есть цену стяжати,

за царство дати.

Аще же презрим днесь купити тое

царство блаженно, царство всесвятое,

торжище имать быть разрешенно,

царство схраненно.

Днесь время благо оно пристяжати,

ныне година себе зготовати

жилище вечно во стране живущих.

в радости сущих.

По днех же малех купля не узрится,

тщету познавшым плачь велий родится,

но невозвратна, увы, та пребудет,

вечна бо будет.

А царства кроме не леть инде жити,

токмо во аде, в муках вечных быти,

их же избави, Христе, Твоя люди,

милостив буди.

Настави ум наш ту куплю познати

и себе самех за ону отдати.

Просвети очи созерцати тую

куплю святую.

Адамант кроме солнце не сияет,

без Тебе. Света, небо не блистает.

Твоим нам светом дажд то созерцати

и цену дати.

Царство небесное есть нищых

Славнии мира славных почитают,

смиренныя же люди презирают

С богатым богачь обыче ходити

и взаим пиры велия творити.

Убогий паки или не впустится,

или на худе месте посадится

И хуждшим брашном будет чествованны,

немного лучше раба почитанны.

Не тако в небе хощет я чредити

Бог всемогущий, егда имуть внити

В вечерник вечный, на вечерю вечну,

пищу имущу весма безконечну.

Нищии тамо будут предпочтени,

на седалищех честнеишых саждени.

Нищи во мире апостоли бяху,

но о престолех обет восприяху.

Яко на онех честно посадятся,

с Христом судии миру сотворятся.

Нишия Христос нарече блаженны,

яко небесным царством суть почтении,

И в наследие то им даровася,

вечный по трудех покой сготовася.

Есть и богатым честно место тамо,

но не прилежат путь взяти онамо.

Богатствы мира к земли пригнетени,

не возникают, аки пригвождени.

Злата и сребра бремя претяжкое

низревает я во дно геенское.

Аще зовоми от Бога бывают,

ушы на глас той своя затыкают.

Ясне во притче той изображенно,

юже глагола слово божественно

О человеце, вечерю составлшем

и многи люди на ону призвавшем.

На ту бо прежде богатии звани,

от пиротворца довле почитани.

Но богатства им в препятие бяху,

ибо звавшым я сице глаголаху.

Первый: Имей мя, молю, отреченна.

яко не могу пира устроенна.

Ясти, вина же сия того дела.

хощу смотрети купленнаго села.

Ново бо купих, отхожду е зрети.

да вем, что ползы возмогу имети.

Вторый отвеща: Молю господина,

да ми не будет пред ним сия вина.

Яко не иду, ей не леть ми ити,

пять супруг волов потщахся купити.

О тех искуство хошу днесь прияти.

аще вси землю искусни тяжати.

Третий глагола: Жену поях себе.

в дому пиршество мне творити требе.

Се богатии аще звани бяху.

спону богатствы своими прияху.

Что же сотвори он дому владыка.

да не постраждет убытка велика?

Послал есть раба си на раступия,

на стогны града призвати нищыя,

И во вечерник вовести бедныя,

с ними слепыя, купно и хромыя.

Сии вси скоро на пир приидоша,

на честных местех седше. той ядоша.

Се иже богатств многих не имяху,

на ту вечерю безпрепятни бяху.

Тако есть нищих вечеря и в небе.

а не богатых. Ты же суди в тебе,

Кто право нищий, кто криво богатый?

Не всяк бо богат носяй пертень златый.

Может кто злата множество держати,

нищь же пред Богом духом пребывати

Ни же той ниший правый наречется,

кто богат быти всячески печется.

Но нищь праведне, иже хвалит Бога,

яко лишен есть споны сребра многа,

Ни промышляет лестию прижити,

не хощет ради злата согрешити

Чтый сия, аще содержиши злато,

не люби его. вменяй, яко блато.

Раздавай нищым, елико леть тебе,

сице за злато будеши на небе.

Аше же нищь ты, не дерзай роптати,

но тшися Богу хвалу возсылати.

Яко во мире безпрепятен еси,

и леть ти быти удобно в небеси.

О доволстве же безгрешно пецыся,

молися Богу и присно трудися.

Тако с убогим в горния полаты

на пир Господень внидет и богатый.

Царство трегубо

Трегубо есть царствие, еже поминает

Писание, еже нам взяти подобает.

Первое — душы царство, егда подчиненна

плоть умови бывает, и тако правленна,

Даже нимало плоти на духа дерзати,

но выну подвластию того пребывати.

Сие всякий человек силен есть стяжати,

способствие деющей Бога благодати.

Второе царство — Церкве, ибо та владеет

и тем, кто увенчанну главу си имеет.

Сие царство гонимо от силных бывает,

егда кто закон ея ломити дерзает,

Но Отмститель тому Бог, имать возмездити,

внегда восхощет дела всемирна судити

Третее царство — неба, еже зде терпящым

скорби дастъся и закон Господень хранящым

В сие скорбми, бедами нужда есть входити,

по трудех бо покою подобает быти.

Церкве противник

Церкве противник несть ми христианин,

аще и крещен, враг, яко поганин.

Церковь

Чювствуяй душу си болезновати

да тщится скоро к Церкви притекати,

Та бо известна есть мироварница,

недугов душы всяких врачебница.

Орел на каменных горах назидает

гнездо себе, в нем же птенцы си питает

Имать же обычай камень полагати

в нем аместит, иже птенцы соблюдати

От яда змиина может совершенно.

Строение си есть о них божественно.

Равне Орел мыслный Христос сотворил есть,

на камени веры Церковь утвердил есть,

В ней же, яко чада, верныя питает,

аместит сокрухи сердец полагает,

Да, аще кто ядом греховным вредится,

силою камене того устрабится.

Един храм Соломоном Господу создася

во Иерусалиме, супостат же тщася

Иеровоам в рощах два телца создати,

да ходит род Исраилск има ся кланяти.

И успе во лукавстве, к тема бо идоша

едва не вси Евреи и за боги чтоша.

Мали же избраннии в святом граде бяху,

иже скверных тех идол чтити не хождаху.

Точне едину Церковь Христос нам создал есть.

в ней же живущым вечный живот обещал есть.

Супостат же диавол многи назидает

храмы, в них же идолы своя поставляет.

Его храм блудилище, ту есть водворенна

Афродита скверная, яже блудом чтенна.

Суть и инии мнози демонстии храми

со различных лжебогов злыми кумирами.

Зрите же, камо сонм ся верных обращает,

мало число во Церкви Христовы витает.

Мала стезя в храм Божий, мало бо входящих,

велик же путь к идолом, яко тым творящих

Честь Божию есть много, мнози бо блудствуют,

а тех число без числа, иже пиянствуют.

Мнози и на мытницах, и в лавах седают,

иже сребролюбия кумир почитают.

Но молю вы, братие, лжебоги лишите.

а во храм Бога жива прилежно ходите,

Ту бо благодать и жизнь вечная стяжется.

тамо узами смерти вечныя вяжется,

И во огнь негасимый вовержен бывает,

кто-либо, презрев Бога, врагу работает.

Не хотяй во храм Божий смиренно входити,

милости Бога щедра прилежно просити,

Нуждею во геенну некогда ввержется,

егда в конце веков Суд Страшный изречется.

Вне корабля Ноева никто же спасен есть,

вне Рахавина дому койждо погублен есть.

Тако, вне дому Церкве иже пребывают,

Бога истинна Судом вовек погибают.

Церковь есть небо, убо, яко в небе

аггели поют, и нам пети требе

Божию славу, а не глаголати,

яже суть земна, но та отвергати.

В доме царстем суть во честь и не в честь сосуди,

тако в Церкви добрии и худии люди.

Во едином суть гумне плевелы, пшеница,

в той же мреже — добрая и злая рибица.

Едина нива куколь и семена родит.

в Церкви лик буих девиц со мудрыми ходит.

Но разлученно будет от куколя семя

и бу ия от мудрых, er да придет время.

Возмутся раби блази, злии повергутся,

сопрячется пшеница, плевелы сожгутся.

Возмут честны сосуды в честь, и ублажатся,

а нечестнии жезлом Суда сокрушатся.

Будим убо чистая во мире пшеница,

да приимет ны в себе Божия житница.

Будим, яко мудрыя девы, бдяще выну,

да сподобимся внити в чертог к Богу Сыну.

Будим блазии раби, да не вержемся,

но на трапезу вечну Богу вознесемся.

Будим доброе семя, растим буйны класы,

да пожнемся во небо жити вечны часы.

Будим сосуди во честь, да почтени будем,

в полате Царя всех век во веки пребудем.

Единою круг луны на небе созданный,

и светлостию солнца Богом налиянный.

Не имать бо лучь своих, чуждыми сияет,

тем или растет в свете, ли оскудевает.

Выну же нужду имать, да ся озаряет,

иначе помрачится, ни видим бывает.

Точне Церковь, един крат сущи зде рожденна,

благодатию Духа бяше исполненна.

Днесь тою множицею скудна ся являет,

озарения Духа Святаго желает.

Того ради ко Богу по вся дни глашает,

или, за яже прият, хвалу возсылает,

Или, их же ей нужда, от Господа просит,

горе сердца верных чад и руце возносит,

Да с высоты небесны скудость исполнится

от Солнца правды, яко луна озарится.

Не хотяй Церкве за матерь си знати

не может Бога Отца себе звати.

Ибо Церковь есть невеста Божия,

Ему родяща сыновы святыя.

Убо, его же Церковь не раждает,

того за сына Бог Себе не знает.

Кровию очищенна Церковь наша мати,

от крове ей начало дадеся прияти.

Кровию возраст стяжа, тою вся красится,

с кровию в конце мира она окончится.

Елико верных в мире мощно обретати.

вся едно тело Церкве подобает звати.

Его же глава Христос, Он бо управляет,

а Дух Святый множество удес съединяет

Взаим друга со другом, паче же и Богу

всыновляет верныя чрез благодать многу.

Его дело — верныя в единство счетати,

едино духовное тело содевати.

А яко из уд многих единое тело

сущее душа живит, бодрит, строит в дело.

Дает силу очесем, еже созерцати,

ушесем паки — гласы всякия слышати.

Ноздрям обоняния, гортани вкушати,

мягкоплотну языку слово провещати.

Рукам дело деяти. ногам же ходити,

прочым удом прочая делеса творити,

Точне Дух Святый уды мысленнаго тела

Церкве Христовы живит, строит на вся дела.

Что кому есть прилично, к тому устрояет,

дары божественныя чинно разделяет.

А яко в человеце, аше отсечется

уд некий, душа с онем с тела не влечется.

Тако от тела Церкве иже отлучится.

Духа Божественнаго общества лишится,

Дух бо тамо, иде же единство бывает

многих верных, а не где един обитает.

Кто-либо убо Церкве мира отлучися.

от живаго телесе уд то удалися.

Ветвь то есть, от корене жива отсеченна,

от лозы животныя розга отломленна.

Аще же образ тела имеяй видится,

яко труп телу, тако Церкви подобится.

Суетно же точию в подобии быти,

в единстве Духа требе всяку верну жити.

Иначе бо, яко уд, иже отсеченны,

телу живущу во тлю бывает сведены.

Тако от тела Церкве кто ся отделяет,

той живущей, он тлеет, вечно погибает.

Церковь есть свята

Свята есть Церковь с сынами своими,

се же доволне винами многими,

Их же первая, яко свокупися

во славу Богу, Ему посвятися.

Паки, яко суть мнози в ней святии

мужие, жены, мнози праведнии,

И вси во святость Богом суть призвании,

во небесное гражданство избрании.

Еще есть свята, яко в ней сущая

Богу угодна суть и пресвятая.

Свята есть вера, свято — учение,

свята — Таиства, свято — служение.

Над всеми сими всех святых святейший

Жених есть Церкве Христос праведнейший.

Иже ей святость праву даровал есть,

егда в невесту Себе ю избрал есть.

Кроме же ея святость не бывает,

сонмище ино люди погубляет.

Тщитеся убо уди живи быти

Церкве Христовы и пресвято жити,

Да победивше супостаты злыя,

возмете венцы славы небесныя.

Церковь есть нива

Нива, цветы многими лепо украшенна,

может ся нарицати Церковь божественна,

Имать бо в себе крины светлобелы зело,

в чистоте сохраншия девы свое тело.

Суть в ней шипци краснии с вонею благою,

мученици, чермнии кровию святою.

Суть цвети юдолнии, воню дающии.

за любовь Христа сами ся смиряющий.

Блистает в ней лозы цвет, елма упаяют

умы словом Божиим, иже то вещают.

Суть и масличны цвети, иже проявляют

милость ближним и злато си нищим отдают.

Суть и прочий цвети благостынь различных,

небесе достойнии во рабех владычних,

Иже, аще косою смерти посеченни

будут, но в пещь не будут огненну ввержении.

Паче же пресадятся во ниву небесну,

тамо благому цвету место есть словесну.

В церковь входити како

Како в храм Божий требе есть входити?

Имам вократце словом изьявити.

Внемлите токмо, будет полза многа,

еже просите, дастся вам от Бога.

Да блюдет кождо со страхом входити,

месту святому честь должну творити.

Да имать сердца си сокрушение,

мирских печалей всех отложение.

Смиренномудро в нем да пребывает,

яко же мытарь, да ся обвиняет.

Намерение да имать благое.

еже славити имя пресвятое

Всещедра Бога, а не в славу себе.

Утренневати, и щедрити требе

Нищыя дарми, да Бог воздарует.

Иже мзду вечну в небеси готует.

Сия, входяще в храм Божий, хваните

и, еже требе, надеждно просите.

Веруйте, дастъся, Бог бо обещает.

Его же слово никогда прелщает.

Не хотяй Церкве в мире за матерь си знати

в будущем веце не свесть Бога Отцем звати.

Авраам елма на гору идяше

со Исааком и жрети хотяше.

Осла и рабы низу есть оставил,

им же ны делом ходити наставил

Во храм Господень жертвы приношати,

но мысли мира низу оставляти.

Ибо во Церкви быти — яко в небе,

и мудрствовати небесная требе

Мойсий на гору егда восхождаше,

сапоги своя низу оставляше.

Нам же, в дом Божий хотящым вхождати,

печали мира должно оставляти,

Да сподобимся со Богом беседы

и не постраждем душевныя беды.

В церковь хождение

У краля Луситанска отрок некий бяше,

иже добронравен бе и верно служаше.

За что от жены краля милость получил есть,

паче инех отроков в чести мнозей был есть.

Име же веру к Богу, ко церкви хождаше,

литургии на всяк день прилежно слушаше.

Тому ин позавидев отрок чести, славы,

умысли клеветами поискати главы.

Оклевета й кралю, ложная вещаше,

даже краль невиннаго убити хотяше

И, призвав художника, что известь палил есть,

ему повеление свое сотворил есть,

Назнаменовав время, да. иже приидет

отрок к нему, той во пещь неволею снидет

И без пощадения во оней сожжется.

Вапноделатель того не отрицается.

Пришедшу же времени, еже нареченно,

краль отрока послаль есть, никому явленно.

Он бедный, ничто зная, кая тайна бяше,

послушав веления, некосно течаше,

Но Бог иначе совет лукавый вратил есть,

невиннаго юношу смерти свободил есть.

Ибо отрок, путствуя, узрев входящыя

люди во храм Господень и исходяшыя,

Потщася и сам внити, на молитве бяше,

даже уреченное время претекаше.

Краль, желая ведети, что с ним сотворися.

ужели в пещи лютей юноша спалися.

Посла тамо отрока, иже клеветаше.

да увесть. аше ов раб в пещи конец взяше.

Тече клеветник скоро, ов же умедлил есть

в церкви, и тако вторыя перва предварил есть.

Притече к художнику, нача вопрошати.

аще кралево слово тщася содеяти.

Он, непщуя, яко той на смерть осудися,

абие воврещи й во пещь устремися.

И тако клеветавый мзду свою приял есть,

оклеветанный паки жив и здрав остал есть.

Тако Бог невиннаго отрока хранил есть,

копавша под ним яму во ону ввалил есть.

Краль, известие прием, делу удивися.

Божиим судбам правым низко поклонися

И невинна отрока оттоле щадяше.

отрок же ему верно службу совершаше.

Сие чтуще, братие, того подражайте

отрока в нравех благих, в церковь учащайте,

А Господь от напасти скор есть зашишати

и врагом возмездие право весть даяти.

Цепь

Егда кто волю свою демону поддает,

абие в нечистоту им прелшен бывает.

Аще же часто делу блудну приложится,

душепагубный налог тако сотворится.

Аще же сопротивно оному не станет,

неизбежная нужда в то время настанет.

Ими же, яко колцы, злая цепь творится,

тою же душа грешна плененна держится.

Тем блюдитеся воли врагу подчиняти.

аще хощете плена его не страдати.

Целование архаггелское

Юноша некий нечисто живяше,

но Матерь Бога выну почиташе,

Гаврилово ей целование

читая часто в воспоминание

Радости ея, яже оней бяше,

егда от Духа Святаго зачаше

Божие Слово, еже воплотися

из нея чисто и без тли родися.

Тому юноши во пустыни бывшу

и все снедное уже истребившу,

Егда надолзе уже алчен бяше,

а где бы взяти брашна, не имяше.

Дева Мария с многими девами

во сне явися, а оны блюдами

Брашна несоша, но зело скверными.

от нечистоты не умовенными.

И рече ему Девица Мария:

Слыши, юноше, яжд ты брашна сия.

Он, поклонився, сице отвещаше:

Добро и сладко сие брашно ваше,

Но аз не могу и мало вкусите,

яко во скверных вижду блюдех быти.

Тогда святая Христа Бога Мати

изволи ему сице глаголати:

Добра и хвала, юже ми поеши,

но в скверном сердце ону подаеши.

Того аз ради не могу прияти,

потщися сердце твое очищати.

Юноша, возбнув, сердцем умилися,

от скверн слезами всяких очистися.

Прочее время в чистоте живяше,

целования никако престаше.

Ч

Чада

Господь Бог нищым чада обыче даяти,

аще и не удобно могут я питати

Се же во знамение любве явления

и изливаемаго благословения.

Яко тии трудами чада си питают,

подданых не имуще, данми не стужают.

Господам же велможным мало попущает,

да ся кто множеством чад живых утешает.

Се же да, аще чада будут оным многа,

не будут грабители, забывше си Бога,

Ибо, аще и без чад дерзают грабити,

что бы, имуще дети, не смели творити?

Две бы из вола коже хотели содрати,

да бы точию дети их были богата.

Сие мучителство Бог оным пресекает,

егда мало чад или ни едина дает.

Чада демоня

Откуду чада демон во мире имеет,

поне же родити их, дух сущь, не умеет?

Не рождением чада от него бывают,

но иже злобу его волно подражают.

Тии подражанием себе его чада

творят, и наследники геенскаго града.

Чадопитание

Голубь птенцы семены чистыми питает,

аист гады, ехидны своим в пищу дает

Тако благий родитель честным хлебом чада

своя питает, нужду утоляя глада.

Злый же отец нечисто деет питание,

иже хищное имать богатств собрание.

Та бо, яко змиеве, чадо уязвляют,

ибо душу в геенны муку устрояют

Чадом богатств не отдаяти

Некто богат муж две дщере питаше

и в супружество чинно сочеташе,

Яже ко отцу любовь проявлясте

и воли его зело угождасте.

Егда же в старость века прихождаше,

глагол от нею сицевый слышаше:

Отче любезный, изволи внимати,

еже мы хощем тебе глаголати.

Кровь твоя есмы, не можем терпети

в печалех тебе, сердце наше, зрети.

Присти же время в покои ти жити,

по трудех многих сладостно почити.

Сам век старости тебе досаждает,

егда недуги в теле умножает.

В них же что ино требе помышляти,

точию к смерти себе готовати,

Да та обрящет совесть очищенну,

а не прелестми мира помраченну.

Не в сокровищех сердце лежящее,

но любовию к Богу горящее,

Еже не может ко Богу горети,

аще кто богатств не хощет презрети.

Та бо ко земли сердце низвлекают,

горе летети никако пущают.

Всяко отсещи она подобает,

кто с Богом жити в небеси желает.

Нищих есть царство. Господь глаголаше,

а не богатым оно обещаше.

Годствует убо, отче наш, и тебе

нищету взяти, да будеши в небе.

Раздажд все злато, яко подобает,

да твоей души оно не стужает.

Возверзи печаль на юныя люди,

сам до кончины в покои пребуди.

Супрузи наши могут ся труждати.

мирское бремя за тебе двизати.

Оным богатство твое да вручиши,

промысл изрядный оком ти узриши.

Мы же ти хощем всеработны быти,

по твоей воли до конца служити.

Бог сердцевидец сих глагол свидетель,

неправдующым Он буди отмститель.

Сладкий глагол сей старца умягчает,

всездравый совет быти помышляет.

Хотя в покой в старости пожити

и о блаженстве вечном помыслити.

Пригласи зяти, умысл изъявил есть,

злато и сребро оным поручил есть.

Зяти же злато с радостию взяша,

всяко доволство ему обещаша

И чрез некое время почитаху.

сами и жены ему угождаху.

Потом же старец много лет живяше,

паче, нежели сердце их желаше.

Тем же начаху его презерати

зяти и дщери, и не угождати

Не яко отца к тому почитаху,

но аки чужда, нища назираху.

Прииде старец во раскаяние

за богатств своих им раздаяние.

Въместо покоя, в скудости живяше,

честную старость в слезах провождаше.

Но зане мудр бе, хитрость сотворил есть,

старый юныя всечюдне прелстил есть.

Во нощь едину неусыпен бяше

в своей коморе, в ней же обиташе.

Возжег светилник, цатою бряцаше,

юже едину или две имяше.

Бряцая паки, приложи считати,

еже бы зятю и дщери слышати.

Начита много, набряца толико,

аки имеяй богатство велико.

Ковчег же велий песком исполнил есть,

замки крепкими хитрец утвердил есть.

Зять же с дщерию глас звука слышаша,

еще богата отца помышляша.

Тем же в день утрый отца присетиша,

о неспании вины вопросиша.

Он даде ответ: Потщахся считати

останки злата, и хощу отдати

Тому, иже мя довле препитает

до конца жизни, ин же да не чает.

Отдах бо части, яко подобало.

сие тому, кто схранит мя, остало.

Они повнегда сия услышаша,

отца доволно чредити начаша.

Едина другу сестру предваряше,

зять зятя паче службу проявляше.

Вси злата хотят, старца учреждают,

на ковчег тяжкий очы обращают.

Та же скончася старец умудренный

и зело честно от чад погребенный.

По сем пришедше, ковчег отверзоша,

песок, не злато, в онем обретоша

И верху того велику палицу,

сице чертанну к родителей лицу:

Чесо говейность не може створити,

к тому лакомство веде убедити.

О родители, чадом не вручайте

всех богатств ваших, сами обладайте.

Лакомство бо их хотяще заткати,

вину злым многим имате подати.

Образом моим вси ся накажите,

буии раны палицы страждите.

Чародей

Кто чародеи в дом свой призывает,

обругав Бога, беса почитает.

Может на мал час демон послужити,

но вечно будет за то он томити.

Чародейство

В немощи к чадодеем иже прибегает,

яд пия, не врачевство, душу убивает,

Или во огни ищет безьумник прохлада,

погибель ту известна, ни мала отрада.

Кто виде волка, овцу зубами целяща,

или лва гладна, в зубах часть мяса щадяща?

Той и от чародеев может ожидати,

яко леть помощь в скорби недужным прияти.

Не лститеся, братие, демон не желает,

да кто от правоверных здрав долго бывает.

Хотел бы он в един час вся ны поморити,

аще бы аггел Божий престал нас хранити.

Аще же видится вам нечто помогати,

летит вы, да дерзаете болше согрешати.

На мал час пособствует, да уморит вечно,

душы вринет в езеро огнем безконечно.

Бог врачь есть всеистинный, к Нему притекайте,

а естественных врачевств не пренебрегайте,

Ибо естества средствы Он Ся не гнушает,

но чрез та силу Свою мирови общает.

Неправо убо деют, иже обхуждают

врачевства художество и врачы хухнают.

Бог врачы и врачевство в ползу сотворил есть,

а от чаров бособство проклято судил есть.

Лучше убо от скорби верным умирати,

неже бабы, шептуны в помощь призывати.

Тако бо отходящым спастися удобно,

а от шепт спасение никогда подобно.

Час смерти

Едина ти душа есть, аще погубиши

ту в един час. никогда ея искупиши.

Аще же единою ты ону спасеши.

никогда погубити тоя возможеши.

От смертна часа черты есть всех спасение,

от тогожде вечное душ погубление.

Тщися убо в час смертный в благодати быти.

тако бо в славе вечней даст ти Господь жити.

Час смерти, яко же тать, к живущым приходит,

множицею безвестно во ин век преводит.

Того ради Христос Бог бдети увещает,

да неготовых сущых смерть не восхищает.

Частость

Не сила капли камень пробивает,

но яко часто на того падает.

Тако читаяй часто научится,

аще и не остр умом си родится.

Чаяние

Не творяй делес, яже Господь завещает,

всуе, яже обеща Он. прияти чает.

Человек

Граду деть человека есть уподобити.

в нем же Царю небесну угодно есть жити.

Пятерица в нем врат есть, чувств пять разумейте,

но затворенна она имети умейте,

Врази бо окрест выну того усмотряют,

да чрез отверста врата на град нападают.

Но и внутрь града вои ковы содевают,

страсти, глаголю, врагом град дати желают.

Тыя убо, во-первых, укротити требе,

та же от враг блюстися полезно есть тебе.

Человек, яко же цвет, красен ся являет,

но яко той же, зело скоро увядает,

И яко друг по друзе цвети исчезают,

тако и человеци жизни ся лишают.

Мир малый человек есть, а конец познает,

да изменою смерти вечность зачинает.

Седмьдесят лет предел есть во мире сем жити,

немногим выше того дается пребыти,

И то в болезнех плоти, потом неизменна

нужда лежит отьити всем до гроба земна

Телом, а душу Богу живу отдаяти,

да изволит по делом место вечно дати.

Тело убо во земли в землю обратится,

душа в небеси или во аде вселится,

Донде же в конце веков паки тожде тело

восприимет, оживит будущее цело.

Тогда же Христос Господь приидет судити

вся, иже от Адама, и мзду сотворити.

Благим убо — благую, яже есть жизнь вечна,

Злым же — злую, яже есть мука безконечна.

Тогда кождо предстанет Судии правому

ответ дати о делех всяческих Оному.

Тогда, яже днесь тайна, народно явятся,

вси деющии злая люте посрамятся

И будут на вечныя муки осуждении,

от пропасти геенски с огнем поглощении.

В ней же пламеней силу нужда есть страдати,

во обществе с демоны вечно пребывати.

А то во веки веков: оле страшно зело!

не сгорит же никогда и душа и тело.

Противно, праведници имут восприяти

от Божественны славу и честь благодати.

В страну жизни вечныя будут воведени.

в немерцающем свете честно водворени,

Иде же веселие будет безконечно,

ликование с духи небесными вечно.

То нам изволи, Христе Боже, даровати,

да Тя выну с аггелы будем прославляти.

Злых же части избави, аще согрешихом,

но разве Тебе Бога, инаго не чтихом.

Твои мы раби есмы, Ты Бог наш во веки,

спаси, Христе, грешныя Твоя человеки

Человек устроен в небо

Древеса, яже плодна, Богом сотворенна,

да плод дают во ползу человека тленна,

А не воеже бы им посеченным быти

и во огнь воверженным. пламени множити.

Обаче, аще плода лишенна бывают,

людие. посекше я, во огнь вовергают.

Да поне горением ползу оным деют.

аще приношением плода не довлеют.

Подобне и человек создася от Бога,

да внидет во светлости небесна чертога.

А не еже бы в аде огню в пажит быти,

его же никогда же леть есть угасити.

Но иже недостоин сам неба творится

грехами, той во пламень огненный судится.

Да истинна Господня на том возсияет.

во нем же милость места си не обретает.

Чертог

Желающим внутрь внити небесна чертога

подобает просити от Господа Бога

Светлости благодати, да бы тмою греха

не лишитися блага к небеси успеха.

Паки искусных мужей вопрошати требе,

да бы не погрешити в спасенной потребе.

Наконец, полезно есть труда не престати.

даже бы искомое добро пристяжати.

Честь

Родителие чадом дают, еже быти,

учителие паки. — еже благо жити.

Тем, аще родители требе почитати,

не меншу учителем лепо честь даяти.

Чести мира без греха неудобь держати,

тем лучше человеку ея не искати.

Честь и слава менит нрава

мало в лучший, часто в хуждший.

Иже тварь паче Творца почитает,

Бога взем славу, твари Его дает.

Кто должен кому, того почитает.

наш долг нескупный Богови бывает.

Убо мы должни Его почитати,

на всяко время службы совершати.

Родителей на сына честь не прехождает,

аше добродетелей их не подражает.

Лучше честь собою комуждо стяжати.

нежели предков си честию сияти.

Честь родителей сыну безчестна бывает,

аще он безчинно жизнь свою провождает.

Аще хощеши долго во мире сем жити,

должно ти родители твоя выну чтити.

Чтый родители своя той благословится,

не чтый паки мерзостен комуждо явится.

Велие в мире есть живущых дело

честь пристяжати и хранити цело.

Мнози живот свой за ню полагают,

ничто же равно ей во мире знают.

И не гаждаю, но злых надымает

и во пагубу вечну низревает.

Ирод Агриппа в показ всем дадеся,

иже безумно сердцем си надмеся,

Егда в некое время явствовася

народом светло и царь показася,

В златыя ризы красно облеченный

и скипетр держа, венцем украшенный.

К тому, слово си егда глаголаше,

народ глас его Божий быти зваше.

Он же. любя глас. Богу не смирися.

за что аггелом смертно уязвися.

Ударен паде, всех сил лишен бяше,

червие тело его расточаше,

И тако снеден. живота лишися,

скоро злогордый чести обнажися.

Еще и инех честь мало держится,

яко бо коло, щастие крутится.

Днесь царь, а утро во плене бывает,

ин тогда губит честь, егда лобзает.

Но дадим и то, еже кому жити

долго во чести и здраву пребыти:

Мощно ли, рцы ми, печалей не знати.

хлада, бед, глада, врагов не видати?

Никако убо. тем же ты не тщися

честьми сияти, но смирен явися.

Найпаче ведый, яко честь раждает

свободу греха, иже зле вреждает,

Ибо честнии мнят вся волна быти,

еже закону противно творити.

Но лстятся вредно и честь оскверняют,

в чести безчестных хуждшии бывают.

Честь епископом должна

Валентиниан царь Мартина святаго

не чтил есть въстанием с престола царскаго.

Единою убо Мартину входящу

напрасно, царю же кичиво седящу,

Пламень под престолом царским воспалися.

им же седалище царско опалися.

Возскочи убо царь, дал ся винен быти.

оттоле Мартина научися чтити.

Ему же волею чести не творяше.

Богом наказанный, того почиташе.

Честь родителей

Пчелы матерь свою зело почитают,

родители чтити чада научают.

Чести презрение

Аммоний богомудрый в пустыни живяше,

град на епископию онаго нудяше.

Ухо себе отсече, да бы тем не быти,

и языку хотяше тожде сотворити.

Оставлен, егда страсти плотския страдаше,

разждеженным железом тело си паляше,

Лаже язвами телу всему полну быти,

огнь внутрний огнем внешним тщася изтребити.

Честная

Первое чести место душе положися

от Платона, на втором тело посадися.

Третие он богатству место полагал есть.

Подобне о гражданстве он же мудрствовал есть:

Добродетелем перво место полагает,

на втором силы плоти честно посаждает,

Третие дал богатству. Аз же предлагаю

славу, ту бо от богатств лучшу быти знаю.

Аще бо вся (глаголет некто) погубиши,

тшися, да во целости славу сохраниши.

И паче сил телесе мощно ю вменяти,

зане за ню и живот волим полагати.

Четыридесятница

Во время жатвы и грозд взимания

собираются плоти питания.

Тем всяк чрез лето целое пасется,

что соберется.

Кто же не хощет тогда собирати,

нужда тому есть глад велий страдати

и от сверстников быти обруганну,

из домов гнанну.

Есть и духовны жатвы время благо,

четыридесят дни поста святаго

и взимания гроздов божественных.

душам спасенных.

В то иже от пищь и питий держится,

книги чтет, Богу умилно молится

и вся благая дела содевает,

добре сбирает

Брашно духовно и вино святое

в града небесна жилище вечное,

о их же туце имать выну жити

и весел быти.

А кто ленится дел тех содевати,

поста хранити, чести и певати,

будет во веки глад велий страдати,

что пес. алкати,

И в дом небесный не будет впущенный,

яко ленивец, с буйми вмененный,

но вне онаго в тузе вечне будет.

Бог й забудет.

Потщимся убо, братие, постити,

труды духовны прилежно творити,

да теми пищу во пресветлом небе

спрятаем себе.

Четыридесятницу Церковь совершает,

да кождо страсти своя постом умерщвляет.

И скверны греховныя да мыем слезами

и во преступлениих да судимся сами,

Еже бы нам на Суде сужденным не быти,

но с праведными страну десную влучити.

Хотяй же время сие чинно провождати

должен всякия злобы от себе вергати.

Несть доволно отьяти плоти брашна себе,

но и вся отринути безчиния требе.

Что бо ползует чрево праздно пишь имети.

а в душе полность грехов скаредных терпети?

Несть полза, аще блед кто постом сотворится,

ненавистию паки в душе учермнится.

Не ползует в пост вина сладкаго не пити,

аще кто не престанет от гнева пьян быти.

Малый успех и мяса скотска не снедати.

а славу ближних словом лукавым терзати.

Обое сие нуждно есть верным хранити,

от брашен телом, от злоб душею постити.

Сугубу человеку пост сугуб есть требе,

да телом и душею водворится в небе.

Птица единым крылом выспрь не возлетает.

человек едным постом в небе не бывает.

Храним убо пост телом, храним и душею,

да бы спастися овем, спастися и сею.

Чистота

Крини светлокраснии чистоту являют,

но и, яко чистота, скоро исчезают.

Обычно же шесть листов им украшение,

то же добродетелей шести знамение.

Ибо хотяй чистоту в себе сохранити

шестерицею должен тех украшен быти

Перва есть трезвение, еже бодра творит

человека и страсти сверепыя морит.

Сей лист невоздержници всевредно терзают,

егда ся обьядают и зле упивают.

Втора — трудолюбие, ибо в трудех жити

честных нужда хотяшым чистоту хранити.

Сей лист празднующими люте ся терзает,

яже демон удобно кознми си прелщает.

Третия есть риз плоти честная жестота,

ею же великая чистоте красота.

Сей лист раздирается мягких ношением

и лишним паче сана плоти крашением.

Четвертая есть плотских чювствий хранение,

найпаче да опасно бывает зрение.

Сей лист оплазивии людие терзают.

с Диною и с Давидом чистоту сгубляют.

Пятая есть кроткое выну ко всем слово,

скверно же да не будет и в мысли готово.

Сей лист отторгается скверными беседы,

яже любяй не имать чистоты без беды.

Шестая есть изветов греха гонзание.

да несть противных полов сопребывание.

Сей бо лист найпаче тем оттерзан бывает,

сено, огня близ суще, всяко согарает.

Мало Фамарь с Аммоном наедине бяше.

а без крина чистоты в дом свой возврат взяше.

Сия шесть добродетель тщитеся имети.

хотящий в чистоте безбедно седети.

Инако того цвета будете лишени,

красоты душевныя с плачем обнажени.

Крин белый благовонен, чювства услаждает,

шесть в себе листов имать, чистоту являет.

Ибо та бела зело пред очесы Бога

и воня в ней достойна небесна чертога.

Шесть же добродетели ону украшают,

аки листие красно, и честну являют.

Первая добродетель ея — трезвение,

пищь и пития мерно употребление.

Еже. аще хранимо неким не бывает,

тамо чистота плоти скоро исчезает.

Лот. меры не сохранив, от вина напися,

но дщерема своима соспяш сотворися.

Вторая добродетель есть трудолюбие

прилежное. жития праздна гонзание.

Иероним блаженный сие похваляет

и хотящых спастися сице увещает:

Выну буди во труде, да тя не обрящет

праздна, егда с искусом враг лукавый сряшет.

Сей Содомы граждане лист люте раздраша.

егда празности присней дни своя отдаша.

Тем во пресыщение и в скверну впадоша,

за что казнию Бога люте погибоша.

Третия — жестота риз, та бо укрощает

стремление похотей и мысль очищает.

Преко. ризы мягкия похоть возбуждают,

противныя чистоте помыслы раждают.

Моавитския дщери в мягких ризах бяху,

но блуд со Иудеи пагубный творяху.

Четвертая — чювств плоти присно хранение,

их же свобода деет во блуд падение.

Дина, дщерь Иаковля, жен странных смотряше,

но от юноши блудна нечесть пострадаше.

Давид, увидев жену нагую, прелстися,

пророк быв и царь честный, с оною смесися.

Пятая добродетель — словеса честная,

и та со кротостию. никогда лестная.

Иероним блаженный сице поучает:

дев слово чисто, мудро, редко да бывает.

Ибо, яже дерзостне уста распушают,

неудобно чистоту плоти сохраняют.

Шестая есть изветов всяких гонзание,

ими же случается блуда деяние.

Найпаче с полом инем наедине быти

никогда подобает, да бы ся не лстити.

С братом Фамар Аммоном наедине бяше,

но девства бысть лишенна, нечесть пострадаше.

Сия добродетели должно есть хранити

хотящым тело свое чисто сохранити.

Благо есть пятерицу чувств плоти хранити.

ограждение твердо оным сотворити.

Да суетием мира будут заключенна.

самому же Господу Богу отверзенна.

Тако бо душа оград затворен бывает,

в нем же любезно жених ея пребывает.

Цветы добродетелей сладце веселится,

за что оград сей в небо светло пресадится

Еже увядения кроме пребывати.

красотою светлости во веки сияти.

Чистота в Писании крину подобится,

иже шесть листов в себе имеяй родится.

Шесть бо дел, яко листов, есть имети требе

желающим чистоту сохранити в себе.

Первое, очы и слух нужда есть хранити.

да бы никоей скверне теми в сердце внити.

Сия бо чювства, аки дверь сердца, бывают,

ими сокровища душ врази окрадают.

Второе, ина чювства требе умерщвляти.

да не могут пламене в сердцах возгнещати.

Обонянию вони благия отьяти

требе, а вкусу многих сладостей не дати.

Осязание мягких полезно лишити.

тако мощно чистоту невредно хранити.

Третее, глагол чистый, движение честно,

риза смиренна хранит чистоту нелестно.

Четвертое, дружество с чистыми имети

требе, а со скверными нимало седети.

Ибо, яко же краста скоро прилипает.

тако от другов скверных друг чист истлевает.

Пятое, вин всяческих полезно бегати,

яже ко блудодейству могут возбуждати.

На места зазорная требе не сходити.

и наедине с полом противным не быти.

Такожде со юными лицы не играти

и любве к ним плотския никогда держати.

Наконец, от злых мыслей сердце блюсти нужда,

да ся не похотствует красота в нем чужда

И елма, не хотящым нам, мысли стужают,

яко змии вреднии. да ся отвергают.

Сия дела хранящу мощно есть пожити

чисто и. яко крину, благовонну быти.

Иначе неудобно цвет сей содержати,

ибо огнем похоти весть он согорати

Иерею чистота вел ми подобает,

да. яко солнце светло. тако чист бывает,

Ибо ему иныя должно есть чистити,

убо лепо самому чистшу от всех быти

Скверная рука тело паче оскверняет,

аще несть очищенна, неже омывает.

Тако скверный иерей не может чищати

словом, аще сам в скверне будет пребывати.

Паче сквернит чистыя, ибо соблазняет

и к нечисту житию делом возбуждает.

Чистота неизвестна, аще чие око

при устех смеющихся носится высоко.

Чищение сердца

Сердце наша есть нива великаго Бога,

убо имать плодами быти неубога.

Богатому в милости и плоды богаты

подобает из нив си комуждо даяти

Плоды добродетелей. Ему возлюбленных,

а душам нишым грешным полезноспасенных.

Не подобает же в них плевелом бывати,

аще случатся когда, требе очищати.

Многа же суть средствия, яже очищают

нивы сердец от плевел и плод умножают.

В первых, слово Божие, ибо проявляет

пороки сердечныя и благодать дает.

Паки, то ж премудрости взыскание деет.

та бо всякия злобы изврещи довлеет.

Еще сокрушение сердца тожде творит.

ибо в душах вся скверны греховныя морит.

Грех исповедание тако ж содевает,

ибо извнутрь вся гады злобы извергает.

К сим, острота жития в чистоту приводит.

ибо. яже вредна суть, из плоти изводит.

Такожде и молитва теплая ко Богу

истребляет, яже есть в сердцах, прозябл многу.

Наказание благо тожде весть творити.

ибо силно всякия злобы изтребити.

И милостыня силна грехи очищати.

тем же ю Христос Господь повеле даяти.

Наконец, и скорбь душы от грех очищает,

добродетели плодит, благодать раждает.

Сими благостынями сердца очищайте

от плевел душевредных, и плоды раждайте

Добродеяний всяких, да за ня от Бога

воздаяния в небе приимете многа.

Чтение

Ходяй при водах всяко омочится,

приседяй огню тепла исполнится.

Тако читаяй книги божественны

аки по нужде будет умудренны.

Чтение без разумения

Арсению святому некто глаголаше,

яко, чтый Писания, силы их не знаше.

Кая убо, рече ми, пол за может быти,

поне же не изволи Бог ми их открити?

Отвеща преподобный: Брате, не сумнися.

приклони ухо к слову, делу научися.

Слышах от святых отец, яко слов не знают

провешаемых. иже змии заклинают,

Обаче действенна суть, змии бо кротятся,

воли заклинателей своих подчинятся.

Тако, аще и мы слов, яже чтем, не знаем,

обаче лишени их действа не бываем,

Знает бо демон силу и тоя гонзает,

противу словесем тым стати не дерзает.

Аще убо, братие, многа нам невестна,

яже поем или чтем, обаче известна

Суть нам во спасение, токмо сердце требе

с любовию имети во пресветлом небе.

Любовь и ревность Господь тамо почитает,

иде же разум чтомых в скудости бывает.

Чудо

Чюдо бяше велие, елма солнце сташе,

егда Иисус Наввин враги воеваше.

Не меншее, и егда тожде возвратися,

Иезекии царю в знамя положися.

Но вящее мир виде, егда Бог смирися

и. со небес на землю сошед, плоть явися.

Чювство

Ему же вкушения чювство повредится,

сот сладкий, яко пелынь, горестен явится.

Вкушение душевно тым есть врежденное.

их же любы склоненна в суетство земное.

Тем суетств любители небесных не любят,

душеполезных сладость в погибель си губят.

Мы от суетствий мира сердцы отвратимся,

чувствы духа к сладости горней приложимся,

Да. ныне приобыкше, потщимся искати,

еже бы тою вечно себе насыщати.

Вепрь ны слухом, островижд превосходит зрением.

пифик вкусом, суп в вони, паук косновением.

Чювства 5

Обоняние

Обоняние люди утешает,

цветов прекрасных вонми услаждает.

Сие пресладким Богом даровася,

егда человек от Него создася.

Видение

Видение злобно многих погубляет,

аще его разум чий не укрощает.

Видеша плод древа Богом показанный

прародителие, за нь же вонь изгнании.

Вкушение

Вкус добра много имать. мнози им вредятся.

иже пищми, питии безмерно чредятся.

Вкушше прародители от древнаго плода,

сами во грех впадоша, и наследство рода.

Слышание

Слышание благих благим поучает,

слушание же злых злобна сотворяет.

Слуша Евва змия, лстивно глаголавша,

страшный услыша глас Бога, вон изгнавша.

Осязание

Часто осязание безчестно бывает

и казнь собою за грех свое чювство знает.

Коснуся прародитель яблку и прамати,

пламенным мечем веле Бог из рая гнати.

Щ

Щадение

Щадяй злыя люди сам губит благия.

Благим благо будет, изми токмо злыя.

Щастие

Иже в щастие мира уповает.

Далиде в руце главу свою дает.

Щастию не верити

Из числа седми мудрых муж избранный,

собственным Солон именем прозванный,

с царем Лидийским Крезом глаголаше

и увещаше.

Да во щастии си не уповает,

непостоянство того помышляет,

яко обыче оно не стояти,

люди прелщати.

Он же из детства име Имармену

всегда работну, аки бы плененну,

ни в коей вещи противства познаше.

прещаслив бяше.

Тем же Солона словес не приял есть,

надежду в щасти своем полагал есть,

на вся дерзаше, щастие безмерно

мня быти верно.

Но прелестное веры не сдержало,

на брани с Киром не пособствовало.

Егда бе нужда, тогда отступило.

Креза прелстило,

Ибо от ратник Кировых пленися.

Киром же на смерть люту осудися.

еже на дровах быти положенну.

огнем соженну.

Внегда й убо на та полагаху

и огнь всеядущ возжещи хотяху.

слово Солона мудра помянул есть

и воздохнул есть:

О Солон, Солон, гласно провещая.

Кир же, глагол сей прилежно внушая,

повеле Креза о том вопросити.

что хощет быти.

Яко Солона поминает себе,

лежа на дровах в последней потребе.

Крез даде ответ: Того поминаю,

ныне бо знаю.

Яко истинну он ми глаголаше,

не уповати егда увещаше

в щастии мнозе. еже ми служило,

а днесь прелстило.

Кир же то слово к себъ обратил есть,

о шастии си тожде помыслил есть.

Абие велъ Креза свободити,

волна пустити.

И ты, кто-либо еси та читаяй.

не буди в щасти твоем уповаяй,

но всю надежду обрати ко Богу.

в щедротах многу.

Иже ни хощет, ни может прелщати,

кто в Нем надежду весть всю полагати.

но яко отец чадо соблюдает

и ущедряет.

Ю

Юность

Во юне версте сущым что деяти требе.

да по старости будут во пресветлом небе?

Богомудрый Августин мудре увещает.

елма в писаниих си сице поведает:

Пишу вам. о юнии, часто разсуждайте,

яко вы юни есте. тем ся подвизайте.

Да возможете враги душевны попрати

и венцы победныя за то восприяти.

Будите же смирении, да бы вам не пасти

в погибели вечныя лютыя пропасти,

Ибо. иже в подвизе духовном гордится,

смиренныя любяшым Богом не крепится.

Юноша

Юноша весма юнец сотворится,

егда юнице лстивей приближится.

Беседа с жены юны умягчает,

яко огнь, воска близ сушь, растопляет.

Новая лоза грозды обиднее родит.

но старая лучшыя в сладости изводит

Тако юнии болше словес изпушают,

но яже полезнейша, старии вещают.

Юных советы не здрави бывают.

по страстем дело всяко разсуждают.

Что ум намыслит. сие им любится,

искушение на мысль не впустится.

Старых словеса суть им ни во что же,

глаголют: Стар муж умом изнеможе.

И тако, еже хотят, содевают,

совешаема и себе прелшают.

Сын Соломонов Ровоам такими

советниками прелщен бысть своими.

Презрев старыя, юных послушаше,

дани народу многи налагаше.

Но что успел есть? Молва сотворися.

царство на двое его разделися.

Мнози избраша Иеровоама.

мали осташа в службе Ровоама.

Тогда он позна вреден совет быти

юных, но ничто леть бе пособити.

Раба своего воцаренна знаше,

тшеты и бедства выну воздыхайте.

Тогда и старых совет не поможе.

даждь юным старых совет знати, Боже.

O [Омега]

Облещися

В нова человека хотяй облешися

первее ветхаго должен совлещися.

Не может бо новый со ветхим стояти.

единому всяко нужда уступати.

Облещися во Христа

Во Христа Господа той ся облекает,

иже. во Нь веровав, в Троицу ся крещает.

И, иже в радости Пресвятое Слово

прием, делы творит в жизни си Христово.

Кто добродетели Его подражает,

в Него ся самаго той муж облекает.

Обличение

В обители Синайстей авва некий бяше,

иже закон Господень прилежно храняше.

Сей. видя во братии нравы развращенны,

вниде в храм, в извращенну ризу облеченны.

Что видяще братия, тому ся смеяху

и, да обратит лицем ризу, глаголаху.

Он рече: Вы, братие. Синай извратисте.

иночество на мирский живот преложисте.

Смеха есмы достойни, убо и вам требе

на добро лице живот возвратити в себе.

Аз ризу кроме труда на лице вращаю,

вас ко исправлению тощно увещаю.

Иде же место несть обличению,

тамо свобода грехов творению.

Брата о гресех хотяй обличите

сам без порока долженствует быти.

Да не услышит: Врачу, исцелися.

мурине беляй, сам бел сотворися.

Канут, краль Британский, елма хвалим бяше

от ласкателей си, яко вся имяше

Слову покоренна во своей державе,

не приложи сердца неправедной славе.

Но умысли оны мудро обличите,

неправедная та их словеса бити.

Веле седалище свое поставити

на брезе вод морских, да бы ту седети.

Изшед сам, седе и морю прещаше:

Не коснися ризам моим, глаголаше.

Море же одежды царски обливаше.

волн своих метати на нь не престаяше.

Тогда к ласкателем сотворил есть слово:

Се зрите, слушати несть море готово.

Всуе убо вы мя словесы лщаете,

егда вся покорна быти вешаете.

Суетна есть крепость царей, в мире сущих,

многими владети никогда могущих.

Един есть Царь вышний, Бог, Его же слова

вся тварь, везде суща, слушати готова.

Тому небо, земля и море покорно,

ни едино сущих Оному есть спорно.

Тому аз смиренно главу поклоняю

и вас ко поклону Его увещаю.

Вы же мне отселе правду глаголите.

а ласкателными словесы не лстите.

Тако обличив я, в дом свой возвратися,

сице всяк лукавство знати научися.

Аше скверну на ризе другови явиши.

благодарно от него слово услышиши.

Аше же порок душы его обличиши,

на гнев и роптание того возбудиши.

Давид царь Нафана зело почиташе,

яко им о гресе си обличен бяше.

И царь Феодосий Амвросия чтил есть,

яко за грех его яве обличил есть.

Подобне достоит и нам днесь творити,

грех обличители чтити и любити.

Не зло есть зерцало, еже изъявляет

порок на лици зряща, правду бо вещает.

Ни же врачь болному зол мним той может быти,

иже недуг ему злый тшится изъявити.

Зерцало бо порока зла не прилагает,

но готовый праведно порок обличает.

Такожде врачь недуга не деет новаго,

но злобу проявляет недуга ветхаго.

Точне, иже нам грехи наша изъявляют,

не зло нам деют, паче злобу обличают.

Да, знающе ту в себе, поищем неправы,

изменим лукавыя на благия нравы.

Паче убо достоит таковыя чтити,

благодарствие за ту их любовь явити.

Но мы противно деем, ненавидим тыя.

иже предлагают нам нравы нашы злыя.

Бог же имать им милость за любовь воздати.

а за неблагодарство нас казни предати.

Обличение гордаго мудрое

Сесостр, в Египте древле царьствовавыи,

многи победы над враги стяжавый,

яко бе силен, во сердцы надмеся,

превознесеся.

Повеле себе воз сооружити

из чиста злата, той же украсити

каменей честных веле лепотою

за славу свою.

И обыкл бяше онем возим быти,

егда хотяше камо путь творити,

четыри цари под той запрягаше,

яже в плен яше.

Единою же оному седяшу

на колеснице и на цари зрящу,

един от онех вспят ся обращаше.

на коло зряше.

Сесостр то видев, веле вопросити.

чесого деля т щ а с я воспять зрети.

Он даде ответ: Кола соглядаю

и разсуждаю

Вращение их. им же что высится,

абие тожде ко земли низится,

и еже прежде вращашеся низко.

тебе есть близко.

Познав царь, яко мудрый ответ бяше.

непостоянство щастия являше,

испряже цари, путствова на конех,

а не на онех.

Обличение гордости

Филипп царь Македонский в царстве имеяше

врача си Менекрата. иже прегорд бяше

И нарицаше себе Диа бога быти.

яко искусен бяше недуги целити.

Филипп, весть о том прием, хоте наказати

тайноумным образом, да ся может знати.

Пир велий сотворил есть и веле почтити

того врача, на месте высоце садити.

Пир бысть. и сотвориша. яко подобаше.

врачь превысоко место паче людей взяше.

Но егда человеком брашна в снедь несоша.

ему. мнящуся богу, кадило возжгоша.

Человеци ядоша, он же пиши зряше,

кадило обвоняя, алчен пребываше.

Позна обругание. усрамися зело,

избежал есть оттуду велми невесело.

Обличитель

Друг есть обличитель, враг — иже ласкает,

сей бо душу губит, ов же ту спасает.

Обличители любити

Пчелы щадятся, аше имут жало.

плод бо их сладок, досаждают мало.

Менши же того друзи досаждают,

елма злы нравы нашы обличают,

А плод превелий деют, тем любити

оны достоит и благодарити.

Обращение

Ефиоп кожу свою изменяет.

елма ся грешник к Богу обращает.

Обращение душ

Вел и я добродетель — грешных наставляти.

от нечестия к Богу шедру обращати.

Хотящему же оны пристяжати себе

посредствия некая соблюдати требе.

Во-первых, нужда Бога прилежно молити,

да бы изволил сердца грешных умягчити.

Паки любовь правую требе есть стяжати.

да бы всяким немощем снисходство являти,

Яко же святый Павел людем снисхождаше,

да приобрящет Богу, вся всем выну бяше.

К сим кротость духа нуждно есть тому стяжати.

кто хощет удобь душы к Богу обращати.

Ибо кротость действенно слово испущает.

яко магнит железо к себе привлекает.

Еще разсуждение полезно имети,

да управляет, яко отец своя дети.

Прежде словом советным. та же прешением,

аше то не успеет, тогда язвлением.

Аще же язва вотще будет наложенна.

тая душа в огнь вечный будет воверженна.

От него же нас, Христе Боже наш. избави,

на путь правый, яко же Сам веси. настави.

Обновление

Иже естества тайны многи изследиша,

то нам во писаниих своих оставиша

О естестве змиеве: той егда познает.

яко старость и немощь его истребляет,

Многи дни яст ничто же, да кожа слабится,

та же горкую траву обрет. насытится.

Ея же сила творит онаго блевати,

мокроту ядовиту извнутрь изметати,

Яже недуга его виновна бывает,

потом, тесную диру обрет. проползает.

И тако тестнотою удобь искожится

и, лег противу солнцу, лучесы сушится.

Их же действо новую кожу устрояет,

и тем образом дивным, змий ся обновляет.

Его же нам Христос Бог велит подражати,

мудрым, яко змиеве, в делесех бывати.

Во-первых убо. должно пост нам сохранити,

от брашен и пития воздержным пребыти.

Найпаче от злоб всяких, сей бо пост есть правый.

его же по нас хощет Господь, ны создавый.

Та же горкую траву нужда есть снедати

сокрушения сердца, потом изблевати

Яд греховный чрез Тайну исповедания,

и во слезах творити душ омывания.

Напоследок, житие тесно проходити,

да бы кожу злых нравов весма низложити.

То же сотворше, прямо Солнцу требе стати

гретися во лучесех Его благодати.

Да тоя действом в нову кожу облечемся.

сиречь в добронравие, тако содеемся

Облечени в новаго внутрня человека

и сподобимся жизни безконечна века.

О дажд то, Христе Боже, да вси обновимся

и небесна царствия жизни сподобимся.

Обрезание духовное

Обрезание древле знамение бяше

рода, иже на земли Бог Себе избраше.

Ныне умерщвление плоти знаменает

в людех, яже Бог Себе в жребий избирает

Древле бяше плотское в Иудейских людех.

токмо в мужеска пола, на родственных удех.

Ныне есть духовное, общее всем людем.

и на всех удех, да вси возлюбленни будем.

К сему обрезанию Павел увещает:

Умертвите удеса ваша, всем вещает.

Яже суть нечистота, блуд, страсть, похоть злая,

лихоимство и ина дела лукавая.

Уды сия нарече, яко с них исходят

и. аки от матерей безчинных, ся родят.

Матери убо тыя нужда умертвити.

да не возмогут чад злых оттоле родити.

Ножем умерщвления обрезати благо,

еже бы не родити оным плода злаго.

Во-первых же. очеса обрезати нужда

от зрения лукава, да не зрят на чужда

Благолепая лица, яже уловляют

сердца муж неискусных и люте пленяют.

Не обреза их древле пророк воцаренны.

име на Вирсавию свободно пущенны,

И бысть в прелюбодействе, в убиство падеся,

и тако плод лукавый с очес изведеся.

Старца Исраилская тожде сотвориста,

на Сусанну очы си свободно пустиста,

И родися има смерть, ибо погибоста,

от каменования за грех свой умроста.

Обреза же я Иов, елма отвращаше

от лица девиц красных, тем же и чист бяше.

Отвращения и нам очес нож есть требе

от лиц. к обрезания духовна потребе.

Ноздри необрезаны тех муж пребывают,

иже и вмале зазрят и вся осуждают.

И далече сущая дерзают судити.

и тайных не срамятся судиами быти.

Обрезати сицевы злобы подобает,

да свою, а не чужду совесть ум смотряет.

Богу тайная сердец благо оставляти.

Ему же есть свойственно и не суща знати.

Несуждения ножем сие совершити

подобает, и тако в ползу имать быти.

Уста необрезанна людие имеют,

иже несытно ясти и сладостно смеют,

Бремене не смотряще, не знающе меры,

подражающе скоты и дивыя зверы.

Тая обрезуются ножем честна поста,

тако бывают лепа. не крива, но проста.

Язык есть необрезан многоглаголивых.

сквернословцев, клеветных. муж лстивых и лживых.

Иже. аки пес лаяй. свободно пущают

всякий глагол на люди, и тем озлобляют.

Той ножем молчания обрезати благо,

да бы не провещати ему слова злаго.

Ушы необрезанны тии соблюдают,

иже на глагол всякий оны приклоняют

Оплазиво, хотяще всем делом внимати

и неприлична себе словеса слышати.

Благовнятия ножем сия обрезати

есть полезно, и от злых глагол затыкати.

Гортань необрезанна тем людем бывает,

их же жажды множество чаш не утоляет.

Ради бы выну пити, деяти ничто же,

не зряще на адское огненное ложе.

Ту трезвения ножем резати достоит,

да бы не пити того, еже я упоит.

Или елико в славу Бога может быти

при целости разума, толико бы пити.

Персты на руках долги излиха имеют,

иже чуждыя вещы хищати умеют.

Ты даяния ножем обрезати мощно,

раздаяние взятых душы есть помошно.

Сердце необрезанно имут люди тии.

в их же мыслях гнездятся помыслы всезлии

С изволением на ня, что душу вреждает,

яко древо злоплодно во огнь устрояет.

То чистых ножем мыслей егда отребится.

въместо злых плодов благий конечно родится.

Чрево необрезанно, еже вся глощает,

яст, пиет, а: Никогда довлеет, вещает.

Сие воздержанием елма укротится.

в то время обрезанно пред Богом явится.

Ни будет бог несытных, но уд доброчестный.

во пособие членом всем в плоти известный.

Удове рождения суть необрезанны,

елма на смешение блудное суть вданны.

Что сквернит человека, Богу мерзка творит,

здравия плоть лишает, душу грехом морит.

Ножем убо чистоты обрезати требе

хотящым честно жити и быти на небе.

Ноги необрезанны право тыя звати,

яже в путь нечестивых тшивы суть ступати,

Купно яже гордостно стопы полагают,

лучшы глав чуждых себе быти появляют.

Си ножем смирения лепо обрезати

и на путь божественный стопы полагати.

По чувствующих удех, и яже лишенны

чувства части, да будут ножем отребленны

Власы убо долзии. иже что иное

знаменают, точию богатство многое,

Еже в искушение человека въводит,

печали же и скорби премногия родит

И в сило демонское многажды въправляет.

малым есть в спасение, многи погубляет?

Власы Авесолому в сила место быша,

егда его на дуб в ветвех повесиша.

Равне богатым злато в погибель бывает.

егда кто. зле стяжав е, злей употребляет.

Полезно убо сия власы обрезати.

Чим? Ножем милостыни, злато нищым дати

Тогда, яко Иосиф, елма остриженны

от влас великих, царю бяше представленны,

И богачь, егда злато потщится раз дати.

Царю веков возможет в небеси предстати.

Еще ногты велики у людей бывают.

иже ярость, сверепство лютых знаменают.

Теми силнии менших дерзают терзати,

всячески убо нужда тыя обрезати

Ножем кротости, зело Богу угодныя.

яко же человеком бедным не вредныя.

Тако ся обрезавый любезен есть Богу,

избран во жребий Его, во славу премногу.

Кто убо верный? Тщися всяк обрезай быти.

да бы тебе царствие в небе наследити.

Сего обрезания суть царства сынове.

не, иже обрезани по плоти, жидове.

Тии бо, по писмени прилежаще жити.

духа лишени. с Богом не возмогут быти.

Обретенное отдаяти

Обретый вещ чуждую должен есть отдати,

иначе за хищника достойно вменяти.

Ибо вещь обретенну не ему Бог дает.

но тако добродетель его искушает,

Да, аще не лакомец о чуждем явится,

мзды за ту добродетель в небе сподобится

Аще же погубивый не может ся знати.

должно обретенную вещь нищым раздати

Или. аще обретый скудно обитает,

с сове том духовнаго здрав да обладает.

О погубившем же вещь да молится Богу,

да даст от щедрот Своих мзду оному многу.

Обстояние града

Град некий от супостат в обшествии бяше.

иже скудости ради злу нужду терпяше.

Граждане к некоему цареви послаху

послы своя, о помощь онаго прошаху

И реша, яко крепость велия есть града

в столпостенах и во рвах, точию от глада

Нужды опосаются. того ради его

ко пособию града требуют своего.

Он, внушив послов гласы. онех вопрошаше,

аще град от Божия гнева покрит бяше,

Еже бы свыше казни не леть приходити:

Тогда аз, рече, готов граду пособити.

Аще же гнев Господень за грехи отмщает,

моя сила противу Богу не востает.

Не хощу вам помощы и малыя дати.

Богу аз есмь покорен, не имам на Нь рати.

Показа царь сей добрый, яко всуе тщится

братися. кто за грехи от Бога казнится.

Не мечем, но слезами нужда воевати,

егда кого Бог хощет за грехи смиряти.

Смиренныя мечь Божий главы не язвляет,

но мало прикоснувся. удобно прощает.

Грехи убо, во-первых, требе истребляти,

аще казни Божия не хощем страдати.

Нинивитяне тыя постом потребиша,

тако себе Божия казни свободиша.

Их разум полезно есть и нам подражати,

смирением, слезами Бога умоляти.

Объятие

Егда тело младенца одушевляется.

яко пчела велико быти вещается

Макровием искусным. Ино поведает

Аристотель, мравию токмо уравняет.

Но что-либо истинно, мало есть обое,

тем же излиха дело уму есть дивное,

Како, воплотившуся Богу, в тако тело

малое воместися Божество всецело.

Его же вселенная не может обьяти.

Той во малейшей плоти возможе витати

Оле чудесе! уме. токмо удивися.

веруй быти истинну и правде сложися.

Не по винам естества сие да судиши.

преестественно дело верою да чтиши.

Обет

Богу обещанная не ктому суть наша,

уже бо руки Его к себе та прияша.

И аще от тех нечто взимати дерзаем.

святотатство лютое пагубно свершаем.

Полезнее убо есть обета не дати.

неже от обешанных на нужду си взяти

Аще о вещи нецей обет сотвориши,

еже Богу ю дати, зри, да сохраниши.

Не дерзай на потребу твою обратити,

не хощеши ли люте Богом казнен быти.

Поминай Анания и Сапфиру его.

иже часть утаиша богатства своего,

Обещавше то Богу всецело отдати.

но. прелшени демоном, часть дерзнуша взяти

На нужды домашныя, за что казнь прияша,

судом Петра напрасну смерть оба страдаша

Обет твой аще благ есть, благо й творити,

аще же зол бе, уне делом не вершити.

Окуп

Истинна Божия того требоваше,

да Сам Бог исправит падение наше.

Мощно бе Адаму к Богу согрешите,

но не леть бе ему того примирите.

И никто чад его довле тому бяше.

не безконечно бо естество есть наше,

Грех же безконечный Адам сотворил есть,

яко безконечну Богу согрешил есть

Безконечна убо ходатая требе

бяше, таков един есть Бог, живый в небе.

Сниде убо Бог Сын в мир и воплотися,

доволен во окуп всех нас положися.

Без плоти страдати за ны не можаше.

яко сущь безстрастный, но ни должен бяше.

Воплотися убо, взя зрак должных сущих,

довле сотворити никако могущих.

Не прият же греха, токмо воплощенны,

за весь мир на окуп правде предложенны.

В плоти сгрешил Адам, Бог же в ней страдаше,

тако за грех мира должну казнь прияше.

Яже в безконечну цену воменися.

ибо безконечный Бог за ны казнися.

Тако безконечный грех есть истребленны

Богом в плоти, а род наш есть свобожденны

От ада и смерти, за что слава Тебе

с Отцем. с Духом Святым, Христе, живый в небе.

Омовение

Егда плотскую пищу мы снедаем,

обычне руце прежде умываем.

Елма же духа снедь хощем взимати.

должни от кала сердце отчищати.

Опасение

Елма ся риза кому окаляет.

друг же. то наблюд. аще опасает,

Не обыкохом за то ся гневати,

но паче поклон ему воздаяти.

Аще же порок душевный покажет.

иже геенским душу калом мажет,

Гневни бываем, не хощем слушати

тшяшася друга о том увещати.

Оле презорства! не тако есть требе

деяти жити хотящему в небе,

В не же ничто же скверно может внити.

Убо достойно есть благодарити

Сицева друга, порок истребляти.

чистителными воды омывати.

Оплазивость

Не ищи оплазиво тайн божественных,

полезно от нашего ума утаенных.

Хотяй бо величество славы изследити

не может кроме казни Божия пребыти

За то Вифсамитове мнози умерщвленны,

что оплазиво зреша в киот божественный

За то мнози мудрии в ереси впадают,

яко во Писаниих излише дерзают.

Фалес звездоблюститель на небо смотряше,

от течения нечто познати хотяше.

Замыслив же ся о нем. праше стезю пряму,

и неопасением впаде в блатну яму.

То видяши. рабыни ему поношаше.

яко. нижних не видяй. на горняя зряше.

Отсюду научимся наша дела знати,

а яже выше нас суть, на та не дерзати.

Некто мужа мудраго тошно вопрошаше,

что прежде, неже мир бе. Господь Бог деяше.

Он, вопрос оплазивый хотя отразити:

Геенну, рече, да бы в ней пытливым быти.

Зде учимся о Бозе не вящше искати,

точию елико нам подобает знати.

Иже киот закона смотрети дерзаху

оплазиво, смертию казними бываху.

Много паче, о Бозе иже испытают

выше меры, от Бога казними бывают

Христос апостолы елма посылаше,

в пути целовати никого веляше.

Да ся оплазиво не застановляют,

но повеленное дело совершают.

Комар в ноши ко свеще горящей летает,

яко любовь к светлости в себе соблюдает,

Но елма ко огневи излише сближится

беумным неопаством, впад во огнь, спалится.

Тонне оплазивии людие творяют,

в свет вежества о Бозе любовь простирают.

Но елма продерзиво тщатся испытати,

обыкоша в грех некий, яко в огнь, впадати.

И тако сами себе убийцы бывают,

яко выше сил своих о Бозе дерзают.

Освящение

Освящение мужа грешнаго бывает.

егда молитву с постом в чистоте являет.

Ибо молитва гнев к нам Божий утоляет,

пост ко милосердию Его приклоняет,

А чистотою скверна мерзка истребится.

по сих благодатию грешник освятится.

Изволи Бог некия люди освятити,

егда им во матерних еще чревех быти.

Тако Иеремия пророк освятися.

да может не грешити смертно, устройся.

Подобне Предитеча в чреве освященны,

да не множит простимых. мошию почтенны.

Но паче тех Мариа Дева освященна.

никако же грешити силою почтенна.

Еще прежде, нежели в зачатии бяше,

от первородна греха Бог ону изьяше,

А егда вторицею Духом освятися,

и Божие во чреве Слово воплотися,

Оттоле согрешити никако можаше,

ибо у твержение во благих прияше.

Оставление мира

Иаков с Иоанном въслед Христа идоша,

Зеведея и корабль и сети вергоша.

Тако комуждо нужда верному творити,

иже хощет по Христе с крестом своим ити,

Лишити Зеведея. сиречь род презрети.

ковчег, сиречь богатство, за ничто имети,

А чрез мрежы плотская умствуются дела.

Та вся, яже оставит душа, будет цела.

Оставление имений

Не иноци точию мир сей оставляют,

егда обет нищеты Богу сотворяют.

Но и в мире сущии могут то творити,

аще и со женами не престают жити.

Ибо, иже нищету терпят неропотно

и тщету восприемлют не зело нехотно.

Но Бога благодарят и на Нь возлагают

печаль, тии мирская добра оставляют

И иже не излише о земных пекутся.

оставители мира вправду прозовутся.

И умерщвляющий себе деют тожде

и достойни бывают имене тогожде.

Еще избравший вся лютая страдати.

неже малейшим грехом Бога прогневати.

Вся своя оставляют и приимут себе

в стократ воздаяние в пребогатом небе.

Благо есть вся земная людем оставити,

но не всякому мощно сие сотворити.

Ему же либо убо сие трудно зело,

да тщится поне сие сотворити дело:

Да держит сам мирская, не ими держится,

да правит я по воли, не сам да правится.

Паче бо человеку теми подобает

владети. неже да ся сам им подчиняет.

Вся бо человек деля создана от Бога,

не их ради человек. аще зело многа.

Все убо временное да будет в потребе,

а желание сердец всех буди на небе.

Земная во пути сем в нужду да держатся.

ум же. воля и память к горним да стремятся.

Мимоходно здешняя достоит смотрети,

а прямым сердца оком на вечная зрети.

Се мы вся оставихом. к Христу глаголаше

Петр святый, егда вослед Онаго хождаше,

А мало вещей име, что убо остави?

Мрежы негли точию. яко весма яве.

Не мало воистинну, ибо что любил есть,

и чим питаше дом свой, все то оставил есть.

Еже есть зело много, тем же не грешаше.

егда предреченное слово глаголаше.

Осуждение

Бог Отец весь Суд Сыну Своему отдал есть.

Сын же нам не судити ближних завещал есть.

Егда мы убо ближних наших осуждаем.

скипетр Христу отъемлем, жезл Его хищаем .

За что жестоким судом имать ны судити.

Не судим убо. да бы не судимым быти.

Грешник сам сый ближняго елма осуждает

о гресех, сам на себе суд достойны дает.

Не хотяй от ближних си в гресех судим быти

да не дерзает греха друг своих судити.

Ею же бо мерою мерити кто тщится.

всяко точною ему от друг возмерится.

Грешный аще грешнаго брата осуждает,

во ином лице злобу свою обличает.

Осязание

В обители некоей инок юный бяше,

иже многи от страстей досады терпяше.

Не може коснутися своим срамным удом

без мыслей злых, но с многим в уме брася блудом.

Тем обет сотворил есть тым ся не касати.

а щ е бы и велику болезнь пострадати.

Демон, того не любяй. пакость сотворил есть,

тяготу ему в срамных удех положил есть.

Даже свинец носити себе непшеваше.

а не плотския уды, о коль тяжко бяше!

Трудися бедный инок, скорбь с срамом таил есть,

но нужде належавшей, неким известил есть

Начали ик благоумный ял есть совещати.

да ся не опасает удом прикасати.

Он. обет поминая, излиха бояся,

от прикосновения всячески держася.

Терпе тяготу выну, а что бе, не знаше,

рукою коснутися удом не дерзаше.

Видя беду, началник его пригласил есть,

себе уды явити онаго нудил есть.

Послуша отца юный, пред мужем толиким

показа тайный уд си со срамом великим.

И се здрав совершенно уд онаго бяше.

токмо притвор демонский бедному стужаше.

Оттоле инок скорби тоя свободися,

зрения мужа честна демон устрашися.

Смири себе мужь святый, что есть срамно зрети,

гордый враг не возможе того претерпети.

Исчезе со притворством, инок свобод бяше,

благодарствие отцу началну творяше,

Яко не возгнушася срамных уд смотряти,

самем зрением врачбу скорби содеяти.

Я [А йотированное]

Язва

Дух зол во душах наших язву сотворил есть.

Дух благ, ибо Бог Христос, ону исцелил есть,

Подобаше бо язву, духом сотворенну,

имети от лучшаго Духа исцеленну.

Язвы Христовы

Христос воскрес из мертвых, язв не исцелил есть,

в руку, в ногу и в ребрех оны оставил есть,

Не во тли знамение, ибо украсися

плоть вены небесными, егда воскресися.

Бысть нетленна и светла, скора, тонка зело,

даже яко Дух везде проникаше тело.

Осташа же ты язвы за вины честныя.

яже от муж премудрых считаются сия.

Любве изъявление вина есть первая,

да в язвах нами зрится любы пресвятая.

Да чрез сия зрим скважни милость превелику,

яже на смерть лютую понуди Владыку,

И да видим ранами щедрость Христа Бога,

ею же сведен в мир сей с небесна чертога.

Вторая вина язв сих — да ся возбуждаем

во взаимную любовь и в ней пребываем.

Руце же Свои Христос рабом Си являет,

язвами Си на подвиг с врагом поощряет.

Ребра прободенная оным же явил есть,

ко взаим люблению себе я будил есть.

Божественне Си нозе егда показал есть.

еже тещи жесток путь, тыя наставлял есть.

О Источниче любве. что реку о Тебе?

В язвах Ти хощу паче жити, неже в небе.

Ты мя не забыл еси, аз ли Тя забуду?

Буди Ты всегда во мне, и аз в Тебе буду.

Третия ран вина тех — да в них уповаем,

а не в наших надежду делех полагаем.

Дела, яко рубище поверженно, наша.

но от заслуг Христовых цену многу взяша.

Теми, яко медь златом, крашенна бывают

и нам от Бога Отца милость притяжают.

Внесл Христос раны в небо Отцу Си являти,

да их ради изволит грехи нам прощати.

Четвертая вина есть, да бы нам умети

всякия скорби, беды без ропта терпети.

Аще бо без греха Сый пострада толико,

нам грешником страдати должно есть колико

На ты язвы страдалцы елма возглядаху,

аки в чуждых телесех за Христа страдаху.

Не чувствоваху ран си, егда ум впериша

в раны Христовы, в них же усердием быша.

От пресладкия раны, яже умерщвляют

мертвенность во телеси. а дух оживляют

Пятая вина тех ран есть утешение

правых во день Суда, а злых обличение.

Тогда бо праведници о них утешатся,

нечестивии паки вечно постыдятся.

О добрых, аки уста, будут глаголати

раны, да бы им вечно с Христом царствовати

На злыя покажутъся сей глас износити:

О грешниче, что еси ты дерзал творити?

Ты рук твоих делесы лукавыми зело

пригвоздил еси кресту сия длани смело.

Ты, ходя путем злобным, проби ноги сия,

путь правости за твоя страда пути злыя.

Сия перси за любовь прободенны к тебе,

да, в ня вселся, будеши житель в светлом небе.

Ты же пренебреги еси во онех витати,

в язвах исцеления твоего искати.

За сия вины язвы осташа Христовы.

Ты. верный человече. пребуди готовы

Усты сердца твоего оны целовати

и сицевыя гласы любезно даяти:

О язвы пресвятыя, язвы Христа Бога.

вами есть исцеленна язва в мире многа.

Вами жизнь всему миру вечно источися,

егда кровь Христа Бога на кресте пролися.

На вы аз очы сердца выну воздвизаю,

света им небеснаго свыше ожидаю.

О язвы! Весь аз во вас хощу всегда жити,

да возмогу вечныя язвы свобод быти.

Егда за весь мир Христос пострадаше.

пять ран глубоких плотию прияше.

Две в ногу, две же в руку, а едину

в персех Божию даша врази Сыну,

Иже, егда бысть смерти победитель,

не хоте тех ран быти исцелитель.

И в прославленней ты плоти являет,

в хвалу я имать, не в срам поставляет.

Яко бо звезды небо украшают,

бисери драги в вещех в честь бывают.

Тако и раны в Христове телеси

дивна лепота в светлом суть небеси.

Кия же вины суть тех хранения,

внемлите гласу его явления.

Первая вина — яко воем раны

в славу, не в нечесть бывают писаны,

И они убо тех не сокривают,

но, яко знамя службы си, являют.

В похвалу убо плоти пресвятыя

изволил Господь сохранити тыя.

Вина вторая — да кождо то знает,

яко Божество в плоти пребывает,

И яко Той же, сошедый с небесе,

а не ин телом, из гроба воскресе.

Божества знамя есть воскресение.

человечества — язв сохранение.

Вина третия — дара ны являет

Отцу, и за ны Ходатай бывает,

И да известно выну то нам будет,

яко пещися о нас не забудет.

Вина четверта. да мы возглядаем

на язвы Его и любовь познаем.

За ту же взаим да возлюбим Его.

Искупителя и Спаса своего.

Вина пятая — язвы соблюдает,

да я на Суде Страшном появляет

Благим в утеху, злым в посрамление,

овым в блаженство, сим в осуждение.

Имать же оны присно соблюдати.

да, зряще знамя Его благодати,

Благодарствие во век возсылаем,

песнь победную Агнцу воспеваем.

Яма

Иже под другом си яму копает,

сам многократно во ону впадает.

Юже кто другу си яму копает,

праведным судом сам в ону въпадает.

Мардохееви древо готоваше

Аман, но на нем сам повешен бяше.

Я [Юс малый]

Язык

Епископ некто от еретик яся

и ко ереси ими понуждася.

Но, стоя добле. в правде пребывайте,

за то отрезай язык ему бяше.

Бог же всешедрый даде ему слово

и без языка имети готово.

Враг паки лстивый на то искусил есть,

яко во сердцы он ся возгордил есть.

Доброте своей чюдо причитая,

не милость Бога вину быти зная.

Тем праведная казнь Богом пустися.

даннаго слова во устех лишися.

Не ктому могл есть того провещати .

да. сложив гордость, весть себе смиряти.

Звери, птицы и гады мощно укрощати,

язык же свой есть трудно комуждо держати.

Ты аще желаеши того укротити.

яже ти предлагаю, тщися сохранити.

Уклоняйся народа и предмысли тебе,

что ти беседовати и когда есть требе.

Моли слова от Бога, и то да судиши

к кому и чесо ради беседу твориши.

Да помниши же. яко вся Бог исполняет,

словеса твоя слышит и дело смотряет.

Помни языка ползкость, и еже раждает

зло человеку, егда изуздан бывает.

Устам проси от Бога твоим хранения

и дверей со Давидом тех ограждения,

Да теми полезное слово испустится.

неполезное паки в онех заключится.

Предложи же во уме, еже впредь держати

язык от словес многих, устне печатати.

Тако неукротима леть есть укротити

и всякое солию слово растворити

Скорпий егда усекнет. сам в целбу бывает.

сотрен бо и приложен, язву исцеляет.

Точне язык злословный славу поврежденну

глаголанием благих творит исцеленну.

Зерцало порок, иже на лице, являет,

язык многоглаголющь тайны окрывает.

Яко необузданный конь ся претыкает

и ездца си на землю люте низвергает,

Тако, аще чий язык свободно пустится,

глаголяй падения люта не лишиться.

Фезвитянина язык ключь небесный бяше,

ибо, егда хотел есть, облаки строяше,

Еже дожда на землю жадну низпустити,

и во казнь грехов тыжде словом заключити.

Язык стрелу острую мощно нарицати,

яже триех обыче купно убивати,

Егда бо клеветныя глаголы вещает,

оклеветаемаго в славе убивает,

Слышащаго любезно язвит душу зело,

и клеветник душею мертв, глаголю смело.

Аще же слушатели будут умножени

вси тем злым орудием падут умерщвлени.

Оле зла орудия! кто онем стреляет.

от страны демонския той ратник бывает.

От него возмездие имать восприяти,

во огни негасимом во веки страдати.

Малая часть телесе — язык человека,

но не виде злейшия никто же от века,

Ибо. аще малое слово изпущает,

хулно или клеветно, многи убивает.

Легко оно исходит, но язву велику

и зело тяжку в сердце деет человеку.

Мягко аер проходит, но в сердце жестоко

вонзаетъся и рану творяет глубоко.

Из уст, яко же птенец малый, излетает,

но. яко велбуд с горбом, абие бывает

И никими мерами может ся сокрити,

весть же сердца человек многих озлобити.

Убо разсудно слово всякое пущайте,

да не будет стрелою, прилежно смотряйте.

Аше бо. яко стрела, пойдет, то вратится

не к языку, но в сердце, и в смерть преложится.

Иаков, брат Господень, язык обхуждает,

дванадесять худостей тому причитает.

Яко подобен коню сверепу творится,

елма никоею же уздою кротится.

Яко, мал сый плотию, великая деет

и паче величайших хвалитися смеет.

Яко, подобне искре мал сушь, сожигает

превеликия вещы и воничтожает.

И неправое дело весть лепотствовати.

и лукавое слово за правду подати.

Все же человеческо тело окверняет,

яко всякия злобы в оном защищает.

И коло рождения палит он нашего

многими злобы чрез глас словесе своего.

Сам же ся из геенны огнем воспаляет,

да невинныя уды Церкве сожигает.

Толь же неукротим есть, яко укротити

удобней зверя всяка, неже й смирити.

Неудержимо бо зло, что хощет, дерзает,

на Бога и на люди словеса пущает,

А смертоносна яда зело исполнися,

блажен, иже тем ядом его не вредися.

Бог, да благословим им, изволи й дати,

а он дерзает ближних словом проклинати.

Тем источнику дивну подобен бывает,

иже сладку и горку воду источает.

Сия слыша, языку кто не почудится,

како во мале уде толико местися

Деяний злобных велми, елико во цело

видится неудобно воместити тело?

Удивлше же ся тому, нужда укрощати ,

да бы за нь человеку всему не страдати,

Он бо един изречет, а казни велики

на душу и на тело будут от Владыки,

От них же сам ны, Христе Боже наш. избави,

язык благи глаголы вещати настави.

Что есть неукротимо никими силами,

еже от создания бышествует с нами?

Малый уд язык зело есть неукротимый,

аще есть оружия всякаго не имый.

Волны моря шумяща песок укрощает,

всяк зверь лютый и птица кротима бывает.

Сам язык есть прежесток, его же никто же

никоим же образом смирити возможе.

Зол огнь, яко все палит, но язык лютейший,

ибо сквернит все тело, от зверь сверепейший.

Острей, неже мечь или стрела изощренна,

язва его змиина. рана — безврачевна.

Паче же кто видел есть две вещы противны,

плод вины единыя, яко язык лстивны

Плодствовати возможе. Бога величая,

в образ же Его бывших человек хухная.

Он орудие клятв и благословения,

от него раждаются свары, смирения.

Лжю он глаголет, тако ж истинна от него,

правда и прелщение рождение его.

Он губит и спасает, кто ж употребити

угодно й может и силу укротити?

Просяй себе от Бога устом хранения

и дверей с псалмопевцем уст ограждения,

Храняй сердце нескверно и ум довлественный.

косен глаголати, се муж есть храборственный.

Иже брозды языку возможет вложити.

неукротима уда без труда смирити.

Язык и очи воздашася

Елма Ирина престол царствия держаше,

Лев на престоле Римстем епископ седяше,

Иже, елма Господу во храме молися.

ят от Римлян, языка и очес лишися.

Но Господь ему очи и язык воздал есть.

виде светло и слово изрядно вещал есть.

Нечестивии тем ся чюдом не страшиша,

паки емше онаго, тожде сотвориша.

Но и паки Господь дал зрети и вещати.

тако весть рабом Своим в бедах помогати

Иже убо гоним быв, в Галлию вдадеся,

бегством от злочестивых убийства спасеся.

Языци огненнии

Во языцех огненных Дух Пребожественный

на апостолы бяше свыше низпущенный

Во знаменование. яко возпалити

огнем любве имеша мир. и очистити

От греховнаго мрака, купно и согрети.

еже бы неверия мразом не ледети

Огненнии языци то знаменоваху,

яко тепло вешати слово должни бяху

Апостоли святии, ибо, где седает

Дух, рвением и словом умы исполняет.

Дает язык огненный, еже бы учити.

и огнем любве сердца слышащих палити.

Инако тщетно глагол учитель вешает.

аще пламене любве в сердцах не вжигает

Огнь язык в человецех прежде Христа бяше

и рождения коло нашего паляше.

На той покаяния Христос воды дал есть,

ины же огневидны языки послал есть

Святым апостолом Си, да в людех такия

возпаляют языки, скверны палящыя.

С небесе огнь сей сниде, и в небо вселяет,

кто-либо его действом язык разпаляет

Ов же бяше геенский и в ню низвлачаше.

яко богатаго, иже вопияше

Ко Аврааму отцу Лазаря послати

на язык горящ каплю воды едну дати.

Оле огня лютаго! зде й угашайте

слезми покаяния, а горний взимайте

В сосуды сердечныя, в уста, в языки,

возгнещайте ко Богу любве огнь великий.

Да, иде же любимый в славе пребывает.

тамо душы вашя пламень возношает.

Язычливый

Несть леть стрелы надолзе во язве терпети.

не леть в тайне язвичным словесе имети.

Еже оным аше кто дружеско вверяет,

то их сердцу, яко же стрела, досаждает.

Пс

Псалмопение

Церковь Духом Божиим правима бывает

и ничто же суетно верным уставляет.

Между инеми чинми святых псалм чтение,

инех же доброгласно и сладко пение

Велми душеполезно верным уставися,

тем, всякий человече верный, усладися.

Первая же есть полза. яко любовь многу

во сердцах ледей верных возбуждает к Богу.

Вторая — яко тех же сердца съединяет,

яко многих едино пение бывает.

Третяя — яко сладость во сердцех родится,

егда псалмопение говейно творится.

Четвертая есть, яко силы подражаем

небесныя, егда глас пения издаем

Во славу Бога жива, ибо они Его

выну славят пением, Здателя своего.

Псалмопение знамя есть мира любезна,

упражнения ума жителя небесна.

Печали сердечныя удобь прогоняет,

а душу веселием чистым исполняет.

В печалех убо ваших псалмы воспевайте,

несуетными делы себе упражняйте.

Псалмопения полза во Церкви велика,

зане же примиряет Богу человека

Глаголанием хвалы, достойныя Тому,

яко едину сущу Богу истинному.

Ктому душу вернаго от грех очищает

и мысли сердец в небо зело возвыжшает.

Учит догматом правым, обличает злая,

велми же ублажает делеса благая.

Настоящая светло уму предлагает,

будущих гадание премудро являет.

Аще же и безчинный муж псалмов любитель,

тех силою зла нрава будет победитель.

Аще злых творец многих будет, и ленивец.

бодр и удобрен будет сладких псалмов певец.

Аще духом немощный сердцем низпадает.

псалом, устрабив того, горе воздвизает.

Пойте убо вси Богу псалмы, человеци,

пойте грешнии умно, купно праведници.

Праведником готова от Бога мзда в небе,

ты. грешниче, заслужи подобную тебе.

Псалом

Душ упокоение псалом божественный.

богомудрым Давидом во Дусе сложенный,

Бури и волны мыслей удобь укрощает,

разгласных сердца любве союзом счетает.

Вражды истребление, брозда гнева страсти,

скорое изъятие из люты напасти.

Псалом демоны гонит, в помощь призывает

аггелы небесныя и радость раждает.

Псалом во страсех нощных безбедство винует.

по трудех дневных покой пресладкий дарует.

Псалом шит есть младенцем, юным же красота,

мужем честным утеха, старым же лепота.

Девам благолепие. жен украшение,

всякаго чина людей возвеселение.

Псалом пустыни гласом своим услаждает.

в умех человеческих мудрость разширяет.

Начинающым благ путь есть возбуждение,

добре же в нем текущым есть поспешение.

Совершаюшым паки есть он совершенство,

устрояющее я во вечно блаженство.

Глас Церковный псалом есть, аггелская сладость,

божественне живущих небесная радость.

Пойте убо Богови псалмы умиленно.

непрестанно хвалите имя Божественно.

Он же вам даст во мире в радости пожити

и агтелское в небе пение гласити.

Освящение душы есть псалом священный,

златыми рече усты отец божественный.

Согласие красное сердец православных,

во жилище Господу любезно избранных,

И зело стрела остра, от Духа всеблага

данная правоверным на лукава врага.

Не толь елени от стрел железных гонзают,

коль демони от псалмов скоро исчезают.

Взем Давид древле гусли, псаломски играше,

а демон от Савла абие бегаше,

Псалмом паче язвенный, нежели острою

елень язвлен бывает от стрелца стрелою.

Псалма демон боится, егда бо читаем

псалом. Господа хвалим, молбы сотворяем

О избаву от его лукава навета.

а он молитв гонзает, яко же нощь света.

К тому в речех псаломских враг ся проклинает,

тех он, яко Громовы стрелы, утекает.

Пойте убо. братие, псалмы живу Богу,

а Он помощь послет вам на враги премногу,

И того победившым венец имать дати,

им же бы вам во веки в небеси сияти.

Ф [Фита]

Трон истинны

Еже есть о блажайшем Судии беседование,

избраннейшими некими образы судебными, на меди

прехитростне и преизрядне нарезанными, изъяснен.

Пред Соломоном царем пря двею бывает

жену о сыне живе. Мудрый разсуждает,

Кая мати мертваго, кая же живаго,

обе бо не могосте родити еднаго.

Велит полма пресеши. обема отдати

по части, но абие отрецает мати.

Ложной жива пушает. Тако разсудися

от любве царем мати, той сын возвратися.

Обетщавшая в злобе старца умыслиста,

да любы творит с ними Сусанна с жен чиста.

Егда же ю познаста неприклонну быти,

целомудру начата лжами поносити.

Ведеся на смерть жена, но Бог свобождает,

отрок Даниил мудре лесть их проявляет.

Тако лесть чистотою славно победися,

двоица лживых старцев каменми побися.

Зрите горкия страсти, виждь Бога казнима.

Его же томит люте рукама своима

Род жестокий, и люди, свойственнии Богу.

ненавистми. жестотми мучат попремногу.

Пилате, царя земна гнева ся боиши,

а небеснаго Царя зле на смерть судити.

Но, зане же гнев Отчий неутолим бяше

инако, сице Христос волею страдаше.

Злый Каракалла, брата умертвив своего.

дерза. Папиниане. помощи твоего

Гласа просити. но тя глас твой ублжает,

ибо злу пособити мужу не дерзает,

О нем же понудися главу подклонити

под острую секиру и умерщвлен быти.

Но мучителю злая слава последствует,

тебе честь и похвала вечно присутствует.

Повеле царь Камвизес судию казнити,

неправедно судивша всего изкожити.

Бысть слово делом. кожа паки положися

на седалиши судном, иде же грешися.

На ней сын изкоженна отца посадися.

отчею правусудства смертию учися.

Но вяшше греха казнен судия, речеши.

Что жь творити Суд правый весма да почтеши.

Никто же да возмнит си безказненно быти

странным путем, истинна неже велит жити.

Не сицев Гвилиелм есть, но правды хранитель,

рекш: Кровию грех мыяй да будет правитель.

Он земледелцу краву повеле отдати

и абие преступце главу урезати.

О княже преголемый. над всеми богатый,

имаше везде имя, яко венец златый.

Судии Цекропидов Ареопагити

в темныя время нощи избраша судити.

Тогда бо цветет хвала ума божественна,

тогда лица не зрятся, и вся утишенна.

Того ради от Еллин нощь именовася

благая советница и добре прозвася.

В ней бо совети, в ней страх умы исполняет,

чюветва паки день чиста и молва вреждает

Истинны стражь праведный и друголюбитель,

Виас бяше во суде верный злоб отмститель.

Елижды злободейцы на смерть осуждайте,

лице свое слезами горце обливаше.

Не достоит, глаголя, с крови ся тешити,

кто желает отчины отцем речей быти.

Паче слезами нужда болезнь проявляти,

обаче винных казни правой предаяти.

Царь Александер найпаче вславися,

яко, брегл правды, выну в ней глумися.

Уст не отверзе, даже обем вняше

странам, лица взор всячески отьяше.

Важдущу убо даяше едино

ухо. важденну соблюдаше ино,

Заткнув перстом си. Кто, не слушав, судит,

и право судя против правды блудит.

О вы. страж, им же правда есть врученна,

законы даде правда божественна.

Недвижни будте ради благодати

от правды, и слез не знайте взирати.

Несть лепо молбам правду попирати,

колми за злато истинну продати?

Страсть, дружбу, вражду забыть подобает,

кто правосудство соблюсти желает.

Судии дело правилы вершится,

пучину дела всяк им да судится.

Убо прилежно аще разсмотренно

дело, да будет абие вершенно.

Несть же леть винна казни свободити,

колми же паче безвинна казнити.

Царю леть вящше. может бо простити

(обаче не все) и живот дарствити.

Судии градов, им же правду знати

весма есть нужда, и всем суд даяти.

Право судите, ибо пред Христово

Судище ставше, дасте о всем слово.

Его же время зане утаенно.

молитвы дейте и бдите бодренно.

Да не пронзет вас труба и Суд правый

в день он престрашный Христа Царя славы.

Солнце едино весь мир озаряет.

Бог превыспрь небом един обладает.

Тако во царстве един имать быти

царь, вся ему же достоит правити

Обаче в помощь трудов нестерпимых

да имать совет муж благочестивых.

Еже Моисию тестем совещанно.

всяк царь да возмнит к себе глаголанно.

Фома

Фома жестокий камень неверием бяше,

егда воскресения Христова не знаше.

Но в сына Авраамля камень преложися,

егда верен Христови потом сотворися.

Сосуд бе прежде в нечесть, та же измененны

в сосуд во честь Богови бяше преложенны,

Егда. аки в горниле, злато очистися.

елма в язвы Христовы рукою вложися.

Егда в язвы Христовы перст Фома вложил есть.

абие очи его Господь просветил есть,

И узрев умным оком Христа Бога быти,

нача: Господь мой и Бог, пресладко гласити.

Мы ум наш в язвы Его потщимся влагати.

да просветит Своея светом благодати.

Еже божество Его оком веры зрети

и: Господь мой и Бог мой, со Фомою пети.

Лишенная в книзе

Глас Божий страх

Глас Господень огненный пламень пресецает,

егда от горячести светлость отлучает.

Светлость имать во радость святых обратити,

горячестию того грешники казнити.

Молния

Молния влагалища меча не вреждает.

а внутрь его железо иногда скрушает.

Подобне, грехом аще тело не вредится,

но внутрь онаго душа грешная мертвится.

Подражание Христа

Христос за ны страдал есть мучения многа.

Бог за люди, мы люди да страждем за Бога.

Он за ны крест Свой взял есть, на нем пригвоздися,

висе срамно, руган бысть. люте умертвися.

Мы о имени Его за честь и за славу

возмим крест бед всяческих и подклоним главу.

За кровь Его святую тшимся не щадити

до последняя капли крове си излити.

Гвоздие Он острое нас деля страдаше

и на прободение бок копию даше.

Мы за Нь всяких орудий да не устрашимся

на копии, на мечы охотно дадимся.

Уне та Христа ради во мире страдати.

Его подражающе. неже сластьствовати.

Ибо по сих горести вечна будет сладость,

по многослезных скорбех — безконечна радость.

Не хотяй же за Христа зде лютых страдати

не возможет в небеси благих восприяти.

Страх Божий

Жезл Моисиев во змия егда преложенны,

жезлозмий злых волхвов тем суть поглощенны.

Тако страх Божий страха лютаго снедает,

человека на благ путь выну наставляет.

Вивлиа

на листе 1

Священнаго Писания Ветхаго и Новаго Завета

изображений исторических подписания, равно-мерно

и краесогласно устроенная.

Бог небо, землю, воды словом созидает

и по тме первобытной свет в мире являет.

Солнце, луна на небе Богом утвердися.

земля травою, древы ливне украсися.

Звери, скоти и гади словом сотворенны,

рыбы в водах, птицы же из вод изведенны.

В день шестый Бог изволил Адама создати

и мир во область ему аки царю дати.

Господь сон на Адама сладкий напустил есть,

из ребра его Евву в помощь сотворил есть.

Змий ветхий, вшед во змия, Евву искушает.

злым советом лукавый к греху увещает.

Будете яко бози, враг ей глаголаше.

взяла Евва яблоко и Адаму даше.

Гонит аггел из рая Евву и Адама,

толикия же казни винна быста сама,

Яко змиеви веру лукавому яста

и быти яко бози прегордо желаста.

Плачется Адам рая. а землю делает,

Евва же во болезни чада си раждает.

Богу Авель жертвою благоугождает,

Каин, тому завидя, брата убивает.

Адам живет во трудех, Сиф малый играет,

Евва с иными чады пищу устрояет.

Енох в страсе Божии выну пребываше,

благочестию дом свой всегда обучаше.

Жертвами Господеви благоугодил есть,

тем его живаго в рай Господь преселил есть.

Велением Господним корабль созда Ное,

им же спасеся от вод животно всякое.

Невшедшии во корабль в водах потопают,

ини вотще на горы, на древа гонзают.

Бог с Ноем по потопе страшном примирися,

во знамение мира дуга положися.

Ною обнажившуся. сын ся Хам ругает,

Сим же со Иафетом нагость покрывает.

Умножшеся людие, столп велий твориша.

разделением язык дело оставиша.

Аврам с Саррою, с Лотом, со всеми рабами

идет в чуждую страну с многими скотами.

Пастырей брань Аврама с Лотом разделяет,

ов оста, сей в Содоме дом си назидает.

Мелхиседек Авраму хлеб, вино вручает.

Богу помогшу ему. хвалу возсылает.

Благословит Аврама, сей же отделил есть

десятину ему всех. яже запленил есть.

Ко Авраму под Мамврииск дуб мужи придоша

три. ядше ту, о сыне ему предрекоша.

Двоица во град Содомск аггел прихождает,

Дот же благочестивый любезно сретает.

Огнь сожже Содомский град. Лот избег, упися,

со дщерема своима, яко муж, смесися.

Авимелех Царь Сарру мужеви отдает,

не познав ея плотски, и обогащает.

Дает бо овец, волов даяния многа

и тысящу сребреник, наказан от Бога.

С Измаилом Агару Авраам пущает

из дому на свободу. Сарру утешает.

Та бо: Изжени рабу, ему глаголаше,

Исааку наследства сыну си желаше.

За скудость воды чадо Агарь повергает.

далече седши, смерти его ожидает.

Но аггел ю утеши. веле сына взяти.

и узре воду, еже жажду утоляти.

Авраам Исаака в жертву хощет дати.

но аггел велит руку с ножем удержати.

Увидев же Авраам овна, закла его,

ублажен и утешен от Бога своего.

Посла Авраам раба девицы искати,

юже бы Исааку сыну в жену дати.

При кладязи Ревеку раб той обретает,

яже его водою жажду утоляет.

Сто седмьдесят и пять лет прежив, преставися

Авраам и от чад си в гробе положися.

Брат Иаков Исаву гладну брашно дает,

от него же первенство за оно взимает.

Иаков Исав быти отцу притворися

и благословения его сподобися.

Мати юношу того дела научает,

егда диваго Исав зверя устреляет.

Иаков на камени в пути положися.

на Лествице Бог ему утвержен явися

Во видении сонном. Аггели схождаху

с небесе на землю, и ини восхождаху.

Иаков при кладези стада обретает

пастырей, о Лаване тощно вопрошает.

Видев дщерь его Рахиль, камень отвалил есть

от кладезя и овцы ея напоил есть.

Иаков со аггелом борбу совершает,

егда с жены и чады в дом ся возвращает.

Зде жила от аггела ему усушися,

имя ново Исраиль тем же наложися.

Исав с многими вои брата, срет, лобзает.

Господь ярость на любовь в сердце изменяет.

Дщерь Иаковлю Дину Сихим восхитил есть

и. страстию палимый, деву ту растлил есть.

Симон и Левви злобу толику отмстиша,

Сихима и пол мужеск во граде избиша.

Иосифа братия в ров сухий впущают,

потом за двадесят й сребреник продают

Купцем Мадианитским, иже й купиша,

в Египте Пентафрию за цену пустиша.

Иуда, грядущ в стадо, жену усмотряет;

та невестка бе его, он того не знает.

Даде Фамаре заклад и совокупися

с нею. и с того Фарес и Зара родися.

Жена Пентефриева Иосифа нудит

красолична юношу, да он с нею блудит.

Вземлет за ризу его, он ту оставляет,

яко змия, блудныя жены отбегает.

Иосиф Фараону сны благо толкует,

За то Фараон его велико чествует,

На своей колеснице его посаждает.

вси ся кланяют, Египт весь ему вручает.

Иаков во Египет посылает чада

пшеницы ради во дни превелика града.

В Египте Иосифа братия не знают,

да продаст им пшыницы, к ногам припадают.

Иосиф братию си обидно питает.

Вениамину в пять крат части болшы дает.

Мужеск пол во Египте егда рожден бяше.

убивати й бабам царь повелеваше.

Потом людем завеща младенцы топити

Иудейския, да бы тым ся не множити.

Дщерь Фараоня сниде. да ся окупает,

Моисия из вод взяти девам завещает.

Иудеи в Египте тяжко работают.

лютии приставници язвы налагают.

Видя то, Моисий зело жалостен бывает,

убив Египтянина, в песце сокривает.

Иофоровы дщери овцы напаяют.

пастырие чуждии оны отревают.

Моисий обидящыя сылно отражает.

тем единой от девиц супружник бывает.

Купину горящую Моисий созерцает,

яже огнем палима, нимало сгоряет.

Елма же восхоте он близу приступите.

Бог из купины веле сапоги лишити.

Моисий со Аароном царя увещает.

да люди Бога жива жрети отпущает

Утружденныя, и жезл койждо свой вергает,

абие змий из жезла престрашен бывает.

Жестоку Фараону казнь си сотворися,

все царствие жабами лише исполнися,

Даже в полаты его тым гадом скакати.

вся сосуды и пищы мерзко оскверняти.

Исраилтяне Пасху тошно совершают,

агнца с опресноками стояще снедают

Израилю путь морский проходен явися.

Фараон же со вои в понте погрузися.

Жезл Моисиев глубину в сушу преложил есть

и паки разделеньи воды съединил есть.

В пустыни оскуде снедь, людие роптаху.

но от Бога всещедра манну восприяху,

Яже пада из облак, всяк вкус содержаше,

выше нужды собравшым в черви ся вращаше.

Во безводной пустыни Моисий ударяет

камень жезлом, абие вода изтекает.

Амалик на Евреи ратно наступает,

Моисий руце на горе горе воздвизает.

Тому руце воздвигшу, враг побежден бяше,

се образ токмо креста силу подаяше.

Во пустыни Синайстей Моисия глашает

Бог на гору высоку и заветы дает.

Велит киот завета, жертвенник создати

и на вся нужды сени от людей взимати.

Образ же их красота се зде написася,

и архиерей в ризах своих показася.

Елма Моисий на горе с Богом глаголаше,

тогда Аарон телца злата содеяше.

.Людие же играху, что, егда внушил есть

Моисий, и Богом данну скрижаль сокрушил есть.

Ааронова чада завет преступиша,

огнь простыя в кадилницы своя положиша.

За то огнь, сшед от Бога, она сожигает,

Моисий со Аароном страха полн бывает.

Сходницы в обещайней земли грозд взимают,

да полком Исраилским плодность изъявляют.

За роптание Господь люди наказал есть,

смертоносныя змии на оны послал есть.

Но и врачевство даде, медянаго змия,

иже от смерти цели на ся возревшыя.

Валаам Исраиля идет проклинати;

ослица зрит аггела, тем же ся воспяти.

Валаам биет ону, она слово дает:

За что мене биеши? Волхв ся умудряет.

На верх горы Моавли боговидец взьиде

и оттуду всю землю обещанну виде.

Но не вниде в ню за грех, тамо умирает,

а Бог аггелом тело его сохраняет.

О теле Моисиеве велия пря бяше,

враг явити. аггел же таити хотяше.

Враг жела телу чтиму божественно быти,

аггел, да не будет блазнь, тщася то сокрыти.

Икон вивлииных часть вторая

Исус Наввин киоту завета предходит,

ко Иордану люди Божия приводит.

Преносиму киоту Иордан путь дает,

разделився надвое, як горы бывает.

Дванадесят каменей людие взьимают,

да в стане полков в память вечну полагают.

Иерихон с ковчегом Божиим обходят,

иереи трубныя гласы производят.

Егда же седмый обход в день седмый свершися,

тогда Иерихон град вконец разорися.

Иисус Наввин к граду Гаю приступает,

простер руру с копием, пресилен бывает.

Тогда бо вои его град он запалиша,

царя Гайска и люди его изтребиша.

Пять царей Аморейских на Гаваониты

восташа, умысливше град их разорити.

Иисус граду в помощь солнцу веле стати.

Бог каменный дождь дал есть на злы сопостаты

Ини на Иисуса царие прийдоша,

но пред воинством его от мечей падоша.

Се царь Адонивезек что иным творяше.

обсечение перстов и сам пострадаше.

Седмидесяти царем он то сотворил есть.

Иуда вожд Исраилск ту казнь на нь судил есть

Сысарра от Барака побежден бегает,

Иаиль его в куще своей покривает.

Воды просивша млеком жажду утолила.

но спяща колом к земли в главу пригвоздила.

Гедеон мяса и хлеб пресный полагает

под дубом на камени, юху возливает.

Аггел жезлом коснуся. жертва воспалися,

тем знамением муж сей на брань утвердися.

Гедеон от Господа знамения просит,

да во знамя свободы руно ся оросит.

Во другу нощь да тожде сухо проявится.

всей земли сущей мокрой, и тако творится.

Хотя Гедеон полки своя умалити,

веле от источника ратным воду пити.

Иже убо яко пси языком локаху,

триста числом, сии с ним на враги идяху.

Вои Гедеоновы трубный глас пущают,

скуделы сокрушивше, свещы проявляют.

А вои Мадиамли зело ся смутиша.

вдавшеся в бегство, мечы сами ся избиша.

Авимелех к Фивийску столпу приступает,

изломком й жерновным жена убивает.

Он оружиеносцу велел ся пробити,

еже бы не от жены убиенну слыти.

Иеффай в жертву Богу рече того дати.

кто бы первый вращшася изшел целовати.

Возврат бысть с победою, дщи его сретает

единая с девами, он в печаль впадает.

Лев младый на Сампсона жестоко рыкает,

он й, яко козлища малаго, терзает.

Челюсть ослю на земли Сампсон похитил есть,

тысящу Филистинов оною избил есть.

Врата града Газкаго Сампсон восхищает

и. на гору высоку вознес, полагает.

Далида стрижет власы, а врази хищают

Сампсона и очию абие лишают.

К жерновом приставиша. часто ся ругаху,

отмщения от него никогда чаяху.

Он же. власом отрастшым, многи убивает

развалением дому, и сам умирает.

В колене Вениамли мерзость сотворися.

жена Леввиты блудом даже умертвися.

За то на Вениамль род идут вся колена

с оружием, да будет та злоба отмщена

Пред враты Силомскими девицы скакаху.

Вениамли сынове на ты подседаху

И. кто кую возможе, в жену похитил есть,

то сделати Исраиль оным попустил есть.

На селе Воозове класы собирает

Руф вдовица, а Вооз милость ей являет.

Велит ей класов ради выну приходити.

и аще ся возжаждет, воду туне пити.

Вооз во гумне своем сном упокойся,

Руф же при ногу его тихо положися.

Исраиль от Филистын люте поразися,

и киот Божий во плен теми восхитися.

О сем прием весть, Илий с престола падает,

хребет сокрушь, абие духа изпущает.

Киот Божий в Азоте в храме поставленный

с Дагоном, и бысть идол в нощи низваленный.

Паки на место его люди вознесоша.

но в день утрий обсечен идол обретоша.

Филистинове киот Божий отпущают,

под колесницу кравы юныя впрягают.

Забыта телят кравы на прям путь идоша.

яже потом Леввити Господу пожроша.

Иноплеменных полци мечы изостриша

на Исраилск род. с ними силу обратиша.

Тогда Самуил жертву Богу сотворил есть

с молитвою. Исраиль враги победил есть.

Саул ослиц погибших отца си искаше.

Бог же царство людей Си ему готоваше.

Самуил Духом Святым онаго познал есть,

взем сосуд со елеем, на главу взлиял есть.

Ионафан самовтор враги поражает,

отцу Саулу и всем радость содевает.

Агаг. царь Амаликов, с вои побежденный,

от Саула в животе бяше соблюденный.

Самуил о сем царя грозно обличает.

Агага нечестива мечем закалает.

Голиаф гордый хулы усты отригаше,

борца от Исраиля на борбу прошаше.

Изьиде малый Давид на щуда велика

и обезглави мечем горда человека.

Победоносне Давид во град возвратися,

Саулом и всем родом излише любися.

Жены паче Саула его ублажиша

песнми и ко зависти царя возбудиша.

Саула дух лукавый царя нападаше,

Давид гуслей си гласом того прогоняше.

Саул же возмездие кое ему дает

Убити его хотя, копие вергает.

Иоанафан зело Давида любяше.

от ярости отца си его соблюдаше.

По согласию стрелы из лука пущает.

к отроку глас дав. тому бегство совещает.

Наван отрекл Давида воем хлеба дати.

Давид гневный грядет на нь смертию отмщати.

Авигея мудрая онаго сретает,

словом и дары ярость в милость претворяет.

Саул иска Давида гробови предати

и посреде полк своих положися спати.

Давид, вшед, взя копие и чашу, а его

не уби. почитая Христа Божиего.

100

Вои Амаликовы Сикелаг спалиша.

Египтянина в пути болна оставиша

Того гладна чредити Давид завещает.

его вождеством враги постиг, побеждает.

101

На горе Гелвунии Саул побежденный

от Филистинов, и сам бяше уязвленный.

Да от враг не сечется, на мечь свой падает,

и оружиеносец тожде содевает.

102

Кивот Божий преславно Давид провождает

с тимпаны, трубы, лики, сам в гусли играет.

Случаем киот к земли пасти поклонися,

Озия, подьутвержей, Богом умертвися.

103

Анон, царь Амонитский, послы безчестил есть

Давидовы, тем на брань того возбудил есть.

Иоав воевода ту службу свершает.

со Авесом братом си враги побеждает.

104

Вирсавия в ограде своем егда мыся,

Давид зря, красотою ея уловися.

Посла рабы жену ту во чертог си взяти,

палим страстми. дерзнул есть плотски ю познати.

105

Нафан пророк прииде царя обличити,

яко к блуду приложи Урию убити.

Нафан гаданием и овцы обличает.

он со смирением грех свой исповедает.

106

Аммон лицем Фамары сестры прелщен бяше,

смыслив недуг, служившу ту плотски познаше.

Но абие в ненависть любовь изменяет,

растленную из ложа сестру избивает.

107

Авесолом Аммону пакость злу отмщает.

за растление сестры того убивает.

Сотворив пир братии, Аммона просил есть,

на подпивша брата си рабы напустил есть

108

Авесолом отца си вражеско гоняше.

но власами на дубе повис, изчезаше.

Иоав воевода его достигает,

смертными оружии злаго убивает.

109

Савей, ковник Давидов, во Евель гонзает,

Иоав разорити град той промышляет.

Жена с высоты мудро вожду глаголаше,

главу Савея врага за мир ему даше.

110

Соломон прю о сыне дву жен разсуждает,

притворно полма чадо сещи завещает.

Лжемати соизволи. правая слезися,

царь ту матерь познал есть, ей сын присудися.

111

Храм Богу Соломоном предивно созданный.

всякими красотами улепотствованный

Иный близу того дом красный царь создал есть,

иде же во славе си с жены обитал есть.

112

Повнегда Соломоном храм Божий свершися.

тогда посвяти его и долго молися.

113

Соломон на престоле, а Савска царица

прииде доброкрасность зрети его лица

И слышати премудрость. Безцены приносит

дары, да благоволит прияти я, просит.

Дивится премудрости, ужасна бывает.

видение си паче слуха извещает.

114

Соломон состаревся, от жен ся прелщает,

идолы проклятыя чести сподобляет.

Постави столп Астарту, кумиру Сидонску,

и всескверну Молоху, лжебогу Аммонску.

115

Лжепророк праведнаго лжею си предстал есть.

аки словом Божиим, ясти возвратил есть.

Казнит Бог прелщеннаго, егда ся вращает,

лев й на пути уби, осел здрав остает.

116

Ила, царя Еврейска. убивает Замврий.

сам гонзает во Ферсу, обступи й Амврий.

Тако в полате царстей сам ся зажигает.

поне же немощь свою к сопротиву знает.

117

Илиа при потоце Хорафе витает,

двоица вран й хлебом и мясом питает.

118

Лжепророци Ваалу жертву приносиша.

но восприятой быта гей не умолиша.

Илиа же и воду на жертву взливает,

а огнь, с небесе сошед, все то сожигает.

Тем веле вся лживыя пророк похитити,

и сам потщася ножем тыя истребити.

119

Илиа спит пол древом, аггел возбуждает.

опреснок ясти. воду пити увещает.

Он же, яд и пив дважды, в силах укрепися,

в пути четыредесять дни о том трудися

120

Ахав на царя Сирска ратно запустися.

Михея не послушав, лживыми прелстися.

Егда же на противных силно наступаше.

седя на колеснице, смертну язву взяше.

121

Илиа яко в небо восхищен бывает,

Иелисею милоть свою низвергает.

Тою от него воды быша разделенны,

егда возвращашеся, Илии лишенны.

122

Вефилстии отроци Елисея знаху:

Гряди, плешиве, гряди, ругателно зваху.

Четыредесять и два отрочища быша.

две медведице оны вся на смерть побита.

123

Иелисею вдова некая стужаше,

яко долгов воздати чим не имеяше

Он елей умножил есть, яко наполнити

множество ей сосудов и нужду избыти

124

Нееман прокаженный к пророку прииде

и во Иорданския воды велен вниде.

Егда седмерицею в онех погрузися,

плотию. яко отрок младый. чист явися.

125

Иелисея царь Сирск яти посылает.

но полк воинств небесных его защищает.

И молитвою враги своя ослепил есть,

в град вовед, очи отверз, здравы отпустил есть.

126

В Самарии, юже царь Сирийск обстояше,

глад бе, а Иелисей хлеб мног прорицаше

Во утрий день будущий. Некто отрицает,

пророк за неверствие смерть ему вещает.

Врагом утекшым, утро хлеб мног в град вношаху,

а не веривша у врат на смерть затоптаху.

127

Иуе во Езрел град повнегда вхождаше.

Езавель, намазавши лице, на нь смотряше.

Он ю низврещи окном скопцем завещает,

ли пробости, а слово делом ся свершает.

128

Неции мертвеца си земли предаяху,

где Иелисеовы кости почиваху.

Узреша враги, мертвец ими ся вергает

на кости, тым коснувся, мертвец жив бывает.

129

Иезекия, царь благ, повеле ломити

капище и кумиры, лес искоренити

И змия Моисиева, яко ту кадяху

аки богови. иже нечестиви бяху.

130

На Иезекия царь Ассирийск восташе.

на Бога жива хулы яве глаголаше.

Сто осмьдесят пять тысящь аггел убивает

в едну нощь врагов, царь же со срамом гонзает.

131

Иезекия, боля, слезно помолися,

пятнадесять лет ему жити приложися.

То Исаиа пророк ему возвещает.

стень часов вспять на десять степеней вращает.

132

В дни Манассии книги бяху погублены.

во дни же Иосии паки обретены.

Велит я царь читати, сердцем умилися.

жгут кости мертвых, а храм Божий очистися

От всяких скверн идолских, лесы истребил есть.

жертвенники, кумиры добре разорил есть.

133

Навходоносор гордый силно приступает

ко Иерусалиму, огнем запаляет.

Весь град и в нем храм Божий люте разорил есть,

ят царя Седекию, очию лишил есть.

134

Филистини по брани трупы разбираху

триех сынов Саулих, и его труп знаху.

Отсекше главу Саулу, в капище послаша,

и броню снемше. в жертву идолу отдаша.

135

Давид согреши, яко люди си считал есть.

Бог аггела со мечем на люди послал есть.

Седмдесят паде тысящь мужей, царь молися,

да его казнит Господь, язва утолися.

136

Аммони и Моавли сынове восташа.

Иосафата царя оружно искаша.

Он всем пост и молитву людем возвестил есть.

Бог враги сотре, люди Си укорыстил есть

137

Азарий пророк люди к Богу увещаше.

Иоас царь каменми убити веляше.

Но прият отмщение, иже бо служиша

ему, тии на ложи онаго убиша.

138

Из плена Вавилонска иже ся вратиша,

создавше олтарь Богу, жертвы приносиша,

И храм Господень тощно с трудом возставляху,

елико силы бяше, того украшаху.

139

Есфир у Артаксеркса милость обретает,

скипетр преклонив, ясти с нею обещает.

Аман бе притрапезник, но зле учредися.

на высоце висети древе осудися.

Еже Мардохееви уготовал бяше.

на том враг Исраилский сам смерть пострадаше.

140

Артаксеркс истории во нощи читает,

верность Мардохееву в онех обретает.

Веле, украсивше й, на конь свой всадити,

Аману под ним коня по стогнам водити.

141

Иов, егда погуби различных скот стада.

и домом прибиенна бяху его чада.

Лемон плоти коснувся. зело ту вредил есть

и жену глаголати хулы наустил есть.

Он же, нищ и болезней, вся кротко терпяще

и благодарение Богу возсылаше.

142

Царь Давид гусли держит, не всуе играет,

славу Богу и теми, и усты воздает.

143

Си невеста с книгою Церковь знаменает.

яже Жениха Христа песнми ублажает,

Иже чрез сего царя нам есть изьявленны,

даяй титлы невесте, мудре умышленны.

Друг друга любезными словесы чествует,

яко же писание песней сих явствует.

144

Егда ся Исаиа с словом посылает,

углем чрез серафима прежде очищает,

Его же от олтаря дух взял есть клещама,

и прикоснуся онем пророка устнама.

145

Иеремиа пророк с Богом глаголаше,

казнь на Иерусалим грядущу предзряше.

Жезл бдящь и горнец кипящ ту знаменоваху,

тако слова Божия ему толковаху.

146

Иеремиа града плен предвозвещаше,

за то от князей людских ненавидим бяше,

И емше его, в тинный ров ужы спустиша,

гладом й уморити тамо умыслиша.

147

Иезекииль пленен в Халдеи живяше.

сицево видение от Бога прияше:

Колеса вселенную прооброзоваху,

звери еваггелистов четырех являху.

Их же вещанием мир вконец исполнися,

яко прежде век сый Бог во плоти явися.

148

Иезекииль кости виде сухи зело,

яже облекошася во живое тело.

Образ то человеча бе воскресения

и людей Исраилских в дом свобождения.

149

Навходоносор во сне име видение.

образ дивен будущих во изьявление.

Даниил сон забвенный ему поминает

и толк его подробну право изъявляет.

150

Трие отроци во пещ горящу въвержени.

но аггелом Божиим быша сохранени.

Иже паки оныя во пещь вовергаху

раби, от всеядуща огня жгоми бяху.

151

Валтасар царь сосуды святы осквернил есть,

на пир употребив их. Бог й осудил есть:

Мани, Фекель, Фарес, что конец знаменаше

царю и царству, яко Даниил сказаше.

152

Даниила Дарию князи клеветаша,

яко молися Богу, вину ему даша.

В снедь лвом вовержен бысть в ров, но Бог сохранил есть.

клеветники на ту смерть утро царь судил есть.

153

Даниил виде звери четыри страшныя

во видении сонном, и зело лютыя.

Тии четыри царства прознаменоваху,

яже во мире силна и престрашна бяху.

154

Иосиа блудницу в жену себе взял есть,

два сына с нею и дщерь мирови издал есть.

Иезраиль имя бе первому реченно,

а Непомилованна дщери возложенно.

Не люди Мои меншу имя сыну бяше,

теми гадателно Бог людем извещаше,

Яко блудит Исраиль с идолы от Бога,

за то без милости месть, крове будет многа.

155

Иоилем пророком Бог миру явил есть.

что в день Пентикостии делом совершил есть.

Излию, рече, на плоть от Духа Моего,

услышат пророчества от рода своего.

156

Во Ниневии Иону Господь посылаше.

он. в Фарсис тек кораблем, китом снеден бяше.

Но в день третий зверь морский того изблевал есть,

тридневно востание Христа знаменал есть.

157

Иона под тыквою печален седяше.

яко по слову его град не изчезаше.

Тыква скоро исчезе. пророк удряхлися.

притчею за нежалость Богом обличися.

158

Чрез Михея пророка Господь извещаше,

что в Вифлееме рожден Бог быти хотяше

159

Разорение града Аввакум сказаше,

о гонении добрых от злых сетоваше.

И пришествие Христа Бога предвестил есть,

краткое злых щастие быти известил есть.

160

Захариа Христово сказа пришествие

и на жребяти Его во Сион вшествие.

161

Товия, оставль обед, тече мертва взяти,

на раменах нес, спрята, положися спати.

Птица калом ослепи, жена привождает

козлища, он, да не чужд будет, увещает.

162

Сын Товии с аггелом путь свой совершает,

иже рыбу извлещи его утвержает.

Тоя утробы дымом диавол прогнася,

желчию отцу стару свет очес отдася.

163

Желчию отцу очы мажет сын Товия,

а Господь просвещает на зрении тыя.

Аггел, сказав о себе, в небо отлетает,

Товия, пад на землю, Бога величает.

164

Иудиф вдова честна, мужественна бяше,

гордому Олоферну главу отрезаше

В его сени и в полцех, и в град возвратися

со главою, торжество верным сотворися.

165

Честнокрасна Сусанна во ограде мыся,

двоица Исраидских судей к ней прелстися

Улучше время, на грех ону увещаша,

отрекшу клевещут, но сами пострадаша.

Даниил бо отрочищ вопрос обновил есть,

чисту свободив, старцы на смерть осудил есть.

166

Даниил змию Вилу смолу вовергает

в челюсти ядовиты, а змий издыхает.

Народ, восхищ пророка, во снедь лвом относит,

Аввакум гладну ему ту пищу приносит.

В день седмый царь свободна его испустил есть.

а враги его брашно лвом быти судил есть.

167

Евреин агнца в жертву кумирови дает,

Мафафий от жалости того прободает.

168

Маккавей благочестный враги побеждает.

Бог ревность, пост, молитву торжеством воздает.

169

Царь Антиох Евпатор полки посылает,

на елефантах столпы с людми утвержает.

А Иуда Маккавей своим дает слово.

да всяко сердце на брань ставится готово.

170

Ионафан Иудский с Александром стает,

царь Димитрий на брани побежден бывает.

171

Илиодор, посланный злато в храме взяти.

вшед в сокровище, нача дело промышляти.

Абие яздец страшный ему ся являет,

иже ногама его люте ударяет.

Та же аггел и тако жезлы его биша,

даже ели живаго в показ оставиша.

172

Во Иерусалиме се чюдо случися.

брань полков на воздусе премногих явися.

Чрез четыридесят дни страшно зрими бяху,

приходящыя на град скорби знаменаху.

173

Антиох нечестивый велит ясти мяса

свиная, а слушати нехотящих гласа

Седмь братий мучит люте и смерти предает,

по них доблественная мати умирает.

174

Зверосердый Антиох хоте разорите

град Божий и вся люди его истребити.

Испад из колесницы, тако повредися,

яко и внутрь плотию, и извне растлися.

Тело падаше. черви всего росточаху,

от смрада люта вой носы затыкаху.

175

Иопъпиане много Еврей потопиша.

Иудино рвение на месть возбудиша,

Иже многи вражия грады разорил есть

и полки пособием Бога победил есть

176

Сокровище историй Новаго Завета

изряднейшими иконы изображенное, сице подписася

177

При Матфеи человек начертан бывает,

яко от плоти Христа книгу начинает.

178

Марку лев знамение, яко он начал есть

гласом в пустыни, иже яко лев кричал есть.

179

Луки благовестие от жреца начася,

того ради вол жремый при нем написася.

180

Иоанн орла имать, яко возле тает

к Солнцу Христу и Его божество являет.

181

Гавриил зачатие Деве возвещает.

Марии Христа Бога Дух Свят устрояет.

182

Аггел пастырем стада в светлости явися,

сказуя, яко Христос в вертепе родися.

183

Христос во Вифлееме от Девы рожденный,

от пастырей во яслех лежащ обретенный

184

В день осмый по закону Христос обрезася,

ту кровь Его. во-первых, за ны пролияся.

185

Волсви от Вавилона к Христу приидоша,

миро, злато, кадило в дары принесоша.

186

В день четыредесятый в церковь принесенный,

от Симеона, Анны хвалами почтенный.

187

В обьятиих Матере Христос Бог гонзает

во Египет, Иосиф осла провождает.

188

Младенцы в Вифлеема вои убивают,

от сосцу родителниц силно оттерзают.

189

Дванадесятолетен Христос вопрошает

учители премудро, и Сам отвещает

В храме Божием. Вси ея Ему удивляют,

ту Его родители славна обретают.

190

Тридесять лет имея, Христос Бог крестися,

на Йордане Троица Святая явися,

Отец в гласе, Сын в плоти, Дух же Божественный

в видении голуба, над Христом явленный.

191

Христа алчна в пустыни демон искушает.

но пред Солнцем истинны тмы князь исчезает.

192

Христос чюдо первое в Кане сотворил есть,

в скудости вина воду в вино претворил есть.

193

Князь жидовский Никодим в нощи посетил есть

Христа. Он же истинне его научил есть.

194

При студенци по пути Христос почивает.

Самаряныню правде святей поучает.

195

В Капернауме сотник к ногам припадает

о рабе бод ном, Христос словом исцедяет.

196

Сед на горе, Христос Бог сдово простираше.

ученики и дюди додго поучаше.

То сдово Матфей в главах триех закдючид есть.

в пятой, шестой и седмой, на сей окончил есть.

197

Бервно изми первие из ока твоего,

та же сучец измеши из ока братнего.

198

Спящу Христу, кораблю люто бедство бяше,

возбнув. запрети морю, ветру, и престаше.

199

Разслабленный ко Христу чрез кров ся спущает,

за веру Он принесших того исцеляет.

200

У врат града Наина мертва воскресил есть

вдовы единородна, матери вратид есть.

201

Фарисей некий Христа хлебом учреждает,

блудница нозе слезми очес омывает.

Трет власы, миром мажет, о гресех ся кает.

Христос, зря любовь многу, грехи оставляет.

202

Сеяй сеет, семена от камень ссыхают,

в тернии гибнут, птицы на пути снедают.

Токмо яже на землю добрую падоша,

нескудны сеятелю плоды принесоша.

203

Иоанн Предитеча, пророк божественный,

обличавый Ирода, бысть обезглавленный.

Дщерь жены Иродовы безстудно скакаше,

просила его главы. Ирод ей отдаше.

204

Пять хлебов и две рыбе отрок продаяше,

тыя чрез апостолы Христос Господь взяше

Пять тысящ насытил есть, выше того взяху

укрухов дванадесять кошниц, что остаху.

205

Христос по водам ходит, Петр ся погружает,

рек: Спаси мя. Господи, тем спасен бывает.

206

Жена Хананейская псом уподобися,

за то дщерь от демона Христом свободися.

207

От разбойник язвенна жрец, леввит лишает.

Самарянин елей и вино возливает.

208

Марфа печется Христа брашны учредите,

Мариа словом тщится душу насытите.

209

Демон во человека немый водворися.

Христос того изгнал есть, бедный исцелися.

210

Христос Бог на Фаворе в свет преобразися,

Моисий со Илиею Ему представися.

211

Людие дети своя ко Христу приносят,

да молится и руце взложит на ня. просят.

Ученицы претиша з детми приходити.

Господь же возбрани им впредь тако творити.

212

Домовит, делатели наем, посылает,

по пенязю за дело на день совещает.

213

На блуде жену яту Христу представиша:

Что сотворити должно? Его вопросиша.

Он писаше на земли, вси вон избегают.

Христа токмо и жену блудну оставляют.

Господь же, наказав ю, с миром отпустил есть.

от законом сужденны смерти свободил есть.

214

Человеку богату нива угобзися,

он гумно разорити ветхо намыслися.

И болшее создати, сам ся ублажает,

душе, да яст и пиет. своей совещает.

А Суд Божий глаголет: Безумие, что лстиши

сам себе се в нош сию вся та оставиши.

215

Блудный сын, вся расточив, к отцу возвратися,

отец, напад на выю, о нем умилися.

216

Богатый пиршествует, а Лазарь желает.

да от крупиц трапезы его ся питает.

Язвы его пси лижут, богатый забыл есть

Лазаря насытите, сам доволно пил есть.

Но по смерти в прохладе нищий Лазарь бяше,

богатый капли воды, в огни сый, моляше.

217

Царь сотвори брак сыну, многи на пир зваше,

убившым рабы огнем и мечем отмщаше.

Видев же не во брачну ризу облеченна

со пиршествующими быта посажденна,

Разгневався, повеле онаго связати

и во тму кромешную абие предати.

218

Десять муж прокаженных словом очищает,

егда ко священником оны посылает.

219

Фарисей на молитве сам ся оправдает,

мытарь очес возвести в небо не дерзает.

Биет перси, милости у Господа просит.

Ов отвержен, сей паки благодать относит.

220

Грядый к Иерихону, слепца приглашает,

милости просящему словом очы дает.

221

Лазарь, недугом держим, на одре лежаше,

Мариа же с Марфою ко Христу послаше,

Да приидет. Лазарь же вмале преставися.

но Христос, воскресив й, славно прославися.

222

Закхей Христа грядуща со древа смотряет,

Христос, пригласив его, у него витает.

223

Во град Иерусалим на осли жребяти

идет Господь волную страсть за ны прияти.

Народи ризы стелют, ветви подстилают:

Осанна Давидову Сыну, воспевают.

224

Куплюдеющих в церкви Господь изгоняет

и трапезы торжником словом превращает.

225

Господин рабом своим таланты вручает,

куплю теми деяти оным завещает.

226

Пасху ветхозаконну Христос совершил есть,

потом хлеб в тело, вино в кровь Си претворил есть.

Иоанн на Господних персех возлегает.

Господь о предателе Своем предвещает.

227

Во вертограде Христос Отцу Си молися,

егда волныя страсти время приближися.

228

Иуда лобзанием Господа предал есть,

Петр апостол Малхови ухо урезал есть.

Нечестивии вой Христа похищают.

вяжут, биют, торгают, люте озлобляют.

229

Христос Бог Каиафе в первых представися,

праведный неправедным мужем зле судися.

Петр при огни греется, но зле позябает.

егда ся Христа Бога за страх отрицает.

230

У столпа каменнаго Христос привязанны,

велением Пилата люте бичеванны.

231

Вои терновый венец Христу возложиша,

уязвенна народу жидовску явиша.

Се человек, сам Пилат Евреом вещает,

а злочестная спира: Распни! возглашает.

232

Пилат нетвердоумный на смерть Христа дает,

руце умы, Варавву от уз испущает.

233

Господь, крест на Голгофу нося, изнеможе,

Симон же Киринейский нести й поможе.

Жены благочестныя Господа плакаху,

во слезах на Голгофу вслед Его идяху.

234

На древе крестном Христа Бога пригвоздиша.

а с Ним два разбойника близу повесиша,

Хотяще с разбойники Онаго вменити,

но славы Царя славы несть леть истребити.

235

Иосиф с Никодимом в гробе положиша

тело Господне, миром доволно мастиша.

Бяше ту Мати слезна, и жены стояху,

яже Спаса нашего усердно любяху.

236

Егда мироносицы к гробу приидоша

с миром, тела Христова в нем не обретоша.

Ибо воскресе смерти, ада Победитель,

рода человеча всеблагий Спаситель.

237

Учеником, в Еммаус грядущым, явися.

но от них не бе познан, ибо утаися,

Даже в преломлении хлеба И познаша.

и шедше, апостолом в Сионе сказаша.

238

Христос пред ученики идет с Елеона,

силою Си носимый в град горня Сиона.

Во Иерусалиме велев оным ж дати,

донде же исполнятся дары благодати.

239

Егда мирови сему конец приближится.

тогда Сын человеческ в славе Си явится

И будет вся делеса всех людей судити,

и всеправедную мзду комуждо творити.

Праведным имать дати в небе живот вечный,

грешники же вовержет во огнь безконечный.

240

Апостоли святии в собрании бяху,

обещанныя силы свыше ожидаху.

И се в день Пятьдесятный шум велий бывает,

Дух Святый во языцех огненных схождает.

241

Петр с Иоанном хромца бедна устрабляет.

во мил остин и место нозе утвержает.

242

Анания часть цены села утаил есть.

прочее пред апостол ноги положил есть.

Петр, Духом лжю уведев, мужа обличает,

он, пад, издше, и жене тожде ся случает.

243

Стефан святый каменми убиен бывает.

Саул, риз страж, на дело то соизволяет.

244

Филипп евнуха вере правды научил есть.

и сседши с колесницы, во пути крестил есть.

245

Саул иде в град Дамаск христиан искати,

на различныя муки оны предаяти.

Но бысть глас: Савле, Савле, что Мя ты гониши?

Он же: Господи, что ми творити велиши?

Лежит низу, очию зрения лишися,

силою Бога в мужа блага преложися.

246

Петрови плащаница с небесе свесися,

притчею не презрети Еллин наставися.

Корнилиев посланник его приглашает,

он шед, самаго и весь дом его крещает.

247

Петр, всажден во темницу, среде стражей спаше.

Церковь о нем молитву прилежно творяше.

Аггел, его возбудив, от уз свободил есть.

провед мимо две страже, Церкви возвратил есть.

Врата железна сама себе отверзоша,

сие молитвы верных у Бога могоша.

248

Павел хроморожденна в Листрех исцеляет

народ Ермия бога быти й вменяет,

Варнаву паки — Дия. Жреци приидоша.

телцы има на жертву тучны приведоша.

Но Павел с Варнавою того возбраняет,

едина Бога быти творца всех вещает.

249

На Милите острове при огни седоша,

иже ся, сокрушившу кораблю, спасоша.

Ехидна Павла в руку усекнула бяше,

человекоубийцу всяк й непщеваше.

Егда же, отряс ю в огнь, без вреда явися,

от несмысленных Еллин за бога вменися.

250

Иоанн в остров Патмос елма заточися,

Сын человечь в восторзе оному явися,

Имеяй седмь звезд в руце и мечь, испущенный

из уст, между светилник седмию ставленный.

251

Бог Отец, на престоле седящ проявленный,

двадесять и четырми старцы окруженный,

Иже, егда зверие четыри пояху

Трисвятое пение, ницы припадаху.

Венцы своя под нозе Господне кладуще:

Достоин еси. Боже, взяти честь, зовуще.

252

Егда Агнцем печати шесть решены бяху.

с луком, с мечем, с мерилы яздцы исхождаху.

Смерть с косою, вслед ея огнен ад идяше.

душы под престолом, звезд спадение зряше.

253

Егда седмая печать Агнцем разрешися.

от четырех аггелов пременно трубися

Всяк глас, горе новое миру возвещаше.

Во первом кровь, град и огнь на землю падаше.

По втором огненная гора низвалися.

по третем звезда Пелын в воды низпустися.

По четвертом в светилех тма свет помрачаше.

еще ин: Горе. горе, горе, вопияше.

254

Возтруби аггел пятый, звезда низвалися,

из бездны с дымом прузей множество пустися

Смертно язвящих люди. Та же возтрубил есть

шестым, и на Ефрате реце разрешил есть

Четверицу аггелов, готовых изьити.

третию часть человек во мире избити.

255

Лицесолнечный аггел, в облак облеченный,

на главе дуга, столпы низу утверженный,

Богом кленется, яко время ся кончает,

Иоанну книжицу, еже снести. дает.

256

Енох со Илиею будут прорицати

в концы веков, и люди к Богу увещати.

Змий антихрист имать я в Сионе убити.

но во день третий хощет Господь оживити.

Речет: Взьидита семо и бу дета взята

на небо, зрящым врагом, яко мужа свята.

257

Зверь лют грядет из моря, злых сонм знаменает,

первая антихриста глава изъявляет,

Ин из земля изходит с агнчима рогама,

оба будета хулы ригати устнама.

Сей лжепророк огнь сведет, люди убоятся.

не писании в небе зверем поклонятся.

258

Аггели чашы гнева в мир сей изливают,

злочестивыя люди скорбми истребляют.

Змий три жабы из устен своих изпущает.

три суть демони, яже злый враг посылает

Лстити словом, чюдесы, от Троицы знания

и Христова божества исповедания.

259

Град великий Вавилон огнем согарает,

скоро, яко жерновный камень, упадает.

Плачут его царие. купцы, художници.

рыбарие и девы и корабелници,

Яко прибытков своих не могут стяжати,

ни ктому ясти, пити в нем и ликовати.

Вавилон же сонмь людей злочестных являет,

их же погибель в концы веков ожидает.

260

Аггел змия связанна в бездну вовергает,

егда Христос демоню силу укрощает.

Той по тысящи годищ паки разрешится.

ибо во антихристе зело укрепится.

Соберет безчисленны на всю Церковь рати,

но Судия воскоре казнь хощет воздати.

261

Иерусалим новый на конец явися

Иоанну святому, и зело светися

Небесными красоты. Несть леть описати

доброты его, ни же помыслом обьяти.

В том Бог людем Си верным жилище готует,

Сам в неприступней славе во веки царствует.

Образа Пресвятыя Богородицы подписание

О Пресвятая Мариа Девице.

Божия Мати. небесе Царице,

Под твою милость вси мы прибегаем,

спасай ны от бед. слезно воспеваем.

Сохраняй, яко чада своя — мати.

благоволи ны от враг защищати.

Умоли Бога, да будем спасени,

по смерти в место святых воведени.

Мы тя имамы присно величати.

скорую помощь твою прославляти.

Образов подписание из Песней песней

Се царь Соломон, иже цари прехождаше

мудростию, богатством, и всех славней бяше.

Духовно супружество пеенми прославляет

Христово со Церквию, Духом прорицает.

Невеста Церковь цвет есть, преизбранный Богу,

Жених ей яблки, цветы дал красоту многу.

Десна честь Бога, мирску шуйца власть являет,

жити с Женихом выну невеста желает.

Егда скиптром, богатством своим удивися.

тогда Жених от нея нечто удалися.

Ищет со плачем, стражей града вопрошает.

Бог тогда Церковь хранит, правит, украшает.

Вся скорбь, печаль прежняя невесты гонзает,

егда Жених, возвращся. ону утешает.

Она: Мой Ты, аз Твоя, рече, тем блажится

от Жениха в красоте, честным подобится.

Царство невесты светло Богом украшенно.

жертвы, словом, доброты всеми исполненно.

Христос с крестом наг смирну из уст источает,

терпение, нищету и пост знаменает.

Касается рукою, от сна возбуждая.

да отверзет дверь сердца невеста святая.

Невеста лобзания Царя си желает

к любезным персем Его тепле воздыхает.

Из тех пища, як млеко, точится духовна,

сладша сота, кадила паче благовонна.

Жених ю в чертог вводит, всех благ сподобляет.

а лик венчанных дары своя приношает.

Образов апостолских подписание.

По руским летописцом.

Святаго Петра

Петр апостол на кресте стремъглав распят бяше

за Христа в Риме, егда Нерон царствоваше.

С. Павла

Павел в Риме Нероном есть обезглавленны,

кровь со млеком изтече, елма посеченны.

С. Андрея

Андрей святый в Ахайских Патрех за Христа

от Егеата люте пригвожден до креста.

С. Иакова Зеведеова

Иаков Зеведеов за Христову славу

Ироду в граде святом дал есть под мечь главу.

С. Иоанна Богослова

Иоанн Богослов в конобе варися,

изгнан в Патм. в Ефесе жив во гроб вселися.

С. Филипппа

Филипп в Иераполи кресту пригвоздися

стремглав от лютых Еллин, к Христу преселися.

С. Варфоломея

Варфоломей стремглавно на кресте распяся

в Армении велицей, Духом в небо взяся.

С. Фомы

Фома святый копиями от вой прободеся,

Миздием царем на ту смерть оным дадеся

С. Матфея

Матфей благовестник мечем посечеся,

ко земли пригвожден, огнем лютым жжеся.

С. Иакова Алфеова

Иаков Алфеов Христа прославляше

и, подобне Христу, смерть креетну страдаше.

С. Леввия Фаддея

Леввий, Иуда и Фаддей реченны,

свидетель Христов, кресту пригвожденны.

С. Симона

Симон апостол истинне учаше

Христовой, за Нь же крестну смерть прияше

С. Матфея

Матфей апостол, вместо Иуды избранный,

в Ефиопии мучен, взя венец желанный.

По Римским же летописцем нечто

изменно, яко же яве есть во ограде

мучений апостолских

Во-первых

С. Филиппа

Филипп в Иераполи кресту пригвоздися

от Еллин, тако Христос Бог им прославися.

С. Варфоломея

Варфоломей ко древу крестно прикрепися

в Армении велицей, люте искожися.

Вместо Иакова Алфеова С. Иакова брата Господня

Иаков брат Господень с крила низверженны,

древом во главу язвен, живота лишенны.

С. Иуды Фаддея

Иуда Леввей, и Фаддей реченны,

свидетель Христов, в ребра прободенны.

С. Симона

Симон апостол истинне учаше

Христовой, за Нь же трен пилою бяше.

С. Матфия

Матфий апостол, вместо Иуды избранный,

в Ефиопии сечен, взя венец желанный.

Подписание образов о Сусанне

Скверна похоть Сусанну чисту искушает

старцы, она же ложа верность соблюдает.

Ложными клеветами чистая Сусанна

неправым судиею на смерть бе сказанна.

Неповинная скверне на смерть проводися.

но мудрым Даниилом смерти свободися.

Лжепослуси каменми сами побиени,

в ров, иже ископаша, старцы вовержени.

О 5 хлебех и 2 рыбех

Бог Слово, прежде век сый, изволи плоть быти

и неизреченная чюдеса творити.

Взем пять хлеб и две рыбе, народом даяше,

тех же пять тысящь разве жен и чад питаше.

Десять со двема кошниц укрухов остаху,

апостол и святии тыя сами взяху.

О богатом и о Лазаре

Богачь на сласти чрево разрешает,

тебе, Лазаре, нища презирает.

Пси язвы лижут, чюдно глаголати,

ведят пси в любви люди превыжшати.

Смерть лютая нить жизни внезап пресецает,

все излишество страстей напрасно кончает.

Хищают душу беси в езера огненна,

яко живе во сластех мерзких погруженна.

Нищий Лазарь смертию болезни кончает,

в места злачна и светла воводим бывает.

Молит о каплю воды, и та возбранися.

весь богачь в снедь огневи вечно присудися.

Из книги Даниила пророка

Избра пленныя дети царь и дал учити,

да бы в пособство царству его могли быти.

Муж желаний Даниил сон царев являет

и будущая царству его провещает.

Златый образ народом всем ся почитает,

муж желаний Даниил ему ся ругает.

Пируя царь с своими, повнегда упися,

рука, суд пишущая на стене, явися.

От сна четыри царства будуща вещает

и их непостоянство, и силы являет.

Змий Вавилонский пищи силою убися.

тем же, яко не бог бе. народно явися.

О Иосифе

Зло дело братов худа ненависть являет,

Иосиф добротою веры побеждает,

И нечистую любовь скверныя Сапфиры

чистотою душы си одоле без меры.

Тем же всемогущий Бог цвет девства избранна

сохранил, яко жертву телца упитанна,

Кое же печалное время утолити

отчеству Хананейску, и во помощь быти.

Пидписание иконы Умиление Пресвятыя Богородицы

Христа Бога Мати умиленна бяше

сице, егда Его умерша ридаше.

Подписания икон

Алексий Помощник

АггеЛ нЕсти Крест СИй мИ пособляет,

помощь во скорбех от Бога являет.

Феодор, Дар Божий

Господь СаваоФ, Есть тО ДОбР всех датель.

Дух Святый даров седми Излиятель.

Иоанн, Благодать Господня

Источник вОд сих, и свет, свыше дАННый.

благодать Бога изъявляет на ны.

Ирина, Мирная

мИр оРужИя браНи зАтворяет,

тучна елея изобилство дает.

Анна, Радость

РАдость На Небе Аггелом бывает,

егда каяйся светилник вжигает.

Татиана, Повелителница

ОТ БогА завеТ Яве Нам есть дАнный,

слушаяй того и скиптра избранный.

Евдокия, Благоволение

ЕВвы До неба чадОм пути КИЯ?

Правда, та Богу за жертвы всякия.

Марфа, Попечение

Мысль, печАль, тРуд Господа СаваоФа рАди,

пекущыяся люди вводит в град отрады.

Софиа, Мудрость

СлавнО, яко ФинИкс, мудрость процветАет,

недвижим камень в трон си полагает.

Екатерина, Надежда, Истинна

ЕлиКа Аще ТЕРпИт кто за Бога СыНА,

надежда, яко воздаст Божия истинна.

Мариа, Владущая

МирА деРжавы власти землИ всеЯ,

имаши образ в руках девы сея.

Феодосиа, Богоданная

Фрон нЕбОДержный плОдит дары СИЯ,

Бог дает людем чада в наследия.

НАТАЛИА именем вещает Святая,

яко она родися трудолюбивая.

Подписание образа царя Константина

Константина Максентий мучитель гоняше,

он же истинна Бога в помощь призываше,

И виде по полудне крест изображенный

над солнцем, паче солнца светом украшенный.

То знамя все воинство его светло зряше,

при нем написание: Сим побеждай, бяше.

В нощи во сне Христос Бог цареви явися.

Им же с крестом на врага ити наставися.

Царь же на знамениих кресты устроил есть,

тако вооруженный, враги победил есть,

Не терпяще бо силы креста, побегоша,

яко Фараон в мори, в реце погибоша.

Подписание образов вивлииных

В Кесарии Корнилий сотник обиташе,

к нему же Бог аггела с небесе послаще.

Повелев апостола Петра пригласити,

да бы тем вере правой наученну быти.

Апостоли в темницу быша вовержени,

но аггелом Господним в нощи изведени,

Иже, извед я, ити в церковь завещает,

слово жизни вещати людем наставляет.

Ирод Петра в темницу повнегда всадил есть,

аггел исполни светом, узы разрешил есть

И вон изведе его. Стрегущии спаху,

вернии апостоли радостно прияху.

Подписание образа Нерукотвореннаго убруса святаго

Сия икона Святаго убруса

изобразися от сладка Исуса,

Да, взирающе, главы преклоняем,

в Христе надежду нашу полагаем.

Иже лице Си на ны просвещает,

в светлое небо жити преселяет.

Кто лицу сему кланяется выну.

любим есть Отца превечнаго Сыну.

Зри зде любезно, усердно молися.

сокруши сердце, за грех прослезися.

Призрит Бог свышше, грехи ти оставит

и в небе лице Свое тебе явит.

Подписание образа Пресвятыя Богородицы

Возводяй очеса си на сию икону,

мни тебе предстояти Божиему трону.

И со благочестием умилно молися,

яко заступницы всех верных поклонися.

Она лета от Сына умолит ти многа

и радости сподобит небесна чертога.

О пренепорочная всесвятая Мати.

благоволи мя от всех лютых избавляти.

В мире сем, наипаче же в день смерти моея,

не лиши мя, раба си. помощи твоея.

Аз же егда тобою стяжу жребий в небе,

Богу хвалу воздая. воздам честь и тебе.

Подписание образа живоначалныя Троицы

Авраам древле троицу аггелов чредил есть,

в них Бога единаго во Троицы почтил есть.

За что зело от Бога ублагословися

плодом, иже без числа в мире умножися.

Аз образ, Аврааме, Троицы даю тебе,

да ублагословит тя Бог, живущий в небе,

Яко же Авраама, да род твой пребудет

славночестен, донде же солнце с небом будет.

Троице святая, щади Авраама.

во всяких нуждах буди с онемь сама.

Даждь в мире здраву многа лета жити

и жизнь вечную в небе получити.

Подписание образа Пресвятыя Богородицы, иже в Честохове

Образ Марии с Христом, Лука й писаше,

Частохов и днесь имать, древле Русь держаше.

Подписание колокола

Во хвалу и во славу Бога всемогуща,

во едином существе в триех лицех суща,

И во честь родившыя воплощенно Слово,

сей колокол состроен есть на Симоново

В обитель Успения Матере Божия,

да гласом созывает в храм его верныя

Хвалу Ему о благих всяческих даяти

и о нуждах молитвы теплы проливати.

Подписание образов Италианских

Елисавеф у Девы Марии витает,

Христос Бог Иоанну любовь проявляет.

На лице зря Христово, кождо умилися,

за тя венцем терновым Покланну молися.

Отец, Сын и Дух Святый Марию венчает.

Матери Бога Слова та честь подобает.

Честнейшая херувим, зело вознесенна,

выше всех сил небесных Богом устроенна.

Елма еще во яслех Христос Бог лежаше,

страсти и смерть будущу во уме держаше.

Выше мира Мария змия попирает,

Христос Бог главе ея свыше ся касает.

Яко пред зачатием бяше освященна,

змиеву сокрушити главу устроенна.

Иосиф Христа Бога руковождествует.

егда в плоти нас ради Вечный младенствует.

Егда от Иосифа Христос храним бяше,

Матере обручника Своея лобзаше.

Григория Дух Святый на то наставляше,

виденный яко голубь, что он всем вещаше.

Рождьшуся Христу, волсви трие приидоша,

миро, злато, кадило в дарех принесоша.

Деве Марии аггел: Радуйся, вещает,

а в ней от Духа Свята Слово плоть бывает.

Иосиф с Мариею Христа вождествует,

свыше Отец и Дух Свят их любителствует.

Христос учеником Си ноги умывает.

смирения нам образ тако содевает.

Иероним блаженный богомыслив бяше,

страсти Христовы и смерть свою размышляше

Мария с Иосифом в Египет гонзает,

Христа от Иролова меча соблюдает.

Иосифом превечный Младенец держится.

Младенцем же Иосиф в бытии хранится.

Дево Марие, о нас изводи молити

Изволшаго из тебе телом Ся родити.

В Египет Христу шедшу аггели служаху.

плоды от древес в пищу Оному даяху.

Егда во храм принесен Христос Господь бяше.

Симеон, взем на руце. Его целоваше.

Бог Сын на руку Девы Марии седяше.

а с Ним Отец и Дух Свят неразлучно бяше.

Предитеча от Чаши Христовы вкушает.

Господь раба Своего любезно чреждает.

Тело, с креста снятое. Мария держаше,

седмь болезней, яко седмь мечев. пострадаше.

Пастырь добрый на рама овцу возлагает,

обрет в заблуждении, в стадо отношает.

Анна Сыну Марии Христу угождает.

сладкими плоды Христа сладка учреждает.

С Мариею Иосиф Христа соблюдаше.

Дух же Святый со Христом неотступно бяше.

Се гряду волю Твою, Оче, сотворити.

на кресте за род людский душу положити.

Душу благочестиву Себе обручает

в невесту Христос Господь, перстен возлагает.

Умерша Христа тело Мати лобызает,

а мечь болезни сердце ея прободает.

Пиршество сладко Христос содевает

душе праведней. Сам ю учреждает.

Во обьятиях держит Сына Мати,

сладко есть Христу тако почивати.

В детстве Своем Христос страсти Своя знаше.

крест, копие, губу умом Си ношаше.

Христа, крест несуща, Мария сретает,

мечь болезни сердце ея прободает.

Первомученик Стефан божественный

камением бысть от жид убиенный.

Мира Держатель Матерь Си венчает.

Христос, аггел же скипетр ей вручает.

Иоанн с Христом зде изображении.

Им же всех Пастырь агнец нареченны.

Умерша Христа Мария ридает,

к погребению тело устрояет.

Давид мечем си враги побеждаше,

а гуслми хвалу Богу возсылаше.

Тело Христово строится ко гробу,

материю болезнь терзает утробу

Анна Марию дщерь си наставляет,

да писание чести лепо знает.

Лице Марии зде изображенно,

ей же бе сердце мечем прободенно.

Христина муки многия страдаше.

конец же двема стрелама прияше.

Лука благовестие от жертвы начаше,

тем же телца жремаго во знамя прияше.

Агафия святая за Христа томленна,

сосца отсекостася, в узах умерщвленна.

Лукия мученица за Христа страдаше

много, наконец мечем посеченна бяше.

Архаггел целование Марии вещает,

она Бога плотию Духом зачинает.

Иустина святая демоны прогнаше

молитвою своею, мечем конец взяше.

Подписания иконы

Источниче мудрости, даждь всем мудрым быти

людем, яже изволил еси сотворити.

Боже, веру утверди, спаси христианы,

покори под ноги их скверныя поганы.

Боже, Ты всех Надежда, всяк да будет в небе,

иже сердце возносит с молением к Тебе.

Любы несозданная, изволь возбудите

всяко сердце, да может Тя право любите.

О дщери моя, днесь вы ублажаю,

егда за Христа мертвы созерцаю.

Елма за Христа душы положихом,

не смерть, но живот вечный получихом.

Мати всяческих Творца, буди верным мати,

тщися от бед я всяких выну защищати.

Сергие, рабе Божий, не имам престати

чтущих мя от бед всяких скоро избавляти.

Преподобне Сергие, помощник нам буди,

Матерь Божию моли за верныя люди,

Да изволит у Христа Бога упросите,

еже непобедимым от врагов си быти.

Предложение

Вифлеем

Во Вифлиоме Хлеб нам предложися

небесный, Им же род наш оживися.

Проскомидиа хлеба

Хлеб. зде лежящий, то нам изъявляет,

что Бог на кресте телом возлегает.

Хлеб предложения

Сын Божий, плоть быв, Отцу Си пожреся

за живот мира, тако мир спасеся.

Копие

Копием ребра воин прободает,

а Христос тайне две из них пущает.

Блюдо

Блюдо се одр есть, в нем ерей готует

Тело Христово, егда священствует.

Вино

Вино Христову Кровь нам изъявляет,

из ребр исшедшу, та мир искупляет.

Вода

Христос Источник из ребр изливает

воду, яже мир живит, очищает.

Чаша

От Премудрости чаша исполненна

вином Крови Си. миру представленна.

Сосудохранителница

Место сосудов есть за место лобно,

проскомисает зде поп Богу годно.

Антимисий

В сей плащанице Христа полагаху,

со креста снемше, егда в гроб влагаху.

Покров чашы

Сим платном тело Христово обвися,

егда с алоем, смирною мастися.

Покров блюда

Сударем глава Христова покрися,

той сим покровцем зде вообразися.

Воздух

К гробу Христову камень приваленный,

лепо воздухом сим воображенный.

Кадилница

Огнь в кадилнице и дым вонный благо

являет Бога нам воплощеннаго.

[Епитафион]

Великаго Бога благоволением, сея книги Верта многоцветнаго творец пречестный господин отец Симеон Петровский Ситняновичь. в Российстем же царствии зовомый Полоцкий, от временных во вечная, от земных в небесная, преставися в лето от создания мира 7188 месяца августа в 25 день, от рождества же Спасителева 1680. в 51 лето течения жизни своея в 9 месяце.

Его же богомолца своего, яко жива суща по премногу жалуя Великий Государь Царь и Великий Князь Феодор Алексеевич Всея Великия и Малыя и Белыя России Самодержец, тако и по смерти его благоволил к нему особную свою царскую милость проявити, повелел бо во знамя своея к нему милости ученику его монаху Силвестру надгробная разнообразно написати.

По повелению же его царскому написана быша сия.

Епитафион

Симеон Петровский зде телом почивает.

Ситняновичь всех мертвых востания чает

О даждь, Христе, ему, встав, одесную быти

Тебе и со святыми во веки хвалити.

Или сице

Многотрудный зде телом витает Симеон

Петровский, любяй вышня Бога горний Сион,

Во нем же да даст ему Вышний обитати,

с аггелы и святыми во век пребывати.

Или тако

Симеон Петровский, богослов искусный,

иеромонах и учитель нелестный.

В сем гробе тело си честно положил есть.

Богу, Церкви, царству весь век свой изжил есть.

Или сице

Ззде Симеон Петровский телом положен есть,

богослов, живый честно, честно погребен есть.

Иерей во монасех. вечных благ желатель,

их же да сподобит й Бог, всех благих Датель.

Или тако

Зри, человече, сей гроб, сердцем умилися,

яко муж мудрый, честный телом положися

Зде, иеромонах и богослов известный,

Симеон Ситнянович, учитель нелестный.

И рцы к Господу Богу, да во место земных

душу его сподобит всех благ небесных.

Или сице

В сем гробе отца честна кости положении

Симеона Петровска, в земли сокровенны.

Иеромонаха и мудра учителя,

богослова и веры правы хранителя.

Душу бо вручил Богу, царствующу в небе.

иде же. читателю, строй жилище тебе.

Или тако

Преходяй зде стани, зря гроб, умилися,

иеромонах бо телом положися

Симеон Петровский, богослов искусный.

живый Богу, Церкви учитель нелестный,

Любяй Бога и с Ним желаяй ввек быти,

о Боже, даждь ему оно улучити.

Или сице

Кийждо человече, зде став, умилися.

где Симеон Петровский телом положися,

Иже всем сердцем выну Господу служаше.

в заповедех Его и трудех прибываше.

Иерей в монасех, кроткий, мудрый, честный,

рцы, да водворит и Господь в рай небесный.

Или тако

Кто есть человек, живый зде, не узрит смерти,

поне же не отдаст в гроб телесе си персти.

Той долг Симеон честный муж днесь заплатил есть,

Петровский Ситняновичь тело положил есть

Свое зде, течение си честно скончавый,

свидетелство в духовной того написавый.

Яко надежду имать с Богом в небе быти,

еже буди, буди, с Ним ему во век жити.

Или сице

Веждь, путниче, яко зде телом пребывает

раб великаго Бога, востания чает,

Симеон Петровский, и богослов известный,

иеромонах честный, учитель нелестный.

Церкви крепкий поборник, ей же и сын правый.

учением в Церкви то миру показавый.

Желатель присный с Богом в небе пребывати,

со всеми святыми и выну воспевати.

Или тако

Сей гроб зря, человече, сердцем умилися,

яко муж премудрый в нем телом положися.

Церкви, царству потребный зело и полезный,

богослов известный и учитель нелестный.

Сын и поборник крепкий Церкве восточныя,

догма блюдый нашея веры истинныя.

Симеон Петровский от мира в небо взяся.

даждь, Христе, ему тамо внити радуяся.

Или сице

Зде муж мудрый, хранитель веры и любитель,

богослов искусный и нелестный учитель,

Поборнилк Церкве крепкий, ей же и сын правый,

многими труды си то миру показавый.

Иеромонах, Бога всем сердцем любящий,

усердно Ему во дни и в нощи служащий.

Симеон есть Петровский телом положенный,

чтый, рци к Богу, да вселит й в рай всеблаженный.

Или тако

Иеромонах честный телом положен есть

зде, учитель премудрый честно погребен есть.

Муж благоверный. Церкви и царству потребный,

проповедию слова народу полезный.

Симеон Петровский, всем верным любим бывый,

богослов правый, Церкве догмата хранивый.

Присными труды многи книги написал есть,

подвиг скончав, душу си Богу в руце вдал есть.

Или сице

Преходяй путниче, о сем умилися,

яко муж мудрый смертию похитися,

Симеон Петровский, богослов, учитель.

иеромонах и веры сохранитель.

Им же полза верных людей наслаждала.

незлобие, тихость, кротость удивляла.

Его же ползы днесь людие лишенны,

зри сего, в гробе сем кости положенный

Многи книги в ползу Церкве списавшаго,

да водворит в небо, моли Создавшаго.

Сих надгробных надписаний Великий Государь слушав, быть им не указал, а указал написать ему. Силвестру, ино надгробное 12 статей, в кийждо статье по два верша. И оное надгробное написано сице:

Епитафион

Зряй, человече, сей гроб, сердцем умилися.

о смерти учителя славна прослезися.

Учитель бо зде токмо един таков бывый,

богослов правый, Церкве догмата хранивый.

Муж благоверный, Церкве и царству потребный,

проповедию слова народу полезный.

Симеон Петровский, от всех верных любимый,

за смиренномудрие преудивляемый.

Им же полза верныя люди наслаждала,

незлобие же, тихость, кротость удивляла,

В нем же вера, надежда, любы пребываше,

молитва, милостыня, пост ся водворяше.

Мудрость со правдою им бысть зело храненна.

мерность же и мужество опасно блюденна.

Многими дары Богом бе преодаренный,

непамятозлобием весма украшенный.

Иеромонах честный, чистоты любитель,

воздержания в слове и в деле хранитель.

Ни о чесом же ином оный промышляше.

но еже Церковь нашу мать увеселяше.

Не хоте ино Божий раб что глаголати,

токмо что ползу может ближним созидати.

Ничесого же ина творити любляше,

точию еже Богу не противно бяше.

Иже труды си многи книги написал есть

и под разсуждение Церковное дал есть,

С Церковию бо хоте согласен он быти,

а ничто же противно Церкве мудрствовати,

Ибо тоя поборник и сын верный бяше,

учением правым то миру показаше.

В зашищение Церкве книгу Жезл создал есть,

в ея же ползу Венец и Обед издал есть.

Вечерю, Псалтырь стихи со Рифмословием.

Вертоград многоцветный с Беседословием.

Вся оны книги мудрый он муж сотворивый,

в научение роду Российску явивый.

Обаче и сего смерть от нас похитила,

Церковь и царство ползы велия лишила.

Его же ползы ныне людие лишенны,

зри сего во гробе сем кости положенны.

Душу же вручил в руце Богу всемогущу,

Иже благоволил ю дата, везде Сущу.

Да приимет ю яко Свое создание

и исполнит вечных благ его желание.

Телом со избранными даст ему востати.

с ними же в десней стране в веселии стати

И внити во вечную небесную радость,

неизглаголанную тамо присно сладость.

Сие надгробное надписание Великий Государь указал, на дву каменных таблицах вырезав, позлатит и устроит над гробом иеромонаха Симеона своею государскою казною из Приказу каменных дел.

Надписание на камени

Великаго Бога раб верный

Симеон Петровский Ситняновичь Полоцкий,

Иеромонах честный, богослов известный

и слова Божия проповедник

преставися

в лето от создания мира 7188

месяца августа 25 день

от рождества Спасителева 1680

в 51 лето возраста

своего в 9 месяц.

Items in A only

Кто здрав сый Бога жива забывает,

того в болезни Бог не поминает.

Наказание

Иде же несть казнь злобе, свобода грешити,

наказание паки нудит благо жити.

Личин притворных младенцы страшатся,

огня паляща нимало боятся.

Мы тщет временных изълиха боимся,

а огня вечна никако страшимся.

Жестоким словом брата мало исправиши,

яви образ житием, исправу узриши.

Слово Божие

Добре Слово мечь ся острый нарицает,

яко ветви плоти чинно отсецает.

Слезы

Иже в нощи слезами ложе омывает,

тому день веселия утро возсияет.

На Рождество Христово

Велия радость весь мир исполняет.

Бога превечна Девица раждает

Деиством Святаго Духа воплощенна

во спасение всего рода земна.

О нем аггели пастырем вещают.

Слава во вышних Богу, воспевают.

Его же и вы с аггелы хвалите,

а многа лета в здравии живите.

Христос кокоши Себе точна глаголаше,

яко, аки под криле — птенцы, собираше

Люди Исраилския, да ся сокривают,

егда от врана адска гоними бывают.

Он же орлу подобен всяко сотворися,

елма от земли в небо телом возвысися.

Видящым апостолом в оно возхождаше,

горе сердца имети оны возбуждаше.

Да, земная презревше, умствуют о небе.

о нем же правоверным всем мыслити требе

Горе убо. братие. сердца возношаите.

пренебрегше мирская, небесных желайте,

Зде бо вся суть временна, прелестна и тленна,

онамо паки — вечна, права, неизменна.

Пресветлая царице, Богом нам данная,

буди ты по печали обрадованная.

Господь Бог да даст тебе многая лет жити

в мире сем во здравии, потом в небе быти.

Того аз раб смиренный верно ти желаю,

до стоп припад, милости твоей ся вручаю.

Великому господину святейшему кир Иоакиму патриарху Московскому и Всея России биет челом богомолец твои святителскии иеромонах Симеон Полоцкии. В прошлом, государ, во 182 году поехал с Москвы по увещанию в Киев чюдотворцем помолитися брат мои родной иеромонах Исакии. И возвратяся оттуду, жил он во твоем святителском богомолий в монастыре Трубческом у игумена Нектария. А ныне вестно мне учинилося, что неведомо по какому делу и по чиему приказу, пришов из города Трубческа приказныи вои поддиачеи Иаков Мефодиев со стрелцами в монастырь и. вземше насилием из монастыря брата моего иеромонаха Исакия, били кулаками и ногами топтали и бердишовыми держалны били убийством смертным невестимо за какову вину и покинули его на пути замертва, от которого он смертнаго убийства лежал и в совершенное здравие не могл приити потому, что печени отбиты и кровию плевал и блевал, и тако кровию сышов, скончался. А за непризрением игумена Нектария без исповедания и причастия божественных Таин отшел из света сего. Милосердый великии господин святеишии кир Иоаким патриарх М: и В: Р:, вели о том нашествии на монастыр и о о насилном взятии и о смертном убиистве брата моего иеромонаха Исакия. о нерадении Нектария игумена о душе его сыск праведный учинити, как тебе, великому святителю. Господь Бог известит. Великии святитель, смилуися, пожалуй, сиск праведный учинити у Великаго Государя взискати. Великии святитель, смилуися.

О всеблагословенная Царя всяческих Мати и всепречистая Богородитенице. призри зеницама благоутробия ти на смирение наше, услыши милостивно глас мления слезнаго и испроси нам у Сына твоего и Бога прощение согрешении наших, мир немятежны, обилие всяческих, кончину христианскую и по смерти живот вечный. Аминь.

Блуд со сыном

Жена некая сына си любяше

и похотию к нему жгома бяше.

В един час убо время получила,

юношу красна ко блуду прелстила.

Падеся с сыном, оле падения!

недостойнаго помяновения.

От сына сына чревом восприяше.

сына и внука в ложеснах ношаше.

Та же родивши, сосцема питала,

но слезы многи за грех проливала.

Каяся присно сердцем сокрушенным.

ридаше плачем велми умиленным.

Потом притече к отцу духовному

исповедати грехи си оному,

Иже услышав, что та содеяше,

к архиерею жену ту послаше.

Да разрешенна будет от онаго

от необычна греха толикаго.

Жена послушна словеси явися,

к архиерею с младенцем пустися.

Града достигши, времене смотряше,

в не же святитель во церкви стояше.

Пришедши убо во едино время,

несущи свое в объятиих бремя,

К архиерею близу приступила,

пред всем народом себе обличила.

О гресе тяжце милости просящи,

непрестанно же слез токи точящи.

Святитель мудрый, слезы созерцая,

покаяния правды искушая.

Ко жене рекл есть: Иди днесь молися,

утро нам в ризах таких зде явися,

В каких ты бяше, егда приходила

к сыну своему, егда его лстила.

Жена в день утрии в хитоне едином

предста народно с прибл уж денным сыном,

Паки пред миром себе обличайте,

разрешения преслезно прошаше.

Святитель, видя жену сокрушенну,

прогласи быти от грех ю прощенну,

Рекл: Иди в мире, прощении ти греси

от щедра Бога и зде, и в небеси.

Жена, слышащи то. возвеселися.

ко святителским ногам поклонися

И взя от него благословение

во известное греха прощение.

Но клирик некто, иже тамо бяше,

на святителя вознегодоваше.

Яко толик грех скоро оставляет

и за нь канона жене не задает.

Видя святитель негодование.

изрекл есть к нему сие сказание:

Аще сотворих аз лукаво дело.

демон да мучит грешное ми тело.

Аще же право содеяся мною,

демон лукавый плоть да томит твою.

Бысть слово делом, демон похитил есть

клирика того и люте томил есть.

Даже святитель о нем помолися,

тогда от врага клирик свободися.

Тем чюдом жена паче утвержденна

знати, яко есть от греха прощенна.

Со веселием в дом свои возвратися,

славящи Бога. Иже щедр явися.

И клирик тем же, иже возропташе.

чудом предивно наказанны бяше.

Еже не ктому на отца роптати,

ему же даде Господь паче знати.

И сам святитель ползу восприял есть,

яко Бог молбы его услышал есть.

И народ в вере о том утвердися.

яко прощенно в небе сотворися,

Что зде святитель обыче прощати,

егда грешники ему разрешати.

Тако по гресе бысть полза велика,

юже содея небесе Владыка,

Ему же слава да есть безконечна

от всея твари, и хвала всевечна.

Стиси краесогласнии

сложеннии во стретение иконы пресвятыя Богородицы из царствующаго града Москвы в Полоцк по первом взятии возвращенныя в лето от рождества Христова 1659 месяца априля 1 день, глаголаннии от отрок училища монастыря Богоявленскаго Полоцкаго в церкви соборной Софии святыя

Отрок 1

Радуйся. Мати Бога Человека,

избранна Ему прежде всяка века.

Честный престоле над вся херувимы,

троне преславныи сый над серафимы.

Радуйся, свитче, в нем же написанно

Слово, прежде век Богом глаголанно.

В тебе Премудрость с Словом заключенна,

ты еси ея храм, свят нареченна.

Дарове Духа седмь тя освящают,

яко седмь столпи храм ея ствержают.

Ложесна твоя стол есть божественный,

Христос есть вино и хлеб предложенный.

Тем же мы к тебе ныне притекаем,

алчбу и жажду утоли, желаем.

Насыти люди, гладом тающыя,

и напои душы, зело жаждущыя.

А мы, оживше, хощем воспевати:

Радуйся, Дево, неневестна Мати.

Ковчеже златыи, от Бога созданный,

в Новом Завете нам от Него данный,

Како имамы днесь тя целовати?

кими во песнех гласы величати?

Соломон древле жертву да де многу.

егда внесл киот в храм, созданный Богу.

А мы не телца, но сердца приносим,

пожри я Богу, тя усердно просим.

Просим, в сем храме изволь выну быти

и в сердцех наших Христа водворити.

Христос есть манна, ты же киот златыи,

даруй нам о Нем всегда пребывати.

Скрижали видим в тебе сокровенны

и жезл духовный, киоте мысленный.

Храни сим жезлом скрижалми завета,

наставляй мрачны люди на путь света.

Да навыкнут ти сице воспевати:

Радуйся, Дево, неневестна Мати.

Что тя наречем, велия царице?

Небо ты еси. Марие Девице.

Яко бо небо солнце украшает.

тако тя Христос светло просвещает.

Луна есть в небе, ты сама реченна

луна, во область нощы положенна.

Мрак бо греховный тебе просвещати

свойство, а ему в конец истребляти.

Он согревает. ты орошаеши,

тем нареченна луна бывавши.

Деиствием неба вс яка вещь держится,

наше тобою житие строиться.

Небо сияет прекрасно звездами,

ты украшенна всеми добротами.

Оно есть престол Божии нареченно,

но им Божество не есть вомещенно.

Ты престол мыслныи. ты же воместила

Бога, егда И во чреве носила.

Тем паче небес тебе возвыжшаем.

Радуйся. Дево Мати, восклицаем.

Рай ты словесный, Марие, реченна.

благовонными цветы украшенна.

Внутрь тебе жизни Древо возрастися,

и вторыи Адам в тебе водворися.

Христос есть древо. Того кто вкушает,

смерти вторыя всяко не познает.

Он есть и Адам вторыи. нам спасенный,

Им же живот наш дивне исправленный,

Иже Адамом первым умертвися,

егда преслушник Богу сотворися.

За что Адаму втору слава буди.

Его во веки вси да славят люди.

И тя. словесный раю, величаем.

Дево Мария, честь ти возсылаем

За сицевыи плод, за сего Адама,

по Бозе буди ты сдавленна сама.

Мы ти по вся дни будем воспевати:

Радуйся, Лево, неневестна Мати.

Столпе огненный Исраиля нова,

сияющ огнем Бога Отца Слова,

Се аггел вижду совета велика

тщится во помощь христианска лика

На руках твоих, яко в Чермном мори

в облаце древле бе помощник скорый.

Ты еси, Дево, облак. озаряяи

в нощи, и в хладе сладко согреваяи.

Ты и от вара веси прохлаждати

благодатию, знойных орошати.

Ты в обещанну землю нас въведеши,

путь неблазненныи ко Богу скажеши.

Ты помощь верным, а мечь на поганы,

защити от враг лютых християны.

Соблюди царя честна, крепка, здрава,

с ним и царицу, да тебе есть слава.

Царевичь точне здрав да возрастает,

в мудрость и силу богат да бывает.

И пресветлыя да будут царевны

здравы телесы, душами спасенны.

Дажд всем им лета многа пребывати,

скорбей, печалеи никогда прияти.

Соблюди собор пресветла сигклита,

донде же солнце исполн сладка света.

Да тя согласно с нами прославляют,

Радуйся, Дево Мати, воспевают.

Воста Соломон с престола своего,

егда прииде к нему мати его.

Одесную си изволил ей дати

престол достойный, да почтится мати.

Наш же Соломон, царь благочестивый.

Богородицу чтити зело тщивыи.

Яко всех Матерь, егда образ ея

узре во граде державы своея,

Даде честь всяку, на место честное

в церков возвел есть жилище свое.

Украсил златом преценным богато.

присно молися. Ты же ему за то

Изволи взаим, царице, воздати,

украси душу златом благодати.

Утверди престол его и державу,

новыми венцы венчай его главу.

Покори враги, да то вси познают,

яко всуе на нь с оружием встают.

Он же ти выну хощет воспевати:

Радуйся, Дево, неневестна Мати.

Врата Сионя зело Бог любует,

яже днесь Полоцк радостно целует.

Деву Марию врата нарицаю.

Бога пришедша ею быти знаю

С небес на землю, еже спасти люди.

тем же достойна честь ей от всех буди.

Она ж Лествица, в небо поставленна,

на ней же Бога видим утверженна,

Готова верных в небо приимати.

Кто ж не потщиться к онеи притекати?

Мы образ ея всечестно лобзаем,

первообразну в оном почитаем.

Сим правоверных ствержаются гради,

Господь я крепит Матере Си ради.

Тем же и в наш град сеи образ священный.

из царствующа града принесенный.

Да, молящеся мы Богородицы,

приимем помощь Божия десницы

Что же мы царстеи милости воздати

возможем за дар его благодати?

Рцем вси: Изволи. Боже щедрый, дата

на многа лета царю здравствовати.

Аарон, иже киот провождаше,

паче всех князей почитаем бяше.

Киот мысленный, пастырю, тобою

к нам днесь принесен. Тем же святость твою

Мы преиз ьящно ныне почитаем,

десницу твою любезно лобзаем

И восклицаем: Здравствуй многа лета,

соблюдай паству от врагов навета.

Храни ны от волк, на се ти жезл даны,

да упасеши Белоруски страны.

В помощь же киот мысленный имаши.

того силою падут врази наши.

К тебе мы убо, киоте мысленный,

вси притекаем, ковчеже спасенный,

О пресвятая Мариа девице,

всех сил небесных и мира царице.

Храни град Полоцк со всеми гражданы,

блюди в Россиистем народе вся саны.

Утоли брани, умоли мир миру,

утверди Церковь и разшири веру.

Подаждь отраду правоверным людем.

да тя во веки величати будем.

Яко сладкопенивы птицы подражают

пение человече, а сами не знают,

Тако филисофове ти обюродеша,

иже, правду погублше, во тме лжи седеша.

Сии поеледнии верши пречестныи господин отец Симеон писал за пол 2 дни до своея смерти из утра.

Items in A and В only

Воздержание 23

Глад человека скоро умерщвляет,

пресыщение болезни раждает

Гонение 2

Во пещ Халдейску трое вовержени

отроци быша, и огнем палени

От злых мучитель, но не пострадаша,

росу во огни хладную прояша.

Злыя же рабы огнь люто палил есть,

на ня весь пламень Господь обратил есть.

Тако в сем мире многажды бывает,

гонитель, не кто гоним, исчезает.

Гониму скорби в добро ся вращают,

терпением ri в небо устрояют,

А враг гонящий, не могущ успети,

нудится сердцем излиха болети.

Многажды и в смерть лютую впадает,

телом с душею купно погибает.

Труд

Птица рожденна, еже бы летати

и пищу себе на всяк день стяжати.

Человек паки — да бы в трудех быти.

своих, не чуждых трудов плодом жити.

Яко же убо птица издыхает

от глада, аще кая не летает,

Тако человек должен глад страдати,

не сый во трудех, потом умирати.

Павел ленивым ясти запрещает,

недостойныя жити осуждает.

Любы

Егда ближняго твоего любиши,

зри, да не злобу во оном блажиши.

Лице достойно в любви всегда быти.

злобу же выну нужда есть хулити,

Да ся не множит, паче истребляти,

корения ей въглубити не дати.

Иначе лице само погубится.

аще из него зло не истребится.

Страсти

Пафнутий богомудрый пресвято живяше,

страсти плотския в себе тощно умерщвляше,

С ними же брася долго, даже им престати

чистоты любителю похотми стужати.

И внегда непщеваше крепка себе быти,

выше похотных сетей время свое жити.

Тогда случися к нему гостем странствовати

святым, еже бы ползу от него прияти.

Тыя брашном сочива чредити хотяше.

возгнетив огнь, сочиво в конобе варяше.

По случаю руку си огнем опалил есть.

чювствуя болезнь, сам ся зело удивил есть

Глаголаше внутрь себе: Что се, увы, дело?

Еще огнь опаляет пустыннаго тело.

Что не мирен со мною, ему же всезлая

уступиша воинства давно демонская?

И паки сице в себе святый помышляше:

Увы ми, како будет прешествие наше

От земля на Суд Страшный, елма всю вселенну

огнь силою си явит весма измененну?

Како ми нужда будет в то время страдати.

не могущу болезни малыя подьяти?

Тако ему мыслившу, сон Богом пустися,

и аггел Господень в сонии явися,

Глаголя преподобну: Что печален еси,

Пафнутие? Живеши в мире, не в небеси.

Еще ти движения в плоти пребывают,

удов твоих похоти не у отбегают,

А хощеши, да бы огнь не могл тя палити.

донеле же страсть в плоти, тому несть леть быти.

Иди и возми деву красну обнаженну,

и зри ю пред тобою тако поставленну.

Аще ти мирно сердце может пребывати

и похотми не начнет ко оней стужати.

Тогда и пламень тебе не имать палити,

с силою естества си может уступити.

Яко же в пещи древле отрок не палил есть,

но кроме всяка вреда целы сохранил есть

Воспрянув, муж блаженный пред Богом смирился,

яко огнь опаляше, ктому не дивился.

Items in В only

Стиси на некия образы

Образа сего хотяй вину знати

изволь прилежно писмо разсуждати.

На высочайшем месте крест спасенный

стоит, на нем же Бог бе пригвожденный,

Яко той знамя всего христианства,

мечь на демоны, страх всего поганства.

К нему Костантин царь зрит умиленно,

яко то знамя бе ему спасенно

На Максентия. злаго мучителя,

рабов Христовых люта гонителя.

Белыя овцы к нему обращенны,

яко чрез него мир есть убеленны

Водами бани чистыми святыя.

Сам он омыся, теми же омы тыя.

Краснии цвети то нам извещают.

яко доброты красоту раждают.

Человек цвет есть, его же красота

есть всяческая душевна доброта.

Зриши древеса, в плоды гобзовита,

та знаменуют всяка нарочита

Мужа и Богу, и людем угодна,

в добродетели различныя плодна.

Таковых древес никто посецает,

и добрых людей Бог не истребляет.

Тщися ты убо добродеяй быти,

аще хощеши зде и в небе жити.

Тебе самому плоди плод сотворят,

егда тя в горнем Сионе водворят.

Другая страна что ны научает.

яко иерарх руце простирает

К Христову кресту, им же мир спасеся,

из плена адска к Богу привлечеся?

Молит Господа силу креста дати

ему на враги, да бы я прогнати

От стада овец, оному врученных,

жезлу крестному выну приученных.

Черныя овцы к нему прибегают,

убелитися чрез его желают.

Ведят, что имать власть я убелити,

егда изволит от грех разрешити.

Он убо руце горе воздезает,

силою креста дело совершает.

Зриши и птицы, парящи высоко.

Тыя аще зрит хитра стрелца око,

Не может онех парящых язвити,

ждет, даже сядут на древе почити.

И демон сущих в трудех не стреляет,

того он ловит, кто рад почивает.

И воды чисты всегда пребывают,

в течении си яже не устают.

Плод их суть рыбы зело нарочиты.

Трудися выну, таков будеш и ты,

Плоды духовны полно принесеши,

в чистоте плоти и духа будеши.

Леность всему есть велий корень злому,

всяк неключим есть ленивец никому.

Что писание сие. брате, зриши,

ума очеса зде да приложиши.

Тогда ти полза душевная будет,

ея же память твоя не забудет.

Царь се Волтасар Перский написася,

иже в покойство плоти древле вдася.

Ктому, пианству вина приучися

и женам красным крепко прилепися.

Свинию держит, яже знаменает,

яко сицевый в скерне пребывает.

Аще бел саном, или светла рода,

но кал и блато, свинская порода,

Каляет белость си нечистотою,

гнусными нравы, всякою злобою.

Аще в нос колце даси вепрю злато,

обаче риет кал и смрадно блато.

Иде же жабы, ехидны легают,

тамо свинии ради почивают.

Тако ленивец честь си погубляет,

в блате греховном рад ся обращает.

Кто же свинию гладит ублатненну,

иже одежду носит узлащенну?

Всяк ю отгонит от себе далече,

тако ты мерзок, скверный человече

Аггелом святым и всем честным людем,

убо потщимся, да нескверни будем.

Праздность отринем, яко корень злобы,

дабы гонзнути адския утробы.

Архиерейство аще сан великий,

возносяй люди в аггелския лики.

Обаче бодрость то в нем содевает,

а не одежда, юже облачает.

Ленивый пастырь овцы погубляет,

гладом я морит, волка насыщает.

Сам или волку хищну подобится,

или сквернами вепрю приложится.

Таков бе Удон в Майдебурском граде,

иже всеблудно живяше в прохладе.

Того зде ради с свинми написася,

яко в греховном блате рад валяся.

И яко люди таковы любляше.

им же нрав свинский ему точний бяше.

Змии, чрепахи, жабы знаменают,

что его дела оным ся равняют.

И всяк ленивец есть древо неплодно,

посечению и огневи годно.

Птица спящая его жь знаменает,

юже удобно стрелец убивает.

Егда кто празден седит и без дела,

той на ся врага сотворяет смела.

Тогда он сети втайне заставляет

и грехов смертных стрелми состреляет.

Хищает душу в сквернолюты руки,

во ад низносит на вечныя муки.

Иде же горе, горе, горе, горе,

бездна мучений, огненное море.

За неблагодарствие демон монаха зауши

Древле сицев обычай в христианех бяше,

егда на литургии слова си читаше:

Сие есть Тело Мое, елма глаголаху,

вси стоящий лицем к земли припадаху,

Честь творяще Господу, на землю вступившу,

во спасение наше человеку бывшу.

Под виды хлеба, вина Телом Си питает

нас и Кровию сладко весма напаяет.

Единою монаху некому случися.

чтомым бо словесем тем он не поклонися.

И се напрасно демон его заушает:

О горделиве старче, всем во слух вещает,

Тако неблагодарен ты человек еси,

не поклоняешися живущу в небеси.

Тебе ради плоть бывшу, до смерти страдавшу

и безконечную ти жизнь уготовавшу.

Телом Си и Кровию тебе Он питает,

от беззакония ти всего очищает.

О аще бы Он мене хотел искупити,

яко же благоволи людем сотворити,

Кланял бы ся во веки Божиему Сыну,

благодарствие много проявлял бым выну.

Зрите, возлюбленнии, демон ударяет,

за непоклонение гордаго смиряет.

Вы убо Божию Плоть и Кровь почитайте,

слово о том слышаще, поклон воздавайте.

Греха ненависть

За любовь благостини ненавидят злаго,

иже суть хранители жития добраго.

Злии паки не грешат, егда убоятся,

да не от имущих власть законно казнятся.

Страсть блуда

Огнь есть во человецех страсть блуда сквернаго,

тело и душу паляй страстника беднаго.

Вещь поджигающая есть пресыщение,

пламень его бывает ума кичение.

Искра — злая беседа, огнь сей возжигает,

иже, яко дым горкий, злу славу раждает.

По нем же пепел скверный — нечистота злая,

ея же конец вечный геенна вечная.

< Назад Далее >

Канал с обзорами, анонсами новинок и книжными подборками

Книжный Вестник

Бот для удобного поиска книг (если не нашлось на сайте)

Поиск книг

Свежие любовные романы в удобных форматах

Любовные романы

О психологии, саморазвитии и личностном росте

Саморазвитие

Детективы и триллеры, все новинки

Детективы

Фантастика и фэнтези, все новинки

Фантастика

Отборные классические книги

Классика

Библиотека с любовными романами, которая наверняка придётся по вкусу женской части аудитории

Любовные романы

Библиотека с фантастикой и фэнтези, а также смежных жанров

Фантастика

Самые популярные книги в формате фб2

Топ фб2 книги