Адкуль наш род

Адкуль наш род?

Ён з даўніны, з вячніны,

Ад крывічоў пачатак свой вядзе.

Нашчадкі Каліноўскага, Скарыны

Са сцежкі веры не сышлі нідзе.

Легенды пушчаў,

Бліскавіц навелы

Пра подзвіг прашчураў

Узносяць спеў.

I сцяг наш крэўны

Бел-чырвона-белы

Нас ад прыблудаў асланіць паспеў.

Мы — беларусы заўтра і сягоння,

Мы — беларусы праз вякі вякоў.

Нястрымная Літоўская Пагоня

Нас кліча бараніць зямлю бацькоў.

Вярыгамі й вясёлкамі спавіты,

Наш род кранае зоры галавой.

Спытай, адкуль ён —

Дужы, панавіты —

I неба дасць адказ высокі свой!