Цветная Триодь (на цсл., гражданский шрифт)

Последование Вечерни в Неделю самаряныни вечера

На Го́споди воззва́х: поста́вим стихо́в 6. И пое́м стихи́ры преполове́нию, 3. Гла́с 5. Подо́бен: Ра́дуйся по́стником:

Яви́ся светоявле́нное и кра́сное Спа́сова Воскресе́ния дне́сь преполове́ние всесвято́е, я́ко полу́дне све́тлое, уясня́ющее мiр Боже́ственными благода́тьми Христо́ва воста́ния, осия́ющее чудеса́ нетле́ния, облистава́ет зна́мения, и показу́ет на высоту́ Вознесе́ние, явля́ет многорачи́тельное Ду́ха прише́ствие, Пятьдеся́тницы всечестны́я светле́йшее торжество́. Те́мже и подае́т душа́м на́шим ми́р, и ве́лию ми́лость.

Я́ко Боже́ственныя сла́вы река́, пра́зднику ны́не преполови́вшуся, Госпо́дь струи́ благоутро́бия все́м подава́яй, вопие́т: жа́ждай да гряде́т ко Мне́, и пие́т те́пле. Исто́чник бо сострада́ния, и ми́лости пучи́на са́м Сы́й, источа́ет мірови оставле́ние, омыва́ет прегреше́ния, и очища́ет неду́ги: спаса́ет Воскресе́ние Его́ пра́зднующих, покрыва́ет любо́вию почита́ющих е́же со сла́вою Вознесе́ние Его́, и подае́т душа́м на́шим ми́р, и ве́лию ми́лость.

Посреде́ святи́лища ста́в, неопи́санный Бо́г же и Госпо́дь: Бо́г бо бя́ше естество́м, а́ще и на́с ра́ди вочелове́чився, опи́сан яви́ся те́лом, все́м источа́ше живото́чныя глаго́лы, все́м глаго́ля: ду́ши очи́стите, и зно́й страсте́й охлади́те, да не ка́ко лиша́тся пития́ челове́цы: Боже́ственную бо благода́ть да́рую безсме́ртнаго и лу́чшаго и вы́шняго Ца́рствия: сопричасти́тися Мне́ Созда́телю, и просла́витися.

И мине́и, 3.

Сла́ва, и ны́не, гла́с 8: Преполови́вшуся пра́зднику пре́жде стра́сти, и сла́внаго Воскресе́ния Твоего́ Го́споди, бы́л еси́ учя́ Бла́же, во святи́лищи непокори́выя иуде́и, и фарисе́и, и кни́жники, и вопия́ к ни́м: жа́ждай да гряде́т ко Мне́ и пие́т: ве́руяй в Мя́, воды́ жи́зни, Ду́ха Боже́ственнаго, ре́ки потеку́т от чре́ва его́. О неизрече́нныя прему́дрости Твоего́ хвале́ния! И́же вся́ исполня́яй Бо́же на́ш, сла́ва Тебе́.

На стихо́вне, стихи́ры Осмогла́сника, гла́с 4:

Животворя́щему Твоему́ Кресту́, непреста́нно кла́няющеся Христе́ Бо́же, тридне́вное Воскресе́ние Твое́ сла́вим: те́м бо обнови́л еси́ истле́вшее челове́ческое естество́ Всеси́льне, и и́же на небеса́ восхо́д обнови́л еси́ на́м, я́ко еди́н Бла́г и Человеколю́бец.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Хоте́х слеза́ми омы́ти мои́х грехо́в Го́споди, рукописа́ние и про́чее живота́ моего́ покая́нием благоугоди́ти Тебе́: но вра́г льсти́т мя́ и бо́рет ду́шу мою́. Го́споди, пре́жде да́же до конца́ не поги́бну, спаси́ мя.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Прославля́яйся в па́мятех святы́х Твои́х Христе́ Бо́же, от ни́х умоле́н быва́я, низпосли́ на́м ве́лию ми́лость.

Сла́ва, и ны́не, гла́с 6: Пра́зднику преполови́вшуся, Твоего́ Христе́ Воскресе́ния, и Боже́ственнаго прише́ствия Свята́го Твоего́ Ду́ха, сше́дшеся чуде́с Твои́х воспева́ем та́инства: во́ньже низпосли на́м ве́лию ми́лость.

Та́же: Ны́не отпуща́еши: Трисвято́е. Та́же тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектения и отпу́ст.

Последование Утрени в понедельник пятой седмицы по Пасхе

На Бо́г Госпо́дь: тропа́рь пра́здника преполове́ния:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

По 1-м стихосло́вии, седа́лен, гла́с 4:

Воззре́вше на гро́бный вхо́д, и пла́мене а́нгельскаго не терпя́ще мνроно́сицы, с тре́петом дивля́хуся глаго́люще: еда́ укра́деся отве́рзый разбо́йнику ра́й? Еда́ ли воста́, И́же и пре́жде стра́сти пропове́давый воста́ние? Вои́стинну воскре́се Христо́с, су́щим во а́де подая́ живо́т и воскресе́ние.

Сти́х: Го́споди, да не я́ростию Твое́ю обличи́ши мене́.

Смире́нную ду́шу мою́ посети́ Го́споди, во гресе́х житие́ все́ ижди́вшую, и я́коже блудни́цу приими́ мя Спа́се, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Дне́сь а́нгельская во́инства, в па́мять страстоте́рпцев приидо́ша, ве́рных мы́сли просвети́ти, и вселе́нную благода́тию уясни́ти: те́ми Бо́же, умоле́н быва́я, да́руй на́м ве́лию ми́лость.

Сла́ва и ны́не, Богоро́дичен: Стена́ непобори́мая на́м христиа́ном еси́ Богоро́дице Де́во: к Тебе́ бо прибега́юще невреди́ми пребыва́ем, и па́ки согреша́юще и́мамы Тя́ моли́твенницу. Те́м благодаря́ще вопие́м Ти́: ра́дуйся Благода́тная, Госпо́дь с Тобо́ю.

По 2-м стихосло́вии седа́лен, гла́с 8. Подо́бен:

Прему́дрость Сло́во О́тчее, И́же и да́вый апо́столом глаго́л Бо́жий, пропове́дати конце́м, е́же на зе́млю Его́ прише́ствие, от преле́стников евре́ев неи́стовством досажда́емь быва́ше, бесну́яйся и преле́стник гро́зно уничижа́емь, И́же незло́биво к ни́м вопия́ше: не суди́те на Мя́ су́д несуди́маго беззако́ннии. К Нему́ у́бо возопии́м: Человеколю́бче Христе́ Бо́же, прегреше́ний оставле́ние низпосли́, воспева́ющим ве́рою безприкла́дную сла́ву Твою́. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника со ирмосы́ на 8, и Мине́и на 4. Конда́к, икос и свети́лен пра́здника.

На хвали́тех поста́вим стихи́ 4, и пое́м стихи́ру воскре́сну, гла́с 4:

Кре́ст претерпе́вый и сме́рть, и воскресы́й из ме́ртвых Всеси́льне Го́споди, сла́вим Твое́ Воскресе́ние.

Овча́ е́смь слове́снаго Твоего́ ста́да, и к Тебе́ прибега́ю Па́стырю до́брому, взыщи́ мене́ заблу́ждшаго Бо́же, и поми́луй мя́.

Му́ченичен: Кто́ не ужаса́ется зря́ святи́и му́ченицы, по́двиг до́брый, и́мже подвиза́стеся? Ка́ко в те́ле су́ще безпло́тнаго врага́ победи́сте, Христа́ испове́давше, и кресто́м вооружи́вшеся. Те́мже досто́йно яви́стеся бесо́м прогони́телие, и ва́рваром победи́телие: непреста́нно моли́теся, спасти́ся душа́м на́шим.

Сла́ва, и ны́не, гла́с 8: Преполови́вшуся пра́зднику Па́схи, в хра́м вше́л еси́ святи́лищный, Спа́се на́ш, и ста́в посреде́ наро́да учи́л еси́ те́х с дерзнове́нием, и глаго́лал еси́: А́з е́смь све́т міра, в сле́д Мене́ иды́й, не и́мать ходи́ти во тме́, но име́ти бу́дет све́т безсме́ртныя жи́зни.

На стихо́вне стихи́ры, гла́с 2: Подо́бен: До́ме Евфра́фов:

Прекло́нь небеса́, сше́л еси́ Спа́се мо́й, и пло́ть от Де́вы кроме́ преложе́ния прия́л еси́, источа́я мне́ оставле́ние.

Сти́х: Бог же Царь наш пре́жде ве́ка, соде́ла спасе́ние посреде́ земли́.

Ве́сь в Бо́зе Сло́ве Ты́ еси́, погиба́юща мя́ хотя́ изъя́ти от прегреше́ний, соединя́ешися мне́, Человеколю́бче.

Сти́х: Помяни́ со́нм Тво́й, его́же стяжа́л еси́ испе́рва.

Ты́ прише́л еси́ Царю́, прему́дросте вели́кая, И́мже Оте́ц мiр сотвори́ прему́дро, со Святы́м Ду́хом.

Сла́ва, и ны́не, гла́с 8: Очи́стим помышле́ний сокро́вища, и душе́вная сия́ния просвети́м, и Жи́знь у́зрим Христа́, во святи́лище прише́дша, премно́жеством бла́гости, да врага́ победи́т, и спасе́т ро́д на́ш, стра́стию Креста́ и Воскресе́ния. К Нему́ же возопии́м: непостижи́ме Го́споди, сла́ва Тебе́.

По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпуст. И час 1-й.

Последование Вечерни в понедельник пятой седмицы по Пасхе вечера

На Го́споди воззва́х: стихи́ры подо́бны, гла́с 1. Подо́бен: Небе́сных чино́в:

Творе́ц все́х и жи́зни Пода́тель, Отцу́ Боже́ственному соприсносу́щное Сло́во, во́лею от Де́вы пло́ть прии́м, и бы́в Челове́к, неизрече́нныя прему́дрости, я́ко Бла́г, все́м источи́ уче́ния.

Пра́зднику преполови́вшуся иуде́йскому Христе́, во святи́лищи предста́л еси́, зако́ну Влады́ка учя́ вла́стию, и кни́жники облича́я, я́коже пи́сано е́сть, и ужаса́я прему́дростию слове́с Твои́х, и чуде́с показа́ньми.

Пода́тель прему́дрости, и до́брых излия́тель, излива́яй Боже́ственныя струи́, от исто́чника приснотеку́щаго: прииди́те ко Мне́, зове́т, во́ду жи́зни жа́ждущии почерпи́те, и ре́ки из чре́ва ва́шего, глаго́лет, дарова́ний Боже́ственных потеку́т.

Сла́ва и ны́не, гла́с 2: Егда́ прише́л еси́ во святи́лище Христе́ Бо́же, преполови́вшуся пра́зднику, тогда́ лю́ди учи́л еси́, вопия́: ве́руяй в Мя́, а́ще и у́мрет, жи́в бу́дет. Иуде́и же распыха́хуся с фарисе́и и саддуке́и и кни́жники, глаго́люще: кто́ е́сть Се́й, И́же глаго́лет хулы́? Не помышля́юще, я́ко Ты́ еси́ пре́жде все́х ве́к, со Отце́м и Ду́хом сла́вимый Бо́же на́ш, сла́ва Тебе́.

На стихо́вне стихи́ры Осмогла́сника, гла́с 4:

Дре́ва преслуша́ния запреще́ние разреши́л еси́ Спасе́, на Дре́ве кре́стнем во́лею пригвозди́вся, и во а́д соше́д Си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых Твоему́ Воскресе́нию, ра́достию вопию́ще: всеси́льне Го́споди, сла́ва Тебе́.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Кто́ обурева́емый, и притека́яй ко приста́нищу сему́, не спаса́ется? Или́ кто́ боле́знуяй, и припа́даяй к враче́бнице се́й, не исцелева́ется? Соде́телю все́х, и врачу́ неду́гующих Го́споди, пре́жде да́же до конца́ не поги́бну, спаси́ мя.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Святы́х му́ченик прие́мый терпе́ние, и от на́с приими́ пе́ние Человеколю́бче, да́руяй на́м те́х моли́твами ве́лию ми́лость.

Сла́ва, и ны́не, гла́с 3. Ге́рмана: Преполови́вшуся пра́зднику, сла́вим посреде́ земли́ спасе́ние Соде́лавша: Посреде́ бо двою́ разбо́йнику Живо́т на Дре́ве пове́шен бе́, и ху́лящему у́бо умолча́л, ве́рующему же возопи́л: дне́сь со Мно́ю бу́деши в раи́. Сше́л еси́ во гро́б, плени́л еси́ а́д, и воскре́сл еси́ тридне́вно, спаса́я ду́ши на́ша.

Та́же: Ны́не отпуща́еши: Трисвято́е. Та́же тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектения и отпу́ст.

Последование Утрени во вторник пятой седмицы по Пасхе

На Бо́г Госпо́дь: тропа́рь пра́здника преполове́ния:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

По 1-м стихосло́вии седа́лен, гла́с 4. Подо́бен: удиви́ся Ио́сиф:

Во́льною Твое́ю во́лею Кре́ст претерпе́л еси́ Спа́се, и во гро́бе но́ве положи́ша Тя́ челове́цы сме́ртнии, сло́вом концы́ соста́вльшаго. Те́мже свя́зан бы́сть чужди́й: сме́рть лю́то пленя́шеся, и су́щии во а́де вси́ взыва́ху живоно́сному воста́нию Твоему́: Христо́с воскре́се Жизнода́вец, пребыва́яй во ве́ки.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Помышля́й душе́, ка́ко предста́нем Судии́? поста́вятся престо́ли стра́шнии, и коего́ждо дея́ния облича́тся. Тогда́ Судия́ неумоли́мый: та́мо о́гнь лю́то предста́нет, я́коже свире́пое мо́ре содержа́, и покрыва́яй концы́. Со все́ми си́ми ви́ждь душе́ моя́, стени́ пре́жде конца́.

Сти́х: Ди́вен Бо́г во святы́х Свои́х Бо́г Изра́илев.

Му́ченичен: И́же во все́м мiре му́ченик Твои́х, я́ко багряни́цею и ви́ссом кровьми́ Це́рковь Твоя́ украси́вшися, те́ми вопие́т Ти́, Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шим ве́лию ми́лость.

Сла́ва, и ны́не, Богоро́дичен: Стра́шное та́инство, и чу́до пресла́вное, ка́ко Де́ва Тебе́ Зижди́теля все́х понесе́, и по рождестве́ па́ки цела́ и Де́ва пребы́сть? Рожде́йся из Нея́ ве́ру утверди́, язы́ки укроти́. И мiр умири́, я́ко Человеколю́бец.

По 2-м стихосло́вии, седа́льны, гла́с 8. Подо́бен: Прему́дрости сло́ва:

Прему́дрости во́ду и жи́зни источа́я мірови, все́х Спа́се призыва́еши почерпсти́ спасе́ния во́ды: Боже́ственный бо зако́н Тво́й прии́м челове́к, в себе́ угаша́ет, преле́стное у́глие: отону́дуже во ве́ки не вжа́ждет, ни преста́нет насыще́ния Твоего́ Влады́ко Царю́ Пренебе́сный. Сего́ ра́ди сла́вим держа́ву Твою́ Христе́ Бо́же, прегреше́ний оставле́ние прося́ще посла́ти бога́тно рабо́м твои́м. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника со ирмосы́ на 8, и Мине́и на 4. Конда́к, икос и свети́лен пра́здника.

На хвали́тех поста́вим стихи́ 4. И пое́м стихи́ры Осмогла́сника. Гла́с 4:

Кресто́м Твои́м Христе́, от дре́вния кля́твы свободи́л еси́ на́с, и сме́ртию Твое́ю естество́ на́ше му́чащаго диа́вола упраздни́л еси́: воста́нием же Твои́м ра́дости вся́ испо́лнил еси́. Те́мже вопие́м Ти́: воскресы́й из ме́ртвых Го́споди, сла́ва Тебе́. Два́жды.

Омы́й мя́ слеза́ми мои́ми Спа́се, я́ко оскверни́х во мно́гих гресе́х. Те́мже и припа́даю Ти́ Ми́лостиве: согреши́х, поми́луй мя́ Бо́же.

Му́ченичен: А́нгелом соприча́стницы бы́сте святи́и му́ченицы, в по́двизе Христа́ му́жески пропове́давше: вся́ бо я́же в мiре оста́висте кра́сная, я́ко не су́щая, ве́ру же я́ко агки́ру тве́рдую удержа́сте. Те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся спасти́ся душа́м на́шим.

Сла́ва, и ны́не, гла́с 4: Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́л еси́, иуде́и со дерзнове́нием учя́, Моисе́ом и в зако́не Тобо́ю законоположе́нным, ужаса́ющеся же Христе́, Твоея́ прему́дрости неизрече́нному та́инству, е́же на Тя́ ропта́нию в себе́ за́вистию поуча́хуся: ка́ко Се́й ве́сть пи́смена не учи́вся? Не ве́дуще Тебе́ Спа́са ду́ш на́ших.

На стихо́вне стихи́ры подо́бны, гла́с 2. Подо́бен: До́ме Евфра́фов:

Коне́ц сы́й и нача́ло, преполове́ние же, посреде́ пра́здника предста́л еси́ во святи́лищи Христе́ мо́й, источа́я ми́ оставле́ние.

Сти́х: Помяни́ со́нм Тво́й, его́же стяжа́л еси́ испе́рва.

Слы́ша Сио́н Воскресе́ния Твоего́ Боже́ственную держа́ву Сло́ве, и ра́дуется с ча́ды, воспева́я Тя́ Благоутро́бнаго.

Сти́х: Бог же Царь наш пре́жде ве́ка, соде́ла спасе́ние посреде́ земли́.

Све́т от Отца́, возсия́в Сло́во, но напоследи́ ле́т яви́лся еси́ я́ко Челове́к, подая́ мне́ прегреше́ний оставле́ние.

Сла́ва, и ны́не, гла́с 8: Преполови́вшуся пра́зднику Па́схи, в хра́м вше́л еси́ святи́лищный Спа́се на́ш, и ста́в посреде́ наро́да, учи́л еси́ те́х с дерзнове́нием, и глаго́лал еси́: А́з е́смь све́т міра, в сле́д Мене́ иды́й, не и́мать ходи́ти во тме́, но име́ти бу́дет све́т безсме́ртныя жи́зни.

По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпуст. И час 1-й.

Последование Вечерни во вторник пятой седмицы по Пасхе вечера

На Го́споди воззва́х: поста́вим стихо́в, 6. И пое́м стихи́ры преполове́нию 3, повторя́юще я́. Гла́с 4. Подо́бен: Го́споди, возше́д на Кре́ст:

Наста́ преполове́ние дне́й, от спаси́тельнаго начина́емых воста́ния, Пятдеся́тницею же Боже́ственною печатле́емое: и све́тится све́тлости обою́ду иму́щее, и соединя́ющее обоя́, и приити́ сла́ве предъявля́ющее Влады́чняго Вознесе́ния предпочита́ет.

Слы́ша и возвесели́ся Сио́н, благовести́вшуся Христо́ву Воскресе́нию: ве́рнии же его́ сы́нове возра́довашася Сего́ ви́девше, и омыва́юща Ду́хом скве́рну христоуби́йства: гото́вится торжеству́ющи, обои́х весе́лое преполове́ние.

Прибли́жися Боже́ственнаго изъоби́льное изли́тие на все́х, я́коже написа́ся Ду́ха: предъузаконе́ние пропове́дует, преполови́вшееся, по Христо́ве сме́рти и погребе́нии и Воскресе́нии, от Него́ да́нну су́щу ученико́м нело́жному обеща́нию, Уте́шителево показу́ющу явле́ние.

Сла́ва, и ны́не, гла́с 6: Пра́зднику преполовля́ющуся Твоего́ Христе́ Воскресе́ния, и Боже́ственнаго прише́ствия Свята́го Твоего́ Ду́ха, сше́дшеся чуде́с Твои́х воспева́ем та́инства: во́ньже низпосли́ на́м ве́лию ми́лость.

На стихо́вне самогла́сны, гла́с 1:

Пятдеся́тницы наста́ дне́й преполове́ние, в не́мже Христо́с обнажи́в малови́дно Боже́ственную си́лу, разсла́бленнаго стягну́ сло́вом, того́ от одра́ возста́вив, и боголе́пно чудотворя́ во зда́нном те́ле, челове́ком дарова́ ве́чный живо́т, и ве́лию ми́лость.

Сти́х: Помяни́ со́нм Тво́й, его́же стяжа́л еси́ испе́рва.

Во святи́лище прише́л еси́ Прему́дросте Бо́жия, преполовля́ющуся пра́зднику, учя́ и облича́я непокори́выя иуде́и, фарисе́и и кни́жники, и вопия́ со дерзнове́нием к ни́м: жа́ждай да гряде́т ко Мне́, и пие́т во́ду живо́тную, и не вжа́ждет во ве́к: ве́руяй Мое́й бла́гости, ре́ки потеку́т из чре́ва его́ жи́зни ве́чныя. О бла́гости и благоутро́бия Твоего́, Христе́ Бо́же на́ш, сла́ва Тебе́!

Гла́с 2:

Сти́х: Бог же Царь наш пре́жде ве́ка, соде́ла спасе́ние посреде́ земли́.

Егда́ преполове́ние пра́здника наста́, взы́де Иису́с во святи́лище, и уча́ше непокори́выя иуде́и, глаго́ля: жа́ждай да гряде́т ко Мне́, и пие́т во́ду живо́тную ве́чную, и не вжа́ждется в ве́к. Ве́руяй в Мя́, ре́ки потеку́т из чре́ва его́, и име́ти бу́дет све́т живо́тный.

Сла́ва и ны́не, гла́с 8: Преполови́вшуся пра́зднику, уча́щу Ти́ Спа́се, глаго́лаху иуде́е: ка́ко Се́й ве́сть пи́смена не учи́вся? Не разуме́юще, я́ко Ты́ еси́ Прему́дрость устро́ившая мiр, сла́ва Тебе́.

Та́же: Ны́не отпуща́еши: Трисвято́е. Тропа́рь отпусти́тельный:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектения и отпу́ст.

Последование Утрени в среду пятой седмицы по Пасхе

На Бо́г Госпо́дь: тропа́рь пра́здника преполове́ния:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

По 1-м стихословии седален, глас 4. Подобен: Ско́ро предвари́:

Всех серде́ц помышле́ния ве́дый, / посреде́ святи́лища став, / взыва́ше лжи́вым, глаго́ля и́стину: / что и́щете уби́ти Мя, животода́вца, пра́зднику преполовля́ющуся, вопия́ де́рзостно? Не на лица́ зря́ще суд суди́те, законопресту́пницы.

Слава, и ныне: тойже.

И чтение в толковании Евангелиа Иоанна.

По 2-м стихословии седален, глас 5. Подобен: Собезнача́льное Сло́во:

Влады́ка всех во хра́ме стоя́, / пра́зднику преполови́вшуся Пятдеся́тницы честны́я, евре́ем бесе́дуя, / облича́ше я́ве в дерзнове́нии мно́зе, я́ко Царь сый и Бог, мучи́тельство тех де́рзостное: / нам же всем да́рует за благоутро́бие ве́лию ми́лость.

Слава, и ныне: тойже.

Та́же, Воскресе́ние Христо́во: еди́ножды, и Псало́м 50.

И кано́ны праздника 4-го гла́са, со ирмосо́м на 8: и осма́го гла́са, на 6. Конда́к, и и́кос, и ексапостила́рий пра́здника.

На хвали́тех, Вся́кое дыха́ние: поста́вим стихи́ 4:

Прему́дрость и си́ла, О́тчее сия́ние, Сло́во присносу́щное и Сы́н Бо́жий, во святи́лище прии́де пло́тию, и уча́ше иуде́йския лю́ди жесто́кия и неблагода́рныя, и удивля́хуся прему́дрости бога́тству, вопию́ще: отку́ду ве́сть пи́смена ни от кого́же учи́вся? Два́жды.

Кни́жником затыка́ше уста́, иуде́и облича́ше Месси́а Госпо́дь, вопия́ к ни́м: не на лице́ законопресту́пницы, я́ко непра́ведни суди́те: в суббо́ту бо А́з разсла́бленнаго воздви́гнух. Те́мже Госпо́дь суббо́ты е́смь и зако́на: что́ и́щете Мене́ уби́ти, уме́ршия воздви́гшаго?

Навуфи́а ка́мением поби́ша лю́тии и законопресту́пнии, иуде́йское собра́ние неблагода́рное, Иса́ию же пило́ю древя́нною растро́ша, в ка́л му́драго Иереми́ю вверго́ша, Го́спода же на Кре́ст возне́сше, взыва́ху: хра́м разоря́я, спаси́ Себе́, и уве́руем.

Сла́ва, и ны́не, гла́с 4: Просвети́вшеся бра́тие Воскресе́нием Спа́са Христа́, и дости́гше преполове́ния пра́здника Влады́чня, прии́скренно сохрани́м за́поведи Бо́жия, да досто́йни бу́дем и Вознесе́ние пра́здновати, и прише́ствие получи́ти Свята́го Ду́ха.

Славословие великое. По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпуст. И час 1-й.

Последование Литургии в среду пятой седмицы по Пасхе

Блаже́нна обои́х кано́нов, пе́снь 9-я.

Проки́мен, и Аллилу́иа пра́здника, Апо́стол, и Ева́нглие дне́.

Причастен: Яды́й Мою Плоть, и пия́й Мою́ Кровь, во Мне пребыва́ет, и Аз в нем, рече́ Госпо́дь. / Аллилуиа. Трижды.

И отдае́тся пра́здник.

Слу́жба Мине́и пое́тся на Повече́рии.

Последование Вечерни в среду пятой седмицы по Пасхе вечера

На Го́споди воззва́х: поста́вим стихо́в 6, и пое́м стихи́ры о самаряны́не. Гла́с 4. Подо́бен: Зва́нный свы́ше:

На кла́дязе Христо́с самаряны́ню обре́т, проси́ во́ду пи́ти от нея́, жа́ждай сея́ исправле́ния и спасе́ния, е́же и уразуме́ся де́лы исполня́емое. Сию́ бо влеку́щую питие́, пития́ Са́м извлека́ет, и пития́ исполня́ет живу́щаго, согра́жданом возвеща́ющую: се́ дре́вле в зако́не рече́нный Месси́а Христо́с, яви́ся я́ко Челове́к, мы́слей сокрове́нных открыва́я неизрече́нная.

Се́ Месси́а Христо́с, су́щим во гра́де, на земли́ яви́ся, самаряны́ня глаго́лет: напи́санный приити́, и́же соде́янная мно́ю сказа́, и я́же во глубине́ се́рдца моего́ сокрове́нная, вся́ мне́ рече́, я́ко соверши́х. Те́мже гра́д сте́кшийся ви́дит словеса́ ея́, по всему́ и́стинствующая, и ве́щи удивля́ется, и уверя́ется виде́нию.

Тебе́ в шесты́й ча́с, я́ко влады́ку иногда́ в раи́ ходя́ща бо́га, прама́терняя ви́де дщи́ па́ки, в ча́с шесты́й та́ко седя́ща, иде́же исто́чник воды́, и кладене́ц ископа́ся, и от нея́ прося́ща пи́ти, я́ко да водо́ю сию́ напои́ши жи́зни нетле́ния, е́же и соде́яся: твоея́ бо живоно́сныя воды́, она́ изъоби́льно напи́вшися, и во гра́де пропове́да водно́е бога́тство.

И Мине́и, 3.

Сла́ва, и ны́не, гла́с 1: На исто́чник прише́л еси́, исто́чниче чуде́с, в шесты́й ча́с, Е́вин улови́ти пло́д: Е́ва бо в то́й изы́де из рая́ пре́лестию зми́евою: Прибли́жи бо ся самаряны́ня почерпсти́ во́ду, ю́же ви́дев рече́ Спа́с: да́ждь Ми́ во́ду пи́ти, и А́з воды́ теку́щия насы́щу тя́, и во гра́д те́кши целому́дренная, наро́дом возвести́ а́бие: прииди́те, ви́дите Христа́ Го́спода, Спа́са ду́ш на́ших.

На стихо́вне стихи́ры Осмогла́сника, гла́с 4:

Врата́ а́дова сокруши́л еси́ Го́споди, и Твое́ю сме́ртию сме́ртное ца́рство разруши́л еси́: ро́д же челове́ческий от тле́ния свободи́л еси́, живо́т и нетле́ние мiру дарова́в, и ве́лию ми́лость.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Апо́стольский ли́к, Ду́хом Святы́м просвети́л еси́ Христе́, и на́шу скве́рну грехо́вную те́ми отмы́й Бо́же, и поми́луй на́с.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Иму́ще дерзнове́ние ко Спа́су святи́и, моли́теся непреста́нно за ны́ гре́шныя, оставле́ние прегреше́ний прося́ще, и душа́м на́шим ве́лию ми́лость.

Сла́ва, и ны́не, гла́с 2: На студене́ц я́ко прии́де Госпо́дь, самаряны́ня моля́ше Благоутро́бнаго: пода́ждь ми́ во́ду ве́ры, и прииму́ купе́льныя воды́ ра́дование и избавле́ние: Животода́вче Го́споди, сла́ва Тебе́.

Та́же: Ны́не отпуща́еши: Трисвято́е. Та́же тропа́рь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектения и отпу́ст.

Последование Утрени в четверток пятой седмицы по Пасхе

На Бог Госпо́дь: тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

По 1-м стихосло́вии, седа́лен, гла́с 4. Подо́бен: Вознесы́йся на Кре́ст:

Распны́йся на́с ра́ди во́лею, и вмене́н бы́в в ме́ртвых Животода́вче, и воскре́с тридне́вно Христе́ Бо́же на́ш, сокруши́л еси́ си́лою Твое́ю сме́рти держа́ву, все́х воста́нием Твои́м су́щих во а́де оживи́вый. И воспева́юще чте́м Твое́ воста́ние вси́, безсме́ртне Го́споди.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Подо́бен: Ско́ро предвари́:

Свети́ла в конце́х ученики́ Твоя́, Спа́се, показа́л еси́ сия́юща Твои́м пропове́данием, просвеща́ющия ду́ши на́ша: пре́лесть и́дольскую те́ми омрачи́в, уче́ньми благоче́стия просвети́вый мiр. Те́х моли́твами спаси́ ду́ши на́ша.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Кресто́м вооружи́вшеся страстоте́рпцы Твои́, победи́ша ко́зни злонача́льнаго врага́, Христе́ Бо́же на́ш: возсия́ша я́ко свети́ла, челове́ки наставля́юще, подаю́т исцеле́ния ве́рою прося́щим. Те́х моли́твами спаси́ ду́ши на́ша.

Сла́ва, и ны́не, Крестобогоро́дичен: Де́во Пренепоро́чная, Преблага́го Бо́га ро́ждшая, со апо́столы Того́ непреста́нно моли́, оставле́ние прегреше́ний, и исправле́ние жития́ пода́ти на́м, пре́жде конца́, ве́рою и любо́вию воспева́ющим Тя́ по до́лгу, еди́на Всепе́тая.

По 2-м стихосло́вии седа́лен, гла́с 6. Подо́бен: Упова́ние мiру:

Я́ко ве́рней самаряны́не Го́споди, Божества́ Твоего́ исто́чник отве́рзл еси́, и излия́л еси́ богоразу́мие на ню́, напоя́я питие́м богоприя́тным: и ны́не все́м на́м низпосли́ прегреше́ний очище́ние преблаги́й. Два́жды.

Та́же, Воскресе́ние Христо́во: еди́ножды, и Псало́м 50.

Кано́н самаряны́ни со ирмосы́ на 8: и Мине́и на 4. Конда́к, и и́кос самаряны́ни, и ексапостила́рий, два́жды.

На хвали́тех поста́вим стихи́ 4. И пое́м стихи́ры Осмогла́сника, гла́с 4:

Оте́ческих Твои́х не́др не разлучи́вся, Единоро́дне Сло́ве Бо́жий, прише́л еси́ на зе́млю за Человеколю́бие, челове́к бы́в непрело́жен, и Кре́ст и сме́рть претерпе́л еси́ пло́тию, безстра́стный Божество́м, воскре́с же из ме́ртвых, безсме́ртие по́дал еси́ челове́ческому ро́ду я́ко еди́н Всеси́лен. Два́жды.

Некни́жныя ученики́ Ду́х Тво́й Святы́й наказа́тели яви́ Христе́ Бо́же, и многовеща́нным сли́чием язы́ков пре́лесть упраздни́, я́ко Всеси́лен.

Му́ченичен: Ка́ко ва́шим подвиго́м не удиви́мся святи́и му́ченицы, я́ко те́лом ме́ртвенным обложе́ни, безпло́тныя враги́ победи́сте? Не устраши́ша ва́с мучи́тельская преще́ния, ни ужаси́ша ва́с му́к приложе́ния, вои́стинну досто́йно от Христа́ просла́вистеся. Непреста́нно моли́теся спасти́ся душа́м на́шим.

Сла́ва, и ны́не, гла́с 2: Собезнача́льный и соприсносу́щный Сы́н и Сло́во О́тчее, на исто́чник прии́де, исто́чник исцеле́ний, и жена́ от Самари́и прии́де почерпсти́ во́ду, ю́же ви́дев рече́ Спа́с: да́ждь Ми́ воды́ пи́ти, и ше́дши пригласи́ твоего́ му́жа. Она́ же я́ко Челове́ку глаго́лющи, а не Бо́гу, утаи́ти тща́щися, глаго́лаше: не и́мам му́жа. И Учи́тель к не́й: и́стину рекла́ еси́: не и́мам му́жа, пя́ть бо име́ла еси́, и ны́не его́же и́маши, не́сть тво́й му́ж. Она́ же о глаго́ле удиви́вшися, и во гра́д те́кши, наро́дом вопия́ше, глаго́лющи: прииди́те ви́дите Христа́, И́же да́рует мірови ве́лию ми́лость.

На стихо́вне самаряны́ни, Гла́с 4. Подо́бен: Я́ко до́бля:

Ты́ исто́чник бла́гости сы́й и пучи́на, жи́зни же храни́тель, еди́не Благоутро́бне, ка́ко жене́ самаряны́не бесе́дуя возгласи́л еси́: да́ждь Ми́ во́ду пи́ти, я́ко да прии́меши оставле́ние: воспева́ем Твое́ мно́гое благоутро́бие, и́мже спаса́еши челове́ческий ве́сь ро́д, за мно́гую бла́гость.

Сти́х: Наляцы́, и успева́й, и ца́рствуй, и́стины ра́ди, и кро́тости, и пра́вды.

Прииди́те ви́дите Челове́ка, И́же рече́ ми дне́сь на исто́чнице седя́й, что́ сотвори́х: Проро́к бо и́стиннеший е́сть и превели́кий, сокрове́нная и явле́нная ве́дый вся́. Но да́руй во́ду жи́ву, ю́же подае́ши жа́ждущим, да не вжа́жду па́ки во ве́ки, Человеколю́бче.

Сти́х: Возлюби́л еси́ пра́вду, и возненави́дел еси́ беззако́ние.

Исто́чник приснотеку́щий, животе́ безсме́ртне, струя́ неистоща́емая же и нетле́нная, путеше́ствовав седя́ше бли́з кла́дязя, Своя́ ученики́ посла́в по бра́шно, бесе́доваше жене́ че́рплющей, сию́ хотя́ улови́ти, и просвети́ти души́ ея́ о́чи.

Сла́ва, и ны́не, гла́с 3: Да ра́дуется дне́сь све́тло не́бо и земля́, я́ко Христо́с яви́ся воплоща́емь я́ко Челове́к, да Ада́ма изме́т от кля́твы всеро́дна, и удивля́ется чудесы́ в Самари́ю прише́д: жене́ же бесе́доваше воды́ прося́, И́же о́блаки вода́ми одева́яй. Те́мже вси́ ве́рнии поклони́мся, на́с ра́ди во́лею Обнища́вшему, благоутро́бным сове́том.

По Трисвятом тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектении и отпуст. И час 1-й.

Последование Вечерни в четверток пятой седмицы по Пасхе вечера

На Го́споди воззва́х: стихи́ры подо́бны, гла́с 4. Подо́бен: Го́споди, возше́д на Кре́ст:

Ви́дите, Его́же преднаписа́ Моисе́й, Иису́са Месси́ю, в зако́не приити́, на земли́ я́вльшася благоутро́бия ра́ди и мне́ бесе́довавша я́ко Челове́ка на кла́дязе: вои́стинну Се́й е́сть Христо́с в мiр гряды́й, су́щим в Сиха́ре самаряны́ня яви́ся глаго́лющи.

От сла́дких у́ст жены́, во́ду пие́мую, сла́дкую истека́ющую, су́щии во гра́де пию́ще, и ко кла́дязю источа́ющему оби́лие воды́, потща́хуся тещи́ ско́ро и исто́чник ви́дети приснотеку́щий, иста́явшия ду́ши воспрохлажда́ющий.

Сообра́зный ви́дяще исто́чник, и единови́дный челове́ческаго составле́ния, жене́ вопия́ху во гра́де су́щии: не ктому́ твоея́ ра́ди бесе́ды мы́ ве́ровахом, вои́стинну позна́вше, я́ко То́й е́сть избавле́ние и спасе́ние мiру ве́чное.

Сла́ва, и ны́не, гла́с 6: При студенце́ Иа́ковли обре́т Иису́с самаряны́ню, про́сит воды́ от нея́, облака́ми покрыва́яй зе́млю. О чудесе́! И́же херуви́мы носи́мый, блудни́це жене́ бесе́доваше, воды́ прося́, И́же на вода́х зе́млю пове́сивый: воды́ иски́й, и́же исто́чники и езе́ра во́д излива́яй: хотя́ привлещи́ сию́ вои́стинну, уловля́емую от супоста́та врага́, и напои́ти ю́ водо́ю живо́ю, пали́мую в безме́стиих лю́те, я́ко еди́н Благоутро́бный и Человеколю́бец.

На стихо́вне стихи́ра кре́стная, гла́с 4:

Всегда́ иму́ще Христе́, Кре́ст Тво́й на по́мощь, се́ти вра́жия удо́бь попира́ем.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Воскре́сна: Го́споди, возше́д на Кре́ст, пра́деднюю на́шу кля́тву потреби́л еси́: и соше́д во а́д, я́же от ве́ка у́зники свободи́л еси́, нетле́ние да́руя челове́ческому ро́ду. Сего́ ра́ди пою́ще сла́вим животворя́щее и спаси́тельное Твое́ воста́ние.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Же́ртвы одушевле́нныя, всесожже́ния слове́сная, му́ченицы Госпо́дни, заколе́ния соверше́нна Бо́жия, Бо́га зна́ющая, и Бо́гом зна́емая овча́та, и́хже огра́да волко́м невхо́дна, моли́теся и на́м упасе́ным бы́ти с ва́ми на воде́ упокое́ния.

Сла́ва, и ны́не, гла́с 6: Та́ко Глаго́лет госпо́дь самаряны́ни: а́ще бы еси́ ве́дала да́р Бо́жий, и Кто́ е́сть глаго́ляй тебе́, да́ждь Ми́ воды́ пи́ти, ты́ бы проси́ла у Него́, и да́л бы ти́ пи́ти, да не вжа́ждешися во ве́ки, глаго́лет Госпо́дь.

Та́же: Ны́не отпуща́еши: Трисвято́е. Та́же тропа́рь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектения и отпу́ст.

Последование Утрени в пяток пятой седмицы по Пасхе

На Бог Госпо́дь: тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

По 1-м стихосло́вии седа́лен, Осмогла́сника, гла́с 4. Подо́бен: Ско́ро предвари́:

На Кресте́ Тя́ пригвозди́ша иуде́и Спа́се, и́мже от язы́ков на́с воззва́л еси́ Христе́ Бо́же на́ш, просте́рл еси́ дла́ни на не́м во́лею, копие́м же в ре́бра Твоя́ изво́лил еси́ пробости́ся: мно́жеству щедро́т Твои́х сла́ва Человеколю́бче.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Му́ченицы Твои́ Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего. Иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́шя.

Сла́ва, и ны́не, Крестобогоро́дичен: На Кресте́ Тя́ возвыша́ема я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи веща́ше: что́ но́вое и стра́нное сие́ чу́до сы́не мо́й? Ка́ко животе́ все́х вкуша́еши сме́рть, оживи́ти уме́ршия хотя́, я́ко Благоутро́бен.

По 2-м стихосло́вии седа́лен пра́здника, гла́с 4: Подо́бен: Ско́ро предвари́:

От кла́дязя воды́, земна́го и тле́ннаго, прише́дши обы́чно самаряны́ня почерпсти́, живу́ю во́ду почерпе́: та́ко обре́тши исто́чник седя́щий, иде́же исто́чник и кла́дязь Иа́ков ископа́, міра пламенопита́тельныя зно́ем напая́ющий. Два́жды.

Та́же, Воскресе́ние Христо́во: еди́ножды, и Псало́м 50.

Кано́н самаряны́ни со ирмосы́ на 8: и Мине́и на 4. Конда́к, и и́кос самаряны́ни, и ексапостила́рий.

На хвали́тех стихи́ры Осмогла́сника, гла́с 4:

Да́л еси́ зна́мение боя́щимся Тебе́ Го́споди, Кре́ст Тво́й честны́й, и́мже победи́л еси́ нача́ла тмы́ и вла́сти, и возве́л еси́ на́с на дре́внее блаже́нство. Те́мже Твое́ человеколю́бное смотре́ние сла́вим, Иису́се Всеси́льне, Cпа́се ду́ш на́ших. Два́жды.

Кресто́м Твои́м Христе́ Спа́се, наста́ви на́с на и́стину Твою́, и изба́ви ны́ от сете́й вра́жиих: воскресы́й из ме́ртвых, возста́ви ны́ па́дшия грехо́м, просте́р ру́ку Твою́ Человеколю́бче Го́споди, моли́твами святы́х Твои́х.

Му́ченичен: Честна́ сме́рть святы́х Твои́х Го́споди: меча́ми бо и огне́м, и сту́дению сокруша́еми, излия́ша кро́вь свою́, наде́жду иму́ще на Тя́, восприя́ти трудо́в мзду́: претерпе́ша, и прия́ша от Тебе́ Спа́се ве́лию ми́лость.

Сла́ва, и ны́не, гла́с 6: Исто́чник живонача́лия Иису́с Спа́с на́ш, ко исто́чнику прише́д патриа́рха Иа́кова, пи́ти проша́ше воды́ от жены́ самаряны́ни. Се́й же неприобщи́тельное иуде́ем прире́кшей, му́дрый Зижди́тель приво́дит ю́ сла́дкими глаго́лы, па́че к проше́нию присноживо́тныя воды́, ю́же и прии́мши все́м пропове́да, ре́кши: прииди́те ви́дите та́йных ве́дца и Бо́га, прише́дша пло́тию, за е́же спасти́ челове́ка.

На стихо́вне стихи́ры, гла́с 4. Подо́бен: Я́ко до́бля:

С почерпа́лом почерпсти́, прише́дши ко кла́дязю, почерпа́ло без воды́ оста́вивши, еди́на ко гра́ду востече́, исто́чник животеку́щий вопию́щи обрести́ самаряны́ня, незави́стный. Отону́дуже почерпе́ спаси́тельную во́ду, и се́ю прохлади́ се́рдце иста́явшее страстьми́.

Сти́х: Наляцы́, и успева́й, и ца́рствуй, и́стины ра́ди, и кро́тости, и пра́вды.

Вои́стинну рекла́ еси́, рече́ Спа́с самаряны́не, я́ко не и́маши дне́сь му́жа зако́нна, пя́ть бо име́ла еси́ пе́рвее, и ны́не, его́же стяжа́ла еси́, не́сть тво́й му́ж, но зако́на чу́ждь. Я́же и потща́вшися су́щим во гра́де вопия́ше: ви́дех Челове́ка, И́же изрече́ ми вся́, ели́ка вта́йне сотвори́х.

Сти́х: Возлюби́л еси́ пра́вду, и возненави́дел еси́ беззако́ние.

Струю́ ину́ю животеку́щую, от небе́снаго кла́дязя самаряны́ня почерпе́, на кла́дязе обре́тши сию́ излива́ему, из него́же тле́нную имя́ше по обы́чаю почерпсти́ во́ду, ину́ю земну́ю. Но ина́я входя́щая в се́рдце ея́ показа́ся, а́ки исто́чник ины́й но́вый, страсте́й ороша́ющий распале́ние.

Сла́ва, и ны́не, гла́с 8: Егда́ яви́лся еси́ во пло́ти Христе́ Бо́же, за неизрече́нное смотре́ние, слы́шавши самаряны́ня сло́во Тебе́ Человеколю́бца, оста́ви почерпа́ло у студенца́, и тече́ глаго́лющи су́щим во гра́де: прииди́те, ви́дите Сердцеве́дца, еда́ Се́й е́сть ча́емый Христо́с, име́яй ве́лию ми́лость?

По Трисвятом тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектении и отпуст. И час 1-й.

Последование Вечерни в пяток пятой седмицы по Пасхе вечера

На Го́споди воззва́х: поста́вим стихо́в 6, и пое́м стихи́ры самаряны́ни три́, и Мине́и три́.

Стихи́ры самаряны́ни, гла́с 1:

На исто́чник прише́л еси́, исто́чниче чуде́с, в шесты́й ча́с, Е́вин улови́ти пло́д: Е́ва бо в то́й изы́де из рая́ пре́лестию зми́евою. Прибли́жи бо ся самаряны́ня почерпсти́ во́ду, ю́же ви́дев рече́ Спа́с: да́ждь Ми́ во́ду пи́ти, и А́з воды́ теку́щия насы́щу тя́. И во гра́д те́кши целому́дренная, наро́дом возвести́ а́бие: прииди́те ви́дите Христа́ Го́спода, Спаси́теля ду́ш на́ших.

Гла́с 2: На студене́ц я́ко прии́де Госпо́дь, самаряны́ня моля́ше Благоутро́бнаго: пода́ждь ми́ во́ду ве́ры, и прииму́ купе́льныя воды́, ра́дование и избавле́ние, Животода́вче Го́споди сла́ва Тебе́.

Собезнача́льный и соприсносу́щный Сы́н и Сло́во О́тчее на исто́чник прии́де, исто́чник исцеле́ний, и жена́ от Самари́и прии́де почерпсти́ во́ду, ю́же ви́дев рече́ Спа́с: да́ждь Ми́ во́ду пи́ти, и ше́дши пригласи́ твоего́ му́жа. Она́ же я́ко Челове́ку глаго́лющи, а не Бо́гу, утаи́ти тща́щися, глаго́лаше: не и́мам му́жа. И Учи́тель к не́й: и́стину рекла́ еси́, не и́мам му́жа: пя́ть бо име́ла еси́, и ны́не его́же и́маши, не́сть тво́й му́ж. Она́ же о глаго́ле удиви́вшися, и во гра́д те́кше, наро́дом вопия́ше, глаго́лющи: прииди́те, ви́дите Христа́, И́же да́рует мірови ве́лию ми́лость.

Сла́ва, гла́с 6: При студенце́ Иа́ковли обре́т Иису́с самаряны́ню, про́сит воды́ от нея́, облака́ми покрыва́яй зе́млю. О чудесе́! И́же херуви́мы носи́мый, блудни́це жене́ бесе́доваше, воды́ прося́, И́же на вода́х зе́млю пове́сивый, воды́ иски́й, и́же исто́чники и езе́ра во́д излива́яй, хотя́ привлещи́ сию́ вои́стинну, уловля́емую от сопоста́та врага́, и напои́ти ю́ водо́ю живо́ю, пали́мую в безме́стиих лю́те, я́ко еди́н Благоутро́бный и Человеколю́бец.

И ны́не, Богоро́дичен, гла́с 4: И́же Тебе́ ра́ди, богооте́ц проро́к Дави́д, пе́сненно о Тебе́ провозгласи́, вели́чия Тебе́ сотво́ршему: предста́ Цари́ца одесну́ю Тебе́. Тя́ бо Ма́терь хода́таицу живота́ показа́, без Отца́ из тебе́ вочелове́читися благоволи́вый Бо́г да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, ко Отцу́ принесе́т, и Своему́ хоте́нию, с небе́сными совокупи́т си́лами, и спасе́т Богоро́дице мiр, Христо́с име́яй ве́лию и бога́тую ми́лость.

На стихо́вне стихи́ры воскре́сны Осмогла́сника, гла́с 4:

Животворя́щему Твоему́ Кресту́ непреста́нно кла́няющеся Христе́ Бо́же, тридне́вное Воскресе́ние Твое́ сла́вим: те́м бо обнови́л еси́ истле́вшее челове́ческое естество́ Всеси́льне, и и́же на небеса́ восхо́д обнови́л еси́ на́м, я́ко еди́н Бла́г и Человеколю́бец.

Сти́х: Госпо́дь воцари́ся, в ле́поту облече́ся.

Дре́ва преслуша́ния запреще́ние разреши́л еси́ Спа́се, на Дре́ве кре́стнем во́лею пригвозди́вся, и во а́д соше́д Си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых Твоему́ Воскресе́нию, ра́достию вопию́ще: всеси́льне Го́споди, сла́ва Тебе́.

Сти́х: И́бо утверди́ вселе́нную, я́же не подви́жится.

Врата́ а́дова сокруши́л еси́ Го́споди, и Твое́ю сме́ртию сме́ртное ца́рство разруши́л еси́, ро́д же челове́ческий от тле́ния свободи́л еси́, живо́т и нетле́ние мiру дарова́в, и ве́лию ми́лость.

Сти́х: До́му Твоему́ подоба́ет святы́ня Го́споди, в долготу́ дни́й.

Го́споди возше́д на Кре́ст, пра́деднюю на́шу кля́тву потреби́л еси́, и соше́д во а́д, я́же от ве́ка у́зники свободи́л еси́, нетле́ние да́руя челове́ческому ро́ду. Сего́ ра́ди пою́ще сла́вим, животворя́щее и спаси́тельное Твое́ воста́ние.

Сла́ва, и ны́не, гла́с 8: Егда́ яви́лся еси́ во пло́ти Христе́ Бо́же, за неизрече́нное смотре́ние, слы́шавши самаряны́ня сло́во Тебе́ Человеколю́бца, оста́ви почерпа́ло у студенца́, и тече́ глаго́лющи су́щим во гра́де: прииди́те, ви́дите Сердцеве́дца, еда́ Се́й е́сть ча́емый Христо́с, име́яй ве́лию ми́лость?

Та́же: Ны́не отпуща́еши: Трисвято́е. Та́же тропа́рь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектения и отпу́ст.

Последование Утрени в субботу пятой седмицы по Пасхе

На Бог Госпо́дь: тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

По 1-м стихосло́вии седа́лен воскре́сен, гла́с 4:

Воззре́вше на гро́бный вхо́д, и пла́мене а́нгельскаго не терпя́ще мνроно́сицы, с тре́петом дивля́хуся глаго́люще: еда́ укра́деся, отве́рзый разбо́йнику ра́й? Еда́ ли воста́, И́же и пре́жде стра́сти пропове́давый воста́ние вои́стинну воскре́се Христо́с, су́щим во а́де подая́ живо́т и воскресе́ние. Два́жды.

Сла́ва, и ны́не, Богоро́дичен: Е́же от ве́ка утае́ное, и а́нгелом несве́домое та́инство, Тобо́ю Богоро́дице су́щим на земли́ яви́ся Бо́г, в несли́тном соедине́нии воплоща́емь, и Кре́ст во́лею на́с ра́ди восприи́м, и́мже воскреси́в первозда́ннаго спасе́ от сме́рти ду́ши на́ша.

По 2-м стихосло́вии седа́лен, гла́с 4. Подо́бен: Вознесы́йся на Кре́ст:

Да ра́дуется не́бо, да веселя́тся земна́я, я́ко Христо́с от Де́вы яви́вся я́ко Челове́к, изба́ви из истле́ния все́ челове́чество Свое́ю сме́ртию, чудесы́ возсия́: жене́ самаряны́не воды́ прося́щей, подае́т исто́чник исцеле́ний, я́ко еди́н Безсме́ртный. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника на 6: И свята́го оби́тели, на 4: И Мине́и на 4. Конда́к, и ексапостила́рий пра́здника.

На хвали́тех поста́вим стихи́ 4. И пое́м настоя́щия стихи́ры воскре́сны, гла́с 4:

Кре́ст претерпе́вый и сме́рть, и воскресы́й из ме́ртвых, Всеси́льне Го́споди, сла́вим Твое́ Воскресе́ние.

Кресто́м Твои́м Христе́, дре́вния кля́твы свободи́л еси́ на́с, и сме́ртию Твое́ю естество́ на́ше му́чащаго диа́вола упраздни́л еси́, воста́нием же Твои́м ра́дости вся́ испо́лнил еси́. Те́мже вопие́м Ти́: воскресы́й из ме́ртвых Го́споди, сла́ва Тебе́.

Твои́м Кресто́м Христе́ Спа́се, наста́ви на́с на и́стину Твою́, и изба́ви ны́ от сете́й вра́жиих: воскресы́й из ме́ртвых, возста́ви ны́ па́дшия грехо́м, просте́р ру́ку Твою́ Человеколю́бче Го́споди, моли́твами святы́х Твои́х.

Оте́ческих Твои́х не́др не разлучи́вся Единоро́дный Сло́ве Бо́жий, прише́л еси́ на зе́млю за человеколю́бие, Челове́к бы́в непрело́жен, и Кре́ст и сме́рть претерпе́л еси́ пло́тию, безстра́стный Божество́м: воскре́с же из ме́ртвых, безсме́ртие пода́л еси́ челове́ческому ро́ду, я́ко еди́н Всеси́лен.

Сла́ва, и ны́не, гла́с 6: Исто́чник живонача́лия Иису́с Спа́с на́ш, ко исто́чнику прише́д патриа́рха Иа́кова, пи́ти проша́ше воды́, от жены́ самаряны́ни: се́й же неприобщи́тельное иуде́ом прире́кшей, му́дрый Зижди́тель приво́дит ю́ сла́дкими глаго́лы, па́че к проше́нию присносу́щныя воды́, ю́же и прии́мши все́м пропове́да реку́щи: прииди́те, ви́дите сокрове́нных ве́дца и Бо́га, прише́дшаго пло́тию, за е́же спасти́ челове́ка.

На стихо́вне стихи́ры, гла́с 4. Подо́бен: Я́ко до́бля:

Исто́чника приснотеку́щаго седя́ща на кла́дязи ви́девши жена́, терпя́щи зно́й премно́гих страсте́й исцели́тельную прося́ше прия́ти во́ду жи́зни, из Него́ излива́емую а́ки пото́к: ю́же и прия́т ту́не от Сло́ва и не ктому́ ко кла́дязю тщи́тся, земно́му и тле́нному.

Сти́х: Наляцы́, и успева́й, и ца́рствуй, и́стины ра́ди и кро́тости, и пра́вды.

Иуде́йския обы́чаи жене́ гоня́щей, и свое́ прилага́ющей неприча́стное, прича́стию воды́ Христо́с, приобщи́ му́дрый Соде́тель, сла́дкими провеща́ньми, и проси́ти животеку́щую сию́ во́ду Боже́ственную, ю́же пи́вши, ко гра́ду прии́де возвеща́ющи бы́вшая.

Сти́х: Возлюби́л еси́ пра́вду, и возненави́дел еси́ беззако́ние.

Ни почерпа́ла и́маши, и кла́дязь глубоча́йший, отку́ду у́бо пода́си ми́ во́ду нетле́нную? Самаряны́ня вопия́ше Ти́ Христе́, Тебе́ я́ко челове́ка мня́щи, а не Бо́га, и словесе́м чудя́щися: ю́же веща́ньми сладча́йшими напои́в, и Бо́га Тя́ все́х тва́рей испове́дати сотвори́л еси́.

Сла́ва, и ны́не, гла́с 6: Та́ко глаго́лет Госпо́дь самаряны́ни: а́ще бы еси́ ве́дала да́р Бо́жий, и Кто́ е́сть глаго́ляй тебе́, да́ждь Ми́ воды́ пи́ти: ты́ бы проси́ла у Него́, и да́л бы ти́ пи́ти, да не вжа́ждешися во ве́ки, глаго́лет Госпо́дь.

По Трисвятом тропарь:

Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.

Ектении и отпуст. И час 1-й.

Последование Литургии в субботу пятой седмицы по Пасхе

Прокимен, глас 3: По́йте Бо́гу на́шему, по́йте, / по́йте Царе́ви на́шему, по́йте.

Стих: Вси язы́цы восплещи́те рука́ми, воскли́кните Бо́гу гла́сом ра́дования.

Деяний святых Апостол чтение, зачало 37 (Деян. 15:35–41).

Во дни о́ны, Па́вел и Варна́ва живя́ста во Антиохи́и, уча́ща и благовеству́юща сло́во Госпо́дне, и со ине́ми мно́гими. По не́ких же днех рече́ Па́вел к Варна́ве: возвра́щшеся подоба́ет посети́ти бра́тию на́шу во всех гра́дех, в ни́хже пропове́дахом сло́во Госпо́дне, ка́ко пребыва́ют. Варна́ва же восхоте́ поя́ти с собо́ю Иоа́нна нарица́емаго Ма́рка. Па́вел же глаго́лаше отсту́пльшаго от на́ю от Памфили́и и не ше́дшаго с на́ма на де́ло, на не́же положе́ни бы́хом, не поя́ти сего́ с собо́ю. Бысть у́бо ра́спря, я́ко отлучи́тися и́ма от себе́: Варна́ва у́бо пое́м Ма́рка отплы́ в Кипр. Па́вел же избра́в Си́лу изы́де пре́дан благода́ти Бо́жией от бра́тий, прохожда́ше же Сири́ю и Килики́ю, утвержда́я це́ркви.

Аллилуиа, глас 4: Наляцы́, и успева́й, и ца́рствуй и́стины ра́ди, и кро́тости, и пра́вды.

Стих: Возлюби́л еси́ пра́вду, и возненави́дел еси́ беззако́ние.

Ева́нгелие от Иоа́нна, зача́ло 38 (10:27–38).

Рече́ Госпо́дь ко прише́дшым к Нему́ иуде́ем: о́вцы Моя́ гла́са Моего́ слу́шают, и Аз зна́ю их, и по Мне гряду́т. И Аз живо́т ве́чный дам им, и не поги́бнут во ве́ки, и не восхи́тит их никто́же от руки́ Моея́. Оте́ц Мой, И́же даде́ Мне, бо́лий всех есть, и никто́же мо́жет восхи́тити их от руки́ Отца́ Моего́. Аз и Оте́ц еди́но есма́. Взя́ша же ка́мение па́ки иуде́е, да побию́т Его́. Отвеща́ им Иису́с: мно́га добра́ дела́ яви́х вам от Отца́ Моего́, за ко́е их де́ло ка́мение ме́щете на Мя? Отвеща́ша Ему́ иуде́е, глаго́люще: о добре́ де́ле ка́мение не ме́щем на Тя, но о хуле́, я́ко Ты, челове́к сый, твори́ши Себе́ Бо́га. Отвеща́ им Иису́с: несть ли пи́сано в зако́не ва́шем: Аз рех, бо́зи есте́? А́ще о́ны рече́ бо́ги, к ни́мже сло́во Бо́жие бысть, и не мо́жет разори́тися Писа́ние, Его́же Оте́ц святи́ и посла́ в мир, вы глаго́лете, я́ко хулу́ глаго́леши, зане́ рех: Сын Бо́жий есмь. А́ще не творю́ дела́ Отца́ Моего́, не ими́те Ми ве́ры, а́ще ли творю́, а́ще и Мне не ве́руете, дело́м Мои́м ве́руйте, да разуме́ете и ве́руете, я́ко во Мне Оте́ц, и Аз в Нем.

Вместо же Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Таже ирмос, глас 1: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Причастен: Те́ло Христо́во приими́те, / исто́чника безсме́ртнаго вкуси́те. / Аллилу́иа. Трижды.