Цветная Триодь (на цсл., гражданский шрифт)

Последование Вечерни в Неделю Антипасхи вечера

Благослови́вшу иере́ю, глаго́лем: Христо́с воскре́се: три́жды. Та́же, Трисвято́е. По О́тче на́ш: Го́споди поми́луй, 12. Сла́ва, и ны́не: Прииди́те поклони́мся: три́жды. И глаго́лем 9-й ча́с обы́чный трипса́лмный: тропа́рь и конда́к пра́здника. Та́же пое́м вече́рню без кафи́смы. Го́споди воззва́х: пое́м во гла́с 1.

Стихи́ры на 6. пра́здника 3, гла́с 1. Подо́бен: Прехва́льнии му́ченицы:

По е́же из гро́ба Твое́м стра́шном Жизнода́вче воста́нии я́коже печа́тей не разруши́л еси́ Христе́, гро́бных, та́ко заключе́нным две́рем вше́д еси́ к пресла́вным апо́столом Твои́м, радостотворя́ и́х, и Пра́вый Тво́й Ду́х подая́ и́м, за безме́рную Твою́ ми́лость.

Фома́ и́же и Близне́ц не бе́ прише́л, егда́ Ты́ ученико́м яви́лся еси́ Го́споди. Те́мже не ве́рова Твоему́ Воскресе́нию и ви́девшим Тя́ вопия́ше: а́ще не вложу́ пе́рста в ре́бра Его́, и гвозде́й я́звы, не ве́рую я́ко воста́л е́сть.

Я́коже хо́щеши осяжи́, Христо́с Фоме́ вопия́ше: вложи́ ру́ку, и позна́й Мя́ ко́сти иму́ща, и земно́е те́ло, и не бу́ди неве́рен, ра́вно же со ине́ми уве́рися. Он же возопи́: Бо́г мо́й и Госпо́дь Ты́ еси́, сла́ва воста́нию Твоему́.

И свята́го Мине́и подо́бны 3. Сла́ва: свята́го.

А́ще ли ни́: Сла́ва, и ны́не: пра́здника, гла́с 1:

Две́рем заключе́нным, ученико́м собра́нным, вше́л еси́ внеза́пу всеси́льне Иису́се Бо́же на́ш: и ста́в посреде́ и́х, ми́р да́в, испо́лнил еси́ Свята́го Ду́ха: жда́ти же повеле́л еси́, и ника́коже разлуча́тися от Иерусали́ма, до́ндеже облеку́тся, е́же с высоты́ си́лою. Те́мже вопие́м Ти́: просвеще́ние, и воскресе́ние, и ми́ре на́ш, сла́ва Тебе́.

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

Проки́мен вели́кий, гла́с 7: Кто́ бо́г ве́лий, я́ко Бо́г на́ш? Ты́ еси́ Бо́г творя́й чудеса́.

Сти́х: Сказа́л еси́ в лю́дех си́лу Твою́.

Сти́х: И ре́х: ны́не нача́х, сия́ изме́на десни́цы Вы́шняго.

Сти́х: Помяну́х дела́ Госпо́дня.

И па́ки: Кто́ бо́г ве́лий, я́ко Бо́г на́ш? Ты́ еси́ Бо́г творя́й чудеса́.

Та́же ектениа́: Рце́м вси́: и Сподо́би Го́споди в ве́чер се́й: и ектениа́: Испо́лним вече́рнюю моли́тву на́шу Го́сподеви.

На стихо́вне стихи́ра воскре́сна Осмогла́сника, гла́с 1:

Вече́рния на́ша моли́твы приими́ Святы́й Го́споди, и пода́ждь на́м оставле́ние грехо́в: я́ко еди́н еси́ явле́й в мiре Воскресе́ние.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Умили́тельный: Я́ко пучи́на ве́лия прегреше́ний мои́х Спа́се, и лю́те погружа́юся согреше́ньми мои́ми, да́ждь ми́ ру́ку я́ко Петро́ви, спаси́ мя Бо́же, и поми́луй мя́.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Моли́твами Го́споди, все́х святы́х, и Богоро́дицы, Тво́й ми́р да́ждь на́м, и поми́луй ны́, я́ко еди́н Ще́др.

Сла́ва, и ны́не, гла́с 1: По дне́х осми́х воста́ния Твоего́ Го́споди, яви́лся еси́ ученико́м Твои́м на ме́сте, иде́же бя́ху со́брани, и возгласи́в и́м: ми́р ва́м, неве́рующему ученику́ ру́це показа́л еси́, и пречи́стое ребро́. Он же ве́ровав вопия́ше Тебе́: Госпо́дь мо́й и Бо́г мо́й, сла́ва Тебе́.

Та́же: Ны́не отпуща́еши: Трисвято́е.

По Трисвято́м, тропа́рь пра́здника. А́ще ли тропа́рь свята́го, рцы́ его́ пре́жде. Пото́м,

Сла́ва, и ны́не: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Си́це у́бо быва́ет после́дование Вече́рням во вся́ Неде́ли святы́я Пятидесятницы.

От дне́сь глаго́лем Повече́рие ма́лое. И пое́м кано́н моле́бный Пресвяты́я Богоро́дицы, во Окто́ихе. И трипе́снцы Трио́ди дне́, творе́ние господи́на Ио́сифа. Иде́же глаго́лем трипе́сно, Богоро́дицы пе́снь кано́на оставля́ется. По Досто́йно: и по О́тче на́ш: глаго́лем конда́к пра́здника, во всю́ Пятдеся́тницу. В Литурги́ах же пое́тся на блаже́ннах, от кано́на пра́здника Неде́ли, пе́снь рядова́я на ки́йждо де́нь, со ирмосо́м на 6, си́це: В понеде́льник, 1. Во вто́рник, 4. В сре́ду, 5. В четверто́к, 7. В пято́к, 8. В суббо́ту, 9.

Последование Утрени в понедельник второй седмицы по Пасхе

Повнегда́ сотвори́ти иере́ю нача́ло, Сла́ва святе́й: Глаго́лем: Христо́с воскре́се, три́жды, ти́хим гла́сом. [3]

И а́бие по Христо́с воскре́се: Сла́ва в вы́шних Бо́гу, и на земли́ ми́р: И обы́чное шестопса́лмие. Ектениа́ вели́кая. Та́же, Бо́г Госпо́дь: во гла́с 7. Тропа́рь пра́зднику:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

Се́й тропа́рь глаго́лется чрез всю́ седми́цу. И стихосло́вим кафи́смы две́, а тре́тия рядова́я на Вече́рни: И та́ко пое́м Псалти́рь до 21 септе́мвриа.

По 1-м стихосло́вии седа́лен воскре́сен, гла́с 1:

Гро́б Тво́й Спа́се, во́ини стрегу́щии, ме́ртви от облиста́ния я́вльшагося а́нгела бы́ша, пропове́дающа жена́м воскресе́ние: Тебе́ сла́вим тли́ потреби́теля, Тебе́ припа́даем воскре́сшему из гро́ба, и еди́ному Бо́гу на́шему.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Умили́тельный: В беззако́ниих зача́т е́смь а́з блу́дный, не сме́ю воззре́ти на высоту́ небе́сную, но дерза́я на человеколю́бие Твое́ зову́: Бо́же очи́сти мя́ гре́шнаго, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Страда́ния похвало́ю, и венце́в досто́инством, сла́внии страстоте́рпцы оде́яшася Тобо́ю Го́споди: терпе́нием бо ра́н беззако́нныя победи́ша, и си́лою Боже́ственною с небесе́ побе́ду прия́ша. Те́х моли́твами свободи́ от неви́димаго врага́ Спа́се, и спаси́ мя.

Сла́ва, и ны́не, Богоро́дичен: Чу́до чуде́с Благода́тная, в Тебе́ зря́щи тва́рь ра́дуется: зачала́ бо еси́ безсе́менно, и родила́ еси́ неизрече́нно, Его́же чинонача́лия а́нгелов ви́дети не мо́гут: Того́ я́ко Бо́га моли́ о душа́х на́ших.

Та́же чте́ние в толкова́нии Иоа́нна Ева́нглиа.

По 2-м стихосло́вии седа́лен, гла́с 1. Подо́бен: Гро́б Тво́й:

Прикосну́выйся руко́ю ре́бром нестерпи́мым Близне́ц Фома́, не опали́ся прикоснове́нием, но пребы́сть я́звы осяза́я изве́стнее, и веща́я на́с ра́ди прободе́нному: Ты́ мо́й Госпо́дь и Бо́г мо́й еси́, а́ще и стра́сть претерпе́л еси́.

Сла́ва, и ны́не: то́йже.

И чте́ние.

Та́же, Воскресе́ние Христо́во ви́девше: еди́ножды, и Псало́м 50.

Канон праздника.

Си́це бо твори́м до Вознесе́ния Госпо́дня, ниже́ Го́сподеви пое́м: глаго́лем, но глаго́лем я́коже написа́ся во Ирмоло́гиах. Нача́ло же твори́м от ирмосо́в, и́хже и повторя́ем, пою́ще и тропари́ на 6. И свята́го Мине́и на 4. По 3-й пе́сни конда́к, и седа́лен свята́го. Сла́ва, и ны́не: седа́лен пра́зднику. По 6-й пе́сни конда́к пра́зднику, и и́кос. И стихосло́вим Честне́йшую. По 9-й пе́сни ексапостила́рий пра́зднику, два́жды. Сла́ва: свята́го, а́ще е́сть. И ны́не: пра́здника, други́й свети́лен.

На хвали́тех поста́вим стихи́ры 3 Осмогла́сника, на 4. Гла́с 1:

Пое́м Твою́ Христе́ спаси́тельную стра́сть, и сла́вим Твое́ Воскресе́ние. Два́жды.

Умили́тельный: Ины́й тебе́ мiр душе́ ожида́ет, и Судия́ хо́щет твоя́ обличи́ти та́йная и лю́тая. Не пребу́ди у́бо в зде́шних, но предвари́ вопию́щи Судии́: Бо́же, очи́сти мя́, и спаси́ мя.

Му́ченичен: Страстоте́рпцы Христо́вы, прииди́те лю́дие, вси́ почти́м пе́сньми и пе́нии духо́вными, свети́ла міра, и пропове́дники ве́ры, исто́чник приснотеку́щий, из него́же истека́ют ве́рным исцеле́ния. Те́х моли́твами, Христе́ Бо́же на́ш, ми́р да́руй мірови, и душа́м на́шим ве́лию ми́лость.

Сла́ва, и ны́не, гла́с 1: Фома́ глаго́лемый Близне́ц не бе́ с ни́ми, егда́ вше́л еси́ Христе́ заключе́нным, две́рем, те́мже и не ве́роваше рече́нным ему́, от неве́рия в ве́ру известву́я: не несподо́бил же еси́ бла́же, показа́ти ему́ пречи́стое ребро́ Твое́, и руку́ и ногу́ я́звы. Он же осяза́в и ви́дев, испове́да Тя́ бы́ти Бо́га не на́га, и Челове́ка не про́ста, и вопия́ше: Госпо́дь мо́й и Бо́г мо́й, сла́ва Тебе́!

Та́же: Сла́ва Тебе́ показа́вшему на́м све́т: И ектениа́: Испо́лним у́треннюю моли́тву на́шу:

На стихо́вне стихи́ры гла́с 2. Подо́бен: До́ме Евфра́фов:

Устна́ми чи́стыми по́йте, со а́нгелы челове́цы, Воскре́сшаго тридне́вно из гро́ба, и мiр совоздви́гшаго.

Сти́х: Похвали́ Иерусали́ме Го́спода, хвали́ Бо́га твоего́ Сио́не.

Яви́лся еси́ свяще́нным Твои́м Спа́се апо́столом, две́рем заключе́нным, те́ми обновля́я на́м Боже́ственный Ду́х Тво́й.

Сти́х: Я́ко укрепи́ вереи́ вра́т твои́х, и благослови́ сы́ны твоя́ в тебе́.

Ны́не Тя́ Всецарю́, ви́девше не очи́ма, но серде́чною любо́вию Бо́га ве́ровавше, в пе́ниих велича́ем.

Сла́ва: свята́го, а́ще е́сть.

И ны́не, гла́с 1: Ученико́м сомня́щимся, во осмы́й де́нь предста́ Спа́с, иде́же бя́ху со́брани, и ми́р да́в, Фоме́ возопи́: прииди́ апо́столе, осяжи́ дла́ни, в ни́хже гво́здия вонзо́ша. О до́брое неве́рие Фомино́, ве́рных сердца́ в позна́ние приведе́, и со стра́хом возопи́: Госпо́дь мо́й и Бо́г мо́й, сла́ва Тебе́!

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Та́же ектениа́: Поми́луй на́с Бо́же: Посе́м иере́й: Сы́й благослове́н Христо́с Бо́г на́ш: Ли́к: Утверди́ Бо́же: И а́бие совокупля́ем ча́с пе́рвый трипса́лмный, по обы́чаю. Тропа́рь и конда́к пра́здника, и свята́го. А́ще же свята́го на 4, конда́к глаго́лется пра́здника непреме́нно: а свята́го конда́к не глаго́лется. И быва́ет соверше́нный отпу́ст. И обы́чная лити́а в притво́ре.

Начина́ем же от дне́сь и междоча́сия часо́в, по после́довавшему уста́ву. Подоба́ет же ве́дати, я́коже написа́ся зде́ восле́дование в Неде́лю ве́чера во свети́льничном, и в понеде́льник во Утрени: си́це да быва́ет во все́х седми́цах до Вознесе́ния Госпо́дня, изменя́емым стихи́рам Осмогла́сника, и седа́льном по обы́чаю.

Последование Литургии в понедельник второй седмицы по Пасхе

Блаже́нна Трио́ди, пе́снь 1 пра́здника, на 6. И от сего́ дне́ во всю́ Пятдеся́тницу. По вхо́де тропа́рь пра́здника: Запеча́тану гро́бу: и хра́ма Богоро́дицы, и хра́ма свята́го. Посе́м настоя́щаго свята́го, а́ще е́сть. Та́же конда́к хра́ма свята́го. Сла́ва: свята́го: И ны́не: пра́здника: Любопы́тною десни́цею: Хра́ма же Христо́ва, и Богоро́дицы конда́к, во всю́ Пятдеся́тницу не глаго́лем.

Проки́мен апо́стола, гла́с 3: Ве́лий Госпо́дь на́ш, и ве́лия кре́пость Его́, и ра́зума Его́ не́сть числа́.

Сти́х: Хвали́те Го́спода я́ко благ псало́м: Бо́гови на́шему да услади́тся хвале́ние.

Деяний святых Апостол чтение, зачало 9 (Деян. 3:19–26).

Во дни о́ны, рече́ Петр к лю́дем: пока́йтеся и обрати́теся, да очи́ститеся от грех ва́ших, я́ко да прии́дут времена́ прохла́дна от лица́ Госпо́дня, и по́слет пронарече́ннаго вам Христа́ Иису́са, Его́же подоба́ет небеси́ у́бо прия́ти да́же до лет устрое́ния всех, я́же глаго́ла Бог усты́ всех святы́х Свои́х проро́к от ве́ка. Моисе́й у́бо ко отце́м рече́: я́ко Проро́ка вам воздви́гнет Госпо́дь Бог ваш от бра́тии ва́шея, я́ко мене́, Того́ послу́шайте по всему́, ели́ка а́ще рече́т к вам. Бу́дет же, вся́ка душа́, я́же а́ще не послу́шает Проро́ка о́наго, потреби́тся от люде́й. И вси же проро́цы от Саму́ила и и́же по сих, ели́цы глаго́лаша, та́кожде предвозвести́ша дни сия́. Вы есте́ сы́нове проро́к и заве́та, его́же завеща́ Бог ко отце́м ва́шим, глаго́ля ко Авраа́му: и о се́мени твое́м возблагословя́тся вся оте́чествия земна́я. Вам пе́рвее Бог, воздви́гий О́трока Своего́ Иису́са, посла́ Его́ благословя́ща вас, во е́же отврати́тися вам кому́ждо от злоб ва́ших.

Аллилуиа, глас 8. Прииди́те возра́дуемся Го́сподеви, воскликнем Бо́гу Спаси́телю на́шему.

Стих: Я́ко Бог ве́лий Госпо́дь, и Царь ве́лий по всей земли́.

Ева́нгелие от Иоа́нна, зача́ло 6 (Ин. 2:1–11).

Во вре́мя о́но, брак бысть в Ка́не Галиле́йстей, и бе Ма́ти Иису́сова ту. Зван же бысть Иису́с и ученицы́ Его́ на брак. И недоста́вшу вину́, глаго́ла Ма́ти Иису́сова к Нему́: вина́ не и́мут. Глаго́ла Ей Иису́с: что есть Мне и Тебе́, Же́но? Не у прии́де час Мой. Глаго́ла Ма́ти Его́ слуга́м: е́же а́ще глаго́лет вам, сотвори́те. Бе́ху же ту водоно́сы ка́менни шесть, лежа́ще по очище́нию иуде́йску, вместя́щия по двема́ или́ трие́м ме́рам. Глаго́ла им Иису́с: напо́лните водоно́сы воды́. И напо́лниша их до верха́. И глаго́ла им: почерпи́те ны́не и принеси́те архитрикли́нови. И принесо́ша. Я́коже вкуси́ архитрикли́н вина́ бы́вшаго от воды́, и не ве́дяше, отку́ду есть, слуги́ же ве́дяху поче́рпшии во́ду, пригласи́ жениха́ архитрикли́н. И глаго́ла ему́: всяк челове́к пре́жде до́брое вино́ полага́ет, и егда́ упию́тся, тогда́ ху́ждшее, ты же соблю́л еси́ до́брое вино́ досе́ле. Се сотвори́ нача́ток зна́мением Иису́с в Ка́не Галиле́йстей и яви́ сла́ву Свою́, и ве́роваша в Него́ ученицы́ Его́.

Причастный: Похвали́ Иерусали́ме Го́спода, / хвали́ Бо́га твоего́ Сио́не. / Аллилуиа, трижды.

И во всю́ седми́цу та́ко твори́м, и во всю́ Пятдеся́тницу во вся́ неде́ли. И про́чее после́дование Литурги́и. И отпу́ст.

Последование Вечерни в понедельник второй седмицы по Пасхе вечера

На Го́споди воззва́х: поста́вим стихо́в 6, и пое́м стихи́ры подо́бны, гла́с 4. Подо́бен: Я́ко до́бля:

Воскре́с из гро́ба, заключе́нным две́рем, предста́л еси́ друго́м Твои́м всеси́льне, и Фоме́ неве́ровавшу, гвозде́й показа́л еси́ я́звы, и ребра́ е́же от копия́ прободе́ние, утвержда́я и уверя́я того́ Сло́ве, я́ко ты́ са́м еси́, за милосе́рдие претерпе́вый спаси́тельныя стра́сти.

За мно́гое снизхожде́ние, и милосе́рдие безме́рное, мое́ зря́ истоща́ние не усумни́ся, но уве́рися бли́знче, Госпо́дь рече́: я́ко Са́м е́смь Аз пострада́вый, и тридне́вен из гро́ба воскресы́й, и а́дова сокро́вища истощи́вый, и оживи́вый от ве́ка уме́ршия.

Удиви́вся я́ко узре́ Фома́ возопи́, егда́ ви́де Тя́ всеси́льне: Ты́ еси́ Бо́г мо́й и Госпо́дь, ве́рую Человеколю́бче, я́ко Са́м еси́ пострада́вый, и стра́сти исцеля́яй ду́ш на́ших. Кла́няюся Твое́й держа́ве, и мірови возвеща́ю стра́шное Твое́ и всеси́льное воста́ние.

И Мине́и 3.

Сла́ва, и ны́не: гла́с 1: Ученико́м сомня́щимся, во осмы́й де́нь предста́ Спа́с, иде́же бя́ху со́брани, и ми́р да́в, Фоме́ возопи́: прииди́ апо́столе, осяжи́ дла́ни, в ни́хже гво́здия вонзо́ша. О до́брое неве́рие Фомино́, ве́рных сердца́ в позна́ние приведе́ и со стра́хом возопи́: Госпо́дь мо́й и Бо́г мо́й, сла́ва тебе́!

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

На стихо́вне стихи́ры, гла́с 1:

Обыди́те лю́дие Cио́н, и обыми́те его́, и дади́те сла́ву в не́м Воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Я́ко помышле́нии лука́выми, и де́лы осуди́хся Спа́се, мы́сль мне́ да́руй обраще́ния Бо́же, да зову́: спаси́ мя благоде́телю Благи́й, и поми́луй мя́.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Е́же на суди́щи ва́ше испове́дание святи́и, де́монов оплева́ си́лу, и от пре́лести челове́ки свободи́. Те́мже и глава́м усека́емым, взыва́сте: да бу́дет, Го́споди, же́ртва ду́ш на́ших благоприя́тна пред Тобо́ю, я́ко Тебе́ возлюби́вше неради́хом о вре́менной жи́зни, Человеколю́бче.

Сла́ва, и ны́не, гла́с 2: По воста́нии Твое́м Го́споди, собра́нным ученико́м Твои́м, и две́рем заключе́нным, посреде́ ста́л еси́, ми́р подая́ и́м: ве́ровав же и Фома́, зре́нием руку́ и ре́бр Твои́х, Го́спода и Бо́га Тя́ испове́да, спаса́ющаго упова́ющия на Тя́, Человеколю́бче.

Та́же: Ны́не отпуща́еши: Трисвято́е.

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Последование Утрени во вторник второй седмицы по Пасхе

На Бо́г Госпо́дь: тропа́рь пра́здника:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

По 1-м стихосло́вии, седа́лен, гла́с 1. Подо́бен: Ка́мени запеча́тану:

Жены́ ко гро́бу приидо́ша ура́ншия, и а́нгельское явле́ние ви́девшия трепета́ху: гро́б облиста́ жи́знь, чу́до удивля́ше я́. Сего́ ра́ди ше́дшия, ученико́м пропове́даху воста́ние: а́д плени́ Христо́с, я́ко еди́н кре́пок и си́лен, и истле́вшия вся́ совоздви́же, осужде́ния стра́х разруши́в Кресто́м.

Сти́х: Го́споди да не я́ростию Твое́ю обличи́ши мене́, ниже́ гне́вом Твои́м нака́жеши мене́.

А́ще пра́ведник едва́ спаса́ется, а́з гре́шный где́ явлю́ся, тяготы́ и ва́ра дневна́го не поне́сший? Но с нае́мники единонадеся́таго часа́ причти́ мя Бо́же, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Я́ко до́брии во́ини единому́дренно ве́ровавше, преще́ния мучи́телей не убоя́вшеся святи́и, приидо́сте усе́рдно ко Христу́, взе́мше честны́й кре́ст, и сконча́вше тече́ние, с небесе́ побе́ду прия́сте. Сла́ва укре́пльшему вы́: сла́ва венча́вшему вы́: сла́ва де́йствующему ва́ми все́м исцеле́ния.

Сла́ва, и ны́не, Богоро́дичен: Неруши́мую сте́ну иму́ще ве́рнии Богоро́дицу Мари́ю, прииди́те поклони́мся, и припаде́м Ей: дерзнове́ние бо и́мать к Ро́ждшемуся из Нея́, и моли́ти, и спаса́ти от гне́ва и сме́рти ду́ши на́ша.

По 2-м стихосло́вии седа́лен, гла́с 5. Подо́бен: Собезнача́льное Сло́во:

Апо́стола вси́ и ученика́ Христо́ва восхва́лим пе́сньми в па́мять его́: боголе́пно бо на́ша помышле́ния, то́й я́звы гвозде́й осяза́в, изве́стну ве́ру изыска́в, утверди́ в мiре, и мо́лит Спа́са, поми́ловатися душа́м на́шим.

Сла́ва и ны́не: то́йже.

Та́же, Воскресе́ние Христо́во ви́девше: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. По 3-й пе́сни, седа́лен Мине́и, конда́к и ексапостила́рий пра́здника.

На хвали́тех, стихи́ры на 4, гла́с 1:

Кре́ст претерпе́вый, и сме́рть упраздни́вый, и воскресы́й из ме́ртвых, умири́ на́шу жи́знь Го́споди, я́ко еди́н всеси́лен. Два́жды.

Не пренебрези́ мене́ Спа́се мо́й, ле́ностию грехо́вною содержи́ма: воздви́гни мое́ помышле́ние к покая́нию, и Твоего́ виногра́да де́лателя иску́сна покажи́ мя, да́руя ми́ единонадеся́таго часа́ мзду́, и ве́лию ми́лость.

Му́ченичен: Си́и во́ини Царя́ вели́каго, сопроти́вишася повеле́нием мучи́телей до́блественно, небрего́ша о му́ках, и пре́лесть всю́ попра́вше, досто́йно венча́ни бы́вше, про́сят у Спа́са ми́ра, и ве́лия ми́лости.

Сла́ва, и ны́не, гла́с 2: Две́рем заключе́нным, предста́в Спа́с ученико́м, безстра́шие и ми́р дая́ше. Та́же глаго́лет Фоме́: что́ Мне́ не ве́руеши, я́ко воскресо́х из ме́ртвых? Принеси́ се́мо ру́ку твою́, и вложи́ в ре́бра Моя́, и ви́ждь. Тебе́ бо неве́рующу, вси́ навыко́ша стра́сти и Воскресе́ние Мое́ зва́ти с тобо́ю: Госпо́дь мо́й и Бо́г мо́й, сла́ва Тебе́.

На стихо́вне стихи́ры пра́здника, гла́с 2. Подо́бен: До́ме Евфра́фов:

Воспои́м ве́рнии, непреста́нно со а́нгелы, Христа́ воскре́сшаго, тридне́вна из гро́ба, и мiр совоздви́гшаго.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Фома́ Твоя́ ре́бра, Благоутро́бне, осяза́в, к ве́ре взы́де: и мы́ те́м Тя́ Бо́га про́чее позна́хом.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Подае́ши о Изба́вителю, ми́р лю́дем Твои́м воскре́с из гро́ба, и мiр совоздви́гнувый от а́да, Всеси́льне.

Сла́ва, и ны́не: гла́с 6. Иоа́нна мона́ха:

Две́рем заключе́нным, прише́л еси́ Христе́ ко ученико́м, тогда́ Фома́ смотри́тельно не обре́теся с ни́ми. Глаго́лаше бо: не иму́ ве́ры, а́ще не уви́жду и а́з Влады́ки. Уви́жду ребро́, отону́дуже изы́де кро́вь, вода́, креще́ние: уви́жду я́зву, от нея́же исцеле́ вели́кий стру́п челове́ческий: уви́жду, ка́ко не бе́ я́коже ду́х, но пло́ть и ко́сти. Сме́рть попра́вый, и Фому́ уве́ривый, Го́споди сла́ва Тебе́.

Та́же, Бла́го е́сть испове́датися Го́сподеви: Ча́с 1-й. И отпу́ст.

Последование Вечерни во вторник второй седмицы по Пасхе вечера

На Го́споди воззва́х: поста́вим стихо́в 6, и пое́м стихи́ры, гла́с 1. Подо́бен: Прехва́льнии му́ченицы:

Осяжи́, глаго́лет Фоме́, из ме́ртвых тридне́вен воскресы́й Человеколю́бец, и ви́ждь руку́ мое́ю и ногу́ я́звы, и ре́бр прободе́ние: и позна́й Мя́ Бо́га непреме́нна, земны́м смеше́нием по существу́ воображе́нна и стра́сть в не́м прие́мша.

Недоумева́шеся Близне́ц, я́звы зря́ ножны́я, и ручна́я вонзе́ния, и бя́ше ужаса́емь стра́шным чу́дом: и руко́ю пречи́стое ребро́ и осяза́я и ви́дя, из ни́хже показа́ несумне́нное язы́ком, е́же из гро́ба тридне́вное воста́ние.

Прие́млю превели́кое ра́дование, Твое́ Спа́се мо́й воста́ние известву́емое ви́дя: от ни́хже сподо́бися де́рзостным ве́щем Фома́ прикосну́тися. Те́мже тя́ про́ста пропове́дуем Бо́га и Челове́ка, де́йства два́ нося́ща су́щественна, от ни́хже сложи́лся еси́.

И мине́и, 3.

Сла́ва, и ны́не, гла́с 4: Го́споди, нестерпи́мым Твоего́ Божества́ блиста́нием, две́рем прише́л еси́ су́щим заключе́нным, и ста́в посреде́ ученико́в, ребро́ обнажи́л еси́, и я́зв Твое́ю руку́ и ногу́ стру́пы явля́я, печа́ль же и ско́рбь разреша́я, я́ве возгласи́л еси́: и́мже о́бразом во Мне́ ви́дите, о дру́зи, пло́ти прия́тие, не ду́ха ношу́ естество́. Сомня́щему же ся ученику́ повелева́л еси́ осяза́ти тре́петно, ре́к: испыта́в вся́, гряди́ про́чее не сумни́ся. Он же ощуща́я руко́ю Твое́ сугу́бое существо́, со стра́хом вопия́ше ве́рно, ве́рою влеко́мь: Госпо́дь мо́й и Бо́г мо́й сла́ва Тебе́.

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

На стихо́вне стихи́ра кре́стна, гла́с 1:

Кре́ст водрузи́ся на ло́бнем, и процвете́ на́м безсме́ртие от исто́чника приснотеку́щаго ребра́ Спа́сова.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Прииди́те лю́дие воспои́м, и поклони́мся Христу́, сла́вяще Его́ е́же из ме́ртвых Воскресе́ние, я́ко То́й е́сть Бо́г на́ш, от пре́лести вра́жия мiр избавле́й.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: О до́брыя ку́пли ва́шея святи́и! я́ко кро́ви да́сте, и небеса́ насле́довасте, и привре́менно искуси́вшеся, ве́чно веселите́ся. Вои́стинну добра́ ва́ша ку́пля: тле́нная бо оста́вльше, нетле́нная восприя́сте, и со а́нгелы лику́юще, пое́те непреста́нно Тро́ицу Единосу́щную.

Сла́ва, и ны́не, гла́с 8: Прикосни́ся Фомо́ руко́ю ре́бром, глаго́лет Христо́с, и я́звы гвозде́й прииди́ осяжи́: ве́рою испыта́й, и бу́ди Ми́ ве́рен, и не бу́ди неве́рен. Фома́ же пе́рстом я́ко прикосну́ся Влады́це, вельми́ возопи́: Ты́ мо́й Бо́г и Госпо́дь, благоутро́бне сла́ва Тебе́.

Та́же: Ны́не отпуща́еши: Трисвято́е.

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Ве́стно бу́ди, я́ко в сре́ды и пятки́ предваря́ют стихи́ры Кре́стныя, та́кожде и седа́льны воскре́сны: зане́же Госпо́дь на́ш пе́рвее распя́ся, посе́м же воскре́се из ме́ртвых.

Последование Утрени в среду второй седмицы по Пасхе

На Бо́г Госпо́дь: тропа́рь пра́здника:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

По 1-м стихосло́вии, седа́лен кре́стный, гла́с 1:

Распе́ншуся Тебе́ Христе́, поги́бе мучи́тельство, попра́на бы́сть си́ла вра́жия: ниже́ бо а́нгел, ни челове́к, но са́м Го́споди спа́сл еси́ ны́, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Исаа́к на хо́лм возведе́н бы́сть, Ио́на во глубину́ низведе́ся, и о́ба стра́сть Твою́ Спа́се образова́ста. Ов у́бо у́зы и заколе́ние: о́в же погребе́ние, и жи́знь пресла́внаго воста́ния Твоего́. Го́споди сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Боле́зньми святы́х, и́миже о Тебе́ пострада́ша, умоле́н бу́ди Го́споди, и вся́ на́ша боле́зни исцели́, Человеколю́бче, мо́лимся.

Сла́ва, и ны́не: Крестобогоро́дичен: Твое́ предста́тельство иму́ще Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

По 2-м стихосло́вии, седа́лен, гла́с 1. Подо́бен: Гро́б Тво́й Спа́се:

Прикосну́выйся руко́ю ре́бром нестерпи́мым Близне́ц Фома́, не опали́ся прикосну́тием: но пребы́сть я́звы осяза́я изве́стнее, и веща́я на́с ра́ди прободе́нному: Ты́ мо́й Госпо́дь, Ты́ и Бо́г мо́й еси́, а́ще и стра́сть претерпе́л еси́.

Сла́ва, и ны́не: то́йже.

Та́же, Воскресе́ние Христо́во ви́девше: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. По 3-й пе́сни, седа́лен Мине́и, кондак и ексапостила́рий пра́здника.

На хвали́тех настоя́щия стихи́ры Кре́стныя, на 4, гла́с 1:

Тебе́ на Дре́ве пригво́ждьшагося, и живо́т на́м пода́вшаго, я́ко Спа́са и Влады́ку пое́м непреста́нно. Два́жды.

А́да плени́вый, и челове́ка воскреси́вый, Воскресе́нием Твои́м Христе́, сподо́би на́с чи́стым се́рдцем Тебе́ пе́ти и сла́вити.

Му́ченичен: Ва́с всехва́льнии му́ченицы, ни ско́рби, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́чь, ниже́ о́гнь претя́щий, разлучи́ти от Бо́га возмого́ша: любо́вию же па́че к Нему́, я́ко в чужди́х подви́гшеся телесе́х, естество́ забы́сте, сме́рть презре́вше: те́мже и по достоя́нию трудо́в ва́ших мзду́ прия́сте, Небе́снаго Ца́рствия насле́дницы бы́сте. Иму́ще дерзнове́ние к Человеколю́бцу Бо́гу, мірови ми́р испроси́те, и душа́м на́шим ве́лию ми́лость.

Сла́ва и ны́не, гла́с 8: Две́рем заключе́нным, ученико́м собра́нным, предста́ Спа́с, иде́же бя́ху со́брани, и ста́в посреде́ и́х, глаго́лет Фоме́: прииди́, осяжи́, и ви́ждь о́бразы гвозде́й. Простри́ ру́ку твою́, и косни́ся ребру́ Моему́, и не бу́ди неве́рен, но ве́рою пропове́ждь е́же из ме́ртвых Мое́ Воскресе́ние.

На стихо́вне стихи́ры, гла́с 2. Подо́бен: До́ме Евфра́фов:

О чудесе́ но́ваго! О пресла́внаго о́браза! Ка́ко трава́ не опали́ся, рука́ апо́столова огне́м Божества́?

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Потщи́мся и мы́ ру́ки освяти́ти, страсте́й упражне́нием, и та́ко Влады́чним ре́бром прико́снемся.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Обнови́ душе́, вся́ твоя́ чу́вства к боже́ственному зре́нию: Христо́с бо си́це хо́щет соверша́тися обновле́нием.

Сла́ва, и ны́не, Богоро́дичен, подо́бен:

Ви́ждь ми́ у́мно, премене́ние міра, и украси́ я́же вну́трь, доброде́тельми я́ко ли́ствием душе́, и украси́шися.

Та́же, Бла́го е́сть испове́датися Го́сподеви: Ча́с 1-й. И отпу́ст.

Последование Вечерни в среду второй седмицы по Пасхе вечера

На Го́споди воззва́х: поста́вим стихо́в 6. И пое́м стихи́ры подо́бны, гла́с 2. Подо́бен: Егда́ от Дре́ва:

Не́др не оста́вль Оте́ческих, яви́лся еси́ на земли́ плотоно́сец, за благоутро́бие Христе́, стра́сть же и сме́рть прии́м, воскре́сл еси́ тридне́вен: две́рем заключе́нным вну́трь вше́л еси́, я́ко всеси́лен. Те́мже ребро́ Твое́ Боже́ственное ра́дуяся Фома́ осяза́в, Го́спода и Зижди́теля Тя́ просла́ви.

Гвоздьми́ пригвозди́лся еси́ на Кресте́, копие́м в ре́бра прободе́н еси́, же́лчи вкуси́л еси́ Христе́, сме́рть претерпе́л еси́, во гро́бе положе́н бы́в я́ко ме́ртв, я́ко Бо́г же сокруши́л еси́ у́зы а́довы, и совоскреси́л еси́ я́же от ве́ка ме́ртвыя. Те́мже печа́ти не разруши́в, Твои́м ученико́м яви́лся еси́, Твое́ Воскресе́ние уверя́я.

Па́сха настоя́щий пра́здник: Па́сха та́йная: Па́сха Боже́ственная: Па́сха спаси́тельная: Па́сха к безсме́ртной жи́зни преводя́щая на́с: Па́сха вся́кую ско́рбь отъе́млющая от среды́: Па́сха весе́лую благода́ть даю́щая ученико́м. Те́мже Фома́ вопия́ше: Госпо́дь Бо́г мо́й еси́, плени́вый а́дова ца́рствия.

И Мине́и, 3.

Сла́ва и ны́не, гла́с 4: О пресла́внаго чудесе́! Неве́рие ве́ру изве́стную роди́: ре́кл бо Фома́: а́ще не ви́жду, не иму́ ве́ры. Осяза́в же ре́бра, богосло́вит воплоти́вшагося, того́жде Сы́на Бо́жия позна́, я́ко пострада́вша пло́тию: пропове́да воскре́сшаго бо́га, и возопи́ све́тлым гла́сом: Госпо́дь мо́й и Бо́г мо́й, сла́ва Тебе́.

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

На стихо́вне, стихи́ра воскре́сная, гла́с 1:

Стра́стию Твое́ю Христе́, от страсте́й свободи́хомся, и Воскресе́нием Твои́м из истле́ния изба́вихомся: Го́споди сла́ва Тебе́.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Апо́стольская всесли́чная цевни́ца, Святы́м Ду́хом дви́жимая, безсту́дных бесо́в тре́бища упраздни́ла е́сть: и еди́наго Го́спода пропове́давши, язы́ки изба́ви от пре́лести и́дольския, и поклоня́тися научи́ Тро́ице Единосу́щней.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Всехва́льнии му́ченицы, ва́с ни земля́ потаи́ла е́сть, но не́бо прия́т: отверзо́шася ва́м ра́йская врата́, и вну́трь бы́вше дре́ва живо́тнаго наслажда́етеся: Христо́ви моли́теся, дарова́ти душа́м на́шим ми́р и ве́лию ми́лость.

Сла́ва, и ны́не, гла́с 4: О пресла́внаго чудесе́! Огню́ трава́ косну́вшаяся спасе́ся: вложи́в бо Фома́ во о́гненная ре́бра ру́ку Иису́са Христа́ Бо́га, не опали́ся осяза́нием. Души́ бо злове́рство преложи́ на благове́рие, те́пле возопи́ от глубины́ душе́вныя: Влады́ка ты́ мо́й еси́ и Бо́г, из ме́ртвых воскресы́й, сла́ва Тебе́.

Та́же: Ны́не отпуща́еши: Трисвято́е.

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Последование Утрени в четверток второй седмицы по Пасхе

На Бо́г Госпо́дь: тропа́рь пра́здника:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

По 1-м стихосло́вии, седа́лен, гла́с 1. Подо́бен: Ка́мени запеча́тану:

На Кресте́ пригвозди́лся еси́ Животе́ все́х, и в ме́ртвых вмени́лся еси́, безсме́ртный Го́споди: воскре́сл еси́ тридне́вен Спа́се, совоздви́г Ада́ма от тле́ния. Сего́ ра́ди си́лы небе́сныя вопия́ху Тебе́ жизнода́вче: сла́ва Боже́ственной стра́сти Твое́й Христе́: сла́ва Воскресе́нию Твоему́: сла́ва снизхожде́нию Твоему́, еди́не Человеколю́бче.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Прему́дрии вселе́нныя ловцы́, от Бо́га прие́мше ми́лостивное, моли́теся и ны́не о на́с вопию́щих: Го́споди, спаси́ лю́ди Твоя́, и гра́д Тво́й, и от содержа́щих лю́тых свободи́ апо́столми ду́ши на́ша.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Подо́бен: Гро́б:

Му́ченики Христо́вы мо́лим вси́, ти́и бо о на́шем спасе́нии про́сят, и вси́ присту́пим к ни́м с ве́рою. Си́и источа́ют исцеле́ний благода́ть, си́и полки́ отгоня́ют де́монския, я́ко храни́телие ве́ры.

Сла́ва, и ны́не, Богоро́дичен: Проро́цы Тя́ я́вственно предвозвести́ша Отрокови́це Ма́терь Бо́жию, и апо́столи боже́ственнии в мiре пропове́даша, мы́ ве́ровахом. Те́мже вси́ благочестному́дренно почита́юще воспева́ем Тя́, и Богоро́дицу госпо́дьственно при́сно имену́ем.

По 2-м стихосло́вии, седа́лен, гла́с 1. Подо́бен: Гро́б Тво́й Спа́се:

Ви́дев Моя́ ре́бра, не неве́руй Ми́ бо́лее, Сло́во Фоме́ неве́рующему вопия́ше, пе́рстом Мя́ осяжи́, и руко́ю испыта́й: и уве́дев Мои́х я́зв зна́мения, мірови пропове́ждь живоно́сное Мое́ сие́ е́же из гро́ба Воскресе́ние.

Сла́ва, и ны́не, то́йже.

Та́же, Воскресе́ние Христо́во ви́девше: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. По 3-й пе́сни, седа́лен Мине́и, кондак и ексапостила́рий пра́здника.

На хвали́тех стихи́ры, на 4, гла́с 1.

Воскре́сна: Боголе́пное твое́ снизхожде́ние сла́вяще, пое́м тя́ Христе́, роди́лся еси́ от де́вы, и неразлуче́н бы́л еси́ от Отца́, пострада́л еси́ я́ко челове́к, и во́лею претерпе́л еси́ кре́ст, воскре́сл еси́ от гро́ба, я́ко от черто́га произше́д, да спасе́ши мiр, Го́споди сла́ва Тебе́. Два́жды.

Петра́ и Па́вла, согла́сно восхва́лим, Луку́, Матфе́а, Ма́рка, Иоа́нна, Андре́а, Фому́, Варфоломе́а, Си́мона Канани́та, Иа́кова, Фили́ппа: и все́ собра́ние ученико́в досто́йно да благопохва́лим.

Му́ченичен: Ра́дуйтеся му́ченицы о Го́споде, я́ко по́двигом до́брым подвиза́стеся, сопроти́вистеся царе́м, и мучи́тели победи́сте, огня́ и меча́ не убоя́стеся, звере́м ди́виим снеда́ющим телеса́ ва́ша, Христу́ со а́нгелы пе́ние возсыла́юще, я́же от небе́с венцы́ прия́сте, проси́те ми́р мірови дарова́ти, и душа́м на́шим ве́лию ми́лость.

Сла́ва, и ны́не, гла́с 4: О пресла́внаго чудесе́! Иоа́нн на пе́рси Сло́ва возлеже́, Фома́ же ре́бра осяза́ти сподо́бися. Но о́в у́бо отону́ду стра́шно, богосло́вия глубо́кое извлече́ смотре́ние: о́в же сподо́бися тайноучи́ти на́с, представля́ет показа́ние я́сно воста́ния Его́, вопия́: Госпо́дь мо́й и Бо́г мо́й, сла́ва Тебе́.

На стихо́вне стихи́ры, гла́с 2. Подо́бен: До́ме Евфра́фов:

Печа́ль страсте́й, и помышле́ний бу́ря, дале́че да отжене́тся, и та́ко процвете́т весна́ ве́ры.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Яви́лся еси́ Спа́се, свяще́нным Твои́м апо́столом, две́рем заключе́нным, те́ми обновля́я на́м Боже́ственный Ду́х дне́сь.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Ны́не Тя́ Всецарю́, ви́девше не очи́ма, но серде́чною любо́вию, Бо́га ве́ровавше пе́сньми велича́ем.

Сла́ва, и ны́не, гла́с 6: По дне́х осми́х воста́ния Твоего́, Иису́се Царю́, единоро́дный Сло́ве О́тчий, яви́лся еси́ ученико́м Твои́м, заключе́нным две́рем, ми́р Тво́й подая́. И неве́рующему ученику́ зна́мения показа́л еси́: прииди́, и осяжи́ ру́це и но́зе, и нетле́нная Моя́ ре́бра. Он же ве́ровав, вопия́ше Тебе́: Госпо́дь мо́й и Бо́г мо́й, сла́ва Тебе́.

Та́же, Бла́го е́сть испове́датися Го́сподеви: Ча́с 1-й. И отпу́ст.

Последование Вечерни в четверток второй седмицы по Пасхе вечера

На Го́споди воззва́х: поста́вим стихо́в 6. И пое́м стихи́ры подо́бны, гла́с 1. Подо́бен: Небе́сных чино́в:

Пра́вды оде́ждею обложе́ни бе́лою па́че сне́га, в настоя́щий Па́схи де́нь возвесели́мся, во́ньже Христо́с я́ко пра́вды Со́лнце, от ме́ртвых возсия́в, все́х на́с нетле́нием уясни́.

Ца́рь и Госпо́дь, пра́здников пра́здник ны́нешний е́сть де́нь, его́же вои́стинну сотвори́ Госпо́дь: во́нь, я́коже пое́т Дави́д, та́инственно возвесели́мся лю́дие, две́рем бо заключе́нным, ученико́м ми́р дарова́.

Фомино́ неве́рие, міроспаси́тельное Богочелове́ка Сло́ва, е́же от а́довы темни́цы воста́ние уверя́ет, я́звы ру́к и но́г де́рзостнее осяза́вшее, ко увере́нию мірско́му, десни́цею любопы́тною.

И Мине́и, 3.

Сла́ва, и ны́не, гла́с 2: Две́рем заключе́нным, предста́в Иису́с ученико́м, безстра́шие и ми́р дая́ше. Та́же глаго́лет Фоме́: почто́ Ми́ не ве́руеши, я́ко воскресо́х из ме́ртвых? Принеси́ се́мо ру́ку твою́, и вложи́ в ре́бра Моя́, и ви́ждь: тебе́ бо неве́рующу, вси́ навыко́ша стра́сти и Воскресе́ние Мое́ зва́ти с тобо́ю: Госпо́дь мо́й и Бо́г мо́й, сла́ва Тебе́.

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

На стихо́вне стихи́ры, гла́с 1.

Кре́стная: Неразруши́мая стена́ на́м е́сть честны́й Кре́ст Спа́сов: на́нь бо наде́ющеся, спаса́емся, вси́.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Воскре́сна: Вече́рния на́шя моли́твы приими́ Святы́й Го́споди, и пода́ждь на́м оставле́ние грехо́в, я́ко еди́н еси́ явле́й в мiре Воскресе́ние.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Моли́твами Го́споди все́х святы́х и Богоро́дицы, Тво́й ми́р да́ждь на́м, и поми́луй на́с, я́ко еди́н Ще́др.

Сла́ва и ны́не, гла́с 8: Прикосни́ся Фомо́ ребру́ руко́ю, глаго́лет Христо́с, и о́бразы гвозде́й прииди́ осяжи́, ве́рою испыта́й, и бу́ди Ми́ ве́рен, и не бу́ди неве́рен. Фома́ же пе́рстом я́ко прикосну́ся Влады́це, вельми́ возопи́: Ты́ мо́й Бо́г и Госпо́дь, благоутро́бне, сла́ва Тебе́.

Та́же: Ны́не отпуща́еши: Трисвято́е.

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Последование Утрени в пяток второй седмицы по Пасхе

На Бо́г Госпо́дь: тропа́рь:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

По 1-м стихосло́вии седа́лен, гла́с 1. Подо́бен: Ка́мени запеча́тану:

Креста́ Твоего́ дре́ву покланя́емся Человеколю́бче, я́ко на не́м пригвозди́лся еси́ Животе́ все́х. Ра́й отве́рзл еси́ Спа́се, ве́рою прише́дшему к Тебе́ разбо́йнику, и сла́дости сподо́бися, испове́дая Тя́: помяни́ мя Го́споди. Приими́ я́коже о́наго, и на́с зову́щих: согреши́хом вси́, благоутро́бием Твои́м не пре́зри на́с.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Воскре́сна: Гро́б Тво́й, Спа́се, во́ини стрегу́щии, ме́ртви от облиста́ния я́вльшагося а́нгела бы́ша, пропове́дающаго жена́м Воскресе́ние. Тебе́ сла́вим тли́ потреби́теля, Тебе́ припа́даем воскре́сшему из гро́ба, и еди́ному Бо́гу на́шему.

Сти́х: Ди́вен Бо́г во святы́х Свои́х Бо́г Изра́илев.

Му́ченичен: Страда́ния похвало́ю, и вене́чною по́честию, сла́внии страстоте́рпцы оде́яшася Тобо́ю Го́споди. Терпе́нием бо ра́н беззако́нных победи́ша, си́лою же Бо́жиею от небе́с побе́ду прия́ша. Те́х моли́твами, Христе́ Бо́же, да́руй на́м ве́лию Твою́ ми́лость.

Сла́ва, и ны́не: крестобогоро́дичен. Подо́бен: Гро́б тво́й:

Нескве́рная А́гница, А́гнца и Па́стыря ви́сима ме́ртва на Дре́ве ви́дящи, рыда́ющи веща́ше, ма́терски крича́щи: ка́ко претерплю́ Твое́ е́же па́че сло́ва, Сы́не Мо́й, снизхожде́ние, и во́льная страда́ния, Бо́же Преблаги́й?

По 2-м стихосло́вии седа́лен, гла́с 1. Подо́бен: Гро́б тво́й:

Блаже́н еси́ ты́, я́звы осяза́вый лу́чшаго ребра́: сие́ велича́йшее чу́до Ада́ма исцели́вшее, и на́м ве́ровавшим неги́блемое блаже́нство исхода́таившее, саме́ми рече́ньми честны́х апо́столов, Его́ Воскресе́ние.

Сла́ва, и ны́не: то́йже.

Та́же, Воскресе́ние Христо́во ви́девше: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. По 3-й пе́сни, седа́лен Мине́и, кондак и ексапостила́рий пра́здника.

На хвали́тех стихи́ры на 4, гла́с 1.

Кре́стная: Кресто́м Твои́м Христе́, еди́но ста́до бы́сть а́нгел и челове́к, и еди́на Це́рковь, не́бо и земля́ весели́тся, Го́споди сла́ва Тебе́. Два́жды.

Воскре́сна: Пое́м Твою́, Христе́, спаси́тельную стра́сть, и сла́вим Твое́ Воскресе́ние.

Му́ченичен: Страстоте́рпцы Христо́вы, прииди́те лю́дие вси́ почти́м пе́сньми и пе́нии духо́вными, свети́ла міра, и пропове́дники ве́ры, исто́чник приснотеку́щий, из него́же истека́ют ве́рным исцеле́ния. Те́х моли́твами Христе́ Бо́же на́ш, ми́р да́руй мірови, и душа́м на́шим ве́лию ми́лость.

Сла́ва, и ны́не: гла́с 8. Анато́лиа: Две́рем заключе́нным, ученико́м собра́нным, предста́ Спа́с, иде́же бя́ху со́брани, и ста́в посреде́ и́х, глаго́лет Фоме́: прииди́ осяжи́, и ви́ждь о́бразы гвозде́й, простри́ ру́ку твою́, и косни́ся ребру́ Моему́, и не бу́ди неве́рен, но ве́рою пропове́ждь, е́же из ме́ртвых Мое́ Воскресе́ние.

На стихо́вне стихи́ры пра́здника, гла́с 4. Подо́бен: Я́ко до́бля:

Распе́нся, ра́й челове́ком отве́рзл еси́, и ме́ртвыя совоздви́гл еси́ Животе́ на́ш, и воскре́сл еси́, и сме́рть плени́в си́лою Твое́ю, и совокупи́в небе́сным вои́стинну земна́я, испо́лнил еси́ весе́лия безчи́сленнаго, Бо́жий Сло́ве, ли́к апо́стольский, си́м ми́р веща́вый.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Тле́ние испрове́ржеся, нетле́ние процвете́, сою́з вре́менный разреши́ся: небеса́ да веселя́тся, земля́ и подзе́мная: воскре́се бо Христо́с, плени́ся сме́рть, весе́лый яви́ся де́нь, заключе́нным две́рем, вну́трь вше́л еси́ Жизнода́вче и Го́споди.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

В де́нь, его́же сотвори́ Госпо́дь дне́сь, возра́дуемся веселя́щеся, Жизнода́вец воста́л е́сть, а́д плене́н бы́сть, апо́стольский ли́к ра́дость слы́шит: осяза́л е́сть ре́бра Влады́чня неве́ровавый Фома́, и осяза́в, сугу́бое существо́ пропове́да.

Сла́ва, и ны́не, гла́с 8: Прикосни́ся Фомо́ ребру́ руко́ю, глаго́лет Христо́с, и о́бразы гвозде́й прииди́ осяжи́, ве́рою испыту́й, и бу́ди Ми́ ве́рен, и не бу́ди неве́рен. Фома́ же пе́рстом я́ко прикосну́ся Влады́це, вельми́ возопи́: Ты́ мо́й Бо́г и Госпо́дь, Благоутро́бне, сла́ва Тебе́.

Та́же, Бла́го е́сть испове́датися Го́сподеви: Ча́с 1-й. И отпу́ст.

Последование Вечерни в пяток второй седмицы по Пасхе вечера

Обы́чная кафи́сма.

На Го́споди воззва́х: стихи́ры самогла́сны, гла́с 1:

Две́рем заключе́нным, ученико́м собра́нным, вше́л еси́ внеза́пу всеси́льне Иису́се Бо́же на́ш: и ста́в посреде́ и́х, ми́р да́в, испо́лнил еси́ Свята́го Ду́ха: жда́ти же повеле́л еси́, и ника́коже разлуча́тися от Иерусали́ма, до́ндеже облеку́тся е́же с высоты́ си́лою. Те́мже вопие́м Ти́: просвеще́ние, и Воскресе́ние и ми́ре на́ш, сла́ва Тебе́.

По дне́х осми́х воста́ния Твоего́ Го́споди, яви́лся еси́ ученико́м Твои́м на ме́сте, иде́же бя́ху со́брани, и возгласи́в и́м: ми́р ва́м, неве́рующему ученику́ ру́це показа́л еси́, и пречи́стое ребро́. Он же ве́ровав вопия́ше Тебе́: Госпо́дь мо́й и Бо́г мо́й, сла́ва Тебе́.

Фома́ глаго́лемый Близне́ц, не бе́ с ни́ми, егда́ вше́л еси́ Христе́ заключе́нным две́рем. Те́мже и не ве́роваше рече́нным ему́, от неве́рия в ве́ру известву́я: не несподо́бил же еси́ Бла́же, показа́ти ему́ пречи́стое ребро́ Твое́, и руку́ и ногу́ я́звы. Он же осяза́в и ви́дев, испове́да Тебе́ бы́ти Бо́га не на́га, и Челове́ка не про́ста, и вопия́ше: Госпо́дь мо́й и Бо́г мо́й, сла́ва Тебе́.

Та́же мине́и, 3.

Сла́ва, гла́с 6: Две́рем заключе́нным, прише́л еси́ Христе́ ко ученико́м, тогда́ Фома́ смотри́тельно не обре́теся с ни́ми. Глаго́лаше бо: не иму́ ве́ры, а́ще не уви́жду и а́з Влады́ки. Уви́жду ребро́, отону́дуже изы́де кро́вь, вода́, креще́ние: уви́жду я́зву, от нея́же исцеле́ вели́кий стру́п челове́ческий: уви́жду, ка́ко не бе́ я́коже ду́х, но пло́ть и ко́сти. Сме́рть попра́вый, и Фому́ уве́ривый, Го́споди сла́ва Тебе́.

И ны́не, Богоро́дичен, гла́с 1: Всемірную сла́ву от челове́к прозя́бшую, и Влады́ку ро́ждшую, небе́сную две́рь воспои́м Мари́ю Де́ву, безпло́тных пе́снь и ве́рных удобре́ние. Сия́ бо яви́ся не́бо, и хра́м Божества́: сия́ прегражде́ние вражды́ разруши́вши, ми́р введе́, и ца́рствие отве́рзе. Сию́ у́бо иму́ще ве́ры утвержде́ние, побо́рника и́мамы из Нея́ ро́ждшагося Го́спода. Дерза́йте у́бо, дерза́йте лю́дие Бо́жии, и́бо То́й победи́т враги́ я́ко Всеси́лен.

Вхо́д: Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

Проки́мен дне́.

На стихо́вне стихи́ры воскре́сныя, гла́с 1:

Вече́рния на́ша моли́твы, приими́ Святы́й Го́споди, и пода́ждь на́м оставле́ние грехо́в, я́ко еди́н еси́ явле́й в мiре Воскре́сение.

Сти́х: Госпо́дь воцари́ся, в ле́поту облече́ся.

Обыди́те лю́дие Сио́н, и объими́те его́, и дади́те сла́ву в не́м, Воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.

Сти́х: И́бо утверди́ вселе́нную, я́же не подви́жится.

Прииди́те лю́дие воспои́м, и поклони́мся Христу́, сла́вяще Его́ из ме́ртвых Воскресе́ние, я́ко То́й е́сть Бо́г на́ш, от пре́лести вра́жия ми́р избавле́й.

Сти́х: До́му Твоему́ подоба́ет святы́ня Го́споди, в долготу́ дни́й.

Стра́стию Твое́ю Христе́, от страсте́й свободи́хомся, и Воскресе́нием Твои́м из истле́ния изба́вихомся, Го́споди сла́ва Тебе́.

Сла́ва, и ны́не, гла́с 5: Человеколю́бче, ве́лие и безприкла́дное мно́жество щедро́т Твои́х, я́ко долготерпе́л еси́, от иуде́й зауша́емь, от апо́стола осяза́емь, и от отмета́ющихся Тебе́ многоиспыту́емь. Ка́ко воплоти́лся еси́: ка́ко распя́лся еси́ безгре́шне? Но вразуми́ на́с, я́ко Фому́, вопи́ти Тебе́: Госпо́дь мо́й, и Бо́г мо́й, сла́ва Тебе́.

Та́же: Ны́не отпуща́еши: Трисвято́е.

Тропа́рь пра́здника: Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.

Ектения и отпу́ст.

Изве́стно же бу́ди, я́ко кано́ны о усо́пших Окто́иха настоя́щаго гла́са, по вся́ суббо́ты в Пятдеся́тнице до́лжни су́ть пе́тися, в пятка́х ве́чера, на Повече́риах.

Последование Утрени в субботу второй седмицы по Пасхе

На Бо́г Госпо́дь: тропа́рь пра́здника:

Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости. Трижды.

По 1-м стихосло́вии седа́лен, гла́с 1:

Гро́б Тво́й Спа́се во́ини стрегу́щии, ме́ртви от облиста́ния я́вльшагося а́нгела бы́ша, пропове́дающаго жена́м Воскресе́ние. Тебе́ сла́вим тли́ потреби́теля, Тебе́ припа́даем воскре́сшему из гро́ба, и еди́ному Бо́гу на́шему.

Гла́с то́йже. Подо́бен: Ка́мени запеча́тану:

Жены́ ко гро́бу приидо́ша ура́ншия, и а́нгельское явле́ние ви́девшия трепета́ху: гро́б облиста́ жи́знь, чу́до удивля́ше я́. Сего́ ра́ди ше́дшия ученико́м пропове́даху воста́ние: а́да плени́ Христо́с, я́ко еди́н кре́пок и си́лен, и истле́вшия совоздви́же вся́, осужде́ния стра́х разруши́в си́лою Креста́.

Сла́ва, и ны́не, Богоро́дичен: Гаврии́лу веща́вшу Тебе́ Де́во, ра́дуйся, со гла́сом воплоща́шеся все́х Влады́ка в Тебе́ святе́м киво́те, я́коже рече́ пра́ведный Дави́д: яви́лася еси́ ши́ршая небе́с, поноси́вши Зижди́теля Твоего́. Сла́ва все́льшемуся в Тя́, сла́ва проше́дшему из Тебе́, сла́ва свободи́вшему на́с Рождество́м Твои́м.

По 2-м стихосло́вии седа́лен, гла́с 1. Подо́бен: Ка́мени запеча́тану:

Стра́ха ра́ди иуде́йска, сокрове́нным ученико́м, и в Сио́не со́бранным, вше́л еси́ к ни́м Бла́же, и ста́л еси́ посреде́ и́х, две́рем заключе́нным, радостотворя́й: и показа́л еси́ и́м ру́це, и пречи́стых Твои́х ре́бр я́звы, глаго́ля неве́рующему ученику́: принеси́ ру́ку твою́ и испыта́й, я́ко Са́м Аз е́смь, тебе́ ра́ди пострада́вый.

Сла́ва, и ны́не: то́йже.

И чте́ние.

Та́же, Воскресе́ние Христо́во ви́девше: еди́ножды, и Псало́м 50.

Кано́н пра́здника со ирмосы́, на 6: и свята́го, его́же е́сть хра́м, на 4: и Мине́и, на 4. По 3-й пе́сни конда́к, и седа́лен Мине́и. Сла́ва и ны́не: пра́здника. По 6-й пе́сни конда́к пра́зднику, и и́кос. По 9-й пе́сни ексапостила́рий пра́зднику.

На хвали́тех стихи́ры воскре́сны, на 4, гла́с 1:

Пое́м Твою́ Христе́ спаси́тельную стра́сть, и сла́вим Твое́ Воскресе́ние.

Кре́ст претерпе́вый, и сме́рть упраздни́вый, и воскресы́й из ме́ртвых, умири́ на́шу жи́знь Го́споди, я́ко еди́н всеси́лен.

А́да плени́вый, и челове́ка воскреси́вый Воскресе́нием Твои́м Христе́, сподо́би ны́ чи́стым се́рдцем Тебе́ пе́ти и сла́вити.

Боголе́пное Твое́ снисхожде́ние сла́вяще, пое́м Тя́ Христе́: роди́лся еси́ от Де́вы, и неразлуче́н бы́л еси́ от Отца́: пострада́л еси́ я́ко Челове́к, и во́лею претерпе́л еси́ Кре́ст. Воскре́сл еси́ от гро́ба, я́ко от черто́га произше́д, да спасе́ши мiр: Го́споди сла́ва Тебе́.

Сла́ва, и ны́не, гла́с 6: По дне́х осми́х воста́ния Твоего́, Иису́се Царю́, единоро́дный Сло́ве О́тчий, яви́лся еси́ ученико́м Твои́м, заключе́нным две́рем, ми́р Тво́й подая́, и неве́рующему ученику́ зна́мения показа́л еси́: прииди́, осяжи́ ру́це и но́зе, и нетле́нныя Моя́ ре́бра. Он же ве́ровав, вопия́ше Тебе́: Госпо́дь мо́й, и Бо́г мо́й, сла́ва Тебе́.

На стихо́вне стихи́ры пра́зднику, гла́с 1. Подо́бен: Прехва́льнии му́ченицы:

По е́же из гро́ба Твое́м стра́шном Жизнода́вче воста́нии, я́коже печа́тей не разруши́л еси́ Христе́ гро́бных, та́ко заключе́нным две́рем, вше́л еси́ к пресла́вным апо́столом Твои́м, радостотворя́ и́м, и пра́вый Тво́й Ду́х подая́ и́м, за безме́рную Твою́ ми́лость.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Фома́ и́же и Близне́ц не бе́ прише́л, егда́ Ты́ ученико́м яви́лся еси́ Го́споди: те́мже не ве́рова Твоему́ Воскресе́нию, и ви́девшим Тя́ вопия́ше: а́ще не вложу́ пе́рста в ре́бра Его́ и гвозде́й я́звы, не ве́рую, я́ко воста́л е́сть.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Я́коже хо́щеши осяжи́, Христо́с Фоме́ вопия́ше, вложи́ ру́ку, и позна́й Мя́ ко́сти иму́ща, и земно́е те́ло, и не бу́ди неве́рен, ра́вно же со ины́ми уве́рися. Он же возопи́: Бо́г мо́й и Госпо́дь Ты́ еси́, сла́ва воста́нию Твоему́.

Сла́ва, и ны́не, гла́с то́йже: Ученико́м сомня́щимся, во осмы́й де́нь предста́ Спа́с, иде́же бя́ху со́брани, и ми́р да́в, Фоме́ возопи́: прииди́ апо́столе, осяжи́ дла́ни, в ни́хже гво́здия вонзо́ша. О до́брое неве́рие Фомино́, ве́рных сердца́ в позна́ние приведе́! И со стра́хом возопи́: Госпо́дь мо́й и Бо́г мо́й, сла́ва Тебе́.

И про́чее у́трени. Тропа́рь: Запеча́тану гро́бу: Ектениа́, и ча́с пе́рвый, и отпу́ст, и обы́чная лити́а в притво́ре.

Последование Литургии в субботу второй седмицы по Пасхе

Изобрази́тельная, и от кано́на пра́здника, пе́снь 9, на 6.

Проки́мен, гла́с 3: Ве́лий Госпо́дь на́ш, и ве́лия кре́пость Его́, и ра́зума Его́ не́сть числа́.

Сти́х: Хвалите Господа, я́ко благ псалом, Богови нашему да усладится хваление.

Деяний святых Апостол чтение, зача́ло 15 (5:21–33).

Во дни о́ны, слы́шавше апо́столи внидо́ша по у́тренице в це́рковь и уча́ху. Прише́д же архиере́й и и́же с ним, созва́ша собо́р и вся ста́рцы от сыно́в Изра́илевых и посла́ша во узи́лище, привести́ их. Слуги́ же ше́дше не обрето́ша их в темни́це, возвра́щше же ся возвести́ша, глаго́люще, я́ко темни́цу у́бо обрето́хом заключе́ну со вся́ким утвержде́нием и блюсти́тели стоя́щия пред две́рьми, отве́рзше же, внутрь ни еди́наго обрето́хом. Я́коже слы́шаша словеса́ сия́ архиере́й же и воево́да церко́вный и первосвяще́нницы, недоумева́хуся о них, что у́бо бу́дет сие́. Прише́д же не́кто возвести́ им, глаго́ля, я́ко се му́жие, и́хже всади́сте в темни́цу, суть в це́ркви стоя́ще и уча́ще лю́ди. Тогда́ шед воево́да со слуга́ми, приведе́ их не с ну́ждею, боя́хуся бо люде́й, да не ка́мением побию́т их: приве́дше же их, поста́виша на со́нмищи, и вопроси́ их архиере́й, глаго́ля: не запреще́нием ли запрети́хом вам не учи́ти о и́мени сем? И се испо́лнисте Иерусали́м уче́нием ва́шим и хо́щете навести́ на ны кровь Челове́ка Сего́. Отвеща́в же Петр и Апо́столи ре́ша: повинова́тися подоба́ет Бо́гови па́че, не́жели челове́ком: Бог оте́ц на́ших воздви́же Иису́са, Его́же вы уби́сте, пове́сивше на дре́ве. Сего́ Бог Нача́льника и Спа́са возвы́си десни́цею Свое́ю, да́ти покая́ние Изра́илеви и оставле́ние грехо́в. И мы есмы́ Того́ свиде́тели глаго́л сих, и Дух же Святы́й, Его́же даде́ Бог повину́ющимся Ему́. Они́ же слы́шавше распыха́хуся и совеща́ша уби́ти их.

Аллилу́иа, гла́с 8: Приидите, возрадуемся Господеви, воскликнем Богу, Спасителю нашему.

Сти́х: Яко Бог велий Господь, и Царь велий по всей земли.

Ева́нглие от Иоа́нна, зача́ло 19 (6:14–27).

Во вре́мя о́но, ви́девше челове́цы зна́мение, е́же сотвори́ Иису́с, глаго́лаху, я́ко Сей есть вои́стинну Проро́к Гряды́й в мир. Иису́с же разуме́в, я́ко хотя́т приити́, да восхи́тят Его́ и сотворя́т Его́ царя́, оты́де па́ки в го́ру еди́н. Я́ко по́зде бысть, снидо́ша ученицы́ Его́ на мо́ре, и влезо́ша в кора́бль, и идя́ху на он пол мо́ря в Капернау́м. И тма а́бие бысть, и не у бе прише́л к ним Иису́с. Мо́ре же, ве́тру ве́лию дыха́ющу, воздвиза́шеся. Гре́бше же я́ко ста́дий два́десять и пять, или́ три́десять, узре́ша Иису́са ходя́ща по мо́рю и близ корабля́ бы́вша, и убоя́шася. Он же глаго́ла им: Аз есмь, не бо́йтеся. Хотя́ху у́бо прия́ти Его́ в кора́бль, и а́бие кора́бль бысть на земли́, в ню́же идя́ху. Во у́трий же наро́д, и́же стоя́ше об он пол мо́ря, ви́дев, я́ко корабля́ ино́го не бе ту, то́кмо еди́н той, во́ньже внидо́ша ученицы́ Его́, и я́ко не вни́де со ученики́ Свои́ми Иису́с в кора́бль, но еди́ни ученицы́ Его́ идо́ша, и и́ни приидо́ша корабли́ от Тивериа́ды близ ме́ста, иде́же ядо́ша хле́бы, хвалу́ возда́вше Го́сподеви. Егда́ же ви́деша наро́ди, я́ко Иису́са не бысть ту, ни учени́к Его́, влезо́ша са́ми в корабли́ и приидо́ша в Капернау́м, и́щуще Иису́са, и обрето́ша Его́ об он пол мо́ря, ре́ша Ему́: Равви́, когда́ зде бысть? Отвеща́ им Иису́с и рече́: ами́нь, ами́нь глаго́лю вам, и́щете Мене́, не я́ко ви́десте зна́мение, но я́ко я́ли есте́ хле́бы и насы́тистеся. Де́лайте не бра́шно ги́блющее, но бра́шно пребыва́ющее в животе́ ве́чнем, е́же Сын Челове́ческий вам даст, Сего́ бо Оте́ц зна́мена Бог.

Причастный: Похвали́ Иерусали́ме Го́спода, / хвали́ Бо́га твоего́ Сио́не. / Аллилуиа, трижды.

По сему́ же воображе́нию пое́м по вся́ суббо́ты до вознесе́ния Христо́ва.