Цветная Триодь (на цсл., гражданский шрифт)

В понедельник второй недели по Пасхе

Трипеснец, егоже краегранесие: Воспоет же тя Иосиф. Глас 1.

Песнь 1.

Ирмос: Твоя́ победи́тельная десни́ца / Боголе́пно в кре́пости просла́вися, / та бо, Безсме́ртне, / я́ко всемогу́щая, проти́вныя сотре́, / Изра́ильтяном / путь глубины́ новосоде́лавшая.

[Α] Воспои́м Бо́гу я́ко победи́телю, низложи́вшему сме́ртию смерть, и воскреси́вшему с Собо́ю род челове́ческий, и нетле́нием пребога́тно поче́тшему.

[Δ] Свя́зан быв, сме́ртныя у́зы я́ко си́лен кре́постию растерза́л еси́; разреши́в же челове́ки от тли, из а́да воскреси́л еси́ воспева́ющия держа́ву Твою́, Многоми́лостиве.

Слава:

[Ε] Благоутро́бне Христе́, мене́ ра́ди да́же до а́да бы́вый во́лею, лежа́ща мя в гро́бе грехо́вном, и в ро́ве преступле́ний, Твои́м присеще́нием воскреси́в поми́луй.

И ныне, Богородичен:

[Ι] Ви́девши Христа́ от ме́ртвых, Богороди́тельнице, пло́тию воста́вша, ра́довалася еси́: испроси́ же и мне радостотво́рный плачь ны́не дарова́ти, я́ко да обря́щу тогда́ Чи́стая, Боже́ственное утеше́ние.

Песнь 8.

Ирмос: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

[Δ] Кресто́м Твои́м разреши́л еси́ кля́тву, положи́вся во гро́бе, и а́дово мра́чное Христе́ мой Иису́се, низложи́в ца́рство, и воскре́с, всю тварь с Собо́ю воскреси́л еси́; те́мже Тя пое́м во вся ве́ки.

[Ε] Возше́дшу Ти на крест со́лнце угасе́, во ад же соше́дшу Ти Человеколю́бче, свет возсия́ душа́м во тьме су́щим, и погребе́нным под го́рькою сме́ртию. Те́мже Тя пое́м во вся ве́ки.

Слава:

[Σ] Свя́зана мя плени́цами грехо́вными, разреши́ Христе́, и осия́й ми покая́ния Боже́ственную све́тлость Спа́се, от тмы ве́чныя избавле́й челове́ки, Твои́м стра́шным воста́нием, е́же воспева́ем во вся ве́ки.

И ныне, Богородичен:

[Ε] На руку́ нося́щая Христа́, из Тебе́ воплоще́нна Де́во, Того́ моли́ прия́ти ны́не и мене́, безпу́тием вся́цем жития́, и согреше́ньми безчи́сленными заблу́ждшаго, срета́ющу ми нра́ву ле́ностному всегда́.

Песнь 9.

Ирмос: О́браз чи́стаго рождества́ Твоего́, / огнепали́мая купина́ / показа́ неопа́льная; / и ны́не на нас / напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

[Ι] Ви́дя со́лнце распина́ема омрачи́ся, посреде́ разбо́йнику Тя Сло́ве, со́лнца незаходи́маго; го́ры, хо́лми, земля́ и мо́ре уклони́шася; ад вострепета́, ю́зники разреша́я, я́же держа́ше, воспева́ющия Тя.

[Ω] Яви́лся еси́ я́коже вели́кое со́лнце, под зе́млю заше́д, возсия́л же еси́ незаходи́мое свети́ло от ме́ртвых, озари́в пресла́вно земны́я концы́: те́мже тя Животода́вче непреста́нно велича́ем.

[Σ] Спа́се Иису́се, Твое́ю сме́ртию смерть разори́вый, воскреси́вый же вся та́мо держи́мыя, воскреси́ и мене́, в ро́ве преиспо́днем страсте́й смертоно́сных и грехо́в су́ща, зову́ Ти Человеколю́бче.

Слава:

[Η] Приидо́ша мνроно́сицы пла́чуще на гроб ра́но, и не обре́тше Тя, ви́деша в бе́лых ри́зах председя́ща а́нгела, и вопию́ща: воста́ Госпо́дь, спеши́те возвести́ти воста́ние ученико́м его́.

И ныне, Богородичен:

[Φ] Диви́тся вся тварь Влады́чице, е́же па́че ума́ та́инству Рождества́ Твоего́: ражда́еши бо Бо́га Емману́ила, бы́вша нас ра́ди челове́ка Всенепоро́чная, и разруши́вшаго сме́рти мучи́тельства Кресто́м Свои́м.

Во вторник второй недели по Пасхе

Трипеснец, егоже краегранесие: Воспою Богу Иосиф. Глас 1.

Песнь 2.

Ирмос: Ви́дите ви́дите, я́ко Бо́г А́з е́смь, порабоще́ныя лю́ди Изра́илевы, Моисе́ю народоводи́ти в пусты́ни повеле́вый, и спасы́й я́ко си́лен вла́стию Мое́ю.

[Ψ] Пои́м днесь, Го́сподеви, восклица́юще распе́ншемуся нас ра́ди, и низложи́вшему злонача́льного врага́, и поло́жшемуся во гро́бе, и оживи́вшему ме́ртвыя воскресе́нием Свои́м.

[Α] Свят Госпо́дь, из ме́ртвых тридне́вно воскресы́й я́ко си́лен, ученико́м явле́йся боголе́пно, и ра́дости неизглаго́ланныя сих испо́лнивый ду́ши, ско́рби испо́лненныя пре́жде.

Слава:

[Λ] Сло́ве собезнача́льне, Отцу́ безнача́льну сопресто́льне, распны́йся и вмени́выйся в ме́ртвых, и воскресы́й я́ко си́лен, мою́ ду́шу оживотвори́ умерщвле́ную преступле́ньми.

И ныне, Богородичен:

[Ω] О чуде́с Твои́х! О стра́шнаго слы́шания! Ражда́еши бо пло́тию Бо́га, разо́ршаго сме́ртныя у́зы, и от тли челове́ки изме́ншаго, Чи́стая Богоблагода́тная.

Песнь 8.

Ирмо́с: Его́же ужаса́ются а́нгели и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

[Θ] Рыда́ет вся тварь о Твое́й стра́сти Бла́же, со́лнце поме́рче, Тебе́ заше́дшу на кресте́, и во тме седя́щии вели́кий свет ви́деша, пою́ще Тя ще́дро.

[Ε] Вострепета́ ад, Тя ви́дев с душе́ю к нему́ иду́ща Христе́ Всецарю́, и я́же от ве́ка ме́ртвыя издава́ше, воспева́ющия Твое́ Человеколю́бие.

Слава:

[Ω] Яви́лся еси́ Христе́, от гро́ба воста́в, прине́сшим арома́ты боже́ственным жена́м, и сих рыда́ние претвори́л еси́, утеше́ние всех сый во ве́ки.

И ныне, Богородичен:

[Ι] Ви́девши, Его́же родила́ еси́ Бо́га, из ме́ртвых воста́вша, ра́дости яви́лася еси́ испо́лнена Де́во Мари́е: Того́ у́бо моли́ Чи́стая, вся́кую печа́ль на́шего се́рдца до конца́ потреби́ти.

Песнь 9.

Ирмос: Светоно́сный о́блак, во́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

[Ω] Я́ко ви́де Тя на дре́ве во́лею распя́та, благоразу́мный разбо́йник, помяни́ мя, вопия́ше, егда́ прии́деши Иису́се во ца́рствии Твоем: и бысть ра́еви жи́тель, ве́рою еди́ною оправда́вся.

[Σ] Тя Спа́се ви́дев в ме́ртвых ад умертви́ся, и издава́ше мертвецы́, я́же пожре́ дре́вле, славосло́вящия Христе́ Твою́ неизглаго́ланную си́лу, и мно́гое благосе́рдие, и́мже спасл еси́ нас Всецарю́.

Слава:

[Η] Приидо́ша нося́щия мν́ра на гроб жены́, и ви́девше Тя Христе́ воста́вша из гро́ба, ра́дости испо́лнишася мно́гия, и апо́столом Твои́м возвести́ша, я́ко воскре́сл и яви́лся еси́, совозста́вль мiр весь с собо́ю.

И ныне, Богородичен:

[Φ] Свет невече́рний, просия́вший из ме́ртвых ви́девши Чи́стая, и ра́дости испо́лнившися мно́гия, ра́довалася еси́ с пресвяты́ми ученики́, с ни́миже и нам испроси́ проще́ние безме́рных прегреше́ний, Богоро́дице засту́пнице ве́рных.

В среду второй недели по Пасхе

Трипеснец, егоже краегранесие: Хвалю Бога, Иосиф. Глас 1.

Песнь 3.

Ирмос: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / свят еси́, Го́споди.

[Α] Свя́те святы́х, освяти́ти мiр хотя́, во́лею на дре́во кре́стное возне́слся, и закла́лся еси́ я́ко а́гнец, и кро́вию благода́тельною обновля́еши нас песносло́вящих Тя.

[Ι] Кре́пость отъя́тся вра́жия, плене́на бысть смерть, обезсме́ртися челове́ческое истле́вшее существо́, Христе́ Иису́се умертви́вшуся Тебе́, и обнови́ся мiр вопия́: свят еси́ Го́споди.

Слава:

[Η] Ны́не не удивля́йтеся, жена́м вопия́ше а́нгел, иди́те же па́че усе́рдно, ученико́м скорбя́щим ра́дости глаго́лы возвеща́юще, я́ко воста́ Христо́с живо́т всех и воскресе́ние.

И ныне, Богородичен:

[Ω] Яви́лася еси́ Ты Де́во Чи́стая вы́шши а́нгел, Бо́га вопло́щши распе́ншагося, и погребе́на, и ме́ртвым нетле́ние источи́вшаго: Его́же моли́ спасти́ нас песносло́вящих Тя.

Песнь 8.

Ирмос: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.

[Θ] Смерть во́лею прия́л еси́, возвыша́емь пло́тию на дре́во, и зря Тя со́лнце угасе́, и церко́вная заве́са раздра́ся всеси́льне. Те́мже воспева́юще Тя зове́м: да благослови́т тварь вся Го́спода, и превозно́сит Его́ во ве́ки.

[Ε] Ви́деша Тя незаходи́мое сия́ние дре́вле седя́щии в се́ни сме́ртней, в ни́хже Тебе́ Го́споди соше́дшу с душе́ю, и уз ве́чных разреши́шася, вельми́ пою́ще Тя, и глаго́люще: да благослови́т тварь вся Го́спода, и превозно́сит Его́ во ве́ки.

Слава:

[Ο] У́тро ко гро́бу прише́дше жены́, блиста́ющася а́нгела ви́деша, и глаго́люща: воскре́се Изба́витель, что жива́го с ме́ртвыми еще́ помышля́ете? Испо́лншеся ра́дости возопи́йте: да благослови́т тварь вся Го́спода, и превозно́сит Его́ во ве́ки.

И ныне, Богородичен:

[Ν] Умерщвле́ние а́ду соде́ла Сын Твой Чи́стая, я́коже пре́жде рече́ из ме́ртвых воста́в, Его́же моли́ тлетво́рного греха́ изба́витися и му́ки, всем ве́рою взыва́ющим: да благослови́т тварь вся Го́спода, и превозно́сит Его́ во ве́ки.

Песнь 9.

Ирмос: Та́инство стра́нное ви́жу и пресла́вное:/ Не́бо – верте́п,/ престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.

[Ι] Исцеля́я первозда́ннаго боле́зни, поболе́л еси́ ви́симь Спа́се во́лею на дре́ве: положи́в же ся в ро́ве преиспо́днем, воскреси́л еси́ ме́ртвыя, я́же смерть возмо́же пе́рвее поглоти́ти.

[Ω] Я́ко ви́де Тя дре́вле лик апо́стольский воскре́сша Го́споди, стра́хом же и ра́достию покланя́шеся, к ни́мже возопи́л еси́: се сбытие́ глаго́лом Мои́м, не скорби́те вы, но ра́дуйтеся.

[Σ] Плащани́цею Тебя́ Спа́се обви́в, положи́ Ио́сиф пра́ведный любо́вию в но́вем гро́бе: врата́ же а́дова я́ве и вереи́ сокру́шь, воздви́гл еси́ ме́ртвыя, я́же смерть возмо́же пре́жде поглоти́ти.

Слава:

[Η] Ра́довахуся мνроно́сицы слы́шавше Христо́во воста́ние те́мже апо́столом вопия́ху: те́кше спе́шно, се уже́ не скорби́те, но ра́дуйтеся вы: воста́ бо из ме́ртвых всех Госпо́дь.

И ныне, Богородичен:

[Φ] Светя́щася всего́ в добро́те без сосужде́ния, я́ко жениха́ Христа́ ви́девши Отрокови́це, из гро́бнаго черто́га пло́тию произше́дша, ра́дости испо́лнилася еси́, Его́же моли́ нас изба́вити тли и муче́ния.

В четверток второй недели по Пасхе

Трипеснец, егоже краегранесие: Пение Иосифово. Глас 1.

Песнь 4.

Ирмос: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / днесь спасе́ние мiру, / я́ко воскре́се Христо́с, / я́ко всеси́лен.

[Υ] О нас смире́нных веде́н был еси́ на смерть Христе́, всех Животе́, и плени́в а́дова ца́рствия, ду́ши я́ко о́вцы исхи́тил еси́, с Собо́ю воскреси́в, я́ко Царь держа́вный и всеси́льный.

[Μ] С ме́ртвыми что жизнь и́щете, явле́йся жена́м, блиста́яйся на гро́бе а́нгел рече́: воста́, прииди́те ви́дите лежа́ща погреба́льная еди́на, и его́ ученико́м возвести́ти потщи́теся.

Слава:

[Ν] Мертв ад быв соше́ствием Христо́вым, всех ме́ртвых отдая́ше вся́ко пленя́емь, и до конца́ испраздня́емо сего́ чре́во всея́дное, всеси́льною во́лею Бо́га всех Царя́.

И ныне, Богородичен:

[Ω] Я́ко в красне́йший храм, всели́ся в Тя Чи́стая Де́во, Иису́с всех Царь: сни́тием а́дово жили́ще мра́чное упраздни́, и воскре́се, совоскреси́в челове́ки, я́ко всеси́лен.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

[Δ] Сла́ва Христу́ врага́ низложи́вшему, и плени́вшему а́да, е́же к нему́ сни́тием, и я́же возмо́же поглоти́ти, оживи́вшему ме́ртвыя, песносло́вящия Его́ во ве́ки.

[Ι] Се жена́м мνроно́сицам вопия́ше, явле́йся а́нгел блиста́яйся: ме́сто, в не́мже положи́ся, ви́девше у́бо смерть и ад плени́вшаго си́лою свое́ю, не ктому́ в ме́ртвых жи́зни ищи́те.

Слава:

[Α] Ад огорчи́ся, до́ле срет Тя Сло́ве, не моги́й Тебе́ прибли́житися, и я́же проглоти́ ме́ртвыя, ско́ро отдая́ше повеле́нием Твои́м, песносло́вящия согла́сно держа́ву Твою́.

И ныне, Богородичен:

[Ι] Ви́дела еси́ из ме́ртвых воста́вша Де́во, Его́же пло́тию неизрече́нно родила́ еси́ Сло́ва, и ра́дости ду́шу испо́лнила еси́, Его́ сни́тие песносло́вящи Чи́стая, во вся ве́ки.

Песнь 9.

Ирмос: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

[Ω] Часо́в же и дней соде́тель сый Изба́вителю, в день и час шесты́й, поно́сно хотя́ претерпе́л еси́ распя́тие ще́дре, я́ко да на́ша утоли́ши поноше́ния, и примири́ши нас Отцу́.

[Σ] Стеня́ ад усре́т Тя Изба́вителю, и я́же име́яше ю́зники со ско́ростию отреши́, Боже́ственными гла́сы воспева́ющия Твою́ Сло́ве, е́же па́че ума́ си́лу и стра́шное снисхожде́ние.

Слава:

[Η] Приидо́ша с мν́ром жены́, у́тру глубоку́ со тща́нием, е́же пома́зати те́ло пречи́стое, и к ним безпло́тный рече́: Нача́льник живота́ воста́ ра́дости Боже́ственныя испо́лнитися.

И ныне, Богородичен:

[Φ] Свет роди́вшая, возсия́вший седя́щим во тме и се́ни сме́ртней, я́ко ви́дела еси́ Пренепоро́чная, возсия́вша из ме́ртвых, с жена́ми все́ми мνроно́сицами, славосло́вясте Его́ лику́юще.

В пяток второй недели по Пасхе

Трипеснец, егоже краегранесие: Слава Богу, аминь. Глас 1.

Песнь 5.

Ирмос: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш.

[Δ] Собо́р евре́йский Тебе́ долготерпели́ваго сло́ве распя́т: сонм же безчи́сленный язы́ков всех Твои́м распя́тием спасл еси́, Человеколю́бче Христе́ Бо́же наш.

[Ο] Не поколеба́л еси́ ка́мене зна́мения, воскресе́нием Твои́м, я́коже ни отве́рзл еси́ в рождестве́ Твое́м, де́вства ключе́й ро́ждшия Тя, Христе́ Бо́же наш.

Слава:

[Ξ] Стра́нным о́бразом ви́девше, Боже́ственно блиста́ющася безпло́тнаго, жены́ ужа́сни бы́вше, слы́шаху: не пла́чите, воскре́се Госпо́дь.

И ныне, Богородичен:

[Α] Свя́та Го́спода сил Пречи́стая родила́ еси́, истощи́вшаго а́дова ца́рствия, и воскре́сша, и совоскреси́вшаго челове́ческое смеше́ние.

Песнь 8.

Ирмос: Песносло́вцы в пещи́ спа́сшаго де́ти / и громопла́менную прело́жшаго на ро́су, / Христа́ Бо́га по́йте и превозноси́те во вся ве́ки.

[Τ] Во́лею распе́ншагося, и поло́жшагося во гро́бе, и упраздни́вшаго сме́рти держа́ву, Христа́ Бо́га по́йте, и превозноси́те Его́ во ве́ки.

[Ω] Яви́лся еси́ пе́рвее жена́м воста́в из гро́ба, и благове́стницы посла́в их апо́столом Христе́: те́мже Тя хвалосло́вим во вся ве́ки.

[Θ] Разруши́в Ще́дре кре́постию сме́рти си́лу, и а́дова ца́рствия, я́ко сый Царь истощи́л еси́; те́мже Тя хвалосло́вим во вся ве́ки.

Слава:

[Ε] Рекл еси́ ученико́м воста́в, во всем мiре пропове́дати потщи́теся Мою́ си́лу, изыма́юще тму многобо́жия све́том и́стинным.

И ныне, Богородичен:

[Ω] Я́ко небе́с вы́шшая, и херуви́мов лу́чшая, честне́йшая же всесвята́я Де́во тва́ри всея́, моли́ся о ве́рою при́сно Тя сла́вящих.

Песнь 9.

Ирмос: Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, велича́ем.

[Α] Ра́дуется земля́ вся днесь, и весе́лие о́блацы да кропя́т: на дре́ве бо Госпо́дь сла́вы распны́йся воста́, тли сме́ртныя нас свободи́в, и нетле́нием просвети́в, я́ко благоутро́бен.

[Μ] Мν́ро иногда́ нося́щим со слеза́ми, свяще́нным жена́м отвещава́ше а́нгел, блиста́яйся све́тло на гро́бе: с ме́ртвыми жива́го почто́ и́щете? Сей воскре́се, просвети́в вся́ческая.

Слава:

[Η] Светоза́рное Бо́га на́шего воста́ние, па́че со́лнечных заре́й освеща́ющее ду́хом ве́рныя, во ве́ки вся просвеща́ет, и наставля́ет ко спасе́нию: е́же чи́стою мы́слию пра́зднуем.

И ныне, Богородичен:

[Ν] Умерщвле́нных нас грехопаде́ньми, живо́т ве́чный роди́вшая Богоро́дице оживи́, и твори́ти поспеши́, к животу́ и́стинному наставля́ющи: я́ко да ве́рою Тя при́сно ублажа́ем.

В субботу второй недели по Пасхе

Четверопеснец, егоже краегранесие се: Первое пою пение. Глас 1.

Песнь 6.

Ирмос: Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние.

[Π] Пригвозди́ша Тя на кресте́ беззако́ннии евре́и долготерпели́ваго: и́хже де́рзость со́лнце зря и луна́, а́бие свет скры́ша, и ме́ртвии воста́вше, тя Христе́ воспева́ху.

[Ρ] Да то́чат го́ры сла́дость днесь, и лю́дие да ра́дуются: воскре́се бо тридне́вно Христо́с, разре́шь сме́ртныя боле́зни. Те́мже тому́ ве́рнии согла́сно вси хвалу́ принесе́м.

Слава:

[Ω] Я́ко у́треневаша Христе́, на гроб Твой жены́ богому́дрыя, ви́деша а́нгела возвеща́юща им Твое́ светоно́сное воскресе́ние, и возгласи́: мν́ро живо́му что ны́не приноша́ете?

И ныне, Богородичен:

[Τ] Ложесна́ твоя́, Чи́стая, не вреди́в роди́ся, я́коже благоволи́, не разре́шь печа́ти гро́ба, и воскре́се я́коже восхоте́: вся бо блага́я твори́т, я́ко Животода́вец и всеси́лен.

Песнь 7.

Ирмос: Тебе́, у́мную, Богоро́дице, пещь, / разсмотря́ем, ве́рнии, / я́коже бо о́троки спасе́ три Превозноси́мый, / мiр обнови́, во чре́ве Твое́м всеце́л, / хва́льный отце́в Бог и препросла́влен.

[Ο] Распны́йся Влады́ко со двема́ разбо́йникома, и о́цта напое́н быв, и зауше́ние подъе́м нас ра́ди Долготерпели́ве, во́лею вся претерпе́л, и воскре́сл еси́ тридне́вно, прехва́льный отце́в Бог, и препросла́влен.

[Ν] Мертволе́пно Ио́сиф снем от дре́ва, и погребе́нию преда́в любе́зно, те́ло Твое́ пречи́стое любо́вию облобыза́ше, и ра́дуяся вопия́ше Ти: прехва́льный оте́ц на́ших Бо́же, благослове́н еси́.

Слава:

[Μ] С ме́ртвыми жива́го что и́щете, глаго́лаше явле́йся а́нгел пла́чущимся жена́м. Что мν́ро приноша́ете? Но ше́дше ученико́м Его́ рцы́те: умертви́выйся воста́ Христо́с, не ктому́ кры́йтеся.

И ныне, Богородичен:

[Ε] В жена́х еди́на благода́тная, пода́теля бо ра́дости арха́нгеловым гла́сом ра́достно родила́ еси́. Те́мже тя чтим, и Сы́ну твоему́ зове́м: прехва́льный оте́ц на́ших Бо́же, благослове́н еси́.

Песнь 8.

Ирмос: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

[Λ] Лю́дие Тя пре́жде непокори́вии евре́и е́млют, и за́вистию возно́сят на крест неи́стовно, не хотя́ще пе́ти Тебе́: благослови́те вся дела́ Госпо́дня Го́спода, по́йте и превозноси́те Его́ во ве́ки.

[Π] Облобыза́ше любо́вию Ио́сиф, те́ло испроси́в, и во гро́бе полага́ет я́ко ме́ртвое: То́йже сокруши́л есть сме́рти вся ключи́, вереи́ же и врата́, и тридне́вно воскре́сл есть.

Слава:

[Ω] Я́ко сый мν́ро мы́сленное, зело́ ра́но прии́де пома́зати те́ло Твое́ же́нский лик, и обрето́ша а́нгела вопию́ща к ним: вся дела́ Госпо́дня Го́спода по́йте, и превозноси́те Его́ во ве́ки.

И ныне, Богородичен:

[Μ] Непрело́жна родила́ еси́ Сы́на Боже́ственнаго существа́, Мари́е благослове́нная, а́ще и яви́ся нас ра́ди пло́тию, я́коже благоизво́ли, Ему́же вопие́м: вся дела́ Госпо́дня Го́спода по́йте, и превозноси́те Его́ во ве́ки.

Песнь 9.

Ирмос: О́браз чи́стаго рождества́ Твоего́, / огнепали́мая купина́ / показа́ неопа́льная; / и ны́не на нас / напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

[Ε] Стал еси́ Влады́ко на дре́ве кре́стнем, и вся язы́ки к ра́зуму привле́кл еси́ Го́споди, и рай отве́рзл еси́, его́же затвори́ша пре́жде пра́отцы вкуше́нием дре́ва: те́мже Тя вси велича́ем.

[Λ] В ро́ве я́ко сме́ртна положи́ша Тя, жи́зни пода́теля и строи́теля, и гро́бная Христе́ вся благообра́зный Ио́сиф и Никоди́м, и же́нский собо́р с ни́ми опря́тав, жа́лостно рыда́юще, боголе́пно Тя велича́ху.

Слава:

[Ο] Весь просвеще́ние и жела́ние, весь Спа́се мой утеше́ние и утвержде́ние всем был еси́, благоче́стно пра́зднующим свято́е и тридне́вное воста́ние Твое́, еди́не Ще́дре: его́же ра́ди Тя вси велича́ем.

И ныне, Богородичен:

[Σ] Плоть от Твои́х Всенепоро́чная ложе́сн, во́лею восприя́т всесоверше́нный, разу́мную пои́стинне и одушевле́нную, и посажда́ется оте́ческим насле́дием Пречи́стая в небе́сных, отону́дуже и па́ки прии́дет.

В понедельник третьей недели по Пасхе

Трипеснец, егоже краегранесие: Поет сия Иосиф. Глас 2.

Песнь 1.

Ирмос: Гряди́те, лю́дие, пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

[Α] Пове́шен на кресте́ во́лею Христе́, тве́рдая ца́рствия а́дова разруши́л еси́, и ве́чныя у́зники изве́л еси́ му́жеством; сла́ва держа́ве Твое́й.

[Δ] Прииди́те, рече́ мνроно́сицам а́нгел, ви́девше ме́сто, иде́же лежа́ше всех Госпо́дь, сего́ воскресе́ние друго́м Его́ пропове́дите.

Слава:

[Ε] В но́вом дре́вле гро́бе Тебе́ положи́ Ио́сиф пра́ведный, новосоде́лавшаго челове́ческое истле́вшее естество́, Животода́вче воскресе́нием Твои́м.

И ныне, Богородичен:

[Ι] Ви́дела еси́ Богоблагода́тная, Христа́ из ме́ртвых возсия́вша, пра́вды со́лнце: Его́же моли́, всех просвети́ти сердца́ воспева́ющих Тя.

Песнь 8.

Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

[Τ] Воздви́женнаго на крест, и погребе́ннаго пло́тию хоте́нием, и сокруши́вшаго врата́ желе́зная, и вереи́ а́довы, просла́вим Го́спода воста́вшаго тридне́вно во сла́ве.

[Α] Да ра́дуется не́бо, да весели́тся и земля́ с челове́ки, Христо́с воскре́се, и свои́м ученико́м яви́ся, и́мже соводворя́яся, сих весе́лия испо́лни сердца́.

[Δ] Слезя́щим жена́м ра́дость провозглаша́ет жизнода́вец, прикосну́вшимся Его́ свяще́нным нога́м, и́хже шу́ма дре́вле убоя́ся прама́ти Е́ва внутрь ра́я.

Слава:

[Ε] Еди́наго Бо́га славосло́вим ипоста́сьми треми́, еди́нем же естество́м, Отца́, и Сло́ва, и Ду́ха Боже́ственна, пра́ва, зову́ще: по́йте Го́спода, и превозноси́те Его́ во ве́ки.

И ныне, Богородичен:

[Ι] Свяще́нными гла́сы Ма́терь Бо́жию песносло́вим, я́ко вы́шних чино́в святе́йшую я́ве, и Боже́ственный мост преводя́й к премiрным ликостоя́нием челове́ки.

Песнь 9.

Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

[Ω] О евре́йского неи́стовства! Ка́ко на дре́ве без пра́вды осужда́ют умре́ти Христа́, пра́ведна еди́наго су́ща, и ме́ртвым и́же во а́де, вдыха́юща жизнь богонача́льно? Его́же Боже́ственное воскресе́ние согла́сно воспои́м.

[Σ] Печа́тем надлежа́щим, воскре́сл еси́ от гро́ба всех воскресе́ние Христе́, и ученико́м яви́лся еси́ недове́домым сих учя́, и иди́те, вопия́, в мiр пропове́дающе сла́ву Мою́.

Слава:

[Η] Воста́ния сей всесвяты́й день, утеше́ние сый душ, и весе́лие ра́достное, ве́рных созыва́ет Боже́ственно пра́здновати и вопи́ти: О́тче и Сы́не и Боже́ственный Ду́ше, сла́ва Тебе́.

И ныне, Богородичен:

[Φ] Светороди́тельнице Де́во, све́том сим Боже́ственным озари́ на́ша мы́сли и сердца́, моли́твами Твои́ми страсте́й мглу разсыпа́ющи, и всех о́бщники невече́рняго дне содева́ющи благода́тию.

Во вторник третьей недели по Пасхе

Трипеснец, егоже краегранесие: Христе спаси мя. Глас 2.

Песнь 2.

Ирмос: Внемли́те, лю́дие Мои́, зако́ну Моему́, / приклони́те у́хо ва́ше во глаго́лы уст Мои́х, / я́ко И́мя Твое́, Го́споди, призва́х.

[Χ] Рука́ма Твои́ма сотвори́вый челове́ка, ру́це пригвозди́л еси́ Всеси́льне на дре́ве, вра́жия руки́ нас избавля́я.

[Ρ] Разори́в Христе́ а́дову несве́тлую темни́цу, и я́же стяжа́ ю́зники взял еси́, и Сам Себе́ я́ко си́лен воскреси́л еси́.

[Ι] Ви́девше Тя Христе́ апо́столи, поклони́шася Тебе́, из гро́ба тридне́вно воста́вшему, и всю́ду Твое́ воста́ние пропове́даша.

Слава:

[Σ] Стеня́ще и сле́зы пролива́юще, гроб святы́й достиго́ша боже́ственныя жены́, и учи́ми быва́ху Христо́вым воскресе́нием.

И ныне, Богородичен:

[Τ] Всех содержи́теля прия́ла еси́ Всенепоро́чная Влады́чице, сте́ршаго а́дова врата́, и воскре́сшаго, я́коже рече́, тридне́вно.

Песнь 8.

Ирмос: В купине́ Моисе́ю Де́вы чу́до / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

[Ε] На крест возне́сся совозне́сл еси́ мiр, и положи́вся Спа́се во гро́бе, во гробе́х спя́щия возставля́еши, Твою́ славосло́вящия вели́кую си́лу.

[Σ] Ты сшед в ме́ртвых, умертви́л еси́ ад, и сокруши́л еси́ врата́ сме́рти и вереи́, и окова́нныя возве́л еси́ му́жеством, всем во спасе́ние.

Слава:

[Ω] Яви́лся еси́ Ще́дре, Твои́м ученико́м во мно́зех зна́мениих, де́ньми четы́редесятьми: те́ми уверя́емь и пропове́дуемь в весь мiр, Бог воста́вый.

И ныне, Богородичен:

[Σ] Ты еси́ всех жизнь, Ты ме́ртвых же и живы́х утеше́ние Сло́ве, и ра́дость и просвеще́ние, возсия́вый из Де́вы, и воскресы́й из гро́ба тридне́вно во сла́ве.

Песнь 9.

Ирмос: От земноро́дных кто слы́ша таково́е / или́ кто ви́де когда́, я́ко Де́ва обре́теся, во чре́ве иму́щая / и безболе́зненно Младе́нца поро́ждшая? / Таково́е Твое́ чу́до, и Тя, Чи́стая Богоро́дице, велича́ем.

[Ο] Распны́йся тридне́вно воскре́сл еси́, я́коже пре́жде рекл еси́, из ме́ртвых же воста́в, совоскреси́в мiр воскресе́нием Твои́м, и жена́м мνроно́сицам пе́рвее яви́лся еси́, и провеща́в, еже ра́доватися, всех ра́досте, от души́ Тебе́ лю́бящим Многоми́лостиве.

[Ν] Ны́не тля потреби́ся, Христо́с бо нетле́ние и жизнь из ме́ртвых воста́в, и соводворя́ется Свои́м апо́столом, учя́ сих лу́чшим и Боже́ственным, и приглаша́я от Иерусали́ма не отлуча́тися.

Слава:

[Μ] Мν́ро иногда́ со слеза́ми прине́сшим а́нгел рече́ жена́м: с ме́ртвыми что и́щете жива́го днесь? Я́коже пре́жде рече́, воста́: несть зде, истощи́вый гро́бы, и ме́ртвым безсме́ртие вдохну́вый, я́ко Человеколю́бец.

И ныне, Богородичен:

[Ε] Из ме́ртвых ви́девши Богоро́дице, Твоего́ сы́на и Бо́га воста́вша, испо́лнилася еси́ ра́дости, су́щая всех ра́дости же и весе́лия вина́. Те́мже Тя ра́достно вся́кая душа́ восхваля́ет и сла́вит Присноде́во.

В среду третьей недели по Пасхе

Трипеснец, егоже краегранесие: Воста Спас. Глас 2.

Песнь 3.

Ирмос: Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.

[Η] Тварь ви́девши Тя на кресте́, стра́ждуща во́лею Го́споди, измени́ся и смуща́шеся, и ме́ртвии от гробо́в воста́ху.

[Γ] Бы́вшу Ти во а́де Животода́вче Го́споди с душе́ю, я́ко ви́де всепа́губная смерть ужасе́ся, отреша́ющи ю́зники, я́же поже́рла.

Слава:

[Ε] Испо́лнися тварь вся ра́дости, ще́дрый Го́споди, из ме́ртвых воста́нием Твои́м, я́ко мiр весь совозста́вил еси́, низло́жь сме́ртное ца́рство.

И ныне, Богородичен:

[Ρ] Ору́жие ду́шу Твою́ про́йде Чи́стая Всенепоро́чная, егда́ Христа́ распина́ема ви́дела еси́: возра́довала же ся еси́, воста́вша из гро́ба Сего́ узре́вши.

Песнь 8.

Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня Го́спода.

[Θ] Умира́еши на кресте́, Живо́т сый всех, и я́ко мертв бездыха́нен во гро́бе положи́лся еси́ Долготерпели́ве, и тридне́вен воста́л еси́ на воста́ние мiру. Те́мже Тя Животода́вче весе́лием сла́вим.

[Η] Услы́ша Сио́н воста́ние Госпо́дне, и весе́лия ны́не испо́лнися, дще́ри же сего́ проявле́нно возра́довашася, и ученико́м пропове́даху глаго́люще: не скорби́те, Животода́вец воста́л есть.

Слава:

[Ο] У́тру бы́вшу, со тща́нием жены́ на гроб приидо́ша, и тре́петом прини́кше, в бе́лых оде́ждах а́нгелы ви́девше, и стра́хом одержи́мы, слы́шаху: не бо́йтеся, Жизнода́вец воста́л есть.

И ныне, Богородичен:

[Σ] Тя све́тлый о́блак со́лнца у́мнаго, Богора́дованная, пою́ще сла́вим: сердца́ на́ша просвети́, тму отгоня́ющи всю уны́ния и страсте́й, Богоневе́сто.

Песнь 9.

Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.

[Ω] Я́ко ви́де Тя со́лнце, пра́веднаго Со́лнца на кресте́ просте́рта, свет скрыва́ше, ка́мение распада́шеся, ад ме́ртвыя ско́ро отдава́ше, пою́щия держа́ву Твою́ Животода́вче всеси́льне.

[Τ] А́дову несы́тую утро́бу, пребоже́ственный пресла́вно истощи́в я́ко всеси́лен, а́бие воскре́с во сла́ве, и ученики́ боже́ственными ви́ден бысть. Тому́ поклони́мся со Отце́м же и Ду́хом.

Слава:

[Η] Воста́ Госпо́дь, мνроно́сицам глаго́лаше, явле́йся во гро́бе святы́й а́нгел: иди́те, и рцы́те сего́ ученико́м, в Галиле́и пла́чущим и рыда́ющим, я́ко да сего́ та́мо у́зрят.

И ныне, Богородичен:

[Ρ] Изба́витися Всенепоро́чная, от напа́стей и скорбе́й, и страсте́й бу́ри и омраче́ния, и многоплете́нных сете́й лука́ваго, моли́ непреста́нно Христа́ Бо́га на́шего, при́сно блажа́щим Тя.

В четверток третьей недели по Пасхе

Трипеснец, егоже краегранесие: Песнь пою Богу. Глас 2.

Песнь 4.

Ирмос: Пою́ Тя, слу́хом бо, Го́споди, услы́шах и ужасо́хся: / до мене́ бо и́деши, мене́ ища́, заблу́ждшаго. / Тем мно́гое Твое́ снизхожде́ние, е́же на мя, / прославля́ю, Многоми́лостив.

[Α] Возше́л еси́ на крест во́лею, Го́споди, си́лою препоя́сан, и соше́д Благоутро́бне с душе́ю во ад, ду́ши ве́чных уз разреши́л еси́, и с Собо́ю Ще́дре совоскреси́л еси́.

[Σ] Сокруши́в стра́шно вереи́ и врата́ а́дова, кре́постию Твое́ю Влады́ко, истощи́л еси́ его́ бога́тство; те́мже мно́гое Твое́ снисхожде́ние и честно́е воскресе́ние сла́вим.

Слава:

[Μ] Пома́зати пречи́стое те́ло Твое́, на гроб приидо́ша жены́, обре́тша же а́нгела на ка́мени седя́ща Христе́, боя́щяся удиви́шася: с ни́ми же песносло́вим Твое́ воста́ние.

И ныне, Богородичен:

[Α] Святы́х Свята́го па́че ума́ родила́ еси́ Богоро́дице, освяще́ние, избавле́ние, и оставле́ние грехо́в ве́рным подаю́ща, хода́тайством Твои́м, Его́ сла́вящим воскресе́ние.

Песнь 8.

Ирмос: Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́дня, Го́спода.

[Α] Возвы́сил еси́ естество́ челове́ческое Христе́, на кресте́ Твои́м возвыше́нием, и с высоты́ па́дшаго врага́ в про́пасть низве́ргл еси́, и погребе́н воста́л еси́, плени́в смерть.

[Σ] Сокруши́л еси́ а́довы вереи́ Христе́, и окова́нныя у́зники в му́жестве изве́л еси́, Твою́ сла́вящия си́лу, и е́же из гро́ба тридне́вно воста́ние.

Слава:

[Ω] Я́ко ви́де Тя дре́вле лик святы́х апо́стол, из гро́ба воста́вша во сла́ве Христе́, весе́лия испо́лнен быв вопия́ше: сла́ва воста́нию Твоему́.

И ныне, Богородичен:

[Τ] Плачь Твой Пречи́стая свята́я, преложи́ся на ра́дость, внегда́ ви́дела еси́ Твоего́ Сы́на и Влады́ку Христа́, из ме́ртвых тридне́вно воскре́сша во сла́ве, и мiр просвети́вша.

Песнь 9.

Ирмос: Я́же пре́жде со́лнца свети́льника Бо́га возсия́вшаго, / пло́тски к нам прише́дшаго из боку́ Деви́чу, / неизрече́нно воплоти́вшая, Благослове́нная Всечи́стая, / Тя, Богоро́дице, велича́ем.

[Ω] Яви́лся еси́ посреде́ двою́ разбо́йнику ра́спят, Многоми́лостиве, и положе́н в ро́ве преиспо́днем, и я́же во тме и се́ни сме́ртней воскреси́л еси́, песносло́вящия благоутро́бне, Твое́ тридне́вное воскресе́ние.

[Θ] Смерть не ктому́ челове́ки облада́ет, я́коже есть пи́сано, отне́лиже Христо́с воскре́се безсме́ртный, а́дова истощи́в несы́тая ца́рствия; да ра́дуется вся вселе́нная пра́зднующи.

Слава:

[Ε] Рече́ мνроно́сицам а́нгел, блиста́яйся пред гро́бом: в ме́ртвых свобо́днаго что пла́чуще и́щете? Я́коже пре́жде рече́, уже́ воста́: иди́те отсю́ду ра́дующеся.

И ныне, Богородичен:

[Ω] Яви́лася еси́ простра́ннее Де́во небе́с, Бо́га вмести́вши, под земле́ю положе́наго бла́гости ра́ди, и сме́ртию безсме́ртие всем дарова́вша: Его́же благоче́стно сла́вяще, Тебе́ по до́лгу ублажа́ем.

В пяток третьей недели по Пасхе

Трипеснец, егоже краегранесие: Слава Богу, аминь. Глас 2.

Песнь 5.

Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

[Δ] Собо́р иногда́ беззако́ннующих евре́й, Тебе́ Человеколю́бче, на дре́во возвы́сив, умертви́; но во гро́бе положе́н, а́довы у́зы вся разруши́л еси́, и я́же от ве́ка ме́ртвыя воскреси́л еси́.

[Ο] Егда́ тле́ния вкуси́л еси́, всех безсме́ртие, тогда́ му́жески свя́занныя вся изве́л еси́, и воскреси́л еси́ от гро́ба Животода́вче, разори́в смерть, и просвети́в нас воста́нием Твои́м.

Слава:

[Ξ] Стра́нною оде́ждою блиста́ющася дре́вле, на гро́бе ви́девша а́нгела жены́ чудя́хуся, он же к ним вопия́ше: не бо́йтеся, Христо́с воскре́се: иди́те, друго́м Его́ возвести́те.

И ныне, Богородичен:

[Α] Восто́к со́лнца пра́веднаго показа́лася еси́ ма́ти Де́во: Его́же ви́девши воскре́сша из ме́ртвых, я́коже рече́, и мiр весь просве́щша, ра́довалася еси́ пою́щи Чи́стая я́ко Человеколю́бца.

Песнь 8.

Ирмос: О подо́бии зла́те небре́гше треблаже́ннии ю́ноши, / неизме́нный и живы́й Бо́жий о́браз ви́девше, / среди́ огня́ воспева́ху: / осуществова́нная да пое́т Го́спода вся тварь / и превозно́сит во вся ве́ки.

[Θ] Бог сый бла́же, сподо́бился еси́ челове́к бы́ти, и распя́тися на дре́ве во́лею, на спасе́ние ве́рою вопию́щим всегда́: осуществова́нная да пое́т Го́спода вся тварь, и превозно́сит во вся ве́ки.

[Ε] В ро́ве преиспо́днем положи́ Тя Ио́сиф, пови́в поня́вами же и сми́рною и ало́ем, но воскре́сл еси́ спаса́я ве́рно зову́щия: осуществова́нная да пое́т Го́спода вся тварь, и превозно́сит во вся ве́ки.

Слава:

[Ω] Яви́лся еси́ ученико́м всеси́льне воскре́с, и тем рек: иди́те в мiр, пропове́дите Мое́ смотре́ние, пою́ще: осуществова́нная да пое́т Го́спода вся тварь, и превозно́сит во вся ве́ки.

И ныне, Богородичен:

[Α] Освяти́ на́ша сердца́, всесвята́я Де́во Богоневе́сто, ви́девшия всесвята́го Бо́га Сло́ва воста́вша, и в весе́лии зову́щия: осуществова́нная да пое́т Го́спода вся тварь, и превозно́сит во вся ве́ки.

Песнь 9.

Ирмос: Недоуме́ет всяк язы́к благохвали́ти по достоя́нию, / изумева́ет же ум и премiрный пе́ти Тя, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо христиа́н еси́ Предста́тельница, Тя велича́ем.

[Μ] То́чию водрузи́ся Спа́се крест Твой на ло́бном, сме́ртное все жили́ще из глубины́ поколеба́ся, и в се́ни седя́щии сме́ртней, уз нереши́мых вои́стинну разреши́шася вси, сла́ва, вопию́ще, держа́ве си́лы Твоея́.

[Η] Земля́ потрясе́ся, ка́мение распаде́ся стра́хом, го́ры и хо́лми вси поколеба́шася, и со́лнце поме́рче, ви́девше Тя на кресте́ пове́шена, вереи́ а́довы и врата́ желе́зная сотро́шася Христе́, егда́ из ме́ртвых Твои́м воста́нием мiр совоздви́гл еси́.

Слава:

[Ν] Ме́ртва Тя Влады́ко ви́дев дре́вле на кресте́, благообра́зный Аримафе́й снят от дре́ва, и поня́вицею ^{16} тогда́ чи́стою пови́т, и во гро́бе но́ве мно́гим стра́хом положи́ со тща́нием: Ты же я́коже проре́кл, воста́л еси́ Сло́ве, тридне́вно.

И ныне, Богородичен:

Зако́нных кроме́ Влады́чице Всенепоро́чная, родила́ еси́ неизрече́нно Сло́ва, Его́же от беззако́нных сове́том распя́та, и положе́на во гро́бе, и воста́вша из ме́ртвых я́ко ви́девши, испо́лнилася еси́ ра́дости: Сего́ моли́ о нас воспева́ющих Тя.

В субботу третьей недели по Пасхе

Четверопеснец. Глас 2.

Песнь 6.

Ирмос: Из глубины́ возведи́ мя, / Ио́на к Тебе́ возопи́, / о́браз погребе́ния и воскресе́ния сый, / е́же нам дарова́л еси́, Всеси́льне Спа́се.

Мνроно́сицы гро́ба Твоего́ дости́гша слезя́ху, но а́нгел тем ра́дость возвеща́ше, взыва́я: Христо́с воскре́се, мiрови пропове́дите.

На крест вознесе́ну Ти, сия́ние скры со́лнце, но Изра́иль Тебе́ Бо́га и Зижди́теля не позна́, за всех во́лею ду́шу поло́жшаго.

Слава:

Да ра́дуются вся́ческая, я́ко Христо́с из гро́ба воста́, плени́в вся а́дова сокро́вища, и о́бщий весе́лия пра́здник да соверша́ют.

И ныне, Богородичен:

А́ще и младе́нца родила́ еси́, но Де́ва пребыла́ еси́, я́коже была́ еси́ пре́жде рождества́, Чи́стая Богоро́дице Де́во: рожде́йся бо естество́ обнови́, я́ко Бог.

Песнь 7.

Ирмос: Пещь дре́вле всегремя́щую угаси́вый / и о́троки ту́чею духо́вною ороси́вый, / благослове́н еси́, Бо́же оте́ц на́ших.

Неразу́мнии лю́дие иуде́йскаго собо́ра, вме́сто благодея́ний, я́же тем дарова́л еси́, ко кресту́ Христе́ пригвозди́ша Тя.

Исто́чник ми́лости за всех положи́лся еси́, да вси до́лга сме́ртнаго разреши́вшеся, пое́м Тя Человеколю́бче.

Слава:

Тридне́вною сме́ртию, и погребе́нием живоно́сным, су́щим во гробе́х пода́л еси́ жизнь ве́чную, ве́рно Спа́се пою́щим Тя.

И ныне, Богородичен:

Тебе́ и еди́ной хода́таице ра́дости, подоба́ет от а́нгел, е́же ра́дуйся, е́же ве́рнии Тебе́ вопие́м, Мари́е Присноде́во.

Песнь 8.

Ирмос: Устраши́ся отроко́в благочести́вых сообра́знаго души́ нескве́рнаго те́ла / и устрани́ся воспита́нный в безме́рном веществе́ неутружде́н огнь, / присноживу́щу же, изувя́дшу пла́меню, ве́чнующая песнь воспева́шеся: / Го́спода, вся дела́, по́йте / и превозноси́те во вся ве́ки.

Разруша́ется безбо́жный сове́т, и печа́ти вотще́ иуде́ем бы́ша: воста́ погребы́йся, поруга́вся всем: Бог бо во́лею страда́ти прие́млет, но вла́стию свое́ю устроя́ет вся, я́коже хо́щет. Я́ко Го́спода того́ непреста́нно пое́м, и превозно́сим во вся ве́ки.

Иди́те, рече́ жена́м блиста́яйся зра́ком: Христо́с воскре́се, пропове́дите про́чее Того́ воскресе́ние мiрови всему́, и не пла́читеся, несть бо слеза́м вре́мя: не ктому́ бо ца́рствует смерть, не ктому́ облада́ет ад, не ктому́ осужде́ния победи́т грех.

Слава:

Скры́ся Влады́ко Христе́, живо́т наш в Тебе́, пострада́вшем пло́тию, и из ме́ртвых воскре́сшем Сло́ве, и живу́щем при́сно: Ему́же наде́емся христиа́не причасти́тися, на стра́шном второ́м прише́ствии Твое́м, ве́рнии, досто́йно пою́ще Твоя́ стра́сти Боже́ственныя, и е́же из ме́ртвых Твое́ воскресе́ние.

И ныне, Богородичен:

Прия́т разреше́ние Тобо́ю пра́баба дре́вняго осужде́ния: не ктому́ бо сия в печа́лех роди́т, Ты бо родила́ еси́ Богороди́тельнице Христа́. Те́мже Тя досто́йно ублажа́ем, пою́ще из Тебе́ Рожде́ннаго без се́мене, и превознося́ще во вся ве́ки.

Песнь 9.

Ирмос: Возвели́чил еси́, Христе́, ро́ждшую Тя Богоро́дицу, / от Нея́же, Созда́телю наш, в подобостра́стное нам обле́клся еси́ те́ло, / на́ших прегреше́ний реши́тельное: / Сию́ ублажа́юще, вси ро́ди, / Тебе́ велича́ем.

Услы́ши глас жениха́ твоего́ це́ркви, вопие́т боже́ственный Дави́д: тебе́ бо из ребр даров́ася вода́ с кро́вию Боже́ственною, на очище́ние согреше́ний: Той бо изба́вил есть тебе́ от ле́сти и́дольския, я́ко Человеколю́бец.

Ты возсия́л еси́ жизнь, воста́нием тридне́вным, язы́к мно́жеству Христе́: не вопроша́ющим, ни и́щущим Тебе́, явле́н был еси́ тем Боже́ственною сла́вою: люде́й же иуде́йских, Тебе́ неве́ровавших осуди́л еси́.

Слава:

Дре́ва е́же во Еде́ме, пре́лестию прозя́бшую ми кля́тву разреши́л еси́, да́же до креста́ послу́шав Сло́ве, Ты оте́ческим сове́том, самовла́стно: те́мже Твое́ несказа́нное истоща́ние пою́ и велича́ю.

И ныне, Богородичен:

Ты прибли́жил еси́ к Тебе́ язы́к свят, дале́че отстоя́щий, вопло́щся из Де́вы Спа́се, и не Твоя́ лю́ди, наре́кл еси́ лю́ди Твоя́ боже́ственныя: сего́ ра́ди вси ны́не покланя́емся Тебе́ Всеси́льне.

В понедельник четвертой недели по Пасхе

Трипеснец, егоже краегранесие: Воскресе Спас. Глас 3.

Песнь 1.

Ирмос: Пресека́емое мо́ре жезло́м дре́вле / Изра́иль про́йде, я́ко по пусты́ни, / и крестообра́зно я́ве предуготовля́ет стези́. / Сего́ ра́ди пои́м во хвале́нии Чу́дному Бо́гу на́шему, / я́ко просла́вися.

[Α] Восше́д на высоту́, плене́ние во а́де содержи́мое, я́ко кре́пкий прия́л еси́ Спа́се, и совоскреси́л еси́ с Собо́ю, тридне́вен из гро́ба воскре́с Человеколю́бче, я́ко всеси́лен.

[Ν] Умерщвле́нна дре́вле Тебе́ Спа́се, и погребе́нна в но́вом гро́бе ви́дев ад, весь мертв пребы́сть и безде́лен; ме́ртвыя же вси Твои́м воста́нием живоно́сным, ра́дующеся, от уз разреши́шася.

Слава:

[Ε] В ме́ртвых жива́го что и́щете? Мνроно́сицам рече́ у гро́ба светообра́зный а́нгел, иногда́ явля́яся: отше́дше ско́ро, апо́столом возвести́ти потщи́теся сего́ воста́ние.

И ныне, Богородичен:

[Σ] Воплоще́нна Го́спода неизрече́нно из пречи́стых крове́й Твои́х Богоро́дице, и нас ра́ди смерть пло́тию восприи́мша, воскре́сша ви́девши из гро́ба, ра́достно сла́вящи велича́ла еси́.

Песнь 8.

Ирмос: Вавило́нская пещь о́троки не опали́, / ниже́ Божества́ огнь Де́ву растли́. / Тем со о́троки, ве́рнии, возопие́м: / благослови́те, дела́ Госпо́дня Го́спода.

[Τ] Распя́таго Го́спода дре́вле ви́девше, со́лнце сокры́ свет, ка́мение распаде́ся, го́ры поколеба́шася, и земля́ потрепета́, и и́же дре́вле у́зницы от уз разреша́хуся.

[Η] Внегда́ Тя ви́де ад всесме́шный, Сло́ве всеси́льне, я́ве к себе́ иду́ща, потрепета́, и всех ме́ртвых отреша́ше, воспева́ющих держа́ву и благоутро́бие Твое́.

Слава:

[Ο] Госпо́дь воста́, вси воскли́кнем, и рука́ми воспле́щим ве́рно, и ли́ки соста́вим, сего́ си́лу пропове́дающе, и вопию́ще: дела́ по́йте Го́спода, и превозноси́те Его́ во ве́ки.

И ныне, Богородичен:

[Σ] Зачала́ еси́ Всенепоро́чная, вся содержа́щаго, и Того́ родила́ еси́ пло́тию, плени́вша смерть сме́ртию тридне́вною: Его́же умоли́, души́ моея́ стра́сти умертви́ти, и спасти́ мя.

Песнь 9.

Ирмос: Купино́ю и огне́м пропи́санную в Сина́и / законополо́жнику Моисе́ю / и Бо́жий во чре́ве неопа́льно заче́ншую Огнь, / Всесве́тлую и Негаси́мую Свещу́, / су́щую Богоро́дицу пе́сньми, чту́ще, велича́ем.

[Ω] Красне́йший Христе́, ка́ко Ти за́йде на кресте́ добро́ты све́тлое? Ка́ко терпи́т земля́ зря́щи Тя ви́сяща? Ка́ко непра́ведное претерпе́ заколе́ние Твое́? Пое́м мно́гое Твое́ и неизрече́нное сло́ве соше́ствие.

[Τ] Тридне́вным Твои́м погребе́нием плене́н бысть враг, и от а́довых уз отреши́шася мертвецы́, умертви́ся смерть, истощи́шася ца́рства а́дова. Те́мже Тя Животода́вче, в пе́снех чту́ще велича́ем.

Слава:

[Η] Ве́чный Животе́, ка́ко вкуси́л еси́ нас ра́ди сме́рти хотя́ Спа́се? Ка́ко сшел еси́ в ме́ртвыя, всех воскресе́ние, и истощи́л еси́ а́дова сокро́вища? Те́мже Тя благода́рственно в пе́снех чту́ще велича́ем.

И ныне, Богородичен:

[Ρ] Изба́ви град и лю́ди прибега́ющия к Тебе́, Богороди́тельнице Чи́стая, роди́вшая Христа́, от вся́каго сопроти́внаго гне́ва, и плене́ния, и язы́к нахожде́ния, я́ко да Тя по до́лгу в пе́снех велича́ем.

Во вторник четвертой недели по Пасхе

Трипеснец, егоже краегранесие: Пение Иосифово: Глас 3.

Песнь 2.

Ирмос: Я́ко ту́ча на тро́скот ^{17} / и я́коже и́ней на се́но, / да сни́дут на зе́млю глаго́ли Мои́.

[Ψ] Псалмы́ воскли́кнем, воспле́щим рука́ми ве́село, из ме́ртвых Животода́вец воста́.

[Α] Возше́л еси́ Христе́ на крест Твой, препоя́сався си́лою и воскре́сл еси́ из ме́ртвых, я́коже предре́кл еси́.

[Λ] Белооде́жден а́нгел ви́ден бысть жена́м вопия́й: воскре́се, сый воскресе́ние ве́рных и спасе́ние.

Слава:

[Μ] Пома́зати Тя тща́щеся, идя́ху жены́ ко гро́бу: воскре́сша же ви́девше, покланя́хуся.

И ныне, Богородичен:

[Ω] Я́ко зау́треннее со́лнце, преднося́щи Де́во на руку́ возсия́ла еси́ нам во тме су́щим.

Песнь 8.

Ирмос: А́нгельми немо́лчно в Вы́шних сла́вимаго Бо́га, / Небеса́ небе́с, земля́, и го́ры, и хо́лми, и глубина́, / и весь род челове́ческий, / пе́сньми Того́, я́ко Созда́теля и Изба́вителя, благослови́те / и превозноси́те во вся ве́ки.

[Δ] Собо́р законопресту́пный евре́йский на дре́ве Тебе́ распя́, дре́ва ра́ди челове́ком бы́вший вред, Влады́ко исцеля́юща Боже́ственно. Те́мже Тя гла́сы ра́достными при́сно пое́м.

[Ι] Ра́вен Отцу́ Христе́ и Ду́ху сый, крест претерпел еси́, и вмени́вся в ме́ртвых, ца́рствия а́дова истощи́л еси́ пресла́вно, и воскре́с совоздви́гл еси́ с собо́ю всю тварь.

Слава:

[Α] А́де всея́дче, где жа́ло твое́? Где твоя́ сме́рте побе́да? Воскре́сшим из ме́ртвых умертви́лся еси́, Спаси́телем Христо́м еди́нем Жизнода́вцем. Его́же со Отце́м и Ду́хом ве́рнии воспева́ем.

И ныне, Богородичен:

[Ι] Да обожи́т челове́чество Бог, челове́к бысть из Тебе́ Всенепоро́чная Чи́стая. Его́же из гро́ба красне́йша ви́дела еси́ проше́дша, я́ко победи́теля а́ду, и ра́дости испо́лнилася еси́.

Песнь 9.

Ирмос: На Сина́йстей горе́ ви́де Тя в купине́ Моисе́й, / неопа́льно Огнь Божества́ заче́ншую во чре́ве; / Дании́л же Тя ви́де Го́ру несеко́мую; / Жезл прозя́бший, Иса́ия взыва́ше, / от ко́рене Дави́дова.

[Ω] Я́ко а́гнец к заколе́нию приведе́н был еси́ Влады́ко во́лею Иису́се, не вопия́, ни зовы́й, я́коже пи́шет, сме́ртию Свое́ю Сло́ве нас обезсме́ртив, песносло́вящих Твою́ страсть пречи́стую, и е́же из а́да стра́шное ожи́тие.

[Σ] Сокруше́нных нас обнови́л еси́, Иису́се всех Царю́, честны́м и стра́шным воскресе́нием Твои́м, ученико́м же ви́девся, мир Твой сим пода́л еси́ Человеколю́бче. Его́же нам да́руй песносло́вящим Твое́ Боже́ственное воста́ние.

Слава:

[Η] Честно́е мνроно́сиц собра́ние, прии́де тща́нием ко свято́му Влады́ко, гро́бу Твоему́, е́же пома́зати Тя ве́рно: в бе́лых же ри́зах ви́деша седя́ща а́нгела, и тем веща́юща: что́ с ме́ртвыми жива́го зре́ти хо́щете?

И ныне, Богородичен:

[Φ] Светода́вца родила́ еси́ и Го́спода, две́ри су́щи све́та, Его́же из гро́ба облиста́вша ви́девши, испо́лнилася еси́ ра́дости: но Того́ моли́ Де́во, плачь мне дарова́ти ра́достный, хода́тайствен Чи́стая та́мошняго утеше́ния.

В четверток четвертой недели по Пасхе

Трипеснец, егоже краегранесие: Хвала Господу. Глас 3.

Песнь 4.

Ирмос: Приосене́нную го́ру Авваку́м прозря́ше, / пречи́стую Твою́ утро́бу, Чи́стая. / Тем взыва́ше: от ю́га прии́дет Бог / и Святы́й от горы́ приосене́нныя ча́щи.

[Α] Неизрече́нным соедине́нием уподо́бився челове́ком, еди́н Пресу́щный, крест пло́тию претерпе́в, и вмени́вся в ме́ртвых, тридне́вно воскре́сл еси́ жизнь всех.

[Ι] Иису́се Бо́же наш, вода́ жи́зни сый, ше́ствуеши тружда́яся в пло́ти ко исто́чнику, соседя́ же и самаряны́не жене́, прему́дрости Твоея́ во́ду та́йно пролива́еши.

Слава:

[Ν] Неду́гов разли́чных приходя́щих к Тебе́ Сло́ве, очища́я повеле́нием Твои́м, крест во́лею претерпе́л еси́ во гро́бе положи́вся, воскреси́л еси́ естество́ челове́ческое истле́вшее.

И ныне, Богородичен:

[Ε] На Тя прему́дрость Отца́ безнача́льнаго сни́де, я́ко дождь на руно́ Чи́стая, и вопло́щши кроме́ преложе́ния, пути́ жи́зни показа́ла еси́ нам ве́дущим Тя Де́ву по рождестве́ и ма́терь.

Песнь 8.

Ирмос: В пла́мень ко отроко́м евре́йским / снизше́дшаго Бо́жиею си́лою и я́вльшагося Го́спода, / свяще́нницы, благослови́те / и превозноси́те во вся ве́ки.

[Σ] Ты на кресте́ возне́сся, челове́ческое все естество́ совозне́сл еси́ Сло́ве, и положи́вся во гро́бе, во гробе́х спя́щия воздви́гл еси́ Боже́ственным воста́нием Твои́м Ще́дре.

[Ι] Иерихо́н и Сали́м бли́жняя с вода́ми мно́гими преше́д, к студенцу́ Иа́ковлю прии́де, исто́чник прему́дрости, во́ду спасе́ния самаряны́не дая́.

Слава:

[Σ] Ты слепца́ просвети́вый сло́вом, и разсла́бленных повеле́нием Твои́м стягну́вый, и мертв тридне́вно возсия́вый из гро́ба, умерщвле́нную воскреси́ ду́шу мою́.

И ныне, Богородичен:

[Κ] Мiрови всему́ Богоро́дице Мари́е Ты еси́ прибе́жище, мiрски́х мя собла́зн и страсте́й теле́сных, и ве́чнующия изба́ви гее́нны, я́ко да песносло́влю Тя.

Песнь 9.

Ирмос: Тебе́, Неопали́мую Купину́ и Святу́ю Де́ву, / Ма́терь Све́та и Богоро́дицу, / Наде́жду всех нас, велича́ем.

[Υ] Просте́рл еси́ дла́ни на дре́ве, зле просте́ртых пра́отца рук, к дре́ва сне́ди, потребля́я вред, Христе́ Многоми́лостиве.

[Ρ] Глаго́лом разсла́бленнаго стягну́вый, и хромы́я испра́вивый, распя́лся еси́, Иису́се, и воскре́сл еси́, ученико́м на мно́гия дни явля́яся.

Слава:

[Ι] Ви́де самаряны́ня жена́ Тебе́, прише́дши почерпсти́, и во́ду жи́зни от Тебе́ прии́мши, насы́тися, Христе́ Бо́же, воспева́ющи Тя.

И ныне, Богородичен:

[Ω] О па́че ума́, Твои́х чуде́с Пречи́стая Де́во, Ты бо родила́ еси́ Бо́га воплоще́нна, Боже́ственным воста́нием свои́м всех спа́сшаго.

В пяток четвертой недели по Пасхе

Трипеснец, егоже краегранесие: Слава Тебе Боже. Глас 3.

Песнь 5.

Ирмос: Я́ко ви́де Иса́ия обра́зно / на Престо́ле превознесе́на Бо́га, / от А́нгел Сла́вы дориноси́ма, / о, окая́нный, – вопия́ше, – аз! / прови́дех бо воплоща́ема Бо́га, / Све́та Невече́рня, / и ми́ром вла́дычествующа.

[Δ] Вя́жемь Ще́дре, и во́лею дре́ву пригвожда́емь, свя́занных вся́кими преступле́ньми избавля́еши, положи́в же ся во гро́бе, во гробе́х усну́вшия мертвецы́ воздвиза́еши, пою́щия Твое́ стра́шное воскресе́ние.

[Ο] Госпо́дь воскре́се из ме́ртвых, я́коже рече́, тридне́вен и со апо́столы водворя́яся вопия́ше: в весь мiр ше́дше возвести́те я́сно, я́же ви́дите вели́кая моя́ чудеса́.

Слава:

[Ξ] Диви́тся се́рдце и слух Спа́се, Твоему́ благоутро́бию, и смотре́нию, и снизхожде́нию: пло́тию бо по земли́ ходя́, самаряны́ни же прося́щей жене́, во́ду жи́зни пода́л еси́ Боже́ственнаго ра́зума.

И ныне, Богородичен:

[Α] Свята́я Богоро́дице, во Святы́х Свята́го роди́вшая Сло́во, от Безнача́льнаго Отца́ возсия́вшее, Того́ моли́ непреста́нно, освяти́ти и просвети́ти ду́ши на́ша, и сердца́ любо́вию пою́щих Тя.

Песнь 8.

Ирмос: Нестерпи́мому огню́ соедини́вшеся, / Богоче́стия пред стоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́д ня, Го́спода / и превозноси́те во вся ве́ки.

[Σ] На крест возне́сся во́лею, все совозне́сл еси́ челове́ческое существо́, в ме́ртвых же жизнь сый вмени́вся, оживи́л еси́ Спа́се пою́щия смотре́ние Твое́, и е́же со сла́вою восхожде́ние ще́дре.

[Ο] Мiр ра́достию пра́зднует во свято́м Твое́м воста́нии Животода́вче, и́мже всю си́лу а́дову попра́л еси́, и сме́рти жа́ло притупи́л еси́ Сло́ве, и нетле́ние источи́л еси́ челове́ком.

Слава:

[Ι] Ви́девши Тя жена́ самаряны́ня труди́вшася, ще́дре, и прося́ща во́ду пи́ти, безсме́ртия прие́млет во́ды, вопию́щи: даждь ми во́ду живу́ю Го́споди, я́ко да не вжа́жду во все вре́мя живота́ моего́.

И ныне, Богородичен:

[Ο] Дом Бо́жий показа́лася еси́ Пречи́стая Де́во Богоро́дице, сему́ плоть одушевле́нную, от Твои́х крове́й пречи́стых взаи́м да́вши отрокови́це: те́мже Тя почита́ем во вся ве́ки.

Песнь 9.

Ирмос: В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, / свят Бо́гу. / Тем Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, / велича́ем.

[Θ] Диви́тся со́лнце, зря на дре́ве пригвожде́нна Тебе́ Христе́, поколеба́шася концы́, и потрясе́ся вся земля́, и распаде́ся ка́мение, и ад до́ле я́же от ве́ка ю́зники отреши́ воспева́ющия Тя.

[Ε] Положи́лся еси́ Христе́ во гро́бе, жизнь и воскресе́ние: воскре́с же во сла́ве, во днех мно́гих Свои́м соводворя́яся ученико́м, и сих пропове́дники во весь мiр посыла́я стра́шнаго смотре́ния Твоего́.

Слава:

[Ο] Пути́ мне жи́зни показу́еши Ми́лостиве, ми́лостию мно́гою ше́ствуеши, и седи́ши труди́вся от пути́: и жене́ прося́щей во́ды безсме́ртия посыла́еши, пою́щей мно́гое Твое́ смотре́ние.

И ныне, Богородичен:

[Σ] Воплоща́ется Христо́с из Тебе́ па́че сло́ва, Сло́во сый О́тчее, Де́во Богоро́дице, и распина́ется хотя́ нас ра́ди, и тридне́вным воста́нием мiру концы́ освеща́ет: с ни́ми же Тя по до́лгу ублажа́ем.

В субботу четвертой недели по Пасхе

Четверопеснец, егоже краестрочие сие: Третий глас яви. Глас 3.

Песнь 6.

Ирмос: Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

[Τ] Пробо́дся копие́м в Боже́ственная ре́бра, уя́звленнаго челове́ка преступле́нием, Животода́вче исцели́л еси́ Боже́ственными Твои́ми страстьми́: те́мже Влады́ко, воспева́ем держа́ву Твою́.

[Ρ] Ударе́ние претерпе́л еси́ Иису́се, разоря́яй а́дова ца́рствия, и вереи́ стерл еси́, руко́ю вседержа́вною Твое́ю спасл всех, и воскре́сл еси́ тридне́вно.

Слава:

[Ι] Стоя́л еси́ пред суди́щем Пила́товым я́ко осу́жденик, земли́ всей судя́й Го́споди, хотя́, его́же созда́л еси́, от а́да изба́вити, соше́л еси́ к нему́ еди́не Милосе́рде.

И ныне, Богородичен:

[Τ] Родила́ еси́ кроме́ боле́зней Сы́на, пре́жде век от Отца́ рожде́ннаго Чи́стая, и о Нем боле́ла еси́, зря́щи пло́тию распина́ема ви́сяща: воскре́сшу же я́ко Бо́гу, ра́довалася еси́ све́тло.

Песнь 7.

Ирмос: Пре́жде о́бразу злато́му, перси́дскому чти́лищу, / о́троцы не поклони́шася, / трие́ пою́ще посреде́ пе́щи: / отце́в Бо́же, благослове́н еси́.

[Ο] Херуви́мом и серафи́мом сый непристу́пен, пло́тию распя́тие претерпе́л еси́ за милосе́рдие ми́лости Твоея́, да спасе́ши Ада́ма истле́вшаго преступле́нием.

[Σ] Ты соше́д с душе́ю ко а́ду, разори́л еси́ держа́ву его́ Влады́ко, и воздви́гл еси́ су́щия в нем свя́занныя, воспева́ющия Твою́ держа́ву Животода́вче.

Слава:

[Η] Отъя́тся печа́ли уны́ние, мνроно́сицы потщи́теся гро́ба дости́гнути, и из гро́ба Христа́ воскре́сша зря́ще, пропове́дите мiру.

И ныне, Богородичен:

[Χ] Христа́, Его́же родила́ еси́ Чи́стая, красу́йся, ви́дящи воскре́сша тридне́вно со сла́вою из ме́ртвых, и я́ко ма́ти умоли́ Его́ о всем мiре.

Песнь 8.

Ирмос: Нестерпи́мому огню́ соедини́вшеся, / Богоче́стия пред стоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

[Ο] Вся́кое дыха́ние созда́вый сло́вом, от иуде́й пло́тию на дре́ве во́лею пове́шается, и же́лчию напоя́ется, и зря́щи тварь вся возмуща́шеся, безблагода́тных рыда́ющи безу́мие.

[Σ] Тебе́ Нача́льника и Спа́са мiру, я́ко челове́ка всея́дец прие́млет ад, его́же связа́в я́ко Госпо́дь, и и́хже дре́вле имя́ше пови́нныя, взял еси́, и совоскреси́л еси́ тридне́вно из гро́ба.

Слава:

[T] Оте́ческих не отлу́чся недр, плоть нас де́ля от Де́вы прия́т, и смерть во́лею подъя́л еси́, положе́н же во гро́бе, воста́л еси́ Сло́ве Бо́жий тридне́вно: те́мже Тя пое́м еди́наго Жизнода́вца.

И ныне, Богородичен:

[Ε] Родила́ еси́ Чи́стая Сы́на без боле́зни, пре́жде век су́щаго со Отце́м же и Ду́хом Святы́м: Его́же на кресте́ ви́сяща зря́щи, боле́ла у́бо еси́, воста́вша же из гро́ба ви́девши, сра́дуешися во ве́ки.

Песнь 9.

Ирмос: В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, / свят Бо́гу. / Тем Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, / велича́ем.

[Φ] Свети́ла Христе́, ви́девше Тя на кресте́ пло́тию ви́сяща, скры́ша свет, и разбо́йник зря богосло́вствует, земля́ же вся коле́блется, и заве́са раздира́ема, вопие́т: сла́ва долготерпе́нию Твоему́ Влады́ко.

[Η] Твое́ Царю́ сни́тие стра́шное вои́стину бысть в преиспо́дних; а́дова бо врата́ и вереи́ стерл еси́, и вся я́же имя́ше у́зники, плени́л еси́, и воскреси́л еси́ держа́вно, Бо́га Тя пропове́давшия.

Слава:

[Ν] Ме́ртва Тя Христе́ снят Ио́сиф от дре́ва ве́рно, и сми́рною и ма́стию и поня́вицею, любо́вию и ра́достию пома́зав, излива́ет слез мно́жество, и в ме́ртвенном гро́бе положи́: те́мже с ним Тебе́ велича́ем.

И ныне, Богородичен:

[Ε] Весели́ся Чи́стая, зря́щи из ме́ртвых Твоего́ сы́на и Бо́га во сла́ве воста́вша, с мνроно́сицами жена́ми, свяще́нными апо́столы, ку́пно и Ио́сифом сла́вным, и Никоди́мом, и мы велича́ем Тя Пречи́стая.

В понедельник пятой недели по Пасхе

Трипеснец, егоже краегранесие: Слава Богу нашему. Глас 4.

Песнь 1.

Ирмос: Триста́ты кре́пкия, / Рожде́йся от Де́вы, / без стра́стия во глубине́ / души́ трича́стное потопи́, молю́ся, / да Тебе́, я́ко в тимпа́не, / во умерщвле́нии телесе́ / побе́дное воспою́ пе́ние.

[Δ] Связа́в вра́жию губи́тельную держа́ву у́зами, и́миже претерпе́л еси́ нас ра́ди Человеколю́бче: кресто́м Твои́м умири́л еси́ Го́споди расточе́нныя, и вражду́ разори́л еси́ средосте́ния: те́мже воспева́ем Тя.

[Ο] Госпо́дь, я́коже предрече́ пре́жде стра́сти, воскре́се держа́вно, плени́в я́ко Бог а́дова ца́рствия, вся же воздви́г ту спя́щия от ве́ка, Того́ велича́ющия.

Слава:

[Ξ] Дивя́ся виде́нию и о́бразу мνроно́сиц лик Боже́ственнаго служи́теля, от него́ науча́хуся: се Христо́с воскре́се, ше́дше пропове́дите ученико́м, рыда́ющим и пла́чущим.

И ныне, Богородичен:

[Α] Возсия́, Чи́стая, я́ко жени́х красе́н из ме́ртвых, от Твои́х ложе́сн воплоти́выйся, па́че ума́ бла́гостию: те́мже со апо́столы ви́девши, сла́вила еси́ тридне́вное его́ воскресе́ние.

Песнь 8.

Ирмос: Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / и научи́л еси́ пе́ти: / вся дела́, благослови́те, по́йте Го́спода.

[Τ] Пречи́стыя просте́рл еси́ дла́ни Твои́ на кресте́ во́лею Долготерпели́ве, объя́т всех, и от руки́ изба́вив чу́ждаго: сего́ ра́ди Тя со стра́хом сла́вим.

[Ω] Я́коже положи́лся еси́ во́лею во гро́бе, спя́щии дре́вле во гробе́х, е́же из ме́ртвых воста́нием Твои́м совозста́ша, стра́хом вопию́ще: благослови́те вся дела́ Госпо́дня Го́спода.

[Θ] Ди́вна и пресла́вна чудеса́, де́йствуяй Христе́ Твои́м глаго́лом, собо́р евре́йский ви́дев Тя осужда́ет на смерть, жизнь всех су́щую, благоутро́бне Го́споди.

Слава:

[Ε] Во днех Христе́ четы́редесятих, с му́дрыми и честны́ми апо́столы я́ве водворя́яся, вве́рил еси́ Боже́ственное смотре́ние, и́мже спасл еси́ мiр пою́щий Тя.

И ныне, Богородичен:

[Ω] Я́ко стра́шное Твое́ Рождество́ Непоро́чная, и́мже вси стра́шнаго паде́ния изба́влени бы́хом, зову́ще: ра́дуйся всех челове́ков предста́тельнице, ра́дуйся мiра па́дшаго воззва́ние.

Песнь 9.

Ирмос: Е́вa у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния мiрови Благослове́ние процвела́ еси́. / Тем Тя вси велича́ем.

[Η] Просте́рлся еси́ во́лею на кресте́, и со́лнце зря Тебе́ Преблаги́й, стра́хом скры лучи́, и поколеба́шася земли́ основа́ния, и ка́мение распаде́ся, Влады́ко, и церко́вная заве́са раздра́ся.

[Μ] Пома́зав Тя дре́вле Ио́сиф, и плащани́цею обви́в, положи́ в но́вем гро́бе, жизнь су́щую всех, и воскре́сл еси́ тридне́вно, истощи́в а́дова ца́рствия Боже́ственною си́лою Всемоги́й.

Слава:

[Ω] Ви́ден был еси́ апо́столы, из гро́ба воста́в тридне́вно, и возопи́л еси́: иди́те дру́зи и ученицы́ Мои́, пропове́дите во всех язы́цех, я́же ви́десте чудеса́, и ю́же па́че сло́ва си́лу Мою́.

И ныне, Богородичен:

[Ν] Ме́ртвым вдыха́ющаго жизнь, я́коже ви́де всенепоро́чная, из гро́ба воста́вша со сла́вою, испо́лнися ра́дости, зову́щи: сы́не мой и Бо́же мой, велича́ю Твое́ е́же па́че сло́ва снизхожде́ние.

Во вторник пятой недели по Пасхе

Трипеснец, егоже краестрочие сие: Песнопение Иосифово. Глас 4.

Песнь 2.

Ирмос: Ви́дите, ви́дите, я́ко Аз есмь Бог, / умерщвля́я и животворя́й, / дарова́вый во́ду из ка́мене несеко́ма / и одожди́вый ма́нну на пи́щу лю́дем Изра́илевым, / я́ко си́лен.

[Υ] Воздви́же зми́а Моисе́й, распя́тие Твое́ вообража́я дре́вле на горе́ Сина́йстей, распны́йся нас ра́ди, и змиины́ вражды́ и я́да избавля́яй челове́ки, и сокруши́вый главу́ всегуби́тельную.

[Μ] Мν́ры со слеза́ми нося́ще, теча́ху к Боже́ственному гро́бу со тща́нием мνроно́сицы ра́но зело́, я́коже богогла́сный рече́, и блиста́ющася зра́ком и оде́ждею ви́девше ю́ношу, стра́хом ужаса́хуся.

Слава:

[Ν] Неду́ги исцеля́юща сло́вом, разсла́бленныя исправля́юща и воскреша́юща ме́ртвыя сло́ве, евре́йстии лю́дие осуди́ша умре́ти: но воскре́сл еси́ я́ко Бог си́лен в кре́пости, а́дово разруши́в ца́рствие.

И ныне, Богородичен:

[Ω] Яви́ся воплоща́емь, Всечи́стая, неизрече́нно от Твои́х крове́й, пресуще́ственный Бог, и вмени́вся в мертвеце́х, всех сый жизнь, воскре́се держа́вно: Его́же ви́девши испо́лнилася еси́ ра́дости, сего́ велича́ющи.

Песнь 8.

Ирмос: Во огни́ пла́меннем предстоя́т Тебе́ / Херуви́ми, Серафи́ми, Го́споди, / и вся тварь песнь Тебе́ пое́т кра́сную: / по́йте, благослови́те, лю́дие, превозноси́те Христа́, / Еди́наго Соде́теля, во вся ве́ки.

[Δ] Раздры́й рукописа́ние Ада́мово кресто́м Го́споди, благослове́ние ны́не источи́л еси́ нам, кля́тва во́лею Христе́ быв: те́мже Тя благослови́м при́сно во ве́ки.

[Ι] Ви́де собо́р учени́ческий Го́споди, воста́вша Тя из ме́ртвых, и утеше́ния испо́лнися та́йнаго, к нему́же вопия́л еси́: ви́дяще Бо́га Животода́вца, иди́те, рече́, пропове́дите Мя всех Царя́.

Слава:

[Α] Воспева́ем Твое́ распя́тие честно́е, Иису́се благоутро́бне, славосло́вим погребе́ние, и стра́шное воскресе́ние ве́рою, и́мже от а́довых разреши́хомся нереши́мых уз, Христе́ Бо́же всех.

И ныне, Богородичен:

[Ι] Иису́са, Его́же воплоти́ла еси́ па́че сло́ва Чи́стая Влады́чице, воста́вша ви́девши от ме́ртвых, вопия́ла еси́: что кра́сная добро́та Твоя́ Сы́не мой, ея́же ра́ди к дре́вней Ада́м ны́не взы́де добро́те?

Песнь 9.

Ирмос: Я́ко сотвори́ мне вели́чия Си́льный, / и свя́то И́мя Его́, / и ми́лость Его́ в род и род боя́щимся Его́.

[Ω] Я́ко возне́слся еси́ на дре́во пригвожда́емь на кресте́, свети́ла скры́ша свет, и тряса́шеся земля́, и су́щии во а́довых у́зах свобожда́хуся Спа́се.

[Σ] Сокруши́вый сме́рти врата́ Христе́ и у́зы, воскре́сл еси́ со сла́вою держа́вно, восхи́тив я́же пе́рвее имя́ше у́зники, я́ко Бо́га песносло́вяще Тя.

Слава:

[Η] Земля́ торжеству́ет, и пра́зднует не́бо воста́ние всех Творца́, и́мже спасе́ нас от уз и тли песносло́вящих Его́.

И ныне, Богородичен:

[Φ] Све́та Твоего́ заря́ми Богоро́дице, разори́ моего́ неве́дения мглу, я́ко да ве́рою гла́сы песносло́влю непреста́нно твоя́ чудеса́.

В четверток пятой недели по Пасхе

Трипеснец, егоже краестрочие: Песнь Богу подобает. Глас 4.

Песнь 4.

Ирмос: Любве́ ра́ди, Ще́дре, Твоего́ о́браза / на Кресте́ Твое́м стал еси́, / и раста́яшася язы́цы: / Ты бо еси́, Человеколю́бче, / кре́пость моя́ и хвале́ние.

[Ω] Я́ко воздви́глся еси́ во́лею на дре́во, и земля́ и го́ры и хо́лми поколеба́шася тре́петом, стра́ждуща Тя ви́дяще, Ще́дре Долготерпели́ве.

[Δ] Убоя́вся Твоего́, Спа́се, сни́тия ад, ме́ртвыя я́же имя́ше, подава́ше вско́ре, песносло́вящия Твою́ неизрече́нную си́лу.

Слава:

[Η] Неразу́мный зря Тя евре́йский собо́р Ще́дре, слепы́м о́чи даю́ща, убива́ше су́щаго жизнь и воскресе́ние.

И ныне, Богородичен:

[Θ] Ви́девши из гро́ба воста́вша Твоего́ Сы́на Де́во, со апо́столы о нем ра́довалася еси́ Чи́стая: с ни́ми же Тя сла́вим.

Песнь 8.

Ирмос: Вся дела́ Бо́жия и вся тварь, / благослови́те Го́спода, / я́ко челове́ком от земли́ возсия́ Свет, / и вселе́нную всю просвети́, / и жизнь ве́чную мiру дарова́, / по́йте, лю́дие, / и превозноси́те Его́ во ве́ки.

[Ε] На кресте́ Тя ви́дев разбо́йник благоразу́мный, помяни́ мя, взыва́ше, Влады́ко, удиви́вся си́ле Твое́й, и е́же па́че ума́ Твоему́ стра́шному смотре́нию.

[Ω] Яви́лся еси́ Христе́ жена́м, ра́дуйтеся, глаго́ля, ми́лостивно я́ко Человеколю́бец, скорбь я́ве утоля́я, и радостнотворя́ челове́ки Твои́м воста́нием.

Слава:

[Π] Дре́вле слепо́му от рожде́ния, я́коже дарова́л еси́ свет, светода́вче Иису́се: си́це и мне серде́чныя зе́ницы отве́рзи, разуме́ти свет Твои́х повеле́ний.

И ныне, Богородичен:

[Ρ] Изба́ви мя огня́ гее́нскаго, и ве́чнаго осужде́ния Чи́стая, утиши́ помышле́ний мои́х свире́пое волне́ние, и напра́ви к ти́хому жи́зни приста́нищу.

Песнь 9.

Ирмос: Ка́мень нерукосе́чный / от несеко́мыя горы́, Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем, веселя́щеся, Тя, Богоро́дице, велича́ем.

[Ε] Просте́рл еси́ дла́ни на дре́ве, пе́рвыя сне́ди дре́ва Влады́ко ру́ку просте́ршуюся, душетле́нна вре́да исцеля́я: те́мже непостижи́мое смотре́ние Твое́ сла́вим.

[Π] Врата́ и вереи́ сме́рти сни́тием Твои́м сокру́шь, а́дова ца́рствия вся Твое́ю си́лою Спа́се истощи́л еси́, и воскре́с тридне́вно, вселе́нную просвети́л еси́.

Слава:

[Ε] Рекл еси́ Спа́се, я́влься Твои́м святы́м апо́столом по воскресе́нии: мiр прете́кше ве́рою пропове́дите, я́же во мне ви́десте стра́шная, и неизрече́нная та́инства.

И ныне, Богородичен:

[Ι] Ви́дела еси́ Христа́ воста́вша, с жена́ми мνроно́сицами, и преложи́вши рыда́ние в ра́дость, сего́ сла́вила еси́: те́мже велегла́сно тя Богороди́тельнице велича́ем.

В пяток пятой недели по Пасхе

Трипеснец, егоже краестрочие: Слава Богу, аминь. Глас 4.

Песнь 5.

Ирмос: Ужасо́шася вся́ческая / о честне́м Успе́нии Твое́м: / Ты бо, Неискусобра́чная Де́во, / от земли́ преста́вилася еси́ к Ве́чным Оби́телем / и к Безконе́чней Жи́зни, / всем воспева́ющим Тя / спасе́ние подава́ющая.

[Δ] Связу́емь Влады́ко, и на дре́ве пригвожда́емь, разреши́л мя еси́ уз грехо́вных, и любви́ Твое́й пригвозди́л еси́: те́мже благода́рно Твое́ пою́ вели́чие, и несказа́нную си́лу.

[Ο] Яви́вшуся Тебе́ Спа́се во а́де, дре́вле осужде́нный Ада́м разреши́ся осужде́ния, и многоле́тных уз, вопия́: сла́ва мно́зей Твое́й Сло́ве бла́гости, Иису́се Многоми́лостиве.

Слава:

[Ξ] Стра́нно явля́ется жена́м а́нгел, внутрь седя́ гро́ба, и возгласи́: что́ приидо́сте ра́но иска́ти? Христо́с воскре́се, умертви́в смерть.

И ныне, Богородичен:

[Α] Свята́я Всенепоро́чная, во Святы́х Свята́го препочива́ющаго роди́вшая, Се́го я́ко ви́дела еси́ из гро́ба возсия́вша, я́ко жениха́ из черто́га, пе́сньми велича́ла еси́ Сего́ снизхожде́ние.

Песнь 8.

Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

[Τ] Во Ада́ме помраче́нное естество́, Человеколю́бче, назида́я, просте́рл еси́ дла́ни Твоя́ на дре́ве пригвожда́емь, и в ре́бра пречи́стая ископова́емь. Те́мже мно́гое благоутро́бие Твое́ песносло́вим во вся ве́ки.

[Ω] Я́ко ви́де Те́бе до́лу ад, пленя́юща сего́ ца́рствия, я́же дре́вле поглоти́, стра́хом Твои́м умерщвля́емь, ме́ртвыя дая́ше вся Сло́ве, зову́щия: Го́спода по́йте дела́ и превозноси́те Его́ во ве́ки.

[Θ] Рыда́ющим вопия́ше мνроно́сицам на ка́мени седя́й а́нгел: те́кше возвести́те ученико́м воста́ние Жизнода́вца: уже́ бо вои́стинну воста́, а́дово низложи́в мучи́тельство, и диа́волю стер зло́бу.

Слава, Троичен:

[Ε] Еди́наго Тя сла́вя существо́м, Тро́ицу же пропове́дую Ли́цы, еди́но Божество́, Отца́ Пребезнача́льна, Сы́на и Ду́ха Свята́го, вопия́ всегда́: Го́спода по́йте дела́, и превозноси́те Его́ во ве́ки.

И ныне, Богородичен:

[Ω] Я́ко яви́ся Бог из Тебе́ Де́во, не разруши́ вся́ко де́вства зна́мения, та́ко воста́, ка́меню запечатле́ния оста́ви непоколе́блема. Его́же ви́девши ра́дости испо́лнилася еси́, благословя́щи сего́ Боже́ственную си́лу во вся ве́ки.

Песнь 9.

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, Богоро́дице, / Чи́стая Присноде́во.

[Α] Горе́ возше́д на высоту́ креста́, во́лею Долготерпели́ве, привле́кл еси́ челове́ка от про́пастей па́губы к све́ту: положи́в же ся во гро́бе жизнь сый Христе́, во гробе́х спя́щия воздви́гл еси́, честны́м и сла́вным воста́нием Твои́м.

[Μ] Мν́ро Тебе́ лик же́нский приноша́ше, жи́зни нача́льнику: и смотри́в Тя воста́вша, благовести́ ученико́м воста́ние, собра́нным вку́пе и пла́чущим, и́же ви́девше Тя, просвеще́ния и ра́дости испо́лнишася.

Слава:

[Η] Со́лнце Христе́, во а́де быв с душе́ю я́ко Бог, та́мо спя́щим окова́нным от ве́ка, Твой свет возсия́л еси́, и воскреси́л еси́ святы́м воскресе́нием Твои́м воспева́ющих Твою́ бла́гость.

И ныне, Богородичен:

[Ν] Ма́нием вся Де́во нося́щаго Бо́га родила́ еси́, челове́ка бы́вша за благоутро́бие Богора́дованная: Его́же приле́жно моли́, просвети́ти на́ша сердца́, блажа́щих Тя вои́стинну, я́ко Чи́стую Богома́терь.

В субботу пятой недели по Пасхе

Четверопеснец. Егоже краестрочие: Пою пение четвертое. Глас 4.

Песнь 6.

Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

[Α] Просте́р на кресте́ Пречи́стеи дла́ни Твои́, мы́сленнаго распя́л еси́ Амали́ка Боже́ственною силою Твоею, и мiр избавил еси́ от работы, Христе Боже наш.

[Δ] Сокруши́вый стра́шным сни́тием ад, Христе́, и я́же держа́ше ю́зники Боже́ственною восхи́тив си́лою, воскре́сл еси́ я́ко Бог из гро́ба тридне́вно.

Слава:

[Ω] Я́ко приидо́ша ко гро́бу жены́, пома́зати Тя безце́нное мν́ро, к ним а́нгел вопия́ше: не пла́чите, Его́же и́щете, воста́ Госпо́дь.

И ныне, Богородичен:

[Μ] Не ктому́ Богома́ти Де́во рыда́й, сын бо Твой воскре́се, я́ко Бог, тридне́вно из гро́ба: но ра́дуйся, и моли́ Его́ спасти́ся нам.

Песнь 7.

Ирмос: Спасы́й во огни́ авраа́мския Твоя́ о́троки / и халде́и уби́в, / я́же Пра́вда пра́ведно уловля́ше, / препе́тый Го́споди, Бо́же оте́ц на́ших, / благослове́н еси́.

[Ε] На ло́бнем нас ра́ди, посреде́ разбо́йнику пове́шен быв на кресте́, и вла́сти тмы на сем упраздни́л еси́ всеси́льне Го́споди, Бо́же оте́ц на́ших, благослове́н еси́.

[Λ] Копие́м в ре́бра прободе́н, источи́л еси́ нам Животода́вче, от исто́чника приснотеку́щаго Твоея́ Боже́ственныя кро́ве Христе́, зову́щим: препе́тый Го́споди Бо́же отце́в, благослове́н еси́.

Слава:

[Ο] Блиста́яйся оде́ждою а́нгел, рыда́ющим вопия́ше жена́м: что я́ко ме́ртва со благоуха́ньми и́щете, иму́щаго животу́ власть Христа́? Воскре́се я́ко же рече́ и пре́жде стра́сти.

И ныне, Богородичен:

[Σ] Плоть прия́т из Тебе́ Чи́стая, содержа́й тварь всю, и земли́ концы́, и умре́ти нас ра́ди изво́ли: Его́же зря́щи воскре́сша со сла́вою от гро́ба, возвесели́ся.

Песнь 8.

Ирмос: Ру́це распросте́р, Дании́л / львов зия́ния в ро́ве затче́; / о́гненную же си́лу угаси́ша, / доброде́телию препоя́савшеся, / благоче́стия рачи́тели, / о́троцы, взыва́юще: / благослови́те, вся дела́ Госпо́дня, Го́спода.

[Τ] Я́звою Влады́ко Твое́ю все исцели́л еси́ челове́чество Спа́се, претерпе́в же смерть, сие́ от тле́ния свободи́л еси́ Твое́ю сме́ртию бла́же, и нас обезсме́ртил еси́ вопию́щих: вся дела́ Госпо́дня Го́спода по́йте, и превозноси́те Его́ во ве́ки.

[Ε] Весели́теся вси лю́дие, земна́я вся ра́дуйтеся ны́не и небе́сная: Жизнода́вец бо Госпо́дь воскре́се от гро́ба, совоскреси́в на́ше естество́, зову́щее: благослови́те вся дела́ Госпо́дня Го́спода, по́йте и превозноси́те Его́ во ве́ки.

Слава:

[Τ] Мучи́теля связа́в Христе́ сни́тием Твои́м, положи́вся во гро́бе, мертвецы́ воздви́гл еси́ вся, благода́рно воспева́ющия Тя, Благоде́теля всех и Вседержи́теля: благослови́те вся дела́ Госпо́дня Го́спода, по́йте и превозноси́те Его́ во ве́ки.

И ныне, Богородичен:

[Α] Ада́ма па́дшаго во Еде́ме, разреши́ти смеше́ние Чи́стая хотя́, всеси́льный Госпо́дь воплоти́ся из Тебе́ Пречи́стая, распя́тся же и погребе́ся: воскре́се спаса́яй нас, любо́вию Тебе́ воспева́ющих, Мари́е Богоневе́сто.

Песнь 9.

Ирмос: Е́вa у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния мiрови Благослове́ние процвела́ еси́. / Тем Тя вси велича́ем.

[Ρ] Раздра́ся Твои́м е́же на крест, Долготерпели́ве, воздви́жением заве́са, и со́лнце сокры́ лучи́, разседа́емо же ка́мение, показа́ше непра́ведное заколе́ние, е́же претерпе́л еси́ Спа́се во́лею за род челове́ческий.

[Τ] Прободе́н копие́м Иису́се Человеколю́бче на дре́ве, исцели́л еси́ уязви́вшагося преступле́нием Ада́ма, в раи́ Долготерпели́ве: положе́н же в ме́ртвых, я́ко безсме́ртен вся изве́л еси́ воспева́ющия Тя.

Слава:

[Ο] Вся дла́нию содержа́й, и ма́нием стро́яй подсо́лнечную, ка́ко в ме́ртвых вмени́лся еси́ безсме́ртен сый, хотя́ изба́вити уя́звенныя угрызе́нием змии́ным? Тебе́ воспева́ем я́ко Человеколю́бца.

И ныне, Богородичен:

[Ν] Ме́ртва и на́га Твоего́ Сы́на, ви́сяща на дре́ве зря́щи, боле́ла еси́: а́бие же сего́ воскре́сша тридне́вно ви́дящи, весели́лася еси́ Всенепоро́чная я́ко ма́ти, моли́ся о ве́рою почита́ющих Тя.

В понедельник шестой недели по Пасхе

Трипеснец, егоже краегранесие: Слава Богу подобает. Глас 5.

Песнь 1.

Ирмос: Пои́м Го́сподеви, / сотво́ршему ди́вная чудеса́ в Чермне́м мо́ри, / песнь побе́дную, / я́ко просла́вися.

[Δ] Твои́м честны́м кресто́м Го́споди, дре́вния кля́твы вси изба́вихомся: те́мже Твою́ сла́вим бла́гость.

[Ο] Распны́йся во́лею воста́, сокро́вища вся плени́ сме́рти, Христо́с Спас наш: Того́ прославля́ем.

Слава:

[Ξ] Стра́нен зрак ви́девше блиста́ющ мνроно́сицы а́нгела, Боже́ственное мня́ху Зижди́теля воскресе́ние, ра́дости исполня́ющеся.

И ныне, Богородичен:

[Α] Восто́к Де́во Пречи́стая была́ еси́ со́лнца пра́вды, и́мже неразу́мия тмы изба́вихомся.

Песнь 8.

Ирмос: Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

[Θ] Бо́га пло́тию распина́ема со́лнце ви́девше помрачи́ся, и земля́ поколеба́ся, и ка́мение распаде́ся.

[Ε] Из ме́ртвых тридне́вен Христо́с воста́, и совозста́ви вся, во тме и се́ни сме́ртней седя́щия.

[Ω] Яви́лся еси́ по воста́нии Твое́м апо́столом, и испо́лнил еси́ сих весе́лия неизглаго́ланнаго Ще́дре.

Слава:

[Π] Отца́ пресвята́го, Сло́ва соприсносу́щна, и Ду́ха Бо́жия несозда́нна, Тро́ицу пое́м непреста́нно.

И ныне, Богородичен:

[Ρ] Изба́ви нас му́ки, и ве́чнаго осужде́ния, Тебе́ воспева́ющих, Богороди́тельнице Чи́стая.

Песнь 9.

Ирмос: Тя, блаже́нную в жена́х / и благослове́нную Бо́гом, / челове́ческий род, / пе́сньми велича́ем.

[Ε] Просте́рл еси́ дла́ни на кресте́, просте́ртаго мя мно́гими кова́рствы льсти́ваго, Ще́дре, приобрета́я.

[Π] Вся совоскреси́л еси́ Бла́же, соше́д во а́дская врата́ Христе́, и совоздви́гл еси́ пою́щия Человеколю́бче Твою́ си́лу.

Слава:

[Ε] Источи́л еси́ Христе́ ме́ртвым живо́т, и воскре́с тридне́вен, возне́слся еси́ во сла́ве, зря́щим честны́м ученико́м.

И ныне, Богородичен:

[Ι] Ми́лостива нам соде́лай Пречи́стая Де́во, Твоего́ сы́на и Бо́га всех, ве́рою воспева́ющим Тя.

Во вторник шестой недели по Пасхе

Трипеснец, егоже краестрочие: Песнопение сие Иосифово. Глас 5.

Песнь 2.

Ирмос: Ви́дите, ви́дите, я́ко Аз есмь Бог, / в плоть облеки́йся во́лею Свое́ю, / да спасу́ Ада́ма, / от ле́сти па́дшаго в преступле́ние зми́ем.

[Ω] Я́коже воздви́же дре́вле зми́а Моисе́й, та́ко на дре́во воздви́глся еси́ Ще́дре, льсти́ваго врага́ яд змии́н и зло́бу отгоня́я, и спаса́я нас.

[Δ] Сла́ва сла́ве Твое́й препросла́вленне Иису́се, положи́в бо ся во гро́бе я́ко мертв во́лею, воскре́сл еси́ я́ко Бог, и совоздви́гл еси́ мiр Твои́м воста́нием, я́ко Всеси́лен.

Слава:

[Η] Се воста́ Животода́вец из ме́ртвых, вопия́ше жена́м дре́вле а́нгел блиста́яйся: не пла́читеся у́бо про́чее, но апо́столом сие́ воста́ние возвести́те.

И ныне, Богородичен:

[Α] Святы́й Го́споди, от Де́вы Чи́стыя рожде́йся, распе́нся же и во́лею погребе́н, и воскресы́й из ме́ртвых, Тоя́ мольба́ми Твою́ ми́лость всем низпосли́.

Песнь 8.

Ирмос: Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

[Υ] Песносло́вим Твое́ Христе́, тридне́вное погребе́ние, и пресве́тлое воскресе́ние, ве́рою при́сно восхваля́ем.

[Τ] Распе́ншагося нас ра́ди, и положи́вшагося во гро́бе, и свои́м воста́нием просвети́вшаго мiр, Христа́ славосло́вим.

Слава:

[Η] Со́лнце незаходи́мое Христе́, погребы́йся и воскресы́й из ме́ртвых, просвети́ всех нас помышле́ния, сла́вити Тя непреста́нно.

И ныне, Богородичен:

[Ι] Мольбу́ из Тебе́ воплоти́вшемуся Сло́ву, сотвори́ Богоро́дице Де́во, я́ко да нас уще́дрит смире́нных.

Песнь 9.

Ирмос: Велича́ем, Христе́, / Твою́ Всенепоро́чную Ма́терь Чи́стую, / я́ко роди́ Тя преесте́ственно пло́тию, / от вся́кия льсти и тли нас избавля́яй.

[Ω] Я́ко а́гнец на заколе́ние приведе́ся Влады́ко Христе́ Бо́же, и я́звами Твои́ми, я́же во́лею претерпе́л еси́, бесо́в вся́кое лука́вое мно́жество уязви́л еси́.

[Σ] Сокруши́шася вереи́ а́довы прише́ствием Твои́м Христе́, и воста́ша от ве́ка истле́вшии, воспева́юще Тя я́ко Победи́теля, и все́ми владу́щаго.

Слава:

[Η] Свято́е Твое́ Христе́, е́же из гро́ба воста́ние, живо́т есть, вознесе́ние же при́сно и весе́лие, е́же ве́рою вси мы ны́не предпра́зднуем.

И ныне, Богородичен:

[Φ] Свет нам и́же от Све́та Де́во Пречи́стая ро́ждши, разори́ла еси́ безбо́жия тму: те́мже вси земноро́днии ве́рою Тя велича́ем.

В пяток шестой недели по Пасхе

Трипеснец. Глас 4.

Песнь 5.

Ирмос: Нечести́вии не у́зрят сла́вы Твоея́, Христе́, / но мы Тя, Единоро́дне, / Оте́ческия Сла́вы Сия́ние Божества́, / от но́щи у́тренююще, / воспева́ем Тя, Человеколю́бче.

Восходя́ от земли́ к небеси́, не отлуче́н был еси́ Отца́, и соседя́ Влады́ко и Ду́ху, Его́же ученико́м посла́л еси́ с небесе́ Уте́шителя.

Безпло́тных чи́ни, я́ко ви́деша Тебе́ Иису́се с пло́тию на небеса́ возше́дша, ра́дующеся дивля́хуся мно́гому Твоему́ Го́споди, к челове́ком снизхожде́нию.

Слава:

Истле́вшее Влады́ко существо́ на́ше, на престо́ле Оте́честе посади́л и удобри́л еси́ Го́споди, с ни́мже и́маши приити́ суди́ти мiру Всеси́льне.

И ныне, Богородичен:

Чи́стую и Пречи́стую почти́м мы́сленно, добро́ту Иа́ковлю, и Боже́ственными де́тельми удобря́ему благоче́стно пои́м, я́ко ма́терь Бо́га на́шего.

Песнь 8.

Ирмос: Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / и научи́л еси́ пе́ти: / вся дела́, благослови́те, по́йте Го́спода.

На херуви́мску ра́му носи́мь, возне́слся еси́ во сла́ве, зря́щим Тя ученико́м Твои́м Го́споди, и вопию́щим непреста́нно: вся дела́ Госпо́дня Го́спода по́йте, и превозноси́те Его́ во ве́ки.

Низложи́в вражду́ средосте́ния, уме́ршия Отцу́ Твоему́ примири́л еси́, и возше́д соприве́л еси́, ю́же прия́л еси́ плоть безнача́льне Сло́ве превы́ше нача́л и сил.

Слава:

Благословля́я ученики́ возноша́лся еси́ на высоту́ Христе́, Уте́шителя сим посла́в, пою́щим и единому́дренно вопию́щим: вся дела́ Госпо́дня Го́спода по́йте, и превозноси́те Его́ во ве́ки.

И ныне, Богородичен:

О́бщее ве́рных очисти́лище, гото́вую челове́ком по́мощь, и к Зижди́телю мост, преводя́щий всех ко спасе́нию, Бо́жию Ма́терь сла́вим.

Песнь 9.

Ирмос: Е́вa у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния мiрови Благослове́ние процвела́ еси́. / Тем Тя вси велича́ем.

От горы́ Христе́ Елео́нския, о́блак Тебе́ я́коже престо́л прия́т, всем Боже́ственным Твои́м ученико́м зря́щим, и с тре́петом вопию́щим Ти: не оста́ви си́ры, и́хже возлюби́л еси́ за милосе́рдие несказа́нное.

Соше́л еси́ пе́рвее без пло́ти, возше́л же еси́ плоть нося́, ю́же прия́л еси́: стра́хом же врата́ небе́сная Тебе́ отверзо́шася, и у́ми небе́снии зря́ще дивля́хуся, глаго́люще: сла́ва е́же нас ра́ди Твоему́ Влады́ко соше́ствию.

Слава:

Что́ стоите́ вы, зря́ще возше́ствие стра́шное? Дре́вле реко́ша а́нгели боже́ственным апо́столом: и́мже о́бразом ви́дите восходя́ща, па́ки на зе́млю прии́дет суди́ти всех, со сла́вою неизрече́нною.

И ныне, Богородичен:

Сопрису́тствующи боже́ственным ученико́м Пречи́стая, и зря́щи, Его́же родила́ еси́, от земли́ возноси́ма, вопия́ла еси́: восхо́диши к безнача́льному Отцу́, сла́вою Твое́ю исполня́яй вся́ческая, препросла́вленный еди́не Го́споди.

В субботу шестой недели по Пасхе

Четверопеснец. Глас 8.

Песнь 6.

Ирмос: Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Испо́лнив я́же на земли́ сла́вы Твоея́, возне́слся еси́ со сла́вою несказа́нною, и Отцу́ прине́сл еси́ плоть, в ню́же от нас за милосе́рдие обле́клся еси́: и воспе́ша небе́сныя си́лы Тебе́, еди́не Человеколю́бче.

Возми́теся небе́сная врата́, и приими́те Бо́га, плотоно́сца, мы́сленныя вопия́ху силы́ повину́ющимся: кто сей, Его́же глаго́лете, и хвалу́ я́ко Творцу́ вся́ческих непреста́нно прино́сите?

Слава:

Восхо́д стра́шный зря́ще сло́ва ученицы́, вопия́ху: посли́ нам Пресвята́го Ду́ха, и си́ры не оста́ви рабы́ Твоя́, ве́дящия Тя и́стиннаго Бо́га, и челове́ка безгре́шна.

И ныне, Богородичен:

Обожи́л еси́ челове́ческое естество́, неизрече́нно роди́вся от Де́вы, Отца́ единосу́щное Сло́во, и возне́слся еси́ со сла́вою: да́руй мир Твои́м ученико́м, и мiрови бога́тую ми́лость.

Песнь 7.

Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Страсть и смерть претерпе́л, и тридне́вен воста́л еси́, я́коже рекл еси́, и к небе́сным возше́л еси́, пою́щим Тя ученико́м, Го́споди Бо́же во ве́ки.

Ду́ха нам, я́коже обеща́л еси́, Пресвята́го посли́ Ще́дре, му́дрии ученицы́ вопия́ху, умудря́юща и вразумля́юща вся ве́рныя во ве́ки.

Слава:

Рука́ми восплещи́те язы́цы, воскли́кните Бо́гу в весе́лии: вознесе́ся Христо́с, и седи́т во сла́ве одесну́ю, я́ко сопресто́лен Отцу́, во ве́ки.

И ныне, Богородичен:

Не́дра О́тча не истощи́в, в не́дрех твои́х Сло́во восклони́ся, безслове́сия нас избавля́я, Де́во, пою́щих Го́спода Бо́га во ве́ки.

Песнь 8.

Ирмос: Седмери́цею пещь / халде́йский мучитель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Вообра́жся, я́коже пи́шет, па́че ума́ в чу́ждее, и страстьми́ всем ве́рным безстра́стие я́ве да́руя, от земли́ восхо́дит, ны́не яви́тися Оте́ческому Лицу́: а́нгелом, арха́нгелом, престо́лом и госпо́дьством, Того́ славосло́вящим во вся ве́ки.

Белоно́сцы а́нгели апо́столом предста́ша, недоумышля́ющимся но́вому виде́нию Твоего́ вознесе́ния, Сло́ве Отцу́ безнача́льне, глаго́люще: вы что взира́ете, та́ко чудя́щеся, на высоту́? Иису́с сей па́ки прии́дет суди́ти мiру, и́мже о́бразом ви́дите.

Слава:

Вся соверши́вый Го́споди, я́ко Бог непрело́жен, к небе́сным с пло́тию восте́кл еси́, повину́ющимся Тебе́ а́нгельским си́лам, и ра́достно ученико́м Тебе́ сла́вящим, и со стра́хом пою́щим: свяще́нницы воспо́йте, лю́дие превозноси́те во вся ве́ки.

И ныне, Богородичен:

Богороди́тельнице Пречи́стая, души́ моея́ я́звы, и греха́ моего́ стру́пы очи́сти, исто́чники излива́ющи из ребр рождества́ Твоего́, и и́же из Него́ очища́ющи струя́ми: к Тебе́ бо взыва́ю, и к Тебе́ припа́даю, и Тебе́ призыва́ю еди́ну спаси́тельницу.

Песнь 9.

Ирмос: Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Возми́те врата́ мы́сленныя, небе́сныя си́лы, прии́де Царь наш, ме́ртвенное существо́ прии́м, и вни́дет Бог сый и челове́к ко Отцу́ своему́, соде́лав стра́шная и пресла́вная.

По́йте вси разу́мно, воскли́кните Бо́гу, сотвори́вшему дела́ пресла́вная, и возше́дшему к небе́сным, и апо́столом Свята́го Ду́ха низпосла́вшему, просвеща́ющему нас сла́вящих Божество́ Его́.

Слава:

Разруши́ся ад погребе́нием, и воста́ние челове́ком дарова́ся воскресе́нием Твои́м, и озари́ся земля́, и небе́сная вознесе́нием Твои́м Христе́, еди́не Непреме́нне и Всеси́льне, Да́телю благи́х, и Спаси́телю наш.

И ныне, Богородичен:

Глас Ти Гаврии́лов со все́ми а́нгелы прино́сим: ра́дуйся пала́то Царя́ возжеле́нная: ра́дуйся земна́я с небе́сными Де́во совокупи́вшая, ея́же ра́ди спаса́емся, ве́дуще Тя Чи́стую Богома́терь.

В понедельник седьмой недели по Пасхе

Трипеснец. Глас 1.

Песнь 1.

Ирмос: Твоя́ победи́тельная десни́ца / Боголе́пно в кре́пости просла́вися, / та бо, Безсме́ртне, / я́ко всемогу́щая, проти́вныя сотре́, / Изра́ильтяном / путь глубины́ новосоде́лавшая.

Твое́ е́же на зе́млю новоле́пное схожде́ние, не разуме́вшим а́нгелом тогда́, восходя́щу Ти ны́не на небеса́ познава́ют, глаго́люще: кто сей есть Царь сил?

Распя́тие во́льное Христе́ претерпе́в, воскре́сл еси́ тридне́вен, та́же возше́л еси́ к небе́сным, ученико́м зря́щим Тя, и дивя́щимся па́че ума́ си́ле Твое́й.

Слава:

О́блаки восхожде́ние Твое́ всеси́льною во́лею полага́яй недомы́сленный, от горы́ Елео́нския ны́не восте́кл еси́ горе́, к высоте́ о́блаком носи́мь.

И ныне, Богородичен:

Чи́ны а́нгел небе́сных вои́стинну Чи́стая превозшла́ еси́, Сло́во воплоти́вши О́тчее: Его́же ны́не приле́жно моли́, дея́ний безслове́сных нам изба́витися Всенепоро́чная.

Песнь 8.

Ирмос: Песносло́вцы в пещи́ спа́сшаго де́ти / и громопла́менную прело́жшаго на ро́су, / Христа́ Бо́га по́йте и превозноси́те во вся ве́ки.

К Безначальносве́тлому Отцу́ возше́дшаго во сла́ве, и низпосла́вшаго апо́столом Дух Святы́й, по́йте, благослови́те и превозноси́те во вся ве́ки.

Воспо́йте, и по́йте Го́сподеви, воскли́кните стра́хом оте́чествия земна́я, вознесе́ бо ся во сла́ве днесь, совокупи́в с небе́сными во вся ве́ки.

Слава:

Му́жие Галиле́йстии, что зря́ще на высоту́ со стра́хом, та́ко стоите́, ученико́м безпло́тнии глаго́лаху? И́мже о́бразом ви́дите, и па́ки Христо́с во сла́ве прии́дет.

И ныне, Богородичен:

Невозде́ланно возрасти́вшая небе́сный клас, пита́ющий Боже́ственною си́лою концы́ Де́во, насы́ти а́лчущую смире́нную ду́шу мою́.

Песнь 9.

Ирмос: О́браз чи́стаго рождества́ Твоего́, / огнепали́мая купина́ / показа́ неопа́льная; / и ны́не на нас / напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

Страсть и распя́тие и смерть за нас претерпе́л еси́ безгре́шне, и воскре́с боголе́пно, возше́л еси́ к безнача́льному Сло́ве Отцу́ Твоему́: те́мже Тебе́ покланя́емся непостижи́мому Божеству́.

Зове́т Моисе́й ду́хом, а́нгельския си́лы да укрепя́тся, всех Царю́ теле́сно восходя́щу от земли́ к го́рним ца́рствием, и на престо́ле Оте́честем уставля́ющу естество́ отпа́дшее.

Слава:

Врата́ у́мная возми́те, проро́чески вопия́ше Дави́д ду́хом, единоро́дный Сын Бо́жий воцари́ся над все́ми язы́ки, и восхо́дит пло́тию ко Отцу́, Его́же снизходя́ не оста́ви.

И ныне, Богородичен:

Весь сла́дость и жела́ние Твой Сын, Бог и Госпо́дь, Пресвята́я Чи́стая: Его́же приле́жно моли́ с вы́шними и безпло́тными во́инствы, го́рести душетле́нныя грехо́в изба́витися нам.

Во вторник седьмой недели по Пасхе

Трипеснец. Глас 2.

Песнь 2.

Ирмос: Ви́дите, ви́дите, я́ко Аз есмь в мо́ри спасы́й, /и в пусты́ни насы́тивый изра́ильтеския лю́ди, / и во́ду из ка́мене источи́вый челове́ком, / да дре́вле па́дшаго, поне́с, / привлеку́ ко Мне за неизрече́нную ми́лость.

Соводворя́яся ученико́м во днех четы́редесятих, по Боже́ственном из гро́ба Спа́се воста́нии, Ду́ха Боже́ственнаго обещава́я им посла́ти я́ве, возне́слся еси́ во сла́ве, на ра́му херуви́мску стра́шно носи́мый.

Врата́ возми́те, разуме́йте пресла́вная, мы́сленныя си́лы вы́шнейшим вопия́ху: Царь вся́ческих те́ло земле́но нося́, прии́де к нам в поко́й свой, челове́ки обожи́в за милосе́рдие мно́гое и безме́рную ми́лость.

Слава:

Закро́в себе́ тму полага́яй, безпло́тному естеству́ на крилу́ ве́треннюю восходя́й Бог, вопло́щся из Де́вы о́блака све́тлаго, о́блаком све́тлым от земли́ на высоту́ взы́де, зря́щим ученико́м сла́вное вознесе́ние.

И ныне, Богородичен:

Невозде́ланная земле́, возрасти́вшая всех пита́теля отверза́юща ру́ку, и благоволе́нием свои́м насыща́юща вся́кое живо́тное, кре́пости Боже́ственныя: утверди́ хле́бом живо́тным разсла́бленная сердца́ сы́тостию злых на́ших грехопаде́ний.

Песнь 8.

Ирмос: О подо́бии зла́те небре́гше треблаже́ннии ю́ноши, / неизме́нный и живы́й Бо́жий о́браз ви́девше, / среди́ огня́ воспева́ху: / осуществова́нная да пое́т Го́спода вся тварь / и превозно́сит во вся ве́ки.

Естество́ Ада́мово восприи́м, и сие́ обожи́в Сло́ве, к первонача́льнику све́та вознесе́ своему́ Отцу́, удиви́вшимся всем безпло́тным чино́м, и вопию́щим: по́йте Го́спода, и превозноси́те Его́ во ве́ки.

Илиа́ прообразу́я стра́шное Твое́ вознесе́ние Животода́вче, Боже́ственным Ду́хом показа́ся ору́жник, и к высоте́ весь от земли́ ноша́шеся, поя́ Влады́це: да пое́т Го́спода вся тварь, и превозно́сит Его́ во ве́ки.

Слава:

Хвали́те Бо́га, воскли́кните язы́цы, восплещи́те рука́ми, согла́сно по́йте, со сла́вою Христо́с взы́де, отону́дуже к нам прии́де, спасти́ вопию́щия: по́йте и превозноси́те Его́ во ве́ки.

И ныне, Троичен:

Отца́ и Сы́на, и собезнача́льна просла́вим вси Ду́ха, Тро́ицу несозда́нную, естество́м соедине́нну, разделе́нну же ту Ли́цы, пою́ще: осу́щественная да пое́т Го́спода вся тварь, и превозно́сит Его́ во ве́ки.

Песнь 9.

Ирмос: Недоуме́ет всяк язы́к благохвали́ти по достоя́нию, / изумева́ет же ум и премiрный пе́ти Тя, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо Христиа́н еси́ Предста́тельница, Тя велича́ем.

Со сла́вою ны́не восходя́й на о́блацех, кто у́бо есть? Реко́ша го́рнейшии чи́нове, вопию́ще им: врата́ у́мная отыми́те, Бог еди́ный я́же на земли́ совокупи́вый небесе́м, сему́ вели́чие, и сла́ву со стра́хом принесе́м.

Зри́те, рекл еси́ Сло́ве ученико́м, скорбя́щим Твои́м восхо́дом: седи́те жду́ще ве́рою, до́ндеже прии́дет к вам Боже́ственный Уте́шитель от вы́шних, даро́в всем незави́стный исто́чник. Сей вас научи́т всему, я́ко Преблаги́й.

Слава:

Отпа́дшее естество́ Ада́мово ви́дится в вы́шних, на престо́ле О́тчи водруже́нно пресла́вно, и покланя́емо всегда́ от а́нгел и арха́нгел, от престо́л, сил и нача́л: сла́ва изво́лившему та́ко, еди́ному Бо́гу на́шему.

И ныне, Богородичен:

Кра́сна добро́тою роди́ Тя кра́сна де́вца, Его́же зря́щи ни ви́да внегда́ страда́ти, ниже́ добро́ты иму́ща, Спа́се, рыда́ющи глаго́лаше: дивлю́ся Твоему́ па́че ума́ сы́не мой смире́нию, и́мже спаса́еши смири́вшееся естество́ челове́ческое.

В среду седьмой недели по Пасхе

Трипеснец. Глас 3.

Песнь 3.

Ирмос: Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Осужде́нное и преступле́нием истле́вшее естество́ челове́ческое, возве́л еси́ Влады́ко превы́ше а́нгел, я́ко милосе́рд.

Возше́л еси́ на небеса́ со сла́вою, пою́щим Тя Го́споди безпло́тным, я́ко всех Творца́ и Бо́га на́шего.

Слава:

Уте́шителя и́стиннаго Ду́ха посла́л еси́ Влады́ко ученико́м Твои́м, возше́д на небеса́ Преблаги́й.

И ныне, Богородичен:

Воплоще́нное из Тебе́ Чи́стая про́йде Сло́во, паде́ние первозда́нных за милосе́рдие щедро́т исправля́яй.

Песнь 8.

Ирмос: Нестерпи́мому огню́ соедини́вшеся, / Богоче́стия пред стоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Все я́ко Бог испо́лнив е́же о нас смотре́ние, возне́слся еси́ зря́щим ученико́м Твои́м, и стра́хом вопию́щим Ти: благослови́те вся дела́ Госпо́дня Го́спода.

Му́жие вои́стинну Галиле́йстии, что взира́ете си́це, Влады́це к небеси́ восходя́щу, глаго́лаху а́нгели? Я́коже ви́дите, па́ки сей и́мать приити́ суди́ти всей тва́ри, Его́же превозно́сим во ве́ки.

Слава:

Ду́ха пра́ваго, Ду́ха Боже́ственнаго, Ду́ха су́щаго с Тобо́ю неразде́льнаго, я́коже обеща́лся еси́, посли́ нам, на о́блацех сла́вы носи́мый, Сло́ве Бо́жий, боже́ственнии апо́столи зовя́ху: я́ко да Тя пое́м и превозно́сим во ве́ки.

И ныне, Богородичен:

Из Тебе́ Бо́жия прему́дрость дом себе́ созда́вши, воплоти́ся неизрече́нным соше́ствием, Отрокови́це неискусобра́чная: Ты бо еди́на во всех роде́х избра́на еси́, бы́ти жили́ще Христу́ Бо́гу.

Песнь 9.

Ирмос: Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет Дверь затворе́на; / Сию́ неизрече́нно / я́ко Богома́терь велича́ем.

Со сла́вою в воскликнове́нии восхо́дит, я́коже проро́к дре́вле рече́, сей всех есть Госпо́дь и Влады́ка: по́йте сему́ ве́рою язы́цы, по́йте и с тре́петом Того́ славосло́вите, я́ко соде́ла неизсле́димая и неизрече́нная.

Скорбя́щим рекл еси́ ученико́м: не разлучу́ся во ве́ки от вас, а́ще и к посла́вшему Мя иду́ Отцу́: иди́те, мiр весь научи́те, позна́ти Мя Бо́га и́стиннаго, соде́лавша Мя пресла́вная, я́же ви́десте и слы́шасте.

Слава:

Мир всем рекл еси́ Христе́, и о́блак подъе́м Тя а́бие све́та, всем зря́щим, от земли́ возне́слся еси́, и возше́д превы́ше сел еси́, над вся́ким нача́лом и вла́стию: те́мже сла́вим многопе́тую си́лу Твою́.

И ныне, Богородичен:

Све́та прия́телище яви́лася еси́ вои́стинну, я́ко из Тебе́ непрело́жно вопло́щся неизрече́нно Бог, на кресте́ возвы́сив Ада́мово существо́, и в ме́ртвых перворожде́н быв, и пребыва́я Бог в вы́шних, ку́пно со Отце́м же и Боже́ственным Ду́хом сла́вимый.

В четверток седьмой недели по Пасхе

Трипеснец. Глас 4.

Песнь 4.

Ирмос: Седя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Непристу́пный естество́м, присту́пен мне быв, в мене́ оболки́йся, все мое́ естество́ осветли́, и Свои́м вознесе́нием возведе́ превы́ше вся́каго нача́ла и вла́сти.

Колесницее́здник Илиа́ возду́х прохожда́ше, прообразу́я дре́вле Твое́ Сло́ве Бо́жий вознесе́ние: я́ко на колесни́це бо Спа́се носи́мь о́блаком, ко Оте́ческим не́дром до́стигл еси́.

Слава:

Ученико́м взира́ющим стра́шное взя́тие, и дивя́щимся, боже́ственнии провещава́ху а́нгели: му́жие вы Галиле́йстии, я́коже ви́дите, си́це па́ки прии́дет Иису́с суди́ти вся.

И ныне, Богородичен:

Обновля́еши Пречи́стая сокруше́нное челове́ческое естество́, и тли подкло́ншееся, Бо́га воплоти́вши, и па́че естества́ роди́вши неискусобра́чная. Ему́же зове́м: сла́ва Христе́ си́ле Твое́й.

Песнь 8.

Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Ходя́й на крилу́ ве́треннюю о́блаком носи́мь, ны́не восприе́млется в небе́сная, иде́же бя́ше пре́жде, и Уте́шителя посыла́ет ученико́м, хвалосло́вящим и превознося́щим во ве́ки.

Распя́тие и погребе́ние претерпе́в во́лею, воскре́сл еси́ всеси́льне, и лю́бящим Тя в четыредесяти́х днех явля́яся радостотвори́л еси́: та́же сих благослови́в, к Твоему́ Отцу́ возше́л еси́ со сла́вою.

Слава:

Научи́в я́ве, я́же па́че Сло́ва Сло́ву богосло́вцы, и возше́д посла́л еси́ сим, я́коже обеща́ся, вседе́йственнаго и сопресто́льнаго Ду́ха, пою́щим: Го́спода по́йте, и превозноси́те Его́ во ве́ки.

И ныне, Богородичен:

Две́ре Бо́жия затворе́нная, ю́же еди́н про́йде Вы́шний, напра́ви мя к стезя́м Боже́ственным, и отве́рзи спасе́ния две́ри мне, Богоблагода́тная: к Тебе́ бо прибега́ю Де́во, еди́ней засту́пнице ро́да челове́ческаго.

Песнь 9.

Ирмос: Ка́мень нерукосе́чный / от несеко́мыя горы́, Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем, веселя́щеся, Тя, Богоро́дице, велича́ем.

До́ндеже у́бо облече́теся си́лою с высоты́, рекл еси́ ученико́м, седи́те вку́пе со́брани: Аз бо уже́ восприе́млемь есмь, и Отцу́ сопресто́льнаго послю́ вам Уте́шителя.

Прии́дите та́йно, возше́дше вси на высоту́ виде́ния, очи́ма у́зрим у́мныма возне́сшася, и седя́ща одесну́ю, я́ко сопресто́льна Отцу́ Сло́ва соприсносу́щнаго.

Слава:

Со́лнце из гро́ба кра́сно возсия́в Влады́ка, я́коже светоно́сныя лучи́, вселе́нней всей вас распосла́ апо́столы светя́щия и мглу отгоня́ющия.

И ныне, Богородичен:

Пощади́ мя Христе́, егда́ прии́деши суди́ти мiру со сла́вою, разреша́я мглу страсте́й мои́х, моли́твами ро́ждшия Тя, и насле́дника мя сотвори́ Небе́снаго Ца́рствия Твоего́.

В пяток седьмой недели по Пасхе

Трипеснец. Глас 6.

Песнь 5.

Ирмос: К Тебе́ у́тренюю, / милосе́рдия ра́ди Себе́ истощи́вшему непрело́жно / и до страсте́й безстра́стно прекло́ншемуся, / Сло́ве Бо́жий: / мир пода́ждь ми, па́дшему, / Человеколю́бче.

Сме́рти держа́ву Боже́ственною си́лою низложи́в, воскре́сл еси́ тридне́вно Христе́ мой, и к небе́сным со сла́вою возше́л еси́, Твои́м ученико́м воспева́ющим Тя Бо́га и Человеколю́бца.

Нас да не оста́виши си́рых Ще́дре, я́коже обеща́лся еси́, посли́ Свята́го Твоего́ Ду́ха, Твои́ ученицы́ изба́вителю приглаша́ху, внегда́ от земли́ восходя́ща ви́деша Тя Человеколю́бче.

Слава:

Се Дух хо́щет сни́ти на зе́млю в язы́цех о́гненных, я́ко да пока́жет о́гненны я́ве бре́нныя, Сло́ва честны́я ученики́, возвеща́ющя сего́ Человеколю́бное.

И ныне, Богородичен:

В челове́ческое естество́, от неискусому́жныя обле́клся еси́ Сло́ве, кра́йняго ра́ди благоутро́бия, тве́рдую нам ту сте́ну дал еси́ и кров при́сно, ве́дущим Тя Бо́га и челове́ка.

Песнь 8.

Ирмос: За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, и превозноси́те во вся ве́ки.

Разстоя́щаяся совокупи́в бла́гостию, Сло́ве Всепреблаги́й, порази́в супоста́та, стра́стию пло́ти Твоея́, ко Отцу́, Его́же не оста́вил еси́ когда́, со сла́вою восте́кл еси́, ученико́м зря́щим: те́мже Тя с ни́ми благослови́м, и превозноси́м во ве́ки.

Поми́ловав Спа́се, и́хже возлюби́л еси́, озло́бленных вра́жиею лю́тостию, от Ма́сличныя горы́ Влады́ко возне́слся еси́, зря́щим ученико́м Твои́м и дивя́щимся, ка́ко с пло́тию Тя о́блак подъя́т, я́ко херуви́мский престо́л? Те́мже Тя с ни́ми благослови́м, и превозно́сим во ве́ки.

Слава:

Не оста́влю си́рых вас, сы́нове и насле́дницы Ца́рствия Моего́, возше́д же Уте́шителя послю́ с высоты́, вас тайнонауча́юща, па́че постиже́ния и ума́, и о́гненных показу́юща прича́стием бре́нных, вопи́л еси́ ученико́м Твои́м Ще́дре: те́мже с ни́ми Тя пое́м, и превозно́сим во ве́ки.

И ныне, Богородичен:

Зако́нных кроме́ Де́во есте́ств, законода́вца ро́ждши, зако́ну отъе́млющаго сено́вное, и благода́ти да́рующаго све́тлость. Те́мже зако́ном греха́ мя Чи́стая, лю́те ны́не побежда́ема свободи́ пе́ти: Го́спода по́йте вся дела́, и превозноси́те Его́ во ве́ки.

Песнь 9.

Ирмос: Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо христиа́н еси́ Предста́тельница, Тя велича́ем.

Отве́рженное и озло́бленное естество́ поми́ловавый, еди́н я́ко сый ми́лостив и Человеколюби́в благоде́телю, плоть челове́ческую восприя́л еси́, и стра́стию кре́пкаго связа́в, восте́кл еси́ Христе́ горе́ ко Отцу́, испо́лнив сла́вы вся́ческая.

Что скорбите́? Что же удивля́етеся? Вопия́ху апо́столом а́нгели, стоя́ще с ни́ми на горе́: сей Иису́с, Его́же ви́дите возне́сшася, си́це во сла́ве мно́зе па́ки прии́дет, суди́ти вселе́нней, и всем да́ти досто́йная.

Слава:

Мир да́вый свяще́нным ученико́м Твои́м, Ду́хом Твои́м всех благослови́в я́ко щедр благоде́телю, от лука́ваго соблюди́ невреди́мы, я́ко да Твою́ сотвори́вше во́лю Христе́, вси Ца́рствию Твоему́ вку́пе сподо́бимся.

И ныне, Богородичен:

Све́та прия́телище, всю просвети́вшаго тварь, показа́лася еси́ еди́на Пречи́стая, Всенепоро́чная Мари́е Богоро́дице. Те́мже молю́ Тя: просвети́ омрачи́вшуся сластьми́ жития́ стра́стную мою́ ду́шу, я́ко да во дни Боже́ственными стезя́ми пойду́.

Во вторник пятдесятныя недели

Трипеснец. Глас 2.

Песнь 2.

Ирмос: Бог, и́стинна дела́ Его́ / и вси путие́ Его́ судьбы́.

Ду́ше пра́вый, на пути́ пра́выя наста́ви, Тебе́ богосло́вящия.

От небе́с прише́дый Уте́шителю, спаси́ Тебе́ пою́щия.

Живо́т жизнотворя́й, и свет сый Уте́шителю, спаси́ Тебе́ пою́щия.

Слава:

Бог сый и́стинный и благода́тель, Уте́шителю, спаси́ Тебе́ пою́щия.

И ныне, Богородичен:

Бо́га и́стинна Де́во ма́ти родила́ еси́, в на́ше спасе́ние: Его́же моли́ о всех нас.

Песнь 8.

Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

В го́рнице собра́нным прему́дрым ученико́м, яви́шася внеза́пу разделя́еми язы́цы, я́ко о́гненни, и дыха́ния бу́рна глас слы́шашеся, превознося́щим Христа́ во ве́ки.

Ино́го Уте́шителя нам, уте́шитель Христо́с благода́тно низпосла́ Ду́ха, во проро́цех глаго́лющаго, и язы́ки о́гненными веща́юща, богогла́сных и прему́дрых апо́стол.

Слава:

Дарова́нием исто́чник, благи́х пода́тель, прише́д Уте́шитель Дух, Христо́вым ученико́м, слия́в их обнови́, свет благоче́стия те́ми облиста́в.

И ныне, Богородичен:

В не́дрех О́тчиих неразлу́чно вку́пе седя́щаго, в ве́щное чре́во Твое́ все́льшася Чи́стая, пое́м Де́во богоневе́сто, и превозно́сим во ве́ки.

Песнь 9.

Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

А́нгельския ли́ки освяща́яй, и сих чи́ны окормля́яй я́ко благ, сей ны́не прии́де с небесе́ соше́д, Боже́ственными блиста́ньми прему́дрыя апо́столы упрему́дрив, вселе́нней посла́.

Божества́ бога́тство раздава́ет, пребыва́ющее и невзима́емое, я́ве Дух Святы́й, апо́столом в язы́цех о́гненных и пла́мене зе́льнейших, на пре́лесть сих сотвори́, идолобе́сия ти́ну попаля́ющих.

Слава:

Ду́ше и́стины и ра́зума, Ду́ше прему́дрости и кре́пости, и сове́та, из Отца́ исходя́й, Сы́на же ра́ди, тва́ри бога́тно дае́мый, спаса́й нас ве́рою покланя́ющихся держа́ве Твое́й.

И ныне, Богородичен:

Богоблаже́нная Де́во, упова́ние мое́ все усе́рдно возлага́ю на Тя: спаси́ мя Ма́ти су́щия жи́зни, и пи́щи ве́чныя насы́титися сподо́би Чи́стая, да ве́рою и любо́вию в пе́снех велича́ю Тя.

В среду пятдесятныя недели

Трипеснец. Глас 3.

Песнь 3.

Ирмос: Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Утверди́вый небе́сныя си́лы, показа́ днесь апо́столы небеса́, Дух уте́шительный.

Единосу́щну, равноси́льну же Ду́ху сопресто́льну, и сообра́зну Отцу́ и Сло́ву, покланя́ющеся благоче́стно велича́ем.

Слава:

Нескве́рнаго чисте́йшаго Ду́ха, Уте́шителя пречи́стаго богосло́вим, владе́юща все́ю тва́рию.

И ныне, Богородичен:

Храм святы́й, и ковче́г, и све́щник, Всепречи́стая, была́ еси́ незаходи́маго све́та, су́щим во тме Христа́ возсия́вша.

Песнь 8.

Ирмос: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Еди́ному в трие́х Ли́цех, несеко́му, Боже́ственному существу́ покланя́емся, единонача́лие и ца́рство богому́дренно пою́ще: благослови́те вся дела́ Госпо́дня Го́спода.

Живонача́льный и Боже́ственный Дух, соверши́тельный же в Тро́ице позна́вше, трисвяты́ми хвалослове́ньми правосла́вно пое́м: благослови́те вся дела́ Госпо́дня Го́спода.

Слава:

Дух у́мный, Дух Боже́ственный влады́чествуяй, всебога́тно раздава́яй даро́в де́йства, в ве́ре пою́щим: благослови́те вся дела́ Госпо́дня Го́спода.

И ныне, Богородичен:

Иа́ковлю добро́ту, Тебе́ боголе́пнейшую, Богома́ти Пречи́стая, кра́сный па́че всех, избра́ Бог Сло́во, Его́же пое́м: благослови́те вся дела́ Госпо́дня Го́спода.

Песнь 9.

Ирмос: В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, / свят Бо́гу. / Тем Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, / велича́ем.

Многоче́стный, и благодви́жимый Дух богосло́вим, дре́вле во проро́цех предвозвести́вший ны́нешнее просвеще́ние, и всебога́тное излия́ние благи́х даро́в, разделя́емое ученико́м Сло́ва и свиде́телем.

Богонача́льнаго, невре́днаго Ду́ха славосло́вим, всем источа́ющаго и деля́щаго Боже́ственныя да́ры, Ду́ха, Уте́шителя друга́го, из Безнача́льна Отца́ исходя́ща, и Сы́ну Собезнача́льному сразумева́ема.

Слава:

Благоде́тельна и бога́та Ду́ха хвалосло́вим, всех освяща́ющаго, и просвеща́ющаго све́том разу́мным, всеси́льную держа́ву всепосети́тельную, счиня́емую Отцу́, и Сы́ну спрославля́емую.

И ныне, Богородичен:

Зако́на сень мимотече́, и просвеще́ние возсия́ во тме седя́щим, из Тебе́ Де́во воплоти́выйся, за мно́гое благоутро́бие, из безнача́льна Отца́ роди́выйся пре́жде век, ро́ждшему единосу́щен.

В четверток пятдесятныя недели

Трипеснец. Глас 4.

Песнь 4.

Ирмос: Седя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

И́стиннаго обетова́ния предузаконе́ние испо́лнися, светоно́сная благода́ть пятдеся́тницею прии́де, Уте́шителева сла́ва яви́ся зову́щим: сла́ва Христе́ си́ле Твое́й.

Непостижи́мь есть Дух Всесвяты́й, прехо́дит всяк ум и смы́сла ско́рость, я́ко веко́в всех древне́йший, я́ко Отцу́ и единоро́дному Сы́ну счиня́емь.

Слава:

Неначина́емь е́же бы́ти, и непрестава́емь по́слежде, но при́сно сый пучи́на бога́тства неизме́римая, всеси́льный Дух присносу́щный, Отцу́ и единоро́дному Сы́ну спрославля́ется.

И ныне, Богородичен:

Осени́ на Тя Дух Всесвяты́й, Всесвята́я Отрокови́це, Тебе́ боголе́пное пребыва́лище воплоще́нию Сы́на соде́ловая кра́сно, небе́с вы́шшую.

Песнь 8.

Ирмос: Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / и на учи́л еси́ пе́ти: / вся дела́, благослови́те, по́йте Го́спода.

Печа́ли мглу разсы́пли Преблаги́й, уте́шительством Твои́м, благоче́стно пою́щих Тя, и ве́рно вопию́щих: благослови́те дела́ Госпо́дня Го́спода.

Хоте́нием Твои́м дарова́ния раздава́яй, и́мже хо́щеши Уте́шителю, Тебе́ Бо́га зна́ющим, Твою́ благода́ть пода́ждь ве́рою вопию́щим: благослови́те вся дела́ Госпо́дня Го́спода.

Слава:

Яко Бог и́стинный, Уте́шитель покланя́емь есть ве́рно, и служи́мь благоче́стно сла́вящими, и вопию́щими непреста́нно: благослови́те вся дела́ Госпо́дня Го́спода.

И ныне, Богородичен:

Бо́га воплоще́нна роди́вшая, страсте́й мои́х утоли́ мяте́ж, и ду́шу мою́ просвети́, сподо́бивши пе́ти: благослови́те вся дела́ Госпо́дня Го́спода.

Песнь 9.

Ирмос: Е́вa у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния мiрови Благослове́ние процвела́ еси́. / Тем Тя вси велича́ем.

Ду́ха Боже́ственный дар излия́ся на вся́кую ве́ровавшую плоть, я́коже дре́вле проро́к зри́тельне ра́дуяся предвозвести́: мы же предрече́нных ны́не сбытие́ зря́ще, просвеща́емся.

Твоя́ богогла́сныя ученики́ испо́лнил еси́, Спа́се, Всесвята́го Ду́ха, мiрови же сих, я́ко лучи́, свет благоче́стия освеща́ющия посла́л еси́, я́ко Влады́ка и Госпо́дь. Те́мже Тя вси велича́ем.

Слава:

Огнь духо́вный, очисти́лище ученико́в ороси́ сердца́: паля́щая роса́ с небесе́, сло́ва самови́дцы просвети́, мiрови богоразу́мие блиста́ющее Тро́ичное посла́вши.

И ныне, Богородичен:

От Свята́го Ду́ха Чи́стая зачала́ еси́, безле́тно возсия́вшаго Сло́ва из нерожде́нна Отца́, и сего́ воплоти́вшася родила́ еси́, ра́ди кра́йняго Человеколю́бия и бла́гости, Богороди́тельнице ма́ти Де́во.

В пяток пятдесятныя недели

Трипеснец. Глас 5.

Песнь 5.

Ирмос: Одея́йся Све́том, я́ко ри́зою, / к Тебе́ у́тренюю и Тебе́ зову́: / ду́шу мою́ просвети́ омраче́нную, Христе́, / я́ко Еди́н Благоутро́бен.

Исходя́щаго от Безнача́льна Отца́ несумне́нно, на Сы́не же почива́ющаго Пресвята́го Ду́ха, ве́рнии славосло́вим.

Обновля́емаго в сердца́х на́ших, и назида́юща и освяща́юща, в ни́хже вселя́ется, со апо́столы све́тло восприи́мем.

Слава:

Неизреченноси́льнаго и всеси́льнаго, пре́жде истле́вшия обновля́ющаго, и просвеща́ющаго всех, Всесвята́го Ду́ха я́сно богосло́вим.

И ныне, Богородичен:

Горо́ я́вственная, горо́ присе́нная, ту́чная горо́ и усыре́нная, ю́же Бог возлюби́, свята́я Де́во, спаси́ рабы́ Твоя́.

Песнь 8.

Ирмос: Тебе́, Вседе́телю, / в пещи́ о́троцы, всемiрный лик спле́тше, поя́ху: / дела́ вся́кая, Го́спода по́йте / и превозноси́те во вся ве́ки.

Пребыва́ние бы́вших всех Ты еси́ Уте́шителю, и соблюде́ние, спаса́й ве́рою Тебе́ пою́щия.

Раздая́ние нетле́нных даро́в, и благода́ти пучи́на, и бога́тство неизглаго́ланное, Ты еси́ Ду́ше Боже́ственный и Святы́й: и Тя пое́м и превозно́сим во ве́ки.

Слава:

Живонача́льную и живоно́сную благода́ть, обновля́ющую нас, дохнове́нием Ду́ха Боже́ственнаго и Свята́го, пое́м и превозно́сим во ве́ки.

И ныне, Богородичен:

Соде́тель, Бо́жия Прему́дрость, те́ла храм из тебе́ Де́во созда́, спаса́й ве́рою Тебе́ Всечи́стая чту́щия, и превознося́щия во вся ве́ки.

Песнь 9.

Ирмос: Иса́ие, лику́й, Де́ва име́ во чре́ве / и роди́ Сы́на Емману́ила, / Бо́га же и Челове́ка, Восто́к и́мя Ему́, / Его́же велича́юще, Де́ву ублажа́ем.

Наш нача́ток Отцу́ Твоему́ Спа́се прине́сл еси́, и естества́ Боже́ственнаго бога́тство возда́в нам, посла́л еси́ благи́й и жизнотвори́вый Дух Святы́й, и собезнача́льный Тебе́ Влады́ко.

Нача́ток Божества́ ны́не да́рует естеству́ пе́рстному Дух О́тчий, и единоро́дному неотчужа́емый, но сбыва́я я́ко единоесте́ствен, и единосу́щен, и единоче́стен, и сопресто́лен.

Слава:

Небеса́ показа́л еси́ Спа́се, боже́ственныя Твоя́ ученики́, глаго́лющия язы́ки о́гненными Твое́ е́же к нам стра́шное схожде́ние, ны́не на них светотво́рное посыла́я де́йство, с небесе́ Уте́шителя.

И ныне, Богородичен:

Свята́го Ду́ха Богоро́дице была́ еси́ черто́г, из нея́же соде́тель Сло́во О́тчее про́йде я́ко челове́к, и в нас пожи́в, ны́не яви́ Тро́ицы позна́ние.

В субботу пятдесятную

Четверопеснец. Глас 6.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, Многоми́лостиве.

Де́йствовал еси́ пе́рвее во а́нгельских во́инствах, свяще́ние да́руя, и просвеща́я божества́ мо́лниями Ду́ше Святы́й, и соблюда́я еди́нственным освяще́нием.

Проро́ки показа́л еси́ могу́щия прозре́ти бу́дущих предве́дение, в сердца́х их я́ко благ, все́лься Уте́шителю, и да́льная прозира́ти устро́ил еси́.

Слава:

От земли́ возноси́ми Боже́ственных ра́ди доброде́телей, Христо́вы апо́столи, с небесе́ Ду́ха Влады́чня прише́дша прия́ша, и Божества́ заре́ю просия́ша.

И ныне, Богородичен:

Дух Святы́й соше́д на Тя, чи́стый де́вства храм соде́ла све́тло, Пречи́стый дом Сы́ну Вы́шняго Всеблаже́нная.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Всевино́внаго Отца́ и роди́теля, еди́наго пре́жде век Сы́на, и происхо́дна Свята́го Ду́ха, ве́рнии согла́сно сла́вим при́сно: благослове́н Бог оте́ц на́ших.

Уте́шитель сво́йство Божества́ нося́ ны́не прии́де, апо́столом бо во о́гненных язы́цех бесе́дуя Бог, показа́ся я́ве: благослове́н Бог оте́ц на́ших.

Слава:

Небеса́ приснодви́жима единоче́стным Ду́хом Твои́м, утверди́л еси́ учени́ки Твоя́ Тебе́ Христе́ пропове́дати вели́кое со́лнце, нам я́сно возсия́вшее: благослове́н Бог оте́ц на́ших.

И ныне, Богородичен:

Воплоще́нием Сло́ва Боже́ственный сосу́д Чи́стая, Дух Святы́й осени́ на Тя, Боже́ственный ковче́г све́тел соде́ла Пречи́стая: благослове́нна Бо́га пло́тию роди́вшая.

Песнь 8.

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Из Отца́ неизрече́нно исходя́ща, и на Сы́не неслия́нно почи́вающа, Ду́ха честна́го и всеси́льнаго, Тя превозно́сим во ве́ки.

Душе́вных скверн нас очи́сти, грехо́внаго ка́ла нас омы́й, даждь нам Христе́ Дух пра́вый спасе́ния, обновля́ющ во вся ве́ки.

Слава:

Во гробе́х живу́щия призва́вый и лице́ всея́ земли́ обновля́яй, я́же на земли́ у́ды умертви́, Тебе́ покланя́ющимся во вся ве́ки.

И ныне, Богородичен:

Не́бо яви́ся Чи́стая земно́е, небе́сное Сло́во во чре́во вмести́вши, су́щим на земли́ пло́тию прибли́жившася: Его́же превозно́сим во ве́ки.

Песнь 9.

Ирмос: Бо́га челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

О́гненными язы́ки я́сно веща́юще ученицы́, лесть и́дольскую попали́ша, ве́рных же ду́ши озари́ша, светле́йшим Боже́ственным де́йством Уте́шителя, проявле́нно прише́дша.

Чи́стая прия́телища Боже́ственныя благода́ти, и Боже́ственныя зари́ нескве́рная зерца́ла, му́дрыя Твоя́ ученики́ показа́л еси́, богонача́льным Ду́ха сия́нием, и сих посла́л еси́ Бла́же, я́ко многоми́лостив.

Слава:

Улучи́ти Боже́ственнаго блаже́нства певце́м Ти, Твои́м прише́ствием Уте́шителю, я́ко исто́чник благи́х, благоволи́, всеору́жных даро́в прича́стие, я́ко благопода́тель подая́, еди́не Человеколю́бче.

И ныне, Богородичен:

Бо́га челове́ком Чи́стая премени́ла еси́ па́че естества́, Его́же и нам исхода́таивши: Тобо́ю бо Пречи́стая совокупи́ во еди́но пре́жде расточе́нныя, и вси небе́снаго Боже́ственнаго насле́дия, и пи́щи сподо́бихомся.