Цветная Триодь (на цсл., гражданский шрифт)

Последование Вечерни в неделю Отцев вечера

На Го́споди воззва́х: поста́вим стихо́в 6, и пое́м стихи́ры святы́х оте́ц, 3, гла́с 6. Подо́бен: Отча́янная:

Из чре́ва роди́лся еси́ пре́жде денни́цы, от Отца́ безма́терен пре́жде ве́к: а́ще и А́рий тва́рь Тя́, а не Бо́га сла́вит, де́рзостию смеша́я Тя́ Зижди́теля тва́рем безу́мно, вещество́ огня́ ве́чнаго себе́ сокро́вищствуяй. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

Кто́ Твою́ Спа́се ри́зу раздра́? А́рий, Ты́ ре́кл еси́, и́же Тро́ицы пресече́ Единоче́стное Нача́ло в разделе́ния: се́й отве́рже Тя́ бы́ти Еди́наго от Тро́ицы, се́й и Несто́риа у́чит Богоро́дицу не глаго́лати. Но Собо́р, и́же в Нике́и Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

В бре́г па́дает греха́, А́рий возненави́девый све́та ви́дети, и боже́ственною растерза́ется у́дицею вну́тренних, все́ изда́ти существо́ и ду́шу ну́жно, други́й Иу́да бы́в нра́вом и о́бразом. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

И Мине́и свята́го, 3.

Сла́ва, гла́с 6: Та́инственныя дне́сь Ду́ха трубы́, богоно́сныя отцы́ восхва́лим песнопе́вшия посреде́ Це́ркве, пе́снь сли́чную богосло́вия, Тро́ицу Еди́ну непреме́нную, Существо́ же и Божество́: низложи́тели А́риевы, и правосла́вных побо́рники, моля́щияся всегда́ Го́споду, поми́ловатися душа́м на́шим.

И ны́не, гла́с то́йже: На гора́х святы́х зря́ще Твое́ Вознесе́ние Христе́, Сия́ние сла́вы О́тчи, пое́м Тво́й светообра́зный лица́ зра́к, кла́няемся Страсте́м Твои́м, почита́ем Воскресе́ние, сла́вное Вознесе́ние сла́вяще, поми́луй на́с.

На стихо́вне стихи́ры, гла́с 6: Все́ собра́вше душе́вное худо́жество: со стихи́ и́х:

Стихиры святых отец, глас 6. Подобен: Всю отложи́вше:

Все собра́вше душе́вное худо́жество, / и Боже́ственным Ду́хом сразсмотри́вше, / небе́сный и честны́й Симво́л ве́ры, / честни́и отцы́ богопи́санне начерта́ша: / в не́мже я́вственнейше Ро́ждшему собезнача́льнаго Сло́ва науча́ют, / и всеи́стинно единосу́щнаго, / апо́стольским после́дующе проявле́нно уче́нием, / благосла́внии и пребога́тии и́стинно, / и богому́дрии.

Все прие́мше у́мное сия́ние Свята́го Ду́ха, / преесте́ственнейшее благосло́вие, / кра́ткими глаго́лы, и мно́гим ра́зумом / богодухнове́нно провеща́ша: / я́ко Христо́вы пропове́дницы, / ева́нгельских предста́телие уче́ний блаже́ннии, / и благочести́вых преда́ний, / свы́ше прие́мше сих открове́ние я́ве, и просве́щшеся, / изложи́ша ве́ру богонауче́нную.

Стих: Благослове́н еси́, Го́споди Бо́же оте́ц на́ших, / и хва́льно и просла́влено И́мя Твое́ во ве́ки.

Все собра́вше па́стырское иску́сство, / и я́рость подви́гше ны́не пра́веднейшую, / отмсти́тельне тя́жкия отгна́ша и па́губныя во́лки, / пра́щею Ду́ха изве́ргше от церко́внаго исполне́ния, / па́дшия я́ко к сме́рти, и я́ко неисце́льно неду́говавшия / боже́ственнии па́стырие, / и я́ко раби́ и́стиннейшии Христо́вы, / и боже́ственнаго пропове́дания таи́нницы свяще́ннейшии.

Стих: Собери́те Ему́ преподо́бныя Его́, / завеща́ющия заве́т Его́ о же́ртвах.

И па́ки 1-ю стихиру:

Все собра́вше душе́вное худо́жество, / и Боже́ственным Ду́хом сразсмотри́вше, / небе́сный и честны́й Симво́л ве́ры, / честни́и отцы́ богопи́санне начерта́ша: / в не́мже я́вственнейше Ро́ждшему собезнача́льнаго Сло́ва науча́ют, / и всеи́стинно единосу́щнаго, / апо́стольским после́дующе проявле́нно уче́нием, / благосла́внии и пребога́тии и́стинно, / и богому́дрии.

Сла́ва, гла́с 3: Апо́стольских преда́ний изве́стнии храни́телие бы́сте святи́и отцы́: Святы́я бо Тро́ицы Единосу́щное правосла́вно научи́вше, А́риево хуле́ние собо́рне низложи́сте, с ни́м же и Македо́ниа духобо́рца обличи́вше, осуди́сте Несто́риа, Евти́хиа и Диоско́ра, Саве́ллиа же и Севи́ра безгла́внаго: и́хже пре́лести испроси́те изба́витися на́м, и нескве́рну на́шему житию́ в ве́ре сохрани́тися, мо́лимся.

И ны́не, гла́с 6: Взы́де Бо́г в воскликнове́нии, Госпо́дь во гла́се тру́бне, е́же вознести́ па́дший о́браз Ада́мов, и посла́ти Ду́ха уте́шителя, е́же освяти́ти ду́ши на́ша.

Та́же: Ны́не отпуща́еши: Трисвято́е.

Отпусти́тельный тропа́рь, гла́с 8:

Препросла́влен еси́, Христе́ Бо́же наш, / свети́ла на земли́ отцы́ на́ша основа́вый, / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́.

Сла́ва: свята́го, а́ще е́сть, а́ще ли ни́:

Сла́ва, и ны́не: пра́здника, гла́с 4:

Возне́слся еси́ во сла́ве, Христе́ Бо́же наш, / ра́дость сотвори́вый ученико́м, / обетова́нием Свята́го Ду́ха, / извеще́нным им бы́вшим благослове́нием, / я́ко Ты еси́ Сын Бо́жий, Изба́витель міра.

И отдае́тся после́дование святы́х оте́ц.

Последование Утрени в понедельник седьмой седмицы по Пасхе

По 1-м стихосло́вии седа́лен, гла́с 1. Подо́бен: Ка́мени запеча́тану:

А́нгелом дивя́щимся восхо́да стра́нному, и ученико́м ужаса́ющимся стра́шному взы́тия, возше́л еси́ со сла́вою я́ко Бо́г, и врата́ тебе́ взя́шася Спа́се. Сего́ ра́ди си́лы небе́сныя дивля́хуся, вопию́ще: сла́ва снизхожде́нию Твоему́ Спа́се, сла́ва ца́рствию Твоему́, сла́ва вознесе́нию твоему́, Еди́не Человеколю́бче.

Сла́ва, и ны́не: то́йже.

По 2-м стихосло́вии, седа́лен. Подо́бен: то́йже:

А́ду плени́вшуся от Тебе́ Животода́вче, и мiру просвети́вшуся во Твое́м Воскресе́нии, возше́л еси́ со сла́вою Спа́се, вся́ обдержа́й руко́ю. Сего́ ра́ди со а́нгелы славосло́вим Тя́ Вседержи́телю Го́споди: сла́ва вознесе́нию твоему́ Христе́, сла́ва ца́рствию Твоему́, сла́ва благоутро́бию Твоему́, Еди́не Человеколю́бче.

Сла́ва, и ны́не: то́йже.

Псало́м 50.

Кано́н пра́здника 4-го гла́са, со ирмосы́ на 8, и мине́и на 4. Конда́к, и ексапостила́рий пра́здника.

На стихо́вне стихи́ры, гла́с 2. Подо́бен: До́ме Евфра́фов:

Сло́ва ученико́м ве́рнии совозме́мся доброде́тели на го́ры, я́ко да Христо́ву сла́ву ви́дети сподо́бимся.

Сти́х: Вси́ язы́цы восплещи́те рука́ми, / воскликните Богу гласом радования.

Посрами́шася я́ве манихе́йская умышле́ния, умы́ о ни́хже недоумева́хуся, Христо́во я́ве сказу́юще с пло́тию вознесе́ние.

Сти́х: Взы́де Бо́г в воскликнове́нии, / Господь во гласе трубне.

Воскли́кни, о Дави́де, ра́дуяся цевни́цею: вознесы́йся бо Христо́с, вещми́ словеса́ утвержда́ет проро́чества твоего́.

Сла́ва, и ны́не, гла́с 2: Возне́слся еси́ во сла́ве на горе́ Ма́сличней Христе́ Бо́же, пред Твои́ми ученики́, и се́л еси́ одесну́ю Отца́, вся́ческая исполня́яй Божество́м: и посла́л еси́ и́м Ду́ха Свята́го, просвеща́юща и утвержда́юща, и освяща́юща ду́ши на́ша.

Последование Литургии в понедельник седьмой седмицы по Пасхе

На литурги́и блаже́нна от кано́на пе́снь 5-я, на 6.

Последование Вечерни в понедельник седьмой седмицы по Пасхе вечера

На Го́споди воззва́х: стихи́ры пра́здника, 3. И мине́и, 3.

Вознесе́ния, гла́с 4. Подо́бен: Да́л еси́ зна́мение:

Пострада́л еси́ я́ко Челове́к Безстра́стный Божество́м, и воскре́сл еси́ тридне́вен Плени́вый сме́рть, и Совоскреси́в вся́ истле́вшия, и Возне́слся еси́ Христе́ ко Отцу́, обеща́в посла́ти Уте́шителя свяще́нным апо́столом Твои́м, Иису́се Всеси́льне, Спа́се ду́ш на́ших.

Вы́ что́ стоите́ зря́ще на не́бо? Ви́димии а́нгели, я́ко челове́цы глаго́лаху, Сло́ва таи́нником: се́й, Его́же зрите́ о́блаком све́тлым Вознося́щася, То́йже прии́дет, и́мже о́бразом ви́десте Его́, суди́ти мiру, я́коже рече́: ше́дше у́бо вся́ рече́нная сотвори́те.

По е́же от гро́ба Твоего́ па́че постиже́ния Воста́нии, Всеси́льне Го́споди, прии́м и́хже возлюби́л еси́, да́же до Вифа́нии изве́л еси́ Сло́ве, и на горе́ бы́в Елео́нстей, си́х благослови́в, и та́ко Возне́слся еси́, повину́ющимся а́нгелом Тебе́, Иису́се Всеси́льне, Спа́се ду́ш на́ших.

Сла́ва, и ны́не, гла́с 4: Егда́ прише́л еси́ на го́ру Христе́ Елео́нскую, О́тчее соверши́ти благоволе́ние, ужасо́шася небе́снии а́нгели, и устраши́шася преиспо́днии, предста́ша же ученицы́ с ра́достию тре́петни, я́ко глаго́лал еси́ и́м: я́ко престо́л же готовля́шеся проти́в о́блак жду́щий: врата́ же не́бо отве́рзшее добро́ту явля́ше, и земля́ сокро́вища открыва́ет, Ада́мову схожде́нию я́ко позна́тися, и па́ки восхожде́нию. Но стопы́ у́бо возвыша́хуся, я́коже ру́це, уста́ же вельми́ благословля́ху, я́коже слы́шашеся, о́блак подъе́мляше, и не́бо вну́трь Тебе́ прия́т. Де́ло сие́ Го́споди соде́лал еси́ вели́кое и пресла́вное, во спасе́ние ду́ш на́ших.

На стихо́вне стихи́ры, гла́с 2. Подо́бен: До́ме Евфра́фов:

Испо́лнивый Бла́же Оте́ческое благоволе́ние, соедини́вый же го́рняя до́льним, возне́слся еси́ во сла́ве к пе́рвейшим.

Сти́х: Вси́ язы́цы восплещи́те рука́ми, / воскликните Богу гласом радования.

Возне́слся еси́ к Твоему́ Роди́телю Ще́дре, отону́ду же не разлучи́лся еси́, и возне́сл еси́ до́лу лежа́щее естество́ Влады́ко.

Сти́х: Взы́де Бо́г в воскликнове́нии, / Господь во гласе трубне.

О́блак Тя́ све́та восприя́т на высоту́, и а́нгели со стра́хом и тре́петом служа́ху Боже́ственному Твоему́ Вознесе́нию.

Сла́ва, и ны́не, гла́с 4: Низше́дшее естество́ Ада́мово в до́льнейшия страны́ земли́, Бо́же новосотвори́вый Собо́ю, превы́ше вся́каго нача́ла и вла́сти возве́л еси́ дне́сь: я́ко бо возлюби́в, спосади́л еси́: я́коже поми́ловав, соедини́л еси́ Себе́: я́ко соедини́вый спострада́л еси́: я́ко безстра́стен пострада́в, и спросла́вил еси́. Но безпло́тнии, кто́ есть Се́й, глаго́лаху, кра́сный Му́ж, но не челове́к то́чию, Бо́г же и Челове́к, совокупле́нно и явля́емо? Те́мже удивле́ни а́нгели, во оде́ждах лета́юще о́крест ученико́в, друзи́и же стоя́ще вопия́ху: му́жие галиле́йстии, И́же от ва́с оты́де, Се́й е́сть Иису́с Челове́к Бо́г, Бо́г Челове́к па́ки прии́дет, Судия́ живы́х и ме́ртвых, ве́рным же да́руяй грехо́в проще́ние и ве́лию ми́лость.

Та́же: Ны́не отпуща́еши: Трисвято́е.

И отпу́ст.

Последование Утрени во вторник седьмой седмицы по Пасхе

По 1-м стихосло́вии седа́лен, гла́с 2. Подо́бен: Вы́шних ищя́:

Свы́ше на зе́млю Христе́ соше́л еси́, и па́ки от земли́ на высоту́ восте́кл еси́ к Твоему́ Роди́телю, ученико́м зря́щим Твое́ восхожде́ние: с ни́ми у́бо пра́зднующе пое́м Твое́, Спа́се, Вознесе́ние.

Сла́ва, и ны́не: то́йже.

По 2-м стихосло́вии седа́лен, гла́с 3. Подо́бен: Красоте́ де́вства:

Преве́чное Сло́во и Безнача́льное, е́же у́бо взя́т естество́ челове́ческое, обоготвори́в та́йно, дне́сь вознесе́: а́нгели предтеку́ще апо́столом пока́зоваху Сего́, иду́ща на небеса́ со сла́вою мно́гою. Ему́же поклони́вшеся глаго́лаху: сла́ва Бо́гу Возне́сшемуся.

Сла́ва, и ны́не: то́йже.

Псало́м 50.

Кано́н пра́здника со ирмосы́ на 8: и мине́и на 4. Конда́к и ексапостила́рий пра́здника.

На стихо́вне стихи́ры, гла́с 2. Подо́бен: До́ме Евфра́фов:

Не оста́влю си́рых, я́же А́з собра́х, Госпо́дь друго́м глаго́лаше, но послю́ ва́м Ду́ха Свята́го.

Сти́х: Вси́ язы́цы восплещи́те рука́ми, / воскликните Богу гласом радования.

А́нгели прему́дрым вопия́ху апо́столом: о му́жие галиле́йстии, и́мже о́бразом зрите́, То́й па́ки прии́дет.

Сти́х: Взы́де Бо́г в воскликнове́нии, / Господь во гласе трубне.

Снидо́ша с ра́достию от Елео́нския горы́ ученицы́ Твои́ Сло́ве, сла́вяще и пою́ще Боже́ственное Твое́ Вознесе́ние.

Сла́ва, и ны́не, гла́с 4: Егда́ возне́слся еси́ во сла́ве Христе́ Бо́же, ученико́м зря́щим, о́блацы подыма́ху Тя́ с пло́тию, врата́ взя́шася небе́сная, ли́к а́нгельский ра́довашеся с весе́лием, го́рнейшия си́лы зовя́ху глаго́люще: возми́те врата́ кня́зи ва́ша, и вни́дет ца́рь сла́вы. Ученицы́ же дивя́щеся глаго́лаху: не разлучи́ся на́с па́стырю до́брый, но посли́ на́м ду́ха твоего́ пресвята́го, наставля́юща, и утвержда́юща, и просвеща́юща и освяща́юща ду́ши на́ша.

Последование Литургии во вторник седьмой седмицы по Пасхе

На литурги́и блаже́нна от кано́на пе́снь 6-я, на 6.

Последование Вечерни во вторник седьмой седмицы по Пасхе вечера

На Го́споди воззва́х: стихи́ры подо́бны пра́здника, 3: и мине́и 3.

Стихи́ры пра́здника, гла́с 4. Подо́бен: Я́ко до́бля:

Зря́щим боже́ственным Твои́м ученико́м, возне́слся еси́ к небе́сным, и се́л еси́ одесну́ю Роди́теля, Того́ неразлуче́нный Пресу́щественный Сы́не: и я́коже ре́кл еси́, посла́л еси́ уте́шителя, небе́сныя земны́я сотворя́юща, му́дрыя и богоглаго́ливыя, и свяще́нныя апо́столы Твоя́.

Воплоти́лся еси́ за неизрече́нную Иису́се бла́гость, и кре́ст и сме́рть Безсме́ртне во́лею претерпе́л еси́, и па́ки тридне́вен воскре́с из ме́ртвых, по дне́х четы́редесятих возне́слся еси́, отону́дуже пе́рвее соше́л еси́, умири́в земна́я, и все́х приве́д Роди́телю.

На о́блацех я́ко ви́деша Тя́ взима́ема Го́споди, му́дрии апо́столи, рыда́юще и се́тования испо́лнени, вопия́ху со слеза́ми: не оста́ви си́рых, и́хже за милосе́рдие возлюби́л еси́, но посли́ на ны́, я́коже обеща́л еси́ Всеще́дре, Пресвята́го Твоего́ Ду́ха, просвеща́ющаго ду́ши на́ша.

Сла́ва, и ны́не, гла́с 5: Прииди́те ве́рных собра́ние, уму́ та́йно научи́вшеся ученико́в Христо́вых, непреста́нную пе́снь рце́м, и я́ко апо́столи, на Елео́нской горе́ с Дави́дом возопии́м: взы́де Бо́г в воскликнове́нии, Госпо́дь во гла́се тру́бне, да изба́вит коле́на челове́ческая от собла́зн го́рдаго, и просвети́т ду́ши на́ша.

На стихо́вне стихи́ры, гла́с 2. Подо́бен: До́ме Евфра́фов:

Чу́до новоле́пное, челове́ческое бо естество́ на небеса́ взы́де, соедини́вшееся Сло́ву Бо́гу Вседержи́телю.

Сти́х: Вси́ язы́цы восплещи́те рука́ми, / воскликните Богу гласом радования.

Возсия́ я́сный и всесве́тлый де́нь, Влады́ки Боже́ственнаго на небеса́ Восхожде́ния, просвеща́ющий вся́ческая.

Сти́х: Взы́де Бо́г в воскликнове́нии, / Господь во гласе трубне.

Я́коже ученико́м посла́л еси́ с высоты́ Сра́сленнаго Твоего́ Ду́ха, и лю́дем Твои́м посли́ Христе́ Спа́се благода́ть Твою́.

Сла́ва, и ны́не, гла́с 5: Го́споди, взе́млющу ти ся отону́дуже не разлучи́лся еси́, во́инства а́нгелов и все́х безпло́тных, ра́достию вопия́ху го́рншим си́лам: возми́те врата́ кня́зи ва́ша, и вни́дет Ца́рь Сла́вы. Престо́л бо херуви́мский взя́т Тя́ с пло́тию, Го́споди сла́ва Тебе́.

Та́же: Ны́не отпуща́еши: Трисвято́е.

И отпу́ст.

Последование Утрени в среду седьмой седмицы по Пасхе

По 1-м стихосло́вии, седа́лен, гла́с 4. Подо́бен: Яви́лся еси́:

Ко Твоему́ Роди́телю па́ки восте́к Вседе́телю, рабо́в Твои́х не оста́ви си́рых, ученицы́ я́ко ви́деша Тя́ возне́сшагося, вопия́ху Человеколю́бче.

Сла́ва, и ны́не: то́йже.

По 2-м стихосло́вии седа́лен, гла́с 4. Подо́бен: Яви́лся еси́ дне́сь:

Сла́вная удобре́ния Боже́ственных умо́в, сла́вы Го́спода возне́сшагося я́ве с пло́тию ви́девше, врата́, вопия́ху дру́г дру́гу, возми́те.

Сла́ва, и ны́не: то́йже.

Псало́м 50.

Кано́н пра́здника со ирмосы́ на 8: и мине́и на 4. Конда́к и ексапостила́рий пра́здника.

На стихо́вне стихи́ры, гла́с 6. Подо́бен: Тридне́вен воскре́сл еси́:

За кра́йнее благоутро́бие Христе́, роди́лся еси́ из Де́вы пло́тию, во́лею же претерпе́вый Кре́ст, тридне́вен воскре́сл еси́ из гро́ба Всеще́дре, совоскреси́вый и оживи́вый на́с.

Сти́х: Вси́ язы́цы восплещи́те рука́ми, / воскликните Богу гласом радования.

Зря́щим Тя́ Христе́ Бо́же, боже́ственным ученико́м, я́ве возне́слся еси́ от земли́ на не́бо, и си́м обеща́л еси́ посла́ти Жизнода́вче от Отца́ Ду́ха Свята́го.

Сти́х: Взы́де Бо́г в воскликнове́нии, / Господь во гласе трубне.

Диви́тся а́нгел мно́жество, стра́нному восхожде́нию Твоему́, и стра́шному Иису́се Всецарю́, и врата́ небе́сная взя́ти, вопия́ху го́рншим ны́не си́лам.

Сла́ва, и ны́не, гла́с 6: Не́др Оте́ческих не разлу́чся, Сладча́йший Иису́се, и с земны́ми я́ко Челове́к пожи́в, дне́сь от горы́ Елео́нския возне́слся еси́ во сла́ве, и па́дшее естество́ на́ше ми́лостивно возне́с, Отцу́ спосади́л еси́. Те́мже небе́снии безпло́тных чи́нове, чудеси́ удивля́ющеся, ужаса́хуся у́жасом, и тре́петом содержи́ми, Твое́ человеколю́бие велича́ху. С ни́миже и мы́ земни́и, е́же к на́м Твое́ снизхожде́ние, и е́же от на́с вознесе́ние славосло́вяще, мо́лимся глаго́люще: ученики́, и Ро́ждшую Тя́ Богоро́дицу, ра́дости безчи́сленныя Испо́лнивый во Твое́ Вознесе́ние, и на́с сподо́би избра́нных Твои́х ра́дости моли́твами и́х, вели́кия ра́ди Твоея́ ми́лости.

Последование Литургии в среду седьмой седмицы по Пасхе

На литурги́и блаже́нна от кано́на пе́снь 7-я, на 6.

Последование Вечерни в среду седьмой седмицы по Пасхе вечера

На Го́споди воззва́х: стихи́ры подо́бны пра́здника 3, и мине́и 3.

Пра́здника, гла́с 4. Подо́бен: Зва́нный свы́ше:

Е́же о все́х соверши́в спасе́ние, на го́ру прише́л еси́ Елео́нскую Христе́, отону́дуже и взя́лся еси́ пред ученики́ Твои́ми, на небеса́ со сла́вою носи́мь. Те́мже та́инству дивя́щеся, го́рним взыва́ху до́льнии чи́нове: возми́те врата́, и вни́дет, отону́дуже изы́де, все́ми ца́рствуяй Бо́г, я́коже благоволи́, пресла́вно мірови спасе́ние соде́лав.

Учени́ческий ли́к, Тебе́ я́коже зря́ше взима́ема, глаго́лаше: Влады́ко, ка́ко ны́не оставля́еши рабы́ Твоя́? И ка́мо и́деши И́же рука́ма Содержа́й концы́? Мы́ же оста́вивше вся́, Тебе́ Бо́гу после́довахом ра́дующеся, во ве́ки с Тобо́ю наде́жду иму́ще бы́ти: не оста́ви си́рых на́с, я́коже обеща́лся еси́ Спа́се на́ш Милосе́рде, Уте́шителя посли́ и Спа́са ду́ш на́ших.

Соверше́ннейшее подая́ благослове́ние друго́м Твои́м Влады́ко, та́йно научи́л еси́ и́х: зри́те дру́зи, иду́ ко Отцу́, ва́м же послю́ Ино́го Уте́шителя, вы́ же се́тование все́ отри́ните: не оста́влю бо ове́ц, я́же собра́х: не забу́ду, и́хже возлюби́х. Боже́ственною с высоты́ обо́лкшеся си́лою иди́те, глаго́люще во вся́ язы́ки спасе́ния благовеща́ние.

Сла́ва, и ны́не, гла́с 6: Взы́де Бо́г в воскликнове́нии, Госпо́дь во гла́се тру́бне, е́же вознести́ па́дший о́браз Ада́мов, и посла́ти Ду́ха Уте́шителя, е́же освяти́ти ду́ши на́ша.

На стихо́вне стихи́ры, гла́с 2. Подо́бен: До́ме Евфра́фов:

Не оста́влю си́рых, я́же А́з собра́х, Госпо́дь друго́м глаго́лаше: но послю́ ва́м Ду́ха Пресвята́го.

Сти́х: Вси́ язы́цы восплещи́те рука́ми, / воскликните Богу гласом радования.

А́нгели прему́дрым вопия́ху апо́столом: о му́жие галиле́йстии, и́мже о́бразом зрите́, То́й па́ки прии́дет.

Сти́х: Взы́де Бо́г в воскликнове́нии, / Господь во гласе трубне.

Снидо́ша с ра́достию от горы́ Елео́нския ученицы́ Твои́ Сло́ве, сла́вяще и пою́ще Боже́ственное Твое́ Вознесе́ние.

Сла́ва, и ны́не, гла́с 1: Возше́д на небеса́, отону́дуже и соше́л еси́, не оста́ви на́с си́рых Го́споди: да прии́дет Тво́й Ду́х, нося́ ми́р мірови, покажи́ сыново́м челове́ческим дела́ си́лы Твоея́, Го́споди Человеколю́бче.

Та́же: Ны́не отпуща́еши: Трисвято́е.

И отпу́ст.

Последование Утрени в четверток седьмой седмицы по Пасхе

По 1-м стихосло́вии седа́лен, гла́с 5. Подо́бен: Собезнача́льное Сло́во:

Соше́дый с небесе́ на земна́я, и до́лу лежа́щий во а́дове стра́жи, совоскреси́вый я́ко Бо́г Ада́мов зра́к, и Вознесе́нием Твои́м Христе́ на небеса́ возве́д, и престо́лу Оте́ческому Твоему́ соседи́теля соде́лал еси́, я́ко Ми́лостив и Человеколю́бец.

Сла́ва, и ны́не: то́йже.

По 2-м стихосло́вии седа́лен, гла́с 8. Подо́бен: Повеле́нное та́йно:

На го́ру возше́д Елео́нскую Ми́лостиве Иису́се, отту́ду взя́лся еси́: све́тлый бо о́блак от земли́ Тя подъя́т, зря́щим ученико́м Твои́м чу́до стра́шное, вопию́щим безпло́тным на небесе́х вы́шшим во́инством: стра́хом врата́ возми́теся. С ни́миже Тя́ Царя́ пое́т вся́ тва́рь, все́х Бо́га.

Сла́ва, и ны́не: то́йже.

Псало́м 50.

Кано́н пра́здника со ирмосы́ на 8: и мине́и на 4. Конда́к и ексапостила́рий пра́здника.

На стихо́вне стихи́ры, гла́с 2. Подо́бен: До́ме Евфра́фов:

Испо́лнивый Бла́же Оте́ческое благоволе́ние, соедини́в же го́рняя с до́льними, возне́слся еси́ во сла́ве к пе́рвейшим.

Сти́х: Вси́ язы́цы восплещи́те рука́ми, / воскликните Богу гласом радования.

О́блак Тя́ све́та восприя́т на высоту́, и а́нгели со стра́хом и тре́петом служа́ху, Боже́ственному Твоему́ Вознесе́нию.

Сти́х: Взы́де Бо́г в воскликнове́нии, / Господь во гласе трубне.

Хвалу́ богокра́сную, со апо́столы Богоро́дица воспева́ет, Го́спода зря́щи на о́блацех носи́ма.

Сла́ва, и ны́не, гла́с 7: На го́ру Елео́нскую прише́л еси́, Ми́луяй ро́д челове́ческий, и о́блак подъя́т Тя́ от о́чию учени́к Твои́х, трепе́щущим у́бо за виде́ние, ра́дующим же ся за ча́яние Свята́го Ду́ха, И́мже утверди́в Спа́се поми́луй на́с.

Последование Литургии в четверток седьмой седмицы по Пасхе

На литурги́и блаже́нна, от кано́на пе́снь 8-я, на 6.

Последование Вечерни, Утрени и Литургии в четверток седьмой седмицы по Пасхе вечера

На Го́споди воззва́х: пое́м после́дование все́ пра́здника неизме́нно, я́коже и в Госпо́дственный де́нь вознесе́ния, кроме́ чте́ний, и полиеле́а: на вече́рни же, и в пято́к на У́трени, и на Литурги́и блаже́нна пра́здника, пе́снь 9-я обои́х кано́нов, на 8. По вхо́де тропа́рь. Сла́ва, и ны́не: конда́к. Проки́мен, аллилу́иа, и прича́стен пра́здника: апо́стол же и ева́нглие дне́.

Слу́жбу же мине́и пое́м на повече́рии.

Последование Вечерни в пяток седьмой седмицы по Пасхе вечера

На Го́споди воззва́х: поставим стихов 6.

Стихиры мученичны, Осмогласника три, глас 6:

Му́ченицы Твои́, Го́споди, / не отверго́шася Тебе́, / ни отступи́ша от за́поведей Твои́х: / тех моли́твами поми́луй нас.

Му́чившиися Тебе́ ра́ди Христе́, / мно́гия му́ки претерпе́ша: / моли́твами Го́споди, и моле́нием их, / всех нас сохрани́.

Страстоте́рпцы му́ченицы, и небе́сные гра́ждане, / на земли́ пострада́вшии, мно́гия му́ки претерпе́ша, / и соверше́нный прия́ша вене́ц на небесе́х, / да мо́лятся о душа́х на́ших.

И усопших три. Глас 8. Подобен: И́же во Еде́ме:

От ве́ка ме́ртвых днесь / всех по и́мени, ве́рою пожи́вших благоче́стно, / па́мять сотворя́юще ве́рнии, / Спа́са и Го́спода воспои́м, прося́ще приле́жно / сим в час суда́ отве́т благи́й да́ти, / Тому́ Самому́ Бо́гу на́шему, / всей судя́щему земли́, / десна́го Его́ предстоя́ния получи́ти в ра́дости, / в ча́сти пра́ведных, и во святы́х жре́бии све́тлем, / и досто́йным бы́ти Небе́снаго Ца́рствия Его́.

Твое́ю кро́вию челове́ки Спа́се искупи́вый, / и сме́ртию Твое́ю от сме́рти го́рькия изба́вивый нас, / и жизнь ве́чную подая́й нам Воскресе́нием Твои́м, / вся упоко́й Го́споди, усо́пшия благоче́стно, / или́ в пусты́нях, или́ во граде́х, или́ в мо́ри, / или́ на земли́, или́ на вся́ком ме́сте: / цари́ же, свяще́нники, архиере́и, / мона́хи, и бельцы́ в во́зрасте вся́ком всеро́дном, / и сподо́би я Небе́снаго Ца́рствия Твоего́.

Из ме́ртвых воста́нием Твои́м Христе́, / не ктому́ смерть облада́ет уме́ршими благоче́стно. / Те́мже мо́лимся приле́жно: / рабы́ Твоя́ упоко́й во дво́рех Твои́х, / и в не́дрех Авраа́ма, от Ада́ма да́же до днесь, / послужи́вшия Тебе́ чи́сто, / отцы́ и бра́тию на́шу, / дру́ги вку́пе и сро́дники, / вся́каго челове́ка, в житии́ послужи́вша ве́рно, / и к Тебе́ преста́вльшася многови́дно и многообра́зно, Бо́же, / и сподо́би я Небе́снаго Ца́рствия Твоего́.

Слава, глас 8: Пла́чу и рыда́ю, / егда́ помышля́ю смерть, / и ви́жду во гробе́х лежа́щую / по о́бразу Бо́жию созда́нную на́шу красоту́, / безобра́зну, и безсла́вну, / не иму́щу ви́да. / О́ле чудесе́! / Что е́же о нас сие́ бысть та́инство? / Ка́ко преда́хомся тле́нию? / Ка́ко припряго́хомся сме́рти? / Вои́стинну Бо́жиим повеле́нием, / я́коже есть пи́сано, / подаю́щаго преста́вльшимся поко́й.

И ныне, Богородичен, глас 6: Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ Возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог сый, / и естество́м быв Челове́к нас ра́ди, / не во двою́ лицу́ Разделя́емый, / но во Двою́ Естеству́ / несли́тно Познава́емый. / Того́ моли́, Чи́стая, Всеблаже́нная, / поми́ловатися душа́м на́шим.

Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.

Вместо же прокимна, поем Аллилуия, на глас 8.

Стих: Блаже́ни я́же избра́л, и прия́л еси́ Го́споди.

Стих: И па́мять их в род и род.

Сподо́би Го́споди:

На стиховне стихиры, глас 6:

Мученичен: Крест Твой, Го́споди, / му́чеником бысть ору́жие непобеди́мое: / ви́дяху бо предлежа́щую смерть, / и предзря́ще бу́дущую жизнь, / наде́ждою в Тя укрепля́хуся: / тех моли́твами поми́луй нас.

Мертвым.

Стих: Ду́ши их во благи́х водворя́тся.

Ты мя почти́л еси́ о́бразом Твои́м, / руку́ Твое́ю Спа́се созда́ние, / живописа́вый в веще́ственном зра́це у́мнаго существа́ подо́бие: / его́же о́бщника мя поста́вил еси́, / положи́вый су́щими на земли́ облада́ти мне самовла́стием сло́ва. / Те́мже, Спа́се, рабы́ Твоя́, во стране́ живу́щих, / в селе́ниих пра́ведных упоко́й.

Стих: Блаже́ни я́же избра́л, и прия́л еси́ Го́споди.

Да мне достоя́ние про́чих живота́ разсу́дится, / вертогра́д во Еде́ме вся́кими укра́шен сады́, / печа́ли и попече́ния свобо́дна мя прича́стника боже́ственныя жи́зни, / равноа́нгельна на земли́, смеше́на учини́вый. / Те́мже, Спа́се, рабы́ Твоя́, во стране́ живы́х, / в селе́ниих пра́ведных упоко́й.

Слава, глас 6: Нача́ток ми и соста́в зижди́тельное Твое́ бысть повеле́ние: / восхоте́в бо от неви́димаго и ви́димаго естества́ жи́ва мя соста́вити, / от земли́ у́бо те́ло созда́в, дал же ми еси́ ду́шу, / Боже́ственным Твои́м и животворя́щим вдохнове́нием. / Те́мже Спа́се, рабы́ Твоя́ во стране́ живы́х, / и в кро́вех пра́ведных упоко́й.

И ныне, Богородичен, глас тойже: Моли́твами Ро́ждшия Тя Христе́, / му́ченик Твои́х и апо́стол, и проро́к, и святи́телей, / преподо́бных, и пра́ведных, и всех святы́х, / усо́пшия рабы́ Твоя́ упоко́й.

Таже, Ны́не отпуща́еши: и Трисвятое.

Отпустительный тропарь, глас 8:

Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.

Слава, и ныне, Богородичен, глас тойже: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

И бывает отпуст.

По отпущении же вечерни творим в притворе панихиду за усопших:

Последование Панихиды за усопших

Таже священник творит: Благослове́н Бог наш: И глаголем Псалом 90: Живы́й в по́мощи Вы́шняго:

Аллилу́иа: трижды.

Стих 1: Блаже́ни, я́же избра́л и прия́л еси́ Го́споди.

Стих 2: Па́мять их в род и род.

Стих 3: Ду́ши их во благи́х водворя́тся.

Тaже тропaрь, глас 8: Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.

И Богородичен: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

Тaже мeртвеннии тропари: Благослове́н еси́, Го́споди:

И поминaет священник всех преждепочивших отец и брaтий нaших, и молитву. По возглaсе же Псалом 50.

И абие поeм настоящий мeртвенный канон во усыпaльнице, егоже краестрочие: Шесту́ю припева́ю отше́дшему песнь. Феофаново. Глас 6.

Песнь 1.

Ирмос: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.

Припев: Упокой, Господи, души усопших раб Твоих.

В небе́сных черто́зех вы́ну до́блии му́ченицы мо́лят Тя, Христе́, / я́же от земли́ преста́вил еси́ ве́рныя, / ве́чных благ получи́ти сподо́би.

Украше́й вся́ческая, живо́тное смеше́нное, / посреде́ мя, челове́ка, смире́ния вку́пе и вели́чества, созда́л еси́, / те́мже раб Твои́х ду́ши, Спа́се, упоко́й.

Слава: Рая́ жи́теля и земледе́лателя в нача́ле мя учини́л еси́, / престу́пльша же Твою́ за́поведь изгна́л еси́, / те́мже раб Твои́х ду́ши, Спа́се, упоко́й.

И ныне, Богородичен: И́же от ребра́ Созда́вый Е́ву, пре́жде на́шу прама́терь, / из пречи́стаго Твоего́ чре́ва в плоть одева́ется, / е́юже сме́рти кре́пость, Чи́стая, разруши́.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Припев: Упокой, Господи, души усопших раб Твоих.

Зако́нно пострада́ша Твои́ му́ченицы, Жизнода́вче, / и венце́м побе́ды украси́вшеся, / от Тебе́ преста́вльшимся ве́рным ве́чное избавле́ние подаю́т.

Наказа́в пе́рвее мно́гими чудесы́ и зна́меньми мене́, заблу́дшаго, / напосле́док самого́ Себе́ истощи́л еси́, я́ко сострада́тель, / и поиска́в обре́л и спасл еси́.

Слава: От теку́щих непостоя́тельныя тли, к Тебе́ преше́дшия, / в селе́ниих ве́чных жи́ти ра́достно сподо́би, Бла́же, / оправда́в ве́рою же и благода́тию.

И ныне, Богородичен: Несть непоро́чны, я́коже Ты, Пречи́стая Богома́ти, / еди́на бо от ве́ка Бо́га и́стиннаго зачала́ еси́ во чре́ве, / сме́рти разруши́вшаго си́лу.

Таже ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Таже ектения.

Седален, глас 6: Вои́стинну суета́ вся́ческая, / житие́ же сень и со́ние, / и́бо всу́е мяте́тся всяк земноро́дный, / я́коже рече́ Писа́ние: / егда́ мiр приобря́щем, / тогда́ во гроб всели́мся, / иде́же вку́пе ца́рие и ни́щии. / Те́мже, Христе́ Бо́же, / преста́вльшияся упоко́й, / я́ко Человеколю́бец.

Слава, и ныне, Богородичен: Всесвята́я Богоро́дице, / во вре́мя живота́ мое́го не оста́ви мене́, / челове́ческому предста́тельству не вве́ри мя, / но Сама́ заступи́ и поми́луй мя.

Песнь 4.

Ирмос: Христо́с моя́ си́ла, / Бог и Госпо́дь, честна́я Це́рковь / боголе́пно пое́т, взыва́ющи / от смы́сла чи́ста, о Го́споде пра́зднующи.

Припев: Упокой, Господи, души усопших раб Твоих.

Прему́дрости бо́льшее явля́я позна́ние, / и е́же о даре́х многосоверше́нныя, Влады́ко, благосты́ни, / му́ченическия ли́ки а́нгелом сочета́л еси́.

Неизрече́нныя сла́вы Твоея́ / получи́ти сподо́би к Тебе́ преста́вльшияся, / иде́же, Христе́, веселя́щихся есть жили́ще, / и глас чи́стаго ра́дования.

Слава: Пою́щих приими́ Боже́ственную держа́ву Твою́, / и́хже от земли́ прия́л еси́, ча́да све́та тех соде́ловая, / грехо́вную мглу очища́я, Многоми́лостиве.

И ныне, Богородичен: Прия́телище пречи́стое, храм всенепоро́чный, ковче́г всесвяты́й, / де́вственное ме́сто свяще́ния, / Тебе́, добро́ту Иа́ковлю, Влады́ка избра́л есть.

Песнь 5.

Ирмос: Бо́жиим / све́том Твои́м, Бла́же, / у́тренюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Припев: Упокой, Господи, души усопших раб Твоих.

Я́ко всепло́дие свяще́нное, / и я́ко нача́ток челове́ческаго, му́ченицы, естества́ / просла́вленному прине́сшеся Бо́гу, / нам спасе́ние при́сно хода́тайствуют.

Небе́снаго пребыва́ния, раздая́ния дарова́ний сподо́би, Го́споди, / пре́жде усо́пшия ве́рныя рабы́ Твоя́, / подая́ прегреше́ний избавле́ние.

Слава: И́же еди́н естество́м Животво́рец, / и́же бла́гости вои́стинну неизсле́димая пучи́на, / сконча́вшияся Ца́рствия Твоего́ сподо́би, Ще́дре, / еди́не Безсме́ртне.

И ныне, Богородичен: Кре́пость и пе́ние и́же из Тебе́, Влады́чице, мiру Рожде́йся, / и спасе́ние быв поги́бшим, и́же от а́довых врат избавля́яй, / ве́рою Тебе́ блажа́щия.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Припев: Упокой, Господи, души усопших раб Твоих.

На Кресте́ пригвожда́емь, / му́ченическия ли́ки к Себе́ собра́л еси́, / подража́ющия страсть Твою́, Бла́же. / Те́мже мо́лимся Ти: к Тебе́ преста́вленныя ны́не упоко́й.

Неизрече́нною сла́вою Твое́ю, / егда́ прии́деши стра́шно суди́ти мiру всему́ на о́блацех, / благоволи́ све́тло сре́сти Тебе́, Изба́вителю, / я́же от земли́ прия́л еси́ ве́рныя рабы́ Твоя́.

Слава: Исто́чник жи́зни Сый, / му́жеством Боже́ственным окова́нныя, Влады́ко, изводя́й / рабы́ Твоя́, я́же к Тебе́ ве́рно отше́дшия, / в сла́дости ра́йстей всели́.

И ныне, Богородичен: В зе́млю возврати́хомся, престу́пльше Бо́жию за́поведь Боже́ственную, / Тобо́ю же, Де́во, на не́бо от земли́ вознесо́хомся, / тлю сме́ртную оттря́сше.

Таже ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Таже ектения.

Кондак, глас 8: Со святы́ми упоко́й, / Христе́, ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка, / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́ и в зе́млю оты́деши, / а́може вси челове́цы по́йдем, / надгро́бное рыда́ние творя́ще песнь: / аллилу́ия.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие, / мучи́теля увеща́ вопи́ти: / благослове́н еси́, Бо́же оте́ц на́ших.

Припев: Упокой, Господи, души усопших раб Твоих.

Изба́вльшиися Твое́ю кро́вию му́ченицы пе́рваго преступле́ния, / окропи́вшеся же свое́ю кро́вию, прообразу́ют я́ве Твое́ заколе́ние, / благослове́н еси́, Бо́же оте́ц на́ших.

Свирепе́ющую смерть умертви́л еси́, Сло́ве живонача́льнейший, / в ве́ре же усо́пшия приими́ ны́не воспева́ющия и глаго́лющия, Христе́: / благослове́н еси́, Бо́же оте́ц на́ших.

Слава: Воодуши́вый мя, челове́ка, вдохнове́нием Боже́ственным Богонача́льнейший Влады́ко, / преста́вленныя Ца́рствия Твоего́ сподо́би, пе́ти Тебе́, Спа́се: / благослове́н еси́, Бо́же оте́ц на́ших.

И ныне, Богородичен: Превы́шши вся́кия тва́ри, Пренепоро́чная, была́ еси́, заче́нши Бо́га, / сокруши́вшаго сме́ртная врата́ и вереи́ сте́ршаго: / те́мже Тя, Чи́стая, песносло́вим ве́рнии, я́ко Богома́терь.

Песнь 8.

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Припев: Упокой, Господи, души усопших раб Твоих.

Кре́пко по́двиги показу́юше, / побе́ды венце́м украси́стеся, му́ченицы Христо́вы страстоте́рпцы, зову́ще: / Тя превозно́сим, Христе́, во ве́ки.

Свяще́нне житие́ оста́вльшия ве́рныя, / и к Тебе́, Влады́це, преше́дшия, / приими́ кро́тце упокоева́я, я́ко благоутро́бен, / Тя превознося́щия во вся ве́ки.

Слава: Ны́не в земли́ кро́тких / вся водворя́тися пре́жде усо́пшия, Спа́се, благоизво́ли, / ве́рою, я́же в Тя оправда́в и благода́тию, / Тя превознося́щия во вся ве́ки.

И ныне, Богородичен: Вси Тя блажи́м, Всеблаже́нная, / ро́ждшую Сло́ва вои́стинну су́щаго Блаже́ннаго, / плоть нас ра́ди бы́вшаго; / Его́же превозно́сим во вся ве́ки.

Песнь 9.

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с небе́сными во́и Тя ублажа́ем.

Припев: Упокой, Господи, души усопших раб Твоих.

Наде́жда му́чеников ли́ки укрепи́, и к Твое́й любви́ распале́нне впери́ / бу́дущих сим предвообрази́вши непоколеби́мый вои́стинну поко́й, / его́же преста́вленныя, Бла́же, ве́рныя сподо́би получи́ти.

Све́тлаго и Боже́ственнаго получи́ти сия́ния Твоего́, Христе́, / ве́рою преста́вльшимся благоволи́ в не́дрех Авраа́мовых упокое́ние, / я́ко Еди́н ми́лостив, тем да́руя, и ве́чнаго сподобля́я блаже́нства.

Слава: И́же Сый естество́м благ и благоутро́бен, / и воли́тель ми́лости и благоутро́бия бе́здна, я́же от ме́ста сего́ озлобле́ния / и се́ни сме́ртныя, Спа́се, преста́вил еси́, / иде́же сия́ет Твой свет, ты́я учини́.

И ныне, Богородичен: Сень святу́ю, Чи́стая, разуме́ем, / и ковче́г, и скрижа́ль Тя зако́на и благода́ти; / Тобо́ю бо оставле́ние дарова́ся, / оправда́нным же кро́вию Воплоще́ннаго из Твоего́ Чре́ва, Всенепоро́чная.

Последование Утрени в субботу седьмой седмицы по Пасхе

По шестопсалмии, Аллилу́ия на глас 8, со стихи его:

Стих: Блаже́ни я́же избра́л, и прия́л еси́ Го́споди.

Стих: И па́мять их в род и род.

Тропарь, глас 8: Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего. Дважды.

Слава, и ныне, Богородичен, глас тойже: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

Таже обычное стихословие: Рече́ Госпо́дь Го́сподеви моему́: седи́ одесну́ю Мене́:

На всех же ектениах стихословия и канона поминаются вси прежде отшедшии отцы и братия наша.

По 1-м стихословии глаголем седальны мертвенны, и мученичны. Глас 6:

Страда́льческая противле́ния в по́двизе, / мучи́тельныя ра́ны на му́ченики, / и стоя́ху ли́цы безпло́тных, по́чести держа́ще побе́ды: / удиви́ша прему́дрии мучи́телей и царе́й, / низложи́ша велиа́ра испове́данием Христо́вым. / Укрепи́вый их Го́споди, сла́ва Тебе́.

Стих: Ди́вен Бог во святы́х Свои́х, / Бог Изра́илев.

Страда́льческий по́двиг претерпе́вше святи́и, / и по́чести побе́ды от Тебе́ прии́мше, / упраздни́ша кова́рства беззако́нных, прия́ша венцы́ нетле́ния. / Те́ми Бо́же, спаси́ ду́ши на́ша.

Стих: Воззва́ша пра́веднии, / и Госпо́дь услы́ша их.

Святы́х Твои́х па́мять Го́споди, / показа́ся я́коже рай, и́же во Еде́ме, / в ней бо ра́дуется вся тварь: / и пода́ждь нам тех моли́твами, мир / и ве́лию ми́лость.

Слава, покоин: В селе́ниих избра́нных, и во стране́ живу́щих, / я́же прия́л еси́ Иису́се, благоче́стно усо́пшия учини́, / я́ко благоуве́тливый Бог, / и испо́лни невече́рняго све́та, / и Небе́сныя Твоея́ ра́дости сподо́би.

И ныне, Богородичен: Благослове́нную нареки́й Твою́ Ма́терь, / прише́л еси́ на страсть во́льным хоте́нием, / возсия́в на Кресте́, взыска́ти хотя́ Ада́ма, / глаго́ля а́нгелом: сра́дуйтеся Мне, я́ко обре́теся поги́бшая дра́хма. / Вся му́дре устро́ивый Бо́же наш, сла́ва Тебе́.

Таже, Блаже́ни непоро́чнии: на две статии.

Тропари мертвеннии, глас 5.

Припев: Благослове́н еси́ Го́споди, / научи́ мя оправда́нием Твои́м.

Святы́х лик обре́те исто́чник жи́зни и дверь ра́йскую, / да обря́щу и аз путь покая́нием: / поги́бшее овча́ аз есмь, / воззови́ мя Спа́се, и спаси́ мя.

Припев: Благослове́н еси́ Го́споди, / научи́ мя оправда́нием Твои́м.

А́гнца Бо́жия пропове́давше, / и закла́ни бы́вше я́коже а́гнцы, / и к жи́зни нестаре́емей святи́и, / и присносу́щней преста́вльшеся. / Того́ приле́жно му́ченицы моли́те, / долго́в разреше́ние нам дарова́ти.

Припев: Благослове́н еси́ Го́споди, / научи́ мя оправда́нием Твои́м.

В путь у́зкий хо́ждшии приско́рбный, / вси в житии́ крест я́ко яре́м взе́мшии, / и Мне после́довавшии ве́рою, / прииди́те наслади́теся, / и́хже угото́вах вам по́честей, / и венцо́в небе́сных.

Припев: Благослове́н еси́ Го́споди, / научи́ мя оправда́нием Твои́м.

О́браз есмь неизрече́нныя Твоея́ сла́вы, / а́ще и я́звы ношу́ прегреше́ний: / уще́дри Твое́ созда́ние Влады́ко, / и очи́сти Твои́м благоутро́бием, / и возжеле́нное оте́чество пода́ждь ми, / рая́ па́ки жи́теля мя сотворя́я.

Припев: Благослове́н еси́ Го́споди, / научи́ мя оправда́нием Твои́м.

Дре́вле у́бо от не су́щих созда́вый мя, / и о́бразом Твои́м Боже́ственным почты́й, / преступле́нием же за́поведи / па́ки мя возврати́вый в зе́млю, от нея́же взят бых, / на е́же по подо́бию возведи́ / дре́внею добро́тою возобрази́тися.

Припев: Благослове́н еси́ Го́споди, / научи́ мя оправда́нием Твои́м.

Упоко́й Бо́же рабы́ Твоя́, / и учини́ я в раи́, / иде́же ли́цы святы́х Го́споди, / и пра́ведницы сия́ют я́ко свети́ла, / усо́пшия рабы́ Твоя́ упоко́й, / презира́я их вся согреше́ния.

Слава: Трисия́тельное еди́наго Божества́, благоче́стно пое́м вопию́ще: / Свят еси́ О́тче Безнача́льный, / Собезнача́льный Сы́не, и Боже́ственный Ду́ше: / просвети́ нас ве́рою Тебе́ служа́щих, / и ве́чнаго огня́ исхити́.

И ныне: Ра́дуйся Чи́стая, Бо́га пло́тию ро́ждшая во спасе́ние всех, / Е́юже род челове́ческий обре́те спасе́ние: / Тобо́ю да обря́щем рай, / Богоро́дице Чи́стая благослове́нная.

Аллилу́ия, аллилу́ия, аллилу́ия, сла́ва Тебе́ Бо́же. Трижды.

Посем ектениа о усопших преждереченная.

Па́ки и па́ки: Мы же, Господи, помилуй, 40.

Иерей молитву: Бо́же духо́в:

И по возгласе седален, глас 5, за упокой:

Поко́й Спа́се наш, / с пра́ведными рабы́ Твоя́, / и сия́ всели́ во дворы́ Твоя́, / я́коже есть пи́сано: / презира́я я́ко благ прегреше́ния их / во́льная и нево́льная, / и вся я́же в ве́дении и не в ве́дении, Человеколю́бче.

Слава, и ныне, Богородичен: От Де́вы возсия́вый мiру Христе́ Бо́же, / и сы́ны све́та То́ю показа́вый, поми́луй нас.

Псалом 50.

Канон святаго обители, со ирмосом на 6, и настоящий на 8.

Канон Студита творение, в Троичных и Богородичных тропарех, краестрочие: Недосто́йнаго Фео́дора [Ту анакси́у Феодо́ру]. Глас 8.

Песнь 1.

Ирмос: Песнь возсле́м лю́дие / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́ еди́ному Влады́це.

Припев: Упокой, Господи, души усопших раб Твоих.

Вси помо́лимся Христу́, / творя́ще па́мять днесь от ве́ка ме́ртвых, / да ве́чнаго огня́ изба́вит я в ве́ре усо́пшия, / и наде́жде жи́зни ве́чныя.

Глубино́ю суде́б Твои́х Христе́, / Всепрему́дре Ты предопредели́л еси́ / коего́ждо кончи́ну жи́зни, преде́л и о́браз. / Те́мже я́же покры́ гроб во вся́кой стране́, / на суде́ спаси́ Всеще́дрый.

Преде́лы жи́зни на́шея да́вый, / те́мже усо́пшия от жите́йския но́щи, / дне невече́рняго сы́ны покажи́ Го́споди, / свяще́нники правосла́вныя, и вся ве́рныя лю́ди Твоя́.

Я́же покры́ вода́, и брань пожа́т, / трус же я́же объя́т, и уби́йцы уби́ша, / и о́гнь я́же попали́, ве́рныя, / Ми́лостиве в ча́сти учини́ пра́ведных.

Вся презира́яй плотски́я до́лги на́ша Спа́се наш, / во вся́ком во́зрасте всего́ ро́да челове́ча, / пред суди́щем Твои́м поста́ви неосужде́ны, / Тебе́ Созда́телю отвеща́ющия.

[Τ] Слава, Троичен: Три еди́наго Естества́ пою́, Ли́ца самоипоста́сная, / нерожде́нна Отца́, Сы́на ро́ждшагося, и Ду́ха Свята́го: / безнача́льное Ца́рство, власть, Божество́ еди́но.

[Ο] И ныне, Богородичен: Вои́стинну Ты яви́лася еси́ не́бо на земли́, / бо́льшее вы́шняго небесе́, Безневе́стная Де́во: / из Тебе́ бо возсия́ Со́лнце в мiре, влады́чествуяй пра́вдою.

Катавасия: Песнь возсле́м лю́дие / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́ еди́ному Влады́це.

Песнь 2:

Ирмос: Ви́дите ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся / и разруши́вый грех пра́отца Ада́ма, я́ко Человеколю́бец.

Припев: Упокой, Господи, души усопших раб Твоих.

Ви́дите ви́дите, я́ко Аз есмь Бог ваш, / пра́ведным судо́м водрузи́вый преде́лы жи́зни, / в нетле́ние от тли прие́мляй вся усо́пшия / в наде́жди ве́чнаго воскре́сния.

От четы́рех коне́ц Го́споди, прие́мляй ве́рно усо́пшия, / в мо́ри, или́ на земли́, или́ в река́х, исто́чницех, или́ е́зерех, / или́ в рове́нницех снедь звере́м бы́вшия, и пти́цам, и гадо́м, вся упоко́й.

В Твое́й дла́ни вся́ческая Го́споди, / предразсуди́л еси́, разре́шшияся в соста́вы четы́ри: / в прише́ствии Твое́м собра́в воскреси́, / вся я́же в неве́дении, и ра́зуме, проща́я тем прегреше́ния.

О стра́шнаго Твоего́ втора́го, Го́споди, прише́ствия! / Зане́ я́ко в ви́де мо́лнии на зе́млю прише́д, / воздви́гнеши все созда́ние Твое́ суди́тися, / в ве́ре Тебе́ тогда́ пожи́вших, / сре́тших Тя с Тобо́ю бы́ти сподо́би.

[Υ] Слава, Троичен: Пресоверше́нная Еди́нице, Пребоже́ственная, Триипоста́сная, / нерожде́нне О́тче и Сы́не Единоро́дне, Ду́ше от Отца́ исходя́й, Сы́ном же явля́яйся: / Существо́ еди́но и Естество́, Госпо́дьство, Ца́рство, спаси́ всех нас.

[Α] И ныне, Богородичен: Неизглаго́ланное чу́до Твоего́ Рождества́ Ма́ти Де́во: / ка́ко бо и ражда́еши, и Чиста́ еси́ в то́мже? / Ка́ко Отроча́ ражда́еши, и не ве́си иску́са му́жеска отню́д? / Я́коже весть па́че естества́ от Мене́ новоле́пно Сло́во Бо́жие ро́ждшееся.

Катавасия: Ви́дите ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся / и разруши́вый грех пра́отца Ада́ма, я́ко Человеколю́бец.

Песнь 3.

Ирмос: Утвержде́й руко́ю Твое́ю, Сло́ве Бо́жий небеса́, / просвеще́нием Твоего́ и́стиннаго позна́ния, / утверди́ и нас на Тя наде́ющихся сердца́.

Припев: Упокой, Господи, души усопших раб Твоих.

Преше́дшия жития́ тече́ние, / в сла́ве благоче́стной пра́ведным оде́ятися венце́м сподо́би Бо́же, / и ве́чных благ наслади́тися.

Напра́сно восхище́нныя, попаля́емыя от мо́лнии, / и изме́рзшия мра́зом, и вся́кою ра́ною, / упоко́й Бо́же, егда́ огне́м вся иску́сиши.

Присному́тное жития́ мо́ре преплы́вшия, Христе́, / в нетле́нное Твоего́ жития́ сподо́би приста́нище притещи́, / правосла́вным житие́м окормле́ныя.

И́хже вся́кое естество́ морски́х и птиц небе́сных, / прия́т снеде́ние Христе́, Твои́ми судьба́ми, / воскреси́ Бо́же, в после́дний день со сла́вою.

[Ν] Слава, Троичен: У́мно Боже́ственную Еди́ницу, / в три Ли́ца про́сто ку́пно е́же пресещи́ совокупля́ю несеко́мая: / я́коже бо ско́рость мо́лнии, трисия́ющая ви́дится во еди́нстве.

[Α] И ныне, Богородичен: Недоуме́нное Твое́ чу́до: без му́жа бо ражда́еши, / и де́вство Твое́ Чи́стая, соблюда́еши ро́ждши. / Те́мже а́нгел мно́жество, и челове́ческий род пое́т Тя во ве́ки.

Катавасия: Утвержде́й руко́ю Твое́ю, Сло́ве Бо́жий небеса́, / просвеще́нием Твоего́ и́стиннаго позна́ния, / утверди́ и нас на Тя наде́ющихся сердца́.

Седален, глас 5: Подобен: Собезнача́льное Сло́во:

Нас ра́ди претерпе́вый Крест и смерть, / и умертви́вый ад, и совоскреси́вый ме́ртвыя, / преста́вльшияся от нас Спа́се, упоко́й, я́ко Человеколю́бец Бог, / и в тре́петное и стра́шное прише́ствие Твое́ Жизнода́вче, / я́ко име́яй мно́жество ми́лости, / Ца́рствия Твоего́ сподо́би.

Слава, тойже.

И ныне, Богородичен: Ско́рый Твой покро́в, и по́мощь и ми́лость покажи́ на рабе́х Твои́х, / и во́лны Чи́стая, укроти́ су́етных помышле́ний, / и па́дшую ду́шу мою́ возста́ви Богоро́дице: / вем бо, вем Де́во, я́ко мо́жеши, ели́ка и хо́щеши.

Песнь 4.

Ирмос: Из горы́ приосене́нныя Сло́ве, проро́к, / еди́ныя Богоро́дицы, / хотя́ще воплоти́тися, богови́дно усмотри́, / и со стра́хом славосло́вяше си́лу Твою́.

Припев: Упокой, Господи, души усопших раб Твоих.

Отцы́ и пра́отцы, де́ды и пра́деды, / от пе́рвых и да́же до после́дних, / во благозако́нии уме́ршия и благове́рии, / вся помяни́ Спа́се наш.

В горе́, на пути́, на ме́стех пусты́х житие́ оста́вльшия в ве́ре, / мона́хи же и бельцы́, ю́ноши и ста́рцы, / со святы́ми Христе́ всели́.

От печа́ли и ра́дости преше́дшия ненаде́жно, / ве́рою а́бие премени́вшия житие́, / в благоде́нствии пострада́вшия, или́ злоде́нствии, / вся упоко́й Спа́се наш.

Я́же уби мечь, и конь совосхи́ти, / град, снег и ту́ча умно́женная: / я́же удави́ пли́нфа, или́ персть посы́па, / Христе́ Спа́се наш упоко́й.

[Ξ] Слава, Троичен: Стра́нно я́ко еди́но, и три, / Божество́ все по еди́ному Лицу́ неразде́льно: / Оте́ц бо, Сын, и Дух Святы́й есть покланя́емь, я́ко един Бог.

[Ι] И ныне, Богородичен: Напра́ви нас Де́во, моли́твами Твои́ми, / окормля́ющи обурева́емыя волно́ю греха́, / во спаси́тельная приста́нища, Господороди́тельнице, / избавля́ющи от вся́ких лю́тых.

Катавасия: Из горы́ приосене́нныя Сло́ве, проро́к, / еди́ныя Богоро́дицы, / хотя́ще воплоти́тися, богови́дно усмотри́, / и со стра́хом славосло́вяше си́лу Твою́.

Песнь 5.

Ирмос: У́тренюет дух мой к Тебе́ Бо́же, / зане́ свет повеле́ния прише́ствия Твоего́: / и́миже у́бо озари́ ум наш Влады́ко, / и наста́ви на стезю́ жи́зни.

Припев: Упокой, Господи, души усопших раб Твоих.

Коего́ждо па́мять уме́рших благоче́стно / от ве́ка днесь творя́ще Го́споди, / приле́жно Ти вопие́м: / вся упоко́й со святы́ми Твои́ми.

От вся́каго, я́же прия́л еси́, ро́да и ро́да / в царе́х, в князе́х, или́ мона́шествующих правосла́вныя, Ще́дре, / ве́чнаго изба́ви муче́ния.

Всех я́же созда́л еси́ поле́зная ве́дый, / и́мже попусти́л еси́ Го́споди, внеза́пными паде́жьми ненаде́жно умре́ти, / изба́ви му́ки вся́кия Бо́же наш.

Огня́ при́сно паля́щаго, и от тьмы несвети́мыя, / скре́жета зу́бнаго, и че́рвия безконе́чно му́чащаго и вся́каго муче́ния / изба́ви Спа́се наш, вся ве́рно уме́ршия.

[Ο] Слава, Троичен: Единопресто́льная, безнача́льная, Триипоста́сная Еди́нице, / разделе́нием Еди́нство, и вопроти́в Ли́цы Естество́ иму́щая, / во еди́но нас совокупи́ хоте́ние Твои́х за́поведей.

[Υ] И ныне, Богородичен: Па́че огнезра́чных серафи́мов яви́лася еси́ Чи́стая Честне́йшая, / поро́ждши сим непристу́пнаго Иису́са Спа́са, / воплоще́нием обожи́вшаго земноро́дных смеше́ние.

Катавасия: У́тренюет дух мой к Тебе́ Бо́же, / зане́ свет повеле́ния прише́ствия Твоего́: / и́миже у́бо озари́ ум наш Влады́ко, / и наста́ви на стезю́ жи́зни.

Песнь 6.

Ирмос: Содержи́ма мя приими́ Человеколю́бче, грехи́ мно́гими / и припа́дающа щедро́там Твои́м, / я́ко проро́ка Го́споди, и спаси́ мя.

Припев: Упокой, Господи, души усопших раб Твоих.

Сме́рти разреши́в боле́зни, пострада́в Нача́льниче жи́зни Бо́же наш, / усо́пшия от ве́ка рабы́ Твоя́ упоко́й.

Неизглаго́ланными Твои́ми судьба́ми, / я́же уби́ша чаро́вная напое́ния, отра́вы, ко́стная удавле́ния, / со святы́ми Го́споди упоко́й.

Егда́ суди́ти бу́деши вся́ческим, / стоя́щим наги́м и открове́ным пред лице́м Твои́м: / тогда́ Ще́дре, пощади́ послужи́вшия Ти ве́рно Бо́же.

После́днею у́бо трубо́ю воструби́вшу Твоему́ Арха́нгелу, / в воскресе́ние жи́зни / всех, тогда́ Христе́, рабы́ Твоя́ упоко́й.

От ве́ка я́же прия́л еси́ ве́рныя Бо́же, / род вся́кий челове́ческий сподо́би, / во ве́ки со служа́щими Тебе́, сла́вити Тя.

[Θ] Слава, Троичен: Богонача́лие Трисвято́е, единопресто́льное, / О́тче, Сы́не со Святы́м Ду́хом, / Ты еси́ Бог мой, вседержи́тельством Твои́м содержа́й все.

[Ε] И ныне, Богородичен: От ко́рене твоего́ возсия́ цвет жи́зни, / Иессе́е пра́отче взыгра́й / спаса́яй мiр, от Чи́стыя Отрокови́цы Христо́с Бог.

Катавасия: Содержи́ма мя приими́ Человеколю́бче, грехи́ мно́гими / и припа́дающа щедро́там Твои́м, / я́ко проро́ка Го́споди, и спаси́ мя.

Кондак, глас 8: Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши: / а́може вси челове́цы по́йдем, / надгро́бное рыда́ние, творя́ще песнь: / аллилу́ия.

Песнь 7.

Ирмос: В нача́ле зе́млю основа́вый, / и небеса́ Сло́вом утверди́вый, / благослове́н еси́ во ве́ки, / Го́споди Бо́же Оте́ц на́ших.

Припев: Упокой, Господи, души усопших раб Твоих.

Благоче́стно от ве́ка преста́вльшихся па́мять творя́ще, вопие́м: / благослове́н еси́ во ве́ки, Го́споди Бо́же Оте́ц на́ших.

Внеза́пу благоче́стно уме́ршия, и от стремни́ны вся́ческия па́дшия, / дре́ва, желе́за, вся́каго ка́мене, / упоко́й Бо́же усо́пшия ве́рныя.

В стра́шное Твое́ прише́ствие Ще́дре, одесну́ю ове́ц Твои́х поста́ви, / правосла́вно Ти в жи́зни послужи́вшия Христе́, и преста́вльшияся к Тебе́.

В ли́це Христе́, избра́нных Твои́х вчини́ Твоя́ рабы́, вопи́ти Тебе́: / благослове́н еси́ во ве́ки, Го́споди Бо́же Оте́ц на́ших.

От земли́ персть соде́тельствовавый, / плоть Ду́хом оживотвори́вый, Спа́се Ще́дрый, / я́же прия́л еси́, упоко́й Бо́же, в нестаре́ющем животе́.

[Ο] Слава, Троичен: Я́коже треми́ со́лнцы Божество́, / еди́ным све́та срастворе́нием да воспое́тся, / Оте́ц, и Сын, и Боже́ственный Дух, / еди́н Естество́м, но три Ипоста́сьми.

[Δ] И ныне, Богородичен: Дави́дское согла́сно воспева́ем Ти пе́ние, / го́ру Тя Бо́жию нарица́юще Де́во, / в не́йже всели́вся пло́тию Сло́во, / обоготвори́ нас духо́вно в Себе́.

Катавасия: В нача́ле зе́млю основа́вый, / и небеса́ Сло́вом утверди́вый, / благослове́н еси́ во ве́ки, / Го́споди Бо́же Оте́ц на́ших.

Песнь 8.

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте и превозноси́те во вся ве́ки.

Припев: Упокой, Господи, души усопших раб Твоих.

Сокруши́вый пе́рвее сень сме́ртную, / возсия́в я́ко со́лнце из гро́ба, / сы́ны Воскресе́ния Твоего́ сотвори́, Го́споди сла́вы, / вся уме́ршия в ве́ре, во ве́ки.

Безве́стных и сокрове́нных Све́детелю, / егда́ и́маши откры́ти дела́ тьмы и сове́ты серде́ц на́ших, / тогда́ не истяжи́ сло́ва со все́ми ве́рою усо́пшими.

Егда́ и́маши се́сти на престо́ле, и повели́ши на суд предста́ти, / со́бранным трубо́ю от коне́ц земли́: / тогда́ пощади́ всех Христе́, я́ко Ми́лостивый.

Уме́ршим напра́сно от слу́чаев, / от кли́ча же зе́льнаго и ско́раго тече́ния, / зауше́ния, удавле́ния же, и ляга́ния, / Го́споди сла́вы, ве́рою усо́пшим осла́би во ве́ки.

Благословим Отца и Сына, и Святаго Духа, Господа.

[Ω] Я́ко Еди́ницу Существо́м пою́ Тя, / я́ко Тро́ицу Ли́цы Тя чту: / О́тче, и Сы́не, и Ду́ше Пресвяты́й, / безнача́льную держа́ву Твоего́ Ца́рствия сла́влю во ве́ки.

[Ρ] И ныне, Богородичен: Струи́ живы́я исто́чник запечатле́нный, показа́лася еси́ Богоро́дице Де́во: / без му́жа бо Го́спода ро́ждши, / безсме́ртия ве́рныя напая́еши водо́ю во ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте и превозноси́те во вся ве́ки.

Песнь 9.

Ирмос: Проявле́нное на горе́ законополо́жнику во огни́ и купине́ / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Припев: Упокой, Господи, души усопших раб Твоих.

Иде́же есть веселя́щихся жили́ще святы́х Твои́х Го́споди, / вся от ве́ка усо́пшия, в ве́ре же и наде́жди ра́доватися сподо́би.

Уме́ршия Бо́жиим преще́нием, / сме́ртных громо́в вся́ких с небесе́ изнесе́нных, / земли́ разсе́дшейся, мо́рю возшуме́вшуся, / вся ве́рныя Христе́, упоко́й.

Вся́кий во́зраст, ста́рцы и ю́ныя, / младе́нцы и де́ти, и ссу́щия млеко́, / му́жеское естество́ и же́нское, / упоко́й Бо́же, я́же прия́л еси́ ве́рныя.

От ядови́тых угрызе́ний уме́ршия, / от поглоще́ния змие́в, от попра́ния ко́ней, / и от удавле́ния, и обе́шения от и́скренняго, / ве́рою Ти послужи́вшия упоко́й.

Коего́ждо по и́мени в ве́ре уме́ршия, / от ве́ка и от ро́да родо́в, / неосужде́нно предста́ти Тебе́ Сло́ве, / в прише́ствии Твое́м сподо́би.

[Ο] Слава, Троичен: Еди́ный в Тро́ице Бо́же, сла́ва Тебе́ непреста́нно: / а́ще бо и Бог Ки́йждо, но еди́н Естество́м есть, / Оте́ц, и Сын, и Дух, трисве́тлыми сво́йствы.

[Υ] И ныне, Богородичен: Па́че ума́ Рождество́ Твое́: ражда́еши бо пре́жде Су́щаго, / и млеко́м пита́еши несказа́нно, Пищеда́вца мiру: / держи́ши же содержа́щаго вся, Христа́ еди́наго / Изба́вителя на́шего, Всенепоро́чная.

Катавасия: Проявле́нное на горе́ законополо́жнику во огни́ и купине́ / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Таже: Досто́йно есть:

Ексапостиларий. Подобен: Не́бо звезда́ми:

Па́мять соверша́юще всех усо́пших во Христе́, / и коне́чный день воспомя́нем ве́рнии, / о нас же и о о́ных Христа́ при́сно моля́ще.

Слава, и ныне, Богородичен: Сла́досте а́нгелов, скорбя́щих ра́досте, / христиа́н предста́тельнице, Де́во Ма́ти Госпо́дня, / заступи́ нас и изба́ви ве́чных мук.

На хвалитех, Вся́кое дыха́ние: поставим стихи 4, и поем настоящие стихиры во глас 6. Подобен: Отчаянная:

Стра́шный коне́ц сме́рти, / и гро́зный суд Влады́ки: / огнь бо неугаси́мый угото́вися та́мо: / червь неусыпа́емый му́чай, и скре́жет зубо́в, / тьма кроме́шная есть, и ве́чное осужде́ние. / Те́мже зове́м ко Спа́су: / я́же избра́л еси́ от привре́менных, упоко́й, / за ве́лию Твою́ ми́лость.

Вси в житии́ оста́вльшиися, / прииди́те, во гробе́х ужаса́ющеся прини́кните, / и ви́дите міра пре́лесть: / где ны́не те́ла добро́та, и сла́ва бога́тства; / где же го́рдость жития́; / вои́стинну су́етная вся. / Те́мже зове́м ко Спа́су: / я́же избра́л еси́ от привре́менных, упоко́й, / за ве́лию Твою́ ми́лость.

Ны́не во гроб, и́же на престо́ле, / ны́не и́же в порфи́ре, во тлю облече́ся: / не ктому́ бо на престо́ле, но во гро́бе лежи́т. / Се исчезе́ ца́рская держа́ва, / се я́ко со́ние челове́ческое прехо́дит житие́. / Те́мже зове́м ко Спа́су: / я́же избра́л еси́, упоко́й, / за ве́лию Твою́ ми́лость.

Вся отсе́ле преложи́вшияся в наде́жде жи́зни ве́чныя, / и житие́ измени́вшия вся́ким Спа́се о́бразом, / вся́кий чин и род, и вся́кий во́зраст, / му́жи вку́пе и жены́ и новорожде́нные младе́нцы, / я́ко Человеколю́бец в не́дрех учини́ Авраа́млих, / и в ме́стех осла́бы, / за ве́лию Твою́ ми́лость.

Слава, глас 2: Я́ко цвет увяда́ет, и я́ко сень мимогряде́т, / разруша́ется вся́к челове́к. / Па́ки же глася́щей трубе́, / ме́ртвии я́ко в тру́се вси воста́нут ко Твоему́ сре́тению Христе́ Бо́же. / Тогда́ Влады́ко, и́хже преста́вил еси́ от нас, / во святы́х Твои́х учини́ кро́вех, / согреше́ния их, Благосе́рде, презира́я.

И ныне, глас 6, Богородичен: Ты еси́ Бог наш, / и́же прему́дростию соде́лавый вся, / и́же и проро́ки посла́вый нам проро́чествовати Твое́ прише́ствие, / и апо́столы, пропове́дати Твоя́ вели́чия. / И о́ви у́бо проро́чествоваху прише́ствие Твое́, / о́ви же креще́нием просвети́ша язы́ки. / Му́ченицы же пострада́вше, получи́ша сла́ву от сих, / и мо́лятся приле́жно Тебе́, Влады́це, / с ро́ждшею Тя Ма́терию: / упоко́й Бо́же ду́ши, я́же прия́л еси́, / и нас сподо́би Ца́рствия Твоего́, / Крест претерпе́вый мене́ ра́ди осужде́ннаго, / Изба́вителю мой и Бо́же.

На стиховне стихиры, глас 6. Подобен: Всю отложи́вше:

Име́яй непости́жное к нам благоутро́бие, / и исто́чник неистоща́емый Боже́ственныя бла́гости, Многоми́лостиве, / к Тебе́, Влады́ко преше́дшия в земли́ живы́х всели́, / в селе́ниих возлю́бленных и вожделе́нных, / одержа́ние да́руяй вы́ну пребыва́ющее: / Ты бо за всех пролия́л еси́ кровь Твою́, Христе́, / и живоно́сною цено́ю мiр искупи́л еси́.

Стих: Ду́ши их во благи́х водворя́тся.

Умерщвле́ние претерпе́л еси́ животво́рное во́лею, / и жизнь источи́л еси́, / и сла́дость присносу́щную ве́рным дал еси́, / Боже́ственным, Влады́ко, благоутро́бием, / еди́не всеще́дре безгре́шне: / в ню́же мо́лимся, / счини́ усо́пшия в наде́жди воскресе́ния, / разреше́ние прегреше́ний да́руяй: / да все́ми пое́тся и́мя Твое́, Христе́, / и спасе́ни сла́вим человеколю́бие Твое́.

Стих: Блаже́ни я́же избра́л, и прия́л еси́ Го́споди.

Живы́ми Госпо́дьствующа богонача́льною вла́стию, / и ме́ртвыми влады́чествующа: / Тебе́, Христе́, ве́дуще мо́лим: / ве́рныя рабы́ Твоя́, к Тебе́ еди́ному Благоде́телю отше́дшия, / Сам упоко́й со избра́нными Твои́ми, Человеколю́бче, / в ме́стех прохлажде́ния, во святы́х све́тлостех: / воли́тель бо ми́лости еси́, и спаса́еши я́ко Бог, / я́же по о́бразу Твоему́ созда́л еси́, / еди́не Многоми́лостиве.

Слава, глас тойже: Боле́знь Ада́му бысть, дре́ва вкуше́нием, дре́вле во Еде́ме, / егда́ змий яд изблева́: / того́ бо ра́ди вни́де смерть всеро́дная, снеда́ющая челове́ка. / Но прише́д Влады́ка низложи́ зми́я, / и воскресе́ние нам дарова́. / К Нему́же у́бо возопии́м: / пощади́ Спа́се, и́хже прия́л еси́, / и со святы́ми поко́й, я́ко Человеколю́бец.

И ныне, Богородичен: Яви́лася еси́ пребыва́ние боголе́пное Пресвята́я, / и Бо́га вмести́ла еси́, / и Бо́га родила́ еси́ неискусобра́чная во двою́ существу́, / во еди́ной же ипоста́си, Чи́стая. / Того́ моли́ Единоро́днаго, и Перворожде́ннаго, / Тя, Де́во, непоро́чну и по рождестве́ сохра́ньшаго, / ду́ши упоко́ити ве́рою усо́пших, / во све́те нетле́нныя све́тлости и блаже́нстве.

Тропарь, глас 8: Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.

Слава, и ныне, Богородичен, глас тойже: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

И обычный отпуст.

Последование Литургии в субботу седьмой седмицы по Пасхе

Изобразительная. Блаженны канона Триоди, песнь 3-я со ирмосом и 6-я, на 8.

Прокимен, глас 6: Ду́ши их / во благи́х водворя́тся.

Стих: К Тебе Го́споди, воздвиго́х ду́шу мою́.

Деяний святых Апостол чтение, зачало 51 (Деян. 28:1–31).

Во дни о́ны, спасе́ни бы́вше и́же о Па́вле от корабля́, тогда́ разуме́ша, я́ко о́стров Мели́т нарица́ется. Ва́рвари же творя́ху не ма́лое милосе́рдие нам: возгне́щше бо огнь, прия́ша всех нас, за настоя́щий дождь и зи́му. Сграма́ждшу же Па́влу ро́ждия мно́жество, и возло́жшу на огнь, ехи́дна от теплоты́ изше́дши, секну́ в ру́ку его́. И я́коже ви́деша ва́рвари ви́сящу змию́ от руки́ его́, глаго́лаху друг ко дру́гу: вся́ко уби́йца есть челове́к сей, его́же спасе́на от мо́ря суд Бо́жий жи́ти не оста́ви. Той же у́бо, оттря́с змию́ во огнь, ничто́же зло пострада́. Они́ же ча́яху его́ хотя́ща возгоре́тися, или́ па́сти внеза́пу ме́ртва: на мно́зе же [того́] ча́ющим, и ничто́же зло в нем бы́вше ви́дящим, претво́ршеся, глаго́лаху Бо́га того́ бы́ти. О́крест же ме́ста о́наго бя́ху се́ла пе́рваго во о́строве, и́менем Попли́а, и́же прии́м нас, три дни любе́зне учреди́. Бысть же отцу́ Попли́еву огне́м и водны́м трудо́м одержи́му лежа́ти: к нему́же Па́вел вшед, и помоли́вся, и возло́ж ру́це свои́ нань, исцели́ его́. Сему́ же бы́вшу, и про́чии иму́щии неду́ги во о́строве том, прихожда́ху и исцелева́хуся. И́же и мно́гими честьми́ почто́ша нас, и отвозя́щимся нам, я́же на потре́бу вложи́ша. По трех же ме́сяцех отвезо́хомся в корабли́ александри́йстем, подпи́саном Диоску́ры, презиме́вшем во о́строве. И доплы́вше в Сираку́сы, пребы́хом дни три. Отту́ду же отплы́вше, приидо́хом в риги́ю, и по еди́ном дни возве́явшу ю́гу, во вторы́й день приидо́хом в Потио́лы. Иде́же обре́тше бра́тию, умоле́ни бы́хом от них пребы́ти дней седмь: и та́ко в Рим идо́хом. И от та́мо бра́тия, слы́шавше я́же о нас, изыдо́ша во сре́тение на́ше да́же до Аппи́ева торга́, и трие́х корче́мниц, и́хже ви́дев Па́вел и благодари́в Бо́га, прия́т дерзнове́ние. Егда́ же приидо́хом в Рим, со́тник предаде́ у́зники воево́де, Па́влу же повеле́ пребыва́ти осо́бь, соблюда́ющим его́ во́ином. Бысть же по днех трех, созва́ти Па́влу су́щия от иуде́ев пе́рвыя: сше́дшимся же им, глаго́лаше к ним: му́жие бра́тие, аз ничто́же проти́вно сотво́рь лю́дем или́ обы́чаем оте́ческим, у́зник от Иерусали́млян пре́дан бых в ру́це ри́мляном. И́же разсуди́вше я́же о мне, хотя́ху пусти́ти, зане́ ни еди́ней вине́ сме́ртней бы́ти во мне. Сопроти́в же глаго́лющим иуде́ем, ну́жда ми бысть нарещи́ ке́саря, не я́ко язы́к мой име́я в чесо́м оклевета́ти. Сея́ ра́ди у́бо вины́ умоли́х вас ви́дети и бесе́довати: наде́жды бо ра́ди изра́илевы вери́гами си́ми обложе́н есмь. Они́ же к нему́ ре́ша: мы ниже́ писа́ния о тебе́ прия́хом от иуде́й, ниже́ прише́д кто от бра́тий возвести́ или глаго́ла что о тебе́ зло. Мо́лимся же от тебе́ слы́шати, я́же му́дрствуеши: о е́реси бо сей ве́домо есть нам, я́ко всю́ду сопроти́в глаго́лема есть. Уста́вивше же ему́ день, приидо́ша к нему́ в странноприе́мницу мно́жайшии, и́мже сказа́ше свиде́тельствуя Ца́рствие Бо́жие, и уверя́я их, я́же о Иису́се, от зако́на моисе́ова и проро́к, от у́тра да́же до ве́чера. И о́ви у́бо ве́роваху глаго́лемым, о́ви же не ве́роваху. Несогла́сни же су́ще друг ко дру́гу отхожда́ху, ре́кшу Па́влу глаго́л еди́н, я́ко до́бре Дух Святы́й глаго́ла Иса́ием проро́ком ко отце́м на́шим. Глаго́ля: иди́ к лю́дем сим и рцы: слу́хом услы́шите, и не и́мате разуме́ти: и ви́дяще у́зрите, и не и́мате ви́дети. Одебеле́ бо се́рдце люде́й сих, и уши́ма тя́жко слы́шаша, и о́чи свои́ смежи́ша, да не ка́ко уви́дят очи́ма, и уши́ма услы́шат, и се́рдцем уразуме́ют, и обратя́тся, и исцелю́ их. Ве́домо у́бо да бу́дет вам, я́ко язы́ком посла́ся спасе́ние Бо́жие, си́и и услы́шат. И сия́ тому́ ре́кшу, отыдо́ша иуде́и, мно́гое иму́ще между́ собо́ю состяза́ние. Пребы́сть же Па́вел два ле́та испо́лнь свое́ю мздо́ю, и приима́ше вся приходя́щия к нему́. Пропове́дуя Ца́рствие Бо́жие и уча́ я́же о Го́споде на́шем Иису́се Христе́, со вся́ким дерзнове́нием невозбра́нно.

Другий за упокой, к Коринфяном, зачало 163 (1 Кор. 15:47–57).

Бра́тие, пе́рвый челове́к от земли́ пе́рстен, вторы́й Челове́к Госпо́дь с небесе́. Яко́в пе́рстный, такови́ и пе́рстнии: и яко́в небе́сный, та́цы же и небе́снии. И я́коже облеко́хомся во о́браз пе́рстнаго, да облече́мся и во о́браз небе́снаго. Сие́ же глаго́лю, бра́тие, я́ко плоть и кровь Ца́рствия Бо́жия насле́дити не мо́гут, ниже́ тле́ние нетле́ния насле́дствует. Се та́йну вам глаго́лю: вси бо не у́спнем, вси же измени́мся. Вско́ре, во мгнове́нии о́ка, в после́дней трубе́: востру́бит бо, и ме́ртвии воста́нут нетле́нни, и мы измени́мся. Подоба́ет бо тле́нному сему́ облещи́ся в нетле́ние, и ме́ртвенному сему́ облещи́ся в безсме́ртие. Егда́ же тле́нное сие́ облече́тся в нетле́ние, и сме́ртное сие́ облече́тся в безсме́ртие, тогда́ бу́дет сло́во напи́санное: поже́рта бысть смерть побе́дою. Где ти сме́рте, жа́ло; где ти а́де, побе́да? Жа́ло же сме́рти грех: си́ла же греха́ зако́н. Бо́гу же благодаре́ние, да́вшему нам побе́ду Го́сподем на́шим Иису́с Христо́м.

Аллилуия, глас 4: Блаже́ни, я́же избра́л, и прия́л еси́ Го́споди.

Стих: И па́мять их в род и род.

Евангелие от Иоанна, воскресно 11, зачало 67 (Ин. 21:15–25).

Во вре́мя о́но, яви́ся Иису́с ученико́м Свои́м воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла Ему́: ей Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя? И глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь глаго́лю тебе́: егда́ бе юн, поя́сашеся сам, и хожда́ше, а́може хотя́ше: егда́ же состаре́ешися, и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́; ты по Мне гряди́. Изы́де же сло́во се в бра́тию, я́ко учени́к той не у́мрет: и не рече́ ему́ Ии́сус, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́: и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с: я́же а́ще по еди́ному пи́сана быва́ют, ни самому́ мню всему́ мiру вмести́ти пи́шемых книг. Ами́нь.

Другое усопшим, от Иоанна, зачало 21 (Ин. 6:35–39).

Рече́ Госпо́дь ко прише́дшим к Нему́ иуде́ем: Аз есмь хлеб живо́тный: гряды́й ко Мне не и́мать взалка́тися, и ве́руяй в Мя не и́мать вжажда́тися никогда́же. Но рех вам, я́ко и ви́десте мя, и не ве́руете. Все, е́же даст Мне Оте́ц, ко Мне прии́дет, и гряду́щаго ко Мне не изжену́ вон. Я́ко снидо́х с небесе́, не да творю́ во́лю Мою́, но во́лю посла́вшаго Мя Отца́. Се же есть во́ля посла́вшаго Мя Отца́, да все, е́же даст Ми, не погублю́ от Него́, но воскрешу́ е́ в после́дний день.

Причастный: Блаже́ни, я́же избра́л, и прия́л еси́ Го́споди. / Аллилу́иа, трижды.