Цветная Триодь (на цсл., гражданский шрифт)

Последование Вечерни в Неделю расслабленного вечера

На Го́споди воззва́х: стихи́ры пра́здника 3: и Мине́и 3.

Стихи́ры пра́здника, гла́с 8. Подо́бен: О пресла́внаго чудесе́!

О пресла́внаго чудесе́! Творе́ц все́х плотоно́сец бы́в, в на́ше обнища́ естество́, хотя́ я́ко благоутро́бен, и с челове́ки пожи́в, чуде́с мно́жество евре́ом показа́. Те́мже исцели́ иногда́ разсла́бленнаго, ре́к ему́: возми́ о́др тво́й, в Вифесду́ прише́д.

Спа́се Бо́же мо́й и Го́споди, па́дшия челове́ки воскреси́ти хотя́, на земли́ я́ко Челове́к обхожда́л еси́ исцеля́я все́х неду́ги, мно́гаго ра́ди благоутро́бия. Те́мже прише́д ко О́вчей купе́ли, це́ла воздви́гл еси́, иногда́ разсла́бленнаго, сло́вом Твои́м, три́десять о́смь ле́т лежа́ща.

За́вистию евре́и снеда́еми, благодея́нием Твои́м преблаги́й Го́споди, вину́ творя́ще, и неи́стовства разжже́нием, беззако́ннующе са́ми в зако́не при́сно, тебе́ иска́ху уби́ти вои́стинну Жи́знь, суббо́ты ра́ди, егда́ всего́ челове́ка показа́л еси́ Ты́ здра́ва, пре́жде разсла́бленна су́ща.

Сла́ва, и ны́не, гла́с 5: При О́вчей купе́ли челове́к лежа́ше в не́мощи, и ви́дев Тя́ Го́споди, вопия́ше: челове́ка не и́мам, да егда́ возмути́тся вода́, вве́ржет мя́ в ню́: егда́ же прихожду́, и́н предваря́ет мя́, и прие́млет исцеле́ние, а́з же немощству́яй лежу́. И а́бие умилосе́рдився спа́с, глаго́лет к нему́: тебе́ ра́ди Челове́к бы́х, тебе́ ра́ди в пло́ть облеко́хся, и глаго́леши: челове́ка не и́мам. Возми́ о́др тво́й и ходи́. Вся́ Тебе́ возмо́жна, вся́ послу́шают, вся́ повину́ются: все́х на́с помяни́, и поми́луй Святы́й, я́ко Человеколю́бец.

На стихо́вне стихи́ры, гла́с 3:

Твои́м Кресто́м Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый: пе́снь Тебе́ всегда́ прино́сит.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Вече́рнюю пе́снь прино́сим Ти́ Христе́, с кади́лом и пе́сньми духо́вными: поми́луй Спа́се ду́ши на́ша.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Ве́лия Креста́ Твоего́ Го́споди си́ла: водрузи́ бо ся на ме́сте, и де́йствует в мiре, и показа́ от ры́барей апо́столы, и от язы́к му́ченики, да мо́лятся о душа́х на́ших.

Сла́ва, и ны́не, гла́с 1: Дла́нию пречи́стою созда́вый челове́ка, прише́л еси́ Благоутро́бне, неду́гующия исцели́ти Христе́, разсла́бленнаго во О́вчей купе́ли сло́вом Твои́м возста́вил еси́: кровоточи́вой же боле́знь исцели́л еси́: ханане́и отрокови́цу стужа́емую поми́ловал еси́, и проше́ние со́тника не презре́л еси́. Сего́ ра́ди зове́м: всеси́льне Го́споди, сла́ва Тебе́.

Та́же: Ны́не отпуща́еши: Трисвято́е. Та́же тропа́рь воскре́сен.

Тропарь: Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ мірови ве́лию ми́лость.

Ектения и отпу́ст.

Последование Утрени в понедельник четвертой седмицы по Пасхе

На Бо́г госпо́дь: тропа́рь воскре́сен:

Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ мірови ве́лию ми́лость. Дважды.

Сла́ва: свята́го, а́ще и́мать.

И ны́не: Богоро́дичен 1-й во гла́с тропаря́ свята́го.

А́ще ли ни́, Сла́ва, и ны́не: Богоро́дичен 1-й гла́са.

По 1-м стихосло́вии, седа́лен, гла́с 3:

Христо́с от ме́ртвых воста́, нача́ток усо́пших, перворожде́н тва́ри, и Соде́тель все́х бы́вших, истле́вшее естество́ ро́да на́шего в Себе́ Само́м обнови́. Не ктому́ сме́рте облада́еши: и́бо все́х Влады́ка держа́ву твою́ разруши́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Живу́щи на земли́ душе́ моя́, пока́йся, пе́рсть во гро́бе не пое́т, согреше́ний не избавля́ет, возопи́й Христу́ Бо́гу: Сердцеве́дче, согреши́х, пре́жде да́же не осу́диши мя́, поми́луй мя́.

Сти́х: Ди́вен Бо́г во Святы́х свои́х, Бо́г Изра́илев.

Му́ченичен: Благоду́шие терпе́ния ва́шего, победи́ ко́зни злонача́льнаго врага́, страстоте́рпцы блаже́ннии. Сего́ ра́ди ве́чнаго сподо́бистеся блаже́нства: но моли́теся Го́сподеви, христолюби́вых люде́й спасти́ ста́до, му́ченицы су́ще и́стины.

Сла́ва, и ны́не: Красоте́ де́вства Твоего́, и пресве́тлой чистоте́ Твое́й, Гаврии́л удиви́вся, вопия́ше Ти́ Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумева́ю и ужаса́юся. Те́мже, я́коже повеле́н бы́х, вопию́ Ти: ра́дуйся Благода́тная.

По 2-м стихосло́вии седа́лен, гла́с 3. Подо́бен: Красоте́ де́вства:

Разслабле́ние обрето́ша всетеле́сное разсла́бленнии, за́вистию стягне́ни в суббо́ту разсла́бленнаго стягну́тие помышля́юще, глаго́люще: не досто́ит цели́ти в суббо́ты, разоря́ти же оте́ческое суббо́ты поко́ище, зако́на Тебе́ не ве́дуще Влады́ку, и цели́теля ду́ш на́ших.

Сла́ва, и ны́не, то́йже.

Та́же, Воскресе́ние Христо́во: еди́ножды, и Псало́м 50.

Та́же кано́ны пра́здника со ирмосы́, на 8: и Мине́и, на 4. Конда́к и ексапостила́рий пра́здника.

На хвали́тех поста́вим стихи́, 4: и пое́м настоя́щия стихи́ры Осмогла́сника, гла́с 3:

Прииди́те вси́ язы́цы, уразуме́йте стра́шныя та́йны си́лу: Христо́с бо Спа́с на́ш, е́же в нача́ле Сло́во, распя́тся на́с ра́ди, и во́лею погребе́ся, и воскре́се из ме́ртвых, е́же спасти́ вся́ческая: Тому́ поклони́мся.

Мно́жицею песнопе́ние соверша́я, обрето́хся гре́х исполня́я, язы́ком у́бо пе́ние веща́я, душе́ю же безме́стная помышля́ю: но обоя́ испра́ви Христе́ Бо́же покая́нием, и поми́луй мя́.

Му́ченичен: Святы́х страстоте́рпец па́мять, прииди́те лю́дие вси́ почти́м: я́ко позо́р бы́вше а́нгелом и челове́ком, побе́ды вене́ц от Христа́ прия́ша, и мо́лятся о душа́х на́ших.

Сла́ва, и ны́не, гла́с 1: Непогребе́н мертве́ц сы́й разсла́бленный, ви́дев Тя́ возопи́: поми́луй мя́ Го́споди, я́ко о́др мо́й гро́б мне́ бы́сть. Что́ ми приобре́тение живота́? Не тре́бую О́вчия купе́ли: не и́мам бо никого́же влага́юща мя́, возмуща́ющимся вода́м: но Тебе́ исто́чнику прихожду́ исцеле́ний, да и а́з со все́ми вопию́: всеси́льне Го́споди, сла́ва Тебе́.

На стихо́вне стихи́ры, гла́с 3. Подо́бен: Ве́лия Креста́:

Зна́мений и чуде́с ви́дяще си́лу, за́вистию разсла́бленнии и си́льнии зло́бою не ве́роваху, я́ко Ты́ еси́ Сы́н Бо́жий и Строи́тель все́х, и разсла́бленнаго здра́ва показа́вый сло́вом.

Сти́х: Ми́лости Твоя́ Го́споди, во ве́к воспою́.

Ви́девше суббо́т храни́телие, разсла́бленнаго стя́гнута в суббо́ту, и душе́ю омрача́хуся: и не подоба́ет в суббо́ту цели́ти, и скверни́ти суббо́ту, не́гли ^{3} я́ко зако́ннии кни́жницы, вопия́ху.

Сти́х: Я́ко ре́кл еси́: в ве́к ми́лость сози́ждется.

Суббо́т самоде́теля не ве́дуще Тя́ и Го́спода, суббо́ты храня́щии, о разсла́бленнаго стягну́тии ропта́ху, в суббо́ту бы́вшем, я́ко не добро́, глаго́люще, взя́ти о́др в де́нь суббо́тный.

Сла́ва, и ны́не, гла́с 5: Взы́де Иису́с во Иерусали́м на О́вчую купе́ль, глаго́лемую иуде́йски Вифесда́, пя́ть притво́ров иму́щую, в те́х бо слежа́ше мно́жество немощству́ющих: А́нгел бо Бо́жий по вся́ ле́та сходя́, возмуща́ше ю́, и здра́вие подава́ше приступа́ющим ве́рою. И ви́дев Госпо́дь многовре́менна челове́ка, глаго́лет к нему́: хо́щеши ли здра́в бы́ти? Немощству́яй отвещава́ше: Го́споди, челове́ка не и́мам, да егда́ возмути́тся вода́, вве́ржет мя́ в купе́ль: враче́м изда́х все́ име́ние мое́, и ми́лости улучи́ти не сподо́бихся. Но Вра́ч ду́ш и теле́с глаго́лет к нему́: возми́ тво́й о́др и ходи́, пропове́дуя Мою́ си́лу, и ве́лию ми́лость в конце́х.

Та́же, Бла́го е́сть испове́датися Го́сподеви: И тропа́рь. Ча́с 1-й. И отпу́ст.

Последование Вечерни в понедельник четвертой седмицы по Пасхе вечера

На Го́споди воззва́х: поста́вим стихо́в 6. И пое́м настоя́щия два́ самогла́сна, повторя́юще пе́рвый. И Мине́и 3. Гла́с 1:

Дла́нию пречи́стою созда́вый челове́ка, прише́л еси́ Благоутро́бне, неду́гующия исцели́ти Христе́: разсла́бленнаго во О́вчей купе́ли, сло́вом Твои́м возста́вил еси́: кровоточи́вой же боле́знь исцели́л еси́: ханане́и отрокови́цу стужа́емую поми́ловал еси́: и проше́ние со́тника не презре́л еси́. Сего́ ра́ди зове́м: всеси́льне Го́споди, сла́ва Тебе́. Два́жды.

Непогребе́н мертве́ц сы́й разсла́бленный, ви́дев Тя́ возопи́: поми́луй мя́ Го́споди, я́ко о́др мо́й гро́б мне́ бы́сть. Что́ ми приобре́тение живота́? Не тре́бую о О́вчия купе́ли: не и́мам бо никого́же влага́юща мя́, возмуща́ющимся вода́м. Но Тебе́ исто́чнику прихожду́ исцеле́ний, да и а́з со все́ми вопию́: всеси́льне Го́споди, сла́ва Тебе́.

Сла́ва, и ны́не, гла́с 5: Взы́де Иису́с во Иерусали́м на О́вчую купе́ль, глаго́лемую иуде́йски Вифесда́, пя́ть притво́ров иму́щую: в те́х бо слежа́ше мно́жество немощству́ющих: Ангел бо Бо́жий по вся́ ле́та сходя́, возмуща́ше ю́, и здра́вие подава́ше приступа́ющим ве́рою, и ви́дев Госпо́дь многовре́менна челове́ка, глаго́лет к нему́: хо́щеши ли здра́в бы́ти? Немощству́яй отвещава́ше: Го́споди, челове́ка не и́мам, да егда́ возмути́тся вода́, вве́ржет мя́ в купе́ль: враче́м изда́х все́ име́ние мое́, и ми́лости улучи́ти не сподо́бихся. Но Вра́ч ду́ш и теле́с глаго́лет к нему́: возми́ тво́й о́др и ходи́, пропове́дуя Мою́ си́лу, и ве́лию ми́лость в конце́х.

И а́бие, Све́те ти́хий: Проки́мен дне́.

На стихо́вне стихи́ры Осмогла́сника, гла́с 3:

Просвети́шася вся́ческая Воскресе́нием Твои́м Го́споди, и ра́й па́ки отве́рзеся: вся́ же тва́рь восхваля́ющи Тя́, пе́снь Тебе́ всегда́ прино́сит.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Спаси́ мя Го́споди Бо́же мо́й, Ты́ бо все́х еси́ спасе́ние, бу́ря мя́ страсте́й смуща́ет, и бре́мя беззако́ний погружа́ет: да́ждь ми́ ру́ку по́мощи, и к све́ту возведи́ мя умиле́ния, я́ко еди́н Благоутро́бен и Человеколю́бец.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Ве́лия му́ченик Твои́х Христе́ си́ла: во гробе́х бо лежа́т, и ду́хи прогоня́ют, и упраздни́ша вра́жию вла́сть, ве́рою Тро́ическою подви́гшеся по благоче́стии.

Сла́ва и ны́не, гла́с 8: В притво́ре Соломо́нове, та́мо слежа́ше мно́жество немощству́ющих, и преполови́вшуся пра́зднику, обре́те Христо́с три́десять о́смь ле́т разсла́бленна лежа́ща, Влады́чним гла́сом глаго́лет к нему́: хо́щеши ли здра́в бы́ти? Немощству́яй отвещава́ше: Го́споди, челове́ка не и́мам, да егда́ возмути́тся вода́, вве́ржет мя́ в купе́ль. Он же глаго́лет к нему́: возми́ о́др тво́й, и ходи́, се́ здра́в бы́л еси́, ктому́ не согреша́й. Богоро́дицы моли́твами низпосли́ на́м ве́лию ми́лость.

Та́же: Ны́не отпуща́еши: Трисвято́е. Та́же тропа́рь:

Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ мірови ве́лию ми́лость.

Ектения и отпу́ст.

Последование Утрени во вторник четвертой седмицы по Пасхе

На Бо́г госпо́дь: тропа́рь воскре́сен:

Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ мірови ве́лию ми́лость. Дважды.

Сла́ва, и ны́не: Богоро́дичен.

По 1-м стихосло́вии, седа́лен, гла́с 3:

Пло́тию сме́рть вкуси́вый Го́споди, го́ресть сме́рти пресе́кл еси́ воста́нием Твои́м, и челове́ка на ню́ укрепи́вый, пе́рвыя кля́твы одоле́ние призыва́я, защи́тниче жи́зни на́шея, Го́споди, сла́ва Тебе́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Доко́ле душе́ моя́, пребыва́еши во гресе́х? Доко́ле прие́млеши покая́ния преложе́ние? Приими́ во уме́ су́д бу́дущий, возопи́й Го́сподеви: согреши́х, Безгре́шне, поми́луй мя́.

Сти́х: Ди́вен Бо́г во святы́х свои́х, Бо́г Изра́илев.

Му́ченичен: Сия́ете ве́рою пресве́тлая свети́ла святи́и, благоче́стия рачи́телие, страстоте́рпцы прехва́льнии: мучи́телей бо не убоя́вшеся ра́н, и́дольскую пре́лесть низложи́сте, побе́ду иму́ще непобеди́мую, Кре́ст и́стинный.

Сла́ва, и ны́не, Богоро́дичен: Прибе́жище и си́ло Богоро́дице, держа́вная по́моще міра, моли́твами Твои́ми спаса́й рабы́ Твоя́ от вся́кия ну́жды, еди́на благослове́нная.

По 2-м стихосло́вии седа́лен, гла́с 3. Подо́бен: Красоте́ де́вства:

Разслабле́ние обрето́ша всетеле́сное разсла́бленнии, за́вистию стягне́ннии, в суббо́ту разсла́бленнаго стягну́тие помышля́юще, глаго́люще: не досто́ит цели́ти в суббо́ты, разоря́ти же оте́ческое суббо́ты поко́ище, зако́на Тебе́ не ве́дуще Влады́ку, и цели́теля ду́ш на́ших.

Сла́ва, и ны́не: то́йже.

Та́же, Воскресе́ние Христо́во: еди́ножды, и Псало́м 50.

Та́же кано́ны пра́здника со ирмосы́, на 8: и Мине́и, на 4. Конда́к и ексапостила́рий пра́здника.

На хвали́тех поста́вим стихи́ 4, и пое́м настоя́щия стихи́ры, повторя́юще пе́рвую, гла́с 3:

Пове́даша вся́ чудеса́ стра́жие Твои́ Го́споди: но собо́р суеты́ испо́лни мздо́ю десни́цу и́х, скры́ти мня́ше Воскресе́ние Твое́, е́же мiр сла́вит: поми́луй на́с. Два́жды.

Разсе́янный мо́й у́м собери́ Го́споди, и олядене́вшее ^{4} се́рдце мое́ очи́сти, я́ко Петру́ дая́й мне́ покая́ние, я́ко мытарю́ воздыха́ние, и я́ко блудни́це сле́зы, да ве́лиим гла́сом взыва́ю Ти́: Бо́же, спаси́ мя, я́ко еди́н Благоутро́бен и Человеколю́бец.

Му́ченичен: Царе́й и мучи́телей стра́х отри́нуша Христо́вы во́ини, и благодерзнове́нно и му́жески Того́ испове́даша все́х Го́спода Бо́га, и Царя́ на́шего: и мо́лятся непреста́нно о душа́х на́ших.

Сла́ва, и ны́не, гла́с 8: Го́споди, разсла́бленнаго не купе́ль исцели́, но Твое́ сло́во обнови́, и ниже́ многоле́тный запя́т ему́ неду́г: я́ко гла́са Твоего́ скоре́йшее де́йство показа́ся, и неудобоноси́мую тя́жесть отве́рже, и бре́мя одра́ понесе́, во свиде́тельство мно́жества щедро́т Твои́х, сла́ва Тебе́.

На стихо́вне стихи́ры, гла́с 3. Подо́бен: Ве́лия Креста́:

Яви́ся разсла́бленным удесе́м сло́во Твое́, я́коже связа́ние Живоно́сное, животво́рче мо́й Сло́ве, его́же свиде́тельство, па́че наде́жди одра́ взя́тие: его́же повеле́н ноша́ше, слежа́в на не́м на мно́зе.

Сти́х: Ми́лости Твоя́ Го́споди, во ве́к воспою́.

Ра́дуяся исполня́ет повеле́ние разсла́бленный, Твоея́ всеси́льныя Влады́чния кре́пости, и о́др сво́й нося́ хожда́ше, и свиде́тельствуя взыва́ше: исцели́вый сие́ мне́ твори́ти повелева́ет.

Сти́х: Я́ко ре́кл еси́: в ве́к ми́лость сози́ждется.

В ле́тех мно́гих и времене́х слежа́й, поми́луй мя́, зове́т разсла́бленный удесы́, Свободи́телю Христе́, свя́зана недоуме́нием, и Спа́с о́др взя́ти повелева́ше, стягну́в у́ды.

Сла́ва, и ны́не, гла́с 5: При О́вчей купе́ли, челове́к лежа́ше в не́мощи, и ви́дев Тя́ Го́споди, вопия́ше: челове́ка не и́мам, да егда́ возмути́тся вода́, вве́ржет мя́ в ню́. Егда́ же прихожду́, и́н предваря́ет мя́, и прие́млет исцеле́ние, а́з же немощству́яй лежу́. И а́бие умилосе́рдився Спа́с глаго́лет к нему́: тебе́ ра́ди Челове́к бы́х, тебе́ ра́ди в пло́ть облеко́хся, и глаго́леши челове́ка не и́мам. Возми́ о́др тво́й и ходи́. Вся́ Тебе́ возмо́жна, вся́ послу́шают, вся́ повину́ются, все́х на́с помяни́, и поми́луй Святы́й, я́ко Человеколю́бец.

Та́же, Бла́го е́сть испове́датися Го́сподеви: И тропа́рь. Ча́с 1-й. И отпу́ст.

Последование Вечерни во вторник четвертой седмицы по Пасхе вечера

Начало по обычаю, и кафисма рядовая.

На Го́споди воззва́х: поставим стихов 6, и поем стихиры настоящия 3, повторяюще я. Глас 4. Подобен: Го́споди, возше́д на Крест:

Наста́ преполове́ние дней, / от спаси́тельнаго начина́емых воста́ния, / Пятдеся́тницею же Боже́ственною печа́таемое, / и све́тится све́тлости обою́ду иму́щее, и соединя́ющее обоя́, / и приити́ сла́ве предъявля́ющее, / Влады́чняго Вознесе́ния предпочита́ет.

Слы́ша и возвесели́ся Сио́н, / благовести́вшуся Христо́ву Воскресе́нию: / ве́рнии же его́ сы́нове возра́довашася Сего́ ви́девше, / и омыва́юща Ду́хом скве́рну христоуби́йства: / гото́вится торжеству́ющи, / обои́х весе́лое преполове́ние.

Прибли́жися Боже́ственнаго изоби́льное изли́тие на всех, / я́коже написа́ся, Ду́ха: предузаконе́ние пропове́дует преполови́вшееся, / по Христо́ве сме́рти и погребе́нии и Воскресе́нии, / от Него́ да́нну су́щу ученико́м, нело́жному обеща́нию, / Уте́шителево показу́ющу явле́ние.

Слава, и ныне, глас 6: Пра́зднику преполовля́ющуся Твоего́, Христе́, Воскресе́ния, / и Боже́ственнаго прише́ствия Свята́го Твоего́ Ду́ха, / соше́дшеся чуде́с Твои́х воспева́ем та́инства, / во́ньже низпосли́ нам ве́лию ми́лость.

Вход. Прокимен дне. Чтения три:

Проро́чества Михе́ина чте́ние. (Глава 4).

Та́ко глаго́лет Госпо́дь: от Сио́на изы́дет зако́н, и сло́во Госпо́дне из Иерусали́ма, и су́дит посреди́ люде́й мно́гих, и обличи́т язы́ки кре́пкия да́же на до́лзе, я́ко вси лю́дие по́йдут ки́йждо свои́м путе́м, мы же по́йдем и́менем Го́спода Бо́га на́шего в век. Та́ко глаго́лет Госпо́дь Вседержи́тель: услы́шите хо́лми суд Госпо́день, и де́бри основа́ния земли́, я́ко суд Го́сподеви к лю́дем Его́, и со Изра́илем сопри́тся, глаго́ля: лю́дие Мои́, что сотвори́х вам; или́ чим опеча́лих вас? Отвеща́йте Ми: зане́ возведо́х вы от земли́ Еги́петския, и из до́му рабо́ты изба́вих вас, и посла́х пред лице́м ва́шим Моисе́а и Ааро́на и Мариа́м. Лю́дие Мои́ [помяни́те у́бо], что совеща́ша на вас сопроти́внии; кто возвести́ тебе́? Возвести́х бо тебе́, челове́че, что добро́, или́ что Госпо́дь и́щет от тебе́, ра́зве твори́ти суд, и люби́ти ми́лость, и гото́ву бы́ти, е́же ходи́ти с Го́сподем Бо́гом твои́м; зане́ в кре́пости возвели́чится Госпо́дь, и упасе́т ста́до Свое́ в ми́ре, да́же до коне́ц земли́.

Проро́чества Иса́иина чте́ние. (Глава 55).

Та́ко глаго́лет Госпо́дь: жа́ждущии иди́те на во́ду, и ели́цы не и́мате сребра́, ше́дше купи́те, и яди́те, пи́йте без сребра́ и цены́, вино́ и тук. Я́ко та́ко глаго́лет Госпо́дь Вседержи́тель вам: лю́дие Мои́, почерпи́те во́ду с весе́лием от исто́чник спасе́ния. И рече́ши в день о́ный: воспо́йте Го́сподеви, призови́те и́мя Его́, возвести́те во язы́цех сла́вная Его́: помяни́те, я́ко вознесе́ся и́мя Его́. Лю́дие Мои́, услы́шите Мене́, и сне́сте блага́я, и наслади́тся во благи́х душа́ ва́ша. Внуши́те уши́ма ва́шима, и после́дуйте путе́м Мои́м. Услы́шите Мене́, и жива́ бу́дет во благи́х душа́ ва́ша, и завеща́ю вам заве́т ве́чный, и призови́те. Внегда́ же а́ще прибли́житеся Мне, да оста́вит нечести́вый пути́ своя́, и муж беззако́нный сове́ты своя́, и обрати́теся ко Мне, и поми́лую вас, и оста́влю грехи́ ва́ша. Не суть бо сове́ти Мои́, я́коже сове́ти ва́ши, ни я́коже путие́ ва́ши, путие́ Мои́, глаго́лет Госпо́дь. Но я́коже отстои́т не́бо от земли́, та́ко отстои́т путь Мой от путе́й ва́ших, и умышле́ния ва́ша от умышле́ния Моего́. Я́коже бо а́ще сни́дет дождь, или́ снег с небесе́, и не врати́тся отту́ду, до́ндеже упои́т зе́млю, и израсти́т, и прозя́бнет, и даст се́мя се́ющему, и хлеб в снедь: Си́це бу́дет глаго́л Мой, и́же а́ще изы́дет из уст Мои́х, не возврати́тся ко Мне тощ, до́ндеже сконча́ет вся, ели́ка восхоте́х, и испра́влю пути́ твоя́, и за́поведи Моя́. С весе́лием бо изы́дете, и с ра́достию научите́ся: го́ры бо и хо́лми ско́чат, ча́юще вас в ра́дости, и вся древа́ се́льная воспле́щут ве́твьми. И вме́сто дра́чия взы́дет кипари́с, вме́сто же кропи́вы взы́дет мνрси́на: ^{5} и бу́дет Госпо́дь во и́мя, и в зна́мение ве́чное, и не оскуде́ет, глаго́лет Госпо́дь Бог Святы́й Изра́илев.

При́тчей чте́ние. (Глава 9).

Прему́дрость созда́ Себе́ дом и утверди́ столпо́в седмь. Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу. Посла́ Своя́ рабы́, созыва́ющи с высо́ким пропове́данием на ча́шу, глаго́лющи: И́же есть безу́мен, да уклони́тся ко Мне. И тре́бующим ума́ рече́: Прииди́те, яди́те Мой хлеб, и пи́йте вино́, е́же раствори́х вам. Оста́вите безу́мие и жи́ви бу́дете, и взыщи́те ра́зума, да поживете́, и испра́вите ра́зум в ве́дении. Наказу́яй злы́я прии́мет себе́ безче́стие, облича́яй же нечести́ваго опоро́чит себе́: обличе́ния бо нечести́вому ра́ны ему́. Не облича́й злых, да не возненави́дят тебе́. Облича́й прему́дра, и возлю́бит тя. Даждь прему́дрому вину́, и прему́дрший бу́дет. Сказу́й пра́ведному, и приложи́т приима́ти. Нача́ло прему́дрости страх Госпо́день и сове́т святы́х ра́зум: разуме́ти бо зако́н по́мысла есть блага́го. Сим бо о́бразом мно́гое поживе́ши вре́мя, и приложа́тся тебе́ ле́та живота́.

Таже, ектениа: Рцем вси: и возглас. Таже: Сподо́би Го́споди: Посем: Испо́лним вече́рнюю:

На стиховне стихиры самогласны, глас 1. Иоанна монаха:

Пятдеся́тницы наста́ дней преполове́ние, / в не́мже Христо́с обнажи́в малови́дно Боже́ственную си́лу, / разсла́бленнаго стягну́ сло́вом, / того́ от одра́ возста́вив, / и боголе́пно чудотворя́й в зда́нном те́ле, / челове́ком дарова́ ве́чный живо́т, / и ве́лию ми́лость.

Стих: Помяни́ сонм Твой, / его́же стяжа́л еси́ испе́рва.

Во святи́лище прише́л еси́, Прему́дросте Бо́жия, преполовля́ющуся пра́зднику, / уча́ и облича́я непокори́выя иуде́и, фарисе́и и кни́жники, / и вопия́ со дерзнове́нием к ним: / жа́ждай да гряде́т ко Мне, / и пие́т во́ду живо́тную, и не вжа́ждет во век: / ве́руяй Мое́й бла́гости, / ре́ки потеку́т из чре́ва его́ жи́зни ве́чныя. / О бла́гости и благоутро́бия Твоего́, / Христе́ Бо́же наш, сла́ва Тебе́!

Стих: Бог же, Царь наш пре́жде ве́ка, / соде́ла спасе́ние посреде́ земли́.

Глас 2: Егда́ преполове́ние пра́здника наста́, / взы́де Иису́с во святи́лище, / и уча́ше непокори́выя иуде́и, глаго́ля: / жа́ждай да гряде́т ко Мне, / и пие́т во́ду живо́тную, ве́чную, и не вжа́ждется во век. / Ве́руяй в Мя, ре́ки потеку́т из чре́ва его́, / и име́ти бу́дет свет живо́тный.

Слава, и ныне, глас 8: Преполови́вшуся пра́зднику, / уча́щу Ти, Спа́се, глаго́лаху иуде́е: / ка́ко Сей весть пи́смена, не учи́вся? / Не разуме́юще, я́ко Ты еси́ / Прему́дрость устро́ившая мiр, сла́ва Тебе́.

Та́же: Ны́не отпуща́еши: Трисвято́е.

Тропарь, глас 8: Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Таже иерей: Прему́дрость. И отпуст по обычаю.

На Повечерии святаго рядоваго поем стихиры, и канон. Кондак праздника. На Полунощнице по 1-м Трисвятом тропарь праздника. По 2-м Трисвятом кондак праздника. Таже, Го́споди поми́луй, 12. И отпуст. Молитвы заупокойныя: Помяни́ Го́споди в наде́жди: не глаголем.

Последование Утрени в среду Преполове́ния

На Бог Господь: тропарь праздника, глас 8:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́. Трижды.

По 1-м стихословии седален, глас 4. Подобен: Ско́ро предвари́:

Всех серде́ц помышле́ния ве́дый, / посреде́ святи́лища став, / взыва́ше лжи́вым, глаго́ля и́стину: / что и́щете уби́ти Мя, животода́вца, пра́зднику преполовля́ющуся, вопия́ де́рзостно? Не на лица́ зря́ще суд суди́те, законопресту́пницы.

Слава, и ныне: тойже.

И чтение в толковании Евангелиа Иоанна.

По 2-м стихословии седален, глас 5. Подобен: Собезнача́льное Сло́во:

Влады́ка всех во хра́ме стоя́, / пра́зднику преполови́вшуся Пятдеся́тницы честны́я, евре́ем бесе́дуя, / облича́ше я́ве в дерзнове́нии мно́зе, я́ко Царь сый и Бог, мучи́тельство тех де́рзостное: / нам же всем да́рует за благоутро́бие ве́лию ми́лость.

Слава, и ныне: тойже.

Та́же, Воскресе́ние Христо́во: еди́ножды, и Псало́м 50.

Канона праздника два со ирмосы на 14. Первый со ирмосы на 8, второй на 6. Последи же Катавасия, ирмос второго канона, оба лика вкупе.

Канон господина Феофана, глас 4, егоже краестрочие сие: Преполове́ние пра́здников превели́ких похвалю́.

Песнь 1.

Ирмос: Мо́ря чермну́ю пучи́ну, / невла́жными стопа́ми, / дре́вний пешеше́ствовав Изра́иль, / крестообра́зными Моисе́овыма рука́ма, / Амали́кову си́лу в пусты́ни победи́л есть.

Припев: Слава Тебе, Боже наш, слава Тебе.

Ве́лия я́же па́че ума́, Влады́ко, / Боже́ственнаго Твоего́ воплоще́ния, благодея́ния сия́ют нам, / да́рове же и благода́ти, и Боже́ственныя све́тлости, / благода́тно истека́ющия.

Прише́л еси́, Христе́, све́тлости Божества́ испуща́я, / пра́здника посреде́ явле́нно: / пра́здник бо ра́достный спаса́емых еси́, / и спасе́ния на́шего хода́тай.

Прему́дрость, пра́вда, Го́споди, / и избавле́ние у Бо́га Ты был еси́ нам, / от земли́ к небе́сной преводя́ высоте́, / и Дух Боже́ственный да́руя.

Плоть Твоя́ истле́ния во гро́бе не ви́де, Влады́ко, / но я́ко соста́вися кроме́ се́мене, тле́ния не прия́т, / после́дованию естества́, пресу́щественно не рабо́тавшая.

Другий канон, творение господина Андреа Критскаго, глас 8.

Ирмос: Мо́ре огусти́л еси́, / погрузи́вый со ору́жием го́рдаго фарао́на, / и лю́ди спасл еси́ немо́кренно Го́споди, / и ввел еси́ я́ в го́ру святы́ни, вопию́щия: / пои́м Тебе́ Бо́гу на́шему песнь побе́дную, я́ко просла́вися.

Припев: Слава Тебе, Боже наш, слава Тебе.

Язы́цы восплещи́те, евре́и воспла́чите, / животода́вец бо Христо́с, у́зы а́довы расто́рже, / и ме́ртвыя воскреси́, и неду́ги исцели́ сло́вом: / Сей есть Бог наш, да́вый жизнь ве́рующим во и́мя Его́.

Чу́до показа́л еси́, во́ду в вино́ преше́дшую, / во Еги́пте ре́ки преложи́вый, Влады́ко, в кровь, / и ме́ртвыя воскреси́л еси́, зна́мение сие́ второ́е сконча́в. / Сла́ва, Спа́се, несказа́нному Твоему́ сове́ту: / сла́ва истоща́нию Твоему́, и́мже обнови́л еси́ нас.

Струя́ приснотеку́щая сый, Го́споди, жи́зни и́стинныя, / Ты еси́ воскресе́ние на́ше, / хотя́ труди́лся еси́, Спа́се мой, / и во́лею вжа́ждался еси́, зако́ном естества́ повину́яся, / и в Сиха́рь шед пло́тию, воды́ проси́л еси́ у самаряны́ни пи́ти.

Хле́бы благослови́л еси́, ры́бы умно́жил еси́, непостижи́мый Бо́же, / и лю́ди насы́тил еси́ незави́стно, / и исто́чник приснотеку́щий, прему́дрость, жа́ждущим обеща́л еси́. / Ты еси́ Спас Бог наш, / да́вый живо́т ве́рующим во и́мя Твое́.

Слава, Троичен: Три собезнача́льны сла́влю и сопресто́льны, / Отца́ безнача́льна Бо́га, и Сы́на собезнача́льна, и Ду́ха соприсносу́щна Сы́ну, / еди́но триипоста́сное Существо́, / еди́но нача́ло пребезнача́льное пою́, / безнача́льнаго Божества́ и Существа́ чту.

И ныне, Богородичен: Еди́на вмести́ла еси́ Зижди́теля Твоего́, Богороди́тельнице, во чре́ве, / и пло́тию родила́ еси́ неизрече́нно, / и Де́ва пребыла́ еси́, ничто́же де́вству оскверни́вшуся. / Сего́, Чи́стая, я́ко Сы́на Твоего́ и Бо́га непреста́нно моли́ о ста́де Твое́м при́сно.

Катавасия: Мо́ре огусти́л еси́, / погрузи́вый со ору́жием го́рдаго фарао́на, / и лю́ди спасл еси́ немо́кренно Го́споди, / и ввел еси́ я́ в го́ру святы́ни, вопию́щия: / пои́м Тебе́ Бо́гу на́шему песнь побе́дную, я́ко просла́вися.

Песнь 3.

Ирмос: Весели́тся о Тебе́ Це́рковь Твоя́ Христе́, зову́щи: / Ты моя́ кре́пость Го́споди, / и прибе́жище, и утвержде́ние.

Припев: Слава Тебе, Боже наш, слава Тебе.

Вод животво́рных Це́ркви исто́чники отве́рзл еси́, / а́ще кто жа́ждет, усе́рдно да прихо́дит и пие́т, вопия́, Бла́же.

От земли́ у́бо на не́бо вознести́ся, проявле́нно глаго́лал еси́: / с небесе́ же Ду́ха посла́ти обеща́л еси́ Свята́го.

Естество́м животворя́й, и от Де́вы роди́выйся Госпо́дь, / всем ве́рным дарова́ безсме́ртие, я́ко Благоутро́бен.

Ин. Ирмос: Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Припев: Слава Тебе, Боже наш, слава Тебе.

Не и́же на лице́ суд суди́те, иуде́е, уча́ глаго́лаше Влады́ка, / егда́ прии́де во святи́лище, я́коже пи́сано есть, / преполови́вшуся зако́нному пра́зднику.

Не и́же на лице́ суд суди́те, иуде́е: / Христо́с бо прии́де, / Его́же нарица́ху проро́цы от Сио́на гряду́ща и мiр взыва́юща.

А́ще и словесе́м не ве́руете, иуде́е, дело́м ве́руйте Влады́ки: / что прельща́етеся, отмета́ющеся Свята́го, / Его́же написа́ в зако́не Моисе́й?

А́ще месси́и вся́ко подоба́ет приити́, иуде́е, / Христо́с же прии́де ны́не Месси́а: / что прельща́етеся, отмета́ющеся Пра́веднаго, / Его́же написа́ в зако́не Моисе́й?

Слава, Троичен: Тебе́ покланя́емся, О́тче, безнача́льный Существо́м, / пое́м безнача́льнаго Сы́на Твоего́, / и Ду́ха благоче́стно Всесвята́го, / я́ко еди́наго три, естество́м Бо́га.

И ныне, Богородичен: Еди́н от Тро́ицы сый быв, плоть ви́делся еси́, / не прело́жь, Го́споди, существа́, / ниже́ опали́в Ро́ждшия нетле́нное чре́во, / Бог сый весь и огнь.

Катавасия: Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Седален, глас 8. Подобен: Прему́дрости Сло́ва:

Стоя́ посреде́ святи́лища, преполовля́ющуся боже́ственно пра́зднику, / жа́ждай, взыва́л еси́, да гряде́т ко Мне и пие́т: / пия́й бо от сея́ Боже́ственныя Моея́ воды́, / ре́ки из чре́ва источи́т веле́ний Мои́х, / а и́же ве́рует в Мя, по́сланнаго от Боже́ственнаго Роди́теля, со Мно́ю просла́вится. / Сего́ ра́ди вопие́м Ти: / сла́ва Тебе́ Христе́ Бо́же, / я́ко бога́тно излия́л еси́ во́ды Твоего́ человеколю́бия рабо́м Твои́м.

Слава, и ныне: Подобен: Прему́дрости во́ду и жи́зни, источа́я мірови, / всех, Спа́се, призыва́еши почерпсти́ спасе́ния во́ды: / Боже́ственный бо зако́н Твой прии́м челове́к, / в себе́ угаша́ет пре́лести у́глие, / отону́дуже во ве́ки не вжа́ждет, / ни преста́нет насыще́ния Твоего́, Влады́ко Царю́ Пренебе́сный. / Сего́ ра́ди сла́вим держа́ву Твою́, Христе́ Бо́же, / прегреше́ний оставле́ние прося́ще низпосла́ти бога́тно рабо́м Твои́м.

Песнь 4.

Ирмос: Вознесе́на Тя ви́девши Це́рковь на Кресте́, / со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й Го́споди.

Припев: Слава Тебе, Боже наш, слава Тебе.

Растерза́в сме́рти врата́ си́лою Твое́ю, / пути́ жи́зни сказа́л еси́, / безсме́ртия же две́ри отве́рзл еси́, ве́рою зову́щим: / сла́ва си́ле Твое́й, Го́споди.

Преполове́ние всех и коне́ц име́яй, / и нача́ла, я́ко безнача́лен, обдержа́й, / стал еси́ посреде́ вопия́: / Боже́ственных, богому́дрии, прииди́те, даро́в наслади́теся.

Я́ко Бог и всех име́яй власть, / я́ко си́лен держа́ву низложи́в сме́рти, / посла́ти обеща́лся еси́, Христе́, Ду́ха Свята́го, / от Отца́ происходя́щаго.

Припев: Пресвята́я Богоро́дице, спаси́ нас.

Богородичен: Дае́ши бога́тно благода́ть Тебе́ пою́щим, / и из Тебе́ ро́ждшагося преве́чнаго Сло́ва, Ма́ти неискусобра́чная, / прегреше́ний оставле́ние сим прося́щи, Пречи́стая.

Ин. Ирмос: Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: от ю́га прии́дет Бог. / Сла́ва си́ле Твое́й, / сла́ва снизхожде́нию Твоему́.

Припев: Слава Тебе, Боже наш, слава Тебе.

А́ще месси́и подоба́ет приити́, / Месси́а же Христо́с есть, беззако́ннии, что не ве́руете Ему́? / Се прии́де, и свиде́тельствует, я́же Той твори́т: / во́ду вино́ сотвори́, разсла́бленнаго сло́вом стягну́.

Не разуме́юще писа́ний, прельща́етеся вси вы, евре́и беззако́ннии: / вои́стинну бо прии́де Христо́с, и всех просвети́, / и в вас показа́ мно́гая зна́мения и чудеса́, / и всу́е отрица́етеся и́стиннаго живота́.

Еди́но де́ло показа́х вам, и вси уже́ дивите́ся, взыва́ше иуде́ем Христо́с. Вы обре́зуете и в суббо́ту челове́ка, рече́, / Мене́ же что оклевета́ете про́чее, / воздви́гшаго сло́вом разсла́бленнаго?

Дела́ сотвори́х мно́гая, и ко́его ра́ди де́ла ка́мением биете́ Мя? / Иуде́ем Христо́с, облича́я, взыва́ше: / еда́ зане́ челове́ка здра́ва всего́ сло́вом сотвори́х, / не суди́те на лице́ челове́цы.

Во апо́столех де́йствуяй, и во проро́цех Сам почива́яй с Ду́хом, / безнача́льное рожде́ние Оте́ческаго естества́ Христе́, / язы́ки к позна́нию возве́л еси́ зна́меньми Твои́ми.

Слава, Троичен: Тро́ице неразде́льная Еди́нице, / безнача́льне О́тче, Сы́не и Ду́ше Святы́й, / во Еди́нице Тро́ица равноче́стная, сопресто́льная, животворя́щая, / несозда́нный Бо́же, спаса́й воспева́ющия Тя, / и изба́ви от бед и скорбе́й.

И ныне, Богородичен: Во чре́ве Твое́м Бо́га неопи́санно вмести́вшая, / Богоневе́сто, Де́во Ма́ти Чи́стая, / не преста́й моля́щи о нас, я́ко да Тобо́ю изба́вимся от обстоя́ний, / к Тебе́ бо при́сно прибега́ем.

Катавасия: Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: от ю́га прии́дет Бог. / Сла́ва си́ле Твое́й, / сла́ва снизхожде́нию Твоему́.

Песнь 5.

Ирмос: Ты Го́споди мой, Свет в мiр прише́л еси́. / Свет Святы́й, обраща́яй из мра́чна неве́дения, / ве́рою воспева́ющих Тя.

Припев: Слава Тебе, Боже наш, слава Тебе.

Боже́ственных пра́здников преполове́ния дости́гше, / соверше́нное боже́ственною доброде́телию обучи́тися потщи́мся, богому́дрии.

Я́ко вои́стинну свяще́нное настоя́щее торжество́, преполове́ние: / превели́ких бо пра́здников ко́рень и све́тится обою́ду.

Припев: Пресвята́я Богоро́дице, спаси́ нас.

Богородичен: Ум арха́нгельский не мо́жет разуме́ти / Твое́ неизрече́нное из Де́вы и пречи́стое рождество́, Спа́се Многоми́лостиве.

Ин. Ирмос: Го́споди Бо́же наш / мир даждь нам, / Го́споди Бо́же наш, стяжи́ ны, / Го́споди, ра́зве Тебе́ ино́го не ве́мы, / И́мя Твое́ имену́ем.

Припев: Слава Тебе, Боже наш, слава Тебе.

Чудесы́ украси́л еси́ апо́столы Твоя́, / дивесы́ возвели́чил еси́ ученики́, / во всем мiре просла́вил, Спа́се наш, и дав им Ца́рствие Твое́.

Вся просвети́ша земли́ концы́ ученицы́, чудесы́ и уче́ньми, / и разли́чными о́бразы сло́во пропове́давше, Христе́ Спа́се, Ца́рствия Твоего́.

Хвалу́ возсыла́ем Ца́рствию Твоему́, пе́ние же Тебе́ прино́сим, / нас ра́ди на земли́ яви́вшемуся, и мiр просвети́вшему, и Ада́ма воззва́вшему.

Слава, Троичен: Сла́ва Тебе́, О́тче Святы́й, Бо́же нерожде́нне: / сла́ва Тебе́, Сло́ве безле́тне единоро́дне: / сла́ва Тебе́, Ду́ше Боже́ственне и сопресто́льне, / и единосу́щне Отцу́ и Сы́ну.

И ныне, Богородичен: Бысть чре́во Твое́ свята́я трапе́за, иму́щая небе́сный хлеб, / от него́же всяк яды́й не умира́ет, / я́коже рече́ всех, Богороди́тельнице, Пита́тель.

Катавасия: Го́споди Бо́же наш / мир даждь нам, / Го́споди Бо́же наш, стяжи́ ны, / Го́споди, ра́зве Тебе́ ино́го не ве́мы, / И́мя Твое́ имену́ем.

Песнь 6.

Ирмос: Пожру́ Ти со гла́сом хвале́ния Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею кро́вию.

Припев: Слава Тебе, Боже наш, слава Тебе.

Преполове́ние Пятдеся́тницы наста́ днесь, / отсю́ду Боже́ственныя у́бо Па́схи, / Боже́ственнейшею све́тлостию озари́вшееся, / отону́дуже Уте́шителевою благода́тию сия́ющее.

Глаго́лал еси́ в хра́ме, Христе́, предстоя́ иуде́йским собо́ром / Свою́ сла́ву открыва́я, и предъявля́я сро́дство к Роди́телю.

Припев: Пресвята́я Богоро́дице, спаси́ нас.

Богородичен: Бу́ди ми предста́тельница, и стена́ неруши́мая, / от мірски́х мя собла́знов избавля́ющая, еди́на Богороди́тельнице, / и боже́ственным светоли́тием освеща́ющая.

Ин. Ирмос: Я́ко во́ды морски́я, Человеколю́бче, / волна́ми жите́йскими обурева́юся, / те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

Припев: Слава Тебе, Боже наш, слава Тебе.

Вся содержа́й концы́, возше́л еси́, Иису́се, / и учи́л еси́ во святи́лищи наро́ды сло́ву и́стины, / пра́зднику преполовля́ющуся, я́коже Иоа́нн вопие́т.

Отве́рзл еси́ устне́ Твои́, Влады́ко, / пропове́дал еси́ мірови безле́тнаго Отца́, и Всесвята́го Ду́ха, / сро́дное обои́х храня́ и по воплоще́нии.

Де́ло О́тчее соверши́л еси́, / де́лы уве́рил еси́ словеса́ Твоя́, / исцеле́ния соверша́я Спа́се, и зна́мения, / разсла́бленнаго исправля́я, прокаже́нныя очища́я, и ме́ртвыя воскреша́я.

Безнача́льный Сын нача́ло бысть прие́м, / е́же по нам вочелове́чися, / и посреде́ пра́здника уча́ше, глаго́ля: / притецы́те ко исто́чнику приснотеку́щему, жизнь почерпи́те.

Слава, Троичен: Еди́но в Тро́ице Божество́, / Существо́ триипоста́сное, несозда́нное, неразде́льное вси сла́вим, / Отца́, и Сы́на, и Свята́го Ду́ха, я́ко три су́щее, и еди́но.

И ныне, Богородичен: Де́ву по рождестве́ пое́м Тя, / Де́ву и Ма́терь сла́вим Тебе́ еди́ну, / Чи́стая Богоневе́сто Отрокови́це, / из Тебе́ бо вои́стинну Бог воплоти́ся, обнови́в нас.

Катавасия: Я́ко во́ды морски́я, Человеколю́бче, / волна́ми жите́йскими обурева́юся, / те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

Кондак, глас 4. Подобен: Вознесы́йся:

Пра́зднику зако́нному преполовля́ющуся, / всех Тво́рче и Влады́ко, / к предстоя́щим глаго́лал еси́, Христе́ Бо́же: / прииди́те и почерпи́те во́ду безсме́ртия. / Те́мже Тебе́ припа́даем и ве́рно вопие́м: / щедро́ты Твоя́ да́руй нам, / Ты бо еси́ Исто́чник жи́зни на́шея.

Икос: Олядене́вшую ^{6} мою́ ду́шу прегреше́ний беззако́ньми, / тече́ньми Твои́х крове́й напо́й, / и покажи́ плодоно́сну доброде́тельми: / Ты бо рекл еси́ всем, е́же приходи́ти к Тебе́, Сло́ве Бо́жий Всесвяты́й, / и во́ду нетле́ния почерпа́ти, живу́ю же и очища́ющую грехи́, / пою́щих сла́вное и Боже́ственное Твое́ воста́ние, / подая́, Благи́й, с высоты́ сше́дшую вои́стинну ученико́м Твои́м Ду́ха кре́пость, / Тебе́ Бо́га ве́дущим: / Ты бо еси́ исто́чник жи́зни на́шея.

Синакса́рий Мине́и. Та́же настоя́щий синакса́рий.

Стихи́: Ста́в науча́ет, посреде́ пра́здника,

Христо́с Месси́а среде́ учи́телей.

В сре́ду разсла́бленнаго, пра́здник преполове́ния Пятдеся́тницы пра́зднуем, по́чести ра́ди вели́кою двою́ дни́ пра́зднику, Па́схи, глаго́лю, и Пятдеся́тницы, я́ко обою́ соединя́ющу и совокупля́ющ. Бы́сть же си́й та́ко: по е́же соде́лати Христу́ на разсла́бленном чу́до преесте́ственное, иуде́и у́бо о разсла́бленном соблажня́ющеся, и́бо в суббо́ту соде́яся, иска́ху Его́ уби́ти. Бежи́т у́бо в Галиле́ю, и в та́мошних гора́х пребыва́я, пятию́ хле́бы и двои́ ры́бу чудоде́йствует, пя́ть ты́сящ муже́й прекорми́, ра́зве же́н и дете́й. Пото́м же ку́щ потче́нию наста́вшу [вели́к же и то́й пра́здник у иуде́й], во Иерусали́м восхо́дит, и обхожда́ше сокрове́нно. В преполове́нии же пра́здника сего́, во святи́лище входя́ уча́ше: святи́лище же е́сть Еди́ному Бо́гу оби́телище, иде́же любо́вь и ми́р, иде́же ве́ра и целому́дрие водворя́ется. Сего́ ра́ди и святи́телю Бо́жию служа́щу Бо́гови, ми́рну подоба́ет бы́ти и кро́тку, не крадли́ву, не льсти́ву, не сребролюби́ву: да пре́жде Бо́га в свою́ ду́шу всели́т, пото́м же и лю́ди по о́бразу и по пути́ своему́ счета́ет. Мо́жется же нарещи́ и коего́ждо ве́рнаго душа́, святи́лище преочище́нно бы́вши: иде́же бо вселю́ся в вы́ и похожду́, глаго́лет Госпо́дь. И вси́ Его́ уче́нию дивля́хуся, зави́дяще Ему́ глаго́лаху: ка́ко Се́й ве́сть, писа́нием не научи́вся? Но́вый бо Ада́м сы́й, ве́дяше я́коже и пе́рвый о́н: вся́кия прему́дрости бя́ше преиспо́лнен, и я́коже Бо́г. Па́ки, ропта́ху у́бо вси́, и к Его́ уби́йству бе́ша вси́ устремля́ющеся. Христо́с же обличе́ния на ня́ употребля́я, я́ко о суббо́те у́бо сваря́щияся глаго́лаше: что́ Мя и́щете уби́ти? Они́ же глаго́лаху: бе́са ли и́маши, кто́ Тя хо́щет уби́ти? О́н же па́ки к пре́дним простира́ется: а́ще о зако́не сварите́ся, глаго́ля, что́ на Мя́ ярите́ся, зане́ всего́ челове́ка в суббо́ту здра́ва сотвори́х? Моисе́ю и сия́ законополага́ющу разруша́ти ю́, внегда́ обре́зания ра́ди глаго́лет. Мно́га у́бо и́м о се́м бесе́довав, и показа́в Себе́ да́теля зако́ну и Отцу́ ра́вна. И па́че в после́дний де́нь вели́кий пра́здника, ка́мением быва́ет мета́емь от ни́х, но ка́мень Тому́ отню́д не косну́ся. Егда́ и мимоходя́ отту́ду, обрета́ет челове́ка от рожде́ния сле́па, и очеса́ ему́ да́рует. Ве́домо же, я́ко три́ бя́ху у иуде́й преве́лии пра́здницы. Пе́рвый, Па́сха, и́же у́бо соверша́ется в пе́рвом ме́сяце, воспомина́ние име́я, е́же в Чермно́м мо́ри прехожде́ния. Вторы́й же, Пятдеся́тница, е́же в пусты́ни пребыва́ние, по преше́ствии Чермна́го мо́ря помина́яй: пятдеся́т бо дни́й пребыва́ху в пусты́ни, до́ндеже зако́н Моисе́ов прии́мут, еще́ же и за по́честь числа́ седми́чнаго, че́стну у ни́х су́щу. Тре́тий же те́м пра́здник, тру́б и се́нниц потче́ния, помина́ние творя́ще ски́нии, ю́же во о́блаце горы́ ви́дев Моисе́й, пе́рвым древоде́лем Веселе́илом водрузи́в поста́ви, я́же и в седмию́ сотворя́ема бя́ше дни́й, сноше́нию плодо́в па́мять иму́щи, и упокое́ния пусты́ннаго. Егда́ же твори́му тому́ пра́зднику, ста́в Иису́с вели́ким гла́сом воззва́: а́ще кто́ жа́ждет, да гряде́т ко Мне́ и пие́т. Елма́ у́бо во учи́тельстве то́м Христо́с Месси́ю Себе́ показа́, хода́тай и примири́тель на́ш бы́в, и ве́чнаго Отца́ Своего́. Тоя́ ра́ди вины́ настоя́щий пра́здник пра́зднующе, и средопятдеся́тницу имену́юще, Месси́ю воспева́ем Христа́, и честно́е е́же от обою́ двою́ вели́кою пра́зднику представля́юще. Сего́ же ра́ди мню́ и самаряны́ни по не́м пра́зднику пра́зднуется, зане́ и та́мо о Месси́и Христе́ мно́гая сказа́шася, и о воде́ и о жа́жди, я́коже зде́ во евангели́сте Иоа́нне, слепа́го па́че самаряны́ни предлежи́т. Неизче́тною ми́лостию Твое́ю Христе́ Бо́же на́ш, поми́луй на́с. Ами́нь.

Песнь 7.

Ирмос: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем опаля́еми взыва́ху: / благослове́н еси́ в хра́ме сла́вы Твоея́ Го́споди.

Припев: Слава Тебе, Боже наш, слава Тебе.

Кре́постию, Спа́се, сме́ртную разо́рь си́лу, / стезю́ жи́зни показа́л еси́ челове́ком, благода́рно Тебе́ зову́щим: / благослове́н еси́ в хра́ме сла́вы Твоея́, Го́споди.

Плоть нося́ща ви́дяще, / не разуме́ша собо́ри евре́йстии Сло́ве Тя Бо́жий, / но мы Тебе́ воспева́ем: / благослове́н еси́ в хра́ме сла́вы Твоея́, Го́споди.

Припев: Пресвята́я Богоро́дице, спаси́ нас.

Богородичен: Вы́шняго освяще́нное боже́ственное селе́ние, ра́дуйся! / Тобо́ю бо даде́ся ра́дость, Богоро́дице, вопию́щим: / благослове́на Ты в жена́х еси́, Пренепоро́чная Влады́чице.

Ин. Ирмос: Халде́йская пещь, огне́м распала́емая, / ороша́шеся Ду́хом, / Бо́жиим предстоя́нием, / о́троцы поя́ху: / благослове́н еси́, Бо́же оте́ц на́ших.

Припев: Слава Тебе, Боже наш, слава Тебе.

Пло́тски потруди́лся еси́, упокое́ние всех: / во́лею вжа́ждался еси́, исто́чниче чуде́с: / воды́ проси́л еси́, во́ду жи́зни, Иису́се, возвеща́яй.

Самаряны́ни, Го́споди, жене́ бесе́довал еси́, / облича́я безу́мие беззако́нных евре́ев: / она́ у́бо ве́рова Сы́на бы́ти Бо́жия, си́и же отверго́шася.

Во́ду живу́ю истека́ющую, во́ду безсме́ртия, / исто́чник присноживу́щий пода́ти обеща́л еси́, / ве́рою Дух Твой прие́млющим, Спа́се, от Отца́ происходя́щий.

Пятьми́ хле́бы препита́л еси́, ты́сящи а́лчущих, / и насыще́ния оста́нки, в други́я ты́сящи, Спа́се умно́жил еси́, / показу́я сла́ву Твою́ свяще́нным ученико́м.

Яды́й Те́ло Твое́, жив бу́дет во ве́ки, / и пия́й Кровь Твою́, в Тебе́ пребу́дет, Спа́се мой, / и Ты в нем пребыва́еши, / и воскреси́ши его́ в после́днее мгнове́ние.

Удиви́л еси́, Влады́ко, Твое́ смотре́ние, / уве́рив чудесы́ Боже́ственную власть, / неду́ги изгна́л еси́, ме́ртвыя воскреси́л еси́ и слепы́я просвети́л еси́ я́ко Бог.

Прокаже́нныя очи́стил еси́, хромы́я испра́вил еси́, / разсла́бленныя стягну́л еси́, кровоточи́вую исцели́вый: / ше́ствовал еси́ по пучи́не, показа́в сла́ву Твою́ свяще́нным ученико́м.

Слава, Троичен: Покланя́емся Твоему́, Го́споди, Пречи́стому Отцу́, / и благода́ти Ду́ха, ю́же Твои́м апо́столом Бог сый разда́л еси́, / посыла́я их на про́поведь.

И ныне, Богородичен: Во чре́ве Твое́м вмести́ла еси́ невмести́маго Сло́ва, / от Твои́х сосе́ц дои́ла еси́ мiру Пита́теля, / на объя́тии носи́ла еси́ Содержи́теля на́шего, Богороди́тельнице Чи́стая.

Катавасия: Халде́йская пещь, огне́м распала́емая, / ороша́шеся Ду́хом, / Бо́жиим предстоя́нием, / о́троцы поя́ху: / благослове́н еси́, Бо́же оте́ц на́ших.

Песнь 8.

Ирмос: Ру́це распросте́р Дании́л, / львов зия́ния в ро́ве затче́: / о́гненную же си́лу угаси́ша, / доброде́телию препоя́савшеся, / благоче́стия рачи́тели о́троцы, взыва́юще: / благослови́те вся дела́ Госпо́дня Го́спода.

Припев: Слава Тебе, Боже наш, слава Тебе.

Красе́н из гро́ба воста́в, Божества́ сла́вою укра́шен, / апо́столом Твои́м, Го́споди, яви́лся еси́, / Ду́ха обеща́яся тем посла́ти де́йство, вопию́щим: / благослови́те вся дела́ Госпо́дня Го́спода.

Умертви́в а́да я́ко Бог живонача́льнейший, / всем источи́л еси́ живо́т ве́чный, / его́же ны́не вообража́ют я́вственнее, / светоно́сных дней сих ра́дости, вопию́щим: / благослови́те вся дела́ Госпо́дня Го́спода.

Лучи́, я́ко Со́лнце, Христе́, пра́вды яви́вся, / мiру посла́л еси́ апо́столы Твоя́, / нося́щия Тебе́ свет непостижи́мый, / и неве́дения мглу очища́ющия и вопию́щия: / благослови́те вся дела́ Госпо́дня Го́спода.

Припев: Пресвята́я Богоро́дице, спаси́ нас.

Богородичен: Се ны́не оскуде́ я́ве от Иу́дина пле́мене князь и вождь: / Ты бо, Всенепоро́чная, родила́ еси́, / пре́жде обеща́нное ча́яние язы́ков, Христа́ Бо́га, / Ему́же пое́м: благослови́те вся дела́ Госпо́дня Го́спода.

Ин. Ирмос: А́нгели и небеса́, / на престо́ле сла́вы седя́щаго / и я́ко Бо́га непреста́нно сла́вимаго, / благослови́те, по́йте / и превозноси́те Его́ во ве́ки.

Припев: Слава Тебе, Боже наш, слава Тебе.

Прииди́те ви́дите, лю́дие, на престо́ле сла́вы воспева́емаго, / от люде́й беззако́нных ху́лимаго, / и ви́дяще по́йте в проро́цех Месси́ю предрече́ннаго.

Ты еси́ вои́стинну Христо́с, в мiр сей прише́дый, / из Него́же спасе́ние и оставле́ние оте́ческих согреше́ний: / Ты еси́ вои́стинну живо́т, в Тя ве́ровавшим.

Прему́дрость Бо́жия, преполови́вшуся пра́зднику, я́коже пи́сано есть, / во святи́лищи предста́ и уча́ше, / я́ко вои́стинну Сей бя́ше Месси́а Христо́с, И́мже спасе́ние.

В суббо́тах Христо́с, и по вся дни пока́зоваше зна́мений дела́, / исцеля́я су́щия в неду́зех разли́чных: / но прельще́ннии лю́дие я́ростию распыха́хуся.

Разсла́бленнаго, глаго́лет, в ле́тех же мно́зех лежа́щаго, / в суббо́ту Сей исцели́, и преступи́ зако́н, / иуде́и Христа́ го́рько укоря́ху.

Не Моисе́й ли вам, зако́н да́вый, повелева́ет обре́затися, / и в суббо́ту му́жа обре́зуете, да не ка́ко зако́н оте́ческий разори́тся, / Христо́с иуде́ем глаго́лаше.

Неблагода́рни всегда́ в пусты́ни жи́вшии, / Благоде́теля за́вистию прогне́ваху, ху́ляще, / дви́жуще непра́ведныя язы́ки, тще́тным поуча́ющеся.

Припев: Благослови́м Отца́, и Сы́на, и Свята́го Ду́ха, Го́спода.

Троичен: Еди́н Бог у́бо Тро́ица, / Отцу́ не преступи́вшу в сыновство́, / ниже́ Сы́ну прело́жшуся во исхожде́ние: / но сво́йственная и́ обоя́, Свет Бо́га, три прославля́ю во век.

Богородичен: Ка́ко родила́ еси́, рцы, от Отца́ безле́тно просия́вшаго, / и со Святы́м Ду́хом воспева́емаго? / Или́ я́ко весть еди́н благоволи́вый из Тебе́ роди́тися, Богоро́дице.

Таже: Хва́лим, благослови́м, покланя́емся Го́сподеви, / пою́ще и превознося́ще во вся ве́ки.

Катавасия: А́нгели и небеса́, / на престо́ле сла́вы седя́щаго / и я́ко Бо́га непреста́нно сла́вимаго, / благослови́те, по́йте / и превозноси́те Его́ во ве́ки.

Честне́йшую: не стихословится.

Песнь 9.

Ирмос: Ка́мень нерукосе́чный / от несеко́мыя горы́ Тебе́ Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся, Тя Богоро́дице велича́ем.

Припев: Слава Тебе, Боже наш, слава Тебе.

Но́вому и чи́стому жи́тельству, от Христа́ научи́вшеся, / сие́ да́же до конца́ сохрани́ти поле́зно вси потщи́мся я́ко да Свята́го Ду́ха прише́ствие восприи́мем.

Ты мое́ сме́ртное, Жизнода́вче, / обложе́нием безсме́ртия, и нетле́ния благода́тию / обле́к, Спа́се, совоскреси́л еси́, / и Отцу́ приве́л еси́, вре́менную мою́ разруши́в брань.

В небе́сное па́ки житие́ зва́ни бы́вше, / хода́тайства си́лою истощи́вшагося да́же и до ра́бия о́браза, и нас возне́сшаго, / Сего́ досто́йно возвели́чим.

Припев: Пресвята́я Богоро́дице, спаси́ нас.

Богородичен: Я́ко ко́рень, исто́чник и вину́ нетле́ния, / Тебе́, Де́во, вси ве́рнии уве́девше, похвала́ми почита́ем: / Ты бо ипоста́сное безсме́ртие нам источи́ла еси́.

Ин. Ирмос: Чу́жде ма́терем де́вство, / и стра́нно де́вам деторожде́ние: / на Тебе́ Богоро́дице, обоя́ устро́ишася. / Тем Тя вся племена́ земна́я / непреста́нно велича́ем.

Припев: Слава Тебе, Боже наш, слава Тебе.

Пра́зднику преполовля́ющуся иуде́йскому, / возше́л еси́, Спа́се мой, во святи́лище Твое́, и науча́л еси́ всех: / чудя́хуся же иуде́е, и отку́ду Сей весть пи́сьмена не научи́вся, глаго́лаху.

Исцеле́ния дарова́ний Изба́витель мой источа́я, / сотворя́ше чудеса́ и зна́мения, / прогоня́ неду́ги, целя́ немощству́ющия: / но иуде́и неи́стовствовахуся мно́жеством чуде́с Его́.

Непокори́выя иуде́и Изба́витель мой облича́я, вопия́ше: / не суди́те на лице́, но пра́веден суд суди́те: / и́бо зако́н и в суббо́ту обре́зоватися повелева́ет вся́кому челове́ку.

Бо́льшая чуде́с ученико́м Твои́м, Спа́се, я́коже обеща́в, по́дал еси́, / посла́в в язы́ки пропове́дати сла́ву Твою́: / они́ же мірови пропове́даху Твое́ Воскресе́ние, благода́ть и воплоще́ние.

А́ще челове́ка обре́зуете в суббо́ту, да не ка́ко разори́тся зако́н: / ны́не на Мя что гне́ваетеся, / я́ко челове́ка всего́ здра́ва сотвори́х сло́вом? / По пло́ти вы су́дите, глаго́лет иуде́ем Христо́с.

Суху́ю исцели́вый ру́ку сло́вом, / изсо́хшую дре́вле зе́млю моего́ се́рдца, исцели́в Сло́ве, / покажи́ мя плодоно́сна, да соде́лаю и аз Спа́се, / плоды́ в покая́нии те́пле.

Прокаже́нное мое́ се́рдце очи́стив, / и души́ моея́, Сло́ве, о́чи просвети́вый, / на одре́ боле́зни мя лежа́ща испра́ви, / я́коже разсла́бленнаго возста́вил еси́ на одре́ лежа́щаго.

Слава, Троичен: Чу́жде есть беззако́нным сла́вити безнача́льную Тро́ицу, / Отца́, и Сы́на же, и Свята́го Ду́ха, / несозда́нное вседержа́ние, / И́мже весь мiр созда́ся держа́вою кре́пости Ея́.

И ныне, Богородичен: Вмести́ла еси́ во чре́ве Твое́м, Де́во Ма́ти, / еди́наго от Тро́ицы Христа́ Жизнода́вца, / Его́же пое́т вся тварь, и трепе́щут го́рнии престо́ли: / Того́ моли́, Всеблаже́нная, спасти́ ду́ши на́ша.

Катавасия: Чу́жде ма́терем де́вство, / и стра́нно де́вам деторожде́ние: / на Тебе́ Богоро́дице, обоя́ устро́ишася. / Тем Тя вся племена́ земна́я / непреста́нно велича́ем.

Ексапостиларий. Подобен: Не́бо звезда́ми:

Ча́шу име́яй неистощи́мых даро́в, / даждь ми почерпсти́ во́ду во оставле́ние грехо́в, / я́ко содержи́мь есмь жа́ждею, Благоутро́бне еди́не Ще́дре. Трижды.

На хвалитех, Вся́кое дыха́ние: поставим стихи 4. И поем подобны праздника 3, повторяюще 1, глас 4. Подобен: Я́ко до́бля:

Прему́дрость, и си́ла, О́тчее сия́ние, / Сло́во присносу́щное и Сын Бо́жий, / во святи́лище прии́де пло́тию, / и уча́ше иуде́йския лю́ди, жесто́кия и неблагода́рныя, / и удивля́хуся прему́дрости бога́тству, вопию́ще: / отку́ду весть пи́смена, ни от кого́же учи́вся? Дважды.

Кни́жником затыка́ше уста́, / иуде́и облича́ше Месси́а Госпо́дь, вопия́ к ним: / не на лице́ законопресту́пницы, я́ко непра́веднии суди́те, / в субботу бо Аз разсла́бленнаго воздви́гнух. / Те́мже Госпо́дь суббо́ты есмь и зако́на, / что и́щете Мене́ уби́ти, уме́ршия воздви́гшаго?

Навуфе́а ка́мением поби́ша, лю́тии и законопресту́пнии, / иуде́йское собра́ние неблагода́рное: / Иса́ию же пило́ю древя́ною растро́ша, / в кал му́драго Иереми́ю вверго́ша, / Го́спода же на Крест возне́сше взыва́ху: / храм разоря́яй, спаси́ Себе́, и уве́руем.

Слава, и ныне, глас 4. Анатолиа. Просвети́вшеся бра́тие, / Воскресе́нием Спа́са Христа́, / и дости́гше преполове́ния пра́здника Влады́чня, / прии́скренно сохрани́м за́поведи Бо́жия, / да досто́йни бу́дем и Вознесе́ние пра́здновати, / и прише́ствие получи́ти Свята́го Ду́ха.

Славословие великое. По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении, и отпуст. И час 1-й.

Последование Литургии в среду Преполове́ния

Блаженна от канона праздника, 4-го гласа, песнь 3-я на 4, и 8-го гласа, песнь 6-я на 4.

По входе тропарь праздника, глас 8:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Слава, и ныне: кондак, глас 4. Подобен: Вознесы́йся:

Пра́зднику зако́нному преполовля́ющуся, / всех Тво́рче и Влады́ко, / к предстоя́щим глаго́лал еси́, Христе́ Бо́же: / прииди́те и почерпи́те во́ду безсме́ртия. / Те́мже Тебе́ припа́даем и ве́рно вопие́м: / щедро́ты Твоя́ да́руй нам, / Ты бо еси́ Исто́чник жи́зни на́шея.

Прокимен, глас 3: Ве́лий Госпо́дь наш, и ве́лия кре́пость Его́, / и ра́зума Его́ несть числа́.

Стих: Хвали́те Го́спода я́ко благ псало́м: Бо́гови на́шему да услади́тся хвале́ние.

И до отдания.

Деяний святых Апостол чтение, зачало 34 (Деян. 14:6–18).

Во дни о́ны, Па́вел и Варна́ва прибего́ста во гра́ды Ликао́нския, в Ли́стру и Де́рвию, и во окре́стныя их, и та́мо бе́ста благовеству́юща. И не́кто муж в Ли́стрех не́мощен нога́ма седя́ше, хром от чре́ва ма́тере своея́ сый, и́же николи́же бе ходи́л. Сей слы́шаше Па́вла глаго́люща: и́же воззре́в нань и ви́дев, я́ко ве́ру и́мать здрав бы́ти, рече́ ве́лиим гла́сом: тебе́ глаго́лю во и́мя Го́спода Иису́са Христа́, вста́ни на но́гу твою́ прав. И а́бие возскочи́ и хожда́ше. Наро́ди же ви́девше, е́же сотвори́ Па́вел, воздвиго́ша глас свой, ликао́нски глаго́люще: бо́зи уподо́бльшеся челове́ком снидо́ша к нам. Нарица́ху же у́бо Варна́ву Ди́а, Па́вла же Ерми́а, поне́же той бя́ше нача́льник сло́ва. Жрец же Ди́ев, су́щаго пред гра́дом их, приведе́ юнцы́, и принесе́ венцы́ пред врата́, с наро́ды хотя́ше жре́ти. Слы́шавша же апо́стола Варна́ва и Па́вел, растерза́вша ри́зы своя́, вскочи́ста в наро́д, зову́ща и глаго́люща: му́жие, что сия́ творите́? И мы подобостра́стна есма́ вам челове́ка, благовеству́юща вам, от сих су́етных обраща́тися к Бо́гу жи́ву, И́же сотвори́ не́бо и зе́млю, и мо́ре и вся, я́же в них. И́же в мимоше́дшия ро́ды оста́вил бе вся язы́ки ходи́ти в путе́х их. И у́бо не несвиде́тельствована Себе́ оста́ви, благотворя́, с небесе́ нам дожде́вы дая́, и времена́ плодоно́сна, исполня́я пи́щею и весе́лием сердца́ на́ша. И сия́ глаго́люща, едва́ уста́виста наро́ды не жре́ти и́ма, но отыти́ коему́ждо во своя́ си.

Аллилуиа, глас 1: Помяни́ сонм Твой, его́же стяжа́л еси́ испе́рва.

Стих: Бог же Царь наш пре́жде ве́ка, соде́ла спасе́ние посреде́ земли́.

Евангелие от Иоанна, зачало 26 (Ин. 7:14–30).

В преполове́ние Пятьдеся́тницы взы́де Иису́с во це́рковь, и уча́ше. И дивля́хуся иуде́е, глаго́люще: ка́ко Сей кни́ги весть не учи́вся? Отвеща́ у́бо им Иису́с и рече́: Мое́ уче́ние несть Мое́, но Посла́вшаго Мя. А́ще кто хо́щет во́лю Его́ твори́ти, разуме́ет о уче́нии, ко́е от Бо́га есть, или́ Аз от Себе́ глаго́лю. Глаго́ляй от себе́, сла́вы своея́ и́щет, а ищя́й сла́вы Посла́вшаго Его́, Сей и́стинен есть, и несть непра́вды в Нем. Не Моисе́й ли даде́ вам зако́н; и никто́же от вас твори́т зако́на. Что Мене́ и́щете уби́ти? Отвеща́ наро́д и рече́: бе́са ли и́маши; кто Тебе́ и́щет уби́ти? Отвеща́ Иису́с и рече́ им: еди́но де́ло сотвори́х, и вси дивите́ся. Сего́ ра́ди Моисе́й даде́ вам обре́зание, [не я́ко от Моисе́а есть, но от оте́ц,] и в суббо́ту обре́заете челове́ка. А́ще обре́зание прие́млет челове́к в суббо́ту, да не разори́тся зако́н Моисе́ов: на Мя ли гне́ваетеся, я́ко всего́ челове́ка здра́ва сотвори́х в суббо́ту? Не суди́те на лица́, но пра́ведный суд суди́те. Глаго́лаху у́бо не́цыи от иерусали́млян: не Сей ли есть, Его́же и́щут уби́ти? И се, не обину́яся глаго́лет, и ничесо́же Ему́ не глаго́лют: еда́ ка́ко разуме́ша кня́зи, я́ко Сей есть Христо́с? Но Сего́ ве́мы, отку́ду есть. Христо́с же егда́ прии́дет, никто́же весть, отку́ду бу́дет. Воззва́ у́бо в це́ркви уча́ Иису́с и глаго́ля: и Мене́ ве́сте, и ве́сте, отку́ду есмь, и о Себе́ не приидо́х, но есть и́стинен Посла́вый Мя, Его́же вы не ве́сте. Аз вем Его́, я́ко от Него́ есмь, и Той Мя посла́. Иска́ху у́бо, да и́мут Его́: и никто́же возложи́ Нань руки́, я́ко не у бе прише́л час Его́.

На Литургии поем и на отдание Преполовения, вместо Досто́йно: Ирмос, глас 8:

Чу́жде ма́терем де́вство, / и стра́нно де́вам деторожде́ние: / на Тебе́ Богоро́дице, обоя́ устро́ишася. / Тем Тя вся племена́ земна́я / непреста́нно велича́ем.

В прочия же дни поем. Свети́ся: и до отдания.

Причастен: Яды́й Мою Плоть, и пия́й Мою́ Кровь, во Мне пребыва́ет, и Аз в нем, рече́ Госпо́дь. / Аллилуиа. Трижды.

На трапезе утешение братии. Празднуется же сей праздник дней 8.

Последование Вечерни в среду Преполове́ния

Обы́чная кафи́сма.

На Го́споди воззва́х: стихи́ры пра́здника 3, гла́с 4. Подо́бен: Зва́нный свы́ше:

Предразори́вый держа́ву сме́рти Христе́, сме́ртию Твое́ю, жи́знь пода́л еси́ челове́ком, в сла́вном воста́нии Твое́м, совоздви́гнувый ро́д челове́ческий, снизхожде́нием Твои́м. Те́мже благода́рственную хвалу́ Тебе́ пое́м, пра́здник пра́зднующе тридне́внаго и светоно́снаго Твоего́ Воскресе́ния, во́ньже преполове́ние всечестны́х ны́не дни́й на́м все́м просия́, Иису́се Жизнода́вче, Благоде́телю ду́ш на́ших.

Пре́жде честна́го Креста́ Твоего́, и стра́сти, чуде́с пресла́вная соверша́яй в лю́дех, я́коже пи́сано е́сть посреде́ пра́здника зако́ннаго ста́л еси́ Христе́ Всеси́льне, и все́м возопи́л еси́: а́ще кто́ жа́ждет, ко Мне́ самохо́тне да прихо́дит, и воды́ Боже́ственныя пи́во да почерпе́т, и жи́зненныя во́ды: жи́зни бо во́ду и си́лы прему́дрости Аз все́м подаю́, я́ко хотя́ челове́ком уподо́бихся, я́ко Человеколю́бец.

Я́ко на одре́ мя лежа́ща боле́зни, согреше́ний мои́х, Христе́ Многоми́лостиве, и разсла́блена удесы́, я́ко за вели́кую Человеколю́бия пучи́ну, челове́к во́лею бы́в, ны́не неви́димо мя́ я́коже разсла́бленнаго воздви́гни, и стезя́ми Боже́ственных за́поведей Твои́х тещи́ благопоспеши́: и́же пре́жде стра́сти, лю́дем Спа́се евре́йским, чуде́с мно́жествы предстоя́, я́ко Бо́г сы́й во́лею стра́ждеши пло́тию.

И мине́и 3. Сла́ва: свята́го, а́ще е́сть: а́ще ли ни́,

Сла́ва, и ны́не: пра́здника, гла́с 2:

Егда́ прише́л еси́ во святи́лище Христе́ Бо́же, преполови́вшуся пра́зднику, тогда́ лю́ди учи́л еси́, вопия́: ве́руяй в Мя́, а́ще и у́мрет, жи́в бу́дет. Иуде́е распыха́хуся, с фарисе́и и саддуке́и и кни́жники, глаго́люще: кто́ е́сть Се́й, И́же глаго́лет хулы́? Не помышля́юще, я́ко Ты́ еси́ пре́жде все́х ве́к, со Отце́м и Ду́хом сла́вимый: Бо́же на́ш, сла́ва Тебе́.

Проки́мен дне́.

На стихо́вне стихи́ра воскре́сна, гла́с 3:

Стра́стию Твое́ю Христе́, омрачи́вый со́лнце, и све́том Твоего́ Воскресе́ния, просвети́вый вся́ческая, приими́ на́шу вече́рнюю пе́снь Человеколю́бче.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Стихи́ра апо́стольская: Во всю́ зе́млю изы́де веща́ние ва́ше святи́и апо́столи, и́дольскую пре́лесть разори́сте, Богоразу́мие пропове́давше: се́й до́брый по́двиг ва́ш е́сть блаже́ннии. Те́мже пое́м и славосло́вим ва́ша па́мяти.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Му́ченицы Твои́ Го́споди, ве́рою утве́рждшеся, наде́ждею укрепи́вшеся, любо́вию Креста́ Твоего́ душе́вно соедини́вшеся, вра́жие мучи́тельство разруши́ша, и улучи́вше венцы́, со безпло́тными мо́лятся о душа́х на́ших.

Сла́ва, и ны́не: гла́с 3. Ге́рмана:

Преполови́вшуся пра́зднику, сла́вим посреде́ земли́ спасе́ние Соде́лавшаго. Посреде́ у́бо двою́ разбо́йнику, Живо́т на Дре́ве ви́сяше, и ху́лящему у́бо молча́ше, ве́рующему же вопия́ше: дне́сь со Мно́ю бу́деши в раи́. Сни́де во гро́б, плени́ а́да, и воскре́се тридне́вен, спаса́яй ду́ши на́ша.

Та́же: Ны́не отпуща́еши: Трисвято́е.

Тропа́рь свята́го, а́ще е́сть: а́ще ли ни́, то́чию пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектениа́ и отпу́ст.

Последование Утрени в четверток четвертой седмицы по Пасхе

На Бо́г Госпо́дь: тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́. Трижды.

По 1-м стихосло́вии седа́лен, гла́с 3. Подо́бен: Красоте́ де́вства:

Вся́ челове́ческая восприи́м, вся́ на́ша присво́ив, на Кресте́ пригвозди́тися благоволи́л еси́ Тво́рче мо́й, сме́рть изво́ливый претерпе́ти я́ко Челове́к, да челове́чество от сме́рти изба́виши я́ко Бо́г. Те́мже я́ко Жизнода́вцу вопие́м Ти́: сла́ва Христе́ Воскресе́нию Твоему́.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Апо́стол Твои́х па́мять Го́споди, уясни́л еси́ я́ко Всеси́лен, зане́ укрепи́л еси́ и́х, стра́сти Твоя́ подража́ти: победи́ша му́жески велиа́рову си́лу, те́мже и прия́ша исцеле́ний дарова́ния. Те́х моли́твами Человеколю́бче, ми́р пода́ждь лю́дем Твои́м.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Обле́кшеся во всеору́жие Христо́во, и оде́явшеся во ору́жие ве́ры, ополче́ния вра́жия му́жески низложи́сте: усе́рдно бо наде́ждею жи́зни, претерпе́сте вся́ мучи́телей преще́ния же и ра́ны. Те́мже и венцы́ прия́сте, му́ченицы Христо́вы, терпеливоду́шнии.

Сла́ва, и ны́не, Богоро́дичен: Проро́цы пропове́даша, апо́столи научи́ша, му́ченицы испове́даша, и мы́ ве́ровахом, Богоро́дицу тя́ вои́стинну святу́ю. Те́мже и велича́ем Рождество́ Твое́ несказа́нное.

По 2-м стихосло́вии седа́лен, гла́с 8. Подо́бен: Прему́дрости сло́ва:

Стоя́ посреде́ святи́лища, преполовля́ющуся боже́ственно пра́зднику, жа́ждай, взыва́л еси́, да гряде́т ко Мне́ и пие́т: пия́й бо от сея́ Боже́ственныя Моея́ воды́, ре́ки из чре́ва источи́т веле́ний Мои́х, а и́же ве́рует в Мя́, по́сланнаго от Боже́ственнаго Роди́теля, со Мно́ю просла́вится. Сего́ ра́ди вопие́м Ти́: сла́ва Тебе́ Христе́ Бо́же, я́ко бога́тно излия́л еси́ во́ды Твоего́ человеколю́бия рабо́м Твои́м. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. Конда́к и ексапостила́рий пра́здника.

На хвали́тех стихи́ры Осмогла́сника, гла́с 3:

Во све́те Твое́м Влады́ко, у́зрим све́т Человеколю́бче: воскре́сл бо еси́ из ме́ртвых, спасе́ние ро́ду челове́ческому да́руяй, да Тя́ тва́рь вся́ славосло́вит еди́наго безгре́шнаго, поми́луй на́с. Два́жды.

Христо́вы за́поведи непоро́чно сохра́ншии святи́и апо́столи, ту́не прия́сте, ту́не подава́ете, исцеля́юще стра́сти ду́ш и теле́с на́ших. Те́мже иму́ще дерзнове́ние, Того́ моли́те, поми́ловатися душа́м на́шим.

Я́ко свети́ла в мiре сия́ете, и по сме́рти святи́и му́ченицы, по́двигом до́брым подвиза́вшеся. Те́мже иму́ще дерзнове́ние, Христа́ моли́те, поми́ловатися душа́м на́шим.

Сла́ва, и ны́не, гла́с 4: Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́л еси́, иуде́и со дерзнове́нием учя́, Моисе́ем и в зако́не Тобо́ю законоположе́нным, ужаса́ющеся же Христе́ Твоея́ прему́дрости неизрече́нному та́инству, е́же на Тя́ ропта́нию в себе́ за́вистию поуча́хуся: ка́ко Се́й ве́сть пи́смена не учи́вся? Не ве́дяще Тебе́ Спа́са ду́ш на́ших.

На стихо́вне стихи́ры, и́хже краегране́сие: Средопятдеся́тницы. Гла́с 2. Подо́бен: До́ме Евфра́фов:

Ве́лий еси́ Царю́, и ве́лия Твоя́ держа́ва: вельми́ бо обнища́в, вели́ких дарова́ний вселе́нную испо́лнил еси́.

Сти́х: Помяни́ со́нм Тво́й, его́же стяжа́л еси́ испе́рва.

Ста́л еси́ в хра́ме источа́я Твоя́ струи́, пра́зднику преполови́вшуся, и напая́я жа́ждущия Боже́ственною Благода́тию, благоутро́бне.

Сти́х: Бог же Царь наш пре́жде ве́ка, соде́ла спасе́ние посреде́ земли́.

Спасти́ мя восхоте́в, воплоти́лся еси́ пресла́вно от Де́вы неискусобра́чныя, и посреде́ хра́ма Твоего́ благода́ть мне́ источи́л еси́.

Сла́ва, и ны́не: гла́с 8. Иоа́нна мона́ха: Преполови́вшуся пра́зднику пре́жде стра́сти, и сла́внаго Воскресе́ния Твоего́ Го́споди, бы́л еси́ учя́ Бла́же во святи́лищи непокори́выя иуде́и, и фарисе́и, и кни́жники, и вопия́ к ни́м: жа́ждай да гряде́т ко Мне́ и пие́т: ве́руяй в Мя́, воды́ жи́зни Ду́ха Боже́ственнаго ре́ки потеку́т от чре́ва его́: о неизрече́нныя прему́дрости Твоего́ хвале́ния! И́же вся́ исполня́яй Бо́же на́ш, сла́ва Тебе́.

По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпуст. И час 1-й.

Последование Вечерни в четверток четвертой седмицы по Пасхе вечера

На Го́споди воззва́х: стихи́ры подо́бны пра́здника, 3: и Мине́и 3.

Пра́здника, гла́с 5. Подо́бен: Ра́дуйся:

Яви́ся светоявле́нное и кра́сное, Спа́сова Воскресе́ния дне́сь преполове́ние всесвято́е, я́ко полу́дне све́тлое, уясня́ющее мiр Боже́ственными благода́тьми Христо́ва воста́ния, осиява́ющее чудеса́ нетле́ния, облистава́ет зна́мения, и показу́ет на высоту́ Вознесе́ние, явля́ет многорачи́тельное Ду́ха прише́ствие, Пятьдеся́тницы всечестны́я светле́йшее торжество́. Те́мже и подае́т душа́м на́шим ми́р и ве́лию ми́лость.

Я́ко Боже́ственныя сла́вы река́, пра́зднику ны́не преполови́вшуся, Госпо́дь струи́ благоутро́бия все́м подава́я, вопие́т: жа́ждай да гряде́т ко Мне́, и пие́т те́пле. Исто́чник бо сострада́ния, и ми́лости пучи́на Са́м сы́й, источа́ет мірови оставле́ние, омыва́ет прегреше́ния, и очища́ет неду́ги: спаса́ет Воскресе́ние Его́ пра́зднующих, покрыва́ет любо́вию почита́ющих е́же со сла́вою Вознесе́ние Его́, и подае́т душа́м на́шим ми́р и ве́лию ми́лость.

Посреде́ святи́лища ста́в, неопи́санный Бо́г же и Госпо́дь: Бо́г бо бя́ше естество́м, а́ще и на́с ра́ди вочелове́чився, опи́сан яви́ся те́лом, все́м источа́ше живото́чныя глаго́лы, все́м глаго́ля: ду́ши очи́стите, и зно́я страсте́й охлади́те, да не ка́ко лиша́тся пития́ челове́цы. Боже́ственную бо благода́ть да́рую, безсме́ртнаго и лу́чшаго и вы́шняго Ца́рствия, сопричасти́тися Мне́ Созда́телю, и просла́витися.

Сла́ва, и ны́не, гла́с 6: Пра́зднику преполовля́ющуся Твоего́ Христе́ Воскресе́ния, и Боже́ственнаго прише́ствия Свята́го Твоего́ Ду́ха, сше́дшеся чуде́с Твои́х воспева́ем та́инства: во́ньже низпосли́ на́м ве́лию ми́лость.

На стихо́вне стихи́ры Осмогла́сника, гла́с 3:

Дре́во преслуша́ния мірови сме́рть возрасти́, дре́во же Креста́ живо́т и нетле́ние. Те́мже Тебе́ покланя́емся распе́ншемуся Го́споду, да зна́менается на на́с све́т лица́ твоего́ Го́споди.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.́

Твои́м Кресто́м Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый, пе́снь Тебе́ всегда́ прино́сит.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Ве́лия Креста́ Твоего́ Го́споди си́ла: водрузи́ бо ся на ме́сте, и де́йствует в мiре, и показа́ от ры́барей апо́столы, и от язы́к му́ченики, да мо́лятся о душа́х на́ших.

Сла́ва, и ны́не: гла́с 8. Иоа́нна мона́ха: Преполови́вшуся пра́зднику, пре́жде стра́сти и сла́внаго Воскресе́ния Твоего́ Го́споди, бы́л еси́ учя́ Бла́же во святи́лищи непокори́выя иуде́и, и фарисе́и, и кни́жники, и вопия́ к ни́м: жа́ждай да гряде́т ко Мне́ и пие́т, ве́руяй в Мя́, воды́ жи́зни, Ду́ха Боже́ственнаго ре́ки потеку́т от чре́ва его́. О неизрече́нныя прему́дрости Твоего́ хвале́ния! И́же вся́ исполня́яй Бо́же на́ш, сла́ва Тебе́.

Та́же: Ны́не отпуща́еши: Трисвято́е. Тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпу́ст.

Последование Утрени в пяток четвертой седмицы по Пасхе

На Бо́г Госпо́дь: тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

По 1-м стихосло́вии, глаго́лем настоя́щия седа́льны, гла́с 3. Подо́бен: Красоте́ де́вства:

Кре́ст и сме́рть пострада́ти изво́ливый, среди́ тва́ри се́й водрузи́л еси́: егда́ благоволи́л еси́ Спа́се, те́ло Твое́ пригвозди́ти, тогда́ и со́лнце лучы́ скры́. Сия́ и разбо́йник зря́, на Кресте́ Тя́ воспе́: помяни́ мя, вопия́, Спа́се, и ве́ровав прия́т ра́й.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Непостижи́мое распя́тия, и несказа́нное воста́ния Богосло́вим ве́рнии та́инство неизрече́нное: дне́сь бо сме́рть и а́д упраздни́ся, ро́д же челове́ческий в нетле́ние облече́ся. Те́мже благодаря́ще вопие́м Ти́: сла́ва Христе́ воста́нию Твоему́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Благоду́шное терпе́ния ва́шего, победи́ ко́зни злонача́льнаго врага́, страстоте́рпцы всехва́льнии. Сего́ ра́ди ве́чнаго сподо́бистеся блаже́нства: но моли́теся Го́сподеви, христолюби́вых люде́й спасти́ ста́до, му́ченицы су́ще и́стины.

Сла́ва, и ны́не, Крестобогоро́дичен: Же́зл си́лы стяжа́вшии Кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

По 2-м стихосло́вии седа́лен, гла́с 8. Подо́бен: Прему́дрости сло́ва:

Прему́дрости во́ду и жи́зни источа́я мірови, все́х Спа́се призыва́еши, почерпсти́ спасе́ния во́ды. Боже́ственный бо зако́н Тво́й прии́м челове́к, в себе́ угаша́ет пре́лести у́глие. Отону́дуже во ве́ки не вжа́ждет, ни преста́нет насыще́ния Твоего́, Влады́ко Царю́ Пренебе́сный. Сего́ ра́ди сла́вим держа́ву Твою́ Христе́ Бо́же, прегреше́ний оставле́ние прося́ще, посла́ти бога́тно рабо́м Твои́м. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника со ирмосы́ на 8: и Мине́и на 4. Конда́к и ексапостила́рий пра́здника.

На хвали́тех стихи́ры Осмогла́сника, повторя́юще 1-ю, гла́с 3:

За́вистию сла́дости изгна́н бы́х, паде́нием пады́й лю́тым: но не презре́л еси́ Влады́ко, восприи́м мене́ ра́ди е́же по мне́ распя́тие, и спаса́еши мя́, в сла́ву вво́диши мя́, Изба́вителю мо́й, сла́ва Тебе́. Дважды.

Прииди́те вси́ язы́цы, уразуме́йте стра́шныя та́йны си́лу: Христо́с бо Спа́с на́ш, е́же в нача́ле Сло́во, распя́тся на́с ра́ди, и во́лею погребе́ся, и воскре́се из ме́ртвых, е́же спасти́ вся́ческая: Тому́ поклони́мся.

Му́ченичен: Святы́х страстоте́рпцев па́мять, прииди́те лю́дие вси́ почти́м, я́ко позо́р бы́вше а́нгелом и челове́ком, побе́ды вене́ц от Христа́ прия́ша, и мо́лятся о душа́х на́ших.

Сла́ва, и ны́не, гла́с 8: Преполови́вшуся пра́зднику Па́схи, в хра́м вше́л еси́ святи́лищный Спа́се на́ш, и ста́в посреде́ наро́да, учи́л еси́ те́х со дерзнове́нием, и глаго́лал еси́: Аз е́смь све́т міра, в сле́д Мене́ иды́й не и́мать ходи́ти во тме́, но име́ти бу́дет све́т безсме́ртныя жи́зни.

На стихо́вне стихи́ры, гла́с 2. Подо́бен: До́ме Евфра́фов:

Ве́сь с Бо́гом Сло́ве Ты́ сы́й, погиба́юща мя́ хотя́ изъя́ти прегреше́ний, соединя́ешися мне́ Человеколю́бче.

Сти́х: Помяни́ со́нм Тво́й, его́же стяжа́л еси́ испе́рва.

Преста́ се́нь: се́ бо Месси́а посреде́ пра́здника, благода́ть я́коже другу́ю денни́цу облиста́.

Сти́х: Бог же Царь наш пре́жде ве́ка, соде́ла спасе́ние посреде́ земли́.

Прииди́те благопокори́во, живо́тныя воды́ пи́ти возжеле́вшии, вопия́ше Спа́с мо́й, и пи́йте благода́ть, боже́ственно веселя́щеся.

Сла́ва, и ны́не, гла́с 6: Очи́стим помышле́ний сокро́вища, и душе́вная сия́ния уясни́м, и Жи́знь у́зрим Христа́ во святи́лище прише́дша премно́жеством бла́гости, да врага́ победи́т, и спасе́т ро́д на́ш, стра́стию Креста́ и Воскресе́ния. К нему́же возопии́м: непостижи́ме Го́споди, сла́ва Тебе́.

По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении и отпуст. И час 1-й.

Последование Вечерни в пяток четвертой седмицы по Пасхе вечера

Обы́чная кафи́сма.

На Го́споди воззва́х: стихи́ры пра́здника 3. Гла́с 1. Подо́бен: Небе́сных чино́в:

Творе́ц все́х и жи́зни Пода́тель, Отцу́ Боже́ственному соприсносу́щное Сло́во, во́лею от Де́вы пло́ть прии́м, бы́в Челове́к, неизрече́нныя прему́дрости, я́ко Бла́г все́м источи́ уче́ния.

Пра́зднику преполови́вшуся иуде́йскому Христе́, во святи́лищи предста́л еси́, зако́ну Влады́ка, учя́ вла́стию, и кни́жники облича́я, я́коже пи́сано е́сть, и устраша́я прему́дростию слове́с Твои́х, и чуде́с показа́ньми.

Пода́тель прему́дрости, и до́брых излия́тель, излива́яй Боже́ственныя струи́ от исто́чника приснотеку́щаго, прииди́те ко Мне́, зове́т, во́ду жи́зни жа́ждущии почерпи́те, и ре́ки из чре́ва ва́шего, глаго́лет, дарова́ний Боже́ственных потеку́т.

И мине́и 3.

Сла́ва, гла́с 1. Иоа́нна мона́ха: Пятдеся́тницы наста́ дне́й преполове́ние, в не́мже Христо́с обнажи́в малови́дно Боже́ственную си́лу, разсла́бленнаго стягну́ сло́вом, того́ от одра́ возста́вив, и Боголе́пно чудотворя́ в зда́нном те́ле, челове́ком дарова́ ве́чный живо́т, и ве́лию ми́лость.

И ны́не, Богоро́дичен, гла́с 3: Ка́ко не диви́мся, Богому́жному Рождеству́ Твоему́ Пречестна́я? Искуше́ния бо му́жескаго не прие́мши Всенепоро́чная, родила́ еси́ без отца́ Сы́на пло́тию, пре́жде ве́к от Отца́ рожде́ннаго без ма́тере: ника́коже претерпе́вшаго измене́ния, или́ смеше́ния, или́ разделе́ния, но обою́ существу́ сво́йство це́ло сохра́ншаго. Те́мже Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

На стихо́вне стихи́ры осмогла́сника, гла́с 3:

Твои́м Кресто́м Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый, пе́снь Тебе́ всегда́ прино́сит.

Сти́х: Госпо́дь воцари́ся, в ле́поту облече́ся.

Просвети́шася вся́ческая, Воскресе́нием Твои́м Го́споди, и ра́й па́ки отве́рзеся, вся́ же тва́рь восхваля́ющи Тя́, пе́снь Тебе́ всегда́ прино́сит.

Сти́х: И́бо утверди́ вселе́нную, я́же не подви́жится.

Сла́влю Отца́ и Сы́на си́лу, и Ду́ха Свята́го пою́ вла́сть, неразде́льное, несозда́нное Божество́, Тро́ицу Единосу́щную, ца́рствующую в ве́к ве́ка.

Сти́х: До́му Твоему́ подоба́ет святы́ня Го́споди, в долготу́ дни́й.

Стра́стию Твое́ю Христе́, омрачи́вый со́лнце, и све́том Твоего́ Воскресе́ния, просвети́вый вся́ческая, приими́ на́шу вече́рнюю пе́снь Человеколю́бче.

Сла́ва, и ны́не, гла́с 1: Во святи́лище прише́л еси́ Прему́дросте Бо́жия, преполовля́ющуся пра́зднику, учя́ и облича́я непокори́выя иуде́и, фарисе́и и кни́жники, и вопия́ со дерзнове́нием к ни́м: жа́ждай да гряде́т ко Мне́, и пие́т во́ду живо́тную, и не вжа́ждет в ве́к. Ве́руяй Мое́й бла́гости, ре́ки потеку́т из чре́ва его́ жи́зни ве́чныя. О бла́гости и благоутро́бия Твоего́ Христе́ Бо́же на́ш, сла́ва Тебе́.

Та́же: Ны́не отпуща́еши: Трисвято́е. Тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектениа́ и отпу́ст.

Последование Утрени в субботу четвертой седмицы по Пасхе

На Бо́г Госпо́дь: тропа́рь пра́здника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

По 1-м стихосло́вии седа́льны воскре́сны, гла́с 3:

Христо́с от ме́ртвых воста́, нача́ток усо́пших, перворожде́н тва́ри, и Соде́тель все́х бы́вших, истле́вшее естество́ ро́да на́шего в Себе́ Само́м обнови́: не ктому́ сме́рте облада́еши, и́бо все́х Влады́ка держа́ву твою́ разруши́.

Сти́х: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Пло́тию сме́рти вкуси́вый Го́споди, го́ресть сме́рти пресе́кл еси́ воста́нием Твои́м, и челове́ка на ню́ укрепи́вый, пе́рвыя кля́твы одоле́ние призыва́я: защи́тниче жи́зни на́шея, Христе́ Бо́же, сла́ва Тебе́.

Сла́ва, и ны́не, Богоро́дичен: Тя́ хода́тайствовавшую спасе́ние ро́да на́шего воспева́ем Богоро́дице Де́во: пло́тию бо от Тебе́ восприя́тою Сы́н Тво́й, и Бо́г на́ш, Кресто́м восприи́м стра́сть, изба́ви на́с от тли́, я́ко Человеколю́бец.

По 2-м стихосло́вии, седа́лен гла́с 8. Подо́бен: Прему́дрости:

Пра́зднику преполови́вшуся зако́нному, бы́л еси́ учя́ Спа́се мо́й во святи́лищи, и облича́я безу́мие неве́рных евре́ев, и вопия́ к наро́дом Боже́ственным гла́сом, я́ко Человеколю́бец: жа́ждай, взыва́л еси́, да гряде́т ко Мне́ и пие́т. Те́мже обеща́л еси́ ве́рующим пода́ти весе́лия во́ды от исто́чника нетле́ннаго. Сего́ ра́ди вопие́м Ти́: низпосли́ Христе́ Бо́же Ду́ха Твоего́ Свята́го, и спаси́ на́с, я́ко еди́н еси́ Многоми́лостивый. Два́жды.

Та́же, Воскресе́ние Христо́во: еди́ножды, и Псало́м 50.

Кано́н пра́здника со ирмосы́ на 6, и свята́го оби́тели на 4, и Мине́и на 4. Конда́к, и ексапостила́рий пра́здника.

На хвали́тех поста́вим стихи́ 4, и пое́м стихи́ры воскре́сны, гла́с 3:

Прииди́те вси́ язы́цы, уразуме́йте стра́шныя та́йны си́лу: Христо́с бо Спа́с на́ш, е́же в нача́ле Сло́во, распя́тся на́с ра́ди, и во́лею погребе́ся, и воскре́се из ме́ртвых, е́же спасти́ вся́ческая, Тому́ поклони́мся.

Пове́даша вся́ чудеса́ стра́жие Твои́ Го́споди: но собо́р суеты́ испо́лни мздо́ю десни́цу и́х, скры́ти мня́ше Воскресе́ние Твое́, е́же мiр сла́вит: поми́луй на́с.

Ра́дости вся́ испо́лнишася, Воскресе́ния иску́с прии́мша. Мари́а бо Магдали́на ко гро́бу прии́де, и обре́те а́нгела на ка́мени седя́ща, ри́зами блиста́ющася, и глаго́люща: что́ и́щете Жива́го с ме́ртвыми? Не́сть зде́, но воста́, я́коже рече́, предваря́я вы́ в Галиле́и.

Во све́те Твое́м Влады́ко, у́зрим све́т Человеколю́бче: воскре́сл бо еси́ из ме́ртвых, спасе́ние ро́ду челове́ческому да́руяй, да Тя́ вся́ тва́рь славосло́вит еди́наго безгре́шнаго: поми́луй на́с.

Сла́ва, и ны́не, гла́с 4. Анато́лиа: Просвети́вшеся бра́тие Воскресе́нием Спа́са Христа́, и дости́гше преполове́ния пра́здника Влады́чня, прии́скренно сохрани́м за́поведи Бо́жия, да досто́йни бу́дем и Вознесе́ние пра́здновати, и прише́ствие получи́ти Cвята́го Ду́ха.

На стихо́вне стихи́ры подо́бны, гла́с 2: До́ме Евфра́фов:

Теку́щий исто́чник Твоея́ прему́дрости, во́ду духо́вную источа́ет, ю́же пию́ще, догма́т Боже́ственных исполня́емся.

Сти́х: Помяни́ со́нм Тво́й, его́же стяжа́л еси́ испе́рва.

Уязвля́шеся лю́тый евре́йский ро́д вои́стинну, слы́ша Тя́ Сло́ве, науча́юща наро́ды спаси́тельным уче́нием.

Сти́х: Бог же Царь наш пре́жде ве́ка, соде́ла спасе́ние посреде́ земли́.

Прише́л еси́ Соде́телю на Сио́н, и ста́л еси́ посреде́ люде́й Твои́х, и лю́дем да́л еси́ благода́ть спаси́тельную.

Сла́ва, и ны́не, гла́с 4: Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́л еси́, иуде́и со дерзнове́нием учя́, Моисе́ем и в зако́не Тобо́ю законоположе́нным. Ужаса́ющеся же Христе́ Твоея́ прему́дрости неизрече́нному та́инству, е́же на Тя́ ропта́нию в себе́ за́вистию поуча́хуся. Ка́ко Се́й ве́сть пи́смена не учи́вся? Не ве́дяще Тебе́ Спа́са ду́ш на́ших.

По Трисвятом тропарь праздника:

Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т. / Исто́чниче жи́зни на́шея, Христе́ Бо́же, сла́ва Тебе́.

Ектении, и отпуст. И час 1-й.

Последование Литургии в субботу четвертой седмицы по Пасхе

На литурги́и блаже́нна, пе́снь 5.

Прокимен праздника, глас 3: Ве́лий Госпо́дь наш, и ве́лия кре́пость Его́, / и ра́зума Его́ несть числа́.

Стих: Хвали́те Го́спода я́ко благ псало́м: Бо́гови на́шему да услади́тся хвале́ние.

Деяний святых Апостол чтение, зача́ло 29 (Деян. 12:1–11):

Во дни о́ны, возложи́ И́род царь ру́це озло́бити не́кия и́же от це́ркве, уби́ же Иа́кова, бра́та Иоа́ннова, мече́м. И ви́дев, я́ко го́де есть Иуде́ем, приложи́ я́ти и Петра́, бя́ху же дни́е опресно́чнии. Его́же и емь всади́ в темни́цу, преда́в четы́рем четвери́цам во́инов стрещи́ его́, хотя́ по Па́сце извести́ его́ к лю́дем. И у́бо Петра́ стрежа́ху в темни́це: моли́тва же бе приле́жна быва́емая от це́ркве к Бо́гу о нем. Егда́ же хотя́ше его́ извести́ И́род, в нощи́ той бе Петр спя между́ двема́ во́инома, свя́зан желе́знома у́жема двема́, стра́жие же пред две́рьми стрежа́ху темни́цы. И се А́нгел Госпо́день предста́, и свет возсия́ в хра́мине: толкну́в же в ре́бра Петра́, воздви́же его́, глаго́ля: воста́ни вско́ре. И спадо́ша ему́ у́жя желе́зная с руку́. Рече́ же А́нгел к нему́: препоя́шися и вступи́ в плесни́цы твоя́. Сотвори́ же та́ко. И глаго́ла ему́: облецы́ся в ри́зу твою́ и после́дствуй ми. И изше́д вслед его́ идя́ше и не ве́дяше, я́ко и́стина есть бы́вшее от А́нгела, мня́ше же виде́ние зре́ти. Проше́дша же пе́рвую стра́жу и втору́ю, приидо́ста ко врато́м желе́зным, вводя́щым во град, я́же о себе́ отверзо́шася и́ма, и изше́дше преидо́ша сто́гну еди́ну, и а́бие отступи́ А́нгел от него́. И Петр быв в себе́, рече́: ны́не вем вои́стинну, я́ко посла́ Бог А́нгела Своего́ и изъя́т мя из руки́ И́родовы и от всего́ ча́яния люде́й иуде́йских.

Аллилуиа, глас 1: Помяни́ сонм Твой, его́же стяжа́л еси́ испе́рва.

Стих: Бог же Царь наш пре́жде ве́ка, соде́ла спасе́ние посреде́ земли́.

Ева́нгелие от Иоа́нна, зача́ло 31 (Ин. 8:31–42А):

Рече́ Госпо́дь к ве́ровавшым к Нему́ иуде́ем: а́ще вы пребу́дете во словеси́ Мое́м, вои́стинну ученицы́ Мои́ бу́дете и уразуме́ете и́стину, и и́стина свободи́т вы. Отвеща́ша и ре́ша Ему́: се́мя Авраа́мле есмы́ и никому́же рабо́тахом николи́же, ка́ко Ты глаго́леши, я́ко свобо́дни бу́дете? Отвеща́ им Иису́с: ами́нь, ами́нь глаго́лю вам, я́ко всяк творя́й грех раб есть греха́, раб же не пребыва́ет в дому́ во век, сын пребыва́ет во век. А́ще у́бо Сын вы свободи́т, вои́стинну свобо́дни бу́дете. Вем, я́ко се́мя Авраа́мле есте́, но и́щете Мене́ уби́ти, я́ко сло́во Мое́ не вмеща́ется в вы. Аз, е́же ви́дех у Отца́ Моего́, глаго́лю, и вы у́бо, е́же ви́десте у отца́ ва́шего, творите́. Отвеща́ша и ре́ша Ему́: оте́ц наш Авраа́м есть. Глаго́ла им Иису́с: а́ще ча́да Авраа́мля бы́сте бы́ли, дела́ Авраа́мля бы́сте твори́ли, ны́не же и́щете Мене́ уби́ти, Челове́ка, и́же и́стину вам глаго́лах, ю́же слы́шах от Бо́га, сего́ Авраа́м несть сотвори́л, вы творите́ дела́ отца́ ва́шего. Ре́ша же Ему́: мы от любодея́ния не́смы рожде́ни, еди́наго Отца́ и́мамы, Бо́га. Рече́ же им Иису́с: а́ще Бог Оте́ц ваш бы был, люби́ли бы́сте у́бо Мене́, Аз бо от Бо́га изыдо́х и приидо́х.

Причастен праздника: Яды́й Мою Плоть, и пия́й Мою́ Кровь, во Мне пребыва́ет, и Аз в нем, рече́ Госпо́дь. / Аллилуиа. Трижды.