Триодь Постная (на цсл., гражданский шрифт)

В субботу вечера, на Малей вечерни

Поставим стихи 4, и поем стихи подобныя.

Творение Николаа, глас 1. Подобен: Небе́сных чино́в:

Ны́не благоче́стия све́тлость всем распростре́ся, / разгоня́ющи лесть нече́стия я́ко о́блак, / просвеща́ющи же сердца́ благочести́вых: / прииди́те вси припаде́м, / благочестивому́дренно честны́м ико́нам Христо́вым / покланя́ющеся правосла́внии.

Священнообра́зными ико́нами ны́не украша́ется, / я́ко неве́ста укра́шена Христо́ва Це́рковь, / и всех созыва́ет духо́вно пра́здновати: / сни́демся во единомы́слии и ве́ре, / ра́достно велича́юще Го́спода.

Міре весь весели́ся: / се бо Госпо́дь низложи́ / с высоты́ нече́стия держа́ву неизрече́нным промышле́нием. / И смире́ннии вознесо́хомся днесь / к ве́ре правосла́вия, / благочести́вою цари́цею наставля́еми.

К первообра́зному но́сится, / глаго́лет Васи́лий, честь ико́ны: / сего́ ра́ди в любви́ почита́ем / ико́ны Спа́са Христа́, и святы́х всех: / да сих собра́вше, / никогда́же ны́не злоче́стием отведе́мся.

Слава, и ныне: Богородичен. Подобен: Безнача́льным, и Боже́ственным естество́м неви́димый, / Челове́к ви́ден бысть Отрокови́це, / от чи́стых Твои́х крове́й, / за кра́йнее благоутро́бие: / Его́же пло́ти написа́вше подо́бие, / че́стно покланя́емся вси ве́рнии, / и благоче́стно велича́ем.

На стиховне, глас 2. Подобен: До́ме Евфра́фов:

Губи́тельства тлетво́рнаго / избе́гше злосла́вных, / правосла́вия сия́нием, / сердца́ми просвети́мся ве́рнии / Бо́га сла́вяще.

Стих: Принеси́те Го́сподеви честь и сла́ву.

Ариева нечи́стая / упраздни́ся пре́лесть, / Македо́ния, Петра́, / Севи́ра же и Пи́рра: / и све́тит Свет трисо́лнечный.

Стих: Поклони́теся Ему́ во дворе́ святе́м Его́.

Не ктому́ злочести́вых / похваля́ется мра́чное уче́ние: / Бог бо правосла́вным, / изволе́нием Феодо́ры, / жезл кре́пости дае́т.

Слава, и ныне, Богородичен. Подобен:

Вознесла́ еси́ / смире́нных рог Богоро́дице, / ро́ждшая Бо́га Сло́ва: / те́мже ве́рно Тя / вси чту́ще велича́ем.

Тропарь праздника: Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мiр.

И бывает отпуст.

В субботу вечера, на Велицей вечерни

По обычном стихословии, Го́споди воззва́х, на глас Осмогласника, поставим стихов 10, и поем стихиры воскресны 3, и анатолиевы 3, и Триоди подобны 4.

Глас 6: Всю отложи́вше:

Тя непостижи́маго, пре́жде денни́цы / безнача́льно из Невеще́ственнаго возсия́вшаго, / безпло́тнаго же чре́ва Роди́телева, / проро́цы Го́споди, Твои́м Ду́хом вдохнове́ни, / прореко́ша Отроча́ бы́ти, / из Неискусобра́чныя воплоща́ема, / челове́ком совокупля́ема, / и су́щими на земли́ зри́ма: / и́миже я́ко ще́дрый / просвеще́ния сподо́би Твоего́, / воспева́ющих неизрече́нное, / и честно́е Твое́ Воскресе́ние.

Подобен: Сло́вом Тя пропове́давшии / богоглаго́ливии проро́цы, / и де́лы поче́тшии, / безконе́чную жизнь приплоди́ша: / тва́ри бо Влады́ко, па́че Тебе́ Соде́теля, / служи́ти не претерпе́вше, / мiра всего́ ева́нгельски отврати́шася, / и сообра́зни бы́ша стра́сти Твое́й, / ю́же провозвести́ша: / и́хже моли́твами, / сподо́би непоро́чно прейти́ / воздержа́ния по́прище, / еди́не Многоми́лостиве.

Естество́м неопи́санный Боже́ственным Твои́м сый, / на после́дняя Влады́ко вопло́щься, / изво́лил еси́ описова́тися: / пло́ти бо прия́тием, и сво́йства вся сея́ взял еси́. / Те́мже вид Твой образова́ния опису́ющии / любе́зно целу́ем, / к Твое́й любви́ возвыша́еми, / и исцеле́ний благода́ть почерпа́ем из него́, / апо́стольским после́дующе / Боже́ственным преда́нием.

Пречестно́е украше́ние Христо́ва Це́рковь, / честны́х прия́т и святы́х ико́н, / Спа́са Христа́ и Богома́тере, / и всех святы́х светле́йшее возставле́ние, / и́мже просвеща́ется, и красу́ется благода́тию, / и со́нмище отлага́ет ерети́ческое изгоня́щи: / и ра́дующися сла́вит человеколю́бца Бо́га, / ея́ ра́ди претерпе́вша стра́сти во́льныя.

Слава, глас 2: Благода́ть возсия́ и́стины, / прообразу́емая дре́вле сено́вно, ^{10} / ны́не явле́нно сконча́ся: / се бо Це́рковь воплоще́нным о́бразом Христо́вым, / я́ко прекра́сною у́тварию облачи́тся, / ски́нии свиде́ния о́браз пронапису́ющи, / и правосла́вную ве́ру содержа́щи: / да его́же почита́ем, / сего́ и о́браз держа́ще, не прельща́емся, / да облеку́тся в студ си́це неве́рующии: / нам бо сла́ва зрак Воплоти́вшагося / благоче́стно покланя́емый, не боготвори́мый. / Той облобыза́юще ве́рнии возопии́м: / Бо́же, спаси́ лю́ди Твоя́, и благослови́ достоя́ние Твое́.

И ныне, Богородичен 1-й гласа.

На литии же, яко обычно, стихира храма.

Слава, глас 2: Ра́дуйтеся проро́цы честни́и, / зако́н Госпо́день до́бре учини́вшии, / и ве́рою я́вльшиися необори́мии столпи́ неукло́ннии: / вы бо и хода́таи яви́стеся Но́ваго Заве́та Христо́ва, / и преста́вившеся на небеса́. Того́ моли́те, / умири́ти мiр, и спасти́ ду́ши на́ша.

И ныне, Богородичен, глас тойже: Все упова́ние мое́ / на Тя возлага́ю, Ма́ти Бо́жия, / сохрани́ мя под покро́вом Твои́м.

На стиховне Осмогласника.

Слава, глас 2: Из нече́стия во благоче́стие преше́дше, / и све́том ра́зума просвети́вшеся, / псало́мски рука́ми воспле́щим, / благода́рственно хвалу́ Бо́гу принося́ще: / и на стена́х, и дска́х, [34] и на свяще́нных сосу́дех, / начерта́нным свяще́нным образо́м Христо́вым, / и Пречи́стыя, и всех святы́х, / че́стно поклони́мся, отлага́юще злоче́стную злосла́вных ве́ру: / [честь бо о́браза, я́коже глаго́лет Васи́лий, на первообра́зное прехо́дит,] / прося́ще моли́твами Пречи́стыя Твоея́ Ма́тере, Христе́ Бо́же наш, и всех святы́х, / дарова́ти нам ве́лию ми́лость.

И ныне, Богородичен: О чудесе́ но́ваго всех дре́вних чуде́с! / Кто бо позна́ ма́терь без му́жа ро́ждшую, / и на руку́ нося́щую, / всю тварь Содержа́щаго? / Бо́жие есть изволе́ние, Ро́ждшееся. / Его́же я́ко Младе́нца, Пречи́стая, / Твои́ма рука́ма носи́вшая, / и Ма́терне дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Тропарь: Богоро́дице Де́во ра́дуйся: (Дважды)

И праздника, глас 2: Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мiр. (Единожды)

И прочее последование бдения.

На утрени

На Бог Господь, тропарь воскресен, дважды.

Слава, настоящий, глас 2: Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мiр.

И ныне: Вся па́че смы́сла, / вся пресла́вная Твоя́ Богоро́дице та́инства, / чистоте́ запеча́танной, и де́вству храни́му, / Ма́ти позна́лася еси́ нело́жна, / Бо́га ро́ждши и́стиннаго: / Того́ моли́ спасти́ся душа́м на́шим.

И обычное стихословие (кафисмы 2, 3): и прочее последование.

Каноны: Воскресный, и Богородицы, и Триоди на 6.

Творение господина Феофана, егоже краестрочие: Днесь благоче́стия Богосве́тлая прии́де заря́. Глас 4.

Песнь 1.

Ирмос: Мо́ря чермну́ю пучи́ну, / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма, / Амали́кову си́лу в пусты́ни победи́л есть.

Припев: Сла́ва Тебе́, Бо́же наш, сла́ва Тебе́.

Пле́щуще с весе́лием днесь ве́рнии возопии́м: / коль чу́дна дела́ Твоя́ Христе́, и вели́ка си́ла, / на́ше единомы́слие и согла́сие соде́лавый!

День ра́достный богому́дреннии / прииди́те соверши́м, / ны́не не́бо и земля́ весели́тся, и а́нгелов чи́ни, / и челове́ков собра́ния изря́дно пра́зднующе.

Преве́лие благодея́ние ви́дяще, рука́ми воспле́щим: / разстоя́щияся у́ды Христо́вы, совоку́плены во еди́нство, / и Бо́га похва́лим мир пода́вшаго.

Слава: Да́шася Це́ркви днесь победи́тельная, / Богодви́жным манове́нием и сове́том, / Михаи́ла же и Феодо́ры, / благоче́стно ве́ру содержа́щих царе́й на́ших.

И ныне, Богородичен: Ору́жия злочести́вых исчезо́ша я́ве ересе́й: / храм бо Твой Пречи́стая Чи́стая, / во образе́х украша́емый всеблаголе́пно зря́ще, / ны́не всесвяще́нно ра́дуемся.

Катава́сия: Мо́ря чермну́ю пучи́ну, / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма, / Амали́кову си́лу в пусты́ни победи́л есть.

Песнь 3.

Ирмос: Весели́тся о Тебе́ Це́рковь Твоя́ Христе́, зову́щи: / Ты моя́ кре́пость Го́споди, / и прибе́жище, и утвержде́ние.

Припев: Сла́ва Тебе́, Бо́же наш, сла́ва Тебе́.

Не ктому́ нечести́вых еретико́в ны́не бровь взе́млется: / Бо́жия бо си́ла правосла́вие удержа́ла есть.

Облацы проро́честии, / животворя́щую с небесе́ днесь ро́су нам да кропя́т, / на воста́ние ве́ры.

Благогла́сно та́йныя апо́столов Христо́вых трубы́, / па́че естества́ да вопию́т, / честны́х образо́в исправле́ние.

Слава: Воспои́м Христа́, показа́вшаго нам / цари́цу благочести́вую, христолюби́вую, / с Боговенча́нною о́траслию.

И ныне, Богородичен: Селе́ние Твое́ свяще́нное / дости́гше ве́рнии, Пречи́стая, / светови́дною благода́тию ны́не озари́тися, мо́лимся.

Катава́сия: Весели́тся о Тебе́ Це́рковь Твоя́ Христе́, зову́щи: / Ты моя́ кре́пость Го́споди, / и прибе́жище, и утвержде́ние.

Седален, глас 1. Подобен: Лик а́нгельский:

Боже́ственный Твой зрак, во о́бразе образу́юще Христе́, / я́сно вопие́м Рождество́, / чудеса́ неизглаго́ланная, во́льное распя́тие. / Отону́дуже бе́сове отго́нятся стра́хом, / и злосла́внии в посупле́нии рыда́ют, / я́ко сих соприча́стницы.

Слава: Зра́ками проро́ков, апо́столов ви́дами, / му́чеников свяще́нных, и святы́х всех ико́нами, / и изображе́ньми свяще́нно красу́ется: / Жениха́ же мы́сленнаго и Неве́сты украша́ется у́мными красова́ньми, / ма́ти вы́шний Сио́н.

И ныне, Богородичен: Любо́вию Чи́стая, Твою́ святу́ю ико́ну почита́ющим, / и Бо́жию Тя и́стинную Ма́терь согла́сно возвеща́ющим, / и ве́рно покланя́ющимся Ти, / храни́тельница яви́лася еси́, и держа́вное предста́тельство, / отвраща́ющи вся́кое лю́тое дале́че сих, / я́ко вся могу́щая.

Песнь 4.

Ирмос: Вознесе́на Тя ви́девши Це́рковь на Кресте́, / со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й Го́споди.

Припев: Сла́ва Тебе́, Бо́же наш, сла́ва Тебе́.

Наи́тием Боже́ственным Уте́шителя, Твой храм освяти́, / и прише́ствием Сего́ ерети́ческую пре́лесть отжени́, / Сло́ве Бо́жий многоми́лостиве.

Ну́жднейшаго изба́вивый злоче́стия Твоя́ лю́ди, / покажи́ благоче́стия ре́вностию разжже́ны, / и ве́рою взыва́ющия: / сла́ва си́ле Твое́й Го́споди.

Священнообра́зными изображе́ньми, / образо́в Христо́вых зря́ще и Богоро́дицы, / сия́ющая Боже́ственная селе́ния, / священноле́пно ра́дуемся.

Слава: Цари́ца по обоему́ укра́шена, / и́стиннаго возжеле́вши Христо́ва Ца́рства, / Сего́ написа́ о́браз пречи́стый, / и святы́х изображе́ния.

И ныне, Богородичен: Воплоще́нна роди́вши Боже́ственнаго Сло́ва, / Боголе́пное освяще́ние Благода́тная, Сего́ показа́ла еси́: / те́мже Твой храм светови́дный обновля́ем.

Катава́сия: Вознесе́на Тя ви́девши Це́рковь на Кресте́, / со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й Го́споди.

Песнь 5.

Ирмос: Ты Го́споди мой, Свет в мiр прише́л еси́. / Свет Святы́й, обраща́яй из мра́чна неве́дения, / ве́рою воспева́ющих Тя.

Припев: Сла́ва Тебе́, Бо́же наш, сла́ва Тебе́.

Положи́ Го́споди Твое́й Це́ркви утвержде́ние, / непрекло́нней пребы́ти в век ве́ка / от смяте́ний ересе́й.

Во всю зе́млю све́тлость возсия́ свы́ше, / да́ннаго ве́рным весе́лия, / и Боже́ственнаго заступле́ния.

Еди́не Благи́й, и исто́чниче бла́гости, / Ты возвы́си правосла́вных рог, / чту́щих о́браз Твой.

Слава: Свет незаходи́мый нам благоче́стия возсия́, / веле́нием Богодухнове́нным ве́рных па́стырей, / и ма́нием Богому́дрым.

И ныне, Богородичен: Обнови́ нам дре́внее благоле́пие, / Пречи́стая Богома́ти, / и дом Твой сей освяти́ / Твое́ю благода́тию.

Катава́сия: Ты Го́споди мой, Свет в мiр прише́л еси́. / Свет Святы́й, обраща́яй из мра́чна неве́дения, / ве́рою воспева́ющих Тя.

Песнь 6.

Ирмос: Пожру́ Ти со гла́сом хвале́ния Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею кро́вию.

Припев: Сла́ва Тебе́, Бо́же наш, сла́ва Тебе́.

Пи́шется и почита́ется ве́рно / покланя́емый о́браз Влады́ки, / и прие́млет па́ки Це́рковь дерзнове́ние, / благоче́стно Спа́са прославля́ющи.

Обнажа́ется се́тования, и тьмы ересе́й Христо́ва Це́рковь, / и но́сит ри́зу весе́лия, / и Боже́ственною и светоно́сною покрыва́ется благода́тию.

Слава: Благосла́вия дре́вняго осия́ния получи́ правосла́вных собо́р, / Феодо́ры манове́нием цари́цы, / и ея́ сы́на благочести́ваго Михаи́ла самоде́ржца.

И ныне, Богородичен: Дре́вле свиде́ния повеле́вый бы́ти ски́нии: / я́ко в ски́нии слове́сней, в Тебе́ живе́т Еди́н Препросла́вленный, / прославля́яй храм Твой Де́во чудесы́.

Катава́сия: Пожру́ Ти со гла́сом хвале́ния Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею кро́вию.

Кондак, глас 2. Самогласен:

Неопи́санное Сло́во Отчее, / из Тебе́ Богоро́дице описа́ся воплоща́емь: / и оскве́рншийся о́браз в дре́внее вообрази́в, / Боже́ственною добро́тою смеси́. / Но испове́дающе спасе́ние, де́лом и сло́вом, / сие́ вообража́ем.

Икос: Сие́ смотре́ния та́инство, / дре́вле проро́цы Богови́дно вдохнове́ни бы́вше, / нас ра́ди в концы́ веко́в дости́гших предвозвести́ша, / получи́вше сего́ сия́ния. / Ра́зум у́бо Боже́ственный от него́ взе́мше, / Еди́наго Го́спода Бо́га зна́ем, / в трие́х Ипоста́сех покланя́емаго: / и Тому́ еди́ному служа́ще, / еди́ну ве́ру, и еди́но креще́ние иму́ще, / во Христа́ облеко́хомся, / но испове́дающе спасе́ние, де́лом и сло́вом, / сие́ вообража́ем.

Синаксарь.

Песнь 7.

Ирмос: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем опаля́еми взыва́ху: / благослове́н еси́ в хра́ме сла́вы Твоея́ Го́споди.

Припев: Сла́ва Тебе́, Бо́же наш, сла́ва Тебе́.

Да сликовству́ет церко́вней све́тлости / любо́вию Боже́ственною а́нгельское во́инство, / Богому́дренно воспева́ющее: / благослове́н еси́ в хра́ме сла́вы Твоея́ Го́споди.

Це́рковь перворожде́нных, и торжество́ ра́дуется, / зря́ще ны́не боже́ственныя лю́ди, единому́дренно воспева́ющия: / благослове́н еси́ в хра́ме сла́вы Твоея́ Го́споди.

Слава: Изба́влени пре́жде мра́чныя е́реси, / ма́нием Феодо́ры достоле́пныя цари́цы, воспева́ем: / благослове́н еси́ в хра́ме сла́вы Твоея́ Го́споди.

И ныне, Богородичен: Па́че вы́шних ликостоя́ний, вознесла́ся еси́ Всечи́стая, / еди́на бы́вши Ма́ти Вседе́теля. / Ра́дующеся у́бо взыва́ем: / благослове́нна Ты еси́ в жена́х, всенепоро́чная Влады́чице.

Катава́сия: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем опаля́еми взыва́ху: / благослове́н еси́ в хра́ме сла́вы Твоея́ Го́споди.

Песнь 8.

Ирмос: Ру́це распросте́р Дании́л, / львов зия́ния в ро́ве затче́: / о́гненную же си́лу угаси́ша, / доброде́телию препоя́савшеся, / благоче́стия рачи́тели о́троцы, взыва́юще: / благослови́те вся дела́ Госпо́дня Го́спода.

Припев: Сла́ва Тебе́, Бо́же наш, сла́ва Тебе́.

Зако́ны Це́ркве оте́ческия сохраня́юще, о́бразы пи́шем, / и лобза́им усты́, и се́рдцем, и хоте́нием / Христо́вы, и Его́ святы́х, зову́ще: / благослови́те вся дела́ Госпо́дня Го́спода.

На первообра́зное я́ве о́браза, / по́честь и поклоне́ние вознося́ще, / чтим, Богоглаго́ливых уче́нием после́дующе, / и Христу́ ве́рою зове́м: / благослови́те вся дела́ Госпо́дня Го́спода.

Благослови́м Отца́ и Сы́на и Свята́го Ду́ха, Го́спода.

Ум озари́вши просвеще́нием Боже́ственнаго Ду́ха, / честна́я цари́ца, плоды́ Богому́дренныя иму́щи, / благоле́пие возлюби́ Це́ркве Христо́вы, и красоту́, / благословя́щи ку́пно с ве́рными Иису́са Богочелове́ка.

И ныне, Богородичен: Луча́ми све́та у́мнаго, освеща́емый Боже́ственный дом Твой, / осеня́ет ны́не всех о́блаком Ду́ха, / и освяща́ет ве́рныя согла́сно пою́щия: / благослови́те вся дела́ Госпо́дня Го́спода.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катава́сия: Ру́це распросте́р Дании́л, / львов зия́ния в ро́ве затче́: / о́гненную же си́лу угаси́ша, / доброде́телию препоя́савшеся, / благоче́стия рачи́тели о́троцы, взыва́юще: / благослови́те вся дела́ Госпо́дня Го́спода.

Песнь 9.

Ирмос: Ка́мень нерукосе́чный / от несеко́мыя горы́ Тебе́ Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся, Тя Богоро́дице велича́ем.

Припев: Сла́ва Тебе́, Бо́же наш, сла́ва Тебе́.

Священнописа́ньми образо́в укра́шеную, / зря́ще па́ки честну́ю Це́рковь, / со благогове́нием вси притеце́м и Бо́гу возопии́м: / Тебе́ велича́ем Трисвяты́й.

Честь и сла́ву стяжа́вши Це́рковь, / Крест Твой и честны́я ико́ны, и святы́х изображе́ния, / с весе́лием Влады́ко и ра́достию велича́ет Тя.

Слава: Освети́ Боже́ственною Твое́ю сла́вою лю́ди на́ши Ще́дрый, / и ополче́ньми а́нгельскими, и всеору́жествы сия́ огради́, / язы́ков свире́пство покаря́я им Влады́ко.

И ныне, Богородичен: Взя́тся прама́тере Евы осужде́ние Богоро́дице, / я́ко Ты всех Влады́ку несказа́нно Чи́стая родила́ еси́: / Его́же и ны́не подо́бие на ико́нах целу́ем.

Катава́сия: Ка́мень нерукосе́чный / от несеко́мыя горы́ Тебе́ Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся, Тя Богоро́дице велича́ем.

Ексапостиларий утренний воскресный, единожды.

И настоящий. Подобен: Со ученики́ взы́дем:

Взыгра́йте, восплещи́те, с весе́лием воспо́йте: / коль чу́дная и стра́нная Твоя́ Христе́, вопию́ще, дела́! / И кто возмо́жет изрещи́ Спа́се могу́тства, Тебе́, / на́ше единомы́слие и согла́сие / во еди́ну соедини́вшаго це́рковь?

Богородичен: Ору́жия ны́не оскуде́ша вражде́бныя е́реси, / и па́мять ея́ исчезе́ с шу́мом: / храм бо Твой Всечи́стая всеблаголе́пно зря́ще, / укра́шенный благода́тьми честны́х ико́н, / ра́дости исполня́емся вси.

На хвалитех стихиры воскресны, 4: и анатолиев 1: и Триоди подобны три, глас 4.

Подобен: Дал еси́ зна́мение:

В Тебе́ ны́не ра́дуется Це́рковь Человеколю́бче / Женисе́ и Созда́теле свое́м, / сию́ во́лею Боголе́пною / от и́дольския ле́сти изба́вльшем, / и Себе́ обручи́вшем честно́ю кро́вию, / све́тло прие́млющи свяще́нное возставле́ние ико́н, / и ра́дующися Тя пое́т, и сла́вит ве́рно.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Пло́ти изображе́ние Твое́ возставля́юще, Го́споди, / любе́зно лобыза́ем, / вели́кое та́инство смотре́ния Твоего́ изъясня́юще: / не мне́нием бо, я́коже глаго́лют богобо́рнии де́ти Ма́нентовы, / нам яви́лся еси́ Человеколю́бче, / но и́стиною и естество́м пло́ти, / Тобо́ю возводи́ми к Твое́й любви́, и жела́нию.

Стих: Возвеселю́ся и возра́дуюся о Тебе́, пою́ и́мени твоему́, Вы́шний.

День ра́достный, и весе́лия испо́лненный яви́ся днесь: / све́тлость бо догма́т и́стиннейших блиста́ет, / и сия́ет Це́рковь Христо́ва / укра́шена возставле́ньми ико́н святы́х ны́не, / и изображе́ний сия́ньми, / и единомы́слие быва́ет ве́рных Богопочте́нное.

Таже глаголем стих, глас 6: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

И поем самогласен дне, глас 6:

Моисе́й во вре́мя воздержа́ния / зако́н прия́т, и лю́ди привлече́; / Илия́ пости́вся небеса́ заключи́; / трие́ же о́троцы Авраа́мстии, / мучи́теля беззако́ннующа поще́нием победи́ша. / Имже и нас Спа́се сподо́би / Воскресе́ние улучи́ти, си́це вопию́щих: / Святы́й Бо́же, Святы́й Кре́пкий, Святы́й Безсме́ртный, поми́луй нас.

Сла́ва, паки тойже.

И ны́не: Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы́ ожи́хом,/ те́м воспева́юще вопие́м:/ благослове́н Христо́с Бо́г// благоволи́вый та́ко, сла́ва Тебе́.

Славословие великое. И отпуст. Сла́ва, и ны́не, стихира евангельская, и Час первый

На литургии

Блаженны гласа, на 6: и от канона дне, песнь 6-я, на 4.

Тропарь праздника, глас 2:

Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мiр. (Единожды)

Кондак, глас 2. Самогласен:

Неопи́санное Сло́во Отчее, / из Тебе́ Богоро́дице описа́ся воплоща́емь: / и оскве́рншийся о́браз в дре́внее вообрази́в, / Боже́ственною добро́тою смеси́. / Но испове́дающе спасе́ние, де́лом и сло́вом, / сие́ вообража́ем.

Прокимен, глас 4. Песнь отцев: Благослове́н еси́ Го́споди Бо́же оте́ц на́ших, / и хва́льно и просла́влено и́мя Твое́ во ве́ки.

Стих: Яко пра́веден еси́ о всех, я́же сотвори́л еси́ нам.

Апостол к Евреем, зачало 329 от полу.

Бра́тие, ве́рою Моисе́й, вели́к быв, отве́ржеся нарица́тися сын дще́ре фарао́новы. Па́че же изво́ли страда́ти с людьми́ Бо́жиими, не́жели име́ти вре́менную греха́ сла́дость. Бо́льшее бога́тство вмени́в Eги́петских сокро́вищ поноше́ние Христо́во, взира́ше бо на мздовоздая́ние. И что eще́ глаго́лю? Не доста́нет бо ми повеству́ющу ле́та, о Гедео́не, Вара́це же и Сампсо́не и Иеффа́и, о Дави́де же и Самуи́ле, и о (других) проро́цех, и́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ льво́в, угаси́ша си́лу óгненную, избего́ша óстрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жeны́ от воскресе́ния ме́ртвыя своя́; ини́и же избие́ни бы́ша, не прие́мше избавле́ния, да лу́чшее воскресе́ние улуча́т. Друзи́и же руга́нием и ра́нами искуше́ние прия́ша, eще́ же и уз и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. Ихже не бе досто́ин весь мiр, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Аллилуия, глас 8.

Стих: Моисе́й и Ааро́н во иере́ех Его́, и Саму́ил в призыва́ющих и́мя Его́.

Стих: Призыва́ху Го́спода, и Той послу́шаше их.

Евангелие от Иоанна, зачало 5.

Во вре́мя о́но, восхоте́ Иису́с изы́ти в Галиле́ю, и обре́те Фили́ппа и глаго́ла eму́: гряди́ по Мне. Бе же Фили́пп от Вифсаи́ды, от гра́да Андре́ова и Петро́ва. Обре́те Фили́пп Нафана́ила, и глаго́ла eму́: Eго́же писа́ Моисе́й в зако́не и проро́цы, обрето́хом Иису́са сы́на Ио́сифова, и́же от Назаре́та. И глаго́ла eму́ Нафана́ил: от Назаре́та мо́жет ли что добро́ бы́ти? Глаго́ла eму́ Фили́пп: прииди́ и виждь. Ви́де же Иису́с Нафана́ила гряду́ща к Себе́, и глаго́ла о нем: се, вои́стинну Израильтя́нин, в не́мже льсти несть. Глаго́ла Eму́ Нафана́ил: ка́ко мя зна́еши? Отвеща́ Иису́с, и рече́ eму́: пре́жде да́же не возгласи́ тебе́ Фили́пп, су́ща под смоко́вницею ви́дех тя. Отвеща́ Нафана́ил и глаго́ла Eму́: Равви́, Ты eси́ Сын Бо́жий, Ты eси́ Царь Изра́илев. Отвеща́ Иису́с, и рече́ eму́: зане́ рех ти, я́ко ви́дех тя под смоко́вницею, ве́руеши: бо́льша сих у́зриши. И глаго́ла eму́: ами́нь, ами́нь глаго́лю вам, отсе́ле у́зрите не́бо отве́рсто и Ангелы Бо́жия восходя́щя, и нисходя́щя над Сы́на Челове́ческаго.

Причастен: Хвали́те Го́спода с небе́с, / хвали́те Его́ в вы́шних.

Другий: Ра́дуйтеся пра́веднии о Го́споде, / пра́вым подоба́ет похвала́. / Аллилу́иа, трижды.

На трапезе же ядим варение со елеем, а не рыбы. Аще же прилучится, пием вино, уставленное в славу Божию, по две чаши. Такожде и в вечер по две.

Последование Недели Православия

По Литургии весь собор духовенства из алтаря исходит на середину храма. Иконы Спасителя и Богоматери полагают на аналое посреди церкви.

Диакон: Благослови́, влады́ко.

Иерей: Благослове́н Бог наш...

Певцы: Ами́нь. И поют: Царю́ Небе́сный: Чтец: Трисвятое по Отче наш. Иерей: Яко Твое́ есть Ца́рство: Чтец: Ами́нь. Го́споди, поми́луй, 12. Сла́ва, и ны́не. Прииди́те, поклони́мся: (трижды).

Псалом 74-й:

Испове́мыся Тебе́, Бо́же, испове́мыся Тебе́, и призове́м и́мя Твое́; пове́м вся чудеса́ Твоя́. Егда́ прииму́ вре́мя, Аз правоты́ возсужду́. Раста́яся земля́ и вси живу́щии на ней, Аз утверди́х столпы́ ея́. Рех беззако́ннующим, не беззако́ннуйте: и согреша́ющим, не возноси́те ро́га, не воздвиза́йте на высоту́ ро́га ва́шего, и не глаго́лите на Бо́га непра́вду: я́ко ниже́ от исхо́д, ниже́ от за́пад, ниже́ от пусты́х гор. Яко Бог судия́ есть: сего́ смиря́ет, и сего́ возно́сит. Яко ча́ша в руце́ Госпо́дни, вина́ нерастворе́на, испо́лнь растворе́ния, и уклони́ от сея́ в сию́: оба́че дро́ждие Его́ не истощи́ся, испию́т вси гре́шнии земли́. Аз же возра́дуюся в век, воспою́ Бо́гу Иа́ковлю: и вся ро́ги гре́шных сломлю́, и вознесе́тся рог пра́веднаго.

Диакон произносит великую ектению и по прошении: О плавающих... прилагает следующие прошения:

О е́же ми́лостивым о́ком призре́ти на Святу́ю Свою́ Це́рковь, и соблюсти́ ю́ невреди́му и непреобори́му от ересе́й и суеве́рий, и ми́ром Свои́м огради́ти, Го́споду помо́лимся.

О е́же утиши́ти раздира́ния ея́ и си́лою Свята́го Ду́ха обрати́ти всех отступи́вших к позна́нию и́стины и сопричести́ ко избра́нному Своему́ ста́ду, Го́споду помо́лимся.

О е́же просвети́ти вся све́том Своего́ богоразу́мия, ве́рных же Свои́х укрепи́ти и непоколеби́мых в правове́рии соблюсти́, Го́споду помо́лимся.

О изба́витися нам... и прочее.

По возгласе певцы:

Бог Госпо́дь, и яви́ся нам, / благослове́н Гряды́й во Имя Госпо́дне. (По каждом стихе)

Стих 1: Испове́дайтеся Го́сподеви, я́ко благ, я́ко в век ми́лость Его́.

Стих 2: Обыше́дше обыдо́ша мя и и́менем Госпо́дним противля́хся им.

Стих 3: Не умру́, но жив бу́ду и пове́м дела́ Госпо́дня.

Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей и есть ди́вен во очесе́х на́ших.

Тропарь, глас 4-й:

Благода́рни су́ще недосто́йнии раби́ Твои́, Го́споди, / о Твоих вели́ких благодея́ниих, на нас бы́вших, / сла́вяще Тя, хва́лим, благослови́м, благодари́м, пое́м и велича́ем Твое́ благоутро́бие, / и ра́бски любо́вию вопие́м Ти: / Благоде́телю, Спа́се наш, сла́ва Тебе́.

Слава, глас 3-й: Твои́х благодея́ний и даро́в ту́не, / я́ко раби́ непотре́бнии, сподо́бльшеся, Влады́ко, / к Тебе́ усе́рдно притека́юще, / благодаре́ние по си́ле прино́сим / и Тебе́ я́ко Благоде́теля и Творца́ сла́вяще, вопие́м: / сла́ва Тебе́, Бо́же Преще́дрый.

И ныне, глас 4-й: Якоже вы́шния тве́рди благоле́пие, / и ни́жнюю споказа́л еси́ красоту́ свята́го селе́ния сла́вы Твоея́, Го́споди, / утверди́ сие́ во век ве́ка / и приими́ на́ша в нем непреста́нно приноси́мая Тебе́ моле́ния, Богоро́дицею, / всех Животе́ и Воскресе́ние.

Диакон: Во́нмем. Иерей: Мир всем. Чтец: И ду́хови твоему́. Диакон: Прему́дрость. Во́нмем.

Чтец: Прокимен, глас 4-й: Насажде́ни в дому́ Госпо́дни, / во дво́рех Бо́га на́шего процвету́т.

Стих: Весели́теся, пра́веднии, о Го́споде, пра́вым подоба́ет похвала́.

Апостол к Римлянам, зачало 121 от полу.

Бра́тие, молю́ вы, блюди́теся от творя́щих ра́спри и раздо́ры, кроме́ уче́ния, ему́же вы научи́стеся, и уклони́теся от них. Такови́и бо Го́сподеви на́шему Иису́су Христу́ не рабо́тают, но своему́ чре́ву: и́же благи́ми словесы́ и благослове́нием прельща́ют сердца́ незло́бивых. Ва́ше бо послуша́ние ко всем дости́же. Ра́дуюся же е́же о вас. Хощу́ же вас му́дрым у́бо бы́ти во благо́е, просты́м же в зло́е. Бог же ми́ра да сокруши́т сатану́ под но́ги ва́ша вско́ре. Благода́ть Го́спода на́шего Иису́са Христа́ с ва́ми. Ами́нь.

Аллилуия, трижды.

Евангелие от Матфея, зачало 75.

Рече́ Госпо́дь: блюди́те, да не пре́зрите еди́наго (от) ма́лых сих: глаго́лю бо вам, я́ко а́нгели их на небесе́х вы́ну ви́дят лице́ Отца́ Моего́ Небе́снаго. Прии́де бо Сын Челове́ческий взыска́ти и, спасти́ поги́бшаго. Что вам мни́тся? Аще бу́дет не́коему челове́ку сто ове́ц, и заблу́дит еди́на от них: не оста́вит ли де́вятьдесят и де́вять в гора́х, и шед и́щет заблу́ждшия? И а́ще бу́дет обрести́ ю, ами́нь глаго́лю вам, я́ко ра́дуется о ней па́че, не́же о девяти́десятих и девяти́ не заблу́ждших. Та́ко несть во́ля пред Отце́м ва́шим Небе́сным, да поги́бнет еди́н от ма́лых сих. Аще же согреши́т к тебе́ брат твой, иди́ и обличи́ его́ между́ тобо́ю и тем еди́нем. Аще тебе́ послу́шает, приобре́л еси́ бра́та твоего́. Аще ли тебе́ не послу́шает, пойми́ с собо́ю па́ки еди́наго или́ два, да при усте́х двою́ или́ трие́х свиде́телей ста́нет всяк глаго́л. Аще же не послу́шает их, пове́ждь це́ркви; а́ще же и це́рковь преслу́шает, бу́ди тебе́ я́коже язы́чник и мыта́рь. Ами́нь бо глаго́лю вам: ели́ка а́ще свя́жете на земли́, бу́дут свя́зана на Небеси́, и ели́ка а́ще разрешите́ на земли́, бу́дут разреше́на на Небесе́х.

На сугубой ектении, прибавляются прошения:

Не хотя́й сме́рти гре́шных, но ожида́яй обраще́ния и покая́ния, соедини́ всех во Святе́й Твое́й Це́ркви, мо́лим Ти ся, Милосе́рдый Го́споди, услы́ши и поми́луй.

Устро́ивый мiр сей в сла́ву Твою́, сотвори́, я́ко да и́стинною ве́рою и благоче́стием Тебе́, Бо́га на́шего, просла́вят, мо́лим Ти ся, Всеси́льный Тво́рче, услы́ши и поми́луй.

Да́вый за́поведь Твою́ нам, е́же люби́ти Тебе́, Бо́га на́шего, и бли́жняго своего́, сотвори́, да не́нависти, вражды́, оби́ды и про́чия беззако́ния прекратя́тся, и́стинная же любо́вь да ца́рствует в сердца́х на́ших, мо́лим Ти ся, Спаси́телю наш, услы́ши и ми́лостивно поми́луй.

Иерей, возглас: Услы́ши ны, Бо́же, Спаси́телю наш... Певцы: Ами́нь. Диакон: Го́споду помо́лимся. Певцы: Го́споди, поми́луй.

Иерей читает молитву:

Всевы́шний Бо́же, Влады́ко и Соде́телю всея́ тва́ри, наполня́яй вся вели́чеством Твои́м и содержа́й си́лою Твое́ю! Тебе́, Вседарови́тому Го́споду на́шему, мы, недосто́йнии, благодаре́ние прино́сим, я́ко не отвраща́ешися нас беззако́ний ра́ди на́ших, но па́че предваря́еши ны щедро́тами Твои́ми. Ты ко избавле́нию на́шему посла́л еси́ Единоро́днаго Твоего́ Сы́на, и благовести́л безме́рное Твое́ к ро́ду челове́ческому снизхожде́ние, я́ко хоте́нием хо́щеши и ожида́еши, е́же обрати́тися нам к Тебе́ и спасе́ным бы́ти. Ты, снизходя́ к не́мощи на́шего естества́, укрепля́еши нас всеси́льною Свята́го Твоего́ Ду́ха благода́тию, утеша́еши спаси́тельною ве́рою и соверше́нною наде́ждою ве́чных благ и, руково́дствуя избра́нных Твои́х в го́рний Сио́н, соблюда́еши, я́ко зе́ницу о́ка. Испове́дуем, Го́споди, вели́кое Твое́ и безприкла́дное человеколю́бие и милосе́рдие. Но ви́дяще мно́гих поползнове́ния, приле́жно Тя, Всеблаги́й Го́споди, мо́лим: при́зри на Це́рковь Твою́ и виждь, я́ко Твое́ спаси́тельное благове́стие, а́ще и ра́достно прия́хом, но те́рние суеты́ и страсте́й твори́т о́ное в не́киих малопло́дно, в не́киих же и безпло́дно, и по умноже́нию беззако́ний о́вии ересьми́, о́вии раско́лом проти́вящеся ева́нгельской Твое́й и́стине, отступа́ют от достоя́ния Твоего́, отрева́ют Твою́ благода́ть и поверга́ют себе́ суду́ Твоего́ Пресвята́го Сло́ва. Премилосе́рдый и Всеси́льный, не до конца́ гне́ваяйся, Го́споди! Бу́ди ми́лостив, мо́лит Тя Твоя́ Це́рковь, представля́ющи Тебе́ Нача́льника и Соверши́теля спасе́ния на́шего, Иису́са Христа́, бу́ди ми́лостив нам, укрепи́ нас в правове́рии си́лою Твое́ю, заблужда́ющим же просвети́ разу́мныя о́чи све́том Твои́м Боже́ственным, да уразуме́ют Твою́ и́стину; умягчи́ их ожесточе́ние и отве́рзи слух, да позна́ют глас Твой и обратя́тся к Тебе́, Спаси́телю на́шему. Испра́ви, Го́споди, ины́х развраще́ние и жизнь, несогла́сную христиа́нскому благоче́стию; сотвори́, да вси свя́то и непоро́чно поживе́м, и та́ко спаси́тельная ве́ра укорени́тся и плодоно́сна в сердца́х на́ших пребу́дет. Не отврати́ Лица́ Твоего́ от нас, Го́споди, возда́ждь нам ра́дость спасе́ния Твоего́; пода́ждь, Го́споди, и па́стырем Це́ркве Твоея́ святу́ю ре́вность, и о спасе́нии и обраще́нии заблужда́ющих попече́ние их, ду́хом ева́нгельским раствори́, да Тобо́ю вси руководи́ми, дости́гнем, иде́же соверше́ние ве́ры, исполне́ние наде́жды и и́стинная любо́вь, и та́мо с ли́ки чисте́йших Небе́сных Сил просла́вим Тебе́, Го́спода на́шего, Отца́ и Сы́на и Свята́го Ду́ха, во ве́ки веко́в.

Певцы: Ами́нь.

Затем диакон, став на уготованном месте, возглашает:

Кто Бог ве́лий, я́ко Бог наш? / Ты еси́ Бог, творя́й чудеса́ Еди́н.

Потом высшим гласом: Кто Бог ве́лий, я́ко Бог наш...

И паки высочайшим гласом: Кто Бог ве́лий, я́ко Бог наш...

И продолжает диакон:

Правосла́вия день пра́зднующе, правосла́внии лю́дие, наипа́че просла́вим Вино́вника всех благ Бо́га, Иже Сый благослове́н во ве́ки. Сей Бог наш, промышля́я и утвержда́я возлю́бленное Свое́ достоя́ние – Святу́ю Це́рковь, пра́отцев, преступле́нием отпа́дших, утеша́я нело́жным Свои́м сло́вом, еще́ в раи́ основа́ние ей положи́. Сей Бог наш, руково́дствуя ко о́ному спаси́тельному обетова́нию, не прикрове́нна Себе́ оста́ви, но хотя́щее бы́ти спасе́ние провозвести́ пе́рвее чрез отце́в и проро́ков, живописа́ разли́чными о́бразы. Сей Бог наш, многоча́стне и многообра́зне дре́вле глаго́лавый отце́м во проро́цех, в после́док дний сих глаго́ла нам в Сы́не, Имже и ве́ки сотвори́, Иже возвести́ Отчее о нас благоволе́ние, откры́ та́инства Небе́сная, уве́ри си́лою Свята́го Ду́ха о и́стине благове́стия, посла́ апо́столы во весь мiр пропове́дати Ева́нгелие Ца́рствия, утверди́ о́ное разли́чными си́лами и чудесы́. Сему́ спаси́тельному открове́нию после́дующе, сего́ благове́стия держа́щеся.

Ве́руем во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, Иже от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, Имже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, Иже от Отца́ исходя́щего, Иже со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дуем еди́но креще́ние во оставле́ние грехо́в. Ча́ем воскресе́ния ме́ртвых, и жи́зни бу́дущаго ве́ка. Ами́нь.

Сия́ ве́ра апо́стольская, сия́ ве́ра оте́ческая, сия́ ве́ра правосла́вная, сия́ ве́ра вселе́нную утверди́.

Еще́ же Собо́ры святы́х оте́ц и их преда́ния и писа́ния, Боже́ственному Открове́нию согла́сная, прие́млем и утвержда́ем.

Всем же о Правосла́вии подвиза́вшимся словесы́, писа́нии, уче́нии, страда́нии и богоуго́дным житие́м, я́ко защи́тникам и посо́бникам о́наго, Христо́ва Це́рковь, ны́нешнее воспомина́ние творя́щи, восклица́ет:

Святе́йшим правосла́вным Патриа́рхом Константинопо́льским, Александри́йским, Антиохи́йским, Иерусали́мским и Всеросси́йским и про́чим Преосвяще́нным митрополи́том, архиепи́скопом и епи́скопом правосла́вным, ве́чная па́мять.

Певцы зде и далее поют: Ве́чная па́мять, трижды.

Святы́м равноапо́стольным царю́ Константи́ну и ма́тери его́ Еле́не, ве́чная па́мять.

Благове́рному равноапо́стольному вели́кому кня́зю Влади́миру и благове́рной вели́кой княги́не Ольге, ве́чная па́мять.

Пострада́вшим и убие́нным в разли́чных похо́дех за правосла́вную ве́ру и Оте́чество, вожде́м и во́ином, и всем правосла́вным христиа́ном, в и́стинней ве́ре и благоче́стии и в наде́жди воскресе́ния сконча́вшимся, ве́чная па́мять.

Правосла́вная Христо́ва Це́рковь, торже́ственно воспомина́ющи подвиза́вшихся во благоче́стии и сие́ всем свои́м христоимени́тым ча́дом к подража́нию представля́ющи, восхваля́ет по́двиги сих, и́же и ны́не, спаси́тельною ве́рою и доброде́телию приуготовля́юще себе́ к ве́чному блаже́нству, утвержда́ют Правосла́вие.

Затем диакон возглашает:

Вели́кому господи́ну и отцу́ на́шему (имярек) Святе́йшему Патриа́рху Моско́вскому и все́я Руси́, мно́гая ле́та.

Певцы здесь и далее поют: Мно́гая ле́та (трижды).

Святе́йшим правосла́вным Патриа́рхом Константинопо́льскому, Александри́йскому, Антиохи́йскому, Иерусали́мскому и про́чим Святе́йшим правосла́вным Предстоя́телем, мно́гая ле́та.

Господи́ну на́шему преосвяще́ннейшему (имярек), митрополи́ту (или: архиепи́скопу, или: епи́скопу, егоже есть область), мно́гая ле́та.

Преосвяще́нным правосла́вным митрополи́том, архиепи́скопом и епи́скопом и всему́ освяще́нному при́чту, мно́гая ле́та.

Богохрани́мей стране́ на́шей, власте́м и во́инству ея́, мно́гая ле́та.

Всем правосла́вным христиа́ном, пра́во содержа́щим спаси́тельную ве́ру и повину́ющимся Христо́вей Це́ркви, пода́ждь, Го́споди, мир, благоде́нствие, изоби́лие плодо́в земны́х и мно́гая ле́та.

Иерей читает молитву:

Свята́я Тро́ице, сих просла́ви и утверди́ да́же до конца́ в правове́рии, отвраща́ющия же ся святы́я и спаси́тельныя правосла́вныя ве́ры и Христо́вы Це́ркве обрати́ и сотвори́, да вси прии́дут в позна́ние ве́чныя Твоея́ и́стины, моли́твами Пресвяты́я Влады́чицы на́шея Богоро́дицы и Присноде́вы Мари́и и всех святы́х.

Певцы: Ами́нь.

Затем иерей произносит: Сла́ва Тебе́, Бо́гу, Благода́телю на́шему, во ве́ки веко́в.

Певцы: Ами́нь.

И поют песнь святого Амвросия Медиоланского:

Тебе́, Бо́га, хва́лим, / Тебе́ Го́спода испове́дуем, / Тебе́ Преве́чнаго Отца́ вся земля́ велича́ет; / Тебе́ вси Ангели, / Тебе́ Небеса́ и вся Си́лы, / Тебе́ Херуви́ми и Серафи́ми непреста́нными гла́сы взыва́ют: / Свят, Свят, Свят Госпо́дь Бог Савао́ф, / по́лны суть Небеса́ и земля́ вели́чества сла́вы Твоея́. / Тебе́ пресла́вный апо́стольский лик, / Тебе́ проро́ческое хвале́бное число́, / Тебе́ хва́лит пресве́тлое му́ченическое во́инство. / Тебе́ по всей вселе́нней испове́дует Свята́я Це́рковь, / Отца́ непостижи́маго вели́чества, / покланя́емаго Твоего́ и́стиннаго и Единоро́днаго Сы́на, / и Свята́го Уте́шителя Ду́ха. / Ты, Царю́ сла́вы, Христе́, / Ты Отца́ Присносу́щный Сын еси́. / Ты, ко избавле́нию прие́мля челове́ка, / не возгнуша́лся еси́ Деви́ческаго чре́ва. / Ты, одоле́в сме́рти жа́ло, / отве́рзл еси́ ве́рующим Ца́рство Небе́сное. / Ты одесну́ю Бо́га седи́ши во сла́ве Отчей, / Судия́ приити́ ве́ришися. / Тебе́ у́бо про́сим: / помози́ рабо́м Твои́м, / и́хже честно́ю Кро́вию искупи́л еси́. / Сподо́би со святы́ми Твои́ми в ве́чной сла́ве Твое́й ца́рствовати. / Спаси́ лю́ди Твоя́, Го́споди, / и благослови́ достоя́ние Твое́, / испра́ви я́, и вознеси́ их во ве́ки: / во вся дни благослови́м Тебе́, / и восхва́лим и́мя Твое́ во век, и во век ве́ка. / Сподо́би, Го́споди, в день сей без греха́ сохрани́тися нам. / Поми́луй нас, Го́споди, поми́луй нас, / бу́ди ми́лость Твоя́, Го́споди, на нас, / я́коже упова́хом на Тя. / На Тя, Го́споди, упова́хом, / да не постыди́мся во ве́ки. Ами́нь.

Во время пения весь освященный собор целует святые иконы на аналоях, и бывает отпуст.

В неделю вечера

Во светильничное на Го́споди воззва́х, поставим стихов 10, и глаголем стихиры умилительные Осмогласника, покаянны 4 и Триоди подобны господина Иосифа, глас 4: Подобен: Дал еси знамение:

Да́ждь ми́ умиле́ние, и злы́х отчужде́ние, / и соверше́нное исправле́ние, / в стра́сти теле́сней ны́не погруже́ному, / и отдале́ному от Тебе́ Бо́же Всецарю́, / и ниотку́дуже упова́ния иму́щу: / и спаси́ мя блу́днаго за мно́гую бла́гость, // Иису́се Всеси́льне, Спа́се ду́ш на́ших.

Моисе́й ди́вный, посто́м очи́щься, / ви́де Жела́емаго. / Сему́ у́бо поревнова́вши смире́нная душе́ моя́, / потщи́ся в де́нь воздержа́ния от злы́х очи́ститися, / я́ко да Го́спода даю́щаго тебе́ оставле́ние, / и очище́ние и избавле́ние, // у́зриши су́щаго Блага́го и Человеколюби́ваго.

И́ный Кир Феодора, гла́с 6: Подобен: Архангельски:

Посто́в ны́не двоеседми́чие све́тло начне́м, / соверша́юще де́нь от дне́ бра́тие, / колесни́цу о́гненну соде́лавше на́м, / я́коже Илия́ Фесви́тянин, / четы́ре вели́кия доброде́тели, / у́м возвы́сим безстра́стием, пло́ть вооружи́м чистото́ю, // теку́ще и побежда́юще врага́.

И мине́и 3. Сла́ва, и ны́не, Богоро́дичен.

Вхо́д: Све́те Ти́хий святы́я сла́вы, Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й: те́мже мiр Тя сла́вит.

Проки́мен, гла́с 8: Да́л еси́ достоя́ние / боя́щимся Тебе́ Го́споди. [35]

Сти́х 1: От коне́ц земли́ к тебе́ воззва́х.

Сти́х 2: Покры́юся в кро́ве кри́л твои́х.

Сти́х 3: Та́ко воспою́ и́мени твоему́ во ве́ки.

И паки: Да́л еси́ достоя́ние / боя́щимся Тебе́ Го́споди.

На стихо́вне, гла́с 8:

Прииди́те, очи́стим себе́ ми́лостынями / и щедро́тами убо́гих, / не трубя́ще, ни явля́юще на́ше благотворе́ние, / да не уве́сть шу́ица десни́цы де́ло, / да не расточи́т тщесла́вие пло́д ми́лостыни, / но в та́йне та́йная Ве́дущему воззове́м: // О́тче оста́ви прегреше́ния на́ша, я́ко Человеколю́бец.

Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

И паки тойже: Прииди́те, очи́стим себе́ ми́лостынями:

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Му́ченичен: Му́ченицы Госпо́дни, / вся́ко ме́сто освяща́ете, / и вся́к неду́г врачу́ете: / и ны́не моли́те, // изба́витися се́тей вра́жиих душа́м на́шим, мо́лимся.

Сла́ва, и ны́не, Богородичен: Небе́сная пою́т Тя́, обра́дованная Ма́ти Безневе́стная, / и мы́ славосло́вим неизсле́дованное Твое́ Рождество́, // Богоро́дице, моли́ спасти́ся душа́м на́шим.

И прочее последование, как обычно.

В неделю на повечерии

Поем канон святым пророком, егоже краегране́сие: Ли́к да пле́щет проро́ков благото́чно. Феофа́ново, гла́с 5.

Пе́снь 1.

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную песнь пою́ща.

Припев: Святи́и проро́цы, моли́те Бо́га о на́с.

Благода́ть мне́ да́ти Боже́ственнаго Ду́ха, честну́ю ва́шу па́мять пою́щу, всевино́внаго Христа́ умоли́те, и согреше́ний оставле́ние, я́ко проро́цы Боже́ственныя благода́ти.

Сосу́ды Богодухнове́нных слове́с согла́сныя, и зерца́ла Боже́ственнаго блиста́ния, явле́ние Боже́ственно прие́млющия, проро́ки вся́ Богому́дрыя воспои́м.

Глаго́лы зако́нныя на горе́ сина́йстей Моисе́й богови́дец от Бо́га прие́мь, лице́м просвети́ся Боговиде́ния, благода́тию зна́менуемь чу́дный.

Сла́ва: Ту́чами Богоразу́мия, мо́ре язы́к многобо́жия благода́тию о́блацы Бо́жии, с шу́мом разори́ша, единонача́льную си́лу Богому́дренно пропове́дающе.

И ныне, Богоро́дичен: Трубы́ Богогла́сныя, Ма́терь тя́ Бо́жию напосле́док веко́в ро́ждшую пречи́стая проро́цы веща́ют, научи́вшеся свы́ше Богоро́дице твои́м та́йнам.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Святи́и проро́цы, моли́те Бо́га о на́с.

Цевни́цы Духо́вныя, бряца́лом ударя́емы, проро́цы вси́, подо́бный гла́с твоего́ позна́ния Христе́, все́м Богоглася́ще, Боголюбе́зным воспева́ют, свы́ше богатя́ще сия́нием.

Ору́жия востаю́щая повеле́нием твои́м, проро́цы вси́ многомяте́жную ле́сть пресеца́ют Христе́, Бо́же́ственною твое́ю си́лою бла́гоче́стно оде́явшеся, и непостижи́мою держа́вою твое́ю.

Сла́ва: Боже́ственныя и мы́сленныя ча́ши ра́зума, проро́цы всю́ зе́млю упои́ша, прообража́юще я́ве твоего́ смотре́ния неудо́бное та́инство, и́ный и́нако тебе́ пропове́дающе.

И ныне, Богоро́дичен: Дре́вле повеле́нное Де́во та́инство, и пре́жде веко́в предразумева́емое, вся́ ве́дущим Богом, в после́днее вре́мя во чре́ве твое́м пренепоро́чная, коне́ц прие́мшее яви́ся.

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во Спасе́ние люде́й Твои́х спасти́ пома́занныя Твоя́ прише́л еси́.

Припев: Святи́и проро́цы, моли́те Бо́га о на́с.

Ду́хом проро́цы веща́юще, и́стины неле́стнии свети́льницы яви́стеся прему́дрии, просвеща́юще вся́ язы́ки жития́ све́тлостию.

Се́ ны́не сбытия́ зря́ще рече́нных от ва́с, проро́цы Боже́ственнии, сла́вим ва́ми пропове́даннаго, и де́лом прорече́ния испо́лньшаго.

Сла́ва: Прему́дростию Боже́ственнии просвеща́еми, язы́ков приведе́ние Бо́жиею благода́тию проразуме́сте, Изра́илево же паде́ние и все́х благи́х запусте́ние.

И ныне, Богоро́дичен: Бо́га воплоще́нна зря́ще, на Боже́ственней стра́жи ста́вше, сего́ всебога́тии сподо́бистеся ви́дети, от горы́ де́выя приходя́ща.

Пе́снь 5.

Ирмо́с: Одея́йся Све́том, я́ко ри́зою, к Тебе́ у́треннюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Святи́и проро́цы, моли́те Бо́га о на́с.

У́тренева ду́х тво́й, к седя́щему на престо́ле превознесе́нне, Иса́ие прему́дре, и с вы́шними ли́ки воспе́л еси́.

Язы́ки ду́хом дви́жуще святи́и, сего́ словеса́ вселе́нней благопостоя́нно пропове́дующе, Богоразу́мия зарю́ уясни́сте.

Сла́ва: Я́коже жили́ща Бо́жия бы́вше, вы́ше естества́ соверша́юща, сего́ в себе́ име́сте: ему́же ны́не предстоя́ще, о на́с моли́теся.

И ныне, Богоро́дичен: У́м сво́й прему́дрый, и дре́вний сове́т ва́м проро́цы и́стины, Бо́г сказа́л е́сть, от Де́вы рожде́йся, я́ко еди́н милосе́рд.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли возведи́ мя, я́ко Благоутро́бен.

Припев: Святи́и проро́цы, моли́те Бо́га о на́с.

Житие́ Боже́ственное, благоче́стия сло́во и́стинное стяжа́вше, пропове́дницы бы́сте всеи́стиннии Боже́ственнаго воплоще́ния святи́и.

Си́лу Боже́ственную иму́ще, царе́й неудержа́нное стремле́ние и звере́й уста́ загради́сте, из чре́ва ки́това це́лы спасо́стеся.

Сла́ва: Из ложе́сн святи́и мiру сия́юще всему́, доброде́тели учи́телие бы́сте, и насади́телие проро́цы вси́ пребога́тии.

И ныне, Богоро́дичен: Боголюби́вая иму́ще помышле́ния, рождество́ твое́ проро́цы Влады́чице, провозвести́ша многообра́зными начерта́ньми и о́бразы чи́стая.

Седа́лен, гла́с 2, самогла́сен: Ли́к проро́ческий с Моисе́ом и Ааро́ном, весе́лием ра́дуется дне́сь, я́ко коне́ц проро́чества наводя́й: сия́ет Крест, и́мже на́с спа́сл еси́. Те́х моли́твами Христе́ Бо́же поми́луй на́с.

Пе́снь 7.

Ирмо́с: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Святи́и проро́цы, моли́те Бо́га о на́с.

Неизче́тная си́ла Госпо́дня веле́ния, в ро́ве львы́ обузда́, вопию́щу проро́ку: Бо́же благослове́н еси́.

Тро́ицы равночи́сленнии честны́я су́ще, пла́мень угаси́ша всему́дрии о́троцы твои́, согла́сно пою́ще: Бо́же благослове́н еси́.

Сла́ва: Я́ко свети́ла сия́юще, доброде́тельными цве́ты зе́млю онебеси́вше, Авраа́мстии о́трасли, проро́цы пою́ще: Бо́же бла́гослове́н еси́.

И ныне, Богоро́дичен: Зако́ны естества́ превозшла́ еси́ Влады́чице, ро́ждши Го́спода зако́ном облада́юща, ему́же вси́ пое́м: Бо́же благослове́н еси́.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный лик спле́тше, поя́ху: / дела́ вся́кая, Го́спода по́йте и превозноси́те во вся ве́ки.

Припев: Святи́и проро́цы, моли́те Бо́га о на́с.

Вну́трь сла́дости ра́йския су́ще, проро́цы Богоприя́тнии, ли́к соста́вльше, все́м ве́рою ва́с восхваля́ющим, изба́витися от бе́д, Христа́ умоли́те.

Пе́ние ве́рнии Богогла́сным все́м проро́ком принесе́м, ли́к испле́тше вси́, си́х словесы́ утверди́вшеся: да моли́твами и́х оправди́мся.

Сла́ва: Сосу́ди мы́сленнии благоуха́ния вси́, проро́цы я́ве Ду́ху бы́сте, вся́ язы́ки к ра́зуму наставля́юще, и превознося́ще Христа́ во ве́ки.

И ныне, Богоро́дичен: От отца́ безнача́льную зарю́, Де́во родила́ еси́ пло́ти прия́тием: те́мже, ра́дуйся, непреста́нно тебе́ зове́м, и превозно́сим чи́стая во ве́ки.

Пе́снь 9.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́ же велича́юще, Де́ву ублажа́ем.

Припев: Святи́и проро́цы, моли́те Бо́га о на́с.

Единому́дренно прииди́те ны́не, проро́ки вся́ Бо́жия всечестны́я, чуде́с соверши́тели преесте́ственных, ве́твь честну́ю, избра́ние Иа́ковле, я́ко пропове́давшия Христа́ восхва́лим.

Ра́дости всемiрныя провозве́стницы, пропове́дницы я́ве, и ра́зума сокро́вища: све́тлии Боже́ственнии прему́дрости бы́сте всеи́стинныя, уста́ чи́стая, язы́цы Ду́ха свята́го всечестни́и.

Сла́ва: Я́ко проро́цы прему́дрии, все́х созда́теля и Бо́га я́ко си́льна зря́ще, и от него́ све́том освеща́еми, ва́шу па́мять бла́гоче́стно ве́рою чту́щих от бе́д спа́са́йте.

И ныне, Богоро́дичен: Спасе́ния хода́таица челове́ком была́ еси́ чи́стая, ро́ждши пло́тски соде́теля и Го́спода, тебе́ ра́ди все́м очище́ние велича́ющим тя́ Де́во подаю́щаго.

Стихи́ры проро́ком, гла́с 1: Подо́бен: Прехва́льнии:

Проро́цы пресла́внии, / вы́ царя́ обличи́сте, / лю́дем же де́рзостным сопроти́вистеся, / в Тро́ице Еди́наго Бо́га пропове́дающе, / и те́пле отгоня́юще от земли́ ле́сть многобо́жную: / и ны́не моли́теся, // дарова́ти душа́м на́шим ми́р и ве́лию ми́лость.

Проро́цы пресла́внии, / вы́ благоче́стно заблужда́юще в пусты́нях и гора́х, / и озлобля́еми в гла́де и жа́жде, / я́ко Бо́жии уго́дницы, / со Христо́м на Небесе́х водворя́етеся: / и ны́не моли́теся, // дарова́ти душа́м на́шим ми́р и ве́лию ми́лость.

Проро́цы прехва́льнии, / вы́ терпели́вно претре́ни, / ка́мением же побива́еми, и умерщвля́еми ме́чным усече́нием, / благоче́стия ра́ди све́тли страда́ньми бы́сте: / и ны́не моли́теся, // дарова́ти душа́м на́шим ми́р и ве́лию ми́лость.

Сла́ва, и ны́не, глас то́йже:

Вои́стинну па́че ума́ чу́дная, Богоневе́сто, / вели́чия Рождества́ Твоего́, / я́же пропове́даша проро́цы вси́ всепресла́вное зача́тие, / и Рождество́ Всепе́тая, // недомы́сленное и несказа́нное, и́мже мiр спасе́ся.