Вирши

Первовечному от Отца рожденну,

божию Слову, отцу съестественну,

аггели в небе славу воспевают,

трисвятым Троицу выну величают.

Днесь же видяше Слово воплощенно

и во вертепе в яслях положенно,

чюдятся, яко от Девы родися

безмужно: и цвет девства не вредися.

«Слава во вышних Богу»,— восклицают

и на земли мир людем провещают.

Желанный се гость, мир нам приносящий,

в единой славе со Отцем седящий.

От многих времен о Христе желаем

да в мире мирно век наш пребываем.

Но грехов ради брань нам досаждает,

не любяй мира, враг мир разоряет.

Ты, царю мирный, утверди мир в мире,

даждь расти везде православной вере.

Раздежи сердца, друг друга любити,

в единстве веры всем народом быти.

Да едиными усты вси тя славят,

единем сердцем тебе Бога хвалят.

Един ты пастырь, едно стадо буди,

ты еси Бог наш, а мы твои люди.

Из нощи темных делес очищает,

Христос ны Господь, егда ся раждает,

от пресвятыя Марии девицы

небес и земли правыя царицы.

Тму прогоняет своими лучами,

нас сотворяет света днесь сынами.

Светлый день ныне, занеже светило

велие мрачну нощь есть разрешило.

Христос, светило, еще просвещает.

Тму грехов мрачных и свет верным дает:

В нем же удобну стезю обретаем,

ею текуще неба достизаем.

Доселе стезя невидима бяше,

и никто ею в небо шествоваше.

Свет наш, Христос-Бог, ону проявляет

и шествовати право наставляет.

Ты, верный роде, Богу возлюбленный,

всегда держи путь ныне проявленный.

Шествуй во свете воли Бога Слова,

тако вечная жизнь ти есть готова.

А гряди ныне к вертепу убогу,

даждь достодолжный поклон Христу-Богу.

Исповеждь его права быти Бога,

он ти дарует светла лета многа.

И исповесть тя пред Отцем си в небе,

и даст наследство вечное в нем тебе.

Отроцы в святей вере воспитани,

от мучителя, в огнь пещный послани.

Яко идолу поклона не даху,

но Сыном Божим орошени бяху[359],

Проклят есть идол, и вси суть проклята,

иже дерзают Богом его звати.

Един есть Бог наш, всю тварь сотворивый,

во триех лицех, от аггел хвалимый.

Отец, Сын и Дух, три лица считаем,

не три же боги, но едина знаем.

Святых лиц едино днесь ны посящает

Бог-Сын и в нашу плоть ся облекает:

да мы божеству его причистимся,

в Сыны Божия с смертных преложимся.

Его же видим в яслях положенна,

божием от царей поклоном почтенна.

Сему от всех нас поклон подобает,

спасение бо наше промышляет.

Придите убо, людие, придите,

дары с поклоном Богу принесите.

Сердце, дар ему есть зело приятный,

за сердце себе даст Бог благодатный.

А с ним все благо удобь получити.

И в небе даст он вечный живот жити.

Всех царя любы, во благочестивых;

хвално укори завет нечестивых.

Трие младенцы царя укориша.

Телу бо злату глав не склониша.

Едному Богу песни воспеваху,

в огни невредно святии стояху.

Той Бог истинный днесь в мире явися,

да нас вознесет низу положися.

Во яслех скотских, вижду, почивает,

скотныя люди к себе призывает.

Слово сый слова хощет научити,

им же словесно нам бы удобь жити.

Скотско доселе бе житие наше,

кто бо не плоти своей работаше,

Начнем от ныне Богови служити,

заповеди его усердно храните.

Тогда во правду словеснии будем,

егда противный скотский нрав избудем.

Един день лучше Богу работати,

неже вовеки в мире царствовати.

Та бо работа платима есть в небе,

его же, кто мудр, не желает себе?

Тем же, людие божии святии,

Христу рожденну поклоните выи.

И главы ваша ему преклоняйте,

царя и Бога его свойго знайте.

А он на небо хощет вы прияти,

светлыми венцы вечны увенчати.

Чюдо велие древле проявися,

в пещи халдейстей, ибо не палися

Троица отроков[360], паче орошени,

иже за Бога во огнь вовержени.

Равне велие чюдо днесь бывает,

огнь божественный Девы не спаляет:

Юже без вреда всякого проходит,

в целости девства мати сына родит.

«Огнь поядай». Бог ся нарицает,

како Марии ныне не вреждает.

Вем яко огнь сей жжет плевелы злобы,

освящает же чистыя утробы.

Тем же Мария оным освятися

яко безгрешна весма сохранися.

Мы грешни суще, како приближимся

к сему огневи, да не опалимся?

Изверзим злобы и пребудем цели

от сего огня, светли же и бели.

Осветит и нас з своей благодати,

еже возмощи пресветло сияти

зде добротами, венцем славы в небе,

его же тщися всяк стяжати себе.

Стяжеши, аще Христа возлюбиши,

и его ради душу погубиши.

Губяй за него душу— обретает,

и с ним во веки в свете обитает.

Утробу Девы прообразоваху,

иже без вреда огня в пещи бяху

Трие отроцы: ибо не вредися

девство Марии, егда Бог родися

из нея. Огнь сый паче чисту, целу

телом и духом сохранил есть Деву.

К тебе, о Дево пресвятая мати,

руце возносим, просим благодати:

Умоли сына твоего и Бога,

да презрит наша падения многа.

И охладевший дух наш, да согреет,

да не во мразе греховном истлеет.

Обычно огню хладных согревати

и темность всяку светло просвещати.

Хладни и темни мы ся быти знаем,

теплоты с светом от сына ти чаем.

Ты, Христе Боже, огнь пресущественный,

освяти ум наш, грехми помраченный.

Даждь любовь теплу да тебе едина

с Отцем и Духом, любим Бога-Сына.

Вся тебе ради в уметы вменяем,

тебе ся сердцем целым прилепляем:

Хотяше верно тебе работати,

инго Бога, кром тебе не знати.

Пустыня мира сего есть безводна,

в путь шествующим зело неугодна.

Весь в ней Исраиль жажден умираше,

яко вод живых весьма не имаше:

Даже истинный Моисей ю изводит,

с камене чиста, егда Дева родит.

Се днесь источник жизни нам дадеся,

не жезлом, духом святым изведеся,

Яко духовный: дабы душам пити,

жадным и в его силе вечно жити.

Сей же источник злобу очищает:

черныя паче снега убеляет.

Пий здрав от него, царю, Богом данный,

прохлаждай дух твой, Богу съготованный.

Омывай душу, дабы чистей быти,

по летех многих горний рай влучити.

Царь славы Христос, всей твари владыка,

сниде на землю при кончине века.

Зрак рака прият, зело умалися,[362]

в малом вертепе в яслях положися.

Аггели поют, волсви припадают,

овец пастыри весело свиряют.

Питает Дева превечна младенца,

его же роди без отца первенца,

Иже восприят на всесилна рама,

яко овча си род ветха Адама,

Хотя вознести в небесную страну,

к Отцу своему в вечную державу.

И обновити жизни нетлением,

вечным от ада темна спасением.

Чесого деля церковь днесь ликует,

весь собор верных светло торжествует.

Вперьвых же ваша весело играет,

царская светлость Христа величает

за его мать неизреченную,

ко падшим людем днесь проявленную.

Вы бо первый в православном мире,

вы началницы в православной вере,

светила есть во церкве велика,

паче всех светил христианска лика.

Светите убо на лета премнога,

просвещаеми светом Христа Бога.

Много сицевых празднеств совершайте,

Христову благость любо прославляйте.

Владейте миром, вам от Бога данным,

царствуйте долго щастием избранным.

Крепость и слава вам да работает,

Бог враги ваша вам да покоряет.

Тех благ от Христа верно вам желаю,

сам к ногам вашим лицем припадаю.

Моля о милость, прося благодати,

да изволите в ней мя сохраняти,

Иже готов есмь верно вам служити,

донелиже мне даст Бог живу быти.

Велия радость в мире днесь сияет,

дева Мария Христа нам раждает.

Пред всеми веки из Отца рожденный,

на конец веков во плоть облеченный

Сын Божий, сын днесь девыя бывает,

Бог человека себе всыновляет.

Да наследницы светла рая будем,

сию Христос Бог даде ползу людем.

Наследи и ты, отче мой любезный,

с рождьшею мене светлый рай небесный.

Братии, сестрам и теткам желаю

вечна жилища в том же светлом раю.

А впредь в сем мире Богу церкви жити,

царствия небес венцы заслужити.

Бог безначалный на земли родися,

отчее слово во плоти явися.

Род человеческ в небо призывает,

в нем же вечная радость пребывает.

Доволне в аде Адаму слезити,

Христос бо имать в небо преселити.

Не к тому будет смерть нам царствовати,

Христос бо прийде живот нам подати.

И царство в небе вечное готует,

того вам душа моя усердствует,

Да царствовавше зде лета премнога

и в небе царство примете от Бога.

Божие Слово,— им же мир создася,

днесь сокращено в мире показася.

Непостижное зело умалися

и в яслях скотских малых воместися:

нас исправляет, да будем словесни,

не к тому перстни паче же небесни.

С небес сие Слово к нам низходит,

перстныя люди на небо возводит.

За плоть божеству нас си сообщает,

рабы тмы в сыны света прелагает.

Алфа, омега, Слово се речеся[364],

Адам о-микрон[365] им с нами спасеся.

Чюжд образ чести в нас доселе бяше,

днесь честен яко Словом подписаше.

Бог-Отец своим тем же убо в небе,

даст место ему, яко точну себе.

Божий ты образ, царю Алексие,

и написася в тебе слово сие,

в скрижалех сердца: лепо убо чтити,

аз яко царю усердно служити.

Образ есть божий и плод твого чрева,

светлый Алексий,— благ плод блага древа.

А образ цветы добро украшенны,

бисерми делес благих упещренный,

Богу во славу ныне нам рожденну,

иже да даст вам милость божественну.

Еже лет много крепко, славно жити

и в небе место светло получити.

Того вседушно раб ваш вам желаю,

себе с поклоном у стоп полагаю.

Равне и аз вам желатель,

да даст Христос всех создатель.

Вашей царстей зде державе

долго жити в светлой славе;

Подаст враги побеждати,

царство в мире устрояти.

Дажд, о Христе, днесь рожденный

миру мир твой божественный,

Даждь церкви лета многа,

молим тебе щедра Бога.

И пресветлу его Сыну

даруй венец зде и выну.

Вся им блага изволь дати

по премнозей благодати.

Сих вам верно аз желаю,

щедрот ваших к себе чаю.

Превечный Бог наш, вселенный создатель,

умов небесных и всех обладатель,

велию любовь свою нам являет,

о спасении нашем промышляет

странным образом: се бо воплотися

и от девицы чистыя родися.

Иже прежде век от отца рожденный,

плоть восприял есть сый невещественыи;

Хотя нас плотских на дух пременити,

еже не плотско, но духовне жити

да тако чада Бога жива будем,

о Бозе, в Бозе и с Богом пребудем.

С Богом мы ныне, ибо Бог есть с нами,

лежай в вертепе, повит пеленами.

Вселися он в ны: а мы в онь вселени,

тако из сети смерти свобождени.

Что убо на ны враг может успети,

егда Бог с нами, не может и зрети.

Бог есть с тобою, царю претишайшый[366],

радуйся убо, монархо блажайшый.

Ныне он духом в тебе ся раждает

и в сердцы паче яслей почивает.

С Богом же всяка благодать бывает,

юже святый дух в сердца посылает.

Та сохранит тя крепка, цела, здрава,—

с Христом пребудет вовек твоя слава.

Христос-Господь сил, он даст силу тебе,

Он же — царь мира — даст мир зде и в небе.

Он есть и жизнь всех,— даст ти долго жити,

Купно с тобою и царицы быти,

Благородныя он ваши сыновы

благословити выну есть готовы.

Тако ж царевнам вся зде благодати

хощет и в небе венец вечный дати.

Сих благ аз раб ваш верно вам желаю,

себе под нози ваши подлагаю,

То изъявствуя, яко хощу быти,

присно вам верен и рад есмь служити.

Вы же изволте на нас призирати,

щадите в светлой вашей благодати.

Новая радость мир возвеселяет,

новое солнце род наш просвещает.

Плачь бе во мире от начала веков,

яко падеся всех лик человеков.

Тма бе повсюду не просветимая,

от всех человек не изменимая:

путь до светлаго погубися неба,

глад бе во мире, без небесна хлеба

вси умираху: вместо райска града

водими бяху в плен подземна ада.

Поболе о том Бог всемилостивый,

во славу свою весь мир сотворивый.

Се ныне темность во свет прелагает,

слезы на радость верных изменяет.

Весь род наш падший изволил подъяти,

егда восхоте плоть нашу прияти.

Высоко ныне человек вознесеся,

егда со словом божиим спряжеся.

То яко солнце, вся ны просвещает,

яко животный хлеб, гладных питает.

Сам путь он нам бысть, да по нем шествуем

и в небе царство вечно наследствуем.

Дает свободу от ада проклята,

и населяет в странах града свята.

Чесого деля церковь торжествует

и весь лик верных пресветло ликует

Изрядне, еже православный царю,

многих царств и княжеств верный государю.

Твоей светлости, верных всех началу,

прилична радость Богу во похвалу

новорожденну и чистей девице,

без мужа рождыней.

Радуйся убо светло, веселися,

новорожденну Христу поклонися.

Он тя изволит выну возвыжшати,

даст ти и в небе вечно царствовати;

печали твоя на радость преложит

и вся благая в державе умножит;

даст лета многа, щастие и славу,

разширит зело царску ти державу,

чесого верно аз раб твой желаю,

с поклоном низким к ногам припадаю.

Моля, да мене раба си щадиши,

лица от мене да не отвратиши.

Аз же всеверно имам работати,

живот мой за тя готов полагати.

Бог Господь ныне мирови явися,

божие слово странно воплотися.

Никто же Бога видел есть доселе

светло, яко днесь в человечестем теле.

Странно и мрачно древле виден бяше,

егда Моисию закон подаваше.

В аггельских лицех иным показася,

но ипостасне не соединяся,

Инако ныне изволил прияти

плоть себе нашу з своей благодати:

ибо на свое лице пресвятое

прият естество наше прехудое.

И соединил есть оно с собою;

бысть лице едно во естеству двою,

и тако род наш ныне обожися,

аки железо огнем распалися.

Огнь, бо есть Бог наш, хладных согреваяй,

и светом правды мрачных просвещаяй.

Нощь бе темная, и тма превелика

до днесь во мире, юже сам владыка

и царь всех, Христос, светло просвещает,

егда яко солнце Восток содевает.

От того солнца на тя, солнце наше,

пресветлый царю, светлость возсияше.

Лучесы солнце повсюду сияет,

тя благодати Христос исполняет.

Да печалную ризу отложиши,

царско ти сердце о нем утешиши.

Христос утеха, прииде утешити,

всякую печаль в радость преложити.

Сам ся до сердца твоего вопрошает,

егда во яслях слезы проливает.

Его бы слезы радость точат тебе,

Христос ти помощь во всякой потребе.

Радуйся убо, царю благоверный,

Христос ти подаст век веселомирный:

даст вся по сердцу и умножит лета,

светло прославит во всех странах света.

По долгих летех и небо дарует,

венец нетленный главе ти сготует.

Да по сем царстве царь будеши в небе,

их же благ верно аз желаю тебе.

Аз сам под стопы твоя припадаю,

за подножие себе постилаю,

Моля, да на мя лице просветиши,

як солнце светлым оком на мя зриши.

Велие Солнце днесь в мире сияет,.

тму всю тмы князя с мира прогоняет.

Свет велий ныне людие видеша,

иже в тме смертней и сени седеша,

плачевный облак уже разрушися,

свет бо радости в мире просветися.

Не к тому Ева должна есть ридати,

не имать Адам отселе плакати:

Сие бо солнце слезы осушает,

во веселие плачь всех прелагает.

Един днесь токмо тмы стонет предстатель,

рода нашего лживый клеветатель,

яко власть его уже погубися,

егда во плоти Бог Слово родися.

Он враг доселе люди побеждаше

и в преисподний ад люди пленяше:

Но днесь от Христа-солнца побежденный,

мрак от светлости зело расточенный.

Возсия солнце, звери угонзают

и в лозех адских горце возлягают.

Человек идет дело си творити,

даже во вечер имея кончити[367].

Несть страха от лвов» солнце восияет,

лучми, як стрелами, верных защищает[368].

Не бойся, стадо малое Христово,

брань за тя деет, превечное Слово.

Еже все может, чему хощет быти:

силно есть от враг люди защитити.

Ничто успеет лев, окрест рыкаяй,

и волк прехищный, на ны нападаяй,

точию требе с Христем выну быти,

его слушати и по нем ходити.

Близ Христос Господь в дверь сердца толцает,

сердце за ясли от верных желает.

В сердцах любезно он хощет витати,

в них сокровища даров полагати.

Благословенно, православный царю,

есть твое сердце, верный государю.

Яко восприят Иисуса себе,

иже царствует на земли, на небе.

Он бо изволит сердце исполнити,

дары своими и радость вселити.

Обновит, яко орлю юность твою,

даст бо ти милость и благодать свою.

Орел твой очи к солнцу обращает —

Христос сый солнце орла просвещает,

И тако светла Христом твоя слава,

ты бо всех царей православных глава.

Христос ти венец солнечно сияет,

на твоей главе и в сердцы блистает.

Живи с ним убо, царю, многа лета,

буди преславен лучми его света.

Где его слава, там и твоя буди,

а неверныя к нему враги люди.

Где имать престол на высоком небе,

тамо по земном престол буди тебе.

По летех мнозех, щасливо прежытых

и по торжествах, в славе нарочитых,

тех пресветлости вашей аз желаю,

яко раб верный аз сам припадаю

под нозе ваши, моля благодати,

да изволите мене сохраняти

в милости своей ради Христа Бога,

он вам дарует за то лета многа.

Радости весь мир ныне исполнися —

Божие Слово во плоти явися

От пречистыя Марии девицы,

Аггельских ликов светлыя царицы.

Егда Бог плоть бысть, миру мир дадеся,

от стран премирных Христом принесеся.

Радуется мир и ты от печали,

родителю мой, отныне престани:

Христос ти радость, о нем веселися,

здравствуй лет много, Христом утвердися.

С ним благоденствуй, а потом на небе

венец нетленный Христос да даст тебе.

Преславный Господь и Бог превеликий.

мудростию си вся создавый веки.

Днесь в нашей стране земной ся являет,

свет божества си телом покривает.

Да безвозбранно можем прохождати,

невидимаго удобь созерцати.

Нань же аггели со страхом взирают,

очеса крылми своя закривают.

Не претерпяще величия славы

царя всех царей и Господа хвалы.

К нему иногда Моисий приближися,

абие лице его прославися

велиим светом, даже не могоша

нань возглядати, иже изыдоша

из уз Египта. Тем же покриваше

лице обрусцем, тако видим бяше:

подобная днесь сам Бог содевает,

истинный Моисий, иже свобождает

весь человечь род, работы велики,

яже Адамом на вся человеки.

Днесь он от Отца пришед, покривает

свет божества си» егда плоть бывает.

Удобно зрим есть, тем же несут ему

царские дары, цареви своему.

С ними же и ты, царю правоверный,

зри Христа и дар неси всеусердный,

дух сокрушенный, иже попремногу

дар есть приятен воплощенну Богу.

Он же смиренных ведый возносити,

даст ти во славе вознесенну быти.

В славе доброты, веры и десницы,

егда падутся твои противницы.

О сем аз, раб твой выну, мил ся дею,

всем сердцем моим и всею душею.

При сем да даст ти здраво царствовати

многая лета и небо стяжати.

Купно с тобою пресветлой царицы,

лет молю многих от богородицы.

О сынах ваших царских, того жь Бога

молю, да даст им жити лета многа,

крепко и славно, во вся мира страны

державно верных и над Агаряны.

Благочестивым царевнам желаю

всех благ на земли и в небесном раю.

Синклит пресветлый да многолетствует,

весь православный род да ликовствует.

Хваляще Бога ныне проявленна,

на спасение наше воплощенна.

Велия радость весь мир исполняет,

Восток ны свыше светло посещает.

Естества наша Запад освящая,

тму греха во свет любве изменяя.

Доселе раби греха мрачна быхом,

днесь иго тяжко его низложихом.

Сынове света превечна бываем,

егда во плоти Бога созерцаем.

Оризонт солнце аще оставляет,

тогда обычно нощь и тма бывает.

Востекшу паки, паки день веселый,

разсиявлет на оризонт целый.

Далече солнце да днесь от нас бяше

за непокорство еже к Богу наше.

Тем же в нощи греховней седехом,

даже едва днесь свет солнца узрехом,

на оризонте мира возсиявша,

свет благодати очем нашим давша.

О сем днесь церковь мати торжествует,

всем чадом своим света приветствует.

Ей подражая, и аз, чадо ея,

дерзнух престолу светлости твоея

предстати, с гласом усердна привета,

о сиянии божественна света,

желая верно царстей ти державе

выну пребывати во немрачной славе

света Христовы вечны благодати,

да возможеши враги побеждати.

Солнце мысленно да просветит тебе,

яко чювственно Наввину[369] в потребе.

В его же свете живи лета многа

с помощницею, данною от Бога,

з сынми и дщерьми, купно и з сестрами,

свет Христов выну да пребудет с вами.

Князем, боляром той же да сияет,

вся вой, люди он да озаряет,

еже во воли божией ходити

без бед и скорбей многолетно жити.

День превеселый ныне совершаем,

радости сердца наша исполняем,

яко Христос Бог днесь ся нам раждает

и яко солнце вселенней сияет,

радости лучы повсюду пущая

и благодати реки изливая.

От того солнца ты днесь просветися,

отче мои честный, и светел явися,

лучесы в тебе его благодати,

выну да будут немрачно сияти.

Того аз, сын твой, верно ти желаю,

должным поклоном любо почитаю.

Моля прилежно Бога, днесь рожденна,

да тя соблюдет здрава и спасенна.

На многа лета и в пресветлом небе

вечное царство да зготует тебе.

Светлое солнце в мире днесь сияет,

от Вифлиема лучи разсыпает.

Во вселенную повсюду светяще,

тму греховную от нас отгоняще.

Во тме доселе вселенная бяше,

яко всемрачным идолам служаше

И мраком греха бяше потемненна,

пути к небеси не знаше спасенна.

Днесь, милостию мыслненнаго солнца

свет нам блистает во вся земли конца.

Уже едина вси мы Бога знаем,

в Троицы лиц едно естество читаем,

ея же Троицы и ипостась едина,

днесь плод бывает чрева Мариина.

Бог-Сын из отца прежде век рожденный,

ныне во плоти в мир бысть изведенный.

Слово днесь плоть бысть: плотских умудряет,

на путь небесный к Богу наставляет.

Не к тому враг наш будет обладати

миром, и скверны кумиры ставляти.

Проклят есть Идол, и кто его знает

за Бога, клятве той же подлегает.

Един есть Бог наш преблагословенный,

от всех пророков древле возвещенный.

Ему же сладце аггели глашают,

слава во вышниих Богу восклицают.

И мир на земли будет его чтущим,

инаго разве его не знающим.

Ты, правоверный Алексие царю,

всея России правый государю,

солнца мысленна лучми озаренный,

добре знаеши в небо путь спасенный.

Вериши Христа Бога права быти,

му тщашися по вся дни служити.

За то он тебе изволит подати

многая лета в мире царствовати,

купно с тобою пресветлой царици

даст благоденство от своей десницы.

И чадом вашим изволит подати,

еже в здравии многолетствовати.

О том аз, раб ваш, Бога молебствую,

о празднестве сем любо приветствую.

Сам ся под ноги ваши подстилаю,

милости царстей себе поручаю.

Царь небесный днесь родися,

нам подобен сотворися.

Бог сый во плоть облечеся[370],

род наш из тля им спасеся.

Тем же церковь днесь ликует,

благодарство возвитует,

Богу слову воплощенну,

зело сущу умаленну.

С нею и ты, царю велий,

исполнь буди днесь веселий.

Благодари Христа Бога,

он даст тебе лета многа.

Их же и аз ти желаю,

поклон низкий полагаю.

Да в милости мя храниши,

светлым лицем выну зриши.

Творец всех сущых на земли явися,

царь всея твари от Девы родися,

хотя нас, земных, в небеси вселити

и снаследники себе сотворити.

Ликует о сем церковь наша мати,

с нею же и ты изволь ликовати,

пресветлый царю, и даждь Богу славу,

к стопам Христовым преклоняя главу,

за его милость, а он за то тебе

по земном царстве даст и вечно в небе.

Его же аз ти всем сердцем желаю,

а сам ся твоей милости вручаю.

Бог превечный днесь родися,

в яслех скотских положися.

С превысока сниде неба

во пещеру дому хлеба:

хотя люди исправити,

глад и жажду утолити.

О сем церковь днесь ликует,

Христу славу возвитует.

С нею и ты веселися,

царю светлый, поклонися

Христу Богу, а он тебе

хощет дати, что ти требе.

Даст ти многа лета жити,

здраву, славну выну быти,

враги твоя побеждати,

потом венец в небе взяти.

Того тебе аз желаю,

одни светлом поздравляю,

до стоп царских припадая,

в милость твою мя вручаю.

Странное чюдо во мире явися —

от Девы чисты младенец родися.

Никто доныне возможе слышати,

дабы со девством была кая мати.

Едина токмо чиста пребывает

Дева Мария и сына раждает.

Сына прежде век от Отца рожденна

матере кроме, днесь же нам явленна

в плоти без отца чюдо се велие,

о нем же миру светло веселие,

ибо сей отрок, от Девы рожденный,

во спасение людем положенный.

Имать от смерти род наш свободити,

с аггелы в стране небесней вселити.

Тем же днесь церковь светло ликовствует,

рождынуся Христу хвалу возвитует.

С нею же и ты тщися ликовати,

пресветлый царю, Христа прославляти

за его милость, а он будет тебе

силный помощник во всяцей потребе.

Даст лета многа, здраво, славно жити,

врага попрати, потом в небе быти.

Того светлости аз твоей желаю,

сам ся милости царстей поручаю.

Бог сын предвеки от Отца рожденны,

матере кроме без тли изведенны.

В кончине веков без отца родися

и матери в девстве[371] цела сохранися.

Чюдное чадо чюдне ся раждает —

невещественный веществен бывает.

Творец всея твари во плоть облечеся,

Сын Божий — сын девы наречеся.

Царь всемогущий небеснаго града

восприят образ отрочате млада,

ветха Адама хотя обновити

и во небесном граде воцарити.

Наготу страждет, о дети желая,

стражствует, дабы сподобити рая.

Вся за нас грешных готов есть терпети,

дабы как в небе безстрастных имети.

Толь благий Господь в вертепе витает,

в твое царское сердце помышляет.

Даждь ему главу тамо приклоните,

родителю мой, благо с ним ти жити.

О нем лет много в мире поживеши

и вся благая удобь пристяжеши.

Их же сыновним сердцем ти желаю,

о событии Христа умоляю.

Небо и земля ныне веселится,

яко человек с творцем си мирится.

Его же в первом Адаме погреба,

елма прелстила его в рай Евва.

Земленный Адам под землю свел бяше

преступлением си естество наше.

Небесный паки, иже днесь ся родит,

на небо род наш светлое возводит.

Еже во славе тамо вечно жити,

создателя си во веки хвалити.

С аггелов лики с горними силами:

днесь мы со Богом и Бог живет с нами.

Нас ради плоть бысть да мы обожимся,

благодатию его оживимся.

О сем ликует церковь наша мати,

с нею же и ты изволь ликовати,

царю пресветлый, Богом увенчанный,

во правление роду Руску данный.

Ликуя, хвали Христа днесь рожденна,

во спасение мира положенна.

Он же есть силен тебе даровати

во веселии выну пребывати:

здраво и славно век свой проводити,

своим любезну, врагом страшну быти.

Сия Христос Бог да дарует тебе,

и еже вечно царствовати в небе.

Аз к нему молбы о том возсылаю,

а до стоп царских главу преклоняю.

Моля, да мене в милости храниши,

на радение милосердно зриши,

иже хощу ти дотоле служити,

доколе Господь дарует ми жити.

Бог всемогущий с превысока неба

в Вифлием сниде, иже дом есть хлеба.

Сниде же в плоти к грешным человеком,

да видим его, царя суща веком:

И по нем грядем делесы благими,

да водворимся с аггелы святыми.

Велий он Господь, днесь же мал явися,

невоместимый в яслех положися:

да нас рабы си сотворит велики,

и вселит в небе с аггелскими лики.

За что мы должни его прославляти,

день рождения светло совершати.

Аггели свыше к песнем возбуждают,

славословие сладко воспевают.

Их же образом и ты славу многу,

царю пресветлый, приносиши Богу.

Царь земный царя небесна славиши,

усты твоими песнь гласиши.

Дело се благо, дело то святое,

Христос воздатель будет ти за тое.

Аз его молю, да изволит дати

здраву и славну тебе пребывати

в мире лет много, потом и на небе

вечныя славы венец да даст тебе.

Да ся с аггелы вечно веселиши

и лицем к лицу всех господа зриши.

Сих благ светлости аз твоей желаю,

приветство дея, главу преклоняю.

Моля, да мене в милости храниши,

лицем веселым на раба ты зриши,

Иже готов есмь верно ти служити

донележе Бог даст ми живу быти.

Создавый небо на земли родися,

Бог наш превелий младенец явися:

Вместо престола в яслех почивает,

смирением си род Адамль спасает.

Врачевство язве противное деет —

врачь се небесный целити умеет.

Его рождество ныне прославляем,

друг друг благих всяческих желаем.

Аз же светлости твоей есмь желатель,

да врачь небесный будет тебе датель,

царю пресветлый, здравия благаго

благоденствия всегда помыслнаго.

Да славу твою везде разширяет,

яко царь славы и победы дает

на супостаты всяческия тебе,

лета зде многа и вечность на небе.

Сих пресветлости благ твоей желаю,

сам ся под стопы твоя постилаю.

Моля смиренно, изволь мя щадити,

хотяща верно всегда ти служити.

Божие Слово духом воплощенно[372],

днесь от чистыя девицы рожденно.

Лежит во яслях, слова не вещает,

обаче делом род наш поучает.

Да смирением потщимся востати

от стана гнева во стан благодати.

Да чада света, а не нощи будем,

в свете небесном вовеки пребудем.

О сем днесь церковь Христа величает,

и твоя светлость ему подражает.

Христос же Господь да изволит дати,

царю пресветлый, твоей благодати

здраво, щасливо, многа лета жити,

венцы победы украшенну быти.

И чесо либо сердце ти желает,

милость Божия то да посылает.

Того ти царствей светлости желаю

верно, а сам след стоп твой лобзаю.

Мил ся ти дея, храни в благодати

готова тебе всегда работати.

Царь всего мира на земли родися,

но не в полатах царских водворися.

В худе вертепе изволил витати,

да всяк возможет удобь целовати.

Нищ и богатый равно да приходит,

всем бо в спасение днесь ся Христос родит.

О сем соборы верных веселятся,

ведуще яко Богу всыновятся.

В первых же тебе, отче мой любезный,

радости вина, Христос царь небесный.

Царю от царя лепо ликовати,

земну небесна благо целовати.

За что он твою царскую державу

укрепит твердо и разширит славу.

Благоденствие даст и лета многа,

о что аз молю всещедраго Бога.

Бог Господь ныне в мире проявися,

во вифлеемстем вертепе родися

от пречистыя Марии девицы,

всех сил небесных сущая царицы,

род человеческ хотя свободити,

узы смертныя в конец сокрушити.

В рай же небесный и мать водворити,

еже бы вечно тамо верным жити.

О сем днесь церковь весело ликует,

всем благодати твоя приветствует.

Ея образом тоя благодати

приветствую ти, пресветлая мати,

сыновним сердцам моля Христа Бога,

да подаст тебе жити лета многа

здраво, весело и венец съготует,

идеже в славе вечной сам царствует.

Всяк земнородный ныне торжествует,

в нем же Дух божий силою действует.

Безплотных умов лицы веселятся,

о рождестве днесь царя всех светятся,

Иже высоту небесе приклонив,

на землю сниде, небо се не лишив.

Во вифлиемстей пещере родися,

Отцу сьпрестолный в яслех положися.

От пречистыя Марии рожденный,

с матере Девы Исус божественный,

во спасение всей словесной твари,

дающей сердца ему своя в дари.

Ты, пресветлая царице Мария,

многшая в дарех, нежели иныя.

В дар тебе Христу выну отдаеши,

Христу, не себе жизнь твою живеши.

Ничесо твоим временных вменивши,

вся твоих Богу истинно вручивши.

Ныне наипаче, егда ся раждает,

к нему душа ти усердно желает,

Да вместо яслей в сердце твое внидет

благонадежно, яко скоро идет.

Возждел бо есть царь твоей доброте,

любит душу ти по своей щедроте.

Паче рещи есть, яко увселися

во сердце твоем и в нем водворися.

Подобие бо он в сердци ти витает,

яко одесну отца пребывает.

Тем же известно спасение тебе

по земном венце готовь венец в небе.

Точию прежде царствуй зде над нами

с благочестивым царем над рабами,

лета премнога, дабы увенчанны

видети вама над многими страны.

Его же весь мир вама приветствует,

и моя душа верно усердствует.

День веселия ныне нам сияет,

Царица неба Царя всех раждает.

Яко да мир сей свободит от ада,

вселит в жилища небеснаго града.

Небо ликует, земля веселится,

яко мир Богу уже примирится.

Аггели песнми Христа прославляют,

к славословию и нас возбуждают.

Возопии убо и ты, моя мати,

песнь похвалную юну отрочати.

А он, яко Бог, даст ти здраве жити

много лет в мире и небо влучити.

Чесо аз верне тебе усердствую,

празднества светла любоприветствую.

Чюдное торжество ныне ся празднует,

о нем же всяк земен лепо веселует.

Днесь во Вифлиеме вторый насадися

рай, в нем же и Адам новый водворися,

от древняго ветхий, паче же создатель,

земных и небесных тварей обладатель.

Есть вторая Евва, чистая девица,

богоизбранная Христу голубица,

яже смирением своим исправляет,

что гордостию си древня погубляет.

Она бо со змием зле име беседу,

на смерть всему роду, на скорбь и на беду.

Сия с Гавриилом[373] добре глаголаше,

в жизнь вечную, в радость, в спасение наше.

Се бо животворный овощь нам дарствует,

его же от Духа Свята приимствует.

Земный в подземныя Адам свел бе страны,

небесный возводит в небо вождь нам даны.

Первым бысть грех, а смерть от греха родися,

вторым спасение и жизнь приплодися.

Овем рая двери быша затворены,

сим отверзошася и страх отдалены.

Убо верным леть есть во рай шествовати,

животворным плодом тленность исцеляти.

Вскую днесь весело весь мир ликовствует,

тебе же наипаче веселость годствует,

преблагороднейший царя наша сыну,

в тебе бо рай мысленный пребывает выну.

Цветы доброт всяких душа украшенна,

паче земна рая Богом упещренна.

В ней же вторый Адам выну господствует,

с Евою своею любезно царствует

над чювствы и страстьми твоими, а тебе

рай вечный готует во превысприем небе.

И зде венцем славы хощет тя венчати,

здравие, лет много имать даровати.

Их же благ вседушно аз тебе желаю,

ног ти подножием сам ся постилаю.

Естества закон егда царствоваше,

доброте злоба начало хищаше.

Нечистоту Бог чистил вод потопом,

потопи люди с несмысленным скотом.

Един бе Ное, иже во ковчезе

исцеле от вод, яко на сусе брезе,

с чады своими и всякаго рода

зверей со малым числом ради плода.

Днесь же греховный потоп наводнися,

мысленный Ное во ковчег вселися,

Христос в Марию во мире витает,

аки во море глубоце плавает.

Вся до ковчега сего призывая,

сыны и скоты, люди припущая

Токмо смирныя: всем хотя спастися,

убо ковчег сей душевный потщися.

Ты, государю наш благороднейшый,

в благочестии от всех изящнейший,

сердцем, душею в ковчег сей вселися,

от волков греховных благо уклонися.

Будеши спасен телом и душею,

мысленным Ноем лодиею сею.

И пристанище выспрнее влучиши —

мир немятежный в небеси узриши.

А на житейском мира сего море

плавай здрав везде властию воскоре.

Океан тебе весь да книсонствует,

даждь Бог, да весь мир тебе подданствует.

Та же, в здравии пожив многа лета,

пристяжи страну невечерня света.

Красная весна ныне нам сияет,

и день пресветлый вселенней блистает.

Аще вся снегом зрятся покровенна,

и лютым хладом, аки умерщвленна:

обаче весна: се бо цвет нам полный,

прозябе Христос, сый же крин юдолный.

Белший от снега плоти чистотою,

краснейший солнца души добротою.

Он же есть шипок, чермно обагренный

кровию, с земли чистыя рожденный.

Сам есть и солнце, Бог, бо естественный,

от света-отца свет произведенный.

Тем же пресветлый день нам содевает,

егда греха нощь темну прогоняет,

вся освящая светом благодати,

да вси возможем в небо шествовати.

Зело днесь низу путь свой совершает,

небесный Зодий в земных изменяет[374]:

да мы земнии к нему приближимся,

небесну свету его приобщимся.

А яко Моисий лице покриваше,

егда свет божий от него сияше,

Даже людие зрети не могоша

света, к нему же не приобыкоша.

Тако Христос Бог светлость божественну

нам предлагает, телом покровенну.

Да удобне к нему приложимся,

помалу весны света изменимся.

Тебе, пресветлый царю, света сыну,

навык от ложесн в свете быти выну.

Отец твой — солнце, ты еси другое,

во свете быти вам есть природное.

Тем же ко солнцу Христу приступите,

в дом ваш душевный его приимите,

дабы сугубым светом вам сияти,

вам в Христе, а в вас Христу пребывати.

Не повредит вы сей свет божественный,

но уврачюет всяк вред душевный.

Пророк вы зовет: к нему приступите

и его светом себе просветите.

И лица ваша так не постыдятся,

паче повсюду славно просветятся.

Будижь прославлен, свете Алексие,

идеже славно есть торжество сие.

И тамо крепость твоя славна буди,

где безверие помрачает люди.

Весь мир тобою Христа да познает

як Костантином[375]. Он же увенчает

честну ти главу увяслом пречестным —

временно земным, вечно же небесным.

Того усердно аз тебе желаю,

к Богу рожденну молбы возсылаю.

А твоя стопы дерзаю лобзати,

да мя блюдеши в твоей благодати.

Красная весна верным днесь сияет,

аще снег землю белый покривает,

се бо мысленный рай наш дает плоды,

принесенныя с горния породы.

Рай есть Мария, чистая девица,

его же назда божия десница.

В том рай древо жизни прозябает,

егда Христос Бог телом ся раждает.

На нем же плоды растут благодати,

юже изволи Господь миру дати.

Благодать его вся ны оживляет,

греха бо язву ныне исцеляет.

Плодом древесе Адам уязвися,

древа же плодом весь род исцелися.

Его же ради церковь наша мати

устави день сей светло праздновати.

Празднуй ты убо, светлый царский сыне,

в светлости сердца и в здравии ныне.

Прими плод сей, с небесе поданный,

в сердца твоего сосуд преизбранный:

да в силе его долгий век живеши,

добродетелми, яко рай, цветеши.

Стяжеши крепость на вся супостаты:

вся сия может плод сей тебе дати.

К тому и в небе увенчан бывает,

кто плоду сему себе сообщает.

Ты о нем буди на земли и в небе

светло увенчан, аз желаю тебе.

Ты же изволь мя в милости хранити,

иже готов ти по вся дни служити.

Неплодный древле камень даде воды

шедшим евреом во страну породы[376].

Ныне же девство плодно проявися,

егда безмужно отроча родися.

Не позна мужа Мария девица,

но не безплодна бысть отроковица.

Неоранное поле цвет раждает —

несеянная нива клас издает.

Живый источник Христос есть спаситель:

рода нашего скверны очиститель.

Жадныя душы имать напоити,

нивы сердец наших добре увлажните.

Да плодны будут всеми добротами

и украсятся онех лепотами.

Он же и цвет нам мысленного рая,

его же роди дева простая,

иже сладкими вонми исполняет

весь мир, а злий смрад греха прогоняет.

Он — клас всеполный чистыя пшеницы

днесь от Марии прозябший девицы,

алчныя душы хотяй насытити,

изнемогшыя в силе укрепити.

Хлеб се небесный, хлеб зело избранный,

чювством душевным сладкий паче манны:

Его же зрящи церковь днесь ликует,

и лик небесный о нем приветствует.

Аз же пред лицем твоея светлости

с приветом предстах о новой радости:

верно желая да от воды сея,

дух пиет выну светлости твоея.

И яко хлебом буди насыщенный,

на все враги ти силно укрепленный.

Цвет сей мысленный да тя украшает,

вонею небес душу исполняет:

О, дивней силе пречюднаго цвета!

жителствуй в мире премногая лета

и сам процветай да плод принесеши

Богу дел благих и душу спасеши.

Расти, яко кедр, на славном Ливане,

буди во всяцей славен мира стране.

Да тя и небо себе возжелает

в красоту светил — ими же сияет.

Сих благ от Христа аз тебе желаю,

под ноги твоя главу приклоняю.

Прилежно моля, да мя в благодати

благоволиши твоей сохраыяти.

Царь славы Христос, от аггел хвалимый,

от всех сил вышних непрестанно чтимый,

в худе вертепе плотию вместися,

вместо престола в яслях положися.

Посреде двою животных бывает,

иже воинством горним обладает.

Его же держит весь мир сей десница,

того рукама пестует девица.

Иже облаки небо повивает,

той пеленами повиван бывает.

Бог велий крепкий зело умалися,

яко же юно детище смирися:

хотя из мира гордость истребити,

смирению же верных научити.

Господь бо гордым сопротиву стает,

смиренныя же он благословляет.

Смиренным небо от него готово,

на смиренныя взирает Бог-Слово.

Взирает на тя, светлый царский сыне,

за смирение Христос-Господь ныне.

Желает в сердце твоем пребывати,

от яслей к нему имать привитати.

Но и у тебе сердце есть готово,

да в нем вселится превечное слово.

Отселе Христос имать в тебе жити,

жизни твоея век благословити.

Иже подаст ти возраст совершенный,

стопы направит в путь душеспасенный.

Даст лета многа, вручит ти державу

и венцем честным увенчает главу.

По летех многих и небо дарует:

того ти душа моя усердствует.

Сам аз под нозе твои припадаю,

на твою службу весь мой век вручаю.

Бог наш превелий в мире днесь явися,

иже прежде век от Отца родися,

матере кроме и превечно бяше,

времене себе начала незнаше.

Днесь начинает в подсолнечной жити,

изволи кроме Отца рожден быти

от чисты Девы, чистоты любитель,

всякия скверны щедрый очиститель.

Величие си излише смирил есть,

егда ся в худый вертеп водворил есть.

Се же, дабы нам светлый рай стяжати

и величество древнее прияти,

еже Адамом первым погубихом,

егда во чреслех его в рай быхом.

О сем ликует церковь мати наша,

ей да сликует и пресветлость ваша.

Благородныя царя славна дщери

Христос отверзает райские двери:

еже в светлости тамо вечней быти,

во венцех славы безконечно жити.

Но впредь да даст вам в мире многа лета

благоденственно жити без навета

от врачь душевных, купно и телесных

таже сподобит всех вы благ небесных.

Того светлости аз вашей желаю,

празднеством днешним верно поздравляю

и молю, милость мне вашу являйте,

ко присной службе тою поощряйте.

Аз же готов есмь выну вам служити,

елико даст Бог в мире тленном жити.

Верности знамя сие содеваю,

смиренно главу до стоп преклоняю.

Сын Бога жива, Бог, создавый веки,

ныне странствует между человеки:

иже от Отца прежде век рожденный,

внутрьнее Слово, умом изведенный —

матере кроме и без нетления,

нашего ради ныне спасения

на землю сошед, во Деву вселися,

без отца плотски всечисто родися.

Сохранив матерь Деву неврежденну,

яко бе лепо сыну божественну,

иже чистоты теплый есть любитель

и ту хранящих прещедрый хранитель.

Сей днесь во яслях худых почивает,

Девою брегом, а внити желает

во сердца ваша в чистая пречистый

ко царским дщерем и сам царь и Бог истый.

Хощет своея светом благодати

драгия душы ваша облистати,

и во вас жити. Благо с ним вам будет,

к светлости вашей его свет прибудет.

В нем же живуще, дщери дня и света,

можете жити в мире многа лета.

Здраво, спасенно, потом получити

светлое небо и в нем вечно жити.

Тех благ светлости аз вашей желаю,

под стопы ваша главу преклоняю.

За милость к отцу являему вами,

яко благодать есть ваша над нами.

За милость милость буди вам от Бога

и наследие Христова чертога.

Той наследити верно вам желаю,

сам ся милости вашей поручаю.

Бог превеликий бысть отроча мало,

Бог безначалный приемлет начало

не по божеству, но по нашей плоти,

ему же служат днесь немии скоти:

вол с ослом купно, аггелов же лики

пением славят рождество Владыки.

Земля вертепом ему угождает,

светлая звезда Бога проявляет.

Волсви с Персиды дарми почитают,

миро и злато с Ливаном вручают.

Всем подобает тако нам сретати,

рождество его весма почитати.

Срящи, почитай и ты Христа Бога,

тетушка моя, в нем есть любы многа.

Любве и сердца он тако желает,

за что небесный чертог обещает.

Драго он сердце имать ти воздати,

даст ти зде здраво многолетствовати,.

а потом вечным венцем увенчает,

чесого любовь моя ти желает.

Царь мира Христос ныне ся раждает,

мир всему миру с Богом содевает.

Вражда доселе великая бяше,

яко весь род наш греху работаше,

оставив Бога. Днесь же утвердися,

мир, егда Слово его воплотися.

Его же ради аггели ликуют,

Господа славят, а нам приветствуют,

слава во вышних Господу поюще

и на земли мир к людем глаголюще;

тех сладким гласом и аз, возбужденный,

к вашей честности придох, раб смиренный,

приветствовати мира божественна,

с вашим наипаче чином сотворенна.

Вы бо особно по Бозе пойдосте,

егда ся мира сего отрекосте.

Избрасте паче крест Христов иосити,

нежели в славе мира лестна жити.

Тем же наипаче вам Христос родися,

его же игу чин ваш подчинися.

Он вам пособник в трудех и воздател,

подвигозритель и верный венчатель.

Ему же зрящу труды полагайте,

на враги ваша Богом возмогайте.

Христа рожденна радостно хвалите,

здраво спасенно долгий век живите.

Потом небесный венец воспримите,

мене в милости вашей сохраните.

Иже празденством светлым поздравляю,

купно поклоном низким почитаю.

Бог безначалный и пресущественный

ныне на земли явися рожденный,

яко младенец от чистыя Девы,

яже исправи падение Евы.

Не светло сниде из страны богаты,

в смиренный вертеп, не в красны полаты.

Образ подая весь мир презерати,

истинных богатств небесных желати.

На нь же вы зряще сами ся смиристе,

суеты мира сего остависте.

Нищету с Христом волею избрасте,

чистоты плоти ему обет дасте.

Послушание купно обещаете,

егда глав ваших власы постригосте.

Все Христа ради сие сотворися,

иже послушлив до смерти явися.

Есть же конечно, паче же самая

чистота он есть боголюбезная,

то иго его, носимое вами,

украшенно есть всеми добротами.

В его же трудех он вам помогает,

вас, изрядныя рабы своя, знает.

Вы убо ныне будите весели,

яко в небеси святии аггели.

Рождьшуся Христу славу возсылайте

и мир всем людем верным возвещайте.

А Христос-Господь даст вам вся благая,

в мире нуждная, в небеси вечная.

Их же честности аз твоей желаю,

рождеством Христа-Бога поздравляю.

Бог всемогущий днесь в мире родися,

в худе вертепе, в яслях положися.

Чистая Дева сосцама питает

и пеленами его повивает.

Анебесныя силы воспевают:

слава во вышних! — Богу восклицают.

Яко сотвори мир людем желанный

мессия правый, древле ожиданный.

О нем же аз ти, дедушко, вещаю,

рождеством Христа-Бога поздравляю.

Желаю тебе многолетно жити,

а ты изволь мя, внучка си, любити.

Велия радость мирови сияет,

Бог сам человек нас деля бывает.

Дабы свободил от темного ада

овец погибших безчисленна стада,

из волчих зубов хотя исхитити,

в небесных селех вечно водворити.

С числа тых овец, мои родители,

Христовых есте и благодетели.

Днесь подобает и вам ликовати,

новорожденна в песнях прославляти.

На лета многа торжествуйте здрави,

в милости царской, в чести и во славе.

Новое чюдо во мире явися —

от Девы чисты младенец родися.

Той же есть Бог наш, вся веки создавый,

роду нашему мир сей в область давый.

Дивное чюдо: два краты рожденно,

предвечно Богом отцем изведенно

матере кроме, днесь же ся раждает

с матере Девы, а отца не знает.

Мелхиседеком он, предображенный[377].

во жертву за мир Богом устроенный.

Стар сей младенец ветхий леты зело[378],

рождество его велми нам весело.

Яко нам Бога-Отца примиряет,

егда плоть нашу себе присвояет.

Радуйся о сем ты, мой родителю

любезный, и даждь славу спасителю.

А он изволит тебе в благодати

чрез многа лета своей соблюдати.

Потом изволит даровати тебе

вечную радость во пресветлом небе.

Ея же верно аз тебе желаю,

отечестей любви себе поручаю.

Всяческих творец на землю низходит,

от пречистыя девицы ся родит.

Иже из Отца прежде век родися,

ныне без отца во мире явися,

хотя нас Отцу своему всынити

и съ наследники себе сотворити.

О коль благ Господь! кто не удивится,

кто благодарства наг пред ним явится?!

Ты, мой любезный стрыю, изволь дати

славу с аггелы давцу благодати.

Он ти дарует многа лета жити,

из страны земны в небо преселити.

Его же аз ти вседушно желаю,

сам ся под ноги твоя постилаю.

Да изволиши милостив мне быти,

яко свою кровь усердно любити.

Краснаго рая род наш отътщетися,

егда преслушлив праотец явися

творцу своему, Адам первозданный,

за что бысть срамно из рая изгнанный.

Днесь вторый Адам с небесе низходит,

послушлив Отцу, от Девы ся родит,

хотя ны паки в лучший рай вселити,

от изгнания в небо водворити.

Ликует о сем церковь наша мати,

с нею же и ты изволь ликовати,

стрыю мой честный, ибо от днесь тебе,

дарует Христос отечество на небе.

В нем же по многих летех будешь житель,

въведет тя тамо Христос вседержитель.

О что аз его выну умоляю,

а нозе твои смиренно лобзаю:

да се приветство любезно примеши

и мене в любви, кровь свою, блюдеши.

Егда денница восток озаряет,

тогда радости сердца исполняет.

Егда же солнце само возсияет,

день всему миру желанный раждает.

Днесь солнце правды на земли родися —

по темной нощи день светлый явися.

В онь же ты ликуй, любезный мой стрыю,

до ног Христовых преклоняя выю.

За что он даст ти день вечный на небе,

по многих летех той да даст ся тебе.

Кто хощет Бога в мире созерцати

и аггел его пение слышати,

да тщится ныне в Вифлием мысленный,

тамо тех даров будет сподобленный.

Бог бо во плоти тамо ся раждает,

лик аггел песни ему воспевает.

Тому, мой любый стрыю, изволи ты

главу под нозе твою преклонити.

Узришь зде умом и вовеки в небе

того аз, кровь ти, усердствую тебе.

Божие Слово, во плоть облеченно

невидимое, днесь миру явленно.

Веки создавый и праздный начала

Бог велий ныне яви себе мала.

И начинает плотский живот жити,

еже бы род наш велик сотворити,

и духовную жизнь нам даровати,

с горними духи вечно пребывати.

Радость си зело людем есть велика —

Бог в любовь прият грешна человека.

Аще же любим, имать то подати,

чесого будем от него желати.

Аз в сей день светлый желаю от него,

да тебе света сохранит моего

во божественней своей благодати

и даст ти здраву долго пребывати

в благоденствии. Потом же на небе

жилище вечно да дарует тебе.

Ты же, мой свете, изволь в благодати

мене, раба ти, выну соблюдати.

Иже праздненством тебе поздравляю,

под ноги твоя главу преклоняю,

желая тебе угодно служити,

донележе Бог даст мне в мире жити.

Твоя аз кровь есмь, яко раб ти буду,

елико в мире во силе пребуду.

Милости твоей мене поручаю,

яко достоит стоп ти след лобзаю.

Ты, свет наш, в твоем свете хощу жити.

Бог да хранит тя долго нам светити.

Сын жива Бога днесь в мире родися,

мир спасти, хотя безмерно смирися.

В худе вертепе в яслех почивает,

в небо вселити нас грешных желает.

Аз ему за то славу возсылаю

и все теплыя молбы проливаю.

Да твою милость изволит хранити

в здравии добром и щасливей быти.

Да во радости много лет живеши

и по них в небо светлое внидеши.

Того усердно аз тебе желаю,

под твоя ноги главу преклоняю.

Моля, изволь мя в милости хранити,

иже готов есмь выну ти служити.

Царь сил небесных, Бог всесовершенный,

от него же бысть весь мир сотворенный,

сниде со небес, во Деву вселися

и от нея днесь плотию родися.

Невещественный веществен бывает

и ветхий деньми детищь ся являет,

ветха Адама хотя обновити,

дабы в новости духа людем жити

и от стран земных вселитися в небе

при водах жизни и радости хлебе.

О сем днесь церковь Христа величает,

благодарствие ему возсылает.

Аз же и молю, да изволит дати

милости твоей здраво пребывати.

И в желании тя возвеселити,

что душа хощет, того не лишити.

Да даст в радости жити лета многа

и внити в радость небесна чертога.

Того милости аз вашей желаю,

под стопы твоя главу преклоняю.

Ты же изволи в любви мя хранити,

готова суща во всем ти служити.

Радость вселенней ныне сотворися,

аггелский собор днесь возвеселися:

умная вся тварь весело ликует,

яко Христос-Бог светло торжествует,-

победив враги, смерть, греха и ада,

нам же дадеся от него отрада.

Не к тому бо смерть нами обладает,

не к тому демон верных в ад хищает.

Во чада Богу есмы усвоени,

адовы власти вечно свобождени

чрез Христа Бога, от гроба воставша,

живот нам вечный верным даровавша.

Ему же церковь славу возсылает,

ко благодарству вся ны возбуждает,

Дадеши славу Христу спасителю,

и ты усердно, наш благодетелю

Богдан Матфеевич, дедушко мой драгий,

рода нашего сам отче преблагий.

А Христос-Господь за то тя прославит,

от всяких скорбей, бед и нужд избавит.

Ты прибежище бедным людем еси,

за то мзда тебе будет на небеси.

Плачющым слезы веси отирати,

Христос имать ти зато радость дати.

Радуйся убо на лета премнога

и с подружием данным ти от Бога.

А мене, внучка, изволти щадити,

яко раба си в милости хранити.

Иже вам всех благ от Христа желаю,

с должным поклоном до ног припадаю.

Смерть вселютая острою косою

вся косит люди, яко траву с росою.

Телеса мертвых в гробы собирает,

но душам правым ничто же вреждает.

Прежде мессии страшна она бяше,

яко и души аду предаяше.

Днесь смерть сладкий сон церковь нарицает,

яко всяк добр муж с Христом почивает.

За жизнь временну вечну наследствует,

за вся тленная в небеси царствует.

Тем же несть лепо мертвых нам ридати,

токмо любезно требе поминати.

Престани убо о брате слезити,

веси яко зде не вечно нам жити.

Бог тя в печали сам да возрадует,

вместо слез горких радость да дарует.

Утоли слезы, наш благодетелю,

и воздаждь славу Христу спасителю.

Яко изволил дом ваш присетити,

брата вашего в небо преселити.

Несть он умерех вам, ибо в своих чадех

жив есть и духом живет в горних градех.

Честен бе в мире, наипаче в Сионе

небесном, честен при божием фроне.

Богатство, славу имать безконечну

за доброты си, к тому славу вечну.

Тем же несть нужда вам о нем ридати,

но Бога от всех присно величати.

А он подаст вам весело зде жити,

потом на небе во светлосте быти.

Их же мы тебе вседушно желаем

и молбы к Богу о том возсылаем.

Дванадесять лет жена пострадавши,

крове ток лютый вся врачем издавши,[381]

Туне от Христа бяше исцеленна,

прикоснувшися риз его спасенна.

Дванадесять лет мы слезы точихом,

от скорбей многих едва живы быхом.

Тыя тобою ныне утоленны,

егда отец наш от тебе призренны.

Егда изволил ты милость явити,

под кров крилу си его припустити.

Ныне всем домом сироты с вдовицы

возносим руце к небесной царицы:

Да изволит тя в милости хранити,

чрез многа лета все добро дарити.

Молим самаго Творца твари всея,

да тя милости не лишит своея.

Дом благодатный твой да защищает,

дондеже солнце на небе сияет.

А твоя милость ныне к нам явленна,

молим, да будет всегда неизменна.

Мы же готови тебе работати,

дондеже даст Бог в живых пребывати.

Богатый в милость Господь всего мира,

возвеселивый древле Иаира[382]

воскрешением дщери любимыя,

в дванадесять лет бывшия юныя.

Возвеселил есть и отца моего,

в дванадесять лет бывша в скорбех его.

Возвеселил же чрез велможность твою,

егда ты к нему явил милость свою.

И благоволил любовь показати,

яко милосерд своей благодати.

За что мы должны Господа молити,

да дасть ти здраво многа лета жити.

С подружием ти и с сыном, с внуками,

с пречестнейшими твоими отрасльми.

Ты же изволь нас в милости хранити,

иже готови всегда ти служити.

Изволь от всяких навет защищати,

готовых сущих тебе работати.

Творцу всех Богу славу возсылаю,

яко днесь здрава тебе созерцаю.

Благодетелю мой премилостивый,

живи лет много, живи век щасливый.

Новое лето да ново ти будет

щастием новым. Бог да не забудет

тя возвыжшати и благословити

и царску милость к тебе утвердити.

Ты же утверди милость твою на мя,

раба твоего, во любви ти знамя.

День превеселый ныне совершаем,

Иова свята песньми прославляем.

Многострадалным иже наречеся,

яко во страсти весь приоблечеся.

Страда нищету, пострада и чада

в болезни ему не бяше отрада.

От всюду беды его обыдоша,

обаче уста в ропот не внидоша.

Хвалу он выну Богу возсылаше,

благодарственно вся скорби терпяше.

За то изволил Бог благословити:

вся усугубив лета умножити.

То и во аггела Богом ти есть данны,

благодетелю мне из всех избранны.

Он тя от скорбей имать свобождати

и от болезней плоти защищати.

Он ти сотворит зде щасливо жити,

в божий и в царской милости пребыти.

К тому умолит от благаго Бога,

да ти дарует в мире лета многа.

А по временной жизни и на небе

на радость вечну превлечет тя к себе.

Его же верно аз ти усердствую,

а твои нозе любезно целую.

Моля, да мене в любви сохраниши,

на рабе твоем милость да явиши.

Аз же готов ти выну работати,

стопы твоих ног любезно лобзати.

Пречестный праздник церковь совершает:

днесь Феодора песнми величает,

иже Стратилат[385], храбрый в мире бяше

и Богу живу верно работаше.

Попра идолы, нищым даде злато,

на древе крестном сам распят за то.

Гвоздми пронзеся, стрелми уязвися,

но от аггела паки устрашися.

Страда до смерти за Бога живаго,

паче онаго не зная инаго.

Тем же днесь в небе со Христом царствует,

о молящихся ему молебствует.

Аз убо его сподоблен прияти,

имя святое дерзаю прошати.

Да молит Бога Сын в небесной славе

о твоей царстей пресветлой державе.

Во еже бы ти многолетствовати,

в здравии, в щастии выну пребывати.

Купно царица чада и царевны

да будут свыше Богом ублаженны.

Феодор имя дар божий являет,

дар божий с небес вас да присещает[386].

Храбрый бе Феодор, храбрость убо тебе

и твоим воим да умолит в небе,

во еже бы ти враги побеждати,

мир утвердити, царство разширяти.

Сих благ усердно аз тебе желаю,

пресветлый царю, аз хлеб приношаю.

Сей со поклоном во усердства знамя

прими, а призри милостивно на мя,

раба твоего, иже ти служити

рад есмь, дондеже даст ми Господь жити.

Истинна есть мудрость еже Бога знати

и закона святаго прилежно искати,

в ней же божественная мудрость заключенна

яко злато в ковчезе, людем предложенна.

Человек разумичный ону обретает,

егда в законе святом себе поучает.

А с нею удобь Богу может угождати,

выну яже о Бозе умом мудрствовати.

О нем же ты, хотящи благомудра быти

и в законе господнем вся дни твоя жити,

о благороднейшая царевно София,

ищеши премудрости выну небесныя.

По имени твоему жизнь твою ведеши:

мудрая глаголеши, мудрая дееши[388],

И прилично Софии выну мудро жити,

да дело со именем точно может быти.

А занеже во книзех мудрость божественна,

яко во сокровищех лежит заключенна,

ты церковныя книги обыкла читати

и в отеческих свитцех мудрости искати.

Уведевши же яко и книга новая

писася, яже «Венец веры» реченная.

Возжелала ту еси сама созерцати

и, еже в черни бывшу, прилежно читати,

и, познавши полезну в духовности быти,

велела еси чисто ону устроити.

Яже велению ти уже сготованна,

со многим трудом долго читана, списана.

Воистинну же имать мудрость превелику,

доволну в спасение всяку человеку.

С богословских училищь сия изведенна,

учения святаго словес исполненна.

Вопросы и ответы зело исполнися

с разсуждением, тако дело устройся,

да мудро вопрошенный мудро отвещает,

кто либо сия книги прилежно читает.

Сокращенно писася, да может пояти

удобне ум и память предолго держати,

ибо краткое слово удобно держится,

к тщащимся пояти годнее творится.

Ту же разрешения многа положенна,

с трудностию судимых, да суть не смущенна.

Ползы ради духовных, да суд грехов знают,

кающыяся добре от грех разрешают.

Суть и ина зде многа, яже оглавляет

и явление тому, кто оно читает.

Вся та с трудом немалым тщихся написати,

исправив множицею начисто списати.

Устроив же в книжен вид, днесь вручаю тебе,

пресветлая царевно, честно яко требе

желая, да прилежно тщишися читати,

да ползу доволную можеши прияти.

Не точию мудрости вопросов ответов,

яко вонных и красных венца сего цветов.

Но паче да можеши благодать стяжати

и плод жизни вечныя в небеси прияти.

Того благородию вашему желаю,

сам ся милосердию прилежно вручаю.

'Милосердие' елей выну знаменает,

елей же мудрым девам не скуден бывает,

чтем во Евангелии[389]. Убо елей тебе

милосердия в сердце яко мудрой требе.

Души царя великаго, царево София,

души царя милостива, царя Алексия,

купно сестро щедраго Феодора царя[390],

Богом дарованнаго царству государя,

мудрейшая ты в девах, убо подобает,

да светилник сердце ти светлее сияет,

обилуя елеем милости к убогим,

сию спряжи доброту к иным твоим многим.

Но и сопрягла еси, ибо сребро, злато

все обратила еси милостивне на то,

да нищым расточиши, иноком даеши,

молитв отце твоем теплых требуеши.

И аз грешный многажды сподобихся взяти,

юже ты милостыню веле щедро дати.

Ни престаю отца ти в молбах поминати,

иже мне щедр бе яко отец или мати.

Тако же мудрой сущей и елей имущей

отверзут ти ся двери к небеси грядущей,

от жениха душы ти, до его чертога,

еже светлости вашей да будет от Бога.

Царска души, к Царю небес буди воведенна,

во чертог веселия вечнаго вселенна.

Того светлости вашей вседушно желаю,

главу мою под стопы твоя преклоняю,

Чая милосердием вашым храним быти,

богомолец ваш будущ, дондеже ми жити.

Нуждно есть небо хотяй восхитити

имат мечем сим рать в мире творити

духовным, дуси будут посечени,

а благим злии будут поражени.

Остр обоюду и есть действен зело,

души и плоти враги сечет смело.

Драг злата паче от божия слова

Нова Завета бысть его основа.

Не из земна кружца он сооружися,

убо тли празден, ратуй, не сумнися.

Вещество его с небес принесенно

устнами Христа: тем же есть спасенью.

И небо может оным ся набыти,

убо продавши ризу, мечь купити

сей подобает, им же и одежду

стяжет небесну имяяй надежду.

Венец победный к тому ся пристяжет,

с его же колом и вечность ся стяжет.

А и маммона выну подъданствует

мечеви сему, в след его шествует.

Блажен делатель его уковавый,

мечь бо сей святый, мечь се не кровавый.

Язвит он сердце, слезы источает,

язвами язвы души исцеляет.

Паки блаженна тебе именую,

о трудолюбче, за любовь такую.

Лазарь — имя ти, убо друг Христови

знаю по любви, по сем божем слове:

Мария, Марфа богомыслность, труди

сестре твое, то яве ведят люди.

И тыя Христос зело в тебе любит,

егда уснеши их ради тя взбудит;

приложит овцам небеснаго стада,

тамо за труды будет ти отрада.

Пастырю с овцы зело есть прилично —

Барановичю с агньцом есть обычно.

Несть верста с козлы тебе ся мешати,

овцам ты пастырь, с овцами верста ти.

По агньце в небе в след выну ходити,

победную песнь ему приносити.

Но мзды вящшия ради потрудися,

вящше во церкви, в болезни крепися.

В немощи твоей может совершити

силу свою Бог, здрава сотворити.

Точию речет Бог-Слово си Слово,

абие здравство будет ти готово.

Мы его молим: о, даждь, Христе-Боже,

Лазару. амвон за смутное ложе:

Да велегласно нам благовествует,

кая ти полза егда болезнует?

Ты — живот, Христе, и здравия датель,

жив, здрав да будет наш мечекователь.

Житие наше брань ся именует —

всяк борец меча на брань потребует:

На брань духовну се есть мечь духовный

словесной твари, не железный, словный.

Уста Христовы острый испустиша

мечь древле, сей мечь уста устроиша

Лазаря честна, ему же от Бога

да пребудет помощь на враги премнога.

За мечь победу вечну да имеет,

подвигом его тризна ти довлеет.

Коса о камень может ся тупити,

но мечь каменем может ся острити.

Камень есть Христос, им же изострися

сей мечь духовный, а не притупися.

Остр есть от ума остраго созданный,

сечет без вреда мечь сей преизбранный.

Вреден тмы князю, верныя спасает,

светел як солнце, тем же просвещает.

С духами злобы хотяй ратовати

меча духовна должен есть искати:

Не ищи, борче, се ищет он тебе,

готов он к действу, ты готови себе.

Чти, ач ти токмо победа готова,

венец ти будет от божия слова.

Его же моли, да и мечатворцу

венец зготовит яко тебе, борцу.

Радости полный днесь день совершаем,

когда свята светло прославляем.

Ktorego dał Bog tobie za patrona,

moj dobrodzieju, on tobie obrona[393].

Велий бе в мире, но вящший на небе,

может от Бога вся стяжати тебе.

Wielce obfitym był bogactwe mnogie,

ale obfitszym w prawdę, w cnoty błogie[394].

Даже от Бога хвалы сподобися,

кто, яко Иов, праведен явися;

Nikt się nie równał w dobrości onemu,

za co przyjemny był twórcy swojemu[395].

Ведь адамант бе в терпении мнозе,

язву безропотно претерпе о Бозе.

Przetrwał ubostwo, Bogiem dopuszczone,

у cne potomstwo, oraz wygubione[396].

Всех отщетися вконец обнищаше,

но за вся хвалу Богу возсылаше.

Mówiąc: «Bog mi dał, on że sam y bierze,

Bog sprawiedliwy we wszeliakiej mierze»[397].

Тем же сугубо вся приять от Бога,

во всех животных и богатства многа.

Nadto y w niebie z Chrystusem króluje,

za tobą modły święte ofiaruje[398].

Он ти заступник, ты питомець ему,

даждь убо хвалу аггелу твоему.

Za to, że on cię mile pielęgnuje,

żywot dowczesny k wiecznemu prostuje[399].

Его пособством Бог тя возвыжшает,

царскую милость к тебе приклоняет.

Y bożą łaskę on uprasza tobie,

że za patrona poczytać go sobie[400].

Тем же молбами Иова святаго

желаю тебе здравия благаго,

Szczęścia, fortuny, wszelkiej pomyślności,

życia w długi wiek z bożej łaskawości[401].

Да тя десница его укрепляет,

на всяко дело благо наставляет.

Od niej dóbr wszelkich twojej wielmożności

zprzyjmi się wiernie ze wszej życzliwości[402].

От вся души всех ти благ желаю,

а себе к стопам твоим повергаю.

Zebracej łaski bym w niej był chowany

у za wiernego służkę poczytany[403].

Аз бо вседушно хощу ти служити,

и в числех верных твоих вменен быта.

Doznasz wierności, da Bog y usługi,

tylko, daj Boże, wiek żyć tobie długi![404]

А ныне в знамя верности моея

сладце лобзаю след ноги твоея.

Mając nadzieję о twojej miłości,

о którą modlę ze wszej uprzejmości[405].

Молю и паки к стопам припадаю,

твоей милости всего мя вручаю.

День превеселый ныне совершаем,

Христа рожденна песньми прославляем.

Któremu niebo posyła anioły

z wdzięcznemi hymny na test przewesoły.

Hi num clarunt Deum incarnatum,

turba pastorum in Bethlee natum[406].

Волсви со дари ко Христу прийдоша,

Мирро, кадило, злато принесоша,

Którym na drodze gwiazda wodzem była,

aż do Bethlehem, gdzie Panna powiła.

Pastores autem ut Christu viderunt,

divino cultu max adoranerunt[407].

Бог се во плоти ныне проявися,

им же весь род наш ада свободися.

Y raj niebieski dziś nam otworzony,

przez owoc drzewa niegdyś utracony.

Maria Virgo felix caeli porta,

de stupę David nostro bono orta[408].

Чем же днесь церковь Христа прославляет,

и его Матерь песнями величает,

Z którą y wy mi dajcie Bogu chwałę,

a on was raczy chować zdrowe, całę.

Caelos, tranquillum largietur dona,

ab eo namque ista fluunt bona[409].

Даст вам щасливо многа лета жити

и рай небесный потом наследити.

Его же аз вам усердно желаю

и до стоп ваших в любви припадаю,

моля: изволте раба си щадити,

готова суща выну вам служити.

Бог солнцем небо светло украсивый,

Луну и звезды на нем утвердивый:

и церкве небо не менше вславляет,

егда святыме ону украшает.

Иже чюдеса дивныя творяще,

всех освящают, як лучи святяще.

Днесь празднуемый сицев есть святитель

святый Алексий, бодрый твой хранитель[411].

От Алексие царя славна чадо,

церкве надеждо, молящих отрадо.

Оне бо чюдеса многая творяше,

егда зде паству верных содержаше.

И ныне его пресвятыя мощи

точат молящим дивные помощы.

А понеже он есть хранитель тебе,

имаши помощь во всякой потребе.

Он ти умолит у истинна света

здравие, щастие, мудрость, многа лета,

крепость на враги и венец на главу,

да разшириши руска рода славу.

Того вседушно аз тебе желаю,

а главу мою к стопам приклоняю,

прося милости, да в ней мя храниши

и работати себе повелиши <...>

Ликуй, утехо российския страны!

Радуйся свете, нам от Бога даны,

Состави лики днесь, о Алексие,

твое торжество есть празднество сие.

В нем же песненно славим Алексия,

пастыря блага, отца Руси всея.

Его же имя на тебе речеся,

он во аггела Богом ти дадеся,

да тебе хранит от всяка прилога

благий хранитель от благаго Бога.

Он тебе имать в путех наставляти,

како божию волю совершати.

Блажен Товиа[412] древле в пути бяше,

яко аггела за вожда имяше.

Равне блаженна и тя мощно звати,

яко Бог вожда того даровати,

иже весть како тебе проводити

и от бед в пути жития хранити.

Того вождеством буди воведенный

по мнозех летех в рай он преблаженный,

во рай небесный, но впред лета многа

да дасть десница всеблагаго Бога

В мире ти жити, честь, славу стяжати,

веру множити, царство разширяти!

Вручит ти скипетр, дарует державу,

возложит увясло честное на главу.

Того аз раб ваш верно вам желаю,

сам ся под стопы ваша подстилаю,

хотя светлости вашей работати,

дондеже имать дух плоть оживляти.

Всякий родитель, ему же от Бога

милость явленна с небесна чертога,

да родит сыны в наследие рода,

да его чада имеет порода

во наследие преславному дому

и аще мал есть чин и сан некому.

Да весть известно: его же родил есть,

втораго себе в мире оставил есть.

Яко древеса яже плоды дают,

от корней си ветви испущают,

да аще самым приде состарети,

отрасли родят аки своя дети.

Та в количество онех возрастают

и качеством же родивших являют.

Точне людие с мира уступают

и вместо себе чада оставляют,

себе подобна естеством и нравы,

да не лишатся и по смерти славы.

Аще не родом, но весма с науки

добронравие идет от рук в руки.

Царь то Василий Македонии зная,

добронравия сыну си желая,

Лву, реченному, царя и постави

и учением к добротам настави,

царю достойным. И мудрость велику

стяжа первую перву человеку.

Да по премудром царь премудрый будет,

и слава отцу сыном да прибудет.

Егда же смерти своей близу бяше,

мудрости полный завет написаше;

да той, читая, весть преблаго жити,

Богу и людем угоден пребыти.

В нем же завете аще суть велика,

яже венчанна учат человека;

обаче всяку отцу не возбранно

то подражати, что в нем написанно.

Кождо учися чада наставляти,

образ и слово по себе им дати;

да образ помнят, слово же читают,

добродетели твоя подражают.

То же веждь, рождший, яко твое чадо

весма подобно тебе быти радо;

аще благ еси, чада блага будут,

аще же ты зол, и та зла пребудут,

ибо с тобою выну пребывают,

что ты дееши, тому навыкают.

Плод от древа си поблизу падает —

чадо от отца нравы получает.

Орел подобна себе орла плодит,

а сова сову темиозрачну родит.

Сын кровь твоя есть, аще ты растленны,

како он будет тли не прицепленны?

От тебе кровь есть, тобою и нравы

ему вдашася, равны еста славы.

Не многа чада, рожденнная злыми,

Богу угодна делесы своими.

Более, иже от благих рождени

в злое житие бяху обращени.

За недосмотром родивших оныя

и от чуждых бо вземлют нравы злыя.

Ты убо, рождший и честная мати,

тщитеся чада ваша соблюдати,

дабы ничто зло слышати и зрети,

тако добри и будут ваши дети.

Вы же, о чада, добрыми рожденна,

да будет печаль всем вам положенна.

Еже бы роду не нечесть творити,

но славу многу к славе приложити

житием благим, всеми добротами,

яже творите, а Бог будет с вами.

Иначе лучше людем чад не знати,

нежели злобна тая созерцати.

Ибо со шумом память погибает

того, кто чада неблага питает.

Кто имения злому оставляет —

и сына губитель, и сам погибает.

Григорий рече[414], слышах глаголавша

два юна к себе, и то задаявша.

Первый второму сице глаголаше:

Твой отец чести муж лишенный бяше!

Аз же от честна отца есмь рожденный,

ты не можеши мне быти сравненный.

Вторый оному благ сый отвещаше:

Мой мне едину отец в нечесть бяше.

Ты же весь род твой безчестиши зело,

даже с честными никто ходит смело.

Смотрите убо и отцы, и чада,

да не будете ко славе преграда

един другому, но благо живите,

что взаим славно прилежно творите,

Благороднии чада наставляйте,

от дел безчинных страхом отлучайте,

От детства благим делесем учите

и сами благо пред ними творите;

да не губите тех лукавым делом,—

яже родисте не духом, но телом.

Ничто бо паче детей погубляет,

яко родитель, иже зла творяет.

Аще же сам благ не хощеши быти,

благости чада потщися учити,

да честь, тобою роду погубленна,

чады твоими будет возвращенна,

Да тя не всегда род твой проклинает,

но не от чад твоих ползу знает.

Всячески требе во благости быти,

ему же даде Бог чада родити.

Аще и в худе доме кто родится,

добру учити чада си да тщится.

Может бо чести набыти и славы

своими и чад си благими нравы.

И чадом добрым быти подобает,

да добра слава в роде пребывает.

Аще и мал род, может велик быти,

елма кто тщится добре честно жити.

С мала семене-древеса велика

растут такожде с мала человека

Может велик род и преславен быти,

елма кто тщится на то заслужити.

Книжица сия добру научает,

кождо чтый ону, что чтет да творяет,

ниже да мнит кто сей завет дан быти

точию царю Лву во благо жити:

всем бо полезен на началстве сущым,

под правлением си люди имущым.

Аще неси, царь, обаче держиши

некия люди и тех да правиши

богоугодно, праву быти требе,

аще хощеши вечно жити в небе.

Аще и домом единем живеши,

всякую благость весма да блюдеши.

И кто без дому един обитает,

в благости жити весма подобает.

Ея же види зде суть положени,

да ту храняше вси будем спасени.

Ея же кроме спасется никтоже,

сам вся настави в благость Христе-Боже.

Да зде добрыми делы служим тебе,

по смерти песни вечно поем в небе.

Ты, читателю, блюди сие слово,

к писаным сердце да будет готово.

Та дела дея будеши на небе,

его же верно аз желаю тебе.

О том нам взаим нужда есть молити,

дабы и тебе, и мне в небе быти.

То бо конец есть человеча рода,

отечество наше, небесна порода.

Тамо аз тщуся и ты тамо буди,

вся твоя, Христе, в небо всели люди.

Да тя согласно во век величаем,

с аггелов лики вечно прославляем.

Из тмы чрева в чрево древа

положенна, но крещенна.

В земли чрева аз из древа

положенна, заключенна

Евдокия, есмь Мария

мене роди, себе вреди.

Помне вскоре в смертном дворе

положися, в гроб вселися

жена царска, государска.

Аз Евдокия, дщерь Алексия,

царя преславна, вселенней явна.

Утре процветох, на вечер иссох.

Едва родихся, в землю вселихся.

Богу причтенна, яко крещенна.

Аз бех Евдокия, роди мя Мария.

Увидех свет, увядох, яко цвет.

От царей рожденна, в гроб сей водворенна.

Древний мудрцы царя знаменаху,

во златом венце сердце прописаху.

Зане, что сердце есть телу своему,

тожде действует царь царствию всему.

О царском паки сердце то вестимо,

яко рукою Бога есть держимо.

Рука божия вся в нем исправляет,

аможе хощет милость обращает.

Венец на сердце, победившем страсти

и плоть духовней подчинившем власти.

То бо царское истинное дело,

еже Алексий царь соблюде цело.

Едину еще нужда победити,

плачь да изволит зелный утолити.

В руце Божии печаль не бывает,

но в нем утеха вечно пребывает.

Аще же сердце жену мощно звати,

се царско сердце Бог изволил есть взяти —

Марию светлую сиречь царицу,

где души правых, во свою десницу.

Тако ей венец вечности от Бога,

зде венце царю живи лета многа,

вся побеждая противныя враги,

потом и в небе стяжи себе венец драгий.

Умирает да живит.