Sonetler

121

Pis olmaq yaxşıdır pis adlanmaqdan,

İfşa olunmaqdan dəhşətlidir şer.

O necə sevincdir edilir bəyan,

Ondan könlüm-gözüm tutmayır xəbər.

Qeybət ustaları zövq almaq üçün

Al-qızıl qanıma deyirlər qara.

Günahda deyiləm onlardan üstün,

Niyə pis görünür yaxşım onlara?

Günbəgün çoxalır, artır böhtanlar,

Yığıb toplayırlar eyiblərimi.

Bəlkə də, mən düzəm, əyridir onlar,

Nə məni görürlər, nə hünərimi…

Pislik qəlblərindən çıxan günədək

Hamı gözlərində pis görünəcək.