La skeleta brigado

Kvara ĉapitro

Fremdula legio de la kolonia armeo

N-ro de la militista matrikulo: 144/IG 193…

Bataliono III. kompanio 2.

Kopio

al la verdikto de la milita tribunalo

M A T R I K U L O

Nomo: Henry Fécamp

Naskiĝloko: Bayonne

Naskiĝdato: tago: 7. monato: aprilo. jaro: 1910.

Varbite: la 8-an de majo 193…, en urbo Brest

Soldatarspeco: infanteriano

Kvalifiko: senranga soldato

Privata numero: 63.

Identiga numero: 171-5004

Li havas brunan hararon, rondforman vizaĝon, bluajn okulojn, normalan nazon kaj buŝon, sanajn dentojn, li estas 1,87 matrojn alta, bone nutrita, taŭga por ĉiuspeca militista servo. Lia rimarkebla rekonilo: sur la interna parto de lia dekstra manplato troviĝas misforma cikatro, proksimume dek centimetrojn longa, kiu meze larĝiĝas kaj finiĝas ĉe la dikfingro. La rekruto asertas, ke li estas skulptisto, kaj dum skulptado li hazarde vundis sian manon per la akra ferparto de la martelo. Instruiteco: ses jaroj en gimnazio. Gepatra lingvo: franca. Iomete li parolas angle. Li ankoraŭ ne estis soldato, lia lasta, civila profesio: artskulptisto. Laŭ lia aserto, li ne estis punita, kaj oni ne reserĉigas lin pro krimafero. Li dungiĝis al kvar jara soldatservo.

Subskriboj

Regiment-komandejo

O R A N

Fort St. Therése

M E D I C I N A S T A T A T E S T O

Senranga infanteriano n-ro 63. Bataliono III. Ekzerc-kompanio 2. Fremdula legio.

Hodiaŭ li soldatiĝis al la regimento de Oran, kaj la ekzameno de la medicina komitato, konsistanta el civilaj kaj profesiaj kuracistoj deklaris lin taŭga por soldatservo.

Rimarko: Lia korfunkcio estas iom intensa.

Vakcinita: kontraŭ variolo, tifo kaj §olero.

Oran 4. XII / 193…

Subskriboj:

Kapitano p. m

Rekrutiga kuracisto p. m.

Stabkuracisto p.m.

Bataliono III. Kompanio2. Infanteriano n-ro 63.

Henry Fécamp, 25 jara franca civitano.

K V A L I F I K A F O L I O

Kopio

La… — an / VII. l93… li estas postenigita el la ekzerc-kompanio al la garnizono de Agadir. En la sama jaro la 20-an de IX. li partoprenas la subpremon de la ribelo de Ĝebel Sagro kaj li ricevas la honorlegion pro lia heroa konduto. La 18-an de X. en l93… li grave vunduĝas ĉe Aut Taurirtm, kaj la tagordo mencias lian nomon. Post du semajnoj oni deklaras lin sana, laŭ la indikoj de la hospitala taglibro. Anstataŭ la ses semajna konvaleksa libertempo li petas, ke li revenu al sia kompanio, kaj la 9-an de januaro en 193… li enmarŝis en Cobrien-on, en la garnizonon n-ro l8.

Post du semajna patrolado en la dezerto, la 27-an de januaro oni kvalifikas lin unuaranga soldato (pro lia kuraĝa, persona entrepreno). La 26-an de februaro (li kun sia patrolo heroe kontraŭstaris la beduenan superforton) li ricevis oran medalon. Dek du fojojn li estis punita pro diversaj, malgravaj rompoj de la disciplino laŭ la ekstrakto de la punlisto. Li estas senpuna, laŭ la militista leĝo. Li pasigis 26 monatojn en la legio.

La kopion aŭtentigis:

Subskribo: kapitano A. Foucolt p. m.

P R O T O K O L O P R I K R I M E S P L O R A D O

La legiano n-ro 27, John Carew, angladevena (bataliono III. kompanio 2.), kiu naskiĝis la 7-an de marto 1908, en Hurshom (Anglio), varbita en Toulon, (30 / V. l93…) denuncas la senrangan soldaton n-ro 63 Henri Fécanpo-on, kiu laŭ lia aserto estas tre suspektebla pri la murdo kaj prirabo de kapitano Philipe Villiers kaj lia ŝoforo, senranga soldato Peter Blanchard.

Iu mortigis kapitanon Villiers, kaj lian ŝoforon Blanchard per pluraj revolverpafoj, la 9-an de la kuranta monato, tute proksime al la oazo Ulogi, kiam ili ekveturis per aŭtomobilo el la fortikaĵo. La farinto rabis ankaŭ militistan aktujon. Estis ankoraŭ rabita eĉ leda aktujo de la vojaĝpakaĵo de kapitano Villiers, certe tial, ĉar pro hasteco li ne povis diferencigi la du similajn, ledajn aktujojn, kaj tio kaŭzintus tempoperdon, se li surloke estus esplorinta ties enhavon.

La okazinta krimesplorado precize rekonstruis la efektivigon de la murdo, pri kiu mi faris fotografaĵojn, kiujn mi aldone sendis kun la krimdokumentoj en sigelita aktujo.

Sur la foto n-ro I, malantaŭ sabloduno, signita per litero X, kaŝiĝis la murdito, kaj kiam la aŭtomobilo estis ĉirkaŭ tridek metrojn proksime al ĝi, li donis la mortigajn pafojn el armea revolvero, kies kalibero estas 9,5 milimetroj.

Sur la foto n-ro II, malantaŭ la monteto estas konstatebla la forviŝiĝintaj konturoj de la piedsignoj de la murdisto, kaj la sep kuglingoj, elĵetiĝintaj el la ripetpafa revolvero. Laŭ la spuroj li revenis en la oazon Ulogi post la faro de la krimo. Kelkaj kamelistoj asertas, ke li kurante fuĝis de antaŭ ili, kiuj persekutis lin ĝis la rando de la oazo, poste li malaperis en la tumulto. Tiam jam eksonis la alarmo.

El la sep pafoj de la murdisto kvin trafis celon. La aŭto (foto n-ro VII) renversiĝis kaj ĝia varmoforigilo boriĝis en la sablon.

La ŝoforon trafis du mortopafoj. 1. Eniraperturo sub la dekstra okulo. La kuglo haltis en la vertebro kaj tuŝis la cerbon. 2. La kuglo eniĝanta sub la maldekstra zigomo penetris tra la cerbo, kaj truiginte la veton, ĝi forlasis la kapon. Ankaŭ la tri vundoj de kapitano Villiers kaŭzis tujan morton. 1. En la makzelo troviĝas nekutime larĝa eniraperturo. La kuglo ŝanĝinte ĝian direkton, frakasis la epigloton kaj foriĝis el la korpo, ŝirinte preskaŭ manplaton grandan vundon el la kolaj muskoloj. 2. En la direkto de la maldekstra pulmolobo, inter la ripoj n-ro 6 kaj 7, tuŝinte la perikardion, ĝi foriĝis el la korpo sub la maldekstra skapolo. 3. Meze de la dekstra brovo estas eniraperturo. La kuglo penetris tra la cerbo ĝis la vertebro.

Ekstrakto de la sekca protokolo: kaŭzo de la morto: mortpafo, ĉe ambaŭ homoj estas senduba.

Parola denunco de senranga soldato n-ro 27, John Carew:

La soldato n-ro 63 kaj mi estas bonaj amikoj ekde du jaroj. Ni patrolis en duopo dum la tago de la krimo, kaj fine ni ekripozis iom en la kafejo de Bochur. Ekdorminte mi vekiĝis je tio, ke la soldato n-ro 63 revenas. Li diris tion, ke li iris rendevui. Momenton mi ne pensis pri lia kulpo, tial mi atestis lian alibion dum la unua kriminala esploro. Hodiaŭ matene mi ekvidis, ke li tiras ledan aktujon el sub ŝtono, poste li remetis ĝin. Kiam li forisis, mi prenis la aktujon. Sendube, ke tiu leda aktujo estas identa kun la vojaĝpakaĵo, malaperinta dum la murdo. Laŭ mi estas verŝajne, dum mi dormis la soldato n-ro 63 ŝteliris el la kafejo en la dezerton.

Mi nenion povas diri krom tio. Mi faris mian konfeson propravole, nek la influo de miaj superuloj, nek alia, ekstera cirkonstanco devigis min al tio.

Antaŭ atestantoj mi aŭtentigas la diritajn per mia subskribo.

John Carew p. m.

La kulpo de senranga soldato Henry Fécamp estas senduba, post la unuaj demandoj li faris sian konfeson memvole, nedevigite, neinfluite:

La konfeso de la senranga soldato n-ro 63:

Mi konfesas, ke mi mortigis kapitanon Villiers kaj la ŝoforon de la armea aŭtomobilo. Mi rabis la aktujon, krome la vojaĝpakĵon de la kapitano. La konfeso de la senranga soldato Carew estas vera. Kiam li ekdormis en la kafejo de Bochur, mi ŝteliris el la ejo. Mi kaŝobservis la aŭton ĉe la rando de la dezerto, kaj el embusko mi mortigis la viktimojn per pluraj pafoj. Fuĝinte mi forŝetis la pistolon. Mi ne povas montri la lokon. Mi fosis la vojaĝpakaĵon. Mi faris la krimon pro la instigo de spiono, esperante ricevi okcent mil frankojn. Oni promesis tiom da mono al mi. Mi rifuzas ĉiun informon rilate la kaŝitan aktujon.

Mi legis kaj aŭtentigis ĝin per mia subskribo:

Henry Fécamp, senranga soldato n-ro 63

Arestinte la suspektaton, mi ordonis transport lin en la militistan prokurarejon de Oran, akompanate de forta eskorto. Aldone mi sendas la liston de la konfiskitaj krimobjektoj.

Subskribo de la majoro, gvidanta la krimesploron

Delives p. m.

LA ARESTEJO DE LA

MILITA PROKUROREJO

ORAN

Kopio

T R A N S P R E N O D E A R E S T I T O

La suboficiro (bataliono III, kompanio 2) kaporalo Timeaut kaj du eskortantoj alkondukis Henry Fécamp-on, la senrangan soldaton n-ro 63 (bataliono III, kompanio 2) al la Militista Prokurorejo de Oran, el la fortikaĵo numero 72, oazo Ulogi. Mi difinis por la arestito la karcelon n-ro 108, kaj mi registris lian nomon en la etaton de la prizono.

Mi tuj transdonis al sinjoro akuzisto la krimesploran protokolon (difektitan, sed ne malfermitan, sigelitan per kvar sigeloj, metitan en grizan, oficialan koverton), krome plombitan, brunan aktujon, kun la surskribo „krimobjektoj”, kunportitajn fare de la eskortanto.

Oran, 26. IV. 193…

Subskribo:

intendanto Du Biron

La subskribo estas stampita:

La Arestejo de la Militista Prokurorejo

Oran

DE L A P L E J S U P E R A

M I L I T A T R I B U N A L O

Kopio

D E C I D O

Mi ordonas laŭ la propono numero 127/193… F. L., prezentita fare de la milita akuz-komisaro, ke la senranga soldato n-ro 63, Henry Fécamp, bataliono III, numero 81, kompanio 2, akuzita pri murdo de du homoj, rabo kaj spionado, restu ĝis la proklamo de la fina verdikto de la ĉefproceso en provizora aresto, kiun efektivigis la kapitano de la fortikaĵo n-ro 72 (oazo Ulogi)

Subskribo:

Joseph Vilmont

milita juĝisto p. m.

Mi proklamis la supran decidon

antaŭ la akuzito, kiu konsentis kun tio.

De La Plejsupera Milita Tribunalo

E N L A N O M O

D E L A F R A N C A R E S P U B L I K O

La Plejsupera Milita Tribunalo de Oran, rilate la krimaferon de Henry Fécamp, akuzita pri patrujperfido, spionado, rabmurdo de du homoj, kiu estas 25 jara, needziĝinta senranga soldato n-ro 63, bataliono III, kompanio 2, hodiaŭ, dum la ĉeftraktado decidis, kaj proklamis la sekvan

F I N A N V E R D I K T O N

Estas rifuzita la kasacio, prezentita fare de la milita advokato, kiu estas designita por pledi la akuziton, kaj la milita tribunalo de Oran aprobas la verdikton n-ro 1026/193… pri mortkondamno, proklamita la 17-an / VIII 193…

M O T I V O

La Plejsupera Milita Tribunalo de Oran akceptas la motivon de la verdikto de la milita tribunalo valida, ĉar siaflanke ne trovis senkulpigan cirkonstancon, favore al akuzito, kaj la eksterordinare grandnombraj pligravigaj cirkonstancoj ĉiumaniere motivas la efektivigon de la puno, proklamita en la juĝo.

Referanto: Prezidanto de la ĉeftraktado

majoro Gaston Joubert p. m. marŝalo De La Roziér-Strass p. m.

La tribunalo proklamis la verdikton antaŭ la akuzito, kaj por komenci la indulgan proceduron, ĝi estas prezentita al la prezidanto de la respubliko.

La 27-an / VIII 193… De La Roziér p. m.

ARESTEJO DE LA

PLEJSUPERA

MILITA TRIBUNALO

ADMINISTRA OFICEJO

Oran, 18. VII. l93…

DEPONEJA BILETO

Senranga soldato n-ro 63, Henry Fécamp (bataliono III. kompanio 2) kondamnita al dumviva malliberigo, la hodiaŭan tagon transdonis deponi unu brunan valizon.

Enhavo: du kovriloj, unu razilkompleto, unu akriga rimeno, ses libroj. Unu termobotelo, unu brakhorloĝo, unu poŝlibro.

La Administra Oficejo transprenis la supre menciitan valizon kun la objektoj, registritaj en la inventaro I. N. 193… 27918. II. 193…

En la deponejo transprenis:

adjutanto Bertman Houbegin

suboficiro de financkontrolo

Anstataŭ la skribisto:

subkaporalo P. Gorlieu

A P E R T A O R D O N O

Kaporalo Emil Larnac kaj du senrangaj soldatoj akompanu la kondamniton n-ro 63 katenite (tiel, ke lia pojnoĉeno estu serure fiksita al la ŝtalringo, forĝita ĉirkaŭ lia maldekstra maleolo) al la provizora compagnie discipline bataliono III, kompanio 2, depotanta en la fortikaŭo n-ro 32, en Bahr El Sudan.

Ekveturo: la …-an / IX / 193…

je la 14,20 horo, Oran, ĉefstacidomo

Neniu rajtas vojaĝi en la kupeo, difinita por la eskorto, krom la akompanantoj kaj la malliberulo, preskribita en la aperta ordono!

La pordo de la kupeo devas estis ŝlosita!

Neniu rajtas paroli al la kondamnito, kaj li ne rajtas sidi proksime al la fenestro. La devo de la suboficiro estas malhelpi, ke li ne komunikadu per signoj.

Tuj post la alveno ili anonciĝu ĉe la kapitano de la puntendaro, alkondukinte la malliberulon kaj transdonu la akompanantajn dokumentoj, senditajn kun la ordono.

La ordono estas skribita: la 8-an de IX / 193… je la 9,40 horo

en la milita arestejo de Oran:

majoro Ballonin

komisiito pri la akuzo p. m.

Alveno: la 14-an de IX / 193… je la 23,30 horo

Fort 32. Bahr El Sudan II/1. C. Dis.

La anstataŭanto de la kapitano:

ĉefleŭtenanto Screbin p. m.

Ŝtatsekretario

S E V E R E K O N F I D E N C A

Al la Prezidanto

de la Plejsupera Milita Tribunalo de Oran

Monsieur Le Maréchal!

Konsidere al la eksterordinare gravajn militistajn interesojn, sinjoro Prezidento ŝanĝis la proklamitan mortkondamnon laŭ la propono de sinjoro ministro pri militaj aferoj kaj generalleŭtenanto Gobieaux. La krimfarinto centoble meritis la morton, sed dum li vivas, ni povas esperi, ke la punlaboro rompos lin, kaj per la promeso de pli bona traktado ni provos konfesigi lin. Sinjoro Marŝalo, bonvolu aldoni la kopiojn de ambaŭ leteroj, krome tiun ĉi severe konfidencan instrukcion al la akompanantaj dokumentoj de la prizonultransporto, komandita al Bahr El Sudan.

Mi ordonas al la kapitano de la disciplina kompanio en Bahr El Sudan, ke la malliberulon n-ro 63, kondamnitan al dumviva punlaboro, ĉiumaniere konfesigu tiun homon, uzante ĉiun rimedon, kiun vi bontrovas, rilate la kaŝejon de la malaperinta aktujo en la oazo Ulogi.

Mi ordonas al la kapitano, ke li traktu la krimaferon de la malliberulo n-ro 63 kiel militan sekreton, li gardu la apartenantajn dokumentojn en la ferŝranko de la fortikaĵo, ke nekompetentuloj ne havu eblecon legi ĝin.

Mi lasas al la bontrovo de la kapitano aŭ al lia anstataŭanto ĉian ajn pligvarigon, cedon, korpan punon, per kiuj ili povas konfesigi la malliberulon n-ro 63, senkonsidere, ke en alia okazo la reglamento aŭ la milita kriminala kodekso kiel prijuĝus la aplikitan pocedon, ili rajtas laŭplaĉe agi.

Certatempe ni atendas raporton de la Disciplina Kompanio pri la plenumo kaj efektivigo de la supre menciitaj.

Kontraŭspiona divizio

de la Ministrejo pri militaj aferoj

Generalo H. Bourden p. m.

Vicŝtatsekretario

*

…La akto finiĝis per tio. Tute ekskludante la eblecon de eraro de kontrolitaj, esploritaj kaj aŭtentikigitaj indikoj.

Ĉu eblas, ke tiuj aktoj tamen eraris pri io?

Ne multe.

Nur pri la esenco.

Sed ankaŭ en fasko de aktoj povas esti eraro, se jam ankaŭ la Sinjoro volas tiel, ke la papero ne ŝanĝu ĝian koloron pro la enhavo de la surskribita teksto…