ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ...

Патриарх Никон.Труды

Научное исследование,

общая редакция В.В. Шмидта

ВОЗРАЖЕНИЕ, или РАЗОРЕНИЕ СМИРЕНАГО НИКОНА,

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы [1]

Обвинения в новых обычаях и разных винах Патриарха Никона, составленныя в 30 вопросах боярина Семена Лукьяновича Стрешнева и ответах на оные Газскаго митрополита Паисия Лигарида. — Отписка — Предисловие — Ответ

Вопрос, глава 1. [2] Естли безгрешно изнова преосвящатися, един архиерей когда пременяется от единыя епархии на другую? Понеже Патриарх Никон егда на Патриаршество поставился, преосвящался опять, сиречь хиротонисался явно пред всеми. — Ответ [3]

Разорение 1-му вопросу и ответу [4]

Вопрос, глава 2. Никон не поизволил, чтоб исповедалися и причащалися которыя были люди виноваты и указано их казнить по градским каноном и судом. Добро ли чинил Никон или худо, поучи мене без лицемерия. — Ответ

На вторый вопрос и ответ возражение

Вопрос, глава 3. Подобает ли, егда облачается архиерей или иерей во святой церкви и во олтари чешется и на зеркало смотрится в церкви суще во святом облачении? Понеже и Никон тое извычанье был чинит прежде Литоргии, как облачится во святыя ризы. — Ответ

Возражение 3-му вопросу и ответ

Вопрос, глава 4. Никон посвящает священники и диаконы: добро ли чинит и есть ли хиротонисание его благоприятно, ей или ни? — Ответ

Возражение 4 вопросу и ответу

Вопрос, глава 5. Никон не учинил отречения своего письмом за рукою, толко из уст рек, что не хощет впредь быти Патриархом. Полно ли на том или надобно, чтоб на письме дано было отречение, чтоб было совершенно на письме дано отречение? — Ответ

Возражение 5-му вопросу и ответу

Вопрос, глава 6. Естли архиереи, которыя обретаются в послушании патриаршеском, имеют грех что не возбранили ему, Никону, злаго совету, или конечнее и совершенной суд обвиненныи, что не возбранили, в том учиненном деле не грешныя? — Ответ

Возражение на 6 вопрос и ответ

Вопрос, глава 7. Доброли б было, чтоб собор был в том деле патриаршеском, чтоб не прилучилося какова соблажнения или помешки в царстве? — Ответ

Возражение 7-му вопросу и ответу

Вопрос, глава 8. Может ли благовернейший Государь Царь наш Алексей Михайлович собрать тот собор или надобно, чтоб по повелению патриаршескому? — Ответ

Возражение на 8-й вопрос и ответ

Вопрос, глава 9. Никон сказал, что повелел Богом венчанный Государь Царь, что был здесь на Москве, то он в ни во что почел, и называл собор тот сонмищем жидовским. — Ответ

Возражение 9-му вопросу и ответу

Вопрос, глава 10. Мощно ли составом главу судити и своего началника? — Ответ

Возражение на 10 вопрос и ответ

Вопрос, глава 11. Никон никогда не изволил называть архиереов братиею своею, но почитал их велми нижайших, для того, что от него были освященыя. — Ответ

Возражение 11 вопроса и ответа

Вопрос, глава 12. Нарекся Никон Великим Государем, для того что его так назвал всещастливейший наш Государь хотящи его паче звычаю почитати. Согрешил ли Никон, что так высочайшее титло на себя принял, согрешил ли, или нет? Скажи нам и протолкуй. — Ответ

Возражение 12 вопроса и ответа

Вопрос, глава 13. Никон строит ныне по се время один монастырь и назвал его новым Иерусалимом. Доведет ли ся, чтоб так Святаго Града имя было перенесено и иному дано и опозорено? — Ответ

Возражение 13 вопроса и ответа

Вопрос, глава 14. Не говорит ли святый Герман, Патриарх Цареградский, яко просвиромисание образует Вифлиом и святый престол образует богоприемный Гроб Господень? — Ответ

Разорение 14 вопроса и ответа

Вопрос, глава 15. Никон разорил епископию Коломенскую для своего монастыря, выговаривая себе, что было ближнее епископство от Москвы, и то не пригоже бысть блиско патриаршескова боку епископии. — Ответ

Разорение 15 вопроса и ответа

Вопрос, глава 16. Доведется ли архиереом строити обозы и грады, понеже Никон полюбил жить на местех пустых и безжителных, и чтоб наполнил тое место и наемцы и боярскими подданными. — Ответ

Разорение 16 вопроса и ответа

Вопрос, глава 17. Никон говорит, что не обретается вне от своего престола и епархии, толко съехал для некоторых притчей достойных, которые он будет явно говорить, егда будет призван от истиннаго судии и праведнаго. — Ответ

Разорение 17 вопроса и ответа

Вопрос, глава 18. Один пастырь, или болярин, который убегает, чтоб уберечь живота своего, потому чтоб инако учинил, был бы в опасении, уподобает ли ся и его погрешит или ни? — Ответ

Возражение, или разорение 18 вопросу и ответу

Вопрос, глава 19. Никон никого не оставил на своем месте, кто б на его месте чинствовал; каким же обычаем митрополит Крутицкой чинствует безопасно на месте патриаршеском? — Ответ

Разорение 19 вопроса и ответа

Вопрос, глава 20. Имеет ли Государь наш грех, что оставил овдовевшую Церковь Божию? — Ответ

Разорение 20-го вопроса и ответа

Вопрос, глава 21. И естли архиереи и боляре, которые не бьют челом и не приводят к тому Царя, чтоб учинил в том деле совершенной указ и исправление, имеют грех, потому что не дают совету чтоб было лутче. — Ответ

Разорение 21-му вопросу и ответу

Вопрос, глава 22. Никон проклинает и выклинает ныне, важно ли его проклинание и достойно ли нам боятися клятвы его или нет, как он нас проклинает? — Ответ

Разорение 22-му вопросу и ответу

Вопрос, глава 23. Подобает ли архиерею бить и ударить и в сылку ссылать, то все чинил Никон и не могся насытить мирскими людьми и духовных чинов всегда. — Ответ

Разорение 23-му вопросу и ответу

Вопрос, глава 24. Тишайший Государь наш и всещасливейшой Царь вручил Никону, чтоб досматривал всяких судеб церковных; и се есть что подарил его всеми привилеи, которыя, велми почитаючи Констянтин Великий Папу Римскаго Селивестра, вручил ему, Папе, також и Никону на письме подал многие привилеи Государь Царь. – Ответ

Разорение 24-му вопросу и ответу

Вопрос, глава 25. Мощно ли Государю отобрать те привилеи одному кому дал бы? — Ответ

Разорение 25-го вопроса и ответа

Вопрос, глава 26. Никон бранил и бранит ныне, что учинил Государь Монастырской приказ и посадил на том судити мирских людей, и что наставляет по монастырем архимандриты и игумены, котораго он похочет. — Ответ

Разорение 26-го вопроса и ответа

Вопрос, глава 27. Один который называет мучителем велможнейшаго Царя нашего и смеет нарицати его несправедливаго обидетеля и хищника, что тому подобает по святым правилом? — Ответ

27-го — разорение

Вопрос, глава 28. Никон очищается, что не позвал его собор, чтоб сказал для чево покинул свой престол и то, что учинил неразсудимо. — Ответ

Вопрос, глава 29. Что есть менши: присяга или проклятие? Доведет ли ся нам присягать, а присягу должни есмы сохранять на всякое время или нет? Понеже Никон винит архиереов своих, что не воздержали присяги своей, учиненной пред ним, но отверглися от него и отлучилися от его послушания. — Ответ

Вопрос, глава 30. Проклял Никон болярина Семена Лукьяновича, потому что бутто собака его благословит, и бутто он принимал на себя особу благословляющаго человека. Есть ли достойно проклять ради того? — Ответ — Конец

Обвинения в новых обычаях и разных винах Патриарха Никона, составленныя в 30 вопросах боярина Семена Лукьяновича Стрешнева и ответах на оные Газскаго митрополита Паисия Лигарида [5]

15 августа 1662 г.

Отписка к болярину Симеону Лукьяновичю Стрешневу митрополита Паисия Газскаго и на тридесят вопросов ответы нововых обычаев Никоновых бывшаго Патриарха Московскаго; в 171-м году.

Отписка

Светлейшему меж боляры и добродетельствующему и пристнейшему господину, господину Симеону Лукьяновичю Стрешневу, многолетное здоровье приветствуем. Се потружден по сим статьи вопросные ответ до пречестнейшей твоей светлости; Свидетеля имею всему зрителя истиннаго Бога, что я не хотел ни осуждения завидных людей того дела починать ведаючи, ни явную недружбу и неприятство иметь буду с Патриархом. Но понеже выучен от Иеросалимскаго началоучителя Христа того проповедати истину, так на стречах, как и в церковных местах на амвонех, постановил есмь дать сей мой ответ короткой, потому что как были короткия роспросныя статьи. Мне велми жаль того, что вашего языка не знаю, чтоб переводил тех речей, как я желаю, понеже переводчики з большой части того, чево не разумеют, отпускают или толкуют противу любви и воли своей, покрываючи прямую свою глупость. Бью челом тогда, чтоб твоя милость учинил радение прилежно, чтоб перевесть на руский язык или на латинский, чтоб я увидел сам ваших переводчиков толкование как е совершают; понеже непобедимое ваше и великое царство потребует таких мужей переводчиков, которыя и иных языков разум имели истинно и прямо и не пременне толковали совестне, и чтоб разсуждение чинили об тех делех, которыя пишутся верою и правдою. И то пускай будет полно теперече. А Господь Бог дал бы вашей честности многолетное здоровье и многолетствие и получил бы спасителное и благое прощение. Здравствуй с пречестнейших мужей высокорожденный господине.

Писано на Москве 15-го числа августа лета от рождения Христова 1662-го. Вашей преславной честности о всем богомолец ваш Ликаридиус.

Статьи распросные, которые даны суть митрополиту Паисию Газскому, чтоб противо их совершенный ответ и отказ дал Великому Государю Царю и Великому Князю Алексию Михайловичю, всея великия и малыя и белыя России самодержцу, чрез болярина его Симеона Лукьяновича Стрешнева.

Предисловие

Рече Господь наш Иисус Христос: Аз есмь путь и истана [6] . Убо последующе Христа, отвещаю вам, яко проповедник истины на некоторые наши статьи и вопросы, которые омрачают очи мыслей наших, и будем имети мзду от мздовоздаятеля Бога и похвалу от христолюбивых людей, понеже возвращая душу от прелести, Спаситель именуется.

Ответ

Аще истина речется прение, наипаче кто утверждает истину, наживет на себя многия враги, яко предтеча Иоанн [7] , аще обличил пребеззаконнаго Ирода для того, что он держал жену брата своего, еще суща живущаго, яко некия глаголют, еще и чад имел от Иродияды отроковицу и до конца погубил живот свой и тако и глава отсечеся. И на се все проповедник ангельский, и наипаче аще б и архиерей есть, должен бывает и тягость имети в душу свою, аще не будет являти истину и проповедать и глаголать пред царем не стыдяся. Свидетельствует сам пророк и царь он, что пел иногда: избави мя от клеветы человеческия и сохраню заповеди Твоя. Воистину ненависть, зависть и убийство родятся от правды; но ради истины и умер бы кто християнское дело есть и пресвято. Имеем перводиякона Стефана, еже есть рек: упрямые и непреклонные и необрезанные сердцем и ушесы [8] , вы всегда супротив Святаго Духа супротивно говорите вы и отцы ваша. Тотчас укаменован есть, потому что не многие хотят слушать правды. Пилат когда услышал Христа глаголющаго, Который есть истинная правда: ради Того и я пришел на сей свет, чтоб свидетелствовал о правде; всяк, который есть правды слушает, слуг моих спросит [9] , что есть правда, и того б я вышел вонь и не дожидался ответу, что то есть правда. Не на ино как самаритянка, которая как услышала: пять мужей ты еси имела и ныне котораго имеешь несть твой муж, что истинну правду сказал, и тотчас переменила слова свои и ответу не учинила на помянутые слова, толко здумала где б поклонения чинить. Всяк лице свое отвращает, как ему правду говорят, а как то лестиш, всяк любит. Я хощу правду говорить и умру для правды Божии.

ВОПРОС, ГЛАВА 1

Естли безгрешно изнова преосвящатися, един архиерей когда пременяется от единыя епархии на другую? Понеже Патриарх Никон егда на Патриаршество поставился, преосвящался опять, сиречь хиротонисался явно пред всеми.

Ответ

Три тайны есть, которые дают знамение, которые николи не грешится и не износится: крещение и миропомазание и священство. Ради чего поется, что знамение не изыдет из человека, что когда один есть во священстве, естли умер а опосля воскрес опять не освящал бы ся болше; потому что имеет знамение на души своей. Но всегда и тот, который не впрямь освящен или не впрямь окрещен, того опять посвящают и крестят потому, что как тот не принял священства, как и тот крещения. Чтый правила святых апостол где сыщеш, яко аще епископ или священник когда б крестил опять извержется, потому что падет в ересь новокрещенцов и преступают святое исповедание веры, в котором говорим и исповедаем едино крещение во оставление грехов, едино а не двое крещение свидетелствуем и проповедаем. Убо и архиерей который освящается дважды, свержется, понеже едино есть архиерейское священие и един Пресвятый Дух, который помазал внутреннюю якоже и апостолов в день пянтикостия хиротонисал и посвятил пастыри и учителие. Убо едино от двоих: аще ли архиерейство не имел преже того Никон, прежде Патриаршества, а будет ли имел священство архиерейское, а приимал опять, есть тым сам извержен; для того что дважды принимал священство архиерейское против заповеди церковной и отеческаго предания и извычая всей Вселенской Соборной Церкви.

РАЗОРЕНИЕ 1-му ВОПРОСУ И ОТВЕТУ

В предисловии вашем написано: рече Господь наш Иисус Христос: Аз есмь путь и живот и истина, и прочая.

Ответ

Да почто начасте от истины все написасте неистинно, якоже впреди покажется; но познаете, яко вы отца вашего диавола есте, и похоти отца вашего хощете творити. Он (л. 2 об.) [10] человекоубийца бе искони и во истине не стоит, яко несть истины в нем, егда глаголет лжу, от своих глаголет, яко лож есть и отец лжи. Рцы ми, Симеоне, которыя книги тебе повелевают на мя о безвестных свидетелствовати.

Господу [11] глаголющу: не судите, да не судими будете, ким же бо судом судите, осудитеся.

Не [12] судите, и не осудитеся, не осуждайте, и не осуждени будете.

Тем [13] же не прежде времени судите, дондеже приидет Господь, иже просветит тайная тмы и явит советы сердечныя, и тогда похвала будет коемуждо от Бога.

Подобало тебе, Симеоне, первие себе (л. 3) [14] исправити якове любо согрешении. Господу глаголющу: что же видиши сучец во очеси брата твоего, бервна же во очеси твоем не чюеши. Или како речеши брату своему: остави, да изму сучец из ока твоего, и се бервно во оце твоем. Лицемере, изми первие бервно из очесе твоего и тогда прозриши изъяти сучец из очесе брата твоего.

Тем [15] же безответен еси, о человече, всяк судяй. Вем же, яко суд Божий воистину на творящая таковая. Помышляеши ли се, о человече, судяй таковая, яко ты убежиши ли суда Божия? Ныне о сем умолчим.

Ты убо, о Паисею, глаголеши, пиша болярину (л. 3 об.) [16] Симеону Стрешневу, яко выучени есмь от Иерусалимскаго началоучителя Христа моего проповедати истину, как на настречах [17] , как в церковных местех на амвонех поставил есмь дать сей мой ответ. И проч.

Повелено ти есть в своей области и епархии учити и проповедати, а не идеже приидешь, без воли святейших вселенских патриарх.

Господу [18] глаголющу: Аз от Бога изыдох и приидох, не бо от себе приидох, но Он мя посла.

Ови [19] убо разсеяни бывше от скорби, бывшая при Стефане, приидоша до Финикия и Кипра и Антиохия, никому же глаголюще слово, разве единем июдеом.

(л. 4) [20] Павел [21] , раб Иисус Христов, зван апостол, отлучен во благовествование Христово.

Како [22] же услышат без проповедающаго, како же проповедят, аще не послани будут.

Павел [23] апостол Иисус Христов по повелению Бога и Спаса нашего.

Тебе же кто повеле семо приити, учити и законы новы творити.

В Халкидоне Вселенскаго собора правило 5.

Преходящии [24] из града во град, иже от них правилом повинни суть.

Толкование.

Речено есть в третиемнадесяте правиле, иже во Антиохии собора, яко не дерзнути епископу преити от своея области во иную и поставити презвитера или диакона без воли сущаго во области (л. 4 об.) [25] той епископа или ино что епископское творити правление: аще бо и сотворит что таково, праздно и нетвердо да пребудет, и той месть да приимет своего безчиния и извержен да будет от своего сана Святою Троицею. Тако бо и зде написаное правило повелевает.

Поместнаго собора во Антиохии Сирстей. Правило 13.

Аще [26] никим же позван, ни умолен быв епископ, во иную область отшед, и поставит презвитера или диакона или правление некоторое церковное творит, таковая нетверда и разрушена да пребудут, а он да извержется.

Толкование.

Многа правила обрящеши о сем (л. 5) [27] возбраняюща, еже не преходити епископу от своея области во иную и поставляти в ней презвитеры и диаконы или иное что епископское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед поставит презвитера или диакона или строение церковных вещей некое правление сотворит, нетвердым и разрушеным быти от него сотвореным и самаго изврещи правила повелевают.

Поместнаго собора Сардикейскаго правило 3.

Никоторый [28] же епископ не позван во град да не приидет, и епископ с епископом, аще (л. 5 об.) [29] имать прю, чюжаго епископа да не призовет, аще ли же ни, да судит Римский, ту будут чюждии.

Толкование.

В различных правилех речено есть, еже никому же дерзнути от своего предела во иную область преходити, аще не будет позван от области тоя митрополита и от сущих с ним епископ, тожде убо и сей святый собор повелевает. Но аще который епископ с другим епископом о некоей вещи разпрю имать, и с ним да судится пред собором тоя области, в ней же есть. И не подобает от иныя области разума ради неких епископ призывати, но от единех тоя области епископ судитися. И аще не угоден ему будет суд и мнит, яко не по праву осужен быв, судивый (л. 6) [30] его митрополит и епископи да возвестят Римскому Папе писанием вину и суд, како осудиша и. И аще не восхощет того суда, и той или сам разсмотрив суд, аще право осужден бысть, возвестит им писанием, аще ли ни, тамо близ их сущия области епископом повелит, да сотворше собор, судят ему паки второе.

Правило 12.

Позван епископ от епископа позвавшему же его не вежде сущу, да не глаголет почасту в людех, порок бо есть невеждному и обругание епископии его и обое не без порока.

Правило 13.

Без нужди тяжки бедно есть епископу свою церковь надолзе [31] оставляти.

Толкование обема правилома.

(л. 6 об.) [32] Аще который епископ в другий град преидет, позван бысть епископом страны тоя, и аще будет позвавый его епископ невежда, не ведый добре божественых писании и учителству неискусен, позвавый епископ да не учит люди прилежно и да не глаголет в народе много божественных писаний. Таковое бо дело мятеж составляет и преобидение творит позвавшему его епископу, мнит же ся указанием таковаго учения, чюжду себе обручая церковь и люди к себе привлачая и тщася преданую ему церковь оставити и в ту преити. Сего ради убо повеле сей святый собор, да позваный епископ вящше трий недель от своея церкви да не останет, (л. 7) [33] но к порученым ему людем да возвратится, аще не некая нужда тяжка и вещь неудобна сотворит его вящше того пребыти от своея церкви.

Правило 18.

О [34] епископстем закоснении и о презвитерстем и диаконстем, изложеныя заповеди да имеют силу.

Толкование.

Да ни который же епископ своего стада не оставляет и во инем граде вящше триех недель не пребывает, се убо и презвитером и диаконом, да и тии боле триех недель не оставляют своих церквей.

Правило 21.

Иже [35] добре и богоприятне изведеная буестию поколебати покушается, (л. 7 об.) [36] несть епсикоп, виден же быв епископ грядый в стан, пакости да не приимет, аще позван будет прежде реченных ради грядый, аще же инако.

Толкование.

Иже не хранит добре и богоугодне исправленых заповедей, но буестию и гордостию ино нечто паче заповеданных творити дерзнет, и чести и сана епископскаго да извержется, понеже уже исправлено есть, инако не ходити епископу в стан царев аще не царскими грамотами позван будет. Аще убо мимо грядый епсикоп хотя ити в стан царев и обитает у другаго епископа, подобает убо епископу, у него же обитает, (л. 8) [37] вопросити вины шествия его, чесо ради грядет. И аще обрящет его по тому образу, якоже прежде рекохом или обидимых ради сирот же и вдовиц, да помолится о них, или иных ради таковых полезных вещей в стан царев грядет, да не спакостит ему никако же, но с честию отпустит его и да пишет о нем к сущим во области братии своей епископом всем приимати того незазорно, яко шествующа по правилом же и без соблазна. Аще же инако обрящет того в стан царев грядуща или показатися цареви хотящу или о неких непотребных вещех молитися, яже неподобна суть архиереом, не приобщатися к нему, ни грамот подписывати, (л. 8 об.) [38] ни промышления, ни единаго же отнюдь сподобити того.

Карфагенскаго собора правило 23.

Епископ [39] да не идет на он пол моря, аще от старейшины страны своея отпустную грамоту не возмет о прехождении.

Толкование.

Ни епископу, ни причетнику далече отходити от своея церкве несть достойно без повеления и без отпустныя грамоты митрополита своего, якоже Средческий и Лаодикийский собор повелевает.

Правило того же собора 106.

Некия [40] ради нужды хотя к церкви отъити да яве сия сотворит к Архидонскому епископу и Римскому и отпустное послание да возмет, аще ли ни, без общения есть.

Толкование.

(л. 9) [41] Епископ или причетник, аще восхощет поити к церкви, да скажет первие вину к Архидонскому епископу, ея же ради идет и возмет от него грамоту отпустную, и в Рим пришед покажет ю епископу Римскому и да явит ему вину, ея же ради идет к церкви, и той да разсудит. И аще будет подобна вина да возмет и от того грамоту, ею же от царя приимет помощь. Аще же кто от епископ или от причетник инако к церкви отъидет, да будет без общения, сиречь да отлучится. И о сем ищи правило 11 Антиохийскаго собора и 9 правило в средце собора.

Шестаго Вселенскаго собора правило 20.

Епископ [42] во инем граде в народе (л. 9 об.) [43] не учит, аще же обрящется да престанет от епископства и презвитерская действует.

Толкование.

Епископ во инем граде в народе уча, понеже гордости и буести ради, преобидит ту сущаго епископа, яко тщася посрамити и уничижити и чюждий престол себе обручити, по достоянию да престанет таковый от епископства, иже бо чюждих желает, своих лишен будет и на презвитерское место свети того и презвитерская да действует. И назнаменай се когда епископ на презвитерское место сводится, ибо 29 правило Халкидонскаго собора святотатство отнюдь нарицает, еже епископа на презвитерский свести степень, и имей (л. 10) [44] сие правило преболше вселенскаго онаго правила.

От свитка новых заповедей правило 3.

Никому [45] же от епископ боле единаго лета от своея церкви пребыти подобает, обаче аще и то будет по цареву повелению, да не творят же извета, глаголюще, яко «церкви моя во многих обидах есть», но таковая причетники или икономы или посолники подобает исправляти. Сим же без ставилных грамот не ходити, ни пришедшим же в Царьград явитися цареви, но прежде приити ко преосвященному патриарху или коейждо области посолником, от нея же и тии суть, и тем сказати вины, ея же ради прииде, и тако потом с ними входити (л. 10 об.) [46] к церкви. Подобает же епископом вестники великия церкве или посолники патриарховыми возвещеном бывати цареви, яко да аще или праведнаго что просив у царя получити или неправедна что не получи вскоре возвратися.

И что к сим отвещаеши, глаголи.

Како ли смел еси в чюждей епархии учити и законополагати о несведомых, еже несть ти прощено от Евангелия и святых апостол и святых отец, во Евангелии же пишется.

Евангелие.

Отвещав [47] убо им Иисус и рече: Мое учение несть Мое, но пославшаго Мя. Аще кто похощет волю его творити, разумеет о учении его, кое [48] от Бога есть, или аз о себе глаголю, глаголяй о себе, (л. 11) [49] славы своея ищет, а ищай славы пославшаго его, сей истинен есть и несть неправды в нем.

Несмы [50] якоже нецыи корчемству слово Божие не от чистоты, яко от Бога пред Богом о Христе глаголем, утешение бо наше не от прелести, ни от нечистоты, ниже лестию, но якоже искусихомся от Бога верни быти, прияти благовествование. Сице глаголем не яко человеком угождающе, но Богу искушающему серадца нага, не бо в слове ласкания когда быхом, якоже весте, ниже виною лихоимания, Бог свидетель, ни ищуще от человек славу, ни от вас, ниже от инех могуще в тяготе быти яко Христови апостоли.

Видиши ли, яко не подобает инако (л. 11 об.) [51] учити или законополагати. Сего [52] ради и Господь учит, глаголя: Аминь, аминь, глаголю вам, не входяй дверми во двор овчий, но прелазя инуде тать есть и разбойник, а входяй дверми пастырь есть овцам. И по мале: Аз есмь пастырь добрый, вси елицы приидоша, татие суть и разбойницы, но не послушаша их овцы.

Но [53] аще мы вам или ангел с небесе благовестит, паче еже приясте проклят да будет.

Аще [54] кто инако учит и не приходит к здравым словесем Господа нашего Иисуса Христа, иже по благочестию и учению разгордевся ничто же сведый. И прочая.

И паки. Шедше, рече Господь, научите вся языки, крестяще их во имя (л. 12) [55] Отца и Сына и Святаго Духа и учаще их блюсти вся елика заповедах вам. И паки рече: Шедше [56] в мир весь проповедите Евангелие всей твари, иже веру имет и крестится, спасен будет, а иже не имет веры, осужден будет. Како вы можете веровати славу от человек приемлюще славу же, яже от единаго Бога не ищуще.

Ты убо, о Паисее, емлеши ли сим веру и аще возглаголеши, яко имаши веру писанию твоему на тя свидетелствующу странному и несведомому нами, яко от овец Христовых, но волк являешися вместо пастыря, смущая и разгоняя стадо Христово не преданое тебе, аще ли не доволно ти есть?

(л. 12 об.) [57] К сим еще присовокупим.

Всех [58] святых апостол купно два правила. Правило 1.

Койждо в даном ему чину да пребывает и не преступайте заповедей, не суть бо наша, но Божия. Якоже рече Господь: Слушаяй вас, Мене слушает, и слушаяй Мене, слушает пославшаго Мя, и вас отметаяйся, Мене отметается, и Мене отметаяй, отмещет пославшаго Мя.

К сим же святаго 7-го Вселенскаго собора правило 1 запрещает ниже приложити что любо или отъяти, якоже и самая истина зде явит.

Правило [59] первое.

Святая правила облобызающе приемлем и держим святых апостол и шестих Вселенских (л. 13) [60] собор, к сим же и поместных, и еще же и святых отец наших, яко единаго Святаго Духа вдухновена. Их же прокляша проклинаем, их же извергоша, изметаем и их же отлучиша, отлучаем, им же запретиша, запрещаем.

Ин перевод.

Иже [61] священнический [62] получивше сан ведения же и правления канонных повелений, си есть воображения, яже приемлюще радостно с богодухновенным Давыдом поем Владыце и Богу глаголюще: на пути свидении Твоих насладихся, яко в богатстве мнозе, заповедал еси правду свидения Твоя, Владыко, вразуми мя и жив буду. И во веки пророческий глас заповедует хранити заповеди Божия и жити в них (л. 13 об.) [63] яко непоколеблемы и недвижимы пребывают, якоже боговидец Моисей рече, в них же несть приложити и от них несть отъяти.

И [64] божественный Петр в них хваляся вопиет, в ня же желают ангели приникнути. И [65] Павел, аще и ангел благовестит вам паче преданаго, проклят да будет. Сим сице сущим и свидетелствующим нам радующимся о них, якоже кто обрящет корысть многу, сладкобожественыя каноны утвержаем и цело пребывание их неподвижимо утвержаем, заповеданных от святых духовных труб, прехвалных апостол и шести святых всея Вселенныя собор и поместных (л. 14) [66] собравшихся, преданием тако в них повелений святых отец наших.

От единаго бо еси Святаго Духа озарени бывше, повелеша яже на ползу и их же проклятию предаша и мы проклинаем, их же извержению и мы извергаем, и их же запрещению и мы запрещаем, и их же отлучению и мы отлучаем. Не сребролюбен имуще нрав, но доволни сущими, иже возшедый на третие небо и слышав неизглаголанныя глаголы, Павел божественый апостол яве вопиет.

Того же святаго седмаго Вселенскаго собора.

Неправе святых учителей Божия Церкве божественыя гласы восприемлющим и яве и явствено в них благодатию Святаго Духа реченная, инако толковати же (л. 14 об.) [67] и превращати покушающимся да будут прокляти.

Такожде и святый Кирилл Александрейский глаголет: аще кто от исправления и утверженых богоносными отцы подвигнет что к тому, таковаго несть како нарещи строением, но преступление и попрание повелений и к Богу нечестие.

Того же.

Отметающим гласы святых отец возгласившия ся о составлении правых догмат Божия Церкви Афанасия и Кирилла, Амвросия, Амфилохия богоглаголиваго, Леонта святейшаго архиепископа стараго Рима и прочих, еще же и Вселенских соборов деяния, четвертаго, глаголю, и шестаго не лобызающим да будет проклят.

(л. 15) [68] В Неделю первую поста.

Мы убо древнему законоположению церковному последуем, мы заповедания святых отец соблюдаем, мы прилагающих что или отъемлющих от церкве проклинаем, мы вводимое новозаконение христианохулник еретик проклинаем, мы не мудрствующих тако проклятию и анафеме предаем.

Сия суть и такова святых отец наших и учитель, яже о православной вере подвизания сих труды и болезни прият человеколюбец Господь паче всякаго плодоприношения. Блажени убо и треблажени суть вси, елицы несумненым сердцем сохраняют, яже онеми укреплена и предана быша Божественая и предания и учения. Блажени (л. 15 об.) [69] убо суть, иже онеми осужденая и уничиженая омержающе и отвращающеся хулных преданий и разумения.

Глаголеши в своем ответе в предисловии.

Ответ Паисеев. Аще истина речется прение, а наипаче к тому утверждает истину, наживет на себя враги, яко Предтеча Иоанн, еже обличил беззаконнаго Ирода для того, что он держал жену брата своего еще сущу живущу, яко некия глаголют, еще и чад имел от Иродиады отроковицы и до конца погубил живот свой, тако и глава отсечеся. И на се все проповедник евангелский, а наипаче аще бы архиерей есть, должен бывает и тягость имети в душу (л. 16) [70] свою, аще не будет являти и проповедати и глаголати пред царем не стыдяся.

Возражение противо ответа Паисеина.

Ты глаголеши, Паисею, аще истина речется, прение наипаче к тому утверждает, наживет на себя враги. И впреди о твоем презорстве показано не баснями, якоже ты глаголеши, но истинным свидетелством, и ныне глаголю ти. Аще бы и вина моя была кая в погрешеных от мене, но не тебе единому суд или ответ творити, ниже ты видел или слышал, что любо от мене. Писанию убо глаголющу, яко не подобает осуждати кого прежде даже не увесть и слышит опасно, яже о нем, аще и мнози (л. 16 об.) [71] суть оглаголующии.

Евангелие.

Глагола [72] Никодим пришедый к Нему нощию един сый от них: Еда закон наш судит человеку, аще не слышит прежде от него и разумеет, что творит.

Якоже [73] много дни сотворшу ему тамо, Фист цареви сказа яже о Павле, глаголя: Муж некий есть, оставлен от Филикса узник, о нем же, бывшу ми в Иерусалиме, явиша архиерее и страцы июдейстии, просяша нань пря. К ним же отвещах, яко несть обычай римляном да яти коего человека прежде даже оклеветаный пред лицем видит клеветники, место же приимет ответа о согрешении.

Ты же ни о клевете уведев, ниже (л. 17) [74] о клеветнике, но единому непреподобну мужу паче прокляту, аще и сигклитик клевету прием, чрез вся святыя Божия заповеди и святых апостол и святых отец каноны на соблазн людем простым ростолковал, а не от повеленных заповедей и канонов.

Правило святых апостол 75.

В [75] послушество на епископа еретик не приятен, но ни верный [76] един токмо, во устех бо рече двою или триех послух станет всяк глагол.

Толкование.

Не токмо на оклеветание еретик несть приятен, но ни на послушество, аще един послушествует, аще и верен есть, несть приятен. И к Тимофеови великий Павел писа, тако рече: На презвитера (л. 17 об.) [77] послушества не приемли, аще не пред двема или треми послухи. Мню же, ни на оклеветание, им же отпадение наводится своего сана епископу или презвитеру, не доволна на два послуха, аще и верна еста и непорочна.

Четвертаго Вселенскаго собора правило 21.

Не [78] искушен причетник или мирский человек, глаголя на епископа, не приятен.

Толкование.

Аще кто клевещет на епископа или на причетника, рекше на презвитера и диакона, подобает прежде истязати житие их, а не без испытания приимати их на оклеветание епископа. Аще причетницы суть оклеветающии или мирстии человецы да некогда будут отвержени от церкве или причащения лишени, или о гресех (л. 18) [79] неких оклеветаеми сами и себе и еще не оправдивше, или инако како житие имуще порочно, или верою чюжди, рекше еретицы, мнози бо таковии церковное благочиние смясти и превратити хотяще, клеветами вины сшивают на непорочныя и правоверныя епископы и причетники. Таковыи на оклеветание не приятни.

Карфагенскаго собора правило 8.

Мирскими [80] винами оплетшихся, клеветы не послушати, не приятни бо таковыи на оклеветание.

Толкование.

Речено есть в шестом правиле втораго Вселенскаго собора, иже в Констянтине граде собравшихся святых отец, без истязания на епископа (л. 18 об.) [81] клеветы не приимати, аще первое не истязани будут оклеветлющии, какова их вера, да не будут еретицы, и потом да испытается житие их, еда како познани будут отвержени сущи от церкве и причащения недостойни, или сами о своих гресех от инех оклеветаеми и себе и еще не исправлших, ни отложивше вины греховныя, о ней же оклеветани быша. Тако убо и сие правило повелевает, никого же, подвинна суща и оклеветаема о неких прегрешениих, на оклеветание епископа не приимати.

Того же собора правило 127.

Не [82] свидетелствует отлученый.

Толкование.

Непорочну подобает (л. 19) [83] быти послушествующему. Сего ради убо ни причетник, ни мирский человек, аще есть отлучен, на епископа или на причетника клеветами или послушествовати не приятен есть.

Кто же ли ныне мнит ти ся Иоанне, кто же Ирод? Аз ли лишеный законныя моея церкви Иоанн или кто владый ею Ирод? Отвещай.

Аще ли мниши ся Предтечево дело исполняя, но несть разве по причастию прелюбодейцем вспомогая.

Ваш вопрос [84] : Есть ли безгрешно изнова преосвящатися? Един архиерей когда пременяется от единыя епархии на другую? И прочее.

Возражение обоим вопросу и ответу.

Ты убо, Симеоне, вопрошаеши не о своих, (л. 19 об.) [85] их же ти не подобает по вышереченым правилом. Ниже ты, Паисею, ответ твориши истиною, и в сем оба истины погрешили.

Наше же возражение сим.

Не приклады пустошными, ни самомнением что любо есть.

Правило святых апостол 68 сице глаголет:

Дващи [86] поставленый и с поставлшим его да извержется, аще не будет токмо еретическая рука первая.

Толкование.

Аще который епископ или презвитер или диакон второе поставление приимет от кого перваго возненавидев да извержется сам и поставивый его, аще токмо не прилучится яко от еретик поставлен бе первие. Ибо от тех крещени не крещени (л. 20) [87] и поставлени не причетницы.

Мы же ни своею волею на престол патриаршеский взыдохом, но общим советом царьского величества и всем священным собором избран, ни в слове ласкания, ни мздою даяния, якоже тогда исповедахомся во святей велицей церкви пред Богом и святыми Его, еже и ныне тожде глаголю. Такожде кляхомся правую веру, изложеную святыми в Никейстем соборе, такожде соблюдати ми и святых апостол и святых отец правила непреложно. Клят же ся и царьское величество, что было ему соблюдати заповеди Божия и святых апостол и святых отец и не сохрани и ниже нам попусти правилно что правити. О поставлении же патриаршеском ни было (л. 20 об.) [88] моего хотения и розыскания, яко есть неподобно второе рукополагатися преходящим во ину степень, ниже яко гнушаяся Бог весть. Тем се подобает, кто рукополагает, да себе непорочны соблюдут и рукоположеным от них беды не сотворят. Обаче же в толковании правила глаголет, яко епископ или презвитер или диакон перваго возненавидев, таковый да извержется. Зде же не возгнушения ради сие тако бысть, но и устав таков преданый имеет святая соборная Церковь со многим свидетелством святейших вселенских патриарх. И не аз точию един дважды рукоположен, много прежде епископи на митрополию Рускую (л. 21) [89] дващи рукоположени, аще возхощеши инде речем, ныне же взыщем от испервых како начася в царьствующем граде Москве патриаршеский стол.

Царьствующу благочестивейшему великому государю царю и великому князю Феодору Ивановичю всеа Русии и слышав от приходящих милостыни ради от вселенных еже Царяграда и прочих святых мест архиереов и архимандритов и прочих священнаго чина, яко многобедно стало православным христианом от поганых житие, разжегшеся царь Божиею любовию и собра собор преосвященнаго митрополита и архиепископы и епископы с прочими священными мужи. Совет благочестия сотвори и возвести им мысль свою, яко да устроится (л. 21 об.) [90] в царьствующем граде Москве патриаршеский стол. Сия же слышав, великий архиерей и вси сущии с ним и вси велможи похвалиша царево произволение, но обаче рекоша: Благочестивый царю, аще возхощет Бог и святая ти держава, да не без совету се будет святейших вселенских патриарх. И сим коемуждо с своими митрополиты и архиепископы и епископы советовавшим писанием, между собою согласившимся, Богу помогающу, удобь таковое начинание к совершению приити возможет, понеже благочестивая ти держава и мы вси имеем сих яко столпы благочестию, аще и во области поганых суть, но святая, яко же рече писание, николи же (л. 22) [91] осквернена бывают.

Слышав же царь, не тяжко о сем внят, урядив послов и посла ко святейшим вселенским патриархом. И желаемое получив вскоре возвращаются, грамоты носяще, возвестиша же и се царю, яко поставления ради патриаршескаго яже в велицей России изволили святым отцам приити [92] в царьствующий град Москву единому от патриарх, наипаче же Константинополскому. В третие же лето по посланых прииде в царьствующии град Москву Иеремия, Божиею милостию архиепископ Константиняграда и вселенский патриарх, и прочии с ним. И тако вскоре Божиею милостию и всего священнаго собора избранием поставлен (л. 22 об.) [93] бысть Иов митрополит Московский и всеа Русии патриархом, в третие рукоположен, прежде во епископы во град Коломну, таже на митрополию Московскую, таже патриархом Московским и всеа Русии. Сему свидетелствуют чиновныя книги и утвержденая грамота царя и великаго князя Феодора Ивановича всеа Русии и святейших патриарх Иеремии Константинополскаго и Иова патриарха Московскаго с прочими с пятиюдесять со двема руки подписавших и печатьми утвердившими. Егда же пресвятейший Иеремия, Божиею милостию архиепископ Константинополя и вселенский патриарх, царьствующаго Константинополя града достиже, (л. 23) [94] и с прочими вселенскими треми патриархи и со инеми отцы совет благочестия сотворив, изложение написав на хартии и священных отцов рукама и печатми утвердив, того первопоставленнаго патриарха власть утвердиша и писание зело нарочито послаша с Дионисием митрополитом Тернова града и со инеми священными мужи, иже убо с четырми патриархи богоносных отец митрополитов и архиепископов и епископов подписашася числом осмьдесят два, яко да имать Церковь Божия, яже в велицей России о поставлении Патриаршества непременно. И сие написание на хартии благодатию Божиею и до днесь соблюдаемо в соборней апостольстей Церкви.

(л. 23 об.) [95] Тако и Ермоген поставлен патриархом преже бывый в Казани митрополитом. Такожде и Филарет патриарх, прежде бывший Ростовский митрополит, о нем же есть свидетелство, написаное святейшим Феофаном патриархом Иерусалимским, яко второе рукоположен есть великий государь святейший Филарет патриарх Московский и всеа Русии. Есть же писаное в книге Кормчей в поставлении на 34-м листе и в самом деянии все покажется явно. От него же мнози архиерее и иерее посвящены, такожде мнози крещены, мню, яко и великий государь царь и иныя царьския чада крещены им. Еда и тии, елицы рукоположени, не ру(л. 24)коположени [96] , или елицы крещени, не крещени, сызнова крестити. Отвещай, суемудрене мудрече.

Такожде Иоасаф патриарх прежде бывый Псковский архиепископ, второе на патриаршество от своих митрополит рукоположен.

Такожде и о нас, смиренных, бысть не нашим то хотением или изволением, но рукополагающих.

Смееши ли таковыя начатки взыскати, изверзи прежде святейшаго Иеремию, архиепископа Константинополскаго и вселенскаго патриарха, иже предаде таковый устав, и с ним и прочих святых патриарх подписавших и 79 митрополит и архиепископ, такожде и Феофана, (л. 24 об.) [97] патриарха Иерусалимскаго изверзи тем же уставом, рукоположившаго великаго государя святейшаго Филарета Никитича патриарха Московскаго и всеа Русии, и елицы от сих рукоположени, изверзи, и елицы крещени теми, прекрести, и самаго того диадиму носящаго крести и прочих с ним. По сем же и о нас таковое невежество и о рукоположеных от нас исправи и елицы крещени нами, прекрести.

ВОПРОС, ГЛАВА 2

Никон не поизволил, чтоб исповедалися и причащалися которыя были люди виноваты и указано их казнить по градским каноном и судом. Добро ли чинил Никон или худо, поучи мене без лицемерия.

Ответ

Божественное писание повелевает: не казни дважды за одну вину и для того не поизволяет двадесятое правило святых апостол, чтоб один священник или диакон украдет что или блудит не извержется вкупе и отлучается, для того чтоб не двоима казньми был казнен, чтоб была тягость большая; не подобает убо и один разбойник или тать казнить ево душевно и телесно, чтоб мучен был здесь времянем и тамо вечно. И кто возбраняет тем исповедатися и причаститися имеет осуждение от Бога, понеже возбраняет душеполезное покаяние на последний час животу его, над которым стоит вечная мука и блаженное блаженство; глаголет бо святое писание в чем обрящу тя, в том и судить тебя буду. Худо убо чинил Никон Патриарх, что не велел виноватых исповедать и причащать, чтоб они исправилися, кидаючи их на конечное отчаяние. Где и Христос разбойника покаявшася на кресте крестил его животочною кровию и водою из ребра, как научает Иоанн Златоустый, и принял его покаяние; убо тот разбойник был явно и Христос не отвергся от его покаяния и на отчаяние его не допустил, но токмо наследника с Собою царствию небесному учинил.

НА ВТОРЫЙ ВОПРОС И ОТВЕТ ВОЗРАЖЕНИЕ

Второе, Симеоне, вопрошаеши не о своих, ни ты архиерей, ни ты поп, аще и самому великодержавному государю царю ведомо твое проклятое безчинство и всему, (л. 25) [98] яко играеши благодатию Христовою, еже при вознесении на Елеонстей горе, якоже пишет Лука евангелист: Извед [99] же их вон до Вифания и воздвиг руце Свои, благослови их. И бысть егда благословяше их, отступи от них и возношашеся на небо.

Ты же, ни самого того Бога зрителя тайнам человеческим постыдеся, благословение апостолом и иже под ними тех наследником даное в игру сотворити дерзнув. Не без греха и тии будут, кто такое твое безчиние проклятое видя, не первое запретит, ни второе возбранит.

Вопрошаеше бо, яко аз не изволил, чтоб исповедались и причащалися которые люди были виноваты и указано их казнить по (л. 25 об.) [100] грацким законом, добро ли чинил или худо, поучи мя. Не сыскал еси зде во святых книгах о сем да суемудренна беззаконнаго пришелца вопрошаеши, и той тебе подобное отвещает. Нам же разве Божественых устав не буди что о себе мудрствовати. Ты убо глаголеши, яко не велел аз исповедовати разбойников, аз того ради во все грады грамоты посылал, яко да преставше разбойницы приходят в покаянное житие прежде даже не яти будут, ниже заповедал в поимании каятися. А еже поиманаго на разбое, вскоре исповедав, причастит, не обретох такова правила. Господу глаголющу [101] : Ядый Мою плоть (л. 26) [102] и пияй Мою кровь во Мне пребывает и Аз в нем. Слыши, совопросниче, что Господь глаголет, яко ядый Мою плоть во Мне пребывает и Аз в нем. Да како кто смеет таковое безстудство показати? Достойна сотворив Божественаго причастия и тогда казнить, несть такова правила, ниже обрящеши апостолу глаголющу: Тем [103] же убо иже аще яст хлеб сей или пиет чашу Господню недостойне, повинен будет Телу и Крови Господни. И паки наведе да искушает же человек себе и тако от хлеба да яст и от чаши да пиет.

Василия Великаго правило 56.

Иже [104] волею убив, 20 лет запрещение приимет. Сице смотри, волею убив и своею волею пришед, покается, (л. 26 об.) [105] 20 лет не причастится.

Того же.

Воин [106] на брани за благоверие аще убиет, 3 лета да не приимет общения. А иже на разбое поиман, ни епитемии что любо понес, но неволею влеком злых ради дел, когда было ему очиститися.

Того же Василия Великаго к презвитеру о Божественей службе и о причащении и о нерадящих запрещениих.

Блюди [107] , кому предстоиши и како служиши, и которым даеши причащение. Не забывай [108] Владычни заповеди и святых Его апостол: Не дадите бо, рече, святая псом и бисера не мещите пред свиниями, блюдите пес и яже по сих. Смотри да не убоишися человека на грех себе, не даждь Сына Божия в руки недостойных, не устыдись (л. 27) [109] никого же от славных земли в час той, ни самаго того носящаго венец. Причащения же дар достойным давай, якоже и ты сам приял еси, им же Божественая правила не повелевают, не давай, яко иноязычницы бо вменишася и аще не обратятся, горе тем и причащающим их.

И [110] божественный Златоуст в толковании к Коринфяном послания глаголет, яко свяжи согрешившаго дондеже умолит Бога, не остави его разрешена, да не множае свяжется Божиим гневом. Аще аз свяжу, Бог к тому не свяжет, аще аз не свяжу, нерешимыя того ждут узы. Аще бо быхом себе разсуждали, не быхом убо осуждени были (л. 27 об.) [111] да никто же суровства быти не пщует се и безчеловечства, но конечныя кротости и изряднаго врачевания.

Святый Мефодий глаголет: Мы убо в людех непокоривых и прирекающих научихомся глаголати, еже спасая и спаси душу свою, не возхощем убо со грехи чюждими погибнути, но убоявшеся тяжкаго суда и Страшный день пред очима имуще, с таковыми погибнути не изволим, но засвидетелствовати день и нощь в народе и особь должни есмы. Соотводити же ся лукавством их и не возхощем прилежати же, паче приобрести их и изъяти от сети лукаваго. Аще же се не возможем, протщимся поне своя души от вечнаго осуждения спасти.

(л. 28) [112] Градскаго закона грань 39, глава 15.

Нарочитии [113] разбойницы на месте, на них же разбой творяху, повешени да будут, и подобает, да видения их ради убоятся начинающии таковая, и да будет утешение сродником убиеных от них.

Грань та же, глава 80.

Творяй [114] убийство волею, коего любо аще есть возраста, мечем муку да приимет.

А еже бы исповедати и причастити святых Божественых таин разбойнику, поиману на разбои или убийце, нигде же не обретается таковое правление, яко же ты, слабоумный толковниче, протолковал, ибо глаголы твоя самаго тебе уличат. Глаголеши, яко глаголет (л. 28 об.) [115] Писание святое, в чем обрящутся, в том и судити тя имать Бог, ты убо повелеваеши всякому по вине умиряющему [116] причастие подавати.

Смотри, от тебе написаных, яко и при распятии Христове, един спасеся и един осудися, како ты глаголеши всякому подавать Пречистых таин, аще и недостоин, или како решиши достойна сотворив Пречистых таин, повелеваеши убити того, где есть писано? А собою кто тебе дал таковую власть, чрез Божественыя законы вязати и решити, самому тебе связану канонами святых апостол и святых отец.

ВОПРОС, ГЛАВА 3

Подобает ли, егда облачается архиерей или иерей во святой церкви и во олтари чешется и на зеркало смотрится в церкви суще во святом облачении? Понеже и Никон тое извычанье был чинит прежде Литоргии, как облачится во святыя ризы.

Ответ

Не подобает, женское убо то есть и не лепо мирским и мужем, а наипаче священником, которыя имеют тогда молитися, а не в зеркало глядетися, и украсят душу свою, а не лица, и петь со Давыдом: Господи, возлюбих благолепие дому Твоего и место вселения славы Твоея. Святый олтарь сего ради глаголется олтарь, понеже есть Божий престол и судилище; и аще в мирское судилище кто внидет страхом многим и трепетом многим внидет, как священник имеет смотретеся в зеркало в тайном и страшном олтари Судии безпосулнаго, который есть зритель сердец и душ человеческих. Не подобает убо в зеркало смотретися слуге Божию не токмо в церкви Божией а не и в келии, ино да уготовит себе страху Божию и да имет совесть свою чисту, яко нескверному зеркалу Божию. И патриарха в том не похваляем и не подобает никому ревновати таковаго дела хотети; и аще чесался Никон и в зеркало смотрелся, лутче бы было, чтоб в своей келии то чинил.

ВОЗРАЖЕНИЕ 3-му ВОПРОСУ И ОТВЕТУ

Глаголеши убо на вопрос, яко не леть есть (л. 29) [117] архиереом украшатися в Божественей службе, слыши, что пишет в древнем законе: Сыном Аароновым да сотвориши ризы и поясы и клобуки, да сотвориши им в честь и славу. Облецы же в ня Аарона, брата твоего, и сыны его с ним и помажеши я, и исполни руце их, и освятиши я, да Ми жертвуют. Аарона [118] же и оба сына его приведеши я пред дверми храму свидения и измыеши я водою, и взем ризы святыя и облечеши Аарона, брата твоего, до земли ризою, и ризу утренюю и слово совокупиши ему [119] , слово ко утренней ризе. И по мале. И да возмеши от елея помазаннаго, и да возлиеши на главу его (л. 29 об.) [120] и мажеши и.

Зри, совопросниче и толковниче человекоугодный, яко и древле уставлено есть от Бога иереом украшатися и Господу глаголющу [121] : Егда же поститеся, не будите якоже лицемери, сетующе, помрачают бо лица своя, яко да явятся человеком постящеся. Аминь, глаголю вам, возприимут мзду свою. Ты же постяся, помажи главу свою и лице твое умый, яко да не явишися человеком постяся. И прочее.

А яже зеркала ищети устроишася во церкви до нас прежде бывшими нас патриарси святейшим Иовом и прочими, ниже мя разоряем, и вси тожде творят, и которое то беззаконие где есть о том писано, скажите ми.

(л. 30) [122] Глаголет 7-го Вселенскаго собора правило 16:

Епископи [123] или презвитери или диакони украшающеся светлыми ризами или миром помазующеся, рекше благоуханными вонями, да преставше, от того исправятся. Пребывающии же в том, запрещение приимут.

Сие подобает всем исправити, еже ныне зрится не по правилу сему.

ВОПРОС, ГЛАВА 4

Никон посвящает священники и диаконы: добро ли чинит и есть ли хиротонисание его благоприятно, ей или ни?

Ответ

Добро несть добро аще не добро бывает, против богослова Григория и котораго посвящает и которые посвящают здадутся быть достойны осуждения; понеже покладаются оба на великом опасении и в великом сомнении, аще есть ли дана им святых таин власть и действо, чтоб то действо святых таин было чинено от особ в усомневании положенных, и есть ли грех службы и таинства служить з заветом и ревностию человеческою, глаголет право в речах непостоянных безопаснейшая сторона имеет быть обрана, потому что безопасни ныне кто таков муж мудр, который бы подался в опасение. Достойно ли ни несть освящен приимаючи освящение от архиереа во усомневании будучаго, понеже не есть таинство святое, которыи бывают дважды и трижды, но которыи единожды, дано бывает. Естли дано истинно добро дано есть, а естли не дано, всегда живет не освящен. Ужо была благовествована от архангела Гавриила Пресвятая Дева Мария, однакоже пошла к святой Елисавети, чтоб уподливана была лутче в благовещении архангелском, глаголет Феофилакт, когда она понеже была мудрая, опасовалася, чтоб не была прелестна не яко неверна была, но хотя знати прилежней вещи яко премудрейшая. Тако же мудрый человек всегда ищет безопаснейшия и в речах постоянных укрепляется к лучшему естли сия наука разширитися имеет или как есть честнейшая душа, нежели тело, надобно и вещей их зрить з большим разсуждением и радением ради спасения своего, чтоб вечно не погибла.

ВОЗРАЖЕНИЕ 4 ВОПРОСУ И ОТВЕТУ

Кто на мя свидетелствуяй, яко не достойно ми есть рукополагати и по каким каноном. Прочтите 6-го Вселенскаго собора 36-е правило: Константиняграда [124] по Римстем да будет равно приемля старейшинство, по нем же Александрийский (л. 30 об.) [125] и потом Антиохийский и потом Иерусалимский.

Толкование.

Константиняграда епископу равно прияти старейшинство по Римстем. Се правило истолковано есть в третием правиле, иже в Константиняграде втораго Вселенскаго собора, и в 28-м правиле Халкидонскаго собора, якоже не честну второму быти по Римстем, но по летом. Тако убо и зде подобает разумети, еже бо рещи по Римстем временем бытие являет, а не чести. По многих бо летех равна старейшинства Римския Церкве и сей престол Константиняграда получи, понеже царем и боляры почтен бысть град сей и равно (л. 31) [126] прият старейшинство ветхому Риму.

ВОПРОС, ГЛАВА 5

Никон не учинил отречения своего письмом за рукою, толко из уст рек, что не хощет впредь быти Патриархом. Полно ли на том или надобно, чтоб на письме дано было отречение, чтоб было совершенно на письме дано отречение?

Ответ

Понеже уста священническая лгати не знают, против пророчества Малахия пророка, должен остатися при своем слове, коли хочет чтоб почтен был за правдиваго, а не за лживаго. Двоякия бывают отречения, письменно и не письменно, но и паче отречение, которое возглашается во церкви Божие почитается быть в болшом постоянии и крепости, ради того та, которая писана, мочно ей быть и по неволной и обманчивой, а сея, которая не писана, никакой не приимет на себя обманы. И для ради того паче иных приимется во всех судах как духовных, так и мирских, когда чрез свидетелей достойной веры свидетелствуется. Зделал Патриарх чево иной никто не зделал, после Литоргии святой совершения, преосвященыя ризы патриаршескаго чину сверже с себя, говорил тыя слова: недостоин, недостоин я быти и впредь я не Патриарх. Дело такое, которое не бывает николи, толко тогда, когда из священничества извержается священик, и то дело редко, коли прилучится. Сверх того где говорится дело не надобно письмо что есть не мое, а глас человеческий глас Божий. Вси свидетелствуют что учинил отрекание Никон и чрез то явно есть, что учинил такое отрекание, потому что то надобно собором разсудить и естли собор приимет его покаяние, тогда будет добро, а естли не приимет отречения, останется отречением. И для того ныне, понеже есть дело не осужденное, не имеет владения творити. Се что принадлежит к патриаршескому чину, ради того что на сам себя бещинствовал, тем се есть образом как сам кто возмет оружие и сам себя убивает, сам нарицается себе убийца.

ВОЗРАЖЕНИЕ 5-му ВОПРОСУ И ОТВЕТУ

Ты глаголеши, Симеоне, яко аз не учинил отречения своим за рукою, толко из уст рек, что не хощу впредь быти патриархом. Полно ли на том или надобно, чтоб на писме дал отрекание? Сам ли ты был и слышал наше отрекание или инии тебе сказывали, аще сам ты тут не был, почто нудишися не своих си ведети. Аз же тебе возвещу и всем слышащим, (л. 31 об.) [127] яко не просто засвидетелствовах во святей Божии церкви о отшествии своем пред Богом и святыми Его ангелы, якоже и на избрании нашего патриаршества, не в слове ласкания прияхом или любовию столп патриаршеский, но со многим прошением царьскаго величества и всего священнаго собора. Но якоже весть Господь и святии ангели и святыя церкви, по писанному во псалмех и глаголах о свидениих твоих пред цареви и не стыдяхся, тако и мы говорили, не стыдяся, во святей Божии церкви, засвидетелствуя пред Богом и святою Богородицею и святыми Его ангелы и всеми святыми Его, яко аще великий государь царь святаго Евангелия (л. 32) [128] и святых апостол и святых отец заповедей не обещался хранити непреложно пред Богом и пред святою Богородицею, то не бы помыслил на таковый сан взыти. Но весть Бог, како великий государь царь дав обещание свое во святей велицей церкви пред Господем [129] Богом и пред святым честным чюдотворным образом Пресвятыя Пречистыя и Преблагословенныя Владычицы нашея Богородицы и приснодевы Марии и пред святыми ангелы и пред всеми святыми и пред всем освященным собором и пред всем своим царским сигклитом и всеми людми. И елико он, великий государь царь, поелико возможно пребывал в своем обещании, повинуяся святей Церкви, и мы терпели, (л. 32 об.) [130] егда же он, великий государь изменился от своего обещания и на нас гнев положил неправедно, якоже весть Господь, и мы, помня свое обещание о хранении заповедей Божиих, како обещалися на избрании поставления патриаршескаго с подписанием, и июля [131] в 10 день вшед во святую великую церковь на память пренесения во царьствующий град Москву святыя и многоцелебныя ризы Господа Бога и Спаса нашего Иисуса Христа, претерпевшаго нас ради поношение и поругание, оплевание, заушение, одеяние хламидою, осуждение неправедное, распятие и крест и смерть, и совершив святую Божественную литоргию и засвидетелствовав (л. 33) [132] пред Богом и Господем нашим Иисусом Христом и пред Святою Богородицею и всеми святыми ангелы и всеми святыми и всеми святыми священными вещми о напрасном государеве гневе. И поминая заповедь Божию, глаголющую: Егда убо гонят вас во граде сем, глаголю вам, не имате скончати грады Израилевы, дондеже Сын человеческий приидет. И егда изшед из града, поминая заповедь Господню, глаголющую: И иже аще не приимет вас, ниже послушает словес ваших, исходяще из дому или из града того, отрясите прах наг ваших. И прочее.

И сотворив по заповеди Господни, отрясши прах ног наших, и пребываю водворясь (л. 33 об.) [133] в пустыни. И кто ми зазирает о сем, яко сотворил чрез волю Божию, а не по правде, и кое отречение хощете ли возвещу вам, яко и писание писах к царьскому величеству и посылах со диаконом нашим Иовом, в нем же обреталося тогда написаное: Се вижу на мя гнев твой умножен без правды и того ради и соборов святых во святых церквах лишаешись, аз же пришлец есмь на земли. Се ныне, поминая заповедь Божию, дая место гневу, отхожу от места и града сего. И ты имаши ответ пред Господем Богом о всем дати.

И разсмотрив государь писание, паки возврати ко мне, зане не бысть ему на ползу.

Да которое се отречение, (л. 34) [134] Кирилла арихиепископа Александрейскаго правило 3.

Через [135] церковныя заповеди, еже писанием отрицатися епископии, и приносити таковая писания неким святителем, аще бо достойни суть святителства, да служат, аще ли ни, да не отрицаются, но обличени бывше о злых своих дел судом да извергнутся. Его же некогда прорек от беды и страха и прещения неких, якоже реша отречесь.

Аще ли смел еси, изверги Григория Богословца списанием и клятвою отречеся ко 150-м епископом в 25-м стихе. Аще неправеднии клеветницы, якоже и ты, праведно ли их послушати?

Глаголеши суемудрене во ответе своем, яко уста священническая (л. 34 об.) [136] лгати не знают, против пророчества Малахия пророка, должен остатися при своем слове, коли хощет, чтоб почтен был [137] за правдиваго, а не за лживаго. Двоякия бывают отречения, писменно и не писменно, наипаче отречение, которое возглашается во церкви Божии, почитается быти в болшом постоянии и крепости ради того. Почто, лицемере, о себе, не смотря о других, движеши ответ. Лицемере, изми первее бревно из очесе твоего и тогда прозриши сучец изъяти из очесе брата твоего. Измый первее внутренее стляницы и блюду. И прочее.

Усмотри о себе, подобно ли ти есть чрез святыя законы вновь изводити (л. 35) [138] новыя законы, пришелцу сущу, без всякия правды или вопросы послушати клеветника, паче проклятаго человека, его же законы отрицают, и по правде судящему не послушати, но паче всякому православному прокляти за его злыя и нехристианския дела. Глаголеши, беззаконный толковниче, яко зделал аз, чего ин никто не зделал, после литоргии святой совершения преосвященныя ризы патриаршескаго чина сверже с себе. Како глаголеши неправедне, яко ни ты сам был ту, ни вопросивый тя о сем вопрошал, а ты глаголеши, яко сверже, егда вы той чин имеете и по совершении литоргии не снимаете от себе священных риз.

А у нас таков есть чин и прежде нас: (л. 35 об.) [139] по совершении святыя литоргии совлачатся вси от священных риз. И глаголеши, присовокупляя свои прикладныя ответы, кроме вопросу, бутто аз говорил: Недостоин я быти, и впредь не патриарх. От кого ты се навык зломысленне, яко ни о вопросе се есть, исповеждь ми.

Аз, егда от Москвы отходя [140] , говорил не тако, якоже ты глаголеши. Засвидетелствовал есмь Господу Богу и Пресвятей Пречистей Богородице и святому честному Животворящему Кресту Господню и святым ангелом в святей велицей церкви пред небом и землею, ведая гнев царев без правды на мя, и сего ради дая место гневу, свидетелствовал, а не клятвою клялся. (л. 36) [141] От них же мало зде изообразим от древних Божественых писаний, якоже свидетелствуют: Егда Аврааму свидетелствова сам Бог о чадородии, тогда засвидетелствова не инем, но небом и звездами, якоже пишется: «И [142] изведе и вон и рече к нему: Возри на небо о сочти звезды, аще можеши исчести. И рече: Тако будет семя твое». Тако: Егда [143] воззва ангел Господень второе Авраама от небеси глаголя: Собою кляхся, глаголет Господь. И прочее. Ияков [144] же в послушество постави столп каменен и собра камение з братиею, сотвори могилу и прозва могила си послух и столп си послух. Сего ради могила послушная бысть между Ияковом и между Ливаном.

(л. 36 об.) [145] Такожде: Егда [146] разгневася яростию Господь на Израиля и рече Господь к Моисею: Поими князя людски и обличи я Господу прямо солнцу. И паки: Егда [147] сконча Моисей, пиша вся словеса закона в книги даже до конца и заповеда левитом возвдижущим ковчег завета Господня, глаголя: Вземше книги закона сего и положите я во страну ковчега завета Господа Бога нашего, и да будет вам во сведение, яко аз веде, аз гневание твое и выю твою жестокую, еще бо мне живу сущу с вами днесь, разгневали есте Господа Бога и яко паче по смерти моей. Призовете ко мне старейшины племен ваших и старца ваша и судия ваша и книгочия ваша да глаголю (л. 37) [148] во уши их вся словеса сия и засвидетелствую вам небесем и землею, веде бо, яко по скончании моем беззаконием собеззакониите и склонитеся с пути, иже аз заповедах вам. И обрящет вы зло в последния дни, яко сотворите зло перед Господем Богом, разгневати Его во всех делех руку вашею. И глагола Моисей во уши всему сонму вся словеса песни сея даже до конца. Вонми небо и возглаголю и да слышит земля глаголы уст моих. И прочее.

Тако [149] Иисус Навин завещавая завет к людем в день он и даст им оправдания и суд в Сихеме (л. 37 об.) [150] пред храмом Господа Бога Израилева, и вписа Иисус словеса сии в книги Божия, и взя камень велий и постави его в Теревинфе, еже есть пред Господем. И рече к людем: Се камень сий да будет вам во сведение, яко сей слыша все глаголанное от Господа, елико глаголах к вам днесь. И сей да будет во сведение до кончины дней, яко да не солжете Господеви Богу вашему. И прочее.

И божественный Давид глаголет: Небеса [151] поведают славу Божию, творение же руку Его возвещает твердь. И паки той же рече: Исповедят небеса чюдеса Твоя, Господи. И паки инде рече: (л. 38) [152] Возвестиша [153] небеса правду Его и видеша вси людие славу Его. И прочее.

Тако [154] и Исаиа свидетелствует, глаголя: Слыши небо и внуши земле, яко Господь глагола «сыны родих и вознесох, сии же отвергошася Мене».

Такожде [155] и Господь наш Иисус Христос свидетелствует множицею небом и землею, якоже бо молниа исходит от восток и является до запад, тако будет и пришествие Сына человеческаго. И по мале рече: Аминь, глаголю вам, не мимоидет род сей, дондеже вся сия будут, небо и земля мимоидет, словеса же Моя не мимоидут.

Аще восхощеши и о отхождении нашем слышати, то по(л. 38 об.)кажем [156] ти без ленности благодатию Божиею нескудно от Божественаго Писания, яже о самом Господе нашем Иисусе Христе и о святых Его ученицех и апостолех и о прочих святых беганиих от злоб человеческих, не от гнилых смердящих учений, но от самаго приснотекущаго источника святаго Евангелия. Слыши самаго Христа, пеленами повита бегающа от злобы Иродовы. Се [157] ангел Господень во сне явися Иосифу, глаголя: Востав, поими Отроча и матерь Его и бежи во Египет и буди тамо, дондеже реку ти, хощет бо Ирод искати Отрочате да погубит Е. Он же, востав, поя Отроча и матерь Его нощию и отъиде во Египет. Умершу же Ироду, се ангел Господень во сне явися Иосифу во Египте, глаголя: Востав, (л. 39) [158] поими Отроча и матерь Его и иди в землю Израилеву, изомроша бо ищущии душу Отрочате. Он же востав поят Отроча и матерь Его и прииде в землю Израилеву. Слышав же, яко Архелай царствует во Июдеи вместо Ирода, отца своего, убояся тамо ити, весть же прием во сне, отъиде в пределы Галилейския. И паки: Слышав [159] же Иисус, яко Иоанн предан бысть, отъиде в Галилею, оставль Назарет. И [160] рече Ирод: Иоанна его же аз усекнух, кто же есть Сей, о Нем же аз слышу таковая. И искаше видети Его. И возвращьшеся апостоли поведаша Ему, елика сотвориша, и поим их, отъиде на место пусто града нарицаемаго Вивсаида. Народи же (л. 39 об.) [161] разумевше по Нем идоша, и прием их глаголаше им о Царствии Божии и требующая исцеления, целяше.

Да где есть глаголющии, яко аз, отшед, рукополагаю недостойне. Слыши, неправедный протолковниче ложных словес, яко и прешед от злобы Иисус на место пусто, о Царьствии Божии учил и требующая исцеления, целил. Паки слыши, неправедный истязателю.

И [162] исполнишася вси ярости в сонмищи, слышавшии сия, и доставше, изгнаша Его вон из града и ведоша Его до верху горы, на ней же град их создан бяше, да быша, Его низринули. Он же, прошед посреде их, идяше. Фарисее [163] же, совет (л. 40) [164] приемше, изыдоша, како да Его погубят. Иисус же, разумев, отлучися оттуду. И [165] искаху убо паки яти Его, изыде от рук их и иде паки на он пол Иордана, на место идеже бе Иоанн прежде крести, и пребысть ту. Глагола [166] им Иисус: Дондеже свет имате, веруйте во свет да сынове света будете. Сия глагола Иисус, отшед скрыся. От дне убо онаго совещашася убити Его. Иисус же не к тому со дерзновением хождаше во июдеох и преклонь колене моляшеся, глаголя [167] : Отче, аще есть воля Твоя, да мимоидет чаша сия, обаче не Моя воля, но Твоя да будет.

Воставше [168] же архиерее и вся иже с ним сущая ересь садукейская, исполнишася зависти, (л. 40 об.) [169] и возложиша руки своя на апостолы и послаша их в соблюдение общее. Ангел же Господень нощию отверзе двери темницы, извед же их, рече: Идите и ставши глаголите во церкви людем вся глаголы жизни сея.

Уведен [170] же бысть Савлу совет их, стрежаху врата день и нощь, яко да убиют того. Поемше же его ученицы нощию, свесиша по стене в кошницы.

В [171] Дамасце языческий князь Арефы царя, стрежаше Дамаск град, яти мя хотя и оконцем в кошницы свешен бых по стене, избегох из руки его.

Во оно же время возложи Ирод царь руце озлобити некия иже от церкве, уби же Иякова, брата Иоаннова, мечем. И видев, (л. 41) [172] яко годе бысть июдеом, приложи яти и Петра. Беху же дние опресночнии, его же и ем, всади в темницу, предав четырем четверицам воином стрещи его. И се ангел Господень прииде и свет возсия во храмине. Толкнув же в ребра Петра, воздвиже его, глаголя: Востани вскоре. И спадоша ему ужа железная с руку. Рече же ангел к нему: Препояшися и вступи в плесницы своя. Сотвори же тако. И глагола ему: Облецыся в ризу свою и последствуй ми. И изшед во след его, идяше. И изшед от Июдея, в Кесарии живяше. В нарочитый же день оболкся Ирод во одежду царску и сед на судищи пред народом глаголаше к ним. (л. 41 об.) [173] Народ же возглаша глас Божий, а не человеч. Внезапу же порази его ангел Господень, зане не даде славу Богу, и быв червьми изъяден [174].

Смутиша [175] же ся народ и градоначалницы слышащих и приемше мы то от Иассона и от прочих, отпустиша их. Братия же, абие в нощи, отослаша Павла и Силу в Берию.

Разделиша [176] же ся множество града и овии убо бяху со июдеи, овии же со апостолы. И якоже (л. 42) [177] бысть стремление языком же и июдеом с началники их досадити и камением побити их. Уведевше же, прибегоста во грады Ликаонския, в Листру и Дервию и иже во окрестных и ту беста благоденствующе.

Напасть [178] вас не приимет разве человеческа. Верен [179] же Бог, иже не оставит вас искуситися паче еже можете, но сотворит со искушением и изводство.

Иже [180] и Господа убивших Иисуса и своя пророки и нас изгнавших и Богу не угодивших и всем человеком сопротивляющимся, возбраняющим нас языком глаголати да спасется [181] , во еже испо(л. 42 об.) [182] лнится им грехи всуду, постиже на них гнев до конца.

Сие доволно ли ти есть сих указание отхождении и бегании, еще ти укажем и от канонов.

Сардикийскаго собора правило 19.

Без [183] правды епископ изгнан, аще и в чюждем пределе пребывает, приятен бывает, дондеже досаждение мимоидет.

Толкование.

От буести и гордости возбраняюще святии отцы, повелеша епископом в реченое время во инех епископиях пребывати. Аще же некий епископ исповедания ради честныя нашея веры или понеже Бог поборник истине, рекше, противяся властелем не творящим истины (л. 43) [184] и того ради от своего града изгнан быв и в другий град приидет. Не возбранится ту пребывати ему дондеже примирение обрести возможет и пременение бывшаго на нем досаждения.

Аще ли сего не доволно ти есть, прочти вселетнаго лета на кийждо день жития святых отец наших, яже о Василии Великом, яже о Григории Богослове, яже о Иоанне Златоусте и прочих святых. И тамо множае увидите о изшествиих и беганиих и отречениях и скитаниих по писанному. Верою святии вси победиша царствия. И прочее. И по мале: Инии же избиени бывше, не приемше избавления, да лучшее воскресение улучат. Друзии же руганием и ранами (л. 43 об.) [185] еще же и узами темничными, камением побиени быша, претрени быша, искушени быша, убийством меча умроша, проидоша в милотех и в козиях, кожах лишени, скорбяще, озлоблени, в пустынях скитающеся и горах и в вертепех и в пропастех земных. И сии вси послушествовани верою, не прияша обетования, Богу лутче что о нас предзревшу, да не без нас совершенство приимут.

ВОПРОС, ГЛАВА 6

Естли архиереи, которыя обретаются в послушании патриаршеском, имеют грех что не возбранили ему, Никону, злаго совету, или конечнее и совершенной суд обвиненныи, что не возбранили, в том учиненном деле не грешныя?

Ответ

Здесь надобно разсуждение, и хотя бы спрошены в любви брацкой и не возбранили погружения престолу и церкви наследующаго имеют тягость самоболшую и великую, за грех удоволства епитемию, а естли не были спрошены, толко Никон сделал своею волею, не имеют греха ради того, что человек без совету, такия и иныя терпит, злаго ради своего безумия, потому что болшия многи увидят, нежели один, для того что один жаден против присловия и беда самому одному, потому что как упадет, некому ево возставити. Мудрено делали, а те ныне, чтоб два ходили вдруг безотступно, чтоб помогали друг другу и радели против времени случая. Иоанн Богослов ради того, что пребывал вместе з Богородицею, достоин учинять, чтоб писал то, чего ни глаз не видел, ни ухо человеческое не слышало, пишет Амвросий святый, и Бог хощет чтоб Его имели обще за общаго добродетеля по совету и солнцем правды называтца; для того что всех освещает и никто не обретается зде без света, что собери, как пишет Климент, но всякия принимают от Его светлость и всяк богатеет Его милостию.

ВОЗРАЖЕНИЕ НА 6 ВОПРОС И ОТВЕТ

Вопрос болярина Симеона Стрешнева: Ты убо, Симеоне, глаголеши таковая не своими устны и языком. Ведят вси, знающие тя, яко ничтоже в тебе тако есть. И глаголеши: (л. 44) [186] Есть ли архиереи, которыя обретаются в послушании патриаршеском, имеют ли грех, что не возбранили ему, Никону, злаго совету, или конечнее и совершенно обвинены, что не возбранили, в том учиненом деле не грешныя.

В пятом убо возражении нашем доволно писано есть о нашем отшествии, обаче и ныне, еже благодать Божия простит, возглаголем. Егда убо согрешали апостоли, еже будучи во Христовом послушании, не возбранили Христу от злобы Иродовы и прочих злодейстов жидовских, еже множицею хотяху Его убити, ни, но един Июда, предавый Его, и что суть бысть ему, якоже пишется.

Аще ли и верховный Петр Господу рек, (л. 44 об.) [187] не возбраняя, но маловерием, глаголя: Милосерд Ты, Господи, не имать Тебе се быти. Но [188] что Божественный ответ: Иди за Мною, сатана, яко не мыслиши яже суть Божеская, но человеческая.

Тако и нашим отступником и предателем и тебе, Симеону, не инако будет. Господу свидетельствующу: Слушаяй вас, Мене слушает, и отметаяйся вас, Мене отметается. Божие есть слово и не погрешает от истины. Аще ученицы Мои есте, рече: Пребудете в словеси Моем. К сопротивным же рече: Вы несте от истины, но есте отца вашего диавола и похоти отца вашего хощете творити. Он человекоубийца (л. 45) [189] бе искони и во истине не стоит, яко несть истины в нем. Егда глаголет лжу, от своих глаголет, яко ложь есть и отец лжи. Тако и ты, Симеоне, неси от истины, но все лживо вопрошаеши, якоже отец твой диавол научил тя.

Ты же, ответотворче, глаголеши: Здесь надобно разсуждение, и хотя спрошены в любви братцкой, не возбранили погружения престолу и церкви наследующаго имети тягость самоболшую и великую за грех удоволства епитемию. А естли не были спрошены, толко Никон зделал своею волею, не имеют греха ради того, что человек без совету такия и иныя терпит злаго ради своего безумия, потому что болшия многия увидят (л. 45 об.) [190] нежели един, для того, что един жаден против присловия и беда одному самому, потому что как упадет, некому его возставить. Мудрено делали, а те ныне, что в два ходили друг в другу безотступно, чтоб воспомогал друг другу и радел против времени и случая. Иоанн Богослов ради того, что пребывал вместе з Богородицею, достоин учинен, чтоб писал то, чего не глаголал, не видел, ни ухо человеческое не слышало. Пишет Амвросии святый: И Бог хощет, чтоб Его имели обще за общаго добродетеля по совету, и солнце правды называется для того, что всех освещает и нихто не обретается зде без света. Что собери, как пишет Климент, но всякия приимают Сего све(л. 46)тлости [191] , всяк богатеет Его милостию.

Возражение.

И уже речено есть вопрошающему тя, смотри, яко не чюжде есть и тебе, ныне же особно ти напишем. Ты же слыши, неправедный ответотворче, Василия Великаго глаголюща, яко не подобает судити кого о безвестных и приводит апостола, свидетелствуя: Тем [192] же не прежде времене судите, дондеже приидет Господь, иже просветит тайныя тмы и явит советы сердечныя, и тогда похвала будет комуждо от Бога.

В [193] последняя дни отступят нецыи от веры, внимающе духом лестчим и учением бесовским, в лицемерии лжесловеснем, сожженым своею совестию.

И [194] не судите и не осудитеся, не осуждайте и не осуждени будете, и имже бо (л. 46 об.) [195] судом судите, осудитеся.

Рече же к неким, уповающим на ся, яко бяху праведни, уничижающе иных, притчю сию: Человека [196] два внидоста в церковь помолитися, един фарисей, а другий мытарь. Фарисей же став, в себе сия помышляше: Боже, благодарю, яко несьм якоже и прочии человецы, хищницы, неправедницы и прочия безумныя глаголы.

Не обрел еси, како рещи от правых святых догмат к вопроснику, но якоже сам явился еси, противословя правых уставов святых апостол и святых отец, извержен, такожде отвержеными законы написаны Климентом, и ответы (л. 47) [197] твориши, о них же 85 правилом святых апостол пишет в толковании сице.

Климентом изглашеныя и преданыи заповеди, и тии бо от зловерных неких развращены и искажены быша. Тем почитати их отнюд отрече Вселенский шестый собор.

Правило 2 шестаго Вселенскаго собора.

Яже [198] от иноверных татебно вверженыя во апостольския заповеди, преданыя Климентом, да извергнутся.

Толкование.

Се же правило за некая ложная, яже суть чюжда благочестия, от иноверных приложена в них. Напред церкви отврещи сия повелевает, на созидание и на утверждение християнскому стаду. Ты же како смел еси дерзнути развращати Вселенскаго 6-го (л. 47 об.) [199] собора каноны и вводити зловерныя, аще не бы ты, окаянне, зловерен сам был. Господу свидетелствующу о твоем зловерии: От [200] сердца бо человеку помышления лукавая, убийства, прелюбодейства, блудове, крадьбы, лжесвидетелства, хулы, сии суть сквернящая человека.

Послушай же апостола, глаголюща: Аще [201] кто инако учит и не приходит ко здравым словесем Господа нашего Иисуса Христа, и еже по благочестию учению разгорде ничесо же сведый, но болезнь о взыскании и любопрениих. От них же бывает зависть, рвение, хула, мнения лукава, прихождения разтленных человек умом и отчюжденных от истины, мнящих приобретение (л. 48) [202] быти благочестие, отступай от таковых.

В [203] последняя дни настанут времена люта, будут бо человецы самолюбцы, сребролюбцы, величави, горди, хулницы, родителем непокориви, не благодатни, не преподобни, не любовни, свадливи, диаволи, невоздержливи, некротцы, не боголюбиви, предателе, продерзателе, горделиви, сластолюбцы паче нежели боголюбцы, имуще образ благочестия, силы же его отметающеся, и сих отвращайся.

ВОПРОС, ГЛАВА 7

Доброли б было, чтоб собор был в том деле патриаршеском, чтоб не прилучилося какова соблажнения или помешки в царстве?

Ответ

Тридесятседмое святых апостол правило, чтоб дважды в году собор был и на нем бы было прежде обыск о существе веры, а после об иных церковных речах был роспрос; и не одиножды бы убо той надобно собрать собор, но и многажды для того то, что учинилось не меншее дело, есть и чрез толко год овдовенство и духовне той разлучение, которая весь свет во удивление приводит.

ВОЗРАЖЕНИЕ 7-му ВОПРОСУ И ОТВЕТУ

Глаголеши, совопросниче, добро ли бы было, чтоб собор был в том деле патриаршеском, чтоб не прилучилося какова соблажнения или помешки во церквах. Слыши, сопросниче [204] , Господу глаголющу: (л. 48 об.) [205] Всяко [206] царство, разделшееся на ся, запустеет и всяк град или дом, разделся на ся, не станет и како не может се быти, Господу свидетелствующу, еже и бысть, мнозем и будет. И ты, ответотворче, глаголеши, предлагая 37-е правило святых апостол, чтоб дважды в году собор был и на нем бы был прежде обыск о существе веры, а после того об иных церковных речах роспрос был и не одиножды, для того, что учинилося не меншее дело, есть и чрез толко год овдовенство и прочая.

Слышите, совопросниче и ответотворче, не едино правило 37-е, но многа обрящеши собору бывати.

(л. 49) [207] Святых апостол правило 37.

Дващи [208] в лете епископи да собираются церковных ради вещей и божественых повелений, первое убо в четвертую неделю по Пасце, второе же октября во вторыйнадесять день.

Толкование.

Сие убо правило преславных апостол повелевает дващи в лете собору быти, но обаче се оставлено бысть, ибо осмое правило Шестаго собора, иже в Трулле полатнем, и 6-е, иже в Никеи 2-го собора [209] , единою в лете повелевают в коейждо области от всех епископ собору быти о церковных вещех и о божественых повелений стязании, и о разрешении недоуменных и неразумных в вине. И аще который епископ некия или епитемиами тяжкими, сиречь запрещении, или отлучением (л. 49 об.) [210] связал, да и о таковых вещех разсудят вси епископи. Время же едино собору уставиша между Пасхою и между месяцем октябрем, перволетии бо по еллински и римски октябрь сказуется.

Собора 1 Вселенскаго правило 5.

Своими епископи отлучении инеми да не будут прияти, обаче аще не за малодшиа или за некую распрю или за ино нечто таковое отлучение бысть. Того бо ради повелено бысть дващи в лете в коеждо области собору быти, первое убо прежде четыредесяте дний святаго и Великаго поста, второе же по времени овощнем.

Толкование.

Подобает по приточному словеси уязвившему человека, тому же (л. 50) [211] и изцелити его. Такожде и от своего епископа, отлучения заповедь приемша, от иного прияту быти без испытания и без взыскания вины несть достойно. Но и вины отлучения смотрети подобает, да некогда не по достоянию нанесено бысть нань отлучение, но от малодушия. Се же есть от ярости епископли или от распри некия или иных ради вины се сотворшу, страстныя воли епископли, страстная же воля есть, еже рещи «не сотворил ми еси сего», да будеши отлучен. Но убо да ни отлучаемии кроме подобныя вины отлучаются, ни отлучающии их епископи преобидени будут другим епископом, приемлющим без испытания таковыя. Сего ради дважды в лете в коейждо (л. 50 об.) [212] области собору быти святый собор повеле, да общею волею всех епископов тоя области всяко совопрошание и истязание церковное и всяко прекословие разрешится, якоже и 37-е правило святых апостол повелевает. Кроме же, якоже тамо написахом, осмое правило, иже в Трулле полатнем, 6-го собора и 6-е правило Седмаго собора, иже в Никеи второе собрася, скудости ради потребных, яже хотят имети напутное шествие собирающиися епсикопи, единою в лете собору быти заповедаста, идеже аще изволит митрополит. Время же собору между праздником святыя Пасхи и месяцем октябрем, той бо есть месяц во времени овощнем.

(л. 51) [213] Собора Антиохийскаго правило 20.

Церковных [214] ради потреб дващи в лете да бывает собор в коейждо области, первое убо в 4-ю неделю по Пасце, второе же в 10 день перворетия [215] .

Толкование.

О сем писано есть в 37-м правиле апостолстем, яко оставлено есть еже дващи в лете в коейждо области собору быти. И осмое правило 6-го Вселенскаго собора, иже в Трулле полатнем, и 6-е правило собора, иже в Никеи второе собрася, повелевает единою в лете епископом коеяждо области собиратися между Пасхою и октябрем месяцем и правилная распрения и допрошания разрешати. На тех же (л. 51 об.) [216] соборех приходят презвитери и диакони и вси, иже мнятся неправедно пообидени от своих епископ, и судом от всего собора управляеми бывают. Несть же достойно никим же о себе собора творити све не сущаго в митрополии епископа, рекше митрополита.

Собора Лаодикийскаго правило 39.

Позван [217] быв епископ на собор, аще не приидет, не имый никоеяждо нужди на пакость, несть без вины.

Толкование.

Прилучающихся ради церковных стязаний и правилных взысканий повелено бысть собором бывати по вся лета и собиратися области епископом, идеже аще повелит митрополит. Аще убо собравшимся (л. 52) [218] епископом, некий епископ позван быв приити не восхощет, сам себе в вину влагает и запрещение да приимет от собора, аще не преслушаниа ради, но телесныя ради немощи или некоея ради житейския печали приити не возможет.

Собора 4 Вселенскаго правило 19.

Дващи [219] в лете собор бывает, идеже повелит епископ, иже есть в митрополии, и да разрешаются разпри и всяко прекословие.

Толкование.

Якоже прежде речено бысть, дващи в лете собору быти, еже сходити всеа области епископом, идеже повелит митрополит, на разрешение и на исправление взыскаемых церковных вещей. Возбранено же бысть, еже (л. 52 об.) [220] бысть еже дващи собору бывати от 6-го правила седмаго Вселенскаго собора, иже в Никеи второе собрася, и осмаго правила шестаго Вселенскаго собора, иже в Трулле полатнем, труда ради и многих потреб, еже хотят имети на путное шествие собирающеся епископи, и повелено бысть единою в лете собору бывати от святаго праздника Пасхи даже до скончания месяца.

Собора Карфагенскаго правило 18.

Иже [221] на соборех исправлена святыми отцы поставляемыи да внушит: мертву убо телеси причащение не дается, не яст бо, ни пиет, и в неведании презвитер да не крестит скончавшагося. По заповедем, иже в Никеи, (л. 53) [222] собор же на всяко лето да собирается и да посылается от митрополит сущих к коейждо области два или трие или елико же их изберет на блюдение места.

Толкование.

Хотяй поставитися епископ или презвитер должен есть святыми отцы повеленная правилы на соборех, рекше веру, и вся церковныя заповеди в слухи своя приимати. Учащу его поставляющему его и да обещается та вся хранити, и умерших телесем да не дают причащения. Господу [223] рекшу: приимите и ядите, се есть тело Мое, яко убо кто мертвому божественаго Тела и Крови причащения подаст, ни прияти бо, ни ясти мертвый не может. Ни да крестити (л. 53 об.) [224] никого же умершаго, презвитерское бо неразумие, не поможет скончавшемуся, по смерти бо крещен быв от него, несть крещен. Сии же отцы, иже в Никеи, святых последующе собору на всяко лето в Калхидоне повелевают собору бывати и посылати от коеяждо области митрополиту два или елико же изберет епископ во всех епископ место сущих во области.

Того же собора правило 74.

Годе [225] бысть и се, да в день бывающаго собора по вся лета, еже есть прежде десяти дний сентября, день святыя Пасхи проповедати.

Толкование.

В различных правилех сего собора повелено есть се, еже день святыя Пасхи возвещати на соборе, (л. 54) [226] , иже бывает по вся лета во Африкии прежде десяти каланд сентября, се же есть в двадесят первый августа.

Того же собора правило 77.

Не [227] приходящии по вся лета на собор, аще неволя не возбранит им, своея церкве общение довлеет им.

Толкование.

Елико же убо епископ в коейждо области не приидут на собор, иже бывает по вся лета, ни старостию, ни болезнию, ни иною же никоею тяжкою нуждею возбраняеми, но леностию или небрежением се творяще, таковыя повеле собор братски наказати. Се же правило и образ наказанию полагает: повелевает бо епископом братии их не приобщатися, ни служити с ними, (л. 54 об.) [228] но токмо в своих церквах таковыи да имут общение и служат в них.

Того же собора правило 95.

Изволиша [229] отцы грамоты послати ко властелем, яко да потщившесь дати им помощь изгнати донатианы, во общей потребе бывши, грамоты да посылаются Господьскому престолу и собор да бывает, идеже есть подобно. Аще не общия потребы, в своих областех да творят собор и судятся.

Толкование.

Иже убо в коейждо области собору бывати по вся лета, собиратись епископом и вся прилучившаяся им, особно церковная стязания, по правилом изысковати же и разрешати собор повелевает. А еже от всех (л. 55) [230] областей и сущих во Африкии епископом сходитися в некоем месте и общь творити собор, аще не будет общая вина, ея же ради должни суть снитися, инако таковому собору быти не прощает, труда ради шествия за долготу дний. Егда же будет некая общая потреба, ея же ради общему собору быти, должни суть вси епископи к держащему первый престол епископу грамоты послати, и той, идеже аще изберет место стройно снитися, ту да соберутся.

Собора 6 Вселенскаго правило 8.

Понеже [231] не мощно дващи единою на всяко лето да бывает собор среде Пасхи и октоврия месяца.

Толкование.

Прилучающихся (л. 55 об.) [232] ради напастей епископом и варварского нашествия, еже дващи в лете бывати собору, от сего правила отложено есть и повелено бысть единою коегождо лета собору бывати между Пасхою и октоврием месяцем.

Собора 7-го Вселенскаго правило 6.

Понеже [233] невозможно по древнему повелению дващи в лете собору бывати, да бывает единою по повелению Шестаго собора, и возбранивый властель да отлучится, и небрегий епископ да приимет запрещение. Собору же бывшу, аще митрополит возмет что от епископа, да истязан будет четверицею.

Утвержает собор сей, еже единою в лете бывати (л. 56) [234] собору в коейждо области, аще убо обрящется страны тоя властель, возбраняя епископом сходитися на собор, иже бывает правилных ради и евангелских вещей, таковаго отлучает. Митрополита же, небрегуща его собору бывати, кроме некоея беды и нужди, правилным запрещением повинует, повелевает же не имети власти митрополиту взяти что, от них же епископи принесоша с собою или скотину, рекше конь, или осля, или ин некий вид. Аще же обличен будет взем нечто от них, да возвратит четверицею.

Но сии вси ни едино что любо написаша о патриаршеском суде, от своих (л. 56 об.) [235] епископ судиму быти разве церковных правлений по святым каноном, а не чрез каноны что любо вново вводити на развращение святей Церкви, яко же ты, ответотворче, новыя законы вводиши, ово от отреченых книг, ово от внешних баснотворных сложений чрез уставленыя святыя книги по святому апостолскому правилу 85-му и 59-му правилу, иже в Лаодикии, и 24-му правилу, иже в Карфагене, и великаго Афанасия и Григория Богословца, и богословнейшаго Амфилохия.

Правило святых апостол 60.

Аще [236] кто лживое писание нечестивых еретик книги яко святы в церкви пред всеми почитает на пагубу (л. 57) [237] людем и церковному причту, да извержется.

Толкование.

Многи книги от еретик искажены быша на вред простейшим человеком, сиречь невеждным, якоже и от святаго Климента написаныя епископом апостолския заповеди, яже того ради собором отвержены быша. Некая же и вся отнюдь от еретик сложена быша и ложно надписание имуща, якоже се от святых отцов списаны, еже потаеныя нарицают. Таковым убо книгам отверженым быти повелевает правило и на почитание не предлагати их. Аще же который пред людей сия изнесет и в церкви чести покусится, аще есть епископ или презвитер или диакон, да извержется, (л. 57 об.) [238] книги же да сожгутся.

Ты же все, еже что любо, ни творишь в ответех твоих, все страстно и разслаблено и всякия нечистоты полно, якоже вторый Максим Киник, о нем же есть писано втораго Вселенскаго собора 4-е правило.

Максим [239] , глаголемый Киник, от епископов чюжд и всяко не священ, иже от него в причет прият бысть.

Толкование.

Сей Максим Киник сказовается безстудный, Церковь Божию раздра и многаго мятежа и молвы сию исполни. Волк вместо пастыря явлься и вся грехи прощати готов согрешающим единаго ради еже нечествовати в повелениих, рекше преступати заповеди, якоже глаголет (л. 58) [240] великий Богословец Григорий: Чюжд убо сей Максим от епископства да будет, и вси от него поставлении презвитери и диакони и прочии причетницы чюжди священия. Послушай же Карфагенскаго собора 21 правило, иже добре и богоприятне изведеная буестию поколебати покушается, несть епископ. Да како ты вводиши чрез святыя каноны суду быти на мя от своих епископ? Покажи ми, слепче, от истины, да и аз тебе покажу, яко ни митрополита достойно есть судити своим епископом, развее святейшаго вселенскаго Константинополскаго патриарха.

Карфагенскаго собора правило 12.

Епископа [241] в некоей вине суща, аще не весь (л. 58 об.) [242] собор области тоя, обаче дванадесять епископ да судят, презвитера же шесть и диакона трие. И се есть о епископех, а не о митрополитех и патриарсех.

4-го святаго Вселенскаго собора обще всем по степенем исчитает кому от кого суд прияти правило 9.

Причетницы [243] между собою распрю имуще, аще оставльше своего епископа, к мирским судиям приступят, по правилом вину да приимут. Причетницы же, аще имеют что на епископа, да ожидают собора. Аще же епископи на митрополита, Константиняграда патриарху да возвестят.

Толкование.

Аще причетник имать нечто на причетника, не подобает ему (л. 59) [244] судитися пред мирскими судиями, но от своего епископа. Аще же оставльше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, да приходит к митрополиту страны тоя, егда в реченое время соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится. Под ним же суть епископи и митрополиты всех [245] областей страны тоя или от патриарха Константиняграда (л. 59 об.) [246] судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

От свитка новых заповедей Иустиниана царя глава 58.

Аще [247] же причетник или ин некто вину имать на епископа, первое преподобный митрополит области тоя по священным правилом и по нашим законом таковую вещь да разсудит. И аще кто поречет сужденая, к преблаженному епископу и патриарху вещь возвестит и той подобный тому подаст конец. (л. 60) [248] Аще же на митрополита имать что епископ или причетник или ин кто, патриарх того правления подобным образом да судит. Зри, ответотворче, где есть, иже бы патриарха свои епископи судили, ниже митрополита прощено есть епископом судити, развее патриарха.

ВОПРОС, ГЛАВА 8

Может ли благовернейший Государь Царь наш Алексей Михайлович собрать тот собор или надобно, чтоб по повелению патриаршескому?

Ответ

Подлинно может, ради того, что он тоже не есть последнейший в чести у Господа Бога, наш государь, как и иныя прежния наияснейшия цесари и цари; и подлинно чли мы о великом цесаре Констянтине святых отец в Никеи собранных явными возилы своими собрал в Никею, где и сам особою своею был. Но и великий он, Феодосий, собрал отцы на собор в Цареграде учиненный, и на третием соборе Ефесском, собраном от младаго Феодосия и в Халкидонстем соборе тоже учинено от Мелетия на кесаря, чтоб собрал тоже слово в слово и иныя кесари, которых скипетры перенесло Божие всемогущество в царствующую и Богом хранимую Москву, со всеми правами и урядами.

ВОЗРАЖЕНИЕ НА 8-й ВОПРОС И ОТВЕТ

Вопрос Симеона Стрешнева: Еже может ли государь наш Алексий Михайлович собрать тот собор, или надобно по повелению патриаршескому?

Возражение: Нигде же есть таковое правило, еже бы царем собирати соборы, паче же себе на отмщение. Апостолское правило 37-е глаголет: дващи в лете собираются епископи церковных ради вещей и божественых (л. 60 об.) [249] повелений. Смотри зде, ответотворче, како святое правило глаголет, собираются, а не собирает царь или ин кто, такожде и перваго Вселенскаго собора 5-е правило, такожде и четвертаго Вселенскаго собора 19 правило и шестаго Вселенскаго собора 8-е правило, и 7-го Вселенскаго собора правило 6-е. Аще и в древния лета благочестивых царей соборы были, но по умолению, а не с повелением, якоже ныне действуется с повелением и нуждею, якоже и в девятом вопросе явно есть повелением, а не умолением.

ВОПРОС, ГЛАВА 9

Никон сказал, что повелел Богом венчанный Государь Царь, что был здесь на Москве, то он в ни во что почел, и называл собор тот сонмищем жидовским.

Ответ

В Матфея святом в евангелии [250], живодавец Христос глаголет: где два или три соберутся во имя Мое, тамо и Аз посреде их. И после во евангелии святаго Луки [251], и Аз посреде вас как служащий, тем же образцом как сидел меж учител и слушая и спрашивая. Убо естли меж двома или трема обретается Спаситель Христос седящи, какоже на одном соборе собранным именем не сидит Спаситель Христос невидимо, как помогающи и освещающи их, коли Сам обещался, говоря: се Аз с вами есмь во вся дни до скончания века [252]. З жестости тогда человеческия, что ни есть говорил Никон, выговорил и слово с яростию сказано: не надобно их с плохостию роспрошать: а кто ни есть соборныя святыя собрания называет сонмищем жидовским, надобно как еретика проклинать, для того что диалог Григорий преждния четыре Вселенския соборы почитал, что четыре крепости святых евангелист.

ВОЗРАЖЕНИЕ 9-му ВОПРОСУ И ОТВЕТУ

Глаголеши, совопросниче, яко аз, собором что повелел Богом венчанный (л. 61) [253] государь царь, что был здесь на Москве, то я ни во что почел и назвал собор тот сонмищем жидовским.

Ответ: [254] Аще кто чрез правила святыя собирает соборы, не есть тот собор. На Василия Великаго повелением епаршеским и на Григория Богослова повелением Иуалиевым, и на Иоанна Златоустаго повелением царевым и царицыным, и на Филиппа митрополита повелением царя Иоанна, и ни есть тии собори, ниже именуются святии, но сонмища суть, а не собори. Тако [255] Господу глаголющу: Идеже [256] о имени Моем собрани два или трие, ту есмь посреде их, и паки овца Моя гласа Моего слушают, и Аз знаю их (л. 61 об.) [257] и последуют Ми. И паки: Аще [258] кто любит Мя, слово Мое соблюдет, и Отец Мой возлюбит его и к Нему приидеве и обитель у Него сотвориве, и [259] аще заповеди Моя соблюдесте, пребудете в любви Моеи, якоже и Аз заповеди Отца Моего соблюдох и пребываю в Того любви. Имеяй [260] заповеди Моя и творя их, он есть любяй Мя.

Не [261] всяк глаголяй Ми «Господи, Господи» внидет в царство, но творяй волю Отца Моего, иже на небесех. Мнози рекут Ми во онь день «Господи, Господи, не Твоим ли именем пророчествовахом и Твоим именем бесы изгонихом и Твоим именем силы мнози сотворихом», и тогда исповем им (л. 62) [262], яко николиже знах вас, отыдите от Мене, делателие беззакония. Всяк убо, иже слышит словеса Моя сия и творит их, уподоблю его мужу мудру, иже созда храмину свою на камени; и сниде дождь, и приидоша реки, и возвеяша ветри, и припрешася храмине той, и паде, и бе падение ея велие.

Что [263] же зовете Мя «Господи, Господи и не творите, яже Аз глаголю». Бога исповедают ведати делы же (л. 62 об.) [264] Его отмещаются. Мерзцы суще и непокоривии и на всяко дело благо [265] неискусни, иже в законе хвалишися, преступлением закона Богу досаждаеши.

Блюдите [266] убо, како опасно ходите, не яко немудри, но яко премудри, искупующе время яко дние злии суть. Сего ради не бывайте безумни, но разумевающе, что есть воля Божия.

И ты убо, ответотворче, пишешь: Господь глаголет: Се Аз с вами есмь во вся дни до скончания века. И [267] паки ты глаголеши о нас з жестости тогда человеческия, что ни есть говорил, Никон выговорил и слово с яростию сказано, но не надобно с плохостию роспрошати, а кто ни есть соборныя святыя со(л. 63)брания [268] называет сонмищем жидовским, надобно как еретика проклять для того диалог Григорий прежние 4 Вселенския соборы почитал, что четыре крепости святых евангелист.

Кто ти, плутотворче, сказал, яко святыя соборныя собрания называю жидовским сонмищем и надобно как еретика проклинать для того, что диалог Григорий прежние 4 Вселенския соборы почитал? Зри, яко и самый совопросник не о Вселенских соборех вопрошал тя, но времене сего, их же царьское величество собра и одари, на отмщение нашему отхождению да глаголют все, еже он, государь, восхоте, якоже (л. 63 об.) [269] и самое тое их соборное деяние являет, а не о Вселенских святых соборех.

Множицею выше рекохом и ныне глаголем, иже аще кто чрез правила 7-го святаго Вселенскаго собора приложит или отложит да будет проклят, якоже и ты, продерзивый, пишешь и глаголеши и новыя законы вводиши от отверженых и несведомых внешних книг.

Такожде ум имеяй, аще кто назовет сие соборище жидовским сонмищем, не погрешит истины. Аще кто разсмотрит тех деяние написаное на соборище том, все лжи полно и ни единыя истины несть.

Собором же убо бывающим по 37-му (л. 64) [270] святых апостол [271], якоже выше рекохом и ныне глаголем собравшимся. Такожде во Антиохии Сирстей в 20-м правиле глаголет: Несть [272] достойно никим же о себе собора творити свене сущаго в митрополии епископа, рекше митрополита. Такожде и в Лаодикии собора в 3-м правиле: Собиратися епископом идеже, аще повелит митрополит. Такожде и святаго Вселенскаго 4-го собора, иже в Халкидоне, в 19-м правиле написано, еже сходитися епископом, идеже повелит митрополит, а не царь. Такожде Карфагенскаго собора в правиле 95-м: Егда ж будет некая общая потреба, ея же ради общему собору быти, должни суть вси епископи к держащему первый престол епископу грамоты послати, (л. 64 об.) [273] и той идеже аще изберет место стройно снитися, ту да соберутся.

Такожде и 7-го Вселенскаго собора в 6-м правиле глаголет: Митрополита же небрегуща его собору бывати, кроме некия беды и нужди, правилным запрещением повинует.

Такожде новых заповедей Иустиниана царя 8-й грани глава 8-я: Митрополитом собиратися к патриархом, а епископом к митрополитом.

И по седми святых Вселенских соборех нигде обретается царем собраный собор, развее во Флоренце осмый был собор чрез святыя Вселенския соборы собран, тамо бывшу и царю и патриарху вселенскому, но обаче беззаконно дерзнувшим. И последи собору тому прокляту бывшу (л. 65) [274] по 1-му правилу 7-го Вселенскаго собора и все ни во что их злодейство бысть, аще и царь был благочестив и вселенский патриарх и со прочих патриарх наместники, но беззаконное деяние сотворшее теми отвержено бысть и со беззаконными вменено есть. О нем же последи пространнее скажем.

Како же ты, враже истины и всякия правды отчюжденне, дерзаеши нововводныя вопросы, чрез святыя правила святых апостол и святых отец вопрошены, толковати и утверждати, не стыдяся божественых законов и утверждения.

Послушай бывшаго соборнаго деяния во времена благочестиваго царя (л. 65 об.) [275] государя и великаго князя Феодора Ивановича всеа Русии, еже по божественней ревности на лучшую красоту святей Божии Церкви устроити патриаршеский престол, еще прежде в Московском государстве не бысть тое власти, но митрополитом Московским и всея Русии именующимся по благословению святейших вселенских патриарх. И уже желаемой царьскаго величества мысли к делу приити начинающейся, и призвав царь преосвященнаго митрополита со всем освященным собором и весь свой царьской сигклит. Таже начат царь мысль свою преосвященному митрополиту и всему освященному собору и всему сигклиту (л. 66) [276] сказовати: весте, отцы, яко излишшее благочестие бысть во дни благочестивых царей во Елладе и во Африке, во Египте и в Ливии, и в Палестине, и в Сирии, сиречь в Греческой земли, в Константинеграде и во Александрии, и во Антиохии, и во Иерусалиме и в других странах, идеже неизреченная смотрения Божия содеяшася, и многочеловечный народ от тмы неведения ко свету благоразумия обратишася. Ныне же яко слышим, аз же и вы, яко тамо преславная и премногия хвалы достойная, еже в похвалу в Троице славимому Богу и ко спасению человек устроена быша, вся попрана бысть рукама (л. 66 об.) [277] злочестивых турков. И яко ничто же от сих во благое зрится, но вся безчествуема, Богу тако изволшу в наказание наше до толика, яко тамо сущим патриархом и прочим святителем наречением святительства токмо именоватися, власти же едва не всяко лишением, ныне то зло и зде достиже [278]. Наша же страна, якоже зрите, благодатию Божию во много разширение приходит, наипаче же благочестивая наша вера, яже на основании апостол и пророк утверждена, возрастает и множится.

И сего ради хощю, аще Богу угодно будет и писания Божественая не пререкуют, яко да в царьствующем нашем граде Москве устроится (л. 67) [279] превысочайший престол патриаршеский. И аще убо угодно вам сия, возвестите ми, аз бо мню, яко ничто же в сих благочестию повреждение, но и паче предспеяние веры Христове.