ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Кто же есть праведнее Давида во царех, но ни сей восхоте просла(л. 521 об.)витися и написати суд царя Давида, но и моляся, глаголал: Боже [1875], суд Твой цареви да даждь и правду Твою сыну цареву. Судити людем Твоим в правоте и нищим Твоим в суде. И паки: Аз [1876] же поставлен есмь царь от Него над Сионом горою святою Его, возвещая повеление Господне. Господь [1877] вовеки пребывает уготова на суд престол Свой и Той судит вселенней в правду, судити людем Своим в правду.

Господь [1878] испытает праведнаго и нечестиваго. От лица Твоего судьба моя изыдета, очи мои да видеста правоты. Яко [1879] вся судьбы Его предо мною и оправдания Его не отступиша от мене. Словеса Господня, словеса чиста, (л. 522) [1880] сребро разжено, искушено земли, очищено седмерицею. Закон [1881] Господень непорочен обращаяй души, свидетельство Господне верно, умудряюще младенцы, оправдания Господня права, веселящая сердце, судьбы Господни истинны, оправданы вкупе, вожделены паче злата и камене честна многа и слаждьша паче меда и сота, ибо раб Твой хранит я, внегда сохранити я, воздаяние много, яко Бог судия есть, сего смиряет и сего возносит. И паки: Любит милостыню и суд Господь. Благ и прав Господь, сего ради закон положи согрешающим на пути. И [1882] честь царева суд любит, Ты уготовал еси правоты, суд и правду во Иякове (л. 522 об.) [1883] Ты сотворил еси. Се же рек уготовай Божий суд всякому лепо есть царю любити, а Божиих судеб не преобидети. В столпе облачне глаголаше к ним, яко храняху свидения Его и повеления Его, яже даде им. С небесе слышан сотворил еси суд. Творяй милостыню Господь и судьбу всем обидимым, сказа пути Своя Моисеови сыновом Израилевым хотения Своя. Яко [1884] судит Господь людем Своим и о рабех Своих умолится.

Блажени [1885] непорочнии в путь ходящии в законе Господни. Блажени испытающии свидения Его. Ты заповедал еси заповеди Твоя сохранити зело. Тогда не постыжусь, внегда призрети ми на вся заповеди Твоя (л. 523) [1886] устнама моима возвестих вся судьбы уст Твоих, а не свое уставление взаконял святый Давид и глаголал: На пути свидений Твоих насладихся, яко о всяком богатстве, в заповедех Твоих поучюся и уразумею пути Твоя. Возлюби душа моя возжелати судьбы Твоя на всякое время, ибо свидания Твоя поучение мое есть и совети мои оправдания Твоя. Путь истинный изволих и судбы Твоя не забых, прилепихся свидением Твоим, Господи, и не посрами мене. Егда разширил еси сердце мое, законоположи мне, Господи, путь оправданий Твоих, и взыщу и выну. Вразуми мя, и испытаю закон Твой и сохраню и (л. 523 об.) [1887] всем сердцем моим. Настави мя на стезю заповедей Твоих, яко тую восхотех и глаголах о свидении Твоих пред цари и не стыдяхся. Благ мне закон уст Твоих паче тысящь злата и сребра. Кляхся и поставих сохранити судьбы правды Твоя. Сего ради возлюбих заповеди Твоя паче злата и топазия. Праведен еси, Господи, и прави суди Твои. Возрадуюся аз о словесех Твоих, яко обретаяй корысть многу, неправду возненавидех и омерзих, закон же Твой возлюбих, мир мног любящих закон Твой, и несть им соблазна. И прочее.

Видели, списателю беззакония, (л. 524) [1888] елико божественный Давид изглагола и свидетельствова о суде Божии. Тем же сущим по себе царем засвидетельствова, глаголя: И ныне, царие, разумейте, и накажитеся вся судящии земли. Работайте Господеви со страхом и радуйтеся ему со трепетом, приимите наказание, то есть заповедь, да некогда прогневается Господь и погибнете от пути праведнаго, егда возгорится вскоре ярость Его, блажени вси надеющиися на Него.

И бысть [1889] яко приближишася Давиду дние умрети, постави Соломона, сына своего, царем и сказа ему, елика заповеда ему Господь Бог: Соломон [1890], сын твой созиждет дом Мой и двор Мой, зане того избрах (л. 524 об.) [1891] Мне в сына быти, и Аз буду ему во отца, и укреплю царьство его даже до века, аще укрепится сохранити заповеди Моя и судьбы Моя, яко и днесь.

Зри, како Бог заповедает хранити судьбы Своя и то свидетельствует крепость царьству.

Таже Давид [1892] заповеда сыну своему Соломону, глаголя: аз отхожу в путь всеа земля, ты же крепися и буди муж совершен и сохрани хранилище Господа Бога твоего ходити во вся пути Его. Сохраняй заповеди Его и оправдания и судьбы и свидения Его, писанныя в законе Моисеове, да разумееши, яже твориши о всех, елико же заповедах ти, да поставит Господь слово его, иже глагола к нему, глаголя: Аще сохранят (л. 525) [1893] сынове твои пути его, яко ходити предо Мною во истине всем сердцем их и всею душею их, глаголя: Не соженет тебе муж со престола Израилева.

Смотри, что и Давид заповедает хранити Соломону, сыну своему, не о заповедех ли Божиих и судбах правды Его, таже и молится Давид, яко да сохранят судбы правды ко Господу за Израиля и за Соломона, сына своего, глаголя: Господи Боже, Авраамов и Исааков и Израиля отец наших сохрани во веки сею волею сердца их и исправи сердца их к Тебе. Соломону ж, сыну моему, дай сердце совершено, да хранит заповеди Твоя и повеления Твоя. И Соломон [1894], сын Давидов, воцарися во Иерусалиме над Июдою (л. 525 об.) [1895] во Елиме. И даст Господь смысл Соломону и мудрость многу зело и широту сердца, яко и песок иже в мори, и исполнися смысла Соломон зело, паче смысла сынов старейших и паче всех мудрых египетских.

Зри, суемудрене, яко прежде явления Божия Соломон премудр бысть. И по приношении тысящи приношений и в ту нощь явися Господь Соломону. Зри и зде, яко по приношении тысяща приношений явися Господь Соломону. А иже кто сам не приносит, а Божие возхищает, не имать ли негодовати на того Бог? Ей, имать. Послушай же прочее, что глагола Господь Соломону и что Соломоне прошение к Богу. И рече ему: (л. 526) [1896] Проси, что хощеши, да дам тебе. Рече ж Соломон к Богу: Ты сотворил еси с Давидом отцем милосердие велико и поставил мя еси царя в него место. И ныне убо, Господи Боже, да исполнится слово Твое, еже обещал еси Давиду, отцу моему. Ты бо мене сотворил царя над людми Твоими многими, якоже прах земный, ныне ж дай мне премудрость и разум, да вниду и изыду пред людми Твоими сими. Кто бо может сии люди Твоя достойно судити? Сего ради даждь рабу Своему сердце смыслено на послушание и суждение людем Твоим в правду, иже разумевати добру и злу, яко кто может судити людем Твоим тяжким сим. (л. 526 об.) [1897] Рече же Бог к Соломону: Иже кто наипаче угодило сердцу твоему и не просил еси богатства, ниже потребных и славы, ниже душ иже тя обидеша, но ни дни взыска живота многа, но просил еси премудрости и разума, да судити можеши люди Моя, над которыми поставих тя царя. Премудрость и разум дана суть тебе, богатство ж и потребная и славу дам тебе тако, да ни един во царех, ни прежде тебе, ни по тебе будет подобен тебе.

Видел ли еси Соломоне прошение, яко не проси ни славы, ни богатства, но сердца смыслена, како судити люди Божия в правду, а не собою и свой суд, якоже (л. 527) [1898] пишет князь Никита: суд государя царя и прочее. Но послушай, что по сих заповеда Соломону.

И аще ходиши по пути Моему и сохраниши заповеди Моя и повеления Моя, якоже ходи и Давид, отец твой. Умножу дни твоя. Таже и сам навык о Божиих судбах чюдится, глаголя: Велицы суть суди Твои, Господи, и неизглаголаны. Сего ради не наказании душа соблазниша, восприяша бо насиловати язык святый беззаконий.

Сыне [1899] мой, глаголы закона не забывай, глаголы ж Моя да соблюдет твое сердце, долготу бо жития и лета жизни и мира приложити. И паки рече: Сыне [1900], не пренемогай в законе Господни, ни ослабей от него (л. 527 об.) [1901] обличаем. И паки ин рече: Не [1902] стыдися о сих и не приемли лица согрешати о законе Вышняго и завете и о суде оправдати нечестиваго. И паки: Сыне, храни моя словеса, моя же заповеди скрый в себе. Сыне, чти Господа и укрепишися разве же Его, не бойся инаго. Храни моя заповеди и поживеши. И паки рече: Страх Господень ненавидит неправды, досаждения и гордыню и путии лукавых. Возненавидех же Аз пути развращеныя злых, Мой совет и утвержение, Моя мудрость, Моя же и крепость. Мною царие царьствуют, Мною велможи величаются и мучителие Мною (л. 528) [1903] держат землю и паки наказателне пишет. Слышите убо царие и разумейте и научитеся судии концем земли, внушите содержащая множества и гордящиися о народех язык, яко дана бысть от Господа держава вам и сила от Вышняго. Иже [1904] истяжет дела ваша и помышления испытает, яко слузи суще царьства не судисте право, ни сохранисте закона, ниже по воли Божия ходисте. Сокрушение скоро явится вам, яко суд жесточайший на тех в находящих бывает, мала бо подается милость, силнии же силне истяжутся. Не лишает бо ся лица всех Владыка, ниже усрамится велможи, яко (л. 528 об.) [1905] мала и велика сей сотвори, подобне же и проразумевает о всех, державных же крепко совесть испытание. И прочее.

Муж [1906] премудр не возненавидит закона, сумняй же ся в нем, яко в бури корабль. Человек разумив веру имеет закону и закон верен ему. И паки премудрый рече: Возлюбите [1907] правду судящии землю, мудрствуйте о Господе во благостыни и в простости сердца взыщите Его. Се глаголет Господь: Снабдите [1908] суд, сотворите правду. И паки: Путь Господень суд. Бог бо мой велик есть, не минет мене Господь, судии наш Господь, князь наш Господь, царь наш Господь. И паки глаголет Господь: Послушайте [1909], людие (л. 529) [1910] Мои, послушайте, яко закон от Мене изыде и суд Мой на свет странам. Послушайте Мене ведящии суд, людие Мои, им же закон Мой в сердцы вашем. Не бойтеся укорения человеча и похвалению их не покоряйтеся, яко риза обетшает и яко сукно изъястся мольми, а правда Моя во веки.

Такожде и о новом евангелском законе и суде Сам Господь свидетельствует, глаголя: Аз с небесе снидох да не творю волю Мою, но волю пославшаго Мя Отца. И паки рече: Аз [1911] не о себе приидох, но пославый Мя Отец. Той Мне заповедь даст, что реку и что возглаголю. И паки рече: Вся [1912] Мне предана суть Отцем Моим.

(л. 529 об.) [1913] И паки: Отец [1914] не судит никому же, но суд весь даст Сынови. И паки инде речеся: Се [1915] отрок Мой, Его же изволих, возлюбленный Мой, нань же благоволи душа Моя. Положу дух Мой и суд языком возвестит. И [1916] аще сужду Аз, суд Мой истинен есть. Не [1917] мните, яко приидох разорити закон или пророки. Не приидох разорити, но исполнити.

И [1918] аще кто услышит глаголы Моя и не верует, Аз не сужду ему. И по мале. Отметаяйся и не приемляй глагол Моих, имать судящаго ему слово, еже глаголах, то судит ему в последний день. И божественный (л. 530) [1919] апостол глаголет: Основания [1920] инаго никто же может положити, паче лежащаго, еже есть Христос. И паки: Наздани [1921] есте на основании апостол и пророк, сущу краеуголну самому Иисус Христу. Братие [1922], по человеку глаголю: Обаче человеку утвержена завета, никто же отметает или приповелевает. И паки: Смеет [1923] ли кто вещь имея, ко инему судитися, а не от святых. Тем же безответен еси, о человече, всяк судяй. Им же бо инаго судиши, себе осуждаеши. Таяжде твориши, судяй, вемы же, яко суд Божий воистину на творящая таковая. Помышляеши ли се, о человече, судяй таковая, яко ты убежиши суда (л. 530 об.) [1924] Божия, вемы же, яко суд Божий есть на творящих таковая. И паки ин апостол глаголет: Аще [1925] ли закон осуждаеши, неси творец закону, но судия. Един есть Законоположник и Судия, могий спасти и погубити.

И се доволно есть сказано о суде, яко суд Божий есть, а не царя и великаго князя. Како же ты, списателю неправедный, не убояся Господа Бога свята обезчестити, глаголя, суд царя и великаго князя, и прочее беззаконие? Кто еси ты, чрез Божественыя законы и святых апостол и святых отец правила смел дерзнути новыя бесовския законы написати, яко новый (л. 531) [1926] Лютор? Не слышал еси вышеписанаго, како Господь заповеда на горе, глаголя: Внемлите [1927], не восходити на гору и ничим же коснутися ея. Всяк прикоснувыйся горе смертию умрет. И паки: Да некогда приступят к горе, к Богу разумети, и падут от них мнози, и жрецы же приступаяй ко Господу Богу, да ся освятят, да некогда изменит от них Господь. Ты же какой Богу советник, ни поп, ни диакон, смел дерзнути противная Богу и святым Его мудрствовати. Не слышал ли самаго Бога, заповедающа: Да [1928] не приложити ко словесем, еже Аз заповедую вам, ниже отъимите от них, (л. 531 об.) [1929] снабдите заповеди Господа Бога вашего, яже заповедал вам днесь.

И паки: Да [1930] сохраните повеления Моя, да не сотвористе от всех закон гнусных, да не осквернитесь в них.

А кои же не боящимся Бога и свои законы творящим, божественый Давид от лица Божия глаголет: Господь [1931] разоряет советы языком, отметает же мысли людей и отметает советы князей, совет же Господень вовеки пребывает. Грешнику же рече Бог: Вскую ты поведаеши оправдания Моя и восприемлеши завет Мой усты твоима. Ты же возненавиде наказание и отверже словеса Моя вспять. И паки инде рече: Глаголет пребеззаконный (л. 532) [1932] согрешати в себе, несть страха Божия пред очима его, яко ульсти пред Ним обрести беззаконие свое и возненавидети, глаголы уст его беззаконие и лесть, не восхоте разумети, еже ублажити, беззаконие умысли на ложи своем, предста всякому пути неблагу. И паки во инем псалме рече: Рече [1933] безумен в сердцы своем, несть Бога, растлеша и отмерзишася в беззакониих, несть творяй благое. Бог с небесе приниче на сыны человеческия, видети аще есть разумеваяй или взыскаяй Бога, вси уклонишася вкупе непотребни быша. Несть творяй благое, несть до единаго, ни ли разумевают вси делающии беззаконие. Утвердиша [1934] (л. 532 об.) [1935] себе слово лукаво, поведаша скрыти сеть, реша, кто узрит их. Сего [1936] ради удержа я гордыня их до конца, одеяшася неправдою и нечестием своим, помыслиша и глаголаша в лукавстве, неправду в высоту глаголаша. Положиша на небеси уста своя, и язык их прейде по земли и реша: Како уведе Бог и аз есть разум в Вышнем. Рех [1937] беззаконнующим, не беззаконнуйте, и согрешающим, не возносисте рога, не воздвизайте на высоту рога вашего и не глаголите на Бога неправду, яко Бог судия есть.

Паки инде речеся: Ныне [1938] убо сед, впиши се в доску и в книги, яко будет се во дни времен и не в век, (л. 533) [1939] яко людие непокориви суть, сынове лживи, иже не похотеша слышати закона Божия, иже глаголют пророком, не поведуйте другаго прелщения, да ны совратисте с пути сего, отъимете от нас путь и отъимете от нас суд Израилев. Того ради сице глаголет Господь Израилев [1940], яко не покористеся словесем сим и надеястеся ко лжи и яко пороптасте и уповая бысте к словеси суме. Того ради будет в вас сий грех, яко стена падающися внезапу и града тверда пленена, в нем же вскоре будет падение. Будет яко сокрушение сосуда глинена и от глины надробно, якоже не обрестися им чрепа, в нем же огнь возмеши и в онь же влиеши воды мало. Се глаголет Господь: Сотво(л.533 об.)ристе [1941] совет не Мною и заветы не духом Моим, приложити грехи ко грехом. И паки ин пророк рече: Яко [1942] не послах их, рече Господь, тии же течаху, и не глаголах к ним, о себе бо глаголют неправедно лжею. Тако рече Господь: Не послушайте словес их, иже сказуют вам, прелщают вас, видения сердца своего глаголют, не от уст Господних глаголют. Люте [1943] прорицающим от сердца своего, прорицающим вослед духа своего, а отнюдь неведящим, глаголет Господь: Аз не несмь послал их. Глаголют, рекуще: Господи, Господи. Аз же несмь послал их. И паки той же рече: Се [1944] глаголет Адонаи Господь, а Господь не глагола. (л. 534) [1945] И паки ин глагола: Несть [1946] красна песнь во устех грешника, яко не от Господа послана бысть. И апостол пишет: Како же проповедят, аще не послани будут. И искусил [1947] еси глаголющаясь быти апостолы, и не суть, и обрете я лжа. Горе им, яко отскочиша от Мене, грешни суть, яко нечествоваша ко Мне, доглаголаша до Мене лжу и суть лукави, не ведяще смысла. Вси в путех своих воследят, койждо в свой путь уклонишася в развращеная от перваго да и до последняго. Горе [1948] пишущим неправду, пишуще бо, лукавая пишут. Горе творящим глубоче совет, а не з Господем. Горе творящим советовати, будут во тме дела их. Горе вам, отвергшаяся чада. Горе (л. 534 об.) [1949] премудрым о себе и пред собою художным. Горе души их, занеже умыслиша совет лукав себе. Горе беззаконнику, злая бо приключаются по делом его. Горе хулящим, иже хулят закон. Горе преступником, иже преступили закон. Горе глаголющим злу добро, а добру зло, полагающим свет тму, а тму свет, полагающим сладкое горко, а горкое сладко. Горе [1950] сердцам страшливом и рукам ослабленам и грешнику, ходящу на две стези. Горе сердцу ослаблену, яко не верует, сего ради непокровено будет. Горе вам, погублщим терпение, и что сотвористе, егда посетит Господь. (л. 535) [1951] Горе [1952] вам, законником, яко взясте ключ разумения, сами не внидосте и входящим возбранисте. Горе вам, книжницы и фарисеи, лицемери, яко одесятствуете мятву и копр и кимен, остависте вящшая закону, суд и милость, и веру, вожди суть слепии, оцеждающе комары, велбуды же пожирающе. Горе вам, книжницы и фарисеи, лицемери, яко очищаете внешнее сткляницы и блюду, внутрь юду же суть полни хищения и неправды. Фарисею слепый, очисти прежде внутренее сткляницы и блюду, да будет има и внешняя чиста. Горе [1953] им, яко в путь Каинов ходиша и в лесть Валаамовы (л. 535 об.) [1954] мзды пролияшася, в пререкании Корреове погибоша, без боязни себе пасуще. Облацы безводни от ветр преносимы, древеса Ессеина безплодна, дважды умерша искоренена, волны свирепыя моря воспеняюще своя струи, звезды прелестныя, им же мрак тмы блюдется. Пророчествова [1955] же и о сих седмый от Адама Енох, глаголя: Се приидет во святых тмах ангел своих сотворити суд о всех и изобличити всех нечестивых о всех делех нечестия их, ими же нечествоваша, и о всех жестоких словесех их, их же глаголаша нань грешницы нечестивии. Сии суть (л. 536) [1956] ропотницы, укорители, часть порочная, в похотех своих ходяще нечестием и законопреступлением, и уста их глаголют прегордая.

О них же сам Господь прорече, глаголя: Блюдитеся [1957], да никто вас прелстит. Мнози бо приидут во имя Мое, глаголюще, яко Аз есмь. Не изыдите убо после их. И мнози лжепророцы востанут и прелстят многия, и за умножение беззакония изсякнет любы многих. И паки: Востанут бо лжехристи и лжепророцы, яко прелстити аще мощно и избраныя. И инде рече: Внемлите [1958] же от лживых пророк, от плод их познайте их, еда объемлют от терния грозды или от репия (л. 536 об.) [1959] смоквы. Тако всяко древо добро плоды добры творит, а злое древо плоды злы творит. Не может древо добро плод зол творити, ни древо зло плод добр творити. Всяко убо древо, еже не творит плода добра, посекают его [1960] и во огнь вметают. Тем же убо от плод их познайте их. И паки притчю прорече: Уподобися [1961] Царьствие Небесное человеку, сеявшу доброе семя на селе своем. Спящем же человеком, прииде враг его и всея плевелы посреде пшеницы и отъиде. Егда же прозябет трава и плод сотвори, тогда явишася и плевелие. Пришедше же раби Господина, реша Ему: Господине, не доброе ли семя (л. 537) [1962] сеял еси на селе Своем? Откуду имать плевелы? Он же рече им: Враг человек се сотвори. Раби же реша Ему: Хощеши ли убо, да шедше, исплевем я. Он же рече им: Ни, да некогда восторгающе плевелы, восторгнете купно с ними и пшеницу. Оставити расти обое купно до жатвы, соберите первее плевелы и свяжите их в снопы, яко сожещи я, а пшеницу соберите в житницу Мою. И приступиша к Нему ученицы Его, глаголюще: Скажи нам притчю плевел селных. Он же отвещав, рече им: Всеявый доброе семя, есть Сын человеческий, село есть мир. Доброе же семя (л. 537 об.) [1963] сии суть сынове Царьствия, а кто новыя законы пишет [1964] плевелы суть сынове неприязнении, а враг всеядый есть диавол, а жатва кончина века есть, а жателие ангели суть, якоже убо собирают плевелы и огнем сожизают. Тако будет в скончание века сего, поглаголет Сын Человеческий ангелы Своя и соберут от Царьствия Его соблазны и творящая беззаконие, и ввергут их в пещь огненую, ту будет плач и скрежет зубом.

Паки подобно есть Царьство Небесное, неводу ввержену в море и от всякаго рода собравшу, иже егда исполнися, извлекоша и на край и седше, избраша добрыя в сосуды, а злыя извергоша (л. 538) [1965] вон. Тако будет в скончание века, изыдут ангели и отлучат злыя от среды праведных и ввергут их в пещь огненну, ту будет плач и скрежет зубом. Потом [1966] же вопрошаху Его фарисее и книжницы, почто ученицы Твои не ходят по преданию старец, но неумовеныма рукама ядят хлеб. Он же отвещав, рече им: Яко добре пророчествова Исаия о вас, лицемерие, якоже есть писано: Сии [1967] людие устнами Мя чтут, сердце же их далече отстоит от Мене. Сие же чтут Мя, учаще учения заповеди человечески, оставаше бо заповедь Божию, держите предания человеческа и глаголаше им, добре отметаете заповедь (л. 538 об.) [1968] Божию, да предание ваше соблюдете. И [1969] призвав весь народ, глаголаше им: Послушайте Мене вси и разумейте, ничесо же внегду человека входимо в он, еже может осквернити, но исходящая от него, та суть оскверняющая человека. Тогда приступлше ученицы Его, реша Ему: Веси ли, яко фарисее, слышавше слово, соблазнишася? Он же рече: Всяк сад, его же не насади Отец Мой небесный, искоренится. Остависте их, вожди суть слепии слепцем, слепец же слепца аще водит, оба в яму впадетася. Отвещав же Петр, рече Ему: Скажи нам притчю сию. Иисус же рече им: Единаче ли и вы (л. 539) [1970] без разума есте? Неужли разумеете, яко всяко, еже входит во уста, во чрево вмещается и афедроном исходит. Изходящая ж изо уст, от сердца исходят, и та сквернят человека, от [1971] сердца бо исходят помышления злая, убийства.

Аще и не мечем кто убивает, но языком законопреступным, паче меча обоюдуостра. Прелюбодеяния, паче положенаго закона ин кто, ему же любодеет. Татьбы, тать истину крадет от Божественых законов и заповедей и свой устав бесовский приписует. Лжесвидетельства, лжесвидетель, иже вместо правых законов ложныя своя приводит. Хулы, хула то, (л. 539 об.) [1972] паче предания свой разум составляет. Обиды, обидлив той, вместо правых Божиих велений свой закон ин полагает. Лукавства, како той не лукав, оставя правый путь, своим лукавым воследует. Лесть, воистину той лстив, оставя истиный свет, тму глаголет свет. Студодеяния, студено того деяние, кто кроме правых догмат мудрствует. Око лукаво, како не лукова око того, иже не толико правду зрит, елико своя си. Гордыня, гордыня ничто же ино, развее еже якоже от испрева диавол. На небо [1973], рече, взыду и выше звезд небесных поставлю претсол свой, и буду подобен (л. 540) [1974] Вышнему. Ныне же во ад снидеши и в корение земли. Тако и ныне, гордяся паче Божественых законов, свои законы уставляя, подобен оному гордынею. Безумство, како той не безумен, паче преданий иныя безумныя предания предая, по писаному во псалмех, рече безумен в сердцы своем, несть Бог, сия вся сквернящая человека. Порождения ехиднова, како можете добро глаголати, зли суще, от избытка сердца уста глаголют, благий человек от благаго сокровища износит благая, и лукавый человек от лукаваго сокровища износит лукавая.

Что [1975] же Мя зовете, Господи, Господи, и не творите, яже Аз глаголю? (л. 540 об.) [1976] Не всяк глаголяй Ми, Господи, Господи, внидет в Царьство Небесное, но творяй волю Отца Моего, иже есть на небесех. Мнози рекут во он день, Господи, Господи, не во Твое ли имя пророчествовахом и Твоим именем бесы изгонихом? И тогда исповем им, яко николи же знах вас, отъидите от Мене делающии беззаконие.

Аминь [1977], аминь, глаголю вам, не входяй дверми во двор овчий, но прелазя инуде, тать есть и разбойник. Тако и Божественный верховный апостол Петр пророчествовал о ложных тех законодавцах, глаголя: Сие прежде ведяще, яко приидут в последняя дни ругателие, по своих похотех ходяще (л. 541) [1978] и глаголюще, якоже и в вас будут лживи учителие, иже внесут ереси погибели, искупавшаго их Владыки отметающеся. Приводяще себе скору погибель и мнози последствуют нечистотам их, ими ж путь истиный похулится и в преумножение лстивых словес вас уловят. Их же суд искони не коснит и погибель их не воздремлет, продерзателех себе угодных, сии же славы не трепещут хуляще, во истлении своем истлеют, яко скоти животни естеством бывше в погибель и тлю. В них же не разумеют хуляще, во истлении своем истлеют, прелщающе душы неутвержены.

И [1979] божественный Иоанн пророчествова, глаголя: Возлюблении, не всякому духу (л. 541 об.) [1980] веруйте, но искушайте духи, аще от Бога суть, яко мнози лживии пророцы изыдоша в мир. И паки рече: Блюдите [1981] себе, да не погубим, яже делахом добрая. И по мале рече: всяк преступаяй и не пребываяй во учении Христове, Бога не имать. Аще кто приходит к вам и сего учения не приносит, не приемлите его в дом и радоватися ему не глаголите. Глаголяй бо радоватися, сообщается делом его злым.

Такожде [1982] святый апостол Июда, брат Божий, о таковых пророчествова, глаголя: Нуждами бысть писати вам, моля подвизатися о преданей вере святым единою. Привнидоша бо нецыи человецы, иже древле предуста(л. 542)влени [1983] на сие осуждение нечестия, Бога нашего благодать предлагающе в скверну. Вы [1984] же, возлюблении, поминайте глаголы преждереченыя от апостол Господа нашего Иисуса Христа, зане глаголаху вам, яко в последнее время будут ругателие, по своих похотех ходяще и нечестиих и суть телесни духа не имуще.

Такожде и божественный Павел апостол пророчествова о таковых, глаголя: Дух [1985] же явственне глаголет, яко в последняя времена отступят нецыи от веры, внемлюще духовом лестчим и учением бесовским, в лицемерии лжесловесник, сожженых своею совестию. И инде той же святый апостол глаголет: Блюдитеся [1986], да никто же вас будет (л. 542 об.) [1987] прелщая хитростию и тщетною лестию по преданию человеческому, по стихиам мира сего, а не по Христе Иисусе. Блюдите [1988], како опасно ходите, не яко немудри, но яко премудри, искупующе время, яко дние зли суть. Сего ради не бывайте безумни, но разумевающе, что есть воля Божия. И паки той же глаголет: В [1989] последняя дни настанут времена люта, будут бо человецы самолюбцы, сребролюбцы, величави, горди и прочая. Имуще образ благочестия, силя ж его отметающесь и сих отвращайся. Буих [1990] же и ненаказаных ж отрицайся. И паки той же рече: Будет [1991] бо время, егда здраваго учения не послушают (л. 543) [1992] и от истины слух отвратят и к баснем уклонятся. И паки инде речеся: Аще [1993] ли инако учит, не приходити ко здравым словесем Господа нашего Иисуса Христа и еже по благочестию и учению разгорде, ничесо ж сведый, но болезнь о взысканиих и любопрениих, от них же бывает зависть, рвение, хула, мнения, лукава прихождения растленых человек умом и отчюжденых от истины, мнящих приобретение быти благочестие, отступай от таковых. Тем же убо, братие, стойте и держите [1994] предание, яже научитеся, или словом, или посланием, которое бо, рече, причастие свету ко тме и правде и беззаконию. И прочее. (л. 543 об.) [1995] Да [1996] никто же вас льстит тщими словесы, сих бо ради грядет гнев Божий на сыны непокоривыя. И паки той же апостол глаголет: Молю ж вы, братие, блюдитеся от творящих распря и раздоры чрез учения, ему же вы научистеся, и уклонистеся от них, тако вси бо Господеви нашему Иисусу Христу не работают.

Якоже [1997] молих тя пребыти во Ефесе, идый в Македонию, да запретиши неким не учити инако, ниже внимати баснем и родословиям безконечным, яже стязание творят, нежели Божие строение еже в вере. От них же нецыи, заблудивше, уклонишася в суесловие, хотяще быти законоучители, не разумевающе ни яже, глаголют, (л. 544) [1998] ни о них же утвержают.

Сея [1999] же ради вины обличай их безщадно, да здрави будут в вере, не внимающе июдейским баснем, ни заповедем человеческим, отвращающим от истины. Вся бо чиста чистым, оскверненым же и неверным ничто же чисто, но осквернися их и ум и совесть. Бога исповедают ведати, а делы отмещутся Его. Мерзцы суще и непокориви и на всяко дело благое неискусни. Буих [2000] же стязании и родословия и сваров законных отступай, суть бо неполезна и суетна, ведый, яко развратися таковый. И [2001] яко не искусиша Бога имети в разуме, предаст их Бог в неискусен ум творити неподобная. (л. 544 об.) [2002] Елма [2003] любовь не прияша истинную спастися им, сего ради посла им Бог действо прелести, воеже веровати им во лжу. Воеже [2004] исполнитися им грехи всюду, постиже же на ня гнев до конца, да суд приимут вси неверовавшии истине, но благоволиша о неправде. Несть [2005] праведен никто ж, несть разумаваяй, несть взыскаяй Бога, вси уклонишася вкупе и непотребни быша, несть творяй благостыню, несть до единаго. Гроб [2006] отверст гортань их, языки своими лщаху. Яд [2007] аспидов под устнама их. Их [2008] же уста клятвы и горести полна суть. Скоры [2009] ноги их пролияти кровь, (л. 545) [2010] сокрушение и озлобление на путех их и пути мирна не познаша. Несть страха Божия пред очима их, несть разньствия, вси бо согрешиша и лишени суть славы Божия.

Не [2011] разумеюще бо Божию правду и свою правду ищуще поставити, правде Божии не повинушася, якоже есть писано [2012]. Дасть им Бог дух умиления, очи не видети и уши не слышати, даже до днешняго дне. И Давид глаголет: Да помрачатся очи их, еже не видети. Всегда [2013] учащеся и николи ж в разум истины приити могуще, якоже и Ананий и Амврий противистася Моисею, такожде и сии противляются истине. Человецы разтлени (л. 545 об.) [2014] умом, безумие бо их явлено будет всем, якоже и онех бысть. На [2015] таковых непокоривых и противящихся закону и заповедем Божиим сам Господь Бог грозится, глаголя: Аще не послушаете Мене и не сотворите повелений Моих и сопротивитеся Мне, и судом Моим не угодит душа ваша, якоже не сотворити вам всех заповедей Моих, яко разсыпати завет Мой, елико Аз заповедах. Приидут на тя вся клятвы сия и постигнут тя, и проклят ты будеши во граде и проклят ты на селе, и прокляты гумна твоя и прочая твоя, прокляты племена утробы твоея и жита земли твоея (л. 546) [2016] и стада волов твоих и паствы овех твоих, и проклят ты, егда входиши, и проклят ты, внегда исходиши.

Тако и святый Исаия Божиим словом глаголет: Се [2017] Господь разсыплет вселенную и опустошит ю и открыет лице ея и расточит живущия на ней, понеже преступиша закон и измениша заповеди и разрушита завет вечный. Сего ради проклятие пояст всю землю, яко согрешиша живущии на ней. И ин пророк рече: Проклят [2018] человек, творяй дело Господне с небрежением. И паки Малахия пророк глаголет [2019]: Аще не услышите и аще не положите на сердцых ваших дати славу имени Моему, глаголет (л. 546 об.) [2020] Господь Вседержитель, послю на вы клятву и проклену благословение ваше. И разумеете, зане Аз, Господь Бог, послах к вам заповедь сию, быти завету Моему. И божественный Давид глаголет: Прокляти [2021] уклоняющиися от заповедей Твоих. И [2022] возлюби клятву, и приидет ему, не восхоте благоговения, и удалится от него, и облечеся в клятву, яко в ризу. Не [2023] любяй Мене и словес Моих не соблюдает. Иже [2024] не любит Господа Иисуса, да будет проклят. Всяк [2025] преступаяй и не пребываяй во учении Христове, Бога не имать. И Господь наш Иисус глаголет: Отъидите [2026] от Мене, проклятии во огнь вечный, уготованный (л. 547) [2027] диаволу и аггелом его.

Тако и апостол глаголет: Но [2028] аще мы или ангел с небесе благовестит вам, паче еже благовестихом вам, проклят да будет, якоже предрекохом и ныне паки глаголю: Аще кто вам благовестит, паче еже приясте, проклят да есть. Земля [2029] бо пившая сходящаго на ню множицею дождя и раждающи былия добра о Нем, их же ради и делаема есть, приемлет благословение от Бога. А износящая тернии и волчец непотребна есть и клятвы близ, ей же кончина пожжение. И Петр верховный глаголет: Клятвы чада, оставльше правый путь, заблудиша.

(л. 547 об.) [2030] Всех святых апостол купно два правила, правило 1-е.

Койждо [2031] в даном ему чину да пребывает и не преступайте заповедей, не суть бо наша, но Божия. Якоже рече Господь: Слушаяй [2032] вас, Мене слушает, и слушаяй Мене, слушает пославшаго Мя, и вас отметаяйся, Мене отметается, и Мене отметаяйся, отмещет пославшаго Мя.

Святаго Вселенскаго 2-го собора правило 1-е.

Еже [2033] в Никеи святых отец твердо да держится и пребывает, реченая же и писаная на ню от еретик, и еретики да будут прокляти.

Святаго Вселенскаго 3-го собора правило 6-е.

(л. 548) [2034] Мирский [2035] человек не причастен, иже противится собору, аще ж причетник, да извержется.

Толкование.

Иже святии отцы на Ефесском соборе заповедаша и повелеша, аще сия покусится кто превратити или весма преложити, аще есть епископ или причетник, своего степене отнюдь да отпадет. Аще ли есть мирский человек, да будет отлучен.

Того же святаго собора правило 8-е.

В [2036] коейждо области сущу епископу, иже суть под нею, правды да соблюдаются чисто и неподвижно. Аще же уставу сему противно вводит кто, всуе тружается.

Толкование.

(л. 548 об.) [2037] Елико же епископ от иныя области отъяша что и под свои руце взяша, еже не бе исперва под ними, или село, или виноград, или землю, или ино что, еже от иныя епископии восхитиши, ничто же от того своего да сотворят, ни да удержат, но да возвратят вскоре во епископию, под ним же беша и прежде была, яко чисто и неподвижно блюсти подобает, коеяждо области сущая под нею стяжания, да не бы есть мирския власти изветом святитетльства влезет в ня. Аще ли устав ин введет кто, повеленым на сем соборе противу глаголя и боряся, ничто же успеет, но всуе тружается.

(л. 549) [2038] Святаго Вселенскаго 4-го собора правило 1-е.

Святых [2039] отец правила на коемждо соборе изложеная, даже и доныне да держатся твердо.

Се разумно правило. Святаго Вселенскаго пятаго собора.

Аще [2040] кто и сану преобидев начнет или суды восхощет церковныя и оправдания или привлачаща насилием епископа или попа или диакона или просто рещи всякаго священническаго и монастырем даное, граблением и насилием дея и отъимая от них все даемое Христови, да будет проклят.

Святаго собора Карфагенскаго правило 114.

Иже [2041] проповедает яко кроме благодати Божии может творити (л. 549 об.) [2042] заповеди Его, но с трудом, да будет проклят. Без [2043] Мене бо, рече Господь, не можете творити ничто же.

Того же святаго собора правило 115.

Богословцу [2044] глаголющу: Аще речем, яко греха в нас несть, себе прелщаем [2045] и истины в нас несть. Развращая убо яко не по истине, но смиреномудрием речено есть се, да будет проклят.

Толкование.

Понеже вси во гресех есмы и никто же чист от скверны, аще и един день живота его есть, проклятию есть повинен глаголяй смиреномудрием, а не по истине. Апостол Иоанн рече се: Аще речем, яко греха в нас несть, себе соблажняем, аще бо смиреномудрием (л. 550) [2046] се рекл быв, не бы рекл себе соблажняем, но рекл бы, яко себе возносим. Он бо себе соблажняет иже прелщается и лжет. Глаголяй же истину не соблажняется.

Святаго Вселенскаго 6-го собора правило 1.

Апостолская [2047] вера непреложна и яже в Никеи святых отец цела да пребывает, иже Ариево веление низвергоша, степени вводящее Божеству, единосущия ради.

Толкование.

Собор при Иустиниане Корконосом собравыйся и апостолских и прежде его бывших шести соборов и поместных девяти сих всех правилом твердо пребывати повелев и непреложно и непревратно хранимы (л. 550 об.) [2048] быти, изложи же и учиненая зде правила на исцеление душам и на врачевание страстем. И первое зде апостолских правил предание утвержает, потом же и Вселенских и поместных соборов священная правила запечатлевает.

Святаго Вселенскаго 7-го собора правило 1.

Святая [2049] правила целующе [2050] приемлем и держим святых апостол и шести Вселенских соборов, к сим же и поместных, и еще же и святых отец наших, яко единаго Святаго Духа вдухновенна, их же прокляши, проклинаем, их же извергоша, изметаем, и их же отлучиша, отлучаем, и им же запретиша, запрещаем.

Ин перевод.

(л. 551) [2051] Иже священнический [2052] получивше сан, ведения же и правления канонных повелений, си [2053] есть воображения, яже приемлюще радостно, с богоявленным Давидом поем Владыце и Богу, глаголюще: На пути свидений Твоих насладихся, яко в богатстве мнозе. Заповедал еси правду свидения Твоя, Владыко, вразуми мя, и жив буду. И вовеки пророческий глас заповедает хранити заповеди Божия и жити в них. Яве непоколеблемы и недвижимы пребывают, якоже Боговидец Моисей рече: В них же несть приложити и от них несть отъяти. И божественный Петр [2054], в них хваляся, вопиет: В ня же желают ангели (л. 551 об.) [2055] приникнути. И Павел: Аще [2056] и ангел благовестит вам паче преданаго, проклят да будет. Сим сице сущим и свидетельствующим нам радующимся о них, якоже кто обрящет корысть многу, сладкобожественныя каноны утвержаем и цело пребывание их неподвижимо утвержаем, заповеданых от святых духовных труб прехвалных апостол и шести святых всея Вселенныя собор и поместных собравшихся поданием, тако в них повелений святых отец наших. От единаго бо вси Святаго Духа озарени бывше, повелеша яже на ползу, и их же проклятию предаша, и мы проклинаем, (л. 552) [2057] и их же извержению и мы извергаем, и их же запрещению и мы запрещаем, и их же отлучению и мы отлучаем. Не [2058] сребролюбен имуще нрав, но доволни сущими, иже возшедый на третие небо и слышав неизглаголанныя глаголы, Павел божественный апостол яве вопиет.

От послания ко Еулогию Александрскому.

Аще [2059] кто от исправления и утверженых богоносныма отцы подвигнет что, к тому таковаго несть, како нарещи строением, но преступление и попрание повелений и к Богу нечестие.

От заповеди благочестиваго великаго царя Константина.

Аще [2060] ли ж кто силою или неверием преобидник будет о сих, вечными да объят (л. 552 об.) [2061] будет осуждении, и онех да подпадет томлением и обрящет тогда сопротивных святых Божиих и началных апостолов Петра и Павла и в настоящем убо житии и в будущем, и да в преисподнем аде мучен будет, да исчезнет со диаволом и со всеми нечестивыми.

От устава великаго князя Владимира, крестившаго Рускую землю.

Аще кто уставление мое порушит, или сынове мои, или внуцы мои, или от рода моего кто, или от бояр кто, а порушит мой ряд и вступятся в суды митрополичьи, что есмь дал митрополиту и церкви, и епископиям по всем градом, по правилом святых отец судивше, (л. 553) [2062] казнити. А кто имется в тыя суды церковныя вступатися, христианское имя не наречется на том, а от святых отец 318 да будет проклят. Аще ли по сих кто не устрашится и не убоится и суд Божий преобидит, на таковых тако глаголет Господь Бог: Аще [2063] не послушасте Мене и не сотвористе повелений Моих сих и сопротивистеся Мне, и судом Моим не угодит душа ваша, якоже не сотворити вам всех заповедей Моих, и яко разсыпати завет Мой, и Аз сотворю сице вам и приставлю на вы неимение и раны и красты, вреждающи очи ваши и душу вашу сушащу, и всеете вотще семена ваша, (л. 553 об.) [2064] изъядят бо его сопостати ваши, и отпру лице Мое на вас, и падете пред враги вашими, и поженут вы ненавидящии вас, и пробегнете никим же гоними. И аще до сего не послушаете Мене, и приложу наказати вы вред за грехи ваша, и сокрушу укоризну презора вашего, и положу небо вам аки железно и землю вашю аки медыну. И не даст земля ваша семяни своего и будет вотще крепость ваша. И аще сим не накажитеся и поидете ко Мне в неправде, и поиду и Аз противу вам в ярости Моей со рвением, и погублю вы Аз седмижды грех ради ваших, и наведу на вы меч, мстяй суда заветнаго, и вбегнете во грады ваша, пущу на вы (л. 554) [2065] смерть и впадете в руце враг ваших, и разсыплю вы во вся языки, и потребит вы приходяй меч, и будет земля ваша пуста, и гради ваши будут пусты, и вы будесте в земли враг ваших и оставлшим от вас вложу страх в сердца их, в земли враг их и поженет их глас листа летяща, и пробегнут яко бежащии от рати, и падут никим же гоними, и презрит брат брата, аки на рати никим же гоними, и не возможете сопротивитися врагом вашим, и погибнете во странах, и потребит вы земля враг ваших, и оставлшии от вас истлеют за грехи их. Сего ради яко презреша суды Моя и по(л. 554 об.)веления [2066] Моих вознегодоваша душа их, и послет тебе Господь недостаток и алкание, и потребление на все, на нем же возложиши руку свою, и елико аще сотвориши дондеже потребит тя и дондеже погубит тя вскоре злых ради дел твоих, понеже оставит Его. Прилепит Господь к тебе смерть, дондеже потребится от земли, побиет тя Господь неимением и молниею и зимою и варом и убоем и ветры тленными и бледостию и поженется, дондеже погубится. И [2067] будет небо над главою твоею медяно и земля под тобою железна, даст Господь дождь земли твоей прах, и перст с небеси снидет (л. 555) [2068] на тя, дондеже сокрушит тя, дондеже погубит тя. Даст тя Господь на изсечение пред враги твоими, путем единем изыдеши к ним, а седмию пробегнеши от лица их, и будеши в разсыпание во всех царьствех земных, и будут мертвецы ваши пища птицам небесным и зверем земным и не будет отгонящаго. Побиет тя вредом египецким в седалех и крастами дивиими и гноем, яко не мощи тебе исцелитися. Побиет тя Господь неистовством, смятением сердца и неведением и ужаснением разума, и будеши осязая в полудни, якоже осязает слепый во тме и не улучити путий своих, и будеши (л. 555 об.) [2069] тогда обидим и разхитаем во вся дни, и не будет помогая тебе. Жену обручиши и ин муж поимет ю, дом соградиши и не поживеши в нем, виноград насадиши и не объемлеши его, вол твой заклан пред тобою, и не яси от него, и осля твое отъято от тебе и не возвратится к тебе, овцы твоя отданы будут врагом твоим, и не будет тебе помогающаго. Сынове твои и дщери твои отданы будут языку иному, и очи твои, зряще, изыдут в ня, и не возможет рука твоя, возраст земли твоея и всяк труд изъяст страна, ея же не веси, и будеши обидим и сокрушен по вся дни, и будеши (л. 556) [2070] исполнен печали, видения ради очию твоею, яже узриши.

Побиет тя Господь вредом злым на коленох и на голенех, яко не мощно исцелитися тебе, от стопы ногу твоею даже до верху главы твоея. И отведет тя Господь и князи твоя, яже поставиши себе, во страну, юже не ведяше ты, ни отцы твои, и послужиши тамо Богом инем, древу и камению, и будеши тамо в позор и на притчю и повесть всем странам. Семя [2071] много изнесеши на поля, а мало взнесеши, яко поядят я прузи, вся древеная твоя и вся жита земли твоея потребит ржа. И приидут на тя вся клятвы сия и поженутся (л. 556 об.) [2072] постигнут тя, дондеже потребят тя, дондеже погубят тя, яко не послуша гласа Господа Бога своего, снабдети заповеди Его и оправдания Его, елико же есть заповеда тебе. И послет Господь Бог твой на тя со гладом и жаждею и наготою и со оскудением всем, и возложит ярем железен на выю твою, дондеже сокрушит тя, и не будет уставления плеснома твоима, и даст тебе Господь сердце горюще и очи скудни и изхнущую душю. И будет житие твое яко вися пред очима твоима, и убоишася во дни и в нощи, и не будет ти известно житие твое. Заутра речеши, како быти вечеру, (л. 557) [2073] и вечер речеши, како быти заутра от боязни сердца твоего. Бояшеся, убоишися от видения очию твоею, их же узриши.

Яко же и Давид святый глаголет: Аще оправдания Моя осквернят и заповеди Моя не сохранят, посещу жезлом беззакония их и ранами неправды. И инде рече: Да исчезнут грешницы от земли и беззаконницы, яко не быти им. И паки: Беззаконницы же потребятся вкупе и семя нечестивых потребится. И приточник глаголет: Путие [2074] нечестивых от земли погибнут, законопреступницы изринутся от нея. И паки: Оружие [2075] свое очистит, лук свой напряже и уго(л. 557 об.)това [2076] и, и в нем уготова сосуды смертныя, стрелы своя со горящими содела. Понеже [2077] звах, и не послушасте Мене, простирах словеса и не внимасте, но отметасте Моя советы и Моих обличений не внимасте. Тем же и Аз вашей погибели посмеюся, порадую же ся всегда, аще приидет вам погибель или яко молва на вы внезапну разорение подобно бури приидет или егда вам приидет печаль и граду обстояние. Будет бо егда призовесте Мя, Аз же не послушаю вас, взыщут Мене злии и не обрящут, возненавидеша бо премудрость и страха Господня не изволиша. Не хотяху бо внимати Моих словес, подражняху бо Моя (л. 558) [2078] обличения, тем же, убо сведят своих путий плоды и своея нечести насытятся. Тако и Исаия глаголет: Яко [2079] звах я, и не послушаша мене и сотвориша злое предо мною, его же не восхотех изволисте.

Сего ради тако глаголет Господь: Се работающии Ми наядятся, вы же взалчете. Се работающии Ми напитаются, вы же вжаждете. Се работающии Ми возрадуются, вы же посрамистеся. Се работающии Ми возвеселятся в веселии сердца, вы же возописте в болезни сердца вашего и сокрушения духа восплачитеся. Останет бо имя ваше в насыщение избраным Моим, вас же избиет Господь. Сего ради тако рече Господь: Се ярость (л. 558 об.) [2080] Моя и прогневание Мое собирается на место то, на мужи и на скоты и на древо страны и на плод земный и возжется и не угаснет. Сия рече Господь силе Израилеве. И паки Исаия [2081] рече: О людие [2082] странно грешна, людие полно грехов, племя злое, сынове беззаконнии, остависте Господа и разгневасте святаго Израилева, обратистеся вспять, что и еще уязвляется, прилагающе беззакония: всяка глава в болезнь и всяко сердце в печаль. От ногу и до главы несть в нем целости, ни сатрупу, ни язве, ниже ран гниющих, несть пластыря приложити, ни масла, ни обязания. Земля ваша пуста, гради ваши огнем пожжени, страну вашю пред вами (л. 559) [2083] чюждии поядают и опустеет разсыпана, яко в разсыпании враг. Плачите [2084], рече, и рыдайте, иже несть обращен гнев ярости Господня от вас. И будет в день той, рече Господь, погибнет сердце царево и сердца началником, и ужаснутся священницы, и пророцы мыслию вознесутся и рекох: Ох, ох, ох, Господи Боже, еда оболстил еси люди сия. Мир будет вам, и се прииде меч и смерть. И паки ин рече: Рыдайте [2085], близко есть день Господень и сокрушение от Бога приидет. Сего ради рука разслабеет и всяка душа человеча убоится, и смятутся послы, и болезни приимут я, яко жене раждающи, и поскорбят друг ко другу и ужаснутся, лице их яко пламы пременят. Се бо день (л. 559 об.) [2086] Господень без целбы грядет ярости и гнева. Положити всю вселенную пусту и грешники погибнут от нея. И рекох: доколе, Господи? Рече ж: Дондеже опустеют города невселением и домове небытием человечим и земля останет пуста. Не [2087] восхотеша бо закона Господа Саваофа и слово святаго Израилева прогневаша. И возъярися Господь Саваоф гневом на люди Своя, и положи руку Свою на них, и порази их, и разгневася на горы, и быша мертвецы их яко гной посреде пути, и во всех сих не отвратися ярость Его, но и еще руку Его высока. И [2088] аще рекут к Тебе, Господи, изыдем. Речеши к ним: Сия рече Господь, иже к смерти, к смерти, иже к мечю, к мечю, (л. 560) [2089] иже к гладу, к гладу, иже к пленению, к пленению, и посещю на тех четырми образы. Рече Господь: Меч на заклание, пси на растерзание и птицы небесныя и зверие земли на пожрение и на расхищение. И дам их в погибель всем царьством земным, и не оплачются, ни погребутся, во смятении на лицы земли будут. Понеже взях мир Мой от людий Моих, рече Господь, милости и щедроты, и умрут велицы и мали и не изломят между их стенящих хлеба ко утешению над мертва, и не дадут им пития чаши, ко утешению отца своего и матере. Рать [2090] извну с мечем, глад же и смерть изнутри, иже на поли, мечем скончается, сущих же во граде (л. 560 об.) [2091] глад и смерть скончает. Поищеши мира, и не будет, люто долю та будет, и весть до вести будет. Царь возсетует, и князь облечется в пагубу, и руки людий разслабеют. По путем их сотворю им, суды их отмщу им, и разумеют, яко Аз Господь. И [2092] будет бежай страха, впадется в пропасть, и излазя ис пропасти, имется в пругле, яко дверие с небесе отверзошася и потрясутся основания земная. Мятежем возмятется земля, преклонит и потрясется земля, аки куща ограды, и аки пивый пьян, сый падется и не возможет стати, соодоле бо им беззаконие.

Таковых зол плачется божественый (л. 561) [2093], глаголя: О люте мне душе, яко погибе боязливый со земли и исправляющаго в человецех несть. Вси в кровех прятся, койждо их по другу своему зазлят, на злобу руце их уготовляют. Князь просит, а судии мирная словеса глагола, а помысл души его лесть. И отъиму благости их, яко моль ядяй, и ходяй во вреде в день присещения. О люте, о люте, отмщения Твоя приспеша. Ныне будут плачи их, не уповайте во друзех, ни надейтеся в старейшинах. Вскую [2094] мне указа труды и болезни, усмотрити страсти и безчестия, противу мне бысть суд и судии вземлет. Сего ради разсыплется закон и не изводится до горшения суд, (л. 561 об.) [2095] яко нечестивый преобидит правдиваго, сего ради изыдет суд укривлен.

Видите [2096], обидливии, смотрите и чюдитеся, и узрите, и исчезнете, яко дело Аз соделаю во дни ваша, ему же не имати веровати, аще кто исповесть вам. Тако [2097] и во священном Евангелии пишется о нехранящих заповеди Господни. Он же раб, ведый волю Господина своего, и не сотворь, ниже уготовлся к хотению Его, биен будет много. И паки инде речеся: Не покаряяй же ся Сыну, не узрит жизни, но гнев Божий пребывает на нем. И паки инде рече: Аще речет раб он в сердцы своем, коснит Господин мой приити, и начнет бити рабы и рабыня, ясте же и пити (л. 562) [2098] и упиватися. Приидет Господин раба того в день, в онь же не чает, и в час, в онь же не весть, и разсечет его пол и часть его с неверными положит.

Такожде Господь и о лукавых приставниках, то есть царех, и о судиах неправедных, иже приемше талант, то есть власть, и не по святым законом суд судят, но по своему изволению, якоже написавый суд их показует беззаконие их, по писаному рече: Рабе лукавый, от уст твоих сужду тя. И прочее, иже зде притча Христова явнее покажет. Человек [2099] некий добра рода иде на страну далече прияти себе царьство и возвратитися. И граждане Его, ненавидяху Его (л. 562 об.) [2100] и послаша молитву во след Его, глаголюще: Не хощем Сего да царьствует над нами. И бысть, егда возвратися, приим царьство, рече: Пригласити рабы, обаче враги Моя оны, не хотевшая Мне, да Царь бых был над ними. Приведете семо и изсецете предо Мною. Тако и тем всем сотворит Господь, иже ныне отметаются Божественых Его заповедей и суда в день Судный, по заповеди, глаголющей: Отметаяйся Мене и не приемляй глагол Моих имать судящаго слово, еже заповедах, то судит ему в последний день. Тако и иже отметающиися святых пророк и святых апостол и святых отец и благочестивых царей заповедей и канонов.

Ину [2101] притчю слышасте. Человек некий (л. 563) [2102] бе домовит, иже [2103] насади виноград и оплотом огради его, и ископа в нем точило, и созда столп, и вдаст делателем и отъиде. Егда же приближися время плодом, посла рабы Своя к делателем прияти плоды Его. И емше делатели рабы Его, ового убо биша, ового же убиша, ового же камением побиша. Паки посла ины рабы множайша первых, и сотвориша им такожде. Последи же посла к ним Сына Своего, глаголя: Усрамятся Сына Моего. Делателие же, видевше Сына, реша в себе: Сей есть Наследник, приидите, убием Его и удержим достояние Его. И изведоша вон из винограда и убиша. Егда убо приидет Господин винограда, (л. 563 об.) [2104] что сотворит делателем тем? Глаголаша Ему: Злых зле погубит, и виноград предаст инем делателем, иже воздадят Ему плоды во времена своя.

Разуместе ли божественную притчю Христову, кто есть Человек нецый? Сам святый Господь Бог. Кто ли делателие? Израилтяне. Кто ли рабы? Пророки, посланыя к ним, их же оваго убо биша, якоже Иеремию, оваго же убиша, якоже Исаию, оваго же камением побиша, якоже Навуфея и прочия. Что же ли сотвори тем дому Владыка, то есть Господь Бог? Злых зле погуби, то есть живот. И где есть тех царьство, но все тако исполнися, якоже пророки прорекоша (л. 564) [2105] роду тому лукавому, о нем же Исаия прорече: Виноград [2106] бысть возлюбленному на холме, на месте блазе, и ограждением оградих, и уколих, и насадих лозу избрану, и создах столп среди его, и предточилие ископах в нем, и ждах, да сотворит гроздие, сотвори же терние. Ныне убо возвещу уже вам, что сотворю винограду Моему, отъиму ограждение, и будет на разграбление, и разорю стену его, и будет в попрание. Тако бысть. Тако ж и ины многи рабы посла, святыя апостолы и учителие множайша первых, их же делателие не послушаша и сотвориша такожде, якоже Предтечю Иоанна усекну Ирод, и Петра и Павла Нерон (л. 564 об.) [2107] и инех инии. Что же сотворивому Владыка? Не се ли? Злых зле погуби и виноград предаст инем делателем, тако и по сих Гречестии царие и инех царьств мнози, елицы пожиша по Божественым заповедем и святыя преданыя правила святых апостол и святых отец сохраняли, в мире скончалися и Царьствию Небесному наследницы быша. А елицы беззаконно согрешиша, беззаконно и погибоша, и царьства их запустеша.

Не сия ли вся збышася на нас по писаному: Соберу на них злая, и стрелы Моя скончаю в них. И по мале.

Не сия ли вся собрашася у Мене и запечатлешася в сокровищих Моих? В день отмщения воздам, (л. 565) [2108] во время, внегда соблазнится нога их, яко близ день погибели их. И предстоят готовая вам, яко поострю яко молнию меч Мой и приимет суд рука Моя, и воздам месть врагом и ненавидящим Мя воздам. Упою стрелы Моя от крове, и меч Мой снесть мяса. Тогда увидите, яко Аз есмь Бог и несть разве Мене.

Не тако ли все, елико вышеписаная на нас збышася? Не быша ли морове велицы во царьствующем граде Москве и во всех градех лютою язвою и неисцелною? Не возбоя ли ся сердце царево, егда мору бывшу, царице же на Москве со царевичем Алексием и со царевнами, и не веде, что сотворити и камо бежати? Не бысть ли (л. 565 об.) [2109] князи в пагубу, якоже князь Михаил Пронской с товарыщи, в мор на Москве умре? И от всенароднаго множества не ослабели всяка рука, якоже князь Алексием Трубецким товарыщи два князь Семен Пожарской и Львов и прочие. И елико со инеми воеводы, с Васильем Шереметевым и князь Иваном Хованским коликия тмы скончашася мором по градом и по селом и по деревням и на войне, не убояша ли ся всяка душа человечья? Не смятоша ли ся послы, от царя посылаеми до Москвы в мор и от Москвы до царя? Не прияша ли болезни, яко жена рождающая? Не поболеша ли друг о друзе? Не ужаснуша ли ся ужасом великим? (л. 566) [2110] Не быша ли лице их яко пламы? Не быша ли день Господень без целбы полн ярости и гнева? Не положи ли Господь Москву и окрестныя грады пусты? Не погуби ли грешники от них? Не разшири ли ад души своея и не разверзе ли уст своих? Не снидоша ли славнии и велицый, богатии и нищии, о них же множестве несть время зде и списати? Их же число един Господь Бог весть. Не все ли се быша по писаному: Псом и свиниям на разтерзание, птицам небесным и зверем земным на пожрение и разхищение? Кто тех оплака? Кто же ли погребе? Никто же. Не се ли всех отдаде Господь в погибель всем царьством земным, якоже от всех (л. 566 об.) [2111] слышится, от тамо приходящих, яко несть дому во странах поганских, в нем же не бе христиана неволника, то есть полоненника. И сбышася все на глаголющих, иже реша: Да наследим себе святилище Божие. Боже мой, положи я яко коло, яко трость пред лицем ветра, яко огнь, попаляя и дубравы, яко пламень, пожигая и горы. Тако поженеши я бурею Твоею и гневом Твоим смятеши я. Исполни лица их безчестия и взыщут имени Твоего, Господи. Да постыдятся и смятутся в век века, и посрамятся и погибнут, и да познают, яко имя Тебе Господь. Ты един Вышний по всей земли.

(л. 567) [2112] И паки во инем псалме: Бог [2113] отмщений Господь. Бог отмщений не обинулся есть. Вознесися судяй земли, воздаждь воздаяние гордым. Доколе, Господи, грешницы, доколе грещницы восхвалятся? Провещают и возглаголют неправду, возглаголют вси, делающии беззаконие. Люди Твоя, Господи, смириша и достояние Твое озлобиша. Вдовицу и сира умориша и пришелца убиша и реша: Не узрит Господь, ниже разумеет Бог Ияковль. Разумейте же, безумнии в людех и буии, некогда умудритеся, яко не отринет Господь людей своих и достояния своего не оставит. Господь судит людем Своим и о рабех Своих умолится. И [2114] воста, яко спя Господь, (л. 567 об.) [2115] яко силен и шумен от вина, и порази враги Своя вспять, поношение вечное даде им. И смирися человек и обезчестися муж, и очи высокоглядающии обнизитася. Обаче [2116] за лщения их положил еси им злая, низложил я еси, внегда разгордешася. Како быша в запустение внезапу, изчезоша и погибоша за беззаконие свое. И [2117] во всех сих не отвратися ярость Его, но и еще рука Его высока.

Тако и оставшим злотворящим Божественое Писание претит, глаголя: Зане [2118] его же ты поразил еси, тии погнаша и к болезни язв моих приложиша. Приложи беззаконие к беззаконию их, да не внидут в правду Твою, (л. 568) [2119] да потребятся от книг живущих и с праведными да не пишутся.

Ныне же к тебе обращаемся, лжи предтеча, списателю неправде и беззаконию. Ты же ми отвещай. Пишешь в своем сложении на листе 63-м: И по государеву цареву и великаго князя Алексия Михайловича всеа Русии указу бояре князь Никита Иванович Одоевской с товарыщи выписал ис правил святых апостол и святых отец и из градских законов Греческих царей, и из старых судебников прежних великих государей и прочее. И что ис правил выписал, ис которых правил? Се ли, еже пишешь в десятей главе, в первой статие о суде? Суд государя царя и великаго (л. 568 об.) [2120] князя Алексия Михайловичя всеа Русии судит бояром и околничим и думным людем и диаком и всяким приказным людем и судьям и всякая росправа делает всем людем Московскаго царьства от болшаго и до меншаго чину в правду.

Отвещай, в которых то правилех написано, что суд великаго государя царя, а не Божий? Мы же ти рехом выше и ныне глаголем, яко суд Божий есть, и о сем доволно предь написахом. И царие слуги суть Божие, яко же приточник глаголет: Слышисте [2121] убо царие и разумейте, и научитеся судии концем земли. Внушите содержащии множества и гордящиися о на(л. 569)родех [2122] язык, яко дана есть от Господа держава вам и сила от Вышняго, иже истяжет дела ваша и помышления испытает, яко слузи суще Царьства Его, и не судисте право, ни сохранисте закона, ниже по воли Божии ходисте. Тако и Давид галголет: И [2123] ныне царие работайте Господеви со страхом. И прочее. А еже работати Господеви рабство знаменует, и сам о себе глаголет, яко: Аз раб Твой есмь. И инде глаголет: Твой есмь аз, спаси мя.

Ты же како смел еси в своем ложном и проклятом писании в десятей главе в 25-й статье: Да [2124] суда же не судить и никаких дел в приказех не делать, опричь великих царьственных дел (л. 569 об.) [2125] в день Рожества Христова, в день святаго Богоявления и в ыныя Господьския праздники, Сырная неделя, Первая неделя Великаго Поста, Страстная неделя, седмь дней по Пасце, да в которой день приспеет праздник, день рождения государя царя и великаго князя Алексия Михайловича всеа Русии и его благоверныя царицы и великия княгини Марии Ильиничны, и их благородных чад. О пребеззаконниче и злобесный человече, како не устыдеся, ни устрашися? Беси того исповедаху Сына Божия и Бога, глаголаху: Почто еси Сыне Божий пришел еси прежде времени мучить нас? А ты, злострастный человече, не исповеда того Бога быти и Господа (л. 570 ) [2126] нашего Иисуса Христа, аки проста человека, пишешь: В воскресной день, в день Рожества Христова. Ибо Христи мнози, и царие и священницы Христи, то есть помазанники и лжехристи, якоже Иисус Христос глаголет и апостоли: Мнози бо лжехристи изыдоша в мир и антихристи мнози, а Христос Бог наш един есть. Не усохл бы скверный твой язык изглаголати или написати: Рожество Господа Бога и Спаса нашего Иисуса Христа или святое Богоявление Господа Бога и Спаса нашего Иисуса Христа [2127], и ниже праздник нарече, но день. А яже о царе, да в который день приспеет праздник, день рождения государя царя и прочее. Такожде и о царице и о них чадех. Которыя праздники, которое таинство? Развее что любострастно и человеческо, и во всем при(л. 570 об.)подобил [2128] еси человеков Богу, но и предпочтеннее Бога. А яже о таинствах Божиих, то есть о Рожестве Господа Бога и Спаса нашего Иисуса Христа и о Святем Его Богоявлении и Воскресении, послушай богословнейшаго Григория, яже на Пасху в первем слове и стихе.

О Воскресении Господа Бога и Спаса нашего Иисуса Христа.

Воскресения [2129] день и начало дейсно. Просветимся торжеством и друг друга обымем, и рцем, братие, ненавидящим нас, не яко любве ради что сотворшим или пострадавшим, простим вся с покорением, дадим милость друг другу.

Толкование.

Приидите прочее о светлем Празднице сем и торжестве, духовне просветимся, еже одеянии добродетели, (л. 571) [2130] и друг друга приимем, показующе всем любовно и братолюбовно и союзно ко единству, рцем братие ненавидящим нас. Сие пророчества Исаина прият Богослов, глаголющее: Рцыте ненавидящим вас и мерзящим: братия наша есте. Ум же слову сицев есть, яко и тии, иже ненавидят нас. Рцем же, о братие, еже есть, призовем их именем братие. Се убо указ благости произволения, к сим подобает бо и врагом глаголати: о братие.

Таинство [2131] праздник многащи Богослов именует, заеже в сих таинства смотрения спасения нашего чюдеса быша. Таинствия ж суть, заеже суть неверным, ни бо подобает к неверным таинственнейша праздник глаголати и по Владычнем слове: Не лепо (л. 571 об.) [2132] есть просыпати бисер пред свиниами.

И во втором слове на Пасху глаголет.

Пасха [2133], Господня Пасха, и паки реку Пасха, честь Святей Троицы, Ты нам праздником праздник и торжеством торжество, толико превозходящим вся, не человеческия точию, но и низу грядущыя, но уже и тыя Христовы и о Нем сотворяемыя елико звезды солнце.

Толкование.

Праздник же праздником Пасху нарицает и Торжество торжеств, яко и Святейший праздник. Тако обычай убо имяху и древнии, яже честнейшая вещей сице именовати, юножска и брачна и населна, по ветхих творяще та глаголаху. Праздноваху тий день той, егда дитя раждашеся или брак творяху или храм созидаху, летному кругу день (л. 572) [2134] носящу, якоже святая святых, и песни песней. Аще не убы было воскресние, не бы и рождество, ниже крещение, ниже и на Христова таинства хотяхуся известити и уверити. Кои же человечестии праздницы, по некоих убо праздницы святых? Поистине же, яже юношска и брачна и населна и елика сим подобна. Таковыи праздницы низу грядут доле и на землю возвращаеми. Святых же праздницы к Богу возносятся и восходят. Не точию человеческия праздники праздник Пасха побеждает и превосходит, но и самыя Христовыя толико покрывает, елико и звезды солнце. Сице пресветляется дне благодать. Прочее ж о Воскресении Христа Бога нашего торжестве и таинстве насладитися, прочти первое (л. 572 об.) [2135] и второе слово на Святую Пасху.

А яже о Рожестве Господа Бога и Спаса нашего Иисуса Христа, никоторые чести творя, пишешь. Послушай того ж богословнейшаго во осмом слове, яже на Рожество Христово.

Христос [2136] раждается, славите, Христос с небесе, срящите, Христос на земли, возноситесь. Пойте Господеви вся земля и да обоя совокуплше, реку: Да веселятся небеса и радуется земля за небеснаго таж земленаго, Христос во плоти, трепетом и радостию радуйтеся, трепетом греха ради, радостию же аз упование. Христос от Девы, жены девствуйте, да Христу будете матери. Кто не поклоняется Исконному, кто не славит Безконечнаго и прочее. Сего [2137] ради убо празднуем не торжественне, но божественне, не мирски, (л. 573) [2138] но премирне, не нашая. Не яже немощи, но яже врачевания, не яже зданию, но яже обновлению, будет же се како не преддверия венчаим, не лики составим, не украсим стогны, не око упитеим, не слух огласим, не ухание возвеселим, не вкус любодействуим, не осяжением порадуемся предручными в злобу путевы и входы греха, не одеянием умягчимся, мягким же и растлевающим и ему же добрейшее непотребство, не каменей прозрачием, не злата светенми, не румянством пред бренми лстящих естественную доброту и на образ умышленных, не игры и пиянствы, им же лжа и нечестна вем сопряжена, понеже злых учителей зла учения, паче ж злых семян злы плодове.

Толкование.

(л. 573 об.) [2139] Сего ради убо празднуем, рече, не яко обычай в людских торжествах, пищею и гощением и того красованием, но яко любезно есть Богови и духовно. Не мирски, рекше сластолюбиве, и якоже миродержец хощет, но премирне и ангелски, не нашая, рекше ко угождению нашему, но яже ко угождению Христову, нашему сроднику по человечеству, Владыце же по Божестве, не яже немощи, но яже врачевания. Подобает убо подобне празднику праздновати и аще убо празднуем, от них же изнемогохом, подобаше праздновати пиянством, немощь бо пиянство и блудство. Елма же сопротивно творим и празднуем, ими же уврачевани быхом, праздновати достоит воздержанием, якоже врачевание (л. 574) [2140] воздержание к душевному врачевству сосвязуя, не яже здания, но яже наздания и обновления, при телеснем убо рождестве телесна вся, и здание и еже того ради торжество. Назданию же духовну сущу и божественну духовне и божественне достоит торжествовати. Здание убо зде не первее глаголет, в ня же Христос перст взем от земли, рукама Своима человека вначале созда, но рождеством друг друга приятием, им же создаемся человецы естественне в материих ложеснах. Будет же се како и коим образом исправити имамы, убеждаеми, еже торжествовати духовне, рекше не ветвьми садовными, еже обыкоша нецыи творити в праздники, венчанми и преддверия, ниже еже (л. 574 об.) [2141] разливателное и радователное, лики составим вне церкви, ниже еже людско вяще есть, украсим стогны, повешающе всякия виды сокровищ ко украшению грядущих на торжество, ниже еже есть страстнейше очи упитем безместны чюдодейств указанми или телесне воззренми, сласти жало влагающих, питение бо и наслаждение очима, еже пытливе зрети ни в чесом прикладная по всем. Начен же Богослов и считати, чювствия пять глаголет. И первие убо царьственнейше зрение, по нем же слух повелевает не ушима растлевателно пение душ удержавати, не свободна бо страсть и охуждение от таковаго, (л. 575) [2142] нецый бо убо от свирепения неистовствуются и скачют, яко беснуеми являются. Возвеселяет и разслабляет обоняние, воня добрых благоуханий, блудим же вкусом, егда сластем пищ едамы той. Радость же осязания, рекше красования, еже страстне телес прикасатися и что убо рещи имать кто о еже не подобати, яже во осяжении и вкусе сладости гонити или яко понуждают, иже всия упразднившихся жити якоже скоти безсловесни к чреву и коя же под ним преклоншихся. И просто чювствия не пестуема добре, убодне суть путие в злобу и входы греха, теми бо приидохом в злобу и теми в душю грех. Не одеянием мягким умягчимся, еже (л. 575 об.) [2143] растлевает и в поползновение тело влечет обоима сима, и избыточеством и мягкостию. Сему ж одеяние изрядное, еже деяти тому праздну щажения ради и не в потребу иметись, добрейшая бо одеяния в ковчежце имамы положена непотребна, ниже шар у премудренми да приемлем, подписующе лица псимитом и кмсаром и иными блудническими сотренми, яже лстят естественную доброту, лицемерующе ту уподоблением и на образ умышлена быша. Потребляют бо зраки и скрывают вид, его ж написа естественный живописец Бог, и еще благообразне да ходим, якоже заповелевает апостол, не игранми и пиянствы и не ложи скверными, добре ж совокупи (л. 576) [2144] и пиянствам, ложа и блуды от тех бо раждаются. Играяй бо упивается, упив же ся, к ложу зрит. Сей же блудит вином к беззаконному смешению и сластем, яко бо злии учителие игра и пиянство, научают злым учением, ложу и блуду, паче ж понеже еже учити одушевленых истейше есть. Свойственнейше убо есть глаголати, яко семя убо есть их пиянство, возделание же того и плод блуд.

Паки на Крещение в первем слове пишет сице.

Паки [2145] Иисус мой и паки Таинство, таинство непрелестно, ниже не украшено, ниже еллинская лсти и пиянства. Тако бо аз нарицаю онех честная, мню же и благосмысленых (л. 576 об.) [2146] койждо, но Таинство высоко же и Божествено и вышния светлости Ходатай, святый бо просвещения день, в онь же собрахомся и еже праздновати сподобихомся днесь. И прочее.

Толкование.

Таинство [2147] же Богослов праздник именует не единою же, но многажды, любве ради, якоже и о ненавидимем случается, его же ни помянути хощем отнюдь. Есть бо, рече, Таинство се не лестно, ни ложно, ни пагубно, якоже убо еллинская празднования лестна и ложна, паче же рещи срамна и скверна. Наше же Таинство высоко и безстрастно и ходатайствено вышния светлости. И прочее.

Того ж.

Время [2148] по рождению, родимся свыше, время обновлению, в перваго Адама (л. 577) [2149] облецемся, не пребудем, в них же есмы, но еже бехом будем.

Толкование.

Рождение бывает человеком от человек, порождение же от Бога. Тем же убо отложше плотское рождение, припряженое тлению, породимся свыше от Небесе. Небесно бо есть, еже во крещении Духом Святым бываемо, сим бо и первое рождение поновляем.

Еллинско [2150] таинство, их же блядь мне, всяка треба и таинство бесовско изобретение темно, и мысли и деяния зломудрена, летом помогаемо и баснею крадомо. И прочее.

Вчера [2151] светлый просвещения день праздновавше, ибо подобаше радостна положити спасению нашему и вящше паче брачных и рождественых имени прозвания любо (л. 577 об.) телесным [2152], юностна же и населна и вселетна, и елика ж ина торжествуют человецы днесь о Крещении, в мале да речем, и от того нам сущей благодати, аще и вчера нас слово прейде, времени прешедшу, к сему ж и слова обилие бегающе. И прочее.

Толкование.

Вчера, рече, светлый просвещения день праздновахом, ибо и радоватися подобно бяше о спасении нашем и то праздновати паче, от еже плотолюбцы празднуют день рождения своего, рекше, в онь же родися, и браки, яко оженися, и имянины, егда имя наречено, и постриги, и прочая плотския торжества. Три [2153] убо рождения нам весть Слово, еже от плоти, еже от крещения, еже от воскресения, (л. 578) [2154] сих же ово есть нощно и страстно, ово же духовно и свободно и решително страстем.

Толкование.

Три убо сия рождения, яже глаголет Богослов, праве о сих и Екклесиаст сповествует. Едино от телес, еже друг от друга раждаяхуся [2155], второе от крещения по рождение, третие от воскресения. И еже убо от телес нощно и темно есть, гресно ту бо и сочетание брака паче нощию бывает, яко рабско суще и яко [2156] страстми владомо, от сластолюбия бо брак и сочетание, се бо в беззаконии зачат есмь, и во гресех роди мя мати моя.

Разсмотри, богоборче, яже о праздниках таинства Воскресения Господа Бога и Спаса нашего Иисуса Христа и святаго Его Рождества и святаго просвещения таинства и рождество царьско, (л. 578 об.) [2157] о нем же Давид свидетельствова выше сего, и которое сочетание свету ко тме, по божественному апостолу и правде к беззаконию, еже ты, зломудре, предпочте день рождения царя и царицы и чад их, паче дней таинственных Христовых, глаголю святаго Его Воскресения и Рождества и Богоявления. Ини же праздники тех нарече таинства ради, якоже выше изообрази богословнейший Григорий, но день Рождества Христова и прочая. А яко о царьском рождества праздник и которой праздник или таинство? Разсмотри усердно, и еще ти к сим приложим.

Вси [2158] убо Владычнии [2159] праздницы и божественная торжества таинства показуют и являют перваго (л. 579) [2160] пришествия плотскаго Господа Бога и Спаса нашего Иисуса Христа, сиречь, яко родился есть и яко крестился есть, яко преобразися, яко распялся есть, яко погребеся, яко воскресе в третий день и яко вознесеся.

Всякий [2161] же праздник Владычний и торжество радости духовней возделание душевней светлости и красоте ходатай, церквам украшение и благолепие духовно, небо земное и плод восхождение, прехождение есть от смиренных на высокия и божественная, восхождение от мирских на премирная, от плотских на духовная: от чювственных на разумная, от земных на небесная. Сего ради и мы духовно празднуем и освящением и безстрашием и миром (л. 579 об.) [2162] и совокуплением Богу угодим и пребываем со страхом в песнех и молитвах и молбах и в правдах, и милостыни Бога умоляем, даже от Него богатно дано будет нам вхождение во Царьство Небесное и безконечное и блаженное, идеже празднующих непрестанный глас и неизреченное благодушие и безсмертных благих наслаждение. Духовнии убо праздницы Божественая торжества спасение воистину искупляют душам нашим. И толико болша суть от мирских праздник и торжеств и всех житейских куплей, елико болши есть душа тела и елико болши есть небо от земли и елико болши есть жития сего мимотекуща в будущее, (л. 580) [2163] по святому: Иже око не виде и ухо не слыша и на сердце человеку не взыде, яже уготова Бог любящим Его.

И видел еси посредство божественных духовных праздник, елико от мирских разнствуют, якоже небо от земли. Аще ли сими недоволен будеши, еще и от святых апостолских и святых отец правил приложим.

Сему же подобно обою святую верховную апостолу Петра и Павла правила 1.

Аз [2164], Петр и Павел, заповедуема людем делати пять дней в недели, в субботу же и в неделю да упражняются в церковь поучения ради еже на благоверие. Суббота бо бытия всея твари образ имать, неделя ж Воскресения.

Правило 2.

Великую неделю, сиречь (л. 580 об.) [2165] Страстную, и другую, яже по ней, рекше Святыя Пасхи, да не делают людие, но да празднуют вси раби и свободнии. Оная убо неделя яко Страстей есть Господних, сия же яко Воскресения Его и требе есть поучатись, Кто есть пострадавый и воскрес и свободивый нас.

Правило 3.

Святое Вознесение да празднуем, понеже совершение есть, еже о Христове смотрения.

Правило 4.

Пятьдесятницу да празднуем пришествия ради Святаго Духа, дарованаго во Христа верующим.

Правило 5.

Рождества Христова да празднуют, в онь же в той нечаемая благодать человеком вдана бысть рождением Божия Слова из Марии девицы на спасение миру.

Правило 6.

Богоявления праздник (л. 581) [2166] да празднуют, понеже в той день бысть явление Христова Божества, свидетельствовашу Ему Отцу в крещении и утешителю Святому Духу, в видении голубине показавшу предстоящим Свидетельствованнаго.

Правило 7.

Дни апостолския празднуйте, учители бо вам быша веровати во Христа и Духа Святаго, достойны вас сотвориша. И Стефана Первомученика день празднуйте и прочих святых мученик, почетших Христа паче своего живота.

Сему же подобны и царьския законы и Иустиниана новых заповедей глава 46 лист 384.

Ты убо, неправедный списателю, глаголеши, яко в онь же прилучится праздник рождения государя царя и прочее. А царево рождение не невеси, и яко во святую мученицу (л. 581 об.) [2167] бывает, такожде царицы и великия княгини, такожде и царевича государя и царевен. Но Божественая повеления не оставляют святую мученицу разрешати, не точию царьских ради рождений, но и святых мученических памятей.

Послушай.

Правило святых апостол 69.

Аще [2168] который епископ или презвитер или диакон или поддиакон или чтец или певец в 40 дней, сиречь в Великий пост не постится и во все лето во всякия среды и пятки, да извержен будет, токмо аще не пакостит ему телесная болезнь, немощному бо прощено есть по силе вкушати масла и вина. Аще же мирский человек не постится, да отлучится.

Собора Гангрьскаго правило 18.

(л. 582) [2169] Аще [2170] кто от воздержавшихся кроме телесныя нужди гордится и преданыя посты во общину и хранимыя Церковию разрешает, якоже се тверду имущу в нем совершеному помыслу, да будет проклят.

Святых отец собора иже в Лаодикии правило 49.

Не [2171] подобает в 40 дний последния недели четвертка разрешати и того ради весь пост безчествовати, но весь Великий пост поститися сухо ядуще.

Толкование.

Четыредесят дний Великаго поста, такоже и вся дни Великия Недели спасеных страстей Господа нашего Иисуса Христа, яже глаголется Страстная Неделя, в посте и в молитве и во умилении сердца совершати и не разрешати поста в Великий Четверток, (л. 582 об.) [2172] но и той поститися и сухо ясти.

Правило 50.

Ни памяти мученик творити, токмо в субботу и в неделю.

Толкование.

В четыредесят дней Великаго Поста кроме [2173] суботы и недели ни мучеником память, ни инем святым творится.

Правило 51.

Не подобает в Великий Пост ни брака, ни обедов [2174] по мертвых, ни инаго коего пира творити.

Се правило разумно.

Сему же подобно пишет Никита мних, презвитер монастыря Студийскаго, по реклом Скифита, к латином, в той же книзе Кормчей в главе 47 на листе 386-м и 7-м.

Ты же, попирателю, како смел равно чествовати великим Господьским праздником царева рождения день? Но и царьский закон (л. 583) [2175] отрицает в неделю и прочия Божественыя святыя дни торжества царьскаго рождения на ин день, а не сточневати.

А еже кому бы хотети царя подобна Богу творити, сам Господь собою такое зло возрази к вопросившему Ему и глаголющему: Учителю [2176] благий, что сотворив живот вечный, наследствую? Рече же ему Иисус: Что Мя глаголеши блага? Никто же благ, токмо един Бог. И ко архиереом, вопрошающим Его: Ты ли еси Сын Божий? Он же рече: Вы глаголете, Аз есмь. Тако и бесом, вопиющим и глаголющим: Что [2177] и Тебе, Иисусе, Сыне Бога Вышняго? Пришел еси прежде времени мучити нас. Он же призапрещ им и умолчаста и исцелевшему рече: Иди в дом свой (л. 583 об.) [2178] и поведай, елика сотвори тебе Бог, то есть Бог Отец небесный, а не о себе рече, елика ти сотвори Иисус.

Вопрошаше [2179] Иисус ученики Своя, глаголя: Кого Мя глаголют человецы, суща Сына человеческаго? Они же реша: Овии убо Иоанна Крестителя, инии же Илию, друзии же Иеремию или единаго от пророк. Глагола им Иисус: Вы же кого Мя глаголите быти? Отвещав Симон Петр, рече, Ты еси Христос, Сын Бога живаго. Тогда запрети Иисус учеником Своим, да никому же рекут, яко сей Иисус есть Христос. И паки инде рече: Вы же кого Мя глаголите быти? Отвещав же Петр, рече: Христа Божия. Он же запреща им, повеле никому же глаголати сего.

А пред государем (л. 584) [2180] мнози не ве и гласи глаголют: Ты, государь, бог земный. И никому государь запрещает. И патриарх Никон государю говаривал, будучи на Москве, и с Москвы сшед, писал, да запретит впредь таким глупцом не называть себя богом. Он же умолче. Не слышат таковии глаголющии, что Давид святый глаголет: Бог наш на небеси и на земли, вся, елико восхоте, и сотвори. Не поревнова верховными апостолома, о них же суть в Деяниих писано: Народи [2181] же видевше, еже сотвори Павел, воздвигоша глас свой ликаонский, глаголюще: Бози уподоблшеся человеком, снидоша к нам. Нарицаху же Варнаву Дия, Павла же Ермию, понеже той бяше (л. 584 об.) [2182] началник слову, жрец же Диа сущаго пред градом их. Онца и венца ко вратом принес, с народы хотяше же ети. Слышавше же се апостоли Варнава и Павел, растерзавше ризы своя, вскочиша в народ, зовуще и глаголюще: Мужие, что сия творите? Имы подобострастна вам еста человека, благовествующа вам от сих суетных обращатися к Богу живу, иже сотвори небо и землю и море и вся, яже в них. Иже в мимошедшыя роды оставил бе вся языки ходити в пути своя. И убо не несвидетельствована себе, остави благотворя, с небесе вам дожди дая и времена плодоносна, исполняя пищею и веселием сердца (л. 585) [2183] ваша и сия глаголюще: Едва устависта народы, не жрети има, но отъити коемуждо восвояси.

Зри тех везде от гордости чистых, не токмо не жалающих, но и даемую отражающих, якоже и Петр глаголаше: Что [2184] на ны взираете, яко своею ли силою или благочестием сотворших ходити сему. И Корнилию рече: Востани, ибо и мы человеки есмы. Иосиф же глаголаше о сынех: Не [2185] от Бога ли изъявление их? И Даниил подобне сему: И мне же не в мудрости сущей во мне открыся. И Павел: Не яко доволни есмы от себе помыслити что, яко от себе, но доволство наше от Бога, которое причастие свету ко тме и правде (л. 585 об.) [2186] к беззаконию и прочее, якоже рече апостол, и которое сочетание и равночестие царю з Господем Богом.

Послушай, новый Арий, что есть царь, якоже премудрый некто рече: И [2187] царь днесь, а утро умрет, егда умрет человек [2188], наследят и гади, зверие и червие. Начаток гордыни человеку, отступающу от Господа, и сотворшаго и, отступи сердце его, яко начаток гордыни грех, и держай его, удержит скверну. Сего ради не прослави Господь наведения и разврати е до конца. И паки ин пророк рече: Ты [2189] бо, рече, во уме своем, на небо взыду и выше звезд небесных поставлю престол, и сяду на горе высоце, на горах высоких, яже на север (л. 586) [2190] и взыду выше облак и буду равен Вышнему. Сие же пророк [2191] рече о Навуходоносоре, царе Вавилонстем, иже подобейся сотвори Богу, ему же показа Господь во сне о гордости, иже протолкова Даниил. Ему же и збысться. От человек изгнася и траву аки вол ядяше и от росы небесныя тело его обросте, дондеже власы ему аки лву возвеличавше и ногти ему аки птицам, дондеже возвратився, исповеда, глаголя: Аз, Новуходоносор, очи свои на небо воздвиг, и ум мой ко мне возвратися. Вышняго благослових, и живущаго вовеки похвалих, яко власть Его власть вечна и царьство Его в роды и роды. И вси живущии на земли (л. 586 об.) [2192] ни во что же наменишася, по воли своей творит в силе небесней в селении земленем, и несть, иже ся противит руце Его. И рече ему: Что сотворих в то время, ум мой возвратися ко мне и в честь царьства своего приидох и озреч моя возвратися ко мне, и мучители мои и велможа моя взыскаша мене, и во царьстве своем утвердихся, и величество изообилнее приложи ми ся. Ныне убо аз, Новуходоносор, хвалю и превозношаю и славлю Царя небеснаго, яко вся дела Его истина и путие Его суди и вся, ходяща со презрением, может смирити.

И пророком Иезекиилем глаголет Господь: И [2193] бысть (л. 587) [2194] слово Господне ко мне, глаголя: И ты, сыне человеч, рцы князю Тирску, се глаголет Адонаи Господь. Понеже вознесеся сердце твое и рекл: Аз есмь Бог. Ты же человек еси, а не Бог. И положи сердце свое яко сердце Божие, еда премудрее ты еси Даниила, премудрии не суть тебе наказали, деили хитростию своею или смыслом своим сотворил еси себе силы и притяжа сребро и злато в домох своих или во граде твоем хитрость куплею своею умножи силою своею, и вознес сердце твое в силе твоей. Того ради се глаголет Адонаи Господь. Елма же даде сердце свое, яко сердце Божие, в то места се Аз наведу на тя чюжда разсыпателя от стран (л. 587 об.) [2195] и измкну меч их на тя и на доброту хитрости твоея. И постелют доброту твою в погубление, еда речеши пред убивающими тя, Бог есмь, ты ж человек еси, а не Бог.

И в Деяниих святых апостол пишет.

В [2196] нарочитый же день оболкся Ирод во одежду царьску и сед на судищи пред народом з гордостию, глаголаше к ним. Народ же возглашаше глас Божий, а не человеч. Внезапу порази его ангел Господень, зане не даде славу Богу и бысть червми изъяден, издше.

И божественный апостол Павел пророчествуя о отступницех закона Христова, глаголет, их же и противниками нарицает: Да [2197] никто же вас прелстит ни по единому же образу, (л. 588) [2198] яко аще не приидет отступление прежде и открыется человек, сын погибели, противник, и превозносяйся над всякаго глаголемаго бога или чтилища тако, якоже ему сести в Церкви Божией аки Богу, показующу себе, яко бог есть.

Толкование.

О антихристе [2199] зде беседует и велия открывает тайны, что есть отступление. Того самаго антихриста нарицает отступление, яко многих имущаго погубити и отставити [2200] тако, яко рече, соблазнити, аще мощно и избраныя. И человека греха нарицает и, безчисленая бо соделает и приуготовит иных, да делают лютая. Сына же погибели глаголет и, зане и той погибнет. Кто же есть сей? (л. 588 об.) [2201] Убо ли сатана? Никако же, но человек некий, всякое его восприемляй действо. И открыется человек, рече, превозносяйся над всякаго глаголемаго Бога или чтилища. Не бо во идолослужение введет он, но богопротивен некто будет и всех разорит богов, и повелит кланятися себе вместо Бога, и сядет во храме Божием, не иже во Иерусалиме, но и в церквах, показующу, рече, себе бога.

Сущее.

Не рече глаголюща, но покушающася показати, ибо дела велия соделает и знамения покажет чюдная.

Не [2202] помните ли, яко еще сый у вас сия глаголах вам? Зриши ли, яко нужно есть часто сия глаголати и почерпати (л. 589) [2203] глаголы? Се бо и тамо сущу, слышаша сия, глаголющу ему, и паки востребоваша воспоминания, якоже бо оскорбех, слышавше. Ибо [2204] егда бехом, рече, у вас, предь глаголахом вам, яко имамы оскорбетися, обаче забыша. И паки утверждает их посланми, тако и о пришествии антихристове слышавше, паки требоваху послании направляющих я. Воспоминает убо им и показует, яко ничто ж странно глаголет, но яже присно глаголаше.

Беседа 4-я.

И [2205] ныне одержащее весте, воеже явитися ему во свое ему время. Тайна [2206] бо уже деется беззакония, точию содержай ныне, дондеже от среды отъят [2207] будет. И тогда явится беззаконный, (л. 589 об.) [2208] его же Господь Иисус убиет духом уст Своих и упразднит явлением [2209] пришествия Своего. Его же есть пришествие по действу сатанину.

Взыскал [2210] бы некто первее в лепоту, что есть одержащее, и по сих бы навыкнути хотел, почто не явленне сице полагает то Павел, что убо есть одержащее явитися ему, сиречь возбраняющее. Инии убо Духа благодать глаголют, инии же римскую власть, им же аз наипаче слагаюся. Почто? Зане аще Духа хотел бы рещи, не бы рек неявленне, но явленне, яко и ныне содержит и Духа благодать, сиречь дарования. Инако же подобаше уже приити, аще бы имел дарованиом (л. 590) [2211] оскудевшим приходити, ибо древле оскудеша. Елма же о римстей власти сие глаголет [2212], в лепоту назнаменова и дотоле рече прикровенне. Ниже бо хотяше излишныя вражды приимати и неполезная беды, аще бо рекл бы, яко мало последе разорится римская власть. Уже абие того и закопали быша, аки губителя, и верных всех, аки на се живущих и воинствующих. Сего ради не рече тако, ниже, яко скоро будет, аще [2213] и присно сия глаголет, но что воеже явитися ему во время свое. Рече: Тайна бо уже деется беззакония. Нерона зде глаголет, аки образ антихристов суща, ибо сей хотяше не пщеватися Бог. И добре рече, тайна, (л. 590 об.) [2214] не бо явленне, якоже он, ниже безстудне. Аще бо прежде времени онаго обретеся, рече, иже немного антихриста оста, аще ся во злобе, что дивно, аще уже будет. Тако убо покровенне рече, и явленна того не восхоте сотворити, не боязни ради вражды излишныя бегати [2215], но наказуя нас излишныя вражды не приимати, егда ничто же будет понуждающее. Такоже и зде глаголет, точию содержай ныне, донеле же от среды будет, сиречь власть Римская егда возмется от среды, тогда он приидет и в лепоту, донеле же бо сея власти будет страх, никто же скоро покорится. Егда же тая разорится, падет на безначалство и человеческую (л. 591) [2216] и Божию поищет похитити власть, якоже бо яже прежде сего разоришася царьствия [2217], сиречь Мидийское от Вавилонскаго, Вавилонское от Персскаго, Персское от Македонскаго, Македонское от Римскаго, тако и сие от антихриста, а он от Христа. И к тому не содержит и сия со многим изъяснением Даниил нам предает. И тогда [2218], рече, явится беззаконный и что по сих близ утеха, наводит бо, его же Господь Иисус, рече, убиет духом уст Своих и упразднит явлением пришествия Своего. Его же есть пришествие по действу сатанину, якоже бо огнь нашед просто малая животная и прежде пришествия самаго от далече сущая унывати творит и изнуряет. (л. 591 об.) [2219] Сице и Христос повелением точию и пришествием антихриста убиет, довлеть ему зде быти и сия вся погибнути, уставит прелесть и явлейся токмо. Таже являяй кто есть сей, его же пришествие по действу сатанину во всякой силе, рече, и знамениих и чюдесех ложных, сиречь всякую покажет силу, но ничто же истиное, но к прелести вся сия предрече. Да не прелщаются сущии тогда и чюдесех, рече, ложных или притворениих или [2220] на лжу ведущих и во всякой прелести неправды в погибающих. Почто [2221] убо, рече, попусти Бог сему быти и каково сие есть смотрение. Кий же прибыток онаго пришествия (л. 592) [2222] на пагубу [2223] нашю приходящаго. Не бойся, возлюбленне, но слыши того глаголюща, в погибающих может, иже аще бы и не пришел он, не быша веровали. Кии убо прибыток рече, зане сии истыи погибающыи заустятся. Како? Яко аще бы и не пришел он, не бы веровали Христу, приидет убо обличая их, да не имут бо глаголати, яко понеже Бога себе быти глаголаше Христос. Аще и нигде, рече, явленне, но обаче понеже сущии по сих проповедаша, не веровахом, понеже слышахом, яко един [2224] Бог, из Него же вся, сего ради не веровахом. Сие их непщевание антихрист отъимет, егда бо приидет он и ничто же пове(л. 592 об.)левая [2225] здраво, но вся законопреступная. От знамений точию ложных уверится, зашиет им уста. Аще бо Христу не веруеши, много паче не подобаше антихристу веровати. Он бо убо глаголаше от Отца послан быти, сей же сопротивное. Сего ради глаголаше Христос: Аз [2226] приидох о имени Отца Моего, и не приясте Мя. Аще ин приидет о имени своем, онаго приимете. Но знамения видехом, рече, но и от Христа быша многая знамения и велия. Тем же много паче тому веровати подобаше, аще и о сем убо многая прежде рекошася, яко беззаконный, яко сын погибели, яко пришествие его по действу сатанину. О онем же (л. 593) [2227] противная [2228], яко Спас, яко безчисленная благая приносит, за ня же бо любве истиныя не прияша, воеже спастися им. Сего [2229] ради послет им Бог действо лсти, воеже веровати им лжи. Да [2230] суд приимут вси не веровавшии истине, но благоволиша о неправде, да суд приимут, не рече, да муку приимут, ибо и кроме сего имеяху муку прияти, но да суд приимут, сиречь да будут осуждени на страшнем судищи, воеже быти им безответнем. Кии же суть сии? Сам сказует, наводя и, не веровавше истине, но благоволиша о неправде. Любовь же истиную Христа нарицает, за ня бо, рече, любве истиныя не прияша, (л. 593 об.) [2231] обоя бо бе и обоих ради прииде и любя человеки и о истиных вещех. Но благоволиша, рече о неправде, на погибель человеком приидет и обидети их имея, что бо не соделовает тогда, вся подвигнет, вся возмутит и повелений ради и страха, страшен будет отвсюду, от власти, от суровства, от законопреступных повелений. Но да не убоишися, в погибающих, рече, имети будет крепость.

Зриши ли, лжесписателю, что божественный апостол провозвести о преди будущих? Нам же есть настоящая вас ради и злобы вашея. Не прииде ли ныне отступление от святаго и священнаго (л. 594) [2232] Евангелия и святых апостол и святых отец преданий? Не явилися человек греха, сын погибели, противник и превозносяйся на всякаго Бога или чтилища? Отступление, глаголет, яко многих имать погубити. Что же ли сея погибели болши, еже оставя Божий закон и заповеди, человеческая предания предпочтоша, то есть Уложеную книгу, в ней же полно горести и лсти.

Кто же ли, рече, сей есть? Сатана ли? Никако же, но человек некий, всякое его приемля действо и приготовит с собою и инех многих, яко тебе, лжисписателю, и подобных тебе. А еже свесте в храме Божии, не иже (л. 594 об.) [2233] во Иерусалиме, но повсюду в церквах, седение же, не еже седети во всех церквах, но власть над всеми церквами имети. Церковь же не стены, но законы и пастырие церковнии. На них же ты, отступниче, превзявся по действу сатанину, написа суд, на патриарха и на митрополитов, и на архиепископов, и на епископов, и по прочих причетников судити простым людем, не помысля божественно ничто же. Якоже рече Господь негде: Иди за Мною, сатана, не мыслиши, яже суть Божия, но яже человеческа. И инде паки рече: Вы отца вашего диавола есте и похоти отца вашего творите.

(л. 595) [2234] О таковых убо и церквах Христос рече: Храм Мой храм молитвы наречется. Вы же сотвористе его вертеп разбойником. Якоже Иеремия рече: Не [2235] хощите надеятися во словесех лживых, рекущи: Храм Господень. Храм Господень есть, како же храм Господень, иже под властию царя и сущих под ним и еже хотят и деют и повелевают, то уже не Божий храм таковый, но онех дом, иже власть имеют над ним. Аще бы был храм Господень, никто же бы за страх Божий владети или имати что от сущих его.

А яже о гонении на Церковь откры Господь богословнейшему возлюбленному (л. 595 об.) [2236] ученику Своему Иоанну.

О гонении церквей первых, ниже имать быти при антихристе.

И [2237] отверзися храм Божий на небеси, и явися кивот завета Господня в храме Его, и быша молния и гласи и громы и трусы и град великий.

Толкование.

Чрез отверзение неба и видение кивота является откровение уготованных благ святым, яже во Христе. В нем же вселися все исполнение Божества телесне, вся сокровенно суть по апостолу: Тогда [2238] открыют егда беззаконным и нечестивым гласи ужасни [2239] и молния и громы и град, наносяй сим геенския муки в трусе премением настоящих.

(л. 596) [2240] Глава 12.

И [2241] знамение велие явися на небеси. Жена оболчена в солнце и луна под ногама Ея и на главе Ея венец от звезд дванадесяте.

Толкование.

Жену [2242] же одеяную солнцем нецыи убо отнюдь Пресвятую Богородицу разумеша, прежде даже познан бысть тоя Божественый Сын, пострадавшую, яже зде имутся последователне. Великий же Мефодий на святую Церковь истолкова, не согласуемая Владычнему рождеству, яже о Нем не пщевал. Заеже уже пред многим временем родился бе Господь наш. Добро же и самыя глаголы божественнаго Мефодиа воспомянути, иже глаголет во глаголемей беседе от лица Проклы девица сице: Жена облаченая (л. 596 об.) [2243] в солнце есть Церковь, а еже нам есть одежда, се Оной свет, а [2244] еже нам злато и ясное драгое камение, се Оной звезды. Звезды же лучшыя и светлейшыя взыде же на луну. Луну же образне мню веру очищаемых и свобождаемых банею за сие, яко влажное естество от луны висит. Болящая [2245] же есть и отраждающая душевная в духовныя и видом и изображением образующая их по подобию Христу. И паки глаголет: Не подобает не пщевати Христа того быти новораждаемаго, древле бо прежде откровения Иоаннова исполнися тайна вочеловечения Божественаго Слова. Иоанн же о настоящих (л. 597) [2246] и будущих законопоет и пророчествует. И после инех тако яко нуждею исповедати требе есть, яко Церковь есть болящая и раждающая искупленыя, якоже глаголет во Исаии Дух: Прежде [2247] даже родити болевше, избеже и роди мужеск пол. От кого избеже? Разве всяко от змия, да родит люди умный Сион мужеска пола. И прочая.

Тем же [2248], в коемждо рождается Христос умне, и сего ради Церковь повивает пеленами и болезнует, донеле же Христос вообразится в нас рождейся, яко да койждо заеже причащатися Христу, Христос будет. Церковь убо солнцем правды Христом одеяся, ибо законный свет нощесветныя луны (л. 597 об.) [2249] и мирскую жизнь отменяющуся, яко луну под ногама имать и на главе венцем венчася, апостолскими же догматами и добродетелми. Той же сиречь Мефодий, и яко от луны висящу влажному существу, глаголет, яко луною знаменует крещение [2250], море образне именуемое, то рождаемым убо спасителное, бесом же пагубное и во чреве имущая взываше болящи и страждущи родити. Глаголем же, яко болит Церковь на коемждо [2251], рождаемых водою и духом, донеле же вообразится Христос в них, якоже глаголет божественный апостол, заеже извергами [2252] суть отпадающии от истиннаго света Христа с путную (л. 598) [2253] жизни и в купно текущую со жизнию чрез неверие, ожидающии и претерпевающии смерть. И явися иное знамение [2254] на небеси, и се змий рыжий [2255] велий, имея седмь глав и рогов десять, и на главах его седмь диадим [2256]. И явися ино знамение на небеси, небо зде мним, яко разумеется воздух. Змий же чермный [2257] созданый да поругаем [2258] бывает от ангел Божиих, якоже во Иове писано есть: Чермен же сей, или же за убийственое его и кроворадостное, или за огненое аггелскаго существа, аще и от ангел отпаде. Седмь [2259] же глав, седмь прелукавыя его силы и духовным действам противныя, или седмь дуси. О них же во Евангелии (л. 598 об.) [2260] Христос [2261] рече, яко вселяются в человека пометеное сердце и тщее от благих мыслей имущаго. Или седмь злобы, им же глаголет Соломон [2262] в сердце быти вражием, иже сиречь враг велиим гласом повинующимся [2263] лицемерне молится. Десять же рози являют десять прегрешения противная десяти законным заповедем, или разделения царьственная [2264], тому царьству красоту несущая, яко расколом и смятением радующуюся. Седмь же диадим на главах его за сие, яко побеждающии демонская действа, оттуду венцы победы носят, отнюду же трудами и потами победу взяша. О сих же (л. 599) [2265] и божественный Мефодий [2266] глаголет сице наречение. Змий велий чермный седмоглавный великий третию часть звезд, иже стояше, наветуяй и наблюдай, да чадо породелищыя [2267] снесть, диавол есть и яже по сих. Но не получает и погрешает лова. Горе к высоте возхищаемым, ограждаемым. И в мале по сих. Третия же звезд наречеся часть, погрешившии окрест единаго в числе Святыя Троицы. Пустыня же, в ню же вшедший питается, Церковь есть, от злых свободная и тления вне сущая. Тысяцы же глаголет во святых умножаемое совершенное число и исполненое объемлет. И по сих по чину глаголет (л. 599 об.) [2268] о венцех его. Подвизавшая бо ся Церковь на диавола и умертвившая седмь глав, седми добродетелными венцами обладает и наследует я. И ошиб его влечет третию часть звезд с небесе и поверже я на землю, и ошиб [2269] его влечет третию часть звезд. Чрез сие мним, яко двое некое является, или первое его с небесе падение, совлекшее к земли с ним отступники аггелы последним завистным движением. Первее бо бысть возношение или ошибное движение, по сокрушении главы его, нетвердыя низводящее с небеснаго мудрования и сопребывания. Звезды образне име(л. 600)нованыя [2270] за светлость из святаго крещения, сице бо и Даниил о Антиосе [2271] пророчествова, яко о хотящем быти образе пришествия антихристова. И змий, стояше пред Женою, хотящею породити, да егда родит, Чадо Ея снесть, и змий пред Женою присно бо отступник противу Церкве вооружается. От рожденыя паки [2272] во времени из Нея, свое си брашно творити [2273] со тщанием желая, паче же чрез Церковь и самаго Христа гоняет [2274], яко Главу Ея сущая [2275], яже верных присвояющаго Себе. Тем [2276] же и Савле: Что Мя гониши, глаголаше. И роди Сына мужеска полу, иже имать пасти вся языки жезлом железным. (л. 600 об.) [2277] И [2278] роди Сына мужеска полу. Выну Церковь [2279] крещаемыми Христа раждает, аки во онех образуемаго, даже до исполнения возраста духовнаго, по апостолу: Мужеска же пола Сын люд церковный и сластми неослабленый, чрез Него же и уже убо крепкими, яко железо, рукама силных римлян языки пасяше Христос [2280] Бог. Упасет же и по воскресении из мертвых, поставляяй судия крепкия верою, яко железо, на растленыя и немощныя сосуды языческия, иже за неверие таинственное и новое вино не вместиша. И восхищено бысть Чадо Ея к Богу и ко престолу Его, и возхищено бысть Чадо. Восхищаются (л. 601) [2281] убо и зде во искушениих святии [2282], яко да не препобеждени будут лютыми сущыми над силу. Восхищени ж будут и тогда на облацех в сретение Господне на воздусе и с Богом и престолом Его, сиречь с превышними ангелскими силами будут. И [2283] Жена побеже в пустыню, идеже имать тамо место уготованое от Бога, да тамо питают Ю дний тысящу шестьдесят. И Жена побеже в пустыню, егда глаголет действуяй во антихристе диявол, им же Церковь ополчится. Избраный сея и верховнейший, поплевавше гражданския поища и смятения и мирския сласти [2284], в пустыню всякоя злобы, в плодоносное ж (л. 601 об.) [2285] всякоя добродетели жителство побегнут, по великому Мефодию, и тамо борющих бесов же и лукавых человек прилог избежати. Достоверно же, яко и чювственая пустыня [2286] спасает в горы и вертепы и в пропасти земныя навета ради отступнича и аже Христа бегающыя. Якоже и прежде мученики ни три же лета и пол, являемая днями тысяща двесте и шестьдесятми, в них же державствовати будет отступление. Его же нас избавляяй великий Подвигоположник, не оставляяй кому над силу искуситися, дарует нам крепкий ум и противными (л. 602) [2287] прилогами нерастленый и непреоборимый. Да законне противно началствам тмы и властем страдалчествовавше, венцем правды украсимся и победныя почести и дары приимем, яко тому подобает, немощными в бегство обращающему, крепкия воздушныя князя, победа и держава, купно Отцу и Животворящему Духу, ныне и присно и во веки веков. Аминь.