ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Слово 12.

О брани ангелов и бесов и о низпадении сатанине, зачало 34.

И [2288] бысть брань на небеси [2289], Михаил и ангели Его брань сотвориша на змия. И [2290] змий брася и аггели его и не возмогоша, ниже место их обретеся к тому на небеси.

(л. 602 об.) [2291] И сия мощно приложити [2292] и к первому диаволю [2293] испадению от ангелскаго чина за гордыню и зависть и во [2294] убиение Владычным крестом, егда якоже глаголет Господь [2295]: Князь мира сего осужден есть и от древняго мучителства извержен есть. Его же гордыню и кичение Божественым ангелом, купно с ними Архистратигу Михаилу, не терпящим. В лепоту того своего си спребывания извергоша первее, якоже глаголет Иезекииль, яко от херувимов извержен бысть той из среды огненых камений, из небесных, мню, чинов, занеже обретошася в нем беззакония и неправды. В пришествии ж Христове служащии Ему, после искушения (л. 603) [2296] аки обезчещена раба паки возгнушашася. Вестно же се буди, якоже отцем взмнеся по содетелстве чювственнаго мира [2297], сице гордостию и завистию низвержен бысть бездушному первее вверен быв началству, якоже глаголет апостол [2298].

И пакий же такожде наречение некоим от них, сиречь от древних Божественых ангел [2299], и строением окрест земля даде владети и началствовати, и добре началствовати испоручись. И по сих глаголет, но ни во что ж случися скончатися их чину, и свержен бысть змий велий, уж [2300] древний, нарицаемый [2301] диавол и сатана, прелщаяй всю вселенную. И свержен бысть на землю и аггели его с ним (л. 603 об.) [2302] свержени быша. И свержен бысть змий велий на землю в лепоту. Не стерпе бо небо земнаго мудрования, зане свету тма не обещителна [2303]. Аще же со Арфром [2304] полагается <...> [2305] сатана, не яко ин сый от диавола, аще и лежит по превозходному. Тожде диавол иже сатана, но яко двема нарицаемый [2306], ово убо заеже оболгати и оклеветати добродетели и сих рачителя и самаго того Бога человеком, якоже Адаму [2307] его завистника подписа, ово же, яко противник [2308] Владыце и рабом Его. Вестно же буди, яко не тако местное по кресте бысть диаволе низпадение, якоже прежднее немощию праотец, но вконец сокрушением [2309], якоже (л. 604) [2310] и сам диавол [2311] великому Антонию исповеда, яко псаломское слово на нем исполнися. Вражия [2312] оружия оскудеша вконец. Испадение убо его есть и лукавых его начинаний и покушений отвержение и разорение со извержением с небес и своего си совершенне началства, якоже речеся. Глаголано же бысть блаженным Юстином [2313], философом и мучеником, яко диавол по пришествии Христове и по ответе нань в геену наипаче хулником будет, аще и первее не тако безстуднее Бога похули. Тем же о нем праволучне речеся: Сердце [2314] его отвердело яко камень, зане ослабленое и неутружденое лукавства, аще же чаяние муки лука(л. 604 об.)внейшаго [2315] того содела, то како мучайся или сам или делателие его в геенне, искушением огненным скверн греховных отмыются.

Сего же не получивше, како имети будут конец муки, по суемудреным еретиком: И слышах глас велий на небеси, глаголющ: Ныне бысть спасение и сила и царьство Бога нашего и область Христа Его, яко низвержен бысть оскорбитель [2316] братий наших, оглаголуяй их пред Богом нашим день и нощь, яко низвержен бысть оглаголник братий наших. Оглаголение и клевета яже на человеком диавола, еже есть, именова, якоже речеся: Веселят же ся ангели о извержении сего. Ни [2317] едина бо часть верному с неверным.

(л. 605) [2318] И [2319] тии победиша того за кровь Агнчю и за слово свидетельства своего и не возлюбиша [2320] душа свою до смерти. Сего [2321] ради веселитеся небеса и живущии в них. Горе земли и морю, зане сниде диавол к вам, велию имеяй ярость, ведый, яко мало время имать. И тии победиша его за кровь Агнчю и оглаголуемии от него глаголетстии, но клеветуемии якоже Иов, со всеми человеки покаряющимися и верующими ему, обаче победиша и по Христе страданиями. А яко веселятся горния силы о падении его и печалуют о навете его на истаявшыя и присохшыя к земным, достоверно есть, ибо богоподражательно. Горе же живущим на земли (л. 605 об.) [2322] и на море, сиречь имущим жителство на небеси, но на земли. Мнози бо от сущих на земли врага побеждают и победят, аще и множае ныне подвизающияся ярящася за близкость своего мучения [2323]. Отнюду же нуждно есть мудрствующим земная и плавающимся на море житейстем, зде бедником страстным быти и окаянным и умилным.

Како змий гоняй Церковь не престает.

И [2324] егда виде змий, яко низложен [2325] бысть на землю, гоняше Жену, яже роди [2326] мужеский пол. И дане бысте Жене две крыле [2327] орла великаго да летит в пустыню на место Ея, яко да питается тамо время и времена и полвремене от лица ужева [2328]. (л. 606) [2329] Егда глаголет диавол Христу [2330] приражся по крещении победися и к святым апостолом вооружився, посрамися, видев я смертию жизнь обретшыя, и яко уж на земли обращатися и витися и землю ясти осужден бысть, сиречь земная мудрования или помышления. Тогда паки начат Церкви гонити, мужский пол, Божий люд, сластми не ослабленый, родившую и раждающую. Но изначала Ей к Богу и ближнему любовь и заступающии и пособляющии нас ради Распятаго промысл дан бысть и два Завета [2331], ими же всяческии крыле орле занаменуются, яко да сима высоко летающи в пустыню. Всякоя (л. 606 об.) [2332] прохладныя сладости жителством питается присно убо, в пришествии же антихристове наипаче. Ему же державствовати реченое время, полтретья лета на мнозе писано бысть. В нем же сиречь времени и по чювственней пустыни в горах и пропастех и вертепех крыющися мощно, яко сего убежать. И [2333] изверже уж [2334] из уст своих за Женою воду яко реку, да сию сотворит рекою похищеную. И [2335] поможе земля Жене и отверзе земля уста своя и поглоти реку, юже изверже дракон [2336] из уст своих. И изверже уж из уст своих за Женою воду яко реку, бежащии, (л. 607) [2337] глаголет, Церкви [2338] в места непроходимыя и безводныя от находа прелестнича из уст своих, яве от повеления своего, за Нею мещет воду аки реку, сиречь безбожных мужей или лукавых бесов, или различных искушений множество на Ню изыдет, яко да поработит Ю. Земля же [2339], глаголет, поможе Ей идти долготою путя и безводием и сухотою, стремление лукавых удержующи и реку, яже от искушений. Сего ради поглощающи или смиреномудрием святых, истино и право глаголющих «аз есмь земля и пепел» [2340], вся сети диаволя упраздняющы, ничто же бо [2341], якоже божественному Антонию от ангела явленно есть, (л. 607 об.) [2342] диаволя силы тако сокрушает и ссецает, якоже смирение. И разгневася змий на Жену и [2343] отъиде сотворити с прочими семене Ея, соблюдающими заповеди Божия и ищущыми свидетельство Христово [2344]. И отъиде змий сотворити брань с прочими, извычныя и избраныя церковныя учителие глаголет, и презревшия землю к беде преставльшияся в пустыню. Аще сия погрешит антихрист, но воинствующыя Христови в мире, изнесет, глаголет, брань. Яко да якоже земным прахом стропотно раздражающым елея слизкость [2345], житейскими, глаголю, вещми и неудобствы. Сия удобь уловляемыя обрет, превратит (л. 608) [2346] мнози же и от сих, за еже преискрене возлюбиша Христа, победят Его.

О ангеле, проповедающем приближение будущаго суда.

И [2347] видех [2348] другаго ангела, парящаго посреде небеси, имуща Евангелие вечное, идуща благовестити седящим на земли и на всяк народ и колено и [2349] язык и люд, глаголяй [2350] гласом велиим: Бойтеся [2351] Бога и дадите Ему славу, яко прииде час суда Его. И поклонитеся [2352] сотворшему небо и землю и море и источники водныя. Средонебесие чюдне высокое являет и еже небесну быти явльшуся ангелу, свыше послану, к еже от земля человеки ввести чрез свое посредство (л. 608 об.) [2353] на небеса своим си ходатайством богоподражателне, тако яко да соединится тело церковное Христу, главе нашей. Вечное же Евангелие, еже от века сие у Бога уставлено и назнаменано бе, глаголет же сие: Бога убо боятися, не бояти же ся антихриста [2354], не могущаго убити душу с телом, но великодушно [2355] противу его стати, на мало время державствующаго, за приближение суда и поживших воздаяния.

Доволно ли ти есть, богопротивниче, ругателю Евангельский, прореченое Господем нашим Иисусом Христом и святыми Его пророки и святыми апостолы, о хотящих збытися, от них же ово збышася, иное деется, иное ж (л. 609) [2356] збытися хощет. И о боготворящихся, а не точию делы добрыми подобитися, и что есть гонение Церквей, и кто есть гонивый и гонимый.

Послушай с вышеписаных о втором ангеле, парящем посреде небеси, держаще Евангелие вечное, ищуща благовестити седящим на земли и на всяк народ и колено и язык и люд [2357], глаголяй гласом велиим: Бойтеся Бога [2358] и дадите Ему славу, яко прииде час суда Его, и поклонитеся Сотворшему небо и землю и море и источники водныя, а не твои скверным и трепроклятым законом судом повиноватися. И Господу самому свидетельствующу (л. 609 об.) [2359] и утвержающу: Аще кто услышит слово Мое и не сохранит Его, Аз не сужду ему, не приидох бо, да сужду мирови, но да спасу мир. Отметаяйся Мене и не приемляй словес имать судящаго слово, еже заповедах, то ему судит в день Судный. И слово, еже заповедах, несть Мое, но пославшаго Мя.

И ко пришедшим к Нему июдеом глагола: Аминь, аминь, глаголю вам, яко слушаяй словесе Моего и веруяй пославшему Мя, имать живот вечный и на суд не приидет, но прейдет от смерти в живот. А не веруяй уже осужден есть. И паки инде рече: Имеяй заповеди Моя и соблюдаяй их, он есть (л. 610) любяй, а не любяй Мя словес Моих не послушает. И о сем разумеем, яко познахом Его, аще заповеди Его соблюдаем. Глаголяй, яко познах Его, и заповеди Его не соблюдает, ложь есть. Иже есть от Бога глаголы Божия послушает, сего ради вы не послушаесте, яко несте от Бога. Всяк не творяй правду несть от Бога. Всяк преступаяй и не пребываяй во учении Христове Бога не имать. Аще кто приходит к вам и сего учения не приносит, не приемлите его в дом и радоватися ему не глаголите. Глаголяй бо ему радоватися сообщается делом его злым. А ты, отметниче Христов, от которых заповедей Христовых или святых апостол заповедей написал (л. 610 об.) [2360] в своем Уложении? Не о таковых ли лжепророках пророчествовал сам Христос и святии пророцы и апостоли, якоже выше показано, по действу вашему? Еже и ныне Богослов пророчествует, глаголя: Дети [2361] последняя година есть, и якоже слышасте, яко антихрист грядет, и ныне антихристи мнози быша, и от сего разумеваем, яко последний час есть. И яко всяка лжа от истины несть. И кто есть лживый, точию отметаяйся, яко Иисус несть Христос, сей есть антихрист.

Послушай [2362] же и инаго апостола, что есть вера во Христа. Ты веруеши, яко Бог един есть, добре твориши. И беси веруют и трепещут. (л. 611) [2363] Хощеши ли разумети, о человече суетне, яко вера без дел мертва есть. Авраам, отец наш, не от дел ли оправдася, вознес Исаака сына своего на олтарь? Видиши ли, яко вера поспешествоваше делом его, и от дел вера совершися, и совершися писание, глаголющее [2364]: Верова же Авраам Богови, и вменися ему в правду, и друг Божий наречется. Зрите ли убо, яко от дел оправдается человек, а не от единыя веры. Такожде и Раав блудница не от дел ли оправдася, приемше сходники и инем путем изведше их. Яко же бо тело без духа мертво есть, тако и вера без дел мертва есть.

Бывайте же творцы слову, а не точию слышателие, (л. 611 об.) [2365] прелщающе себе самех, зане аще кто слышатель слову, а не творец таковый уподобися мужу, смотряющю лице бытия своего в зерцале, усмотри бо себе и отъиде, и абие забы, каков бе. Приникий же в закон совершен свободе и пребыв, сей не слышатель забытлив быв, но творец делу, сей блажен в делании своем будет. Аще ли зависть горку имате и рвение в сердцах ваших, не хвалитеся, ни лжите на истину, несть сия премудрость нисходящи, но земна, душевна, бесовска.

Послушай, лжи списателю, како ни сын, развее отца не делает, яко же сам Господь свидетельствует: Отец [2366] Мой доселе делает, и Аз делаю. (л. 612) [2367] Сего же ради паче искаху Его июдее убити, яко не токмо разоряше субботу, но и Отца Своего глаголаше Бога, равен Ся творя Богу. Отвещав же Иисус рече им: Аминь, аминь, глаголю вам, не может Сын творити от себе ничесо же.

А ты, беззаконниче, почто смел о себе творити? Таже рече: Аще не еже видит Отца творяща, яже бо Он творит, сия и Сын такожде творит. Отец бо любит Сына и вся показует Ему, яже Сам творит, и болша сих покажет Ему дела, да вы чюдитеся. А ты, богоборче, от кого видев, навык делати беззаконие свое? Господу глаголющу: Яко бо Отец воскрешает мертвых и живит. А ты, беззаконнодавче, имаши ли власть (л. 612 об.) [2368] воскрешати и живити? Господу глаголющу: Отец бо не судит никому же, но суд даст весь Сынови, да вси чтут Сына, яко же чтут Отца. Иже не чтет Сына, не чтет Отца, пославшаго Его. А тебе, злохитре, кто даде суд писати и нарицати суд государя царя? Господу Богу глаголющу: Аминь, аминь, глаголю вам, яко слушай словесе Моего и веруя пославшаму Мя, имать живот вечный и на суд не приидет, но прейдет от смерти в живот. А ты почто не слушаеши словесе Божия и не веруеши пославшему Его, и живота вечнаго не хощеши имети, и на суд хощеши приити, от живота вечнаго в вечную смерть?

Господу глаголющу: Яко же бо Отец имать живот в Себе, тако даст (л. 613) [2369] и Сынови живот имети в Себе, и область даст Ему и суд творити, яко Сын человеч есть, не дивитися сему. Ты убо откуду имаши живот в себе и кто ти даст область сию и суд творити?

Господу глаголющу: Яко грядет час, в онь же вси сущии во гробех услышат глас Сына Божия и изыдут сотворшия благая в воскрешение животу, а сотворшия злая в воскрешение Суду. Ты имаши ли власть такову, дабы кто услышал глас твой, имел живот вечный и на Суд пришел? Аще ли же не имаши, почто сам не содрогаешися от суда Божия, беззаконно судя патриарха и митрополитов, и архиепископов, и прочих священнаго чина, яко же пишет в 10-й главе в 30-й статье. (л. 613 об.) [2370]

Господу глаголющу: Не могу Аз о себе творити ничесо же, яко же слышу сужду, и суд Мой праведен есть, яко не ищу волю Мою, но волю пославшаго Мя Отца. Ты же, непокориве, како смел о себе сотворити суд, и от кого ты слышал о суде, судишь, и кто знает, яко суд твой праведен есть, и не по своей воли написал, но по воли Божией, и где есть такова воля Божия, покажи нам.

Господу глаголющу: Аще Аз свидетельствую о Мне, свидетельство Мое несть истинно. Ин есть свидетельствуя о Мне, и вем, яко истинно свидетельство, еже свидетельствует о Мне. Твое же кто весть свидетельство, яко истино есть предание и суд? (л. 614) [2371]

Господу глаголющу: Вы посласте ко Иоанну, и свидетельствова о истине. Аз же не от человека свидетельство приемлю, но сия глаголю, да вы спасени будете. Он бо светилник горя и светя, вы же хотесте возрадоватися в час светения Его. Аз же имам свидетельство боле Иоаннова. Дела бо, яже даст Мне Отец, да совершу я, та дела, яже Аз творю, свидетельствуют о Мне, яко Отец Мя посла, и пославый Мя Отец той свидетельствова о Мне. Ни гласа Его нигде же слышасте, ни видения Его видесте, и словесе Его не имате, пребывающа в вас, зане Его же Той посла, Сему вы веру не емлете.

Ты же которое о себе свидетельство приводишь, яко приятна дела твоя (л. 614 об.) [2372] и кая свидетельствуют дела твоя, вся скверна и всякия мерзости полна и отступления от Бога. О Сыне Божий Отец свидетельствова, а о тебе кто свидетельствова? И почто не возхотел еси спасти, яко же рече Господь: Но сия глаголю, да вы спасени будесте. И кто тя посла и почто не емлеши веры словеси Божию? Не о тебе ли речеся: Сынови [2373] чюждии солгаша Ми.

Господу глаголющу: Но рех вам, яко видесте Мя, и не веруете. Все, еже даст Ми Отец, ко Мне приидет. А ты почто ко Господу нашему Иисусу Христу не приходиши, но своим путем ходиши? Не слышал еси Писания: Овца гласа Моего слушают и по Мне грядут. Ты же не си от овец Христовых. Горе грешнику, во два (л. 615) [2374] пути ходящу. И инде: Удаляющиися от Мене погибнут.

Господу глаголющу: Яко снидох с небесе, да не творю волю Мою, но волю пославшаго Мя Отца. И паки [2375] инде рече: Мое учение несть Мое, но пославшаго Мя. Аще кто хощет волю Его творити, разумеет учение, кое от Бога есть. Или аз о себе глаголю, глаголяй о себе славы своея ищет, а ищай славы пославшаго его, сей истинен есть, и несть неправды в нем.

Тебе, славолюбче, кто посла, и откуду пришел, и чью волю творишь, и заповеди и законы кто ти повеле писати, и по чему разумети? Яко от Бога есть твое предание и учение и заповеди, и несть неправды в нем, покажи нам.

Паки Господу глаголющу: Глаголы, яже Аз (л. 615 об.) [2376] глаголах вам, дух суть и живот суть, но суть иже от вас не веруют. Ведяше бо искони Иисус, кто суть неверующие и кто есть предая Его. И глаголаше: Сего ради рех вам, яко никто же может приити ко Мне, аще не будет дано ему свыше от Отца Моего. От сего мнози от ученик Его идоша вспять и к тому не хождаху и глаголаша: Жестоко есть слово се, и кто может послушати его. Еда и ты, отступниче, един еси от таковых отступник, возвратившихся вспять.

О [2377] них же есть писано, быша же им последняя горша первых, лучше бо бе им не познати пути правды, нежели познавшим возвратитися от преданыя им святыя заповеди.

(л. 616) [2378] Случит бо ся им истиная притча: Пес возвращся на свою блевотину и свиния омывшися в кале тине.

Паки Господу глаголющу: Аз приидох во имя Отца Моего и не приемлете Мене. Аще ин приидет во имя свое, того приемлете. И паки инде рече: Аз [2379] еже ведев у Отца моего, глаголю, и вы, убо еже ведесте у отца вашего, творите. Аще Бог Отец ваш бы был, любили убо бысте Мене, Аз бо от Бога изыдох и приидох, не о Себе бо приидох, но Той Мя посла. Почто беседы Моея не разумеете, яко не можете слышати словесе Моего? Вы отца вашего диавола есте и похоти отца вашего хощете творити. Он человекоубийца бе искони и во истине не стоит, яко (л. 616 об.) [2380] несть истины в нем. Егда глаголет, лжу от своих глаголет, яко ложь есть и отец лжы. Аз же зане истину глаголю вам и не веруете Мне. Кто от вас обличает Мя о гресе? Аще [2381] ли истину глаголю, почто вы не веруете Мне? Иже есть от Бога, глаголы Божия послушает, сего ради вы не послушаете, яко от Бога несте.

Видели свыше реченая Господем нашим Иисусом Христом, глаголюща, яко не о себе пришел, но во имя Отца Своего и кто не приемлет Его, и кто приемляй во имя свое приходящаго, то есть антихриста, якоже и ваше множицею написася. И кто есть Божий и кто есть диавол, и кто есть волю Божию творяй (л. 617) [2382] и кто диаволю, и кто есть истина и кто есть ложь, и кто есть слышаяй глаголы Божия и кто есть не слушает.

Паки Господу глаголющу: Испытайте [2383] писания, яко вы мните в них имети живот вечный и та суть свидетельствующа о Мне, и не хощете приити ко Мне да живот имате. Славы от человек не приемлю, но разумех вы, яко любве Божия не имате в себе, како вы можете веровати, славы друг от друга приемлюще и славу, юже от единаго Бога не ищете, не мните, яко аз на вы реку ко Отцу, есть иже на вы глаголет Моисей, нань же вы уповаете. Аще бо бысте веровали Моисеови, веровали убо бысте и Мне, (л. 617 об.) [2384] о Мне бо той писа. Аще ли того Писанием не веруете, како Моим глаголом веру имате.

Зриши ли, неверче, яко и Господь наш Иисус Христос везде о Себе свидетельствует Писанием и неверующим повелевает испытати. Испытайте, рече, Писание. И тако везде свидетельствова о Себе от закона и пророк, якоже свидетельствует святое и священное Евангелие. О родстве и о рождестве Христове и прочем Его спасителном смотрении [2385].

О родстве убо сице.

Книга [2386] родства Иисус Христова сына Давыдова, сына Авраамля. И прочее.

(л. 618) [2387] Такожде и о рождестве Христове. Во сне явися Иосифу, глаголя: Иосифе, сыну Давидов, не убойся прияти Мариам, жены твоея, Рождьшее бо ся от Духа Свята, родит же Сына и наречеши имя Ему Иисус. Той бо спасет люди Своя от грех их. Се же все бысть, да збудется реченое от Господа пророком, глаголющем: Се [2388] дева во чреве приимет и родит Сына и нарекут имя ему Еммануил, еже есть сказаемо «с нами Бог». Инде речеся: Тако [2389] бо писано есть пророком, и ты, Вифлиеме, земле Июдова, ничим же менши еси во владыках Июдовых, ис тебе бо изыдет Вождь, иже упасет люди Моя Израиля. И паки инде речеся: Да [2390] збудется от Господа пророком, глаголющем: (л. 618 об.) [2391] От Египта возвах Сына Моего. И паки. Тогда [2392] збысться реченое Иеремием пророком, глаголющем: Глас в Раме слышан бысть. И прочее. Мнози же от народа слышавше слово, глаголаху: Сей [2393] есть Христос. Овии же глаголаху: Еда от Галилея Христос приходит, не Писание ли рече, яко от семене Давидова и от Вифлиомския веси, идеже бе Давид, Христос приходит. И бысть [2394] во онех днех, прииде Иисус от Назарета Галилейскаго и крестися от Иоанна во Иордани. И абие возходя от воды, виде разводящася небеса и Дух яко голубь сходящаго нань, и глас бысть с небесе: Ты еси Сын Мой возлюбленый, о Нем же благоволих.

(л. 619) [2395] Тако [2396] и Иоанн Предтеча не собою свидетельствова, глаголя: Покайтеся, приближи бо ся Царьствие Небесное.

Се бо есть реченый Исаием пророком, глаголющем: Глас вопиющаго в пустыни, уготовайте путь Господень, прав творите стезя Его.

Тако и сам Господь ко искусителю диаволу рече: Писано [2397] есть, не о хлебе едином жив будет человек, но о всяком глаголе, изходящем из уст Божиих. И паки [2398] второе ко искусителю рече Господь: Писано есть, не искусиши Господа Бога своего. И третие: рече [2399] Господь ему: Иди за Мною. Писано бо есть, Господу Богу твоему поклонишися и Тому Единому послужиши.

Слышав [2400] же Иисус, яко Иоанн предан (л. 619 об.) [2401] бысть, отъиде в Галилею, оставль Назарет и пришед, вселися в Капернаум в Поморие в пределех Завулоних и Неффалимлих, да збудется реченое Исаием пророком, глаголющем [2402]: Земля Завулоня и земля Неффалимля, путь моря обои пол Иордана, Галилея язык. И прочее.

Тако [2403] и о Иоанне Христос свидетельствова: Сей бо есть, о нем же есть писано: Се Аз посылаю ангела Моего пред лицем Твоим, иже уготовит путь Твой пред Тобою.

И паки: Отвещавше [2404] нецый от книжник и фарисей, глаголюще: Учителю, хощем от Тебе знамение видети. Он же отвещав, рече им: Род лукав и прелюбодей (л. 620) [2405] знамения ищет, и знамения не дастся ему, токмо знамение Ионы пророка [2406], якоже бо бе Иона во чреве китове три дни и три нощи. Тако [2407] будет и Сын человеческий в сердцы земли три дни и три нощи. Мужие ниневитстии востанут с родом и осудят и, яко покаяшася проповедию Иониною [2408] и се боле Ионы зде. Царица Южская востанет на суд с родом сим и осудит и, яко приидет от конец земля [2409], слышати премудрость Соломонову и се боле Соломона зде.

И паки [2410] ко учеником рече: Сего ради в притчах глаголю им, яко видяще не видят и слышаще не слышат, ни разумеют. И збысться в них (л. 620 об.) [2411] пророчество Исаино, глаголюще: Слухом услышасте и не имате разумети, и зряще узрите и не имате видети. Отолсте бо сердце людий сих, ушима тяжко слышаша и очи свои смежиша. Паки [2412] вопросиша его книжницы и фарисее, глаголюще: Почто ученицы Твои преступают предание старец, не умывают бо рук своих, егда хлеб ядят. Он же, отвещав, рече им: Почто и вы преступаете заповедь Божию за предание ваше, Бог бо заповеда [2413], чти отца и матерь, иже злословит отца или матерь, смертию да умрет. И по мале рече: Добре [2414] пророчествова о вас Исаия, глаголя: Приближаются Мне людие, (л. 621) [2415] сии усты своима и устнами Мя чтут, сердце же их далече отстоит от Мене, всуе чтут Мя, учаще учения заповеди человеческа.

И приступиша [2416] фарисее, искушающе Его и глаголаша Ему: Аще достоит человеку пустити жену по всякой вине. Он же отвещав, рече им: Несте [2417] ли человеки, яко сотворивый искони, мужеский пол и женский сотворил я есть. И рече: Сего [2418] ради оставит человек отца своего и матерь и прилепится к жене своей и будета оба плоть едину. И се един некий приступль, рече Ему: Учителю благий, что сотворю, да имам живот вечный. Он же рече ему: Что Мя глаголеши блага, никто же (л. 621 об.) [2419] благ, токмо един Бог. Аще хощеши внити в живот, соблюди заповеди [2420]. Глагола ему: Кия? Иисус же рече: Еже не убиеши, не прелюбы сотвориши, не украдеши. И прочее.

И [2421] егда приближишася во Иерусалим и приидоша в Вифсагию к горе Елеонстей. Тогда Иисус посла два ученика, глаголя им: Идета в весь прямо вама и абие обрящете осля привязано и жеребя с ним, и отрешивше, приведита Мя. И аще вама кто речет что, речета, яко Господь ею требует, абие же послет я. Се же все бысть, да збудется реченое пророком, глаголющим: Рцыте [2422] дщери Сионове, се Царь твой грядет тебе кроток, всед на осля и жребя, сына яремнича.

(л. 622) [2423] И вниде [2424] в церковь Божия и изгна вся продающая и купущая в церкви и трапезы торжником испроверже и седалища продающих голуби. И глагола им: Писано [2425] есть, храм Мой храм молитвы. Вы же сотвористе его вертеп разбойником. Видевше же архиерее и книжницы чюдеса, яже сотвори и отроки зовуща во церкви и глаголюща: Осанна сыну Давидову. Негодоваша и реша Ему, слышиши ли, что сии глаголют. Иисус же рече им: Ей, несте ли чли николи же. Яко [2426] изо уст младенец ис сущих совершил еси хвалу.

И [2427] по шести дни поят Иисус Петра и Иякова и Иоанна и возведе их на гору высоку особь едины, (л. 622 об.) [2428] и преобразися пред ними, и ризы Его блещашася, и явися им Илия с Моисеом, и беста со Иисусом, глаголюща. И по мале. Бысть облак, осеняя их, и прииде глас из облака, глаголя: Сей есть Сын Мой возлюбленный, Того послушайте.

Глагола Иисус: Несте [2429] ли видех николи же в Писаниих. Камень, его же невреду, сотвориша зиждущей. Сей бысть во главу углу, от Господа бысть си и есть дивна во очию вашею.

Отвещав же Иисус, рече им: Прелщаетеся, не ведяще Писания, ни силы Божия. И по мале. О воскреснии мертвых. Несте ли чли реченаго Богом, глаголющем: Аз [2430] есмь Бог Авраамлев и Бог Исааков (л. 623) [2431] и Бог Ияковль, несть Бог, Бог мертвых, но Бог живых.

Фарисеи слышавше, яко посрами саддукей, собрашася вкупе и вопроси един от них законоучитель, искушаяй Его и глаголя: Учителю, кая заповедь болши есть в законе? Иисус же рече ему: Возлюбиши [2432]Господа Бога твоего всем сердцем твоим и всею душею твоею и всею мыслию твоею, си есть первая и болшая заповедь. Вторая ж подобна есть ей, возлюбиши [2433] искренняго твоего яко сам себе. В сию обою заповедию весь закон и пророцы вси ят.

Собраном же фарисеом [2434] вопроси их Иисус, глаголя: Что ся вам мнит о Христе, чий есть Сын? Глаголаша ему Давид (л. 623 об.) [2435], глагола им. Како убо Давид духом Господа Его нарицает, глаголя: Рече [2436] Господь Господеви моему, седи одесную Мене, дондеже положу враги Твоя подножие ногама Моима. Аще убо Давид нарицает Его Господа и како Сын ему есть и никто же можаше отвещати Ему словесе, ниже смеяше кто от того дне вопросити Его к тому.

И бысть [2437] мимо ходити Ему в субботу сквозе сеяния и начаша ученицы Его путь творити, востерзающе класы. И фарисее глаголаху Ему: Виждь, что творят в субботы, еже не достоит. И Той глаголаше им: Несте [2438] ли николи же чли, что сотвори Давид, егда требование име и взалка сам и иже с ним, (л. 624) [2439] како вниде в дом Божий при Авиафаре архиереи, и хлебы предложения снесть, их [2440] же недостояше ясти, токмо иереом, и даст и сущим с ним. Но [2441] в тыя дни воскорби Той, солнце померкнет, и луна не даст света своего, и звезды будут с небесе спадающа, и силы, яже на небесех, подвижутся. И тогда узрят Сына человеческаго, грядуща на облацех и с силою и славою многою. И [2442] якоже бысть во дни Ноевы, тако будет и во дни Сына человеческаго, ядях, пияху. И прочее. Такожде и якоже бысть во дни Лотовы, ядяху, пиаху. И прочее. И по мале.

Поминайте [2443] жену Лотову, иже аще взыщет душу свою спасти, погубит ю. (л. 624 об.) [2444] Обрете Филипп Нафанаила и глагола ему [2445]: Его же писа Моисей в законе и пророцы обретохом Иисуса сына Иосифова иже от Назарета. И глагола ему Нафанаил: От Назарета может ли что добро быти? Глагола ему Филипп: Прииди и виждь.

Никто [2446] же взыде на небо, токмо сошедый с небесе. И якоже Моисей вознесе змию в пустыни, тако подобает вознестися Сыну человеческому. Да всяк веруяй в Он, не погибнет, но имать живот вечный.

Грядый с небесе над всеми есть и еже виде и слыша, се свидетельствует и свидетельства Его никто же приемлет. Приемый Его свидетельство, верова, яко Бог истинен есть, (л. 625) [2447] Его же бо послал Бог, глаголы Божия глаголет.

Рече же Господь: Аще [2448] бо бы веровали Моисеови, веровали убо бысте и Мне, о Мне той писа. Аще ли того писанием не веруете, како Моим глаголом веру имате?

Реша же Ему: Кое [2449] убо Ты твориши знамение, да видим и веру имем Тебе. Что делаеши? Отцы наши ядоша манну в пустыни, якоже есть писано, хлеб с небесе даст им ясти. Рече убо им Иисус: Аминь, аминь, глаголю вам, не Моисей даст вам хлеб с небесе, но Отец Мой даст вам хлеба истинаго с небесе. И прочее.

Есть [2450] писано во пророцех: И будут вси ученицы Богу, всяк слышавый Отца и навык, приидет ко Мне.

(л. 625 об.) [2451] Абие же в преполовение праздника взыде Иисус в церковь и учаше, и дивляхуся июдее, глаголюще: Како Сей книги весть не учився? Отвеща убо им Иисус и рече: Мое учение несть Мое, но пославшаго Мя. Аще кто хощет волю Его творити, разумеет о учении, кое от Бога есть или Аз о себе глаголю. Не Моисей [2452] ли даст вам закон, и никто же от вас творит закона. Что Мене ищете убити?

Веруяй [2453] в Мя, рече Писание, реки от чрева Его истекут воды живы. Се же рече о Дусе, Его же хотяху приимати верующии во имя Его. Не убо бе Дух Святый, яко Иисус не бе прославлен [2454]. Глагола Никодим к ним, иже пришедый к Нему нощию един (л. 626) [2455] сый от них: Еда закон судит человеку, аще не слышит от Него прежде и разумеет, что творит, отвещаша. И рекоша ему: Еда и ты от Галилея еси, испытай и виждь, яко пророк от Галилея не приходит.

Приведоша [2456] же книжницы и фарисее к Нему жену, в прелюбодеянии яту, и поставиша ю посреде, и глаголаша к Нему: Учителю, сия жена ята есть ныне в прелюбодеянии. В законе [2457] же нам Моисей повеле таковыя камением побивати. Ты же что глаголеши? Се же реша, искушающе Его, да быша имели что глаголати нань. Иисус же долу преклонься, перстом писаше на земли, не слагая им, якоже прилежаху вопрошающе Его [2458], воскло(л. 626 об.)нься [2459], рече им: Иже есть без греха в вас, верзи камень на ню.

Паки [2460] же Иисус рече, глаголя: Аз есмь свет миру, ходяй по Мне не имать ходити во тме, но имать свет животный. Реша же Ему фарисее: Ты о Себе Сам свидетельствуеши, свидетельство Твое несть истинно. Отвеща Иисус, рече им: Аще [2461] Аз свидетельствую о Себе, истинно есть свидетельство Мое, яко вем, откуду приидох и камо иду. Вы ж не весте, откуду прихожду и камо гряду. Вы по плоти судите, Аз не сужду никому же. И аще сужду Аз, суд истинен есть, яко един несмь, но Аз и пославый Мя Отец. И в законе [2462] же вашем писано (л. 627) [2463] есть, яко человеку [2464] свидетельство истинно есть. Аз есмь свидетельствуяй о Мне самем и свидетельствует о Мне пославый Мя Отец. Глаголах же Ему: Где есть Отец Твой? Отвеща Иисус: Ни Мне весте, ни Отца Моего. Аще Мя бысте ведали и Отца Моего ведали бысте. Сия глаголы глагола Иисус в газофилакии, уча в церкви, и никто же не ят Его, яко не бе пришел час Его. Рече же им паки Иисус: Аз иду, и взыщете Мене, и во гресе вашем умрете. Аможе Аз иду, вы не можете приити. Глаголаху убо июдее: Еда ся Сам убиет, яко глаголет «аможе Аз иду, вы не можете приити». И рече им: Вы от нижних есте, Аз от вышних (л. 627 об.) [2465] есмь. Вы от мира сего есте, Аз несть от мира сего, рех убо вам, яко умрете во гресех ваших, аще бо не имате веры, яко Аз есмь, умрете во гресех ваших. Глаголаху же Ему: Ты кто еси? И рече им Иисус: Начаток яко и глаголю вам, многа имам о вас глаголати и судити, но пославый Мя истинен есть. И Аз, яже слышах от Него, сия глаголю в мире. Не разумеша, убо яко Отца им глаголаше. Рече же им Иисус: Егда вознесете Сына человеческаго, тогда разумеете, яко Аз есмь и о Себе ничесо же не творю, но якоже научи Мя Отец Мой сия глаголю и пославый со Мною есть. Не остави Мене единаго Отец, яко Аз угодная Ему (л. 628) [2466] всегда творю. Си Ему глаголющу, мнози вероваша в Него.

Глаголаше [2467] же Иисус к веровавшим к Нему июдеом: Аще вы пребудесте в словеси Моем, воистину ученицы Мои будесте и разуместе истину, и истина свободит вы. Кто [2468] от вас обличает Мя о гресе? Аще ли истину глаголю, почто вы не веруете Мне? Иже есть от Бога, глаголы Божия послушает, сего ради вы не послушасте, яко от Бога несте. Аминь, аминь, глаголю вам, аще кто слово Мое соблюдет, смерти не имать видети вовеки. Реша же Ему жидове: Ныне разумехом, яко бес имаши. Авраам умрет и пророцы и Ты глаголеши: Аще кто слово (л. 628 об.) [2469] Мое соблюдет, смерти не имать вкусити вовеки. Егда Ты болий еси отца нашего Авраама, иже умре, и пророцы умроша? Кого ся сам Ты твориши? Отвеща Иисус: Аще Аз славлюся сам, слава Моя ничесо же есть, есть славляй Мя, Его же вы глаголете, яко Бог наш есть, и не познасте Его. Аз же вем Его и аще реку, не вем Его, буду подобен вам ложь, но и вем Его и слово Его соблюдаю.

Отче [2470], прослави имя Твое. Прииде же глас с небесе и прославих, и паки прославлю. Народ же, стоя, слышав глаголаху, гром бысть. Инии глаголаху, ангел глагола Ему. Отвеща Иисус и рече: Не Мене ради глас сей бысть, но на(л. 629)рода [2471] ради. Ныне суд есть миру сему, ныне князь мира сего изгнан будет вон. И аще Аз вознесен буду от земли, вся привлеку к Себе. Се же глаголаше: Назнаменуя, коею смертию хотяше умрети. Отвеща Ему народ: Мы [2472] слышахом от закона, яко Христос пребывает вовеки.

Толика знамения сотворшу Ему пред ними и не веровах в Него, да збудется слово Исаия пророка: Еже [2473] рече Господи, кто верова слуху нашему и мышца Господня кому открыся? Сего ради не можаху веровати, яко паки рече Исаия: Ослепи [2474] очи их и окаменил есть сердца их, да не видят очима, ни разумеют сердцем, и обратятся и исцелю их. (л. 629 об.) [2475] Сия рече Исаия, егда виде славу Его и глагола о Нем.

Архиереи же вопроси Иисуса о ученицех Его и о учении Его. Отвеща ему Иисус: Аз, не обинуяся, глаголах миру. Аз всегда учих на сонмищих и в церкви, идеже вси людие снемлются, и тай не глаголах ничесо же. Что Мя вопрошаеши? Вопроси слышавших, что глаголах им. Се сии ведят, яже Аз рех. Сия рекшу Ему, един от предстоящих слуг удари в ланиту Иисуса, рек: Тако ли отвещаваеши архиереови? Отвеща ему Иисус: Аще зле глаголах, свидетельствуй о зле, аще ли добре, что Мя биеши?

Глагола [2476] же Ему Пилат: Мне ли не глаголеши? Не веси ли, яко власть имам (л. 630) [2477] распяти Тя и власть имам пустити Тя? Отвеща Иисус: Не имаши ни единыя на Мне власти, аще не быти дано свыше.

Воини [2478] же, егда пропяша Иисуса, прияша ризы Его и сотвориша четыре части, коемуждо воину часть и хитон. Бе же хитон не швен, свыше исписан весть. Реша же к себе, не предерем его, но метнем жребия о нем, кому будет. Да збудется Писание, глаголющее: Разделиша ризы Моя себе и о матисме Моей меташа жребия.

По [2479] сем ведый Иисус, яко вся уже совершишася, да збудется, глагола, жажду. Сосуд же стояше полн оцта и на трость вонзи же, придеша (л. 630 об.) [2480] ко устом Его. Егда прият оцет Иисус, рече, совершишася.

Быша [2481] бо сия, да збудется Писание, кость не сокрушится от Него. И паки другое Писание глаголет: Возрят нань, Его же прободоша.

Тогда [2482] убо вниде и другий ученик, пришедый прежде ко гробу, и виде и верова, не убо ведях Писания, яко подобает Ему из мертвых воскреснути. Глагола ей Иисус: Марие. Она же обращшися, глагола Ему: Раввуни, еже глаголется Учителю. Глагола ей Иисус: Не прикасайся Мене, не убо взыдох ко Отцу Моему. Иди же к братии Моей и рцы им: Восхожду ко Отцу Моему и Отцу вашему и Богу Моему и Богу вашему.

(л. 631) [2483] И [2484] идоша нецый от нас ко гробу и обретоша тако, якоже и жены реша, Самаго же не видеша. И Той рече к ним: О несмысленая и косная сердцем, еже веровати о всех, яже глаголаша пророцы. Не сия ли подобаше пострадати Христу и внити в славу Свою? И начен от Моисея и от всех пророк сказоваше има, от всех Писаний, яже о Нем.

Рече же им: Сии суть словеса, яже глаголах вам еще сый с вами, яко подобает скончатися всем написаным в законе Моисеове и в псалмех о Мне. Тогда отверзе им ум разумети Писания и рече им, яко тако писано есть и тако подобаше пострадати Христу (л. 631 об.) [2485] и воскреснути от смертных в третий день, и проповедатися во имя Его покаянию и отпущению грехом во всех языцех, наченше от Иерусалима. Вы же есте свидетелие сим, и се Аз послю обетование Отца Моего на вы. Вы же сядете во граде Иерусалимсте, дондеже облечетеся силою свыше.

И [2486] во дни сия востав Петр посреде ученик, рече, бе же народ имей вкупе яко сто и двадесяте: Мужие, братие, подобаше скончатися писанию сему, еже прежде рече Дух Святый усты Давидовы [2487] о Июде бывшем вожди, емшем Иисуса, яко причтен бе с нами и прият жребий службы сея. Сей же убо стяжа село от (л. 632) [2488] неправедныя и ниц быв проседеся посреде. И излия вся утроба его и разумно бысть всем живущим во Иерусалиме, яко нарещися селу тому своим их языком Акелдама, еже есть село крове.

Пишешь бо в книзе псаломстей [2489], и да будет двор его пуст и не будет живяй в нем, и епископство [2490] его приимет ин. Став [2491] же Петр со единемнадесяте, воздвиже глас свой и рече им: Мужие иудейстии, живущии во Иерусалиме вси. Се вам разумно да будет и внушите глаголы моя, не бо якоже вы мните сии пияни суть, есть бо час третий дне, но се есть реченое пророком Иоилем [2492]: И будет в последняя дни, глаголет Господь, (л. 632 об.) [2493] излию от Духа Моего на всяку плоть и прорекут сынове ваши и дщеря ваша и юноша ваша видения узрят, и старцы ваша сония видят, ибо на рабы Моя и на рабыня Моя во дни оны излию от Духа Моего и прорекут, и дам чюдеса на небеси горе, и знамения на земли низу кровь и огнь и курение дыма, солнце преложится во тму и луна в кровь. Прежде даже не приити дню Господню великому и просвещеному и будет всяк [2494], иже призовет имя Господне, спасется. Мужие израильтестии, слышите словеса сия Иисуса Назореа, мужа от Бога извествована в вас силами и чюдесы и знамении, иже сотвори тем Бог посреде вас, (л. 633) [2495] якоже и сами весте. Сего пронарекованым советом и проразумением Божиим продана приемше, рукама беззаконных пригвождше, убисте. Его [2496] же Бог воскреси, разреши болезни смертныя, якоже не бяше мощно держану быти Ему от нея. Давид [2497] бо глаголет о Нем: Предзрех Господа предо мною выну, яко одесную мене есть да ся не подвижу. Сего ради возвеселися сердце мое и возрадовася язык мой, еще же и плоть моя вселится на упование, яко не оставиши душу мою во аде, ни даси же преподобному Своему видети истления. Сказал ми еси пути живота, исполниши мя веселия с лицем Твоим. Мужие братие, (л. 633 об.) [2498] достоит рещи со дерзновением к вам о патриарсе Давиде [2499], яко умре и погребен бысть. И гроб Его есть в нас даже до дне сего. Пророк убо сый и ведый [2500], яко клятвою клятся ему Бог, от плода чресл его по плоти воздвигнути Христа и посадити Его на престоле Его. Предвидев, глагола о воскресении [2501] Христове, яко не оставися душа Его во аде, ни плоть Его виде истления. Сего Иисуса воскреси Бог, Ему же вси мы есмы свидетелие. Десницею убо Божиею вознесеся, обетование же Святаго Духа прием, от Отца излия. Се еже вы ныне видесте и слышасте, не бо Давид взыде на небеса, глаголет бо сам [2502]: Рече Господь Господеви моему, седи одесную Мене, дондеже положу (л. 634) [2503] враги твоя подножие ногама Моима. Твердо убо да разумеет весь дом Израилев, яко и Господа и Христа Его Бог сотворил есть сего Иисуса, Его же вы распясте. Слышавше же, умилишася сердцем, реша ж к Петру и прочим апостолом: Что сотворим, мужие братие? Петр же рече [2504] к ним: Покайтеся и да крестится койждо вам во имя Иисуса Христа во оставление грехов и приимете дар Святаго Духа. Вам бо есть обетование и чадом вашим и всем далним, елика аще призовет Господь Бог наш. Иными же словесы множайшими свидетельствоваше и моляше я, глаголя: Спаситеся от рода строптиваго сего. Отпущена ж бывша приидоста ко своим (л. 634 об.) [2505] и возвестиста елика к ним, архиереи и старцы реша. Они же слышавше, единодушно воздвигоша глас к Богу и рекоша: Владыко, Ты Боже, сотворивый небо и землю и море и вся, яже в них, иже Духом Святым усты отца нашего Давида [2506] отрока рекий. Вскую шаташася языцы и людие поучишася тщетным, предсташа царие земстии и князи, собрашася вкупе на Господа и на Христа Его.

Стефан же исполнь веры и силы, творяше знамения и чюдеса велия в людех. Восташа же нецый от сонма глаголемаго Ливертинска и Киринейска и Александрска и иже от Киликия и Асия, состязающеся (л. 635) [2507] со Стефаном и не можаху стати противо премудрости и Духу, имже глаголаше. Тогда изведоша мужа, глаголюща, яко слышахом его глаголюща глаголы хулныя на Моисея и на Бога. Сподвигоша же люди и старцы и книжники, и воставше, восхитиша его, и приведоша на сонмище. Поставиша же свидетеля ложны, глаголюща, яко человек сей не престает глаголы хулныя глаголя на место святое сие и закон, слышахом бо его глаголюща, яко Иисус Назарей сей разорит место сие и изменит обычая, яже предаде нам Моисей. И возревше нань вси седящии в сонмищи, видеша лице его, яко лице ангелу. Рече же архиерей, аще убо сия тако суть. Он же рече: (л. 635 об.) [2508] Мужие, братие и отцы послушайте. Бог славы явися отцу нашему Аврааму, сущу в Междоречии прежде даже не вселитися ему в Харран. И рече к нему: Изыди [2509] от земля твоея и от рода твоего и от дому отца твоего и прииди в землю, ея же аще ти покажу. Тогда изыде от земля Халдейская, вселися в Харран, и оттуду по умертвии отца его, пресели его в землю сию, на ней же вы ныне живете. И не даст ему наследия в ней, ни стопы нозе. И обеща дати ему во одержание ея и семени его по нем, не сущу ему чаду. Глагола же ему Бог [2510], яко будет семя его пришелцы в земли чюждей и поработят е и озлобят лет четыреста, и я(л. 636)зыку [2511] ему же поработают. Сужду Аз, рече Бог, и по сих изыдут и послужат Ми на месте сем. И даст ему завет обрезания [2512]. И тако роди Исаака [2513] и обреза его в день осьмый. И Исаак Иякова [2514], и Ияков обанадесяте патриарха [2515], и патриарси, позавидевше Иосифу, продаша его во Египет [2516]. И Бог бе с ним и изъят его от всех скорбей его и даст ему благодать и премудрость [2517] пред фараоном царем Египетским. И постави его вожда над Египтом и надо всем домом своим. Прииде же глад на всю землю Египетскую и Ханааню и скорбь велия, и не обретаху сытости отцы нашы [2518]. Слышав же Ияков сущую пшеницу во Египте, (л. 636 об.) [2519] посла отца нашего первее [2520]. И внегда второе приидоша, познан бысть Иосиф братии своей и яве бысть фараонови род Иосифов. Послав же Иосиф, призва отца своего Иякова и весь род душ седмьдесят и пять. Сниде [2521] же Ияков во Египет. И [2522] скончася сам и отцы нашы, и принесены [2523] быша в Сихем, и положени быша во гробе [2524], еже купи Авраам ценою сребра от сынов Емморов Сихема. И якоже приближашеся время обетования, иже клятся Бог Аврааму [2525], возрастоша людие и умножишася во Египте, дондеже наста царь ин, иже не знаяше Иосифа. Сей зле умыслив о роде нашем и озлоби отца наша уморити младенца (л. 637) [2526] их и не ожидати. В [2527] некое же время родися Моисей и бе [2528] угоден Богови, иже воспитан бысть в дому отца своего месяца три. Отвержену же ему, взят [2529] же его дщи фараонова и воспита его себе в сына. И наказан бысть Моисей в сей премудрости египетстей, бе же силен в делех и словесех. И якоже наполняшеся ему четыредесят лет время, взыде на сердце ему посетити братию свою сыны Израилевы. И видев некоего обидима [2530], пособствова, и сотвори отмщение обидимому, убив египтянина. Мняше же разумети братиям своим, яко Бог рукою его даст спасение им, они же не разумеша. Во [2531] утрий же день явися им тяжущемся (л. 637 об.) [2532] и привлачаше их в смирение, рек: Мужие, братия есте вы. Обидяй же ближняго отрину и рек: Кто тя постави князи и судию над нами, еда убити мя ты хощеши, им же образом убил вчера египтянина. Бежа же Моисей о словесе сем и бысть пришлец в земли Мадиамстей, идеже роди сына Давида. И исполнишемся [2533] летом четыредесятем явися ему в пустыни горы Синайския ангел Господень в пламени огненне в купине. Моисей же видев, дивляшеся видению. Приступающему же ему разумети бысть глас Господень к нему: Аз Бог Отец твоих, Бог Авраамов, Бог Исааков, Бог Ияковль. Трепетен же (л. 638) [2534] быв Моисей, не смеяше смотрети. Рече же ему Господь: Разреши сапог ногу твоею, место бо, на нем же стоиши, земля свята есть. Видя видех озлобление людей моих, иже во Египте, и стенание их услышах, и снидох изъяти их. И ныне гряди и послю тя во Египет. Сего Моисея, его же отринуша, рекше, кто тя постави князя и судию? Сего Бог князю избавителя посла рукою ангела явльшагося ему в купине. Сей [2535] изведе их, сотворив чюдеса и знамения в земли Египетстей и в Чермнем мори и в пустыни, лет четыредесят. Сей есть Моисей, рекий сыном Израилевым пророка [2536] вам воздвигнет Господь Бог ваш от братия вашея, яко мене того послу(л. 638 об.)шайте [2537]. Сей есть бывый в церкви в пустыни со ангелом, глаголавшем ему в горе Синайстей, и отцем нашим, иже прият словеса жива дати нам. Его же восхотеша послушати отцы наши, но отринуша и и обратишася сердцем [2538] своим во Египет, рекше Аарону: Сотвори нам Боги, иже предыдут пред нами. Моисей бо сей, иже изведе нас от земли Египетския, не вемы, что бысть ему. И телец сотвориша во дни оны и принесоша жертву идолу, и веселяхуся в делех руку своею. Отврати же ся Бог и предаде их служити воем небесным, якоже пишет в книзе пророк [2539]. Еда заколения и жертвы принесосте Ми лет четыредесяте в пустыни доме Израилеве и восприясте кровь (л. 639) [2540] молохов и звезду бога вашего Рефамна, образы, яже сотвористе, поклонятися им. И преселю вы далее Вавилона, сень свидения беяше отцем нашим в пустыни. Якоже [2541] повеле, глаголяй Моисеови, сотворити ю по образу, его же виде. Ея [2542] же и внесоша, приемше отцы наши со Иисусом во одержании языком. Ея же изрину Бог от лица отец наших даже до дний Давида, иже обрете благодать пред Богом и испроси обрести селение Богу Ияковлю. Соломон [2543] же созда Ему храм, но Вышний не в рукотвореных церквах живет, якоже пророк глаголет: Небо [2544] Мне престол есть, земля же подножие ногама Моима. Кий храм созиждете Ми, глаголет Господь, или кое место покоищу Моему? (л. 639 об.) [2545] Не рука [2546] ли Моя сотвори сия вся, жестоковыйни и необрезании сердцы и ушесы, вы присно Духу Святому противистеся, якоже отцы ваши, тако и вы. Кого от пророк не изгнаша отцы ваша и убиша провозвестившая о пришествии праведнаго. Ему ж вы ныне предателе [2547] и убийца бысте, иже приясте закон повелением ангел и не сохранисте. Слышаще же сия, распыхахуся сердцы своими и скрежетаху зубы нань. Стефан же сый, исполнь Духа Свята, возрев на небо, виде славу Божию, Иисуса стояща одесную Бога, и рече: Се вижу небесе отверста и Сына человеча одесную стояща Бога. Возопивше же глагом велиим, затыках уши свои и устремишася (л. 640) [2548] нань. И изведше вне града, камением побиваху его, и свидетелие положиша ризы при ногу юноши, нарицаемаго Савла, и камением побиваху Стефана, молящеся и глаголюща: Господи Иисусе, приими дух мой. Преклонь же колени и возопи гласом велиим: Господи [2549], не постави им греха сего. И сия рек, успе.

Умоли [2550] же каженик Филиппа возшедша сести с ним. Слово же Писания, еже чтяше, сие бе, яко овча на заколение ведеся и яко агнец прямо стригущему его безгласен, тако не отверзает уст своих. Во смирении же его суд его взятся, род же его кто исповесть, яко вземлется от земля живот его. Отвещав же (л. 640 об.) [2551] каженик, к Филиппу рече: Молю тя, о Ком пророк глаголет се, о себе ли или о инем некоем. Отверз же Филипп уста своя, начат от Писания сего благовестити ему Иисуса.

Ныне [2552] убо вси мы пред Богом приидохом слышати вся повеленая тебе от Бога. Отверз же Петр уста, рече: Поистине разумеваю, яко не на лица зрит Бог [2553], но во всяком языце бойся Бога и делаяй правду приятен Ему есть. Слово, еже посла сыном Израилевом, благовествуя мир Иисус Христом. Сей есть всем Господь, вы весте глагол, бывший по всей Июдеи, начен от Галилея, по крещении, еже проповеда Иоанн Иисуса, иже от Назарета, яко помаза Бог Духом Святым (л. 641) [2554] и силою, иже прииде, благовествуя и исцеляя вся насилованая от диавола, яко Бог бяше с Ним. И мы есмы свидетелие всем, их же сотвори во стране Июдейстей и во Иерусалиме. Его же и убиша, повешше на древе. Сего Бог воздвиже в третий день и даде Ему яве быти не всем людем, но свидетелем прежнареченым от Бога нам, иже ядохом с Ним и пихом. По воскресении Его от [2555] мертвых и повеле нам проповедати людем и засвидетельствовати, яко Той есть нареченый от Бога Судия живым и мертвым. И о Сем вси пророцы свидетельствуют, оставление грехов прияти именем Его всякому верующему в Него. По чтении [2556] же закона (л. 641 об.) [2557] и пророк послаша началницы сонмища к ним, глаголюще: Мужие, братия, аще есть слово в вас утешения, к людем глаголита. Востав же Павел и помаав рукою, рече: Мужие израильтяне, и боящиися Бога, услышите. Бог людий сих избра отца наша и люди вознесе в пришествии в земли Египетстей [2558] и с мышцею высокою изведе их из нея и до четырехдесят лет препита их в пустыни, и низложив язык седмь в земли Ханаанстей, даде им в наследие землю их. И по сих, яко лет четыреста и пятдесят, даде им судиа до Самуила пророка. И оттуду просиша царя [2559]. И даде им Бог Саула, сына Киссова, мужа от колена (л. 642) [2560] Вениаминова лет четыредесят. И преставль его, воздвиже им Давыда в царя. Ему же рече, свидетельствовав: Обретох [2561] Давида Иессеова, мужа по сердцу Моему, иже сотворит вся хотения Моя. От сего семени Бог по обетованию воздвиже Израилю спасение Иисуса. Проповедавшу Иоанну пред лицем снития Его, крещение покаяния всем людем Израилевым.

Якоже скончавше Иоанн течение, глаголавше: Кого [2562] мя не пщуете быти, несмь аз, но Ся грядет по мне, Ему же несмь достоин разрешити ремень сапогу Его. Мужие братия, сынове рода Авраамля, и иже в вас боящиеся Бога, вам слово спасения сего послася. Живущии во Иерусалиме и князи (л. 642 об.) [2563] их сего не разумевше и глас пророческих, иже по вся субботу чтомых судивше скончася. И ни единыя вины смертны обретше, просиша убити Его [2564], якоже скончаша вся, якоже о Нем писаная. Снемше со древа, положиша во гробе, Бог же воскреси [2565] Его от мертвых, иже явися на дни многи возшедним с Ним от Галилея во Иерусалим, иже ныне суть свидетелие Его к людем, и мы вам благовествуем, еже ко отцем обетование бывшее. Яко сие Бог сконча чадом их, нам воздвиг Иисуса, якоже и во псалме втором пишет: Сын [2566] Мой еси Ты. Аз днесь родих Тя. А якоже воскреси Его от мертвых, не к тому хотяща (л. 643) [2567] возвратитися во истление. Сице рече [2568], яко дам вам преподобная Давидова верная. Тем же и в другом глаголет: Не [2569] даси же преподобному Своему видети истления. Давид убо своему роду послужив, Божиим советом успе и приложися ко отцем своим и виде истление, а Его же Бог воздвиже, не веде истления. Ведомо убо да будет вам, мужие братия, яко ради сего вам оставление грехов проповедается и от всех, их же не могосте в законе Моисеове оправдатися. О сем всяк веруяй оправдается. Блюдите убо, да не приидет на вас реченое в пророцех: Видите [2570], нерадивии, и чюдетеся и узрите и исчезнете, яко дело Аз соделаю (л. 643 об.) [2571] во дни ваша, Ему же не имати веровати, аще кто повесть вам. Исходящим же им от сонмища иудейска, молях языцы в другую субботу глаголатися им глаголом сим. Разшедшу же ся собору, последоваша мнози от июдей и честивых пришлец Павлу и Варнаве, иже глаголюще им, уверях их пребывати во благодати Божии. Во грядущую же субботу мало не весь град собрася послушати слово Божие. Видевше же июдее народы, исполнишася зависти и вопреки глаголаху глаголемым от Павла, сопротив глаголюще и хуляще. Дерзнувша же Павел и Варнава, рекоста: Вам бе лепо первее глаголати слово Божие. А понеже отвергосте е и недостойны (л. 644) [2572] творите сами себе вечному животу, се обращаемся во языки. Тако бо заповеда нам Господь, положих тя в свет языком, еже быти ти во спасение даже до последних земли.

Слышавше [2573] же апостоли Варнава и Павел, растерзавше ризы своя, вскочиша в народ, зовуще и глаголюще: Что сия творите? И мы подобострастна есте вам человека, благодетелствующа вам, от сих суетных обращатися к Богу живу, иже сотвори небо и землю и море и вся, яже в них. Иже [2574] в мимошедшая роды оставил бе вся языки ходити в пути Своя, иде убо не несвидетельствована Себе остави, благо творя. С небесе вам дождевы дая и времена плодоносна, насыщая (л. 644 об.) [2575] пища и веселия сердца ваша.

По [2576] умолчании же их отвеща Ияков, глаголя: Мужие братие, послушайте мене. Симеон поведа, яко прежде Бог посети прияти от язык люди о имени Своем и сему согласуют словеса пророк, якоже пишет: По сих обращуся и созижду кров Давидов, падшии и раскопаная его созижду и исправлю его, яко да взыщут простии человецы Господа и вси языцы, в них же нарицается имя Мое на них, глаголет Господь, творяй сия вся. Разумна от века суть Богови вся дела Его.

Став [2577] же Павел посреди Ариева дела, рече: Мужие афинейстии, по всему зрю, яко в вере блудяще есте. Проходяй бо и соглядая Боги ваша, (л. 645) [2578] обретох и кумир, на нем же бе написано имя неведомому Богу, Его же убо, не ведуще, благолепно чтете. Сего аз проповедаю вам, Бог сотворивый мир и вся, яже в нем, сей небу и земли Господь сый [2579]. Не в рукотвореных храмах живет, ни от рук человеческих угождения приемлет, требуя, что Сам дая всем живот и дыхание по всяческих.

Тогда [2580] Павел рече к нему: Битися имать Бог стено повапленая и ты седиши судя ми по закону, и преступая закон, велиши, да биют мя. Предстоящии ж реша: Архиерею ли Божию досаждаеши? Рече же Павел: Не ведах, братие, яко архиерей есть. Писано есть: Князю [2581] людий своих да не речеши зла.

(л. 645 об.) [2582] Молим [2583] же ся о тебе слышати, яже мудрствуеши о ереси сей ведомо есть нам, яко всюду сопротив глаголема есть. Уставивше же ему день, приидоша к нему, пространно приимницу множайшии, им же сказавше, свидетельствуя Царьствие Божие, от закона Моисеова и пророк, от утра даже и до вечера. Ови убо веровах глаголемым, ови же не веровах. Несогласни же суще друг ко другу, отхожаху, рекшу Павлу глагол един, яко добре Дух Святый глагола Исаием пророком ко отцем вашим, глаголя: Иди к людем сем и рцы, слухом услышите и не имате разумети, и видяще узрите, и не имате видети. Аще [2584] убо закон совершаете царьски по писанию: Возлюбиши (л. 646) [2585] искренняго [2586] своего якоже самаго себе, добре творите. Аже ли на лица зрите, то грех содеваете, обличаеми от закона якоже преступницы [2587]. Иже бо весь закон соблюдет [2588], согрешит же во единем, бысть всем повинен, рекий, не прелюбы сотвориши, рекл есть, не убиеши. Аще ли не прелюбы твориши, убиваеши же, бысть преступник закону. Тако глаголете и тако творите, яко законом свободном хотящем суд прияти, суд бо без милости не сотворшему милости, хвалится милость на суде.

Хощеши же ли разумети, о человече суетне, яко вера без дел мертва есть? [2589] Авраам, отец наш, не от дел ли оправдася [2590], вознес Исаака, сына своего, (л. 646 об.) [2591] на олтарь. И совершися Писание, глаголющее [2592]: Верова же Авраам Богови и вменися ему в правду, друг Божий наречеся.

Зрите ли, убо яко от дел оправдается человек, а не от веры единыя. Оклеветаяй [2593] бо брата или осуждая брата своего, оклеветает закон и осуждает закон. Аще ли закон осуждаеши, неси творец закону, но судия. Един есть Законоположник и Судия, могий спасти и погубити.

Петр [2594], апостол Иисус Христов, избраным пришелцам разсеяния Понту, Галатии, Каппадокии, Асии и Вифинии по презрению Бога и Отца во святыню Духа, в послушание и кропление крови Иисус Христовы, благодать вам и мир да умножится.

(л. 647) [2595] Зачало.

Благословен [2596] Бог Отец Господа нашего Иисуса Христа, иже по мнозей Своей милости порождей нас во упование живо воскресением Иисус Христовым от мертвых в наследие нетлено и нескверно и неувядаемо соблюденых на небесех в вас, иже силою Божиею соблюденых верою, во спасение готово явитися во время последнее. О Нем же радуйтеся мало ныне, аще лепо есть, прискорбни бывше в различных напастех, да искушение вашея веры, многочестнейша злата гибнуща, огнем же искушена, обрящется в похвалу и славу и честь. Во откровении Иисус Христове, Его, не видевше, любити, на Него же ныне не зряще, верующе же, радуйтеся радостию неизглаголаною и прославленою, приемлюще (л. 647 об.) [2597] кончину вере вашей, спасение душам. О Нем же спасение взыскаша и испыташа пророцы, иже о вашей благодати прорекшей, испытающе, в каково или в кое время являше в них Дух Христов. Прежде свидетельствуя о Христовых страстех, и яже по сих словах им же открыся, яко не им самем, но и нам же служаху [2598] сия. Яже ныне возвестишася вам Духом Святым, посланым с небесе, в ня же желают ангели приникнути.

Зачало.

Тем [2599] же, возлюблении, препоясавше чресла помышления вашего, трезвящеся, совершенне уповайте на приносимую вам благодать откровением Иисус Христовым, яко чада послушанию, не преобразующеся первыми (л. 648) [2600] неведения вашего похотении, но возвавшему вы святому, и сами святи во всем житии будесте. Зане писано есть, яко Аз [2601] свят есмь. И аще Отца называете нелицемерно судяща коемуждо [2602] по делу, со страхом жития вашего время жителствуете, ведяще, яко неистленным сребром или златом избавистеся от суетнаго вашего жития отцы преданаго, но честною кровию, яко Агнца непорочна и нескверна Христа. Предуведена [2603] убо прежде сложения мира, явльша же ся в последняя лета вас ради, иже Его ради веровавших в Бога, воздвигшаго Его из мертвых и славу Ему давша [2604] и упование будет (л. 648 об.) [2605] на Бога. Душа [2606] очистивше в послушание истине Духом, в братолюбие нелицемерно от чиста сердца друг друга любите прилежно. Порождение не от семене истленна, но неистленна, Словом живаго Бога и пребывающаго вовеки. Зане [2607] всяка плоть яко трава и всяка слава человеку яко цвет травный. Исше трава и цвет ея отпадет, глагол же Господень пребывает во веки. Сей же есть глагол, благовествованый в вас.

Глава 2.

Отложше [2608] убо всяку злобу и всяку лесть и лицемерие и зависть и вся клеветы, яко новорождени младенцы, словесное и нелестное млеко возлюбисте, да о Нем возрастете во спасение, понеже вкусисте, яко (л. 649) [2609] благ Господь, к Нему же приходяще, Камени живу, от человек убо уничижену, от Бога же избрану честну. И сами яко камение живо зиждетеся в храм духовен, священство [2610] свято вознести жертвы духовны, благоприятны Богови Иисус Христом. Зане писано есть в Писании: Се [2611] полагаю вси оне Камень краеуголен, избран честен, и веруяй в Онь, не постыдится. Вам убо честь верующим, а противящимся камень, его же небрегоша Зиждущий. Сей [2612] бысть во главу углу и камень претыканию и камень соблазну, о Нем же и претыкаются слову противляющиися, о Нем же и положени быша. Вы же род избран, царьское священие, язык свят, людие (л. 649 об.) [2613] обновления, яко да добродетели возвестисте, иже ис тмы вас призвавшему в чюдный Его свет.

Иже [2614] иногда не людие, ныне же людие Божии, иже не помиловани, ныне же помиловани бысте.

Зане Иисус Христос пострада по нас, нам оставль образ, да последуем стопам Его. Иже [2615] греха не сотвори, ни обретется лесть во устех Его, иже укаряем противу неукаряше, стражда не прещаше, предаяше же судящему праведно. Иже [2616] грехи наша Сам вознесе на теле Своем на древо, да от грех избывше, правдою поживем, Его же язвою исцелесте. Аще [2617] ли же яки христианин да не стыдится, но да про(л. 650)славляет [2618] же Бога в части сей. Яко [2619] время начати суда от дому Божия, аще ли прежде от вас что кончина противящимся Божию Евангелию. И [2620] аще праведник едва спасется, нечестивый и грешный где явится.

Глава 3 [2621].

Сие уже, возлюбленнии, второе пишу вам послание, в них же возбуждаю вас воспоминанием чистаго смысла помянути преждереченыя глаголы о святых пророк и апостол ваших и заповедей Господа и Спаса. Сие [2622] прежде ведяще, яко приидут в последняя дни ругателие, по своих похотех ходяще и глаголюще: Где есть обетование пришествия Его? Отнели же бо отцы усопша, вся тако пребывают от начала созданию. Утаит бо ся им сие (л. 650 об.) [2623] хотящым, яко небеса быша исперва и земля от воды и водою составлена Божиим словом, ими же тогдашний мир, водою потоплен быв, погибе. А нынешняя небеса и земля тем же словом сокровенна суть, огнем блюдома в день Суда и в погибель нечестивым человеком.

Едино же сие да не утаится вам, возлюбленнии, яко един день пред Господем [2624] яко тысяща лет и тысяща лет яко день един. Не коснит Господь обетования, якоже нецыи коснение мнят, но долго терпит на нас [2625], не хотя, да никто ж погибнет, но да вси в покаяние приидут. Приидет [2626] же день Господень яко тать в нощи, в онь же убо небеса с шумом (л. 651) [2627] мимоидут. Стихия ж сжегаемы разорятся, земля ж и яже на ней дела сгорят. Сим убо всем разоряемым, кацем подобает быти нам во святых пребываниих и благовериих чающим и скорее быти делающим пришествия Божьяго дне. Его же ради небеса, жегома, разорятся [2628], нова же небеса и землю нову по обетованию Его чаем, в них же правда живет. Тем же, возлюблении, сих чающе, потщитеся, нескверни и непорочни, тому обрестися в мире и [2629] Господа нашего долготерпение: спасение непщуйте, якоже и возлюбленый наш брат Павел, по данней ему премудрости написа вам, якоже и во всех своих посланиих, глаголя в них о сих, (л. 651 об.) [2630] в них же суть неудобь разумна некая, яже ненаучении и неутвержении развращают, якоже и прочая писания к своей погибели им.

Вы же убо, возлюблении, ведяше, хранитеся, да не лестию беззаконных сведени бывше отпадете от своего утвержения, но да растете же во благодати и разуме Господа нашего и Спаса Иисуса Христа, тому слава и ныне и в день века. Аминь.

Павел [2631], раб Иисус Христов, зван апостол, избран во благовестие Божие. Еже прежде обеща пророки своими в писаниих святых о Сыне своем, бывшем от семени Давидова по плоти, нареченем Сыне Божий в силе, по Духу Святу, из воскрешения мертвых Иисус Христа Господа нашего, имже (л. 652) [2632] прияхом благодать и послание в послушание веры по вся языки о имени Его, в них же есте и вы звани Иисусу Христу всем сущим в мире возлюбленым Богу.

Глава 1 [2633].

Не хощу же вас не ведети, братие, яко множицею восхотех приити к вам и возбранен бых доселе, да некий плод имею и в вас, якоже и в прочих языцех, еллинех же и в варварех. Мудрым же и неразумным должен есмь, толико есть еже по моему усердию и вам, сущим в Риме, благовестити. Не [2634] стыжу бо ся благовествованием Христовым, сила бо Божия есть во спасение всякому верующему, иудееви же прежде и еллину [2635]. Правда бо Божия в Нем является, от веры в веру, якоже есть писано: Праведный [2636] же (л. 652 об.) [2637] от веры жив будет.

Зачало 80.

Открывает [2638] бо ся гнев Божий с небесе на всяко нечестие и неправду человеческу, содержащих истину в неправде, занеже разумное Божие яве есть в них. Бог бо явил есть и им, невидимая бо от создания мира творенми помышляема видима суть и присносущная же сила Его и Божество. Воеже быти им безответном, занеже разумевше Бога, не яко Бога прославиша или благодариша [2639], но осуетишася помышлении своими и омрачися неразумное их сердце, глаголющеся быти мудры и обьюродеша и измениша славу нетленнаго Бога в подобие образа тленна человека и птиц и четвероног и гад. Тем же и предаст (л. 653) [2640] их Бог в похоть сердец их, в нечистоту, воеже сквернитися телесем их в себе самех, иже преминаше истину Божию во лжу, и почтоша и послужиша твари, паче Творца, иже есть благословен во веки. Аминь.

И [2641] якоже не искусиша Бога имети в разуме, сего ради предаст их Бог в неискусен ум творити неподобная, исполненых всякия неправды. И прочее. Нецыи же и оправдание Божие разумеша, яко иже таковая творящии, достойни суть смерти. Не точию же се творят, но и волю деют творящим.

Глава 2 [2642].

Сего [2643] ради безответен еси, о человече, всяк судяй, им же бо судом судиши другу, себе осуждаеши, тажде бо (л. 653 об.) [2644] твориши судяй. Вемы же, яко суд Божий есть поистине на творящих таковая. Помышляеши же ли сие, о человече, судяй таковая творящим и творя сам тажде, яко ты избежиши ли суда Божия или о богатстве благодати Его [2645], и кротости и долготерпения не радиши, не неведый, яко благодать Божия в покаяние тя вводит. По жестокому ж и твоему непокаяному сердцу [2646] собираеши себе гнев в день гнева и откровения праведнаго Суда Божия, иже [2647] коемуждо по делом его. Овем убо по терпению дела благаго славу и честь и нетление ищущим живота вечнаго, а иже по рвению и противляющимся убо истине, (л. 654) [2648] повинующим же ся неправде, ярость и гнев и скорбь и теснота на всяку душу человека творящаго злое, иудееви же прежде и еллину.

Зачало 81.

Слава же и честь и мир всякому делающему благое, иудееви же прежде и еллину. Несть [2649] бо на лица зрения у Бога, елицы бо беззаконно согрешиша, беззаконно и погибнут, и елицы в законе согрешиша, законом суд приимут, не слышатели бо закону праведни пред Богом, но творцы закону, сии оправдятся.

Зачало 82.

Егда бо языцы, не имуще закона, естеством законная творят, сия закона не имуще сами себе суть закон, иже являют дело законное написано в сердцы своих (л. 654 об.) [2650] с послушествующы им совести их и между собою помыслом осуждающым или отвещающым в день, егда судит Бог тайныя человеком по благовестию моему Иисус Христом. Се ты иудей имянуешися и почиваеши на законе, и хвалишися о Бозе, и разумееши волю, и разсуждаеши лучшая научаем от закона, уповая же себе вожда быти слепым, свет сущим во тме, наказателя безумным, учителя младенцем, имуща образ разума и истинне в законе, научаяй убо инаго, себе ли не учиши. Проповедуяй не красти, крадеши, глаголяй, не прелюбы творити, прелюбы твориши, гнушаяся идол, святая крадеши, иже в законе хвалишися, (л. 655) [2651] преступлением закона Бога безчествуеши. Имя [2652] бо Божие вами хулится во языцех, якоже есть писано: Обрезание убо ползует, аще закон твориши. Аще ж закона преступник еси, обрезание твое не обрезание бысть. Аще убо не обрезание, оправдание закона сохранит, не необрезание ли его во обрезание вменится и осудит, яже от естества необрезание, закон совершающы, тебе иже Писанием и обрезанием суща преступника закону.

Зачало 83.

Не бо иже яве иудей есть, ни еже яве во плоти обрезание, но иже в тайне иудей, сей иудей есть и обрезание сердца духом [2653], а не Писанием, ему ж похвала не от человек, но от Бога.

(л. 655 об.) [2654] Глава 3.

Что убо лишшее иудею или кая полза обрезанию, много по всякому образу. Первее, убо яко вероваша быша им словеса Божия, что бо аще не вероваша нецыи, еда убо неверие их веру Божию [2655] упразднит, да не будет. Да будет же Бог истинен [2656], всяк же человек ложь, якоже есть писано, яко да оправдишися в словесех своих [2657] и победиши внегда судит ти ся. Аще ли неправда ваша Божию правду составляет, что речем, еда неправеден Бог, наносяй гнев, по человеку глаголю, да не будет, понеже како судити имать Бог всему миру. Аще убо истина Божия в моей лжы избыточествова в славу Его, что еще (л. 656) [2658] и аз яко грешник осуждаюся и не якоже хулимся. Якоже глаголют нецыи нас глаголати, яко сотворим злая да приидут на ны благая, их же суд праведен есть. Что убо повинни ли есмы? Никако же. Предукорихом бо убо иудеех и еллинех всем под грехом быти, якоже есть писано [2659], яко несть праведен никто ж, несть разумевая и несть взыскаяй Бога, вси уклонишася, вкупе непотребни быша. Несть творяй благостыню, несть даже до единаго. Гроб [2660] отверст гортань их, языки своими лщаху. Яд [2661] аспидов под устнами их. Их [2662] же уста клятвы и горести полна суть. Скоры [2663] ноги их пролияти кровь. Сокрушение [2664] и озло(л. 656 об.)бление [2665] на путех их и пути мирна не познаша. Несть [2666] страха Божия пред очима их.

Зачало 84.

Вемы [2667] же, яко елика закон глаголет сущым в законе глаголет, да всяка уста заградятся, и повинен будет весь мир Богови. Зане от дел закона не оправдится всяка плоть пред Ним. Законом бо познание греха. Ныне же кроме закона правда Божия явися, свидетельствована от закона и пророк [2668]. Правда же Божия верою Иисус Христовою во вся и на всех верующих, несть бо разньствия, вси бо согрешиша и лишени суть славы Божия. Оправдаеми туне благодатию Его и избавлением, еже о Христе и Спасе, Его же положи Бог очищение верою (л. 657) [2669] в крови Его, в явление правды Своея за отпущение прежде бывших грехов в долготерпении Божии и взыскание правды Его в нынешнее время, воеже быти Ему праведну и оправдающу сущаго от веры Иисусовы. Где убо похвала? Отгнася. Которым законом? Делы ли? Ни. Но законом веры.

Зачало 85 [2670].

Мыслим бо верою оправдитися человеку без дел закона, или иудеем Бог токмо, а не и языком. Сей и языком, понеже един Бог, оправит и обрезание от веры и необрезование верою. Закон ли убо разоряем верою? Да не будет, но закон утвержаем.

Глава 4.

Что [2671] убо речем обрести Авраама, отца нашего по плоти, аще бо Авраам, (л. 657 об.) [2672] от дел оправдася, имать похвалу, но не к Богу, что бо Писание глаголет: Верова [2673] Авраам Богови, и вменися ему в правду.

Зачало 87 [2674].

Делающему ж мзда не вменяется по благодати, но по долгу, а не делающему, верующу же на оправдающаго нечестива, причитается вера его в правду, якоже и Давид глаголет: Блаженство человеку, ему же рече Бог причитаеть правду без дел закона. Блажени [2675], им же отпустишася беззакония и им же прикрышася греси. Блажен муж, ему же не вменит Господь греха. Блаженство убо сие, на обрезание ли или на необрезание. Глаголем бо, яко вменися Аврааму вера в правду.

Како убо вменися ему, по обре(л. 658)зании [2676] ли сущу или не во обрезании? Не во обрезании, но в необрезании. Знамение прият обрезания [2677], печать правды вере, яже в необрезании, еже быти ему отцу всем верующим. В необрезание, воеже вменитися и тем в правду, и отца обрезанию, не иже обрезания сущим точию, но и ходящим в стопах веры, яже в необрезании отца нашего Авраама.

Зачало 87.

Не законом бо обетование Аврааму или семени его, яко наследником быти ему миру, но правдою веры. Аще бо сущии от закона наследницы, испразднися вера и разорися обетование, закон бе гнев соделовает. Идеже бо несть закона, ту ни пре(л. 658 об.)ступление [2678]. Сего ради от веры да по благодати, воеже быти известну обетованию всему семени, не еже точию сущим от закона, но и сущим от веры Авраамовы, иже есть отец всем нам. Яже есть писано: Яко [2679] отца многим языком положих тя. Прямо ему ж верова Богу животворящему мертвыя и нарицающу не суща яко сущия. Иже паче упования на упование верова, воеже быти ему отцу многим языком, по реченому: Тако [2680] будет семя твое. И не изнемог верою; но усмотри свою плоть уже умерщвлену, столетен негде сый из мертвость ложесн Саррин. По обетовании же Божии, не усумнеся неверованием, но возмо(л. 659)же [2681] верою, дав славу Богови, и известен быв, яко еже обеща, силен есть и сотворити. Тем же и вменися ему в правду, не писано ж есть за того единаго точию, яко вменися ему, но и за ны. Им же хощет вменитися, верующым на воскресившаго Иисус Христа Господа нашего из мертвых, иже предан бысть на прегрешения наша и воста за оправдание наше.

Что [2682] убо речем к сим? Аще Бог по нас, кто на ны? Иже убо Сына Своего не пощаде, но за ны вся предал есть Его, како убо не с ним вся нам дарует? Кто [2683] поемлет на избраныя Божия? Бог оправдаяй, кто осуждаяй? Христос Иисус умерый паче ж и воскрес, иже есть одесную Бога (л. 659 об.) [2684], иже проповедает о нас. Кто ны разлучит от любве Божия? Скорбь ли или теснота или гонение или глад и нагота или беда или меч, якоже есть писано, яко Тебе ради умерщвяеми есмы весь день, вменихомся яко овца заколению.

Глава 9.

Истину глаголю о Христе, не лжу. Послушествующыми совести моей Духом Святым, яко скорбь ми есть велия и непрестающая болезнь сердцу моему. Молил [2685] бых бо ся, аз отлучен быти от Христа по братии моей сродник моих по плоти, иже суть израильстей. Их же сыновение и слава и завети и законоположение и служение и обетование, их же отцы и от них же Христос по плоти, иже есть (л. 660) [2686] надо всеми Бог вовеки. Аминь.

Не тако же [2687], якоже отпадет слово Божие, не вси бо сущии от Израиля сей Израиль, ни зане суть семя Аврааме всем чада. Но [2688] о Исааце рече, наречется семя, сиречь не чада плотская, сия чада Божия, но чада обетования причитается в семя. Обетованию [2689] бо слово сице, на се время прииду, и будет Сарре сын. Не точию [2690] же, но и Ревека от единаго ложа имущи Исаака, отца нашего. Не убо рождьшимся, ниже сотворшым чесо благо или зло, да по избранию предложение Божие да пребудет, не от дел, но от призывающаго речеся ей, яко болий поработает меншему. Якоже есть писано [2691], Иякова возлюбих, (л. 660 об.) [2692] Исава же возненавидех. Что убо речем, еда неправда у Бога, да не будет. Моисеови убо глаголет [2693]: Помилую, его же аще помилую, и ущедрю, его же аще ущедрю, тем же убо ни хотящему, ни текущему, но милующему Богу. Глаголет бо Писание фараонови [2694], яко на истое воздвигох тя, да покажу тобою силу Мою и яко да возвестится имя Мое по всей земли.

Зачало 102.

Тем же убо его ж хощет, милует, а его ж хощет, ожесточит. Речеши [2695] же ми убо, чесо ради убо укаряет. Воли бо Его кто противитися может? Тем же убо, о человече, ты, кто еси против, отвещеваяй Богови. Егда речет здание создавшему е [2696], почто (л. 661) [2697] мя [2698] сотворил еси тако? Или не имать власти скуделник брения. От [2699] того ж смешения сотворити, ов убо сосуд в честь, ов же не в честь. Аще ли же хотя Бог гнев показати Свой и явити силу Свою, пренес во мнозе долготерпении сосуды гнева, совершены в погибель, и да скажет богателство славы Своея на сосудех милости, яже прежде уготова в славу. Их же и призва нас, не точию от июдей, но и от язык. Якоже Иосия глаголет [2700]: Нареку не люди Моя люди Моя и не возлюбленую возлюблену. И будет на месте, идеже речеся им [2701], не людие Мои есте вы, ту нарекутся сынове Бога живаго. Исаия же вопиет [2702] о Израили, аще и будет число сынов Израилевых (л. 661 об.) [2703]яко песок морский, останок спасется. Слово бо скончавая и обращая в правду, яко слово сокращено сотворит Господь на земли и якоже прорече Исаия [2704], аще не бы Господь Саваоф оставил нам семене, якоже Содом убо были быхом и яко Гомору уподобилися быхом. Что убо речем, яко языцы, не гонящей правду, постигоша правду. Правду же яже от веры. Израиль же гоня закон правды, в закон правды не постиже. Чесо ради? Зане не от веры, но от дел закона. Преткоша бо ся о камень претыкания, якоже есть писано: Се [2705] полагаю в Сионе Камень претыкания и Камень соблазну, и всяк веруяй в Онь не постыдится.

(л. 662) [2706] Глава 10.

Братие [2707], благоволение моего сердца и молитва яже к Богу по Израили есть во спасение. Свидетельствую бо им, яко ревность Божию имут, но не по разуму, не разумеюще бо Божию правду и свою правду ищуще поставити, правде Божии не повинушася. Кончина [2708] бо закону Христос в правду всякому верующему. Моисей бо пишет [2709]: Правду яже от закона, яко сотворивый та человек, жив будет в них. А яже от веры правда, сице глаголет: Да не речеши в сердцы своем, кто взыдет на небо, сиречь Христа свести или кто снидет в бездну, сиречь Христа от мертвых возвести. Но что глаголет Писание [2710]: Близ ти глагол есть во устех твоих (л. 662 об.) [2711] и в сердцы твоем, сиречь глагол веры, его же проповедаем. Яко аще исповеси усты своими Господа Иисуса и веруеши в сердцы своем, яко Бог Того воздвиже из мертвых, спасешися. Сердцем бо веруется в правду, усты же исповедуется во спасение.

Зачало 104.

Глаголет бо Писание: Всяк веруяй в Онь не постыдится, несть бо разньствия, иудееви же прежде и еллину. Той бо Бог всем богат во всех призывающих Его. Всяк [2712] бо иже аще призовет имя Господне, спасется. Како убо призовут, в Него ж не вероваша? Како же веруют, Его ж не услышаша? Како же услышат без проповедающаго? Како же (л. 663) [2713] проповедят, аще не послани будут? Якоже есть писано [2714]: Коль красны ноги благовествующых мир, благовествующых благая, но не вси послушаша благовествования. Исаия [2715] бо глаголет: Господи, кто верова слуху нашему, тем же убо вера от слуха. Слух же глаголом Божиим, но глаголю еда не слышаша. Паче [2716] убо во всю землю изыде вещание их и в концы вселенныя глаголы их, но глаголю еда не разумне Израиль. Первый Моисей глаголет [2717]: И аз раздражу вы не о языцех, но о языце, неразумне прогневаю вас. Исаия [2718] же дерзает и глаголет: Обретохся и не ищущым мене, явлен бых не вопрошающым о мне. Ко Израилю же глаголет [2719]: Весь день (л. 663 об.) [2720] воздех руце мои к людем непокоривым и пререкающым.

Или [2721]не весте, о Израили что глаголет Писание, якоже проповедует на Израиля: Господи, пророки Твоя избиша и олтаря Твоя раскопаша, и остах аз един, и ищут душу мою изъяти ю. Но что глаголет ему Божественый ответ [2722]: Оставих себе седмь тысящ мужей, иже не преклониша колена пред Ваалом. Тако убо и ныне останок по избранию благодати бысть. Аще ли же по благодати, то не от дел, зане благодать уже не бывает благодать. Аще ли от дел, к тому несть благодать, а дело уже несть дело. Что убо, его же искаше Израиль, не получи сего, а избра(л. 664)ние [2723] получи. Прочии же ослепишася, якоже писано есть: Даст [2724] им Бог дух умиления, очи не видети и уши не слышати, даже до днешняго дне. И Давид глаголет: Да будет трапеза их в сеть и в лов и в соблазн и в воздаяние. Да помрачатся очи их не видети и хребет их отнюдь преклони.

Не бо хощу вас не ведети тайну сию, братие, да не будете о себе мудри, яко недоумение отчасти Израилеви бысть, дондеже исполнение языком внидет и тако весь Израиль спасется. Якоже есть писано: Приидет [2725] от Сиона, избавляяй и отвратит нечестие от Иякова. И [2726] се им от Мене завет, егда отъиму грехи их, ни единому. (л. 664 об.) [2727] Ничим [2728] же должни бывайте, точию же любити друг друга, любяй [2729] бо друга, закон сконча. Еже бо не прелюбы сотвориши, не похощеши и аще ина заповедь в сем словеси совершается [2730]. Воеже возлюбиши искренняго своего, яко сам себе, любы искреннему зло не творит, исполнение закону любы есть.

Могущему [2731] же вас утвердити по благовествованию моему и проповеданию Иисус Христу, по откровению тайны, леты вечными умолчанныя, явльши же ся ныне писании пророческими по повелению вечнаго Бога в послушание веры во всех языцех познавшися единем премудрым (л. 665) [2732] Богом Иисус Христом.

На [2733] се бо Христос и умре и воскресе и оживе, да смертными и живыми обладает. Ты же почто осуждаеши брата своего, вси бо предстанем судищу Христову. Писано бо есть: Живу Аз, глаголет Господь, яко Мне поклонится всяко колено и всяк исповесться Господеви. Тем же убо кождо нас о себе слово даст Господеви.

Ибо [2734] и Христос не Себе угоди, но якоже есть писано: Поношение поносящих тебе, нападоша на мя. Елико бо преднаписана быша в наше наказание, да терпением и утешением писаний упование имамы. Терпения и утешения да даст вам, тожде мудрствовати друг ко другу (л. 665 об.) [2735] о Христе Иисусе, да единодушно единеми усты славите Бога и Отца Господа нашего Иисуса Христа.

Тем [2736] же приемлите друг друга, якоже и Христос прият вас в славу Божию. Глаголю же Христа Иисуса служителя бывша, обрезанию по истине Божии, воеже утвердити обетование Божия отцем, а языком по милости прославити Бога. Якоже [2737] есть писано: Сего ради исповемся Тебе во языцех, Господи, имени Твоему пою. И паки глаголет: Возвеселитеся языцы с людми Его. И паки: Хвалите [2738] Господа вси языцы и похвалите Его вси людие. И паки Исаиа глаголет [2739]: Будет корень Иессеов и востаяй (л. 666) [2740] владети над языки, на Того языцы уповают.

И паки инде рече [2741]: Им же не возвестися, о Нем им узрят, и иже не услышаша, уразумеют.

Никто [2742] же себе да прелщает, аще кто мнится мудр быти в вас в веце сем, буи да бывает. Яко да будет премудр, премудрость мира сего буйство у Бога есть.

Писано бо есть [2743]: Запинаяй премудрым в коварстве их.

И паки [2744]: Господь весть помышлениа человека, яко суть суетна. Тем же никто же да хвалится в человецех. Не весте [2745] ли, яко телеса ваша удове Христови суть, в земли уды Христовы, сотворю уды блудничи, (л. 666 об.) [2746] да не будет, или не весте, яко прилепляяйся сквернодейцы едино тело есть с блудодеицею.

А оженившимся [2747] завещаваю не аз, но Господь, жене от мужа не разлучатися, аще ли разлучится да пребывает безбрачна или да смирится с мужем своим. Мужу [2748] жены не отпущати, буде та бо, рече, оба плоть едину.

Мой [2749] бо ответ востязующим мене сей есть: Еда не имамы власть ясти и пити или един аз и Варнава не имамы власть, еже не делати, кто воинствует своими оброки когда, или кто насаждает виноград и от плода его не яст, или кто пасет стадо (л. 667) [2750] и от млека стаду не яст, еда по человеку сия глаголю, не и закон ли сия глаголет.

В Моисеове бо законе пишет [2751]: Да не заградиша уста вола молотяща, еда о половех радит Бог, но нас ради всяко глаголет, нас бо ради и писася. Не весте [2752] ли, яко делающии священная, от святилища ядят, и служащии олтарю, со олтарем зделяются. Тако и Господь повеле: Проповедающим благовестие от благовестия питатися.

Не [2753] хощу вас не ведети, братие, яко [2754] отцы наши вси под облаком беша и вси сквозе море проидоша и вси у Моисея крестишася во облаце и в море. И вси [2755] тожде (л. 667 об.) [2756] брашно духовно ядоша. И [2757] тожде вино духовное пиша, пияху бо от духовнаго последующаго Камени, Камень же бе Христос.

Зачало 144.

Но [2758] не во множайших их благоволи Бог, поражени бо быша в пустыни. Сия же образы нам быша, яко не быти нам похотником злых, якоже и они похотеша, ни идослужители бывайте, якоже нецыи от них, якоже есть писано: Седоша людие ясти и пити и восташа играти. Ниже соблудим, якоже нецыи от них соблудиша и падоша во един день [2759] два десяти и три тысящи. Ни да искушаем Бога, якоже нецыи от них искусиша (л. 668) [2760] и от змий погибоша. Ни ропщите [2761], якоже нецыи от них поропташа и погибоша от всегубителя. Сия же вся образы прилучахуся о Нем, писана же быша в научение наше, в них же концы век достигоша.

Вся ми [2762] лет есть, но не вся на ползу. Вся ми лет суть, но не вся назидают. Никто же своего си да ищет, но яже ближняго койждо. Вси еже на торжище продаемое ядите, ничто же сумнящеся за совесть. Господня [2763] бо есть земля и исполнение ея. Аще ли кто от неверных призывает вы и хощете ити, все предлагаемое вам ядите, ничто же сумнящеся за совесть. Аще ли кто вам речет, (л. 668 об.) [2764] сие идоложертвено есть, не ядите, за онаго поведавшаго и совесть. Господня [2765] бо есть земля и исполнение ея, совесть же глаголю не свою, но другаго. Аще [2766] не покрывается жена, да стрижется, аще ли срам жене стрищися или бритися, да покрывается. Муж не должен есть покрывати главу, образ и слава Божия сый, жена же слава мужу есть. Несть [2767] муж от жены, но жена от мужа, ибо не создан бысть муж жены ради, но жена мужа ради.

Братие [2768], не дети бывайте умы, но злобою младенствуйте, умы же совершени бывайте.

В [2769] законе пишет, яко иноязычными (л. 669) [2770] устны инеми возглаголю людем сим и такожде послушают мене. Глаголет Господь: Что [2771] убо, братие, егда сходитеся, койждо вас псалом да имать, учение имать, язык имать, откровение имать, сказание имать, вся же к созиданию да бывают. Жены [2772] ваша в церкви да молчат, не повеле бо ся им глаголати, но повиноватися, якоже закон глаголет: Аще [2773] ли чесому научитися хотят, в домех своя мужи да вопрошают, срамно бо есть жене в церкви глаголати.

Предах бо вам исперва, еже и приях, яко Христос умре грех ради наших по писаниих, и яко погребен бысть, и яко воста в третий (л. 669 об.) [2774] день по Писаниих.

Ныне [2775] же Христос воста от мертвых, начаток умершим бысть, понеже бо человека ради смерть бысть и человека ради воскресение мертвым, якоже бо о Адаме вси умирают, такожде о Христе вси оживут, койждо во своем чину. Начаток [2776] Христос потом же Христовни, во пришествие Его, потом же кончина, егда предаст Царьство Богу и Отцу, егда испразднит всяку власть и всяко владычество и силу. Подобает бо Ему царьствовати [2777], дондеже положит вся враги под ногама Своима. Последний же враг испразднится смерть, вся бо покори под нозе Его. Внегда же речет, (л. 670) [2778] яко вся покорена суть Ему, яве яко разве покоршаго Ему вся.

Аще [2779] по человеку со зверем боряхся во Ефесе, кая ми полза? Аще мертвии не востают, да ямы и пием, утре бо умрем. Не лститеся, тлят бо обычая благи, беседы злы. Есть [2780] тело душевно и есть тело духовно. Тако и есть писано: Бысть первый человек Адам в душу живу, последний Адам в Дух животоврящ. Но не прежде духовный, но душевный, потом же духовный.

Подобает [2781] бо тлеемому сему облещися в нетление и мертвеному сему облещися в безсмертие. Егда же тленное сие облечется в нетление (л. 670 об.) [2782] и смертное сие облечется в безсмертие, тогда [2783] будет слово написаное: Пожерта бысть смерть победою. Где ти смерти жало? Где ти аде победа? [2784] Аще ли есть покровенно благовествование наше, в гибнущих есть сокровенно, в них же Бог века сего ослепи разумы неверных, воеже не возсияти им свету благовествования славы Христовы, иже есть образ Бога невидимаго. Не себе бо проповедаем, но Христа Иисуса Господа, себе же самех рабы вам Иисуса Господа ради. Якоже [2785] Бог рекий ис тмы свету возсияти, иже возсия в сердцах наших ко просвещению разума славы Божия о лицы Иисус Христове.

(л. 671) [2786] Имуще [2787] же той же дух веры по писанному: Веровах тем же и возглаголах, и мы веруем, тем же и глаголем. Ведяще, яко воздвигий Господа Иисуса и нас со Иисусом воздвигнет и предпоставит с вами.

Поспешествующе [2788] же молим, не вотще благодать Божию прияти вам. Глаголет бо: Во время благоприятно послушах тебе и в день спасения помогох ти. Не [2789] бо да инем отрада, вам же скорбь, но от избавнения в нынешнее время ваше избыточествие, во онех лишение, да и онех избыток будет в вашем лишении, яко да будет равенство, якоже есть писано: Иже [2790] многое не преумно(л. 671 об.)жил [2791] есть и иже малое не умалил. Се же глаголю: Сеяй скудостию, скудостию и пожнет. А сеяй о благословении, о благословении и пожнет. Койждо якоже изволение имать сердцем [2792], ни от скорби, ни от нужды. Доброхотна бо дателя любит Бог. Силен же Бог всяку благодать изообиловати в вас, да о всем всегда всяко доволство имуще. Избыточествуйте во всяко дело благо, якоже есть писано [2793]: Расточи, даде убогим, правде Его пребывает вовеки.

Аще [2794] бысте прияли малое мое безумие, но и приемлете, ревную бо о вас Божиею ревностию. Обру(л. 672)чих [2795] бо вас единому мужу Давиду, чисту представити Христови.

Бою [2796] же ся, да не како, якоже змиа Еву прелсти лукавством своим, тако истлеют разумы ваша от простоты яже о Христе.

От [2797] мнимых бе быти великих, якоже убо беша, ничто же ми разньствует. Лице Бог человеку не приемлет, мне бо мнимии ничто же ми привозложиша.

О несмыслении [2798] Галате, кто вы прелстил есть не покорятися истине? Им же пред очима Иисус Христос прежде написан бысть в вас распят. Сие точию хощу ведети от вас, от дел ли закона Дух приясте или от слуха веры? (л. 672 об.) [2799] Тако [2800] несмыслени есте наченше духом, ныне плотию скончаваете. Толика пострадасте без ума, аще же и без ума, подаяй убо вам дух и действуяй силы в вас. От дел ли закона или от слуха веры, якоже верова Авраам Бога и вменися Авраам Богу, и вменися ему в правду. Разумейте убо, яко сущии от веры, сии суть сынове Авраамли. Прежде видевше бо Писание [2801], яко от веры оправдает языки Бог. Прежде благовествова Аврааму [2802], яко благословятся о тебе вси языцы. Тем же сущии от веры благословятся с верным Авраамом, елицы бо от дел закона суть, под клятвою (л. 673) [2803] суть. Писано бо есть [2804]: Проклят всяк, иже не пребудет во всех писаных в книзех законней, яко сотворити я. А яко в законе [2805], никто же оправдается от Бога. Яве [2806] же, яко праведный от веры жив будет. Закон же несть от веры, но сотворивый [2807] та человек жив будет в них.

Христос [2808] искупил ны есть от клятвы законныя, быв по нас клятва. Писано бо есть [2809]: Проклят всяк, висяй на древе, да во языцех семя Авраамле будет. О Христе Иисусе да обетование Духа приимем верою.

Братие [2810], по человеку глаголю. Обаче человеку утвержена завета, никто ж отметает (л. 673 об.) [2811] или преповелевает. Аврааму ж речени быша обеты и семени его, не глаголет «и семенем», яко о мнозех, но яко о единем «и семени твоему», иже есть Христос.

Хотех [2812] же приити к вам ныне и изменити глас мой, яко не домышляюся о вас. Глаголет ми, иже под законом хотящии быти, закона ли не слышасте? Писано бо есть [2813], яко Авраам два сына име, единаго от рабы, а другаго от свободныя. Ной [2814] же от рабы по плоти родися, а иже от свободныя по обетованию, яже еста ино сказуема. Сия бо еста два Завета, един убо от горы Синайския в работу рождаяся, еже (л. 674) [2815] есть Агарь. Агарь бо Синай гора есть во Аравии, прилагает же ся нынешнему Иерусалиму, работает же с чады своима. А Вышний Иерусалим свобода есть, иже есть милости всем нам. Писано бо есть: Возвеселися неплоды нерождающия, яко много чада, пустыя паче нежели имущия мужа. Мы [2816] же, братие, по Исааку обетования чада есмы. Но якоже тогда иже по плоти родивыйся, гоняше духовнаго, тако и ныне. Но что глаголет Писание [2817]: Изжени рабу и сына ея. Не имать бо наследовати сын рабынин с сыном свободныя. Тем же, братия, несмы рабыни чада, но свободныя. Свободою, (л. 674 об.) [2818] убо ею же нас Христос свободи, стойте и не паки под игом работы держитеся.

Вы [2819] бо на свободу зване бысте, братие, точию да несвобода ваша в вину плоти, но любовию работайте друг другу, ибо весь закон во единем словеси совершается: Воеже [2820] возлюбиши ближняго своего, якоже себе. Аще друг друга грызаете и снедаете, блюдетеся, да не друг от друга истреблени будете.

Едино [2821] тело, един дух, якоже и звани бысте во единем уповании звания вашего. Един Господь, едина вера, едино крещение. Един [2822] Бог и Отец всем, иже (л. 675) [2823] над всеми и о всех и во всех нас.

Единому [2824] же коемуждо нас дается благодать по мере дарования Христова. Тем же глаголет [2825]: Возшед на высоту, пленил еси плен, приял еси даяние в человецех. Блюдите [2826] убо, опасно како ходите, не яко немудри, но якоже премудри искупующе время, яко дние лукави суть. Сего [2827] ради не бывайте несмыслени, но разумевающе, что есть воля Божия, и не упивайтеся вином, в нем же есть блуд, но паче исполняйтеся духом, глаголюще себе во псалмех и песнех духовных, воспевающе и поюще в сердцах ваших Господеви.

Тако [2828] должни суть мужие любити (л. 675 об.) [2829] своя жены яко своя телеса. Любяй бо свою жену себе самаго любит. Никто же бо когда свою плоть возненавиде, но питает и греет ю, якоже и Господь Церковь, яко уды есмы тела Его от плоти и от костей.

Сего [2830] ради, рече, оставит человек отца своего и прилепится жене своей, и будета оба в плоть едину. Чада [2831], послушайте своих родителей о Господе, сие бо есть праведно: Чти [2832] отца своего и матерь, яже есть первая во обетовании, да благодати будет и будеши долголетен на земли. Отцы, не раздражайте чад своих, но воспитовайте их в наказании (л. 676) [2833] и учении Господни. Раби [2834], послушайте господий своих по плоти со благоразумием, служаще якоже Господу, а не яко человеком. Ведуще [2835], яко койждо, еже сотворит благо, сие приимет от Господа, аще раб, аще свободь. И господие такожде творите к ним, послабляюще им прещения. Ведуще, яко и вам самем и тем, Господь есть на небесех, и обиновения лицу у Него несть.

Не [2836] лжите друг другу, совлекшися ветхаго человека со деянми его и оболкшеся в новаго обновляемаго в разум по образу Создавшаго его, идеже несть еллини и июдеи, обрезание и необре(л. 676 об.)зание [2837], варвар и скиф, раб и свободь, но всяческая и во всех Христос.

А [2838] о летех и о временех, братие, не требе есть вам писати. Сами бо вы известно весте, яко день Господень, якоже тать в нощи, тако грядет. И по мале.

Тем же убо да не спим, якоже и прочии, но да бодрствуем и трезвимся, спящии бо, в нощи спят, и упивающиися, в нощи упиваются. Мы же сынове суще дне да трезвимся [2839], оболкшеся во броня веры и любве и шлем упованию спасения.

Да [2840] никто же вас прелстит ни по единому же образу, яко аще не приидет отступление пре(л. 677)жде [2841] и открыется человек беззаконию и сын погибели, противник, и превозносяся паче всякаго глаголемаго Бога или чтилища, якоже ему сести в церкви Божии аки богу, показуя себе, яко бог есть.

Не помните ли, яко еще живый у вас сия глаголах вам и ныне обдержаще весте, явитися ему во свое ему время. Тайна бо уже деется беззаконию, точию держай ныне, дондеже от среды будет и тогда явится беззаконный, его [2842] же Господь Иисус убиет духом уст Своих.

Молю [2843], убо прежде всех творити молитвы, моления, прошения, благодарение за вся человеки, (л. 677 об.) [2844] за царя и за вся иже во власти суть. Да тихо и безмолвно житие поживем во всяком благоверии и чистоте, сего добро и приятно пред Спасителем нашим Богом, иже [2845] всем человеком хощет спастися и в разум истины приити.

Жене [2846] же учити не повелеваю, ни владети над мужем, но быти в безмолвии. Адам [2847] бо прежде создан бысть, потом же Ева. И Адам не прелстися, жена же прелстившися, в преступлении бысть.

Павел [2848], раб Божий, посланник Иисус Христов, по вере избраных Божиих и разуму истины, яже по благоверию, о уповании жизни вечныя, (л. 678) [2849] иже обетова неложный Бог, прежде лет вечных. Яви [2850] же во времена своя слово свое проповеданием, еже мне поручено бысть по повелению Спасителя нашего Бога.

Многочестне [2851] и многобразне древле Бог глаголав отцем пророки, в последок дний сих глагола нам во Сыне, Его же положи наследника всем, им же и веки сотвори. Иже Сый сияние славы Отча и образ ипостаси Его. Но ся же всяческая глаголом силы своея Собою очищение сотворив грехов наших, седе одесную престола величествия на высоких. Толико лучши быв ангел, елико преславнее паче их (л. 678 об.) [2852] наследова имя. Кому бо рече когда от ангел: Сын [2853] Мой еси Ты, Аз днесь родих Тя. И паки: Аз [2854] буду ему во отца и той будет мне в сына.

Егда паки вводит Первороднаго во вселенную, глаголет: И да поклонятся Ему вси ангели Божии.

И [2855] ко ангелом убо глаголет: Творяй ангелы своя духи и слуги своя пламень огненный. К Сыну же: Престол [2856] Твой, Боже, в век века, жезл правлению, жезл царьствия Твоего. Возлюбил еси правду и возненавиде беззаконие, сего ради помаза Тя, Боже, Бог Твой елеом радости паче причастник Твоих. И паки: (л. 679) [2857] Ты [2858] в начале, Господи, землю основа и дела руку Твоих суть небеса. Та погибнут, Ты же пребываеши, и вся, якоже риза обетшают, яко одежду свиеши их и изменятся, Ты же тойжде еси и не оскудевают.

Кому же от ангел рече когда: Седи [2859] одесную Мене, дондеже положу враги Твоя подножию ногама Твоима. Сего [2860] ради подобает нам лишше внимати слышаным, да никогда отпаднем. Не [2861] ангелом бо покори Бог вселенную грядущую, о ней же глаголем. Засвидетельствова же негде некто: Что [2862] есть человек, яко помниши его, или Сын человеческий, яко посещаеши и. (л. 679 об.) [2863] Умалил еси малым нечим от ангел, славою и честию венчал еси его. И поставил [2864] еси Его над делы руку Твоею, вся покорил еси под нозе Его. Внегда [2865] же покорити Ему всяческая, ничто ж остави Ему непокорено, ныне же не увидим Ему всяческая покорена, а умаленаго малым чим от ангел. Видим [2866] Иисуса за приятие смерти, славою и честию венчана, яко да благодатию Божиею за всех вкусит смерть. Подобаше бо Ему, Его же ради всяческая и Им же всяческая, приведшу многи сыны в славу. И святяй [2867] и святяеми от Единаго вси, ея же ради вины не стыдится братию нарицати их, (л. 680) [2868] глаголя: Возвещу [2869] имя Твое братии моей, посреде церкви воспою Тя. И паки: Аз [2870] буду надеяся нань. И паки: Се [2871] аз и дети, яже ми дал Бог.