ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Како убо, злелукавый человече, глаголеши, яко царь велел нам судеб церковных досматривати, его же сам не имеет. И видел еси, кто есть антихристи и кто есть чада Божия и чада неприязнена, кто (л. 303) [1122] Дух истинный и дух лстеч. Ныне мнози антихристи есть, Крутицкой митрополит и прочии подобнии ему. Чада неприязнена ты и подобнии тебе. Дух лстеч Газской митрополит и инии подобнии ему.

Но послушай еще паки апостола Павла глаголюща: Да [1123] никто вас лстит, ни по единому образу, яко аще не приидет отступление прежде, которое отступление ничто же ино, развее яко Господь сказал: Тогда предадят вы в скорби и убиют вы, и будете ненавидими от всех имени Моего ради. И тогда соблазнятся мнози и друг друга предадят и возненавидит друг друга. И за умножение беззакония (л. 303 об.) [1124] изсякнет любы многих. Яве есть ныне всякому, мочно ум имущему, разумети, яко время то есть по деянию нынешнему. Что беззаконнее, еже царю арихиереов судити? Не Богом данную власть взял на ся. Где есть ныне Евангелскаго словеси послушание и святых Его заповедей хранение? То есть отступление от Бога. И тогда, глаголет, открыется человек греха, сын погибели, противник и превозносяйся над всякаго Бога или святилища тако, якоже сести [1125] ему в Церкви Божией аки Богу, показуя себе, яко бог есть. О антихристе глаголет зде и велия открывает тайны. Что есть отступление? Того антихриста нарицает от(л. 304)ступление [1126], яко многих имущаго погубити и отставити. Погубити не чювственно како любо, но в свою волю приведет, якоже тебе, Симеоне, и иных подобных тебе, святому священному Евангелию ругатися и Божиим рабом досаждати и поносити имени ради Христова и всяк зол глагол лгати и изгнати.

Тако яко, рече, соблазнити, аще мощно и избраныя и человека греха нарицает и безсчиленная бо соделает и приготовит иных, да делают лютая, якоже ныне в настоящем времени зрятся злобы его рабы его творят, антихристи. То есть, якоже Иоанн глаголет: И ныне антихристи мнози, то есть богопротивницы, все противно (л. 304 об.) [1127] священному Евангелию делают, и не просто, но и хвалятся таковыми своими злыми.

И сядет, глаголет, во Церкви Божией, не иже во Иерусалиме единем, но повсюду во церквах власть его будет. Свидетельствует Иоанн Богослов глаголя, яко антихрист уже в мире есть, но никто же слышал или видел чювстенно, то есть чрез Божественыя заповеди владети начнут мирския власти Церковию Божиею. Седалище бо глаголется или престол власть церковная, а не стол. Мнози мирския человеки таковыя же столы имеют подобием, якоже и царие и архиерее, но не глаголются престолы, понеже власти данныя не имеют. (л. 305) [1128] И повелит себе кланятися, не чювствено, но якоже ныне архиереи, и оставя свое достояние священническое и честь, кланяются царем и князем аки преобладающим и о всем тех спрашиваются и чести ищут. И сподобляются, по писаному: Оставя свет, возлюбили тму, оставя правый путь, ходят во стезях погибели, осуетишася в помышлениих своих, ослепи бо их злоба их и не разумеша таин Божиих. Их же верховный Петр проклиная, глаголет: Клятвы [1129] чада, оставлше правый путь, последоваша пути Валаама Восорова. Сии суть источницы безводнии и облацы и мглы от ветр преносимы, (л. 305 об.) [1130] имже мрак темный во веки блюдется.

Паки глаголеши, совопросниче: Се есть что подарил его всеми привилеи, которыя, велми почитаючи Константин Великий папу Римскаго Селивестра, вручил ему же, папе. Такоже и Никону на писме подал многия привилеи государь царь. Изорцы имянно, которыя подал привилеи, и аз ти реку, колико разорил и пренебрег. Древняя, якоже глаголет, мимоиде и се быша вся нова. О древних, даных Богом, привилеях и десятинах мимо преидем по апостолскому указанию, о новем же да глаголем. Яже Христос Спас наш предаде привилея святым своим учеником и апостолом, (л. 306) [1131] глаголя: Аз же тебе глаголю, яко ты еси Петр, и на сем камени созижду Церковь Мою. И врата адова не удолеют Ей.

Государь царь сие привилеи разори и Церкви одоле, и сотвори Ю себе повиноватися во всем. Павел апостол глаголет: Глава Церкви Христос и якоже повинуется Церковь Христу. И прочая.

И паки Господь рече: И дам ти ключя Царствия Небеснаго, и еже аще свяжеши на земли, будет связан на небеси. Царьское величество и ключ у Петра и прочих апостол и по них наследник тех отъял. И еже свяжут, и Владыка Христос Бог не решит на небеси, государь царь то разрешает на земли и на небеси. И еже аще разрешиши, рече, на земли, будет раз(л. 306 об.)решено [1132] на небеси. Государь царь то вяжет на земли. И паки: Дунув Господь на святыя своя ученики и апостолы, глаголя: Приимите Дух Свят, им же отпустите грехи, отпустятся, и им же держите, держатся. Государь царь, не прием Святаго Духа благодати, оставляет грехи и держит, им же хощет, властию мира сего, а не по благодати.

Господу глаголющу: Аще [1133] вы пребудете в словеси Моем, воистину ученицы Мои будете. Государь царь не точию сам пребывает, но и пребывающих ненавидит. Паки Господу глаголющу: Аминь, аминь, глаголю вам. Аще кто слово Мое соблюдет, смерти не имать видети. Государь царь не точию сам соблюдает, (л. 307) [1134] но и соблюдающих слово Божие казни предает. Господу глаголющу: Аминь, глаголю вам. Веруяй в Мя, дела, яже Аз творю, и той сотворит и болша сих сотворит. Государь царь не точию сам творит, но и творящих ненавидит и гонит. Господу глаголющу: Аще любите Мя, заповеди Моя соблюдите. Государь царь не точию сам соблюдает, но и соблюдающих ненавидит. Господу глаголющу: Имеяй заповеди Моя и соблюдая их, той есть любяй Мя. Государь царь, не точию любя Бога, заповеди Его соблюдает, но и соблюдающих не любит. Господу глаголющу: Не любяй Мя и словес Моих не соблюдает. Государь Царь сам не соблюдает, но и ругающихся (л. 307 об.) [1135] лобзает. Господу глаголющу: Мир Мой оставляю вам, мир Мой даю вам. Государь царь не точию мир Божий приемлет сам, но и приносящих гонит из града своего. Господу глаголющу: Аще бысте Мя любили, возрадовалися бысте убо. Государь царь не точию радуется, еже любити Бога, но и радующимся плакати творит. Господу глаголющу: Си [1136] есть заповедь Моя, да любите друг друга, якоже Аз возлюбих вы. Государь царь сам не любит и инем возбраняет любити друг друга. Господу глаголющу: Болша сея любве никто же имать, да кто душю свою положит за други своя. Вы друзи Мои есте, аще творите, елико Аз заповедаю вам. (л. 308) [1137] Государь царь не точию благоволит душу свою положити за други своя, но и хотящим хощет сам душю отъяти, и не еже братиею кого любо именовати от менших подданных своих, но и отца, иногда называя и пиша своею рукою, простому человеку уподобил, за злобу свою Никоном зовет, и ниже патриархом именует, и яко раба под оброки себе сотворил. И не мене, худаго раба Божия, но и Господа моего Иисуса Христа поработил себе. Все, еже Господу нашему Иисусу Христу даное в вечное наследие святей Церкви Его, себе усвоил и людем своим. О нем же суд имеет от Господа Бога, по делом руку своею приимут. Аще возмнится (л. 308 об.) [1138] кому жестоко слово се, мы не отречемся показати от Писания на инем месте.

Узрев [1139] же народы, Господь взыде на гору, и сшедшу Ему, приступиша к Нему ученицы Его. И отверз уста Своя, учаше их, глаголя: Блажени нищии духом, яко тех есть Царьство Небесное. Яве есть, яко несть блажен, аще кто не нищ духом, то есть богатый, несть его Царьствие Небесное. Господу свидетельствующу: Горе вам, богатым, яко отстоите утешения вашего.

Паки рече Господь: Блажени плачющиися, яко тии утешатся. Яве есть, яко несть блажен, от них же ныне плачются, и тии не утешатся. Господу свидетельствующу: Горе вам, (л. 309) [1140] смеющимся ныне, яко восплачете и возрыдаете.

Паки рече Господь: Блажени [1141] кротцыи, яко тии наследят землю. Яве есть, яко не блажени некротцы, понеже не наследят кротких земли.

Паки рече Господь: Блажени алчющии и жаждущии правды, яко тии насытятся. Яве есть, яко несть блажен не алчющий и не жаждущий правды, яко и богатый он, иже не помилова Лазаря, сам единыя капли водныя вжада и не получи. Господу свидетельствующу: Горе вам, насыщеным ныне, яко взалчете.

Паки рече Господь: Блажени [1142] милостивии, яко тии помиловани будут. Яве есть, яко немилостивии помиловани не будут. (л. 309 об.) [1143] Господу свидетельствующу: Елико [1144] не сотвористе менших Моих братий, ни Мне сотвористе. Отъидите, рече, от Мене, проклятии, во огнь вечный, уготованый диаволу и аггелом его.

Паки рече Господь: Блажени чистии сердцем, яко тии Бога узрят. Яве есть, яко нечистии сердцем Бога не узрят, по писаному: Нечестивии не узрят славы Твоея, Христе. И паки: Всяк высокосердый нечист пред Богом и мерзок.

Паки рече Господь: Блажени миротворцы, яко тии сынове Божии нарекутся. Яве есть, яко всяк враждотворец не наречется сын Божий, но сын диаволий. Якоже и Господь свидетельствует: (л. 310) [1145] Вы отца вашего диавола есте и похоти отца вашего творите.

Паки рече Господь: Блажени изгнани правды ради, яко тех есть Царьство Небесное. Яве есть, яко изгонившии несть достойни блаженства, ниже их есть Царьство Небесное. Господу свидетельствующу: Аще изгонят вы из града сего, бегайте во ин. И паки: Идеже не приемлют вы, ниже послушают словес ваших, исходяще из града того, отрясите и прах ног ваших. Отраднее будет Содому и Гомору в день Судный, неже граду тому.

Паки Господь рече: Блажени есте, егда поносят вам и ижденут и рекут всяк зол глагол на вы, лжуще Мене ради, яве есть, яко несть блажени, иже (л. 310 об.) [1146] поносят вам и ижденут вас и всяк зол глагол на вас лжущих.

Господу глаголющу: Радуйтеся и веселитеся, яко мзда ваша многа на небесех. Яве есть, яко не имут радоватися тии, котории не имут мзды прияти на небеси от Господа Бога, якоже и Господь свидетельствует, глаголя: Имущему [1147] бо везде дано будет и преизбудет. От неимущаго же и еже мнится имея, взято будет от него. И неключимаго раба вверзите во тму кромешную, ту будет плач и скрежет зубом.

И апостол глаголет: Да [1148] еще, братие, или не весте, яко неправедницы, Царствия Божия не наследят, ни тление нетление наследствует.

Господу глаголющу: Вы есте (л. 311) [1149] свет миру. Не может град укрытися, верху горы стоя, ни вжигают светилника и поставляют его под спудом, но на свещнице. И светит всем, иже в храмине суть. Тако да просветится свет ваш пред человеки, яко да видят ваша добрая дела и прославят Отца вашего, иже на небесех. Тако яко и иже некто не покажет добрых дел, помрачится пред человеки, яко да увидят злыя дела, хулу нанесет на Отца небеснаго.

Господу глаголющу: Глаголю [1150] бо вам, яко аще не избудет правда ваша, паче книжник и фарисей, не внидите в Царьство Небесное.

Ныне же не точию преизобилуют паче книжник и фарисей, но иже (л. 311 об.) [1151] аще преизбывают, яко врага ненавидят, сами же преизбывают паче злобою.

Господу глаголющу: Слышасте, яко речено бысть древним: Не убиеши, иже бо аще убиет, повинен есть суду. Аз же глаголю вам, яко всяк, гневаяся на брата своего, повинен есть суду.

Ныне не точию гневаются всуе, но и мучат без правды и убивают и не боятся суда Божия, имже хощет Бог воздати коемуждо по делом их.

Господу глаголющу: Иже бо аще речет брату своему «рака», повинен есть сонмищу. А иже речет «юроде», повинен есть геене огненней.

Ныне же не точию брату своему (л. 312) [1152] глаголют «рака», но и вящше, и не боятся суда, но и юродом называя, не боятся геены огненней. Зане хотят тое наследовати и за злобу свою познают тогда, егда не избавятся от нея никогда.

Господу заповедающу: Аще убо принесеши дар твой ко олтарю и ту помянеши, яко брат твой имать нечто на тя, остави ту дар твой пред олтарем, и шед, прежде смирися с братом своим. И тогда пришед, принеси дар твой.

Ныне ничто же в дар ко святому олтарю велий государь царь и бояря приносят, якоже Господь заповеда, да не явишися Господеви своему тощ, ниже входя в церковь, имущим на них нечто, оставляют пред олтарем (л. 312 об.) [1153] дар, понеже никогда ничево не приносят, развее сами себе, и оставити пред олтарем ничево. И аще что на ково имуть нечто, то в церкви, яко в судилищи осудив, возмездие творят по судбам своим беззаконным, якоже ходят без боязни. Не поминают Господем реченаго: Аще ли не отпущаете человеком согрешения их, ни Отец ваш небесный отпустит вам согрешений ваших. И памятуют, в церковь пришед, где бы что от церкве отнять.

Господу глаголющу: Слышасте [1154], яко речено бысть первым, не прелюбы сотвориши. Аз же глаголю вам, яко всяк, иже воззрит на жену, воеже вожделети ей, уже (л. 313) [1155] любодействова с нею в сердцы своем.

Ныне же, видя прелюбы деящих, государь царь и вся полата его безгрешна того творят.

Господу глаголющу: Паки [1156] слышасте, яко речено бысть древним: не во лжу кленешися, воздаси же Господеви клятвы твоя. И прочее.

Ныне же евангелски кленутся, еже ести ей, ей, якоже государь царь обещался во святей церкви на избрании нашем и клялся, что было евангелския Христовы заповеди и святых апостол и святых отец правила соблюдати. И ничто же соблюде, но паче инех сверстник своих возненавиде и всех архиерей и весь сигклит свой в таковый же грех поучи.

Господу глаголющу: Слышасте, яко речено есть, око за око и зуб (л. 313 об.) [1157] за зуб. Аз же глаголю вам, не противитися злу, но аще тя кто ударит в десную твою ланиту, обрати ему и другую.

Ныне же государь царь за едино слово, аще кто о правде молвит, языки режет и руки и ноги отсекает, в заточение невозвратное ссылает, забыв смертый час: аки безсмертен, и не чая будущаго суда Божия, яко имать о всем Бог разсудити и отмстити. За здешнее маловременное усечение усечения вечных мук и ввержение в геену огненую, яко выше писано есть за един уд, колми паче за вся уды, и за здешнее заточение тмы кромешныя, и за здешнее лишение вечных (л. 314) [1158] благ.

Паки Господу глаголющу: Хотящему судитися с тобою и ризу твою взяти, отпусти ему и срачицу.

Ныне же государь царь и не хотяшим судитися, в суд силно влечет, аще и ризу отдают и срачицу оставляют, силно судит, имже сам суд повинен есть. Но он, государь, все то преобидев, архиереов судит, и архиереов [1159] и иереов и весь причет церковный, ему же самому недостойно бе, он же и бояром и всем своим неправедным судиям и диаком судити велит чрез Божественыя правила. Правила убо повелевают епископа всею областию митрополитом судити и епископом. Аще невозможно есть всем снитися, менши двоюнадесять (л. 314 об.) [1160] да не будет. Митрополита по 9-му правил святаго Вселенскаго 4-го собора без [1161] патриарха не велено судити и всеми митрополиты и епископы.

Он же, государь, сам и гонитель, и истец, и судия, и свидетель, и повелитель, и собратель сонмища, и решитель суда на патриарха своими епископы, чрез вся священныя законы в суд нудит приити. Не поминает Христову заповедь, яко ким же судом судите, осудитесь. И апостола глаголаша [1162], всем бо нам подобает явитися пред судищем Христовым, да приимет кийждо, яже с телом содела или благая или злая.

Паки Господь глаголет: И аще кто тя поимет по силе поприще едино, (л. 315) [1163] иди с ним две. Заповеду убо Господь всем едины заповеди, но ныне государь царь не хранит сих и все прежде бывшия заповеди благочестивых царей и великих государей и князей не брежет. И отца своего, блаженныя памяти великаго государя царя и великаго князя Михаила Феодоровича всеа Руси, все ни во что поставил. Даныя по последования древних благочествых царей Константина и Иустиниана и прочих, и емлет по силе у великой церкви в патриархии и в прочих церквах мирополичьих и архиепископлих и во святых монастырех и посылает, идеже хощет, на войну и на прочая недостойная своя дела.

Господу заповедающу: Просящему у тебе (л. 315 об.) [1164] дай и хотящаго от тебе взяти, не отврати, и от взимающаго твоя, не истязуй.

Ныне все противно сим заповедем. Аще кто и своего просит, не дают, не поминают реченаго Господем: И иже мнится имея, взято будет от него. Како же взято будет? Псалмопевца вопросим, и той проповедает нам, яко царь, никого не бояся, и яко пророк не обинуяся лица человеча, и яко богатый искусом сведый. Глаголи убо пророче Божий и царю глаголи со дерзновением, якоже Святый Дух просвети сердце твое. Таже начат, рече: Услышите сия вси языцы, внушите вси живущии по вселенней, земнии же (л. 316) [1165] и сынове человечестии, вкупе богат и убог, уста моя возглаголют премудрость и поручение сердца моего разум, приклоню в притчах ухо мое, отверзу во Псалтыри ганание мое, вскую бояся в день лют.

Видели, совопросниче лукавый, с каковым дерзновением пророк начинает глаголати всякому лицу не обинуяся, всем живущим по вселенней и всем земным вкупе богату и убогу [1166]. Таже и себе зазирая, рече: Вскую боюся в день лют, беззаконие пяты моея обыдет мя. Пяту пророк глаголет, еже что содела в мимошедшее время и не стыдится, сам себе оглаголуя, якоже хощет, о них же согреши, суд прияти. Темже (л. 316 об.) [1167] и наводит, глаголя: Надеющиися силе своей и множеством богатства своего хваляйшиися, брат не избавит, избавит ли человек. Не даст Богу измены за ся и цену избавления.

Видели, како пророк глаголет, яко по прехождению жития сего ни брат не избавит, ниже даст, рече, Богу измену за ся, ниже цену избавления ради души своея. Но что рече пророк: Утрудися ввек и жив будет до конца. Не узрит пагубы, егда видит премудрыя умирающа, вкупе безумен и несмыслен погибнета и истаявят чюждим богатство свое, и гроби их жилища их ввек, селения их в род и род, нарекоша имена (л. 317) [1168] своя на земных. И человек, в чести сый, не разуме, приложися скотом несмысленым и уподобися им. Сей путь их соблазн им и по сих во устех своих благоизволят.

Видиши ли, совопросниче, силу словесе пророческа, яко сей путь соблазн их, то есть житие здешнее или добре или зле сотворит. Таже пророк глаголет: И по сих во устех своих благоизволят. Тогда благоизволят во устех своих, когда не будет их воля. И яко овцы во аде положени суть, смерть упасет их и обладают ими правии заутра и помощь их обетшает во аде. От славы своея изриновени быша, обаче Бог (л. 317 об.) [1169] избавит душю мою из руки адовы, егда приемлет мя.

Видели, како пророк трепещет и содрогает, моляся, Бога избавителя призывает на избавление души своея, сведущему безвестная и тайная премудрости Божия. Таже рече паки: Не убойся, егда разбогатеет человек или умножится слава дому его, яко егда умирает, не оставит ли вся, ниже снидет с ним слава его. И прочая.

Паки Господу глаголющу: Слышасте, яко речено есть: Возлюбиши искренняго своего и возненавидиши врага своего. Аз же глаголю вам: Любите враги ваша, благословите кленущая вы, добро творите ненавидя(л. 318)щим [1170] вас и молитеся за творящих вам напасть и изгоняющыя вы, яко да будете сынове Отца вашего, иже на небесех, яко солнце свет сияет на злыя и благия и дождит на праведныя и на неправедныя.

Зри, совопросниче, Божественыя и святыя заповеди Христовы. Кто ли бо слышай сия, усрамился бы мало и постыдился, якоже инде Господь глаголет: Иже аще постыдится Мене и Моих словес в роде сем прелюбодейнем и грешнем, и сего Сын человеческий постыдится во славе Отца своего. Кто ныне любит враги своя или благословит кленущыя или добро творит ненавидящим или молится за творящих напасти? И прочая. (л. 318 об.) [1171] Но вси ненавидят друг друга, вси зло творят друг другу, вси гонят. Како таковии могут быти сынове Отца небеснаго? Явно есть, по Господню словеси, таковии сынове отца их диавола есть и похоти отца их творят.

Господу глаголющу: Аще любите любящих вас, кую мзду имате, не и мытаре ли тожде творят. И аще целуете други ваша токмо, что лишше творите, не и язычницы ли такожде творят. И аще благо(л. 319)творите [1172] благотворящим вам, кая вам благодать есть, ибо и грешницы тожде творят.

Кто же ныне благотворит кому, развее присномыслит вся како зазлит кому. И аще взаим даете, от них же чаете восприяти, кая вам благодать есть, ибо грешницы грешником взаим давают, да восприимут равная. Ныне же никто дает, но вси взимают, неправедники, а не ведают, аще что малое милостыни даст, всюду обходя пред собою трубит. Дати же милостыню, якоже лицемери творят в сонмищах и стогнах, такожде яко и молятся, да прославятся от человек. К таковым Господь глаголет: Аминь, (л. 319 об.) [1173] глаголю вам, восприимут мзду свою, которую мзду, тое же человецы ублажат. Божественыя же мзды лишени таковыи. А иже чюждая похищающии, которую мзду приимут, развее воздаяние вечных мук.

Паки Господу глаголющу: Аще [1174] отпущаете человеком согрешения их, отпустит и вам Отец ваш небесный согрешения ваша.

Ныне же никто никому отпускает согрешения якова любо, но власть собою восхитили и не даная им вязати и решити на земли, и тех бедных вяжут, имже дадеся власть о благодати Святаго Духа, якоже и Господь заповеда: Его же, рече, аще [1175] свяжете на земли, будет связан (л. 320) [1176] на небеси. И прочая. Их же Господь да утвердит и не разрешит по словеси Своему и на небеси. Аще и небеснаго жителства достойни бы были, ниже Отец небесный отпустит согрешения их.

Господу глаголющу: Не скрывайте себе сокровищ на земли, идеже червь и тля тлит, идеже татие подкопывают и крадут. Сокрывайте же себе сокровище на небеси, идеже ни червь, ни тля тлит, идеже татие не подкопают, ни крадут, идеже бо сокровище ваше, ту будет и сердце ваше.

Видиши ли, богате, где сущее свое повелевает Бог сокровиществовати? А иже чюждая похищая и насилуя, где той мнится быти? Аще и царь или велможа, всем во Христе божественный апостол (л. 320 об.) [1177] заповедует, аще царь или боярин, или велможа, или владыка, по божественному апостолу: Да [1178] аще, братие, или не весте, яко неправедницы и хищницы Царьствия Божия не наследят.

Господь [1179] же и мукою претит, глаголя: Убойтеся, рече, имущаго власть по убиении воврещи в дебрь огненную и не просто, но и с клятвою. Ей, глаголю вам, того убойтеся. И инде паки: Связавше ему руце и нозе, вверзите во тму кромешную. И инде паки рече: Злых зле погубит. И паки: И неключимаго раба вверзите во тму кромешную. И инде: Отъидите от Мене, делателие беззакония. И паки: Приведите Ми его семо и иссецыте предо Мною, зане не хотеша, да (л. 321) [1180] бых царь был над ними. И инде: Соберите их и свяжите в снопы, яко сожещи я. И паки: Иже аще кто не пребудет во Мне, извержется вон, яко розга и изсышет, и собирают я, и во огнь влагают, и згарает. И инде: А [1181] иже аще речет юроде, повинен есть геене огненней. И паки: Аще око твое соблажняет тя, изми е и верзи от себе. И прочее. Уне бо ти есть, да погибнет един от уд твоих, а не все тело твое ввержено будет в геену огненную. И инде паки: идите от Мене, проклятии, во огнь вечный, уготованный диаволу и аггелом его. Взалках бо ся, и не дасте Ми ясти. И прочее.

Сия вся реченая самем Богом и святыми Его апостолы, кто ныне сохраняет? (л. 321 об.) [1182] Кто ли боится, якоже подобает? Того ради к таковым Господь рече: И идут сии в муку вечную. И глаголеши, совопросниче, яко тишайший государь наш и всещастливой царь вручил Никону, чтоб досматривал всяких судеб церковных. Вручил Никону не царь досматривати судеб церковных, вручила Никону благодать Святаго Духа. Но царь тую уничижи и Святаго Духа благодать обесчести и немощну ту сотвори, яко без царьскаго указу не может ныне действовати благодать Святаго Духа, якоже пишут растленнии умом архиерее, ныне поставил есмь сего или онаго архимандрита или игумена или презвитера и прочих по благодати (л. 322) [1183] Святаго Духа и по указу великаго государя. И прочее. Такожде удавленаго или убитаго погребати или молитва во гресе рожденому дати, все по государеву указу, и что сего страшнее.

Господу свидетельствующу: Сего [1184] ради глаголю вам, всяк грех и хула отпустится человеку, а яже на Духа хула, не отпустится человеку. И иже аще [1185] речет слово на Сына человечскаго, отпустится ему, а иже речет на Духа Святаго, не отпустится ему ни в сий век, ни в будущий, но повинен есть вечному суду. Кого имать помиловати таковы, еже Святаго Духа дерзну обезчестити и немощна того сотвори, действие и силу присовокупися тому, и по указу великаго государя. И прочее. Несть ли (л. 322 об.) [1186] выше сего писано, яко мирскими властьми избраный извержется и с поставльшим его. Но ничему не внимают. Что более сего свидетельства самому Богу свидетельствующу, яко ни в сем веце, ни в будущем не отпустится таковое согрешение. Но он, государь, ни сего содрогается, еже несть что любо тяжчае сего, яко не имать отпущения ни в сем веце, ни в будущем, но действует аки архиерей великий, и его же хощет, того велит рукополагати. Ох, ох, ох, увы, увы таковаго презорства и страшнаго прещения кто будет поможет от него.

Паки пишешь, и сие есть, что подарил (л. 323) [1187] его всеми привилеи, которыя, велми почитаючи Константин Великий папу Римскаго Силивестра вручил ему же, папе. Такожде и Никону на писме подал многия привилеи государь царь. Которыя привилеи, скажи ми? Еда по древнему закону десятину или ино что яже суть по закону или преданию благочестивых царей? Ни. Но что прежде от Церкве наследия отъятие и потом и с привилеями изгнание нам самем.

Послушай, совопросниче, яже ты глаголеши о Константине Велицем, какова суть того привилея.

В перый же день по еже прияти ми тайну Божественаго крещения и по исцелении еже от проказы моего (л. 323 об.) [1188] телесе познах не быти иному Богу, развее Отца и Сына и Святаго Духа, его же блаженный папа Силивестр возвещает, Троицу во единице и единицу в Троице. Вси же бози язычестии, им же изначала веровах, бесове суть, дела рук человеческих, яве показашася.

Видиши ли, совопросниче, яко не единым телом очистися, но сугубо душею и телом. А иже аще мнится, кто тело чисто имети, а душю проказиву, что ползует его внешняя чистота его, душа прокажена сущи. Тем же и Господь к таковым глаголет: Лицемере, измый прежде внешнее сткляницы и блюду, и будет и внутренняя има (л. 324) [1189] чиста. Паки Великаго Константина устав. К сим же, колику власть самый Спаситель наш Господь своему апостолу блаженному Петру подаде на небеси и на земли, явлено и нам, той честный отец наш Силивестр изложи.

Внегда онаго верна обретох в вопросех. И рече: Ты еси Петр, камень веры, и на сем камени созижду Церковь Мою и врата адова не удолеют Ей.

Разумейте, силнии, и ушима сердечныма внушите, что благий Учитель и Владыка своему ученику совокупив рек: И дам ти ключи Царствия Небеснаго, и его же, аще свяжеши на земли, будет связан на небесех, и его же разреши на земли, будет разрешен на небесех. Преславно убо се слово, еже на земли (л. 324 об.) [1190] вязати и разрешати, и на небесех связану быти и разрешену.

Видели, совопросниче, како утвержает благочестия утвержение, яко аще, рече, свяжет на земли, будет связан на небеси, а не как ныне, яко им же подобает вязати. Тех самех и вяжут и разрешают, но паки на первое обратимся.

Сия убо блаженному нашему отцу Силивестру учащу, разумех и благодетелствовах самаго блаженнаго Петра совершеннейшее здравие ощущая пришедшее телеси моему. Достойно разсудихом со всеми нашими тысящники и сотники и сигклиты и с велможами и со всеми Римскаго царства величествы (л. 325) [1191] подлежащему людству, ему же блаженный Петр яко викарий, сиречь наместник, является уставлен на земли Сыну Божию.

Сице и нами и нашим царьством место преимущее и властелина апостолскаго приимут даное им началство, власть болшая и превысочайшая, неже еже имать наша кротость и царьство на земли всеми ведомо. Предразсудихом того апостолскаго властелина и того по нем приемника присных быти нам к Богу отцем и ходатаем.

Видели, совопросниче, завещания святыя оныя царьския души, како почте не единаго Силивестра папу, но и по нем приемников, присных, рече, быти нам к Богу отцем и ходатаем. А не якоже (л. 325 об.) [1192] ныне сам, немилосердием своим изгнав, сам, яко хощет, государь не почитает и хулящим не возбраняет и клевещущих приемлет, якоже тебе и прочих подобных тебе окаянных.

Таже паки оная святая и блаженная душа глаголет: И якоже нашу на земли царьскую власть, тако и его священную и святую Церковь Римскую оставихом чтити со благоговением и священнейшим его седалищем блаженнейшаго апостола Петра паче нежели нашего царьства. Наипаче бо земнаго престола преславнее превознести и воздати сему власть и славы достоинство, скорость же и господьствование и силу и честь царьскую.

Видиши ли, со(л. 326)вопросниче [1193], блаженныя оныя и святыя царьския души уставы завещания, не тако, якоже ты глаголеши, вручил Никону и на писме подал многия привилеи государь царь. Которыя? Сия ли, еже ныне по ево государеву по всему государьству грамоты розосланы, что с ково взял я, якоже есть писано выше. А сам забыл о себе разсмотрети праведно по Божественому словеси. Изми первее бревно из очесе твоего. И прочее.

Колико от святых церквей и монастырей и святых мест поимал, яже суть оных святых церквей и монастырей и святых мест приставницы святии ангели зрят? Якоже есть писано: Ангели их выну видят лице Отца небеснаго. Таже глаголет: И еще же уставаяюще, (л. 326 об.) [1194] законополагаем власть имети на изряднейших четырех престолех, Константинополскаго глаголю и Александрийскаго и Антиохийскаго и Иерусалимскаго. Еще же и на всех, иже по Вселенней, Божиих церквах и по временем той священнейшей и святей Римстей Церкви сущаго святителя выщшаго быти и властелина над всеми архиереи и священики, иже по всей Вселенней, но и вся, о их же достоит попечение имети к Божественней службе и к крепости и утверждению християнския веры, сего судом устроитися. Достойно бо главе началство святаго закона имети, идеже святых законов законоположи Спаситель наш блаженнаго Петра апостолский устави (л. 327) [1195] послушание имети престол, идеже крестную страсть и сам той претерпе, блаженный, смертную чашу испив, подобник своему Владыце быв. И тамо до скончания века и всегда поищут учителя, идеже святое почивает учителево тело, тамо и языцы о имени Христове и исповедания выю свою преклоняют, и идеже сих учитель блаженный апостол Павел о Христе выю свою протяг, мечем во главу усечен бысть, и венцем мученическим украсися. Тамо преклонения смиреннии сотворяют и небеснаго Царя и Бога и Учителя нашего Иисуса Христа да поработаю сану, идеже величеству и гордости земнаго царя поработаша власти, тамо да поработают и небеснаго Царя (л. 327 об.) [1196] поработаша властелинам и первым лика апостолскаго Петру и Павлу. Их же ради ведати хощем всем, иже по всей Вселенней языческим людем яко мы внутрь латеринския полаты нашея по крещении храм воздвигохом самому Спасу нашему и Богу и Владыце Иисусу Христу от самых оснований и с крестилницею, из них же оснований 12-и кошев земли сам обременився, своима рамены изнесох, равночислены 12-и апостолом. Еже достоит священным сию святую церковь, главу и верх всем по Вселенней церквам глаголатися и веровати и возвещати и чтити повелеваем, якоже и инеми нашима (л. 328) [1197] царьскими веленми указано положихом. Создахом же и церковь блаженным [1198] Петру и Павлу, первым апостолом, юже сребром и златом достойно и обилно украсихом, идеже и священнейшая телеса их положихом с великою честию. Паки им от илектра, его же ни едина вещей сила есть крепчайши, сотворихом. Крест же златом чистейшим и бисером драгим украшено сотворен. На коейждо стране обоим ракам положихом, златыми пригвоздивше гвоздми, яже церквам всем по Вселенней многими светилы и свещами устроихом содержания ради и крепости и светлости стяжания.

Зри, совопросниче лукавый, что от сих (л. 328 об.) [1199] сотвори государь царь, якоже ты глаголеши, велми почитаючи. Которое почитание, яже от сих ничто же? Но паки слушай.

Земли же и села и винограды и езера и пошлины, сочетавше, дахом церквам. И Божественным повелением и нашим царьским положением уставихом, на восточных и на западных, на полунощных же и южных странах, во Июдеи же, и во Асии, и во Фракии, и во Елладе, во Африкии же, и во Италии, и в различныя острову нашего им повеления свобожение возвещая и по всей Вселенней, идеже православнии цари и князи и властели под нами обладают нашего свобожения, и волю им утвердивше, дахом владети святителем (л. 329) [1200] и никаковому мирскому сану смети прикоснутися церковным пошлинам. Богом заклинаем и нашим повелением утверждаем непреложно и соблюдено быти даже до скончания века сего.

Зри, совопросниче, где есть царьское жалование, привилеи подобны сим, якоже ты глаголеши, велми почитаючи Константин Великий папу Римскаго Силивестра вручил ему же, папе, такоже и Никону на писме подал многия привилеи государь царь. Которыя? Разсмотри противо сим, то есть царя Константина.

Видиши ли, како царь Константин Великий дав и утвердил даже до скончания века сего. Государь же царь, аще что и дал, и того сам не соблюл, и бывших всех, (л. 329 об.) [1201] и отца своего и свои привилеи везде ни во что обратил. Паки же к сущим царя Константиновым заповедем приидем.

Се же явлено убо, яко рукама блаженнейшаго отца нашего Силивестра святителя и того по нем приемником, сия вся удержана будет. Да возвеселится ныне с нами весь народ и вси, яже по Вселенней языки и роды. Глаголем и молим, яко да с нами Спасителю нашему и Богу и Господу Иисусу Христу безчисленыя исповемы благодати. Яко той есть Бог на небеси горе и на земли доле, иже нас святыми апостолы посети и святую тайну Крещения и телеси здравие достойно сотвори прияти. О них же и подаем тем святым апостолом (л. 330) [1202] и владыкам нашим, блаженнейшим Петру и Павлу и с ними Силивестру, нашему отцу, и всем отцем поднебесныя, отцу, крайнему святителю, и соборному града Римскаго папе и всем его, иже по нем приемником святителем, даже до скончания мира, на престоле блаженнаго Петра седящим. Первое, убо в латеринстей полате царьства нашего, яже всех, иже по всей Вселенней, полате препочитается и преимет и славится, якоже диадима, еже есть венец главы нашея, подобне же и фригион, еже есть покрывало, еже митрою нарицают, и не токмо той, но и епомион, еже есть препоясание, еже обычно есть царьской мышце облагатися, рекше омофор, (л. 330 об.) [1203] и еще же и багряная одежда и червленая риза и вся царьская одеяния, но и царьскаго председания достоинство и царьских коней утварение, и царьския скипетры, и вся знамения, еще же и колесницы и различныя царьския утвари, и вся, еже в происхождение их, царьскаго верха, славы и силы.

Сице честнейшим же мужем, клириком в различных чинех той священней святей Римской Церкви работающих, оноя же высоты усвоение и силы преизящество имети уставляем, еже и великий наш сигклит славою зрится украшен, сиречь патрикеем, бывати им и ипатом. К сим же и инеми царьскими саны в проповедаемых (л. 331) [1204] украшатися им, якоже царьскому воинству. Сице и клиросу святыя Римския Церкве украшатися и чествоватися уставляем. И якоже царьская власть различныма саны кудикуларийскима и остирьяскима и скудиторскима украшается, тако и святей Римской Церкви украшатися. Но и пространнейше святительское благоукрашение священным и Божественым повелением и нашим царьским повелением сияти и чествоватися уставляем. И тех клирик тоя святыя Церкве, кони покровени одеянии, белейшаго зрака украшатись повелеваем и сиятися мимоездящих обувенми, сиречь белейшима одеяний по ногам имущих, (л. 331 об.) [1205] якоже сими и наш сигклит одевается. Да якоже небесная, такожде подобает и земная украшати в славу Божию. Прежде же всех волю даем тому святейшему отцу нашему Силивестру, иже града нашего Рима святителю папе и всем, иж по нем приемником, хотящим быти на приходящия веки блаженнейшим святителем ради чести и славы Господа нашего Иисуса Христа в велицей сей соборней и апостольстей власти. Аще кто от великаго нашего царствия велмож восхощет ко благоговейным клириком причетатися, никому же, иже к сему призываему за гордость, отрицатися чина, узаконополагаем же и се всякия чести достойно отцу на(л. 332)шему [1206] Силивестру, крайнему святителю, и всем его, иже по нем приемником, святителем препоясанием и венцем, иже от главы нашея подахом ему, златом чистейшим и каменми многоценными и драгим бисером составленый. Должен есть одеватися и на главе носити на славу Божию и на честь блаженнаго Петра, понеже той блаженный папа на венце главнаго пострижения знамение сотвори, его же ради чести блаженнаго Петра имеет. Не восхоте же ль злата носити венец, мы же венец вместо сего, лицем белейшим светлое Воскресение Господне назнаменавше, на священнейшую его главу своима рукама положихом и брозды (л. 332 об.) [1207] коня его своима рукама держаще, чести ради блаженнаго Петра, конюшеским саном ему себе дахом. Повелеваем же того чина и обычая всем, иже по нем, святителем всегда творити в поездех своих по подобию царства нашего. Темже ради сего постриженаго знамения верховнаго святительския главы, да не мнит кто сие пострижение худо быти и безчестно. Но и паче земнаго царьства саном и славою и честию и силою ея украшати подобает. Се же и полата наша, якоже преди речеся, но и Рим град весь и вся Италия и западныя страны и пределы и места и грады и земли. Сему же множицею предреченому блаженнейшему (л. 333) [1208] отцу нашему Силивестру соборному папе предаем и отступаемся ему и всем, иже по нем бываемым святителем, и по всей Вселенней, идеже православная наша вера обдержит, и владение и суд держати им Божественым нашим и делным сим законоположением повелеваем пребывати наместнику святей Римской Церкви. И подлежащее и пребывающее отдаваем ей, отнюду же судихом нашему царьству и его славе на Восточныя страны преселитися вместо Византии, краснейшее место о нашем имени град создавше, тамо царьство наше утвердим, идеже бе святительская власть и христианскаго благочестия глава небесным царем уставлена бысть, (л. 333 об.) [1209] недостойно есть тамо власть имети земному царю. Сия убо вся яже священным нашим сим писанием и инеми Божествеными суды повелена же и укреплена, даже до скончания мира, яже по всей Вселенней. Даныя же святителем церковныя пошлины неприкосновенна и непоколеблема пребывати уставляем в наших летех и по нас в приходящыя лета и роды. Заповедаем православным царем и князем и всем людем, яже по всей Вселенней, даже и до скончания мира. Отнюду же пред живым Богом, иже повелевшем нам царьствовати, и Страшнаго Его суда предзасвидетельствуем, священым и Божественым повелением (л. 334) [1210] и царьским сим нашим уставлением, всем нашим по нас преемником царем и всем силным и всем тысящником и всем сотником и всем велможам Римским, всему пространнейшему сигклиту полаты нашего царства, и всем, иже по всей Вселенней людем и иже ныне сущим в сих летех и потом, по вся лета впреди бывающим, и нашему царьству подлежащих. Ни единому же сих мощно буди по некоторому образу, яже нами и царьским нашим законоположением священнейшей святей Римской Церкви и всем, иже по нею, святителем, по всей Вселенней бываемая данная порушити, или пречинити, или которым образом досадити. (л. 334 об.) [1211] Аще ли же кто силою, или недоверием, или гордостию преобидник будет о сих, вечныма да объят будет осуждении и онех да подпадет томлением и обрящет тогда себе сопротивных святых Божиих и началных апостолов Петра и Павла и в настоящем убо житии, и в будущем, и да в преисподнем аде мучим будет, и да исчезнет со диаволом и со всеми нечестивыми. Сего же нашего царьскаго повеления писание своима рукама укрепивше, честному телеси началнаго апостолом блаженнаго Петра своима рукама в раку положихом, сим Божию апостолу обращахомся, непорушима нами сия вся соблюдати и нами и по нас (л. 335) [1212] приемники царьскими, зде и по всей Вселенней православным царем же и князем и велможам владалным, соблюдаема Божественыма заповедьми и нашима уставы укрепихом. И блаженному отцу нашему Силивестру, соборному папе и, его ради, всем его приемником святителем Господа нашего Иисуса Христа благонравно поведавше вечно и благополучно сих воздаяние предавше. Такожде инем четырем Патриаршеским престолом, коемуждо пределу честных ради апостол и ученик Христовых, Византийскому, его же во свое имя преименовахом Андрея ради апостола, яко много потрудившася к богоразумию тех привести и Церкви водрузити православных, (л. 335 об.) [1213] такожде и Александрийскому, Маркову преемнику, и Антиохийскому, Лукину настолнику, и Иерусалимскому, Ияковля брата Господня, коемуждо во своем пределе подобающую честь подаем и наши по нас преемницы до века, такоже и всем Церквам Христовым, митрополиям, архиепископиям и епископиям и иже по них настолником их, честь сами даем и наши по нас преемницы и велицыи сатрапы, яко служителем Божиим, преемником Христовым апостолом, сице твористе и соблюдайте, яко да не предреченой тягости подпадете и славы Божия лишени будете, но держите предание, якоже приясте. Бога (л. 336) [1214] бойтеся и священную Его Церковь и настоятели Ея чтите, да милость Божию получите и в сем веце и в будущем и сынове Света будете.

Царьское подписание сице.

Божество вас да соблюдет во многая лета святейшии блаженнейшии отцы. Дадеся в мире в день третий каланд априлиевых владыки нашего Флавия Константина Августа Галаканом мужем честнейшим Ипат славнейших.

Видели, совопросниче, великаго царя Константина веру и деяние и утвержение, како при себе и по себе и навеки до скончания века утвердил и заклял страшным прещением, кто не сохранит заповеди его, глаголя: (л. 336 об.) [1215] Аще ли же кто силою, рече, или неверием, или гордостию преобидник будет, вечными объят будет осуждении и онех да подпадет томлением, и обрящет тогда сопротивных святых Божиих и началных апостолов Петра и Павла и в настоящем убо житии и в будущем, и да в преисподнем аде мучим да будет, и да исчезнет со диаволом и со всеми нечестивыми. Такожде и Иустиниана, царя великаго, законы даныя Церкви на утвержение, во всем последуя святых апостол и святых отец правилом, 87-го правила, еже не вместно скупости ради времене вписати, сам на месте их (л. 337) [1216] прочти во святых правилех. Такожде и прочия Греческия цари благочестивыя.

Таков же и равноапостолный великий князь Владимир крестився и созда церковь соборную Пресвятыя Богородицы десятинную. И дах ей десятину со всего своего княжения от всякаго суда десятое и с торгу десятую неделю во всех градех, и на всякое лето десятое от всякаго стада, и от всякаго живота на всякое лето десятое Господу Богу и Спасу нашему Иисусу Христу и Пречистей Его Матере Пресвятей Богородице и отцу своему митрополиту. Такожде и епископом по всей земли Руской, во всех княжениях в соборную церковь епископом устроил по греческим номоканоном. И паки разсмотрив греческия номо(л. 337 об.)каноны [1217], обрете в них написано, яко не подобает церковных судов мирским князем судити, ни бояром, ни тиуном их, и той такожде сотвори. Седе со отцем своим Леоном, митрополитом же всеа Руси, и со всеми детми и со всеми князи своими, и с боляры и дал те все суды по греческим законом святей Божией церкви Пресвятыя Богородицы и отцем митрополитом всеа Русии и всем епископом по всей русской земли в род и в род до века, глаголя: завещаю и заклинаю Богом и Пречистою Богородицею все, еже соблюдати сия неподвижно, и никако же вступатися во святительския суды и во власти их и в люди их ни детем (л. 338) [1218] моим, ни внучатом, ни правнучатом, ни всему роду моему в род и в род до века. А бояром нашим и тиуном нашим и всем судиам нашим и иже по нас в род и в род до века никако же судов святительских церковных не судити и наших мирских судов без судей митрополичьих не судити десятаго ради дохода. Богом заклинаем и Пречистою Богородицею соблюдати сия неподвижно даже до скончания мира. Аще же кто преобидит сей устав, таковым грех и непрощеным быти от Господа Бога, аще не покаются. И своим убо судиам и тиуном приказываю и засвидетельствую пред Христом (л. 338 об.) [1219] Богом и пред всеми святыми Его и пред всем народом, священных доходов и пошлин и управ, судов церковных не обидети и с судов градских давати 9 частей князю, а десятую часть святей церкви, отцу нашему святителю. Такожде и всем святителем по всей рустей земли, где суть священнии епископстии престоли. А се люди церковнии по Божественым правилом предани патриарху или митрополиту или епископу, в коем аще предел будет. Епископи, архимандрити и игумены, игумении, попы, диакони, попадьи и диаконицы и дети их, и иже суть в клиросех, иноки и инокини, понамари, проскурницы, стражи священнии (л. 339) [1220] церковнии, местницы, прощеницы, бабы, вдовицы, задушнии человецы, прикладницы, странницы, нищии, монастыри и бани их и врачи их, болницы и врачи их, пустынницы, странноприемницы, и кто святая одеяния иноческая свержет, те вси по древнему уставу святых апостол и святых отец и благочестивых православных царей святым церквам даны, патриарху или митрополиту или епископу, в коемждо аще пределе будет, да ведает их той и управу дает и разсуждает, аще что будет промеж ими или которание, или безчиние, или нестроение, или суды, или обиды, или насилие, или церквам и закону христианскому что (л. 339 об.) [1221] неподобно содевается, или лихоимством имение преставлшаго восхитится, душа вышши и болши всего есть, или мерила неправедна и весы и спуды, или задница, аще ли иному человеку будет с ними суд или обида которая, то общий суд и пересуд наполы.

Сия и убоися, аще кто преступит правила, якоже есмь управил по святых апостол и по святых отец и по первых православных благочестивых царей управлению. А кто имет поругати и преступати сия правила, или дети мои, или внуцы мои, или правнуцы, или по тех князи и бояре, или в которых городех наместницы, или судьи, или тиуны, аще (л. 340) [1222] имут поругати и обидети те священныя суды и управы и доходы и пошлины церковныя святительския или отъимати, да будут прокляти в сий век и в будущий и от святых апостол и от седми соборов святых отец Вселенских.

Глаголет бо во Евангелии своем Господь к таковым: Отъидите от Мене, проклятии, во огнь вечный, уготованый диаволу и аггелом его.

О мерилех и о весех, и о спудех, и о ставилах.

Сие убо искони поручено Господем Богом святителем и епископиям их, градския и торговыя и везде всякия мерила и спуды и весы и ставила от Господа Бога тако изначала уставлено есть и непоколеблемо никогда же быти даже (л. 340) [1223] и до скончания мира. И святителю блюсти без пакости всего того подобает, за все бо за то воздати ему слово в день великаго Суда Христова, якоже и о душах человеческих.

А се о десятинах.

От всякаго княжа суда десятая векша, и ис торгу десятая неделя и от дани, и от веры, и из всего схода, и прибытка, и от лова княжа, и от всякаго стада, и от всякаго жита десятое в соборную церковь епископу. Царь или князь в девятих частех, а церковь соборная в десятей части. Глаголет бо апостол: Основания же инаго никто же может положити, паче лежащаго сего от начала век положенаго от Господа Бога и святых Его. И да вси со(л. 341)граждают [1224] на сем основании. Аще кто разсыплет храм Божий, разсыплет того Христос Бог, Церковь бо Божия свята есть и утвержена Господем Богом в век века. Аще кто обезчестит и разорит святый сей устав апостолский и отеческий, гнев Божий на себе привлечет и гнев не прощен, и проклятие в сий век и в будущий, якоже во Евангелии писано есть, яко с проклятием таковии отсылаются от Господа Бога во огнь вечный, уготованый диаволу и аггелом его.

Аще кто поругает и изобидит священныя доходы и пошлины и управы и суды церковныя святительския, четверицею да воздаст и страшен ответ воздаст на страшнем Суде (л. 341 об.) [1225] Христове, идеже никто же никому же поможет, развее истиныя веры православныя и добрых дел. Аще кто завещание мое сие и уставление мое порушает, или сынове мои, или внуцы мои, или от бояр или кто от властелей, или от тиунов и от прочих кто ни буди, аще порушает мой ряд, или вступятся в суды священныя святительския или в доходы и пошлины, что есми дал митрополиту, своему отцу и епископом во всех княжениих по святых апостол и святых отец и по первым православных благочестивых царей управлению, да приимет от Христа Бога и от достойне держащаго державу Русскую. Аще же вся сия преобидит (л. 342) [1226] кто и имет вступатися и отнимати, и судити, преслушав спасеныя заповеди Божия и апостолския и отеческия и православных и благочестивых первых царей, и неключимых нас завещание священныя церковныя управы и суды и доходы и пошлины, той да станет со мною пред Христом Богом на нелицемернем и грознем и страшнем Суде, и да не будет на нем милости Божия в сем веце и в будущем, и да будет проклят.

И таковая с молитвою завещания трудолюбезно от святых Писаний снискав и завет сугубо доволен написа, и клятвами страшными утвердив, и таковое писание в той велицей церкви (л. 341 об.) [1227] Богоматере на утвержение благочестия, еже и доныне благодатию Христовою многоразличныя даяния Богу даная, свидетелствуют, благословенный плод сего святаго Владимира, иже суть наследницы богохранимыя державы его, божественне ревнующе по истиннем благочестии, якоже прияша отеческая правоверная вера законоположения. И сия вся не токмо непоколебаемо держаще исправляху, наипаче же того много сугубно и приложиша, созидающе многия церкви и епископы устрояху, и честныя монастыри воздвизаху, и нещадно даяху вечное наследие, грады и погосты, села и винограды, земли и болоти, езера и реки, и ве(л. 343)ликия [1228] власти со всеми прибытки. К сим же и десятое изо всего царьствия и княжения.

Такоже [1229] и христолюбивыя их царицы и благоверныя княгини усердно вдаваху свою лепотную утварь и всякую нарочитую кузнь и светлыя ризы, злато же и камение драгое и великий жемчюг, и святыя иконы, и евангелия, и царьскими сосуды святыя престолы украсивше, обогатили паче тех, от кого сия прияли суть, внимающе писанию апостольских правил. Якоже церковное богатство нищих есть богатство, еже сим издовляти весь освященный чин и вся причетники церковныя, и возраста ради и сирот, и в старость пришедшим, и в немощи (л. 343 об.) [1230] и в недуги впадшим, нищим в прекормление и много убо чади, и странным в прилежание, и убогим сиротам в промышление, вдовицам же пособие, девицам потребы, обидимым заступление, пленным искупление, во гладе прекормление, в худобу умирающим покровы и гробы и погребание, церквам пустым и монастырем подъятие, живым прибежище и утешение, а мертвым память.

Сих ради потреб церковных людие даваху имения своя, о таковых потребах блаженный Владимир велик подвиг показа и вечное блаженство получи.

Что же ли, совопро(л. 344)сниче [1231], государь царь подобно сим сотвори? Но все сопротивно священному Христову Евангелию и святых апостол и святых отец и благочестивых царей и великих князей преданием и утвержениям, якоже выше много множество писано есть. Архиерейство ли почте, якоже Господь заповеда: Слушаяй вас, Мене слушает? То таково государь царь не почел, но и обесчестил тако, что невозможно и писати, безчестнее и поганых царей обезчестил.

Глаголет государь царь, якоже всенародное слово слышится во всем мире, что бутто он нас избрал на архиерейство. Едина весть Святая Троица, Отец и Сын и Святый Дух, яко не искал, ни хотел, и иже имать судити Господь, (л. 344 об.) [1232] тогда познано будет. А я, аще бы ведал таковое его государево немилосердие, не бы помыслил, якоже весть Господь и всенародное множество, как молил сам государь. Ныне же от всенароднова множества общий глас слышится, кто де он был, толко де бы не аз ево избрал? Говорили и на Христа моего: Кто Сей есть? Инии глаголаху: Не Сей ли есть тектонов сын? И инии же глаголаху: Откуду Сему сия и что премудрость даная Ему, и силы таковы рукама Его бывают, не Сей ли есть тектон, сын Мариин, брат же Иякову и Иосии и Июде и Симону, и не сестры ли Его зде суть в нас. И блажняхуся о Нем.

Глаголаше же им Иисус: Яко несть пророк (л. 345) [1233] без чести, токмо во отечествии своем и в сродстве и в дому своем, то есть от отечствия своего, яко знает кто отечствие пророческое и соблажняет и не верует быти яко пророк. Якоже глаголется: Ни братия Его вероваху в Него. И паки: Сотвори что и зде, во отечествии своем, то есть в сродстве своем и в дому своем. И несть чюдно и государю царю, что ныне говорит, яко аз избрал на хулу Святому Духу, аще исперва благ явился и достоин помазанием и возложением руки архиерейския нашествия Святаго Духа, якоже и Саул по помазании на царьство Израилю от Самуила дар Святаго Духа име и пророчествова. И [1234] бысть, рече, егда возвратися (л. 345 об.) [1235] Саул от совокупления, разытися с Самоилом, и преложи ему Бог сердце на ино, и приидоша вся знамения в день онь. И взыдет оттуду на холм и се лик пророческий противу ему, и взыде нань Дух Божии, и прорицаше среде их. И реша вси людие, кийждо ко искреннему своему: Что се бывшее сыну Киссову, еда и Саул есть во пророцех? Егда возгордев и пождав Самоила, якоже заповеда ему, и коснуся неприкасаемых, и вознесе всесожжение, тогда и царьство его разрушися и отъятся. И во царя место вождь наречеся, и Дух Господень отступи от Саула, и даваяше дух лукавый от Господа. Егда же второе сотвори вознести жертву, от Малик (л. 346) [1236] возвратився, и архиерея Господня уби и прочих 80 священников, тогда от Бога и сам осужден, со всем родом его побиен быти, якоже и бысть. Тако и Соломон, от исперва благочестив бысть, но конец жития не подобен юности соверши.

Тако несть чюдно и государю царю, от исперва по помазании елея имети Святаго Духа, якоже и прежде бывше мнози царие благочестивии и потом бывше злии, отступницы и гонителие и мучителие, о них же повествует книга летописная.

Тако и государь царь, аще от исперва был милостив, кроток, благопослушлив, ведаем и хвалим, а еже ныне явился противе во всем священному (л. 346 об.) [1237] Евангелию, Духа Святаго обезчести, правила святых апостол и святых отец и всех благочестивых царей и великих князей законы и уставы, преданыя Церкве, испроверже. И елико отец ево, государев, царь и великий князь Михаил Феодорович всеа Русии со отцем своим великим государем святейшим кир Филаретом, патриархом Московским и всеа Русии, исправили и обновили и утвердили, все до конца ни во что положи. И елико сам от исперва быв благ и кроток и милостив, исправи и устави, все ни во что положи, забыв страх Божий и святыя Его заповеди. Господу глаголющу: Аще вы в словеси Моем пребудете, воистину ученицы Мои будете (л. 347) [1238] и разумеете истину, и истина свободит вы. Тако и всяк, не пребываяй в словеси Божии, несть ученик Христов, ни разумеет истины, ниже свободен есть от истины. И паки Господу глаголющу: Аминь [1239], аминь, глаголю вам, яко творяй грех, раб есть греху, раб же не пребывает в дому вовеки, сын пребывает вовеки. Аще убо Сын свободит вы, воистину свободни будете. Явно есть, яко их же не свободит, не будут свободни. Паки Господу глаголющу: Веруяй [1240] в Сына, имать живот вечный, а иже не верует в Сына, не узрит живота, но гнев Божий пребывает на нем. Паки Господу глаголющу: Аминь, аминь, глаголю вам, яко слушаяй (л. 347 об.) [1241] словесе Моего и веруяй пославшему Мя, имать живот вечный и на суд не приидет, но прейдет от смерти в живот. Явно есть, яко не слушаяй словес Господних, ниже веруяй пославшему Его, не имать живота вечнаго, ниже может приити от смерти на живот.

Господу глаголющу: Се же есть воля пославшаго Мя, да всяк видяй Сына и веруяй в Него, имать живот вечный, и воскрешу его Аз в последний день. Всяко и не веруяй в Сына, не воскресит тех Господь в последний день, по писаному: Не воскреснут нечестивии на Суд, ниже грешницы в совет праведных. Господу глаголющу: Аминь, аминь, глаголю вам, аще кто слово (л. 348) [1242] Мое соблюдет, смерти не имать видети во веки. Явно есть, яко аще кто и не соблюдает словес Божиих, не избавится смерти вечныя.

Видели, колико добро есть слушати словес Божиих и заповеди соблюдати. Таковым Господь обеща живот вечный, и воскреснет в последний день, и смерти не имать видети вовеки. И колико зло есть преслушати заповеди Божия, яко гнев Божий пребывает на них, ниже имать преити от смерти на живот, ниже имать воскреснути в последний день, ниже имать наследовати живота вечнаго. Сия вся государь царь презре и не страшится. Аще ли кто возглаголет, яко соблюдает (л. 348 об.) [1243] государь сия вся, и аз к таковым реку. Господу глаголющу: Аще кто любит Мя, слово Мое соблюдет. И паки: Имеяй заповеди Моя и соблюдая их, той есть любяй Мя. Аще заповеди Моя соблюдете, пребудете в любви Моей. Которую ли заповедь? Се есть заповедь Моя: да любите друг друга. И паки: По сему познают вы, яко Мои ученицы есте, аще любите друг друга. И се всем повсюду ведомо, яко государь царь не любит Господа, понеже не хранит заповеди Его, ниже есть ученик Христов, понеже не любит нас.

Господу свидетельствующу: Не любяй Мя, словес Моих не соблюдает. И паки: Ненавидяй Мя и Отца Моего ненавидит. (л. 349) [1244] И [1245] не любяй брата своего, пребывает в смерть. Всяк ненавидяй брата своего, человекоубийца есть. И [1246] весте, яко всяк человекоубийца не имать живота вечнаго в себе пребывающа. Аще ли кто речет, яко люблю Бога, а брата своего ненавидит, ложь есть. Ибо не любяй брата своего, его же виде, Бога, Его же не виде, како может любити? И сия заповедь имамы от Него, да любяй Бога, любит и брата своего. Благотворяй [1247], от Бога есть, а злое творяй, не веде Бога.

Что же есть благотворение государево? Се ли есть, еже восхити на ся чин священства? Ино бо есть священства чин и ино царьства, якоже выше писахом много. Но и ныне еще при(л. 349 об.)глаголем [1248], яко священство более есть царьства. Священство от Бога есть, от священства же царьства помазание.

Аще ли хощеши навыкнути, послушай. Сниде же Господь на гору Синайскую, на верх горы, и воззва Господь Моисея на верх горы, и взыде Миосей, рече же Бог к нему, глаголя: Иже рцы же, приступаяй к Богу, да ся отстоят, да некогда изменит от них Господь. И по мале. Взыди ты и Аарон с тобою, и ту прият Моисей оправдания и суды. И паки сниде к людем и паки рече Господь к Моисею: Взыди ты на гору и стани ту. И взыде Моисей и бе ту на горе 40 дний и 40 нощий. Сходящю же Моисею с горы Синайския, и обе досце в руку беста (л. 350) [1249] Моисеину. Сходящю же ему з горы, Моисей же не ведяше, яко прославися обличие плоти лица его, егда глаголаше с ним. И зре Аарон и вси сынове Израилевы Моисея, бяше бо прославлено обличие плоти лица его. И се есть освящение Моисеова священства.

Та же Моисей по заповеди Господней освяти и сыны его. Ты [1250] же приведи к себе Аарона, брата твоего и сыны его от сынов Израилевых зрети Мне, Аарона и Надапа, и Авиуда, и Елиазара, и Фамара сыны Аароня. И да сотвориши ризы святы Аарону, брату твоему, на честь и славу. Аарона же и оба сына его, приведеши я пред двери храму свидения и измыеши я водою. И взем ризы (л. 350 об.) [1251] святыя и облечеши Аарона, брата твоего, до земли ризою, и ризу утрьнюю, и слово совокупиши ему, слово ко утрьней ризе. И возложиши на главу его клобук и возложиши доску освящения на увясло. И да возмеши от елеа помазанаго и да возлиеши на главу его и мажеши и. И сыны его приведоша и облечеши я в ризы, и опояшеши я пояса, и возложиши има клобука. И да будет има жрети мне во веки. И да возмеши от крове, яже на олтари и от елеа помазанаго, и да воскропиши на Аарона и на ризу его и на сыны его, и на ризы сынов его с ним. И освятится сам и ризы его, и сыны его, и ризы сынов его. (л. 351) [1252]

Се есть начало священства Ветхаго Завета, ни от человек, ни человеком, но самем Богом. И потом распростреся священство во вся дни Израиля.

Егда же Ветхому Закону прииде время исполнитися, якоже Господь свидетельствует: Не приидох разорити закона, но исполнити. Якоже и апостол пишет: Егда прииде кончина лету, посла Бог Сына Своего единароднаго, раждаемаго от жены. И прочее. О Нем же есть писано: Се отрок Мой, Его же изволих, возлюбленый Мой, нань же благоволи душа Моя. Положу дух Мой на Нем, и суд языком возвестит. Вы [1253] весте глагол, бывший по всей Июдеи, начет от Галилеи, по крещении же проповеда Иоанн Иисуса, (л. 351 об.) [1254] иже от Назарета, яко помаза Его Бог Духом Святым и силою, иже прииде, благодетельствуя и исцеляя вся насилованыя от диавола, яко Бог бяше с Ним.

Се священства Христова показание есть. И паки: И прииде, рече, в Назарет, идеже бе воспитан, и вниде по обычаю своему в день субботный в сонмище, и воста чести, и даша Ему книгу Исаии пророка. И разгнув книгу, обрете место, идеже бе написано: Дух Господень на Мне, его же ради помаза Мя, благовестите нищим, посла Мя. И прочее. И согнув книгу, отдав слузе, седе. И всем в сонмищи очи бяху зряще нань. И начат глаголати к ним яко: Днесь збысться во ушию вашею. И вси (л. 352) [1255] свидетельствоваху Ему и дивляхуся о словесех благодати, исходящих из уст Его. Се же явно есть, еже рече Господь: Дух Господень на Мне, Его же ради помаза Мя, священства совершение и еже седети и глаголати со архиереи. Аще не бы священник Христос был, не бы места имел архиерейскаго и председания и слова учение. Аще и не суть от колена Левиина, но зависть бесовския и тогда не умолча о худородстве Христове. Глаголаху бо: Не се ли есть сын Иосифов, Ему же мы знаем отца и матерь? Якоже и днесь глаголют о нас, смиренных: А кто Он есть? Мы знаем, каков Он был, и мы Его и избрали.

Пишет же ся и во истории евреина (л. 352 об.) [1256] некоего, яко обычай бе июдеом в церкви число имети по 22 священников. И тако свиток учинен, лежаше в церкви, да егда от них един умрет, тогда вместо избираху инаго. И по освящении написоваху имя Его в книгу, и отца и матерь Его. И егда вниде Христос по обычаю в день субботний, якоже выше писано есть, и в то время един от 22 священник умре. И овии глаголаху сего, овии глаголаху инаго. И един архиерей рече, яко не имать ин быти, развее Иисуса, сына Иосифова, аще и не суть от колена Левиина, но от Июды. И тако рукоположиша и даша Ему книгу Исаии пророка, якоже есть выше писано. И посадиша Его на архиерейстем (л. 353) [1257] месте, о Нем же апостол пишет. Аще убо совершено левитском священством бы было, людие бо на Нем взаконени быша. Почто еще требе по чину Мелхиседекову иному востати священнику, а не по чину Ааронову глаголатися? Прелагаему убо священству по нужди и закону пременение бывает. О Нем же глаголются сия: Колену иному причаститися. От него же никто же причастися ко олтарю, яве бо, яко от колена Июдова возсия Господь наш. О нем же, колене, Моисей о священстве ничесо же глагола, и лишшее еще яве, яко по подобию Мелхиседекову востанет священник ин, иже не по закону заповеди плотския, но по силе живота неразрушенаго. Свидетель(л. 353 об.)ствует [1258] бо яко: Ты еси священник по чину Мелхиседекову. И по мале. Закон бо человеческий поставляет архиереи, имущая немощь, слово же клятвеное, еже по законе, Сына вовеки совершенна. И аще не был архиерей Господь наш Иисус Христос, не бы из церкви, взем бич, изгна продающыя и купующыя во церкви, глаголя: Храм Мой храм молитвы. Вы же сотвористе его вертеп разбойником. Яко и ныне святая великая Церковь бысть вертеп разбойнич. И аще кто Христову ревность восприемше, изгонит, аки бочем, законом заповеди, и ныне безгрешно есть. И о Христове архиерействе до зде.

Таже Христос рукоположи святыя Свои ученики и апостолы, (л. 354) [1259] глаголя: Приимите, рече, Дух Святый, им же отпустите грехи, отпустятся им, и им же держите, держатся. И се яве Господь рукоположил святых апостол. Приятие Святаго Духа не ино что знаменует, точию Божественыя благодати и власти преподаяние, сего ради и рече. Шедше, убо научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам. И иже веру имет креститися, спасен будет, а иже не имет веры, осужден будет. Се есть священническия власти деяние. Та же рече: Знамение же веровавшим сия последуют, именем Моим бесы ижденут, языки возглаголют новы. И прочее. И паки: Приимите, (л. 354 об.) [1260] рече, силу, нашедшу Святому Духу на вы. И паки: Бысть, рече, внезапу с небесе шум, яко носиму дыханию бурну, и исполнь весь дом, идеже бяху седяще. И явишася им разделени языцы яко огнени, седе на единем коегождо их, и исполнишася Духа Свята. И по сошествии Святаго Духа на апостолы, разделиша верховнии апостолы страны и метнуша жребий, якоже пишет: и кийждо идоша во свою страну. И по словеси Божию учаще и проповедающе всюду, Господу поспешствующу. И по избрании коегождо в своей части рукоположиша седмьдесят апостол, якоже Писание свидетельствует Никифора Калиста в книзе второй (л. 355) [1261] во главе 35, яко Петр апостол Марка евангелиста рукоположи во Александрии. Таже Андрей апостол постави Стахию апостола, его же Павел апостол воспоминает во епистолии к Римляном, первый Византии епископом. Сам же верховный апостол в проповеди трудися, еже пишется в книгах, яко проходя некогда, и Киевское место минуя, благослови и водрузи божественный крест Христов. Таже и Великий Новград благослови. И тако святыми апостолы по местом и градом рукоположишася епископи.

По преставлении же святых апостол распространися евангелская проповедь и вера Христова всюду во Вселенную по Писанию: Во всю землю изыде вещание их и в концы Вселенныя глаголы их. (л. 355 об.) [1262]

И тако благодатию Святаго Духа устроишася первопрестолства архиерейския пятеры: Римское, Константинополское, Александрийское, Антиохийское и Иерусалимское. Яко человеком телеси единогласие имети и едину веру содержати под единым Наставником спасения нашего и главою Иисус Христом. И убо от исперва верховнейший бе папа Римский, и егда папа умре, и тогда советом и избранием четырех Вселенских патриарх поставляшеся ин вместо умершаго на апостолский престол. Такожде, егда которому от четырех патриарх преставашуся, абие советом папы Римскаго и триех патриарх избранием четвертый патриарх по(л. 356)ставляшеся [1263]. Егда же Римский папа в ересь впаде, и тогда папа от четырех Вселенских патриарх от обычнаго поминания извержеся, и по нем первенство имея Константинополский и Вселенский патриарх.

Егда благоволи Бог по пророчеству и благословению верховнаго Андрея апостола свету возсияти в Русох евангелския проповеди, в лето от воплощения слова Божия 886-е при блаженнейшем Фотии патриарсе Царяграда, при царе гречестем Василии Македонине по прошению великаго князя Владимира Киевскаго и всеа Русии присла патриарх Михаила митрополита, мужа свята, к Киеву граду и той просвети святым крещением и на(л. 356 об.)учи [1264] русов вере Христове. И по преставлении Михаила митрополита един по единому поставляхуся на Рускую митрополию в Цареграде от Вселенскаго Константинополскаго патриарха. И потом грех ради Греческому царьству, гордости ради падшу, по писаному: Всяк возносяйся, смирится, и попущением Божиим туркам власть приемшим. И невозможно стало за тесноту пути во царьград на Рускую митрополию ко Вселенскому патриарху отходити поставления ради. И по прошению Руския митрополии митрополита и всех архиерей Вселенстии четыре патриархи единою посланием согласившемся, даша благословение и власть (л. 357) [1265] по правилом святых апостол и святых отец избиратися и поставлятися на Рускую митрополию своими епископы, якоже и сами тии Вселенстии патриарси чин и устав во своих епархиях прияли, от своих епископ избрание и поставление приемлют. И тако и грамотами утвердиша. И бысть до лета 7097-го году.

По Божественому же смотрению в лето 7097-го прииде во царьствующий град Москву Иеремия, архиепископ Царяграда и Вселенский патриарх, и с ним Моновасийской митрополит Иерофей и Еласонской архиепископ Арсений во царьство благочестиваго царя и великаго князя Феодора Ивановича всеа Русии. Их же благочестивый царь и архиерей в царьствующий град прияша с радостию (л. 357 об.) [1266] и с достойною честию. И разсмотрив, Вселенский патриарх, яко царьство христианское несть инуде пространнее развее царьствующаго града Москвы, приложи царю и митрополиту слово, яко да устроится в царьствующем граде Москве Патриаршеский престол во святей велицей Церкви на лучшее христианское благохваление. И бысть царю и архиерею в любовь и всему освященному собору. И по малех днех совершается слово се делом и бывает по избранию Вселенскаго патриарха Иеремия Константинополскаго и иже с ним и всех руских архиерей области и советом благочестиваго царя, бывает царьствующаго града Москвы (л. 358) [1267] и всеа Русии Иов митрополит наречен и освящен благодатию Святаго Духа святейший патриарх царьствующаго града Москвы и всеа Русии в лето 7097-е индикта 2-го. Якоже имать деяние о сем болшее свидетельство в книзе правил святых апостол и святых отец московския печати, нареченой Кормчей.

И по отшествии святейшаго Иеремия Константинополскаго патриарха, еже и достигшю ему на свой стол в Царьград, совет сотвори по умолению и прошению благочестиваго царя и великаго князя Феодора Ивановича Московскаго и всеа Русии со всеми патриархи Вселенскими и митрополиты и архиепископы и епископы прислали ставленую грамоту, то есть (л. 358 об.) [1268] хрисовул патриаршеский, имже, хрисовулом, повеле и извести, да той же архиепископ Московский господин Иов будет пятый патриарх, и имать патриаршеское достоинство и честь и сочетается и мерится с прочими патриархи на вся веки. Но и по смерти хотящим поставленым быти у Московскаго собора первым архиереом патриархом именоватися повелеваем по правилу и образу бывшему, наченшемуся от патриарха сего Московскаго господина Иова во Святем Дусе возлюбленаго брата и сослужебника нашего смирения. На сем бо и настоящий соборный свиток бысть во всегдашнее (л. 359) [1269] утвержение. В лето 7098-е маия во 8 день. Подписаша же ся три патриархи Вселенския Константинополский, Александрийский и Иерусалимский, с ними же инех святителей 79.

Такожде и в лето 7127-м по благочестивом государе царе и великом князе Михаиле Феодоровиче всеа Русии блаженныя памяти святейший Феофан патриарх святаго града Иерусалима и всеа Палестины с преосвященными митрополиты и архиепископы и епископы о Святем Дусе избраша блаженныя памяти Филарета патриарха, но не без свидетельства, но обретше в газофилакии оную же грамоту Иеремия патриарха с прочими патриархи Вселенскими. И тако рукополо(л. 359 об.)жиша [1270] святейшаго Филарета патриарха по благодати Святаго Духа, а не по царьскому избранию, якоже свидетельствуют оныя святыя грамоты. Аще ли бы по царьскому избранию избраны, то не бы утаилось в грамотах святейшаго Иеремия патриарха Константинополскаго и с прочими Вселенскими патриархи и Феофана патриарха Иерусалимскаго. Но и завет свой заповедал благочестивому царю государю и великому князю Михаилу Феодоровичю всеа Русии самодержцу: И по благодати, данней нам от Святаго Духа, завещаем сему, яко да хранит и соблюдает ко оному новопоставленому во святейших Филарету Никитичю, Божиею (л. 360) [1271] милостию патриарху Московскому и всеа Русии, любовь, милость, щедроты благое подаяние, наипаче же святительства ради в духовных вещех повиновение, в телесных же послушание и покорение, и всегда имети главу и пастыря и отца чадолюбива, и о спасении того промышляюща и пекущася, якоже лепо по превосходящему святительству. И тако возмогоша в таковых спешнейша того сотворити, еже о нем ходатайствовати и о святем его царьствии молящася к Богу, милостива того обрести, понеже и ваше царьское благородие человек еси и тоюжде плотию обложен, якоже и вси.

Таже по сем и всем велможам наказа повиноватися, (л. 360 об.) [1272] якоже и Христос и святый апостол Павел глаголя: Вас убо, о благороднии велможи и честнии в сигклите пребывающии, соблюдащии царево здравие и пребывающии в воинстве и управляющии царьския потребы и все, яже о Христе, многонародное христолюбивое множество, воспоминаем и завещаем, со всяцем покорением священному сему мужу, ныне же благодатию Божиею вашему отцу и учителю и вождю вашего спасения, предложити тому душа ваша со всяцем смирением и послушанием, и ничесо же о таковом безместно что помышляти, но якоже самому Владыце Христу служаще повиноватися по Божественому Того речению: Слушаяй, рече, вас, (л. 361) [1273] Мене слушает, и отметаяйся вас [1274], Мене отметается, отметаяй же ся Мене, отметается пославшаго Мя. И паки: Иже чтит иерея, чтит вышняго Бога, понеже иерейская честь на Бога восходит. Да аще убо тако к простым иереом завещание и повиновение подобает соблюдати, колми паче ко превозходящим честию, наипаче же сему ныне святопомазаному превысокому патриарху, отцем отцу и крайнему святителю. Его же сан святительства не точию зде, но и в самом небеси мощен есть по Божественому Спасову речению: Иже бо аще свяжете, рече, на земли, связан будет на небеси, а иже разрешите на земли, на небеси разрешено будет. (л. 361 об.) [1275] И да никто же, речет, яко ко апостолом единем сия речена суть, но и ко всем, хотящим быти преемником сих, иже убо от апостол и доныне хранимо и соблюдаемо ненаветно в православных, ему же милостивый Христос буди и соблюдатися и хранитися и до втораго и страшнаго пришествия, паче же и молю соблюдатися сему непременно и до скончания века. Самому же превысочайшему патриарху поставляти сущих под ними Росийския области митрополитов и архиепископов и епископов и прочих освященных муж, якоже Церковь прият по апостолскому преданию и святых отец правилом. К болшему же (л. 362) [1276] утвержению ныне нами новопоставленаго патриарха Филарета Никитича и прочих, хотящих по нем быти, аз, смиренный Феофан, Божиею милостию патриарх святаго града Иерусалима и всея Палестины, и митрополиты и архиепископы и епископы и честнии архимандриты и игумены посудихом сие наше писание написати на хартии и подписати рукама нашима и печатми затвердити, яко да будет к поставлению патриаршества свидетельствовано и утвержено во веки и никим же пременяемо. Аминь. Писана в царьствующем граде Москве лета от создания мира 7127-го месяца июния.

Видели, совопросниче (л. 362 об.) [1277] неправедный, како священство начася, не от человек, ни человеком, но от самаго Бога, и древнее и нынешнее, а не от царей, якоже ты глаголеши, но паче от священства царьство произыде. И ныне есть, якоже устав царьскаго поставления свидетельствует, священство всюду пречестнейши есть царьства, якожде выше назнаменах от Божественаго писания и ныне паки речем.

Царьство, аще и от Бога дадеся в мир, но во гневе Божии, и се чрез священство помазуется чювственым елеом, священства же помазание Святым Духом непосредственне, якоже Господь наш Иисус Христос помазан на архиерейство, яко выше сего писано есть такожде и святии апостоли. Сего ради (л. 363) [1278] на помазании архиерейства архиереи, приемше святое Евангелие, распростерше свыше держат над главою поставляющагося архиерея.

Молитва.

Владыко, Господи Боже наш, законоположивый нам всехвалным си апостолом Павлом степенем и чином устав, еже работати и служити честным и пречестным Ти таинам во святем жертвенице, первое апостолы, второе пророки, третие учители, сам Владыко всем и сего нареченаго сподобашагося подоити Евангелскому игу и святительскому достоинству рукою моею, грешнаго и с сущими служители, с митрополиты и со архиепископы и епископы, и осиянием и силою и благодатию Святаго Твоего Духа. И паки вся молитва. (л. 363 об.) [1279] Господи Боже наш, заеже немощи человеческому естеству Божества существо понести, сего ради Твоим смирением подобострастным нам учителя уставив Твой предержащий престол и яко подобники Твоя на величествии престоле Твоем седяща, воеже приносити Тебе жертву и приношение о всех людех Твоих. Ты, Господи, и сего явленаго строителя святительския благодати сотвори быти подобника Тебе, истинному Пастырю, положшаго душю Свою о овцах Твоих, наставника слепым, света сущим во тме, наказателя безумным, светилника в мире, яко да устроит душа ввереныя ему в насто(л. 364)ящем [1280] сем житии и предстанет судищу Твоему непосрамлен и великую мзду приимет, юже уготовал еси пострадавшим о благовестии Евангелия Твоего.

Слышели, безумне, коликая дарования архиереи имут от благодати Святаго Духа, яже священное слово показа, яко архиереи подобники Божия. Почто Божиих подобников порицаеши и на величии престола Божия седящих уничижаеши, и пастыря словесным овцам отбегаеши, наставника слепым отреваешися, света сущим во тме зрением не услаждаешися, наказателя безумным отметаешися? Яже ти Господь заповеда: Слушаяй вас, Мене (л. 364 об.) [1281] слушает и отметаяйся вас, Мене отметается. Светилника суща в мире лишаешися, могущаго ему души ввереныя в настоящем сем житии представити судищу Христову не посрамлены и великия мзды достойных показати. Аки немощна уничижаеши, яже Божественый апостол свидетелствует, глаголя: Братие, повинуйтеся наставником вашим и покаряйтеся, яко тии бдят о душах ваших, аки слово воздати хотяще. Сия бо власть толико гражданския лучши есть, елико земли небо, паче же и много вящше. Наше бо, рече, житие на небесех есть, и живот наш тамо сокровен со Христом в Бозе, и почести тамо (л. 365) [1282] и течение о сущих тамо венцех, ниже бо разоряется по скончании сей живот, но тогда сияет болше. Сего ради не точию князей и местных, но и самых, иже диадимою обложеных болшую прияша честь, ти у сущих сию власть, аки в болших и над болшими предворяюще человеки. И сия тако, совопросниче, а не инако свидетельствует истиною и Божественым писанием, а не якоже ответотворец ваш лестный лстит, к нему же ныне паки приидохом. О них же и вас божественный апостол издалека предзрев пишет, глаголя: дух же явственне глаголет, яко в последняя времена отступят нецыи от веры, внемлюще духовом лестчим (л. 365 об.) [1283] и учением бесовским в лицемерии лжесловник сожженых своею совестию. И паки, суть бо мнози непокориви суесловцы и умом прелщени, их же подобает крепце обличати и уста их заграждати, иже вся домы развращают, учаще, яже не подобает, сквернаго ради прибытка. О коемждо ли апостол глаголет: Дух явствен глаголет и прочее, о вас. Кому же ли внемлюще духовом лестчим и учением бесовским в лицемерии лжесловеснем сожженых своею совестию, Газскому митрополиту умом прелщеному, иже учит, яже не подобает сквернаго ради прибытка своего трапез пространных и ризнаго украшения, (л. 366) [1284] еже имать наг быти в день брака и не имеяй брачныя одежды, якоже самыя ево лестныя и бесовския ответы имут обличити. Глаголеши, ответотворче, на воле то есть цареве почитати которых хощет, а наипаче егда ради достоинства и чести церковной делают. Где, ответотворче, писано есть о сих, еже царю почитати которых хощет? Лепо есть царю почитати подданых слуг своих, их же хощет, а не о архиереи се речено есть. О архиереи же инако рече Спас: Слушаяй, рече, вас, Мене слушает, и отметаяйся вас, Мене отметается. И паки апостол засвидетельствует, глаголя: Братие, повинуйтеся наставником вашим (л. 366 об.) [1285] и покаряйтеся. И паки: Без всякаго прекословия меншее от болшаго благословляется, како же может царь, его же хощет почитати таковых, котории от самаго Бога славою и честию венчали, и честь и слава паче царьства, елико небо земли честнейши есть, якоже свидетельствуют богословцы. Разсмотри, самомниме, чести посредство небеси и земли, кто убо свидетель. Сам Бог глаголет: Небо Мне престол есть, земля же подножие ногама Моима. Такоже и о пространстве небеси разумети есть, якоже капля дождя от великия тучи, то есть земля от небеси мерится, тако и царьство меншится от священства. (л. 367) [1286] Царь аще и власть приял от Бога в маловременнем сем царьстве почтити или уничижити кого, но не пребывает ввек, и Бог того разрешити может и время и царьствия пременением разрешает, и на самаго того царя суд Божий настоит. Аще почтил, его же почтил благозаконно, а не по своей любви, и уничижил, его же уничижил по закону заповедей, а не по своей ненависти. Священник же аще кого свяжет на земли, ни сам Бог разрешит того, якоже свидетельствует, будет, рече, связан и на небеси.

Зриши ли, яко небеснаго жительства достойнаго свяжет священник на земли, Бог того на небеси (л. 367 об.) [1287] не разрешит. О грешницех связаных инако Господь показа и не просто. Связавше ему, рече, руце и нозе, вверзите во тму кромешную, ту будет плач и скрежет зубом.

Ты же, лицемере, како глаголеши чрез Божия заповеди почитати и не почитати на воле есть цареве. Где есть то писано? Новозаконие бесовское вводиши, а не закона Божия. Господь равночестна Себе архиерея почте, глаголя: Слушаяй, рече, вас, Мене слушает, и отметаяйся вас, Мене отметается, отметаяй же ся Мене, отметается пославшаго Мя. И паки глаголеши: Однако же и тыя, которыя приимают честь от царя, надобно, чтоб (л. 368) [1288] бережно и опасно приимали оберегали. Надобно тем, которые честь от царя приемлют, чтоб бережно и опасно приимали, то есть мирским всяким подданым его, а не к нам. К нам же и самому носящему диадиму дары носити по долгу есть и во всем повиновение, якоже Господь заповеда: Слушаяй вас, Мене слушает. И прочее.

А ты, малоумне, Божию благодать хулишь, даную нам Святым Духом и низводиши покорятися царем, якоже и Навуходоносору и образу златому, якоже пишется.

Тогда [1289] приступиша мужие халдейстии и наскочиша на июдея, якоже ты ныне, и отвещавше, реша, царю (л. 368 об.) [1290] во веки живи. Ты, царю, заповеда заповедь, весь человек, иже аще услышит глас трубы и прочаго мусикийскаго рода, да падет и поклонится телу златому. Аще ли же ни, да ввержен будет в пещь, огнем горящую. Суть бо мужи иудейстии, их же постави над делы земли Вавилонския Седрах, Мисах и Авденаго. Мужи тии не послушаша заповеди твоея, царю, и богом твоим не служат и телу златому, еже постави, не поклоняются. Тогда Навуходоносор с яростию и гневом рече: Привести Седраха, Мисаха и Авденаго. И мужи тии приведени быша пред царя. Отвещав же Навуходоносор и рече (л. 369) [1291] им: Аще воистину Седрах, Мисах и Авденаго богом моим не служисте и телу златому, еже поставих, не поклоняетеся, ныне убо аще есте готови, да яко услышисте глас трубы, пищалий же и гуслий, цевница же и прегудница, и писк и всего рода Мусикийска, падше, поклоняйтеся телу, еже сотворих. И аще не поклонитеся, в той год ввержени будете в пещь огнем горящю. И кто есть Бог, иже измет вы от руку моею. И отвещаша Седрах, Мисах и Авденаго, глаголюще царю Навуходоносору: Не требуем мы о глаголе сем отвещати тебе. Есть бо Бог наш на небесех, Ему же мы служим. Силен изъяти (л. 369 об.) [1292] ны от пещи, огнем горящия, и от руку твоею избавити ны, царю. Аще ли ни, вестно дати есть царю, яко богом твоим не служим, и телу златому, его же постави, не поклоняемся.

Тако и мы за милостыню царьскую не будем кланятися, но будем Бога молити. Да которую же ли честь от царя приемлем? Се ли, что малое подание за оставление грех своих, то не дает, паче царь приемлет. Не слышал ли еси свидетелства Божия, яко сторицею приимет и живот вечный наследит, а не даяй, что имать прияти или како живот вечный наследит, аще и царь будет. Елико бо, рече, (л. 370) [1293] сотвористе менших Моих братий, Мене сотвористе. Да иже сотворив Богу, почто ныне, лицемери, от нас истязовати чести творите царя? Не слышасте ли слова Божия, глаголюща, яко: Не сотвористе менших Моих братий, ни Мене сотвористе. И что по сих, сам разсмотри. А иже малое что сотворив Бога ради и раскаивается, которух мук достоин есть.

Паки глаголеши, ответотворче: Царь Артаксеркс рек ко Аману, ближнему своему боярину: Что зделаю человеку, котораго хочю учтити? И Аман, знаючи за то, он будет учтен, отвеща: Чтоб тот человек, которой имать быти учтен, надобно (л. 370 об.) [1294] чтоб был в добросветлыя ризы и сел бы на лошадь царьскую и пошел бы чрез улицы, возглашая: Так будет человеку, котораго хощет царь учтить.

Добро бы было, аще бы и нашего царя государя отъял Господь сон забвения, якоже и от царя Артаксеркса, якоже пишется: Господь же отъят сон от царя в нощи оной и повеле рабу принести книги памятныя дни и прочитати, в них же написано, обрете. Иже поведа Мардохей царю о дву евнуху царьских, внегда стрегущих им, иже умыслиша убити царя Артаксеркса.

Помянул бы государь наш и нашу к ним, государем, работу и молитвы (л. 371) [1295] и слезы, якоже есть ведомо им, государем, во два моры, и превратив свое к нам немилосердие на первую любовь. И иже советующим на мя злое, сотворил бы якоже и Аману, иже приготова Мардохею виселицу в дому своем 50 лакоть, понеже [1296] Мардохей не кланяшеся Аману и зависти ради, что седел Мардохей в дому цареве. Дабы и наш государь сотворил тем, которыя душю его смущают и ненавидети нас творят, и тогда бы и нашего государя царя утишил Господь Бог, якоже царя Артаксеркса от ярости.

Паки глаголеши, совоспросниче: Конечнее так зделал великий Константин святому Силивестру и Иустиниян царь Агапиту, который (л. 371 об.) [1297] посвятил Мину, патриарха Цареградскаго, и Иустиниян убо держал лошадь, на которой сидел Агапит, за узду, как и ты, благочестивейший царю Алексей Михайлович, на Вербное воскресение. Однако же не вси знают разсудить, разсуждение бо всех правд мати. Солгал ты на государя нашего и царя, что он, государь, конечно так зделал, как великий Константин святому Силивестру. Посмотри в вышеписаном к совопроснику нашему ответе написаное от заповедей великаго царя Константина к Силивестру и прочим Римским папам. Есть ли малое что подобно, но ничто же. О Иустиниане и Агапите, котором любо (л. 372) [1298] не свемы, в наших книгах не обретается. А что государь царь под Крутицким митрополитом лошадь водит, как государь царь изволит, хотя и ино что посадит да поведет, на ево то воли. Но Господь Бог не благоволи, ни заповеда учеником Своим о сем, еже бы рекл, се творите в Мое воспоминание, якоже о хлебе и вине, и ногы умы, глаголя: Якоже Аз сотворих, и вы твористе и болящих исцеляти, прокаженых очищати и беси изгоняти. И прочее.

Верховный же Петр не точию се сотворити не восхоте, якоже Христос на осля вседе, но ни смертию тою восхоте умрети, якоже Христос, но умоли мучителей, да обесится (л. 372 об.) [1299] на кресте стремглав. Аки глаголеши: Похвалился сатана в дарех, которыми Господь Бог подарил его, не умеючих утребити смирно. Господу глаголющу: Видех сатану, яко молнию с небесе спадша. Аще на рабы своя не веруй, на аггелы своя жестоко. И паки Петр верховный глаголет: Аще бо Бог аггелов согрешивших не пощаде, но пленицами мрака связав, предаст на суд мучимы блюсти. И паки Июда апостол глаголет: Аггелех же и не соблюдших своего началства, но оставлших свое жилище, на суд Великаго дне узами [1300] вечными под мраком соблюде. А яже коея ради вины спаде с небесе, Христос глаголет: И не верует (л. 373) [1301] на ангелы жестоко и предаде на суд мучимы блюсти. Послушай Исаии: како [1302] спаде денница заутра возсиявающи. Сий бо свет создан бысть от Содетеля и за светлость денница именуем. И понеже взятия на Сотворшаго и Бога, противен быти Тому восхотев, на небо, рече, взыду и верху звезд небесных положу престол мой. Взыду на облацех и буду подобен Вышнему. Тма от произволения за таковую гордыню и бысть и глаголется.

Видели, ответотворче, яко аггелов Бог не пощаде, понеже взят ся на Бога сотворшаго и, где сниде. Тако и ныне кто вознеистовися на Бога, не даною благодатию действует, (л. 373 об.) [1303] якоже государь царь архиерейским достоинством обладает и повелевает, якоже выше писано есть, ина убо власть царю и ина архиерею, но едина другой преболе, архиерейство, глаголю, царства, якоже небо земли болши и честнейши есть, яко выше в молитвах поставления явлено есть. Архиерей убо подобник Божий и на престоле Божии седит, царь ни в четцы, ни в поддиаконы, ни во диаконы, ни во презвитеры, ни во архиереи не ставлен есть, но на царьство мира сего помазан есть. И еже дарова ему власть Бог чрез архиерейское благословение, послушай. Поставляемому царю преклоншу главу и патриарх возложит на верх главы его руку (л. 374) [1304] и глаголет молитву во услышание всем. Зри, человекоугодниче, кто кому привилеи дает. Се не царь на патриаршю главу руце возлагает, но патриарх на царьскую главу. Сего ради всегда, яко долг отдая, благодетелю царь главу свою поклоняет под священническия руки. Таже глаголет архиерей во услышание всем.

Молитва.

Господи Боже наш, Царь царьствующим и Господь господьствующим, иже Самоилом пророком избрав раба своего Давида и помазав того во церкви над людми своими Израиля. Ты и ныне услыши молитву нашу недостойных и виждь от святаго жилища Твоего благовернаго раба Своего царя и великаго князя Алексия Михайловичя всеа Русии, еже благоволил (л. 374 об.) [1305] еси воздвигнути царя в языце Твоем святе, его же стяжал еси честною кровию единороднаго Ти Сына, помазати сподобил елеом возрадования. Одей того свыше силою, положи на главе его венец от камене честна, даруй тому долготу дний, дай же в десницы его скифетро царьствия, посади его на престоле правды, огради того всеоружством Святаго Ти Духа, утверди того мышцу, покори ему вся языки варварския, всей в сердцы его страх Твой, и еже к послушным милостивное, соблюди того в непорочней вере, покажи того опасна хранителя святыя Твоея соборныя Церкви велениях, да судит люди (л. 375) [1306] Твоя правдою и нищих Твоих судом, спасет сыны убогих и наследник будет Ти небеснаго царьствия.

И паки вторую молитву патриах глаголет: Тебе, единому Царю веком, иже земное царьство Тобою ввереный, поклони выю с нами и молим Ти ся, Владыко всех. Сохрани того под покровом Твоим, удержави того царьство, благоугодная Ти творити всегда того сподоби. Возсияй во днех его правду и множество мира, да в тихости его тихо и безмолвно житие поживем во всяком благочестии и чистоте.

Возглас: Ты бо еси Царь мирови и Спас душам нашим и Тебе славу возсылаем Отцу и Сыну и Святому Духу ныне и присно и вовеки веков. Аминь.

(л. 375 об.) [1307] Зри, ответотворче, в молитвах сих где есть речено, якоже во святительских, еже работати и служити, честным и причестным Тайнам во святем жертвенице и предержащих престол яко подобники Твоя и на величествии престоле Твоем седяща, во еже приносити Тебе жертву и приношение о всех людех Твоих; Ты, Господи, и сего явленаго строителя святительския благодати сотвори быти, подобника Тебе, истиному Пастырю, положшаго душу Свою о овцах Твоих.

В царьских же молитвопоставлениях не тако: разсмотри выше в молитвах и ныне. Ты и ныне услыши молитву нашу, недостойных раб Твоих и виждь (л. 376) [1308] от святаго жилища Твоего благовернаго раба своего царя и великаго князя Алексия Михайловичя всеа Русии, еже благоволил еси воздвигнути царя в языце Твоем святе, его же стяжал еси честною кровию единороднаго Ти Сына, помазати сподобил елеом возрадования. Одей того свыше силою, положи на главе его венец от камене честна, даруй тому долготу днии, дай же в десницы его скифетро царьствия, посади того на престоле правды. Зри, а не на престоле величествия Твоем седяща. Огради того всеоружством Святаго Ти Духа, утверди того мышцу, покори ему вся языки варварския, всей в сердцы его страх Твой, (л. 376 об.) [1309] а не жертвы и приношения и святительства и благодати, ниже подобника Божия быти речеся. Но еже к послушным милостивное, его же не бысть. И паки рече: Соблюди того в непорочней вере, и грех ради наших ничто же есть. Покажи того опасна хранителя святыя Твоея соборныя Церкви велениях, и не бысть хранитель, но разрушитель и преобидник. Да судит люди Твоя правдою, и отнюдь всюду неправда умножись. И нищих Твоих судом, и ни есть, ни именуется суд. И спасет сыны убогих, и никако же бысть, но всех сотвори сыны убогих, аще кто и бысть богат.

Таже паки воследованию поставления (л. 377) [1310] царьскаго приидем. И по молитве патриарх посылает дву архимандритов да игумена болших по святыя бармы и повелевает им с налоя взяти честно на златом блюде. И как архимандриты и игумен святыя бармы к месту принесут, и патриарх повелевает трем митрополитом или архиепископом у них взяти святыя бармы на златом блюде и принести к себе, и патриарх покланяется святым бармам и потом целует их. И прием своима рукама, и знаменует ими поставляемаго царя и великаго князя, и повелевает ему, прекрестився, их поцеловати. И потом патриарх возлагает (л. 377 об.) [1311] святыя бармы на царя и великаго князя и потом благословит его крестом и глаголет патриарх: Мир всем. Архидиакон же: Главы ваша Господеви преклоните. И патриарх глаголет молитву 2-ю вышеписаную: Тебе, единому Царю веком. И прочее.

И по скончании молитвы патриарх посылает всех архимандритов и игуменов по царьский венец и повелевает взяти им с налоя честно на златом блюде. И архимандриты и игумены принесут царьский венец на златом блюде к месту. И патриарх повелевает епископом у них взяти царьский венец на златом блюде да принести ко архиепископом. И (л. 378) [1312] архиепископы со всеми епископы, приимше царьский венец, принесут к патриарху на златом блюде. И патриарх, прекрестив рукою, царьский венец целует и благословит царя и великаго князя крестом, глаголя: Во имя Отца и Сына и Святаго Духа. И возлагает на него той царьский венец. И потом приим его за десную руку и поставляет его на царьском месте, и благословляет его рукою, и отшед, поклонится ему мало. И потом патриарх станет на своем месте, и царь и великий князь против патриарха поклон творит, подняв царьский венец. Таже патриарх посылает по царьский скифетр архимандрита (л. 378 об.) [1313] и дву игуменов. И как архимандрит и игумены принесут той царьский скифетр к месту, и митрополиты со архиепископы и епископы у них возмут да принесут патриарху. И патриарх, приим у них той царьский скифетр, да прекрестив его рукою, и вдает его царю и великому князю, глаголет ему сице: О боговенченный царь и великий князь Алексий Михалович всеа Русии самодержец, приими от Бога вданое ти скифетро, правити хоругви великаго царьства Росийскаго, и блюди и храни его, елика ти сила.

Царь же и великий князь покланяется. Таже патриарх благословит боговенчаннаго (л. 379) [1314] царя и приим его за десную руку и посадит его на царьском месте.

Виждь, ослеплене умом, кто кого венчает и кто кому божественыя по твоему привилеи дает. И како кто может дающему что дати? Аще государя царя и не аз, Никон, на царьство помазал, но преждебывший отец и брат наш святыя памяти всесвятейший Иосиф, патриарх Московский и всеа Русии, его же мы по Божественей благодати наследницы есмы. Таже по обычных молитвах и по здравии всех людей, послушай поучения и заповеди архиерейской ко царю.

Поучение архирейское ко государю царю и великому князю Алексию Михайловичю (л. 379 об.) [1315] всеа Русии самодержцу.

О Святем Дусе господин и возлюбленый сын святыя Церкве и нашего смирения, царь и великий князь Алексий Михайлович всеа Русии самодержец. Се отныне от Бога поставлен еси боговенчанный царь и великий князь правити хоругви и содержати скифетры великаго царьства Росийскаго. И венчан еси царьским венцем по благодати Святаго Духа и по милости Пресвятыя Богородицы и по благословению великаго чюдотворца Петра митрополита Киевскаго и всеа Русии и всея святых молитвами, и по благословению приснопомнимаго святаго отца твоего царя и великаго князя Михаила Феодоровича (л. 380) [1316] всеа Русии самодержца, и по данней нам благодати от Святаго и Животворящаго Духа рукоположением нашего смирения с митрополиты и со архиепископы, и с епископы Руския митрополии и со всеми священными соборы во святей велицей церкви Успения Пречистыя Богородицы у чюдотворных гробов великих чюдотворцов Петра и Алексия и иконы митрополитов всеа Русии и прочих святых митрополит Руския митрополии в царьствующем твоем граде Москве.

И ты, господине и сыну, боговенчанный православный царь и великий князь Алексий Михайлович всеа Русии самодержец, имей страх Божий в сердцы и сохрани веру христианскую греческаго закона (л. 380 об.) [1317] чисту и непоколеблему, и соблюди царьство свое чисто и непорочно, якоже ныне приял еси от Бога, и люби правду и милость и суд правый и к послушным милостивное. Ко святей же соборней Церкви и ко всем святым церквам имей веру и страх Божий и воздавай честь, понеже в ней, царю, второе положен еси от святыя купели духовным своим порождением, и ко святым честным монастырем велию веру держи по данней ти от Бога царьстей власти. К нашему же смирению и ко всем своим богомолцем о Святем Дусе царьское свое духовное повиновение по Христову евангелскому словеси, ко святым своим учеником и апостолом глаголющу: Слушаяй вас, (л. 381) [1318] Мене слушает, а отметаяйся вас, Мене отметается, отметаяй Мене, отметается пославшаго Мя. И сего ради ведяще и се, елико кто честь воздает святителю, и та честь самому Христу восходит, от Него же и мзды приимут сторицею. Братию же свою по плоти, о благочестивый и боголюбивый царю, люби и почитай по царьскому своему союзу, по божественному апостолу: Любяй бо, рече, брата своего, в Бозе пребывает и Бог в нем. Бояр же своих и велмож жалуй и береги по отечеству их, ко всем же князем и княжатам и детем боярским и ко всему христолюбивому воинству буди приступен и милостив и приветен (л. 381 об.) [1319] по царьскому своему сану и чину.

Всех же православных християн блюди и жалуй и попечение имей о них от всего сердца. За обидимых же стой царьски и мужески, не попускай и не давай обидети не по суду и не по правде. Се бо, о царю, приял еси от Бога скифетро правити хоругви великаго царьства Росийскаго и разсудити и управити люди твоя в правду. Блюди и храни бодрено от дивиих волков губящих е, да не растлят стада Христовых словесных овец, от Бога даннаго ти и врученнаго содержати скифетро, по воли Его святей и по вашему исконному царьскому жребию и отечеству того великаго Росийскаго царьства.

(л. 382) [1320] И паки глаголю ти, боголюбивый царь, блюди с Богом и храни, елика твоя царьская власть и сила содержит, покрываем Вышняго десницею и храним благодатию Святаго Духа от всех врагов твоих видимых и невидимых. Глаголет бо Господь пророком: Аз воздвигох тя, царя, с правдою и приях тя за руку и укрепих тя. Сего ради слышете, царие и князи, и разумейте, яко от Бога дана бысть держава вам и сила от Вышняго. И сего ради подобает приемше от Вышняго повеления правление человеческаго рода православным царем, не токмо о своих пещися и свое житие точию правити, но и все обладаемое от треволнения спасати и соблю(л. 382 об.)дати [1321] стадо Его от волков невредимо, и боятися серпа небеснаго, и не давати воли злотворящим человеком, иже душу с телом погубляющих, якоже бо солнцу на земле не сущу, темно суть все и не разсудно. Сице и наказанием души не сущи, размешено все, едина бо точию добродетель от стяжания безсмертна суть. И паки ти глаголю, о боговенчанный царю, цело имей мудрование православным догматом, почитай излише Матере твою Церковь, яже о Святем Дусе тя воздои, да и сам будешь от Нея, и священника стыдися, яко отца духовнаго, ходатая к Богу, честь бо священническая на Бога восходит, (л. 383) [1322] тако, иже на них безчестие, множае паче Бога прогневляет. Языка же льстива и слуха суетна не приемли, царю, ниже оболгателя слушай, ни злым человеком веры емли. Смотряй в себе, о боговенчанный царю, яко всем человеком мудрость честнейши есть и всем тщателнейшим, вси бо ту яко благу похваляют. И любомудру ти быти подобает или мудрым последовати, на них же воистину, яко на престоле, Бог почивает. Не тако красная мира вся, якоже добродетель красит царя, но зри доброту духовную и раздавай саны туне, а не дарех продавай власти, еже бо ценою купивый власть, (л. 383 об.) [1323] множае паче обладаемыя купует, яко мздовозданию надеяся, ко мздоприятию без боязни зрит. Аще бо и неприступен еси царю нижняго ради царьства, но удобь приступен буди горняя ради власти, но имаши и сам Царя, иже на Небесех. Аще убо он всеми печется яко Бог, сице потребно есть тебе, царю ничто же презирати. Тщися, о боговенчанный царю, не точию сия царьства исправити нравы благими, но и Небесная наследовати добродетелными благодеянми. И аще хощеши милостива имети себе небеснаго Царя и Бога, милостив буди и ты, царю, ко всем, да и зде добре и благо поживеши (л. 384) [1324] и царьствуеши во веки веком добрым царьским слухом зде, а тамо славою со ангелы Божиими прежде Воскресения и страшнаго Суда силою Творца и премудростию искупителя и Духа Святаго благодатию. Возмогай, о благочестивый царю, о Христе и паки возмогай, да и наследник будеши Небеснаго Царьствия со всеми святыми православными цари, да возможеши со дерзновением рещи во Второе пришествие Господа Бога и Спаса нашего Иисуса Христа: Се аз, Господи, и людие Твои, их же ми еси дал великаго Твоего царьства Росийскаго. И тогда, о благочестивый и боговенчанный царю, и сам услыши сладкий он глас небеснаго Царя и Бога: Благий рабе, добрый и верный, (л. 384 об.) [1325] Росийский царю и великий князь Алексий Михайлович всеа Русии, мале Ми бысть верен, над многими тя поставлю. Вниди в радость Господа своего и тогда, царю, внидеши во Царьство Небесное со всеми святыми и приимеши неувядаемый славы венец по божественному апостолу: Их же око не виде и ухо не слыша, и на сердце человеку не взыде, яже уготова Бог любящим Его. И тогда, боговенчанный царю, против своих царьских подвиг и трудов приимеши от Бога мзду сторицею и начнеши царьствовати со Христом в Небеснем Царьствии, со ангелы и всеми святыми славити Бога, в Троицы певаемаго, и веселитися с ними в без(л. 385)конечныя [1326] веки. Буди же с тобою, боговенчанным и православным царем, и нам получити Царьство Небесное, благодатию и человеколюбием Господа нашего Иисуса Христа, с Ним же Отцу купно и Святому Духу честь и поклонение ныне и присно и в веки веком. Аминь.

И потом патриарх благословляет царя крестом и паки глаголет ему: Боговенчанный царю и великий князь Алексий Михайлович всеа Русии самодержец, буди на тебе милость Божия и Пречистыя Богородицы и сила Честнаго и Животворящаго Креста, и великих чюдотворцов, и всех святых молитва и благословение, да и нашего смирения молитва и благословение, (л. 385 об.) [1327] всего священнаго собора Руския митрополии отныне и до века и во многия годы и века, и на твоей богодарованной матере, великой княгине и царице, и на ее богодарованных царьских чадех. И умножит Господь Бог лет живота царьства вашего, и узриши сыны сынов твоих, и устроит Господь царьство твое, и возвысит Господь царьскую десницу надо всеми твоима недруги и враги, и устроит Господь Бог царьство твое мирно и вечно в род и род и навеки. И вси людие рекут: будет и будет многолетно.

Таже бывает литоргия, и на литоргии по пренесении святых Даров возлагает (л. 386) [1328] патриарх цепь златую аравийскаго злата и святый Крест з Животворящим Древом. И прежде совершения святыя литоргии по причастии Тела и Крове Христовы, помазует патриарх елеом святым царя, яко чин показует. Видел ли еси, ответотворче и человекоугодниче, что откуду начало приемлет? Не от царьства священство, но царьство от священства. Елико святыя молитвы и елико священное деяние и заповедание архиерейское показует, что противу сим наша винность пред царем государем и что суть царьская правда.

В молитвословии глаголется: Опасна хранителя святыя Церкви Твоея, которое хранение разве разорения. Како и древнии уставы гречестии поведают сице: Два меча (л. 386 об.) [1329] владычествовати, иже есть духовный и мирский во представительство людей своих Господь Христос в Церкви утвердил, от них же архиерей духовный, царь же мирский. Помыслил ли кто, еже в оня язвление того проуставлено в сих показуется. Аще которые архиереови не хощут быти послушны от царя, в послушание имут быти принуждени, такожде убо от архиерея, которыя бы царя послушати не восхотели, идеже употребление будет, а сия меча суть владычества и суды двоякия, духовныя и мирския, убо яко мечем мирским казнь имут злодеи. Такожде духовным мечем души грешныя бывают удержани, ту бы кто могл промышляти, аще владычества духовное и мирское теми двема (л. 387) [1330] мечами содержится, который убо от них выщший и достойнейший. Едини разумевают тако, иже бы царь выщши был, неже архиерей, тыя сумнения своего тако подкрепляют. Первее. Яко господьство ни от кого инаго не походит, токмо от Господа Бога. Второе. Егда бы архиерей имел быти выщши нежели царь, тогда бы и начатки шли от него до архиереа, чего не бывает. Над сими же царь во время дар победы от Церкви емлет, а не архиерей. До сего и то прииде, яко цареви дан есть меч предстательство закона, правды, вдов и сирот, им же и судити всякия вещи может, чесо архиереови не благоизволено. Якоже слышим о святем Петре, ему же Избавитель рек: (л. 387 об.) [1331] Вложи меч твой в место его, хотяще всем показати, дабы со властию мира сего не общался и сим помышления своего тощно ограждают. Противу сего суть нецыи тако утверждают, яко архиерей выщши есть, неже царь. И тое убо толкуют сице, яко Господь Бог архиерею великому даде обое владычество и мира сего и духовную судитися в том, яко Господь Иисус Христос святым апостолом рек: Аще кого свяжете на земли, будет связан на небесех. И сие восхоте распространити на вси тыя наместники. И глаголаша же, яко архиереови дана есть власть на Небеси, яже есть достойнейша, нежели мира сего. Се уже известнейше архиерей вышшим имать быти (л. 388) [1332] над сими же, яко архиерей во время и меча и суда мирских потребует, может то творити, что царь обыкл творити, творит бо законы православныма. Еще же к тому сице, еже царя архиерей поставляет и мощен его и вязати по заповедем Божиим, аще бо священницы, им же царие исповедуют греси своя и наричют их отцем духовным, могут и вязати, колми паче архиерей великий, иже над священником, царевым отцем духовным, власть имея, должне есть царя вязати и решити. Царь убо при помазании на царьство должен есть исповедатися, правду разпространяти, неправду же сокрушати, но отложити сопротивление, со обою страну служащее, буди ведати, како тое (л. 388 об.) [1333] противное совопрошение разрешити, иже в вещех духовных во славу Божию подлежащих, архиерей есть выщши нежели царь. Тако бо суд духовный содержит, но в тех, яже в заступлении мира сего належат, не мнее до службы Божией прилежат, между же собою противления не имут. Обаче архиерей в суде мирском пристяжание имать для лучшаго исправления и в пристойных вещех. Царь же не к тому в церковных и священных правлениих, якоже выше есть писано, ибо есть ли царь не творит ему пристойнаго в Божественых законех, такожде и архиерею возможно быти противу его запрещати, не яко противу царя, но яко противу изступленаго от закона. Власть же (л. 389) [1334] и владычество Церкви христианстей вящши процвете во время великаго Константина царя: иже был от святаго Селивестра папы крещен и от болезни уздравлен [1335] той, егда знамением Животворящаго Креста, егда виде на небесе, Максентия победил, и иныя мучители отгнал. Царьство же Греческое и Римское умирил, творяще обещаное моление к Богу палату свою, юже Латеранску палату в Риме зовут, даровал Селивестрови и наместником его верховных святых апостол Петра и Павла нарек. Потом и венец со главы своея и багряницу и иное всякое одеяние царьское на него возложил. Над сими же дал ему скипетр царьский и все знаменование и чин престола царьскаго, (л. 389 об.) [1336] яко разнейшима достоинствы удобрено было воинство его. Такожде и иереи Церкви святей христианстей учтити и украсити повелел, такожде и иныя архиереи по достоинству почтил, над сими же поставил, дабы он, достойнейший пастырь и его наместники венцем, который со главы своея дал, от злата честнейшаго з драгим камением утвореный, венчани были. И сия вся вящшия ради почести святаго Петра над сими всеми [1337] христианский царь во знамение великаго покорения [1338] коня за узду под папою Селивестром приимал. Потом вручил ему Рим и вся Волошскую землю во область даровал. Царьский свой престол пренесл на восток солнца и тамо (л. 390) [1339] славное место, его же потом во имя свое Константинополь нарече, сотворил. Аще бы кто рекл, како оттуду между некиими сомнение возрасте, еже та два меча христианскаго царьства между двема особы разделилися, еже есть при архиерействе меч духовный, при царе же меч мира сего уставися. Кто абие от тех обою вышши есть, от нею же разное суть помышление людей. Тако приимем первее разумение ученых в законе духовнем, яже утверждают, яко власть царьская имать быти повинна власти архиерейстей. И тое тако подкрепляют [1340] и толкуют, власти архиерейстей поручи Господь Бог ключи Царьства Небеснаго и дал ей силу на земли вязати и решати. К сему же (л. 390 об.) [1341] архиерейская власть духовная, царьская же мира сего дана есть ему, и вещи власти небесныя, сиречь духовныя, изряднейши суть нежели мира сего или временныя.