ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Видел ли еси, каково обещание дали перд Богом и святыми Его ангелы и пред всем священным собором и пред государем царем и пред всем сигклитом и множеством народа? Что же сохранили? Ничто же, во всем солгали. Обещалися последовати святейшим Вселенским патриархом, Вселенския па(л. 221 об.)триархи [823] на Москве патриарш престол утвердили быти по правилом святых апостол и святых отец и яко главу всем почитати указали, и без того воли ничто же не творити, и по смерти инаго избирати. Тии же чрез их утвержение, не испытав о нашем отшествии, сошедшеся по царьским грамотам, собор составили чрез правила святых апостол и святых отец седми Вселенских соборов, якоже свидетельствует беззаконное их деяние, яко ничто же есть от апостолских или святых отцов правил, но от инех неких списано, чрез седмаго Вселенскаго собора перваго правила утвержение. И того ради (л. 222) [824] повинни вси святых апостол и святых отец правилом и Вселенских патриархов утвержение и своему обещанию.

Нигде, ни в которых правилех не обретается митрополитом митрополита судити, развее епископа и не менее 12, тии же новое беззаконие собором своим сотворили и на патриарха суд изнесли.

Во обещании их написано: и не сотворити им ничто же по нужди царя и великаго князя, ни от бояр или от князей многих, ни от множества народа, аще и смертию претят, веляще служити или святительское творити, кроме данныя им епархии. И то ведомо и самому государю царю и всем (л. 222 об.) [825] князем и бояром, понеже пред царем и всем сигклитом такое исповедание бывает, ниже царю государю лепо по них грамоты для такова дела посылати.

Собора, иже во Антиохии, правило 11.

Епископ или презвитер или диакон, сам о себе к царю приходя без повеления сущаго во области митрополита, с причащением сана да отпадет.

Толкование.

Непокорство во всем святии отцы измещуще и благочиние соблюдающе, возбраняют епископом и презвитером и инем священническаго чина без повеления и без писания митрополита своего к царю отходити или слухома его стужати и возвещати (л. 223) [826] о неких вещех. И того ради без воли митрополита своего отходящаго епископа ко царю или презвитера и от сана изврещи повелевает и от причащения упразднити.

Правило 12.

Извержен быв от сана, аще пристужает цареви, возвещая о себе, да просит к болшему собору приступити и судитися. И каков суд тии изнесут нань, в том да пребывает, аще же и потом противу глаголет, да не имать оправдания.

Толкование.

Аще который епископ или презвитер или диакон, извержен быв от сана собором, и мнит, яко без правды извержен бысть, се правило не возбраняет, но паче повелевает (л. 223 об.) [827] ему к болшему собору приступити и судитися и от того исправитись, в них же мнится прав быти на превращение изнесеннаго нань суда от собора того. Аще не хощет приступити к болшему собору, ни пред ним исправити, в них же творится прав быти, но царьскима слухома стужает, подвизая того на отмщение, се правило таковаго никоея же милости сподобляет, ни места ответу не дает ему, ни надеждею чаяти, яко будет исправление.

Инако же ко царю не приходити, развее обиды ради церковных и заступления ради сирот и вдов. Но и се с разсмотрением инех епископов.

(л. 224) [828] Собора в средце правило 8.

Аще [829] сирота или вдовица, в коей напасти нуждею страждущи, и помолятся епископу помощи им, да дерзнет епископ и приступит к цареви и молится, елико может, да помилует их, но да не изветом тоя вины пребудет долго время в воех, но паче диакона да посылает.

Правило 9-е.

Прибегающим в церковь да помогают.

Толкование.

Иже убо заступати сироты и вдовицы и печалныя утешати и в напастех нужду приемлющих помогати епископи должни суть. Такоже и в церковь прибегающим своих ради прегрешений и требующим милости, приходити их (л. 224 об) [830] ради к цареви и молитися о них ему, да мстит обидимыя и да простит осужденныя неких ради вин и прегрешений, се правило тако повелевает епископом. Таковых же ради вин не оставляти им надолзе своих церквей и не ходити в онех долго время или инде, идеже царь есть, и стужати ему о них, яко наводящу сего ради епископом порок и оклеветание не прощает тому быти правило, но своим диаконом молба посылати цареви повелевает.

И собора Карфагенскаго правило 104.

Людскаго [831] суда у царя просяй, не епископ.

Толкование.

Епископ или причетник, (л. 225) [832] о гресех оклеветаем, и отрицается церковнаго судища и просит от царя мирских судей, таковый своея чести да будет лишен.

Правило 106.

Некия ради нужды хотя ко цареви отъити, да яве сия сотворит Халкидонскому епископу и Римскому и отпустное послание да возмет. Аще ли ни, без общения есть.

Толкование.

Епископ или причетник, аще возхощет пойти к цареви, да скажет первое вину Халкидонскому епископу, ея же ради идет и возмет от него грамоту отпустную, и в Рим пришед, покажет ю епископу Римскому, и да явит ему вину, ея же ради идет к цареви. И той да разсудит, (л. 225 об.) [833] и аще будет подобна вина, да возмет от того грамоту, ею же от царя приимет помощь. Аще же кто от епископ или от причетник инако к цареви отъидет, да будет без общения, сиречь да отлучится. И о сем ищи правило 11-е Антиохийскаго собора и 9-е правило в средце собора.

И того ради повинни вси сим святым правилом и своему обещанию. И сбыстся на них писание, глаголющее: И [834] не восхоте благоговения и удалится от него. И прочее.

Паки глаголеши, ответотворче: Всем на Страшной недели ради спасителныя страсти Избавителю нашему все есмы кручинны и слезны, (л. 226) [835] показующе явный лицем внутренюю печаль, сопротивно во Святое Воскресение во светлыя ризы облачимся и веселимся. И кто на тот день не возвеселился Церковию Божиею, того сущим христианином не почитаем для того, что не радуется с Невестою Христовою, которая изнову увидела возлюбленнаго Мужа своего Христа. Для того наша вся кручина есть, для вдовства и разлучения Церкви Божии. Радость бы наша была вся, есть ли бы сложила платье печали Церковь Божия, Матка наша, и облеклась в светлое и белое платье. Овдовел есть престол патриаршеский, потому что един как отрекание учинил, почитается за мертваго (л. 226 об.) [836] человека, убо желает имети мужа своего, что потом и докуль будет жити в печали и докуль в том платье слезном будет безутешно. Муж, который оставляет жену свою чрез четыре лета, никакова радения о ней не имеет и харчем ей не промышляет, произволяет правило, чтоб инаго мужа была жена. Како же не может взяти инаго мужа Церковь Божия, когда Никон, что живой погребен, никакова радения об Ней не имеет, ни Ея питает.

Послушай, ответотворче. Писано есть. Грешнику рече Бог: Вскую ты поведаеши оправдания Моя и восприемлеши (л. 227) [837] завет Мой усты твоими, ты же возненавиде наказание и отверже словеса Моя вспять.

Господу глаголющу: Не слышателие закону праведни но творцы. Ияков апостол пишет: Аще кто слышатель, а не творец, таковый уподобися мужу смотрящу лице бытия своего в зерцале, усмотрив, и отъиде, абие забыв, каков бе. Посмотри о себе праведно, каков еси, якоже Господь повеле: Иже без греха, вверзи камень на ню. Глаголеши, вся наша кручина для того есть, для вдовства и разлучения Церкви Божия. О сей ли глаголеши Церкви? Почто сам о себе не усмотрел праведное, оставя волею свою Церковь и скитаешися всюду (л. 227 об.) [838] чрез Божественыя законы. Правила тех измещут, которыя без вины отходя, скитаются и не радеют о своих церквах, якоже множицею выше сего изъявихом. А еже о изгнаных без правды от церквей и отходящих от своего предела собора в средце правило 19.

Ничто же возбраняет, паче же Божие, аще гонят вы из града сего, бегите во ин.

Паки же ты глаголеши, радость наша была вся, есть ли бо сложила платье печалное Церковь Божия, Матка наша, и облеклася в светлое и белое платье. Сим твоим словам за безумие их ничто же рещи мочно есть, развее мужику из деревни велеть, (л. 228) [839] чтоб тебя такими же небывалыми словами выбранил.

Глаголеши, овдовел есть патриаршеский престол, потому что един как отрекание сотворил, почитается за мертваго человека. Есть мертв тот человек, который оставя свою епархию без вины и преходя семо и овамо, творит чрез Божественыя законы смуты многия и плищи во градех, якоже ты смутил мутьяны и государя изгнал. И зде пришед, такожде твориши смущения и соблазны многия. Таковый, аще и жив обретается, подобает таковому по Христову Евангелию [840] на выю его обязатися оселскому камени и потопитися в море.

Муж, который оставляет (л. 228 об.) [841] жену свою, глаголеши, чрез четыре лета, никакова радения об ней не имеет и харчем ей не промышляет, поизволяет право, чтоб инаго мужа была жена. Рцы ми, ответотворче, где есть писано, еже чрез четыре лета которой муж, оставя свою жену, никакова радения об ней не имеет и харчом не промышляет, поизволяет правило, чтоб инаго мужа была жена? Которое право, покажи, прелестниче. Самаго ли Христа или святых апостол или святых отец? И аз ти покажу, но прежде о сем речем, яко харчем ей не промышляет. Не зриши ли, яко никоторой скудости не имет, и яко и царь сего ради возлюби Ю, якоже (л. 229) [842] вторый Давид Уриеву жену Вирсавию, и тешится харчем Ея со всем домом. Како же не может, глаголешь, взять мужа инаго Церковь Божия, когда Никон что живой погребен, никакова радения об Ней не имеет и не питает. Упитана есть в сытость и паче меры. Того ради возлюбила и любодействовати со многими, якоже ныне зрится. А еже глаголеши, Никон, аки жив погребен, мертв есмь от немощи, но жив есмь от силы Божия.

Яко [843] не достоит мужу от жены или жене от мужа разлучатися, ниже есть мощно отпустившему свою жену пояти иную, ниже пущенней от мужа (л. 229 об.) [844] инаго пояте быти. Реченно [845] убо бысть: Иже аще пустит жену свою и даст ей книгу распутную. Аз же глаголю вам: Иже аще пустит жену свою, развее словесе прелюбодейнаго, творит ю прелюбы действовати, и иже пущеницу поимет, прелюбы действует.

Зриши ли, прелюботворче, како Христос утверди, як всяк, отпущая жену свою разве словесе любодейна, творит ю любодействовати. Аз же пред Богом о сем извет творя во святей церкви, яко много олюбодействова царь, якоже и ныне от всех видится, како любодействует святою Церковию, всеми церковныма уставы и вещми. (л. 230) [846] Якоже Господь глаголет, обличая таковое безчиние: И иже, рече, пущеницу поимет, прелюбодействует.

Послушай, каково люто прелюбодейство, кто праведнее Давида, и того коснуся. Аще не бы достоин покаяния плод принесл, внегда ангел хотяше того оба пол пресечь. Но кто более Иоанна Крестителя, о нем же сам Христос свидетельствует, яко не воста в рожденных женами болий Иоанна Крестителя, мний же во Царствии Небеснем болий его есть, но и того любодейственная страсть не пощаде, якоже святое Евангелие свидетельствует сице.

В то время услышав Ирод четвертовластник слух Иисусов и рече отроком своим, се есть Иоанн (л. 230 об.) [847] Креститель, его же аз усекнух, той воскресе от мертвых и сего ради силы деются о нем. Ирод бо ем Иоанна, связа его и всади в темницу Иродиады ради, жены Филиппа, брата своего. Глаголеша бо ему Иоанн: Не достоит ти имети ея. И хотяше его убити, убояся народа, зане яко пророка его имеяху. Дни же бывшу рожества Иродова, плясавше Иродиада посреде и угоди Иродови. Тем же и с клятвою изрече ей, чего же аще [848] воспросит. Она же наваждена материю своею, даждь ми, рече, зде на блюде главу Иоанна Крестителя. И печален бысть Царь, клятвы же ради и за возлежащих с ним, повеле дати ей. (л. 231) [849] И послав, усекну Иоанна в темнице, и принесоша главу его на блюде, и даша девице, и отнесе матери своей. И приступльше ученицы его, взяша тело его и погребоша его. И пришедша, возвестиша Иисусови, и слышав, Иисус отъиде оттуду в корабли в пусто место едино.

Видел ли еси прелюбодейства лакомство, яко ни пророка милует и о царстве не брежет. Полцарства, рече, отдает плясавице Ирод, но прелюбодейство о том не брежет, едино да обличителя погубит.

Слышав же Иисус прелюбодейства злобу и тогда в пусто место отходит, якоже и о нас слышавшии от царя исповедают, глаголюща, (л. 231 об.) [850] яко аще не бы боялся Бога, зделал бы де я патриарху то, чево он не ведает, якоже Ирод, о нем же есть выше писано. И хотяше его убити, убояся народа, зане пророка его имеяху. И аще не бы рука Господня покрывала и нас, то бы давно убили, якоже Родион Стрешнев и Иосиф Сукин за некия моя слова грозилися на мя у мене в келье, убийством глаголюще: Буде де станешь такия слова говорить впредь, не стану терпеть. Мое же слово говорено се, яко мало християнства во царе есть. Аще бы было християнство, то слушал бы во святем Евангелии святаго писания: Слушаяй [851] вас, Мене слушает, и (л. 232) [852] отметайся [853] вас, Мене отметается, отметаяй бо ся не человека отмещется, но Бога, давшаго Дух свой Святый в нас.

Иже [854] не приимет вас, ниже послушает словес ваших, исходяще из дому или из града того, отрясите и прах от ног ваших. Аминь, глаголю вам, отраднее будет земли Содомстей и Гоморстей в день Судный, неже граду тому.

Виждь, яко иже словом Божиим кто засвитеделствует и не покаряются тем посланым от Господа, но и досаждают, не даже до сего стают, но возводят на пославшаго их суд себе горши, паче содомлян и гоморян содевают.

Паки же глаголеши, и како же не может взять инаго мужа (л. 232 об.) [855] Церковь Божия, когда Никон что живой погребен, никакова радения об Ней не имеет, ни питает. Всуе сие глаголеши, понеже нигде есть писано, что от живаго мужа жену разлучити, но паче послушай Господа, глаголюща: Иже [856] аще пустит жену свою и женится иною, прелюбы творит на ню. И аще жена пустит мужа и посягнет за инаго, прелюбы творит.

Или не разумеете, братие, ведущим закон глаголю, яко закон обладает над человеком, во елико время живет, ибо мужатая жена живу мужу привязана законом. Аще ли же умрет муж ея, разрешится от закона мужескаго. Тем же убо (л. 233) [857] живу сущу мужу прелюбодеица бывает, аще будет мужеви иному.

Посягшим же глаголю, не аз, но Господь, жене [858] от мужа не разлучатися, аще ли же разлучится, да пребывает безбрачна или с мужем своим да смирится. И паки. Мужу жены не отпущати, кийждо свою жену да имать, и каяждо жена своего мужа да имать.

Отнюду [859] же слышится в вас блуждение, яково ни во языцех именуется, яко некоему имети жену отчюю и разгордесте и не наче плакасте, да измется от среды вашея соделовавый сие. Аз убо, аки не у вас сый телом, ту же живый духом, уже судих, яко ту сый, содеявшаго сице сие (л. 233 об.) [860] о имени Господа нашего Иисуса Христа собравшимся вам и моему духу с силою Господа нашего Иисуса Христа предати таковаго сатане во изможение плоти, да дух его спасется в день Господа нашего Иисуса Христа, не добра ваша похвала.

Видел ли еси, новый Люторе, поругателю Евангелский, како сам Господь утверди брак не на четыре годы. Откуду ты таковое сатанинское слово приял, еже до четырех лет муж не сотворит он ней никакова радения, поизволяет правило, что инаго мужа была? Рцы, кое правило поизволяет?

Видел ли еси божественнаго Павла, глаголюща Божиим словом: Посягшим же глаголю не аз, но Господь: жене от мужа не разлучатися, аще ли разлу(л. 234)чится [861], да пребывает безбрачна или с мужем да смирится.

Карфагенскаго собора правило 102.

Мал [862] браком совокупившесь [863] женца распущаются, аще не смиритася да пребываета тако. Аще ли ни, к покаянию да понуждена будет.

Толкование.

Угодно бысть отцем собора сего по евангелскому и апостолскому учению, никому же свою жену не изгнати просто, ни разлучитися от нея. Аще же прилучится, или мужу восхотевшу или жене разлучитися от сожительства, и не смиритася, и не восхощета, паки снитися и купно жити, да пребудут тако во единстве и другому браку да не сочетаются, понеже, иже пущеницу поимет, прелюбы (л. 234 об.) [864] творит. Аще же муж поимет иную жену или жена инаго мужа, в покаяние да приведутся и любодейства запрещение да приимут.

К сему ищи правила 87-го собора 6-го Вселенскаго и святаго Василия правила 9, 35, 48 и 77, и о сем тамо тоже глаголет.

И святаго 6-го Вселенскаго собора правило 77.

Иже [865] от мужа бывши жена, за другаго поидет, прелюбодеица есть. И пустивый жену свою и ину поим, прелюбы творит по Господню слову.

Како ты, развратниче, смеешь на самаго Господа нашего Иисуса Христа и святых апостол ложно писати? О таковых апостол пишет: Аще мы или ангел с небесе благовестит вам, паче еже (л. 235) [866] приясте, анафема да будет.

Такоже и соблудившаго со отчею женою, не сущею материю, предати таковаго повеле сатане во измождение плоти, да дух его спасется. Колми же паче с материю блудити осудятся. А ты глаголеши, яко добро то государь царь сотворил, что Крутицкому митрополиту отдал Матерь свою соборную великую Церковь в прелюбодейство, которая его помазала елеом радости на царьство. И вы, видяще таокове беззаконие, разгордесте и не паче плакасте. И еже бы собрався о имени Господа нашего Иисуса Христа предати таковаго сатане во измождение плоти, да дух его спасется в день Господа нашего Иисуса Христа, по писаному: Потребил (л. 235 об.) [867] еси всякаго, любы деющаго, от себе.

Жены [868], рече, своим мужем повинуйтеся яко Господу, зане муж глава есть жене, якоже и Христос глава есть Церкви и той есть Спас телу, но якоже Церквь повинуется Христу, сице и жены своим мужем во всем.

Василия Великаго 7-е правило: Прелюбодея на 15 лет отлучает Божественнаго причащения. Того же 22-е правило: Кровосмешение с сестрою 20 лет, а иже с материю, которой епитимьи повинен [869] будет достоин.

И уже от Божиих заповедей и святых апостол канонов о прелюбодействе доволно показано ти есть. Хощеши ли, враждотворче, да покажем еще к сим и святых отец правила. (л. 236) [870] Еже ты глаголеши, яко по четырех лет может жена иному мужу быти по праву, по которому праву? Смотри 6-го Вселенскаго собора правило 92.

Мужеви [871] без вести бывшу, и не уведевши о нем жена его идет за инаго, прелюбы сотворит. Да возвратившуся мужу, аще хощет, да поимет ю.

Толкование.

Подобно есть сему правилу и 17 Иустинианова новая заповедь, яже в 7-й грани царских книг лежит. Повелевает бо и она, яко аще жена имеет мужа воина, и на войну отъидет, и услышит его умерша, инако несть ей, како за инаго мужа поити, аще извещения не приимет от старейшины (л. 236 об.) [872] чина, в нем же муж ея воинствоваше, предлежащу святому Евангелию, и о содеянных воспоминанием исповедати, яко воистину муж ея умре. И таковая воспоминания приимет и по таковом извещении пребудет, ожидающи за едино лето. Аще же не соблюдши заповеди, за инаго отъидет, и саму ту и поимшаго ю [873] ту, яко прелюбодеев мучити. Аще же таковому ожиданию бывшу и той замуж шедши, обрящутся истинствовавшии солгавше, иже с клятвою извествоваше, яко муж ея умре, тии убо от воинства обнажени будут и десять литр злата да вдадят оному, на не(л. 237)го [874] же солгаша, яко умре. Той же, аще восхощет свою жену пояти, не возбранится ему. Ко времени же оставившему свою жену, аще посягнут по невежествию, не вменяется ей в прелюбы. И о сем ищи правила Великаго Василия 46-го.

Василия Великаго правило 31.

Жена [875], аще отъидет муж ея и без вести будет, и не испытавши, ни уведевши добре, яко умре, за ин муж идет, прелюбы творит.

Толкования несть.

Правило 36.

Воинов жены, иже мужем их без вести бывшим, за иныя отходяще, помилованнейши суть от инех, иже отшедшим мужем не ожидают.

Толкование.

(л. 237 об.) [876] Единако прелюбодеяния запрещения повинни суть обоя жены. Аще бо и не [877] воинничя, но купца некоего жена или инаго проста человека, отшедшу мужеви ея на ину страну и прежде извещения о смерти его за инаго мужа поидет, тогда бо яко прелюбодеица судится. Аще и та, не уведевши прежде о смерти известно мужа своего, со инем сочетается, такожде и воинническия жены, уведевши о своих мужех, яко скончашася, должни суть испытовати о смерти их.

Иустинианова же 117 новая заповедь повелевает, иже в 7-й грани 28-х Царьских книг лежит, ея же сила и в 91-м правиле (л. 238) [878] писана есть шестаго Вселенскаго собора, иже в Константине граде в Трулле полатнем. И се правило помилования некоего сподобляет и воинническия жены паче инех и их же мужи отходят на куплю или на ину некую работу, аще и ко второму браку приидут, мужем их без вести сущим, понеже паче к смерти есть воинническое отшествие на брань и велико дает промышление, аще без вести будут, якоже или умроша или убиени быша.

Того же правило 46.

Иде некая в неведении замуж, его же остави жена, и потом первая возвратится, сия же пущена бысть, блудница вменяется по не(л. 238 об.)ведению [879], и аще хощет, да посягнет, добре же есть, аще не посягнет.

Толкование.

Оставлен бысть муж от своея жены на время, он же мнев, яко до конца, разрешися от оноя и другую поят, не ведущу, яко на время оставлен есть от нея. Возвратися [880] к нему первая и приим ту, вторую же отпусти, яко блудница судится сия отпущеная, обаче в неведении шла бе зань. И того ради аще хотением брака сочетатися и со другим, не возбранится ей, не вменяет бо ся пущеница, яко ни он истинный бе муж ей, иже ю отпусти. Аще же восхощет пребывати без брака и не ити за ин муж, (л. 239) [881] добре есть се.

Паки дерзаеши ко всем архиереом учительски, глаголя: А вы, архиереи, когда не имеете радения о обирании патриаршеском и поставлении, кто же ино порадеет; чините, что имеете чинить, ваше то дело и ваше радение. То пастыри для какой притчи не бережете престола патриаршескаго, который есть обща паства.

Покажи, лжесловче, по которым правилом святым начат таковое учительство, а не от своих гнилых произношений. Писал ты, по четырех летех может жена оставленая иному мужу быти. И та вся твоя блядь обличена святым Евангелием и святыми отеческими правилы. А ныне пишешь учите(л. 239 об.)льски [882], аки власть имея, по которым каноном таковое ты дерзновение приим, покажи, где есть писано, еже свою епархию оставя, в чюжую пришед иным архиереом законополагати, паче же чрез Божественыя святыя правила [883] заповеди. Богоноснии отцы на седмом Вселенстем соборе утвердили, якоже в первом правиле есть выше сего писано и ввек таковое утвержение на койждо год в Неделю Православия всюду обновляют. Аще кто [884] надувся своим злоумием убавит или прибавит, да будет проклят. Или не слышал еси в Неделю Православия что мое сие? Збысться Исаино пророчество о тебе: Имеяй уши (л. 240) [885] слышати, не слышиши и очи свои сомжил, одебеле бо сердце твое, славолюбче. Оберегайтеся, глаголеши, чтоб та ваша неприлежность Бога не возбудила до отмщения и ярости. Глаголет бо Захария: А то вижу летающи серп длиною 20 лакоть, шириною 10 лактии. Якоже везде, тако и зде солгал еси, еже будто того ради серп сошел с небесе за неприлежность архиереов, что патриарха новаго не оберут долго. Послушай же, лжесловче, мы тебе пространно зде покажем, чесого ради сниде серп той, якоже глаголет: И обратихся и возведох очи мои и видех и сей серп летящь. И рече ко мне: (л. 240 об.) [886] Что ты видиши? И рех аз: Вижу серп летящь в долготу лакоть двоюдесяту и в ширину десять лакт. И рече ко мне: Си клятва, исходящая на лице всея земля, зане всяк тать от сего до смерти мстится. И вынесу и, глаголет Господь Вседержитель, и внидет в дом татины и в дом кленущагося именем Моим во лжу и обитает посреде дому его и скончает и, и древо его и камение его.

Видели, малоумне, каково сниде серп оный. Си клятва, рече пророк, сходящая на лице всея земли, зане всяк тать от сего до смерти мстится. И вынесу и, глаголет Господь Вседержитель, и внидет в дом (л. 241) [887] татины. Кто же тать? Не ты ли, лжесловче, пришедый в Российскую страну благочестие украсти, прелазя Божественаго писания оплоты.

Господу глаголющу: аминь [888], Аминь, глаголю вам, не входяй дверми во двор овчий, но прелазя инуде, той тать есть и разбойник.

Како же не тать, укажи ми, которыми ты дверми во двор овчий входиши и что твориши.

Глаголет Господь: Аз [889] есмь дверь, Мною аще кто внидет, спасется, и внидет и изыдет и пажить обрящет.

Тать не приходит, разве украдет и убиет и погубит. Не ты ли еси таковый, яко ничтоже от священнаго Евангелия или святых апостол (л. 241 об.) [890] и святых отец предания писания приводяй неправе и истину во лжу претворяеши, и есть таковый тать и разбойник, который простых людей прелщает своими пагубными слабоумными ответы. В таковый душевный двор серп той внидет и обитает, дондеже скончает и.

Василия Великаго по 15 правилу: Разбойник 20 лет да кается и причетник не будет. Градских законов по 39 грани глава 15: Разбойницы повешени будут на тех местех, идеже разбой творят.

Кто же кленущийся именем Господним во лжу? Видел еси, яже выше сего писана суть. Како всякому (л. 242) [891] архиерею собора [892] Карфагенскаго 18 правило на избрании повелевает святый Символ исповедати и вся церковныя заповеди в слухи своя приимати, учащу его поставляющему его, и да обещается та вся сохранити.

Ты же и вси российстии митрополити и архиепископы ничтоже сотворше таковое обещание. И сбысться писаное во псалмех: Бог [893] с небесе приниче на сыны человеческия видети, аще есть разумеваяй или взыскаяй Бога. Вси уклонишася вкупе и непотребни быша, несть творя благое, несть до единаго, ни ли разумевают вси делающии беззаконие. Снедающе люди моя в хлеба место, Бога не призваша, та(л. 242 об)мо [894] устрашишася страха, идеже не бе страха, яко Бог разсыпа кости человекоугодником, постыдешася, яко Бог уничижи их. В таковых домы кленущихся именем Господним во лжу внидет серп той огненный и обитает посреде домов их, дондеже скончает их. А уже многих и скончал. Овии вином згорели, ин удавился, ин инако, зло пострадав, умре, якоже вси знают о сем.

Глаголеши, се что добро или что красно, еже жити братии вкупе. Ничтоже несть инако что лучшаго, как совет и совокупление любве брацкой. Для чего вы друг друга тягости не носите, (л. 243) [895] ни обще воспомогаете себе. Для чего не докончал, рекл, друг другу тягости не носите, а еже и тако скончаете закон Христов. Где есть во Христове законе писано, еже бы друга ненавидети? Словом учиши любити, а делом самем погубити. И глаголеши, заповедь имеем от Бога возлюбити ближняго своего, яко самаго себе. Всех христиан как одной веры имеете возлюбити, а наипаче свой народ и сродники имеете возлюбити. И есть ли вы сами о своем добре и чести не радеете, кто иной, странной, будет радети? Которое радение? Се ли, еже выше рекл еси о (л. 243 об.) [896] избрании патриаршеском? Несть сия любовь Божия, но мирска бесовска. Аще [897] кто речет, яко люблю Бога, а брата своего ненавидит, ложь есть и в сем истины несть. Всяк ненавидяй брата своего, человекоубийца есть и весте, яко всяк человекоубийца не имать живота, пребывающа в себе. И где есть любовь Божия в том, изгнати, еже отъяти, убити. Писание глаголет: Не противитися злобе, злобою противитеся, рече, злобе, аще и наше что лихо было к ним. А еже отъяти, Бога заповеда и за сущее свое не стояти, хотящему, рече, судитися с тобою и ризу твою взяти от тебе, не возбрани ему и срачицу. (л. 244) [898] А еже убивати, слышасте, яко речено бысть древним: Не [899] убиеши, иже аще убиет, повинен есть суду. Аз же глаголю вам, яко всяк гневаяся на брата своего всуе, повинен есть суду. Слышасте, яко речено бысть первым: Не прелюбы сотвориши. Аз же глаголю вам, яко всяк [900] воззревый на жену, коей же возжделети ю, уже любодействова с нею в сердцы своем.

Зриши ли, яко закон деяния точию отрицает Евангелие и самыя вины, откуду страсти востают, отсекает. Темже убо иже инаго учиши, себе ли не учиши.

ВОПРОС, ГЛАВА 22

Никон проклинает и выклинает ныне, важно ли его проклинание и достойно ли нам боятися клятвы его или нет, как он нас проклинает?

Ответ

Проклинание есть суще яко молния, клятва есть как камень, на обе страны остр. Для того есть болшая стрела молниина: естли по достоинству бывает, сожжет виннаго, а естли не по достоинству, падает на того, который клятву чинит, для того что без вины требует меча Божия против того, который есть безвинный; который по достоинству бывает проклят, тотчас от Бога предается в руце сатане, чтоб им владел и для того надобно чтоб гораздо очи отворил, который чинит, и который приимает проклятие, потому что Богом смеятися не надобно, но Бог есть отмщение и впасти в руце Бога жива сострастнейший страх, и всякому то надобно в разуме своем разсудити добре, на всякий час и день. Братия, так пишет святый Павел апостол [901], естли кто взыман будет в таком грехе, вы духовнии его поучите духом кротости, осматривая, чтоб ты и сам в тот же искушен не попался. Не поспешайте, о, вы, пастырие, бросать стрелы молнены, понеже пастыри есте душевныя, оберегаючи не насилством, но любовно, не государьствующи над духовным чином, но будьте образом своего чину. Как покажется первой пастырь Христос, могли бесте принять венец хвалы нетленной так научает апостол Петр, глава всех апостол: будете милосердныя яко Отец ваш милосерд есть [902]. Не помните что рек сыновом Зеведеовым Господь, которыя Его к ярости приводили, чтоб огнем казнил самаритян: не знаете какова духа вы есте, Сын бо человеческий не пришел души человеческия погубити, но спасти. Первой пастырь ваш и высочайший епископ Христос показался таков милосерд, какоже мы, которыя люди равно страстны есмы, имеем быть к ровным нашим братиям милосерды и человеколюбцы. Павел, проповедник языком, не проклинал, толко трожды: ради кровосмешения, ради ереси и ради хулы от архиерей, аще б воздержали клятву для ради великия вины и грехов не был бы так уничижен, потому, как частое будет проклятие, никто не станет почитать.

РАЗОРЕНИЕ 22-му ВОПРОСУ И ОТВЕТУ

Глаголеши, совопросниче, Никон про(л. 244 об.)клинает [903] и выклинает. Ныне важно ли его проклятие и достоит ли нам боятися клятвы его или несть, как он нас проклинает.

Кого проклинаю, рцы, известно. Аще о Питириме митрополите вопрошаеши, послушай, яко и по вся дни глаголы слышишь пророчи, како тех проклинает. Прокляти [904], рече, уклоняющиеся от заповедей Твоих. Проклят [905], иже злословит отца своего, и рекут вси людие, буди. Проклят, лежай со женою отца своего, яко открыл есть откровение отца своего, и рекут вси людие, буди. Видиши, совопросниче, не единому мне таковая творящих проклинати, но и всем, (л. 245) [906] якоже и божественый апостол к Коринфом пишет [907] о соблудившем со отчею женою. Уже судих, рече, яко ту сый содеяша сице сие о имени Господа нашего Иисуса Христа собравшимся вам и моему духу. С силою Господа нашего Иисуса Христа предати таковаго сатане во измождение плоти, да дух спасется. Зриши ли, яко не единому мне таковаго проклинати, но и всем видящим и слышащим.

Тако и древле бысть. Истрезви [908] же ся Ное от вина и разуме, елико сотвори ему сын его юнейший. И рече: Проклят буде Ханаан, зане виде наготу отца своего и не сохрани.

Призвав [909] же Ияков сыны своя и рече: Рувим, первенец мой, ты (л. 245 об.) [910] крепость моя и зачало чад моих, порок бысть и порок лют, и укорив, и аки воды расплынешись, взыде бо на ложе отца своего.

Глаголеши, важно ли его проклинание. Ей, важно. Сам Христос, давый таковую власть святым своим учеником и апостолом: И [911] Аз же тебе глаголю, яко ты еси Петр, и на сем камени созижду Церковь Мою и врата адова не удолеют Ей. И дам ти ключа Царствия Небеснаго. И еже аще свяжеши на земли, будет связано на небесех, и еже аще разреши на земли, будет разрешено на небесех. Возрадоваша [912] же ся ученицы, видевше Господа. Рече же им Иисус: Паки мир вам; якоже посла Мя (л. 246) [913] Отец, и Аз посылаю вы. И се рек, дуну и глагола им: Приимите Дух Свят, им же отпустите грехи, отпустятся им, и им же держите, держатся.

Аще убо до сего не слышал еси, сего ради слушай и ими веру. Сам бо Господь рече: А иже не имет веры, осужден будет.

И [914] иже аще не приимет вас, ниже послушает словес ваших, исходяще из дому или из града того, отрясите прах от ног ваших. Аминь, глаголю вам, отраднее будет земли Содомстей и Гоморстей в день Судный, неже граду тому.

Тогда [915] начат Иисус поношати градовом, в них же быша множайшая силы его, зане не покаяшася: (л. 246 об.) [916] Горе тебе, Хоразин, горе тебе, Вивсаидо, яко аще в Тире и Сидоне быша силы были бывшая в вас. Древле убо во вретищи и пепеле седяще, покаялися быша, обаче глаголю вам, Тиру и Сидону отраднее будет в день Судный, нежели вам. И ты, Капернауме, иже до небес вознесыйся, до ада снидеши, зане аще в Содомех быша [917] силы были бывшая в тебе, пребыли убо быша до днешняго дне. Обаче глаголю вам, яко земли Содомстей отраднее будет в день Судный нежели тебе.

Всяк преступаяй и не пребываяй во учении Христове, Бога не имать. Видел ли еси, совопросниче, страха и ужаса и трепета многа исполнено, иже (л. 247) [918] кто слыша заповеди Божия, и не сохранит, како осуждается.

Мы бо не своею властию вяжем, но Божиею благодатию, данною нам от Пресвятаго и Животворящаго Духа. Видел [919] ли еси священническую честь и власть, яко елико свяжете на земли, будут связани на небеси. Кто ли сия глаголет: Сам небесный Царь. Что сего свидетельства болши? От земли начало приемлет небо, понеже судиа на земли седит, Владыка последует рабу, и яже убо сей осудит, сия Он горе утвержает. И между Бога и человеческаго естества стоит архиерей. Ныне же, ответотворче, приидохом к тебе, пишешь: Проклинание есть суще яко молния, (л. 247 об.) [920] клятва есть как меч на обе страны остр. Для того есть болшая стрела молниина. Есть ли по достоинству бывает, сожжет виннаго, а есть ли не по достоинству, падает на того, который клятву чинит для того, что без вины. Требует меча Божия против того, который есть безвинный, которое по достоинству бывает проклятие, тотчас от Бога предается в руце сатане, чтоб им владел. И для того надобно, чтоб гораздо очи отворил, который чинит и который приимает проклятие, потому что Богом смеятися ненадобно, но Бог есть отмщение и власти в руце Бога, сострастнейший страх.

(л. 248) [921] О ком ты глаголеши? Знаеши ли подлинно, кто ково клял и чесо ради? Ты б прежде уведал от совопросника и тогда бы подлинно писал, и не от себе, ни своими притворении, но от Божественнаго писания. Книги же, которыя подобает чести, изочтены в 85-м правиле святых апостол. Учити же подобает, якоже выше сего писано и ныне вкратце речем не от себе, но от Божественнаго писания.

Шестаго Вселенскаго собора правило 19.

Старейшина церковный на всяк день изряднее, еже на всякую неделю, да учит люди Божественым повелениям и да сказует не от себе, но якоже божественнии отцы достигоша. И где есть писано, яже ты ныне глаголеши? (л. 248 об) [922] Кто же ли тя постави старейшиною зде, рцы ми. Подобает тебе учити, но не зде, но в своей тебе епархии, и то не от своего ума, но от Божественаго писания.

Иже [923] бо кроме Духа пишущии и глаголющии, Церковь созидовати хотяще душевни суть, якоже негде божественный рече апостол: Духа не имуще. Тако вси бо повинни суть клятве, глаголющей: Горе разумным в себе и пред собою художным. От себе бо глаголют, а не Дух Божий глаголяй в них по Господню словеси. От своих убо помысл прежде чистоты глаголюще, духомнения прелстишася. О сем бо глаголет притча: Видех мужа, мневшася о себе мудра быти: упо(л. 249)вание [924] паче его имать безумный. И еже не быти мудр о себе, премудрость запрещает нам. Но и сам исполненый Духа Божия апостол исповедует, глаголя: Не бо доволни есмы от себе помыслити что яко от себе, но доволство наше от Бога, пред Богом о Христе глаголем. Но таковых бо словеса не сладка непросвящена, не от живаго источника Духа приемлюще же и глаголюще, но якоже от некоего езера тименнаго сердца пиавица, змия и жабы похотем возношения невоздержания [925] имущаго питающа и разума их смердящаго имут. Нам же тепла, яже пиюще на возгнушение и скаредие и блевание бременями обращаются.

Хощеши ли (л. 249 об.) [926] навыкнути и о проклятии Крутицкаго митрополита, аще о нем еси допрошен от совопросника. Разсмотри первый наш ответ к совопроснику твоему, яко иже по плоти отчюю жену посрамивый прокляти, колми паче подобает того проклинати, кто с рождшею его Материю прелюбодействует чрез Божественыя заповеди. Господу глаголющу: Слушаяй [927] вас, Мене слушает, и отметаяйся вас, Мене отметается, отметаяй же ся Мене, отметается пославшаго Мя. Кто есть лживый, точию яко Иисус несть Христос, сей есть антихрист, отметаяйся Отца и Сына, всяк отметаяйся Сына, ни Отца имать.

Видели [928], како (л. 250) [929] речено есть Господем нашим Иисусом Христом? Слушаяй вас, Мене слушает, и отметаяйся вас, Мене отметается. Не о мне единем писано есть се, дабы мене слушал Крутицкой митрополит и престал от любодейства, но прежде всех явлено о апостолех святых и святых отцех, которые проповедали Господа нашего Иисуса Христа и святыя Его заповеди написали и глаголали. Мы от Бога есмы, разумеваяй Бога, послушает нас, иже несть от Бога, не послушает нас. О сем разумеваем Дух Божий истиный [930] и дух лстеч.

Или ты не веси, елико беззаконуеши чрез Божественныя заповеди и святых апостол и святых отец правила деянием своим (л. 250 об.) [931] и писанием? Како же ты и Крутицкой митрополит несте антихристи и отметницы Божии, понеже Божественых Его повелений и святых апостол и святых отец правил отвергостеся непослушанием. По 62-му правилу святых апостол: Отметник Христа отверженый, яко простый человек приимется. Василиа Великаго правило 73: Христов отметник во всем житии своем да кается, на исхождении жития своего сподобится святаго причащения. Перваго святаго Вселенскаго собора правило 10-е тожде пишет. Много бо писано о сем и выше сего и не довлеет о вас написати лето едино.

Не удоволился еси в даной тебе епархии (л. 251) [932] заблуждати от истины, но прииде и семо скитатися душею и телом, смущати и превращати на пагубу тебе подобных, отчюжденне от Бога и Божественых повелений.

Якоже и Крутицкой не доволен в своей епархии собрати множество грехов на свою выю, но и олюбодействова и Матерь свою, и ниже о сем доволен бысть к своей погибели. Приложи и Константинополскую Церковь насиловати и на Киевскую митрополию, на живаго митрополита стол лицемерием поставил епископа, чего мы сами, соблюдающе Божественыя правила, не смели зделати, еже и множицею от царя на то нудимы были речением и писанием, (л. 251 об.) [933] правила возбраняют без наречения места и времени епископа и презвитера ставити, аще ни да извержется и поставивый и с поставленым. А Крутицкой митрополит поставил Нежинскаго протопопа в Литовской град Оршу, которой не под царьскою державою, ниже церкви православной есть в нем. И той епископ, не быв в том граде, в него же поставлен, да скоре и отпущен наместником в епархию Константинополскаго патриарха, а не Московскую. Аще Киев и под царьскаго величества державою, но о сем ни которое слово к Цареградскому патриарху от царя и великаго князя не бывало, чтобы быть Киевстей (л. 252) [934] митрополии под Московским патриархом. И о том писали Киевской митрополии духовенство до Цареградскаго патриарха. И Цареградской патриарх, брат наш, святых апостол по правилу 35-му изверг и проклял ево, Крутицкаго митрополита, и с поставльшимся от него.

Правило святых апостол 35.

Не поставляти от чюждаго предела, ни в пределе, аще же без воли того места епископа се сотворит, с поставленым от него и сам не поставлен.

Толкование.

Не подобает никому же от епископ вне своих предел поставляти, ни от чюжих предел приходящих поставляти кого презвитера или диакона. Аще же таковое что сотворит (л. 252 об.) [935] кто без воли страны тоя епископа, да извержется сам и поставленый от него.

И собора, иже во Антиохии правило 13, и святаго Втораго собора правило 2-е.

Той же Крутицкой митрополит, ведая сия апостолския и святых отец правила и ни во что вменив, единому цареву повелению последовал, беззаконно избрал, яже выше писано есть о сем, что мирскими властьми избран епископ не освящен, и той и с поставльшим его извержется.

Священными правилами прощено есть, коемуждо митрополиту в своей митрополии поставляти епископов и то со всеми епископы. А он четверо сугубо [936] беззако(л. 253)ние [937] сотворил, послушав единаго царя, вся священныя Божественыя заповеди и святых апостол и святых отец правила поправ. Первое беззаконие содеяв, мирския власти избранием, еже есть царьским, на епископство епископа постави чрез правила Лаодикийскаго собора 13-е правило и седмаго Вселенскаго собора правило 3-е и Антиохийскаго собора правило 19-е. Второе беззаконие, яко епископи ничто же творят без старейшаго своего, а он ни сам старейший, ни первый митрополит, но последний. И о таковом новом деле без всех епископ совета, никому же было мощно дерзостно начинати, якоже правило являет (л. 253 об.) [938] святых апостол 34 и собора, иже во Антиохии, правило 9-е. Таковых ради вин велено по вся лета собором бывати по правилу святых апостол 37-му и перваго Вселенскаго собора по 5-му правилу, и собора Лаодикийскаго по 20-му правилу и иных многих, якоже выше сего писано. А он ни собора о том не собирал, ни соборовал.

Третие беззаконие, яко в чюждей епархии ставил мирския власти повелением, а не в своей митрополии чрез правило святых апостол 14-го и святаго Вселенскаго 1-го собора 16-е правило, и собора Антиохийскаго правило 13-е и 16-е и 21-е, и святаго Вселенскаго 2-го собора правило 2-е, (л. 254) [939] и 4-го Вселенскаго собора правило 5-е.

Четвертое беззаконие, яже выше есть писано, в Цареградскую патриархию поставил епископа. Сего ради по всем сим четырем беззакониям Крутицкой митрополит по правилом святых апостол и святых отец извержен есть. Аще и не повинуется, но обаче горший суд на ся навел.

Святых апостол правило 28.

Иже епископ или поп или диакон извержен праведне о согрешении явленне, и дерзнет прикоснутися прежде врученыя ему службы, сей отнюдь отсечен будет от Церкве.

А яже нами проклят, и ты глаголеши, тотчас от Бога предается сатане, чтоб им владел. И для (л. 254 об.) [940] того надобно, чтоб гораздо очи отворил и который чинит проклятие, потому что Богом смеятися не надобно, но Бог есть отмщение, и впасти в руце Бога живаго сострашнейший страх.

Или от тебе единаго утаися грех Крутицкаго митрополита, еже назнаменано выше сего. Послушай, еще ти приложу.

Писано есть во Евангелии: И егда приближашеся Иисус во Иерусалим и приидоша в Вирсавию к горе Елеонстей. Тогда Иисус посла два ученика, глаголя има: Идета в весь, яже прямо вама, и абие обрящета осля привязано и жребя с ним, и отрешивше, приведета Ми. И аще вама кто речет (л. 255) [941] что, речета, яко Господь ею требует, абие же послет я. Се же все бысть, да сбудется реченое пророком, глаголющим: Рцыте дщери Сионове, се Царь твой грядет тебе кроток, всед на осля и жребя, сына яремничя. Шедша же ученики и сотвориша, якоже повеле им Иисус, приведоста осля и жребя, и возложиша верху ею ризы своя, и вседе верху их. Множайшии же народи постилаху ризы своя по пути, друзии же резаху ветви от древ и постилаху по пути. Народи же приходящии Ему и воследствующии зваху, глаголюще: Осанна Сыну Давидову, благословен грядый во имя Господне, осанна в вышних.

Видели таинства (л. 255 об.) [942] силу, о Христе Спасе нашем пророченое от пророка, якоже и сам Господь свидетельствует. Да сбудется реченое пророком, глаголющим: Рцыте, дщери Сионове, се Царь твой грядет тебе кроток, всед на осля и жребя сына яремничя.

Имеяй престол небо, всед на жребя, входит во Иерусалим, дети же еврейския и сами подстилаху Ему ризы своя и ветви фиников, (л. 256) [943] овыя убо режуще, другия же и в руках носяще, вопияху Ему предсылающе осанна Сыну Давидовы: Благословен грядый во имя Господне, Царь Израилев.

Сие же бысть, онех языки подвигшу Всесвятому Духу в славу и благохваление Христово. Являху же Христову на смерть победу ваиями, си есть ветвьми. Ваия бо у евреов ветвь мяхкая глаголется. Обычаяй бо бяше победителем и подвигов и брани некиих, ветвьми древес присноцветущих в победных провождениих почитати и обводити. Гадателствено же знаменоваше жребец сущыя ны от язык люди, на нем же всед Христос и препочив одолитель и по(л. 256 об.)бедитель [944], Царь всея земли наречесь.

Евангелие.

Множаешии же народи постилаху ризы своя по пути. Друзии же резаху ветви от древ и постилаху по пути.

Толкование.

По сказании убо Писания, велию честь являет ризное растилание и ветвенное ношение, торжества бо день являет. По духовному же веждь, яко по возложении риз апостолских, сиречь плоти их, риза бо души плоть, тогда потом вседает Господь. Аще бо не украсится душа апостолскими добродетелеми, не возходит на ню Господь. Предваряющии же суть, иже прежде воплощения Христова пророцы. Последущии же, иже потом мученицы и преподобни, (л. 257) [945] учителие, иже ризы своя разстилаху Христу, сиречь плоть покаряют духови. Риза бо и покров души плоть есть. Разстилаше на пути, сиречь по Христове: Аз бо есть путь. Аще кто плоти своея не разстелет, сиречь не смирит о Христе, еже есть путь и живот, и в Нем присно не пребывает, уклоняяся от всякаго беззакония и неправды, и не возходит нань Господь.

Евангелие.

И вшедшу Ему [946] во Иерусалим, потрясеся весь град, глаголя: Кто есть Сей? Народи же глаголаху: Сей есть Иисус пророк, иже от Назарета Галилейскаго.

Толкование.

Народи яко не лстивии суще и препрости, ни бо завидяху Христу, ниже паки подобный разум о Нем имеяху, (л. 257 об) [947] тем же и пророка Его нарицаху, еда како понеже яве, тако пророка Его глаголаху. Возмогут разумети Его, яко Сей есть чаемый пророк, о Нем же рече Моисей, яко: Пророка вам воздвигнет Бог. Глаголаху бо, яко Сей есть пророк, сиречь Он же чаем.

Крутицкой же митрополит по какому указанию творит? Которой пророк о нем писал, яко подобает ему тако творити? Есть ли праведно или ни единому [948] патриарху таковое деяние творити или ни? Понеже в Писании явлено есть, яко патриарх Христов образ носит на себе, градстии же епископи по образу суть двунадесяти апостол, селстии же по 70 апостол. А Крутицкой митро(л. 258)полит [949] селскаго епископа место держит и како может таковое действо содеяти? Аще бе и повелено было, но в своей енории, ибо Господь наш Иисус Христос, седе на ослицу, ни единой сущи иной потребе, токмо совершити проречение и по показанию и по разума устроению, яко и на жеребя вседе, сиречь на новыя и не ученыя люди и непокоривыя язычники. Иным же по Себе творити не повелел тако, но како. Шедше убо, рече, научите вся языки, крестяще их во имя Отца и Сына и Святаго Духа, учаще их блюсти вся, елика заповеда вам.

Почто Крутицкой митрополит в свою епархию не идет учити и проповедати, якоже священныя правила (л. 258 об.) [950] повелевают на всякой год обходити епископу свою епархию. А он, как и поставлен, не бывал с Москвы. Сего ради правила святыя возбраняют в чюжих епархиях пребывати надолзе и непозвану епископом, ея же епархия есть: Не приходити, ни учити, ни ино что творити без воли местнаго епископа, якоже выше сего писано есть о сем. А он, Крутицкой митрополит, якоже вторый Максим глаголемый Кинин, еже сказается безстудный, Церковь Божию раздра и многа мятежа и молвы сию исполни. Волк вместо пастыря бысть и вся грехи прощати готов согрешающим. Единаго ради еже нечествовати в повелениих, рекше (л. 259) [951] преступати заповеди, якоже глаголет великий богословец Григорий: Чюжд убо сий Максим от епископства да будет и вси от него поставлении презвитери и диакони и прочии причетницы чюжди священия.

Паки заповеда Господь, глаголя: Ходяще [952] же, проповедайте, глаголюще, яко приближися Царьство Небесное, болящая исцелите, прокаженыя очищайте, мертвыя воскрешайте, бесы изгоните. И прочая.

Почто сих повеленных от Бога Крутицкой митрополит не исполняет, но тамо гоняет, где мирским злосмрадием воняет. Не о нем ли есть пророчествова Господь, глаголяй: Блюдите [953], да никто же вас прелстит. Мнози бо приидут во имя Мое, глаголюще: (л. 259 об.) [954] Аз есмь Христос, и многих прелстят. Не изыдите вслед их.

Не он ли есть сей? Егда убо узрите мерзость запустения, реченую Даниилом пророком, стоящу на месте святе, иже чтет да разумеет. Мерзость и запустение Крутицкой митрополит не заеже Отца своего седалище просмради, но инаго самаго Христа, окаянный, вознеистовися, творит, что Христос делал, ему же не достойно есть творити. Сел на месте святе, еже никто от апостол сотвори, ниже заповеда Господь творити.

Верховный апостол Петр, ниже на кресте восхоте тако пригвоздитися, якоже Христос, но стремглав мучителей умоли пригвоздитися. Егда убо (л. 260) [955] умы Иисус нозе учеником, возлег, паки рече им: Весте ли, что сотворих вам, вы глашаете Мя учителя и Господа и добре глаголите, есмь бо. Аше убо умых ваши нозе Господь и учитель, и вы должни есте друг друга умывати нозе, образ бо дах вам, да якоже Аз сотворих, и вы творите. Аминь, аминь, глаголю вам, несть раб болий Господа своего, ни посланник более пославшаго его. Аще сия весте, блажени будете, аще сотворите такожде.

И что преславнее сего, еже Царьство Божие проповедати, Тело Христа ясти и Кровь пити. Се, рече, творите в Мое воспоминание, елижды бо аще ясте хлеб сей и чашу сию пиете, смерть (л. 260 об.) [956] Господню возвещаете. Болных целити, прокаженых очищати, мертвых воскрешати, бесы изгонити, ноги умыти, горы преставляти, власть наступати на змию и на скорпию и на всю силу вражию.

Не доволно ли есть даныя власти? Почто якоже диавол возгордеся, на высоту [957] наскачеши не данную, ибо сатана тако возгордевся, рече: Поставлю престол мой на небеси и буду подобен Вышнему. О нем же Господь глаголет: Видех сатану, с небесе спадша. Такожде Июда, брат Божий, глаголет: Ангелех же, не соблюдших своего началства, но оставлших свое жилище, на суд Великаго дне узами вечными (л. 261) [958] под мраком соблюде.

И Петр верховный глаголет: Аще [959] бо Бог ангелов согрешших не пощаде, но пленницами мрака связав, предаде на суд мучимы блюсти.

Почто, святотатче, не внимаеши Писанию? Гордишися и не данным ти обладаеши. Послушай Писания, что Господь глаголет: Не о всех молю, Аз бо вем, их же избрах и поставих на высоте, которой ты не достоин. Аще ли речеши, яко Царь повеле ти есть, и видел еси выше сего писаное и ныне веждь, яко всяк мирский (л. 261 об.) [960] властми власть приемый извержен есть. И ты, прельстився, глаголеши, яко Царь повелел есть, что и царем вышний Царь Христос мстит за таковое беззаконие.

Возлюбил ли царь венчати тя цветы, яко победителя смерти. Почто прочее последование оставил, яже о Христе суд, оплевание, поругание, пропятие, смерть и гроб? Пусть усмотрили бы любимцы твои и воскресение твое, как востанешь, аще мнишися, что един аз тебя проклиню, не един, но и сам Господь. Тогда, речет к сущим ошую Его, идите от Мене, (л. 262) [961] проклятии, во огнь вечный, уготованый диаволу и аггелом его. Тогда, рече, когда слушай, взалках бо ся, и не дасте Ми ясти. И прочая.

И аще в той час проклят, в онь же не даяше ясти. А иже чюжая похищая, то колми паче проклят, якоже издревле речено есть: Проклят [962], иже претворяет пределы подруга своего, и рекут вси людие, буди.

И будет, аще не послушаеши гласа Господа Бога твоего, снабдети и творити вся заповеди Его: Елика Аз заповедаю тебе днесь, приидут на тя вся клятвы сия и постигнут тя, и проклят ты будеши во граде и проклят ты и на селе, проклят ты, внегда вхо(л. 262 об.)диши [963], и проклят ты, внегда исходиши.

Где ли входиши и откуду исходиши, яве чрез Божественыя заповеди, якоже и Господь глаголет: Не входяй дверми во двор овчий, но прелазя инуде, тать есть и разбойник. Татие же и хищницы Царствия Божия не наследят, якоже рече апостол: А еже не наследовати, яве есть проклят. По градским законам разбойницы повешаются. По древнему же закону проклят есть от Бога всяк висяй на древе, елицы от дел закона суть под клятвою суть. Писано бо есть: Проклят всяк, иже не пребудет во всех писаных в книзе законней, яко творити я. И паки: Проклят (л. 263) [964] всяк, творяй дело Божие с небрежением.

Собора в Константине граде во Святей Софии правило 1.

Иже в связании [965] или во извержении или в проклятии от папы Римскаго быв и от патриарха Константиняграда, аще кто связан или извержен или проклят и от прочих патриарх, в том же да пребывает.

Колико есть явлено Крутицкаго митрополита небрежения и преступления Божественых заповедей и святых правил святых апостол и святых отец. Иже [966] есть от Бога глаголы Божия послушает, сего ради вы не послушаете, яко от Бога несте. Кто же есть глаголавый? Сие сам Бог. Указание же заповедем Божиим, их же не твористе, выше сего писано. (л. 263 об.) [967] И паки: Всяк преступаяй и не пребываяй во учении Христове, Бога не имать. Разумеваяй Бога, послушает вас, иже несть от Бога, не послушает нас. Возлюбленнии, не всякому духу веруйте, но искушайте, аще от Бога суть, яко мнози лживии пророцы изыдоша в мир. О сем разумеем Дух Божий и дух лстеч. Всяк дух, иже исповедует Иисуса Христа в плоть пришедша, от Бога есть. И всяк дух, иже не исповедует Иисуса Христа в плоть пришедша, сей есть антихристов. Его же слышасте, яко грядет и ныне в мире есть уже. Не любяй Мя, словес моих не соблюдает, иже не любит Господа Иисуса да будет проклят. (л. 264) [968] Како же той несть проклят, кто Бога не знает, тот есть антихристов, якоже ты, ответотворче, и Крутицкой митрополит. Аще ли глаголете, яко знаете Бога, послушай наперсника возлюбленнаго апостола Богослова Христова, на инем месте глаголюща: И [969] о сем разумеем, яко познахом Его, аще заповеди Его соблюдаем. Глаголяй, яко познахом Его и заповеди Его не соблюдает, ложь есть, и в сем истины несть. Кто [970] же есть лживый, точию отметаяйся, яко Иисус несть Христос, сей есть антихрист, отметаяйся Отца и Сына. Всяк отметаяйся Сына, ни Отца имать.

А [971] иже отвержется Мене пред человеки, отвергуся его и Аз пред Отцем Моим, (л. 264 об.) [972] иже на небесех. Аще отвержемся, и той отвержется нас, иже несть со Мною, на Мя есть, и иже не собирает со Мною, расточает.

Ты веруеши, яко Бог един есть, добре твориши, и беси веруют и трепещут. Хощеши же ли разумети, о человече суетне, яко вера без дел мертва есть? Авраам, отец наш, не от дел ли оправдася, вознес Исаака, сына своего на олтарь? Видиши, яко вера поспешествоваше делом и от дел вера совершися. И совершися Писание, глаголющее: Верова Авраам Богови, и вменися ему в правду, и друг Божий наречеся. Зрите ли, убо яко от дел оправдается человек, а не от веры еди(л. 265)ныя [973]? Видесте ли по Святому Писанию, яко никотораго христианства в вас что есть любо, но и отметницы есте Божии и не просто отметницы, но и Антихристи, то есть богопротивницы. Анафема, ничто же ино, разве отлученый от Святыя Троицы. Вы же по коликим святым книгам отлучилися есте сами собою. А яже от правил святых, о проклятии, писано есть доволно в первом нашем к тебе возражении. Таяжде и зде и Крутицкаго митрополита презорство святых апостол и святых отец правил клятвою наполнят, паче же святаго седмаго Вселенскаго собора первое правило. И прочее.

Деяние, в Неделю Православия действуемое. В нем же есть сице писано: (л. 265 об) [974] Неправе [975] святых учителей Божия Церкве божественныя гласы восприемлющим, и яве и явственне в них благодатию Святаго Духа реченая, инако толковати же и превращати покушающимся, да будет проклят.

Ваше же писание и Крутицкаго митрополита деяние беззаконное всем ведомо.

Просиша Иаков и Иоанн: Даждь нам, да един одесную Тебе и един ошую Тебе сядема во славе Твоей. Иисус же рече има: Не веста, что просита. Можета ли пити чашю, юже Аз пию, и крещением, им же Аз крещаюся, креститися. Они же реста Ему: можема. Иисус же рече има: Чашю, убо юже Аз испию, испиета, и кре(л. 266)щением [976], им же Аз крещаюся, креститася. А еже сести одесную Мене и ошую, несть Мне дати, но им же уготовано есть.

Никто [977] же собою приемлет честь, но званый от Бога. Якоже Аарон, тако и Христос, не себе прослави первосвященнику, но глаголавый к Нему: Сын Мой еси, Аз днесь родих Тя. И по мале. Ибо Сын сый навыче откуду пострада послушание и совершився бысть всем послушающим Его виновен спасению вечному, наречен от Бога первосвященник по чину Мелхиседекову.

Вскочи на брак, не имея одеяния брачна, вшед Царь видети возлежащих. Виде ту человека, не облечена во одеяние брачное и глагола ему: Друже, (л. 266 об.) [978] како вниде семо, не имый одеяния брачна? Он же умолча. Тогда рече Царь слугам: Связавше ему руце и нозе, возмите и вверзите его во тму кромешную, ту будет плач и скрежет зубом.

Егда зван будеши киим на брак, не сяди на преднем месте, еда кто честнее тебе будет званых. И пришед, иже тебе звавым и онаго, речет: Ты даждь сему место. И тогда начнеши со студом последнее место держати.

Предвари Петра Июда седети на вечери, вниде в него сатана. Аминь, аминь, глаголю вам, яко един от вас предаст Мя. Созираху же ся между собою ученицы и недоумева(л. 267)ющеся [979], о ком глаголет. Бе же един от ученик Его, возлежай на лоне Иисусове, его же любяше Иисус. Помаану же сему Симон Петр вопросити, кто убо есть, о нем же глаголет. Напад же той на перси Иисусове, глагола Ему: Господи, кто есть? Отвеща Иисус: Той есть, ему же Аз, омочив хлеб, подам. И омочь хлеб, даст Июде Симонову Искариотскому. И по хлебе тогда вниде в он сатана. И по мале рече: но [980] да Писание сбудется. Ядый со Мною хлеб, воздвиже на Мя пяту.

Суди, ответотворче, что наше зло Крутицкому, яже он воздает нам злая за благая, не яко ли Июдино того деяние есть? Аще ли же вы приемлете яко лжехриста, по (л. 267 об.) [981] писаному: Востанут бо, рече, лжехристи и лжепророцы. И паки пророчествова о вас Петр верховный: Быша и лживии пророцы в людех, якоже и в вас будут лживии учителие, иже внесут ереси погибели, и искупашаго их Владыки отметающеся, приводяще себе скору погибель. И мнози последствуют их нечистотам, ими же путь истиный похулится и в преумножении лживых словес вас уловяй, их же суд не коснит и погибель их не воздремлет.

Не се ли вся ныне деются вами прорекованное? Но не радуйтеся, паки верховный наведе, утешая нас, злостраждущих, от зол ваших. (л. 268) [982] Весть [983], рече Господь, благочестивыя от напасти избавляти, неправедники же в день Судный мучимы блюсти. Но и паче вслед плотския похоти сквернения ходящии и о Господе не радящыя, продерзателие, себе угодныя, славы не трепещут, хуляще, идеже ангели крепостию и силою болши суще, не терпят на ся укоризнен суд. Сии же, яко скоти животни естеством бывше, погибель и тлю, в них же не разумеют хуляще, во истлении своем истлеют. Приемлюще мзду неправедну, сласть мняще вседневное насыщение, сквернители и порочницы, питающеся лестми своими, очи имуще исполнь блудодеяния (л. 268 об.) [984] и непрестаемаго греха: прелщающе души неутверждены, сердце научено лихоимству имуще, клятвы чада, оставлши правый путь заблудиша, последоваша пути Валаамову Восорова, иже мзду неправедну возлюби, обличение же име своего беззакония. Подъяремник безгласен, человеческим глаголом провещавшим, возбрани пророка безумие. Сии суть источницы безводни, облацы и мглы, от ветр преносимы. Им же мрак темный во веки блюдется. Прегордыя, суеты вещающе, прелщают в скверны похоти плотския, отбегающе их отнюд, живущих во лсти, свободу обещавающе, сами раби суще тления, (л. 269) [985] имже бо кто побежден бывает, сему и работен есть.

Паки, ответотворче, пишешь, так пишет святый апостол Павел: Есть [986] ли кто, изыман в каком гресе, вы, духовнии его, поучите духом кротости, осматривая, чтоб ты сам в то же искушенье не впался. Не поспешайте, о вы, пастырие, бросати стрелы молнии, понеже пастыри есте душевныя, оберегаючи не насилством, но любовию, не господьствуючи над духовным чином.

Кто ти область сию даде, да сия твориши, лицемере, сам превосходя вся заповеди Божия, овогда глаголеши, яко несть патриарша власть боле оноя? Почто ты твориши ся сам учителем и законоположником над нами? (л. 269 об.) [987] Не добре ли писал верховный Петр, яже выше сего изображено, которой духа кротости образ ты показал? А яже нами клятва кому нанесеная, разсмотри выше писаное, яко сами на ся нанесли, а не мы. Мы, последующе богоносных отцех преданиом, их же они прокляли, и мы, соблюдая их заповедание, проклинаем, якоже выше есть писано. Но будите, глаголешь, образом своего чину так, как покажется первой пастырь Христос, могли б есте принять венец хвалы нетленныя. Так научает апостол Петр, глава всех апостол: Будите милосерди, яко и Отец ваш милосерд есть.

Не помните ли, что рек сыновом Зеведеовым Господь, кото(л. 270)рыя [988] Его к ярости приводили, чтобы огнем казнил самаритян: Не знаете какова духа вы есте? Сын бо человеческий не пришел [989] души человеческия погубити, но спасти. Первой пастырь ваш и высочайший епископ Христос показался таков милосерд. Како же мы, которыя люди, равнострастны есмы имеем быти, к равным нашим братиям быти милосердны и человеколюбцы? Ибо Спас выше закана [990], человеком же добро предания подражать, ибо овогда смирения образ показуя, наказа. Не веста, коего духа еста вы, Сын бо человеческий не прииде душ человеческих погубити, но спасти. Иногда же, связавше ему руце и нозе, вверзите во тму кромешную. Иногда [991], обаче враги Моя оны, (л. 270 об.) [992] иже не хотевшия Мне да Царь бых был над ними, приведите семо и ссецыте предо Мною. Иногда же паки, что убо сотворит им Господин винограда, приидет и погубит делатели сия и виноград даст инем. Иногда же отъидите от Мене проклятии, во огнь вечный, уготованый диаволу и аггелом его. Инде: Отраднее будет Содому и Гоморе, неже вама на суде. И паки: Отраднее Тиру и Сидону, неже вама. И повеле грады их сожещи. Инде: Свяжите я в снопы, яко сожещи я. И паки: Посецыте ю вскую землю упражняет. И ино: Лутче есть не бы родился человек он. И паки: Иди за Мя, сатано, яко не мыслиши (л. 271) [993] яже суть Божия, но яже человеческа.

Сия вся не казнь ли и отмщение? Глаголеши, яко Павел проповедник языком не проклинал, толко трожды ради кровосмешения и ради ереси и ради хулы от архиерей. Аще бы воздержали клятву для ради великия вины и грехов, не бывал бы так уничижен, потому как что частое будет проклятие, никто не станет почитати.

Павел и ныне таковых проклинает, якоже ты и Крутицкой митрополит, презоривых того заповедей. Но [994] и аще мы или ангел с небесе благовестит вам, паче же благовестихом вам, анафема да будет, якоже прежде рех и ныне глаголю. Аще кто вам благо(л. 271 об.)вестит [995] паче еже приясте, проклят да будет. И паки: Иже не любит Господа Иисуса, проклят да будет.

Сия вся и ныне действует на нововводных законников, которыя предпочитают славу человеческую неже славу Божию. Якоже пишет Иоанн Богослов: Обаче убо и от князь мнози вероваша в Него, но фарисей ради не исповедаху, да не из сонмища изгнани будут, возлюбиша бо паче славу человеческую нежели славу Божию.

ВОПРОС, ГЛАВА 23

Подобает ли архиерею бить и ударить и в сылку ссылать, то все чинил Никон и не могся насытить мирскими людьми и духовных чинов всегда.

Ответ

Не сыскиваю лутчей добродетели, что правда в християнском человеке что терпение, а хуждшаго зла что гнев. Авраама похваляем для терпения его, который имел при рождестве сына своего единороднаго, в котором его была вся надежда. Моисея почитаем для терпения, которое показал на пустыни и против людий непослушнаго и неблагодарнаго. Иеву приудивляемся его болшему терпению незносимому и великаго Павла, что поносил многие беды и труды, которые он сам пишет, и наконец пророка и царя Давида, который поносил неблагодарение от сына своего Авессалома и злобу Семеева, который с камением последовал ему. Не прикасайтеся помазаному Моему и во пророцех Моих не лукавнуйте. Помазанники называет вас священнический чин ради помазания священства и ради Христоподобной благости Христа нашего, и учинила есть нас цари и священники, по освященной апокалипсис [996], цари тогда бываем, когда владеем страсти телес наших, священники когда приносим вся чювствия наша, убо Епикур безумно бредил, что человек не может терпения поносить и временныя помешки. Наипаче философ тогда есть философ, когда терпение понесет. Не подобает архиереом такие снасти мучителные имети, а инако делаючи услышат Христово прещение: возврати меч свой в недра своя; вси бо которыя приимаются за меч, от меча погибают. Мирскому князю дано препоясатися мечем, а не человеку священному. Не видиши ли его, все облачение архиерейское, что есть кротость, одежда правды; стихарь образует ангельскую чистоту и светлаго архиерейскаго жития; епитрахиль — низшедшая свыше совершенная благодать Всесвятаго Духа; поручи прообразуют ужи, что были связаны руки Христовы; пояс — связание Христово; палица — смертную победу; амофор, что на рамо заблуждшее овча восприим, первому Пастырю знамение; Крест — проповедание евангельское; панагия — Бога Слова воплощение; митра — царьское священство; сакос или полиставрия, еже ради страсти и распятия правду и истину образует. Яко что все архиерейское облачение являет: терпение, кротость, целомудрие и богоизбранное собрание всех добродетелей правды.

РАЗОРЕНИЕ 23-му ВОПРОСУ И ОТВЕТУ

Глаголеши, совопросниче, подобает ли архиерею бить и ударить и в сылку сослать, то все чинил Никон, и не могся насытить мирскими людьми (л. 272) [997] и духовным чином всегда. И ты, совопросниче, внимай, что возглаголем ответотворцу.

Глаголеши, ответотворче, не сыскиваю лутчей добродетели, что правда в человеке, что терпение, а хуждшаго зла, что гнев. Авраама похваляем для терпения его, который имел при рожестве сына своего единороднаго, в котором его была вся надежда. Что же конец сему? Се ли, яко вознес на жертву? Зриши ли, яко патриарх Авраам, изшед [998] по словеси Божию от земли своея и от рода своего и от дома отца своего и пришед до места Сихемска, и постави храм свой в Вефиле, и созда требник Господу, и помолися во имя Господа, явлшагося ему. И паки по возвращении (л. 272 об.) [999] от Египта вселися у дуба Мамврийска в Хевроне и созда ту требник Господу. Услышав же Авраам, яко плениша Лота, сыновца его, и собра вся домочадца, 318, и гнаша вслед до Дана. И нападе на ня нощию сам и отроцы его с ним, и порази их, и гони их до Ховала, яже есть ошую Дамаска, и возврати вся и коня содомска, и Лота, сына брата своего, возврати. Видели, что сотворил Авраам патриарх по возношении жертвы и по приятии священства за единокровнаго человека, племянника своего Лота? Колико порази сам и отроцы его, якоже глаголется инде, 300 побил и по сем паки священствовал, якоже пишет: Вознес сына своего Исаака на жертву.

(л. 273) [1000] И Авраам племянника ради своего мстил. А иже кто за дело Божие отмстит кому по закону, которое то лихо, якоже последи укажем. Ныне, во ответе твоем, сряду возразим, аще и не потребно есть нынешнему закону, но ты безумием своим принудил нас на се.

Паки глаголеши, Моисея почитаем для терпения, которыя показал на пустыни и против люда непослушливаго и неблагодарнаго.

Читал ли ты, ответотворче, Моисейския книги, тако безумно глаголеши? Аще ли же ни, аз ти покажу, колико Моисей в правде не кроток, но и зело суров и не милостив. Не видел еси, како египтянина убил и скрыл в песце. Уведа же фараон, искаше (л. 273 об.) [1001] его убити, он же, бежав, вселися в земли Мадиамстей, священник убо и Моисей, якоже пишется во псалмех «Моисей и Аарон во иереох Его», а не царь или воевода. Почто воева противу Амалика в Рафидине и по избиении сошед з горы, созда Моисей олтарь Господу Богу? Аще ли речеши, яко Иисус воевал. И бысть, рече, егда воздвизаше Моисей руце, одолеваше Израиль, егда же притинаше руце, одолеваше Амалик. И бысть, егда Моисею снити з горы Синайския, и егда же приближися к полку, узре телец велики. Возъярився гневом Моисей, поверже с руку своею обе досце и сокруши я под горою. И взем телец, иже сотвориша, (л. 274) [1002] сожже во огни и сотре по тонку, и разсыпа и по воде, и напои ею сыны Израилевы. И паки повеле, препоясався мечи сыновом Левииным, побити комуждо брата своего и друга своего и соседа своего. Не ярости ли дело се, яко и досце, даная от Бога, сокрушил?

О Иовове кротости удивляешися, а делы нисколко не уподобляешися, как собака, присно не престая, сваришися, ничим же тебе обидящаго.

Про Павла пишешь, что поносил многия труды и беды, которыя он сам пишет. А инде тот же Павел сам о себе пишет [1003]: Гонитель Церкви был. Якоже и в Деяниих явлено есть [1004], Савл же еще дыша прещением (л. 274 об.) [1005] и убийством на ученики Господа. Видиши ли, яко и Павел по правде не кроток был. Палицею ли, рече, прииду к вам или духом кротости. И паки судих таковаго предати сатане, да дух спасется.

О Давиде глаголеши, которой поносил неблагодарение от сына своего Авессалома и злобу Семееву, которой с камением последовал ему. Кто же Урия уби? Давид. И вси святии себе не отмщали, а по суду всяку неправду мстили, били и убивали, якоже Давид, о нем же свидетельствуют Царства. Нафану пророку сам ся своим судом осудил на смерть за Уриино убийство и Вирсавиино имство. Достоин, рекл, (л. 275) [1006] есть человек он смерти, кто чюжую агницу похищает. Якоже и ныне, которыя держат не сущую свою Церковь или не своей епархии, которыя ложное издают писание, якоже ты чрез Божественыя заповеди и законы на прелесть пишешь все ложно.

Пишешь, не прикасайтеся помазаному Моему и во пророцех Моих не лукавствуйте. Помазанники называешь [1007] весь священнический чин, ради помазания священства и ради христоподобной благости Христа нашего, учинил еси нас цари и священники, по священной Апокалипсии. Цари [1008] тогда бываем, егда владеем страстьми телес наших, когда [1009] приносим вся чювствия наша. Убо Епикур безумно (л. 275 об.) [1010] отрядил, что человек не может терпения поносить и временныя помешки. Наипаче же философ тогда есть, когда терпение понесет и не подобает архиереем такия снасти мучителныя имети. А ино делаючи, услышат Христово прещение: Возврати меч свой в недра своя. Вси бо, которыя приимаются за меч, от меча погибают. Мирскому князю дано препоясатися мечем, а не человеку священному.

Кто ти сказывает о мечи, яко мечем имамы? Ни совопросник тебе о сем что любо вопрошал? Сам ли ты лжешь или ини тебе рекоша, яко меч имамы и тем отмщаем? Укажи, кому мечем отмстили о чем любо, (л. 276) [1011] а яже о церковных невежествах и любо о иных наказаниих по вине имамы законодателя самаго Христа Бога нашего. Той нам закон положил.

И [1012] приидоша паки во Иерусалим и вшед Иисус в Церковь, начат изгонити продающыя и купующыя во церкви и трапезы торжником, и седалища продающих голуби испроверже. И не даяше, да кто мимо несет сосуд сквозе церковь, и учаше, глаголя им: Несть ли писано, яко храм Мой храм молитвы наречется всем языком. Вы же сотвористе его вертеп разбойником.

Толкование.

Еже изгнати Иисус продающыя, Иоанн повествует, но убо в начале Евангелия: И [1013] сотвори бич от вервий. (л. 276 об.) [1014] Не просто изгна, но безчестным бичем плетеным бия. Сей же к концу, достоит бо второе быти сему.

Пещеру же разбойническу именует Церковь за беззаконное удержание от недостойных.

Толкование.

Толма возненавидев лукавство ваше, яко ни церкви дому Моему, глаголю, быти, но дом ваш. Донеле же бо живяше в Ней добродетель и любовь, дом Мой бе. А понеже осквернисте и торг и пещеру разбойником соделасте, но и столы продающих голуби испровращаются, сиречь архиерей, продающих духовныя дары. Духа образ есть голубь, иже бо злата ради поставляяй, проклят. А иже Кру(л. 277)тицкой [1015] митрополит в чюжих епископиях и по указу государя царя и по повелению велмож ставит, коликих клятв достоин, якоже выше сего есть писано: Кто мирскими властьми избран, извержется и с поставльшим его. А ныне архиепископов и архимандритов и попов многих сам государь царь избирает, а Крутицкой митрополит ставит. Но паки к первым обратимся.

Иже [1016] аще соблазнит единаго от малых сих, верующих в Мя, уне есть ему, да обесится, жернов ослий о выи его, и ввержен будет в море.

Святых апостол правило 27.

Святитель [1017], вернаго или невернаго бив, да извержется.

Толкование.

(л. 277 об.) [1018] Епископ или презвитер или диакон, аще биет досадившаго ему вернаго или невернаго, и того ради боязнь влагая другим, да и тии подобно тому не согрешают, к тому таковии яко противно творят, Евангелскому закону, повелевающему «аще тя кто ударит за ланиту, обрати ему и другую», да извержется. Понеже от гордости и неудержания ярости нанесе рану на искреняго. Аще же кто, целомудрен смысл имый, беззаконно нечто творящаго в церкви святей или во святых местех биет, таковый не извержется. Понеже и Господь наш Иисус Христос продающыя и купующыя в законней церкви, сотворив бич от вервии (л. 278) [1019] и бия, таковы оттуду изгна. Церковнии бо хранители отместницы нарицаются, яко от отец превыше поставлени суть таковы казнити.

Видели, что накончает святое правило, аще и во святей церкви или во святых местех биет, не извержется. И прочее.

А еже бывшу ми на Москве, якоже совопросник глаголет, подобает ли архиерею бити и ударити и в сылку сослать, то все делал Никон, и на то есть правила святых отец и законы царьския, которыя Церковь святая приемлет за едино со апостолскими и отеческими правилами, якоже в предисловии книги Кормчия к концу является писано.

Паче [1020] же иже во блаженней памяти от Иустиниана царя (л. 278 об.) [1021] со свитком Божественых новых заповедей, еже не токмо правоверных наших отец правилом последуют, но и от царския крепости господьство даруют с приложением законным же и богоугодным. Полезное всему человеческому созданию богоподобно смотряюще, в них же есть повелено местником быти [1022] архиереов.

Собора Карфагенскаго правило 76.

Да не сутужают епископу да будут местницы.

Толкование.

Убозии от силнейших озлобления и обиды подъимаху и того ради приходяще к епископом, стяжаху им и молящеся помощи им. Епископи же овогда помогающе, овогда же не возмогающе. Сице изволиша отцы (л. 279) [1023] собора сего просити у царя, да с промышлением епископов изберет и поставит местников. Местницы же, казнители суть церковнии, да противятся насилию и мучителству богатых и отмщают убогия от насилия их. И епископи того ради не стужаеми пребывают.

Того же собора правило 97.

От [1024] царя да испросится соглаголник, рекше помощник заступлению о церковных главизнах, иже хитрость имеют, отмщати вещи церковныя и яко святители о приключающихся удобно возвещати могут.

Толкование.

И паки изволися отцем собора сего, якоже в 75-м правиле, угодно бысть просити от царя, яко да вдаст им власть поставляти местники (л. 279 об.) [1025] в церкви, еже суть казнители и судии, то самое служение и хитрость имущих церковныя вещи отмщати. Яко да противятся святители прилучающимся, коль краты аще нужда будет, и удобь зело могут в судища входити и церкви о таковых возвещати и оттуду помощи приимати.

Собора Перваго и Втораго в церкви святых апостол правило 9.

Аще святители или верныя согрешшыя или неверныя, преобидевше, биют или своею рукою или повелевше кому, да извергнутся. Подобает бо учением и наказанием и церковными запрещении безчинныя наказовати, а не ранами или язвами. Аще же не послушают властельскою (л. 280) [1026] рукою, да накажутся мстити.

Видели, ответотворче, управление святых богоносных отец, тако и у нас бысть с царьским советом, местницы на то, кому доведется какое наказание, а еже в церкви смиряли мы овогда, а иногда рукою помалу, того не отрицаемся и ныне творити врагом и безстрашным людем по образу Христову и по правилу святых апостол и святых отец.

Не погрешит истины и ныне, аще кто, взем бич, изгонит из церкви соборней прелюбы творящих и прочая беззакония, яже выше сих много явлено. Глаголя, дом Божий домом молитвы наречется, вы же властию мира сего сотвористе вертеп разбойником. (л. 280 об.) [1027] А яже о царьских заповедех кто хощет потребное ко исправлению и к наказанию церковному, в них да смотрит. Но едину от тех главизну вчиним, како православнии царие священство предпочитали паче царьства, а не как ныне, еже в лицо нам говорят, понося. Царь де един велик, а вас де много, не тот де патриарх, яко иной, чернцов де много у государя. А чернцы Божии раби и богомолцы царьския, а не раби, еже ныне архиереи и монастыри принуждены царьским величеством во все злое мирское дело и тягло и воинствовать, яко и простым человеком. Ох, увы, яко обогатихомся во злых. Обаче, аще что по нужи (л. 281) [1028] и деется, несть на ползу, якоже свидетелствует свитка новых заповедей царя Иустиниана главизна 1-я, сице глаголюща: Великая [1029] паче инех иже в человецех есть дара Божия. От вышняго дарована человеколюбия Божия, священничество же и царьство, ово убо Божественым служа, се же человеческими владея и пекийся. От единаго же и тогожде начала обоя происходят, человеческое украшающе житие. Якоже ничто же тако бывает поспешнее царьству сего ради, якоже святительская честь, о обоих самех тех присно Богови молятся. Аще бо они непорочни будут во всем и к Богу имут дерзновение и праведной подобно украшати начнут (л. 281 об.) [1030] преданыя им грады и сущая под ними, будет согласие некое благо все, еже добро человечестей даруя жизни. Сему быти веруем, аще священных правил блюдение сохранится. Их же праведно похваляемии и покланяемии самовидцы Божию слову предаша апостоли и святии отцы сохраниша и заповедаша.

Видели царьское правыя души произношение непорочных святых догмат лобзание и священства предпочитание и веры несумненныя глагол, все, еже рече, добро человечестей даруя жизни, сему быти веруем. И прочая.

Паки глаголеши, толкуя о одежди архиерейской, не видиши ли все облачение архиерейское, что есть кротость (л. 282) [1031] одежды и правды. Стиахрь образует ангелскую чистоту и свет [1032] архиерейскаго жития. Тако Господу глаголющу: Аз [1033] есмь свет миру, ходяй по Мне, не имать ходити во тме.

Почто слыша про свет, во тму беззакония отходиши? Христу глаголющу: Не имать ходити во тме. И паки Господу глаголющу: Вы есте свет миру.

Покажи нам собою свет, понеже и ты архиерейскою одеян одеждою, аще и недостойне носишь ю, по неправде твоей явно в писме твоем.

Послушай возлюбленнаго ученика Христова Иоанна Богослова, что есть свет, и навыкни. И [1034] си есть обетование, еже слышахом от Него и повелеваем вам, яко Бог свет есть и тмы (л. 282 об.) [1035] в Нем несть ни единоя. Аще речем, яко причастие имамы с Ним и во тме ходим, лжем и не творим истины. Аще ли же во свете ходим, яко Сам есть во свете, причастие имамы друг ко другу и Кровь Иисуса Христа сына Его очистит нас от всякаго греха. Аще свет, иже в тебе тма, колми паче тма. Которое ты причастие имееши ко другом по писанию своему, покажи ми.

Епитрахиль, низшедшая свыше, совершенная благодать Всесвятаго Духа. Писано есть: И [1036] се Аз послю обетование Отца Моего на вы. И инде: И дунув, глаголя, приимите Дух Святый, им же отпустите грехи, отпустятся, и им же держите, держатся. (л. 283) [1037] И паки: Но [1038] приимите силу нашедшу Святому Духу на вы. И паки: И бысть внезапу с небесе шум, яко носиму дыханию бурну, и исполни весь дом, идеже бяху седяще. И явищшася им разделени языцы яко огненнии. Седе же на единем коегождо их и исполнишася вси Духа Свята. И инде: И [1039] Аз вам глаголю, просите и дастся вам. И по мале. Аще убо вы зли суще умеете даяния блага даяти чадом вашим, колми паче Отец, иже с небесе даст Дух Свят просящим у Него. Но по заповеди Божией повелено от плод коегождо познавати, аще от Бога есть, от плод их познаете их, рече.

Плод [1040] бо духовный есть во всякой благостыни и правде и истине, искушающе, (л. 283 об.) [1041] что есть благоугодно Богови. И паки: Плод [1042] духовный есть любы, радость, мир, долготерпение, благость, милосердие, вера, кротость, воздержание. И по мале. Аще живем Духом, Духом и да ходим. Не бываим тщеславни, друг друга раздражающе, друг друга завидяще.

Ты же которыя от сих плоды в себе носиши? Не все ли противныя, по писаному: Или сотвориши древо добро, и плод его добр, или сотворши древо зло, и плод его зол. Тако и твое дело явлено есть, от дел и глагол уст твоих. Святый Бог да возмерит в день Судный противу твоих беззаконных смыслов.

Обаче же (л. 284) [1043] от отец [1044], епатрахиль есть по единому повести образу, уже, имже связавше злодеи Владыку Христа и распяша, по образному же видению есть препоясание царьское и ангельское знамение.

Поручи, глаголеши, прообразуют ужи, что были связаны руки Христовы. Аще и не правословил еси в сих, якоже последи скажем, обаче есть связание рук ужи знаменуют, почто тех не велел еси связати, дабы не действовали по неправде смысла твоего? Или паче поминая Владыку своего связана тебе ради, почто не постыделся теми связати бремя тяжко и неудобь носимо на брата своего? Сам же единым перстом не хощеши двигнути. Послушай Христова (л. 284 об.) [1045] наказания: Аще соблажняет тя рука твоя, отсецы ю. Лутче ти, беднику, внити в Царьство Небесное, неже обе руце имуще, ввержену быти в геену огненую, идеже червь их не умирает и огнь не угасает.

По Писанию святому: Нарукавницы [1046] ко благочестию и сопрятанию точию умышлены быша. По иному же образу нарукавницы яже знаменуют вседетелное Божие, яко вся дела создания Той сотвори. Сие глаголет и молитва: Десница Твоя, Господи, прославися в крепости и руце Твои сотвористе мя. По другому же образу нарукавницы являют силу, еже Христос победи враги своя.

Пояс, глаголешь, (л. 285) [1047] связание Христово. Как в первых солгал, так и в сем ничто же истинствуеши. По Писанию же пояс являет благолепие, им же Христос, царьствовав, препоясался благолепною и красною силою Божества.

Инде же глаголет: Пояс иже знаменует силу, данную в чресла его, сиречь в среду его, целомудрия ради и чистоты да будет связан девством и чистотою. Тем же и глаголет псалма приличное: Благословен Бог, препоясуй мя силою и положи непорочен путь мой, си есть живот мой непорочен, сиречь честный и добродетелный.

Что же ты, слышай и глаголяй, препоясуйся, ниже якоже сам глаголеши, (л. 285 об.) [1048] яко связан пребываешь. Связаный не к тому деяти, что может, но едино да свободу получит [1049]. Ты же сам связан, по писаному, многими путы железными нерешимыми, по правилом святых апостол и святых отец, и о себе не судиши праведно, лицемере, но нас, труждающихся в слове Божии, наскачеши, ничто же тебе зла сотворшу, якоже и ко всем.

Что же все не по ряду писал еси о священных одеждах архиерейских и сие скудно зело, как сам малоумен, так и святыя таинства описал безумно. Не менше есть знамение епигонатии, еже повешается о поясе. Глаголет же ся, яко се являет (л. 286) [1050] победу смерти и воскресение Спаса Христа, иже имать образ и вид меча. На нем же воображается распятия или воскресения образ, якоже и молитва сие являет: Препояши оружие твое по бедре твоей силне. Ко Христу обращся, пророк глаголет: О [1051], силне, препояши оружие твое по бедре твоей, сие есть меч твой на бедре твоей, и борися с мучителем. Оружия же Христова не суть мечи и копия, но сила мучителная, юже употребляше на враги. Силна нарече его за Божество, еже соединися со Христом, красотою твоею и добротою твоею, красотою души и добротою добродетелей. Красоту и доброту, глаголет, за безгрешное и на ляцы испей и царьствуй (л. 286 об.) [1052] истины ради и кротости и правды, и распространи оружия твоя и стремление твое, и да будут спешна дела твоя, и царьствуй, помогая немощным и безсильным. Сие глаголем и в молитвах: Да приидет Царьствие Твое. Сия вся делай и побеждай. Глаголет сам Господь: Аз [1053] есмь и путь и истина и живот. Сице бо лепо нам исполнити всяку правду или сотворити оноя, яже выше рекохом, да сееши на земли истину и кротость и правду вместо лжи и суровства и неправды, Где же твоя правда, называеши палицу победою? Глаголеши, яко палица смертную победу. Какая палица? Есть у нас палица, глаголется, которою дебелыя (л. 287) [1054] дрова разбивают. Может же таковою палицею и дебелость непреподобнаго ума твоего разбити кто? И паки палица есть, аще кто хощет сырость сластолюбия от кого отгнати, склинивая и бия божественною палицею и изгнетает. Аще ли о жезле архиерейском пишешь, послушай Писания. Жезл, убо его же держит архиерей, являет власть архиерейскую к людем, якоже Моисей и Аарон жезлы чюдотворяше во Египте и в мори и в камени.

Тако и ныне жезл правды чюдотворит в сердцах злобы египецкия содержащих истину в неправде. Аще кто яко змия лютостию потребится от жезла правды, аще кто яко вода, (л. 287 об.) [1055] напоеваяй лестных напоений, ссядется яко кровь на возгнушение пиющим. Аще ли кто, яко фараон жестокосердый, накажется жабами и скнипы и прочими язвы, дондеже потонет, яко олово в воде, зелне в море тма вечныя, идеже червь их не умирает и огнь не угасает.

Паки жезл являет власть Святаго Духа и укрепителное людей и паствителное, и еже наставити мощи и наказати непокоривыя. Слыши, что глаголет, являет господьство, еже дает архиерею Святый Дух и хранителное людей, еже пасти и питати духовно словесныя овцы и еже наказовати непокоривыя и жестосердыя, и собирает (л. 288) [1056] оныя, елицы суть далече от чина добраго христианскаго. Сего ради имати две главы на верху главы, яже нарицают рукоятия. Да изгонит зверовидная еретики, да не вредят православныя люди. Еще же являет и Крест Христов, им же побеждаем и стоим известни и утвержени, и основани в вере, и воинствуем, и влечемся ко Христу, умерщвляюще страсти, изгоняем враги и есмы хранимы от всякаго искушения. Доволно ти есть о палице, еже ты глаголеши? Не будет виновен греху, кто взяв палку и отгнал бы тя аки волка или яко пса беснующагося и угрызающаго неопасныя человеки.

Сакос или палиставриа, (л. 288 об.) [1057] еже ради страсти и распятия правдуя истиною образует, глаголеши.

Богоноснии [1058] же отцы знаменуют сакос или фелонь святительскаго устроения знамение чистыя и простыя и от страстей свободныя души. Полиставрий, сиречь многокрестный, яже знаменует червлену ризу, в ню же облекоша Христа жиды, по збытию пророческих глагол: Совлекоша с Него ризы Его и облекоша И в ризу червлену. Якоже и инде пишет: Кто Сей приходяй от Едома? Едом толкуется земный или избраный или червленый. Таже глаголет червленость риз Его: от винограда Восора. Чесо ради суть ризы твоя червлены, яко от прания грозди. Являет одежду (л. 289) [1059] Христову, сиречь плоть, яко омочися кровию на Кресте. И паки, яко носи червлену ризу Христос, в страсти грядый на Крест, сею одеждою показуют архиерее, коего Архиерея слузи и поборницы, яко верховный апостол Павел глаголет: Имуще [1060] убо Архиерея велика, прошедшаго небеса Иисуса, Сына Божия, да держимся исповедания. И паки: Бог [1061] же мира возведый из мертвых Пастыря овцам велика кровию завета вечнаго Господа нашего Иисуса Христа, да совершит вы во всяком деле блазе сотворити волю Его, творяй в вас благоугодное пред Ним, Иисус Христом.

Ты же како держиши исповедание Его, то есть Евангелие: Мир Мой даю вам, мир Мой оставляю вам. (л. 289 об.)[1643] И паки: Идеже внидите во град или в дом, глаголите, мир дому сему. Ты же который мир принес, яже повсюду свидетельствуют писания твоя вся, яже полна неправды и беззакония? По сему вас и познают, глаголет Христос, яко Мои ученицы есте, аще любовь имате между собою. Ты же которую любовь пришед показал, развее свара и ненависти, якоже диавол? Ибо всяк ненавидяй брата своего, человекоубийца. И прочее. Вы отца вашего диавола есте и похоти отца вашего творите. И паки: Несте от овец Моих, овца Моя гласа Моего слушает.

Паки глаголешь: Омофор, что на рамо заблудшее (л. 290) [1062] овча восприим, понесе. Омофорий [1063] же конечный налагает архиерей, ему же подобает соделану быти от руна, четыре кресты имуща, сугубая одежда благодати. Назнаменует же и слову от страстей умерщвение, ангельский виде навершая и свет быти и во свете жити. Просветително имея навыкновение и силу, просвещатися и просвещати. Или паки омофор по иному смышлению заблудшее овча знаменует, еже прииде на рамо, взем Пастырь добрый, очистив и просветив, и освятив, и Отцеви крестом жертву принес. И еже от всех умерщвление и славу Тому даровав и едино с Ним непреложно быв. Кресты же (л. 290 об.) [1064] знаменуют, зане Христос ношаше на раме своей Крест Свой. Еще же и архиерее хотят жити, якоже бе житие Христово, взимают Крест Его на рамена своя, еже есть злострадание, зане Крест есть скрижаль злострадания.

Ты же почто не взял еси креста своего, но и носящих Крест Христов хулишь? Господу свидетельствующу: Иже не возмет креста своего и вслед Мене не [1065] грядет, несть Мене достоин, враги Креста Христова, имже кончина погибель, имже Бог чрево. И паки: Слово [1066] крестное погибающим убо юродство есть, нам же спасаемым сила Божия есть. Зане писано есть: Погублю премудрость премудрых и разума разумных (л. 291) [1067] отвергуся.

Панагия, глаголеши, Бога слова воплощение. Не приходит Господь, ниже воплощается в сердцы злобы. Аще [1068] кто любит Мя и слово Мое соблюдет, и Отец Мой возлюбит его и к Нему приидете и обитель в Нем сотворите. И паки: Якоже заповеда Мне Отец, тако творю. Востаните, идем отсюду, откуду, от презорников святых Его заповедей. И паки. Якоже [1069] розга не может плода сотворити о себе, аще не будет на лозе, тако и вы, аще во Мне не пребудете. Аз есмь лоза, вы же рождие. И иже будет во Мне, и Аз в нем, той сотворит плод мног, яко без Мене не можете (л. 291 об.) [1070] творити ничесоже. Аще кто во Мне не пребудет, извержется вон, якоже розга, и изсышет, и собирают ю, и во огнь влагают, и згарает.

Митра есть, глаголешь, царьское священство. Но мы уже выше сих [1071] написали, яко священство боле есть царьства. Почто предваряеши царьством? Увеждь в вышеписанных, яко и царие предпочтоша священство паче царьства. Почто низводиши священство, горе седящее на Небеси? Не [1072] поминаеши ли хотящих обезчестити священство Дафана и Авирона, что случися тем. И паки Саул и Озия паче достояния своего поискавше, и еже имевше погубиша, но мы не едино, (л. 292) [1073] но три достоинства с преимителством имамы ныне, ибо Царьствие имамы восприяти и священницы бываем, приносяще в жертву телеса наша. Представите [1074] убо уды ваша жертву живу, благу и угодну Господеви, рече. И с сими и пророцы поставляемся, яже око не виде и ухо не слыша, сия откровенна суть нам. И [1075] инако же и царие бываем, аще восхощем обладати безместными помышленми, яко бо сицевый царьствует и наипаче, нежели иже диадимою обложеный. Уже сие сотворю ти явленно. Многи имать воинства онь, но имы паче сих множайшая имамы помышления. Несть бо счести неисчетное мыслей мно(л. 292 об.)жество [1076], еже в нас. Не множество же токмо есть видети, но и многия во множестве сем помыслов, и воеводы, и чиноначалники, и десятоначалники, и стрелцы, и пращере. Что ли другое творит царя, ризы ли? Но мы лутчею и добрейшею обложени есмы одеждою, юже ни тля снедает, ниже время изнуряет. И венец имамы различный, иже славы, иже щедрот Божиих. Благослови [1077], душе моя, Господа, венчающаго тя милостию и щедротами. И иже словы: Славою [1078] и честию венчал еси его. И благоволения, яко оружием благоволения венчал еси нас. И иже благодати, венец бо благодати (л. 293) [1079] приимеши о твоей главе.

Видел ли еси многоплетеную и благообразнейшую митру, но обаче свыше тая, опаснее да истяжем о царьстем. Царя [1080] ли речеши, но ниже он безпечалное живет житие, но многих скорбей и попечений исполненое, не бо на диадиму да взираеши, но на вдаяние и попечение, им же ему венец мятеж раздает. Ниже на багряницу гляди, но на душю, паче оноя багряницы [1081] чернеющуюся. Не тако венец вяжет главу, якоже душю попечение. Ниже на оруженосцов множество да взираеши, но на печали множества. Ниже бо простую храмину обрести, толиких исполненую (л. 293 об.) [1082] попечений еликих царьския, смерти на всяк день ожидающии утех самых, и прежде трапезы кровь зрится проливаема. И прежде пития вместо пития крови наполняется и присно есть исполнен помост царьский кровьми.

Но Царьство Небесное не таково, но поеже прияти его, мир, живот, радость, веселие. А яже в царьствии земном, коликих зол исполнено есть, коликия многажды басни от сих сложены быша, всяческая, негли яже на игралищи сетования, от царей начинаются и басни, множайшая яже суть в баснях от бывших образуются.

Аще хощеши, и от Писания речем. Саул первый царьствова, (л. 294) [1083] но веси, како и сей погибе, безчисленых зол искусився. Кто праведнее Давида и той, греха не избыв, многи напасти пострадав, скончался. Кто ли мудрее Соломона, и сей во гресе умер. Тако и Авив, тако Иезекий, тако Иосия, тако и прочии царие. Но мы печалуемся не о сих, о нихже царие, но о сицевых, о нихже приобретение имамы велия, якоже пишет апостол: Печаль бо по Бозе, покаяние нераскаяное во спасение соделовает, но ниже царие развее молитв священнических [1084] где любо подебу показаша.

Мы же плодоприяти нечто велие благо и зело веруем, яко вся исправим, аще восхотим вси единодушно руце прострети к Богу (л. 294 об.) [1085] о всех наших сетованных.

Такова [1086] ополчаемся на враги молитвами и молбами, аще бо с вооружеными ополчахуся древнии колми паче ныне подобает. Тако [1087] Авраам победи Хедорлаомора с прочими четырми цари. Тако [1088] Моисей фараона потопи со всем воинством его. Тако победи Амалика в Рафиде со всем воинством его. Тако [1089] Ханаана победи. Тако Сигона царя Амморейска победи. Тако и Ога царя Васанска и вся царьствия Ханаанска победи. Тако [1090] Иисус Наввин Ерихон взят. Тако Гаи взят и цари поби 31 и вся землю взят Иисус, якоже заповеда Господь (л. 295) [1091] Моисею, и даде ю в причастие Израилю. Тако [1092] Июда Ханаана и Ферезея поби. Тако Гедеон с трема сты 120 000 поби и князи Орива и Зива, и Зевея, и Салмона цари Мадиамли и прочии судии, Варак, Самсон, Иеффай и Самоил вси молитвою и верою победиша царьствия. Содеявше правду, получиша обетование.

Тако и Саул, донележе не согрешив во всесожжениих и жертвах, и священства сана не восхити. Тако и Давид победи враги своя. Тако и Соломон, Иезекия и Иозия, донележе в своих уставох пребывал и священства не преобидел. Тако и Константин царь великий и [1093] (л. 295 об.) [1094] первый христианский Максентия победи и прочия враги своя.

Тако и вси православнии царие, аще идеже оружия требоваху и ополчения и рати, оружие оставльше, на молитву прибегаху.

Но ниже [1095] все молитвам святых оставльшем нам праздном быти подобает и к злобе ничесо же притекати и ничесо же в добродетель приводящих держатися, ниже паки делающим благая презирати пособие оно. Много бо может молитва бываемая от нас, но егда и мы делаим благая.

Паки глаголеши, яко [1096] что архиерейское облачение являет терпение, кротость, целомудрие (л. 296) [1097] благоизбранная всех добродетелей правда.

Хвалиши терпение инем, а сам ничтоже терпя являешися. Кротость ублажаеши, а сам яко лев яришся или яко пес от явных твоих сердечных сокровищ неистовствуешь. Целомудрие похваляеши, сам присно прелюбы дееши. Добродетель и правду любити закониши, сам не престаеши враждуя. Вы бо, рече Господь, оправдаете себе пред человеки, Бог же весть сердца ваша.

ВОПРОС, ГЛАВА 24

Тишайший Государь наш и всещастливейшой Царь вручил Никону, чтоб досматривал всяких судеб церковных; и се есть что подарил его всеми привилеи, которыя, велми почитаючи Констянтин Великий Папу Римскаго Селивестра, вручил ему, Папе, також и Никону на письме подал многие привилеи Государь Царь.

Ответ

На воли то есть цареве почитать которых хощет, а наипаче егда ради достоинства и чести церковной делают. Однакож и тыя, которыя приимают чести от царя, надобно, чтоб бережно и опасно принимали и оберегали. Царь Артаксеркс рекл к Аману, ближнему своему боярину: что зделаю человеку, котораго хочю учтить? И Аман, чаючи, что он будет учтен, отвещал: чтоб тот человек, которой имеет быть учтен, надобно чтоб был оделся в добро — светлыя ризы и всел бы на лошадь царьскую и пошел бы чрез улицы, возглашая: так будет человеку, котораго хощет царь учтить; кончее так зделал Великий Констянтин Селивестру и Устиниян царь Агапиту, который посвятил Мину патриарха Цареградскаго: Иустиниян убо держал лошадь, на которой седел Агапит, за узду, как и благочестивейший делает царь Алексей Михайлович на Вербное воскресение. Однакож не вси знают разсудить, разсуждение бо всех правд мати. Похвалился сатана в дарех, которыми подарил Господь Бог его, не умеючи их употребити смирно. Лутче бы и пожиточнее было Никону меншие привилеи, потому что оные подвышли его и в спех привели; присматривался в них Никон как в зеркале и прилучилося ему то, что пишут виршописцы о Нарцысу, которой в речной воде Ары сталной посматривал свое лице, и увидя свое лице, чаючи, что не его, приклонился, хотя целовать; и как приклонился сверх потребы, утонул.

РАЗОРЕНИЕ 24-му ВОПРОСУ И ОТВЕТУ

Ты глаголеши, совопросниче, тишайший государь наш и всещасливой царь вручил Никону, чтоб досматривал всяких судеб [1098] церковных. И се есть что (л. 296 об.) [1099] подарил его всеми привилеи, которыя, велми почитаючи Констянтин Великий папу Римскаго Силивестра вручил ему, папе. Такоже и Никону на писме подал многия привилеи государь царь.

Страха и гордости бесовския полно твое вопрошение, совопросниче, обаче не от нас початок сей есть, но твоя вина, занеже ты своим вопросом принуди нас на сий ответ.

Глаголеши, яко тишайший государь наш и всещастливой царь. Про всещастливство царьское отвечать нам не треба, ведают вси людие счастие и безсчастие царьское, или койждо какову благодать приял от его царьскаго счастия. А еже глаголеши, что нам (л. 297) [1100] вручил, чтоб досматривал всяких судеб церковных, то уже сия скверная хула и денницы превосходит гордение. Той бо рече, поставлю престол мой на небеси и буду подобен Вышнему. Зде же яко и над Богом имети власть мнится быти.

Глаголеши, яко тишайший государь наш и всещастливой царь вручил Никону, чтоб досматривал всяких судеб церковных. Како убо глаголеши, совопросниче, яко царь вручил Никону всяких судеб церковных? Не виде в вышеписаных, яко не от царей началство священства приемлется, но от священства на царьства помазуются. Тем же явлено есть множицею, яко священство царьства (л. 297 об.) [1101] преболе есть. И ты глаголеши, яко царь вручил Никону, чтоб досматривал всяких судеб церковных. И се есть что подарил всеми привилеи. Которыми привилеи? Воеже ли вязати и решити? Мы инаго себе Законоположника не вемы, разве Христа, иже даде святым Своим учеником и апостолом власть вязати и решити, глаголя: Приимите [1102] Дух Свят, им же грехи отпустите, отпустятся, и им же держите, держатся. Которую же царь дал? Еда сию? Ни, но похитил, якоже ты свидетельствуеши и вся дела его беззаконная. Что же ли дела его Церковию обладать, священными вещми богатится (л. 298) [1103] и питается, славится в них, яко вси церковницы митрополиты, архиепископы и епископы, священницы и вси причетницы покаряются, работают, оброки дают, воюют, судом, пошлинами владеет. Мы же таковаго привилея не точию не приемлем, но и гнушаемся и бегаем, яко змиина рютия и аки антихристова взаконения гнушаемся по Христове заповеди, глаголющей, якоже назнамена Христос о нынешних настоящих летех, глаголя ко учеником: Блюдитеся, рече, да никто же вас прелстит. Мнози бо приидут во имя Мое глаголюще: Аз есмь Христос. И многи прелстят. Не изыдите во след их, то есть не покоряйтесь (л. 298 об.) [1104] заповедем тех.

Тако и божественный апостол Павел учит ны: Блюдите [1105], убо опасно как ходите, не яко немудри, но яко премудри, искупующе время, яко дние лукави суть. Сего ради не бывайте несмыслени, но разумевающе, что есть воля Божия. И паки: В [1106] премудрости ходите ко внешним время искупующе. И паки: Молю [1107] убо вы, братие, щедротами Божиими представите телеса ваша, жертву живу, святу, благоугодну Богови. Словесное служение ваше и не сообразуйтеся веку сему, но преобразуйтеся обновлением ума вашего, воеже искушати вам, что есть воля Божия благая и угодная и совершенная. (л. 299) [1108] И паки: Никто же вас да лстит суетными словесы. Сих бо ради грядет гнев Божий на сыны противления, не бывайте убо сопричастницы сим. И паки: Тайна [1109] уже беззакония деется. Якоже и Господь рече: Услышати [1110] же имате брани и слышания бранем. Зрите, не ужасайтеся. Подобает бо всем сим быти, но не тогда есть кончина. Востанет бо язык на язык и царьство на царьство, и будут глади и пагубы и труси по местом, вся же сия начало болезнем.

Видел ли, совопросниче, что деется. Не вся ли в нас суть? Но послушай последования, что глаголет Христос, не ложный пророк (л. 299 об.) [1111] с клятвою глаголет быти с ним: Аминь, глаголю вам, небо и земля прейдет, словеса же Моя не мимоидут. Тогда предадут вы в скорби и убиют вы, и будете ненавидими всеми имени Моего ради. Тогда, когда [1112] кто станет за слово Божие, якоже и ныне мы, и друг друга предадят, и возненавидит друг друга. Не се ли суть в нас? И паки: И мнози лжепророцы востанут.

Кто же лжепророцы? Газской митрополит. Ничто же от Божественых писаний глаголет, но от себя, и правила таковое писание ложное наричют. А иже ложное писание пишет, (л. 300) [1113] яве яко лжепророк он есть. И за умножение беззакония и изсякнет любы многих, котораго беззакония яве есть, яко кто чрез волю Божию восхитит кто не сущее свое, якоже государь царь восхити Церковь и достояние Ея все в свою область беззаконно. И того ради и нас ненавидит, якоже прелюбодей никогда может любити законнаго мужа, но присно помышляет о нем злое. А еже глаголеши, совопросниче, что царьское величество вручил Никону, чтоб досматривал всяких судеб церковных, что вручил, его же сам не имеет, священство ли, но сам того не имеет. Како (л. 300 об.) [1114] может инем преподати, аще сам кто не имев? Аще ли глаголеши, яко свяшенства благодать хулит царь Святаго Духа благодать и его же благодатию мы вси приемлем благодать. А иже хулит на Святаго Духа, не имать оставления ни в сий век, ни в будущий. Кто же ли свидетельствует? Сам Христос Бог. Но власть ли вязати и решити, и се несть его власть подаяти, но Христа единаго. Той бо подая учеником, глаголя: Приимите [1115] Дух Свят, им же отпустите грехи, отпустятся, и им же держите, держатся. Но хощеши ли истину навыкнути, яко и сам той диадимою украшаяйся, священнической власти повинен, (л. 301) [1116] и его же свяжет кто по правде на земли, будет связан на небеси. Сему быти, истинно веруем.

А его же царь свяжет временно или убиет, имать о сем и ответ пред Господем Богом в день Судный дати. На се же Христос научил не боятися от убивающих тело, душю же не могущих убити. Но боятися подобает могущаго и душю и тело погубити в геене огненней. А еже глаголеши, что царь вручил нам, чтоб досматривал Никон всяких судеб церковных, солгал ты, злословче, ниже царь нам дал что любо власть которую, ниже мы требуем, что любо кую власть, ведая Божественыя (л. 301 об.) [1117] правила, яже суть выше писано.

Всяк мирскою властию Церковь прием, извержется. Аще и ныне Бог терпит такому его беззаконию, что чрез Божественыя уставы избирает, его же любит, и ставити повелевает. Вси тии не избраны от Бога и недостойни. За всех же имать ответ дати государь царь пред Господем Богом. Како может кто дати, его же сам не имеет.

Подобает [1118] ныне паки рещи Божие слово, еже есть. Блюдитеся, рече, да никто же вас прелстит и многи прелстят, не изыдите во след их. Подобает же зде со опасством истязати слово, чесого Христос заповедает блюстися, (л. 302) [1119] понеже провидец есть Бог, провидев яко мнози прелстятся. Чим и от кого? Не от самаго антихриста прелщени будут, но якоже божественный апостол Иоанн Богослов глаголет: Дети [1120], последняя година есть, и яко слышасте, яко антихрист грядет. И ныне антихристи мнози быша, и от сего разумеваем, яко последний час есть. От нас изыдоша, но не беша от нас. Аще бо беша от нас, пребыли убо беша с нами, но да явятся, яко не беша вси от нас. И паки: чадца, никто же да лстит вас. Творяй правду праведник есть, якоже он праведен есть. Творяй грех от неприязни есть, яко от исперва (л. 302 об.) [1121] неприязнь согрешает. Сего ради явися Сын Божий да разрушит дела неприязненна. Всяк рожденый от Бога греха не творит, яко семя Его в нем пребывает, и не может согрешати, яко от Бога родися. Сего ради явлена суть чада Божия и чада диаволска. И паки: Разумеваяй Бога, послушает нас, иже несть от Бога, не послушает нас. О сем разумеваем Дух истинный и дух лстеч.