ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Всех святых апостол правило 1.

Койждо [1620] в даном ему чину да пребывает и не преступает заповедей, не суть бо наша, но Божия, якоже рече Господь: Слушаяй [1621] вас, Мене слушает, и слушаяй Мене, слушает пославшаго Мя, и вас отметаяйся, Мене отметается, и Мене отметаяйся, отмещет пославшаго Мя.

Святых отец собора, иже в Халкидоне, правило 39.

Причетницы [1622] между собою распрю имуще, аще оставлше епископа к мирским судиям (л. 995) [1623] приступят, по правилом вину да приимут. Причетницы же, аще имеют что на епископа, да ожидают собора, аще же епископи на митрополита Константиняграда патриарху да возвестят.

Толкование.

Аще причетницы имать что на причетника, не подобает ему судитися пред мирскими судиами, но от своего епископа. Аще же оставлше своего епископа, к мирскому судищу приступят, по правилом запрещение да приимут. Такожде и причетник, аще имать нечто на своего епископа, да приходит к митрополиту страны тоя, егда в реченое время соберутся к митрополиту всея области его епископи, (л. 995 об.) [1624] тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится, под ним же суть епископи и митрополиты всех областей страны тоя, или от патриарха Константиняграда судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

Святых отец собора, иже в Карфагене, правило 15.

Епископи [1625] или презвитери или диа(л. 996)кони [1626] в греховных вещех оклеветаеми суще, аще оставлше церковныя суды и к мирским судиам прибегнут и осуждени будут, свой чин погубят. Аще же и оправдани бывше градским судом, иже тому приложившеся, свой погубят чин. Судии же церковныя, аще не обличени будут по милости или по мзде или по вражде или прежде отгнани собором бывше, да не противятся. Аще же обе стране изберета судию, суда их да не преступят.

Толкование.

Епископом и презвитером и диаконом не подобает отрицатись церковнаго судища. Аще ли кто от них оклеветаем о гресе, церковный (л. 996 об.) [1627] оставит суд и ко градским судиам приступит и пред теми исповесть вину и судится. И аще неповинен явится и осужден будет от градских судей, свой погубит степень. Аще же не о гресех будет нань вина, но о имении или о злате или о неких мирских вещех, и прилучится ему о таковых препрети и оправдану быти, подобно ему судище церковное оставлшу и к мирским судиам приступлшу, и от тех судившуся, аще убо хощет тех суд держати и вопросит имения или злата или инаго что, о нем же, препрев, оправдан бысть, свой степень (л. 997) [1628] погубит. Аще же преобидев мирский суд и не возмет, ни вопросит ничто же, о них же оправдан бысть, во своем степени да пребывает. Аще же кто от епископ осужден, и осужден быв от них, к болшим церковным судиам возглаголет на тех, иже осудиша его первое, аще не будут отлучени, или по гневу, или по любви, или по некоей мзде суд сотворше, в том суде осужденый да пребывает, и елико от повинных епископ и причетник, аще же оба суперника, и оклеветаемый, и оклеветаяй, оба избереста церковныя судии и восхощета судитися пред ними, аще и мне их есть. (л. 997 об.) [1629] Епископа убо оклеветаема дванадесят епископа судита, презвитера ж шесть епископ и седмый свой ему, и диакона трие и четвертый свой ему епископ, якоже во втором на десять правиле сего собора написахом, судивша же ся пред ними и осуждена бывша, не имата како на суд их припадати, но пребывати в том, якоже тии судиша и собор исправляет невежество или неправду судии, како убо прият будет, иже сам избрав церковныя судии, и словом и делом непорочны глаголя. И по сем паки глаголет, яко не добре, ни по правде осужден бых от них, или ино некое поречение нанося на священныя мужи, их же сам избра.

(л. 998) [1630] Того же святаго собора правило 104.

Людскаго [1631] суда у царя просяй, не епископ.

Толкование.

Епископ или причетник о гресех оклеветаем и отрицается церковнаго судища и просит от царя мирских судей, таковый своея чести да будет лишен.

Григория Богослова о Святем Афанасии слово 13 стих 22. Толкование.

Где скверному соборищу с простыми людьми судяху преподобныя епископы и жития их беззаконно истязоваху, како бо рещи небеззаконно, еже епископская дела пред всеми истязати и смешати несмесная и пред внешними людьми о тайных вещех вопрошати. Иереом бо лепо от епископ судитися, а не от внешних судей, (л. 998 об.) [1632] епископом же самем межи собою, а не пред людми. Они же нечестивии осуждающе и великаго Афанасия, якоже прежде о руце, тако и паки некто глаголаше нань, облыгая, яко по воли его святую трапезу испроверже и потир разби и ина таковая тайная пред людми испытанию быти устроиша. Не бо истина бе, но клеветники наяша, обещаша дати им мзду доволну, аще от вашея клеветы осудятся судимии епископи. И последованием таковых клевет благочестивии святителие от церквей изреваеми бываху, вместо ж их вводими нечестивии. Тии же просими бяху рукописания нечестия и пишущии таковая предстояху и (л. 999) [1633] чернило готово. И от сего мнози и от правоверных прелстишася в таково написание злочестия, заеже не отпасти от престола. Аще ли же лепо есть и вины сих рещи, ими ж нечестию подклонишася, обретаю четыре. Первое страхом нецыи смущени бывше. Второе же, яко имением нецыи порабощаются, прелстившеся, и предают истину на лжу. Третие же, яко и ласканием не утвержени прелщаются. Четвертое ж и хуждьшее, или неразумием окрадаеми бывают нецыи, обаче аще и предложат таковое во ответ святители, глаголюще, яко не разумели есмы, но не будет им от сего нимало ползы. Простейшим бо (л. 999 об.) [1634] довлеет таковое рещи, не доведущим Божественаго писания, людин бо простый се пострадав неведением, малу милость получит. Учителем же како не безместно се рещи, иже и других неведения исправляти вчинившихся, ни закон греческий, якоже мню не весть кто, аще и от грубейших будет зело и неученых, яко николи же помогает злотворящим за невежствие. Аще быша и тмами во ответ предложили когда таковое, спасения таиноводцем, церковным началником, епископом, не ведети всего спасения начала, еже о Христе благочестие и вера святых апостол и святых отец предания Церкви. Аще (л. 1000) [1635] и во иных будут прости и не глубоцы разумом, обаче буди мало во ответ, по моему бо слову, иже от неведения последствовавшим нечестию, что, рече, хощем рещи от других, елицы и разумом остри суще и мудрость в смысле имуще, и прелщени вин ради предреченых властелем в нечестие повинушася. О сей страсти аз многащи плаках зря излияшееся нечестие на мнозе и воздвигшееся гонение на иже праваго слова сущих от неистинных представник слова, но лукавых. Мнимых убо пастырей быти Христову стаду, делом же волков поистине и губителей стаду. О таковых бо рещи со пророком Иеремием: Поистине (л. 1000 об.) [1636] яко пастырей изумишася. И паки: Пастырие мнози растлиша виноград Мой и часть желанную посрамиша, Церковь Господню глаголю, собраную и украшеную многими подвиги и закланми, еже прежде Христа, глаголю, пророки и проповедники и по Христе апостоли и мученик множества, над всеми же сими великими еже о нас самаго Христа страстьми.

Богослов, слово 9 стих 56.

Тогда [1637] убо подвигшуся ипарху разгоретися вящшею яростию и от седалища востати и острейшима к нему воспрети словесы: Что же, не боиши ли ся власти, рече, да нечто будет, ничто же постражду, да нечто от многих едино, (л. 1001) [1638] яже моея силы суть. Василий рече: Кая? Да скажут бо ся и нам. Ипарх рече: Разграбление, изгнание, мучение, смерть. Василий отвеща: Аще что и ино прети, сих бо нас ничто же касается. Ипарх рече: Како и коим образом? Василий рече: Зане убо разграбления не ятен, иже ничто же имея, разве аще сих требуеши власяных моих рубищ и книг мало, в них же все мне житие. Изгнания же не знаю, иже николи же местом описан, и ниже сию вменяю мою, на ней же обитаю ныне, и всю мою, в ю же аще повергуся, паче ж Божия вся, Его же преселник аз и пришлец. Муки же, что убо возмут, (л. 1001 об.) [1639] не сущу телеси, разве первую глаголеши язву, тоя бо ты единыя господин. Смерть же благодетель ибо скоро мя послет к Богу, Ему же живу и гражданствую и вящшим умрох, к Нему же тщуся издалеча.

Толкование.

Тогда убо, рече, подвигшуся ипарху, еже есть паче возгоревшуся яростию, сим хотя устрашити святаго, начат к нему острейшима словесы со прещением глаголати. Паче недоумевся рече, ко власти притече и како ты не боиши ли ся власти. Но он: Что ради ми рече? Власти твоея боятись, да не будет, что ни постражду. Ипарх с тягостию рече: Прашаеши, да нечто постраждеши от многих, (л. 1002) [1640] яже в моей области суть. И святый абие, и кая суть, ипарше, да сказана будет. Он же изочте: разграбление имении, отгнание, мучение, конечное смерть. Святый же противу сим отвеща: От сих убо мне ни едино касается. Ипарху о сем удивльшуся, нача вопрашати святаго: Како глаголеши, рече, сим тебе не касатися, человеку сущу единому от многих. И святый: Лучше убо грабящих сам своея надежда ради Царьствия Небеснаго разграбих и ничто же ныне имея, разграбления не боюся. Отгнания же страха изменихся, едино отечество горе рай ведый, всю же землю, яко преселение удаления зрю, по глаголу Давида пророка: Господня есть (л. 1002 об.) [1641] земля и концы ея, аз же пришлец есмь и преселник, якоже и вси отцы мои. Мук же не боюся, что бо и возмут, не обретше тела, от воздержания и печали измождену, разве се глаголеши, яко первую и вторую ми язву нанесеши, могущую ми смерть сотворити. До сего бо во твоей власти есть, но аз апостолски рещи, по вся дни умирая умерщвением плоти, когда убоюся смерти, но яко благодетелницу вменяю, Богу мя препосылающу, Ему же живу и служу и тщуся издавна явитися лицу Его. Бедно же ми, еже не пострадати мученическа подвига за истину.

Богослов, стих 57.

(л. 1003) [1642] Сим [1643] удивлшюся ипарху, ничто же, рещи, даже доныне сице мне беседова и с толицем дерзновением, свое приложив имя, ниже бо епископу, рече, убо случися еси или всяко убо [1644] сим стязался бы нравом. О сицевых подвизаяся, иная убо кротцы мы, ипархе, и всякаго инаго смиреннейши и се заповеди повелевающи, и не яко толице державне, но ниже отключившихся единому брови возводящи. А идеже Бог беседствуемо и предлежащее есть, иная не брегущи, к тому единому зрим. Огнь же и меч, и зверие и иже плоти стружущии нокте, пища нам паче суть нежели ужас. Противу сим досаждай прети (л. 1003 об.) [1645] твори все, еже что убо будет хотящу ти власти насладися, да слушает сия и царь, яко нас убо не поймеши, ниже преприши соприложитися нечестию и аще претиши лютейша.

Толкование.

Сими, глаголет Богослов, удивлшуся ипарху и рещи, приложившу имя свое, яко мне Димостенови ни един же и доныне с таковым дерзновением беседова. К нему же святый: Всяко, рече, яко николи же получил еси епископа. Аще ли бы получил, и он такоже быти без страха и со дерзновением беседовал, за истину благочестия подвизаяся. Мы убо, о ипарше, о инех смирени есмы ко всякому человеку. Се нам повелевает (л. 1004) [1646] заповедь Божия, понеже и Он волею нас ради смирися, быв послушлив до смерти, якоже свидетельствует божественный апостол, пиша к Филиппиком. Тем же и мы подражающе, волное Его смирение елика сила, ни наихуждша не возносимся, но и к тем с милостию смирени есмы, не возводяще брови на высоту. А идеже вера страждет и отщетеваемся Бога, аще и сана лишают или и на лютейшая предлежат пострадати, не смиряемся, но вся уметы вменивше, о Сем единем подвизаемся. Предлежащая ж мучения, аще огнь или меч или зубы зверей и строгания плоти, сия суть ужасения недоблим и страх (л. 1004 об.) [1647] малодушным. Нам же сия сладостна и тощно пищи приемлема. Тем же твори, еже хощеши и власти насладися, муча мя. Да слышит же, рече, сия и царь, яко мене убо не удержи, ниже можеши сотворити и ереси твоей сообщитись, аще и лютейша некая воспретиши.

Богослов, стих 58.

Елма сия рещи, и слышати ипарху и сопротивление уведати мужа, тако не ужасно и непобедимо, сего убо вон пустити и преставити не к тому ж с тем же прещением, но неким говением и уступлением. Тому же ко царю пришедшу, яко имяше скоро, учинихомся царю, рещи старейшину, сея церкве лучшия (л. 1005) [1648] прещения муж, словес твердейши, прения крепчайши, инаго убо некоего ослушати подобает о недоблих. Сего же или нудити яве, или не надеятися прещенми. О сих же себе зазревшу цареви и похвалами мужа побеждшуся, видит бо ся мужа добродетели и ратник, ниже нудити повелев и тожде железом пострадати, еже умягчавается убо огнем и пребывает обаче железо и преложивша в чюдо прещение, сообщение убо не прияти, преложения стыдящуся. Просити ж ответа, иже преблаголепнейши, скажет же и той слово, во святилище бо вшед, со всеми, иже о нем (л. 1005 об.) [1649] оружия носящими, бе же день просвещеный соборен и людем часть быв, тако нарицается совокупления.

Толкование.

Елма, рече, ипарху сия рещи ко святому с толиким прещением острейшая словеса, и слышати от него словеса ответна, со всякою премудростию и целомудрием, како противу егову [1650] прещением с толицем дерзновением беседова без всякаго ужасения, поразуме, убо от сих непобедима быти прещенми, но со гонением неким и почитанием. Сам же вскоре шед ко царю, поведает противление мужа. Мы убо, рече, царю, умнихомся от старейшины церкви сея, выщши (л. 1006) [1651] бо прещений муж сей, во словесех ответа твердейши, во прении непобедим, инаго бо кого от препростых повиновати прещенми. Сего же или нудити яве, еже есть мучити, или и тако не надеятися одолети, но оставити его пребывати, якоже хощет. О сих же, рече, зазревшу цареви, от похвал мужа принужену, толика бо есть сила добродетели, яко и сопротивным творит дивитися и почитати. Повеле же царь к тому не нудити святаго. Сам же пострада подобно железу, якоже бе оно умягчавается от огня, пребывает же обаче железо, сице убо Иуалий, (л. 1006 об.) [1652] от добродетели великаго устыдеся и похвали и, прещение в чюдо преложи, обаче сам до конца пребысть во своем злочестии, приобщитися с верными святей Божии соборней апостольстей Церкви не прият, преложения, рече, стыдящуся. О безумства стыдетися подобает, купно же и боятися, еже от благочестия во злочестие преложитись. Сей же окаянный стыдяшеся от злочестия во благочестие преложитися, входи же во святую церковь со всеми оруженосцы, бе же день просвещенный соборен, еже есть святая Неделя воскресный день, и людем часть быв, рекше смесися с людми во святей церкви. И тако со святым (л. 1007) [1653] получи совокупления.

Того же слова стих 64.

Блюди же борбу другую труднику Василиеви и судящу ему ипарху. Сей убо, гордяся, сторгнути мандию святаго веляше. Он же готов бе. Аще, рече, хощеши и ризы совлеку ти ся. Бити претяше судия и строгати ногти, изнести же утробу его, сим мня в страх вложити его. Святый же суетное и ненаказанное его прещение укаряя, рече: Сладко ми паче есть слышати, еже таковому о нас рещися произволению. Стружеши ми десне, иже от мног лет внутрь ми неисцелно лежащ. Ты же таковым торганием изврачюеши. Аще ли же извлачиши утробу, якоже и претиши, печалнаго вскоре (л. 1007 об.) [1654] свободиши телесе. Се бо ми желанно есть, еже изрешитися тела и со Христом быти. Сия же тогда ипарху убо претящу, святому же противу ему отвещевающу.

Стих 80.

Изряднее же яви ми ся приложити и се ко всем, зане он готов бе за благочестие не токмо отечества изгнатися и от стола, но и умрети.

Стих 65.

До зде убо глаголет Богослов, яже на святаго Василия мирская рать преста, рекше еже от Иуалия и от ипарха Димостена и последнее, еже от Евсевия ипарха Понтскаго стужение, и вся разсыпашася и престаша, и конец благ имяху святаго веры достоин Богу сице устроившу.

(л. 1008) [1655] Житие святаго Иоанна Златоустаго.

Тогда [1656] блаженный Иоанн паки рече ко цареви: Молю же тя убо чисто в православии пребывати, клеветник отвращатися и часто ходити во святую Божию церковь, и не оскорбити Дух Святый гневанием вашим и души моея убогия да не ввержете в печаль. Но [1657] и се, да весть твое благочестие, яко не имам устыдети, ему же будет требе наказание и обличение на ползу душам.

Отвеща же царь и вси, иже с ним, со благоговением реша к нему: Слышахом словеса твоя, честный отче, сотворим, якоже угодно есть при всем пред очима твоима и никто же ослушается тебе, но все (л. 1008 об.) [1658] повелеваемое нам тобою всем сердцем сотворим и не отвращаемся словес твоих, но яко от Христа глаголемая послушаем.

Того ж Иоанна Златоустаго житие.

Жена [1659] же некая именем Калистрофия, жена бывши старейшины Навклира Александрскаго, завистию же диаволею гражане оклеветаша ю к Павликию, иже тогда сан имеяше во граде том Августалский, якоже богат сущи ей изряд. И приведше ю, повеле взъяти от нея пятьсот златиц, и не имущи ей того дати, заложи все имение свое у чади в лихву, и даст Павликию. Взем же той пятьсот златиц (л. 1009) [1660] и отпусти ю. По времени же должники беду ей творяху, просяще данное ими. Двема же летома минувшема, извергоша Павликия из сана и ведоша и в Константинград, истязающе, како есть строил область свою. Воставши же убогая та вдова и седши в корабль, иде вослед его, и пришедши, паде пред царем отмщения просящи на Павликия. Слышав же царь, повеле епарху градному извопрошати и иже неправедно взятое воздати паки вдвоей.

Епарх же, помогаше Павликию, и не тако поведаше царю, якоже глаголаше вдовая, им же в сан той ввел и беяше епарх. Жена ж (л. 1009 об.) [1661] та, видевши себе обидиму, припаде Навклиру царицыну и сказа ему вся беду свою. И яко сказано бысть царице, в том часе посла два от отрок своих привести Павликия к себе. Пришедшу же ему, глагола ему царица: Ты ли еси иже пусту сотворивый митрополию Александрии Египецкия в снабдения место и составления и еже бы ю насадити полну, то ты всю погуби. Он же, отвещав, рече: Да веси, царице, яко не отпустих, ни погрузих, ни беды сотворих никому же, но и яже взях, свесть е твоя власть, яко отдах в ризницу прежде испадения моего из сана того. Она же рече: Не (л. 1010) [1662] веде того, что ты глаголеши, обаче тако ми спасения царева не имам тебе пустити, дондеже даси сто литр злата. Сице ж ей рекши: Поведе отроком да и держат, дондеже отдаст то. Видев же Павликий повеление ея, яко не гонзнет ея, вдаст злато все и простыню прием и отъиде. Вземши же царица, даст вдовице тридесят и шесть златиц, таже испусти ю вон. Изыде ж вдова, плачющися и вопиюще, якоже не надеяшеся вторыя той беды прибывшия. Слышавши же о блаженнем Иоанне, яко заступает обидимыя, паче же иже не имут ни от кого ж (л. 1010 об.) [1663] помощи. Препаде пред ним, исповедающи все, еже сотвори царица Павликиеви ея ради и яко надеющися милость прияти от нея, паче пакость и беду прият.

Слышав же то великий Иоанн, сжалися, паче же яко рече с лихвою просят, им же есть должна во Александрии. И тако блаженный Иоанн призва Павликия во святую церковь и глагола ему яко: Вижду о тебе изволившу ти к Богу творити неправды, иже есть отец сиротам и судия вдовицам, не ведый, яко жестоко есть противу остану [1664] прати. Ныне убо вдаждь убозей сей пятьсот златиц, еже еси взял (л. 1011) [1665] без правды, да ся искупит, от них же взяла есть и гонзнет и з детьми своими беды, яже ю обдержат и юзы тоя неправедныя. Отвещав же, Павликий рече ему: Сия припаде к царице и взят у мене сто литр злата и тщету ми многу сотворила ея ради. Но да идет к ней и возмет от нея, при нем же мя тяжет и вопиет на мя. Иоанн же рече: Аще и царица взяла есть толико от тебе злата, но за грехи твоя, яже еси сотворил тогда, егда беяше в сану том. Аз же воистину не имам неправду сотворити убогия сея жены, дондеже воздаси все, еже еси от нея взял, а извета (л. 1011 об.) [1666] не твори, глаголя на царицу. Глаголю бо ти, яко не имаши изыти отсюду, дондеже возмет и последнюю медницу. А то ей будет даное царицею тридесят и шесть златиц на пищу.

Слышавши же то царица наречие, воздаст ко Иоанну сице: Пусти Павликия, уже бо взяла есмь аз досыть злата за той долг. Иоанн же отвеща ей теми же послаными рек: Веру ими ми, глаголющу, яко не имать пущен быти отсюду, дондеже воздаст, еже взя убогия сея жены. Паки же посла к нему царица, глаголющи: Отпусти убо мужа того. Иоанн же противу тому отвеща: Аще хощеши, да отпущу (л. 1012) [1667] и, то посли вдовице сей пятьсот златиц. Аще ли же и тако сотвориши, то ничто же будеши велико сотворила, им же сея ради вины много взят злата от Павликия сто литр. Сия слышавши царица, гнева исполнися и рече: Якоже вижду, прииде Иоанн от Антиохии да упразднит повеления царьския. Таже абие в той час повеле двема сотникома со двемастома воин ити в церковь и нуждею извести Павликия от патриарха и пустити и в дом свой. Пришедшим же им пред двери церковныя и хотящим внити, видеша ангела Господня, стояща при дверех, и в руце его копие наго (л. 1012 об.) [1668] имуща и не дадуща им внити. Видевши же сие, убояшася зело и возвратишася к царице трепещуще, и поведаша ей видение ангелское и како со оружием стояше.

Слышавши же то царица, убояся и возмутися зело со ужасти, обаче егда мину то, паки таяжде бысть вражда во уме ея, юже име и прежде на Иоанна, года ждуще, како бы ему отдати. И помале паки посла к нему царица Фроментия именем, мужа сановита, молящи, дабы пустил Павликия. Великий же Иоанн ни того ласки послушав, но единаче глаголаше: Не прети мне хотящу, хощу бо избавити убогую сию вдову из беды (л. 450) [1669] сея неправедныя, аз есть сотворил сей, к сему же и царице, строя души ея спасение. Павликий же, видев, яко не может гонзнути из церкви, посла в дом свой, и принесоша пятьсот златиц, и даде той вдове пред патриархом, и тако их отпусти, и иде в дом свой, возвратишася же и жена во град свой и в дом свой, славящи Бога, иже ю помилова молитвою Иоанновою. Иоанн же паки учаше народы, да останутся неправедных имений. По неколицех же днех паки посла царица ко блаженному Иоанну, овогда претящи, овогда же ласкающи и велящи, да ся ей не противит, ни вопреки (л. 450 об.) [1670] творит, глаголющи сице: Останися уже еже тебе не лепо есть царьская правити, яко же и мы церковных дел не строим, но уступаем, да сам, яко же хощеши, твориши я: останись по церквам мятежа, и притчю мя всем творити: аз бо всегда яко отца имам тя и чту зело, поне отныне от обою избери, или церковь строити, или царьских дел останися, не бо стерплю тебе, пакости творящю.

Блаженный же Иоанн, слышав то, зело опечалися и помышляше, сам в себе глаголя: что будет, сей тако без студа сотворшися, и гневающи Христа делы своими, и воздохнув (л. 451) [1671] велми, отвещав, рече посланым: Аще человеком угождал бых, Христов раб не бых был. И паки той же апостол глаголет, обличи, запрети, умоли, и паки: мне убо глаголати не леностно, вам же безблазнено послушати. Бо паче тако подвизаюся и непрестану поучая, да не остану в тяжести или в скверне всякой чюжих грехов, но да буду сохранен Господним промыслом без скверны и до последняго моего издыхания. Аще ли мя мнит, яко обличающа ю во учении, то неполезно ей есть зазрети мне, ни жалити си. Вижду ю в неподобных сущю и заповеди Христовы не хранящу, обаче (л. 451 об.) [1672] в лице ни тоя, ни инаго кого обличих, ни безчестия сотворих, не даждь ми Боже, но злату хотящая обличая не почих, поущая [1673] остатися того, ни имам почити. Да аще есть вне того вреда, то паче ей лепо есть радоватися, им же есть вне того всего. Аще ли не свободь есть глаголемым тем, той да весть, яко аз ея не обличаю, ни безчестия ей творю, но тоя самая дела суть, иже бо творит грех. Раб есть греху, якоже глаголет апостол, что бо есть, иже возбраняет ей добро творити или кая ей будет полза, аще и весь мир приобрящет, а душю свою от(л. 452)щетит [1674], или что даст измену на души своей. Сими словесы уча и множайшими, удивив человеки, и отпусти я с миром, поведати ей, иже слышаша. Они же написаша скорыми писмены словеса та, исповедаша ей, рекуще: Слышахом словеса днесь от человека не боящася никоея же смерти, ни мечныя, ни морския, но вся ни во что же вменяюща, единем ся точию пекуща, еже обличати и запрещати, иже неправым путем ходящая. Да тако неутомим пребывает николи же. Се же глаголавше к ней, подавше ей хартию, в ней же бяху словеса си написана.

Того ж Иоанна Златоустаго житие.

(л. 452 об.) [1675] Бяше [1676] же тогда во граде у царя боярин Феогност именем. Сей убо добр муж сый, имеяше страх Божий в сердцы своем присно, да того ради и царь любляше и зело. Беяше же и другий боярин именем Гай, арианския веры. Сей, взавиде и оклевета Феогноста ко царю, глаголя, яко поносит царю и царице, рече, яко не сыти суть беруще злато и губители своея власти суть. Ту абие разгневався царь, повеле заточити и в Селунь, а имение его все восхитити, разве единех хлевинец вне града на прекормление жене его и детем. Идущю же Феогносту в Селунь, от печали впаде в болезнь (л. 453) [1677] и умре. Жена ж его, видевши тую напрасную напасть и смерть бывшую мужу своему, еще же и имению отъяту многу сущу, убоявшеся велми, прибеже в церковь к блаженному Иоанну и сказа ему всю беду свою. Слышав же милостивый той муж, сжалися зело и начат увещевати ю, глаголя: Не жалиси, но паче добре славящи Бога, терпи напасть твою и мужа твоего. Имаши бо ты Бога судию, иже ся тобою печет и твоим сиротам Отец есть, вся бо Той весть, и еже ны есть на ползу, то же и строит, яко своим рабом. Но обаче, аще неправедно умре, Феогност (л. 453 об.) [1678] отпущен, то смерть тая на вечную жизнь ему будет, а тем на вечную муку, иже и суть оклеветали. Теми словесы и инеми множайшими увещав ю и отпусти в дом свой, и повеле ей от Ксенодоксии взимати на пищу доволно себе же и детем своим по вся дни. И мысль имеяше молити царя, да возвратит ей имение мужа ея. Потом же и другое зло неприязнь умысли на бедную ту жену и дети ея, паче же на блаженнаго Иоанна. Времени бо пришедшу, егда вина берут, в не же исходят вси на села имати вин своих. Евдоксия же царица, царева села проходящи, мимо гря(л. 454)дущи [1679] же, вниде в Феогностов виноград и уреза гроздь от того винограда своима рукама и яст от него. Реша же ей предстоящий: Госпоже, чюждь есть сей виноград. (Устав же бяше положен царем, аще царь или царица, походящи, внидет в виноград кий и яст от овоща его, то да не будет к тому лет господину села того владети им, но царь да возмет и, а господин того места таков же да изберет виноград царев, в он же несть входил царь, или цену да возмет от ризницы царевы) [1680].

Повеле же царица приписати Феогнастов виноград к царевым виноградом, надвое мыслящи, ово хотящи пакость (л. 454 об.) [1681] вдове и детем ея, понеже гневашеся на ню, имже поведала бяше Иоаннови, ово же взыскаше речи и извета, имже бы могла впречитися и изгнати из церкве Иоанна, ведяше бо его милостив ум сущи, и о таковей неправде, аще услышит бывшее, то не имать претерпети вдовицы тоя беды и чад ея, да негли нечто взыдет от того помогающи ей. Якоже помышляше, тако и бысть. Уведев бо то блаженный Иоанн, абие наречие пусти к ней Евтихием, архидиаконом своим, мужем хитрым и смысленым в словесех и житие имущем добро, сице глаголя: Христо(л. 455)любивая [1682] вера и житие твоею родителю знаемо есть всеми, зане и молитв ради и добрых дел ею Бог дал ти есть царьство сея земли, ожидая тебе, да и ты подвигнешися добрыми делы и Царьство Небесное приимеши от Него. Богатство же и слава и хвала сея жизни ничто же имать успети в страшный он Судный день, но точию дела жития нашего добраго. Темже не забывай страха Божия, добре ведущи, яко дыхание всех нас в Того руку есть, ему же, аще хощет, приложит, и от него ж, аще хощет, умалит. Персть же и пепел суще есмы, скоро в землю сходим, в темная и несветлая (л. 455 об.) [1683] места, якоже и древнии прежде вас вси царие и князи и повинницы. Воззри на цари, иже прежде вас быша, кацы тии бяху тогда, кацы ли суть ныне. Разумей же, иже суть добро творили, како тии блажими суть, а иже зло творили, то тии поминаются клятвами немалыми, иногда же и имен их не хотяя слышати, толма ся суть им пригнусили. Да и ты, убо христолюбице доброчестивая подражай добрых, иже веру без вреда сохраниша и се житие правдами препроводиша и благими делы. Повели, да ся возвратит убозей жене Феогнастове и детем (л. 456) [1684] ея виноград, иже имеяху на утеху себе. Довлеет бо им болшая беда и печаль, еже оному изгнану и умершу и имению его всему отъяту. Ей, молю тя, отверги, еже имаши гнев на ню, помнящи Христово слово, иже во Евангелии глаголемое: Да не зайдет солнце во гневе вашем. Паче же, еже к богатому оному реченое: Безумне, в сию нощь душю твою истяжут от тебе, а яже собра, кому та будут, еда снидет во ад с нами сладость плода виннаго или сквара древянаго масла, или ризное украшение, или богатство, или слава и власть. Не все ли оставивше зде, отходим отсюду (л. 456 об.) [1685] нази неимуще, ниоткуду же помощи, разве дел своих. Да тем вся та поминающи, повели возвратити виноград убозей вдове, да стяжаше мзду от Бога в день Судный.

Сия словеса и ина подобная тем глагола к царице Еутихий от блаженнаго Иоанна. Она же, слышавши словеса сия, написа к нему, сице имущи: Ожесточив, просиши, осудив мя словесы твоими, яко неправедну и беззаконие творящу. Не ведый царьский устав и закон, ни дая ми чести ведомыя царем, но обидну мя имаши. К тому не стерплю тебе до конца, презрима тобою. А о винограде Феогнастове то веси (л. 457) [1686] римския законы, яже велят о таковем. Аще ли не веси, то разумей, како тии суть уставили исперва бывшии царие: Да иже годе ей есть, от обоих изберет себе от сих или в того место, идеже хощет, виноград также себе да возмет или цену его. Аз бо не хощу потваряти уставы древних царей, ни смышляю тако ничто же сотворити.

Таже яко прият от нея писание блаженный Иоанн и почет, востав, иде к ней в полату и седе у нея, начат паки тихыми словесы увещавати ю, множае перваго глагола к ней, таже потом рече ей: Возврати вспять (л. 457 об.) [1687] виноград вдовей. И не хощи слышати, яко неправду сотворши. Она же рече: Уже ти вписала есмь, что есть уставлено древними прежде нас бывшими цари о тацех местех. Дала же есмь ей избирати, якоже хощет, любо в того место виноград ин, а любо цену его. Иоанн же рече к ней: Глаголах ти и паки реку ти, воздаждь убозей вдове свое, ничто же бо чюждаго не просит. Царица же рече ему: Не тако сопротивися царем, не бо убо тебе будет на успех некий же сие. Отвещав же Иоанн, паки рече ей: Воздаждь виноград, а извета не твори ветхими уставы и (л. 458) [1688] законы, им же неверными цари то есть установлено. Да тем и лепо то есть было, вси бо царие законы суть уставили, да ничто же ти возбраняет крив устав и неправеден разорити и право творити царице суще и жене цареве. Да не мози тако сотворити и вещати, да тя не прозову новую Езавель и приобрящеши си клятву равну той клятве.

Сице же ему глаголющу разгневавшись царица, повеле нуждею Иоанна изринути ис полаты, отрыгнувши яд, иже крыяше в сердцы своем на праведнаго, глаголющи: Аз имам сама себе отмстити, но и винограда не дам, ни ино что в него (л. 458 об.) [1689] место, ни ты можеши преодолети мене и принудити творити, еже аз не хощу, но и тебе накажу, да мене не преобидиши. Иоанн же изшед ис полаты и призва Евтихия архидиакона и заповеда ему, глаголя: Рцы дверником церковным, да егда приидет к церкви царица, то да затворят двери пред нею и не дадят ей внити и всем, иже с нею суть. Но да ей поведят, яко Иоанн есть, повелев сице сотворити, блюдите и не ослушайтеся.

Празднику же приспевшу Воздвижения Честнаго Креста, собрася весь народ града в церковь. Царь же и вси бояри с ним и живущии (л. 459) [1690] окрест града и приходящии странницы не токмо праздника ради, но да и слышав сладкое учение Иоанново. Той же Иоанн, силою Святаго Духа просветився, начат беседовати к народу повестми многими и вси слышащии чюждахуся, яже от Бога данней ему премудрости. И тако им разрешаше, яже в Божественем Писании неудобь беяше разумное и закрытое. Тем же от сего паче чюждим беяше и похваляем от всех [1691], и радость немалая беяше во всем народе, яко всем глаголати: Поистине достоин есть престола сего третий на десяте апостоле, Христос бо посла тебе (л. 459 об.) [1692] царьствующему граду, да спасеши душы наша и напоиши от источник спасеных, яже ти есть дал Бог. Беяше же ту схоластик множество скоропишущих и любящих труды, их же он глаголаше, они писаху и дивляхуся, како ни едино сомнение имяше в словесех, ни дващи едино слово речаше, но яко изученую речь издавна глаголаше. И всем радующимся учения его ради, яко скончатися пророческому словеси о том, глаголющю, яко всем веселящимся жилище у тебе.

Прииде же царица к дверем церковным и с рабичищи и со всеми чинми хотящими внити. Вратницы же (л. 460) [1693] церковнии затвориша двери перед нею и не даша ей внити. Она же исполнишися гнева, вкупе же и срамом объята бывши, вопияше, глаголющи: Разумейте вси, како гнев держит человек сей на мя, яко вси входят во святую церковь, мне же точию единой возбраняет входа, еже аз не могу согнати его с престола своего ему. А иже с нею беяху пришли, толкаху во врата, глаголющи: Отверзите госпожи, а не безчинуйте. Они же отвещаша им, рекуще: Не о себе се сотворихом, но якоже нам повеле патриарх, и не смеем без позволения его ввести ея семо. Тогда ту един от сущих с царицею простер руку, (л. 460 об.) [1694] хотя ударити в церковныя двери, и ту абие усше рука ему и бысть яко мертва. Видевши же сие царица и вси иже с нею, убояшася зело и возвратишася в полату. А ему же усше рука, той вниде в церковь и ста посреде народа всем зрящим его. И возопи, глаголя: Помилуй мя, Господи, отче святый, исцели ми руку изсохшую, безумно дерзнувшу на святый храм, согреших, прости мя. Разумев же Духом Святым Иоанн вину, ея же ради сия прилучишася ему, рече ему: Иди и умый си руку в церковней опанице, в ней же воду свящают, и верую Господу Иисусу Христу, яко будет ти по вере твоей. Шед же человек, (л. 461) [1695] умыся и бысть цел. И пришед на среду, славя и благодаря Бога, и вси, иже и видевши внезапу исцелевша, хвалу воздаша Христу Богу, даровавшу угоднику Своему Иоанну исцеления дары. Сия же и царя не утаися, но обаче не ведыйся творяше о царицы, ведый ея нрава лютость и жестосердие. Любляше же зело царь преподобнаго Иоанна и в сладость его послушаше.

Послание к Кириаку епископу.

Не [1696] печалуй, брате Кириаке, ибо аз егда изгоним бех от царьствующаго града, ничто же о сих вменях, но глаголах в себе, аще хощет царица изгнати мя, да изженет, Господня бо есть земля и концы ея. (л. 461 об.) [1697] Аще хощет претерти мя, да претрет, имам Исаию подобие. Аще хощет в пучину воврещи мя, воспоминаю Иону. Аще ли в ров ввержет, имам Даниила ко лвом ввержена в ров. Аще ли и камением побиет мя, имам Стефана первомученика тако пострадаша. Аще ли главу мою отсечет, имам Иоанна Крестителя. Аще хощет имения взяти, да возмет, наг изыдох от чрева матере моея, и наг паки отъиду. Мене утешает апостол, глаголя: Бог лица человечя не стыдится. Тем же аще человеком угождал бых, Христов раб не бых убо был. И Давид вооружает мя: Глаголах о свидениих твоих пред цареви и не (л. 462) [1698] стыдяхся. Многая на мя уготоваша, но вся зависти ради сотвориша.

Видел ли еси, совопросниче, мужество святых и приснопамятных великих отец наших, како не точию сами под суд царей не приходили, но и царей беззаконныя суды исправляли и обличали. Аще и множицею муками и смертию претими, но не возмогоша тем устрашити, изволиша правды ради умрети, нежели беззаконен суд прияти. И аще будет недоволно Божественых заповедей и святых апостол и святых отец правил и уставов к возбранению беззаконнаго вашего судища, то и от царьских уставов (л. 462 об.) [1699] к сим еще приложим.

Первый царь Саул, вознеистовився на священство, царьства испаде. Поби священники Божия, сам убиен бысть своима рукама. И по нем царьствова Давид над Израилем, и бе Давид творяй суд и правду над всеми людми его, а не над священники. Паки Давид божественный по Христе и за Христа, такоже и на Христа борющих глаголаша: Вскую [1700] шаташася языцы и людие поучишася тщетным, предсташа царие земстии и князи собрашася вкупе на Господа и на Христа Его, расторгнем узы их и отвержем от нас иго их.

Послушай же, совопросниче, кто шатается и поучается тщетным. (л. 463) [1701]. Не иже ли ныне со беззаконными архиереи предсташа цареви и князи собрашася вкупе на Господа и на Христа Его, то есть на святое и священное Евангелие, глаголющее: Аминь, глаголю вам, елика аще свяжете на земли, будут связаны на небеси, и елика аще разрешите на земли, будут разрешены на небеси. И глаголаша: Расторгнем узы их и отвержем от нас иго их, то есть не послушаем запрещения патриарша и отвержем от нас повеление его. Таковым живый на небесех посмеется им и Господь поругается им. Тогда возглаголет к ним гневом своим и яростию своею смятет я.

Темже паки той же (л. 463 об.) [1702] божественный Давид, аки советуя, глаголет: И ныне царие разумейте, накажитеся вси судящии земли. Работайте Господеви со страхом и радуйтеся Ему с трепетом.

А еже и ныне царие разумейте, то есть не преходите, рече, устав, но пребывайте в даном вам уставе и на восхищение не желайте, сиречь священническии [1703] власти и суда не отъемлите. Тем же и претит, глаголя: Накажитеся вся судящии земли. Како прежде вас, которые восхитили святительское действо, якоже Саул и прочии, и погибоша. И глаголаше: Работайте Господеви со страхом и радуйтеся Ему с трепетом. И паки засвидетельствует, (л. 464) [1704] глаголя: Приимите, рече, наказание, то есть закон заповедей Божиих. И паки устрашая, глаголет: Да некогда прогневается Господь и погибнете от пути праведнаго, егда возгорится вскоре ярость Его.

Такожде же и Соломон подобно засвидетельствует, глаголя: Ты же избрал мя еси царя людем Твоим и судиею сыном Твоим и дщерем, а не священником. И паки: Слышисте бо, рече, царие и разумейте и научитеся судия концем земли. Внушите содержащии множества и гордящиися о народех язык, яко дана есть от Господа держава вам и сила от Вышняго. Иже [1705] истяжет дела ваша и помышления испы(л. 464 об.)тает [1706], яко слузи суще Царьства Его, не судисте право, ни сохранисте закона Его, ниже по воли Божии ходисте.

Да где есть закон или воля Божия, еже царем или велможам Его судити архиереов и прочии священный чин и достояние их? К таковым премудрый Соломон претит, глаголя: Сокрушение скоро явится вам, яко суд жесточайший на тех в находящих бывает. Мала бо подается милость, силнии же силне и стяжутся. Не лишает бо ся лица всех Владыка, ниже усрамится велможи, яко мала и велика сей сотвори. Подобно же проразумевает о всех, державным же (л. 465) [1707] крепко свесть испытание. И паки той же рече: разрушение [1708] ж законопреступных зла, се суть путие всех творящих беззаконие. Нечестием бо душу свою отъемлют. И паки: Сыне мой, глаголы закона не забывай. Глаголы же Моя да соблюдет твое сердце, долготу бо жития и лета жизни и мира приложит ти.

Да где есть закон таков и заповедь, еже бы царем владети архиереи и прочим священным причтом. А иже аще кто без правды беззаконно восхитит на ся власть священства и суд архиерейский, како тому приложится долгота жития и лета жизни и мира?

И паки той же рече: Царь [1709] дерз впадет в злое. Царю послушающу словесе неправедна, вси под ним законопреступницы.

(л. 465 об.) [1710] И паки пишется в Паралипоменах: Возврати [1711] же ся Иосафат царь Иудин в дом свой мирно во Иерусалим. Его же срете Еву [1712] сын Анании видящаго, и рече к нему: Нечестиву ли даеши помощь или ненавидимаго от Господа дружбу складаеши. И рече ему Иосафат: Сего ради не бысть на тя гнев Господень, яко и на блага дела обрете на суть в теле, зане отъял еси кумиры от земли Иудины и исправил сердце твое взыскати Господа Бога овец твоих и вселися убо Иосафат во Иерусалиме. Паки же изыде к людем от Вирсавии даже до горы Евфемая и возврати их к Господу Богу овец своих. И постави же судии земли во всех градех Иудиных запасистых по коемуждо месту и повеле судиам видите, рече: Что твористе, не бо человечески сотвористе суд, но Господень. (л. 465 а) [1713] И что елика судите, в вас преизбудет и да будет страх Господень с вами присно и с люблением вся твористе. Несть [1714] бо пред Господем Богом нашим беззаконие, ниже дивления лицу, ни прияти мзды. Во Иерусалиме ж постави Иосафат левиты и священницы и началницы обителем от Израиля, да суд и вещь ту судят жителем во Иерусалиме. Повеле же им, глаголющи: Тако делайте во страсе Господни и верне. И [1715] сердцем сокрушеным всякую вещь, иже приидет к вам братий ваших, иже обитают во градех их. Промежу кровию кровь, где коли же вопрошение будет от закона, от заповеди, от чинов, от оправданий покажите им, да не согрешают Господеви. И не приидет ярость на вас и на братию вашу. Тако бо делающе, не согрешите. А Мария же священник, архиерей ваш, сий же к Богу (л. 465 а об.) [1716] предстояти предстанет. И паки Завадия сын Измаель, иже есть вож в дому Иудине, иже к цареву чину предстоит и книжники левиты пред вами. Укрепитеся и делайте любящии, и будет Господь с вами во благих.

Прочее же царей Июдиных и царей Израилевых, яже к Богу беззаконноваша и священники обругаша и того ради погибоша. И о сем писано есть в книгах Царств.

Послушай же, како и язычестии царие, боящиися Бога, предпочитающе священство древле, якоже пишет в книге Ездры. Еже даде грамоту Перский царь Артаксеркс Ездре священнику писцу, научену во словесех и повелениих Господних в книзе закона и повелении его во Израили сице: Артаксеркс [1717], царь царем, Ездре священнику, писцу закона Бога небеснаго (л. 466) [1718] совершити слово и ответ.

От [1719] мене повелено есть, да койждо, иже имать усердие благо от людий Израилевых в царьстве моем и от священников его и от левитов поити во Иерусалим с тобою, да идет, от лица бо царева и седми советников его послан еси. Да посетишь Июдею Иерусалима закона Бога твоего, иже есть в руку твоею, и да несеши сребро и злато, что царь и советницы его со усердием даша Богу Израилеву, иже во Иерусалиме обитает. И все злато и сребро, кое аще найдеши во всей области Вавилонстей, с волею людскою и священник, иже волею принесоша дому Бога своего, иже есть во Иерусалиме, и вся, иже (л. 466 об.) [1720] до расходу заповедах в писании том, да дают телцы и овны, и агнцы и пожрения их и возлияния их. И принеси та на олтарь церкви Богу вашему, иже есть во Иерусалиме. Но аще что тебе и братии твоей восхощется и от прочаго сребра и злата, еже по воли Богу вашему творити, да сотвористе, и сосуды, иже даны тебе в службу дому Бога твоего, дай пред Богом во Иерусалиме. Но и прочии потребы в дому Бога твоего, колико же потребно есть, да раздаси, даси же от сокровища и от сокровища царева и от мене. Аз, Артаксеркс царь, поставих и повелех всем стражем сокровища, иже (л. 467) [1721] есть за рекою, да что елико ж воспросит от вас Ездра священник, писец закону Бога небеснаго без стояния давайте 100 талант сребра, такожде и пшеницы до 100 мер, такожде и вина до 100 бочек, такожде и елея до 100 чванов и соли без меры, все, что ко обычаю Богу небесному достоит, да воздается. Вонмите, да никто зазлит дому Бога небеснаго, иже бы не был когда гнев на царьство царево и сынов его. И вам же знаемо творим, всем священником и левитом, певцем и двеником, нафинеом, слугам дому Божия, се да есть ти ведомо, дани не берите, ниже имейте области наставляти на них что. (л. 467 об.) [1722] Ты же, Ездра, по премудрости Бога твоего, иже есть в руку твоею, постави книжники и судия и наместницы, да судят вся люди, иже есть за рекою, всем, иже знают закон Бога твоего, и неведающему ведати сотвористе. И всяк, иже не сотворит закона Бога твоего и закона царева тощно, суд да будет сотворен от Него, аще в смерть или в наказание или во отщетение живота или в темницу.

Видели, совопросниче, древняго иноплеменническаго царя, боящагося Бога Израилева, какову честь и свободу священником сотвори. Не имать ли в день Судный востати на суд и осудити, иже ныне кто прео(л. 468)бидит [1723] священническую честь и власть, якоже пишется: Царица Южская востанет на суд с родом сим и осудит. И прочее.

Но аще восхощеши уведати и от христианских царей законов и заповедей навыкнути о сем, яко не подобает благочестивым царем судом священническим обладати, послушай.

Первый христианский царь Константин при конце своей заповеди к Силивестру, папе Римскому, пишет сице: Идеже [1724] святительская власть и христианскаго благочестия глава Небесным Царем уставлена бысть, недостойно есть тамо власть имети земному царю. Сия убо вся, яже священным (л. 468 об.) [1725] нашим сим писанием и иными Божественыма суды повелена же и укреплена даже до скончания миру. Заповедаем православным царем и князем и всем людем, иже по всей вселенней, даже до скончания миру. Отнюду же пред живым Богом, иже повелевшим нам царьствовати, и страшнаго Его Суда предсвидетельствуем священным и Божественым повелением. Аще ли же кто силою или неверием или гордостию преобидник будет о сих, вечными да объят будет осуждении и онех да подпадет томлением и обрящет тогда себе сопротивных (л. 469) [1726] святых Божиих и началных апостолов Петра и Павла и в настоящем убо житии и в будущем веце и да в преисподнем аде мучим будет, и да исчезнет со диаволом и со всеми нечестивыми.

Видели благочестивыя души царьския, предание и утвержение страшное? Пространнее сего разсмотри напреди, в полной его заповеди.

Но и на первем святем Вселенстем соборе [1727] вражебнии нецыи мужие на некои епископы подписана давше царю оклеветания. Он же сия прием и свив, и перстнем запечатлев, повеле хранити. Таже к смирению тех и единомыслию учинив и сия принес, (л. 469 об.) [1728] пред всеми сожже, отнюдь никако ж прочте писаных. Не бо речех по есть согрешением священническим явленом быти, мнозим вину отсюду приемше, без страха согрешают. Аще возхощеши и от царьских законов покажем ти.

Той [1729] же царь Иустиниан Иоанну епарху воеводскому, дващи епарху бывши и Патрикию, мнози законныя написавше книги о боголюбивых же епископех и потом о всем священничестве и о благоговейных мнисех и малом преж сего то сотворше, в них же (л. 470) [1730] восхотехом благоговейным мнихом токмо от градских епископ, под ними же суть монастырие их, позываемом быти на суд. Убеждени быхом от Мины боголюбиваго епископа пребогатаго сего града и вселенскаго патриарха и благоговейным причетником таковое дати свобождение, яко аще кто имать некакову разпрю с неким, первое боголюбивому епископу, под ним же есть, возвестити о том и без писания разсуждение прияти. И аще будет се, не стужати им, ни повлачити ж на градское судище, но без писания и без пагубы приимати образ равен писаному, аще оба тако (л. 470 об.) [1731] восхощета соперника и пременитася от зависти. Аще же некоего ради неудобия не будет епископу возможно разрешити вины, тогда свободно будет и пред градския властели ити и еже вземлют от церкве всему храниму сущу. Елика же благоговейным причетником Божественыя заповеди дают, и да потщатся конец положити суду. И аще убо о градских винах повлачатся, ту убо суть и подобни судити бояре. Аще же от инех области своим властели да будут судии и да не преступает суд дву месяцу ожиданием, отнели же начало бысть, якоже (л. 471) [1732] вборзе положити вещи конец, оному яве сущу, иже повинен быти от обою мнится. Того области владый судия и казни достойне, осудит его. Первее убо обнажену быти тому священническаго сана от боголюбиваго епископа, и тако под законней руце предану быти на казнь. Аще же будет церковный грех, требуя целомудрия и запрещений церковных, епископ таковое да судит, не хощем бо да уведят таковыя вины градстии бояре.

Глава 54.

Аще кто на некоего причетника или на монаха или на диаконису, или на постницу имать некую вину, (л. 471 об.) [1733] да скажет первие преподобному епископу, под ним же есть койждо их, он же вещь между има да разсудит.

Того же 56.

Аще же о церковных вещех будет вина, ни единаго же общения градским властелем, но епископ по священным правилом да судит.

Того же 57.

Аще нецыи преподобнии епископи того же собора, рекше от единыя области, распрю некую имеют друг ко другу, или о церковных местех, или о иных неких вещех, первое митрополит их со другими епсикопы от своего собора таковую вещь да судит. И аще не пребу(л. 472)дета [1734] оба суперника в сужденных, тогда преблаженный патриарх того правления между ими да разсудит, и тако да повелит, якоже церковным правилом и законом подобно, ни единому же сопернику противу сего глаголати могущу.

Того же 58.

Аще же причетник или ин некто вину имать на епископа, первее преподобный мирополит области тоя по священным правилом и по нашим законом таковую вещь да разсудит. И аще кто поречет сужденная к преблаженному епископу и патриарху вещь возвестити, и той подобный тому вдаст конец. (л. 472 об.) [1735]. Аще же на митрополита имать что епископ или причетник или ин кто, патриарх того правления подобным образом вещь да судит. По всяких же винах или от своих митрополит или от патриарх или от инех киих любо судей епископи судятся.

Новых заповедей Иустиниана царя глава 32.

Вторая [1736] заповедь первыя грани новых заповедей. Причетники, глаголет, презвитеры и диаконы, и иподиаконы, четцы и певцы. Шестая же заповедь третия грани первых книг свитка и заклинатели и дверники поминает. Вси же сии управляеми и (л. 473) [1737] судими своим их епископом да суть.

Того же Иустиниана царя новых заповедей 9-я грани глава 30.

Якоже [1738] имый нечто на некоего от мних или от священных девиц и жен сущих в монастырех ко епископу места того да приступит и возвестит ему. Он же с честию мниха или черноризицу послав игумена да приведет, или посолника, или инаго от смиренных и кротких и, разсмотрив, судит. Властель же [1739] мирский покушаяся привести пред ся, таковый лишен будет власти и даст в людское сокровище 10 литр перепер купно с своим чином. Послании же, (л. 473 об.) [1740] иже приведоша я, заключени будут в преграде и подобную казнь да приимут, и епископом возбранени будут, к тому таковых на мирских властелех судища не приводити.

Устав святаго князя Владимира, крестившаго Рускую землю, о церковных судех и о десятинах.

Во имя Отца и Сына и Святаго Духа.

Се аз, князь Владимир, нареченый во святом крещении Василий, сын Святославль, внук Игорев, и божественныя княгини Олги, принял есмь крещение от греческаго царя и от Фотия, Патриарха Цареградскаго, и приях от него перваго митрополита Михаила Киеву, (л. 474) [1741] иже крести всю Рускую землю святым крещением. Потом развергше греческий Номоканон, обретох в нем о самой истины святых апостол и святых отец предание и перваго правовернаго царя Константина и всех прежних царей христианских на всех Вселенских соборех исправления о судех церковных и о всем священническом чину и о десятинах, яже не подобает сих судов и тяж князю судити, ни бояром его, ни тиуном.

И аз с своими детми и со всеми князи и с своими бояры дал есмь те суды церквам Божиим, преосвященному митрополиту и всем епископиям по Рустей земли. А по сем (л. 474 об.) [1742] не надобно вступатися ни детем моим, ни внучатом, ни всему роду моему до века, ни в люди церковныя, ни во все суды их. То все дал есмь церкви Божии по всем градом и по погостом и по слободам, где суть христиане, и своим тиуном приказываю судов церковных не судити и наших судов без владычня судии не судити десятин деля.

А се людие церковныя преданы епископом по правилом: епископ, игумен, поп и дети их, диакон, причетник, кто в клиросе стоит, чернецы, черница, попадья, просвирница, паломник, чтец, баба, вдовица, задушный человек, (л. 475) [1743] стороник, слепец, хромец, монастыри, болницы, гостинницы, странноприемницы, богаделны, то люди церковныя, епископ ведает меж ими суд или обида или которая вражда или задница.

О церковных судех.

А се церковныя судове, данныи законом Божиим по правилом святых апостол и святых отец и по уставом православных царей и князей во всех христианских людех: роспуты, смилное застатие, пошибание, умычки, промеж мужем и женою о животе их, в племяни или в сватовстве поймутся, ведовстов, потворы, чародеяние, волхование, зелейни(л. 475 об.)чество [1744], урекания три, бляднею и зелием и еретичеством, зубоежа, или сын отца и матерь биет или дщи матерь биет, или сноха свекровь, или дети тяжутся о задницу, церковная татьба, мертвецы сволочат, крест посекут или на стенах третки емлют и с креста, скот или псы или потки без великия нужды введет в церковь, или что неподобно в церкви деет, или два друга имета ся бити, единаго жена другаго имет за лоно и раздавит, или кого застанут с четвероножиною, или кто под овином молится, или во ржи, или под рощением, или у воды, (л. 476) [1745] или девица дитя повержет, те суды все церквам даны суть.

Основания инаго никто же может положити, паче лежащаго, да вси сограждают на сем основании. И иже аще кто разсыплет храм Божий, разсыплет того Бог, церкви бо Божия свята есть. Аще кто изменит святый сей устав, якоже есмы уставили по святых отец правилом и первых царей управлению, или сынове мои князи, или внуцы мои, или правнуцы мои, или от рода моего кто, или от князей, или от бояр, или в котором городе наместник, или судия, или тиун, а порушат ряд мой и вступятся в суды (л. 476 об.) [1746] церковныя, или отъимати, да будут прокляти в сий век и в будущии от седми собор Вселенских.

О тех же судех великаго князя Ярослава, сына великаго князя Владимира, крестившаго Рускую землю.

Се аз, князь великий Ярослав, сын Владимирь, по данию отца своего, згадал есмь с митрополитом Иларионом, сложил есмь греческий Номоканон, аже не подобает сих тяж судити князю и бояром, дал митрополиту и епископом те суды, которыя по правилом святых апостол и святых отец отдал отец, великий князь Владимир, по всем градом и по всей области, где (л. 477) [1747] христианство.

Аще восхощеши, еще ти приложим и от прежде бывших Ордынских царей законов, то есть ярлыков, иже даша в лето 6821-е преосвященному Петру митрополиту Киевскому и всея Росии чюдотворцу и прочим митрополитом, яко да и тии в день Судный востанут, якоже царица Южеская с родом сим и осудят и, аще не покаются.

В нем же есть тако писано.

Вышняго и безсмертнаго Бога силою и волею и величеством и милостию Его многою азбяково слово всем нашим князем великим и средним и нижним и силным воеводам, (л. 477 об.) [1748] велможам и князем нашим уделным, и дорогам славным, и полским князем, высоким и нижним, и книжником, и уставодержалником, и учителным людским поветсником, избирателем и баскаком, и послом нашим и гонцом, и данщиком, и писцом, и мимоездящим послом, и ловцом нашим, и соколником, и пардусником, и всем людем, высоким и нижним, малым и великим нашего царьства, по всем нашим странам, по всем нашим улусом, где наша Бога безсмертнаго сила власть держит и слово наше владеет. (л. 478) [1749] Да никто же обидит на Руси соборную Церковь митрополита Петра и его людей и церковных его, да никто же взимает, ни стяжаний, ни имений, ни людей. А знает Петр митрополит в правду и право судит и управляет люди своя в правду в чем ни будь, и в розбое, и в поличном, и в татбе, и во всяких делех ведает сам Петр митрополит един или кому прикажет. Да вси покаряются и повинуются митрополиту вся его церковныя причты, первым изначала законом их и первым грамотам нашим первых царей великих грамотам (л. 478 об.) [1750] и дефтерем, да не вступаются в церковное и в митрополичье никто ж, занеже то Божие все суть. А кто вступится, а наш ярлык и наше слово преслушает, тот есть Богу повинен и гнев на себя от Него приимет, а от нас казнь ему будет смертная. А митрополит правым путем ходит да правым путем пребывает и тешитца, да правым сердцем и правою мыслию вся своя церковная [1751] управляет и судит, и ведает или кому повелит таковыя ведати и управляти. А нам в то не вступатца ни во что, ни детем нашим, ни всем нашим (л. 479) [1752] князем нашего царьства и всех наших стран и всех наших улусов да не вступаются никто же ничем в церковныя и в митрополичьи, ни в городы их, ни в волости их, ни в села их, ни во всякия ловли их, ни в борти их, ни в земли их, ни в улусы их, ни в лесы их, ни во ограды их, ни в волостныя места их, ни в винограды их, ни в мелницы их, ни в зимовища их, ни в стада их конныя, ни во всякия скотския стада, но вся стяжания и имения их церковныя и люди их и вся причты их и вся законы их уложеныя старыя от начала их, то все ведает митро(л. 479 об.)полит [1753] или кому прикажет, да не будет ничто же перечинено или порушено или кем изобижено [1754]. Да пребывает митрополит в тихом и кротком житии без всякия голки, да правым сердцем и правою мыслию молит Бога за нас и за наши жены и за наши дети и за наше племя. И мы то такожде управляем и жалуем, якоже и прежние цари ярлыки им давали и жаловали их, а мы по тому же пути теми же ярлыки жалуем их, да Бог нас пожалует, заступит. А мы Божия брежем, а даннаго Богу не взимаем, а кто взимает Божия, и тот будет Богу повинен, а гнев Божий (л. 480) [1755] на него ж будет, а от нас будет казнен смертною казнью, да то видя, и иныя в боязни будут. А поедут наши баскаки и таможники, данщики, поборщики, писцы по сим нашим грамотам, как наше слово молвило и уставило, да все будут целы соборныя церкви митрополичьи, никем ни от кого не изобижены вся его люди и вся стяжания его, как ярлык имеет. И архимандриты и игумены и попы и вся причты церковныя ничем никто да не будет изобижен. Дань ли на нас емлют или иное что ни буди, тамга ли, поплужное ли, ям ли, мыт ли, (л. 480 об.) [1756] мостовшина ли, война ли, ловитва коя ни буди наша, или егда на службу нашю с наших улусов повелим рать збирати, где восхотим воевати, а от соборныя Церкви и от Петра митрополита никто же да не взимает и от них людей и от всего его причта. Те бо за нас Бога молят и нас блюдут и наше воинство укрепляют, кто бо того и прежде нас не ведает, что Бога безсмертнаго силою и волею живут все и воюют, то все ведают. И мы, Богу моляся, по первым царей грамотам грамоты им давали жаловалныя, а не изыначивали ни в чем. Как то (л. 481) [1757] было прежде нас, так молвя и наше слово уставило, по первому пути которая дань наша будет, или запросы наши накинем, или поплужное, или послы наши будут, или кормы наши, или коней наших или подводы, или корм послов наших, или наших цариц, или наших детей и кто ни есть и кто ни буди, да не взимают, да не просят ничто же. А что возмут, и они отдадут назад третицею, аще будет взяли за нужу великую, а от нас им будет некротко, а наше око тихо на них не смотрит. А что будут церковнии люди, ремесленицы кои или писцы, или (л. 481 об.) [1758] каменныя здатели, или древяныя, или иныя мастеры каковы ни буди, или ловцы какова лова ни буди, или соколницы, а в то наши никто не вступаются и на наше дело да не емлют их, и пардусницы наши и ловцы наши и соколницы наши и побережницы наши да не вступаются в них и да не взимают у них их делных орудий и да не отнимают ничего ж. А кто закон их и в законе их церкви и монастыри и часовни их ничем да не вредят, ни хулят, а кто учнет веру хулити или осуждати, тот человек не извинится ничим же и умрет (л. 482) [1759] злою смертию. А что попы и диаконы их един хлеб ядят и во единем дому живут, у коего брат или сын, и тем по тому ж пути наше жалование, еже кто будет от них не выступил, а митрополиту не служит, а живет себе, тот именем поповским да не отъимается, но дает дань. А попы и диаконы и причты церковныя пожалованы от нас, по первей нашей грамоте и стоят молящеся за нас Богу правым сердцем и правою мыслию. А кто учнет неправым сердцем молитися о нас Богу, тот грех на нем будет. А кто будет поп (л. 482 об.) [1760] или диакон или причетник церковный или люди кто ни буди, откуду ни есть, митрополиту похотят служити и о нас Бога молити, что будет у них, у митрополита в мысли, то ведает митрополит. Так слово наше учинило, и дали есьмя Петру митрополиту грамоту сию крепости ему для. Да сию грамоту видяще и слышаще вси людие и все церкви и все монастыри и все причты церковныя да не преслушают ни в чем его, но послушни будут ему по их закону и по старине, как у них изстари идет. Да пребывает митрополит правым сердцем (л. 483) [1761] без всякие скорби и без печали, Бога моля о нас и о нашем царьстве.

А кто вступится в церковное или в митрополичье, и на того будет гнев Божий, а по нашему великому истязанию не извинится ничим же и умрет злою смертию.

Так ярлык дан, так молвя слово наше учинило, таковою крепостию утвердило заечего лета асеннаго перваго месяца 4 ветха, на поли их писана и дана.

Такожде и Атюляк царь Михаилу митрополиту дал ярлык.

Такожде и Таидула царица Зенезбекова (л. 483 об.) [1762] Феогносту митрополиту и Алексию и Ионе митрополитом давала ярлыки, и Бердебек царь дал Алексию митрополиту во всем подобны первому вышеписаному, не изыночевая, и ни во что святительское не вступалися, ни в суд, ни в вотчины.

Паки [1763] в лето 7059 месяца февраля в 23 день царь и великий князь Иван Васильевич всеа Росии со отцем своим Макарием митрополитом всеа Росии и со всем освященным собором. Быша же вопросы и ответы мнози о различных чинех церковных. Быша же сия в царьствующем граде Москве в царьских полатех от благочестиваго (л. 484) [1764] и боговенчаннаго царя государя и великаго князя Иоанна Васильевича всеа Русии самодержца ко отцу его Макарию митрополиту и ко всему священному собору во 18 лето царьства его, в 21 лето от рожества его, в 10 лето святительства преосвященнаго Макария митрополита.

Бысть же на соборе сем Феодосий, архиепископ Великаго Новаграда и Пскова, Никандр, архиепископ Ростовский и Ярославский, Трифон, епископ Суздалский и Торуский, Гурий, епископ Смоленский и Брянский, Касиан, епископ Рязанский и Муромский, Феодосий, епископ Коломенский и Коширский, Сава, епископ Сарский и Подонский, Киприан, епископ Пермский (л. 484 об.) [1765] и Вологодский и честныя архимандриты и игумены. И всем седящим, абие благочестивый царь воста со престола своего и посреде святительскаго лика став, светлым воззрением и веселым лицем на всех возрев, сицевая собору изглагола.

Молю вас, святейшии отцы мои, аще обретох благодать перед вами, утвердисте в мя любовь, яко во приснаго сына и не обленитеся изрещи ми слово ко благочестию единомысленно и о православней нашей христианстей вере и о благостоянии святых Божиих церквей и о нашем благочестивом царьствии и о устроении всего православнаго (л. 485) [1766] християнства, зело бо желаю и срадуюся и согласую, сослужебен с вами быти и вере поборник. Во славу Святыя Животворящыя неразделимыя Троицы, Отца и Сына и Святаго Духа, и в похвалу и славу благочестивыя нашея веры и церковных устав, тем же и всякому разгласию отныне далече быти повелеваем, всякому же согласию и единомыслию содержатися в нас. И сия изрек и множае сих.

И на том же соборе вдаст царь своея руки написание се богодухновенным наказанием и с душеполезным покаянием, зело полезно слышащим и внемлющим сия, имуще сице.

Сие убо предлагаем (л. 485 об.) [1767] писание вашей отеческой любви ради пречистыя истинныя нашея веры во единосущную и неразделимую и Живоначалную Троицу. Иже [1768] Вседержителя Бога Отца благоволением и щедротами и еже к нам единороднаго и собезначална Сына Его, Господа нашего Иисуса Христа, и поспешением и действом Пресвятаго и вседетельнаго и Животворящаго Духа и помощию православныя христианския надежды Пречистыя и Преблагословенныя Владычицы нашея Богородицы и Приснодевы Марии, силою Честнаго и Животворящаго Креста, заступлением святых Божиих архангел Михаила и Гавриила и прочих небесных сил безплотных, (л. 486) [1769] честнаго и славнаго пророка и предтечи Крестителя Иоанна и святых славных и всехвалных апостол, самовидцов Сына и Слова, и святых великих мученик, иже любви ради и веры во Христа не пощадивша живота своего и страдалческими вечными венцы увязошася, и святых святитель преподобных, и святаго великаго святителя пресловущаго в чюдотворцех Николая, и святаго и равнаго апостолом перваго православнаго царя Константина и христолюбивыя матери его Елены и всех благочестивых царей и цариц православных, иже о благочестии воздвизавшихся, и святых великих чюдотворцов, иже в нашей земли великия Росии (л. 486 об.) [1770] в чюдотворении просиявших преосвященных митрополитов Петра и Алексия и Ионы и Леонтия, епископа Ростовскаго чюдотворца, и святаго равна апостолом царя и великаго князя Владимира, просветившаго всю Рускую землю святым крещением, и баба его, предтечи росийския к Богу, святыя и блаженныя княгини Олги, и сынов его святых страстотерпец, боголюбивых князей руских обою брату по плоти Бориса и Глеба, и прочих от роду его, православно поживших и Богу угодивших, и преподобных и богоносных отец наших Антония и Феодосия Печерских, и Сергия Великаго, и Варла(л. 487)ама [1771] Новгородскаго, и Кирила Белоозерскаго, и Никиты Переславскаго, и Пафнотия Боровскаго, и Димитрия Прилуцкаго, и всех мученик и преподобных и уродивых Христа ради, и всякаго чину царьска и княжска и боярска и на всех православных христиан, иже добрыми делы просиявших и от Бога прославленых великими чюдесы, в богодарованней нам державе от прародителей наших Росийскаго царьствия великих новых чюдотворцов и всех святых, иже от века Богу угодивших. На тех святых молитвы уповая, предлагаем совет вашей отечестей любви, еже (л. 487 об.) [1772] поутвердити древняго предания христианския истинныя нашея веры, еже от самаго Создателя нашего предание, а не от слуги, ни от посланнаго. Сам бо преда божественным своим учеником и апостолом, они же убо предаша иже по них, даже и доныне слово спасителное Господа нашего Иисуса Христа дойде. Тем же молим вы и засвидетельствуем Господем нашим Иисусом Христом и божественныма Его ученики и апостолы и святыма Вселенскима седьми соборы и святыма Поместныма соборы и всеми святыми преждереченныма, Бога ради и Пречистыя Богородицы и всех святых ради, потруждайтеся (л. 488) [1773] воеже исправити истинная наша и непорочная христианская вера, иже от Божественаго писания, во исправление церковному благочинию и царьскому благозаконию и всякому земскому строению и нашим единородным безсмертным душам на просвещение и на [1774] оживление и на утвержение истинныя православныя христанския веры, дабы утвержена была и непоколебима в роды и роды и навеки и неврежденна от душегубителных волк и от всяких козней вражиих.

И вы, господие святии святитилие, преосвященный отец мой Макарий митрополит всея Росии, и вси архиепископы и епископы и преподобнии архимандриты и честнии (л. 488 об.) [1775] игумени, и весь освященный собор, и иноцы и прочии вси Божии молебницы, такожде и братия моя и вси любимии мои, князи и бояры и воеводы и воини и все православное христианство, помогайте ми и способствуйте вседушно вкупе, и с плачем припадем к человеколюбцу Богу, да отверзет нам умныя наша очи и узрим пред собою грехи наша, яже содеяхом зле по вся дни живота нашего. И молитв ради Пречистыя Богородицы и всех святых долготерпяй о нас Господь Бог, да обратит ны на истинный пусть святых Его заповедей, о них же согрешихом пред Богом и человеки и всяким законопреступлением, (л. 489) [1776] яже не мочно писанием и списати и человеческим языком изглаголати содеянная нами вся злая согрешения и законопреступления грехом от юности моея и неведения моего. Ныне всех злых дел возненавидевше, добрыя и богоугодная дела возлюбим, да не постраждем подобных со прогневавшими и непокаившимися, якоже Христос во Евангелии пишет: Пришедше бо, поведаша Ему о галилеох, их же кровь Пилат смеси с жертвами их. Рече же им Иисус: Мните ли, яко сии галилеане грешнейши суть паче всех в роде сем? Ни, глаголю вам. Аще не покаетеся вси, такожде погибнете. Воспомянем (л. 489 об.) [1777] убо от начала миру, како не пощаде Бог сатаны за едину гордость и всех аггел, иже суть в чину Его, но пленницами мрака связа и с небесе сверже и в бесы претвори.

За един грех Адам и Ева, не покаявшися, из рая извержени быша, и за единаго человека преступление вси праведнии во ад снидоша, донележе изведе я Господь, за блуды неудержания плоти и за преступление, еже не совокуплятися сыновом Божиим со дщерми человеческими. Не пощаде Бог всеа вселенныя, потом потреби, токмо праведнаго Ноя [1778] самаго есма соблюде. За мужеложство и за любодеяние и за прелюбодеяние Содо(л. 490)ма [1779] и Гомора огнем сожже, токмо праведнаго единаго Лота со двема дщерьма обидима, избави от нечистоты. И что прочее о сем много глаголати или писати, ведаете и видите вся писания известно в Ветхом законе и в Новой благодати. Такожде и в нынешния времена за всякия различныя грехи всякими различныма казньми многия грады разоришася, и людие без вести быша, и великия царьствия запустеша, овии за гордость, а инии за братоненавидение и за насилие своим. Многия же погибоша за идолопоклонение, иже не обратишася на благочестие. Наипаче же горши всего зла за любодеяние (л. 490 об.) [1780] и прелюбодеяние и за содомский блуд и за всякую нечистоту многия царьствия исчезоша и без вести быша, еще же и за срамословие и клятвопреступление и за безмерное объядение и пиянство напрасною смертию исчезоша.

Мы же убо всех сих убоявшеся и ум свой собравше и очистивше чювствие душ и телес наших, порастворим вся сия мимоидущая и настоящая вся, яже пред нашима очима бывшая вся и бывающая разсмотрим. Не вся ли та в нас злодеяния, иже глаголахом? Речет же ми кто, яко идолопоклонения в нас несть, ино сребролюбие (л. 491) [1781] не второе ли идолослужение или блудная скверная деяния. Сим же подобная како поработахом, сребру ли или сласти плотстей сами весть паче нас. Аще же речет ми кто, яко не вем таковаго беззакония, дерзаю рещи по пророку, глаголющему: Яко аспид глухий, иже не слышит гласа обаваящих. Чем же бо прежде поскорбим о толиких беззакониих и о чем восплачемся? Како нам Бога милостива сотворити? О сем видим вси, каковы различныя казни и милостивное наказание на нас посла Господь, обращая нас от заблуждения, яко чадолюбивый отец. Мы ж никако ж о сем воспомянухомся.

(л. 491 об.) [1782] Первее смирил нас Бог, отнял у меня отца, а у вас пастыря и заступника. Еще же сия скорбь не мину, начашася множати великия бедныя скорби, бояря и велможи вернии и любимии отцем моим совет не благ совещаша ми, вменяюще, яко мне доброхотствуют, наипаче же себе самовластие улучающе, яко помрачении умом дерзнули поимати и скончати братию отца моего. И егда хощу воспомянути их нужную смерть и немилостивное мучение, весь слезами разливаюся и в покаяние прихожду, и прощение у них прошю за юность (л. 492) [1783] и не неведение, по скончании дядь моих по немнозе времени и мати моя преставися, оттоле горкая скорбь постиже нас, мне сиротствующу, а царьству вдовствующу. И тако бояре наши, улучиша себе время, сами владеша всем царьством самовластно, никому же возбраняющу изо всякаго неудобнаго начинания и моим грехом и сиротством и юностию мнози межусобною бедою потреблени быша. Аз же возрастох в небрежении и в ненаказании отца своего и матере, якоже подобает наказати отцу чадолюбцу, и навыкох их злокозненыя обычаи (л. 492 об.) [1784] и тая же мудрствовах, якоже и они. И от того времени и доныне каких зол не сотворихом пред Богом и каких казней не посла на нас Бог, приводя нас на покаяние, ово пленением и святым церквам разорение и попрание всяким святыням и много безчисленное кровопролитие и пожжение и истопление и в плен расхищение всякаго священническаго и иноческаго чина, князей и бояр, и всякаго христанскаго рода, мужеска полу и женска, разсеянныя по лицу всеа земли и оскверненныя всякими нечистотами и всякими страданми и муками томимы и (л. 493) [1785] смертем предаваемы. Мы же о сем многажды покушахомся месть сотворити врагом своим и ничто же успехом. Сего его же Господь наказует нас сими, а не поганых поспешеством над нами. И сими великими казнми в покаяние не внидохом, сами межусобство зло сотворихом и бедным христианом всяко насилство чинихом. И милосердый Господь за премногия грехи наша наказуя нас ово потопом, ово мором и различныма болезньми и бедами, и никакоже не наказахомся. И посла Господь на ны тяжкия и великия пожары и вся наша злая собрания потреби и прародитель благословение (л. 493 об.) [1786] огнь пояде, паче же всего святыя Божия церкви и многия великия и неизреченныя святыни и святыя мощи и много безчисленное народа людска. И от сего убо вниде страх в душю мою и трепет в кости моя, и смирися дух мой и умилихся, и познах своя согрешения, и прибегох ко святей соборней и апостолстей Церкви, и припадох Божию человеколюбию великому и ко Пречистей Богородицы и ко всем святым и ко твоему первому святительству и всем, иже с тобою, святителем, и умилно припадая, истинным покаянием прося прощения, яже зло содеях. И Божия ради великия милости получих от вас (л. 494) [1787] мир и благословение и прощение о всем, яже содеях зле. Тогда же убо и аз всем своим князем и бояром по вашему благословению, а по их обещанию, на благотворение подах прощение в их к себе прегрешениих, и по вашему благому совету, Богу помогающу нам, начах вкупе устрояти и управляти Богом врученое ми царьство, елико Бог поспешит, у Него милости и помощи просяще.

Еще же молю вашу святыню и преподобие, и о сем прострите прилежную молитву ко всесилному и милостивому Богу, еже попустил на нас Бог многую скудость всякому плоду (л. 494 об.) [1788] земному, такоже и скотом и птицам и прочему изобилию и всякому стяжанию. И аще вашима отеческима молитвами умолен будет Бог о нас и милостива Его себе [1789] сотворим и очистимся от всяких грех душевных и телесных. И тако уповаем на милость Его, да помилует нас и моления нашего не презрит, щедр бо есть и милостив и не оставит нас, сирых, но послет свою помощь рабом Своим и просветит ум наш, и утвердит страх Свой в нас, и укрепит нас на путь мирен, и наставит на всяко дело благо, и годину подаст всяческих (л. 495) [1790] плодов, и вся враги наша видимыя и невидимыя вскоре да покорит в нозе наши.

Вы же, господие, отцы наши, пастырие и учителие, внидите в чювства ваша, прося у Бога помощи и стрезвите ум ваш, и просветитеся во всяких богодухновенных обычаех, якоже предаде вам Господь. Ваше же от Бога порученное вам стадо словесных овец всего православнаго христианства Росийскаго царьствия, наполнив себе духовныя ползы святаго Писания, мене, сына своего, наказуйте и просвещайте на всякое благочестие, якоже лепо есть благочествым царем быти во всяких царьских законех праведных (л. 495 об.) [1791] и во всяком благоверии и чистоте братию нашу и всех князей и бояр и все православное христианство неленостно и тщателно утвержайте и вразумляйте и просвещайте и наказуйте, да непорочно сохранят истинный христианский закон. Прежде убо вы сами, пастырие и учителие, известите себе и утвердитеся и множите данный вам от Бога талант, такожде и весь священный собор и иноческий чин, якоже предаша вам святии отцы седми святых собор Вселенских и Поместных, праведный закон утверждайте и истинную православную веру христианскую. (л. 496) [1792] Да и мы, видяще ваша добрая дела и духовная наказания и Божественая писания от вас внимающе, Богу поспешествующу, негли просветимся и обратимся на истинное покаяние, вашим о нас духовным желанием и попечением и да получим великую милость зде и в будущем веце от Христа Бога. Ныне молю вас, о благособраный соборе, Бога ради и Пречистыя Богородицы и всях святых ради потружайтеся о истинней и непорочней православней христианстей вере и утвердите и изъясните, якоже предаша вам святии отцы по Божественым правилом. И не токмо глаголю вам, потрудитеся, (л. 496 об.) [1793] но и постраждите за имя Христово, якоже они, божественнии мужие, не токмо за имя Его пострадаху, но и за образ, якоже Стефан Новый и Максим Исповедник, и Феофилакт Никомидийский и инии мнози, якоже сами паче весте и помнисте, како обещастеся на святем соборе. Яко аще паче что ми велят сотворити не по правилом святых отец князи и бояре [1794], аще и сами владущии, аще ли и смертию воспретят, никако же ми их не послушати.

Видите убо, яко и смерти обещаются епископи предатися за веру Христову. Коль же вам паче труда и поношения от безумных человек (л. 497) [1795] и ино ничто же, якоже о них божественный во апостолех Павел глаголет, воеже к Тимофею послания его: Чадо Тимофее, ведый буди, яко в последняя дни настанут времена люта, будут бо человецы самолюбцы и сребролюбцы, а не боголюбцы, предатели, предерзливи, возносливи, сластолюбцы, паче не боголюбцы [1796]. И сих отвращайся, якоже Аннии и Амврии противистася Моисею, тако сии противистася истине. Безумие их яве будет всем, якоже и онех бысть. И сих ли безумия убоимся, ни убо, но аще бы мучителие были всем, ино бы пострадати до крови и до смерти ради веры Христовы. Вы же, о богособранный соборе, потруждайтеся веры ради Христовы, воеже исправити (л. 497 об.) [1797] и изъяснити по правилом святых отец. На сие бо и собрех аз вы, о боголюбезный соборе, отцы святии, за веру христианскую и за истинный православный закон, якоже предаде нам церкви Божия вкупе единодушевно всегда есмы с вами исправляти и утверждатися, якоже наставит нас Дух Святый. Аще по вражию навету некое поползновение будет чрез Божественое правило вашим нерадением во всяких наших христианских законех без обличения, сему убо аз не причастен. Вы о сем ответ дадите в день Страшнаго суда. Аще ли аз буду вам сопротивник (л. 498) [1798] кроме Божественых правил вашему согласию, вы о сем не умолчите, аще преслушник буду, воспретите ми без всякаго страха, да жива будет душа моя и вси, подлежащии нам, яко да непорочен будет истинный православный христианский закон и славится в нем пресвятое имя Отца и Сына и Святаго Духа ныне и присно и во веки веков. Аминь.

И сим на соборе прочтены бывшим архиереом же, в первенствующий преосвященный Макарий, митрополит всеа Русии, со всем освященным собором, со архиепископы и епископы и со честнейшими архимандриты и игумены, зело о сем (л. 498 об.) [1799] удивишася и о благочестии слово изнесоша и Вседержителю Богу хвалу воздаша. И бе чюдно видение и всякаго ужаса исполнь толикое царьское величество со душевным желанием церкви Божии совокупляется. И кто от толикои радости зелныя не испусти слез, видя царьскую душу совокупльшуюся с церковным устроением. И потом на соборе царь вдаст иная писания о многих царьских чинех.

Видели ли еси произволение царьское и усердие и покаяние о содеянных мимошедших злых и церковныя законы велит утверждати по преданию святых апостол и святых (л. 499) [1800] отец, и сам пострадати обещася. Аще ли, рече, и аз в чем погрешю, не умолчите, но воспретите без всякаго страха, да жива будет душа моя.

И на сем соборе царь и вси архиерее в 53 главе о святительском суде соборной ответ от священных правил апостолских и отеческих и от заповедей благочестивых царей.

Яко не подобает князем и бояром и всяким мирским судиам священническаго и иноческаго чина на суд привлачати, ниже таковым судити, да не обладает ми никто ж от простых людей, точию великая соборная Церковь обладает и судит таковыми по закону еще (л. 499 об.) [1801] иных правил. А от простых людей ни князь, ни боярин, ни всяк мирский судия да не обладает иерея, ниже монастыри, ниже мниси. Сия вся освященная Богови возложена суть и святителем и никто же ими обладает от мирских, яко не неосвященна священная вносится, ниже от Церкве да приемлют что. Аще ли и создатели церкви кои монастыреви суть, точию единаго благословения церковнаго и приношения и сего узаконено со страхом приимати и со благословением архиереовым или иереовым. Аще ли ж кто покусится что взяти от церкве чрез благословение архиереово или иереово кроме закона церковнаго, таковый ничему (л. 500) [1802] подобен есть, точию священная крадущему и скверностяжателем иноверным человеком и сии убо яко тати суть и хищницы и разбойницы Церкви Божия. И сия аще кто сотворит и таковыи аще не покаются и пагубу наследуют, сице бо Господь наш Иисус Христос, заповеда, рек: Отдадите кесарева кесареви, а божия Богови.

О том же святительском суде от священных правил святых апостол 2-го правила толкование.

Божественаго [1803] писания и священная правила и законы не повелевают мирским судиам судити священников и прочих причетников и иноков, но священныя мужи. И прочая вся причетники и иноки и монастыри (л. 500 об.) [1804] и прочая вся церкви болшая же и молитвенныя храмы сих область и господьства все и владычества все и управление и попечение местным епископом повелевают имети. И аще причетник с причетником прю имать, да не оставляет своего епископа и на мирския судища да не приходити, но да судит их епископ их или в себе место коему прикажет судити их. Такоже и иноцы и прочии церковнии людие да судит их епископ или в себе место кому прикажет тех судити. Аще ли причетник прю имать с своим епископом или со инем да судит их митрополит тоя области с своими епископы собором. Аще ли причетник или (л. 501) [1805] прю имать с митрополитом, патриарх их судит и митрополит убо имать в своей области под собою епископы и сих избирает и поставляет и управляет. Епископы ж в своих пределех под собою имеют вся церкви и монастыри и иноки и причетники и сих избирают и поставляют и управляют мирстии властели, вси чины и власти приразящиися, и осуждаются в сем веце и в будущем, якоже писано есть в заповедех святых апостол, яко восхищей недарованная им, раздражают Бога, якоже Дафан и Авирон и Корей и их сынове и сотницы и Иозия царь. Страшно убо и бедно есть мирским человеком (л. 501 об.) [1806] ко священным вещем прикасатися, но ни диакону убо приносити жертвы несть достойно, ни крестити кого, ни благословенная мала или велика сотворити. Такоже презвитеру несть достойно поставление сотворити и развращати чин священнический, якоже дерзнувше на [1807] таковая, не с нами борются, но с великим архиереом Христом. Аще ли бо Филипп скопца крестив и Анания мене Павла, но не сама себе восхитиста святительскаго сана, но от Бога прияста власть, от несочетаннаго Архиерея. Мирским женам и паче отнюдь не подобает ко священным чином и властем и степенем и причтом прикасатися (л. 502) [1808] или судити сих и управляти, аще и согрешит от сих кто, от Бога истязан будет. И паки в тех же апостолских заповедех глаголет яко, койждо в даннем ему чину да пребывают и не преступают и не суть бо наша, но Божия, якоже рече Господь: Слушаяй Мене, слушает пославшаго Мя, и отметаяйся вас, Мене отметается, отметаяй же ся Мене, отметается пославшаго Мя.

О том же святительском суде от священных правил собора, иже в Халкидоне, правило 9.

Аще [1809] о чем прятся причетники, да не приходят к мирским судиам, но к своему епископу. Аще некий причетник со причетником прю имеет, (л. 502 об.) [1810] да не оставляет своего епископа, к мирским судищам не прирыщет, но прежде да скажет вещь своему епископу. Да повелением того епископа придут обои хотящии претися, да разсудит епископ с началными его попы. Аще ли кто чрез се сотворит, правилным запрещением да есть повинен. Аще ли причетник имать прю с своим епископом или с попом, пред областным собором да прится.

Толкование.

Аще причетник имать нечто на причетника, не подобает ему судитися пред мирскими судиами, но от своего епископа. Аще ли к мирскому судищу приступят, по правилом запрещение да приимут. Тако ж и при(л.503)четник [1811], аще имать нечто на своего епископа, егда в реченая времена соберутся епископи всеа области, пред собором да судится. Иже аще епископ или причетник с митрополитом имать некая распря, от патриарха всея тоя земли да судится, под ним же суть епископи и митрополиты всех областий и страны тоя, или от патриарха Константиняграда да судится. Сия бо власть от инех патриарх никому же вдана бысть, ни от правил, ни от закона, еже судити митрополита, под иным патриархом суща, другому патриарху, но токмо Константиняграда патриарху се дано есть.

О том же святительском суде собора, иже в Карфагене, правило 15.

(л. 503 об.) [1812] Епископом [1813], презвитером и диаконом не подобает церковнаго судища отрицатися. Аще кто от них, оклеветаем о гресе, церковный остави суд, и к градским приступит судиам, и пред теми исповесть и судится. Аще неповинен явится и осужден будет от градских судей, свой погубит степень. Аще не о гресех будет вина, но о имении или о злате или о неких мирских вещех, и прилучится ему таковых препрети и оправдану быти, подобно ему судити, оставлшу, и к мирским судиам приступлшю и от тех судившуся. Аще любо хощет тех суд держати и вопросити имении или злата или инаго что, о нем же препрев, (л. 504) [1814] оправдан бысть, свой степень погубит. Аще же преобидив мирский суд, и не возмет ничто же, от них же оправдан бысть, во своем степени да пребывает.

О том же.

Яко не подобает мирским судиам священническаго и иноческаго чина судити, ниже на суд привлачати, святаго 5-го собора от заповедей святых отец 165, тамо бо речено бысть: Аще ли кто и сану преобидети начнет или судии восхощет церковныя, и опраною или привлачаща насилует епископа или попа или диакона или всякаго просто рещи священнаго или монастырем даное, граблением и насилием дея и отъимая от них все, даемое Христови, да будет проклят.

(л. 504 об.) [1815] О том же от книг Иустиниана царя правило 74.

Аще [1816] ли кто Божественым таинам или иным святым службам совершаема, во святую церковь вшед, или епископу или причетницы или иным слугам церковным досаду нанесет, повелеваем убо сего муками казнити и в заточения посылати. Аще же и иныя Божественыя тайны и Божественную службу смятет или совершити возбранит, мечем главу его да отсекнут. И таковая отмщати повелеваем не токмо градским, но и воинским властелем.

О том же от различных святитель и Иустиниана царя глава 1.

Властель [1817] же мирский да не привлачит пред себя чернца или черницы (л. 505) [1818] или девицы или жен, якоже имый нечто на кого от мних или от священных девиц и жен сущих в монастырех, ко епископу места того да приступит и возвестит ему. Он же с честию мниха или черноризицу, послав игумена, да приведет, или посолника, или кого от мирских, и разсмотрив, и судит их. Властель же, покушаяся привести пред ся, таковый лишен будет власти и даст в людское сокровище десять литр и перепер купно своим чином. Посланым же приведша, да заключены будут в предград и подобную казнь да приимут и епископом возбранени будут, к тому таковых на мирских властелей не приводити.

Того ж Иустиниана (л. 505 об.) [1819] царя о том же святительском суде правило 87.

Не творити пакости мнишескому чину, ни черноризцу, ни черноризице никиим любо образом, ни поругатися церковному строению. Се же аще кто дерзнет сотворити, телесную подъимет муку и в заточение предан будет.

Такожде же и от перваго христианскаго царя Константина заповеди приписаша, еже не судити священнический чин и весь причет и великаго князя Владимира заповеди, якоже есть выше сего писано.

И заповеди благочестиваго царя Мануила греческаго, еже написа о суде святительском и о достоянии.

Понеже и се к ушима нашего царьства достиже от жалобник церковных (л. 506) [1820] повсюду, идеже аще суть церковная стяжания пошлины изобидимы [1821] от наместников моих или от судий, абие положися нашему царьству брежени, и о сем честному сему храму и всем по Вселенней и сущим митрополитом и архиепископом и епископом и монастырем и всем Божиим церквам, идеже аще суть, или на восточных странах по всей вселенней, якоже суть отдана Богу, приношение жертвам даже до скончания века, да пребывают моего царьства нерушима писания ради. Аще гради, аще села, аще лугове или езера, торжища и одрины или люди купленыя в домы церковныя, или пошлиною под судом церковным, или винограды, или са(л. 506 об.)дове [1822], или что таковое от церковных вещей, якоже еже царьство наше судивше, узаконив, положи, и наместницы царьства нашего несть им кому их посудити. Такоже и елика суть в дании или куплена в домы церковныя, да суть по судом церковным, такоже не смеит никто же посужати, изыскивати кому от судии моих или от наместников. И аще кто, смеяв от наместников или от судии царьства моего посудити и проданая в церкви или даная от кого или какова отдана будет, всяк бо, иже аще [1823] таково смеяв изыскивати или посужати смеит дерзнути, немилостивно сего дом разграблен да будет в дом церковный или судиям, и той сам по вся лета (л. 507) [1824] живота своего безчинствен будет и от сына своего и от лучия смоего [1825] отлучен, яко противится цареву законению. Аз же глаголю, честне и боголюбезне церквам и монастырем отдавшаго и сего ради мал некаков дар приносящу ми Богови, от Него ж тмочисленых дарований от богодателныя Его десницы восприимшу ми, сего ради подобает, ниже от наместников, ниже от судии и царьства моего всяческое церковное или монастырское стяжание или даное или купленое не изыскивати, ниже подсуждати, понеже царьство клявся отдаде стяжание и пошлины церквам Божиим ради имени Божия и на славу Его, яко да сохранени будем под кре(л. 507 об.)пкою [1826] Его десницею, ово же прося милости и прощения о иже к Богу, яко человек, плоть нося, приразихся и согреших, ово же ради помощи от них, иже воины Великаго Царя Христа, иже от младаго возраста иноческому житию прилепившихся и во все оружие одеявшихся, Святаго Духа споспешника имети и поборника крепка на видимыя и невидимыя враги. Тем же, аще убо кто дерзнет или наместник или судия или велможа царьства моего, или ради имения, или ради насилия, или ради мзды, или ради которою хистростию преобидети восхощет церкви Божия, аще суть писано во утверженом писании, и царьства моего пре(л. 508)обидите [1827] отданая Богови и Его Церкви, и яже под областию Ея на востоце и западе, всем митрополитом, архиепископом и епископом, всем монастырем, идеже аще суть, якоже предрехом, и по всей Вселенней пошлины церковныя отданыя Богу, аще град, аще села, аще лугове или езера, торжища и одрины, или люди купленыя в домы церковныя, или пошлины под судом церковным, или виноград, или садове, или какова суть от церковных притяжаний и презрит или изобидит или подсуждати начнет. Первие же Святыя Троицы света и милости, егда предстанем страшному Судищу да не узрит и да отпадет от христианския части, якоже Июда от дванадесятнаго (л. 508 об.) [1828] числа апостолскаго. К сему ж и клятву да приимет, иже от века усопших первородных святых праведных и богоносных отец.

Седмаго святаго Вселенскаго собора изложение.

Не восхощи прияти новых законов на развращение, но соблюди твердо истину, якоже плотское Божие пришествие словом и усты и сердцем и умом, писанием же и образы исповедати и соблюдати подобает, подобне ж и священная правила, закон же и уставы, яже прият святая Церковь и вся Предания писаная, яже предаша святии апостоли и преподобнии отцы и благочестивии царие, непреложно и непревратно соблюдати подобает. Неповинующии бо ся сих хранити вечно (л. 509) [1829] мучимы будут, хранящии же сия вечнаго живота наследницы будут.

Сия де вся пишем, аще и от единых Божественых законов, но объявляя тую ж благодать Святаго Духа, действующую во всех благочестивых сердцах и произволений царьских.

А в прошлом во 156-м году июля в 16 день

Государь [1830] царь и великий князь Алексий Михаилович всеа Росии самодержец в двадесятое лето возраста своего, в третие лето Богом хранимыя своея державы, советовал со отцем своим и богомолцом Святейшим Иосифом, Патриархом Московским и всеа Русии, и с митрополиты, и со архиепископы, и епископы, и со всем освященным собором и говорил с своими государевыми бояры и с окольничими, (л. 509 об.) [1831] и с думными людьми, которыя статьи написаны в правилех святых апостол и святых отец и в градских законех Греческих царей, а пристойны те статьи к государьственным и к земским делем, и те бы статьи выписать и чтобы прежних великих государей царей и великих князей Росийских и отца его государева, блаженные памяти великаго государя царя и великаго князя Михаила Феодоровича всеа Росии указы, и боярские приговоры на всякия государьственныя и на земския дела собрать, и те государьския указы и боярские приговоры со старыми судебниками справити.

A на которые статьи в прошлых годех прежних государей в судебниках указу не положено и боярских приговоров на те (л. 510) [1832] статьи не было, и те бы статьи по тому ж написати и изложити по его государеву указу общим советом, чтоб Московскаго государства всяких чинов людем от болшаго и до меншаго чину суд и росправа была во всяких делех всем равна.

И указал государь царь и великий князь Алексий Михаилович всеа Русии то все собрать и в доклад написати бояром князю Никите Ивановичю Одоевскому да князю Семену Васильевичю Прозоровскому да околничему князю Федору Федоровичю Волконскому да диаком Гаврилу Левонтьеву да Феодору Грибоедову. А для того своего государева и земскаго великаго царственнаго дела указал государь по совету со отцем своим и богомолцом Святейшим (л. 510 об.) [1833] Иосифом Патриархом Московским и всеа Росии и бояре приговорили выбрать ис столников и ис стряпчих и из дворян московских и из жилцов ис чину по два человека. Также всех городов из дворян и из детей боярских взяти из болших городов, опричь Новагорода, по два человека, а из новгородцов с пятины по человеку, а из менших городов по человеку, а из гостей трех человек, а из гостиныя сотни и из суконныя сотен по два человека, а ис черных сотен и из слобод и из городов с посаду по человеку добрых и смышленых людей, чтоб ево, государево, царьственное и земское дело с теми со всеми выборными людьми утвердити и на мере поставити, чтобы те вси великия дела по нынешнему (л. 511) [1834] его, государеву, указу и Соборному уложенью впредь были ничем нерушимы.

И по государеву цареву и великаго князя Алексия Михайловича всеа Русии указу бояре князь Никита Иванович Одоевской с товарыщи, выписав ис правил святых апостол и святых отец и из градских законов Греческих царей и из старых судебников прежних великих государей, и из указов блаженныя памяти великаго государя царя и великаго князя Михаила Феодоровича всеа Росии и из боярских приговоров, и которых статей в прежних судебниках и в указех прежних государей и в боярских приговорех не написано, и те статьи, написав вновь, к государю приносили.

И в нынешнем во 157-м году октября 3-го числа государь (л. 511 об.) [1835] и великий князь Алексий Михаилович всеа Русии самодержец со отцем своим и богомолцом Святейшим Иосифом, Патриархом Московским и всеа Русии, и с митрополиты, и со архиепископы, и епископы, также и с своими государевыми бояры и с околничими, и з думными людьми того собранья слушал, и выборным людем, которыя к тому общему совету выбраны на Москве и из городов чтено, чтоб то все Уложение впредь было прочно и неподвижно. И указал государь то все Уложенье написать на список и закрепить тот список Иосифу, Патриарху Московскому и всеа Росии, и митрополитом, и архиепископом, и епископом, и архимандритом и игуменом и всему (л. 512) [1836] освященному собору и своим государевым бояром и окольничим, и думным людем, и выборным дворяном и детем боярским, и гостем, и торговым, и посадским людем Московскаго государьства и всех городов Росийскаго государьства [1837]. А закрепя то Уложение рукама, указал государь списати в книгу и закрепить тое книгу диаком Гаврилу Леонтьеву и Феодору Грибоедову, а с тое книги для утвержения на Москве во все приказы и городы напечатать многия книги и всякия дела делать по тому ж Уложенью.

И по государеву цареву и великаго князя Алексия Михайловича всеа Русии указу то Уложенье на список написано и Святейший Иосиф, Патриарх Московский и всеа Росии, и митрополиты, и архиепископы, и епископы, и архимандриты, (л. 512 об.) [1838] и игумены и весь освященный собор, также и бояре, и окольничие, и думные люди, и выборные дворяне и дети боярские, и гости, и торговые посадские люди к тому Уложенью на списке руки свои приложили и с того Уложенья списав список в книгу слово в слово, а с тое книги напечатана сия книга.

Разсмотри, лукавый совопросниче, ослепленне умом, и зде царьское повеление и совет Святейшаго Патриарха с митрополиты и архиепископы и епископы и со всем освященным собором и приговор государевых бояр и околничих и думных людей велено написать ис правил святых апостол и святых отец и из градских законов Греческих и прежних великих государей царей (л. 513) [1839] и великих князей Росийских и отца его, государева, блаженныя памяти великаго государя царя и великаго князя Михаила Феодоровича всеа Росии указы и боярские приговоры с старыми судебниками справить, и ни в чем же отменно. А на которые статьи в прошлых годех прежних государей в судебниках указу не положено и боярских приговоров на те статьи не было, и те бы статьи по тому ж написати и изложити по ево государеву указу общим советом, а не новыя законы вводити, чтоб Московскаго государьства всяких чинов людем от болшаго и до меншаго чину суд и росправа была во всяких делех всем равна, и не патриарху и митрополитом, и архиепископом, и епископом, и архимандритом и игуменом и всему освященному собору. (л. 513 об.) [1840] А указал государь царь то все собрать и в доклад написать бояром князю Никите Ивановичю Одоевскому с товарыщи. И он, князь Никита, человек прегордой, страху Божия в сердцы не имеет и Божественаго писания и правил святых апостол и святых отец ниже чтет, ниже разумеет, и жити в них не хощет, и живущих в них ненавидит яко врагов сущих, сам быв враг всякой истине. А товарыщи его люди простыя и Божественаго писания не ведущии. А диаки, ведомыя враги Божия и дневныя разбойники, без всякия боязни в день людей Божиих губят. А что для того своего государьства и земскаго великаго царьственнаго дела указал государь, бутто по совету со отцем своим Святейшим Иосифом, (л. 514) [1841] Патриархом Московским и всеа Русии, и бояре приговорили выбрать из столников и из стряпчих и из дворян московских и из жилцов ис чину по два человека, также всех городов из дворян и детей боярских, опричь Новагорода, по два человека, а из Новагорода с пятины по человеку, а из менших городов по человеку [1842], а из гостей трех человек, а из гостиныя и из суконныя сотен по два человека, а из черных сотен и из слобод, из городов с посадов по человеку добрых и смышленых людей, чтобы его государево царьственное и земское дело с теми со всеми выборными людьми утвердити и на мере поставити, чтобы те все великия дела по нынешнему его, государеву, указу и соборному Уложенью ничем не ру(л. 514 об.)шимы [1843]. И то всем ведомо, что збор был не по воли, боязни ради и междоусобия от всех черных людей, а не истиныя правды ради. А что по государеву цареву и великаго князя Алексия Михайловича всеа Росии указу бояре князь Никита Иванович Одоевской с товарыщи, будто выписав ис правил святых апостол и святых отец и из градских законов Греческих царей и из старых судебников прежних великих государей, к царю приносили, и то он, враг Божий и всякой истины, все солгал. Ис правил святых апостол и святых отец и благочестивых царей градских законов ничево не выписывал, якоже и самыя та Уло(л. 515)женая [1844] беззаконная книга свидетельствует беззаконие их. А где и написал, будто ис правил святых апостол и святых отец, и то солгал. Во апостолских и святых отец таковых правил нет и во всей его книге ни единаго апостолскаго правила, ниже святых отец седми Вселенских соборов и прочих нет, ни благочестивых Греческих царей градских законов что любо, ниже [1845] от православных великих государей царей и великих князей Руских, но все ново некое списание чюжде православия и святых апостол и святых отец церковных законов и православных царей Греческих градских законов. Да и сам той сви(л. 515 об.)детелствует [1846] в своем ложном списании в десятой главе о суде.

Суд [1847] государя царя и великаго князя Алексия Михайловича всеа Русии. Судить бояром и околничим, и думным людем, и диаком, и всяким приказным людем, и судьям, и всякая росправа делать всем людем Московскаго государства от болшаго и до меншаго чину в правду. Также и приезжих иноземцов и всяких прибылых людей, которые в Московском государстве будут, тем же судом судить, и росправа делать по государеву указу в правду, а своим вымыслом в судных делех по дружбе и по недружбе ничего не прибавливати, ни убавливати, и ни в чем (л. 516) [1848] другу не дружить, а недругу не мстить, и никому ни в чем ни для чего не норовить, делать всякие государевы дела, не стыдяся лица силных, и избавляти обидящаго от руки неправеднаго.

А спорные [1849] дела, которых в приказех зачем вершить будет не мощно, взносить ис приказов в доклад ко государю царю и великому князяю Алексию Михайловичю всеа Русии и к его государевым бояром и околничим, и думным людем. А бояром и околничим, и думным людем сидеть в полате и по государеву указу всякие дела делать всем вместе.

Како же ты, списателю суда царьска, (л. 516 об.) [1850] а реку беззакония, суд глаголеши государя царя? Суд бо Божий есть и от исперва, а не царев, ни от человек, ни человеком предан бысть, но самем Богом. Послушай.

Месяца [1851] же третияго изшествия сынов Израилевых от земли Египецкия, в сий день приидоша в пустыню Синайскую и воздвигошася от Рафидина и приидоша в пустыню Синайскую. И [1852] ста ту Израиль прямо Гоморе, Моисей же взыде на гору Божию. И возва и Бог от горы, глаголя: Сице глаголеши дому Ияковлю и повеждь сыном Израилевым. Сами [1853] видесте, елико сотворих Египтяном и взях вы яко на криле орли и приведох вы к Себе. И ныне аще послушанием послушаете (л. 517) [1854] гласа Моего и снабдите завет Мой, будете Ми людие сущии от всех язык. Моя бо есть вся земля [1855]. Вы же будете Ми царьское священие и язык свят. Си словеса да глаголеши сыном Израилевым.

Пришед же Моисей, созва вся старцы людския и рече, и исповеда им вся словеса си, яже завеща им Бог. Отвещаша же вси людие купно и рекоша: Все, елико рекл Бог, и послушаем. Донес же Моисей словеса си к Богу. И рече Господь к Моисею: Се Аз прииду к тебе в столпе облачне, да услышат людие глаголюща Мя к тебе, и да тебе веруют вовеки.

Поведа же Моисей словеса людий ко Господу. И рече Господь Моисею: Сниди, возвести (л. 517 об.) [1856] людем и очисти я днесь и утре, и да исберут ризы и да будут готови в день третий, в третий бо день снидет Господь на гору Синайскую пред лицем всех людий и устроиши людие обоямо, глаголя: Внемлите [1857] себе, не восходити на гору и ничим же коснутися ея. Всяк бо прикоснувыйся горе смертию умрет, приемшая же ей рука камением побиется или стрелою устрелится, любо зверь, любо человек не будет жив. Егда же глас трубы и облак отъидет от горы, сии да взыдут на гору.

Изыде ж Моисей з горы к людем и очисти я и исбраша ризы своя. Рече же людем: Будете готови три дни и не ходите (л. 518) [1858] к женам. Бысть в третий день к свитанию и быша гласи и молния и облак молниан на горе Синайстей, и глас трубный глашаше силно зело. И убояшася вси людие в полце. Изведе же Моисей люди противу Богу от полка и сташа под горою. Гора [1859] же Синайская куряшеся вся схождения ради Божия на ню, во огни, исхождаше дым, яко дым пещный. И ужасошася вси людеи зело. Быша же гласи трубнии, сходяще крепце зело. Моисей же глаголаше [1860], а Бог отвещаваше ему гласом. Сниде ж Господь на гору Синайскую на верх горы и возва Господь Моисея на верх горы и взыде Моисей. Рече же Бог к нему, глаголя: Сниди и возвести людем, (л. 518 об.) [1861] да некогда приступят к горе, к Богу разумети, и падут от них мнози, и жрецы же приступаяй ко Господу Богу да ся постят, да некогда изменит от них Господь. Рече же Моисей к Богу: Не возмогут людие взыти на гору Синайскую, Ты бо запрещал еси нас, глаголя: Предети ли у горы и освятити ю. И рече ему Господь: Иди, сниди и взыди ты и Аарон с тобою. Жрецы же и людие да ся не нудят взыти к Богу, да некогда погубит от них Господь. Сниде ж Моисей к людем и рече им.

И глагола [1862] Господь вся словеса си к Моисею, глаголя: Аз есмь Господь Бог твой, изведый тя от земли Египетския от дому работнаго, да не будут тебе (л. 519) [1863] бози, разве Мене, и прочая суда. Вси же людие смотряху гласа и свещ и гласа трубнаго, гору курящуся. И убояшася вси людие, сташа подале, и рекоша Моисею: Глаголи ты с нами, да не глаголет к нам Бог, да некогда умрем. Рече ж им Моисей: Уповайте, не бойтеся, искушения бо ради прииде Бог к вам, яко да будет страх Его в вас, яко да не согрешаете. Стояху ж вси людие подале. Моисей же вниде во мглу, идеже беяше Господь. И [1864] рече Господь к Моисею: Се рцы дому Ияковлю и возвести сыном Израилевым. Вы видесте, яко с небесе глаголах к вам. И ныне аще послушанием послушаесте гласа Моего и снабдите завет Мой. (л. 519 об.) [1865] И паки рече Господь: И [1866] сия оправдания и суды положи пред ними. И прочая. И паки рече Господь к Моисею: Истеши [1867] себе две досце каменне, яже беста и первие и взыди ко Мне на гору, да впишю словеса на доску, яже беста на первую доску, яже еси сокрушил. Буди же готов заутра, да взыдеши на гору Синайскую и станеши ту на севере горы. И да никто же взыдет с тобою, ни да ся явит кто в сей горе. И истеса две досце каменны, яце же и первее. И урани Моисей заутра и взыде на гору Синайскую, якоже завеща ему Господь. И взят Моисей две досце каменне и сниде Господь во облаце и ста пред ним ту, (л. 520) [1868] и возва именем Господним, и мину Господь пред лицем его, и призва Господа: Господь [1869] Бог щедр и милостив, долготерпелив и истинен. Правду снабдяй, творяй милость в тысящах, отмщая беззакония и неправды и грехи, и не потребится вина его. И рече Господь к Моисею: Се Аз полагаю тебе завет пред всеми людми твоими. И рече Господь к Моисею: Пиши себе словеса си, в словесех бо сих полагаю тебе завет Израилю. И бе тамо Моисей пред Господем 40 дний и 40 нощий, хлеба не ядый, ни воды пия. И вписа Моисей в досце словеса си завета. И паки рече Господь к Моисею, глаголя: Глаголи [1870] сыном Израилевым и рцы к ним: Аз Господь Бог ваш (л. 520 об.) [1871] потварением земля Египецкая, в ней же обитасте, да не сотвористе потварением земля Хананейская, в ню же Аз введу вы, там не сотвористе и по законом их не ходите. Суды [1872] Моя сотвористе и повеления Моя снабдисте, да ходисте в них, Аз Господь Бог ваш, и сына бдите вся повеления Моя и вся суды Моя да сотвористе я. А сотворивый я человек, жив будет в них, Аз Господь Бог ваш. И паки: И [1873] заповеда судиам вашим в то время, глаголя: Разсуждайте между братиею своею и судите по правде межи мужем и между братом его и между пришелцем. Не зрите лица в суде, по малу и по велику суди(л. 521)ши [1874], не сумняся лица человеча, суд бо Божий есть. И паки: Глагола Моисей всему Израилю и рече к ним: Послушай, Израилю, оправдания и суды, елика аз глаголю во уши ваши во днешний день, да ся научисте их снабдети и творити я. Господь Бог завеща вам завет в Хориве, не одным отцом вашим завет сей, но и вам. Вы же убо зде вси живи днесь. Лицем к лицу глагола Господь к вам на горе из среды огня. Аз же стоях между Господем и вами, во время оно возвестити вам глагол Господень, яко убоястеся от лица огню и не взыдосте на гору, глаголяй.