ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

Сия же слышав, преосвященный митрополит и прочии святителие и благороднии боляре совет благочестиваго царя похваляют и отвсюду утверждают, и церковь Божию, яже в Русцтей митрополии патриаршския власти достойну быти глаголют. Но обаче, рекоша, благочестивый царю, аще возхощет благочестивая твоя держава, да возвестится о сем писанием вселенским четырем патриархом. И сим коемуждо (л. 67 об.) [280] своими митрополиты и епископы советовавшим писанием между собою согласившемся, Богу помогающу, удобь таковое начинание к совершению приити возможет. Понеже благочестивая ти держава и мы вси имеем сих яко столпы благочестию, аще и во области поганых суть, но святая, якоже рече Писание, николи же осквернена бывают. Но и паче же сего ради, да не возмнится, о благочестивый царю, инем языком, наипаче же пишущим на святую нашу веру латином и прочим еретиком, яко в царьствующем граде Москве патриаршеский престол устроися токмо единою (л. 68) [281] царьскою властию.

Благочестивый же царь, слышав сия, не тяжко внят о сем [282], аще и властию можаше превысочайший престол патриаршеский устроити, яко царь и самодержец, но обаче изволи повинутися воли Божией по правилом святых апостол и святых отец и святительскому совету, предпочиташе бо святительство боле царства предстояния ради олтарю и приношения непорочнаго Агнца рукама сих, по Божественному писанию чтит иерея, чтит вышняго Бога, понеже иерейская честь на Бога возходит, не существене не буди то, но премногия ради благодати, яже от Христа Бога апостолом и апостолским приемником дадеся. (л. 68 об.) [283] Слушаяй, рече, вас, Мене слушает, и отметаяйся вас, Мене отметается, отметаяйся Мене, отметается и пославшаго Мя. И паки. Приемляй вас, Мене приемлет. Наипаче же по всему являяся, яко сын и послушник святыя Церкве.

И абие слово в дело произвести повеле и писанием убо царьским и святительским к четырем патриархом и ко многим митрополитом с таковым вопрошением вскоре посылаемым. Послании же со многим желанием пути емляхуся и благодатию Божиею искомое получиша. Виждь, расколниче святыя Церкви, не тайно послание, якоже ныне [284]. И времени неколико немалу минувшу, абие послании в царьствующий град Москву ко [285] (л. 69) [286] благочестивому царю приидоша, носяще с собою от четырех патриарх и от митрополит о патриаршестве совет и изложение на болшее утверждение, и писание патриаршее и митрополичье и прочих епископ принесоша червлеными шарми назнаменовано и с подписанием рук и печатей святительских утвержено, их же ко утвержению благочестия к таковому изложению подписаша и печатьми утвердиша более седмидесять отец.

Возвестиша же и сие, яко поставления ради патриаршескаго яже в велицей России изволит святым отцем приити в царьствующий град Москву единому от патриарх, наипаче же Константино(л. 69 об.) [287]полскому, превысочайшее место имущему.

И сия слышав, благочестивый царь премногия радости исполнися. В третие же лето прииде вселенский патриарх Иеремия со иными митрополиты и архиепископы, архимандриты и игумены, нося на рускую митрополию о патриаршестве совет и утверждение. И тако совершается о патриаршестве совет и избрание и бывает поставлен в царьствующем граде Москве преосвященный Иов митрополит патриархом, в третие рукоположен святейшим Иеремиею патриархом. Первие поставлен бысть в Коломенския епископы, второе на Московское митрополичество, (л. 70) [288] третие на патриаршество, свидетелствуют тому книги поставления.

Даде же вселенский патриарх Российскому престолу Божия Церкве власть, яко по преставлении коегождо патриарха своими митрополиты и архиепископы и епископы и всем освященным собором возводити инаго на патриаршеский престол, якоже и утверждения грамоты свидетелствуют о сем святейших вселенских патриарх, а не на живаго место инаго возводити. Но ни же без совету вселенских патриарх.

Видел [289] ли еси, расколниче святыя Церкве и попрателю святых апостолских канонов и святых отец, каковою божественною любовию царь благочестивый (л. 70 об.) [290] возгореся, обаче же чрез святыя правила никакоже смел что любо сотворити, ниже преслуша совета архиерейскаго, но во всем повинуясь божественным велениям и з долготерпением созда дело Божие в совершение о патриаршестве, ниже тайно что любо [291], якоже ныне послали ко святейшим вселенским патриархом лазутчиком о нашем отшествии.

Смотри же о сем и собора бывшаго во Цареграде, како не смели ниже вселенстии четыре патриархи чрез правила святыя дерзнути о патриаршестве Московском и о прочих взыскании что любо, но со свидетелством святых правил, а не так как ты, новый (л. 71) [292] расколниче, а реку еретиче, извержеными Климентовыми правилы и прочими езоповыми и воронами и иными ложными шпынскими проклятыми книгами чрез апостолское 60-е и 85-е и первое Вселенскаго 7-го собора приводиши ложная свидетелства, как ворона сам, обходиши сушю и море, творя расколы как в Мутьянской земле, тако и зде.

Слушай, расколниче.

Соборное деяние, еже бысть написано в Константинополи, написано убо тамо еллиногрецким диалектом, в он же облечено, претече во преславный царьствующий град Москву. В нем же стяжа сии, словенская (л. 71 об.) [293] диалекта одеяние, его же красоту да зрит всяко верных состояние.

Святому и священному великому собору во имя Господа Бога и Спаса нашего Иисуса Христа, собравшуся во храме Пресвятыя Владычицы нашея Богородицы и Всеблаженныя Приснодевы Марии, нареченныя Парамифии, сиречь Утешение, в Константинополи во дни благочестиваго и Богом венчаннаго великаго царя Московскаго и самодержца всеа Русии Феодора Ивановича, председателствующим святейшим православным патриархом.

Всесвятейшему Иеремию, архиепископу Константинополскому, новаго Рима и вселенскому патриарху, (л. 72) [294] и блаженнейшему Мелетию, папе и патриарху великаго града Александрии и судии вселенскому, и наместнику всесвятейшаго Иоакима Божия града великия Антиохии и всего Востока, и всесвятейшему Софронию, патриарху святаго града Иерусалима и всеа Палестины, пришедшу пресветлому Григорию, Афанасиеву посланнику, предреченнаго благочестивейшаго царя соседящим и всесвященнейшим архиереом от всеа области Восточныя Церкви православным.

Мелетий блаженнейший Александрийский рече: Весте, братие, яко знаменательне, еже ко Спасу и Богу нашему любве пастырьское есть тщание. Петре бо (л. 72 об.) [295] рече: Любиши ли Мя, паси овцы Моя. Ея же ради вины и мы многия многажды подвиги же и труды и беды претерпехом и терпим, якоже весте, и ныне убо, понеже присланы к нам грамоты от всесвятейшаго вселенскаго брата и сослужителя нашего и прочих архиереов, просящим приити в Константинград церковных ради нужд. Аз же и грамоты, яже из православнейшия Москвы от православнейшаго Феодора получив, и о обоих вещех пекийся, нужде церковней и царьском достоинстве, молю ваше благоволение, опасно глаголемая от нас разсмотряюще, соизвествоватися нами о возглаголющихся, (л. 73) [296] еже аще праведно быти бы явилося.

Первое, убо понеже Божиею благодатию Церковь Христова совершена сущи и по благочестивым догматом совершеное прият устроение во уставленых и изъявленых от самаго Спаса и апостолы и отцы святыми возсиявшими зде. На святем же соборе тремисты и осмиюнадесяте богоносныма отцы, иже в Никеи, и в последующих Вселенских шестих соборех даже до седмаго, второе в Никеи собравшагося, такожде и иже между сими седми Вселенскими в различная времены собравшихся поместных православных соборех, понеже убо совершение прият православных Церковь, не токмо по (л. 73 об.) [297] богоразумия и по благочестия догматов и по освященному церковных вещей уставу.

Праведно есть и нам всякую церковных ограждений новину потребляти или разоряти, видящим новины всегда виновны бывати церковнаго смятения же и разлучения [298], но уставом последовати святых отец и яже наученая невредимо без приложения коего любо и отъятия приемлющим, по первому Вселенскаго 7-го собора правилу сице имущу.

Правило 1-е седмаго Вселенскаго собора.

Святыя [299] правила облобызающе приемлем и держим святых апостол и шестих Вселенских собор, к сим же и поместных и еще же и святых отец (л. 74) [300] наших, яко единаго Святаго Духа вдохновенных. Их же прокляша, проклинаем, их же извергоша, изметаем, и их же отлучиша, отлучаем, им же запретиша, запрещаем.

Ин перевод.

Иже священнический [301] получивше сан ведения и правления канонных повелений, си есть воображения, яже приемлюще радостно, с богоявленным Давыдом поем Владыце и Богу, глаголюще: На пути свидений Твоих насладихся яко в богатстве мнозе, заповедал еси правду, свидения Твоя, Владыко, вразуми мя и жив буду. И вовеки пророческий глас заповедует хранити заповеди Божия и жити в них, яве непоколеблемы (л. 74 об.) [302] и недвижимы пребывают, якоже боговидец Моисей рече: В них же несть приложити и от них несть отъяти. И [303] божественный Петр, в них хваляся, вопиет: В ня же, желают ангели приникнути. И [304] Павел, аще и ангел, благовестит вам: Паче преданаго проклят будет сим сицем сущим и свидетелствующим нам, радующимся о них, якоже кто обрящет корысть многу. Сладкобожественныя каноны утвержаем и цело пребывание их неподвижимо утвержаем, заповеданных от святых духовных труб, прехвалных апостол и шестих святых всея Вселенныя собор и поместных (л. 75) [305] собравшихся поданиом тако в них повелении святых отец наших.

От единаго бо вси Святаго Духа озарени бывше, повелеша яже на ползу. И их же проклятию предаша, и мы проклинаем, и их же извержению, и мы извергаем, и их же запрещению, и мы запрещаем, и их же отлучению, и мы отлучаем.

Не [306] сребролюбен имуще нрав, но доволни сущими, иже взошедый на третие небо и слышав неизглаголанныя глаголы, Павел, божественный апостол, яве вопиет.

Толкование.

При Константине царе, внуце треклятаго и богоненавистнаго Лва гноеименитаго [307], и при Ирине, матери его, яже бе от Афинеи, сей Седмый собор (л. 75 об.) [308] бысть 367 богоносных отец советом и умолением Тарасия священнаго патриарха [309] Константиняграда. Собор же сих бысть на иконоборцы, рекше на оклеветающия христианы, и сих прокленше. Церкви же древнюю красоту Ея дароваша, и иконная воображения Той имети, и любезно облобызати сия добре заповедавше. Тако же и образу Честнаго Креста покланятися и облобызати его повелевше. Святых же и прехвалных апостол правила и святых Вселенских шестих собор, к сим и поместных собравшихся, утвердивша. Проклятыя же от них, проклиняют и сии, осужденныя же (л. 76) [310] от них некоего ради греха или изверженыя, такожде и сии осуждают, отлученыя же от них, отлучают, и запрещением повинных от них запрещают равно, ничтоже приложивше или отъемше от святых апостол и от богоносных отец, изложеных и повеленых.

Сим сице рекшимся от блаженнейшаго Александрийскаго Иеремии, всесвятеиший патриарх рече: Сия убо вси исповедахом, абие же священноначалства, наипаче же и самаго Божественнаго крещения сподобльшеся исповедуем. Святый собор, рече, вси исповедуем и у всех сия хранима быти повелеваем, якоже отцем нашим вси последующе, и яже (л. 76 об.) [311] целуют они, целуем мы, и яже отметают, тако и мы отметаем, якоже и первое правило святаго и Вселенскаго, иже в Халкидоне, собора прознаменова и первое 7-го изъясни.

Мелетий блаженнейший Александрийский рече: Понеже патриаршеских престолов поставление бе убо и древним неким обычаем соборныя Церкве, прежде начертавшися, яснее же изобразися по святому Вселенскому первому собору, яко сего 6-е правило показует имать же сице. Древний обычай да держится, иже во Египте и Ливии и Пендаполии, якоже Александрьскому епископу всех сих имети власть, понеже и в Риме сей обычай есть, (л. 77) [312] подобне же и во Антиохии и во иных областех началства цела сохраняема от церквей. Соборне же произъявлено оно, яко аще кто был бы епископ без митрополичьи мысли, таковому великий собор устави не быти епископом. И Седмый, на нем же Иерусалимский почтиша престол ради Спасителя нашего, по плоти смотрения во оней стране бывшаго, подавше подобную честь, аще и последний иных патриаршеских престол да не бы мечтание некое подали, паче иных предпочитавше, Христово Царство славити земное.

Подобает же и мне благочестивейшим грамотам боговенчаннейшаго царя отвещати. Молю и ваше благоволение, аще праведная (л. 77 об.) [313] глаголати явихся бых и отеческих уставов держащаяся, искусити и сопричтати соборне, сужду, убо праведне быти Божиим человеколюбием и благодатию, украшенный царством град православнейший Московский и в церковных величатися вещех по 28-му 4-го собора правилу 630 святых отец, в Халкидоне сошедшихся, глаголющему сице «везде святых уставом последующе», и ныне прочтеное правило 150 боголюбезнейших епископов, собравшихся при благочестивыя памяти великом Феодосии, бывшем царе, в царьствующем в Константинополи, новем Риме ведуще. Таяжде и мы уставляем же и судим о старейшинствах святейшия Церкве (л. 78) [314] тогожде Константинополя, новаго Рима, занеже царьствовати граду оному отцы в лепоту даша старейшинство. И тою же мыслию движащеся 150 боголюбезнейшии епископи равная старейшинства воздаша новаго Рима святейшему престолу, благословно разсудивша царьством и сигклитом почтенному граду и равное получившему достоинство старейшему царьствующему Риму и во церковных, яко оному, величатися вещех, второму по оному сущу. И яко Понтийския и Асийския и Фракийския страны митрополитом токмо, еще же и иже в варварских епископом предреченных стран, рукополагатися от предреченнаго святейшаго престола (л. 78 об.) [315] Константинополския святейшия церкве, рекше коемуждо митрополиту предреченных стран со епископы области поставляющу епископы, якоже Божественныма правилы повеленое есть. Рукополагати же ся, якоже речеся, митрополитом предреченных стран от Константинополскаго архиепископа уставом согласным по обычаю бываемым и возносимым к нему. Глаголет же и Константинополское святых отец правило 73: Константинополскому убо епископу имети старейшинство чести по Римстем епископе, заеже быти ему Константинополю новому Риму.

Но ниже святый великии собор 318 богоносных отец является иным неким (л. 79) [316] словом разделивше чины же и уставы и власти патриаршеским престолом, их же изобрази, токмо по царским достоинством Александрию председателствующу Египта, Ливию и прочих, Антиохию же и Асирию и всего Востока. Якоже во Европе Рим, тако и Асии Константинополь, иже и потом равных сподобись санов стараго Рима, за еже пренесену быти оттуду семо царьству, якоже пределяет [317] и 36-е, еже в Трулле полатнем, святаго собора правило, имущее сице: Обновляюще от 150 святых отец, в богохранимом сем и во царьствующем граде сошедшихся, и от 630, в Халкидоне собравшихся, законоположеная уставляем, (л. 79 об.) [318] яко Константинополскому престолу равная восприимати достоинства стараго Рима престола и в церковных якоже оному величатися вещех, второму по оном сущу. Понеже Александрии великаго града и по сем Иерусалима града праведно убо сужду и святый сей и великий собор судити молю, престолу благочестивейшаго и православнаго града Москвы быти же и нарицатися патриархиею, за еже царьства сподобитися от Бога стране сей [319]. Всей же России и северней стране повиноватися патриаршескому престолу Московскому и всеа Русии и северных стран, имети место свое по святейшем Иерусалимском патриарсе во священных помянниках (л. 80) [320] и в церковных собраниох, да предреченная святых отец правила непоколеблема соблюдаем. Преимуществовати же ся епископом, митрополитом, архиепископом во всей соборней православней Христове Церкви. Епархии же оной Московской и всеа Русии и северных стран главе быти и извествоватися по 34-му правилу святых и всехвалных апостол, сице повелевающему.

Епископом коегождо языка подобает ведати иже в тех перваго и имети яко главу, и ничто же творити излишнее без онаго мысли. Оная же токмо коемуждо творити, елика его епархии должная суть и сущим под нею странам.

Но ниже (л. 80 об.) [321] он без всех мысли что да творит, тако бо единомыслие будет и прославится Бог Господем во Святем Дусе, Отец и Сын и Святый Дух.

По рукоположении же хранити же ся чину церковному, первопрестолному, возглашающу молитву. Аз убо сия тако сужду, святый же собор да изъявит умышление.

Иеремия всесвятейший вселенский рече: (л. 81) [322] Се и мы первие содеяхом и написанно изъявихом благочестивейшему царю.

Софроний Иерусалимский рече: Святейший патриарх рече: Сам непреложно обновляю.

Святый собор единодушно рече: Сие понеже по святым законом уставися, вси приемлем и сие о царстве оном уставляем, да благочестивейший царь Московский самодержец всеа Русии и северных стран, якоже доднесь во священных службах Восточных церквах имать память свою и во святых предложениах и во священных помянниках, такоже и в начале шестопсалмия, по совершении двою псалму о царе глаголем, возглашается по возгласию оному, (л. 81 об.) [323] по имени яко православнейший царь.

Вси реша и сие благословно есть.

Уставляем же и сие, яко подобает послану быти деянию сему, писании нашими утвержденному, ко благочестивейшему царю Московскому и всесвятейшему Иову патриарху всеа Русии и северных стран.

Вси реша угодно.

К сим же подписаша руки своя и печатми запечатлеша в вечное утверждение.

Како же ты, расколниче неполный умом, чрез апостолския правила и чрез святых седми Вселенских соборов дерзаеши ответы творити на погибель христианским душам? Видел ли еси деяние святых отец, яко ничтоже смеюще отложити (л. 82) [324] или приложити, но и новины реша погубляти, тии глаголют, яко глагола патриарх всем епископом, да будет. А ты глаголеши ничтоже, развее таков же.

Паки глаголеши, яко Римская слава и честь прейде на Москву. Откуду ты то навык, покажи ми. Се видел еси деяние святых отец собора в Костантинополи и ничто же о сем глаголано бысть в них, якоже выше писано есть, но равночестием Московский патриарх Иерусалимскому почтен в помяннике же по Иерусалимстем патриарсе. И радуемся в таком уставе и утверждении пребывати, а не преходити меры и устава святых отец святейших вселенских патриарх.

(л. 82 об.) [325] Еже ты глаголеши против десятаго вопросу во ответе своем, яко Христос глава есть, а архиерей толко глаза и уста, а мирския люди составы.

Правило святых апостол 55.

Аще [326] который причетник досадит епископу да извержется. Писано бо есть, князю людей своих да не речеши зла.

Толкование.

Епископи убо по образу суще Господа нашего Иисуса Христа и глава церковнаго телесе именуеми и болшия чести достойни суть. Тем же, аще кто досадит им, да измещется. Презвитери же и диакони по образу суще рук, яко теми церковное правления содевает епископ, чести убо и тии достойни суть, но не тако, (л. 83) [327] якоже епископи, глава бо рук честнейши есть.

Собора в Новей Кесарии правило 14.

Селстии [328] епископи суть убо по образу 70 апостол. Градстии же по образу 12 святых апостол. Всем же глава патриарх, якоже выше есть писано, а не якоже ты, расколниче, глаголеши.

34-е правило святых апостол, такожде собора во Антиохии Сирстей 9-е правило и митрополита старейшим почитати велят. Ты же, не имея или не ведая Божественнаго писания, словес крепости в ответех своих не имея, ко внешним лжам и баснословиям приходиши на прелесть простейшим человеком.

Господу свидетелствующу, горе человеку тому, (л. 83 об.) [329] им же соблазн приходит. И паки. Иже аще соблазнит единаго от малых сих, мнии наречется во Царствии Небеснем.

Глаголи, лжечеловече, где есть писано, еже бы своего архиепископа или митрополита свои епископи, собрався, судили, но митрополит епископа судит со епископы, а митрополита патриарх, под ним же есть епархия митрополия, или Цареградский патриарх, якоже святаго 4-го собора 9-е правило глаголет. Но ни епископа лепо есть судити прежде даже неувестыя о нем или не сушу ему призвану, якоже Василий Великий пишет в первой книге глава 54.

Яко [330] не подобает осуждати кого прежде даже не (л. 84) [331] увесть опасно яже о нем, аще и мнози суть оглаголующии.

Глагола [332] Никодим пришедый к нему нощию един сый от них: Еда закон наш судит человеку, аще не слышит прежде от него и разумеет, что творит.

Фист [333] же цареви сказал, яже о Павле, глаголя: Муж некий есть, оставлен от Филикса, узник, о нем же, бывшу ми во Иерусалиме, явиша архиерее и старцы июдеистии, просяща нань пря. К ним же отвещах, яко несть обычай римляном даяти кого человека, прежде даже оклеветанный видит клеветники, место же приимет ответа о согрешениих своих.

Правило святых апостол 74.

Оклеветаем [334] епископ и позываем на суд, (л. 84 об.) [335] и не послушая дващи и трищи, двема епископома да позван будет. Аще же не приидет, якоже же хощет собор да судит таковаго.

Толкование.

Оклеветаема епископа о некоем прегрешении от достоверных мужей и позываема собором на судище, и не послушающу, не тако вскоре подобает собору осудити таковаго, но и дващи и трищи позвати того, и да посылается по нань коемждо позвании по два епископа. Аще же пребудет небрегий и не приидет на судище, да испытает вину по единей части собор и по подобию вины достойно да осудят его, да не мнится избыв суда беганием.

Такожде и Карфагенскаго собора 19-е (л. 85) [336] правило глаголет:

Без позвания и епископа не судит, но подобает и на епископа клеветы послушати от достоверных мужей и по подобию достойно да судят его.

Видел ли еси, яко ни епископа, без позвания дважды и трижды, не судити, а о митрополитех и ни есть такова правила, еже бы своим епископом судити, но патриарху со всеми митрополиты, якоже выше есть писано 9-е правило святаго Вселенскаго 4-го собора.

А яже о патриарсех нигде не обретается, яже бы от своих епископ судиму быти, да како то их соборище нарещи кто может, чрез вся святыя правила творящих и епископским правилом винна мя творити, (л. 85 об.) [337] ниже вопросившем что любо о нашем отшествии, ниже яко епископа позвавшем по вышеписанному святых апостол 74-му правилу.

Четыредесятая глава Василия Великаго первыя книги.

Яко не подобает инако учащим внимати, аще и воображаются во еже прелстити на обличение неизвещенных.

Господу глаголющу: блюдитеся [338], да никто вас прелстит. Мнози бо приидут во имя Мое глаголюще: Аз есмь Христос и многи прелстят. Внемлите [339] от книжник хотящих ходити во одеждах и любящих целования на торжищих и председания на торжищих и предвозлежания (л. 86) [340] на вечерях, иже снедают домы вдовиц, виною далече молящеся, сии приимут множайший суд.

На [341] Моисеове седалищи седоша книжницы и фарисеи, вся убо елика, аще рекут вам блюсти, соблюдайте и творите, по делом же их не творите: глаголют и не творят, связуют бремена тяжка и бедне носима и возлагают на плеща человеческа. Перстом же своим не хотят двигнути их, вся же дела своя творят да видими будут человеки. Разширяют же хранилища своя и величают воскрилия риз своих, любят же прежде возлегания на вечерях и прежде седания на сонмищах и целования (л. 86 об.) [342] на торжищах и зватися от человек учителя. И по мале.

Горе [343] вам, книжницы и фарисеи, лицемери, яко преходит море и сушу, сотворити единаго пришелца, и егда будет, творите его, сына геены, сугубейша вас.

Горе [344] вам, книжницы и фарисеи, лицемери, яко одесятствуете мятву и копр и кимин и остависте вящшая закона, суд и милость и веру. Сия же подобаше творити и онех не оставляти. Вожди слепии, оцеждающе комари, велбуда же пожирающе.

Горе вам, книжницы и фарисеи, лицемери, яко очищаете внешнее сткляницы и блюды, внутрь яду же (л. 87) [345] суть полни хищения и неправды.

Фарисею слепый, очисти прежде внутренее сткляницы и блюду да будет и внешняя има чиста.

Горе [346] вам, книжницы и фарисеи, лицемери, яко подобитеся гробом повапленым, иже внеюду убо являются красни, внутрь яду же полни суть, костии мертвых и всякое нечистоты. Тако и вы, внеюду убо является человеком праведни, внутрь яду же есте полни лицемерия и беззакония.

Сего [347] ради Аз послю к вам пророки и премудры и книжники, и от них биете на сонмищах ваших и ижденете от града во град. И прочая.

Аминь, аминь, глаголю вам, яко приидут вся сия народ сей. (л. 87 об.) [348] Противляше [349] же ся Еллима волхв, тако бо сказовается имя его, иский [350] развратити Анфипата от веры. Савл же, иже и Павел, исполнися Духа Свята и воззрев нань, рече: О исполнен всякия льсти и всякия злобы сыне диаволов, враже всякия правды, не престаеши ли, развращая пути Господни правыя. И прочая.

Но [351] аще мы или ангел с небесе благовестит вам, паче еже благовестихом, анафема да будет. Якоже прежде рех вам и ныне глаголю, аще кто вам благовестит, паче еже приясте, проклят да будет.

Ты убо лжеши, ответотворче, на мя, яко 4-х Вселенских соборов то надобно прокляти. Где убо наше (л. 88) [352] слово, яко тако глаголах? И самый совопросник не глаголет о сем, латины убо точию приемлют четыре Вселенския соборы, о прочих триех не брегут. Явно, яко еси онаго сонмища исчадие, ибо беседа твоя явна тя творит. Мы убо не четыре Вселенских соборов, но седмь приемлем и облобызаем, якоже заповедано есть в первом правиле 7-го Вселенскаго собора, еже выше писахом тожде.

Правило 1-го Вселенскаго собора.

Святая правила облобызающе приемлем и держим святых апостол и 6-и Вселенских соборов, к сим же и поместных, и еще же и святых отец наших, яко единаго Святаго Духа вдохновенна. Их же прокляша, проклинаем, их же извергоша, изметаем, их же отлучиша, отлучаем, им же запретиша, (л. 88 об.) [353] запрещаем.

Да почто, лицемере, нас приговариваешь проклинать, сам солгав, а яже о себе самом не смотриши. Лицемере, изми первие бревно из очесе твоего, и тогда прозриши изъяти сучец из очесе брата твоего. Усмотри сам о себе, како есть писано о всех твоих неправдах, еже прежде писахом и ныне паки пишем.

Правило 13 собора Антиохии Сирстей.

Аще [354] никим же позван, ни умолен быв епископ, во иную область отшед, и поставит презвитера или диакона или правление некое церковное творит, таковая нетверда и разрушена да пребудут, а он да извержется.

Вселенскаго святого собора, иже в Халкидоне правило 5.

Преходящии [355] из града во град, (л. 89) [356] иже от них правилом повинни суть.

Толкование.

Речено есть в 13 правиле, иже во Антиохии собора, яко не дерзнути епископу прейти от своея области во иную и поставити презвитера или диакона без воли сущаго во области той епископа или ино что епископское творити правление. Аще бо и сотворит что таково, праздно и нетвердо да пребудет, и той месть да приимет своего безчиния и извержен да будет от своего сана Святою Троицею. Тако бо и зде написаное правило повелевает.

К сим же Сардикийскаго собора правило 3-е и 12-е того же собора, и 18-е правило того же собора, и Карфагенскаго собора 23-е, и шестаго Вселенскаго собора правило 20-е.

Епископ [357] во инем граде в народе да не учит. (л. 89 об.) Аще же обрящется да престанет от епископства и презвитерская да действует.

ВОПРОС, ГЛАВА 10

Мощно ли составом главу судити и своего началника?

Ответ

Каково судили патриархи, которые впали во блуды. Един глава Христос есть, который нарицается и злата глава, архиереи толко суть глаза и уста, а мирстие людие составы церковнаго тела. Всех властию суд 12 апостол и наследитель истины, каково и всякие священники суд и наследники 72 учеников, и помянутым святым апостолом глаголал по воскресении от мертвых Христос всем апостолом: приимите Святаго Духа, связати и решити, для чего и самаго того присловнаго началу все имеют сию же совершенную власть. Для чево против Евсевия на первом соборе Антиохийстем, на котором изложен есть от того собранаго собора еретик патриарх Павел Антиохийский, Аврилиян кесарь, хотя неверной и идолопоклонник был, похотел чтоб указ соборной был воздержан, и для того со престола Антиохийскаго был свержен.

ВОЗРАЖЕНИЕ НА 10 ВОПРОС И ОТВЕТ

Глаголеши, совопросниче: Мощно ли составом главу судити и своего началника?

Возражение: Не самое ли естество тя учит, яже в неподобном твоем вопросе глаголеши, мощно ли составом главу судить. Нужно есть главе без инех состав быти, обаче бывает, а еже без главы инем удом содержатися невозможно, и сия тако суть. Поглаголем же ти и от заповедей Божиих.

Господу глаголющу: Не [358] может человек прияти ничтоже, аще не дано ему будет с небесе. И паки инде глаголет Господь яко «не ищу волю Мою, но волю пославшаго Мя Отца». И паки (л. 90) [359] ин есть: Что имаши, еже не приял еси.

Ты же откуду дерзновение таковое приял еси наскакати на не сущая твоя? Аще Сын Божий глаголет, яко «не ищу волю Мою, но волю пославшаго Мя Отца», ты же где обрел какову любо заповедь Божию, да суда на нас изыщеши? Не слышал еси, что о не имущем брачныя одежды, то есть достоинства, и вшед на брак, Господь отрече: Возмите его и связавше ему руце и нозе, вверзите во тму кромешную, ту будет плач и скрежет зубом. Еже да и сотворит ти Господь по делом руку твою за напрасное наше преобидение, якоже и великий Павел негде глаголет: Александр ковач много ми зла сотвори да воздаст ему Господь по делом его. И прочее.

(л. 90 об.) [360] Собора во святей церкви Божия мудрости правило 3.

Аще [361] который мирский человек епископа в темницу ввержет или биет без вины или сплет некую вину, да будет проклят.

И паки Господь о таковых глаголет: Горе человеку оному, им же соблазн приходит.

Почто ново начинаеши испытати не сущих своих, не слышали: не судите, да не осуждени будете. Не о том глаголет Господь, да кто по закону судит, но паче закона и заповедей, понеже инде есть реченое, но праведен суд судите. И божественный апостол глаголет: Тем же не прежде времене судите, дондеже приидет Господь. И прочая.

Слыши же и ответотворцу твоему наш ответ.

Ты же, ответотворче, во ответе своем (л. 91) [362] пишешь: Каково судил патриарх, которые впадали в блуды? Едина глава Христос есть и который нарицается и златая глава, архиереи толко суть глаза и уста, а мирския люди составы церковнаго тела, всевластию суд 12 апостол наследителие, истинныя каково и всякия священиков 72 учеников. И помянутым глаголал по воскресении от смертных Христос всем апостолом: Приимите Духа Святаго вязати и решити. Для чего и самаго того приславнаго началу имеют сию же совершенную власть.

Возражение.

Господу глаголющу: Сый [363] от Бога глаголы Божия послушает. И паки: Отметаяйся Мене и не приемляй словес Моих, имать судящаго слово, еже заповедах вам, то судит. И божественный апостол глаголет: (л. 91 об.) [364] Аще мы или ангел благовестит вам, паче еще приясте, проклят да будет.

Тако и святии отцы на Вселенских соборех утвердили и клятвами закляли, еже к тому не имати кому что приложити или отложити.

Ты почто чрез Божественныя заповеди и законы от себе везде толкуеши? Не слышал ли Писания [365] , яко подобает ключаема коемуждо благоразумне отдаяти. И вопросиша Его, глаголюще: Учителю, вемы, яко право глаголеши и учиши и не зриши на лица, но воистину пути Божию учиши. Достоит ли кесарю дань даяти или ни? Разумев же лукавство их, рече к ним: Что Мя искушаете, покажите ми пенязь, чии имать образ и надписание. Они же рекша: Кесарев. Он же рече им: (л. 92) [366] Отдадите убо кесарева кесарю.

И паки глаголет Господь: Аще [367] нога твоя или рука твоя соблажняет тя, отсецы ю и верзи от себе. И по мале: И аще око твое соблажняет тя, истни е и верзи от себе.

Смотри [368] правосудие Божие, яко кроме инех удов возможно есть жити человеку, а без главы не есть лзе. Тем же невозможно инем удом главу отсещи и тако всем живым и действуемым быти.

Собора 4-го Вселенскаго правило 9.

Причетницы [369] между собою распрю имуще, аще оставльше своего епископа, к мирским судиям приступят, по правилом вину да приимут. Причетницы же, аще имеют что на епископа, да ожидают собора. Аще же епископи на митрополита Константиняграда патриарху да возвестят.

Толкование.

Аще причетник имать нечто на причетника, не подобает ему судитися пред мирскими судиями, но от своего епископа. Аще же оставльше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, (л. 93) [370] да приходит к митрополиту страны тоя. Егда в реченое время соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится, под ним же суть епископи и митрополити всех областей страны тоя, или от патриарха Константиняграда судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть. (л. 93 об.) И нигде же обретается суд на патриарха от своих епископ, разве твоего блядословия.

ВОПРОС, ГЛАВА 11

Никон никогда не изволил называть архиереов братиею своею, но почитал их велми нижайших, для того, что от него были освященыя.

Ответ

А Иисус, Бог и Человек, рекл святым женам: не бойтеся, идите и рцыте братии Моей. А естли священники Его, братия Его не суть, что же ли они суть? Сыны ли? Нет, для того что мирския люди суть сыны, и он есть отец всех мирских людей, а иныя архиереи то же их отцы. А как многие зла притчею есть много разумения и гордости, пишет отец наш Дорофей, что был некоторой старец, которой первой сказал, чтоб он был, что авва Зосима и Макарий, толко чтоб быть менши Василия Великаго и Григория Богослова, а Дорофей разсмеявся глаголя ему: по немногих днех и сих лутче будет. И так учинилося для того, что по немногих днех [371] похвалится, что паче их во святых стану, толко недостало ему, что он не превышшил апостолов Петра и Павла. И опять глаголал, что и тых превышшил; и опосле к такой смелости пришел, что приподобился к Пресвятой Троице и наследия Люцыфера [372] возгласил: кто таков что я? и зопхнен тотчас во ад тот святократца. Подлинно гордость не имеет крепко стоящия ноги, но всегда ищет пременнаго поступления, а однако же опять назад ползет что рак. И дивно мне на некоторых людей, которыя похваляются: тот и тот от меня посвящен, я того учинил епископом, того митрополитом; я да ты, кто ли еси который столко похваляется? Христос крещает как первоначалный, а священник как снасть, власть от Него имеючи. Христос помазует. Христос посвящает, но посредителством священника и архиерея. Не помните ли что обвестил сосуда избраннаго апостола Павла святаго уста: внимайте убо себе и всему стаду, в нем же вас Дух Святый постави епископы паствити Церковь Божию, которую снабдил Кровию Своею [373]. Слушайте вы, слушайте, Дух Святый и божественная благодать обирает и освящает епископы, и митрополиты, и всякие архиереи. Иди ныне и глаголи, что я свящал тово и тово, и еще и Павел глаголет, что всякое освящение есть Святаго Духа, а не человеческое, и не как преже говорили: я Аполлосов, а я Кифин.

ВОЗРАЖЕНИЕ 11 ВОПРОСА И ОТВЕТА

Глаголеши, совопросниче, яко аз никогда не изволил называть архиереов братиею своею, но почитал их велми нижайших для того, что от него были освящены.

Возражение.

Лжеши, лицемере, яко аз не называл их братиею, но есть свидетельство во святей литоргии [374] по принесении Честных Даров, глаголет архиерей ко прочим служащим: Помяните мя, братия и сослужителие. (л.94) [375] И аще в нужнейших соглашался, како глаголеши, яко нижайши себе почитал, во инем месте покажем, яко глава инех уд честнейши. Ныне же о сем глаголем, яко от него, глаголеши, посвящены были. Истину глаголеши, яко от нас были посвящены и ныне несть уже священия на них, яко же глагол твой свидетельствует, якоже Перваго и Втораго собора в церкви святых апостол глаголет.

Правило 13.

Аще [376] который презвитер или диакон, якоже се мня, сведый своего епископа согреша, прежде суда и уведения всех епископ собора отступит от общения его и не поминает имени его в службе, да извержется и всея священническия (л.94об.) [377] да будет лишен. Последующий же ему, аще суть священницы, своея чести да отпадут, мниси же и мирстии человецы да отлучатся дондеже обратятся.

Правило 14.

Аще который епископ тожде сице дерзнет сотворити на своего митрополита да извержется, подобает бо коемуждо своя меры ведати.

Правило 15.

Такожде аще который епископ или митрополит на своего патриарха таковая же дерзнет, всего святительства да будет лишен.

Доволни ли ти есть сего на ответ ко твоему вопрошению. Аще ли мниши мало, послушай вкупе со ответотворцем. Глаголеши убо, (л. 95) [378] ответотворче, яко Иисус, Бог и Человек, рекл святым женам: Не бойтесь, идите и рцыте братии Моей. Есть ли с пол священники Его, братия Его не суть, что же ли они суть, сыны ли несть для Того, что мирския люди суть сыны и Он есть Отец всех мирских людей, а иный архиерей тоже их отец.

Тако [379] Господу глаголющу ко святым женам, яко же ты глаголеши: Идите и рцыте братии Моей. Есть же Господу глаголющу и заповедающу, ни учителем кому прощено есть нарицатися. Вы же, рече, не нарицайтеся учитилие, един бо есть учитель ваш Христос, вси же вы братия есте. Да почто уже и учителем нарицаются учители, понеже вси братия есмы? (л. 95 об.) [380] И паки Господу глаголющу: И отца не зовите себе на земли, един бо Отец ваш, иже на небесех. Да почто ты глаголеши, яко несмь отец своим чадом, а они отцы своим сыном?

Господу отрицающу всем не звати на земли отца развее на небеси, а ты глаголеши, яко отцы всем людем архиерее. Почто же великий архиерей нарицается патриарх, не еже ли отцем начало, то есть малым и великим? Что же ли епископ, развее посетитель, а не отец, ни отцем начало? Да уже видел еси святаго Перваго и Втораго собора в церкви святых апостол, яко коейждо степени свое правило имуща 13-е о епископех и 14-е о митрополитех (л. 96) [381] и 15-е о патриарсех. Не доволно ли и едино правило быти, но изволи ся святому собору коемуждо по чести и по степенем правило написати.

Прочти же святаго Карфагенскаго собора правило 87.

Да [382] не почтеши себе болши сущаго прежде тебе, но да последствуеши. Не брегий же о первом, от него сам небрегом будет.

Толкование.

Во Африкии тогда и во инех странех правовернии епископи не имеяху по престолом различныя чести, но вси бяху равночестни. Епископ же прежде поставленый и поставленаго по нем и седанием и в правилных взысканиох и во ответех честней бяше и тако, иже по них по летом [383] (л. 96 об.) [384] поставлениа их последоваху. Не хотящаго же по тому уставу творити епископа во Африкийстей стране, но гордящася и самомнима суща и о старейших его не брегуща, повелеша отцы небрегому быти таковому от всего собора.

Да коя твоя правда, самомниме, чрез евангелское учение и святых апостол и святых отец правила, еже не радети о старейшинстве. Вводиши, чево прежде не было. Послушай апостола Павла к Тимофею пишуща: Старцу [385] не твори пакости, но утешай якоже отца, юношу якоже братию. Почто и апостол различие положил старцу с юным?

Патриарх есть образ жив (л. 97) [386] Христов и одушевлен делесы и словесы в себе живописуя истину.

Блюдение патриарху.

Первие, убо их же от Бога прият, во благочестии и чистоте житие сохранити. Потом же и вся еретики, поелику мощно тому, ко православию и соединению церковному обратити. Еретицы же законы и правилы нарицаются, иже соборней не общевающеся Церкви, еще же и неверныя светлым и чюдным его деянием удивляя, подражателя сотворити [387] в вере и зрящих дела его, служителя Пресвятей и Единосущней Троицы, елико по нем соделати. Конец патриарху, еже ввереных тому душ спасение и еже жити убо о Христе, распяти же ся мирови, (л. 97 об.) [388] особная патриарху, еже быти учителну, еже ко всем высоким же и смиреным не тесно местне изровнятися и кротку убо быти ко всем приступающим ему и собеседующим ученми. Обличителну же к непокоряющимся, о истинне и о отмщении преданий, соблюдении правды и благочестия глаголати пред цари и не стыдетися жителству от частей и удов, подобне человеку некоему составляему великая и нужнейшая части царь есть и патриарх. Тем же и еже по души и телу мир и благоденство послушник царствия есть и архиерейства во всем единомыслие и согласие. Константиняграда (л. 98) [389] престол царством украсися, соборными сужденми первый наречен бысть. Им же божествении последующе закони и иже от иных престол бывающим недоуменным, яко по однаго повелевают возноситися разсмотрение и суд всех митрополий и епископий. Монастырь же и церковь промышление и попечение, еще же и суд и осуждение и освобождение от вины своему патриарху належит. Константинова же града первоседалнику лет есть во инех престол енориях, в них же несть предосвящения, храмех крестоводружения давати не токмо, но и иже престолех бывающая распря и недоумения назирати и изправляти и конец налагати судом. (л. 98 об.) [390] Такожде и покаяния и обращения от грехов и ересей сам един бывает разчинитель и расправитель и устаменитель.

Собора в Новой Кесарии правило 14.

Сельстии [391] же епископи, суть убо по образу седмидесяте апостол, якоже с служебницы суще, потщания ради, иже ко убогим, почитаеми, да служат во градстей церкви.

Толкование.

Епископи убо градстии, по образу суть двоюнадесяте апостолу, на них же дуну Господь: Приимите, рече, Святый Дух, им же отпустите грехи, отпустятся им, и им же держите, держатся им. Се же по сих им же даравано бысть и благодать Святаго Духа инем раздавати. (л. 99) И уже видели еси своего исправления разрушение в 13-м правиле святаго собора, иже во Антиохии Сирстей, и святаго шестаго Вселенскаго собора в 20-м правиле, почто еще многословиши.

ВОПРОС, ГЛАВА 12

Нарекся Никон Великим Государем, для того что его так назвал всещастливейший наш Государь хотящи его паче звычаю почитати. Согрешил ли Никон, что так высочайшее титло на себя принял, согрешил ли или нет? Скажи нам и протолкуй.

Ответ

Истинно согрешил и велми, для новости титлы и новости речи, для того те речи, которыя опроче достоинства почитаются и величают болши приносят соблажнение, неже чести и достоинства умных мужей. Понеже Карфагенский собор возбранил первому епископу сей страны: не называйся вышним священником, ни называтися екзархом священников, но токмо епископом перваго престола. Чти подписи патриаршеския, которыя съехалися в Никею на шестый Вселенский собор, второе собранный; Павел недостойный епископ Константинополский новаго Рима, по указу подписал; Петр недостойной епископ Александрийский великаго града, по указу подписал; Анастасий епископ наименший Иерусалимский, по указу подписал; Георгий менший епископ Антиохийский Божия града, по указу подписал, но и Григорий диалог, раб рабов Божиих подписал. Видишь какие титлы прежнейшия тебе патриархи требовали во своих подписях. Который возносится будет понижен. Низложи силныя со престол и вознося смиренныя. Такова есть правда.

ВОЗРАЖЕНИЕ 12 ВОПРОСА И ОТВЕТА

Глаголеши, совопросниче, неправедне, яко нарекся Никон великим государем для того, что его так назвал всегда сщастливейшой наш государь хотячи его паче звычаю почитать. Согрешил ли Никон, что так высочайшее титло на себя принял, согрешил ли или нет, скажи нам и протолкуй.

И сам, вопросниче, глаголеши, что назвал всегда сщасливейшой наш государь хотячи ево паче (л. 99 об.) [392] звычаю почитать, да уже чево ино взыскуеши толку и сам свидетелствуеши, яко назвал государь, да на нем то Господь Бог и взыщет. А где и когда назвал, аз ти скажу.

Как великий государь пришел ис под Смоленска в Вязьму, а мы пришли з государынею царицею и з государем царевичем и з государынями царевнами в Вязьму же. И он, великий государь, со многим молением говорил нам о сем, чтоб писатца великим государем, а нашего изволения на то не было. А что он в своем изволении раскаялся и всем порицает нас тем, яко мы тако начали писати, Господь Бог разсудит в день Судный по ево рукописаным грамотам, в них же есть (л. 100) [393] писано то, и положены на престол Божий.

Но обаче известите ми, что различествует государь з господином, еже и ныне епископи вси пишутца великими господами, а боляре и вси людие государями. И которое приложение [394] чести есть, еже великий государь изволил от тех времен писатися нам великим государем, как на нас, смиреннаго своего богомолца, воздвиг негодование. И что есть к чести [395] царьской пристойнейший, так ли как ныне великий государь описуется «великий государь царь» и вси людие пишут о своих делех сице «великому государю царю», или как прежде писывали вси людие «царю государю», обаче во священных книгах нигде же есть обретается Господь государем и царь царем, но Царь царьствующим и Господь господствующим [396] . (л. 100 об.) [397] Изестнее же во Апокалипсисе пишется: И [398] имать на ризе и на стегне своем имя написано Царь царем и Господь государем. И почто ине вси людие, его же хотят, того государем называют, малих и великих и средних и равных себе и менших себя пишут и глаголют. А еже бы кому продерзивому назвать кого, аще и от великих царей, и той в сладость себе приимет, оба без муки не будут и в правду.

ВОПРОС, ГЛАВА 13

Никон строит ныне по се время один монастырь и назвал его новым Иерусалимом. Доведет ли ся, чтоб так Святаго Града имя было перенесено и иному дано и опозорено?

Ответ

Никак не достойно, потому что пишет святый Кирилл во своих поучениях, яко старый Иерусалим был пророкоубийца и Христоубийца, а новая Иерусалима есть Христос, честь воздающи и учеником Его: из Сиону изыде закон и слово Господне из Ерусалима. Егда поем на святую Пасху «Светися, светися, Новый Иерусалиме», ныне есть ли есть новый Иерусалим но Никонов. Убо паки новый Иерусалим учинился ветх и пришел уже к старому и прежнему своему постановлению, и по наследованию доведется, чтоб мы от прежняго и сущаго Иеросалима отстали, а в сей новой Никонов пристали. О, недостоинство! О, неизвычна новость! Не называет тот монастырь новую обитель, но новый Иерусалим Ник., любител новых речей муж. Не бы ли пророчество о твоем, не прямом Иерусалиме, о Никоне; ново письмо начинаешь, котораго желают и дожидаются себе жидове, что изыдет воплотитися и родитися новый мессия в новом Иерусалиме на удачю не в твоем антихристова будет родителница. Покинь человече, не шути святыми делы, не играй речми [399] от Бога данными, един есть Иеросалим на земли, а вторый на Небеси, который никогда несказателный, сиречь нерушимый; третий Иеросалим никто не здумал, толко один Никон, и то не по достоинству; и будет вопрос: кто истинный патриарх Иеросалимский?

ВОЗРАЖЕНИЕ 13 ВОПРОСА И ОТВЕТА

Глаголеши, совопросниче, яко Никон строит ныне по се время один монастырь и назвал его новым Иерусалимом, доведет ли ся, чтоб так Святаго Града имя было перенесено и иному дано.

Возражение.

Не позорю аз староноваго Иерусалима, еже называю Воскресенской монастырь Новаго (л. 101) [400] Иерусалима, понеже писано есть во пророцех: Из Сиона изыдет закон и слово Господне из Иерусалима. Того закона есмь любитель и слова Господня хранитель, не стыжуся и сам иерусалимлянином нарицатися и со всем воследующим нам. Писано есть: Отроча [401] родися нам и Сын дастся нам, Ему же власть на раме Его и мирови Его несть предела. И по мале. Велия власть Его и мирови Его несть предела.

Да кто описал есть от Сиона закону место, писано есть: Не вси, иже от Израиля сии израилтяне, ниже иже от Авраама сии суть сынове Авраамли, но иже дела Авраамова сотворит, той сын Авраамль есть. Тако не вси от Иерусалима сии суть иерусалимляне, но иже закон, (л. 101 об.) [402] от Иерусалима изшедший, сохранит.

Да кто укорит мя о сем, развее иже не любит Господа. Аще ли же кто того Иерусалимом назовет, не погрешит истины, зане начало тому бысть царьскаго величества и всего освященнаго собора и всего царьскаго сигклиту. Зане и на освящении первыя церкви Воскресения Христова изволися великому государю царю и великому князю Алексию Михайловичю всеа великия и малыя и белыя России самодержцу со всем сигклитом быти. Изволи же ся ему, великому государю, именем звати новый Иерусалим и в своих царьских грамотах написать своею рукою на утвержение, еже и ныне таковая грамота ево, государева, (л. 102) [403] держится в честне месте. На ково ты, злоначалный человече, ответотворче, злые поносы твориши, глаголя. О недостоинство, о неизвычена новость, не называет тот монастырь новую обитель, но новый Иерусалим. Смотри и виждь, откуду начася таковое звание, не на него ли ты таково поношение износиши и досаду твориши?

И паки глаголеши, издыха о Никоне, ново писмя начинаешь, котораго желают и дожидаются себе жидове, что изыдет новый мессия в новом Иерусалиме на удачю не в твоем антихристова родителница.

Зело мне видится, безумный человече, не ведети тебе Божественнаго писания, ни сылы [404] его, (л. 102 об.) [405] и глаголеши, яко ново писмя начинаю, аз и тебя по святым каноном проклинаю, начинающаго чрез Божественыя правила новые законы издавати на соблазн людем. Не погрешил бы тот истины, аще бы кто обязал о выи твоей жерновный камень и потопил в море, яко в Евангелии пишется. Аще не веси, идеже подобает отцу твоему, антихристу, родитися, мы ти от святых книг покажем место, а не яко же ты, еже собою что слыши, то и глаголеши, ничто же истинно, везде лжи полно, якоже и зде. Слыши, ответотворче, како имать антихрист родитися и где.

Господу глаголющу во святем Евангелии: (л. 103) [406] Блюдите [407], да никто же вас прелстит, мнози бо приидут во имя Мое, глаголюще, яко аз есмь Христос, и многи прелстят. Услышати же имате брани и слышания бранем, зрите, не ужасайтеся, подобает бо всем сим быти. Но некогда есть кончина, востанет бо язык на язык и царьство на царьство, и будут труси же велицы по местом, и глади и пагубы будут, страхования велия с небесе будут. Вся же сия начало болезнем.

Тогда предадят вы в скорби и убиют вы, и будете ненавидими всеми языки имени Моего ради, и тогда соблазнятся мнози и друг друга предадят и возненавидит [408] друг друга, и мнози лжепророки возстанут (л. 103 об.) [409] и прелстят многия за умножение беззакония, изсякнет любы многих.

Прежде [410] же сих всех возложат на вы руки своя и ижденут, предающе на сонмища и темница, ведоми ко царем и владыкам имени Моего ради. Прилучит же ся вам во свидетельство. Предани же будете и родителию и братиею и родом и други, и умертвят от вас. И будете ненавидими от всех имене Моего ради. Претерпевый же до конца, той спасется. И проповесться Евангелие царьствия по всей вселенней во свидетельство всем, и тогда приидет кончина. Егда бо узрите мерзость запустения реченую Даниилом пророком, сто(л. 104)ящу [411] на месте святе, идеже не подобает, иже чтет да разумеет. И по мале.

Будут [412] бо дние тии скорбь, якова не бысть такова от начала созданию, еже созда Бог, доныне и не будет. Но в тыя дни по скорби той солнце померкнет, и луна не даст света своего, и звезды будут с небесе падающе, и силы, яже на небесех, падвигнутся [413]. И тогда узрят Сына человеческаго грядуща на облацех с силою и славою многою. И прочая.

Виждь, человече, где имать стати мерзость запустения на месте святе не ижели во Иерусалиме. Пошед, скажем.

Како ты сводиши таковыми безумными приклады, яко антихристу изыти из Воскресенскаго монастыря Новаго (л. 104 об.) [414] Иерусалима. Послушай же и апостола Павла, глаголюща: Да [415] никто же вас прелстит, ни по единому же образу, яко аще не приидет отступление прежде, и открыется человек беззакония, сын погибели, противник, и превозносяйся паче всякаго глаголемаго бога или чистилища, якоже ему сести во Церкви Божии аки Богу, показуя себе, яко бог есть. Не помните ли, яко еще живый у вас сия глаголах вам, и ныне одержащее весте, явитися ему во свое ему время, тайна бо уже деется беззаконию. Точию держаяй ныне, дондеже от среды будет, и тогда явится беззаконный, его же Господь Иисус убиет духом уст Своих (л. 105) [416] и упразнит явлением пришествия Своего. Его же есть пришествие по действу сатанину во всякой силе и знамениих и чюдесех ложных и во всякой лести и неправде, в погибающих, зане любве истинныя не прияша, воеже спастися им. И сего ради послет им Бог действо лсти, воеже веровати им лжи, да суд приимут вси неверовавшии истине, но благоволиша о неправде.

Навыкнем [417] спасеная словеса, како всегда нам утвержатися запоручаем. Блюдитеся, рече, да не прелщени будете, мнози бо приидут о имени Моем глаголюще, яко аз есмь, ибо поеже вознестися ему ко Отцу, бысть о них что. И восташа нецыи глаголющии, (л. 105 об.) [418] яко аз есмь Христос, якоже Симон волхв и инии мнози, имже несть ныне время имян воспомянути. Темже и в последняя дни скончания подобает паки востати лжепророком, мужем глаголющим: Се зде Христос или онде, не имите веры, но суетно мудрование стяжавшии и писания прилежно не почитающии взыщут Мя, еже обрести, и не возмогут.

Подобает бо сим первее быти и тако явитися сыну погибелну, сиречь диаволу. Отнюду же и богословцы апостоли, извествующе Господа Иисуса Христа свидетелство, койждо их показа скверных и тлетворных человек показание и проповедание яве тех неправедная деяния. Первый (л. 106) [419] Петр, камень Церкве и веры, его же ублажи Христос Бог наш, учитель церковный, первый ученик, иже ключи Царьствия имеяй, научи нас, глаголя: Сие [420] же ведите, чада, яко внидут в последняя дни ругателие, по своих похотех ходящии, и в вас будут ложнии учителие, иже введут ереси погибельныя.

С сим же согласует святый Иоанн Богослов, возлюбленный Христу, взывая: Яве [421] суть чада диаволя и ныне антихристи мнози быша, но да не прелстятся вослед их. Не всякому духу веруйте, яко мнози лжепророцы и лжехристи в мир внидоша.

Та же Июда Ияковль подобно сим глаголет: в последняя времена будут (л. 106 об.) [422] ругателие, по своих ходящии похотех нечестивых, сии суть иже без страха себе пасущии.

Разуместе ли Богословец и апостол согласие и единомыслие учительства их. Послушай еще к сим Павлово дерзновение, како таковым яве открывает.

Блюдитеся [423] от злых делателей. Блюдитеся от псов [424]. Блюдитеся от сечения неверных. Блюдитеся, да никто от вас будет крадый философиею тщею и лестною. Блюдите, како опасно ходите, яко дние зли суть.

Но скончания сим слову давше, обратим повесть на последующая нам.

Прочее же, еже о антихристе, отчасти вам скажем. Но елика возможно пророк ради и Писанием воспро(л. 107) [425]повем, еже на всю землю прелесть его и законопреступное прихождение.

Господу бо Иисусу Христу, по плоти на землю пришедшу от Святыя чистыя Девы, Июдино племя восприемшу. От него же прошед, царьское сродство изъяви, по Иакову, иже во благословении чад возглашающему к своему сыну: Июдо [426], тебе возхвалят братия твоя, руце твои на плещу враг твоих, скимен лвов, Июда. От леторасли Сын мой взыде. Возлег поспа яко лев и яко скимен, кто возбудит Его. Не оскудеет князь от Июды, ниже вождь от стегну Его, дондеже убо приидет Ему же щадится, и Той чаяние языком.

Видели Ияковли главы, ко Июде глаголемы и на Господе исполняемы. Таковая же (л. 107 об.) [427] убо и о антихристе патриарх взывает, тем же, яко и о Июде пророчествова, такоже и о сыне своем Дане.

Да [428] будет Дан змий, при пути седя, хапля пяту коню. Змий убо кий сий, но иже изначала лстец прелстивый Адама.

Но понеже многих ради достоит показати глаголемая, не обленимся. Яко убо воистину от колена Данова хощети родитися и противитися мучитель сый, царь и судия лютый, диавол.

Рече пророк: Дан судит людем своим, яко сый едино племя от Израиля.

Глаголет Иеремия: Спех от Дана. Услышим, борзостию коня его потрясется вся земля. И паки Моисей рече: Скимен лвов, Дан изско [429]чит от Васана. (л. 108) Якоже убо от колена Июдова родися Христос, сице и от колена Данова родится антихрист и сотворит вся, елика Христос сотвори, исперва июдейский язык возлюбит, по сих же всех знамения сотворит и чюдеса страшна, не по истине же, но по привидению, яко прельстити подобныя себе нечестивыя, аще возможно и избраныя отставити от любве Христовы. И всяку добродетель навыкнет и всех прелстит [430], воеже сотворити его царя, исперва убо лстивне приимлет ложь, беззаконный отречется славы своея, человецы пребудут моляще его, и поставляет его царь [431]. Таже вознесется сердцем своим во царьствии своем и ополчит брань и три цари убиет гневом Египецкаго, Ливийскаго и Ефиопскаго. И по сих сотворит церковь, иже во Иерусалиме, (л. 108 об.) [432] и возставит ея июдеом. Таже вознесется сердцем на всякаго человека, не точию же, но и на Бога хулная речет, помышляя, окаянный, яко царь будет даже до века. Не ведый всестрастный, яко царьство его вскоре разорится и восприимет уготованный ему огнь со всеми покаряющимися тому и сослужащими.

Прочее же пространнее хотяй навыкнути о хотящих быти сложение от святаго Евангелия и святых апостол, о сем Ипполитово прочти и увеси, или Мефодия, епископа Патарскаго, о антихристе.

Сей родится в селе Хоразине и воспитается в Вивсаиде и воцарится в Капернауме. Возвеселит же ся весь Хоразин, яко родися в нем, и (л. 109) [433] Вивсаида, яко воспитася в нем, а Капернаум, яко воцарися.

Сего ради Господь во Евангелии рече по трищи: Горе тебе, Хоразине, горе тебе, Вивсаида, горе тебе, Капернауме, яко до небес вознесеся и до ада низведешися. И внидет сын погибелный во Иерусалим, и сядет во церкви Божии, и прочее сотворит, елика во инех книгах пишет.

Такожде и святый Ефрем пишет: Родится из скверныя жены и покажется во всем благ и кроток, и возлюбят сквернии жидове, чтити его начнут и радоватися царьству его. Он же, всескверный, тех почитати начнет и место и церковь им воздвигнет.

Святый же Андрей в 9-м слове на толкование Откровения (л. 109 об.) [434] пишет [435], воспоминая Евфрата, яко от онех стран исходит антихрист.

К сему же и Новый Иерусалим, возлюбленный град, взяти и поработити хотящи, из него же Божественный закон чрез апостоли во вселенную протече. Идеже глаголют, яко и антихрист в храме Божии сядет или во июдейстем, древле убо божественнем, разрушеннем же за дерзость на Христа, и от него паки исправитися чаемем богоборцами июдеями. Или воистину в Божественнем храме в соборней Церкви чуждая себе присвояй, показуя себе, яко бог есть, яко же глаголет апостол: Но ненадолго, глаголет, огнь с небесе сошед, или видимый, якоже на два пятьдесятники при Илии, или (л. 110) [436] Христово славное пришествие убиет духом уст сових.

Доволно ли ти есть, лжесловче, о антихристове пришествии вкратце реченная от святых книг?

Мы же от Спасителя Христа научившеся молитися, еже не внити в напасть, протяженне и прилежне о сем помолимся. Немощь свою познавше, избавитися прорекованных искуса, и ниже видети антихристово пришествие, ниже предглаголаных язык движение, ниже беду смертную, от спасительныя веры отступити насилующую. Но свидетельство совести по силе соблюдающе невредимо, неуязвлено, ко искупившему нас честною Своею кровию Христу Богу распалением любве делы (л. 110 об.) [437] благими показующе, вечных благ сподобимся.

Глаголеши, ответотворче, яко един есть Иерусалим на земли, а вторый на небеси. Покажи ми описание, якоже небеснаго, такожде и земнаго качество и количество. И есть ли кто, от Иерусалима изнесеный закон чрез апостолы хранит, может нарицати иерусалимлянин или ни? Да почто во Антиохии почася християнское имя нарицатися, и еже ныне и повсюду нарицаются христиане, согрешают ли в сем христиане или ни? Да аще несть подобно держай Иерусалимский закон иерусалимлянин нарицатися, то ниже христианином кому лепо есть нарицатися, разве единыя Антиохии, еже ныне всюду на(л. 111)рицаются [438]. И аще не лепо есть христианом нарицати, ниже от первообразных кому за любовь первообразнаго вообразити, что любо вещь кую или именем тем нарещися, то уже все елико от первообразных воображеная или нареченая вся неправа суть по твоему, безумный ответотворче, списанию проклятому. То уже несть праведно и Евангелие, Богом преданое во Иерусалиме, где инде нарицати Евангелием, ниже Святый Крест развее святыя Голгофы, ниже церковь Воскресения Христова развее церкви святаго Иерусалима града?

И списать будет и от святаго Евангелия реченое Спасом слово: Шедше в мир весь проповедите Евангелие всей твари, иже веру имать, крестится [439], и спасен (л. 111 об.) будет, а иже не имет веры, осужден будет.

И [440] рече им, яко тако писано есть, и тако подобаше пострадати Христу и воскреснути от мертвых в третий день, и проповедатися во имя Его покаянию и отпущению грехов во всех языцех, наченше от Иерусалима, вы же есте свидетелие сим.

Зри, ответотворче суемудрене, яко не единому Иерусалиму предано святое и священное Евангелие, но в весь мир, якоже пишет: И проповестся Евангелие во всем мире, тогда приидет кончина.

Согрешают ли в том, еже, преписав от онаго, иныя многия содержат по всей Вселенней и нарицают Евангелие, а не образец?

(л. 112) [441] Такожде и святый Крест повсюду есть, еже поченшеся от святаго царя Константина и матере его Елены, и есть повсюду Крест. Такожде и святыя иконы зрим Владычния о нас страсти крест, гроб, ад умерщвленый и разрушеный, апостол проповедание, мучеников подвиги, венцы, самое спасение, еже первый наш Подвигоположник и Подвигодатель и Венечник посреди земли спасение [442] содела.

Согрешает ли кто, еже в славу Господу Богу с любовию созиждет храм во имя Святаго Воскресения по образу храма Воскресения, еже есть во Иерусалиме, величеством и мерою и добротою? И есть ли новая иная нарицатися может, а не таяжде, яже суть (л. 112 об.) [443] Иерусалимская? Или не подобно начал той, кто любо тако творит? Отвещай. И что суть множество повсюду святых церквей, еда не таяжде Иерусалимская церковь и святый Сион? Развее иныя еретическия другия церкви, нигде же есть другая.

Послушай, прелестниче, еже прияла Святая Соборная Церковь предание святаго седмаго Вселенскаго собора в Неделю Православия держати.

Должное к Богу летнее благодарение в онь же день прияхом Божия Церковь с показанием благочестия догмат и развращением злобы нечестия.

Пророческим последующе речением, апостолским учением покаряющесь и Евангелскими повестьми учащеся, (л. 113) [444] обновлений день празднуем.

Исаия бо рече: Обновляйтеся, острови, к Богу, от язык гадательству Церкви. Бяху же, убо церкви не просто храмов здания и светлования, но в тех благочествующих исполнение, и ими же они Божеству песнми и славословии служат.

Апостол же самому сему уча, во обновлении жизни ходити повелевает, и аще кая во Христе новая тварь обновлятися. Словеса же Господня и пророческое показующе состояние, быша, рече, обновления во Иерусалиме и зима бе.

Или убо мысленая, в ню же род июдейский на общаго Спаса скверноубийства подвизаше, бурю же и молву, (л. 113 об.) [445] или оскорбляющая телесная чювства пременением воздуха на зимноти.

Бысть же убо и на нас зима не прилучшаяся, но воистину великия злобы изливающая суровством.

Помяни, Господи, поношение рабов Твоих, его же удержал еси в недре моем многих языков, им же поносиша врази Твоя, Господи, им же поносиша изменение Христа Твоего. Изменение же убо [446] бяше Христово, смертию Его искуплении и веровавшии Ему словом же проповеди и иконным изображением, ими же велие дело смотрения избавленым познавется.

Крестом же и прежде Креста и по Кресте страстьми же и чюдеся Его. От них же и подража(л. 114)ние [447] страданий Его на апостолы, оттуду же на мученики преходит, и теми же даже до исповедников и постников преходит.

Верующим и проповедающим сие есть благовествующим словеса на писменах, вещи на начертаниях, и во едину обое совершати ползу. Словесы же проповедание и иконами истины извещение.

Словом освящающим устне, таже слышателем словом, ведущим и проповедающим, яко освещаются убо такожде честными иконами очи зрящих. Воздвижет же ся теми ум к Богувидению, якоже и Божествеными храмы и священными сосуды и иными вещьми в писаниох и умышлениох, в жертвах, (л. 114 об.) [448] в храмех, во изображениох, тому убо, яко Богу и Владыце, поклоняющеся и чтуще.

Сия вера апостолская, сия вера отеческая, сия вера православная, сия вера вселенную утверди. Зриши, неправедный ответотворче, како святии апостоли и святии отцы священными изображении и храмы и жертвами в писаниих и умышлениих очи зрящих. Воздвижет же ся теми ум к Боговидению, якоже и Великому Василию мнится, священными иконами ум на первообразное возводити.

Да которой грех от первообразных в славу Божию, аще кто кую священную вещь преписати, якоже глаголю святое (л. 115) [449] и священное Евангелие и прочия святыя книги или иконным изображением по заповеди святых апостол и святых отец, еже суть Рожество Христово и Крещение, евангелское проповедание и еже от христоненавистных жидов укорение, поругание, оплевание, распятие и смерть, во гробе положение и воскресение и ада разрушение. Таже святых и священных апостол проповедание и страсти и святых мучеников подвиги и мучение и святых и преподобных житие и исправление и святых храмов и прочих вещей во славу Божию зиждемых. Или и самаго того Иерусалима кто бы по образу его во славу Божию святое ограждение создал, на видение приснопамятнаго святаго того (л. 115 об.) [450] Иерусалима, в нем же спасителныя Страсти нашего ради спасения содеяшася, или мнится бесчестно есть. Да [451] аще града от первообразнаго ин создати беззаконно есть? Той все ты, непреподобный, обругал. Ини же уже к тому мощно есть преписати кому Евангелие или изоображение которое, или священныя храмы и прочия вещи от первообразных воображеныя.

И что различие ты глаголеши, еже начертаными или воображеными священныя вещи воображены, яже суть и иконы, яже суть храмы и жертвеники, иже повсюду от первообразных размножишася.

Вся, кроме церковнаго предания и учения и изоображения святых и присно(л. 116)памятных [452] отец обновляемая или по сем содеянная проклята.

Глаголеши, ответотворче, будет воспрос, кто истинный патриарх Иерусалимский. Смотри, хрисовула, святейших вселенских патриарх руками подписаннаго осмиюдесят со двема и печатми утвержена, о чести Московских патриарх и седалища о равночестии. Аще сам не веси, вопроси ведущих, яко ни града, ниже что любо ино есть развее монастыря и святых церквей.

ВОПРОС, ГЛАВА 14

Не говорит ли святый Герман, Патриарх Цареградский, яко просвиромисание образует Вифлиом и святый престол образует богоприемный Гроб Господень?

Ответ

Тако есть, но ино есть: ино есть образец нарицается, ино есть что нарицается и первый образец и самая сущая истинная речь; образец имеет начало от истинныя речи; ныне Иеросалим Никонов не есть ли образец, последующий истинному образу, но самый первый началной Новый Иеросалим. И так преставают всякия церковныя уставы, для того, что истина Иеросалима престала и не есть Новый Иеросалим, и ни Мати Церквам Божиим, жития Божия и селения, как поет, восхваляя его любительной Иоанн Дамаскин. И паки престал престол Иякова брата Господня по плоти и перваго архиереа Иеросалимскаго. И не правду ли сказал Христос когда рекл: и врата адова не одолеют Ея; а то ныне одолели, а то уже спорченыя места святыя, Спасителевыми ноги топтаныя, новым Римом наречен есть Царьград, по последованию ветхаго Рима; и не болше старый Рим назывался новым, ни новый назывался старым. Пусть [453] разсудит и указ соборной учинит, что святой Новой Иеросалим не называется впредь Новым Иеросалимом, он старинной, чтоб утвердился его новый Иеросалим Никонов, которой достойно бы назвал Никаполим, сиречь градовом смятение, убо по-гречески «никос» толкуется смятение, для ради греха и смуты, которая прилучилась в первом основании его.

РАЗОРЕНИЕ 14 ВОПРОСА И ОТВЕТА

Глаголеши, совопросниче, не говорит ли святый Герман, патриарх Цареградский, яко просфоромисание образует Вифлиом и святый престол образует (л. 116 об.) [454] Богоприемный гроб. Не погрешает истины, аще кто нарицает предложение святый Вифлиом и святилище, еже есть олтарь гроб Христов, ниже погрешит тот от истины, иже назовет всякую православную церковь святый Сион или Новый Иерусалим.

И предложение являет место Вифлиема, идеже родися Христос. Един сый от Святыя Троицы Сын Божий и Слово воплощшееся от святыя Богородицы во единем лице, бе совершен Бог и совершен Человек, подобен нам разве греха. Сицевым образом и Господне тело, яко от некоего чрева и крове и плоти святыя Богородицы девы, глаголю, от всего собственнаго хлеба просфоры ипостасию изымается.

Жертвенник же (л. 117) [455] или святилище глаголется, в нем же приносится Христос грехов наших ради, в нем же, жертвенице, принесе Христос святое Свое тело к Богу и Отцу, яко Овча закланое и яко Архиерей и Сын человеч приносится в жертву тайную безкровную, закалаяся и дая верным в словесную службу. Ею же причащаемся вечнаго живота и безсмертнаго.

Трапеза же знаменует место погребения, в нем же, месте, погребеся Христос. Еще же трапеза глаголется быти престол Божий.

Жертвеник [456] же златый Христос есть, в нем же всякая служебная и святая поставися и утвердися сила и мученическия приносятся жертвы. Его же бе показаным на горе Моисею со скиниею жертвенник. (л. 117 об.) [457] Кажения же, молитва святых, яко благовонныя Богу, якоже глаголася. Пред престолом же, сиречь пред вышними святыми силами Христа, за излияние между ними ражденыя Божественныя любве и честныя изрядныя премудрости же и свидения.

Аще и образуются в вещества и шары видимая святыми, аще жертвенник или кадилница или ино что, но невидимая и умная суть. На сицевом убо став ангел жертовнице и кадилницу, сиречь ливан, приемлющую держай молитвы святых, аки кажения Богу приношаше. Ими же приношах да по всемирней кончине мучителными убо казньми злочестивых и беззаконных умалит (л. 118) [458] в будущем веце мучение. Своим же пришествием мзды раздаст потрудившимся и о предложении о святилище, еже есть о святем жертовнице доволно рекохом.

Ныне же паки, ответотворче, ко ответом твоим з Богом возвращаемся. Да како ты бесовскою завистию надувся, глаголеши, яко тако есть, но ино есть, ино нарицается образец, ино есть, что нарицается первый образец, и самая сущая истиная речь образец имеет начало от истиныя речи. И ныне Иеросалим Никонов не есть образец, последующе истинному образу, но самый первый началный Новый Иерусалим. И так преставают всякия уставы (л. 118 об.) [459] церковныя для того, что истина Иерусалима престала и не есть Новый Иерусалим и ни Мати Церквам, жития Божия и селения, как поем [460], восхваляя его любительной Иоанн Дамаскин.

И после престал престол Иякова брата Господня по плоти и перваго архиерея Иерусалимскаго. А не правду ли сказал Христос, когда рекл: И врата адова не одолеют Ю. А то ныне одолели, а то уже спорчены места святыя, Спасителевыми ногами топтаныя.

О [461] Иерусалиме, ответотворче, уже речено есть выше, и зде в мале речем. Еда может образ быти не бывший истине, еда может сын быти без отца или не может родивыйся от отца сын во отчее имя зватися? Почто (л. 119) [462] Адам первозданный наречен Адам или Ева Евою наречена? Иже по них мнози Адами и Евы, но несть новому Адаму Христу всем что любо к безславию или уничижению. Определиша бо ся, якоже ветхий Адам, тако и новый Адам Христос и иже прежде Христа и по Христе времены и лета и месты, якоже и ныне бывает.

Мнози Авраамы, но един в вере великий Авраам, иже Божия зрения сподобися. Мнози Исааки, но един вознесенный на жертву. Мнози Ияковы быша, но един дравыйся з Богом. Мнози Моисеи, но един паче инех от Бога прославленный пред фараоном великий законодатель. Мнози Иисусы, но един Господь Иисус Христос (л. 119 об.) [463] во славу Бога Отца. Аминь. Мнози Иоанны, но един паче инех Иоанн Предтеча. Мнози Петры и Павлы, но едини верховнии апостоли Петр и Павел. Такожде и прочим вещем имена или церквам святым или монастырем или градовом бывают от первообразных. Но каяждо разлучается [464] от первыя времены и месты, якоже старый Рим от новаго, но уже новаго Рима слава скончася, старый же пребывает. Новаго Иерусалима имя не описано, ни определено, «иеро» бо сказуется святилище или священие, «салим» же толкуется мир. И совокуплено «иеро» к «салиму» и вкупе нарекошася Иеросалим, сиречь священный мир.

(л. 120) [465] Может бо ся разуметися всякому, яко и Церковь и Иерусалим есть, сиречь священный мир, в ней же освещаются святым крещением и просвещаются святым маслосвящением и миропомазанием. Откуду же ты новое, ответотворче, глаголеши, яко ныне Иерусалим Никонов не есть образец? Почто, еда Никон во свое имя нарицает, глаголеши Никонов?

Никон несть Иерусалим, но Никон Никон есть. А еже Воскресенской монастырь Новаго Иерусалима разумей от сочетания и глаголеши, яко престала истина Иерусалима, и не есть Новый Иерусалим. Почто, того ли ради, еже срацынская власть того удержа грех ради наших, якоже нам слышится, (л. 120 об.) [466] еже тамо бывающая, яко ни единыя власти имате во святей церкви Святаго Воскресения Христова, но вся полна всякия мерзости и запустения. И зря по тамо бываемому глаголеши, яко преста истина Иерусалима, якоже и Каиафа неволным пророчеством прорек, глаголя, яко уне есть да един человек умрет за люди, а не весь язык, еже и бысть. И ни [467] Мати Церквам Божиим жития Божия и селения глаголеши. Почто, тамо ли зря уверяеши зде неведящим бываемое и яко преста престол Иякова, брата Господня по плоти и перваго архиереа Иерусалимскаго, несть тощно твое слово, но не истинно.

Приводиши Господем реченная Петру во Евангелии: (л. 121) [468] Аз [469] же ти глаголю, яко ты еси Петр и на сем камени созижду Церковь Мою, и врата адова не удолеют Ей.

И ты глаголеши ныне, яко одолели. Церковь глаголется не место точию, но нрав, и не стены церковныя, но закон церковныя и вера и житие. Се ли мниши, безумне, еже во славу Христа Бога нашего зиждутся святыя церкви по образу святаго храма Воскресения Христа, его же созда христолюбивая царица Елена, ея же образ принесе брат наш блаженныя памяти всесвятейший Паисий патриарх святаго града Иерусалима, Богу на сем предпославшу. Богу бо вся порабощена суть, и врата адова не удолеют Ей, то есть по временех бывающии гонителие, иже прелщением во ад отпущаху (л. 121 об.) [470] христианы, еретицы же суть врата во ад низводяща. Многим бо гонителем и многим еретиком одоле Церковь по писаному.

Ненавидящии Сиона посрамятся от Господа, да будут убо прежде восторжения яко трава, ссечет бо Христос выя их усечением мук. И ты глаголеши, яко преста истина Иерусалима и ни Мати Церквам Божиим жития Божия и селения. Да како преста, не оный бо Иерусалим пренесеся, ниже Мати Церквам Божиим она от Иерусалима, но образ тех. Тии же, идеже суть, тамо и днесь.

Слыши, лестный ответотворче: И [471] виде Бог, яко добро, и рече Бог: Сотворим человека по образу Нашему и по подобию.

(л. 122) [472] И паки Соломон глаголет: Яко [473] Бог созда человека в неистление и во образ подобия Своего сотвори его.

Господь [474] созда человека от земли и паки возврати его в ню. Дни, числа и времена дал им и дал им власть на ней сущим, якоже они сами, облече их крепостию и по образу Своему сотвори я.

Зри, прелестниче мира сего, еда Бог погрешил от истины, еже сотвори по образу Своему и по подобию человека, якоже ты глаголеши, ныне Иерусалим Никонов не есть образец последующий истинному образу, но самый первый началный Иерусалим. А выше глаголеши: Образец имеет начало от истинныя речи. Еда несть начало первый второму, такожде и третиему, (л. 122 об.) [475] по сем и многим, якоже от отца родится сын, первый глаголется сын, таже по нем вторый глаголется сын, по сем инии по тому же числятся, обаче вси сынове отца единаго.

Тако и едина церковь Иерусалимская глаголется всем церквам Мати, якоже Исаия глаголет: от [476] Сиона бо изыдет закон и слово Господне из Иерусалима. Еда в Констянтинополи и во Александрии и во Антиохии и прочих митрополиях церкви быша ныне зиждемей, еда и тии не от первообразныя прияли начало, рцы ми, аще ли речеши от первообразныя, почто не престала первообразная быти Мати Иерусалимская церковь и селение Божие, якоже ты ныне глаголеши?

(л. 123) [477] Послушай, человекоугодниче, дондеже разсыплет Бог кости твоя, не нашего списания на любопрение, но от книги Великаго Афанасия архиепископа Александрийскаго, его же вопроси Антиох князь.

Вопрос.

Киим же образом увещаем невежду и варвара, яко паче всех ересей соборная Церковь праву веру имать и не блазнится?

Ответ.

Не могущии писаний же догматов опаство и глубину услышати, отсюду самому и благочестивому соборныя Церкве уверитися должна суть, глаголю же, всем спасителным и честным Христовых страстей местом, соборней православней нашей вере и Церкви от Бога да радоватися и ввереным (л. 123 об.) [478] быти, глаголю же Назареф, идеже Христос в нас вселися, Вифлеем, идеже по плоти родися, Сион, идеже спасение мира содела, Иордан, идеже Адама обнови, Фавор, идеже Небесное Царство прообразова, Елеонскую гору, идеже ко Отцу на небеса от нас взыде, якоже вся Его святая и честная места, не туне, ниже всуе, соборней Церкви ввери, но якоже благочестнейшей, сиречь и честнейшей всех еретических именуемых вер Церквей, и якоже Царь честныя Его полаты, ложницы и сокровища вернейшим всех слуг своих вручает и вверяет.

Тако Иисус Христос от начала пришествия Своего соборней Церкви честная Своя места ввери, (л. 124) [479] аще же глаголет сопротивный, яко царьскую властию сия держим, да навыкнет таковый, яко и варваром, многажды Палестину приимшим, не попусти Христос Своя места еретиком преданым быти. Но аще в мале сия начаша вкратце паки соборная Церковь отгна сия, яко свиния, от святых Христа Бога нашего дворов и мест.

Послушай, расколниче, святыя Церкве, яко не описана есть церковь местом, но по всей земли, ниже другая инде именуется развее еретическая.

И [480] взыдоша на широту земли и окружиша стан святых и град возлюбленный.

Толкование.

Полк святых яве Церковь Христову, водруженую в четырех концех вселенныя, хотящи (л. 124 об.) [481] попленити и разрушити, не ведущи, яко не един ангел токмо, но мнози окрест боящихся Его.

И [482] четыре животная глаголаху «аминь», и двадесят четыре старца падоша и поклонишася Живущему во веки веков.

Толкование.

Чрез четыре же животная и старцов указуется, яко бысть едино стадо и едина Церковь ангелов и человеков, Христом Богом совокупившем настоящая и средостение градежа разоршим. Почто, злоумне, паки средостения вражду воздвизаеши, ея же сам Христос разори. Зде не погрешит истины, аще кто тя лжехристом наречет, яко противная Богу мудрствуеши. Паки слыши: (л. 125) [483] И [484] вси ангели стояху окрест престола и старцов и четырех животных. И падоша пред престолом на лице свое, и поклонишася Богу, глаголюще: Аминь. Благословение и слава, и премудрость, и благодарение, и честь, и сила, и крепость Богу нашему во веков. Аминь.

Толкование.

И вси ангели стояху окрест престола и старцов, се едина Церковь ангелов и человеков.

Со [485] всеми призывающими имя Господа нашего Иисуса Христа не Он сице, но имя Господне на всяком месте, тех же и нашем.

Аще бо и к Коринфяном писания суть написана токмо, но и всех, иже по всей земли воспоминает верных, показуяй, якоже по вселенней единей достоит быти Церкви, аще и месты (л. 125 об.) [486] мнозими разделенней, но Господь сочетовает их общий сый, тем же и соединяяй их наведе, тех же и в нашем. Много же онаго господьственнейши, якоже бо иже на единем месте сущии. Егда многия имут противныя владыки, растерзани суть, и ничто же от места к единению ползуются, различная владыком запрещающим и к себе влекущим. Не можете бо, рече, Богу служити и мамоне. Сице, иже в различных местех сущии, аще не различных имут господий, но единаго токмо, ничто же от мест к единению вреждаются, Господу единому сочетовающу их. Не глаголю прочее, рече, яко к Коринфяном. Коринфяне суще едино(л. 126)мыслие [487] имети должни есте точию, но ко всем, иже по вселенней общаго имуще Владыку. Сего ради и приложив, повторил есть, еже нашем, понеже бо, рече, имя Господа нашего Иисуса Христа да не мнится разлучати у несмысленых, наводити паки Господа нашего же и тех. И да явленнее, еже глаголю, будет, прочту по разумению сице.

Павел и Сосфен Церкви Божией сущей в Коринфе и всем призывающим имя Господа нашего же и тех, на всяком месте, аще в Риме, аще где любо суть, благодать вам от Бога Отца и Господа нашего Иисуса Христа. Или сице паки еже и паче истинее вменяю быти. Павел и Сосфен, иже в Коринфе, освященным званым святым, со всеми призывающими (л. 126 об.) [488] имя Господа нашего Иисуса Христа на всяком месте, тех же и нашем, сиречь благодать вам и мир, вам, иже в Коринфе освященным и званым бывшим, не самем, но со всеми, иже на всяком месте призывающими имя Господа нашего Иисуса Христа, и тех, аще ли же о благодати мир, что велемудрствуеши, что велми мнешися, благодатию спасен быв.

Якоже [489] тело едино есть и уды имать многия, вся же уды тела многия сущия, едино есть тело, тако и Христос.

Достояше, рещи, тако и Церковь, сие бо бе последователно [490]. То убо не глаголет вместо оноя Христа полагает, на высоту возводя слово и множае посрамляя слышателя, а еже глаголет, сие есть. Тако и Христово тело, еже есть (л. 127) [491] Церковь. Якоже и тело и глава един есть человек, тако и Церковь и Христа едино быти глаголет. Тем же и Христа вместо Церкве положи и тело Его тако именуя, якоже убо рече, едино нечто есть наше тело, аще и от многих слагается. Тако и в Церкви едино нечто вси есмы, аще бо и от многих Та слагается удов, но многия сия едино бывает тело.

Вы [492] же есте тело Христово и уды от части. Не тело бо токмо, рече, но и уды есмы, о обоих бо сих выщше беседова, мнозих воедино собирая и показуя всех едино нечто по телеси образу бывших и едино сие многими составляемо, и во мнозех сущее, многая от сего содержащаяся и могущая быти (л. 127 об.) [493] многая что же есть еже отчасти елико в вас мощно и елико лепо от вас наздатися части, понеже бо рече тело не яже в Коринфянех церковь, но яже везде во вселенней. Сего ради рече отчасти, сиречь яко церковь яже в вас, часть есть повсюду лежащия церкве и тела всяческими состоящимися церквами. Тем же не токмо с собою, но и со всею сущею по вселенней Церковию мир имейте, да бысте были праведни, аще есте уды всего тела.

Павел [494], посланник Иисусов Христов волею Божиею, и Тимофей, брат церкви Божией, сущей в Коринфе, со святыми сущими во всей Ахаии, благодать вам и мир от Бога Отца и Господа Иисуса Христа. Церкви Божией, сущей в Коринфе, (л. 128) [495] паки их церковь нарицает, собирая всех воедино и связуя, ни бо будет Церковь едина раздравшимися иже в ней и друг на друга воставшем.

Со святыми всеми сущими во всей Ахаии купно и почитает Коринфяны, сих посланием вся целуя, и весь собирает язык. Святыя же нарицает, показуя, яко аще кто нечист в ней есть привета сего. Чесо же ради, в митрополии пишай, всем не ю посылает, не всюду сие творяй. К Солуняном убо пиша негде и к Македоняном посылаше, и к Ефесом пишай подобне, не объят всю Асию. И еже к Римляном послание, не иже во Италии живущим есть посланое, но зде сие творит, и воеже к Гала(л. 128 об.)том [496] послании, ниже бо тамо единому граду или двум или трием, но всюду разсеянным пишет, глаголяй: Павел апостол не от человек, ниже человеком, но Иисусом Христом и Богом Отцем воскресившем Его из мертвых, и иже со мною вси братия, церквам Галатийстим, благодать вам и мир.

И ко Евреом же едино всем написа послание, ниже сих разделив по градех, что убо есть виновное. Мне мнится, еже общим недугованием быти зде, тем же и общее творить послание, понеже и общаго требоваху исправления, ибо галате вси недуговаху и еврее, мню же и сии. Собрав прочее в весь народ (л. 129) [497] и целовав их, якоже всех приветити ему закон бе. Благодать бо, рече, вам и мир от Бога Отца нашего и Господа Иисуса Христа.

Почто [498] же во Апоколепсии пишет Иоанн седмим церквам сущим во Асии: Благодать вам и мир от сего, иже есть сый и иже бе, и иже есть грядый, и от седми духов, иже суть пред престолом Его, и от Иисуса Христа.

Толкование.

Многим же сущим Церквам по мире, седмим единем посла чрез седмичное число таинственное, сущих повсюду церкви знаменуя, и согласное настоящему животу. В нем же и седмичное дний обхождение бывает. Тем же и седмь ангел и седмь Церквей воспомяну, (л. 129 об.) [499] им же глаголет «благодать вам и мир от триипостаснаго Божества». Чрез сие убо сый Отец явлен бывает, возвестивый Моисею: Аз есмь, глаголяй, сый. Чрез сие, иже бе Слово, еже бе в начале у Бога, а чрез сие грядый Утешитель, присноприходяй на церковная чада святым крещением, совершеннее же и пространнее в будущем. Седмь же духов, седмь ангел разумевати мощно, получивших Церкве правление, несчисляемых Богопреначалнейшей и Царицы Святей Троицы, но яко рабов воспоминаемых с Нею. Якоже и божественый рече апостол: Засвидетельствую ти пред Богом и Господем Иисусом Христом и избраными Его ангелы. Негли же и инако сие разу(л. 130)мено [500] будет. Чрез убо сый и иже бе и грядый Отец назнаменуем есть, содержай в Себе всех сущих начало, средняя и конечная. Чрез седмь же духов действа животворящаго Духа, чрез последуемое же Христа Бога, нас ради человек бывша. На мнозех бо местех не разъиственне каяждо Божественная ипостась, у апостола предчиняется и после полагается. Тем же и зде глаголет от Иисуса Христа и прочая по ряду.

И се слышал еси, яко и в седмих вся суть Церкви, яже во вселенней, и едина Церковь ангелов и человеков, Христом Богом совокупившем растоящая и средостение градежа разоршем. Аще месты и составми глаголются мнози и что разнство есть Церкви первообразней (л. 130 об.) [501] Ей, якоже и превообразному образ.

Икона [502] глаголется, от еже подобитися. Словенски же образ, за еже образовати ино лице, ино естественый и ино подобителный образ. Ов убо не естествено разнство имущи к виновнику, но состава, якоже Сын ко Отцу, едино бо сим естество, два же состава. Ов же сопротивно сему не состава разнство имущи к первообразному, но естественое, якоже образ Христов ко Христу. Един бо состав сим, две же естестве, ино бо естество вещи писания, но Христово по человечеству, по ему же и описуется. Покланяемей иконе, Христос покланяем есть, Ему же есть подобие, а иже обесчещевает икону Христос обесчещиваем есть. (л. 131) [503] И обесчещаяй яков любо храм, обесчещает первообразный, кленый бо ся олтарем, кленется и живущим в нем. А не подъемшия подобия вещи, якоже о видящимся в зерцале, сей бо облобызающе, не вещно образ обгорнуем и без вести бывшу изоображению, о нем же покланяние вещь пребысть непоклонна. Ничто же приобщившися подобию, но якоже печать умышление сущи вещи разлучена, ничтоже к вещи истиною имать обще, аще и в вещи печать образ составися.

Всякаго подобителне образуемаго не естеством, но состав образуется. И сего ради тойжде первообразному образ его не естеством, но составом, (л. 131 об.) [504] сиречь подобием состава, священным иконы воставляем, да сих зряще, сим мним зрети первообразная. Бывают нам воспоминания и увещание любве, еже к сих первообразным, елико бо часто образи зрятся, толико и иже сие зрящии воставляются к первообразным памяти и желанию и любве. Еже убо духом и истиною служения блаженной Троицы от православных воздавается. Святым же образом не служение всяко, но поклонение и лобзание и почести. Аще бо и почести образа на первообразное преходят, на служение блаженныя Троицы, а не честных образов: да не твари служителие и вещни служителие воз(л. 132)мнени [505] будем. О Самом убо том Христе служителное поклонение и естественное есть. Покланяяй бо ся тому, споклоняется Отцу и Сыну и Святому Духу, иже во Троицы единому естеству, иже есть троическое поклонение и служение. О иконе же Христове усвоителное, рекше любовнаго завещания поклонение, и единоименно. Покланяяй бо ся сей не спокланяется Отцу и Духу, но токмо иже в ней Христу, иже заеже воплотитись образуемому по телесовидном зраце Его, иже есть усвоителное, рекше любовное поклонение и составное, рекше состава. Христос убо зрится во иконе Его, таже состоится о Нем, якоже сень с телесем, Его же и разделитися се не мощно, аще и не вина (л. 132 об.) [506] сия видится, но якоже сень осиянием является солнечным. Сице и Христова икона изображением вещи.

Толкуеши, «Никос» по грецки смятение. Несмь же «Никос», но совершеный Никонос, то есть победник, ни есть, ни была смута, и в первом основании лжеши. Но елицы смущаются, якоже тебя и ты и о тебе сокрушатся от камене претыкания Христа, на Него же падут, сокрушатся, а на них же падет, сотрыет их. Или от недостойных уст твоих неволно изречеся Симеоново пророчество: Се лежит сей на падение и на востание многим во Израили, и в знамение пререкаемо. Тако и сия церковь, на востание любящим Христа и почитающим (л. 133) святыя Его страсти, а на падение всем ненавидящим, иже Христос усечет выя их усечением вечных мук.

ВОПРОС, ГЛАВА 15

Никон разорил епископию Коломенскую для своего монастыря, выговаривая себе, что было ближнее епископство от Москвы, и то не пригоже бысть блиско патриаршескова боку епископии.

Ответ

Сиречь хочет сказать, что прежния патриархи были глупы и слепы, что оставляли такую ближную епископию боку патриаршескому; толко он, что орел, имеючи очи многозрителныя, увидев такую недостойность, заборонил, не тако есть, но полюбил еси угодие епископское и вотчины и завладел еси ими, непщевая вины о гресех; и беднаго епископа напрасно изобидел, емлючи его харч, как разоритель. Не подобается тебе имети вотчин и имения епископскаго, отдай престол истинному архиерею, не обижай его без путя и не по правде; не любит Иеросалим чужих животов, но толко своих хочет и желает, неправедное не благословится, всегда вопиет в небеса; толко отдай его венчание, отдай отыманное, к его архиерейству приналежащее, естли хощешь быти оправдан в твоих правдах ты, который славишся быти справедливый судия.

РАЗОРЕНИЕ 15 ВОПРОСА И ОТВЕТА

Глаголеши, совопросниче, яко аз разорил епископию Коломенскую, своего монастыря выговаривая себе, что было ближнее епископство, и то непригоже быть блиско патриаршескаго боку епископии. И то ты солгал беззаконне, яко не твое есть вопрошати о сих, ниже ответолжетворцу отвещати. Коемуждо подобало своя мера знати, обаче отвещаем в разорения вашея злобы.

Вы глаголете, яко аз разорил Коломенскую епископию, еже бо аще кто разорит или запустошит, еже иныя не (л. 133 об.) [507] укажет. А еже вместо иныя другую укажет, несть разорение, но строение. Ибо епископия Коломенская прилежит патриаши области поблизу сущи. Земля же Вяцкая и Великопермская отстоит болши полуторых тысящ верст, и есть место не малое и людей множество. К ним же прилежат страны язык не мало и есть тамо не мало останок языческих обычаев. Нецыи же глаголют и идолопоклоннических останков останцы есть. И сего ради по совету с великим государем царем и великим князем Алексием Михайловичем всеа великия и малыя и белыя России самодержцем таковое (л. 134) [508] дело соделано, а не для Воскресенскаго монастыря. Еще в то время и початку Воскресенскаго монастыря не было, но елико мерилася Коломенская епископия доходы церковными, толико и дано по выписке из патриаршей епархии. Такожде елико число крестьянских дворов было во епископии, толико по государеву указу и там дано по выписке, а Коломенския епископии взяты на государя. И после того государь пожаловал в свое государево богомолье Воскресенской монастырь, будучи на освящении церковном, глаголя, святая святым достойна, а не аз взял или разорил. А то дело зделано к Божественей славе и Божиим людем ко спасению, что епископия преведена в далнее и многочеловечное место. (л. 134 об.) [509] И сам ты глаголеши в 17-м ответе, яко Антиохийский престол пренесен в Дамаск и Александрийский во Египет на лутчия и безопасныя места. Да почто порокуеши деяние царьское и архиерейское в чюжей епархии?

Господу заповедающу: Шедше [510], рече, научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам. И паки: Слушаяй вас, Мене слушает, и отметаяйся вас, Мене отметается.

И апостол заповедает: Вся [511] творите без роптания и размышления. И 14-е апостолское правило с разсуждения епископу не возбраняет прейти.

Карфагенскаго собора правило 56.

Предел аще хощет (л. 135) [512] имети своего епископа по воли власть имущаго и по повелению его да имать. Таковый же на прочия пределы да не находит.

Толкование.

Повелено есть в коейждо области без воли митрополита нигде же никого же не поставити епископа, но ни в селе некоем, ни в мале градце, в нем же и един презвитер довлеет учити, епископа не поставляти, аще не умножится в таковых народ и достойно явится нарещися епископу. Аще же в пределе некоем, в нем же прежде не бе бывал епископ, прошением людей и волею имущаго власть, во области той митрополита поставлен будет епископ. Тоя люди токмо да держит, них же [513] (л. 135 об.) [514] поставлен есть епископ, инаго же предела да не заимет.

И святаго 6-го Вселенскаго собора правило 38.

Аще который град обновится царем или созиждется градским и людским законом и церковных вещей чин да последует. Аще единаго мя сим укоряют, в приказе Посолских дел свидетелствуют отпуск, яко царьскаго величества с волею содеяно и епископов советом.

Собора иже во Антиохии правило 17.

Не причастен, иже поставлен быв епископ, и абие оставив, дондеже покаявся, приимет.

Толкование.

Аще кто поставлен быв епископ и оставив, не послушает отъити в Церковь, в ню же поставлен быв (л. 136) [515] и порученных ему людей учити, да будет отлучен, дондеже покаявся попечение порученных ему душ приимет.

Собора, иже во Анкире, правило 18.

Епископ поставлен быв, аще не прият будет жители предела того, в он же поставлен бысть, и начнет инем епископиям стужати, да отлучится. Аще же хощет, да причтен будет, с презвитеры да причтется. Аще же и ту сущим епископом стужает, да изринется и от презвитерския чести.

Толкование.

Аще поставлен быв епископом и не прият будет людми града того, в нем же попечение ему поручено бысть, и начнет на чюжду епископию наскакати и ту сущим епископом мятеж творити, (л. 136 об.) [516] да отлучится. Аще же хощет с презвитеры да причтен быти и сидети с ними и равну честь прияти, да причтен будет с ними. Аще же и противу ту сущим епископом молву творит, епископская некая правления восхищает, таковый и презвитерския чести да будет лишен и от Церкви отвержен.

Видел ли еси, ответотворче неправедный, яко не разорена Коломенская епископия, но на лучшее пременена и Коломенский епископ, преступая отеческия правила, в указанную ему Церковь не идет и скитается беззаконно, его же священная правила извергают, аще не приятаго того града людми измещают, колми паче хотящим (л. 137) [517] людем прияти, а он не идет как в митрополиты или в патриархи, аще и Божественнии закони не составляют без совета всех епископ, уже бы пошол и единем царевым повелением. Ты же, расколниче, сваришися, ничто же принося от Божественнаго писания свидетельства.

Глаголет бо святый Григорий Богослов ко 150-м епископом: якоже не имате что на мя глаголати и вы бранию хотите одолети. Тако и ты, нечего тебе писати и то сварливыми словесами.

ВОПРОС, ГЛАВА 16

Доведется ли архиереом строити обозы и грады, понеже Никон полюбил жить на местех пустых и безжителных, и чтоб наполнил тое место и наемцы и боярскими подданными.

Ответ

Мелхиседек, который един был царь и председетел властвующий, что был не толко Салиму царь и создатель, так пишет Иосиф, что Салим есть сущий Иеросалим, который ради святилища Соломонова, после назывался Иеросалим; лучше убо пишут иныя что Салим он есть, который именовался Скифопол град близ Иордана; убо не видится нигде, чтоб архиерей создал град и обоз, токмо монастыри, церкви, книгохранительницы, школы, училища, дела и радение церковное; грады же и обозы царем и велможам даны создати и строити на имя свое. Однако же в житии поместья без жительнаго места прилучилось Никону, что прилучилось ворону. Хотели птицы меж собою царя поставити: пошли к судие, который бы постановил, что которая птица будет краснейшая, та бы одержала тое место. Итак все тыя птицы пошли к воде, чтоб омылися, и всякая птица, мыющися, отвергла от себе одно перо, которое виделося ей быти худо и нечисто; пошла и ворона к той же воде купатися, и увиде розных птиц перья, позбирала все перья и к себе прилепила и побегла к судие так украшена, и как увидел ея судия, тотчас хотел ей честь воздати паче иных, но иныя птицы, всякая увидя и узнав свое перье, прибегали и отнимали, и тако делаючи порядком учинили по старому вороною, и стала как и прежде была. Такожде терпит, кто чюжим владеет.

РАЗОРЕНИЕ 16 ВОПРОСА И ОТВЕТА

Глаголеши, совопросниче, доведет ли ся архиереом строити обозы и грады, понеже Никон полюбил жити на пустых местех и безжителных (л. 137 об.) [518] и чтоб наполнил тыя места наемцы и боярскими поддаными.

Возражение.

Ни обоза строю, но аще и оградою огражден есмь от обычая прежде созданых инех монастырей, но никотораго надеяния в сем имею, якоже свидетельствуют вещи. Но есть правда, яко основан и утвержден на камени веры и огражден Божественою благодатию. Аще и ветри возвеют, аще и реки смущеныя потекут, не поколеблют по писанному: Возшумеша и смятошася воды их, речная устремления веселят град Божий. Освятил есть селение свое Вышний, Бог посреде его и не подвижится, поможет ему Бог утро за утра. И аще ополчится на мя полк, не убоится сердце мое, аще востанет на мя (л. 138) [519] брань, на Бога аз уповаю и не убоюсь от тем людей окрест, нападающих на мя. И паки ополчится ангел Господень окрест боящихся его и избавит их, оружие извлекоша грешницы, напрягоша луки своя. Низложити у Бога и нища заклати правыя сердцем, оружие их внидет в сердца их и луцы их сокрушатся.

Научи бо нас Спас не убоятися от убивающих тело, души же не могущих убити, но паче боятися научи имущаго власть воврещи в дебрь огненую.

И божественый апостол учит, глаголя: Несть наша брань к крови и плоти, но к началом и ко властем и к миродержителем тмы века сего, к духовом злобы поднебесным. И не имамы (л. 138 об.) [520] зде града пребывающа, но грядущаго взыскуем.

Глаголеши, совопросниче, яко Никон полюбил на пустых местех и безжителных.

Писано есть: Лучши есть един благотворяй, паче тмы законопреступных. Лучши вселятися на пустых местех, по писанному: Се удалихся, бегая, и водворихся в пустыни, чаях Бога спасающаго мя от малодушия и бури. Несть же пусто место благодатию Божиею, но велми многонародно, и ниже наймиты, ниже боярские, но раби Бога вышняго живут.

А яже о отхождении. Писано есть выше и ныне реку, якоже заповеда Господь: Егда [521] убо гонят вы во граде сем, бегите во другий, и научи (л. 139) [522] молитися, глаголя: не введи нас во искушение, но избави нас от лукаваго.

А яже о судии глаголешь, яко аз говорю, егда будет призван истинный судия и праведный, тогда скажу. Ведают вси о нашем отхождении, а еже бы кому судити по правилом, не обрящеши ни правил, ни судии, ни митрополита подобает митрополитом или епископом судити, развее патриарха, якоже вышеписано [523] есть святаго 4-го Вселенскаго собора по 9-му правилу, развее писанаго во Евангелии: Внемлите же от человек, предадят бо вы на сонмы, пред владыки же и цари ведени будете Мене ради во свидетельство им и языком.

Искусом Григорий (л. 139 об.) [524] богословнейший позна, глаголет в 14-м слове в 23-м стихе. Прелюто бо есть и велми тяжко, еже понести гнев царьский. Паче же от християнскаго тягота бе и укор, тягота гонения ради, укор же и досада, яко христианский царь, темже ни озлобляеми во уверение мучению страсти приимаху, ни людие ж в мученичестем чину страждущая имяху, зане царь християн, тем же ни мняху же ся обиды приимати гонимы, но яко злодеем страдати. Увы мне, глаголет Богослов, яко во злых быхом бегати.

Глаголеши ты, расколниче, ответотворче, нигде есть, чтоб архиерей создал град или обоз, токмо монастыри, церкви, (л. 140) [525] книгохранилницы, школы, училища, дела и радения церковная. Грады же и обозы царем и велможам даны созидати. Не видиши ли, но имея уши слыши, яко ни града, ни обоза есть кое любо строение, развее церкви и монастыря и еже подобное нужднейшее монастырю, якоже свидетельствуют вещи места.

Початок же того святаго монастыря не беззаконен, но есть законно несть и по правилом святых отец, яко быти и самому самодержавнейшему царю со всем сигклитом и нам со обретающимися архиереи и прочими священными мужи, архимандриты и игумены на освящении святаго места того.

И есть правило святаго 4-го Вселенскаго собора 24-е: (л. 140 об.) [526] Монастырь [527] с волею епископа поставлен да пребывает не претворен и яже суть к нему имения да будут неотъемлема. Аще же кто инако начнет творити, несть без вины.

Толкование.

Монастыри, иже без благословения и без повеления епископля создани быша, не создани суть, ни освящени. Повелением же и со благословением епископа создании монастыри, яко Божественная места и Богу поручени суще, да пребывают не претворени и не обидими во веки, и мирския жилища николи же да не будут в них. Да сохраняют же имения их и стяжания, села и винограды и вся прочая неотъемлема и неотходна на них. Аще же кто преступит (л. 141) [528] повеление се, от правил запрещению да будут повинни.

И святаго 6-го Вселенскаго собора правило 49.

Елицы [529] же монастыри, повелением епископа своего создани бывше, к тому да не будут мирския жилища и мирским человеком да не отдадутся.

Толкование.

Подобно 24-му правилу Халкидонскаго собора, возбраняет здати монастырь без повеления места того епископа.

И святаго 1-го и 2-го Собора в церкви святых апостол правило 1.

Без повеления епископа никому же достоит монастыря создати, но да весь епископ и молитву сотворит, и созданый монастырь и вся сущая в нем внутренняя и внешняя на хартию да напишутся и да будут под властию (л. 141 об.) [530] епископа, и без воли епископли не подобает ни самому создавшему игуменити в нем, ни игумена поставляти.

Да ты же, ответотворче, глаголешь: Однако же Никону в житии поместья безжительнаго места прилучилось. Не есть безжителен, но множае нежели на Москве патриархия имеет, яко ничто же, но все царьское величество чрез Божественныя законы вышеписаныя зде олихоимствова. И не имеет святая великая церковь никотораго причастия в Москве, якоже прежде при прежних царех и великих князех имела, но есть пуста всякаго перваго своего достояния, яко вдова осиревше.

Да ты же вракаешь, враже всякоя (л. 142) [531] истины, не повинуяся евангелскому учению, еже глаголет: Глаголю [532] же вам, яко всяк глагол празден, иже аще рекут человецы, воздадят о нем слово в день Судный.

Не [533] любяй Мене, словес Моих не соблюдает.

Иже [534] в законе хвалишися, преступлением закона Богу досаждаеши.

Да [535] никто же вас лстит тщими словесы. Сих бо ради грядет гнев Божий на сыны непокоривыя. Елма бо не прияша истину, воеже спастися им. Сего ради посла им Бог действо прелести, воеже веровати им во лжу. Отложше же всяку лжу, глаголите истину.

И 65-е правило святых апостол глаголет.

Аще кто лживое писание нечестивых еретик книги яко святы в церкви (л. 142 об.) [536] пред всеми почитает на пагубу людем и церковному причту, да извержется.

И святаго 6-го Вселенскаго собора правило 19.

Старейшина [537] церковный на всяк день, изряднее же во всякую неделю, да учит люди Божественным повелениям и да сказует не от себе, но якоже божествении отцы достигоша.

Толкование.

Епископи убо во вся дни должни суть учити причет церковный и вся люди своя благоверию и Божественым повелениям. Паче же иных дней во всякую неделю всего причта и народа поучати благочестия словесы, якоже пред речеся: От Божественнаго писания избирающе истинная разумения же и судьбы и не преступати (л. 143) [538] уже положеныя пределы и Богоносных отец предания, но точию от Божественных писаний сказывати и учити истинному разумению Божиих заповедей. А аще кто воспросит их словесе Божественных писаний, да не от своего ума то сказует, но якоже церковнии светилницы и учителие своими писании написаша [539]. То бо им есть благоволно, еже ведети и умети предания Богоносных отец и потом разрешити вопрошаемая, да не како недоумеюще от себе разрешити восхотят таковых и истиннаго сказания далече отпадут.