Библиотека литературы Древней Руси. Том 2 (XI-XII века)

ОРИГИНАЛ

Добро есть, братие, почетанье книжьное, паче вьсякому хрьстьяну, блаженеи бо, рече: «Испытаюштии съведения Его вьсемь сьрдцьмь възиштють Его». Чьто бо, рече, «испытаюштеи съведения Его»? — Егда чьтеши книгы, не тъштися бързо иштисти до другыя главизны, нъ поразумей, чьто глаголють книгы и словеса та, и тришьды обраштяяся о единой главизне. Рече бо: «Въ сьрдьци моемь съкрыхъ словеса твоя, да не съгрешу тебе». Не рече «усты тъчью изглаголаахъ», нъ «и въ сьрдьци съкрыхъ, да не съгрешу тебе», и поразумевая убо истиньне писания, правимъ есть ими. Реку же: «Узда коневи правитель есть и въздьржяние, правьдьнику же книгы я».

Не съставить бо ся корабль без гвоздий, ни правьдьникъ бес почитания книжьнааго, и якоже пленьникомъ умъ стоить у родитель своихъ, тако и правьдьнику о почитаньи книжьнемь. Красота воину — оружие, и кораблю — ветрила, тако и праведнику — почитание книжьное. «Отъкрый бо, — рече, — очи мои, да разумею чудеса отъ закона Твоего» — очи бо глаголеть размыслъ сьрдьчьный и прочее; «Не съкрый отъ мене заповедий твоихъ», — разумей, яко не отъ очию съкрый, нъ отъ разума и сьрдца. Темьже и похули не поучаюштаяся, глаголя: «Прокляти уклоняюштеися отъ заповедий Твоихъ». Темьже и самъ ся похвали, глаголя: «Коль сладъка словеса твоя, паче меда устомъ моимъ, паче тысяштя злата и сребра». И въспетъ, глаголя: «Въздрадуюся азъ о словесехъ твоихъ, яко обретая користь мъногу» — користь бо нарече словеса Божия, глаголя, яко: «Обретохъ недостоинъ сы такъ даръ, еже ми ся поучяти словесьмь твоимъ дьнь и ношть», — то мы, братия, поразумеимъ и послушаимъ разумьными ушима и поразумеимъ силу и поучение святыхъ книгъ.

Послушай ты житья святааго Василия и святааго Иоанна Златоустааго, и святааго Кирила Философа, и инехъ многъ святыихъ, како ти съпьрва поведають о нихъ рекуште: измлада прилежааху святъхъ книгъ, тоже и на добрая дела подвигнушася. Вижь, како ти начятъкъ добрыимъ деломъ поучение святыихъ книгъ! Да теми, братия, и сими подвигнемъся на путь жития ихъ и на дела ихъ, и поучаимъся въину книжьныимъ словесьмъ, творяще волю ихъ, якоже велять, да и вечьныя жизни достоини будемъ въ векы. Аминь.

Господи, благослови!

Сыну мой и чадо, приклони ухо свое, послушай отьця своего, съветуюштааго ти спасьная.

Чадо, приближи разумы сьрдьця своего и вънуши глаголы родивъшааго тя, не суть бо на вредъ души своей, нъ аште разумьнея и имеши я, то къ цьсарьству небесьному вождити будуть.

Простьри сьрдчьныи съсудъ, да накаплють ти словеса слажьше меду, могуштая оживити и бесъмьртьна явити тя.

Нъ отъ чесо пьрвое начьну казати тя, сыну мой, чьто ти пьрвее явлю: мятежь ли или зълобы света сего — житие ли богоугодьно и спасьно?

Паче же бы нама лепоты мыслити, о чадо, отъ Адама, праотьца нашего, до сего нашего века: колико множьство бысть чловекъ по земли, и вьси бес памяти бышя, едини же памятьни бышя, и прослушя на небеси и на земли, иже по заповедьмъ Божиямъ вься дьни своя пожиша и къ единому вышьнему възирааху; иже въ кротости пожиша и въ добрословьи уста своя учиниша; иже малъмь света сего причящааху ся, вьсю же свою мысль, вьсе свое хотение въ бесъмрьтьное житие правляаху и о томъ единомь въздыхааху и моляаху бъшью Бога, яко достоиномъ его явити ся.

Темь же, чядо мое, изволи си техъ житие и техъ норовы приими и порасудуй деломъ ихъ, възишти кыимь путьмь идошя и коею стьзею текоша.

<...>

Буди пониженъ главою, высокъ же умъмь, очи имея въ земли, умьнеи же въ небеси; уста сътиштена, а сьрдчьная въину къ Богу въпиюшта.

Нозе тихо ступаюшти, а умьнеи скоро текушти къ вратомъ небесьныимъ; уши укланяя отъ зла слышания, умьнымъ же въину прилетая къ шюмению святыихъ словесъ, яже въ святыихъ кънигахъ писана суть.

Руце съгъбене имей на събьрание зълааго имения света сего, простьрте же на приятие убогыихъ.

Не стыдися вьсякому съзъданому въ образъ Божии главы своя покланяти, старейшааго дьньми почьстити не ленися, и покоити старость его потъщися.

Съвьрстьникы своя миромъ съретай, мьньшая себе съ любъвью приемли, честьнейшимь себе не трудися стояти.

Чядо, не буди самохотью лишенъ вечьнааго житья, греха бежи яко ратьника, губящаго душу твою.

Не въсхошти веселоваться въ мире семь, все бо веселие света сего съ плачьмь коньчаваеться. И се яве видети въ мире семь въ дъвоихъ суседехъ: у сихъ сватьбу творять, а у другыихъ мрьтвьца плачються. И тъ же плачь суетьны: дньсь плачються, а утро упиваються.

Темьже разумей суету века сего и скоропадуюштюю плъть нашу: дньсь бо растемъ, а утро гниемъ.

Темьже въ малемъ животе възишти вечьныя жизни, идеже отъ сея жизни весть ни скърби, ни въздыхания, ни плача, ни сетования, нъ радость и веселие, светъ немьрцяя: слъньце — самь Господь.

Ту жизнь възлюби, къ той по вься дьни тъштися и о той въину помышляй; буди ти съпяшту мысль възглавие помыслъ небесныя радости, въстаюштю же брашьно память царьства небеснааго.

Чядо, алчьнааго накърми, якоже ти самъ Господь повелелъ, жадьнааго напои, страньна въведи, больна присети, къ тьмьници доиди, виждь беду ихъ и въздъхни.

Буди ти въ скърбь твою прибежиште цьркы, паче же и кроме скърбии по вься часы и дьни въшьдъ, припади къ Вышьнюуму лицемь си землю покрый, и принуди его поминати тя, не уклонить бо ся тебе душелюбьць, чловеколюбьць, но прииметь тя и утешить тя.

Църковь же разумевай небо суште, олтарь же престолъ Вышьняаго, служителя же аггелы Божия. Темьже въ цьркъви акы на небеси съ страхъмь стой, яко предъ очима самого Бога; исходя же не забывай, чьто бе или чьто слыша.

Сътвори си въ чловецехъ кротъкыи, да небесьныи житель будеши;

Скърби о гресехъ, въздыхай о съблазнехъ, печалуй и о падении своемъ да очистишися, да на исходе душьнемь обряштешися бес порока;

Съмьрть поминай въину, да та память научить тя паче вьсехъ, како бо жити въ малемь семь времени;

Буди съмъсльнъ, разумей, чьто е воля Божия, чьто требует небесьный царь отъ земльныихъ, чьто просить отъ своея твари немалыя ли и удобь творимыя милостыни? Писано бо есть: «Помилуй и да помилованъ будеши!»

Чьто требуеть отъ насъ Богъ, вьсего блага испълненъ? Хвалы ли? но хвалять Его ангелы; покланяния ли? но покланяються ему небесьныя силы.

Нъ то Того просить, еже намъ на пользю, на спасение: просить бо милостиня, желаеть кротости, любить миръ. Темьже ты, чадо, Оного волю сътвори въ мале, и Онъ твою волю въ векы: даруй малое — и възьми вечьное, дажь едино — възьми сторицею; присвоися Бозе, да врагомъ си видимыимъ вьсьмъ и невидимыимъ страшънъ будеши.

Въ влънахъ житийскахъ еси, въ бури ли морьскей беду приемлеши, показаю ти, сыну мои, истиньная пристанища: манастыря, домы святыихъ. Къ темъ прибегай и утешять тя, поскърьби къ нимь и обеселишися, сынове, бо бес печали суть и умеють печальнааго утешити.

И аште чьто имееши въ дому своемь потребьно же онемь, донеси имъ, вьсе бо то въ руце Божии вълагаеши и възданью будеши.

Въ граде, въ немьже живеши, и въ инехъ окрьстьнихъ, поишти, ли единого человека бояштяся Бога и тому вьсею силою служаштя, обрете ли такого чловека, то уже не скърби: обрете бо уже ключь царьствия небесьнааго; къ тому присьни и душею, и телъмь, съмотри жития его хожения, седания, едения и вьсего обычая его пытая, паче же блюди словесъ его, не дажь ни единому словеси его пасти на земли: дражьша бо бисьра суть святая словеса.

Праздьникы же святыихъ почьсти, не самъ упиваяся, нъ алчьныя и жядьныя накърмляя.

Знаемыя твори дом свой ништиимъ, въдовицямъ, сиротамъ, не имущтиимъ, кде главы подъклонити. Богатъ ли имееши домъ свой, худъ ли — вьсе то Божиемь промыслъмъ, нъ потъштися вьсего име.

Не рьци бо имению своему: «Мое есть», — нь рьци: «Поручено ми есть на мало дний», да акы клучарь порученое ти раздавай, якоже велить поручивый ти. Темьже еже ти далъ Вышьний, то Вышьняаго ты имение сътвори въ немь.

Не оставляй последънему роду своему, нъ и дети своя и жену свою, и вьсе племя свое поручи Богу, добрууму блюстелю, егоже милость велика и богатьство несъведомо.

Имение бо света сего реце подобьно есть: суда отъидеть вънизъ и пакы съвьрху приходить. Темьже еда вышьнии граждяне рекы и съсудъ своихъ не наплъняють ли, или скота своего не напоять, рекуштеи, яко нижьниимъ граждянемъ оставимъ, а сами мало приимемъ? Ни убо, нъ до избытька череплють, а нижьними не пекуться, та же бо река минуеть я.

Такоже бо и о именьи: не пецися последьниими сыны, вънукы, правънукы, дъштерьми. Темъ бо инако время ключиться ли напасть, ли татьба, ли рать, и тъгда изгубленое не станеть имъ помагая.

Темьже въ животе своемь своей души размышляй и тою крепъко пьцися, яко едина ти есть душя, едино время живота, едина съмьрьть.

Темьже собою поболи, собою поскърби, и сьде очищения грехомъ проси, и на исходе провождения от бесъ, и тамо пришьдъшю, како бы въ уготовано прити и царьство же Божие отъ века: и полаты же его светьлыя учинены суть, нъ аште сьде купилъ я будеши. Аште же бы мира сего богатьствъмь купити, едину оть мьньшиихъ полатъ вышьняаго Иерусалима, то ни вьсего мира богатьство събьрано недостойно есть цены ея.

Милостынею же купиться царьствие Божие, милостыни же не въ велицемъ и мноземь и малемь даянии лежить, нъ по силе даюштааго и всемь сьрдьцьмь.

Даяние бо требуюштиимъ то есть милостыни она блаженая, еяже беша пълни съсуди и онехъ 5 девъ мудрыихъ, имже царьство отъвьрзеся небесное.

Су же милостыню и ты приими неотъпустьно и навяжи ю на выи своеи, да будеть съ тобою въину векъ веки.

Глаголеть бо Писание: «Милостыни мужу, акы печять» — темь же аште ту приимеши, ниединъже отъ супротивьныихъ въстанеть на тя, ни речеть ти: «Камо идеши?», видяште, яко царя небесьнааго печять носиши и к Тому идеши.

Въпрос: Како же ю´ прииму?

Ответ: Вьсяко можеши, аште хочеши, несть бо тяжько: аште бо насытилъ ся еси пиштею — накърми альчьнааго, напилъ ли ся еси — напои жядьнааго, и съгрелъ ли ся еси — съгрей трясуштаагося зимою, въ храме ли красьне и высоце възлежиши — въведи скытаюштаагося по улицамъ въ домъ свои. Възвеселилъ ли ся еси на тряпезе — обесели и скърбяштааго, обрадовали ся о чемь — обрадуй и сетуюштааго, почьстиша ли тя яко богата — почьсти и ты убогыя, весело ли ступаеши по степеньмъ, отъ князя исходя, — сътвори да в дому твоемь скърбяште не ходять.

И то бо не мала милостыни, еже домашьняя своя бе-скърбии, безъ въздыхания и бес плача сътворити. Аште достойни казни будуть при коей любо вине, то в того место помилованы будут. Тако аште будеши творяи, то и ты въ казни место въ исходе душя милость обряштеши.

Буди же домъ твой молитве и покой иереемъ, служителемъ Божиемъ, и всякому чину цьркъвьнуму. И въведи таковыя въ домъ свой, съ вьсякою чьстью посади я, постави имъ тряпезу и якоже самому Христу, самъ же имъ стани въ службе.

Да у олтаря Божия молитва ихъ за тя, яко тьмьянъ къ Богу въсходить отъ нихъ. Свешта же твоя въину въ цьркви да светить и просфора твоя такожде.

Поминай же суштиихъ въ манастырьхъ, аггельскый образъ носяштая; аште ти е како, въведи я въ домъ свой, постави имъ тряпезу въ чинъ манастырьскый, жену же свою и дети и отрокы научи съ страхомъ и мълчяниемь служити, яко аггеломъ Божиемъ. Проважая же съ покланяниемь отъпусти я, въдавъ имъ и манастырю ихъ потребьная.

Мъного бо то, аште едино «Господи помилуи» на дьнь укупиши у нихъ, то и бес цены зело, писано бо есть: «Мъного можеть молитва правьдьнааго». Темьже аште единого можеть, то чьто паче, аште мнози таци възъпиють к Богу.

Паче же къ суштиимъ въ горахъ самъ потрудися, къ плътьныимъ ангеломъ, иже мира сего устранивъшеся, угаждають единому Богу; неси потребьное имъ, приими молитву ихъ, въкладай въ сьрдце си святая словеса, помажися благословлениемь, его молися единою за грехы твоя въздъхнути и отъидеши въ домъ свои чистъ.

Клеветы же не приимай ни на коегоже чьрноризьца ли святителя, аште и самъ видиши съблажняюштася. Послушай Бога паче очию си, рекъшааго: «Не осужайте, да не осуждени будете».

Паче же минуюштиимъ тя по пути не стыдися таковыимъ главы свое покланяти.

Аште тако можеши творити, не сътворить ти пакости богатьство твое, нъ якоже и преди рекох, вождь ти будеть царьству небесьнууму, акы ходатай и другъ добръ, а зъле приемлемо и хранимо зълее диявола явиться губя тя. Богу слава ныне.

Яко елико великыимъ сьподобилься еси отъ Бога благыимъ, тольма и большяя длъжьнъ еси въздаяти.

Отъвьрзай уши свои въ ништете стражюштимъ, да обряштеши и ты Божий слухъ отвьрзенъ.

Аци же убо бываемъ нашимъ повиньникомъ, тако и о насъ обряштемъ небесьнааго Владыку.

Отъвраштяйся ласкавьць льстьныихъ словесъ, яко и врановъ: искалають бо очи умьнеи.

Аште отъ вьсехъ хоштеши чьсть имети, буди всемъ благодетель обьшти; ашти хоштеши вся сущяя подъ собою исправити, добро творяштяя чьсти и зъло творяштимъ запрещай.

Такы убо себе другы и съветьникы имей, иже не вься глаголемая тобою хвалять, нъ судъмь правьдьныимь тъштаться отвештати ти.

Разумьно послушяти подобаеть пьря судиямъ, неудобь бо есть правьды изобрести скороотъбегаюште или отъгоняште; разумевай пьря мьдьльно, твори же расуждения не тъштася.

Твьрдо разумей: спасения своего хранилиште — еже николиже людина обидети.

Буди своимъ повиньникомъ страшьнъ сана ради, а любьзнъ поданиемь милостыня: елико силою превышии еси вьсехъ, тольма и делы добрыими свьтети ти подвизайся паче всехъ.

Проштения требуя греховъ, праштай и самъ къ тебе съгрешаюштяя, еже бо на рабехъ нашихъ проштение Божия гнева бываеть свобода.

Тъгда наречеться къто убо истиньный властелинъ, егда самъ собою обладаеть и нелепыимъ похотьмъ не работаеть.

Съмьрть и гонение и напасть и вься видимая зълая предъ очима ти да будуть по вься дьни и чясы.

Такъ буди о своихъ рабехъ, якоже молишися тебе Богу быти.

Не оправьдай неправьдьнааго, аште и другъ ти есть, ни обиди правьдьнааго, аште и врагъ ти есть.

Аште къто имать очиштену душу отъ чловечьскыя прельсти и видить худость своего естьства, умаления же, и напрасную съмьрть сего жития, — въ грехъ гърдостьный не въпадеться, аште и въ сану есть высоце.

Въ известьнемь сьрдьця твоего съвете разумевай суштиихъ съ тобою норовы, да познаеши въ истину съ любъвью служяштиихъ ти или съ льстью ласкаюштиихъ. Мънози бо приязнию лицемерьною вельми известьныимъ пакость творять.

Яко не достоить послушати клеветаря, сладъко ти глаголюшта, или слышати на ближьняаго, да не отъпадеши Божия лубъве и царьства.

Въвъздьржи клевештуштааго въ ушию своею, да не купно съ нимь погынеши.

Еже убо правоверьну веру имети основания добрыихъ делъ есть,[813] темьже отъ веры начьнеться слово къ тебе, брате, понеже бо верою въстребова, а нелукаво: веде, яко въдасть ми Господь веры ради твоея написати ти словеса ключема спасению.

Веруй въ Отьца и Сына и Святааго Духа, въ Троицю нераздельну, Божьство едино, Отьця нерождена, Сына рожена, а не зъдана, Духа Стаа ни рождена и зъдана, нъ исходяштя: трие въ единой воли, едину славу, едину чьсть и едино поклонение отъ вьсея твари и отъ аггелъ и чловекъ приемлюштю, превечьну и бесконьчьну пребываюштю въ векы.

Въплъштение же Сына веруй истиньно суште, а не привидениемь: въ две естьстве Божьство и чловечьство — Бога по Божьству, чловека по въчловечению, въ обоемь съвьршена.

Крьсту Христову съ верою покланяйся, яко на томь спасение вьсемъ чловекомъ съдела Господь.

Иконе Христове и пречистыя его матере и вьсехъ святыхъ его съ верою чьсть въздавай, и яко къ самемъ любъвьно въ молитве глаголи.

Страхъ Божий имей въ срьдьци въину и память, акы ту сушта Бога съ тобою на вьсякомь месте, идеже идеши или сядеши.

Страхъмь же его, акы уздою обръти умъ свой и въстязай по вся часы, да не безъ въстягновения ходя пустошьныимъ научишися.

Простейшааго въ всемь ишти — и въ брашьне, и въ одежди, и не стыдися ништетою, понеже большяя чясть мира сего въ ништете есть.

Не рьци: «Богата мужя сынъ есмь и срамъ ми есть» — никътоже бо богатей Христа, отьця твоего небесьнааго, родивъшааго тя въ купели святей, въ ништете же ходивъшя и не имуштя, къде главы подъклонити.

Правьдою украшяйся и къ вьсякому тьщися истиньно глаголати, не мози ся лиця устыдевъ лъжи послухъ быти, яко губить Господь глаголюштяя лъжу, нъ съ покорениемь истиньно отъвештавай.

Уне бо есть чловеку отъ истины пользу приемлюштю възненавидену быти, паче, нежели оть лицемерия врежену възлюблену быти.

Възненавиденыя бо бес правьды въздвигнеть Господь, възлюбленыя же вьсуе уничьжить, клеветьници бо истиньни бывають безъ испытанья.

И аште ти правьду изъглаголавъшу и въ гневъ въпадеши отъ кого любо, не скърби о томь, нъ паче утешайся, реченыимъ отъ Бога: «Блажени възненавидении правьды ради, яко техъ есть царьствие небесьное».

Кротькъ буди къ вьсякому чловеку, къ старейшууму тебе и къ мьньшюуму, лицемерьная бо то кротость, еже большиихъ устыдевъшеся, а мьньшяя озълобити.

Кротъко ступание, кротъко седение, кротъкъ възоръ, кротъко слово, — вься си въ тебе да будуть; отъ сихъ бо истиньный хрьстьянъ явишися.

Кротость же есть, еже никомуже не досажати ни въ словеси, ни въ делеси, ни въ повеленьи, нъ вьсякому чловеку норовы своими осладити срдце.

Славы земельныя никоемьже деле не похошти, слава бо земльная ругаеться любяштиимъ ю, припахнувъши бо въ мало время чловеку, яко буря ветръняя и плодъ добрыихъ делъ обронивъши, въскоре же отъшьдъши посмееть неразумию его.

Иже хочеть славьнъ быти вь семь мире, ть бештьстья не тьрпить, веру же дрьжяй беславие любить, помышляя реченое отъ Господа: «Како убо можете веровати, славу отъ чловекъ приемлюште, славы же, яже отъ Иночядааго, не ищете?»

Бештьстье люби акы чяшю пелына и приими е, аште и притрано ти есть, нъ на прогънание грехъвънуму недугу, иже бо грехъ сладостью въниде, горестию да проженеться.

Желаюштюуму вечьныя жизни и худе земленыихъ причяштяюштюся и въину мысляштю о исходе своемь, не сътужить ему поношение чловечьско, яко гость бо, пришьдъ въ миръ сь, сътьрпить бештье господы своея, понеже утро надееться остити.

Съ мученыими Христа ради хотя ликъствовати, предажь тело свое на наготу, волю на попьрание, утробу на постъ, срдце на крепость, кръвь же аште не на пролитие извъну, то вънутрь исучи ю сухотою яди, да приимеши обештяная.

Веси, яко призываеши и князя, очищають храмы, и ты, аще желаеши Бога своего въ домъ телесьный въселити на светъ жизни твоей, очисти тело постъмъ, истреби жяждею, украси съмерениемь, накади благоуханьною молитвою.

Храни свештю отъ ветра и молитву же отъ юности украси, яко невесту, бъдениемь, трудъмь, тьрпениемь, да похоштеть еи царь небесьныи.

Тайно место обретъ и седъ съ тихостию помяни грехы и отъпадение царьства, и умилися срдцьмь и образъмь, преклони главу и рьци съ стенанием: «Охъ, мъне, яко пришьльствие мое удалися, и къто дасть главе моей воду, и очима моима сльзы? увы мъне, увы мъне, яко близь дьнь Господень!»

Сльзъ ли не имаши, нъ не отъчяйся, въздыхай же чясто и тяжько отъ вьсего срдця, сльзы бо суть даръ Божии, и помалу въздыханиемь и умилениемь испросиши у Бога: вьсякъ бо просяй прииметь.

Обретъ сльзы, храни я вьсею силою своею отъ объядания и пияньства, паче же отъ осуждения вьсякого чловека; своему бо делу зазирай, чловека же, егоже не съзъда, тому не суди.

Не веруй ни очима своима, аште видиши кого съгрешяюштя, яко и те неверьне есте, ибо и пьрвое въ раи очи съблазнистася, и падениемъ онемъ отъ възора быста.

Иже бо имееть на ребрехъ своихъ язву, гноя испълнену, прыштиемъ чюжимъ не съгнусить си и помышляя въину с мъножьстве грехъ своихъ, николиже о дружьни съблазне беседы съставить коли.

Чьрвь съмеренъ зело и худъ, ты же славьнь и гръдь, нъ аще разумьнъ еси самъ, уничьжи гърдость свою, помышляя, яко крепость твоя и сила, чьрвьмъ покоиште бываеть.

Помяни пьрвыя прослувъшая въ храбърьстве, въ богатьстве же и славе, и вьси яко без вести отъидоша и беспамятьни бышя; худии же и убозии въ мире семь, о души своеи подвигьшеися, како и на небеси прославлени и по земли хвалими, и на помошть призываеми.

Възведи очи милостивьно на седяя въ наготе и зимою съкърчивъшаагося, понуди естьство свое прикрыти одеждею, лежаштею у тобе, и Господь дасть ти пакы съторицею жизнь вечьную.

Простьри руку скытаюштюмуся по улицамъ, въведи таковыя въ свою обитель, общъ ти буди съ нимь хлебъ твой, обьштя чяшя, воды ли или пития, яко же ти Господь далъ есть.

Страньна въведи въ домъ свой, бескровьнааго въ храмъ свой, даждь мокнуштюму сухоту, зимному теплоту, омый сквьрну тела его, яко убогъ есть зело и достоинъ помилования.

Посети суштиихъ въ тьмьници, по Господню повелению, вижь беду, вижь страсть и рьци: «Охъ мъне! си за едино съгрешение стражють! Азъ же по вься чясы владыце моему Христу съгрешяю и въ льготе пребываемъ!»

Аште видиши кого отъ нихъ, по оклеветании стражюшта, помози ему, Христа ради, яви истину къ нимъже оклеветанъ есть: велико бо то спасение есть, еже обидимыя избавляти.

Седящю ти надъ мъногоразличьною тряпезою, помяни сухъ хлебъ ядуштааго и не могуштааго си воды принести недуга ради.

Насыштяяй тело свое, дажь чясть отъ тряпезы ты твоея души своей, яко та чьстьнеиши тела есть, даждь же да душьную часть нищии хранять, да егда въстребуеть, тьгда готово обряштеть. Будеть бо веремя на исходе и у вратъ небесьныихъ обряштеть, егда мъного требовати имать.

Насыштяяся многосластьнааго пития, помяни пиюштааго теплу воду, отъ слъньца въстопевъшу, и ту же пороха нападъшу отъ места незаветръна.

Въ богатьстве сы и земльныихъ благъ изобиль имея, помьни въину слово Авраамле, еже къ богатому: «Въсприя ты благая въ животе своемъ, якоже и убогыи зълая, темьже онъ веселиться, а ты стражеши».

Възлагъ на мъногомякъце постели и пространо протягаяся, помяни наго лежаштааго подъ единемь рубъмь и не дрьзнуштя ногу своею прострети зимы деля.

Лежащю ти въ твьрдо покръвене храмине, слышащю же ушима дъждевьное множъство, помысли о убогыхъ, како лежать ныня, дъждевьными каплями, яко стрелами, пронажяеми, а другыя отъ неусъновения седяштя и водою пъдъяты.

Сидяшту ти въ зиму въ тепле храмине и без боязни изнаживъшуся, въздъхни, помысливъ о убогыхъ, како клячять надъ малъмь огньцьмь съкърчивъшеся, большу же беду очима оть дыма имуште, руце же тъкмо съгревающе, плешти же и вьсе тело морозъмь измьрзъше.

Приклони ухо свое къ просяштюуму и обништавъшюуму въ житьи семь, заплати избываюштиимъ своимъ оного недостатъчьную диру его.

Духовьнааго и духовьная помышляй, а не земльная; ведый, яко по нетьленьному одению крьштение вси равьни суть, и убозии, и богатии. Темьже блюди, еда по земльному помышляя, презриши убогааго, тьленьною одеждею съ тобою не равъно одена.

Святыихъ, угождьшиихъ Господу, моли, акы помоштьникы сушта и заступникы притекаюштиимъ къ нимъ, понеже прияшя дрьзновение къ Господу, акы угодьнии раби къ своему господину.

Мошти святыихъ съ верою целуй и чьсть въздажь имъ, яко чьстьномъ, понеже Христа деля пострадашя.

Тайнамъ Божиямъ веруй, телу и кръви Его, съ страхъмъ причяштяяся, да причастьникъ будеши царьству Его.

Неверьство же отъметай, не рьци, како хлебъ тело и вино кръвь? но слыши, яже отъ чловекъ невъзможьна, отъ Бога възможьна.

Веруй въскрьсению мрьтвыиихъ и жизни будуштааго века, по неиздреченьну словеси Господню, еже въ еуагглистемь слыши учении.

Помни Судъ, чяи отъвета и въздаяния по деломъ, и веруй, яко будеть, будеть!

По семь же възлюби Господа Бога своего отъ всея души своея и отъ всея крепости и подвигнися вься твоя дела и добрыя норовы къ Его угождению творити лепо.

Пакы же искрьняаго своего възлюби, съ нимьже въ единой купели породися, рекъше всякого хрьстьяна, паче же брата си: «Въсхожю бо, — рече Господь, — к Отцу моему и Отцю вашему».

Поклоняй главу свою вьсякому старейшюму тебе, и временьмъ и разумъмь, съмереныя бо въздвигнеть Господь.

Другы своя и съравьныя тебе любъвию съретай и съ обятиемь целование дай ему, акы Елисавефь и Мария.

Мьньшяя тебе малыя вьрстою любъвьно приими и помилуй, и къ Богу о нихъ въздъхни, яко не ново начьнъшя познавати Господа.

Князя бойся вьсею силою своею, несть бо страхъ его пагуба души, нъ паче научишися отъ того и Бога боятися.

Небрежение же о властьхъ — небрежение о самомь Бозе. Иже на власти земльне поучения видимаго владыкы небояся, како невидимааго убоиться?

Боиться ученикъ учителева слова, паче же самого учителя, такоже бояйся Бога боиться и князя, имьже казняться съгрешяюштии: князь бо есть Божий слуга къ чловекомъ, милостью и казнью зълыимъ.

По семь же вьсякому богату главу свою покланяй и съмерения ради, древо бо многоветвьно: поклонениемь подъидеши и мимо идеши.

Приимъшеи бо власть и емение отъ князя своего, отъ другъ своихъ славы хотять, а отъ мьньшиихъ поклонения просять и чьсти.

Предъ князьмь же бойся лъжю глаголати, яко губить Господь глаголюштяя лъжю, нъ съ покорениемь истиньно отъвештявай ему, акы къ самому Господу.

Аште бо въ время некое неправо чьто възглаголеть ти, а тобе съведуштю, блюдися, еда искушаеть тя, блюдеши ли своея душя? И аште явишися неистовьствуя, не можеши уверитися ему, яко блудеши оного душя.

Умъ свой присно отъ суетьныхъ мыслий въстягай, въспуштяй же къ Господу горе, симь бо на стьзю подвига въступаеши, душу же отъ раслабления свобажяеши.

Несть бо дивьно чловечьску естьству низъпадати къ земльныимъ, нъ еже падъшися не въстати? Къто бо заблудивъ съ пути не възиска пакы? Раслабленъ ли бысть отъчаяниемь пакы дньсь, утрешний пакы днь подвигу отдажь.

Неразумие же убо есть, еже приходяштямъ благостынямъ вечьныимъ даръмь благааго Бога, ти не пожьдати трьпениемь и верою, нъ о земльныихъ радоватися и техъ приятися, акы неверуюшту въскрьсению.

Аште бо бы слава сего мира приближилася славе небесьней, не бышя сынове мира сего распяли Господа славы, то кый бо рабъ дрьзнеть въ томь дому обитати, идеже господина его не прияшя?

Алкоту и жяжду Христа деля люби, елико бо пакость телу твориши, души благодеть зиждеши. Въздаяй бо судъ противу словомъ и помысломъ въздасть пакы благая и за малое, еже Его деля потрьпимъ.

Молитвы же душьныя пищя не отълагай, якоже бо тужить тело и отънемагаеть пиштя лишяемо, тако душя молтвьныя сладости лишяема на раслабление и умьртвие умьное приближяеться.

Светъ убо въ храмине свештя, светъ же въ чювьстве молитвьный разумъ; яснъ же светъ от свештя, не суштю въмесу никоемуже, светла же зело молитва непримесна мысли земьныихъ.

Предай хотение Богу, ведуштюуму вся преже бытия чловеку, и не проси воли твоей быти: всякого бо чловека мысль о непользьныихъ, нъ глаголи къ Богу: «Да будеть воля твоя!» Тъ бо строить вься на пользю намъ, ихъже мы плътьнии не вемы.

Въстени акы мытарь, прибегни акы блудьныи, умилися акы Ахаавъ, плачися акы Петръ, зови акы ханааныни, предъстои яко въдовица, молися акы Иезекия, съмерися акы Манаси, — аште тако молишися, прииметь благый Господь молитву твою, акы мати младенца.

Безгрешьнааго есть дело, еже грехомъ судити чюжимъ, къто же е без греха? Разве единъ Богъ. Тъ бо единъ неомеримъ и тому подобаеть судити суштиимъ подъ мерою.

Еже судити чловеку съблазивъшюся гърдость есть и съмнение; Господь же гърдыимъ противиться. Иже бо по вься чясы отъветъ дати о своихъ гресехъ чясть, не скоро главы своея възведеть съблазнъ чюжиихъ съмотрити.

Не буди гърдъ, да не похвалиться гробъ, гърдость твою объдьржа, и убогый почиеть на гробе твоем и никоегоже вреда прииметь.

Видевъ мьртвьць носимъ, акы свое естьство помиловавъ последуй ему и до гроба, дъвое бо добро приемлеши: оного деля съмьрти свое умрьтвие помянувъ съмеришися, и пакы тело его помиловавъ, гробу предавъ, помилованъ будеши.

Боляштааго посети, неси егоже хочеть въкусити, самъ же послужи о немь, акы о своемь сьрдоболи, ведый, яко и ты такоже имаши пострадати.

Стенюштю оному тяжько отъ болезни, ты же милостьныя своя сльзы испусти и въздъхни о болезни его къ Богу, въ нейже есть, и аште и лечьць прилучиться, ты даждь цену ицеления его деля.

Умираюштю же ему, ты своима рукама очи его сътисни и уста его, къ Богу о души его отъ вьсего срдця помолися и омый своима рукама, аще же и убогъ есть, попецися не нага погрести его.

Зело успешьно къ покаянию и сльзамъ посештение умираюшттиихъ. И къто бо тъгда не приидеть въ умиление, видя естьство свое въ гробъ съходяшть, и имя его угасъше, славу же богатааго въ тьлю съшьдъшу.

Аште имееши дрьзновение къ властелемъ и къняземъ, поскърби о обидимемь отъ сильнаго, и до пота попьри по сироте, да въменить Господь капля пота твоего съ кръвию мученичьскою.

Аште ли незнаемъ еси князьмъ си, то къ темъ, иже имуть дрьзновение къ нему, потужи о убоземь, и Господь рано по пьрвому се въменить ти.

Цьркви Божии завушти на молитву, остави дело земльное кое любо и иди на душевьную пиштю съ тъштяниемь, акы Петръ, Иоанъ къ гробу.

Идушту ти въ святый храмъ помысли, еда кого прогневалъ еси въ коемъ деле, и всяко потъштися гневъный мракъ разгънати, да яко слнце осветить ти душу молитвьная доброта.

Съкрываеть бо тьмьный облакъ сличьную красоту и светьлость, погубить молитвьную красоту помнение гневьное.

Ступивъ въ двьри црквьныя, помысли сама врата небесная прошьдъ, и ту глаголавъ вьсь чясъ таиныи, съ дивъмь и съ страхъмь стой, съмотря бываемыихъ съ верою телесьныима очима и душевьныима, тъгда и самъ пременися отъ земльныихъ мыслий на будущая блага.

Видевъ Христа, закалаема въ жьртву къ Отцу за вьсь миръ, чьто ино моштьнъ еси помыслити плътьнъ сы, тъкмо руце въздевъ, рьци: «Слава многуму ти чловеколюбию, Христе Боже!»

Размышляя же по вься часы чястая съгрешения чловечьска, премъногое же и бештисльное чловеколюбие Божие, еже на чловечьсте роде имать и еже съгрешаюштемъ намъ тьрпить, и до последьняаго дыхания ожидаеть покаяния нашего. Темьже варимъ лице Его исповеданием. Прииди потъштися и припади предъ Господьмь и въсплачи предъ сътворивъшимъ тя, зови милость его, приглашай штедроты его, да же съмьрть не варить.

Не рьци: «Много съгрешихъ, много беззаконьновахъ, не имамь дрьзновения, еже къ Богу припасти», ни убо не отъчай себе, не прилагайся тъкмо отъселе къ съгрешениемъ и силою вьсемилостивааго Бога не имаши посрамленъ быти.

Не лъжьнъ рекый: «приходяштяаго къ мъне не иждену вънъ», и по сихъ: «вьсе обратитеся къ мъне и азъ исцелю вы, и не хочу съмьрти грешьнику». Темьже дьрзай и веруй, яко Чисть сый приближяюштааго ся къ нему очистить.

Аште истиньно покаяние хоштеши прияти, то яви е делъмь: аште гърдости каешися, покажи съмерение, аште пияньства, покажи постъ, аште любодеяния, покажи чистоту. «Уклони бо ся, — рече, — отъ зла и сътвори добро».

Тъкъмо не ожидай въ тине греховьней. Вънезапы приимеши и въздъхнеши и не будеть послущяюштааго: егда аггелъ не пожидая предъ очима ти станеть, врази же твои, яко облакъ, покрыють тя.

Вънимай души своеи, яко едина ти есть, едино веремя живота и неведомъ коньць, и непреходьна пучина въздуха, и врагъ твоихъ исплънена, несть же помагаюштааго, разве добрыихъ делъ, темьже всею силою своею възишти ихъ.

Въступи на добродетель стьзю, поиди скоро, да же вечеръ не постигнеть, потъштиимъ къ вратомъ града вышьняаго, не съкланяйся ни на десно, ни на шюе, да не заблудиши въ пропасти мучения.

Епископомъ и пастухомъ Христова стада словесьныхъ овьць главу свою покланяй и припадай къ ногама ихъ, и моли да дасть ти ся благословление ихъ.

Прозвутеры ерея Христовы, предъстателя таиней его тряпезе и дробителя телу его вьсякою чьстью почьсти и съ страхъмь възирай на ня.

Таже дияконы, иподьякони, анагносты и акы служителя Божия съ верою помышляй, и тъштися ниединомуже ихъ ни въ чемь же прегрешити.

Аште убо стояштиихъ предъ земльныимь царьмь съ страхъмь чьстиши, бояся словъмь пререшти имъ, како убо разумееши о слугахъ небесьнааго царя?

Въ манастыря домы святыихъ потружяйся, вижь житие и устрой чинъ и уставъ. Видевъ бо перебывание ихъ, окаеши свое житие и управишися отътоле.

Съ суштиимъ же въ горахъ не ленися, ишти молитвы, проси благословления, и аште чьто имееши телесьныя потребы, донеси имъ и приимеши душевьну потребу.

Паче вьсякого чьрноризьца не тъштися минути бес поклонения, аште бо знаемымъ тъкъмо покланяешися и чьстиши я, то по съдружию то есть, а не по чьсти образа сущааго на нихъ.

Коньць же вьсемь прежереченыимъ възлюбиши Господа отъ вьсея душя и страхъ его да пребываеть въ срдци твоемь.

И правъ буди и истиньнъ, съмеренъ, кротъкъ, покоривъ, долу поничя, умъ же къ небеси простирая, умиленъ къ Богу и къ человекомъ приветьливъ и печальнааго тешитель, трьпеливъ въ напасти и ништете, штедръ и милостивъ, ништиимъ кърмитель, страньноприимьникъ, скърбьнъ греха ради, веселъ о Бозе, алчьнъ буди, жядьнъ, кротъкъ, робокъ, покоренъ, неславохотьнъ, не златолюбьць, друголюбьць, негърдъ, боязнивъ предъ царьмь, готовъ въ повелении его, въ отъветехъ сладъкъ, чясто молитвьникъ, разумьнъ трудьникъ къ Богу, не осудитель вьсякого человека, попьрьникъ и обидимыихъ нелицемерьнъ.

Чадо Еуаггелия, сынъ въскрьсения, наследьникъ будуштая жизни о Христе Иисусе, Господи нашемь, Ему же слава, чьсть ныня и присно и въ век векомъ. Аминь.

Страхъ въину имей и Божию любъвь и чисто къ вьсемь срдце.

Самого надъ собою стояшта Бога веруй, елькраты чьто твориши.

Радуйся, егда твориши добро, нъ не высися, еда погрязение на отишьи будеть.

Елико же въ законе предиидеши, толико же недостаточьнъ ся съврьшеньемь вежь.

Вьсякого дела коньць предъ начялъмъ распытай дьнь и ношть, къ коньчьнуму же дни възирай въину.

Не съмешайся съ теми николиже, яже видиши хулимы от добрыхъ.

Спеши же никомуже вереда сътворити въ своемь деле.

Не веселися цвьтуштими мира сего, яко травьныи бо есть цветъ: елико бо имь вьрпеши, толико же увядаеть.

Въ печяльхъ благодарьстви Бога, и ярьмъ ти греховьный обльгъчить ся.

Съмотримъ себе, да инемъ не зазираемъ, мъного бо того въ насъ, имьже то инемь зазираемъ.

Псалъмь въину да будеть въ устехъ твоихъ, Богъ бо менимъ прогонить бесы.

Молитва ти съ трезвениемь да бываеть умьнымъ, да не тако молимъ ся, якоже несть годе Богу.

Въину поминай Бога, да яко небо будеть умъ твой.

Съвяжи языкъ си: многашьды бо извештаеть, еже есть лепо таити.

Доброты своя таи, послухы же житию мъногы имей.

Толико тъчью дай телу, елико же требуеть, не елико же похочеть.

Не люби питати ся, любъвь бо съ симь житьемь творить, вражьда же отъ него къ Богу плодить ся.

Отъвраштай ся житийскыя радости: та бо подъплъзати ся творить, текуштиимъ на спасение свое.

Елико же еси съгрешилъ, то стенаниемъ поминай, бываеть бо оттуду отъпуштение.

Потребию святыихъ приобьштай ся, теми бо ти будеть къ Богу приобьштение.

Въ цьрквъви акы на небеси ступай, и ничьтоже въ ней не глаголи, ни помышляй земльнааго.

Уне вьсего довълъ имей, уступай же Богу пешти ся о немь, да будеши въину обильнъ.

Съпону твори плъти въ благыихъ трудехъ.

Пий медъ помалу, елико бо е съкрачаеши, то благодеть ти е: и незапинани творить.

Утоли гневъ, бесу бо есть отьць, егда без меры исходить.

Въ язве преже врачя имей молитву.

Попы вься единако чьти, а къ добрыимъ подвижьникомъ тьци.

Люби Божия домы, Божии же домъ потъштися самъ вътворити.

Въ църкъвь чясти, мятежь бо ны вънешьнихъ свобажаеть.

Егда молитву твориши, умъ си къ Богу възведи, аште же и отъпадеть, пакы и горе възведи.

Не престаеть умъ, зълы помыслы ражяя — а зълыя мысли выметай, а добрыя сей.

Весели ся съмерениемь, еже бо бываеть высость съмерениемь, то необаряеть ся, нъ великъ есть.

Толико тружайя ся, елико мошти начьнеши въсхластити плътьскыя похоти.

Помышляй небесьныихъ благолепие добротъ, да ти о земльныихъ не будеть никоеяже похоти, и еже земльная красота не приидеть ти на умъ.

Земльныя мысли — семена суштя вражия, веруй. Яко и мысли предстануть, и беси, иже на ны, ту абие осрамять ся.

Укланяй ся многа смеха, раслабляеть бо душю, раслабевъши же отъ законъныя узды удобь исхлаштяеть ся.

На дела подобаеть душу разлучяти ти на молитвы, тако бо не обрящеть многа въхода въ ны дияволъ.

Дело законьное мьни чьтение книжьное: егда бо умъ съ языкъмь къто хочеть ицелити, то въ книгы въину да зрить.

Аште на дело руце простираеши, языкъ ти да поеть, а умъ ти да молить ся, просить бо отъ насъ Бог въину поминати его.

Вьсяко дело молитвою печятьлевай — то же дело, о немьже ти ся умъ на двое не мутить.

Праздьный же да не ясть, и пакы слышимъ иного въ васъ бештина ходяща и ничьтоже делаюшта, нъ лицемерьствуюштяя.

Любяй дело бес печали перебываеть, начало гърдыни — еже не потрудити ся съ братъмь противу силе; приходяшти же на дело — не много глаголемъ, на тъштание наше буди, егоже ради изыдохомъ.

Мати зъльмъ — леность: доброты бо, яже имаши, крадеть, а ихъже не имаши — не дасть обрести.

Аште хочеши, да ти будеть ручьное дело ти божъствьно, а не земльно — то да ти буде обьче съ убогыми.

Радуй ся о молитвахъ святыихъ мужь. И поистинне суштя святы отъ делъ распытай: кое бо овоште отъ плода познавается.

Безълобие твори сьрдьцьмь, а чистоту телъмь; то бо обое сътворить тя Божию цьркъвь телесьную.

<...>

Егда тя оклеветають, разумей, еда е чьто до тебе въ клевете той, аште ли несть, то мни акы дымъ расходяшту ся клевету.

Егда обидимъ еси, подъбегай къ трьпению, и трьпение твое вредить обидяща тя и устроить.

Егда богатьство или славу видиши, помышляй тьленьныихъ вьсе, и убежиши уды жития сего.

Тьрпи скърби, въ скърбьхъ бо доброты цвьтуть, акы въ трьньи цветьци.

Плачи ся грешьника въ обильи живуштя, мечь бо си судьный готоваеть.

Егда къто зъло творя, и не стыдить ся о немь — отяжьчя бо ему струпы, и въ отьчаяние приходить уже.

Елишьды въстужиши, помысли, колико ти правьдьныимь приходить пакостии — и приидеть ти даръ его.

Подобаеть быти всякому хрьстьянину съмерену, а еже къ овемъ съмерити ся, а къ овемь ни, — то лицемерьныихъ то есть съмерение.

Не беседуй съ зълыими, они бо поучяють тя на зълое, а съ приобьштениемь ихъ греха того приобьштиши ся.

Послушяти присно и глаголати съ добрыими поспевай, на рать бо благу душу подвизають.

Цьркъвь домашьнюю къжьдо насъ имей умъ свой, да творити подобьно ны есть въ ней законы црквьныя.

Зълобу тъгда възненавидиши, егда разумееши, яко — бесовьскъ то есть нож, на ны обостренъ.

Егда съ святыими беседуеши, въпрашай ихъ о духовьнемь, егда ли не съ тацеми, то ты самъ духовьне беседуй.

Иже слабо живеть, то того не приводи на съветъ, и иже бо ся о зъле радуеть, то тъ ненавидить добра и съвета о томь не хочеть деяти.

Аште хочеши мучьныя болезни гонезнути, то никогоже не оклеветай, ни осужай: о томь бо Божьство паче вьсего гневаеть ся.

Аште хоштеши вьсякого греха боли быти, чюжихъ испытай: много бо того есть въ тебе, имьже то иному зазираемъ.

Бежи величанья, о человече, аште и великъ еси: еда Бога отъмештюшта ся, тебе обряштеши?

Люби съмерение, аште и великъ еси, да въ дьнь съкончянья възвышенъ будеши.

Не похули чловека николиже — и похуления не приимеши въ всемь животе своемь.

Егда въ цьркъвь идеши, не глуми ся пустошьныими, иже бо стоять предъ кънязьмь, то ни смеють ся, ни глумять ся.

Не посмейся чюжему падению, да самъ скоро падъ смеху будеши, отъ нихъже не хочеши.

Храни учения си — да веньця славы подадять ти ся.

Буди дьржявьливъ заповедьмъ симъ — да сътворять тя славьна въ чловецехъ и угодьна к Богу, тако бо славить ся Божьство, и тацеми исправленьи въгодити есть Богу.

Тако подобаеть хотяштууму безъистьленьно житие жити, и ни въ чьтоже менити тьлеемыихъ.

Аште истовыя жизни жядиши, то присно съмрьти чяй чловечьскы.

Ненавиди настояштяя сея жизни, видиши бо ю, акы коло валяще ся.

Вьсего паче почьсти душу — да добрыи ти трудъ без болезни творить ся.

Вьсе бо сьде тьленьно, душя же едина бес тьля, чтити убо подобаеть бестьленьное паче тьленьнааго.

Не проси у Господа славьныихъ, нъ точию пользьнааго проси: оного бо аште и просяшти, то не дасть, аште ли и дасть, то истьлееть.

Не весели ся о богатьстве, печяли бо его отълучяють ны отъ Бога, аште и не хочемъ.

Николиже не презьри убога плачюштя ся — да не презьримы будуть сльзы мольбы твоея.

Отътязати ся подобаеть пияньства, въ немь бо по истверезении стенание и каязнь бываеть.

Помыслъ плътолюбивыих уне гнушяти ся, тьлять бо душу и плъть осквьрняють.

И земльное бес труда добро не творить ся, да почьто благословленаго ради труда укланяемъ ся?

Аште хочеши бес труда добро творити, то поминай, яко трудъ малогодьнъ есть, а мьзда вечьная.

Святъ есть домъ мольбьныи, имьже святыи свято намъ ведеть.

Аште сееши ништиимъ въ руце, то не чюже сей, нъ свое: небонъ чюже семя половела горчее.

Аште небесьныихъ желаеши, то ненавиди земльныихъ, не дадять бо си къ онемъ възлетати.

Матери благынямъ си суть чистота и милостыни: да нельзе ни бес тоя, ни бе-сея къ Христу воиньствовати.

Не обиди милостыня и любъве: та бо благааго Бога съ небесе съведе.

Не презри чистотьныихъ съсудъ, Творьца бо въплъштена чловекомъ показа.

Не хошти богатети зело ни славити ся: тьля бо то есть, а мы несмь тьленьни.

Надъ мрьтвыимь не плачи, нъ надъ несъмысльныимь: онъ бо обьшть путь, а се своя воля.

Съгрешаюштааго плачи, а не убожаюштааго: веньчяти бо ся имать сий, а онъ — мучити.

Глаголи къ Богу много, а къ человекомъ мало, поушчениемъ же законьныимь исправляй обою.

Омывание души — благомолитвьная сльза, нъ по мольбе помяни, чьсо ради ся еси просльзилъ.

Богатыихъ жития сего не блажи, сильнии бо сильнее испытаеми будуть, темьже ти Судию пристрашьна имуть имети.

Аште сами судимъ си — то и Суди ны укротить ся, радуеть бо ся; яко Благъ видя грешьника, беремя си распраштяюштя.

Якоже бедьно въ путе ристати, такоже и обязавъшюму ся симь житиемь бедьно тешти на небеса.

Вьсе дело зъло възуштяеть диавола, вьзуштенъ же бывъ, горьце на възуштенааго обраштяеть ся.

Аште хочеши врага ои немоштьна сътворити, то грехы си умаляй — и, опешенъ отъ крылу, акы птиця играемъ и смеху будеть тобою.

Горе хульнику, съвяжеть бо ся ему языкъ и не мошти начьнеть къ судии отвещати.

Горе нечьстивуму, егда бо вьси просветять ся, тогда онъ помрачить ся зле.

Горе безаконьнику, къ суди бо яру и правьдивуму придеть.

Горе лихоимьцю, богатьство бо его отъбежить, а огнь и прииметь.

Горе ленивому, станет искать, неправедьно погубивъ, но ничего не обрящетъ.

Горе блудьнику, осквьрняеть бо ризу невестьнику, да и — царьства брака съ студъмь изгънанъ будеть.

Путь же съмьрти есть въ делехъ зълыихъ разумеваемъ, въ томь бо есть неведение Бога, имьже бываеть блудъ и разбой, и прочяя зълая дела.

Вьсяка мудрость отъ Господа и съ нимь есть въ векы: песъка морьскааго и капля дъждевьныя, Господьни векъ къто иштьтеть?

Премудрость кто иследить, корень премудрости кому отъкрыся, и разумъ ея кто разуме?

Единъ есть премудръ страшьнъ зело, седяй на престоле своемь Господь самъ създалъ ю виде и иштьте ю, и пролия ю на вьсехъ делехъ своихъ, и даровалъ ю любяштиимъ его.

Зачало премудрости — страхъ Господень, страхъ Господень — слава и похвала, и веселье — и веньць радости.

Страхъ Господень възвеселить сьрдьце и дасть веселие и дългодьние.

Бояштяму ся Господа благо будеть напоследъкъ, и въ дьнь съконьчяния своего благословленъ будеть.

Мъножьство мудрости — бояти ся Господа: и напаяеть ся отъ плодъ своихъ, вьсь домъ свой испълнить желания, и житьниця отъ жить своихъ.

Веньць премудрости — бояти ся Господа: страхъ Господень процвитая миръ и съдравие и ицеление.

Въжделевъ премудрости, съблюди заповеди, и Господь дастъ ти ю, премудрость бо и наказание — страхъ Господень и благословление, вера и кротость.

Не съкрыва премудрости своея, словъмь бо познана будеть премудрость твоя.

Не можеть ярость неправьдьна оправьдити ся, чясъ бо ярости его — падение ему.

До времене сътрьпить дълготрьпеливый — и напоследъкъ дасть веселие; до времене съкрыеть словеса своя премудрый.

Не вьзнеси себе — да не отъпадеши, и наведеши на душу свою бештьстие, и отъкрыеть Господь тайны твоя, и посреде съньма низъложить тя.

Чядо, аште приступаеши работати Господеви, то уготови душю своя въ напасти, управи сьрдьце свое и сътьрпи, и не тъштися въ время наведения.

Вьсе, елико нанесено ти будеть, — приими съ съмерениемь, дълго трьпи: яко огньмь искушено бываеть злато, а чловеци приятьни въ веремя съмерения. Веруй ему — и заступить тя, и до времене потрьпи трьпениемь — и послежде ти дасть веселие. И устьны мъногыихъ исповедять съмыслъ его, и въ недузе своемь не презри.

Нъ помоли ся Господеви, и исцелить тя, отъложи прегрешения и управи руку, и отъ всякого греха очисти срдьце.

Бояштеи ся Господа, веруйте ему — и не отъпадеть мьзда ваша.

Бояштеи ся Господа надейте ся на благая, възьрите на пьрвыя роды и видите: кто веровавъ Господеви, постыдеся? или кто, пребы въ страсе Его — оставленъ бысть? или къто призъва и´ — и презьренъ бысть? — зане штедръ и милостивъ Господь и оставить грехы, и спасаеть въ время печали.

Горе грешьнику, находяштю на два пути.

Горе сьрдьцю, ослаблену, яко не веруеть.

Горе вамъ, погубивъшиимъ трьпение — и чьто сътворите, егда посетить Господь?

Бояштеи ся Господа и не противять ся глаголомъ Его и предъ Нимь съмерять душа своя.

Да въпадемъ ся въ руце Господни, а не въ руце чловекъ: яко величие Его, тако и милость Его.

Мене, отьця, послушайте, чада, и сице творите — да съпасете ся.

Не пререкуй противу истине и о ненаказаньи своемь срамляй ся.

Не постыди ся исповедати грехы своя, и не стани противу быстрине речьней, и не покори себе мужю безумьну, и не обини ся лиця сильнааго. До съмрьти противи ся по истине, и Господь Богъ побореть по тебе.

Не рьци: «Много съгрешихъ, и чьто ми бысть?» — Господь бо тьрпеливъ есть и оцештение бестраха не буди приложити грехы на гръхы; и не рьци: «Штедрота Его мънога есть, и мъножьство грехъ моихъ оцестить» — милость бо и гневъ у него есть, и на грешьницехъ престанеть ярость Его.

Не буди скоръ языкъмь своимь, и ленивъ и слабъ въ делехъ своихъ.

Не буди яко львъ въ дому своемь и величяя ся въ рабехъ своихъ.

Не буди рука твоя простьрта на възятие, а на даяние съгъбена.

Не належи имъньи своемь и не рьци: довъльно ми есть.

Не ходи въ следъ душа своея и не рьци: «Кто мя преможеть?» — Господь бо мьстяй мьстить ти.

Не жьди обратити ся къ Богу и не отълагай дьнь отъ дне, напрасно бо изидеть гневъ Господень, и въ время мьсти погыбнеши.

Не належи именьи неправьдьныихъ, никакояже ти польза сътворить въ днь наведения.

Не ходи вьсяцемь путьмь съ грешьникъмь и дъвоязычьникъмь.

Буди утвьрженъ въ разуме своемь, и едино буди слово твое.

Буди скоръ въ послушянии своемь, длъготьрпениемь отъвештавай отъветъ, аште есть въ тебе разумъ — то отъвештяй искрьнюму, аште ли же несть — то рука твоя буди на устехъ твоихъ: яко слава и бештьстие — въ беседе и языкъ человечь — падение ему есть.

Не слови шьпътникъ и языкъмь своимь не лукуй, зазоръ бо зълъ на иноязычьнемь.

О велице и о мале не разумевай, и въ друга место не буди врагъ: имя бо лукаво поношение наследить, тако и грешьный и дъвоязычыи.

Душя лукава погубить сътворьшааго и´, и радости врагомъ своимъ сътворить.

Грътанъ сладъкъ умножить другы, и языкъ доброглаголивъ умъножить добру беседу.

Съмиряюштии ся съ тобою да будуть мнози, съветьници же твои — одинъ отъ тысушть.

Аште сътвориши друга, то въ напастьхъ си и сътвори и, и не скоро увери ся ему.

Есть бо другъ въ время радости и не пребудеть въ днь печали твоея: и отъ другъ пременуя ся и бывая врагъ, и сваръ поношения твоего отъкрыеть.

И есть другъ, тряпезамъ обьштьникъ, и не пребудеть въ днь скърби ти, а и въ добре твоемь будеть якоже и ты, и на рабы твоя простьретъ ся, а аште съмеренъ будеши, то и на тя будеть, и отъ лиця твоего съкрыеться. Отъ другъ своихъ отълучи ся и отъ другъ своихъ вънимай.

Другъ верьнъ — кровъ крепъкъ, обретый же его обрете съкровиште: другъ верьнъ — утеха житию.

Бояштеи ся Господа обряштють его.

Чядо, отъ уности своея избери наказание и до седины обряштеши мудрость.

Якоже оряй и якоже сеяй, тако приступи къ ней и жиди благыихъ плодъ ея.

Въ деланьи бо ея мало потрудиши ся и скоро имаши ясти отъ житъ ея благая.

Премудрость бо имя ея есть, и не многыимъ есть явлена.

Слыши, чадо, и сътвори волю мою, и не отъверзи съвета моего, и въведи нозе свои въ пута ея, и въ гривьну ея — выю свою, подъложи рамо свое и поноси ю — и да не будуть узъкы узы ея.

Вьсею душею своею приступи къ ней, и вьсею силою своею съблюди пути ея, иследи и изишти и познана ти будеть, и самъ ся за ню не оставиши, напоследъкъ бо обрящеши покой ея, и обратить ти ся на веселие. И будуть ти пута ея на покровъ крепости, и гривьны ея на одение славы, красота бо злата есть на ней, и узы ея — извитье камене драгааго.

Въ одеждю славы облечеши ся ею и веньць радости възложиши на ся.

Аште въсхоштеши, чадо, наказанъ будеши, и аще въдаси душю свою — то разумьнъ будеши, и аште възлюбиши слышяти — то поживеши, и аште приклониши ухо свое — то мудръ будеши.

Чадо, въ мъножьстве старьць станн и аште къто е премудръ, томь ся прилепи, вьсяку повесть въсхочи слышяти, и притъчя разума не убежить тебе.

Яште узьриши разумива, то утрьнюй къ нему, и степени двьрий его да тьреть нога твоя.

Не твори зъла, да не постигнеть тебе зъло, отъступи отъ неправьды и уклонить ся отъ тебе.

Сыне, не сей на браздахъ неправьды — и не пожьнеши ихъ седмерицею.

Не проси у Господа владычьства, ни у князя седалища славьна.

Не оправьдай себе предъ Богъмь и паче цесаря не премудряй ся.

Не ишти да буди судии, еда не мошти начьнеши неправьды отълучити, еда како убоиши ся отъ лица сильнааго и положиши блазнъ въ правости своеи.

Не съгрешай въ мъножьстве граду, ни низъложи себе въ народе.

Не сътвори дъвоици греха — в одинемъ бо повиньнъ будеши.

Не ругай ся чловеку въ горести душя его сушти: есть бо съмеряяй и въносяй.

Не глаголи на брата неправьды, ни другу того сътвори, еже ти себе не <хоштеши>.

Не въсхотеи лъгати вьсякоя лъжа, воиньство бо ея не благо.

Не примешай себе множьства грешьникъ, помяни, яко гневъ Господень не замьдлить.

Не измени друга различия деля, ни брата приснааго злата деля и камене драгааго.

Не лиши ся жены мудры и благы: благодеть бо ея есть паче злата.

Не озълоби раба, делаюшта въ истину, ни наимьника, делаюшта душею своею.

Раба разумива да любить душя твоя и не лиши его свободы.

Су ли ти чада, то наказай я и преклони отъ уности выя ихъ.

Су ли ти дъштери, то вънимай телесьмъ ихъ и не утишяй к нимъ лиця своего.

Въдай дъштерь — и будеши съвьршилъ дело велико, и мужеви разумиву въдай ю.

Е ли ти жена душевьна, то не изгони ея, и ненавидяшти тебе — не веруй еи.

Вьсемь сьрдьцьмь своимь прослави отьця своего, и матерьня болезни не забуди, помяни, яко тема рожденъ еси, ничьто има въздалъ еси, якоже та тебе.

Вьсею душею своею работай Господеви, иереомъ его покаряйся; вьсею душею своею възлюби Сътворьшааго тя и служитель его не оставляй.

Бой ся Господа и прослави иерея, и дай часть его, якоже ти есть заповедалъ Господь начатъкы о съгрешениихъ и жьртву святыня. Ништиимъ простьри руку свою, да съвьршить ся благословление и благодать даяния предъ вьсяцемъ живъмъ.

И надъ мрьтвьци не възбрани благодети и не лиши ся отъ плачюштиихъ ся, и съ желеюштиими сетуй и не лиши ся посештяющихъ, — сими бо възлюбленъ будеши.

Въ всехъ словесьхъ своихъ поминай последьняя своя и Судъ страшьный — и въ векы не съгрешиши.

Не свари ся съ чловекъмь сильнъмъ, еда како въпадеши въ руце его.

Не тишти ся с чловекъмь сильнъмь, еда како отягьчить ти меру: многы бо погубило есть злато, и сърдьца нъ на земъ уклонило.

Не свари ся съ чловекъмь язычьныъмъ, и не накладай на огнь его дровъ.

Не играй съ ненаказаныимь — да не приимуть бештьстия прадеди твои.

Не безъчьствуй чловека въ старости его: и отъ насъ бо състареются.

Не радуй ся о умьръшиихъ, помяни, яко вьси умираемъ.

Не презьри повестий мудрыихъ и въ притъчахъ ихъ живи, яко отъ нихъ навыкнеши наказание и послужиши вельможамъ.

Не отъступай отъ повестий старьчь, и ти бо навъкли суть отъ отьць своихъ, да навыкнеши отъ нихъ и ты разуму, и въ время подобьно въдаяти ответъ.

Не дай чловеку крепльшу тебе въ заимъ, аште ли въдаси бо ему въ заимъ — то будеши яко и погубивъ е.

Не поручяй ся выше силы своея, и аште поручиши ся, то пьци ся, яко и въдаяи.

Не свари ся съ судиею по преже бо судять ему.

Егда тя призоветь сильный — то отъступай, и егда паче призоветь тя — то не нападай, да не отъринеши себе, и не стани далече — да не забъвенъ будеши.

Не належи равьнъ быти съ нимь и не веруй мъногыимь словесьмъ его, мъногою бо беседою искусить тя; и яко смеяти ся испытаеть тя, съблюди и вънимай вельми, яко съ падениемь своимь ходиши.

Богатый бо колебля ся утвьржяеть ся другы, убогый же съпадъ ся пориновенъ будеть другъ его.

Богату съблазнивъшу ся, мънози заступници и глаголы неиздреченьныими оправьдять и.

Убогъй же съблазни ся — и припретиша ему, и извешта разумъ — и не дашя ему места.

Мързость гърдому — съмерение, такожде и же мьрзость богатуму — убогын.

Богатый възглагола — и вьси умълкоша, и слово его възнесошя до облакъ, убогый же възглагола — и вьси рекоша: «Чьто сь есть?» — и аште потъкнеть ся, въздринуть и.

Добро есть богатьство, въ немьже несть греха, а зъло есть ништета въ устехъ нечьстиваго.

Чловеку завидьливу нелепо е богатьство: ниже есть себе зълъ, иному добръ будеть? Возвесели ся въ имении своем?

Завидьливу у себя несть зълейша, и се въздание зълобе его: аште и добро сътворить, то забывъ ся творить, и на последъкъ изнесеть зълобу свою.

Око лихоимьця не насытить доръсти, и обида лукавааго исушаеть душю его.

Око лукаво завидьливо о хлебе, и скудьно на тряпезе своей.

Несть веселия паче радости срдьчьныя, луче есть съмьрть паче живота горька.

Льсти душю свою веселиемь и теши сьрдьце свое, и печаль далече отърини отъ себе — да не въскоре състарееши ся.

Красьна есть милостини въ время скърби, якоже и облаци дъждевьнии въ время ведра.

Братия и помошть въ время скърби, и паче обоего — милостыни избавить. Имение и крепость възносить сьрдьце, обаче обоего — страхъ Господень.

<...>

О вьсякомь деле буди бъдръ, и вьсякъ недугъ не приступить къ тебе.

Чядо, въ животе своемь искуси душу свою и виждь, чьто ей есть зъло и не дажь ей: не ключить бо ся вьсе вьсемь, не вьсяка душя въ всемь благоволить. И не пресыштяй ся въ вьсякой пишти и не разливай ся на различьне брашьне.

Въ мнозе бо брашьне недугъ бываеть и пресыщение до кручины доидеть, пресыштениемь бо мнози умьроша — помняй же се, приложить ся животе.

Несть убо добро не хранити ся отъ всякого суда.

Чядо, якоже имаши добро сътвори себе и приношения Богу приноси достойно, помяни, яко съмьрть не замьдьлить, и заветъ адовъ не показнъ бысть.

Даже не умьреши, добро сътвори другу и по силе своей простьри руку, и даждь убогыимъ по силе своей.

Не лиши ся добра, и чясть добра не минеть тебе; и не инемъ ли оставиши тяжяние свое, и труды твоя на разделение жребия, яко несть въ аде искати пиштя?

Чядо, не люби множьства неключима и не весели ся о сынъхъ ненаказаныихъ — рекъше нечьстивыихъ; аште и умъножать ся. Не весели ся о нихъ, аште несть страха Господня съ ними. Не веруй животу ихъ, въздыхание бо и плачь невидимъ — и вънезапу коньчину ихъ разумееши.

Луче бо е одинъ, нежели тысяшти, и умрети добрее бештядъ, нежели имети чада неверьна. Оть единого бо разумива уселить ся градъ, колено же безаконьныихъ опустееть: мъного сицего виде око мое.

Чловекъ мудръ въ всемь угодить, и въ дни греха уклонить ся съгрешения, вьсякъ разумивый познаеть мудрость.

Разумьнии словесы ти умудришя ся и удрьжашя притьчя испытьны.

Делатель пияница не обогатееть.

Медъ и жены отворять разумьныя, и прилепляяй ся любодеицяхъ дьрзеи будетъ.

Слыша ли слово тайно — да умьреть съ тобою, и не всякому словеси веру емли.

И одение мужя, и смьяние зубъ, и ступание чловека възвестить яже о немь.

Есть мълчя обретая ся мудръ, есть другый ненавидимъ многою беседою, и есть мълча не имать бо отъвета.

Чловеекъ мудръ умълчить до времене, и умъножяй словеса мьрзъкъ будеть, гърдяй ся — възненавиденъ будеть.

Даяние безумьнааго не сътворить пользя никоеяже: мало бо въдасть, а мъного испоносить.

Поплъзение отъ земля добрее паче, нежели от языка.

Усты безумьнааго отъвьржена будеть притъчя, не речеть бо ея въ время свое.

Порокъ зълъ чловеку лъжа, и въ устехъ ненаказаныихъ присно будеть.

Уне е тать, неже лъжя присно, оба же пагубу наследуета.

Мьзда и дарове ослепляють очи мудрыихъ, да видяштеи не видять.

Студъ отьцю о ненаказании рожденааго отъ него.

Дъшти же на умиление будеть, дъшти мудра почьстить мужя своего.

Отьца и мужя посрамить дьрзая, и отъ обою прииметь бещьстие.

Надъ мьртвыимь плачи ся — отъиде бо света, и безумьнааго плачи ся — иштезе бо отъ него разумъ.

Вьргый на пътице камень отъгонить е, тако же иже поносить другу своему — разорить дружьбу.

За друга аште отъвьрзеши уста — не стыди ся, есть бо съмерение.

Не кльни ся именьмь святого: чловекъ кльныи ся мъного испълнить ся безакония, и не отъиметь ся отъ дому его рана, и аште съгрешить — грехъ его на немь.

Чловекъ, сълазя отъ одра своего, глаголя въ души своеи: «Кто мя видить? — и стены застоять мя, и никътоже мене видить, яко и крыю ся грехъ моихъ, — и не въспомянеть Вьшьнии». И почи чловечьске страхъ его. И не разуме, яко очи Господни — тьмами есть светьлейше сълньця, призирающи на вься пути чловечьскыя и съматряюшти въ тайныхъ местехъ, и разумеють оставльшеи, яко ничьтоже луче страха Господня, и ничьтоже слаже, еже вънимати заповьдемъ Господнямъ.

Стыди ся отьця и матери — блудъмь, сильнааго и властелина — о лъжи, судия и кънязя — о съгрешеньи, събора и людии — о безаконии, обьштьника и друга — о неправьде, места, на немьже живеши, — о татьбе и правьды Божия и завета Его.

Храни ся отъ словесъ поносьныихъ на другы, и не поноси ти давъшу, и не стыди ся о сихъ.

И на суде не оправьдай нечьстива.

Съ дьрзъмь не ходи на путь — да не въстанеть на тя, тъ бо сътворить по силе своей, и въ неразумьи его погынеши.

Съ яръмь не свари ся и не ходи с нимь сквозе пустыню, предъ очима бо его кръвь яко ничьтоже есть, и идеже не будеть помошти, то ту и низложить тя.

Съ уродивыимъ света не твори, не можеть бо словесе дьржяти.

Предъ чюждиими не сътвори ничьто же тайна: не веси бо, чьто ти сътворять.

Не являй вьсякому чловеку сьрдьца своего, да не възнесеть ти хвалы.

Не даждь жене душя своея, наступити ей на крепость твою.

Не съретай жены блудьниця, да не како въпадеши въ сети ея.

Девы не съматряй, еда како съблазниши ся въ опитимияхъ ея.

Не дажь блудьницамъ душя своея, да не погубиши наследия своего.

Отъврати очи свои отъ жены красьны и не глядаи чужея доброты, въ доброте бо женьскей мнози заблудишя и похоть отъ нея, яко огнь разгараеть ся.

Съ мужатицею отинудь не поседи и не побеседуй съ нею въ вине: еда како уклонить ся душя твоя на ню — и духъмь своимь поплъзнеши ся въ пагубу зъле.

Не рьвьнуй славе грешьника: не веси бо, како будеть раздрушение его.

Не оставляй старааго друга: новый бо несть тъчьнъ ему.

И съ мудрыими съвещавай, и съ разумьныими буди размышление твои, и вься повести твоя въ законе вышьняаго.

Мужи правьдьни да обедають съ тобою, и въ страсе Господни буди похвала твоя.

Премудръ судии накажеть луди своя, и владычьство разумивааго учинено будеть; и акоже будеть судии людьмъ своимъ, такъ же и слугы его.

<...>

Не дрьжи гнева на ближьняаго своего, и не сътвори ничьсоже въ делехъ досяждения; възненавидена предъ Богъмь и чловекы гърдыни, и отъ обоихъ съгрешить неправьда.

<...>

Неправо есть укаряти убога разумива, и неподобьно есть славити мужя грешьна.

Самъ испьрва сътвори чловека и остави и въ руце мысли своея. Иште хочеши — съблюдеши заповеди, и веру сътвориши благоволения.

Предъложилъ ти огня и воду: на неже аште хочеши — простьреши руку.

Предъ чловекъмь животъ и съмьрть, и еже аште изволить — дасть ся ему: яко многа премудрость Господня.

Крепъкъ силою и зьряй вьсего, и очи Его на бояштиихъ ся его, и Тъ познаеть вьсяко дело чловечьско.

Не заповедалъ ни одиному же бештьствовати, и не дасть ослабы ни единому же съгрешати.

Обраштая ся къ Богу, огрени ся греха, и отъврати ся отъ неправьды, и зело възньнавиди мьрзость.

Пьрвее даже въ недугъ не въпадеши съмери себе, и въ время грехъ обрати ся къ Господу.

И не замьдьли въздати молитву въ время, и уготови себе и не буди, яко чловекъ, искушая Бога, помяни гневъ въ дьнь съконьчания своего.

Добро есть обличати, нежели ярити ся.

Обличи друга: мъногашьды бо бываеть клевета; и не вьсякому словеси веру емли.

Премудрыи словесы предъведеть ся, и чловекъ мудръ годе будеть вельможямъ.

Луче чловекъ, съкрывая буесть свою, нежели съкрывая мудрость свою.

<...>

Познанъ есть издалечя сильный языкъмь своимь.

Разумивый же весть, въ чемь ся поплъзаеть.

Сьрдьце буяго яко съсудъ утьлъ: вьсякого разума не удьрьжить.

Слово мудро аште услышить разумивый, въсъхвалить е и къ нему приложить.

Боголишивый же смехъмь възнесеть гласъ свои, мужь же мудръ одъва осклабить ся.

Осквьрняеть свою душу шъпътьникъ.

Якоже сълепляй съсудъ изломленъ, такоже учяий безумьнааго.

Иже поведаеть безумьному — и на коньци речеть: «Чьто бе?»

Дьве вешти умножаеть грехы, и третия — идеть гневъ.

Мала есть вься зълоба противу зълобе женьскей, жребий грешьника да испадеть на ню.

Жена лукава — язва сьрдьчьная.

Отъ жены начятъкъ греху — и тою вьси умираемъ.

Не даждь жене дрьзновения на тя глаголати, аште не ходить подъ рукою ти, отъсеци ю отъ плъти своея.

Жены добры блаженъ есть мужь ея, и число днии его сугубо.

Жена добля веселить мужя своего, и лета его испълнить миръмь.

<...>

Жену мудру не удобь обрести.

Въ женахъ редъко обрящеши истину.

Волю жити съ львъмь, неже съ женою лукавою.

Лукавьство жены изменяеть зракъ ея, и посупляеть лице свое.

<...>

Якоже емляй ся за стень и гоняй ветры, такоже емляй веру съномъ.

Духъ бояштиихъ ся Господа поживеть, надежда бо ихъ на Спасаюштааго я, бои ся Господа ничимьже постыдить ся, очи бо Господьни на бояштяя ся Его.

Благословление Господьне еже отъступити отъ грехъ, и оцештение еже отъступити отъ неправьды.

Приносяй ся жьртву отъ неправьды, приношение его небрегомо есть, ни множьствъмь жьрьтвъ не отьпустить ся грехъ.

Якоже закаляй сына предъ отьцьмь его, тако приносяй жрътву отъ имения убогыихъ.

Хлебъ бо — плъть ихъ, животъ убо ихъ, лишяяй же его чловекъ кръвь проливаяй есть.

Якоже проливаяй кръвь, тако же удьржавый мьзду наимьника.

Не яви ся предъ Господьмь тъшть — вьсе бо се есть заповеди ради: приношение правьдьнааго мастить олътаря и благоухания его предъ Вышьнимъ.

Жьртва мужа правьдива благоприятьна, и память его не забъвена будеть: окомь благомь прослави Господа, и не умали начатъка отъ руку своею.

<...>

Дажь вышьнему подаяния Его, яко Господь въздаяй есть, и седмерицею въздасть ти.

<...>

Любяии злато не оправдять ся, и любяй растьлеюштяя самъ насытить ся: мънози съпадоша злата деля и бысть пагуба ихъ прямо лицу ихъ.

Блаженъ богатый иже обрете ся бес порока и иже въ следъ злата не иде; къто сь есть — да блажимъ его, сътворилъ бо есть дивьная въ лудьхъ своихъ.

Къто искушенъ имъ бысть и съвьршилъ ся — и да будеть на похваление.

Къто бы моглъ преступьникъ быти и не преступи, и зло сътворити, и не сътворилъ — да утвьрьдять ся благая его и милостыни его исповесть цьркы святая.

Бояштааго ся Господа не съряштеть зъло, аште ли въ напасть въпадеть, то пакы изьметь его.

Чловекъ разумивъ веру иметь закону и по Христовамъ заповедьмъ ходить, и законъ его верьнъ есть.

Боляре и судия славьни суть, и несть ихъ ни единъ же болии боящааго ся Господа.

Рабу разумиву свободы поработають.

Не премудряй ся, творя дело, и не слави ся въ время тугы.

У друга подъзираюштааго тя и у врага не поведай съвета.

<...>

Отъкрываяяй таину погубилъ есть веру и не обряштьть друга противу души своей.

<...>

Мудрость съмеренааго възнесеть главу его и посреде вельможь посадить и´.

Пьрвее даже не слышиши — не отъвештявай, и не вълагай ся въ среду беседы, и на съвете грешьныихъ не седай.

<...>

И чяды своими познанъ будеть мужь.

И не всякого чловека въведи въ домъ свой: блюди ся зълодея, зло бо съдеваеть.

<...>

Егда въ добре будеть мужь, то врази его въ печяли будуть.

И не емли веры врагомъ своимъ въ векы.

И якоже бо медь обръжявееть, тако и злоба его; и аште и съмерить ся и поидеть поникъ, постави душу свою и храни ся оть него — и будеши ему, яко очиштено зьрцяло.

Не постави его у себя, да не въздривъ тя станеть на месте твоемь. Не постави его одесную себе, да не поиштеть седалиштя твоего, — и напоследъкъ разумееши словеса моя и о глаголехъ моихъ умилиши ся.

Устьнама своима усладить тя врагъ, а сьрдьцьмь своимь съветуеть въринути тя въ ровъ.

Очима своима просльзить ся врагъ, и егда обряштеть время — не насытить ся отъ кръви.

Даште обряштеть тя зъло, то ту его обряштеши пьрвее себе, и яко помагая подъразить пяте твои, главою своею покываеть и въсплещеть рукама своима, и много пошьпъчеть, и изменить лице свое.

Беремене паче себе не въздвижи, и съ креплешиимъ себе и съ богатейшимъ не приобьштай ся: кое бо приобьштение гърньцю съ котьлъмь — тъ бо приразить ся и съкрушить ся.

Богатый, обиду сътворивъ, и самъ прогневаеть ся, убогый же, обидимъ, и самъ примолить ся. Аште ли имаше, то поживеть съ тобою, аште ли не имаши — то отъльстить тя отъ себе, и въсмееть ти ся, и възглаголеть ти добре, и речеть: «Ти е ли ти, чьто требе?» — и посрами тя борошьнъмь своимь, дондеже не тъштить тя дъвоици, и напоследъкъ поругаеть ти ся шютомь, узьрить тя — и оставить тя и главою своею покываеть на тя.

Вънимай, сыну мой, и не забуди, да не съмериши ся въ веселии своемь.

Въ меду не мужай ся, мъногы бо погубилъ медъ. Горесть души мъного пиемъ медъ съ гневъмь и съ клеветою зъле.

Въ пире меда не облыгай ближьняаго, и не сърини его въ веселии его.

Старейшиною ли тя поставишя, то не възноси ся, буди въ нихъ яко единъ отъ нихъ.

Идеже послушяние будеть — не изнеси беседы, и без ума въ пире не мудри ся, буди якоже веды и мълчя.

Посреде вельможь не равьнъ ся твори, и иному не глаголюштю не зело прилежи, мужь бе съветливъ не презрить размышления.

Бе-съвета не сътвори ничьсоже, и егда сътвориши — не раскай ся.

Не съвещай съ подъзираюштиими тя, и отъ искушяюштиихъ тя съкрый съветъ.

Не съвештавай съ страшивъмъ о брани, съ купьцьмь о приложеньи и съ купуюштиими о купли, и съ завидьливъмь о похвалении, и съ несмилостивыимь о помилованьи, и съ рабъмь ленивъмь о мънозе деланьи, — не наложи на сия о всякомь съвештяньи.

Съ мужьмь благоверьномь буди, егоже аште познаеши съблудаюшта заповеди Господня: и аште съгрешиши — поболить съ тобою, и съвета сьрдьчьнааго поставить.

Есть мужь съмысльнъ и многомъ казатель, и своей души есть неклучимъ.

И есть чловекъ мудръ своей души, и плодъ разума его въ устехъ верьнъ.

Мужь мудръ люди своя накажеть.

Чядо, надъ мрьтвьцьмь источи сльзы: и якоже зъле стражя, начьни плачь, и якоже достоить съкрый тело его, и не презьри погребения его.

Горькъ сътвори плачь и рыдание дьнь единъ или дъва хуления ради: отъ печяли бо съмьрть бываеть, и печаль сьрдьчьная съломить крепость.

Помяни уставъ, яко и сице твой: «Мьне — заутра, а тебе — дьньсъ».

Въспомяни ся о немь въ исходе душя его и утеши ся, въ печяли бо и въ плачи не сътвориши ползя ему никоеяже.

Сьрдьце свое дажь утрьневати къ Господу, сътворьшууму тя, и предъ Вышьниимь помоли ся, и отъврьзи уста своя на молитву; и о гресехъ своихъ помоли ся, и убога помилуй.

Печаль велия испьрва съзъдана бысть вьсякому чловеку.

Имение неправьдьныихъ яко река исхънеть.

Чяда грешьныихъ мрьзъка будуть живуштя съ притъчями нечьстивыихъ.

Чядъ грешьныихъ наследие погынеть и съ семеньмь ихъ будеть поношение.

О отьци нечьстиве зазьрять чяда, яко его ради приемлють поношение. Чада грешьныихъ не укоренять ся.

Господь прославилъ отьця о чядехъ, и судъ матерьнь утвьрдилъ есть о чядехъ.

Чьтый отьця оцести грехы, и якоже богатяй ся прославить матерь свою.

Чьтый отьця възвеселить ся о чядехъ, и въ дьнь мольбы своея послушянъ будеть.

Прославляяй отьця длъгы дьни сътворить, и послушяяй Господа покоить матерь свою, и ту же владыкама поработаеть ражьшима его: делъмь и словъмь чьти отьца своего, да наидеть ти благословление отъ него, благословление бо отьче утвьрьжяеть домы чядомъ, клятва же матерьня искореняеть до основания.

Не слави ся въ бештьстьи отьця своего, несть бо ти слава къ бештьстьи, нъ слава чловеку отъ чьсти отьця своего, и поношение чадомъ мати въ беславьи.

Чадо, заступи въ старость отьця своего, и не оскърби его въ животе его, и аште изумляеть ся — то не зазри емь и не укори его вьсею крепостью своею.

Милостыни бо отьчя не забъвена бываеть — и въ грехъ место привъзиждеть ти ся, и в дьнь печяли твоея въспомянеть ти ся, яко угъ на мразъ, тако растають ся греси твои.

Коль хульнъ оставлий отьця своего и проклятъ Богьмь раздражаяй матерь свою.

Чядо, лета своя съ кротостию препровожяй — и чловекомъ възлюбленъ будеши.

<...>

Огнь поляшть вода угасить, а милостыни оцестить грехы.

Чядо, жита ништааго не лиши и не мини очью просьливу.

Душя алчушта не оскърби, и не разгневай мужя въ нищете его.

Сьрьдця разгневана не превъзмути и не мимо неси даяния требуюштааго.

Раба скърбяштя не отърей и не отъврати лиця своего отъ ништа.

И отребуюштааго не отъврати очью.

Не дажь места чловеку кляти тя: кльнуштюуму бо тя въ горести душя его сушти — мольбу его услышить Сътворивый его.

<…>

Премудрость похвалить душю свою и посреде людий своихъ похвалить ся и въ цьркъви вышьняаго уста своя отъвьрьзеть.

<...>

<Мудрость> трьми украсихъ ся и есмь красьна: предъ Богомь и чловекы; лубъвь ближьнихъ и мужя, на селе тяжяштя; три же норовы възненавиде душя моя, и зело ми мьрзить животъ ихъ: убога хупава, и богата лъжива, и старца, умаляюштя ся разумъмь своимь — егоже въ уности не събьралъ еси, то како можеши обрести въ старости своей?

<...>

Лепо есть чловеку имети паче вьсего жития — да не прилежить именьи зело, нъ телеси въздьржяние, удобрение норову, гласу умиление и удобрение, едение и питие без говора съ удьржяниемь.

Предъ старьци — мълчяние, предъ мудрыими — послушяние, съ тъчьныими любъвь имети, съ мьньшиими — лубъвьное съвещание.

Отъ плътьскыихъ и любосластьнынхъ вештий бегати, мало глаголати, а множее разумевати, не дьрзу быти словъмь, ни пререковати въ людьхъ.

Не скоро въ смехъ въпадати, соромяживу быти, долу очи имети, а не горе, не противу отъвещавати.

Послушьливу быти до съмьрти, тружяти ся до съмьрти, поминати присно страшьное и въторое пришьствие и дьнь съмьртьный.

О надежди радовати ся, молити ся непрестаньно, при вьсемь Бога хвалити.

Въ скърбьхъ тьрпети, къ всемъ съмерену быти, величяния бегати, говеину быти.

Блюсти сьрдьце отъ помыслъ зълыихъ, събирати имение на небесьхъ, законъ хоронити, любити Господа вьсемь сьрдьцьмь и ближьняаго, яко самъ ся.

И самому ся испытати о помыслехъ и о делехъ по вся дьни.

Не оплитати ся лихыми речьми и не искати жития ленивыихъ, нъ тъкъмо подражяти я святыихъ отьць.

Радовати ся съ исправльшими доброноровие и не завидети, съ стражуштими страдати и съ плачюштиими зело плакати ся.

Осужену быти неже осудити, ниже поносити обраштяюшту ся отъ грехъ.

Николиже себе правьдьна творити, нъ грешьника себе имети предъ Богьмь и чловекы.

Учити ненаказаныя, увештати малодушьныя, служити больньшъ, ногы святыихъ умывати.

Страньныихъ и братолубьи прилежяти, съ единоверьныими миръ имети.

Еретикъ чловекъ отъвраштяти ся, книгы преданыя почитати, а въ съкръвеныя отинудь не приницяти.

О Отьци и Сыне и Святемь Дусе не пытати, нъ единосуштьну святую Троицу съ дрьзновениемь глаголати.

Крьштяти ся есть лепо, якоже прияхомъ и не кляти ся отинудь, и не даяти сребра своего въ лихву, ни иного ничьсоже на умножение пиштя.

Бегай пияньства и отъ печалии жития сего, не беседуй луками отинудь ни о комь же глаголати.

И никакоже послушяти клеветания, нъ вьсе съ испытаниемь, никомуже скоро яти веры.

Не томи ся гневъмь, не быти дьржиму похотьу, не без ума гневати ся на ближьняго.

Сълньце да не заидеть о гневе вашемь. Не дьржяти гнева ни на когоже, не въздати зъла на зло, ни клеветы за клевету.

Нъ паче похулену быти, неже хулити, обидиму быти, а не обидети, отъштетити ся, а не отъштетити.

Паче же вьсего достоить чловеку въздьржяти ся отъ беседъ женьскыихъ и срамьныихъ словесъ, медъ бо и жены отъвраштяють и съмысльныя.

Въ заповеди не сътужити ся, нъ мьзды и похвалы отъ Него чяяти и вечьныя жизни желати и прияти.

Имей Бога предъ очима въину: яко сыну отъ вьсего сьрдьця и крепости и разума лубити Бога, и яко рабу — бояти ся, сумьнети и служити Ему.

Страхъмь и трепетъмь спасение себе съдевати, духъмь горети и тешти не леняшти ся, обълъчену быти въ оружие Святааго Духа.

И бороти ся съ врагъмь въ изнеможени плъти и въ ништете душя, и вьсе повеление творити, и непотребьна себе глаголати, и благодарити Бога.

И ничьсоже съ завистью творити, и чловекоугождения бегай, зане Богъ расыпа кости чловекоугодьникъ, и не хвалити ся отинудь.

Ни похвалы себе глаголати, ни иному хваляшту послушяти, вътайне вьсе творити, и не на видение чловекомъ творити, нъ тъкмо отъ Бога хвалы и милости просити.

Помышляти прешьствие отъсуду, приготованая благая правьдьныимъ, такоже уготованый огнь дияволу и ангеломъ его.

По вьсему и апостольское слово помьнети, яко не достоины страсти сего времене противу будущимъ глаголати ся въ насъ, и съ Давыдъмь глаголати: «Храняштиимъ заповеди Его — въздание много», и веньци мнози — правьдьныимъ, вечьнии крови, жизнь бес коньця, радость неизглаголанная отъ Отьця и Сына и Святого Духа.

Съ цьсари и патриархы, съ пророкы и апостолы и мученикы, и съ вьсеми угождьшиими съ нимиже обрести потъштим ся о Христе Исусе, Господи нашемь, Емуже славы ныня и присно и въ векы векомъ.

Азъ, чяде, реку вама, чловечя жития отити хоштю. Веста бо, како въ житии семь жихъ без лукы, како отъ вьсехъ чьстьнъ бехъ и лубимъ не сана ради велика, нъ норовъмь великъмь.

Не укорихъ никогоже, ни вередихъ и никогоже не оклеветахъ, ни завидехъ никомуже.

Ни разгневахъ ся ни на когоже, ни на мала, ни на велика.

Не оставихъ цьркъве Божия вечеръ, ни заутра, ни до полудьне.

Не презьрехъ ништиихъ, ни оставихъ страньна, и печальна не презьрехъ никъгъда же, и иже въ тьмьницахъ заклучении, потребьная имъ даяхъ, и иже въ пленьницехъ — избавихъ.

Не помыслихъ на доброту чужю, не познахъ жены другыя, разве матере ваю, и та дондеже ва роди, и потомь еште не познахъ ея, нъ съвештяхове ся чистою съвестью телесьною, и о Господе мудре съхранихове ся по православьней всякои вере; тако сътворихъ до съмрьтьнааго дьне.

Тако и вы живета, чяде мои, да и ваю Богъ ублажить и длъголетьна явить и сътворить.

Убогыихъ посештяйта, въдовице заштиштайта, немоштьныя милуйта и осужяемыя бес правьды изьмета, миръ имеита съ всеми.

Паче же вьсехъ, иже въ пустыни и въ печерахъ, и въ пропастьхъ земльныихъ добро творита.

Поминайта манастыря, чьрноризьць стыдитася и чьтета и милосрьдуйта.

Матери же ваю чьсть отъдайта, и вьсе добро сътворита ей, да Господа узьрита радуюштя ся, и о томь веселита ся въ векы.

Вьсе, елико имата златъмь и сребръмь и ризами, неимуштиимъ подайта, и въ работе суштяя, акы своя чяда лубита, и уныя милуйта, и старыя свободы съподобита, пищу имъ до съмртьти дающя, и съпроста реку: еже мя видеста творяштя — и вы творита, да спасета ся и съподобита ся святыихъ.

Матере не забывайта, волу ея творита и послушяйта съ страхъмь Господьньмь.

Веде бо, яко дело Господьне делаета, заповеди Господьня хранита, и Богъ мира сего буди съ вама. Аминь.

<…>

Бе некыи чловекъ, живыи въ Иерусалиме, Созоменъ именьмь. Тъ идый единою сквозе градъ, узьре нища, нага и печяльна; и съвлъкъ ся, дасть ему одеждю свою и иде въ домъ свой. И дьнь преклонилъ ся бе на отъвечерие.

И легъ; мало усънувъ, виде въ съне, яко обрете ся въ дворьци пречюдьне, и въ немь бяше светъ безмерьный чисть и цветове мънози различьни, и садове вьсяции.

И видехъ же ины ограды, яже бяаху обрасли отъ горы до долу плоды, добровоньныими и красьныими, и ветвие преклонило ся бе до земля, другъ друга добрее.

Пътиця же многообразьны седяху вьрху ихъ, песнь поюштя сладъку, друга къ друзе прикланяюшти ся, млъчяния не имуште.

Яко же гласу слышяну быти отъ земля до небесе, садове же колебааху ся, стояште въ славе велице, источьници же течяаху, яко и дуга въ красу стояшти.

Си же ему видяшту: приде къ нему некый уношя, красьнъ зело, и глагола ему: «Поиде въследъ мене». Онъ же иде въследъ его, и придосте къ стоборию, золотъмь покръвену, и полаты зело славьны и красьны. И зьряштю Созомену тамо, и се изидошя ис полатъ техъ мужи крилати, свьтяште ся, яко и сълньце, носяште ларе 4-ри, о коемьжьдо лари служяште 4.

Егда же пречюдьныя ты двьри миновааху анъгели, разуме Созоменъ, яко къ нему бяху идуште, и егда приидоша къ стоборию оному и противу Созомену сташя.

Съньмъше же ларе съ шии своихъ и поставльше е, жьдааху некоего вельможе прити къ нимъ. И виде Созоменъ: и се мужь, красьнъ зело и доброобразьнъ вельми, излезъ ис полатехъ, прииде къ ангеломъ, носяштиимъ ларе, и глагола имъ:

«Отъкрыите ларе и покажете я чловеку оному, чьто ему хранять свитъ за едину свиту, зане помилова нагааго оньсицю».

И ту абие отъкрышя единъ отъ златыхъ онехъ ларевъ, и начашя искладати — срачице и свиты цьсарьскыя; и оскрилы красьны и различьны видениемь, и простираху предъ нимь, глаголуште: «Воле, господи Созомени, угодьна ли ти суть предъ очима?»

Онъ же глаголааше: «Несмь достоинъ на стень свитъ сихъ зьрети!» Кажюштемъ же имъ светьлыя и пьстрыя и златыя ризы, и възиде число ихъ до тысяштя.

Егдаже показашя ему, еже глаголеть, «100-рицею прииметь и животъ вечьный наследуеть — за едину свиту», глагола ему ангелъ: «Тебе глаголю, Созомене, се колико ти уготовахъ благыихъ за едину свиту, еже виде мя нага и умилосрьди ся и облече мя — иди убо и твори такожде, и въздасть ти ся 100-рицею!»

Се слышавъ, Созоменъ глагола ему, страхъмь одьрьжимь и радостью, глагола ему: «Да тако ли есть, иже милостыню творять убогыим?» — И глагола ему: «Ей! всякъ бо, облачяяй убогааго, Христа облачить, и всякъ съвлачяя, Христа съвлачить. Или: накърьмляя, Христа накръмить и прииметь.

Се же ти заповедаю: не раскай ся николиже о милостыни, ни поноси ништю, яко далъ ему еси чьто, еда въ мьзды место сугубу тъштету въсприимеши, вьсякъ бо даяй милостыню и раскаявъ ся и поносивъ, мьзду си погубить».

И се слышявъ, Созоменъ въспрянувъ и дивляаше ся, чюдя ся видению и помышляаше, глаголя: «Аште си тако, то и другую дамь свиту нищиимъ». И въ другую ночь виде тъ же сънъ.

И бысть милостивъ зело на убогыя, яко слышяти вьсемъ коньцемъ земля милостивое его житие и штедроты, яже на всякомъ чловеце, и бысть угодьнъ Богу и чловекомъ.

Иже всхочеть самовольствъмь и льготою бес труда спасти душу свою — милостынею можеть спасти ю, милуяй бо ништя, Богу въ заимъ даеть, и сеяй съ благословлениемь и съ благословлениемъ и пожьнеть жизнь вечьную.

Якоже самъ Господъ въ Еуангелии глаголеть: «Блаженни милостивии, яко ти помиловани будуть». Богу же нашему слава и ныня.

Коньчяшя ся книгы сия рукою грешьнааго Иоана; избьрано из мъногъ книгъ княжихъ. Идеже криво, братие, исправивъше чьтете: благословите, а не клънете. Аминь.

Кончяхъ книжькы сия въ лет 6584 лето при Святославе князи Руськой земля. Аминъ.

ПЕРЕВОД

КОММЕНТАРИЙ

Переписывая для великого князя Святослава Киевского из болгарского оригинала торжественно исполненный Изборник 1076 года, дьякон Иоанн собрал для себя самого (или для сына) выписки из различных нравоучительных текстов. Композиционная последовательность без особого выделения источников, которыми пользовались составители Изборника, в целом напоминает обычную для средневековой традиции компилятивно составленную беседу умудренного житейским опытом человека с «сыном» — быть может, сыном духовным, поскольку моральные требования первоисточников, несомненно, переработаны тут применительно к мирской жизни; «обмирщение» прослеживается отчетливо и проявляется даже в оформлении книги — карманной «осьмушки», писаной мелким почерком для себя, скромно украшенной.

Не очень еще развившиеся в пословичные формы, какими они стали позднее в связи с распространением их в устном обиходе, собранные здесь изречения воспринимаются как «заповеди для ненаказанных», т. е. людей неученых и вместе с тем — еще не постигших сложные ритуалы и нормы поведения христианской культуры. Эти изречения последовательно и упорно внедряют в сознание «новых людей» — новых христиан — моральные установки христианской этики. Все актуальные для середины XI в. нравственные проблемы нашли отражение в этом сборнике, который, по оценке современных ученых, и преследовал цели практической морали.

Многие статьи при переводе с греческого или в результате их обработки в Киеве претерпели идейное или художественное переосмысление; так, вполне сознательно при передаче греческой философской терминологии, особенно лексики стоицизма или неоплатонизма, приведены соответствующие славянские слова и понятия; встречаются перестановки или сокращения изречений; много отклонений и от первоначального южнославянского перевода. Текст, переработанный для нужд восточного славянина, широко использует русские формы произношения и грамматики, а также и слова: ларь вместо ковчежьць, медъ вместо вино, ветвие вместо веие, поноси вместо укоряй и т. п. Большинство текстов — переводы византийских стихотворных или, во всяком случае, ритмически организованных произведений. Славянские переводчики старались передать эту особенность оригиналов, повышающую художественно-изобразительную их ценность.

К некоторым отрывкам найдены и греческие параллели, однако возможные несоответствия этим текстам славянской версии не учитывались при переводе на современный русский язык.

Отдельные части Изборника получили на Руси особенную известность и неоднократно использовались в поучениях, посланиях и «словах», откуда и поступили в устную речь. Впоследствии сам принцип построения сборника стал образцом для составления других средневековых сборников нравственного содержания, стал прототипом Златой Чепи, Измарагда — с XIV в., а в конце XV в. — Домостроя.

Восемь текстов Изборника 1076 года (82 % всего состава его) публикуются по рукописи: РНБ, Эрмитажное собр., 20. Полностью сборник опубликован в прекрасно подготовленном издании: Изборник 1076 года. М., 1965 / Издание подгот. В. С. Голышенко, В. Ф. Дубровина, В. Г. Демьянов, Г. Ф. Нефедов. В настоящем издании публикуется текст л. 1—80 об., 84—85, 101 об.—112, 134—187 об., 269—276 (по изданию соответственно с. 151—418, 425—426, 460—481, 687—701).