СПРЭЧКА 3 ЛЕКТАРАМ
Чытаў у клубе добра лекар
Пра неба, пра зямную шыр,
Даводзіў нам і так, і гэтак;
Няма і бога, і душы.
І тут падняўся дзед харобра
І гэтак гутарку пачаў:
— Пра бога гаварылі добра,
Я на яго даўно начхаў.
Пацвердзіць кожны можа гэта:
Яго я выгнаў за парог.
А вось наконт таго прадмета!
Ты тут перахапіў, дальбог.
Хоць і не дужы я ў асвеце,
А ўсё ж, браток, як ні кажы,
А быць, а жыць на белым свеце
Як чалавеку без душы?
3 агульных правілаў бывае
І выключэнне іншы раз.
Ды толькі век не выстаўляе
Ніхто бяздушнасць, напаказ.
Сядзіць, напрыклад, ва ўстанове
Чыноўнік, а не чалавек.
На словах — ён на ўсё гатовы,
На справе — не скранецца век
І з месца, каб дапамагчы дзе,
Каб нешта нейкае рашыць...
Да вас з душой такі не прыйдзе,
Бо сам не мае той душы.
Альбо яшчэ. Набыў абутак,
Напрыклад, я ці хто другі.
Не пранасіў і двое сутак,
А ўжо скідай яго з нагі.
І зноўку паўстае пытанне:
Мо скажаце, што працаваў
3 душой, як кажуць, і стараннем
Той майстар абутковых спраў?
Ды не! Ва ўсім — малым, вялікім
Гарыць і свеціцца спярша,
Як сонца ў кропельках шматліках,
І чалавечая душа.
Чужою хто бядою ўзрушан,
На дапамогу хто прыйшоў,
Не кажам пра такіх: бяздушных,
Гаворым: чалавек з душой.
Не ведаў хто заўжды спакою,
Гарэў, нідзе не адставаў,—
Ён жыў і працаваў з душою,
Душу ён справе аддаваў.
Дык як жа зразумець вас, лектар?
У нас гавораць з веку ў век:
Калі хто без душы, дык гэта,
Прабачце, ўжо не чалавек.