КЛЮНІ. МУЗЭЙ СЯРЭДНЯВЕЧЧА
1. Вітраж XIII ст.
Салямэя
ўстае на задні мосьцік.
Ёсьць ад чаго страціць галаву.
2. Пакуты Гасподнія (XIV ст.)
Вартаўнікі сьпяць.
Хрыстос вылазіць з труны.
Асьцярожна, каб не абудзіць.
3. Вітраж XV ст.
Першая думка:
каго і навошта Хрыстос
цягае за вуха?
Толькі па мячы Пётры
разумееш, што вуха насамрэч
прыстаўляюць на месца.
4. Сярэднявечны алегарызм
Пяць выяваў Дамы з аднарогам
адпавядаюць пяці пачуцьцям.
На той, што сымбалізуе зрок,
аднарог глядзіцца ў люстэрка Дамы.
Люстэрка маленькае —
і аднарог бачыць сябе
бязрогім.
5. Сярэднявечны рэалізм
Сьвінка грае на аргане,
прычым і арган, і сьвінка
выглядаюць максымальна
праўдападобна.
6.
На выйсьці
машынальна падаў міласьціну
музэйнаму супрацоўніку.