ШЧЫГРЫНАВАЯ ТРАЎКА
Ехаў казачнік-бай
па бульвары Распай,
да бамонду ў кавярню «Ратонда»:
там зь відэльца й нажа
усьміхаецца джа —
скарачэньне ад слова «Джаконда».
Круціць з бронзы касяк
Анарэ дэ Бальзак
у плашчы ад Агюста Радэна.
Ёсьць на цэлы бульвар
эксклюзыўны тавар,
а тапельцам — бясплатная Сена.
Дастаўляе трава
з Монпарнасу ў Менск-2,
зь перасадкай у Шарля дэ Голя.
І ні да, ні пасьля:
прэзыдэнт Нікаля —
проста хлопчык па імені Коля.
І ніхто не памрэ,
бо з травой Анарэ
ўсе памерлі яшчэ да народзін…
Па бульвары Распай
едзе казачнік-бай:
«Баяць казку?» Ня хоча ніводзін.