Библиотека литературы Древней Руси. Том 17 (XVII век)

Месяца октомврия во 2 день[3482]. Житие и подвиги преподобныя благоверныя великия княгини-инокини Анны Кашинския чюдотворицы. Благослови, отче, прочести

Господу Богу и Спасу нашему Иисусу Христу преже волныя страсти и воскресения сеющу слово спасенное живущим, но и часто не токмо божественным своим учеником единым и апостолом беседоваше, но и ко всем народом учение свое простирая и подвизая ученики своя на проповедь, и сице глаголаше: «Се аз посылаю вы, яко овцы посреде волков[3483]. Предадят бо вы на сонмы и на соборища, пред цари и владыки ведени будете имени моего ради. И не убойтеся от убивающих тело, души же не могущих убити»[3484]. И последователи таковаго и пресладкаго, и небеснаго учения мнози явишася, яко звезды небесныя множеством, мученицы и исповедницы и подобницы его страстем показашася. Всяких вид мучения доблественно претерпеша и победители врагу явишася. Иногда же народом беседоваше, глаголя: «Возмите иго мое на себе и научитеся от мене, яко кроток есмь и смирен сердцем, и обрящете покой душам вашим, иго бо мое благо и бремя мое легко есть»[3485]. И паки: «Аще ли кто оставит отца или матерь, или жену, или чада, и села, и имения имене моего ради, сторицею приимет и живот вечный наследит. И аще кто не возмет креста своего и вслед мене грядет, сей несть мой ученик»[3486]. И не просто учаше, но Бог и Владыка всех, ведый помышления человеческая и испытаяй сердца и утробы, яко не от слышания точию спасение бывает, но аще кто сотворит пресвятую волю его, сей спасен будет, сице глаголаше: «Аще кто слово мое соблюдет, жив будет вовеки».[3487] Таковаго небеснаго проповедания приемше слово спасенное и развергше бразды сердец своих, вземше крест, последоваша Христу, в пустынях скитающеся, и в гора, и в вертепах[3488], и в пропастех земных живуще[3489], отбегающе от прелести мира сего, и яко на небо парили орли, приемше крила легкостию смысла своего, возлетеша на небо. Понеже все сердцем возлюбиша Господа Бога и тому невозвратным путем шествоваша, якоже напреди слово яви о сем.

Сея убо преподобная отечество имеяше град Кашин. Дщи бяше благородных и благочестивых родителей от славных боляр[3490]. И добре има воспитана бывши во страсе Господни и наказании того пресвятыя заповеди творити; и научена же бывши Божественному Писанию. И добре поучашеся страху Господню и не возгарашеся бо на красоту века сего, яко прелесть бе; ниже уклоняшеся к сладости пищи и покоя, но пища бе ей молитва непрестанная и желание ненасытное к Богу; ниже честь и слава ей когда от любве Божия отвождаше; но присно прилежаше благим делом, како бы угодити Богу, и на того пресвятую волю полагаше упование свое. И всема поучашеся в законе Господни. И яко древо при исходищих вод[3491] напояема бяше Божественных словес поучением и от того навыче духовнаго веселия. Моляшеся часто Господеви, яко да не лишит ю[3492] небеснаго чертога своего, но да сотворит о ней, якоже волит пресвятая воля его. Нищим же и убогим довольную милостыню воздаваше.

И присно цветущи ей благими детельми, приспе в совершенный возраст, подобна на сочетание браку. Обручиша бо ея родители великому князю Михаилу Ярославину, господьствующу тогда во граде Твери[3493]. Такожде и той благоверный князь Михаил велми благочестив и боголюбив, смирением кротостию и благочестием сияя, к нищим и странным[3494] попремногу пребывая милостив, иже последи скончася мученическим подвигом и венцем увязеся мучения от вседержителныя руки, якоже напреди о сем явит слово.

Живущема же има во благочестии, и в законе Господни поучашеся день и нощ, преспевающе красотою делания своего, еже к нищим и убогим нищеподателством, и к странным и болным призрением, якоже древле Авраам праведный[3495], и, по Иову терпеливому, всем всяка быста: «нога хромым и око слепым»[3496]. Велми же любяста священнический чин, якоже Божии слуги, и яко слово хотяще воздати о данней им благодати. И попремногу почитаста иноков, яко присных[3497] Божиих делателей заповедей. Не зряше бо на красоту века сего суетнаго, яко прелесть бо и скоро преходит, и яко сень[3498] мимо течет, ниже возвеличастася благородием и величеством господьства своего, или гордостию превзымастася[3499], якоже нецыи творят, вздымаются бо величеством благородства своего и яко беземертнии творят ся, надмением и кичением, тщеславием же и высокоумием и гордостию превзымающеся еже друг на друга, не ведуще, яко гордости ради, иже иногда бывши Денница отпаде славы Божия и вместо света тьма бысть и Диавол преименовася[3500]. И хотящим во смирении быти вельми супостат душ наших запинает[3501] и в преисподняя с собою сводит, иже и Адама праотца высокоумия ради из породы[3502] изгна[3503]. И сице вспоминаста в себе благоверный и благочестивый великий князь Михаил со благоверною великою княгинею своею Анною, велми смирение любяста и любовь равну между собою держаста. Ведуще от Божественна Писания, яко любви ради Сын Божий, преклонив небеса, и сниде на землю, и воплотися нашего ради спасения от преблагословенныя Владычицы нашея Богородицы и Приснодевы Марии, и бысть совершен Бог и совершен человек, и толико смирив себе, Творец и Зиждитель всея твари, и быв послушлив даже до креста и смерти, якоже апостол глаголет[3504], да нас примирит Бог Отцу своему, и вся сия пострадав безгрешный, да нас свободит от клятвы законный и наследники сотворит Царства своего Небеснаго. Сия помышляста в себе блаженная, како от толикия высоты сведе себе и премногия ради благости быв подобен нам, кроме греха, и яко не имеяше, где главы подклонити. Так и нам по примеру сему его ради смирятися и любити всех, не токмо своих единоплеменных, но и врагов наших, по еваггелскому гласу[3505]. И сице Бог смирение наше видев, отпустит нам согрешения и наследники сотворит Небеснаго своего Царствия. И сице разсуждая в себе, блаженный и благочестивый князь Михаил с супружницею своею великою княгинею Анною присно[3506] поучающеся во псалмех, и пениих, и песнех духовных, и Богови молястася, о еже сохранитися отечеству и всей державе их от нашествия иноверных язык. И сице блаженныма цветущема благими детелми, беззлобием, и красотою, и кротостию, и смирением, и благотворением во всей велицей России, яко некая два светила великая, озаряющу своим житием, ничимъже лишена быста Авраама, Иова и Давида[3507], но и во всем последоваста сродником своим и в России бывшим светилником: великому князю Михаилу Черниговскому и деду своему великому князю Александру Невскому[3508]. По сем же родистася има четыре сына: первый князь Дмитрий, вторый князь Александр, третий князь Василий, четвертый князь Констянтин[3509]. И добре их воспита в страсе Господни, и боятися Бога, и того пресвятую волю творити.

Что же по сих? Видев враг и супостат душ наших диавол блаженнаго и великаго князя Михаила в таковей славе и чести и яко царя почитаема, и ничимъже от него побежден бывает, но присно победися и в конец разрушися неприязненная его сила, и весма попираем, яко худая птица, испрошает на него от Бога, якоже древле и на праведнаго Иова[3510], злыми своими ухищрении напасти чрез своих има единоплеменных во плоти сродников. И коварствует лстивый диавол на великаго и блаженнаго князя Михайла, хотя его доброму течению спону[3511] сотворити и великой княгине Анне. Но оне пояху: «Господь нам помощник и не убоимся; что сотворит нам человек, аще бо и возвизает диавол на святых брань, но помале на его главу болезнь возратится»[3512]. Тогда многа зависть и крамола на блаженных воста, и многа брань от своих ему приидоша. Но Господь, видя своего угодника непорочное житие, дарова ему победу великую на супостаты его и на совостающия на него единородных братий.

Таже[3513] видев враг, яко ничтоже успе сотворити великому князю, и яко попрана бысть неприязненная его сила, паки воздвизает брань лютейшую первой: вооружает на него ордынскаго царя Озбяка[3514] с великим воинством, грозя ему его державу пленити и пролить кровь христианскую неповинных сущих. Тогда великий князь велми скорбя душею и плакася горко, глаголаше к супружнице своей великой княгине Анне: «О, госпоже моя, яко слышу повеление злочестиваго царя и восточнаго на нас по зависти, и хощет многу брань сотворити и пролити кровь стада Христова. Но аз хощу, аще Богу изволившу, итти сам во Орду к беззаконному царю и собою ответ сотворити и душу мою положити за овцы стада Христова, по Христову словеси»[3515]. Сие слыша, блаженная и великая княгиня Анна оскорбися[3516] душею и в себе глаголаше: «Что ми рече благоверный мой князь, яко „хощу итти в Орду к нечестивому царю и душу свою положити за овцы стада Христова”? И будет ли истинна, яко хощет за имя Христово пострадати?» Сице ей размышляющей, рече ко князю: «О, драгий мой, любимый и великий княже Михаиле! Почто боишися злочестиваго царя и его беззаконнаго повеления, аки немощен трепещеши? Еда[3517] не имаши бранных и силных оружников у себе, или тьмы тем окружающих тя храбрых воинов? Еда не можеши с толикою силою ратных людей, паче же за Божиею помощию, сопротив стати безбожнаго царя? Не ты ли приял еси искус Божия помощи пред малыми сими днями, егда прииде на тя с ратию брат твой великий князь Георгий[3518] со окаянным варваром[3519]? И колико тогда побил еси пришедших на тя от их воиньства, что и самаго варвара в руки твоя предал тебе Бог! И ныне ли, благочестивый мой княже, боишися злочестиваго царя и хощеши предатися самоволно, яко агнец злохищному волку!» Он же глагола к ней: «Аз, госпоже, от многа времени желаю пострадати за имя Христово и душу мою положити за порученное мне стадо, но не сущу удобну времени. Ныне же, аще Бог восхощет, готов есмь пострадати за иже[3520] мене ради пострадавшаго. И мню, яко лучше есть мне единому умрети за стадо Христово, нежели мене ради мнозей крови христианстей от мучителя пролитися». Сия слышавше блаженная, яко истинно хощет пострадати за имя Господа Иисуса, и рече к нему тихостию: «О, господине мой, благочестивый княже? Весть убо Господь наш Иисус Христос, яко несть нашея обиды пред беззаконным царем. Но понеже велегласный учитель вселенныя, божественный апостол Павел пишет к Тимофею, глаголя, яко „вси, хотящия благочестно жити о Христе, гоними будут, лукавии же человецы предуспеют на горшее”[3521]. И сам, беседуя, Сын Божий ко учеником своим глаголаше: „Аще бысть от мира были, мир убо своя любил бы. Но аз избрах вы от мира, сего ради ненавидит вас мир”[3522]. И паки ко иудеом глаголаше: „Сего ли ради ищете мя убити, яко слово мое не вмещается в вас”[3523]. И по сему Христову словеси, господине мой, аще быхом были мы подобии их житию и ласкание бы к ним творили, не бы убо такова на нас зависть когда востала, или на нашу державу от братий твоих кто позавиде, но понеже Спас ко учеником своим глаголаше, яко „хощете, — рече, — скорбь имети, но дерзайте, яко аз победих мира и прелесть его. И не убойтеся от убивающих тело, души же не могущих убити. Но паче боятися могущаго по убиении тело и душу воврещи в дебрь огненную”[3524]. И смотри, благочестивый, великий, драгий княже, яко сродницы твои благовернии князи Борис и Глеб от брата своего Святополка зависти ради убиени быста[3525]. Такожде благоверный и великий князь Михаил Черниговский с болярином своим Феодором, колико пострадаста за веру Христову от злочестиваго Батыя и никакоже покористася беззаконному велению, но и кровь свою излияша за Христа, сего ради и венцем мучения от вседержителныя руки венчастася и мученицы Христовы нарекошася. И аще, господине мой, благоверный княже, пойдеши в Орду к беззаконному царю и самоволно хощеши страдати за имя Господа Иисуса, никомуже тя понуждающу, то поистинне блажен будеши во вся роды, и память твоя вовеки будет, толко подщися усердно во звании[3526] своем стояти, и Господь тебе помощник будет». Блаженный же и великий князь Михаил рече к ней: «Что бо ми сладчайши сего, еже за имя Господа моего Иисуса Христа страдати и уповати на щедроты его, яко исполнит желание сердца моего». Тогда блаженная глагола к нему: «Молю тя, господине мой, благоверный княже! Егда предстанеши нечестивому царю, яко добр воин Христов, и егда нанесут тебе злоковарныя муки, хотяще покорити тя своему умышлению, тогда, господи мой, никако да не убоишися от грядущих на тя зол, ниже огнь или колеса, или мечь, или сечива устрашать тя. Но буди терпелив по изволении своем, в немъже еси хощеши самоволно итти. Ниже доброму твоему течению и помышлению возбранит ти величество державы твоея; ниже ино что от земных и тленных да препнет самоволному твоему званию, вся бо она мимо ходит. Ниже терпения твоего ослабят друг твоих ласкания, ниже да украдут твоея яже во Христа веры некоторыми лестными словесы, но токмо возлюби, господине мой, единаго Господа Иисуса Христа, возлюбившаго от младых ногот и предавшагося себе. Тогда аз буду блаженна тебе ради во всех российских женах». Сия глаголаше блаженная и великая княгиня Анна супругу своему, благочестивому великому князю Михаилу, бояшеся, да некако отбегнет добраго подвига, еже о Христове имени пострадати.

Он же, яко слышавши таковыя глаголы, вельми удивляшеся премудрости глагол ея и премудрому ея совету и Бога похваляя, яко извещение приим Божия помощи, еже к подвигу желаемаго ему пути, яко женою ему подаде таковый совет. Видите, братие, и почюдитеся блаженныя и великия княгини Анны премудрому совету! Не восхоте бо супруга своего в мале времени славима быти, но вовеки блаженна и похваляема от Бога ради добраго его исповедания. И не яко Ева советова Адаму древа вкушением в раи[3527], но яко Ревекка совещаше о благословении сыну своему Иакову[3528]. Таже рече к ней обрадованным лицем: «О, госпоже моя супружнице Анно! Мне бо еже жити — Христос, а еже умрети — приобретение жизни его. И что сладчайши сего и возлюбленнейши, яко умрети за имя Господа Иисуса Христа». И сия рек, умолче. Таже призвав дети своя и поучив их страху Господню, и по всему наказоваше подобитися своему благому житию: «Матери же своей покаряйтеся, и на ню[3529] взирайте, и непорочному деланию и многим добродетелям ея последуйте». Конечное же рече: «Якоже видите нас творяща, сице и вы такожде творите, и Бог мира да будет с вами». И разделив им наследие достояния своего, подав им благословение, комуждо своя грады, таже прием благословение у епископа своего блаженнаго Варсонофия[3530], и отъиде во Орду, точию поим единаго сына своего, князя Димитрия[3531], да видит страдание его. Хотяй же уведети о сем, да прочтет Житие и страдание блаженнаго и великаго князя Михаила[3532], како подвизався добрым своим самоволнозванием, еже о имени Господа нашего Иисуса Христа, и колико от беззаконнаго и нечестиваго царя и его боляр, паче же от треклятаго и зверообразнаго варвара Кавгадыя[3533], прият поношения и уничижения, биение, и досады, и различных томлений, и озлоблений, последи же блаженную кончину прият — мечем усекновен бысть[3534], и тако мучения венцем увязен[3535], добрым подвигом подвизався, течение скончав и веру соблюде[3536] в лето 6827, месяца ноемврия 22 день[3537]. Тело же его пресвятое принесено бысть из Орды в славный град Тверь и положено бысть со псалмы и пении, и песни духовными, и со многими слезами от всего града в соборней и апостолской церкви[3538], и даже и доныне безчисленная чудеса источает с верою притекающим к пресвятому гробу его и прикасающимся многоцелебным мощем его.

Благоверная же и благочестивая и великая княгиня Анна радовашеся душею и велми Бога благодарствовавши, яко сподобил супружника ея великаго князя Михаила пострадати за имя его пресвятое и страшное и в добром исповедании блаженную кончину прияти. И нападши на перси его духовными слезами, яко к живому, глаголаше: «Блажен еси ныне, господине мой, великий княже, и поистинне во вся роды блажен будеши, яко пострадал еси пострадавшему по нас, и се ныне отшел еси к возлюбленному ти Христу. И тамо Божественную и неизреченную славу его зриши, и вкупе со аггелы воспеваеши Пресвятую и Живоначалную Троицу. И ныне молю тя, о, страдалче Христов, да не оставиши мя погруженну прелестьми жития сего, но помяни мя у престола Вседержителя Христа Бога нашего, яко да достойна и аз буду небеснаго чертога с мудрыми девами, и яко да не угаснет светилник души моея от добраго подвига. Тебе бо ныне стяжахом о мне ходатая к Богу и молитвенника крепка». И сице доволно помолившеся и целовавши любезно пресвятое тело его и вместо многоразличных аромат многими слезами облиявши тело его, и отъиде в дом свой, славяще и благодаряще Христа Бога нашего и его рождшую Матерь Владычицу нашу Богородицу и Приснодеву Марию.

Что же по сем? Благоверная княгиня Анна пребываше в дому своем с сыном своим благоверным князем Констянтином Михайловичем, — тому бо юнейшему сыну его той славный град Тверь отча достояния в наследие достася[3539], — яко горлица чадолюбивая, вдовствующи, молитвами частыми и многим молением выну[3540] Бога молящи, яко да и ту не лишит достояния святых лику и наследия Небеснаго Царствия. И многому посту и воздержанию себе вдавши, кротостию же и смирением украшашеся, такожде и нищих, и странных и убогих повелеваше в дом свой вводити, и пищу им и одежду доволну подаваше, и сирот и вдовиц заступая, и насилующим возбраняя, наказуя и уча их не обидети нищих и сирот, и сице, яко сиротам есть и вдовцам и убогим Отец Небесный помощник и заступник, якоже и пророк глаголе: «Терпение убогих не погибнет до конца»[3541]. И паки: «Сиру и убогу ты буди помощник»[3542]. И всяку неправду ненавидя и всяко нечестие потребляя, учаше же и сына своего возлюбленнаго, благовернаго князя Констянтина, любити Господа всем сердцем и всею душею, и того выну пред собою имети, и святыя заповеди его хранити, и суд праведен творити, и ласкания и лукавых словес от велмож ненавидети, и любов ко всем равну имети, и от насилующих сирот и убогих изымати[3543]. И таковыми благочестивая и великая княгиня Анна тогда плоды добродетелей цветяше и Богу угождающи, якоже и древнии святии. Помышляше же, како бы отврещися мира и единому Богу в молчании работати и того доброты выну насыщатися, понеже рече: «Уязвленна есмь того любовию; и въслед твоего человеколюбия потеку». Глаголаше к Богу: «Приими мя, женише небесный, Иисусе Христе, твоею любовию мя мудрым девам». И сице моляшеся Богу и исповедовашеся. Таже по сем блаженная, разсуждая в себе, глаголаше: «Аще пребуду в дому моем в таковей чести, и славе, и покои, паче же в молве и суете, яве отлучит мя от Божия любве и никогда же попустит мя в безмолвии единому Богу молитвою беседовати. И „кая полза будет, аще человек и весь мир приобрящет, душу же свою отщетит”[3544]. Ибо и Моисей, он Боговидец, никогда же бы сподобился славы Божия и в купине на горе Синайстей закон прияти, аще бы токмо не отлучился чести и покоя и нарицатися сыном дщере фараоновы[3545]. Сего ради подобает работающему Богу от всего усердия и на высоту добродетелей взыти, всякаго покоя и славы мира сего бегати, и в дому Божии приметатися, и без молвы Богу работати, се бо и Господь Иисус Христос учит нас глаголя: „Аще кто не отвержется себе, си есть пристрастия земнаго, и возмет крест свой и вслед мене грядет, не может быти мой ученик”[3546]. Сему гласу святии отцы последоваша и святыя жены поревноваша, в пустынях вселишася, и в горах, и в вертепах, и в пропастех земных, иже чудо, яко и дневныя пиши лишаеми бяху, и озлобляеми от бесов; якоже и божественный Павел глаголет: „Ихьже недостоин весь мир”[3547]. Сего ради и Бог их воспрослави, понеже возлюбили Господа Бога всеми сердцем. Что же успеет[3548] и мне мир сей и слава, богатство же и красота века, и многая молва и мятежи бывающи! Невозможно бо единым оком зрети на небо, а другим на землю; невозможнейши же и весма неудобно во многих молвах от всего сердца Богу единому работати, понеже прелесть века сего помрачает очи душевныя, и ослепляет мысли умныя, и работающему Богу запинает во всякой добродетели. Что же ползова и рай праотца нашего Адама и праматерь Еву, егда бо видеста красоту древа, от негоже заповедь прияста не вкусити. Что же сотвориста? Еда ли не прелстистася Ева очима ко древу? Еда ли не поползеся[3549]? А Адам вкушением? И не токмо испадение из рая пострадаста, но и от Бога отлучистася и смертию осудистася. Еда ли аз крепчайши онех буду, в таковей чести сый? И пред очима моима всяка честь и слава господства сего, и яко царица почитаема от боляр и от всех людей. И како могу аз избыти ловления и сети диаволи? Понеже мнози от многих начаша в мире добродетели проходити, и мали обретошася. Сего ради девственный сосуд, возлюбленный ученик Христов Иоанн Богослов глаголет: „Не любите мира и яже в нем. Вся бо сущая видимаго сего мира похоть плотская, и похоть очес, и гордость житейская”»[3550]. И сице разсуждая себе, блаженная и поистинне благочестивая великая княгиня Анна вскоре и делу касается, весть бо, яко медление раскаяние обыче творити. Тогда блаженная оставляет мир и распинается Христу, оставляет дом и господство века сего, изволи приметатися в дому Божии, паче и понесше тяготу и вар дневный, «нежели жити ми в царских палатах и имети славу и господство мимотекущаго и яко сень преходящаго века сего». Се бо и Моисей Боговидец изволил страдати с людьми Божиими и имети поношение Христово, нежели имети временнаго греха сладость и жити в дому фараонове[3551].

Приходит убо благоверная княгиня Анна в монастырь девичь, нарицаемый Софеинской, в немъже храм Премудрости Слова Божия[3552], и тамо покланяется Богови, радостными слезами обливаяся, и на мног час Богу исповедовашеся, пометает же себе с великим смирением на нозе сущим тамо постницам и молит с кротостию, яко да и она от них тамо причтена будет в лик. Они же дивляхуся необычному пременению и великому смирению блаженныя, и яко раба моляше их, а госпожа всем сый. Сего ради бояхуся и ужасахуся и в трепете велице послушаху словес великия княгини Анны. Видяще же и сына ея, благовернаго князя Констянтина, и всех боляр, и весь народ плачущися, и дивляхуся, како толик плачь не возможе блаженную отторгнути от любве Божия. Таже повелевает себе пострищи во святый ангельский образ. И сему бывшу, приведе себе жертву Богу непорочну, и яко юница нескверная принесеся на всеплодие[3553] вышнему архиерею Господу нашему Исусу Христу. И исторжеся мирския прелести, яко птица от пругла[3554] и яко серна от тенета. И весма радовашеся о Господе Бозе своем, яко получи желание сердца своего. От юности бо своея непрестанною молитвою Бога моляше, дабы сподобил благий свой ярем понести и того единаго доброты выну наслаждатися. И тако благодатию Христовою нача подвизатися: постом, и молитвами, и бдением всенощным, и слезы многия изливая, и непрестанно томяше себе алчбою и жаждою. Глаголаше бо, яко подобает плоть презирати, прележати же паче души, вещи беземертней, ведяше бо, яко мног труд иноческаго жития и многими труды подобает внити в Царство Небесное. «Нужно бо есть Царство Небесное, и нужницы восхищают е»[3555]. Смирение же и кротость вельми любяше, ведяше бо, яко смирения ради вся коварства вражия растлеваются. Послушание же ко всем равно имеяше и всем постницам равно покаряшеся о Господе. Кто бо тоя слезы исповесть или труд, смирение же и кротость, и послушание, и терпение, и бдение, всенощное стояние и любовь, яже к Богу? Како возможно словом постигнути или писанию предать? Выну бо пояше: «Прилпе душа моя по тебе[3556], Христе Боже, возжада душа к Богу крепкому и живому. Когда прииду и явлюся лицу Божию»[3557]. И тако помощию всесилнаго Бога, в мале времени превзыде добродетельми всех сущих тамо постниц. Егда же прихождаше ко преподобней сын ея благоверный князь Констянтин благословения ради и поучения с велможами своими, она же учаше и его, како Бога боятися, и тому угодная творити, и ничтоже от видимых, паче любве его, предпочитати, и на того уповати. «Той бо, рече, Царь царствующим и Господь господствующим[3558]; и тем бо цари царствуют и силнии держат землю, емуже хощет, подаст царство. Той бо есть мертвит и живит, и низводит во ад, и возводит, убожит и богатит, смиряет и высит, возставляет от земли нища и от гноища воздвизает, и посаждает с могущими людьми, и престол земнаго царства подает ему. И несть кому мощно противитися. Якоже и пророк Давыд глаголет: „Ты страшен еси, и кто противостанет тебе. Яко Бог велий Господь и Царь велий по всей земли, яко в руце его вси концы земли, и высоты гор того суть”»[3559]. Сего ради воспоминаше ему, да не величеством господьства своего возгордится когда, но быти смиренну и кротку и ненавидети неправду, поминати же смертный час и во всем последовати отцу своему великому князю Михаилу. И сице учаше его преподобная, отпущает в дом свой. Прочим никакоже беседоваше великая, но в молчании пребываше и единому Богу в молитве, упражняшеся, поя Господеви в сердцы своем: «Господь помощник мой, на того упова сердце мое, и поможе ми, и процвете плоть моя, и волею моею исповемся ему»[3560]. И день от дне возхождение полагая в сердцы своем, и душу свою просвещая божественным светопролитием[3561], и ума зрителное очищая, и яко безплотна во плоти подвизался, и безплотных ликостоянию тщащися усердно постигнути, и разума духовнаго непрестанно боговидения и разсуждения прияти. Имяше же во уме и память смертнаго часа поминаше, и плакаше велми, како по исхождении от тела испытание душам бывает на воздусе от лукавых бесов. И люто поистинне тогда бывает душам тем, иже не имевше плода благих дел и во время сей жизни не подвизавшимся, како бы угодити Богу и избыти вечнаго осуждения. Сего ради и божественый апостол Павел, уча нас, глаголет: «Облецытеся, — рече, — во вся оружия, яко возмощи вам стати противу кознем дияволским, яко несть наша брань к крови и плоти, но к началом, и ко властем, и к миродержителем тьмы века сего, к духовом злобы поднебесным. Сего ради возмите вся оружия Божия, да возможете противитися в день лют и вся содеявши стати»[3562]. И якоже алчущим невозможно без хлеба быти, сице и хотящему спастися невозможно есть, аще не имать памяти смертныя.

Таже по неколицех летех сыну ея благоверному князю Констянтину отшедшу ко Господу, тогда приходит во Тверь вторый сын ея из града Кашина, благоверный князь Василий Михайловичь и молит матерь свою, преподобную и благочестивую и великую княгиню Анну, яко да приидет от Твери града в господствующий его град Кашин[3563] и яко да посети отечество свое, яко да он тамо выну зрит святое и аггелоподобное лице ея и сладкаго зрения присно наслаждатися. И сице моляше ея: «Елма убо, о, мати моя, преподобная и благоверная великая княгиня Анно! Сице Богу изволившу судбами своими, яко скончавшуся брату моему, твоим пресладким учением присно наставляем, аще бяше тогда скорбно и неутешно, яко лишен тогда сладкаго твоего учения, не восхотех оскорбити брата моего и тебе молити, дабы пришла жити во град мой Кашин. Ныне же не могу терпети, еже быти ми от тебе в далнем разстоянии и еже не насыщатися твоего божественнаго учения. И что живот мой и слава моя, и княжение мое, еже быти ми лишену твоего аггелоподобнаго зрения?» Преподобная же мати его отвеща к нему и рече: «Чадо мое возлюбленное, страшно наше иноческое житие и ложно, некако ко Христу обещание, еже до последняго моего издыхания на единем месте, на немъже обещахомся, терпети всяку скорбь Христа ради, аще не времени коему позываищу, или гонения ради, или частых наносимых ради скорбей бывающих, Христа ради понесшим тяготу и вар дневный, но и сие подобает преобидети любве ради Божия. Или паки смотрения ради некоего подобает бегати в другое место, по Христову словеси: „Аще гонят вы из града, бегайте в другий град”[3564]. Ныне же, помощию всесилнаго Бога, несть во граде сем ни гонения, ни иных скорбей находящих, якоже в прежнее время было при отце твоем великом князе Михаиле Ярославиче от поганых нашествия и своих сродников крамолы и зависти. И аще оставлю град сей и в тот град преселився, буду подобна ищущими славы мира сего. Рече бо Сын Божий: „Никтоже, возложь руку свою на рало[3565] и зря вспять, управлен будет в Царство Небесное”[3566]. Ибо и Авраам, праотец наш, повелен бы был от Бога оставити отечество свое и преселитися в чуждую землю, аще не бы возбранило ему отеческое идолобесие от Божия любве и познания[3567]. И аз како могу оставити град сей, в немъже дарова всещедрый Бог страстотерпца своего и моего князя Михаила, егоже в заступление и помощи имеет и к Богу ходатая весь град сей, и аз имею пред очима моима пресвятое и страстотерпческое тело его и, зря на нь, усердно теку в добром сем подвиге, егоже молитвами, аки некими крилы, вперився умом к Богу. Ни, чадо мое, престани понуждати мя преселитися во град свой Кашин, и прочее не стужай[3568] ми». Они же со слезами моляше блаженную и не хотяше восклонитися от святыя ноги ея. Паки рече к ней: «Веси, мати моя преподобная, яко от младых лет твоей любви привязан и тобою паче братий прочих моих любим бе, и никогдаже повелений твоих преслушахся, и никогдаже хотел отлучитися твоего сопребывания. Но Божиих судеб несть кому возможно постигнути. Зане[3569] по жребию и по благословению святаго отца моего и твоими достася мне в наследие град той, и есть ми любезен ради покорения и послушания боляр моих и велмож и всего народа. Аще бы хотели оставити град той и преселитися семо по смерти брата моего и твоего выну слышати медоточнаго языка и учения, и зрения ангеловиднаго насыщатися, но никакоже оставят мя велможи мои и весь град, ради любве моея еже к ним, оттоле к ним бе преселитися. Сего ради, по совету боляр моих и велможь и всего града, приидох молити тя. Весь бо град желает видети ангелоподобный твой зрак и в себе имети, и сице глаголет, яко „да посетит преподобная и благоверная княгиня Анна отечество свое и да в нем пребывает”. „Того бо града, — рекоша, — таковая благочестивая и святая отрасль израсте от благородну родителю, и есть нами печаль не мала належит, яко лишихомся пресладкаго учения. Иди, благоверный княже, во град Тферь и моли преподобную матерь свою, яко да преселится во град Кашин своего отечества, яко да будет граду нашему Кашину и всей области его вечная похвала тоя пришествием. Граду же Тфери дарова Бог молитвенника тепла и заступника скора, страстотерпца своего, отца твоего, благовернаго великаго князя Михаила Ярославина, нашему же граду всяко дарует всещедрый Бог преподобную матерь твою благоверную и великую княгиню Анну в помощь и заступление во вся роды до века. Токмо потщися усердно доити во град Тферь, умолити матерь свою, и Бог благий исполнит желание сердца твоего”. Сего ради, о, мати святая и блаженная моя, да не оставиши мя тща, ради своего еже к нам преселения, да не презриши моления всего народа, паче же мене возлюбленнаго сына своего, да не печалию снеден буду, еже лишену быти мне твоего медоточнаго языка; лучши есть зде умрети, нежели возвратитися тщу во свой град». Таковыя глаголы благоверный князь Василий ко преподобней матери своей со многими слезами изрече и в себе Бога моляше, яко да получит желание сердца своего. Блаженная же и преподобная княгиня Анна таковое моление от сына своего слышаше и веру его видевше, не без Божия промысла, разсуди, сему быти, но яко от Бога послан бысть к ней, преклоняется на моление и обещевается преселитися во свое отечество и тамо пребыти до дне исхода своего еже к Богу. И сице рече к нему: «Буди, сын мой возлюбленный, по твоему повелению, и якоже Господу угодно, тако и будет». Благоверный же князь, сын ея, слышав таковая глаголы, радости многия наполняшеся и всесилнаго Бога прославляше, яко не презре моление. Тогда преподобная и великая княгиня созва к себе постницы, еже в монастыре том, и поведает им свое еже от них отшествие. Они же, яко услышавше от преподобныя сицевыя глаголы, слез исполнившеся, глаголаше к ней: «Камо[3570] грядеши, госпоже наша? И чесо ради разлучение твое от нас хощет быти? Еда в чем прогневах тя, или неправдовах[3571] пред тобою, или скорбь кую наведох твоему непобедимому и терпеливому смиренномудрию? Еда гражане гонят тя от нашего пребывания? Повеждь нам, преподобная мати, вину[3572] отшествия своего». Она же: «Не плачите, рече, сестры мои, видите, яко сын мой прииде из Кашина града, благоверный князь Василий, и той понуждает мя и молит со многими слезами еже преселитися отсюду во свой ему град. Аз же много отрицахся, дабы не отлучитися от вашего постническаго пребывания. Он же не престанно моля мя, дабы поити ми в Кашин град. Аз же разсудила в себе: не без Божия промысла сему быти, но яко от Бога послан прииде ко мне и моля мое смирение, дабы преселитися отсюду, и Богу хотящу, и молитвам вашим поспешествующим мне во благое, хощу итти во град к сыну моему, благоверному князю Василию. Вы же, сестры мои, оставайтеся зде с Богом и в молитвах своих поминайте мое смирение». Они же реша к ней: «Аще, госпоже наша, отходиши от нас, на кого воззрим и кто нам путь смирения и безмолвия покажет? Кто же ли нам без тебе учение прострет, да яко возможем ловления дияволя преити?» Блаженная же рече к ним: «Бог благий благодатию своею да сохранит вас от многоплетенных сетей вражиих. Токмо молю вас, яко да имеете попечение о душах ваших и красоту девства вашего храните без всякаго вреда и свещу вашего течения добраго соблюдите неугасиму, дондеже приидет жених, Христос, Бог наш. И аще обрящет ны в перве нашем воздержании и добром течении иноческаго жития, тогда введет ны на брак своего Небеснаго Царствия со всеми святыми. Аще ли не таковых нас обрящет, всяко и нам возглаголет, яко и буим девам: „Отъидите от мене, яко не вем вас”[3573]. И тогда плакати имамы во веки веков, яко погубихом труд чернечества нашего. Но подобает нам со всяким смиренномудрием и кротостию духа молити человеколюбиваго Бога, Господа нашего Иисуса Христа, дабы сподобил нас с мудрыми девами небеснаго своего чертога наследницам быти и дабы доброе течение соблюл по своей ему благости цело и непорочно, яко тому подобает всякая слава вовеки. Аминь». Они же слышавше учение ея, вельми дивляхуся безмерному смирению и реша к ней: «О, госпоже наша, преподобная мати! Кто убо виде твое безмерное смирение и любовь, послушание же и терпение, кротость и незлобие, и милосердие ко всем, успех своему житию не приимаше и всемилостиваго Бога прославляше! Мы же, видевше твое постническое житие, пост и воздержание и непрестанную любовь, яже к Богу, зело успех своему житию приимахом. Ныне же отходиши от нас, како не сетование нам будет твое разлучение, и како нам не плакать: еже дарова Бог, и сего лишаемся. Молим тя, госпоже, не оставляй нас, сирых, но пребуди с нами». И сицевыми словесы хотяще удержати неудержимую, мняще, яко послушает тех, паки пребудет с ними. Но блаженная и преподобная мати утешаше их сладкими учении и рече им: «Не скорбите, сестры мои и госпожи, аще и отхожду от вас, но и тамо вы со мною есте, и аз с вами буду духом. И аще всеблагий Бог союзом духовныя любви совокупил нас, кое тех разлучение или разстояние приимем?» И мир дав им, и лобза коюждо[3574] святым целованием, и отходит в соборную церковь, и тамо на мног час Богу моляшеся покрыти ю́ своим человеколюбием, идеже аще изволил ей быти[3575]. Паки же припадает со многими слезами ко гробу супруга своего, страстотерпца Христова, благовернаго и великаго князя Михаила, яко да и тамо помогает ей молитвами своими. «Понеже, — рече, — велика стяжах тебе к Богу ходатая и молитвеника». И сице помолившеся и приимши благословение от епископа, пути касается, всем людем плачущимся о отшествии преподобныя, яко мнети им тогда и глаголати, яко «прогневася на нас Бог тоя ради отшествия и, аще не бы согрешихом пред Богом, не бы попустил когда отъити преподобней от града нашего». Благоверный же князь Василий многу милостыню подав сущим тамо постницам, и пищею удоволив, и все убогим, яже во граде, многу милостыню подав и благословение приим от епископа, отходит во свой град, поим с собою и матерь свою, преподобную и благочестивую великую княгиню Анну, велми прославляше в сердце своем всемилостиваго Бога и Пречистую Богородицу, яко получил желание своего благохотения.

Егда же приближишася ко граду Кашину, тогда изыдоша вси людие града Кашина, иереи и иноцы, мужи и жены и старцы с юнотами, во сретение преподобныя и блаженныя Анны и, друг друга предваряюще, хотяще преподобную видети, и ови[3576] «прикасахуся воскрилию[3577] риз ея»[3578], освящение приимаху, инии же зрением токмо ангелоподобнаго лица ея освящахуся и Бога прославляху и того Пречистую Матерь Пресвятую Богородицу. И сице приглашаху[3579]: «Приими, славный граде Кашине, свою похвалу и славу неотъемлему и радость присноцветущую. Яже ты изведе от себе плод богоданен и ветвь благочестивую, паки преблагий Бог к тебе приведе, и радуйся радостию непобедимою во вся роды, и радости твоея никтоже отъимет от тебе». И тако, Божиими судбами и того хотением, преподобная и блаженная великая княгиня-инокиня Анна от супружника своего великаго князя тверскаго преселися во свое отечество, во славный град Кашин, от града Тфери. И нача тамо подвизатися болшими труды и подвиги, и пощением, и молитвою непрестанною вооружатися на невидимые враги, и стоянием всенощным победила бесовския брани. И толико истин[3580] себе блаженная постом и многим воздержанием, яко токмо познаватися составу человеческому, якоже глаголет пророк: «Прилпе кость моя плоти моей, и колена моя изнемогоста от поста, и плоть моя изменися елея ради»[3581]. И весма покорила плоть духу, и жилище явися и престол Пресвятыя, и Единосущныя, и Животворящия, и Неразделимыя Троицы. Пришед бо Господь со Отцем и со Святым Духом, обитель сотворил себе в пресвятей души ея, и толико возлюбил красоту, благородие чистоты ея, яко и по смерти соблюде святое тело ея невредимо от тления, яко и ныне всем видится воочию. Любяше же беззлобие, безмолвие и никомуже беседоваше, но точию егда прихождаше к ней сын ея, благоверный князь Василий, и сего учаше и наказоваше, како любве ради Христовы видимая презирати и ни во чтоже красоту века сего вменяти, любити же и боятися и почитати страшнаго и славнаго всесвятаго Бога и того вечных благ искати милостынею и благотворением к нищим: «Ничтоже бо, — рече, — тако просвещает человека и до престола Божия доводит, якоже милостыня»; поминати же смертный час: «Понеже, — рече, — чадо мое возлюбленное, аще царь или князь, или богатый, или нищ, раб или свободь, все смерти предаются, и никтоже от них на земли вовеки пребывает, но „яко сень скоро преходит и яко цвет скоро увядает”»[3582], — держатися же правды, понеже правда вовеки пребывает. «Праведный же, — рече приточник, — от веры жив будет, вместо же его предается нечестивый»[3583]. «А еже смиренну, и кротку, и милостиву, и долготерпеливу быти, и аще тако поживеши и будеши долголетен на земли, и никтоже на тя злое помыслит когда, и супостатом твоим страшен будеши, и вечнаго блаженства от Господа нашего Иисуса Христа покой на небесех приимеши». И сими поученми наказоваше сына своего благовернаго князя Василия, отпущаше его в дом свой. Сама же единому Богу беседоваше молитвою непрестанною и прочими богодухновенными детелми просвещаше душу свою. Благоверный же князь Василий, таковыми учении от преподобный матери своей наставляем и наказуем, яко «древо при исходищах вод напояемо»[3584], возращая плод сторичен[3585], и никогдаже преступайте наказания блаженныя, но тщашеся усердно последовати стопам ея.

Поживе же преподобная княгиня Анна, по пришествии от Тфери в Кашин, неколико лет во мнозех трудех и пощениих, и в воздержании, и молитвах. Таже, уведавше свое отшествие к Богу, призывает к себе сына своего, благовернаго князя Василия, и много поучив его о вере и о милостыне, по сем же преподобная сказует ему и отшествие свое к Богу. Он же, яко слышав, и велми восплакася и рече ко блаженней: «О, мати моя преподобная! Кому нас оставляеши, и от кого по твоем отшествии учение восприиму? Что же ли живот мой кроме[3586] твоего пресладкаго учения и наказания? Уне[3587] мне с тобою умрети, нежели по отшествии твоем лишену быти ми ангелоподобнаго твоего зрения». Блаженная же рече к нему: «Не плачи, чадо мое возлюбленное, и не скорби о сем: предаю тебе и весь град сей в руце всемилостивому Богу и Пречистей Богородице. Той да наставит вас на всяку истину и исправит стопы ваша к деланию божественных заповедей его. Токмо, чадо мое возлюбленное, держися, яже[3588] научен еси и в нихъже[3589] пребывавши, и имеяй веру несумненну, и Бог мира да будет с тобою. И молитвы отца твоего великаго князя Михаила и страстотерпца Христова и мое благословение вовеки на тебе пребудет». Такожде наказавши и велможь его, како всем сердцем Бога боятися и угодная пред ним творити, и того пресвятыя заповеди без лености соблюдати, и покорение во всем имети «к сыну моему» благоверному князю Василию, и суд праведный творити и не насиловати немощным, воспоминати же им шесть заповедей евангелских[3590]. «В них, — рече Бог, — истязани будете от Бога. И аще тако сотворите, и того ради сподобитеся от Бога милость прияти и Небеснаго Царствия наследие». И сице поучив блаженная и преподобная и великая княгиня Анна и помолився за них и о всем граде, таже возлеже на одре и опрятавшися велелепием, и сице рече: «Владыко Господи Иисусе Христе, Боже мой, ненадеющимся надежда, источниче благоутробия, тебе, света пресладкаго, возжелех и тебе душу свою предаю, приими ю́ и покой со всеми святыми». И тако предаде честную свою и ангелом говейную[3591] душу в руце Господеви, егоже возлюби от юности своей и непрестанно въслед того человеколюбия течаше, в лето 6846-е, месяца октомврия во 2 день.[3592]

Сын ея, благоверный князь Василий, видев матери своея преподобныя и блаженныя великия княгини Анны отшествие к Богу, и напад на перси ея, со слезами вопияше: «О, мати моя преподобная и преблаженная, свете очию моею, учителнице и наказательнице моего ума! Аще и скончала еси свою жизнь и прешла еси от временных на безконечная, и от многих трудов на вечный покой, но духом не отступай от нас, чад своих, и молися Христу Богу нашему о сохранении державы моея и о спасении града сего, в немъже изволила еси жити и душу свою предати Господеви, и избавитися нам от всех находящих видимых и невидимых враг и спастися душам нашим». Слышано же бысть по всему граду преставление преподобныя, скоро притекоша мужие и жены, и со младенцы, нищии и убозии. Велможи плачущеся, яко истинная им бе учителница и «окормление животу нашему», нищии же и убозии, сироты же и вдовицы рыдаху, яко питателницы своея, и крепкия помощницы, и непобедимыя заступницы лишишася. И тако положиша на одре честное и трудолюбивое тело блаженныя и великия княгини Анны и понесоша честно со псалмы и песнми в соборную церковь Пресвятыя Владычицы нашея Богородицы, честнаго и славнаго ея Успения, и отпевше надгробная пения, и погребоша тело преподобныя под соборною церковию со псалмы и песнми духовными; отдаша персть[3593] персти, и много плачущи и сетующи, яко лишишася добрыя учителницы и крепкия заступницы, обаче[3594] надеющеся и по отшествии ея иже к Богу незабвенно в молитвах своих память имети о отечествии своем. И тако разыдшася в домы своя, славяще и благодаряще Бога.

Сице бо житие преподобныя блаженныя княгини Анны и пребывание ея на земли совершишася, яже от младых ногтей нача Богу работати благими детелми и всеми сердцем любити. И ничтоже от видимых сущих на земли (яко прелесть мира сего хотящими Богу работати помрачает очи) паче же любве Божия предпочте, и до конца гнушашеся славы века сего суетнаго. И якоже прежде сопряжения добродетелем прилежа, тако и в сопряжении, а по скончании супруга своего, великаго князя Михаила, чистоту своего благородия нескверну соблюде, и в посничестем тризнищи[3595], иноческом пребывании добрыми подвигом подвизався. И ничтоже возможе отлучити ю́ от любве Божия: ни слава мира сего и ни честь, ниже величество, но вся сия от юности преобидети нача, тако и сконча, и во уметы[3596] положи и до конца оплева, токмо единаго Христа да приобрящет, и того доброты выну и славы божественный да насладится. Сице и Христос Сын Божий возлюби ю́ и венча святый верх славы ея светлыми венцем правды, и достойну сотворили ю́ небеснаго своего чертога, и с мудрыми девами причте ю́ в Царствии своем Небеснем.

Сын же ея, благоверный и великий князь Василий, такожде и той житие свое благочестно и мирно препроводил, и мирно к Богу отъиде того же лета, месяца июния в 24 день[3597]. Бе бо смиренномудрен, и кроток, и милостив до конца, и во всем ревноваше житию родителем своим. О всем мире моляся и ходатайствует о отечествии своем.

Сия тебе моих словес плетения, о, преподобная мати и богоблаженная великая княгиня Анна, приписую, и аще точию твоему равноаггелному иже во плоти житию буди благотворение Богу, того бо есть дар и от его велелепнаго Божества славы его вся сия приносим, якоже и оная вдовица убогая, иже лепту принесе Богу в дар и свидетелствованна бывших паче множества принесших[3598]. Аще ли что и еще недостаточно явися твоему богоугодному пребыванию, обаче по силе принесохом тебе, елико подаде благодать Святаго Духа. Кто бо может по достоинству изрещи ваше иже во плоти аггелское пребывание, иже многия труды и поты, лощение и воздержание, и слезы непрестанныя, смирение же и кротость, и любов нелицемерную, еже и сами аггели удивишася невещественному вашему житию! Ты же молися, преподобная и богоблаженная великая княгиня Анно, о мне, недостойном, ко Христу Богу, и достойна мя сотвори небесныя породы наследника быти и избавитися вечнаго осуждения, и твоими молитвами в настоящем сем житии сохранену быти от многоплетенных коварств вражиих благодатию и человеколюбием Господа нашего Иисуса Христа, с нимъже Отцу, купно и Пресвятому и Животворящему его Духу всякая слава и держава, от всея твари честь и поклонение, ныне и присно и вовеки веков.

Чудо о явлении преподобный матере нашея благоверныя великия княгини-инокини Анны, како явися пономарю Герасиму[3599]

Прешедшим убо многим летом по успении блаженныя и великия княгини Анны, яко двесте и четыредесять и три лета[3600], в неже время всещедрый Бог благодатию своею явил нам источник неизчерпаемый — гроб знаменоносныя матере и великия княгини Анны. И по явлении том неведом бе и небрегом гроб ея, зане сущу времени тогда в Росийском государстве нестройну бывшу от нашествия богомерских латынския ереси восприемников, литовских людей, якоже летописныя книги повествуют.

Царствующу бо тогда в Московском государстве и скиптр Российскаго царства правящу царю Василию[3601], тогда убо окрест Московскаго царства безчисленное воинство бяше литовских людей, на взятие царствующаго града готовляхуся, прочия же грады, окаянни, пленяюще и пожигающе и в запустение полагающе. И многие святые места, и честные монастыри разориша, и крови христианския, окаяннии, множество пролияше: от Москвы даже и Великаго Новагорада и окрест окиана-моря протече необузданное их воинство. Богу тако попущающу за грехи наша, яко да накажемся[3602] и человеколюбие его престанем гневати, яко да научимся пресвятыя заповеди его не преобидети, но всегда угодная пред ним навыкнем творити. Той бо сам глаголет пророком своим: «Аще мене послушаете, благая земли снесте; аще ли не послушаете, оружие вас пояст»[3603]. Якоже речено есть, яко злохищнии волцы, литовстии людие нещадно погубляюще овцы стада Христова, и несть кто возбраняя им или сопротивлялся, понеже царю Василию и самому тогда сущу в велицем утеснении, бывшу елико от литовскаго воинства, паче же от своих присных мятежи и нестроения бяху.

Приразишася[3604] окаяннии литовскаго воинства ратнии и ко граду Кашину не токмо единою, но и дважды и трижды, но ничтоже могоша успети или зла сотворити, Богу его соблюдающу ради молитв благоверныя княгини Анны. Людие же тогда во граде бяху ратнии и простии, видевше милость Божию, иже от нашествия латинския ереси восприемников невредим пребывает град, и разумевше, яко не от своея им силы соблюдается, обаче не ведаху, яко кто по них побарает[3605] и избавляет их от пленения сопротивных, понеже все грады плещи своя вдаша[3606] воюющим. Тогда убо премилостивый Бог восхоте показати рабу свою и явити людем своим целебный источник и сущую помощницу во граде, преподобную и благоверную великую княгиню Анну, сим образом.

По ошествии убо преподобныя к Богу пресвятое тело ея под соборною церковию Пресвятыя Богородицы лежаше, и многи лета прешедше той церкви в ветхость, якоже и помосту церковному обвалившуся до самыя земли и разрушшуся. Тогда гроб великия княгини Анны обретеся на верху земли. Людие же воинстии, иже во граде том учинены бяху на сохранение града, приходяще во храм Пресвятыя Богородицы помолитися и от неведения полагаху шапки свои на гроб блаженныя, инии же неразумнии и саждахуся, мняще быти гробу просту, и никакоже помышляху кого нетлению причастна быти в нем[3607]. Бог же сущую во граде заступницу восхоте абие показати людем своим, яко да не к тому преобидима бывает[3608] благодать его, юже дарова угодником своим, но да прочее яко светило сияет на подсвещнице.

В то время (о, дивна дела твоя, Господи!), яко в неже лета тма богомерских и треклятых литовских людей повсюду обнажашеся, и крови христианския проливахуся, и людие в велицей скорби и печали суще, и страхом сердца их сокрушахуся, тогда убо Господь наш Исус Христос изволи рабу свою явити. Является преподобная и богоблаженная и великая княгиня Анна, в велицем иночестем образе одеяна, пономарю тоя церкви Пресвятыя Богородицы, именем Герасиму, емуже тогда в велицей болезни бывшу и весма ко вратом смертным приближающуся и отнюдь не чаяху ему живу быти. И явлением своим исцеление ему подаде и здрава его сотвори. Таже поведает ему о себе, кто бе[3609]. Потом, поношая им о неразумии их, сице глаголет: «Почто, — рече, — гроб мой ни во чтоже вменяете, и мене презираете, и яко просту помышляете гробу быти? Не видете ли людей приходящих и на гроб мой шапки пометающих и садящихся, понеже от вас невозбраняемы бывают, и отнюдь небрегом бе от вас и преобидима, и несть разумевающаго в вас? И доколе тако быти ми от вас попираема ногами. Или не весте, яко аз молю всемилостиваго Бога и того рождшую Матерь Пречистую Богородицу, дабы не предан был град сей в руки врагов ваших, и от многих пакостей, находящих на вы, соблюдаю вас? Обаче ныне не мози, человече, ослушатися моих словес, да не горшая сих постраждеши. Пойди ко пресвитеру сея церкви и ко всему причту и повеждь им вся, реченная от мене, яко дабы отселе гроб мой честна имели и приходящим бы возбраняли садитися, и шапки класти не велели на него, и свещу бы есте возжгли на гробе моем пред нерукотворенным образом Господа нашего Иисуса Христа». Той же пономарь от видения в себе быв и скорому пременению еже от болезни здрава себе видев, велми дивляшеся и Бога прославляше, яко безчисленное богатство благости своея открыл есть и от врат смертных возведи, и великую княгиню Анну немолчными усты похваляше.

Таже нимало замедлив, бояся прещения[3610], но скоро приходит ко пресвитеру и с ним всему причту тоя церкви поведает вся реченная от преподобныя[3611], и яко здрава сотворила от недуга и отнюдь к смерти приближающася явлением своим от смертных врат возведе. Они же слышавше таковая и онаго ведяху всема болезненна бывша и неначаема[3612], видевше исцеление получивши, благодарственными песньми всесилнаго Бога и Пречистую Богородицу воспрославиша, яко неистощимое богатство и небесное сокровище и крепкую помощницу явил им, блаженную и великую княгиню Анну прославляюще, таже и всем людем поведаша. И оттоле вси людие града Кашина, яко стяжавше крепкую во граде побарательницу[3613], никтоже не имеяху скорби еже от нашествия безбожных и латинския ереси восприемников, скверных и преокаянных литовских людей, ведуще, и непобедимую во бранех помощницу, яко не оставит преподобная отечества своего в руки нечестивых предану быти. Таже по повелению преподобныя на гробе ея пред нерукотворенным образом Господа нашего Иисуса Христа свешу неугасимую возжгоша, и мнози приходяще с верою помолитися Пресвятой Богородице и гробу богоблаженныя честне, якоже подобает святым покланятися и почитати. И вси, иже многоразличными болезньми содержими, прикасахуся честному гробу ея и неоскудную благодать от преподобныя почерпающе, отхождаху в домы своя здравы, славяше и благодаряще Христа Бога нашего и того рождшую Матерь Пречистую Богородицу, и благодать велию исповедающе благоверныя и великия княгини Анны, яко молитвами ея здравы бываху. Но тогда аще и многим чюдесем, бывающими от гроба преподобныя, и мнозей благодати, изливающейся от живоприемнаго гроба, обаче в простоте ума своего, или тако Богу изволившу судбами своими, не попущающися таковый светилник, иже под спудом сокрытый, пресвятое и нетленное тело богоблаженныя и великия княгини Анны, на свещнице поставите[3614], сиречь яве быти мощем, дабы видим были таковый источник неисчерпаемый всеми приходящими. И Бог сие сотвори смотрения[3615] ради некоего, яко да покажет всем яве таковое неистощимое богатство, древния своея благости источники неисчерпаемыя во свое время, когда они весть судбами своими. И от того времени явлен бысть гроб преподобныя, тако почитаем бе и покланяемся честне и велелепне. Аминь.

Месяца июлия 21 день. Обретение честных мощей святыя преподобныя благоверныя и великия княгини-инокини Анны Кашинския чудотворицы

Во дни благовернаго и христолюбиваго царя и великаго князя Алексия Михайловича, всея России самодержца, и при святейшем Иосифе, патриархе Московском и всея России[3616], благий, и преблагий, и всемилостивый Бог наш, иже неизреченнаго своего благоутробия пучину излия на нас богатно щедротами своими, дарова нам божественное свое сокровище, неистощимое богатство, и открыл есть в последняя сия роды иже под спудом лежащий светилник, и подаде неизчерпаемый источник от приснотекущия своея благости — мощи преподобныя и благоверныя великия княгини-инокини Анны, и толиким бо летом прешедшим по преставлении богоблаженныя, и никакоже тлению причастны показали. И, яже прежде рехом, неизследимыми судбами Владыки всех и Бога, творящаго преславная и непостижимая чудотворения роду человеческому, явився гроб благоверныя и великия княгини-инокини Анны на верху земли[3617], и многим преестественным чудесем от него изливающимся.

И сие видевше пресвитер тоя церкви и с ним причет церковный, таже и прочий священнический чин и вси людие преславнаго града Кашина, како таковый источник, повсегда неисчерпаемый, истекает и никогдаже оскудевает, и в себе помышляюще, яко «Бог благодатию своею дарова граду нашему таковое сокровище неистощимое, и яко многу времени прешедшу по явлении гроба преподобныя, и никакоже прежде нас бывших, глаголаше, поднявшихся[3618], ведяху, еже бы мощи преподобныя яве сотворити. И се ныне пред очию нашею всякому приходящему от всечестнаго гроба ея изливается благодать, спасителная всем человеком, и яве показующи нам преестественными чудесы, аще и нам молчащим, но многая чудеса яве творят данную благодать иже от юности возлюбившей и его легкое иго понесшей благоверной и великой княгине-инокене Анне. И како таковый божественный сосуд, иже небеснаго мира полный, во гробе лежащий, аки под спудом сокрытый и никимже ведом. И доколе супостат наш, враг, диявол, сопротивник святых, таковым нашим нерадением и небрежением поносит нам, тии бо вся козни, лукавства и ухищрения, во Христову благодать оболкшеся, и того пронырства до конца победиша, яко худая птица, попираема от них. По смерти же своей, вся наша страсти неисцелныя исцеляют и того козни яве нам творят. И сего ради лукавый супостат не хощет ни единым божественным мощем в видении быти всем человеком. Якоже и в пренесении мощей явлено есть первомученика и архидиякона Стефана от Иерусалима в Царьград, и како нечистии дуси на пути вопияху: „О, горе нам, яко первомученик Стефан идет мучити нас![3619]” И аще не Божия десница тех стремления не возбранише, не бы убо когда попустили лукави дуси мощем его явленным быти всем человеком. Якоже и в прочих житиях святых написано есть: вся козни и ухищрения, лукаваго сатаны творимая, от святых мощей побеждаеми».

И таковая в себе помышляху, любовию вперяющеся людии, еже бы дойти в царствующий град Москву и поведати государю царю и великому князю Алексию Михайловичу, всея России самодержцу, о таковых великих и многоразличных чудесех благоверныя и великия княгини-инокини Анны, дабы повелел государь таковому светилу из-под спуда на свещнице поставитися и церкви Божия Матере свою красоту восприяти[3620]. И сему бывшу, вскоре делу касаются, и царствующаго матере градов богоспасаемаго града Москвы достизают, и тамо государю царю и великому князю Алексию Михайловичу, всея России самодержцу, вкупе со святейшими Иосифом, патриархом Московским и всея России, таковый неисчерпаемый источник во своем граде, гроб благоверныя и великия княгини-инокини Анны, супруги благовернаго и великаго страстотерпца Христова Михаила Тверскаго, на верху земли поведают, вкупе же и многая и различная чудеса, бывающая от всечестнаго гроба молитвами преподобныя, яве извещают, яко от лица Божия Матере церкви благочестиваго царя моляще, сице глаголюще: «Даруй, царю благочестивый, мою красоту велелепную и утварь многоценную, и сокровище неистощимое, и светилник пресветлый, источник неизчерпаемый, сосуд, божественнаго мира полный, гроздь истинныя лозы — повели открытися гробу моея дщери возлюбленныя и яве быти мощем преподобныя всем приходящим. Доколе таковому небесному сокровищу под спудом лежати? Не могу бо сия надолзе зрети во гробе затворенну, понеже аки многим облаком, сокрывшим пресветлыя лучи божественнаго солнца, сице и моея дщери во гробе затворенныя мощи никим ведомы. И доколе в поношении есмь от всех ради таковаго презрения? Се бо и Жених мой небесный, иже предобручил мя себе невестою, Сын Божий единородный и соприсносущный Отцу и Святому Духу, иже сый сияние славы Отчи, вопиет во святем своем Еваггелии, яко „неподобно светилнику возженному под спудом быти, но на свещнице полагатися, яко да светит всем, иже во храмине суть”[3621]. Аще ли откровено будет таковое пресвятое селение и божественный сосуд, тогда буду от всех славима и ублажаема, восприимши в себе таковый источник, иже от многих лет сокровенный. Такова слава моя, таково украшение мое, таковою добротою и утварию украсив мя небесный Жених и твой Творец и Владыка. Кроме же таковыя утвари, еже есть мощей святых и образов подобия их написанных, лишенна бываю славы, яко горлица пустынная пребываю».

Сия слышав, благоверный и христолюбивый государь царь и великий князь Алексий Михайловичь, всея России самодержец, вкупе с богомолцом своим и отцем, святейшим Иосифом патриархом, радости многия наполнишася и благодарственныя песни всемилостивому Богу возсылающе, яко таковое сокровище своея благодати во дни благочестивыя державы его открыл есть. Таже вскоре посылает своя царская писания во град Тферь к сущему ту архиепископу Ионе[3622], повелевает ему немедленно доити во град Кашин и мощи благоверныя и великия княгини-инокини Анны со всяким благоговением открыти, и таковое небесное сокровище, источник приснотекущий, не к тому покрывати или в земли положити, яко да, видевше чада церковная и Христова стада словесныя овцы мощи богоблаженныя и великия княгини-инокини Анны, прославят Бога Отца и Единороднаго Сына его, Господа нашего Иисуса Христа, и Пресвятаго и Животворящаго его Духа.

Принесену бывшу таковому царскому писанию во град Тферь ко архиепископу Ионе, и прочет, вскоре пути емлется[3623], поим с собою весь крилос соборныя церкви. И пришед во град Кашин, молебная пения и благодарственныя песни ко Христу Богу и Пречистей Богородице принесе, таже и всенощное бдение, и утреннему славословию бывшу во храме Пресвятыя Богородицы, честнаго и славнаго ея Успения, и над гробом преподобныя великия княгини Анны. И после божественныя литургии, певша надъгробная пения богоблаженней со псалмы, и пенми, и песньми духовными, со всякими умилением и благоговением, и многому благодарению бывшу, людем же всеми взывающими: «Господи, помилуй!» И абие преосвященный Иона архиепископ священными своима дланмя[3624] со архимандритом и игумены, и со множеством священнаго чина всечестному ковчегу касается, и открывше приснотекущий источник, мощи блаженныя и великия княгини-инокини Анны и видевше яко крин во юдолех[3625] сияющ и яко финик цветущий. О, непостижимым судбам твоим, Владыко Христе Царю! Обретше мощи, ихъже не надеявшеся, целы и неразрушимы, и никакоже тлению причастны Быша, аще и некая часть к сродному сродное отдадеся. Но слава всемогущему Богу и Пречистой его Матери Владычице нашей Богородице, яко тако прославляет угодников своих! Таже благоухания неизреченнаго воздух наполнився от мощей преподобныя и всех услаждая и возвеселевая сердца, подвизая на благодарение, иже во святых чудодействующему Богу, таковая преславная чудеса творящему. Таже архиепископ Иона со всеми освященным собором многая благодарения Богу изрече, яко в последния сия роды таковое небесное богатство, от многих лет сокровенно, нетленное явил людем своим. И «Слава ти, Владыко мой Иисусе Христе, — глаголаше, — яко сподобил мене, недостойнаго, видети приснотекущий источник, древния своея благодати сокровище, пречестныя мощи благоверныя и великия княгини-инокини Анны. И что воздадим мы, недостойнии, твоему непостижимому и человеколюбному благодеянию, иже твориши человеческому роду своим человеколюбием! Велии еси, Господи, и чудна дела твоя, и ни едино слово достойно к похвалению чудес твоих!» И таковое благодарение воздав всесилному Богу, и целовав любезно святыя мощи преподобныя и богоблаженныя и великия княгини-инокини Анны, и благословив когождо по единому, и отниде во свой град Тферь, славя и благодаря Христа Бога нашего, и того рождшую Пречистую Матерь Пресвятую Богородицу, и их угодницу преподобную и великую княгиню Анну.

Таже и писанием возвещает царю и великому князю Алексию Михайловичу и всея России самодержцу, яко «во дни, — рече, — твоя, благочестивый и христолюбивый царю, открыл есть Господь в последняя сия роды, ради боголюбивыя твоея веры, юже имаши ко святым его угодником, таковое безценное богатство и поистинне дражайшии, паче древняго кивота, мощи благоверныя и великия княгини-инокини Анны. И мы видевше, яко благодатию Христовою никакоже тлению причастны явишася, ни поне ризами ея»[3626]. Благочестивый же и богомудрый государь царь, слышав таковая, великою радостию радуется о обретении мощей благоверныя великия княгини-инокини Анны, и велми Бога благодарствуяй и Пречистую Богородицу, яко посетил люди своя, ихъже стяжа пречистою кровию своею, таковыми безценным сокровищем. Но кто может изрещи иже тогда благочестиваго царя веру и любовь ко преподобней! Аще бы мощно ему взяти златыя крыле, по пророку, богоотца Давида и прелетети желанием богодухновенным вскоре во град Кашин, якоже некогда пророк Аввакум в Вавилоне обретеся[3627], или, паче рещи, к богоприятному и к пречестному селению божественнаго кивота, Пресвятыя Богородицы, на тоя Успение апостоли снидошася на облацех во мгновении ока от конец земли [3628], тако он, благочестивый и богохранимый царь и великий князь Алексий Михайловичу всея России самодержец, толикою любовию божественною возгоревся и желанием видети мощи благочестиваго корене, благочестиваго и благовернаго и великаго князя Михаила Ярославина Тферскаго, супружницы его благоверныя и великия княгини-инокини Анны, и целовати любезно пресвятое тело ея и поклонитися целбоносному гробу ея. Аще бо тогда и отложил на время путное шествие ко граду Кашину, но абие в предьидущее лето веру свою делом совершил ю, якоже в пренесении мощей преподобныя и великия княгини-инокини Анны написася о сем.

Мы же, церковная чада, сошедшеся во обретение честных мощей благоверныя и великия княгини-инокини Анны, духовно празднуем, во псалмех, и пениих, и песнех духовных восхваляюще Господа Бога и Творца своего, и приемшаго труды и подвиги угодницы своея благоверныя и великия княгини-инокини Анны, и той верх пресвятый венчавшаго божесвенною славою своею, и многими преестественными обогащающаго, немолчными усты воспоем и восхвалим. И тако в таковом духовном торжестве любовию вперившееся, и на высоту божественнаго разума возшедшую похвалим и воспоем, сице рекуще:

Радуйся, преподобная и богоблаженная великая княгиня-инокиня Анна, иже от юности своея нача Богу работати и того пресвятыя заповеди усердно в сердцы своем прияла еси. Радуйся, духовная мати, иже возненавидевши красоту и славу мира сего, токмо единаго возжеле преславнаго света Иисуса Христа Бога нашего доброты выну наслаждатися и того божественныя славы наследница быти. Радуйся, преподобная и блаженная великая княгиня-инокиня Анна, яко и супругу своему великому князю Михаилу подала еси совет благ к страданию мучения добрым подвигом еже за Христа кровь свою излияти. Радуйся, ластовице прекрасная и горлице чадолюбивая, иже по оного иже за Христа мучении вдовствующи и чистоту девства своего сохранила еси, и к Богу выну[3629] беседовала еси молитвою и постом и воздержанием многим, якоже древле блаженная пророчица Анна, иже во Еваггелии свидетелствована[3630], в дому Божии присно водворяющися. Радуйся, пречистое селение и жилище Святаго Духа, иже всяку славу и честь и господство века сего оставила еси, и ни во чтоже, яко уметы, положила еси вся сущая в мире, и Христу единому последовала еси, и его пресвятое иго на раме[3631] носила еси, и многими добродетелными делы угодила еси. Радуйся, преподобная мати Анно, иже невозвратным путем шествовала по заповедем Владыки своего Христа и ничтоже паче любве его предпочте. Сего ради и Христос возлюби тя, яко невесту прекрасную, и с мудрыми девами в чертозе своем сочтал тя есть, и по успении твоем соблюде святое тело твое нетленно, душу же твою святую в премирная селения вселил и многими чудесы обогатил тя есть. Радуйся, крепкая помощнице отечеству своему, граду Кашину, и всей области его великое утверждение. Радуйся, заступнице и всем скорбящим душею божественое утешение. Радуйтася и веселитася, двоица Христова, благоверный и великий княже Михаиле, вкупе с супругою своею великою княгинею Анною, и радости вашея никтоже отъимет от вас. Радуйтася, светила пресветлая, иже всю землю Российскую просветили еста божественых зарями чудес ваших. Радуйтася и веселитася, угодники Христовы, вы бо врачи показалися есте всем приходящим с верою к цельбоносным мощем ваю[3632] и исцеляете страсти[3633] наша неисцелныя. Молитеся, святая, вкупе Христу Богу нашему даровати императору нашему Николаю Павловичу[3634] на враги победу и одоление, и миру спасение, и всей Росийской земли великое утверждение, яко да и мы вами получим оставление грехов и житию исправление, Небеснаго Царствия наследницы будем благодатию и человеколюбием Господа Бога и Спаса нашего Иисуса Христа, с нимъже купно Отцу и Пресвятому Духу подобает всякая слава, честь и поклоняние, ныне и присно и вовеки веков. Аминь.

Месяца июния в 12 день. Слово о пренесении мощей святыя преподобныя благоверныя великия княгини-инокини Анны в соборную церков Воскресения Христа и Бога нашего

Многа убо и различна дарования Божия и добродетелство неисповедимое человеком, яже содея в наше спасение божественным и неизреченным своим смотрением, якоже глаголет божественный апостол Павел: «Велия благочестия тайна — Боги явися во плоти»[3635]. И како не велия тайна смотрения его, иже Отцу сопрестолный, собезначалный и соприсносущный, прежде всех век от Отца рожденный, и невидимый, и неосязаемый, благоволением Отца изволил Сын Божий снити на землю и плоть прияти от святыя и преблагословенныя и Приснодевы Марии, и совершен явися ко всем человеком, и пребысть, еже бе и еже не бе прияти, и бысть совершен Бог и совершен человек, и восхотев, милосердия ради своего, падшаго человека возставити и страстию[3636] своею и Воскресением истлевша обновити, и пострада плотию, яко человек, а не божеством, божество бо безстрастно пребысть, умре же и воскресе, и человека с собою воскреси. Якоже глаголет велегласный апостол Павел: «О немже имамы избавление кровию его и оставление грехов, иже есть образ Бога невидимаго, и той есть глава Церкви, иже есть начало, перворожден из мертвых, яко убо в нем благоволи все исполнения вселитися и тем примирити всяческая к себе, и умирив распятия своего собою, аще земная, аще небесная»[3637]. Сия «тайна, сокровенная от века и от родов»[3638], ныне же явися святым его апостолом, имже восхоте Бог сказати, что богатство славы тайны сея во языцех[3639] и той есть дал овы апостолы, овы же пророки, овы же благовестники, овы же пастыри и учители, к совершению святых в дело сложения, в совершение Тела Христова[3640]. Сие благочестие корень злочестия искорени, сие мучащаго нас диавола попрана всеми сотвори, по реченному Христову словести: «Дах, — рече, — вам власть наступати на змию, и на скорпию, и на всю силу вражию»[3641]. Кто есть наступаяй на оную змию? Токмо той, иже победивый мир сей. И по святому апостолу, вся уметы[3642] вменив, и не толико небо украшается солнцем, и луною, и звездами, и земля — древесы многоразличных видов и цветы, елико Церков Божия святых и праведных мужей и жен подвиги и труды красится и прославляется святыми их мощми, понеже они Бога возлюбиша, и невозвратным путем последоваша, и святыя заповеди сохраниша, и ничтоже паче его любви от видимых предпочтоша. Сего ради Бог их воспрослави не токмо в животе, но и по смерти святыя их телеса нетленны почте, ради крайния их чистоты, и многими чудными и различными чудодействы их ради молитв всю землю исполни. Яко и ныне поведаемая святая благоверная великая княгиня Анна, о нейже слово предлежит.

Бысть убо супружница великаго князя и страстотерпца Христова Михаила Тверскаго. Како в толицей господской чести бывши, в величестве, и славе, и в богатстве, и яко царица почитаема, Богу угоди и ныне со всеми святыми Святей Троице предстоит, о всем мире молящися. Что бы ей в житии сем от видимых мира сего препя[3643] или возбрани от добраго течения и ненасытная сладости прекраснаго жениха Иисуса Христа Сына Божия? Еда[3644] господская честь и слава мира сего? Сия от младых ногтей презре. Или супружество? И се никако. Кое убо возбранение будет к соблюдению заповедей Божиих, идеже души воедино живут? И бе в них сердце едино и едина душа, и ревность к сохранению заповедей Божиих, и непрестанное течение еже Богу день от дне. Но сия Быша святый благоверный князь Михаил и супружница святая благоверная княгиня Анна всякими добродетелми своими украшены, и ничтоже паче любве Христовы предпочтоша, и непрестанно еже к нему рачением течаста[3645], в молитвах присно, и во бдениих, и слезах неисповедимых, идеже бо труд совсеяшеся[3646], по реченному, како возможно писанию предати. Но аще и в господстве бяху, но присно поминати одр блаженнаго во царех богоотца и пророка Давида, мочаща слезами, а не водою[3647]. И по всему быста милостынею ко убогим и благотворением к нищим, якоже древле праведный Иов[3648], гордыню же и тщеславие отнюдь возненавидеша.

И конечное — святая и благоверная княгиня Анна укрепляше супруга своего благовернаго князя Михаила. Егда ощути злочестиваго царя на свою державу гневающася и от своих сродник клеветы сшиваемый, не хотяше на свою державу от злочестивых, с ратию пришедших, неповинно кров христианскую пролияти, сам поиде во Орду к злочестивому царю, яко да за всех постраждет. И сице супружница его благоверная княгиня Анна укрепляше его на подвиг и глагола ему: «Да не будет тебе, господине мой, паче любве Христовы предпочести что: ни ласкания царева, ни господския чести обещание умягчат душу твою от подвига, ниже паки устрашат тя прещения его различная, ни томления нужная[3649], яко бы сотворити волю его скверную, стени[3650] бо подобна или сну таковая страшилища, но буди во исповедании яко добр воин Христов и присно поминай велегласнаго апостола Павла, глаголюща сице, яко „ни скорбь, ни теснота, ни гонение, ни нагота, ни глад, ни беда, ни ино что от лютых мира сего возможет нас разлучити от любве Божия за пострадавшая) нас ради”[3651]. И буди верен до смерти, и даст ти Господь венец жизни». И сице укрепляше блаженная супруга своего великаго князя Михаила, яко самому ему дивитися премудрому разуму ея и доброму совету, и Бога прослави, яко к подвигу его ревность подаде женою, а не якоже древле в рай Ева ко Адаму[3652]. И сему тако бывшу — пострада убо блаженный и венцем мучения увязеся[3653].

Блаженная же и великая княгиня Анна по страдании супруга своего поразуме, яко невозможно ей спастися, посреде плещев[3654] и всяких молв быти, аще не отречением всякия славы мира сего, и господския чести возненавидевши, и въслед еваггельскаго гласа ити, глаголющаго: «Аще кто не оставит отца своего и матерь, и жену, и чада, и села, и имения, не может быти мой ученик [3655]». И ни мало помедлив, но всю славу жития своего господскаго и детей своих моления, еже быти с ними, презре, и вся во уметы вмени, и яко некую жертву себе Богови приведе, на тризнищий[3656] подвиг исходит и иноческому житию себе во обители девам сопривмещает. И бывает вся Христова, и едина Единому последовавши в молитвах и молениих, присно поучаяся псалмом и прочими богодухновенным писанием. Смирением же и кротостию украшался, молчание любя, и покорение ко всеми имея, аще и госпожа всеми бысть, но едино воспоминая, како Господь наш и Бог, иже всего мира Творец, обнища нас ради (яко апостол глаголет: «Бог обнища, да нас богатством небесным обогатит»[3657]), дал образ послушанию, иже и быв послушлив, даже до креста и смерти, и не прииде к нам, да послужат ему, но да послужит нам, и дати избавление за многих, нам подаде образ всем, яко да по стопам его ходяще, будем послушливы во всем. И сице живяше блаженная, яко «древо плодовито при исходищах вод источник»[3658], и день от дне восхождения, по пророку Давиду, в сердцы своем полагая, душу же и тело просвещая божественными поучении, яко ни дне, ни часа не хотяше от славословия Божия престати, но всю свою жизнь изнуряше Господеви, егоже возлюби, последова и присно глаголаше: «Не трудно ми тещи въслед тебе, Женише мой любимый, ибо любовь твоя распали мя, и последовати по тебе научи мя, и воистинну весь еси желание, весь сладость и ненасытимая радость, Слово Божие. Тебе, Господу Богу моему, и душу мою предаю, приими ю́[3659] с миром и сочетай мя с мудрыми девами[3660], яко да и аз с ними вниду в чертог твой и узрю свет лица твоего и просвящение Святыя, Единосущныя, Живоначалныя и Неразделныя Троицы, всели мя во обителех твоих, яже уготовал еси любящим тя, якоже святый апостол Павел глаголет»[3661].

Таково блаженныя житие, таково и пребывание и исправление божественных ея добродетелей. И тако жизнь свою сконча и преиде ко оному блаженству, идеже чист глас празнующих, идеже радость и веселие присное[3662]. Сего ради и Бог ея не токмо в животе[3663], но и по смерти дарова ей нетление и исцеления дар, присно разливающийся. И только Божия благодать сохрани цело тело блаженныя, яко множае[3664] двою сот лет сокровено бысть в земли святое тело ея и никакоже тлению причастно явися. И ныне видимы всеми предлежат честныя и святыя мощи ея, изцеления подают всем приходящим с верою, Господу прославляющу ея трудов ради многих и воздержания неослабнаго. Рече бо Господь: «Прославляющаго мя прославлю и волю боящихся сотворю»[3665].

Сего ради и мы, братие, воспрославим прославлшую Господа и возвеселимся во псалмех и песнех духовных в день пренесения честных ея мощей. И возвеселимся духовне, и помолимся ей, яко да милостива сотворит нам Бога в настояще сем житии и по отшествии отсюду, да сподобит нас благая со избранными его получити пресладкаго гласа слышати, якоже глаголет Господь: «Приидите, благословеннии Отца моего, наследуйте уготованное вам Царствие от сложения мира»[3666].

Что же прочее возглаголем? Или которыя похвалы достойныя преподобней принесем, паче же — Богу, чудотворящему во святых своих, по реченному словеси Давидове, якоже во псалмех глаголет: «Дивен Бог во святых своих, Бог Израилев»?[3667] Память бо святых — вина нашему веселию, по премудрому Соломону: «Похваляемому бо праведнику, возвеселятся людие»[3668]. И память праведнаго с похвалами бывает, понеже и Бог похваляем, и прославляем, и величаем ради торжества угодник его. Сам бо Господь наш Иисус Христос глаголет сице: «Тако да просветится свет ваш пред человеки, яко да видят ваша добрая дела и прославят Отца вашего, иже на небесех»[3669]. И паки: «Аще кто мне служит и последсвует, идеже есмь аз, ту и слуга мой будет»[3670]. Не делом ли исполнилось сие Спасово слово? Не токмо мужие послужили, но и жены. Якоже Лука еваггелист глаголет о женах: «Послужили Господу от имений своих, якоже Мария Магдалина»[3671]. Тако и сия блаженная и великая княгиня Анна сим уподобився и прочим женам преподобным, в посте просиявшим и во всякой добродетели процветшим, и ни едино отста ея от божественных добродетелей, еже бы преподобная в себе не имела. И сими всеми исправлении Богу послужи в преподобии, и правде, и во всякой святыни. Такожде и от имений своих последова Христу в нищих утробы, и вдовиц, и сирот, странных, и вся сокровища богатства своего сокры, яко да на небесех некрадомое сокровище, сокровенное от век и от родов, обрящет, идеже тля не тлит, ни тать подкопает, яже уготова Бог любящим его, якоже святый апостол Павел глаголет о воздаянии Божии праведным: «Ихъже око не виде, и ухо не слыша, и на сердце человеку не взыдет, яже уготова Бог любящим его»[3672]. О, Отче святый небесный, подаждь нам, Христе, сотворити волю твою, наследником быти тоя неизглаголанныя радости и веселия святых.

Время же прочее веру показати самаго великаго государя царя и великаго князя Алексия Михайловича, колику веру показал он ко преподобней и колико тщание и усердие о пренесении мощей ея имел, якоже некогда болгарский царь Иоаннъ о пренесении честных мощей преподобныя Параскевии во свой царствующий град[3673], такожде и благочестивый царь о преподобней же и благоверной княгине Анне: не яко от града во град, но от древяныя церкви в соборную каменную церковь да пренесутся мощи ея, дондеже на том месте, идеже обретено бысть святое тело ея, храм каменной прекрасен воздвигнется в похвалу Пречистыя Божия Матери и преподобней великой княгине Анне. Яко хотяше благочестивый царь веру свою делом показати к преподобней, тако и делы веру свою исполняше.

И первее убо посылает царская своя писания во град Ростов к преосвященному Варлааму, митрополиту Ростовскому[3674], яко да приидет скоро во славный град Кашин на пренесение мощей святыя благоверныя княгини Анны, понеже и сам благочестивый царь изволи тамо быти. Преосвященный же Варлаам митрополит приим царская писания и вскоре пути касается и достизает града Кашина. Потом прииде и великий государь царь и великий князь Алексий Михайловичь с царицею и великою княгинею Мариею Ильиничною[3675] и со своими царскими чады[3676], и сестрами[3677], и князи, и боляры, и со всем своим царским сиклитом на пренесение мощей преподобныя великия княгини Анны. И вечернему убо и утреннему славословию бывшу и Божественней службе совершившейся, и многия молбы всещедрому Богу принесшее, времени же приспевшу, абие касается благочестивый царь гробу преподобныя радостною душею и веселием божественным с князи и боляры, на рамех своих возложивше, яко некое сокровище пречестное, воистинну сокровище божественное, паче древняго кивота[3678], тело драгое, тело честное, тело святое, в немъже обита Отец и Сын и Святый Дух — Святая Троица, и понесша в соборную церковь. Разстояния же имый от древянаго храма до соборныя церкви яко единым стрелением. Преосвященный же Варлаам митрополит со всем освященным собором последующе со псалмы, и песньми, и пеньми духовными, со многими свещами и кандилы благовонными, отвсюду стекшуся множеству народа: мужи и жены, старцы со юнотами, — и бе видети дивный сей позор[3679] множества свещ блистания, яко второе небо звездами испещрено. Горе[3680] аггелская ликостояния Бога славословят ради показавшаго чуда сего рабом своим, дондеже человецы, яко едино согласие, от всех Богу приношашеся и еже «Господи, помилуй» взываху. Воистинну ту видети веру. Якоже иногда царь Давид и пророк пред кивотом Господним скакаше, играя, ради пришествия его и, пред ним идуще, пояху[3681], тако и сей великий государь царь радовашеся душею и веселяшеся сердцем, яко изволил Бог в его благочестивое церство от давных лет таковое сокровище сокровеное открыти, и яко посетил люди своя и сподобил его послужити преподобней, яко и гроб ея с мощми на раме своем понести.

О, дивна дела твоя, Господи, вся бо твориши, елико хощеши, и несть кто противен твоей власти! Воистинну страшен еси! И кто противостанет тебе?

Паки приидем на предняя.

Но зде бысть честнее древняго кивота. Тамо — святая святых, ручка и манна, жезл и скрыжали, вещи суть предивны и в Божие имя сотворены[3682]. Зде же предивнее, понеже сам Бог обетова, глаголя, яко «вселюся в них, и похожду, и буду им Бог, и тии будут мне людие»[3683]. И паки: «Аз и Отец приидема и обитель у него сотворима»[3684]. Аще ли Божий храм человек и обитель Святей Троице, но воистинну сей гроб блаженныя и великия княгини Анны, в немъже положено бысть тело ея, святее и честнее древняго кивота. И не яко Озан он, прикоснувыйся кивоту Господню, ту и поражен бысть[3685], но зде прикасахуся всякаго чина и возраста мужи и жены честному гробу блаженныя, освящение приимаху, такожде и различными недуги и болезнми содержими здравие получаху. Понеже в древнем законе всяк прокаженный изгоняшеся из града и никтоже смеяше прикасатися им, дондеже очистится[3686]. Пришедшей же благодати, не к тому зако, что действовашеся. Сам бо Господь наш Иисус Христос, исполнитель закона, егда десять прокаженных очистил, и не возгнушался их[3687]. Пониже сень прейде и истинна наста. Аще и девять неблагодарных ко благодетелю не явишася, и се преобразование бысть иудейское неблагодарному сонму, но един показася и дав славу, сей иноплеменник показа, яже от язык, Церковь. Ныне же, благодатию Христовою, аще кто и прокажен телесно, или гноем обложен лютым и язвами, или разелаблен рукама и ногама, всех приемлет Церковь, и несть возгнушания ни от кого, вси бо един уд[3688] о Христе Иисусе быхом.

О, преславных дел твоих, Христе царю! Всяко немощи наша понесл еси за грехи наша. Иудеи же окаяннии суботство наблюдаху и тебе, Творца, оклеветаху, яко бы не от Бога пришел еси. О, несмысленнаго сердца! О, сквернаго языка! Како от зависти потемнеша мысленный очи, и не восхотеша разумети пришедшаго тебе на спасение. Но даждь им, Господи, по делом их. Мы же тебе исповедуем, Христа Бога нашего, пришедшаго на взыскание наше. Слава преблагому милосердию твоему!

И якоже дойде великий государь царь и преосвященный митрополит с мощми преподобныя в паперть соборныя церкви, и абие гроб блаженныя показася отягчен, и не можаху прочее[3689] нести в церковь. И се Богу являющу, яко не в той церкви положенным быти мощем ея, но идеже изволил Господь въначале погребенным быти и обретенным мощем ея, в дому Матере своея, тамо и пребудут вовеки веков. Великий же государь царь, видя сия, и помыляше, яко не хощет преподобная в соборной церкви положена быти, и моляще Бога в себе, яко да изволит ей на время в той церкви положенней быти, дондеже воздвигнется храм прекрасен во имя Пресвятыя Богородицы и его угодницы преподобныя и великия княгини Анны. И абие подадеся им святая, яко да внесше в церковь и положити мощи ея. И сему бывшу — внесше гроб блаженныя с мощми в соборную церковь Воскресения Христова и поставиша его на правой стороне у столпа. И молебная пения Господу Богу и Пресвятей Богородице и его угоднице великой княгине Анне певше, и многая благодарения изрекоша, яко изволил Господь сим преславн чудесем в его благочестивое царство быти.

По положении же мощем преподобныя многая исцеления бывают оттоле и доныне от святых мощей ея всякими недуги и болезнми одержимым: здравие получаху, и отхождаху в домы своя, и многое благодарение воздаваху Господу Богу и Пресвятей Богородице и преподобней благоверной великой княгине Анне. Царь же благочестивый повеле от царскаго своего сокровища священному причту многу милостыню подати, такожде и нищим и маломощным, в память благоверный княгини Анны. И пребыв царь неколико дней в Кашине, и заповедав церковь строити каменну, идеже обретено бысть тело блаженныя, сущему ту священноиерею тоя церкви, именем Василию. Сам же отходит в царствующий свой град Москву, благодаря Бога и Пречистую Богородицу, яко сподобил его послужити преподобней и преславных чудес ея видети. Такожде и преосвященный Варлаам митрополит отходит во свой град Ростов, и многое благодарение воздая Богу и Пречистей Богородице, яко сподобил его видети преславных чудес его.

Священник же Василий, тепл убо верою ко преподобней и царское заповедание приим, вскоре касается делу, и, благодатию Христовою и молитвами преподобныя, не во мнозе времени прекрасну церковь каменну воздвиже во имя Пресвятая Богородицы, честнаго ея Успения, присовокупивше ину церковь об ону страну тоя церкви, во имя преподобныя благоверныя великия княгини-инокини Анны.

Дозде Слово о пренесении честных ея многоцелебных мощей совершися.

Повесть о чудесех преподобныя благоверныя и великия княгини-инокини Анны Кашинския чудотворицы

Аще убо и предивное чудо соделася во дни наша во граде Кашине, милостию Творца и всеблагаго Господа нашего Иисуса Христа и рождшия его Пресвятыя и преблагословенныя Владычицы нашея Богородицы и Приснодевы Марии и угодницею их преподобною и благоверною великою княгинею Анною, от честных и многоцелебных мощей ея, но како возмогу, недостоин сый и недостойне устне имеяй, провещевати таковая? Но обаче надеяся на молитвы преподобныя, хотя слабый глагол восприиму.

Благословен Бог и Отец Господа нашего Иисуса Христа, Отец щедрот и Бог всякия утехи, утешая нас благословением духовным. Прежде убо праведный гнев свой беззакония ради нашего вмале испусти на нас, очищая многия грехи наша, и в мало дней оскорбихомся, потом же, благости ради Божия, скорбная забыхом, неизреченнаго ради человеколюбия на нас, радости многия сподобихомся, явления ради верху земли гроба со многоцелебными мощми преподобныя благоверныя и великия княгини Анны, яже подает неоскудно исцеление с верою приходящим. Мне же, недостойному, самовидцу бывшу многим чудесем, писанию же предати замедлившу, ово неразумием, ово же нерадением и душегубителныя лености, еще же и страха ради недостоинства, пленицами[3690] бо грехов моих стягнут есмь и таковым преславным вещам нелепо ми коснутися, но разве точию беззакония моя знати и просити отпущения безчисленным согрешениям моим. Но понеже желание привлечит мя, и страх глаголати нудит мя, греси бо мои, яко бремя тяжко, отяготеша на мне[3691]. И что убо сотворю? Дерзну ли к начинанию? Реку ли или запрещу себе окаянства ради моего? Чудесная исцеления безпрестани неоскудне бывают, и недуги телесныя немедленно от человек отгоними бывают. Сие биет мя к торжеству и глаголати понуждает, и яко подобает ми и писанию сия предати, и яко да не буду осужден, яко скрывый талант господина[3692]. И тако хощу изъяви о преждебывших, яже содеявшася праведным судом Божиим.

Бысть сице в лета, в няже бе нашествия поганских и литовских людей на государство Московское и на вся окрестныя их грады. Тогда бе во граде Кашине в осадное время в остроге утеснение велие, стояще храмина подле храмины, человецы же малыми стезями ради утеснения приходиша ко вратом градским. И аще загорится храмина, и та згорит одна, а подле тоя ничим невредима молитвами и заступлением преподобныя благоверныя великия княгини и инокини Анны, а болших пожаров не бывало. И литовских людей приходы ко граду Кашину были многие, и милостию Божиею и заступлением преподобныя княгини Анны отходили посрамлени. И тогда было явление преподобныя благоверныя княгини Анны, и чудеса с верою приходящим к целбоносному гробу ея были многа и различна исцеления. От нихъже от многа едино чудо всех боле преподобныя, како явися пономарю Герасиму и поведа ему о многоцелебных своих мощех, и како ходятайсвует и заступает град Кашин молитвами своими ко Господу и Пречистей Богородице, и како подаде ему скорое исцеление. И то чудо прежде сего писания в Житии преподобныя изъявися. Прочая же чудеса многая и различная исцеления, бывающая от честных мощей, написана и забвению предана, ово нерадением, ово же неверием малым.

Чудеса, прежде свидетелства бывшая у гроба преподобныя благоверныя и великия княгини-инокини Анны

Жена кашинца, посацкаго человека, кузнеца Власа, именем Анна, в разслаблении была многое время, не владела ни рукою, ни ногою. И слыша о чудесех, бывающих от гроба преподобныя благоверныя великия княгини Анны, и повеле себя отвести ко гробу преподобныя, и у гроба певше молебная пения Пресвятей Богородице Успению и литию по великой княгине над гробом ея служити, и ко гробу приподобныя приложиша. И от того часа той жене Анне, милостию всемогущаго Бога и Пресвятыя Богородицы и молитвами преподобныя, от разслабления Бог дарова здравие, и отъиде в дом свой здрава, яко николиже боле, славя Бога и Пресвятую Богородицу и угодницу их преподобную благоверную и великую княгиню Анну.

Кашинскаго дворянина Иоанна Борисова сына Тютчева сын отрок Иоанн одержим был недугом зелным и не владел ни рукою, ни ногою многое время. И привезоша его ко гробу преподобныя благоверныя великия книгини Анны, и повелеша литию пети у гроба великия княгини, и по окончании литии приложиша ко гробу благоверныя. И от того дне тот младенец Иоанн здрав бысть молитвами преподобныя и благоверныя великия княгини Анны.

Кашенския конюшенныя слободы тяглеца Артемья Скорикова сын его отрок Иоанн быв разслаблен, лежал в дому отца своего многое время, не владел ничем и даже главы своея не мог приподнять. И в той болезни привозили его к Пресвятей Богородице Успению и ко гробу преподобныя, и повелеша служити молебен Пресвятей Богородице Успению, и над гробом великия княгини Анны литию служити, и ко гробу того отрока приложиша. И от того часа незапно тот отрок Иоанн здрав бысть и отъиде в дом свой, славя и хваля Бога и Пречистую Богородицу и их угодницу преподобную матерь княгиню Анну.

Дворянина иноземца Иоанна Иоаннова сына Детновскаго жена его, именем Иулиания, очима велми больна была и от тоя болезни не видела рук своих многое время. Слышав же о чудесех, бывающих у гроба преподобныя благоверныя великия княгини, муж же ея Иоанн Детновской в то время был в Кашине на воеводстве. И привозил ея к Пресвятей Богородице Успению и ко гробу преподобныя Анны, и певше молебен Пресвятей Богородице Успению, и у гроба преподобныя литию служили, и по окончании молебна и литии приложили ея ко гробу великия княгини Анны. И в том часе прозре на многоцелебном гробе преподобныя и от болезни той здрава бысть. И отъиде в дом свой, радуяся и славя Бога и Пречистую Богородицу и угодницу их преподобную благоверную великую княгиню Анну.

Дмитровского монастыря, что в Кашине, слуга Феодор, Стефанов сын, Маламахов лежал болен, и в той болезни помутился умом, и не познавал никого из домашних своих, и бесновался многое время. Свои же его едва привезоша к Пресвятой Богородице Успению ко гробу преподобныя благоверныя великия княгини Анны. И пели молебен Пресвятей Богородице Успению, и литию у гроба благоверной служили, и по окончании молебна и литии приложили его ко гробу преподобныя. И от того часа тот Феодор людей познал и ум по-прежнему возвратих, и от той болезни здрав бысть, и отъиде в дом свой, радуяся и славя Бога и Пречистую Богородицу и преподобную великую княгиню-инокину Анну.

157-м[3694] году генваря в 5 день привезли Михайловскую жену Гавренева Софию, Власову дочь, разслабленну в Кашин в Сретенский монастырь девичий, и в той болезни пострижеся, и наречено бысть имя ей во инокинях Феодосия, и в монастыре лежала в разслаблении многое время. И обещася та инокиня Феодосия помолитися в церкви соборней Пресвятей Богородице Успению, и повеле себя отвести в соборную церковь. И повелеша пети молебен Пресвятей Богородице, и воду святити, и панихиду по великой княгине служити, и ко гробу ея приложили. И от того часа та старица Феодосия здрава от разслабления молитвами преподобныя благоверныя княгини Анны, и отъиде в монастырь, радуяся и славя Бога и Пречистую его Матерь и угодницу их преподобную благоверную и великую княгиню Анну.

Сретенскаго девичья монастыря крестьянина Тихона Иванова жена его Евдокея одержима была недугом зелным, и в той болезни ума отступила, и не знала никого, и лежала в дому своем в том недузе много время. И привозили ея к Пресвятей Богородице Успению и ко гробу преподобныя, и молебен Пресвятей Богородице пели, и воду святили, и панихиду по великой княгине служили. И по окончании молебна и панихиды приложите ее ко гробу преподобныя и даша ей святыя воды пити. И от того часа та Евдокея людей познала, и умом стала цела, и от недуга исцеление получи молитвами преподобныя великия княгини Анны, и отъиде в дом свой здрава, радуяся и славя Бога и Пречистую его Матерь и угодницу их преподобную великую княгиню Анну.

Кашинския Конюшенный слободы тяглеца Ивана Зызюкина жена его, именем Ксения, в недузе лежала много лет, и, не владея ничем, была разслаблена пять лет, и в той болезни обещалась Пресвятей Богородице Успению и преподобной благоверной княгине Анне, пришедши в соборную церковъ, помолитися. И по тому обещанию привезоша ее к Пресвятей Богородице Успению и ко гробу преподобныя княгини Анны, и, певше молебен Пресвятей Богородице, воду святили, и панихиду у гроба по благоверной княгине служили, и по окончании молебна и воды освящения и панихиды даша ей святыя воды пити и ко гробу благоверныя княгини Анны приложили. И от того часа та Ксения от разслабления исцеление получи и бысть здрава, яко николиже боле, молитвами преподобныя великия княгини Анны, и отъиде в дом свой, славя и благодаря Бога и Пресвятую Богородицу и преподобную матерь княгиню Анну.

157-м[3697] году июния 29 день кашинских посадских людей многия жены приходили к Пресвятей Богородице Успению помолитися и преподобныя благоверныя великия княгини Анны гробу поклонитися, с ними же приходила кашинскаго посацкаго человека Богдана Митрофанова жена его, именем Акилина. И прочия жены, помоляся Богу и Пречистей его Матери, и гробу преподобныя благоверныя великия княгини Анны поклонилися с верою, и та Акилина прикоснулася с небрежением ко гробу преподобныя и безстрашием оперлась о гроб рукою. И как оперлась — от того часа отнялась у нее рука, коею она оперлась, да половина главы и нога той же стороны начали болеть. И едва отведоша ю в дом свой. И она лежала в дому своем до самаго обретения мощей преподобныя. И по повелению государя царя и великаго князя Алексия Михайловича приезжал преосвященный Иона, архиепископ Тверский и Кашинский, в город Кашин со многими честными властми, со архимадриты и игумены, свидетелствовати мощи преподобныя княгини Анны, и того дни привезли ту жену Акилину ко гробу преподобныя, которая и ночевала у гроба преподобныя и молилась о исцелении своем. И как начали литургию служити, и от того часа Бог ей дал от разслабления исцеление молитвами преподобныя княгини Анны. И тако жена та Акилина здрава отъиде в дом свой, радуяся, и славя, и благодаря Господа Бога и Пречистую Богородицу и преподобную великую княгину Анну, каяся о прежнем неверствии своем.

Кашинскаго посацкаго человека Иоанна, Елисеева сына, Потребова жена, именем Евдокия, была в недузе зелном и разслаблена была, ни рукою, ни ногою не владела целый год. И привезли ее к Пресвятей Богородице Успению и к мощам преподобныя благоверныя великия княгини Анны, и молебен Пресвятой Богородице Успению пели, и панихиду у гроба благоверной служили, и по окончании молебна и панихиды многоцелебным мощем ее приложили. И от того часа незапным временем та жена Евдокия стала от разслабления здрава, яко возмощи ей идти на своих ногах в дом свой, радуяся, славя Бога и Пречистую Богородицу и преподобную благоверную великую княгиню Анну.

Человек некий земледелец, именем Калинник Иванов, Тверскаго уезду деревни Борзенева, разслаблен был и не владел ни рукою, ни ногою болше двух лет. И слышав о чудесех преподобныя благоверныя великия княгини Анны, и обещася помолитися преподобней. И по его обещанию свои ему едва его на носилах привезоша во град Кашин к Пречистей Богородице Успению и ко гробу преподобныя благоверныя великия книгини Анны, и неделю жил и молился о исцелении своем. И во едину нощ лежаше у гроба преподобныя, и во уме своем моляся, и мало уснувшу, явися ему преподобная, аки бы из гроба близ пришедши, и рече ему: «Человече, востани!» Он же, отвещав, глаголя: «О, преподобная мати, аще и хощу востати, но не могу». Она же, емши его за руку, и воздвиже, и постави его на ногах, и рече ему: «Исцеляет тя Господь Бог и Пресвятая Богородица моим смирением». И абие невидима бысть. Он же, воспрянув от видения, и обретеся, стоя, у гроба преподобныя, здрав, и не виде никого, токмо едину свещу, возженную над гробом преподобныя, яже и прежде бе, и дивися скорому пременению от болезни во здравие, и благодарствуя Господа Бога и Пресвятую Богородицу, и припаде ко гробу преподобныя, и моляся со слезами, яко подаде ему скорое исцеление. Священницы же, пришедше к заутрени и видевше его стояща у гроба и молящася здрава, прославиша Бога, и молебная благодарения певше Пресвятей Богородице Успению и преподобней благоверной княгине Анне. Человек же тот Калинник отъиде в дом свой здрав молитвами преподобныя благоверныя великия княгини Анны, радуяся, яко николиже боле.

Человек некий земледелец, именем Филипп, сын Григорьев, болярина некоего князя Сунтелеевича Черкасскаго крестьянин, Кашинскаго уезду деревни Токарева, имея жилище от града Кашина верст с шездесят, слепи был и не видел рук своих три года с половиною. И привезли его в Кашин Пресвятей Богородице Успению и ко гробу преподобныя, и ночевал но, и молился о исцелении своем. Наутра же в день четверток после литургии начал священник панихиду у гроба преподобныя, оному же молящуся о прозрении своем. И внезапу того часа Бог даровал ему, Филиппу, прозрение молитвами преподобныя благоверныя великия княгини Анны, стал видети, якоже и прежде. И вопияше благодарным гласом людем многим, стекшимся видети преславное чудо, и певша молебная пения Спасу, и Пресвятей Богородице Успению, и преподобной благоверной великой княгине Анне. Оной же Филипп совершенно прозре и отъиде в дом свой, славя и благодаря Бога и Пресвятую Богородицу и угодницу их преподобную благоверную великую княгиню Анну.

Человек некий, именем Давыд, Осипов сын, земледелец, Троицы Сергиева монастыря крестьянин, Кашинскаго уезду села Фроловскаго, лежал в болезни и ослеп, и не видел даже рук своих года два. И приведоша его к Пресвятей Богородице Успению и ко гробу преподобныя благоверныя великия княгини Анны, и молился у гроба преподобныя день и нощ. Прилучися убо в день Воскресения Христова, и после утрени начали петь священницы у гроба преподобныя молебен Пресвятей Богородице Успению, оному же Давыду молящуся о прозрении своем со слезами. И внезапу свети узре очима своима, и вопияше со слезами ко преподобней: «О, преподобная мати! Подаждь ми совершенное очима моима прозрение!» И по окончании молебна священник благословив крестом и окропив святою водою, оный же приложися к целбоносному гробу преподобныя и абие совершенно прозре, и видя все, якоже и прежде, молитвами преподобныя благоверныя великия княгини Анны. И отъиде в дом свой, радуяся и славя Бога и Пречистую его Матерь и преподобную благоверную великую княгиню Анну.

Болярина князя Никиты Ивановича слуги его, именем Андрея, по природе татарина, дщерь его, именем Анна, в то время была пяти лет. Очи у нея сомжалися болезнию, и не видела ничего, ни рук своих, с полгода. Отец же ея Андрей то время был у боярина своего на приказе на Углече в селе Красном, и слышав о чудесех преподобныя благоверныя великия княгини Анны, что Бог подает молитвами ея от чудотворнаго гроба ея многа исцеления с верою приходящим, и привезе дочь свою в Кашин к Пресвятей Богородице Успению, и повеле панихиду по благоверной служити. И по окончании молебна и водосвящения и панихиды священнику благословившу ея крестом и святою водою укропившу, и ко гробу преподобныя приложиша. И от того часа та девица прозре и нача видети совершенно, якоже и прежде. Отец же ея и матерь, видя незапное преложение в совершенное прозрение дщери своея, и благодарение со слезами воздавше Господу Богу и Пречистей Богородице и угоднице их преподобной благоверной великой княгине Анне, и отъиде со дщерию своею в дом свой, радуяся.

Чудеса после свидетельства

Кашинскаго дворянина Иоанна Петрова сына Скорпеева жена его, именем Анна, Андреева дочь, Зыкова, одержима была недугом зелным, и в том недузе ума отступила, и бесновалась, кричаше и нелепыя глаголы испущаше, и простовласа бегаше, гонима бесом, и одежду на себе раздираше, и не можаху многие люди удержати, амо[3703] же устремляшеся. Муж же ея в дому своем многие дни смиряше ея, вязаше и коваше. Она же оковы и вязания разрушаше, и бегаше, и нелепая кричаше, муж же ея в дому своем не возможе удержати. И взя отец ея Андрей Зыков в дом свой, и прилежаше о ней, и ничтоже успеваше[3704], она же паче от духа нечистаго мучима. Егда же приезжал преосвященный Иона, архиеписком Тверский и Кашинский, с прочими властями в Кашин свидетелствовати мощи преподобныя благоверныя княгини Анны, тогда отец преждереченныя Анны Андрей Зыков привозил дщерь свою беснующуюся Анну и моляся о исцелении ея у гроба преподобныя. Тогда архиепископ и все власти беснование ея видеша и ужасахуся вопля и кричания ея неистовых глагол. И телу ея изменившуся и почерневшу от зелнаго мучения. И тако в том недузе пребысть в мучении нечистаго духа года с два и больши, и в то время не получи исцеления. Отцу же ея паки отвезшу в дом свой, и даша ему священницы персти из-под гробу[3705] преподобныя благоверныя княгини Анны и повелеша в воду сыпати и беснующейся давати пити. И после того она многое время бесновалась в дому отца своего. И в нощи в субботу на воскресение ушла из дому отца своего в поле и в лес, и едва ея многие люди, нашедше, уловиша в лесу, и едва привлекоша в дом отца ея. И нача она просити пити воды, и даша ей воды пити, всыпавши в ту воду персти, которую дали отцу ея из-под гроба преподобныя. И как этой воды напилася, то нападе на нее сон, и спала долгое время, и когда пробудилась, в то самое время стала здрава и смысленна молитвами преподобныя княгини Анны. Отец же ея, видев незапное преложение и исцеление, от нечистаго духа избавлшуся, поят дщерь свою, прежде бесновавшуюся, ныне же целомудренну, и приехав в Кашин со дщерию своею Анною к Пресвятей Богородице Успению и к мощем преподобныя, и повеле пети молебен Пресвятей Богородице Успению и преподобной благоверной княгине Анне, и поведа иерею и всему причту дщери своея исцеление молитвами преподобный. И абие отъиде в дом свой, радуяся и хваля Бога и Пресвятую Богородицу и преподобную благоверную великую княгиню Анну. Дщерь же его Анна и доныне здрава и ничим не вредима.

Человек города Переславля Залескаго посаду церкви Симеона Столпника, диаконов сын, по имени Иакинф, одержим был болезнию тяжкою и разслаблен был до того, что не мог приподнять главы своея, и был в болезни сей десять месяцов. Отец же его привождаше к себе врачев и ничтоже от врачевания успевшу, но паче в горшая пришедшу, и болезнь тягчае бысть. И слышав о чудесех преподобныя великия княгини Анны, яко подает исцеления ко святому гробу ея прикасающимся с верою многа и различна, и привезе сына своего Иакинфа в Кашин в соборную церковъ Воскресения Христова и ко гробу преподобныя княгини Анны, и положи его у гроба преподобныя. И молебная пения певше Воскресению Христову и преподобной княгине Анне, оному же Иакинфу лежащу на одре своем и молящуся со слезами, милости прося от Бога о исцелении своем. И по окончании молебнаго пения благословиша его крестом, и окропиша святою водою, и приложиша его ко гробу преподобныя княгини Анны. И абие в часе человек той Иакинф здравие получи молитвами преподобныя Анны, и отъиде в дом свой здрав, радуяся и славя Бога и преподобную благоверную великую княгиню Анну.

Кашинскаго посацкаго человека, именем Сидора[3708], жена его Екатерина болна была главною болезнию и умом помутилась, и была в той болезни полтора года, и искаше от вречев исцеления, и не возможе получити, но паче тяжчае болезнь бысть. И привезоша ее в соборную церков Воскресения Христова и к мощем преподобныя великия княгини Анны, и певше молебен Воскресению Христову и преподобной. И по окончании молебна оную жену крестом священнику благословившу и святою водою покропившу, и ко гробу приложившу, и в той час Бог дал той Екатерине исцеление молитвами преподобныя княгини Анны, и ум стал цел по-прежнему, и отъиде в дом свой, радуяся и славя Господа Бога и Пречистую Богородицу и преподобную благоверную великую княгину-инокиню Анну.

Человек некий Никита Иванов, Кашинскаго уезду села Горки[3710], одержим был зелным недугом, и в том недузе нападе на него падучая болезнь и мучила его чрез неделю и чрез месяц, и той скорби был слеп лет с пять и болши, якоже сам о себе поведа. И во едину нощ явися ему в тонце сне преподобная княгиня Анна и рече ему, глаголя: «Прииди в Кашин в соборную церков Воскресения Христова и ко гробу преподобныя, и исцелееши». Он же возбнув от сна и никого не виде, и разумев посещению Божию быти. И не по мнозе времени иде в Кашин в соборную церков Воскресения Христова и ко гробу преподобныя княгини Анны, и повеле пети молебен Воскресению Христову и преподобной княгине Анне. Сам же Никита прилежно моляся о исцелении своем. И по окончании молебна благослови его священник крестом и окропи святою водою, и приложився ко гробу преподобныя княгини Анны, и абие[3711] здрав бысть. И отъиде в дом свой, радуяся, славя и благодяря Бога и Пресвятую Богородицу и преподобную благоверную великую княгиню Анну.

Человек некто, именем Никита Ананьин, града Клина, вотчины болярина князя Петра Иванова Пронскаго, крестьянин деревни Бороздни, сей был одержим черною падучею болезнию лет десять, и много врачем раздан имения своего, и от них искаше исцеления, и не можаше ни от единаго их получити, но паче в горшая пришед, и болезнь тягчае бысть. И слышав о чудесех преподобныя, яко молитв ради ея подает Бог многа и различна исцеления у гроба ея с верою приходящим. И привезоша его в Кашин в соборную церков ко гробу преподобныя, и повелеша пети молебен Воскресению Христову и Пресвятой Богородице Успению и преподобней княгине Анне. Оный же Никита моляся со слезами о исцелении своем. И по окончании молебнаго пения покропиша его святою водою и приложиша ко гробу преподобныя княгини Анны, и в тот час исцеление получи молитвами преподобныя, и отъиде в дом свой здрав, радуяся, славя и хваля Бога и Пречистую Богородицу и преподобную великую княгиню Анну.

Троицы Сергиева монастыря Пятницкаго девичья монастыря старица Мавра одержима была падучею болезнию, и пометаше ея бес овогда в воду, овогда в стремнины, и от тоя болезни тело ея почерне. И слыша о чудесех преподобныя княгини Анны, яко подает Бог молитвами ея исцеления. Пребысть же в той болезни десять лет, якоже сама о себе поведа, и привезоша ея в Кашин в соборную церков Воскресения Христова и ко гробу преподобныя великия княгини Анны, и повелеша пети молебен Воскресению Христову и преподобней. Старица же моляся о исцелении своем, и по молебном пении ко гробу благоверныя приложися. И неколико дней пребысть у гроба преподобныя, и исцеления не получи. И отвезоша ю́ в свой ея монастырь, и абие болезнь тяжчае бысть. И не по мнозе времени в тонце сне явися ей преподобная благоверная княгиня Анна и рече ей: «Дщи моя Мавро, молися Господу Богу и Пречистей Богородице по своему обещанию и не пей хмелнаго пития — и исцелееши». И абие в той же час оная старица исцеле, преподобная же невидима бысть. Старица же возпрянув от сна и не виде никого, токмо храмина ея исполнися благоухания. И ощути себе здраву, и паки скоро прииде в Кашин в соборную церковъ Воскресения Христова, и припаде к целбоносному гробу преподобныя, и помолися со слезами, и славя Бога о исцелении своем, и пев молебная пения Спасу и Пресвятей Богородице, и преподобной княгине Анне молебен, и отъиде в свой монастырь, радуяся.

Столника государева Иоанна Гавренева жена его Стефанида одержима была сердечною болезнию, и в той болезни ослабела руками и ногами, и не владела целый год. И привезли ея в Кашин в соборную церков Воскресения Христова и ко гробу преподобныя, и повелеша пети молебная пения Воскресению Христову и преподобной княгине Анне молебен. Ея же, Стефаниду, держаше рабыня ея у гроба преподобныя, и моляся со слезами о исцелении своем. И во чтение святаго Еваггелия бысть во изумлении, и слыша скорби своей облегчение, и на ногах стала стоять о себе. И по отпуске молебнаго пения и по целовании честнаго креста и по окроплении святою водою приложися ко гробу преподобныя и ощути в себе совершенное исцеление. И пойде о себе к ранней литургии в предел, и хождаше не скорбя, и после литургии повода всему собору свое исцеление молитвами преподобныя благоверныя великия княгини Анны. И отъиде в дом свой здрава, радуяся.

Жена некая, именем Дария, земледелца Ермолая Иванова, Кашинскаго уезду села Студена Поля, лежала огневою болезнию, и в той болезни ума отступила, и не познавала никого своих присных, и в бесновании том произносила неистовыя глаголы восем недель. И привезоша ее в Кашин в соборную церков Воскресения Христова ко гробу преподобныя, и певше молебен, и окропиша ея святою водою и приложивши ея ко гробу преподобныя. И после того стало ей полегче, и людей стала узнавать, и от беснования пременилась, однако скорби своей совершеннаго исцеления не получи. И паки отвезоша ее в дом свой. И не по мнозех днех в тонце сне явися ей стар муж, глаголя: «Пойди в Кашин в соборную церков и помолися приподобней княгине Анне с верою — и исцелееши». Она же воспрянув от видения и не виде никого, кроме домашних своих, и поведа им видение, еже виде, и повеле себя отвести в Кашин в соборную церков к мощем преподобныя. И певше молебен Воскресению Христову и преподобней панихиду, жена же оная со слезами моляся у гроба преподобныя о исцелении своем. И по окончании молебнаго пения приложиша ея ко гробу преподобныя, и в той час совершенное исцеление получи молитвами преподобныя благоверныя княгини Анны. И отъиде в дом свой, радуяся.

Отрок некий, именем Антипа[3717], седми лет, немог[3718] огневою немощию шесть недель, и в той скорби отнялися у него очи, и не видел ничего, даже рук своих, две недели. Мати же его Улита приведе его в соборную церков Воскресения Христова и ко гробу преподобныя. И пев молебная пения, и моляся о исцелении сына своего, однако исцеления не получи, и отъиде в дом свой. И паки в другий раз хотяше идти в Кашин молитися о исцелении сына своего, в то время внезапу ему, Антипе, Бог дал чистое исцеление, и стал видети, якоже и прежде. И прииде с материю своею Улитою в Кашин в соборную церков Воскресения Христова и ко гробу преподобныя, и поведа всем сына своего прозрение молитвами преподобный благоверныя великия княгини Анны.

Ниже умолчу и сие от чудес преподобныя. Дворянина дмитревца Ивановская жена Пекина вдова, именем Екатерина, скорбела главною болезнию от рождения своего, и находил на нее обморок чрез два и чрез три дни, и в том недузе лежит сутки без памяти, без пищи и пития, не образумившись. И слышав она о чудесех преподобныя княгини Анны, и обрекшися идти в Кашин помолитися Христову Воскресению и поклонитися гробу преподобныя, и повеле себя отвести в Кашин. И прииде в соборную церков Успения[3720] Пресвятая Богородицы и ко гробу преподобныя, и пев молебная пения, и моляся Спасу и Пречистей Богородице и преподобной княгине Анне о исцелении своем. И в то время исцеления не получи, и отъиде в дом свой скорбна. И после того спустя дватцать недель уснула в скорби своей, и во сне видит себя в Кашине в церкви Успения Пресвятыя Богородицы, молящуся, и явися ей преподобная княгиня Анна, и рече ей: «Молися с прилежанием». Она же содрогнулась и вострепета от видения, и проснувшись, обретеся здрава, и поведа домашним своим видение. И паки прииде в Кашин к Пречистей Богородице Успению и ко гробу преподобныя княгини Анны, и певши молебная пения у гроба преподобныя, и поведа всему причту свое исцеление молитвами преподобныя княгини Анны. И отъиде в дом свой, радуяся, здрава.

Кашинскаго дворянина Лукиана Мизинцова жена его, именем Матрона, лежала огненною болезнию, и отнялися у нея очи, и не видела ничего многое время. И в той болезни обещалася помолитися в Кашине преподобной княгине Анне — и зделалось ей от болезни легчае, и с очей пухота опала, и стала очима видеть. И после того послала в Кашин к Пресвятей Богородице Успению и преподобной свещи и на молебен, сама же забы обещание свое, не пойде в Кашин. И найде на нее паки та же скорбь, и очима не виде, и немалое время лежала. И явися ей в тонце сне преподобная княгиня Анна и рече ей:

«Что ты свещи и на молебен присылаешь, а сама обещание свое забыла, молиться не ходишь?» Она же, возбнув от видения, обрете себе легче, и вскоре повеле себя отвести в Кашин к Пресвятой Богородице Успению и ко гробу преподобныя княгини Анны[3722], и повеле пети молебен Пресвятей Богородице Успению и преподобной княгине Анне. И по отпетии молебна и по кроплении святыя воды приложися ко гробу преподобныя, и в томъ часе стала видеть чисто и от болезни бысть здрава молитвами преподобныя благоверныя княгини Анны. И поведа всему церковному причту явление преподобныя, како явися ей во сне. И отъиде в дом свой здрава, радуяся и славя Бога и Пресвятую Богородицу и преподобную матерь великую княгиню Анну.

В лето 7174-го года месяца апреля на Городецке на посаде никольскаго попа Иоанна сын его отрок Петр лежал в болезни три недели и замертво лежал три дня, распух и весь налился, что пузырь, не видно было и глаз. И принесоша родители его преподобныя княгини Анны образ, и поставиша над ним, и начаша пети молебен преподобной княгине Анне. И как отпели молебен, и в том часе тот отрок Петр проглянул, и пухота с очей опала, и увидел образ преподобныя, и стал говорить, что «надо мною светло». И в том часе пухота со всего его опала, и бысть здрав, яко николиже болев. Родители же его видевши таковое чудо, приехав со отроком в Кашин, и пев молебен у гроба преподобныя, и отъидоша в дом свой, радующися, славяще Господа Бога и Пресвятую Богородицу и угодницу их преподобную и благоверную великую княгиню Анну.

1711 году кашинскаго посацкаго человека Феодора Иванова сына Руделева жена его Ирина была одержима зелным недугом, и в той болезни ума отступила, и кричаше нелепые глаголы. И в той болезни пребысть три года, и многажды была скована и связана. И потом явилась ей в сонном видении преподобная княгиня Анна в доме ея нощию во образе монашеском, и лице ея было, яко свет, и вся храмина от того чуднаго явления просветилась, и глагола ей: «Ирино, что ты трудишися[3724]? Пойди в соборную церковь, отслужи молебен Пресвятей Богородице Владимирской и благоверной княгине Анне панихиду, и Господь Бог даст тебе здравие». И не по мнозе времени паки вторицею той жене таким же образом явися преподобная нощию и то же глаголаше. И как привели ее в соборную церковъ ко святей литургии, то во всю литургию держали ее два человека, и она была без памяти. А как отпели литургию, и молебен, и панихиду, то она обмерла и лежала с четверть часа. И как ее подняли и приложили к мощам святыя благоверныя княгини Анны, в той час Бог молитвами преподобныя дал ей здравие, и отъиде в дом свой, радуяся.

1711 года Бежецкаго уезду Городецкаго стану вотчины болярина князя Андрея Петрова Прозоровскаго села Кесова Горы у крестьянина Козмы, Васильева сына, Соколова в дому его посещением от Господа Бога дочь его девица Феврония была в болезни и безъумвстве, и прикована была к стене, также и руки и ноги были окованы. И ей от Господа Бога бысть прощение грехов, и явися ей жена, аки вдова образом и одеждою, наипаче цвету селнаго[3725] светящеся, и рече к ней: «Февроние, пойди во град Кашин и помолися благоверной княгине Анне с верою». По котором явлении к ней, девице Февронии, по совету, отец ее и матерь взяша с собою с великою нуждою[3726] тую безумную девицу Февронию во град Кашин помолитися. По чему ей, благоверной княгине Анне, пришедши в Кашин, отслужили чрез священника панихиду, и потом Пресвятей Богородице молебное пение, и освящение воды совершили. И от того времени дарова Бог оной девице Февронии разум по-прежнему и от скорби исцеление. И в то время пострижеся в Бежецком девичьем монастыре Воздвижения честнаго креста. О которой ея скорби известно всей той вотчине и другим прочим окресным волостям, какова над нею скорбь была.

Кашинскаго уезду села Ламонова девица Параскева одержима была болезнию, и ума отступила, и не знала никого из своих домашних, бесновалася и нелепая глаголаше многое время, овогда замертво лежаше. И по мнозех днех в тонце сне явися ей преподобная великая княгиня Анна со аггелы, и несоша пред нею два аггела свещи возженныя, и два ведоша преподобную княгиню Анну. И прииде к девице, и рече к ней преподобная: «Параскево, что страждеши? Пойди в Кашин в соборную церков и помолися преподобней княгине Анне с верою. Аще же мене не послушаешь, и ты мучима будешь злою болезнию». Она же возбнув от видения, и никогоже виде, кроме домашних своих, и поведа им видение, и повеле, себя отвести вскоре в Кашин в соборную церковь к мощам преподобныя. И приидоша к литургии, и певше молебен Воскресению Христову и преподобной благоверной княгине-инокине Анне панихиду. Она же моляся со слезами у гроба преподобныя о исцелении своем. И по окончании молебнаго пения и панихиды приложися Воскресения Христова образу и ко гробу преподобныя, и в тот час совершенное исцеление получи молитвами преподобныя благоверныя великия княгини-инокини Анны. И отъиде в дом свой здрава, радуяся и славя Бога.

Кашинскаго уезду столника Феодора, Иванова сына, Лазарева жена его вдова Анна одержима была зелным недугом, и в том своем недузе ума отступила, и бесновалася, кричаше, и нелепые глаголы испущаше, и простоволоса бегаше, гонима бесом, и одежду на себе раздираше, еяже не можаху многие людие держати, аможе устремляшеся. Смиряше же ея домашнии и прилежаху о ней, но ничтоже успеваху, она же паче от духа нечистаго мучима. И привождаху в дом свой врачев, искаху исцеления, и имения много раздаяху, и не можаху ни от единаго их исцеления получити, но паче в горшая прииде. И в той болезни бысть пять лет. И по днех неких в тонце сне явися ей преподобная княгиня Анна, по Пасхе в неделю разслабленнаго в четверток, и рече ей: «Анно, пойди в Кашин в соборную церковь к заутрени в пятницу и помолися преподобней благоверной великой княгине-инокине Анне с верою». Она же воспрянув от видения, и не виде никого, кроме домашних, и поведа им видение, и повеле себя отвести в Кашин в соборную церковь к мощам преподобныя. И певше молебен Воскресению Христову и преподобной благоверной великой княгине Анне панихиду, она же моляся со слезами и с прилежанием у гроба преподобныя о исцелении своем. И како начали литургию божественную пети, она кричаше нелепая, и не можаху многие люди держати ея. И в то время множество народу стекошася в соборную церковь видети таковое преславное чудо от гроба преподобныя, и многим людем ужасающимся от вопля и кричания неистовых ея глагол. И телу ея изменившуся и почерневшу от зелнаго мучения находящаго беса. И како начаша петь «Христос воскресе» трижды на отпусте вместо «Славы, и ныне»[3727], и в то время подаде ей Бог исцеление молитвами преподобныя благоверныя великия княгини-инокини Анны. И приложися Воскресения Христова образу и ко гробу преподобныя, и от того часа бысть здрава, яко николиже боле. И отъиде в дом свой, радуяся и благодаря Бога и Пречистую Богородицу и преподобную благоверную великую княгиню-инокиню Анну.

1717 году кашинец посадкой человек Антипа, Иванов сын, Рожественой одержим был по женидве своей великим безумием, четыре месяца был скован, а потом обещание со всем домом своим положил преподобней великой княгине отслужити большую панихиду. И егда сотвори обещание, и чрез неделю от того безумия получил себе здравие, благодаря Бога и Пречистую его Матерь и преподобную княгиню Анну.

1732 года кашинец посацкой человек Иван, Казмин сын, Кулешев одержим был болезнию безъязычною пять недель, и обещался преподобной великой княгине Анне отслужити у гроба ея панихиду. И по исполнении обещания чрез три дни молитвами преподобныя великия княгини Анны получил исцеление и стал говорить по-прежнему.

1735 года Новогородской епархии Бежецкого уезду Городецкаго стану, вотчины брегадира князя Ивана, Андреева сына, Прозоровскаго, села Кесова Горы вдова Анна Семенова и другая жена Евдокея Левонтьева с дочерью своею Настасьею Трофимовою, из коих Анна была в безумии целый год, а девица Настасия одержима была разслаблением, и обещались они благоверной княгинь кашинской отслужить панихиду, и по совершении оной получили здравие молитвами преподобныя княгини-инокини Анны.

1744 года кашинец посацкой человек Стефан, Иванов сын, Тулупов был в тяжкой болезни, и одержим немотою так, что не говорил ничего два месяца, и обрекся преподобной благоверной княгине Анне отслужить панихиду. И по исполнении обещания чрез два дни даровал ему Господь Боги здравие, и стал говорить ясно молитвами преподобныя княгини-инокини Анны.

1744 года кашинец посадкой человек Иоанн, Емельянов сын, Бородкин посещением Божиим был в тяжкой болезни, и очима ничего не видел, и людей не знал год и шесть месяцов. И как обещался благоверной княгине Анне отслужить панихиду, и егда исполни обещание, и дарова ему Господь Бог здравие чрез неделю помощию и молитвами преподобныя благоверныя великия княгини Анны.

1745 года Бежецкого уезду Городецкаго стану, вотчины брегадира князя Ивана, Андреева сына, Прозоровскаго, села Кесова Горы у крестьянина Семена Панфилова жена Параскева Кирилова одержима была безумством, и обещася благоверной княгине-инокине Анне отслужить панихиду, и по совершении обещания получи исцеление.

1745 года вышеписанной вотчины села Кесова у крестьянина Тимофея Михайлова жена Стефанида Сергеева скорбела ногою с полгода и болше, и обещалась благоверной княгине Анне Кашинской отслужить панихиду, и по совершении обещания получи исцеление молитвами преподобныя княгини-инокини Анны.

1745 года вотчины Алексия, Денисьева сына, Норова, деревни Мотолыгина крестьянина Хрисанфа Евдокимова жена Евдокея Гордеева одержима была разслаблением, и обещася благоверной княгине-инокине Анне отслужить панихиду, и по совершении обещания получи исцеление молитвами преподобныя Анны.

1745 года вотчины Александра, Иванова сына, Суворова, деревни Мотолыгина крестьянина Логина Архипова жена его одержима была очною болезнию, и обещалась благоверной княгине-инокине Анне Кашинской отслужить панихиду, и по исполнении ея обещания получи исцеление молитвами преподобныя Анны чудотворицы.

1745 года села Кесова крестьянина Козмы Нестерова сын его Василий слеп был три лета, и мать его Мавра Семенова обещалась благоверной княгине-инокине Анне отслужить панихиду, и по окончании панихиды получи сыну своему прозрение молитвами преподобныя и благоверныя великия княгини-инокини Анны.

1746 года сентября в 15 день пришед в собор Кашинскаго уезду Кочемскаго стану деревни Глаголева крестьянская жена Стефанида Елеферьева, объявляла, что она сего ж семъсот сорок шестаго года февраля месяца была в великой болезни, и против десятаго числа сего февраля в ночи во сне якобы пошла в город Кашин, и пришла в соборную церков помолитися благоверной княгине Анне. И пришед в церков, видит, якобы святыя мощи благоверныя княгини Анны двигнулися, и ста гроб ея среди церкви, и открыся гроб благоверныя, и воста из гроба преподобная княгиня Анна, и седе на гробе, и глагола священнику: «Подай мне скляницу». И священник принес болшую скляницу, и в склянице масло от лампады ея и перо гусиное. «И принявши скляницу, глагола мне: „Прииди ко мне”. И как я подошла, то взяла благоверная перо из скляницы и помаза мне грудь, и повеле приложитися мне к правой ноге к болшему персту к подошве. И как я приложилася, то зделалась здрава и молитвами преподобныя благоверныя княгини-инокини Анны, яко николиже боле».

Примеч. Сюда же относится чудо нынешняго времени о прекращении холеры в Кашине после крестнаго хождения с иконою Анны благоверныя, издревле находящеюся в кашин. соборе и слывущей у всех в Кашине чудотворною. О сем значится в особом историческом изследовании г. Прудникова, бывшего в благоразсмотрении Св. Синода и признанным благонамеренным и основательным.