Тлумачальны слоўнік па інфарматыцы

Я

Ядрó (kernel) — аснова АС, менавіта тая яе частка, якая кіруе памяццю, аперацыямі з файламі і перыферыйнымі прыладамі, адсочвае час і дату, запускае прыкладныя праграмы і размяркоўвае рэсурсы сістэмы.

Ядрó бяспéкі (security kernel) — ядро бяспекі аперацыйнай сістэмы, абароненае ад несанкцыяванага выкарыстання. Гл. ядро.

Ядрó прагрáмы (core program) — гл. рэзідэнтная праграма.

Яркасць (brightness) — успрымальная характарыстыка выпраменьвання альбо аб’екта. Яркасць — змесціва белага колеру ў гэтым колеры: 0% адпавядае чорнаму колеру, а 100% — беламу.

Ярлык (shortcut) — невялікі файл, які ўказвае на другі аб’ект (файл, праграму, каталог) значна большага памеру і які размешчаны ў другім месцы (на другім дыску, на другім кампутары). З дапамогай ярлыка можна хутка адчыніць аб’ект, на які ён ўказвае.

Ячэйка 1. (cell) — у таблічных працэсарах: адрасаваны абсяг аператыўнай памяці, якая акрэслена перасячэннем слупка і радка электроннай табліцы. Кожная ячэйка мае свой унікальны адрас. 2. (location, cell) — мінімальны абсяг памяці, які магчыма адрасаваць.

Ячэйка пáмяці (storage location) — мінімальны адрасавальны абсяг памяці для захоўвання асобнага элемента звестак (машыннага слова альбо яго часткі); мінімальны абсяг памяці, які магчыма адрасаваць.

Ячэйка сімвала (character cell) — прамавуглавы блок пікселяў, якія ўтвараюць абсяг адлюстравання сімвала на экране.

Ячэйка двайкóвая (binary cell) — двайковы элемент; элемент памяці для запамінання адной двайковай лічбы.

Ячэйка рабóчая (working cell) — ячэйка асноўнай памяці для размяшчэння прамежкавых звестак прыкладной праграмай.

Ячэйка магнітнай стýжкі (magnetic cell) — элемент памяці, у якім інфармацыя прадстаўляецца двума супрацьлеглымі станамі намагнічанасці, і які здольны запомніць інфармацыю і забяспечыць яе счытванне.

Ячэйка абарóненая (protected location) — ячэйка памяці для спецыяльных мэтаў. У яе інфармацыя запісваецца толькі пасля праверкі дапушчальнасці запісу.