Библиотека литературы Древней Руси. Том 13 (XVI век)

ОРИГИНАЛ

Благослови, отче![29]

Бысть въ дни благочестиваго великого князя Василия Васильевича Володимерьскаго и Московскаго и великого князя Бориса Александровича Тверьскаго, и великого князя Феодора Резанскаго Олговича в лето 6 тысяч девятсотъ 44-е; архиерейскый престолъ правящу тогда некоему от грекъ Фотию митрополиту и в Новегороде съдержащу престолъ архиепископу Ифимию Брадатому.[30]

Бе во едином от манастырей Белозерскых Кирилов именуем,[31] ту бо бе пребывая и прежде реченный Саватие, егоже выше рекохом. А иже града или веси родителю его пребываниа, невемы известно, многа бо лета прешла суть да написаниа сего, и не возмогохом обрести, коликыми леты възраста своего вниде во образ иноческаго жития. Нъ точию обретохом от боголюбивых мужий и бесед духовных от приходящих инок острова того, и о них испытах вмале беседами в ползу душевную хотящиим спасениа душам своим и сих ревновати по Бозе добродетелному житию, якоже сей жителствуя въ предреченной обители сь пребывающими тамо мнихи и съодолев вся послушаниемь къ игумену и всему еже о Христе братству в заповеданных ему службах, к сему же многим въздержанием и пощениемь изнуряше тело свое и съодолеваще страстемъ, купно же и всем съличным четам бесовъскым и самому дьяволу не малу язву наложи.

Любим же бе и славим от всех тамо пребывающих инок и от самого игумена обители тоя за премногое его послушание и кротость и смирение; от всех почитаем бяше яко быти ему образ всем тамо пребывающим въ всех добродетелех и исправлениих житиа. И начат стужати си, глаголя: «Славу от человекь приемлюще, а славы, яже от единого Бога, не ищете».[32] Многа бо лета имый в манастыри оном и тщася в лучшия преходити[33] житием блаженый Саватие — по глаголещему пророку: «въсхожениа в сердци си полагая юдоль плачевну на месте, идеже положи, ибо благословение дасть Закон Даяй, и пойдут от силы в силу».[34]

Начатъ же молити игумена живущими ту братиями и собою, дабы отпущенъ был съ благословением. Слышал бо бе от некых пришелцевъ, глаголющих сице: «Есть озеро в Ноугородцкой области, глаголемо Ладожьское, и на том озере — остров, рекомый Валам.[35] На острове же томь бяше манастырь Господа нашего Исус Христа Преображение. И тамо иноци имуще неослабно житие, тружающеся и делающе своими руками, и от таковаго труда пищу нужную приимаху, пениа же и молитвы беспрестани к Богу приносяще». От слуха же того уверився раб Божий Саватие и много в желание боголюбно таковаго помысла прииде во еже быти ему тамо.

Не по мнозе же времени и получи желание свое. По некоему Божию смотрению прииде в манастырь онъ, рекомый Святаго Спаса иже на Валаме, и приатъ бысть игуменом и братиею манастыря того. Пребываше же ту съ братиею, тружаяся и къ трудом труды прилагааше; и бе любим всеми. И пребыв тамо немало время и добре устрояя заповеданныя ему службы въ обители той съ всяцем смирениемъ и многим терпением и кротостию зелною. Не довле бо ему таковаго труда подвига еже изнурити тело и весма плоть поработити духу. Истнив бо сию до конца, жилище явися Святаго Духа.

Видевъ же игумен и братиа обители тоя в таковем устроении толика времени неуклонно въ трудех пребывающа и тако дивишася и реша в себе: «Что убо сътворим, яко видим тако сего подвизающася, а ничтоже вещающа, но съ всяцем тщанием зело, яко раб некий без искупа работаша зде без всякого прекословиа. Воистинну раб есть Божий и велик делатель заповедей Его».

Внят же се слухом словеса сиа блаженый Саватие и тяжко вменив, бе бо отнюдь ненавидя похвалы человеческыя. И рече к себе: «Что сътворю? Которому разумению вдамся? Азъ бо за грехи моя предах себе прародителска осуждениа, иже в раи. Сам бо Владыко Христос нам сей образ положи и подписание: богат сый нас ради обнища, да мы его нищетою обогатимся.[36] Сиа повелениа и заповеди его, ихъ же подобааше хранити яко же мощно, рече бо пречистыми своими усты: „Иже кто хощет по Мне ити, да възмет крестъ свой и последует Мне”.[37] Лучше ми есть отлучитися от пребываниа места сего, нежели честь приимати и похвалы и покой подобных мне человек — и всуе труд мой будет, да никако тело изнурив мъзды лешен буду!» Не бо можаше град укрытися верху горы стоя,[38] но зрим бяше от всех, сице и добродетелных мужий богоугодное житие не возможет утаитися; въпиют к Господу втайне, и Бог творит тех явленны, рече бо: «Славящая Мя прославлю».[39]

Снедааше же ся утробою блаженный Саватие, видя себе почитаема от игумена и всей братии, и помышляаше безмолвиа путь гонити. Слышал бо бе от живущих ту о острове, рекомем Соловкы, в мори акиана сказовашеся. Отстоит же от земли яко два дни шествиа имяше. Глаголют, округ его яко верстъ сто или множае, а вдоль биаше острова того яко тридесять верстъ. Имяше же посреди себе езера многи, и рыбы разны образы множество в них беху по родом ихъ, а не морьскыя. А иже в мори округ его ловитвы рыб, то беху морьскыя рыбы. Преплаваху же с брега морьскаго населници ловитвы ради рыбныя и звъри морьскаго ловци, кождо их с добытки отхождаху в домы своя. Островъ же той древесы разными цветяше и бориемъ верси горам покровени, и по раздолиамъ всяко древеса имяше и ягодичиа многа разны бяху, и сосниа древеса велиа бяху к созиданию храмов — и на вся потребы благоустроен бе. Есть же доброугоден к сожитию человеческому по всему, въ еже хотящим пребывати тамо.

Преподобный же Саватие, слышав сиа, сердечною уязвися безмолвиа любовнию, въ еже ити ему тамо, поминая в себе речениа псаломская: «Се удалихся бегая и водворихся в пустыни, чаях Бога, спасающаго мя».[40] И начат с молением проситися у игумена и всей братии, да его бы съ благословением отпустили на взыскание острова того. Сим же нимало послабевшим приати оного моление, не въсхотеша пустити его ради добродетелнаго житиа, поразумеша бо о нем, яко истинен раб Божии есть, образом и делом превелик устав сим проувидеся, сего ради немалу тщету себе вменяху быти отшествие праведнаго. Сему же сердцемъ распалающуся поити в желаемое место, Богом изволеный покой, и рещи съ Давыдомъ: «Сей покой мой, зде вселюся, обратися душа моя в покой твой, яко благоизволи тебе Богъ».[41] И пребысть еще мало некое время и помышляаше в себе, како бы ему достигнути остров он.

Но понеже не возможе умолити игумена и братии обители тоя, дабы его отпустили съ молитвою и благословениемъ, но възложи себе на Божию волю, рекъ: «Якоже годе Господеви, тако и буди, благословено имя Господне отныне и до века». И знаменася крестным знамением, глаголя: «Господи Исусе Христе Боже, Сыне и Слово Отчее, родивыйся от Отца превечна прежде всех векъ и послежде от Пречистыя Девы Богородица въплотися непреложно, неизреченно рожество имея на небеси, горе, и несказанно на земли сшествие! Владыко, не пришел еси спасти спасаемых, но призвати грешных в покаяние![42] Настави мя, Господи, на путь, в онже пойду, яко к тебевзяхдушу мою,[43] и спася мя, уповающаго на Тя!»[44] И тако утаився от всех, нощию изыде из манастыря, нося молитвы отеческыя, възложив себе на Божию волю. Исторжеся якоже птица от пругла и яко серна от тенета,[45] — и рад бысть зело.

И тако изыде блаженый Саватие, распалаем любовию безмолвиа, начат гонити шествие долгаго пути; бяше бо разстояние от Валамскаго манастыря до брега морьскаго яко седмьсот версть или и множае. Шествуя, Богу помогающу, храним бе действом Святаго Духа и направляем даже и до моря благодатию Христовою.

И начат въпрашати живущих ту близ моря о состоянии месту и колико отстоит от брега в мори Соловецской остров. Начаша же ему поведати населници местнии, иже прямо острова того живущеи, есть убо остров той в мори отстояй от брега не близ суще, но яко двема деньма въ благолучныи ветри едва достизают в плавании. Блаженому же Саватию съ многым прилежаниемь въпрашающу их подробну: каков величеством и о древесех и о сладкыхъ водах и о всяком устроении.

Они же жителие поразумеша мысль блаженнаго, что ради толико прилежно въпрашаеть, яко хощеть тамо вселитися. Реша же к нему: «О старче, остров онъ велик есть и всяческы угоден ко устроению человечьскаго житиа имать быти. Мнози бо от мног лет тамо вселитися хотеша и невозмогоша людие сожительствовати страхованиа ради морскыа нужда». Друзии же глаголаху: «Еще тя зримь, о мнише, въ всяцемъ убожестве и нищете, то чим имаши питатися или одежда имети?» В сицевых сединах многолетных бяше, яко ничтоже могыи тружатися, еже хотяше быти ко устроению человечьскаго житиа, а страна сиа хладна беяше. Рече же преподобный Саватие: «Азъ убо, о чада, такова имам владыку, Христа Сына Божиа, укрепляющаго мя, естество старости юностно творяща и младенцам до старости съвръшеный возрастъ подающа, убогих обогащающа, алчныа насыщающа, нагиа одеюща. Всеведець бо есть всем, вся строя на ползу боящимся Его и хранящим заповеди Его. Некогда бо ему пятью хлеб 5000 народа насытившу,[46] разве жен, и дванадесять кошниць укрух избытка ученикомъ събравшем. И пакы седмью хлеб 4000 насытившу[47] — и седмь кошниць взяша; иногда воду вино сътворша».[48]

Человеци же они слышавше глаголемая святым, имущей разум дивляхуся Божию человеколюбию и святаго премудрости учениа, овии же, не имущеи смысла блага, ругахуся и понашахут ему, яко не имущу смысла. Он же наипаче възлюби а и непрестанно глаголя Божия чюдеса. По сих же, помышляа в себе реченное Давидомъ: «Възверзи на Господа печаль твою и Той тя препитает в векы»,[49] и сътвори молитву и благословивь их и миръ дав, отиде в путь свой, радуяся, яко обрете желаемое.

И прииде на реку Выг, место бо наричемо Сорока.[50] Ту бо бяше храм молитвеный, завомый чясовня. И обрете тамо некоего мниха, выше мененаго, именем Германа, бяше бо сей родом корелскых людей. И сътворше молитву, седоста. Начат же его блаженый въпрашати с тихостию о месте острова оного и о шествии путном къ острову. Герман же поведа ему все известно, якоже и прежнии и яко самовидец бяше острова того. И съвет сътвориша не токмо допроводити его тамо, но и съжителствовати с ним на острове Соловецком.

И по мале времени начаста путное шествие творити по морю, седши въ малу ладиицу, иже глаголеться карбас,[51] и по Божию смотрению плаванию бывшу благополучну, Богу съхраняющу своих раб. И въ третий день достигоша острова Соловецского. Блаженый же Саватие възрадовася радостию виликою, яко не презре Богъ молениа его!

Изыдоста на сухо и ту поставиша шатеръ; и сътворша молитву, въдрузиста крестъ на месте том, идеже достигоша пристанища. И начаста шествовати по острову смотряюще семо и овамо, где бы хижица въдрузити себе къ упокоению. Видевше же место некое стройно и начаста здати келиа себе близ езера, малым отстояща от моря яко поприще едино. Бе же над езером тем гора превысока зело.[52]

Рабъ же Божий Саватие с подругом си Германом начаста здати келиа себе близ моря и езера — и съвершиста въскоре благодатию Христовою. Начат же преподобный усердно кь трудом труды прилагати, разжегся теплотою духа, яко желание сердца своего получив, и радуяся. К вышним умъ свой вперяя,[53] плоть духови повинуя, вдаваашеся на всенощная стояниа и молитвы беспрестанныя, поучаяся присно въ псалмех и пениих духовных, поя Господеви въ сердци своем:[54] «На тя бо, Господи, упова душа моя,[55] и помощник ми бысть».[56]

И тако тружахуся с подругом своим Германом, землю копающе мотыками, и тем питахуся. Нужную пищу приимаху и «в поте лица, по глаголющему, снедааху хлеб свой».[57] И бе Богъ питая их съ мнозем обилием.

Увидевши же то мужие живущеи по брегу моря, яко вселишася иноци на остров Соловецскый; и населници прямо острова того начаша завидети им и восхотеста изгнати их со острова, глаголюще сице: «Мы паче ближае всех земля Корелскыя сроднии наследници острова сего. Начнем имети в наследие по отечеству себе и чадом нашим и въ прочаа лета родов наших, а сих пришелцев изгоним от места того». И съвещавшеся, послаша единого от житель корелскых людей с женою и чады.

Той же прииде на остров по съвещанию съсед своих; и начаста здати храмы, яко же бы мощно житие имети, и по езером начаша ловити рыбы. Преподобному же Саватию не ведущу техъ пришествиа на остров, ни подругу его Герману.

Прилучи же ся в день воскресениа, дни свитающу, святому же поющу заутренюю и въ время исшедшу ему ис келиа покадити Честный Крестъ, иже и бе въдрузилъ близъ келия своея поклонениа ради,[58] и слыша глас и вопль велик вопиющь, моляся. И бысть въ удивлении и в ужасе от гласа вопля того, и възва Германа ис келиа, рече: «Что, яко слышу глас вопля человеческаго?» Он же рече: «Откуда бе таковый глас слышашеся, а не имущим жития человеком, разве нас?» И знаменавшеся крестным знамениемъ, отидоша в келию, дивяшеся глаголаху: «Что се бысть? Откуду бе таковъ гласъ?» И кончаста утренюю, сътворша молитву. Гласу же паки болма слышащуся. Германъ же приимъ благословение от святаго и поиде на глас той.

Пришедшу же ему, обрете жену лежащу и плачющу с воплем. Герман же въпрашаше вины плача ея: «Что ти бысть, жено, почто плачеши кричащи?» Она же съ многым въсклицаниемь начат поведати, сице глаголющи: «Господине отче! Идущу ми на езеро к мужу своему, и срътоста мя два юноши страшна образом свътла зело и начаста мя бити дубци, глаголюще: „Изыдета скоро от острава сего, вам бо не достоит жити зде! Но благоволи Богъ на пребывание иноческого чина устроену быти месту сему! Вы же скорее отидете отсуду, да не како злою смертию погыбнете! Сие же место иноческое жительство будеть отселе, да съберутся ту множество иноческых чина, и да прославляеться от них имя Божие на месте семь, и храм во имя Исусъ Христа възъдвигнется!” И тако невидима быша».

Герман же, слышав сие, отиде от неа, скоро възвратися кь старцу Саватию и сказавъ ему вся пореду, еже слыша. И тако поразумеша от Бога хотящую быти благодать на острове том. И от того времене никтоже смея дерзнути от человекъ мирьскых приближатися ко острову тому жити. Преподобный же, слышав от Германа, въстав, прослезися и съкрушеным сердцемь общу хвалу въздаша Господеви и Пречистей Его Матери съ многым благодарением. Начаша жити на месте том въ всяцех трудех и злостраданиих мнозех.

По летех же неколикых Герману обычное благословение испросившу от святаго, еже отити на брег моря и на Онегу реку некыя ради потребы. И тамо отшед, умедли. Старцу же Саватию единому оставшу на острове и пребывающу много времени. И сперва убо мыслию поскорбе о отшествии Германове, и по сих нача болма простиратися на подвиг и, слезами на всяк день постелю омокая, псаломскы рече: «Господи, Боже мой, на Тя уповах, спаси мя![59] Яко к Тебе взях душю мою[60] от юности моея, и не лиши мене, от мног лет въжделевша места сего святаго!»

Видевшие же нечистии дуси себе утесняеми и страдалца крепко оружием крестным утвердившася, начаша досады многы и страшилища творити и сподвигошася на нь всею силою. Приидоша, воображахуся овии въ змиа, инии же в различныа зверя дивия, поглотити хотяше. Святый же оградився крестным знамением и начатъ пети: «Да въскреснетъ Богъ и разыдутся врази Его!»[61] И скончавъ весь псаломъ, и тако вси лукавых козни без вести быша. И тако святый пребысть без вреда, день же и нощь всегда пребываа в молитвах безпрестани.

Герману же пришедшу на осень къ брегу морьскому, хотящу шествиа творити на остров Соловецькый, и не возможе, бе бо воздухъ хладен, и ветри противни, и снегове мнози, и бяше въ мори велико волнение. И пакы възвратися на Онегу озимети. Въ второе же лето хотяше ити в путь свой взыскати старца, и бе обият болезнию на многа времена, и пакы не возможе шествовати, к нему же желааше.

Преподобный же Саватий, стоя на обычном своем правиле[62] и единъ къ единому Богови беседуа в молитвах, и приим извещение от Бога, еже отрешитися съюзъ плотскых и отити к Господу, егоже от юности въжделе. И начатъ молитися, сице глаголя: «Господи Боже, Вседръжителю, услыши мя, Человеколюбче, не презри молитву недостойнаго раба своего! Сподоби мя быти причастника Пречистых и Животворящих Тайнъ Пречистаго Ти Тела и Всечестныа Крове Твоея, Господа моего Исуса Христа, юже нас ради пролия! Понеже бо много времена лишен бых сего сладкого просвещениа, якоже с Валаама изыдох и пребых во острове сем».

Святый же по молитве изыде на брег острова к морю и обрете карбас на брезе съ всяцемь устроением, якоже мощно быти плаванию. И уразумъв бывшее Божие смотрение, не възвратися в келью, но седе в карбас, поиде шествие творя по морю, аможе Богъ наставит й обрести желаемое.

Бывшу же стройну плаванию: бысть в мори тишина велиа, ветру тонку дыхающу. Блаженый же моляшеся, глаголя: «О Владыко, Ты утвердил еси силою твоею море,[63] възмущение же волны его Ты укращаеши».[64] И тако сохраняемъ Божьею благодатию, въскоре преплу пучину морскую, яко единем днем, на Выгънаволокъ.[65] И обрете ту игумена именем Нафонаила[66] на Выгу-реце у часовни, пришедше тамо посещения ради православных християн. И яко узре его блаженый Саватие, возрадовася духом и рече: «Величит душа моя Господа,[67] яко на презре молениа моего Благыи!» И, сотворше молитву, лобызааше друг друга святым целованием, и един от единого просяше благословения. Посем рече преподобный Саватие: «Подобает убо тебе, о священный отче, благословити наше смирение, понеже сподобися просвещениа благодати Святаго Духа, приимь великый чинъ священьства вязати и решати согрешающая,[68] ими же и нашу худость просветити и направити к Божиим повелением и святых заповедей хранению».

Поразумев же игуменъ Нафонаилъ Божиа раба суща старца и рече: «Кто ты еси, отче? И откуду? И камо идеши?» Отвещав же, блаженныи рече к нему: «Азъ, о отче святый, многрешный Саватие нарицаюся, живях в некоем островов сих морьскых, страны сея имый пребывание. И пребых неколико лет, работаа Господеви. И имех с собою брата именем Германа, и се второе лето, якоже отиде от мене со острова, и не вем, что случися ему. Аз же, грешный, молих Господа Бога о сем, да мя сподобить Пречистых Тайнъ причастия, поразумех бо, яко ошествие мое приближися, и не вем дне скончаниа моего. И се Божья благодать настави мя приити до тебе. И ныне молю свою святость, да отимеши грехы моя от мене честнымь исповеданием. И аще Богъ благоволит и твое священьство, да мя сподобиши быти причастника Святых и Животворящих Тайнъ Причистаго Тела и Честныа Крови Владыкы Христа и Бога моего, от много бо лет желаю напитатися душепитателною сею пищею! Ныне же человеколюбець Богъ объяви ми твое боголюбье чистителя душам и врача, да оцестиши мя от согрешениих, яже согреших от юности моеа, словом и делом и помышлением, отнележе родихся, даже и доднесь».

И отвеща игумен преподобному Саватию: «Богъ да простит ти, отче святый, мною, недостойным рабом своим!» И на небо возведе очи свои, глаголаше: «О колико имать Господь съкровеных рабъ, имьже не бе достоинъ весь мир!»[69] И надолзе стоя, дивяся, взирая к преподобному и съ слезами глаголаше: «Да бых аз имел грехы твоя, отче, въ оцищение моего недостоинъства!»

И намнозе рад бых игуменъ, яко видению блаженаго Саватиа сподобися и слышав от него богодухновеная словеса. Бе бо многа слава о немъ добродетелнаго ради житиа его. Тогда глагола преподобный къ игумену: «Отче святый, время уже настоит: концу приближающуся моего житиа; молюся твоей святыни, да подаси ми комкание пречистаго бисера — Тела и Крове Господа нашего Исуса Христа! Да не умедлиши нимало!»

Игумен же глагола ему тако: «Да идеши ты, господи мой Саватие, на Выг-реку к часовне и пождеши мене. Аз же скоро заутра възвращюся к тебе». И прииде бо в то время некый человекь по игумена от населных тамо живущих, сказуа человека тяжка боляща и желающа отца духовнаго. Блаженый же Саватие глагола ему яже о себе: «Како же убо, отче духовный, не отлагай до заутра въ еже сподобити мене Божественных Тайнъ причастия! Не убо вемы, аще съберемь духа от въздуха дыханиа до заутра». Прорече же й исхождение свое. «А иже речеши ми на Выг-реку к часовне, иду, а по сих сключившихся, не вем, что будеть, понеже сила моя в немощи совершается».[70]

Игуменъ же познает раба Божиа; и слышавъ известно от него о исшествии ис телесе и том часе причасти его Пречистых и Животворящих Тайн Тела и Крове Христа Бога нашего. И давъ ему целование, отпусти и рекъ: «Молю, рабе Божии, да пождеши мя при часовне на Выгу». Святый же отвеща: «Аще Богъ повелит, всяко имамь преждати тя при часовне, — якоже тъи самь рече Владыка Христос: „Небо и земля мимоидеть, а словеса моя не преидут”».[71] Игумен же отоиде на присещение болнаго оного, егоже прежде рекохом, и тщашеся скоро возвратись къ блаженому.

Саватие же прииде на реченое от Бога место на Выг к часовне, и радостию великою возрадовася, яко сподобися Пречестных Тайнъ причастия. И вшед в часовню, помолився на мног час, хвалу възсылая Господеви и Его Пречистей Матери Богородици. И отоиде в кельицу, затвори себе, и тамо молитвы безпрестани въздая Богови, готовляшеся к вечному шествию.

В то же время прииде некый купець из Новаграда, иды в насаде,[72] именем Иоаннь. И пришед из насада, вниде в часовню поклонениа ради святых иконъ — образа Господа нашего Исуса Христа и Пречистыа Его Матере и иных святых икон, обретшихся тамо. И прииде в келью блаженнаго Саватиа, въсхоте благословитися от него. Старець же отверзъ двери келиа и приат его.

Муж же той боголюбив сый, и бе богатство имея много, и рабы, и рабыня, и принесе милостыня. Старець же не въсхоте взяти. Купець же много молив старца, дабы что взял от руку его: одежда или пища, или сребреница. И отречеся блаженый, едино рек ему: «Аще хощеши творити милостыня, то имате требующих». И поучив его доволно о милостини, о любви и целомудрии, и о милосердии домочадець, и о заступлении вдовиць и сиротах, и о прочей ползи душевней — и благословивъ, отпусти и́.

Иоан же отиде, зело скорбя о сем, яко не приятъ от него святый ничтоже, и тщету велию вменив си, бе бо любя иноческы чинъ. Блаженый же проувидевъ о сем, что ради прискорбен бысть, и възва и́, глаголя: «Не скорби, чадо Иоанне, но послушай мене. Препочи на брезе до утра — и узриши благодать Божию быти хотящую. И въ утреи безтрудным плаванием отидеши в путь свой».

И по малем времени бысть буря велиа, и громи, и молния, и трус велик бысть в мори и в реце чрез всю нощь. Иоанн же, видевъ пременение въздуха, и волнение морьское и речное устремление, по пророчеству старца, и ужасеся зело: восхотев бо ити и не возможе. И, приимъ благословение старче, отиде в шатеръ свой и препочи в нощи ту.

Святый же беспрестани поя и моляся всю нощь, исходныа молитвы всылаа ко Владыце Христу. И кадилницу въсприимъ, и фимиянъ на углие възложи, и отшед в часовню. И тамо доволно молитвовав, отиде в келью. И покадивъ святыа иконы, съвершив молитвы Господеви, и поне вмале изнеможе, и седе на обычном месте келия, кадильницу же особь по стране себе постави. И руце въздвигь горе, и рече: «Господи, в руце Твои предаю духъ мой».[73] И тако предасть блаженую свою душу в руце Божии, и в безславии славы о Бозе словый славне изыде.[74]

Утру же бывшу, въздух на тихость преложися и светлость солнечная въсия. Прииде Иоаннъ в часовню поклонитися образом святых икон, и по сем къ келии приходить преподобнаго, хотя от него благословениа прияти и отити в путь свой. И сътворь молитву, и не бысть гласа.[75] И пакы сътворивъ молитву, не бе гласа ни послушаниа.[76] И бе толкый вь двери — и отверзошася. Он же, сотворь молитву, вниде в келью — и слыша велие благовоние, а святаго седяща, и ужасеся, мня его жива суща. И глагола к старцу: «Отдай же ми, отче честный, яко дерзностне внидохъ к тебе, многою верою обьдержим кь твоей святости, понеже не смею отити в путь свой не приим благословениа от тебе». И стояше пред святым, а ответа никоегоже слыша от него.

В мантии[77] бо и куколе[78] седяше блаженый, и кадилница стояше въскраи его. Келия же бе исполнь благоуханиа неизреченаго. И приступль, рече: «Благослови, отче Саватие, к путному шествию раба своего». Та же приник и видев его о Господе скончавшася.

И стоя помышляя, в себе глаголаше, взирая ко образу Господня иконы: «О Владыко Господи,что сотворю? Которому разумению вдамся? Аще оставлю мощи преподобнаго сего без управлениа, то боюся, Милостиве, а прикоснутися не смею святаго телеси его недостойныма рукама своима, да некако что бедно постражу за недостоинъство мое!» И помену в себе слово Господне, глаголюща кровоточивей: «Вера твоя спасеть тя».[79] И дерзнув с верою велиею, приступив, взять и, възложи на раме свои, яко легкый ерем Христовъ,[80] отнесе и положи посреде часовни и, лобзавь со слезами, изыде.

И в той час прииде игумен Нафанаил к чясовне. Изьявил бо бяше преподобный исход свой от телесе тогда, егда комкаше от руку его Пречистых Тайн Тела и Крове Господа нашего Исусъ Христа! И облобызав честныя мощи со слезами, и начат въпрашати купца о преставлении святаго. Он же сказав вся известно о блаженнем: како прииде прежде еще ему живу сущу; и о всех полезных богодуховных словес, яже наказая и́ учише; и о хотящем быти наказании от Господа — въздуха пременении — како прорече; и како виде его и по преставлении седяще, яко жива.

Игумен же въздохнувъ из глубины сердца, рече: «Слава тебе, Боже, прославляющему святых своих!»[81] И тако, съ псалмы и песнми, честне погребоша святыя мощи преподобнаго Саватия, вдавше персть персти, месяца септеврия в 27,[82] славяще Христа Бога.

По погребении же преподобнаго седоста оба вкупе, Иоан же и игумен, и рече игумен: «Веси ли, Иване, какыя благодати сподобихомься от владыкы Христа, такова свята мужа послужихом погребению?» И начатъ поведати ему о житии святаго на острове и о пришествии со острова, како единъ по морю плавание творя, и яже слыше от устъ блаженаго. Онъ же начат дивитися, глаголя: «Въистинну, господине отче, мене недостойнаго много наказа от Божественых Писании, како жити подобает православному християнину и имети чистоту и целомудрие и милость к ближнему; и како прорече ми святая уста его хотящее быти божие наказание и человеколюбие? И аще бых уведелъ честное его преставление, то никакоже бых отступил от келья сея! Но и о семь благодарю всемилостиваго Бога, яко сподоби мя видети преставльшася земнаго аггела, а небеснаго человека яко жива седяща, и по преставлении, отнести в часовню честныя и трудолюбныя его мощи!» И дасть игумену милостыню доволну.

И тако, чюдящеся, воздаша хвалу Богови, творящему дивная чюдеса святыми своими угодникы, «ихже око не виде и ухо не слыша и на сердце любострастнаго не взыде, яже уготова Богъ любящимь Его».[83]

И разыдошася кождо восвоя, носящи яко съкровище многоценно[84] в домы своя молитвы святаго Саватиа, славяще святую Троицу: Отца и Сына и Святаго Духа, ныне и присно и в веки веком. Аминь.

Благослови отче!

По преставлении же блаженнаго Саватиа минувшу единому лету,[85] хотя Человеколюбец Богъ въздвигнути место оно, да в незабвении труди угодника его изъостанут. И въсхоте болма прославити, идеже преподобный Саватий лета многа препроводивь[86] житиемь чюдным и трудолюбным пребываниемь въ острове Соловецком, якоже преди речеся, по аггельскому речению яже рекоша к жене: «Сие место благоволи Богъ селение иноческаго жития быти». И тако судбамъ Божиимъ изволися и молитвами присвятыа Богородица въздвигнути место то.

Бе некый муж от тамо живущих, в веси Шунга[87] нарицаемо, именем Зосима. Сьй бяше благочестиву и богату родителю сынъ,[88] и измлада възраста нравъ имея аггелъ, детьскых глумлений ошаяшеся отнюд. Прежде бо беста родителя его имуща житие в Великом Новегороде, и тако вселистася въ оной веси близъ моря. Ту убо хотяста житие имети — яко двесте верстъ от моря или множае, тамо бо хотяше Богъ прославити угодника своего.

Тъй отвержеся мира и бысть мних.[89] И желааше места пустыннаго, еже уединитися и единъ единому Богу беседовати въ молитвах, «якоже желает елень на источникы водныя».[90] И помышляаше в себе, глаголя: «Како азъ и еще сыи исполу, вмале отвержение мира сътворих — словом, писано есть: „не словесемь отвержения мьзды даются, но делателем”,[91] а „не послушници закона спасаються, но творци”.[92] Родителем всегда пред очима моима и всем ближникомь по плоти, другом же и знаемым, и съобращаяся посреди их, — что же есть мое отвержение от мира? Писано бо есть: „Не любите мира и яже в нем”,[93] не бо есть мощно единем окомь зрети на небо, а другимь на землю,[94] ни пакы „единому рабу двема господинома работати, любо единаго възлюбит, а другаго възненавидит, или единаго держится, а о друзем же нерадити начнеть, сиреч, Богу работати и мамоне”».[95] Сия помышляющу рабу Божию Зосиме всегда вь сердци своемь — и разгараашеся на любовь Божию по вся дни и нощи, како бы отлучитися от мира, и прилагаше любовь к любви и огнь ко огню и искаше спомогающаго ему въ духовный подвиг.

Таже по мале времени по Божию смотрению прилучися обрести Зосиме прежереченнаго раба Божия старца Германа, иже бе преже съжительствовавый съ блаженным Саватием на томъ Соловецком острове. И начаста беседовати к себе духовне друг къ другу. Герман же начат поведати ему о блаженнем Саватии: како подвизася въ острове Соловецком, и како, ему отшедшю съ острова, блаженый подвиг течения съвершивъ на брезе морстемь.

Зосима же, слышав беседу о святем и о состоянии острова и угодных местех къ устрою манастыря: иже делныя земля, и древа к създанию храмов, и многы езера с рыбами, и морских рыбъ ловитвы — и слышав сие Зосима от Германа, радовашеся духомь, и рече в себе, очи возвед на небо, глаголя: «Господи, Владыко Человеколюбче, постави мя на путь, в он же пойду,[96] и како спасуся, Милостиве!» И тако просветишася ему очи сердечнеи;[97] начат съветъ творити о путном шестьвии по морю с Германом, како бы достигнути Соловецкаго острова. Рече к Герману: «Давидъ Богоотець[98] в песнех рече: „Въпроси бо, рече, отца твоего — и възвестит тебе, и старца твоя — и рекут тебе”»;[99] и открываше Зосима Герману тайная сердца своего, не бо терпяше скрытися Божия веления съкровище; яже Богъ благоволи, сих человекъ преложити не можеть. Понеже бо яко огнь възгореся вь сердци блаженнаго Зосимы от великаго желания. И тако съ многим тщаниемъ устраяетъ к морю хотящаго ему путнаго шествия. Съвосприемлеть же с собою и Германа и вся потребная ко устрою местному.

В та же времяна отець его, болезнию огненою обьятъ быв, отиде к Господу. Мати же его оста вдовьствующи. Он же съ многыми слезами и псалмопением честне погребе отца своего, — и приходит в дом отчий, съвещая съветъ благъ своей родителници, глаголющи ей: «Госпоже моя мати, Богу тако изволившу — твоего супруга, а моего отца отшествие. Богу изволившу тако. Не вся ли прах, не все ли пепелъ?»[100] Она же, повинувшися всей быти воли его, рече: «Якоже повелиши, чадо, никако же преслушаю тебе ни в чем же». И тако блаженый съвещавает оставити дом и имение, отити тамо близ сущи девическый манастырь и прияти великий аггельскый образ. Мати же, все сътворив по воли его, отиде в манастырь и вся остави, якоже годе бысть ему. И тако блаженный, расточив вся имения своя убогим и родитель своих вся жителства домовная раздавъ нищим, рабы же и рабыня вся свободи и достойную часть имения подаде им. Сам же на предняя подвигы възвращается, пакы второе отвержение мира сътворяет[101] (первее — родителей и сродникъ по плоти, пища и всех красных мира): рода и отечества и всех знаемых удаление.[102]

И приходить на прежереченное место к Герману и, вся устроивъ к морскому плаванию, таже пути касаются, по морю шествие творяще. И тако, Божиим строением, ветру пособну дыхающу, въ вторый день достизаютъ острова Соловецскаго. И поставиша карбасъ въ пристанищи, сам же въсходить на островь с Германом предиреченым. И начатъ блаженый Зосима обходити места острова того, помышляаше в себе, где бы на коемь месте манастырю здатися подобно, аще Богъ изволить и Пречистая Богородица. Обрете же место ко устроению, доволно на вмещение обители и зело изрядно и прекрасно, да и езеро близ над моремъ, яко единем стрелениемь вдалее, и пристанище моря тихо и невлаемо.[103] Ту бо бе и ловитва рыбамъ морьскым. И на том месте поставиша шатеръ свой и в нем пребыша, всю нощь бдяще и молящеся, поюще псаломьская пнения съ многою верою къ Христу Богу и Пречистей Его Матери и всею духовною любовию друг къ другу.

Утру же бывшу, изшедшу блаженному Зосиме из шатра, явльшуся ему некоему страшну видению: лучю пресветлу, просвещающу его, и осиянию Божественому осиявшу место оно. И ужас нападе на нь от таковаго видения; и зрит кь востоку церковь превелику зело, пречюдну, простерту на воздусе стоящу. И от таковаго видения страшнаго изменися образом, и прииде кь Герману, и начатъ поведати видение.

Он же възревъ на нь, и виде изменена лицемъ, и поразуме, понеже тъй мудръ бе и искусенъ от многолетнаго чернечества и добраго жития. И въпроси его: «Что ти бысть, о любимый? Егда что приключи ти ся, или зрак, или вид некый възмяте сердце и душю твою?» Зосима же изрече ему все подробну: яже виде неизреченный он светъ и церковь прекрасну. Герман же ражжеся духомь и рече: «Дерзай, любимый, тебе убо благоволи Богъ на место сие! То же и азъ реку ти: о бывшем чюдеси, яже и преже поведах ти, при блаженемь Саватии бывшее. Аггеломь Божиим изгнавшим из места сего рыболовца и жену едину казнившим дубци. „Изыдета, рече, скоро отсюду, да не злою смертию умрета; се место острова в наследие будет иноческаго пребывания". И се уже речение аггельско по мале времени всяко хощеть исполънитися. Рече бо сам владыка Христос: „Небо и земля преидет, словеса же Моя не преидуть".[104] Показа бо древле Богъ скынии образ в пустыни Моисеови,[105] тако и тебе на месте семъ яви страшное видение; се тобою имать въздвигнути место сие».

И сия Герману рекшю кь блаженному Зосиме, укрепив и́ на подвигъ и дерзостна сътвори его. И тако устремися на подвиг, телесный и духовный: телесьней убо еже о здании манастыря неотложно, кь духовным же — еже на невидимыя врагы въоружатися постомь и молитвами. И укрепляшеся от Германа и наипаче же от Бога, дающаго помощь рабом своим победити съпостаты. И помолистася оба вкупе, глаголюще сице:

«Господи Исусе Христе, Сыне Божий, Слово безначалнаго Отца, рекый правдивому Аврааму: „Изыди от земля твоея и от дому отца твоего и вселися в землю, юже ти аще покажу, — и тамо реку ти, яже подобаеть творити”,[106] — тако и бысть. Изведыи Иякова от Лавана с женами и детицами и съ имениемъ животным многым[107] и сътворивыи его обрести благодать пред Исавом,[108] и преложи его вь язык въ Египте.[109] Иосифа праведнаго положи царя страстемъ и князя всему Египту и пшеницодавца на вселеную.[110] И Моисея руководителя и наставника всему Израилю далъ еси, правителя и законодавца.[111] И Аарона пречюднаго жреца сътворилъ еси, служителя законным жертвам.[112] И Исуса Наввина причастодавца съделав земли обетования.[113] И Давида пророка и царя сътвори праведна роду еврейскому,[114] и обещаниемь с клятвою извеща ему Христу Господу от семени сести на престоле его, на нь же языци уповаютъ,[115] — се убо прииде, ему же щадеся. О сих всех дерзающе и уповающе, молим Тя, всемилостиваго Владыку Христа Бога, да сътвориши на нас по милости твоей, а не по нашего недостоиньства недоумению! Но щедротами человеколюбия твоего направи нас на твоего хотения волю, да и мы, немощнии, смирении и недостойнии, сподобимся слышати кроткых глас оного: „Се целъ еси и ктому не съгрешай”,[116] или: „Вера твоа спасет тя, иди с миром”.[117] Утверди ны, Господи Владыко Христе, на месте семъ прославити имя твое святое — Отца и Сына и Святаго Духа, ныне и присно и в векы веком. Аминь».

И по молитве начаста древеса сещи и келия здати.[118] И въскоре совершиста благодатию Христовою. И оттоле преподобный Зосима начатъ къ трудом труды прилагати, радуяся о Господе и «умъ свой к вышнимъ вперяя».[119] Тело убо духови покаряя, вдааше себе на всенощная стояниа, и молитвы беспрестанныя възсылааше к Богу, присно поучаяся в псалмехъ и пениих духовныхъ, поя Господеви[120] непрестанно, рече: «На тя, Господи, уповахъ, спаси мя[121] по милости твоей! Буди нам помощник на противника нашего дьявола, яко благословенъ еси въ векы! Аминь».

И тако бяху с Германом: копаху землю мотыками и от того питахуся — и «в поте лица, по глаголющему, снедаху хлебъ свой».[122] И Бог бе питая их.

По некоему же времени Германъ съвещеваетъ съ блаженным Зосимою отити на брег моря къ христолюбивым людем, потребъ ради еже на съзидание обители. И приим молитву, отиде в путь свой на брег. Старцу же Зосиме единому оставшу на острове. Герману же тамо пребывшу неколико времени, и умедли. И пакы на брег моря прииде, въсхоте ити къ острову Соловецкому, и не възможе, бе бо уже осень, и въздух небесный к стюдению пременися, и бяху снегове велиции, и волнение морьское неукротимо бе, ледовом многым по морю плавающим. И томяшеся с нуждею, хотяаше доити къ острову, и не возможе. И тако Герману озимевшю на брезе, несть бо мощно никомуже преити къ острову; беша бо на мори ледове снежнии велици и естество водное неукротимо: преходит семо и онамо съ устремлениемъ, быстряся зело. Сие бо и Давидъ пророкъ писа въ Псаломъской книзе, глаголя: «Духомъ устъ Его вся сила их, събираа яко мехъ воды морьскыя, полагая въ скровищахъ бездны».[123] И пакы море възвращаяся съ устремлениемь, быстряся велми. Такоже и ледове преходят, с водою обращающеся, испроверзая их быстрина и истирая. Да сего ради несть мощно кому преити на островь или со острова.

Блаженному же Зосиме единому на острове пребывающу. И сперва убо мыслию поскорбе о старци Германе, потомъ же, възложив упование на Господа Бога, и рече: «Господи Боже мой, на Тя уповахъ, спаси мя![124] Яко „к Тебе приверженъ есмь от юности моея и от чрева матере моея!”[125] И ныне, Человеколюбче, утверди мя на камени веры и неподвижна мя съхрани, яко к Тебе взях душю мою! Никогдаже бо отлучаешися своих рабъ, но присно в них пребывая, Христе, свете истинный, не остави мене раба своего, уповающаго на Тя!» И тако начат болших подвигъ касатися и слезами на всяк день постелю омакая,[126] молитвами же и постом и злостраданиемъ тело свое удручая, непрестанныя молитвы возсылая Богови.

Видевше же беси себе поругаемы и изгоняемы от острова молитвами преподобнаго Зосимы, и тако начаша въоружатися на нь и клопот многъ творити, и сподвигошася на нь всею силою, елико их тамо жилища имяху. Не обретаху бо ся ту живущии человеци на острове томъ никогдаже — отнелиже солнце вь небеси до пришествия блаженыхъ Саватия и Зосимы.

Приидоша нечистии дуси на преподобнаго Зосиму, скрегчюще зубы, овии въ змия въображахуся, друзии же в различныя зверя, и гады, и скоръпия, и ящерица, вся присмыкающаяся по земли. И устремишася вси вкупе: змия — зияющи, хотяще ѝ пожрети, зверие же — рыкающе, мняшеся растерзати его. Раб же Божий Зосима никакоже убояся, ни усумнеся онех лукавьства и наглости, но вопияше, глаголя: «О вражья грубая немощь, аще прияли есте на мя власть от Бога, то творите еже хощете; аще ли ни, то всуе тружаетеся, мене бо вы от любве Христовы никакоже отлучити възможете».[127] И знаменався непобедимымъ оружиемъ животворящаго креста Господня: «Да въскреснет Богъ, и разыдуться врази Его, и да бежат от лица вси ненавидящеи Его, яко исчезает дым, да исчезнут»,[128] — и тако вся вражиа сила без вести бысть. Святый же въздевъ руце на небо и рече: «Боже вечный, Царю безначалный, Съдетелю всей твари, молю Ти ся азъ, раб твой: Ты еси Царь царем и Господь господемь![129] Ты еси разрешитель душам, Ты еси избавитель в Тя верующим! Ты еси упование тружающимся, Ты еси наставник рабом и всем уповающим на Тя! Ты еси утешитель плачющимся! Ты еси творець тварем, Ты еси любитель всякому добру! Ты еси владыка и съдетель всемь! Ты еси радость и веселие святых, и живот вечный, и свет незаходимый! Ты еси источник святыни и сиание славы Бога и Отца прежде всех век! Ты еси спаситель миру и исполнение Святаго Духа! Ты седиши одесную Бога и Отца, владыи живыми и мертвыми в бесконечныя векы! Ты убо, Господи Пресвятыи Царю, услыши мя в час сей, недостойннаго, молящагося твоей благости! Не отврати лица твоего от мене, яко скорблю;[130] избави мя от устъ пагубнаго змиа, зияющаго пожрети мя и свести во адъ жива, и всех коварствий человекоубийца дьявола! Да, ополченьемь святых Твоих аггелъ съхраняемъ и наставляемъ, достигну въ единство веры[131] и в разум единосущныа Троица, Отца и Сына и Святаго Духа, ныне и присно и въ векы веком. Аминь».

И абие словом вся противныя силы без вести быша. И оттоле преподобный Зосима приат власть на нечистыя духы, и не можаху весма никакоже приближитися к нему призракы и мятежными виды своих прелестий. И тако святый пребывая без мятежа и моляся по вся дни и нощи, воздая молитвы своя Господеви.

И по мале времени недостаток бе пища; и о сем вмале поусумнеся помыслом, таже возложи упование на Господа Бога, глаголя в себе псаломскы реченое: «Възверзи на Господа печаль твою, и Тъй тя препитает в векы».[132] И по мале времени, въ един от днии молящуся ему в келии своей, приидоша к нему два мужа светлы зело образом, влекуще за собою кережу,[133] полну хлебов и мукы и масла. И сътворша молитву, приимше от преподобнаго обычное благословение, и глаголаша ему: «Приими, господине отче, у нас хлебы и муку и масло и положи у собя, а мы идем на добыткы на море. И аще будет у тебе недостаток яди, и ты яжь хлебы сиа и муку и масло; а мы, аще Богъ повелит, по времени будем у тобе». Старець же, много время алчен пребывая, ожидааше мужий тех, и не приидоша. И ураземе Божие милосердие, яко се Богомь послано ему, и прославив Человеколюбца Господа о всей милости Его, яко не презре раба своего, уповающаго на Нь.

По времени же, весне приходящи, прииде Герман старец с брега морьскаго, и с ним муж Марко именем, бе бо сьй хитръ на рыбную ловитву, имыи с собою морскаго рыбнаго запасу много и иныя запасы, яже бе на потребу манастырю; бе бо муж на то строен.

Не по мнозе же времени присташа людие къ острову, с ними же бе инок именем Феодосие. Сей прииде къ преподобному Зосиме, хотяше съжительствовати с ним на острове, бяше бо имый священничества чин. Святый же съ усердием приат ѝ, с радостию великою прослави Бога, яко сподоби его съжительствавати съ братиею вкупе. И повелениемъ преподобнаго сей постризает во иноческый образ предреченнаго Марка и нарицает имя ему Макариа. И по семь мнози прихожаху иноци к нему на остров, хотящеи съжительствовати с ним о Бозе. Святый же радостною душею приимаше их и глаголаше: «Владыко Господи, призри с небесе и виждь и посети место сие, еже сътвори десница Твоя».

И начаста древеса сещи и келиа здати. По сих же и церквицу малу въздвиже, и трапезку малу по стране церкви присъвокупи, — на том месте, идеже лучю светавиде неизреченнаго и церковь на воздусе. Церковьже именова во имя Господа нашего Исуса Христа святое Преображение.

Таже съвещавает сь братиею и посылает старца в Великий Новград къ пресвященному архиепископу Ионе;[134] да въсприимут от него благословение и просят святости церковныа на освящение храма антимиса,[135] да и игумена просити свящати церковь и имети попечение о братии. Брат же некый наредяся скоро по благословению святаго и пути касается; и благостройно ему бяше путное шествие по морю и по рекам и по езером, молитвами преподобнаго Зосимы. Въскоре приходит вь пресловущий Новград.

И прииде къ архиепископу, просяше благословениа. Архиерей же старца благослови и въпрашает ѝ: «Откуду, о иноче, и чьсо ради твое к нам пришествие?» Чернець же отвеща и рече: «Владыко святый, съвершися божественый храм внове в морском острове окыяна в твоей державе. И аще повелит твое святительство, дай нам благословение свое на освящение храму Господа нашего Исуса Христа боголепнаго Преображениа антимис. Якоже годе бысть твоему святительству, дай нам и игумена съ благословениемъ». Архиепископъ же глаголя: «Где, брате — селико вдалее от людей? Да кто может жити тамо?» Бе бо приближилися чюжеверных земли — Мурманская и Каянская.[136] «И како церкви быти тамо?» И по сем мало размысливь в себе, рече: «Невозможная от человекъ, вся бо возможна суть от Бога;[137] аще Богъ въсхощет, вся сиа будут. Наша убо начати, Божие же съвершити. Буди имя Господне благословено въ векы».

И старца посолника благослови, и учредивъ ѝ, повеле дати на освящение церкви антимис. И избрав старца некоего именем Павла, чином священничества подобне украшена, и дасть им игумена. И сего наказав благодухновенными словесы, како пасти Христово стадо словесных овец и имети прилежно попечение о душах их. И тако повелев дати им потребнаа на путь и отпусти с миром. Они же, приимше от старца благословение, скоро пути касахуся, и не по мнозе времени, деньми яко четыредесяти, достизают острова Соловецскаго, молитвами преподобнаго.

Таже начаша поведати блаженному Зосиме святительское благословение. Он же радостною душею прослави Бога, яко получи желание сердца своего. Павел же игумен освяти церковь священиемь во имя святаго Преображениа Господа нашего Исуса Христа — преподобный же велми возрадовася духом о величии Божии! И тако съ игуменом и братиею пениа и молитвы беспрестани възсылаху Богови и Пречистей Его Матери. И тружахуся постом и молением, купно же и ручным деломъ: овогда землю копаху, иногда же древеса на устрой манастырю сготовляху; иногда дров множество секуще готовляху, и росол морскый черплюще, и тако соль варяху — и даяху купцем, приходящим къ острову, и от них взимаху всяко орудие на потребу манастырскую, и в прочих делехъ тружахуся. Такоже и рыбную ловитву творяху в мори и по езером, беша бо на острове езера многы, числом яко 70 или множае.[138] Благоугодно бо бе место то къ устрою манастырьскому! И тако от своихъ трудовъ и потовъ питаахуся. Бе бо их число братии съ игуменом и съ блаженым Зосимою 20 и два; и бе всем подвиг о обители, яко едина душа в разных телесех тщание.

Видевше же беси себе поругаемы и уничижаеми от преподобнаго и от братии, иже с ним подвизающихся, и мног мятеж и смущениа приношаху всякими козньми, и лаянии, и призракы, и мятежными виды своих прелестий, и ничимже възмогоша вредити блаженнаго. Но паче инеми злыми ухищренми възустиша на нь некыя неразумныя человекы на погыбель душамъ их. Начаша людие многы пакости творити святому: преходящии морем населници — болярьстии людие и приказници раби — рыбную ловитву творяху на острове по езером, много оскорбляху преподобнаго. И зле належаще, не даваху рыбы ловити братии и злыми словесы наречие дающе ему, глаголюще сице: «Почто ты, калугере, зде вселяешися? Се есть по отечеству наследие наших болярь!» Такоже и корельстии людие преходяще, ловитву творяху на море округъ острова и по езером на острове, рекоша: «Се есть наша отчина, корельскыя земля» — и пакости многы творяще.

Святый же рече: «Господи Владыко Человеколюбче! Яко же рече пророкъ Давидъ в третиемь псалме: „Господи, что ся умножиша стужающеи ми? Мнози въсташа на мя и глаголють души моей: несть спасениа ему",[139] многы скорби наносять рабом твоим, уповающим на Тя». И рече к Герману: «Се, брате, на ны бесовское ухыщрение — злыхъ человекъ въстаниа». Отвещавъ Германъ, глаголя: «Отче святый, потреба терпению и молитвам, но вем, яко не оставит Господь моление раб своих, боящихся Его».

Святый же крепко въоружився на невидимых врагь ополчениа. Нечистии же дуси видевше свою погибель, не можаху приближитися никакоже зло сотворити блаженому, но крепце въоружаху на нь лукавых человекь, мняще лукавии: еда, когда поне досады человечьскыя не терпя, отбегнет от места оного. И сбысться на них реченое въ псалмех: «Тии спяти быша и падоша»,[140] твердаго же столпа покалебати никакоже възмогоша. Раб же Божий Изосима яко воинъ непобедимый крепце ратоваше врагы Христовою благодатию, день и нощь присно въ псалмех и пениих и песнех духовных, поя вь сердци своем Господеви,[141] глаголя: «На Тя, Господи, уповах, да не постыжуся в векы».[142]

И помощь Божиа приспеваше. Братьство же о Христе събираашеся, и место распространяшеся. Вси же братия последоваша въ всем своему пастырю, преподобному Зосиме: въ мнозе смирении и терпении, в постех и молитвах беспрестани и в делех ручных тружахуся. Павелъ же игуменъ, даный архиепископомь, сей не могы понести труда пустыннаго жителства; немного лет пребыв, и отиде въсвояси. И по сем инаго игумена избраша себе по съвету преподобнаго, именемь Феодосья. И тъй в мало лет подвизася пустынным подвигомь и пакы остави и отиде, аможе въсхоте.

Преподобный же Зосима съвет сътворяет з братиею, да поставится имъ игумен иже от обретшихся у них въ обители братиа. Бяше бо ту старец Игнатие, трудолюбно по Бозе проходя житие и лета доволна имый, и пострижеся в той же обители, имяше на себе чинъ дьяконства.[143] И сего въсхоте преподобный, да будет игумен имъ, или аще кого от своих въсхотят братиа. И никтоже от них смеаше дерзнути в чин тъй, подражая смиреномудрию по бозе своего отца.

Нъ съветъ сътворше, вся братиа начаша глаголати Герману: «Господине отче, ты прииде с нашим началником на место сие святое! Инаго ходатая не имамы к нему, разве тебе, да речеши к нему! Мы вси приидохом зде наставитися к нашему спасению от еговы святости и в любви истиннаго целомудрия за слух добродетелнаго его жития. И се ныне видение паче слуха уверяеть, мы же о сем да глаголемь: никто же от нас может начальствовати на месте семь святем, точию емуже наменено бысть от Бога, а не от человекъ».

Герман же сия слышав от братия, прииде и глагола преподобному. Он же никако хотяше прияти хиротониа[144] за многу кротость и смирение. Братии же намнозе належащим и стужающе ему, рекуще: «Аще ли ты не хощеши хиротанисатися, то разыдемся отсюду вси, и въздаси ответъ Богови вь День Судный о душахъ наших!» Преподобный же неволею повинуся хотению ихь. Они же възрадовашася вси единодушно о даровании святаго.

Неции же от братии, потщание сътворше, въсхотеша ити в Великый Новьгород къ архиепископу о прошении святаго на игуменство. И испросивше молитву от него, пути касахуся. Таже по мале времени приидоша в Новгород къ архиепископу Ионе[145] и приимше благословение и рекоша к нему: «Владыко святый, манастырь нашь внове съставляется, и не имамы игумена». И рече им архиепископъ: «То почто манастырь, а игумена несть?» — «Молит тя, владыко святый, съборъ обители тоя, священници и братия: да сътвориши попечение о спасении наших душь!» Он же рече им: «Колико братии бе в манастыри вашем?» И глаголаша: «Господи владыко, имамы числом яко четыредесят с началником нашим». Он же отвеща: «Или таковаго не имате от братиа вашеа? Аще будеть иереи, то благословение дарьствуемь вашего ради прошения, аще ли мних, то хиротонию возложим на нь». Они же, яко некый даръ въсхытивше слово от устъ архиепископа, глаголаше: «Владыко святый, есть у нас таковый — началникъ места того святаго, и много молихом его, но не приемлет моления нашего! Имя бе старцу Зосима. И аще повелит твое святительство, да послеши по него и да приидеть к тебе и да глаголеши ему сам о веши!» Архиепископъ же рече: «Пакы вы шедше, призовите ѝ ко мне скоро!» Мниси же молиша архиепископа, да послеть писание свое к нему с повелениемъ приити. И тако приимше писание от святителя, скоро възвратишася. И пришедше в манастырь и вдаша преподобному послание съ благословением архиепископа.

Написанию же вина сице: «Сыну нашего смирения старцу Зосиме. По нашего писания посланию скоро и ничтоже умедлив да приидеши по нашему благословению к нам, имамы до тебе свое орудие». Святый же възвещаетъ Герману и братии и прочитает пред братиею послание. Они же рекоша: «Ничтоже разсужая, отче, да идеши къ святителю». Блаженый же рече: «Воля Господня да будет!» И възревь на образ Господень, глаголя: «О Владыко Христе, Царю, милостивъ буди мне грешному, на Тя бо, Творче, упование възложих от юности моея!»[146] И се рекь, умолче.

И начать устремлятися к путному шествию. И поять с собою некыя от братии ити к Новугороду, и тако пути касахуся. Бе бо святому путь благостроенъ по морю и по езером и по рекам. И не по мнозе времени обретеся вь пресловущемь Великомь Новеграде.

И възвестиша о нем архиепископу. Пришедшу же преподобному Зосиме ко архиепископу. Святитель же благословивь его и повеле сести, и въпрашашеть ѝ от богодуховенных писаний многыми словесы, и о доведении острова, и о устроении манастыря. И блаженый же поведа ему вся о себе и о пришествии на меесто то. Бяше бо ему и преж пришествия преподобнаго ведомо о нем, и поразуме архиепископъ по образу и видению смысла и разума его, яко въистину Божий человекъ бе.[147] И тако освяти ѝ, и священьства саном почте, и съверши его, игумена Спасьскаго Соловецкаго манастыря постави.

И дает братии с ним пришедшим, и рекь им: «Едино сей отець вашь игумен. Имейте его вь Христовъ образ со всяцем послушаниемъ и покорением». И дасть игумену Зосиме яже на устрои манастырю сребра и злата, сосуды и ризы, и вся ихже на путь требующихъ; и, благословивь, отпусти я с миром.

Мнози же боляре града того даша манастырю блаженнаго имения доволно, и от сосуд и одежь церковных, и сребро и жита. И инии же съ мноземь обещаниемь хотяху помогати манастырю его, велию бо слуху о нем прошедшу добродетелнаго его ради жития, и славно бяше имя его въ стране той. Рече бо Господь: «Славящая Мя прославлю»[148] — и тако «волю боящихся Его сътворяет».[149]

Преподобный же помолися въ церкви съборней святыя София и прочим святым церквам, строя яже на путь; и тако отходит вь свой манастырь, нося доволно на устрои церковныи и манастырьскыя потребы, и благодатию Божиею стройне достизает манастыря.

Германъ же старець и вся братия изыдоша въ стретение преподобнаго подъ манастырем вь пристанищи. И тако, о Христе целование дав, благослови всех, и внидоша вь церковь святаго Преображения Господа нашего Исуса Христа. Дьяконъ же сътвори ектению[150] за правоверныя князя и архиепископа и за все православное хрестияньство.

Внидоста вь трапезу, и подають писание от архиепископа братии, и възведенъ бысть на место игуменское. И тако поучивъ братию доволно, и разыдостася кождо вь свою келью. Бе бо уже приспевьшю вечеру, и повеле игуменъ Зосима ту сущим иереомъ и дьякону готовитися къ божественей Литургии, понеже бо и сам хотяше комкати Пречистое Тело и Кровь Господа нашего Исуса Христа и съвершити божественую службу по Глаголющему: «Ядыи мою Плоть и пия мою Кровь въ Мне пребывает, и Азъ в нем».[151] И по сих повеле келарю[152] износити из ладия вся, яже суть привезена из града, даемое блаженному от христолюбцовъ на потребу манастырскую. По сем же заутреней[153] съвершившися, и времени приспъвьшу божественъй службе. И повеле священником, тако же и сам вниде въ святую церковь, и начаста божественую Литургию.

Да якоже причастися Божественых Тайнъ преподобный, видеша вси священници и братиа лице его просветившася яко лице аггелу, и церкви исполнившися благоухания, свидетелствующе достоинство священства блаженаго. Братья же, яко видеша таково преславное видение, възрадовашася радостию великою зело и прославиша Бога, прославляющаго святых своих.

И тако съвершися божественая служба. Внидоша неции гостие вь церьквь; игумен же Зосима благослови их, и подав им просфиру[154] службы своей, и възвав ихъ на обед с братиею ясти. Они же гостие, приимше просфиру, и идоша к ладии своей потребы ради. И коим неведениемъ от пазуху им испаде просфира. И поискавше ю, не обретше, сжалися о семъ зело.

Игумен же Зосима, вь трапезе седя на месте своем, и възревь, не виде званных мужей на трапезе, и повеле келарю послати по них. Келарь же посла некоего брата именем Макария. Он же скоро изыде к ладьи, а пред нимь песь излезъ из манастыря, текыи вдальи мало вержением камени. И начат брехати зело, с пути не съвращаяся никаможе и хотяще усты своими яко взяти что — и не можаше: и вержеся скоро, и възвратися, и пакы вержеся. Макарие же зря и преспевая, хотя уведети бывшее. Якоже приближаяся к месту, и виде огнь пламенем исхожаше от места оного из земля, идеже пес, скача, брехаше. И тече скоро, помышляя в себе видети, что се местооно, идеже пламень исхождааше. Пес же обозреся на старца, отскочи сь яростию, паче тщася яко въсхытити усты, наипаче пламенем огня отгоним бысть от места.

Брат же Макарие ускори приити и обрете на месте том просфиру, юже бе далъ преподобный от олтаря гостем на благословение, и взем, съкры ю, но токмо удивляяся огненому видению, ужас бо обдержаше ѝ. И пришед к ладии и зваше гостей, и по звании глагола имъ: «Что изгубисте, идуще от церкви, вне манастыря?» Они же реша: «Ничтоже ино, точию просфиру — благословение игумена вашего». Он же, иземъ ю от недръ своих, и рече: «Сия ли суть?» Они же реша: «Еи, та же есть». И глаголаша старцу: «Повежь нам, отче, яко ведехом тя медляща на пути и пса ярящася и усты своими хапающа пламень, дондеже ты прииде». Макарие же сказа имь вся бывшая.

И тако приидоста в трапезу, приносяще братии потребная. Игумен же благословивь их и въпроси: «Что тако умедлисте, о чада?» И глагола: «Макарие, что ради умедли толико?» Макарие же, пад, поклонися ему до земля, изрече вся бывшая, еже виде своима очима. И гостие они тако же реша. И тако блаженный и вся братия рекоша: «Верен Господь въ всех словесех своих и преподобенъ въ всех делех своих,[155] творяй чюдеса единъ».[156] И вси яко единеми усты прославиша Бога.[157]

Преподобный же Зосима, подвизаем Божиею благодатию, начатъ труды кь трудом прилагати и спехъ к спеху. И тако, радуяся, течаше, в вышних умъ вперяя.[158] И по сем повеле съзидати церковь превелику Святое Преображение Господа нашего Исуса Христа на том месте, идеже, якоже предърекохом, видение видев луча божественнаго явльшяся ему.

И обложив сь братиею церковь,[159] и тако начаша рубити. И прииде на делателя церковныя комары и мшица и уядаху их зело. Они же възгнетиша себе мало огня дыма ради, курящагося и на отгнание комаровъ и мшиць. И срубиша дажь до прага церковных дверии, и восхотеша делатели почити въ время полудне. Не веде како, приближшуся огню к начинию церкви и възгореся и попали все до основания.

Братия же делатели смутишася, глаголюще: «То уже Богъ не велит нам въздвизати великия церкви». Преподобный же Зосима глагола има: «О, чада, сие есть злоба от неприязни, той нам пакости деетъ. Мы же не престанем подвизающеся». И повеле ударити в било.[160] Събрашася братия, и начат пети молебенъ Господеви и Пречистой Его Матери. И по молебне освятив воду, и покропи место и делателя, и благословивь их Животворящаго Креста знамениемь, и сам положи начало основанию церкви. И тако начаша мастеры здати по обычаю, и во время мало в полудне приимаху покоя. В та же времена, егда почиваху здателе, мнози от братии слышаху стукъ зиждущих церковь: яко рубят на церкви и тешут невидимо. Се же слышаху не единою, ни дважды, но многащи — Божия бо помощь посылаашеся молитвами преподобнаго Зосимы. И тако благодатию Христовою в мале времени церковь съвершивше Преображение Господа нашего Исуса Христа.

Потом же начаша здати трапезу велию, понеже братство множашеся числом и не бе где вместитися. И с въсточныя страны трапезы начаста здати церковь во имя Пречистыя Владычица нашея Богородица честнаго Успения. И тако помощию Божьею и Пречистыа Его Матере, и угодника их преподобнаго игумена Зосимы молитвами, обитель всемъ распространяшася, и место исполняшеся, и братство о Христе множашеся; иереи, приходяще, священнодействоваху, и дьякони, и клирици; и кельи многи здахуся, и поварня, и хлебня в доволство. Вся сия съвершахуся благодатию Христовою и поспешеством Святаго Духа.

Блаженый же простирашеся болма на духовное делание, труды кь трудомь прилагая и успевая на лучшая,[161] по реченному: «текох и направих»,[162] и радуяся, шествуя без преткновения по стопам Владыкы своего, вышних ища[163] и умъ к небеси простирая, и сердце предочищая от всех страстьных помышлений всегда.[164] И пребываше въ всенощных стояниих непрестанно. Добродетелнаго же ради жития его всеми зримь бяше яко, въ плоти сый, аггелом подобяся. И пронесеся всюду о нем слава. И мнози отвсюду приходяще, желающе съжителствовати с ним и слышати от устъ его слово спасения, жадаху «яко елень на источникы»[165] — сице и любящей Бога и ищуще спасения душам своим. Блаженный не токмо словесы учаше, но и делы въ всем образъ бываше стаду, известно творяше, по реченному въ Евангелии: «Блаженъ, иже сътворитъ и научит, — се велий наречется въ Царствии Небесном».[166]

И мнози от окрестъных стран приходящи иноци и хотяще ревновати добродетельному его житию и исправлению. Он же, яко чадолюбивый отець, всех с радостию приимаше, и безмерною кротостию и смирением поучаше духовне, и телесный подаваше покой: трапеза всем равно, и питие, и одежда, и обуща.[167] И множашеся число братии, и вси имуще, и изообилство бе всем, и бе по чину уставному изрядно зъло.

Весь чинъ положи по Типику иерусалимскому[168] въ своем монастыри. И учаше братию хранити вся заповеди, преданныя по Божественем Писании святыих апостол и святыих отець седмии Соборов,[169] непреложно блюсти инночьскаго жития правила, уставъ хранити неизьменно, иже предасть великый Антоние, и Еуфимие, и Сава, и Феодосие, и Пафомие,[170] и прочий преподобнии отци, симь последоваша. Тако и сей преподобный учаше и въ всяком деле образ собою показаваша вышних искати.[171] Братия же, яко благоплодная земля, приемлюще съмена, и во всем повиновахуся, послушание творяще, зряще чюднаго его пребывания, терпения и смирениа нелицемернаго, постъ и молитвы беспрестани съ умилением. И тако пребывающе с ним, в дьлех ручных тружахуся, и от своихъ трудовъ и потовъ пищу приимаху, даже и доднесь, благодатию Христовою и Причистыя Его Матере, и во всяцем устроении без мятежа. Мы же на предняя възвратимся.

По неколицех летехъ своего пастырьства преподобный Зосима въспомянувь о блаженем Саватии, яко преже подъятъ подвизи, труды, постъ и терпение и многыя добродетели, а ныне мощи его на месте пусте суть положени. И съветъ положи с братиею, глаголаше: «О братие, како прельстихомся от неразумия о сицевой вещи!» Сия ему глаголющу, приидоша братия, посланнии на службу к Новугороду, и принесоша послание с Бела-езера, писано изъ обители Пречистые Богородица Кирилова манастыря, послано от игумена братии, глаголюще сице:

«Възлюбленному о Христе благодать и милость от Бога Отца Господа нашего Исуса Христа![172] Духовному настоятелю боголюбивому игумену Зосиме и со всею еже о Христе братиею — радоватися.

Слышахом бо некогда от приходящих страны вашиа до нас о острове том Соловецком, яко не приближно бе человеком первие за морскую скорбь и нужду во еже тамо пребывания от древних лет, отнелиже солнце вь небеси. Ныне же слышим от многых самовидець, яко той остров Божиим изволением и Пречистыя Богородица ходатайством и вашего по Бозе трудолюбия тщанием състависте обитель и братства множество събрася, и монастырь създан бысть честенъ, и храми въздвигошася велелепнаго Преображения Господа Бога и Спаса нашего Исуса Христа и его Пречистыя Матери честнаго ея Успения, и вся добре исправисте добродетели, памяти достойна. Но единого дара лиховани бысте, — иже прежде вашего трудолюбиа о Бозе жительствующаго и скончавшаго житие в молитвах, и трудех, и в пощениих, и въ исправлении добродетелнем съвершена. Якоже древнии бяху преподобнии отци, тако и той блаженный Саватие удалився мира и всею душею Христа възлюбивъ и в совершении блаженую кончину приятъ, радуяся. Слышаху бо неции братия от манастыря нашего, бывшеи в Велицем Новегороде, сицеву повесть от некоего христолюбца мужа именем Иванна. Сей поведая рече: „Идущу ми к морю из рекы Выгъ, и обретох старца отшелника имянем Саватия, жительствовавшаго на Соловецком острове. И сподоби мя Богъ погрести святыя мощи его съ игуменом Нафаналом близъ Выгу-рекы у часовни. И молитвами его чюдодействоваше Богъ преславная чюдеса”. Такоже и о брате своем Феодоре изрече, яко поклонися токмо гробу преподобнаго и от каковы злыя смерти съхранен бысть на мори молитвами блаженнаго Саватиа! И ина многа чюдеса и знамениа, яже творяхуся у гроба его святаго.

Сего ради пишем вашему преподобию о сем, яже слышахом. А и сами есмы сведетели добродетелному его житию, понеже бо сей блаженый Саватие житие имеаше в дому Пречистыя Богородица Кирилова манастыря, якоже преди речеся.

Ныне же вашей святости даем съвет духовный: да не лиховани будете таковаго дара, егоже сподоблени бысте от Бога, но скоро с потщаниемь шедше, пренесете блаженнаго мощи въ свой манастырь, да идеже лета многа телом потрудився, тамо и святыя мощи его да будут положени.

Здравьствуйте о Христе Исусе в вечную жизнь, и нас вь молитвах ваших поминайте, яко боголюбиви, да некли и нам подасть Господь Богъ свободу от всех зол, находящих на ны, молитвами своего угодника, преподобнаго Саватиа».

Блаженый же игумен Зосима прочет написаная к ним посланиа Кирилова манастыря и възрадовася душею, тако же и братство все о Господе, въздаша благодарение Богови. И реша вси, яко единеми усты: «Несть се от человекъ послание, но от самого Бога, прославляющаго святыя своя!»

И в том часе съ множеством братии начат готовитися к шествию насады по морю. И тако повеле ударити в било — и начат пети молебен Господу Богу и Пречистей Его Матери, дабы Человеколюбець по милости своей дал получити желаемое. И молебная совершивше, глагола к братии: «Благословите мя, отци святии, и помолитеся вси купно, яко да устроит нам Господь путь по своему милосердию!» И възвеявшу ветру благополучну. Онъ же с братиею пути касаются; и заповеда в манастыри братии, рекь: «Аще не закосним в пути, но скоро възвратимся с брега, то получихом искомое. Вы же, стража приставльше, бдите прилежно. Егда же узрите ветрила по знамению, тогда въсприимше свеща и фимиан,[173] священници, вся братиа изыдете въ сретение». И се рек, изыде к насаду, путнаго шествиа касаеться. Бе бо ему стройно по морю плавание молитвами искомаго. И въ вторый день доплывше места, идеже бе гроб блаженнаго Саватиа.

Обретше же время благополучно, никомуже възбраняющу имь, и раскопавше землю, обретоша гроб, в немъже положены быша честныя мощи святаго. И бе дивно видение! Въздух исполняшеся благоуханиа неизреченнаго, яко миро[174] многоценно. И дивляхуся зело. Открыша раку — и обретоша тело блаженнаго Саватия, цело и ничимьже вредимо, — Богу съблюдающу своего угодника. Но и ризы его яко вчера облъчени! О, дивно чюдо, братие: колико лет бысть в земли, что ни поне ризам тление прикоснуся! Преподобный же Зосима, видевь таково Божие смотрение к человеком, велми възопи съ слезами, глаголя: «Велий еси, Господи, и дивен в делех твоих, яко вся премудростию сътвори!»[175] И припадая, лобызаше мощи святаго, глаголаше: «Избранник Божий, святый Саватие, велико имаши к Богу дерзновение! Даруй нам святыя своя мощи пренести к желающим тя словесному стаду христовых овець — на место свое, идеже многолетне потрудися!»

И так молитвами преподобных Саватиа и Зосимы ветръ благостроен бываше и въспят шествие творяше возвращению пути. Раб же Божий игумен Зосима зело веселяшеся духовне, зря молитвы святаго Саватиа помогающа ему. И приим честное тело святаго в раце, скоро в насад отнесе. И въздвизаху ветрила спешно, къ обители шествие творяшеся има яко единем днем по смотрению же Божию.

Егда приближахуся ко острову Соловецкому, тогда узреша из манастыря, и изыдоша вся братия на сретениа съ свещами и с кандилы к мощем святаго, изнесоша честно из насада и положиша на одре. И тако съ псалмопеением достойно внесоша въ святую церковь Преображениа Господа Бога и Спаса нашего Исуса Христа. И знаменавашася к мощем святаго до утриа. Наутриа же надгробное пение съвершивше. И мнози стражуще различными недуги, приходяще с верою, облобызающе мощи святаго, и исцеление приемлюще, здрави отхожаху въсвоя, радующеся и благодаряще Христа Бога и Пречистую Его Матерь, иже такыми почести даровавших угодника своего. Братиа же, видевши чюдеса многа, бывающа от раки преподобнаго, зело радовахуся о обретении таковаго бесценнаго бисера, плодителнаго душевному спасению. И ископавше гроб за олтарем церкви Пречистые Богородици честнаго ея Успениа, и тако погребоша честне святыя мощи преподобнаго Саватия,[176] покрыша землею съ псалмы и песнми, идеже лежат и до сего дне, подавающе исцелениа всем, иже с верою притекающим.

Раб же Божий игумен Зосима болшими подвиги начат простиратися, Вышняго себе прибежище положи,[177] жестокое прохожаше житие. И възгради гробницу над мощьми блаженаго Саватиа и в ней постави иконы — образ Господа нашего Исуса Христа и Пресвятыа Богородица, приходити на поклонение братии.И свещу повеле поставити над гробом преподобнаго. И съвещевает сь братиею, еже бы велети и образ написати блаженнаго и поставити на гробе. По мале же времени привезоша из Новагорода икону от Иванна, оного купца, преже реченнаго, погребшему честно тело святаго съ игуменом Нафанаилом на Выгу у чесовни. От того же времени тъй Иван и Феодоръ, брат его, велию веру иместа на Соловки къ Спасу и Пречистей Его Матери и их угодником преподобному Саватию и Зосиме игумену; и вдаша игумену Изосиме образ блаженнаго Саватия. Он же постави ю на гробе святаго. И во вся дни и нощи по всяком славословии церковнаго правила игумен и вся братиа приходяще ко гробу святаго поклонятися образу Господа нашего Исуса Христа и Пречистыа Богородица и их угоднику блаженому Саватию.

Игумен же Зосима приходя в нощи, поя и молясь, имы во устех псалмопение непрестанно и коленопреклонениа многажды творяше всю нощь даже и до заутрении къ образу Владыкы Христа и того Пречистыя Матере, над гробомъ стоящих блаженнаго Саватиа, к преподобнаго образу, яко к живу глаголаше: «О, рабе Божий, преподобне, аще и телом скончал еси свое житие от земных селений, но духомь неотступно буди с нами, молясь Владыце Христу Богу; руководьствуй нам и достойны представи шествовати божественныя его заповеди съвершены, якоже рекшу въ святем Еуангелии, „взем крестъ, последовати по Себе”.[178] Ты убо, преподобне, имыи дерзновение ко Господу и Пречистей Его Матери, буди молитвеник о нас, недостойных рабех твоих, живущих въ святей обители сей, ейже ты бысть началник! Тако и ныне буди помощник Богомь събранному стаду словесных овец, еже о Христе братству сему! Да твоими молитвами к Богу невредими будем, пребывающе на месте сем, от враг видимых и невидимых и человекъ, зло творящих святому месту сему! Да всегда съхраняеми ходатайсътвом Ти, славу възсылаем Отцу и Сыну и Святому Духу, ныне и присно и в векы веком! Аминь».

И по сих рабу Божию игумену Зосиме пребывающу во мнозех трудех и сугубых пощениих лета доволна. Лукавии же человеци, от врага поощряеми, многа зла сътворяху обители блаженнаго, насилуя и оскорбляюще, да како бы възмогли изгнати его от места того святаго.

Святый же съветъ сътворяет с братьею, яко пойти ему в Великый Новград и молити архиепископа, дабы ему был помощник от обидящих человекъ и творящих пакости его манастырю. И начат строитися к путному шествию. И повеле ударити в било — братии съшедшеся, начинат молебнаа к Господу Богу и Пречистей Его Матери за благоверныя князя и архиепископа и о устроение земьском, и о всем православном христьянъстве, и на помощь призываа блаженнаго Саватия, еже способьствовати молитвам его. И молебьная съвершив, некых от братии поимь с собою, и поиде в путь свой, шествие творя по морю к Великому Новуграду. И стройно бяше плавание блаженному по морю и по рекам, и по езером.

И не по мнозех временех достизаеть Новаграда; и прииде къ архиепископу.[179] И поведано бысть о нем. Архиепископъ же, видев и благослови его, и въпрошает о братии, о строении манастыря. Зосима же все поведа ему, и въстав от места, поклонся архиепископу до земля, моля его и глаголя сице: «Господи мой и владыко святый, буди нам милостивъ, заступая нас от оскорбляющих лукавых человекъ, многажды зле належаще на ны! Приходят болярьстии раби, населници, и пакости многи творяще, не дающе нам округ острова рыбъ ловити и ина многа насилствующе, хотяще место разорити и нас изгнати!» Отвеща архиепископъ: «Азъ, отче, помагающу ми Богови, готов есмь пособьствовати манастырю твоему, а се оповедаю боляром первым, съдержащим град».[180] Зосима же поклонся архиепископу и отиде. И приходя к боляром, моляше их, таже глаголяше о скорбех бывающих ему. И вси боляре, съдержащеи град, съ мнозем тщанием обещашася помагати манастырю его.

И прииде к некоей болярыни, именем Марфе,[181] молити ея от скорбии населникъ ея, приходящих на остров Соловецскый и многи пакости творяще манастырю преподобнаго, и хотя ей изглаголати, еже творят раби ея обиды многи. Она же, услышав от рабъ своих о вещи, чесо ради прииде к ней блаженый, и разъярився, повеле его отслати от дому своего, не восхоте благословениа. И удалися от нея.

Рабъ же Божий отиде, ничтоже сумняся от лица злобы, и помянув евангельскый гласъ реченный: «Идеже аще внидете в дом и глаголете: миръ дому сему, аще ли достоинъ будет дом мира, и миръ вашь пребудет на нем; аще ли же ни, то пакы к вам възвратится, исходяще же оттуду, и прах от ног ваших отрясете въ сведетелство имъ».[182] И позыбав главою, сущим иже с ним братии глаголаше: «Се дние грядут, иже дому сего жителие не изследят стопами своими двора сего. И затворятся двери дому того и ктому не отверзуться, и „будет дворъ их пустъ”».[183] И се рек, умолче, дондеже сбышася реченая Божиим угодником въ свое время. Но на предняя възвратимься.

Игумен же Зосима, паки шед къ архиепископу, въспоминает о обидах, бывающих от населникъ онех и от рабъ боляръскых. Архиепископъ же съзва к себе боляр и сказа им о скорбех, бывших преподобному от неразумных человекъ. Боляре же вси съ мнозем обещанием[184] изволиша помогати монастырю святаго и вдаша ему написание на совладение острова Съловецскаго,[185] и к тому другий остров Анзер, отстоя яко десять поприщь от Соловецского острова, и третий остров Муксома, яко три поприща отстоящь. И приложиша к написанию восмь печатей оловяных:[186] первую владычню, другую посадничю,[187] третью тысяцского, таже пять печатей с пяти концевь града.[188] И запечатлев, даша блаженному на утвержение. Архиепископъ же, одарив преподобнаго, и вдасть манастырю потребная доволно и, благословив, отпусти его с миром. И мнози боляре града того даваху в манастырь имениа и от сосуд церковных и одеж и жита, и вси съ многим тщанием и верою обещастася помогати манастырю его.

Та же предреченная болярыня Марфа прииде в раскаяние, еже оскорби преподобнаго, слышала бо бе, яко вси людие велию веру имяху к нему и дааху манастырю потребных доволно. И уведе от многых, яко муж боголюбив и житием добродетелным цветыи, и въсхоте благословитися от него и причастна быти вь приношении кь Спасу, в дом святаго Преображениа Господа нашего Исуса Христа к Пречистыа Его Матере. Посла к нему съ многим молением, дабы пришел и благословил ея, бе бо та едина от славнейших и первых града. Понеже бо первее прогневася на преподобнаго, рекущи, яко «отчину нашу отъемлет». И по сих размысли в себе, глаголющи: «То како аз на много время прогневах Божиа раба? Но прииму от него и аз благословение и молитвы, и да отдасть ми Богъ съгрешениа, елико съгреших къ угоднику его, яростию сътворши!» И тако призывает его с молениемъ.

Пришедшу же блаженному, и приемлет от него Марфа благословение с чады своими вкупе же, и прощениа просит о нихъже съгреши неведениемъ. И възва и на обед, и посади и́ посреде пиршества. И вси възрадовашася о пришествии преподобнаго, понеже слышаху по Бозе добродетелное его житие и въздержание, и чудишася. Он же, обычным смирением и кротостию одержим сый, и седя въмале пища причастися, бяше бо от юности любя безмолвие, не точию на трапезе, но и всегда. И възрев на возлежащих и дивляшеся, поник на землю, ничтоже вещаше. И пакы възре, то же виде и пониче долу. И еще възвед очи третицею, то же зрит: некыя от возлежащих в первых седяща, а глав не имуща.

И ужасеся блаженный о таковом необычном видении, из глубины сердца въздохнув, прослезися, и ктому не приложи вкусити ничтоже от предложеных на трапезе, дондеже въсташа. И по воздвижении святаго Пречистыя хлеба,[189] сътворь поклонение, хотяше изыти. Болярыни же, предиреченая Марфа, моляше преподобнаго, паче же и прощениа прошаше, дабы молил Бога о ней и чадех ея, и давъ манастырю его деревню на реце Суме,[190] на пристанищи брега, и ина потребная дав манастырю, елико можаше.

Велможа же вси, иже бяху възлежащеи на пиршестве том, ти такожде манастырю даяху потребная доволно и молиша блаженнаго молити Бога о них, велию бо слуху прошедшу, и славно бе имя его въ стране той чюднаго ради житиа его, рече бо Господь: «Славяща Мя прославлю»,[191] и «волю боящихся Его творит».[192] Таже поклонся преподобный, благослови ихъ, отиде.

Герман же, старець предреченый, иже прииде съ святым на остров Съловецскый, имея к нему дръзновение, рече: «Отче, не прогревайся на мя, и нихже ти глаголю». Онъ же рече: «Рци о полезных». Герман же глагола к нему: «Почто ты, отче, въ время обеда, позрев на председящая, и пониче на землю, и паки возревъ, скоро пониче, и третицею тако же сътвори, и позыбав главою, въздохнув и прослезися и оттоле ничтоже вкусив от представляемых тебе брашен, аще и нудим еси от них много?» И отвещав блаженый, рече ему: «Чадо, „ожестил еси просити”.[193] Но обаче Богъ давыи тебе дерзновение о вопрошении сем, то ни аз от тебя съкрыю судеб Его неизреченных, иже хотят быти въ свое время. Но обаче не повеж сего никомуже, дондеже исполнится время Божиих велений! Видех шесть мужий, преди седящих на трапезе сей, без главь! И видех — и дивихся много, и не възмогох ни ясти, ни пити принести ко устом от такова ужасна видениа! Но о сих никомуже повеж, яже глаголах тебе!»

Потом же некий муж, имянем Памфилие, и приимы иноческый великий образ и нареченъ бысть Похомие, имьш житие добродетелно, и сей бяше от славных града, и седяй на трапезе сь преподобным и имеяй велию веру к нему, тако же видев святаго взирающа, яко и Герман, и внят себе Пахомие въ сердци своем. На утрии же день тъи благочестивый муж Пахомие прииде к преподобному, моля, и възва ѝ к себе на обед сь братьею. И велми учредив, таже съ опасением наедине приступль, въпроси блаженнаго: «Отче честный, не возгнушайся мене грешнаго, моляща тя, но повеж ми истинну, яко виде тя взирающа на председящих боляръ не единою, но дважды и трищи, и позыбавша главою и прослезившася, и оттоле ничтоже вкусивша». Святый же съ многимь запрещением поведа ему все, якоже и Герману, бе бо сей верен ему, приемля божественых словес поучение съ всяцем вниманием.

Се же аз слышах от ученикъ его, и пакы хотех уведети известно о сем, и въпросих того старца Пахомиа. И поведа ми вся тако же, якоже и ученици реша. И уведев известно, предах писанию.

Игуменъ же Зосима с братиею отиде въ свой манастырь на Соловкы.

По некых же летех приидоша гости по морю, и присташа къ острову Соловецскому, и начаша поведати блаженному, яко приде благоверный великий князь Иван Васильевич,[194] самодержець всея Русии, съ всею своею братиею и служащими ему царьми и князьми татарскыми[195] и со всеми силами, и съвокупив воиньства бесчисленое множество на Великий Новград,[196] и ста в Русе.[197] И съвещав с братиею, посла дву воевод своих на Шелону.[198] И сретоша и́ новогородци со многими силами,[199] и бысть бой воеводам великого князя. И побиша новогородцов;[200] изымаша 6 боляринов великых, иных множество приведоша к великому князю. Онъ же овех к Москве отосла,[201] а иных казнил, да и прочии страх имут. И шесть боляринов: Дмитрея Исакова, да Губу Селезенева, да Кипреяна Арзубьева и иных три с ними, — повеле им князь великий глав посещи.[202] И отиде к Москве.

И по неколикых летех пакы прииде князь великий Иван в Великый Новград на осмотрение[203] — и взят вся казны, издавна положеныя от великого князя Ярослава Володимерича[204] и даже и до его самодержавства в велицеи церкви Съфеи,[205] и по всех церквах градскых по улицам, и болярьскыя казны по домох их; и владыку Феофила к Москве свел,[206] и вся нарочитыа града с женами и детми; и оное болярыню предиреченую Марфу съ сыномь ея Феодоромь и дщерми и внучаты, сих посла в Нижний Новьград.[207]

Въспомянуша же бывшеи ту раба Божиа игумена Зосиму, иже видениа виде в дому пиршества оноя болярыни Марфы, яко седящим мужем на трапезе, а глав не имущим, имже бысть кончина въ свое время, и пророчество блаженнаго, иже о запустении дому ея изрече, егда отслан бысть от лица Марфы оноя, — и не преходим бысть дом ея даже и днесь наследникы ея по пророчеству святаго.[208] И сиа убо о сих; и тако сбыстся, иже рече блаженый. Мы же на предняя възвратимся.

Преподобный же игумен Зосима пребываше въ мнозех трудех и въздержании, иже памет смертную и Суд Божий в себе всегда имети хотя и понужая себе на делание плача.[209] И създа себе гроб и положи в клетце келии своея; в земли гроб вь меру того сам себе ископа своими рукама. И по вся нощи исходя ис келии до утреняго клепаниа,[210] плачася своея душа, яко мертвеца, над гробом своим.[211] Писано бо есть: «Воздыханиа и скорби от душа вопиют къ Господу, а яже от страха слезы, та прилежно молят Господа».[212]

И тако вся дни своя въ иночестем житии сице пожив в воздержании, яко ни дне, ни часа отщетитися когда хотя от трудов и славословиа Божиа, но Господеви сиа вся изнуряше. И образ всех добродетелей остави пребывающим тамо иноком.

По сих же разумев блаженый къ Господу свое отшествие, и призвав братию, глаголаше им: «Се убо, о чада и братие, время моего скончания приходит. Вас же оставляю Всемилостивому Богу и Его Пречистей Матери. То изберете себе кого хощете имети с Богомъ игумена вместо мене». Братия же вси, яко единеми усты реша: «Аще бы мочно нам умрети с тобою, отче, нежели от тебе разлучитися, пастырю добрый! Но се есть воля Божиа, а яже ти извести всеведый Богъ твое отшествие к вечным обителем, Тои может тебе ради подати нам пастыря и учителя, егоже въсхощет. И да будет нам наставник и вожь къ спасению и твое от нас грешных к Богу моление! Ты бо, господине отче, въ нынешнем житии имаши попечение о душах наших. Но молим тя, не остави нас сирых и по своемъ к Богу шествии, имаши бо дерзновение к Нему!» И сиа глаголаста съ многым плачем и рыданиемь, слезами землю мочаху. Блаженый же глагола имъ: «Не скорбите, о чада, се уже предаю вас Богови и Пречистей Его Матери; и аще будутъ угодна дела моя Богови, то не оскудеет потребными святая обитель сиа до скончаниа века и болма распространится. Но токмо любовъ имейте друг къ другу и смирение нелицемерно, и страннолюбие, и милостыни съ тщанием прилежите, без неяже никтоже узрит Господа. А о игумене възложите упование на Господа Бога и Пречистую Богородицу и на наше смирение, то уже наставник вам вместо мене да будет Арсение».[213]

И тако вручает ему манастыр и братию, глаголя сице: «Се убо, о брате Арсение, оставляю тя по Бозе строителя и наставника святей обители сей и всей братии, о Бозе събраней. Но блюди, брате, паче всего, да ничтоже погрешиши обычая манастырского, по правилом святых апостолъ и святых отець седми Събор Вселеньскых, иже имат Церкви Божиа! Пение и чтение съборное без мятежа съ вниманиемь да будет ти, и на трапезе ястия и питие с молчанием, вь благодарении и послушании Божественых Писаний! И блюди весь чин и обычай манастыря сего, уставленый о Бозе нашим смирениемь, — и Господь Богъ да исправит стопы ваша к деланию заповедей Его, молитвами Пречистыа Богородица и всех святых, и преподобнаго отца нашего старца Саватиа! И Господь да съхранит вы и утвердить в любви своей! Азъ же, аще телесне отхожу от вас, но духомъ с вами неотступно пребуду! И о семь разумно да будет вам: аще обрящу благодать от Господа, то обитель сиа по моем отшествии наипаче распространиться, и съберутся множество братии в любви духовней, и в телесных потребах ничимъже скорбнии будете».

И тако поучив их доволно и всем о Христе целование дав, отпусти их когождо во свою келию, молитвами одарив и благословением печатле. Самъ же безпрестани славословию прележа, на вечный путь готовляшеся. И въздвиг руце горе, знаменавався крестным знамением, и лице перекрестив, дав миръ всем, и рече: «Владыко Человеколюбче, сподоби мя одесную Тебе стати в последний день,[214] егда приидеши во славе судити живым и мертвым и воздати комуждо по делом его!» И сиа рек, возлежа на одре. И так предасть честную свою душю в руце Божии блаженый Зосима игумен, началник Соловецскаго манастыря, в лето 6986, месяца априля вь 17, на паметь преподобнаго отца нашего Симеона иже в Персиде.[215]

И так скуташа честное и трудолюбное тело; и погребен бысть братиею честно с кандилы и съ свещами и надгробным пением. Положиша ѝ въ гробе, иже ископа себе своима рукама, за олтарем церкви Святаго Преображениа[216] Господа нашего Исуса Христа.

В девятый день по погребении своем явися блаженый некоему от ученикъ своих — старцу имянемь Данилу. Сему стоящу на обычном своем правиле,[217] и зрит посреди манастыря полкъ велик зело нечистых духовъ, тмообразных бесов, и по воздуху множество их, акы дыма темна. Сему же надолзе зрящу, и прииде явленно преподобный Зосима к Данилу, глаголя: «Се видиши, от сих нечистых темнообразных духовъ и многокозненых бесов избежахъ! Мнози бо простерты по воздуху сети дьяволя,[218] но помилова мя Богъ и с преподобных ликы причте.[219] Вы же съхраняйтеся от лаяния их!» И се рек, невидим бысть. Мы же се слышахом от старца Данила, прославихом Господа о посещении святаго; яко же обещася духом не отступен быти от обители своея, так исполняше обещание!

По третьем же лете успениа святаго ученици възградиша гробницу над гробом его. И в ней поставиша образ Господа нашего Исуса Христа и Пречистыа Богородица на покланяние братии, приходящим къ гробу святаго. И свещу поставиша пред иконами у гроба его. И прихожаху ученици на всякъ день къ гробу пастыря своего, блаженаго Зосимы, молящеся Владыце Христу и Пречистей Его Матери, и кь преподобному, яко к живу, глаголаху: «О рабе Божий, истинный пастырю и наказателю нашь, аще телесне скончалъ еси свою жизнь, но духом неотступно буди с нами! Мы бо чада твоа и овца словеснаго ти стада. Поминай стадо, еже събра мудре, и съблюди Богом дарованную ти пасьству яко чадолюбивый отець! Но руководствуй молитвами си, представи нас Христу Богу достойны шествовати по заповедем Его и творити повеления, „взем крестъ, последовати Ему".[220] Тя убо ныне молим, призывающе на помощь, еже молитися о нас, недостойных, к Богу и Пречистей Богородици о Богом събранней иже въ святей обители сей братии, юже ты своими труды съгради и началникъ бысть, да и мы твоими молитвами и заступлением, пребывающе на месте сем, невредими от бесов и злых человекъ пребудем, славяще Христа Бога нашего!»

Бе некый старец имянемь Тарасие. Сей велию веру имея кь преподобному Зосиме. По вся нощи приходя, молитвы и коленопреклонение творяше у гроба святаго, къ Владыце Христу и Пречистей Богородици глаголюще: «Боже! Владычице Богородице! Умоли Сына своего, Христа Бога нашего, дабы съхранилъ святое место сие от враг видимых и невидимых молитвами угодника вашего, преподобнаго игумена Зосимы!» К святому же яко живу глаголаше: «О старче, ныне убо припадая, молю тя и на помощь призываю, буди молебникъ къ Христу и Пречистей Его Матери о мне грешнем! Азъ бо есмь „овча ограды твоея",[221] яко да пребывая на месте сем святем, невредимь пребуду от всегубителя врага молитвами твоими!» И тако моляся, отходя в келью свою.

Въ едину же от нощей, пришедшу ему вь гробницу по обычаю помолитися, и виде у гроба дскы удвинуто и край мантии немало вне гроба висящь. Старец же, хотя опрятати мантию во гроб, и укры мало дскы, и веде преподобнаго лежаща верху земля, и образ его светлосветяся, яко финик цветущь въ удолии и яко крин селный сияя;[222] и руце его на персех лежаща согбены накрестъ и обнажены мало не до лактии и такоже светящася.

И сие старець видевъ и, шед, поведа игумену Исаии[223] и многым братиям. Мы же се слышавше, дивихомся, ведуще, яко погребохом святаго телов земли, и как обретеся верху земля. И тако прославихом Бога и его угодника преподобнаго игумена Зосиму.

Бе некый старець имянем Митрофан. Сей имый пострижение в Муромском манастыри[224] на Онеге езере, тамо и житие имый. Тъй ми поведа сие:

«Еще сущу ми в мире пребывающу и домовное попечение имех. И некогда плавающу ми по морю на весновании, и имех многы добыткы, и далече ми сущу в пучине моря. И тридесят дьнии носим бехъ в мори волнами, и не видех брега, ни острова. И прииде буря ветреняя велика зело, и в мори трус велий, волны люте устремляхуся. Мы же отчаяхомся своего спасениа от нахождения волнъ, покрывають бо ладью нашу волны морскыя, и начахом молити Господа Бога и Пречистую Богородицю и святых многых призывати на помощь, сих и иных, и не преста волнение. И прииде ми въ умъ, начах молитися и призывати на помощь началника соловецкаго, блаженнаго Зосиму; и обещахомся кь Спасу на Соловкы дати на молебенъ и на обедню. И в той час внезапу обретеся в ладии нашей старець, седя на корме. И прихожаху волны морскыя с великым устремлением, хотяаху покрыти ладию нашю. Старецже он простираше вскрылие мантии[225] обема рукама на обе страны ладии — и волны прохождааху ладию нашю мирно и тихо.

И тако плавахом многы дьни и нощи, носими ветреными дыхании. Старец же он пакы по вся дьни седя на корме, съблюдая нас от волнъ и окормляя даже и до брега. И тако невидим бысть. Достигшим же нам пристанища тиха, и на брегъ изыдохом; и начахом поведати друг другу о видении старца, бяше бо не всемь видим, но трем токмо. И так на мног час дивящуся, прославихом Бога, творящего преславная чюдеса святым своим угодником!»

Некыим от сущих ту по морю стражущим в плавании и велику беду приемлюще от буря волнъ. И так начаша молитися Всемилостивому Богу и того Пречистей Матери, и святых на помощь призывати началников соловецскых Зосиму и Саватия. И так единем часом волны престаша и море на тихость преложися.

И многым являющеся по морю и по суху, скории в бедах помощьници. И от сего вси человеци округ моря и от многых странъ велию веру имяху к ним.

И вся болящая различными недугы и зле стражющих от духь нечистых мучимы, — сих приводяще в манастыр и ко гробом прикладающе, вхскоре вси исцеление приемлют и здравии отходят в домы своя.

И вси близ моря живущии человеци имуще велию веру к манастырю Соловецкому, понеже бо от началников тех видяху многа чюдеса бываема. И начаста писати образы их и в домехъ у себя держаху и, вносяще в церкви Божия, поставляху на поклоняние всем православным христьяном. Мы же, иноци суще, не смеюще дерзнути таковых угодников Божиихъ по тридесятех лет преставлениа их, и неимуще образа преподобных у себе,[227] а Богови творящу их ради такова преславнаа чюдеса! Мирстии же человеци, православнии христьяне, велию веру кь святым имуще, молящеся Христу Богу и святых его угодниковь на помощь призывающе, невредими пребывають от всехъ вражиих обьстояний, славу и благодарение възсылающе Христу Богу.

Инъ некый старець, имянем Осифъ, — тый нам поведа сице: «Некогда ми пловущу по морю, прилучися пристанище у острова некоего, рекомый Кузова,[228] за тридесят поприщь отстоящь Соловецкаго острова. И стоящу ми в том пристанищи неколико дьни ради противных ветръ и волнения морскаго. И в некую нощь изыдох из шатра и взыдох на гору высоку и зрех на море. И се вижу: над островом Соловецкым, яко над манастырем тем, два столпа огнены светяща и до небесе досязающа. И зрях и дивихся на многъ час. И сшед с горы, поведахъ братии всем сущим со мною. Они же глаголаша: „Се началникы манастыря того сияют от гробов своих, просветившеся духа зарями. Се есть столпи духовнии, велми подвизавшеся въ временней сей жизни въ молитвах и трудех, въ бдениих же и пощениих, и ныне яко светила сиаютъ, съ аггелы предстояще святей Троици”.

Мы же начахом молити всесилнаго Бога и Пречистую Богородицу, и их угодников преподобных Зосиму и Саватия, на помощь призывающе: „О блаженнии светилници, вы убо непрестанно Христа славословяще и неизреченную его славу ясно зряще! Но и на чад своих не презрите, яко приясте от Бога за труд въздаание! Просветите наша сердца омраченная, с верою к вам притекающих! Да молитвами вашими съхраняеми, от всех зол избавит ны Христос Богъ нашь!” На утри, яже въстахом, и бысть на мори тишина велия. Мы же, седше в карбасы, и яко трема часы достигохом острова Соловецкаго. И тако прославихом Бога и Его угодник Зосиму и Саватия».

Обретох в том манастыри Соловецком старца некоего, многолетна суща, имянем Саватия, имуща въ обители той лет пятдесят. Сей поведа ми вещь чюдну о сих преподобных началникехъ соловецких, Зосиме и Саватии, при игумене Исаи бывшую:

«Въ время Великого поста, и Спасеной страсти Господа нашего Исуса Христа приближающися, нам же делающим трапезу съ иными братиями, внезапу прииде к нам игумен Исаиа ис келии своея слезенъ велми, яко въ ужасе, яко некоим видением движим, начат нам глаголати жалостно: „И кто, — рече, — от вас, братие, хощет потружатися до Шужмоя-острова?[229]” (Бе же той остров от манастыря отстоя верстъ яко шестьдесят). Нам же въпрашающим о вещи: „Что ради, отче, тако скорбенъ еси и ненадежну нам сицеву нужну службу повелеваеши?” — понеже море не учистилося, ледове зело мнозии велици по морю; и всем отрицающимся таковыя службы. Он же к нам рече: „Есть на Шужмои-острове нужно мучатся и зле стражут православнии христьяне вь велице скорби!” Мне же, Саватию, уязвися сердце о игуменском послании, и не рехъ того никому, точию прииде ми желание не преслушати игумена.

Не по мнозе же времени посла нас игумен с другым братом, имянем Ферапонтъ, противу служебников пошедших к Новуграду некыа ради потребы манастырьскыа, в Вирму.[230] Тамо бо бяше пристанище на брезе, дворъ манастырской и всякыя потребы и запасы. Нам же отпущеном на службу, изыдох из манастыря и озрехся вьспят, еже поклонитися кь церкви, и абие узрех от въстока яко плащаницу огнену по въздуху летящу, и прилетевъ прямо гробници преподобнаго Зосимы, и невидима бысть. Мне же страхом и радосию объяту бывшу о предивнем видении, наипаче извещение приимшу ми о игуменском повелении еже до Шужмоа-острова. Мы же, помолившеся Господу Богу и Пречистей Его Матери и преподобных Зосиму и Саватия на помощь призывающе, отпустихомся на море гребью меж ледов.

И тако Божиею помощью приплухом к некоей луде морстей;[231] нарицаема Габлуда, от Шужмоя-острова яко пятнадесятъ верстъ, ту же и пристахом. Уже вечеру сущу, възревъшу ми на Шужмои-островъ, идеже ми игуменъ повеле быти, проплухом бо мимо его, ветромъ носими, и показа ми ся знамение некое вьскраи острова того: яко два столпа багровидны, не велми великы, — и дивихся видению. И поведах брату Ферапонту, сущу съ мною, и глагола ми, яко „и азъ то же зрю”.

Мы же възгнетихом себе огнь, за належащую стюдень, и възлегох къ огню плечима. Не спящу же ми, токмо греющуся, а брату Ферапонту отшедшу в судно почивати. Внезапу слышу за собою человека, огнь спотыкающа. Мне же помышляющу: „Что се есть?” Онъ же рече ко мне: „Саватей, ехат ли ти в Шужмои?” Мне же отвещавшу: „Аще Богъ повелит, и Пречистая Богородица, и началник Зосима — ехати ми”. Он же отвеша ми: „Бог тебя благословитъ, поеди!” Аз же начах зрети около себе и никогоже видех, и сего никому же поведах сущим со мною.

Въставъше же заутра, яхомся пути; Богу помогающу, достигохом до Вирмы. Манастырьское же дело спешно устроися нам. Азъ же начах ту живущих въпрашати, есть ли каковыи люди зимовникы в Шужмои-острове. Они же поведаша: „Судно, рече, розбило там еще с первозимья, иного не вемы ничтоже”. Аз же зело уязвихся и начах домышлятися, как бы достигнути Шужмоя. Абие отплых от пристанища, начах молити брата иже съ мною, как бы игуменом заповеданое сътворити. Оному же не хотящу. Аз же рех: „Аще Богъ повелить быти наж тамо, то и ветръ дасть по нас". Еже и бысть вскоре. Ветру бо дохнувши прямо кь Шужмою-острову. И так въздвигше ветрила, скоро достигохом. Брату же прекословящу и вельми смущающуся на мя. Аз же молих его с терпением вещь понести.

Ходящим же нам по острову с нуждею, снегу зело велику сущу. Мы же тружахомся, где бы искомое обрести. Потом же обретохом при камени храминку малу, в ней же два человека, нага и гладна, и ногам ихъ гниющим зело, точию еле живу сущу. И яко узреша нас, начаша кричати, елико могуще: „Господие, кто есте? Или вас соловецкые старци к нам послаша?” Нам же въпрашающим: „Кого глаголите соловецкыхъ старцовъ?” Они же реша: „Два, рече, старца приходяще зде, посещаху нас, единому имя Зосима, другому же — Саватеи. И егда прихожаху к нам, тогда нам болезнь облегчаше, и глад отхождаше, и стюдень престааше. И ныне были пред вашим приходом, рекуще: «Уже пришлемь по вас, не скорбите!» Ино то они ли вас прислали?” Нам же чюдящимся зело удивьляющим преподобных отець посещению и милости. Какову приязнь имеют, аще кто с верою их на помощь призывает! Сим же ничтоже о сем ведящим, мняху — простии старци приходяще к ним, тако зовоми.

Мы же начахом помалу кормити их и по днех взяхом ихь с собою в карьбас, отвести к манастырю. И начахом плыти. Богъ же молитвами преподобныхъ дая нам тишину велику вь мори. Егда же бехом посреди салмы,[232] абие множество ледов прииде, елико нелзе протиснутися карбасу. Брат же нача мя которати о взятии болных. Стражющии же, яко услышаша старца сваряща мя, начаша глаголати промежи себя: „Почто старець бранит про нас Саватия, не видит ли людей онех, лед распихающих?” Нам же того ничтоже видящим, точию начать лед расплыватися пред нами. Нам же яко река доволно на прохождение посреди ледовъ, такоже и воды по нас устремишася. Мы же в радости и веселии в манастырь достигохом».

Сия ми сказа старець Саватие съ многыми слезами. Обретох бо того в манастыри, пребывающа въ всяком благочестии и чистоте и целомудрии, многа лета имуща въ обители и в чернеческых исправлениих зело искусна. Сего же не поведа ми, каково извещение игумену тому бысть, азъ же того и не написах.

Бе некий старець имянем Герасим,[233] ученикъ блаженнаго Зосимы, живый в пустыни. Сей поведа намъ:

«Некогда ми пришедшу ис пустыни в манастырь вечере в суботу, и слышах утреняя в день въскресения вь трапезе, и по отпетии утреняя братья разыдошася кождо въ свою келью. Мне же оставшю в трапезе, и мало, яко час, пребых, изыдох ис трапезы, уже светящися утренеи зари светло. И мало не дошедшу ми гробници блаженаго Саватиа и възрехъ, вижу старца изшедша из гробници Саватиевы и ко Изосимине идуща и, озревься на мя, глагола: „Подвизайся, да приимеши противу трудовь своих!” И азъ узрех образ лица его и познах, яко въистину преподобный Зосима. И вниде вь гробницу свою, затворися. И мне, въслед его пришедшу, и отверзох двери гробници, и зрях: не бысть никогоже, точию гроб святаго, — и се явленно видех его. И рекох в себе: воистину неложна суть обещания святаго духом пребывати с нами! Иногда же, пакы пришедшу ми ис пустыня въ святый Великый четверток, и время Литургии наста, идох въ трапезу и стах близ дверей, и се вижу дверми явьствено входяща старца. И зрях на нь прилежно, и познах, яко блаженый Зосима прииде; и иде вь церковь. И азъ идох въслед его и стах по стране дверей церковных, а Зосима стояше на игуменьском месте. Егда же Литургии съвершающися, святый приступи близ царьскых дверей и начат причащати братию Пречистых Тайн Тела и Крове Христа Бога нашего; и глагола ми святый: „Иди и ты причастися”. И азъ же идох, причаститися, великым страхом обьятъ бых, зря преподобнаго. И вся братиа причастишася; а святый стояше близ Тайн Христовых, и так невидим бысть. И се разумно буди вам, братие, якоже неложно святый духом с нами пребывает, якоже обещася».

Бяше некий старець именем Филимон, поведа нам глаголя: «Живущу ми в пустыни, и вражнимь наваждением прииде ми скорьбь велия зело и възмете ум мой, и пребых неколико дьний смущаяся. И въстаах на обычное свое правило помолитися. По молитве же седшу ми, и мало въздремахъ и бых в забвение. Се приидоша в келию мою два старца, аз же глаголах к нимь: „Что без молитвы приидосте зде?”[234] И рекоша ми: „Се сътворихом молитву. И ты ли не слыша?” И рекох има: „Сядита, господина моя". И сътворше молитву, седе един. И въпросих его: „Господи мой, кто ты еси? Не нашего вы манастыря старци и не имам знати вас". И рече ми: „Зосима ми имя, а се есть Саватие”. И глагола ми о скорби моей, утешая мя: „Не буди ти скорби о том, что погыбе в кельи твоей; то будет, точию подвизайся, а не унывай!” И ина глагола на утешение души моей. И так невидимь бысть. И азъ воспрянух и не видех никогоже. Скорбь же отиде от мене, и бых в радости.

Некый бо брат положи в моей келии числом 12 гривен сребра, и се, не вем како, погибе. Братъ же оскорбися. И аз такоже скорбь приа его ради. И по глаголу преподобнаго, погыбшее съкровище обретеся на своем месте. И азъ от скорби утешихся, и брат мой. И въздахом хвалу Богови и святым Его угодникомъ Зосиме и Саватию, посещающим чадъ своих».

Се поведа нам священноинок Досифей, ученикъ святаго: «Бывшу ми некогда игуменом на Соловках.[235] И стоях в паперти[236] церковнем на пении, братии нефимон поющимь.[237] И прииди ми въ умъ о некоемь брате клирице,[238] болящем тяжким недугом, стражущу от беса. И взирах ко образу преподобнаго, начах молитися, глаголя: „Отче святый и преподобне Зосимо! Ты еси началник святей обители сей и о Бозе събранней братии, не печеши ли ся о брате сем? Много бо время стражющу ему в недузе том! Не можеши ли ты исцелити его и въставити здрава?” И се изглаголахъ, опрехся о пососе[239] и яко въздремах, то же помышляа. И се вижу идуща преподобнаго от своея гробница в церковь, и озревся, рече ми: „Несть ти на ползу прошение, еже молитися о оном брате; еще ему в том пребывати”. И се рек, невидим бысть. Азъ же възрехъ и трепет обьять мя. По отпущении же пениа, идох по обычаю ко гробу святаго с братиею, и поведах им, еже видех его на пении и яже изрече ми. И се вси братиа прославиша Бога, глаголюще: „Въистину, господине отче, слышахом от многых братии, яко беспрестани посещаеть преподобный святое место сие по своему обещанию, и нас назирая, да некако в лености преходим житиа сего поприще”».

Ину вещь памяти достойну поведа ми прежереченый старець Саватие, глаголя: «Послал нас игумен и братиа на службу: рыб ловити на реце Выгу, у поруга у Золотца. А нас четыре браты, оприч мирянъ: первый — Данила, вьторый — Елисей, третий — азъ, Саватий, четвертый — Филаретъ. Идущим же нам по морю и приидохом на уреченое место Золотець. Начахом по обычаю нашему платити ветхыя сети. И не вем чесо ради, начат глаголати Даниил Елисею: „Почто, брате Елисей, всуе тружаешися, платя сети сиа, а уже твоа ловля минула. Ктому убо не имаши рыбъ ловити, се бо ти смерть приближися”.

Елисей же сия слышав от него, начат телом утерьпати, душею же ужасатися. И обьять ѝ скорбь велика, понеже не у сподобися великаго образа аггелскаго — схимы;[240] священноиноку бо не сущу ту близ,[241] понеже на пусте месте быхом. Мы же начахом его увещавати утешителными словесы, глаголюще: „Почто тако, брате, малодушьствуеши и себе съкрушаеши;[242] положи упование на Бога,[243] и Тъй сътворит яко же хощеть, Человеколюбець бо есть, и устроить путь твой. Аще на пусте месте есмы и священноиноку не сущу, но Богъ везде вся зритъ, Всевидящее Око, аще кто призовет Его от всея душа чистым сердцем. Ты же сътвори достойно и, прекрестяся, положи на себя схиму, молитвы призывая преподобных отець наших Зосимы и Саватиа”.

Нощи же приспевшю, начат Елисей зело пакы скорбети, глаголя: „Яко рече ми Данил, как бы ми копие вь сердце въньзе!” И по глаголу нашему положи на себя святую схиму. Нам же велми скорбящим о скорем преложении брата; положихом его на постели, и сами опочити възлегохом близ его. Таже сном побежени быхом крепце. И убудившеся, не обретохом брата на одре. И воставъ, скоро идохом на взыскание его. Мало же поискавъше, сретохом его идуща к нам, схимы же не бе на главе его. Мы же въпросихом: „Где, брате, схима, бывшаа на главе твоей?” Он же отвеща: „Приидоша множество бесов и въсхитиша мя от места, на немже лежа, вам же спящим. И схиму с меня сняша, не вем где”. Мы же въпросихом его, како от бесовскых техъ рукь избеже. Отвеща: „Зосима, началникь нашь, отъял мя у них”. Мы же и схиму обретохом, на кляпине висящу.

Болный же начать зело скорбети, якоже и преже, — молит нас, како бы мощно домыслитися вь схиму пострищи его. Мы же положихом его в карбас и пустихомся по Выгу-реце вниз. Бе бо река она страшна велми — порогы высокы зело и неудобь проходимы. И ужасахомся вельми стремления воднаго. Болный же укрепляа нас, глаголя: „Не бойтеся, Зосима зде с нами”. Мы же, благодаряще Господа и святаго на помощь призывающе, без вреда преидохом по страшной оной реце и моря достигохом, Богу помогающу нам.

По морю и в Вирму приидохом. Болному же зелне болящу и велми скорбящу о своем несъвершении. Нам же о сем мыслящим, како бы вещь ськратить: пуститися к манастырю — далече, яко верстъ от пристанища того 120, а ветри по морю противни. Мы же умысливше везьти его в Суму-реку,[244] тамо сущу священноиноку, но пакы нощи темне сущи. Вложихом его в большее судно и людей на помощь к себе прияхом. Начахом плыти по морю к Суме-реце, и яко быхом посреди губы, вьста на мори буря велика зело. И смяте нас и в недоумение приведе, понеже парус раздрася и стыр изломися от зелныя буря, волны же, горам подобны, въсхождаху на нас. И всем нам живота отчаявшимся, людие же с нами в судне горко укоряху и проклинаху нас и болнаго.

Болной же, яко услыша их укоряющих и велми ужасающихся, понеже ничто надеятися, разве смерть пред очима, зане и весла волны из рук избиша и осташа безделни, ниоткуду помощи надеятися, точию на всесилнаго Бога надежю възложихом и непрестанно преподобных Зосиму и Саватиа на помощь призывахом, нощи же темне сущи, другу друга пред собою не видети, болный же рече: „Не скорбите, братие, и не бойтеся, вижю бо отца нашего святаго Зосиму с нами в судне, помогающа нам! Сия же вся стражемь от врага, хотящаго погубити душю мою! Богъ же проженет съпостата молитвами преподобных угодник Своих!” По мале же времени начат ветръ улягати и море тишитися. И бысть тишина велиа молитвами святых, — и дьни свитающу.

Мы же познахомься близ пристанища, егоже не надеяхомся, понеже бо вдахомся волнам, отнюд не имуще о себе промышлениа. Приидохом же в Суму-реку и манастырскаго дому достигохом. Аз же, Саватей, текох позвати игумена того,[245] и сказах старца болнаго, требующа его. Он же не обленися, но скоро прииде съ мною. Приидохом же — и обретохом старца умерша. Мы же начахом плакати горкыми слезами, и на святаго поимы деюще и слезы къ слезам прилагающе, глаголахом: „Что, преподобне, толика труда подьяхом, колику в мори беду приимше, а надеяхомся на твою помощ и заступление! Ныне же всего лишихомься, егоже надеяхомся, и не получихом!” Абие же мертвый нача двизатися, мы же припадше и обретохом жива. Начат же глаголати к нам ясно и целомудрено. Внесохом же его в келию, и священник начатъ постригание великаго образа, и, съвершив, причастив его Святых Тайнъ Тела и Крове Христа Бога нашего. Болный же о всем прославив Бога, и миръ дав всем и о Христе целование, и пакы успе о Господе,[246] сподобився божественаго просвещениа[247] молитвами преподобных отець Зосимы и Саватия».

Поведа ми той же старец Саватей:

«Случися, рече, по нашим грехом, Богу попущающу сгорела у нас в манастыре трапеза и церковь теплаа Успение Пресвятыя Богородица.[248] И что было в церкви: сосуды, и ризы, и книгы, и в трапезе и под трапезою в подклетех всякыя запасы манастырскыя, — то все погоре, понеже попусти Богъ тому быти в зимное время. Ни единоя иконы успеша вынести из церкви или из трапезы; елико служба съдержит церковнаа, и чимь питатися братии, от рыб и от всякого запасу, то все огнь потреби, зане в нощи сущи прииде огнь. Нам же в конечней нищете оставшим, и начахом съветовати, терпети ли на месте томъ, или разытися, кого где Богъ направит. Но токмо едино утешение имамы: еже къ гробом началников своих чюдотворцев приходяще молитися, и от них помощи и заступлениа просяще, понеже в недоумение впадохом о своем пребывании.

Старец некый, Макарие именем, спостник бе преподобному отцу нашему игумену Зосиме, живяще бо тогда в пустыни,[249] — той прииде к намъ в монастырь на посещение — и нам зело в скорби сущи. Он же начат утешати нас, глаголя: „Не скорбите, братие, но потерпите с благодарениемь, възложше упование на Господа Бога и Пречистую Богородицу, и преподобных отець наших Зосиму и Саватиа на помощь призывающе. Не оставит Господь, призирая на место сие святое, своих ради угодник; точию подвизаитеся!”

Мы ж словесы его утешевшеся, делу касахомся; братию разрядихом: овех — к Москве к великому князю, а инех — в Великый Новград къ архиепископу Генадию, понеже велику веру имяше къ обители преподобных;[250] и повелехом на Москве и в Новегороде просити у всех христолюбцов на създание новыа церкви — храма Пречистыа Богородица честнаго ея Успениа. И отпустихом служебников на море, как бы мощно на брег доити, понеже еще зиме належащи и ледове мнози ходяще по морю.

Симъ же отшедшим, и мы, оставшеи, идохом в лес и начахом приспевати древеса на здание церковное и трапезное. Мне же, Саватию, делающу с братиею, и начат ми в нощнем видении являтися старець — не единою, но многащи приходя, глаголя ми сице: „Саватей, ехати тебе за салму проводити братию, ихъже отпустисте на службу!” Азъ же помыслих се бесовско мечтание быти, не веровах виденным, дондеже в дело произыде.

Старци же повелеша ми ити в манастырь. И приидох вьскоре, аже посланнии на службу братиа безделны възвратишася. Начаше же мене нудити, яко проводити их за салму. Аз же притекох къ гробу преподобнаго, начах глаголати спроста, яко к живу, к святому: „О, старче Божий, братия нудят мя на такову скорбьную службу! И аще будет угодно святыни твоей, буди ми помощник на дело се!” По молитве же идох в соборъ; священици же и старци всем служебником слушати меня повелеша, и знаменаша нас крестомь, и отпустиша. Мы же яхомся пути на мори.

Доплыхомъ же некоея луды, и неугодно бе пристанище, но понеже нощи наставши, поставихом карбас при брезе. Мне же хотящу выше възвлещи, онемъ же не хотящим, и своеволне поставиша; весла же и дрова, еже имехом с собою за настоящую зиму, туто же, близ судна, положиша. Аз же умолчах ради прекословия, и почихом.

Въставше же заутра, судно едва удержахом, весла же и дрова — все вода отнесе.[251] И начахом скорбети велми: в манастырь леды не пустят, а на море не с чим пуститися! Всем слезы во очию, а помощи ниоткуду! Аз же глаголахъ к ним: „Добро было, братие, слушати мене; а ныне какова беда от вашего преслушаниа!”

Начахомъ же молити Господа Бога и Пречистую Богородицу и преподобных на помощь призывати. И смотряхом на море — и паки дрова наши и весла, аки некым гоними, к нам пловяху, дондеже и кь брегу приткошася! Мы же все извлекохом, отнюд ничтоже погибе. И прославихом Бога и Его угодников!

Обаче же единако скорбни есмы, понеже ледове мнози по морю плаваху и пути несть. И зрях к манастырю — и се вижу к нам летящи белы яко снег две птици, яко бы мало поменши гуси, и яко прилетеша близ нас и пакы невидими быша.

Азъ же един отшед кроме братии, смотрях на море вод и видех судно к нам пловуще, бе же велми хорошо. Слышу же и говорь людской в судне том, глаголющих руским языком. Аз же призвах слугу, шедшаго с нами,[252] и показах ему судно то. Онъ же рече: „И азъ вижу". Мы же много час ждахомь, яко бы близ нас, и пакы невидимо бысть. Нам же ледове разступишася и вода многа явися. Вседохомъ же въ свой карбас и преплыхом безбедно даже и до брега, направляемы молитвами преподобных Зосимы и Саватия.

Пристахом же и судно извлекохом на гору, и идоша служебники во свой путь кождо, идеже послан. Единъ же старец устремися к Шуе-реце, а бяше от пристанища 60 верстъ. И изнеможе старець на пути. И видит человека, едуща скоро на дровнях, именем Иеремиа.[253] И вопроси й старець: „Далече ли, господине, едешь?” Отвеща ему Еремиа: „Не вем откуду приде старець и посла мя по тебя, рече: «Брат изнеможе на пути, иди и возми его!» — и невидим бысть от мене. Аз же скоро изыдох по тебе”. И привезе его к себе в Шуи-реку, понеже бо велию веру имяше человекъ той к манастырю. И поведа старец Иеремию о скорби той, яже в манастыре съдеяся: что трапеза сгорела с церковью и съ всяким запасом. Еремеи же, учредив его и отвезе в Вирму-реку на пристанище манастырьское к старцу именем Зосиме.[254]

Старець же поведа Зосиме бывшую скорбь в манастыре, что и вина служебнаго нету: нечем Литургии служити. И вопроси Зосимы: „Уже ли, господине, из Новагорода прислали что запасу?” Он же отвеща: „Еще служебники не поспели и к Новугороду! Но не вем кто без мене привез коробью велику за печатми”. Старець же по съвету сь Зосимою, — и мне, Саватию, туто же прилучися быти, — отпечатахом крабию, оже в ней все те вещи церковные, о коих наказывали священници и братия: и съсуды, и ризы, и вина съсуд служебнаго. Мы же възрадовахомся и прославихом Господа и Пречистую Богородицю и преподобных началников своих Зосиму и Саватиа, и отпустихом все то в манастырь.

Азъ же, Саватей, рекох Зосиме, живущему в Вирме: „Где будет, господине, мощно половити рыбы или купити, и ты, Бога ради, пошли: нечего ясти братии!” Онъ же ми отвеща: „Идут отселе людие рыбъ ловити на езера, да и от меня с ними идет старець. Хощеши, и ты поиди с ними”. И начаша нарежати лыжи и кережи, и поидоша ловити рыбы. И азъ с ними же идох. И яша рыб много множество. Азъ на свою долю ях с пять тысящь лещей. И прииде весна, бысть расторопь, соли нет, чимъ рыба солити, — а се ужины не ставает![255] Мы же начахом скорбети и призывати началников на помощь. В нощи же той яви ми ся преподобный Зосима, глаголя: „Не скорбите; въстав, идете в путь свой!” Мы же, въставше, обретохом живущих ту христолюбцов много, пришедших на лыжах, и привезоша на кережах ови соль, инии хлебы. И так устроихом ловитву свою. Сами же паки пути яхомся и двема дьньма достигохом в Вирму, молитвами преподобных Зосимы и Саватиа».

Поведа ми священник тоя обители Геласиа именем: «Некий человекь в Шуи-реце именем Анисимь, жену имея именем Марью. Человекъ же тъи богобоязнив, саном быше дьякь церковный,[256] живыи вь благочестии с женою своею, но и правило по вся дьни держашеся. В правиле же своем и канун[257] пояше преподобному Зосиме, понеже велию веру имыи къ святому, видя и слыша бывающая чюдеса от гроба преподобнаго.

Случи же ся жене его в лют недуг впасти, от беса мучиме. На мнозе же сему бываюшу, Богу попущающу за съгрешениа человека ко исправлению нашему на болшую ползу. Еже и бысть. Сему же Анисиму прииде во ум ити в манастырь на Соловки Всемилостивому Спасу и Пречистей Богородици, и къ гробом преподобных отець Зосимы и Саватиа ити, и помолитися с женою своею. И сътвори тако. И вложивше болную жену в карбас, начаша плыти по морю. Болная же на сон обратися. Възбнувши же от сна, начатъ глаголати мужу своему: „Аз уже была в манастыре”. Онъ же нача претити ей: „Престани, жено, что беснуешися". Она же пакы крепляшеся тако быти. И нача поведати какова церковь, какова ли другая церковь, какова трапеза в манастыре.

Абие же манастыря достигоша. Анисим же по благословению священниковъ и старцов приводит болную свою жену в манастырь, и помолився вь церквах Спаса и Пречистыа Богородица. Молебная съвершивше, внидоша вь гробницу преподобнаго Зосимы. И остави жену едину у гроба святаго молитися, самъ же изыде въ другую гробницу — преподобнаго Саватиа, отстоящу ступеней яко четыредесять, тамо помолитися о болящей. Сему же молящуся, болная велми въскрича гласомъ. Анисим же слышав, тече скоро и обрете ю лежащу на земли безгласну. Подъятъ же ея и отведе в теплую церковь у трапезы — храм Пречистыя Богородица честнаго ея Успениа. Священникъ же, предиреченый Геласие, освятивъ воду и покропи ея освященною водою, и знаменав Животворящим Крестомъ. Она же пременися от недуга и бысть здрава и смыслена, яко николиже болев, и начат глаголати: „Яко внидохом вь гробницу, и мужу отступльшу от мене, мне же молящеися у гроба, ста предо мною ефиопъ чернъ страшен образом, держа в руце древо велико, и удари мя древом по главе. Аз же от страха взора того и от удара възопих, елико могыи, и падох на земли. Не веде себе, колико лежах. Таже вижду исшедша из гроба старца седа брадою. И нача мя отирати мантиею своею по лицу и по главе и рече ми: «Жено, буди здрава от недуга твоего». Яви же ми ся и Саватей преподобный и глагола ми: «И почто мене не призываеши на помощь, не веси ли, яко оба едино есмы?». Зосима же глагола ему: «Не деи ея, отче, понеже во мнозе скорби не успе»”.

Жена же, получивши исцеление у гробов преподобьных, отиде в дом с мужем своим, радующеся и славя Бога и Пречистую Богородицю и их угодников Зосиму и Саватиа. И оттоле болма начаша держати веру къ святым и обители их.

По некых же временех случися тому Онисиму самому страдати от зелнаго недуга, еже фрянчюги наричются.[258] Он же, забыв благодеаниа святых к себе, прелстився малоумием и призвав некоего кудесника к себе в дом, хотя от него врачеватися.[259] И позва его ясти к себе. Седоста же на обеде — и кудеснику с ними за столом. Абие кудесник начат кричати, въскочив, нелепыми гласы и очи развращати и побеже из дому. Мариа же, Анисимова жена, над неюже преже реченое чюдо бысть, пакы смятеся умом и въскочи от стола, начатъ ужасатися и плакати. Анисиму же в недоумении сущу.

Абие же пакы по мале Мариа собрав си умъ. Муж же нача въпрашати ея: „Что ти бысть? Почто тако ужасеся?” Она же рече: „Яко седящим намъ за столом, абие внидоша въ нашу храмину преподобнии Изосима и Саватей, с ними же познах и третьяго старца, Иоан имя ему".[260]

Той же Иоан всеми знаемъ бе; мнози свидетелствуют добродетелное его житие, яко велик подвижник бысть в манастыри том, пустынное бо и отходное жителство любя, всякым послушаниемь и смирением, и кротостию украшен, много лет поработав в манастыри. Мы же, сиа оставльше, на предлежащее възвратимся.

„Зосима же вшед, держа жезлъ в руце,[261] и нача бити кудесника, глаголя: «Почто прииде, окаянне и страстне, к рабу Божию? Не подобает ти семо приходити, но иди к подобным тебе!» Приступи же к тебе Зосима, имыи в руце съсудець мал, и нача помазывати из него яко кистью по главе твоей и по лицу. Азъ же, в себе пришед, не видех ничтоже”.

Сиа же слышав Анисим от жены своея, абие въ уныние впаде, начат велми скорбети и плакати о своем съгрешении, глаголя: „Горе, мне грешному, яко Бога прогневах и преподобных отець Зосиму и Саватиа в негодование на ся приведох!” И о сем велми скорбя и каяся. Являет же ся ему в сонномъ видении преподобный Зосима, глаголя: „Что скорбиши тако, человече, и зело унываеши! Аз ти даю севет, в немже велику обрящеши ползу: аще хощеши исцелети до конца, молися Богу прилежно и глаголи Псалтырь. Аще не можеши самъ, то ученику вели глаголати Псалтырь, сам же, послушая, твори Исусову молитву.[262] Егда же приидет праздник святых Богоявлений,[263] ты же искупайся въ иердани[264] и получиши целбу". Анисимь же вся повеленная в видении яве сътвори — и абие бысть здравъ всем телом, яко николиже болев.

Въпрашаетъ же и кудесника оного, что ради тако воскрича. Он же, понашая ему, рече: „Почто нас призываеши на срамоту, а имыи у собя такова врача, от негоже азъ зле пострадах!” Той же Анисим поживе многа лета, здравьствуя и благодаря Бога и угодников Его — преподобных Зосиму и Саватиа. И вь старости добре и исповедании преставися».

Се же написах к вашей любви на ползу, слышах бо от неложных устъ достоверных человекъ. Вы же, Господа ради, простите мя, понеже дерзнух растленнымъ смыслом и недоуменным разумом, отнюд недоволен к сицевой повести. Сами раздрешите недоумение мое, о Бозе имея разум по данному вам от Господа таланту, и сиа украсив, и нас просветите и мьзду приимете от Вседержителя Бога.

Некий человек, имянем Иеремей, измлада живый у преподобнаго въ обители, послужив лета доволна в манастыри всякую службу, еще блаженному Зосиме сущу в животе. Потомъ же той Иеремей отиде в Шую-реку и пребываше мирьскым обычаем: поят себе жену и породи чадо. Преподобный же въ своя времяна отиде Господу, егоже от юности възлюби, и преиде в вечную жизнь.

Той же Иеремей, самовидець быв чюдному житию святаго, аще и в миру живый, но обаче велию веру имяше к святому; аще коя скорбь прилучашеся ему, онъ же моляшеся Богови и на помощь вь молитве Зосиму призываше. Имяше же у собя дщер едину; да яко прииде юная в возрастъ подобный на счетание брака, онъ же приатъ себе некоего юношу в дом свой и вдасть за него дщерь свою в жену. Сим тако бывающим: юным онем пребывающим вь благопокорении, съюзе любовнем и о всем отцу и матери угажающим.

Ненавидяй же добра искони дьявол состави им брань меж себя. Оскорбися юноша гневом велиимъ на отроковицу — и связа ей руце слабце же некако, сам же отступи негде мало взыскати орудиа, чим бити ю. Являет же ся ей кознь бесовъская въ образе человечи, показаяй нож, лежащь близ ея, глаголя: «Возми нож сий и заколи себе, понеже муж твой велми разгневася на тя и хощет тя мучити без милости». Она же, наваждениемъ врага, исторже руце от юзе и, похватив нож, нача резати себя по горлу и по грудем. Прииде же муж ея и обрете ю лежащу, всю кроваву, мало дышущу. Мышляше же юноша въ уме, хотя вринути ея в реку и без вести сотворити. В то же время прилучися быти тамо игумену соловецьскому Исайи. Родителя же отроковици, ощутивше сия, скоро притекоша в дом, плачюще горце. И тако призывают игумена Исайю, идеже лежаше мертвая.

Прииде же отець отроковици в память чюдес бывающих Зосимою, начат съ слезами призывати преподобнаго на помощь, глаголя: «Умоли Бога, отче святый, о лишеней сей отроковици, да негли умилосердиться Богъ твоими молитвами и въздвигнеть еа от смертныя язвы! Помяни, блажене, яко послужихъ тебе съ всем усердиемъ и николиже заповеди твоя преступих! Помози ми, старче Божий, бедующу и убогое свое чадо видя зле кончающеся! Услыши, святый Божии, не презри нас, молящихся в час сей, припадающихъ твоей святости!» Сия отцу отроковици съ слезами горкыми и рыданием въпиющу, яко и всех ту сущих на плач подвиже с собою.

Умили же ся игумен Исайа, зря человека того в велицей скорби и беде, начат молити Господа Бога и святых молитвы на помощь призывати о умершой отроковици. Сим же молящимся, мертвая ненадежно очи възведе и въста абие, яко от сна. Они же сия видевше, ужасом одержими беяху; и прославиша Бога и преподобнаго Зосиму! И бе видети странно зрение: смертныя раны на теле имущи и кровию всю обагрену, но молитва святаго, сь Богом, възможе и неисцелныя целити!

Отець же еа, радость съ слезами смесив, въпияше къ святому, яко живу сущу и ту предстоящу: «О блажене отче Зосимо! Аще възмоглъ еси о Бозе мертвую въздвигнути, то и раны сия можеши въскоре исцелити!» Болная же на сон обратися — и являются ей преподобнии Зосима и Саватие во сне; и дасть ей Зосима съсудець, яко масти исполнь, глаголя: «Помажи себе по ранамъ, понеже отца твоего и матере слез не можем стерпети! Того ради приидохом исцелити тя». Она же сътвори тако, и абие по трех днех раны оны неисцелныя без вести быша.

Сице безмездный врач действова благодатию Святаго Духа и възможе неисцелнаа въскоре целити! Дивити же ся и человека того вере: якоже некто от подруга своего должное прошаше, сице и сей похвалным безстудством прошение получи! Понеже добре проси — и приат независтне! По некых же летех тьй Иеремей отвержеся мира и прият аггельскый образ на Соловках, въ обители святаго, и поживе в добре исповедании, и тако скончася о Господе.

Некий человекъ ноугородець, рода болярьска, Василие именемь, бе же силою велми мочен, живый непотребно житие, сиречь буяческо, бе бо разбойник лют. И прииде ему въ уме, како бы отрещися злаго того нрава и приати иноческый образ. И прииде на Соловкы въ обитель преподобнаго Зосимы, и ту постризается от игумена, и облачит его въ мнишескый образ. Пребысть же неколико время в манастыре в повиновении и в велице послушании и смирении.

Ненавидяй же добра искони злый съветник диаволъ начат разжигати и влещи его на первый обычай. Приим же си въ умъ бежати из манастыря. Таже злый съвет и на дела производит окааннаго. Украдает себе карбас манастырской и елико же где что обрете: от книг или платья, или иныа какыа вещи, якоже есть обычай крадущим, събирает же вся сиа в карбас. Нощи же наставши, Василию бдящу, подобна времени ожидающу, и съ всем тем, елико имяше, бегу ся ят, един пловый по морю, аможе ветръ несый его.

Приносим же бывает въ Анзеры — остров тако нарицаем, Соловецкый же бе; той остров от манастыря верстъ пять на десять. Абие сонъ нестерпим наиде на нь, елико немощно гренутися или очию възвести. Он же приставает к брегу, хотя мало опочити. Поставляет карбас с рухледию при брезе, сам же падает на земли, сном тяжко одержим. Спящу же ему, являются два старца къ нему пришедша. Единъ же от них, со гневом възрев на нь, рече: «Како, окаанне, крадеши мя! Азъ съзидаю, ты же разаряеши!» Тать же и въ сне, яко на яве, нача каятися к нему: «Прости, господине отче, прости!» Святый же отвеща: «Прощение получиши, а седети три дни на месте том, плача!» Еже и бысть. Възбнув же от сна, не бе гласа, ни послушаниа: ни старцевь, ни карбаса. Он же начат плакати о своем съгрешении 3 дни. В четвертый же день гостем едущим с Двины близ острова того, он же начат вопити и звати их к себе. И послаша по него с малым карбасомъ, и привезоша й к себе в ладию.[265] Он же сказа им вся яже о себе. И тако привезоша его в манастырь.

Мы же на предняа возвратимся: каково промышление имеет святый о своей обители. Ловцем манастырьским седящим на тони[266] за морем во Умбе-реце,[267] отстоит от Соловецского острова яко пятьсот верстъ или множая. Бе же тамо старець Фотей именем. Сему же спящу в келии, от труда ловитвенаго почивающу. Являются ему два старца; зрит же, яко и молитву сътвориста. Фотей же позна единого, бе бо ученикъ святаго, рече: «Какъ бы тя знаю, господине, ты еси Зосима, отець нашь». Святый же отвеща: «Азъ есмь. Привезох же вам и карбас, аще требуете. А яже в карбасе, сия вся съхраните, да ничтоже от тех погибнет!» Сим же бе нужна потреба, карбаса на ловлю не имеющим.

Фотей же, от сна възбнув, истинно видение обрете. Призываетъ же и съделникъ-подруг своих и възвещает виденнаа во сне. Они же яве шедше на море, обретоша карбасъ съ всею рухледию, ничтоже от положеных погибе! А таково растояние долготы моря: колико ловцов, колико ездящих по брегу и по морю, а никим же бысть врежено положеное в карбасе! Видите ли, братия, каково попечение имат о месте сем блаженый отець наш Зосима! Сия же видяще и слышаще, подобает намъ съ страхом о своем спасени пещися, и несумненною верою Богови молитися прилежно, и угодников его преподобных Зосиму и Саватиа на помощь призывающе — да молитвами их избудем вечныя мукы и будущих благъ сподобимся!

Поведа нам некий человекъ именем Феодоръ, житие имыи в Суме-реце вскрай моря, имея же велию веру к преподобным Зосиме и Соватию, началником соловецскым, и глаголя:

«Случися нам некогда в лодиях ити по морю з Двины, а азъ сь своими наимникы в лодии, и внезапу приде буря велика в мори. Нам же в велице беде сущи. И начахом молити Всемилостиваго Бога и Пречистую Богородицу и преподобных на помощь призывати Зосиму и Саватиа. Лодии же стоящи на якори, велми обуреваеме, и нам отчаявшимся живота. Мне же влезшу внутрь лодии, и седя, от печали въздремах — и се вижу: на лодии нашей два старца седяща и глаголюща кормнику: „Вороти лодию носом к ветру — и стройно будет". Азъ же възбнух, скоро притек к сущим во льяле, воду льющим,[268] и начах сказывати, яже видех. Единъ же от них рече: „Азъ льях много воды и утрудихся, и сон обьят мя. Седя дремах — и вижу два старца седяща на лодии нашей в сий час, и един к другому глаголя: «Побреги, брате, лодии сея, азъ спешю къ обедне на Соловкы»”.

Мы же сие видехом, и слышавше глаголанная, велми возрадовахомся и прославихом Бога и преподобных Зосиму и Саватиа. И надежаю веселихомся о спасении нашем от истоплениа. И абие ветръ преста, и море на тихость преложися, и бысть нам поветрее благостройно и до пристанища, ко молитвами святых здрави достигохом в домы своя».

Многа от многых человекъ слышах о семь преподобнем Зосиме, игумене соловецском, по рекам и по наволокам[269] живущих во всем Помории. Аще ко гробу его кто с теплою верою приходит, призывая на помощь, всяк тощь не отходит. Не точию же у гроба исцеление бываеть, но и по морю и по суху: идеже аще кто призовет къ Богу в молитве преподобнаго Зосиму, абие милость Божиа последует и скоръ в помощи обретается. Ныне же ми слово предлежит, еже слышах известно от поведающих сиа.

Есть в Помории наволок, Унежма[270] завомо место то. Некий же человекъ, Никон имянем, тамо живый. Сему же прилучися болезнь тяжка зело: бесъ лют нападе на нь. И удолжися болезнь его яко до полутора года. И живота отчаяся, непрестанно мучим от беса на всяк день. Нападению же бесовскому сице вина бысть на Никона.

Два волхва живяху в той веси, имеюшу прю между собою и тяжущася на суде. Никону же прилучися сведетельство между има: и единому угоди, а другаго оскорби. Оскорбленный же похвалися на нь. И так, бесовскым ухищрениемъ и прелестию своею, злокозненым действом нача кудесбити — и насылает беса на Никона, Богу попущающу съгрешений ради. Начатъ же бес мучити его без милости. Никон же разуме, откуду сиа скорбь наиде ему, яко похвалися на нь окаанный той волховъ. Посылаетъ же сына своего къ другому волхву, емуже приазнь сътвори, да бы ему помоглъ и беса прогнал от него. Он же расмотрив въ своем вълхвовании, отвеща сице: «Не мощно ми прогнати беса от тебе, понеже самому сатоне предан еси, но и кости твоя отдав бесам на разделение. Нечто ти мало помогу за твое добро — на един месяць, прочее же промысли о себе. Аз ти даю съвет: аще хощеши съвершене избыти от беса того, то поеди на Соловкы к тамошнему старцу. Инако бо не можеши избыти, понеже сатане предан еси в даръ».

Никонъ же бяше зело мучим от врага, съвещавает своим, повеле вести собя на Соловки къ Всемилостивому Спасу и Пречистые Богородици, и ко гробом преподобных Зосимы и Саватиа. Абие бес нача мучити его без отпуска на многи дни, разуме бо окааный скорое свое побеждение от святаго. И толма умучи болнаго, яко замертва лежаща. Сердоболи же его в недоумении быша: вести ли в манастырь или не везти, понеже видеща его конечное дышуща, и ничтоже надеятися, разве смерть. Еще же ему дышащу, они же по перьвому съвету и по его вере, тех веру восприимше, иже при Христе разслабленаго принесше на одре къ Христу[271] на исцеление, и не обретше куде внести народа ради, они же верхъ храмины прокопавше, свесиша съ одром пред Исуса, Христосъ же по принесших вере исцели разслабленаго. Сице и сих вера действова. Положиша болнаго в карбас еле жива, Богъ же подасть им угодно плаваниа, скоро достизають манастырь. И вземше болнаго на одръ, в гробницу преподобнаго внесоша.

Лежащу же ему у гроба святаго от третьяго чеса нощи даже до шестаго. Старець же некий, имея к нему приязнь, прииде въ гробницу посетити болнаго. Дети же его седяху над нимъ. Старець же глагола им: «Отидите от него и шедше почиите, не подобает вам ту седети». Самъ же един оста у него и начат речи истязати от болнаго. Он же точию очи възведе, гледая семо и овамо. Показует ему старець гроб преподобнаго. Он же едва мичаша, речь же его не знаашеся. И отиде старец в келию, его же остави единого. Помедлив же мало, пакы приходит къ гробници. И пришед кь дверем, молитву сътворяет, болный же, внутрь седяй, отвеща сладце светлым гласомъ: «Аминь». Старець же скоро вниде вь гробницу, обрете Никона здрава и сьмыслена, в ногах у гроба святаго приседяща.

И начатъ въпрашати его, како исцеление получи. Болный же рече: «Зосима чюдотворець исцели мя». Въпрашаше же ѝ старець: как и кыим образом? Онъ же отвеща: «Приидоша множество бесов и начаша клопот велик творити, идеже лежахъ. И стену начаша гробници подоймати: хотяху отсюду похитити мя. Гласы же страшными кричаху. Ови же крючие поддеюще, влечаху мя. Кождо их поглотити хотяше, зубы скрегчюще. Аз же слышу глас из гроба преподобнаго, к себе зовуща мя, и рече: „Приближися ко мне, а не устрашайся ловлениа их!” Аз же отвещах: „Не могу, господи мой, въсклонитися!” Он же рече: „Опирайся рукама и ногама — и Богъ поможеть ти”. Аз же едва въстах и приползох къ гробу святаго. Онъ же прият мя своима рукама и посади мя зде и рече ми: „Богъ помилова тя, яко к нам прибеглъ еси; отселе не бойся лаяниа их, и не имаши их ктому узрети”».

Никон же поведая старцу бесовские речи: «Якоже отъят мя у них преподобный, они же начаша тязати беса того, кои мя мучил, от негоже мя избави Господь молитвами святаго чюдотворца Зосимы: „Почто, — рече, — окаанне, пустил еси его семо к прелагатаю сему? Или не веси его, колико нам много зла творяща! Что ради там не предал еси его горцей смерти, да не избежал бых от рук наших? Се был предан отцу нашему сатане!” Той же к ним вещаше: „И добре умучих его, но не вем, како гонзя от мене!”»

Никон же здравъ бысть, благодатию Христовою. Веде его старец в келию свою, и даша ему ясти и пити. Дети же не хотяху взяти его в дом свой, бояхуся пакы бесовскаго нападаниа. Являет же ся ему преподобный в нощнем видении в келии и рече: «Иди в дом свой, ничтоже бояся; якоже преже рех ти, не узриши ктому бесовскаго злодейства». Отиде же в дом свой, радуяся и веселяся и славя Бога, и благодать исповедая угоднику Христову преподобному Зосиме, яко его молитвами и заступлением исцеление получив.

Оттоле же велию веру стяжа къ святому. Его же и сам видех здравьствующа и скачюща, хваляща Бога. Яко Енея он, иже при апостолех исцеление получи, иже бывый хром от чрева матерня, егоже Петръ и Иоан исцели,[272] и тако и сей «мертвъ быв и оживе, и изгиблъ бе и обретеся».[273] Сице действуют молитвы преподобнаго отца нашего Зосимы! Не токмо же се, но ина многа и неисчетенна чюдеса! Мы же елика достигохом, сиа и писанию предахом.

Брат некий, живый в том манастыри на Соловках, Викентие именем, поведа нам сицеву вещь о себе. Не точию же от него единого слышахом, но и от многых с нами живущих в манастыри.

Отверьгшуся ему мира в юности и приимшу иноческый образ в той обители, поживе же во исправлениих чернеческых, якоже лепо юным черньцем; в послушании у старца живяше даже и до днесь. И сему тако живущу, елика сила подвизающуся о своем спасении, Богу попущающу, искушение прииде на нь от врага, ли юннаго юность наказующе, или угодника своего преподобнаго Зосиму прославляюща, да и всем победителя покажет его на нечистыа духы, еже и бысть.

Случися ему такова страсть от бесов, мука нестерпимая; за летнее обхожение мучаху его непрестанно, на всяк день разбивающи, пены кровавы точаща, якоже ми сам споведа. Егда же мало облегчаше ему, он же хождааше к церкви на съборное пение. И беси непрестанно нападаху на нь: егда к церкви или от церкви идяше, они же емше, в лес влечахут ѝ. Когда же приступлют к нему нечистии дуси, тогда являхуся ему два старца в куколех и отимают его у них, и проваждаху в келью его. Являет же ся иногда третий старець с ними незнаем, иже велику приазнь имея к нему. Въ время егда мучаху его демони, к себе влекущу и своим называюще, старець же той отгоняше их, знамением креста ограждая болнаго. Болный же вопрошаше его, глаголя: «Кто еси, господи мой, сице мене милуеши, окааннаго?» Он же отвеща: «Не знаеши ли мя? Аз бех вашь ближний съсед, понамарь[274] на Ильине улице; имя мое Василей»[275]* — бе бо той Викентие ноугородець родом. Поведает же известно и о тех дву старцех, иже в куколех являются, провожающе болнаго до кельи: «Той, рече, отець нашь преподобный Зосима, а другий — Саватей». Се же мнит ми ся яко аггелъ его хранитель или ин некто от святых.

Потом же и язык отъятся у болнаго брата яко на месяць. Приставлени же бяху к нему два брата стрещи его, и водяхут его по вся дьни ко гробом преподобных Зосимы и Саватиа. Въ един же от дьни приведоша его вь гробницу блаженнаго — болный же зрит явьствено преподобнаго Зосиму, въставша из гроба и вь правой руце держаща крест и знаменающа его, и по лицу мантиею своею отираше. И абие в той час отверзеся язык его, и бысть здравь и смыслень, начат глаголати ясно Божиа величиа и святаго чюдеса, како пострада от бесов и како исцеле благодатию Христовою и Пречистыя Богородица — общиа надежда и ходатаици всем христианом, и преподобных отець наших Зосимы и Саватиа.

Человек некый земледелецъ, Иоан именем, житие имыи в Золотице-реке,[276] отстоит от Соловецского острова яко 60 верстъ. Сему случися болезнь очная, тяжка зело, бысть даже до года, дондеже и свет очию погуби. Отнюд ничтоже видя, прочее ногама ходя и руками осязая, водим бываше человекы. Сей слыша многа чюдеса бывающа у гроба преподобнаго Зосимы, началника соловецьскаго. Нача молити некыя от тамо живущих, яко да везут его на Соловкы къ Всемилостивому Спасу и Пречистей Богородици и целбоносному гробу богоноснаго отца. Они же умильшеся на нь, взяша его с собою в манастырь.

Приводят его к некоему старцу от живущих ту, дабы ѝ научил како помолитися, бяше бо простъ поселянин. Старець же веде его к священнику, егоже неделя, и повеле дати на молебен и на службу. Священнику молебная съвершающу, старець отводит слепаго ко гробу преподобнаго и рече ему: «Молися прилежно Господу Богу и преподобному Зосиме, да некли милостив ти будеть Богъ, молитвами святаго, и получиши желаемое». Слепый же все сътвори по повелению старца.

Божественей службе съвершаеме, оному же стоящу у гроба святаго въ велице умилении, съ многы слезами молящуся и лицемь к земли прекланяющеся, — абие милость Божиа последова, и слепому сладкый свет даровася. Он же начат велиимь гласом хвалити Бога и святому благодать исповедая. И вниде в трапезу человек той, и с братиею яст и пит веселяся; заутра бе слеп, ныне же прозрачно видит!

Идущу же ему посреди монастыря, ненавидя искони добра враг вложи в сердце его, яко не молитвами святаго прозре, но тако просто болезнь отиде. И паки мрак наиде на нь, ничтоже видя. Он же, въскричав, начат осязати пакы, яко же и преже. Взятъ же быв некым и отведен к тому же старцу. Старець же той, искусен сый, въпроси его: «Что ты помысли о себе, егда прозре?» Болный же, срамом побежен, утаив вещь. Старец же прилежно въпрошаа, он же едва в чювство прииде своего маловериа, начат каятися старцу, яко: «Помысли лукавии сътвориша ми се! Сия же ми помышляющу (конец моему неверию!) — казнь приях от Бога и от преподобнаго Зосимы: в той час ослепох». Старец же, тазая его досадителными словесы, глаголаше: «Окаянне и страстне! Как дерзнул еси таковая помыслити о святем — и прогнева Господа и преподобнаго! Ныне же даю ти съвет на ползу: аще хощеши помилован быти, иди къ гробу святаго и плачися о своем безумии, моляся Богови и святаго на помощь призывая, да некли помилует тя Господь молитвами преподобнаго, и отпустит ти съгрешениа!»

Он же, шед в гробницу, нача горко плакати своего лишения и, припадая пред гробом святаго, с многыми слезами каяся о своем зломыслии. Братии всей плачася, еже молити за нь, и исповедаяся Господеви прилежно в сокрушении сердца умиленною душею, якоже пишет въ Книзе Псаломстей: «Сердце съкрушено и смирено Богъ не уничижит».[277] Умилосердися убо Всемилостивый и незлобивый Владыка Христосъ молитвами угодника своего, дарова ему в той час пакы прозрети. Он же изыде из гробници светел очима и здрав всеми чювствы, много благодарив Господа и Пречистую Богородицу и великаго в чюдесех преподобнаго Зосиму, свое же безумие укаряя и маловерие; и достоверен быв проповедник чюдесем святаго, понеже сам искусись не поношати святым, но тепле молитися.

Некый юноша именем Анфим прииде из Новаграда с некым купцем в Поморие купля ради в зимное время. И обиташа въ Шуи-реце на брезе моря. Приспе же тогда вешнее время. Люди с места того хотяху итти на добыткы на море на веснование.[278] Въсхоте же и тъй Анфим с ними итти на промыслъ. Таже поплыша в судех по обычаю. Богъ же дарова им угодно плавание, достигоша до онех местъ, идеже имать обычай зверь восходити. Они же велми много яша звери добытка, кождо на свою часть, юноша же той в заговоре с некиим человеком тамо живущих, и поплуша въсвояси в велице гобзавании веселящися.

Принесе же их ветръ к Соловецскому острову. Бе же обычай манастыря того, по грамоте великого князя жаловалной: аще кого прикинет ко острову з добытком, игумен з братьею того манастыря от всякого добытка емлют на монастырь десятое.[279] Послаша же к ним единого старца имянем Пахомия. Той же рече имъ: «Дайте нам, чада, десятину от добытка вашего, якоже обычай содержит». Они же не хотяху дати десятины, отвещаша тако: «Дадим мало нечто, еже обещахом дати Николе на молебен». Той же юноша Анфим скоро притек, рече старцу: «Азъ, господине, от своего добытка дам десятую часть». Старець же благослови его, рек: «Богъ, чадо, исправит добрую твою мысль». Место же то от манастыря тринадесять верстъ, идеже присташа.

Юноша же той, отпустив старца, возлеже почити. И якоже успе, абие слышит некоего стояще над собою и молитву Исусову творяща. И по молитве рече: «Богъ, чадо, да исправит мысль твою благую, еже добре съвещал еси, да воздасть ти сторицею в нынешний год и въ прочая, да умножатся имениа твоя!» Юноша же, яко услыша, скоро въскочив с места, на немже лежа, нача зрети прилежно, от кого сие слыша. Абие видит дале старца идуща от него, худы ризы носяща и мала возрастом. И скоро течаша вьслед его, еже бы постигнути. Он же невидим бысть. Анфим же известився видением, с радостию отдав манастырю десятину от своего добытка, ничтоже разсужая.

Мужие же они, иже скупостию одержими, не восхотеша дати десятины манастырю, вкладшеся в насады,[280] поплыша от острова в голомя. И абиа въста буря велиа, и много тружшеся, ничтоже успеша, но и насады их съ всем добытком опровергошася въ глубину. И едва сами еле живи спасени быша от иступлениа. Приплувша на брег, поискавше же добытков и ничтоже обретоша, възвратишася въ своя тщама рукама.

Юноша же Анфим отиде по морю стройно, благодатию Христовою и молитвами преподобнаго игумена Зосимы, исторгова добре и придобы доволное богатство по словеси святаго.

Поведа ми старец тоя же обители Соловецскые:

«Послан бых на службу игуменом и братиею в Великый Новград и тамо о делех манастырьскых упражняющу ми ся. И некый гость именем Михайло Сысоев позва мя к себе. Сему же Михаилу сын боляше велми, Матфей именем, отроча возрастом шестью лет. Бяше же болезнь тяжка зело: оба прохода занело, и оток прииде на все тело его, и уже лежащу у последняго издыханиа без ответа на долго время; отець убо и мати отчаястася живота его.

Пришед же к нему и обретох его в велицей скорби по детищи. Бе видети жалостен позоръ и умилениа достоин. Сына отцу и матери еле жива зрящу, мало дыхающа, и начаша ми глаголати: „Слышали есме, господине, о чюдесех преподобнаго Зосимы, вашего началника, яко его ради молитвъ Богъ многим подает исцеление. И ныне помолися к нему, отче, дабы помиловал чадо наше!” Азъ же, видя их в велице скорби, дерзостне отвещах: „Аще хощете его жива видети, обещайте его на Соловкы преподобному Зосиме!” Они же, с радостию слово приимше, рекоша: „Не точию, господине, его, но и дворъ сей в дом Всемилостивому Спасу на Соловки и Его угоднику преподобному Зосиме!”

Азъ же, приступив ко отрочати, начах именем звати его: „Матфей!” Онъ же яко от сна възбудися: очи възведе, ясно зря на мя, и языком проглагола, яко здравъ. И азъ подъимъ его, посадих на постели. Начат же отрок ясти просити. И принесоша скоро. Онъ же ясть и пить, и бысть здравь, благодатию Христовою. Отець же и мати начаста дивитися Божию человеколюбию и отрока скорому изменению, яко да от врат смертных изведен бысть въ едином часе, — и прославиша Господа Бога и Пречистую Его Матерь и угодника их Зосимы чюдотворца».

Инъ некий гость в том же Великом Навеграде имянем Алексей Курюков. Сего же сынъ имянем Василей тяжкым недугом одержим, якоже и много случается отроком юнным. Отець же отрока бяше в велице скорби, видя чядо свое на всяк день мучимо от лютаго беса. Но и скорбяше, а человеческа пакы помышляше, а не разуме твердаго пристанища, еже просити от Бога милости и святых его призывати на помощь («плотстии бо, рече, духовная мудрьствовати не могут»[281]). Пристави ко отроку некоего волхва. Той же и по иным волхвом ношаше его, и ничтоже успеша. Болезни же продолжившися на много время, и детищу в горшее пришедшу. И бе видети родителем странно зрением. О, очи развращенне смысла не имущу!

Прииде же въ ум Алексею тому, отцу отрока, колико время погуби и много имениа истощи волхвам и обавником, а ползы ни малы получи! (Како бо мощно бесу, беса изгнати, а естественую любовь межьду собою имущим!) Съвещавает съвет благъ - прибегает к Господу Богу и Его Пречистей Матери, и преподобнаго Зосиму, началника соловецскаго, на помощь призывает, бе бо слышал от многих о святемъ, яко его ради молитвъ бывают многа исцелениа.

В то же время прилучись старцу соловецскому быти в Новегороде. Алексей же старца призывает в домъ свой и поведает о отрочати, како стражет нестерпимую болезнь от нечистаго беса: «Молим же тя, отче, помоли Бога и Пречистую Богородицу и преподобнаго Зосиму, началника вашего, дабы его молитьвами Богъ помиловал детище наше!»

Старець же, верою огражен преподобнаго Зосимы, повеле отроча к себе принести. И принесоша. И взем на руце отроча, глаголя: «Молитвами преподобнаго отца нашего игумена Зосимы — буди, чадо, здравъ!» И взем рукою своею руку отрока и прекрести его трижды. Абие же отрок нача веселети и светло склабитися, потомъ же сам нача креститися. И тако, Божьею благодатью и молитвами преподобнаго, отроча исцеле[282] и даровася отцу сынъ здравь, очистився от лютаго беса, яко николиже болев. Алексей же послав Соловецскому манастырю доволно милостыню. И от того времени велию веру стяжа к Спасу на Соловкы и его угоднику преподобному Зосиме.

Человекъ некий, Андроник именемъ, бе же от нарочитых, данник великого князя, житие имыи во Унбе-реце.[283] Едущу ему на Лопъ дани брать,[284] и прилучися ему быти в Варзузе-реце[285] с ним же и жена его. Бе же детище у них мужскый пол, Симеон имянем, двою лет сущи. Впаде же отроча оно в болезнь тяжку зело и к концу приближися, последнее дышущу. Отець же и мати жалостно плакаху над детищем и гробная уже приготоваша.

Прилучи же ся тамо быти старцем Соловецскаго манастыря, ловцем рыбным на тонях. И приидоша ко Ондронику утешити его от скорби бывшей ему, понеже бо человекъ той велию веру име к манастырю. Рече же к ним Андроник: «Помолитеся, отци святии, Спасу и Пречистей Богородици и преподобному Зосиме чюдотворцу, дабы молитвами его ожило наше детище!» Отроча же ни очию възведе, точию мало дыша.

Единъ же от старець тех, теплъ верою к преподобному, рек ко Андронику и жене его: «Хощете ли — продадите ми сына вашего? Азъ куплю его на Зосимино имя. Единаче вам уже не требе мертвое сие тело». Они же рекоша: «Купи, отче; даждь нам на нем, елико хощеши». Онъ же, иземъ сребреницу, дасть им. Отроча же кончавающеся. Старець же, взем на рукы отрока, рече: «Отселе се детище несть ваша, но преподобнаго Зосимы, началника соловецского!»

Отроча же нача устнама двизати, якоже бы нечто ясти. Старец же осязая рукою отроча по главе и по устом. Таже проглагола детище, рече: «Дай еще!» Андроник же и жена его видеша чюдо преславное, начаша вопити от радости, благодарение въздающи Всемилостиву Богу, дивному въ святых своих, действующему их ради преславная чюдеса! Отроча же, благодатию Христовою и молитвами святаго, устрабися и бысть здраво, знамение на себе нося преподобнаго игумена Зосимы.

Бяше некий купець в Великом Навеграде именем Матфей. Сей жену имея Мамелфу именем. Человекъ же тъй богатство имыи доволно, живыи благочестием украшен и всеми потребными изообилуя. Жена же его ражаше ему чада, но не воспитааше. Седмь бо бремен бяше ей, но ни единого наследника оста: вси бо млади умирающи, точию в просвящении святаго крещениа, пожинаеми, яко незрела пшеница. Матфей же с супружницею своею вь скорби велице беша о сем и моляхуся прилежно Богови, и святых Его на помощь призывающе.

Прилучи же ся в то время соловецскому старцу Саватию быти въ граде. Той же христолюбець призвав старца в дом свой на обед, яко име обычай странных и нищих кормити. Сяде же на трапезе и, въздохнув, прослезися, нача скорбети о бесчадии. Възрев жена своего супруга слезяща и тако же разлиася слезами, помянув скорби своя; понеже болезни многы подъятъ, а ни едино утешение обрете, лишено бо бяше оноя радости, якоже бывает родителем о чадех велико веселие. Бе же Мамелфа в то время имущи во чреве. Саватие же виде их скорбящих велми и умилися, рече к Мамелфе: «Сей, ныне имаши, госпоже, въ чреве, прадажь й мне! Азъ же куплю его на Зосимино имя, началника соловецского». Она же отвеша: «Купи, отче! Да будет сей не ктому наше детище, но старца Зосимы раб неотходный!» Старец же, яко глумяся, изем две медници, дасть ей.

По времени же жена роди отроча мужескъ пол, и по днех крестиша ѝ. Отроча же растяше без всякого вреда, дондеже и в съвершен възраст прииде. Потомъ же Мамелфа многы сыны и дщери породи, и вси здрави быша благодатию Христовою и молитвами угодника Его преподобнаго Зосимы. И оттоле велию веру имяста къ святому. И бе видети преже бесчадну скорбящу, ныне же «матерь о чадех веселящуся».[286] Сицево благодеание и скорое пременение блаженнаго от скорбных на радостная: приходящим к нему с верою и усердно призывающим на помощ не тщи бывают надежда.

Слово о создании жития основателей Соловецкого монастыря Зосимы и Савватия

Ведомо да будет о сих началникох соловецскых, како житие их начало приат написанию. Азъ, многогрешный и неключимый ни в коемъ же деле блазе и грубый разумом священноинок Досифей,[287] ученикъ блаженаго Зосимы, пребых у него и до скончаниа его, скутах и погребох честное и трудолюбное тело святаго, и елика очима видех и слышах от честных его устъ, сие и предах писанию.

По преставлении же государя своего преподобнаго игумена Зосимы пребых у его спутника у старца Германа в келии. Бе же той Герман пришедый прежде со преподобным Саватием. И поведа ми вся яже о преподобнемь — бывшее житие и отчасти чюдес. Но азъ, грубый смыслом, недоумевах сие удобрити, но толико памети ради написах, да не в забытии будет такова праведнаго мужа житие. Потом же начах въпрашати старца Германа о блаженем Зосиме: како прииде с ним на остров и како при животе преподобнаго чюдодействоваша святыя его молитвы и кая суть до нашего пришествие къ старцу съдеяшеся чюдеса. Сиа вся написах памети ради и сим ползовахся.

Бе же той Герман от простых человекъ, не учився Божественному Писанию, но тако просто поведааше святых житиа и чюдеса. Азъ же, неразумный, како слышах, тако и написах, не украшая писаниа словесы, понеже груб сый и невежда, но точию памяти ради писах. Братиа же — овии любяще писанная мною, а иныи глумящеся о написанных и въ смех сиа полагааху.

Прииде же некий священноинок именем Иосиф з Бела-езера тамошних манастырей и пребысть у нас время немало въ обители Соловецской. И той испроси почести житиа святых, и удержав в келии у себя много время. И пакы отиде въсвоями, и житие святых, написаное Германом, с собою увезе. Мы же остахом бес паметий о житии началником, понеже Герман преставися.[288]

По времени же послан бых игуменом и братиею на службу в Великий Новоград. И приидох къ архиепископу Генадию[289] благословитися от него. И благослови мя, и начат въпрашати многими словесы о ведании места, и о устрои манастыря, и о началникехместа того и манастыря, како и от кого зачатся. Азъ же, елико помня, вся подробну поведах архиепископу. Онъ же рече: «Напиши ми, брате, о житии и о чюдесех началников манастыря вашего вся сиа, еже ми еси поведал». Азъ же отвещах: «Господи архиепископе, человекъ есмь груб естеством, на сие дело не доволенъ, како добре изложити». Архиепископъ же рече: «Елико Богъ вразумит тя, напиши. Веру бо имам к началником манастыря вашего, понеже Саватие, началник вашь, старець ми был,[290] азъ у него в послушании бых немало время и вем достойна житием старца, велика и свята. Ныне же благословляю тя: иди и напиши». И так, понужен бых от архиепископа, приах благословение, испросихся у него писати в манастыре и к нему привести.

И седох в келии уединясь, и понудив себе, елико возмогъ, прострох грубую си десницу и, колико въспомних, вся написах, Богу поспешествовавшу ми, молитвами преподобных отець Саватия и Зосимы. Написание же держаах у себя и помышлях: «Како везти ко архиепископу? Стыжуся, понеже истинну написах, но удобрити якоже бы сложно недоумехся». И о семь размышлях: «Како бы изообрести такова человека, могущаго украсити якоже подобает?»

Послан же бых игуменомъ и братиею къ осподствующему граду Москве о потребах манастырскых. И на пути прилучи ми ся быти на Беле-езере в манастыри Ферапонтове.[291] И приидох тамо благословитися к некоему старцу — мужу добродетелну, вь всех исправлениих пребывающу и премудростию разума украшену, Спиридону именемъ, бывшему митрополиту Кыевскому. И той начат въпрошати мя о острове Соловецском, и о создании манастыря, и о началникех. Аз же поведах ему все подробну, и начах молити его о изложении житиа преподобных; и показах ему свое грубое писание, понеже бе муж мудръ, измлада извыче и добре умея Божественая Писаниа — Новая и Ветхая. И, Божиа ради имени, не отречеся понудити старость свою: изложи и написа добре, якоже подобно въ общую ползу хотящим спастися и ревновати сих преподобных житию. Азъ же, грубый, возрадовахся зело, яко сподоби мя Богъ изъобръсти такова благоразумна старца, яко желание сердца моего исполни и недостаточная наверши.

Сиа же везох ко архиепископу Генадию. Онъ же почет и похвали зело, и начат блажити мя, глаголя: «Како ты, брате, селико имы разума и отрицаешися святых житие писати? Се воистину добро!» И рекох ему: «Прости мя, владыко святый, не мое се творение!» И поведах вся пореду, како и от кого сътворена суть. Онъ же рече ми: «Благословенъ ты от Бога, чадо, яко такова благоразумна мужа обрете! Сий человекъ в нынешняя роды беяше столпъ церковный, понеже изъмлада извыче Священная Писаниа и чюден бяше старець житиемъ, многолетными сединами украшен».

Списано же бысть житие се преподобных отець, началников соловецскых, Саватиа и Зосимы в лето 7011 Спиридоном, митрополитом Кыевьскым,[292] заточену ему сущу тогда во стране Бела-езера в манастыри Пречистыа Богородица честнаго Ея Рожества, глаголемо Ферапонтовь, въ славу Христу Богу.

Мы же к сим да приложим: молящеся Богови и святых Его на помощь призывающе, сице рцем:

«О пастырие добрии и истиннии строителие, наставници и наказателие иноческаго житиа; отцемь славо и преподобным единокровници, и праведнымъ инокомъ наставници, общему житию съвершителе и събеседници бесплотным! Страннымь питателие, нищим богатное сокровище, недугующим врачеве; плененым свободителие, слепым вожди, старости подпора; заблужшим руководителе, скудостным — ума наказателе, съкровенным возвестителие, вь скорбех утешители; княземь православным миротворци и поборници на сопротивныя, крепость на поганыа!

Троици съ бесплотными предстояще, и нас не отступайте; поминайте стадо, еже собрасте мудре, и соблюдите Богомь дарованную вам паству, яко чадолюбивии отци; и не презрите иже верою и любовию чтущих пречестную и многорадостную память вашу, защищающе нас и съблюдающе от находящих враг! Да, молитвами вашими присно съблюдаеми, Царствия Небеснаго сподобимся, о Христе Исусе, Господе нашем, Ему же подобаеть слава и держава — съ безначалным Отцемь и Пресвятыим и благым и животворящим Духом, ныне и присно и въ векы векомь. Аминь».

ПЕРЕВОД

КОММЕНТАРИЙ

Жития Зосимы и Савватия Соловецких были созданы на рубеже XV—XVI вв. двумя выдающимися книжниками — соловецким игуменом Досифеем и митрополитом Киевским Спиридоном. Кроме них в создании житий принимали участие преп. Герман Соловецкий и выдающийся деятель Русской Церкви конца XV — нач. XVI в. архиепископ Геннадий Новгородский. История создания житий соловецких преподобных рассказана самим Досифеем в его послесловии к житиям («Слове о сотворении жития первоначальников Соловецких Зосимы и Савватия»).

Игумен Досифей был учеником преп. Зосимы и после кончины своего старца жил в одной келий с преп. Германом, со слов которого и записал рассказы о жизни преподобных Зосимы и Савватия («памяти ради»). По словам Досифея, Герман был неискусен в «божественном писании» и рассказывал о жизни соловецких святых просто и незатейливо. Некоторое время спустя записи его рассказов были утрачены: их взял почитать некий священноинок, пришедший из Белозерья, и, уйдя, унес их с собой. Так пропали «памяти» о жизни основателей Соловецкого монастыря — живое свидетельство о них «спостника их» преп. Германа.

Будучи человеком весьма деятельным (которого по праву считают одним из создателей библиотеки Соловецкого монастыря), Досифей прибыл по монастырским делам в Новгород и при встрече с архиепископом Геннадием рассказал ему о жизни основателей Соловецкого монастыря. Оказалось, что архиепископ Геннадий в молодости был учеником преп. Савватия. Услыхав рассказ Досифея о жизни своего старца на пустынном острове и о создании на месте его подвигов Соловецкого монастыря, Геннадий тотчас благословил Досифея написать жития обоих подвижников. Так было положено начало созданию житий соловецких святых — благословением, преподанным ученику преп. Зосимы учеником преп. Савватия, и благоговейным желанием обоих сохранить память об их духовных отцах.

Уединившись и заново вспоминая рассказы Германа о жизни Зосимы и Савватия (самого Германа к этому времени уже не было в живых), Досифей сочинил некий «первый опыт» житий соловецких чудотворцев. Разумея несовершенство своего сочинения и нуждаясь в помощи другого, более опытного, писателя, Досифей постарался найти такового в Ферапонтовом монастыре, где в это время находилось сразу несколько видных иерархов Русской Церкви: архиепископ Ростовский Иоасаф, епископ Пермский и Вологодский Филофей и митрополит Киевский и всея Руси Спиридон. Было это в 1503 г. (примерно через год после того, как в Ферапонтове трудился Дионисий, расписавший по заказу архиепископа Иоасафа церковь Рождества Богородицы).

Архиепископ Иоасаф и епископ Филофей являлись постриженниками Ферапонтова монастыря и теперь пребывали там на покое. Киевский же митрополит Спиридон — в прошлом глава Русской Церкви на территории Литовского государства и законный претендент на московский митрополичий стол — находился в Ферапонтовом монастыре «в заточении».

Митрополит Спиридон был известным книжником, хорошо знавшим Священное Писание, и именно к нему Досифей и обратился за помощью. И Спиридон согласился ему помочь. Используя сочинение Досифея в качестве основного источника сведений о жизни основателей Соловецкого монастыря, он написал жития соловецких преподобных в соответствии со всеми требованиями агиографического жанра.

Сочинение Спиридона замечательно своим точным следованием агиографическому канону. Почти не располагая достоверными данными о жизни преп. Савватия, Спиридон сумел (используя житийную топику) написать полноценное житие, распространяя с помощью «общих мест» те немногие сведения, которые он почерпнул из сочинения Досифея.

Трудности в создании Жития Савватия были связаны прежде всего с отсутствием сведений о раннем периоде жизни святого. Вследствие этого целый ряд тем, характерных для жанра жития: происхождение героя (место его рождения и родители), воспитание, обучение, описание места монашеского пострига и т. д., — в Житии Савватия не могли получить развития. Значимость названных «топосов» для житийного жанра митрополит Спиридон осознавал вполне отчетливо. Поэтому при создании Жития Савватия он применил весьма изящный прием: он лишь наметил большинство из названных житийных «топосов» как бы пунктиром (сославшись на свое неведение), сумев при этом воспроизвести традиционную схему житийного «энкомия»: «А из какого города или селения были его родители, этого мы не знаем точно, ведь много лет прошло до нынешнего написания. И не смогли узнать мы, в каком возрасте он принял иноческий образ».

Отсутствие фактических сведений о жизни Савватия в Кирилло-Белозерском и Валаамском монастырях также не могло помешать Спиридону описать его иноческие подвиги, благодаря тому что топос «монашеского делания» был уже хорошо разработан.

В заключительной части Жития Савватия, посвященной последним дням жизни преподобного, Спиридон также использовал известный житийный топос описания «кончины праведника». Приготовление Савватия к кончине земного пути изображено им весьма подробно: святой предвидит свой уход, просит Бога о причащении Святых Тайн, чудесным образом удостаивается святого причащения, и затем, готовясь к уходу, поет по себе чин на отшествие души.

Описание кончины Савватия выполнено с поразительной достоверностью, притом что Спиридон (в отличие, например, от автора «Записки о кончине Пафнутия Боровского») не был ни учеником преп. Савватия, ни свидетелем его последних дней. Почти с кинематографической точностью писатель фиксирует каждый шаг преп. Савватия, предшествующий его кончине: вот он взял в руки кадильницу, положил на уголья ладан и пошел помолиться в часовню; потом возвратился в келию, покадил в ней честным иконам, помолился Господу и, почувствовав, что силы от него уходят, сел на лавку, а кадильницу опустил рядом с собой... Так и умер он сидя, с возжженной кадильницей, поставленной рядом с собой.

Яркий художественный образ (возжженная кадильница рядом с усопшим Савватием), возникающий на фоне бесстрастно-проникновенного повествования, производит на читателя сильное впечатление, делая его незримым свидетелем последних мгновений жизни преподобного.

Таким образом, несмотря на почти полное отсутствие фактических сведений о преп. Савватии, митрополит Спиридон сумел написать цельное произведение о его житии, умело воссоздавая в нем недостающие эпизоды и широко используя житийную топику.

В сравнении с Житием Савватия, Житие Зосимы Соловецкого содержит больше сведений о жизни святого. Основные факты Жития Зосимы были собраны и расположены в хронологической последовательности, по-видимому, еще игуменом Досифеем. Редакторская правка митрополита Спиридона выразилась прежде всего в стремлении дополнить «событийный» ряд Жития изображением иного, «несобытийного», ряда духовной биографии святого, основным содержанием которого является описание неустанного монашеского «делания». Отдельные эпизоды Жития Зосимы писатель объединил с помощью внешне «бессобытийных» сюжетных «скреп», изображающих непрерывность монашеского подвига: «С того времени начал блаженный Зосима к трудам труды прилагать (...) Тело повинуя духу, предавался он всенощным стояниям и воссылал непрестанные молитвы к Богу...»

Вновь и вновь возвращаясь к заданной теме, автор изображает неизменность «внутреннего пути» преподобного и его постепенное восхождение по ступеням монашеского «делания» («от силы в силу», от подвига к подвигу): «И устремился он к еще большим подвигам, слезами каждый день ложе омывая, молитвами, постом и жестоким изнурением тело свое удручая и непрестанные молитвы вознося Богу...». «Блаженный же еще больше предавался духовному деланию, труды к трудам прилагая (...) и предупреждением страстных помыслов сердце всегда очищая...», «И после того пребывал раб Божий игумен Зосима во многих трудах и сугубом пощении немало лет...» (подобные фрагменты повторяются в Житии 14 раз).

Сочетание упомянутых «бессобытийных» фрагментов с эпизодами «событийного ряда» создает неповторимую композицию Жития Зосимы. Каждый из двух «рядов» композиции этого Жития соответствует одному из двух главных жизненных поприщ Зосимы — созиданию обители и устроению души (ср.: «...и устремился он на подвиг, телесный и духовный: телесный — в созидании монастыря непрестанном, духовный же — в вооружении не невидимых врагов постом и молитвой»).

«Исправляя» жития соловецких преподобных и «украшая» их цитатами из святоотеческой литературы и Священного Писания, Спиридон не преследовал цели чисто «эстетические». Библейские цитаты использованы им для обозначения конкретных монашеских подвигов. За большинством из этих цитат в святоотеческой традиции закреплен определенный смысл, выражающий аскетический опыт святых отцов. Описывая монашеские подвиги Зосимы, Спиридон использует, например, то сравнение из «Лествицы» Иоанна Синайского («...и каждую ночь, выходя из келий до того, как начинали бить к утрене, Зосима плакал о своей душе, словно над покойником...»), то стих из псалма Давида («...и, „слезами каждый день ложе омывая" (Пс. 6, 7), непрестанные молитвы возносил Богу»). «Слезы покаяния» являются неотъемлемой частью монашеского подвига, о необходимости которых говорили многие святые отцы, например Антоний Великий: «Каждую ночь слезами своими обливай ложе свое и смачивай постель твою, и смиряй себя пред Христом Господом (...) Непрестанно плачь о грехах своих, как если бы ты имел мертвеца в келий своей» («Устав отшельнической жизни»). О слезах покаяния говорит и Иоанн Лествичник в 5-й главе своей книги, вспоминая подвижников, «рыдавших над своими душами, как над мертвецами» (глава «О покаянии»),

Опираясь на опыт собственной духовной жизни, Спиридон подобно искусному зодчему «выстроил» жития Зосимы и Савватия на «твердом основании» святоотеческой традиции, подтвердив слова, сказанные о нем архиепископом Геннадием, назвавшим его «столпом церковным» и «старцем чудной жизни».

Жития соловецких преподобных Зосимы и Савватия связаны между собой единством замысла и повествования (включая и их общие «чудеса») и представляют собой единое произведение. Предположительно древнейшая редакция обоих житий сохранилась в сборнике РГБ, Волоколамское собр., № 659 (список датируется 30-ми гг. XVI в.). Впоследствии жития Зосимы и Савватия неоднократно редактировались и пополнялись за счет добавления новых «чудес». Среди редакций XVI в. наиболее известна так называемая «редакция Великих Миней Четьих» (созданная не позднее 1520-х гг.).

К 1535—1536 гг. относится создание похвальных слов и служб Зосиме и Савватию, написанных по заказу соловецкой братии сербским монахом Ианикитой Львом Филологом. Официальная канонизация преподобных Зосимы и Савватия была совершена на соборе 1547 г., установившем их повсеместное почитание в качестве общерусских святых.

Текст «Житий Зосимы и Савватия» издается по списку РГБ, Волоколамское собр., № 659.