Библиотека литературы Древней Руси. Том 16 (XVII век)

СУД ШЕМЯКИН

В некоих местех живяше два брата, земледелцы, един богат, други убог. Богатый же ссужая много лет убогова и не може исполни скудости[4016]его. По неколику времени прииде убоги к богатому просити лошеди, на чем ему себе дров привести. Брат же ему не хотяше дати <...> лошеди и глагола ему: «Много ти[4017], брате, ссужал, а наполнити не мог». И егда даде ему лошадь, он же, вземь, нача у него хомута просити. И оскорбися[4018] на него брат, нача поносити убожество его, глаголя: «И того у тебя нет, что своего хомута». И не даде ему хомута.

Поиде убогой от богатого, взя свои дровни, привяза за хвост лошади, поеде в лес и привезе ко двору своему и забы выставить подворотню и ударив лошадь кнутом. Лошедь же изо всей мочи бросися чрез подворотню с возом и оторва у себя хвост.

И убоги приведе к брату своему лошадь без хвоста. И виде брат его, что у лошеди ево хвоста нет, нача брата своего поносити, что лошадь, у него выпрося, испортил, и, не взяв лошади, поиде на него бить челом во град к Шемяке судии.

Брат же убоги, видя, что брат ево пошел на него бити челом, поиде и он за братом своим, ведая то, что будет на него из города посылка[4019], а не ити, ино будет езд приставом платить.

И приидоша оба до некоего села, не доходя до города. Богатый прииде начевать к попу того села, понеже ему знаем. Убогий же прииде к тому же попу и, пришед, ляже у него на полати. А богатый нача погибель сказывать своей лошади, чего ради в город идет. И потом нача поп с богатым ужинать, убогова же не позовут к себе ясти. Убогий же нача с полатей смотрети, что поп з братом его ест, и урвася[4020] с полатей на зыпку[4021] и удави попова сына до смерти. Поп также поеде з братом в город бита челом на убогова о смерти сына своего.

И приидоша ко граду, идеже[4022] живяше судия. Убогий же за ними жь иде. Поидоша через мост в город. Града же того некто житель везе рвом в баню отца своего мыта. Бедный же веды себе, что погибель ему будет от брата и от попа, и умысли себе смерти предати, бросися прямо с мосту в ров, хотя ушибьтися до смерти. Бросяся, упаде на старого, удави отца у сына до смерти; его же поимаше, приведоша пред судию. Он же мысляше, как бы ему напастей избыти и судии что б дати. И ничего у себе не обрете, измысли[4023], взя камень и, завертев в плат и положи в шапку, ста пред судиею. Принесе же брат его челобитную на него исковую в лошеди и нача на него бити челом судии Шемяке.

Выслушав же Шемяка челобитную, глагола убогому: «Отвещай!» Убогий же, не веды, что глаголати, вынял из шапки тот заверчены камень, показа судии и поклонися. Судия ж начаялся[4024], что ему от дела[4025] убоги посулил, глаголя брату ево: «Коли он лошади твоей оторвал хвост, и ты у него лошади своей не замай до тех места[4026], у лошеди выростет хвост. А как выростет хвост, вто время у него и лошадь свою возми».

И потом нача другий суд быта. Поп ста искати[4027] смерти сына своего, что у него сына удави. Он же так же выняв из шапки той же заверчены плат и показа судие. Судиа же виде и помысли, что от другова суда други узел сулит злата, глаголя попу судия: «Коли де у тебя ушип сына, и ты де атдай ему свою жену попадью до тех мест, покамест у пападьи твоей он добудет ребенка тебе. В то время возми у него пападью и с ребенком».

И потом нача трети суд быта, что, бросясь с мосту, ушиб у сына отца. Убогий же, выняв заверчены из шапки той же камень в плате, показа в третие судие. Судия же начался, яко от третьего суда трети ему узол сулит, глаголя ему, у кого убит отец: «Взыди ты на мост, а убивы отца твоего станеть под мостом, и ты с мосту вержися[4028] сам на него, такожле убий его, якоже он отца твоего».

После же суда изыдоша исцы со ответчиком ис приказу. Нача богаты у убогова просити своей лошади, он же ему глагола: «По судейскому указу как, де, у ней хвост выростет, в ту, де, тебе пору и лошадь твою отдам». Брат же богаты даде ему за свою лошадь пять рублев, чтоб ему и без хвоста отдал. Он же взя у брата своего пять рублев и лошадь его отда.

Той же убоги нача у попа просити попадьи по судейскому указу, чтоб ему у нее ребенка добыть и, добыв, попадью назад отдать ему с робенком. Поп же нача ему бити челом, чтоб у него попадьи не взял. Он же взя у него десять рублев.

Той же убоги нача и третиему говорить исцу: «По судейскому указу я стану под мостом, ты же взыди на мост и на меня тако ж бросися, яко ж и аз на отца твоего». Он же размышляя себе: «Броситися мне — и ево де не ушибить, а себя разшибьти». Нача и той с ним миритися, даде ему мзду, что броситися на себя не веле.

И со всех троих себе взя. Судиа шь высла человека ко ответчику и веле у него показанние три узлы взять. Человек же судиин нача у него показанныя три узла просить: «Дай, де, то, что ты из шапки судие казал в узлах, велел у тебя то взяти». Он же, выняв из шапки завязаны камень, и показа. И человек ему нача говорить: «Что, де, ты кажеш камень?» Ответчик же рече: «То судии и казал». Человек <...> нача его вопрошати:«Что то за камень кажешь?» Он же рече: «Я, де, того ради сей камень судье казал <...> кабы он не по мне судил, и я тем каменем хотел его ушипти». И пришед человек и сказал судье. Судья же, слыша от человека своего, и рече: «Благодарю и хвалю Бога моего, что я по нем судил: ак бы я не по нем судил, а он бы меня ушип».

Потом убоги отыде в дом свой, радуяся и хваля Бога. Аминь.