Библиотека литературы Древней Руси. Том 16 (XVII век)

Преподобный отец Варлаам в лета бе царя и великаго князя Иоанна Васильевича[4317] всея России самодержца. Рождение и воспитание име в Керецкой волости, на море окияне. Научен же бысть книгам и Божиим судом поставлен бысть презвитером[4318] в Колском граде в церкви Николы чюдотворца, и тамо пребываше, добре подвизаяся на невидимаго врага[4319] козни, и люди закону Божию яко истинный пастырь поучаше, и бысть ходатай Богу и человеком.

Видев убо его диавол всяческими добродетелми украшена, свою же окаянную и немощную силу, яко паучину раздираему от него, простре сеть во уловление праведнаго, якоже древле на Адама, вложив бо его во убийство супружницы его. Он же по сотворении греха разумев, яко завидев ему враг, плакався велми и недостойна себе судив еже священная действовати, но паче изволил страдати за грех, — еже с мертвый телом по морской пучине с места на место плавати, дондеже[4320] оно мертвое тело тлению предастся. И бе видети праведнаго труды: единаго по морю в карбасе ездяща с мертвым телом, от Колы около Святаго Носа даже и до Керети. И не якоже протчии человецы ожидаху паруснаго плавания, но он плаваше против зелнаго обуревания[4321] и весла из рук своих не выпущаше, но труждашеся велми и псалмы Давидовы пояше, то бо ему пища бяше. И во дни убо труждаяся по морю, в нощи же без сна пребываше, моля Бога со слезами о отпущении греха. И понеже доволно время потрудився, хотя извещение прияти[4322]. Доиде прежереченнаго места — Святаго Носа. Ту бе, глаголют, прежде того непроходну месту тому быти ради множеств червей морских, иже творяху многи пакости над лодиями мореходцем. Еще бо и он без вреда пребываше от них, но восхоте и протчим человеком путь без вреда сотворити. Став на молитву и руце воздев на небо, услышан бысть. И абие[4323] черви без вести сотворишася, и путь мореходцем около Святаго Носа сотворил чист даже и до ныне.

И понеже преподобный извещение прием от Бога, вскоре оставляет мир и бывает инок, и в пустыню вселився и, Божиею помощию бесовския полки победив, с миром ко Господу отъиде в Чюпской губе. Оттоле же пренесено бысть святое тело его в Кереть и погребено близ церкви святаго великомученика Георгия с восточной стране за олтарем.

По некоем же времени восхоте Бог явити труды своего угодника преподобнаго Варлаама. Некоему убо купцу именем Евфимию, каргополцу, пловущу по морю в лодии и от зелнаго обуревания потопающи лодия его, и всем ненадежно[4324] плачющим погибели своея. Тогда представ им святый и от потопления избавил, и себе поведал, кто бе явивыйся. Евфимий же и сущии с ним, видевше преславную помощь от преподобнаго ко всем, и приеха в Кереть, и поведа всем, яко молитвами преподобнаго Варлаама Керецкаго избавил Бог от потопления морскаго, и повеле от имения своего поставити сень над гробом святаго и свещу пред святителевым образом вжигати. И отъиде в путь свой радуяся, благодаря Бога и угодника его, преподобнаго отца нашего Варлаама Керецкаго.

ПОВЕДАНИЕ ОТ ЧЮДЕС ПРЕПОДОБНАГО ВАРЛААМА КЕРЕЦКАГО ЧЮДОТВОРЦА

В лета 7172 (1664) году, июня в 1 день поведа нам некий муж именем Петр Васильев, пореклом[4325] Буторин.

Юну ми сущу, в первое на десят лето[4326] возраста моего, упражняющее же ся со отцем в рыбных ловитвах в Соностровах. Видение таковое во сне виде, яко пловушу нам со отцем моим в карбасе, против Шарапова наволока[4327], напрасно[4328] возъярися море волнами, и наполнися судно наше воды, и аз бых яко во иступлении. И паки видех ину волну, идущу и хотящу покрыти судно наше. И озрехся и видех в судни нашем старца седа брадою, защишающе нас от волны тоя. И абие внезапу обретеся судно наше во отишии за коргою[4329]. И егда избави нас от потопления, и рече нам: «Потонути было бы вам, аще не бы аз, Варлаам ис Керети», и повеле ми поведати людем. Аз же возбнув и начат поведати отцу моему бывьшее видение. Он же, яко младенцу мне, и не внимаше себе во ум.

Наутрие же узрехом лодию, в море идущу, и егда близ нас бывшей, ин сусед прииде к нам з другие тони[4330] и поведа: «Наша де, керецкая, прошла лодья, но аз не смеяше ехати к ней, понеже зыби на море много».

Отец же мой внезапу начат глаголати: «Поедем мы в волость хлеба ради». И поехаша, и ветру сушу велику. И егда бывшим нам у Шарапова наволока, напрасно пришед волна и наполни карбас наш воды. Нам же в недоумении велицем бывшим и ужасшися. И паки видехом вторую волну, лютее той ярящуся и покрыта нас хотящу. Нам же до конца отчаявшимся живота своего. И абие внезапу судно наше, никимже направляемо, обретеся за коргою у брега. Мы же возрадовахомся велми и выливше воду из карбаса и доидохом в волость. По пяти же днех яви ми ся паки той же старец во сне в трапезе, поношая мя мне и ужасая[4331], и хотяше мя бити дубцы и глаголаше: «Что ты мною бывшее вам не поведа всем человеком деяния моего?» И повеле поведати людем.

Ино чюдо. Той же муж поведа нам. Бысть некто от велмож царевых правя в Колском остроге воеводскую власть при благоверном царе Михаиле Феодоровиче всея России после Литовския войны.[4332] Ему же имя Гурий Иванов,[4333] сын Волынцов. Бысть же ему черная болезнь. И недоумеющуся, како бы ему болезни тоя избыта. И явися ему святый Варлаам в той болезни, во образе иноческом, глаголя: «Не скорби, человече, избавит тя Бог от тоя болезни». Той же муж начат глаголати ему: «Кто еси ты, господине мой, и откуду?» Он же отвеща ему: «Аз есмь Варлаам ис Керети». Той же велможа возбнув от болезни своея, яко от сна, и начат поведати еже виде и вопрошати, кто есть той Варлаам. И поведаша ему во граде живущии: «Той в древняя лета таков муж священствовав в Колском остроге и после жил в Керети иноком, тамои преставися». Той же велможа посла на взыскание, кто есть тоя веси живущии в том граде. И обрете пришелца, керецские волости жилца Василия именем, пореклом Мухина, и вопрошая его о святем Варлааме, како и где положено честное тело его. Он же Василий поведа ему подробну вся, яже о святем, и яков небрежении ему на месте, на немже положен, тамо и почивает. Той же предреченный велможа Гурий начат с тем Василием совещати, дабы сотворити сень над гробом святаго Варлаама и крест поставити. И даст ему сребро на устроение. Василий же той взем сребро и прииде в Кереть, и по повелению онаго воеводы содела гробницу над гробом святаго. Велможа же той избавлен бысть от духа нечистаго молитвами преподобнаго Варлаама.

Ино чюдо преподобнаго бывшаго. Нецыи мужии, купцы града Каргополя, имя единому Маков, пореклом Поснов, другому же имя Евфимий Болнищев, поведаша, сице рече. Идущим нам на лодии весною от Онежскаго устья в куплю. И егда пробежавшим Соловецкой остров и бывшим на болшем море[4334], и наехаша ледове много, и обыдоша лодью нашу оттовсюду лду, яко ни протиснутися могущим нам сквозе ниха. И ледовом идущим на лодью и погубити нас хотящим, и много нам трудившимся и ничтоже нам успевшим, всем живота своего отчаявшимся. Преждереченному же оному мужу Евфимию стоящу в корме и опершуся о палубы, от великия печали воздремавшу. Абие явися ему на лодии старец, вопрошая бо: «Далече ли путь ваш, братие?» Он же глагола: «Идем в Поморие торговати, и ныне ледом нас затерло и вси погибнути хощем». Старцу же рекшу: «Не скорби, брате, но поедите вы в Кереть, и Бог даст вам пусть чист». Сам же иде на нос и начат лды роспихивати.

Евфимию же возбнувшуся и не виде никогоже, токмо дружину свою сущую с ними на лодьи. И нача им поведати, еже виде во сне. И внезапу бысть яко дорога сквозе льда. Они же возрадовашася. И начаша присно ятися пути[4335], и абие повеявшу ветру поносному[4336] и выехаша на море ничемже вредими. И приидоша в Кереть и поведаша им в слух живущим ту явление святаго Варлаама, како их Бог избавил от тоя погибели молитвами его. И того ради чудесе муж той Евфимий содела над гробом преподобнаго часовню, оттоле веру держа ко святому велию.

Чюдо ино преподобнаго. Той же муж поведа нам. Двиненину[4337] некоему, именем Никифору, со своими клевреты[4338] идущу с мурманского рыбнаго промыслу. И егда бывшу ему против Святаго Носа, начат труждати их ветренная буря, и древо[4339] сломило парусное у них, и парус унесло в море, волны же вливахуся на лодью. И снесло у них с лодье все волнами, и отнесло их на лодье в морскую пучину, и уже имвсем отчаявшимся живота своего, и занесло их в плавании их в пучину морскую.

И многим днем минувшим, явися тому Никифору во сне преподобный отец Варлаам и начат ему глаголати: «Что вы впадосте во отчаяние и не промышляете о себе? Парус ваш под лодьею, а древо и с ногами[4340] тут же под лодьею, и вы того древа не ставьте. Промышляйте, не плошитеся[4341], — Бог вас вынесет!»

Никифору же тому в недоумении бывшу о видении, начат поведати дружине, глаголаху: «Где, братие, парус?» — «Мы не видехом». И начаша напрасно семо и овамо[4342] искати, и абие обретоша парусь под лодьею и едва извлекоша на лодью, тамо же весла и стир[4343]. Они же, много трудившеся, изнемогоша и сон объят их. Паки[4344] явися им той же муж, глаголя: «Промышляйте, призывайте еще Бога на помощь, и вынесет Господь Бог». Никифору же оному вопрощающу его: «Кто ты, господине мой, сице в промышлении нашем твориши и о нас печешися?» Той же отвеща: «Аз есмь из Керети Варлаам». Никифору же оному не ведящу его, и начат вопрошати у дружине своей. О нем такожде не ведущим имвсем его.

Начаша обычная на лодье уготовляти и промышляти о путнем шествии своем. И видеша яко дорогу расплывающуся пред ними лед той. И абие ветру возвеявшу поносному им, в третий день достигоша до Двинскаго устия.

Во второе лето по явлении том прииде муж той Никифор в Кереть, вопрошая: «Кто есть и где таков муж, нарицаемый Варлаам?», — чая бо еще жива его суща. Живущии ту поведаша ему, яко «той святый во успении явися, избавил тя Бог молитвами его от потопления». И показаша ему гроб святаго. Той же Никифор принесе свещи многи и положиша на гроб его, моля преподобнаго о избавлении своем.